\id 1CO Mazatec of Jalapa de Díaz
\h Xu̱ju̱n xi tjun kinꞌekjíhi̱ xu̱ta̱ ni̱nku̱ Corinto̱
\toc1 Xu̱ju̱n xi tjun kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Corinto̱
\mt Xu̱ju̱n xi tjun kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Corinto̱
\c 1
\s Bꞌi̱ tsꞌín kikjaniñaha̱ Pablo̱ xu̱ta̱ ni̱nku̱ xi tjín nanki Corinto̱
\p
\v 1 An Pablo̱, Nti̱a̱ná kitsꞌín mana nku nda̱ postru̱hu̱\f + \fr 1:1 \ft “Xi kisꞌexá” tsuhu̱ ra̱ “nda̱ postru̱” ko̱ a ra̱ “já postru̱”.\f* Jesucristo̱ a̱tꞌaha̱ bꞌa̱ tsꞌín kama mjehe̱. An ko̱ nda̱ ntsꞌeé Soste̱ne̱
\v 2 tísuniñai̱hi̱ jun xu̱ta̱ ni̱nku̱hu̱ Nti̱a̱ná xi tintsu̱bo̱o nanki Corinto̱. Cristo̱ Jesu kitsꞌín nga Nti̱a̱ná kikjꞌátsꞌe̱nu̱u. Kinchja̱nu̱u nga kju̱átsꞌe̱nu̱u xi nkú ta̱ kitsꞌínko̱ ngatentee̱ xu̱ta̱ xi tu̱ má xi tje̱hén ni sꞌejihi̱n Nda̱ Nti̱a̱ná Jesucristo̱. Kui xi Nda̱ Nti̱a̱ná ko̱ ta̱ Nda̱ Nti̱a̱ha̱ xu̱ta̱ xuꞌbo̱.
\p
\v 3 Kasꞌenu̱u kju̱a̱nda ko̱ kju̱a̱jyu xi tsjáná Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\s Bꞌi̱ tsꞌín tsjáha̱ Pablo̱ mábꞌa̱chjíhi̱ Nti̱a̱ná nkꞌie nga fꞌáítsjehe̱n xi nkú tsꞌín nda kitsꞌínko̱ho̱ Nti̱a̱ná xu̱ta̱ ni̱nku̱ Corinto̱
\p
\v 4 Tehe̱nte tsjaha̱ mábꞌa̱chjí Nti̱a̱ná nga fꞌáítsjenna jun, a̱tꞌaha̱ kisakúnu̱u kju̱a̱ndaha̱ Nti̱a̱ná. Cristo̱ Jesu kitsꞌín nga kisakúnu̱u kui niu̱.
\v 5 Kitsꞌín nga kinꞌekjóho̱on ngayje tíkjá kju̱a̱nchi̱ná xi tsjá Nti̱a̱ná. Kui kju̱a̱nchi̱nóo̱ xi nkú tsꞌín tjíhin nga chu̱bo ko̱ xi nkú tsꞌín tjíhin nga ka̱mankjinnu̱u ni xi tsꞌe̱ Nti̱a̱ná.
\v 6 Bꞌa̱ tsꞌín kisꞌejña chjihi a̱jinnu̱u nga kju̱axi̱ én nda tsuhu̱ Cristo̱ xi kisꞌeni̱jmínu̱u.
\p
\v 7 Kui nga najmi ndyjatꞌaha̱nu̱u ndaha nku kju̱a̱nda xi tsjá Nti̱a̱ná nkꞌie nga tíchuyóho̱o ni̱stjin nga ku̱a̱kúchji yjoho̱ Nda̱ Nti̱a̱ná Jesucristo̱.
\v 8 Ko̱ ndjá tsꞌi̱ínkinchánu̱u Nti̱a̱ná santaha ni̱stjin xi fekuu̱, tu̱ xi najmi tjín ni xi nꞌe̱nijéhe̱nu̱u ni̱stjin nkꞌie nga kjꞌu̱a̱í ngáha Nda̱ Nti̱a̱ná Jesucristo̱.
\v 9 Tsꞌíntjusun Nti̱a̱ná ni xi tsu. Kui xi kinchja̱nu̱u nga nkuhú ka̱mako̱o Ntíhi̱, kui xi Nda̱ Nti̱a̱ná Jesucristo̱.
\s Bꞌi̱ tsꞌín tsakúya Pablo̱ nkꞌie nga najmi nda tjín tsa najmi nkuhú kꞌu̱a̱ xinkjín xu̱ta̱ ni̱nku̱
\p
\v 10 Jun já ntsꞌe, ngajoho̱ Nda̱ Nti̱a̱ná Jesucristo̱ bꞌa̱ tíxinnu̱u nga nkuhú ni xi chu̱bo ko̱ nkuhú chꞌo̱o xinki̱u. Nkuhú kasꞌeyanu̱u ko̱ nkuhú ni xi nꞌo̱o.
\v 11 Bꞌa̱ tíxian, já ntsꞌe, a̱tꞌaha̱ xinkjín Kloe kitsúyana nga kju̱a̱chán rú tjín a̱jinnu̱u.
\v 12 Tjín rú a̱jinnu̱u xi: “An tje̱nnkia Pablo̱”, tíi̱ncha tsu rú. Ko̱ rú tjín ngá xi: “An tje̱nnkia Apolo̱”, tíi̱ncha tsu rú. Ko̱ ta̱ tjín rú ngá xi: “An tje̱nnkia Pedro̱”, tíi̱ncha tsu rú. Ko̱ ta̱ tjín rú ngá kjꞌa̱í xi: “An tje̱nnkia Cristo̱”, tíi̱ncha tsu rú.
\p
\v 13 Nga chasehe̱ ra̱á, ¿a tsakjányahá yjoho̱ Cristo̱? ¿A Pablo̱hó kisꞌetꞌa kruu̱ ngandanu̱u? ¿A Pablo̱hó kikjꞌátsꞌe̱nu̱u nkꞌie nga kisaténtó?
\v 14 Tsjaha̱ mábꞌa̱chjíhi̱ Nti̱a̱ná nga najmi tjín a̱jinnu̱u xi an tsatentá, nku tutuhú Krispo̱ ko̱ Gayo̱.
\v 15 Bꞌa̱ tsꞌín najmi chꞌa xi bꞌa̱ ku̱i̱tsu̱hu tsa an kikjꞌatsꞌa̱n.
\p
\v 16 Ta̱ tsatentá xinkjín nda̱ Estefa̱na̱. Najmi ta̱ fꞌáítsjehenna tsa tjín sa kjꞌa̱í xi tsatentá.
\v 17 A̱tꞌaha̱ najmi kui xá xi kitsjána Cristo̱, tsa xu̱ta̱ kuatentá. Nkꞌie ní kꞌueni̱jmíá én nda tsuhu̱, kui ní xáha xi kitsjána. Ko̱ najmi én na̱nka̱ tsꞌinchjén nga nchja, tu̱ xi najmi nku én tiya ka̱maha ngabayaha̱ Cristo̱ tꞌa kruu̱.
\s Bꞌi̱ tsꞌín tsakúya Pablo̱ nkꞌie nga a̱jihi̱n ni xi kitsꞌín Cristo̱ kisꞌejña chji ngaꞌyúhu̱n ko̱ kju̱a̱nkjintakꞌuhu̱n Nti̱a̱ná
\p
\v 18 Én xi sꞌeni̱jmí nga̱tꞌa tsꞌe̱ xi nkú tsꞌín kꞌien Cristo̱ tꞌa kruu̱, kui xi tu̱ a éhén maha̱ xu̱ta̱ xi tíndyja. Tu̱nga máha ñá xi kinꞌekꞌankiná, ngaꞌyúhu̱n Nti̱a̱ná maná kui ée̱n.
\v 19 A̱tꞌaha̱ bꞌi̱ títsu Nti̱a̱ná má nga tjítꞌa xu̱ju̱n:
\q Tsꞌinndyja kju̱a̱nkjintakꞌuhu̱n já xi na̱nka̱ tsꞌínnkjinkꞌun.
\q Tsꞌinndyjajian xi nkú tsꞌín tsꞌínnkjinkꞌun já nkjinkꞌuu̱n.
\p
\v 20 ¿Yá nda̱ xi na̱nka̱ tsꞌínnkjinkꞌun? ¿Yá nda̱ xi tu̱ xí mahá ra̱ xu̱ju̱n? ¿Yá nda̱ xi maha̱ nchja̱ni̱jmíyaha ni xi tjín a̱sunntei̱? Tu̱ a nihí kitsꞌín ma Nti̱a̱ná kju̱a̱nkjintakꞌun na̱nka̱ xi tjín a̱sunntee̱.
\v 21 A̱tꞌaha̱ a̱jin kju̱a̱nkjintakꞌun na̱nka̱ha̱ Nti̱a̱ná yꞌénda nga najmi kju̱a̱nkjintakꞌun xi tjíhi̱n xu̱ta̱ sku̱e̱ko̱ho̱ ra̱. Kama mje níhi̱ nga xu̱ta̱ xi sꞌe̱jihi̱n én xi tísꞌeni̱jmíu̱, nga kui xi tsꞌi̱ínkꞌanki, én xi tu̱ a éhén maha̱ xu̱ta̱.
\p
\v 22 Xu̱ta̱ xi ntje̱ judio̱ tje̱he̱n ra̱ mjehe̱ sku̱e̱ kju̱a̱nkjúhu̱n Nti̱a̱ná, ko̱ xi najmi ntje̱ judio̱ tje̱he̱n ra̱ mjehe̱ ku̱a̱sínñjuhu̱ nku kju̱a̱nkjinkꞌun na̱nka̱.
\v 23 Tu̱nga ji̱n, nga kisꞌetꞌa kruu̱ Cristo̱ tíbꞌeni̱jmíi̱. Kui nii̱ xi najmi sasíhi̱n xu̱ta̱ xi ntje̱ judio̱ tje̱he̱n ra̱ ko̱ tu̱ a éhén maha̱ xu̱ta̱ xi najmi ntje̱ judio̱ tje̱he̱n ra̱.
\p
\v 24 Tu̱nga máha xu̱ta̱ xi Nti̱a̱ná kinchja̱ha̱ nga kju̱átsꞌe, ndaha tsa xi ntje̱ judio̱ tje̱he̱n ra̱ ko̱ ta̱ ndaha tsa xi najmi ntje̱ judio̱ tje̱he̱n ra̱, kui xi tsꞌínkjáíhi̱n nga a̱jihi̱n Cristo̱ tsakúchji Nti̱a̱ná ngaꞌyúhu̱n ko̱ kju̱a̱nkjintakꞌuhu̱n.
\v 25 A̱tꞌaha̱ ni xi yꞌénda Nti̱a̱ná xi tu̱ a nihí maha̱ xu̱ta̱, ꞌyún tjín saha̱ sin nkꞌie nga ni xi tsꞌínnkjinkꞌun xu̱ta̱. Ko̱ má bꞌa̱ maha̱ xu̱ta̱ nga tsꞌínnkjinkꞌun nga najmi tjíhi̱n ngaꞌyún Nti̱aṉá, yo̱ ní ꞌyún bakúchji ngaꞌyúhu̱n nga ngaꞌyún xi tjíhi̱n xu̱ta̱.
\p
\v 26 Jun já ntsꞌe, nꞌe̱kjꞌáítsjon xi nkú tsꞌín kinchja̱nu̱u Nti̱a̱ná nga kju̱átsꞌe̱nu̱u. Najmi nkjin mahanu xi yaha̱ nga nkjinkꞌun. Najmi nkjin mahanu xi já kꞌaku̱. Najmi nkjin mahanu xi nkꞌa tjo̱on.
\v 27 Tu̱nga xi tu̱ a xu̱ta̱há maha̱ xu̱ta̱, kui xi jꞌájin Nti̱a̱ná tu̱ xi tsjáha̱ ra̱ kju̱a̱suba já nkjinkꞌuu̱n. Ko̱ jꞌájin xu̱ta̱ xi̱ najmi chumi ni chjíhi̱ ra̱ nginku̱n xu̱ta̱ tu̱ xi tsjáha̱ ra̱ kju̱a̱suba já xi nkꞌa tje̱n.
\v 28 Ta̱ jꞌájin xu̱ta̱ xi najmi bꞌachjíhi̱ ra̱ xu̱ta̱ ko̱ xi najmi nda tíꞌmihi̱. Ta̱ jꞌájin santaha ni xi najmi kje̱e tjín tu̱ xi kjéxihin ni xi ja tjín.
\v 29 Bꞌa̱ kitsꞌín Nti̱a̱ná tu̱ xi najmi chꞌa nkꞌa ka̱ma kꞌu̱a̱sjehe yjoho̱ nginku̱n.
\p
\v 30 Tu̱nga nkuhú kitsꞌín mako̱nu̱u Nti̱a̱ná Cristo̱ Jesu ko̱ kitsꞌín nga Cristo̱ tsichu ma kju̱a̱nkjintakꞌunná. Nga̱tꞌaha̱ ni xi kitsꞌín Cristo̱ na̱xu̱ tsichu maá nginku̱n Nti̱a̱ná, kikjꞌátsꞌe̱ná ko̱ yꞌéchjíntjai jéná.
\v 31 Kui bꞌa̱ maha, xi nkú tsꞌín tjítꞌa éhe̱n Nti̱a̱ná: “Xi nkꞌa kꞌu̱a̱sje yjoho̱, nga̱tꞌaha̱ ní ni xi kitsꞌínko̱ho̱ Nti̱a̱ná, kui ní nga̱tꞌaha̱ nga nkꞌa katꞌasjehe yjoho̱.”
\c 2
\s Bꞌi̱ tsꞌín kitsꞌínkjáítsjehe̱n Pablo̱ xu̱ta̱ ni̱nku̱ Corinto̱ xi nkú tsꞌín yꞌéni̱jmíhi̱ én nda tsuhu̱ Cristo̱
\p
\v 1 Já ntsꞌe, nkꞌie nga tsichukꞌieni̱jmínu̱u én xi Nti̱a̱ná tíbꞌéjña chji ndꞌa̱i̱, najmi én tsjo tsu kitsꞌinchjén ko̱ tsa én xi na̱nka̱.
\v 2 Najmi kama mjena tsa kjꞌa̱í nihi kinchja a̱jinnu̱u. Nku tutuhú Jesucristo̱ kinchjani̱jmíya ko̱ á kruu̱ kꞌientꞌáha.
\p
\v 3 Nkꞌie nga tsáte̱jñajinnu̱u najmi nda̱ chánka kamana yjona̱. Títsankjun níná ko̱ xí tíbꞌatsénkjúnná.
\v 4 Ko̱ nkꞌie nga yꞌeni̱jmínu̱u ko̱ tsakuyánu̱u éhe̱n Nti̱a̱ná, najmi kitsꞌinchjén én nkjinkꞌun xi sꞌejihi̱n xu̱ta̱. Espiri̱tu̱hu̱ ní Nti̱a̱ná ko̱ ngaꞌyúhu̱n Nti̱a̱ná yꞌejñá chjiko̱hona ni xi kinchja,
\v 5 tu̱ xi sꞌe̱jihi̱nnu̱u Nti̱a̱ná xi tjíhi̱n ngaꞌyún, najmi kju̱a̱nkjinkꞌuhu̱n xu̱ta̱.
\s Bꞌi̱ tsꞌín tsakúya Pablo̱ nkꞌie nga Espiri̱tu̱hu̱ Nti̱a̱ná xi yꞌéjña chjiná kju̱a̱nkjinkꞌuhu̱n Nti̱a̱ná
\p
\v 6 Tu̱nga a̱jihi̱n ní xu̱ta̱ xi ja tsichu mankjihi̱n ni xi tsꞌe̱ Nti̱a̱ná kju̱a̱nkjinkꞌun nꞌechjéi̱n nkꞌie nga chubako̱i̱. Najmi kju̱a̱nkjinkꞌun xi tsꞌínchjén xu̱ta̱ nꞌechjéi̱n nga chubai̱, ko̱ ta̱ ndaha najmi kju̱a̱nkjinkꞌun xi tsꞌínchjén já xi batéxuma nꞌechjéi̱n, já xi ndyja̱ ndyjun nkini̱.
\v 7 Nkꞌie ní bakuyái̱ éhe̱n Nti̱a̱ná, chubani̱jmíyai̱ ni xi kitsꞌínnkjinkꞌun Nti̱a̱ná nga yꞌéjña ꞌma. Kui niu̱ xi yꞌénda Nti̱a̱ná kintehe̱ ni nga kitsꞌínnda a̱sunntee̱. Bꞌa̱ kitsꞌín tu̱ xi sꞌe̱hená kju̱a̱chánka.
\v 8 Ndaha nku xi batéxuma a̱sunntei̱ najmi kamankjihi̱n kju̱a̱nkjintakꞌun xuꞌbi̱. A̱tꞌaha̱ tsa kamankjihi̱n niu̱, najmi kingjátꞌa kruu̱ ra̱ Nda̱ Nti̱a̱ná xi tjíhi̱n kju̱a̱chánka.
\p
\v 9 Tu̱nga bꞌa̱há kama xi nkú tsꞌín tjítꞌa éhe̱n Nti̱a̱ná:
\q Ni xi najmi kikie xu̱ta̱ ko̱ najmi kintꞌé,
\q xi ndaha̱chí najmi kje̱e nꞌenkjínkꞌun,
\q kui nihi xi Nti̱a̱ná yꞌénda títjun,
\q ngandaha̱ xu̱ta̱ xi i̱ncha tjoho̱ Nti̱a̱ná.
\p
\v 10 Espiri̱tu̱hu̱ Nti̱a̱ná yꞌéjña chjiná ni xi yꞌénda títjun Nti̱a̱ná. A̱tꞌaha̱ Espiri̱tu̱hu̱ Nti̱a̱ná be sisin ngayjee̱ ni xi tjín ko̱ santaha ni xi ꞌyún na̱nka̱ha̱ Nti̱a̱ná.
\v 11 A̱tꞌaha̱, ¿yá xi be xi nkú tsꞌín tsꞌínnkjinkꞌun xu̱ta̱ xi kjꞌa̱í? Nku tutuhú xu̱ta̱ xuꞌbo̱ xi be xi nkú tsꞌín tsꞌínnkjinkꞌun. Bꞌa̱ ta̱ tsꞌín najmi chꞌa be xi nkú tsꞌín tsꞌínnkjinkꞌun Nti̱a̱ná. Nku tutuhú Espiri̱tu̱hu̱ Nti̱a̱ná be xi nkú tsꞌín tsꞌínnkjinkꞌun.
\p
\v 12 Nga̱tꞌa tsꞌa̱ñá bi, nginku̱n Nti̱a̱ná nibáha Espiri̱tu̱ xi kinꞌekjáíhi̱ín, najmi a̱suntei̱ tsꞌe̱. Nti̱a̱ná kitsjáná Espiri̱tu̱hu̱ tu̱ xi ka̱mankjihinná kju̱a̱nda xi kitsjáná.
\v 13 Kui niu̱ xi chubai̱ nkꞌie nga bakuyái̱. Najmi nꞌechjéi̱n én xi bitjuhu kju̱a̱nkjinkꞌuhu̱n xu̱ta̱. Kju̱a̱nkjinkꞌun xi bitju níhi̱ Espiri̱tu̱hu̱ Nti̱a̱ná nꞌechjéi̱n. Bꞌa̱ tsꞌín ꞌmiyaha̱ ri̱ xu̱ta̱ xi tíjñajihi̱n Espiri̱tu̱hu̱ Nti̱a̱ná ni xi tsꞌe̱ Espiri̱tu̱.
\p
\v 14 Xu̱ta̱ xi najmi tjíhi̱n Espiri̱tu̱hu̱ Nti̱a̱ná najmi tsꞌínkjáíhi̱n ni xi tsꞌe̱ Espiri̱tu̱, a̱tꞌaha̱ tu̱ a nihí maha̱. Najmi tjín nkú tsꞌín ka̱ma ka̱mankjihi̱n ra̱, a̱tꞌaha̱ nku tutuhú Espiri̱tu̱hu̱ Nti̱a̱ná bꞌéjña chji niu̱.
\v 15 Xi tíjñajihi̱n Espiri̱tu̱hu̱ Nti̱a̱ná, kui xi mankjihi̱n ni xi tjín. Tu̱nga xu̱ta̱ xi kꞌoo̱ najmi mankjihi̱n á kjꞌa̱í tsꞌín tsꞌínnkjinkꞌuhun xu̱ta̱ xi tíjñajihi̱n Espiri̱tu̱hu̱ Nti̱a̱ná.
\p
\v 16 A̱tꞌaha̱ bꞌi̱ tsꞌín tjítꞌa éhe̱n Nti̱a̱ná:
\q ¿Yá xi be xi nkú tsꞌín tsꞌínnkjinkꞌun Nti̱a̱ná?
\q ¿Yá xi tsjáni̱yáha̱?
\m Tu̱nga ñá bi, nꞌenkjínkꞌaán xi nkúhu Cristo̱ a̱tꞌaha̱ Espiri̱tu̱hu̱ Nti̱a̱ná tíjñajinná.
\c 3
\s Bꞌi̱ tsꞌín kitsúya Pablo̱ xá xi kikanéhe̱ ko̱ xá xi kikanéhe̱ Apolo̱ a̱jihi̱n xu̱ta̱ ni̱nku̱ Corinto̱
\p
\v 1 Jun já ntsꞌe, najmi kama kinchjako̱nu̱u xi nkú tsꞌín nchjaka̱ xu̱ta̱ xi tíjñajihi̱n Espiri̱tu̱hu̱ Nti̱a̱ná. Kinchjako̱ nínu̱u xi nkú tsꞌín nchjaka̱ xu̱ta̱ xi a̱sunntee̱ tje̱he̱n ra̱, xi nkúhu xu̱ta̱ xi a̱sꞌa̱i kuakatutsꞌi̱hín ra̱ nga kuakakjꞌá éhe̱n Cristo̱.
