\id REV
\h Apocalipsis
\toc1 Apocalipsis
\mt Xa̱jo̱n‑la̱ San Juan ra tjíꞌta kjoa̱ ra tsakón tsijen‑la̱ Jesucristo
\c 1
\s Kjoa̱ ra isíkjíꞌnchré jè Jesucristo jè ra chi̱ꞌnda‑la̱ ma
\p
\v 1 Kjoa̱ ra Nainá kitsjà‑la̱ Jesucristo mé‑ni nga katabakón tsijen‑la̱ ra xi̱ta̱ chi̱ꞌnda‑la̱ ma, kjoa̱ ra ta ndi̱to̱n kjón‑ní ko̱ka̱ma. Ko̱ ꞌkoa̱á ꞌsín isíkjíꞌnchré Juan ra chi̱ꞌnda‑la̱ ma ꞌkia̱ nga jngo ìkja̱li̱‑la̱ isìkasén‑la̱ nga ko̱kitsò‑la̱ jñà kjoa̱ kìi̱.
\v 2 Ko̱ jè Juan tíchja̱ kixi̱‑ní [ꞌkia̱ nga tsikíꞌta xa̱jo̱n] ngaꞌtsì kjoa̱ ra kijtse ko̱ ra kiíꞌnchré koni ꞌsín nga jè Jesucristo kiìchja̱ kixi̱‑la̱ jñà ꞌén ra kitsjà‑la̱ Nainá.
\p
\v 3 Mé ta̱ nda‑la̱ jè xi̱ta̱ ra kotáꞌyá ko̱ jñà xi̱ta̱ ra ꞌnchré jñà ꞌén‑la̱ Nainá ra tjíꞌta xa̱jo̱n ra̱kìi̱, kjoa̱ ra ꞌsa̱ ko̱ka̱ma; ti̱ꞌkoa̱á mé ta̱ nda‑la̱ jñà xi̱ta̱ ra síhitjasòn koni ꞌsín nga tíchja̱ jñà ꞌén ra ya̱ tjíꞌta, nga̱ jè ni̱chjin ra̱kìi̱, ijyeé tímachraña.
\s Kjoa̱ nìhixoꞌta a̱ꞌta ꞌtse̱ jñà na̱xi̱ndá‑la̱ Cristo ra ito ma‑nioo̱
\p
\v 4 ꞌA̱n ra ꞌmì‑na Juan, ꞌa̱án tíbindá‑no xa̱jo̱n jiòn ra na̱xi̱ndá‑la̱ Cristo ꞌmì‑no ra ito i̱ꞌnde titsa̱jna ya̱ nangi ra chja̱‑ni Asia. Jè katatsjá‑no kjo̱nda ko̱ kjo̱ꞌnchán jè Nainá ra tíjna skanda ni̱chjin ꞌndi̱, ko̱ jè ra tíjna‑ni skanda kjoꞌtsia̱, ko̱ jè ra ꞌsa̱ kjꞌi̱í india‑ni, ko̱ jñà Inìma̱ Tsje ra ito ma‑ni ra títsa̱jna ya̱ ngixko̱n jè ra tíjnasòn íxile̱ nga tíbatéxoma,
\v 5 ko̱ jè Jesucristo jè ra ngi ꞌén kixi̱ tsjá, jè iꞌndí‑tjòn ra jaáya‑ila̱ ya̱ a̱jin‑la̱ miꞌken, ko̱ jè ra batéxoma‑la̱ jñà xi̱ta̱ ra tjíhijyo ítjòn i̱ a̱ꞌta nangi. Jè Cristo ra tsjake‑ná, ra ngi ko̱ó jní‑la̱ ra ixaájten isìtsje‑ni jñà jé‑ná.
\v 6 Xi̱ta̱xá ítjòn ko̱ na̱ꞌmì kiꞌsín‑ná nga ya̱ si̱xáꞌta‑lá Nainá ra Na̱ꞌìn‑la̱ ma. Jeya katijna kiꞌta ra jè, ko̱ jè katabatéxoma kiꞌta skanda ta kjiá‑nioo̱ ko̱ skanda ta mé ni̱chjin‑nioo̱. Ko̱ꞌsín katama.
\p
\v 7 ¡Chítsijen‑la jè Cristo, ijyeé nchrabá ya̱ a̱jin ifi! Ngaꞌtsì xi̱ta̱ ske̱é‑ni xko̱n. Ko̱ jñà xi̱ta̱ ra isìꞌken ti̱ꞌkoa̱á ske̱‑ní. Ngaꞌtsì xi̱ta̱ na̱xi̱ndá ra tjín i̱ a̱ꞌta nangi ꞌñó ski̱ndaya ꞌkia̱ nga ske̱. Jon, ꞌkoa̱á ꞌsín ko̱ma.
\p
\v 8 “ꞌA̱án‑ná ra tíjna̱ ítjòn skanda kjoꞌtsia̱, ko̱ ꞌa̱án‑ná ra tíjna̱ skanda ꞌkia̱ nga kje̱heꞌtà ni̱chjin, ꞌkoa̱á ꞌsín xiaa̱n ꞌa̱n ra Nainá ꞌmì‑na ra tíjna̱ ítjòn‑no, ꞌa̱n ra tíjna̱ skanda ni̱chjin ꞌndi̱, ꞌa̱n ra tíjna̱‑na skanda kjoꞌtsia̱, ko̱ ꞌa̱n ra ꞌsa̱ kjíꞌi̱ india‑na, ra bato tse ngaꞌñó tjín‑na.”
\s ꞌÉn ko̱ kjoa̱ ra kjoꞌtsia̱‑ni nga tsakón‑la̱ Nainá Juan ra a̱ꞌta ꞌtse̱ Cristo
\p
\v 9 ꞌA̱n ra ꞌmì‑na Juan, ra ꞌndsé chibé tísíngásòn‑ko̱‑najiòn ta nga̱tjì‑la̱ nga ngásòn ya̱ mahítji̱ngi‑lá jè Jesucristo; ꞌkoa̱á ma‑ni nga ngásòn i̱nchinìkjeén kjo̱hiꞌin, ko̱ ngásòn ya̱ nakjoá‑ná ñánda̱ nga Nainá tíbatéxoma ko̱ ngásòn i̱nchichíkjoa̱jin‑ná ngaꞌtsì kjoa̱. India ꞌkia̱ nga ya̱ tíjna̱ i̱ꞌnde ra kjijnajin‑ndá ra ꞌmì Patmos ta nga̱tjì‑la̱ ꞌén‑la̱ Nainá ko̱ tà nga̱tjì‑la̱ nga jè tsiꞌkènájmíya a̱ꞌta ꞌtse̱ Jesucristo.
\v 10 Ya̱á tíjna̱ ꞌkia̱ nga jè ni̱chjin‑la̱ Na̱ꞌín‑ná ko̱ jè ngaꞌñó ꞌtse̱ Inìma̱ Tsje‑la̱ Nainá ꞌjiìkànè‑na; ko̱ ya̱ a̱jto̱n íꞌndsian kíꞌnchré jngo‑la̱ ꞌén ra ꞌñó kiìchja̱ koni tsa jngo jta̱‑la̱ chrjoo̱ ra ꞌñó jane,
\v 11 nga kitsò:
\p ―ꞌA̱án‑ná ra tíjna̱ ítjòn skanda kjoꞌtsia̱, ko̱ ꞌa̱án‑ná ra tíjna̱ skanda ꞌkia̱ nga kje̱heꞌtà ni̱chjin. Jngo xa̱jo̱n tindaꞌtí jè kjoa̱ ra tjìꞌyi, a̱kjòn ti̱kasén‑la̱ jñà na̱xi̱ndá‑na̱ ra ito i̱ꞌnde títsa̱jna ya̱ nangi ra chja̱‑ni Asia, jñà na̱xi̱ndá ra ꞌmì Éfeso, Esmirna, Pérgamo, Tiatira, Sardis, Filadelfia ko̱ Laodicea.
\p
\v 12 Ko̱ ísikáfa‑náa̱ nga mejèn‑na skee̱ yá‑ní ra tíchja̱‑na. Ito ki̱cha̱ candelero kíjtsee̱ ra ngi ki̱cha̱ sinè ra ya̱ tìya sera̱.
\v 13 Ya̱ nga masen‑la̱ ñánda̱ nga i̱jncha jñà ki̱cha̱ candelero ra ito ma‑nioo̱, ya̱á síjna ra ko̱ꞌsín ꞌki koni iꞌndí‑la̱ xi̱ta̱. Jngo nikje ndajò kjiya ra bijchó skanda a̱tjòn ndsa̱ko̱. Ko̱ tjíkjá jngo xìncho̱ ra ngi ki̱cha̱ sinè ra tjíté ya̱ a̱sòn inìma̱‑la̱.
\v 14 Jñà tsja̱‑sko̱, ꞌkoa̱á ꞌsín ꞌñó chraba kjòn koni kjòn tsja̱‑la̱ forrè, ko̱ koni ꞌsín kjòn jñà ꞌnchán. Jñà xko̱n, ꞌkoa̱á ꞌsín tsijen koni tsa títì niꞌí.
\v 15 Jñà ndsa̱ko̱, ꞌkoa̱á ꞌsín kjòn koni ki̱cha̱ sinè ra ꞌñó nda fate ꞌkia̱ nga ijye sijin niꞌí. Jè jta̱‑la̱ ꞌkoa̱á ꞌsín naꞌyá‑la̱ koni ꞌsín ma jngo xa̱ngá ñánda̱ nga ꞌñó jè nandá tíxaájten.
\v 16 Ya̱ tsja nga kixi̱, ito nitse tjíya. Ya̱ tsaꞌba, jngo ki̱cha̱ ndajò bitjo ra i̱tsjí ꞌki ra ijò ngajò ꞌka̱. Ko̱ jè i̱sén‑la̱, ꞌkoa̱á ꞌsín ꞌki koni jè tsáꞌbí ꞌkia̱ nga ꞌñó tsje ma ndabá‑la̱.
\p
\v 17 ꞌKia̱ nga kíjtsee̱, ya̱á ískàtje̱n‑ngiaa̱ ndsa̱ko̱ koni tsa jngo miꞌken. Ko̱ ꞌkia̱á tsakásòn‑na jè tsja kixi̱, kitsò‑na:
\p ―Kì tà chjàn skon‑jìn, ꞌa̱án‑ná ra tíjna̱ ítjòn skanda kjoꞌtsia̱ ko̱ ꞌa̱án‑ná ra tíjna̱ skanda ꞌkia̱ nga kje̱heꞌtà ni̱chjin;
\v 18 ko̱ ꞌa̱án‑ná ra tíjna̱kon; ꞌkeén‑náa̱, tanga ꞌndi̱ ꞌndi̱ tíjna̱kon‑ná skanda ta kjiá‑nioo̱ ko̱ skanda ta mé ni̱chjin‑nioo̱. ꞌA̱án tsáꞌya̱ jè yabi̱ ꞌtse̱ kjo̱biya ya̱ i̱ꞌnde‑la̱ miꞌken. [Tjíꞌndeé‑na nga ꞌa̱n ma skíꞌxa̱ i̱ꞌnde‑la̱ miꞌken nga sikjaáya‑ila̱ ti̱ꞌkoa̱á tjíꞌnde‑na nga kichjàa̱ jè xo̱tjo̱ba̱‑la̱.]
\v 19 Tindaꞌtí xa̱jo̱n jñà kjoa̱ ra ijye kàꞌyi ko̱ kjoa̱ ra tíma ꞌndi̱ ꞌndi̱ ko̱ jñà kjoa̱ ra ꞌsa̱ ko̱ka̱ma.
\v 20 Ki̱í ꞌsín tíchja̱‑ni kjoa̱ꞌma ꞌtse̱ nitse ra ito ma‑ni ra kàꞌyi ko̱ jñà candelero ra ito ma‑ni ra ngi ki̱cha̱ sinè. Jñà nitse ra ito ma‑nioo̱, jñá ìkja̱li̱ ꞌtse̱ na̱xi̱ndá‑na̱ ra ito i̱ꞌnde tjítsa̱jna. Ko̱ jñà candelero ra ito ma‑ni, jñá‑ní na̱xi̱ndá‑na̱ ra ito i̱ꞌnde tjítsa̱jna.
\c 2
\s Kjoa̱ ra isinè‑la̱ jè na̱xi̱ndá‑la̱ Nainá ra tíjna ya̱ ján Éfeso
\p
\v 1 ’Tinda‑la̱ xa̱jo̱n jè ìkja̱li̱ ꞌtse̱ na̱xi̱ndá‑na̱ ra tíjna ya̱ ján Éfeso: “Ki̱í ꞌsín tíchja̱ jè ra ito nitse tjíya ya̱ tsja nga kixi̱, jè ra ya̱ tsáꞌbajin masen‑la̱ jñà ki̱cha̱ sinè ra ito ma‑nioo̱ ra ma sincháya sera̱, nga tsò:
\v 2 Be‑ná jñà kjoa̱ ra i̱nchiꞌnià, nga ꞌñó i̱nchiníxá ko̱ nga mì kì tsa i̱nchimiꞌòn‑no. Ti̱ꞌkoa̱á beé‑te nga mì kì sasén‑no kjoa̱ꞌcho ra ꞌsín xi̱ta̱. Ko̱ beé‑te nga ijye ichjìꞌta jñà xi̱ta̱ ra ko̱ꞌsín tsò‑la̱ ijo‑la̱ nga Nainá tsikíxáya‑la̱, tanga mì tsa kixi̱‑ni kjoa̱, nga̱ ijyeé kijcha jiòn nga ta xi̱ta̱ ndiso‑ní.
\v 3 Tíchíkjoa̱ko̱ó‑no ni̱ꞌsín tse kjo̱hiꞌin i̱nchinikjioón ta nga̱tjì tsa̱ꞌa̱n; kjè tsa mìꞌon‑no.
\v 4 Tanga tjín kjoa̱ ra ꞌcho tjín i̱nchiꞌnià ra mì kì sasén‑na. Mì kì ti̱ ko̱ꞌsín tjín‑no kjo̱tsjacha koni ꞌsín nga ti̱ꞌsa̱ ítjòn.
\v 5 Ti̱kítsjen kóꞌsín nga kiꞌnià ꞌkia̱ nga ti̱ꞌsa̱ ítjòn ꞌkia̱ nga ti̱kje kjoa̱ kajion. Ti̱kájno jé‑no. Ko̱ꞌsín ꞌtia̱àn india‑no koni ꞌsín nga kiꞌnià nga ti̱ꞌsa̱ ítjòn. Tsa mì ko̱ꞌsín ꞌsia̱an, kjín‑na ñánda̱ nga titsa̱jna jiòn ko̱ kjo̱híxìn‑náa̱ jè candelero‑no ra títì mé‑ni mì ti̱ tsja ya̱ ki̱ti̱‑ni ya̱ a̱jin na̱xi̱ndá‑na̱ ra iꞌka.
\v 6 Tanga tjín kjoa̱ ra nda ꞌnià, nga jticha‑no jñà kjoa̱ ra ꞌsín jñà xi̱ta̱ nicolaítas, ko̱ ti̱ꞌkoa̱á jtike̱é‑te ra ꞌa̱n.
\v 7 Nda katafìya‑no koni ꞌsín jè Inìma̱ Tsje‑la̱ Nainá tsò‑la̱ jñà na̱xi̱ndá‑na̱ ra ito i̱ꞌnde tjítsa̱jna. Jñà ra si̱ìkijne‑la̱ ngaꞌtsì kjoa̱ ra ko̱tojin, tsjaꞌndé‑la̱ nga ski̱ne̱ jñà to‑la̱ jè yá ra tsjá kjo̱binachon ra síjna ya̱ i̱ꞌnde‑la̱ Nainá ñánda̱ nga ꞌñó nda chon.”
\s Kjoa̱ ra isinè‑la̱ jè na̱xi̱ndá‑la̱ Nainá ra tíjna ya̱ ján Esmirna
\p
\v 8 ’Tinda‑la̱ xa̱jo̱n jè ìkja̱li̱ ꞌtse̱ na̱xi̱ndá‑na̱ ra tíjna ya̱ ján Esmirna: “Ki̱í ꞌsín tíchja̱ jè ra tíjna ítjòn skanda kjoꞌtsia̱ ko̱ ra tíjna skanda nga kje̱heꞌtà ni̱chjin, jè ra ꞌken tanga jaáya india‑ila̱ ko̱ tíjnakon ꞌndi̱ ꞌndi̱; ki̱í ꞌsín tsò:
\v 9 ꞌA̱n be‑náa̱ jè xá ra ꞌnià ko̱ be‑náa̱ kjo̱hiꞌin ra i̱nchibato ko̱ nga xi̱ta̱ i̱ma̱‑no, (tanga ra a̱ꞌta ꞌtse̱ Nainá, ꞌñó tse kjo̱nda tísakó‑no). Be‑náa̱ nga chja̱jno‑no jñà xi̱ta̱ ra ko̱ꞌsín tsò‑la̱ ijo‑la̱ nga xi̱ta̱ judío‑ní, tanga mì tsa kixi̱ kjoa̱ nga xi̱ta̱ judío; jñà xi̱ta̱ kìi̱, ya̱á chja̱‑ni ñánda̱ nga maxkóya xi̱ta̱‑la̱ xi̱ta̱‑ni̱í.
\v 10 Kì tà chjàn skon jiòn, ni̱ꞌsín ta mé kjo̱hiꞌin ra ko̱tojiòn, nga̱ jè xi̱ta̱‑ni̱í nda̱yá si̱ìkjahaꞌsen iꞌka‑najiòn mé‑ni nga tjáꞌta‑no a̱ꞌta ꞌtse̱ kjoa̱ ra makjiín‑no, ko̱ te ni̱chjin si̱kjioón kjo̱hiꞌin. Tanga nda ꞌtia̱àn ra a̱ꞌta tsa̱ꞌa̱n skanda ꞌkia̱ nga ki̱yá jiòn, ko̱ ꞌa̱án singátsja‑no jè kjo̱binachon ra mì feheꞌta koni jngo corona.
\v 11 Nda katafìya‑no koni ꞌsín jè Inìma̱ Tsje‑la̱ Nainá tsò‑la̱ jñà na̱xi̱ndá‑na̱ ra ito i̱ꞌnde tjítsa̱jna. Jñà ra si̱ìkijne‑la̱ ngaꞌtsì kjoa̱ ra ko̱tojin, ni̱mé kjo̱hiꞌin ko̱to a̱ꞌta ꞌtse̱ kjo̱biya ra ma‑ni jò ꞌka̱.”
\s Kjoa̱ ra isinè‑la̱ jè na̱xi̱ndá‑la̱ Nainá ra tíjna ya̱ ján Pérgamo
\p
\v 12 ’Tinda‑la̱ xa̱jo̱n jè ìkja̱li̱ ꞌtse̱ na̱xi̱ndá‑na̱ ra tíjna ya̱ ján Pérgamo: “Ki̱í ꞌsín tíchja̱ jè ra tjín‑la̱ ki̱cha̱ ndajò i̱tsjí ra ijò nga jò ꞌka̱ nga tsò:
\v 13 ꞌA̱n be‑ná jè xá ra i̱nchiꞌnià; be‑ná ñánda̱ titsa̱jna; ya̱á titsa̱jna ya̱ ñánda̱ tíbatéxoma jè xi̱ta̱‑ni̱í, tanga be‑ná nga kixi̱í titsa̱jna jiòn nga mì kì tsa i̱nchinijchajin‑jiòn ra a̱ꞌta tsa̱ꞌa̱n; ti̱ꞌkoa̱ mì tsa i̱nchibìꞌma‑jiòn koni ꞌsín nga makjiín‑no a̱ꞌta tsa̱ꞌa̱n; ni̱ꞌsín ꞌkia̱ nga ꞌken jè Antipas, xi̱ta̱ ra tsiꞌkéna̱jmí kixi̱ a̱ꞌta tsa̱ꞌa̱n, nga̱ ya̱á ꞌken‑jin‑no ya̱ ñánda̱ tíjna jè xi̱ta̱‑ni̱í.
\v 14 Tanga tjín iꞌka kjoa̱ ra ꞌcho tjín i̱nchiꞌnià jiòn ra mì sasén‑na, nga ya̱á títsa̱jnajin‑no xi̱ta̱ ra makjiín‑la̱ koni ꞌsín tsakón‑ya jè Balaam kjotseé nga tsincháꞌa xi̱ta̱ ra tsiꞌkìn Balac nga mejèn‑la̱ nga jñà xi̱ta̱ Israel kátátsji‑jé nga katakjine tsajmì ra xkósòn isinchaꞌtá‑la̱ ti̱ꞌkoa̱ kataꞌsín ra kjoa̱chijngi.
\v 15 Ti̱ꞌkoa̱á títsa̱jiín iꞌka‑no xi̱ta̱ ra makjiín‑la̱ koni ꞌsín bakón‑ya jñà xi̱ta̱ nicolaítas; jñà xi̱ta̱ kìi̱ jtike̱‑ná ra ꞌa̱n.
\v 16 ꞌKoa̱á ma‑ni ti̱kájno jé‑no ko̱ kì ti̱ tsja jé bátsji‑no; tsa mì kì ko̱ꞌsín ꞌsia̱an, ndi̱to̱ón kjiáa̱n ñánda̱ nga titsa̱jna jiòn nga ska̱jàn‑ko̱ jñà xi̱ta̱ kìi̱, ko̱ jè sichjée̱n jè ki̱cha̱ ndajò ra i̱tsjí ꞌki ra ya̱ bitjo‑ni ndsa̱ꞌbaa̱.
\v 17 Nda katafìya‑no koni ꞌsín jè Inìma̱ Tsje‑la̱ Nainá tsò‑la̱ jñà na̱xi̱ndá‑na̱ ra ito i̱ꞌnde tjítsa̱jna. Jñà ra si̱ìkijne‑la̱ ngaꞌtsì kjoa̱ ra ko̱tojin, ꞌa̱án tsja‑la̱ tsajmì ra ski̱ne̱ ra ꞌmì maná ra ꞌa̱n tíjnaꞌma‑na; ti̱ꞌkoa̱á jngo na̱jo̱ i̱tsé ra chraba ꞌki tsja‑la̱ ra ya̱ tjíꞌta jngo ꞌí xi̱tse̱ ra ni̱yá bexkon; ta jé ske̱ jè ra tjábé‑la̱.”
\s Kjoa̱ ra isinè‑la̱ jè na̱xi̱ndá‑la̱ Nainá ra tíjna ya̱ ján Tiatira
\p
\v 18 ’Tinda‑la̱ xa̱jo̱n jè ìkja̱li̱ ꞌtse̱ na̱xi̱ndá‑na̱ ra tíjna ya̱ ján Tiatira: “Ki̱í ꞌsín tíchja̱ jè Iꞌndí‑la̱ Nainá ra ko̱kjòn xko̱n koni tsa títì niꞌí ko̱ ra ko̱ꞌsín kjòn jñà ndsa̱ko̱ koni ki̱cha̱ sinè ra ꞌmì bronce ra ꞌñó nda kjochrjaꞌi; ki̱í ꞌsín tsò:
\v 19 ꞌA̱n be‑ná jè xá ra i̱nchiꞌnià jiòn ko̱ be‑ná jè kjo̱tsjacha ra tjín‑no ko̱ kóꞌsín nga makjiín‑no ko̱ kóꞌsín i̱nchiníxá ko̱ nga i̱nchichíkjoa̱ko̱‑no; be‑ná nga jè ni̱chjin ꞌndi̱ ꞌndi̱, isa̱á nda i̱nchiníxá mì ꞌkoa̱‑ni koni nga ꞌsa̱ ítjòn.
\v 20 Tanga tjín iꞌka kjoa̱ ra ꞌcho tjín i̱nchiꞌnià jiòn ra mì kì sasén‑na, nga biꞌnde‑la jiòn jè chjo̱ón ra ꞌmì Jezabel ra ko̱ꞌsín tsò‑la̱ ijo‑la̱ nga maá‑la̱ ꞌbéna̱jmíya mé kjoa̱ ra ꞌsa̱ ko̱ka̱ma, nga konda̱cha̱‑la̱ ko̱ bakón‑ya‑la̱ xi̱ta̱ chi̱ꞌnda‑na̱ mé‑ni nga kjoa̱chijngi kataꞌsín‑ni ti̱ꞌkoa̱ nga katakjine tsajmì ra xkósòn sincháꞌta‑la̱.
\v 21 ꞌA̱n títsja-isa‑la̱ ni̱chjin nga katasíkájno jé‑la̱ nga kì ti̱ tsja jé bátsji‑ni, tanga majìn‑la̱ tsjin kjoa̱chijngi ra ꞌsín.
\v 22 Tanga ꞌa̱án tsja jngo‑la̱ ꞌchin ra ꞌñó tse kjo̱hiꞌin si̱ìkjiín ko̱ jñà xi̱ta̱ ra ya̱ ta̱ña síngásòn‑ko̱ kjoa̱chijngi, tsa mì kì si̱íkájno jé‑la̱ nga mì ti̱ jé koa̱àtsji‑ni.
\v 23 India kjón‑ní siꞌkée̱n jñà xi̱ta̱ ra ya̱ fìtji̱ngi‑la̱. Ko̱ ngaꞌtsì jñà xi̱ta̱ na̱xi̱ndá‑la̱ Cristo ske̱‑ní nga ꞌa̱án‑ná ra be kótsò jè kjo̱bítsjen‑la̱ xi̱ta̱ ko̱ kóꞌsín tjín a̱jin inìma̱‑la̱; jiòn, ra jngó jngó‑no, ꞌkoa̱á ꞌsín tsja‑no kjo̱hiꞌin koni ꞌsín tjín kjoa̱ ra i̱nchiꞌnià.
\v 24 Tanga jiòn ko̱ xi̱ta̱ ra iꞌka ra ya̱ títsa̱jna ya̱ Tiatira ra mì tsa ya̱ i̱nchichitáꞌyá kjo̱bítsjen ra mì nda tjín, ra ti̱ꞌkoa̱á kjè kì tsa ya̱ nda ꞌyaxkon jiòn jè ra ko̱tsò‑la̱ jñà xi̱ta̱ kìi̱: Kjo̱bítsjen ra tjíꞌma‑la̱ xi̱ta̱‑ni̱í. Jiòn, ꞌkoa̱á ꞌsín xin‑no: Mì tsa ti̱ mé kjoa̱ ra síjé‑isa‑no.
\v 25 Koni ꞌsín ijye i̱nchiꞌnià, ko̱ꞌsín ꞌtia̱àn skanda ꞌkia̱ nga ꞌa̱n ra kjíꞌi̱ india‑na.
\v 26 Jñà ra si̱ìkijne‑la̱ ngaꞌtsì kjoa̱ ra ko̱tojin ko̱ ra si̱hitjasòn xá‑na̱ koni ꞌsín mejèn‑na skanda ꞌkia̱ nga kje̱heꞌtà ni̱chjin, ꞌa̱án tsja‑la̱ xá nga jñà ko̱tèxoma‑la̱ na̱xi̱ndá ra tjín ya̱ i̱sàꞌnde.
\v 27 Ngi ko̱ó kjo̱ꞌtse̱n‑la̱ ko̱ jngo ki̱cha̱ koa̱àya tsja nga ko̱tèxoma ko̱ ꞌkoa̱á ꞌsín si̱ìxkoa̱ya koni tsa ti̱jí niꞌnde. ꞌKoa̱á ti̱ꞌsín ꞌsi̱in koni ꞌsín kitsjà‑na kjo̱téxoma Na̱ꞌìn‑na̱.
\v 28 Ko̱ tsjaá‑la̱ jè nitse‑xó ra tjo ꞌkia̱ nga ta̱jñò.
\v 29 Nda katafìya‑no koni ꞌsín jè Inìma̱ Tsje‑la̱ Nainá tsò‑la̱ jñà na̱xi̱ndá‑na̱ ra ito i̱ꞌnde tjítsa̱jna.”
