\id JHN Mazateco de Jalapa de Díaz
\h Xu̱ju̱n xi yꞌétꞌa Jua
\toc1 Xu̱ju̱n xi yꞌétꞌa Jua én nda tsuhu̱ Jesucristo̱
\mt1 Xu̱ju̱n xi yꞌétꞌa Jua // én nda tsuhu̱ Jesucristo̱
\c 1
\s Bꞌi̱ tsꞌín kitsúya nda̱ xi kitsꞌínntu xu̱ju̱i̱n yáha Jesu
\p
\v 1 Nga tutsꞌihi̱n ni tu̱ bꞌa̱ tsꞌín jahá tíjña Ée̱n. Kui Ée̱n xi yꞌejñako̱ho̱ Nti̱a̱ná. Kui Ée̱n xi Nti̱a̱ná.
\v 2 Kui xi yꞌejñako̱ Nti̱a̱ná nkúhu nga tutsꞌihi̱n ni.
\v 3 Ée̱n kitsꞌínndako̱ho Nti̱a̱ná ngayjee̱ ni xi tjín. Ndaha nku ni xi tjín najmi kinꞌenda tsa najmi tjín Ée̱n.
\v 4 Yo̱ nibáha̱ ra̱ kju̱a̱tíkꞌun. Kui kju̱a̱tíkꞌuu̱n, kui ndꞌí xi tsꞌín ndzjehe̱n xu̱ta̱.
\v 5 Ndíi̱ tíbꞌatꞌai má jyuu̱n ko̱ má jyuu̱n najmi tíchúkju̱a̱ha̱ nga títsꞌínkꞌien.
\p
\v 6 Jꞌai nku nda̱ xi ꞌmi Jua xi Nti̱a̱ná kitsꞌín nibáha̱.
\v 7 Jꞌai tsúya ni xi kikie tu̱ xi ku̱i̱tsu̱yaha yáha ndꞌíu̱ ko̱ tu̱ xi sꞌe̱jihi̱n ra̱ ngayjee̱ xu̱ta̱ ndꞌí xi jꞌai nchja̱ni̱jmíyaha.
\v 8 Najmi kui xi ndꞌíu̱. Tu̱ kinꞌe nibáhá tu̱ xi ku̱i̱tsu̱yaha yáha ndꞌíu̱.
\v 9 Ndꞌí xi ndoo̱ xi tsꞌín ndzjehe̱n ngayjee̱ xu̱ta̱ ja ma kjꞌu̱a̱íhí a̱sunntee̱.
\p
\v 10 Ée̱n jꞌaikꞌiejña a̱sunntee̱, Én xi Nti̱a̱ná kitsꞌínndako̱ho a̱sunntee̱. Tu̱nga xu̱ta̱ a̱sunntee̱ najmi kamankjihi̱n yáha kui.
\v 11 Jꞌai a̱nte xi tsꞌe̱, tu̱nga xu̱ta̱ xi tsꞌe̱ najmi kitsꞌínkjáíhi̱n.
\v 12 Tu̱nga xi kitsꞌínkjáíhi̱n ko̱ kisꞌejihi̱n, kui xu̱ta̱ha xi kitsjáha̱ nga ka̱ma ntíhi̱ Nti̱a̱ná.
\v 13 Kui xi kitsin xi nkú tsꞌín kama mjehe̱ Nti̱a̱ná. Najmi kitsin xi nkú tsꞌín tsin xu̱ta̱ xi tjín, ko̱ ta̱ ndaha najmi xi nkú tsꞌín tíjñaha̱ xu̱ta̱, ko̱ ta̱ ndaha najmi xi nkú tsꞌín mjehe̱ xu̱ta̱.
\p
\v 14 Kui Ée̱n xi kikꞌa yjoninte ko̱ yꞌejñajinni̱ ko̱ kiyai̱ kju̱a̱chánkaha̱, a̱tꞌaha̱ kui xi Ntí nku tutuhu̱ Nti̱a̱ Na̱ꞌmiu̱. Tsakúchji kju̱a̱nda chánkaha̱ ko̱ én xi bꞌa̱ tjíu̱n.
\v 15 Jua kitsúya yáha kui. Bꞌi̱ kitsú:
\p —Kui xi kinchjani̱jmíyahana nga bꞌa̱ kixian: “Xi a̱skahan nibá nga an, kui xi tjun nga an, a̱tꞌaha̱ kui xi tu̱ bꞌa̱ tsꞌín jahá tíjña.”
\p
\v 16 Xki̱ kju̱a̱nda xi kikꞌa̱i̱ná kju̱a̱nchi̱ná chánka xi tsꞌe̱ tsitjujihin.
\v 17 A̱tꞌaha̱ Nti̱a̱ná kitsꞌínchjén Moise nga kitsjá kju̱a̱téxumoo̱, tu̱nga jꞌaihí Jesucristo̱ nga yꞌéjña kju̱a̱ndoo̱ ko̱ én xi na̱xu̱ tjín.
\v 18 Najmi tjín xi ja be nkú tjín Nti̱a̱ná. Nku tutuhú Ntí nku tutuu̱ xi tíjñako̱ Nti̱a̱ Na̱ꞌmiu̱, kui xi jꞌaikúchjiná Nti̱a̱ná.
\s Bꞌi̱ tsꞌín kitsúya Jua Bautista̱ yáha Jesu
\r (Mt. 3:11-12; Mr. 1:7-8; Lc. 3:15-17)
\p
\v 19 Bꞌi̱ tsꞌín kinchja̱ Jua nkꞌie nga já judio̱ kꞌaku̱ xi tjín nanki Jerusalen kitsꞌínkji já na̱ꞌmi ko̱ já xi ta̱ tsꞌínxátꞌa ni̱nku̱ xi má nga ngju̱ásjaiyaha̱ Jua yáha kui.
\v 20 Kinchja̱ kixi̱ kixi̱ Jua ko̱ najmi tsꞌana̱cha̱. Bꞌi̱ kitsú:
\p —Najmi an nda̱ xi xi kitsú Nti̱a̱ná nga tsꞌi̱ín nibá.\f + \fr 1:20, 25, 41\ft “Xi kitsꞌín nibá Nti̱a̱ná” tsuhu̱ ra̱ “Mesi̱a̱” nga én hebreo̱ ko̱ “Cristo̱” nga én griego̱.\f*
\p
\v 21 Bꞌa̱ kitsú jóo̱ nga kingjásjaiyaha̱:
\p —¿Yáhá ni ji? ¿A jihí xi Elia̱?
\p —Najmi an —kitsú Jua.
\p —¿A jihí xi nda̱ profeta̱ xi tjíhin nga kjꞌu̱a̱í? —kitsú jóo̱.
\p —Najmi —kitsú Jua.
\p
\v 22 —¿Yáha ji? —ta̱ kitsú ngáha jóo̱—. A̱tꞌaha̱ tjíhin nga kuankínko̱ ngáha̱ ri̱ én kixi̱ já xi kitsꞌín nibáni̱. ¿Nkú bixín?
\p
\v 23 A̱sꞌa̱i bꞌi̱ kitsú Jua:
\p —An xi nku nda̱ xi tínchja̱ a̱nte kixiu̱ nga bꞌa̱ títsu: “Tjen kixi̱u ni̱yá má nga nibá Nti̱a̱ná.” Kui niu̱ xi yꞌétꞌa nda̱ profeta̱ Isaia̱ xu̱ju̱n éhe̱n Nti̱a̱ná.
\p
\v 24 Ko̱ já xi kitsꞌínkji já fariseo̱
\v 25 ta̱ kingjásjaiyaha̱ Jua:
\p —Tsa najmi ji xi kitsú Nti̱a̱ná nga tsꞌi̱ín nibá ko̱ ta̱ ndaha Elia̱ ko̱ ta̱ ndaha nda̱ profeta̱ xi tjíhin nga kjꞌu̱a̱í, ¿á xu̱ta̱ tíbatentáhani?
\p
\v 26 Bꞌi̱ kitsú Jua:
\p —An ntánijua tíbatentáko̱hona xu̱ta̱, tu̱nga síjñajihínnu̱u nku xi najmi yo,
\v 27 xi kjꞌu̱a̱í a̱skahan nga an. Najmi tje̱henna tsa kjendáya nꞌúhu̱ tja̱ba̱xín ntéhe̱.
\p
\v 28 Bꞌa̱ kama ni xuꞌbi̱ nanki xi ꞌmi Betani̱a̱, nanki xi tíjña ngabantá ntáje̱ Jordan, má tsaténtá xu̱ta̱ Jua.
\s Bꞌi̱ tsꞌín kitsúya Jua nga Jesu xi chu̱tsa̱nka̱ha̱ Nti̱a̱ná
\p
\v 29 Ni̱stjin xi ma ndyjuu̱n ngáha kikie Jua nga Jesu nibákꞌun tiñaha̱ ko̱ bꞌi̱ kitsú:
\p —Kui xuꞌbi̱ xi chu̱tsa̱nka̱ha̱ Nti̱a̱ná xi kjexín ngatitsuhu̱n xu̱ta̱ a̱sunntee̱.
\v 30 Kui xi kinchjani̱jmíyahana nga bꞌi̱ kixian: “Xi a̱skahan nibá nga an, kui xi tjun nga an, a̱tꞌaha̱ kui xi tu̱ bꞌa̱ tsꞌín jahá tíjña.”
\v 31 Nkꞌie ta̱ ndaha an najmi be yá níhi, tu̱nga ntánijuahá jái̱tentá xu̱ta̱ tu̱ xi sꞌe̱jña chjihi̱ ra̱ xu̱ta̱ Israel yáha kui.
\p
\v 32 Bꞌi̱ ta̱ kitsúya Jua ni xi kikie:
\p —Kikie nga nibajen Espiri̱tu̱ ndji̱o̱jmi ján xi nkú joyaha nku chu̱tuju ko̱ nga jꞌaikꞌiejñantjai nintaku̱.
\v 33 Ta̱ ndaha an najmi kje̱e be yá níhi, tu̱nga xi kitsꞌín nibáhána nga ntánijua kuatentáhana xu̱ta̱, kui xi bꞌa̱ kitsúna: “Xi cha̱i̱ nga ni̱bajenkꞌuhu̱n Espiri̱tu̱ ko̱ kꞌúéjñantjaihi̱, kui xi Espiri̱tu̱ Santo̱ ku̱a̱téntáko̱ho xu̱ta̱.”
\v 34 An kikie nga tsitjusun kui ée̱n ko̱ tíxinya nga kui xi Ntíhi̱ Nti̱a̱ná.
\s Bꞌi̱ tsꞌín kinchja̱ha̱ Jesu já niꞌyakuyá xi tjuu̱n
\p
\v 35 Nkꞌie nga kama ndyjuu̱n, ta̱ yo̱hó tíi̱nchako̱ ngáha Jua jo já niꞌyakuyáha̱. Kikie nga jꞌa Jesu yo̱ ko̱ bꞌi̱ kitsú:
\p
\v 36 —Kui xuꞌbo̱ xi chu̱tsa̱nka̱ha̱ Nti̱a̱ná.
\p
\v 37 Kintꞌé nga joo̱ já niꞌyakuyáha̱ ni xi kinchja̱ ko̱ kitsjennkíhi̱ Jesu.
\v 38 A̱sꞌa̱i tsasenji a̱stu̱n Jesu ko̱ kikie nga tje̱nnkihi̱ jóo̱. Bꞌi̱ kitsúhu̱:
\p —¿Mí xi tíbinchisjó?
\p —Ji nda̱ maestru̱\f + \fr 1:38, 49 \ft “Maestru̱” tsuhu̱ ra̱ “rabi” nga én hebreo̱.\f* —kitsú jóo̱—, ¿má tinchin?
\p
\v 39 —Nibáa̱so̱ho̱o —kitsú Jesu.
\p A̱sꞌa̱i ngji jóo̱ ko̱ kikie má tíjña Jesu. Yo̱ kitsꞌínkjꞌa ni̱stjin xuꞌbo̱, a̱tꞌaha̱ ja ngixun. Nkú ra̱ ma nga chu̱ba̱ ñju niu̱.
\v 40 Já xi joo̱ xi kintꞌé ni xi kinchja̱ Jua ko̱ kitsjennkíhi̱ Jesu, nku xi ꞌmi Andre xi nda̱ ntsꞌe̱ maha Simon Pedro̱.
\v 41 Kui xi títjun ngjingisjai Simon ko̱ bꞌa̱ kitsúhu̱:
\p —Ja kuasakúni̱ nda̱ xi kitsú Nti̱a̱ná nga tsꞌi̱ín nibá.
\p
\v 42 A̱sꞌa̱i jꞌaiko̱ Andre nda̱ ntsꞌe̱ nga jꞌaisehe̱ Jesu. Jesu tsasehe̱ Simon ko̱ bꞌi̱ kitsúhu̱:
\p —Ji xi Simon, ntíhi̱ Jona. Ji xi kꞌúín ngáha ri Pedro̱.\f + \fr 1:42 \ft “Pedro̱” tsuhu̱ ra̱ “Cefa” nga én hebreo̱.\f*
\p
\v 43 Ni̱stjin xi ma ndyjuu̱n, nkꞌie nga tífi Jesu a̱nte Galilea̱, a̱sꞌa̱i ngjisehe̱ Felipe̱ ko̱ bꞌi̱ kitsúhu̱:
\p —Tsjénnkiní.
\p
\v 44 Nanki Betsaida̱ nibáha Felipe̱, má nga ta̱ nankihi̱ Andre ko̱ Pedro̱.
\v 45 A̱sꞌa̱i Felipe̱ ngjisehe̱ Natanael ko̱ bꞌa̱ kitsúhu̱:
\p —Ja kuasakúni̱ nda̱ xi kinchja̱ni̱jmíyaha Moise nga yꞌétꞌa xu̱ju̱n kju̱a̱téxumoo̱ ko̱ xi ta̱ yꞌétꞌa já profeta̱. Kui xi Jesu ntíhi̱ Kuse, nda̱ xi nibáha nanki Nazaret.
\p
\v 46 Bꞌa̱ kitsú Natanael:
\p —¿A ka̱mahá stjújin Nazaret nku ni xi nda?
\p —Nibáa̱se̱i̱hi̱ —kitsú Felipe̱.
\p
\v 47 Nkꞌie nga kikie Jesu nga nibá tiña Natanael, bꞌa̱ kitsú:
\p —Kuihí nda̱ xuꞌbi̱ xi xu̱ta̱ Israel tje̱he̱n ra̱, nku nda̱ xi najmi bꞌana̱cha̱.
\p
\v 48 —¿Nkú tsꞌín yahaní? —kitsú Natanael.
\p Bꞌi̱ kitsú Jesu:
\p —Kuakiehe kintehe̱ ni nga kuanchja̱hi Felipe̱, nkꞌie nga kabinchunnkí yá higuera̱.
\p
\v 49 —Ji nda̱ maestru̱ —kitsú ngáha Natanael—, ji xi Ntíhi̱ Nti̱a̱ná. Ji xi nda̱ rei̱hi̱ xu̱ta̱ Israel.
\p
\v 50 Bꞌi̱ kitsú Jesu:
\p —¿A a̱tꞌaha̱ kuakiehe kintehe̱ yá higuera̱ kuaxihin, a kui kju̱a̱ha nga kuasꞌejihin ri nga Nti̱a̱ná kitsꞌín nibáhana? ꞌYún chánka ni xi cha̱ sai nga xuꞌbi̱.
\p
\v 51 Ko̱ bꞌi̱ ta̱ kitsú ya Jesu:
\p —Kju̱axi̱ ni xi tíxinnu̱u. Cho̱o nga tsjén ti̱xa̱ ndji̱o̱jmi ján ko̱ nga ntítsjehe̱ Nti̱a̱ná ku̱i̱yájnu ko̱ ku̱i̱tjujen nga kjꞌu̱a̱ísehe̱ Ntíhi̱ Nda̱xꞌi̱u̱n.
\c 2
\s Bꞌi̱ tsꞌín kitsꞌín Jesu nku kju̱a̱nkjún a̱jihi̱n nku sꞌí kju̱a̱bixan
\p
\v 1 Ni̱stjin xi ma jahan kama nku kju̱a̱bixan nanki Cana, nanki xi tíjñajihi̱n a̱nte Galilea̱, ko̱ yo̱ ngji na̱aha̱ Jesu.
\v 2 Ta̱ ngji Jesu ko̱ já niꞌyakuyáha̱ kju̱a̱bixoo̱n, a̱tꞌaha̱ kikꞌinyaha̱.
\v 3 Nkꞌie nga jeya binu̱, a̱sꞌa̱i bꞌa̱ kitsú na̱aha̱ Jesu nga kinchja̱ko̱ho̱:
\p —Ja najmi ta̱ tjíhi̱n ra̱ binu̱.
\p
\v 4 —Ji ta̱chju̱ún —kitsú Jesu—, ¿á an tíꞌmiyahaní niu̱? Najmi kje̱e bichú chu̱ba̱na̱.
\p
\v 5 A̱sꞌa̱i kinchja̱ko̱ na̱aha̱ Jesu já xi tíi̱ncha basehe̱ yámixo̱ nga bꞌa̱ kitsúhu̱:
\p —Nꞌe̱tjusun ngayjee̱ ni xi ku̱i̱tsu̱nu̱u.
\p
\v 6 Yo̱ tíi̱ncha jun ndji̱í nisa xi kamandako̱ho ndji̱o̱. Kui xi tsꞌínchjén xu̱ta̱ xi ntje̱ judio̱ tje̱he̱n ra̱ nkꞌie nga tsꞌín je yjoho̱ nginku̱n Nti̱a̱ná, xi nkú tsꞌín tíjña ni̱yáha̱. Nkúnkú ndji̱íu̱ sꞌen ra̱ tsa cháte ko̱ tsa cháte ko̱ kan litru̱ ntánijua.
\v 7 Bꞌi̱ kitsúhu̱ Jesu já xi tíi̱ncha basehe̱ yámixo̱:
\p —Nꞌe̱tso ntánijua ndji̱íi̱.
\p Kitsꞌíntse susun jóo̱ ndji̱íu̱.
\p
\v 8 A̱sꞌa̱i Jesu bꞌi̱ kitsúhu̱ jóo̱:
\p —Chjúbó chuba ko̱ tankínko̱ho nda̱ xi tíbasehe̱ sꞌíu̱.
\p Bꞌa̱ i̱ncha kitsꞌín jóo̱.
\v 9 A̱sꞌa̱i kikjutꞌa nda̱ xi tíbasehe̱ sꞌíu̱ ntánijua xi ja kama binu̱, tu̱nga najmi behé má nibaha̱ ra̱ ntóo̱. Tu̱ já xi tíi̱ncha basehé ra̱ yámixo̱ xi be, a̱tꞌaha̱ kui xi tsꞌasje ntánijuo̱. Kui nga nda̱ xi tíbasehe̱ ra̱ sꞌíu̱ kinchja̱ha̱ ra̱ nda̱ bixoo̱n ko̱ bꞌa̱ kitsúhu̱:
\p
\v 10 —Ngayjee̱ xu̱ta̱ títjun tsjá binu̱ xi nda ko̱ nkꞌie nga ja ꞌyún kaꞌbi xu̱ta̱, a̱sꞌa̱i ní tsjá xi najmi ꞌyún ndaha̱. Tu̱nga máha ji, binu̱ xi ꞌyún nda xi tjítjoihi ndꞌa̱i̱ tíꞌba̱i̱.
\p
\v 11 Kui kju̱a̱nkjún xuꞌbi̱ xi títjun kitsꞌín Jesu nanki Cana, nanki xi tíjñajihi̱n a̱nte Galilea̱. Bꞌa̱ tsꞌín tsakúchjihi kju̱a̱chánkaha̱, ko̱ kisꞌejihi̱n já niꞌyakuyáha̱ nga Nti̱a̱ná kitsꞌín nibáha̱.
\p
\v 12 Ja kamoo̱. A̱sꞌa̱i ngji Jesu nanki Capernaum nga tje̱nko̱ na̱aha̱ ko̱ já ntsꞌe̱ ko̱ já niꞌyakuyáha̱. Yo̱ yꞌentu chuba ni̱stjin.
\s Bꞌi̱ tsꞌín kikꞌonsje Jesu chu̱ xi tíi̱ncha batéña jóo̱ // má ma na̱tsihi̱n ni̱nku̱
\r (Mt 21:12-13; Mc 11:15-18; Lc 19:45-46)
\p
\v 13 Nkꞌie nga ja tíbichú tiña Sꞌí Pascu̱a̱ xi bꞌasje xu̱ta̱ xi ntje̱ judio̱ tje̱he̱n ra̱, a̱sꞌa̱i ngji Jesu nanki Jerusalen.
\v 14 Má ma na̱tsihi̱n ni̱nku̱ kisakúhu̱ já xi tíi̱ncha batéña turu̱ ko̱ chu̱tsa̱nka̱ ko̱ chu̱tuju ko̱ já xi tjíntu yo̱ nga tíi̱ncha tsꞌínkꞌóntjaiya to̱on.
\v 15 A̱sꞌa̱i jáchꞌá nꞌúꞌya̱, kui xi kikꞌonsjeko̱ho ngayjee̱ chu̱tsa̱nko̱ ko̱ turu̱. Kikjaní ndzjo to̱oho̱n já xi tíi̱ncha tsꞌínkꞌóntjaiya to̱on yo̱ ko̱ kitsꞌínkꞌótsjá yámixa̱ha̱.
\v 16 Bꞌi̱ kitsúhu̱ já xi tíi̱ncha batéña chu̱tuju:
\p —Ti̱chꞌonsjo̱o chu̱nu̱u e̱i̱. Najmi tu̱ tiyanta̱ nꞌe mo niꞌyaha̱ Na̱ꞌmina̱.
\p
\v 17 Jꞌáítsjehe̱n já niꞌyakuyáha̱ nga bꞌi̱ tsꞌín tjítꞌa éhe̱n Nti̱a̱ná: “Tjo tsꞌatina niꞌyahi̱, kui nga tíbꞌenkíhina kju̱a̱ni̱ma̱.”
\p
\v 18 A̱sꞌa̱i já judio̱ kꞌaku̱ kingjásjaiyaha̱ Jesu:
\p —¿Mí kju̱a̱nkjúhun xi ku̱a̱kúchji nga ma nꞌe ni xi tínꞌei?
\p
\v 19 Bꞌi̱ tsꞌín kinchja̱ Jesu:
\p —Nꞌe̱katsúnyo ni̱nku̱ ko̱ jan ni̱stjin kjesíntje̱n ngáhana.
\p
\v 20 Bꞌi̱ kitsú já judio̱ kꞌaku̱:
\p —Yachán jun nú kamandaha ni̱nku̱. ¿Nkú tsꞌín jan ni̱stjin chjúsíntje̱henni ji?
\p
\v 21 Tu̱nga yjonintehe̱ ní Jesu kinchja̱ni̱jmíyaha nga kitsꞌínkjó ni̱nku̱.
\v 22 Kui kju̱a̱ha, nkꞌie nga jꞌáíya ngáha̱ ra̱ ngabayoo̱, jꞌáítsjehe̱n ra̱ já niꞌyakuyáha̱ ni xi kitsú ko̱ kisꞌejihi̱n én xi tjítꞌa xu̱ju̱n éhe̱n Nti̱a̱ná ko̱ én xi kinchja̱ko̱ já judio̱ kꞌaku̱.
\p
\v 23 Nkꞌie nga tíjña Jesu nanki Jerusalen a̱jihi̱n Sꞌí Pascu̱a̱, nkjin ṉkjún xu̱ta̱ kisꞌejihi̱n nkꞌie nga kikie kju̱a̱nkjún xi kitsꞌín.
\v 24 Tu̱nga Jesu najmi kitsꞌínkjáíhi̱n xi nkú tsꞌín tsꞌínnkjinkꞌun xu̱to̱, a̱tꞌaha̱ be xi nkú kꞌun.
\v 25 Najmi kamachjén tsa tjín xi kitsúyaha̱ nkú kꞌun, a̱tꞌaha̱ be xi nkú tsꞌín tjíntuyá ani̱ma̱ha̱.
\c 3
\s Bꞌi̱ tsꞌín kinchja̱ni̱jmíko̱ Jesu Nicodemo̱
\p
\v 1 Nku nda̱ fariseo̱ xi ꞌmi Nicodemo̱ xi ta̱ nda̱ kꞌaku̱hu̱ xu̱ta̱ judio̱
\v 2 jꞌaisehe̱ Jesu nga jyuu̱n ko̱ bꞌi̱ kitsúhu̱:
\p —Ji nda̱ maestru̱, yaníi̱ nga ji xi nku nda̱ maestru̱ xi Nti̱a̱ná kitsꞌín nibáha̱. A̱tꞌaha̱ najmi chꞌa ka̱maha̱ tsꞌi̱ín kju̱a̱nkjún xi tínꞌei tsa najmi tíjñajihi̱n Nti̱a̱ná.
\p
\v 3 Bꞌi̱ kitsú Jesu:
\p —Kju̱axi̱ ni xi tíxihin. Xi najmi tsin tse̱tse̱, kui xi najmi ma chjihi̱ xi nkú tsꞌín batéxuma Nti̱a̱ná.
\p
\v 4 Bꞌa̱ kitsú Nicodemo̱:
\p —¿Nkú tsꞌín tsín tse̱tse̱ ngáha nku nda̱ nkꞌie nga ja chá? ¿A ka̱mahá ta̱ kju̱a̱sꞌen xi ma johó ngáha a̱ya ka̱tsꞌa̱ na̱aha̱ ko̱ tsín ngáha?
\p
\v 5 Bꞌi̱ tsꞌín kinchja̱ Jesu:
\p —Kju̱axi̱ ni xi tíxihin. Xi najmi tsínjin ntánijua ko̱ Espiri̱tu̱ najmi ka̱ma kju̱a̱sꞌenjin nga Nti̱a̱ná xi ku̱a̱téxumaha̱.
\v 6 Xi xu̱ta̱ tsjáha̱ kju̱a̱tíkꞌun, kui xi kju̱a̱tíkꞌuhu̱n xu̱ta̱ tjíhi̱n. Xi Espiri̱tu̱ tsjáha̱ kju̱a̱tíkꞌun, kui xi kju̱a̱tíkꞌuhu̱n Espiri̱tu̱ tjíhi̱n.
\v 7 Najmi tu̱ ma nkjúhin ni xi kuaxihin, nga tjíhin nga tsín tse̱tse̱ ngáhanu.
\v 8 Fi ntjo̱ tu̱ má nga mjehé ra̱ ko̱ ta̱ nuꞌyáí nga xu. Tu̱nga najmi yaní má nibáha ko̱ má tífi. Bꞌa̱ joyaha ngayjee̱ xu̱ta̱ xi tsinjín Espiri̱tu̱.
\p
\v 9 Bꞌa̱ kitsú Nicodemo̱:
\p —¿Nkú tjíhi̱n ra̱ ni xi tíbixín?
\p
\v 10 Bꞌi̱ tsꞌín kinchja̱ Jesu:
\p —Ji xi nda̱ maestru̱hu̱ xu̱ta̱ Israel. ¿A najmi yaní niu̱?
\v 11 Kju̱axi̱ ni xi tíxihin. Ji̱n chubai̱ ni xi yai̱ ko̱ bixínyai̱ ni xi kiyai̱, tu̱nga jun najmi nꞌe sꞌejiun én xi bixínyai̱.
\v 12 Tsa najmi sꞌejinnu̱u énna̱ nkꞌie nga ni xi tsꞌe̱ a̱sunntei̱ tínchjani̱jmíyaha̱nu̱u, ¿nkú tsꞌín sꞌe̱jihi̱nnu̱u énna̱ tsa ni xi tsꞌe̱ ndji̱o̱jmi ján kuinchjani̱jmíyaha̱nu̱u?
\v 13 Ndaha nku najmi kje̱e fi ndji̱o̱jmi ján. Nkuhú Ntíhi̱ Nda̱xꞌi̱u̱n xi nibajehen yo̱.
\p
\v 14 ’Xi nkú tsꞌín kikjesíntje̱n Moise ye̱ a̱nte kixiu̱ nkꞌie, bꞌa̱ ta̱ tsꞌín tjíhin nga chjúsíntje̱n Ntíhi̱ Nda̱xꞌi̱u̱n,
\v 15 tu̱ xi najmi ndyja̱ha xi sꞌe̱jihi̱n ra̱ kui nga tu̱ sahá kꞌúéntu tíkꞌun sín.
\p
\v 16 ’Kitsꞌíntjo Nti̱a̱ná xu̱ta̱ a̱sunntee̱ nga kitsjá Ntí nku tutuhu̱ tu̱ xi najmi ndyja̱ha xi sꞌe̱jihi̱n ra̱ kui, nga tu̱ sahá kꞌúéntu tíkꞌun sín.
\v 17 Nti̱a̱ná najmi kitsꞌín nibá Ntíhi̱ a̱sunntee̱ tsa tu̱ xi kꞌu̱éjñanehe̱ ra̱ xu̱ta̱ ni xi kanéhe̱ nga̱tꞌaha̱ ngatitsun xi kitsꞌín. Kitsꞌín nibá ní tu̱ xi tsꞌi̱ínkꞌankihi.
\p
\v 18 ’Xi sꞌejihi̱n Ntíhi̱ Nti̱a̱ná najmi tjín ni xi ngju̱a̱i̱néhe̱. Tu̱nga xi najmi sꞌejihi̱n, kui xi ja tje̱n jé a̱tꞌaha̱ najmi kisꞌejihi̱n Ntí nku tutuhu̱ Nti̱a̱ná.
\v 19 Kui nga̱tꞌai̱ tje̱he̱n ra̱ jé xu̱ta̱. Jꞌai a̱sunntee̱ ndꞌí xi tsꞌín ndzjehe̱n xu̱ta̱, tu̱nga ꞌyúhún kama mjehe̱ xu̱ta̱ má jyuu̱n nga má ndzjee̱n, a̱tꞌaha̱ najmi nda tjín ni xi tíi̱ncha tsꞌín.
\v 20 Ngayjee̱ xi chꞌon tsꞌín, kui xi chꞌoho̱n ndꞌí xi tsꞌín ndzjehe̱n. Najmi fikꞌúhu̱n tu̱ xi najmi cha̱ha ni xi tíi̱ncha tsꞌín.
\v 21 Tu̱nga xi na̱xu̱ tsꞌín, kui xi fikꞌúhu̱n ndꞌíu̱ tu̱ xi cha̱ha nga tíi̱ncha tsꞌín xi nkú tsꞌín mjehe̱ Nti̱a̱ná.
\s Bꞌi̱ tsꞌín ta̱ kitsúya ngáha Jua yáha Jesu
\p
\v 22 A̱skahan nga bꞌa̱ kamoo̱ ngjiko̱ Jesu já niꞌyakuyáha̱ a̱nte Judea̱. Yo̱ yꞌejñako̱ já niꞌyakuyáha̱ chuba ni̱stjin nga tsaténtá xu̱ta̱ xi tjín yo̱.
\v 23 Jua ta̱ tsaténtá xu̱ta̱ nanki Enon, yo̱ má tiña maha̱ nanki Salim, a̱tꞌaha̱ ꞌyún tjín ntánijua yo̱. I̱ncha jꞌai xu̱ta̱ nga kisaténtá yo̱.
\v 24 Bꞌa̱ kama nkꞌie nga najmi kje̱e sꞌeyaꞌyún Jua.
\p
\v 25 A̱sꞌa̱i já niꞌyakuyáha̱ Jua ko̱ nku nda̱ judio̱ kinchja̱ni̱jmíyaha xi nkú tsꞌín tjíhin nga tsꞌi̱ín je yjoho̱ xu̱ta̱ judio̱ nginku̱n Nti̱a̱ná.
\v 26 I̱ncha ngjisehe̱ Jua ko̱ bꞌa̱ kitsúhu̱:
\p —Ji nda̱ maestru̱, nda̱ xi jꞌaisehi ngabantá ntáje̱ Jordan, xi tsixínyai yáha kui, kui xi ta̱ tíbaténtá ko̱ ngayjee̱ xu̱ta̱ tíi̱ncha fisehe̱.
\p
\v 27 A̱sꞌa̱i bꞌi̱ tsꞌín kinchja̱ Jua:
\p —Ndaha nku ni najmi ma tsꞌínkjáíhi̱n xu̱ta̱ tsa najmi ndji̱o̱jmi ján kikꞌa̱i̱hi̱ ra̱.
\v 28 Jun kinuꞌyó ni xi kinchja, nga najmi an nda̱ xi tsꞌi̱ín nibá Nti̱a̱ná ngajoho̱. Tu̱ kinꞌe nibá títjuhúnna.
\v 29 Xi nkúhu tsa nku kju̱a̱bixan, nkuhú nda̱ xi tíbixan. Nda̱ xinkjín nda̱ bixoo̱n tu̱ síjñatꞌahá ra̱. Tímjéñjuhu̱ ni xi tínchja̱ ko̱ tsjo tímaha̱ nga tíntꞌé nta̱ha̱ nda̱ bixoo̱n. Bꞌa̱ tsꞌín an ndꞌa̱i̱. Ja tsichu ma ndju̱ú kju̱a̱tsjona̱.
\v 30 Kui ndo̱ xi tjíhin nga nkꞌa ngju̱a̱i̱, an kinte kfíán.
\p
\v 31 ’Xi nibáha nkꞌa ján ꞌyún chánka sa nga tu̱ yáhá ni. Xi tje̱he̱n ra̱ a̱sunntee̱, kui xi xu̱ta̱ a̱sunnte ko̱ ni xi tsꞌe̱ a̱sunntee̱ nchja̱. Xi nibáha ndji̱o̱jmi ján ꞌyún chánka sa nga tu̱ yáhá ni.
\v 32 Títsuya ni xi kikie ko̱ ni xi kintꞌé, tu̱nga najmi chꞌa tísꞌejihín ra̱ én xi tínchja̱.
\v 33 Tu̱nga xi tísꞌejihi̱n én xi tínchja̱, kui títsꞌínkie yjoho̱ nga kju̱axi̱ én xi nchja̱ Nti̱a̱ná.
\v 34 A̱tꞌaha̱ xi kitsꞌín nibá Nti̱a̱ná, kui xi nchja̱ éhe̱n Nti̱a̱ná, a̱tꞌaha̱ Nti̱a̱ná kitsjáyjehe̱ Espiri̱tu̱.
\v 35 Nti̱a̱ Na̱ꞌmiu̱ ꞌyún tjoho̱ Ntíhi̱ ko̱ ngayjee̱ ni xi tjín ja kitsꞌínkjasꞌen a̱ya ntsja.
\v 36 Xi tísꞌejihi̱n Ntíu̱, kui xi tíjña tíkꞌun sín. Tu̱nga xi najmi tíma mjehe̱ nga ku̱i̱ntꞌé éhe̱n Ntíu̱, kui xi najmi kꞌúéjña tíkꞌun. Kju̱a̱kjaha̱n Nti̱a̱ná tíjñanehe̱.
\c 4
\s Bꞌi̱ tsꞌín kinchja̱ni̱jmíko̱ Jesu nku na̱ Samari̱a̱
\p
\v 1 Kikꞌinyaha̱ já fariseo̱ nga Jesu ꞌyún tjín saha̱ xu̱ta̱ niꞌyakuyá nga Jua ko̱ nga ꞌyún nkjin xu̱ta̱ tíbaténtá.
\v 2 Tu̱nga najmi Jesu xi tsaténtá xu̱ta̱. Já niꞌyakuyáha̱ ní xi bꞌa̱ kitsꞌín.
\v 3 Nkꞌie nga kintꞌé Jesu ni xi kikꞌinyaha̱ já fariseo̱, a̱sꞌa̱i tsitju a̱nte Judea̱ nga kikꞌóya ngáha a̱nte Galilea̱.
