\id GAL Mazatec of Jalapa de Díaz
\h Xu̱ju̱n xi kinꞌekjíhi̱ xu̱ta̱ ni̱nku̱ Galaci̱a̱
\toc1 Xu̱ju̱n xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Galaci̱a̱
\mt Xu̱ju̱n xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Galaci̱a̱
\c 1
\s Bꞌi̱ tsꞌín kikjaniñaha̱ Pablo̱ xu̱ta̱ ni̱nku̱ xi tjín a̱nte Galaci̱a̱
\p
\v 1 An Pablo̱, an xi kama nku nda̱ postru̱\f + \fr 1:1, 17, 19 \ft “Xi kisꞌexá” tsuhu̱ ra̱ “nda̱ postru̱” ko̱ a ra̱ “já postru̱”.\f* a̱tꞌaha̱ Jesucristo̱ kitsjá xána ko̱ Nti̱a̱ Na̱ꞌminá xi kitsꞌínkjꞌáíya ngáha̱ ra̱ Jesucristo̱ ngabayoo̱. Najmi xu̱ta̱ kitsjá xána ko̱ yꞌéxána.
\v 2 An ko̱ ta̱ ngayjee̱ já ntsꞌeé xi tjíntuko̱na e̱i̱ tínꞌekjíi̱hi̱ xu̱ju̱i̱n jun xu̱ta̱ ni̱nku̱ Galaci̱a̱.
\p
\v 3 Kasꞌenu̱u kju̱a̱nda ko̱ kju̱a̱jyu xi tsjáná Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\v 4 Kui xi kitsjá yjoho̱ nga kꞌienntjáíhiná a̱tꞌaha̱ ngatitsun tjínná. Bꞌa̱ kitsꞌín tu̱ xi tsꞌi̱ín nda̱íhiná a̱sunnte chꞌonkꞌun xi kichꞌaá ndꞌa̱i̱. Kitsjá yjoho̱ xi nkú tsꞌín kama mjehe̱ Nti̱a̱ Na̱ꞌminá.
\p
\v 5 ¡Kasꞌehe̱ Nti̱a̱ Na̱ꞌminá kju̱a̱chánka santaha tu̱ nkjéhé ni! Bꞌa̱ katuma.
\s Bꞌi̱ tsꞌín tsakúya Pablo̱ nkꞌie nga tu̱ nkú én nda tsuhu̱ Jesucristo̱ xi tíjña
\p
\v 6 Tu̱ bꞌa̱há tu̱ mana nkꞌie nga kutjuhú tíbankín tꞌaxíhu̱un Nti̱a̱ná xi jꞌájinnu̱u ko̱ xi kitsjánu̱u kju̱a̱nda xi sakújinná Jesucristo̱. Tínꞌekjóho̱on kjꞌa̱í én xi i̱ncha tsu jóo̱ nga kui xi én nda tsuhu̱ Nti̱a̱ná.
\v 7 Tu̱nga najmi tjíhín kjꞌa̱í én nda tsu. Bꞌa̱ tíxian a̱tꞌaha̱ tjín xi títsꞌínndyjajinnu̱u ko̱ mjehe̱ nga tsꞌi̱ínkꞌóntjaiya én nda tsuhu̱ Jesucristo̱.
\p
\v 8 Tsa tjín xi najmi bꞌa̱ tsꞌín kꞌu̱éni̱jmínu̱u én nda tsuhu̱ Nti̱a̱ná xi nkú tsꞌín yꞌeni̱jmíi̱, kui xi najmi nda katuma nginku̱n Nti̱a̱ná. Bꞌa̱ ta̱ katumani̱ tsa ji̱n kjꞌa̱í tsꞌín kꞌúéni̱jmíi̱ ko̱ tsa nku ntítsje xi ni̱baha ndji̱o̱jmi ján.
\v 9 Ja bꞌa̱ kixinnu̱u nga tjuhun ko̱ bꞌa̱há ta̱ tíxin ngáha̱nu̱u ndꞌa̱i̱. Tsa tjín xi kꞌu̱éni̱jmínu̱u nku én nda tsuhu̱ Nti̱a̱ná xi kjꞌa̱í nga xi kinꞌekjóho̱on, kui xi najmi nda katuma nginku̱n Nti̱a̱ná.
\p
\v 10 ¿Yá xi mjena nga nda tsꞌín ku̱a̱se̱na ndꞌa̱i̱? ¿A xu̱ta̱ a ra̱ Nti̱a̱ná? ¿A ra̱ tíbangisjainá nga tsjaha̱ kju̱a̱tsjo xu̱ta̱? Tsa mjena nga tsjaha̱ kju̱a̱tsjo xu̱ta̱, ja najmi ta̱ Cristo̱ títsꞌinxátꞌaha̱ ra̱ ma.
\s Bꞌi̱ tsꞌín tsakúya Pablo̱ xi nkú tsꞌín kama nku nda̱ postru̱hu̱ Jesucristo̱
\p
\v 11 Tíxinyanu̱u ni xuꞌbi̱, já ntsꞌe. Én nda tsu xi tíbꞌeni̱jmíá, najmi éhe̱n xu̱ta̱ niu̱.
\v 12 Najmi xu̱ta̱ kitsjána ée̱n ko̱ ta̱ ndaha najmi xu̱ta̱ tsakúyana. Jesucristo̱ kikjihín yꞌéjña chjina ée̱n.
\p
\v 13 Ja yo xi nkú tsꞌín tsáte̱jña ni̱stjin nkꞌie. Kikienkján Nti̱a̱ná xi nkú tsꞌín tíjñaha̱ xu̱ta̱ xi ntje̱ judio̱ tje̱he̱n ra̱. ꞌYún kitsjennkí unkie xu̱ta̱ ni̱nku̱hu̱ Nti̱a̱ná. Kama mjena nga tsꞌinkjé kai.
\v 14 Xi nkú tsꞌín tíjñaha̱ xu̱ta̱ judio̱ nga kꞌúéntu nginku̱n Nti̱a̱ná, an xi ꞌyún nkꞌa kitsjehe̱n nkjin já judio̱ xi ta̱ ñja kama cháka̱. Ngayjehe kꞌan kitsꞌintjusan sin cháha̱ ntje̱ chána̱.
\p
\v 15 Kintehe̱ ni nga kitsian, a̱tꞌaha̱ chánka kju̱a̱ndaha̱ Nti̱a̱ná, yꞌéjña tꞌaxínna ko̱ jꞌájinna. Chu̱ba̱ nkꞌie nga kama mjehe̱
\v 16 tsakúchjina Ntíhi̱, tu̱ xi kꞌueni̱jmíhi̱ ra̱ én nda tsuhu̱ xu̱ta̱ xi najmi ntje̱ judio̱ tje̱he̱n ra̱. Ko̱ nkꞌie nga tsakúchjina Ntíhi̱, najmi xu̱ta̱ ngjingjasjáíyaha̱.
\v 17 Ta̱ ndaha najmi ngjia nanki Jerusalen, tsa ngjisehe̱ já postru̱ xi tjun nga an. A̱nte Arabi̱a̱ ní ngjia. A̱skahan kikꞌóya ngáhana nanki Damasco̱.
\p
\v 18 A̱skahan nkꞌie nga ja jꞌa jan nú, ngjia Jerusalen nga ngjisehe̱ Pedro̱. Tjꞌion ni̱stjin tsꞌandayana yo̱ nga tsáte̱jñaka̱.
\v 19 Najmi kikie já postru̱ xingisoo̱. Nkuhú Santiago̱ kikie, kui xi ntsꞌe̱ maha Nda̱ Nti̱a̱ná Jesu.
\v 20 ¡Nti̱a̱ná be nga najmi tíbꞌana̱cha̱nu̱u ni xi tíbꞌetꞌá xu̱ju̱nnu̱u e̱i̱!
\p
\v 21 A̱skahan ngjia a̱nte Siri̱a̱ ko̱ a̱nte Cilici̱a̱.
