\id 2CO Mazatec of Jalapa de Díaz
\h Xu̱ju̱n xi ma joho xi kinꞌekjíhi̱ xu̱ta̱ ni̱nku̱ Corinto̱
\toc1 Xu̱ju̱n xi ma joho xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Corinto̱
\mt Xu̱ju̱n xi ma joho xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Corinto̱
\c 1
\s Bꞌi̱ tsꞌín kikjaniñaha̱ Pablo̱ xu̱ta̱ ni̱nku̱ xi tjín nanki Corinto̱
\p
\v 1 An Pablo̱, an xi kama nku nda̱ postru̱hu̱\f + \fr 1:1 \ft “Xi kisꞌexá” tsuhu̱ ra̱ “nda̱ postru̱” ko̱ a ra̱ “já postru̱”.\f* Jesucristo̱ a̱tꞌaha̱ Nti̱a̱ná bꞌa̱ tsꞌín kama mjehe. An ko̱ nda̱ ntsꞌeé Timoteo̱ tísuniñai̱hi̱ jun xu̱ta̱ ni̱nku̱hu̱ Nti̱a̱ná xi tintsu̱bo̱o nanki Corinto̱ ko̱ ngatentoo̱ xu̱ta̱ha̱ Nti̱a̱ná xi tintsu̱bo̱o nga ngúsuhu̱n a̱nte Akaya̱.
\p
\v 2 Kasꞌenu̱u kju̱a̱nda ko̱ kju̱a̱jyu xi tsjáná Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\s Bꞌi̱ tsꞌín yꞌéjña chji Pablo̱ nga Nti̱a̱ná kitsjáha̱ ngaꞌyúhu̱n a̱jihi̱n kju̱a̱ni̱ma̱ xi jꞌajin
\p
\v 3 Kanꞌetsjoho̱ Nti̱a̱ná, kui xi Nti̱a̱ha̱ ko̱ Na̱ꞌmihi̱ Nda̱ Nti̱a̱ná Jesucristo̱. Kui xi Na̱ꞌminá ko̱ Nti̱a̱ná xi ma ni̱ma̱ha̱ ñá ko̱ xi tehe̱nte tsjá ngaꞌyúnná.
\v 4 A̱jihi̱n ngayjee̱ kju̱a̱ni̱ma̱ xi tíbitjajíaán tsjá ngaꞌyúnná tu̱ xi ko̱ ta̱ ñá ta̱ ka̱ma kꞌu̱a̱i̱ ngaꞌyúhu̱n ra̱á xu̱ta̱ xi kju̱a̱ni̱ma̱ tífꞌajin. A̱tꞌaha̱ títsjá ngaꞌyúnná Nti̱a̱ná, kui nga ka̱mahaná kꞌu̱a̱i̱ ngaꞌyúhu̱n ra̱á xu̱ta̱.
\p
\v 5 Xi nkú tsꞌín nkjin kju̱a̱ni̱ma̱ tíbitjajíi̱n nga̱tꞌaha̱ Cristo̱, bꞌa̱ ta̱ tsꞌín tse ngaꞌyún xi tísakújinni̱ Cristo̱.
\v 6 Tu̱ xi sa̱kú ngaꞌyún níhi̱nu̱u ko̱ tu̱ xi kꞌu̱a̱nkihinu, kui nga tíbitjajíhi̱nni̱ kju̱a̱ni̱ma̱. Ko̱ nkꞌie nga tíꞌba̱i̱ ngaꞌyúnni̱, tíꞌba̱i̱ ngaꞌyúnni̱ tu̱ xi sa̱kú ngaꞌyúhu̱nnu̱u. Kui ngaꞌyúu̱n xi ku̱a̱si̱nko̱nu̱u tu̱ xi nꞌe̱ chúkju̱a̱nu̱u nkꞌie nga ni̱banenu̱u kju̱a̱ꞌun xi tíbitjajíi̱n.
\v 7 Yai̱ xi nkú tsꞌín tjíyanu̱u. Kui niu̱ xi tíma ꞌyún takꞌui̱n. A̱tꞌaha̱ yai̱ nga nkuhú bitjajíaán kju̱a̱ꞌun ko̱ bꞌa̱ ta̱ tsꞌín sakú ngaꞌyúnná.
\p
\v 8 Jun já ntsꞌe, najmi mjeni̱ tsa kꞌúéꞌmai̱ kju̱a̱ni̱ma̱ xi tsitjajíi̱n a̱nte Asi̱a̱. Tu̱ xí tsehé ni xi kamatꞌai̱n nga ta̱ santaha najmi ta̱ tíchúkju̱a̱ha̱ni̱ niu̱. “Ja najmi ta̱ ku̱i̱tjunkihiná xuꞌbi̱”, tsixíi̱n.
\v 9 Bꞌa̱ kamani̱ xi nkú maha̱ já xi nꞌe̱kꞌien. Tu̱nga bꞌa̱há kamani̱ tu̱ xi najmi ji̱n su̱ba̱ ka̱ma ꞌyún takꞌuhu̱nni̱ yjoni̱. Bꞌa̱ ní kama tu̱ xi Nti̱a̱ná ka̱ma ꞌyún takꞌuhu̱nni̱. Kui xi tsꞌínkjꞌáíyaha̱ xu̱ta̱ kꞌie̱n.
\v 10 Nti̱a̱ná kitsꞌínkꞌankini̱ nga ja ma ku̱a̱yá níi̱ ko̱ behe̱ takꞌui̱n nga tu̱ nku tsꞌi̱ínkꞌankihíni̱. Tu̱ nkú bꞌa̱há tsꞌi̱ín.
\p
\v 11 Chu̱bantjai saha̱ni̱ nkꞌie nga chu̱bako̱o Nti̱a̱ná. A̱tꞌaha̱ tsa nkjin maha xi ku̱i̱nchja̱ntjaini̱ nkꞌie nga ku̱i̱nchja̱ko̱ Nti̱a̱ná, ta̱ nkjin ka̱maha xi tsjáha̱ mábꞌa̱chjíhi̱ Nti̱a̱ná nga̱tꞌaha̱ nga nda títsꞌínko̱ni̱.
\s Bꞌi̱ tsꞌín kitsúya Pablo̱ mí kju̱a̱ha nga tu̱ xu̱ju̱hún kitsꞌínkjihi̱ ra̱ xu̱ta̱ ni̱nku̱ Corinto̱
\p
\v 12 Tsjo mani̱ nkꞌie nga chasei̱ xi nkú tsꞌín tintsu̱ba̱i̱ ko̱ yai̱ nkꞌie nga na̱xu̱ kinꞌei̱ a̱jihi̱nnu̱u ko̱ a̱jihi̱n ngayjee̱ xu̱ta̱. Najmi chꞌa kichꞌana̱cha̱i̱hi̱. Nkꞌie nga bꞌa̱ kinꞌei̱ a̱jinnu̱u, kju̱a̱ndaha̱ ní Nti̱a̱ná kitsjáni̱yáni̱. Najmi xi nkú tsꞌín tíjñaha̱ xu̱ta̱ kitsjáni̱yáni̱.
\v 13 Nkꞌie nga nꞌekjíi̱hi̱ xu̱ju̱n, bꞌetꞌai̱hi̱ ni xi ka̱mankjinnu̱u nga nꞌe̱yo. Nda ṉkjún tjín tsa ka̱mankjinyjenu̱u niu̱.
\v 14 Ja tímankjinnu̱u i̱chí ndꞌa̱i̱ nga ni̱stjin nga kjꞌu̱a̱í ngáha Nda̱ Nti̱a̱ná Jesu tsjo ka̱manu̱u ji̱n xi nkú ta̱ tsꞌín tsjo ka̱mani̱ jun.
\p
\v 15 Tu̱ nga̱tꞌaha̱ nga ja be nga bꞌi̱ tíma a̱jinná, kui nga kama mjehena nga tjun kfínsehe̱nu̱u tu̱ xi sa̱kúhu̱nu̱u kju̱a̱nda nga jo ni̱yá kfíntsubekꞌúhu̱nnu̱u.
\v 16 Mjena kai nga tjun kjꞌu̱a̱ a̱jinnu̱u nkꞌie nga kfíán a̱nte Macedoni̱a̱ ko̱ a̱skahan ta̱ kjúái̱sehé ngáha̱nu̱u nkꞌie nga kꞌo̱óya ngáhana yo̱. Bꞌa̱ tsꞌín ka̱ma ku̱i̱si̱nko̱honú nga tsꞌinndju̱ú ngáhana ni̱yána̱ xi tje̱hen a̱nte Judea̱.
\p
\v 17 Kui bꞌa̱ maha, nkꞌie bꞌa̱ tsꞌín yꞌendáhana, ¿a najmi kitsꞌinnkjín sisihín ra̱ kꞌan? ¿A ra̱ bꞌendáná ni xi tsꞌian xi nkú tsꞌín bꞌénda xu̱ta̱ ni xi tsꞌín, nga ta̱ kuihi chu̱bo̱ “joho̱n” ko̱ tsa “najmi” tsu?
\v 18 Nti̱a̱ná xi be nga najmi ta̱ kuihi chu̱bo̱ “joho̱n” ko̱ “najmi” bixíi̱hi̱n.
\v 19 A̱tꞌaha̱ a̱jinnu̱u an ko̱ Silbano̱ ko̱ Timoteo̱ yꞌeni̱jmíi̱ Jesucristo̱ xi Ntíhi̱ Nti̱a̱ná, ko̱ kui xi najmi ta̱ kuihi chu̱bo̱ “joho̱n” ko̱ “najmi” títsu. Kui ní xi “joho̱n” títsuná.
\v 20 A̱tꞌaha̱ ngayjee̱ ni xi tsuya títjun Nti̱a̱ná nga tsꞌi̱ín, kui xi bitjusun a̱jihi̱n Cristo̱. Kui kju̱a̱ha nga̱tꞌaha̱ Cristo̱ “bꞌa̱ katꞌe” bixíhinná tu̱ xi sakúhu̱ ra̱ kju̱a̱chánka Nti̱a̱ná.
\p
\v 21 Nti̱a̱ná tsꞌín nga jun ko̱ ji̱n ndjá binchajián Cristo̱, kui xi jꞌájinná.
\v 22 Kikjꞌátsꞌe̱ná nga yꞌéjñajin Espiri̱tu̱hu̱ ani̱ma̱ná. Bꞌa̱ tsꞌín yahaná nga nꞌe̱kjáíhi̱ín ni xi tsjáná a̱skahan.
\p
\v 23 Nginku̱n Nti̱a̱ná bꞌa̱ tíxinnu̱u: Nkꞌie nga najmi ngjisenu̱u nanki Corinto̱, najmi ngjia a̱tꞌaha̱ najmi mjena tsjanu̱u kju̱a̱ba. Kataya tsa najmi kju̱axi̱ ni xi tíxian.
\v 24 Najmi tínꞌe kju̱a̱ꞌyúhu̱n ri̱ xi nkú tsꞌín sꞌe̱jinnu̱u Nti̱a̱ná, a̱tꞌaha̱ ja ndjá tincho. Tu̱ sa ní tíbisinko̱i̱hi̱ tu̱ xi sꞌe̱he̱nu̱u kju̱a̱tsjo.
\c 2
\nb
\v 1 Kui nga bꞌa̱ kixihinna nga najmi kfínsenu̱u, tu̱ xi najmi kju̱a̱ba kꞌuejñájihi̱nnu̱u.
\v 2 A̱tꞌaha̱ tsa tsjanu̱u kju̱a̱ba, ¿yá xi tsꞌi̱ín nga kꞌúé tsjo tsjona? ¿A najmi nku tutuhú jun xi kitsjanu̱u kju̱a̱ba nꞌo̱o nga kꞌúé tsjo tsjona?
\p
\v 3 Kui nga kitsꞌinntúhu̱nu̱u tu̱ xi najmi sa̱kúhuna kju̱a̱ba nkꞌie nga ku̱i̱chusehe̱nu̱u. A̱tꞌaha̱ jun xi tjíhin nga kꞌu̱a̱i̱nú kju̱a̱tsjo. Ko̱ behe̱ kꞌan nga kju̱a̱tsjona̱, kui xi ta̱ kju̱a̱tsjonu̱u.
\v 4 A̱tꞌaha̱ ni xi yꞌetꞌánu̱u nkꞌie nga kitsꞌinntúnu̱u, bꞌa̱ tsꞌín yꞌetꞌá a̱tꞌaha̱ tu̱ xí bahá tjíhi̱n ani̱ma̱na̱ ko̱ tu̱ xí nusihín tjíyaha̱ kui chu̱bo̱ nga santaha i̱xí kikjíi̱nntaná. Najmi kitsꞌinntúnu̱u tsa tu̱ xi kꞌúé babaha̱nu̱u. Kitsꞌinntú nínu̱u tu̱ xi cha̱hanu nga tu̱ xí tjohóna jun.
\s Bꞌi̱ tsꞌín kitsúya Pablo̱ mí kju̱a̱ha nga tjíhin nga nꞌe̱ndyjatꞌa̱ha̱ ra̱ nda̱ xi najmi nda kitsꞌíu̱n
\p
\v 5 Tsa tjín xi kitsꞌín nga kikꞌie babana, najmi tu̱ nku an xi bꞌa̱ kitsꞌínna. Nkꞌie nga chasehe̱ ra̱á, ko̱ ní jun bꞌa̱ ta̱ kitsꞌínnu̱u. Nkꞌie nga chasehe̱ ra̱á tíxian, bꞌa̱ tíxian tu̱ xi najmi kꞌu̱a̱tihi̱ ra̱ ni xi tíxian.
\v 6 Nkjin maha xi tjín a̱jinnu̱u xi ja kitsꞌínkꞌíéchjí nda̱ xi kitsꞌínkꞌíé babana. Najmi ta̱ chúkju̱a̱ha̱ ra̱.
