\id REV
\h Apocalipsis
\toc1 Apocalipsis
\mt Xo̱jo̱n‑la̱ San Juan kjoa̱ xi tsakó‑la̱ Jesucristo
\c 1
\s Kjoa̱ xi kijtseè ko̱ ꞌén xi kiìꞌnchré San Juan
\p
\v 1 Jñà kjoa̱ koi xi kitjoé‑la̱ Jesucristo nga Nainá kitsjaà‑la̱ mé‑ne nga ko̱kò‑la̱ xi̱ta̱ chi̱ꞌnda‑la̱ jñà kjoa̱ xi ta ni̱to̱ón o̱ko̱ma. Jesucristo kisìkasén àkja̱le̱‑la̱ nga tsakó‑la̱ kjoa̱ koi Juan xi chi̱ꞌnda‑la̱ ma.
\v 2 Ko̱ jè Juan tíchja̱ kixi̱‑né [kꞌe̱ nga kiskiì] ngatsꞌiì kjoa̱ xi kijtseè ko̱ xi kiìꞌnchré koni sꞌín nga jè Jesucristo kiìchja̱ kixi̱‑la̱ jñà ꞌén xi kitsjaà‑la̱ Nainá.
\p
\v 3 Mé tà ndaà‑la̱ jè xi̱ta̱ xi bíxke̱jiìn xo̱jo̱n koa̱ jñà xi ꞌnchré ꞌén‑la̱ Nainá xi tjítꞌaà xo̱jo̱n jè, jñá kjoa̱ xi sa̱ ki̱tasòn; ti̱koa̱á mé ta ndaà‑la̱ jè xi̱ta̱ xi síkitasòn koni tsò xo̱jo̱n jè, nga jè na̱chrjein, jyeé nchrobá machrañà.
\s Kó tsò Juan nga síhixatꞌaà nga itoò na̱xa̱ndá‑la̱ Cristo xi títsa̱jna ján i̱ꞌnde Asia
\p
\v 4 ꞌA̱n xi ꞌmì‑na Juan, tisìhixatꞌaà‑nò, jñò xi na̱xa̱ndá‑la̱ Cristo maà xi itoò i̱ꞌnde titsa̱jnaà ján nangui Asia. Jè kàtatsjá‑nò kjo̱ndaà ko̱ kjoa̱ꞌnchán jè Nainá xi tíjna, jè xi tsibìjna ko̱ jè xi kjoi̱í ìjngoò kꞌa‑ne; kꞌoa̱ ti̱sꞌín kàtatsjá‑nò kjo̱ndaà ko̱ kjoa̱ꞌnchán jñà ini̱ma̱ xi itoò ma‑ne xi títsa̱jna nguixko̱n jè xi tíjnasòn íxi̱le̱ nga tíhotíxoma;
\v 5 ko̱ jè Jesucristo kꞌoa̱ ti̱sꞌín kàtatsjá‑nò kjo̱ndaà ko̱ kjoa̱ꞌnchán. Jè Cristo, jè xi nguì ꞌén kixi̱ tsjá, xi kiꞌndí tjòn xi jaáya‑la̱ i̱tꞌaà tsꞌe̱ kjoa̱ biyaà ko̱ jè xi otíxoma‑la̱ jñà xi̱ta̱ sko̱‑la̱ xi tjín i̱ i̱tꞌaà nangui. Cristo matsjakeè‑ná nga kisìtsjeè jé‑ná i̱tꞌaà tsꞌe̱ jní‑la̱ xi tsibíxteèn.
\v 6 Cristo kꞌoa̱á sꞌín kisìkítsa̱jna‑ná nga xi̱ta̱ ítjòn ko̱maá ko̱ no̱ꞌmiì ko̱maá nga jñá si̱xá‑lá Nainá xi Na̱ꞌèn‑la̱ ma Jesucristo. Jeya kàtìjna; jè kàtatíxoma kjitꞌaà, ni̱ta̱ mé na̱chrjein‑ne, ni̱ta̱ mé nó‑ne. Kꞌoa̱sꞌín kàtama.
\p
\v 7 ¡Chítsejèn‑là! Jè Cristo jyeé kjo̱meé fꞌiì nga tínchrobájiìn ifi. Ngatsꞌiì xi̱ta̱, xko̱ón skoe̱‑ne. Jñà xi̱ta̱ xi kisìkꞌen Cristo ti̱koa̱á skoe̱‑ne. Ngatsꞌiì xi̱ta̱ na̱xa̱ndá xi tjín i̱ i̱tꞌaà nangui ski̱ndáyakeè‑né nga ꞌon ko̱ma‑la̱ i̱tꞌaà tsꞌe̱. Jon, kꞌoa̱á sꞌín ko̱ma.
\p
\v 8 “ꞌA̱n‑ná xi tìjna̱ ítjoàn skanda tàtsꞌen‑la̱ kjoa̱ ko̱ nga skanda fehetꞌaà‑ne; ꞌa̱n‑ná xi tìjna̱a, xi tsibijna̱a, ko̱ xi kjoi̱i ìjngoò kꞌa; ta̱jngoó‑ná xi tse ngaꞌñó tjín‑na”, tsò Na̱ꞌèn‑ná xi Nainá.
\s Kjoa̱ xi tsakó‑la̱ Nainá Juan i̱tꞌaà tsꞌe̱ Cristo
\p
\v 9 ꞌA̱n‑ná xi mì‑na̱ Juan, xi ꞌndsè xan‑nò i̱tꞌaà tsꞌe̱ Cristo. Nga ya̱á titsa̱jnakoa̱á Cristo ngásòn titsa̱nìkjiaán kjo̱ꞌin, ko̱ ngásòn ya̱ nokjoà‑ná ñánda tíhotíxoma Nainá ko̱ ngásòn tíchíkjoa̱ko̱‑ná ngatsꞌiì kjoa̱. ꞌA̱n nga ꞌén‑la̱ Nainá tìchjàya ko̱ tìbeno̱jmí kixi̱‑la̱ xi̱ta̱ i̱tꞌaà tsꞌe̱ Cristo, kꞌoa̱á komà‑ne ján kinìkasén‑na ya̱ nangui jiìn‑ndá ñánda ꞌmì Patmos.
\v 10 Jngoò na̱chrjein‑la̱ Nainá, ꞌa̱n, nga ya̱ tìjna̱koa̱a Ini̱ma̱ Tsjeè‑la̱, ya̱ i̱jto̱n índsiàn kiꞌnchrè jngoò‑la̱ ꞌén xi ꞌñó kiìchja̱ koni jngoò chrjo xi ꞌñó jane,
\v 11 kitsò‑na:
\p ―ꞌA̱n‑ná xi tìjna̱ ítjoàn ko̱ xi fehetꞌaà‑ne. Chjoí jngoò xo̱jo̱n, títꞌeiì kjoa̱ xi tìꞌyi; i̱kjoàn ti̱kasén‑la̱ na̱xa̱ndá‑na̱ xi itoò i̱ꞌnde títsa̱jna ján nangui Asia, jñà na̱xa̱ndá xi ꞌmì Éfeso, Esmirna, Pérgamo, Tiatira, Sardis, Filadelfia ko̱ Laodicea.
\p
\v 12 Kꞌe̱é kisìkátjifaya nga mejèn‑na skoeè yá xi̱ta̱ xi tíchja̱‑na; kìjtseè itoò candelero xi nguì ki̱cha̱ oro xi ma tìya asìti̱.
\v 13 Ya̱ jngoò osen‑la̱ ñánda jncha candelero xi itoò ma‑ne síjnajiìn xi o̱kji koni kji kiꞌndí‑la̱ xi̱ta̱. Jngoò nikje kinakjá xi ndojò kji. Bijchó skanda i̱tjòn ndso̱ko̱. Tíkjá jngoò naꞌñó payo̱ ya̱ i̱sòn ini̱ma̱‑la̱ xi nguì oro.
\v 14 Tsja̱ sko̱, kꞌoa̱á kjoàn koni kjoàn tsja̱ chroba‑la̱ orrè, koni kjoàn ꞌnchán kjoàn. Xko̱n, kꞌoa̱á sꞌín tsejèn koni tsà títì niꞌín.
\v 15 Ndso̱ko̱ kꞌoa̱á kjoàn koni ki̱cha̱ sinè xi ꞌñó ndaà ote kꞌe̱ nga jye si̱jiìn niꞌín. Jè jta̱‑la̱, kꞌoa̱á sꞌín naꞌyà‑la̱ koni ñánda ꞌñó je nandá tíbixòjen‑tjòn.
\v 16 Jè tsja kixi̱, itoò niꞌño tjíya. Jè tsoꞌba jngoò ki̱cha̱ ndojò bitjo xi ꞌñó yijò kji ingajò ngobà. I̱sén‑la̱ kꞌoa̱á kji koni kji tsꞌoí kꞌe̱ nga ꞌñó matsjè ndobá, ꞌñó ote kji.
\p
\v 17 Kꞌe̱ nga kìjtseè, kiskaànguia i̱ngui ndso̱ko̱ koni jngoò mikꞌen. I̱kjoàn jè tsakájnasòn‑na tsja kixi̱, kitsò‑na:
\p ―Kì tsakjoòn‑jèn, ꞌa̱n‑ná xi tìjna̱ ítjoàn ko̱ xi fehetꞌaà‑ne,
\v 18 ko̱ tìjna̱kon‑ná. Tsakáti̱jna kꞌen‑ná ta̱nga i̱ꞌndei̱ tìjna̱kon‑ná ni̱ta̱ mé na̱chrjein, ni̱ta̱ mé nó‑ne. ꞌA̱n tjíya ndsa̱a ibi̱ tsꞌe̱ kjoa̱biyaà ya̱ i̱ꞌnde‑la̱ mikꞌen. [Tjíꞌndeé‑na nga skíxꞌa̱a ko̱ kichjoà nga si̱ìkjaáya‑la̱.]
\v 19 Chjí jñà kjoa̱ xi jye kàꞌyi ko̱ kjoa̱ xi tíma na̱chrjein i̱ꞌndei̱ ko̱ kjoa̱ xi ko̱ma nga ko̱ma i̱skan.
\v 20 Kií tsò‑ne jè kjoa̱ꞌma xi kàꞌyi tsꞌe̱ niꞌño xi itoò ma‑ne xi tjíya ndsa̱a kixi̱ ko̱ xi itoò candelero xi nguì ki̱cha̱ oro. Jñà niꞌño xi itoò ma, jñà àkja̱le̱‑la̱ na̱xa̱ndá‑na̱ xi itoò i̱ꞌnde títsa̱jna; ko̱ jñà candelero xi itoò ma‑ne, jñà‑né xi na̱xa̱ndá‑na̱ xi itoò i̱ꞌnde títsa̱jna.
\c 2
\s Kjoa̱ xi kisinè‑la̱ na̱xa̱ndá‑la̱ Cristo ján Éfeso
\p
\v 1 ’Chjí jngoò‑la̱ xo̱jo̱n jè àkja̱le̱‑la̱ na̱xa̱ndá‑na̱ xi tíjna ján Éfeso: “Kií tsò jè xi itoò niꞌño tjíya tsja kixi̱, jè xi tsóhojiìn osen‑la̱ jñà candelero xi itoò ma‑ne xi nguì ki̱cha̱ oro, tsò‑né:
\v 2 Tìbe‑ná xá‑nò, ꞌñó titsa̱nìxá ko̱ nga mìkiì bijta‑nò. Ti̱koa̱á tìbe‑ná nga mì ti̱ kiì chíkjoa̱ko̱‑nò jñà xi̱ta̱ xi chꞌo sꞌín. Ti̱koa̱á tìbe‑ná nga jyeé kichìtꞌaà jñà xi̱ta̱ xi tsò‑la̱ yijo‑la̱ nga Cristo tsibíxáya‑la̱, ta̱nga mìtsà kixi̱ kjoa̱. Jyeé kiꞌyaà nga xi̱ta̱ ndiso‑né.
\v 3 Kjitꞌaà na̱chrjein ꞌñó tse kjo̱ꞌin titsa̱nìkjioón, ko̱ ꞌñó titsa̱nìxá xi kjoa̱ tsꞌa̱n. Mìkiì bijta‑nò.
\v 4 Ta̱nga tjín jngoò‑nò kjoa̱ xi chꞌo tjín xi mìkiì sasén‑na nga mì ti̱ kꞌoa̱á sꞌín tjín‑nò kjo̱tjòcha koni nga sa̱ ítjòn.
\v 5 Jñò, ti̱kítsjeèn kó kiꞌnè nga sa̱ ítjòn kꞌe̱ nga kjꞌeè jé bixòjñoò. Ti̱kájno jé‑nò. Ìjngoò kꞌa Nainá tanguítꞌaà‑là. Kꞌoa̱á sꞌín tꞌe̱en koni kiꞌnè nga sa̱ ítjòn. Tsà majìn‑nò, ꞌa̱n kjián nga tsjaà‑nò kjo̱ꞌin ko̱ kjoa̱áxìn‑nò niꞌín candelero‑nò ya̱ i̱ꞌnde ñánda síjna.
\v 6 Ta̱nga tjín kjoa̱ xi ndaà titsa̱ꞌnè nga majticha kjoa̱ xi sꞌín jñà xi̱ta̱ nicolaítas. ꞌA̱n, ti̱koa̱á majtike̱‑ná.
\v 7 Ndaà ti̱náꞌyaà koni tsò Ini̱ma̱ Tsjeè‑la̱ Nainá nga tíchja̱‑la̱ na̱xa̱ndá‑na̱. Jñà xi si̱ìkijne, ꞌa̱án tsjaà‑la̱ nga ski̱ne̱ jñà toò‑la̱ jè yá xi síkíjnakon‑ná xi síjna ya̱ i̱ꞌnde‑la̱ Nainá ñánda ꞌñó ndaà choòn.”
\s Kjoa̱ xi kisinè‑la̱ na̱xa̱ndá‑la̱ Cristo ján Esmirna
\p
\v 8 ’Chjí jngoò‑la̱ xo̱jo̱n jè àkja̱le̱‑la̱ na̱xa̱ndá‑na̱ xi tíjna ján Esmirna: “Kií tsò jè xi tsibìjna ítjòn ko̱ xi fehetꞌaà‑ne, jè xi kꞌen ko̱ jaáya‑la̱, tsò‑né:
\v 9 ꞌA̱n be‑ná xá‑nò ko̱ kjo̱ꞌin xi titsa̱nìkjioón ko̱ nga xi̱ta̱ i̱ma̱ ꞌmì‑nò (ta̱nga i̱tꞌaà tsꞌe̱ Nainá, xi̱ta̱ nchi̱ná‑nó jñò). Be‑ná nga chꞌoó chja̱jno‑nò jñà xi̱ta̱ xi tsò nga xi̱ta̱ judío‑né ta̱nga mìtsà kixi̱ kjoa̱ nga xi̱ta̱ judío. Jñà xi̱ta̱ koi, ya̱á chja̱‑ne ya̱ niꞌya ñánda maxkóya xi̱ta̱‑la̱ xi̱ta̱ nei̱í.
\v 10 Kì tsakjoòn‑jèn jè kjo̱ꞌin xi si̱kjioón, jè xi̱ta̱ nei̱í ski̱nìsꞌen‑nò nda̱yá mé‑ne nga skótꞌaà‑nò kjoa̱ xi mokjeiín‑nò; te na̱chrjein sꞌe̱‑nò kjo̱ꞌin. ꞌÑó tꞌè‑là takòn kóni skanda kꞌe̱ nga ki̱yá. Ko̱ ꞌa̱án tsjaà‑nò jè kjoa̱binachon xi mìkiì fehetꞌaà koni jngoò corona.
\v 11 Ndaà ti̱náꞌyaà koni tsò Ini̱ma̱ Tsjeè‑la̱ Nainá nga tíchja̱‑la̱ na̱xa̱ndá‑na̱. Jñà xi si̱ìkijne, ni̱mé kjoa̱ xi ko̱matꞌin i̱tꞌaà tsꞌe̱ kjoa̱biyaà xi ma‑ne jò kꞌa.”
\s Kjoa̱ xi kisinè‑la̱ na̱xa̱ndá‑la̱ Cristo ján Pérgamo
\p
\v 12 ’Chjí jngoò‑la̱ xo̱jo̱n jè àkja̱le̱‑la̱ na̱xa̱ndá‑na̱ xi tíjna ján Pérgamo: “Kií tsò jè xi tjín‑la̱ ki̱cha̱ ndojò xi yijò kji nga ingajò ngobà, tsò‑né:
\v 13 ꞌA̱n tìbe‑ná xá‑nò, tìbe‑ná nga ya̱á titsa̱jnaà ñánda tíhotíxoma xi̱ta̱ nei̱í. Ta̱nga be‑ná nga kixi̱ titsa̱jnaà; mìkiì nìjchàajioòn i̱tꞌaà tsꞌa̱n. Ti̱koa̱ be‑ná nga mìkiì bìꞌma koni sꞌín mokjeiín‑nò i̱tꞌaà tsꞌa̱n, na̱sꞌín kꞌe̱ nga kꞌen Antipas, xi̱ta̱ xi kixi̱ béno̱jmí xi i̱tꞌaà tsꞌa̱n; nga ya̱á kꞌen i̱jiìn na̱xa̱ndá‑nò ya̱ ñánda síxá xi̱ta̱ nei̱í.
\v 14 Ta̱nga tjín iꞌnga kjoa̱ xi mìkiì sasén‑na nga chꞌo titsa̱ꞌnè, nga ya̱á títsa̱jnajiìn‑nò xi̱ta̱ xi mokjeiín‑la̱ koni sꞌín tsakóya Balaam kjòtseé nga chincháꞌa Balac nga mejèn‑la̱ ko̱hótsji jé jñà xi̱ta̱ Israel nga kàtakine tsojmì xi xkósòn kisinchaàtꞌaà‑la̱; ti̱koa̱ kàtasꞌín kjoa̱chijngui.
\v 15 Ti̱koa̱á títsa̱jnajiìn iꞌnga‑nò xi̱ta̱ xi mokjeiín‑la̱ koni sꞌín okóya jñá xi̱ta̱ nicolaítas. Jñà xi̱ta̱ koi, ꞌa̱n majtike̱‑ná.
\v 16 Kꞌoa̱á ma‑ne ti̱kájno jé‑nò, kì ti̱ jé binchaàtsji‑nò. Tsà mì kꞌoa̱ sꞌe̱en, ni̱to̱ón kjián nga ska̱àn‑koa̱a xi̱ta̱ koi. Jè sikjeén ki̱cha̱ ndojò xi bitjo‑ne ndso̱ba.
\v 17 Ndaà ti̱náꞌyaà koni tsò Ini̱ma̱ Tsjeè‑la̱ Nainá nga tíchja̱‑la̱ na̱xa̱ndá‑na̱. Jñà xi si̱ìkijne, ꞌa̱án tsjaà‑la̱ tsojmì xi ski̱ne̱ xi ꞌmì maná xi ꞌa̱n tjíꞌma‑na; ti̱koa̱ tsjaà jngoò‑la̱ ndí nda̱jo̱ jtobá xi chroba kji; ya̱á tjítꞌaà ꞌín xi̱tse̱ xi mì yá beèxkon; tà jè skoe̱xkon xi tjoé‑la̱.”
\s Kjoa̱ xi kisinè‑la̱ na̱xa̱ndá‑la̱ Cristo ján Tiatira
\p
\v 18 ’Chjí jngoò‑la̱ xo̱jo̱n jè àkja̱le̱‑la̱ na̱xa̱ndá‑na̱ xi tíjna ján Tiatira: “Kií tsò jè Kiꞌndí‑la̱ Nainá xi ko̱kjoàn xko̱n koni niꞌín, ko̱ jñà ndso̱ko̱, kꞌoa̱á kjoàn koni ki̱cha̱ sinè xi ꞌmì bronce xi ꞌñó ndaà kjòchrjaꞌi:
\v 19 ꞌA̱n, be‑ná xá‑nò ko̱ kjoa̱tjòcha‑nò, ko̱ kósꞌín nga mokjeiín‑nò koa̱ kósꞌín titsa̱nìxá nga tíchíkjoa̱ko̱‑nò xá xi titsa̱ꞌnè. Be‑ná nga jè na̱chrjein i̱ꞌndei̱ ìsa̱á ndaà titsa̱nìxá mì kꞌoa̱‑ne koni nga sa̱ ítjòn.
\v 20 Ta̱nga tjín iꞌnga kjoa̱ xi mìkiì sasén‑na nga chꞌo titsa̱ꞌnè, nga biìꞌnde‑là jè chjo̱ón Jezabel xi tsò‑la̱ yijo‑la̱ nga ma‑la̱ béno̱jmíya mé kjoa̱ xi i̱skan ko̱ma nga kona̱cha̱n ko̱ okóya‑la̱ xi̱ta̱ chi̱ꞌnda‑na̱ mé‑ne nga kjoa̱chijngui kàtasꞌín‑ne ti̱koa̱ kàtakine tsojmì xi xkósòn sinchátꞌaà‑la̱.
\v 21 ꞌA̱án tìtsja ìsa̱‑la̱ na̱chrjein nga kàtasíkájno jé‑la̱ nga mì ti̱ jé ko̱hótsji‑ne, ta̱nga majìn‑la̱ tsjeiìn takòn kjoa̱chijngui xi sꞌín.
\v 22 Ta̱nga ꞌa̱án tsja‑la̱ chꞌin nga ꞌñó tse kjo̱ꞌin si̱ìkjeiín ko̱ jñà xi̱ta̱ xi ngásòn sꞌín kjoa̱chijngui, tsà majìn‑la̱ nga si̱ìkájno jé‑la̱ nga mì ti̱ jé ko̱hótsji‑ne.
\v 23 Jñà xi̱ta̱ xi ya̱ fìtꞌaà‑la̱, jngoò kꞌaá si̱kꞌen. Ko̱ ngatsꞌiì xi̱ta̱ na̱xa̱ndá‑la̱ Cristo skoe̱‑né nga ꞌa̱n‑ná xi be kó tsò kjo̱hítsjeèn‑la̱ ko̱ ini̱ma̱‑la̱ jñà xi̱ta̱. Jñò, nga jngoò ìjngoò, kꞌoa̱á sꞌín tsja‑nò kjo̱ꞌin koni tjín kjoa̱ xi titsa̱ꞌnè.
\v 24 Ta̱nga jñò ko̱ xi̱ta̱ xi iꞌnga xi títsa̱jna Tiatira xi mìkiì kotaꞌyà kjo̱hítsjeèn xi mìkiì ndaà tjín, ti̱koa̱ kjꞌeè kiì beè jè xi tsò‑la̱ jñà xi̱ta̱ koi kjoa̱tjíꞌma‑la̱ xi̱ta̱ nei̱í. Jñò, kꞌoa̱á xan‑nò mìtsà ti̱ mé kjoa̱ si̱ìjé‑ìsa‑nò.
\v 25 Ta̱nga jñò, koni sꞌín tjín jè kjo̱hítsjeèn ndaà xi titsa̱ꞌnè, kꞌoa̱á sꞌín tꞌe̱en skanda kꞌe̱ nga ꞌa̱n kjoia̱a ìjngoò kꞌa.
\v 26 Jñà xi si̱ìkijne‑la̱ kjoa̱ tsꞌe̱ jé ti̱koa̱ si̱ìkitasòn xá‑na̱ koni sꞌín mejèn‑na̱ skanda kꞌe̱ nga kjoe̱hetꞌaà na̱chrjein, ꞌa̱án tsjaà‑la̱ xá nga jñà ko̱tìxoma‑la̱ ngatsꞌiì na̱xa̱ndá xi tjín i̱sòꞌnde.
\v 27 Jñà xi̱ta̱ xi ko̱tìxoma, nguì ko̱ó ki̱cha̱ ko̱tìxoma‑ne. Kꞌoa̱á sꞌín si̱ìxkoa̱ya koni ti̱jí niꞌnde.
\v 28 Jè kjo̱tíxoma jè, ti̱jé‑ne xi kitsjaà‑na Na̱ꞌèn‑na̱. ꞌA̱n ti̱koa̱á tsjaà‑la̱ jè niꞌño tse xi bitjokàtji kꞌe̱ nga ta̱jñòya.
\v 29 Ndaà ti̱náꞌyaà koni tsò Ini̱ma̱ Tsjeè‑la̱ Nainá nga tíchja̱‑la̱ na̱xa̱ndá‑na̱.”