\c 3
\s Kjoa̱ ra isinè‑la̱ jè na̱xi̱ndá‑la̱ Nainá ra tíjna ya̱ ján Sardis
\p
\v 1 ’Tinda‑la̱ xa̱jo̱n jè ìkja̱li̱ ꞌtse̱ na̱xi̱ndá‑na̱ ra tíjna ya̱ ján Sardis: “Ki̱í ꞌsín tíchja̱ jè ra ito Inìma̱ Tsje‑la̱ Nainá tjín‑la̱ ko̱ ra ito ma‑ni nitse‑la̱, nga tsò: ꞌA̱n be‑ná mé ra ꞌnià, ꞌkoa̱á ꞌsín ꞌyaxkon‑najiòn nga titsa̱jnakon‑no, tanga ra kixi̱‑ni kjoa̱, miꞌken‑ná jiòn.
\v 2 Ti̱kjaáya‑la ijo‑no; ꞌti̱‑la ngaꞌñó jñà kjoa̱ ra ijye mejèn i̱nchichija; nga kjè kì bee̱ tsa ndaá i̱nchiꞌnià jiòn ya̱ ngixko̱n Nainá.
\v 3 Ti̱kítsjen kjo̱bítsjen ra ijye itjábé‑no ko̱ ra ijye kinaꞌyá; ko̱ꞌsín ti̱hitjasòn; ko̱ ti̱kájno jé‑no nga kì ti̱ tsja jé fatsji‑no. Tsa mì kì si̱konda̱a ijo‑no, ta ndi̱to̱n kjón‑ní kjíhi̱ꞌka‑no koni ꞌsín ꞌfiì jngo xi̱ta̱ chijé, mì kì jcha̱a mé ni̱chjin nga kjíhi̱ꞌka‑no.
\v 4 Tanga tjíhijyo chiba xi̱ta̱ ya̱ Sardis ra kjè tsa mé jé bátsji; ya̱á kímako̱‑na ko̱ nikje chrobaá kjòn ra kjóya koni ꞌsín nga bakèn‑la̱.
\v 5 Jñà ra si̱ìkijne‑la̱ ngaꞌtsì kjoa̱ ra ko̱tojin, nikje chrobaá kjòn ra kjóya; ko̱ ni̱kjiá ti̱ sikjéhejno‑na ꞌí‑la̱ ya̱ a̱ꞌta xa̱jo̱n ꞌtse̱ kjo̱binachon; ꞌkoa̱á ꞌsín xiáa̱n ya̱ ngixko̱n Nainá ra Na̱ꞌìn‑na̱ ma ko̱ ya̱ ñánda̱ nga i̱ncha masen ìkja̱li̱‑la̱ nga xi̱ta̱ tsa̱ꞌa̱n‑ná.
\v 6 Nda katafìya‑no koni ꞌsín jè Inìma̱ Tsje‑la̱ Nainá tsò‑la̱ jñà na̱xi̱ndá‑na̱ ra ito i̱ꞌnde tjítsa̱jna.”
\s Kjoa̱ ra isinè‑la̱ jè na̱xi̱ndá‑la̱ Nainá ra tíjna ya̱ ján Filadelfia
\p
\v 7 ’Tinda‑la̱ xa̱jo̱n jè ìkja̱li̱ ꞌtse̱ na̱xi̱ndá‑na̱ ra tíjna ya̱ ján Filadelfia: “Ki̱í ꞌsín tíchja̱ jè ra ngi xi̱ta̱ tsje ko̱ ra ngi jè sabà ra ngi xi̱ta̱ kixi̱, jè ra tsáꞌya yabi̱ ꞌtse̱ xi̱ta̱xá ítjòn ra tsiꞌkìn David, jè ra ma‑la̱ kjíꞌxa̱ꞌnde ján ngajmi ko̱ ni̱yá ra tjíꞌnde‑la̱ nga ki̱ìchjàjto‑ni, ko̱ ꞌkia̱ nga jè saba bíchjàjto, nì yá ra tjíꞌnde‑la̱ nga ski̱íꞌxa̱. Ki̱í ꞌsín tsò:
\v 8 ꞌA̱n be ijye‑ná xá ra ꞌnià jiòn; chítsijen, jngo xo̱tjo̱ba̱ tíbasijná masen‑no ra ti̱ꞌxájto ra ni̱yá tjíꞌnde‑la̱ nga ki̱ìchjàjto; nga̱ ni̱ꞌsín chiba ngaꞌñó tjín‑no, i̱nchinitjasòn‑no koni ꞌsín tsò ꞌén‑na̱, ko̱ mì kì tsa i̱nchibìtsa̱ꞌma jiòn ra a̱ꞌta tsa̱ꞌa̱n.
\v 9 Tjín jngó jtín xi̱ta̱ ra ya̱ chja̱‑ni ya̱ ñánda̱ nga maxkóya xi̱ta̱‑la̱ xi̱ta̱‑ni̱í nga tsò nga xi̱ta̱ judío‑ní tanga mì tsa kixi̱ kjoa̱, ta xi̱ta̱ ndiso‑ní. ꞌA̱án kjíhi̱ko̱ jñà xi̱ta̱ kìi̱ nga katincha-xkóꞌnchi ya̱ a̱ngi ndsa̱kò jiòn mé‑ni nga katabe‑ni nga tsjake̱‑najiòn.
\v 10 Ta nga̱tjì‑la̱ nga i̱nchinitjasòn kiꞌta‑najiòn jñà ꞌén ra kítsja‑no nga katachíkjoa̱‑no, ꞌkoa̱á ma‑ni nga kósi̱ko̱‑no jè ni̱chjin ra ijye nchrabá machraña, ꞌkia̱ nga kji̱íkanè kjo̱hiꞌin xi̱ta̱ nga tjáꞌta ijye ngaꞌtsì ra títsa̱jna ya̱ a̱ꞌta nangi.
\v 11 Kítjo̱je̱n ndi̱to̱ón india‑na; kì tà chjàn jmio jñà kjoa̱nda ra ijye tjín‑no koni ꞌsín makjiín‑no mé‑ni mì yá ra kjoa̱áꞌan‑no kjo̱tjò ra jiòn ijye inikijne.
\v 12 Jñà ra si̱ìkijne‑la̱ ngaꞌtsì kjoa̱ ra ko̱tojin, ꞌa̱án singátsja jngo i̱ꞌnde ñánda̱ nga ni̱yá ra ma ko̱chrjexìn koni jngo ítsji ngaꞌñó ꞌtse̱ i̱ngo̱ ítjòn‑la̱ Nainá. Ko̱ ya̱á ki̱ìndaꞌtá jè ꞌí‑la̱ ra Nainá‑na̱ xian‑la̱ ko̱ jè ꞌí‑la̱ na̱xi̱ndá‑la̱ Nainá, jè na̱xi̱ndá xi̱tse̱ ra ꞌmì Jerusalén ra ya̱ nchrabá‑ni ján ngajmi ya̱ ñánda̱ nga tíjna Nainá; ko̱ ti̱ꞌkoa̱á ki̱ìndaꞌtá‑te ꞌí xi̱tse̱ ra tsa̱ꞌa̱n.
\v 13 Nda katafìya‑no koni ꞌsín jè Inìma̱ Tsje‑la̱ Nainá tsò‑la̱ jñà na̱xi̱ndá‑na̱ ra ito i̱ꞌnde tjítsa̱jna.”
\s Kjoa̱ ra isinè‑la̱ jè na̱xi̱ndá‑la̱ Nainá ra tíjna ya̱ ján Laodicea
\p
\v 14 ’Tinda‑la̱ xa̱jo̱n jè ìkja̱li̱ ꞌtse̱ na̱xi̱ndá‑na̱ ra tíjna ya̱ ján Laodicea: “Ki̱í ꞌsín tíchja̱ jè ra ꞌjií síjngo ijye‑ni kjoa̱, jè ra ngi ꞌén kixi̱ tsjá ko̱ jè ra ngi jé kjón‑ní ra kjo̱hixi̱, jè ra tíjna ítjòn‑la̱ ngaꞌtsì ra Nainá tsikínda, ki̱í ꞌsín tsò:
\v 15 ꞌA̱n be‑ná ngaꞌtsì kjoa̱ ra i̱nchiꞌnià jiòn nga mì tsa ngi ꞌñó tjín takòn, ko̱ ni̱ mì tsa ngi inda tjín takòn jiòn, ta jò tjín‑no.
\v 16 Ta nga̱tjì‑la̱ nga ta jò tjín‑no nga ni̱ mì tsa ngi tsa ꞌñó tjín takòn jiòn, ko̱ ni̱ mì tsa ngi inda tjín takòn, ki̱í ko̱ꞌsín jngó kjá kochrjéngi‑no.
\v 17 Nga̱ jiòn, ꞌkoa̱á ꞌsín bixó: Xi̱ta̱ nchi̱ná‑náji̱n; ndaá titsa̱jna‑ji̱n; ni̱mé ra chijaꞌta‑naji̱n. Tanga jiòn, mì kì ꞌya‑no tsa iꞌiín titsa̱jna‑no; ni̱mé ra tjín‑no; xi̱ta̱ i̱ma̱‑no, ko̱ xi̱ta̱ xka̱‑no ko̱ titsa̱jna líka̱‑no.
\v 18 ꞌKoa̱á ꞌsín tsja jngo‑no ꞌén nga a̱ꞌta tsa̱ꞌa̱n maá tjatsjio to̱n sinè ra ngi niꞌí kjotsje‑ni mé‑ni nga ngi xi̱ta̱ nchi̱ná katama kiti‑no; ko̱ ti̱ꞌkoa̱á a̱ꞌta tsa̱ꞌa̱n maá tjatsji‑te nikje chroba ra tsjáya mé‑ni nga mì kì jcha̱‑la̱ kjo̱sabà‑no nga titsa̱jna líká; ti̱ꞌkoa̱á a̱ꞌta tsa̱ꞌa̱n maá tjatsjio jè xki ra kíngio jñà xkòn mé‑ni nga nda ko̱tsíjen‑no.
\v 19 Ngaꞌtsì xi̱ta̱ ra ꞌa̱n matsjake̱ batíko̱‑ná ko̱ kjo̱hiꞌin tsja‑la̱; ki̱í machjeén‑ni nga ꞌñó nda ti̱tsa̱jnanda kiꞌta nga ti̱kájno jé‑no ko̱ kì ti̱ tsja jé fatsji‑no.
\v 20 ꞌA̱n ya̱á síjna̱jto ya̱ xo̱tjo̱ba̱ niꞌya nga tíchjàa̱; tsa tjín iꞌka yá ra ꞌnchré jè jta̱‑na̱ ko̱ tsa ski̱íꞌxa̱ xo̱tjo̱ba̱ niꞌya‑la̱, ko̱maá kjoáha̱ꞌse̱n ko̱ ya̱á kókje̱n‑ko̱, ko̱ ta̱ñaá ki̱chi‑ji̱n.
\v 21 Jñà ra si̱ìkijne‑la̱ ngaꞌtsì kjoa̱ ra ko̱tojin, ꞌa̱án tsjaꞌndé‑la̱ nga ya̱ kítsa̱jnaꞌta‑na ya̱ íxile̱ ñánda̱ nga ꞌa̱n tíbatexóma, koni ꞌsín nga ijye ichìkjoa̱ko̱‑na ngaꞌtsì kjoa̱ ra tsatojiaa̱n nga ísikíjne‑la̱ ko̱ ya̱á tíjna̱ꞌta‑la̱ Na̱ꞌìn‑na̱ ya̱ íxile̱‑la̱ ñánda̱ nga tíbatéxoma ra jè.
\v 22 Nda katafìya‑no koni ꞌsín jè Inìma̱ Tsje‑la̱ Nainá tsò‑la̱ jñà na̱xi̱ndá‑na̱ ra ito i̱ꞌnde tjítsa̱jna.”
\c 4
\s Kóꞌsín ꞌyaxkón Nainá ya̱ ján ngajmi
\p
\v 1 Ra ijye kjomà a̱skan‑nioo̱ ískotsíjen‑náa̱ ya̱ ján iꞌngaá ko̱ kíjtse‑náa̱ ngajmi nga ti̱ꞌxá jngo xo̱tjo̱ba̱, ko̱ jè jta̱ ra kíꞌnchree̱ nga ꞌsa̱ ítjòn ra ko̱ꞌsín tsò koni jngo chrjoo̱, kitsò‑na:
\p ―Nchrabámijìn i̱jndíi̱; ꞌa̱án kokon‑la mé kjoa̱ ra ꞌsa̱ ko̱ka̱ma ꞌkia̱ nga ijye ko̱to kjoa̱ ra tíma ꞌndi̱ ꞌndi̱.
\p
\v 2 Ta ndi̱to̱ón ꞌjiìkànè india‑na jè ngaꞌñó ꞌtse̱ Inìma̱ Tsje‑la̱ Nainá, ko̱ kíjtsee̱ jngo íxile̱ ñánda̱ nga tísatéxoma ra tíjna ya̱ ján ngajmi ko̱ ya̱ íxile̱ ra̱kìi̱ tíjna jngo ra ya̱ tíjnasòn.
\v 3 Jè ra tíjnasòn íxile̱ nga tíbatéxoma, ꞌkoa̱á ꞌsín ꞌñó fate tsijen koni jè na̱jo̱ ra ꞌmì jaspe ko̱ koni jè na̱jo̱ ra ꞌmì cornalina; ko̱ ya̱ a̱ndi‑la̱ íxile̱, ya̱á síjnandi jngo ꞌya̱ ra ko̱ꞌsín fate tsijen koni jngo na̱jo̱ ra ꞌmì esmeralda.
\v 4 Kóhoꞌki tjindi‑la̱ ñánda̱ nga tíjna ra tíjnasòn íxile̱ nga tíbatéxoma, ngi kahíjòn íxile̱ i̱ncha‑isa ñánda̱ tísatéxoma‑te, ko̱ kíjtse‑náa̱ nga kahíjòn xi̱ta̱ jchínga títsa̱jnasòn ra ngi nikje chroba kjòn nikje ra kjiya, ko̱ ngi jñà corona ra ki̱cha̱ sinè tjíꞌa sko̱.
\v 5 Ya̱ ñánda̱ nga tíjna ra tíjnasòn íxile̱ nga tíbatéxoma, bitjoó niꞌí ꞌcho̱n ko̱ ꞌtsiín ꞌcho̱n, ti̱ꞌkoa̱ naꞌyá‑la̱ jta̱ ra chja̱; ko̱ ito niꞌí síhisen ra títì ñánda̱ nga tíjna masen íxile̱; jñà niꞌí kìi̱, jñà inìma̱ tsje ra ito ma‑ni ꞌtse̱ Nainá.
\v 6 Ya̱ ngixko̱n jè ra tíjnasòn íxile̱ nga tíbatéxoma kjijnaá jngo ndáchikon ra ko̱ꞌsín ꞌki koni jngo chi̱tsín ra ꞌñó fate. Ko̱ ya̱ a̱ꞌta íxile̱ ko̱ ya̱ a̱ndi‑la̱ ijòn ma‑ni ra títsa̱jnakon títsa̱jna; ko̱ kóhotíjngo ijo‑la̱ jñà ra ijòn ma‑ni ra títsa̱jnakon, jndíi̱ ra ján kitsejnó xko̱n.
\p
\v 7 Jè ra tíjna ítjòn jñà ra títsa̱jnakon koni ꞌki xaá ꞌki; jè ra ma‑ni jò koni ꞌki nchra̱ja̱ iꞌndí ꞌki; ko̱ jè ra ma‑ni jàn i̱sén‑la̱ xi̱ta̱á tjín‑la̱; ko̱ jè ra ma‑ni ijòn, ꞌkoa̱á ꞌsín ꞌki koni xija̱ ra tsáꞌbajin ya̱ a̱jin i̱sén.
\v 8 Jñà ra ijòn ma‑nioo̱, jñà ra títsa̱jnakon, jón‑jon na̱jngá tjín‑la̱ nga jngó jngó; ko̱ ya̱ nga tíjngo a̱ndi‑la̱ ko̱ ya̱ nga̱ya‑la̱, jndíi̱ ra ján tjíꞌta xko̱n; ko̱ mì kì síkjáya nga ni̱chjin ko̱ ni̱tje̱n nga tsò:
\q Tsje‑ní, tsje‑ní, tsje jè Na̱ꞌín‑ná,
\q jè Nainá ra bato tse ngaꞌñó tjín‑la̱,
\q jè ra tíjna‑ni skanda kjoꞌtsia̱,
\q ko̱ jè ra tíjna skanda ꞌndi̱
\q ko̱ jè ra sa kjꞌi̱í india‑ni.
\p
\v 9 Jñà ra títsa̱jnakon, i̱nchibexkón‑ní ko̱ ꞌkoa̱á ꞌsín i̱nchitsò‑la̱ nga tse kjo̱nda kataꞌse‑la̱, ko̱ i̱nchitsjá‑la̱ kjoa̱jeya jè ra tíjnasòn íxile̱ nga tíjnakon skanda ta mé ni̱chjin‑nioo̱. Ko̱ ꞌkia̱ nga ko̱ꞌsín ꞌsín,
\v 10 jñà xi̱ta̱ jchínga ra kahíjòn ma‑nioo̱ mincha-niña‑ní nga mincha-xkóꞌnchiꞌta‑la̱ jè ra tíjnasòn íxile̱, ti̱ꞌkoa̱á bexkón‑ní jè ra tíjnakon ta mé ni̱chjin‑nioo̱, ko̱ ya̱á síkíhijyo jñà corona‑la̱ ya̱ ngixko̱n jè ra tíjnasòn íxile̱ nga tsò:
\q
\v 11 Na̱ꞌìn bakén‑li nga ji̱ tjábé‑li kjoa̱jeya nga kataꞌyaxkón‑li
\q nga̱ batoó ꞌñó tse ngaꞌñó tjín‑li,
\q nga ji̱í tsikindi ngaꞌtsì tsajmì ra tjín
\q ko̱ kjo̱bítsjen tsa̱ji‑ní nga tjín ngaꞌtsì tsajmì ra tjín
\q ko̱ nga ma isinda ngaꞌtsiòo̱.
\c 5
\s Xa̱jo̱n ra tjíxkóya ko̱ jngo Forrè
\p
\v 1 ꞌA̱n kíjtse‑náa̱ jè ra tíjnasòn íxile̱ nga tíbatéxoma nga kjinaya tsja nga kixi̱ jngo xa̱jo̱n ra kjixkóya ra tjíꞌta letra ya̱ nga̱ya‑la̱ ko̱ ya̱ ngatsijen‑la̱; ko̱ itoó ꞌka̱ tjíꞌñó ñánda̱ nga tjíchjáꞌñó nga tjíꞌta chi̱ba̱ nga mì yá ra ma taxki̱ ski̱íꞌxa̱.
\v 2 Ko̱ jngo ìkja̱li̱ kíjtsee̱ ra tse ngaꞌñó tjín‑la̱ ra ꞌñó kiìchja̱ nga kitsò:
\p ―¿Yá ra bakèn‑la̱ nga ma ski̱íjnda̱ya‑te xa̱jo̱n ra̱kìi̱ ko̱ nga ma‑la̱ kjo̱híxìn ñánda̱ nga tjíꞌta chi̱ba̱ nga tjíchjáꞌñó?
\p
\v 3 Tanga ni̱yá isakò ra ma‑la̱ iskíjnda̱ya‑te jè xa̱jo̱n ra̱kìi̱, ni̱ mì kì ma iskotsíjen‑la̱ kóꞌsín tsò ꞌén ra tjíꞌta; ni̱yá isakò ya̱ ján ngajmi, ni̱yá isakò ya̱ a̱ꞌta nangi ko̱ ni̱yá isakò ya̱ a̱jin ꞌndé ján.
\v 4 ꞌA̱n, ꞌñó ískindáya‑na ko̱ ndáxkoaa̱n ꞌkia̱ nga kíjtsee̱ nga ni̱yá isakò ra tsakìn‑la̱ nga iskíjnda̱ya‑te jè xa̱jo̱n ra̱kìi̱ nga iskotáꞌyá ko̱ nga iskotsíjen‑la̱ kóꞌsín tsò ꞌén ra tjíꞌta.
\v 5 Jngo xi̱ta̱ jchínga ra kahíjòn ma‑nioo̱, kitsò‑na:
\p ―Kì ti̱ tsja chindáya‑ni. Tíjnaá jè ra ꞌmì: Xa‑la̱ xi̱ta̱ na̱xi̱ndá Judá, ko̱ jè ra ꞌmì‑te: Tje̱‑la̱ xi̱ta̱xá ítjòn ra tsiꞌkìn David, jè ra ijye isikijne‑la̱ ngaꞌtsì xi̱ta̱ kondra̱‑la̱; jé ra bakèn‑la̱ nga ma ski̱íjnda̱ya jè xa̱jo̱n ra̱kìi̱, ko̱ nga ma‑la̱ kjoa̱híxìn ñánda̱ nga ito ꞌka̱ tjíꞌta chi̱ba̱ nga tjíchjáꞌñó.
\p
\v 6 ꞌKia̱á kíjtse jngo Forrè nga síjna ya̱ nga masen‑la̱ ñánda̱ nga tíjna ra tíjnasòn íxile̱ nga tíbatéxoma ko̱ ñánda̱ nga tjítsa̱jna jñà ra ijòn ma‑ni ra títsa̱jnakon, ko̱ ya̱ ñánda̱ tjítsa̱jna jñà xi̱ta̱ jchínga. Jè Forrè, ꞌkoa̱á ꞌsín ꞌki koni tsa ijye ꞌken; ko̱ ito ma‑ni nchra̱já‑la̱ ti̱ꞌkoa̱á ito ma‑ni xko̱n; jñà xko̱n, jñá‑ní jñà inìma̱‑la̱ Nainá ra ito ma‑ni ra inikasén nga tíjngo i̱sàꞌnde.
\v 7 Jè Forrè ra̱kìi̱, iskábé jè xa̱jo̱n ra kjinaya ya̱ tsja nga kixi̱ jè ra tíjnasòn íxile̱ nga tíbatéxoma.
\v 8 ꞌKia̱ nga ijye iskábé xa̱jo̱n jè Forrè, jñà ra ijòn ma‑ni ra títsa̱jnakon ko̱ jñà xi̱ta̱ jchínga ra kahíjòn ma‑ni tsincha-niña‑ní nga tsincha-xkóꞌnchiꞌta‑la̱ Forrè ra̱kìi̱. Sabà arpa ꞌya ngaꞌtsiòo̱ ko̱ ꞌyaá‑te chi̱tsín ra ngi ki̱cha̱ sinè ra tjíya chrjongó nainá ra ngi kitse‑ní. Jñà chrjongó nainá, jñá‑ní kjoa̱ bitsaꞌba‑la̱ xi̱ta̱‑la̱ Nainá.
\v 9 Ko̱ jngo ꞌén xi̱tse̱ kise ra tsò:
\q Bakén‑li nga ji̱ chjíbí jè xa̱jo̱n
\q ko̱ nga ji̱ chjíꞌxi̱i ñánda̱ tjíꞌta chi̱ba̱ nga tjíchjáꞌñó;
\q nga̱ ji̱í‑ní ra iniꞌken‑li
\q nga ko̱ó jní‑li tsikíchjítjì‑ni xi̱ta̱
\q ra ya̱ itjojin‑la̱ ngaꞌtsì tje̱‑la̱ xi̱ta̱ ra tjín ya̱ i̱sàꞌnde,
\q ko̱ ngaꞌtsì ꞌén ra tjín ya̱ i̱sàꞌnde,
\q ko̱ ngaꞌtsì na̱xi̱ndá ra tjín
\q ko̱ ngaꞌtsì nangi ra tjín nga tíjngo i̱sàꞌnde
\q mé‑ni nga ya̱ ki̱chja̱‑ni a̱ꞌta ꞌtse̱ Nainá.
\q
\v 10 Ko̱ xi̱ta̱xá ítjòn kiꞌnì
\q ko̱ na̱ꞌmì kiꞌnì nga ma si̱hitjasòn‑la̱ Nainá;
\q ko̱ jñá ko̱tèxoma ya̱ a̱ꞌta nangi.
\p
\v 11 ꞌKia̱ nga ískotsíjee̱n, kíꞌnchré‑la̱ jta̱‑la̱ ìkja̱li̱ ra ꞌñó kjìn millón ma‑ni ra i̱nchise ya̱ a̱ndi‑la̱ ñánda̱ nga tíjna ra tíjnasòn íxile̱ nga tíbatéxoma ko̱ ya̱ ñánda̱ títsa̱jna jñà ra títsa̱jnakon ko̱ títsa̱jna‑te jñà xi̱ta̱ jchínga.
\v 12 ꞌÑó jchán i̱nchichja̱ nga tsò:
\q Jè Forrè ra iniꞌken,
\q jé bakèn‑la̱ nga kataꞌyaxkón;
\q nga̱ jé ra tjín‑la̱ ngaꞌñó,
\q ko̱ jé ra tjín‑la̱ kjoa̱nchi̱ná,
\q ko̱ jé ra tjín‑la̱ kjoa̱chji̱ne̱,
\q ko̱ jé tsjá ngaꞌñó;
\q ko̱ꞌsín kataꞌyaxkón,
\q nga jeya katijna,
\q ko̱ nga jè, ꞌnga katijna.
\p
\v 13 Ngaꞌtsì ra Nainá tsikínda ra tjín ya̱ ján ngajmi, ko̱ ra tjín i̱ a̱ꞌta nangi, ko̱ ra tjín ya̱ a̱jin ꞌndé ján, ko̱ ra tjín ya̱ a̱jin ndáchikon, ko̱ ngaꞌtsì tsajmì ra tjín; kíꞌnchré‑la̱ nga kitsò:
\q Jè ra tíjnasòn ya̱ íxile̱ ko̱ jè Forrè,
\q ꞌnga katabìhijyo
\q ko̱ kataꞌyaxkón nga jeya katabìhijyo
\q nga̱ jñà ra tse ngaꞌñó tjín‑la̱ skanda ta mé ni̱chjin‑nioo̱.
\p
\v 14 Jñà ra ijòn ma‑ni ra títsa̱jnakon kitsó‑ní:
\p ―¡Ko̱ꞌsín katama!
\p Ko̱ jñà xi̱ta̱ jchínga ra kahíjòn ma‑ni tsincha-niña‑ní nga tsincha-xkóꞌnchiꞌta‑la̱ nga kijtsexkón jè ra tíjnakon kiꞌta skanda ta mé ni̱chjin‑nioo̱.
\c 6
\s Jñà chi̱ba̱ ra tjíchjáꞌñó ra ito ma‑ni
\p
\v 1 A̱kjòn ꞌkia̱á kíjtsee̱ nga jè Forrè tsjahíxìn ítjòn jngo chi̱ba̱ ñánda̱ nga tjíchjáꞌñó xa̱jo̱n ra kjixkóya; a̱kjòn kíꞌnchrè jngo‑la̱ jñà ra ijòn ma‑ni ra títsa̱jnakon nga ꞌñó kiìchja̱. ꞌKoa̱á ꞌsín kitsò jta̱‑la̱ koni ꞌsín ma ꞌcho̱n ꞌkia̱ nga ꞌñó tsin, kitsò:
\p ―¡Nchrabí‑róoi̱!
\p
\v 2 Ískotsíjen‑náa̱, ko̱ jngo kabàyo̱ ra chraba ꞌki kíjtsee̱, ko̱ jè ra tíjnakjá‑la̱ kabàyo̱, jngo yá chrjo̱ꞌbì ra ꞌmì arco tsáꞌya jè ra machjeén ya̱ kjo̱jchán, ko̱ ítjábé jngo‑la̱ corona jè ra ꞌbì‑la̱ jñà xi̱ta̱ ra síkijne‑la̱ xi̱ta̱ kondra̱‑la̱; a̱kjòn kiì india‑ni mé‑ni nga si̱ìkijne-isa‑ni.
