\id 2JN
\h 2 Juan
\toc1 2 Juan
\mt Xo̱jo̱n carta xi ma‑ne jò xi kiskiì San Juan
\c 1
\s Kjoa̱ tsjacha ko̱ kjoa̱ kixi̱
\p
\v 1 Ji̱ ndí chjo̱ón xi xó jaàjiìn‑lè Nainá, ko̱ jñà i̱xti‑lè, tìkjiì‑nò Xo̱jo̱n jè ꞌa̱n xi xi̱ta̱ jchínga ꞌmì‑na ya̱ i̱ngo̱. Nguì o̱kixi̱‑né nga matsjake̱‑nò; mìtsà ta ꞌa̱n xi matsjake̱‑nò, ti̱koa̱á matsjakeè‑nò ngatsꞌiì jñà xi̱ta̱ xi jye beè kósꞌín tjín xi kjoa̱kixi̱.
\v 2 Koií kꞌoa̱sꞌín matsjake̱‑nò, nga̱ jyeé ndaà tíjiìn ya̱ ini̱ma̱‑ná jè xi nguì kjoa̱ kixi̱, ko̱ ya̱á kíjnajiìn kjitꞌaà skanda ni̱ta̱ mé na̱chrjein‑ne.
\v 3 Nainá xi Na̱ꞌèn ꞌmì‑laà ko̱ Na̱ꞌèn‑ná Jesucristo xi Kiꞌndí‑la̱ Nainá ma, kàtatsjá‑nò kjo̱ndaà, kàtahi̱ma̱keè‑nò, ꞌnchán kàtasíkíjna i̱jiìn ini̱ma̱‑nò, xi nguì ko̱ kjoa̱kixi̱ ko̱ kjo̱tsjacha‑la̱.
\p
\v 4 ꞌÑó kjòtsja‑na kꞌe̱ nga kijtseè xkoaàn iꞌnga i̱xti‑lè, nga̱ kꞌoa̱á sꞌín nchisíjchá yijo‑la̱ koni sꞌín tjín kjoa̱ kixi̱ tsꞌe̱ Nainá, koni sꞌín jye tsatíxoma‑ná jè Nainá xi Na̱ꞌèn ꞌmì‑laà.
\v 5 Kꞌoa̱á sꞌín tìbitsiꞌbà‑nò i̱ꞌndei̱ jñò ndí ꞌndsè xi ꞌñó matsjake̱‑nò, nga mochjeén‑né nga ꞌñó ko̱tsjachaá xinguia̱á nga jngó íjngoá. Ko̱ mìtsà kjo̱tíxoma xi̱tse̱ xi tìkjiì‑nò, ti̱jé‑ne jè kjo̱tíxoma xi kitjoé‑ná skanda ti̱sa̱ tàtsꞌen‑la̱ kjoa̱.
\v 6 Kꞌoa̱á sꞌín tjín xi i̱tꞌaà tsꞌe̱ kjo̱tsjacha, jé‑né nga kꞌoa̱sꞌín si̱kitasoán koni sꞌín tjín kjo̱tíxoma‑la̱ Nainá; jyeé kinaꞌyà nga ti̱sa̱ ꞌñó kjòtseé kósꞌín tíchja̱ kjo̱tíxoma nga ꞌñó mochjeén nga ko̱tsjachaá xinguia̱á nga jngó íjngoá.
\s Xi̱ta̱ xi kona̱cha̱n
\p
\v 7 Nga̱ kjín ma‑ne xi̱ta̱ xi tjímasòn nga tíjngoò i̱sòꞌnde xi nchikona̱cha̱n‑la̱ xi̱ta̱, nga tsò: “Mìtsà ꞌén kixi̱ nga kꞌoa̱sꞌín kitsꞌiìn Jesucristo nga xi̱ta̱ komà koni jñá.” Jè xi̱ta̱ xi ko̱tsò, ta tíkona̱cha̱n‑né ko̱ jè‑né xi tíjna ítjòn nga kondra̱ fì‑la̱ Cristo.
\v 8 Ndaà tꞌe̱en kinda̱ yijo‑nò, mé‑ne nga mìkiì si̱chjaà‑nò jè kjo̱tjò xi tjoé‑nò i̱tꞌaà tsꞌe̱ xá xi titsa̱ꞌnè. Nga̱ mochjeén‑né nga kàtatjoé yije‑nò jè chjí‑la̱ xá xi titsa̱ꞌnè.
\p
\v 9 Ngatsꞌiì xi̱ta̱ xi otonè‑la̱ koni sꞌín tjín ꞌén xi tsakóya jè Cristo nga xìn ndi̱yá kjoé, mìtsà Nainá tíjnako̱; ta̱nga jè xi kixi̱ tíjna nga̱ kꞌoa̱sꞌín tísꞌín koni sꞌín tsakóya Cristo, ya̱á tíjnako̱ Nainá xi Na̱ꞌèn ꞌmì‑laà ko̱ jè xi Kiꞌndí‑la̱ ma.
\v 10 Tsà kꞌe̱ jngoò xi̱ta̱ ki̱jchòkon‑nò xi mejèn‑la̱ nga ꞌén‑la̱ Nainá ke̱èno̱jmí‑nò ta̱nga tsà mì kꞌoa̱sꞌín okóya koni tsò ꞌén‑la̱ Cristo, kì kiì biìꞌnde‑laà nga niꞌya‑nò fahasꞌen ko̱ kì ꞌmì‑laà: “Ti̱kjáyi.”
\v 11 Nga̱ jè xi tsjáꞌnde‑la̱ nga si̱ìkasꞌen niꞌya‑la̱, ti̱koa̱á ya̱á tísíngásòn‑ko̱ kjo̱hítsjeèn‑la̱ jñà xi̱ta̱ xi ta kjoa̱ ndiso nchihokóya.
\s ꞌÉn xi fehetꞌaà‑ne
\p
\v 12 Tjín jchán‑ìsa mé ꞌén xi mejèn‑na nga ko̱xán‑nò, ta̱nga majìn‑na nga tà Xo̱jo̱n kitꞌaà‑nò. Jè xi mejèn‑na nga kjíkon xátí‑nò. Kꞌe̱é ìsa̱ ndaà jchi̱bá mé‑ne nga ngatsꞌiaá ngásòn ngáya kàtasꞌe‑la̱ kjo̱tsja ini̱ma̱‑ná.
\p
\v 13 Jñà i̱xti‑la̱ chjo̱ón tichji xi ti̱koa̱ xó jaàjiìn‑ne Nainá nchisíkasén‑lè ꞌén nga síhixatꞌaà‑lè. Kꞌoa̱sꞌín kàtama.