\p
\v 4 Tjíhin nga kjꞌu̱a̱ a̱nte Samari̱a̱.
\v 5 Kui nga jꞌaihi Sicar, nanki xi tíjñajihi̱n a̱nte Samari̱a̱. Tíjñakjoko̱ xuꞌba xi Jacob kitsjáha̱ Kuse xi ntíhi̱ maha.
\v 6 Yo̱ tíjña ntá ti̱xa̱ xi kitsꞌínnda Jacob. A̱sꞌa̱i ngjikꞌiejñatꞌa Jesu ntá ti̱xo̱, a̱tꞌaha̱ ja kafentaha̱ nga títsꞌín ni̱yá. Nkú ra̱ ma nga chu̱ba̱ te jo niu̱.
\v 7 A̱sꞌa̱i jꞌai nku ta̱chju̱ún Samari̱a̱ nga jꞌaikꞌasje ntánijua. Bꞌi̱ kitsú Jesu:
\p —Kꞌu̱a̱i̱ní i̱chí ntánijua xi kꞌu̱i̱a̱.
\p
\v 8 Kui chu̱bo̱ najmi tjíntuko̱ho̱ já niꞌyakuyáha̱, a̱tꞌaha̱ nichine i̱ncha kafíkꞌatse a̱jin na̱nti̱o̱.
\v 9 A̱sꞌa̱i bꞌi̱ kitsú ta̱chjúu̱n:
\p —¿Nkú tjíhi̱n ra̱ nga an tíbinchihiní ntánijua xi sꞌi̱hini, nga ji xi chá judio̱ ko̱ an xi na̱ Samari̱a̱?
\p Bꞌa̱ kitsú ta̱chjúu̱n a̱tꞌaha̱ najmi nda i̱ncha yꞌa xinkjín xu̱ta̱ judio̱ xu̱ta̱ Samari̱a̱.
\v 10 Bꞌi̱ kitsú Jesu:
\p —Tsa yai ni xi tsjá Nti̱a̱ná ko̱ tsa yai yá xi tíbankihi ntánijua, ji ku̱i̱nchíhi̱ ko̱ kui tsjáhi ntánijua xi tsꞌínkꞌíéntu tíkꞌuhu̱n xu̱ta̱.
\p
\v 11 —Ji chá nti̱a̱ —ta̱ kitsú ngáha ta̱chjúu̱n—, najmi tjíhin ni xi nꞌe̱sjeko̱honi ntánijuo̱ ko̱ ꞌyún na̱nka̱ ntá ti̱xo̱. ¿Má kꞌúínchjꞌahani ntánijua xi tsꞌínkꞌíéntu tíkꞌuhu̱n xu̱ta̱?
\v 12 Ntje̱ cháná Jacob yꞌéjñaná ntá ti̱xa̱i̱. Kui xi ta̱ kitsꞌi ntánijuaha̱ ko̱ ta̱ kitsꞌi ntíhi̱ ko̱ chu̱ xi kisꞌehe̱. ¿A jihí xi ꞌyún chánka sai nga kui?
\p
\v 13 A̱sꞌa̱i bꞌi̱ kitsú Jesu:
\p —Ngayjee̱ xi kꞌúí ntánijua xuꞌbi̱ ta̱ ka̱ma xintá ngáha̱ ra̱.
\v 14 Tu̱nga xi kꞌúí ntánijua xi tsjaha̱, kui xi ndaha̱chí najmi ta̱ ka̱ma xintáha̱ ra̱. A̱tꞌaha̱ ntánijua xi tsjaha̱ ka̱ma a̱jihi̱n xu̱ta̱ xuꞌbo̱ xi nkú joyaha nku ntá ti̱xa̱ xi bitju subaha̱ ntánijua. Bꞌa̱ tsꞌín kꞌúéntu tíkꞌun síhin.
\p
\v 15 —Ji chá nti̱a̱ —kitsú ta̱chjúu̱n—, kꞌu̱a̱i̱ní ntánijua xuꞌbo̱ tu̱ xi najmi ta̱ ka̱ma xintáhana ko̱ najmi ta̱ kjꞌúái̱kꞌasjéhena ntánijua e̱i̱.
\p
\v 16 —Tꞌin chu̱baihi̱ xꞌi̱hi̱n ko̱ nibáko̱i̱ —kitsú Jesu.
\p
\v 17 —Najmi tjínna xꞌi̱n —kitsú ta̱chjúu̱n.
\p A̱sꞌa̱i bꞌi̱ kitsú Jesu:
\p —Kju̱axi̱ ni xi tíbixín, nga najmi tjíhin xꞌi̱n.
\v 18 A̱tꞌaha̱ ja ma un xꞌi̱n binchunko̱i̱ ko̱ nda̱ xi tinchunko̱i̱ ndꞌa̱i̱ najmi xꞌi̱hi̱n maha. Kju̱axi̱ ni xi kuakixín.
\p
\v 19 —Ji chá nti̱a̱ —kitsú ta̱chjúu̱n—, tímankjinna nga chá profeta̱ ní.
\v 20 Ntje̱ cháni̱ kitsꞌíntsjoho̱ Nti̱a̱ná na̱xi̱ xuꞌbi̱. Tu̱nga máha jun, bꞌa̱ bixíún nga Jerusalen tíjña a̱nte má nga tjíhin nga nꞌe̱tsjoho̱ Nti̱a̱ná.
\p
\v 21 —Ji ta̱chju̱ún —kitsú Jesu—, nꞌe̱ sꞌejin ni xi tíxihin. Ku̱i̱chú chu̱ba̱ nkꞌie nga najmi ta̱ kjúái̱hinu na̱xi̱ xuꞌbi̱ ko̱ najmi ta̱ kuankíhinnu Jerusalen nga nꞌe̱tsjoho̱o Nti̱a̱ Na̱ꞌmiu̱.
\v 22 Jun najmi yo xi nꞌetsjoho̱o. Tu̱nga ji̱n yai̱ xi nꞌetsjoi̱hi̱, a̱tꞌaha̱ a̱jihi̱n xu̱ta̱ xi ntje̱ judio̱ tje̱he̱n ra̱ stjújin xi tsꞌi̱ínkꞌanki xu̱ta̱.
\p
\v 23 ’Tu̱nga jahá tíbichú chu̱ba̱ ko̱ ja kuichu chu̱bo̱ ndꞌa̱i̱ nkꞌie nga kju̱axi̱ nꞌetsjoho̱ Nti̱a̱ Na̱ꞌmiu̱. Xi nkú tsꞌín ku̱a̱kúyaha̱ Espiri̱tu̱ Santo̱ xu̱ta̱, bꞌa̱ tsꞌín tsꞌi̱íntsjoho̱ Nti̱a̱ Na̱ꞌmiu̱. A̱tꞌaha̱ Nti̱a̱ Na̱ꞌmiu̱ mjehe̱ nga xu̱ta̱ xi bꞌi̱ tsꞌín tjíntuyáha̱ tsꞌi̱íntsjoho̱.
\v 24 Xi tsꞌi̱íntsjoho̱, tjíhin nga kju̱axi̱ bꞌa̱ tsꞌi̱ín xi nkú tsꞌín ku̱a̱kúya Espiri̱tu̱ Santo̱. A̱tꞌaha̱ Espiri̱tu̱ ní Nti̱a̱ná.
\p
\v 25 Bꞌa̱ kitsú ta̱chjúu̱n:
\p —Be nga kjꞌu̱a̱í Mesia̱,\f + \fr 4.25, 29 \ft “Xi kitsꞌín nibá Nti̱a̱ná” tsuhu̱ ra̱ “Mesia̱” nga én hebreo̱ ko̱ “Cristo̱” nga én griego̱.\f* chá xi tsꞌi̱ín nibá Nti̱a̱ná. Nkꞌie nga kjꞌu̱a̱í, ku̱i̱tsu̱yaná nkú tjíhi̱n ra̱ ni xi tjín.
\p
\v 26 —An ní niu̱, an xi tínchja̱ko̱hi —kitsú Jesu.
\p
\v 27 Kui chu̱bo̱ jꞌai ngáha já niꞌyakuyáha̱ ko̱ kama nkjúhu̱n nga nku ta̱chju̱ún tínchja̱ni̱jmíko̱ Jesu. Tu̱nga ndaha nku najmi kama kꞌun kingjásjaiyaha̱ mí nihi xi mjehe̱ ko̱ a ra̱ mí nihi xi tínchja̱ni̱jmíyako̱ho ta̱chjúu̱n.
\v 28 A̱sꞌa̱i tsasínjña nisaha̱ ta̱chjúu̱n ko̱ ngji a̱jin na̱nti̱o̱. Ngji tsúyaha̱ xu̱ta̱ ni xi kamatꞌain.
\v 29 Bꞌi̱ kitsú:
\p —Nibáa̱se̱ ma ru̱u xu̱ta̱ xꞌi̱n xi kuatsúyana ngatentee̱ ni xi kitsꞌian. Kutsa kuihí xi kitsú Nti̱a̱ná nga tsꞌi̱ín nibá.
\p
\v 30 A̱sꞌa̱i tsitju xu̱ta̱ na̱nti̱o̱ nga jꞌaisehe̱ Jesu.
\v 31 Nkꞌie nga ngji ta̱chjúu̱n a̱jin na̱nti̱o̱, já niꞌyakuyáha̱ Jesu bꞌi̱ kitsúhu̱:
\p —Ji nda̱ maestru̱, chi̱ne̱i̱ i̱chí nichinei̱.
\p
\v 32 —Tíjñana nichine xi najmi yo —kitsú Jesu.
\p
\v 33 Kui nga bꞌi̱ ngján kingjásjaiyaha̱ ra̱ xinkjín já niꞌyakuyóo̱ nga bꞌa̱ kitsú:
\p —Tjín ra̱ xi kjꞌuaiko̱ho̱ nichine.
\p
\v 34 A̱sꞌa̱i bꞌi̱ kitsú Jesu:
\p —Nkꞌie nga tsꞌian xi nkú tsꞌín mjehe̱ xi kitsꞌín nibána ko̱ nga tsꞌintjusan xá xi tsꞌe̱, kui ní niu̱ xi nichinena̱.
\v 35 Tíbixíún: “Ndyja sa ñju sá nga ku̱i̱chú cho̱n.” Tu̱nga an bꞌa̱ tíxinnu̱u: Chjúxꞌánkiu tunkun ko̱ cha̱so̱o. Xu̱ta̱ xi nibá ján, kui xi nkú joyaha cha̱n. Ja tíbichú chu̱ba̱ha̱. Ja ka̱ma kjꞌu̱a̱íya cho̱n.
\v 36 Xi tífꞌáya cha̱n xi nibá yo̱ ka̱ma chjíhi̱. A̱tꞌaha̱ kꞌúéntu tíkꞌun sín xu̱to̱. Bꞌa̱ tsꞌín nkuhú tsjo ka̱maha̱ ra̱ xi tsꞌínxájin ko̱ xi fꞌáya cho̱n.
\v 37 A̱tꞌaha̱ kju̱axi̱ kjáíhin én xi bꞌa̱ tsuu̱: “Nku xi bꞌéntje̱ ko̱ kjꞌa̱í xi fꞌáya.”
\v 38 An kitsꞌinkjínu̱u nga chjꞌa̱yo cha̱n xi najmi jun kisꞌenkinu̱u kju̱a̱ni̱ma̱. Kjꞌa̱í xi kuakꞌíéntje̱ nga nibá xu̱ta̱i̱, ko̱ jun ta̱ sakútꞌanu̱u chjíhi̱ xóo̱.
\p
\v 39 Nkjin xu̱ta̱ Samari̱a̱ xi tjíntu a̱nte xuꞌbo̱ kisꞌejihi̱n Jesu nkꞌie nga kintꞌé nga bꞌi̱ kitsú ta̱chjúu̱n: “Kuatsúyana ngatentee̱ ni xi kitsꞌian.”
\v 40 Kui kju̱a̱ha nkꞌie nga jꞌaisehe̱ ra̱ xu̱ta̱ Samari̱a̱ Jesu, tsankihi̱ nga kꞌúéjña yo̱. Yꞌejña Jesu jo ni̱stjin tjíhin
\v 41 ko̱ ꞌyún nkjin sa xi kisꞌejihi̱n én xi kinchja̱.
\v 42 A̱sꞌa̱i bꞌa̱ i̱ncha kitsúhu̱ ta̱chjúu̱n:
\p —Sꞌejinni̱ ndꞌa̱i̱ tu̱nga najmi tu̱ nga̱tꞌaha̱ ní én xi tsixín. Sꞌejin níni̱ a̱tꞌaha̱ ko̱ ji̱n kuanuꞌyái̱ ko̱ mankjinni̱ nga kju̱axi̱ nga kui xi tsꞌínkꞌanki xu̱ta̱ xi tu̱ má tjíntuhú.
\s Bꞌi̱ tsꞌín kitsꞌínnkihi̱ Jesu nku nda̱ chí
\p
\v 43 Nkꞌie nga jꞌa jo ni̱stjin, a̱sꞌa̱i tsitju Jesu yo̱ nga ngji a̱nte Galilea̱.
\v 44 A̱tꞌaha̱ kitsúya Jesu nga najmi yankjún nku nda̱ profeta̱ a̱nte xi tsꞌe̱.
\v 45 Nkꞌie nga tsichu Galilea̱, xu̱ta̱ xi tjín yo̱ kitsꞌínkjáíhi̱n, a̱tꞌaha̱ kikie ngayjee̱ ni xi kitsꞌín Jesu nanki Jerusalen a̱jihi̱n sꞌíu̱. A̱tꞌaha̱ ko̱ kui i̱ncha ngji sꞌíu̱.
\p
\v 46 A̱sꞌa̱i tsichu ngáha Jesu Cana, nanki xi tíjñajihi̱n a̱nte Galilea̱ má nga kitsꞌín ma binu̱ ntánijuo̱. Yo̱ tíjña nku nda̱ xi tsꞌínxátꞌaha̱ nda̱ rei̱, kui xi tíjñaha̱ nku nda̱ chí xi kjijña un nanki Capernaum.
\v 47 Nkꞌie nga kintꞌé nga tsitju Jesu a̱nte Judea̱ ko̱ jꞌai a̱nte Galilea̱, a̱sꞌa̱i jꞌaisehe̱ ko̱ tsankihi̱ nga ngju̱a̱i̱ niꞌyaha̱ tu̱ xi tsꞌi̱ínnkihi̱ ra̱ nda̱ chíhi̱, a̱tꞌaha̱ ja tíꞌme.
\v 48 Bꞌi̱ kitsú Jesu:
\p —Tsa najmi cho̱o kju̱a̱nkjún ko̱ ni xi tíbakúchji ngaꞌyúhu̱n Nti̱a̱ná, najmi sꞌe̱jinnu̱u nga Nti̱a̱ná kitsꞌín nibána.
\p
\v 49 A̱sꞌa̱i bꞌa̱ kitsú nda̱ xi tsꞌínxátꞌaha̱ nda̱ rei̱:
\p —Ji nda̱ nti̱a̱, nibá mai i̱chí kintehe̱ ni nga ku̱a̱yá nda̱ chína̱.
\p
\v 50 Bꞌi̱ kitsú Jesu:
\p —Tꞌin ngáhani niꞌyahi̱. Ja nda ngáha nda̱ chíhi̱.
\p Kisꞌejihi̱n ndo̱ én xi kitsú Jesu ko̱ ngji.
\v 51 Nkꞌie nga tje̱n masen ni̱yóo̱, kisatéjin já musu̱hu̱ ko̱ bꞌa̱ kitsúhu̱:
\p —Ja nda ngáha ntíhi̱.
\p
\v 52 Kingjásjaiyaha̱ ndo̱ já musu̱hu̱ mí chu̱ba̱ha kikꞌatutsꞌi̱hi̱n nga kisꞌe nda ngáha̱ ra̱ ntíhi̱. Bꞌa̱ kitsú jóo̱:
\p —Kujña̱ nga chu̱ba̱ nku tsitjujihi̱n chꞌiu̱n nda̱ chíu̱.
\p
\v 53 Jꞌáítsjehe̱n na̱ꞌmihi̱ nda̱ chíu̱ nga kui chu̱bo̱: “Ja nda ngáha nda̱ chíhi̱”, kitsúhu̱ Jesu. Kui ko̱ ngayjee̱ xu̱ta̱ xi tjín niꞌyaha̱ kisꞌejihi̱n Jesu.
\v 54 Kui kju̱a̱nkjún xuꞌbi̱ xi ma joho xi kitsꞌín Jesu nkꞌie nga tsitju a̱nte Judea̱ ko̱ jꞌai ngáha a̱nte Galilea̱.
\c 5
\s Bꞌi̱ tsꞌín kitsꞌínnkihi̱ Jesu nku nda̱ xi kjijña un
\p
\v 1 Kjꞌa̱í ni̱stjin ngáha, nkꞌie nga tíi̱ncha bꞌasje sꞌíhi̱ xu̱ta̱ judio̱ ngji ngáha Jesu nanki Jerusalen.
\v 2 Yo̱ tíjña nku ntá ti̱xa̱ chánkantsú xi tiña maha̱ a̱nkju̱a̱ha̱ na̱xi̱nantóo̱ xi ꞌmi A̱nkju̱a̱ Chu̱tsa̱nka̱. Kui ntá ti̱xo̱ xi ꞌmi Betesda̱ nga én hebreo̱. Un a̱nte nkꞌíén kisꞌentuhu̱.
\v 3 Yo̱ fantu ṉkjún xu̱ta̱ un, xu̱ta̱ ka̱, xi najmi ma fi ko̱ xi nta sjai. Kui xi i̱ncha kuyáha̱ nga tsꞌín ni̱yá ntánijuo̱.
\v 4 A̱tꞌaha̱ tu̱ nkjé tu̱ nkjéhé ni nku ntítsjehe̱ Nti̱a̱ná fꞌaijénjin ntá ti̱xo̱ ko̱ tsꞌín ni̱yánkihi̱ ntánijuo̱. Ko̱ xi tjun tsungijin yjoho̱ ntóo̱ nkꞌie nga ja kuanꞌe ni̱yáha̱, kui xi ma nda tu̱ mí chꞌin xi kꞌuhún ra̱.
\p
\v 5 Yo̱ kjijñajihi̱n xu̱ta̱ uu̱n nku nda̱ xi tjíhi̱n kan tjꞌion jan nú nga uhu̱n.
\v 6 Nkꞌie nga kikie Jesu nga kjijña ndo̱ yo̱, kamankjihi̱n nga ja nkjin nú tjíhi̱n nga uhu̱n ko̱ bꞌi̱ kitsúhu̱:
\p —¿A mjehi ka̱ma nda ngáhani?
\p
\v 7 —Ji nda̱ nti̱a̱ —kitsú nda̱ uu̱n—, najmi chꞌa tjínna xi ku̱a̱si̱nko̱na, tsa tsúngijinna ntá ti̱xo̱ nkꞌie nga nꞌe ni̱yáha̱. Nkꞌie nga mjena tsungijian yjona̱, tu̱ kjꞌa̱íhí xi tjun tsungijin yjoho̱.
\p
\v 8 A̱sꞌa̱i bꞌi̱ kitsú Jesu:
\p —Ti̱síntje̱i̱n, chjúbéí nijña xi kisujñasuin ko̱ tꞌin.
\p
\v 9 Ta̱ kuihi chu̱bo̱ kama nda ngáha ndo̱. Jakjꞌá nijña xi kjijñasun ko̱ ngji. Tu̱nga xua̱tu̱hú kui ni̱stjiu̱n, ni̱stjin nkjúhu̱n xu̱ta̱ judio̱.
\v 10 Kui nga bꞌa̱ kitsúhu̱ ra̱ já judio̱ kꞌaku̱ nda̱ xi kama ndoo̱:
\p —Xua̱tu̱ ndꞌa̱i̱. Tíjña nkjúhu̱n kju̱a̱téxumoo̱ nga chꞌa̱i̱ nijñahi̱.
\p
\v 11 Bꞌa̱ kitsú ndo̱:
\p —Xi kuatsꞌínnkina, kui xi bꞌa̱ kuatsúna: “Chjúbéí nijña xi kisujñasuin ko̱ tꞌin.”
\p
\v 12 Bꞌa̱ kitsú jóo̱ nga kingjásjaiyaha̱:
\p —¿Yá xi bꞌa̱ kuatsúhi: “Chjúbéí nijña xi kisujñasuin ko̱ tꞌin”?
\p
\v 13 Tu̱nga najmi behé nda̱ xi kama nkihi̱ yá xi kitsꞌínnkihi̱, a̱tꞌaha̱ ngji tꞌaxín Jesu a̱jihi̱n xu̱ta̱ xi tíi̱ncha yo̱.
\v 14 A̱skahan Jesu kisatéjin ngáha ndo̱ má ma na̱tsihi̱n ni̱nku̱ ko̱ bꞌi̱ kitsúhu̱:
\p —Ji, ja kama nda ngáhani. Najmi ta̱ nꞌeheni ngatitsun tu̱ xi najmi sa̱téhe ri nku ni xi ꞌyún chꞌonkꞌun sa.
\p
\v 15 A̱sꞌa̱i ngji tsúyaha̱ ndo̱ já judio̱ kꞌaku̱ nga Jesu xi kitsꞌínnkihi̱.
\v 16 Kui kju̱a̱ha nga kitsꞌín unkiehe̱ ra̱ Jesu já judio̱ kꞌaku̱, a̱tꞌaha̱ bꞌa̱ kitsꞌín nga ni̱stjin nkjúu̱n.
\v 17 A̱sꞌa̱i bꞌi̱ kitsú Jesu:
\p —Na̱ꞌmina̱ títsꞌínxá santaha ndꞌa̱i̱ ko̱ an ta̱ títsꞌinxá.
\p
\v 18 Kui kju̱a̱ha nga tu̱ sahá ꞌyún tsangisjai ni̱yáha já judio̱ kꞌaku̱ nga mjehe̱ tsꞌi̱ínkꞌiehen Jesu. A̱tꞌaha̱ najmi tu̱ suba tsa ni̱stjin nkjúu̱n xi najmi kitsenkjún, tu̱nga bꞌa̱há kitsú ya nga Nti̱a̱ná xi Na̱ꞌmihi̱. Bꞌa̱ tsꞌín ta̱ kuihi kitsꞌín ma yjoho̱ xi nkúhu Nti̱a̱ná.
\s Bꞌi̱ tsꞌín tsakúchji Jesu xáha̱
\p
\v 19 A̱sꞌa̱i kinchja̱ Jesu nga bꞌa̱ kitsúhu̱ jóo̱:
\p —Kju̱axi̱ ni xi tíxinnu̱u. Ndaha nku ni najmi ma tsꞌín Ntíhi̱ Nti̱a̱ná kuenta̱ subaha̱. Tu̱ nkuhú ni xi tíbe nga títsꞌín Na̱ꞌmihi̱, kui xi tsꞌín. A̱tꞌaha̱ ngatentee̱ ni xi tsꞌín Na̱ꞌmiu̱, ta̱ kui nihi xi tsꞌín Ntíu̱.
\v 20 A̱tꞌaha̱ Na̱ꞌmiu̱ ꞌyún tjoho̱ Ntíu̱ ko̱ bakúchjihi̱ ngayjee̱ ni xi tsꞌín. Ko̱ ku̱a̱kúchji saha̱ ni xi ꞌyún chánka. Xí ka̱ma nkjúhúnnu̱u.
\v 21 A̱tꞌaha̱ xi nkú tsꞌín Na̱ꞌmiu̱ tsꞌínkjꞌáíyaha̱ xu̱ta̱ ngabayoo̱ ko̱ tsꞌínkꞌíéntu tíkꞌun ngáha, bꞌa̱ ta̱ tsꞌín Ntíu̱ tsꞌínkꞌíéntu tíkꞌun xi mjehe̱.
\v 22 Najmi Na̱ꞌmiu̱ xi ku̱a̱se̱he̱ tsa nda ko̱ tsa najmi nda ni xi kitsꞌín xu̱ta̱. Ntíu̱ ní kitsjáha̱ nga kui xi ku̱a̱se̱yjehe̱ kui niu̱,
\v 23 tu̱ xi ngayjee̱ xu̱ta̱ sku̱e̱nkjúhun Ntíu̱ xi nkú ta̱ tsꞌín benkjún Na̱ꞌmiu̱. Xi najmi benkjún Ntíu̱, bꞌa̱ ta̱ tsꞌín najmi benkjún Na̱ꞌmi xi kitsꞌín nibáha̱.
\p
\v 24 ’Kju̱axi̱ ni xi tíxinnu̱u. Xi basínñjuhu̱ énna̱ ko̱ sꞌejihi̱n xi kitsꞌín nibána, kui xi ja tjíntu tíkꞌun sín. Najmi tjín ni xi ngju̱a̱i̱néhe̱ a̱tꞌaha̱ ja tsitjujin ngabayoo̱ ko̱ tjíntu tíkꞌun sín.
\v 25 Kju̱axi̱ ni xi tíxinnu̱u. Ku̱i̱chú chu̱ba̱ ko̱ ja kuichu chu̱bo̱ ndꞌa̱i̱ nkꞌie nga xu̱ta̱ kꞌie̱n ku̱i̱ntꞌé nta̱ha̱ Ntíhi̱ Nti̱a̱ná, ko̱ xi tíntꞌéꞌéhe̱n kꞌúéntu tíkꞌun.
\v 26 A̱tꞌaha̱ xi nkú tsꞌín Nti̱a̱ Na̱ꞌmiu̱ kuenta̱ha̱ tíjña tíkꞌuhun, bꞌa̱ ta̱ tsꞌín kitsjáha̱ Ntíu̱ nga kuenta̱ha̱ tíjña tíkꞌuhun.
\v 27 Na̱ꞌmiu̱ kitsjáha̱ Ntíu̱ tu̱ xi ku̱a̱se̱he̱ ra̱ tsa nda ko̱ tsa najmi nda ni xi kitsꞌín xu̱ta̱, a̱tꞌaha̱ kui xi Ntíhi̱ Nda̱xꞌi̱u̱n.
\p
\v 28 ’Najmi tu̱ ma nkjúnnu̱u niu̱. A̱tꞌaha̱ ku̱i̱chú chu̱ba̱ nkꞌie nga ku̱i̱ntꞌé nta̱ha̱ Ntíu̱ ngayjee̱ xu̱ta̱ xi kjintuyánji
\v 29 ko̱ ku̱i̱síntje̱n ngáha. Xi nda kitsꞌín ku̱i̱síntje̱n nga kꞌúéntu tíkꞌun. Xi najmi nda kitsꞌín ku̱i̱síntje̱n nga sꞌe̱néhe̱ ni xi kanéhe̱ nga̱tꞌaha̱ ni xi i̱ncha kitsꞌín.
\v 30 Ndaha nku ni najmi ma tsꞌian kuenta̱na̱. Xi nkú tsꞌín ntꞌe, bꞌa̱ tsꞌín tsꞌian kju̱a̱. Ko̱ kixi̱ tsꞌian kju̱a̱, a̱tꞌaha̱ najmi bangisjai su̱ba̱ ni xi mjena. Ni xi mje níhi̱ Na̱ꞌmi xi kitsꞌín nibána bangisja.
\s Bꞌi̱ tsꞌín kitsúya Jesu ni xi bakúchji nga kikꞌa̱i̱ xáha̱
\p
\v 31 ’Tsa ta̱ ahan xínya yáha an, najmi chjíhi̱ ra̱ én xi kuinchja.
\v 32 Tu̱nga tíjñahá kjꞌa̱í xi tífina kju̱a̱nda, ko̱ be nga chjíhi̱ ra̱ ni xi tsꞌín nga bꞌéjña chji yáha an.
\v 33 Jun kinꞌekjíú já xi ngjingjásjaiyaha̱ Jua nga yáha kui ko̱ kui xi kitsúya yáha an.
\v 34 An najmi machjénna tsa xu̱ta̱ yjoninte ngju̱a̱i̱na kju̱a̱nda, tu̱nga tíxihínnu̱u nga nꞌe̱chjíhi̱ ru̱u Jua tu̱ xi kꞌu̱a̱nkihinu.
\v 35 Jua bꞌa̱ joyaha nku ndꞌí xi tsatꞌai ko̱ kitsꞌín ndzjen, ko̱ jun kinꞌe tsjojiun kutju ndꞌíhi̱.
\p
\v 36 ’Tu̱nga ꞌyún chánka sa ni xi tífina kju̱a̱nda nga én xi kinchja̱ Jua. A̱tꞌaha̱ xá xi kitsjána Nti̱a̱ Na̱ꞌmiu̱ nga tsꞌintjusan ko̱ xi títsꞌian ndꞌa̱i̱, kui xi ta̱ tífina kju̱a̱nda. Tíbakúchji nga Nti̱a̱ Na̱ꞌmiu̱ kitsꞌín nibána.
\v 37 Ko̱ Na̱ꞌmiu̱ ya xi kitsꞌín nibána ta̱ tífina kju̱a̱nda. Jun najmi kje̱e nuꞌyó nta̱ha̱ ko̱ ta̱ ndaha najmi kje̱e yo xi nkú tjín.
\v 38 Ta̱ ndaha najmi tíjñajinnu̱u éhe̱n a̱jin ani̱ma̱nu̱u, a̱tꞌaha̱ najmi sꞌejinnu̱u xi kitsꞌín nibá.
\v 39 ꞌYún ṉkjún nꞌeyo xu̱ju̱n éhe̱n Nti̱a̱ná a̱tꞌaha̱ bꞌa̱ manu̱u nga bꞌa̱ tsꞌín sa̱kúhu̱nu̱u nga ku̱i̱ntsu̱ba̱ tíkꞌun síún. Tu̱nga an ní tínchja̱ni̱jmíyahana xu̱ju̱n nga tífina kju̱a̱nda.
\v 40 Tu̱nga najmi mjehénu̱u ni̱basenú tu̱ xi ku̱i̱ntsu̱ba̱ tíkꞌuhunnu.
\p
\v 41 ’Najmi tíbangisja tsa xu̱ta̱ tsjána kju̱a̱chánka.
\v 42 Tu̱nga behénu̱u. Be nga najmi nꞌetjó Nti̱a̱ná.
\v 43 Ngajoho̱ Na̱ꞌmina̱ jái̱hina ko̱ jun najmi nꞌekjáínnú. Tu̱nga tsa kjꞌa̱í xi ku̱a̱té xá subaha̱ yjoho̱, tu̱ sahá kui xi nꞌekjóho̱on.
\v 44 Bꞌi̱ ngján ꞌbo̱ho̱ kju̱a̱chánka yjonu̱u. Najmi binchisjó nga Nti̱a̱ná xi nku tutuu̱ tsjánu̱u kju̱a̱chánka. Nkꞌie nga bꞌa̱ nꞌo, ¿nkú tsꞌín sꞌe̱jihi̱nnu̱u énna̱?
\p
\v 45 ’Najmi tu̱ bꞌa̱ bixíún tsa an xínyatꞌainnu̱u nginku̱n Nti̱a̱ Na̱ꞌmiu̱. Moise ní xi tíma ꞌyún takꞌun, kui ní xi títsuyatꞌainnu̱u.
\v 46 Tsa kju̱axi̱ nga sꞌejinnu̱u ni xi yꞌétꞌa Moise, ta̱ sꞌe̱jinnu̱u an, a̱tꞌaha̱ an kinchja̱ni̱jmíyahana Moise.
\v 47 Tu̱nga tsa najmi sꞌejinnu̱u ni xi yꞌétꞌa Moise, ¿nkú tsꞌín sꞌe̱jihi̱nnu̱u én xi tínchja?
\c 6
\s Bꞌi̱ tsꞌín kitsꞌínkjen Jesu já xi un mii̱
\r (Mt. 14:13-21; Mr. 6:30-44; Lc. 9:10-17)
\p
\v 1 Kjꞌa̱í ni̱stjin ngáha ngji Jesu ngabantá ntáchakꞌun Galilea̱, xi ta̱ ꞌmi ntáchakꞌun Tiberi̱a̱.
\v 2 Nkjin ṉkjún xu̱ta̱ kitsjennkíhi̱, a̱tꞌaha̱ kikie kju̱a̱nkjún xi kitsꞌín nga kitsꞌínnkihi̱ xu̱ta̱ un.
\v 3 A̱sꞌa̱i tsiyajnu Jesu nku a̱sunntu tje̱nki̱ ko̱ yo̱ yꞌejñako̱ já niꞌyakuyáha̱.
\v 4 Kui ni̱stjiu̱n ja tíbichú tiña Sꞌí Pascu̱a̱ xi bꞌasje xu̱ta̱ xi ntje̱ judio̱ tje̱he̱n ra̱.
\v 5 Nkꞌie nga tsase Jesu ko̱ kikie nga nkjin ṉkjún xu̱ta̱ xi tíi̱ncha nibákꞌuhu̱n, bꞌa̱ kitsúhu̱ Felipe̱:
\p —¿Má xi tje̱hen chꞌa̱tseé ni̱nku̱a̱n xi kji̱ne̱ xu̱ta̱ nkiu̱n?
\p
\v 6 Tu̱nga tu̱ xi kikjutꞌayákꞌuhún ni Felipe̱ nga bꞌa̱ kitsúhu̱, a̱tꞌaha̱ be ni xi tsꞌi̱ín.
\v 7 A̱sꞌa̱i bꞌa̱ kitsú Felipe̱:
\p —Ta̱ ndaha tsa jo unchan to̱on denari̱o̱ ni̱nku̱a̱n chꞌa̱tseé, tsa a̱sꞌa̱i i̱chí i̱chí kꞌu̱a̱i̱hi̱ nga nkúnkú, najmi ku̱i̱chú maha̱ ra̱.
\p
\v 8 A̱sꞌa̱i bꞌi̱ kitsú nda̱ niꞌyakuyá xi ꞌmi Andre, xi ntsꞌe̱ maha Simon Pedro̱:
\p
\v 9 —E̱i̱ síjña nku nda̱ chí xi yꞌa un ni̱nku̱a̱n xi kamandako̱ho tu cebada̱ ko̱ jo tji̱o̱. Tu̱nga, ¿mí skan ka̱maha̱ ra̱ xu̱ta̱ nkjiu̱n niu̱?
\p
\v 10 Bꞌi̱ kitsú Jesu:
\p —Bꞌa̱ tꞌihu̱un nga katꞌentu ngayjee̱ xu̱ta̱.
\p Tjín ṉkjún na̱xi̱ chu̱ kui a̱nte xuꞌbo̱ ko̱ yꞌentu a̱jin na̱xi̱ chu̱ nkú ra̱ ma un mii̱ jáxꞌi̱n.
\v 11 A̱sꞌa̱i jakjꞌá Jesu ni̱nku̱o̱n, kitsjáha̱ mábꞌa̱chjíhi̱ Nti̱a̱ná ko̱ kitsꞌínndzjoho̱ xu̱ta̱ xi kabꞌentu yo̱. Bꞌa̱ ta̱ kitsꞌíhi̱n tji̱o̱ nga kitsjáha̱ xi nkú tjín mjehe̱ xu̱ta̱.
\v 12 Nkꞌie nga kikꞌie sisihi̱n xu̱ta̱, a̱sꞌa̱i bꞌi̱ kitsúhu̱ já niꞌyakuyáha̱:
\p —Chjꞌa̱yo ni̱nku̱a̱n xi kꞌuankiu̱ tu̱ xi najmi ku̱a̱tsúhun.
\p
\v 13 A̱sꞌa̱i jꞌáya jóo̱ ni̱nku̱a̱n xi tsꞌankiu̱, kui xi nibaha̱ ra̱ ni̱nku̱a̱n cebada̱ xi uu̱n. Te jo ni̱si̱n kama ni̱nku̱a̱n xi tsꞌankihi̱ xu̱ta̱.
