\id JUD
\h Judas
\toc1 Judas
\mt Xo̱jo̱n carta xi kiskiì San Judas
\c 1
\p
\v 1 ꞌA̱n, Judas xi chi̱ꞌnda‑la̱ Jesucristo ma, ko̱ ꞌndsè ma Jacobo, tìkjiì‑nò jñò xi xó kinokjoà‑nò nga tjòkeè‑nò Nainá xi Na̱ꞌèn‑ná ma, ko̱ nga jè Jesucristo síkinda̱‑nò.
\v 2 Tse kjo̱hi̱ma̱takòn ko̱ kjoa̱ꞌnchán ko̱ kjoa̱tjòcha kàtatsjá‑nò Nainá.
\s Kjo̱ꞌin xi tjoé‑la̱ jñà xi̱ta̱ xi jahasꞌen‑jiìnꞌma na̱xa̱ndá‑la̱ Nainá nga ꞌén ndiso okóya
\r (2 Pedro 2:1‑17)
\p
\v 3 Ndí ꞌndsè xi ꞌñó matsjake̱‑nò, kjòtseé tjín‑ne nga mejèn‑na skiì‑nò koni sꞌín ngásòn kisìko̱‑ná Nainá nga tsachrjekàjiìn‑ná kjo̱ꞌin kjoa̱ tsꞌe̱ jé‑ná. Ta̱nga i̱ꞌndei̱ mochjeén‑né nga tìkjiì‑nò mé‑ne nga ma bítsiꞌba‑nò nga ꞌñó ti̱xkàtjiò jè kjo̱tíxoma koni sꞌín mokjeiín‑nò xi xó kꞌoa̱sꞌín jngoò kꞌa kisꞌeno̱jmí‑la̱ xi̱ta̱ tsjeè‑la̱ Nainá.
\v 4 Tjín iꞌnga xi̱ta̱ xi jahasꞌen‑jiìnꞌma‑nò. Jñà xi̱ta̱ koi, kjòtseé kꞌoa̱sꞌín tjínè‑la̱ nga kjo̱ꞌin sꞌe̱‑la̱ koni tsò Xo̱jo̱n‑la̱ Nainá. Jñà xi̱ta̱ koi, chꞌoó sꞌín; mìkiì beèxkón Nainá. Síkjatjìyaá‑la̱ kjo̱ndaà‑la̱ Nainá; koií síkitasòn kjoa̱ chꞌo xi síjé yijo‑la̱. Ochrjenguií Jesucristo xi ta jè ta̱jngoò otíxoma‑ná.
\p
\v 5 Jñò, na̱sꞌín jye tíjiìn‑nò kjoa̱ koi, ta̱nga ìjngoò kꞌa tìsìkítsjeèn‑nò, jè Nainá tsachrjekàjiìn xi̱ta̱ na̱xa̱ndá Israel ján Egipto, ta̱nga xi jye komà i̱skan, ìjngoò kꞌa kisìkjehesòn jñà xi̱ta̱ xi mìkiì kòkjeiín‑la̱ i̱tꞌaà tsꞌe̱.
\v 6 Kꞌoa̱á ti̱ komàtꞌin jñà àkja̱le̱ xi mìkiì ndaà tsibìtsa̱jnajiìn xá xi kjònga̱tsja, ta̱ sa̱á kitsjeiìn takòn i̱ꞌnde xi kitjoé‑la̱. Tje̱n‑ne na̱chrjein jè, skanda i̱ꞌndei̱, Nainá, naꞌñó ki̱cha̱ cadena tjítꞌaàꞌñó‑la̱ ni̱ta̱ mé na̱chrjein‑ne, ya̱ ñánda i̱ꞌndei̱ jñò choòn, skanda jè na̱chrjein kꞌe̱ nga si̱ndaàjiìn.
\v 7 Kꞌoa̱á ti̱sꞌín komàtꞌin jñà na̱xa̱ndá Sodoma ko̱ Gomorra ko̱ na̱xa̱ndá xi ya̱ chrañàtꞌaà‑la̱ kjiyijò nga kjoa̱chijnguií kisꞌiìn nga nguì ta kjoa̱chꞌo tsꞌe̱ yijo‑la̱ kiìtji̱ngui‑la̱. Na̱xa̱ndá koi, ngatsꞌiì xi̱ta̱ xi tjín, niꞌín kisìkjehesòn. Nainá kꞌoa̱á sꞌín tsibíjna jngoò‑ná chi̱ba̱ niꞌín xi tsꞌe̱ kjo̱ꞌin xi mìkiì bitsꞌo ni̱ta̱ kjé‑ne.