\c 3
\s Kjoa̱ xi kisinè‑la̱ na̱xa̱ndá‑la̱ Cristo ján Sardis
\p
\v 1 ’Chjí jngoò‑la̱ xo̱jo̱n jè àkja̱le̱‑la̱ na̱xa̱ndá‑na̱ xi tíjna ján Sardis: “Kií tsò jè xi itoò ini̱ma̱‑la̱ Nainá tjín‑la̱, ko̱ itoò ma niꞌño‑la̱: ꞌA̱n be‑ná kjoa̱ xi titsa̱ꞌnè; kꞌoa̱á sꞌín ꞌya‑nò nga titsa̱jnakon‑nó ta̱nga xi nguì kixi̱ kjoa̱, titsa̱jnakꞌen‑nó.
\v 2 Ti̱kjaáya‑là yijo‑nò, tjiì‑là ngaꞌñó kjoa̱ xi jye mejèn tíchija. ꞌA̱n, kjꞌeè kiì be tsà ndaà titsa̱ꞌnè nga nguixko̱n Nainá.
\v 3 Ti̱kítsjeèn kjo̱hítsjeèn xi kitjoé‑nò ko̱ xi jye ndaà kinaꞌyà; kꞌoa̱sꞌín ti̱kitasòn. Ti̱kájno jé‑nò, kì ti̱ jé binchaàtsji‑nò. Tsà mìkiì si̱kinda̱a yijo‑nò kꞌoa̱á sꞌín kjoi̱ikjaá‑nò koni sꞌín xi̱ta̱ chijé kꞌe̱ nga mìkiì titsa̱jnandaà mé hora‑ne nga kjoi̱í.
\v 4 Ta̱nga tjín chiba‑nò xi̱ta̱ ya̱ Sardis xi kjꞌeè mé jé ótsji, ya̱á ta̱ña ki̱nchimako̱‑na nga chroba kjoàn nikje xi kókjá nga kꞌoa̱á sꞌín okꞌìn‑la̱.
\v 5 Jñà xi̱ta̱ xi si̱ìkijne‑la̱ kjoa̱ tsꞌe̱ jé, nikje chrobaá kjoàn xi kókjá; mìkiì sìjchàaya ꞌín‑la̱ ya̱ i̱tꞌaà xo̱jo̱n tsꞌe̱ kjoa̱binachon. Ko̱ kꞌoa̱á xán nga nguixko̱n Nainá xi Na̱ꞌèn‑na̱ ma ko̱ nguixko̱n àkja̱le̱‑la̱ nga xi̱ta̱ tsꞌa̱n‑ná.
\v 6 Ndaà ti̱náꞌyaà koni tsò Ini̱ma̱ Tsjeè‑la̱ Nainá nga tíchja̱‑la̱ na̱xa̱ndá‑na̱.”
\s Kjoa̱ xi kisinè‑la̱ na̱xa̱ndá‑la̱ Cristo ján Filadelfia
\p
\v 7 ’Chjí jngoò‑la̱ xo̱jo̱n jè àkja̱le̱‑la̱ na̱xa̱ndá‑na̱ xi tíjna ján Filadelfia: “Kꞌoa̱á tsò jè xi nguì xi̱ta̱ tsjeè ko̱ xi nguì jè sobà xi xi̱ta̱ kixi̱, jè xi tjín‑la̱ ibi̱‑la̱ xi̱ta̱xá ítjòn xi kiꞌmì David, jè xi ma‑la̱ kíxꞌa̱ xòhotjoa̱‑la̱ ngajmiì ko̱ ni̱jngoò‑ìsa xi tjíꞌnde‑la̱ nga ki̱ìchjoàjto; ko̱ kꞌe̱ nga jè ki̱ìchjoàjto, ni̱jngoò‑ìsa xi tjíꞌnde‑la̱ nga skíxꞌa̱jto:
\v 8 ꞌA̱n be yije‑ná xá‑nò; chítsejèn‑là, kisìkíjna osen jngoò‑nò xotjoa̱ xi ti̱xꞌá, xi ni̱jngoò tjíꞌnde‑la̱ nga ki̱ìchjoàjto. Nga na̱sꞌín tà chiba ngaꞌñó tjín‑nò ta̱nga titsa̱nìkitasòn‑nó koni tsò ꞌén‑na̱; mìkiì bitsa̱jnaꞌma i̱tꞌaà tsꞌa̱n.
\v 9 Tjín jngoò jtín xi̱ta̱ xi ya̱ chja̱‑ne ya̱ niꞌya ñánda maxkóya xi̱ta̱‑la̱ xi̱ta̱ nei̱í; xi̱ta̱ ndiso‑né nga tsò nga xi̱ta̱ judío, ta̱nga mìtsà kixi̱ kjoa̱. Xi̱ta̱ koi, ꞌa̱án kichjà‑la̱ nga kàtjanchrobá mé‑ne nga ki̱ncha-xkóꞌnchitꞌaà‑nò; kꞌoa̱á sꞌín skoe̱‑ne nga ꞌa̱n, ꞌñó matsjake̱‑nò.
\v 10 Koií kjoa̱‑la̱ nga titsa̱nìkitasòn koni tsò ꞌén xi kitsjaà‑nò nga ki̱chìkjoa̱ko̱ kjitꞌaà‑nò ni̱ta̱ mé kjoa̱‑ne, kꞌoa̱á ma‑ne, ꞌa̱án kósi̱ko̱‑nò jè na̱chrjein xi jye nchrobá machrañà nga sꞌe̱‑la̱ kjo̱ꞌin nga tíjtsa i̱sòꞌnde kꞌe̱ nga chítꞌaà yije xi̱ta̱ xi i̱ títsa̱jna i̱tꞌaà nangui.
\v 11 Kjoi̱i ni̱to̱ón ìjngoò kꞌa. Ndaà ti̱kinda̱a ngatsꞌiì kjo̱ndaà xi tjín‑nò koni sꞌín mokjeiín‑nò mé‑ne nga mì yá xi kjoa̱áꞌan‑nò xi jñò jye kinìkijne.
\v 12 Jñà xi si̱ìkijne‑la̱ ngatsꞌiì kjoa̱ chꞌo xi tjín i̱sòꞌnde, ꞌa̱án tsja jngoò‑la̱ i̱ꞌnde ñánda kítsa̱jna nga kjitꞌaà na̱chrjein kꞌoa̱á ngaya‑la̱ koni jngoò chrjó xi ko̱si̱nguiꞌñó‑la̱ ya̱ niꞌya tsjeè‑la̱ Nainá nga skiìjnoa ꞌín‑la̱ xi Nainá xan‑la̱ ko̱ ꞌín‑la̱ na̱xa̱ndá‑la̱ Nainá, xi Jerusalén xi̱tse̱ ꞌmì xi kji̱nchrobà‑ne ngajmiì ñánda tíjna Nainá, ti̱koa̱ skiìjnoa ꞌín xi̱tse̱ xi tsꞌa̱n.
\v 13 Ndaà ti̱náꞌyaà koni tsò Ini̱ma̱ Tsjeè‑la̱ Nainá nga tíchja̱‑la̱ na̱xa̱ndá‑na̱.”
\s Kjoa̱ xi kisinè‑la̱ na̱xa̱ndá‑la̱ Cristo ján Laodicea
\p
\v 14 ’Chjí jngoò‑la̱ xo̱jo̱n jè àkja̱le̱‑la̱ na̱xa̱ndá‑na̱ xi tíjna ján Laodicea: “Kií tsò jè xi síjngoò yije ꞌén‑la̱ Nainá, jè xi nguì ꞌén kixi̱ tsjá, jè xi nguì jè sobà kjoa̱kixi̱, jè xi tsibítsꞌia̱ ngatsꞌiì xi tsibíndaà Nainá. Kꞌoa̱á tsò:
\v 15 ꞌA̱n, be‑ná mé kjoa̱ xi titsa̱ꞌnè; mìtsà ꞌnchán titsa̱jnaà ni̱ mìtsà tsjè titsa̱jnaà nga mìtsà kondra̱ titsa̱jnako̱‑ná ko̱ mìtsà ndaà onguítꞌaà‑ná. Ndaà‑là tjín tsà nguì ndaà onguítꞌaà‑ná ko̱ tsà majìn tsà nguì kondra̱ titsa̱jnako̱‑ná.
\v 16 Ta̱nga jñò, nga isò‑nò, mìtsà ꞌnchán titsa̱jnaà ni̱ mìtsà tsjè titsa̱jnaà, kꞌoa̱á ma‑ne nga ndso̱ba skìhisò‑na.
\v 17 Jñò kꞌoa̱á bixón: Xi̱ta̱ nchi̱ná‑náje̱n; ndaà titsa̱jna‑je̱n; ni̱mé chijatꞌaà‑naje̱n. Ta̱nga mìkiì ꞌya nga ꞌiín titsa̱jnaà; ni̱mé xi tjín‑nò; xi̱ta̱ i̱ma̱‑nó; mìkiì tsejèn‑nò; laká titsjoò.
\v 18 ꞌA̱n, kꞌoa̱á xan‑nò, ꞌa̱án ti̱ndátꞌaà‑ná to̱n oro xi niꞌín kjòtsjeè‑ne mé‑ne nga xi̱ta̱ nchi̱ná ko̱ma‑nò. Ti̱koa̱ ꞌa̱án ti̱ndátꞌaà‑ná nikje tsjeè xi chroba kjoàn mé‑ne nga mì ko̱sobà‑nò nga títsa̱jna laká yijo‑nò. Ti̱koa̱ tìnguioò xkiì colirio jñà xkoòn mé‑ne nga ndaà ko̱tsejèn‑nò.
\v 19 Ngatsꞌiì xi̱ta̱ xi ꞌa̱n matsjake̱, otìko̱‑ná ti̱koa̱ tsjaà‑la̱ kjo̱ꞌin. Mochjeén‑né nga tjiì‑là ngaꞌñó yijo‑nò; ti̱kájno jé‑nò, kì ti̱ jé binchaàtsji‑nò.
\v 20 ꞌA̱n, ya̱á tìjna̱jtoa xotjoa̱ niꞌya nga tìchjà; tsà tjín iꞌnga xi kji̱ꞌnchré‑na, koa̱ tsà skíxꞌa̱ xotjoa̱ niꞌya‑la̱, ko̱maá kjoa̱hasꞌen nga kókje̱n‑koa̱a, ti̱koa̱ jè, ko̱kje̱n‑ko̱‑na.
\v 21 Jñà xi si̱ìkijne tsjaàꞌnde‑la̱ nga ya̱ kítsa̱jnatꞌaà‑na ñánda tíjna íxi̱le̱ tsꞌe̱ kjo̱tíxoma‑na̱ koni sꞌín ꞌa̱n jye kisìkijne nga ya̱á tìjna̱tꞌaà‑la̱ Na̱ꞌèn‑na̱ ñánda tíjna íxi̱le̱ tsꞌe̱ kjo̱tíxoma‑la̱.
\v 22 Ndaà ti̱náꞌyaà koni tsò Ini̱ma̱ Tsjeè‑la̱ Nainá nga tíchja̱‑la̱ na̱xa̱ndá‑na̱.”
\c 4
\s Kósꞌín yaxkón Nainá ján ngajmiì
\p
\v 1 Xi jye komà i̱skan, kiskoòtsejèn ján iꞌngaá; kìjtseè ngajmiì nga ti̱xꞌá jngoò xotjoa̱ ko̱ jè jta̱ xi kiꞌnchrè ítjòn‑la̱ xi koa̱ tsò koni chrjo trompeta, kitsò‑na:
\p ―Nchrobá mijìn i̱jndé; kokoò‑lè kjoa̱ xi ko̱ma kꞌe̱ nga jye komà yije kjoa̱ xi tíma i̱ꞌndei̱.
\p
\v 2 Tà ni̱to̱ón jꞌiì kanè ìjngoò kꞌa‑na jè ngaꞌñó‑la̱ Ini̱ma̱ Tsjeè‑la̱ Nainá; kìjtseè jngoaà íxi̱le̱ xi tíjna ngajmiì ñánda tísatíxoma. Jé íxi̱le̱ jè, tíjna jngoò xi ya̱ tíjnasòn.
\v 3 Jè xi tíjnasòn íxi̱le̱ nga tíhotíxoma, kꞌoa̱á kji ote tsejèn koni kji nda̱jo̱ chjí xi ꞌmì jaspe, o koni kji nda̱jo̱ chjí xi ꞌmì cornalina. Ya̱ i̱ndiì‑la̱ íxi̱le̱ síjnandiì jngoò‑la̱ i̱jñe̱ xi o̱kji ote tsejèn koni kji nda̱jo̱ chjí xi ꞌmì esmeralda.
\v 4 Ti̱ya̱á‑ne nga jngoò itjandiì‑la̱ ñánda tíjna xi tíjnasòn íxi̱le̱ nga tíhotíxoma, kaàn ñijòn íxi̱le̱ ꞌncha ìsa̱ ñánda tísatíxoma, ti̱koa̱ kaàn ñijòn xi̱ta̱ jchínga títsa̱jnasòn xi nguì chroba kjoàn nikje xi kikjá; saà corona ki̱cha̱ oro tjíꞌa sko̱.
\v 5 Ya̱ ñánda tíjna xi tíjnasòn íxi̱le̱ nga tíhotíxoma, bitjo niꞌín chꞌo̱n, ko̱ tsꞌiìn chꞌo̱n, ti̱koa̱ naꞌyà‑la̱ jta̱ xi chja̱; itoò niꞌín xi síhiseèn títì ya̱ nguixko̱n íxi̱le̱; jñà niꞌín, jñà ini̱ma̱ tsjeè‑la̱ Nainá xi itoò ma‑ne.
\v 6 Ya̱ nguixko̱n jè xi tíjnasòn íxi̱le̱ nga tíhotíxoma, kjijna jngoò ndáchikon xi koni kji chi̱tsín kji xi ꞌñó ote.
\p Ya̱ i̱tꞌaà íxi̱le̱ ko̱ ya̱ i̱ndiì‑la̱, ñijòn ma xi títsa̱jnakon; kóho̱kji i̱jto̱n ítsꞌi̱n ko̱ ya̱ i̱ndso̱ꞌba̱, xki̱ xi ján tjítꞌaà xko̱n.
\v 7 Jè xi tíjna ítjòn jñà xi títsa̱jnakon, kꞌoa̱á kji koni kjoàn xa. Xi ma‑ne jò, koni kji nchra̱ja̱ kiꞌndí kji. Xi ma‑ne jàn, i̱sén‑la̱ xi̱ta̱á tjín‑la̱. Xi ma‑ne ñijòn, kꞌoa̱á kji koni kji ja̱ xi tsóꞌbajiìn i̱sén.
\v 8 Jñà xi ñijòn ma‑ne xi títsa̱jnakon nga jngoò ìjngoò, joòn jnga̱á tjín‑la̱. ꞌÑó kjín ma‑ne xko̱n xi tjín nga jngoò itjandiì‑la̱ ko̱ i̱ya‑la̱. Mìkiì síkjáya ko̱ na̱chrjein ko̱ ni̱tje̱n nga tsò:
\q Tsjeè‑né, tsjeè‑né, tsjeè‑né jè Na̱ꞌèn‑ná xi Nainá,
\q xi ta jè ta̱jngoó xi ꞌñó tse ngaꞌñó tjín‑la̱,
\q jè xi tsibìjna, jè xi tíjna ko̱ jè xi kjoi̱í ìjngoò kꞌa‑ne.
\p
\v 9 Jñà xi títsa̱jnakon nchitsjá‑la̱ kjoa̱jeya, nchitsjá‑la̱ kjo̱ndaà, ko̱ nchibeèxkón jè xi tíjnasòn íxi̱le̱ jè xi tíjnakon ni̱ta̱ kjé‑ne. Kꞌe̱ kꞌoa̱ nchisꞌín,
\v 10 jñá xi̱ta̱ jchínga xi kaàn ñijòn ma‑ne bincha-xkóꞌnchi-ñiatꞌaà‑la̱ jè xi tíjnasòn íxi̱le̱ ti̱koa̱ beèxkón‑né jè xi tíjnakon ni̱ta̱ mé na̱chrjein‑ne. Síkatsjoò corona‑la̱ ya̱ nguixko̱n jè xi tíjnasòn íxi̱le̱ nga tsò:
\q
\v 11 Na̱ꞌèn, okꞌín‑lè nga ji̱ tjoé‑lè kjoa̱jeya, nga jcha̱xkón‑lè,
\q nga tsi̱ji yije‑né ngaꞌñó xi tjín,
\q nga ji̱ tsibìndiì ngatsꞌiì tsojmì xi tjín,
\q nga kꞌoa̱á sꞌín kjòmejèn‑lè nga tjín yije tsojmì
\q ko̱ nga kisindaà kóho̱tjín xi tjín.
\c 5
\s Xo̱jo̱n xi maxkóya ko̱ jè Orrè
\p
\v 1 ꞌA̱n, kìjtseè jè xi tíjnasòn íxi̱le̱ nga tíhotíxoma, kjinaya tsja kixi̱ jngoò xo̱jo̱n xi kjixkóya xi kitjeijno i̱ya‑la̱ ko̱ ngatsejèn‑la̱ ko̱ itoò kꞌa tjíꞌñó ñánda jncha‑la̱ sello nga jngoò ìjngoò kꞌa.
\v 2 Kìjtseè jngoaà àkja̱le̱ xi tse ngaꞌñó tjín‑la̱, xi ꞌñó kiìchja̱ nga kitsò:
\p ―Yá xi okꞌìn‑la̱ nga skíxꞌa̱ jè xo̱jo̱n koa̱ komà‑la̱ kjoa̱áxìn jñà sello xi jncha‑la̱.
\p
\v 3 Ta̱nga ni̱yá kisakò xi komà‑la̱ nga kiskíxꞌa̱ jè xo̱jo̱n, ni̱ mìkiì ma kotsejèn‑la̱ nga kotꞌaà kó tsò ꞌén xi tjítꞌaà; ni̱jngoò kisakò ján ngajmiì, ni̱jngoò kisakò i̱tꞌaà nangui, koa̱ ni̱jngoò kisakò i̱ngui nangui.
\v 4 ꞌA̱n, ꞌñó kiskindàya nga ko̱ ndáxkoaàn kꞌe̱ nga kìjtseè nga ni̱jngoò kjòtsji xi okꞌìn‑la̱ nga kiskíxꞌa̱ jè xo̱jo̱n nga ma kotꞌaà kó tsò ꞌén xi tjítꞌaà.
\v 5 Jñà xi̱ta̱ jchínga xi kaàn ñijòn ma‑ne, jngoò xi kitsò‑na:
\p ―Kì chìhindáya‑jèn. Tíjna xi ꞌmì: Xa‑la̱ xi̱ta̱ na̱xa̱ndá Judá, xi ti̱koa̱ ꞌmì: Tje̱‑la̱ xi̱ta̱xá ítjòn David, nga jè xi jye kisìkijne‑la̱ kondra̱‑la̱. Jè xi okꞌìn‑la̱ nga skíjnda̱ya jè xo̱jo̱n koa̱ ko̱ma kjoa̱áxìn sello‑la̱ xi itoò ma‑ne.
\p
\v 6 Kꞌe̱é kìjtseè jngoò Orrè nga síjna ya̱ jngoò osen‑la̱ ñánda tíjna xi tíjnasòn íxi̱le̱ nga tíhotíxoma, ko̱ ñánda títsa̱jna jñà xi ñijòn ma‑ne xi títsa̱jnakon, ko̱ ñánda títsa̱jna xi̱ta̱ jchínga xi kaàn ñijòn ma‑ne. Jè Orrè, kꞌoa̱á kji koni tsà jye kꞌen; itoò ma nchra̱já‑la̱ ti̱koa̱ itoò ma xko̱n; jñà xko̱n, jñà ini̱ma̱‑la̱ Nainá xi itoò ma‑ne xi kinìkasén nga tíjtsa i̱sòꞌnde.
\v 7 Jè Orrè, kiskoé jè xo̱jo̱n xi kjinaya tsja kixi̱ jè xi tíjnasòn íxi̱le̱ nga tíhotíxoma.
\v 8 Jè Orrè, kꞌe̱ nga jye kiskoé xo̱jo̱n jè, jñà xi ñijòn ma‑ne xi títsa̱jnakon ko̱ jñà xi̱ta̱ jchínga xi kaàn ñijòn ma‑ne chincha-xkóꞌnchi-ñiatꞌaà‑la̱ nga nguixko̱n Orrè. Ngatsꞌiì saà níꞌñó arpaá ꞌya ko̱ chi̱tsín xi nguì oro xi tjíya chrjongó‑la̱ nainá. Jè chrjongó‑la̱ nainá jñà xi kjoa̱ bítsiꞌba‑la̱ jñà xi̱ta̱‑la̱ Nainá.
\v 9 Kiseè jngoò sò xi̱tse̱ xi tsò:
\q Okꞌín‑lè nga ngaji̱ chjoí jè xo̱jo̱n, chja̱àxìn sello‑la̱
\q nga ji̱ kinìkꞌen‑lè, nga ko̱ jní‑lè tsibíchjítjì xi̱ta̱
\q xi ya̱ itjokàjiìn‑ne ngatsꞌiì tje̱‑la̱ xi̱ta̱ xi tjín i̱sòꞌnde,
\q ngatsꞌiì ꞌén xi tjín i̱sòꞌnde,
\q ngatsꞌiì na̱xa̱ndá xi tjín,
\q ko̱ ngatsꞌiì nangui xi tjín i̱sòꞌnde
\q mé‑ne nga ya̱ ki̱chja̱‑ne i̱tꞌaà tsꞌe̱ Nainá.
\q
\v 10 Ko̱ xi̱ta̱xá ítjòn kiꞌnì ko̱ no̱ꞌmiì kiꞌnì
\q nga ma si̱ìkitasòn‑la̱ Nainá,
\q koa̱ jñà ko̱tìxoma i̱ i̱tꞌaà nangui.
\p
\v 11 Kꞌe̱ nga kiskoòtsejèn, kiꞌnchrè jta̱‑la̱ jñà àkja̱le̱ xi kjiìn jchán millón ma‑ne xi nchiseè ya̱ i̱ndiì‑la̱ ñánda tíjna xi tíjnasòn íxi̱le̱ nga tíhotíxoma ko̱ ya̱ ñánda títsa̱jna jñà xi títsa̱jnakon ko̱ jñà xi̱ta̱ jchínga.
\v 12 ꞌÑó jchán nchichja̱ nga tsò:
\q Jè Orrè xi kinìkꞌen, okꞌín‑la̱ nga jcha̱xkón
\q nga tsꞌe̱ yije‑né ngaꞌñó xi tjín,
\q ko̱ kjoa̱ nchi̱ná ko̱ kjoa̱ chji̱ne̱,
\q ko̱ jè tsjá ngaꞌñó,
\q ndaà kàtayaxkón,
\q jeya kàtìjna ko̱ ꞌnga kàtìjna.
\p
\v 13 Ngatsꞌiì xi xó kisindaà‑ne xi tjín ngajmiì, xi tjín i̱ i̱tꞌaà nangui ko̱ ya̱ i̱ngui nangui, ko̱ xi tjín i̱jiìn ndáchikon, kiꞌnchrè‑la̱ nga tsò:
\q Jè xi tíjnasòn íxi̱le̱ ko̱ Orrè, ꞌnga kàtìtsa̱jna;
\q kàtayaxkón, jeya kàtìtsa̱jna,
\q kàtasꞌe‑la̱ ngaꞌñó ni̱ta̱ mé na̱chrjein‑ne.
\p
\v 14 Jñà xi ñijòn ma‑ne xi títsa̱jnakon, kitsò:
\p ―¡Kꞌoa̱sꞌín kàtama!
\p Jñà xi̱ta̱ jchínga xi kaàn ñijòn ma‑ne chincha-xkóꞌnchi-ñiatꞌaà‑la̱ nga jeya kisìkíjna jè xi tíjnakon ni̱ta̱ mé na̱chrjein‑ne.
\c 6
\s Sello xi itoò ma‑ne
\p
\v 1 Kꞌe̱é kìjtseè jè Orrè nga jaàxìn ítjòn jngoò sello. I̱kjoàn kiꞌnchrè jngoò‑la̱ jñà xi ñijòn ma‑ne xi títsa̱jnakon nga kiìchja̱. Kꞌoa̱á kitsò koni ma chꞌo̱n nga one, kitsò:
\p ―Nchroboí.
\p
\v 2 Kiskoòtsejèn, kꞌe̱é kìjtseè jngoò kohòyo̱ xi chroba kji; jè xi tíjnakjá‑la̱ kohòyo̱, kjinaya tsja jngoò arco xi mochjeén kꞌe̱ nga tjín kjo̱jchán; i̱kjoàn kitjoé jngoò‑la̱ corona xi siꞌa sko̱ xi̱ta̱ kꞌe̱ nga síkijne; kiì nga jye kisìkijne mé‑ne nga si̱ìkijne ìsa̱‑ne.