\p
\v 3 ꞌKia̱ nga jè Forrè tsjahíxìn jè chi̱ba̱ ra ma‑ni jò ñánda̱ nga tjíchjáꞌñó xa̱jo̱n ra kjixkóya, kíꞌnchré‑la̱ jè ra ma‑ni jò jñà ra títsa̱jnakon nga kitsò:
\p ―¡Nchrabí‑róoi̱!
\p
\v 4 Ko̱ ìjngo kabàyo̱ itjo ra inì ꞌki; ko̱ jè ra tíjnakjá‑la̱ kabàyo̱ kiꞌtsí jngo‑la̱ ki̱cha̱ ndajò ra ꞌñó je ꞌki; ti̱ꞌkoa̱á kiꞌtsì‑la̱ ngaꞌñó nga jè katjahíxìn kjo̱ꞌnchán ra tjín ya̱ a̱ꞌta nangi mé‑ni nga ti̱jñà katasíꞌken‑ni xákjén xi̱ta̱.
\p
\v 5 ꞌKia̱ nga jè Forrè tsjahíxìn jè chi̱ba̱ ra ma‑ni jàn ñánda̱ nga tjíchjáꞌñó xa̱jo̱n ra kjixkóya, kíꞌnchré‑la̱ jè ra ma‑ni jàn jñà ra títsa̱jnakon nga kitsò:
\p ―¡Nchrabí‑róoi̱!
\p ꞌKia̱ nga ískotsíjee̱n kíjtseé jngo kabàyo̱ ra jmà ꞌki; jè ra tíjnakjá‑la̱ jè kabàyo̱, jngo ra ꞌmì libra tsáꞌya, jè ra machi̱ba̱ya‑ni tsajmì.
\v 6 Kíꞌnchré jngo jta̱ ra ya̱ kiìchja̱ ya̱ nga masen‑la̱ ñánda̱ nga títsa̱jna jñà ra títsa̱jnakon nga kitsò:
\p ―Nga jngo niso je trigo, jngo ni̱chjin chjí‑la̱ chi̱ꞌnda tjín‑ni; ko̱ jè ra jàn niso cebada, ti̱ꞌkoa̱á jngoó ni̱chjin chjí‑la̱ chi̱ꞌnda tjín‑ni; tanga kì tà chjàn ta nìkitsón‑jiòn jñà sihìti̱ ko̱ jè nandá xán ꞌtse̱ uva.
\p
\v 7 ꞌKia̱ nga jè Forrè tsjahíxìn jè chi̱ba̱ ra ma‑ni ijòn ñánda̱ nga tjíchjáꞌñó xa̱jo̱n ra kjixkóya, kíꞌnchré‑náa̱ jta̱‑la̱ jè ra ma‑ni ijòn jñà ra títsa̱jnakon nga kitsò:
\p ―¡Nchrabí‑róoi̱!
\p
\v 8 Ískotsíjen‑náa̱, ko̱ jngo kabàyo̱ ra sinè ꞌki kíjtsee̱ ko̱ jè ra tíjnakjá‑la̱ jè kabàyo̱ ra̱kìi̱, Kjo̱biyaá ꞌmì jè ꞌí‑la̱, ko̱ tje̱n‑ngi‑la̱ jè ra ꞌmì I̱ꞌnde ꞌtse̱ Miꞌken. Kiꞌtsí‑la̱ kjo̱hixi̱ nga ngaꞌtsì xi̱ta̱ ra tjín ya̱ i̱sàꞌnde, jñà ra ijòn xi̱ta̱, jngo si̱ìꞌken, nga ko̱ó kjo̱jchán, ko̱ó kjinchrá, ko̱ó ꞌchin si̱ìꞌken‑ni, ko̱ ti̱ꞌkoa̱ ko̱ó cho̱ ꞌtse̱n ra tjín ya̱ a̱jin ijñá si̱ìꞌken‑ni.
\s Jè chi̱ba̱ ra tjíchjáꞌñó ra ma‑ni ꞌòn ko̱ ra ma‑ni jon
\p
\v 9 ꞌKia̱ nga jè Forrè tsjahíxìn jè chi̱ba̱ ra ma‑ni ꞌòn ñánda̱ nga tjíchjáꞌñó xa̱jo̱n ra kjixkóya, kíjtse‑náa̱ ya̱ a̱ngi ñánda̱ nga sihijyosòn kjo̱tjò ra manga̱tsja Nainá nga ya̱ títsa̱jna inìma̱ tsje‑la̱ jñà xi̱ta̱ ra iniꞌken ra ta nga̱tjì‑la̱ ꞌén‑la̱ Nainá, ti̱ꞌkoa̱á nga ta nga̱tjì‑la̱ nga ngi kixi̱ tsiꞌkéna̱jmí ꞌén nda‑la̱ Cristo.
\v 10 ꞌÑó i̱nchichja̱ nga tsò:
\p ―Ji̱ Na̱ꞌìn ra ji̱ sabà tjibatexomi, ji̱ ra tsje tijni ko̱ ra ngi ji̱ ra kjo̱hixi̱, ¿skanda mé ni̱chjin ꞌki̱‑la̱ ji̱ kjo̱hiꞌin ko̱ kíndajín‑la̱ ji̱ jñà xi̱ta̱ ra títsa̱jnakon ya̱ i̱sàꞌnde mé‑ni nga si̱ndajín‑ni koni ꞌsín nga isìꞌken‑naji̱n?
\p
\v 11 ꞌKia̱á kiꞌtsì‑la̱ nikje ra chroba kjòn; ꞌkoa̱á tsiꞌkìn‑la̱ nga katasíkjáya chiba ni̱chjin‑isa, skanda ꞌkia̱ nga ko̱jngoꞌtá jñà ra ꞌndse̱ jo̱ó a̱ꞌta ꞌtse̱ Cristo ra ti̱ꞌkoa̱ ta nga̱tjì‑la̱ xá‑la̱ Nainá ki̱yájin.
\p
\v 12 Kíjtse‑náa̱ ꞌkia̱ nga jè Forrè tsjahíxìn jè chi̱ba̱ ra ma‑ni jon ñánda̱ nga tjíchjáꞌñó xa̱jo̱n ra kjixkóya; ꞌkia̱á ꞌji jngo chón ra ꞌñó ꞌtsa; jè tsáꞌbí, jmà ꞌki kjomà koni tsa jngo nikje jmà, ko̱ jè sá, inì ꞌki kjomà koni tsa jní.
\v 13 Ko̱ jñà nitse ra tjín ya̱ ján ngajmi iskatsajoꞌtá skanda ya̱ a̱ꞌta nangi koni ꞌsín ma iꞌka jñà to chíꞌndé ꞌkia̱ nga ꞌñó ꞌba tjo̱ tsjè.
\v 14 Ko̱ jè ngajmi isìxkóya‑ní koni tsa jngo xa̱jo̱n ra sixkóya; ngaꞌtsì jñà nindo ko̱ i̱ꞌnde ra kjijin ndáchikon jahatjìya i̱ꞌnde‑la̱.
\v 15 Jñà ra xi̱ta̱xá ítjòn títsa̱jna ya̱ i̱sàꞌnde, jñà xi̱ta̱ ra ꞌñó nda ꞌyaxkón‑la̱, jñà ra xi̱ta̱ nchi̱ná, jñà xi̱ta̱ ítjòn‑la̱ chíchàn, jñà xi̱ta̱ ra tse ngaꞌñó tjín‑la̱, ra xi̱ta̱ chi̱ꞌnda ko̱ jñà ra títsa̱jnandi̱í nga mì tsa ni tjín‑la̱, ya̱á tsikitsa̱jnangi ngijo ko̱ ya̱ a̱jin na̱xi̱ nga tsikìtsa̱ꞌma.
\v 16 Kitsò‑la̱ jñà nindo ko̱ jñà na̱xi̱:
\p ―Nchrabá kanè‑náji̱n nga tijtsa i̱ꞌnde‑náji̱n mé‑ni nga mì ske̱‑naji̱n jè ra tíjnasòn íxile̱ nga tíbatéxoma ko̱ nga ki̱tsa̱jnaꞌma‑la̱ji̱n jè kjo̱jti‑la̱ jè Forrè.
\v 17 Nga̱ ijyeé ijchó ni̱chjin‑la̱ nga ꞌñó tse kjo̱hiꞌin ꞌjiìkó kjo̱jti‑la̱ Nainá ko̱ kjo̱jti‑la̱ jè Forrè. ¿Yá ra ko̱ma ki̱chíkjoa̱‑la̱?
\c 7
\s Jñà chi̱ꞌnda‑la̱ Nainá ra isiꞌta chi̱ba̱
\p
\v 1 ꞌKia̱ nga ijye kjomà kjoa̱ kìi̱, ijòn ìkja̱li̱ kíjtsee̱ ra i̱jncha kixi̱ ya̱ nga ijòn nga chrja̱ngi̱‑la̱ i̱sàꞌnde ra i̱nchibíchjà-ikon‑la̱ tjo̱ mé‑ni nga mì ti̱ kataꞌba‑ni ya̱ a̱sòn i̱sàꞌnde ko̱ ya̱ a̱jin ndáchikon nga ti̱ꞌkoa̱á ni̱jngo yá katasíjtiya‑la̱.
\v 2 Ti̱ꞌkoa̱ kíjtseé ìjngo‑isa ìkja̱li̱ ra ya̱ tínchrabá‑ni ya̱ ñánda̱ nga bitjokátji‑ni tsáꞌbí ra ꞌya jngo ki̱cha̱ ra ꞌtse̱ Nainá ra tíjnakon ra ma siꞌta chi̱ba̱‑ni chi̱ꞌnda‑la̱; ꞌñó kiìchja̱‑la̱ jñà ìkja̱li̱ ra ijòn ma‑ni ra ijye itjábé‑la̱ ngaꞌñó nga tsjáꞌchin‑la̱ jè i̱sàꞌnde ko̱ jè ndáchikon,
\v 3 kitsò‑la̱:
\p ―Kì tà chjàn kó nìko̱o jè i̱sàꞌnde ko̱ jè ndáchikon ko̱ jñà yá, ꞌkia̱ nga ti̱kje siꞌta chi̱ba̱ ya̱ tátjen‑la̱ jñà ra chi̱ꞌnda‑la̱ Nainá ma.
\p
\v 4 Kíꞌnchré‑la̱ kótjín ma‑ni jñà ra isiꞌta chi̱ba̱: jngo sindo̱ ko̱ ichán ijòn jmi ma‑ni, ta ngaꞌtsì ra tje̱‑la̱ xi̱ta̱ Israel.
\v 5 Jñà ngaꞌtsì tje̱‑la̱ xi̱ta̱ kìi̱ ra isiꞌta chi̱ba̱: ra tje̱‑la̱ Judá, tejò jmi ma‑ni; ra tje̱‑la̱ Rubén, tejò jmi ma‑ni; ti̱ꞌkoa̱á tejò jmi ma‑ni ra tje̱‑la̱ Gad;
\v 6 ra tje̱‑la̱ Aser, tejò jmi ma‑ni; ra tje̱‑la̱ Neftalí, ti̱ꞌkoa̱á tejò jmi ma‑ni; ko̱ ra tje̱‑la̱ Manasés, tejò jmi ma‑ni;
\v 7 ra tje̱‑la̱ Simeón, tejò jmi ma‑ni; ti̱ꞌkoa̱á ra tje̱‑la̱ Leví, tejò jmi ma‑ni; ko̱ ra tje̱‑la̱ Isacar, tejò jmi ma‑ni;
\v 8 ra ti̱ꞌkoa̱á tje̱‑la̱ Zabulón, tejò jmi ma‑ni; ko̱ ra tje̱‑la̱ José, tejò jmi ma‑ni; ko̱ ti̱ꞌkoa̱á tejò jmi ma‑ni ra tje̱‑la̱ Benjamín. [Sabà isiꞌta chi̱ba̱á ngaꞌtsì jñà xi̱ta̱ kìi̱.]
\s Xi̱ta̱ ra kjìn ma‑ni ra kjiya nikje chroba
\p
\v 9 Ra ijye kjomà jñà kjoa̱ kìi̱, ꞌkia̱ nga ískotsíjee̱n, kjín jchán ma‑ni xi̱ta̱ kíjtsee̱ ra ni̱yá ma maxki̱ya‑la̱. Ya̱á títsa̱jna xi̱ta̱ ra ya̱ inchrabàjin‑ni ngaꞌtsì nangi ra tjín ya̱ i̱sàꞌnde; ko̱ ngaꞌtsì tje̱‑la̱ xi̱ta̱ ra tjín ya̱ i̱sàꞌnde; ko̱ títsa̱jnaá xi̱ta̱ ra chja̱ ngaꞌtsì ꞌén ra tjín, ko̱ xi̱ta̱ ra ya̱ inchrabà‑ni ngaꞌtsì na̱xi̱ndá ra tjín. Jñà xi̱ta̱ kìi̱, ya̱á i̱ncha kixi̱ ya̱ ngixko̱n ra tíjnasòn íxile̱ nga tíbatéxoma ko̱ ya̱ ngixko̱n Forrè. Saba nikje chrobaá kjòn ra kjiya, ko̱ xka̱jén kjiya tsja.
\v 10 Ngaꞌtsì jñà xi̱ta̱ kìi̱ ꞌñó i̱nchichja̱ nga tsò:
\q Jè Na̱ꞌín‑ná ra Nainá ra tíjnasòn íxile̱ nga tíbatéxoma
\q ko̱ jè Forrè,
\q kjomà‑la̱ tsachrjekàjin‑ná kjo̱hiꞌin.
\m
\v 11 Ngaꞌtsì jñà ìkja̱li̱, ya̱á i̱ncha kixi̱ ya̱ a̱ndi‑la̱ ñánda̱ tíjna ra tíjnasòn íxile̱ nga tíbatéxoma ko̱ ya̱ ñánda̱ títsa̱jna jñà xi̱ta̱ jchínga ra kahíjòn ma‑ni, ko̱ jñà ra ijòn ma‑ni ra títsa̱jnakon. Tsincha-niña‑ní nga tsinchaxkóꞌnchiꞌta a̱ꞌta nangi nga kijtsexkón jè Nainá,
\v 12 nga kitsò:
\q Ko̱ꞌsín katama.
\q Jè ra Nainá, ꞌnga katijna, jè jeya katijna,
\q nga̱ jè sabá ra tjín‑la̱ kjoa̱chji̱ne̱
\q ko̱ ta jé ra ko̱ꞌsín katatsò‑la̱ xi̱ta̱: “Tse kjo̱nda kataꞌse‑li”,
\q ko̱ jè kataꞌyaxkón
\q nga jè sabà ra tjín‑la̱ kjo̱téxoma
\q ko̱ ra tjín‑la̱ ngaꞌñó.
\q Ko̱ꞌsín katama skanda ta mé ni̱chjin‑nioo̱.
\p
\v 13 ꞌKia̱á kiìchja̱ jngo jñà xi̱ta̱ jchínga, kitsò‑na:
\p ―Jñà xi̱ta̱ ra nikje chroba kjiya, ¿yá xi̱ta̱‑ni, ko̱ ñánda̱ kaꞌfi‑ni?
\p
\v 14 Ko̱ ꞌa̱n, kíxiín‑la̱:
\p ―Ji̱í‑ní ra ꞌyi na̱ꞌìn.
\p Ko̱ jè kitsò‑na:
\p ―Jñá‑ní xi̱ta̱ kìi̱ ra ya̱ tsatojin kjo̱hiꞌin jñà ni̱chjin ꞌkia̱ nga ꞌñó tse kjo̱hiꞌin kiꞌse, ra ko̱ jní‑la̱ Forrè isìtsje‑ni nikje‑la̱ nga kjochroba‑ni.
\v 15 Kií ko̱ꞌsín ya̱ títsa̱jna‑ni ya̱ ngixko̱n jè ra tíjnasòn íxile̱ nga tíbatéxoma nga ni̱chjin ko̱ ni̱tje̱n i̱nchisísin‑la̱ ya̱ a̱ya i̱ngo̱‑la̱. Ko̱ jè ra tíjnasòn íxile̱, ya̱á kíjnajin masen kiꞌta‑la̱ nga si̱ìkinda̱.
\v 16 Mì kì ti̱ kjinchrá si̱ìkjiín‑ni, mì ti̱ kì ko̱xándá‑la̱, ko̱ mì kì ti̱ bato tsjè ko̱ma‑la̱ ndabá‑la̱ tsáꞌbí ko̱ mì kì ti̱ chján‑la̱ ndabá.
\v 17 Nga̱ jé Forrè ra tíjna ya̱ masen‑la̱ ya̱ ñánda̱ tíjna jè ra tíjnasòn íxile̱ nga tíbatéxoma, jé si̱ìkinda̱ koni ꞌsín makìnda̱ jñà forrè ko̱ jé skén‑la̱ ndi̱yá nga ki̱ko̱ ñánda̱ nga títjo nandá ra tíjnakon. Ko̱ jé Nainá si̱ìxìjno‑ni ngaꞌtsì ndáxko̱n jñà xi̱ta̱ kìi̱.
\c 8
\s Jè chi̱ba̱ ra tjíchjáꞌñó ra ma‑nì ito
\p
\v 1 ꞌKia̱ nga jè Forrè tsjahíxìn jè chi̱ba̱ ra ma‑ni ito ñánda̱ nga tjíchjáꞌñó xa̱jo̱n ra kjixkóya, maseén‑la hora jñá kiꞌse ya̱ ján ngajmi.
\v 2 A̱kjòn kíjtsee̱ jñà ìkja̱li̱ ra ito ma‑ni ra i̱ncha kixi̱ ya̱ ngixko̱n Nainá nga jngó jngó chrjoo̱ kiꞌtsì‑la̱.
\v 3 ꞌKia̱á ꞌji ìjngo‑isa ìkja̱li̱ ra ꞌya jngo ki̱cha̱ sinè jè ra ya̱ tìya chrjongó nainá; tsasijna kixi̱ ya̱ a̱ꞌta ímixa̱ tsje ya̱ ñánda̱ nga tì jè chrjongó nainá; kiꞌtsì‑isa‑la̱ mé‑ni ya̱ si̱ìjngoko̱‑ni jñà kjo̱bitsaꞌba‑la̱ jñà xi̱ta̱‑la̱ Nainá; ya̱á tsaká ya̱ a̱sòn ímixa̱ tsje ra ngi ki̱cha̱ sinè ra tíjna ya̱ ngixko̱n jè ra tíjnasòn íxile̱ nga tíbatéxoma.
\v 4 Jè ni̱ꞌndi̱‑la̱ chrjongó nainá, ya̱á tjíjngoko̱, ko̱ jñà kjo̱bitsaꞌba‑la̱ jñà xi̱ta̱‑la̱ Nainá nga kijìmijìn koni ꞌsín nga tsáꞌya jè ìkja̱li̱ nga ijchò skanda ñánda̱ nga tíjna jè Nainá.
\v 5 Jè ìkja̱li̱, a̱kjòn ꞌkia̱á iskábé jè ki̱cha̱ ra tìya chrjongó nainá; tsinchá‑isa xóꞌbí ra títì nga tjísòn ya̱ ímixa̱ tsje; a̱kjòn ya̱á isìkàtje̱n ya̱ a̱sòn i̱sàꞌnde, ko̱ ꞌñó kitsin ꞌcho̱n, ko̱ inaꞌyá‑la̱ jta̱, ko̱ ꞌñó jate ko̱ ti̱ꞌkoa̱á ꞌtsa chón.
\s Mé ra kjomà a̱ꞌta ꞌtse̱ jñà chrjoo̱
\p
\v 6 Jñà ìkja̱li̱ ra ito ma‑nioo̱ ra ito chrjoo̱ tjímaꞌya; tsikitsa̱jna nda‑ní nga si̱ìkjiꞌndá chrjoo̱‑la̱.
\p
\v 7 Jè ìkja̱li̱ ra síjna ítjòn, isikjiꞌndá jè chrjoo̱‑la̱; ko̱ a̱kjòn ꞌkia̱á inikasén ya̱ a̱ꞌta nangi jtsí na̱jo̱ ko̱ niꞌí ra tjíkójin jní. Nga jàn‑ya i̱sàꞌnde, jngo‑yá kitì; ko̱ ti̱ꞌkoa̱á ta ngaꞌtsì jñà yá ra tjín, jè ra jàn‑ya, jngo‑ya kitì‑te; ko̱ kitì ijye‑ní ngaꞌtsì xka̱ ijñá.
\p
\v 8 Jè ìkja̱li̱ ra ma‑ni jò isikjiꞌndá jè chrjoo̱‑la̱; ko̱ ꞌkia̱á inìkàtje̱n‑jin ya̱ ndáchikon jngo ra ko̱ꞌsín ꞌki koni jngo nindo ra ꞌñó je ꞌki ra títì jnga̱ jnga̱. Ko̱ jè ra jàn‑ya ꞌka̱ tjín‑ni jè ndáchikon, jngo‑yá, ngi jní kjomà.
\v 9 Jñà cho̱ ra tjín ya̱ a̱jin ndáchikon, jè ra jàn‑ya ta ngaꞌtsì cho̱, jngo‑yá ꞌken. Ko̱ ti̱ꞌkoa̱á jè ra jàn‑ya ta ngaꞌtsì chitso ra tjín ya̱ a̱jin ndáchikon, jè ra jngo‑yá, ngi kinìkitsón‑ña‑ní.
\p
\v 10 Jè ìkja̱li̱ ra ma‑ni jàn isikjiꞌndá jè chrjoo̱‑la̱, ko̱ jngo nitse ra ꞌñó je ꞌki iskàtje̱n‑ngi‑ni ya̱ ján ngajmi ra ko̱ꞌsín ꞌki koni jngo niꞌí ra títì jnga̱ jnga̱; ko̱ jè nitse ra̱kìi̱, jè ra jàn‑ya ta ngaꞌtsì xa̱ngá nandá, ya̱á iskàtje̱n‑jin jè ra jngoyá xa̱ngá ko̱ ngaꞌtsì i̱ꞌnde ñánda̱ nga títjo nandá.
\v 11 Jè ꞌí‑la̱ nitse ra̱kìi̱: xka̱ tsja ꞌmì, jè ra jàn‑ya ma‑ni ta ngaꞌtsì nandá, jngo‑yá kjotsja; ko̱ kjín jchán xi̱ta̱ ꞌken ta nga̱tjì‑la̱ nga kjotsja nandá.
\p
\v 12 Jè ìkja̱li̱ ra ma‑ni ijòn, isikjiꞌndá jè chrjoo̱‑la̱, a̱kjòn jè ra jàn‑ya, koni ꞌsín ꞌki jè tsáꞌbí, jngo‑yá itsiꞌon; ko̱ jè sá, ꞌkoa̱á ti̱ꞌsín kjomà; ko̱ jñà nitse, ꞌkoa̱á ti̱ꞌsín kjomà‑te; a̱kjòn kjòjñò jngo‑yá jè tsáꞌbí ko̱ jè sá ko̱ jñà nitse; ko̱ jè ni̱chjin ꞌkia̱ nga jàn‑ya tjín‑ni, jngo‑yá kjòjñò, ko̱ ꞌkoa̱á ti̱ꞌsín kjomà ꞌkia̱ nga ni̱tje̱n.
\p
\v 13 ꞌKia̱á ískotsíjee̱n, kíꞌnchrè jngo‑la̱ xija̱ nga itjotjén ya̱ masen‑la̱ a̱jin i̱sén. Ko̱ ꞌñó kiìchja̱ nga kitsò:
\p ―¡I̱ma̱‑ró‑ni, i̱ma̱‑ró‑ni, i̱ma̱‑ró‑ni jñà xi̱ta̱ ra tjín ya̱ a̱ꞌta nangi; batoó ꞌñó ton ko̱maꞌtin ꞌkia̱ nga si̱ìkjiꞌndá chrjoo̱‑la̱ jñà ìkja̱li̱ ra ngi jàn chija‑isa!
\c 9
\s Jè chrjo ra ma‑ni ꞌòn
\p
\v 1 Jè ìkja̱li̱ ra ma‑ni ꞌòn isikjiꞌndá jè chrjoo̱‑la̱, ko̱ kíjtseé jngoo̱ nitse ra ya̱ inchrabà‑ni ya̱ ján ngajmi nga iskàtje̱n‑ngi ya̱ a̱ꞌta nangi, ko̱ jè kjonga̱tsja yabi̱ ra ꞌtse̱ nga̱jo̱ na̱tja̱n.
\v 2 A̱kjòn iskíꞌxa̱ jè nga̱jo̱ na̱tja̱n; ko̱ ni̱ꞌndi̱í itjo koni tsa jngo nga̱já ra ꞌñó je ꞌki; ko̱ jè ni̱ꞌndi̱ ra itjo, jahajton‑jñó‑la̱ jè tsáꞌbí ya̱ a̱jin i̱sén.
\v 3 Ya̱ a̱jin ni̱ꞌndi̱, ya̱á itjojin likò ra ꞌñó iꞌi kjòn ra tsangasòn ya̱ a̱ꞌta nangi; ko̱ kiꞌtsí‑la̱ ngaꞌñó nga ma ꞌke̱e naꞌyá‑la̱ koni ꞌsín ꞌbé naꞌyá‑la̱ jñà cho̱ naꞌyá toxòli̱ ra tjín ya̱ a̱ꞌta nangi.
\v 4 ꞌKoa̱á ꞌsín kiꞌtsì‑la̱ kjo̱hixi̱ nga mì kì jñà tsjá ꞌchin‑la̱ jñà ndi̱jyi̱ ra tjín ya̱ i̱sàꞌnde, ko̱ ni̱jñà xka̱ ijñá ko̱ ni̱jngo yá; nga ta jñá katatsjá ꞌchin‑la̱ jñà xi̱ta̱ ra mì kì tjíꞌta chi̱ba̱‑la̱ Nainá ya̱ tótjen‑la̱.
\v 5 Mì kì kiꞌtsìꞌnde‑la̱ nga katasíꞌken jñà xi̱ta̱; ta jé‑ní nga ꞌòn sá katatsjá‑la̱ kjo̱hiꞌin; ko̱ jè kjo̱hiꞌin ra tsjá‑la̱ xi̱ta̱, ꞌkoa̱á ꞌsín ma koni ꞌsín ma ꞌkia̱ nga ꞌbé‑ná cho̱ naꞌyá toxòli̱.
\v 6 Jñà ni̱chjin kiòo̱, jñà xi̱ta̱ koa̱àtsji‑ní kóꞌsín nga si̱ìꞌken ijo‑la̱, tanga mì kì sa̱kò‑la̱ kóꞌsín nga ma ki̱yá; ko̱ mején‑la̱ nga ki̱yá, tanga mì kì ki̱yá‑jin.
\p
\v 7 Jñà likò kìi̱, ꞌkoa̱á ꞌsín kjòn koni ꞌsín kjòn jñà kabàyo̱ ra ijye títsa̱jnanda nga ki̱ji̱ kjo̱jchán. Ya̱ a̱sòn sko̱, tjíꞌa jngo‑la̱ ra koni kjòn corona ra ꞌtse̱ ki̱cha̱ sinè; ko̱ i̱sén‑la̱, ꞌkoa̱á ꞌsín kjòn koni kjòn i̱sén‑la̱ xi̱ta̱.
\v 8 Jñà tsja̱‑sko̱, ꞌkoa̱á ꞌsín kjòn koni ꞌsín kjòn jñà tsja̱‑sko̱ íchjín; ko̱ jñà ni̱ꞌño̱, ꞌkoa̱á ꞌsín kjòn koni tsa ni̱ꞌño̱ xa.
