\id EPH Mazatec of Jalapa de Díaz
\h Xu̱ju̱n xi kinꞌekjíhi̱ xu̱ta̱ ni̱nku̱ Efe̱so̱
\toc1 Xu̱ju̱n xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Efe̱so̱
\mt Xu̱ju̱n xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Efe̱so̱
\c 1
\s Bꞌi̱ tsꞌín kikjaniñaha̱ Pablo̱ xu̱ta̱ ni̱nku̱ xi tjín nanki Efe̱so̱
\p
\v 1 An Pablo̱, an xi kama nku nda̱ postru̱hu̱\f + \fr 1:1 \ft “Xi kisꞌexá” tsuhu̱ ra̱ “nda̱ postru̱” ko̱ a ra̱ “já postru̱”.\f* Jesucristo̱ a̱tꞌaha̱ Nti̱a̱ná bꞌa̱ tsꞌín kama mjehe̱. Tífaniñanu̱u jun xu̱ta̱ Efe̱so̱ xi kikjꞌátsꞌe̱nu̱u Nti̱a̱ná, jun xi sꞌejinnu̱u Cristo̱ Jesu.
\p
\v 2 Kasꞌenu̱u kju̱a̱nda ko̱ kju̱a̱jyu xi tsjáná Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\s Bꞌi̱ tsꞌín tsakúya Pablo̱ kju̱a̱ndaha̱ Nti̱a̱ná
\p
\v 3 Kanꞌetsjoho̱ Nti̱a̱ná xi Nti̱a̱ha̱ ko̱ Na̱ꞌmihi̱ Nda̱ Nti̱a̱ná Jesucristo̱. Kui xi kitsꞌín nga a̱jihi̱n Cristo̱ kisakúná ngayje tíkjá ni nda xi nibáha ndji̱o̱jmi ján, ni xi tsjáná Espiri̱tu̱hu̱.
\v 4 Cristo̱ kitsꞌínchjén nga jꞌájinná kintehe̱ ni nga kitsꞌínnda a̱sunntee̱ tu̱ xi kju̱átsꞌe̱he̱ná ko̱ tu̱ xi najmi sꞌe̱hená jé nginku̱n. Tjoho̱ Nti̱a̱ná ñá.
\v 5 Kui nga yꞌénda títjuhun nga Jesucristo̱ tsꞌi̱ínchjéhen tu̱ xi ntíhi̱ tsichu mahaná. Tsitjusun xi nkú tsꞌín kama tsjoho̱ ko̱ kama mjehe̱.
\v 6 Kui nga kanꞌetsjoho̱ ra̱ Nti̱a̱ná xi bakúchji kju̱a̱nda chánkaha̱, kju̱a̱nda xi sakújinná Ntíhi̱ xi tu̱ xí tjohó ra̱.
\p
\v 7 Kisaténdzjo jníhi̱ Ntíu̱. Bꞌa̱ tsꞌín kisꞌechjíntjaihi jéná ko̱ kinꞌendyjatꞌaná ngatitsunná. Kama xi nkú tjín bichú kju̱a̱chánkaha̱ kju̱a̱ndaha̱ Nti̱a̱ná.
\v 8 Kui kju̱a̱ndoo̱ xi tu̱ ni xí kitsjáháná tu̱ xi sꞌe̱hená ngayje tíkjá kju̱a̱nkjintakꞌun ko̱ tu̱ xi ka̱mankjihinná ni xi tsꞌe̱.
\v 9 Yꞌéjña chjiná ni xi kama mjehe̱ nga tsꞌi̱ín, xi yꞌéjña ꞌma ni̱stjin nkꞌie. Kama tsjoho̱ nga yꞌénda títjun ni xi tsꞌi̱ín Cristo̱.
\v 10 Yꞌénda nga nkuhú ku̱i̱chúkꞌiekú a̱jihi̱n Cristo̱ ngayjee̱ ni xi tsichuba ndji̱o̱jmi ján ko̱ a̱sunntee̱. Bꞌa̱ ka̱ma nkꞌie nga ja ku̱i̱chú chu̱ba̱. Tsꞌi̱íntjusun ni xi ja yꞌénda.
\p
\v 11 Xi nkú tsꞌín yꞌénda títjun Nti̱a̱ná, bꞌa̱ tsꞌín kitsꞌínchjén Cristo̱ tu̱ xi jꞌájihi̱nni̱ ji̱n xi ntje̱ judio̱ tje̱he̱nni̱ ko̱ kitsjáni̱ ni xi tsjáha̱ ntíhi̱. Bꞌa̱ kitsꞌín a̱tꞌaha̱ Nti̱a̱ná tsꞌíntjusun ngayjee̱ ni xi bꞌénda.
\v 12 Ko̱ ji̱n kichuyái̱hi̱ ni nda xi sa̱kújinni̱ Cristo̱. Ji̱n tjun bꞌa̱ kinꞌei̱. Kui nga tínꞌetsjoho̱ ra̱ Nti̱a̱ná xi tjíhi̱n kju̱a̱chánka.