\p
\v 8 Jñà xi̱ta̱ xi jahasꞌen‑jiìnꞌma‑nò, kꞌoa̱á ti̱sꞌín tà nijñá tíꞌbiì‑la̱, nchihótsji jé‑la̱ yijo‑la̱, ochrjengui kjo̱tíxoma‑la̱ Na̱ꞌèn‑ná, chja̱jno‑la̱ jñà ngaꞌñó xi mìkiì tsejèn.
\v 9 Jè Miguel xi àkja̱le̱ ítjòn, mìtsà ꞌén ꞌngaá kiìchja̱ko̱ jè xi̱ta̱ nei̱í kꞌe̱ nga kiskaàn‑ya‑ne yijo‑la̱ Moisés; mìtsà kó kitsò‑la̱ mé kjo̱ꞌin xi tjoé‑la̱; ta kitsò‑la̱: “Nainá kàtatsjá‑lè kjo̱ꞌin.”
\v 10 Ta̱nga jñà xi̱ta̱ koi, chja̱ kondra̱á‑la̱ kjoa̱ xi mìkiì tíjiìn‑la̱. Ko̱ jñà kjoa̱ xi tíjiìn‑la̱, kꞌoa̱á sꞌín síchjeén koni cho̱ xi tsjìn‑la̱ kjo̱hítsjeèn nga ti yijo tsꞌe̱ síkitsꞌón‑ne.
\p
\v 11 ¡I̱ma̱ xó‑ne xi̱ta̱ koi, nga jè ndi̱yá‑la̱ Caín kiìtji̱ngui‑la̱! Kꞌoa̱á ti̱ tjín jé xi tsohótsji koni kisꞌiìn Balaam ta̱ jè kjoa̱‑la̱ nga to̱n síkijne. Kꞌoa̱á sꞌín ki̱yá koni sꞌín kꞌen Coré koií kjoa̱‑la̱ nga kondra̱ kiì‑la̱ Nainá.
\v 12 Jñà xi̱ta̱ koi kꞌe̱ nga ya̱ báhijtako̱‑nò nga sꞌeí‑la̱ Na̱ꞌèn‑ná tjín‑nò, síkitsꞌón‑jiìn‑nò, mìkiì masobà‑la̱ kꞌe̱ nga kjèn‑ko̱‑nò. Ta yijo‑la̱á sísꞌin‑la̱. Kꞌoa̱á ngaya‑la̱ koni ifi xi mìtsà jtsí tji̱ko̱, xki̱ xi ján fìko̱ tjo̱; koni yá xi bixòjen xka̱‑la̱ nga mì toò ojà‑la̱ i̱kjoàn tjánè ko̱ i̱ma̱‑la̱, jngoó kꞌa biyaà.
\v 13 Jñà xi̱ta̱ koi, kꞌoa̱á ngaya‑la̱ koni xó‑la̱ ndáchikon nga bíxteèn tjé‑la̱ ya̱ i̱ndiì‑la̱ nga okó kjoa̱sobà‑la̱; koni niꞌño xi kisìchja ndi̱yá‑la̱, ko̱ kꞌoa̱á sꞌín tjínè‑la̱ nga ya̱ kítsa̱jna ñánda i̱ꞌnde jñò choòn ni̱ta̱ mé na̱chrjein‑ne.
\p
\v 14 Jè Enoc xi ma‑ne itoò tje̱‑la̱ Adán xi ya̱ inchrobàtꞌaà‑ne; kꞌoa̱á ti̱sꞌín tsibíjna ꞌén i̱tꞌaà tsꞌe̱ xi̱ta̱ koi kꞌe̱ nga kitsò: “Chítsejèn‑là Na̱ꞌèn‑ná nga tínchrobá, kjìn jchán jmiì ma àkja̱le̱‑la̱ xi tji̱ko̱,
\v 15 nga koi̱ìndaàjiìn‑la̱ ngatsꞌiì xi̱ta̱ mé‑ne nga tsjá‑la̱ kjo̱ꞌin ngatsꞌiì xi̱ta̱ xi jé tjín‑la̱ koni tjín kjoa̱ chꞌo xi kisꞌiìn, jñà xi mìkiì beèxkón Nainá nga chꞌo tsò ꞌén xi chja̱jno‑la̱.”
