\id 1JN
\h 1 Juan
\toc1 1 Juan
\mt Xo̱jo̱n carta xi kiskiì ítjòn San Juan
\c 1
\s Jesús, jè ꞌÉn xi síkíjnakon ini̱ma̱‑ná
\p
\v 1 \fig Lamp at night - 25% 1JN 1|70-HK00151B.TIF|col|1JN 1||Jngoò niꞌín xi síhiseèn|1JN 1.1\fig*Jè Jesús, jè ꞌÉn xi síkíjnakon‑ná xi tíjna skanda ti̱sa̱ tàtsꞌen‑la̱ kjoa̱. Ta̱nga i̱ꞌndei̱, jyeé kinaꞌyà‑la̱je̱n, ko̱ xko̱ón kiꞌya‑naje̱n, kichìtsejèn‑la̱je̱n kó kji, ti̱koa̱á ndsa̱á kinìko̱‑na̱je̱n.
\v 2 Jè ꞌÉn jè, kiꞌya tsejeén‑la̱. Ko̱ kiꞌya‑náje̱n. Ko̱ nguì kjoa̱ kixi̱‑né xi bèno̱jmí‑je̱n xi i̱tꞌaà tsꞌe̱. Ko̱ ti̱koa̱á bèno̱jmíya‑nòje̱n jè ꞌÉn xi síkíjnakon ini̱ma̱‑ná ni̱ta̱ kjé‑ne. Jè ꞌÉn jè, kꞌe̱ nga ti̱sa̱ ítjòn, ya̱á tíjnatꞌaà‑la̱ Nainá. Ta̱nga i̱ꞌndei̱, jyeé tsatsejèn‑naje̱n.
\v 3 Bèno̱jmí‑naje̱n kjoa̱ xi kiꞌya‑je̱n ko̱ xi kinaꞌyà‑je̱n, mé‑ne jñá, kꞌoa̱ ti̱sꞌín ngásòn ki̱tsa̱jnakoa̱á, koni sꞌín ndaà titsa̱jnakoa̱á Nainá xi Na̱ꞌén‑ná ma, ko̱ Kiꞌndí‑la̱ xi Jesucristo.
\v 4 Koií xá titsa̱chjiì‑nòje̱n Xo̱jo̱n jè mé‑ne nga nguì ko̱ kjo̱tsja kàtasakó kjitꞌaà‑la̱ ini̱ma̱‑ná.
\s Jè Nainá kjoa̱ iseèn‑né
\p
\v 5 Kꞌoa̱á sꞌín tjín jñà ꞌén xi tsakóya‑naje̱n Jesucristo, ko̱ koií‑né xi nokjoàyajiìn‑nòje̱n: Jè Nainá, kjoa̱ iseèn‑né. Xi i̱tꞌaà tsꞌe̱, tsjìn xi kjoa̱ jñò.
\v 6 Tsà kixoán nga ndaà titsa̱jnakoa̱á Nainá, ta̱nga tsà ya̱á titsa̱nìjchá yijo‑ná ya̱ ñánda jñò choòn, ñánda tjín kjoa̱chꞌo, ꞌén ndisoó titsa̱nokjoá; mìtsà kjoa̱ kixi̱ xi titsa̱ꞌné.
\v 7 Ta̱nga tsà ya̱ titsa̱jnaá ñánda iseèn choòn, koni jè Nainá ya̱á tíjna ñánda iseèn choòn, ndaá titsa̱jnakoa̱á xinguia̱á, ko̱ jè jní‑la̱ Jesucristo xi Kiꞌndí‑la̱ Nainá ma, sítsjeè yijeé jñà jé xi tjín‑ná.
\p
\v 8 Tsà kixoán: “Tsjìn‑na jé”, ti̱jñá titsa̱chona̱cha̱n‑lá yijo‑ná; mìtsà kjoa̱ kixi̱ xi titsa̱nokjoá.
\v 9 Ta̱nga tsà kéno̱jmí yije‑lá Nainá jñà jé xi tjín‑ná, ko̱maá jè kjótꞌaàtakoán nga si̱ìjchàatꞌaà‑ná jé‑ná ti̱koa̱á si̱ìtsjeèya‑ná ngatsꞌiì kjoa̱ xi chꞌo ꞌné. Nga̱ jè Nainá síkitasòn ꞌén‑la̱, ko̱ nguì kjoa̱ kixi̱í xi sꞌín.
\v 10 Ta̱nga tsà kixoán: “Kjꞌeè tsà jé otsjià”, jè Nainá ndisoó titsa̱nachrjekànguiaá, ko̱ mìtsà kixi̱ kjoa̱ nga mokjeiín‑ná jè ꞌén‑la̱.
\c 2
\s Yá xi̱ta̱ xi chja̱tjì‑ná ya̱ nguixko̱n Nainá
\p
\v 1 Jñò xi koni tsà ndí i̱xti‑na̱ xan‑nò, koií xá tìkjiì‑nò Xo̱jo̱n jè, mé‑ne nga mì ti̱ jé ki̱nchátsji‑lá yijo‑nò. Ta̱nga tsà tjín jngoò xi̱ta̱ xi tíhótsji jé‑la̱ yijo‑la̱, jè Nainá si̱ìjchàatꞌaà‑la̱, nga̱ tíjna jngoò‑ná xi̱ta̱ xi chja̱tjì‑ná ya̱ nguixko̱n Nainá, jè xi ꞌmì Jesucristo xi nguì xi̱ta̱ kixi̱.
\v 2 Jesucristo kitsjaà kjo̱tjò yijo‑la̱ nga kꞌen ngajo‑ná, mé‑ne ko̱ma si̱ìjchàatꞌaà‑ná jñà jé‑ná, ta̱nga mìtsà tà jñá xi si̱ìjchàatꞌaà‑ná; ti̱koa̱á si̱ìjchàatꞌaà yijeé‑la̱ ngatsꞌiì xi̱ta̱ xi tjín nga tíjtsa i̱sòꞌnde.
\p
\v 3 Tsà ndaà si̱kitasoán kjo̱tíxoma‑la̱, maá kíjngoò‑lá takoán nga jyeé ndaá yaxkoaán.
\v 4 Tsà tjín xi̱ta̱ xi tsò: “ꞌA̱n, jyeé ndaà bexkoan Nainá”, ta̱nga tsà mìkiì ndaà síkitasòn kjo̱tíxoma‑la̱, xi̱ta̱ ndiso‑né; tsjìn‑la̱ kjoa̱ kixi̱.
\v 5 Ta̱nga tsà ndaà nìkitasoán koni tsò ꞌén‑la̱, jyeé ꞌñó ndaà tjín‑ná kjo̱tsjacha‑la̱ Nainá ko̱ kꞌoa̱á sꞌín ma‑ne nga ꞌya‑la̱ nga kixi̱í kjoa̱ nga jè Cristo titsa̱jnakoa̱á.