\v 22 Kui chu̱bo̱ najmi bena xu̱ta̱ ni̱nku̱hu̱ Cristo̱ xi tjín a̱nte Judea̱.
\v 23 Tu̱ i̱ncha behé nkꞌie nga bꞌa̱ kitsú én: “Nda̱ xi kitsjennkí unkie rúná nkꞌie, kui rú xi ja ta̱ tíbꞌéni̱jmí ndꞌa̱i̱ én nda tsu xi sꞌejinná, én xi kama mjehe̱ nga tsꞌi̱ínndyja ni̱stjin nkꞌie.”
\v 24 Bꞌa̱ tsꞌín, nga̱tꞌaha̱ ni xi kamatꞌan, i̱ncha kitsꞌínkiehe yjoho̱ nga Nti̱a̱ná xi ꞌyún chánka.
\c 2
\s Bꞌi̱ tsꞌín kitsúya Pablo̱ xi nkú tsꞌín i̱ncha kitsꞌínkjáíhi̱n já postru̱ xingisoo̱
\p
\v 1 Nkꞌie nga ja jꞌa te ñju nú ta̱ ngjihí ngáhana Jerusalen. Ngjiko̱na Bernabe ko̱ ta̱ ngjika̱ Tito̱.
\v 2 Ngjia a̱tꞌaha̱ Nti̱a̱ná tsakúchjina nga tjíhin nga bꞌa̱ tsꞌian. Yo̱ kinchjani̱jmíko̱ tꞌaxíán já xi yaha̱ nga kui xi já kꞌaku̱hu̱ xu̱ta̱ ni̱nku̱. Kixinyaha̱ xi nkú tsꞌín tíbꞌeni̱jmíhi̱ én nda tsuhu̱ Jesucristo̱ xu̱ta̱ xi najmi ntje̱ judio̱ tje̱he̱n ra̱. Bꞌa̱ kitsꞌian tu̱ xi najmi ndyja̱ha xá xi títsꞌian.
\p
\v 3 Tito̱, nda̱ xi tje̱nko̱na xi najmi ntje̱ judio̱ tje̱he̱n ra̱, najmi kinꞌe kju̱a̱ꞌyúhu̱n nga nꞌe̱he̱ ni circuncision,
\v 4 ndaha tsa jasꞌenjinni̱ kꞌu̱a̱ xi já ntsꞌeé kitsꞌín ma maña̱ yjoho̱. Kama ñjajinni̱ tu̱ xi tsase maña̱ha xi nkú tsꞌín ñá xi sꞌejinná Jesu Cristo̱ najmi tíjñanená kju̱a̱téxuma xi kinꞌekjasꞌehe̱n Moise nkꞌie. Bꞌa̱ kitsꞌín jóo̱ a̱tꞌaha̱ mjehe̱ nga tsꞌi̱ín maná xu̱ta̱ musu̱hu̱ kju̱a̱téxumoo̱.
\v 5 Tu̱nga ndahá i̱chí najmi kikꞌa̱i̱ntei̱hi̱, a̱ta̱ha̱ mjeni̱ nga xi nkú títsu én nda tsuhu̱ Nti̱a̱ná, kuihí xi ngju̱a̱i̱ndju a̱jinnu̱u.
\p
\v 6 Máha já xi yaha̱ nga kui xi já kꞌaku̱hu̱ xu̱ta̱ ni̱nku̱, najmi yꞌésuhu̱n ni xi tíbꞌeni̱jmíá. Tsa já kꞌaku̱ niu̱ a̱ ra̱ najmi, najmi an be. A̱tꞌaha̱ tu̱ nku chu̱ba̱náhá nginku̱n Nti̱a̱ná.
\v 7 I̱ncha kamankjihi̱n nga Nti̱a̱ná kitsjá xána nga xu̱ta̱ xi najmi ntje̱ judio̱ tje̱he̱n ra̱ kꞌueni̱jmíhi̱ én nda tsuhu̱, xi nkú ta̱ tsꞌín kikꞌa̱i̱ xáha̱ Pedro̱ nga kui xi kꞌu̱éni̱jmíhi̱ xu̱ta̱ xi ntje̱ judio̱ tje̱he̱n ra̱.
\v 8 A̱tꞌaha̱ xi títsꞌínchjéhe̱n Pedro̱ nga ka̱ma nda̱ postru̱ a̱jihi̱n xu̱ta̱ judio̱, ta̱ títsꞌínchjénna nga ka̱ma nda̱ postru̱ a̱jihi̱n xu̱ta̱ xi tjín a̱sunntee̱.
\p
\v 9 I̱ncha kamankjihi̱n Santiago̱, Pedro̱ ko̱ Jua, xi yaha̱ xi nkúhu já kꞌaku̱, nga Nti̱a̱ná kitsjána kju̱a̱nda xuꞌbi̱. I̱ncha kitsjáni̱ ntsja nga bꞌi̱ tsꞌín yꞌejñai̱ nga an ko̱ Bernabe nꞌe̱i̱ xáha̱ Nti̱a̱ná a̱jihi̱n xu̱ta̱ xi najmi ntje̱ judio̱ tje̱he̱n ra̱ ko̱ nga kui i̱ncha tsꞌi̱ín xáha̱ Nti̱a̱ná a̱jihi̱n xu̱ta̱ xi ntje̱ judio̱ tje̱he̱n ra̱.
\v 10 Nku tutuhú ni xuꞌbi̱ xi tsankini̱, nga katjꞌáítsjenni̱ xu̱ta̱ xꞌa̱n, ni xi ngayjehe kꞌan ja ndꞌa̱i títsꞌintjusuhunna.
\s Bꞌi̱ tsꞌín kitsúya Pablo̱ xi nkú tsꞌín bꞌa̱ kitsúhu̱ Pedro̱ nga najmi nda kitsꞌín
\p
\v 11 Nkꞌie nga tsichu Pedro̱ nanki Antiokia̱, a̱nkjín a̱nkjín bꞌa̱ kixihi̱n nga najmi nda tjín ni xi títsꞌín, a̱tꞌaha̱ jé tje̱he̱n ra̱ ni xi kitsꞌín.
\v 12 Kintehe̱ ni nga i̱ncha tsichu yo̱ kꞌu̱a̱ já xi mako̱ Santiago̱, títjun tíkjineko̱ maha xu̱ta̱ xi najmi ntje̱ judio̱ tje̱he̱n ra̱. Tu̱nga nkꞌie nga tsichu jóo̱, a̱sꞌa̱i kikjexín yjoho̱ Pedro̱ ko̱ ngji tꞌaxín. Kitsankjún já xi tsu nga ta̱ tjíhin nga nꞌe̱he̱ ni circuncision já xi najmi ntje̱ judio̱ tje̱he̱n ra̱.
\v 13 A̱sꞌa̱i já ntsꞌeé judio̱ xingisoo̱ ta̱ jo kitsꞌín éhe̱n xi nkúhu Pedro̱. Santaha ko̱ Bernabe ta̱ kama kꞌun nga kitsꞌín jo éhe̱n.
\p
\v 14 Kikie nga najmi kixi̱ tíi̱ncha fiko̱ én nda tsuhu̱ Nti̱a̱ná xi nkú tsꞌín tje̱he̱n ra̱ ée̱n, a̱sꞌa̱i bꞌi̱ kixihi̱n Pedro̱ nginku̱n ngayjee̱ xu̱ta̱: “Ji xi ntje̱ judio̱ tje̱hen ri ko̱ tinchin xi nkú tsꞌín tjíntu xu̱ta̱ xi najmi ntje̱ judio̱ tje̱he̱n ra̱, najmi xi nkú tsꞌín tjíntu xu̱ta̱ xi ntje̱ judio̱ tje̱he̱n ra̱. Kui nga, ¿á mjehe ri nꞌe̱ kju̱a̱ꞌyúhu̱n ri̱ xu̱ta̱ xi najmi ntje̱ judio̱ tje̱he̱n ra̱ nga kꞌúéntuhu xi nkú tsꞌín tjíntu xu̱ta̱ xi ntje̱ judio̱ tje̱he̱n ra̱?”