\v 9 Jñà xo̱tjo̱ba̱ inìma̱‑la̱, ꞌkoa̱á ꞌsín kjòn koni kjòn jñà ki̱cha̱ ra faya jñà xi̱ta̱ ra fì kjo̱jchán; jñà na̱jngá‑la̱, ꞌkoa̱á ꞌsín naꞌyá‑la̱ nga fane koni tsa ꞌñó kjín ma‑ni ki̱cha̱ na̱xítji ra kabàyo̱ tjíꞌndo̱fe‑la̱ nga i̱nchimahachikon nga i̱nchifì kjo̱jchán.
\v 10 Tjín ndiꞌtsin koni tsa cho̱ naꞌyá toxòli̱; ko̱ tjín‑la̱ naꞌyá; ko̱ jñà ndiꞌtsin tjín‑la̱ ngaꞌñó nga ma ꞌòn sá si̱ìkiꞌon xi̱ta̱.
\v 11 Jè ra tíjna ítjòn‑la̱ jñà likò, jè ìkja̱li̱‑la̱ ra ꞌtse̱ na̱tja̱n; jè ꞌí‑la̱ ìkja̱li̱ ra̱kìi̱ nga ꞌén hebreo, Abadón ꞌmì, ko̱ ra ꞌén griego, Apolión ꞌmì, [jè ꞌén ra tsò‑ni: Jè ra ma‑la̱ síkitsón‑ña].
\p
\v 12 Ijyeé tsato jè kjo̱hiꞌin ra tíjna ítjòn jè ra bato ꞌñó ton kjomàꞌtin jñà xi̱ta̱; tanga ingi jò chija‑isa ra ꞌsa̱ nchrabá.
\s ꞌKia̱ nga jane chrjo ra ma‑ni jon
\p
\v 13 Jè ìkja̱li̱ ra ma‑ni jon isikjiꞌndá jè chrjo‑la̱, ko̱ kíꞌnchré jngo‑la̱ jta̱ ra ya̱ inchrabà‑ni ya̱ nga ijòn nchra̱já ra tjín‑la̱ ímixa̱ tsje ra ngi ki̱cha̱ sinè ra ya̱ síjna ya̱ ngixko̱n Nainá,
\v 14 jè jta̱ ra kitsò‑la̱ ìkja̱li̱ ra ma‑ni jon ra tsáꞌya chrjoo̱:
\p ―Chjíjnda̱ꞌñó‑ni jñà ìkja̱li̱ ra ijòn ma‑ni ra tjíꞌtáꞌñó ya̱ chraña‑la̱ ndáje̱ ra ꞌmì Éufrates.
\p
\v 15 Ko̱ itjájnda̱ꞌñó‑ni jñà ìkja̱li̱ ra ijòn ma‑ni ra ijye ko̱ꞌsín títsa̱jnanda nga jè hora, ko̱ jè ni̱chjin, ko̱ jè sá, ko̱ jè nó, nga jè ra jàn‑ya ta ngaꞌtsì xi̱ta̱ ra tjín, jngo‑yá si̱ìꞌken.
\v 16 ꞌA̱n kíꞌnchrè‑la̱ kótjín ma‑ni jñà chíchàn ra kabàyo̱ títsa̱jnakjá‑la̱; jò sindo̱ millón ma‑ni.
\p
\v 17 ꞌKoa̱á ꞌsín tsatsíjen‑na jñà kabàyo̱ ko̱ jñà xi̱ta̱ ra títsa̱jnakjá‑la̱ nga ki̱cha̱ tája kjijtsa ya̱ a̱sòn inìma̱‑la̱ ra inì tsijen koni niꞌí, ko̱ ra chji̱ꞌndi̱ tsijen koni jngo na̱jo̱ ra ꞌmì zafiro, ko̱ ra sinè tsijen koni jè chijo ra ꞌmì asùfre̱. Jñà sko̱ kabàyo̱, ꞌkoa̱á ꞌsín kjòn koni ꞌsín kjòn sko̱ xa, ko̱ ya̱ tsaꞌba, niꞌí bitjo, ko̱ ni̱ꞌndi̱, ko̱ asùfre̱.
\v 18 Ta nga̱tjì‑la̱ jñà nga jàn kjo̱hiꞌin kìi̱, jè ra jàn‑ya ta ngaꞌtsì xi̱ta̱ ra tjín, jngo‑yá ꞌken. Jé niꞌí ko̱ jè ni̱ꞌndi̱ ko̱ azufre ra bitjo ya̱ tsaꞌba kabàyo̱ isìꞌken.
\v 19 Jñà kabàyo̱ ya̱á tjíꞌa ngaꞌñó‑la̱ ya̱ tsaꞌba ko̱ ya̱ a̱tjòn ndiꞌtsin. Jñà ndiꞌtsin, ꞌkoa̱á ꞌsín tjín sko̱ koni ꞌsín kjòn ye̱; ko̱ jé ma tsjáhiꞌin‑la̱ xi̱ta̱.
\p
\v 20 Jñà xi̱ta̱ ra tsijnengi‑ni ra mì kì ꞌken ꞌkia̱ nga kjomà kjo̱hiꞌin kìi̱, takó mì kì isíkájno jñà jé‑la̱ ko̱ mì kì kitsjin‑jìn; takó jñá kijtsexkón jñà inìma̱ ꞌcho‑la̱ ni̱í, ko̱ jñà xkósòn ra nainá tsò‑la̱, koni jñà ra ki̱cha̱ sinè, ko̱ ra ki̱cha̱ chroba, ko̱ ra ki̱cha̱ bronce, ko̱ ra na̱jo̱, ko̱ ra yá, jñà ra mì kì tsijen‑la̱, ko̱ mì kì ꞌnchré, ko̱ mì kì ma‑la̱ fì.
\v 21 Ko̱ jñà xi̱ta̱ kìi̱, mì kì isíkájno‑jìn, ko̱ mì kì kitsjin‑jìn nga ma‑la̱ síꞌken xi̱ta̱, ko̱ mì kì kitsjin‑jìn nga ma‑la̱ ꞌsín ra kjoa̱tjꞌee̱, ko̱ ni̱ mì kì kitsjin‑jìn nga ma‑la̱ ꞌsín kjoa̱chijngi, ko̱ mì kì kitsjin‑jìn nga ma‑la̱ síchijé.
\c 10
\s Jè ìkja̱li̱ ra kjiya tsja jngo xa̱jo̱n ra i̱tsé ꞌki
\p
\v 1 Ìjngo ìkja̱li̱ kíjtse‑isa ra tjín‑la̱ ngaꞌñó ra ya̱ tínchrabájen‑ni ya̱ ngajmi nga tjìkótjìjno síjnajin ifi; ya̱ sko̱, jngo ꞌya̱ síjnasòn; jè i̱sén‑la̱, ꞌkoa̱á ꞌki koni jè tsáꞌbí, ko̱ jñà ndsa̱ko̱, ꞌkoa̱á kjòn koni tsa niꞌí ra i̱ncha kixi̱ nga i̱nchitì.
\v 2 Jngo xa̱jo̱n ra i̱tsé ꞌki tsáꞌya ra kjijna tsijen; ko̱ jè ndsa̱ko̱ kixi̱, ya̱á tsasíjnajin ya̱ a̱jin ndáchikon ko̱ jè ndsa̱ko̱ ngaskoán, ya̱á tsasíjna ya̱ a̱sòn nangi.
\v 3 Ko̱ ꞌñó jchán kiìchja̱; ꞌkoa̱á ꞌsín kitsò koni ꞌsín tsò jè xa ꞌkia̱ nga kjindáya. ꞌKia̱ nga ijye kiìchja̱, itoó ꞌcho̱n inaꞌyá jta‑la̱.
\v 4 ꞌKia̱ nga ijye kíꞌnchrè jta̱‑la̱ ꞌcho̱n ra ito inaꞌyá‑la̱ nga kiìchja̱, tjín‑ni nga xa̱jo̱ón kiꞌtàa̱; tanga kíꞌnchrè jngo‑la̱ jta̱ ra ngajmi inchrabà‑ni ra kitsò‑na:
\p ―Ta ji̱ katasijin‑li jñà ꞌén ra kàchja̱ jñà ꞌcho̱n ra ito ma‑nioo̱; kì tà chjàn xa̱jo̱n biꞌtì.
\p
\v 5 Jè ìkja̱li̱ ra kíjtsee̱ ra ya̱ síjnasòn ya̱ ndáchikon ko̱ ya̱ a̱sòn nangi, iskimítje̱én jè tsja kixi̱ ya̱ ján ngajmi,
\v 6 ko̱ ꞌkoa̱á ꞌsín kitsjá kixi̱ ꞌén‑la̱ a̱ꞌta ꞌtse̱ Nainá ra tíjnakon skanda ta mé ni̱chjin‑nioo̱, jè ra tsikínda jè ngajmi ko̱ jè nangi ko̱ jè ndáchikon ko̱ ngaꞌtsì tsajmì ra tjín ya̱ ngajmi, ya̱ a̱ꞌta nangi, ko̱ ya̱ ndáchikon; ꞌkoa̱á ꞌsín kitsò:
\p ―Mì ti̱ kì ꞌse̱‑isa‑ni ni̱chjin, nga mì ti̱ kì sko̱óña kjoa̱‑ni.
\v 7 Nga jè ni̱chjin ꞌkia̱ nga ki̱ìꞌtsia̱ jè ìkja̱li̱ ra ma‑ni ito nga si̱ìkjindáya jè chrjoo̱‑la̱, ꞌkia̱á ki̱tjasòn jè kjoa̱ ra tjíꞌma‑la̱ Nainá koni ꞌsín ijye kitsò jñà xi̱ta̱ chi̱ꞌnda‑la̱ ra kiìchja̱ ngajo‑la̱.
\p
\v 8 Jè jta̱ ra a̱sa kíꞌnchrè‑la̱ nga ꞌsa̱ ítjòn ra ngajmi inchrabà‑ni, india kiìchja̱‑isa‑na nga kitsò‑na:
\p ―ꞌTin, ko̱ chjíbí jè xa̱jo̱n i̱tsé ra kjijna tsijen ra kjiya tsja jè ìkja̱li̱ ra síjna kixi̱ ya̱ a̱sòn ndáchikon ko̱ ya̱ a̱sòn nangi.
\p
\v 9 Kiì káse̱nꞌta‑la̱ ꞌa̱n jè ìkja̱li̱ ko̱ a̱kjòn kíxin‑la̱:
\p ―ꞌTi̱‑ná jè xa̱jo̱n i̱tsé ra tjaꞌchí.
\p Ko̱ jè ìkja̱li̱ kitsó‑na:
\p ―Chjíbí ko̱ chji̱ni̱i; ya̱ a̱ꞌa ndsa̱ꞌbì, ixií ka̱ma‑li koni tsa tsjén; tanga ya̱ a̱ya i̱ndsi̱ꞌbì, tsjayaá ko̱ma.
\p
\v 10 Ískábé‑náa̱ jè xa̱jo̱n i̱tsé ra tsáꞌya jè ìkja̱li̱; ꞌkia̱ nga ijye ískíne̱, ixiꞌá kiꞌsìn ya̱ ndsa̱ꞌbaa̱ koni tsa tsjén, tanga ya̱ a̱ya i̱ndsi̱ꞌbà tsjayaá kjomà.
\v 11 ꞌKia̱á kiꞌmì-isa‑na:
\p ―Machjeén‑ní nga india ki̱nákjoa̱ nga̱jo̱‑la̱ Nainá nga kóꞌsín ko̱maꞌtin jñà xi̱ta̱ ra kjìn na̱xi̱ndá nchrabá‑ni ko̱ ra kjìn nangi chja̱‑ni ko̱ ra kjìn sko̱ya tjín‑ni ꞌén ra chja̱, ko̱ kóꞌsín ko̱maꞌtin ra xi̱ta̱xá títjòn títsa̱jna.
\c 11
\s Jñà xi̱ta̱ ra jò ma‑ni ra tsjá ꞌén‑la̱
\p
\v 1 ꞌKia̱á kiꞌtsì jngo‑na yá ra ma machi̱ba̱‑ni ra koni ꞌki ndi̱jyi ꞌki, ko̱ kiꞌmì‑na:
\p ―Ti̱sítji̱in ko̱ ti̱chi̱bi̱i jè i̱ngo̱ ítjòn‑la̱ Nainá ko̱ jè ímixa̱ tsje‑la̱ ko̱ tìxki̱yi kótjín ma‑ni jñà ra ya̱ bexkón Nainá.
\v 2 Tanga kì tà chjàn nìchi̱bi̱i jè ndi̱tsin‑la̱ i̱ngo̱. Jè i̱ꞌnde ra̱kìi̱, jñá itjábé‑la̱ jñà ra taxki̱ xi̱ta̱ ra mì tsa xi̱ta̱ judío. Ko̱ jñà xi̱ta̱ kìi̱, ichán‑jò sá ko̱tèxomasòn jè na̱xi̱ndá Jerusalén ra i̱ꞌnde tsje‑la̱ Nainá.
\v 3 Ko̱ sikásén‑náa̱ jñà xi̱ta̱‑na̱ ra jò ma‑ni ra tsjá ꞌén ra a̱ꞌta tsa̱ꞌa̱n nga jngo jmi ko̱ jò sindo̱ ko̱ jàn‑kan ni̱chjin ki̱chja̱ya; ko̱ jñà nikje ra kjóya, nikje naxá kjòn [mé‑ni ko̱kòn chi̱ya‑ni jè kjo̱ba ra ꞌse̱].
\p
\v 4 Jñà ngajò xi̱ta̱ ra tsjá ꞌén, jñá‑ní ngajò yá olivo ko̱ ngajò ki̱cha̱ candelero ra i̱ncha kixi̱ ya̱ ngixko̱n Nainá ra batéxoma‑la̱ i̱sàꞌnde.
\v 5 Tsa yá ra mejèn‑la̱ nga si̱ìkiꞌon jñà xi̱ta̱ kìi̱, niꞌí bachrje tsaꞌba ra jngó‑kjá india kjón baká jñà xi̱ta̱ kondra̱‑la̱, ko̱ ꞌkoa̱á ꞌsín ki̱yá ni̱ꞌsín ta yá ra mejèn‑la̱ si̱ìkiꞌon.
\v 6 Jñà xi̱ta̱ kìi̱, tjín‑la̱ ngaꞌñó nga ma ki̱ìchjà‑la̱ jè ngajmi mé‑ni nga mì ti̱ kì ꞌkoa̱‑ni jtsí jñà ni̱chjin ꞌkia̱ nga ki̱chja̱ya; ti̱ꞌkoa̱á tjín‑la̱ ngaꞌñó a̱ꞌta ꞌtse̱ nandá nga ma‑la̱ jní ꞌsi̱in; ko̱ tjín‑la̱ ngaꞌñó nga kjìn sko̱ya kjo̱hiꞌin tsjá‑la̱ jñà xi̱ta̱ i̱sàꞌnde; ko̱maá‑la̱ ko̱ꞌsín ꞌsi̱in ni̱ꞌsín ta kótjín ꞌka̱ mejèn‑la̱.
\v 7 Ko̱ jñà xi̱ta̱ kìi̱, ꞌkia̱ nga ijye tsjá ꞌén‑la̱, jè cho̱ ra ꞌñó ꞌcho ꞌkioo̱ ra ya̱ tíbitjomijìn‑ni ya̱ nga̱jo̱ na̱tja̱n, ska̱jànko̱‑ní ko̱ si̱ìkijne‑la̱, ko̱ ki̱yá ngajò xi̱ta̱ kìi̱.
\v 8 Jñà ijo‑la̱ xi̱ta̱ kìi̱, ya̱á si̱hijyo masen ya̱ ndi̱tsi̱n‑la̱ jè na̱xi̱ndá‑tjòn ya̱ ñánda̱ nga kisiꞌta krò jè Na̱ꞌín‑ná; jè ꞌí‑la̱ na̱xi̱ndá‑tjòn ra̱kìi̱, ꞌkoa̱á ꞌsín ngoya‑la̱ koni tsa jè Sodoma ko̱ jè Egipto.
\v 9 Ko̱ jñà xi̱ta̱‑la̱ na̱xi̱ndá ra tjín i̱sàꞌnde, ko̱ ngaꞌtsì tje̱‑la̱ xi̱ta̱ ra tjín, ko̱ xi̱ta̱ ra chja̱ ngaꞌtsì ꞌén ra tjín, ko̱ xi̱ta̱ ra ya̱ i̱ꞌnde‑la̱ ngaꞌtsì nangi ra tjín i̱sàꞌnde, jàn ni̱chjin masen ta sko̱òtsíjen‑jnó jñà ijo‑la̱ miꞌken; ko̱ mì kì tsjáꞌnde nga si̱iꞌnde.
\v 10 Jñà xi̱ta̱ ra tjín ya̱ i̱sàꞌnde, ꞌñó je ꞌsí ki̱ìjna, nga̱ ijyeé ꞌken jñà xi̱ta̱ kìi̱; skanda si̱ìkasén kañá‑la̱ tsajmì jñà xákjén; kií ko̱ꞌsín ꞌsi̱n‑ni nga̱ tse kjo̱hiꞌin isìkjiín jñà xi̱ta̱ i̱sàꞌnde a̱ꞌta ꞌtse̱ xi̱ta̱ kìi̱ ra kiìchja̱ ngajo‑la̱ Nainá.
\v 11 ꞌKia̱ nga ijye tsato ra jàn ni̱chjin masen, jè Nainá isíkítsa̱jnakon india‑ni inìma̱‑la̱ nga jaáya‑ila̱, a̱kjòn tsincha kixi̱ india‑ni; ngaꞌtsì xi̱ta̱ ra kijtse ꞌñó kitsakjòn.
\v 12 Ngajò jñà xi̱ta̱ kìi̱, kiíꞌnchré jngo‑la̱ jta̱ ra ꞌñó kiìchja̱ ra ya̱ ngajmi inchrabà‑ni ra kitsò‑la̱:
\p ―Nchrabámijiòn ya̱ i̱jndíi̱.
\p A̱kjòn kijìmijìn ya̱ a̱jin ifi ya̱ ján ngajmi, ko̱ kijtse‑ní ngaꞌtsì jñà ra xi̱ta̱ kondra̱‑la̱ ma.
\v 13 Ti̱ꞌkia̱á‑ni ꞌji jngo chón ra ꞌñó jchán ꞌtsa; jè ra te‑ya ma‑ni kóhoꞌki na̱xi̱ndá, jngo‑yá ixojen; ko̱ ito jmi xi̱ta̱ ꞌken ra ta jè kjoa̱ ꞌtse̱ chón; ko̱ jñà xi̱ta̱ ra tsangì‑ni, taxki̱ ꞌñó itsakjòn, a̱kjòn kiìchja̱ꞌta‑la̱ Nainá ra tíjna ngajmi nga jeya isíkíjna.
\p
\v 14 Ijyeé tsato jè kjo̱hiꞌin ra ma‑ni jò, jè ra bato ꞌñó ton kjomàꞌtin jñà xi̱ta̱; tanga ijyeé nchrabá ndi̱to̱n jè ra ma‑ni jàn.
\s ꞌKia̱ nga jane jè chrjo ra ma‑ni ito
\p
\v 15 Jè ìkja̱li̱ ra ma‑ni ito isikjiꞌndá jè chrjoo̱‑la̱ ko̱ kjín jchán jta̱ inaꞌyá‑la̱ ya̱ ngajmi ra ꞌñó kiìchja̱ nga kitsò:
\q Jñà kjo̱téxoma ra tjín ya̱ i̱sàꞌnde
\q ijyeé ꞌtse̱é jè Na̱ꞌín‑ná ra batéxoma‑ná
\q ko̱ jè Cristo ra jè isìkasén;
\q ko̱ jè ko̱tèxoma skanda ta mé ni̱chjin‑nioo̱.
\m
\v 16 Jñà xi̱ta̱ jchínga ra kahíjòn ma‑ni ra ya̱ títsa̱nè íxile̱ ya̱ ngixko̱n Nainá, tsikitsa̱jna-niña‑ní nga tsinchaxkóꞌnchi nga kijtsexkón Nainá,
\v 17 kitsò:
\q ꞌKoa̱á ꞌsín ꞌmì‑laji̱n Na̱ꞌìn ra Nainá ꞌmì‑li nga tse kjo̱nda kataꞌse‑li,
\q nga ta ji̱ ta̱ jngo‑ní ra bato tse ngaꞌñó tjín‑li;
\q ji̱ ra tijni skanda ꞌndi̱ ꞌndi̱
\q ko̱ ra tijna‑ni skanda kjoꞌtsia̱,
\q [ko̱ ji̱ ra ꞌsa̱ kjíꞌi̱ india‑ni];
\q nga̱ ijyeé kachjíbí jè ngaꞌñó ra tjín‑li;
\q ko̱ ijyeé kabiꞌtsi̱i nga ji̱ ko̱te̱xomi.
\q
\v 18 Ngaꞌtsì jñà ra taxki̱ xi̱ta̱ ra mì tsa xi̱ta̱ judío, ijyeé kjojti‑la̱;
\q tanga ijyeé ijchó ni̱chjin‑la̱ nga ꞌjíi̱ki̱i jè kjo̱jti‑li nga ꞌki̱i kjo̱hiꞌin,
\q ko̱ jè ni̱chjin nga kíndajín‑la̱ jñà xi̱ta̱ ra ijye ꞌken,
\q ko̱ jè ni̱chjin nga ꞌki̱‑la̱ jè kjo̱tjò ra bakèn‑la̱ jñà xi̱ta̱ chi̱ꞌnda‑li ra kiìchja̱ ngajo‑li
\q ko̱ jñà ra xi̱ta̱‑la̱ Nainá
\q ko̱ ngaꞌtsì jñà ra bexkón‑li,
\q ngaꞌtsì ra i̱tsíñá kjòn ko̱ ngaꞌtsì jñà ra jchínga kjòn;
\q ko̱ jè ni̱chjin nga si̱kjehesìn jñà xi̱ta̱ ra ma‑la̱ síkjehesòn xi̱ta̱ i̱sàꞌnde.
\p
\v 19 Ko̱ itjáꞌxa̱á jè i̱ꞌnde tsje‑la̱ Nainá ra tíjna ya̱ ján ngajmi; ya̱ a̱ya i̱ꞌnde tsje‑la̱ tsatsíjen‑ni jè kàxa̱ ra tsikíndajín‑ni kjoa̱ jè Nainá ko̱ jñà xi̱ta̱; a̱kjòn ꞌñó jate niꞌí ꞌcho̱n, ko̱ kjín jta̱ inaꞌyá‑la̱, ko̱ ꞌñó kitsin ꞌcho̱n, ko̱ ꞌtsa chón ti̱ꞌkoa̱á ꞌtsa jtsí na̱jo̱ ra ꞌñó tsiña kjòn.
\c 12
\s Jè chjo̱ón ko̱ jè ye̱
\p
\v 1 Ya̱ ján ngajmi jngo kjo̱xkón tsatsíjen; jngo chjo̱ón tsatsíjen ra tjìkótjìjno tsáꞌbí koni tsa tjìkótjìjno jngo nikje ko̱ jè sá ya̱á tíjnangi ya̱ ndsa̱ko̱ ko̱ jngo corona tjíꞌa sko̱ ra tejò nitse tjíꞌta‑la̱.
\v 2 Jè chjo̱ón ra̱kìi̱, iꞌndí tjíhiꞌma‑la̱; ko̱ ꞌñó jchán tíkjindáyako̱ i̱ndsi̱ꞌba̱ nga títsin iꞌndí‑la̱ ko̱ tseé kjo̱hiꞌin tísíkjiín.
\v 3 Ya̱ ján ngajmi, ìjngo kjo̱xkón tsatsíjen‑isa: jngo ye̱ ra ꞌñó je ꞌki tsatsíjen ra inì ꞌki, ko̱ ito ma‑ni sko̱; ko̱ te ma‑ni jñà nchra̱já‑la̱, ko̱ jngó jngó corona ra i̱tsíñá kjòn tjíꞌa nga jngó jngó sko̱.
\v 4 Jè ndiꞌtsin ye̱, jngo jtín nitse tsikíꞌndo̱fe jè ra jàn jtín ta ngaꞌtsì jñà nitse ra tjín ya̱ ján ngajmi; a̱kjòn ya̱á tsikítsajo ya̱ a̱ꞌta nangi. Jè ye̱ ya̱á tsasijnaꞌtà‑la̱ jè chjo̱ón ra mejèn jtsín iꞌndí‑la̱, mé‑ni nga jè ski̱ne̱‑ni jè iꞌndí‑la̱ chjo̱ón ꞌkia̱ nga ijye jtsín.
\v 5 Jè chjo̱ón, jngo iꞌndí ꞌxi̱n kitsin‑la̱ ra ko̱ꞌsín ko̱tèxoma‑la̱ ngaꞌtsì na̱xi̱ndá ra tjín i̱sàꞌnde koni jngo xi̱ta̱ ra kjiya tsja jngo ki̱cha̱ ra koni ꞌki xka̱hijnchra ꞌki nga ki̱ìnè‑la̱ kjo̱hiꞌin xi̱ta̱ ra mì kì ꞌnchréhijon‑la̱. Ngi ko̱ó kjo̱hiꞌin ko̱tèxoma‑la̱ ngaꞌtsì na̱xi̱ndá ra tjín. Tanga ta ndi̱to̱ón itjaꞌán‑la̱ jè iꞌndí‑la̱ chjo̱ón ra̱kìi̱; ko̱ ya̱á inikasén ya̱ ján ngajmi ya̱ ñánda̱ nga tíjna jè Nainá nga tíbatéxoma.
\v 6 Jè chjo̱ón, tsanga‑ní; ya̱á kijì ya̱ i̱ꞌnde a̱ꞌta xìn ñánda̱ nangi kixì, ya̱ ñánda̱ nga Nainá ijye tsikíjnanda jngo‑la̱ i̱ꞌnde, mé‑ni nga ya̱ kataꞌbì‑la̱ tsajmì ra ski̱ne̱ ra jngo jmi ko̱ jò sindo̱ ko̱ jàn‑kan ni̱chjin ya̱ kíjna.
\p
\v 7 Ra ijye kjomà a̱skan‑nioo̱, ya̱ ján ngajmi, kjo̱jchán kiꞌse. Jè ìkja̱li̱ ítjòn ra ꞌmì Miguel ko̱ jñà ìkja̱li̱‑la̱, iskajàn‑ko̱ò jè ye̱ ra ꞌñó je ꞌkioo̱. Jè ye̱ ra ꞌñó je ꞌkioo̱, ko̱ jñà ìkja̱li̱ ra tjín‑la̱ ra jè, ni̱ꞌsín ꞌñó iskajàn‑ko̱ jñà ìkja̱li̱‑la̱ Nainá,
\v 8 mì kì ma isikijne‑la̱, ko̱ mì ti̱ kì mé i̱ꞌnde kiꞌse‑la̱ ya̱ ján ngajmi.
\v 9 ꞌKoa̱á ꞌsín kjomà‑ni nga itjokàjin ya̱ ngajmi jè ye̱ jchá ra ꞌmì: Xi̱ta̱‑ni̱í, ko̱ ra ꞌmì: Xi̱ta̱ Kondra̱, ra konda̱cha̱‑la̱ ngaꞌtsì jñà xi̱ta̱ i̱sàꞌnde. Ya̱á inìkàtje̱n‑ngi ya̱ a̱ꞌta nangi ko̱ jñà ìkja̱li̱ ra tjín‑la̱.
