\id 1JN
\h 1 Juan
\toc1 1 Juan
\mt Xa̱jo̱n ra tsikínda ítjòn jè Juan
\c 1
\s Jesús, jè ꞌÉn ra síkíjnakon inìma̱‑ná
\p
\v 1 Jè Jesús, jè ꞌÉn ra síkíjnakon‑ná ra tíjna‑ni skanda ti̱ꞌsa̱ tjàꞌtsin‑la̱ kjoa̱. Tanga ꞌndi̱ ꞌndi̱, ijyeé ko̱ꞌsín inaꞌyá‑la̱ji̱n, ko̱ xkoàn kijcha‑naji̱n, ko̱ nda kjón ichitsíjen‑la̱ji̱n, ko̱ ti̱ꞌkoa̱á ichaájnò‑náji̱n.\fig Lamp at night -25%|70-HK00151B.TIF|col|1JN 1||Jngo niꞌí isen|1JN 1:1\fig*
\v 2 Jè ꞌÉn ra̱kìi̱, kijcha tsijeén‑la̱. Ko̱ kijcha‑náji̱n. Ko̱ ngi kjoa̱kixi̱‑ní ra i̱nchiꞌbèna̱jmí‑ji̱n ra a̱ꞌta ꞌtse̱. Ko̱ ti̱ꞌkoa̱á i̱nchiꞌbèna̱jmíya‑laji̱n ra jiòn‑jiòn jè ꞌÉn ra síkíjnakon inìma̱‑ná ni̱ta kjiá‑nioo̱. Jè ꞌÉn ra̱kìi̱, ꞌkia̱ nga ti̱ꞌsa̱ ítjòn, ya̱á tíjnaꞌta‑la̱ Nainá. Tanga ꞌndi̱ ꞌndi̱, ijyeé tsatsíjen tsijen‑naji̱n.
\v 3 I̱nchiꞌbèna̱jmí‑laji̱n kjoa̱ ra kijcha‑ji̱n ko̱ ra inaꞌyá‑ji̱n mé‑ni nga ꞌkoa̱ ti̱ꞌsín ngásòn nda ki̱tsa̱jnajtién ra jién koni ꞌsín ijye nda titsa̱jnajtín‑ke̱é Nainá ra Na̱ꞌín‑ná ma ko̱ Iꞌndí‑la̱ ra Jesucristo.
\v 4 Kií xá i̱nchibinda‑laji̱n xa̱jo̱n ra̱kìi̱ mé‑ni nga jngó kjá ngi tà kjo̱tsjaá katasakó kiꞌta‑la̱ inìma̱‑ná.
\s Jè Nainá kjoa̱hisen‑ní
\p
\v 5 Ki̱í ꞌsín tjín jñá ꞌén ra tsakón‑ya‑naji̱n Jesucristo, ko̱ kií‑ní ra ko̱ꞌsín nakjoáya‑ji̱n: Jè Nainá, tà kjoa̱hisen‑ní ra jè. Ra a̱ꞌta ꞌtse̱, tsìn ra kjoa̱jñò.
\v 6 Tsa kixé nga ya̱á nda titsa̱jnajtín‑ke̱é Nainá, tanga tsa ya̱á i̱nchiníjchá‑ná ijo‑ná ya̱ ñánda̱ nga jñò chon, ñánda̱ tjín kjoa̱ꞌcho, ꞌén ndisoó ra i̱nchinakjé; mì tsa kjoa̱kixi̱‑ní ra i̱nchiꞌnié.
\v 7 Tanga tsa ya̱á titsa̱jneé ñánda̱ isen chon, koni ꞌsín jè Nainá ya̱á tíjna ya̱ ñánda̱ isen chon, ndaá titsa̱jnajtién ko̱ xàngie̱é, ko̱ jè jní‑la̱ Jesucristo ra Iꞌndí‑la̱ Nainá ma, sítsje ijyeé jñà jé ra tjín‑ná.
\p
\v 8 Tsa kixé: “Tsìn‑na jé ra ꞌa̱n”, ti̱jién i̱nchibindo̱cha̱‑lá ijo‑ná; mì tsa kjoa̱kixi̱‑ni ra i̱nchibixé.
\v 9 Tanga tsa ꞌkéna̱jmí ijye‑lá Nainá jè jé ra tjín‑ná, ko̱maá jè kjóꞌtatakén nga si̱hijchaꞌta‑ni jè jé ra tjín‑ná ko̱ si̱ìtsje ijo‑ná ngaꞌtsì kjoa̱ꞌcho ra i̱nchiꞌnié. Nga̱ jè Nainá síhitjasòn ꞌén‑la̱ ra jè, ko̱ ngi kjoa̱kixi̱‑ní ra ꞌsín.
\v 10 Tanga tsa kixé: “Kjè sa india jé batsjía̱ ra ꞌa̱n”, jé Nainá ndiso i̱nchinachrjengieé, ko̱ mì tsa kixi̱‑ni kjoa̱ nga makjiín‑ná jè ꞌén‑la̱.
\c 2
\s Kóꞌsín jè Cristo ma ra chja̱tjí‑ná ya̱ ngixko̱n Nainá
\p
\v 1 Jiòn ra koni tsa ndí i̱xti‑na̱ xin‑no, kií xá tíbindá‑no jè xa̱jo̱n ra̱kìi̱, mé‑nì nga mì ti̱ tsja jé kjótsji‑no. Tanga tsa tjín jngo xi̱ta̱ ra tíbátsji-jé‑la̱ ijo‑la̱, jé Nainá si̱hijchaꞌta‑la̱, nga̱ tíjna jngo‑ná xi̱ta̱ ra chja̱tjí‑ná ya̱ ngixko̱n Nainá, jè ra ꞌmì Jesucristo ra ngi xi̱ta̱ kixi̱.
\v 2 Jesucristo kitsjà kjo̱tjó ijo‑la̱ nga ꞌken ngajo‑ná, mé‑ni nga ko̱ma si̱hijchaꞌta‑ná jñà jé‑ná, tanga mì tsa tà jién ra si̱hijchaꞌta‑ná; ti̱ꞌkoa̱á si̱hijchaꞌta ijyeé‑la̱ ngaꞌtsì xi̱ta̱ ra tjín nga tjíjtsa i̱sàꞌnde.
\s Jè kjo̱téxoma ꞌtse̱ kjoa̱tsjacha
\p
\v 3 Tsa nda si̱hitjasén kjo̱téxoma‑la̱, maá kíjngo‑lá takén nga ijyeé ndaá ꞌyaxkeén ra jè.
\v 4 Tsa tjín xi̱ta̱ ra tsò: “ꞌA̱n, ijyeé nda bexkoo̱n ra jè”, tanga tsa mì kì nda tísíhitjasòn‑ni kjo̱téxoma‑la̱, xi̱ta̱ ndiso‑ní; tsìn‑la̱ ra kjo̱hixi̱.