\s Bꞌi̱ tsꞌín tsakúya Pablo̱ nkꞌie nga xu̱ta̱ judio̱ ta̱ bichú ma na̱xu̱ nginku̱n Nti̱a̱ná tu̱ nga̱tꞌaha̱ nga Jesucristo̱ sꞌejihi̱n
\p
\v 15 Ji̱n xi xu̱ta̱ judio̱ nga kitsii̱n, najmi tintsu̱ba̱jii̱n ngatitsun xi nkúhu xu̱ta̱ xi tjín a̱sunntei̱.
\v 16 Tu̱nga yaníi̱ nga na̱xu̱ bichú ma xu̱ta̱ nginku̱n Nti̱a̱ná tu̱ nga̱tꞌaha̱ nga sꞌejihi̱n Jesucristo̱, najmi tu̱ nga̱tꞌaha̱ ni tsa títsꞌíntjusun ni xi tjítꞌa kju̱a̱téxuma xi kinꞌekjasꞌehe̱n Moise. Kui nga ko̱ ta̱ ji̱n kinꞌe sꞌejihi̱nni̱ Cristo̱ Jesu tu̱ xi na̱xu̱ ku̱i̱chú maha̱ni̱ nginku̱n Nti̱a̱ná tu̱ nga̱tꞌaha̱ nga sꞌejinni̱ Cristo̱, najmi tu̱ nga̱tꞌaha̱ tsa tínꞌetjusui̱n ni xi tjítꞌa kju̱a̱téxumoo̱. A̱tꞌaha̱ ndaha nku xu̱ta̱ najmi na̱xu̱ ku̱i̱chú ma nginku̱n Nti̱a̱ná tu̱ nga̱tꞌaha̱ tsa títsꞌíntjusun ni xi tjítꞌa kju̱a̱téxumoo̱.
\p
\v 17 Ji̱n xi xu̱ta̱ judio̱ ta̱ tíbinchisjái̱ nga na̱xu̱ ku̱i̱chú mai̱ nginku̱n Nti̱a̱ná nga̱tꞌaha̱ ni xi kitsꞌín Cristo̱. Tu̱nga nkꞌie nga bꞌa̱ tínꞌei̱, tíyani̱ xi nkúhu xu̱ta̱ ngatitsun. ¿A kui xi tsuhu̱ ra̱ nga Cristo̱ yꞌéjñajinni̱ ngatitsuu̱n? ¡Najmi! ¡Ndaha tsa mí yjehe!
\v 18 Tsa ta̱ tsꞌihín ngáhana ni xi ja yꞌejñá tꞌaxíán, nkꞌiehé nga ta̱ ahan títsꞌin ma su̱ba̱ yjona̱ nku nda̱ xi tjíhi̱n jé.
\v 19 A̱tꞌaha̱ kju̱a̱téxumoo̱ tsayahana. Kju̱a̱téxumoo̱ xi bꞌa̱ kitsꞌínna, tu̱ xi nga̱tꞌaha̱ Nti̱a̱ná kúáte̱jña tíkꞌuhunna ndꞌa̱i̱.
\p
\v 20 Tꞌa kruu̱ tsayaka̱ Cristo̱. Najmi ta̱ an tíi̱jña tíkꞌun sahana. Cristo̱hó tíjña tíkꞌunjinna. Sꞌejinna Ntíhi̱ Nti̱a̱ná xi kitsꞌíntjona ko̱ kitsꞌínkjasꞌenntjaihina yjoho̱. Bꞌa̱ tsꞌian nga tíi̱jña sa a̱sunntei̱.
\v 21 Najmi tsꞌin tꞌaxíán kju̱a̱ndaha̱ Nti̱a̱ná. A̱tꞌaha̱ tsa kju̱a̱téxumoo̱ maha̱ tsꞌín nga na̱xu̱ ma xu̱ta̱ nginku̱n Nti̱a̱ná, kui xi tsuhu̱ ra̱ nga tu̱ kju̱a̱ndahá kꞌien Cristo̱.
\c 3
\s Bꞌi̱ tsꞌín kitsúya Pablo̱ ni xi kitsꞌínko̱ho̱ Espiri̱tu̱ xu̱ta̱ Galaci̱a̱
\p
\v 1 Jun xu̱ta̱ Galaci̱a̱, ¡á bꞌa̱ ṉkjún tsꞌín nchi̱nihinu! ¿Yá tsꞌana̱cha̱nu̱u? Kisꞌejña chjinu̱u xi nkúhu tsa tunkun kiyako̱honu xi nkú tsꞌín kisꞌetꞌa kruu̱ Jesucristo̱.
\v 2 Nku ni mjena kuasjáíyanu̱u. ¿Nkú tsꞌín kinꞌekjáíhi̱n ru̱u Espiri̱tu̱hu̱ Nti̱a̱ná? ¿A a̱tꞌaha̱ kinꞌetjusun ni xi tjítꞌa kju̱a̱téxumoo̱ a ra̱ a̱tꞌaha̱ ní nga kisꞌejinnu̱u én nda tsu xi kinuꞌyó?
\p
\v 3 ¿A tu̱ xí nchi̱ninú? Nga títjuhu̱n ni Espiri̱tu̱hu̱ Nti̱a̱ná tsasinko̱nu̱u xi nkú tsꞌín ku̱i̱ntsu̱bo̱o nginku̱n Nti̱a̱ná, tu̱nga ndꞌa̱i̱, ¿á jun su̱ba̱ bꞌa̱ tínꞌehenu?
\v 4 ¿A tu̱ kju̱a̱ndahá nkjin kju̱a̱ni̱ma̱ tsitjajíún? ¡Kutsa tu̱ kju̱a̱ndahá bꞌa̱ kama!
\v 5 Nti̱a̱ná tsjánu̱u Espiri̱tu̱hu̱ ko̱ tsꞌín kju̱a̱nkjún a̱jinnu̱u. ¿Á bꞌa̱ maha? ¿A a̱tꞌaha̱ tínꞌetjusun ni xi tjítꞌa kju̱a̱téxumoo̱ a ra̱ a̱tꞌaha̱ ní nga sꞌejinnu̱u én nda tsu xi kinuꞌyó?
\s Bꞌi̱ tsꞌín tsakúya Pablo̱ nkꞌie nga na̱xu̱ tsichu ma Abraham nginku̱n Nti̱a̱ná nkꞌie nga kisꞌejihi̱n Nti̱a̱ná
\p
\v 6 Abraham bi kisꞌejihi̱n Nti̱a̱ná. Kui niu̱ xi kitsꞌínchjíhi̱ ra̱ Nti̱a̱ná nga nku nda̱ xi na̱xu̱ kama Abraham.
\v 7 Kui nga katumankjihi̱nnu̱u nga xu̱ta̱ xi sꞌejihi̱n ra̱ Nti̱a̱ná, kuihí xi ntje̱he̱ Abraham.
\v 8 Kisꞌetꞌa éhe̱n Nti̱a̱ná xi má nga Nti̱a̱ná tsjáha̱ nga na̱xu̱ ku̱i̱chú ma xu̱ta̱ xi najmi ntje̱ judio̱ tje̱he̱n ra̱ tu̱ nga̱tꞌaha̱ nga Nti̱a̱ná sꞌe̱jihi̱n. Nti̱a̱ná kitsúya títjuhu̱n Abraham én nda tsuhu̱ nkꞌie nga bꞌi̱ kitsúhu̱: “Tsꞌinchjéhen tu̱ xi tu̱ nga̱tꞌahi̱ nda ka̱matꞌaihin ngayjee̱ na̱xi̱nantá xi tjín a̱sunntee̱.”
\v 9 Kui bꞌa̱ maha, xi sꞌejihi̱n ra̱ Nti̱a̱ná ndꞌa̱i̱, Nti̱a̱ná ta̱ nda tsꞌínko̱ho̱ xi nkú tsꞌín nda kitsꞌínko̱ Abraham xi kisꞌejihi̱n nkꞌie.