\v 14 Nkꞌie nga kikie xu̱ta̱ nkjiu̱n kju̱a̱nkjún xi kitsꞌín Jesu, a̱sꞌa̱i bꞌa̱ i̱ncha kitsúhu̱ xinkjín:
\p —Kju̱axi̱ kjáíhin nga kui nda̱i̱ xi nda̱ profeta̱ xi tjíhin nga kjꞌu̱a̱í a̱sunntei̱.
\p
\v 15 Tu̱nga kamankjihín ra̱ Jesu nga mjehe̱ jóo̱ ngju̱a̱i̱ko̱ kju̱a̱ꞌyúhu̱n nga nda̱ rei̱ tsꞌi̱ín maha̱. Kui nga ngji tꞌaxín suba ngáha a̱suntu tje̱nki̱u̱.
\s Bꞌi̱ tsꞌín ngjisun Jesu ntáchakꞌuu̱n
\r (Mt. 14:22-27; Mr. 6:45-52)
\p
\v 16 Nkꞌie nga ja tíma jyun, a̱sꞌa̱i i̱ncha jꞌaijen a̱ndai ntáchakꞌuu̱n já niꞌyakuyáha̱ Jesu.
\v 17 Jasꞌen yábarku̱ tu̱ xi kjꞌu̱a̱tikjáha ntáchakꞌuu̱n nga ngju̱a̱i̱ nanki Capernaum. A̱sꞌa̱i tu̱ kama jyuntꞌaihín nkꞌie nga najmi kje̱e bichú tje̱nnkihi̱ Jesu.
\v 18 Ko̱ tu̱ nkuhú ntjo̱ xi tu̱ xí ꞌyúhún kama. Xí kitsꞌín xuhú ntáchakꞌuu̱n.
\v 19 Nkꞌie nga tsichu nkú ma tsa un ko̱ tsa jun kilome̱tru̱ tjíhin, kikie jóo̱ nga Jesu nibásun ntáchakꞌuu̱n nga nibákꞌun tiñaha̱ yábarku̱. I̱ncha kitsankjún jóo̱,
\v 20 tu̱nga bꞌi̱hí kitsú Jesu:
\p —An ní niu̱. Najmi tu̱ binkjun.
\p
\v 21 Tsjo kamaha̱ jóo̱ nga jasꞌen Jesu yábarku̱ ko̱ tu̱ tsichu sahá yábarku̱ nanki xi má nga tíi̱ncha fi.
\s Bꞌi̱ tsꞌín kitsúya Jesu nga kui xi tsꞌínk'íéntu tíkꞌun xu̱ta̱
\p
\v 22 Ni̱stjin xi ma ndyjuu̱n kamankjihi̱n xu̱ta̱ xi yꞌentu ngabantá ntáchakꞌuu̱n nga tu̱ nkuhú maha yábarku̱ xi tsitju yo̱ ko̱ nga Jesu najmi jasꞌen nga ngjiko̱ já niꞌyakuyáha̱, a̱tꞌaha̱ tu̱ já niꞌyakuyáha̱ ngji subahá.
\v 23 A̱sꞌa̱i i̱ncha jꞌai kjꞌa̱í yábarku̱ xi tsitjuhu nanki Tiberi̱a̱ nga jꞌai tiña má xi tje̱hen kikjine ni̱nku̱a̱n xu̱ta̱ nkꞌie nga kitsjáha̱ Jesu mábꞌa̱chjíhi̱ Nti̱a̱ná.
\p
\v 24 Kui bꞌa̱ maha, nkꞌie nga kikiehe xu̱ta̱ nga najmi ta̱ tjíhin Jesu yo̱ ko̱ ta̱ ndaha já niꞌyakuyáha̱, a̱sꞌa̱i jasꞌen yábarku̱ nga ngjingisjai nanki Capernaum.
\v 25 Ngabantá xinkuu̱ kisakúhu̱ ko̱ bꞌi̱ i̱ncha kitsúhu̱:
\p —Ji nda̱ maestru̱, ¿nkú nꞌe jái̱hini e̱i̱?
\p
\v 26 A̱sꞌa̱i bꞌi̱ kitsú Jesu:
\p —Kju̱axi̱ ni xi tíxinnu̱u. Kiyo kju̱a̱nkjún xi kitsꞌian, tu̱nga najmi kuihí kju̱a̱ha tíbinchisjáíhinú. Tu̱ nga̱tꞌaha̱ ní ni̱nku̱a̱n xi kichinehenu nga kitse susunnu̱u, kui kju̱a̱ha nga tíbinchisjáíhinú.
\v 27 Najmi tu̱ nꞌexántjaihinu ni̱nku̱a̱n xi maha̱ fe. Ni̱nku̱a̱n xi najmi ma níhi̱ fe nꞌe̱xántjaihinu. Kui xi tsꞌi̱ínkꞌíéntu tíkꞌunnu̱u. Ntíhi̱ Nda̱xꞌi̱u̱n tsjánu̱u ni̱nku̱a̱n xuꞌbo̱. Nti̱a̱ Na̱ꞌmiu̱ tsakúnu̱u nga kui xi kitsꞌín nibá.
\p
\v 28 Bꞌa̱ kitsú jóo̱:
\p —¿Mí ni xi tjíhin nga nꞌe̱i̱ ji̱n tu̱ xi nꞌe̱tjusuhu̱nni̱ ni xi mjehe̱ ra̱ Nti̱a̱ná?
\p
\v 29 Bꞌi̱ kitsú Jesu:
\p —Kui ni xuꞌbi̱ xi mjehe̱ Nti̱a̱ná nga nꞌe̱tjusun. Kasꞌejinnu̱u nda̱ xi kitsꞌín nibá.
\p
\v 30 A̱sꞌa̱i bꞌa̱ i̱ncha kitsú jóo̱:
\p —¿Mí kju̱a̱nkjúhun xi ku̱a̱kúchjini̱ nga Nti̱a̱ná kitsꞌín nibáhi tu̱ xi cha̱ha̱ni̱ ko̱ sꞌe̱jinni̱ ji? ¿Mí xáha̱ Nti̱a̱ná xi mahi?
\v 31 A̱tꞌaha̱ ntje̱ cháná kikjine mana nkꞌie nga yꞌentu a̱nte kixiu̱. Kui nihi xi tjítꞌa éhe̱n Nti̱a̱ná nga bꞌa̱ títsu: “Ni̱nku̱a̱n xi ndji̱o̱jmi ján nibaha̱ ra̱ kitsjáha̱ nga kikjine.”
\p
\v 32 Bꞌi̱ kitsú Jesu:
\p —Kju̱axi̱ ni xi tíxinnu̱u. Na̱ꞌmina̱há xi kitsjánu̱u ni̱nku̱a̱n xi ndji̱o̱jmi ján nibaha, najmi Moise. Ko̱ ndꞌa̱i̱ títsjánu̱u ni̱nku̱a̱n xi nda kjikjin. Kui xi ndji̱o̱jmi ján nibáha.
\v 33 A̱tꞌaha̱ ni̱nku̱a̱n xi tsjá Nti̱a̱ná, kui xi nibajehen ndji̱o̱jmi ján ko̱ tsꞌínkꞌíéntu tíkꞌun xu̱ta̱ a̱sunntei̱.
\p
\v 34 —Ji nda̱ nti̱a̱ —kitsú jóo̱—, kꞌu̱a̱i̱ tehe̱nteni̱ ni̱nku̱a̱n xuꞌbo̱.
\p
\v 35 A̱sꞌa̱i bꞌi̱ kitsú Jesu:
\p —An ni̱nku̱a̱n xi tsꞌínkꞌíéntu tíkꞌuhu̱n xu̱ta̱. Xi kjꞌu̱a̱ísena najmi ta̱ ka̱ma bjoho̱ ra̱ ko̱ xi sꞌe̱jihi̱n an najmi ta̱ ka̱ma xintáha̱ ra̱.
\v 36 Tu̱nga jahá bꞌa̱ kuaxinnu̱u, ndaha tsa tíyanú tu̱nga najmi tísꞌejihínnu̱u.
\v 37 Kjꞌu̱a̱ísena ngayjee̱ xu̱ta̱ xi tsjána Na̱ꞌmina̱, ko̱ xi kjꞌu̱a̱ísena najmi kꞌonsje̱ na̱tsin ján.
\p
\v 38 ’A̱tꞌaha̱ ndji̱o̱jmi ján nibaje̱henna tu̱ xi tsꞌintjusuhunna xi nkú tsꞌín mjehe̱ Na̱ꞌmi xi kitsꞌín nibána ko̱ najmi xi nkú tsꞌín mjena.
\v 39 Ko̱ ni xi mjehe̱ xi kitsꞌín nibána, najmi mjehe̱ tsa tsꞌinndyja ndaha nku xi kitsjána. Mje níhi̱ nga tsꞌinkjꞌáíya ngáha̱ ra̱ ngabayoo̱ xu̱ta̱ xuꞌbo̱ ni̱stjin xi fekuu̱.
\v 40 A̱tꞌaha̱ ni xi mjehe̱ Na̱ꞌmina̱, mjehe̱ nga kꞌúéntu tíkꞌun sín ngayjee̱ xi kjꞌu̱a̱ísehe̱ Ntíu̱ ko̱ sꞌe̱jihi̱n. Ko̱ an tsꞌinkjꞌáíya ngáha̱ ra̱ ngabayoo̱ xu̱ta̱ xuꞌbo̱ ni̱stjin xi fekuu̱.
\p
\v 41 Nkꞌie nga bꞌa̱ kitsú Jesu nga kui xi ni̱nku̱a̱n xi ndji̱o̱jmi ján nibajehen, a̱sꞌa̱i já judio̱ kinchja̱yanehe̱.
\v 42 Bꞌa̱ i̱ncha kitsúhu̱ xinkjín:
\p —¿A najmi kuihí nda̱i̱ xi Jesu, ntíhi̱ Kuse? Yaá na̱ꞌmihi̱ ko̱ na̱aha̱. ¿Nkú tjíhi̱n ra̱ nga bꞌa̱ títsuhu nga ndji̱o̱jmi ján nibajehen?
\p
\v 43 A̱sꞌa̱i bꞌi̱ kitsú Jesu:
\p —Najmi tu̱ chubayanenú.
\v 44 Ndaha nku najmi ka̱ma kjꞌu̱a̱ísena tsa najmi kjꞌu̱a̱íko̱ho̱ Na̱ꞌmi xi kitsꞌín nibána. Ko̱ xi kjꞌu̱a̱ísena an tsꞌinkjꞌáíya ngáha̱ ra̱ ngabayoo̱ ni̱stjin xi fekuu̱.
\v 45 Bꞌa̱ tsꞌín yꞌétꞌa já profeta̱: “Nti̱a̱ná ku̱a̱kúyaha̱ ngayjee̱ xu̱ta̱.” Kui bꞌa̱ maha, ngayjee̱ xi mjéñjuhu̱ ra̱ ko̱ bangiya ni xi bakúyaha̱ Nti̱a̱ Na̱ꞌmiu̱, kui xi kjꞌu̱a̱ísena.
\p
\v 46 ’Ndaha nku najmi kje̱e be yáha Nti̱a̱ Na̱ꞌmiu̱. Nku tutuhú xi nibaha má tíjña Nti̱a̱ná, kui xi ja be Nti̱a̱ Na̱ꞌmiu̱.
\v 47 Kju̱axi̱ ni xi tíxinnu̱u. Xi sꞌe̱jihi̱n an, kui xi kꞌúéntu tíkꞌun sín.
\v 48 An ni̱nku̱a̱n xi tsꞌínkꞌíéntu tíkꞌuhu̱n xu̱ta̱.
\v 49 Ntje̱ chánu̱u kikjine mana a̱nte kixiu̱, tu̱nga tu̱ nkú jesuhún.
\v 50 Tu̱nga ni̱nku̱a̱n xuꞌbi̱ ndji̱o̱jmi ján nibajehen tu̱ xi kji̱ne̱he xu̱ta̱ ko̱ najmi ta̱ ku̱a̱yáha.
\v 51 An xi ni̱nku̱a̱n tíkꞌun xi ndji̱o̱jmi ján nibajehen. Tsa tjín xi kji̱ne̱ ni̱nku̱a̱n xuꞌbi̱, kui xi kꞌúéjña tíkꞌun sín. Ko̱ ni̱nku̱a̱n xi tsja, kui xi yjonintena̱ xi tsjantjáíhina xu̱ta̱ a̱sunntei̱.
\p
\v 52 A̱sꞌa̱i tu̱ yꞌésiko̱hó xinkjín já judio̱ nga bꞌa̱ kitsú:
\p —¿Nkú tsꞌín tsjáhaná yjonintehe̱ nda̱i̱ nga chi̱ne̱é?
\p
\v 53 Bꞌi̱ kitsú Jesu:
\p —Kju̱axi̱ ni xi tíxinnu̱u. Tsa najmi chi̱no̱o yjonintehe̱ Ntíhi̱ Nda̱xꞌi̱u̱n ko̱ sꞌi̱u jníhi̱, najmi ku̱i̱ntsu̱ba̱ tíkꞌun.
\v 54 Xi kji̱ne̱ yjonintena̱ ko̱ kꞌúí jnína̱, kui xi kꞌúéntu tíkꞌun sín, ko̱ an tsꞌinkjꞌáíya ngáha̱ ra̱ xu̱ta̱ xuꞌbo̱ ni̱stjin xi fekuu̱.
\v 55 A̱tꞌaha̱ yjonintena̱ xi nichine xi ndoo̱ ko̱ jnína̱ xi ntá xi ndoo̱.
\v 56 Xi kji̱ne̱ yjonintena̱ ko̱ kꞌúí jnína̱, kui xi kꞌúéntujínna ko̱ an kúáte̱jñajihi̱n.
\p
\v 57 ’Na̱ꞌmiu̱ kitsꞌín nibána. A̱tꞌaha̱ tíjña, kui nga tíi̱jñahana. Bꞌa̱ ta̱ tsꞌín a̱tꞌaha̱ tíi̱jña tíkꞌan, kui nga kꞌúéntu tíkꞌuhun xu̱ta̱ xi tsꞌi̱ín mana nichinehe̱.
\v 58 Kui xuꞌbi̱ ni̱nku̱a̱n xi ndji̱o̱jmi ján nibajehen. Kui xi najmi xi nkú joyaha mana xi kikjine ntje̱ chánu̱u ko̱ tu̱ nkú jesuhún. A̱tꞌaha̱ xi kji̱ne̱ ni̱nku̱a̱n xuꞌbi̱, kꞌúéntu tíkꞌun sín.
\p
\v 59 Bꞌa̱ tsꞌín kinchja̱ Jesu nga tsakúya a̱yaha̱ nku niꞌya sinagoga̱ xi tíjña nanki Capernaum.
\v 60 Nkꞌie nga kintꞌé xu̱ta̱ niꞌyakuyáha̱ én xi kinchja̱, a̱sꞌa̱i nkjin xi bꞌa̱ kitsú:
\p —ꞌNi tjín tsa nꞌe̱sihi̱n én xi tínchja̱. ¿Yá xi tsꞌi̱ínkjáíhi̱n ni xi kuatsú?
\p
\v 61 Kamankjihi̱n Jesu nga kinchja̱yanehe̱ xu̱ta̱ niꞌyakuyáha̱ nga bꞌa̱ kitsú. A̱sꞌa̱i bꞌi̱ kitsú Jesu:
\p —¿A tínꞌendyjajihín ru̱u yjonu̱u én xi kuanchja?
\v 62 ¿Nkú sa ka̱manu̱u tsa cho̱o Ntíhi̱ Nda̱xꞌi̱u̱n nkꞌie nga ngju̱a̱i̱nji ngáha a̱nte má nga nibaha?
\v 63 Espiri̱tu̱ Santo̱ tsꞌínkꞌíéntu tíkꞌun xu̱ta̱. Xu̱ta̱ bi, najmi maha̱ tsꞌínkꞌíéntu tíkꞌun xu̱ta̱ xinkjín. Én xi kuaxinnu̱u Espiri̱tu̱ Santo̱ nibáha̱ ra̱ ko̱ kui ée̱n tsꞌi̱ínkꞌíéntu tíkꞌunnu̱u.
\v 64 Tu̱nga tjín a̱jinnu̱u xi najmi sꞌejihi̱n an.
\p Bꞌa̱ kitsú Jesu a̱tꞌaha̱ be santaha nga tutsꞌihi̱n ni yá xi najmi sꞌejihi̱n ko̱ yá xi tsꞌi̱ínkjasꞌehe̱n.
\v 65 Ko̱ bꞌi̱ ta̱ kitsú ya:
\p —Kui kju̱a̱ha nga bꞌa̱ kuaxihi̱nnu̱u nga ndaha nku najmi ka̱ma kjꞌu̱a̱ísehena tsa najmi Nti̱a̱ Na̱ꞌmiu̱ kitsjáha̱ nga kjꞌu̱a̱ísena.
\p
\v 66 Yo̱ kikꞌatutsꞌi̱hi̱n ra̱ nga nkjin xu̱ta̱ niꞌyakuyáha̱ yꞌéjñaha̱. Najmi ta̱ kitsjenko̱ho̱ ra̱.
\v 67 A̱sꞌa̱i bꞌi̱ kitsúhu̱ já niꞌyakuyá xi te joo̱:
\p —¿A mjenu̱u kuankíún ko̱ jun?
\p
\v 68 —Ji Nda̱ Nti̱a̱ —kitsú Simon Pedro̱—, ¿yá sa ka̱ma tsjénnkihi̱ ji̱n? Jihí xi chubai én xi tsꞌínkꞌíéntu tíkꞌun síhi̱n xu̱ta̱.
\v 69 Sꞌejinni̱ ko̱ ja kamankjinni̱ nga ji Cristo̱,\f + \fr 6:69 \ft “Xi kitsꞌín nibá Nti̱a̱ná” tsuhu̱ ra̱ “Cristo̱”.\f* xi Ntíhi̱ Nti̱a̱ná xi tíjña tíkꞌuu̱n.
\p
\v 70 Bꞌi̱ kitsú Jesu:
\p —An jꞌajínnu̱u jun xi te joo̱, tu̱nga tje̱njihínnu̱u nku nda̱ninda.
\p
\v 71 Bꞌa̱ kitsú Jesu nga kinchja̱ni̱jmíyaha Juda̱ Iscariote̱, ntíhi̱ Simon. A̱tꞌaha̱ kui xi tsꞌi̱ínkjasꞌehe̱n ko̱ kui xi nku nda̱ niꞌyakuyá xi te joo̱.
\c 7
\s Bꞌi̱ tsꞌín ngji Jesu Sꞌíhi̱ Niꞌya Kichoo̱
\p
\v 1 A̱skahan kikjatsúꞌba Jesu a̱nte Galilea̱. Najmi kama mjehe̱ nga kikjatsúꞌba chji a̱nte Judea̱, a̱tꞌaha̱ já judio̱ kꞌaku̱ tsangisjai ni̱yá xi nkú tsꞌín tsꞌi̱ínkꞌiehen.
\v 2 Tu̱nga jahá tíbichú tiña sꞌí xi bꞌasje xu̱ta̱ xi ntje̱ judio̱ tje̱he̱n ra̱, sꞌí xi ꞌmi Sꞌíhi̱ Niꞌya Kichoo̱,
\v 3 ko̱ bꞌa̱ kitsú já ntsꞌe̱ Jesu:
\p —Najmi tu̱ e̱i̱ binchin. Tu̱ sahá tꞌin Judea̱ tu̱ xi sku̱e̱he xu̱ta̱ niꞌyakuyáhi̱ ni xi nꞌei.
\v 4 A̱tꞌaha̱ najmi tjín xi bꞌéjña ꞌma ni xi tsꞌín tsa mjehe̱ cha̱. Tu̱ sahá ta̱kúchjihi̱ yjohi̱ xu̱ta̱ a̱sunntei̱ nga nꞌe̱i ni xi tínꞌei.
\p
\v 5 Bꞌa̱ kitsú já ntsꞌe̱ a̱tꞌaha̱ ta̱ ndaha kui najmi i̱ncha kisꞌejihi̱n yáha Jesu.
\v 6 A̱sꞌa̱i bꞌi̱ kitsú Jesu:
\p —Najmi kje̱e bichú chu̱ba̱na̱ nga tsꞌian ni xi tjíhin nga tsꞌian. Jun bi, tu̱ mí chu̱ba̱há ni ma nꞌo ni xi tjíhin nga nꞌo̱o.
\v 7 Najmi títsꞌín unkienu̱u xu̱ta̱ a̱sunntei̱. An bi, títsꞌín unkiena a̱tꞌaha̱ tíbꞌejñá chja nga chꞌon tjín ni xi tíi̱ncha tsꞌín.
\v 8 Tankíún sꞌíu̱. Najmi kfíán an a̱tꞌaha̱ najmi kje̱e bichú chu̱ba̱na̱.
\p
\v 9 Bꞌa̱ kitsú Jesu, a̱sꞌa̱i yꞌejña a̱nte Galilea̱.
\v 10 Tu̱nga nkꞌiehé nga i̱ncha ngji sꞌíu̱ já ntsꞌe̱, a̱sꞌa̱i ngji ko̱ kui. Tu̱nga najmi ngji chjihí, tsa jóo̱ tje̱njihi̱n. Ngji suba.
\v 11 A̱sꞌa̱i a̱jin sꞌíu̱ já judio̱ kꞌaku̱ tsangisjaihi̱. Bꞌa̱ i̱ncha kitsúhu̱ xinkjín:
\p —¿A najmi kjꞌu̱a̱íhí ndo̱?
\p
\v 12 Ko̱ xu̱ta̱ nkjiu̱n ta̱ kinchja̱ni̱jmíyaha Jesu. Tjín xi bꞌa̱ kitsú: “Ndahá ndo̱.” Kꞌu̱a̱ ngá xi bꞌa̱ kitsú: “Najmi nda ndo̱. Xu̱ta̱há bꞌana̱cha̱ha̱ ndo̱.”
\v 13 Tu̱nga najmi kama takꞌuhún xu̱ta̱ kinchja̱ni̱jmíya chji chjihi Jesu a̱tꞌaha̱ tsankjún já judio̱ kꞌaku̱.
\s Bꞌi̱ tsꞌín tsakúya Jesu a̱jin sꞌíu̱
\p
\v 14 Nkꞌie nga a̱jihi̱n sꞌíu̱, jasꞌen Jesu má ma na̱tsihi̱n ni̱nku̱ ko̱ tsakúya.
\v 15 Kama nkjúhu̱n já judio̱ kꞌaku̱ ko̱ bꞌa̱ kitsúhu̱ xinkjín:
\p —¿Nkú tsꞌín behe ni xi tsꞌe̱ Nti̱a̱ná nda̱i̱ nga najmi tsangiyaha?
\p
\v 16 A̱sꞌa̱i bꞌi̱ kitsú Jesu:
\p —Najmi an tsꞌa̱n ni xi tíbakuyá. Xi kitsꞌín nibá nína tsꞌe̱ ée̱n.
\v 17 Xi mjehe̱ tsꞌi̱ín xi nkú tsꞌín mjehe̱ Nti̱a̱ná, kui xi sku̱e̱ tsa Nti̱a̱ná tsꞌe̱ ni xi tíbakuyá ko̱ tsa an tsꞌa̱n.
\v 18 Nku xu̱ta̱ xi nchja̱ ni xi tsꞌe̱, kui xi bankisjai kju̱a̱chánka xi tsꞌe̱. Tu̱nga xi bankisjai kju̱a̱chánkaha̱ xi kitsꞌín nibáha̱, kui xi kju̱axi̱ ni xi tsu ko̱ na̱xu̱ tsꞌín.
\v 19 ¿A najmi kitsjáhánu̱u Moise kju̱a̱téxumoo̱? Tu̱nga ndaha nku jun najmi títsꞌíntjusun kju̱a̱téxumoo̱. ¿Á mjehe̱nu̱u nꞌe̱kꞌiehennú?
\p
\v 20 A̱sꞌa̱i bꞌa̱ i̱ncha kitsú xu̱to̱:
\p —¡Kutsa nda̱nindahá tíjñajihin! ¿Yá xi mjehe̱ tsꞌi̱ínkꞌiehin?
\p
\v 21 Bꞌi̱ kitsú Jesu:
\p —Nku ni kitsꞌian ko̱ ngatentoo̱ kama nkjúnnu̱u.
\v 22 Tsakúyanu̱u Moise nga nꞌe̱tjusun circuncision, ndaha tsa najmi Moise kikꞌatutsꞌi̱hi̱n ra̱ niu̱. Ntje̱ chánu̱u ní kikꞌatutsꞌi̱hi̱n ra̱ niu̱. Kui nga nꞌetjusuhun niu̱ ndaha tsa ni̱stjin nkjún.
\v 23 Bꞌa̱ nꞌoho̱o ntíxꞌi̱nnu̱u ndaha tsa ni̱stjin nkjún tu̱ xi najmi ndyja̱ha kju̱a̱téxumaha̱ Moise. Tu̱nga tsa bꞌa̱ nꞌo nga ni̱stjin nkjúu̱n, ¿á tínꞌekjanko̱honú nga ni̱stjin nkjún kitsꞌinnkíhi̱ ra̱ nku nda̱?
\v 24 Najmi tu̱ kju̱a̱ sunnkꞌa nꞌo. Kixi̱ ní nꞌo̱o kju̱a̱.
\s Bꞌi̱ tsꞌín kinchja̱ni̱jmíyaha xu̱ta̱ yáha Jesu
\p
\v 25 A̱sꞌa̱i bꞌa̱ kitsú kꞌu̱a̱ xu̱ta̱ nanki Jerusalen:
\p —¿A najmi kuihí nda̱i̱ xi mjehe̱ tsꞌi̱ínkꞌiehe̱n jóo̱?
\v 26 Tu̱nga, á tínchja̱ chji chjihi ko̱ najmi chꞌa nkú títsuhu̱ ra̱. ¿A kju̱axi̱hí nga ja kamankjihi̱n já tjíxóo̱ nga kui nda̱i̱ xi kitsú Nti̱a̱ná nga tsꞌi̱ín nibá?\f + \fr 7:26, 27, 31, 41, 42 \ft “Xi kitsꞌín nibá Nti̱a̱ná” tsuhu̱ ra̱ “Cristo̱”.\f*
\v 27 Tu̱nga yanáá má nibáha nda̱i̱. Nkꞌie nga kjꞌu̱a̱í xi Cristo̱, najmi chꞌa sku̱e̱ má ni̱baha.
\p
\v 28 A̱sꞌa̱i ꞌyún kinchja̱ Jesu nga bꞌi̱ tsꞌín tsakúya má ma na̱tsihi̱n ni̱nku̱:
\p —Bꞌa̱ tíbixíún nga yanú ko̱ yo má nibáhana. Tu̱nga najmi kuenta̱na̱há jái̱hina. Tjín xi kitsꞌín nibána. Ko̱ xi kitsꞌín nibána ma nꞌe sꞌejián ni xi tsu. Kui xi najmi yo.
\v 29 Tu̱nga an be yáha, a̱tꞌaha̱ má tíjña nibahana ko̱ kui xi kitsꞌín nibána.
\p
\v 30 A̱sꞌa̱i kama mjehe̱ jóo̱ nga ku̱a̱kjꞌánijéhe̱. Tu̱nga ndahá nku najmi kitsꞌínko̱ho̱, a̱tꞌaha̱ najmi kje̱e bichú chu̱ba̱ha̱.
\v 31 Tu̱nga nkjin xu̱ta̱ xi tíi̱nchajihi̱n xu̱ta̱ nkjiu̱n kisꞌejihi̱n Jesu. Bꞌa̱ kitsúhu̱ xinkjín:
\p —Nkꞌie nga kjꞌu̱a̱í xi Cristo̱, ¿a ꞌyún tsꞌi̱ín sa kju̱a̱nkjún nga nda̱ xuꞌbi̱?
\p
\v 32 Kintꞌé já fariseo̱ ni xi kitsú xu̱to̱ nga kinchja̱ni̱jmíyaha Jesu. A̱sꞌa̱i já na̱ꞌmi kꞌaku̱ ko̱ já fariseo̱ kitsꞌínkji já xi kunntá ni̱nku̱ tu̱ xi ku̱a̱kjꞌánijéhe Jesu.
\v 33 A̱sꞌa̱i bꞌi̱ kitsú Jesu:
\p —Tu̱ chuba ni̱stjihín kúáte̱jñajin sanu̱u ko̱ kfín ngáhana má tíjña xi kitsꞌín nibána.
\v 34 Ku̱i̱nchísjainú tu̱nga najmi ta̱ sa̱kúhu̱nu̱u an. Má nga kfínte̱jña najmi ka̱ma kuankíún.
\p
\v 35 Bꞌa̱ kitsúhu̱ xinkjín já judio̱ kꞌaku̱:
\p —¿Má ngju̱a̱i̱hi̱ nda̱i̱ nga najmi ta̱ sa̱kúhuná? ¿A xu̱ta̱ judio̱ xinki̱á xi tjíntujíhi̱n xu̱ta̱ xi nchja̱ griego̱ ngju̱a̱i̱sehe̱? ¿A ta̱ ku̱a̱kúyaha̱ xi nchja̱ én griego̱?
\v 36 Ni xi kuanchja̱: “Ku̱i̱nchísjainú tu̱nga najmi ta̱ sa̱kúhu̱nu̱u an”, ko̱: “Má nga kfínte̱jña najmi ka̱ma kuankíún”, ¿nkú tsuhu̱ ra̱ ni xi kuatsú?
\s Bꞌi̱ tsꞌín tsakúya Jesu ni xi ka̱maha̱ xu̱ta̱ xi sꞌe̱jihi̱n kui
\p
\v 37 Ni̱stjin xi fekuhu̱ sꞌíu̱, kui xi ꞌyún bꞌasje xu̱ta̱, a̱sꞌa̱i tsasinjña ndju Jesu ko̱ ꞌyún kinchja̱:
\p —Tsa tjín xi tíma xintáha̱, kanibásena ko̱ katꞌi.
\v 38 Bꞌa̱ ka̱maha̱ xi nkú tsꞌín tjítꞌa éhe̱n Nti̱a̱ná. Xi sꞌe̱jihi̱n an ani̱ma̱ha̱ stjújin ntáje̱, ntá xi tsꞌínkꞌíéntu tíkꞌuhu̱n xu̱ta̱.
\p
\v 39 Bꞌa̱ kitsú Jesu nga kinchja̱ni̱jmíyaha Espiri̱tu̱ xi a̱skahan tsꞌi̱ínkjáíhi̱n xu̱ta̱ xi sꞌe̱jihi̱n Jesu. Najmi kje̱e fꞌai Espiri̱tu̱ Santo̱ kui ni̱stjiu̱n, a̱tꞌaha̱ najmi kje̱e sꞌe̱jña chji kju̱a̱chánkaha̱ Jesu.
\p
\v 40 Nkꞌie nga kintꞌé xu̱to̱ éi̱n, kꞌu̱a̱ xi bꞌa̱ kitsú:
\p —Kju̱axi̱ kjáíhin nga kui nda̱i̱ nda̱ profeta̱ xi tjíhin nga kjꞌu̱a̱í.
\p
\v 41 Bꞌa̱ kitsú ngá kꞌu̱a̱:
\p —Kui nda̱i̱ xi kitsú Nti̱a̱ná nga tsꞌi̱ín nibá.
\p Tu̱nga tjín ngá xi bꞌa̱ kitsú:
\p —¿Nkú tsꞌín Galilea̱ ni̱baha xi Cristo̱?
\v 42 ¿A najmi bꞌa̱há tsꞌín tjítꞌa éhe̱n Nti̱a̱ná, nga ntje̱he̱ David ni̱baha̱ ra̱ xi Cristo̱, ko̱ nga Belen ni̱baha, má nga nankihi̱ David?
\p
\v 43 Bꞌa̱ tsꞌín tsakjányaha yjoho̱ xu̱ta̱ na̱nti̱o̱ nga i̱ncha kinchja̱ni̱jmíyaha Jesu.
\v 44 Tjín xi kama mjehe̱ nga ku̱a̱kjꞌánijéhe̱ tu̱nga ndahá nku najmi kitsꞌínko̱ho̱.
\s Bꞌi̱ tsꞌín najmi kisꞌejihi̱n já judio̱ kꞌaku̱ nga Nti̱a̱ná kitsꞌín nibáha̱ Jesu
\p
\v 45 A̱sꞌa̱i já xi kunntá ni̱nku̱ jꞌai ngáha má tjíntu já na̱ꞌmi kꞌaku̱ ko̱ já fariseo̱ ko̱ bꞌi̱ kikꞌihi̱n:
\p —¿Á najmi kjúái̱ko̱honu ndo̱?
\p
\v 46 Bꞌa̱ kitsú jóo̱:
\p —Ndaha nku najmi kje̱e bꞌa̱ tsꞌín nchja̱ xi nkú tsꞌín nchja̱ ndo̱.
\p
\v 47 Bꞌa̱ kitsú já fariseo̱:
\p —¿A ko̱hó jun ta̱ kuakꞌana̱cha̱nu̱u ndo̱?
\v 48 ¿A tjíhín a̱jihi̱n já tjíxóo̱ ko̱ a ra̱ a̱jihi̱n já fariseo̱ xi sꞌejihi̱n Jesu?
\v 49 Tu̱nga xu̱ta̱ xuꞌbi̱ bi, najmi mankjihi̱n kju̱a̱téxumoo̱. Kui xi najmi nda nginku̱n Nti̱a̱ná.
\p
\v 50 A̱sꞌa̱i kinchja̱ Nicodemo̱, nda̱ fariseo̱ xi jꞌaisehe̱ Jesu nga jyuu̱n:
\p
\v 51 —Xi nkú tsꞌín tíjña kju̱a̱téxumaná, títjun tjíhin nga ku̱a̱sinñjuhu̱ú xu̱ta̱ tu̱ xi cha̱haná ni xi kitsꞌín ko̱ a̱skahan nꞌe̱ ra̱á kju̱a̱.
\p
\v 52 Bꞌa̱ kitsú jóo̱:
\p —¿A ta̱ ko̱hó ji xi nibáhani Galilea̱? Nꞌe̱ya nda ndai xu̱ju̱n éhe̱n Nti̱a̱ná ko̱ cha̱i̱ nga ndaha nku nda̱ profeta̱ najmi kje̱e tjujín Galilea̱.
\p
\v 53 A̱sꞌa̱i bꞌi̱ ngján i̱ncha ngji ngáha niꞌyaha̱.
\c 8
\s Bꞌi̱ tsꞌín kichjutꞌayákꞌun Jesu nga jꞌaichꞌáha̱ nku ta̱chju̱ún
\p
\v 1 A̱sꞌa̱i ngji Jesu a̱sunntu tje̱nki̱ xi ꞌmi Yá Olivo̱.
\v 2 Nkꞌie nga ja kama sehe̱n ni̱stjin xi ma ndyjuu̱n, jꞌai ngáha má ma na̱tsihi̱n ni̱nku̱. Yo̱ jꞌaise ṉkjúhu̱n xu̱ta̱ ko̱ yo̱ yꞌejña nga tsakúya.
\v 3 A̱sꞌa̱i i̱ncha jꞌaiko̱ já chji̱ne̱ꞌéhe̱n kju̱a̱téxumoo̱ ko̱ já fariseo̱ nku ta̱chju̱ún xi kiya nga kjꞌa̱í nda̱ kjijñako̱ho̱. Jꞌaisínjña nginku̱n Jesu ko̱ nginku̱n xu̱to̱
\v 4 ko̱ bꞌa̱ kitsú:
\p —Ji nda̱ maestru̱, kuaya ta̱chjíi̱n nga kjꞌa̱í nda̱ kjijñako̱ho̱.