\v 5 Tanga tsa nda tjinihitjasén koni ꞌsín nga tsò ꞌén‑la̱ ijyeé ꞌñó nda tjín‑ná kjo̱tsjacha‑la̱ Nainá, ko̱ ꞌkoa̱á ꞌsín ma‑ni nga ꞌya‑la̱ nga kixi̱í kjoa̱ nga jè Cristo titsa̱jnake̱é.
\v 6 Jè xi̱ta̱ ra tsò nga ya̱á tíjnako̱ Cristo, machjeén‑ní nga ko̱ꞌsín katasíjchá ijo‑la̱ koni ꞌsín kiꞌsìn Jesucristo.
\s Kjo̱téxoma xi̱tse̱
\p
\v 7 Jiòn ndí ꞌndsé ko̱ ndí tichjeé, jè kjo̱téxoma ra tíbindá‑no, mì tsa ngi kjo̱téxoma xi̱tse̱‑jìn; ti̱jé‑ni kjo̱téxoma ra kiꞌtsì‑no nga ꞌsa̱ ítjòn ꞌkia̱ nga ti̱ꞌsa̱ kjokjiín‑no. Jè kjo̱téxoma jchínga ra̱kìi̱, ti̱jé‑ni ꞌén ra a̱sa inaꞌyá jiòn nga ti̱ꞌsa̱ ítjòn.
\v 8 Tanga ꞌndi̱ ꞌndi̱, ꞌkoa̱á ꞌsín tíbindá‑no koni tsa jngo kjo̱téxoma xi̱tse̱. Nga̱, ra a̱ꞌta ꞌtse̱ Cristo, kijchaá‑la̱ nga xi̱tse̱‑ní ko̱ ti̱ꞌkoa̱á tíꞌyaá‑te‑la̱ ra a̱ꞌta tsa̱jiòn. Nga̱ ijyeé tíbato kjoa̱ ra jñò tjín, ko̱ ijyeé tíꞌya‑la̱ ra ngi kixi̱ kjoa̱ nga kjoa̱ isen tjín.
\p
\v 9 Tsa jngo xi̱ta̱ ko̱ꞌsín tsò nga ꞌkoa̱á ꞌsín tísíjchá ijo‑la̱ koni ꞌsín tjín kjoa̱ isen‑la̱ Nainá, tanga tsa jtikeé tíꞌsín‑ni xi̱ta̱ xákjén ra ti̱ꞌkoa̱ a̱ꞌta ꞌtse̱ Cristo makjiín‑la̱, mì tsa kixi̱‑ni kjoa̱ nga isen tísíjchá ijo‑la̱, takó ya̱á tíjnajin‑ni ya̱ ñánda̱ nga jñò chon.
\v 10 Jè xi̱ta̱ ra tsjake xi̱ta̱ xákjén ra ti̱ꞌkoa̱ a̱ꞌta ꞌtse̱ Cristo makjiín‑la̱, ꞌkoa̱á ꞌsín tísíjchá ijo‑la̱ koni ꞌsín tjín kjoa̱hisen‑la̱ Nainá. Jè xi̱ta̱ ra̱kìi̱, mì tsa ti̱ mé tjín‑ni ra ma koa̱àtsji-jé‑la̱.
\v 11 Tanga jè xi̱ta̱ ra jtike xi̱ta̱ xákjién ra ti̱ꞌkoa̱ a̱ꞌta ꞌtse̱ Cristo makjiín‑la̱, ya̱á tíjna, ko̱ ya̱á tsáꞌbaya ya̱ ndi̱yá ñánda̱ nga jñò chon. Mì kì be ñánda̱ tífì, nga̱ jè kjoa̱jñò, tjíchjàjin‑la̱ inìma̱‑la̱.
\p
\v 12 Jiòn ra ndí i̱xti ꞌmì‑no, tíbindá‑no jè xa̱jo̱n ra̱kìi̱, nga̱ a̱ꞌta ꞌtse̱ Cristo‑ní nga ijye isìhijchaꞌta‑no Nainá jñà jé ra tjín‑no.
\v 13 Jiòn ra xi̱ta̱ jchínga ꞌmì‑no, tíbindá‑no jè xa̱jo̱n ra̱kìi̱, nga̱ ijyeé kijchaxkon jè Jesucristo ra tíjna‑ni skanda ti̱ꞌsa̱ tjàꞌtsin‑la̱ i̱sàꞌnde. Jiòn i̱xti ra ꞌsa̱ i̱nchiníjchá ijo‑no, tíbindá‑no jè xa̱jo̱n ra̱kìi̱, nga̱ ijyeé inikijne‑la jè xi̱ta̱‑ni̱í. Jiòn ra ndí i̱xti ꞌmì‑no, ijyeé ítsikindá‑no jè xa̱jo̱n ra̱kìi̱ nga̱ ijye kijchaxkon jè Nainá ra Na̱ꞌìn ꞌmí‑lá.
\p
\v 14 Ijyeé ítsikindá‑no xa̱jo̱n, jiòn ra xi̱ta̱ jchínga ꞌmì‑no, ta nga̱tjì‑la̱ nga̱ ijyeé kijchaxkon Jesucristo ra tíjna‑ni skanda ti̱ꞌsa̱ tjàꞌtsin‑la̱ i̱sàꞌnde. Ti̱ꞌkoa̱á ijyeé ítsikindá‑no jiòn i̱xti ra ꞌsa̱ i̱nchiníjchá ijo‑no, ta nga̱tjì‑la̱ nga̱ tjín‑no ngaꞌñó ko̱ ijyeé ya̱ tíjnajin inìma̱‑no jè ꞌén‑la̱ Nainá ko̱ ijyeé inikijne‑la jè xi̱ta̱‑ni̱í.
\p
\v 15 Kì jñà matsjacha jñà kjoa̱ ra tjín ya̱ i̱sàꞌnde. Tsa yá xi̱ta̱ ra matsjake jñà kjoa̱ ra tjín ya̱ i̱sàꞌnde, mì tsa kixi̱‑ni kjoa̱ nga matsjake Nainá ra Na̱ꞌìn ꞌmì‑lá.
\v 16 Ngaꞌtsì kjoa̱ꞌcho ra jè i̱sàꞌnde bíꞌta‑ná, mì tsa ya̱ nchrabá‑ni a̱ꞌta ꞌtse̱ Nainá ra Na̱ꞌìn ꞌmì‑lá. Ti̱ya̱á tísinda‑ni i̱ i̱sàꞌnde. Jñà kjoa̱ꞌcho ra tjín ya̱ i̱sàꞌnde, jñá kìi̱: kjoa̱ꞌcho ra síjé ijo‑ná, kjoa̱ ra tsijen‑la̱ xkén nga mején‑ná tsa̱jién ꞌkín‑lá, ko̱ kjoa̱ꞌngatakòn ra ꞌtse̱ kjoa̱nchi̱ná.