\v 16 Jñà xi̱ta̱ koi, kjitꞌaà na̱chrjein nchihojé, chja̱jno‑la̱ ngatsꞌiì kjoa̱. Ta koi ótsji kjoa̱ xi mochjeén‑la̱ yijo‑la̱. Kꞌe̱ nga chja̱ko̱ xi̱ta̱, ndaà síkítsa̱jna yijo‑la̱, ta ꞌén sin ꞌén ndaà chja̱; ta jè xi mejèn‑la̱ nga si̱ìkijne mé xi mejèn‑la̱.
\s Kjoa̱ kixi̱ xi si̱nè‑la̱ xi̱ta̱
\p
\v 17 Ta̱nga jñò ndí ꞌndsè xi matsjake̱‑nò, ti̱kítsjeèn koni sꞌín jye kiìchja̱ko̱ ítjòn‑nò jñà xi̱ta̱ xi tsibíxáya‑la̱ Na̱ꞌèn‑ná Jesucristo,
\v 18 nga kitsò‑nò: “Kꞌe̱ nga jye kjoe̱hetꞌaà na̱chrjein, sꞌe̱é xi̱ta̱ xi tà ki̱jno̱keè xi kjoa̱ kixi̱. Kꞌoa̱á sꞌín ko̱jchájiìn kjoa̱chꞌo xi síjé yijo‑la̱ nga mìkiì beèxkón Nainá.”
\v 19 Xi̱ta̱ koi, xi̱ta̱ na̱xa̱ndá‑la̱ Nainá síjòya. Kjo̱hítsjeèn‑la̱ i̱sòꞌnde tjín‑la̱ nga tsjìn‑la̱ Ini̱ma̱ Tsjeè‑la̱ Nainá.
\p
\v 20 Ta̱nga jñò ndí ꞌndsè xi matsjake̱‑nò, ꞌñó kixi̱ ti̱nchako̱o jè kjoa̱ tsjeè‑la̱ Nainá xi mokjeiín‑nò. Tìtsiꞌba‑là Nainá nga jè Ini̱ma̱ Tsjeè‑la̱ kàtasíchi̱ya‑nò.
\v 21 Ti̱kinda̱a yijo‑nò nga kjitꞌaà na̱chrjein kàtasꞌe‑nò kjoa̱tjòcha‑la̱ Nainá. Chíña‑la kjoa̱ i̱ma̱ takòn‑la̱ Na̱ꞌèn‑ná Jesucristo, mé‑ne nga tsjá‑nò kjoa̱binachon xi mìkiì fehetꞌaà ni̱ta̱ kjé‑ne.
\p
\v 22 Jcha̱ i̱ma̱ takòn nga ti̱si̱ko̱ò jñà xi̱ta̱ xi jò beè‑la̱ ikon.
\v 23 Ko̱ jñà xi̱ta̱ xi iꞌnga, ni̱to̱ón ti̱náchrjekàjñoò jñà kjoa̱ chꞌo xi sꞌín nga jyeé kjo̱meè ya̱ bixòjiìn niꞌín tsꞌe̱ kjo̱ꞌin. Jcha̱ i̱ma̱ takòn iꞌnga ta̱nga tꞌe̱en kinda̱ yijo‑nò tsà ti̱koa̱ ya̱ ska̱jñoò jé‑la̱. Ti̱nachrjekànguioò kjoa̱ tsꞌe̱ jé‑la̱. Skanda jñà nikje tjé‑la̱ ti̱nachrjenguioò.
\s Jeya kàtìjna Nainá
\p
\v 24 Jè Nainá xi ma‑la̱ síkinda̱‑nò mé‑ne nga mìkiì ki̱xo̱nguioò. Tsjeè síkítsa̱jna‑nò ya̱ nguixko̱n kjoa̱ jeya‑la̱ nga ni̱mé jé sa̱kò‑nò ko̱ ꞌñó sꞌe̱‑nò kjo̱tsja.
\v 25 Jè Nainá xi ta jè ta̱jngoò ma‑ne nga ochrjekàjiìn‑ná kjo̱ꞌin xi i̱tꞌaà tsꞌe̱ Na̱ꞌèn‑ná Jesucristo, ta jè ta̱jngoò xi jeya kàtìjna, ꞌnga kàtìjna; kàtasꞌe‑la̱ kjo̱tíxoma; kàtasꞌe‑la̱ ngaꞌñó; skanda kjòtseé, ko̱ na̱chrjein i̱ꞌndei̱, ko̱ skanda ni̱ta̱ kjé‑ne. Kꞌoa̱sꞌín kàtama.