\p
\v 3 Jè Orrè, kꞌe̱ nga jaàxìn sello xi ma‑ne jò, kiꞌnchrè‑la̱ jè xi ma‑ne jò xi títsa̱jnakon nga kitsò:
\p ―¡Nchroboí!
\p
\v 4 Ko̱ ìjngoò kohòyo̱ itjo xi inì kji; jè xi tíjnakjá‑la̱, kitjoé jngoò‑la̱ ki̱cha̱ ndojò xi ꞌñó je kji, ti̱koa̱ kitjoé‑la̱ ngaꞌñó nga kàtjaàxìn kjoa̱ꞌnchán xi tjín i̱tꞌaà nangui mé‑ne nga kàtasíkꞌen‑ne xíkjín jñà xi̱ta̱.
\p
\v 5 Jè Orrè, kꞌe̱ nga jaàxìn sello xi ma‑ne jàn, kiꞌnchrè‑la̱ jè xi ma‑ne jàn xi títsa̱jnakon nga kitsò:
\p ―¡Nchroboí!
\p Kꞌe̱ nga kiskoòtsejèn, kìjtseè ìjngoò kohòyo̱ xi jmà kji; jè xi tíjnakjá‑la̱ kohòyo̱, jngoò libra tjíya tsja jè xi machi̱ba̱ya‑ne tsojmì.
\v 6 Kiꞌnchrè jngoò‑la̱ jta̱ ya̱ jngoò osen‑la̱ jñà xi ñijòn ma‑ne xi títsa̱jnakon nga kitsò:
\p ―Nga jngoò nisoò trigo, jngoò na̱chrjein chjí‑la̱ chi̱ꞌnda tjín‑ne. Ko̱ nga jàn nisoò cebada, ti̱koa̱á jngoò na̱chrjein chjí‑la̱ chi̱ꞌnda tjín‑ne. Kì tà nìkitsꞌón‑jen jè asìti̱ ko̱ vino.
\p
\v 7 Jè Orrè, kꞌe̱ nga jaàxìn sello xi ma‑ne ñijòn, kiꞌnchrè jta̱‑la̱ jè xi ma‑ne ñijòn xi títsa̱jnakon nga kitsò:
\p ―¡Nchroboí!
\p
\v 8 Kiskoòtsejèn, kìjtseè jngoaà kohòyo̱ xi sinè kji. Jè xi tíjnakjá‑la̱, Kjoa̱biyaà ꞌmì ꞌín‑la̱; ìjngoò tji̱ngui‑la̱ xi I̱ꞌnde tsꞌe̱ Mikꞌen ꞌmì. Kitjoé‑la̱ kjo̱tíxoma nga ngatsꞌiì xi̱ta̱ xi tjín i̱sòꞌnde, xi ñijòn xi̱ta̱, jngoò ki̱yá xi kjoa̱ tsꞌe̱ kjo̱jchán, kjoa̱ tsꞌe̱ kjinchrá, kjoa̱ tsꞌe̱ chꞌin ko̱ kjoa̱ tsꞌe̱ cho̱ tsꞌe̱n xi tjín i̱jiìn ijñá si̱ìkꞌen.
\p
\v 9 Jè Orrè, kꞌe̱ nga jaàxìn sello xi ma‑ne ꞌòn, ꞌa̱n kìjtseè ya̱ i̱ngui ími̱xa̱ tsjeè‑la̱ Nainá títsa̱jna jñà xi̱ta̱ xi kinìkꞌen nga koií kjoa̱‑la̱ ꞌén‑la̱ Nainá, ti̱koa̱ koií kjoa̱‑la̱ nga kixi̱ kitsjaà ꞌén‑la̱ Nainá.
\v 10 ꞌÑó nchichja̱ nga tsò:
\p ―Na̱ꞌèn xi ji̱ sabà tìhotìxomai, ji̱ xi nguì tsjeè tijni ko̱ nguì kjo̱kixi̱, skanda mé na̱chrjein kíndaàjiìn‑la̱ nga kꞌoi̱‑la̱ kjo̱ꞌin jñà xi̱ta̱ xi tjín ján i̱sòꞌnde, jñà xi kisìkꞌen‑naje̱n.
\p
\v 11 Kꞌe̱é kitsꞌiì‑la̱ nikje xi chroba kjoàn, kiꞌmì‑la̱ nga kàtasíkjáya chiba na̱chrjein ìsa̱ skanda kꞌe̱ nga ko̱jngoò jñà xi ꞌndse̱ joó i̱tꞌaà tsꞌe̱ Cristo xi ti̱koa̱ ngásòn xá‑la̱ Nainá ki̱yájiìn‑ne.
\p
\v 12 Jè Orrè, kꞌe̱ nga jaàxìn sello xi ma‑ne joòn, kiskoòtsejèn nga jꞌiì jngoò chꞌón xi ꞌñó tsꞌa. Jè tsꞌoí, jmà kji komà koni nikje jmà, ko̱ jè sá, inì kji komà koni jní.
\v 13 Jñà niꞌño xi tjín ngajmiì, chixòtꞌaà nangui koni ma jñà toò iko̱ xkoén nga bixòngui kꞌe̱ nga ꞌñó ꞌba tjo̱.
\v 14 Jè ngajmiì, kꞌoa̱á sꞌín kichijà koni jngoò xo̱jo̱n xi ma maxkóya; ngatsꞌiì jñà nindoò ko̱ nangui jiìn‑ndá xi tjín i̱jiìn ndáchikon, jahatjìya‑la̱ ya̱ i̱ꞌnde ñánda títsa̱jna.
\v 15 Jñà xi̱ta̱xá ítjòn xi tjín i̱sòꞌnde, ko̱ xi̱ta̱ xi ꞌñó ndaà yaxkon‑la̱, ko̱ xi̱ta̱ nchi̱ná, ko̱ xi̱ta̱ sko̱‑la̱ soldado, ko̱ xi̱ta̱ xi tse ngaꞌñó tjín‑la̱, ko̱ xi̱ta̱ chi̱ꞌnda, ko̱ xi̱ta̱ xi títsa̱jnandei̱í nga mìtsà nei tjín‑la̱, ya̱á tsibìtsa̱jnaꞌma ñánda tjín nguijo ko̱ na̱xi̱ xi tjín‑la̱ nindoò.
\v 16 Kitsò‑la̱ jñà nindoò ko̱ jñà na̱xi̱:
\p ―Ti̱katsjònè‑náje̱n yijo‑nò, tijtsaꞌma‑náje̱n mé‑ne nga mìkiì skoe̱‑naje̱n jè xi tíjnasòn íxi̱le̱ nga tíhotíxoma ko̱ ti̱koa̱ ki̱tsa̱jnaꞌma‑la̱je̱n kjoa̱jti‑la̱ ko̱ kjo̱ꞌin xi tsjá jè Orrè.
\v 17 Nga jye ijchò na̱chrjein‑la̱ Nainá ko̱ Orrè nga ko̱ kjo̱jti‑la̱, ꞌñó tse kjo̱ꞌin tsjá. ¿Yá xi ko̱ma ki̱chìkjoa̱ko̱‑la̱?
\c 7
\s Jñà chi̱ꞌnda‑la̱ Nainá xi tjítꞌaà chi̱ba̱‑la̱
\p
\v 1 Xi jye komà i̱skan kjoa̱ koi, ꞌa̱n kìjtseè ñijòn àkja̱le̱ xi jncha kixi̱ nga ñijòn chrja̱ngui̱‑la̱ i̱sòꞌnde xi nchibíchjoàhikon‑la̱ tjo̱ mé‑ne nga mì ti̱ kiì kꞌoa̱‑ne ya̱ i̱sòn i̱sòꞌnde ko̱ i̱sòn ndáchikon, ti̱koa̱ ni̱jngoò yá si̱ìníyá‑la̱.
\v 2 Ti̱koa̱á kìjtseè ìjngoaà àkja̱le̱ xi tínchrobá‑ne ñánda bitjokàtji‑ne tsꞌoí xi ꞌya jngoò ki̱cha̱ tsꞌe̱ Nainá xi tíjnakon xi ma sitꞌaà chi̱ba̱‑la̱ xi̱ta̱. ꞌÑó kiìchja̱‑la̱ jñà àkja̱le̱ xi ñijòn ma‑ne xi jye kitjoé‑la̱ ngaꞌñó nga tsjá chꞌin‑la̱ i̱sòꞌnde ko̱ ndáchikon.
\v 3 Kitsò‑la̱:
\p ―Kì tà chjà chꞌin ꞌbì‑lá i̱sòꞌnde ko̱ ndáchikon ko̱ yá, skanda kꞌe̱‑né nga jye si̱tꞌaà chi̱ba̱‑la̱ ya̱ tjen‑la̱ jñà xi chi̱ꞌnda‑la̱ Nainá.
\p
\v 4 Kiꞌnchrè‑la̱ kótjín ma‑ne jñà xi̱ta̱ xi kisitꞌaà chi̱ba̱‑la̱, jngoò sìndo̱ ko̱ ichán ñijòn jmiì ma‑ne, ngatsꞌiì tje̱‑la̱ xi̱ta̱ Israel.
\v 5 Jñà ngatsꞌiì tje̱‑la̱ xi̱ta̱ koi xi kisitꞌaà chi̱ba̱‑la̱: jñà tje̱‑la̱ Judá, tejò jmiì ma‑ne. Jñà tje̱‑la̱ Rubén, tejò jmiì ma‑ne. Jñà tje̱‑la̱ Gad, tejò jmiì ma‑ne.
\v 6 Jñà tje̱‑la̱ Aser, tejò jmiì ma‑ne. Jñà tje̱‑la̱ Neftalí, tejò jmiì ma‑ne. Jñà tje̱‑la̱ Manasés, tejò jmiì ma‑ne.
\v 7 Jñà tje̱‑la̱ Simeón, tejò jmiì ma‑ne. Jñà tje̱‑la̱ Leví, tejò jmiì ma‑ne. Jñà tje̱‑la̱ Isacar, tejò jmiì ma‑ne.
\v 8 Jñà tje̱‑la̱ Zabulón, tejò jmiì ma‑ne. Jñà tje̱‑la̱ José, tejò jmiì ma‑ne. Jñà tje̱‑la̱ Benjamín, tejò jmiì ma‑ne.
\s Xi̱ta̱ xi kjín jchán ma‑ne xi chroba kjoàn nikje xi íkjá
\p
\v 9 Xi jye komà, kꞌe̱ nga kiskoòtsejèn, kjín jchán xi̱ta̱ kìjtseè; ni̱yá xi maxke̱ya‑la̱. Ya̱á títsa̱jna xi̱ta̱ xi ya̱ inchrobàjiìn‑ne ngatsꞌiì nangui xi tjín i̱sòꞌnde, ko̱ ngatsꞌiì tje̱‑la̱ xi̱ta̱ xi tjín i̱sòꞌnde, ko̱ títsa̱jna xi̱ta̱ xi chja̱ ngatsꞌiì ꞌén xi tjín, ko̱ xi̱ta̱ xi ya̱ nchrobá‑ne ngatsꞌiì na̱xa̱ndá xi tjín. Jñà xi̱ta̱ koi, ꞌncha kixi̱‑né nga nguixko̱n xi tíjnasòn íxi̱le̱ nga tíhotíxoma ti̱koa̱ nga nguixko̱n jè Orrè. Saà nikje chrobaá íkjá ko̱ saà xka̱jén kjiya tsja.
\v 10 Ngatsꞌiì xi̱ta̱ koi, ꞌñó jchán nchichja̱ nga tsò:
\q Jè Na̱ꞌèn‑ná xi Nainá xi tíjnasòn íxi̱le̱ ñánda nga tíhotíxoma
\q ko̱ jè Orrè,
\q tsachrjekàjiìn‑ná kjo̱ꞌin.
\m
\v 11 Ngatsꞌiì jñà àkja̱le̱ ꞌncha kixi̱‑né ya̱ i̱ndiì‑la̱ ñánda tíjna xi tíjnasòn íxi̱le̱ nga tíhotíxoma ko̱ ya̱ ñánda títsa̱jna jñà xi̱ta̱ jchínga xi kaàn ñijòn ma‑ne, ko̱ jñà xi ñijòn ma‑ne xi títsa̱jnakon. Chincha-xkóꞌnchi-ñiatꞌaà‑la̱ skanda i̱tꞌaà nangui nga kijtseèxkón Nainá.
\v 12 Kitsò:
\q Kꞌoa̱á sꞌín kàtama.
\q Nainá ꞌñó tjín‑la̱ kjoa̱ machikon‑tꞌin, ko̱ kjoa̱ jeya, ko̱ kjoa̱ chji̱ne̱,
\q tjín‑la̱ kjo̱ndaà, ꞌñó ꞌnga tíjna, tse ngaꞌñó tjín‑la̱,
\q ko̱ tjín‑la̱ kjo̱tíxoma.
\q Kꞌoa̱sꞌín kàtama skanda ni̱ta̱ mé na̱chrjein‑ne.
\p
\v 13 Kꞌe̱é kiìchja̱ jngoò‑na jñà xi̱ta̱ jchínga, kitsò:
\p ―Jñà xi̱ta̱ xi chroba kjoàn nikje xi íkjá, ¿yá xi̱ta̱‑ne, ñánda kòfꞌiì‑ne?
\p
\v 14 ꞌA̱n, kixan‑la̱:
\p ―Ngaji̱í tíjiìn‑lè na̱ꞌèn.
\p Jè kitsò‑na̱:
\p ―Jñà xi̱ta̱ koi xi tsatojiìn kjo̱ꞌin jè na̱chrjein kꞌe̱ nga ꞌñó tse kjo̱ꞌin kisꞌe. Kisìtsjeè nikje‑la̱ nga ko̱ jní‑la̱ Orrè‑la̱ Nainá kisìchroba‑ne.
\v 15 Koií kjoa̱‑la̱ nga ya̱ títsa̱jna‑ne nguixko̱n jè xi tíjnasòn íxi̱le̱ nga tíhotíxoma ko̱ na̱chrjein ko̱ ni̱tje̱n sísꞌin‑la̱ ya̱ i̱ngo̱‑la̱. Jè xi tíjnasòn íxi̱le̱ ya̱á kíjnajiìn osen kjitꞌaà‑la̱ nga si̱ìkinda̱.
\v 16 Mì ti̱ kiì kjinchrá si̱ìkjeiín‑ne ko̱ mì ti̱ kiì ko̱xíndá‑la̱. Ko̱ mì ti̱ kiì ko̱kà‑ne yijo‑la̱ jè ndobá‑la̱ tsꞌoí kꞌe̱ nga ꞌñó matsjè.
\v 17 Nga jè Orrè xi tíjna jngoò osen‑la̱ ñánda tíjna xi tíjnasòn íxi̱le̱ nga tíhotíxoma, jè si̱ìkinda̱ koni sꞌín makinda̱ orrè; jè kjoi̱ko̱ ñánda tíbitjo nandá xi tíjnakon. Nainá si̱ìxìjno yije ndáxko̱n jñà xi̱ta̱ koi.
\c 8
\s Xi ma‑ne itoò sello
\p
\v 1 Jè Orrè, kꞌe̱ nga jaàxìn jè sello xi ma‑ne itoò, osen‑la hora jñá kisꞌe ján ngajmiì.
\v 2 I̱kjoàn kìjtseè jñà àkja̱le̱ xi itoò ma‑ne xi ꞌncha kixi̱ nguixko̱n Nainá, jngoò chrjo trompeta kitsꞌiì‑la̱ nga jngoò ìjngoò.
\v 3 Kꞌe̱é jꞌiì ìjngoò àkja̱le̱ xi ꞌya jngoò ki̱cha̱ xi nguì oro jè xi tjíya chrjongó‑la̱ Nainá. Tsasíjna kixi̱ ya̱ i̱tꞌaà ími̱xa̱ tsjeè‑la̱ Nainá, i̱kjoàn tse chrjongó‑la̱ Nainá kitsꞌiì‑la̱ mé‑ne nga ya̱ kisìjngoòko̱‑ne jè kjoa̱ bìtsiꞌba‑la̱ jñà xi̱ta̱‑la̱ Nainá. Ya̱á tsaká ya̱ i̱sòn ími̱xa̱ tsjeè xi nguì oro xi tíjna ya̱ nguixko̱n jè xi tíjnasòn íxi̱le̱ ñánda tíhotíxoma.
\v 4 Jè ni̱ꞌndi̱‑la̱ chrjongó‑la̱ nainá ko̱ kjoa̱ bítsiꞌba‑la̱ xi̱ta̱‑la̱ Nainá tsijin‑né ya̱ tsja jè àkja̱le̱ ya̱ nguixko̱n Nainá.
\v 5 Jè àkja̱le̱ kiskoé jè ki̱cha̱ xi tìya chrjongó‑la̱ Nainá, chinchá‑ìsa̱ xáꞌí xi títìsòn ya̱ i̱tꞌaà ími̱xa̱ tsjeè‑la̱ Nainá. I̱kjoàn kisìkatje̱n‑sòn i̱sòꞌnde; ꞌñó kitsꞌiìn chꞌo̱n, kinaꞌyà‑la̱ jta̱, kiꞌya‑la̱ niꞌín chꞌo̱n, ko̱ tsꞌa chꞌón.
\s Jñà chrjo trompeta
\p
\v 6 Jñà àkja̱le̱ xi itoò ma‑ne ko̱ itoò chrjo trompeta tjímaꞌya tsibítsa̱jnandaà nga si̱ìkjindáya.
\p
\v 7 Jè àkja̱le̱ xi síjna ítjòn kisìkjindáya chrjo‑la̱. I̱kjoàn tsꞌa jtsí nda̱jo̱ ko̱ niꞌín xi tsjájiìn jní; ján kisìkasén i̱tꞌaà nangui. Jè xi ma‑ne jàn‑ya‑la̱ i̱sòꞌnde, jngoòya kitì; kꞌoa̱ ti̱ tjín kitì jñà yá; kitì yije xka̱ xkoén.
\p
\v 8 Jè xi ma‑ne jò àkja̱le̱ kisìkjindáya chrjo‑la̱. Ko̱ jngoò xi o̱kji koni jngoò nindoò xi je kji xi títì, ya̱á kinìkatje̱n‑jiìn ndáchikon. Nga jàn‑ya‑la̱ ndáchikon, jngoòya, jní komà.
\v 9 Jñà cho̱ xi tjín‑ngui ndáchikon, jngoòya kꞌen xi ma‑ne jàn‑ya cho̱. Kꞌoa̱á ti̱sꞌín komà jñà chitso, jngoòya chixoña xi ma‑ne jàn‑ya chitso.
\p
\v 10 Jè xi ma‑ne jàn àkja̱le̱ kisìkjindáya chrjo‑la̱. Jngoò niꞌño xi ꞌñó je kji xi títìjnga̱, kiskaàngui‑ne ngajmiì. Jè niꞌño jè, jngoòya xa̱jngá nandá kiskaàjiìn xi ma‑ne jàn‑ya xa̱jngá nandá ko̱ ya̱ ñánda títjo nandá.
\v 11 Jè ꞌín‑la̱ niꞌño jè, xka̱ tsja ꞌmì. Ko̱ jè nandá, jngoòya kjòtsja, jè xi ma‑ne jàn‑ya nandá. Kjín jchán xi̱ta̱ kꞌen nga kjòtsja nandá.
\p
\v 12 Jè xi ma‑ne ñijòn àkja̱le̱ kisìkjindáya chrjo‑la̱. I̱kjoàn jngoòya kitsìꞌon jè tsꞌoí xi ma‑ne jàn‑ya yijo‑la̱; ko̱ kꞌoa̱á ti̱sꞌín komà jè sá ko̱ niꞌño. I̱kjoàn kòjñò jngoòya jè tsꞌoí ko̱ sá ko̱ niꞌño. Koa̱ jngoòya kòjñò jè na̱chrjein xi jàn‑ya tjín‑ne; ko̱ kꞌoa̱á ti̱sꞌín komà kꞌe̱ nga ni̱tje̱n; mì ti̱ kiì kjòhiseèn‑ne.
\p
\v 13 Kꞌe̱ nga kiskoòtsejèn, kiꞌnchrè jngoò‑la̱ ja̱ xi kitoòtje̱n ján i̱jiìn i̱sén. ꞌÑó kiìchja̱ nga kitsò:
\p ―I̱ma̱ xó‑ne, i̱ma̱ xó‑ne, i̱ma̱ xó‑ne jñà xi̱ta̱ xi tjín ján i̱sòꞌnde, ta̱xki̱ ꞌoón ko̱matꞌin kꞌe̱ nga ski̱ndàya chrjo‑la̱ jñà àkja̱le̱ xi nguì jàn chija‑ìsa.
\c 9
\s Chrjo trompeta xi ma‑ne ꞌòn
\p
\v 1 Jè xi ma‑ne ꞌòn àkja̱le̱ kisìkjindáya chrjo‑la̱; ꞌa̱n kìjtseè jngoaà niꞌño xi kiskaàngui‑ne ngajmiì skanda i̱tꞌaà nangui. I̱kjoàn kjònga̱tsja jè ibi̱ tsꞌe̱ ni̱tja̱n.
\v 2 Kiskíxꞌa̱ jè ni̱tja̱n. Kꞌoa̱á sꞌín itjo ni̱ꞌndi̱ koni tsà tsꞌe̱ nga̱já xi ꞌñó iì kjoàn. Jè ni̱ꞌndi̱ xi itjo, kisìjñò jè tsꞌoí ko̱ i̱jiìn i̱sén.
\v 3 Jè ni̱ꞌndi̱, ya̱á itjojiìn cho̱ langosta xi tsangasòn i̱sòꞌnde; kitsꞌiì‑la̱ ngaꞌñó nga ma‑la̱ kꞌoe̱e‑la̱ xi̱ta̱ koni cho̱ naꞌyá xi tjín i̱sòꞌnde.
\v 4 Kꞌoa̱á sꞌín kisatiìxoma‑la̱ nga mìkiì tsjá chꞌin‑la̱ ngatsꞌiì xka̱ ijñá xi tjín i̱sòꞌnde, ko̱ ni̱jngoò yá; tà jñà xi ko̱ma tsjá chꞌin‑la̱ jñà xi̱ta̱ xi tsjìn‑la̱ chi̱ba̱‑la̱ Nainá ya̱ i̱tjòn tjen‑la̱.
\v 5 Mìkiì kitsjaàꞌnde‑la̱ nga si̱ìkꞌen xi̱ta̱; tà kjo̱ꞌiín ꞌòn sá tsjá‑la̱; jè kjo̱ꞌin xi tsjá, kꞌoa̱á ngaya‑la̱ koni kꞌe̱ nga ꞌbé‑la̱ cho̱ naꞌyá xi̱ta̱ nga ijò ꞌbeé.
\v 6 Na̱chrjein koi, jñà xi̱ta̱ mejèn‑la̱ nga ki̱yá, ta̱nga mìkiì sa̱kò‑la̱ kósꞌín si̱ìkꞌen yijo‑la̱. ꞌÑó ko̱mejèn‑la̱ nga si̱ìkꞌen yijo‑la̱ ta̱nga mìkiì ko̱ma ki̱yá.
\p
\v 7 Jñà cho̱ langosta kꞌoa̱á kjoàn i̱sén‑la̱ koni kjoàn kohòyo̱ xi binchandaà‑la̱ kjo̱jchán. Tjísòn sko̱ koni corona xi nguì oro; i̱sén‑la̱ xi̱ta̱á tjín‑la̱.
\v 8 Tsja̱ sko̱ kꞌoa̱á kjoàn koni kjoàn tsꞌe̱ íchjín; ni̱ꞌño̱, kꞌoa̱á kjoàn koni tsꞌe̱ xa.
\v 9 Ya̱ i̱sòn ini̱ma̱‑la̱ kꞌoa̱á kjoàn xi kijtsa koni ki̱cha̱ tájaà xi síkjeén xi̱ta̱ kjo̱jchán; jñà jnga̱á‑la̱ kꞌoa̱á sꞌín naꞌyà‑la̱ nga one koni tsà ꞌñó kjìn ma carreta xi bíndofe kohòyo̱ nga ongachikon nga fì kjo̱jchán.
\v 10 Tjín nditsin koni cho̱ naꞌyá ko̱ tjín‑la̱ naꞌyá. Jñà nditsin tjín‑la̱ ngaꞌñó nga ꞌòn sá si̱ìkiꞌon xi̱ta̱.
\v 11 Jè xi síjna sko̱‑la̱ cho̱ langosta, jè àkja̱le̱ tsꞌe̱ ni̱tja̱n. Jè ꞌín‑la̱ àkja̱le̱ jè, xi ꞌén hebreo, Abadón ꞌmì, koa̱ xi ꞌén griego, Apolión ꞌmì. [Jñà ꞌín koi, tsòyaá‑ne: jè xi síkitsꞌóña.]