\p
\v 13 Jun bi kinuꞌyó ko̱ kisꞌejinnu̱u én xi na̱xu̱ tjín. Kui xi én nda tsuhu̱ Jesucristo̱ xi kitsꞌínkꞌankinu̱u. Ko̱ Cristo̱ kitsꞌín nga kinꞌekjóho̱on Espiri̱tu̱hu̱ Nti̱a̱ná, Espiri̱tu̱ xi kitsúya títjun nga tsjá. Bꞌa̱ tsꞌín kisꞌejña chjihi nga Nti̱a̱ná tsꞌe̱nu̱u.
\v 14 A̱tꞌaha̱ tsjá títjun Espiri̱tu̱hu̱ tu̱ xi cha̱ha nga nꞌe̱kjáíhi̱n ni xi tsjáha̱ ntíhi̱ nkꞌie nga ka̱ma nda̱íyjehe̱ xu̱ta̱ xi ja kisꞌechjíntjai. Kui nga kanꞌetsjoho̱ ra̱ Nti̱a̱ná xi tjíhi̱n kju̱a̱chánka.
\s Bꞌi̱ tsꞌín kinchja̱ntjai Pablo̱ xu̱ta̱ ni̱nku̱ nanki Efe̱so̱
\p
\v 15 Kui bꞌa̱ maha, nkúhu nga kintꞌe nga sꞌejinnu̱u Nda̱ Nti̱a̱ná Jesu ko̱ nga tjonu̱u ngayjee̱ xu̱ta̱ xi tsꞌe̱ Nti̱a̱ná,
\v 16 najmi títsꞌinkjꞌáíya nga nchjantjáínu̱u nkꞌie nga nchjaka̱ Nti̱a̱ná ko̱ tsjaha̱ mábꞌa̱chjíhi̱ nga nda tímatꞌon.
\v 17 Tíbankihi̱ xi Nti̱a̱ha̱ Nda̱ Nti̱a̱ná Jesucristo̱, Na̱ꞌmi xi tjíhi̱n kju̱a̱chánka, nga Espiri̱tu̱hu̱ katsjánu̱u kju̱a̱nkjintakꞌun ko̱ kꞌu̱éjña chjinu̱u ni xi tsꞌe̱, tu̱ xi ka̱mankjihi̱nnu̱u nkú tjíhi̱n ra̱ nga̱tꞌa tsꞌe̱ Nti̱a̱ná.
\p
\v 18 Tíbankihi̱ nga kakjexꞌájin kju̱a̱nkjinkꞌunnu̱u tu̱ xi cha̱hanu ni xi tíkuyáha̱ xu̱ta̱ xi Nti̱a̱ná jꞌájihi̱n ko̱ tu̱ xi cha̱hanu xi nkú tsꞌín chánka ni xi tsꞌi̱ínkjáíhi̱n xu̱ta̱ tsꞌe̱.
\v 19 Mjena nga cho̱o xi nkú tsꞌín chánka tsꞌati ngaꞌyúhu̱n Nti̱a̱ná, ngaꞌyún xi basinko̱ná ñá xi sꞌejinná éhe̱n. Kui ngaꞌyún xuꞌbo̱ bakúchji ni xi tsꞌín Nti̱a̱ná.
\v 20 Kui xi kitsꞌínxájihi̱n Cristo̱ nkꞌie nga Nti̱a̱ná kitsꞌínkjꞌáíyaha̱ ngabayoo̱ ko̱ kitsꞌínkꞌíéjñatꞌaha̱ Nti̱a̱ná nkꞌa ján, yo̱ má batéxuma.
\p
\v 21 Kitsjáha̱ a̱nte xi ꞌyún nkꞌa a̱jihi̱n ngayjee̱ xi batéxuma a̱sunntei̱ ko̱ xi tjíhi̱n xá, xi yankjún, xi nkꞌa tje̱n ko̱ xi tjíhi̱n tu̱ mí xáhá ni xi yankjún. Najmi tu̱ nku ni̱stjin xi kichꞌaá ndꞌa̱i̱ bꞌa̱ tsꞌín nkꞌa tje̱n, ko̱ ní ni̱stjin xi kjꞌu̱a̱í a̱skahan.
\v 22 Ngayjee̱ ni xi tjín a̱ya ntsja Cristo̱ yꞌéya Nti̱a̱ná ko̱ yꞌéjña títjun ya Cristo̱ nga ku̱a̱téxumaha̱ ngayjee̱ ni xi tjín ngandaha̱ xu̱ta̱ ni̱nku̱.
\v 23 A̱tꞌaha̱ xu̱ta̱ ni̱nku̱, kui xi yjonintehe̱ Cristo̱ ko̱ Cristo̱ xi tsꞌín nga ka̱ma ndju̱ú tu̱ mí nihí ni. Tsa ni xi najmi tjíhin xu̱ta̱ ni̱nku̱, najmi ma ndju̱ú Cristo̱ kai.