\p
\v 10 Ngayjee̱ xi tíkuyá nga ku̱i̱chú ma na̱xu̱ nginku̱n Nti̱a̱ná a̱tꞌaha̱ títsꞌíntjusun ni xi tjítꞌa kju̱a̱téxumoo̱, kui xi tíjñanehe̱ nga najmi nda ka̱ma nginku̱n Nti̱a̱ná tsa najmi tsꞌi̱íntjusun ngayjee̱ kju̱a̱téxumoo̱. A̱tꞌaha̱ bꞌi̱ tsꞌín tjítꞌa: “Najmi nda nginku̱n Nti̱a̱ná ngayjee̱ xu̱ta̱ xi najmi tsꞌi̱íntjusun tehe̱nte nga nkúnkú ni xi tjítꞌa xu̱ju̱n kju̱a̱téxumoo̱.”
\v 11 Ko̱ tíjña chji chji nga ndaha nku xu̱ta̱ najmi na̱xu̱ bichú ma nginku̱n Nti̱a̱ná tu̱ nga̱tꞌaha̱ tsa tsꞌíntjusun ni xi tjítꞌa kju̱a̱téxumoo̱, a̱tꞌaha̱ bꞌi̱ ta̱ tsꞌín tjítꞌa ya: “Xi ja na̱xu̱ nginku̱n Nti̱a̱ná tu̱ nga̱tꞌaha̱ nga sꞌejihi̱n kꞌúéjña tíkꞌun.”
\v 12 Najmi bꞌa̱ títsu kju̱a̱téxumoo̱: Xi sꞌe̱jihi̱n Nti̱a̱ná kui xi kꞌúéjña tíkꞌun. Bꞌi̱ ní títsu: “Xi tsꞌi̱íntjusun ni xi tjítꞌa kju̱a̱téxumoo̱, kui ní nihi xi tsꞌi̱ínkꞌíéjña tíkꞌuhu̱n.”
\p
\v 13 Cristo̱ yꞌéchjíntainá. Ngajoná kitsꞌín ma yjoho̱ nku ni xi najmi nda nginku̱n Nti̱a̱ná tu̱ xi tsꞌi̱ín nda̱íhiná kju̱a̱ꞌun xi nchja̱ni̱jmíyaha kju̱a̱téxumoo̱. A̱tꞌaha̱ bꞌi̱ ta̱ tsꞌín tjítꞌa ya: “Tu̱ yáhá ni xi tsjén tje̱nbꞌankitꞌa nku yá nga nꞌe̱kꞌien, kui xi najmi nda katuma nginku̱n Nti̱a̱ná.”
\v 14 Bꞌa̱ kitsꞌín Cristo̱ tu̱ xi Nti̱a̱ná tsꞌi̱íhin nga nda ka̱matꞌain xu̱ta̱ xi tjín a̱sunntee̱ xi nkú nga kitsúya títjuhu̱n Abraham, ko̱ tu̱ xi nꞌe̱kjáíhi̱n ra̱á Espiri̱tu̱hu̱ Nti̱a̱ná xi kitsúya títjun nga tsjáha̱ xi sꞌejihi̱n.
\s Bꞌi̱ tsꞌín tsakúya Pablo̱ nkꞌie nga najmi tsꞌínkꞌóntjaiya Nti̱a̱ná ni xi yꞌénda nkꞌie
\p
\v 15 Jun já ntsꞌe, kꞌuejñá chu̱ba̱yanu̱u nku ni. Nkꞌie nga tjín xi bꞌénda nku ni ko̱ basínnehe̱ ntsja xu̱ju̱n, najmi ta̱ chꞌa ma banganehe ni xi tjítꞌoo̱ ko̱ a ra̱ tsa kꞌu̱ésun saha̱.
\v 16 Nti̱a̱ná kitsúya títjuhu̱n Abraham ni xi tsjáha̱ kui ko̱ ntje̱ xi sꞌe̱he̱. Najmi bꞌa̱ títsu éhe̱n Nti̱a̱ná tsa nkjin maha ntje̱he̱ Abraham. Bꞌa̱ ní títsu nga nku i̱chí maha. “Ntje̱ xi tsꞌi̱”, títsu. Kui ntje̱, kui xi Cristo̱.
\p
\v 17 Kui ni xuꞌbi̱ xi mjena xínnu̱u nga bꞌa̱ tíxian. Ni xi yꞌéndako̱ Nti̱a̱ná Abraham najmi maha̱ tsꞌínndyjajnu nku kju̱a̱téxuma xi jꞌai sꞌejña ñju unchan ko̱ katé nú a̱skahan. Tsa ni xi bꞌa̱ kamaha, kindyja ni xi kitsú Nti̱a̱ná nkꞌie.
\v 18 A̱tꞌaha̱ tsa kju̱a̱téxumoo̱ yꞌaha̱ ra̱ ni xi tsjáná Nti̱a̱ná, ja najmi ta̱ én xi kitsúya títjuhun Nti̱a̱ná xi yꞌaha̱ ra̱ ni xi tsjá. Tu̱nga bꞌa̱há kitsú títjuhu̱n Nti̱a̱ná Abraham nga tu̱ tsjáhá ra̱ niu̱.
\s Bꞌi̱ tsꞌín tsakúya Pablo̱ xá xi tjíhi̱n kju̱a̱téxumaha̱ Nti̱a̱ná
\p
\v 19 Kui bꞌa̱ maha, ¿má xi kui xáha̱ kju̱a̱téxumoo̱? Jꞌai sꞌejña tu̱ xi sku̱e̱he xu̱ta̱ nga ngatitsun ni xi tíi̱ncha tsꞌín. Kui xá xi kisꞌehe̱ santa nkúhu nga kisꞌejña ntje̱he̱ Abraham, kui ntje̱ xi tjíhin nga tsꞌi̱ínkjáíhi̱n ni xi kitsúya títjun Nti̱a̱ná nga tsjáha̱. Ko̱ najmi ntsja Nti̱a̱ná kitsjáha̱ ra̱ xu̱to̱ kju̱a̱téxumoo̱. Tu̱ kitsꞌínkꞌatiyahá. Ntítsjee̱ ko̱ Moise kitsꞌínchjén nga bꞌa̱ kitsꞌín.
\v 20 Tu̱nga nkꞌie nga kinchja̱ko̱ Nti̱a̱ná Abraham, najmi kitsꞌínkꞌatiya éhe̱n.
\p
\v 21 Kui bꞌa̱ maha, ¿a tífi kontra̱há ra̱ kju̱a̱téxumoo̱ ni xi kitsúhu̱ Nti̱a̱ná Abraham? ¡Najmi! ¡Ndaha tsa mí yjehe! A̱tꞌaha̱ tsa kisꞌejña nku kju̱a̱téxuma xi ka̱maha̱ tsꞌi̱ínkꞌíéntu tíkꞌun xu̱ta̱, nkꞌiehé ka̱ma tsꞌi̱ínchjén xu̱ta̱ kju̱a̱téxumoo̱ ko̱ bꞌa̱ tsꞌín ku̱i̱chú ma na̱xu̱hu nginku̱n Nti̱a̱ná.
\v 22 Ni xi títsu ní éhe̱n Nti̱a̱ná, nkꞌie nga ngatitsuu̱n tjíꞌyúhu̱n ngayjee̱ xu̱ta̱, tu̱ xi xu̱ta̱ xi sꞌe̱jihi̱n ra̱ Jesucristo̱, kui xi tsꞌi̱ínkjáíhi̱n ni xi kitsú Nti̱a̱ná nga tu̱ tsjáhá ra̱ xi sꞌe̱jihi̱n.
\p
\v 23 Sꞌejinná Jesucristo̱ ndꞌa̱i̱, tu̱nga kintehe̱ ni nga kisꞌejña chji Jesucristo̱, kju̱a̱téxumoo̱ tjíꞌyúhu̱n ñá.