\v 5 Bꞌa̱ tsꞌín yꞌétꞌa Moise kju̱a̱téxumoo̱ nga ndji̱o̱ nꞌe̱kꞌiehen xi bꞌa̱ tsꞌi̱íu̱n. Ji bi, ¿nkú bixín?
\p
\v 6 Tu̱ xi kikjutꞌayákꞌuhún ni Jesu nga bꞌa̱ i̱ncha kitsú, a̱tꞌaha̱ mjehe̱ ku̱a̱téjéne. A̱sꞌa̱i yꞌejñantu Jesu ko̱ na̱jnú ntsja kitsꞌínntuko̱ho tꞌanankiu̱.
\v 7 Nkꞌie nga tu̱ nku tíi̱ncha bjásjaiyahá ra̱ jóo̱, tsasinjña ngáha ko̱ bꞌi̱ kitsú:
\p —Xi najmi tjíhi̱n ngatitsun, kui xi tjun katꞌéhe̱ ndji̱o̱ ta̱chjúu̱n.
\p
\v 8 A̱sꞌa̱i ta̱ yꞌejñantuhú ngáha nga tu̱ nku kitsꞌínntuhú tꞌanankiu̱.
\v 9 Nkꞌie nga kintꞌé jóo̱ éi̱n, nkúnkú bꞌi̱ ngján i̱ncha ngji. Xi ꞌyún cháha̱ tjun ngji. A̱sꞌa̱i tu̱ Jesu ko̱ ta̱chjúu̱n tsinchajin subaha̱ xu̱ta̱.
\v 10 Ta̱ tsasinjña ngáha Jesu ko̱ bꞌi̱ kitsú:
\p —Ji ta̱chju̱ún, ¿má kfihi̱ jóo̱? ¿A ndaha nku najmi ta̱ tíbatéjénehe ri?
\p
\v 11 —Najmi, Chá Nti̱a̱. Ndaha nku —kitsú ta̱chjúu̱n.
\p Bꞌi̱ kitsú Jesu:
\p —Ta̱ ndaha an najmi chumi ni kjaninéhe. Tꞌin ngáhani ko̱ najmi ta̱ nꞌeheni ngatitsun.
\s Bꞌi̱ tsꞌín tsakúya Jesu nga kui xi ndꞌíhi̱ xu̱ta̱
\p
\v 12 A̱sꞌa̱i kinchja̱ko̱ ngáha xu̱to̱:
\p —An ndꞌí xi tsꞌín ndzjehe̱n xu̱ta̱ a̱sunntei̱. Xi tsjénnkina najmi jyun má kꞌúéma. Sꞌe̱he̱ ndꞌí xi tsꞌi̱ínkꞌíéntu tíkꞌuhu̱n.
\p
\v 13 A̱sꞌa̱i bꞌa̱ i̱ncha kitsú já fariseo̱:
\p —Ji tíꞌmi su̱ba̱i̱ kju̱a̱nda yjohi̱. Kui nga najmi chjíhi̱ ra̱ én xi tíchubahani.
\p
\v 14 Bꞌi̱ kitsú Jesu nga kinchja̱:
\p —Ta̱ ndaha tsa an tífi su̱ba̱ha̱ ra̱ kju̱a̱nda yjona̱, tu̱nga chjíhi̱ ra̱ én xi tínchja, a̱tꞌaha̱ be má nibahana ko̱ má kfín ngáhana. Jun najmi yo má nibáhana ko̱ najmi yo má kfín ngáhana.
\v 15 Jun bi, xi nkú tsꞌín tíjñaha̱ a̱sunntei̱, bꞌa̱ tsꞌín chasoho̱o ni xi nda ko̱ ni xi najmi nda, tu̱nga an najmi basjehe̱ ni xi nda ko̱ ni xi najmi nda tsꞌín xu̱ta̱.
\v 16 Tu̱nga tsa ni xi bꞌa̱ tsꞌihinna, kixi̱ tsꞌian, a̱tꞌaha̱ najmi kuenta̱na̱ bꞌa̱ tsꞌihinna. Na̱ꞌmi xi kitsꞌín nibá nína bꞌa̱ tsꞌinka̱.
\v 17 Santaha kju̱a̱téxumanu̱u bꞌa̱ tsꞌín tjítꞌa: Tsa jo já ku̱i̱tsu̱ya nku ni, chjíhi̱ ra̱ ni xi ku̱i̱tsu̱ jóo̱.
\v 18 An tífihi̱ ra̱ kju̱a̱nda yjona̱ ko̱ Na̱ꞌmina̱ xi kitsꞌín nibána ta̱ tífina kju̱a̱nda.
\p
\v 19 Bꞌa̱ kitsú jóo̱:
\p —¿Má tíjña Na̱ꞌmihi̱?
\p Bꞌi̱ kitsú Jesu:
\p —Najmi yanú ko̱ ta̱ ndaha najmi yo Na̱ꞌmina̱. Tsa yanú, ta̱ cha̱ ru̱u Na̱ꞌmina̱.
\p
\v 20 Bꞌa̱ tsꞌín kinchja̱ nga tsakúya má ma na̱tsihi̱n ni̱nku̱, má tíjña kaxa̱ha̱ to̱on chje̱. Ndaha nku najmi jakjꞌánijéhe̱, a̱tꞌaha̱ najmi kje̱e bichú chu̱ba̱ha̱.
\s Bꞌi̱ tsꞌín tsakúya Jesu nga najmi a̱sunntee̱ tje̱he̱n ra̱
\p
\v 21 A̱sꞌa̱i ta̱ kinchja̱há ngáha:
\p —An kfíán ko̱ ku̱i̱nchísjainú. A̱jihi̱n ngatitsunnu̱u ku̱a̱yájiun nga najmi ta̱ tíi̱jñahana. Má nga kfíán najmi ka̱ma kuankíún.
\p
\v 22 Bꞌa̱ kitsú já judio̱ kꞌaku̱:
\p —¿A tsꞌi̱ínkꞌien subahá yjoho̱? ¿Á: “má nga kfíán najmi ka̱ma kuankíún”, títsuhu?
\p
\v 23 Bꞌi̱ kitsú Jesu:
\p —Kintei̱ tsꞌa̱jun, nkꞌa ján tsꞌa̱n. A̱sunntei̱ tje̱he̱nnu̱u, nkꞌa ján tje̱he̱nna.
\v 24 Tsa najmi sꞌe̱jinnu̱u nga an xi tíi̱jña, ngatitsunnu̱u ku̱a̱yájiun. Kui kju̱a̱ha nga bꞌa̱ kuaxihi̱nnu̱u na̱ndꞌa̱i̱ nga ngatitsunnu̱u ku̱a̱yájiun.
\p
\v 25 —¿Yáha ji? —kitsú jóo̱.
\p Bꞌi̱ kitsú Jesu:
\p —Xi ja kixinnu̱u nga tutsꞌihi̱n ni.
\v 26 Benu̱u. Ka̱ma xínya xi nkú tsꞌín tjíntuyánu̱u. Ka̱ma xínya má nihi xi nda ko̱ má nihi xi najmi nda tínꞌo. Tu̱nga xi kitsꞌín nibána, kui xi ma nꞌe sꞌejián ni xi tsu. Ko̱ ni xi kintꞌe nga kinchja̱, kui xi tínchja ngáhana a̱sunntei̱.
\p
\v 27 Tu̱nga najmi kamankjihín ra̱ jóo̱ nga Nti̱a̱ Na̱ꞌmiu̱ kinchja̱ni̱jmíyaha.
\v 28 Kui nga bꞌi̱hí ta̱ kitsú ngáha Jesu:
\p —Nkꞌie nga chjúsíntje̱nnkꞌo Ntíhi̱ Nda̱xꞌi̱u̱n, nkꞌiehé nga ka̱mankjinnu̱u nga an xi tíi̱jña ko̱ nga ndaha nku ni najmi tsꞌian kuenta̱na̱. Xi nkú tsꞌín tsakúyana Na̱ꞌmina̱, kui nihi xi tínchja.
\v 29 Xi kitsꞌín nibána tíjñako̱na. Najmi bꞌéjña subana, a̱tꞌaha̱ tsꞌintjusun tehe̱nte ni xi sasíhi̱n.
\p
\v 30 Nkꞌie nga bꞌa̱ kitsú, nkjin ṉkjún xi kisꞌejihi̱n Jesu.
\s Bꞌi̱ tsꞌín tsakúya Jesu yá xi ntíhi̱ Nti̱a̱ná
\p
\v 31 A̱sꞌa̱i kinchja̱ko̱ xu̱ta̱ judio̱ xi kisꞌejihi̱n:
\p —Tsa ku̱i̱ntsu̱ba̱jiun énna̱, kju̱axi̱ nga ka̱mo xu̱ta̱ niꞌyakuyána̱
\v 32 ko̱ cho̱o ni xi na̱xu̱ tjín ko̱ kui niu̱ xi tsꞌi̱ín nda̱ínu̱u.
\p
\v 33 Bꞌa̱ kitsú jóo̱:
\p —Ntje̱he̱ Abraham ji̱n. Ndaha nku najmi kje̱e tsꞌín mani̱ xu̱ta̱ musu, tsa tsꞌatseni̱. ¿Nkú tsꞌín bꞌa̱ tíbixíhinni nga ka̱ma nda̱íhi̱ni̱?
\p
\v 34 Bꞌi̱hí ta̱ kitsú ngáha Jesu:
\p —Kju̱axi̱ ni xi tíxinnu̱u. Ngayjee̱ xi títsꞌín ngatitsun, ngaꞌyúhu̱n ngatitsuu̱n tíjñajin. Najmi nda̱íhi̱ yjoho̱.
\v 35 Nku nda̱ musu̱ xi kichꞌatse najmi nda̱íhi̱ yjoho̱, ndaha tsa niꞌyaha̱ nda̱ nti̱a̱ha̱ tsꞌínxá. Tu̱nga ntíhi̱ ní nda nti̱a̱ha̱ ka̱ma tsꞌe̱ niꞌyoo̱.
\v 36 Kui nga tsa Ntíhi̱ Nti̱a̱ná tsꞌi̱ín nda̱ínu̱u, kju̱axi̱ nga ka̱ma nda̱ínu̱u.
\v 37 Be nga ntje̱he̱ Abraham nibáhanu, tu̱nga mjehénu̱u nꞌe̱kꞌiennú a̱tꞌaha̱ najmi mjenu̱u nꞌe̱kjóho̱on énna̱.
\v 38 An nchja ni xi bakúchjina Na̱ꞌmina̱. Jun bi, nꞌo ni xi bakúyanu̱u na̱ꞌminu̱u.
\p
\v 39 Bꞌa̱ kitsú jóo̱:
\p —Abraham na̱ꞌmini̱.
\p Bꞌi̱ kitsú Jesu:
\p —Tsa ntíhi̱ Abraham jun, bꞌa̱ ra̱ nꞌo̱o xi nkú kitsꞌín Abraham.
\v 40 Tu̱nga ndꞌa̱i̱ mjenu̱u nꞌe̱kꞌiennú, ndaha tsa tíxinyanu̱u ni xi na̱xu̱ tjín xi tsakúyana Nti̱a̱ná. Ndaha̱chí najmi bꞌa̱ kitsꞌín Abraham.
\v 41 Jun bi, ni xi tsꞌíhín na̱ꞌminu̱u nꞌo.
\p Bꞌa̱ kitsú jóo̱:
\p —Ntí nda níi̱. Tíjñaháni̱ nku na̱ꞌmi nku tutu. Kui xi Nti̱a̱ná.
\p
\v 42 Bꞌi̱ kitsú Jesu:
\p —Tsa Nti̱a̱ná xi na̱ꞌminu̱u, jun ra̱ xi nꞌe̱tjónú, a̱tꞌaha̱ má tíjña Nti̱a̱ná nibahana. Najmi kuenta̱na̱ jái̱hina. Kui ní xi kitsꞌín nibána.
\v 43 Najmi mankjinnu̱u ni xi tínchja a̱tꞌaha̱ najmi mjenu̱u ku̱a̱sinñjuhu̱u énna̱.
\v 44 Nda̱nindoo̱ ní na̱ꞌminu̱u. Kui tsꞌe̱nu̱u ko̱ mjenu̱u nꞌo̱o xi nkú tsꞌín mjehe̱. Kui xi santaha nga tutsꞌihi̱n ni kitsꞌínkꞌien xu̱ta̱. Najmi yꞌejñajin ni xi na̱xu̱ tjín, a̱tꞌaha̱ najmi tíjñajihi̱n ni xi na̱xu̱. Nkú tsꞌín tjíyaha̱, bꞌa̱ tsꞌín nchja̱. Én tsankꞌá nchja̱. Kui xi tsankꞌá ko̱ na̱ꞌmihi̱ én tsankꞌóo̱.
\p
\v 45 ’An bi, ni xi na̱xu̱ tínchja. Kui kju̱a̱ha nga najmi tísꞌejihi̱nnu̱u an.
\v 46 ¿A tjín a̱jinnu̱u xi ka̱ma ku̱a̱kúchji nga tjínna ngatitsun? Tu̱nga tsa na̱xu̱ tjín ni xi tínchja, ¿á najmi sꞌejihi̱nnu̱u an?
\v 47 Xi Nti̱a̱ná tsꞌe̱he̱ mjéñjuhu̱ én xi tsꞌe̱ Nti̱a̱ná. Tu̱nga najmi Nti̱a̱náhá tsꞌe̱nu̱u. Kui kju̱a̱ha nga najmi mjeñjúhunú.
\p
\v 48 Bꞌa̱ kitsú já judio̱:
\p —Kju̱axi̱hí ni xi tíbixíi̱n. Samari̱a̱ nibáhani. Nda̱nindoo̱ tíjñajihin.
\p
\v 49 Bꞌi̱ kitsú Jesu:
\p —Najmi nda̱nindoo̱ tíjñajinna. Benkján Na̱ꞌmina̱ tu̱nga jun najmi tíyankjúnnú.
\v 50 Najmi kju̱a̱chánka tíbangisja nginku̱n xu̱ta̱, tu̱nga tíjñahá xi tíbangisjai kju̱a̱chánkana̱. Kui xi ku̱i̱tsu̱ya yá xi na̱xu̱ títsꞌín.
\v 51 Kju̱axi̱ ni xi tíxinnu̱u. Xi kꞌúéjñajin énna̱, najmi tsꞌi̱ínkjáíhi̱n ngabayoo̱.
\p
\v 52 Bꞌa̱há ta̱ kitsú ngáha já judio̱:
\p —Kju̱axi̱hí nga nda̱nindoo̱ tíjñajihin. Abraham ko̱ já profeta̱ ta̱ kꞌien. Tu̱nga ji bꞌa̱ tíbixín nga najmi tsꞌi̱ínkjáíhi̱n ngabayoo̱ xi kꞌúéjñajin éhi̱n.
\v 53 ¿A ꞌyún chánka sai nga Abraham xi ntje̱ cháná? Kui xi ta̱ kꞌien ko̱ já profeta̱. ¿Yá xi tínꞌe mai yjohi̱?
\p
\v 54 Bꞌi̱ kitsú Jesu:
\p —Tsa an su̱ba̱ chánka tíbꞌasje yjona̱, najmi chumi ni chjíhi̱ ra̱ kju̱a̱chánka xi tísakúna. Tu̱nga Na̱ꞌmina̱há xi chánka tíbꞌasjena, kui xi ta̱ Nti̱a̱ ꞌmihu̱u.
\v 55 Kui xi najmi yo, tu̱nga máha an, be. Tsa bꞌa̱ xínnu̱u nga najmi be, ta̱ nda̱ tsankꞌá ka̱ma xi nkúhu jun. Tu̱nga bená ko̱ tíi̱jñajian éhe̱n.
\v 56 Tsjo kamaha̱ Abraham xi ntje̱ chánu̱u nga sku̱e̱ ni̱stjin nga kjúa̱. Kikie kjáíhin ko̱ tsjo kamaha̱.
\p
\v 57 Bꞌa̱ kitsú já judio̱:
\p —Ndaha najmi kje̱e tjíhin cháte nú nga bꞌa̱ tíbixín. ¿Nkú tsꞌín nga kiyahani Abraham?
\p
\v 58 Bꞌi̱ kitsú Jesu:
\p —Kju̱axi̱ ni xi tíxinnu̱u. Kintehe̱ ni nga tsín Abraham, tu̱ bꞌa̱ tsꞌín jahá tíi̱jña.
\p
\v 59 A̱sꞌa̱i jakjꞌá ndji̱o̱ jóo̱ xi má nga mjehe̱ tsꞌi̱ínkꞌiehe̱n, tu̱nga Jesu ngji tꞌaxíhi̱n jóo̱ ko̱ tsitju má ma na̱tsihi̱n ni̱nku̱.
\c 9
\s Bꞌi̱ tsꞌín kitsꞌínnkihi̱ Jesu nku nda̱ ka̱
\p
\v 1 Má xi tje̱hen jꞌa Jesu, kikie nku nda̱ xi tu̱ bꞌa̱ tsꞌín ka̱há nkúhu nga kitsin.
\v 2 A̱sꞌa̱i kingjásjaiya já niꞌyakuyáha̱:
\p —Ji nda̱ maestru̱, ¿yá xi kitsꞌín ngatitsun tu̱ xi bꞌa̱ tsꞌín ka̱ kitsihin nda̱i̱? ¿A kui, a ra̱ xi cháha̱ ní?
\p
\v 3 Bꞌi̱ kitsú Jesu:
\p —Ta̱ ndaha kui ko̱ ta̱ ndaha xi cháha̱ najmi kitsꞌín ngatitsun nga bꞌa̱ kamoo̱. Bꞌa̱ tsꞌín kitsin tu̱ xi sa̱kúchjihi ni xi maha̱ tsꞌín Nti̱a̱ná.
\v 4 Tjíhin nga nꞌe̱é xá xi tsꞌe̱ xi kitsꞌín nibána nkꞌie nga ndzjen sa. A̱tꞌaha̱ nga ka̱ma jyun, najmi ta̱ chꞌa ka̱ma tsꞌi̱ínxá saha.
\v 5 Nkꞌie nga tíi̱jña a̱sunntei̱, an xi ndꞌí xi tsꞌín ndzjehe̱n xu̱ta̱ a̱sunntei̱.
\p
\v 6 Bꞌa̱ kitsú Jesu, a̱sꞌa̱i tsatété tꞌanankiu̱ ko̱ ntá na̱téhe̱ kitsꞌínndako̱ho si. Kui xi kingjájnuhu̱ tunku̱n ndo̱ ko̱ bꞌi̱ kitsúhu̱:
\p
\v 7 —Tꞌihi̱nnejnui tunkuin ntá ti̱xa̱ Siloe.\f + \fr 9:7 \ft “Xi kinꞌe nibá” tsuhu̱ ra̱ “Siloe”.\f*
\p Kui nga ngjinéjnuhu tunku̱n ndo̱. Ja chjihi̱ nkꞌie nga kikꞌóya ngáha.
\v 8 A̱sꞌa̱i já xi nda nchja̱ko̱ho̱ ko̱ já xi kikiehe̱ nga banki to̱on kinchja̱ni̱jmíyaha ndo̱. Bꞌa̱ kitsú kꞌu̱a̱:
\p —¿A najmi kuihí nda̱i̱ xi bꞌejña nga banki to̱on?
\p
\v 9 —Joho̱n, kui —kitsú kꞌu̱a̱.
\p —Najmi kui, tu̱nga bꞌa̱ tjín xi kuihí tjín —kitsú ngá kjꞌa̱í.
\p —Ahán niu̱ —kitsú ndo̱.
\p
\v 10 —¿Nkú tsꞌín tsixꞌánkihi tunkuin? —kitsú jóo̱.
\p
\v 11 Bꞌa̱ kitsú ndo̱:
\p —Nda̱ xi ꞌmi Jesu kuatsꞌínnda si ko̱ kuangjájnuhu̱ tunkán ko̱ bꞌi̱ kuatsúna: “Tꞌin ntá ti̱xa̱ Siloe ko̱ ta̱nejnui tunkuin.” Kui nga kfihina ko̱ nkꞌie nga kuakanejná tunkán, kama chjina.
\p
\v 12 —¿Má tíjña ndo̱? —kitsú jóo̱.
\p —Najmi be —kitsú ndo̱.
\p
\v 13 A̱sꞌa̱i ngjiko̱ho̱ jóo̱ nda̱ xi kama chjihi̱ nginku̱n já fariseo̱.
\v 14 Ni̱stjin nga kitsꞌínnda siu̱ Jesu ko̱ tsixꞌánki tunku̱n ndo̱, kui xi ni̱stjin nkjún. Xua̱tu̱ niu̱.
\v 15 Kui nga já fariseo̱ kingjásjaiyaha̱ ra̱ nkú tsꞌín kama chjihi̱ ra̱ ko̱ bꞌa̱ kitsú ndo̱:
\p —Si kuangjájnuhu̱ tunkán, kuakanejná, ko̱ kama chjina.
\p
\v 16 A̱sꞌa̱i bꞌa̱ kitsú kꞌu̱a̱ já fariseo̱:
\p —Najmi Nti̱a̱ná kitsꞌín nibáha̱ nda̱ xi bꞌa̱ kuatsꞌíu̱n, a̱tꞌaha̱ najmi benkjún ni̱stjin nkjúu̱n.
\p Bꞌa̱ kitsú ngá kꞌu̱a̱:
\p —¿Nkú tsꞌín nku nda̱ ngatitsun ka̱ma tsꞌi̱íhin kju̱a̱nkjún xi nkúhu xuꞌbi̱?
\p Bꞌa̱ tsꞌín tsakjányaha yjoho̱ já fariseo̱ nga̱tꞌaha̱ Jesu.
\v 17 A̱sꞌa̱i ta̱ i̱ncha kingjásjaiyahá ngáha̱ ra̱ nda̱ xi kama chjihi̱:
\p —Ko̱ ji xi kuixꞌánki tunkuin, ¿yáha ndo̱? ¿Nkú bixín?
\p —Nda̱ profeta̱ niu̱ —kitsú.
\p
\v 18 Tu̱nga najmi kisꞌejihín ra̱ já judio̱ kꞌaku̱ tsa kui ndo̱ xi ka̱ nkꞌie ko̱ tsa kui xi ja chji ngáha̱ ra̱. Kui nga kinchja̱ha̱ ra̱ xi cháha̱
\v 19 ko̱ kingjásjaiyaha̱:
\p —¿A kui ntínu̱u xuꞌbi̱ xi bixíún nga ka̱ nga kitsin? ¿Nkú tsꞌín kama chjihi̱ ra̱?
\p
\v 20 Bꞌa̱ kitsú xi cháha̱ ndo̱:
\p —Yai̱ nga kui xi ntíni̱ ko̱ ka̱ nga kitsin.
\v 21 Tu̱nga najmi yaníi̱ nkú tsꞌín kama chjihi̱ ra̱. Najmi yai̱ yá xi kuakjexꞌánki tunku̱n. Tu̱ sahá kui cha̱sjaiyoho̱o. Ja chá. Ka̱ma ku̱i̱tsu̱ya subanu̱u ni xi kamatꞌain.
\p
\v 22 Bꞌa̱ kitsú xi cháha̱ ndo̱ a̱tꞌaha̱ tsankjún já judio̱ kꞌaku̱. A̱tꞌaha̱ yꞌéndako̱ xinkjín já judio̱ kꞌaku̱ tsa tjín xi tsꞌi̱ínkie yjoho̱ nga Jesu xi kitsꞌín nibá Nti̱a̱ná,\f + \fr 9.22 \ft “Xi kitsꞌín nibá Nti̱a̱ná” tsuhu̱ ra̱ “Mesia̱” nga én hebreo̱ ko̱ “Cristo̱” nga én griego̱.\f* kui xi ku̱i̱chꞌonsje a̱jihi̱n xu̱ta̱ sinagoga̱.
\v 23 Kui kju̱a̱ha nga: “Cha̱sjaiyoho̱o, ja chá”, kitsúhu xi cháha̱ ndo̱.
\p
\v 24 A̱sꞌa̱i ta̱ kinchja̱há ngáha̱ ra̱ ni̱yá xi ma joho já judio̱ kꞌaku̱ nda̱ xi kama chjihi̱ ko̱ bꞌa̱ kitsúhu̱:
\p —Yai̱ nga nda̱ ngatitsuhún xi kuatsꞌínnkihi. Nꞌe̱kiei yjohi̱ nginku̱n Nti̱a̱ná xi tjíhi̱n kju̱a̱chánka nga kju̱axi̱ ni xi tíbixín.
\p
\v 25 Bꞌa̱ kitsú ndo̱:
\p —Tsa nku nda̱ ngatitsun niu̱ najmi be. Tu̱ nkuhú ni xi be. Ka̱ná ni̱stjin nkꞌie tu̱nga ndꞌa̱i̱ ja chjina.
\p
\v 26 Bꞌa̱ kitsú jóo̱:
\p —¿Mí xi kuatsꞌíhin? ¿Nkú tsꞌín kuakjexꞌánkihi tunkuin?
\p
\v 27 A̱sꞌa̱i bꞌa̱ kitsú ndo̱:
\p —Ja kuaxinyanu̱u tu̱nga najmi tínꞌesihínnú. ¿Á mjehe̱nu̱u nga bꞌa̱há ta̱ xín ngáha̱nu̱u? ¿A ko̱hó jun mjenu̱u ka̱mo já niꞌyakuyáha̱ ndo̱?
\p
\v 28 Bꞌa̱ kitsú jóo̱ nga kinchja̱tiko̱:
\p —Nda̱ niꞌyakuyáha̱ ní ndo̱ ji. Tu̱nga ji̱n já niꞌyakuyáha̱ ní Moise ji̱n.
\v 29 Yai̱ nga Moise kinchja̱ én xi Nti̱a̱ná kitsúyaha̱, tu̱nga najmi ya níi̱ má jꞌaihi̱ ra̱ nda̱ xuꞌbo̱.
\p
\v 30 A̱sꞌa̱i bꞌi̱ kitsú ndo̱:
\p —Ma nkjúnna nga najmi yo má jꞌaihi̱ ra̱ nda̱ xi kamaha̱ kuakjexꞌánki tunkán.
\v 31 Yaá nga Nti̱a̱ná najmi basínñjuhu̱ xu̱ta̱ ngatitsuu̱n. Tsa tjín xi sku̱e̱nkjún Nti̱a̱ná ko̱ tsꞌi̱ín ni xi mjehe̱, kuihí xi basínñjuhu̱.
\v 32 Ndaha̱chí najmi kje̱e nuꞌyá tsa tjín xi kjexꞌánki tunku̱n xu̱ta̱ xi ka̱ nga kitsin.
\v 33 Tsa najmi Nti̱a̱ná kitsꞌín nibáha̱ nda̱ xuꞌbo̱, najmi chumi nihi xi ka̱maha̱ ra̱ tsꞌi̱ín.
\p
\v 34 Bꞌi̱ kitsú jóo̱ nga tsichꞌonsje ndo̱ a̱jihi̱n xu̱ta̱ sinagoga̱:
\p —Ngatitsun kitsinjín. ¿A jihí xi ku̱a̱kúyani̱?
\p
\v 35 Kintꞌé Jesu nga tsichꞌonsje ndo̱. Bꞌi̱ kitsúhu̱ nkꞌie nga kisatéjin ngáha:
\p —¿A sꞌejihin Ntíhi̱ Nda̱xꞌi̱u̱n?
\p
\v 36 —Ji Nda̱ Nti̱a̱ —kitsú ndo̱—, ¿yáha xuꞌbo̱, tu̱ xi sꞌe̱jihinna?
\p
\v 37 Bꞌi̱ kitsú Jesu:
\p —Ja kuayai. An ní niu̱, an xi tínchjako̱hi.
\p
\v 38 —Sꞌejinna ji, Nda̱ Nti̱a̱ —kitsú ndo̱ ko̱ tsasinkúnchꞌintꞌaha̱ Jesu.
\p
\v 39 A̱sꞌa̱i bꞌi̱ kitsú Jesu:
\p —An jáa̱ a̱sunntei̱ tu̱ xi nꞌe̱ko̱kju̱a̱ha, tu̱ xi ka̱ma chjihi̱ ra̱ xi ka̱ ko̱ ka̱ma ka̱ xi chjihi̱.
\p
\v 40 Ta̱ kintꞌé éi̱n kꞌu̱a̱ já fariseo̱ xi tíi̱nchako̱ Jesu ko̱ bꞌa̱ kitsúhu̱:
\p —¿A ko̱hó ji̱n xi ta̱ ka̱i̱?
\p
\v 41 Bꞌi̱ kitsú Jesu:
\p —Tsa ni xi ka̱hanu, najmi tjínnu̱u jé kai. Tu̱nga bꞌa̱há tíbixínnú nga chjinu̱u. Kuihí kju̱a̱ha nga tjíhi̱nnu̱u jé.
\c 10
\s Bꞌi̱ tsꞌín tsakúya Jesu nga kitsꞌínchjén nku nda̱ bastu ko̱ chu̱tsanka̱ha̱
\p
\v 1 Bꞌi̱ tsꞌín kinchja̱ Jesu:
\p —Kju̱axi̱ ni xi tíxinnu̱u. Tu̱ yáhá ni xi najmi kju̱a̱sꞌen a̱nkju̱a̱ niꞌyaha̱ chu̱tsa̱nko̱ nga tu̱ sahá xin kju̱a̱sꞌenntjai, kui xi nda̱ ndyjé xi mjehe̱ ngju̱a̱i̱ko̱ chu̱tsa̱nko̱.
\v 2 Tu̱nga xi kju̱a̱sꞌen má tje̱n a̱nkju̱o̱, kui xi nda̱ bastuhu̱ chu̱tsa̱nko̱.
\v 3 Kjexꞌá nda̱ xi basehe̱ a̱nkju̱o̱ nkꞌie nga be nda̱ bastuu̱. Chu̱tsa̱nka̱ xi tsꞌe̱ ntꞌé nta̱ha̱, ko̱ nga nkúnkú chu̱tsa̱nka̱ha̱ jꞌáíhi̱n nchja̱ha̱ ra̱ nga bitjuko̱ niꞌyoo̱.
\v 4 Nkꞌie nga bitjuko̱ ngayjee̱ chu̱tsa̱nka̱ xi tsꞌe̱, a̱sꞌa̱i tsjen títjuhu̱n ko̱ chu̱tsa̱nko̱ tsjennkíhi̱ a̱tꞌaha̱ be nta̱ha̱.
\v 5 Chu̱ xi tsꞌe̱ najmi tsjennkíhi̱ xu̱ta̱ xi kjꞌa̱í. Tu̱ sahá banka, a̱tꞌaha̱ najmi be nta̱ha̱ xu̱ta̱ xi kjꞌa̱í.
\p
\v 6 Bꞌa̱ kitsú Jesu nga yꞌéjña chu̱ba̱ya ni xuꞌbi̱. Tu̱nga najmi kamankjihín ra̱ xu̱ta̱ ni xi kinchja̱.
\s Bꞌi̱ tsꞌín tsakúya Jesu nga kui xi nda̱ bastu xi ndoo̱
\p
\v 7 A̱sꞌa̱i bꞌa̱há ta̱ kitsú ngáha Jesu:
\p —Kju̱axi̱ ni xi tíxinnu̱u. An xi nkú joyaha a̱nkju̱a̱ má nga fasꞌen chu̱tsa̱nko̱.
\v 8 Ngayjee̱ já xi jꞌai títjun nga an, kui xi já ndyjé xi kama mjehe̱ nga ngju̱a̱i̱ko̱ chu̱tsa̱nko̱. Tu̱nga najmi kintꞌéhé chu̱tsa̱nko̱ nta̱ha̱ jóo̱.
\v 9 An xi nkú joyaha a̱nkju̱o̱. Xu̱ta̱ xi kju̱a̱sꞌenjinna kꞌu̱a̱nki. Kui xi ka̱ma xi nkú joyaha chu̱tsa̱nka̱ xi fasꞌen ko̱ bitju niꞌyaha̱ nga fi kjine jñá.
\p
\v 10 ’Nda̱ ndyjée̱ fꞌai tu̱ xi fiko̱ho ko̱ tsꞌínkꞌien ko̱ tsꞌínkje chu̱tsa̱nko̱. Tu̱nga ahán jáa̱ tu̱ xi ka̱ma kꞌúéntu tíkꞌuhun xu̱ta̱, tu̱ xi sa̱kúhu̱ ra̱ kju̱a̱tíkꞌun xi ndoo̱.
\v 11 An xi nda̱ bastu xi ndoo̱, ko̱ nda̱ bastu xi ndoo̱ tsjá yjoho̱ nga ku̱a̱yántjaihi chu̱tsa̱nka̱ha̱.
\v 12 Nda̱ xi tu̱ to̱ohón tsꞌínxántjaihi, xi najmi kui tsꞌe̱ xóo̱ ko̱ najmi kui tsꞌe̱ chu̱tsa̱nko̱, kui xi binchá masen chu̱tsa̱nko̱ ko̱ banka nkꞌie nga be nga nibá chu̱ kjoo̱n. A̱sꞌa̱i chu̱ kjoo̱n kjine chu̱tsa̱nko̱ ko̱ tsꞌínndzjoya.
\v 13 Bꞌa̱ tsꞌín bankaha ndo̱ a̱tꞌaha̱ tu̱ to̱ohón tsꞌínxántjaihi ko̱ najmi nkjún maha̱ chu̱tsa̱nko̱.
\p
\v 14 ’An xi nda̱ bastu xi ndoo̱. Be chu̱tsa̱nka̱na̱ ko̱ ta̱ bena,
\v 15 xi nkú tsꞌín bena Nti̱a̱ Na̱ꞌmiu̱ ko̱ an be Nti̱a̱ Na̱ꞌmiu̱. Tsja yjona̱ nga ku̱a̱yántjaihina chu̱tsa̱nko̱.
\v 16 Tíi̱ncha sana kjꞌa̱í chu̱tsa̱nka̱ xi najmi tíi̱ncha nchꞌá xuꞌbi̱. Kui xi ta̱ tjíhin nga kjúái̱ka̱. Ku̱i̱ntꞌé nta̱na̱. Bꞌa̱ tsꞌín nku stíhín ka̱maha ko̱ nkuhú nda̱ bastu xi ku̱a̱se̱he̱.
\p
\v 17 ’Kui kju̱a̱i̱ nga tjoho̱ ra̱ an Nti̱a̱ Na̱ꞌmiu̱. Tsja yjona̱ nga ku̱a̱yá tu̱ xi kjꞌu̱a̱íya ngáhana.
\v 18 Najmi chꞌa ka̱ma kjéꞌana nga tíi̱jña tíkꞌan. An ní tsja su̱ba̱ yjona̱ nga ku̱a̱yá. Tjínna ngaꞌyún xi má nga tsja yjona̱ ko̱ ta̱ tjínna ngaꞌyún nga kúáte̱jña tíkꞌun ngáhana. Kui xái̱ xi kitsjána Na̱ꞌmina̱ nga tsꞌian.
\p
\v 19 Nkꞌie nga kintꞌé jóo̱ éi̱n, a̱sꞌa̱i ta̱ tsakjányahá ngáha yjoho̱. Nkjin xi bꞌa̱ kitsú:
\p
\v 20 —Nda̱nindahá tíjñajihi̱n ndo̱ ko̱ luku̱. ¿Á jun tíbasinñjuhu̱ru̱u?
\p
\v 21 Bꞌa̱ kitsú ngá kꞌu̱a̱:
\p —Najmi bꞌa̱ tsꞌín ku̱i̱nchja̱ xi tíjñajihi̱n nda̱nindoo̱. ¿A ka̱mahá ra̱ nda̱nindoo̱ kjéxꞌánki tunku̱n xu̱ta̱ ka̱?