\c 2
\s Bꞌi̱ tsꞌín tsakúya Pablo̱ nkꞌie nga nꞌekꞌankiná tu̱ nga̱tꞌaha̱ ni xi kitsꞌín Cristo̱
\p
\v 1 Jun bi tu̱ nga̱tꞌaha̱ ngatitsunnu̱u ko̱ jénu̱u xu̱ta̱kꞌien kamo.
\v 2 Nkꞌie tintsu̱ba̱jiun jénu̱u xi nkú tsꞌín tíjñaha̱ xu̱ta̱ a̱sunnte xuꞌbi̱ ko̱ xi nkú tsꞌín mjehe̱ nda̱ninda kꞌaku̱ xi tjíhi̱n ngaꞌyún a̱jihi̱n sée̱n. Kui xi títsꞌínxájihi̱n ndꞌa̱i̱ xu̱ta̱ xi najmi ntꞌéꞌéhe̱n Nti̱a̱ná.
\p
\v 3 Ngatenteé bꞌa̱ ta̱ nꞌe tintsu̱ba̱á ni̱stjin nkꞌie xi nkú tsꞌín kinchja̱ha̱ ani̱ma̱ná a̱sunntee̱. Kinꞌeé ni xi kama mjehe̱ ani̱ma̱ ngatitsunná ko̱ ni xi tjínjin kju̱a̱nkjinkꞌunná. Xi nkú kꞌaán nkꞌie, ñá tsuhuná kju̱a̱kjaha̱n Nti̱a̱ná xi nkúhu xu̱ta̱ xingisoo̱.
\v 4 Tu̱nga tu̱ ni xí ma ni̱ma̱há ra̱ Nti̱a̱ná xu̱ta̱, kui nga ꞌyún kitsꞌíntjohoná.
\v 5 Kui kju̱a̱ha kitsꞌínkꞌíéntu tíkꞌunko̱honá Cristo̱ nkꞌie nga ja tsayaha̱á ngatitsunná. Nga̱tꞌaha̱ kju̱a̱ndaha̱ tu̱ títsꞌínkꞌankihínu̱u Nti̱a̱ná.
\p
\v 6 Nti̱a̱ná ta̱ ñja kitsꞌínkjꞌáíyako̱ná Cristo̱ ngabaya xi tintsu̱ba̱jián kai ko̱ kitsꞌínkꞌíéntuko̱ná Cristo̱ ndji̱o̱jmi ján.
\v 7 Bꞌa̱ kitsꞌín tu̱ xi ni̱stjin xi nibáha ku̱a̱kúchjihi xi nkú tsꞌín chánka tíjña kju̱a̱ndaha̱, kui xi tu̱ xí ndahá, a̱tꞌaha̱ nda tsasená nga̱tꞌaha̱ ni xi kitsꞌín Cristo̱ Jesu.
\v 8 Nga̱tꞌaha̱ kju̱a̱ndaha̱ Nti̱a̱ná tsꞌankihinu a̱tꞌaha̱ kisꞌejinnu̱u. Nti̱a̱ níná tu̱ kitsꞌínkꞌankihínu̱u. Najmi jun manu̱u nꞌo ni xuꞌbi̱.
\v 9 Najmi nga̱tꞌaha̱ ni nda xi kinꞌeé tsꞌankihiná, tsa tu̱ xi bꞌa̱ tsꞌín tjín xi nkꞌa kꞌu̱a̱sjehe yjoho̱.
\v 10 Nti̱a̱ná kitsꞌínndaná. Yꞌéyaná xi nkúhu Cristo̱ nga kitsꞌínndaná tu̱ xi nꞌe̱hená ni xi nda xi yꞌénda títjun ko̱ tu̱ xi ku̱i̱ntsu̱ba̱jihinná ni xi ndoo̱.
\s Bꞌi̱ tsꞌín tsakúya Pablo̱ nkꞌie nga Cristo̱ nkuhú ntje̱ kitsꞌín ma xu̱ta̱ judio̱ ko̱ xi najmi judio̱
\p
\v 11 Kui bꞌa̱ maha, jun xi najmi ntje̱ judio̱ kichꞌo nga kitsiun, nꞌe̱kjꞌáítsjehennu xi nkú nꞌe tintsu̱bo̱o ni̱stjin nkꞌie. Xu̱ta̱ xi najmi kinꞌehe̱ ni circuncision kitsúnu̱u xu̱ta̱ xi ntje̱ judio̱ tje̱he̱n ra̱, a̱tꞌaha̱ kui xi tsꞌíhi̱n yjoninintehe̱ ni circuncision.
\v 12 Nꞌe̱kjꞌáítsjon nga kui ni̱stjiu̱n tintsu̱ba̱ tꞌaxíhu̱un Cristo̱ ko̱ nga najmi ntje̱he̱ xu̱ta̱ Israel jun. Najmi kama tsꞌa̱jun ni xi yꞌéndako̱ títjun Nti̱a̱ná xu̱ta̱ xi tsꞌe̱, ni xi kitsúya títjuhu̱n nga tsjáha̱. Ndaha nku ni xi tsjáha̱ Nti̱a̱ná xu̱ta̱ xi tsꞌe̱ najmi tíchuyóho̱o nga sa̱kúnu̱u kai. Chu̱ba̱ tintsu̱ba̱nú a̱sunntee̱ nga najmi yo Nti̱a̱ná.