\p
\v 10 Kíꞌnchré jngo‑la̱ jta̱ ya̱ ján ngajmi ra ꞌñó kiìchja̱ nga kitsò:
\p ―ꞌNdi̱ ꞌndi̱, ijyeé ijchó ni̱chjin nga jè Nainá si̱ìkítsa̱hijyondi̱í xi̱ta̱ xàngie̱é, ñánda̱ nga jè Nainá ko̱kòn ngaꞌñó‑la̱ koni ꞌsín nga jè batéxoma ko̱ jè kjo̱téxoma ra tjín‑la̱ jè Cristo [ra jè isìkasén]. Nga̱ ijyeé kinìkàtje̱n‑ngi jè ra ko̱ ni̱chjin ko̱ ni̱tje̱n tsakánè‑la̱ ꞌén ndiso jñà xi̱ta̱ xàngie̱é ya̱ ngixko̱n Nainá.
\v 11 Jñà xi̱ta̱ xàngie̱é, ngi ko̱ó ngaꞌñó ra tjín‑la̱ jè jní ra tsikíxten jè Forrè isikijne‑ila̱, ko̱ ngi ko̱ó jñà ꞌén ra kitsjà a̱ꞌta ꞌtse̱ Nainá, ko̱ mì kì kitsakjòn‑la̱ ni̱ꞌsín kjo̱biya.
\v 12 Tsja kataꞌse‑la̱ jè ngajmi ko̱ jñà ra ya̱ títsa̱jna. Tanga, i̱ma̱‑ró‑no jiòn ra ya̱ titsa̱jna ya̱ a̱ꞌta nangi ko̱ ya̱ a̱jin ndáchikon nga̱ jè xi̱ta̱‑ni̱í ijye ya̱ ijchòkajen‑nè‑no ko̱ ꞌñó jti tjín‑la̱; nga̱ be‑ní nga ta chibaá ni̱chjin kíjna‑isa.
\p
\v 13 ꞌKia̱ nga ijye kíjtsee̱ jè ye̱ ra ꞌñó je ꞌki nga ijye inìkàtje̱n‑ngi ya̱ a̱ꞌta nangi, tsahatji̱ngií‑la̱ jè chjo̱ón ra kitsin‑la̱ iꞌndí ꞌxi̱n.
\v 14 Tanga jè chjo̱ón, jò na̱jngá‑la̱ xija̱ tsiꞌkì‑la̱ ra ꞌñó iꞌi kjòn mé‑ni nga kjomà itjotjén‑ni nga tsanga‑la̱ jè ye̱ ra ꞌñó je ꞌkioo̱; ya̱á kijì ya̱ i̱ꞌnde a̱ꞌta xìn ñánda̱ nga nangi kixì; jàn nó masen ya̱ tsikijna ñánda̱ nga tjínè‑la̱ nga ko̱kinda̱ ko̱ nga ꞌki̱‑la̱ tsajmì ra ski̱ne̱.
\v 15 Jè ye̱ ra je ꞌkioo̱, nandá tsachrje tsaꞌba, ra ya̱ tsachrjetji̱ngi‑la̱ jè chjo̱ón, mé‑ni nga jè ndáje̱ ra tsachrje tsaꞌba ko̱maá i̱ko̱ chrjoba‑ni jè chjo̱ón.
\v 16 Tanga jé nangi tsasìko̱ jè chjo̱ón; itjáꞌxa̱jiín jè nangi, ko̱ ya̱á ꞌjahaꞌsen jè ndáje̱ ra tsachrje tsaꞌba jè ye̱ ra ꞌñó je ꞌkioo̱.
\v 17 ꞌÑó jti kjomà‑isa‑la̱ jè ye̱ a̱ꞌta ꞌtse̱ jè chjo̱ón nga mì kì kjomà isìko̱; a̱kjòn ya̱á kijìtji̱ngi‑la̱ jñà xi̱ta̱ ra ya̱ chja̱‑ni tje̱‑la̱ chjo̱ón ra̱kìi̱ nga kiì kjaán‑ko̱ ngaꞌtsì xi̱ta̱ ra síhitjasòn jñà kjo̱téxoma‑la̱ Nainá ko̱ jñà ra nda tsjá ꞌén‑la̱ a̱ꞌta ꞌtse̱ Cristo.
\v 18 Ko̱ jè ye̱ ya̱á tsikijnajin chrjoo̱ ra tjín ya̱ a̱ndi ndáchikon.
\c 13
\s Jò cho̱ iꞌi ra ꞌcho kjòn
\p
\v 1 Kíjtse‑náa̱ nga jngo cho̱ ra ꞌñó ꞌcho ꞌkioo̱ itjomijìn‑jin‑ni ya̱ a̱jin ndáchikon ra ito ma‑ni sko̱ ko̱ te ma‑ni nchra̱já‑la̱ ko̱ jngó jngó corona ra i̱tsíñá kjòn tjíꞌa nga jngó jngó nchra̱já‑la̱; ko̱ ra jngó jngó sko̱ tjíꞌta jngo ꞌí ra chja̱jno‑la̱ Nainá.
\v 2 Jè cho̱ ra ꞌñó ꞌcho ꞌkioo̱ ra kíjtsee̱, ꞌkoa̱á ꞌki koni kjòn jñà xa indò; ko̱ jñà ndsa̱ko̱, ꞌkoa̱á kjòn koni jñà ndsa̱ko̱ cho̱ oso; ko̱ jè tsaꞌba, ꞌkoa̱á ꞌki koni ꞌsín kjòn tsaꞌba xa; jè ngaꞌñó‑la̱ jè ye̱ ra ꞌñó je ꞌkioo̱ ko̱ jè i̱ꞌnde‑la̱ ñánda̱ nga tíbatéxoma, ya̱á kisìnga̱tsja jè cho̱ ra ꞌñó ꞌcho ꞌkioo̱ ra itjojin‑ni ndáchikon. Ko̱ ꞌñó tse kjo̱téxoma kitsjà‑la̱.
\v 3 ꞌÑó tse kiti jngo sko̱ jè cho̱ ra ꞌñó ꞌcho ꞌkioo̱; ꞌkoa̱á ꞌki koni tsa ijye ki̱yá; tanga ya̱ sko̱ ñánda̱ nga ꞌñó tse kiti‑la̱, kjondaá‑ni. Ngaꞌtsì xi̱ta̱ ra tjín nga tjíjtsa i̱sàꞌnde ngi ta kjóxkón‑la̱ jè kjoa̱ ra kjomà, ko̱ ya̱á kiìꞌta‑la̱ jè cho̱ ra ꞌñó ꞌcho ꞌkioo̱.
\v 4 Ngaꞌtsì xi̱ta̱ kijtsexkón‑ní jè ye̱ ra kitsjà‑la̱ kjo̱téxoma ra tísíchjeén jè cho̱ ra ꞌñó ꞌcho ꞌkioo̱, ko̱ jñà xi̱ta̱ ti̱ꞌkoa̱á kijtsexkón‑te jè cho̱ ra ꞌñó ꞌcho ꞌkioo̱; a̱kjòn kitsò:
\p ―Tsìn jngo‑isa koni jè cho̱ ra ꞌñó ꞌcho ꞌkioo̱; ko̱ ni̱yá ra chíkjoa̱‑la̱ nga ska̱jàn‑ko̱.
\p
\v 5 Jè cho̱ ra ꞌñó ꞌcho ꞌkioo̱ kiꞌtsìꞌndeé‑la̱ nga katachja̱ jñà ꞌén ra jè ꞌnga síkíjna ijo‑la̱ nga chja̱jno‑la̱ Nainá. Ti̱ꞌkoa̱á kiꞌtsìꞌndeé‑la̱ nga ichán jò sá katatéxoma.
\v 6 Ko̱ ꞌkoa̱á ꞌsín kiꞌsìn; kiìchja̱jno‑la̱ Nainá, ko̱ kiìchja̱jno‑la̱ jè ꞌí‑la̱ Nainá ko̱ jè Niꞌya Tsje‑la̱ ko̱ kiìchja̱jno‑te‑la̱ jñà xi̱ta̱ ra ya̱ títsa̱jna ngajmi.
\v 7 Ko̱ kiꞌtsìꞌndeé‑la̱ nga iskajàn‑ko̱ jñà xi̱ta̱‑la̱ Nainá, ko̱ skanda isikijneé‑la̱. Ko̱ ti̱ꞌkoa̱á kiꞌtsì‑la̱ kjo̱téxoma a̱ꞌta ꞌtse̱ ngaꞌtsì tje̱‑la̱ xi̱ta̱ ra tjín, ko̱ a̱ꞌta ꞌtse̱ ngaꞌtsì na̱xi̱ndá ra tjín, ko̱ a̱ꞌta ꞌtse̱ xi̱ta̱ ra chja̱ ngaꞌtsì ꞌén ra tjín, ko̱ a̱ꞌta ꞌtse̱ ngaꞌtsì na̱xi̱ndá ra chja̱‑ni nga jngó jngó nangi ra tjín i̱sàꞌnde.
\v 8 Ko̱ ngaꞌtsì xi̱ta̱ ra tjín nga tíjngo i̱sàꞌnde, jè cho̱ ra ꞌñó ꞌcho ꞌkioo̱, ske̱xkón, jñà ra mì kì tsa ya̱ tjíꞌta ꞌí‑la̱ skanda nga ti̱ꞌsa̱ tjàꞌtsin‑la̱ i̱sàꞌnde jè xa̱jo̱n ꞌtse̱ kjo̱binachon ra ꞌtse̱ Forrè‑la̱ Nainá ra iniꞌken.
\p
\v 9 Nda katafìya‑la̱ ngaꞌtsì xi̱ta̱:
\v 10 Jñà ra ijye ko̱ꞌsín kiꞌtsì‑la̱ nga nda̱yá ki̱ji̱, xá nda̱yá ki̱ji̱‑ni. Ko̱ jñà ra ijye ko̱ꞌsín kiꞌtsì‑la̱ nga ki̱cha̱ ndajò ki̱yá‑ni, xá ki̱cha̱ ndajò ki̱yá‑ni. Ya̱á i̱jndíi̱ machjeén nga nda katachíkjoa̱ko̱‑la̱ ko̱ kixi̱ katitsa̱hijyo kiꞌta jñà ra xi̱ta̱‑la̱ Nainá.
\p
\v 11 Ra kjomà a̱skan‑nioo̱, ìjngo cho̱ ra ꞌñó ꞌcho ꞌkioo̱ kíjtsee̱, ra ya̱ itjomijìn‑ni ya̱ a̱jin nangi; jò ma‑ni nchra̱já‑la̱ ra ko̱ꞌsín kjòn koni kjòn nchra̱já‑la̱ forrè, ko̱ ꞌkoa̱á ꞌsín chja̱ koni jngo ye̱ ra ꞌñó je ꞌki.
\v 12 ꞌKoa̱á ꞌsín tjín‑la̱ kjo̱téxoma koni jè cho̱ ra ꞌñó ꞌcho ꞌkioo̱ ra tíjna ítjòn nga ya̱ síjna ya̱ ngixko̱n. Ko̱ jé bínè‑la̱ ngaꞌtsì xi̱ta̱ ra tjín nga tíjngo i̱sàꞌnde mé‑ni nga jè katabexkón‑ni jè cho̱ ra ꞌñó ꞌcho ꞌkioo̱ ra tíjna ítjòn ra kjonda‑ni ñánda̱ ꞌñó tse kiti jngo sko̱.
\v 13 Ti̱ꞌkoa̱á kiꞌsìn kjo̱xkón ra ꞌñó iꞌin tjín, skanda kjamà‑la̱ isikjinchrabájen‑ni niꞌí ya̱ ján ngajmi nga iskatsajo skanda ya̱ a̱ꞌta nangi ra kijtse ngaꞌtsì xi̱ta̱.
\v 14 Ko̱ iskonda̱cha̱á‑la̱ ngaꞌtsì xi̱ta̱ ra tjín ya̱ i̱sàꞌnde, ta nga̱tjì‑la̱ jñà kjo̱xkón ra kiꞌtsìꞌnde‑la̱ nga kiꞌsìn ya̱ ngixko̱n cho̱ ra ꞌñó ꞌcho ꞌkioo̱ ra tíjna ítjòn; tsikíꞌtin jñà xi̱ta̱ mé‑ni nga kátínda jngo xkósòn‑la̱ jè cho̱ ra tíjna ítjòn ra ni̱ꞌsín ki̱cha̱ ndajò kiti jngo‑ni sko̱, tanga jaáya‑la̱ ko̱ tíjnakon‑ní.
\v 15 Jè cho̱ ra ꞌñó ꞌcho ꞌkioo̱ ra ma‑ni jò, kiꞌtsí‑la̱ ngaꞌñó nga isíkíjnakon jè xkósòn ra isinda mé‑ni ma‑la̱ katachja̱‑ni ko̱ nga katasíꞌken ngaꞌtsì xi̱ta̱ ra mì kì ske̱xkón.
\v 16 ꞌKoa̱á ꞌsín tsikínè‑la̱ jñà ra i̱xti ko̱ jñà ra xi̱ta̱ jchínga, jñà ra xi̱ta̱ nchi̱ná ko̱ jñà ra xi̱ta̱ i̱ma̱, jñà xi̱ta̱ ra títsa̱jnandi̱í ko̱ jñà ra chi̱ꞌnda títsa̱jnaꞌñó, mé‑ni nga katasiꞌta chi̱ba̱‑ni ya̱ tsja kixi̱ ko̱ ñá tsa ya̱ a̱tjòn tótjen‑la̱.
\v 17 Ni̱jngo xi̱ta̱ ra ma ko̱tse tsajmì, ko̱ ni̱jngo ra ma ko̱tina, tsa mì jè chi̱ba̱‑la̱ cho̱ ra kìi̱ ko̱ tsa mì jè ꞌí‑la̱ tjíꞌta chi̱ba̱‑ni, ko̱ tsa mì tjíꞌta‑la̱ jè número ꞌtse̱ ꞌí‑la̱.
\v 18 I̱í i̱jndíi̱ machjeén jè kjo̱bítsjen ra chji̱ne̱; jè ra nda machi̱ya‑la̱, katabíxki̱yaá jè número‑la̱ cho̱ ra ꞌñó ꞌcho ꞌkioo̱; ko̱ jè número ra̱kìi̱, jngo número ra jcha̱xkon‑la̱ jngo xi̱ta̱; jè número: ra jon sindo̱ ko̱ jàn‑kan ko̱ jon, (666).
\c 14
\s Jè Forrè‑la̱ Nainá ko̱ jñà xi̱ta̱ ra jngo sindo̱ ko̱ ichán ijòn jmi ma‑nì
\p
\v 1 Ra kjomà a̱skan‑nioo̱, ꞌkia̱ nga ískotsíjee̱n, kíjtse‑náa̱ jè Forrè nga síjnasòn ya̱ nindo ra ꞌmì Sión nga i̱jnchaꞌta‑la̱ jñà xi̱ta̱ ra jngo sindo̱ ko̱ ichán ijòn jmi ma‑ni nga tjíꞌta ya̱ tótjen‑la̱ xi̱ta̱ kìi̱ jè ꞌí‑la̱ Forrè Iꞌndí‑la̱ Nainá ko̱ jè ꞌí‑la̱ Na̱ꞌìn‑la̱.
\v 2 Ko̱ kíꞌnchrè‑la̱ jta̱ ra ngajmi inchrabà‑ni ra ko̱ꞌsín ꞌñó fane koni jè nandá ꞌkia̱ nga ꞌñó maje, ko̱ koni ꞌsín ma jè ꞌcho̱n ꞌkia̱ nga ꞌñó tsin; jè jta̱ ra kíꞌnchrè‑la̱, ꞌkoa̱á ꞌsín tsò koni ꞌsín naꞌyá‑la̱ ya̱ ñánda̱ nga kjìn ma‑ni xi̱ta̱ ra síkjane jñà níꞌñó ra ꞌmì arpa.
\v 3 Ko̱ jngo ꞌén xi̱tse̱ tíjnda ya̱ ngixko̱n jè ra tíjnasòn íxile̱ nga tíbatéxoma ko̱ ya̱ ngixko̱n jñà ra ijòn ma‑ni ra títsa̱jnakon ko̱ ya̱ ngixko̱n jñà xi̱ta̱ jchínga; ni̱yá ra kjomà‑la̱ kise‑isa jè ꞌén xi̱tse̱ ra̱kìi̱, ta jñá‑ní ra jngo sindo̱ ko̱ ichán ijòn jmi ma‑ni jñà ra ijye itjokàjin kjo̱hiꞌin ꞌtse̱ i̱sàꞌnde.
\v 4 Jñà xi̱ta̱ kìi̱, mì tsa íchjín tsikitsa̱jnako̱, ngi tsjeé kisíjchá ijo‑la̱. Jñà xi̱ta̱ kìi̱ ra fìtji̱ngi‑la̱ jè Forrè ni̱ꞌsín ta ñánda̱ nga fì. Jñà‑ní ra itjokàjin ítjòn kjo̱hiꞌin a̱ꞌta ꞌtse̱ xi̱ta̱ i̱sàꞌnde ko̱ jñá‑ní ra kjonga̱tsja ítjòn Nainá ko̱ jè Forrè;
\v 5 ra ni̱mé ꞌén ndiso itjo ya̱ tsaꞌba, ko̱ ni̱mé jé isakò a̱ꞌta ꞌtse̱ xi̱ta̱ kìi̱ ya̱ ngixko̱n Nainá.
\s Jñà ìkja̱li̱ ra jàn ma‑nì
\p
\v 6 Ìjngo ìkja̱li̱ kíjtsee̱ ra tsáꞌbajin i̱sén ra tsáꞌya jè ꞌén xi̱tse̱ ra nda tsò a̱ꞌta ꞌtse̱ Cristo ra tíjna skanda ta mé ni̱chjin‑nioo̱ mé‑ni nga ꞌke̱èna̱jmíya‑la̱ ngaꞌtsì xi̱ta̱ ra tjín ya̱ i̱sàꞌnde, ngaꞌtsì xi̱ta̱ ra tjín nga jngó jngó nangi, ko̱ ngaꞌtsì xi̱ta̱ tje̱‑la̱ xi̱ta̱ ra tjín, ko̱ xi̱ta̱ ra chja̱ ngaꞌtsì ꞌén ra tjín, ko̱ xi̱ta̱ ra tjín ta ngaꞌtsì na̱xi̱ndá ra tjín ya̱ i̱sàꞌnde.
\v 7 ꞌÑó chja̱ nga tsò:
\p ―Ti̱skón‑la jè Nainá ko̱ jeya ti̱kíjna, nga̱ ijyeé ijchó ni̱chjin nga ki̱ìndajín. Jcha̱xkón jè ra tsikínda ngajmi, nangi, ndáchikon ko̱ ngaꞌtsì i̱ꞌnde ñánda̱ títjo nandá.
\p
\v 8 Ìjngo ìkja̱li̱ tsatsíjen ra ꞌñó chja̱‑te nga tsò:
\p ―Ijyeé iskajen‑ngi, ijyeé iskajen‑ngi jè na̱xi̱ndá Babilonia, jè na̱xi̱ndá ra ꞌñó je ꞌki; jè ra tsakón‑ya‑la̱ xi̱ta̱ i̱sàꞌnde nga kjꞌií nainá kiìtji̱ngi‑la̱, ra ꞌkoa̱á ngoya‑la̱ koni jè kisìkaꞌchi̱‑ni xi̱ta̱ xán ꞌtse̱ kjoa̱chijngi‑la̱.
\p
\v 9 Ko̱ ìjngo ìkja̱li̱ tsatsíjen ra ma‑ni jàn, ra ꞌñó chja̱ nga tsò:
\p ―Tsa yá ra ske̱xkón jè cho̱ ra ꞌñó ꞌcho ꞌkioo̱ ko̱ tsa ske̱xkón‑te jè i̱sén‑la̱ ko̱ tsa tsjáꞌnde nga si̱ꞌta chi̱ba̱ ya̱ tótjen‑la̱ ko̱ ya̱ tsja,
\v 10 ꞌkoa̱á ꞌsín Nainá tsjá iꞌin‑te‑la̱ koni tsa skꞌí nandá xán‑la̱ uva ra ꞌya kjo̱jti‑la̱ Nainá, koni jngo xán ra tjíya chi̱tsín ra ꞌñó ꞌnga tjín‑la̱ ko̱ ra ꞌñó kjàn, ra xá ngi jè sabà Nainá tsikínda nga ko̱kòn kjo̱jti‑la̱. Tseé kjo̱hiꞌin ꞌki̱‑la̱; ngi ko̱ó niꞌí ko̱ chijo azufre ra ꞌñó tsjè títì nga ko̱to kjo̱hiꞌin ya̱ ngixko̱n ìkja̱li̱ tsje‑la̱ Nainá ko̱ ya̱ ngixko̱n Forrè.
\v 11 Jè ni̱ꞌndi̱ ꞌtse̱ kjo̱hiꞌin‑la̱, kjiꞌtá ni̱chjin nga ki̱tjo ko̱ ni̱jngo ni̱chjin nga mì kì ki̱tjo skanda ta kjiá‑nioo̱. Ko̱ ni̱kjiá ma si̱ìkjáya ni̱ꞌsín ni̱chjin ko̱ ni̱ꞌsín ni̱tje̱n jñà ra ko̱ꞌsín bexkón jè cho̱ ra̱kìi̱ ra ꞌñó ꞌcho ꞌkioo̱, ko̱ jñà ra bexkón‑te jè i̱sén‑la̱, ko̱ jñà ra kitsjáꞌnde nga isiꞌta chi̱ba̱ ra a̱ꞌta ꞌtse̱ cho̱ ra ꞌñó ꞌcho ꞌkioo̱.
\v 12 I̱í i̱jndíi̱ machjeén nga nda katachíkjoa̱‑la̱ jñà xi̱ta̱‑la̱ Nainá ra nda síhitjasòn kjo̱téxoma‑la̱ ko̱ ra nda makjiín‑la̱ ra a̱ꞌta ꞌtse̱ Jesús.
\p
\v 13 Kíꞌnchrè jngo ꞌén ra ngajmi inchrabà‑ni ra kitsò‑na:
\p ―Ko̱ꞌsín tiꞌtì xa̱jo̱n: “ꞌNdi̱ ꞌndi̱‑ni̱ ko̱ jñà ni̱chjin ra ꞌsa̱ nchrabá‑isa, mé ta̱ nda‑la̱ jñà ra ya̱ ki̱yájin koni ꞌsín makjiín‑la̱ a̱ꞌta ꞌtse̱ Na̱ꞌín‑ná.”
\p “Kixi̱í kjoa̱”, tsò jè Inìma̱ Tsje‑la̱ Nainá: “Jñà xi̱ta̱ kìi̱, si̱ìkjáyaá‑ni ngaꞌtsì xá iyí ra kiꞌsìn; ko̱ ya̱á jcha̱‑la̱ jñà kjoa̱ ra nda kiꞌsìn ya̱ a̱ꞌta nangi.”
\s ꞌKia̱ nga ko̱xkósòn xi̱ta̱ ra tjín a̱ꞌta nangi
\p
\v 14 ꞌKia̱ nga ískotsíjee̱n, jngo ifi chraba kíjtsee̱; ya̱ a̱sòn‑la̱ ifi tíjnasòn jngo ra koni ꞌki iꞌndí‑la̱ xi̱ta̱ ꞌki; jngo corona ra ngi ki̱cha̱ sinè tjíꞌa ya̱ sko̱, ko̱ jngo ki̱cha̱ tsitin tsáꞌya ra ma tisòn‑ni ijñá ra ꞌñó ijò ꞌki.
\v 15 Ìjngo ìkja̱li̱ itjo‑ni ya̱ i̱ꞌnde tsje‑la̱ Nainá, ra ꞌñó kiìchja̱‑la̱ ra tíjna ya̱ a̱sòn ifi nga kitsò‑la̱:
\p ―Tiꞌtsi̱i nga ti̱chásìn jñà tsajmì ra ijye kjójchá ko̱ tíxkí, nga̱ ijyeé ijchó chi̱ba̱‑la̱ nga ko̱xkó jñà tsajmì kìi̱, nga̱ ijyeé kjójchá ngaꞌtsì tsajmì ra tjín ya̱ a̱ꞌta nangi.
\p
\v 16 Jè ra tíjnasòn ya̱ a̱sòn ifi ꞌtsoón ki̱cha̱‑la̱ ya̱ a̱ꞌta nangi ko̱ jñà tsajmì ra tjín ya̱ a̱ꞌta nangi isinchaxkó‑ní.
\p
\v 17 Ìjngo ìkja̱li̱ itjo‑ni ya̱ i̱ꞌnde tsje‑la̱ Nainá ra tíjna ya̱ ján ngajmi ra tsáꞌya‑te jngo ki̱cha̱ tsitin ra ma tisòn‑ni ijñá ra ꞌñó ijò kji‑te.
\v 18 Ìjngo ìkja̱li̱ ra be ꞌtse̱ niꞌí itjo‑ni ya̱ ñánda̱ tíjna ímixa̱ tsje‑la̱ Nainá, ko̱ ꞌñó kiìchja̱‑la̱ jè ìkja̱li̱ ra tsáꞌya jè ki̱cha̱ tsitin ra ꞌñó ijò; kitsò‑la̱:
\p ―Tiꞌtsi̱i nga ti̱chjiín ki̱cha̱ ijò‑li nga ti̱cháꞌtì jñà to uva jñà ra tjín ya̱ a̱ꞌta nangi nga̱ ijyeé kjójchá tsje‑nì.
\p
\v 19 Jè ìkja̱li̱ ꞌtsoón jè ki̱cha̱‑la̱ ya̱ a̱ꞌta nangi. Tsateꞌtà jñà to uva; a̱kjòn ya̱á isìkatsajoyá ya̱ chitso na̱jo̱, ra ꞌya kjo̱jti‑la̱ Nainá.
\v 20 Mì tsa ya̱ a̱jin na̱xi̱ndá isinè jñà to uva; ya̱á a̱ndi‑la̱ na̱xi̱ndá‑ní nga isinè; ꞌkia̱ nga ijye isinè, jní itjo ya̱ ñánda̱ nga isinèya; ꞌñó tse tsangasòn jè jní ra ya̱ itjo; skanda ijchòtji̱ngi‑la̱ ya̱ freno ra tjíꞌa ya̱ tsaꞌba kabàyo̱, skanda jàn sindo̱ kilómetro tsangasòn.
\c 15
\s Jñà ìkja̱li̱ ra ito ma‑ni ra ito kjo̱hiꞌin ꞌjiìkó
\p
\v 1 Ìjngo kjoa̱ tsatsíjen‑na ya̱ ján ngajmi ra ꞌñó jeya tsatsíjen ko̱ ꞌñó xkón ꞌki: Ito ma‑ni ìkja̱li̱ ra ito kjo̱hiꞌin ꞌya, jñà kjo̱hiꞌin ra feheꞌta‑ni; nga̱ ya̱á si̱ikjeheꞌta‑ni jè kjo̱jti‑la̱ Nainá.
\p
\v 2 Ti̱ꞌkoa̱á kíjtseé‑te ra koni ꞌki ndáchikon ra chi̱tsín ꞌki ra tjíkójin‑ko̱ niꞌí ra títì jnga̱. Ko̱ ya̱á i̱jncha kixi̱ ya̱ a̱sòn ndáchikon ra̱kìi̱ jñà xi̱ta̱ ra ijye isikijne a̱ꞌta ꞌtse̱ cho̱ ra ꞌñó ꞌcho ꞌkioo̱, ko̱ nga isikijne‑te a̱ꞌta ꞌtse̱ xkósòn‑la̱ cho̱ ra̱kìi̱, ko̱ ni̱ mì kì kitsjáꞌnde nga isiꞌta chi̱ba̱ jè número ra ꞌtse̱ ꞌí‑la̱ cho̱ ra̱kìi̱. Ngaꞌtsì jñà xi̱ta̱ kìi̱, kjiya tsja jñà níꞌñó arpa ra Nainá kitsjà‑la̱.