\s Bꞌi̱ tsꞌín najmi kisꞌejihi̱n já judio̱ kꞌaku yáha Jesu
\p
\v 22 Nkꞌie nga ni̱stjin chu̱nchꞌóo̱n, nanki Jerusalen tíi̱ncha bꞌasje sꞌí xu̱ta̱ nga tíi̱ncha tsꞌínkjꞌáítsjen ni̱stjin nkꞌie nga kisꞌejña chji ni̱nku̱ nginku̱n Nti̱a̱ná.
\v 23 Kikjatsúꞌba Jesu má ma na̱tsihi̱n ni̱nku̱ xi tje̱hen má nga ꞌmi Kinte Niꞌyaha̱ Salomon.
\v 24 A̱sꞌa̱i yꞌétjindaihi̱ jóo̱ ko̱ bꞌa̱ kitsúhu̱:
\p —¿Nkú tjín ni̱stjin nꞌe̱sti sani̱? Tsa kju̱axi̱ nga ji xi kitsꞌín nibá Nti̱a̱ná, tꞌinya kixi̱ kixi̱ni̱ ndꞌa̱i̱.
\p
\v 25 Bꞌi̱ kitsú Jesu:
\p —Ja bꞌa̱ kixinnu̱u tu̱nga najmi kisꞌejihínnu̱u. Ni xi títsꞌian ngajoho̱ Na̱ꞌmina̱, tíbakúchji yáha an.
\v 26 Tu̱nga najmi sꞌejihínnu̱u a̱tꞌaha̱ najmi chu̱tsa̱nka̱na̱ jun.
\v 27 Chu̱tsa̱nka̱na̱ ntꞌé nta̱na̱. An be chu̱tsa̱nka̱na̱ ko̱ tsjennkína.
\v 28 An tsꞌinkꞌíéntu tíkꞌun síán. Najmi ka̱ma ndyja̱ ko̱ najmi chꞌa xi kjéꞌana a̱ya ntsa̱.
\v 29 Na̱ꞌmina̱ kitsjána chu̱tsa̱nko̱ ko̱ kui xi ꞌyún chánka nga tu̱ yáhá ni. Ndaha nku najmi ka̱maha̱ kjéꞌaha̱ chu̱tsa̱nka̱ xi tjíntu a̱ya ntsja.
\v 30 Na̱ꞌmiu̱ ko̱ an nkuhú maha̱ni̱.
\p
\v 31 Nkꞌie nga kintꞌé éi̱n já judio̱ kꞌaku̱, a̱sꞌa̱i ta̱ jakjꞌá ngáha ndji̱o̱ nga mjehe̱ tsꞌi̱ínkꞌien Jesu.
\v 32 Bꞌi̱ kitsú Jesu nga kinchja̱:
\p —Nkjin ṉkjún ni xi nda kitsꞌian a̱jinnu̱u, xá xi kitsjána Na̱ꞌmina̱. ¿Má nga̱tꞌaha̱ mjehe̱nu̱u kꞌúéhenú ndji̱o̱?
\p
\v 33 A̱sꞌa̱i bꞌi̱ kitsú jóo̱:
\p —Najmi nga̱tꞌaha̱ ni nda xi kinꞌei. Tu̱ nga̱tꞌaha̱ ní nga najmi tíyankjúín Nti̱a̱ná nga bꞌa̱ tíbixín. Kui kju̱a̱ha nga ndji̱o̱ sꞌe̱he ri. Nda̱ a̱sunnte ní, tu̱nga Nti̱a̱náhá tínꞌe mai yjohi̱.
\p
\v 34 Bꞌi̱ kitsú Jesu:
\p —Kju̱a̱téxumanu̱u tjítꞌa má nga bꞌa̱ kitsú Nti̱a̱ná nga kinchja̱ko̱ xu̱ta̱: “Nti̱a̱nú kixinnu̱u.”
\v 35 Bꞌa̱ tsꞌín Nti̱a̱ná bꞌa̱ kitsúhu nga nti̱a̱ xu̱ta̱ xi tsichukꞌúhu̱n éhe̱n. Ko̱ yaá nga chjíhi̱ ra̱ ngayjee̱ ni xi tjítꞌa éhe̱n Nti̱a̱ná.
\v 36 An bi, Nti̱a̱ Na̱ꞌmiu̱ kitsjána xá xi tjíhin nga tsꞌian ko̱ kitsꞌín nibána a̱sunntei̱. Kui nga, ¿nkú tjíhi̱n ra̱ nga bꞌa̱ tíbixíhinnu nga najmi tíbenkjúhunna Nti̱a̱ná nkꞌie nga bꞌa̱ tíxian nga an xi Ntíhi̱ Nti̱a̱ná?
\v 37 Tsa najmi títsꞌian xá xi tsꞌe̱ Na̱ꞌmina̱, najmi tu̱ nꞌe sꞌejinnú.
\v 38 Tu̱nga tsa títsꞌian xáha̱, ndaha tsa najmi sꞌe̱jinnu̱u an, tu̱nga nꞌe̱ sꞌejinnú xóo̱. Bꞌa̱ tsꞌín cha̱hanu ko̱ ka̱mankjinnu̱u nga Nti̱a̱ Na̱ꞌmiu̱ tíjñajinna ko̱ nga an tíi̱jñajihi̱n Nti̱a̱ Na̱ꞌmiu̱.
\p
\v 39 A̱sꞌa̱i ta̱ kama mjehé ngáha̱ ra̱ jóo̱ nga ku̱a̱kjꞌánijéhe̱, tu̱nga tsitjuhú Jesu yo̱ nga ngji tꞌaxín.
\v 40 A̱sꞌa̱i tsichu ngáha ngabantá ntáje̱ Jordan. Ngjikꞌiejña a̱nte má nga tsaténtá Jua xu̱ta̱ nga tjuhun.
\v 41 Nkjin xu̱ta̱ xi jꞌaisehe̱ Jesu yo̱ ko̱ bꞌa̱ i̱ncha kitsú:
\p —Ndaha nku kju̱a̱nkjún najmi kitsꞌín Jua, tu̱nga kju̱axi̱hí ngayjee̱ ni xi kinchja̱ni̱jmíyaha nda̱i̱.
\p
\v 42 Nkjin xu̱ta̱ kisꞌejihi̱n Jesu a̱nte xuꞌbo̱.
\c 11
\s Bꞌi̱ tsꞌín kitsꞌínkjꞌáíya ngáha̱ ra̱ Jesu Laza̱ro̱
\p
\v 1 Kjijña un nku nda̱ xi ꞌmi Laza̱ro̱ xi nda̱ Betani̱a̱, má nga ta̱ nankihi̱ Maria̱ ko̱ Marta̱ xi nichja maha xinkjín.
\v 2 Kui Maria̱ xi tsaténdzjojnúhu̱ ntá sinjne̱ sjai Nda̱ Nti̱a̱ná Jesu ko̱ ta̱ kuihi ntsja̱ku̱ kitsꞌínxijnuko̱ho. Kui xi ntsꞌe̱ maha Laza̱ro̱ xi kjijña uu̱n.
\v 3 A̱sꞌa̱i i̱ncha kitsꞌínkjihi̱ én Jesu nga joo̱ jminchjíu̱n. Bꞌa̱ kitsúhu̱:
\p —Ji Chá Nti̱a̱, xi tjohi kjijña un.
\p
\v 4 Nkꞌie nga kintꞌé ée̱n Jesu, bꞌi̱ kitsú:
\p —Najmi tsꞌi̱ínkꞌien kjihi̱n chꞌin xi kꞌuhu̱n. Tu̱ sahá ku̱a̱kúchji chꞌiu̱n kju̱a̱chánkaha̱ Nti̱a̱ná. Bꞌa̱ tsꞌín sꞌe̱jña chjihi kju̱a̱chánkaha̱ Ntíhi̱ Nti̱a̱ná.
\p
\v 5 Ndaha tsa Jesu ꞌyún tjoho̱ Marta̱ ko̱ na̱ nichja ko̱ Laza̱ro̱,
\v 6 tu̱nga nkꞌie nga kintꞌé nga kjijña un Laza̱ro̱, tu̱ sahá yꞌejña sa jo ni̱stjin a̱nte má nga tíjña.
\v 7 A̱skahan bꞌi̱ kitsúhu̱ já niꞌyakuyáha̱:
\p —Ta̱ tjihín ngáhaná Judea̱.
\p
\v 8 Bꞌa̱ kitsú já niꞌyakuyóo̱:
\p —Ji nda̱ maestru̱, najmi kje̱e tjíhi̱n ni̱stjin nga já judio̱ kꞌaku̱ ndji̱o̱ mjehe̱ tsꞌi̱ínkꞌiehen ri. ¿Á ta̱ yo̱hó mje ngáha ri kꞌúín?
\p
\v 9 Bꞌi̱ kitsú Jesu:
\p —¿A najmi te johó ora̱ tjíhi̱n nku ni̱stjin? Tsa tjín xi tsúꞌba nga ni̱stjiu̱n, najmi sa̱ténki, a̱tꞌaha̱ tíbe ndꞌíhi̱ a̱sunntei̱.
\v 10 Tu̱nga tsa tjín xi tsúꞌba nga ni̱stje̱n, kui xi sa̱ténki, a̱tꞌaha̱ najmi tjíhi̱n ndꞌí.
\p
\v 11 A̱sꞌa̱i bꞌi̱hí ta̱ kitsú ngáha Jesu:
\p —Kjifehé nda̱ xinki̱á Laza̱ro̱, tu̱nga kfín tsꞌinkjꞌáhá ra̱.
\p
\v 12 Bꞌa̱ kitsú já niꞌyakuyóo̱:
\p —Ji Nda̱ Nti̱a̱, tsa kjife, kjꞌu̱á ngáha̱ ra̱.
\p
\v 13 Nkꞌie nga bꞌa̱ kitsú Jesu, kju̱a̱bayaha̱ ní Laza̱ro̱ kinchja̱ni̱jmíyaha tu̱nga nijñóo̱ ní kamankjihi̱n já niꞌyakuyáha̱.
\v 14 Kui nga kinchja̱ko̱ kixi̱ kixi̱hi jóo̱:
\p —Ja kaꞌme Laza̱ro̱.
\v 15 Ko̱ tsjo mana nga najmi tíi̱jña yo̱, a̱tꞌaha̱ tu̱ sahá ngandanu̱u, tu̱ xi sꞌe̱jihi̱nnu̱u Nti̱a̱ná. Tu̱nga tjihi̱nse̱hé ra̱á.
\p
\v 16 A̱sꞌa̱i kinchja̱ Toma xi ta̱ ꞌmi Nda̱ꞌyu̱n nga bꞌa̱ kitsúhu̱ já niꞌyakuyá xingisoo̱:
\p —Tjián ko̱ ñá tu̱ xi ku̱a̱yáko̱honá.
\p
\v 17 Nkꞌie nga tsichu Jesu nanki Betani̱a̱, kikꞌinyaha̱ nga ja tjíhi̱n ñju ni̱stjin nga ngjiyanji Laza̱ro̱.
\v 18 Betani̱a̱ tiña maha̱ nanki Jerusalen, tjíhi̱n ra̱ tsa jan kilome̱tro̱.
\v 19 Ko̱ nkjin xu̱ta̱ i̱ncha jꞌaisehe̱ Marta̱ ko̱ Maria̱ nga̱tꞌaha̱ nda̱ ntsꞌe̱ xi kꞌie̱n.
\v 20 Nkꞌie nga kintꞌé Marta̱ nga jꞌai tiña Jesu, a̱sꞌa̱i tsitjusje nga ngjikjꞌá ni̱yá ko̱ Maria̱ yꞌejñantaha̱ niꞌyoo̱.
\v 21 Bꞌa̱ kitsú Marta̱:
\p —Ji Chá Nti̱a̱, tsa tu̱ e̱i̱hi ma tinchuhunni, najmi kꞌien ra̱ chá ntsꞌé.
\v 22 Tu̱nga bená nga tsjáhi Nti̱a̱ná tu̱ mí nihí ni xi ku̱i̱nchíhi̱.
\p
\v 23 Bꞌi̱ kitsú Jesu:
\p —Kjꞌu̱a̱íya ngáha̱ ra̱ nda̱ ntsꞌei.
\p
\v 24 Bꞌa̱ kitsú Marta̱:
\p —Be nga kjꞌu̱a̱íya ngáha̱ ra̱ chá ntsꞌé ni̱stjin xi fekuu̱, nkꞌie nga kjꞌu̱a̱íya tente ngáha̱ ra̱ xu̱ta̱ kꞌie̱n.
\p
\v 25 Bꞌi̱hí ta̱ kitsú ngáha Jesu:
\p —An xi tsꞌinkjꞌáíyaha̱ xu̱ta̱ kꞌie̱n ko̱ an xi tsꞌinkꞌíéntu tíkꞌan. Xi sꞌe̱jihi̱n an, ndaha tsa ja kꞌien tu̱nga kꞌúéntu tíkꞌuhún.
\v 26 Ko̱ ngayjee̱ xi tjíntu tíkꞌun ko̱ sꞌejihi̱n an, ndaha nku ni̱stjin najmi ku̱a̱yá. ¿A sꞌejihin ni xi tíxihin?
\p
\v 27 Bꞌa̱ kitsú Marta̱:
\p —Joho̱n, Chá Nti̱a̱. Sꞌejinna nga ji xi kitsꞌín nibá Nti̱a̱ná,\f + \fr 11:27 \ft “Xi kitsꞌín nibá Nti̱a̱ná” tsuhu̱ ra̱ “Cristo̱”.\f* nga ji xi Ntíhi̱ Nti̱a̱ná xi tjíhin nga kjꞌu̱a̱í a̱sunntei̱.
\p
\v 28 Nkꞌie nga bꞌa̱ kitsú Marta̱, ngji nchja̱ko̱ se̱n Maria̱ xi na̱ nichja maha. Bꞌa̱ kitsúhu̱:
\p —Ja kjꞌuai Chá Maestru̱ ko̱ tínchja̱hi.
\p
\v 29 Nkꞌie nga kintꞌé Maria̱ éi̱n, ki̱tsa̱ tsisintje̱n nga ngjisehe̱ Jesu má nga síjña.
\v 30 Najmi kje̱e fasꞌen Jesu a̱jin na̱nti̱o̱. Yo̱ síjña má kisatékjá Marta̱.
\v 31 Máha xu̱ta̱ xi kabꞌentu na̱xa̱ꞌyo̱, nkꞌie nga kikie nga tsisintje̱n ntsu ntsu Maria̱ ko̱ tsitjusje, a̱sꞌa̱i ta̱ i̱ncha kitsjennkíhi̱. Bꞌa̱ i̱ncha kitsú nga má tíjña tsjóo̱ ngju̱a̱i̱ kjintá.
\p
\v 32 Nkꞌie nga tsichu Maria̱ má síjña Jesu, tsasinkúnchꞌintꞌaha̱ ko̱ bꞌa̱ kitsúhu̱:
\p —Ji Chá Nti̱a̱, tsa tu̱ e̱i̱hi ma tinchuhunni, najmi kꞌien ra̱ chá ntsꞌé.
\p
\v 33 Nkꞌie nga kikie Jesu nga tíkjintá Maria̱ ko̱ nga tíi̱ncha kjintá xu̱ta̱ xi tje̱nko̱ho̱, kikꞌie nusin nusihi̱n ko̱ kama ni̱ma̱ha̱.
\v 34 Bꞌi̱ kitsú:
\p —¿Má kikjayanjiu?
\p Bꞌa̱ i̱ncha kitsú jóo̱:
\p —Nibáa̱se̱i̱hi̱, Nda̱ Nti̱a̱.
\p
\v 35 A̱sꞌa̱i kikjintá Jesu.
\v 36 Bꞌa̱ kitsú xu̱to̱:
\p —Cha̱se̱ maru̱u. Tu̱ xí kitsꞌíntjohó ra̱.
\p
\v 37 Tu̱nga bꞌa̱há kitsú kꞌu̱a̱:
\p —Kui nda̱i̱ xi kikjexꞌánki tunku̱n nku nda̱ ka̱. Kutsa kamahá ra̱ kitsꞌínnkihi̱ Laza̱ro̱ ko̱ najmi kꞌien ra̱.
\p
\v 38 Ta̱ kikꞌie nusin nusihín ngáha̱ ra̱ Jesu nga tsichu tsjóo̱. Kui xi nku ti̱xa̱ ngijo. Nku ndji̱o̱ tjíchjaneko̱ho a̱nkju̱a̱ha̱. Bꞌi̱ kitsú Jesu:
\p
\v 39 —Chjúxiun ndji̱o̱.
\p Bꞌa̱ kitsú Marta̱, na̱ nichja nda̱ xi kꞌie̱n:
\p —Ji Chá Nti̱a̱, ja ra̱ chꞌon jne̱, a̱tꞌaha̱ ja tjíhi̱n ñju ni̱stjin ndꞌa̱i̱ nga kꞌien.
\p
\v 40 Bꞌi̱ kitsú Jesu:
\p —¿A najmi bꞌa̱há kuaxihin nga tsa sꞌe̱jihin an, cha̱i̱ kju̱a̱chánkaha̱ Nti̱a̱ná?
\p
\v 41 A̱sꞌa̱i kikjexín jóo̱ ndji̱o̱. Tsasenjinki Jesu nkꞌa ján ko̱ bꞌi̱ kitsú:
\p —Na̱ꞌmi, mábꞌa̱chjíhi nga tímjeñjuní.
\v 42 Be nga mjeñju tehe̱ntení, tu̱nga tínchjako̱hó ra ngandaha̱ xu̱ta̱ xi tíi̱ncha e̱i̱ tu̱ xi sꞌe̱jihi̱n ra̱ nga ji kinꞌe nibání.
\p
\v 43 Nkꞌie nga ja kamaha̱ nga bꞌa̱ kitsú, a̱sꞌa̱i ꞌyún kinchja̱:
\p —¡Laza̱ro̱, ti̱tjusje̱i̱ yo̱!
\p
\v 44 A̱sꞌa̱i tsitju nda̱ kꞌie̱n nga najyun tjíꞌyúnko̱ tsꞌíhin ntsja ko̱ sjai, ko̱ a̱nkjín tjíꞌmako̱ho kjꞌa̱í najyun.
\p Bꞌa̱ kitsú Jesu nga kinchja̱ko̱ xu̱to̱:
\p —Chjúxihi̱un najyuu̱n. Nꞌe̱ndo̱hóo̱.
\s Bꞌi̱ tsꞌín yꞌénda já tjíxóo̱ nga mjehe̱ tsꞌi̱ínkꞌien Jesu
\r (Mt. 26:1-5; Mr. 14:1-2; Lc. 22:1-2)
\p
\v 45 Máha xu̱ta̱ xi jꞌaisehe̱ Maria̱ ko̱ kikie ni xi kitsꞌín Jesu, nkjin maha xi kisꞌejihi̱n.
\v 46 Tu̱nga tjíhín xi ngjisehe̱ já fariseo̱ ko̱ kitsúyaha̱ ni xi kitsꞌín Jesu.
\v 47 A̱sꞌa̱i já na̱ꞌmi kꞌaku̱ ko̱ já fariseo̱ kinchja̱ ñjaha̱ ngayjee̱ já tjíxóo̱ ko̱ bꞌa̱ kitsúhu̱:
\p —¿Nkú nꞌe̱é e̱i̱ ni̱? A̱tꞌaha̱ ja ꞌyún títsꞌín kju̱a̱nkjún ndo̱.
\v 48 Tsa tu̱ nku kꞌu̱a̱i̱ntehé ra̱á nga bꞌa̱ tsꞌi̱ín, a̱sꞌa̱i ngayjee̱ xu̱ta̱ tsjénnkihi̱ ndo̱ ko̱ i̱ncha kjꞌu̱a̱í já Roma̱ nga tsꞌi̱ínkje ni̱nku̱ná ko̱ xu̱ta̱ nankiná.
\p
\v 49 A̱sꞌa̱i bꞌi̱ kitsú Caifa xi tjíhi̱n nda̱ na̱ꞌmi títjun nú xuꞌbo̱:
\p —¿Á najmi mankjihi̱nnu̱u?
\v 50 ¿A najmi ma chu̱ba̱yahánu̱u nga tu̱ sahá nda tjín tsa nku nda̱ ku̱a̱yántjaihi ngandaha̱ ngayjee̱ xu̱ta̱, tu̱ xi bꞌa̱ tsꞌín najmi nꞌe̱kjehe xu̱ta̱ nankiná?
\p
\v 51 Tu̱nga najmi kuenta̱ha̱ ní Caifa kinchja̱ha nga bꞌa̱ kitsú. Kui xi nda̱ na̱ꞌmi títjun nú xuꞌbo̱ ko̱ xi nkúhu nku nda̱ profeta̱ kinchja̱ éhe̱n Nti̱a̱ná nga ku̱a̱yá Jesu ngandaha̱ na̱xi̱nantóo̱.
\v 52 Ko̱ najmi tu̱ suba ngandaha̱ xu̱ta̱ xi ntje̱ judio̱ tje̱he̱n ra̱ ku̱a̱yáha Jesu. Ta̱ ku̱a̱yá ní tu̱ xi kꞌu̱ékúhu ngayjee̱ ntíhi̱ Nti̱a̱ná xi tjímasún.
\v 53 Kui bꞌa̱ maha, ni̱stjin xuꞌbo̱ kikꞌatutsꞌi̱hi̱n ra̱ já tjíxóo̱ nga yꞌéndako̱ho xinkjín xi má nga mjehe̱ tsꞌi̱ínkꞌien Jesu.
\v 54 Kui nga najmi ta̱ kikjatsúꞌba chjihi Jesu a̱jihi̱n xu̱ta̱ judio̱. Ngji tꞌaxín nanki xi ꞌmi Efrain xi tiña maha̱ a̱nte kixiu̱. Yo̱ yꞌejñako̱ já niꞌyakuyáha̱.
\p
\v 55 Nkꞌie nga ja tíbichú tiña Sꞌí Pascu̱a̱ xi bꞌasje xu̱ta̱ judio̱, nkjin ṉkjún xu̱ta̱ i̱ncha ngji nanki Jerusalen tu̱ xi tsꞌi̱ín jehe yjoho̱ nginku̱n Nti̱a̱ná kintehe̱ ni nga ku̱i̱chú sꞌíu̱.
\v 56 Yo̱ tsangisjai Jesu ko̱ kingjásjaiyaha̱ xinkjín nga kabincha má ma na̱tsihi̱n ni̱nku̱. Bꞌi̱ ngján bꞌi̱ kitsúhu̱ xinkjín:
\p —¿Nkú manu̱u? ¿A nibá ndo̱ sꞌíu̱? ¿A ra̱ najmi nibáhá?
\p
\v 57 Kui chu̱bo̱ ja kitsjá kju̱a̱ já na̱ꞌmi kꞌaku̱ ko̱ já fariseo̱, tsa tjín xi be má tíjña Jesu tjíhin nga ku̱i̱tsu̱ya tu̱ xi ka̱ma ku̱a̱kjꞌánijéhe.
\c 12
\s Bꞌi̱ tsꞌín nku ta̱chju̱ún tsaténdzjojnúhu̱ // ntá sinjne̱ Jesu
\r (Mt. 26:6-13; Mr. 14:3-9)
\p
\v 1 Nkꞌie nga ndyja sa jun ni̱stjin nga ku̱i̱chú Sꞌí Pascu̱a̱, a̱sꞌa̱i jꞌai Jesu nanki Betani̱a̱, má síjña niꞌyaha̱ Laza̱ro̱, nda̱ xi kitsꞌínkjꞌáíya ngáha̱ ra̱ ngabayoo̱.
\v 2 Yo̱ kisꞌendaha̱ nku nichine. Marta̱ yꞌéya nichinee̱ ko̱ Laza̱ro̱ ta̱ yꞌejñajihi̱n xu̱ta̱ xi yꞌentutꞌáko̱ Jesu yámixo̱.
\v 3 A̱sꞌa̱i jꞌaiko̱ Maria̱ nkú ra̱ ma masen litru̱ ntá sinjne̱ xi ꞌmi nardo̱, xi ꞌyún nda ko̱ xi ꞌyún chjí. Kui xi tsaténdzjojnúhu̱ sjai Jesu ko̱ ta̱ kuihi ntsja̱ku̱ kitsꞌínxijnuko̱ho. I̱xí kitsjehén nta̱ sinjne̱ a̱yoo̱.
\v 4 A̱sꞌa̱i bꞌi̱ kitsú Juda̱ Iscariote̱, xi nda̱ niꞌyakuyáha̱ Jesu xi a̱skahan tsꞌi̱ínkjasꞌehe̱n:
\p
\v 5 —Tsa tu̱ sahá kuasatéña ntá sinjne̱i̱ kai. Tsa jan unchan to̱on denari̱o̱ kuachꞌa, tu̱ xi ka̱ma ku̱i̱si̱nko̱ho xu̱ta̱ xꞌa̱n.
\p
\v 6 Tu̱nga najmi xu̱ta̱ xꞌa̱hán kitsꞌínnkjinkꞌun nga bꞌa̱ kitsú. Tu̱ nga̱tꞌaha̱ ní to̱oo̱n bꞌa̱ kitsúhu, a̱tꞌaha̱ kui xi fꞌátjo to̱oo̱n ko̱ bakjá ndyjé.
\v 7 Bꞌi̱ kitsú Jesu:
\p —Najmi tu̱ ji bꞌechjꞌáíhi̱ ta̱chjúu̱n. A̱tꞌaha̱ ni̱stjin nga sꞌe̱yanjia jꞌátjona ntá sinjne̱i̱.
\v 8 Xu̱ta̱ xꞌa̱n bi tehe̱nte kꞌúéntujínnu̱u, tu̱nga an najmi tehe̱nte kúáte̱jñajinnu̱u.
\p
\v 9 Nkjin ṉkjún xu̱ta̱ kintꞌé nga nanki Betani̱a̱ tíjña Jesu ko̱ i̱ncha ngjisehe̱. Tu̱nga najmi tu̱ nkuhú Jesu ngjisehe̱. Ta̱ i̱ncha ngji ní a̱tꞌaha̱ ta̱ mjehe̱ nga sku̱e̱ Laza̱ro̱ xi kinꞌekjꞌáíya ngáha̱ ra̱ ngabayoo̱.
\v 10 A̱sꞌa̱i kama ñjakú já na̱ꞌmi kꞌaku̱ ko̱ yꞌéndako̱ xinkjín xi má nga ko̱ Laza̱ro̱ tjíhin nga nꞌe̱kꞌien.
\v 11 A̱tꞌaha̱ nga̱tꞌaha̱ Laza̱ro̱ nkjin ṉkjún xu̱ta̱ tsꞌasje tꞌaxíhi̱n yjoho̱ jóo̱. Tu̱ sahá Jesu kisꞌejihi̱n.
\s Bꞌi̱ tsꞌín jasꞌen Jesu nanki Jerusalen
\r (Mt. 21:1-11; Mr. 11:1-11; Lc. 19:28-40)
\p
\v 12 Ni̱stjin xi ma ndyjuu̱n ngáha nkjin ṉkjún xu̱ta̱ kintꞌé nga Jesu kjꞌu̱a̱í nanki Jerusalen, a̱tꞌaha̱ nkjin maha xi jꞌaikꞌasje Sꞌí Pascu̱a̱.
\v 13 A̱sꞌa̱i i̱ncha jakjꞌá tjiaha̱ yá xka̱jén ko̱ tsitju nga i̱ncha ngjikjꞌá ni̱yá. Bꞌi̱ i̱ncha kitsú nga ꞌyún kinchja̱:
\p —¡Katsꞌínkꞌankiná Nti̱a̱ná! ¡Nti̱a̱ná nda katsꞌínko̱ xi nibáha ngajoho̱, xi Nda̱ Rei̱hi̱ xu̱ta̱ Israel!
\p
\v 14 Nku ntí búrrú kisakúhu̱ Jesu ko̱ yꞌesún, xi nkú tsꞌín tjítꞌa éhe̱n Nti̱a̱ná:
\q
\v 15 Xu̱ta̱ Sion, najmi tu̱ binkjun.
\q Cha̱so̱o, ja nibá Nda̱ Rei̱nu̱u nga tjísun nku ntí búrrú.
\p
\v 16 Kui ni xuꞌbi̱ najmi kamankjihi̱n já niꞌyakuyáha̱ nga tjuhun. Tu̱nga a̱skahán ni, nkꞌie nga tsakúchji kju̱a̱chánkaha̱, nkꞌiehé jꞌáítsjehe̱n já niꞌyakuyáha̱ nga bꞌa̱ tsꞌín tjítꞌa éhe̱n Nti̱a̱ná nga kinchja̱ni̱jmíyaha Jesu ko̱ nga bꞌa̱ kinꞌehe̱.
\p
\v 17 Xu̱ta̱ xi tíi̱nchako̱ Jesu nkꞌie nga kinchja̱ha̱ Laza̱ro̱ a̱ya tsjóo̱ nga kitsꞌínkjꞌáíya ngáha̱ ra̱ ngabayoo̱, kui xi i̱ncha kitsúya ni xi kikie.
\v 18 Kui kju̱a̱ha nga nkjin ṉkjún xu̱ta̱ tsitjuhu nga ngjikjꞌá ni̱yáha Jesu, a̱tꞌaha̱ kintꞌé kju̱a̱nkjún xi kitsꞌín.
\v 19 A̱sꞌa̱i kinchja̱ni̱jmíyaha já fariseo̱ niu̱. Bꞌi̱ ngján bꞌi̱ kitsúhu̱ xinkjín:
\p —¿A tíyo? Najmi chumi nihi xi ka̱ma nꞌe̱é. Cha̱se̱ maru̱u. Ngayjee̱ xu̱ta̱ títsjennkíhi̱ ndo̱.
\s Bꞌi̱ tsꞌín kitsúya títjun Jesu nga ku̱a̱yá
\p
\v 20 Ta tje̱njihi̱n xu̱ta̱ kꞌu̱a̱ xu̱ta̱ xi nchja̱ griego̱ xi ta̱ i̱ncha jꞌai nanki Jerusalen nga jꞌai tsꞌíntsjoho̱ Nti̱a̱ná a̱jihi̱n sꞌíu̱.
\v 21 Kui xi jꞌaisehe̱ Felipe̱ xi nda̱ Betsaida̱, nanki xi tíjñajihi̱n a̱nte Galilea̱, ko̱ bꞌa̱ kitsúhu̱:
\p —Ji nda̱ nti̱a̱, mjeni̱ nga cha̱i̱ Jesu.
\p
\v 22 A̱sꞌa̱i Felipe̱ ngji tsúyaha̱ Andre ko̱ nga joo̱ ngji tsúya ngáha̱ Jesu.
\v 23 A̱sꞌa̱i bꞌi̱ kitsú Jesu:
\p —Ja kuichu chu̱ba̱ nga sa̱kúchji kju̱a̱chánkaha̱ Ntíhi̱ Nda̱xꞌi̱u̱n.
\v 24 Kju̱axi̱ ni xi tíxinnu̱u. Tsa najmi ku̱i̱jne̱ tꞌanankiu̱ nku xujmá tuni̱ñu̱ ko̱ ku̱a̱yá, tu̱ nku sꞌe̱jña subahá. Tu̱nga tsa ku̱a̱yá, nkꞌiehé nga tsjá cha̱n xi ꞌyún tse.
\v 25 Xi tjoho̱ yjoho̱, kui xi tu̱ sahá ndyja̱. Tu̱nga xi najmi tjoho̱ yjoho̱ a̱sunntei̱, kui xi tu̱ sahá kjꞌu̱átjo ko̱ kꞌúéjña tíkꞌun sín.
\v 26 Tsa tjín xi títsꞌínkjáínna nga an xi ka̱ma Nda̱ Nti̱a̱ha̱, katsjennkína. Má kúáte̱jña, ta̱ yo̱ kꞌúéjña xi tsꞌi̱ínkjáínna, ko̱ Nti̱a̱ Na̱ꞌmiu̱ kꞌu̱a̱sjenkꞌaha̱ xu̱ta̱ xuꞌbo̱.
\p
\v 27 ’ꞌYún un tíbehe̱ ani̱ma̱na̱ ndꞌa̱i̱. ¿Nkú xíán? ¿A bꞌi̱ xíán: Ji Na̱ꞌmi, nꞌe̱kjꞌa tꞌaxínní kju̱a̱ni̱ma̱ xuꞌbi̱ ndꞌa̱i̱? Tu̱nga kuihí xá jái̱hina.
\v 28 Tu̱ sahá ta̱kúchji kju̱a̱chánkahi̱, Na̱ꞌmi.
\p Nkꞌie nga bꞌa̱ kitsú Jesu, a̱sꞌa̱i bꞌi̱ kitsú nku nta̱ xi nibaha nkꞌa ján:
\p —Ja tsakuchjá kju̱a̱chánkana̱ ko̱ ta̱ kuakuchjíhí ngáhana.
\p
\v 29 Nkꞌie nga kintꞌé nto̱ xu̱ta̱ xi tíi̱ncha yo̱, tjín xi bꞌa̱ kitsú:
\p —Nku chꞌo̱n kjuaneya.
\p Ko̱ kꞌu̱a̱ xi bꞌa̱ kitsú:
\p —Nku ntítsje kuanchja̱ko̱ho̱.
\p
\v 30 A̱sꞌa̱i bꞌa̱ kitsú Jesu:
\p —Najmi ngandana̱ kuanuꞌyáha nto̱. Ngandanu̱ ní bꞌa̱ kamaha.
\v 31 Ndꞌa̱i̱ nꞌe̱ko̱kju̱a̱ a̱sunntei̱ ko̱ ndꞌa̱i̱ ku̱i̱chꞌonsje na̱tsin ján xi tíbatéxumaha̱ a̱sunntei̱.
\v 32 Ko̱ nga chjúsíntje̱n nkꞌana tꞌanankiu̱, tsꞌian nga ni̱bakꞌúnna ngayjee̱ xu̱ta̱ xi tjín a̱sunntee̱.
\p
\v 33 Bꞌa̱ kitsú Jesu nga kitsúya xi nkú tsꞌín ku̱a̱yáha.
\v 34 A̱sꞌa̱i bꞌa̱ kitsú xu̱ta̱:
\p —Tu̱nga yaníi̱ ni xi tjítꞌa kju̱a̱téxumoo̱, nga xi tsꞌi̱ín nibá Nti̱a̱ná ngajoho̱ kꞌúéjña sín. ¿Nkú tsꞌín bꞌa̱ tíbixíhinni nga tjíhin nga chjúsíntje̱n nkꞌaha Ntíhi̱ Nda̱xꞌi̱u̱n? ¿Yá xi Ntíhi̱ Nda̱xꞌi̱n xi tíbixín?
\p
\v 35 Bꞌi̱ kitsú Jesu:
\p —An ndꞌíu̱. Tu̱ chuba ni̱stjihín tíi̱jñajin sanu̱u. Ti̱nimo nga tíjña sanu̱u ndꞌíu̱ tu̱ xi najmi ka̱ma jyuntꞌaihinnu. A̱tꞌaha̱ xi tsúꞌba má jyuu̱n najmi be má fi.
\v 36 Nkꞌie nga tíi̱jñajinnu̱u xi nkúhu ndꞌí, nꞌe̱ sꞌejinnú tu̱ xi ku̱i̱nimahanu má ndzjee̱n.
\p Bꞌa̱ kitsú Jesu ko̱ a̱sꞌa̱i ngji tꞌaxíhi̱n xu̱to̱.
\s Kui nga̱tꞌai̱ xu̱ta̱ najmi kisꞌejihi̱n ra̱ Jesu
\p
\v 37 Ndaha tsa nkjin ṉkjún kju̱a̱nkjún xi kitsꞌín Jesu nginku̱n xu̱ta̱, tu̱nga najmi kisꞌejihín ra̱ yáha kui.