\v 13 Kjin tintsu̱bo̱o ni̱stjin nkꞌie, tu̱nga ndꞌa̱i̱ nkuhú ja kamako̱o Cristo̱ Jesu ko̱ ja tintsu̱ba̱ tiño tu̱ nga̱tꞌaha̱ jní xi tsaténdzjo Cristo̱.
\p
\v 14 Nga̱tꞌaha̱ Cristo̱ tjíhinná kju̱a̱jyu. Kui xi nkuhú ntje̱ kitsꞌín ma xi ntje̱ judio̱ tje̱he̱n ra̱ ko̱ xi najmi ntje̱ judio̱ tje̱he̱n ra̱. Kikjexuba xjó xi yꞌéchjaha̱ xu̱ta̱ nkꞌie tu̱ xi nkuhú ka̱maha. Kikjexín ni xi ngji kontra̱ha̱ ra̱ xinkjín xu̱ta̱. Kitsjá yjonintehe̱
\v 15 tu̱ xi yꞌéjña tꞌaxíhin kju̱a̱téxuma xi kinꞌekjasꞌehe̱n Moise xi nkjin ni tjítꞌaha̱. Bꞌa̱ tsꞌín nkuhú ntje̱ tse̱tse̱ kitsꞌín maha nga joo̱ ko̱ nkuhú kitsꞌín mako̱ yjoho̱. Kitsꞌín nga tsichutꞌáha̱ xinkjín nga nkúnkú.
\v 16 Kꞌientꞌá kruu̱ tu̱ xi nkuhú ntje̱ tsꞌi̱ín maha nga joo̱ ko̱ nga ku̱i̱nchja̱ko̱ nda ngáha Nti̱a̱ná. Bꞌa̱ tsꞌín kikjexíhin ni xi ngji kontra̱ha̱ ra̱ xinkjín xu̱ta̱.
\p
\v 17 Cristo̱ jꞌai tsjá én nda tsu, kui xi yꞌa kju̱a̱jyu. Bꞌa̱ tsꞌín kisakúhu̱nu̱u kju̱a̱jyu jun xi kjin tintsu̱bo̱ho̱ Nti̱a̱ná ni̱stjin nkꞌie ko̱ ta̱ kisakúhu̱ kju̱a̱jyu xi tiña tjíntu.
\v 18 Nga̱tꞌaha̱ Cristo̱ xi ntje̱ judio̱ tje̱he̱n ra̱ ko̱ xi najmi ntje̱ judio̱ tje̱he̱n ra̱ ma bichútꞌaha̱ Nti̱a̱ná ndꞌa̱i̱. Nkuhú Espi̱ri̱tu̱hu̱ Nti̱a̱ná xi tsꞌín nga bichútꞌaha̱á.
\p
\v 19 Kui bꞌa̱ maha, najmi ta̱ xu̱ta̱ kjꞌa̱íhinu ko̱ ta̱ ndaha xu̱ta̱ xi tjímasún. Ja ní tsichumo ko̱ jun xu̱ta̱ xi tsꞌe̱ Nti̱a̱ná ko̱ nkuhú ja mako̱o xu̱ta̱ xi tjíntunkí nkꞌíéhe̱n Nti̱a̱ná.
\v 20 Jun xi nkú joyaha nku niꞌya xi tímanda, xi já postru̱ ko̱ já profeta̱ kikꞌatutsꞌi̱hi̱n. Tu̱nga Jesucristo̱hó kitsjá xáha̱ nga bꞌa̱ i̱ncha tsꞌi̱ín.
\v 21 Cristo̱ be xi nkú tsꞌín ngju̱a̱i̱ niꞌyoo̱. Nkꞌie nga ka̱ma ndju̱ú niꞌyoo̱, nku ni̱nku̱ xi tsje ka̱maha̱ Nti̱a̱ná.
\v 22 Jun xi yꞌaha̱nu̱u Cristo̱ bichúmo ni̱nku̱ xi má nga tíjñaya Espiri̱tu̱hu̱ Nti̱a̱ná.
\c 3
\s Bꞌi̱ tsꞌín kitsúya Pablo̱ xá xi kikꞌa̱i̱hi̱
\p
\v 1 An Pablo̱ nga̱tꞌaha̱ Cristo̱ Jesu kjíi̱yaꞌyúhunna. Bꞌa̱ tímatꞌan tu̱ nga̱tꞌaha̱ ngandanu̱u jun xi najmi ntje̱ judio̱ tje̱he̱nnu̱u.
\v 2 Yo nga kikꞌa̱i̱na nga kꞌueni̱jmínu̱u kju̱a̱ndaha̱ Nti̱a̱ná.
\v 3 Tsakúchjina ni xi yꞌéjña ꞌma ni̱stjin nkꞌie, xi nkú nga ja ta̱ kuakꞌietꞌánu̱u.
\v 4 Nkꞌie nga nꞌe̱yo xu̱ju̱i̱n, cho̱o nga be sisian ni xi kisꞌejña ꞌma nga̱tꞌa tsꞌe̱ Cristo̱.