\v 7 Tu̱ sahá nꞌe̱ndyjatꞌoho̱o ndo̱ ko̱ tjon ngaꞌyúhu̱un tu̱ xi najmi kju̱a̱boo̱ tsꞌi̱ínkjetꞌaha̱ ra̱ kꞌun.
\v 8 Kui nga tíbankihi̱nu̱u nga ta̱kúchji ngáha̱ ru̱u ndo̱ nga tjonu̱u.
\p
\v 9 ¿Á kitsꞌinntúhu̱nu̱u? Kitsꞌinntúnu̱u tu̱ xi skuehena tsa ku̱i̱núꞌyáꞌénnú.
\v 10 Xi nꞌe̱ndyjatꞌoho̱o ko̱ ta̱ an tsꞌinndyjatꞌaha̱. Tsa ni xi tjíhin nga nꞌe̱ndyjatꞌa nku ni, ja kitsꞌinndyjatꞌa. Bꞌa̱ kitsꞌian ngandanu̱u nginku̱n Cristo̱,
\v 11 tu̱ xi najmi tjín xi nkú tsꞌín tsungijihin yjoho̱ nda̱nindoo̱. A̱tꞌaha̱ ja yaá xi nkú tsꞌín chꞌon tsꞌín tjíyaha̱.
\s Bꞌi̱ tsꞌín kitsúya Pablo̱ mí kju̱a̱ha nga najmi tsꞌandayaha̱ ra̱ nkꞌie nga ngji nanki Troa̱
\p
\v 12 Nkꞌie nga tsichukꞌieni̱jmíá nanki Troa̱ én nda tsuhu̱ Cristo̱, ndaha tsa kitsjántena Nda̱ Nti̱a̱ná nga kꞌueni̱jmíá yo̱,
\v 13 tu̱nga najmi kisꞌeya tsjo tsjohó ra̱ ani̱ma̱na̱, a̱tꞌaha̱ najmi kisakúna nda̱ ntsꞌeé Tito̱ yo̱. Kui nga “ja tífihina”, kixihi̱n ra̱ xu̱ta̱ xi tjín yo̱ ko̱ ngjia a̱nte Macedoni̱a̱.
\s Bꞌi̱ tsꞌín kitsúya Pablo̱ nga Nti̱a̱ná kitsꞌínchjéhe̱n nga ngjindjuko̱ én nda tsuhu̱ Cristo̱
\p
\v 14 Mábꞌa̱chjíhi̱ ra̱ Nti̱a̱ná xi tsꞌín nga tehe̱nte nꞌe ngana̱ko̱i̱ Cristo̱ Jesu ko̱ nga ji̱n títsꞌínchjénni̱ nga tíbꞌéjña chji éhe̱n. Kui ée̱n xi nkú joyaha ni xi sinjne̱ xi tífꞌánta tu̱ má xi tje̱hén ni.
\v 15 Ji̱n xi nkú joyaha nta̱ha̱ chje̱ sinjne̱ xi Cristo̱ tsꞌínkjasꞌehe̱n Nti̱a̱ná, xi tífꞌánta a̱jihi̱n xi tíbꞌanki ko̱ a̱jihi̱n xi tíndyja.
\v 16 Xi tíndyjoo̱ jne̱ ngabaya tífꞌántaha̱ ji̱n ko̱ kui nto̱ títsꞌínkꞌiehe̱n. Tu̱nga jne̱ kju̱a̱tíkꞌuhún tífꞌántaha̱ ji̱n xi tíbꞌanki ko̱ títsꞌínkꞌíéntu tíkꞌuhu̱n nto̱. ¿Yá xi ka̱maha̱ tsꞌi̱ín xá xuꞌbi̱?
\v 17 Ji̱n najmi bꞌa̱ tínꞌei̱ xi nkú i̱ncha tsꞌín xi tíbatéña éhe̱n Nti̱a̱ná tu̱ xi sa̱kúhu̱ ra̱ ni. Ngayjehe̱ ní ani̱ma̱ni̱ bꞌeni̱jmíi̱ Cristo̱. Bꞌa̱ nꞌei̱ nginku̱n Nti̱a̱ná xi kitsjá xáni̱.
\c 3
\s Bꞌi̱ tsꞌín yꞌéjña chji Pablo̱ mí nihi xi yꞌaha̱ ni xi yꞌénda Nti̱a̱ná nga tjuhun ko̱ ni tse̱tse̱ xi yꞌénda ndꞌa̱i̱
\p
\v 1 Nkꞌie nga bꞌa̱ tíbixíi̱n, ¿a ji̱hín nda tsꞌín tíchubantjái̱ yjoni̱? ¿A ra̱ machjéhénni̱ xi nkúhu xu̱ta̱ xi kjꞌa̱í nku xu̱ju̱n xi nda tsꞌín ku̱i̱nchja̱ntjaini̱ tu̱ xi jun nꞌe̱kjáíhi̱nni̱? ¿Ko̱ a ra̱ machjéhénni̱ tsa jun nꞌe̱ndo nku xu̱ju̱n tu̱ xi tsꞌi̱ínkjáíhi̱nni̱ xu̱ta̱ xingisoo̱?
\v 2 Jun ní xu̱ju̱n xi nda ncha̱ntjaini̱, kui xi yꞌéjñajinni̱ Cristo̱. Be ko̱ tsꞌínya ngayjee̱ xu̱ta̱,
\v 3 a̱tꞌaha̱ ya chji chjihi̱ nga jun xi xu̱ju̱n xi kitsꞌínntu Cristo̱ xi ji̱n kinꞌekjasꞌei̱n. Najmi kinꞌentú xi nkú tsꞌín nꞌentú xu̱ju̱n. Espiri̱tu̱hu̱ ní Nti̱a̱ná xi tíjña tíkꞌuu̱n kinꞌentúko̱ho. Ko̱ najmi ndji̱o̱ kisꞌetꞌa ée̱n. A̱jin níná xi xu̱ta̱há kisꞌetꞌa.
\p
\v 4 Cristo̱ títsꞌín nga ma kꞌui̱n nga bꞌa̱ ku̱i̱xíi̱n nga bꞌa̱ tjín ni xi tíbixíi̱n nginku̱n Nti̱a̱ná.
\v 5 Najmi tjínni̱ ngaꞌyún kuenta̱ tsꞌa̱ji̱n su̱ba̱i̱, tsa bꞌa̱ ku̱i̱xíi̱n nga tsꞌa̱ji̱n ni xi mani̱ nꞌei̱. Nti̱a̱ níná tsjáni̱ ngaꞌyún nga nꞌe̱i̱ ni xi nꞌei̱.
\v 6 Kui xi yꞌéndani̱ tu̱ xi ka̱ma nꞌe̱xájihi̱n ri̱ ni tse̱tse̱ xi Nti̱a̱ná yꞌénda nga nda tsꞌi̱ínko̱ho̱ xu̱ta̱ xi tsꞌe̱. Ni xi tse̱tse̱, najmi nku kju̱a̱téxuma xi tjítꞌa niu̱. Ni xi títsꞌín ní Espiri̱tu̱hu̱ Nti̱a̱ná niu̱. A̱tꞌaha̱ ngabaya fiko̱ná kju̱a̱téxuma xi kisꞌetꞌoo̱, tu̱nga Espiri̱tu̱hu̱ Nti̱a̱ná tsꞌínkꞌíéntu tíkꞌunná bi.
\p
\v 7 Kisꞌehe̱ kju̱a̱chánka xá xi kisꞌehe̱ kju̱a̱téxuma xi kisꞌetꞌa ndji̱o̱ nga santaha xu̱ta̱ Israel xi kisꞌe nkꞌie najmi kama tsaseꞌa Moise tu̱ nga̱tꞌaha̱ ku̱a̱chánka xi tíbatꞌaijín a̱nkjín, ndaha tsa najmi tse kamaha̱ nga tsatꞌai. Tsa kju̱a̱téxuma xi kisꞌehe̱ xá nga tsꞌi̱ínnijéhe̱ ra̱ xu̱ta̱ nga tje̱he̱n ngabaya, tsa kui xi bꞌa̱ nkjún tsꞌín kisꞌehe̱ kju̱a̱chánka,
\v 8 ¿a najmi ꞌyúhún nkjún tsꞌín tjín saha̱ kju̱a̱chánka ni xi tsꞌín Espiri̱tu̱?
\p
\v 9 Tsa kisꞌehe̱ kju̱a̱chánka xáha̱ kju̱a̱téxuma xi tsꞌínnijéhe̱ xu̱ta̱, ¿a najmi ꞌyúhún tjín saha̱ kju̱a̱chánka xáha̱ én nda tsuhu̱ Nti̱a̱ná xi tsꞌín nga na̱xu̱ tíma xu̱ta̱ nginku̱n Nti̱a̱ná?
\v 10 A̱tꞌaha̱ kju̱a̱chánka xi kisꞌejña nkꞌie ja kindyja. Bꞌa̱ tsꞌín mankjinná nga chꞌachu̱ba̱ka̱á kju̱a̱chánka xi ꞌyún chánka sa xi tíjña ndꞌa̱i̱.
\v 11 Tsa kisꞌehe̱ kju̱a̱chánka ni xi najmi tse kamaha̱ nga tsatꞌai, ¿a najmi ꞌyúhún tjín saha̱ kju̱a̱chánka ni xi najmi maha̱ feya?
\p
\v 12 A̱tꞌaha̱ yai̱ nga bꞌa̱ tjín ni xi sꞌejinni̱, kui nga najmi tjín ni xi títsꞌínkasínꞌyúhu̱nni̱.
\v 13 Najmi bꞌa̱ nꞌei̱ xi nkú kitsꞌín Moise. Kui xi najyun yꞌéꞌmako̱ho a̱nkjín tu̱ xi najmi sku̱e̱he xu̱ta̱ Israel ndꞌíhi̱ kju̱a̱chánka xuꞌbo̱, kju̱a̱chánka xi najmi tse kamaha̱ nga tsatꞌai.
\v 14 Tu̱nga kisꞌe jyuhún kju̱a̱nkjintakꞌuhu̱n xu̱ta̱ xuꞌbo̱. Ko̱ santaha ndꞌa̱i̱, nkꞌie nga i̱ncha tsꞌínya ni xi yꞌéndako̱ho̱ Nti̱a̱ná nkꞌie, bꞌa̱ ma tsa ta̱ kuihi najyuu̱n bꞌéꞌma kju̱a̱nkjintakꞌuhu̱n. Najmi kje̱ chjuxíhi̱n najyun xi nkuhú Cristo̱ maha̱ kjexín.
\v 15 Santaha ni̱stjin ndꞌa̱i̱, nkꞌie nga i̱ncha tsꞌínya ni xi yꞌétꞌa Moise, kjiꞌma sa kju̱a̱nkjinkꞌuhu̱n.
\p
\v 16 Tu̱nga nkꞌie nga sꞌejihi̱n xu̱ta̱ Nda̱ Nti̱a̱ná, chjuxíhi̱n najyuu̱n.
\v 17 A̱tꞌaha̱ nkuhú Nda̱ Nti̱a̱ná ko̱ Espiri̱tu̱, ko̱ má nga tíjña Espiri̱tu̱hu̱ Nda̱ Nti̱a̱ná nda̱íhi̱ yjoho̱ xu̱ta̱.
\v 18 Kui bꞌa̱ maha, ngatenteé najmi ta̱ tjíꞌmaha a̱nkjíán. Xi nkú ní tsꞌín ma chjiya sénni̱stjinná nku chu̱tsín, bꞌa̱ tsꞌín bakuchjáá kju̱a̱chánkaha̱ Nda̱ Nti̱a̱ná. Tíbichú maá xi nkú tjín ko̱ xki̱ ni̱stjin ꞌyún tísakú saná kju̱a̱chánkaha̱. Bꞌa̱ títsꞌínko̱ná Nda̱ Nti̱a̱ná xi Espiri̱tu̱.
\c 4
\s Bꞌi̱ tsꞌín kitsúya Pablo̱ xi nkú tsꞌín yꞌéni̱jmí
\p
\v 1 Kui nga najmi nꞌekjehe̱ ri̱ takꞌui̱n, a̱tꞌaha̱ Nti̱a̱ná tsase ni̱ma̱ni̱ nga kitsjáni̱ xá xuꞌbi̱.
\v 2 Najmi tjín ni xi kinꞌei̱ xi suba mani̱. Najmi chumi nihi nꞌeꞌmái̱. Najmi kju̱a̱maña̱ tínꞌechjéi̱n ko̱ najmi tínꞌekꞌóntjaiyai̱ éhe̱n Nti̱a̱ná. Tíbixínya chji chji níi̱ éhe̱n Nti̱a̱ná xi na̱xu̱ tjín. Bꞌa̱ tsꞌín nginku̱n Nti̱a̱ná bakuchjíhi̱ ri̱ nkú kꞌui̱n ngayjee̱ xu̱ta̱ xi je tjíntuyá kju̱a̱nkjintakꞌuhu̱n.
\v 3 Tsa bꞌa̱ ma tsa tíjña ꞌma sa én nda tsuhu̱ Nti̱a̱ná xi tíbꞌeni̱jmíi̱, tu̱ a̱jihi̱n ní xu̱ta̱ xi ndyja̱ tíjña ꞌma.
\p
\v 4 A̱tꞌaha̱ nti̱a̱ xi batéxumaha̱ a̱sunntei̱ kitsꞌín jyun kju̱a̱nkjintakꞌuhu̱n xu̱ta̱ xi najmi sꞌejihi̱n Nti̱a̱ná tu̱ xi najmi i̱ncha sku̱e̱he ndꞌíu̱, tsa ka̱mankjihi̱n én nda tsu xi títsuya kju̱a̱chánkaha̱ Cristo̱. A̱tꞌaha̱ nkꞌie nga chasehe̱é Cristo̱, Nti̱a̱ná yaá.