\v 17 Ngaꞌtsì kjoa̱ꞌcho ra tjín ya̱ i̱sàꞌnde, ko̱ kjoa̱ ra ya̱ faajin‑ná, ijyeé ta tíbato‑ní, tanga jè xi̱ta̱ ra síhitjasòn koni ꞌsín mejèn‑la̱ Nainá, kíjnakon‑ní skanda tà mé ni̱chjin‑ni.
\s Jè ra kjo̱hixi̱ ko̱ ra kjoa̱ ndiso
\p
\v 18 Jiòn ra ndí i̱xti xin‑no, ijyeé tífeheꞌta ni̱chjin. Ijyeé tjíjin‑no nga kjꞌi̱í jngo xi̱ta̱ ra ngi kondra̱ tíjna‑la̱ Cristo. Ko̱ ni̱chjin ꞌndi̱ ꞌndi̱ ijyeé ko̱ꞌsín ꞌñó kjìn ma‑ni ra kondra̱ i̱nchifì‑la̱ Cristo. ꞌKoa̱á ma‑ni nga ko̱ꞌsín machi̱ya‑ná nga ijyeé tífeheꞌta ni̱chjin.
\v 19 Jñà xi̱ta̱ kìi̱, ti̱ i̱í itjokàjin‑ná, tanga ra kixi̱ kjoa̱ mì tsa ngi xi̱ta̱ tsa̱jién ma, nga̱ tsa kixi̱í‑la kjoa̱ nga xi̱ta̱ tsa̱jién, i̱í‑la títsa̱jnako̱‑ná. Tanga kií ko̱ꞌsín itjokàjin‑ná jñà xi̱ta̱ kìi̱ mé‑ni nga nda kjòn‑ní kataꞌya‑la̱ nga ngaꞌtsì xi̱ta̱ ra ko̱ꞌsín kondra̱ fì‑la̱ Cristo mì tsa ngi xi̱ta̱ tsa̱jién.
\p
\v 20 Jè Jesucristo, ra xi̱ta̱ tsje, ijyeé kitsjà‑no jè Inìma̱ Tsje‑la̱ Nainá; ꞌkoa̱á ꞌsín ma‑ni nga ngaꞌtsì‑najiòn ijyeé nda tjíjin‑no kóꞌsín tjín ra kjoa̱kixi̱.
\v 21 ꞌKoa̱á ma‑ni nga ko̱ꞌsín tíbindá‑no xa̱jo̱n, nga̱ ijyeé nda tjíjin‑no; mì tsa ki‑ni nga kjè ꞌya jiòn ra kjoa̱kixi̱. Ko̱ ijyeé nda ꞌya jiòn nga ni̱jngo ꞌén ndiso ya̱ nchrabáꞌta‑ni ra a̱ꞌta ꞌtse̱ kjoa̱kixi̱.
\p
\v 22 ¿Yá‑ni ra xi̱ta̱ ndiso? Jè‑ní ra bíꞌma nga tsò: “Jè Jesús mì tsa jè‑jìn ra Cristo, [mì tsa Nainá isìkasén‑jìn].” Jé xi̱ta̱ ra̱kìi̱ ra kondra̱ fì‑la̱ Cristo nga̱ jngó kjá mì kì makjiín‑la̱ ra a̱ꞌta ꞌtse̱ Nainá ra Na̱ꞌín‑ná ma ko̱ a̱ꞌta ꞌtse̱ Jesucristo ra Iꞌndí‑la̱ Nainá.
\v 23 Ngaꞌtsì xi̱ta̱ ra jngó kjá mì kì makjiín‑la̱ a̱ꞌta ꞌtse̱ Iꞌndí‑la̱ Nainá, mì tsa Nainá ra Na̱ꞌín‑ná ma tíjnako̱. Tanga jè xi̱ta̱ ra makjiín‑la̱ ti̱ꞌkoa̱ tsjá ꞌén‑la̱ nga jè Jesús ra Iꞌndí‑la̱ Nainá, ya̱á tíjnako̱ Nainá ra Na̱ꞌín‑ná ma.
\p
\v 24 Kií ko̱ꞌsín xin‑no, ndaá tijin takòn ya̱ inìma̱‑no jè ꞌén ra a̱ꞌta ꞌtse̱ Cristo ra ko̱ꞌsín ijye inaꞌyá jiòn skanda ti̱ꞌsa̱ ítjòn. Tsa ko̱ꞌsín nda kíjin takòn jiòn ya̱ inìma̱‑no, ti̱ꞌkoa̱á ndaá ki̱tsa̱jnako̱o Nainá ra Na̱ꞌín‑ná ma ko̱ Iꞌndí‑la̱.
\v 25 Jesucristo, ꞌkoa̱á ꞌsín ijye kitsjá ꞌén‑la̱ nga tsjá‑ná kjo̱binachon ra mì feheꞌta ni̱ta kjiá‑nioo̱.
\p
\v 26 Kií xá tíbindá‑no jè xa̱jo̱n ra̱kìi̱ mé‑ni nga ma jcha̱xkon‑no jñà ra mejèn‑la̱ nga sko̱ónda̱cha̱‑no.
\v 27 Tanga jiòn, ijyeé tjíjin ya̱ inìma̱‑no jè Inìma̱ Tsje‑la̱ Nainá ra kitsjà‑no Jesucristo. Mì ti̱ kì machjeén‑ni tsa yá ra ko̱kòn‑ya‑no. Nga̱ jè sabá Inìma̱ Tsje‑la̱ Nainá ꞌke̱èna̱jmíya‑no kóꞌsín tjín ngaꞌtsì kjoa̱ ra nda tjióo̱n. Koni ꞌsín nga ko̱kòn‑ya‑no, ꞌén kixi̱‑ní, mì tsa ꞌén ndiso‑jìn. Ko̱ꞌsín nda ti̱tsa̱jnajtínꞌta kiꞌta‑la Jesucristo, koni ꞌsín nga síchi̱ya‑no Inìma̱ Tsje‑la̱ Nainá.
\p
\v 28 Jiòn ra ndí i̱xti xin‑no, ko̱ꞌsín nda titsa̱jnajtínko̱o Cristo, mé‑ni nga ꞌñó tjín‑ni takén ko̱ mì kì tsa ko̱sabà‑ná ꞌkia̱ nga jè ra ki̱tjojen india‑ni ján ngajmi.
\v 29 Koni ꞌsín ijye tjíjin‑no nga jè ra Cristo, xi̱ta̱ kixi̱‑ní ya̱ ngixko̱n Nainá, ꞌkoa̱á ti̱ꞌsín nda katasijin‑te‑no, nga ngaꞌtsì xi̱ta̱ ra kjoa̱kixi̱ ꞌsín ya̱ ngixko̱n Nainá, iꞌndí‑la̱ Nainá‑ní.