\v 24 Xi nkú joyaha nku nda̱ musu̱ xi kjebénki jántí xi̱, bꞌa̱ tsꞌín ngjiko̱ná kju̱a̱téxumoo̱ nginku̱n Cristo̱ tu̱ xi sꞌe̱jihinná ko̱ bꞌa̱ tsꞌín na̱xu̱ ku̱i̱chú mahaná nginku̱n Nti̱a̱ná.
\v 25 Tu̱nga ndꞌa̱i̱, nkꞌie nga ja sꞌejinná Jesucristo̱, ja najmi ta̱ machjéhenná xi kjébénkiná.
\s Bꞌi̱ tsꞌín tsakúya Pablo̱ nkꞌie nga ñá xi ntíhi̱ Nti̱a̱ná ndꞌa̱i̱
\p
\v 26 Ngatentoo̱ ja ntíhi̱ Nti̱a̱ná mahanu ndꞌa̱i̱, a̱tꞌaha̱ sꞌejinnu̱u Cristo̱.
\v 27 Ngatentoo̱ kisaténtájiun Cristo̱ ko̱ Cristo̱ tintsu̱ba̱jiun.
\v 28 Najmi chumi ni tsꞌi̱íhi̱n yá xi ntje̱ judio̱ tje̱he̱n ra̱ ko̱ yá xi najmi ntje̱ judio̱ tje̱he̱n ra̱, yá xi musu̱ xi kichꞌatse ko̱ yá xi nda̱íhi̱ yjoho̱, yá xi xꞌi̱hi̱n ko̱ yá xi chju̱úhu̱n. A̱tꞌaha̱ nkuhú mako̱o Cristo̱ Jesu, kui nga nku chu̱ba̱hanu nginku̱n Nti̱a̱ná.
\v 29 Tsa Cristo̱ tsꞌe̱nu̱u, ntje̱he̱ Abraham tje̱he̱nnu̱u ko̱ nꞌe̱kjóho̱on ni xi kikꞌinya títjuhu̱n Abraham.
\c 4
\p
\v 1 Bꞌi̱ tsꞌín xínyanu̱u ni xi tíxian. Ntíhi̱ nku nda̱ tsꞌi̱ínkjáíhi̱n ni xi tsꞌe̱ na̱ꞌmihi̱ santaha nga ka̱ma chá. Nkꞌie nga ndyja saha̱, bꞌa̱ ta̱ joya xi nkúhu nku nda̱ chí  musu̱ xi kichꞌatse, ndaha tsa kui tsꞌe̱ ngayjee̱ ni xi tjíhi̱n na̱ꞌmihi̱.
\v 2 Tjín xi kunntáha̱ ko̱ tjín xi tsꞌín kuenta̱ ni xi machjéhe̱n. Tu̱nga nkꞌiehé nga bꞌa̱ ku̱i̱tsu̱ na̱ꞌmihi̱ nga najmi bꞌa̱ ta̱ tsꞌín kꞌúéjñaha, ja nda̱íhi̱ yjoho̱.
\p
\v 3 Bꞌa̱ ta̱ kamatꞌaán ko̱ ñá. Nkꞌie nga najmi kje̱e yaá Nda̱ Nti̱a̱ná, ni xi tsꞌe̱ a̱sunntee̱ tsatéxumaná. Kamaá xi nkúhu  musu̱ xi kichꞌatse.
\v 4 Tu̱nga nkꞌie nga tsichu ni̱stjin xi yꞌéjña Nti̱a̱ná, kitsꞌín nibá Ntíhi̱. Kitsihi̱n nku ta̱chju̱ún ko̱ kisꞌejñanehe̱ kju̱a̱téxumoo̱ nkúhu nga kitsin.
\v 5 Bꞌa̱ kitsꞌín Nti̱a̱ná tu̱ xi yꞌéchjíntjaihi xu̱ta̱ xi tíjñanehe̱ kju̱a̱téxumoo̱, tu̱ xi ko̱ ta̱ ñá Nti̱a̱ná tsꞌi̱ín mahaná ntíhi̱.
\p
\v 6 A̱tꞌaha̱ ja ntíhi̱ Nti̱a̱ná mahaná ndꞌa̱i̱, kui nga Nti̱a̱ná kitsꞌín nibáha a̱jin ani̱ma̱ná Espiri̱tu̱hu̱ Ntíhi̱, xi: “¡Ji Na̱ꞌmi i̱chí!”, tsuhu̱ Nti̱a̱ná nga nchja̱ko̱.
\v 7 Kui bꞌa̱ maha ndꞌa̱i̱ ja najmi ta̱ xu̱ta̱ musu̱ xi kichꞌatseheni. Ntíhi̱ ní Nti̱a̱ná ji ndꞌa̱i̱. Ko̱ tu̱ nga̱tꞌaha̱ nga ji xi ja ntíhi̱ Nti̱a̱ná, kui nga ta̱ nꞌe̱kjáíhi̱n ri̱ ni xi tsjáha̱ ra̱ Nti̱a̱ná ntíhi̱.
\s Bꞌi̱ tsꞌín kitsúya Pablo̱ nkꞌie nga tu̱ bꞌa̱há tu̱ maha̱ ni xi títsꞌín xu̱ta̱ ni̱nku̱ xi tjíntu a̱nte Galaci̱a̱
\p
\v 8 Ni̱stjin nkꞌie, nkꞌie nga najmi kje̱e yo Nti̱a̱ná, nkjin tíkjá nti̱a̱ xi najmi Nti̱a̱ná tsatéxumanu̱u.
\v 9 Tu̱nga ndꞌa̱i̱ ja yo Nti̱a̱ná, nkꞌie nga kju̱axi̱hi Nti̱a̱ níná xi benu̱u. Kui nga, ¿nkú tsꞌín ta̱ tínꞌekꞌótjiyakꞌún ngáhanu ni xi najmi tjíhi̱n ngaꞌyún, ni xi najmi chumi ni chjíhi̱ ra̱? ¿A mjehénu̱u nga ta̱ ku̱a̱téxuma ngáha̱nu̱u nti̱a̱ xi najmi Nti̱a̱ná?
\v 10 A̱tꞌaha̱ kꞌu̱a̱ ni̱stjin ko̱ sá ko̱ sꞌí ko̱ nú tíyankjún.
\v 11 Tu̱ bꞌa̱há tu̱ mana. Kutsa xá tiyahá kitsꞌian a̱jinnu̱u, tjín nga xian.
\p
\v 12 Tíbankinu̱u, já ntsꞌe. Kasꞌeyanu̱u xi nkúhu an. A̱tꞌaha̱ an bi ja tjíyana xi nkúhu jun. Najmi bꞌa̱ tíxian tsa a̱tꞌaha̱ tsa tjín ni xi kinꞌenú.
\v 13 Xi nkú tsꞌín ja yo, nga tjuhun najmi nda tjínna nkꞌie nga ngjikꞌieni̱jmínu̱u én nda tsuhu̱ Jesucristo̱.
\v 14 Ko̱ ndaha tsa kju̱a̱sti kitsjanu̱u nga̱tꞌaha̱ chꞌin xi kisaténa, tu̱nga najmi chꞌohón tsꞌín kichasenú ko̱ ta̱ ndaha najmi kinꞌe tꞌaxínnú. Tu̱ sa ní kinꞌekjáínnú xi nkúhu tsa nku ntítsjehe̱ Nti̱a̱ná an, xi nkúhu tsa Cristo̱ Jesu kikjin xi kinꞌekjóho̱on.
\v 15 Kui nga, ¿má ngjihi̱ ra̱ ngayjee̱ kju̱a̱tsjo xi kisꞌejñajinnu̱u kui ni̱stjin xuꞌbo̱? A̱tꞌaha̱ ka̱ma xínya kixi̱a̱ nga santaha kama kꞌun kai nga kinꞌesjo tunkun nga kikꞌa̱i̱nú kui ni̱stjiu̱n.