\v 5 Kui niu̱ xi najmi kikꞌinyaha̱ xu̱ta̱ xi kisꞌe nú chá ján nkꞌie, tu̱nga ndꞌa̱i̱ Espiri̱tu̱hu Nti̱a̱ná ja tsakúchjihi̱ já postru̱hu̱ ko̱ já profeta̱ha̱ Nti̱a̱ná
\v 6 nkꞌie nga xu̱ta̱ xi najmi ntje̱ judio̱ tje̱he̱n ra̱ ta̱ tsꞌi̱ínkjáíhi̱n ni xi tsjáha̱ Nti̱a̱ná ntíhi̱ ko̱ ta̱ ku̱i̱chú ma nku yjonintehe̱ Cristo̱ ko̱ ta̱ sa̱kú yaha̱ ni xi kitsúya títjun Nti̱a̱ná nga tsjáha̱ xu̱ta̱ xi tsꞌe̱. Én nda tsuhu̱ Cristo̱ xi bꞌa̱ tsꞌíu̱n.
\p
\v 7 Nti̱a̱ná tu̱ kitsjáhana nga kꞌueni̱jmíá én nda tsu xuꞌbi̱. Kju̱a̱ndaha̱ Nti̱a̱ná xi bꞌa̱ kitsꞌíu̱n. Kitsjána xi nkú tsꞌín tje̱he̱n ra̱ ngaꞌyún chánkaha̱.
\v 8 An xi ꞌyún i̱chí sa a̱jihi̱n ngayjee̱ xu̱ta̱ xi tsꞌe̱ Nti̱a̱ná, tu̱nga kikꞌa̱i̱hína kju̱a̱ndaha̱ nga tíbꞌeni̱jmíhi̱ xu̱ta̱ xi najmi ntje̱ judio̱ tje̱he̱n ra̱ kju̱a̱nchi̱náha̱ Cristo̱ xi ndaha nku najmi chꞌa mankjinyjehe̱.
\v 9 Tíbꞌejñá chja xi nkú tsꞌín tíbitjusun ni xi yꞌéjña ꞌma Nti̱a̱ná ni̱stjin nkꞌie, kui xi kitsꞌínnda ngayjee̱ ni xi tjín.
\v 10 Bꞌa̱ tsꞌín xu̱ta̱ ni̱nku̱ tíbꞌéjña chji ndꞌa̱i̱ xi nkú tjín kju̱a̱nkjinkꞌuhu̱n Nti̱a̱ná, kju̱a̱nkjinkꞌun xi kjꞌa̱í kjꞌa̱í tsꞌín yaha̱. Kui ni xuꞌbi̱ tísꞌejña chji nginku̱n xi tjíhi̱n xá ko̱ xi tjíhi̱n ngaꞌyún nkꞌa ján.
\p
\v 11 Kui niu̱ xi yꞌénda títjun Nti̱a̱ná nkúhu ni̱stjin nkꞌie ko̱ Nda̱ Nti̱a̱ná Jesucristo̱ ja kitsꞌíntjusun niu̱ ndꞌa̱i̱.
\v 12 A̱tꞌaha̱ nkuhú maka̱á Cristo̱ ko̱ a̱tꞌaha̱ sꞌejinná én nda tsuhu̱, kui nga tsuhu̱ ra̱ takꞌaán ko̱ najmi binkjaán nga bichúkꞌun tiñaha̱á Nti̱a̱ná.
\v 13 Kui bꞌa̱ maha tíbankihi̱nu̱u nga najmi tu̱ nꞌekjehe̱ ru̱u takꞌun nga̱tꞌaha̱ nga un tíbena ngandanu̱u. Nga̱tꞌaha̱ nga un tíbena, Nti̱a̱ná títsꞌín nga tísꞌejña chjinu̱u kju̱a̱chánkaha̱.
\s Bꞌi̱ tsꞌín kitsúya Pablo̱ xi nkú tsꞌín bankintjáí xu̱ta̱ ni̱nku̱ Efe̱so̱
\p
\v 14 Kui kju̱a̱ha báa̱si̱nkúnchꞌihinna nginku̱n Nti̱a̱ Na̱ꞌminá.
\v 15 Kui xi bꞌéjña nga sꞌe nga nkúnkú ntje̱ xi tjín ndji̱o̱jmi ján ko̱ a̱sunntee̱.
\v 16 Bankihi̱ nga Espiri̱tu̱hu̱ Nti̱a̱ná katsjá ngaꞌyúnko̱ho̱nu̱u xi nkú tsꞌín tíjña kju̱a̱chánka tsjo tjíhi̱n tu̱ xi sꞌe̱he̱ ra̱ ngaꞌyún ani̱ma̱nu̱u,
\v 17 ko̱ nga Cristo̱ katꞌejñajin ani̱ma̱nu̱u tu̱ nga̱tꞌaha̱ nga sꞌejinnu̱u. Katji na̱nka̱ kja̱ma̱nu̱u a̱jihi̱n kju̱a̱tjoo̱ ko̱ ndjá ti̱nchajiun,
\v 18 tu̱ xi bꞌa̱ tsꞌín jun ko̱ ngayjee̱ xu̱ta̱ xi tsꞌe̱ Nti̱a̱ná ka̱ma ka̱mankjihi̱nnu̱u xi nkú tsꞌín tayá ko̱ ndju ko̱ na̱nka̱ ko̱ nkꞌa kju̱a̱tjoho̱ Cristo̱.