\c 3
\s I̱xti‑la̱ Nainá
\p
\v 1 Nda katasijin‑no, ꞌñó nda matsjake‑ná Nainá ra Na̱ꞌín‑ná ma, ꞌkoa̱á ma‑nì nga i̱xti‑la̱ tsó‑ná. Ko̱ ngi kixi̱ kitií kjoa̱ nga i̱xti‑la̱ Nainá ꞌmì‑ná. ꞌKoa̱á ma‑ni nga jñà xi̱ta̱ i̱sàꞌnde, mì kì makjiín‑la̱ tsa i̱xti‑la̱ Nainá ꞌmì‑ná, tà nga̱tjì‑la̱ nga̱ jñà xi̱ta̱ kìi̱, mì kì makjiín‑la̱ ra jñà, a̱ꞌta ꞌtse̱ Nainá.
\v 2 Jiòn ndí ꞌndsé ra matsjake̱‑no, ꞌndi̱ ꞌndi̱ ijyeé iꞌndí‑la̱ Nainá ꞌmì‑ná. Tanga kjè tsa nda bakón‑ná Nainá kóꞌsín kjòn ka̱meé ra a̱skan‑nioo̱. Tanga ijyeé tjíjin‑ná nga ꞌkoa̱á ꞌsín kjòn ka̱meé koni ꞌsín ꞌki ra jè Jesucristo ꞌkia̱ nga ki̱jchò ni̱chjin nga jè ra kjꞌi̱í india‑ni; nga̱ jcha̱xkon‑ná ra jè koni ꞌsín ꞌki kjòn‑ni.
\v 3 Ngaꞌtsì xi̱ta̱ ra ko̱ꞌsín i̱nchikoñá nga ꞌkoa̱á ꞌsín kjòn ko̱ma koni ꞌsín ꞌki ra jè Jesucristo, ni̱chjin nchijón‑ní nga tsje i̱nchisíjchá ijo‑la̱ koni ꞌsín nga xi̱ta̱ tsje ra jè Jesucristo.
\p
\v 4 Ngaꞌtsì xi̱ta̱ ra bátsji‑jé, kondra̱ fì‑la̱ kjo̱téxoma‑la̱ Nainá. ꞌKia̱ nga ko̱ꞌsín fatsji‑jé iseé, jé kjo̱téxoma‑la̱ Nainá tjinachrjengieé.
\v 5 Jiòn, ijyeé tjíjin‑no nga jè Jesucristo kií xá ꞌji‑ni nga jè faháxìn‑ná jñà jé ra tjín‑ná. Ko̱ ꞌya‑najiòn nga jè Jesucristo ni̱jngo jé tsakátsji ra jè.
\v 6 Ngaꞌtsì xi̱ta̱ ra Cristo tíjnako̱, mì tsa bátsji-jé‑jìn; tanga jñà xi̱ta̱ ra bátsji‑jé, takó kjè kì bexkon ko̱ ti̱ꞌkoa̱á mì kì tjíjin‑la̱ yá‑ni ra ꞌmì Jesucristo.
\v 7 Jiòn, ra ndí i̱xti‑na̱ xin‑no, kì biꞌnde nga yá ra sko̱ónda̱cha̱‑no. Jè xi̱ta̱ ra kjoa̱kixi̱ ꞌsín ya̱ ngixko̱n Nainá, xi̱ta̱ kixi̱‑ní, koni ꞌsín nga xi̱ta̱ kixi̱ jè Cristo.
\v 8 Tanga jè xi̱ta̱ ra kiꞌta ni̱chjin tíbátsji‑jé, ꞌtse̱ xi̱ta̱‑ni̱í‑ní. Nga̱ jè xi̱ta̱‑ni̱í, ꞌkoa̱á ꞌsín tíbátsji‑jé ra jè skanda ti̱ꞌsa̱ tjàꞌtsin‑la̱ i̱sàꞌnde. Ko̱ kií xá ꞌji jnchro‑ni Jesucristo ra Iꞌndí‑la̱ Nainá nga jè ma‑la̱ si̱ìkitsón‑ña jè kjoa̱ꞌcho ra ꞌsín jè xi̱ta̱‑ni̱í.
\p
\v 9 Ngaꞌtsì xi̱ta̱ ra ijye Nainá isìkaatjìya‑la̱ nga iꞌndí‑la̱ Nainá ma, mì tsa ti̱ ya̱ tjítsa̱jnajin‑ni jé. Nga̱ ijyeé ya̱á tíjnajin inìma̱‑la̱ jè Inìma̱ Tsje‑la̱ Nainá. Ko̱ mì kì ti̱ ma‑ni nga koa̱àtsji-jé‑isa, nga̱ ijyeé iꞌndí‑la̱ Nainá‑ní.
\v 10 ꞌKoa̱á ꞌsín ma‑nì nga ꞌyaxkon‑la̱ yá‑ní ra i̱xti‑la̱ Nainá ko̱ yá‑ní ra i̱xti‑la̱ xi̱ta̱‑ni̱í; ngaꞌtsì xi̱ta̱ ra mì kì ma‑la̱ síhitjasòn kjoa̱kixi̱ ꞌtse̱ Nainá, ti̱ꞌkoa̱ mì kì tsjake ꞌsín xi̱ta̱ xákjén ra ti̱ꞌkoa̱ a̱ꞌta ꞌtse̱ Cristo makjiín‑la̱, mì tsa iꞌndí‑la̱ Nainá‑jìn.
\s Ngásòn ngáya tsjacha ꞌsie̱én xàngie̱é
\p
\v 11 Nga̱ ꞌkoa̱á ꞌsín tíchja̱ jè ꞌén ra ijye inaꞌyá jiòn ꞌkia̱ nga ti̱ꞌsa̱ kjokjiín‑no nga ꞌsa̱ ítjòn nga tsò: Ngásòn ngáya tsjacha ꞌsie̱én xàngie̱é.
\v 12 Mì kì ko̱ꞌsín ꞌsie̱én koni ꞌsín kiꞌsìn jè xi̱ta̱ ra kiꞌmì Caín nga jè xi̱ta̱‑ni̱í kijìꞌta‑la̱ nga isìꞌken ꞌndse̱. ¿Mé‑nì nga isìꞌken‑nì ꞌndse̱? Tà kií nga̱tjì‑la̱ nga jè ꞌndse̱, xi̱ta̱ kixi̱‑ní ya̱ ngixko̱n Nainá ko̱ jè Caín ꞌchoó tjín kjoa̱ ra ꞌsín ra jè.
\p
\v 13 ꞌKoa̱á ma‑ni nga ko̱ꞌsín tíxin‑no jiòn ndí ꞌndsé, kì tà chjàn maxkón‑no tsa jtike‑no xi̱ta̱ i̱sàꞌnde ra mì kì makjiín‑la̱ ꞌén‑la̱ Nainá.