\v 5 Najmi ji̱n tíbꞌeni̱jmíyaha̱ni̱ yjoni̱. Tíbꞌeni̱jmí níi̱ nga Jesucristo̱ xi Nda̱ Nti̱a̱ná maha. Ngandanu̱u tínꞌei̱ ni xi tínꞌei̱ a̱tꞌaha̱ tíjñajinni̱ kju̱a̱tjoho̱ Jesu.
\v 6 A̱tꞌaha̱ Nti̱a̱ná xi kitsjá kju̱a̱ nga ku̱a̱tꞌai ndꞌíu̱ má jyuu̱n, kui xi ta̱ kitsꞌínkatꞌaijínná tu̱ xi bꞌa̱ tsꞌín cha̱haná kju̱a̱chánkaha̱ Nti̱a̱ná xi tíbatꞌai a̱nkjín Jesucristo̱.
\s Bꞌi̱ tsꞌín kitsúya Pablo̱ ni xi jꞌajin
\p
\v 7 Kikꞌa̱i̱ni̱ kju̱a̱nchi̱ná xuꞌbi̱, tu̱nga bꞌa̱há joya ji̱n xi nkú joyaha ndji̱í ninte xi má nga tíjñaya kju̱a̱nchi̱nóo̱. Bꞌa̱ kama tu̱ xi sꞌe̱jña chjihi nga Nti̱a̱ná tsꞌe̱ ngaꞌyún chánkoo̱ ko̱ najmi ji̱n tsꞌa̱ji̱n.
\v 8 Nkjin tíkjá maha kju̱a̱ni̱ma̱ xi tíyai̱, tu̱nga tísakú ni̱yáháni̱. Kjinta̱ha̱ni̱, tu̱nga najmi tífetꞌahá ra̱ kꞌui̱n.
\v 9 Tjín xi yjanki unkieni̱, tu̱nga najmi títsꞌín nga maháni̱ Nti̱a̱ná. Tjín xi ꞌyún títsꞌínꞌunni̱, tu̱nga najmi títsꞌíhin nga tíbayai̱.
\p
\v 10 Tu̱ má xi tje̱hén ni nga tíbankíi̱n, ta̱ kuihi kju̱a̱ni̱ma̱ tibitjajíi̱n xi nkúhu̱ xi jꞌajin Jesu nga kꞌien, tu̱ xi bꞌa̱ tsꞌín ta̱ sa̱kúchjihi a̱jinni̱ nga Jesu xi tíjña tíkꞌun.
\v 11 A̱tꞌaha̱ ji̱n xi tintsu̱ba̱ tíkꞌui̱n, tehe̱nte tintsu̱ba̱jii̱n ngabayoo̱ tu̱ nga̱tꞌaha̱ Jesu, tu̱ xi bꞌa̱ tsꞌín ta̱ sa̱kúchjihi nga tíjña tíkꞌun Jesu a̱jihi̱n yjoninteni̱, yjoninte xi tjíhin nga ku̱a̱yá ndyjun nkini̱.
\v 12 Bꞌa̱ tsꞌín ji̱n xi tíbayaha̱ni̱ ko̱ jun tíbintsu̱ba̱ tíkꞌun.
\p
\v 13 Bꞌi̱ tsꞌín tjítꞌa éhe̱n Nti̱a̱ná: “Kisꞌejinna, kui nga kinchjahana.” Ko̱ ji̱n bꞌa̱ ta̱ tsꞌín tjíntuyáni̱. Ta̱ sꞌejinni̱, kui nga ta̱ chubaha̱ni̱.
\v 14 A̱tꞌaha̱ yaá nga Nti̱a̱ná xi kitsꞌínkjꞌáíya ngáha̱ ra̱ Nda̱ Nti̱a̱ná Jesu ngabayoo̱, kui xi ta̱ tsꞌi̱ínkjꞌáíyako̱ná Jesu ko̱ tsꞌi̱ínkincháná nginku̱n.
\v 15 Ngandanu̱u ngayjee̱ ni xuꞌbi̱, tu̱ xi nkjin xu̱ta̱ tsjáha̱ ra̱ mábꞌa̱chjíhi̱ Nti̱a̱ná tu̱ nga̱tꞌaha̱ kju̱a̱nda xi tíi̱ncha sakúhu̱. Bꞌa̱ tsꞌín tísꞌejña chjihi kju̱a̱chánkaha̱ Nti̱a̱ná.
\p
\v 16 Kui nga najmi nꞌekjehe̱ ri̱ takꞌui̱n. Ndaha tsa tífenki ngaꞌyúhu̱n yjoninteni̱, tu̱nga xki̱ ni̱stjihín tísakú ngaꞌyúhu̱n ani̱ma̱ni̱.
\v 17 I̱chí ko̱ kutjuhú fꞌa kju̱a̱ni̱ma̱ xi tíyaá ndꞌa̱i̱, tu̱nga kuihí niu̱ xi tsꞌi̱ín nga nku kju̱a̱chánka xi tíjña sín ko̱ xi nda tsꞌati sa sa̱kúná.
\v 18 Najmi ni xi tíyaá nꞌesihi̱ín. Ni xi najmi tíya nínáá kjinta̱ha̱ná. A̱tꞌaha̱ ni xi ma chji tu̱ tífahá, tu̱nga ni xi najmi ma chji sꞌejña sín.
\c 5
\s Bꞌi̱ tsꞌín tsakúya Pablo̱ nkꞌie nga yjoninte tse̱tse̱ chꞌa̱á
\p
\v 1 A̱tꞌaha̱ yjonintená, kui xi nkú joyaha nku niꞌya najyunte xi tintsu̱ba̱yaá e̱i̱ a̱sunntei̱. Ko̱ nkꞌie nga ku̱a̱tsún niꞌya najyuntee̱, yaá nga ndji̱o̱jmi ján chꞌa̱á nku niꞌya xi ꞌyún nda xi tsjáná Nti̱a̱ná, xi najmi xu̱ta̱ kitsꞌínnda ko̱ xi najmi maha̱ batsun.
\v 2 Un tímaná nkꞌie nga tintsu̱ba̱á e̱i̱. Mangimjená nꞌe̱kjáíhi̱ín niꞌya xi kꞌu̱a̱i̱ná ndji̱o̱jmi ján. Kui xi nkú joyaha tsa najyun tse̱tse̱ ka̱maná nga ndyja̱á.
\v 3 Bꞌa̱ tsꞌín ndaha tsa chjúxiná niꞌya najyunte xi kichꞌaá ndꞌa̱i̱, najmi kisti cha̱ná.
\p
\v 4 A̱tꞌaha̱ nkꞌie nga kichꞌa saá niꞌya najyunte xuꞌbi̱ xi yjonintená, xí fꞌáítseꞌuhúnná nga najmi ta̱ chúkju̱a̱haná. Nkꞌie nga najmi mjená chꞌa̱á yjoninte xi kichꞌaá ndꞌa̱i̱, najmi tsuhu̱ ra̱ tsa najmi mjená yjoninte. Ni xi mje nínáá, nga chꞌa̱á yjoninte tse̱tse̱ tu̱ xi bꞌa̱ tsꞌín ni xi tíjña tíkꞌuu̱n kꞌúéjñaha ngajoho̱ ni xi maha̱ ꞌme.
\v 5 Kui nga̱tꞌoo̱ kitsꞌínndahaná Nti̱a̱ná ko̱ kitsjáná Espiri̱tu̱hu̱, tu̱ xi cha̱ kixi̱hiná nga nꞌe̱kjáíhi̱ín ni xi tsjáná a̱skahan.
\p
\v 6 Kui nga tehe̱nte ndjá tinchahaná ko̱ yaá nkꞌie nga tintsu̱ba̱jin saá yjonintee̱, tintsu̱ba̱ tꞌaxíhi̱ín Nda̱ Nti̱a̱ná.
\v 7 Tinimaá tu̱ nga̱tꞌaha̱ xi sꞌejinná, najmi nga̱tꞌaha̱ ni xi tíyaá.
\v 8 Ndjá tinchaá ko̱ mangimjená nga tu̱ sahá kꞌúéjña tꞌaxíaán yjoninte xi kichꞌaá ndꞌa̱i̱ nga ku̱i̱ntsu̱ba̱ka̱á Nda̱ Nti̱a̱ná.
\p
\v 9 Kui nga tu̱ nkú mjehéná nga nꞌe̱é ni xi tsjoho̱ Nda̱ Nti̱a̱ná, tsa ni xi tintsu̱ba̱jin saá yjoninte xuꞌbi̱ ko̱ tsa ja kinꞌekjꞌáíyaá.
\v 10 A̱tꞌaha̱ ngatenteé tjíhin nga ku̱i̱cháá nginku̱n Cristo̱ nga ku̱a̱se̱he̱ ni xi kinꞌeé, tu̱ xi nꞌe̱kjáíhi̱n ra̱á ni xi kanéná nga nkúnkáá, ni xi kinꞌeé nga tintsu̱ba̱jián yjonintená e̱i̱ a̱sunntei̱, tsa nda ko̱ tsa najmi nda kinꞌeé.
\s Bꞌi̱ tsꞌín tsakúya Pablo̱ ni xi kitsꞌín Cristo̱ ngandaná
\p
\v 11 Kui bꞌa̱ maha, a̱tꞌaha̱ yankjúi̱n Nda̱ Nti̱a̱ná, kui nga tíꞌmiya sisihi̱n ri̱ xu̱ta̱ nga ta̱ sꞌe̱jihi̱n. Nti̱a̱ná be xi nkú tsꞌín tjíyani̱ ko̱ mjena nga ko̱ ta̱ jun xi nda ani̱ma̱nu̱u cho̱o xi nkú tsꞌín tjíyani̱.
\v 12 Najmi ta̱ tíchubantjáí ngáha̱ni̱ yjoni̱, tsa tu̱ xi jun nꞌe̱kjáíhi̱nni̱. Tu̱ sa ní tíꞌba̱i̱ntei̱ nga jun tsjo tímanu̱u ji̱n. Bꞌa̱ tsꞌín ka̱ma nꞌe̱kꞌóyaha̱ ru̱u xi chu̱ba̱ tsjohó maha̱ xi nkú tsꞌín tíya, xi̱ najmi nusihi̱n xi nkú tsꞌín tjíyaha̱.
\p
\v 13 A̱tꞌaha̱ tsa ji̱n xi luku̱i̱ tsu xu̱ta̱, luku̱ níi̱ a̱tꞌaha̱ xáha̱ Nti̱a̱ná tínꞌei̱. Tunga ngandanu̱u, kui nga nꞌesisihi̱nni̱ ni xi nꞌei̱.
\v 14 A̱tꞌaha̱ kju̱a̱tjoho̱ Cristo̱ tíjñajinni̱ ko̱ tíbatéxumani̱. Behe̱ takꞌui̱n nga nkuhú maha xi kꞌien ngandaha̱ ngatentee̱ xu̱ta̱, ko̱ kui nga kꞌiehen ngatentee̱ xu̱ta̱.
\v 15 Kꞌien Cristo̱ ngandaha̱ ngatentee̱ xu̱ta̱, tu̱ xi xi tjíntu tíkꞌuhun ja najmi ta̱ kuenta̱ tsꞌe̱ suba kꞌúéntu tíkꞌuhun. Kꞌúéntu ní tu̱ xi tsꞌi̱íhin ni xi tsjoho̱ Cristo̱. Kui xi kꞌien ngandaha̱ xu̱ta̱ ko̱ jꞌáíya ngáha̱ ra̱.
\p
\v 16 Kui nga najmi ta̱ chasehe̱ ri̱ xu̱ta̱ xi nkú tsꞌín basehe̱ xinkjín xu̱ta̱. Ndaha tsa nkꞌie bꞌa̱ ta̱ tsꞌín kichasei̱hi̱ Cristo̱, tu̱nga ndꞌa̱i̱ najmi bꞌa̱ ta̱ tsꞌín chasehe̱ ri̱.
\v 17 Kui nga xi nkuhú kamako̱ Cristo̱, kui xi xu̱ta̱ tse̱tse̱ ngáha. Ja jꞌa ni chóo̱. Ja jꞌai ni xi tse̱tse̱.
\p
\v 18 Ngayjee̱ ni xuꞌbi̱ Nti̱a̱ná nibáha̱ ra̱. Cristo̱ kitsꞌínchjén nga tsichukꞌún ngáha̱ ra̱á Nti̱a̱ná. Ko̱ ji̱n kitsjá xáni̱ nga kꞌúéni̱jmíi̱hi̱ xu̱ta̱ nga ja ma bichúkꞌun ngáha̱ ra̱.
\v 19 Tsuhu̱ ra̱ nii̱ nga Nti̱a̱ná kitsꞌínchjén Cristo̱ nga ka̱ma ku̱i̱chúkꞌun ngáha̱ ra̱ xu̱ta̱ xi tjín ngayjee̱ a̱sunntee̱, nga najmi tsꞌi̱ínsihi̱n jéhe̱. Ji̱n kitsjáni̱ nga kꞌúéni̱jmíi̱ nga ja ma bichúkꞌun ngáha̱ ra̱á Nti̱a̱ná.
\p
\v 20 Ji̱n xi yꞌéxáni̱ Cristo̱ nga ku̱i̱xínyai̱ éhe̱n. Kui nga xi nkúhu tsa Nti̱a̱ná tínchja̱ko̱nu̱u nkꞌie nga tíchubako̱i̱hi̱. Ngajoho̱ Cristo̱ bꞌa̱ tíꞌmii̱hi̱ nga tꞌendako̱o Nti̱a̱ná.