\v 3 Ko̱ jè i̱nchise jè ꞌén ra kise jè Moisés ra chi̱ꞌnda‑la̱ Nainá, ko̱ jè ꞌén ra kise jè Forrè, ra tsò:
\q Na̱ꞌìn ra Nainá ꞌmì‑li, ra batoó tse ngaꞌñó tjín‑li,
\q ꞌñó jeya ko̱ ꞌñó xkón tjín ngaꞌtsì kjoa̱ ra ꞌnì.
\q Ji̱, ngi ta kjoa̱ kixi̱í ra ꞌnì, ko̱ ngi ndaá tjín ngaꞌtsì kjoa̱ ra ꞌnì,
\q ko̱ ji̱‑ní Xi̱ta̱xá ítjòn ra batéxoma‑la̱ ngaꞌtsì xi̱ta̱ i̱sàꞌnde.
\q
\v 4 ¿Yá ra mì kì jtsa̱kjòn‑li Na̱ꞌìn?
\q ¿Yá ra mì kì ske̱xkón‑li?
\q Ta̱jngo‑ní ra ji̱ nga xi̱ta̱ tsje.
\q ꞌKoa̱á ma‑ni nga ngaꞌtsì xi̱ta̱ ra tjín ya̱ i̱sàꞌnde kji̱nchrabá‑ní nga ske̱xkón‑li
\q nga̱ ijyeé tíꞌya‑la̱ jè kjoa̱kixi̱ ra ꞌnì.
\p
\v 5 ꞌKia̱ nga ijye kíjtsee̱ jñà kjoa̱ kìi̱, ískotsíjen‑náa̱ nga ya̱ ján ngajmi itjáꞌxa̱ jè i̱ꞌnde tsje‑la̱ Nainá ra tíjna ya̱ a̱ya Niꞌya Nikje ra bakón nga ya̱ tíjna Nainá.
\v 6 Jñà ìkja̱li̱ ra ito ma‑nioo̱ ra ito kjo̱hiꞌin ꞌya, itjoó ya̱ i̱ꞌnde tsje‑la̱ Nainá. Kjiya nikje nda ra ꞌñó chraba kjòn ra ꞌñó fate tsijen; ko̱ tjíkjá‑la̱ ya̱ a̱sòn inìma̱‑la̱ xìncho̱ ra ngi ki̱cha̱ sinè.
\v 7 Jngo itjojin jñà ra ijòn ma‑nioo̱ ra tjítsa̱jnakon, nga jngó jngó chi̱tsín ra ngi ki̱cha̱ sinè kitsjà‑la̱ nga jngó jngó ìkja̱li̱ ra ito ma‑nioo̱. Ko̱ jñà chi̱tsín kìi̱, ya̱á i̱jncha kjo̱hiꞌin ra ꞌya kjo̱jti‑la̱ Nainá ra tíjnakon skanda ta mé ni̱chjin‑nioo̱.
\v 8 Ya̱ a̱ya i̱ꞌnde tsje‑la̱ Nainá, ngi kitseé jè ni̱ꞌndi̱ ra ya̱ inchrabà‑ni a̱ꞌta ꞌtse̱ kjoa̱jeya‑la̱ Nainá ko̱ a̱ꞌta ꞌtse̱ ngaꞌñó‑la̱; ni̱yá ra ma ꞌjahaꞌsen ya̱ a̱ya i̱ꞌnde tsje ꞌkia̱ nga takó kjè bitjasòn kjo̱hiꞌin ra ito ma‑ni ra ꞌjiìkó jñà ìkja̱li̱ ra ito ma‑nioo̱.
\c 16
\s Chi̱tsín ra ito ma‑ni ra ꞌtse̱ kjo̱jti‑la̱ Nainá
\p
\v 1 Kíꞌnchré jngo jta̱ ra ꞌñó kiìchja̱ ra ya̱ itjo‑ni ya̱ i̱ꞌnde tsje‑la̱ Nainá, ra kitsò‑la̱ jñà ìkja̱li̱ ra ito ma‑ni:
\p ―Tangió ko̱ tìxten ya̱ a̱sòn i̱sàꞌnde jè kjo̱hiꞌin ra ꞌya kjo̱jti‑la̱ Nainá ra tjíya ya̱ chi̱tsín ra ito ma‑ni.
\p
\v 2 Kijì jngo ìkja̱li̱ ra kiì ítjòn; tsikíxten ya̱ a̱sòn i̱sàꞌnde jè ra tjíya jè chi̱tsín ra tsáꞌya; ngaꞌtsì jñà xi̱ta̱ ra tjíꞌta‑la̱ chi̱ba̱‑la̱ cho̱ ra ꞌñó ꞌcho ꞌkioo̱, ko̱ jñà ra bexkón jè i̱sén‑la̱ cho̱ ra̱kìi̱, jngo ꞌchin tsako̱‑la̱ nga tsajàjno jtsé ijo‑la̱ ra bato ꞌñó ꞌcho tsatsíjen ko̱ ra bato tse kjo̱hiꞌin kitsjá‑la̱.
\p
\v 3 Jè ìkja̱li̱ ra ma‑ni jò, ya̱á tsikíxten‑jin ya̱ a̱jin ndáchikon jè ra tjíya chi̱tsín‑la̱; jè ndáchikon ngi kjójní‑ní koni tsa jní‑la̱ xi̱ta̱ ra xá iniꞌken‑ni, ko̱ ngaꞌtsì cho̱ ra tjín ya̱ a̱jin ndáchikon ngi ꞌken ijye‑ní.
\p
\v 4 Jè ìkja̱li̱ ra ma‑ni jàn, ya̱á tsikíxten ra tjíya chi̱tsín‑la̱ ya̱ ñánda̱ nga tjín xa̱ngá nandá ko̱ ya̱ ñánda̱ nga títjo nandá; jñà nandá saba jní kjomà.
\v 5 Kíꞌnchré‑la̱ jè ìkja̱li̱ ra ꞌtse̱ nandá nga kitsò:
\p ―Ji̱ Na̱ꞌìn, kjo̱hixi̱í ra tjiꞌnì koni ꞌsín tjinìkasín kjo̱hiꞌin kìi̱ ta nga̱tjì‑la̱ kjoa̱ ra tjín i̱sàꞌnde, nga̱ xi̱ta̱ tsje‑ní ra ji̱ ko̱ ji̱í‑ní ra tijni ꞌndi̱ ꞌndi̱ ko̱ ji̱í‑ní ra tijna‑ni skanda ti̱ꞌsa̱ kjotseé.
\v 6 Nga̱ jñà xi̱ta̱ kìi̱, tsikíxten jní nga isìꞌken jñà xi̱ta̱‑li ko̱ jñà xi̱ta̱ ra kiìchja̱ ngajo‑li; ko̱ ꞌndi̱ ꞌndi̱, ꞌkoa̱á ꞌsín tjiꞌbi‑la̱ ji̱ nga jní kataꞌbi koni ꞌsín nga bakèn‑la̱.
\p
\v 7 Ti̱ꞌkoa̱á kíꞌnchré jngo‑la̱ jta̱ ra ya̱ a̱ꞌta ímixa̱ tsje‑la̱ Nainá kiìchja̱‑ni nga kitsò:
\p ―Ji̱ Na̱ꞌìn ra Nainá ꞌmì‑li, ji̱ ra bato tse ngaꞌñó tjín‑li, kixi̱í kjoa̱, jñà kjo̱hiꞌin ra tjiꞌbi‑la̱ xi̱ta̱, ngi kixi̱ tjín koni ꞌsín nga bakèn‑la̱.
\p
\v 8 Jè ìkja̱li̱ ra ma‑ni ijòn, ya̱á tsikíxten‑jnó tsáꞌbí jè ra tjíya chi̱tsín‑la̱; ko̱ jè tsáꞌbí kiꞌtsìꞌndeé‑la̱ nga jè ndabá‑la̱ ꞌñó katachjàn‑la̱ xi̱ta̱.
\v 9 Ko̱ batoó ꞌñó kichjàn‑la̱ jè ndabá‑la̱ tsáꞌbí jñà ijo‑la̱ xi̱ta̱; ko̱ jñà xi̱ta̱ kìi̱, ta isa̱á kiìchja̱jno jnchro‑la̱ Nainá ra tjín‑la̱ ngaꞌñó a̱ꞌta ꞌtse̱ kjo̱hiꞌin kìi̱; ko̱ mì kì isíkájno jé‑la̱, ko̱ ni̱ mì jeya isíkíjna Nainá.
\p
\v 10 Jè ìkja̱li̱ ra ma‑ni ꞌòn, ya̱á tsikíxten‑jnó ra tjíya chi̱tsín‑la̱ ya̱ ñánda̱ nga tíbatéxoma jè cho̱ ra ꞌñó ꞌcho ꞌkioo̱; ya̱ ñánda̱ nga tíbatéxoma, ꞌñó kjòjñò ni̱tje̱n. Jñà xi̱ta̱ ra ya̱ títsa̱jna, ngi iskinenè ndi̱je̱n‑la̱ ta nga̱tjì‑la̱ nga ajò kjomà‑la̱ ijo‑la̱ jñà kjoa̱ kìi̱.
\v 11 Takó mì kì isíkájno jé‑la̱ xi̱ta̱ kìi̱; ta isa̱á jnchro kiìchja̱jno‑la̱ Nainá ra ꞌtse̱ ngajmi ta nga̱tjì‑la̱ nga ajò kjomà‑la̱ jñà ꞌchin jtsé ra tsako̱‑la̱ ijo‑la̱.
\p
\v 12 Jè ìkja̱li̱ ra ma‑ni jon, ya̱á tsikíxten‑jín ra tjíya chi̱tsín‑la̱ ya̱ ndáje̱ ra ꞌmì Éufrates; jè nandá‑la̱ xa̱ngá jè, kixìya‑ní mé‑ni nga ma ko̱to‑ni jñà xi̱ta̱xá ítjòn ra ya̱ nchrabá‑ni ya̱ ñánda̱ nga bitjokátji‑ni tsáꞌbí.
\p
\v 13 Kíjtse‑náa̱ tsaꞌba jè ye̱ ra ꞌñó je ꞌki ko̱ ya̱ tsaꞌba jè cho̱ ra ꞌñó ꞌcho ꞌkioo̱, ko̱ ya̱ tsaꞌba jè xi̱ta̱ ra kiìchja̱ya ꞌén ndiso nga itjo jàn inìma̱ ꞌcho ra koni kjòn xke̱ kjòn.
\v 14 Jñà inìma̱ ꞌcho kìi̱, inìma̱ ꞌcho‑la̱ ni̱í‑ní; jñà ra bakón kjo̱xkón ko̱ ra fì nga bíxkóya jñà xi̱ta̱xá ítjòn ra tjín ya̱ nga tíjngo i̱sàꞌnde nga ska̱jàn jè ni̱chjin ra ijye ko̱ꞌsín tjínda‑la̱ jè Nainá ra bato tse ngaꞌñó tjín‑la̱.
\v 15 “Nda ti̱náꞌya, nga̱ ꞌkoa̱á ꞌsín kjíꞌia̱ ra ꞌa̱n koni ꞌsín ꞌfiì jngo xi̱ta̱ chijé. Mé ta̱ nda‑la̱ jè xi̱ta̱ ra ijye tíjnanda ꞌkia̱ nga ꞌa̱n ra kjíꞌia̱ ko̱ ra ijye kjijnanda nikje‑la̱; ko̱ tsa kjijna líká, jcha̱á‑la̱ kjo̱sabà‑la̱.”
\v 16 Jñà inìma̱ ꞌcho‑la̱ ni̱í, ya̱á tsikíxkóya jñà xi̱ta̱xá ítjòn ra tjín ya̱ i̱sàꞌnde ya̱ i̱ꞌnde ñánda̱ nga ꞌmì Armagedón ra ꞌén hebreo.
\p
\v 17 Jè ìkja̱li̱ ra ma‑ni ito, ya̱á tsikíxten ya̱ a̱jin i̱sén jè ra tjíya jè chi̱tsín‑la̱. Ya̱ a̱ya i̱ꞌnde tsje‑la̱ Nainá ra tíjna ján ngajmi ñánda̱ nga tíjna jè ra tíjnasòn íxile̱ nga tíbatéxoma itjo jngo jta̱ ra ꞌñó kiìchja̱ nga kitsò:
\p ―Ijyeé itjasòn.
\p
\v 18 A̱kjòn taxki̱ ꞌñó jate, ko̱ inaꞌyá‑la̱ jta̱, ko̱ kitsin ꞌcho̱n; ꞌtsa chón ra bato ꞌñó ꞌtsa; kjè sa ni̱jngo chón ra ko̱ꞌsín ta̱ ꞌñó ꞌba skanda ꞌkia̱ nga ti̱ꞌsa̱ isinda jñà xi̱ta̱ ya̱ a̱sòn i̱sàꞌnde.
\v 19 Jè na̱xi̱ndá ra ꞌñó nda ꞌyaxkon‑la̱, jàn‑ya kjomà. Ko̱ jñà na̱xi̱ndá ra chja̱‑ni jngó jngó nangi ra tjín i̱sàꞌnde, jngo kjá ixojen. Ko̱ jè na̱xi̱ndá ra ꞌmì Babilonia ra ꞌñó nda ꞌyaxkon‑la̱ mì kì isìkato jè Nainá; kitsjá‑la̱ kjo̱hiꞌin ra i̱jncha chi̱tsín ñánda̱ nga ꞌya kjo̱jti‑la̱ ra ꞌñó ajò kjomà‑la̱.
\v 20 Ngaꞌtsì nangi ra ya̱ kjihijyo ya̱ a̱jin ndáchikon, jngo kjá kichija; ko̱ jñà nindo, mì kì ti̱ kijcha‑ila̱.
\v 21 Ján ngajmi inchrabà‑ni jtsí na̱jo̱ ra iskatsanè jñà xi̱ta̱; ko̱ ꞌñó tsiña kjòn skanda tsatoó‑la ichán kilo iyí nga jngó jngó. Jñà xi̱ta̱ ꞌñó kiìchja̱jno‑la̱ Nainá ta nga̱tjì‑la̱ jè kjo̱hiꞌin ra ꞌjiìkó jtsí na̱jo̱ nga batoó tse kjo̱hiꞌin kiꞌtsì‑la̱.
\c 17
\s Kóꞌsín nga kiꞌtsi‑la̱ kjo̱hiꞌin jè chjo̱ón skáya
\p
\v 1 ꞌJií jngo jñà ìkja̱li̱ ra ito ma‑ni jñà ra ito chi̱tsín ꞌya ra ito sko̱ya kjo̱hiꞌin i̱jncha; tsakáko̱ò‑na nga kitsò‑na:
\p ―Nchrabí, kokon‑la jè kjo̱hiꞌin ra ꞌki̱‑la̱ jè chjo̱ón skáya ra ꞌñó nda ꞌyaxkon‑la̱ ra ya̱ tíjna ñánda̱ nga ꞌñó kjìn xa̱ngá nandá kjihijyo.
\v 2 Jñà xi̱ta̱xá ítjòn ra tjín ya̱ i̱sàꞌnde ya̱á isíngásòn‑ko̱ chjo̱ón skáya ra̱kìi̱ nga kjꞌií nainá kijìtji̱ngi‑la̱ ra ꞌkoa̱ ngoya‑la̱ koni tsa ya̱ kiskàjin‑ko̱ kjoa̱chijngi‑la̱ chjo̱ón skáya ra kìi̱, ko̱ ngaꞌtsì xi̱ta̱ ra tjín nga tíjngo i̱sàꞌnde jé xán ꞌtse̱ kjoa̱chijngi‑la̱ chjo̱ón ra̱kìi̱ kjoꞌchi̱‑ni.
\p
\v 3 ꞌKia̱ nga isikatsíjen jngo‑na kjoa̱ jè Inìma̱ Tsje‑la̱ Nainá, jè ìkja̱li̱ ya̱á ìko̱‑na ya̱ i̱ꞌnde a̱ꞌta xìn ñánda̱ nangi kixì. Ya̱á kíjtse jngo chjo̱ón ra tíjnakjá jngo‑la̱ cho̱ ra ꞌñó ꞌcho ꞌkioo̱ ko̱ ra inì ꞌki. Jè cho̱ ra̱kìi̱, tjín‑jno tjínꞌta ya̱ ijo‑la̱ ꞌén ra ꞌcho tsò nga chja̱jno‑la̱ Nainá; ko̱ ito ma‑ni sko̱ ko̱ te ma‑ni nchra̱já‑la̱.
\v 4 Jè chjo̱ón ra̱kìi̱, nikje chji̱ꞌndi̱ ko̱ nikje inì ꞌki ra kjiya; ki̱cha̱ siné ijàjno, ko̱ na̱jo̱ chjí ra ꞌñó nda kjòn ko̱ jè na̱jo̱ ra ꞌmì perla. Ko̱ tsáꞌya jngo chi̱tsín ra ngi ki̱cha̱ sinè ra ya̱ tjíya ngaꞌtsì kjoa̱ꞌcho‑la̱ ko̱ kjoa̱tjé ra ꞌtse̱ kjoa̱chijngi ra ꞌsín.
\v 5 Ya̱ tótjen‑la̱ tjíꞌta jngo ꞌí ra kjo̱ꞌma ra mì kì fìya‑ná mé‑ni ko̱tsò‑ni, jè ra tsò: “Jè na̱xi̱ndá je Babilonia, ra ꞌñó ꞌyaxkon‑la̱, jè ra na̱‑la̱ ma ngaꞌtsì íchjín skáya ra tjín ko̱ ngaꞌtsì kjoa̱ꞌcho ra tjín ya̱ i̱sàꞌnde.”
\v 6 Kíjtse‑náa̱ jè chjo̱ón ꞌchi̱ ra jní‑la̱ xi̱ta̱‑la̱ Nainá kjoꞌchi̱‑ni ko̱ jní‑la̱ xi̱ta̱ ra iniꞌken ra ta nga̱tjì ꞌtse̱ Jesús. Ko̱ ꞌkia̱ nga kíjtsee̱, ta ꞌkoa̱á kjomà‑na, ngi ta kjóxkón‑na.
\v 7 ꞌKia̱á kitsò‑na jè ìkja̱li̱:
\p ―¿Mé‑ni nga maxkón‑li? ꞌA̱án ko̱xín‑la kóꞌsín tsò‑ni jè kjoa̱ꞌma ra a̱ꞌta ꞌtse̱ chjo̱ón ra̱kìi̱ ko̱ a̱ꞌta ꞌtse̱ cho̱ ra ꞌñó ꞌcho ꞌki ra tíjnakjá‑la̱, jè ra ito ma‑ni sko̱ ko̱ ra te ma‑ni nchra̱já‑la̱.
\v 8 Jè cho̱ ra kàꞌyi, jè‑ní ra tíjnakon nga ti̱ꞌsa̱‑ni, tanga ijye ꞌken‑ní, ko̱ ijyeé mejèn nchrabámijìn‑ni ya̱ nga̱jo̱ na̱tja̱n nga ki̱ji̱ ya̱ ñánda̱ nga ngi ta ya̱ jchi̱ja. Jñà xi̱ta̱ i̱sàꞌnde ra mì tsa ya̱ tjíꞌta ꞌí‑la̱ ya̱ xa̱jo̱n ra ꞌtse̱ kjo̱binachon skanda ti̱ꞌkia̱‑ni nga ti̱ꞌsa̱ isinda i̱sàꞌnde, ta ko̱xkón‑la̱ ꞌkia̱ nga sko̱òtsíjen‑la̱ jè cho̱ ra ꞌñó ꞌcho ꞌkioo̱, nga jè‑ní ra tíjnakon nga ti̱ꞌsa̱‑ni, ra ijye ꞌken ko̱ ko̱tsíjen india‑ni.
\p
\v 9 ’Ya̱á i̱jndíi̱ machjeén jè kjo̱bítsjen ra chji̱ne̱ tjín. Jñà sko̱ ra ito ma‑ni, itoó nindo tsò‑ni; ko̱ jñà nindo kìi̱, ya̱á tíjnasòn jè chjo̱ón ra̱kìi̱; jñà sko̱ ra ito ma‑ni, ti̱ꞌkoa̱á ito xi̱ta̱xá ítjòn tsò‑ni.
\v 10 Ko̱ ꞌòn ma‑ni ra ijye iskajen‑ngi; jngo‑isa‑ni ra takó tíbatéxoma; jè ra ìjngo, takó kjè kì ꞌfiì; tanga ꞌkia̱ nga kjꞌi̱í, ta chibaá ni̱chjin ko̱tèxoma.
\v 11 Jè cho̱ ra ꞌñó ꞌcho ꞌki ra tíjnakon nga ti̱ꞌsa̱‑ni, tanga ijye ꞌken, jè‑ní ra ma‑ni jin xi̱ta̱xá ítjòn; ya̱á tíjnajin‑la̱ jñà ra ito ma‑ni ko̱ ya̱á tífì ñánda̱ nga ta ya̱ jchi̱ja.
\p
\v 12 ’Jñà nchra̱já ra te ma‑ni ra kàꞌyi, teé xi̱ta̱xá ítjòn tjín‑ni ra takó kjè kì bíꞌtsia̱ nga batéxoma. Tanga ta jngoó hora nga xi̱ta̱xá ko̱ma nga ta̱ña ko̱tèxoma‑kjo ko̱ jè cho̱ ra ꞌñó ꞌcho ꞌkioo̱.
\v 13 Jñà xi̱ta̱xá ítjòn kìi̱ ra te ma‑ni, ta jngoó kjo̱bítsjen tjín‑la̱ nga ya̱á si̱ìnga̱tsja jñà ngaꞌñó‑la̱ ko̱ jè kjo̱téxoma‑la̱ jè cho̱ ra ꞌñó ꞌcho ꞌkioo̱.
\v 14 Ska̱jàn‑kjo‑ko̱ó jè Forrè, ko̱ jé Forrè si̱ìkijne; nga̱ jé batéxoma‑la̱ ngaꞌtsì xi̱ta̱ ra batéxoma, ko̱ jé Xi̱ta̱xá Ítjòn‑la̱ ngaꞌtsì ra xi̱ta̱xá ítjòn títsa̱hijyo; ko̱ jñà ra ya̱ tjítsa̱hijyo‑ko̱, xá inakjoá‑ila̱, ko̱ xá itjahájin‑ni, ko̱ kixi̱í síkitjasòn‑la̱.
\p
\v 15 Kitsò-isa‑na jè ìkja̱li̱:
\p ―Jè nandá ra kàchitsíjen‑la̱ ñánda̱ nga tíjna jè chjo̱ón skáya ra̱kìi̱, na̱xi̱ndá‑ní, xi̱ta̱ kjín‑ní, jñá‑ní xi̱ta̱ ra tjín nga jngó jngó nangi ra tjín ya̱ i̱sàꞌnde, ko̱ jñá‑ní xi̱ta̱ ra chja̱ ngaꞌtsì ꞌén ra tjín ya̱ i̱sàꞌnde.
\v 16 Jñà nchra̱já ra te ma‑ni kàꞌyi ko̱ jè cho̱ ra ꞌñó ꞌcho ꞌkioo̱, ko̱jtikeé jè chjo̱ón skáya ra̱kìi̱. Ske̱ton‑ní ko̱ si̱íkájna líka̱‑nì, ski̱neé jè ijo‑la̱ ko̱ ngi ko̱ó niꞌí nga ko̱kà‑ni.
\v 17 Nga̱ jè Nainá, ꞌkoa̱á ꞌsín ijye tsikíjin ya̱ kjo̱bítsjen‑la̱ jñà xi̱ta̱ kìi̱, nga ko̱ꞌsín kataꞌsín koni ꞌsín jè Nainá iskosòn‑la̱. ꞌKoa̱á ma‑ni nga si̱ìjngoó jñà kjo̱bítsjen‑la̱ jñà xi̱ta̱ kìi̱ nga si̱ìnga̱tsja jñà kjo̱téxoma‑la̱ jè cho̱ ra ꞌñó ꞌcho ꞌkioo̱.
\v 18 Jè chjo̱ón ra kàꞌyi, jè‑ní jè na̱xi̱ndá‑je ra batéxoma‑la̱ ngaꞌtsì xi̱ta̱xá ítjòn ra tjín ya̱ i̱sàꞌnde.
\c 18
\s Kóꞌsín nga iskajen‑ngi jè na̱xi̱ndá Babilonia
\p
\v 1 Ra ijye kjomà kjoa̱ kìi̱, ìjngo ìkja̱li̱ kíjtse‑isa ra inchrabàjen‑ni ya̱ ján ngajmi ra ꞌñó tse ngaꞌñó tjín‑la̱; jè kjoa̱jeya‑la̱ ra ꞌñó jate tsatsíjen, ngi kisìhisen tíjngo ya̱ a̱ꞌta nangi.
\v 2 ꞌÑó kiìchja̱ nga kitsò:
\p ―Ijyeé iskajen‑ngi, ijyeé iskajen‑ngi jè na̱xi̱ndá‑je ra ꞌmì Babilonia; ijyeé ta i̱ꞌnde‑la̱ inìma̱ ꞌcho‑la̱ ni̱í kjamà ko̱ nga̱jo̱‑la̱ ngaꞌtsì ra inìma̱ ꞌcho ra tjé kjòn; ko̱ ya̱á títsa̱jna jñà ni̱se ra ꞌñó ꞌcho kjòn ra mì kì ma chine.
\v 3 Nga̱ ngaꞌtsì xi̱ta̱ i̱sàꞌnde, ya̱á isíngásòn‑ko̱ jè na̱xi̱ndá je ra̱kìi̱ nga kjꞌií nainá kiìtji̱ngi‑la̱ koni ꞌsín xi̱ta̱ ra kjoa̱chijngi ꞌsín, ꞌkoa̱á ngoya‑la̱ tsa ya̱ kjoꞌchi̱‑ni xi̱ta̱ jñà kjoa̱chijngi ra kiꞌse ya̱ a̱jin na̱xi̱ndá ra kìi̱. Ko̱ jñà xi̱ta̱xá títjòn ra tjín ya̱ i̱sàꞌnde, ti̱ꞌkoa̱á ya̱á kiìtji̱ngi‑te‑la̱ ra kjꞌií nainá ra tjín ya̱ na̱xi̱ndá ra̱kìi̱ koni tsa kiꞌsìn‑te kjoa̱chijngi. Ko̱ jñà xi̱ta̱ i̱sàꞌnde ra batínaya‑ni tsajmì, ya̱á kjonchi̱ná‑ni nga̱ꞌta ꞌtse̱ kjoa̱ꞌcho ra kiꞌse‑la̱ jè na̱xi̱ndá ra kìi̱.
\p
\v 4 Ìjngo jta̱ kíꞌnchre-isa‑la̱ ra ngajmi inchrabà‑ni nga kitsò:
\p ―Jiòn ra na̱xi̱ndá tsa̱ꞌa̱n, títjo̱kajion jè i̱ꞌnde ra̱kìi̱, mé‑ni nga mì ya̱ kjótsji-jé‑te‑no jè jé ra ꞌsín, ko̱ ti̱ꞌkoa̱á mé‑ni mì ya̱ ko̱ko̱‑te‑no jñà kjo̱hiꞌin ra tjábé‑la̱.
\v 5 Nga̱ jñà jé‑la̱ ijyeé ꞌñó kjotse skanda ijye tsihijin i̱ ngajmi, ko̱ jè Nainá tíꞌsín kinda̱ ngaꞌtsì kjoa̱ꞌcho ra i̱nchiꞌsín.
\v 6 Ko̱ꞌsín katamaꞌtin ngajo‑ni koni ꞌsín nga kiꞌsìn ra jè. Jò ꞌka̱ ko̱ꞌsín katamaꞌtin ngajo‑ni koni ꞌsín tjín kjoa̱ꞌcho ra kiꞌsìn. Ti̱jé‑ni chi̱tsín ra tsikíndayá xán, jò ꞌka̱ ko̱ꞌki jchá ꞌti̱ ngajo‑ila̱ koni ꞌsín jchá xán ra jè tsikínda.