\v 6 Jè xi̱ta̱ xi tsò nga ya̱ tíjnako̱ Cristo, mochjeén‑né nga kꞌoa̱sꞌín kàtasíjchá yijo‑la̱ koni sꞌín kisꞌiìn Jesucristo.
\s Kjo̱tíxoma xi̱tse̱
\p
\v 7 Jñò ndí ꞌndsè, jè kjo̱tíxoma xi tìkjiì‑nò, mìtsà nguì kjo̱tíxoma xi̱tse̱; ti̱jè‑ne kjo̱tíxoma xi kitsꞌiì‑nò kꞌe̱ nga sa̱ ítjòn kꞌe̱ nga ti̱sa̱ kòkjeiín‑nò. Jè kjo̱tíxoma jchínga jè, ti̱jè‑ne ꞌén xi kinaꞌyà jñò nga ti̱sa̱ ítjòn.
\v 8 Ta̱nga i̱ꞌndei̱ kꞌoa̱á sꞌín tìkjiì‑nò koni tsà jngoò kjo̱tíxoma xi̱tse̱. Nga̱ i̱tꞌaà tsꞌe̱ Cristo kiꞌya‑la̱ nga xi̱tse̱‑né ko̱ ti̱koa̱á tíꞌyaá‑la̱ xi i̱tꞌaà tsa̱jòn. Nga̱ jyeé tífahato kjoa̱ xi jñò choòn, ko̱ jyeé tíꞌya‑la̱ xi nguì kjoa̱ iseèn‑la̱ Nainá.
\p
\v 9 Tsà jngoò xi̱ta̱ kꞌoa̱sꞌín títsò nga kꞌoa̱á sꞌín tísíjchá yijo‑la̱ koni sꞌín tjín kjoa̱ iseèn‑la̱ Nainá, ta̱nga tsà majtikeè xíkjín xi ti̱koa̱ i̱tꞌaà tsꞌe̱ Cristo mokjeiín‑la̱, mìtsà kixi̱ kjoa̱ nga iseèn tísíjchá yijo‑la̱, ta̱kó ya̱á tíjnajiìn ñánda jñò choòn.
\v 10 Jè xi̱ta̱ xi matsjakeè xi̱ta̱ xíkjín xi ti̱koa̱ i̱tꞌaà tsꞌe̱ Cristo mokjeiín‑la̱, kꞌoa̱á sꞌín tísíjchá yijo‑la̱ koni sꞌín tjín kjoa̱ iseèn‑la̱ Nainá. Jè xi̱ta̱ jè, mìtsà ti̱ mé tjín‑ne xi ma ko̱hótsji jé‑la̱.
\v 11 Ta̱nga jè xi̱ta̱ xi majtikeè xi̱ta̱ xíkjín xi ti̱koa̱ i̱tꞌaà tsꞌe̱ Cristo mokjeiín‑la̱, ya̱á tíjna, ko̱ ya̱á tsóꞌbaya ya̱ ndi̱yá ñánda jñò choòn. Mìkiì beè ñánda tífì, nga̱ jè kjoa̱ jñò, bíchjoà xko̱n.
\p
\v 12 Jñò xi ndí i̱xti ꞌmì‑nò, tìkjiì‑nò Xo̱jo̱n jè, nga̱ i̱tꞌaà tsꞌe̱ Cristo‑né nga jye kisìjchàatꞌaà‑nò Nainá jñà jé xi tjín‑nò.
\v 13 Jñò xi xi̱ta̱ jchínga ꞌmì‑nò, tìkjiì‑nò Xo̱jo̱n jè, nga̱ jyeé kiyaxkoòn jè Jesucristo xi tíjna skanda ti̱sa̱ tàtsꞌen‑la̱ kjoa̱. Jñò i̱xti xi sa̱ titsa̱nìjchá yijo‑nò, tìkjiì‑nò Xo̱jo̱n jè, nga̱ jyeé kinìkijne‑là jè xi̱ta̱ nei̱í. Jñò xi ndí i̱xti ꞌmì‑nò, jyeé kiskiì‑nò Xo̱jo̱n jè nga̱ jye kiyaxkoòn Nainá xi Na̱ꞌèn ꞌmì‑laà.
\p
\v 14 Jyeé kiskiì‑nò xo̱jo̱n, jñò xi xi̱ta̱ jchínga ꞌmì‑nò, koií kjoa̱‑la̱ nga̱ jyeé kiyaxkoòn Jesucristo xi tíjna skanda ti̱sa̱ tàtsꞌen‑la̱ kjoa̱. Ti̱koa̱á jyeé kiskiì‑nò jñò i̱xti xi sa̱ titsa̱nìjchá yijo‑nò, koií kjoa̱‑la̱ nga̱ tjín‑nò ngaꞌñó ko̱ jyeé ya̱ tíjnajiìn ini̱ma̱‑nò jè ꞌén‑la̱ Nainá ko̱ jyeé kinìkijne‑là jè xi̱ta̱ nei̱í.
\p
\v 15 Kì jñà matsjacha jñà kjoa̱ xi tjín i̱sòꞌnde. Tsà yá xi̱ta̱ xi matsjakeè jñà kjoa̱ xi tjín i̱sòꞌnde, mìtsà kixi̱ kjoa̱ nga matsjakeè Nainá xi Na̱ꞌèn ꞌmì‑laà.
\v 16 Ngatsꞌiì kjoa̱ chꞌo xi jè i̱sòꞌnde bítꞌaà‑ná, mìtsà ya̱ nchrobá‑ne i̱tꞌaà tsꞌe̱ Nainá xi Na̱ꞌèn ꞌmì‑laà. Ti̱ya̱á tísindaà‑ne i̱ i̱sòꞌnde. Jñà kjoa̱ chꞌo koi, xi tjín i̱sòꞌnde: jñà‑né kjoa̱ chꞌo xi síjé yijo‑ná, kjoa̱ xi tsejèn‑la̱ xkoaán nga mején‑ná tsa̱ján ko̱ma, ko̱ kjoa̱ ꞌnga takòn xi tsꞌe̱ kjoa̱ nchi̱ná.
\v 17 Ngatsꞌiì kjoa̱ chꞌo xi tjín i̱sòꞌnde, ko̱ kjoa̱ xi ya̱ fahajiìn‑ná, jyeé tífehetꞌaà, ta̱nga jè xi̱ta̱ xi síkitasòn koni sꞌín mejèn‑la̱ Nainá, kíjnakon‑né ni̱ta̱ kjé‑ne.