\v 2 Kintehe̱ ni nga ni xi ndjá kuakuyánu̱u, tu̱ ni xi najmi ndjáhá tsakuyánu̱u. A̱tꞌaha̱ bꞌa̱ kꞌun ntí xi̱hí kꞌun, ntí xi tu̱ ntáchikihí ꞌbi, xi najmi ma kjine ni xi ndjá. Ko̱ santaha ndꞌa̱i̱ najmi kje̱e tjíndanu̱u yjonu̱u tsa ka̱mankjinnu̱u ni xi na̱nka̱ tjín.
\p
\v 3 A̱sunntee̱ yꞌa sanu̱u. Nkꞌie nga tjín sa a̱jinnu̱u kju̱a̱nchi̱ni̱ ko̱ kju̱a̱chán, ¿a najmi a̱sunntee̱hé yꞌaha̱nu̱u? ¿A najmi bꞌa̱há tsꞌín tintsu̱bo̱o xi nkú tsꞌín tjíntu xu̱ta̱ a̱sunntee̱?
\v 4 A̱tꞌaha̱ tjín xi: “An tje̱nnkia Pablo̱”, títsu ko̱ tjín ngá xi: “An tje̱nnkia Apolo̱”, títsu. Nkꞌie nga bꞌa̱ tínꞌo, ¿a najmi bꞌa̱há tínꞌo xi nkú tsꞌín xu̱ta̱ xi najmi be Nti̱a̱ná, xi najmi tíjñajihi̱n Espiri̱tu̱hu̱ Nti̱a̱ná?
\p
\v 5 ¿Yáha Pablo̱? ¿Yáha Apolo̱? Tu̱ já musu̱hú niu̱ xi Nti̱a̱ná kitsꞌínchjéhe̱n tu̱ xi sꞌe̱jihi̱nnu̱u. Nga nkúnkúi̱ kinꞌei̱ xá xi kitsjáni̱ Nti̱a̱ná.
\v 6 Xi nkúhu tsa an yꞌentje̱ yá tuu̱ ko̱ Apolo̱ kikuhu̱n, tu̱nga Nti̱a̱náhá xi kitsꞌín nga kisá yóo̱.
\v 7 Kui bꞌa̱ maha, najmi xi bꞌéntje̱ yóo̱ ko̱ ta̱ ndaha xi kuhu̱n, tsa kui xi chánka. Nku tutuhú Nti̱a̱ná xi kitsꞌín nga kisá yóo̱, kui xi chánka.
\v 8 Xi bꞌéntje̱ ko̱ xi kuhu̱n yóo̱ tu̱ nku chu̱ba̱há. Sꞌe̱chjíhi̱ nga nkúnkú xi nkú tsꞌín kitsꞌínxá.
\v 9 Nga nkúnkúi̱ mako̱i̱ xinki̱ nga tínꞌexátꞌai̱hi̱ Nti̱a̱ná. Jun xi nkú joyaha jñá xi tsꞌe̱ Nti̱a̱ná xi ji̱n tínꞌexájii̱n.
\p Jun xi nkú joyaha niꞌyaha̱ Nti̱a̱ná.
\v 10 Xi nkú tsꞌín tíjña kju̱a̱ndaha̱ Nti̱a̱ná xi kitsjána, an xi kama nda̱ maestru̱ chji̱ne̱xjó xi kingjájña tutsꞌin niꞌyoo̱. Ko̱ kjꞌa̱í ngá xi tíi̱ncha kjesíntje̱n xjóho̱ niꞌyoo̱ ndꞌa̱i̱, tu̱nga ndahá tsꞌín katsꞌínnkjinkꞌun nga nkúnkú xi nkú tsꞌín ngju̱a̱i̱ndjuko̱ xjóo̱.
\v 11 A̱tꞌaha̱ Jesucristo̱, kui xi tutsꞌin xjóho̱ niꞌyoo̱. Najmi ma sꞌejña sa kjꞌa̱í tutsꞌin xjó nga xi ja kjijñoo̱.
\p
\v 12 A̱sun tutsꞌin niꞌyoo̱ ka̱ma chjúsíntje̱n xjó xi ka̱mandako̱ho to̱onsine, ko̱ a ra̱ to̱ontaba, ko̱ a ra̱ ndji̱o̱ tsjo kꞌun, ko̱ a ra̱ yáte, ko̱ a ra̱ ndji̱, ko̱ a ra̱ xka̱.
\v 13 Sꞌe̱jña chji xá xi kitsꞌín nga nkúnkú xu̱ta̱ ni̱stjin nga ku̱a̱se̱he̱ Nti̱a̱ná ni xi kitsꞌín xu̱ta̱. A̱tꞌaha̱ ndꞌí xi kjꞌu̱a̱í kui ni̱stjiu̱n kꞌu̱éjña chji xi nkú kꞌun xá xi kitsꞌín nga nkúnkú xu̱ta̱.
\v 14 Xi kitsꞌínnda xjó xi ku̱i̱chúkju̱a̱ha̱ ndꞌíu̱, kui xi tsꞌi̱ínkjáíhi̱n chjíhi̱.
\v 15 Tu̱nga xi kitsꞌínnda xjó xi kꞌu̱étihi̱ ndꞌíu̱, kui xi ndyja̱ ni xi kitsꞌín, ndaha tsa tu̱ kui ku̱a̱nkihí xi nkú maha̱ xi ndꞌí bitjujin.
\p
\v 16 ¿A najmi yanú nga jun xi ni̱nku̱hu̱ Nti̱a̱ná ko̱ nga Espiri̱tu̱hu̱ Nti̱a̱ná tíjñajinnu̱u?
\v 17 Tsa tjín xi tsꞌi̱ínkatsún ni̱nku̱hu̱ Nti̱a̱ná, Nti̱a̱ná tsꞌi̱ínkje xi bꞌa̱ tsꞌi̱íu̱n. A̱tꞌaha̱ tsje ni̱nku̱hu̱ Nti̱a̱ná, ko̱ jun bi, jun xi ni̱nku̱hu̱ Nti̱a̱ná.
\p
\v 18 Najmi tu̱ chꞌa kꞌu̱a̱na̱cha̱ha̱ yjoho̱. Tsa tjín a̱jinnu̱u xi bꞌa̱ maha̱ nga kui xi nkjinkꞌun xi nkúhu já nkjinkꞌun xi tjín a̱sunntee̱, tu̱ sa ní nku nda̱ xi najmi chumi nihi xi maha̱ katsꞌín ma yjoho̱, tu̱ xi bꞌa̱ tsꞌín ku̱i̱chú ma kju̱axi̱hi nku xi nkjinkꞌun.
\v 19 A̱tꞌaha̱ kju̱a̱nkjinkꞌun xi tjín a̱sunntee̱, kui xi tu̱ a nihí nginku̱n Nti̱a̱ná. A̱tꞌaha̱ bꞌi̱ tsꞌín tjítꞌa éhe̱n Nti̱a̱ná: “Nti̱a̱ná tsꞌín nga ta̱ kuihi kju̱a̱maña̱ha̱ já nkjinkꞌuu̱n jnejin.”
\v 20 Ko̱ bꞌi̱ ta̱ tsꞌín tjítꞌa ya: “Nti̱a̱ná be nga tu̱ a nihí ni xi tsꞌínnkjinkꞌun já nkjinkꞌuu̱n.”
\p
\v 21 Kui bꞌa̱ maha, najmi tu̱ chꞌa nkꞌa kꞌu̱a̱sjehe yjoho̱ nga̱tꞌaha̱ yá xi tje̱nnki. Jun kichꞌo ngayjee̱ ni xi tjín.
\v 22 Pablo̱, Apolo̱ ko̱ Pedro̱, a̱sunntee̱, kju̱a̱tíkꞌuu̱n ko̱ ngabayoo̱, ni xi tíma ko̱ ni xi ka̱ma, ngayjee̱ niu̱ jun kichꞌo.
\v 23 Cristo̱ yꞌanu̱u, ko̱ Nti̱a̱ná yꞌaha̱ Cristo̱.
\c 4
\s Bꞌi̱ tsꞌín kitsúya Pablo̱ nkú tjíhi̱n ra̱ xáha̱ já postru̱
\p
\v 1 Kui bꞌa̱ maha, já xi tsꞌínxátꞌaha̱ ra̱ Cristo̱ katumanu̱u ji̱n nga cha̱se̱ni̱, já xi kikꞌa̱i̱ xáha̱ nga ku̱a̱kúya ni xi yꞌéjña ꞌma Nti̱a̱ná ni̱stjin nkꞌie ko̱ mjehe̱ nga kꞌu̱éjña chji ndꞌa̱i̱.
\v 2 Yahá nga xi ꞌba̱i̱hi̱ nku xá binchihi̱ nga kixi̱ ngju̱a̱i̱ko̱ xáha̱.
\v 3 An bi najmi kjinta̱hana tsa cha̱so̱ho̱ mí nihi xi nda ko̱ tsa najmi nda títsꞌian ko̱ tsa nku nda̱ jue xi bꞌa̱ tsꞌi̱ín. Ta̱ ndaha an najmi be xi nkú tsꞌín tsꞌinnisihi̱ ra̱ yjona̱ tsa mí nihi.
\p
\v 4 Nda tjíya kju̱a̱nkjintakꞌunna̱ tu̱nga najmi kuihí niu̱ tsuhu̱ ra̱ tsa najmi tje̱nna. A̱tꞌaha̱ Nti̱a̱náhá xi basehe̱ ni xi tsꞌian.
\v 5 Kui nga najmi tu̱ chasehe̱ ru̱u yá xi nda títsꞌín ko̱ yá xi najmi nda títsꞌín kintehe̱ ni nga kjꞌu̱a̱í Nda̱ Nti̱a̱ná. A̱tꞌaha̱ kuihí xi ku̱a̱kúchji ni xi tíjña ꞌma má jyuu̱n ko̱ kꞌu̱éjña chji xi nkú tsꞌín tjíntuyá ani̱ma̱ha̱ xu̱ta̱. Kui ni̱stjiu̱n Nti̱a̱ná nda tsꞌín ku̱i̱nchja̱ne xu̱ta̱ xi nkú tsꞌín kanéhe̱ nga nkúnkú.
\p
\v 6 Jun já ntsꞌe, Apolo̱ ko̱ yjona̱ kuanchjani̱jmíyahana tu̱ xi cha̱hanu nga najmi tjíhin nga ku̱i̱tjátihu̱u xi nkú tsꞌín tjítꞌa. Kui nga najmi tu̱ chánka katumaha̱nu̱u yjonu̱u nga̱tꞌaha̱ xi tje̱nnkiu ko̱ a̱sꞌa̱i najmi nꞌe̱chjíhi̱ ru̱u xinkuu̱.
\v 7 A̱tꞌaha̱, ¿yá xi bꞌa̱ títsu nga ji xi ꞌyún nda sai a̱jihi̱n xu̱ta̱ xingisoo̱? Ngayjee̱ ni xi tjíhin tu̱ kikꞌa̱i̱híri. Nkꞌie nga tu̱ kikꞌa̱i̱hí ri ni xi tjíhin, ¿á chu̱ba̱ chánkahá tínꞌesjeheni yjohi̱, xi nkúhu tsa najmi tu̱ kikꞌa̱i̱hí ri ni xi tjíhin?
\p
\v 8 Jun ja tjínnu̱u ngayjee̱ ni xi mjenu̱u. Ja kama nchi̱nó. Ja tsichumo xi nkú joyaha já rei̱ xi najmi ta̱ machjéhe̱n ra̱ ji̱n. Mjena tsa já rei̱ kju̱axi̱ ka̱mo kai, tu̱ xi bꞌa̱ tsꞌín ko̱ ji̱n sa̱kútꞌaha̱ni̱ xánu̱u nga ta̱ ku̱a̱texumai̱.
\v 9 A̱tꞌaha̱ bꞌa̱ mana nga ji̱n xi tíꞌmini̱ já postru̱ Nti̱a̱ná kitsjánte nga kamai̱ xi nkúhu já xi finijé, xi tjín nga nꞌe̱kꞌien. Ntítsjee̱ ko̱ xu̱ta̱ tíbe ni xi tímatꞌai̱n.
\v 10 Ji̱n xi xu̱ta̱ chi̱ni tíꞌmini̱ a̱tꞌaha̱ Cristo̱ nꞌexátꞌai̱hi̱, ko̱ jun xi xu̱ta̱ nkjinkꞌun kamo nga kisꞌejinnu̱u Cristo̱. Ji̱n xi najmi tjínni̱ ngaꞌyún, jun xi tjínnu̱u ngaꞌyún. Jun nda tsꞌín tsꞌínkjáínnu̱u xu̱ta̱, ji̱n chꞌon tsꞌín tsꞌínkjáínni̱.
\p
\v 11 Santaha ni̱stjin ndꞌa̱i̱ kjintjíá tíyai̱ ko̱ santaha ni xi sꞌi̱ najmi tísakúni̱. Najmi tjínni̱ najyun, tíbichꞌonjinni̱ ko̱ chu̱ba̱ tinimasún níi̱.
\v 12 Ji̱n kjineni̱ yjoni̱. Chꞌon tsuni̱ xu̱ta̱, tu̱nga binchintjáí níi̱ xi bꞌa̱ tsuni̱ tu̱ xi Nti̱a̱ná nda tsꞌi̱ínko̱ho̱ ra̱, ndaha tsa bꞌa̱ títsuni̱. Tje̱nnki unkieni̱ xu̱ta̱, tu̱nga nꞌe chúkju̱a̱ níi̱.
\v 13 Chꞌon tsꞌín nchja̱yaneni̱ xu̱ta̱, tu̱nga én ndahá nꞌekꞌóyai̱hi̱ xi bꞌa̱ tsuni̱. Ja tsichu mai̱ xi nkúhu stjé a̱jihi̱n xu̱ta̱ a̱sunntee̱, xi nkúhu ni xi najmi chumi ni chjíhi̱ ra̱. Bꞌa̱ tímatꞌai̱n santaha ni̱stjin ndꞌa̱i̱.
\p
\v 14 Najmi tíbꞌetꞌánu̱u ni xuꞌbi̱ tsa tu̱ xi tsjaha̱nu̱u kju̱a̱suba. Tíbꞌetꞌá níná ni xuꞌbi̱ tu̱ xi títsjani̱yáha̱nu̱u jun xi ntína̱ xi tjona.
\v 15 A̱tꞌaha̱ ndaha tsa sꞌe̱nu̱u te mii̱ xi ku̱a̱kúyanu̱u éhe̱n Cristo̱, tu̱nga najmi nkjihín na̱ꞌmi xi sꞌe̱nu̱u. An tsichu ma xi nkúhu tsa na̱ꞌminu̱u nga yꞌeni̱jmínu̱u én nda tsuhu̱ Cristo̱ Jesu, kui xi kitsꞌínkꞌíéntu tíkꞌunnu̱u.
\p
\v 16 Kui bꞌa̱ maha, tíbankihi̱nu̱u nga cha̱se̱ chu̱ba̱yahanú tu̱ xi bꞌa̱ ta̱ nꞌe̱henu.
\v 17 Kui kju̱a̱ha nga títsꞌinkjísehe̱nu̱u Timoteo̱, xi ta̱ kikjꞌátsꞌe̱he̱ Nda̱ Nti̱a̱ná. Kui xi xi nkú joyaha ntína̱ xi tjona, xi ma ꞌyún kꞌan. Tsꞌi̱ínkjꞌáítsjennu̱u xi nkú títsꞌian nga títsꞌinxátꞌaha̱ Cristo̱ Jesu, xi nkú tsꞌín bakuyá ngayjee̱ ni̱nku̱ xi tjín tu̱ má xi tje̱hén ni.
\p
\v 18 Tjín xi chu̱ba̱ tíbasin títjuhún a̱jinnu̱u a̱tꞌaha̱ bꞌa̱ títsu nga najmi kfínsenu̱u.
\v 19 Tu̱nga tsa Nti̱a̱ná mjehe̱, kfínse xatínu̱u ko̱ skue najmi tu̱ nkú títsu jóo̱. Ta̱ skue nkú tu̱ nkꞌa xáha̱ xi bꞌa̱ tíi̱ncha tsu.
\v 20 Nkꞌie nga Nti̱a̱ná batéxumaha̱ xu̱ta̱, ni xi tsꞌín xu̱to̱ bakúchji nga Nti̱a̱ná batéxumaha̱, najmi ni xi tsu.
\v 21 ¿Má nihi xi mjenu̱u? ¿A nkꞌie nga kfínsenu̱u, ndjá tsꞌinko̱nu̱u? ¿A ra̱ tu̱ sahá kju̱a̱tjo kfínko̱nu̱u ko̱ ni̱ma̱kju̱a̱ kuasenu̱u?
\c 5
\s Bꞌi̱ tsꞌín tsasehe̱ Pablo̱ kju̱a̱ha̱ nda̱ xi tíjñajihi̱n xu̱ta̱ ni̱nku̱ Corinto̱
\p
\v 1 Kju̱axi̱ nga tínuꞌyá nga tíjñajinnu̱u nku xi ta̱ kuihi na̱júhu̱n tíjñako̱, ni xi ta̱ santaha xu̱ta̱ xi najmi be Nti̱a̱ná najmi tsꞌín.
\v 2 ¿Nkú tsꞌín nga tsjo tímaha̱nu̱u xi nkú tsꞌín tífi ni̱nku̱? ¿A najmi tjíhín ni nga kꞌúé babanu̱u nga̱tꞌaha̱ ni xi tímoo̱ ko̱ najmi ta̱ kꞌu̱a̱i̱ntehe̱ ru̱u nga kꞌúéjñajinnu̱u nda̱ xi bꞌa̱ titsꞌíu̱n?
\p
\v 3 Ndaha tsa kjin tíi̱jñanu̱u tu̱nga ani̱ma̱na̱há tintsu̱ba̱jiun. Kui nga bꞌa̱ mahana xi nkúhu tsa tíi̱jñajinnu̱u. Ko̱ xi nkúhu tsa tíi̱jñajinnu̱u, ja bꞌa̱ kixian nga najmi nda tjín ni xi títsꞌín ndo̱.
\v 4 Nkꞌie nga ka̱ma ñjakú xi nkúhu tsa an kúáte̱jñajinnu̱u ko̱ ta̱ kꞌúéjñajinnu̱u ngaꞌyúhu̱n Nda̱ Nti̱a̱ná Jesu, ngajoho̱ Nda̱ Nti̱a̱ná Jesu
\v 5 nꞌe̱kjasꞌoho̱on nda̱nindoo̱ nda̱ xi bꞌa̱ títsꞌíu̱n. Bꞌa̱ tsꞌín katatsuhun yjoninte ngatitsuhu̱n tu̱ xi nꞌe̱kꞌankihi ani̱ma̱ha̱ ndo̱ ni̱stjin nga kjꞌu̱a̱í ngáha Nda̱ Nti̱a̱ná Jesu.
\p
\v 6 Nga̱tꞌa tsꞌe̱ xi nkú tsꞌín tintsu̱bo̱o, ¿nkú tsꞌín nga tsjo tímaha̱nu̱u nkꞌie nga tínꞌekjóho̱on nda̱ xi bꞌa̱ títsꞌíu̱n? ¿A najmi yanú nga kutin na̱ꞌyu̱ san tsꞌínsanyje na̱ꞌyu̱ ni̱nku̱o̱n?
\v 7 Ngatitsuhu̱n ndo̱, kui xi nkú joyaha na̱ꞌyu̱ san. Títsꞌínkatsúnnu̱u ngatitsuhu̱n. Chjúxiun ndo̱ xi nkú ta̱ tsꞌín xu̱ta̱ xi ntje̱he̱ judio̱ tje̱he̱n ra̱ nga kjexín na̱ꞌyu̱ soo̱n kintehe̱ ni nga kꞌu̱a̱sje Sꞌí Pascu̱a̱. A̱tꞌaha̱ Cristo̱ ja kꞌienntjáí ngandaná, kui xi chu̱tsa̱nka̱ha̱ Sꞌí Pascu̱a̱ná ko̱ jun xi nkú joyaha na̱ꞌyu̱ tse̱tse̱ xi najmi ta̱ tjíhi̱n ra̱ na̱ꞌyu̱ san.
\v 8 Kui bꞌa̱ maha, nꞌe̱sjeko̱honá Sꞌíu̱ ni̱nku̱a̱n xi najmi tjíhi̱n na̱ꞌyu̱ san. Kui xi tsuhu̱ ra̱ nga najmi ta̱ kasꞌejñajinná kju̱a̱ngakꞌun ko̱ kju̱a̱chꞌonkꞌun. Tu̱ sa ní je kasꞌeyaná ko̱ na̱xu̱.
\p
\v 9 Xu̱ju̱n xi ja kitsꞌinkjínu̱u bꞌa̱ kixinnu̱u nga najmi tu̱ nꞌengujinko̱o yjonu̱u xu̱ta̱ xi fantuko̱ jminchjín nga najmi kje̱e bixan.
\v 10 Tu̱nga najmi xu̱ta̱ xi najmi behé Nti̱a̱ná kinchjajihi̱n nga bꞌa̱ kixian. Ta̱ ndaha xi ꞌyún mjehe̱ to̱on, ta̱ ndaha xi tsꞌín ndyjé, ko̱ ta̱ ndaha xi tsꞌíntsjoho̱ nti̱a̱ xi ntsja xu̱ta̱ tsꞌínndaha. A̱tꞌaha̱ tsa najmi ku̱i̱ntsu̱ba̱jihu̱un xu̱ta̱ xi bꞌa̱ tsꞌíu̱n, tjíhín ni nga ku̱i̱tju e̱i̱ a̱sunntee̱ ma.
\v 11 Nkꞌie nga kitsꞌinntúnu̱u, bꞌa̱ kixinnu̱u nga najmi tu̱ nꞌengujinko̱o yjonu̱u xi chu̱ba̱ já ntsꞌeé tsꞌín ma yjoho̱ tu̱nga jminchjíhín fantuko̱ ngá, ko̱ tsa xi ꞌyún mjehe̱ to̱on, ko̱ tsa xi tsꞌíntsjoho̱ nti̱a̱ xi ntsja xu̱ta̱ tsꞌínndaha, ko̱ tsa xi nchja̱ én chꞌon tsu, ko̱ tsa xi ma chꞌi̱, ko̱ tsa xi ndyjé tsꞌín. Xi chu̱ba̱ já ntsꞌehé tsꞌín ma yjoho̱ tu̱nga bꞌa̱há tsꞌín ngá, santaha ni̱ñu̱ najmi tu̱ chineko̱o.