\v 16 Kui bꞌa̱ maha, ¿a nda̱ kontra̱nu̱uhú an ndꞌa̱i̱ tu̱ nga̱tꞌaha̱ nga tíxinyanu̱u ni xi na̱xu̱ tjín?
\p
\v 17 Nda tsꞌín basenu̱u já xi mjehe̱ nga ko̱ kju̱a̱téxumoo̱ chꞌo̱o, tu̱nga najmi ngandanu̱u nga bꞌa̱ tíi̱ncha tsꞌín. A̱tꞌaha̱ ni xi mje níhi̱ jóo̱ nga nꞌe̱ tꞌaxíhi̱ín xinki̱á, tu̱ xi kui jóo̱ nda tsꞌín cha̱se̱he̱ru̱u.
\v 18 Nda tjín nga nda tsꞌín basehe̱ xinkjín xu̱ta̱. Ñá bi, tehe̱nte bꞌa̱ nꞌe̱é, najmi tu̱ nku nkꞌie nga tíi̱jñajinnu̱u.
\v 19 Mjena jun xi nkúhu tsa ntína̱ mahanu. Nkꞌie nga najmi kje̱e bꞌa̱ tsꞌín sꞌeyanu̱u xi nkú tsꞌín tjíyaha̱ Cristo̱, tíꞌba̱i̱nú kju̱a̱ni̱ma̱ xi nkúhu kju̱a̱ni̱ma̱ xi fꞌajin nku ta̱chju̱ún xi tíbꞌéntaha̱ ntí.
\v 20 ¡Á bꞌa̱ uhun kju̱a̱ nga najmi yo̱ tíi̱jñajihi̱nnu̱u ndꞌa̱i̱ tu̱ xi kuinchjako̱ sisihi̱nnu̱u kai! Najmi ta̱ behena nkú tsꞌinnu̱u, a̱tꞌaha̱ tu̱ bꞌa̱há tu̱ mana ni xi tínꞌo.
\s Bꞌi̱ tsꞌín yꞌéjña chu̱ba̱ya Pablo̱ nga tsakúya ni xi yꞌénda Nti̱a̱ná nkꞌie
\p
\v 21 Tꞌinyanú ma, jun xi mjenu̱u nga sꞌe̱jñanenu̱u Kju̱a̱téxuma xi kinꞌekjasꞌehe̱n Moise. ¿A najmi kje̱hé nuꞌyó ni xi tjítꞌa yo̱?
\v 22 Bꞌa̱ títsu nga jo ntí kisꞌentuhu̱ Abraham, nku xi kitsihi̱n na̱ musu̱ xi kichꞌatse ko̱ nku xi kitsihi̱n chju̱úhu̱n.
\v 23 Kitsin ntíhi̱ na̱ musu̱ xi kichꞌatsee̱ a̱tꞌaha kikjantuko̱ xinkjín jóo̱, tu̱nga kitsihín ntíhi̱ chju̱úhu̱n Abraham a̱tꞌaha̱ Nti̱a̱ná ja bꞌa̱ kitsúhu̱ nga nku ntí tsjáha̱.
\p
\v 24 Ni xi tíxinnu̱u, bꞌi̱ tsꞌín tíjña chu̱ba̱yaná. Nga joo̱ ni xi yꞌéndako̱ Nti̱a̱ná xu̱ta̱ xi tsꞌe̱, kui xi nga joo̱ jminchjíu̱n. Ni xi tjun yꞌénda Nti̱a̱ná na̱xi̱ Sinai, kui xi na̱ xi tjuu̱n. Kui xi ꞌmi Agar ko̱ ntíhi̱ no̱, kui xi ma xu̱ta̱ musu̱.
\v 25 Na̱ Agar, kui xi na̱xi̱ Sinai xi tíjña a̱nte Arabi̱a̱. Kui xi nkú joyaha nanki Jerusalen xi tíjña ndꞌa̱i̱. Xu̱ta̱ musu̱ xi kichꞌatse kui ko̱ ntíhi̱.
\p
\v 26 Ni tse̱tse̱ xi yꞌénda Nti̱a̱ná, kui xi chju̱úhu̱n Abraham. Kui xi nkú joyaha nanki Jerusalen xi tíjña nkꞌa ján. Nda̱íhi̱ yjoho̱ ko̱ ta̱ nda̱íhi̱ yjoho̱ ntíhi̱, kui xi ñá.
\v 27 A̱tꞌaha̱ bꞌi̱ tsꞌín tjítꞌa éhe̱n Nti̱a̱ná:
\q Katꞌetsjohi ji ta̱chju̱ún nti̱ xi najmi tjíhi̱n ntí.
\q Cha̱jnu̱tsin ji xi najmi yai xi nkú tsꞌín nibá chji̱nti̱hi̱ ntí.
\q A̱tꞌaha̱ ꞌyún sꞌe̱ saha̱ ntí ta̱chju̱ún xi kisꞌejña masen
\q nga ta̱chju̱ún xi tíjñaha̱ xꞌi̱n.
\p
\v 28 Jun já ntsꞌe, jun xi nkúhu Isaac. Jun xi ntí xi kitsúya títjun Nti̱a̱ná nga tsjáha̱ Abraham.
\v 29 Tu̱nga xi nkú kama nkꞌie, bꞌa̱ ta̱ tíma ndꞌa̱i̱. Ntí xi kitsin tu̱ nga̱tꞌaha̱ nga kikjantuko̱ xinkjín jóo̱, kui xi kitsjennkí unkie ntí xi kitsin xi nkú tsꞌín mjehe̱ Espiri̱tu̱hu̱ Nti̱a̱ná.
\v 30 Tu̱nga, ¿nkú títsu éhe̱n Nti̱a̱ná? Bꞌi̱ títsu: “Ti̱yútje̱nnki na̱ musu̱ xi kichꞌatsee̱ ko̱ ntíhi̱. A̱tꞌaha̱ ntíhi̱ na̱ musu̱ xi kichꞌatsee̱ najmi ka̱ma sa̱kútꞌaha̱ ni xi tsꞌi̱ínkjáíhi̱n ntíhi̱ chju̱úhu̱n Abraham.”
\v 31 Kui bꞌa̱ maha, já ntsꞌe, najmi ntíhi̱ na̱ musu̱ xi kichꞌatsee̱ ñá, ntíhi̱ ní na̱ xi nda̱íhi̱ yjoho̱ ñá.
\c 5
\s Bꞌi̱ tsꞌín tsakúya Pablo̱ nkꞌie nga Jesucristo̱ kitsꞌín nda̱íná kju̱a̱téxuma xi kinꞌekjasꞌehe̱n Moise
\p
\v 1 Cristo̱ kitsꞌín nda̱íná ni xi tíjñanená tu̱ xi ku̱i̱nima nda̱íhiná. Kui nga ndjá ti̱nchahanu ko̱ najmi tu̱ ꞌba̱i̱nto tsa tu̱ mí nihí ni xi ta̱ kꞌu̱éꞌyún ngáha̱nu̱u.
\p
\v 2 Ta̱sinñjunú. An Pablo̱ bꞌa̱ tíxinnu̱u. Tsa nꞌe̱nu̱u ni circuncision, najmi sa̱kúnu̱u ni xi mjehe̱ Cristo̱ nga tsjánu̱u.
\v 3 Ta̱ tsꞌinkjꞌáítsjen ngáha̱nu̱u nga ngayjee̱ xi nꞌe̱he̱ ni circuncision, kui tjíhin nga tsꞌi̱íntjusun ngayjee̱ ni xi tjítꞌa kju̱a̱téxumoo̱.
\v 4 Xi tíbangisjai nga na̱xu̱ ku̱i̱chú ma nginku̱n Nti̱a̱ná tu̱ nga̱tꞌaha̱ nga títsꞌíntjusun kju̱a̱téxumoo̱, kui suba suba ngji tꞌaxíhi̱n Cristo̱. Najmi ta̱ tíjñajihin kju̱a̱ndaha̱ Nti̱a̱ná.