\v 19 Mjena nga cho̱o kju̱a̱tjoho̱ Cristo̱ tu̱ xi bꞌa̱ tsꞌín katsejín kikjihi̱nnu̱u Nti̱a̱ná, ndaha tsa ꞌyún chánka sa kju̱a̱tjoho̱ nga ni xi mankjinná.
\p
\v 20 Kanꞌetsjoho̱ Nti̱a̱ná, kui xi tsꞌati ni xi maha̱ tsꞌín nga xi nkúhu ni xi binchihi̱í ko̱ tsa xi nkú tsꞌín títsu ani̱ma̱ná nga ka̱ma. Bꞌa̱ ma xi nkú tsꞌín tíjña ngaꞌyún xi tsꞌe̱ xi títsꞌínxájinná.
\v 21 Katsꞌínkjáíhi̱n Nti̱a̱ná kju̱a̱chánka a̱jihi̱n xu̱ta̱ ni̱nku̱ xi tsꞌe̱ Cristo̱ Jesu. Tehe̱nte bꞌa̱ katuma ko̱ santaha tu̱ nkꞌéhé ni. Joho̱n, bꞌa̱ katuma.
\c 4
\s Bꞌi̱ tsꞌín tsakúya Pablo̱ nkꞌie nga nkuhú tinchajián Cristo̱
\p
\v 1 Kui bꞌa̱ maha tíbankihi̱nu̱u an xi kjíi̱yaꞌyán nga̱tꞌaha̱ Nda̱ Nti̱a̱ná. Kixi̱ tankínko̱o yjonu̱u xi nkú tsꞌín tjíhin nga tsꞌi̱ín xu̱ta̱ xi Nti̱a̱ná jꞌájihi̱n. A̱tꞌaha̱ Nti̱a̱ná jꞌájinnu̱u.
\v 2 Ni̱ma̱kju̱a̱ nꞌe̱sjo yjonu̱u ko̱ nda kasꞌeya ani̱ma̱nu̱u. Kasꞌenu̱u kju̱a̱tsenta ko̱ bꞌi̱ ngján nꞌe̱ꞌyún takꞌun xinki̱u. Bꞌa̱ nꞌo̱o tu̱ nga̱tꞌaha̱ kju̱a̱tjo xi tíjñajinnu̱u.
\v 3 Tjen ngaꞌyúhu̱un yjonu̱u nga nkuhú katumako̱ tehe̱nto xinki̱u xi nkú tsꞌín tsjáni̱yánu̱u Espiri̱tu̱hu̱ Nti̱a̱ná ko̱ xi nkú tsꞌín nkuhú tsꞌín manu̱u kju̱a̱jyuu̱.
\p
\v 4 Nkuhú maha yjonintehe̱ Cristo̱ ko̱ nkuhú maha Espiri̱tu̱hu̱ Nti̱a̱ná xi tíjña. Bꞌa̱ ta̱ tsꞌín nkuhú jꞌájinnu̱u Nti̱a̱ná, kui nga nkuhú ni xi tíchuyóho̱o.
\v 5 Nkuhú maha Nda̱ Nti̱a̱ xi tíjña. Nkuhú ni xi sꞌejinná ko̱ nkuhú Nda̱ Nti̱a̱ná nꞌekjasꞌehe̱én xu̱ta̱ nga batentáha̱á.
\v 6 Nkuhú maha Nti̱a̱ná xi Na̱ꞌminá ngatenteé, kui xi batéxumaha̱, tsꞌínchjén ko̱ tíjñajihi̱n ngayjee̱ ni xi tjín.
\p
\v 7 Tu̱nga kinꞌekjáíhín ra̱á kju̱a̱nda nga nkúnkáá. Xi nkú tsꞌín kitsꞌíndzjoná Cristo̱, bꞌa̱ tsꞌín kisakúná.
\v 8 Kui nga bꞌi̱ tsꞌín tjítꞌaha éhe̱n Nti̱a̱ná:
\q Ngjinji nkꞌa ján nga ngjiko̱ xi jakjꞌá,
\q ko̱ tu̱ kitsjáhá ra̱ xu̱ta̱ ni xi nda.
\m
\v 9 ¿Nkú tsuhu̱ ra̱ nga ngjinji? Kui xi tsuhu̱ ra̱ nga tjun ngjijen má na̱nka̱ha̱ tꞌanankiu̱.
\v 10 Ko̱ xi ngjijee̱n, kui xi ta̱ ngjinji má ꞌyún nkꞌaha̱ nkꞌa ján tu̱ xi tsꞌi̱íntjusuhun ngayjee̱ ni xi tsichuba.