\v 14 Jién ijyeé tjíjin‑ná nga ijyeé ítjo̱kajieén ya̱ ndi̱yá kjo̱biya ra ya̱ timayeé kjotseé ko̱ ijyeé tjín‑ná kjo̱binachon ra mì kì feheꞌta skanda tà kjiá‑nioo̱. Nga̱ ijyeé ko̱ꞌsín nda tsjacheé jñà xàngie̱é ra ti̱ꞌkoa̱ a̱ꞌta ꞌtse̱ Cristo makjiín‑la̱. Jè xi̱ta̱ ra mì kì tsjake xákjén, ndi̱yá kjo̱biyaá tsáꞌbaya jè inìma̱‑la̱.
\v 15 Ngaꞌtsì xi̱ta̱ ra jtike xi̱ta̱ xákjén, ꞌkoa̱á ꞌsín jngoya‑ila̱ koni tsa xi̱ta̱ síꞌken. Jiòn, ndaá ꞌya, jè xi̱ta̱ ra ko̱ꞌsín xi̱ta̱ síꞌken, mì tsa jè kjo̱binachon ra mì feheꞌta tísíjchájin ijo‑la̱.
\v 16 Jién, ꞌkoa̱á ꞌsín ꞌya‑ná mé ra ꞌmì kjo̱tsjacha ꞌkia̱ nga jè Jesucristo kitsjá kjo̱tjò ijo‑la̱ nga ꞌken ngajo‑ná. Jién, ꞌkoa̱á ti̱ꞌsín machjeén nga ꞌsie̱én ra jién ra a̱ꞌta ꞌtse̱ xàngie̱é koni ꞌsín kiꞌsìn jè Cristo.
\v 17 Tsa tjín jngo xi̱ta̱ ra tjín‑la̱ jñà tsajmì ra tímachjeén kiꞌtá‑ná, tsa ske̱ jngo xi̱ta̱ xákjén ra ti̱ꞌkoa̱ a̱ꞌta ꞌtse̱ Cristo makjiín‑la̱ nga tsìn‑la̱ tsajmì ra machjeén‑la̱, tsa mì kì ma‑la̱ nga ko̱si̱ko̱ jè xi̱ta̱ xákjén ra a̱ꞌta ꞌtse̱ tsajmì ra tsìn‑la̱, mì tsa kixi̱‑ni kjoa̱ nga kjo̱tsjacha‑la̱ Nainá tíjnajin ya̱ inìma̱‑la̱.
\v 18 Jiòn ra ndí i̱xti‑na̱ xin‑no, tsjacha ꞌtio̱òn xàngio̱o, kì tà ꞌén ra ko̱ꞌsín nakjoá jiòn, ngi ndaá kataꞌya kiti‑la̱ kóꞌsín nga tsjacha ꞌsio̱on jñà xàngio̱o nga ti̱si̱ko̱ꞌta mé ra machjeén‑la̱ mé‑ni nga kataꞌya‑la̱ nga kixi̱ kitií kjoa̱ nga nda tsjacha jiòn xàngio̱o.
\s ꞌÑó tjín takén ya̱ ngixko̱n Nainá
\p
\v 19 ꞌKia̱ nga ko̱ꞌsín i̱nchiꞌnié, ꞌkia̱á jcha̱ kiti‑ná ra jién nga kixi̱í kjoa̱ nga ꞌkoa̱á ꞌsín i̱nchiníjché ijo‑ná koni ꞌsín tjín kjoa̱ kixi̱‑la̱ Nainá ko̱ níkíjnaꞌnchán‑ná inìma̱‑ná ya̱ ngixko̱n Nainá.
\v 20 Ni̱ꞌsín jè inìma̱‑ná tíbánè jé‑ná, tanga jè Nainá, isa̱á nda tjíjin‑la̱ ra jè nda mí ꞌkoa̱‑ni koni jè inìma̱‑ná. Nga̱ jè Nainá isa̱á nda tsijen ijye‑la̱ ngaꞌtsì kjoa̱ ra i̱nchiꞌnié.
\v 21 Jiòn ndí ꞌndsé ra matsjake̱‑no, tsa jè inìma̱‑ná mì tsa ti̱ mé kjoa̱ꞌcho tíbánè‑ná, ꞌñó tjín takén ya̱ ngixko̱n Nainá.
\v 22 Tsa mé ra si̱jé‑lá Nainá, maá‑la̱ tsjá ijye‑ná tà mé kjo̱nda‑ni; nga̱ nihitjasón‑ná kjo̱téxoma‑la̱, ko̱ ꞌkoa̱á ꞌsín ꞌnié koni ꞌsín sasén‑la̱ ra jè.
\v 23 Jè kjo̱téxoma‑la̱ Nainá ra mejèn‑la̱ nga nda si̱hitjasén: jé‑ní nga nda katakjiín‑ná a̱ꞌta ꞌtse̱ Jesucristo ra Iꞌndí‑la̱ ma, ti̱ꞌkoa̱ nga ngásòn ngáya tsjacha ꞌsie̱én xàngie̱é koni ꞌsín ijye tsatéxoma‑ná Cristo.
\v 24 Jè xi̱ta̱ ra síhitjasòn kjo̱téxoma‑la̱ Nainá, ya̱á tíjnako̱ Nainá, ko̱ jè Nainá ya̱á tíjnajin inìma̱‑la̱ xi̱ta̱ ra̱kìi̱. ꞌKoa̱á ꞌsín ma‑ni nga ꞌyeé nga Nainá ya̱á tíjnako̱‑ná tà nga̱tjì‑la̱ nga̱ ijyeé kitsjá‑ná jè Inìma̱ Tsje‑la̱.
\c 4
\s Jñà ra kondra̱ fì‑la̱ Cristo
\p
\v 1 Jiòn ndí ꞌndsé ra ꞌñó matsjake̱‑no, kì taxki̱ makjiín‑no a̱ꞌta ꞌtse̱ ngaꞌtsì xi̱ta̱ ra tsò nga jè Inìma̱ Tsje‑la̱ Nainá síchi̱ya‑la̱ ꞌén ra chja̱. Ítjòn chjíꞌta jiòn, a kixi̱ kitií kjoa̱ a jè Inìma̱ Tsje‑la̱ Nainá tísíchi̱ya‑la̱ ꞌén ra chja̱, o̱ ra majìn‑ní. Nga̱ jñà ni̱chjin ra titsa̱jneé ꞌndi̱ ꞌndi̱, tjín jchán xi̱ta̱ ndiso ra tjímasòn ya̱ i̱sàꞌnde ra tsò nga jè Nainá tsjá‑la̱ ꞌén ra i̱nchiꞌbéna̱jmíya.