\p
\v 12 A̱tꞌaha̱ an najmi tje̱henna nga kuasehe̱ tsa tje̱he̱n jé ko̱ tsa najmi tje̱he̱n jé xu̱ta̱ xi najmi ni̱nku̱ nchja̱ha̱ ra̱. Tu̱nga máha jun, ¿a najmi tjíhín ni nga cha̱so̱ho̱ ni xi tíma a̱ya ni̱nku̱?
\v 13 Kui nga ti̱yú tje̱nnkihinu nda̱ ngatitsuu̱n. Xu̱ta̱ xi najmi ni̱nku̱ nchja̱ha̱ ra̱ bi, Nti̱a̱ná tje̱he̱n ra̱ nga ku̱a̱se̱he̱ tsa tje̱he̱n jé ko̱ tsa najmi tje̱he̱n jé.
\c 6
\s Bꞌi̱ tsꞌín tsakúya Pablo̱ xi nkú tsꞌín tjíhin nga sꞌe̱nda nku kju̱a̱sti a̱jihi̱n xu̱ta̱ ni̱nku̱
\p
\v 1 Tsa kju̱a̱sti sa̱kúko̱ho̱ xinkjín já ntsꞌeé, ¿á ma kꞌun fisehe̱ ra̱ já jue xi najmi benkjúhun Nti̱a̱ná tu̱ xi kꞌúéndaha kju̱a̱ha̱, a̱ntehe̱ ni nga xu̱ta̱ xi sꞌejihi̱n Nti̱a̱ná ngu̱a̱i̱sehe̱ ra̱?
\v 2 ¿A najmi yanú nga xu̱ta̱ xi sꞌejihi̱n Nti̱a̱ná ku̱a̱se̱he̱ ni xi nda ko̱ tsa xi najmi nda xi kitsꞌín xu̱ta̱ xi tjín a̱sunntee̱ ndyjun nkini̱? Tsa jun xi bꞌa̱ nꞌo̱o, ¿nkú tsꞌín najmi ka̱manu̱u kꞌúéndahanu nku ni xi najmi ꞌni tjín?
\v 3 ¿A najmi yanú nga ta̱ santaha ntítsjee̱ cha̱se̱éhe̱ mí nihi xi kitsꞌín? Kui nga tjíhin nga ka̱mahaná kꞌúéndaá kju̱a̱sti xi sakúná a̱sunntei̱.
\p
\v 4 Kui nga tsa tínꞌeko̱kju̱a̱hanu xinki̱u nga̱tꞌaha̱ kju̱a̱sti xi tjín a̱sunntei̱, ¿á já xi najmi yankjúhun a̱jihi̱n xu̱ta̱ ni̱nku̱ tíbankísehe̱ ru̱u nga kꞌu̱éndaha kju̱a̱nu̱u?
\v 5 Bꞌa̱ tíxinnu̱u tu̱ xi ka̱ma subaha̱nu̱u. ¿A najmi tjíhin a̱jinnu̱u nku xi nkjinkꞌun, xi ka̱maha̱ kꞌu̱énda kju̱a̱ xi tjínko̱ho̱ xinkjín já ntsꞌeé?
\v 6 Tu̱ sa ní nginku̱n já xi najmi sꞌejihi̱n Nti̱a̱ná tíi̱ncha tsꞌínko̱kju̱a̱ xinkjín já ntsꞌeé.
\p
\v 7 Nga ta̱ juhun tjínko̱nu̱u kju̱a̱sti xinki̱u tsuhu̱ ra̱ nga ja tíndyjajinnu̱u. ¿Á najmi tu̱ sahá tínꞌe chúkju̱a̱hanu ni xi najmi bꞌa̱ tjín xi tínꞌenu̱u? ¿Á najmi tu̱ sahá tíꞌba̱i̱ntehenu nga nꞌe̱he̱nu̱u ndyjé?
\v 8 Tu̱nga ta̱ juhún ni tínꞌo ni xi najmi bꞌa̱ tjín ko̱ ndyjé. Najmi xu̱ta̱ xi kjꞌa̱í xi bꞌa̱ tínꞌoho̱. Já ntsꞌehé ní xi bꞌa̱ tínꞌoho̱.
\p
\v 9 ¿A najmi yanú nga xu̱ta̱ xi najmi na̱xu̱ tsꞌín nginku̱n Nti̱a̱ná, kui xi najmi ka̱ma kju̱a̱sꞌenjin nga Nti̱a̱ná ku̱a̱téxumaha̱? Najmi tu̱ chꞌana̱cho̱ho̱ yjonu̱u. Xi fantuko̱ jminchjín nga najmi kje̱e bixan, xi tsꞌíntsjoho̱ nti̱a̱ xi ntsja xu̱ta̱ tsꞌínndaha, xi najmi benkjún kju̱a̱bixaha̱n, já no̱ ya,
\v 10 xi tsꞌín ndyjé, xi ꞌyún mjehe̱ to̱on, xi ma chꞌi̱, xi chꞌon tsꞌín nchja̱ne xu̱ta̱, ko̱ xi bꞌana̱cha̱ha̱ xu̱ta̱ nga kjeꞌáha̱ ni xi tjíhi̱n, ngayjee̱ xi bꞌa̱ tsꞌín najmi ka̱ma kju̱a̱sꞌenjin nga Nti̱a̱ná ku̱a̱téxumaha̱.
\v 11 Kui ni xuꞌbi̱ kitsꞌín kꞌu̱a̱ xi tjín a̱jinnu̱u ni̱stjin nkꞌie, tu̱nga ndꞌa̱i̱ ja kisanéjnunu̱u. Nti̱a̱ná ja kikjꞌátsꞌe̱nu̱u. Ja na̱xu̱ tsichumo nginku̱n Nti̱a̱ná nga̱tꞌaha̱ ni xi kitsꞌín Nda̱ Nti̱a̱ná Jesucristo̱ ko̱ nga̱tꞌaha̱ Espiri̱tu̱hu̱ Nti̱a̱ná.
\s Bꞌi̱ tsꞌín tsakúya Pablo̱ nkꞌie nga Nti̱a̱ná tsꞌe̱ yjonintená
\p
\v 12 “Ma tsꞌian tu̱ mí nihí ni”, tsu xu̱ta̱. Bꞌa̱ tjín, tu̱nga najmi ngandanáá ngatentee̱ niu̱. Ndaha tsa ma tsꞌian tu̱ mí nihí ni, tu̱nga najmi tsjantéhé ra̱ tsa tjín nku ni xi kjéꞌyúnna nga tsꞌi̱íntsꞌe̱na.
\v 13 “Nichinee̱ ka̱ntsꞌá tje̱he̱n ra̱ ko̱ ka̱ntsꞌá tje̱he̱n ra̱ nichinee̱”, tsu xu̱ta̱ ko̱ bꞌa̱ tjín kjáíhin, tu̱nga Nti̱a̱náhá tsꞌi̱ínkatsún nga joo̱ niu̱. Najmi kui xáha̱ yjonintená tsa tu̱ chu̱ba̱ súnntuko̱náá xinki̱á. Tíjña ní tu̱ xi Nda̱ Nti̱a̱ná ka̱ma tsꞌe̱he ko̱ tu̱ xi tsꞌi̱íhin xáha̱ Nda̱ Nti̱a̱ná.
\v 14 A̱tꞌaha̱ ngaꞌyúhu̱n Nti̱a̱ná kitsꞌínkjꞌáíyako̱ho Nda̱ Nti̱a̱ná ngabayoo̱, ko̱ ñá bi, ngaꞌyúhu̱n ta̱ tsꞌi̱ínkjꞌáíyako̱ná ngabayoo̱.
\p
\v 15 ¿A najmi yanú nga nku te ni̱nku̱ nga nkúnkú jun ko̱ nga ni̱nku̱ kui xi yjonintehe̱ Cristo̱? ¿A nda tjín tsa nku te ni̱nku̱hu̱ Cristo̱ ka̱mangujinko̱ nku na̱ská? Najmi. Ndaha tsa mí yjehe.
\v 16 ¿A najmi yanú nga xi tsꞌínko̱ nku na̱ská, kui xi nkuhú bichú mako̱ yjonintehe̱ na̱skóo̱? A̱tꞌaha̱ bꞌi̱ tsꞌín tjítꞌa éhe̱n Nti̱a̱ná: “Nkuhú yjoninte ku̱i̱chú ma nga joo̱.”
\v 17 Tu̱nga xi nkuhú tsꞌín mako̱ yjoho̱ Nda̱ Nti̱a̱ná, kui xi nkuhú bichú mako̱ Espiri̱tu̱hu̱ Nda̱ Nti̱a̱ná.
\p
\v 18 Kui nga ti̱yú tꞌaxíhi̱n ru̱u ngayje tíkjá ni xi tsꞌín nga chu̱ba̱ fantuko̱hó xinkjín xu̱ta̱. Tu̱ má ngatitsuhún ni xi tsꞌín xu̱ta̱ najmi fasꞌenjin yjonintehe̱, tu̱nga xi chu̱ba̱ fantuko̱hó xinkjín, kui xi tsꞌín nku ngatitsun xi tsꞌín chu̱ntí yjonintehe̱.
\v 19 ¿A najmi yanú nga yjonintenu̱u xi ni̱nku̱hu̱ Espiri̱tu̱ Santo̱ xi tíjñajinnu̱u, Espiri̱tu̱ xi kitsjánu̱u Nti̱a̱ná? Najmi ta̱ tsꞌa̱juhunnu yjonu̱u.
\v 20 A̱tꞌaha̱ kisꞌechjíntjainu̱u nga kichꞌatsenu̱u. Kui nga cha̱nkjúnko̱honu yjonintenu̱u Nti̱a̱ná.
\c 7
\s Bꞌi̱ tsꞌín tsakúya Pablo̱ nga̱tꞌa tsꞌe̱ nga kꞌúéntuko̱ xinkjín xu̱ta̱
\p
\v 1 Kuinchjako̱ ma ngánu̱u ndꞌa̱i̱ nga̱tꞌaha̱ ni xi kichasjaiyanú nga kinꞌe nibánú xu̱ju̱n. Nda tjín tsa nku nda̱ najmi ku̱i̱xan.
\v 2 Tu̱nga tu̱ nga̱tꞌaha̱ ní nga ma mjehe̱ nga chu̱ba̱ kjúántuko̱hó xinkjín xu̱ta̱, kui nga tu̱ sahá katꞌentuko̱ho chju̱ún jáxꞌi̱u̱n ko̱ nga jminchjíu̱n kasꞌehe̱ xꞌi̱n.
\v 3 Xi tíꞌmi xꞌi̱n najmi tu̱ katꞌéchoho̱ yjoho̱ chju̱úhu̱n nga kjúájñako̱, ko̱ xi tíꞌmi chju̱ún najmi tu̱ katꞌéchoho̱ yjoho̱ xꞌi̱hi̱n nga kjúájñako̱.
\v 4 A̱tꞌaha̱ xi tíꞌmi chju̱ún najmi ta̱ kui batéxuma subaha̱ ra̱ yjoho̱. Ko̱ ní xꞌi̱hi̱n batéxumaha̱ yjoho̱. Bꞌa̱ ta̱ tjín tsꞌe̱ xi tíꞌmi xꞌi̱n. Najmi ta̱ kui batéxuma subaha̱ ra̱ yjoho̱. Ko̱ ní chju̱úhu̱n batéxumaha̱ yjoho̱.
\v 5 Najmi tu̱ bꞌechꞌóho̱o yjonu̱u xinki̱u, nku tutuhú tsa tse mjenu̱u chu̱bako̱o Nti̱a̱ná. Tu̱nga tꞌendako̱ títjunnú xinki̱u tu̱ xi tu̱ chubahá ni̱stjin najmi chjúngajnuhunu xinki̱u, a̱skahan chjúngajnu ngáhanu xinki̱u. A̱tꞌaha̱ tsa najmi chjúngajnu xinki̱u, kjútꞌayákꞌunnu̱u nda̱nindoo̱ nkꞌie nga najmi ka̱ma ꞌyúhu̱nnu̱u.
\p
\v 6 Tíbꞌejñá nda̱ínu̱u tsa bꞌa̱ nꞌo̱o. Najmi kju̱a̱ꞌyún títsꞌihi̱nnu̱u kui nii̱.
\v 7 Mjena kai tsa ngatentee̱ xu̱ta̱ kꞌúéntu suba xi nkúhu an, tu̱nga kjꞌa̱í kjꞌa̱íhí kju̱a̱nda xi kitsjáná Nti̱a̱ná nga nkúnkáá. Najmi tu̱ nku chu̱ba̱ kju̱a̱nda xi kikꞌa̱i̱ná.
\p
\v 8 Nga̱tꞌa tsꞌe̱ xi najmi kje̱e bixan ko̱ jminchín xi ja kꞌien xꞌi̱hi̱n, bꞌa̱ tíxian nga nda tjín tsa kꞌúéntu suba xi nkúhu an.
\v 9 Tu̱nga tsa najmi ka̱ma ꞌyúhu̱n nkꞌie nga mjehe̱ nga chjúngajnu, tu̱ sahá i̱ncha katixan. A̱tꞌaha̱ tu̱ sahá nda tjín nga ku̱i̱xan tsa chꞌon tsꞌín ku̱i̱nchja̱ ani̱ma̱ha̱.
\p
\v 10 Nga̱tꞌa tsꞌe̱ xi ja tsixan títsjaha̱ kju̱a̱téxuma xuꞌbi̱, kju̱a̱téxuma xi najmi an tsꞌa̱n, xi Nda̱ Nti̱a̱ná tsꞌe̱. Xi tíꞌmi chju̱ún najmi tu̱ katꞌéjña xꞌi̱hi̱n.
\v 11 Tu̱nga tsa ni xi tíbꞌéjñaha xꞌi̱hi̱n, najmi ta̱ katixahan ko̱ tsa kanchja̱ko̱nda ngáha. Ko̱ xi tíꞌmi xꞌi̱n najmi tu̱ katꞌéjña chju̱úhu̱n.
\p
\v 12 Nga̱tꞌa tsꞌe̱ xi tjíntuko̱ xinkjín nga sꞌejihi̱n ko̱ xi najmi sꞌejihi̱n Nti̱a̱ná, an xi bꞌa̱ tíxihi̱n, najmi Nda̱ Nti̱a̱ná xi bꞌa̱ tsꞌín tíbatéxumaha̱. Tsa nku nda̱ ntsꞌeé tíjñaha̱ chju̱ún xi najmi sꞌejihi̱n Nti̱a̱ná ko̱ tsa yuhu̱ chju̱úhu̱n nga kꞌúéjñako̱ho̱, najmi tu̱ katꞌéjña.
\v 13 Ko̱ tsa nku ta̱chju̱ún tíjñaha̱ xꞌi̱n xi najmi sꞌejihi̱n Nti̱a̱ná ko̱ tsa yuhu̱ xꞌi̱hi̱n nga kꞌúéjñako̱ho̱, najmi tu̱ katꞌéjña.
\v 14 A̱tꞌaha̱ nda̱ xi tíꞌmi xꞌi̱n xi najmi sꞌejihi̱n Nti̱a̱ná, fátsꞌe̱he̱ Nti̱a̱ná tu̱ nga̱tꞌaha̱ chju̱úhu̱n xi sꞌejihi̱n. Ko̱ ta̱chju̱ún xi najmi sꞌejihi̱n Nti̱a̱ná, fátsꞌe̱he̱ Nti̱a̱ná tu̱ nga̱tꞌaha̱ xꞌi̱hi̱n xi sꞌejihi̱n. Tsa najmi bꞌa̱ maha niu̱, najmi je ntíhi̱ nginku̱n Nti̱a̱ná. Tu̱nga ndꞌa̱i̱ Nti̱a̱ná ja tsꞌe̱ ntíhi̱.
\p
\v 15 Tu̱nga tsa xi najmi sꞌejihi̱n Nti̱a̱ná mjehe̱ kꞌu̱éjña xi sꞌejihi̱n, tsa xꞌi̱hi̱n ko̱ tsa chju̱úhu̱n maha, najmi tjíhi̱n kju̱a̱ꞌyún nda̱ ntsꞌeé ko̱ a ra̱ nichjaá nga kꞌúéjñako̱ xi najmi sꞌejihi̱n Nti̱a̱ná. A̱tꞌaha̱ Nti̱a̱ná mjehe̱ nga sꞌe̱ná kju̱a̱jyu nga ku̱i̱ntsu̱ba̱á.
\v 16 A̱tꞌaha̱, ¿nkú nꞌe yahani ji xi tíꞌmihi chju̱ún tsa ku̱i̱jne̱i̱hi xꞌi̱hi̱n? ¿Ko̱ nkú nꞌe yahani ji xi tíꞌmihi xꞌi̱n tsa ku̱i̱jne̱i̱hi chji̱íhi̱n?
\s Bꞌi̱ tsꞌín tsakúya Pablo̱ nkꞌie nga ja játsꞌe̱ná Nti̱a̱ná, kui xi ꞌyún chjíhi̱ ra̱
\p
\v 17 Tu̱nga tjíhín ni nga katꞌentu nga nkúnkú xu̱ta̱ xi nkú tsꞌín kitsjáha̱ Nti̱a̱ná ko̱ katꞌentu xi nkú tsꞌín tjíntu nkꞌie nga Nti̱a̱ná kinchja̱ha̱ nga kju̱átsꞌe̱he̱. Kui kju̱a̱téxuma xuꞌbi̱ xi tsjaha̱ ngayjee̱ xu̱ta̱ ni̱nku̱.
\v 18 Xi Nti̱a̱ná kikjꞌátsꞌe̱he̱ nkꞌie nga ja kinꞌehe̱ ni circuncision, najmi tu̱ katjánta̱ha̱ ra̱ yjoho̱. Ko̱ xi Nti̱a̱ná kikjꞌátsꞌe̱he̱ nkꞌie nga najmi kje̱e nꞌehe̱ ni circuncision, najmi tu̱ katsꞌín ni circuncision.
\v 19 Najmi chumi ni tsꞌi̱íhi̱n tsa kinꞌená ko̱ tsa najmi kinꞌená ni circuncision. Nkꞌiehé nga nꞌe̱tjusaán kju̱a̱téxumaha̱ Nti̱a̱ná, kuihí xi chjíhi̱ ra̱.
\p
\v 20 Katꞌentu saha nga nkúnkú xu̱ta̱ xi nkú tsꞌín tjíntu nkꞌie nga Nti̱a̱ná kinchja̱ha̱ nga kju̱átsꞌe̱he̱.
\v 21 Tsa ja tsatéñahi jóo̱ nkꞌie nga kikjꞌátsꞌe̱hi Nti̱a̱ná, najmi tu̱ fanta̱ha̱ ri̱ yjohi̱. Tu̱nga tsa tísakú ni̱yáhi nga ka̱ma nda̱íhi yjohi̱, bꞌa̱ nꞌe̱i̱.
\v 22 A̱tꞌaha̱ xi kichꞌatsꞌe nkꞌie nga Nti̱a̱ná kikjꞌátsꞌe̱he̱, kui xi ja nda̱íhi̱ yjoho̱ nginku̱n Nda̱ Nti̱a̱ná. Bꞌa̱ ta̱ tjín tsꞌe̱ xi nda̱íhi̱ yjoho̱ nkꞌie nga Nti̱a̱ná kikjꞌátsꞌe̱he̱. Kui xi xu̱ta̱ musu̱hu̱ Cristo̱ ndꞌa̱i̱.
\v 23 Tse chjí xi kisꞌechjí nga kichꞌatsenu̱u, kui nga najmi tu̱ xu̱ta̱ musu̱hu̱ xu̱ta̱ nꞌe mahanu yjonu̱u.
\v 24 Kui bꞌa̱ maha, já ntsꞌe, xi nkú tsꞌín tintsu̱bo̱o nkꞌie nga Nti̱a̱ná kitsúyanu̱u nga kju̱átsꞌe̱nu̱u, bꞌa̱ tsꞌín ti̱ntsu̱ba̱ sahanu nginku̱n Nti̱a̱ná.
\s Bꞌi̱ tsꞌín basehe̱ Pablo̱ nga̱tꞌa tsꞌe̱ tsa ku̱i̱xan xu̱ta̱ ni̱nku̱ ko̱ tsa najmi
\p
\v 25 Nga̱tꞌa tsꞌe̱ xi tíjña xu̱nkú najmi tjínna nku kju̱a̱téxuma xi kitsjá Nda̱ Nti̱a̱ná xi tsjaha̱. Tu̱nga xínyahánu̱u xi nkú tsꞌín tsꞌinnkjíhi̱n kꞌan. A̱tꞌaha̱ Nti̱a̱ná tsase ni̱ma̱na nga kitsꞌín mana nku xi ma nꞌe sꞌejihi̱n ni xi tsu.
\v 26 Bꞌa̱ mana nga nda tjín nga katꞌentu saha xu̱ta̱ xi nkú nga tsꞌín tjíntu tu̱ nga̱tꞌaha̱ kju̱a̱ni̱ma̱ xi tjín ndꞌa̱i̱.
\p
\v 27 ¿A tíjñahi chju̱ún? Najmi tu̱ binchisjáí ni̱yáí xi nkú tsꞌín kꞌúéjñai. ¿A najmi tjíhin chju̱ún? Najmi tu̱ binchisjáí ni̱yáí nga ku̱i̱xain.
\v 28 Tsa tíbixain, najmi ngatitsun tínꞌei. Ko̱ tsa nku ta̱kjín xu̱nkú tíbixan, najmi ngatitsun títsꞌín. Tu̱nga xi ku̱i̱xan sꞌe̱he̱ kju̱a̱sti xi tjín a̱sunntee̱. An bi, najmi mjena tsa ku̱i̱tjájiun kui niu̱.