\s Jè xi kjoa̱ kixi̱ ko̱ kjoa̱ ndiso
\p
\v 18 Jñò xi ndí i̱xti xan‑nò, jyeé tífehetꞌaà na̱chrjein. Jyeé tíjiìn‑nò nga kjoi̱í jngoò xi̱ta̱ xi nguì kondra̱ tíjna‑la̱ Cristo. Ko̱ na̱chrjein i̱ꞌndei̱ jyeé ꞌñó kjìn ma‑ne xi kondra̱ nchifì‑la̱ Cristo. Kꞌoa̱á ma‑ne nga kꞌoa̱sꞌín machi̱ya‑ná nga jyeé tífehetꞌaà na̱chrjein.
\v 19 Jñà xi̱ta̱ koi, ti̱ i̱í itjokàjiìn‑ná, ta̱nga xi kjoa̱ kixi̱, mìtsà nguì xi̱ta̱ tsa̱ján ma; tsà kixi̱í kjoa̱ nga xi̱ta̱ tsa̱ján, i̱í‑là títsa̱jnako̱‑ná. Ta̱nga koií kꞌoa̱sꞌín itjokàjiìn‑ná jñà xi̱ta̱ koi mé‑ne nga ndaà kàtaꞌya‑la̱ nga ngatsꞌiì xi̱ta̱ xi kꞌoa̱sꞌín kondra̱ fì‑la̱ Cristo, mìtsà nguì xi̱ta̱ tsa̱ján.
\p
\v 20 Jè Jesucristo, xi xi̱ta̱ tsjeè, jyeé kitsjaà‑nò jè Ini̱ma̱ Tsjeè‑la̱ Nainá; kꞌoa̱á ma‑ne nga ngatsꞌioò jyeé ndaà tíjiìn‑nò kósꞌín tjín xi kjoa̱ kixi̱.
\v 21 Kꞌoa̱á ma‑ne nga kꞌoa̱sꞌín tìkjiì‑nò xo̱jo̱n jè, nga̱ jyeé ndaà tíjiìn‑nò xi kjoa̱ kixi̱; mìtsà koi‑ne nga kjꞌeè tíjiìn‑nò. Ko̱ jyeé ndaà tíjiìn‑nò nga ni̱jngoò ꞌén ndiso xi ya̱ nchrobátꞌaà‑ne i̱tꞌaà tsꞌe̱ kjoa̱ kixi̱.
\p
\v 22 ¿Yá‑ne xi xi̱ta̱ ndiso? Jè‑né xi bíꞌma nga tsò: “Jè Jesús mìtsà jè xi Cristo, [mìtsà Nainá kisìkasén].” Jè xi̱ta̱ jè xi kondra̱ fì‑la̱ Cristo nga̱ jngoò kꞌa mìkiì mokjeiín‑la̱ i̱tꞌaà tsꞌe̱ Nainá xi Na̱ꞌèn‑ná ma ko̱ i̱tꞌaà tsꞌe̱ Jesucristo xi Kiꞌndí‑la̱ Nainá ma.
\v 23 Ngatsꞌiì xi̱ta̱ xi jngoò kꞌa mìkiì mokjeiín‑la̱ i̱tꞌaà tsꞌe̱ Kiꞌndí‑la̱ Nainá, mìtsà Nainá xi Na̱ꞌèn‑ná ma tíjnako̱. Ta̱nga jè xi̱ta̱ xi mokjeiín‑la̱ ti̱koa̱ tsjá ꞌén‑la̱ nga jè Jesús, jè xi Kiꞌndí‑la̱ Nainá, ya̱á tíjnako̱ Nainá xi Na̱ꞌèn‑ná ma.
\p
\v 24 Koií kꞌoa̱sꞌín xan‑nò, ndaá kàtasijiìn ini̱ma̱‑nò jè ꞌén xi i̱tꞌaà tsꞌe̱ Cristo xi jye kinaꞌyà nga ti̱sa̱ tàtsꞌen‑la̱ kjoa̱. Tsà kꞌoa̱sꞌín ndaà si̱jiìn ini̱ma̱‑nò, ti̱koa̱á ndaá ki̱tsa̱jnako̱o Nainá xi Na̱ꞌèn‑ná ma ko̱ Kiꞌndí‑la̱.
\v 25 Jesucristo kꞌoa̱á sꞌín kitsjaà ꞌén‑la̱ nga tsjá‑ná kjoa̱binachon xi mìkiì fehetꞌaà ni̱ta̱ kjé‑ne.
\p
\v 26 Koií xá tìkjiì‑nò xo̱jo̱n jè mé‑ne nga ma jcha̱xkon‑nò jñà xi mejèn‑la̱ kona̱cha̱n‑nò.
\v 27 Ta̱nga jñò, jyeé tíjiìn ini̱ma̱‑nò jè Ini̱ma̱ Tsjeè‑la̱ Nainá xi kitsjaà‑nò Jesucristo. Mì ti̱ kiì mochjeén‑ne tsà yá xi ko̱kòya‑nò. Nga̱ ti̱jè‑ne Ini̱ma̱ Tsjeè‑la̱ Nainá ke̱èno̱jmíya‑nò kósꞌín tjín ngatsꞌiì kjoa̱ xi ndaà tjín. Koni sꞌín ko̱kòya‑nò, ꞌén kixi̱‑né, mìtsà ꞌén ndiso. Kꞌoa̱á sꞌín ndaà titsa̱jnako̱o kjitꞌaà Jesucristo, koni sꞌín síkíchi̱ya‑nò Ini̱ma̱ Tsjeè‑la̱ Nainá.
\p
\v 28 Jñò xi ndí i̱xti xan‑nò, kꞌoa̱á sꞌín ndaà titsa̱jnako̱o Cristo, mé‑ne nga ꞌñó tjín‑ne takoán ko̱ mìkiì ko̱sobà‑ná kꞌe̱ nga jè xi ki̱tjojen ìjngoò kꞌa‑ne ngajmiì.
\v 29 Koni sꞌín jye tíjiìn‑nò nga jè Cristo, xi̱ta̱ kixi̱‑né nga nguixko̱n Nainá, kꞌoa̱á ti̱sꞌín ndaà kàtasijiìn‑nò, nga ngatsꞌiì xi̱ta̱ xi kjoa̱ kixi̱ sꞌín nga nguixko̱n Nainá, kiꞌndí‑la̱ Nainá‑né.