\v 21 Cristo̱ najmi kisꞌehe̱ ngatitsun, tu̱nga tsasehé ra̱ Nti̱a̱ná xi nkúhu tsa ngatitsun kisꞌehe̱. Ngandaná bꞌa̱ kitsꞌíhin Nti̱a̱ná, tu̱ xi tu̱ nga̱tꞌaha̱ Cristo̱ na̱xu̱ ka̱mahaná nginku̱n.
\c 6
\nb
\v 1 Kui nga tíbinchihi̱ ri̱ ji̱n xi tínꞌexátꞌai̱hi̱ Nti̱a̱ná nga najmi tu̱ to̱hón manu̱u kju̱a̱ndaha̱ Nti̱a̱ná.
\v 2 A̱tꞌaha̱ bꞌi̱ títsu éhe̱n Nti̱a̱ná:
\q Nda chu̱ba̱ tsasinñjúhu,
\q tsási̱nko̱ho ni̱stjin nga kitsꞌinkꞌankia xu̱ta̱.
\m Bꞌa̱ tíxinnu̱u nga ndꞌa̱i̱ ja kichꞌaá chu̱ba̱ha̱ Nti̱a̱ná. Ja tinchajián ni̱stjin nga títsꞌínkꞌanki xu̱ta̱.
\s Bꞌi̱ tsꞌín kitsúya Pablo̱ ni xi i̱ncha jꞌajin tu̱ nga̱tꞌaha̱ xáha̱
\p
\v 3 Ndaha nku najmi tínꞌendyjajii̱hi̱n tsa tu̱ xi ndyja̱ha. Bꞌa̱ tínꞌei̱ tu̱ xi najmi chꞌon tsꞌín chu̱bayanéhe xá xi tínꞌei̱.
\v 4 Tu̱ sa ní a̱jihi̱n ngayjee̱ ni xi nꞌei̱ bakúchji nga Nti̱a̱ná tínꞌexátꞌai̱hi̱. Tínꞌe chúkju̱a̱i̱ nkjin tíkjá kju̱a̱ꞌun ko̱ kju̱a̱ni̱ma̱ xi tíyai̱ ko̱ kju̱a̱ba xi tísakúni̱.
\v 5 Tísꞌeni̱, nu̱ba̱yá tínꞌekjasꞌenni̱, ko̱ tíma ñjakúneni̱ xu̱ta̱ nga tífi kontra̱ni̱. Xá ndjá tínꞌei̱, najmi tísuntuféi̱, ko̱ kjintíá tíyai̱.
\p
\v 6 Na̱xu̱ tíbankínko̱i̱ yjoni̱ ko̱ mankjinni̱ ni xi najmi chu̱ba̱ mankjiná. Tjínni̱ kju̱a̱tsenta ko̱ nꞌetjóíhi̱ xu̱ta̱. Tíjñajinni̱ Espiri̱tu̱hu̱ Nti̱a̱ná ko̱ tíjñajinni̱ kju̱a̱tjo xi nda.
\v 7 Én xi bꞌa̱ tjín tíchubai̱ ko̱ ngaꞌyúhu̱n Nti̱a̱ná tíjñajinni̱. Na̱xu̱ tinchai̱ nginku̱n Nti̱a̱ná, kui xi nꞌechjéi̱n nga binsinko̱i̱ yjoni̱.
\p
\v 8 Tjín nga yankjúnni̱ ko̱ tjín nga najmi yankjúnni̱. Tjín nga nda tsꞌín chubantjáíni̱ ko̱ tjín nga chꞌon tsꞌín chubantjáíni̱. Já tsankꞌá nꞌe mani̱, ndaha tsa én xi na̱xu̱ tíchubai̱.
\v 9 Xu̱ta̱ xi najmi chꞌa xi behe̱ nꞌe mani̱, ndaha tsa ya sisinni̱. Xu̱ta̱ xi ja tíꞌme nꞌe mani̱, ndaha tsa tintsu̱ba̱ tíkꞌun sai̱. Tíꞌba̱i̱ni̱ kju̱a̱ni̱ma̱, tu̱nga najmi tíbaya níi̱.
\v 10 Tintsu̱ba̱i̱ xi nkúhu tsa kju̱a̱ba tjínni̱, tu̱nga tehe̱ntehé tjín tsjo tsjoni̱. Tintsu̱ba̱i̱ xi nkúhu xu̱ta̱ xi xꞌa̱n, tu̱nga nkjihín maha xi ja kinꞌe nchi̱nái̱. Tintsu̱ba̱i̱ xi nkúhu xi najmi chumi nihi xi tjíhi̱n, tu̱nga tjíhínni̱ ni.
\p
\v 11 Jun xu̱ta̱ Corinto̱, ji̱n ja kuachubako̱ kixi̱ kixi̱hi̱. Tíꞌmiyai̱hi̱ ni xi tíjñajin ani̱ma̱ni̱.
\v 12 Mje níni̱ jun, tu̱nga jun najmi bꞌa̱ tsꞌín mjenu̱u ji̱n.
\v 13 Kui nga tínchjako̱ho̱nu̱u xi nkúhu tsa ntína̱ jun. Bꞌa̱ ta̱ nꞌo̱o xi nkú nga tínꞌei̱. Bꞌa̱ ta̱ tsꞌín ta̱kúni̱ ni xi tíjñajin ani̱ma̱nu̱u.
\s Bꞌi̱ tsꞌín kitsúya Pablo̱ nga najmi tjíhin nga nkuhú tsꞌi̱ín mako̱ yjoho̱ xi sꞌejihi̱n Nti̱a̱ná ko̱ xi najmi sꞌejihi̱n
\p
\v 14 Najmi tu̱ nkuhú nꞌe mako̱o yjonu̱u xu̱ta̱ xi najmi sꞌejihi̱n Nti̱a̱ná nga tsꞌi̱ínko̱nu̱u ni xi tsꞌe̱. A̱tꞌaha̱, ¿a nkuhú mako̱ xinkjín ni xi jee̱ ko̱ ni xi chꞌonkꞌuu̱n? ¿A mahá má ndzjee̱n ko̱ má jyuu̱n bꞌatjijihi̱n xinkjín?
\v 15 ¿A mahá nda nchja̱ko̱ Cristo̱ nda̱nindoo̱? ¿Mí ni xi nkuhú i̱ncha yꞌa xi sꞌejihi̱n Nti̱a̱ná ko̱ xi najmi sꞌejihi̱n?
\p
\v 16 ¿A ka̱mahá ni̱nku̱hu̱ Nti̱a̱ná tsꞌi̱ínkjáíhi̱n nti̱a̱ xi ntsja xu̱ta̱ tsꞌínnda? A̱tꞌaha̱ ñá xi ni̱nku̱hu̱ Nti̱a̱ná xi tíjña tíkꞌuu̱n. Bꞌi̱ kitsú Nti̱a̱ná nkꞌie:
\q Kúáte̱jñajihi̱n ko̱ kjuatsúꞌba̱jihi̱n xu̱ta̱ xuꞌbo̱.
\q An xi ka̱ma Nti̱a̱ha̱ ko̱ kui xi ka̱ma xu̱ta̱na̱.
\m
\v 17 Kui nga bꞌa̱ ta̱ kitsú saha Nti̱a̱ná:
\q Ti̱tjujíúhu̱n xu̱to̱, tankín tꞌaxíún.
\q Najmi tu̱ nꞌeko̱o ni xi si nginkán,
\q ko̱ bꞌa̱ tsꞌín an nda tsꞌín tsꞌinkjáínnu̱u.
\q
\v 18 An xi ka̱ma Na̱ꞌminu̱u ko̱ jun xi ka̱mo ntína̱.
\q Bꞌa̱ títsu Nti̱a̱ná xi tjíhi̱n ngaꞌyún.
\c 7
\p
\v 1 Kui bꞌa̱ maha, jun xi tjona, ñá tsꞌa̱ñáá ni xi kitsúya títjun Nti̱a̱ná nga tsjáha̱ xu̱ta̱ xi tsꞌe̱. Kui nga nꞌe̱ jehená yjoná nginku̱n Nti̱a̱ná nga nꞌe̱ tꞌaxíaán ngayjee̱ ni xi tsꞌínsi yjonintená ko̱ ani̱ma̱ná. Katuma je kikjián nginku̱n Nti̱a̱ná nkꞌie nga chja̱nkjáán.
\s Bꞌi̱ tsꞌín kitsúya Pablo̱ nga tsjo tímaha̱ ni xi nda tsꞌín jꞌajin xu̱ta̱ ni̱nku̱ Corinto̱
\p
\v 2 Tjennteni̱ a̱jin ani̱ma̱nu̱u. Ndaha nku najmi chꞌon kinꞌei̱hi̱. Ndaha nku najmi kinꞌeꞌui̱hi̱n. Ndaha nku najmi kichꞌana̱cha̱i̱hi̱.
\v 3 Najmi bꞌa̱ tíxinnu̱u tsa tu̱ xi sꞌe̱nta̱ha̱nu̱u. A̱tꞌaha̱ xi nkú nga ja kixinnu̱u, jun xi tintsu̱ba̱jiun ani̱ma̱ni̱, tu̱ xi nkuhú chꞌa̱haná xinki̱á ndaha tsa ku̱i̱ntsu̱ba̱á ko̱ ndaha tsa ku̱a̱yáá.
\v 4 Ma kꞌan nchjako̱ kixi̱ kixi̱nu̱u ko̱ tsjo mana jun. A̱jihi̱n ngayjee̱ kju̱a̱ni̱ma̱ xi tíyai̱, ꞌyún tísakúna ngaꞌyún ko̱ títsejíhinna kju̱a̱tsjo.
\p
\v 5 Nkꞌie nga jái̱ a̱nte Macedoni̱a̱, ndaha̱chí najmi kinꞌekjꞌáíyai̱. Tu̱ sa ní kju̱a̱sti kisakúni̱ tu̱ má xi tje̱hén ni. I̱ncha kikjánko̱ xinkjín xu̱ta̱ xi tjíntundáíni̱ ko̱ tsinkjunyai̱.
\v 6 Tu̱nga Nti̱a̱ná xi tsjá ngaꞌyúhu̱n xu̱ta̱ xi tjíhi̱n kju̱a̱ba, kui xi kitsjá ngaꞌyúnni̱ nga kitsꞌín nibáseni̱ Tito̱.
\v 7 Najmi tu̱ nku nga kiyai̱ Tito̱ nga kisakú ngaꞌyúnni̱. Ta̱ kisakú ngaꞌyún níni̱ nga kitsúyani̱ xi nkú tsꞌín kisakú ngaꞌyúhu̱n a̱jinnu̱u. Kitsúyani̱ nga ꞌyún mjenu̱u cha̱ ngáha̱ni̱ ko̱ nga nusin tjíntuyánu̱u ko̱ nga kjinta̱ha̱nu̱u an. Kui niu̱ xi kitsꞌín nga ꞌyún kisꞌe sana kju̱a̱tsjo.
\p
\v 8 Ndaha tsa kitsꞌínkꞌíé babanu̱u xu̱ju̱n xi kitsꞌinkjínu̱u, tu̱nga najmi ta̱ kjinta̱hana ndꞌa̱i̱. Kju̱axi̱ nga kisꞌenta̱na nga tjuhun, a̱tꞌaha̱ kamankjinna nga kikꞌie babanu̱u kutju nga̱tꞌaha̱ xu̱ju̱n xi kitsꞌinkjínu̱u.
\v 9 Tu̱nga ndꞌa̱i̱ tsjo tímana, najmi tu̱ nga̱tꞌaha̱ nga kikꞌie babanu̱u, tu̱ nga̱tꞌaha̱ ní nga kui kju̱a̱boo̱ kitsꞌín nga tsankinchjꞌa ngáha̱ ru̱u ani̱ma̱nu̱u. Kikꞌie babanu̱u xi nkú tsꞌín sasíhi̱n Nti̱a̱ná. Kui nga najmi chumi ni chꞌonkꞌuhun xi kinꞌehe̱ ri̱.
\v 10 A̱tꞌaha̱ kju̱a̱ba xi nibáha̱ ra̱ Nti̱a̱ná tsꞌín nga bankíchjꞌaha̱ ra̱á ani̱ma̱ná. Kui niu̱ xi tsꞌín nga bꞌankiá. Kui nga najmi tjín xi nkú tsꞌín un ka̱maha takꞌaán nga kui kju̱a̱boo̱ ni̱banehená. Bꞌa̱ tíxian a̱tꞌaha̱ kju̱a̱ba xi tsjáná a̱sunntee̱, kui xi tsꞌínkꞌienná.
\p
\v 11 Cha̱so̱o ni xi kitsꞌínko̱nu̱u kju̱a̱ba xi kitsꞌín nibánu̱u Nti̱a̱ná. Tu̱ xí kjꞌa̱íhí tsꞌín kisꞌeyanu̱u. Nku tutuhú nga bꞌa̱ kamanu̱u, kiyo nga najmi chumi nihi tje̱nna. Santaha kichubantjáínú. Kama stinu̱u ko̱ tsinkjun nga̱tꞌaha̱ ni xi ka̱ma kai. Kama mjenu̱u nga cha̱nú ko̱ kikꞌo̱ho̱ xi nkú tsꞌín tje̱he̱n ra̱ nda̱ xi chꞌon kitsꞌíu̱n. Nkꞌie nga bꞌi̱ nkjún kama, tsakuchjíú nga najmi ko̱ jun yꞌaha̱nu̱u ni chꞌon tjín xi kamoo̱.