\v 2 Jè xi̱ta̱ ra ꞌke̱èna̱jmí nga jè Jesucristo i̱í kitsin ya̱ a̱ꞌta nangi, ko̱ xi̱ta̱á kjomà koni jién, jè xi̱ta̱ ra ko̱ꞌsín ꞌke̱èna̱jmí, jè‑ní ra tjín‑la̱ Inìma̱ Tsje‑la̱ Nainá. Ya̱á jndáa̱ jcha̱‑nájiòn yá xi̱ta̱‑ni ra jè Inìma̱ Tsje‑la̱ Nainá tísíchi̱ya kiti‑la̱ ꞌén ra tíchja̱ya.
\v 3 Tanga jè xi̱ta̱ ra mì kì ko̱ꞌsín ꞌke̱èna̱jmí nga jè Jesucristo i̱í kitsin ya̱ a̱ꞌta nangi, ko̱ xi̱ta̱á kjomà koni jién, jè xi̱ta̱ ra ko̱ꞌsín tsò, tsìn‑la̱ Inìma̱ Tsje‑la̱ Nainá. Xi̱ta̱ ra̱kìi̱, jé tísíchjeén kjo̱bítsjen‑la̱ xi̱ta̱ ra tíjna ítjòn nga kondra̱ fì‑la̱ Cristo. Ijyeé a̱sa inaꞌyá‑nájiòn nga kjꞌi̱í‑ní jè ra kondra̱ fì‑la̱ Cristo, ko̱ ni̱chjin ra titsa̱jneé ꞌndi̱ ꞌndi̱ ijyeé ko̱ꞌsín tísíxá kjo̱bítsjen‑la̱.
\p
\v 4 Jiòn ra ndí i̱xti‑na̱ xin‑no, ijyeé xi̱ta̱‑la̱ Nainá ꞌmì‑najiòn; ijyeé jiòn inikijne‑la jñà xi̱ta̱ ra ko̱ꞌsín ꞌén ndiso chja̱ya; mì kì ti̱ ma‑ni tsa jñà sko̱ónda̱cha̱‑no, nga̱ jè Inìma̱ Tsje‑la̱ Nainá ra tíjnajin ya̱ inìma̱‑najiòn, isa̱á tse ngaꞌñó tjín‑la̱ nda mí ꞌkoa̱‑ni koni jè kjo̱bítsjen ꞌtse̱ xi̱ta̱‑ni̱í ra síxájin inìma̱‑la̱ xi̱ta̱ ra mì kì makjiín‑la̱ a̱ꞌta ꞌtse̱ Cristo.
\v 5 Jñà xi̱ta̱ kìi̱, tà jñá títsa̱jnakon‑ni kjo̱bítsjen ra tjín ya̱ i̱sàꞌnde; ꞌkoa̱á ma‑ni nga ko̱ꞌsín chja̱ ko̱ jñà ꞌnchré‑la̱ xi̱ta̱ ra ti̱ꞌkoa̱ kjo̱bítsjen ꞌtse̱ i̱sàꞌnde síchjeén.
\v 6 Tanga ra ji̱n, xi̱ta̱‑la̱ Nainá‑náji̱n. ꞌKoa̱á ma‑ni nga jñá ꞌnchré‑naji̱n jñà xi̱ta̱ ra makjiín‑la̱ ꞌén‑la̱ Nainá. Tanga jñà ra mì tsa xi̱ta̱‑la̱ Nainá ma, mì kì tsa ji̱n sísin‑naji̱n. ꞌKoa̱á ꞌsín ma‑ni nga maá ꞌya‑ná yá‑ni ra ngi jè Inìma̱ Tsje‑la̱ Nainá tísíchi̱ya‑la̱ ra ngi kjoa̱kixi̱ ko̱ yá‑ni ra inìma̱ ndiso‑la̱ ni̱í tíkonda̱cha̱‑la̱.
\s Nainá ꞌñó tjín‑la̱ kjo̱tsjacha
\p
\v 7 Jiòn ndí ꞌndsé ra ꞌñó matsjake̱‑no, machjeén‑ní nga ngásòn ngáya tsjacha ꞌsie̱én xàngie̱é, nga̱ jè ra kjo̱tsjacha, a̱ꞌta ꞌtse̱ Nainá nchrabá‑ni. Ngaꞌtsì xi̱ta̱ ra tjín‑la̱ kjo̱tsjacha, iꞌndí‑la̱ Nainá‑ní ko̱ ti̱ꞌkoa̱á be‑ní yá‑ni ra Nainá.
\v 8 Jè xi̱ta̱ ra mì kì matsjake xi̱ta̱ xákjén, kjè kì be yá‑ni ra Nainá, nga̱ jè Nainá kjo̱tsjacha‑ní.
\v 9 ꞌKoa̱á ꞌsín tsakón‑ná Nainá kjo̱tsjacha ra tjín‑la̱ ra a̱ꞌta tsa̱jién nga kisìkasén iꞌndí‑la̱ i̱ i̱sàꞌnde, jè iꞌndí‑la̱ ra ta jè ta̱jngo ma‑ni, mé‑ni nga a̱ꞌta ꞌtse̱ ma nda ki̱tsa̱jnakon‑ná.
\v 10 Ki̱í ꞌsín tjín kjo̱tsjacha ra tsakón Nainá ra a̱ꞌta tsa̱jién: Mì tsa ki‑ni nga jién nda matsjacheé Nainá. Jè Nainá ra ꞌñó nda matsjake‑ná. ꞌKoa̱á ma‑ni nga isìkasén iꞌndí‑la̱ nga ꞌken ngajo‑ná, mé‑ni nga si̱hijchaꞌtá‑ná jñà jé ra tjín‑ná.
\p
\v 11 Jión ndí ꞌndsé ra matsjake̱‑no, tsa jè Nainá ko̱ꞌsín ꞌñó nda matsjake‑ná, machjeén‑ní nga ꞌkoa̱ ti̱ꞌsín ko̱tsjacheé xàngie̱é nga jngó jngó‑ná.
\v 12 Ni̱ kjè sa jngo xi̱ta̱ xko̱n be‑ni Nainá, tanga tsa nda ko̱tsjacheé xàngie̱é nga jngó jngó‑ná, jè Nainá ya̱á tíjnajin kiꞌta ya̱ inìma̱‑ná ko̱ a̱ꞌta tsa̱jién‑ná nga nda tíbitjasòn ijye kjo̱tsjacha‑la̱ Nainá.
\v 13 Nainá ijye kitsjá‑ná Inìma̱ Tsje‑la̱. ꞌKoa̱á ꞌsín ma‑ni nga ijyeé ꞌyeé nga kjiꞌtá ni̱chjin ya̱ titsa̱jnake̱é Nainá ko̱ ya̱á tíjnako̱‑te‑ná Nainá nga tíjnajin ya̱ inìma̱‑ná.