\p
\v 29 Jun já ntsꞌe, ni xuꞌbi̱ xi mjena xínnu̱u. Tu̱ chubahá ni̱stjin tíjña sa. Kui nga ni̱stjin xi ndyja saha, xi tjíhi̱n chju̱ún katsꞌín xi nkúhu tsa najmi tjíhi̱n.
\v 30 Xi tíintá katsꞌín xi nkúhu tsa najmi tíintá. Xi tsjo tjíhi̱n katsꞌín xi nkúhu tsa najmi tsjo tjíhi̱n. Xi tíbꞌatse tsa mí nihi, katsꞌín xi nkúhu tsa najmi kui tsꞌe̱ niu̱.
\v 31 Ko̱ xi títsꞌínchjén tsa mí nihi, katsꞌín xi nkúhu tsa najmi kui niu̱ xi ꞌyún chjí. A̱tꞌaha̱ ndyja̱ a̱sunnte xi tíyaá ndꞌa̱i̱.
\p
\v 32 Mjena nga najmi kjúánta̱ha̱ ru̱u yjonu̱u. Xi tíjña xu̱nkú, kui xi ni xi tsꞌe̱ Nda̱ Nti̱a̱ná fánta̱ha̱ ra̱ yjoho̱ ko̱ xi nkú tsꞌín tsꞌi̱ín ni xi tsjoho̱ Nda̱ Nti̱a̱ná.
\v 33 Tu̱nga xi tíjñaha̱ chju̱ún, ni xi tjín kui xi fánta̱ha̱ ra̱ yjoho̱ ko̱ xi nkú tsꞌín tsꞌi̱ín ni xi tsjoho̱ chju̱úhu̱n.
\v 34 Bꞌa̱ tsꞌín najmi nkuhú ni xi kjinta̱ha̱ ra̱. Nku ta̱chju̱ún xi najmi tjíhi̱n xꞌi̱n ko̱ a ra̱ ta̱kjín xi tíjña xu̱nkú, kui xi fánta̱ha̱ ra̱ yjoho̱ ni xi tsꞌe̱ Nda̱ Nti̱a̱ná ko̱ xi nkú tsꞌín ka̱ma je yjonintehe̱ ko̱ ani̱ma̱ha̱. Tu̱nga ta̱chju̱ún xi tíjñaha̱ xꞌi̱n, ni xi tjín kui xi fánta̱ha̱ ra̱ yjoho̱ ko̱ xi nkú tsꞌín tsꞌi̱ín ni xi tsjoho̱ xꞌi̱hi̱n.
\p
\v 35 Ngandanu̱u bꞌa̱ tíxihi̱nnu̱u. Najmi mjena tsa chꞌá tsꞌinkꞌanjinu̱u. Mje nína nga nda nꞌe̱ ku̱i̱ntsu̱bo̱o ko̱ nꞌe̱kjasꞌen sisihu̱un yjonu̱u Nda̱ Nti̱a̱ná.
\p
\v 36 Tsa tjín xi bꞌa̱ maha̱ nga najmi títsꞌíntjusunko̱ ni xi yꞌéndako̱ ta̱kjín xi ja tjíndako̱ho̱, ko̱ tsa ja tífꞌa núhu̱ ta̱kjíu̱n ko̱ bꞌa̱ maha̱ nga tu̱ sahá nda tjín nga ku̱i̱xanko̱, katsꞌín xi nkú tsꞌín tíma mjehe̱. Katixan. Najmi ngatitsun niu̱.
\v 37 Tu̱nga xi tjínkuhu̱ kꞌun nga najmi ku̱i̱xan ko̱ chúkju̱a̱ha̱ tsꞌín jnenta yjoho̱ nga chju̱ún ma mjehe̱, ko̱ ma ꞌyúhu̱n nga bꞌéchꞌoho̱ yjoho̱, ko̱ ja kitsꞌínnkjinkꞌun sisin nga tu̱ sahá nda tjín nga najmi ku̱i̱xan, nda tjín nga najmi ku̱i̱xan.
\v 38 Kui bꞌa̱ maha, xi ku̱i̱xanko̱ho xi tjíndako̱ho̱, nda tsꞌi̱ín. Tu̱nga ꞌyún nda tjín sa ni xi tsꞌi̱ín xi najmi ku̱i̱xan.
\p
\v 39 Nku ta̱chju̱ún xi tíjñaha̱ xꞌi̱n, kui xi tjítꞌaꞌyúnko̱ xꞌi̱hi̱n nkꞌie nga tíjña sa. Tu̱nga tsa ku̱a̱yá xꞌi̱hi̱n, ka̱ma nda̱í ngáha̱ ra̱ yjoho̱ ko̱ ka̱ma kꞌúéjñako̱ ngáha xi mjehe̱, tsa nku xi ta̱ sꞌejihi̱n Nti̱a̱ná kꞌúéjñako̱.
\v 40 Tu̱nga bꞌa̱há xian nga ꞌyún nda tsꞌín kꞌúéjña tsa najmi ta̱ kꞌúéjñako̱ho xꞌi̱n. Bꞌa̱ tsꞌín tsꞌinnkjíhi̱n kꞌan ko̱ ndzjen mana nga ta̱ tíjñajinna Espiri̱tu̱hu̱ Nti̱a̱ná nga bꞌa̱ tíxian.
\c 8
\s Bꞌi̱ tsꞌín tsakúya Pablo̱ nga̱tꞌa tsꞌe̱ nichine xi chje̱ ꞌba̱i̱hi̱ nti̱a̱ xi ntsja xu̱ta̱ tsꞌínnda
\p
\v 1 Kuinchjako̱ ma ngánu̱u ndꞌa̱i̱ nga̱tꞌa tsꞌe̱ nichine xi chje̱ ꞌba̱i̱hi̱ nti̱a̱ xi ntsja xu̱ta̱ tsꞌínnda. Ja yaá nkú tjíhi̱n ra̱ nga̱tꞌa tsꞌe̱ kui nii̱. Tu̱nga ni xi be xu̱ta̱, kui xi tsꞌín ngakꞌuhu̱n. Kju̱a̱tjoo̱ bi, kui xi tsjá ngaꞌyúhu̱n xu̱ta̱.
\v 2 Xi bꞌa̱ maha̱ nga be tsa mí nihi, kui xi najmi kje̱e be xi nkú tsꞌín tjíhin nga sku̱e̱.
\v 3 Tu̱nga xi tjoho̱ Nti̱a̱ná bi, Nti̱a̱ná be yáha xu̱ta̱ xuꞌbo̱.
\p
\v 4 Kui bꞌa̱ maha, nga̱tꞌa tsꞌe̱ tsa ma chine nichine xi chje̱ kikꞌa̱i̱hi̱ nti̱a̱ xi ntsja xu̱ta̱ kitsꞌínndaha, yaá nga nti̱a̱ xuꞌbo̱ najmi chumi ni chjíhi̱ ra̱ ko̱ nga nku tutuhú maha Nti̱a̱ná. Najmi tjín sa kjꞌa̱í.
\v 5 Kju̱axi̱ nga tjín nkꞌa ján ko̱ tꞌanankiu̱ xi nti̱a̱ tsuhu̱ xu̱ta̱, ko̱ santaha nkjin maha xi ꞌmi nti̱a̱ ko̱ nkjin maha xi chu̱ba̱ yankjúhún.
\v 6 Ñá bi, nku tutuhú maha Nti̱a̱ná. Kui xi Nti̱a̱ Na̱ꞌmiu̱ xi kitsꞌínnda ngayjee̱ ni xi tjín ko̱ a̱tꞌaha̱ mjehe̱ kui nga tintsu̱ba̱haná. Ko̱ ta̱ nku tutuhú maha Nda̱ Nti̱a̱ná, kui xi Jesucristo̱ xi nga̱tꞌaha̱ tjíhin ni xi tjín ko̱ xi nga̱tꞌaha̱ tintsu̱ba̱haná.
\p
\v 7 Tu̱nga najmi ngatentee̱hé xu̱ta̱ be ni xuꞌbi̱. Tjín xi ja kama nkaha̱ nti̱a̱ xi ntsja xu̱ta̱ tsꞌínndaha̱. Tsa xu̱ta̱ xuꞌbo̱ kjine nichine xi chje̱ kikꞌa̱i̱hi̱ nti̱o̱, tu̱ sa bꞌa̱há tsu ngá kju̱a̱nkjintakꞌuhu̱n nga ja chu̱ntí kama nginku̱n Nti̱a̱ná, a̱tꞌaha̱ najmi ndjá tjíya kju̱a̱nkjintakꞌuhu̱n.
\v 8 Kju̱axi̱ nga najmi nga̱tꞌaha̱ ni xi chineé binchúkꞌun tiñaha̱á Nti̱a̱ná. Najmi ꞌyún nda ka̱ma saá tsa chi̱ne̱é ko̱ najmi ꞌyún chꞌonkꞌun ka̱ma saá tsa najmi chi̱ne̱é.
\p
\v 9 Tíjña nda̱ínu̱u ni xi ma chino, tu̱nga cha̱se̱nú nga ni xi chino najmi tsꞌi̱ínndyjajihi̱n xu̱ta̱ xi najmi ndjá tíi̱ncha.
\v 10 A̱tꞌaha̱ tsa nku xi najmi ndjá tjíya kju̱a̱nkjintakꞌuhu̱n sku̱e̱hi ji xi ja yai ni xuꞌbi̱ nga kabinchin nku a̱nte má yankjún nti̱a̱ xi ntsja xu̱ta̱ kitsꞌínndaha ko̱ nga tíchinei ni xi tjín yo̱, ¿a najmi ko̱hó kui ka̱ma kꞌun kji̱ne̱ ni xi chje̱ kikꞌa̱i̱hi̱ ra̱ nti̱a̱ xuꞌbo̱?
\v 11 Bꞌa̱ tsꞌín nga̱tꞌaha̱ ni xi yai ndyja̱ha nda̱ ntsꞌeé xuꞌbi̱ xi najmi ndjá síjña, xi Cristo̱ kꞌienntjáíhi.
\p
\v 12 Nkꞌie nga bꞌa̱ tsꞌín tínꞌekatsúnjiun kju̱a̱nkjintakꞌuhu̱n já ntsꞌeé xi najmi ndjá tíi̱ncha, ngatitsun xi tífi kontra̱ha̱ já ntsꞌeé tínꞌo ko̱ ta̱ xi tífi kontra̱ha̱ Cristo̱.
\v 13 Kui bꞌa̱ maha, tsa nga̱tꞌaha̱ nichinena̱ títsꞌinkijnejihinna ngatitsun nda̱ ntsꞌé, tu̱ sahá ndaha nku ni̱stjin najmi ta̱ kjíne̱hena yjo, tu̱ xi bꞌa̱ tsꞌín najmi tsꞌinkijnejihinna ngatitsun nda̱ ntsꞌé.
\c 9
\s Bꞌi̱ tsꞌín tsasinntjai yjoho̱ Pablo̱ nga kju̱axi̱ nga nda̱ postru
\p
\v 1 ¿A najmi ka̱mahá tsꞌian ni xi tsꞌín nku nda̱ postru̱? ¿A najmi nda̱ postru̱ná? ¿A najmi tunkáhán kikieko̱hona Nda̱ Nti̱a̱ná Jesu? ¿A najmi juhún nga chjihi̱ xá xi títsꞌian nga Nda̱ Nti̱a̱ná títsꞌin xáha̱?
\v 2 Ta̱ ndaha tsa tjín xi najmi tsꞌínkjáíhi̱n nga an xi nku nda̱ postru̱, tu̱nga jun tjíhin nga nꞌe̱kjáínnú. A̱tꞌaha̱ ndꞌa̱i̱ nkꞌie nga sꞌejinnu̱u Nda̱ Nti̱a̱ná, kui niu̱ xi bakúchji nga kju̱axi̱ nga an xi nku nda̱ postru̱.
\p
\v 3 Bꞌi̱ tsꞌín bási̱ntja yjona̱ nginku̱n xu̱ta̱ xi bꞌaya xána̱.
\v 4 ¿A najmi ka̱mahá nꞌe̱kjáíhi̱n an ko̱ Bernabe ni xi chi̱ne̱i̱ ko̱ ni xi sꞌi̱?
\v 5 ¿A najmi ka̱mahá nga sꞌe̱jñani̱ chju̱ún xi sꞌejihi̱n Nti̱a̱ná, xi tsjénko̱ni̱ nga ku̱i̱nimai̱ xi nkú i̱ncha tsꞌín já postru̱ xingisoo̱ ko̱ já ntsꞌe̱ Nda̱ Nti̱a̱ná ko̱ Pedro̱?
\v 6 ¿A tu̱ nkuhú an ko̱ Bernabe tjíhinni nga nꞌe̱xái̱ tu̱ xi sa̱kúhu̱ni̱ ni xi machjénni̱?
\p
\v 7 Nku nda̱ jun, ¿a kuihí bꞌéchjí ni xi fetꞌaha̱ nga tsꞌín xáha̱? Xi bꞌéntje̱ tuntsja̱jé, ¿a najmi kjinehé tuu̱? Xi kunntá chu̱tsa̱nka̱, ¿a najmi yo̱hó sakútꞌaha̱ ni xi kji̱ne̱?
\v 8 ¿A kju̱a̱nkjintakꞌun tsꞌa̱hán tíbꞌasjéhena ni xi tíxian? ¿A najmi bꞌa̱há ta̱ tsꞌín tjítꞌa kju̱a̱téxumoo̱?
\v 9 A̱tꞌaha̱ bꞌa̱ tsꞌín yꞌétꞌa Moise xu̱ju̱n kju̱a̱téxumoo̱: “Najmi tu̱ tsa bꞌeꞌoho̱o turu̱ tsa tu̱ xi najmi kji̱ne̱he tuni̱ñu̱ nkꞌie nga títsꞌínxá nga tíbitjíá tuni̱ñu̱.” ¿A turu̱hú kjinta̱ha̱ ra̱ Nti̱a̱ná?
\v 10 ¿A najmi ngandanáhá bꞌa̱ kitsú? Joho̱n, ngandaná bꞌa̱ tsꞌín kisꞌetꞌaha kju̱a̱téxumoo̱. A̱tꞌaha̱ xi bakján tꞌanankiu̱ ko̱ xi bitjíá tuni̱ñu̱, kui xi tjíhin nga kúyaha̱ nga ta̱ sa̱kútꞌaha̱ cho̱n.
\p
\v 11 Kui kju̱a̱ha, tsa ji̱n tíbꞌentje̱he̱ni̱ a̱jinnu̱u ni xi tsꞌe̱ Nti̱a̱ná, ¿a tsehé ni xi tíbinchii̱ tsa ta̱ sakútꞌani̱ chuba cha̱ha̱n ni xi tjínnu̱u e̱i̱ a̱sunntei̱?
\v 12 Tsa kjꞌa̱í ma sakútꞌaha̱ ni xi tjínnu̱u, ¿a najmi ꞌyúhún tsuhu̱ni̱ nga sakútꞌani̱ ni xi tjínnu̱u? Ka̱maní ku̱i̱nchíi̱, tu̱nga najmi bꞌa̱há tínꞌei̱. Ni xi nꞌe níi̱, nꞌe chúkju̱a̱i̱ ngayjee̱ ni xi matꞌai̱n tu̱ xi najmi chumi ni kꞌu̱échꞌoho̱ ra̱ xu̱ta̱ én nda tsuhu̱ Cristo̱.
\p
\v 13 ¿A najmi yanú nga xi tsꞌínxá ni̱nku̱ kjine ni xi masún ni̱nku̱ ko̱ xi tsꞌínxátꞌa na̱chan chje̱ ta̱ sakútꞌaha̱ yjoho̱ chu̱ xi nꞌekꞌien yo̱?
\v 14 Bꞌa̱ ta̱ tsꞌín yꞌénda Nti̱a̱ná nga xi bꞌéni̱jmí én nda tsuhu̱, én xi kꞌu̱éni̱jmí kꞌúéntuhu. Yo̱ sa̱kúhu̱ ra̱ ni xi kji̱ne̱.
\p
\v 15 Tu̱nga an ndaha̱chí najmi tíbankia ni xi tjíhin nga ka̱néna kai. Ko̱ ta̱ ndaha najmi títsꞌinntúnu̱u tsa tu̱ xi ni kꞌu̱a̱i̱hinú. Tu̱ sa ní nda tjín tsa ku̱a̱yá kintehe̱ ni nga tu̱ nku kꞌu̱a̱i̱hína ni, a̱tꞌaha̱ tsjo tjínna nga najmi chumi ni tíꞌba̱i̱na.
\v 16 Nkꞌie nga tíbꞌeni̱jmíá én nda tsuhu̱ Jesucristo̱, najmi kui kju̱a̱ha tsa nkꞌa kꞌuasjéhena yjona̱. A̱tꞌaha̱ ja tjínena nga bꞌa̱ tsꞌian. ¡Ni̱ma̱ rú tsꞌihinna tsa najmi kꞌueni̱jmíá én nda tsuhu̱ Jesucristo̱!
\p
\v 17 Kui bꞌa̱ maha, tsa xá an mjehena kꞌueni̱jmíhina én nda tsuu̱, tsꞌinkjáíhi̱n chjína̱. Tu̱nga tsa tjínena nga kꞌueni̱jmíá, a̱ xá xi kikꞌa̱i̱hína títsꞌian ma.
\v 18 Kui nga, ¿mí chjíhi xi tsꞌinkjáíhín ra̱ ma? Chjína̱ nga najmi fꞌachjá nga bꞌeni̱jmíá én nda tsuhu̱ Jesucristo̱ ko̱ nga najmi bankia ni xi kanéna nga̱tꞌaha̱ nga tíbꞌeni̱jmíá én nda tsuu̱.
\s Bꞌi̱ tsꞌín kitsúya Pablo̱ ni xi tsꞌín nga tsꞌín xáha̱
\p
\v 19 Ndaha tsa nda̱ína yjona̱, tu̱nga jahá kitsꞌin ma yjona̱ nku nda̱ musu̱hu̱ ngayjee̱ xu̱ta̱, tu̱ xi bꞌa̱ tsꞌín nkjin xu̱ta̱ tsꞌin ngana̱ sahana nga ku̱a̱kjꞌá éhe̱n Cristo̱.
\v 20 A̱jihi̱n xu̱ta̱ xi ntje̱ judio̱ tje̱he̱n ra̱ bꞌa̱ tsꞌian xi nkú tsꞌín xu̱ta̱ xi ntje̱ judio̱ tje̱he̱n ra̱, tu̱ xi tsꞌin ngana̱hana kui xu̱to̱. Ndaha tsa an najmi tíjñanena kju̱a̱téxuma xi kinꞌekjasꞌehe̱n Moise, tu̱nga a̱jihi̱n xu̱ta̱ xi tíjñanehe̱ kju̱a̱téxumoo̱ bꞌa̱ tsꞌian xi nkú tsꞌín xi tíjñanehe̱ kju̱a̱téxumoo̱, tu̱ xi tsꞌin ngana̱hana kui xu̱to̱.
\p
\v 21 A̱jihi̱n xu̱ta̱ xi najmi tíjñanehe̱ kju̱a̱téxuma xi kinꞌekjasꞌehe̱n Moise bꞌa̱ tsꞌian xi nkúhu tsa ko̱ an najmi tíjñanena kju̱a̱téxumoo̱, tu̱ xi tsꞌin ngana̱hana xu̱ta̱ xi najmi tíjñanehe̱ kju̱a̱téxumoo̱. Tu̱nga najmi tíi̱jña tꞌaxíhín ra̱ kju̱a̱téxumaha̱ Nti̱a̱ná, a̱tꞌaha̱ kju̱a̱téxumaha̱ Cristo̱ tíi̱jñajihi̱n.
\v 22 A̱jihi̱n xu̱ta̱ xi najmi ndjá tíi̱ncha nginku̱n Nti̱a̱ná bꞌa̱ ta̱ tsꞌín tsꞌin ma yjona̱, tu̱ xi tsꞌin ngana̱hana xu̱ta̱ xi najmi kje̱ ndjá tíi̱ncha. Tsꞌin ma yjona̱ xi nkú kꞌun ngayje tíkjá xu̱ta̱ tu̱ xi tjín xi kꞌu̱a̱nkihi.
\v 23 Bꞌa̱ títsꞌian a̱tꞌaha̱ xáha̱ én nda tsuhu̱ Jesucristo̱ títsꞌian ko̱ tu̱ xi ta̱ sa̱kúhuna kju̱a̱nda xi tsjá.
\p
\v 24 ¿A najmi yanú, nkꞌie nga nkjin maha xi bangatsanka, nkuhú xi tsꞌín ngana̱? Kui nga ti̱yútsanka sisihinnu tu̱ xi ka̱ma nꞌe̱kjáíhi̱n ru̱u chjí xi kꞌu̱a̱i̱ná.
\v 25 Ko̱ xi bꞌénda yjoho̱ nga tsúton, nkjin ni xi bꞌéchꞌoho̱ yjoho̱. Bꞌa̱ i̱ncha tsꞌín tu̱ xi ka̱ma tsꞌi̱ínkjáíhi̱n ra̱ nku chjí xi batsun. Tu̱nga ñá bi, tíbꞌendaá yjoná tu̱ xi nꞌe̱kjáíhi̱n ra̱á nku chjí xi najmi maha̱ batsun.
\p
\v 26 An bi, najmi tíbangatsanka xi nkúhu xi chu̱ba̱ tíbangatsankahá ko̱ najmi tíkjan xi nkúhu xi chu̱ba̱ tíbꞌéjin séhén.
\v 27 Tu̱ sa ní títsjaha̱ kju̱a̱ni̱ma̱ yjonintena̱ ko̱ títsꞌinkꞌa ni̱yá, tu̱ xi najmi ndyja̱hana an xi yꞌeni̱jmíhi̱ xu̱ta̱ xingisoo̱.
\c 10
\s Bꞌi̱ tsꞌín tsakúya Pablo̱ nkꞌie nga kitsꞌínchjén ni xi kamatꞌain ntje̱ cháha̱ xu̱ta̱ judio̱
\p
\v 1 Jun já ntsꞌe, najmi mjena nga nꞌe̱chayo ni xi kamatꞌain ntje̱ cháha̱ xu̱ta̱ judio̱. Ngayjee̱ yꞌema kintehe̱ ni̱nti̱ xi kitsjáni̱yáha̱ ko̱ ngayjee̱ jꞌatikjá ntáchakꞌuu̱n.