\v 12 Kui nga ndaha tsa kitsꞌinkjíhi̱nu̱u xu̱ju̱n xuꞌbo̱, najmi bꞌa̱ kitsꞌian tu̱ nga̱tꞌaha̱ xi chꞌon kitsꞌín ko̱ ta̱ ndaha nga̱tꞌaha̱ xi chꞌon kinꞌehe̱. Bꞌa̱ ní kitsꞌian tu̱ xi cha̱ha nginku̱n Nti̱a̱ná nga kjinta̱ha̱nu̱u ji̱n.
\v 13 Ni xi kamoo̱ kitsjá ngaꞌyúnni̱.
\p Ko̱ najmi tu̱ nku ni xuꞌbi̱ xi kitsjá ngaꞌyúnni̱. Ta̱ tu̱ xí tsjo ní kamani̱ nga kiyai̱ nga tu̱ xí tsjohó tjíhi̱n Tito̱ a̱tꞌaha̱ kisakú ngaꞌyúhu̱n nga yꞌejñajinnu̱u.
\v 14 Ja ní bꞌa̱ kixihi̱n Tito̱ nga tsjo mana jun, ko̱ bꞌa̱ tjín ni xi kixian. Najmi tíya tsankꞌána. Xi nkú tsꞌín kju̱axi̱ ngayjee̱ ni xi tsixíi̱hi̱n, bꞌa̱ ta̱ tsꞌín kju̱axi̱ ni xi kikꞌihi̱n Tito̱ nga tsjo mani̱ jun.
\v 15 Tito̱ ꞌyún tjo tsꞌatihi̱ jun ndꞌa̱i̱, a̱tꞌaha̱ fꞌáítsjehe̱n xi nkú tsꞌín ngatentoo̱ kinuꞌyáꞌóho̱on ko̱ xi nkú tsꞌín nda kinꞌekjóho̱on ko̱ kiyankjún.
\v 16 Tsjo mana, a̱tꞌaha̱ be nga ma ma ꞌyún takꞌunnu̱u.
\c 8
\s Bꞌi̱ tsꞌín kitsúya Pablo̱ nga tjíhin nga ka̱makúhu̱ to̱on chje̱ xu̱ta̱ ni̱nku̱ xi tjín a̱nte Judea̱
\p
\v 1 Ko̱ ndꞌa̱i̱, já ntsꞌe, mjeni̱ nga cho̱o xi nkú tsꞌín Nti̱a̱ná títsjáha̱ kju̱a̱ndaha̱ xu̱ta̱ ni̱nku̱ xi tjín a̱nte Macedoni̱a̱.
\v 2 Ndaha tsa ndjá kju̱a̱ni̱ma̱ xi tíi̱ncha satéjin nga tíchjutꞌayákꞌun, tu̱nga tsjohó tjíntuhu̱. Ko̱ ndaha tsa xꞌa̱n ṉkjún, tu̱nga i̱ncha kitsꞌínsuhún to̱on chje̱ xi nkú joyaha tsa nchi̱ná.
\p
\v 3 Be nga ngayjehe kꞌun i̱ncha kitsjá. Xi nkú tjín kamaha̱ kitsjá, ko̱ santaha yꞌésun saha̱ nga kitsjá.
\v 4 ꞌYún tsankini̱ nga kjꞌu̱a̱i̱ntei̱hi̱ nga sa̱kútꞌaha̱ kju̱a̱tsjo xuꞌbi̱ tu̱ xi ku̱a̱si̱nko̱ho xu̱ta̱ xi sꞌejihi̱n Nti̱a̱ná xi tjíntu a̱nte Judea̱.
\v 5 Ko̱ najmi tu̱ nku ni xi tsixíi̱n nga tsꞌi̱ín i̱ncha kitsꞌín. A̱tꞌaha̱ títjun títjun i̱ncha kitsjáha̱ yjoho̱ nga i̱ncha tsjénnki Nti̱a̱ná, ko̱ ta̱ i̱ncha kitsjáha̱ yjoho̱ nga ka̱mako̱ni̱ xi nkú tsꞌín mjehe̱ Nti̱a̱ná.
\p
\v 6 Kui nga tsinchii̱hi̱ ri̱ Tito̱ nga tsꞌi̱ínndju̱úhu xá nda xi kikꞌatutsꞌi̱hi̱n ra̱ a̱jinnu̱u, nga kꞌu̱énda chje̱ nda xi tínꞌesún.
\v 7 ꞌYún nda nꞌo ngayjee̱ ni xi nꞌo. Sꞌejinnu̱u Nti̱a̱ná. Chubani̱jmíyahanu ni xi tsꞌe̱ Nti̱a̱ná. Mankjinnu̱u éhe̱n Nti̱a̱ná. Tjíndanu̱u yjonu̱u nga ku̱i̱si̱nko̱o xu̱ta̱ xi kjꞌa̱í. Tjonu̱u ji̱n. Kui nga xi nkú tsꞌín tehe̱nte nda nꞌehenu ni xi nꞌo, bꞌa̱ ta̱ tsꞌín ndꞌa̱i̱ nda nꞌe̱sún ngó to̱on chje̱ xuꞌbi̱.
\p
\v 8 Najmi bꞌa̱ tíxian tsa tjíhi̱n kju̱a̱ꞌyún nga bꞌa̱ ta̱ nꞌo̱o. Ni xi mje nína, nga cho̱o ni nda xi tíi̱ncha tsꞌín já ntsꞌeé xi kꞌoo̱ tu̱ xi bꞌa̱ ta̱ tsꞌín ku̱a̱kúchjihinu nga ta̱ ngayjee̱ ani̱ma̱nu̱u tínibáha kju̱a̱tjonu̱u.
\v 9 Ja yo kju̱a̱nda xi yꞌa Nda̱ Nti̱a̱ná Jesucristo̱ nga jꞌai, nga ndaha tsa tu̱ xí nkꞌahá tje̱n tu̱nga tsꞌasje xꞌa̱hán yjoho̱ ngandanu̱u, tu̱ xi a̱jihi̱n kju̱a̱xꞌa̱n xi kisꞌehe̱ ra̱ kisakúhu̱nu̱u kju̱a̱nchi̱ná.
\p
\v 10 Tsjanu̱u nku kju̱a̱téxuma a̱tꞌaha̱ kjennu̱u ni̱yá nga cho̱o kui nii̱. Nkꞌie nú jun tjun kama mjenu̱u nga nꞌe̱sún to̱on chje̱ ko̱ jun tjun kinꞌesún.
\v 11 Kui nga nꞌe̱ndju̱úhunu ndꞌa̱i̱ ni xi kichꞌatutsꞌi̱hi̱nru̱u. Xi nkú tsꞌín ngayjehe kꞌun kama mjenu̱u nga bꞌa̱ nꞌo̱o, bꞌa̱ tsꞌín ngayjehe kꞌun xi nkú tsꞌín tísakúnu̱u tjon niu̱ ndꞌa̱i̱.
\v 12 A̱tꞌaha̱ tsa ngayjee̱ ani̱ma̱ná tíꞌba̱á, ko̱ tsa tíꞌba̱á xi nkú tjín tísakúná, Nti̱a̱ná tsꞌínkjáíhi̱n ni xi tíꞌba̱á. Najmi tíbankiná ni xi najmi tjínná.
\p
\v 13 Najmi bꞌa̱ tíxian tsa jun tjíhin nga ku̱i̱tjájiun kju̱a̱ni̱ma̱ ko̱ tu̱ sa kjꞌa̱íhí ngá xi nda tsꞌín kꞌúéntu. Ni xi nda ní tjín nga nkuhú nga nda tsꞌín ku̱i̱ntsu̱bo̱o.
\v 14 Ndꞌa̱i̱ tjínnu̱u ko̱ ka̱ma kꞌu̱o̱ho̱ ni xi ndyjatꞌaha̱ xu̱ta̱ xuꞌbo̱, ko̱ kjꞌa̱í ni̱stjin ngáha kui sꞌe̱he̱ ni xi ndyjatꞌanu̱u. Bꞌa̱ tsꞌín ta̱ ka̱ma tsjánu̱u. Nku chu̱ba̱há sꞌe̱nu̱u.
\v 15 Ku̱i̱tjusun xi nkú tsꞌín tjítꞌa éhe̱n Nti̱a̱ná: “Najmi tsꞌanki kamaha̱ xi ꞌyún tse jꞌáya ko̱ najmi kindyjatꞌaha̱ xi chuba jꞌáya.”
\s Bꞌi̱ tsꞌín kitsúya Pablo̱ yá xi ngju̱a̱i̱ko̱ to̱on chje̱
\p
\v 16 Tsjaha̱ mábꞌa̱chjíhi̱ Nti̱a̱ná a̱tꞌaha̱ kitsjáha̱ Tito̱ nga ta̱ ngju̱ánta̱ha̱ ra̱ yjoho̱ jun xi nkú ta̱ tsꞌín kjinta̱hana an.
\v 17 Kitsꞌínjꞌo̱ nga tsꞌi̱íntjusun ni xi an tsankihi̱ ko̱ ngayjehe kꞌun tífisenu̱u. Ja bꞌa̱ títsu ko̱yaha ani̱ma̱ha̱.
\p
\v 18 Ko̱ ta̱ tínꞌekjíko̱i̱ Tito̱ nda̱ ntsꞌeé xi nda tsꞌín nchja̱yanehe̱ ngayjee̱ xu̱ta̱ ni̱nku̱, a̱tꞌaha̱ kixi̱ bꞌéni̱jmí én nda tsuhu̱ Nti̱a̱ná ndo̱.
\v 19 Ko̱ najmi tu̱ nku nda tsꞌín chubani̱jmíyaha ndo̱. Ta̱ yꞌétꞌa xáha̱ xu̱ta̱ ni̱nku̱ nga kui xi ngju̱a̱i̱ko̱ni̱ nga kuankínko̱i̱ to̱on chje̱. Bꞌi̱ nda tínꞌei̱ ko̱ bꞌa̱ tsꞌín tínꞌetsjoho̱ ra̱ Nda̱ Nti̱a̱ná ko̱ tíbꞌejña chjii̱ nga mjeni̱ ku̱i̱si̱nko̱i̱ xu̱ta̱.
\v 20 Najmi mjeni̱ tsa tjín xi ku̱i̱nchja̱yaneni̱ nga̱tꞌaha̱ xi nkú tsꞌín tincha títjui̱hi̱n to̱on chje̱ chánka xi tímakú.
\v 21 Kui nga nda nda tíchasehe̱ ri̱ xi nkú tsꞌín kixi̱ tíbankínko̱i̱ ni xi tínꞌei̱ nginku̱n Nda̱ Nti̱a̱ná ko̱ ta̱ nginku̱n xu̱ta̱.
\p
\v 22 Ko̱ ta̱ tínꞌekjíko̱i̱ já xuꞌbi̱ kjꞌa̱í nda̱ ntsꞌeé xi ja nkjin ni̱yá tsakúchjini̱ nga nda fiko̱ xáha̱. ꞌYún mjehe̱ ku̱a̱si̱nko̱nu̱u, a̱tꞌaha̱ ꞌyún sasíhi̱n jun.
\v 23 Ko̱ máha Tito̱, ta̱ kui xáha xi títsꞌín xi nkúhu an, nga ta̱ tíbasinko̱nu̱u. Ko̱ já ntsꞌeé xingisoo̱ xi tje̱nko̱, xu̱ta̱ ni̱nku̱ kitsꞌínkjihi̱. Kui jóo̱ ta̱ tsꞌín nga yankjún Cristo̱ tu̱ nga̱tꞌaha̱ xá xi tsꞌín.
\v 24 Kui bꞌa̱ maha, nda tsꞌín nꞌe̱kjáíhi̱n ru̱u jóo̱ tu̱ xi sku̱e̱he ngayjee̱ xu̱ta̱ ni̱nku̱ xi nkú tjín kju̱a̱tjonu̱u ko̱ mí kju̱a̱ha nga tsjo maha̱ni̱ jun.
\c 9
\s Bꞌi̱ tsꞌín yꞌénda Pablo̱ xi nkú tsꞌín sꞌe̱kú to̱on chje̱ xi ka̱makú
\p
\v 1 Ta̱ ndaha najmi machjéhe̱n tsa kuetꞌánu̱u nga to̱on chje̱ tímasúhu̱n xu̱ta̱ xi Nti̱a̱ná kikjꞌátsꞌe̱he̱ xi tjíntu a̱nte Judea̱.
\v 2 A̱tꞌaha̱ be nga nda ani̱ma̱nu̱u. Xí tsjohó tímana nkꞌie nga kixinyaha̱ kui nii̱ xu̱ta̱ xi tjín a̱nte Macedoni̱a̱. Bꞌa̱ kixihi̱n nga jun xi tintsu̱bo̱o a̱nte Akaya̱ nkꞌie nú kjin tintsu̱ba̱ ndahanu nga kꞌu̱o to̱on. Nkꞌie nga kintꞌé xu̱ta̱ Macedoni̱a̱ kui nii̱, nkjin xi ta̱ kixinchá tsjoho̱ nga ta̱ tsꞌi̱ínsun to̱on.
\p
\v 3 Tu̱nga títsꞌinkjísehénu̱u já ntsꞌeé xuꞌbi̱ tu̱ xi najmi tu̱ a éhén ka̱maha ni xi kixihi̱n jóo̱ nkꞌie nga bꞌa̱ kixian nga tsjo mana jun nga̱tꞌaha̱ ni xi tínꞌo. Tífi jóo̱ yo̱ tu̱ xi ku̱a̱si̱nko̱ho̱nu̱u nga kꞌúékú to̱on xi kꞌu̱o. Bꞌa̱ tsꞌín ka̱maha ni xi kixihi̱n.