\p
\v 12 Jyeé tsato kjo̱ꞌin xi tíjna ítjòn xi ta̱xki̱ ꞌoón komàtꞌin xi̱ta̱; ta̱nga nguì jò chija xi sa̱ nchrobá.
\s Chrjo trompeta xi ma‑ne joòn
\p
\v 13 Jè xi ma‑ne joòn àkja̱le̱ kisìkjindáya chrjo‑la̱; kꞌe̱é kiꞌnchrè jngoò‑la̱ jta̱ xi ya̱ itjojiìn‑ne nga ñijòn nchra̱já‑la̱ jè ími̱xa̱ tsjeè xi nguì oro jè xi síjna nguixko̱n Nainá
\v 14 nga kitsò‑la̱ jè àkja̱le̱ xi ma‑ne joòn, xi kjiya chrjo tsja:
\p ―Chjíjnda̱ꞌñoí jñà àkja̱le̱ xi ñijòn ma‑ne xi tjítꞌaàꞌñó ya̱ chrañà‑la̱ jè nandá xa̱jngá je Éufrates.
\p
\v 15 Kꞌe̱é kitjájnda̱ꞌñó jñà àkja̱le̱ xi ñijòn ma‑ne xi jye kꞌoa̱sꞌín títsa̱jnandaà jè hora, jè na̱chrjein, jè sá ko̱ jè nó, mé‑ne nga jngoòya si̱ìkꞌen‑ne xi̱ta̱ xi ma‑ne jàn‑ya ngatsꞌiì xi̱ta̱ xi tjín.
\v 16 ꞌA̱n, kiꞌnchrè‑la̱ kótjín ma‑ne jñà xi̱ta̱ kjo̱jchán xi kohòyo̱ títsa̱jnakjá‑la̱; jò sìndo̱ millón ma‑ne.
\p
\v 17 Kꞌoa̱á sꞌín tsatsejèn‑na jñà kohòyo̱ ko̱ xi̱ta̱ xi títsa̱jnakjá‑la̱ nga ki̱cha̱ tájaà kijtsa ini̱ma̱‑la̱ xi inì kjoàn koni niꞌín, xi azul kjoàn koni zafiro, ko̱ xi sinè kjoàn koni azufre. Jñà sko̱ kohòyo̱, kꞌoa̱á kjoàn koni sko̱ xa; ko̱ ya̱ tsoꞌba, niꞌín bitjo, ni̱ꞌndi̱í bitjo, ko̱ azufre bitjo.
\v 18 Jè kjoa̱‑la̱ nga ingajàn kjo̱ꞌin koi, jngoò ya kꞌen xi̱ta̱ xi jàn ya ngatsꞌiì xi̱ta̱ xi tjín. Jè kisìkꞌen jè niꞌín, ni̱ꞌndi̱ ko̱ azufre xi bitjo‑ne tsoꞌba kohòyo̱.
\v 19 Ngaꞌñó xi tjín‑la̱ kohòyo̱, ya̱á tjíꞌa tsoꞌba ko̱ i̱tjòn nditsin, nga jñà nditsin kꞌoa̱á kjoàn koni kjoàn ye̱; koa̱ jñà sko̱ síkiꞌon‑ne jñà xi̱ta̱.
\p
\v 20 Jñà xi̱ta̱ xi tsiningui‑ne xi mìkiì kꞌen kꞌe̱ nga jye tsato yije kjo̱ꞌin koi, mìkiì kisìkájno jé‑la̱ nga mì ti̱ jé ko̱hótsji‑ne; ta̱kó jñà kijtseèxkón ini̱ma̱ chꞌo‑la̱ nei̱í, ko̱ jñà i̱sén xi Nainá tsò‑la̱ xi ki̱cha̱ oro, plata, bronce, nda̱jo̱ ko̱ yá, jñà xi mìkiì tsejèn‑la̱ ko̱ xi mìkiì ꞌnchré ko̱ xi mìkiì ma fì.
\v 21 Jñà xi̱ta̱ koi, mìkiì kisìkájno jé‑la̱ nga mì ti̱ jé ko̱hótsji‑ne nga xi̱ta̱ síkꞌen, nga ma‑la̱ bíndaà, ko̱ nga kjoa̱ chijngui sꞌín, ko̱ kjoa̱ chijé.
\c 10
\s Àkja̱le̱ xi kjiya tsja jngoò xo̱jo̱n libro jtobá
\p
\v 1 Ìjngoò àkja̱le̱ kìjtseè‑ìsa xi tjín‑la̱ ngaꞌñó xi tínchrobájen‑ne ngajmiì nga ifi tsátijno; jè sko̱ kijnasòn jngoò i̱jñe̱; i̱sén‑la̱ kꞌoa̱á kji koni tsꞌoí; jñà ndso̱ko̱ kꞌoa̱á sꞌín tsejèn koni tsà niꞌín xi ncha kixi̱ nga títì.
\v 2 Kjinaya tsja jngoò xo̱jo̱n xi jtobá kji xi jye kitjájnda̱ya. Jè ndso̱ko̱ kixi̱ tsasíjnajiìn ya̱ ndáchikon ko̱ jè ndso̱ko̱ ngaskón tsasíjnasòn nangui.
\v 3 Kꞌoa̱á sꞌín ꞌñó kiìchja̱ koni tsò xa kꞌe̱ nga kjindáya; kꞌe̱ nga jye kiìchja̱, itoò chꞌo̱n kinaꞌyà jta̱‑la̱ nga ti̱koa̱ kiìchja̱.
\v 4 Kꞌe̱ nga jye jane chꞌo̱n xi itoò kitsꞌiìn, ꞌa̱n tìjna̱ndaà‑ná nga mejèn‑na skiìjno jngoaà xo̱jo̱n, ta̱nga kiꞌnchrè jngoò‑la̱ jta̱ xi ngajmiì inchrobà‑ne xi kitsò‑na:
\p ―Jñà ꞌén xi kàchja̱ chꞌo̱n xi itoò katsꞌiìn, ꞌmaá ti̱kíjni; kì xo̱jo̱ón bìtꞌiì.
\p
\v 5 Jè àkja̱le̱ xi ꞌa̱n kìjtseè nga ya̱ síjnajiìn jngoò ndso̱ko̱ ndáchikon ko̱ xi ìjngoò ndso̱ko̱ ya̱ síjnasòn nangui, kiskímiìꞌnga tsja kixi̱ ján ngajmiì,
\v 6 kitsjaà ꞌén‑la̱ i̱tꞌaà tsꞌe̱ Nainá xi tíjnakon ni̱ta̱ mé na̱chrjein‑ne, jè xi tsibíndaà ngajmiì, nangui ko̱ ndáchikon, ngatsꞌiì tsojmì xi ya̱ tjín, kitsò:
\p ―Mì ti̱ kiì sꞌe̱ ìsa̱‑ne na̱chrjein.
\v 7 Kꞌe̱ nga ki̱chóya na̱chrjein‑la̱ nga koi̱ìtsꞌia̱ jè àkja̱le̱ xi ma‑ne itoò nga si̱ìkjindáya chrjo‑la̱, jè kjoa̱ꞌma‑la̱ Nainá ki̱tasòn‑né koni sꞌín kitsò jñà xi̱ta̱ chi̱ꞌnda‑la̱ xi kiìchja̱ ngajo‑la̱.
\p
\v 8 Jè jta̱ xi kiꞌnchrè ítjòn‑la̱ xi ngajmiì inchrobà‑ne, ìjngoò kꞌa kiìchja̱‑na kitsò:
\p ―Tꞌin, chjoí jè xo̱jo̱n xi jtobá kji xi jye kitjájnda̱ya nga kjinaya tsja jè àkja̱le̱ xi síjnakixi̱ i̱sòn ndáchikon ko̱ i̱sòn nangui.
\p
\v 9 Kiìkoa̱an jè àkja̱le̱, kixan‑la̱:
\p ―Tjiì‑ná jè xo̱jo̱n jtobá xi kjinaya ndsei̱i.
\p Kitsò‑na:
\p ―Chjoí, i̱kjoàn chi̱ni̱i; ján i̱ya i̱ndso̱ꞌboì ko̱tsjaya‑né, ta̱nga ya̱ i̱ꞌa ndso̱boi, ixiì ko̱ma‑lè koni tsà tsjén.
\p
\v 10 Kiskoé jè xo̱jo̱n xi kjiya tsja jè àkja̱le̱. Kꞌe̱ nga kiskíne̱e, kisìhixiìꞌá ndso̱ba koni tsà tsjén; ta̱nga ján i̱ya i̱ndso̱ꞌbà kjòtsja‑né.
\v 11 Kiꞌmì‑na:
\p ―Mochjeén‑né nga ìjngoò kꞌa ki̱nókjoa̱ya ngajo‑la̱ Nainá mé kjoa̱ xi ko̱matꞌin jñà xi̱ta̱ xi kjìn na̱xa̱ndá nchrobá‑ne ko̱ xi kjìn nangui chja̱‑ne ko̱ xi kjìn sko̱ya ꞌén chja̱, ko̱ mé kjoa̱ xi ko̱matꞌin xi̱ta̱xá ítjòn xi tjín i̱sòꞌnde.
\c 11
\s Jò ma xi̱ta̱ xi tsjá ꞌén i̱tꞌaà tsꞌe̱ Cristo
\p
\v 1 Kꞌe̱é kitsꞌiì jngoò‑na yá xi ma machi̱ba̱ya‑ne, xi kꞌoa̱ kji koni kjoàn yá nise. Kiꞌmì‑na:
\p ―Ti̱sítji̱in, ti̱chi̱ba̱yi jè i̱ngo̱ ítjòn‑la̱ Nainá ko̱ jè ími̱xa̱ tsjeè‑la̱. Tìxke̱yi kótjín ma‑ne jñà xi̱ta̱ xi ya̱ beèxkón Nainá.
\v 2 Jè ndi̱tsin xi kijnatꞌaà‑la̱ i̱ngo̱, kì kiì nìchi̱ba̱yi nga jñá kitjoé‑la̱ xi ta̱xki̱ xi̱ta̱ xi mìtsà xi̱ta̱ judío. Jñà xi̱ta̱ koi, ichán jò sá ko̱tìxoma ya̱ Jerusalén xi i̱ꞌnde tsjeè‑la̱ Nainá.
\v 3 ꞌA̱án siìkasén ingajò xi̱ta̱‑na̱ xi tsjá ꞌén i̱tꞌaà tsꞌa̱n nga ki̱chja̱ya jngoò jmiì ko̱ jò sìndo̱ ko̱ jàn‑kaàn na̱chrjein; ko̱ jñà nikje xi ko̱kjá, nikje jmà kjoàn xi tsꞌe̱ kjoa̱ba.
\p
\v 4 Jñà ingajò xi̱ta̱ xi tsjá ꞌén, jñà‑né ingajò yá olivo ko̱ ingajò ki̱cha̱ candelero xi jncha kixi̱ nguixko̱n Nainá xi otíxoma‑la̱ i̱sòꞌnde.
\v 5 Tsà yá xi mejèn‑la̱ si̱ìkiꞌon xi̱ta̱ koi; niꞌín ko̱chrje tsoꞌba xi jngoò kꞌa ko̱kà jñà xi kondra̱‑la̱. Kꞌoa̱á sꞌín ki̱yá yije, ni̱ta̱ yá‑ne xi mejèn‑la̱ si̱ìkiꞌon.
\v 6 Jñà xi̱ta̱ koi tjín‑la̱ ngaꞌñó nga ma‑la̱ ki̱ìchjoà‑la̱ ngajmiì mé‑ne mì ti̱ kiì kꞌoa̱‑ne jtsí jñà na̱chrjein kꞌe̱ nga ki̱chja̱ya. Ti̱koa̱á tjín‑la̱ ngaꞌñó i̱tꞌaà tsꞌe̱ nandá nga ma‑la̱ nga jní sꞌi̱in; ko̱ ko̱maá‑la̱ kjìn sko̱ya kjo̱ꞌin tsjá‑la̱ xi̱ta̱ i̱sòꞌnde; ko̱maá‑la̱ nga ko̱sꞌín sꞌi̱in ni̱ta̱ kótjín kꞌa mejèn‑la̱ nga sꞌi̱in.
\v 7 Ingajò xi̱ta̱ koi, kꞌe̱ nga jye tsjá ꞌén‑la̱, jè cho̱ je xi chꞌo kji xi bitjomijìn‑ne ya̱ ni̱tja̱n jñò, ska̱àn‑ko̱‑né, ko̱ si̱ìkijne‑la̱, i̱kjoàn ki̱yá ingajò xi̱ta̱ koi.
\v 8 Jñà yijo‑la̱ xi̱ta̱ koi, ya̱á si̱yijò osen ndi̱tsin‑la̱ na̱xa̱ndá ítjòn, ñánda kisitꞌaà krò Na̱ꞌèn‑ná. Jè ꞌín‑la̱ na̱xa̱ndá ítjòn xi o̱kji, kꞌoa̱á sꞌín ngaya‑la̱ koni Sodoma, o Egipto.
\v 9 Xi̱ta̱ xi ya̱ inchrobàjiìn‑ne na̱xa̱ndá xi tjín i̱sòꞌnde, ko̱ ngatsꞌiì tje̱‑la̱ xi̱ta̱ xi tjín i̱sòꞌnde, ko̱ xi̱ta̱ xi chja̱ ngatsꞌiì ꞌén xi tjín, ko̱ xi̱ta̱ xi ya̱ nchrobá‑ne ngatsꞌiì nangui xi tjín i̱sòꞌnde, ján na̱chrjein osen skótsejèn‑jno yijo‑la̱ mikꞌen; ko̱ mìkiì tsjáꞌnde nga si̱ìjiìn jñà xi̱ta̱ koi xi jò ma‑ne.
\v 10 Jñà xi̱ta̱ xi tjín i̱sòꞌnde ko̱tsjaá‑la̱ nga jye kꞌen xi̱ta̱ koi; tsjá kjo̱tjò‑la̱ tsojmì xi̱ta̱ xíkjín. Koií kꞌoa̱sꞌín sꞌi̱in‑ne nga jñà ingajò xi̱ta̱ xi chja̱ ngajo‑la̱ Nainá, tseé kjo̱ꞌin tsjá‑la̱ jñà xi̱ta̱ i̱sòꞌnde.
\v 11 Kꞌe̱ nga jye tsato xi jàn na̱chrjein osen, jè Nainá kisìkítsa̱jnakon ìjngoò kꞌa‑ne nga jaáya‑la̱; i̱kjoàn chincha kixi̱ ìjngoò kꞌa‑ne; ko̱ ngatsꞌiì xi̱ta̱ xi kijtseè, ꞌñó jchán kitsakjòn.
\v 12 Ingajò xi̱ta̱ koi kiìꞌnchré jngoò‑la̱ jta̱ xi ꞌñó kiìchja̱ xi ngajmiì inchrobà‑ne, kitsò‑la̱:
\p ―Nchrobá‑mijìn‑jno i̱jndé.
\p I̱kjoàn kiìmijìn‑jiìn ifi ján ngajmiì. Ngatsꞌiì jñà xi̱ta̱ kondra̱‑la̱ kijtseè‑né.
\v 13 Ti̱kꞌe̱é‑ne jꞌiì jngoò chꞌón xi ꞌñó jchán tsꞌa; jngoò ya na̱xa̱ndá chixoña xi ma‑ne te ya kóho̱kji na̱xa̱ndá; ko̱ jè kjoa̱‑la̱ chꞌón, itoò jmiì xi̱ta̱ kꞌen. Jñà xi̱ta̱ xi tsiningui‑ne, ndaà jchán kitsakjòn. I̱kjoàn kiìchja̱tꞌaà‑la̱ Nainá xi tíjna ngajmiì nga jeya kisìkíjna.
\p
\v 14 Jyeé tsato kjo̱ꞌin xi ma‑ne jò xi ta̱xki̱ ꞌoón komàtꞌin xi̱ta̱; ta̱nga nchrobá ni̱to̱ón xi ma‑ne jàn kꞌa.
\s Chrjo trompeta xi ma‑ne itoò
\p
\v 15 Jè xi ma‑ne itoò àkja̱le̱ kisìkjindáya chrjo‑la̱; kjín jchán jta̱ kinaꞌyà‑la̱ ngajmiì xi ꞌñó kiìchja̱ nga kitsò:
\q Jñà kjo̱tíxoma xi tjín i̱sòꞌnde,
\q jyeé tsꞌe̱ Na̱ꞌèn‑ná xi otíxoma‑ná ko̱ jè Cristo xi xó kinìkasén‑ne.
\q Jè ko̱tìxoma ni̱ta̱ mé na̱chrjein‑ne.
\m
\v 16 Jñà xi̱ta̱ jchínga xi kaàn ñijòn ma‑ne, xi títsa̱jnanè íxi̱le̱ nga nguixko̱n Nainá, chincha-xkóꞌnchi-ñiatꞌaà‑la̱ nga kijtseèxkón Nainá.
\v 17 Kitsò:
\q Na̱ꞌèn xi Nainá ꞌmì‑lè.
\q Ndaà chjí‑lè nga ta ji̱ ta̱ jngoò‑né xi ꞌñó tse ngaꞌñó tjín‑lè,
\q ngaji̱ xi tijni i̱ꞌndei̱,
\q ko̱ xi tijni skanda kjòtseé,
\q [ko̱ xi sa̱ kjoi̱i ìjngoò kꞌa‑ne].
\q Tìꞌbiì‑lèje̱n kjo̱ndaà nga jyeé kachjoí ngaꞌñó xi tjín‑lè;
\q ko̱ jyeé kòbítsꞌi̱i nga ji̱ tìhotìxomai.
\q
\v 18 Jñà xi̱ta̱ xi ta̱xki̱ xi̱ta̱ xi mìtsà xi̱ta̱ judío jyeé kòjti‑la̱;
\q ta̱nga jyeé ijchò na̱chrjein‑la̱ kjo̱jti‑lè kꞌe̱ nga ji̱ kꞌoi̱‑la̱ kjo̱ꞌin xi̱ta̱ koi,
\q jè na̱chrjein kꞌe̱ nga ji̱ kíndaàjiìn‑la̱ jñà xi̱ta̱ xi jye kꞌen
\q ko̱ kꞌoi̱‑la̱ kjo̱tjò xi okꞌìn‑la̱ nga tjoé‑la̱ xi̱ta̱ chi̱ꞌnda‑lè xi kiìchja̱ ngajo‑lè
\q ko̱ jñà xi̱ta̱‑la̱ Nainá ko̱ ngatsꞌiì xi beèxkón‑lè,
\q jñà xi jtobá kjoàn ko̱ xi̱ta̱ jchínga.
\q Si̱kjehesoìn jñà xi̱ta̱ xi ma‑la̱ síkjehesòn xi̱ta̱ na̱xa̱ndá i̱sòꞌnde.
\p
\v 19 Ján ngajmiì kitáxꞌa̱ i̱ꞌnde tsjeè‑la̱ Nainá; ya̱ i̱ya i̱ꞌnde tsjeè‑la̱ kiꞌya‑la̱ jè kaxa̱ tsꞌe̱ kjoa̱ xi tsibíndaàjiìn Nainá ko̱ jñà xi̱ta̱. I̱kjoàn jate niꞌín chꞌo̱n, kinaꞌyà‑la̱ jta̱, kitsꞌiìn chꞌo̱n, tsꞌa chꞌón, tsꞌa jtsí nda̱jo̱ xi ꞌñó tsiaàn kjoàn.
\c 12
\s Jè chjo̱ón ko̱ jè ye̱
\p
\v 1 Ján ngajmiì tsatsejèn jngoò kjo̱xkón. Jngoò chjo̱ón kiꞌya‑la̱; jè tsꞌoí xi ma nikje‑la̱. Jè sá ya̱á tíjna i̱ngui ndso̱ko̱, ko̱ jngoò corona tjíꞌa sko̱ xi tejò niꞌño tjítꞌaà.
\v 2 Jè chjo̱ón, kiꞌndí ꞌya. ꞌÑó jchán kjindáya nga jye machrañà nga jtsꞌín kiꞌndí‑la̱; tseé kjo̱ꞌin tísíkjeiín nga jye ijchò chi̱ba̱‑la̱ nga jtsꞌín kiꞌndí‑la̱.
\v 3 Ján ngajmiì ìjngoò kjo̱xkón tsatsejèn. Jngoò ye̱ xi ꞌñó je kji tsatsejèn. Inì kji, itoò ma sko̱, ko̱ jngoò corona i̱tsé tjíꞌa nga jngoò ìjngoò sko̱. Ti̱koa̱á te ma nchra̱já‑la̱.
\v 4 Jè nditsin ye̱, jngoò ya niꞌño tsibíndofe xi ma‑ne jàn ya ngatsꞌiì niꞌño xi tjín ngajmiì, i̱kjoàn tsibítsjotꞌaà nangui. Jè ye̱ je, tsasìjnatꞌaà‑la̱ jè chjo̱ón xi tíꞌbeé kiꞌndí mé‑ne nga ski̱ne̱‑ne kiꞌndí‑la̱ kꞌe̱ nga jye jtsꞌín.
\v 5 Jè chjo̱ón, tsiꞌbeé jngoò kiꞌndí xꞌi̱n nga jè ko̱tìxoma‑la̱ ngatsꞌiì na̱xa̱ndá xi tjín i̱sòꞌnde koni jngoò xi̱ta̱ xi yá ki̱cha̱ kjiya tsja nga ki̱ìnè‑la̱ kjo̱ꞌin xi̱ta̱ xi mìkiì ꞌnchréñijon‑la̱. Ta̱nga jè kiꞌndí‑la̱ chjo̱ón, kitjáꞌan‑la̱; ya̱á kiìko̱ ñánda tíjna Nainá nga tíhotíxoma.
\v 6 Jè chjo̱ón, tsanga‑né. Ján kiì i̱ꞌnde i̱tꞌaà xìn ñánda nangui kixì choòn, ñánda nga Nainá tsibíjnandaà jngoò‑la̱ i̱ꞌnde nga ya̱ katjiì‑la̱ tsojmì xi ski̱ne̱. Jngoò jmiì ko̱ jò sìndo̱ ko̱ jàn‑kaàn na̱chrjein kíjna.
\p
\v 7 Xi jye komà i̱skan, ján ngajmiì kisꞌe kjo̱jchán. Jè àkja̱le̱ Miguel ko̱ àkja̱le̱‑la̱ kiskaàn‑kjoòko̱ jè ye̱ je. Ko̱ jè ye̱ je, ko̱ àkja̱le̱‑la̱ na̱sꞌín ꞌñó kiskaàn‑kjoò,
\v 8 ta̱nga mìkiì kisìkijne‑la̱, ko̱ mì ti̱ mé i̱ꞌnde kisꞌe‑la̱ ján ngajmiì.
\v 9 Kꞌoa̱á sꞌín komà nga itjokàjiìn ngajmiì jè ye̱ jchínga xi ꞌmì Xi̱ta̱ Nei̱í ko̱ xi ꞌmì Satanás xi kona̱cha̱n‑la̱ ngatsꞌiì xi̱ta̱ i̱sòꞌnde. Kinìkatje̱ngui ya̱ i̱tꞌaà nangui ko̱ àkja̱le̱‑la̱.
\p
\v 10 Kiꞌnchrè jngoò‑la̱ jta̱ ján ngajmiì xi ꞌñó kiìchja̱ xi tsò:
\p ―I̱ꞌndei̱ jyeé ijchò na̱chrjein nga ki̱tjokàjiìn kjo̱ꞌin xi̱ta̱ xinguia̱á nga ko̱ ngaꞌñó‑la̱ Nainá nga jè ko̱tìxoma ko̱ kjo̱tíxoma xi tjín‑la̱ Cristo [xi Nainá xó kisìkasén‑ne], koií kjoa̱‑la̱ nga jye kànìkatje̱ngui jè xi ko̱ na̱chrjein ko̱ ni̱tje̱n tsjátꞌin ꞌén ndiso xi̱ta̱ xinguia̱á nga nguixko̱n Nainá.
\v 11 Jñà xi̱ta̱ xinguia̱á, nga nguì ko̱ó ngaꞌñó xi tjín‑la̱ jní xi tsibíxteèn jè Orrè kisìkijne‑la̱ ko̱ nguì ko̱ó jñà ꞌén xi kitsjaà i̱tꞌaà tsꞌe̱ Nainá. Mìkiì kitsakjòn‑la̱ na̱sꞌín kinìkꞌen.