\v 5 Ñá bi tíjñajinná Espiri̱tu̱hu̱ Nti̱a̱ná ko̱ tíchuyáá nga na̱xu̱ ku̱i̱chú maá nginku̱n Nti̱a̱ná tu̱ nga̱tꞌaha̱ nga Cristo̱ sꞌejinná.
\v 6 Nkuhú maka̱á Cristo̱ Jesu. Najmi ta̱ chjíhi̱ ra̱ tsa kinꞌená ko̱ tsa najmi kinꞌená ni circuncision. Nkꞌie ní sꞌejinná Nti̱a̱ná, kui ní nihi xi chjíhi̱ ra̱ ko̱ kui xi bakúyaná xi nkú tsꞌín nꞌetjáá xinki̱á.
\p
\v 7 Nga tjuhun nda tsꞌín tintsu̱bo̱o, tu̱nga, ¿yá xi yꞌéchꞌonu̱u nga najmi ta̱ tínuꞌyáꞌéhe̱n ru̱u én xi na̱xu̱ tjín?
\v 8 Én xi tínuꞌyó ndꞌa̱i̱ najmi nginku̱n Nti̱a̱ná xi jꞌájinnu̱u nibáha̱ ra̱.
\v 9 Bꞌi̱ tsú xu̱ta̱: “Kutin na̱ꞌyu̱ san tsꞌínsanyje na̱ꞌyu̱ ni̱nku̱o̱n.”
\v 10 Behe̱ kꞌan nginku̱n Nti̱a̱ná nga najmi kjꞌa̱í tsꞌín nꞌe̱nkjíntakꞌun nga̱tꞌaha̱ ni xi tíxinnu̱u. Tu̱ yáhá ni xi títsꞌínndyjajinnu̱u ni xi kisꞌejinnu̱u, Nti̱a̱ná tsꞌi̱ínnijéhe̱.
\p
\v 11 Já ntsꞌe, tsa an xi kꞌueni̱jmíhina nga tjíhin nga nꞌe̱he̱ ni circuncision xu̱ta̱ xi sꞌejihi̱n Jesu, najmi ta̱ kꞌúéma tje̱nki unkiehena jóo̱ bꞌa̱. Ko̱ bꞌa̱ tsꞌín najmi i̱ncha ka̱ma stihi̱ ra̱ nkꞌie nga kꞌueni̱jmíá Cristo̱ Jesu xi kꞌientꞌá tꞌa kruu̱.
\v 12 Já xi títsꞌínndyjajinnu̱u, xi mjehe̱ nga ku̱i̱chátꞌo yjonintenu̱u nga nꞌe̱nu̱u ni circuncision, ¡tu̱ sahá katatetꞌayje má nkjúhu̱n ma!
\p
\v 13 Jun já ntsꞌe, Nti̱a̱ná jꞌájinnu̱u tu̱ xi ka̱ma nda̱íhi̱nu̱u nti̱a̱ xi najmi Nti̱a̱ná, xi tsatéxumanu̱u nkꞌie. Tu̱nga ndaha tsa ja nda̱ínu̱u yjonu̱u, najmi tíjña nda̱ínu̱u nga nꞌo̱o ni xi ku̱i̱nchja̱ha̱ ani̱ma̱nu̱u. Tu̱ sa ní tu̱ nga̱tꞌaha̱ kju̱a̱tjo xi tjínnu̱u, bꞌi̱ ngján ti̱si̱nko̱o xinki̱u.
\v 14 A̱tꞌaha̱ ngayjee̱ ni xi tjítꞌa kju̱a̱téxumoo̱ nkuhú bichú majihi̱n kju̱a̱téxuma xuꞌbi̱: “Nꞌe̱tjóí xu̱ta̱hi̱ xi nkú tsꞌín tjohi yjohi̱.”
\v 15 Tu̱nga tsa ta̱ jun tjínko̱nu̱u kju̱a̱sti ko̱ tínꞌeꞌuhu̱un xinki̱u, chúhu̱n yjonu̱u, a̱tꞌaha̱ kutsa ta̱ jun ta̱ mahá nꞌe̱kjehenu xinki̱u.
\s Bꞌi̱ tsꞌín tsakúya Pablo̱ nkꞌie nga Espiri̱tu̱hu̱ Nti̱a̱ná tsjáni̱yáná xi nkú tsꞌín ku̱i̱ntsu̱ba̱á
\p
\v 16 Kui nga bꞌa̱ tíxihi̱nnu̱u. Ti̱ntsu̱bo̱o xi nkú tsꞌín mjehe̱ Espiri̱tu̱hu̱ Nti̱a̱ná. Najmi tu̱ nꞌo ni xi tínchja̱ha̱ ani̱ma̱nu̱u.
\v 17 A̱tꞌaha̱ ni xi nchja̱ha̱ ani̱ma̱ná fi kontra̱ha̱ Espiri̱tu̱hu̱ Nti̱a̱ná, ko̱ Espiri̱tu̱ fi kontra̱ha̱ ni xi nchja̱ha̱ ani̱ma̱ná. Satékjo nga joo̱, ko̱ tu̱ nga̱tꞌaha̱ nga bꞌa̱ ma najmi jun batexumoho̱o yjonu̱u.
\v 18 Tu̱nga tsa Espiri̱tu̱hu̱ Nti̱a̱ná títsjáni̱yánu̱u, tsuhu̱ ra̱ ma nga najmi tíjñanenu̱u kju̱a̱téxuma xi kinꞌekjasꞌehe̱n Moise.
\p
\v 19 Yaha̱ nkꞌie nga ni xi nchja̱ha̱ ani̱ma̱ha̱ xu̱ta̱ tsꞌín. Chu̱ba̱ fantuko̱hó xinkjín, tsꞌín ni xi si nginku̱n Nti̱a̱ná, najmi chumi nihi bꞌéchꞌoho̱ yjoho̱,
\v 20 benkjún nti̱a̱ xi ntsja xu̱ta̱ tsꞌínndaha, tsꞌín tjꞌe, fi kontra̱ha̱ xinkjín, bꞌésiko̱ xinkjín, nchi̱ni̱, tsꞌín unkie xinkjín, tsꞌínxkíhi̱n xinkjín ni xi tjíhi̱n, kju̱a̱chán bꞌéntje̱ ko̱ xin ma ñjakúko̱ xinkjín,
\v 21 ni xi tjíhi̱n xu̱ta̱ xingisoo̱ mjehe̱, ma chꞌi̱, ko̱ tu̱ nku ngatitsuhún i̱ncha mjehe̱ tsꞌi̱ín. Ngayjee̱ ni xuꞌbi̱ ko̱ kjꞌa̱í sa ni xi nkúhu ni xuꞌbi̱ i̱ncha tsꞌín xu̱ta̱ xi tsꞌín ni xi nchja̱ha̱ ani̱ma̱ha̱. Títsꞌinkjꞌáítsjennu̱u ndꞌa̱i̱ xi nkú nga ta̱ kixinnu̱u nga tjuhun. Xu̱ta̱ xi bꞌa̱ tíi̱ncha tsꞌín najmi tsuhu̱ ra̱ nga Nti̱a̱ná ku̱a̱téxumaha̱.
\p
\v 22 Tu̱nga Espiri̱tu̱hu̱ Nti̱a̱ná bi tsꞌín sꞌená kju̱a̱tjo, kju̱a̱tsjo, kju̱a̱jyu ko̱ kju̱a̱tsenta. Tsꞌín ya nga bisinka̱á xinki̱á, nga nda sꞌeya ani̱ma̱ná, nga kixi̱ nꞌetjusaán ni xi nda,
\v 23 nga ni̱ma̱kju̱a̱ nꞌe maá yjoná, ko̱ nga kꞌúéchꞌo su̱ba̱áha̱ yjoná ni xi tjín. Nkꞌie nga nꞌe̱é ni xuꞌbi̱, najmi tjín kju̱a̱téxuma xi kꞌúéchꞌoná.