\v 4 A̱tꞌaha̱ tsa kuankínko̱i̱ yo̱ kꞌu̱a̱ xu̱ta̱ Macedoni̱a̱, ko̱ tsa a̱sꞌa̱ihi i̱ncha sku̱e̱ nga najmi kje̱e tjíkúnu̱u to̱on chje̱, ka̱ma subani̱. A̱tꞌaha̱ ja tu̱ xí tíma ꞌyún kꞌun níi̱ ni xi tsixíún. Ko̱ jun ta̱ ka̱ma subanu̱u.
\v 5 Kui nga bꞌa̱ kixihinna nga tu̱ sahá bꞌa̱ xíhi̱n já ntsꞌeé nga tjun ngju̱a̱i̱sehe̱nu̱u tu̱ xi kꞌu̱éndako̱ho̱nu̱u to̱on chje̱ xi tsixínya títjun nga kꞌu̱o. Bꞌa̱ tsꞌian tu̱ xi bꞌa̱ tsꞌín sꞌe̱jña ndaha nku to̱on chje̱ xi ngayjee̱ ani̱ma̱ tíꞌba̱i̱, najmi tu̱ kju̱a̱ꞌyúhún tíꞌba̱i̱.
\p
\v 6 Nꞌe̱kjꞌáítsjon ni xuꞌbi̱. Xi chuba ni xi bꞌéntje̱, kui xi chuba cha̱n kjesíntje̱n, ko̱ xi tse ni xi bꞌéntje̱, kui xi tse cha̱n kjesíntje̱n.
\v 7 Nga nkúnkú tjon xi nkú tjín nibáha̱ ra̱ ani̱ma̱nu̱u. Najmi tu̱ un katuma kꞌun ni xi kꞌu̱o nga kꞌu̱o, ko̱ ta̱ ndaha najmi tu̱ kju̱a̱ꞌyún ꞌbo̱o. A̱tꞌaha̱ Nti̱a̱ná tjoho̱ xi tsjo tjíhi̱n nga tsjá ni xi tsjá.
\v 8 Tjíhi̱n ngaꞌyún Nti̱a̱ná nga tu̱ ni xí tsjáhánu̱u ngayje tíkjá kju̱a̱nda, tu̱ xi tu̱ nkjéhé nihi najmi chumi nihi xi ndyja̱tꞌaha̱nu̱u ko̱ bꞌa̱ tsꞌín ka̱ma nꞌe̱henu ngayjee̱ ni xi nda.
\v 9 Xi nkú tsꞌín tjítꞌa éhe̱n Nti̱a̱ná nga bꞌi̱ títsu:
\q Kitsꞌínndzjo ni xi tjíhi̱n,
\q xu̱ta̱ xꞌa̱n kitsjáha̱.
\q Tu̱ nkjéhé ni nga na̱xu̱ tsꞌín.
\p
\v 10 Nti̱a̱ná xi tsjá xu̱jmá xi sꞌentje̱ ko̱ tsjá nichine, kui xi tse ni xi tsjánu̱u tu̱ xi ta̱ ka̱ma ku̱i̱si̱nko̱ho̱nu̱u xu̱ta̱. Tsꞌi̱ín nga ꞌyún tse sꞌe̱nu̱u ko̱ nga xúbáya ni nda xi tínꞌo.
\v 11 Nkjin tíkjá kju̱a̱nchi̱ná sꞌe̱nu̱u tu̱ xi ngayjehe kꞌun ka̱ma ku̱i̱si̱nko̱o xu̱ta̱. Ko̱ máha ni xi nꞌe̱ nibáko̱ni̱, kui xi tsꞌi̱ín nga já ntsꞌeé tsjáha̱ mábꞌa̱chjíhi̱ Nti̱a̱ná.
\p
\v 12 Nkꞌie nga tíbisinko̱o xu̱ta̱ xi Nti̱a̱ná kikjꞌátsꞌe̱, tíꞌbo̱ho̱ ni xi machjéhe̱n ko̱ kui nga nkjin xi títsjáha̱ ra̱ mábꞌa̱chjíhi̱ Nti̱a̱ná.
\v 13 Nkꞌie nga sku̱e̱ ni xi tínꞌo, i̱ncha tsꞌi̱íntsjoho̱ Nti̱a̱ná, a̱tꞌaha̱ tínuꞌyáꞌóho̱on én nda tsuhu̱ Cristo̱ ko̱ a̱tꞌaha̱ ngayje ani̱ma̱nu̱u tíbisinko̱o, ko̱ najmi tu̱ kui, kjꞌa̱í sa xu̱ta̱.
\v 14 Ko̱ nkꞌie nga i̱ncha ku̱i̱nchja̱ko̱ Nti̱a̱ná, ku̱i̱nchja̱ntjainu̱u a̱tꞌaha̱ tjoho̱ jun. I̱ncha sku̱e̱ nga tu̱ xí tsehé kju̱a̱ndaha̱ Nti̱a̱ná kitsjánu̱u.
\v 15 ¡Mábꞌa̱chjíhi̱ ra̱ Nti̱a̱ná nga̱tꞌaha̱ ni xi tsjáná! ¡Najmi tjínná én xi ku̱i̱xínyahaná xi nkú tsꞌín chánka ni xi tu̱ kitsjáháná!
\c 10
\s Bꞌi̱ tsꞌín yꞌéjña chji Pablo̱ nga tsjo maha̱ xá xi Nti̱a̱ná kitsjáha̱
\p
\v 1 Nginku̱n Cristo̱ xi tjoho̱ ko̱ xi nda tsꞌínko̱ xu̱ta̱, an Pablo̱ tíbankinu̱u nku ni. Bꞌa̱ tíxian a̱tꞌaha̱ tjín xi bꞌa̱ tsu nga najmi nda̱ nkjún tjíán nkꞌie nga tíi̱jñajinnu̱u ko̱ nga ndjá nchja nkꞌie nga kjin tíi̱jñanu̱u.
\v 2 Tíbankinu̱u nga najmi tu̱ nꞌo nga ndjá kuinchjako̱nu̱u nkꞌie nga ku̱i̱chusenu̱u. A̱tꞌaha̱ tjínnkuhu̱ kꞌan nga ndjá kuinchjaka̱ xi bꞌa̱ maha̱ nga bꞌa̱ tsꞌín tintsu̱ba̱i̱ xi nkú tsꞌín nkaha̱ xu̱ta̱ a̱sunntei̱.
\p
\v 3 Kju̱axi̱ kjáíhin nga a̱sunntei̱ tintsu̱ba̱i̱, tu̱nga najmi bꞌa̱há tsꞌín tíbixkjai̱n xi nkú tsꞌín kján xu̱ta̱ a̱sunntei̱.
\v 4 A̱tꞌaha̱ najmi a̱sunntei̱ tsꞌe̱ ni xi tínꞌechjéi̱n nga tíbixkjai̱n. Ngaꞌyúhu̱n ní Nti̱a̱ná tínꞌechjéi̱n, ngaꞌyún xi maha̱ tsꞌínkje ngaꞌyúhu̱n já kontra̱ ko̱ basinneꞌyún én xi nchja̱ xi fi kontra̱ni̱.
\v 5 Chjuxubai̱ ngayjee̱ ngaꞌyún chꞌonkꞌun xi bꞌéchjaha̱ xu̱ta̱ nga sku̱e̱ Nti̱a̱ná, ko̱ nꞌe ngana̱i̱hi̱ ngayjee̱ ni chꞌonkꞌun xi tsꞌínnkjinkꞌun xu̱ta̱. Bꞌa̱ nꞌei̱ tu̱ xi ku̱i̱ntꞌéꞌéhe̱n ra̱ Cristo̱.
\v 6 Tjíndani̱ yjoni̱ nga nꞌe̱kꞌíéchjíi̱ xi nkú tsꞌín tje̱he̱n ra̱ xi najmi ku̱i̱ntꞌéꞌén, tu̱nga títjuhún tjíhin nga jun tjun ku̱i̱núꞌyáꞌén sisinnú.
\p
\v 7 Jun xi chase sunnkꞌoho̱o ni xi tjín. Tsa tjín xi behe̱ kꞌun nga Cristo̱ yjanki, kui xi ta̱ katsꞌín kuenta̱ nga ko̱ ta̱ ji̱n yjankii̱ Cristo̱ xi nkúhu kui.
\v 8 Ndaha tsa nkꞌa bꞌasjé yjona̱ nga̱tꞌaha̱ xáni̱, tu̱nga najmi subahá mana nga bꞌa̱ tsꞌian, a̱tꞌaha̱ Nda̱ Nti̱a̱ná kitsjá xáni̱. Kui xi mjehe̱ nga nꞌe̱i̱ nga sa̱ájin so ni xi tsꞌe̱ Nti̱a̱ná, najmi mjehe̱ tsa nꞌe̱i̱ nga ndyjo̱o.
\p
\v 9 Najmi mjena tsa xu̱ju̱n xi títsꞌinkjínu̱u ku̱i̱nchánkjúnnu̱u.
\v 10 A̱tꞌaha̱ tjín xi bꞌa̱ tsu nga ndjá rú ko̱ kjan rú én xi bꞌetꞌánu̱u, tu̱nga nkꞌie rú nga tíi̱jñajinnu̱u najmi ndjá rú bꞌasjé yjona̱ ko̱ rú najmi chumi ni chjíhi̱ ra̱ én xi nchja.
\v 11 Tu̱nga xi bꞌa̱ títsuu̱ katsꞌín kuenta̱ nga ni xi bꞌetꞌa xu̱ju̱i̱n nga kjin tintsu̱ba̱i̱, kui niu̱ xi nꞌe̱i̱ nkꞌie nga ku̱i̱ntsu̱ba̱jii̱hi̱n.
\p
\v 12 Tjín xi nda tsꞌín nchja̱ni̱jmíyaha yjoho̱. Tu̱nga máha ji̱n, najmi ma kꞌui̱n tsa bꞌa̱ bixíi̱n nga ji̱n xi nkú joyaha já xuꞌbo̱, ko̱ tsa ta̱ ñja nꞌe mako̱i̱ yjoni̱ jóo̱. Ta̱ ndaha najmi be ni xi i̱ncha tsꞌín jóo̱, a̱tꞌaha̱ ta̱ kuihi xinkjín base chu̱ba̱yako̱ho̱ ra̱ yjoho̱ ko̱ i̱ncha base chu̱ba̱yaha̱ xinkjín.
\v 13 Tu̱nga máha ji̱n, nku tutuhú nga̱tꞌaha̱ xá xi kikꞌa̱i̱ni̱ ji̱n, kui niu̱ xi chánka nꞌesjeko̱ho̱ni̱ yjoni̱. Najmi bitjatíi̱hi̱ chjintí xi yꞌéjñaha̱ Nti̱a̱ná xáni̱, xá xi tsichukꞌúnnu̱u santaha ko̱ jun.
\v 14 Tsa najmi tsichukꞌúi̱hi̱n kai, ja ra̱ tíbitjatíi̱hi̱ má tje̱he̱n ra̱ xáni̱. Tu̱nga kju̱axi̱hí kjáíhin nga ji̱n tjun tsichuko̱i̱hi̱ én nda tsuhu̱ Cristo̱.
\p
\v 15 Najmi tífꞌa tsꞌa̱ji̱n xá xi i̱ncha kitsꞌín kjꞌa̱í xu̱ta̱ha, tsa tu̱ xi nkꞌa nꞌe̱sjehe̱ni̱ yjoni̱. Tu̱ sa ní tíchuyái̱hi̱ nga xi nkú tsꞌín ꞌyún sꞌe̱jin sanu̱u Nti̱a̱ná, bꞌa̱ tsꞌín ka̱ma tse sa a̱jinnu̱u xáni̱,
\v 16 tu̱ xi ka̱ma ku̱a̱nkínkꞌíéni̱jmíhi̱ni̱ én nda tsuhu̱ Cristo̱ a̱jihi̱n xu̱ta̱ xi kjin tjíntu sa nga jun. A̱tꞌaha̱ najmi mjeni̱ tsa nꞌe̱ tsꞌa̱ji̱n xá xi kitsꞌín kjꞌa̱í, tsa tu̱ xi bꞌa̱ tsꞌín nꞌe̱ chánkaha̱ni̱ yjoni̱.
\p
\v 17 Tsa tjín xi mjehe̱ nkꞌa kꞌu̱a̱sje yjoho̱, nga̱tꞌaha̱ ní ni xi kitsꞌínko̱ho̱ Nti̱a̱ná, kui ní nga̱tꞌaha̱ nga nkꞌa katꞌasjehe yjoho̱.
\v 18 A̱tꞌaha̱ najmi xi nda tsꞌín nchja̱yane suba yjoho̱, tsa kui xi nda nꞌekjáíhi̱n. Xi nda ní tsꞌín nchja̱yanehe̱ Nti̱a̱ná, kui ní xi nda nꞌe̱kjáíhi̱n.
\c 11
\s Bꞌi̱ tsꞌín kitsúya Pablo̱ ni xi tsꞌín já postru̱ tsꞌankꞌóo̱
\p
\v 1 Nꞌe̱chúkju̱o i̱chí tsa kuinchjajnu kuinchjatꞌa. Joho̱n, nꞌe̱ chúkju̱a̱nú.
\v 2 A̱tꞌaha̱ nginku̱n Nti̱a̱ná nibáha̱ ra̱ xi nkú tsꞌín tíkunnu̱u. A̱tꞌaha̱ jun xi nkú joyaha ta̱kjín xi an kitsꞌinkjasꞌen nga ku̱i̱xanko̱ nku nda̱, kui xi Cristo̱. Ko̱ mjena tsꞌinkjasꞌehe̱n jun xi nkú joyaha nku ta̱kjín xu̱nkú.