\v 7 Ta nga̱tjì‑la̱ nga jeya isíkíjna ijo‑la̱ ko̱ nga isitsjako̱‑te ijo‑la̱, ko̱ꞌsín ꞌti̱‑la kjo̱hiꞌin nga katakjindáya‑ni ndáxko̱n. Nga̱ ꞌkoa̱á ꞌsín tsò ya̱ a̱jin inìma̱‑la̱: “ꞌA̱án‑ná chjo̱ón ítjòn ko̱ ꞌa̱án tíbatexóma, ko̱ mì tsa chjo̱ón jchꞌa̱n‑jiàa̱n, ko̱ ni̱jngo ni̱chjin nga kjo̱hiꞌin sikjiáa̱n.”
\v 8 ꞌKoa̱á ma‑ni nga ta jngo kjón ni̱chjin kjꞌi̱í kanè ijye kjo̱hiꞌin ra ꞌki̱‑la̱: ki̱yá xi̱ta̱‑la̱; ski̱ndaya‑ni ndáxko̱n; ko̱kjijnchrá‑la̱. Ko̱ ngi niꞌí kje̱hesko‑ni. Nga̱ batoó tjín‑la̱ ngaꞌñó jè Nainá ra ijye ko̱ꞌsín kiskosòn‑la̱ nga ko̱tjín kjo̱hiꞌin tsjá‑la̱.
\p
\v 9 Jñà xi̱ta̱xá ítjòn ra tjín ya̱ i̱sàꞌnde, ꞌñó ski̱ndayake ko̱ ꞌñó ꞌon ka̱ma‑la̱ ꞌkia̱ nga ske̱ nga tímihijiín jè ni̱ꞌndi̱‑la̱ nga títì jè na̱xi̱ndá je ra̱kìi̱ ya̱ ñánda̱ nga kijìtji̱ngi‑la̱ nainá xkósòn ra tjín ya̱ na̱xi̱ndá je ra̱kìi̱ ra ꞌkoa̱ ngoya‑la̱ koni tsa kijìtji̱ngi jngo‑la̱ chjo̱ón ra kisìko̱ kjoa̱chijngi ko̱ nga kisitsjako̱ ijo‑la̱.
\v 10 Kjiín ki̱ncha‑ni nga jtsa̱kjòn‑la̱ jè kjo̱hiꞌin ra̱kìi̱; ꞌñó ki̱chja̱ nga ki̱tso̱:
\p ―¡I̱ma̱‑ró‑ni, i̱ma̱‑ró‑ni na̱xi̱ndá je Babilonia ra ꞌñó nda kijchaxkon‑la̱, nga̱ ta jngohíjta kjón‑ní kàꞌfiìkánè‑la̱ jè kjo̱hiꞌin ra kaꞌbì‑la̱!
\p
\v 11 Jñà xi̱ta̱ ra tjín ya̱ i̱sàꞌnde ra batínaya‑ni tsajmì, ti̱ꞌkoa̱á ski̱ndayakeé‑te nga baá ꞌse̱‑la̱ nga̱ mì ti̱ yá ra ko̱tse‑ni jñà tsajmì‑la̱,
\v 12 jñà tsajmì ra ki̱cha̱ sinè, ra ki̱cha̱ chroba, ko̱ na̱jo̱ chjí ra ꞌñó nda kjòn, ko̱ ndáto̱n ra ꞌmì perla, ko̱ nikje chjí ra chroba kjòn, ko̱ ra chji̱ꞌndi̱ nájtsé kjòn, ko̱ nikje ra ngi seda ko̱ nikje ra inì kjòn, ko̱ ngaꞌtsì yá íte ra nda jne̱, ko̱ kjín ndi̱yá‑la̱ tsajmì chjí ra ngi ninda ni̱ꞌño̱ cho̱ isinda‑ni, ko̱ tsajmì ra yá akon isinda‑ni, ko̱ ki̱cha̱ bronce, ko̱ jñà ki̱cha̱ ra ꞌmì hierro, ko̱ jñà na̱jo̱ ra ꞌmì marmol;
\v 13 ko̱ jñà chrja̱ba̱‑yá canela, ngaꞌtsì tsajmì ra nda jne̱, ko̱ chrjongó nainá, ko̱ perfume ra ꞌñó nda jne̱ ra ꞌmì mirra, chrjongó ꞌtse̱ yá olivo, ko̱ xán ra ꞌtse̱ to uva, ko̱ sihìti̱, ko̱ chijo ni̱ño̱ nchra̱jín ko̱ trigo, ko̱ jñà cho̱ ra ma ꞌba ꞌchá, ko̱ forrè, ko̱ kabàyo̱, ko̱ carreta, skanda satína‑te jñà xi̱ta̱ ra chi̱ꞌnda ꞌñó síxá.
\v 14 Ki̱tso̱‑la̱:
\p ―¡Ngaꞌtsì kjoa̱ ra nda isasèn‑la̱ ijo‑li, ijyeé itjahíxìn‑li; ijyeé inichija tsji ngaꞌtsì tsajmì ra nda kjòn ra tsjachi tsiki, ko̱ ni̱ì‑ti̱‑jngo ni̱chjin sa̱kò india‑ili!
\p
\v 15 Jñà xi̱ta̱ ra tjín ya̱ i̱sàꞌnde ra batínaya tsajmì ra ya̱ kjonchi̱ná a̱ꞌta ꞌtse̱ na̱xi̱ndá ra̱kìi̱, kjiín ki̱ncha‑ni nga jtsa̱kjòn ꞌkia̱ nga ske̱ jè kjo̱hiꞌin ra̱kìi̱. ꞌÑó ski̱ndayake ko̱ baá ꞌse̱‑la̱,
\v 16 nga ki̱tso̱:
\p ―¡Mé ta̱ jé‑la̱ jè na̱xi̱ndá‑je ra ngi nikje lino chraba tsakjaya, ko̱ nikje ra chji̱ꞌndi̱ nájtsé, ko̱ ra nikje inì, ko̱ nga tsajàjno ya̱ ijo‑la̱ ra ngi ki̱cha̱ sinè, ko̱ na̱jo̱ chjí ra ꞌñó nda kjòn, ko̱ ndáto̱n ra ꞌmì perla,
\v 17 nga̱ ta̱ jngohíjta kjón‑ní kafehesòn‑ni ngaꞌtsì kjoa̱nchi̱ná ra tjín‑la̱!
\p Ngaꞌtsì xi̱ta̱ ra síxáko̱ chitso ko̱ ngaꞌtsì xi̱ta̱ ra ya̱ i̱nchifìya ya̱ chitso, ko̱ jñà xi̱ta̱ ra ya̱ síxá ya̱ a̱ya chitso ko̱ ngaꞌtsì ra ya̱ síxá ya̱ a̱jin ndáchikon, kjiín tsincha‑ni
\v 18 ꞌkia̱ nga kijtse jè ni̱ꞌndi̱‑la̱ nga títì jè na̱xi̱ndá ra̱kìi̱; ꞌñó kiìchja̱ nga kitsò:
\p ―Ni̱ kjè sa jngo na̱xi̱ndá ta nda kiꞌyaxkon‑la̱ koni jè na̱xi̱ndá ra títì ꞌndi̱‑ni̱.
\p
\v 19 Tsikíxten‑jnó chijo ya̱ sko̱ ko̱ ꞌñó ba kiꞌse‑la̱ nga iskindayake nga kitsò:
\p ―Mé ta̱ jé‑la̱ jè na̱xi̱ndá‑je ra̱kìi̱, nga̱ ngaꞌtsì ra tjín‑la̱ chitso ya̱ a̱jin ndáchikon, ndaá kjonchi̱ná‑ni a̱ꞌta ꞌtse̱ kjo̱nchi̱ná ra kiꞌse‑la̱ jè na̱xi̱ndá je ra̱kìi̱, ko̱ ꞌndi̱‑ni̱ ta jngohíjta kjón‑ní kafehesòn‑ni ngaꞌtsì kjoa̱nchi̱ná‑la̱.
\p
\v 20 Ngaꞌtsì ra titsa̱jna ján ngajmi, tsjaá kataꞌse‑no; ko̱ ngaꞌtsiò ra xi̱ta̱‑la̱ Nainá ma, ko̱ jiòn ra tsikíxáya‑no Cristo, ko̱ jiòn ra inakjoá ngajo‑la Nainá, tsja ꞌtè‑la takòn. Nga̱ ijyeé jè Nainá kàtsjáhiꞌin‑la̱ ta nga̱tjì‑la̱ ngaꞌtsì kjoa̱ ra isìko̱‑najiòn.
\p
\v 21 Jngo ìkja̱li̱ ra ꞌñó tse ngaꞌñó tjín‑la̱, jngo na̱jo̱ tse iskábé ra na̱jo̱ natsí ra litji ꞌki, a̱kjòn ya̱á isìkàtje̱n‑jin ya̱ a̱jin ndáchikon, kitsò:
\p ―Na̱xi̱ndá Babilonia ra ꞌñó nda kijchaxkon‑la̱, ꞌkoa̱á ti̱ꞌsín ꞌñó na̱nga̱ ska̱jin‑ndá ko̱ ngi jchi̱ja‑ní ko̱ mì ti̱ yá ra ske̱xkon-isa‑ni ya̱ i̱sàꞌnde.
\v 22 Ko̱ ya̱ i̱ꞌnde ra̱kìi̱, mì ti̱ kì ki̱náꞌya‑ila̱ jñà ra síkjane arpa ko̱ jñà ra síkjane chrjoo̱ i̱tsjí ko̱ jñà ra síkjane chrjoo̱ iꞌi. Ko̱ mì ti̱ yá xi̱ta̱ ꞌse̱‑ni ra ma‑la̱ si̱íxáko̱ ta mé tsajmì‑nioo̱. Ko̱ mì ti̱ kì mé na̱jo̱ molino ko̱xáko̱‑ni.
\v 23 Ni̱ì‑ti̱‑jngo niꞌí ko̱hisen‑ni ya̱ i̱ꞌnde ra̱kìi̱, ko̱ mì ti̱ yá xi̱ta̱ ki̱xan‑ni, ta nga̱tjì‑la̱ nga batoó ꞌñó nchi̱ná kinaꞌyà‑la̱ nga tíjngo i̱sàꞌnde jñà xi̱ta̱‑la̱ ra tsatìnaya‑ni tsajmì, ko̱ ta nga̱tjì‑la̱ nga jñà kjoa̱tjꞌee̱ ra kiꞌse jè na̱xi̱ndá ra̱kìi̱, tsikíndisoko̱ ngaꞌtsì na̱xi̱ndá ra tjín i̱sàꞌnde.
\v 24 Jé na̱xi̱ndá ra̱kìi̱ tjín‑la̱ jé nga kinìꞌken ko̱ nga kixaájten jní‑la̱ xi̱ta̱‑la̱ Nainá ko̱ jñà ra isìchjeén Nainá nga kiìchja̱ ngajo‑la̱, skanda ngaꞌtsì xi̱ta̱ ra kinìꞌken nga tíjngo i̱sàꞌnde.
\c 19
\s Kóꞌsín nga ꞌyaxkón ko̱ nga nitsjako̱ Nainá ya̱ ján ngajmi
\p
\v 1 ꞌKia̱ nga ijye tsato jñà kjoa̱ kìi̱, ya̱ ján ngajmi kíꞌnchré‑la̱ jta̱ ra ꞌñó jchán inaꞌyá‑la̱ koni tsa kjín jchán ma‑ni xi̱ta̱ nga kitsò:
\q ¡Aleluya! ¡Nda kataꞌyaxkón Nainá!
\q Nga̱ jè tsachrjekàjin‑ná kjo̱hiꞌin,
\q ko̱ jè‑ní ra jeya tíjna
\q ko̱ ra ꞌnga tíjna
\q ko̱ ra tse ngaꞌñó tjín‑la̱;
\q
\v 2 nga ndaá tjín ko̱ kixi̱í tjín koni ꞌsín nga bíndajín ra jè,
\q koni ꞌsín nga ijye kitsjá‑la̱ kjo̱hiꞌin jè na̱xi̱ndá je ra̱kìi̱,
\q ra isìkitsón‑jin i̱sàꞌnde nga tsakón‑la̱ xi̱ta̱ nga kjꞌií nainá kiìtji̱ngi‑la̱,
\q ꞌkoa̱á ngoya‑la̱ koni tsa tsakón‑la̱ a̱ꞌta ꞌtse̱ kjoa̱chijngi‑la̱
\q ko̱ kitsjá ngajo‑la̱ kjo̱hiꞌin
\q koni ꞌsín nga tsikíxten jní‑la̱ nga kisìꞌken jñà ra chi̱ꞌnda‑la̱ Nainá kjomà.
\p
\v 3 Ìjngo ꞌká kitsò‑isa:
\p ―¡Aleluya! ¡Nda kataꞌyaxkón Nainá! Nga̱ jè ni̱ꞌndi̱ ra tífaáꞌndi̱ ñánda̱ nga títì na̱xi̱ndá ra̱kìi̱, ꞌkoa̱á ꞌsín kjoa̱áꞌndi̱ skanda ta mé ni̱chjin‑ni.
\p
\v 4 Jñà xi̱ta̱ jchínga ra kahíjòn ma‑ni ko̱ jñà ra ijòn ma‑ni ra títsa̱jnakon, tsincha-xkóꞌnchi-niña‑ní nga kijtsexkón jè Nainá ra tíjnasòn íxile̱‑la̱ nga tíbatéxoma ko̱ kitsò:
\p ―¡Ko̱ꞌsín katama, nda kataꞌyaxkón jè Nainá! ¡Aleluya!
\p
\v 5 Jngo jta̱ itjo‑ni ya̱ ñánda̱ nga tíjna jè ra tíjnasòn íxile̱ nga tíbatéxoma ra kitsò:
\q Nda jcha̱xkón Nainá ngaꞌtsiò ra chi̱ꞌnda‑la̱ ma,
\q ko̱ íchjín ko̱ íchjá ko̱ i̱xti ko̱ iꞌndí,
\q jiòn ra ngi ko̱ó kjo̱skon‑no nga ꞌyaxkón Nainá.
\p
\v 6 Ti̱ꞌkoa̱á kíꞌnchre jtaá‑te‑la̱ ra ꞌkoa̱ ꞌsín inaꞌyá‑la̱ koni tsa kjín jchán ma‑ni xi̱ta̱ ra kiìchja̱, koni tsa faháya‑la̱ jè nandá ꞌkia̱ nga ꞌñó fane, ko̱ koni ꞌsín nga faháya‑la̱ jè ꞌcho̱n ꞌkia̱ nga ꞌñó tsin, nga i̱nchitsò:
\q ¡Aleluya!
\q ¡Nda jcha̱xkón jè Nainá ra Na̱ꞌín‑ná!
\q Nga̱ jè ra bato ꞌñó tse ngaꞌñó tjín‑la̱
\q ko̱ ijyeé jè tíbatéxoma.
\q
\v 7 Tsja ꞌké‑lá jè inìma̱‑ná
\q ko̱ si̱tsjakeé jè takén
\q ko̱ jeya si̱kíjneé ra jè,
\q nga̱ ijyeé ijchó ni̱chjin‑la̱ nga ki̱xan jè Forrè.
\q Ko̱ jè chjo̱ón‑la̱ ijyeé tíjnanda,
\q
\v 8 ko̱ ijyeé kaꞌbì‑la̱ nikje chraba ra kjónaya,
\q jngo nikje tsje ra ꞌñó chjí‑la̱ ra ngi nikje fate‑ní.
\m Jè nikje chraba ra ꞌñó chjí‑la̱ jè jngoya‑la̱ jñà kjoa̱ ra nda ꞌsín jñà xi̱ta̱‑la̱ Nainá.
\p
\v 9 Jè ìkja̱li̱ kitsò‑na:
\p ―Xa̱jo̱n tiꞌtì jñà ꞌén kìi̱: “Mé ta̱ nda‑la̱ jñà xi̱ta̱ ra xá inakjoá‑ila̱ nga ya̱ ko̱kje̱n‑ko̱ jè Forrè ꞌkia̱ nga ki̱xan nga ki̱ìjna ꞌsí.”
\p Ko̱ kitsò-isa‑na:
\p ―Jñá kìi̱ ra ngi ꞌén kixi̱‑la̱ Nainá.
\p
\v 10 Tsáse̱n-xkóꞌnchiꞌtá‑la̱ ꞌa̱n jè ìkja̱li̱ nga mejèn‑na nga skexkón, tanga kitsò‑na:
\p ―Majìn, kì tà chjàn ko̱ꞌsín ꞌnì; ti̱ꞌkoa̱á chi̱ꞌnda‑la̱ Nainá‑ná ra ꞌa̱n koni nga ji̱, ko̱ koni jñà ꞌndsì ra iꞌka ra nda i̱nchifìtji̱ngi‑la̱ ꞌén kixi̱ ra kitsjà Jesús. Jè Nainá nda jcha̱xkín.
\p Jñà ꞌén kixi̱ ra kitsjà jè Jesús, ti̱jñá‑ni ra síchi̱ya‑la̱ jñà xi̱ta̱ ra síchjeén Nainá nga chja̱ ngajo‑la̱.
\s Jè ra tíjnasòn‑la̱ jè kabàyo̱ chraba
\p
\v 11 ꞌKia̱á kíjtsee̱ jè ngajmi nga ti̱ꞌxá, ko̱ jngo kabàyo̱ chraba tsatsíjen. Ko̱ jè ra tíjnakjá‑la̱, jò ꞌí tjín‑la̱, jngo ra tsò‑ni: Ngi Kixi̱í Síhitjasòn, ko̱ ra ìjngo: Ngi Xi̱ta̱ Kixi̱‑ní. Nga̱ ngi kixi̱í ꞌsín ꞌkia̱ nga bínda‑jín kjoa̱ ko̱ ꞌkia̱ nga kjaán.
\v 12 Jñà xko̱n, ꞌkoa̱á ꞌsín kjòn koni tsa títì niꞌí; ko̱ ya̱ sko̱ kjín jchán corona ra i̱tsíñá kjòn tjíꞌa‑la̱, ko̱ jngo ꞌí tjíꞌta‑la̱ ra mì kì yá be kótsò‑ni; ta̱ jngoó jè ra be.
\v 13 Jè nikje ra kjinaya, jní ijàjno tíjngo. Ko̱ jè ꞌí‑la̱, ꞌÉn‑la̱ Nainá ꞌmì.
\v 14 Ya̱á tji̱ngi‑la̱ jñà chíchàn ra ꞌtse̱ ngajmi; kjiya nikje chraba ra ngi tsje kjòn ko̱ ra ꞌñó chjí‑la̱; títsa̱kjá‑la̱ kabàyo̱ ra chraba kjòn.
\v 15 Jngo ki̱cha̱ ndajò ra i̱tsjí ꞌki ra ꞌñó ijò bitjo‑ni ya̱ tsaꞌba jè ra tsjáhiꞌin‑la̱ ngaꞌtsì xi̱ta̱ na̱xi̱ndá ra tjín ya̱ i̱sàꞌnde. Ko̱ jngo ki̱cha̱ koaya tsja nga ko̱tèxoma‑ila̱ jñà na̱xi̱ndá. Jè sabá ko̱si̱nè to uva ya̱ a̱ya chitso na̱jo̱ nga ko̱chrje nandá xán ra tji̱ko̱ kjo̱jti‑la̱ Nainá ra tse kjo̱hiꞌin ꞌya, nga̱ bato tse ngaꞌñó tjín‑la̱ ra jè.
\v 16 Ya̱ a̱sòn nikje‑la̱ ko̱ ya̱ a̱sòn chrjamí‑la̱ tjíꞌta ꞌén ra tsò: “Jè ra xi̱ta̱xá ítjòn‑la̱ ra xi̱ta̱xá títjòn títsa̱jna ko̱ jè ra batéxoma‑la̱ ngaꞌtsì xi̱ta̱ ra batéxoma.”
\p
\v 17 Jngo ìkja̱li̱ kíjtsee̱ ra ya̱ síjnasòn ya̱ tsáꞌbí nga ꞌñó kiìchja̱‑la̱ ngaꞌtsì cho̱ ra tjímajin ya̱ a̱jin i̱sén ra kjine ijo see̱n nga kitsò‑la̱:
\p ―Nchrabá tíxkóya xàngio̱o ngaꞌtsì‑no, mé‑ni nga chji̱ne̱‑no ngaꞌtsì jñà ijo ra jè Nainá ijye tjínda‑la̱,
\v 18 nga chji̱ne̱e ijo‑la̱ jñà ra xi̱ta̱xá ítjòn, ko̱ ijo ra ꞌtse̱ chíchàn ítjòn, ko̱ ra ꞌtse̱ xi̱ta̱ nchi̱ná, ko̱ ijo‑la̱ kabàyo̱, ko̱ ꞌtse̱ xi̱ta̱ ra bìtsa̱kjá‑la̱, ko̱ ijo‑la̱ ra ngaꞌtsì ta yá xi̱ta̱‑ni, ra xi̱ta̱ chi̱ꞌnda ko̱ jñà ra mì tsa xi̱ta̱ chi̱ꞌnda, ko̱ íchjín ko̱ íchjá ko̱ i̱xti ko̱ iꞌndí.
\p
\v 19 Ko̱ kíjtse‑náa̱ jè cho̱ ra ꞌñó ꞌcho ꞌkioo̱ ko̱ ngaꞌtsì jñà ra xi̱ta̱xá ítjòn títsa̱jna ya̱ i̱sàꞌnde ko̱ jñà chíchàn‑la̱; kjóxkóya‑ní mé‑ni nga ska̱jàn‑ko̱‑ni jè ra tíjnakjá‑la̱ jè kabàyo̱ chraba ko̱ chíchàn‑la̱ ra tji̱ko̱.
\v 20 Tanga indabáꞌñó jè cho̱ ra ꞌñó ꞌcho ꞌkioo̱ ko̱ indabáꞌñó‑te jè ra kiìchja̱ya ꞌén ndiso, jè ra kiꞌsìn kjo̱xkón ya̱ ngixko̱n jè cho̱ ra ꞌñó ꞌcho ꞌkioo̱ nga tsikínda̱cha̱‑la̱ jñà xi̱ta̱ ra isiꞌta chi̱ba̱‑la̱ nga ti̱ꞌkoa̱á kijtsexkón jè i̱sén‑la̱ jè cho̱ ra̱kìi̱. Ya̱á inìkatsajin tíkon ngajòo̱ ya̱ a̱jin niꞌí ra títì jnga̱ ra ngi ko̱ó azufre títì‑ni.
\v 21 Jñà xi̱ta̱ ra iꞌka, jè ꞌken‑ni jè ki̱cha̱ ndajò ra tíbitjo ya̱ tsaꞌba jè ra tíjnakjá‑la̱ jè kabàyo̱; ngaꞌtsì jñà cho̱ ra bimajin ya̱ a̱jin i̱sén ra kjine ijo see̱n, jñà kjoski‑ni nga kiskine ijo ꞌken‑la̱ ngaꞌtsì jñà xi̱ta̱ kìi̱.
\c 20
\s Jè ra jngo jmi nó
\p
\v 1 Ìjngo ìkja̱li̱ kíjtse‑isa ra ngajmi itjojen‑ni; ꞌya jè yabi̱ ꞌtse̱ nga̱jo̱ na̱tja̱n, ko̱ jngo cadena ra ꞌñó je ꞌki kjinaya tsja.
\v 2 Itsabáꞌñó jè ye̱ jchá ra ꞌmì: Xi̱ta̱‑ni̱í, ko̱ ra ꞌmì: Xi̱ta̱ Kondra̱, nga jngo jmi nó tsikítéꞌñó.
\v 3 Ko̱ ya̱á isìkàtje̱n‑ya ya̱ nga̱jo̱ na̱tja̱n ko̱ ya̱á tsikíchjàꞌya. Tsikíꞌta jngo chi̱ba̱ nga tsikíchjàꞌñó mé‑ni nga mì yá ra ko̱ma ski̱íxa̱‑ni ko̱ mì ti̱ kì ko̱ma ki̱ìndisoko̱‑ni jñà xi̱ta̱ na̱xi̱ndá ra tjín ya̱ i̱sàꞌnde skanda ꞌkia̱ nga ijye ko̱to jngo jmi nó. A̱kjòn ꞌkia̱á tjájnda̱ꞌñó chiba ni̱chjin india‑ni.
\p
\v 4 Kíjtse‑náa̱ íxile̱ ra i̱jncha ñánda̱ nga tísatéxoma, ko̱ ya̱á tsikitsa̱jna jñà ra xá ko̱ꞌsín tsiꞌkì‑la̱ kjo̱téxoma nga jñà ki̱ìndajín. Ko̱ kíjtseé‑náa̱ jñà inìma̱ tsje‑la̱ jñà xi̱ta̱ ra kitisín ra ta nga̱tjì‑la̱ jñà ꞌén kixi̱ ra kitsjà a̱ꞌta ꞌtse̱ Jesús ko̱ ra ta nga̱tjì‑la̱ nga jñà ꞌén‑la̱ Nainá kijìtji̱ngi‑la̱. Jñà xi̱ta̱ ra mì tsa jè kijtsexkón jè cho̱ ra ꞌñó ꞌcho ꞌkioo̱ ko̱ ti̱ꞌkoa̱ mì kì kijtsexkón jè i̱sén‑la̱ cho̱ ra̱kìi̱, ko̱ nga mì kì kitsjáꞌnde nga isiꞌta‑la̱ jè chi̱ba̱‑la̱ cho̱ ra̱kìi̱ ya̱ tótjen‑la̱ ko̱ ya̱ tsja. Jñà xi̱ta̱ kìi̱, tsikitsa̱jnakoón india‑ni, ko̱ jngo jmi nó tsatéxoma ko̱ jè Cristo.
\v 5 I̱íjndíi̱ nga jaáya ítjòn‑la̱ xi̱ta̱. Tanga jñà miꞌken ra iꞌka, skanda ꞌkia̱á jaáya india‑ila̱ ꞌkia̱ nga ijye tsato ra jngo jmi nó.
\v 6 ¡Mé ta̱ nda‑la̱ jñà xi̱ta̱ ra ko̱ko̱‑la̱ nga kjoa̱áya ítjòn‑la̱! Xi̱ta̱ kìi̱, ijye xi̱ta̱‑la̱ Nainá ko̱ma. Nga̱ jè kjo̱biya ra bijchó jò‑ni, mì ti̱ kì mé ngaꞌñó tjín‑la̱ ra a̱ꞌta ꞌtse̱; mì ti̱ mé ma si̱ìko̱‑ni. Ta isa̱á na̱ꞌmì ka̱ma ra a̱ꞌta ꞌtse̱ Nainá ko̱ a̱ꞌta ꞌtse̱ Cristo ko̱ jngo jmi nó ta̱ña ko̱tèxoma ko̱.
\p
\v 7 ꞌKia̱ nga ijye kje̱ ra jngo jmi nó jè ra xi̱ta̱ kondra̱ ki̱tjo‑nì ya̱ ñánda̱ tíjnaꞌya nga tísíkjiín kjo̱hiꞌin;
\v 8 ko̱jmendi̱í‑ní mé‑ni nga sko̱ónda̱cha̱‑la̱ ngaꞌtsì jñà xi̱ta̱ na̱xi̱ndá ra tjín nga tíjngo i̱sàꞌnde, jè Gog ko̱ Magog. Ki̱íxkóya xákjín mé‑ni nga ska̱jàn‑ni nga ꞌse̱ kjo̱jchán. Batoó kjín ma‑ni, ꞌkoa̱á jngoya‑la̱ koni jñà chrjo̱ ra i̱jncha ya̱ a̱ndi ndáchikon.