\v 38 Bꞌa̱ kama tu̱ xi tsitjusuhun én xi kitsú nda̱ profeta̱ Isaia̱ má nga bꞌa̱ tsꞌín yꞌétꞌa:
\q Ji Nti̱a̱, ¿yá xi kisꞌejihi̱n én xi kichubai̱?
\q ¿Yá xi kisꞌejña chjihi̱ ngaꞌyúhu̱n Nti̱a̱ná?
\m
\v 39 Kui kju̱a̱ha nga najmi kama kisꞌejihi̱n ra̱ xu̱ta̱, a̱tꞌaha̱ bꞌi̱ ta̱ tsꞌín yꞌétꞌa ya Isaia̱ éhe̱n Nti̱a̱ná:
\q
\v 40 Nti̱a̱ná yꞌéchja tunku̱n xu̱ta̱ xuꞌbi̱ ko̱ kitsꞌín ndjá ani̱ma̱ha̱,
\q tu̱ xi najmi sku̱e̱he ko̱ tu̱ xi najmi ka̱mankjihi̱n ra̱,
\q tsa tsꞌi̱ínkꞌóntjaiya ani̱ma̱ha̱ xi má nga tsꞌinnkíhi̱ xu̱ta̱ xuꞌbi̱.
\m
\v 41 Bꞌa̱ kitsú Isaia̱ a̱tꞌaha̱ kikie kju̱a̱chánkaha̱ Jesu ko̱ kinchja̱ni̱jmíyaha.
\p
\v 42 Ko̱ ta̱ nkjin maha já tjíxá xi kisꞌejihi̱n Jesu, tu̱nga najmi kitsꞌínkiehé yjoho̱ a̱tꞌaha̱ tsankjún já fariseo̱ ko̱ najmi mjehe̱ nga ku̱i̱chꞌonsje a̱jihi̱n xu̱ta̱ sinagoga̱.
\v 43 Bꞌa̱ kitsꞌín a̱tꞌaha̱ ꞌyún kama tsjo saha̱ nga sꞌe̱he̱ kju̱a̱chánka a̱jihi̱n xu̱ta̱ nga nginku̱n Nti̱a̱ná.
\s Bꞌi̱ tsꞌín kinchja̱ni̱jmíyaha yjoho̱ Jesu
\p
\v 44 ꞌYún kinchja̱ Jesu nga bꞌi̱ kitsú:
\p —Xi sꞌejihi̱n an, najmi tu̱ nku an tísꞌejihi̱n. Ta̱ tísꞌejihi̱n xi kitsꞌín nibána.
\v 45 Xi tíbena, tíbe xi kitsꞌín nibána.
\v 46 An ndꞌí xi jꞌai tsꞌín ndzjehe̱n xu̱ta̱ a̱sunntei̱, tu̱ xi ngayjee̱ xi sꞌe̱jihi̱n ra̱ an najmi kꞌúéntuhu má jyuu̱n.
\p
\v 47 ’Tsa tjín xi ku̱i̱ntꞌé én xi tínchja tu̱nga najmi tsꞌi̱íntjusuhún, najmi an kuasehe̱ má ni xi nda ko̱ má ni xi najmi nda xi kitsꞌín xu̱ta̱ xuꞌbo̱. A̱tꞌaha̱ najmi kui xóo̱ jái̱hina. Jái̱ tsꞌinkꞌanki níná xu̱ta̱.
\v 48 Xi tsꞌi̱ín tꞌaxínna ko̱ najmi tsꞌi̱ínkjáíhi̱n én xi tínchja, tíjña xi ku̱a̱se̱he̱ má ni xi nda ko̱ má ni xi najmi nda xi kitsꞌín. Én xi tínchja, kui xi kꞌu̱éjñanehe̱ ni xi kanéhe̱ xu̱ta̱ xuꞌbo̱ ni̱stjin xi fekuu̱.
\p
\v 49 ’A̱tꞌaha̱ najmi kuenta̱na̱ tínchjahana. Kuenta̱ha̱ ní Na̱ꞌmi xi kitsꞌín nibána tínchjahana. Kui xi kitsjána kju̱a̱ má nihi xi tjíhin nga kuinchja ko̱ kuakuyá.
\v 50 Ko̱ be nga kju̱a̱téxumaha̱ tsꞌi̱ínkꞌíéntu tíkꞌun síhi̱n xu̱ta̱. Kui kju̱a̱ha, xi nkú kitsúhuna Nti̱a̱ Na̱ꞌmiu̱, bꞌa̱ tsꞌín tínchja.
\c 13
\s Bꞌi̱ tsꞌín tsanéjnu Jesu sjai já niꞌyakuyáha̱
\p
\v 1 Chubahá ndyjaha̱ ni̱stjihi̱n Sꞌí Pascu̱a̱ ko̱ be Jesu nga ja tíbichú chu̱ba̱ nga kꞌu̱éjña a̱sunntee̱ nga ngju̱a̱i̱ ngáha má tíjña Nti̱a̱ Na̱ꞌmiu̱. Tehe̱nte kitsꞌíntjo xu̱ta̱ xi tsꞌe̱ xi tjíntu a̱sunntee̱ ko̱ ngayjehe kꞌun kitsꞌíntjo.
\v 2 Kikjineko̱ já niꞌyakuyáha̱ nichinehe̱ sꞌíu̱, ko̱ kui chu̱bo̱ nda̱nindoo̱ ja kabꞌéjñajin ani̱ma̱ha̱ Juda̱ Iscariote̱ ntíhi̱ Simon nga tsꞌi̱ínkjasꞌen Jesu.
\v 3 Be Jesu nga Nti̱a̱ Na̱ꞌmiu̱ kitsꞌínkjasꞌen a̱ya ntsja ngayjee̱ ni xi tjín. Be nga má tíjña Nti̱a̱ná nibaha ko̱ nga yo̱ ngju̱a̱i̱se ngáha̱ ra̱.
\p
\v 4 Kui bꞌa̱ maha, nkꞌie nga tjíntutꞌáha yámixo̱, a̱sꞌa̱i tsisintje̱n Jesu, tsꞌasje najyun ndju xi yja ko̱ jakjꞌá nku najyunxú nga yꞌékjá ndayáha̱.
\v 5 Jakjꞌá ntánijua, tsanéjnu sjai já niꞌyakuyáha̱ ko̱ kitsꞌínxijnuko̱ho najyunxú xi yꞌékjá ndayáha̱.
\v 6 Nkꞌie nga tsichukꞌúhu̱n Simon Pedro̱, bꞌa̱ kitsú ndo̱:
\p —Ji Nda̱ Nti̱a̱, ¿nkú tsꞌín ji ku̱a̱nejnuhuni tsu̱ká?
\p
\v 7 Bꞌi̱ kitsú Jesu:
\p —Ndꞌa̱i̱ najmi yai ni xi títsꞌian tu̱nga a̱skahán ni ka̱mankjihin.
\p
\v 8 Bꞌa̱há ta̱ kitsú ngáha Pedro̱:
\p —Ndaha tsa mí yjehe najmi ku̱a̱nejnui tsu̱ká.
\p Bꞌi̱ kitsú Jesu:
\p —Tsa najmi kuanejná tsu̱kui, najmi ta̱ xu̱ta̱ xi tsꞌa̱n ka̱mahani.
\p
\v 9 A̱sꞌa̱i bꞌa̱ kitsú Simon Pedro̱:
\p —Ji Nda̱ Nti̱a̱, najmi tu̱ suba tsu̱ká xi ta̱nejnui ma. Ta̱ ta̱nejnui ntsa̱ ko̱ nintaká.
\p
\v 10 Bꞌi̱ kitsú Jesu:
\p —Xi a̱sꞌa̱i kabinguyahá tu̱ tsu̱ku̱hú machjéhe̱n nga kfe̱jnú, a̱tꞌaha̱ je yje. Jun bi ja jo, tu̱nga najmi ngatentenú.
\p
\v 11 A̱tꞌaha̱ be Jesu yá xi tsꞌi̱ínkjasꞌehe̱n, kui nga: “Najmi ngatentoo̱ xi jo”, kitsúhu.
\p
\v 12 Nkꞌie nga ja kamaha̱ nga tsanéjnu sjai já niꞌyakuyáha̱, a̱sꞌa̱i kingja ngáha najyun ndjuhu̱, yꞌejñatꞌa yámixo̱ ko̱ bꞌi̱ kitsú:
\p —¿A mankjinnu̱u ni xi kuatsꞌinko̱nu̱u?
\v 13 Jun xi ꞌminú Nda̱ Maestru̱ ko̱ Nda̱ Nti̱a̱. Ko̱ tjínnu̱u kixi̱ nga bꞌa̱ bixínnú, a̱tꞌaha̱ bꞌa̱ tjín kjáíhin.
\v 14 Kui bꞌa̱ maha, tsa an xi kuakanejnúhuna tsu̱ku, nga an xi Nda̱ Maestru̱nu̱u ko̱ Nda̱ Nti̱a̱nu̱u, kui nga ko̱ jun tjíhin nga ku̱a̱nejnuhunu tsu̱ku̱ xinki̱u.
\v 15 Ja kuakꞌiejñá chu̱ba̱yanu̱u tu̱ xi bꞌa̱ nꞌe̱henu xi nkú kuatsꞌinnu̱u.
\v 16 Kju̱axi̱ ni xi tíxinnu̱u. Ndaha nku nda̱ musu̱ najmi ꞌyún nkꞌa tje̱n nga nda̱ nti̱a̱ha̱. Ko̱ nku nda̱ xi sꞌexá najmi ꞌyún nkꞌa tje̱n nga xi bꞌéxáha̱.
\v 17 Tsa tímankjinnu̱u ni xi tíxian ko̱ ta̱ nꞌe̱tjusun, á bꞌa̱ nda tjíhin tsꞌa̱jun.
\p
\v 18 ’Najmi nga tentoo̱ bꞌa̱ tíxinnu̱u. An be yá xi jꞌajián. Tu̱nga tjíhín ni nga ku̱i̱tjusun éhe̱n Nti̱a̱ná xi bꞌa̱ tsꞌín tjítꞌa: “Xi kjineko̱na ni̱ñu̱, kui xi ja kama nda̱ kontra̱na̱.”
\v 19 Ndꞌa̱i̱ bꞌa̱ tíxinnu̱u kintehe̱ ni nga ku̱i̱tjusun ni xi tjíhin nga ka̱ma, tu̱ xi nkꞌie nga bꞌa̱ ka̱moo̱ sꞌe̱jihi̱nnu̱u nga an xi tu̱ bꞌa̱ tsꞌín tíi̱jñaná.
\v 20 Kju̱axi̱ ni xi tíxinnu̱u. Xi tsꞌi̱ínkjáíhi̱n xu̱ta̱ xi tsꞌinkjíá, kui xi an títsꞌínkjáínna. Ko̱ xi tsꞌi̱ínkjáínna, kui xi títsꞌínkjáíhi̱n xi kitsꞌín nibána.
\s Bꞌi̱ tsꞌín kitsúya Jesu nga Juda̱ Iscariote̱ tsꞌi̱ínkjasꞌehe̱n
\r (Mt. 26:20-25; Mr. 14:17-21; Lc. 22:21-23)
\p
\v 21 A̱sꞌa̱i xí tsꞌatséhé ani̱ma̱ha̱ Jesu ko̱ bꞌi̱ kitsú:
\p —Kju̱axi̱ ni xi tíxinnu̱u. Tíjñajinnu̱u nku xi tsꞌi̱ínkjasꞌenna.
\p
\v 22 A̱sꞌa̱i bꞌi̱ ngján i̱ncha tsaseꞌa xinkjín já niꞌyakuyóo̱, a̱tꞌaha̱ najmi be yá xi títsu Jesu.
\v 23 Yo̱ tíjñatꞌa tiñaha̱ Jesu nda̱ niꞌyakuyá xi ꞌyún tjoho̱ nga tíjñatꞌako̱ho̱ yámixo̱.
\v 24 Kui nga jyukjꞌi Simon Pedro̱ kingjásjaiya se̱he̱n ra̱ nda̱ niꞌyakuyá xuꞌbo̱ nga ngju̱ásjaiyaha̱ Jesu yá xi títsu.
\v 25 A̱sꞌa̱i nda̱ niꞌyakuyóo̱ ꞌyún ngjikꞌún saha̱ Jesu ko̱ bꞌi̱ kitsú:
\p —Ji Nda̱ Nti̱a̱, ¿yá xi bꞌa̱ tsꞌi̱íu̱n?
\p
\v 26 Bꞌi̱ kitsú Jesu:
\p —Xi tsꞌinkꞌanchi̱hi̱ ni̱nku̱a̱n ko̱ tsjaha̱, kui xi bꞌa̱ tsꞌi̱íu̱n.
\p A̱sꞌa̱i kitsꞌínkꞌanchi̱ ni̱nku̱o̱n ko̱ Juda̱ Iscariote̱ kitsjáha̱, kui xi ntíhi̱ Simon.
\v 27 Nkꞌie nga kikꞌa̱i̱hi̱ Juda̱ ni̱nku̱o̱n, jasꞌenjihi̱n nda̱nindoo̱. A̱sꞌa̱i bꞌi̱ kitsúhu̱ Jesu ndo̱:
\p —Ki̱tsa̱ nꞌe̱i̱ ni xi nꞌe̱i̱.
\p
\v 28 Tu̱nga ndahá nku xi tjíntutꞌá yámixo̱ najmi kamankjihi̱n á bꞌa̱ kitsúhu̱ ra̱.
\v 29 Tjín xi kitsꞌínnkjinkꞌun nga bꞌa̱ kitsú nga tjíhin nga kꞌu̱a̱tse Juda̱ ni xi machjén sꞌíu̱ ko̱ a ra̱ nga tsjáha̱ to̱on xu̱ta̱ xꞌa̱n, a̱tꞌaha̱ Juda̱ fꞌátjo to̱oo̱n.
\v 30 Nkꞌie nga kikꞌa̱i̱hi̱ ni̱nku̱o̱n Juda̱, tje̱nꞌyún tsitjusjehé na̱tsiu̱n. Ja jyun kui chu̱bo̱.
\s Kui kju̱a̱téxuma tse̱tse̱ xuꞌbi̱ yꞌéjña Jesu
\p
\v 31 Nkꞌie nga ja ngji Juda̱, bꞌa̱ kitsú Jesu:
\p —Ndꞌa̱i̱ sa̱kúchji kju̱a̱chánkaha̱ Ntíhi̱ Nda̱xꞌi̱u̱n, ko̱ ni xi tsꞌi̱ín Ntíhi̱ Nda̱xꞌi̱u̱n ku̱a̱kúchji kju̱a̱chánkaha̱ Nti̱a̱ná.
\v 32 Ko̱ tsa Ntíhi̱ Nda̱xꞌi̱u̱n ku̱a̱kúchji kju̱a̱chánkaha̱ Nti̱a̱ná, bꞌa̱ ta̱ tsꞌín Nti̱a̱ná ku̱a̱kúchji kju̱a̱chánkaha̱ Ntíu̱. Ja ma ma bꞌa̱ ka̱moo̱.
\v 33 Jun ntína̱, tu̱ kutjuhú tíi̱jñajin sanu̱u. Ku̱i̱nchísjainú tu̱nga má nga kfíán najmi ka̱ma kuankíún. Bꞌa̱ ta̱ tíxinnu̱u ndꞌa̱i̱ xi nkú nga ta̱ kixihi̱n xu̱ta̱ xingisoo̱.
\p
\v 34 ’Tsjanu̱u nku kju̱a̱téxuma tse̱tse̱: Nꞌe̱tjó xinki̱u. Xi nkú nga tsꞌín tjona jun, bꞌa̱ ta̱ tsꞌín nꞌe̱tjó xinki̱u.
\v 35 Bꞌa̱ tsꞌín sku̱e̱he ngayjee̱ xu̱ta̱ nga jun xi já niꞌyakuyána̱, tsa nꞌe̱tjó xinki̱u.
\s Bꞌi̱ tsꞌín kitsúya títjun Jesu nga Pedro̱ bꞌa̱ ku̱i̱tsu̱ nga najmi behe̱
\r (Mt. 26:31-35; Mr. 14:27-31; Lc. 22:31-34)
\p
\v 36 Bꞌa̱ kitsú Simon Pedro̱:
\p —Ji Nda̱ Nti̱a̱, ¿má xi tje̱hen kꞌúín?
\p Bꞌi̱ kitsú Jesu:
\p —Najmi ka̱ma tsjénnkiní ndꞌa̱i̱ má nga kfíán, tu̱nga a̱skahán ni tsjénnkiní.
\p
\v 37 Bꞌa̱há ta̱ kitsú ngáha Pedro̱:
\p —Ji Nda̱ Nti̱a̱, ¿á najmi ka̱ma tsjénnkihi ra ndꞌa̱i̱? Tjínkuhu̱ kꞌan nga ku̱a̱yántjaihi ra.
\p
\v 38 Bꞌi̱ kitsú Jesu:
\p —¿A tjínkuhu̱ kꞌuin nga ku̱a̱yántjaihiní? Kju̱axi̱ ni xi tíxihin. Kintehe̱ ni nga kji̱ntá xa̱nto̱ bꞌa̱ ku̱i̱xín nga najmi yaní jan ni̱yá tjíhin.
\c 14
\s Bꞌi̱ tsꞌín kitsúya Jesu nga ngju̱a̱i̱se ngáha̱ ra̱ Nti̱a̱ Na̱ꞌmiu̱
\p
\v 1 Bꞌi̱ ta̱ kitsú ya Jesu:
\p —Najmi tu̱ fanta̱ha̱ ru̱u yjonu̱u. Nꞌe̱ sꞌejiun Nti̱a̱ná ko̱ kasꞌejinnu̱u an.
\v 2 Niꞌyaha̱ Na̱ꞌmina̱ tjín ṉkjún a̱nte. Tsa najmi kju̱axi̱, ja ra̱ ndꞌa̱i̱ kixinyaha̱nu̱u kai. Kfín kꞌuendánu̱u a̱nte.
\v 3 Tsa kfín kꞌuendánu̱u a̱nte, a̱sꞌa̱i kjúái̱kjꞌa ngáha̱nu̱u tu̱ xi ta̱ yo̱ ku̱i̱ntsu̱ba̱hanu má nga kúáte̱jña.
\v 4 Yo ni̱yá xi fi má nga kfíán.
\p
\v 5 Bꞌa̱ kitsú Toma:
\p —Ji Nda̱ Nti̱a̱, najmi yai̱ má kꞌúín. ¿Nkú nꞌe̱ cha̱ha̱ni̱ ni̱yóo̱?
\p
\v 6 Bꞌi̱ kitsú Jesu:
\p —An ni̱yá xi fi má tíjña Nti̱a̱ Na̱ꞌmiu̱, an bakuyá én xi na̱xu̱ ko̱ an tsja kju̱a̱tíkꞌun. Ndaha nku najmi ku̱i̱chúsehe̱ Nti̱a̱ Na̱ꞌmiu̱ tsa najmi an.
\v 7 Tsa yanú, ta̱ cha̱ ru̱u Na̱ꞌmina̱. Ko̱ ndꞌa̱i̱ tíchꞌatutsꞌi̱hi̱n ru̱u nga tíyo ko̱ tunkun tíyako̱honu.
\p
\v 8 Bꞌa̱ kitsú Felipe̱:
\p —Ji Nda̱ Nti̱a̱, ta̱kúchjini̱ Nti̱a̱ Na̱ꞌmiu̱ ko̱ sꞌe̱nkuni̱.
\p
\v 9 Bꞌi̱ kitsú Jesu:
\p —Ji Felipe̱, ja ndꞌa̱i tíi̱jñajihi̱nnu̱u. ¿A tu̱ yje najmi kje̱hé yaní? Xi tíbena ta̱ tíbe Nti̱a̱ Na̱ꞌmiu̱. ¿Á: “ta̱kúchjini̱ Nti̱a̱ Na̱ꞌmiu̱” tíbixíhinni?
\v 10 ¿A najmi sꞌejihín ri nga an xi tíi̱jñajihi̱n Nti̱a̱ Na̱ꞌmiu̱ ko̱ Nti̱a̱ Na̱ꞌmiu̱ tíjñajinna? Én xi tínchjako̱nu̱u najmi kuenta̱na̱ tínchjahana. Na̱ꞌmi xi tíjñajinna, kui xi títsꞌín ni xi tsꞌe̱.
\v 11 Nꞌe̱ sꞌejiun nga an tíi̱jñajihi̱n Nti̱a̱ Na̱ꞌmiu̱ ko̱ nga kui tíjñajinna. Tsa najmi sꞌejinnu̱u énna̱, ndaha tsa tu̱ ni xi kitsꞌian nꞌe̱ sꞌejiun.
\p
\v 12 ’Kju̱axi̱ ni xi tíxinnu̱u. Xi sꞌe̱jihi̱n an ta̱ kui nihi xi tsꞌi̱ín xi nkúhu xi títsꞌian. Ko̱ ꞌyún chánka sa ni xi tsꞌi̱ín xu̱ta̱ xuꞌbo̱, a̱tꞌaha̱ an tífia má tíjña Nti̱a̱ Na̱ꞌmiu̱.
\v 13 Ngayjee̱ ni xi ku̱i̱nchíhu̱u Na̱ꞌmiu̱ ngajona̱, tsjanu̱u. Bꞌa̱ tsꞌín an xi Ntíu̱ kuakuchjíhina kju̱a̱chánkaha̱ Nti̱a̱ Na̱ꞌmiu̱.
\v 14 Tsꞌian ni xi ku̱i̱nchúhu̱u ngajona̱.
\s Bꞌi̱ tsꞌín kitsúya Jesu nga tsꞌi̱ín nibá Espiri̱tu̱hu̱ Nti̱a̱ná
\p
\v 15 ’Tsa tjonu̱u an, nꞌe̱tjusun kju̱a̱téxumana̱.
\v 16 Kuankihi̱ Nti̱a̱ Na̱ꞌmiu̱, ko̱ tsjánu̱u kjꞌa̱í xi ta̱ ku̱a̱si̱nko̱nu̱u ko̱ xi kꞌúéjñajin sínnu̱u.
\v 17 Kui xi Espiri̱tu̱ xi ku̱a̱kúchji ni xi na̱xu̱. Xu̱ta̱ xi najmi be Nti̱a̱ná najmi ka̱ma tsꞌi̱ínkjáíhi̱n, a̱tꞌaha̱ najmi ma chjihi̱ ko̱ najmi be yáha. Tu̱nga máha jun, ja yo yáha, a̱tꞌaha̱ kui xi tíjñajinnu̱u ko̱ kꞌúéjñajinnu̱u.
\p
\v 18 ’Najmi kꞌuentú masennu̱u. Kjúái̱se ngáha̱nu̱u.
\v 19 Sa kutju najmi ta̱ sku̱e̱hena xu̱ta̱, tu̱nga máha jun, cha̱nú. A̱tꞌaha̱ tíi̱jña tíkꞌan, kui nga ta̱ ku̱i̱ntsu̱ba̱ tíkꞌuhunnu.
\v 20 Nkꞌie nga bꞌa̱ ka̱moo̱, cho̱o nga an tíi̱jñajihi̱n Na̱ꞌmina̱ ko̱ jun tintsu̱ba̱jinnú ko̱ an tíi̱jñajinnu̱u.
\v 21 Xi kjꞌu̱átjo kju̱a̱téxumana̱ ko̱ tsꞌi̱íntjusun, kui xi tjoho̱ an. Ko̱ xi tsꞌi̱íntjona, Na̱ꞌmina̱ ta̱ tsꞌi̱íntjoho̱ ko̱ an tsꞌintjá ko̱ kuakuchjíhi̱ yjona̱.
\p
\v 22 A̱sꞌa̱i kinchja̱ Juda̱, tu̱nga najmi Juda̱ Iscariote̱hé:
\p —Ji Nda̱ Nti̱a̱, ¿nkú tjíhi̱n ra̱ nga tu̱ ji̱n ku̱a̱kúchjihíni̱ yjohi̱ ko̱ nga najmi ku̱a̱kúchjihi̱ yjohi̱ xu̱ta̱ xi kꞌoo̱?
\p
\v 23 Bꞌi̱ kitsú Jesu:
\p —Xi tjoho̱ an, kui xi tsꞌi̱íntjusun énna̱. Na̱ꞌmina̱ tsꞌi̱íntjoho̱ xu̱ta̱ xuꞌbo̱, ko̱ Na̱ꞌmina̱ ko̱ an kjúái̱sei̱hi̱ nga ku̱i̱ntsu̱ba̱ko̱ tehe̱ntei̱.
\v 24 Tu̱nga xi najmi tjoho̱ an, najmi tsꞌi̱íntjusun énna̱. Én xi tínuꞌyó, najmi an tsꞌa̱n. Tsꞌe̱ Na̱ꞌmi xi kitsꞌín nibána.
\p
\v 25 ’Bꞌi̱ tíxinnu̱u nkꞌie nga tíi̱jñajin sanu̱u.
\v 26 Tu̱nga Nti̱a̱ Na̱ꞌmiu̱ tsꞌi̱ín nibá Espiri̱tu̱ Santo̱ ngajona̱. Kui xi ku̱a̱si̱nko̱nu̱u. Ku̱a̱kúya yjenu̱u ko̱ tsꞌi̱ínkjꞌáítsjen yjenu̱u ni xi kixinnu̱u.
\p
\v 27 ’Tíbꞌejñánu̱u kju̱a̱jyu. Kju̱a̱jyuna̱ títsjanu̱u. Najmi bꞌa̱ tsꞌín tsja xi nkú tsꞌín tsjá a̱sunntei̱. Najmi tu̱ fanta̱ha̱ ru̱u yjonu̱u ko̱ najmi tu̱ binkjun.
\v 28 Ja kuanuꞌyó nga bꞌa̱ kuaxinnu̱u nga kfíán ko̱ kjúái̱se ngáha̱nu̱u. Tsa kju̱axi̱ nga tjonu̱u an, ta̱ tsjo ka̱manu̱u nga kfíán má tíjña Nti̱a̱ Na̱ꞌmiu̱, a̱tꞌaha̱ ꞌyún chánka sa Nti̱a̱ Na̱ꞌmiu̱ nga an.
\v 29 Ndꞌa̱i̱ bꞌa̱ tíxinnu̱u kintehe̱ ni nga ku̱i̱tjusun ni xi tjíhin nga ka̱ma tu̱ xi sꞌe̱jihi̱nnu̱u nkꞌie nga bꞌa̱ ka̱moo̱.
\p
\v 30 ’Najmi ta̱ tse kuinchjako̱ saha̱nu̱u, a̱tꞌaha̱ kjꞌu̱a̱í xi tíbatéxumaha̱ a̱sunntei̱. Najmi tjíhi̱n ngaꞌyún tsa kui xi tsꞌi̱ín ngana̱na.
\v 31 Tu̱nga tjíhín ni nga bꞌa̱ ka̱ma, tu̱ xi ka̱mankjihi̱n ra̱ a̱sunntei̱ nga tjona Nti̱a̱ Na̱ꞌmiu̱ ko̱ nga títsꞌintjusan xi nkú kitsúna. Ti̱síntjo̱on ko̱ tjián.
\c 15
\s Bꞌi̱ tsꞌín kitsꞌínchjén Jesu yá tuntsja̱jée̱ ko̱ tjiaha̱ nga tsakúya
\p
\v 1 21 ’An tutsꞌin yá tuntsja̱jé xi nda, ko̱ Na̱ꞌmina̱ xi tsꞌe̱ yá tuntsja̱jée̱.
\v 2 Ngayjee̱ tjia xi tjínna xi najmi tsjá tu, batetꞌa. Ko̱ ngayjee̱ tjia xi tsjá tu, tsꞌín chuhu̱n tu̱ xi ꞌyún ngju̱a̱ saha̱ ra̱.
\v 3 Nga̱tꞌa tsꞌa̱jun, én xi tsakuyánu̱u kitsꞌínchjén Na̱ꞌmina̱ nga kitsꞌín chunnu̱u.
\v 4 Ti̱ntsu̱ba̱jinnú ko̱ an kúáte̱jñajinnu̱u. Nku tjia najmi ma tsjá suba tu tsa najmi tjítꞌa yáha̱. Bꞌa̱ ta̱ tsꞌín najmi kꞌu̱o tu tsa najmi ku̱i̱ntsu̱ba̱jinnú.
\p
\v 5 ’An tutsꞌin yá tuntsja̱jée̱ ko̱ jun tjiaha̱. Xi tíjñajinna ko̱ an tíi̱jñajihi̱n, kui xi ꞌyún tsjá tu. A̱tꞌaha̱ tsa najmi tjíán, najmi chumi nihi xi ka̱ma nꞌo̱o.
\v 6 Xi najmi kꞌúéjñajinna ngju̱a̱i̱ya na̱tsin ján xi nkúhu tjia xi titꞌáha̱ yá tuntsja̱jée̱. Yo̱ xi̱ ko̱ sꞌe̱ntukú ko̱ nꞌe̱kjꞌajin a̱jin ndꞌíu̱ nga ku̱i̱ti̱.
\p
\v 7 ’Tsa ku̱i̱ntsu̱ba̱jinnú ko̱ tsa énna̱ kꞌúéjñajinnu̱u, ti̱nchíú tu̱ mí ni xi mjehénu̱u ko̱ kꞌu̱a̱i̱nu̱u.
\v 8 Kui ni xuꞌbi̱ xi ku̱a̱kúchji kju̱a̱chánkaha̱ Na̱ꞌmina̱, nga ꞌyún kꞌu̱o tu ko̱ nga xu̱ta̱ niꞌyakuyána̱ ka̱mo.
\v 9 Xi nkú tsꞌín tjoho̱ an Nti̱a̱ Na̱ꞌmiu̱, bꞌa̱ ta̱ tsꞌín tjona jun. Ti̱ntsu̱ba̱jin sahanu kju̱a̱tjona̱.
\v 10 Tsa nꞌe̱tjusun kju̱a̱téxumana̱, tu̱ nkú ku̱i̱tsu̱ba̱jinnú kju̱a̱tjona̱, xi nkú tsꞌín títsꞌintjusan kju̱a̱téxumaha̱ Na̱ꞌmina̱ ko̱ tu̱ nkú tíi̱jñajinná kju̱a̱tjoho̱.
\p
\v 11 ’Bꞌa̱ tíxinnu̱u tu̱ xi tsjo kꞌúéhe̱nu̱u xi nkú tsꞌín tsjo tjínna. Nkꞌie nga bꞌa̱ nꞌo̱o, bꞌi̱hí tsꞌín nga tsjo kꞌúénu̱u.
\v 12 Kui kju̱a̱téxumana̱ xuꞌbi̱: Bꞌi̱ ngján nꞌe̱tjó xinki̱u xi nkú tsꞌín tjona jun.
\v 13 Kui xuꞌbi̱ kju̱a̱tjo xi ꞌyún chánka xi tíjña, tsa tjín xi ku̱a̱yántjaihi xinkjín.
\v 14 Jun xi xu̱ta̱ xinkjíán tsa nꞌe̱tjusun kju̱a̱téxuma xi títsjanu̱u.
\v 15 Najmi ta̱ já musu̱ tíxihi̱nnu̱u, a̱tꞌaha̱ já musu̱ najmi be ni xi tsꞌín nda̱ nti̱a̱ha̱. Tu̱nga xu̱ta̱ xinkjíáhán tíxinnu̱u, a̱tꞌaha̱ tíbꞌejñá chjinu̱u ngayjee̱ ni xi kitsúna Na̱ꞌmina̱.
\p
\v 16 ’Najmi jun xi kichjꞌajinnú. An ní xi jꞌajínnu̱u ko̱ kitsja xánu̱u nga kuankíún ko̱ kꞌu̱o tu. ꞌYún tse ku̱i̱chúkju̱a̱ha̱ tunu̱u. Kui kju̱a̱ha nga tsjáha̱nu̱u Nti̱a̱ Na̱ꞌmiu̱ tu̱ mí nihí ni xi ku̱i̱nchíhu̱u ngajona̱.
\v 17 Kui kju̱a̱téxumana̱ xuꞌbi̱: Bꞌi̱ ngján nꞌe̱tjó xinki̱u.
\s Bꞌi̱ tsꞌín kitsúya Jesu nga nꞌe̱ uncha já niꞌyakuyáha̱
\p
\v 18 ’Tsa tsꞌi̱ín unkienu̱u xu̱ta̱ a̱sunntee̱, nꞌe̱kjꞌáítsjon nga an tjun kitsꞌín unkiena.
\v 19 Tsa a̱sunntei̱ tsꞌe̱nu̱u, tsꞌi̱íntjonu̱u xu̱ta̱ a̱sunntei̱ xi nkú tsꞌín tjoho̱ xinkjín. Tu̱nga najmi a̱sunntei̱hí tsꞌe̱nu̱u, a̱tꞌaha̱ an jꞌajínnu̱u a̱jihi̱n xu̱ta̱ xi tjín a̱sunntei̱. Kui kju̱a̱ha nga tsꞌi̱ín unkiehe̱nu̱u.
\p
\v 20 ’Tꞌejin takꞌun én xi kuaxinnu̱u, nga nku nda̱ musu̱ najmi ꞌyún nkꞌa tje̱n nga nda̱ nti̱a̱ha̱. Tsa tje̱nnki unkiena xu̱ta̱, ko̱ ta̱ jun tsjénnki unkienu̱u. Ko̱ tsa títsꞌíntjusun énna̱, ta̱ tsꞌi̱íntjusun énnu̱u.
\v 21 Ngayjee̱ ni xuꞌbi̱ tsꞌi̱ínko̱nu̱u xu̱ta̱ tu̱ nga̱tꞌana̱, a̱tꞌaha̱ najmi i̱ncha be xi kitsꞌín nibána.
\p
\v 22 ’Tsa najmi jái̱ nchjaka̱ xu̱ta̱ xuꞌbo̱, najmi sꞌe̱he̱ ra̱ jé. Tu̱nga ndꞌa̱i̱ najmi ta̱ tjín nkú tsꞌín ku̱a̱si̱nko̱ho yjoho̱ nga̱tꞌaha̱ ngatitsun xi tíi̱ncha tsꞌín.
\v 23 Xi unkiena ta̱ unkie Na̱ꞌmina̱.
\v 24 Ni xi ndaha nku najmi kje̱e chꞌaha tsꞌín kitsꞌian a̱jihi̱n xu̱ta̱ xuꞌbo̱. Tsa najmi bꞌa̱ kitsꞌian, najmi sꞌe̱he̱ ra̱ jé. Tu̱nga ndaha tsa i̱ncha kikie ni xi kitsꞌian, tu̱ nkú i̱ncha kitsꞌín unkiehéni̱ Na̱ꞌmina̱ ko̱ an.
\v 25 Bꞌa̱ kama tu̱ xi tsitjusuhun ni xi tjítꞌa xu̱ju̱n kju̱a̱téxumaha̱ xu̱ta̱ xuꞌbo̱ má nga bꞌa̱ títsu: “Chu̱ba̱ i̱ncha kitsꞌín unkiehéna.”
\p
\v 26 ’Tu̱nga kjꞌu̱a̱íhí xi ku̱a̱si̱nko̱nu̱u, xi tsꞌin nibásenu̱u nkꞌie nga tíi̱jñaka̱ Na̱ꞌmiu̱. Má tíjña Na̱ꞌmiu̱ ni̱baha. Kui xi Espiri̱tu̱ Santo̱ xi ku̱a̱kúchji ni xi na̱xu̱. Kui ku̱i̱nchja̱ni̱jmíyahana.
\v 27 Jun bi ta̱ chu̱bani̱jmíyahanú, a̱tꞌaha̱ santaha nkúhu nga tutsꞌihi̱n ni tintsu̱ba̱ko̱nú.