\v 12 Tsja kàtasꞌe‑la̱ ngajmiì ko̱ jñà xi ya̱ títsa̱jna. Ta̱nga i̱ma̱ xó‑nò jñò xi ya̱ titsa̱jnaà i̱tꞌaà nangui ko̱ xi titsa̱jnaà ya̱ i̱jiìn ndáchikon nga jè xi̱ta̱ nei̱í jyeé ijchòjen‑tji̱ngui‑nò ko̱ ꞌñó jti tjín‑la̱ nga jyeé tíjiìn‑la̱ nga ta chiba na̱chrjein kíjna‑ìsa.
\p
\v 13 Jè ye̱ xi ꞌñó je kji, kꞌe̱ nga kinìkatje̱ngui i̱tꞌaà nangui, tsangatji̱ngui‑la̱ jè chjo̱ón xi tsiꞌbeé kiꞌndí xꞌi̱n.
\v 14 Ta̱nga jè chjo̱ón, jò jnga̱á tsꞌe̱ ja̱ kitsꞌiì‑la̱ xi ꞌñó iì kjoàn mé‑ne ko̱ma tótje̱n‑ne nga ko̱nga‑la̱ jè ye̱ xi je kji. Ján kiì kíjna ya̱ i̱ꞌnde i̱tꞌaà xìn ñánda nangui kixì choòn. Jàn nó osen kíjna nga ko̱kinda̱ nga tjoé‑la̱ tsojmì xi ski̱ne̱.
\v 15 Jè ye̱ xi je kji, tsachrje nandá tsoꞌba nga ndána̱ ko̱ma mé‑ne nga ko̱ma ki̱chrjoako̱‑ne jè chjo̱ón.
\v 16 Ta̱nga jè nangui kisìchjátꞌaà‑la̱ jè chjo̱ón; kitáxꞌa̱, kitsꞌiì ndána̱ xi jè ye̱ tsachrje tsoꞌba.
\v 17 Jè ye̱ ìsa̱á ꞌñó kjòjtikeè jè chjo̱ón. Kiì tji̱ngui kondra̱‑la̱ jñà xi̱ta̱ tje̱‑la̱ chjo̱ón nga kiìkjaán‑ko̱ jñà xi síkitasòn kjo̱tíxoma‑la̱ Nainá ko̱ jñà xi ndaà tsjá ꞌén i̱tꞌaà tsꞌe̱ Cristo.
\v 18 Jè ye̱, ya̱á tsibìjnajiìn tsomì xi ꞌncha i̱ndiì ndáchikon.
\c 13
\s Jò cho̱ iì xi chꞌo kjoàn
\p
\v 1 Kìjtseè jngoaà cho̱ je xi chꞌo kji xi itjo‑mijìn‑jiìn‑ne ndáchikon xi itoò ma sko̱; te ma nchra̱já‑la̱; jngoò corona i̱tsé tjíꞌa nga ìjngoò ìjngoò nchra̱já‑la̱; jñà sko̱ tjítꞌaà ꞌín xi Nainá chja̱jno‑la̱.
\v 2 Jè cho̱ je xi chꞌo kji xi ꞌa̱n kìjtseè, kꞌoa̱á kji koni kjoàn xa indo; kꞌoa̱á kjoàn ndso̱ko̱ koni tsꞌe̱ cho̱ oso; kꞌoa̱á kji tsoꞌba koni tsoꞌba xa. Jè ngaꞌñó xi tjín‑la̱ jè ye̱, ko̱ jè i̱ꞌnde‑la̱ ñánda tíhotíxoma, ko̱ jè kjo̱tíxoma‑la̱ xi ꞌñó tjín, jè cho̱ tsꞌe̱n kjònga̱tsja.
\v 3 ꞌÑó tse kitiì jngoò sko̱ jè cho̱ je xi chꞌo kji; kꞌoa̱á kji komà koni tsà jye ki̱yá; ta̱nga jè sko̱ xi ꞌñó tse kitiì, kjòndaà‑ne. Ngatsꞌiì xi̱ta̱ xi tjín nga tíjtsa i̱sòꞌnde, tà kjòxkón‑la̱ kjoa̱ xi komà, ko̱ ya̱á kiìtji̱ngui‑la̱ jè cho̱ tsꞌe̱n.
\v 4 Ngatsꞌiì xi̱ta̱ kijtseèxkón jè ye̱, nga jè ye̱ kitsjaà‑la̱ kjo̱tíxoma xi tísíkjeén jè cho̱ tsꞌe̱n. Jñà xi̱ta̱ ti̱koa̱á kijtseèxkón jè cho̱ je xi chꞌo kji. I̱kjoàn kitsò:
\p ―Tsjìn ìjngoò ìsa̱ koni jè cho̱ je xi chꞌo kji; mì yá tjín xi ki̱chìkjoa̱‑la̱ nga ska̱àn‑ko̱.
\p
\v 5 Jè cho̱ tsꞌe̱n kitjòꞌndeé‑la̱ nga kiìchja̱ ꞌén xi ꞌnga síkíjna yijo‑la̱ nga chja̱jno‑la̱ Nainá. Ti̱koa̱á kitsꞌiìꞌnde‑la̱ nga ichán jò sá ko̱tìxoma.
\v 6 Kꞌoa̱á sꞌín kisꞌiìn; kiìchja̱jno‑la̱ Nainá, kiìchja̱jno‑la̱ ꞌín‑la̱ Nainá ko̱ Niꞌya Tsjeè‑la̱, ko̱ kiìchja̱jno‑la̱ jñà xi̱ta̱ xi títsa̱jna ngajmiì.
\v 7 Ti̱koa̱ kitjòꞌndeé‑la̱ nga kiskaàn‑ko̱ xi̱ta̱‑la̱ Nainá skanda kó nga kisìkijne‑la̱. I̱kjoàn kitsꞌiì‑la̱ kjo̱tíxoma i̱tꞌaà tsꞌe̱ ngatsꞌiì tje̱‑la̱ xi̱ta̱, ko̱ i̱tꞌaà tsꞌe̱ ngatsꞌiì na̱xa̱ndá xi tjín, ko̱ i̱tꞌaà tsꞌe̱ ngatsꞌiì xi̱ta̱ xi chja̱ ngatsꞌiì ꞌén xi tjín, ko̱ i̱tꞌaà tsꞌe̱ xi̱ta̱ xi tjín nga ìjngoò ìjngoò nangui xi tjín i̱sòꞌnde.
\v 8 Ngatsꞌiì xi̱ta̱ xi tjín nga tíjtsa i̱sòꞌnde, jè cho̱ tsꞌe̱n skoe̱xkón, jñà ngatsꞌiì xi̱ta̱ xi mìkiì tjítꞌaà ꞌín‑la̱ nga ti̱sa̱ tàtsꞌen‑la̱ kjoa̱, jè xo̱jo̱n xi tsꞌe̱ kjoa̱binachon xi tsꞌe̱ Orrè‑la̱ Nainá xi kꞌen ngajo‑la̱ xi̱ta̱.
\p
\v 9 Ndaà ti̱náꞌyaà koni xan‑nò.
\v 10 Jè xi nda̱yá kji̱sꞌen, kꞌoa̱á sꞌín tjínè‑la̱ nga nda̱yá kjoi̱. Jè xi ki̱cha̱ ndojò ki̱yá‑ne, kꞌoa̱á sꞌín tjínè‑la̱ nga ki̱cha̱ ndojò ki̱yá‑ne. I̱í mochjeén nga kixi̱ kítsa̱jna kjitꞌaà ko̱ nga ki̱chìkjoa̱ko̱‑la̱ kjo̱ꞌin jñà xi̱ta̱‑la̱ Nainá.
\p
\v 11 Xi komà i̱skan kìjtseè ìjngoaà cho̱ je xi chꞌo kji xi itjo mijìn‑ne i̱jiìn nangui. Jò ma nchra̱já‑la̱ xi kꞌoa̱ kjoàn koni nchra̱já‑la̱ orrè. Kꞌoa̱á sꞌín chja̱ koni jngoò ye̱ xi ꞌñó je kji.
\v 12 Kꞌoa̱á sꞌín tjín‑la̱ kjo̱tíxoma koni jè cho̱ je xi chꞌo kji xi tíjna ítjòn nga ya̱ síjna nguixko̱n. Bínè‑la̱ xi̱ta̱ xi tjín i̱sòꞌnde nga kàteèxkón jè cho̱ je xi chꞌo kji xi tíjna ítjòn, jè xi kjòndaà‑ne ñánda ꞌñó tse kitiì jngoò sko̱.
\v 13 Ti̱koa̱á maá‑la̱ kisꞌiìn kjo̱xkón xi ꞌin tjín. Skanda maá‑la̱ kisìkjinchrobà‑jen niꞌín xi ngajmiì nchrobá‑ne skanda i̱tꞌaà nangui nga nguixko̱n xi̱ta̱.
\v 14 Kiskoòna̱cha̱n‑la̱ xi̱ta̱ xi tjín i̱sòꞌnde, koií kjoa̱‑la̱ jñà kjo̱xkón xi kitsꞌiìꞌnde‑la̱ nga kisꞌiìn nguixko̱n cho̱ je xi chꞌo kji xi tíjna ítjòn. Tsibítꞌin‑la̱ xi̱ta̱ nga kàtíndaà jngoò xkósòn‑la̱ jè cho̱ xi tíjna ítjòn xi ki̱cha̱ ndojò kitiì‑ne sko̱ ta̱nga jaáya‑la̱.
\v 15 Jè cho̱ xi ma‑ne jò kitsꞌiì‑la̱ ngaꞌñó nga kisìkíjnakon jè xkósòn‑la̱ cho̱ xi kisindaà, mé‑ne nga ko̱ma ki̱chja̱‑ne ko̱ ngatsꞌiì xi̱ta̱ xi mìkiì skoe̱xkón si̱ìkꞌen‑ne.
\v 16 Kꞌoa̱á sꞌín tsibínè‑la̱ nga kàtasitꞌaà chi̱ba̱‑la̱ jñà xi xi̱ta̱ i̱xti, jñà xi̱ta̱ jchínga, jñà xi̱ta̱ nchi̱ná ko̱ jñà xi̱ta̱ i̱ma̱, jñà xi̱ta̱ xi títsa̱jnandei̱í ko̱ xi chi̱ꞌnda títsa̱jnaꞌñó. Ya̱á kàtasitꞌaà chi̱ba̱‑la̱ ya̱ tsja kixi̱ ko̱ tsà ya̱ i̱tjòn tjen‑la̱.
\v 17 Ni̱jngoò xi̱ta̱ xi ma ko̱tse tsojmì, ni̱jngoò xi ma ko̱tìjna tsà mìkiì tjítꞌaà chi̱ba̱‑la̱ ko̱ tsà jè ꞌín‑la̱ cho̱ mìkiì tjítꞌaà‑la̱ ko̱ tsà mìkiì tjítꞌaà‑la̱ número tsꞌe̱ ꞌín‑la̱ cho̱.
\v 18 I̱jndé mochjeén kjoa̱chji̱ne̱‑la̱ xi̱ta̱; jè xi ndaà machi̱ya‑la̱, kàtíxke̱ya número‑la̱ cho̱ je xi chꞌo kji; tsꞌe̱ xi̱ta̱‑né. Jè número: joòn sìndo̱ ko̱ jàn kaàn ko̱ joòn.
\c 14
\s Jè Orrè‑la̱ Nainá ko̱ jñà xi̱ta̱ xi jngoò sìndo̱ ko̱ ichán ñijòn jmiì ma‑ne
\p
\v 1 Xi komà i̱skan, kiskoòtsejèn, kìjtseè jè Orrè, nga síjnakixi̱ i̱sòn nindoò Sión ko̱ xi̱ta̱ xi jngoò sìndo̱ ko̱ ichán ñijòn jmiì ma‑ne xi tjítꞌaà i̱tjòn tjen‑la̱ ꞌín‑la̱ Orrè ko̱ tsꞌe̱ Na̱ꞌèn‑la̱.
\v 2 Kiꞌnchrè jngoò‑la̱ jta̱ xi ngajmiì nchrobá‑ne xi ꞌñó tíhone koni ma nandá kꞌe̱ nga ꞌñó maje, koni ma nga faáya‑la̱ chꞌo̱n kꞌe̱ nga jye tsꞌiìn; kꞌoa̱á sꞌín kiꞌnchrè‑la̱ koni tsà kjìn ma xi̱ta̱ xi síkjane níꞌñó arpa.
\v 3 Tínaꞌyà jngoò‑la̱ sò xi̱tse̱ nga tíjnda nguixko̱n jè xi tíjnasòn íxi̱le̱ nga tíhotíxoma, ko̱ ya̱ nguixko̱n xi ñijòn ma‑ne xi títsa̱jnakon ko̱ ya̱ nguixko̱n jñà xi̱ta̱ jchínga. Ni̱yá xi ma‑la̱ seè jè sò xi tíjnda, ta jñà‑né xi jngoò sìndo̱ ko̱ ichán ñijòn jmiì ma‑ne, jñà xi jye itjokàjiìn kjo̱ꞌin ya̱ i̱sòꞌnde.
\v 4 Jñà xi̱ta̱ koi, mìtsà íchjín tsibìtsa̱jnako̱, nguì tsjeè kisìjchá yijo‑la̱. Jñá‑né xi fì tji̱ngui‑la̱ Orrè ni̱ta̱ ñánda‑ne nga fì. Jñà‑né xi itjokàjiìn ítjòn kjo̱ꞌin ngatsꞌiì i̱tꞌaà tsꞌe̱ xi̱ta̱ xi tjín i̱sòꞌnde, mé‑ne nga ko̱ma ko̱nga̱tsja ítjòn‑ne Nainá ko̱ Orrè.
\v 5 Ni̱mé ꞌén ndiso kiìchja̱, ko̱ ni̱mé jé tjín‑la̱ nga nguixko̱n Nainá.
\s Àkja̱le̱ xi jàn ma‑ne
\p
\v 6 Kìjtseè ìjngoaà àkja̱le̱ xi tsóꞌbajiìn i̱sén nga tífìko̱ ꞌén ndaà‑la̱ Nainá xi tjín ni̱ta̱ mé na̱chrjein‑ne nga ke̱èno̱jmí‑la̱ jñá xi̱ta̱ xi títsa̱jna i̱sòꞌnde, ngatsꞌiì xi̱ta̱ xi tjín nga ìjngoò ìjngoò nangui, ngatsꞌiì tje̱‑la̱ xi̱ta̱, ngatsꞌiì xi̱ta̱ xi chja̱ ngatsꞌiì ꞌén xi tjín, ko̱ ngatsꞌiì xi̱ta̱ xi tjín nga ngatsꞌiì na̱xa̱ndá xi tjín i̱sòꞌnde.
\v 7 ꞌÑó chja̱ kitsò:
\p ―Jcha̱xkón Nainá, jeya ti̱kíjna; jye ijchò na̱chrjein‑la̱ nga koi̱ìndaàjiìn. Jcha̱xkón jè xi tsibíndaà ngajmiì, xi tsibíndaà nangui, xi tsibíndaà ndáchikon ko̱ ñánda tíbitjo nandá.
\p
\v 8 Ìjngoò àkja̱le̱ kiìchja̱ xi kitsò:
\p ―Jyeé kakaàngui, jyeé kakaàngui Babilonia, na̱xa̱ndá xi ꞌñó je kji, jè xi bítꞌin‑la̱ na̱xa̱ndá xi tjín i̱sòꞌnde nga [kjꞌei̱í nainá fìtꞌaà‑la̱] koni sꞌín xi̱ta̱ kꞌe̱ nga kjoa̱chijngui sꞌín. Koni sꞌín kisꞌiìn, kꞌoa̱á ngaya‑la̱ koni tsà kisìchꞌi̱ yije xi̱ta̱ i̱sòꞌnde jè xán tsꞌe̱ kjoa̱chijngui‑la̱ xi tji̱ko̱ kjo̱jti‑la̱ Nainá.
\p
\v 9 Ìjngoò àkja̱le̱ tsatsejèn xi ma‑ne jàn xi ꞌñó chja̱ nga kitsò:
\p ―Tsà yá xi skoe̱xkón jè cho̱ je xi chꞌo kji ko̱ i̱sén xkósòn‑la̱, tsà ti̱koa̱ si̱tꞌaà chi̱ba̱‑la̱ i̱tjòn tjen‑la̱, o tsà tsja,
\v 10 Nainá tsjá‑la̱ kjo̱ꞌin, kꞌoa̱á ngaya‑la̱ koni tsà vino skoí xi tji̱ko̱ kjoa̱jti‑la̱ Nainá. Nga jè sobà Nainá jyeé tsibíndaà jngoò chi̱tsín vino xi ꞌñó kjaán mé‑ne nga ko̱kò‑ne kjoa̱jti‑la̱ nga sꞌe̱‑la̱ kjo̱ꞌin i̱jiìn niꞌín azufre xi ꞌñó tsjè títì. Tíkotsejèn àkja̱le̱ tsjeè ko̱ Orrè.
\v 11 Jè ni̱ꞌndi̱‑la̱ tsꞌe̱ kjo̱ꞌin‑la̱, kjitꞌaá na̱chrjein ni̱ta̱ kjé‑ne nga ki̱tjomijìn. Mìkiì si̱ìkjáya ko̱ na̱chrjein ko̱ ni̱tje̱n jñà xi̱ta̱ xi jè cho̱ tsꞌe̱n ko̱ i̱sén xkósòn‑la̱ beèxkón, jñà xi ti̱koa̱ tjítꞌaà chi̱ba̱‑la̱ ko̱ ꞌín‑la̱ jè cho̱ je xi chꞌo kji.
\v 12 I̱íjndé nga mochjeén nga kàtachíkjoa̱‑la̱ ni̱ta̱ mé kjoa̱‑ne jñà xi̱ta̱‑la̱ Nainá xi síkitasòn kjo̱tíxoma‑la̱ ko̱ xi ndaà mokjeiín‑la̱ i̱tꞌaà tsꞌe̱ Jesús.
\p
\v 13 Kiꞌnchrè ìjngoaà ꞌén xi ngajmiì inchrobà‑ne xi kitsò‑na:
\p ―Chjí, títꞌeiì xo̱jo̱n: “Jñà na̱chrjein xi fì‑ìsa, mé tà ndaà‑la̱ jñà xi̱ta̱ xi ki̱yá nga mokjeiín‑la̱ i̱tꞌaà tsꞌe̱ Na̱ꞌèn‑ná.” Kꞌoa̱á tsò Ini̱ma̱ Tsjeè‑la̱ Nainá: “Kixi̱í kjoa̱, jñà xi̱ta̱ koi si̱ìkjáya‑né kjoa̱ tsꞌe̱ xá‑la̱; ján ngajmiì, jcha̱á‑la̱ ngatsꞌiì kjoa̱ xi ndaà kisꞌiìn.”
\s Kꞌe̱ nga maxkó tsojmì xi jye kòjchá ya̱ i̱tꞌaà nangui
\p
\v 14 Kꞌe̱ nga kiskoòtsejèn, kìjtseè jngoaà ifi xi chroba kji, ya̱ i̱sòꞌnga ifi tíjna jngoò xi kꞌoa̱ kji koni kiꞌndí‑la̱ xi̱ta̱. Jngoò corona xi nguì oro tjíꞌa sko̱, ko̱ jngoò ki̱cha̱ libá kjiya tsja xi ꞌñó yijò kji.
\v 15 Ìjngoò àkja̱le̱ itjo ya̱ i̱ꞌnde tsjeè‑la̱ Nainá xi ꞌñó chja̱, kitsò‑la̱ jè xi tíjnasòn ifi:
\p ―Titsꞌi̱i nga ti̱xákoi̱i ki̱cha̱ libá‑lè; ti̱chásoìn, ko̱ tíxkoí kóho̱tjín tsojmì tjè xi tjín i̱tꞌaà nangui nga jye kòjchá yije; ko̱ jyeé ijchò na̱chrjein‑la̱ nga sincháxkó.
\p
\v 16 Jè xi tíjnasòn ifi, tsibítsꞌia̱ko̱ ki̱cha̱ libá‑la̱ ya̱ i̱sòn nangui nga tsatesòn tsojmì tjè‑la̱ i̱sòꞌnde, i̱kjoàn chincháxkó.
\p
\v 17 Ìjngoò àkja̱le̱ itjo ya̱ i̱ꞌnde tsjeè‑la̱ Nainá xi kijna ngajmiì xi ti̱koa̱ ki̱cha̱ libá kjiya tsja xi ꞌñó yijò kji.
\v 18 Ìjngoò àkja̱le̱ itjo‑ne i̱tꞌaà ími̱xa̱ tsjeè‑la̱ Nainá, jè xi síkinda̱ niꞌín. ꞌÑó kiìchja̱‑la̱ jè àkja̱le̱ xi ki̱cha̱ libá kjiya tsja; kitsò‑la̱:
\p ―Titsꞌi̱i nga ti̱xákoi̱i ki̱cha̱ libá‑lè xi ꞌñó yijò kji; ti̱chátꞌeiì ꞌén‑la̱ jñà toò uva xi tjín i̱tꞌaà nangui, nga jñà toò‑la̱ jye kichji.
\p
\v 19 Jè àkja̱le̱ tsibítsꞌia̱ko̱ ki̱cha̱ libá‑la̱ nga tsatetꞌaà toò‑la̱ jñà yá uva; i̱kjoàn kisìkatsjoòya ya̱ ñánda nga ma binchanè toò uva. Kjoa̱ koi, jè okó kjoa̱jti‑la̱ Nainá.
\v 20 Mìtsà ya̱ i̱jiìn na̱xa̱ndá kisinè jñà toò uva; ján i̱ndiì na̱xa̱ndá kisinè; kꞌe̱ nga jye kisinè, jní itjo ñánda nga kisinè; ꞌñó tse jní itjo skanda ijchò kangui‑la̱ kó kji ꞌnga tíjna freno xi tjíꞌa tsoꞌba kohòyo̱ ko̱ jàn sìndo̱ kilómetro tsangasòn.
\c 15
\s Itoò ma àkja̱le̱ xi itoò kjo̱ꞌin jꞌiìko̱
\p
\v 1 Ìjngoò kjo̱xkón kìjtseè ján ngajmiì xi ꞌñó xkón kji ko̱ ꞌñó jeya kiꞌya‑la̱. Itoò ma àkja̱le̱ xi itoò kjo̱ꞌin jꞌiìko̱ jñà kjo̱ꞌin xi fehetꞌaà‑ne nga ya̱á fehetꞌaà‑ne kjoa̱jti‑la̱ Nainá.
\p
\v 2 Ti̱koa̱ kìjtseè jngoaà ndáchikon xi chi̱tsín kji; tsjájiìn ko̱ niꞌín. Ya̱ ncha kixi̱ i̱sòn ndáchikon xi chi̱tsín kji, jñà xi̱ta̱ xi jye kisìkijne i̱tꞌaà tsꞌe̱ cho̱ je xi chꞌo kji ko̱ i̱sén xkósòn‑la̱, jñà xi mìkiì kitsjáꞌnde nga kisitꞌaà chi̱ba̱‑la̱, ko̱ número tsꞌe̱ ꞌín‑la̱. Xi̱ta̱ koi kjiya tsja níꞌñó arpa xi Nainá kitsjaà‑la̱.
\v 3 Nchiseè sò‑la̱ Moisés xi chi̱ꞌnda‑la̱ Nainá ko̱ sò‑la̱ Orrè, nchitsò:
\q Na̱ꞌèn xi Nainá ꞌmì‑lè, xi ta ji̱ ta̱ jngoò‑né xi ꞌñó tse ngaꞌñó tjín‑lè,
\q ꞌñó jeya ko̱ ꞌñó xkón tjín ngatsꞌiì kjoa̱ xi ꞌnì.
\q Xi̱ta̱ kixi̱‑né; kixi̱í tjín ndi̱yá‑lè.
\q Ji̱í‑né xi Xi̱ta̱xá Ítjòn tìjna̱‑la̱ ngatsꞌiì na̱xa̱ndá xi tjín i̱sòꞌnde.
\q
\v 4 ¿Yá xi mìkiì tsakjón‑lè Na̱ꞌèn?
\q ¿Yá xi mìkiì skoe̱xkón‑lè?
\q Ta̱jngoò ngaji̱ xi xi̱ta̱ tsjiì,
\q koií kꞌoa̱sꞌín kjoi̱í‑ne ngatsꞌiì na̱xa̱ndá‑la̱ i̱sòꞌnde nga skoe̱xkón‑lè
\q nga jye tíꞌya‑la̱ kjoa̱ kixi̱‑lè.