\v 14 Ngaji̱n sabá kijcha‑ji̱n ko̱ ꞌbí‑náji̱n ꞌén‑na̱ji̱n nga jè Nainá ra Na̱ꞌìn ꞌmí‑lá isìkasén Iꞌndí‑la̱ nga jè ko̱chrjekàjin kjo̱hiꞌin ra kjoa̱ ꞌtse̱ jé‑la̱ ngaꞌtsì xi̱ta̱ i̱sàꞌnde.
\v 15 Ngaꞌtsì xi̱ta̱ ra ngi ko̱ inìma̱‑la̱ tsjá ꞌén‑la̱ nga jè Jesús ra Iꞌndí‑la̱ Nainá, kjiꞌtá ni̱chjin ya̱ tíjnako̱ Nainá ko̱ jè Nainá ya̱á tíjnajin inìma̱‑la̱.
\p
\v 16 Ijyeé ko̱ꞌsín nda ꞌyeé, ko̱ ti̱ꞌkoa̱ makjiín‑ná, nga jè Nainá tjín‑la̱ kjo̱tsjacha ra a̱ꞌta tsa̱jién. Nga̱ jè Nainá kjo̱tsjacha‑ní. Ko̱ jè xi̱ta̱ ra kjo̱tsjacha tíjnajin kiꞌta ya̱ inìma̱‑la̱, ya̱á tíjnako̱ Nainá ko̱ jè Nainá ya̱á tíjnajin inìma̱‑la̱ xi̱ta̱ ra̱kìi̱.
\v 17 ꞌKia̱ nga a̱ꞌta tsa̱jién ko̱ꞌsín nda tíbitjasòn ijye kjo̱tsjacha‑la̱ Nainá, ꞌñó tjín takén ra jién nga mì tsa ti̱ mé skon‑ná jè ni̱chjin ꞌkia̱ nga si̱ndajín‑la̱ xi̱ta̱ ra kjoa̱ ꞌtse̱ jé‑la̱. Nga̱ jién, ꞌkoa̱á ꞌsín nda i̱nchiꞌnié i̱ i̱sàꞌnde koni ꞌsín kiꞌsìn jè Jesucristo.
\v 18 Ya̱ ñánda̱ nga tjín ra kjo̱tsjacha, mì tsa ti̱ mé kjo̱skon tjín‑ni. Nga̱ jè ra ngi kjo̱tsjacha kjo̱hixi̱, faháxìn‑ní ngaꞌtsì ra kjo̱skon ꞌmì. Jè xi̱ta̱ ra tsakjón, kjo̱hiꞌiín‑ní ra títsakjón‑la̱. Ko̱ jè xi̱ta̱ ra takó kjo̱skon tjíjin inìma̱‑la̱, kií‑ní nga kjè tsa nda tjíjin ya̱ inìma̱‑la̱ jè kjo̱tsjacha‑la̱ Nainá.
\p
\v 19 Kií ko̱ꞌsín matsjacha‑ná Nainá, ta nga̱tjì‑la̱ nga̱ jè kjotsjake ítjòn‑ná.
\v 20 Tsa tjín xi̱ta̱ ra tsò: “ꞌA̱n, matsjake̱‑ná Nainá.” Tanga tsa jtikeé tíꞌsín‑ni xi̱ta̱ xákjén ra ti̱ꞌkoa̱ a̱ꞌta ꞌtse̱ Cristo makjiín‑la̱, jè xi̱ta̱ ra̱kìi̱, xi̱ta̱ ndiso‑ní. Tsa mì kì matsjake xi̱ta̱ xákjén ra xko̱n tíbe‑ni, kóꞌsín ma‑ni ko̱tsjake Nainá ra kjè tsa xko̱n be‑ni.
\v 21 Jè kjo̱téxoma ra kitsjá‑ná Jesucristo, ꞌkoa̱á ꞌsín tsò: Jè ra matsjake Nainá, machjeén‑ní nga ti̱ꞌkoa̱ katamatsjake xi̱ta̱ xákjén ra ti̱ꞌkoa̱ a̱ꞌta ꞌtse̱ Cristo makjiín‑la̱.
\c 5
\s Nikijne‑lá kjoa̱ ꞌtse̱ i̱sàꞌnde
\p
\v 1 Ijyeé i̱xti‑la̱ Nainá‑ní ngaꞌtsì xi̱ta̱ ra ngi ko̱ inìma̱‑la̱ makjiín‑la̱ nga jè Jesús, [jé‑ní ra Nainá isìkasén], jé‑ní ra Cristo. Ko̱ ngaꞌtsì xi̱ta̱ ra tsjake ra na̱ꞌìn tíjna‑la̱, tjínè‑la̱ nga ti̱ꞌkoa̱á ko̱tsjake ngaꞌtsì i̱xti‑la̱ na̱ꞌìn‑la̱.
\v 2 ꞌKia̱ nga matsjacheé Nainá, ko̱ ti̱ꞌkoa̱ nihitjasén kjo̱téxoma‑la̱, ꞌya‑ná nga ti̱ꞌkoa̱á i̱nchimatsjachaá‑teé jñà ra i̱xti‑la̱ Nainá ma.
\v 3 Ki̱í ꞌsín tjín tsa kixi̱ kjoa̱ nga matsjacheé Nainá, jè‑ní nga nda si̱hitjasén kjo̱téxoma‑la̱. Ko̱ jè kjo̱téxoma‑la̱, mì tsa ꞌñó iꞌin bitjasòn‑ni.
\v 4 Nga̱ ngaꞌtsì xi̱ta̱ ra i̱xti‑la̱ Nainá ma, síkijneé‑la̱ ngaꞌtsì kjoa̱ꞌcho ra tjín ya̱ i̱sàꞌnde. Kií ma nikijne‑ilá kjoa̱ ra tjín ya̱ i̱sàꞌnde tà nga̱tjì‑la̱ nga̱ ya̱á makjiín‑ná ra a̱ꞌta ꞌtse̱ Cristo.
\v 5 Ni̱yá ra ma si̱ìkijne‑la̱ jè kjoa̱ꞌcho ra tjín ya̱ i̱sàꞌnde, ta̱jngoó‑ní jè xi̱ta̱ ra makjiín‑la̱ a̱ꞌta ꞌtse̱ Jesús, nga jè‑ní ra Iꞌndí‑la̱ Nainá ma. Jè‑ní ra chíkjoa̱‑la̱ nga síkijne.
\s Jè ra tsjá kixi̱ ꞌén a̱ꞌta ꞌtse̱ Iꞌndí‑la̱ Nainá
\p
\v 6 Jé‑ní Jesucristo ra ꞌji i̱ i̱sàꞌnde. Ko̱ ꞌkia̱ nga ꞌji, jé nandá ko̱ jní ra nda tsakón. Ko̱ mì tsa tà jè nandá ra tsakón, ko̱ó‑te jè jní. Ko̱ jé Inìma̱ Tsje‑la̱ Nainá ra ꞌbéna̱jmí kixi̱ yá‑ni ra jè. Nga̱ jè Inìma̱ Tsje‑la̱ Nainá, ngi kjoa̱kixi̱‑ní ra jè.