\v 9 Tsinchimasòn‑ní kóhoꞌki nga tíjngo i̱sàꞌnde; jngo tjandi kijì‑la̱ ya̱ ñánda̱ nga títsa̱jna jñà xi̱ta̱‑la̱ Nainá ko̱ jè na̱xi̱ndá ra Nainá tsjake. Tanga jè Nainá, niꞌí isikjinchrabájen‑ni ya̱ ján ngajmi nga tsaká ngaꞌtsiòo̱.
\v 10 Ko̱ jè xi̱ta̱‑ni̱í ra tsikíndo̱cha̱‑la̱, ya̱á inìkàtje̱n‑jin ya̱ ñánda̱ nga títì jnga̱ niꞌí ra ngi ko̱ azufre títì‑ni, ya̱ ñánda̱ nga ijye títsa̱jna jè cho̱ ra ꞌñó ꞌcho ꞌkioo̱ ko̱ jè ra kiìchja̱ya ꞌén ndiso; ya̱á si̱ìkjiín kjo̱hiꞌin nga ko̱ ni̱chjin ko̱ ni̱tje̱n skanda ta kjiá‑nioo̱ ko̱ skanda ta mé ni̱chjin‑nioo̱.
\s ꞌKia̱ nga si̱ndajín‑la̱ jñà miꞌken
\p
\v 11 Kíjtseé jngo íxile̱ ra chraba ꞌki ko̱ ra ꞌñó je ꞌki nga tíjnasòn jè ra ya̱ tíbatéxoma. ꞌKia̱ nga tsatsíjen jè ra tíjnasòn íxile̱ chraba, jè nangi ko̱ jè ngajmi mì kì kijcha‑la̱ kóꞌsín nga ichijà.
\v 12 Ko̱ kíjtse‑náa̱ jñà miꞌken ra íchjín ko̱ íchjá ko̱ jñà ra i̱xti ko̱ iꞌndí kjòn nga i̱jncha kixi̱ ya̱ ngixko̱n Nainá. Jñà libro itjáꞌxa̱jin‑ní [ñánda̱ tjíꞌta mé ra kiꞌsìn nga jngó jngó xi̱ta̱], ko̱ ìjngo itjáꞌxa̱‑isa ra a̱skan‑nioo̱ jè ra libro ꞌtse̱ kjo̱binachon; isindajín‑la̱ jñà miꞌken koni ꞌsín tjín kjoa̱ ra kiꞌsìn nga jngó jngó koni ꞌsín nga tjíꞌta jñà libro ra itjáꞌxa̱jin.
\v 13 Jè ndáchikon kitsjà jñà miꞌken ra ya̱ tjíhijyo‑la̱. Jè i̱ꞌnde ꞌtse̱ miꞌken ko̱ jè i̱ꞌnde ꞌtse̱ kjo̱hiꞌin kitsjá jñà miꞌken ra ya̱ títsa̱jna‑la̱; ko̱ ꞌkoa̱á ꞌsín isindajín‑la̱ koni ꞌsín tjín kjoa̱ ra kiꞌsìn nga jngó jngó.
\v 14‑15 Jè i̱ꞌnde‑la̱ miꞌken ko̱ jè i̱ꞌnde‑la̱ kjo̱hiꞌin ya̱á inìkatsajojín ya̱ ñánda̱ nga títì jnga̱ niꞌí. Ko̱ jñà miꞌken ra mì kì isakò ꞌí‑la̱ ya̱ a̱ꞌta xa̱jo̱n ꞌtse̱ kjo̱binachon, ya̱á iskatsajojín‑te ya̱ a̱jin niꞌí ra ngi títì jnga̱. Jé kjo̱biya ra̱kìi̱ ra bijchó jò‑ni.
\c 21
\s Jngo ngajmi xi̱tse̱ ko̱ jngo nangi xi̱tse̱
\p
\v 1 Jngo ngajmi xi̱tse̱ ko̱ jngo nangi xi̱tse̱ kíjtsee̱; jè ngajmi ra tíjna nga ti̱ꞌsa̱ ítjòn ko̱ jè nangi, ijyeé kichija; ko̱ mì ti̱ kì mé ndáchikon kijna‑ni.
\v 2 Ko̱ kíjtseé‑te na̱xi̱ndá tsje‑la̱ Nainá ra jè Jerusalén xi̱tse̱, nga tínchrabájen‑ni ngajmi ya̱ ñánda̱ nga tíjna Nainá, jè na̱xi̱ndá ra ijye ko̱ꞌsín tíjnanda koni jngo chjo̱ón ra ki̱xan ra ijye tjínda‑la̱ ijo‑la̱ nga tíkoñá nga ska̱ábé ꞌxi̱n‑la̱.
\v 3 Jngo jta̱ ra ngajmi inchrabà‑ni kíꞌnchre‑la̱ ra ꞌñó kiìchja̱ nga kitsò:
\p ―Chítsijen‑la jè Niꞌya Tsje‑la̱ Nainá, ijyeé ya̱á tíjnajin masen‑la̱ jñà xi̱ta̱. Nga̱ jè Nainá kíjnajin masen‑la̱ jñà xi̱ta̱, nga xi̱ta̱ na̱xi̱ndá‑la̱ ko̱ma. Jè sabá Nainá kíjnako̱ jñà xi̱ta̱ kìi̱ nga Nainá‑la̱ ki̱tso̱‑la̱.
\v 4 Jè sabá Nainá si̱ixì‑ni ngaꞌtsì ndáxko̱n xi̱ta̱; ko̱ mì kì ti̱ yá xi̱ta̱ ra ki̱yá‑ni; ko̱ mì kì ti̱ yá ra ski̱ndaya‑ni ndáxko̱n; ko̱ mì kì ti̱ yá ra ꞌon ko̱ma‑la̱ nga ski̱íjo‑ko̱ ijo‑la̱; nga̱ ijye tsato ra kjoa̱ jchínga.
\p
\v 5 Ko̱ jè ra tíjnasòn íxile̱ ñánda̱ nga tíbatéxoma, kitsó‑ní:
\p ―¡Chítsijen! ꞌA̱n, tísìxítse̱ya ijyeé‑na ngaꞌtsì tsajmì ra tjín.
\p Ko̱ kitsò‑na:
\p ―Xa̱jo̱n tiꞌtì jñà ra ꞌa̱n ko̱tíxian‑la; nga̱ jñà ꞌén kìi̱, ngi ꞌén kixi̱‑ní ko̱ ngi kixi̱í tjín.
\p
\v 6 Ko̱ kitsò-isa‑na:
\p ―Ijyeé itjasòn. ꞌA̱n‑ná ra tíjna̱ ítjòn‑na skanda kjoꞌtsia̱ ko̱ ꞌa̱n‑ná ra tíjna̱ skanda ꞌkia̱ nga kje̱heꞌtà ni̱chjin; ꞌa̱n‑ná ra tsikiꞌtsiá‑na ko̱ ꞌa̱n‑ná ra sikjéheꞌta‑na. Jñà ra xándá‑la̱, ta kjo̱tjò tsja‑la̱ nandá ra skꞌí, ya̱ i̱ꞌnde ñánda̱ tíbitjo nandá ra tsjá kjo̱binachon.
\v 7 Jñà ra si̱ìkijne, jñá ko̱nga̱tsja ijye ngaꞌtsì kjoa̱nda kìi̱; ꞌa̱án ko̱ma jè Nainá‑la̱ ko̱ jñá ko̱ma i̱xti‑na̱.
\v 8 Tanga jñà xi̱ta̱ ra tsakjón, ko̱ jñà ra mì makjiín‑la̱, jñà ra ꞌñó ꞌcho tjín kjoa̱ ra ꞌsín, ko̱ jñà ra xi̱ta̱ síꞌken, jñà xi̱ta̱ chijngi ko̱ jñà xi̱ta̱ ra ꞌsín kjoa̱tjꞌee̱, jñà xi̱ta̱ ra kjꞌií nainá bexkón ko̱ ngaꞌtsì jñà ra xi̱ta̱ ndiso, ya̱á ko̱ko̱‑la̱ ya̱ ñánda̱ nga títì niꞌí‑jnga̱ nga ngi ko̱ azufre títì. Jé ra̱kìi̱, kjo̱biya ra bijchó jò‑ni.
\s Na̱xi̱ndá xi̱tse̱ ra ꞌmì Jerusalén
\p
\v 9 ꞌJi kasiꞌta chraña jngo‑na jñà ìkja̱li̱ ra ito ma‑ni, jñà ra tjímaꞌya jñà chi̱tsín ra ito ndi̱yá‑la̱ kjo̱hiꞌin ra feheꞌta‑ni tjíya, ko̱ tsakáko̱ò‑na nga kitsò‑na:
\p ―Nchrabí ya̱ i̱jndíi̱, mé‑ni nga kokon‑la jè chjo̱ón ra tíjnanda jè ra ki̱xan‑ko̱ jè Forrè.
\p
\v 10 ꞌKia̱ nga jè Inìma̱ Tsje‑la̱ Nainá isikatsíjen jngo‑na kjoa̱, jè ìkja̱li̱ ya̱á ìko̱‑na ñánda̱ síjna jngo nindo ra je ꞌki ko̱ ꞌnga ꞌki, ko̱ tsakón‑na jè na̱xi̱ndá ra je ꞌki ra na̱xi̱ndá tsje ra ꞌmì Jerusalén ra ya̱ itjojen‑ni ján ngajmi ra ꞌtse̱ Nainá inchrabà‑ni.
\v 11 Jè na̱xi̱ndá tsje Jerusalén, ꞌkoa̱á ꞌsín ꞌñó fate tsatsíjen koni tsa jngo na̱jo̱ chjí ra ꞌñó nda ꞌki; ko̱ ngi ꞌkoa̱á ꞌsín fate koni jè na̱jo̱ ra ꞌmì jaspe ra ko̱ꞌsín tsijen‑yá‑ni koni tsa chi̱tsín. Kì ko̱ꞌsín fate tsatsíjen‑ni nga jé kjoa̱jeya‑la̱ Nainá ko̱ꞌsín isikatsíjen.
\v 12 Jngo chrjó ra ꞌñó je ko̱ ꞌñó ꞌnga tjíchjàndi‑ila̱ jè na̱xi̱ndá ra̱kìi̱, ko̱ tejò ma‑ni jñà xo̱tjo̱ba̱‑la̱. Nga jngó jngó xo̱tjo̱ba̱ jngo ìkja̱li̱ síjnajto. Ko̱ ya̱á tjíꞌta ꞌí‑la̱ jñà ra tejò na̱xi̱ndá ra ya̱ inchrabàꞌta‑ni i̱xti‑la̱ Israel.
\v 13 Ya̱ ñánda̱ tjo‑ni tsáꞌbí, jàn xo̱tjo̱ba̱ tjín‑la̱. Ko̱ ya̱ ñánda̱ kàtjì‑ni tsáꞌbí, ti̱ꞌkoa̱á jàn xo̱tjo̱ba̱ tjín‑la̱. Ya̱ nga kixi̱‑la̱ ñánda̱ tjo‑ni tsáꞌbí jàn xo̱tjo̱ba̱ tjín‑la̱, ko̱ ya̱ ngaskoán‑la̱ ñánda̱ nga tjo‑ni tsáꞌbí ti̱ꞌkoa̱ jàn xo̱tjo̱ba̱ tjín‑la̱.
\v 14 Jè chrjó ra tjíchjàndi‑ni ya̱ na̱xi̱ndá, tejò chrjó tjàꞌtsin tjín ya̱ ñánda̱ nga tejò ꞌí tjíꞌta ra ꞌtse̱ jñà xi̱ta̱ ra tejò ma‑ni ra tsikíxáya‑la̱ jè Forrè.
\p
\v 15 Jè ìkja̱li̱ ra tíbáko̱‑na, jngo ki̱cha̱ kjiya tsja ra ngi ki̱cha̱ sinè ra koni ꞌki jngo yá ra ma machi̱ba̱‑ni ꞌki, jè ra síchjeén nga machi̱ba̱‑ni jè na̱xi̱ndá ko̱ jè chrjó ra tjíchjàndi‑ni na̱xi̱ndá ko̱ jñà xo̱tjo̱ba̱‑la̱.
\v 16 Jè na̱xi̱ndá, ꞌkoa̱á ꞌki koni tsa jngo kàxa̱. ꞌKoa̱á ti̱ ꞌki ndajò‑ni koni ꞌki nga teyá. Jè ìkja̱li̱, jé ki̱cha̱ ra tsáꞌya kisìchi̱ba̱‑ni jè na̱xi̱ndá. Jò jmi ko̱ jò sindo̱ kilómetro tjín‑la̱. ꞌKoa̱á ti̱ ꞌki tjín‑la̱, jè ra ndajò ko̱ ra teyá ko̱ ra ꞌnga.
\v 17 Isìchi̱ba̱á‑te jè chrjó ra tjíchjàndi‑la̱ jè na̱xi̱ndá, jngo sindo̱ ko̱ ichán ijòn xkó ndse̱é tjín‑la̱ ra chi̱ba̱ ꞌtse̱ xi̱ta̱ isìchjeén jè ìkja̱li̱, [jè ra ichán nanga tjín‑ni].
\p
\v 18 Jè chrjó ra tjíchjàndi‑ni, ngi jé kisinda‑ni na̱jo̱ chjí ra ꞌmì jaspe. Tanga ra jè na̱xi̱ndá, ngi ki̱cha̱ sinè ra jè. ꞌKoa̱á ꞌsín tsijen koni jngo chi̱tsín ra tsje.
\v 19 Ko̱ jñà chrjó tjàꞌtsin jè chrjó ra tjíchjàndi‑ni ya̱ na̱xi̱ndá, ngi sabà jñà na̱jo̱ chjí ra ꞌñó nda kjòn ijàjno; jè ra tíjna ítjòn, jé na̱jo̱ ra ꞌmì jaspe; jè ra ma‑ni jò, jé na̱jo̱ ra ꞌmì zafiro; jè ra ma‑ni jàn, jé na̱jo̱ ra ꞌmì ágata; jè ra ma‑ni ijòn, jé na̱jo̱ ra ꞌmì esmeralda;
\v 20 jè ra ma‑ni ꞌòn, jé na̱jo̱ ra ꞌmì ónice; jè ra ma‑ni jon, jé na̱jo̱ ra ꞌmì cornalina; jè ra ma‑ni ito, jé na̱jo̱ ra ꞌmì crisólito; jè ra ma‑ni jin, jé na̱jo̱ ra ꞌmì berilo; jè ra ma‑ni ijan, jé na̱jo̱ ra ꞌmì topacio; jè ra ma‑ni te, jé na̱jo̱ ra ꞌmì crisopraso; jè ra ma‑ni tejngo, jé na̱jo̱ ra ꞌmì jacinto; ko̱ jè ra ma‑ni tejò, jé na̱jo̱ ra ꞌmì amatista.
\v 21 Jñà tejò xo̱tjo̱ba̱‑la̱, tejò na̱jo̱ chjí ra ꞌmì perla tjín‑ni. Nga jngó jngó xo̱tjo̱ba̱, jngoó na̱jo̱ chjí ra ꞌmì perla tjínda‑ni. Jè ndi̱yá té‑la̱ na̱xi̱ndá, ngi ki̱cha̱ sinè‑ní; ꞌkoa̱á ꞌsín nda fate tsijen koni tsa jngo chi̱tsín.
\p
\v 22 Ya̱ a̱jin na̱xi̱ndá, ni̱jngo i̱ngo̱ kíjtsee̱. Nga̱ jè sabá Na̱ꞌín‑ná ra Nainá ra bato tse ngaꞌñó tjín‑la̱, ko̱ jè Forrè, ra ma i̱ngo̱‑la̱.
\v 23 Jè na̱xi̱ndá, mì tsa ti̱ tsáꞌbí ko̱ mì tsa ti̱jè sá machjeén‑ila̱ nga síhisen‑la̱; nga̱ jè sabà kjoa̱jeya‑la̱ Nainá síhisen‑la̱; ko̱ jé Forrè ma niꞌí‑la̱.
\v 24 Jñà xi̱ta̱ na̱xi̱ndá ra tjín ya̱ i̱sàꞌnde, jè kjoa̱hisen‑la̱ Nainá kímahisen‑ni; ko̱ jñà xi̱ta̱xá ítjòn ra tjín ya̱ a̱ꞌta nangi, ki̱ko̱ó kjoa̱nchi̱ná‑la̱ nga ya̱ si̱ìnga̱tsja.
\v 25 Jñà xo̱tjo̱ba̱‑la̱ na̱xi̱ndá ni̱kjiá nga si̱chjà ꞌkia̱ nga ni̱chjin; nga̱ ya̱ i̱jndáa̱, mì kì tsa ko̱jñò‑jìn.
\v 26 Jñà xi̱ta̱ na̱xi̱ndá ra tjín ya̱ i̱sàꞌnde ya̱á ki̱ko̱ ngaꞌtsì kjoa̱nchi̱ná‑la̱ ko̱ ngaꞌtsì ra ꞌñó nda kjòn nga ya̱ si̱ìnga̱tsja.
\v 27 Ni̱mé kjoa̱tjé ma kjoa̱haꞌsen; ni̱jngo ra kjoa̱ꞌcho ꞌsín ko̱ ra ꞌén ndiso chja̱ ma kjoa̱haꞌsen‑jin na̱xi̱ndá; ta jñá kjoa̱haꞌsen jñà ra tjíꞌta ꞌí‑la̱ jè xa̱jo̱n‑la̱ Forrè ra ꞌtse̱ kjo̱binachon.
\c 22
\p
\v 1 Ra kjomà a̱skan‑nioo̱ jé ìkja̱li̱ tsakón jngo‑na xa̱ngá ñánda̱ nga tíꞌfa nandá ra kjijna tsjé tsje, jè nandá ra tsjá kjo̱binachon, ra ngi fate‑ní koni tsa jngo chi̱tsín. Ya̱á tíbitjo‑ni ya̱ ñánda̱ nga tíjna Nainá nga tíjnasòn íxile̱ nga tíbatéxoma ko̱ ya̱ ñánda̱ nga tíjna‑te jè Forrè.
\v 2 Jè xa̱ngá nandá, ya̱á ꞌfa ya̱ nga masen‑la̱ jè ndi̱yá té‑la̱ na̱xi̱ndá. Ya̱ nga ngajò ꞌka̱ a̱ndi‑la̱ xa̱ngá nandá, síjna jè yá ra tsjá kjo̱binachon; jè yá, tejò ꞌka̱ majchá to‑la̱ nga inó; jngo ꞌká majchá nga jngó jngó sá; jñà xka̱‑la̱ yá, jñà maxki‑ila̱ jñà xi̱ta̱ na̱xi̱ndá ra tjín ya̱ i̱sàꞌnde.
\v 3 Mì kì ti̱ mé kjoa̱ ꞌse̱‑ni ra mì kì sasén‑la̱ Nainá. Nga̱ ya̱á kijna jè Nainá ko̱ jè Forrè nga ko̱tèxoma; ko̱ jñà ra chi̱ꞌnda‑la̱ ma, ya̱á si̱íxáꞌta‑la̱.
\v 4 Ngi sko̱óꞌan tsijen Nainá; ko̱ jè ꞌí‑la̱ Nainá, ya̱á si̱ꞌta ya̱ tótjen‑la̱.
\v 5 Ya̱ i̱jndáa̱, mì kì ti̱ ni̱tje̱n ꞌse̱‑ni; ko̱ mì tsa niꞌí isen ko̱chjeén‑ila̱, ko̱ mì tsa ti̱ niꞌí‑la̱ tsáꞌbí ko̱chjeén‑ila̱; nga̱ jè sabà Nainá ra Na̱ꞌín‑ná si̱hisen‑la̱. Ko̱ jñá ko̱tèxoma skanda ta kjiá‑nioo̱ ko̱ skanda ta mé ni̱chjin‑nioo̱.
\s Ijyeé kjochraña nga kjꞌi̱í jè Cristo
\p
\v 6 Jè ìkja̱li̱ kitsò‑na:
\p ―Jñà ꞌén kìi̱, ngi ꞌén kixi̱‑ní ko̱ ngi kixi̱í tjín. Jè Na̱ꞌín‑ná ra Nainá jè ra síchi̱ya‑la̱ jñà xi̱ta̱ ra chja̱ ngajo‑la̱, jè kàsíkasén jè ìkja̱li̱‑la̱ mé‑ni nga ko̱kòn‑la̱ jñà xi̱ta̱ chi̱ꞌnda‑la̱ jñà kjoa̱ ra ta ndi̱to̱n kjón‑ní ko̱ka̱ma.
\p
\v 7 ―¡Nda chítsijen, ꞌa̱n ijyeé kjíꞌi̱ ndi̱to̱n‑ná!
\p ¡Mé ta̱ nda‑la̱ jñà ra nda síhitjasòn jñà ꞌén ra kitsjà Nainá ra tjíꞌta jè xa̱jo̱n ra̱kìi̱!
\p
\v 8 ꞌA̱n ra ꞌmì‑na Juan, ꞌa̱án‑ná ra kíꞌnchree̱ ko̱ ra kíjtsee̱ jñà kjoa̱ kìi̱. ꞌKia̱ nga ijye kíꞌnchree̱ ko̱ nga kíjtsee̱, tsáse̱n-xkóꞌnchi-niña‑náa̱ ya̱ a̱ngi ndsa̱ko̱ jè ìkja̱li̱ ra tíbakón‑na jñà kjoa̱ kìi̱, nga kíjtsexkóon.
\v 9 Tanga jè ìkja̱li̱ kitsò‑na:
\p ―Majìn kì tà chjàn ko̱ꞌsín ꞌnì. Nga̱ ꞌa̱n, ti̱ꞌkoa̱á ti̱ chi̱ꞌndaá‑te ma koni ngaji̱, ko̱ koni jñà ꞌndsìi̱ jñà ra síchjeén Nainá nga chja̱ ngajo‑la̱, ko̱ jñà ra síhitjasòn jñà ꞌén ra tjíꞌta jè xa̱jo̱n ra̱kìi̱. Jé Nainá, ra jcha̱xkíin.
\p
\v 10 Ko̱ kitsò-isa‑na:
\p ―Kì tà chjàn biꞌma‑jìn jñà ꞌén ra kitsjà Nainá ra tjíꞌta jè xa̱jo̱n ra̱kìi̱, nga̱ ijyeé kjochraña ni̱chjin nga ki̱tjasòn koni ꞌsín tíchja̱.
\v 11 Jñà ra mì tsa xi̱ta̱ kixi̱ ya̱ ngixko̱n Nainá, takó ko̱ꞌsín katitsa̱jna; ko̱ jñà xi̱ta̱ ra ꞌcho ꞌsín, takó ko̱ꞌsín ꞌcho kataꞌsín‑te; tanga jñà ra xi̱ta̱ kixi̱ ya̱ ngixko̱n Nainá, ko̱ꞌsín kixi̱ katitsa̱jna; ko̱ jñà ra xi̱ta̱ tsje, ko̱ꞌsín tsje katitsa̱jna‑isa.
\p
\v 12 ―Nda chítsijen, ꞌa̱n, ijyeé kjíꞌi̱ ndi̱to̱n‑ná nga ꞌya jè kjo̱tjò ra tsja‑la̱ nga jngó jngó xi̱ta̱ koni ꞌsín tjín kjoa̱ ra kiꞌsìn nga jngó jngó.
\v 13 ꞌA̱án‑ná ra tíjna̱ ítjòn‑na skanda kjoꞌtsia̱ ko̱ ꞌa̱án‑ná ra tíjna̱ skanda ꞌkia̱ nga kje̱heꞌtà ni̱chjin; ꞌa̱n‑ná ra tsikiꞌtsiá‑na ko̱ ꞌa̱n‑ná ra sikjéheꞌta‑na. ꞌA̱án tíjna̱ ítjòn ko̱ ꞌa̱án feheꞌta‑na.
\p
\v 14 Mé ta̱ nda‑la̱ jñà xi̱ta̱ ra [jè jní‑la̱ Forrè] sítsje‑ni nikje‑la̱ mé‑ni nga ki̱ꞌnde‑la̱ nga ma ski̱ne̱ to‑la̱ jè yá ra tsjá kjo̱binachon, ko̱ mé‑ni nga tjóꞌnde‑la̱ nga ya̱ xo̱tjo̱ba̱‑la̱ na̱xi̱ndá ma kjoa̱haꞌsen‑ni.
\v 15 Tanga ndi̱tsiaán kítsa̱jna jñà ra xi̱ta̱ nañá, ko̱ jñà xi̱ta̱ ra ꞌsín kjoa̱tjꞌee̱, ko̱ jñà ra kjoa̱ chijngi ꞌsín, ko̱ jñà ra síꞌken xi̱ta̱, ko̱ jñà ra kjꞌií nainá bexkón ko̱ ngaꞌtsì jñà ra tsjake kjoa̱ndiso ko̱ ra ꞌén ndiso chja̱.
\p
\v 16 ―ꞌA̱n ra ꞌmì‑na Jesús, ꞌa̱án‑ná ra ísikásén‑no jè ìkja̱li̱‑na̱ mé‑ni nga tsjá‑no ꞌén a̱ꞌta ꞌtse̱ kjoa̱ kìi̱, jiòn ra xi̱ta̱ na̱xi̱ndá‑na̱ ma. ꞌA̱n‑ná jè jtsꞌén ra itjoꞌta‑ni tje̱‑la̱ David; ꞌa̱n‑ná jè nitse‑xó ra ꞌñó fate ꞌki ra tjo ꞌkia̱ nga ta̱jñòya.
\p
\v 17 Jè Inìma̱ Tsje‑la̱ Nainá ko̱ jè chjo̱ón ra tíjnanda nga ki̱xan, tsó‑ní:
\p ―Nchrabí [Na̱ꞌìn Jesús].
\p Ko̱ jiòn ra i̱nchinaꞌyá, ko̱tixó‑te:
\p ―Nchrabí [Na̱ꞌìn Jesús].
\p Jiòn ra xándá‑no ko̱ ra mejèn‑no, nchrabá, ꞌtio̱ kjo̱tjò jè nandá ra tsjá kjo̱binachon.
\p
\v 18 ꞌA̱n, ꞌkoa̱á ꞌsín tíxian‑no ngaꞌtsì‑no ra naꞌyá jñà ꞌén ra kitsjà Nainá ra tjíꞌta xa̱jo̱n ra̱kìi̱: Tsa yá ra ki̱ìsòn‑isa‑la̱ koni ꞌsín nga ijye tjíꞌta, jè Nainá ki̱ìsòn‑isa‑la̱ jñà kjo̱hiꞌin ra tjíꞌta xa̱jo̱n ra̱kìi̱.
\v 19 Ko̱ tsa yá ra kjo̱híxìn iꞌka‑la̱ jñà ꞌén ra kitsjà Nainá ra tjíꞌta jè xa̱jo̱n ra̱kìi̱, jé Nainá kjo̱híxìn‑la̱ jè kjo̱nda ra ko̱ko̱‑la̱ a̱ꞌta ꞌtse̱ yá ra tsjá kjo̱binachon ko̱ a̱ꞌta ꞌtse̱ na̱xi̱ndá tsje‑la̱ Nainá ra tjíꞌta xa̱jo̱n ra̱kìi̱.
\p
\v 20 Jè ra títsjá kixi̱ ꞌén‑la̱ a̱ꞌta ꞌtse̱ kjoa̱ kìi̱, tsó‑ní:
\p ―Ngi kixi̱í kjoa̱, ijyeé kjíꞌi̱ ndi̱to̱ón‑ná ra ꞌa̱n.
\p Jon, ko̱ꞌsín katama. ¡Nchrabí ji̱ Na̱ꞌìn Jesús!
\p
\v 21 Jè kjo̱nda‑la̱ Na̱ꞌín‑ná Jesucristo katijnako̱‑no ngaꞌtsì‑no. Ko̱ꞌsín katama.