\p
\v 5 Kꞌe̱ nga jye kìjtseè kjoa̱ koi, kiskoòtsejèn nga kitáxꞌa̱ ján ngajmiì jè i̱ꞌnde tsjeè‑la̱ Nainá xi tíjnaya i̱ya Niꞌya Nikje xi okó nga ya̱ tíjna Nainá.
\v 6 Itjo ya̱ i̱ꞌnde tsjeè‑la̱ Nainá jñà àkja̱le̱ xi itoò ma‑ne xi jꞌiìko̱ itoò kjo̱ꞌin. Íkjá nikje lino chroba xi ꞌñó ote kjoàn; tíkjá ndáyá‑la̱ naꞌñó payo̱ xi nguì oro.
\v 7 Jñà xi ñijòn ma‑ne xi títsa̱jnakon, jngoò itjojiìn xi kisìnga̱tsja nga íjngó íjngó àkja̱le̱ xi itoò ma‑ne; kitsjaà íjngó íjngó‑la̱ chi̱tsín xi nguì oro xi ya̱ tjíya kjo̱ꞌin tsꞌe̱ kjoa̱jti‑la̱ Nainá xi tíjnakon ni̱ta̱ mé na̱chrjein‑ne.
\v 8 Ya̱ i̱ya i̱ꞌnde tsjeè‑la̱ Nainá, kitseè ni̱ꞌndi̱ xi ya̱ inchrobà‑ne i̱tꞌaà tsꞌe̱ kjoa̱jeya‑la̱ Nainá ko̱ ngaꞌñó xi tjín‑la̱. Ni̱yá xi kitjòꞌnde‑la̱ nga jahasꞌen ya̱ i̱ꞌnde tsjeè‑la̱ Nainá skanda kꞌe̱ nga jye tsitasòn yije jñà kjo̱ꞌin xi itoò ma‑ne xi jꞌiìko̱ jñà àkja̱le̱ xi itoò ma‑ne.
\c 16
\s Chi̱tsín xi itoò ma‑ne
\p
\v 1 Kiꞌnchrè jngoaà ꞌén xi ya̱ itjo‑ne i̱ꞌnde tsjeè‑la̱ Nainá nga kitsò‑la̱ jñà àkja̱le̱ xi itoò ma‑ne:
\p ―Tanguió, tíxteèn‑sòn i̱sòꞌnde jñà xi tjíya chi̱tsín xi itoò ma‑ne, kjo̱ꞌin xi tji̱ko̱ kjoa̱jti‑la̱ Nainá.
\p
\v 2 Kiì jè àkja̱le̱ xi tsako̱ ítjòn‑la̱. Tsibíxteèn‑sòn i̱sòꞌnde xi tjíya chi̱tsín‑la̱. Ngatsꞌiì xi̱ta̱ xi tjín‑la̱ chi̱ba̱‑la̱ cho̱ tsꞌe̱n ko̱ xi beèxkón jè i̱sén xkósòn‑la̱ jè cho̱ je xi chꞌo kji, tsako̱‑la̱ chꞌin xa̱jtsé xi ꞌñó chꞌo kjoàn ko̱ ijò jchán ma.
\p
\v 3 Jè àkja̱le̱ xi ma‑ne jò tsibíxteèn‑jiìn ndáchikon xi tjíya chi̱tsín‑la̱. Ko̱ jè ndáchikon, nguì jní komà, koni tsà ya̱ kꞌen‑jiìn xi̱ta̱. Ngatsꞌiì xi títsa̱jnakon ya̱ i̱jiìn ndáchikon jngoò kꞌaá kꞌen.
\p
\v 4 Jè àkja̱le̱ xi ma‑ne jàn, tsibíxteèn‑jiìn ya̱ xa̱jngá nandá ko̱ ñánda tíbitjo nandá, jè xi tjíya chi̱tsín‑la̱. Saà jní komà.
\v 5 I̱kjoàn kiꞌnchrè‑la̱ jè àkja̱le̱ xi tsꞌe̱ nandá, kitsò:
\p ―Ngaji̱ Na̱ꞌèn, tjín‑lè kjoa̱kixi̱, nga kꞌoa̱á sꞌín kitsꞌiì‑la̱ kjo̱ꞌin jñà xi̱ta̱ i̱tꞌaà tsꞌe̱ kjoa̱ koi, nga̱ ji̱í xi xi̱ta̱ tsjeè ꞌmì‑lè, ji̱í xi tijni skanda kjòtseé, tijni skanda i̱ꞌndei̱.
\v 6 Nga jñà xi̱ta̱ koi tsibíxteèn jní‑la̱ xi̱ta̱‑lè nga jñà kisìkꞌen, ko̱ xi̱ta̱ xi kiìchja̱‑ngajo‑lè. I̱ꞌndei̱ ngaji̱ kꞌoa̱á ti̱sꞌín tìꞌbiì ngajo‑la̱ jní nga nchiꞌbiì; ya̱á chi̱ba̱‑la̱.
\p
\v 7 Ti̱koa̱ kiꞌnchrè jngoò‑la̱ ꞌén xi ya̱ i̱tꞌaà ími̱xa̱ tsjeè‑la̱ Nainá chja̱, nga tsò:
\p ―Ji̱ Na̱ꞌèn xi Nainá ꞌmì‑lè, xi ta ji̱ ta̱ jngoò‑né xi ꞌñó tse ngaꞌñó tjín‑lè, kixi̱í kjoa̱, jñà kjo̱ꞌin xi tíꞌbiì‑la̱ xi̱ta̱ koi, ndaá tjín ko̱ nguì kixi̱í tjín.
\p
\v 8 Jè àkja̱le̱ xi ma‑ne ñijòn, tsibíxteèn xi tjíya chi̱tsín‑la̱ ya̱ i̱sòn tsꞌoí. Jè tsꞌoí kitjòꞌnde‑la̱ nga jè ndobá‑la̱ kisìchjàn yijo‑la̱ xi̱ta̱.
\v 9 Jè ndobá‑la̱ tsꞌoí ꞌñó kisìchjàn‑la̱ ngatsꞌiì xi̱ta̱ ta̱nga jñà xi̱ta̱ koi mìkiì kisìkájno jé‑la̱ ni̱ mìkiì jeya kisìkíjna Nainá; ta sa̱á kiìchja̱jno‑la̱ Nainá nga jè xi tjín‑la̱ ngaꞌñó i̱tꞌaà tsꞌe̱ kjo̱ꞌin koi.
\p
\v 10 Jè àkja̱le̱ xi ma‑ne ꞌòn, tsibíxteèn‑sòn jè xi tjíya chi̱tsín‑la̱ ya̱ ñánda tíhotíxoma jè cho̱ tsꞌe̱n. Ko̱ jè i̱ꞌnde ñánda tíhotíxoma jè cho̱ je xi chꞌo kji, kòjñò‑né. Jñà xi̱ta̱ xi beèxkón jè cho̱ tsꞌe̱n kiskinetjòn ni̱je̱n‑la̱ nga ꞌñó ijò komà‑la̱.
\v 11 Ta̱nga mìkiì kisìkájno jé‑la̱; tà sa̱á ìsa̱ ndaà kiìchja̱jno‑la̱ Nainá xi tsꞌe̱ ngajmiì, koií kjoa̱‑la̱ nga ijò komà yijo‑la̱ nga xa̱jtsé tjín‑la̱.
\p
\v 12 Jè àkja̱le̱ xi ma‑ne joòn tsibíxteèn‑jiìn xi tjíya chi̱tsín‑la̱ ya̱ xa̱jngá nandá‑je Éufrates. Jè nandá‑la̱ xa̱jngá, kixìya‑né, mé‑ne nga ko̱ma kjoa̱hato‑ne jñà xi̱ta̱xá ítjòn xi nchrobá‑ne ñánda bitjokàtji‑ne tsꞌoí.
\p
\v 13 Kìjtseè‑ná nga jè ye̱ xi ꞌñó je kji, ko̱ jè cho̱ je xi chꞌo kji, ko̱ jè xi̱ta̱ xi kiìchja̱ya ꞌén ndiso nga itjo‑ne tsoꞌba jàn ini̱ma̱ chꞌo xi cho̱ xke̱ kjoàn.
\v 14 Jñà‑né ini̱ma̱ chꞌo‑la̱ nei̱í xi sꞌín kjo̱xkón; bitjo nga bíxkóya xi̱ta̱xá ítjòn xi tjín nga tíjtsa i̱sòꞌnde nga kji̱nchrobà kjo̱jchán jè na̱chrjein xi jye tjíndaà‑la̱ Nainá xi ta jè ta̱jngoó xi ꞌñó tse ngaꞌñó tjín‑la̱.
\v 15 “Ti̱náꞌyaà, ꞌa̱n, kꞌoa̱á sꞌín kjoia̱a koni sꞌín fꞌiì xi̱ta̱ chijé. Mé ta ndaà‑la̱ jè xi̱ta̱ xi tíjnandaà kꞌe̱ nga ꞌa̱n xi kjoia̱a; kjijnandaà nikje‑la̱ nga ko̱kjá; mé‑ne nga mìkiì ko̱sobà‑la̱ nga tíjna laká.”
\v 16 Jñà ini̱ma̱ cho̱‑la̱ nei̱í tsibíxkóya xi̱ta̱xá ítjòn‑la̱ i̱sòꞌnde ya̱ i̱ꞌnde ñánda ꞌmì Armagedón xi ꞌén hebreo.
\p
\v 17 Jè àkja̱le̱ xi ma‑ne itoò, tsibíxteèn i̱jiìn i̱sén xi tjíya chi̱tsín‑la̱. Kiìꞌnchré‑la̱ ꞌén xi ꞌñó kiìchja̱ xi ya̱ inchrobà‑ne i̱ꞌnde tsjeè‑la̱ Nainá xi tíjna ngajmiì ñánda tíjna jè xi tíjnasòn íxi̱le̱ nga tíhotíxoma; kitsò:
\p ―Jyeé tsitasòn yije.
\p
\v 18 I̱kjoàn jate niꞌín chꞌo̱n, kinaꞌyà‑la̱ jta̱, kitsꞌiìn chꞌo̱n, tsꞌa chꞌón xi ꞌñó jchán tsꞌa; ni̱ saà jngoò kꞌa kꞌoa̱sꞌín ꞌba kóni nga ti̱sa̱ tsatsejèn xi̱ta̱ i̱sòꞌnde.
\v 19 Jè na̱xa̱ndá je xi ꞌñó ndaà yaxkon‑la̱, jàn ya komà. Ko̱ jñà na̱xa̱ndá xi chja̱‑ne nga ìjngoò ìjngoò nangui xi tjín i̱sòꞌnde, jngoò kꞌaá kichijà. Ko̱ jè na̱xa̱ndá je xi ꞌmì Babilonia xi ꞌñó ndaà yaxkon‑la̱, mìkiì kisìjchàajiìn Nainá nga kitsjaà‑la̱ kjo̱ꞌin, kꞌoa̱á ngaya‑la̱ koni kisìkꞌiì jngoò chi̱tsín xi tjíya vino xi nguì kjoa̱jti‑la̱ Nainá xi jè jye tíjnandaà‑la̱.
\v 20 Ngatsꞌiì nangui xi tjín i̱jiìn ndáchikon ko̱ jñà nindoò, jngoó kꞌaá kichijà, mì ti̱ kiì kiꞌya‑la̱.
\v 21 Jñà xi̱ta̱ tsanè jtsí nda̱jo̱ xi ꞌñó tsiaàn kjoàn, tjín‑la̱ tsà ichán kilo nga jngoò ìjngoò. Jñà xi̱ta̱, ꞌon kiìchja̱jno‑la̱ Nainá, koií kjoa̱‑la̱ nga tse kjo̱ꞌin kisꞌe‑la̱ kjoa̱ tsꞌe̱ jtsí nda̱jo̱.
\c 17
\s Kósꞌín sꞌe̱‑la̱ kjo̱ꞌin jè chjo̱ón chijngui
\p
\v 1 Jꞌiì jngoò jñà àkja̱le̱ xi itoò ma‑ne xi itoò chi̱tsín tjíya tsja, kiìchja̱, kitsò‑na̱:
\p ―Nchroboí, kokoò‑lè kjo̱ꞌin xi tjoé‑la̱ jè chjo̱ón chijngui xi ꞌñó ndaà yaxkon‑la̱ xi tíjnandiì ñánda nga kjìn xa̱jngá nandá fahato.
\v 2 Jñà xi̱ta̱xá ítjòn xi tjín i̱sòꞌnde, ya̱á tsafáhijtako̱ chjo̱ón jè nga kjꞌei̱í nainá kijtseèxkón kꞌoa̱á ngaya‑la̱ tsà kjoa̱ chijngui kisìko̱ jè chjo̱ón. Ko̱ ngatsꞌiì xi̱ta̱ xi tjín i̱sòꞌnde, kꞌoa̱á ti̱ kisꞌiìn nga kjꞌei̱í nainá kiìtji̱ngui‑la̱ kꞌoa̱á ngaya‑la̱ koni tsà xán tsꞌe̱ kjoa̱chijngui‑la̱ chjo̱ón kjòchꞌi̱‑ne.
\p
\v 3 I̱tꞌaà tsꞌe̱ Ini̱ma̱ Tsjeè‑la̱ Nainá, jè àkja̱le̱ kiìko̱ ini̱ma̱‑na̱ jngoò i̱ꞌnde i̱tꞌaà xìn ñánda nangui kixì choòn. Kìjtseè jngoaà chjo̱ón xi tíjnakjá‑la̱ cho̱ je xi chꞌo kji xi inì kji. Yijàjno yije yijo‑la̱ ꞌén xi kondra̱ tsꞌe̱ Nainá nga chja̱jno‑la̱. Itoò ma sko̱ ko̱ te ma nchra̱já‑la̱.
\v 4 Jè chjo̱ón, nikje sko ko̱ nikje inì kjoàn xi íkjá. Yijàjno xi nguì oro ko̱ nda̱jo̱ ote xi ꞌñó tsꞌe̱ chjí‑la̱, ko̱ ndáto̱n fangui xi ꞌñó chjí‑la̱ xi ꞌmì perla. Tjíya tsja jngoò chi̱tsín xi nguì oro; jè chi̱tsín kitseé kjoa̱ chꞌo‑la̱ ko̱ kjoa̱ tjé xi tsꞌe̱ kjoa̱ chijngui‑la̱.
\v 5 Ya̱ i̱tjòn tjen‑la̱, tjítꞌaà ꞌén ꞌma xi tsò: “Babilonia xi ꞌñó je kji nga ndaà yaxkon‑la̱, jè nea̱‑la̱ íchjín chijngui ko̱ ngatsꞌiì kjoa̱ chꞌo xi tjín i̱sòꞌnde.”
\v 6 Kꞌe̱ nga kiskoòꞌan chjo̱ón jè, kìjtseè xkoaàn nga chꞌi̱‑né nga jní‑la̱ xi̱ta̱‑la̱ Nainá kitsꞌiì ko̱ tsꞌe̱ xi̱ta̱ xi kinìkꞌen nga ꞌén‑la̱ Jesús kiìchja̱ya. Kꞌe̱ nga kìjtseè tà kjòxkón‑na.
\v 7 Kitsò‑na jè àkja̱le̱:
\p ―¿Mé‑ne maxkón‑lè? ꞌA̱án, kèno̱jmí‑lè kó tsòya‑ne kjoa̱ ꞌma‑la̱ chjo̱ón jè, ko̱ i̱tꞌaà tsꞌe̱ cho̱ je xi chꞌo kji xi tíjnakjá‑la̱ xi itoò ma sko̱ koa̱ te ma nchra̱já‑la̱.
\v 8 Jè cho̱ xi kàꞌyi, tsibìjnakon‑né, ta̱nga i̱ꞌndei̱ tíjnakꞌen‑né; ya̱á kji̱nchrobà mijìn‑ne ni̱tja̱n jñò mé‑ne nga jngoò kꞌa chi̱ja‑ne. Jñà xi̱ta̱ xi tjín i̱sòꞌnde, xi mìkiì tjítꞌaà ꞌín‑la̱ xo̱jo̱n tsꞌe̱ kjoa̱binachon kóni nga ti̱sa̱ kisindaà i̱sòꞌnde, tà ko̱xkón‑la̱ kꞌe̱ nga skoe̱xkon jè cho̱ xi tsibìjnakon, ko̱ i̱ꞌndei̱ tíjnakꞌen‑né, ta̱nga ko̱tsején ìjngoò kꞌa‑ne.
\p
\v 9 ’I̱íjndé mochjeén kjo̱hítsjeèn xi tjín‑la̱ kjoa̱ chji̱ne̱. Jñà sko̱ cho̱ xi itoò ma‑ne, jñà ngaya‑la̱ jñà nindoò xi itoò ma‑ne ñánda tíjnanè jè chjo̱ón. Ti̱koa̱á jñà ngaya‑la̱ xi itoò ma‑ne xi̱ta̱xá ítjòn.
\v 10 ꞌÒn ma‑ne xi jye kꞌen, jngoò ma xi tíhotíxoma‑ìsa, ko̱ jè xi ìjngoò, kjꞌeè kiì fꞌiì. Ta̱nga kꞌe̱ nga kjoi̱í, tà chibaá na̱chrjein ko̱tìxoma.
\v 11 Jè cho̱ je xi chꞌo kji xi tsibìjnakon ta̱nga i̱ꞌndei̱ tíjnakꞌen‑né, jè xi ma‑ne jiìn xi̱ta̱xá ítjòn. Ya̱á tíjnajiìn‑la̱ xi itoò ma‑ne, ko̱ ya̱á tífì ñánda nga jngoò kꞌa jchi̱ja.
\p
\v 12 ’Jñà nchra̱já xi te ma‑ne xi kàꞌyi, jñà ngaya‑la̱ xi̱ta̱xá ítjòn xi te ma‑ne xi kjꞌeè kiì tjoé‑la̱ kjo̱tíxoma. Ta̱nga kꞌe̱ nga tjoé‑la̱ kjo̱tíxoma ta jngoò hora ko̱tìxomakjoò ko̱ jè cho̱ je xi chꞌo kji.
\v 13 Jñà xi̱ta̱xá ítjòn xi te ma‑ne, ta̱jngoó kjo̱hítsjeèn tjín‑la̱ nga jè cho̱ je xi chꞌo kji si̱ìnga̱tsja ngaꞌñó‑la̱ ko̱ kjo̱tíxoma‑la̱.
\v 14 I̱kjoàn ska̱àn‑ko̱ jè Orrè, ta̱nga jè Orrè si̱ìkijne‑né. Nga jè‑né xi otíxoma‑la̱ jñà xi̱ta̱ xi otíxoma, ko̱ Xi̱ta̱xá Ítjòn‑la̱á ma jñà xi xi̱ta̱xá ítjòn títsa̱jna. Jñà xi̱ta̱ xi títsa̱jnako̱, xó kinokjoà‑la̱, xó kitjaàjiìn‑ne, ko̱ kixi̱í síkitasòn‑la̱.
\p
\v 15 Jè àkja̱le̱ kꞌoa̱á ti kitsò‑na:
\p ―Jè nandá xi kàꞌyi, ñánda tíjnandiì chjo̱ón chijngui, na̱xa̱ndá‑né, xi̱ta̱ kjín‑né, jñá‑né xi̱ta̱ xi tjín nga ìjngoò ìjngoò nangui xi tjín i̱sòꞌnde, koa̱ jñá‑né xi̱ta̱ xi chja̱ ngatsꞌiì ꞌén xi tjín i̱sòꞌnde.
\v 16 Jñà nchra̱já xi te ma‑ne xi kàꞌyi, ko̱ jè cho̱ je xi chꞌo kji xi kàꞌyi, si̱ìjtikeè‑né jè chjo̱ón chijngui, kjoa̱áꞌan yije‑la̱ skanda jñà nikje‑la̱, si̱ìkájna laká‑né. Yijo‑la̱ ski̱ne̱‑né. I̱kjoàn ya̱á ko̱kájiìn niꞌín.
\v 17 Nainá kꞌoa̱á sꞌín tsibíjiìn kjo̱hítsjeèn‑la̱ jñà xi̱ta̱ koi nga kꞌoa̱sꞌín si̱ìkitasòn koni sꞌín mejèn‑la̱ Nainá. Jè kjo̱tíxoma xi tjín‑la̱ xi̱ta̱ koi tíjngoò ikon nga jè cho̱ tsꞌe̱n ko̱nga̱tsja, skanda kꞌe̱ nga ki̱tasòn yije ꞌén xi kiìchja̱ Nainá.
\v 18 Jè chjo̱ón xi kàꞌyi, jè‑né na̱xa̱ndá je xi otíxoma‑la̱ jñà xi̱ta̱xá ítjòn xi tjín i̱sòꞌnde.
\c 18
\s Kósꞌín kiskaàngui jè na̱xa̱ndá Babilonia
\p
\v 1 Xi jye komà i̱skan, ìjngoò àkja̱le̱ kìjtseè xi tínchrobájen‑ne ngajmiì, xi ꞌñó tse ngaꞌñó tjín‑la̱. Jè kjoa̱ jeya‑la̱ xi ꞌñó ote kji, kisìhiseèn‑sòn nangui.
\v 2 ꞌÑó kiìchja̱, kitsò:
\p ―Jye kiskaàngui, jye kiskaàngui na̱xa̱ndá je Babilonia. Jyeé ta i̱ꞌnde‑la̱ ini̱ma̱ chꞌo‑la̱ nei̱í komà, ya̱ ñánda kitseè yije ini̱ma̱ tjé xi chꞌo kjoàn. Ko̱ ya̱ títsa̱jna ni̱se xi chꞌo kjoàn xi mìkiì ma chine.
\v 3 Ngatsꞌiì xi̱ta̱ i̱sòꞌnde, kꞌoa̱á ti kisꞌiìn koni sꞌín xi̱ta̱ na̱xa̱ndá jè nga kjꞌei̱í nainá kiìtji̱ngui‑la̱, kꞌoa̱á ngaya‑la̱ koni tsà kjòchꞌi̱‑ne jñà kjoa̱chijngui xi kisꞌiìn. Jñà xi̱ta̱xá ítjòn‑la̱ xi tjín nga tíjtsa i̱sòꞌnde, kꞌoa̱á ti kisꞌiìn. Ko̱ jñà xi̱ta̱ i̱sòꞌnde xi tsojmì otseya nga sꞌín kjo̱hi̱ma̱, kjònchi̱ná‑né xi kjoa̱ tsꞌe̱ kjo̱tsja‑la̱ yijo‑la̱ koni sꞌín jñà xi̱ta̱ xi tjín na̱xa̱ndá jè.
\p
\v 4 Ìjngoò ꞌén kiꞌnchrè xi ngajmiì inchrobà‑ne, xi kitsò:
\p ―Jñò xi na̱xa̱ndá tsꞌa̱n xan‑nò, tìtjokàjñoò na̱xa̱ndá jè, mé‑ne nga mì ya̱ ko̱ko̱tꞌaà‑nò jé‑la̱, ti̱koa̱ mìkiì ko̱ko̱tꞌaà‑nò kjo̱ꞌin xi sꞌe̱‑la̱.
\v 5 Jñà jé‑la̱, jyeé tímakjìn, jyeé jꞌiì skanda i̱ ngajmiì. Nainá, mìkiì si̱ìjchàajiìn [nga tsjá‑la̱ kjo̱ꞌin] xi kjoa̱ tsꞌe̱ jé‑la̱.
\v 6 Kꞌoa̱á ti̱sꞌín kàtamatꞌin ngajo‑ne koni sꞌín kisꞌiìn jè. Jò kꞌa kꞌoa̱ ti̱sꞌín kàtamatꞌin ngajo‑ne koni tjín kjoa̱ xi kisꞌiìn. Jè chi̱tsín xi kisìkáyajiìn vino, ko̱kji ti̱kájiìn ngajo‑là nga jò kꞌa ìsa̱ jchá kàtama, [jò kꞌa o̱kji kjo̱ꞌin kàtako̱‑la̱].
\v 7 Jè kjoa̱‑la̱ nga jeya kisìkíjna yijo‑la̱ ko̱ nga ꞌñó kisꞌe‑la̱ kjo̱tsja, kꞌoa̱ ti̱sꞌín tjiì ngajo‑là kjo̱ꞌin nga kàtakjindáya. Nga kꞌoa̱á tsò ini̱ma̱‑la̱: “ꞌA̱n, kꞌoa̱á sꞌín tìjna̱ nga chjo̱ón sko̱‑la̱ ꞌmì‑na. ꞌA̱n mìtsà chjo̱ón kaꞌàn ꞌmì‑na, ti̱koa̱á mìkiì siìkjiaán kjo̱ꞌin ni̱ta̱ kjé‑ne.”