\c 16
\p
\v 1 ’Tíxinyanu̱u ni xuꞌbi̱ tu̱ xi najmi nꞌe̱ndyjajihi̱n ru̱u yjonu̱u.
\v 2 A̱tꞌaha̱ ku̱i̱chꞌonsjenu̱u a̱jihi̱n xu̱ta̱ sinagoga̱. Ku̱i̱chú chu̱ba̱ nkꞌie nga tu̱ yáhá ni xi tsꞌi̱ínkꞌiennu̱u, bꞌa̱ ka̱maha̱ nkꞌie nga sa̱síhi̱n Nti̱a̱ná nkꞌie nga bꞌa̱ tsꞌi̱ínnu̱u.
\v 3 Bꞌa̱ tsꞌi̱ínnu̱u xu̱ta̱ a̱tꞌaha̱ najmi beni̱, ta̱ ndaha Na̱ꞌmiu̱ ko̱ ta̱ ndaha an.
\v 4 Tíxinyanu̱u nga bꞌa̱ ka̱ma tu̱ xi nkꞌie nga ku̱i̱chúhu chu̱bo̱ kjꞌu̱a̱ítsjehe̱nnu̱u nga bꞌa̱ kixinnu̱u.
\s Bꞌi̱ tsꞌín kitsúya Jesu ni xi tsꞌi̱ín Espiri̱tu̱ Santo̱
\p ’Najmi kixinyanu̱u ni xuꞌbi̱ nga tutsꞌihi̱n ni a̱tꞌaha̱ an tíi̱jñajin sanu̱u.
\v 5 Tu̱nga ndꞌa̱i̱ tífia má tíjña xi kitsꞌín nibána. Jun najmi tíchasjaiyanú má kfíán.
\v 6 Tu̱ sa ní tíꞌbe nusin nusinnu̱u a̱tꞌaha̱ bꞌa̱ tíxinnu̱u.
\v 7 Tu̱nga kju̱axi̱hí ni xi tíxinnu̱u. Tu̱ sahá ngandanu̱u nga kfíán. A̱tꞌaha̱ tsa najmi kfíán, najmi kjꞌu̱a̱í xi ku̱a̱si̱nko̱nu̱u. Tu̱nga tsa kfíán, kui xi tsꞌin nibásenu̱u.
\p
\v 8 ’Nkꞌie nga kjꞌu̱a̱í, tsꞌi̱ín nga ka̱mankjihi̱n xu̱ta̱ xi tjín a̱sunntei̱ nga ngatitsun tjíhi̱n, ko̱ nga an kitsꞌian ni xi na̱xu̱ nginku̱n Nti̱a̱ná, ko̱ nga Nti̱a̱ná ku̱a̱se̱he̱ ni xi nda ko̱ ni xi najmi nda kitsꞌín xu̱ta̱.
\v 9 Ka̱mankjihi̱n xu̱ta̱ nga ngatitsun tjíhi̱n, a̱tꞌaha̱ najmi sꞌejihi̱n an.
\v 10 Ka̱mankjihi̱n nga na̱xu̱ kitsꞌian, a̱tꞌaha̱ tífia má tíjña Na̱ꞌmiu̱. Najmi ta̱ cha̱hanú.
\v 11 Ko̱ ka̱mankjihi̱n nga Nti̱a̱ná ku̱a̱se̱he̱ ni xi nda ko̱ ni xi najmi nda kitsꞌín, a̱tꞌaha̱ ja kisꞌenéhe̱ ni xi kanéhe̱ xi batéxumaha̱ a̱sunntei̱.
\p
\v 12 ’Tjín ṉkjún sana ni xi xínyanu̱u tu̱nga najmi ka̱makjinnu̱u ndꞌa̱i̱.
\v 13 Nkꞌie ní kjꞌu̱a̱í Espiri̱tu̱ xi bꞌéjña chji ni xi na̱xu̱ tjín, kui xi ku̱a̱kúyanu̱u ngayjee̱ ni xi na̱xu̱ tjín. A̱tꞌaha̱ najmi kuenta̱ha̱ ku̱i̱nchja̱ha. Ni xi ku̱i̱ntꞌé ní, kui ní nihi xi ku̱i̱nchja̱. Ko̱ ta̱ ku̱i̱tsu̱yanu̱u ni xi ka̱ma a̱skahan.
\p
\v 14 ’Kui xi tsꞌi̱ín nga ka̱mankjinnu̱u ni xi títsꞌian. Bꞌa̱ tsꞌín kꞌu̱éjña chjihi kju̱a̱chánkana̱.
\v 15 Ngayjee̱ ni xi yꞌaha̱ ra̱ Nti̱a̱ Na̱ꞌmiu̱, ko̱ ta̱ an yꞌahana. Kui kju̱a̱ha nga bꞌa̱ tíxihi̱nnu̱u nga Espiri̱tu̱ tsꞌi̱ín nga ka̱mankjinnu̱u ni xi títsꞌian.
\s Bꞌi̱ tsꞌín kitsúyaha̱ Jesu já niꞌyakuyáha̱ nga ngju̱a̱i̱
\p
\v 16 ’Sa kutju najmi ta̱ cha̱hanú, ko̱ sa kutju cha̱ ngáhanú. A̱tꞌaha̱ má tíjña Na̱ꞌmiu̱ kfíán.
\p
\v 17 A̱sꞌa̱i kꞌu̱a̱ já niꞌyakuyáha̱ bꞌi̱ ngján kingjásjaiyaha̱ xinkjín:
\p —¿Nkú tsuhu̱ ra̱ niu̱? Bꞌa̱ títsuná: “Sa kutju najmi ta̱ cha̱hanú ko̱ sa kutju cha̱ ngáhanú.” Ko̱ ta̱ bꞌa̱ títsu: “A̱tꞌaha̱ má tíjña Na̱ꞌmiu̱ kfíán.”
\v 18 ¿Nkú tsuhu̱ ra̱ én xi tsu: “sa kutju”? Najmi mankjinná ni xi tínchja̱ko̱ná.
\p
\v 19 Kamankjihi̱n Jesu nga mjehe̱ já niꞌyakuyóo̱ ngju̱ásjaiyaha̱ nkú tsuhu̱ ra̱ niu̱ ko̱ bꞌa̱ kitsú:
\p —Ja bꞌa̱ kuaxinnu̱u nga sa kutju najmi ta̱ cha̱hanú ko̱ sa kutju cha̱ ngáhanú. ¿A kui nihi xi tíchubani̱jmíyako̱honu xinki̱u?
\v 20 Kju̱axi̱ ni xi tíxinnu̱u. Chꞌi̱ú ko̱ kꞌúé nusin nusinnu̱u, tu̱nga xu̱ta̱ xi najmi be Nti̱a̱ná bi sꞌe̱he̱ kju̱a̱tsjo. Ndaha tsa kꞌúé nusin nusinnu̱u, tu̱nga a̱skahán ni kju̱a̱tsjo ka̱ma ngáha kju̱a̱nusinnu̱u.
\p
\v 21 ’Xi nkúhu nku ta̱chju̱ún xi tsihi̱n nku ntí, sꞌehe̱ kju̱a̱ba a̱tꞌaha̱ ja kuichu chu̱ba̱ha̱. Tu̱nga nkꞌie nga ja kuatsin ntíu̱, najmi ta̱ fꞌáítsjehe̱n ra̱ kju̱a̱ni̱mo̱, a̱tꞌaha̱ tsjo maha̱ nga nku ntí sꞌejñaha̱.
\v 22 Bꞌa̱ ta̱ tsꞌín tíma nusinnu̱u ndꞌa̱i̱, tu̱nga ni̱basehé ngáha̱nu̱u. Tsjo kꞌúé ngáha̱ ra̱ ani̱ma̱nu̱u ko̱ najmi chꞌa xi ka̱ma kjéꞌanu̱u kju̱a̱tsjonu̱u.
\p
\v 23 ’Kui ni̱stjiu̱n ndaha nku ni najmi ta̱ cha̱sjaiyahanú. Kju̱axi̱ ni xi tíxinnu̱u. Tsjánu̱u Nti̱a̱ Na̱ꞌmiu̱ tu̱ mí nihí ni xi ku̱i̱nchíhu̱u ngajona̱.
\v 24 Santaha ndꞌa̱i̱ ndaha nku ni najmi kje̱e binchiu ngajona̱, tu̱nga ndꞌa̱i̱ ti̱nchíú ko̱ nꞌe̱kjóho̱on tu̱ xi ꞌyún sꞌe̱he̱nu̱u kju̱a̱tsjo.
\p
\v 25 ’Tíbꞌejñá chu̱ba̱yanu̱u ndꞌa̱i̱ tu̱nga ku̱i̱chúhú chu̱ba̱ nkꞌie nga najmi ta̱ kꞌuejñá chu̱ba̱yaha̱nu̱u. Kꞌuejñá chji sisinnu̱u Nti̱a̱ Na̱ꞌmiu̱.
\v 26 Kui ni̱stjiu̱n ku̱i̱nchíú ni xi mjenu̱u ngajona̱. Najmi ka̱machjén tsa an kuankintjáínu̱u nginku̱n Nti̱a̱ Na̱ꞌmiu̱.
\v 27 Kui xi ta̱ tjoho̱ jun, a̱tꞌaha̱ tjonu̱u an ko̱ sꞌejinnu̱u nga má tíjña Nti̱a̱ná nibahana.
\v 28 Má tíjña Nti̱a̱ Na̱ꞌmiu̱ nibahana ko̱ jáa̱ a̱sunntei̱. Kꞌuejñá ngáhana a̱sunntei̱ ko̱ kfínse ngáha̱ ra̱ Nti̱a̱ Na̱ꞌmiu̱.
\p
\v 29 Bꞌa̱ i̱ncha kitsú já niꞌyakuyáha̱:
\p —Ndꞌa̱i̱ tíchubako̱ kixi̱ kixi̱ni̱. Najmi tíbꞌejña chu̱ba̱yani̱.
\v 30 Tímankjinni̱ ndꞌa̱i̱ nga yai ngayjee̱ ni xi tjín ko̱ najmi machjén tsa tjín xi ngju̱ásjaiyahi. Kui kju̱a̱ha nga sꞌejihi̱nni̱ nga má tíjña Nti̱a̱ná nibahani.
\p
\v 31 Bꞌi̱ kitsú Jesu:
\p —¿A sꞌejinnu̱u ndꞌa̱i̱?
\v 32 Tu̱nga ku̱i̱chúhú chu̱ba̱ ko̱ ja kuichu chu̱bo̱ ndꞌa̱i̱ nkꞌie nga nkúnkú kuankín tꞌaxíún nga sa̱téndzjoyo ko̱ kꞌúéjña su̱ba̱nú. Tu̱nga najmi tíi̱jña su̱ba̱ná, a̱tꞌaha̱ Nti̱a̱ Na̱ꞌmiu̱ tíjñako̱na.
\v 33 Tíxinyanu̱u ni xuꞌbi̱ tu̱ xi sꞌe̱he̱nu̱u kju̱a̱jyuna̱. Un sku̱e̱nu̱u a̱sunntei̱, tu̱nga tsjohó katꞌenu̱u a̱tꞌaha̱ an ja kitsꞌin ngana̱ha̱ a̱sunntei̱.
\c 17
\s Bꞌi̱ tsꞌín kinchja̱ntjai Jesu já niꞌyakuyáha̱
\p
\v 1 Nkꞌie nga ja kamaha̱ Jesu nga bꞌa̱ kitsú, a̱sꞌa̱i tsasenjinki nkꞌa ján ko̱ kinchja̱ko̱ Nti̱a̱ná nga bꞌi̱ kitsú:
\p —Ji Na̱ꞌmi, ja kuichu chu̱ba̱. Ta̱kúchji kju̱a̱chánkaha̱ Ntíhi̱ tu̱ xi ko̱ kui Ntíhi̱ ku̱a̱kúchjihi kju̱a̱chánkahi̱.
\v 2 A̱tꞌaha̱ kikꞌa̱i̱ xáhi̱ xi má nga ku̱a̱téxumaha̱ ngayjee̱ xu̱ta̱, tu̱ xi tsꞌi̱ínkꞌíéntu tíkꞌun síhin ngayjee̱ xi ji kikꞌa̱i̱hi̱.
\v 3 Nga kꞌúéntu tíkꞌun sín xu̱ta̱, kui xi tsuhu̱ ra̱ nga sku̱e̱hi ji xi Nti̱a̱ nku tutuu̱ ko̱ nga sku̱e̱na an Jesucristo̱ xi kinꞌe nibáí.
\p
\v 4 ’Ja tsakuchjá kju̱a̱chánkahi̱ a̱sunntei̱ nga kitsꞌintjusan xá xi kikꞌa̱i̱ní.
\v 5 Ndꞌa̱i̱ Na̱ꞌmi, ta̱kúchji kju̱a̱chánkana̱ nginkuin, kju̱a̱chánka xi tu̱ bꞌa̱ tsꞌín jahá tíjñana nginkuin kintehe̱ ni nga kisꞌejña a̱sunntei̱.
\p
\v 6 ’Ja yꞌejñá chjihi̱ xu̱ta̱ yáha ji, xu̱ta̱ xi kikꞌa̱i̱ní a̱jihi̱n xu̱ta̱ xi tjín a̱sunntei̱. Ji tsꞌi̱ xu̱ta̱ xuꞌbi̱ ko̱ kikꞌa̱i̱ní, ko̱ kitsꞌíntjusun éhi̱n.
\v 7 Mankjihi̱n ndꞌa̱i̱ nga ngayjee̱ ni xi kikꞌa̱i̱ní má tinchin nibáha.
\v 8 A̱tꞌaha̱ én xi kikꞌa̱i̱ní, kixinyaha̱ xu̱ta̱ xuꞌbi̱. Kitsꞌínkjáíhi̱n ko̱ kamankjihi̱n nga kju̱axi̱ nga má tinchin nibahana. Sꞌejihi̱n nga ji kinꞌe nibání.
\p
\v 9 ’Tíbankintjáíhi xu̱ta̱i̱. Najmi tíbankintjáíhi xu̱ta̱ a̱sunntei̱. Tíbankintja xu̱ta̱ xi kikꞌa̱i̱ní a̱tꞌaha̱ ji tsꞌi̱.
\v 10 Ngayjee̱ xu̱ta̱ xi tsꞌa̱n ji ta̱ tsꞌi̱, ko̱ xi tsꞌi̱ an ta̱ tsꞌa̱n. Tíma chji kju̱a̱chánkana̱ a̱jihi̱n xu̱ta̱ xuꞌbi̱.
\p
\v 11 ’An kfíán má tinchin, tu̱nga kui kꞌúéntu sa a̱sunntei̱. Tsje ní ji, Na̱ꞌmi. Ngaꞌyíhi̱n chúnko̱ho̱ ri̱ xu̱ta̱ xuꞌbi̱ xi kikꞌa̱i̱ní tu̱ xi nkuhú i̱ncha ka̱maha xi nkúhu ñá.
\v 12 Nkꞌie nga tsáte̱jñajihi̱n xu̱ta̱ xuꞌbi̱ a̱sunntei̱, kikunko̱ho̱ ra̱ ngaꞌyíhi̱n ko̱ tsasehe̱. Ndaha nku najmi kindyja. Tu̱ nku sahá xi tje̱he̱n ra̱ nga ndyja̱, kui xi kindyja tu̱ xi ku̱i̱tjusuhun ni xi tjítꞌa xu̱ju̱n éhi̱n.
\p
\v 13 ’Tu̱nga ndꞌa̱i̱ má tinchin tífia. Tíxinya ni xuꞌbi̱ nkꞌie nga tíi̱jña sa a̱sunntei̱ tu̱ xi sꞌe̱jñajin kikjihi̱n ra̱ kju̱a̱tsjona̱ xu̱ta̱ xuꞌbi̱.
\v 14 An kixinyaha̱ éhi̱n, ko̱ xu̱ta̱ a̱sunntei̱ kitsꞌín unkiehe̱ a̱tꞌaha̱ najmi a̱sunntei̱ a̱ntehe̱ xi nkú tsꞌín najmi a̱sunntei̱ a̱ntena̱.
\v 15 Najmi tíbankihi nga ku̱i̱chꞌonsjei a̱sunntei̱, tu̱nga chjúxin tꞌaxíhín ri̱ ni xi chꞌonkꞌuu̱n.
\v 16 Najmi a̱sunntei̱ a̱ntehe̱ xi nkú tsꞌín najmi a̱sunntei̱ a̱ntena̱.
\v 17 Éhi̱n bakúya ni xi na̱xu̱ tjín. Nꞌe̱i nga katumankjihi̱n xu̱ta̱ xuꞌbi̱ ni xi na̱xu̱, tu̱ xi katsꞌínkjasꞌehen ri yjoho̱ nga tsꞌi̱ín ni xi mjehi.
\v 18 Xi nkú tsꞌín kinꞌe nibání a̱sunntei̱, bꞌa̱ tsꞌín títsꞌinkjíá xu̱ta̱ xuꞌbi̱ a̱sunntei̱.
\v 19 Ngandaha̱ xu̱ta̱ xuꞌbi̱ títsjaha̱ yjona̱ nga tsꞌian ni xi mjehi, tu̱ xi ko̱ ta̱ kui ka̱maha̱ ra̱ tsꞌi̱ínkjasꞌehen ri yjoho̱ nkꞌie nga ka̱mankjihi̱n ni xi na̱xu̱ tjín.
\p
\v 20 ’Najmi tu̱ nku xu̱ta̱ xuꞌbi̱ tíbankintja. Ta̱ tíbankintjá xi sꞌe̱jihi̱n an nkꞌie nga ku̱i̱ntꞌé én xi ku̱i̱tsu̱ya xu̱ta̱ xuꞌbi̱,
\v 21 tu̱ xi nkuhú ka̱maha ngayjee̱. Xi nkú tsꞌín tinchunjinní ko̱ an tíi̱jñajihin, Na̱ꞌmi, bꞌa̱ ta̱ tsꞌín nkuhú katumajinná xu̱ta̱ xuꞌbi̱, tu̱ xi sꞌe̱jihi̱n ra̱ xu̱ta̱ a̱sunntei̱ nga ji kinꞌe nibání.
\v 22 Kitsjaha̱ xu̱ta̱ xuꞌbi̱ kju̱a̱chánka xi kikꞌa̱i̱ní tu̱ xi nkuhú ka̱maha xi nkú tsꞌín nkuhú mahaná.
\v 23 An tíi̱jñajihi̱n xu̱ta̱ xuꞌbi̱ ko̱ ji tinchunjínní tu̱ xi bꞌa̱ tsꞌín nkuhú ku̱i̱chú maha. Bꞌa̱ tsꞌín xu̱ta̱ a̱sunntei̱ ka̱mankjihi̱n ra̱ nga ji kinꞌe nibání ko̱ nga tjohi xu̱ta̱ xuꞌbi̱ xi nkú tsꞌín tjohi an.
\p
\v 24 ’Ji Na̱ꞌmi, mjena nga kꞌúéntuko̱na xu̱ta̱ xi kikꞌa̱i̱ní má nga kúáte̱jña, tu̱ xi sku̱e̱he kju̱a̱chánkana̱ xi kikꞌa̱i̱ní a̱tꞌaha̱ kinꞌetjóní kintehe̱ ni nga kamanda a̱sunntei̱.
\v 25 Ji Na̱ꞌmi xi na̱xu̱ nꞌeko̱i xu̱ta̱, xu̱ta̱ a̱sunntei̱ najmi behi. Tu̱nga máha an, behe ko̱ ta̱ xu̱ta̱ xuꞌbi̱ be nga ji kinꞌe nibání.
\v 26 Yꞌejñá chjihi̱ xu̱ta̱ xuꞌbi̱ yáha ji ko̱ tu̱ nku kꞌuejñá chjihí saha̱, tu̱ xi ka̱maha̱ ra̱ tsꞌi̱íntjoho xu̱ta̱ xinkjín xi nkú tsꞌín tjohi an. Bꞌa̱ tsꞌín kúáte̱jñajihi̱n ra̱.
\c 18
\s Bꞌi̱ tsꞌín jꞌaichjꞌanijé Jesu
\r (Mt. 26:47-56; Mr. 14:43-50; Lc. 22:47-53)
\p
\v 1 Nkꞌie nga ja kamaha̱ nga kinchja̱ko̱ Nti̱a̱ná Jesu, a̱sꞌa̱i tsitjuko̱ já niꞌyakuyáha̱. I̱ncha ngji ngabantá ntáxu̱nká Cedron ko̱ jasꞌen nku a̱nte má tjíntje̱ yá tu.
\v 2 Juda̱ xi títsꞌínkjasꞌehe̱n ta̱ be a̱nte xuꞌbo̱, a̱tꞌaha̱ nkjin ni̱yá kama ñjako̱ Jesu já niꞌyakuyáha̱ yo̱.
\v 3 Kui nga Juda̱ jꞌaiko̱ho já jun ko̱ chuba já xi kunntá ni̱nku̱ xi kitsꞌín nibá já na̱ꞌmi kꞌaku̱ ko̱ já fariseo̱. Kui xi i̱ncha yꞌa ndꞌí ko̱ ki̱cha̱.
\v 4 Ja be Jesu ngayjee̱ ni xi ka̱maha̱ ko̱ tsasinjña títjun nga bꞌi̱ kitsúhu̱ jóo̱:
\p —¿Yá xi tíbinchisjó?
\p
\v 5 Bꞌa̱ i̱ncha kitsú jóo̱:
\p —Jesu, nda̱ xi nibáha Nazaret.
\p —Ahán niu̱ —kitsú Jesu.
\p Ta̱ kabasinjñajihi̱n jóo̱ Juda̱ xi títsꞌínkjasꞌehe̱n.
\v 6 Nkꞌie nga bꞌa̱ kitsú Jesu: “Ahán niu̱”, i̱ncha ngjinji a̱stu̱n jóo̱ ko̱ tsixuntu.
\v 7 A̱sꞌa̱i Jesu ta̱ kingjásjaiyahá ngáha̱ ra̱:
\p —¿Yá xi tíbinchisjó?
\p Bꞌa̱ i̱ncha kitsú jóo̱:
\p —Jesu, nda̱ xi nibáha Nazaret.
\p
\v 8 Bꞌi̱ kitsú Jesu:
\p —Ja bꞌa̱ kuaxinnu̱u nga ahán niu̱. Tsa an xi tíbinchisjáínú, tjehe̱nnto nga katji já xuꞌbi̱.
\p
\v 9 Bꞌa̱ kama tu̱ xi tsitjusuhun én xi kinchja̱ Jesu nga kinchja̱ko̱ Nti̱a̱ná nkꞌie nga bꞌa̱ kitsú: “Na̱ꞌmi, xu̱ta̱ xi kikꞌa̱i̱ní, ndaha nku najmi kitsꞌinndyja.”
\v 10 A̱sꞌa̱i tsꞌasje ki̱cha̱ xi yꞌa Simon Pedro̱ ko̱ kingjáha̱ nga tsatetꞌa tja̱ba̱xínñju kixi̱ nda̱ xi ꞌmi Malco̱, xi nda̱ musu̱hu̱ nda̱ na̱ꞌmi títjuu̱n.
\v 11 Tu̱nga bꞌi̱hí kitsúhu̱ Jesu Pedro̱:
\p —Tjaya ngáhani ki̱cha̱hi̱ tja̱ba̱xíhi̱n. Tsa Nti̱a̱ Na̱ꞌmiu̱ títsjána kju̱a̱ni̱ma̱ xuꞌbi̱, ¿a najmi tjíhín ni nga un sku̱e̱na?
\p
\v 12 A̱sꞌa̱i já juu̱n ko̱ nda̱ jun kꞌaku̱hu̱ ko̱ já xi kunntá ni̱nku̱ i̱ncha jakjꞌánijé Jesu nga yꞌétꞌaꞌyún.
\v 13 Títjun ngjiko̱ niꞌyaha̱ Ana, na̱ꞌmi nchíꞌyaha̱ Caifa, xi tjíhi̱n nda̱ na̱ꞌmi títjun nú xuꞌbo̱.
\v 14 Kui Caifa xi tsincháꞌa já judio̱ kꞌaku̱ nga bꞌa̱ kitsú nga tu̱ sahá nda tjín tsa nku nda̱ ku̱a̱yántjai ngandaha̱ ngayjee̱ xu̱ta̱.
\s Bꞌi̱ tsꞌín kitsúya Pedro̱ nga najmi be Jesu
\r (Mt. 26:69-70; Mr. 14:66-68; Lc. 22:55-57)
\p
\v 15 Simon Pedro̱ ko̱ kjꞌa̱í sa nda̱ niꞌyakuyá i̱ncha kitsjennkíhi̱ Jesu. Nda̱ niꞌyakuyá xuꞌbi̱ behe̱ nda̱ na̱ꞌmi títjuu̱n ko̱ jasꞌenko̱ Jesu na̱tsin niꞌyaha̱ nda̱ na̱ꞌmi títjuu̱n.
\v 16 Tu̱nga máha Pedro̱, tsasinjña na̱tsiu̱n má tje̱n a̱nkju̱o̱. Kui nga a̱sꞌa̱i tsitjuhu nda̱ niꞌyakuyá xi behe̱ ra̱ nda̱ na̱ꞌmi títjuu̱n ko̱ kinchja̱ko̱ na̱ xi tíkunntá a̱nkju̱o̱ nga kitsꞌínkjasꞌen Pedro̱.
\v 17 A̱sꞌa̱i kingjásjaiya na̱ xi tíkunntá a̱nkju̱o̱:
\p —¿A najmi ko̱hó ji xi ta̱ chá niꞌyakuyáha̱ chá xuꞌbo̱?
\p —Najmi an —kitsú Pedro̱.
\p
\v 18 Nchꞌán kui ni̱stjiu̱n. Kui nga já musu̱ ko̱ já xi kunntáha ni̱nku̱ tíi̱ncha tsꞌínsutꞌáha yjoho̱ tꞌa ndꞌí xi katsꞌínꞌyún. Pedro̱ ta̱ síjñajihi̱n nga títsꞌínsutꞌá yjoho̱.
\s Bꞌi̱ tsꞌín kinꞌeko̱kju̱a̱ Jesu nginku̱n nda̱ na̱ꞌmi títjuu̱n
\r (Mt. 26:59-66; Mr. 14:55-64; Lc. 22:66-71)
\p
\v 19 A̱sꞌa̱i nda̱ na̱ꞌmi títjuu̱n kingjásjaiyaha̱ Jesu yáha já niꞌyakuyáha̱ ko̱ mí nihi xi bakúya.
\v 20 Bꞌi̱ kitsú Jesu:
\p —Kinchja chji chja nginku̱n ngayjee̱ xu̱ta̱. Tehe̱nte tsakuyá niꞌya sinagoga̱ ko̱ na̱tsihi̱n ni̱nku̱ má nga ma ñjakú ngayjee̱ xu̱ta̱ judio̱. Ndaha nku ni najmi kinchja ꞌma.
\v 21 ¿Á an tíchasjaiyahaní? Cha̱sjaiyaihi̱ xu̱ta̱ xi kintꞌé ni xi kinchja. Kui xi be ni xi kinchja.
\p
\v 22 Nkꞌie nga bꞌa̱ kitsú Jesu, a̱sꞌa̱i kikꞌonjihi̱n nku nda̱ xi kunntá ni̱nku̱ ko̱ bꞌa̱ kitsúhu̱:
\p —¿Á bꞌa̱ nꞌe tíchubako̱honi nda̱ na̱ꞌmi títjuu̱n?
\p
\v 23 Bꞌi̱ kitsú Jesu:
\p —Tsa chꞌon kuaxian, tꞌinyaní má én chꞌon tsuhu xi kuanchja. Tu̱nga tsa bꞌa̱ tjín ni xi kuaxian, ¿á kuakichꞌonjihinní?
\p
\v 24 A̱sꞌa̱i Ana kitsꞌínkji Jesu nginku̱n Caifa xi nda̱ na̱ꞌmi títjun nga tjínꞌyún tsꞌíhi̱n ra̱.
\s Bꞌi̱ tsꞌín Pedro̱ bꞌa̱há ta̱ kitsú ngáha nga najmi be Jesu
\r (Mt. 26:71-75; Mr. 14:69-72; Lc. 22:58-62)
\p
\v 25 Máha Simon Pedro̱, kabasinjña sa nga títsꞌínsutꞌá yjoho̱ tꞌa ndꞌíu̱. A̱sꞌa̱i kichasjaiyaha̱:
\p —¿A najmi ko̱hó ji xi ta̱ nku nda̱ niꞌyakuyáha̱ ndo̱?
\p Tu̱nga najmi kitsꞌínkiehé yjoho̱ Pedro̱. Bꞌa̱ kitsú:
\p —Najmi an niu̱.
\p
\v 26 Nku nda̱ musu̱hu̱ nda̱ na̱ꞌmi títjuu̱n xi xinkjín maha nda̱ xi Pedro̱ tsatetꞌa tja̱ba̱xínñju, kui xi ta̱ kingjásjaiyaha̱:
\p —¿A najmi kuakiehé ra nga ko̱ ji kabisinjñako̱i̱ ndo̱ ján má tjíntje̱ yá tuu̱?
\p
\v 27 Tu̱nga bꞌa̱há ta̱ kitsú ngáha Pedro̱ nga najmi be Jesu. Ko̱ ta̱ kuihi chu̱bo̱ kikjintá nku xa̱nta̱.
\s Bꞌi̱ tsꞌín kinꞌeko̱kju̱a̱ Jesu nginku̱n nda̱ títjun Pilato̱
\r (Mt. 27:1-2, 11-14; Mr. 15:1-5; Lc. 23:1-5, 13-25)
\p
\v 28 A̱sꞌa̱i tsitjuko̱ho̱ jóo̱ Jesu niꞌyaha̱ Caifa nga ngjiko̱ho̱ niꞌya pretori̱o̱, má nga tsꞌín kju̱a̱ nda̱ títjun Roma̱. Ja tífi ma sen niu̱ ko̱ najmi i̱ncha jasꞌen jóo̱ niꞌya pretori̱o̱, a̱tꞌaha̱ tsa kju̱a̱sꞌen nku niꞌya xi najmi xu̱ta̱ judio̱ tsꞌe̱, tsuhu̱ ra̱ nga najmi ta̱ jehe nginku̱n Nti̱a̱ná ko̱ najmi ta̱ ma kjinehe nichinehe̱ Sꞌí Pascu̱a̱.
\v 29 Kui nga tsitjusjehe Pilato̱ na̱tsiu̱n nga jꞌai nchja̱ko̱ho̱ ra̱. Bꞌa̱ kitsúhu̱ jóo̱:
\p —¿Mí kju̱a̱ha tíbatejénehenu nda̱i̱?
\p
\v 30 Bꞌa̱ kitsú jóo̱:
\p —Tsa najmi nda̱ chꞌonkꞌun niu̱, najmi a̱ya ntsa̱i̱ ra̱ nꞌe̱kjasꞌei̱n.
\p
\v 31 Bꞌa̱ kitsú Pilato̱:
\p —Tu̱ sahá tankínko̱o ko̱ nꞌe̱ko̱kju̱o̱o xi nkú tsꞌín tíjña kju̱a̱téxumanu̱u.
\p Bꞌa̱ kitsú já judio̱ kꞌaku̱:
\p —Tíjña nkjúnni̱ tsa nꞌe̱kꞌiei̱n xu̱ta̱.
\p
\v 32 Bꞌa̱ tsꞌín tsitjusuhun én xi kinchja̱ Jesu nga kitsúya títjun nkú tsꞌín ku̱a̱yáha.
\v 33 A̱sꞌa̱i jasꞌen ngáha Pilato̱ niꞌya pretori̱o̱. Kinchja̱ha̱ Jesu ko̱ bꞌa̱ kitsúhu̱:
\p —¿A ji xi nda̱ rei̱hi̱ xu̱ta̱ judio̱?
\p
\v 34 Bꞌi̱ kitsú Jesu:
\p —¿A kuenta̱hi̱ bꞌa̱ tíbixíhinni, a ra̱ tjíhín xi kuatsúyahi yáha an?
\p
\v 35 Bꞌa̱ kitsú Pilato̱:
\p —¿A nda̱ judio̱ná? Xu̱ta̱ nankihi̱ ko̱ já na̱ꞌmi kꞌaku̱ kuatsꞌínkjasꞌenna ji. ¿Mí nihi xi kinꞌei?
\p
\v 36 Bꞌi̱ kitsú Jesu:
\p —Najmi bꞌa̱ tsꞌín batexuma xi nkú tsꞌín batéxuma já rei̱ xi tjín a̱sunntei̱. Tsa ni xi bꞌa̱ tsꞌín tíbatexumahana kai, kja̱ántjaina xi tíi̱ncha tsꞌínxátꞌana tu̱ xi najmi nꞌe̱kjasꞌehe̱n ra̱ an já judio̱ kꞌaku̱. Tu̱nga najmi bꞌa̱há tsꞌín tíbatexuma.
\p
\v 37 Bꞌa̱ kitsú Pilato̱:
\p —¿A xúhu̱ nda̱ rei̱ ní?
\p Bꞌi̱ kitsú Jesu:
\p —Nda̱ rei̱, xi nkú tíbixín. Tu̱nga kitsinná ko̱ jáa̱ a̱sunntei̱ tu̱ xi kuakuyáhana ni xi na̱xu̱ tjín. Ngayjee̱ xu̱ta̱ xi tsꞌínkjáíhi̱n ni xi na̱xu̱ tjín ntꞌé nta̱na̱.
\p
\v 38 Bꞌa̱ ta̱ kitsú ngáha Pilato̱:
\p —¿Mí nihi xi na̱xu̱?
\p Nkꞌie nga bꞌa̱ kitsú, a̱sꞌa̱i tsitju nga ngjise ngáha̱ ra̱ xu̱ta̱ judio̱. Bꞌa̱ kitsúhu̱:
\p —Najmi chumi jéhe tísakújinna tsa tje̱he̱n ndo̱.
\v 39 Tu̱nga bꞌa̱há tsꞌín tíjña ni̱yánu̱u nga tsꞌin nda̱íhi̱ nku nda̱ nu̱ba̱yá xi binchinú nga Sꞌí Pascu̱a̱. ¿A mjenu̱u nga tsꞌin nda̱íhi̱ nda̱ rei̱hi̱ xu̱ta̱ judio̱?
\p
\v 40 A̱sꞌa̱i bꞌa̱ i̱ncha kitsú jóo̱ nga kikjintáya:
\p —¡Najmi tu̱ kui ndo̱ nꞌe nda̱íhi̱! ¡Tu̱ sahá Barraba nꞌe nda̱íhi̱!
\p Máha nda̱ Barraba, nda̱ ndyjéhé niu̱.
\c 19
\p
\v 1 A̱sꞌa̱i kitsjá kju̱a̱ Pilato̱ nga sꞌe̱he̱ Jesu.
\v 2 Já juu̱n kitsꞌínnda nku corona̱ naꞌyá ko̱ yꞌéꞌaha̱ nintaku̱. Kitsꞌínngja nku najyun ndju kuan xi nkúhu xi bja já rei̱ nga i̱ncha kikꞌaya.
\v 3 Jꞌaikꞌúhu̱n ko̱ kikꞌonjin nga bꞌa̱ kitsúhu̱:
\p —¡Antahi, nda̱ rei̱hi̱ xu̱ta̱ judio̱!
\p
\v 4 A̱sꞌa̱i ta̱ tsitjuhú ngáha Pilato̱ na̱tsiu̱n ko̱ bꞌa̱ kitsúhu̱ jóo̱:
\p —Tsꞌinkꞌonsje̱nu̱u ndo̱ na̱tsiu̱n tu̱ xi cha̱hanu nga najmi chumi jéhe xi tísakújinna ndo̱.