\c 3
\s I̱xti‑la̱ Nainá
\p
\v 1 Ndaà kàtasijiìn‑nò, ꞌñó ndaà matsjakeè‑ná Nainá xi Na̱ꞌèn‑ná ma, kꞌoa̱á ma‑ne nga i̱xti‑la̱ tsò‑ná. Ko̱ nguì kixi̱í kjoa̱ nga i̱xti‑la̱ Nainá ꞌmì‑ná. Kꞌoa̱á ma‑ne nga jñà xi̱ta̱ i̱sòꞌnde, mìkiì mokjeiín‑la̱ tsà i̱xti‑la̱ Nainá ꞌmì‑ná, koií kjoa̱‑la̱ nga̱ jñà xi̱ta̱ koi, mìkiì mokjeiín‑la̱ i̱tꞌaà tsꞌe̱ Nainá.
\v 2 Jñò ndí ꞌndsè xi matsjake̱‑nò, i̱ꞌndei̱ jyeé kiꞌndí‑la̱ Nainá ꞌmì‑ná. Ta̱nga kjꞌeè tsà ndaà okó‑ná Nainá kó kjoàn ko̱maá nga ko̱ma i̱skan. Ta̱nga jyeé tíjiìn‑ná nga kꞌoa̱ ti̱ kjoàn ko̱maá koni kji jè Jesucristo kꞌe̱ nga ki̱jchò na̱chrjein nga jè xi kjoi̱í ìjngoò kꞌa‑ne; nga̱ kꞌoa̱á sꞌín jcha̱xkoaán koni kji jè.
\v 3 Ngatsꞌiì xi̱ta̱ xi kꞌoa̱sꞌín nchikoña nga kꞌoa̱á sꞌín kjoàn ko̱ma koni kji jè Jesucristo, na̱chrjein nchijòn‑né nga tsjeè nchisíjchá yijo‑la̱ koni sꞌín nga xi̱ta̱ tsjeè jè Jesucristo.
\p
\v 4 Ngatsꞌiì xi̱ta̱ xi ótsji jé, kondra̱á fì‑la̱ kjo̱tíxoma‑la̱ Nainá. Kꞌe̱ nga jé binchaàtsjiaá, jè kjo̱tíxoma‑la̱ Nainá tìnáchrjenguiaá.
\v 5 Jñò, jyeé tíjiìn‑nò nga jè Jesucristo koií xá jꞌiì‑ne nga jè faáxìn‑ná jñà jé xi tjín‑ná. Ko̱ ꞌya‑nò nga jè Jesucristo, ni̱mé jé tsohótsji.
\v 6 Ngatsꞌiì xi̱ta̱ xi Cristo títsa̱jnako̱, mìtsà jé ótsji; ta̱nga jñà xi̱ta̱ xi ótsji jé, kjꞌeè kiì beèxkon ko̱ ti̱koa̱ mìkiì tíjiìn‑la̱ yá‑né xi ꞌmì Jesucristo.
\v 7 Jñò, xi ndí i̱xti‑na̱ xan‑nò, kì kiì biìꞌnde tsà yá xi skóna̱cha̱n‑nò. Jè xi̱ta̱ xi kjoa̱ kixi̱ sꞌín nga nguixko̱n Nainá, xi̱ta̱ kixi̱‑né, koni xi̱ta̱ kixi̱ jè Cristo.
\v 8 Ta̱nga jè xi̱ta̱ xi kjitꞌaà na̱chrjein tíhótsji jé, tsꞌe̱ xi̱ta̱ nei̱í‑né. Nga̱ jè xi̱ta̱ nei̱í, kꞌoa̱á sꞌín tíhótsji jé skanda ti̱sa̱ tàtsꞌen‑la̱ kjoa̱. Ko̱ koií xá jꞌiì‑ne Jesucristo xi Kiꞌndí‑la̱ Nainá nga jè sikixòña jñà kjoa̱ chꞌo xi sꞌín jè xi̱ta̱ nei̱í.
\p
\v 9 Ngatsꞌiì xi̱ta̱ xi jye Nainá kisìkjatjìya‑la̱ nga kiꞌndí‑la̱ Nainá ma, mìtsà ti̱ya̱ títsa̱jnajiìn‑ne jé. Nga̱ jyeé ya̱ tíjnajiìn ini̱ma̱‑la̱ jè Ini̱ma̱ Tsjeè‑la̱ Nainá. Ko̱ mì ti̱ kiì ma ko̱hótsji‑jé‑ìsa, nga̱ jyeé kiꞌndí‑la̱ Nainá‑né.
\v 10 Kꞌoa̱á sꞌín ma‑ne nga yaxkon‑la̱ yá‑né xi i̱xti‑la̱ Nainá ko̱ yá‑né xi i̱xti‑la̱ xi̱ta̱ nei̱í; ngatsꞌiì xi̱ta̱ xi mìkiì síkitasòn kjoa̱ kixi̱‑la̱ Nainá, ti̱koa̱ mìkiì tsjakeè beè xi̱ta̱ xíkjín xi ti̱koa̱ i̱tꞌaà tsꞌe̱ Cristo mokjeiín‑la̱, mìtsà kiꞌndí‑la̱ Nainá ma.
\s Ngásòn ngáya tsjacha sꞌe̱én xinguia̱á
\p
\v 11 Nga̱ kꞌoa̱á sꞌín tíchja̱ jè ꞌén xi jye kinaꞌyà kꞌe̱ nga ti̱sa̱ kòkjeiín‑nò nga sa̱ ítjòn nga tsò: Ngásòn ngáya tsjacha sꞌe̱én xinguia̱á.
\v 12 Mìkiì kꞌoa̱sꞌín sꞌe̱én koni kisꞌiìn jè xi̱ta̱ xi kiꞌmì Caín nga jè xi̱ta̱ nei̱í kiìtꞌaà‑la̱ nga kisìkꞌen ꞌndse̱. ¿Mé‑ne kisìkꞌen‑ne ꞌndse̱? Tà koií kjoa̱‑la̱ nga jè ꞌndse̱, xi̱ta̱ kixi̱‑né nga nguixko̱n Nainá ko̱ jè Caín chꞌoó tjín kjoa̱ xi sꞌín.
\p
\v 13 Kꞌoa̱á ma‑ne kꞌoa̱sꞌín tìxan‑nò jñò ndí ꞌndsè, kì maxkón‑nò tsà si̱ìjtikeè‑nò xi̱ta̱ i̱sòꞌnde xi mìkiì mokjeiín‑la̱ ꞌén‑la̱ Nainá.
\v 14 Jñá jyeé tíjiìn‑ná nga jyeé itjokàjñaá ya̱ ndi̱yá kjoa̱biyaà xi ya̱ tjaáyaá kjòtseé ko̱ jyeé tjín‑ná kjoa̱binachon xi mìkiì fehetꞌaà ni̱ta̱ kjé‑ne. Nga̱ jyeé kꞌoa̱sꞌín ndaà matsjachaá jñà xi̱ta̱ xinguia̱á xi ti̱koa̱ i̱tꞌaà tsꞌe̱ Cristo mokjeiín‑la̱. Jè xi̱ta̱ xi mìkiì matsjakeè xíkjín, ndi̱yá kjoa̱biyaá tsóhoya jè ini̱ma̱‑la̱.