\v 24 Ko̱ xu̱ta̱ xi tsꞌe̱ Cristo̱ Jesu ja kingjátꞌa kruu̱ ani̱ma̱ha̱, ani̱ma̱ ngatitsun xi mjehe̱ ko̱ fásihi̱n ni chꞌonkꞌun xi tjín a̱sunntee̱.
\v 25 Tsa Espiri̱tu̱hu̱ Nti̱a̱ná tintsu̱ba̱ tíkꞌuhunná ndꞌa̱i̱, ta̱ tjenntehe̱é nga Espiri̱tu̱ katsjáni̱yáná.
\v 26 Najmi tu̱ nkꞌa nꞌesjeé yjoná. Najmi tu̱ nꞌestihi̱í xinki̱á. Najmi tu̱ kasꞌená kju̱a̱nchi̱ni̱.
\c 6
\s Bꞌi̱ tsꞌín tsakúya Pablo̱ nkꞌie nga tjíhin nga ku̱i̱si̱nka̱á xinki̱á
\p
\v 1 Jun já ntsꞌe, tsa yo nga tjín xi tíjnejin ngatitsun, jun xi ja tintsu̱bo̱o xi nkú tsꞌín bakú ni̱yáná Espiri̱tu̱hu̱ Nti̱a̱ná ti̱si̱nko̱o nga chjúsíntje̱n ngáhanu. Cha̱so̱ sisiun ko̱ ni̱ma̱kju̱a̱ nꞌe̱sjo yjonu̱u nga bꞌa̱ nꞌo̱o, tu̱ xi najmi ko̱ ta̱ jun chjútꞌayákꞌuhu̱nnu̱u.
\v 2 Xinki̱u xi tífꞌajin kju̱a̱ni̱ma̱ bꞌi̱ ngján ti̱si̱nko̱o. Nkꞌie nga bꞌa̱ nꞌo̱o, kju̱a̱téxumaha̱ Cristo̱ tínꞌetjusun.
\p
\v 3 Tsa tjín xi chu̱ba̱ chánka suba kuihí kꞌu̱a̱sje yjoho̱ nkꞌie nga yaha̱ nkꞌie nga najmi bꞌa̱ tjín ni xi tíbakú, ta̱ kuihi tíbꞌana̱cha̱ subaha̱ yjoho̱.
\v 4 Nga nkúnkáá tjíhin nga cha̱se̱ sisihi̱ín tsa bꞌa̱ tjín ni xi tínꞌeé. Bꞌa̱ tsꞌín tsjo kꞌúéhená nga̱tꞌaha̱ ni xi tínꞌeé, najmi nga̱tꞌaha̱ ni xi títsꞌín kjꞌa̱í xu̱ta̱.
\v 5 A̱tꞌaha̱ nga nkúnkáá chꞌa̱nji chꞌa̱njináá ni xi tínꞌeé.
\p
\v 6 Xi tíbangiya éhe̱n Nti̱a̱ná tjíhin nga ku̱a̱kjányako̱ xi tíbakúyaha̱ ngayje tíkjá ni xi nda tísakúhu̱.
\p
\v 7 Najmi tu̱ chꞌana̱cho̱o yjonu̱u. Ndaha nku najmi ma tsutonko̱ Nti̱a̱ná. A̱tꞌaha̱ ni xi kꞌu̱éntje̱ xu̱ta̱, kui nihi xi sa̱kú ngáha̱ ra̱.
\v 8 Xi títsꞌín ni xi nchja̱ha̱ ani̱ma̱ha̱, kui xi xi nkú joyaha tsa xujmá xi najmi nda tíbꞌéntje̱. Cha̱n xi kjꞌu̱áya, kui xi ngabayoo̱. Tu̱nga xi títsꞌín ni xi bakúyaha̱ Espiri̱tu̱hu̱ Nti̱a̱ná, kui xi xi nkú joyaha tsa xujmá xi nda tíbꞌéntje̱. Cha̱n xi kjꞌu̱áya, kui xi kju̱a̱tíkꞌuu̱n. A̱tꞌaha̱ Espiri̱tu̱hu̱ Nti̱a̱ná tsꞌi̱ínkꞌíéjña tíkꞌun síhi̱n.
\v 9 Kui nga najmi tu̱ nꞌekjentaha̱ ra̱á yjoná nga nꞌe̱é ni xi nda. A̱tꞌaha̱ tsa najmi nꞌe̱kjehe̱é takꞌaán, ku̱i̱chú ni̱stjin nga chjꞌa̱yaá cha̱ha̱n ni xi yꞌentje̱é.
\v 10 Kui bꞌa̱ maha, nda nꞌe̱he̱ ra̱á tu̱ yáhá ni xki̱ xki̱ nga sa̱kúntená nga bꞌa̱ nꞌe̱é. Ko̱ ꞌyún nda nꞌe̱ saha̱á já ntsꞌeé xi ta̱ sꞌejihi̱n Nti̱a̱ná.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 11 An su̱ba̱ su̱ba̱ títsꞌinntúnu̱u. Cha̱so̱o nga xí ihí ntu xi tíbꞌetꞌánu̱u.
\p
\v 12 Xi tíi̱ncha tsꞌín kju̱a̱ꞌyúhu̱nnu̱u nga nꞌe̱nu̱u ni circuncision, bꞌa̱ tíi̱ncha tsꞌín a̱tꞌaha̱ mjehe̱ nga nda sku̱e̱he̱ xu̱ta̱. Najmi mjehe̱ nga nꞌe̱ unkie, kui nga najmi yꞌéni̱jmíhi nga nku tutu Cristo̱ xi kisꞌetꞌa kruu̱ tsꞌínkꞌanki xu̱ta̱.
\v 13 Ta̱ ndaha já xi nꞌehe̱ ni circuncision najmi tsꞌíntjusun ni xi tjítꞌa kju̱a̱téxumoo̱. Ni xi mjehé ra̱ jóo̱ nga nꞌe̱nu̱u ni circuncision tu̱ xi nkꞌa kꞌu̱a̱sjehe yjoho̱ nkꞌie nga ku̱i̱nchja̱ni̱jmíyaha nga kui nga̱tꞌaha̱ tjítꞌaha̱nu̱u kui chu̱bo̱.
\v 14 An bi, najmi mjena tsa nkꞌa kꞌuasjé yjona̱ nga̱tꞌaha̱ ni xi títsꞌian. Nku tutuhú ni xi kitsꞌín Nda̱ Nti̱a̱ná Jesucristo̱ tꞌa kruu̱, kui nihi xi bꞌasjé chánkako̱hona yjona̱. Tꞌa kruu̱ xuꞌbo̱ kꞌien ni a̱sunnte xi nchja̱na ko̱ an ta̱ tsaya yo̱.
\v 15 Najmi chumi ni chjíhi̱ ra̱ tsa kinꞌená ko̱ tsa najmi kinꞌená ni circuncision. Ni xi chjí níhi̱ ra̱, nkꞌie nga Nti̱a̱ná kitsꞌín maná xu̱ta̱ tse̱tse̱.
\v 16 Nti̱a̱ná katsjáha̱ kju̱a̱jyu ko̱ katasinko̱ ngayjee̱ xu̱ta̱ xi bꞌa̱ tsꞌín tjíntu xi nkú tsꞌín títsjáni̱yá kju̱a̱téxuma xuꞌbi̱ ko̱ xi kju̱axi̱ nga xu̱ta̱ha̱ Nti̱a̱ná.
\p
\v 17 Ndꞌa̱i̱ tíbꞌaha̱ ra̱ nga najmi ta̱ mjehena tsa tjín xi tsjána kju̱a̱sti. A̱tꞌaha̱ yjonintena̱ yjajnu chu̱ba̱ha̱ ni xi kinꞌena. Kui xi tíbakúchji nga Jesu títsꞌinxátꞌaha̱.
\p
\v 18 Já ntsꞌe, katsejíhin ani̱ma̱nu̱u kju̱a̱ndaha̱ Nda̱ Nti̱a̱ná Jesucristo̱. Bꞌa̱ katuma.