\v 2 Bꞌa̱ tsꞌín ngayjee̱ nkuhú kamako̱ho Moise nga kisaténtájin ni̱nti̱u̱ ko̱ ntáchakꞌuu̱n.
\p
\v 3 Nkuhú nichine xi kitsjáha̱ Nti̱a̱ná i̱ncha kikjine ngayjee̱
\v 4 ko̱ nkuhú ntá xi kitsjáha̱ Nti̱a̱ná i̱ncha kikꞌi ngayjee̱. I̱ncha kikꞌi ntánijua xi tsitjuhu̱ nku na̱xi̱ xi kitsjáha̱ Nti̱a̱ná. Kui na̱xi̱u̱ xi Cristo̱ ko̱ kui na̱xi̱u̱ xi kitsjenko̱ho̱.
\v 5 Tu̱nga ndaha tsa bꞌa̱ kama, najmi kisasíhi̱n Nti̱a̱ná xi nkú tsꞌín yꞌentu nkjin xu̱to̱. Kui kju̱a̱ha i̱ncha kꞌiehen a̱nte kixiu̱.
\p
\v 6 Ni xi kamatꞌain xu̱ta̱ xuꞌbo̱ kisꞌejña chu̱ba̱yaná, tu̱ xi najmi nꞌe̱ mjehená ni xi najmi nda xi nkú tsꞌín kitsꞌín mje xu̱ta̱ xuꞌbo̱.
\v 7 Najmi tu̱ nꞌe̱tsjoho̱o nti̱a̱ xi ntsja xu̱ta̱ tsꞌínnda xi nkú kitsꞌín kꞌu̱a̱ xu̱ta̱ xuꞌbo̱, xi nkú tsꞌín tjítꞌa éhe̱n Nti̱a̱ná: “Yꞌentu xu̱ta̱ nga kikjine ko̱ kikꞌi ko̱ a̱skahan i̱ncha tsisintje̱n nga kitenki tsjo.”
\p
\v 8 Najmi tu̱ chu̱ba̱ suntuko̱náá xinki̱á xi nkú kitsꞌín kꞌu̱a̱ xu̱ta̱ xuꞌbo̱. Kui kju̱a̱ha kꞌiehen kan jan mii̱ nga nkuhú ni̱stjin sa.
\v 9 Najmi tu̱ chjutꞌayákꞌaán Nda̱ Nti̱a̱ná xi nkú kitsꞌín kꞌu̱a̱ xu̱ta̱ xuꞌbo̱. Kui kju̱a̱ha kꞌiehen nga kikjinehe̱ ra̱ ye̱.
\v 10 Najmi tu̱ chubayanó Nti̱a̱ná xi nkú kitsꞌín kꞌu̱a̱ xu̱ta̱ xuꞌbo̱. Kui kju̱a̱ha nga ntítsje xi tsꞌínkje xu̱ta̱ kitsꞌínkꞌiehe̱n ra̱.
\p
\v 11 Ni xuꞌbi̱ xi kamatꞌain ntje̱ cháha̱ xu̱ta̱ judio̱, kui xi kisꞌejña chu̱ba̱yaná. Xu̱ju̱n éhe̱n Nti̱a̱ná kisꞌetꞌa niu̱ tu̱ xi tsjáni̱yáhaná ñá xi tintsu̱ba̱á ndꞌa̱i̱ ni̱stjin xi fekuu̱.
\v 12 Kui bꞌa̱ maha, xi tsꞌínnkjinkꞌun nga najmi ku̱i̱jne̱nki, kakuhu̱n yjoho̱ tu̱ xi najmi ku̱i̱jne̱nkihi.
\v 13 Ni xi tímatꞌon nga tíchjutꞌayákꞌunnu̱u najmi tsꞌati sa nga ni xi matꞌain xu̱ta̱. Ma ma ꞌyún takꞌaán Nti̱a̱ná. Najmi tsjánte tsa ꞌyún chjútꞌayákꞌun sanu̱u nga kjꞌu̱a̱ínenu̱u nku ni xi najmi ku̱i̱chjúkju̱a̱nu̱u. Tsjáni̱yá nínu̱u xi nkú tsꞌín ku̱i̱tjunkihinu nkꞌie nga chjútꞌayákꞌunnu̱u, tu̱ xi bꞌa̱ tsꞌín nꞌe̱ chúkju̱a̱hanu ni xi ni̱banenu̱u.
\p
\v 14 Já ntsꞌena̱ xi tjona̱, kui nga tankín tꞌaxíhi̱n ru̱u nti̱a̱ xi ntsja xu̱ta̱ tsꞌínndaha.
\v 15 Tínchjako̱nu̱u xi nkúhu xu̱ta̱ xi be ni xi tsꞌín. Nꞌe̱nkjínkꞌun sisiun ni xi tíxinnu̱u.
\v 16 Nkꞌie nga ꞌyaá binu̱ nkjúu̱n nga ꞌba̱i̱hi̱í mábꞌa̱chjíhi̱ Nti̱a̱ná, ¿a najmi nkuhú bichú majihi̱ín jníhi̱ Cristo̱? Ko̱ nkꞌie nga chineé ni̱nku̱a̱n xi bakjanyáá, ¿a najmi nkuhú bichú majihi̱ín yjonintehe̱ Cristo̱?
\v 17 Nkuhú maha ni̱nku̱o̱n, kui nga nkuhú yjoninte bichú mahaná ndaha tsa nkjin mahaná. A̱tꞌaha̱ ngatenteé sakútꞌaná ni̱nku̱a̱n xi nkuhú maha.
\p
\v 18 Cha̱se̱ chu̱ba̱yoho̱o xu̱ta̱ xi ntje̱ Israel tje̱he̱n ra̱. Xi i̱ncha kjine yjoho̱ chu̱ xi chje̱ ꞌba̱i̱hi̱ Nti̱a̱ná, ¿a najmi nkuhú bichú majihi̱n chje̱ xi sꞌentusún na̱chan chje̱?
\v 19 Nkꞌie nga bꞌa̱ tíxian, najmi bꞌa̱ tíxian tsa chjíhi̱ ra̱ nti̱a̱ xi ntsja xu̱ta̱ tsꞌínndaha ko̱ ta̱ ndaha tsa chjíhi̱ ra̱ yjo xi ꞌba̱i̱hi̱ chje̱.
\v 20 Ni xi tíxin níná, chje̱ xi tsjáha̱ nti̱a̱ xu̱ta̱, kui xi jánindoo̱ títsjáha̱. Najmi Nti̱a̱ná tsjáha̱ niu̱. Najmi mjena tsa tjín ni xi sꞌe̱ko̱nu̱u jánindoo̱.
\p
\v 21 Najmi ka̱ma sꞌi̱u̱yo chu̱tsín xi tsꞌe̱ Nda̱ Nti̱a̱ná ko̱ ta̱ chu̱tsín xi tsꞌe̱ jánindoo̱. Najmi ka̱ma ku̱i̱ntsu̱ba̱tꞌo yámixa̱ xi tsꞌe̱ Nda̱ Nti̱a̱ná ko̱ ta̱ yámixa̱ xi tsꞌe̱ jánindoo̱.
\v 22 ¿A ra̱ mjehéná nga ka̱ma stihi̱ Nti̱a̱ná? ¿A ꞌyúhún tjínná ngaꞌyún nga ka̱ma ku̱a̱nkín kontra̱á Nti̱a̱ná?
\s Bꞌi̱ tsꞌín tsakúya Pablo̱ nkjé chi̱ne̱é yjo xi ja kinꞌe ma chje̱
\p
\v 23 “Ma tsꞌian tu̱ mí nihí ni”, tsu xu̱ta̱. Tu̱nga najmi ngandanáhá ngayjee̱ niu̱. “Ma tsꞌian tu̱ mí nihí ni”, tsu xu̱ta̱. Tu̱nga najmi ngatentee̱hé niu̱ tsjá ngaꞌyúnná.
\v 24 Ndaha nku najmi tu̱ katangisjai ngandaha̱. Ni xi ka̱ma ní ngandaha̱ xu̱ta̱ xinkjín katangisjai.
\p
\v 25 Ka̱ma chi̱no̱o tu̱ mí yjohó ni xi tjín má satéña yjo. Najmi tu̱ bꞌa̱ bixíún tsa kui niu̱ xi tsꞌi̱ínkatsún kju̱a̱nkjintakꞌunnu̱u.
\v 26 A̱tꞌaha̱ ngayjee̱ a̱sunntee̱ ko̱ ni xi tjíhi̱n, Nti̱a̱ná tsꞌe̱.
\p
\v 27 Tsa nku xi najmi sꞌejihi̱n Nti̱a̱ná bꞌa̱ ku̱i̱tsu̱nu̱u nga kuankín chi̱no̱o ni̱ñu̱ niꞌyaha̱ ko̱ tsa mjenu̱u kuankíún yo̱, chi̱no̱o tu̱ mí ni xi kꞌu̱éjñatꞌahánu̱u. Najmi tu̱ bꞌa̱ bixíún tsa kui niu̱ xi tsꞌi̱ínkatsún kju̱a̱nkjintakꞌunnu̱u.
\v 28 Tu̱nga tsa tjín xi bꞌa̱ ku̱i̱tsu̱nu̱u: “Nti̱a̱ xi ntsja xu̱ta̱ tsꞌínndaha ja kikꞌa̱i̱hi̱ chje̱ yjo xuꞌbi̱”, najmi tu̱ chino nkꞌie. Tꞌechꞌóho̱o yjonu̱u niu̱ tu̱ nga̱tꞌaha̱ tsa nkú ka̱maha̱ xi bꞌa̱ kuatsúnu̱u ko̱ tu̱ nga̱tꞌaha̱ tsa ku̱a̱tsún kju̱a̱nkjintakꞌuhu̱n.
\p
\v 29 Najmi bꞌa̱ tíxian tsa kju̱a̱nkjintakꞌuhu̱n xi kji̱ne̱ niu̱ ku̱a̱tsún. Kju̱a̱nkjintakꞌun níhi̱ xi bꞌa̱ kuatsúu̱ tíxian. A̱tꞌaha̱, ¿á xi nkú tsꞌín tínchja̱ha kju̱a̱nkjintakꞌuhu̱n xu̱ta̱ xi kjꞌa̱í cha̱se̱he̱ ra̱ nga cha̱ mí nihi xi ma tsꞌian?
\v 30 Tsa tsjaha̱ mábꞌa̱chjíhi̱ Nti̱a̱ná a̱tꞌaha̱ títsjána ni xi tíi̱ne̱, ¿á ku̱i̱nchja̱yanehena xu̱ta̱ tsa kjíne̱ ni xi ja kuatsjaha̱ mábꞌa̱chjíhi̱ Nti̱a̱ná?
\p
\v 31 Kui bꞌa̱ maha, tsa chi̱no̱o ko̱ tsa sꞌi̱u ko̱ tsa tu̱ mí nihí ni xi nꞌo̱o, ngayje ni xi nꞌo̱o katakúchji kju̱a̱chánkaha̱ Nti̱a̱ná.
\v 32 Najmi tu̱ nꞌo nga ndyja̱jihi̱n xu̱ta̱ xi ntje̱he̱ judio̱ tje̱he̱n ra̱ ko̱ xi najmi ntje̱he̱ judio̱ tje̱he̱n ra̱ ko̱ ta̱ ndaha xu̱ta̱ ni̱nku̱hu̱ Nti̱a̱ná.
\v 33 An bi, tu̱ mí nihí ni xi tsꞌian, ni xi sasíhi̱n ngayjee̱ xu̱ta̱ tsꞌian. Najmi tu̱ ni xi ngandana̱ bangisja nga tsꞌian. Ni xi ka̱ma ní ngandaha̱ xu̱ta̱ tsꞌian. Bꞌa̱ tsꞌian tu̱ xi kꞌu̱a̱nkihi.
\c 11
\p
\v 1 Bꞌa̱ ta̱ nꞌo̱o xi nkú nga tsꞌian, a̱tꞌaha̱ an bi, bꞌa̱ ta̱ tsꞌian xi nkúhu Cristo̱.
\s Bꞌi̱ tsꞌín tsakúya Pablo̱ xi nkú tsꞌín sku̱e̱nkjún jminchjíu̱n
\p
\v 2 Tsjo tsꞌín nchjani̱jmíyaha̱nu̱u, já ntsꞌe, a̱tꞌaha̱ tehe̱nte fꞌáítsjennu̱u an ko̱ a̱tꞌaha̱ tínꞌo ni xi tsakuyánu̱u. Kui ni xi kikꞌa̱i̱na ko̱ bꞌa̱ ta̱ tsꞌín kitsꞌinkjasꞌennu̱u.
\v 3 Tu̱nga mjehéna nga cho̱o nga Cristo̱ kui xi tje̱n títjuhu̱n nga nkúnkú jáxꞌi̱n, ko̱ xi tíꞌmi xꞌi̱n kui xi tje̱n títjuhu̱n chju̱úhu̱n, ko̱ Nti̱a̱ná kui xi tje̱n títjuhu̱n Cristo̱.
\p
\v 4 Tu̱ yá nda̱há ni xi kꞌu̱éꞌma nintaku̱ nkꞌie nga ku̱i̱nchja̱ko̱ Nti̱a̱ná ko̱ tsa nga tsꞌi̱ínkjasꞌen én xi tsjáha̱ Nti̱a̱ná, kui xi najmi tíbenkjún xi tje̱n títjuhu̱n.
\v 5 Ko̱ tu̱ yá ta̱chju̱úhún ni xi najmi kꞌu̱éꞌma nintaku̱ nkꞌie nga ku̱i̱nchja̱ko̱ Nti̱a̱ná ko̱ tsa nga tsꞌi̱ínkjasꞌen én xi tsjáha̱ Nti̱a̱ná, kui ta̱chjúu̱n xi najmi tíbenkjún xi tje̱n títjuhu̱n. Nkꞌie nga chasehe̱ ra̱á, bꞌa̱ joyaha tsa kichjꞌajnu kaha̱.
\v 6 A̱tꞌaha̱ tsa nku ta̱chju̱ún najmi kꞌu̱éꞌma nintaku̱, tu̱ sahá katate ntsja̱ha̱. Ko̱ tsa subaha̱ nga ku̱a̱te ntsja̱ha̱ ko̱ a ra̱ nga kjꞌu̱ájnu kaha̱ yjoho̱, tu̱ sahá katꞌéꞌma nintaku̱ ma.
\p
\v 7 Xi tíꞌmi nda̱xꞌi̱n najmi tjíhin nga kꞌu̱éꞌma nintaku̱. A̱tꞌaha̱ xi nkú tsꞌín tjíyaha Nti̱a̱ná, bꞌa̱ tsꞌín kitsꞌínndaha̱ Nti̱a̱ná nda̱xꞌi̱n xi tjuu̱n, ko̱ kui ndo̱ bakúchji kju̱a̱chánkaha̱ Nti̱a̱ná. Tu̱nga xi tíꞌmi ta̱chju̱ún, kui xi bakúchji kju̱a̱chánkaha̱ xi tíꞌmi xꞌi̱n.
\v 8 A̱tꞌaha̱ nda̱xꞌi̱n xi tjuu̱n najmi yjonintehe̱ ta̱chjúu̱n nibaha̱ ra̱. Ta̱chju̱ún xi tjuu̱n ní xi nibaha̱ ra̱ yjonintehe̱ nda̱xꞌi̱u̱n.
\v 9 Najmi ngandaha̱ ta̱chjúu̱n kinꞌendaha nda̱xꞌi̱u̱n. Ngandaha̱ ní nda̱xꞌi̱u̱n kinꞌendaha ta̱chjúu̱n.
\v 10 Kui kju̱a̱ha tjíhin nga kꞌu̱éꞌmaha nintaku̱ xi tíꞌmi ta̱chju̱ún, tu̱ xi sku̱e̱nkjúhun xi batéxumaha̱ ko̱ sku̱e̱nkjúhun ntítsjee̱.
\p
\v 11 Tu̱nga a̱jinná xi sꞌejinná Nda̱ Nti̱a̱ná, tjín xi chju̱úu̱n a̱tꞌaha̱ ta̱ tjín xi xꞌi̱n, ko̱ tjín xi xꞌi̱n a̱tꞌaha̱ ta̱ tjín xi chju̱úu̱n.
\v 12 A̱tꞌaha̱ xi nkú tsꞌín yjonintehe̱ nda̱xꞌi̱u̱n nibaha̱ ra̱ ta̱chju̱ún xi tjuu̱n, bꞌa̱ ta̱ tsꞌín ndꞌa̱i̱ xi tíꞌmi ta̱chju̱ún tsihi̱n xi xꞌi̱n tíꞌmi. A̱tꞌaha̱ ngatentee̱ ni xi tjín nginku̱n Nti̱a̱ná nibáha̱ ra̱.
\p
\v 13 Nꞌe̱nkjíntakꞌun sisiun ni xuꞌbi̱. ¿A nda tjín nga nku ta̱chju̱ún najmi kꞌu̱éꞌma nintaku̱ nkꞌie nga ku̱i̱nchja̱ko̱ Nti̱a̱ná?
\v 14 Xi nkú tsꞌín yaha̱, tsa nku nda̱ tsꞌi̱ínndju ntsja̱ha̱, ta̱ kui ta̱ maha títsjáha̱ kju̱a̱suba yjoho̱.
\v 15 Tu̱nga tsjohó tjíhi̱n nku ta̱chju̱ún tsa tsꞌi̱ínndju ntsja̱ha̱. A̱tꞌaha̱ kui xi kikꞌa̱i̱hi̱ nga ndju ka̱ma ntsja̱ha̱ tu̱ xi kꞌu̱éꞌmako̱ho nintaku̱.
\p
\v 16 Tu̱nga tsa tjín xi mjehe̱ kꞌu̱ésiyáha ni xuꞌbi̱, najmi bꞌa̱ tsꞌín nkani̱ ko̱ ta̱ ndaha najmi bꞌa̱ tsꞌín nkaha̱ xu̱ta̱ ni̱nku̱hu̱ Nti̱a̱ná.
\s Bꞌi̱ tsꞌín tsakúya Pablo̱ xi nkú tsꞌín tjíhin nga nꞌekjꞌáítsjen ngabayaha̱ Nda̱ Nti̱a̱ná nkꞌie nga ka̱ma ñjakú xu̱ta̱ ni̱nku̱
\p
\v 17 Najmi tínchjako̱ tsjo tsjonu̱u ni xi xínnu̱u ndꞌa̱i̱, a̱tꞌaha̱ najmi ngandanu̱u ma ñjakúko̱honu xinki̱u. Nꞌeꞌun níhi̱ xinki̱u nga ma ñjakú.
\v 18 Kui ni xuꞌbi̱ xi tjun xínnu̱u. Tíꞌmiyana nga bꞌi̱ ngjáhán chꞌachꞌanú xinki̱u nga nꞌesje tꞌaxíún yjonu̱u nkꞌie nga ma ñjakú ni̱nku̱. Ko̱ santaha tísꞌejinna ni xi tíꞌmina,
\v 19 a̱tꞌaha̱ tjíhín ni nga chꞌa̱chꞌa̱nú xinki̱u nga nꞌe̱sje tꞌaxíún yjonu̱u tu̱ xi cha̱ha yá xi ndjá síjña nginku̱n Nti̱a̱ná.
\p
\v 20 Nkꞌie nga ma ñjakúko̱o xinki̱u, najmi nꞌo xi nkú tsꞌín tsakúyaná Nda̱ Nti̱a̱ná nga kikjineko̱ sa já niꞌyakuyáha̱.
\v 21 A̱tꞌaha̱ nkꞌie nga chino, bꞌi̱ ngján nkúnkú fakjꞌá ni xi tsꞌe̱. Tjín xi najmi sakúhu̱ nichinee̱ ko̱ tjín ngá xi ma chꞌi̱.
\v 22 ¿A ra̱ najmi tjíhínnu̱u niꞌya má nga ka̱ma chi̱no̱o ko̱ sꞌi̱u? ¿Á tu̱ ni xi najmi chumi ni chjíhi̱ ra̱ tínꞌeko̱honu xu̱ta̱ ni̱nku̱hu̱ Nti̱a̱ná ko̱ tíꞌba̱i̱hi̱ ru̱u kju̱a̱suba xu̱ta̱ xi najmi chumi ni xi tjíhi̱n ra̱? ¿Nkú xínnu̱u? ¿“Nda tínꞌo”, a xínnu̱u? Nkꞌie nga bꞌi̱ tínꞌo, najmi tjín xi nkú tsꞌín “Nda tínꞌo” xíhi̱nnu̱u.
\p
\v 23 Ta̱ kui ma maha én xi kitsjána Nda̱ Nti̱a̱ná, ta̱ kui ma maha én xi tsakuyánu̱u. Bꞌi̱ kixinnu̱u: Ta̱ kuihi ni̱stje̱n nga kinꞌekjasꞌen Nda̱ Nti̱a̱ná Jesu, jakjꞌá ni̱nku̱a̱n.
\v 24 Nkꞌie nga ja kamaha̱ nga kitsjáha̱ mábꞌa̱chjíhi̱ Nti̱a̱ná, tsakjánya ni̱nku̱o̱n ko̱ bꞌi̱ kitsú: “Kui xuꞌbi̱ xi yjonintena̱ xi nꞌe̱kjasꞌen ngandanu̱u. Bꞌi̱ ta̱ nꞌo̱o tu̱ xi kjꞌu̱a̱ítsjehe̱nnu̱u an.”
\p
\v 25 Bꞌa̱ ta̱ tsꞌín jakjꞌá chu̱tsíu̱n nkꞌie nga ja kamaha̱ nga kikjine nichinee̱. Bꞌi̱ kitsú: “Kui chu̱tsíi̱n tíbakúchji jnína̱ xi ja tíbꞌéndako̱ tse̱tse̱he Nti̱a̱ná ndꞌa̱i̱ xi nkú tsꞌín nda tsꞌi̱ínko̱ xu̱ta̱. Bꞌi̱ ta̱ nꞌo̱o tu̱ xi kjꞌu̱a̱ítsjehe̱nnu̱u an xki̱ xki̱ nga sꞌi̱u.”