\v 15 Ngatsꞌiì xi̱ta̱ xi majtikeè xi̱ta̱ xíkjín, kꞌoa̱á sꞌín ngaya‑la̱ koni tsà xi̱ta̱ síkꞌen. Jñò, ndaá tíjiìn‑nò, jè xi̱ta̱ xi xi̱ta̱ síkꞌen, mìtsà kjoa̱binachon xi mìkiì fehetꞌaà tísíjchájiìn yijo‑la̱.
\v 16 Jñá, kꞌoa̱á sꞌín ꞌya‑ná mé xi ꞌmì kjo̱tsjacha kꞌe̱ nga jè Jesucristo kitsjaà kjo̱tjò yijo‑la̱ nga kꞌen ngajo‑ná. Jñá kꞌoa̱á ti̱sꞌín mochjeén nga sꞌe̱én i̱tꞌaà tsꞌe̱ xi̱ta̱ xinguia̱á koni kisꞌiìn jè Cristo.
\v 17 Tsà tjín jngoò xi̱ta̱ xi tjín‑la̱ tsojmì xi tímochjeén kjitꞌaà‑la̱, tsà skoe̱ jngoò xi̱ta̱ xíkjín xi ti̱koa̱ i̱tꞌaà tsꞌe̱ Cristo mokjeiín‑la̱ nga tsjìn‑la̱ tsojmì xi mochjeén‑la̱, tsà mìkiì ma‑la̱ nga ko̱si̱ko̱ jè xi̱ta̱ xíkjín xi i̱tꞌaà tsꞌe̱ tsojmì xi tsjìn‑la̱, mìtsà kixi̱ kjoa̱ nga kjo̱tsjacha‑la̱ Nainá tíjnajiìn ini̱ma̱‑la̱.
\v 18 Jñò xi ndí i̱xti‑na̱ xan‑nò, ti̱tsjacha xinguio̱o, kì tà ꞌén nokjoà; nguì ndaá kàtaꞌya‑la̱ kósꞌín matsjacha xinguio̱o nga ti̱si̱ko̱ò mé tsojmì xi mochjeén‑la̱ mé‑ne nga kàtaꞌya‑la̱ nga kixi̱í kjoa̱ nga ndaà matsjacha xinguio̱o.
\s ꞌÑó tjín takoán nga nguixko̱n Nainá
\p
\v 19 Kꞌe̱ nga kꞌoa̱sꞌín titsa̱ꞌné, kꞌe̱é jcha̱‑ná nga kixi̱í kjoa̱ nga kꞌoa̱á sꞌín titsa̱nìjchá yijo‑ná koni sꞌín tjín kjoa̱ kixi̱‑la̱ Nainá ko̱ ꞌnchán nìkíjnaá ini̱ma̱‑ná nga nguixko̱n Nainá.
\v 20 Na̱sꞌín jè ini̱ma̱‑ná jé tíbínè‑ná, ta̱nga jè Nainá, ìsa̱á ndaà tíjiìn‑la̱ mì kꞌoa̱‑ne koni jè ini̱ma̱‑ná. Nga̱ jè Nainá ìsa̱á ndaà tsejèn yije‑la̱ ngatsꞌiì kjoa̱ xi titsa̱ꞌné.
\v 21 Jñò ndí ꞌndsè xi matsjake̱‑nò, tsà jè ini̱ma̱‑ná mìtsà ti̱ mé kjoa̱ chꞌo tíbínè‑ná, ꞌñó tjín takoán nga nguixko̱n Nainá.
\v 22 Tsà mé xi si̱jé‑lá Nainá, maá‑la̱ tsjá yije‑ná ni̱ta̱ mé kjo̱ndaà‑ne; nga̱ nìkitasoán kjo̱tíxoma‑la̱, ko̱ kꞌoa̱á sꞌín ꞌné koni sꞌín sasén‑la̱ Nainá.
\v 23 Jè kjo̱tíxoma‑la̱ Nainá, jé‑né nga ndaà kàtakjeiín‑ná i̱tꞌaà tsꞌe̱ Jesucristo xi Kiꞌndí‑la̱ ma, ti̱koa̱ ngásòn ngáya ko̱tsjachaá xinguia̱á koni sꞌín jye tsatíxoma‑ná Cristo.
\v 24 Jè xi̱ta̱ xi síkitasòn kjo̱tíxoma‑la̱ Nainá, ya̱á tíjnako̱ Nainá, ko̱ jè Nainá ya̱á tíjnajiìn ini̱ma̱‑la̱ xi̱ta̱ jè. Kꞌoa̱á ma‑ne nga ꞌyaá nga Nainá ya̱ tíjnako̱‑ná, koi kjoa̱‑la̱ nga̱ jye kitsjaà‑ná jè Ini̱ma̱ Tsjeè‑la̱.
\c 4
\s Jñà xi̱ta̱ xi kondra̱ fì‑la̱ Cristo
\p
\v 1 Jñò ndí ꞌndsè xi ꞌñó matsjake̱‑nò, kì ta̱xki̱ mokjeiín‑nò i̱tꞌaà tsꞌe̱ ngatsꞌiì xi̱ta̱ xi tsò nga jè Ini̱ma̱ Tsjeè‑la̱ Nainá síkíchi̱ya‑la̱ ꞌén xi chja̱ya. Ítjòn chítꞌaà, a kixi̱í kjoa̱ nga jè Ini̱ma̱ Tsjeè‑la̱ Nainá tísíchi̱ya‑la̱ ꞌén xi chja̱, a xi majìn‑né. Nga̱ jñà na̱chrjein xi titsa̱jnaá i̱ꞌndei̱, tjín jchán xi̱ta̱ ndiso xi tjímasòn ya̱ i̱sòꞌnde xi tsò nga jè Nainá tsjá‑la̱ ꞌén xi nchibéno̱jmíya.
\v 2 Jè xi̱ta̱ xi béno̱jmí nga jè Jesucristo, i̱í kitsꞌiìn i̱tꞌaà nangui, ko̱ xi̱ta̱á komà koni jñá, jè xi̱ta̱ xi kꞌoa̱sꞌín béno̱jmí, jè‑né xi tjín‑la̱ Ini̱ma̱ Tsjeè‑la̱ Nainá. Kꞌoa̱á sꞌín ꞌya‑nò yá xi̱ta̱‑ne xi jè Ini̱ma̱ Tsjeè‑la̱ Nainá tísíchi̱ya‑la̱ ꞌén xi tíchja̱ya.