\v 7 Ko̱ jàn ma‑ni ra ngi tsjá kixi̱ ꞌén‑la̱ ra a̱ꞌta ꞌtse̱ kjoa̱ kìi̱:
\v 8 Jè Inìma̱ Tsje‑la̱ Nainá, jè nandá, ko̱ jè jní. Ko̱ ngajàn kìi̱, ngásòn tsò.
\v 9 Tsa makjiín‑ná jñà ꞌén ra tsjá ra xi̱ta̱ i̱sàꞌnde, machjeén‑ní nga isa̱ nda ko̱kjiín‑ná ꞌén ra jè saba Nainá títsjá. Nga̱ jè ꞌén ra títsjá, jé tíꞌbéna̱jmí yá kjòn‑ni ra Iꞌndí‑la̱.
\v 10 Jè ra ngi ko̱ inìma̱‑la̱ makjiín‑la̱ a̱ꞌta ꞌtse̱ Iꞌndí‑la̱ Nainá, ya̱á tjíjin inìma̱‑la̱ nga kixi̱í kjoa̱ ꞌén ra tsjá Nainá. Tanga jè ra mì kì makjiín‑la̱ a̱ꞌta ꞌtse̱ Nainá, jé Nainá, ndiso tíbachrjengi, ta nga̱tjì‑la̱ nga mì kì makjiín‑la̱ jè ꞌén ra tsjá Nainá ra a̱ꞌta ꞌtse̱ Iꞌndí‑la̱.
\v 11 Jè ꞌén ra kitsjà Nainá, jè‑ní nga jè Nainá tsjá‑ná kjo̱binachon ra mì feheꞌta ni̱ta kjiá‑nioo̱. Ko̱ jè kjo̱binachon ra̱kìi̱, ya̱á sakó‑ná ra a̱ꞌta ꞌtse̱ Iꞌndí‑la̱.
\v 12 Jè xi̱ta̱ ra Iꞌndí‑la̱ Nainá tíjnajin ya̱ inìma̱‑la̱, tjín‑la̱ kjo̱binachon ra mì feheꞌta ni̱ta kjiá‑nioo̱; tanga jè xi̱ta̱ ra mì tsa Iꞌndí‑la̱ Nainá tíjnajin inìma̱‑la̱, tsìn‑la̱ kjo̱binachon ra̱kìi̱.
\s ꞌÉn ra feheꞌta‑ni
\p
\v 13 Jiòn ra makjiín‑no a̱ꞌta ꞌtse̱ Iꞌndí‑la̱ Nainá, kií xá tíbindá‑no jè xa̱jo̱n ra̱kìi̱ mé‑ni nga nda katasijin‑no nga ijyeé tjín‑no kjo̱binachon ra mì kì feheꞌta skanda ta mé ni̱chjin‑ni.
\p
\v 14 ꞌKoa̱á ꞌsín ma‑ni nga ꞌñó tjín takén ꞌkia̱ nga nakjoáꞌta‑lá Nainá. ꞌKoa̱á ꞌsín nda kji̱ꞌnchré‑ná tsa ko̱ꞌsín si̱jéꞌtá‑lá koni ꞌsín nga sasén‑la̱ ra jè.
\v 15 Tsa ijye ko̱ꞌsín tjíjin‑ná nga Nainá ꞌnchré‑ná ꞌkia̱ nga tsa mé ra níjé‑lá, ti̱ꞌkoa̱á ijyeé ꞌya‑ná nga ti̱ꞌkia̱á ko̱ꞌtsia̱‑ni nga tsjá‑ná ꞌkia̱ nga ko̱ꞌsín si̱jé‑lá.
\p
\v 16 Tsa yá xi̱ta̱ ra ske̱ jngo xi̱ta̱ xákjén ra ti̱ꞌkoa̱ a̱ꞌta ꞌtse̱ Cristo makjiín‑la̱ nga ya̱ tíkajin jñà jé ra mì tsa kjo̱biya fìko̱‑ná, maá katabítsaꞌbatjì, ko̱ jè Nainá tsjá‑la̱ kjo̱binachon jè xi̱ta̱ ra tíbátsji‑jé. Tanga tà jñá‑ní ra ko̱xin‑la̱ nga ma si̱tsaꞌbatjì jñà xi̱ta̱ ra mì tsa ngi kjo̱biya kjiꞌta‑la̱ jñà jé ra i̱nchibátsji. Nga̱ tjín jé ra kjo̱biya fìko̱‑ná, ko̱ ꞌkoa̱á ꞌsín xiaa̱n nga mì tsa machjeén nga si̱tsaꞌbatjì jè xi̱ta̱ ra ko̱tjín jé ra tíbátsji.
\v 17 Tanga ngaꞌtsì kjoa̱ꞌcho ra ꞌsín xi̱ta̱, saba jé‑ni ya̱ ngixko̱n Nainá. Tanga tjín‑ní jñà jé ra mì tsa kjo̱biya fìko̱‑ná.
\p
\v 18 Ijyeé tjíjin‑ná nga jñà ra i̱xti‑la̱ Nainá ma, mì tsa ti̱ ya̱ tjítsa̱jin‑ni jé, nga̱ jé Jesús ra Iꞌndí‑la̱ Nainá ma, tjíkinda̱‑la̱, ko̱ jè xi̱ta̱‑ni̱í, mì kì ti̱ mé ma ꞌcho síko̱‑ni.
\p
\v 19 Ijyeé ꞌya‑ná nga i̱xti‑la̱ Nainá ꞌmí‑ná ra jién; tanga jñà xi̱ta̱ ra mì kì makjiín‑la̱ a̱ꞌta ꞌtse̱ Cristo ra tjín nga tjíjtsa i̱sàꞌnde, jè xi̱ta̱‑ni̱í tíbatéxoma‑la̱.
\p
\v 20 Ti̱ꞌkoa̱á ꞌya‑ná nga kií xá ꞌji‑ni jè Iꞌndí‑la̱ Nainá i̱ a̱ꞌta nangi nga jè nda isìchi̱ya‑ná mé‑ni nga ma ꞌyaxkeén ra ngi jè saba kjón‑ni Nainá. Ko̱ ya̱á titsa̱jnake̱é jè ra ngi jè saba Nainá tà nga̱tjì‑la̱ nga ya̱ titsa̱jnake̱é Jesucristo ra Iꞌndí‑la̱ ma, ra ti̱jé saba‑ni Nainá ko̱ ra ma‑la̱ tsjá‑ná kjo̱binachon ra mì feheꞌta ni̱ta kjiá‑nioo̱.
\v 21 Jiòn ra ndí i̱xti xin‑no, kì jñá mangítji̱ngi‑la jñà nainá ra bexkón xi̱ta̱ ra mì tsa kixi̱‑ni kjoa̱ nga Nainá.