\v 26 Kui bꞌa̱ maha, xki̱ nga chi̱no̱o ni̱nku̱o̱n ko̱ sꞌi̱yo chu̱tsíu̱n, bꞌaha̱ ra̱ nga kikꞌatutsꞌi̱hi̱n kui nii̱ santa nkúhu nga kjꞌu̱a̱í ngáha Nda̱ Nti̱a̱ná, tíbixínyo nga kꞌien.
\p
\v 27 Kui nga tu̱ yáhá ni xi najmi sku̱e̱nkjúhun nga kji̱ne̱ ni̱nku̱o̱n ko̱ nga kꞌúíya chu̱tsíu̱n nga tsꞌi̱ín xi nkú kitsú Nda̱ Nti̱a̱ná, kui xi títsjehe̱n jé nga najmi tíbenkjún yjonintehe̱ ko̱ jníhi̱ Nda̱ Nti̱a̱ná.
\v 28 Kui bꞌa̱ maha, kintehe̱ ni nga xu̱ta̱ kji̱ne̱ ni̱nku̱o̱n ko̱ nga kꞌúíya chu̱tsíu̱n, tjíhin ni nga katasejin sisin ani̱ma̱ha̱.
\v 29 A̱tꞌaha̱ tsa tjín xi chu̱ba̱ kji̱ne̱hé ko̱ chu̱ba̱ kꞌúíhí nga najmi tsꞌi̱ínkie yjoho̱ nga yjonintehe̱ Nda̱ Nti̱a̱ná niu̱, kui xi nꞌe̱nijéhe̱ ra̱ a̱tꞌaha̱ chu̱ba̱ tíkjinehé ko̱ tíꞌbi niu̱.
\p
\v 30 Kui kju̱a̱ha nga tjíhin a̱jinnu̱u nkjin xi kjintuꞌun ko̱ xkꞌíén ko̱ kꞌu̱a̱ xi ja kꞌien.
\v 31 Tu̱nga tsa cha̱se̱jin sisihi̱ín ani̱ma̱ná, Nti̱a̱ná najmi tsꞌi̱ínkꞌanjiná jé.
\v 32 Nkꞌie nga base Nda̱nti̱aná tsa nda ko̱ tsa najmi nda ni xi nꞌeé, yo̱ títsjáni̱yáná tu̱ xi najmi nꞌe̱nijéhená ni̱stjin nga nꞌe̱nijéhe̱ xu̱ta̱ xi tjín a̱sunntee̱.
\p
\v 33 Kui bꞌa̱ maha, já ntsꞌena̱, nkꞌie nga ka̱ma ñjakú nga chi̱no̱o nichinee̱, bꞌi̱ ngján chúyoho̱o xinki̱u.
\v 34 Tsa tjín xi tíma bjoho̱, niꞌyaha̱ kakjine. Bꞌa̱ katsꞌín tu̱ xi najmi tsꞌi̱ínkꞌa ni̱yáha̱ ra̱ Nti̱a̱ná nga̱tꞌaha̱ ni xi títsꞌín nkꞌie nga tíma ñjakúko̱o xinki̱u.
\p Ni xi tjín sa a̱jinnu̱u, nkꞌie nga kfínsenu̱u kꞌuendá.
\c 12
\s Bꞌi̱ tsꞌín tsakúya Pablo̱ nkꞌie nga kjꞌa̱í kjꞌa̱í kju̱a̱nda tsjáha̱ Espiri̱tu̱hu̱ Nti̱a̱ná xu̱ta̱ ni̱nku̱
\p
\v 1 Jun já ntsꞌe, mjena nga cho̱o nga nkjin tíkjá kju̱a̱nda xi tsjáha̱ Espiri̱tu̱hu̱ Nti̱a̱ná xu̱ta̱ ni̱nku̱.
\p
\v 2 Yo xi nkú nꞌe tintsu̱bo̱o nkꞌie, nga najmi kje̱e sꞌejinnu̱u Nti̱a̱ná. Xi nkúhu tsa kichjuꞌyúnnu̱u nga kitsjennkíhu̱u nti̱a̱ xi najmi maha̱ nchja̱, xi ntsja xu̱ta̱ tsꞌínndaha.
\v 3 Kui bꞌa̱ maha, tíxinyaha̱nu̱u nga ndaha nku xu̱ta̱ xi Espiri̱tu̱hu̱ Nti̱a̱ná títsꞌínkinchja̱ha̱ najmi ma bꞌa̱ tsu: “¡Najmi nda Jesu!” Ko̱ ta̱ ndaha nku najmi ma: “¡Jesu xi Nda̱ Nti̱a̱ná!” tsu, tsa najmi tíjñajihi̱n Espiri̱tu̱hu̱ Nti̱a̱ná.
\p
\v 4 Kjꞌa̱í kjꞌa̱í kju̱a̱nda xi ꞌba̱i̱hi̱ xu̱ta̱, tu̱nga nkuhú maha Espiri̱tu̱hu̱ Nti̱a̱ná xi tsjáha̱.
\v 5 Kjꞌa̱í kjꞌa̱í xá xi maha̱ tsꞌín xu̱ta̱, tu̱nga nkuhú maha Nda̱ Nti̱a̱ná xi tsjá xáha̱.
\v 6 Kjꞌa̱í kjꞌa̱í ni xi maha̱ i̱ncha tsꞌín, tu̱nga nkuhú Nti̱a̱ná xi tsꞌín ngayjee̱ niu̱ nga tsꞌínxájinyjehe̱ xu̱ta̱ ni̱nku̱.
\p
\v 7 Nga nkúnkú kikꞌa̱i̱hi̱ nga Espiri̱tu̱hu̱ Nti̱a̱ná ku̱a̱kúchji yjoho̱ ngandaha̱ ngayjee̱ xu̱ta̱ ni̱nku̱.
\v 8 Tjín xi Espiri̱tu̱ tsjáha̱ nga ku̱i̱tsu̱yaha̱ xu̱ta̱ én xi na̱nka̱, ko̱ ta̱ tjín xi ta̱ kuihi Espiri̱tu̱ tsjáha̱ nga ku̱i̱tsu̱yaha̱ xu̱ta̱ ni xi ka̱mankjihi̱n.
\v 9 Tjín xi ta̱ kuihi Espiri̱tu̱ tsjáha̱ nga ꞌyún sꞌejihi̱n Nti̱a̱ná, ko̱ tjín ngá xi tsꞌi̱ínnkihi̱ xu̱ta̱. Ta̱ kuihi Espiri̱tu̱ xi tsjáha̱ nga bꞌa̱ tsꞌi̱ín.
\p
\v 10 Tjín xi maha̱ tsꞌín kju̱a̱nkjún, ko̱ tjín ngá xi Nti̱a̱ná tsjáha̱ éhe̱n, a̱sꞌa̱i tsꞌínkjasꞌen niu̱. Tjín xi mankjihi̱n tsa kju̱axi̱ nga Espiri̱tu̱hu̱ Nti̱a̱ná tíjñajihi̱n xu̱ta̱. Tjín xi nchja̱ kjꞌa̱í én xi tsjáha̱ Espiri̱tu̱, ko̱ tjín ngá xi tsꞌínkꞌatiya én xi tsjá Espiri̱tu̱.
\v 11 Nkuhú Espiri̱tu̱hu̱ Nti̱a̱ná xi tsꞌín ngayjee̱ ni xuꞌbi̱. Xi nkú tsꞌín mjehe̱ tsjá nii̱, bꞌa̱ tsꞌín tsjáha̱ nga nkúnkú xu̱ta̱ ni̱nku̱.
\s Bꞌi̱ tsꞌín tsakúya Pablo̱ nkꞌie nga nkuhú kichꞌaá xinki̱á ñá xi xu̱ta̱ ni̱nku̱
\p
\v 12 Xi nkúhu yjonintená, nkuhú maha tu̱nga nkjihín ni xi tjíhi̱n nga tjíxanya. Ko̱ ngayjee̱ ni xi tjíhi̱n, ndaha tsa nkjin maha tu̱nga nkuhú yjoninte bichú ma. Bꞌa̱ ta̱ tjín nga̱tꞌa tsꞌe̱ Cristo̱.
\v 13 A̱tꞌaha̱ nkuhú Espiri̱tu̱hu̱ Nti̱a̱ná kisaténtáhaná ngatenteé ko̱ ngayjeé kikꞌa̱i̱ná nga kiꞌyaá ta̱ kuihi Espiri̱tu̱hu̱ Nti̱a̱ná. Bꞌa̱ tsꞌín nkuhú yjoninte tsichu mahaná, ndaha tsa xu̱ta̱ xi ntje̱ judio̱ tje̱he̱n ra̱ ko̱ ta̱ ndaha tsa xi najmi ntje̱ judio̱ tje̱he̱n ra̱, ndaha tsa xu̱ta̱ musu̱ xi kichꞌatse ko̱ ta̱ ndaha tsa xi nda̱í yjoho̱.
\p
\v 14 Nku yjoninte najmi nku ndju̱ú maha. Nkjin ní ni xi yꞌaha̱ ra̱ nku yjoninte.
\v 15 Tsa bꞌa̱ ku̱i̱tsu̱ nku tsu̱kaá: “Najmi yjonintee̱ yꞌahana a̱tꞌaha̱ najmi ntsa̱ ꞌmina”, tsa bꞌa̱ ku̱i̱tsu̱, ¿a kui kju̱a̱ha nga najmi ta̱ yjonintee̱ yꞌaha̱ ra̱?
\v 16 Ko̱ tsa nku tja̱ba̱xínñjaá bꞌa̱ ku̱i̱tsu̱: “Najmi yjonintee̱ yꞌahana a̱tꞌaha̱ najmi tunku̱n ꞌmina”, tsa bꞌa̱ ku̱i̱tsu̱, ¿a kui kju̱a̱ha nga najmi yjonintee̱ yꞌaha̱ ra̱?
\p
\v 17 Tsa tu̱ subahá tunku̱n ka̱ma yjonintee̱, ¿nkú tsꞌín ku̱i̱núꞌyáhaná? Ko̱ tsa tu̱ subahá tja̱ba̱xínñju ka̱ma yjonintená, ¿nkú tsꞌín kjꞌu̱ántahaná?
\v 18 Xi nkú tsꞌín kisasíhi̱n Nti̱a̱ná, bꞌa̱ tsꞌín yꞌéntu nga nkúnkú ni xi tjíhi̱n yjonintená.
\v 19 A̱tꞌaha̱ tsa nkuhú ni xi tíjña, najmi ta̱ yjonintehe ma.
\v 20 Kui nga ndaha tsa nkjin maha ni xi yꞌaha̱ ra̱ yjonintee̱, tu̱nga nkuhú maha yjonintee̱.
\p
\v 21 “Najmi machjénna ji”, najmi tsuhu̱ tunkaán ntsa̱á. Ta̱ ndaha: “Najmi machjénna jun”, najmi tsuhu̱ nintakaá tsu̱kaá.
\v 22 Tu̱ sa ní má najmi ꞌyún machjénná yjonintená bixíhaán, tu̱ sa ní kui xi ꞌyún machjén sa.
\v 23 Ko̱ xi bꞌa̱ maná nga kinte tje̱n, kui xi tu̱ sahá tsjo nꞌekꞌíé saá. Ko̱ má najmi mjená nga ka̱ma chji, kui xi bꞌeꞌmaá,
\v 24 a̱tꞌaha̱ najmi machjéhe̱n nga kꞌúéꞌmaá yjonintená má nga ma chji bixíaán. Bꞌa̱ kitsꞌínkꞌíé Nti̱a̱ná yjonintená nga ꞌyún nꞌe̱chjí saá xi bꞌa̱ maná nga kinte tje̱n.
\p
\v 25 Bꞌa̱ kitsꞌín Nti̱a̱ná tu̱ xi najmi ka̱ma ngabihi̱ ra̱ xinkjín yjonintená ko̱ tu̱ xi bꞌi̱ ngján kúhu̱n ra̱ xinkjín.
\v 26 Nga ngayjee̱ ni xi yꞌaha̱ ra̱ yjonintená, tsa tjín xi un tíbehe̱, ta̱ un sku̱e̱he̱ xi kꞌoo̱. Ko̱ tsa ꞌyún tíchun saha̱á nku, ngayjee̱ xi kꞌoo̱ ta̱ tsjo i̱ncha ka̱maha̱.
\p
\v 27 Jun xi yjonintehe̱ Cristo̱. Nga nkúnkú jun, jun xi yjonintee̱.
\v 28 Nti̱a̱ná kitsjá nga sꞌe̱ a̱jihi̱n xu̱ta̱ ni̱nku̱ tjun já postru̱, xi ma joho já profeta̱ xi tsuya én xi Nti̱a̱ná tsjáha̱, xi ma jahan já maestru̱, ko̱ a̱skahan xi maha̱ tsꞌín kju̱a̱nkjún, ko̱ xi maha̱ tsꞌínnkihi̱ xu̱ta̱, ko̱ xi be nkú tsꞌín ku̱a̱si̱nko̱ xu̱ta̱, ko̱ xi tsjen títjun, ko̱ xi nchja̱ kjꞌa̱í én xi Espiri̱tu̱hu̱ Nti̱a̱ná tsjáha̱.
\p
\v 29 ¿A ngatentee̱hé xu̱ta̱ ni̱nku̱ xi já postru̱? ¿A ngatentee̱hé xi já profeta̱? ¿A ngatentee̱hé xi já maestru̱? ¿A ngatentee̱hé xi maha̱ tsꞌín kju̱a̱nkjún?
\v 30 ¿A ngatentee̱hé xi kikꞌa̱i̱hi̱ nga ka̱maha̱ tsꞌi̱ínnkihi̱ xu̱ta̱? ¿A ngatentee̱hé xi kikꞌa̱i̱hi̱ nga nchja̱ kjꞌa̱í én xi tsjáha̱ Espiri̱tu̱hu̱ Nti̱a̱ná? ¿A ngatentee̱hé xi maha̱ tsꞌínkꞌatiya nkú tsuhu̱ ra̱ kjꞌa̱í én xi Nti̱a̱ná tsjáha̱ xu̱ta̱?
\p
\v 31 Kui bꞌa̱ maha, a̱jihi̱n ngayjee̱ kju̱a̱nda xi tsjá Espiri̱tu̱hu̱ Nti̱a̱ná, nꞌe̱ mjo xi kjennu̱u ni̱yá. Tu̱nga xínyahánu̱u nku xi ꞌyún kjennu̱u ni̱yá.
\c 13
\s Bꞌi̱ tsꞌín tsakúya Pablo̱ nkꞌie nga kju̱a̱tjoo̱ xi ꞌyún chjí saha̱
\p
\v 1 Tsa mayjena én xi tjín ko̱ én xi nchja̱ ntítsjee̱ tu̱nga tsa najmi tjíhínna kju̱a̱tjo, xi nkú joyaha nku ni xi tu̱ tífanehé bichú ma ko̱ a ra̱ nku ki̱cha̱ xi tífanetꞌáha̱ son xi chꞌon tsꞌín nuꞌyá nga tínꞌekjane.
\v 2 Tsa tsꞌinkjasꞌen én xi tsjána Nti̱a̱ná, tsa mankjinna ngayjee̱ ni xi yꞌéjña ꞌma Nti̱a̱ná, tsa be tu̱ mí nihí ni, ko̱ tsa ꞌyún sꞌejinna Nti̱a̱ná nga santaha ka̱ma tsꞌinkjí tꞌaxíán na̱xi̱, tu̱nga tsa najmi tjíhínna kju̱a̱tjo, najmi chumi ni chjíhi̱ ra̱ an.
\v 3 Tsa tsjaha̱ xu̱ta̱ xꞌa̱n ngayjee̱ ni xi tjínna ko̱ tsa tsꞌinkjasꞌen yjona̱ tu̱ xi ku̱i̱ti̱hi ngandaha̱ xu̱ta̱ xi kjꞌa̱í, tu̱nga tsa najmi tjíhínna kju̱a̱tjo, tu̱ kju̱a̱ndahá bꞌa̱ tsꞌian.
\p
\v 4 Xi tjíhi̱n kju̱a̱tjo, kui xi ta̱ tjíhi̱n kju̱a̱tsenta ko̱ nda ani̱ma̱ha̱. Xi tjíhi̱n kju̱a̱tjo najmi xintakꞌun, najmi nchja̱ én ngakꞌun, najmi nkꞌa bꞌasje yjoho̱,
\v 5 najmi tsꞌín ni xi najmi sasíhi̱n xu̱ta̱ xingisoo̱, najmi tu̱ ni xi tsꞌe̱ subahá bangisjai, najmi ki̱tsa̱ ma kjaha̱n, najmi bꞌéjin takꞌun ni xi najmi nda kinꞌehe̱,
\v 6 najmi tsjo maha̱ ni chꞌonkꞌun xi tsꞌín xu̱ta̱. Tsjo ní maha̱ ni xi na̱xu̱ tsꞌín xu̱ta̱.
\v 7 Xi tjíhi̱n kju̱a̱tjo tsꞌínꞌyún takꞌunyje ni xi fꞌajin, sꞌejihi̱n ngayjee̱ ni xi tsꞌe̱ Nti̱a̱ná, ma ꞌyún kꞌun tehe̱nte Nti̱a̱ná, ko̱ tsꞌín chúkju̱a̱yje ni xi matꞌain.
\p
\v 8 Najmi ka̱maha̱ kfe̱ya kju̱a̱tjoo̱. Ku̱i̱chú ni̱stjin nga najmi ta̱ tsꞌi̱ínkjasꞌehen já profeta̱ éhe̱n Nti̱a̱ná, ko̱ nga najmi ta̱ tsjáha Nti̱a̱ná nga ku̱i̱nchja̱ xu̱ta̱ kjꞌa̱í kjꞌa̱í én, ko̱ nga najmi ta̱ ka̱machjéhen nga cha̱ xi nkú tsꞌín yaá ndꞌa̱i̱.
\v 9 A̱tꞌaha̱ tu̱ i̱chíhí yaá ndꞌa̱i̱ ko̱ tu̱ i̱chíhí ni xi tsuyaná já profeta̱ ndꞌa̱i̱,
\v 10 tu̱nga nkꞌie nga ku̱i̱tjusun ni xi tjíhin nga ka̱ma, nkꞌiehé kfe̱tꞌa ni xi tu̱ i̱chíhí yaá ndꞌa̱i̱.
\p
\v 11 Nkꞌie nga ndyjana, kinchja xi nkú tsꞌín nchja̱ jántí xi̱, kitsꞌinnkjíhi̱n kꞌan xi nkú tsꞌín tsꞌínnkjinkꞌun jántí xi̱, ko̱ kamankjinna xi nkú tsꞌín mankjihi̱n jántí xi̱. Tu̱nga nkꞌie nga ja kama chá, yꞌejñá tꞌaxíán ni xi tsꞌín jántí xi̱.
\v 12 A̱tꞌaha̱ ndꞌa̱i̱ tu̱ tíya xa̱náá ni xi tsꞌe̱ Nti̱a̱ná xi nkú joyaha tsa nku chu̱tsín tíchaseyaá nga najmi nda tsꞌín tíyaá, tu̱nga ku̱i̱chúhú ni̱stjin nga cha̱ sisián Nti̱a̱ná. Ndꞌa̱i̱ chuba be, tu̱nga ku̱i̱chúhú ni̱stjin nga skue sisian. Bꞌa̱ tsꞌín skue xi nkú tsꞌín bena.
\p
\v 13 Najmi maha̱ feya nga tísꞌejinná Nti̱a̱ná ko̱ nga tíma ꞌyún kꞌaán ko̱ nga tjínná kju̱a̱tjo. Tu̱nga kju̱a̱tjoo̱hó xi ꞌyún chjíhi̱ ra̱ nga nga jaa̱n nii̱.
\c 14
\s Bꞌi̱ tsꞌín tsakúya Pablo̱ xá xi tjíhi̱n nga kjꞌa̱í kjꞌa̱í én nchja̱ xu̱ta̱
\p
\v 1 Nꞌe̱ mjo kju̱a̱tjoo̱ ko̱ ta̱ nꞌe̱ mjo nkjin tíkjá kju̱a̱nda xi tsjá Espiri̱tu̱hu̱ Nti̱a̱ná. Tu̱nga a̱jihi̱n kui niu̱, ꞌyún nꞌe̱ mjo nga Nti̱a̱ná tsjánu̱u éhe̱n ko̱ nga nꞌe̱kjasꞌon.
\v 2 A̱tꞌaha̱ xi tsjáha̱ Espiri̱tu̱hu̱ Nti̱a̱ná nga kjꞌa̱í én ku̱i̱nchja̱, kui xi Nti̱a̱ná nchja̱ko̱, najmi xu̱ta̱. Nkuhú Espiri̱tu̱ be ni xi nchja̱. Najmi tíjña chji niu̱. Najmi chꞌa be nkú tsuhu̱ ra̱.
\v 3 Tu̱nga xi Nti̱a̱ná tsjáha̱ éhe̱n ko̱ nga tsꞌi̱ínkjasꞌen, kui xi xu̱ta̱ nchja̱ko̱ tu̱ xi kjésíntje̱hen, ku̱a̱si̱nko̱ ko̱ tsjá ngaꞌyúhu̱n.
\p
\v 4 Xi kikꞌa̱i̱hi̱ nga nchja̱ kjꞌa̱í én xi najmi chꞌa mankjihi̱n, ta̱ kuihi tsjá ngaꞌyún subaha̱ yjoho̱. Tu̱nga xi kikꞌa̱i̱hi̱ nga Nti̱a̱ná tsjáha̱ éhe̱n ko̱ nga tsꞌi̱ínkjasꞌen, kui xi kjesíntje̱n xu̱ta̱ ni̱nku̱.