\p
\v 11 Ko̱ kui kikjin xi kitsjá nga tjín xi ka̱ma já postru̱, ko̱ nga tjín xi ka̱ma já profeta̱, ko̱ nga tjín xi kꞌu̱éni̱jmí én nda tsuhu̱ Nti̱a̱ná, ko̱ nga tjín xi ka̱ma já bastuu̱ ko̱ já maestru̱.
\v 12 Kui kju̱a̱ndoo̱ kikꞌa̱i̱hi̱ jóo̱ tu̱ xi ku̱a̱kúyaha̱ ra̱ xu̱ta̱ xi tsꞌe̱ Nti̱a̱ná xi nkú tsꞌín ku̱a̱si̱nko̱ xinkjín ko̱ tu̱ xi bꞌa̱ tsꞌín sa̱kú ngaꞌyúhu̱n ra̱ xu̱ta̱ ni̱nku̱, kui xi yjonintehe̱ Cristo̱.
\v 13 Bꞌa̱ tsꞌín nkuhú sꞌe̱jihinná ko̱ nkuhú cha̱á yáha Ntíhi̱ Nti̱a̱ná. Yo̱hó ni̱ ma ku̱i̱chú maá xi tjíhin nga ku̱i̱chú maá ko̱ sꞌe̱yaná xi nkúhu kui.
\p
\v 14 Nkꞌie nga bꞌa̱ kamoo̱, najmi sꞌe̱yaná xi nkúhu jántí xi̱ xi kjitꞌa kjitꞌa kjꞌa̱í tsꞌín sꞌeyaha̱ ko̱ najmi kꞌu̱a̱i̱nteé tsa tu̱ mí ni tse̱tse̱hé xi sa̱kúyaná, tsa kui niu̱ xi kjéꞌyúnná nga mjehe̱ kꞌu̱a̱na̱cha̱ná. A̱tꞌaha̱ kui niu̱ xi tsꞌínchjén já maña̱ xi ni tsankꞌá bakúya.
\v 15 Tu̱ sa ní én xi na̱xu̱ chu̱ba̱á a̱tꞌaha̱ tjoná xi̱nki̱á. Bꞌa̱ tsꞌín sájihinná Cristo̱, kui xi nintaku̱ xu̱ta̱ ni̱nku̱.
\v 16 Cristo̱ tsꞌín nga ngayjee̱ yjonintee̱ nkuhú bichú mako̱ xinkjín ko̱ bꞌaꞌyún sisihi̱n xinkjín ngatentee̱ ni xi tjíhi̱n yjonintee̱. Tsa ngatentee̱ yjonintee̱ tsꞌínxá sisin, ngayjee̱ yjonintee̱ sá sisin ko̱ sakú ngaꞌyúhu̱n nga binchajin kju̱a̱tjo.
\s Bꞌi̱ tsꞌín tsakúya Pablo̱ xi nkú tsꞌín tjíhin nga ku̱i̱ntsu̱ba̱á nginku̱n Nti̱a̱ná
\p
\v 17 Kui nga bꞌa̱ xíhi̱nnu̱u ko̱ ngajoho̱ Nda̱ Nti̱a̱ná bꞌa̱ xíhi̱nu̱u ma. Najmi bꞌa̱ ta̱ nꞌe bintsu̱ba̱ sahanu xi nkú tsꞌín tjíntu xu̱ta̱ xi tjín a̱sunntee̱, xu̱ta̱ xi ni tiya tsꞌínnkjinkꞌun.
\v 18 Kui xi ja kisꞌejyún kju̱a̱nkjintakꞌuhu̱n ko̱ najmi tjíntu tíkꞌun xi nkú tsꞌín tsꞌínkꞌíéntu tíkꞌun Nti̱a̱ná xu̱ta̱ xi tsꞌe̱. A̱tꞌaha̱ ja kitsꞌín ndjá ani̱ma̱ha̱ ko̱ najmi ta̱ mankjihi̱n ra̱ ni xi tsꞌe̱ Nti̱a̱ná.
\v 19 Ja najmi ta̱ tjíhi̱n ra̱ kju̱a̱suba ko̱ ja kitsꞌínkjasꞌehe̱n yjoho̱ ni chꞌonkꞌuu̱n. Najmi ta̱ bꞌéchꞌoho̱ ra̱ yjoho̱ nga tsꞌín ngayje tíkjá ni xi chu̱ntí nginku̱n Nti̱a̱ná.
\p
\v 20 Jun bi najmi bꞌa̱ tsu éhe̱n Cristo̱ xi tsakuyái̱hi̱ tsa bꞌa̱ no̱o.
\v 21 A̱tꞌaha̱ ja kinuꞌyó éhe̱n Cristo̱ ko̱ tsinchiyó ni xi tsꞌe̱, ko̱ yo nga Jesu tíjñajihi̱n ni xi na̱xu̱ tjín.