\v 8 Koií kjoa̱‑la̱ nga ta̱jngoò na̱chrjein ki̱tjojenè‑la̱ kjo̱ꞌin: Ki̱yá xi̱ta̱‑la̱. Ti̱koa̱á ski̱ndàya‑né. Sꞌe̱é‑la̱ kjoa̱ tsꞌe̱ kjinchrá. Niꞌín ki̱ti̱‑ne nga kjoe̱hesòn. Nga ꞌñó tse ngaꞌñó tjín‑la̱ jè Nainá xi otíxoma nga kꞌoa̱á sꞌín jye kiskoòsòn‑la̱ nga tsjá‑la̱ kjo̱ꞌin.
\p
\v 9 Jñà xi̱ta̱xá ítjòn‑la̱ i̱sòꞌnde ꞌñó ski̱ndáyakeè ko̱ ꞌñó ꞌon ko̱ma‑la̱ kꞌe̱ nga skoe̱ nga tíbitjo ni̱ꞌndi̱‑la̱ nga títì jè na̱xa̱ndá jè ya̱ ñánda kiìtji̱ngui‑la̱ xi kjꞌei̱í nainá kꞌoa̱á ngaya‑la̱ koni tsà jngoó chjo̱ón chijngui kiìtji̱ngui‑la̱ nga kisìtsjako̱ yijo‑la̱.
\v 10 Kjiín ki̱ncha‑ne nga skótsejèn‑la̱, nga tsakjón‑la̱ kjo̱ꞌin‑la̱. ꞌÑó ki̱chja̱, ki̱tso̱:
\p ―I̱ma̱ xó‑ne, i̱ma̱ xó‑ne na̱xa̱ndá je Babilonia xi ꞌñó kisꞌe‑la̱ ngaꞌñó; ta̱jngoò tjò kòfꞌiì‑la̱ kjo̱ꞌin.
\p
\v 11 Jñà xi̱ta̱ xi otíjnaya tsojmì xi tjín i̱sòꞌnde, ti̱koa̱á ski̱ndáyakeè‑né nga ꞌon ko̱ma‑la̱ ini̱ma̱‑la̱ nga mì ti̱ yá xi ko̱tse‑ne tsojmì xi otíjnaya,
\v 12 tsojmì xi tsꞌe̱ to̱n oro, plata, nda̱jo̱ chjí xi ꞌñó ndaà kjoàn, ndáto̱n chjí xi ꞌñó ndaà kjoàn; nikje lino xi ꞌñó chjí, ko̱ nikje seda, nikje sko ko̱ xi inì kjoàn; ngatsꞌiì yá xi ꞌñó ndaà jne̱, tsojmì chjí xi nindaà ni̱ꞌño̱ cho̱ kisindaà‑ne, ngatsꞌiì tsojmì xi yá xi ꞌñó chjí xi yá ikon, ko̱ ki̱cha̱ bronce, ko̱ ki̱cha̱ xi ꞌmì hierro, ko̱ nda̱jo̱ marmol,
\v 13 ko̱ chrjoa̱yá canela, ngatsꞌiì tsojmì xi ndaà jne̱, chrjongó‑la̱ Nainá, ko̱ xkiì jne̱ xi ꞌmì mirra, ko̱ chrjongó tsꞌe̱ yá olivo, ko̱ vino ko̱ asìti̱. Trigo ko̱ skoa̱n i̱nchra̱jín, ko̱ cho̱ chꞌá, orrè, kohòyo̱, carreta, ko̱ xi̱ta̱ chi̱ꞌnda nga kisatíjna.
\v 14 Ki̱tso̱‑la̱ jè na̱xa̱ndá:
\p ―Ngatsꞌiì kjoa̱ xi ndaà kisaseèn‑la̱ ini̱ma̱‑lè, jyeé kitjaàxìn yije‑lè. Kjoa̱ nchi̱ná‑lè jyeé kichijà. Ko̱ kjoa̱ xi ndaà kòtsjachi, mì ti kiì sa̱kò‑lè ni̱ta̱ kjé‑ne.
\p
\v 15 Jñà xi̱ta̱ xi otíjnaya tsojmì xi ya̱ kjònchi̱ná tsꞌe̱ na̱xa̱ndá jè, kjiín ki̱nchatꞌaàxìn nga tsakjón‑la̱ kjo̱ꞌin. Ski̱ndáyakeè koa̱ ꞌñó ꞌon ko̱ma‑la̱ ini̱ma̱‑la̱.
\v 16 Kꞌoa̱á ki̱tso̱:
\p ―I̱ma̱ xó‑ne na̱xa̱ndá xi ꞌñó je kji, xi nikje lino chjí tsakakjá ko̱ nikje xi sko kjoàn ko̱ xi inì kjoàn. Yijàjno yijo‑la̱ oro, ndáto̱n chjí xi ꞌmì perla ko̱ nda̱jo̱ chjí xi ꞌñó ndaà kjoàn.
\v 17 Ta̱jngoò tjò kachija yije kjoa̱ nchi̱ná xi tjín‑la̱.
\p Ngatsꞌiì xi̱ta̱ xi síxáko̱ chitso, ko̱ ngatsꞌiì xi̱ta̱ xi ya̱ chitso títsa̱ya nga nchifì, jñà xi ya̱ i̱ya chitso síxá ko̱ ngatsꞌiì xi síxájiìn ndáchikon, kjiín tsibìtsa̱jna
\v 18 kꞌe̱ nga kijtseè ni̱ꞌndi̱‑la̱ na̱xa̱ndá nga títì; ꞌñó kiìchja̱, kitsò:
\p ―Ni̱ sa̱á jngoò na̱xa̱ndá tjín xi mangásòn‑kjoò koni kji na̱xa̱ndá jè, nga ꞌñó ndaà kiyaxkon‑la̱.
\p
\v 19 I̱kjoàn tsibíxteèn‑jno chijo sko̱, ꞌñó kiskindàyakeè nga ꞌon komà‑la̱ ini̱ma̱‑la̱; kitsò:
\p ―I̱ma̱ xó‑ne na̱xa̱ndá xi ꞌñó je kji; jè kjoa̱ nchi̱ná‑la̱, ndaà kjònchi̱ná‑ne jñà xi̱ta̱ xi tjín‑la̱ chitso ya̱ i̱jiìn ndáchikon. Ko̱ i̱ꞌndei̱, ta jngoó tjò kachija yije kjoa̱ nchi̱ná‑la̱.
\p
\v 20 Ngatsꞌioò jñò xi titsa̱jnaà ngajmiì, tsjaá tꞌè‑là takòn. Jñò xi xi̱ta̱‑la̱ Nainá maà, jñò xi tsibíxáya‑nò Cristo, ko̱ jñò xi Nainá nokjoà ngajo‑là, tsja tꞌè‑là ini̱ma̱‑nò. Nainá jyeé kàtsjá‑la̱ kjo̱ꞌin na̱xa̱ndá jè koií kjoa̱‑la̱ nga chꞌo kisìko̱‑nò.
\p
\v 21 Jngoò àkja̱le̱ xi ꞌñó tse ngaꞌñó tjín‑la̱ kiskoé jngoò nda̱jo̱ xi koni kji nda̱jo̱ natsí kji, kisìkatje̱n‑jiìn ndáchikon, kitsò:
\p ―Jè na̱xa̱ndá Babilonia, xi ꞌñó je kji, kꞌoa̱á sꞌín ska̱jiìn‑ndá; jngoó kꞌaá chi̱ja ni̱ta̱ kjé‑ne, mì ti̱ yá xi skoe̱xkon‑ne.
\v 22 Mì ti̱ kiì ki̱náꞌya‑la̱ i̱nchò calle‑la̱ jñà música xi síkjane arpa, jñà xi síkjindáya xo̱bí, ko̱ xi síkjane chrjo trompeta. Mì ti̱ kiì sꞌe̱‑la̱ xi̱ta̱ xi síxá ni̱ta̱ mé xá‑ne. Ti̱koa̱ mì ti̱ kiì ko̱xáko̱‑ne molino tsꞌe̱ ncheé.
\v 23 Niꞌín tsꞌe̱ lámpara, mì ti̱ kiì si̱ìhiseèn‑ne; mì ti̱ kiì sꞌe̱‑ne sꞌeí nga ki̱xan xi̱ta̱; koií kjoa̱‑la̱ ko̱sꞌín ko̱matꞌin‑ne nga jñà xi̱ta̱‑la̱ xi otseya ko̱ otíjnaya tsojmì, ꞌñó xi̱ta̱ nchi̱ná komà i̱ i̱sòꞌnde; ti̱koa̱ kiskoòna̱cha̱n yije‑la̱ na̱xa̱ndá xi tjín i̱sòꞌnde nga komà‑la̱ kisꞌiìn kjoa̱tjꞌe.
\v 24 Na̱xa̱ndá jè, Nainá kitsjaà‑la̱ kjo̱ꞌin nga jé tsꞌe̱‑né nga kinìkꞌen xi̱ta̱‑la̱ Nainá ko̱ xi̱ta̱ xi kiìchja̱ya̱ nga̱jo̱‑la̱ Nainá ko̱ ngatsꞌiì xi̱ta̱ xi kinìkꞌen nga tíjtsa i̱sòꞌnde.
\c 19
\s Xi̱ta̱ xi tsjá‑la̱ kjo̱ndaà Nainá ján ngajmiì
\p
\v 1 Xi jye komà i̱skan, kiꞌnchrè‑la̱ ján ngajmiì ꞌén koni kjín jchán ma xi̱ta̱ xi chja̱ nga tsò:
\q ¡Aleluya! ¡ꞌNga ti̱kíjna Nainá!
\q Nga jè ochrjekàjiìn‑ná kjo̱ꞌin kjoa̱ tsꞌe̱ jé‑ná,
\q ko̱ ta jè ta̱jngoò xi tjín‑la̱ kjoa̱jeya
\q ko̱ xi tse ngaꞌñó tjín‑la̱.
\q
\v 2 Nga jè Nainá, ndaà sꞌín ko̱ kixi̱í sꞌín
\q kꞌe̱ nga tsjá‑la̱ kjo̱ꞌin xi̱ta̱;
\q nga jyeé kitsjaà‑la̱ kjo̱ꞌin jè na̱xa̱ndá je Babilonia
\q xi kisìkitsꞌón‑jiìn i̱sòꞌnde nga tsakó‑la̱ xi̱ta̱ i̱sòꞌnde
\q nga kjꞌei̱í nainá kijtseèxkón
\q kꞌoa̱á ngaya‑la̱ koni jngoò chjo̱ón xi kjoa̱ chijngui sꞌín.
\q Koií jé xi komà‑la̱ nga jè kisìkꞌen xi̱ta̱ chi̱ꞌnda‑la̱ Nainá xi kiìchja̱ ngajo‑la̱.
\p
\v 3 Ìjngoò kꞌa kꞌoa̱ kitsò:
\p ―¡Aleluya! ¡ꞌNga ti̱kíjna Nainá! Jè ni̱ꞌndi̱‑la̱ jè na̱xa̱ndá nga títì, kꞌoa̱á sꞌín ki̱tjomijìn ni̱ta̱ mé na̱chrjein‑ne.
\p
\v 4 Jñà xi̱ta̱ jchínga xi kaàn ñijòn ma‑ne ko̱ xi ñijòn ma‑ne xi títsa̱jnakon, chincha-xkóꞌnchi-ñiatꞌaà‑la̱ nga kijtseèxkón Nainá xi tíjnasòn íxi̱le̱ ñánda tíhotíxoma. Kitsò:
\p ―¡Kꞌoa̱sꞌín kàtama! ꞌNga ti̱kíjna Nainá. ¡Aleluya!
\p
\v 5 Ya̱ íxi̱le̱‑la̱ ñánda tíhotíxoma, kinaꞌyà‑la̱ ꞌén xi kitsò:
\q Tjiì‑là kjo̱ndaà Nainá ngatsꞌioò jñò xi chi̱ꞌnda maà,
\q jñò xi i̱xti maà ko̱ xi̱ta̱ jchínga,
\q ngatsꞌioò xi tsakjoòn‑chaà Nainá.
\p
\v 6 Kiꞌnchrè‑la̱ ꞌén koni tsà kjín jchán ma xi̱ta̱ xi chja̱, koni sꞌín naꞌyà‑la̱ nandá kꞌe̱ nga one, koni sꞌín naꞌyà‑la̱ kꞌe̱ nga one chꞌo̱n, xi kitsò:
\q ¡Aleluya!
\q ¡ꞌNga ti̱kíjna Nainá xi ta jè ta̱jngoó xi ꞌñó tse ngaꞌñó tjín‑la̱!
\q Nga jyeé jè tíhotíxoma.
\q
\v 7 Tsja kꞌoé‑lá ini̱ma̱‑ná, si̱tsja‑chaá takoán, jeya si̱kíjnaá Nainá,
\q nga jyeé jꞌiì kjoa̱ bixan‑la̱ Orrè;
\q chjo̱ón‑la̱ jyeé tíjnandaà.
\q
\v 8 Jè chjo̱ón, jye koꞌbiì‑la̱ nikje lino xi ꞌñó chjí,
\q xi ꞌñó tsjeè kjoàn ti̱koa̱ ꞌñó ote nga kónakjá.
\m Jè nikje lino xi ꞌñó chjí, jè ngaya‑la̱ kjoa̱kixi̱ xi sꞌín xi̱ta̱‑la̱ Nainá.
\p
\v 9 Jè àkja̱le̱ kitsò‑na:
\p ―Chjí kjoa̱ koi: “Mé ta ndaà‑la̱ jñà xi̱ta̱ xi xó kinokjoà‑la̱ kjoa̱ bixan‑la̱ Orrè nga jè ko̱kje̱n‑ko̱.”
\p Kitsò ìsa̱:
\p ―Jñà ꞌén koi, nguì ꞌén kixi̱‑la̱ Nainá‑né.
\p
\v 10 Tsohósi̱jna xkóꞌnchiñia i̱tꞌaà ndso̱ko̱ jè àkja̱le̱ nga mejèn‑na̱ skoexkoán. Ta̱nga jè àkja̱le̱ kitsò‑na̱:
\p ―Kì kꞌoa̱á ꞌnì; ꞌa̱n, ti̱koa̱á chi̱ꞌnda‑la̱ Nainá ma koni ngaji̱ ko̱ jñà ꞌndsì xi ndaà fì tji̱ngui‑la̱ jñà ꞌén kixi̱ xi kiìchja̱ Jesús. Jè Nainá cha̱xkoín.
\p Jñà ꞌén kixi̱ xi kiìchja̱ Jesús, ti̱jñà‑ne xi síkítsjeèn‑ya‑la̱ xi̱ta̱ xi chja̱ ngajo‑la̱ Nainá.
\s Jè xi tíjnasòn‑la̱ kohòyo̱ chroba
\p
\v 11 Kìjtseè ngajmiì nga ti̱xꞌá; tsatsejèn jngoò kohòyo̱ xi chroba kji. Jè xi̱ta̱ xi tíjnakjá‑la̱, kꞌoa̱á sꞌín yaxkon‑la̱ nga kixi̱ síkitasòn ko̱ kixi̱ tíjna, koií kjoa̱‑la̱ nga nguì ko̱ kjoa̱kixi̱‑la̱ bíndaàjiìn ko̱ nga kjaán‑kjoò.
\v 12 Jñà xko̱n, kꞌoa̱á kjoàn koni niꞌín. Ya̱ sko̱, kjín corona jtobá tjíꞌa ko̱ jngoò ꞌín‑la̱ tjítꞌaà xi mìkiì yá xi machi̱ya‑la̱ kó tsòya‑ne; ta̱jngoò jè machi̱ya‑la̱ kó tsòya‑ne.
\v 13 Jè nikje xi kinakjá, jní yijàjno. Jè ꞌín‑la̱, ꞌÉn‑la̱ Nainá ꞌmì.
\v 14 Ya̱á tji̱ngui‑la̱ jñà soldado tsꞌe̱ ngajmiì nga títsa̱jnakjá‑la̱ kohòyo̱ chroba; saà nikje lino chrobaá íkjá xi ꞌñó chjí ko̱ tsjeè kjoàn.
\v 15 Jè tsoꞌba bitjo jngoò ki̱cha̱ ndojò xi ꞌñó yijò kji, jè xi síkiꞌon‑ne ngatsꞌiì na̱xa̱ndá. Nga jè ko̱tìxoma‑la̱ xi̱ta̱ na̱xa̱ndá. Jè yá nise si̱ìkjeén xi nguì ki̱cha̱ tájaà. Jè sobá ko̱sinè jñà toò uva ya̱ i̱ya chitso nga ko̱chrje vino xi okó kjoa̱jti‑la̱ Nainá xi ta jè ta̱jngoó xi ꞌñó tse ngaꞌñó tjín‑la̱.
\v 16 Jè nikje‑la̱ ko̱ chrjomí‑la̱ tjítꞌaà ꞌín xi tsò: “Xi̱ta̱xá Ítjòn‑la̱ ngatsꞌiì jñà xi xi̱ta̱xá ítjòn títsa̱jna ko̱ jè‑né xi otíxoma‑la̱ ngatsꞌiì jñà xi̱ta̱ xi otíxoma.”
\p
\v 17 Kìjtseè jngoaà àkja̱le̱ xi ya̱ síjnasòn‑la̱ tsꞌoí; ꞌñó chja̱‑la̱ ngatsꞌiì cho̱ xi tjímajiìn i̱sén xi yijo kine. Tsò:
\p ―Nchrobá, tixkóyaà xinguio̱o mé‑ne nga chji̱ne̱e yijo xi Nainá tsjá‑nò,
\v 18 nga chji̱ne̱e yijo‑la̱ xi̱ta̱xá ítjòn, ko̱ yijo‑la̱ xi̱ta̱ sko̱‑la̱ soldado, yijo‑la̱ xi̱ta̱ tsꞌe̱n, yijo‑la̱ kohòyo̱ ko̱ yijo‑la̱ xi̱ta̱ xi titsa̱kjá‑la̱ kohòyo̱, yijo‑la̱ ngatsꞌiì xi̱ta̱ xi títsa̱jnandei̱í ko̱ xi̱ta̱ chi̱ꞌnda ko̱ xi i̱xti ko̱ xi̱ta̱ jchínga.
\p
\v 19 Kìjtseè jè cho̱ je xi chꞌo kji ko̱ jñà xi̱ta̱xá ítjòn tsꞌe̱ i̱sòꞌnde ko̱ xi̱ta̱ soldado‑la̱; jyeé títsa̱jnandaà nga ska̱àn‑ko̱ jè xi tíjnakjá‑la̱ kohòyo̱ chroba ko̱ jñà soldado‑la̱.
\v 20 Jè cho̱ je xi chꞌo kji kindobàꞌñó; ti̱koa̱ kindobàꞌñó jè xi ꞌén ndiso kiìchja̱ xi kisꞌiìn kjo̱xkón nga nguixko̱n jè cho̱. Kꞌoa̱á sꞌín komà‑ne nga kiskoòna̱cha̱n‑la̱ jñà xi̱ta̱ xi kiskoé chi̱ba̱‑la̱ ti̱koa̱ kijtseèxkón i̱sén xkósòn‑la̱ jè cho̱. Ingajò kinìkatsjoòjiìn tíkòn i̱jiìn niꞌín xi títìjnga̱ ñánda títì ko̱ azufre.
\v 21 Jñà xi̱ta̱ xi iꞌnga, jè kisìkꞌen‑ne jè ki̱cha̱ ndojò xi bitjo tsoꞌba jè xi tíjnakjá‑la̱ kohòyo̱. Ngatsꞌiì cho̱ xi tjímajiìn i̱sén, jñà kjòskiì‑ne nga kiskine yijo‑la̱ xi̱ta̱ xi jye kꞌen.
\c 20
\s Jè xi jngoò jmiì nó
\p
\v 1 Kìjtseè jngoaá àkja̱le̱ xi tínchrobájen‑ne ngajmiì. ꞌYa ibi̱ tsꞌe̱ ni̱tja̱n jñò. Kjiya tsja jngoò naꞌñó ki̱cha̱ cadena xi ꞌñó je kji.
\v 2 Jè àkja̱le̱ kitsobàꞌñó jè ye̱ jchínga xi ti̱jè‑ne xi ꞌmì Xi̱ta̱ Nei̱í ko̱ xi Satanás. Jngoò jmiì nó tsibítꞌaàꞌñó.
\v 3 Kisìkatje̱n‑sꞌen ya̱ ni̱tja̱n jñò; tsibíchjoàꞌñó‑la̱ jè xotjoa̱; i̱kjoàn tsasíjna‑la̱ sello mé‑ne nga mì yá skíxꞌa̱‑ne jè xotjoa̱ ni̱tja̱n. Ya̱á tsasíjnahi̱ya mé‑ne nga mì ti̱ kiì ko̱ma skóna̱cha̱n‑la̱ xi̱ta̱ i̱sòꞌnde, skanda kꞌe̱ nga kjoe̱hetꞌaà xi jngoò jmiì nó. Xi ko̱ma i̱skan tjájnda̱ꞌñó ìjngoò kꞌa‑ne nga ko̱ma ko̱jmeèndei̱í chiba na̱chrjein ìsa̱.
\p
\v 4 Kìjtseè íxi̱le̱ tsꞌe̱ kjo̱tíxoma; títsa̱jnasòn jñà xi̱ta̱ xi kitjoé‑la̱ kjo̱tíxoma nga jñà koi̱ìndaàjiìn. Ti̱koa̱ kìjtseè ini̱ma̱‑la̱ jñà xi̱ta̱ xi kitiísꞌiìn, nga koi kjoa̱‑la̱ ꞌén kixi̱ xi kitsjaà i̱tꞌaà tsꞌe̱ Jesús ko̱ nga ꞌén‑la̱ Nainá kiìchja̱ya. Jñà xi̱ta̱ koi, mìkiì kijtseèxkón jè cho̱ je xi chꞌo kji ko̱ i̱sén xkósòn‑la̱; ti̱koa̱ mìkiì kisitꞌaà chi̱ba̱‑la̱ i̱tjòn tjen‑la̱ ko̱ tsja. Xi̱ta̱ koi, ìjngoò kꞌa tsibítsa̱jnakon; jngoò jmiì nó tsatíxoma ko̱ Cristo.
\v 5 Jñà xi̱ta̱ koi xi jaáya ítjòn‑la̱. Ta̱nga jñà mikꞌen xi iꞌnga, skanda kꞌe̱é jaáya‑la̱ nga ijchò jngoò jmiì nó.
\v 6 Mé ta ndaà‑la̱ jñà xi ko̱ko̱‑la̱ nga kjoa̱áya ítjòn‑la̱; xi̱ta̱ koi, jyeé xi̱ta̱‑la̱ Nainá ko̱ma; jè kjoa̱ biyaà xi ma‑ne jò, ni̱mé ngaꞌñó tjín‑la̱ i̱tꞌaà tsꞌe̱ xi̱ta̱ koi; mì ti̱ mé ma si̱ìko̱‑ne. Tà sa̱á no̱ꞌmiì‑la̱ Nainá ko̱ma ko̱ tsꞌe̱ Cristo. Jngoò jmiì nó ko̱tìxomako̱.
\p
\v 7 Kꞌe̱ nga kjoe̱hetꞌaà xi jngoò jmiì nó, tjájnda̱ꞌñó ìjngoò kꞌa‑ne jè Satanás ya̱ ñánda tíjnahi̱ya ni̱tja̱n jñò.
\v 8 Ki̱tjondei̱í‑ne nga skóna̱cha̱n‑la̱ xi̱ta̱ na̱xa̱ndá xi tjín nga tíjtsa i̱sòꞌnde, jè Gog ko̱ Magog. Koi̱ìxkóya xi̱ta̱ mé‑ne nga koi̱ìtsꞌia̱‑ne kjo̱jchán. Kjín jchán ko̱ma xi̱ta̱, kꞌoa̱á ngaya‑la̱ koni tsomì xi jncha i̱ndiì ndáchikon.
\v 9 Chinchimasòn kóho̱kji i̱sòꞌnde; chinchandiì‑la̱ nga jngoò itjandiì ñánda títsa̱jna xi̱ta̱‑la̱ Nainá ko̱ na̱xa̱ndá xi tsjakeè. I̱kjoàn kisìkasén niꞌín Nainá xi inchrobà‑ne ngajmiì. Jngoò kꞌa tsaká kóho̱tjín.
\v 10 Jè xi̱ta̱ nei̱í xi kiskoòna̱cha̱n‑la̱ xi̱ta̱, kinìkatje̱n‑jiìn ya̱ i̱ꞌnde ñánda títìjnga̱ niꞌín ko̱ azufre. Jyeé ya̱ títsa̱jna jè cho̱ je xi chꞌo kji ko̱ xi kiìchja̱ya ꞌén ndiso. Ya̱á si̱ìkjeiín kjo̱ꞌin ko̱ na̱chrjein ko̱ ni̱tje̱n ni̱ta̱ kjé‑ne.