\v 5 Mjena kai tsa ngatentoo̱ kꞌu̱a̱i̱nu̱u nga chu̱bo én xi kjꞌa̱í xi tsjá Espiri̱tu̱, tu̱nga ꞌyúhún mje sana tsa kꞌu̱a̱i̱nu̱u nga tsjánu̱u Nti̱a̱ná éhe̱n ko̱ nga nꞌe̱kjasꞌon. A̱tꞌaha̱ ꞌyún chjí saha̱ ra̱ xi tsꞌínkjasꞌen én xi Nti̱a̱ná tsjáha̱ nga xi nchja̱ én xi kjꞌa̱í xi najmi chꞌa mankjihi̱n. Tu̱nga ndahá tjín tsa tjín xi tsꞌi̱ínkꞌatiya én xi kjꞌa̱í xi tsjáha̱ Espiri̱tu̱, tu̱ xi bꞌa̱ tsꞌín ku̱i̱síntje̱hen xu̱ta̱ ni̱nku̱.
\p
\v 6 Kui bꞌa̱ maha, já ntsꞌe, tsa kfínsenu̱u ko̱ kuinchjako̱nu̱u kjꞌa̱í én xi tsjána Espiri̱tu̱ xi najmi chꞌa mankjihi̱n, ¿mí nihi xi sa̱kúnu̱u tsa bꞌa̱ tsꞌian? ¿A najmi tu̱ sahá nda tjín nga xínyanu̱u ni xi bꞌéjña chjina Nti̱a̱ná, ko̱ a ra̱ ni xi tsꞌe̱ Nti̱a̱ná xi mankjinna, ko̱ a ra̱ tsꞌinkjasꞌennu̱u nku én xi kitsjána Nti̱a̱ná, ko̱ a ra̱ tjín ni xi kuakuyánu̱u?
\p
\v 7 Santaha ni xi fane xi nkúhu yána̱xu̱ ko̱ a ra̱ arpa̱, tsa najmi kjꞌa̱í kjꞌa̱í tsꞌín fane, ¿nkú tsꞌín cha̱ha suu̱n xi tínꞌekjaneko̱ho yána̱xu̱ ko̱ a ra̱ arpa̱?
\v 8 Ko̱ tsa najmi kju̱a̱ne̱ sisin tjio xi nchja̱ha̱ já juu̱n nga kján, ¿yá xi kꞌu̱énda yjoho̱ nga ngju̱a̱i̱ kján?
\v 9 Bꞌa̱ ma a̱jinnu̱u. Tsa chu̱bo kjꞌa̱í én xi najmi chꞌa mankjihi̱n, ¿nkú tsꞌín ka̱mankjihi̱n ra̱ xu̱ta̱ ni xi chu̱bo? Bꞌa̱ joya xi nkúhu tsa tíchubajihi̱nsón.
\p
\v 10 Nkjin maha én xi tjín a̱sunntee̱ ko̱ nkúnkú tjíhi̱n sin.
\v 11 Tu̱nga tsa najmi tímankjinna nkú tsuhu̱ ra̱ én xi tínchja̱ko̱na nku nda̱, nku nda̱ xi najmi yo̱ nankihi̱ ka̱maha̱ an ndo̱ ko̱ an nku nda̱ xi xin nankihi̱ ka̱mana ndo̱.
\v 12 Bꞌa̱ ta̱ tíma a̱jinnu̱u. Mjenu̱u nga sꞌe̱nu̱u nkjin tíkjá kju̱a̱nda xi tsjá Espiri̱tu̱hu̱ Nti̱a̱ná. ꞌYún ní nꞌe̱ mjo nga nkjin katuma kju̱a̱nda xi kjénsíntje̱n xu̱ta̱ ni̱nku̱.
\p
\v 13 Kui bꞌa̱ maha, xi nchja̱ha kjꞌa̱í én xi tsjáha̱ Espiri̱tu̱, katankihi̱ Nti̱a̱ná tu̱ xi ka̱maha̱ ra̱ tsꞌínkꞌatiya én xi ku̱i̱nchja̱.
\v 14 A̱tꞌaha̱ tsa nkꞌie nga kuinchjaka̱ Nti̱a̱ná, kuinchja kjꞌa̱í én xi tsjána Espiri̱tu̱, najmi tsꞌinchjén kju̱a̱nkjinkꞌunna̱. Tu̱ ani̱ma̱na̱ tínchja̱ko̱hó Nti̱a̱ná.
\v 15 Kui nga, ¿mí ni xi tsꞌian ni̱ ma? Ani̱ma̱na̱ kuinchjako̱hona Nti̱a̱ná, tu̱nga ta̱ tsꞌinchjénná kju̱a̱nkjintakꞌunna̱. Ani̱ma̱na̱ séko̱hona, tu̱nga ta̱ tsꞌinchjénná kju̱a̱nkjintakꞌunna̱.
\v 16 A̱tꞌaha̱ tsa tu̱ ani̱ma̱hi̱ ní tínꞌetsjoko̱ho̱ ri̱ Nti̱a̱ná ko̱ a̱sꞌa̱i tíbasínñjuhi nku xi najmi be ni xi tínꞌei, ¿nkú tsꞌín nkuhú tsꞌi̱ín mako̱ho ri yjoho̱ nga tsꞌi̱íntsjoho̱ Nti̱a̱ná nkꞌie nga najmi tímankjihi̱n ni xi tíchubai?
\v 17 A̱tꞌaha̱ kju̱axi̱ nga nda tsꞌín tínꞌetsjoihi̱ Nti̱a̱ná nga bꞌa̱ tínꞌei, tu̱nga najmi tíchjusíntje̱nní nda̱ xinkuu̱.
\p
\v 18 Tsjaha̱ mábꞌa̱chjíhi̱ Nti̱a̱ná nga ꞌyún nchja sa kjꞌa̱í én xi tsjána Espiri̱tu̱ nga jun.
\v 19 Tu̱nga nkꞌie nga ma ñjakúka̱ xu̱ta̱ ni̱nku̱, tu̱ sahá mjena kuinchja tsa tu̱ un tsu̱ꞌba én xi ku̱i̱tjujin kju̱a̱nkjintakꞌunna̱ nga te mii̱ tsu̱ꞌba én xi najmi chꞌa ka̱mankjihi̱n. A̱tꞌaha̱ én xi bitjujin kju̱a̱nkjintakꞌunna̱, kui xi tsjáni̱yáha̱ xu̱ta̱ xingisoo̱.
\p
\v 20 Jun já ntsꞌe, najmi bꞌa̱ tu̱ tsꞌín nꞌenkjíntakꞌun xi nkú tsꞌín tsꞌínnkjinkꞌun jántí xi̱. Xi nkú ní tsꞌín je tjíyaha̱ ntí xi̱, bꞌa̱ ní tsꞌín je kasꞌeyanu̱u, tu̱nga nꞌe̱nkjíntakꞌunnú xi nkú tsꞌín tsꞌínnkjinkꞌun xu̱ta̱ xi chá.
\v 21 Bꞌi̱ tsꞌín tjítꞌa xu̱ju̱n kju̱a̱téxumoo̱:
\q Kjꞌa̱í én ko̱ kjꞌa̱í xu̱ta̱ xi xin nankihi
\q tsꞌinchjén nga kuinchjaka̱ xu̱ta̱ xuꞌbi̱.
\q Tu̱nga ndaha tsa bꞌa̱ tsꞌian,
\q najmi ku̱a̱sínñjuna, kitsú Nti̱a̱ná.
\p
\v 22 Kui bꞌa̱ maha, kjꞌa̱í én xi tsjá Espiri̱tu̱ nga nchja̱ xu̱ta̱, kui xi bakúchji ngaꞌyúhu̱n Nti̱a̱ná ngandaha̱ xu̱ta̱ xi najmi sꞌejihi̱n Nti̱a̱ná, najmi ngandaha̱ xi ja sꞌejihi̱n. Tu̱nga én xi tsjá Nti̱a̱ná nga nꞌe̱kjasꞌehe̱n xu̱ta̱, kui xi ꞌba̱i̱ ngandaha̱ xu̱ta̱ xi ja sꞌejihi̱n, najmi ngandaha̱ xi najmi sꞌejihi̱n.
\p
\v 23 Tsa tíma ñjakú xu̱ta̱ ni̱nku̱ ko̱ tsa ngayjee̱ ku̱i̱nchja̱ kjꞌa̱í kjꞌa̱í én xi tsjáha̱ Espiri̱tu̱, ko̱ tsa a̱sꞌa̱i kju̱a̱sꞌen yo̱ xu̱ta̱ xi najmi be ni xi tínꞌo ko̱ tsa xu̱ta̱ xi najmi sꞌejihi̱n Nti̱a̱ná, ¿a najmi bꞌa̱há ku̱i̱tsu̱ nga luku̱u?
\v 24 Tu̱nga tsa ngatentoo̱ tínꞌekjasꞌon én xi títsjánu̱u Nti̱a̱ná, tsa a̱sꞌa̱i kju̱a̱sꞌen yo̱ xi najmi sꞌejihi̱n ko̱ tsa xi najmi be ni xi tínꞌo, nkꞌie nga ku̱i̱ntꞌé ni xi tíchubo, bꞌa̱ ku̱i̱tsu̱ ani̱ma̱ha̱ nga tjíhi̱n ngatitsun ko̱ nga nꞌenijéhe̱ ra̱ ni xi tje̱he̱n.
\v 25 Sꞌe̱jña chji ni xi tjíntuꞌmá ani̱ma̱ha̱ ko̱ ku̱a̱si̱nkúnchꞌin nga tsꞌi̱íntsjoho̱ Nti̱a̱ná ko̱ bꞌa̱ ku̱i̱tsu̱ nga kju̱axi̱ nga Nti̱a̱ná tíjñajinnu̱u.
\s Bꞌi̱ tsꞌín tsakúya Pablo̱ xi nkú nꞌe̱ a̱ya ni̱nku̱
\p
\v 26 Kui nga, ¿nkú ku̱i̱xíaán ni̱, já ntsꞌe? Nkꞌie nga ma ñjakúko̱o xinki̱u, tjín xi se, tjín xi bakúyaha̱ xu̱ta̱ xingisoo̱, tjín xi tsuya ni xi bꞌéjña chjihi̱ Nti̱a̱ná, tjín xi nchja̱ kjꞌa̱í én xi tsjáha̱ Espiri̱tu̱, ko̱ tjín xi tsꞌínkꞌatiya ée̱n. Ngatentee̱ ni xi nꞌo̱o nga nkúnkú, bꞌa̱ nꞌo̱o tu̱ xi chjúsíntje̱hennu xu̱ta̱ ni̱nku̱.
\v 27 Tsa tjín xi ku̱i̱nchja̱ kjꞌa̱í én xi tsjáha̱ Espiri̱tu̱, tsa jo ko̱ santaha tsa jan katuma. Nkúnkú bꞌa̱ i̱ncha katsꞌín ko̱ nku xi katsꞌínkꞌatiya ée̱n.
\v 28 Tsa najmi tjín xi maha̱ tsꞌínkꞌatiya ée̱n, xi nchja̱ kjꞌa̱í én xi tsjáha̱ Espiri̱tu̱ tu̱ sahá jyu katꞌejña. Kanchja̱ko̱ suba yjoho̱ ko̱ kanchja̱ko̱ Nti̱a̱ná.
\p
\v 29 Ko̱ máha xi tsꞌínkjasꞌen én xi tsjáha̱ Nti̱a̱ná, tsa jo ko̱ tsa jan katuma ko̱ xu̱ta̱ xingisoo̱ katsꞌínnkjinkꞌun sisin nkú tsuhu̱ ra̱ ni xi tíntꞌé.
\v 30 Ko̱ tsa nku xi kabꞌejña yo̱ Nti̱a̱ná kꞌu̱éjña chjihi̱ kjꞌa̱í ni, kandjén jyu xi tínchjo̱.
\v 31 Bꞌa̱ tsꞌín nkúnkú jun ka̱ma nꞌe̱kjasꞌon én xi Nti̱a̱ná tsjánu̱u tu̱ xi ngatentoo̱ cha̱hanu ko̱ sa̱kú ngaꞌyúnnu̱u.
\v 32 Xi kikꞌa̱i̱hi̱ kju̱a̱nda nga tsꞌi̱ínkjasꞌen én xi tsjáha̱ Nti̱a̱ná, kui xi tjíhin nga sku̱e̱ chu̱ba̱ nga ku̱i̱nchja̱.
\v 33 A̱tꞌaha̱ kju̱a̱jyu tsjoho̱ Nti̱a̱ná, najmi ni xi nꞌejnu nꞌetꞌa.
\p Xi nkú tsꞌín tíjñaha̱ ngayjee̱ xu̱ta̱ ni̱nku̱ xi tsꞌe̱ Nti̱a̱ná,
\v 34 jminchjíu̱n tjíhin nga ngju̱én jyu a̱ya ni̱nku̱. A̱tꞌaha̱ najmi tjíhi̱n kju̱a̱ tsa ku̱i̱nchja̱. Kantꞌéꞌéhe̱n xꞌi̱hi̱n xi nkú nga títsu kju̱a̱téxumoo̱.
\v 35 Tsa tjín ni xi mjehe̱ sku̱e̱, niꞌyaha̱ kandjásjaiyaha̱ xꞌi̱hi̱n. A̱tꞌaha̱ najmi nda tjín tsa a̱jihi̱n xu̱ta̱ ni̱nku̱ ku̱i̱nchja̱ nku ta̱chju̱ún.
\p
\v 36 ¿A a̱jinnu̱uhú kichꞌatutsꞌi̱hi̱n ra̱ nga kisꞌeni̱jmí éhe̱n Nti̱aná? ¿A tu̱ nkuhú jun xi kinꞌekjóho̱on ée̱n?
\v 37 Tsa tjín xi bꞌa̱ maha̱ nga Nti̱a̱ná tsjáha̱ éhe̱n ko̱ a ra̱ tsa kui xi kitsꞌínkjáíhi̱n nku kju̱a̱nda xi tsjá Espiri̱tu̱, kui xi katsꞌínkie nga kju̱a̱téxumaha̱ Nda̱ Nti̱a̱ná xi tíbꞌetꞌánu̱u e̱i̱.
\v 38 Tsa tjín xi najmi tsꞌi̱ínsihi̱n ni xi tíbꞌetꞌánu̱u e̱i̱, najmi tu̱ nꞌesihu̱un ko̱ kui.
\p
\v 39 Kui bꞌa̱ maha, já ntsꞌena̱, katuma mjenu̱u nga Nti̱a̱ná katsjánu̱u éhe̱n nga nꞌe̱kjasꞌon ko̱ najmi tu̱ bꞌechꞌóho̱o xi ku̱i̱nchja̱ kjꞌa̱í én xi tsjá Espiri̱tu̱.
\v 40 Ngatentee̱ ni xi nꞌo̱o, nꞌe̱sisiun ko̱ tankínko̱ chꞌichꞌiun.
\c 15
\s Bꞌi̱ tsꞌín kitsꞌínkjꞌáítsjehe̱n Pablo̱ xu̱ta̱ ni̱nku̱ Corinto̱ ni xi tjun tsakúyaha̱
\p
\v 1 Ko̱ ndꞌa̱i̱ já ntsꞌe, mjena tsꞌinkjꞌáítsjennu̱u én nda tsuhu̱ Nda̱ Nti̱a̱ná xi yꞌeni̱jmínu̱u, xi kinꞌekjóho̱on ko̱ xi ndjá tinchajiun.
\v 2 Kui én nda tsu xuꞌbi̱ tsꞌi̱ín nga kꞌu̱a̱nkinu̱u yjonu̱u. Bꞌa̱ ka̱ma tsa nꞌe̱tjusun én xi yꞌeni̱jmínu̱u. A̱tꞌaha̱ tsa najmi, tsuhu̱ ra̱ ma nga tu̱ kju̱a̱ndahá kisꞌejinnu̱u ée̱n.
\p
\v 3 Títjun kitsꞌinkjasꞌenu̱u én xi kitsꞌinkjáíhi̱n, nga nga̱tꞌaha̱ ngatitsunná kꞌiehen Cristo̱. Bꞌa̱ kama xi nkú tsꞌín tjítꞌa xu̱ju̱n éhe̱n Nti̱a̱ná.
\v 4 Kisꞌeyanji ko̱ ni̱stjin xi ma jahan jꞌáíya ngáha̱ ra̱ ngabayoo̱, xi nkú tsꞌín tjítꞌa xu̱ju̱n éhe̱n Nti̱a̱ná.
\p
\v 5 Tsakúchjihi̱ yjoho̱ Pedro̱ ko̱ a̱skahan já postru̱ xi te joo̱.
\v 6 A̱skahan nkuhú nga tsakúchjihi̱ ra̱ yjoho̱ tsꞌati un unchan já ntsꞌeé. Nkjin maha xi tjíntu sa xi i̱ncha kikie Nda̱ Nti̱a̱ná ko̱ kꞌu̱a̱ xi ja kꞌien.
\v 7 A̱sꞌa̱i ta̱ tsakúchjihi̱ yjoho̱ Santiago̱ ko̱ a̱skahan ngayjee̱ já postru̱.
\p
\v 8 Ko̱ xi fekuhu, a̱skahan kjin tsakúchjina yjoho̱.
\v 9 A̱tꞌaha̱ bꞌa̱ xian nga an xi ꞌyún i̱chí sa a̱jihi̱n já postru̱ ko̱ najmi ma kꞌan tsa nda̱ postru̱ xíhi̱n yjona̱, a̱tꞌaha̱ kitsjennkí unkie xu̱ta̱ ni̱nku̱hu̱ Nti̱a̱ná.
\v 10 Tu̱nga tu̱ nga̱tꞌaha̱ ní kju̱a̱ndaha̱ Nti̱a̱ná tsichu mahana yáha an ndꞌa̱i̱, ko̱ najmi tu̱ kju̱a̱ndahá kitsjána kju̱a̱ndaha̱ Nti̱a̱ná. An xi ꞌyún kitsꞌinxá sa nga ngayjee̱ já postru̱ xingisoo̱. Tu̱nga najmi ahán xi bꞌa̱ kitsꞌian. Kju̱a̱nda xi kikꞌa̱i̱ nína, kui xi bꞌa̱ kitsꞌíu̱n.
\v 11 Kui bꞌa̱ maha, tsa an ko̱ tsa já postru̱ xingisoo̱, én nda tsuu̱ yꞌeni̱jmíi̱ ko̱ kui xi kisꞌejinnu̱u.
\s Bꞌi̱ tsꞌín tsakúya Pablo̱ nkꞌie nga kjꞌu̱a̱íya ngáha̱ ra̱ xu̱ta̱ xi ja kꞌie̱n
\p
\v 12 Tu̱nga tsa ni xi tísꞌeni̱jmíhi nga jꞌáíya ngáha̱ ra̱ Cristo̱ ngabayoo̱, ¿nkú tsꞌín bꞌa̱ tíi̱ncha tsuhu kꞌu̱a̱ xi tjín a̱jinnu̱u nga najmi ta̱ kjꞌu̱a̱íyaha̱ ra̱ xu̱ta̱ xi ja kꞌie̱n?
\v 13 A̱tꞌaha̱ tsa najmi kjꞌu̱a̱íyaha̱ xu̱ta̱ xi ja kꞌie̱n, ta̱ ndaha Cristo̱ najmi jꞌáíyaha̱ ngabayoo̱ ma.
\v 14 Ko̱ tsa najmi jꞌáíyaha̱ Cristo̱ ngabayoo̱, kui xi tsuhu̱ ra̱ ma nga tu̱ kju̱a̱ndahá tíbꞌeni̱jmíi̱ ko̱ nga tu̱ kju̱a̱ndahá tísꞌejinnu̱u ée̱n.
\v 15 Tsa ni xi bꞌa̱ tjíhin nii̱, já tsankꞌá níi̱ ji̱n, a̱tꞌaha̱ najmi bꞌa̱ tjín ni xi tíbixínyai̱. Bꞌa̱ tíxian a̱tꞌaha̱ ji̱n tsixínyai̱ nga Nti̱a̱ná kitsꞌínkjꞌáíyaha̱ Cristo̱ ngabayoo̱, tu̱nga tsa najmi ta̱ kjꞌu̱a̱íyaha̱ ra̱ xu̱ta̱, kui xi tsuhu̱ ra̱ nga najmi jꞌáíyaha̱ Cristo̱.
\p
\v 16 A̱tꞌaha̱ tsa najmi ta̱ kjꞌu̱a̱íya ngáha̱ ra̱ xu̱ta̱ xi ja kꞌie̱n, ta̱ ndaha Cristo̱ najmi jꞌáíyaha̱.
\v 17 Tsa najmi jꞌáíyaha̱ Cristo̱ ngabayoo̱, tu̱ kju̱a̱ndahá kisꞌejinnu̱u ni xi kisꞌejinnu̱u. Tu̱ yje tintsu̱ba̱jihín so ngatitsunnu̱u bꞌa̱.
\v 18 Ko̱ ta̱ ja kindyja xu̱ta̱ xi kꞌien xi kisꞌejihi̱n Cristo̱.
\v 19 Tsa ni xi tu̱ e̱i̱hí a̱sunntei̱ tíchuyáá ni xi sakúná a̱tꞌaha̱ sꞌejinná Cristo̱, tu̱ xí kintehé tsjéhe̱én ngayjee̱ xu̱ta̱ xi ta̱ tjín a̱sunntei̱ bꞌa̱.
\p
\v 20 Tu̱nga jꞌáíya kju̱axi̱hí ra̱ Cristo̱ ngabayoo̱. Kui xi nkú joyaha cha̱n xi tjun xi ꞌba̱i̱hi̱ Nti̱a̱ná, a̱tꞌaha̱ kui xi tjun jꞌáíyaha̱ a̱jihi̱n xu̱ta̱ kꞌie̱n.
\v 21 A̱tꞌaha̱ xi nkú tsꞌín nga̱tꞌaha̱ ni xi kitsꞌíhin nku nda̱ jꞌaikjasꞌehen ngabayoo̱, bꞌa̱ ta̱ tsꞌín nga̱tꞌaha̱ ni xi kitsꞌíhin kjꞌa̱í nda̱ kjꞌu̱a̱íyaha̱ xu̱ta̱ ngabayoo̱.