\p
\v 5 A̱sꞌa̱i tsitju Jesu na̱tsiu̱n nga tjíꞌa tsꞌíhi̱n ra̱ corona̱ naꞌyóo̱ ko̱ nga yja tsꞌíhin najyun ndju kuo̱n. Bꞌa̱ kitsú Pilato̱:
\p —¡Á ndo̱ e̱i̱!
\p
\v 6 Já na̱ꞌmi kꞌaku̱ ko̱ já xi kunntá ni̱nku̱, nkꞌie nga i̱ncha kikie Jesu kikjintáya:
\p —¡Tjatꞌa krui̱ ndo̱! ¡Tjatꞌa krui̱!
\p Bꞌa̱ kitsú Pilato̱:
\p —Tu̱ sahá jun tankínko̱o ko̱ tjatꞌa kruu̱. An najmi chumi jéhe xi tísakújinna ndo̱.
\p
\v 7 Bꞌa̱há ta̱ kitsú ngáha já judio̱ kꞌaku̱:
\p —Tíjñani̱ kju̱a̱téxuma ko̱ xi nkú tsꞌín tíjña kju̱a̱téxumani̱ tjíhin nga ku̱a̱yá nda̱i̱, a̱tꞌaha̱ Ntíhi̱ Nti̱a̱ná títsꞌín ma yjoho̱.
\p
\v 8 Nkꞌie nga kintꞌé Pilato̱ niu̱, ꞌyún kitsankjún sa.
\v 9 Ta̱ jasꞌehén ngáha niꞌya pretori̱o̱ ko̱ bꞌa̱ kitsúhu̱ Jesu:
\p —¿Má nibáhani?
\p Tu̱nga najmi kinchja̱há Jesu.
\v 10 A̱sꞌa̱i bꞌa̱ kitsú Pilato̱:
\p —¿A najmi chu̱bako̱hóní? ¿A najmi yaní tsa ka̱ma kjuatꞌá kruu̱hu ko̱ tsa tsꞌin nda̱í ngáhara?
\p
\v 11 Bꞌi̱ kitsú Jesu:
\p —Ndaha nku ni najmi ka̱ma nꞌe̱ní tsa najmi Nti̱a̱ná kitsjá xáhi. Kui kju̱a̱ha, xi kitsꞌínkjasꞌehenna a̱ya ntsa̱i̱ ꞌyún tje̱n saha̱ ra̱ jé nga ji.
\p
\v 12 Kui chu̱bo̱ kikꞌatutsꞌi̱hi̱n Pilato̱ nga tsangisjai ni̱yá xi nkú tsꞌín ka̱ma tsꞌi̱ín nda̱í ngáha̱ ra̱ Jesu. Tu̱nga bꞌi̱hí tsꞌín i̱ncha kikjintáya já judio̱ kꞌaku̱:
\p —¡Tsa nꞌe̱ nda̱íhi̱ ndo̱, najmi nda tínꞌei nginku̱n nda̱ títjun Cesa̱r! ¡Xi nda̱ rei̱ tsꞌín ma suba yjoho̱, kui xi tífi kontra̱ha̱ nda̱ títjun Cesa̱r!
\p
\v 13 Nkꞌie nga kintꞌé Pilato̱ én xuꞌbi̱, a̱sꞌa̱i kikꞌonsje Jesu na̱tsiu̱n ko̱ yꞌejña a̱nte xi má nga tsꞌín kju̱a̱, a̱nte xi ꞌmi Má Kjiya Ndji̱o̱, én xi tsuhu̱ ra̱ Gabata nga én hebreo̱.
\v 14 Ni̱stjin xuꞌbi̱ ja tíi̱ncha bꞌénda xu̱ta̱ ni xi tsꞌe̱ Sꞌí Pascu̱a̱, a̱tꞌaha̱ ja tíbichú tiña sꞌíu̱. Nkú ra̱ ma nga chu̱ba̱ te jo niu̱. A̱sꞌa̱i bꞌa̱ kitsúhu̱ Pilato̱ xu̱ta̱ judio̱:
\p —¡Á nda̱ rei̱nu̱u e̱i̱!
\p
\v 15 Bꞌa̱ i̱ncha kitsú xu̱to̱ nga kikjintáya:
\p —¡Ti̱chꞌonsje̱i ndo̱! ¡Ti̱chꞌonsje̱i! ¡Tjatꞌa krui̱ ndo̱!
\p Bꞌa̱ kitsú Pilato̱:
\p —¿A ngjuatꞌá kruu̱ná nda̱ rei̱nu̱u?
\p Bꞌa̱ kitsú já na̱ꞌmi kꞌaku̱:
\p —¡Najmi tjín sani̱ kjꞌa̱í nda̱ rei̱, tu̱ nku sahá nda̱ títjun Cesa̱r!
\p
\v 16 A̱sꞌa̱i Pilato̱ kitsjá kju̱a̱ nga sꞌe̱tꞌa kruu̱ Jesu ko̱ i̱ncha ngjiko̱ho̱ jóo̱.
\s Bꞌi̱ tsꞌín kisꞌetꞌa kruu̱ Jesu
\r (Mt. 27:32-44; Mr. 15:21-32; Lc. 23:26-43)
\p
\v 17 A̱sꞌa̱i tsitju Jesu nga yꞌanji kruu̱hu̱ nga ngji a̱nte xi ꞌmi Nintaku̱ A̱ni̱ma̱, én xi tsuhu̱ ra̱ Golgo̱ta̱ nga én hebreo̱.
\v 18 Yo̱ kisꞌetꞌa kruu̱ kui ko̱ jo sa já. Nku xi kisꞌetꞌa kruu̱ nga kixi̱hi̱ ko̱ nku nga skúhu̱n.
\v 19 Kitsjá kju̱a̱ Pilato̱ nga sꞌe̱tꞌa nku yáte a̱ntsjáku̱ kruu̱. Bꞌi̱ tsꞌín kisꞌetꞌa: “Jesu, nda̱ xi nibáha Nazaret, nda̱ rei̱hi̱ xu̱ta̱ judio̱.”
\v 20 Nkjin xu̱ta̱ judio̱ kitsꞌínya ntuu̱, a̱tꞌaha̱ tiña maha̱ na̱xi̱nantóo̱ a̱nte má nga kisꞌetꞌa kruu̱ Jesu ko̱ a̱tꞌaha̱ kisꞌetꞌa yátee̱ én hebreo̱ ko̱ én latin ko̱ én griego̱.
\v 21 A̱sꞌa̱i jꞌaisehe̱ Pilato̱ já na̱ꞌmi kꞌaku̱hu̱ xu̱ta̱ judio̱ ko̱ bꞌa̱ kitsúhu̱:
\p —Najmi nda tjín nga: “Nda̱ rei̱hi̱ xu̱ta̱ judio̱”, tjítꞌa yátee̱. Tu̱ sahá tꞌetꞌai nga: “Kui xi kitsú: An xi nda̱ rei̱hi̱ xu̱ta̱ judio̱.”
\p
\v 22 Bꞌa̱ kitsú Pilato̱:
\p —Ni xi kabꞌetꞌá, ja kabꞌetꞌá.
\p
\v 23 Máha já juu̱n, nkꞌie nga ja kingjátꞌa kruu̱ Jesu, jakjꞌá najyun xi yja nga kitsꞌínxi̱. Ñju tsꞌasje ko̱ nkúnkú kikanéhe̱. Ko̱ ta̱ jakjꞌá najyun ndju xi yja Jesu, xi najmi tjíhi̱n ni̱yá chjuya. Nkuhú nga ngjiꞌaha kásin santaha tutsꞌin. Kui nga bꞌa̱ kitsúhu̱ ra̱ xinkjín:
\p
\v 24 —Najmi tu̱ chjunti̱yaá xuꞌbi̱. Tu̱ sahá ti̱nútonyáhaná yá xi ka̱ma tsꞌe̱.
\p Bꞌa̱ kama tu̱ xi tsitjusuhun éhe̱n Nti̱a̱ná xi bꞌa̱ tsꞌín tjítꞌa: “Kitsꞌínxi̱hi̱ xinkjín najyunna̱ ko̱ kitsutonyáha najyun ndjuna̱.” Kui nga bꞌa̱ kitsꞌíhin já juu̱n.
\p
\v 25 Tíi̱nchatꞌa tiñaha̱ kruu̱ na̱aha̱ Jesu, na̱ nichja na̱aha̱, Maria̱ chju̱úhu̱n Kleofa ko̱ Maria̱ Magdalena̱.
\v 26 Nkꞌie nga kikie Jesu na̱aha̱ ko̱ nda̱ niꞌyakuyá xi ꞌyún tjoho̱ nga síjña yo̱, bꞌa̱ kitsúhu̱ na̱aha̱:
\p —Ji ta̱chju̱ún, á ntíhi̱ yo̱.
\p
\v 27 Ko̱ bꞌi̱ kitsúhu̱ nda̱ niꞌyakuyóo̱:
\p —Á na̱ahi̱ yo̱.
\p Ta̱ kuihi chu̱bo̱ nda̱ niꞌyakuyá xuꞌbi̱ kitsjántehe̱ na̱aha̱ Jesu niꞌyaha̱.
\s Bꞌi̱ tsꞌín kꞌien Jesu
\r (Mt. 27:45-56; Mr. 15:33-41; Lc. 23:44-49)
\p
\v 28 Nkꞌie nga ja kama ni xuꞌbi̱, be Jesu nga ja kama ndju̱ú ngayjee̱ ni xi tjíhin nga ku̱i̱tjusun. Tu̱ xi tsitjusuhun xi nkú tsꞌín tjítꞌa éhe̱n Nti̱a̱ná, kui nga bꞌi̱ kitsúhu:
\p —Xintá tímana.
\p
\v 29 Síjña yo̱ nku nisa ninte xi tíi̱ncha binu̱ san. Nku nixú kitsꞌínkꞌanchi̱ko̱ho jóo̱ binu̱ soo̱n. Kui xi yꞌéku kꞌaku̱hu̱ nku yáxá nga kitsungiꞌa tsꞌa Jesu.
\v 30 Nkꞌie nga kitsꞌi Jesu binu̱ soo̱n, bꞌa̱ kitsú:
\p —Ja kuitjusunyje.
\p A̱sꞌa̱i kingjénsten nintaku̱ ko̱ a̱kui kꞌiehén.
\p
\v 31 Kui ni̱stjiu̱n tísꞌenda ni xi tsꞌe̱ Sꞌí Pascu̱a̱. Kui nga najmi mjehe̱ ra̱ já judio̱ kꞌaku̱ tsa sꞌe̱tꞌa kruu̱ yjoninte kꞌie̱n nkꞌie nga ku̱i̱chú ni̱stjin nkjúu̱n, a̱tꞌaha̱ ꞌyún ṉkjún kui ni̱stjin xuꞌbo̱. Kui nga tsankihi̱ ra̱ kju̱a̱ Pilato̱ nga chjútꞌo̱kjáha sjai já xi kjintutꞌá kruu̱ ko̱ nga chjúxin yjonintehe̱ tꞌa kruu̱.
\v 32 A̱sꞌa̱i jꞌai já juu̱n ko̱ kikjetꞌo̱kjá sjai nda̱ xi tjun kjitꞌa ko̱ sjai nda̱ xinkuu̱ xi ta̱ kjitꞌa kruu̱ko̱ Jesu.
\v 33 Tu̱nga nkꞌie nga i̱ncha tsichu má kjitꞌa Jesu, kikie nga ja kaꞌme. Najmi kikjetꞌo̱kjáha sjai.
\v 34 Tu̱nga nkuhú nda̱ juu̱n kikꞌíénjinkihi̱ ki̱cha̱ ꞌme̱he̱ Jesu ko̱ tje̱nꞌyún tsitjuhú jní ko̱ ntánijua.
\p
\v 35 Nda̱ xi kikie ni xi kamoo̱, kui xi kitsúya ni xi kama ko̱ kju̱axi̱ ni xi tsuya. Be nga kju̱axi̱ ni xi tsuya tu̱ xi ta̱ sꞌe̱jihi̱nnu̱u ko̱ jun.
\v 36 A̱tꞌaha̱ bꞌa̱ kama tu̱ xi tsitjusuhun éhe̱n Nti̱a̱ná xi bꞌa̱ tsꞌín tjítꞌa: “Ndaha nku nintaha̱ najmi chjútꞌo̱kjá.”
\v 37 Ko̱ ta̱ tjítꞌa ya éhe̱n Nti̱a̱ná má nga bꞌa̱ títsu: “Ku̱a̱se̱he̱ jóo̱ nda̱ xi kisꞌenjinkihi̱ ki̱cha̱.”
\s Bꞌi̱ tsꞌín kisꞌeyajni Jesu
\r (Mt. 27:57-61; Mr. 15:42-47; Lc. 23:50-56)
\p
\v 38 A̱skahan nkꞌie nga ja bꞌa̱ kamoo̱, nku nda̱ xi nibáha nanki Arimatea̱ xi ꞌmi Kuse tsankihi̱ kju̱a̱ Pilato̱ nga ngju̱a̱i̱ko̱ yjonintehe̱ Jesu. Kui Kuse xi ta̱ nda̱ niꞌyakuyáha̱ Jesu tu̱nga tu̱ kitsjennkí ꞌmahá ra̱ a̱tꞌaha̱ tsankjún já judio̱ kꞌaku̱. A̱sꞌa̱i kitsjá kju̱a̱ Pilato̱ ko̱ ngjikjꞌá ndo̱ yjonintehe̱ Jesu.
\v 39 Ko̱ ta̱ Nicodemo̱, nda̱ xi ngjisehe̱ Jesu nga jyuu̱n, jꞌaiko̱ nkú ra̱ ma katé kilu̱ ni xi sinjne̱ xi ꞌmi mirra̱ ko̱ aloe xi jꞌatjijinko̱ho̱ xinkjín.
\v 40 I̱ncha jakjꞌá nga joo̱ yjonintehe̱ Jesu ko̱ kikꞌontikjájnu najyun ndju nga kikꞌonjnu tsꞌíhi̱n ra̱ ni xi sinjne̱, xi nkú tsꞌín tíjña ni̱yáha̱ xu̱ta̱ judio̱ nga fáyanji xinkjín.
\p
\v 41 Má kisꞌetꞌa kruu̱ Jesu, tiña maha̱ nku a̱nte má nga tjíntje̱ yá tu. A̱nte xuꞌbo̱ tíjña nku tsjó tse̱tse̱ xi ndaha nku najmi kje̱e sꞌeya.
\v 42 Yo̱ kingjáya jóo̱ yjonintehe̱ Jesu, a̱tꞌaha̱ tíjña tiña tsjóo̱ ko̱ a̱tꞌaha̱ kui ni̱stjiu̱n tíi̱ncha bꞌénda xu̱ta̱ judio̱ ni xi tsꞌe̱ sꞌíu̱.
\c 20
\s Bꞌi̱ kama nkꞌie nga jꞌáíyaha̱ Jesu ngabayoo̱
\r (Mt. 28:1-10; Mr. 16:1-8; Lc. 24:1-12)
\p
\v 1 Tuminku̱ ta̱ jyun nkꞌie nga jyunya sa, ngjisehe̱ tsjóo̱ Maria̱ Magdalena̱ ko̱ kikie nga kachjuxín ndji̱o̱ xi kisꞌechjanehe ti̱xa̱ tsjóo̱.
\v 2 A̱sꞌa̱i tsangatsanka nga ngjisehe̱ Simon Pedro̱ ko̱ nda̱ niꞌyakuyá xinkuu̱ xi Jesu ꞌyún tjoho̱. Bꞌi̱ kitsú:
\p —¡Ja kachjuxín yjonintehe̱ Chá Nti̱a̱ná a̱ya tsjóo̱ ko̱ najmi yai̱ má kasꞌejña ngáha!
\p
\v 3 A̱sꞌa̱i tsitjusje Pedro̱ ko̱ nda̱ niꞌyakuyá xinkuu̱ nga ngjisehe̱ tsjóo̱.
\v 4 Tsangatsanka nga joo̱, tu̱nga nda̱ niꞌyakuyá xinkuu̱ ꞌyún ki̱tsa̱ tsangatsanka sa nga Pedro̱ ko̱ tjun tsichu tsjóo̱.
\v 5 Tu̱nga tu̱ tsasekjásꞌehén ko̱ kikie nga kjijña najyun ndju xi tsichꞌontikjájnu yjonintehe̱ Jesu. Najmi jasꞌen tsjóo̱.
\v 6 A̱sꞌa̱i tsichu tje̱nnkihi̱ Pedro̱ ko̱ jasꞌen a̱ya tsjóo̱. Kikie najyun ndju xi kjijña yo̱
\v 7 ko̱ najyun xi tsichꞌontikjájnu nintaku̱ Jesu. Kui xi najmi kjijñakjoko̱ najyun ndjuu̱. Tꞌaxín kjijña nga tjíkjoya.
\v 8 A̱sꞌa̱i ta̱ jasꞌen nda̱ niꞌyakuyá xinkuu̱ xi tjun tsichusehe̱ tsjóo̱. Kikie ko̱ kisꞌejihi̱n nga tíjña tíkꞌun Jesu.
\v 9 A̱tꞌaha̱ najmi kje̱e mankjihi̱n jóo̱ éhe̱n Nti̱a̱ná xi bꞌa̱ tsꞌín tjítꞌa nga tjíhin nga kjꞌu̱a̱íya ngáha̱ ra̱ Jesu ngabayoo̱.
\v 10 A̱sꞌa̱i kikꞌóya ngáha já niꞌyakuyóo̱ niꞌyaha̱.
\s Bꞌi̱ tsꞌín tsakúchjihi̱ yjoho̱ Jesu Maria̱ Magdalena̱
\r (Mr. 16:9-11)
\p
\v 11 Tu̱nga máha Maria̱, tsasinjña na̱tsihi̱n tsjóo̱ nga tíkjintá. Ta̱ tíkjintá tsꞌíhin nga tsasekjásꞌen tsjóo̱
\v 12 ko̱ kikie jo ntítsje xi yja najyun taba, xi kabꞌentusún a̱nte má nga kisꞌejña yjonintehe̱ Jesu. Nku xi kabꞌejña má kisꞌejña nintaku̱ ko̱ nku xi kabꞌejña má kitsjen sjai.
\v 13 Bꞌa̱ kitsú ntítsjee̱:
\p —Ji ta̱chju̱ún, ¿á tíchꞌíhini?
\p Bꞌa̱ kitsú Maria̱:
\p —A̱tꞌaha̱ kachjuxín yjonintehe̱ Chá Nti̱a̱na̱. Najmi be má kafi sꞌejña ngáha.
\p
\v 14 A̱sꞌa̱i kitsꞌínkꞌótjiya ko̱ kikie nga yo̱ kabasinjña Jesu, tu̱nga najmi kamankjihín ra̱ tsa Jesu niu̱.
\v 15 Bꞌi̱ kitsú Jesu:
\p —Ji ta̱chju̱ún, ¿á tíchꞌíhini? ¿Yá xi tíbinchisjáí?
\p Tu̱ nda̱ xi kunntáhá yá tu xi tjín yo̱ kitsꞌín ma Maria̱ ko̱ bꞌa̱ kitsú:
\p —Ji, tsa ji kaꞌmiko̱i̱ yjonintee̱, tꞌinyaní má kafajñai ko̱ kfínkjꞌa ngáhana.
\p
\v 16 —Ji Maria̱ —kitsú Jesu.
\p Kitsꞌínkꞌótjiya Maria̱ ko̱ bꞌa̱ kitsúhu̱ nga én hebreo̱:
\p —¡Raboni̱!
\p Kui éi̱n xi tsuhu̱ ra̱ Maestru̱. Bꞌi̱ kitsú Jesu:
\p
\v 17 —Najmi tu̱ nubaꞌyúnní, a̱tꞌaha̱ najmi kje̱e finjia má tíjña Na̱ꞌmina̱. Tu̱nga tꞌinyahá ri̱ já ntsꞌé nga kfínnjia má tíjña Na̱ꞌmina̱ xi ta̱ Na̱ꞌminu̱u, Nti̱a̱na̱ xi ta̱ Nti̱a̱nu̱u.
\p
\v 18 A̱sꞌa̱i Maria̱ Magdalena̱ ngji tsúyaha̱ já niꞌyakuyóo̱ nga kabe Nda̱ Nti̱a̱ná ko̱ kitsúyaha̱ ni xi kitsúhu̱.
\s Bꞌi̱ tsꞌín tsakúchjihi̱ yjoho̱ Jesu já niꞌyakuyáha̱
\r (Mt. 28:16-20; Mr. 16:14-18; Lc. 24:36-49)
\p
\v 19 Nkꞌie nga ja kama jyuu̱n ta̱ kuihi ni̱stjin tuminku̱, tjíchja a̱nkju̱a̱ má nga kabꞌentu já niꞌyakuyóo̱, a̱tꞌaha̱ tíi̱ncha tsankjún já judio̱ kꞌaku̱. A̱sꞌa̱i Jesu jꞌai sinjñajihi̱n ko̱ kikjaniñaha̱ nga bꞌi̱ kitsúhu̱:
\p —Kasꞌenu̱u kju̱a̱jyu.
\p
\v 20 Nkꞌie nga bꞌa̱ kitsú, tsakúchji ntsja ko̱ ꞌme̱he̱. Tsjo kamaha̱ já niꞌyakuyóo̱ nga kikie ngáha Nda̱ Nti̱a̱ná.
\v 21 A̱sꞌa̱i bꞌa̱há ta̱ kitsú ngáha Jesu:
\p —Kasꞌenu̱u kju̱a̱jyu. Xi nkú tsꞌín kitsꞌín nibána Nti̱a̱ Na̱ꞌmiu̱, bꞌa̱ ta̱ tsꞌín tsꞌinkjínu̱u ndꞌa̱i̱.
\p
\v 22 Kikjenimajin jóo̱ ko̱ bꞌi̱ kitsúhu̱:
\p —Nꞌe̱kjóho̱on Espiri̱tu̱ Santo̱.
\v 23 Xi nꞌe̱ndyjatꞌoho̱o jéhe̱ ka̱ma ndyjatꞌaha̱ jéhe̱. Xi najmi nꞌe̱ndyjatꞌoho̱o jéhe̱ tu̱ nku sꞌe̱hé ra̱ jé.
\s Bꞌi̱ tsꞌín tsakúchjihi̱ yjoho̱ Jesu Toma
\p
\v 24 Toma xi ta̱ ꞌmi nda̱ꞌyu̱n, xi ta̱ nku nda̱ niꞌyakuyá xi te joo̱, najmi tíjña nkꞌie nga jꞌai Jesu.
\v 25 A̱sꞌa̱i já niꞌyakuyá xingisoo̱ bꞌa̱ kitsúhu̱ ndo̱:
\p —Kuayai̱ Nda̱ Nti̱a̱ná.
\p Bꞌa̱ kitsú Toma:
\p —Tsa najmi skue chu̱ba̱ha̱ xiu̱n a̱ya ntsja ko̱ tsa najmi tsungisꞌen na̱jnú ntsa̱ má ngjihi̱ xiu̱n ko̱ tsa najmi tsungisꞌen ntsa̱ ꞌme̱he̱, najmi sꞌe̱jinna.
\p
\v 26 Nkꞌie nga jꞌa jin ni̱stjin, ta̱ tjíntuhú ngáha já niꞌyakuyóo̱ nku a̱ya niꞌya ko̱ ta̱ tíjña ñja Toma. A̱sꞌa̱i ta̱ jꞌai sinjñajihín ngáha̱ ra̱ Jesu, nkꞌie nga tjíchja a̱nkju̱o̱. Bꞌi̱ kitsúhu̱ nga kikjaniñaha̱:
\p —Kasꞌenu̱u kju̱a̱jyu.
\p
\v 27 A̱sꞌa̱i bꞌa̱ kitsúhu̱ Toma:
\p —Nibá mahi e̱i̱. Cha̱se̱i̱hi̱ ntsa̱ ko̱ ti̱núngisꞌein na̱jnú ntsa̱i̱ ko̱ ti̱núngisꞌein ntsa̱i̱ ꞌme̱na̱. Najmi nda tínꞌei nga najmi tísꞌejihin. Nꞌe̱ sꞌejinní.
\p
\v 28 Bꞌa̱ kitsú Toma:
\p —¡Ji Nda̱ Nti̱a̱ ko̱ Nti̱a̱na̱!
\p
\v 29 Bꞌi̱ kitsú Jesu:
\p —¿A a̱tꞌaha̱ kuayaní, a kui kju̱a̱ha kuasꞌejihin ri? Á bꞌa̱ nda tjíhin tsꞌe̱ xu̱ta̱ xi tísꞌejihi̱n an ndaha tsa najmi tíbena.
\s Kui nga̱tꞌai̱ kinꞌendaha xu̱ju̱i̱n
\p
\v 30 Nkjin ko̱ kjꞌa̱í sa kju̱a̱nkjún xi kitsꞌín Jesu nginku̱n já niꞌyakuyáha̱. Kui xi najmi kisꞌetꞌayje xu̱ju̱n xuꞌbi̱.
\v 31 Tu̱nga ni xuꞌbi̱ kisꞌetꞌa tu̱ xi sꞌe̱jihi̱nnu̱u nga Jesu xi kitsꞌín nibá Nti̱a̱ná,\f + \fr 20:31 \ft “Xi kitsꞌín nibá Nti̱a̱ná” tsuhu̱ ra̱ “Cristo̱”.\f* nga kui xi Ntíhi̱ Nti̱a̱ná, tu̱ xi bꞌa̱ tsꞌín ku̱i̱ntsu̱ba̱ tíkꞌuhunnu nga sꞌe̱jinnu̱u kui.
\c 21
\s Bꞌi̱ tsꞌín tsakúchjihi̱ yjoho̱ Jesu yatu já niꞌyakuyáha̱
\p
\v 1 A̱skahan ta̱ tsakúchjihí ngáha̱ ra̱ yjoho̱ Jesu já niꞌyakuyáha̱ a̱ndai ntáchakꞌun Tiberi̱a̱. Bꞌi̱ tsꞌín tsakúchjihi̱ yjoho̱.
\v 2 Nkuhú i̱ncha kabꞌa xinkjín nga kabꞌentu Simon Pedro̱, Toma xi ta̱ ꞌmi nda̱ꞌyu̱n, Natanael xi nda̱ xi nibáha nanki Cana, nanki xi tíjñajihi̱n a̱nte Galilea̱, jáha̱ Zebedeo̱ ko̱ kjꞌa̱í sa jo já niꞌyakuyá.
\v 3 A̱sꞌa̱i bꞌa̱ kitsú Simon Pedro̱:
\p —Tji̱o̱ kfín tsuba.
\p Bꞌa̱ kitsú já xingisoo̱:
\p —Ko̱ ji̱n kuankíi̱n.
\p A̱sꞌa̱i i̱ncha jasꞌen nku tsutsu, tu̱nga kui ni̱stje̱n xuꞌbo̱ ndaha nku tji̱o̱ najmi kisakúhu̱.
\v 4 Nkú ra̱ ma nga ja tífi ma sen, jꞌai sinjña Jesu a̱ndai ntáchakꞌuu̱n, tu̱nga najmi kamankjihín ra̱ já niꞌyakuyóo̱ tsa Jesu niu̱.
\v 5 A̱sꞌa̱i bꞌi̱ kitsú Jesu:
\p —Jun já, ¿a najmi kje̱e sakúnu̱u tji̱o̱?
\p —Najmi —kitsú jóo̱.
\p
\v 6 Bꞌa̱há ta̱ kitsú ngáha Jesu:
\p —Xi tje̱hen nga kixi̱hi̱ tsutsuu̱ chja̱nikjꞌo na̱ꞌyanu̱u ko̱ sa̱kúnu̱u.
\p Bꞌa̱ kitsꞌín jóo̱ ko̱ a̱sꞌa̱i ndaha najmi ta̱ ma kjenjihi na̱ꞌyoo̱, a̱tꞌaha̱ nkjin ṉkjún tji̱o̱ xi kisakúhu̱.
\v 7 Nda̱ niꞌyakuyá xi Jesu ꞌyún tjoho̱ bꞌa̱ kitsúhu̱ Pedro̱:
\p —¡Nda̱ Nti̱a̱náhá niu̱!
\p Nkꞌie nga kintꞌé Simon Pedro̱ nga “Nda̱ Nti̱a̱ná niu̱” kikꞌihi̱n, kingja ngáha najyuhu̱n, a̱tꞌaha̱ kabꞌasje, ko̱ kikjaníkjꞌajin yjoho̱ ntáchakꞌuu̱n.
\v 8 A̱skahan já niꞌyakuyá xingisoo̱ tsichuko̱ tsutsuu̱ nga tíbꞌéfe tsꞌíhin na̱ꞌya xi katsehe tji̱o̱, a̱tꞌaha̱ tiña maha̱ a̱ndai ntóo̱ nkú ra̱ ma unchan metru̱.
\v 9 Nkꞌie nga tsitjujen jóo̱ tsutsuu̱, kikie nku ndꞌí xi tíma ꞌyún ko̱ nku tji̱o̱ xi kjijñajin xꞌíu̱ ko̱ ni̱nku̱a̱n.
\v 10 Bꞌi̱ kitsú Jesu:
\p —Nibáko̱o chuba tji̱o̱ xi kuasakúnu̱u.
\p
\v 11 Tsiyajnu Simon Pedro̱ tsutsuu̱ ko̱ yꞌéfe má kixiu̱ na̱ꞌya xi katsehe tji̱o̱ i. Unchan ko̱ cháte ko̱ jan maha. Tu̱nga ndahá tsa bꞌa̱ tsꞌín nkjin kamaha tji̱o̱, najmi kitiyá na̱ꞌyoo̱.
\v 12 A̱sꞌa̱i bꞌi̱ kitsú Jesu:
\p —Nibá chi̱no̱o.
\p Ndaha nku já niꞌyakuyóo̱ najmi kama kꞌun kingjásjaiyaha̱: “¿Yáha ji?”, tsa kitsúhu̱, a̱tꞌaha̱ be nga Nda̱ Nti̱a̱ná niu̱.
\v 13 A̱sꞌa̱i jꞌai tiña Jesu, jakjꞌá ni̱nku̱o̱n ko̱ kitsjáha̱ jóo̱. Bꞌa̱ ta̱ kitsꞌíhi̱n tji̱o̱.
\p
\v 14 Kui xuꞌbi̱ xi ni̱yá xi ma jahan nga tsakúchjihi̱ Jesu yjoho̱ já niꞌyakuyáha̱ a̱skahan nkꞌie nga jꞌáíya ngáha̱ ra̱ ngabayoo̱.
\s Bꞌi̱ tsꞌín kitsjá xáha̱ Jesu Pedro̱
\p
\v 15 Nkꞌie nga ja kamaha̱ nga kikjine, Jesu kingjásjaiyaha̱ Simon Pedro̱:
\p —Ji Simon ntíhi̱ Jona, ¿a ꞌyún tjo sahi an nga já xuꞌbi̱?
\p Bꞌa̱ kitsú Pedro̱:
\p —Joho̱n, Nda̱ Nti̱a̱, yai nga tjona ji.
\p Bꞌi̱ kitsú Jesu:
\p —Chúnntai chu̱tsa̱nka̱na̱.
\p
\v 16 A̱sꞌa̱i bꞌa̱há ta̱ kitsú ngáha̱ ra̱ ni̱yá xi ma joho:
\p —Ji Simon ntíhi̱ Jona, ¿a tjohi an?
\p Bꞌa̱ kitsú Pedro̱:
\p —Joho̱n, Nda̱ Nti̱a̱, yai nga tjona ji.
\p Bꞌi̱ kitsú Jesu:
\p —Cha̱se̱i̱hi̱ chu̱tsa̱nka̱na̱.
\p
\v 17 A̱sꞌa̱i bꞌa̱há ta̱ kitsú ngáha̱ ra̱ ni̱yá xi ma jahan:
\p —Ji Simon ntíhi̱ Jona, ¿a tjohi an?
\p Kikꞌie nusin nusihi̱n Pedro̱ nga kichasjaiyaha̱: “¿A tjohi an?”, ni̱yá xi ma jahan. Bꞌa̱ kitsúhu̱:
\p —Ji Nda̱ Nti̱a̱, ji xi yai ngayjee̱ ni xi tjín. Yai nga tjona ji.
\p Bꞌi̱ kitsú Jesu:
\p —Chúnntai chu̱tsa̱nka̱na̱.
\v 18 Kju̱axi̱ ni xi tíxihin. Nkꞌie nga ndyja sahi, kindyja su̱ba̱i̱ najyihi̱n ko̱ kꞌin tu̱ má nga kama mjehé ri. Tu̱nga nkꞌie nga ka̱ma cháí, kféntei ntsa̱i̱ ko̱ kjꞌa̱í xi tsꞌi̱ínngja ngáha ri najyihi̱n ko̱ ngju̱a̱i̱ko̱hi má nga najmi mjehi kꞌúín.
\p
\v 19 Bꞌa̱ tsꞌín kitsúya títjuhun Jesu xi nkú tsꞌín ku̱a̱yá Pedro̱ nga ku̱a̱kúchji kju̱a̱chánkaha̱ Nti̱a̱ná. Ko̱ bꞌi̱ ta̱ kitsú yaha̱:
\p —Tsjénnkiní.
\s Bꞌi̱ tsꞌín kinchja̱ni̱jmíyaha Jesu nda̱ niꞌyakuyá xi ꞌyún tjoho̱
\p
\v 20 A̱sꞌa̱i tsasenji a̱stu̱n Pedro̱ ko̱ kikie nga tje̱nnkihi̱ nda̱ niꞌyakuyá xi Jesu ꞌyún tjoho̱, xi tíjñatꞌa tiñaha̱ Jesu nkꞌie nga i̱ncha kikjine nichinehe̱ Sꞌí Pascu̱a̱ ko̱ xi bꞌa̱ kitsúhu̱: “Ji Nda̱ Nti̱a̱, ¿yá xi tsꞌi̱ínkjasꞌehin?”
\v 21 Nkꞌie nga kikie Pedro̱ nda̱ niꞌyakuyóo̱, kingjásjaiyaha̱ Jesu:
\p —Ji Nda̱ Nti̱a̱, kui nda̱i̱, ¿nkú ka̱maha̱?
\p
\v 22 Bꞌi̱ kitsú Jesu:
\p —Tsa mjena nga kꞌúéjña santa nkúhu nga kjúái̱ ngáhana, najmi ji tje̱hen ri nga cha̱i ni xuꞌbo̱. Ji tsjénnkiní.
\p
\v 23 A̱skahan kikꞌinyaha̱ én xuꞌbi̱ xu̱ta̱ ni̱nku̱, nga najmi ku̱a̱yá nda̱ niꞌyakuyá xuꞌbo̱. Tu̱nga najmi bꞌa̱há kitsú Jesu tsa najmi ku̱a̱yá ndo̱. Bꞌi̱ ní kitsú: “Tsa mjena nga kꞌúéjña santa nkúhu nga kjúái̱ ngáhana, najmi ji tje̱hen ri nga cha̱i ni xuꞌbo̱.”
\p
\v 24 Kui nda̱ niꞌyakuyóo̱ tsuya kixi̱ niu̱ ko̱ kui xi yꞌétꞌa ni xuꞌbi̱. Ko̱ yai̱ nga kju̱axi̱ én xi kinchja̱.
\p
\v 25 Nkjin sa ni xi kitsꞌín Jesu. Tsa sꞌe̱tꞌa ngayjee̱ ni xi kitsꞌín, bꞌa̱ mana nga najmi sꞌe̱n ngayjee̱ a̱sunntee̱ xu̱ju̱n xi sꞌe̱tꞌa niu̱.