\s Jè íxi̱le̱ tsꞌe̱ kjo̱tíxoma xi chroba kji
\p
\v 11 Kìjtseè jngoò íxi̱le̱ xi chroba kji ko̱ ꞌñó je kji nga ya̱ tíjnasòn jngoò xi tíhotíxoma. Nga nguixko̱n jè xi tíjnasòn íxi̱le̱, jngoò kꞌa kichijà nangui ko̱ ngajmiì. Ni̱ta̱ ñánda‑ne, mì ti̱ kiì kiꞌya‑la̱.
\v 12 Kìjtseè mikꞌen xi i̱xti kjoàn ko̱ xi xi̱ta̱ jchínga kjoàn, ꞌncha kixi̱ nguixko̱n Nainá. I̱kjoàn kitáxꞌa̱ jñà libro [ñánda tjítꞌaà mé xi kisꞌiìn nga jngó jngó xi̱ta̱]; koa̱ ìjngoò libro kitáxꞌa̱ ñánda tjítꞌaà tsꞌe̱ kjoa̱binachon. Jñà mikꞌen, kꞌoa̱á sꞌín kisindaàjiìn‑la̱ koni sꞌín tjítꞌaà xo̱jo̱n tsꞌe̱ libro, mé kjoa̱ xi kisꞌiìn.
\v 13 Jè ndáchikon kitsjaà jñà mikꞌen xi ya̱ kꞌen‑jiìn. Jè kjoa̱biyaà ko̱ i̱ꞌnde kjo̱ꞌin ti̱koa̱á kitsjaà mikꞌen xi ya̱ títsa̱jna. Kꞌoa̱á sꞌín kisindaàjiìn‑la̱ nga jngoò ìjngoò xi̱ta̱ koni tjín kjoa̱ xi kisꞌiìn.
\v 14-15 Jè kjoa̱biyaà ko̱ i̱ꞌnde kjo̱ꞌin kinìkatsjoòjiìn ñánda títì niꞌín jnga̱. Ko̱ jñà mikꞌen xi mìkiì tjítꞌaà ꞌín‑la̱ jè libro tsꞌe̱ kjoa̱binachon, ti̱koa̱á ya̱á kinìkatsjoòjiìn ñánda títì niꞌín jnga̱. Jè xi ma‑ne jò kjoa̱biyaà.
\c 21
\s Ngajmiì xi̱tse̱ ko̱ nangui xi̱tse̱
\p
\v 1 Kìjtseè jngoaá ngajmiì xi̱tse̱ ko̱ nangui xi̱tse̱. Jè ngajmiì xi kisijna ítjòn ko̱ nangui xi kisijna ítjòn, jyeé kichijà; ti̱koa̱á kichijà jè ndáchikon.
\v 2 Ti̱koa̱ kìjtseè jè na̱xa̱ndá tsjeè xi Jerusalén xi̱tse̱ ꞌmì, nga tínchrobájen ngajmiì nga nguixko̱n Nainá. Kꞌoa̱á sꞌín tíjnandaà koni jngoò chjo̱ón xi ndaà bíndaà yijo‑la̱ nga jye ki̱xan‑ko̱ xꞌi̱n‑la̱.
\v 3 Kiꞌnchrè‑la̱ ꞌén xi ꞌñó chja̱, xi ngajmiì inchrobà‑ne, xi tsò:
\p ―Chítsejèn‑là Niꞌya Tsjeè‑la̱ Nainá, jyeé kòbitjojen; Nainá ya̱á kíjnako̱ jñà xi̱ta̱; xi̱ta̱ na̱xa̱ndá‑la̱á ko̱ma, nga jè sobà xi Nainá ki̱tso̱‑la̱.
\v 4 Jè sobà Nainá si̱ìxìjno yije ndáxko̱n; mì ti̱ kiì sꞌe̱‑ne kjoa̱biyaà; mì ti̱ kiì sꞌe̱‑ne kjoa̱ba; mì ti̱ kiì yá ski̱ndàya‑ne; mì ti̱ kiì sꞌe̱‑ne xi ijòjno ijòtꞌaà yijo‑la̱, koi kjoa̱‑la̱ nga jye tsato kjoa̱ jchínga.
\p
\v 5 Jè xi tíjnasòn íxi̱le̱ tsꞌe̱ kjo̱tíxoma, kitsò:
\p ―Chítsejèn‑la̱, ꞌa̱án siìxi̱tse̱ya yije tsojmì xi tjín.
\p I̱kjoàn kitsò‑na̱:
\p ―Chjí, xo̱jo̱n títꞌeiì jñà ꞌén koi; nga nguì kꞌoa̱á sꞌín tjín nga ki̱tasòn; nguì ꞌén kixi̱‑né.
\p
\v 6 I̱kjoàn kitsò‑na:
\p ―Jyeé tsitasòn yije. ꞌA̱n‑ná xi tìjna̱ ítjoàn skanda tàtsꞌen‑la̱ kjoa̱ kó nga skanda fehetꞌaà‑ne. ꞌA̱n‑ná xi tsibìtsꞌia̱a ko̱ xi sikjehetꞌaà‑na kjoa̱. Ngatsꞌiì xi xíndá‑la̱, ꞌa̱án tsjaà kjo̱tjò‑la̱ nandá xi tíbitjo ya̱ i̱ꞌnde ñánda mìkiì xìya nandá mé‑ne ko̱ma kíjnakon‑ne ini̱ma̱‑la̱ ni̱ta̱ kjé‑ne.
\v 7 Jñà xi si̱ìkijne, jñà skoé kjo̱tjò ngatsꞌiì kjo̱ndaà koi. ꞌA̱án kóti̱jnakoa̱a nga Nainá ki̱tso̱‑na ko̱ jñà, i̱xti‑na̱á ko̱ma.
\v 8 Ta̱nga jñà xi̱ta̱ xi tsakjón, jñà xi mìkiì mokjeiín‑la̱, jñà xi ꞌñó chꞌo sꞌín, jñà xi xi̱ta̱ síkꞌen, jñà xi kjoa̱ chijngui sꞌín, jñà xi xi̱ta̱ tjꞌe, jñà xi xkósòn beèxkón, ngatsꞌiì xi ꞌén ndiso chja̱, ján ki̱xo̱jiìn ñánda títì niꞌín jnga̱ ko̱ azufre; jè xi ma‑ne jò kjoa̱biyaà.
\s Na̱xa̱ndá xi̱tse̱ xi ꞌmì Jerusalén
\p
\v 9 Jꞌiìkon jngoò‑na̱ àkja̱le̱ jñà xi itoò ma‑ne, xi ti̱koa̱ itoò chi̱tsín tjín‑la̱, xi jncha kitseè xi itoò kjo̱ꞌin xi fehetꞌaà‑ne. Kitsò‑na̱:
\p ―Nchroboí, kokoò‑lè jè xi ko̱ma chjo̱ón‑la̱ Orrè.
\p
\v 10 I̱tꞌaà tsꞌe̱ Ini̱ma̱ Tsjeè‑la̱ Nainá, jè àkja̱le̱ kiìko̱ ini̱ma̱‑na̱ jngoò nindoò xi je kji ko̱ ꞌnga kji. Tsakó‑na jè na̱xa̱ndá xi je kji, na̱xa̱ndá tsjeè Jerusalén nga tínchrobájen‑ne ngajmiì nga nguixko̱n Nainá.
\v 11 Jè na̱xa̱ndá tsjeè Jerusalén, oteé tsejèn xi kjoa̱ tsꞌe̱ kjoa̱jeya‑la̱ Nainá. Kꞌoa̱á sꞌín ote kji koni nda̱jo̱ chjí xi ꞌñó ndaà kjoàn, koni nda̱jo̱ xi jaspe ꞌmì nga ote kji koni chi̱tsín.
\v 12 Nga jngoò itjandiì, jè na̱xa̱ndá, chrjó nda̱jo̱ tjíndiì‑la̱ xi ꞌñó je kji ko̱ ꞌñó ꞌnga kji. Tejò xotjoa̱ tjín‑la̱. Nga jngoò ìjngoò xotjoa̱, jngoò àkja̱le̱ síjnajto. Ti̱koa̱ ya̱ tjítꞌaà ꞌín‑la̱ nga tejò na̱xa̱ndá xi ya̱ inchrobàtꞌaà‑ne i̱xti‑la̱ Israel.
\v 13 Ya̱ kixi̱‑la̱ ñánda bitjokàjiìn‑ne tsꞌoí, jàn xotjoa̱ tjín‑la̱, ya̱ kixi̱‑la̱ ñánda kahatji‑ne tsꞌoí, jàn xotjoa̱ tjín‑la̱. Ya̱ norte, ti̱koa̱á jàn xotjoa̱ tjín‑la̱, ya̱ sur, ti̱koa̱á jàn xotjoa̱ tjín‑la̱.
\v 14 Jè chrjó nda̱jo̱ xi tjíndiì‑la̱ na̱xa̱ndá, tejò chrjó nda̱jo̱ xi ya̱ tjítꞌaà nga tejò ꞌín‑la̱ xi̱ta̱ xi tejò ma‑ne xi i̱tꞌaà tsꞌe̱ Orrè kisìxáya‑la̱.
\p
\v 15 Jè àkja̱le̱ xi tíchja̱ko̱‑na, jngoò ki̱cha̱ kjinaya tsja xi nguì oro xi koni kji yá xi ma machi̱ba̱‑ne. Jè kisìkjeén nga ma kisìchi̱ba̱ na̱xa̱ndá ko̱ xotjoa̱‑la̱ ko̱ chrjó nda̱jo̱‑la̱.
\v 16 Jè na̱xa̱ndá kꞌoa̱á sꞌín kijna nga ñijòn chrja̱ngui̱ tjín‑la̱. Koni kji ndojò, kꞌoa̱á ti̱ kji tiyà‑ne. Jè àkja̱le̱, kꞌe̱ nga kisìchi̱ba̱, jò jmiì ko̱ jò sìndo̱ kilómetro tjín‑la̱. Ngásòn chi̱ba̱ tjín‑la̱ nga ndojò ko̱ nga tiyà ko̱ nga ꞌnga.
\v 17 I̱kjoàn kisìchi̱ba̱ jè chrjó nda̱jo̱. Jngoò sìndo̱ ko̱ ichán ñijòn xkó tsja tjín‑la̱ xi chi̱ba̱‑la̱ xi̱ta̱ xi tísíkjeén jè àkja̱le̱, [jè xi ichán nanga tjín‑ne].
\p
\v 18 Jè chrjó nda̱jo̱ xi tjíndiì‑la̱ na̱xa̱ndá, koií tjíndaà‑ne nda̱jo̱ chjí xi ꞌmì jaspe. Ko̱ jè na̱xa̱ndá, nguì oro sobà‑né. Kꞌoa̱á sꞌín ote kji koni chi̱tsín tsjeè.
\v 19 Jñà tàtsꞌen chrjó xi tjíndaà‑ne nga tíchjoàndiì‑la̱ na̱xa̱ndá, nguì nda̱jo̱ chjí yijàjno xi ꞌñó ndaà kjoàn. Jè xi ítjòn, jè nda̱jo̱ xi ꞌmì jaspe; xi ma‑ne jò, nda̱jo̱ xi ꞌmì zafiro; xi ma‑ne jàn, nda̱jo̱ xi ꞌmì ágata; xi ma‑ne ñijòn, nda̱jo̱ xi ꞌmì esmeralda;
\v 20 xi ma‑ne ꞌòn, nda̱jo̱ xi ꞌmì ónice; xi ma‑ne joòn, nda̱jo̱ xi ꞌmì cornalina; xi ma‑ne itoò, nda̱jo̱ xi ꞌmì crisólito; xi ma‑ne jiìn, nda̱jo̱ xi ꞌmì berilo; xi ma‑ne ñijaàn, nda̱jo̱ xi ꞌmì topacio; xi ma‑ne te, nda̱jo̱ xi ꞌmì crisoprasa; xi ma‑ne tejngoò, nda̱jo̱ xi ꞌmì jacinto; xi ma‑ne tejò, nda̱jo̱ xi ꞌmì amatista.
\v 21 Jñà xotjoa̱ xi tejò ma‑ne, tejò nda̱jo̱ perla tjíndaà‑ne. Nga jngoò ìjngoò xotjoa̱ jngoò perla tjíndaà‑ne. Ndi̱yá teè‑la̱ na̱xa̱ndá, nguì oro sobà‑né koni chi̱tsín xi ma chítsejèn‑ya.
\p
\v 22 Ya̱ i̱jiìn na̱xa̱ndá, ni̱jngoò i̱ngo̱ kìjtseè; nga jè sobà xi ma i̱ngo̱‑la̱ na̱xa̱ndá, jè Nainá xi tíjna ítjòn nga ta jè ta̱jngoò‑né xi ꞌñó tse ngaꞌñó tjín‑la̱ ko̱ jè Orrè.
\v 23 Jè na̱xa̱ndá, mìkiì mochjeén‑la̱ jè tsꞌoí ko̱ sá nga si̱ìhiseèn‑la̱. Nga jè sobà kjoa̱ i̱sén‑la̱ Nainá síhiseèn‑la̱; ko̱ jè Orrè ma niꞌín‑la̱.
\v 24 Ngatsꞌiì jñà xi̱ta̱ na̱xa̱ndá tsꞌe̱ i̱sòꞌnde kinchima iseèn‑né i̱tꞌaà tsꞌe̱ niꞌín‑la̱. Ko̱ jñà xi̱ta̱xá ítjòn xi tjín i̱sòꞌnde, kji̱ko̱ kjoa̱nchi̱ná‑la̱ nga ya̱ si̱ìnga̱tsja.
\v 25 Jñà xotjoa̱‑la̱ na̱xa̱ndá, mìkiì si̱chjoàjto nga kjitꞌaà na̱chrjein; nga ya̱ na̱xa̱ndá, mìkiì ko̱jñò.
\v 26 Ngatsꞌiì na̱xa̱ndá kjoi̱ko̱ ngatsꞌiì kjoa̱ nchi̱ná‑la̱ ko̱ ngatsꞌiì tsojmì xi ꞌñó chjí‑la̱ nga ya̱ si̱ìnga̱tsja.
\v 27 Ya̱ i̱ꞌnde jè ni̱mé kjoa̱hasꞌen xi tjé kjoàn xi chꞌo sꞌín ko̱ xi kjoa̱ ndiso. Tà jñà kjoa̱hasꞌen xi tjítꞌaà ꞌín‑la̱ jè xo̱jo̱n‑la̱ Orrè xi tsꞌe̱ kjoa̱binachon.
\c 22
\p
\v 1 Jè àkja̱le̱ tsakó jngoò‑na xa̱jngá nandá xi kijna tsjeè tsjeè, jè nandá xi bítsa̱jnakon‑ná ni̱ta̱ mé na̱chrjein‑ne. Kꞌoa̱sꞌín tsjeè kji koni chi̱tsín. Ya̱á tíbitjo ñánda síjna íxi̱le̱‑la̱ Nainá nga tíhotíxoma ko̱ ya̱á tíbitjo ñánda tíjna jè Orrè.
\v 2 Ya̱ jngoò osen ndi̱yá‑la̱ na̱xa̱ndá tífa nandá. Ko̱ ya̱ ngobà ngobà xa̱jngá nandá, ya̱á síjna jè yá xi tsjá kjoa̱binachon ni̱ta̱ mé na̱chrjein‑ne. Tejò kꞌa ojà‑la̱ toò nga jngoò nó. Jngoò jngoò kꞌa ojà‑la̱ toò nga ìjngoò ìjngoò sá. Jñà xka̱‑la̱, kꞌoa̱á sꞌín mochjeén nga maxkiì‑la̱ na̱xa̱ndá tsꞌe̱ i̱sòꞌnde.
\v 3 Mì ti̱ mé kjoa̱ chꞌo sꞌe̱‑ne xi mìkiì sasén‑la̱ Nainá. Ya̱á sasíjna jè íxi̱le̱‑la̱ Nainá ko̱ tsꞌe̱ Orrè nga ko̱tìxoma. Ko̱ ngatsꞌiì xi̱ta̱ chi̱ꞌnda‑la̱, ya̱á si̱ìxá‑la̱.
\v 4 Ngatsꞌiì xi xi̱ta̱‑la̱ ma, skoe̱xkon‑né kó kji i̱sén‑la̱ Nainá; ko̱ jè ꞌín‑la̱ Nainá ya̱á si̱tꞌaà i̱tjòn tjen‑la̱.
\v 5 Ya̱ i̱ꞌnde jè, mì ti ko̱jñò‑ne. Jñà xi̱ta̱ xi ya̱ títsa̱jna, mì ti̱ niꞌín ko̱chjeén‑la̱ xi si̱ìhiseèn‑la̱, ti̱koa̱á mì ti̱ tsꞌoí ko̱chjeén‑la̱; nga jè sobá Na̱ꞌèn‑ná xi Nainá si̱ìhiseèn‑la̱. Jñà xi̱ta̱ ko̱tìxoma ni̱ta̱ mé na̱chrjein‑ne.
\s Jyeé nchrobá machrañà nga kjoi̱í ìjngoò kꞌa Cristo
\p
\v 6 Jè àkja̱le̱ kitsò‑na:
\p ―ꞌÉn koi, nguì kꞌoa̱á sꞌín tjín nga ki̱tasòn; nguì ꞌén kixi̱‑né. Jè Na̱ꞌèn‑ná xi Nainá xi síkíchi̱ya‑la̱ jñà xi̱ta̱ xi chja̱ ngajo‑la̱, koií xá kisìkasén‑ne àkja̱le̱‑la̱ nga ko̱kò‑la̱ xi chi̱ꞌnda‑la̱ ma jñà kjoa̱ xi ta ni̱to̱ón o̱ko̱ma.
\p
\v 7 ―Ti̱náꞌya‑ná. ꞌA̱n, kjoíi ni̱to̱ón ìjngoò kꞌa.
\p Mé tà ndaà‑la̱ jñà xi síkitasòn jñà ꞌén xi kitsjaà Nainá koni sꞌín tíchja̱ xo̱jo̱n jè.
\p
\v 8 ꞌA̱n‑ná xi ꞌmì‑na Juan, ꞌa̱án kiꞌnchrè koa̱ kìjtseè kjoa̱ koi. Kꞌe̱ nga jye kiꞌnchrè koa̱ jye kìjtseè, tsohósi̱jna-xkóꞌnchi-niñiatꞌaà‑la̱ jè àkja̱le̱ xi tíhokó‑na̱ kjoa̱ koi, nga mejèn‑na skoexkoán.
\v 9 Ta̱nga jè àkja̱le̱ kitsò‑na̱:
\p ―Kì kꞌoa̱á ꞌnì. Jè Nainá jcha̱xkoín. ꞌA̱n, ti̱koa̱á chi̱ꞌnda‑la̱ Nainá ma, koni ngaji̱, ko̱ xi̱ta̱ xingui̱i xi chja̱ ngajo‑la̱ Nainá, ko̱ ngatsꞌiì xi̱ta̱ xi síkitasòn ꞌén xi tjítꞌaà xo̱jo̱n jè.
\p
\v 10 Kꞌoa̱á ti̱sꞌín kitsò‑na̱:
\p ―Kì bìjnaꞌma jñà ꞌén xi Nainá kitsjaà xi tjítꞌaà xo̱jo̱n jè, nga jyeé nchrobá machrañà na̱chrjein nga ki̱tasòn.
\v 11 Jñà xi̱ta̱ xi mìtsà kixi̱ títsa̱jna nguixko̱n Nainá nga chꞌo sꞌín, ta kꞌoa̱á sꞌín kàtìtsa̱jna. Ko̱ jñà xi tjín‑la̱ kjoa̱kixi̱ ko̱ tsjeè títsa̱jna nga nguixko̱n Nainá, kꞌoa̱á ti̱sꞌín kàtasíkitasòn xi kjoa̱kixi̱ ko̱ kjoa̱tsjeè.
\p
\v 12 ―Ti̱náꞌya, ꞌa̱n, kjoíi ni̱to̱ón ìjngoò kꞌa. Ya̱á kjoi̱ikoa̱a chjí‑la̱ xi tsjaà‑la̱ xi̱ta̱ koni sꞌín kisꞌiìn nga ìjngoò ìjngoò.
\v 13 ꞌA̱n‑ná xi tìjna̱ ítjoàn skanda tàtsꞌen‑la̱ kjoa̱ ko̱ skanda fehetꞌaà‑ne. ꞌA̱n‑ná xi tsibìtsꞌia̱a ko̱ xi sikjehetꞌaà‑na kjoa̱. ꞌA̱n‑ná xi tìjna̱ ítjoàn ko̱ xi fehetꞌaà‑ne.
\p
\v 14 Mé ta ndaà‑la̱ jñà xi̱ta̱ xi [jní‑la̱ Orrè] sítsjeè‑ne nikje‑la̱ mé‑ne nga tjòꞌnde‑la̱ nga ski̱ne̱ toò‑la̱ yá xi tsjá kjoa̱binachon, ti̱koa̱ ko̱ma kjoa̱hasꞌen xotjoa̱‑la̱ jè na̱xa̱ndá.
\v 15 Ta̱nga ndi̱tsiaán kítsa̱jna, ngatsꞌiì jñà xi̱ta̱ xi chꞌo sꞌín, ko̱ jñà xi xi̱ta̱ tjꞌe, ko̱ jñà xi kjoa̱ chijngui sꞌín, ko̱ jñà xi xi̱ta̱ síkꞌen, ko̱ jñà xi xkósòn beèxkón ko̱ ngatsꞌiì xi tsjakeè kjoa̱ ndiso nga ꞌén ndiso chja̱.
\p
\v 16 ―ꞌA̱n xi ꞌmì‑na Jesús, ꞌa̱án kisìkasén‑nò àkja̱le̱‑na̱ nga tsjá‑nò ꞌén i̱tꞌaà tsꞌe̱ kjoa̱ koi, jñò xi xi̱ta̱ na̱xa̱ndá‑na̱ ma. ꞌA̱n‑ná jè jtsꞌén xi itjotꞌaà‑ne tje̱‑la̱ xi̱ta̱xá ítjòn xi kiꞌmì David. ꞌA̱n‑ná niꞌño tse xi ꞌñó ote kji xi bitjokàtji kꞌe̱ nga ta̱jñòya.
\p
\v 17 Jè Ini̱ma̱ Tsjeè‑la̱ Nainá ko̱ chjo̱ón‑la̱ Orrè, tsò‑né:
\p ―Nchroboí [Na̱ꞌèn Jesús].
\p Jñà xi nchiꞌnchré, kꞌoa̱á ti̱ kàtatsò:
\p ―Nchroboí [Na̱ꞌèn Jesús].
\p Jñà xi xíndá‑la̱ ko̱ xi mejèn‑la̱ nandá, kàtjanchrobá, kàtꞌiì kjo̱tjò nandá xi tsjá kjoa̱binachon.
\p
\v 18 ꞌA̱n, kꞌoa̱á xan‑nò, ngatsꞌioò xi naꞌyà‑là jñà ꞌén xi kitsjaà Nainá xi tjítꞌaà xo̱jo̱n jè: Tsà yá xi ki̱ìtꞌaàsòn kjoa̱ xi tjítꞌaà xo̱jo̱n jè, Nainá kꞌoa̱á ti̱sꞌín tsjásòn‑la̱ kjo̱ꞌin koni sꞌín tjítꞌaà xo̱jo̱n jè.
\v 19 Tsà yá xi kjoa̱áxìn jngoò‑la̱ ꞌén xi kitsjaà Nainá xi tjítꞌaà xo̱jo̱n jè, Nainá, ti̱koa̱á kjoa̱áxìn kjo̱ndaà xi tjíꞌnde‑la̱ nga ski̱ne̱ toò‑la̱ yá xi tsjá kjoa̱binachon ko̱ mìkiì tsjáꞌnde‑la̱ nga ya̱ kítsa̱jna na̱xa̱ndá tsjeè‑la̱ Nainá koni sꞌín tjítꞌaà xo̱jo̱n jè.
\p
\v 20 Jè xi béno̱jmí kjoa̱ koi, kꞌoa̱á tsò:
\p ―Jon, kjoi̱i ni̱to̱ón ìjngoò kꞌa.
\p Kꞌoa̱á sꞌín kàtama. ¡Nchroboí Na̱ꞌèn Jesús!
\p
\v 21 Kjo̱ndaà‑la̱ Na̱ꞌèn‑ná Jesucristo kàtìjnako̱‑nó ngatsꞌioò. Kꞌoa̱á sꞌín kàtama.