\v 22 Xi nkú tsꞌín nga̱tꞌaha̱ ni xi kitsꞌín Adan fesuhun ngayjee̱ xu̱ta̱, bꞌa̱ ta̱ tsꞌín nga̱tꞌaha̱ ni xi kitsꞌín Cristo̱ nꞌe̱kꞌíéntu tíkꞌun síhin ngayjee̱ xu̱ta̱.
\p
\v 23 Tu̱nga fꞌáíyahá ra̱ nga nkúnkú xi nkú tsꞌín kanéhe̱. Tjun jꞌáíyaha̱ Cristo̱ ko̱ a̱skahan nkꞌie nga kjꞌu̱a̱í ngáha kjꞌu̱a̱íyaha̱ xu̱ta̱ xi tsꞌe̱.
\v 24 Nkꞌiehé ku̱i̱tjusunyje ni xi ka̱ma a̱sunntee̱. Tjun tsꞌi̱ínkje Cristo̱ ngayjee̱ xi batéxuma ko̱ ngayjee̱ xi tjíhi̱n xá ko̱ xi tjíhi̱n ngaꞌyún, ko̱ a̱skahan tsꞌi̱ínkjasꞌen má batéxuma a̱ya ntsja Nti̱a̱ná xi Na̱ꞌminá maha.
\v 25 Tjíhin nga ku̱a̱téxuma Cristo̱ santaha nkúhu nga kꞌu̱éntu kinte sjai ngayjee̱ xi tífi kontra̱ha̱.
\v 26 Kontra̱ xi kfe̱kuhu nga nꞌe̱kje, kui xi ngabayoo̱.
\p
\v 27 A̱tꞌaha̱ Nti̱a̱ná kitsꞌínkꞌíéntu kinte sjai Cristo̱ ngayjee̱ ni xi tjín. Tu̱nga nkꞌie nga bꞌa̱ títsu éhe̱n Nti̱a̱ná nga kinꞌekꞌíéntu ngayjee̱ ni xi tjín kinte sjai Cristo̱, tínchja̱ chji chji nga najmi ko̱ Nti̱a̱ná xi tíjña kinte sjai Cristo̱, a̱tꞌaha̱ kui xi bꞌa̱ kitsꞌíu̱n.
\v 28 Nti̱a̱ná kitsꞌínkjasꞌehe̱n a̱ya ntsja Cristo̱ ngayjee̱ ni xi tjín, ko̱ nkꞌie nga kitsꞌínkꞌíéntu Cristo̱ ngayjee̱ ni xi tjín kinte sjai, a̱sꞌa̱i ko̱ ta̱ Cristo̱ xi Ntíhi̱ Nti̱a̱ná tsꞌi̱ínkjasꞌehe̱n yjoho̱ Nti̱a̱ná. Bꞌa̱ tsꞌín Nti̱a̱ná nkuhú kui ka̱ma tsꞌe̱he ngayjee̱ ni xi tjín.
\p
\v 29 Tjín xi baténtá yjoho̱ ngajoho̱ xu̱ta̱ xi ja kꞌie̱n. Tu̱nga tsa najmi kjꞌu̱a̱íyaha̱ xu̱ta̱ xi ja kꞌie̱n, ¿á ngajoho̱ xu̱ta̱ xuꞌbo̱ i̱ncha baténtáha yjoho̱ xi bꞌa̱ tsꞌíu̱n?
\p
\v 30 Ko̱ ji̱n, ¿á tínꞌekjáíhi̱n ri̱ ni chꞌonkꞌun xi tímatꞌain tehe̱ntehe̱ni̱?
\v 31 An bi, já ntsꞌe, xki̱ ni̱stjin tíi̱jñajihi̱n ngabayoo̱. Kju̱axi̱ ni xi tíxinnu̱u xi nkú tsꞌín kju̱axi̱ nga tsjo mana nga sꞌejinnu̱u Nda̱ Nti̱a̱ná Jesucristo̱.
\v 32 Nanki Efe̱so̱ kisꞌeko̱na kju̱a̱sti já xi bꞌa̱ tsꞌín kjan xi nkúhu chu̱ kjan, tu̱nga tsa najmi ta̱ kjꞌu̱a̱íya ngáha̱ ra̱ xu̱ta̱ xi ja kꞌie̱n, ¿mí nihi xi tsijnena nga bꞌa̱ kitsꞌian? Tu̱ sahá bꞌa̱ nꞌe̱é xi nkú i̱ncha tsu kꞌu̱a̱ já: “Sꞌi̱á ko̱ chi̱ne̱é, a̱tꞌaha̱ ndyjunni̱ ku̱a̱yáá.”
\p
\v 33 Najmi tu̱ ꞌba̱i̱nto tsa tjín xi kꞌu̱a̱na̱cha̱nu̱u. Yo nga bꞌa̱ tsu én: “Xi tsjenko̱ xu̱ta̱ xi chꞌonkꞌun, ta̱ chꞌonkꞌun bitju.”
\v 34 Nꞌe̱kꞌóntjaiyo kju̱a̱nkjintakꞌunnu̱u ko̱ najmi tu̱ nꞌo ngatitsun. A̱tꞌaha̱ tjín a̱jinnu̱u xi najmi be ni xi tsꞌe̱ Nti̱a̱ná. Bꞌa̱ tíxinnu̱u tu̱ xi ka̱ma subaha̱nu̱u.
\s Bꞌi̱ tsꞌín tsakúya Pablo̱ nkú ka̱ma nkꞌie nga kjꞌu̱a̱íya ngáha̱ ra̱ xu̱ta̱ xi ja kꞌie̱n
\p
\v 35 Kutsa tjíhín xi bꞌa̱ ku̱i̱tsu̱: “¿Nkú ka̱ma nkꞌie nga kjꞌu̱a̱íya ngáha̱ ra̱ xu̱ta̱ kꞌie̱n? ¿Mí yjonintehe xi kꞌu̱a̱ ngáha?”
\p
\v 36 ¡Ji nda̱ nchi̱ni xi bꞌa̱ tíbixín! Ni xi bꞌentje̱i̱ najmi ku̱a̱su̱ tsa najmi títjun ku̱a̱yá.
\v 37 Najmi ni xi stjúkjóo̱ bꞌentje̱i̱. Xujmá ní bꞌentje̱i̱, tsa xujmá tuni̱ñu̱ ko̱ tsa kjꞌa̱í xujmá.
\v 38 Nti̱a̱ná tsjáha̱ xujmóo̱ yjoninte xi mjehe̱. Nga nkúnkú xujmóo̱ tsjáha̱ yjoninte xi kanéhe̱.
\p
\v 39 Najmi tu̱ nku chu̱ba̱ yjoninte xi tjín. Kjꞌa̱í kꞌun yjonintehe̱ xu̱ta̱ ko̱ kjꞌa̱í kꞌun xi tsꞌe̱ chu̱. Kjꞌa̱í kꞌun ngá xi tsꞌe̱ ni̱see̱ ko̱ ta̱ kjꞌa̱í kꞌun xi tsꞌe̱ ti̱u̱.
\v 40 Bꞌa̱ ta̱ tsꞌín kjꞌa̱í kꞌun ni xi tjín nkꞌa ján ko̱ xi tjín tꞌanankiu̱. Tsjo kꞌun xi tjín nkꞌa ján ko̱ tsjo kꞌun xi tjín tꞌanankiu̱, tu̱nga kjꞌa̱í kjꞌa̱í kju̱a̱tsjo xi tjíhi̱n.
\v 41 Tsꞌíu̱ kjꞌa̱í tsꞌín batꞌai, ko̱ sóo̱ kjꞌa̱í tsꞌín batꞌai, ko̱ niñuu̱ kjꞌa̱í tsꞌín batꞌai ngá. Ko̱ nga nkúnkú niñu xi tjín kjꞌa̱í kjꞌa̱í tsꞌín batꞌai.
\p
\v 42 Bꞌa̱ ta̱ ka̱ma nkꞌie nga kjꞌu̱a̱íyaha̱ xu̱ta̱ ngabayoo̱. Sꞌeyanji yjoninte xi maha̱ batsun, tu̱nga yjoninte xi kjꞌu̱a̱íya ngáha̱ ra̱ najmi ta̱ ka̱maha̱ ra̱ ku̱a̱tsúhun.
\v 43 Sꞌeyanji ni xi najmi chumi ni chjíhi̱ ra̱, tu̱nga nkꞌie nga kjꞌu̱a̱íya ngáha̱ ra̱ sꞌe̱he̱ kju̱a̱chánka. Sꞌeyanji xi najmi tjíhi̱n ngaꞌyún, tu̱nga nkꞌie nga kjꞌu̱a̱íya ngáha̱ ra̱ sꞌe̱he̱ ngaꞌyún.
\v 44 Sꞌeyanji yjoninte xi kichꞌaá ndꞌa̱i̱, tu̱nga kjꞌu̱a̱íya ngáha̱ ra̱ yjoninte xi Espiri̱tu̱hu̱ Nti̱a̱ná kꞌu̱énda xi nkú tsꞌín mjehe̱. Tsa tjín yjoninte xi nkúhu xi kichꞌaá, ko̱ ta̱ tjín ngá xi kꞌu̱énda Espiri̱tu̱hu̱ Nti̱a̱ná.
\p
\v 45 Bꞌa̱ tsꞌín tjítꞌa xu̱ju̱n éhe̱n Nti̱a̱ná: “Nda̱ xi tjuu̱n kinꞌenda ko̱ yꞌejña tíkꞌun.” Kui xi Adan. Tu̱nga Adan xi fekuhu, xi Cristo̱, kui xi tsichu ma Espiri̱tu̱ xi tsꞌínkꞌíéntu tíkꞌun xu̱ta̱.
\v 46 Tu̱nga najmi kju̱a̱tíkꞌun xi tsjáhá Espiri̱tu̱ xi tjun. Títjun ní kju̱a̱tíkꞌun xi tsjá a̱sunntei̱, a̱skahan kju̱a̱tíkꞌun xi tsjá Espiri̱tu̱.
\p
\v 47 Nda̱ xi tjuu̱n ndyjo tꞌanankiu̱ kinꞌendako̱ho, tu̱nga nda̱ xi ma joho ndji̱o̱jmi ján nibaha.
\v 48 Xi nkú tjín nda̱ xi kinꞌendako̱ho ndyjo tꞌanankiu̱, bꞌa̱ ta̱ kꞌun ngayjee̱ xi tsꞌe̱ tꞌanankiu̱. Ko̱ xi nkú tjín nda̱ xi nibaha ndji̱o̱jmi ján, bꞌa̱ ta̱ kꞌun ngayjee̱ xi tsꞌe̱ ndji̱o̱jmi ján.
\v 49 Xi nkú tsꞌín tjíyaná ndꞌa̱i̱ xi nkúhu nda̱ xi kamandako̱ho ndyjo tꞌanankiu̱, bꞌa̱ ta̱ tsꞌín sꞌe̱yaná xi nkúhu nda̱ xi kinꞌe nibáha ndji̱o̱jmi ján.
\p
\v 50 Jun já ntsꞌe, tíxinyanu̱u nga yjoninte xi kichꞌaá ndꞌa̱i̱ najmi ka̱ma kju̱a̱sꞌenjin nga Nti̱a̱ná ku̱a̱téxumaha̱. Ta̱ ndaha ni xi maha̱ batsun najmi ma sakúntehe̱ a̱jihi̱n ni xi najmi maha̱ batsun.
\v 51 Xínya manu̱u ni xi tíjña ꞌmaná. Najmi ngatenteé ku̱a̱yáá, tu̱nga ngatentee̱hé kꞌo̱óntjaiyaá.
\v 52 Xi nkú tsꞌín ki̱tsa̱ bꞌechjáá ko̱ chjuxꞌáá tunkaán, bꞌa̱ tsꞌín ki̱tsa̱ kꞌo̱óntjaiyaá nkꞌie kju̱a̱ne̱ tjio xi fekuu̱. A̱tꞌaha̱ kju̱a̱ne̱ tjioo̱, a̱sꞌa̱i kjꞌu̱a̱íyaha̱ ngabayoo̱ xu̱ta̱ xi ja kꞌie̱n tu̱ xi najmi ta̱ ku̱a̱yá saha, ko̱ ñá ta̱ kꞌo̱óntjaiyaá.
\v 53 A̱tꞌaha̱ yjoninte xi kichꞌaá ndꞌa̱i̱ xi maha̱ batsun tjíhin nga yjoninte xi najmi maha̱ batsun ka̱ma. Yjonintená xi maha̱ ꞌme ndꞌa̱i̱ tjíhin nga yjoninte xi najmi ta̱ ku̱a̱yáha ka̱ma.
\p
\v 54 Nkꞌie nga yjonintená xi maha̱ batsun ka̱ma yjoninte xi najmi maha̱ batsun, ko̱ nkꞌie nga yjonintená xi maha̱ ꞌme ka̱ma yjoninte xi najmi ta̱ ku̱a̱yáha, nkꞌiehé ku̱i̱tjusun én xi tjítꞌa:
\q Ja kuanꞌekje ngabayoo̱, ja kuanꞌe ngana̱ha̱.
\q
\v 55 Ji ngabaya, ¿má ni̱ nga kinꞌe ngana̱i̱?
\q Ji ngabaya, ¿má ni̱ ngaꞌyún
\q xi nꞌekꞌienko̱honi xu̱ta̱?
\p
\v 56 A̱tꞌaha̱ ngabayoo̱ tsꞌínchjén ngatitsuu̱n nga tsꞌínkꞌienko̱ho xu̱ta̱, ko̱ ngatitsuu̱n tsꞌínchjén kju̱a̱téxumoo̱ nga bakúchji ni xi ꞌmihi̱ ngatitsuu̱n.
\v 57 Tu̱nga mábꞌa̱chjíhi̱ ra̱ Nti̱a̱ná, kui xi tsjáná nga nꞌe ngana̱áha̱ ngabayoo̱ nga̱tꞌaha̱ ni xi kitsꞌín Nda̱ Nti̱a̱ná Jesucristo̱.
\p
\v 58 Kui bꞌa̱ maha, já ntsꞌena̱ xi ꞌyún tjona, ndjá ti̱ncho ko̱ tjen ngaꞌyúhu̱un yjonu̱u. Tehe̱nte tankínko̱ ndju so xáha̱ Nda̱ Nti̱a̱ná. Yo nga najmi xá tiya tínꞌo nga Nda̱ Nti̱a̱ná tínꞌexátꞌoho̱o.
\c 16
\s Bꞌi̱ tsꞌín kitsúya Pablo̱ nga nꞌe̱súhu̱n to̱on chje̱ xu̱ta̱ ni̱nku̱ Jerusalen
\p
\v 1 Máha nga̱tꞌa tsꞌe̱ to̱on chje̱ xi tímasúhu̱n xu̱ta̱ ni̱nku̱ Jerusalen, bꞌa̱ ta̱ nꞌo̱o xi nkú nga kixihi̱n xu̱ta̱ ni̱nku̱ xi tjíntu nanki xi tjín a̱nte Galaci̱a̱.
\v 2 Xi nkú tjín mahanu, xki̱ tuminku̱ tꞌejña tꞌaxíún i̱chí to̱on nga nkúnkú. Xi nkú tjín sa̱kúnu̱u, bꞌa̱ tjín tꞌejña tꞌaxíún. Chꞌa̱tjó to̱oo̱n tu̱ xi nkꞌie nga ku̱i̱chusehe̱nu̱u najmi tjíhin nga chjꞌa̱súhun to̱on chje̱.
\p
\v 3 Nkꞌie nga ku̱i̱cha yo̱ tsꞌinkjíá nanki Jerusalen xu̱ta̱ xi jun chjꞌa̱jiun ko̱ tsjaha̱ xu̱ju̱n má nga an tíbꞌexá, tu̱ xi ngju̱a̱i̱ko̱ho̱ ra̱ to̱on xi kinꞌesúu̱n xu̱ta̱ ni̱nku̱ xi tjín ján.
\v 4 Tsa nda tjín nga ko̱ an kfíán yo̱, ta̱ tsꞌinka̱ ni̱yá jóo̱.
\s Bꞌi̱ tsꞌín kitsúya Pablo̱ ni xi tjíndaha̱ nga tsꞌi̱ín
\p
\v 5 Kfínsenu̱u, tu̱nga nkꞌiehé nga kjꞌu̱a̱ a̱nte Macedoni̱a̱ kfínsenu̱u, a̱tꞌaha̱ tjíhin nga kjꞌu̱a̱ nanki xi tjín yo̱.
\v 6 Kutsa nkjihín ni̱stjin kúáte̱jñajinnu̱u nga ku̱i̱cha yo̱. Kutsa yo̱hó tsꞌinkjꞌa ni̱stjin chu̱nchꞌóo̱n, tu̱ xi bꞌa̱ tsꞌín ka̱ma ku̱i̱si̱nko̱honú má xi tje̱hen kfín ngáhana a̱skahan.
\v 7 A̱tꞌaha̱ najmi mjena tsa tu̱ skuehénu̱u nga kjꞌu̱a̱ yo̱. Mje nína nkjin ni̱stjin kúáte̱jñajinnu̱u. Bꞌa̱ tsꞌian tsa Nti̱a̱ná tsjántena.
\v 8 Tu̱nga kúáte̱jñaná nanki Efe̱so̱ santaha nkúhu nga ku̱i̱chú Sꞌí Pentekoste,
\v 9 a̱tꞌaha̱ sa̱kúntena nga tsꞌinxá sisian, ndaha tsa nkjin maha xi fi kontra̱ha̱ ni xi títsꞌian.
\p
\v 10 Tsa ku̱i̱chúsenu̱u Timoteo̱ yo̱, nda nꞌe̱ nꞌe̱kjóho̱on tu̱ xi tsjo kꞌúéhe̱ ra̱ nga kꞌúéjñajinnu̱u. A̱tꞌaha̱ ta̱ xáha̱ Nda̱ Nti̱a̱ná títsꞌín xi nkúhu an.
\v 11 Kui nga najmi tu̱ ꞌba̱i̱nto tsa tjín xi tu̱ tohón ka̱maha̱ ndo̱. Tu̱ sa ní ti̱si̱nko̱o tu̱ xi nda tsꞌín katsꞌínndju̱úhu ni̱yáha̱ nga kjꞌu̱a̱ísehena e̱i. Kasꞌehe̱ kju̱a̱jyu nga kanibá, a̱tꞌaha̱ tíkuyá nga kjꞌu̱a̱íko̱ já ntsꞌeé xingisoo̱.
\p
\v 12 Máha nda̱ ntsꞌeé Apolo̱, bꞌa̱ kixin ṉkjúhu̱n nga ngju̱a̱i̱ko̱ já ntsꞌeé xi ngju̱a̱i̱tsubekꞌúnnu̱u, tu̱nga najmi kitsꞌín yuhú nga ndꞌa̱i̱ ngju̱a̱i̱. Nkꞌie rú nga sa̱kúntehe̱, nkꞌie rú nga ngju̱a̱i̱.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 13 Ti̱ntsu̱ba̱ ndo ko̱ ndjá ti̱nchajiun xi sꞌejinná. Ndjá nꞌe̱sjo yjonu̱u ko̱ tjen ngaꞌyúhu̱un yjonu̱u.
\v 14 Ngayjee̱ ni xi nꞌe̱ko̱o xinki̱u, katakúchji kju̱a̱tjonu̱u.
\p
\v 15 Jun já ntsꞌe, yo nga xu̱ta̱ xinkjín nda̱ Estefa̱na̱ tjun kitsꞌínkjáíhi̱n éhe̱n Nti̱a̱ná a̱jihi̱n xu̱ta̱ xi tjín a̱nte Akaya̱ ko̱ kitsjáha̱ yjoho̱ nga tíi̱ncha basinko̱ xu̱ta̱ ni̱nku̱.
\v 16 Tíbankinu̱u nga ta̱sinñjuhu̱u xu̱ta̱ xi bꞌa̱ kꞌun xi nkúhu xu̱ta̱ xuꞌbi̱ ko̱ ngayjee̱ xi ta̱ kuihi xá xi tsꞌín ko̱ xi tsꞌínkjasꞌehe̱n yjoho̱ xóo̱.
\p
\v 17 Tsjo mana nga jꞌaisena Estefa̱na̱ ko̱ Fortunato̱ ko̱ Akai̱ko̱, a̱tꞌaha̱ ngajonu̱u i̱ncha tsasinko̱na.
\v 18 Kitsꞌín nga kikjenta̱ ani̱ma̱na̱ xi nkú nga ta̱ kitsꞌín a̱jinnu̱u. Xu̱ta̱ xi nkúhu xuꞌbi̱ kayaha̱ nga nda ṉkjún xá xi tsꞌín.
\p
\v 19 Títsꞌínkjinu̱u kju̱a̱suniña xu̱ta̱ ni̱nku̱ xi tjín a̱nte Asi̱a̱. Akila̱ ko̱ Priscila̱ ko̱ ngayjee̱ xu̱ta̱ ni̱nku̱ xi ma ñjakú niꞌyaha̱ ꞌyún títsꞌínkjinu̱u kju̱a̱suniña jun xi ta̱ sꞌejinnu̱u Nda̱ Nti̱a̱ná.
\v 20 Ko̱ ngayjee̱ já ntsꞌeé xi tjín e̱i̱ títsꞌínkjinu̱u kju̱a̱suniña. Bꞌi̱ ngján súniñoho̱o xinki̱u.
\p
\v 21 An Pablo̱ ntuna̱ tíbꞌetꞌáha̱nu̱u kju̱a̱suniñana̱.
\p
\v 22 Tsa tjín xi najmi tjoho̱ Nda̱ Nti̱a̱ná Jesucristo̱, kui najmi nda katuma nginku̱n Nti̱a̱ná. ¡Nibáí Nda̱ Nti̱a̱!
\p
\v 23 Kasꞌenu̱u kju̱a̱ndaha̱ Nda̱ Nti̱a̱ná Jesucristo̱.
\v 24 Tjona ngatentoo̱ jun xi nkú tsꞌín Cristo̱ Jesu tjoho̱ ñá.