\v 3 Ta̱nga jè xi̱ta̱ xi mìkiì kꞌoa̱sꞌín ke̱èno̱jmí nga jè Jesucristo i̱í kitsꞌiìn i̱tꞌaà nangui, ko̱ xi̱ta̱á komà koni jñá, jè xi̱ta̱ xi kꞌoa̱sꞌín tsò, tsjìn‑la̱ Ini̱ma̱ Tsjeè‑la̱ Nainá. Xi̱ta̱ jè, jè tísíkjeén kjo̱hítsjeèn‑la̱ xi̱ta̱ xi tíjna ítjòn nga kondra̱ fì‑la̱ Cristo. Jñò, jyeé kinaꞌyà nga kjoi̱í‑né jè xi kondra̱ fì‑la̱ Cristo, ko̱ na̱chrjein xi titsa̱jnaá i̱ꞌndei̱ jyeé kꞌoa̱sꞌín tísíxá kjo̱hítsjeèn‑la̱.
\p
\v 4 Jñò xi ndí i̱xti‑na̱ xan‑nò, jyeé xi̱ta̱‑la̱ Nainá ꞌmì‑nò; jñò, jyeé kinìkijne‑là jñà xi̱ta̱ xi kꞌoa̱sꞌín ꞌén ndiso chja̱ya; mì ti̱ kiì ko̱ma‑ne nga jñà skóna̱cha̱n‑nò, nga̱ jè Ini̱ma̱ Tsjeè‑la̱ Nainá xi tíjnajiìn ini̱ma̱‑nò, ìsa̱á tsꞌe̱ ngaꞌñó tjín‑la̱ mì kꞌoa̱à‑ne koni jè kjo̱hítsjeèn tsꞌe̱ xi̱ta̱ nei̱í xi síxájiìn ini̱ma̱‑la̱ xi̱ta̱ xi mìkiì mokjeiín‑la̱ i̱tꞌaà tsꞌe̱ Cristo.
\v 5 Jñà xi̱ta̱ koi, tà jñá títsa̱jnakon‑ne kjo̱hítsjeèn xi tjín ya̱ i̱sòꞌnde; kꞌoa̱á ma‑ne nga kꞌoa̱sꞌín chja̱ ko̱ jñà ꞌnchré‑la̱ xi̱ta̱ xi ti̱koa̱ kjo̱hítsjeèn tsꞌe̱ i̱sòꞌnde síkjeén.
\v 6 Ta̱nga ngaje̱n, xi̱ta̱‑la̱ Nainá‑náje̱n. Kꞌoa̱á ma‑ne nga jñà ꞌnchré‑naje̱n jñà xi̱ta̱ xi mokjeiín‑la̱ ꞌén‑la̱ Nainá. Ta̱nga jñà xi mìtsà xi̱ta̱‑la̱ Nainá ma, mìtsà ngaje̱n sísꞌin‑naje̱n. Kꞌoa̱á ma‑ne nga ꞌya‑la̱ yá‑né xi nguì jè Ini̱ma̱ Tsjeè‑la̱ Nainá tísíkíchi̱ya‑la̱ nga nguì kjoa̱ kixi̱ ko̱ yá‑né xi ini̱ma̱ ndiso‑la̱ nei̱í tíkona̱cha̱n‑la̱.
\s Nainá, ꞌñó tjín‑la̱ kjo̱tsjacha
\p
\v 7 Jñò ndí ꞌndsè xi ꞌñó matsjake̱‑nò, mochjeén‑né nga ngásòn ngáya tsjacha jcha̱á xinguia̱á, nga̱ jè xi kjo̱tsjacha, i̱tꞌaà tsꞌe̱ Nainá nchrobá‑ne. Ngatsꞌiì xi̱ta̱ xi tjín‑la̱ kjo̱tsjacha, kiꞌndí‑la̱ Nainá‑né ko̱ ti̱koa̱á beè‑né yá‑né xi Nainá.
\v 8 Jè xi̱ta̱ xi mìkiì matsjakeè xi̱ta̱ xíkjín, kjꞌeè kì beè yá‑né xi Nainá, nga̱ jè Nainá kjo̱tsjacha‑né.
\v 9 Kꞌoa̱á sꞌín tsakó‑ná Nainá kjo̱tsjacha xi tjín‑la̱ xi i̱tꞌaà tsa̱ján nga kisìkasén kiꞌndí‑la̱ i̱ i̱sòꞌnde, jè kiꞌndí‑la̱ xi ta jè ta jngoò ma‑ne, mé‑ne nga i̱tꞌaà tsꞌe̱ ndaà ki̱tsa̱jnakoaán.
\v 10 Kꞌoa̱á sꞌín tjín kjo̱tsjacha xi tsakó Nainá xi i̱tꞌaà tsa̱ján: Mìtsà koi‑ne nga jñá ndaà matsjachaá Nainá. Jè Nainá xi ꞌñó ndaà matsjakeè‑ná. Kꞌoa̱á ma‑ne nga kisìkasén kiꞌndí‑la̱ nga kꞌen ngajo‑ná, mé‑ne si̱ìjchàatꞌaà‑ná jé‑ná.
\p
\v 11 Jñò ndí ꞌndsè xi matsjake̱‑nó, tsà jè Nainá kꞌoa̱sꞌín ꞌñó ndaà matsjakeè‑ná, mochjeén‑né nga kꞌoa̱ ti̱sꞌín ko̱tsjachaá xinguia̱á nga ìjngoò jngoá.
\v 12 Ni̱ sa̱á jngoò xi̱ta̱ xi xko̱n beè‑ne Nainá, ta̱nga tsà ndaà ko̱tsjachaá xinguia̱á nga ìjngoò jngoá, jè Nainá ya̱á tíjnajiìn kjitꞌaà ini̱ma̱‑ná ko̱ i̱tꞌaà tsa̱ján‑ná nga ndaà tíbitasòn yije kjo̱tsjacha‑la̱ Nainá.
\v 13 Nainá jyeé kitsjaà‑ná Ini̱ma̱ Tsjeè‑la̱. Kꞌoa̱á ma‑ne nga jye ꞌyaá nga kjitꞌaà na̱chrjein ya̱ titsa̱jnakoa̱á Nainá ko̱ ti̱koa̱á ya̱ tíjnako̱‑ná Nainá nga tíjnajiìn ini̱ma̱‑ná.
\v 14 Ngaje̱n sobá kiꞌya‑je̱n ko̱ ꞌbí‑náje̱n ꞌén‑na̱je̱n nga jè Nainá xi Na̱ꞌèn ꞌmì‑laà kisìkasén Kiꞌndí‑la̱ nga jè ko̱chrjekàjiìn kjo̱ꞌin xi kjoa̱ tsꞌe̱ jé‑la̱ ngatsꞌiì xi̱ta̱ i̱sòꞌnde.