\v 3 Tu̱nga tsankjunná tsa bꞌa̱ ka̱matꞌon xi nkú nga kamatꞌain Eva̱ nkꞌie nga kju̱a̱maña̱ha̱ ye̱ tsꞌana̱cha̱ko̱ho̱ ra̱, tsa bꞌa̱ tsꞌínndyja̱jihin kju̱a̱nkjintakꞌunnu̱u ko̱ najmi ta̱ ngayjehe kꞌun ko̱ je tsjénnkihi̱ ru̱u Cristo̱.
\p
\v 4 Bꞌa̱ tíxian a̱tꞌaha̱ nda tsꞌín nꞌekjóho̱on já xi kjꞌa̱í én bꞌéni̱jmínu̱u, kui xi najmi éhe̱n Jesu xi ji̱n yꞌeni̱jmíi̱. Jun xi ja kinꞌekjóho̱n Espiri̱tu̱hu̱ Nti̱a̱ná, ta̱ nꞌekjóho̱n kjꞌa̱í xi najmi Espiri̱tu̱hu̱ Nti̱a̱ná. Jun xi ja kinꞌekjóho̱n én nda tsuhu̱ Cristo̱, ta̱ tínꞌekjóho̱n kjꞌa̱í én.
\v 5 Najmi i̱chí mana yjona̱ nginku̱n já postru̱ i xi tjín.
\v 6 Ndaha tsa najmi ꞌyún mana nchja nga nchja, tu̱nga bená ni xi tsꞌe̱ Nti̱a̱ná. Ja ní tu̱ xí tsakuchjíhí ri̱ nga yai̱ ni xi tsꞌe̱ Nti̱a̱ná.
\p
\v 7 Nkꞌie nga yꞌeni̱jmínu̱u én nda tsuhu̱ Nti̱a̱ná, najmi jꞌachjínu̱u. Bꞌa̱ tsꞌín tsꞌasjé ni̱ma̱kju̱a̱hana yjona̱ ko̱ jun tsꞌasjénkꞌanu̱u. ¿A ngatitsuhún kitsꞌian nga bꞌa̱ kitsꞌinnu̱u?
\v 8 Tsakjꞌa to̱on xi kitsjána kjꞌa̱í ni̱nku̱ tu̱ xi ka̱ma tsꞌihinna xána̱ a̱jinnu̱u.
\v 9 Nkꞌie nga tsáte̱jñajinnu̱u ko̱ nga kindyjatꞌana tsa mí nihi, najmi kitsꞌinstinu̱u. A̱tꞌaha̱ ni xi kindyjatꞌána, já ntsꞌeé xi nibáha a̱nte Macedoni̱a̱ kitsjána. Najmi yꞌenénu̱u yjona̱ ko̱ tu̱ nkú najmi kꞌuenéhénu̱u yjona̱.
\v 10 Kju̱axi̱ nga éhe̱n Cristo̱ tíjñajinna ko̱ kju̱axi̱ nga ngúsuhu̱n a̱nte Akaya̱ najmi ka̱ma sꞌe̱chꞌónna kju̱a̱tsjo xi tjínna nkꞌie nga najmi fꞌachjá nga bꞌeni̱jmíá én nda tsuhu̱ Cristo̱.
\v 11 ¿Áhan? ¿A a̱tꞌaha̱ najmi tjona jun? Nti̱a̱ná be nga tjona jun.
\p
\v 12 Tu̱ nkú kfínndjuko̱ná ni xi títsꞌian. Bꞌa̱ tsꞌín najmi tsjantéhe̱ ra̱ xi tíi̱ncha bangisjai ni̱yáha nga xi nkúhu ji̱n tsꞌi̱ín ma yjoho̱, tsa tu̱ xi bꞌa̱ tsꞌín nkꞌa kꞌu̱a̱sjehe yjoho̱.
\v 13 A̱tꞌaha̱ já postru̱ tsankꞌáhá jái̱. Xá xi i̱ncha tsꞌín bꞌana̱cha̱ko̱ho̱ ra̱ xu̱ta̱. Já postru̱hu̱ Cristo̱ tsꞌín ma maña̱ yjoho̱.
\v 14 Najmi ni tse̱tse̱ ni xi tíi̱ncha tsꞌín jóo̱. A̱tꞌaha̱ nda̱nindoo̱ nku ntítsjehe̱ Nti̱a̱ná tsꞌín ma maña̱ yjoho̱.
\v 15 Kui nga najmi ma nkjúhunná nga já xi tsꞌínxátꞌaha̱ ra̱ nda̱nindoo̱ xu̱ta̱ xi tsꞌín ni xi nda i̱ncha tsꞌín ma maña̱ yjoho̱. Tu̱nga ku̱i̱chúhú ni̱stjin nga tsꞌi̱ínkjáíhi̱n chjíhi̱ ni xi tíi̱ncha tsꞌín.
\s Bꞌi̱ tsꞌín kitsúya Pablo̱ nga nkjin kju̱a̱ni̱ma̱ jꞌajin nga̱tꞌaha̱ xáha̱
\p
\v 16 Bꞌa̱há ta̱ tíxin ngáha̱nu̱u. Ndaha nku najmi bꞌa̱ tu̱ katsú nga nchjajnu nchjatꞌa. Tu̱nga tsa jun xi bꞌa̱ ku̱i̱xíún, tu̱ sa ní tjennténú nga kuinchjako̱nu̱u xi nkúhu nku xi nchja̱jnu nchja̱tꞌa tu̱ xi chánka kꞌuasjéhena i̱chí yjona̱.
\v 17 Nga ma kꞌan chánka kꞌuasjé yjona̱, najmi Nda̱ Nti̱a̱ná tínibáha̱ ra̱ nga bꞌa̱ tíxian. An ní su̱ba̱ chu̱ba̱ tínchjaná.
\v 18 Xihi̱ nkjihín maha xi chánka i̱ncha maha̱ yjoho̱ nga̱tꞌaha̱ xi nkú tsꞌín, kui nga ko̱ ta̱ an chánka ka̱mahana yjona̱.
\v 19 A̱tꞌaha̱ jun xi nkjinkꞌun, kui nga nda tsꞌín nꞌekjáíhi̱n ru̱u xi nchja̱jnu nchja̱tꞌa.
\v 20 Santaha ꞌba̱i̱nto nga xu̱ta̱ musu̱ nꞌe manu̱u, nga chꞌana̱cha̱nu̱u, nga chjuꞌánu̱u ni xi tsꞌa̱jun, ko̱ ꞌba̱i̱ntoho̱ xi nkꞌa bꞌasjenu̱u yjoho̱ ko̱ xi i̱ncha mꞌojinnu̱u.
\p
\v 21 Ji̱n bi najmi bꞌa̱ tsꞌín ndjá kinꞌeko̱i̱hi̱ xi nkúhu já xuꞌbo̱. Xí tíma subahána nga bꞌa̱ tíxian. Tsa tjín xi ma kꞌun nga tsjo maha̱ nga̱tꞌa tsꞌe̱ yáha kui, ta̱ ka̱ma kꞌan bꞌa̱ ta̱ tsꞌian, ndaha tsa tínchjajnu tínchjatꞌa nga bꞌa̱ tíxian.
\v 22 ¿A já hebreo̱ niu̱? Ta̱ nda̱ hebreo̱ná. ¿A ntje̱ Israel tje̱he̱n ra̱ jóo̱? Ta̱ ntje̱ Israel tje̱henna. ¿A ntje̱he̱ Abraham jóo̱? Ta̱ ntje̱he̱ Abraham an.
\v 23 ¿A kui xi tíi̱ncha tsꞌínxátꞌaha̱ Cristo̱? An xi ꞌyún títsꞌinxátꞌa saha̱, ndaha tsa bꞌa̱ tsꞌín tínchja xi nkú tsꞌín nchja̱ xi nchja̱jnu nchja̱tꞌa. An xi ꞌyún kitsꞌinxá sa nga kui jóo̱. ꞌYún nkjin ni̱yá kinꞌekjína nu̱ba̱yá. ꞌYún nkjin ni̱yá kisꞌena. Ko̱ nkjin ni̱yá ja ma tsayaná kai.
\v 24 Un ni̱yá kingjána já kꞌaku̱ xi tjíhi̱n xu̱ta̱ judio̱ kan tjꞌion ñju ni̱yá. Xi nkú tsꞌín tíjñaha̱, bꞌa̱ kitsꞌín.
\v 25 Jan ni̱yá tsichꞌonyána. Nku ni̱yá yꞌétjítsena ndji̱o̱ jóo̱. Jan ni̱yá ngjijintí yábarku̱ xi tjíi̱ya. Nku ni̱stje̱n ko̱ nku ni̱stjin kitsjenbꞌásan ntáchakꞌuu̱n.
\p
\v 26 ꞌYún ṉkjún jatsúu̱ꞌba̱ tu̱ má xi tje̱hén ni. Nkꞌie nga kitsꞌian ni̱yá kitsankjan ni xi ka̱matꞌan a̱jin ntáje̱. Kitsankjan tsa já ndyjée̱ sa̱téjian. Kitsankjan tsa nkú i̱ncha tsꞌi̱ínna xi ta̱ ntje̱ judio̱ tje̱he̱n ra̱ xi nkúhu an ko̱ ta̱ xu̱ta̱ xi najmi ntje̱ judio̱ tje̱he̱n ra̱. Kitsankjan tsa nkú ka̱matꞌan a̱jin na̱nti̱o̱ ko̱ ngijñóo̱ ko̱ a̱jin ntáchakꞌuu̱n, ko̱ ta̱ a̱jihi̱n xi já ntsꞌeé tsꞌín ma maña̱ yjoho̱.
\v 27 Tu̱ xí nchjáhá ni xi kitsꞌian ko̱ tse kju̱a̱ni̱ma̱ kikie. Tu̱ xí nkjihín ni̱yá najmi kikjafe. Kama bjona, kama xintána, ko̱ tu̱ xí nkjihín ni̱yá tsáte̱jña kjintíá nga najmi chumi nihi xi kisakúna nga kjíne̱. Jꞌajian nchꞌán ko̱ kindyjatꞌána najyun.
\p
\v 28 Ndaha tsa bꞌa̱ tímatꞌan, tu̱nga ta̱ kisꞌenta̱hána ngayjee̱ ni̱nku̱ xki̱ ni̱stjin.
\v 29 Tsa tjín xi saté chꞌin, ko̱ ta̱ an ma unna. Tsa tjín xi nꞌendyjajihi̱n ni xi tsꞌe̱ Nti̱a̱ná, tu̱ xí kjahán mana.
\p
\v 30 Tsa ni xi machjéhe̱n ra̱ nga chánka kꞌuasjéhena yjona̱, chánka ní kꞌuasjé yjona̱ nga najmi tjínna ngaꞌyún xi tsꞌa̱n.
\v 31 Nti̱a̱ha̱ ko̱ Na̱ꞌmihi̱ Nda̱ Nti̱a̱ná Jesucristo̱ xi tjíhin nga nꞌe̱tsjoho̱ tu̱ nkjéhé ni. Kui xi be nga najmi tíbꞌana̱cha̱.
\v 32 Nkꞌie nga tsáte̱jña nanki Damasco̱, kitsjá kju̱a̱ nda̱ títjun xi tsꞌínxátꞌaha̱ nda̱ rei̱ Areta̱ nga chúnnta a̱nkju̱a̱ha̱ nankiu̱ tu̱ xi chjúbénijéhena.
\v 33 Tu̱nga nkuhú ni̱si̱n kichjuje̱nko̱hona xjó xi tífꞌa tjindaihi̱ nankiu̱. A̱nkju̱a̱nkꞌa xi tje̱ntꞌa xjóho̱ nankiu̱ kinꞌesjehena. Bꞌa̱ tsꞌín tsankaha̱ ra̱ jóo̱.
\c 12
\s Bꞌi̱ tsꞌín kitsúya Pablo̱ nga ngaꞌyúhu̱n Cristo̱ tíjñaha
\p
\v 1 Ndaha tsa najmi chumi ni chjíhi̱ ra̱ nga chánka kꞌuasjé yjona̱, tu̱nga tjíhín ni nga bꞌa̱ tsꞌian. Kui nga kuinchjahana ni xi kikie ko̱ xi tsakúchjina Nda̱ Nti̱a̱ná.
\v 2 Be nku nda̱ xi sꞌejihi̱n Cristo̱ xi kichjubéjihi̱n sén nga ngji nkꞌa ján xi ma jahan. Ja tjíhi̱n te ñju nú nga bꞌa̱ kamoo̱. Tsa ngji yjonintehe̱ ko̱ tsa najmi ngji, najmi be. Nti̱a̱ná xi be.
\v 3 Be nga nda̱ xuꞌbo̱ ngji ndji̱o̱jmi ján. Tsa ngji yjonintehe̱ ko̱ tsa najmi ngji, najmi be. Nti̱a̱ná xi be.
\v 4 Yo̱ kintꞌé én xi najmi tjín xi nkú tsꞌín chubahaná, xi tíjña nkjún nga kꞌúínyaha̱ xu̱ta̱.
\p
\v 5 Ka̱ma chánka kꞌuasjé yjona̱ nga̱tꞌaha̱ ni xi kamaha̱ nda̱ xuꞌbo̱, tu̱nga najmi chu̱ba̱ chánkahá kꞌuasjé yjona̱. Chánka ní kꞌuasjé yjona̱ nga̱tꞌaha̱ nga najmi an tsꞌa̱n ngaꞌyún xi tjínna.
\v 6 Tu̱nga tsa chánka kꞌuasjé yjona, najmi tínchjajnu tínchjatꞌa tsa bꞌa̱ tsꞌian, a̱tꞌaha̱ bꞌa̱ tjín ni xi kuinchja. Tu̱nga najmi bꞌa̱há tsꞌian tu̱ xi najmi chꞌa bꞌa̱ ku̱i̱tsu̱hu tsa nihi xi nkjún tsꞌian ko̱ nihi xi nkjún tsꞌín nchja, tsa a̱sꞌa̱i najmi bꞌa̱ tjín niu̱.