\v 15 Ngatsꞌiì xi̱ta̱ xi nguì ko̱ ini̱ma̱‑la̱ tsjá ꞌén‑la̱ nga jè Jesús xi Kiꞌndí‑la̱ Nainá, kjitꞌaà na̱chrjein ya̱ tíjnako̱ Nainá ko̱ jè Nainá ya̱á tíjnajiìn ini̱ma̱‑la̱.
\p
\v 16 Jyeé kꞌoa̱sꞌín ndaà ꞌyaá, ko̱ ti̱koa̱ mokjeiín‑ná, nga jè Nainá tjín‑la̱ kjo̱tsjacha xi i̱tꞌaà tsa̱ján. Nga̱ jè Nainá kjo̱tsjacha‑né. Ko̱ jè xi̱ta̱ xi kjo̱tsjacha tíjnajiìn kjitꞌaà ya̱ ini̱ma̱‑la̱, ya̱á tíjnako̱ Nainá ko̱ jè Nainá ya̱á tíjnajiìn ini̱ma̱‑la̱ xi̱ta̱ jè.
\v 17 Kꞌe̱ nga i̱tꞌaà tsa̱ján kꞌoa̱sꞌín ndaà tíbitasòn yije kjo̱tsjacha‑la̱ Nainá, ꞌñó tjín takoán nga mìtsà ti̱ mé tsakjoòn‑ná jè na̱chrjein kꞌe̱ nga si̱ndaàjiìn‑la̱ xi̱ta̱ xi kjoa̱ tsꞌe̱ jé‑la̱. Nga̱ jñá, kꞌoa̱á sꞌín ndaà titsa̱ꞌné i̱ i̱sòꞌnde koni sꞌín kisꞌiìn jè Jesucristo.
\v 18 Ya̱ ñánda nga tjín xi kjo̱tsjacha, mìtsà ti̱ mé kjo̱skon tjín‑ne. Nga̱ jè xi nguì kjo̱tsjacha, faáxìn‑né ngatsꞌiì xi kjo̱skon ꞌmì. Jè xi̱ta̱ xi tsakjón, kjo̱ꞌin‑né xi tsakjón‑la̱. Ko̱ jè xi̱ta̱ xi tákó kjo̱skon tíjiìn ini̱ma̱‑la̱, koií‑né nga kjꞌeè tsà ndaà tíjiìn ini̱ma̱‑la̱ jè kjo̱tsjacha‑la̱ Nainá.
\p
\v 19 Koií kꞌoa̱sꞌín matsjacha‑ná Nainá, koií kjoa̱‑la̱ nga̱ jè kjòtsjakeè ítjòn‑ná.
\v 20 Tsà tjín xi̱ta̱ xi tsò: “ꞌA̱n, matsjake̱‑ná Nainá.” Ta̱nga tsà majtikeè xi̱ta̱ xíkjín xi ti̱koa̱ i̱tꞌaà tsꞌe̱ Cristo mokjeiín‑la̱, jè xi̱ta̱ jè, xi̱ta̱ ndiso‑né. Tsà mì kì matsjakeè xi̱ta̱ xíkjín xi xko̱n tíbeè‑ne, ¿kósꞌín ma‑ne ko̱tsjakeè Nainá xi kjꞌeè tsà xko̱n beè‑ne?
\v 21 Jè kjo̱tíxoma xi kitsjaà‑ná Jesucristo, kꞌoa̱á tsò: Jè xi matsjakeè Nainá, mochjeén‑né nga ti̱koa̱ kàtamatsjakeè xi̱ta̱ xíkjín xi ti̱koa̱ i̱tꞌaà tsꞌe̱ Cristo mokjeiín‑la̱.
\c 5
\s Kósꞌín ko̱ma si̱kijne‑lá kjoa̱ tsꞌe̱ i̱sòꞌnde
\p
\v 1 Jyeé i̱xti‑la̱ Nainá‑né ngatsꞌiì xi̱ta̱ xi nguì ko̱ ini̱ma̱‑la̱ mokjeiín‑la̱ nga jè Jesús, [jè‑né xi Nainá kisìkasén], jè‑né xi Cristo. Ko̱ ngatsꞌiì xi̱ta̱ xi tsjakeè xi na̱ꞌèn tíjna‑la̱, tjínè‑la̱ nga ti̱koa̱ ko̱tsjakeè ngatsꞌiì i̱xti‑la̱ na̱ꞌèn‑la̱.
\v 2 Kꞌe̱ nga matsjachaá Nainá, ko̱ ti̱koa̱ nìkitasoán kjo̱tíxoma‑la̱, ꞌya‑ná nga ti̱koa̱ matsjachaá jñà xi i̱xti‑la̱ Nainá ma.
\v 3 Kꞌoa̱á sꞌín tjín tsà kixi̱ kjoa̱ nga matsjachaá Nainá, jè‑né nga ndaà si̱kitasoán kjo̱tíxoma‑la̱. Ko̱ jè kjo̱tíxoma‑la̱, mìtsà ꞌñó ꞌin bitasòn.
\v 4 Nga̱ ngatsꞌiì xi̱ta̱ xi i̱xti‑la̱ Nainá ma, síkijneé‑la̱ ngatsꞌiì kjoa̱ chꞌo xi tjín i̱sòꞌnde. Koií ma nìkijne‑lá kjoa̱ xi tjín i̱sòꞌnde nga̱ mokjeiín‑ná i̱tꞌaà tsꞌe̱ Cristo.
\v 5 Ni̱yá xi ma síkijne‑la̱ jè kjoa̱ chꞌo xi tjín i̱sòꞌnde, ta̱jngoò‑né jè xi̱ta̱ xi mokjeiín‑la̱ i̱tꞌaà tsꞌe̱ Jesús, nga jè‑né xi Kiꞌndí‑la̱ Nainá ma. Jè‑né xi chíkjoa̱‑la̱ nga si̱ìkijne.
\s Jè xi tsjá kixi̱ ꞌén i̱tꞌaà tsꞌe̱ Kiꞌndí‑la̱ Nainá
\p
\v 6 Jé‑né Jesucristo xi jꞌiì i̱ i̱sòꞌnde. Ko̱ kꞌe̱ nga jꞌiì, jè nandá ko̱ jní xi ndaà tsakó. Ko̱ mìtsà tà jè nandá xi tsakó, ti̱koa̱á jè jní. Ko̱ jè Ini̱ma̱ Tsjeè‑la̱ Nainá xi béno̱jmí kixi̱ yá‑ne xi jè. Nga̱ jè Ini̱ma̱ Tsjeè‑la̱ Nainá, nguì kjoa̱ kixi̱‑né.
\v 7 Jàn ma‑ne xi nguì tsjá kixi̱ ꞌén‑la̱ xi i̱tꞌaà tsꞌe̱ kjoa̱ koi:
\v 8 jè Ini̱ma̱ Tsjeè‑la̱ Nainá, jè nandá, ko̱ jè jní. Ko̱ ngajàn koi, ngásòn tsò.
\v 9 Tsà mokjeiín‑ná jñà ꞌén xi tsjá xi̱ta̱ i̱sòꞌnde, mochjeén‑né nga ìsa̱ ndaà ko̱kjeiín‑ná jè ꞌén xi jè sobà Nainá títsjá. Nga̱ jè ꞌén xi títsjá, jè tíbéno̱jmí, yá‑ne xi Kiꞌndí‑la̱ Nainá.
\v 10 Jè xi nguì ko̱ ini̱ma̱‑la̱ mokjeiín‑la̱ i̱tꞌaà tsꞌe̱ Kiꞌndí‑la̱ Nainá, ya̱á tíjiìn ini̱ma̱‑la̱ nga kixi̱í kjoa̱ jè ꞌén xi tsjá Nainá. Ta̱nga jè xi mìkiì mokjeiín‑la̱ i̱tꞌaà tsꞌe̱ Nainá, jè Nainá, ndiso tíhochrjengui, koií kjoa̱‑la̱ nga mìkiì mokjeiín‑la̱ ꞌén xi tsjá Nainá xi i̱tꞌaà tsꞌe̱ Kiꞌndí‑la̱.
\v 11 Jè ꞌén xi kitsjaà Nainá, jè‑né nga jè Nainá tsjá‑ná kjoa̱binachon xi mì fehetꞌaà ni̱ta̱ kjé‑ne. Ko̱ jè kjoa̱binachon jè, ya̱á sakó‑ná i̱tꞌaà tsꞌe̱ Kiꞌndí‑la̱.
\v 12 Jè xi̱ta̱ xi Kiꞌndí‑la̱ Nainá tíjnajiìn ini̱ma̱‑la̱, tjín‑la̱ kjoa̱binachon xi mìkiì fehetꞌaà ni̱ta̱ kjé‑ne; ta̱nga jè xi̱ta̱ xi mìtsà Kiꞌndí‑la̱ Nainá tíjnajiìn ini̱ma̱‑la̱, tsjìn‑la̱ kjoa̱binachon.
\s ꞌÉn xi fehetꞌaà‑ne
\p
\v 13 Jñò xi mokjeiín‑nò i̱tꞌaà tsꞌe̱ Kiꞌndí‑la̱ Nainá, koií xá tìkjiì‑nò Xo̱jo̱n jè mé‑ne nga ndaà kàtasijiìn‑nò nga jyeé tjín‑nò kjoa̱binachon xi mìkiì fehetꞌaà ni̱ta̱ kjé‑ne.
\p
\v 14 Kꞌoa̱á ma‑ne nga ꞌñó tjín takoán kꞌe̱ nga nokjoátꞌaà‑lá Nainá. Kꞌoa̱á sꞌín ndaà kji̱ꞌnchré‑ná tsà kꞌoa̱sꞌín si̱jétꞌaà‑lá koni sꞌín sasén‑la̱ jè.
\v 15 Tsà jye kꞌoa̱sꞌín tíjiìn‑ná nga Nainá ꞌnchré‑ná kꞌe̱ nga tsà mé xi nìjé‑laá, ti̱koa̱á jyeé ꞌyaá nga ti̱kꞌe̱é‑ne nga nìjé‑laá tsjá‑ná mé xi nìjé‑laá.
\p
\v 16 Tsà yá xi̱ta̱ xi skoe̱ jngoò xi̱ta̱ xíkjín xi ti̱koa̱ i̱tꞌaà tsꞌe̱ Cristo mokjeiín‑la̱ nga ya̱ tíkàjiìn jñà jé xi mìtsà kjoa̱biyaà fìko̱‑ná, maá katítsiꞌbatjì, ko̱ jè Nainá tsjá‑la̱ kjoa̱binachon jè xi̱ta̱ xi tíhótsji jé. Ta̱nga tà jñá‑né xi ko̱xan‑la̱ nga ma si̱tsiꞌbatjì jñà xi̱ta̱ xi mìtsà nguì kjoa̱biyaà kjitꞌaà‑la̱ jñà jé xi nchihótsji. Nga̱ tjín jé xi kjoa̱biyaà fìko̱‑ná, ko̱ kꞌoa̱á xan nga mìtsà mochjeén nga si̱tsiꞌbatjì jè xi̱ta̱ xi ko̱tjín jé xi tíhótsji.
\v 17 Ta̱nga ngatsꞌiì kjoa̱ chꞌo xi sꞌín xi̱ta̱, nguì jé‑né nga nguixko̱n Nainá. Ta̱nga tjín‑né jñà jé xi mìtsà kjoa̱biyaà fìko̱‑ná.
\p
\v 18 Jyeé tíjiìn‑ná nga jñà xi i̱xti‑la̱ Nainá ma, mìtsà ti̱ya̱ títsa̱jnajiìn‑ne jé, nga̱ jè Jesús xi Kiꞌndí‑la̱ Nainá ma, tísꞌín kinda̱, ko̱ jè xi̱ta̱ nei̱í, mì ti̱ kiì mé xi chꞌo síko̱‑ne.
\p
\v 19 Jyeé ꞌya‑ná nga i̱xti‑la̱ Nainá ꞌmì‑ná; ta̱nga jñà xi̱ta̱ xi mìkiì mokjeiín‑la̱ i̱tꞌaà tsꞌe̱ Cristo xi tjín nga tíjtsa i̱sòꞌnde, jè xi̱ta̱ nei̱í tíhotíxoma‑la̱.
\p
\v 20 Ti̱koa̱á ꞌya‑ná nga koií xá jꞌiì‑ne jè Kiꞌndí‑la̱ Nainá i̱ i̱tꞌaà nangui nga jè ndaà kisìkichi̱ya‑ná mé‑ne nga ma yaxkoaán xi nguì jè sobà Nainá. Ko̱ ya̱á titsa̱jnakoa̱á jè xi nguì jè sobà Nainá koií kjoa̱‑la̱ nga ya̱ titsa̱jnakoa̱á Jesucristo xi Kiꞌndí‑la̱ ma, xi ti̱jè sobà‑ne Nainá ko̱ xi ma‑la̱ tsjá‑ná kjoa̱binachon xi mìkiì fehetꞌaà ni̱ta̱ kjé‑ne.
\v 21 Jñò xi ndí i̱xti‑na̱ xan‑nò, kì jñà onguítji̱ngui‑là jñà nainá xi beèxkón xi̱ta̱ xi mìtsà kixi̱ kjoa̱ nga Nainá.