\p
\v 7 Tu̱ xi najmi chánka ka̱mahana yjona̱ nga̱tꞌaha̱ ni chánka xi kisꞌejña chjina, Nti̱a̱ná kitsꞌín nibánena nku kju̱a̱ꞌun xi nkú joyaha tsa naꞌyá kisasínsꞌehe̱n yjonintena̱. Tsuhu̱ ra̱ nga nda̱ musu̱hu̱ nda̱nindoo̱ tsꞌínꞌunna tu̱ xi najmi chánka ka̱mahana yjona̱.
\v 8 Jan ni̱yá tsankihi̱ Nda̱ Nti̱a̱ná nga kjéxinna kju̱a̱ꞌuu̱n,
\v 9 tu̱nga bꞌa̱há kitsúna: “Kju̱a̱ndana̱há xi machjéhin, a̱tꞌaha̱ a̱jihi̱n xi najmi tjíhi̱n ngaꞌyún sꞌejña chji ngaꞌyúnna̱.” Kui nga tsjo mahana nga chánka tímahana yjona̱ nga̱tꞌaha̱ nga najmi tjínna ngaꞌyún. Bꞌa̱ tsꞌín sꞌejña chjihi ngaꞌyúhu̱n Cristo̱ a̱jinna̱.
\v 10 A̱tꞌaha̱ mjena Cristo̱, kui nga tsjo mahana nga najmi tjíhinna ngaꞌyún, ko̱ nga chꞌon tsꞌín nchja̱yanena xu̱ta̱, ko̱ nga ndyjatꞌána ni xi machjénna, ko̱ nga tsjennkí unkiena xu̱ta̱, ko̱ nga sakúna kju̱a̱ni̱ma̱. A̱tꞌaha̱ nkꞌie nga najmi tjínna ngaꞌyún, nkꞌiehé nga tjínna ngaꞌyún.
\s Bꞌi̱ tsꞌín yꞌéjña chji Pablo̱ nga kjinta̱ha̱ ra̱ xu̱ta̱ ni̱nku̱ Corinto̱
\p
\v 11 Kuanchja xi nkúhu nku nda̱ xi nchja̱jnu nchja̱tꞌa, tu̱nga juhún kuanꞌe kju̱a̱ꞌyúnnú nga bꞌa̱ kuatsꞌian. Kutsa juhún xi tjíhin nga nda kꞌúínnú. A̱tꞌaha̱ najmi ꞌyún nkꞌa tje̱nna já xi chu̱ba̱ já postru̱hú maha̱ yjoho̱ ko̱ chu̱ba̱ ihí maha̱ yjoho̱ nga an, ndaha tsa bꞌa̱ xian nga najmi chumi ni chjíhi̱ ra̱ an.
\v 12 Kjitꞌa kjitꞌa kama kju̱a̱nkjún ko̱ kju̱a̱chánka ko̱ ni xi tsakúchji ngaꞌyúhu̱n Nti̱a̱ná a̱jinnu̱u. Kui ni xi tsakúchji nga nda̱ postru̱ná.
\v 13 ¿Mí nihi xi kisakúhu̱ xu̱ta̱ ni̱nku̱ xingisoo̱ xi najmi kisakúnu̱u? Nku tutuhú nga najmi kikꞌienénu̱u yjona̱ nkꞌie nga tsáte̱jñajinnu̱u, xi nkú kitsꞌinka̱ xu̱ta̱ ni̱nku̱ xingisoo̱. ¡Nꞌe̱ꞌyún takꞌunnú nga bꞌa̱ chꞌon kitsꞌinko̱nu̱u!
\p
\v 14 Ja tjíndana yjona̱ nga kfínsenu̱u ni̱yá xi ma jahan ko̱ ta̱ ndaha ndꞌa̱i̱ najmi kꞌuenénu̱u yjona̱. A̱tꞌaha̱ najmi ni xi tjínnu̱u tíbangisja. Jun ní xi nusinna. A̱tꞌaha̱ najmi xi tíꞌmi ntí tjíhin nga kjꞌu̱átjo to̱on xi tsꞌi̱ínchjén xi cháha̱. Xi tíꞌmi ní xi chá, kui xi tjíhin nga kjꞌu̱átjo to̱on xi tsꞌi̱ínchjén ntíhi̱ ndyjun nkini̱.
\v 15 Kui nga tsjo tjíhinna nga tsꞌinchjén ngayjee̱ ni xi tjínna ko̱ santaha yjona̱ katjejnú tsa ma tu̱ nga̱tꞌaha̱ ngandanu̱u. Nkꞌie nga ꞌyún mjena jun, ¿á ꞌyún i̱chí tínꞌe mjehenú?
\p
\v 16 Nꞌe̱kjáíhi̱ín nga najmi yꞌenénu̱u yjona̱, ndaha tsa bꞌa̱ tsu xu̱ta̱ nga nda̱ maña̱ná xi tsꞌana̱cha̱nu̱u.
\v 17 Já xi kitsꞌinkjísenu̱u, ¿a kitsꞌinkjíá jóo̱ tu̱ xi kjéꞌaha̱nu̱u ni xi tjínnu̱u?
\v 18 Tsankihi̱ Tito̱ nga ngjisenu̱u ko̱ ta̱ kitsꞌinkjíka̱ kjꞌa̱í nda̱ ntsꞌeé. ¿A ra̱ kikjeꞌáhánu̱u Tito̱ ni xi tjínnu̱u? ¿A najmi tu̱ nkuhú tjíntuyá ani̱ma̱ni̱ an ko̱ Tito̱? ¿A najmi ta̱ kuihí ni xi tínꞌei̱?
\p
\v 19 Kutsa bꞌa̱há tsꞌín tínꞌenkjínkꞌun, nga tíbisinko̱i̱ yjoni̱ nga bꞌi̱ tíbixíi̱n. Cristo̱ tsꞌe̱ni̱ ko̱ nginku̱n Nti̱a̱ná tíchubai̱. Jun xi tjoni̱. Ngayjee̱ ni xi tínꞌei̱, bꞌa̱ tínꞌei̱ tu̱ xi sahánu nginku̱n Nti̱a̱ná.
\v 20 A̱tꞌaha̱ kjinta̱hana tsa nkꞌie nga ku̱i̱chusenu̱u, skue nga najmi bꞌa̱ nꞌe tintsu̱bo̱o xi nkú tsꞌín mjena nga skuenu̱u. Ko̱ jun kutsa najmi cha̱hánú xi nkú tsꞌín mjenu̱u nga cha̱nú. Kjinta̱hana tsa najmi nkuhú kichꞌo xinki̱u, tsa tjín kju̱a̱xintakꞌun, tsa tjín kju̱a̱kjan, tsa tjín xi nkꞌa tífꞌaha̱ xinkjín, tsa tjín én tsankꞌá, tsa tjín xi tínchja̱yane xinkjín, tsa tjín xi ngakꞌun, ko̱ tsa tjín xi tíbꞌéntje̱ kju̱a̱chán.
\p
\v 21 Kjinta̱hana tsa nkꞌie nga ku̱i̱chuse ngáha̱nu̱u, sa̱kúna kju̱a̱suba nginku̱n Nti̱a̱ná. Kutsa tjíhín ni nga kjíi̱ntatꞌá nkjin xi tjín a̱jinnu̱ xi kitsꞌín ngatitsun ko̱ najmi kje̱e fikjꞌáha̱ ra̱ ani̱ma̱ha̱ nga̱tꞌaha̱ ni xi i̱ncha kitsꞌín, xi tsꞌín ni xi chu̱ntí nginku̱n Nti̱a̱ná, xi chu̱ba̱ fantuko̱hó xinkjín, xi tu̱ tsꞌínkjasꞌehén ra̱ yjoho̱ tu̱ mí nihí ni xi nchja̱ha̱ ani̱ma̱ha̱.
\c 13
\s Bꞌi̱ tsꞌín kitsúya Pablo̱ xi nkú tsꞌi̱ínko̱ xu̱ta̱ Corinto̱ nga ku̱i̱chúsehe̱
\p
\v 1 Ni̱yá xi ma jahan nga kfínsenu̱u xuꞌbi̱. Sꞌe̱nda tu̱ mí kju̱a̱há ni tsa jo ko̱ tsa jan já testiyu̱ ku̱i̱nchja̱ ni xi be.
\v 2 Ja bꞌa̱ kixinnu̱u nkꞌie nga ngjisenu̱u ni̱yá xi ma joho ko̱ ndꞌa̱i̱ nga najmi tíi̱jñajinnu̱u bꞌa̱há ta̱ tíxin ngáha̱nu̱u. Nkꞌie nga kfínse ngáha̱nu̱u, najmi ka̱ma ni̱ma̱na xi kitsꞌín ngatitsun nkꞌie ko̱ ta̱ ndaha tsa kjꞌa̱í sa.
\v 3 Bꞌa̱ tsꞌian a̱tꞌaha̱ tíbinchisjó ni xi ku̱a̱kúchji nga éhe̱n Cristo̱ tínchja. Tu̱nga a̱jinnu̱uhú bakúchji ngaꞌyúhu̱n. Najmi tíjñajinnu̱u Cristo̱ xi nkúhu nku xi najmi tjíhi̱n ngaꞌyún.
\v 4 Ndaha tsa najmi tsakúchji ngaꞌyúhu̱n nkꞌie nga kꞌientꞌá kruu̱, tu̱nga ndꞌa̱i̱ ngaꞌyúhu̱n Nti̱a̱ná tíjña tíkꞌuhun. Ko̱ ji̱n bꞌa̱ ta̱ tsꞌín najmi tjínni̱ ngaꞌyún, xi nkúhu Cristo̱ nkꞌie nga kꞌien. Tu̱nga ngandanu̱u ngaꞌyúhu̱n Nti̱a̱ná tintsu̱ba̱ tíkꞌunko̱ho̱ni̱ Cristo̱.
\p
\v 5 Jun cha̱se̱ su̱bo̱ho̱ yjonu̱u tsa sꞌejinnu̱u Jesucristo̱. ¿A najmi mankjihínnu̱u nga Jesucristo̱ tíjñajinnu̱u? Nꞌe̱nkjínkꞌun sisin ní ngáhanu. Nkꞌie nga ja kuanꞌenkjínkꞌun sisin, kutsa najmi tíjñajihínnu̱u Cristo̱.
\v 6 Nkꞌie nga ja kuanꞌenkjínkꞌun sisin, tíkuyáha̱ nga sꞌe̱jña chji nga éhe̱n Cristo̱ tíchubai̱.
\v 7 Tíbinchii̱hi̱ Nti̱a̱ná nga ndaha̱chí najmi chꞌon nꞌe̱henu. Najmi bꞌa̱ tíbixíi̱n tsa tu̱ xi cha̱ha nga tínꞌetjusun sisii̱n xáni̱. Bꞌa̱ ní tíbixíi̱n tu̱ xi nda nꞌe̱henu, ndaha tsa bꞌa̱ ku̱i̱tsu̱ xu̱ta̱ nga najmi nda tínꞌei̱ xáni̱.
\v 8 A̱tꞌaha̱ najmi ma bankín kontra̱i̱hi̱ ni xi bꞌa̱ tjín xi bakúya Jesucristo̱. Ji̱n ní tínꞌexátꞌai̱hi̱ kui niu̱.
\p
\v 9 Tsjo mani̱ nkꞌie nga bꞌa̱ tsu xu̱ta̱ nga najmi tjínni̱ ngaꞌyún ko̱ nkꞌie nga jun xi tjínnu̱u ngaꞌyún xi tsjá Nti̱a̱ná. Tu̱ nku tíbinchihí ri̱ Nti̱a̱ná nga ku̱i̱chúmo xi nkú tsꞌín mjehe̱ Nti̱a̱ná.
\v 10 Kui kju̱a̱ha nga bꞌi̱ tsꞌín tíbꞌetꞌáha̱nu̱u ni xuꞌbi̱ nkꞌie nga najmi tíi̱jñajinnu̱u, tu̱ xi nkꞌie nga ku̱i̱chusehe̱nu̱u najmi tjíhin nga ꞌyún ndjá tsꞌinko̱nu̱u. A̱tꞌaha̱ Nda̱ Nti̱a̱ná kitsjá xána xi má nga tsꞌian nga sa̱ájiun xi sꞌejinná. Najmi kitsjá xána tsa tsꞌinkjénu̱u.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 11 Ko̱ ni xi fekuhu xi xínnu̱u, já ntsꞌe, kasꞌenu̱u kju̱a̱tsjo. Ti̱nchísjo xi nkú tsꞌín na̱xu̱ ka̱mo nginku̱n Nti̱a̱ná. Tjen ngaꞌyúhu̱un xinki̱u. Nkuhú kasꞌeyanu̱u. Jyu ti̱ntsu̱ba̱ko̱o xinki̱u. Ko̱ kꞌúéjñajinnu̱u Nti̱a̱ná ma xi tsjáná kju̱a̱tjo ko̱ kju̱a̱jyu.
\p
\v 12 Bꞌi̱ ngján súniñoho̱o xinki̱u.
\v 13 Títsꞌínkjinu̱u kju̱a̱suniña ngayjee̱ xu̱ta̱ xi kikjꞌátsꞌe̱ Nti̱a̱ná xi tjín e̱i̱.
\p
\v 14 Ngatentoo̱ kasꞌenu̱u kju̱a̱ndaha̱ Nda̱ Nti̱a̱ná Jesucristo̱ ko̱ kju̱a̱tjoho̱ Nti̱a̱ná ko̱ katꞌejñajinnu̱u Espiri̱tu̱hu̱ Nti̱a̱ná.