\v 22 Najmi bꞌa̱ ta̱ tsꞌín bintsu̱ba̱hanu xi nkúhu nkꞌie. Nꞌe̱kꞌóntjaiyo ani̱ma̱nu̱u. A̱tꞌaha̱ ni xi kama mjenu̱u nkꞌie tsꞌana̱cha̱ha̱ ko̱ kitsꞌínkatsúhu̱n.
\v 23 Tjíhin nga nꞌe̱ tse̱tse̱ ngáhanu ani̱ma̱nu̱u ko̱ kju̱a̱nkjintakꞌunnu̱u.
\v 24 Nꞌe̱ tse̱tso̱o yjonu̱u, a̱tꞌaha̱ Nti̱a̱ná kitsꞌínnda tse̱tse̱ ngáha ani̱ma̱nu̱u. Xi nkú tsꞌín tjíyaha̱ nga kixi̱ ko̱ je, bꞌa̱ kitsꞌínkꞌíé.
\p
\v 25 Kui bꞌa̱ maha, najmi ta̱ chꞌana̱cha̱ha̱ ru̱u xinki̱u. Najmi tu̱ én tsankꞌá chubo, a̱tꞌaha̱ nkuhú yjoninte mahaná ngatenteé.
\p
\v 26 Nkꞌie nga tíma kjannu̱u, najmi tu̱ ngatitsun nꞌo. Najmi tu̱ bintsu̱ba̱ kjon nku ni̱stjin tantoo̱.
\v 27 Najmi tu̱ ꞌba̱i̱ntoho̱o nda̱nindoo̱.
\p
\v 28 Xi ndyjé tsꞌín nkꞌie, najmi bꞌa̱ ta̱ katsꞌíhin. Katsꞌínxá ní ko̱ katsꞌínchjén ntsja nga katsꞌín ni xi nda, tu̱ xi bꞌa̱ tsꞌín ka̱ma ku̱a̱si̱nko̱ho xu̱ta̱ xi machjéhe̱n ra̱ tsa mí nihi.
\p
\v 29 Ndaha nku én chꞌon tsu najmi tu̱ ku̱i̱tju tsu̱ꞌbo. Én xi nda ní chu̱bo, én xi tsjá ngaꞌyúhu̱n xu̱ta̱, tu̱ xi nda ka̱matꞌaihin xu̱ta̱ xi ku̱i̱ntꞌé énnu̱u.
\v 30 Najmi tu̱ ni xi tsꞌi̱ínꞌuhu̱n Espiri̱tu̱hu̱ Nti̱a̱ná nꞌo. A̱tꞌaha̱ kui xi kikꞌa̱i̱nu̱u tu̱ xi cha̱ha nga jun xi xu̱ta̱ xi tsꞌe̱ Nti̱a̱ná nkꞌie nga ku̱i̱chú ni̱stjin nga ku̱i̱tjusun nga ka̱ma nda̱í kikjinnu̱u.
\p
\v 31 Ti̱chꞌonsjo̱o ngayjee̱ ni chꞌonkꞌun xi tjíntujín ani̱ma̱nu̱u, kju̱a̱kjoo̱n ko̱ kju̱a̱stintoo̱. Najmi tu̱ chꞌíya kjon, ko̱ najmi tu̱ chꞌon ꞌmihi̱u xinki̱u, ko̱ najmi tu̱ nga̱tꞌaha̱ tu̱ mí nihí ni nꞌe̱ uncho xinki̱u.
\v 32 Nda ní cha̱so̱ho̱ xinki̱u ko̱ cha̱se̱ni̱mo̱ho̱ xinki̱u. Nꞌe̱ ndyjatꞌoho̱o xinki̱u xi nkú tsꞌín kisakújinnu̱u kju̱a̱nꞌendyjatꞌa a̱jihi̱n Cristo̱.
\c 5
\s Bꞌi̱ tsꞌín tsakúya Pablo̱ nkꞌie nga ñá xi ntíhi̱ Nti̱a̱ná
\p
\v 1 Ntí tjoho̱ Nti̱a̱ná jun, kui nga bꞌa̱ ta̱ nꞌe̱henu xi nkú tsꞌín Nti̱a̱ná.
\v 2 Xi nkú tsꞌín yꞌejñajin kju̱a̱tjo Cristo̱ nga kitsꞌíntjoná, bꞌa̱ tsꞌín ti̱ntsu̱ba̱jiun kju̱a̱tjo. Kui xi kitsjá yjoho̱ nga kꞌienntjáíhiná. Kui xi kama nku chje̱ sinjne̱ xi kinꞌekjasꞌehe̱n Nti̱a̱ná.
\p
\v 3 Ja kikjꞌátsꞌe̱nu̱u Nti̱a̱ná. Kui nga ta̱ santaha najmi tjíhin nga chu̱bani̱jmíyahanu xi nkú tsꞌín chu̱ba̱ fantuko̱hó xinkjín xu̱ta̱ xi tjín, ko̱ tsa tu̱ mí nihí ni xi chu̱ntí nginku̱n Nti̱a̱ná, ko̱ tsa kjúásihu̱un ni xi tjíhi̱n xu̱ta̱ xingisoo̱.
\v 4 Ko̱ najmi tu̱ chubo én xi najmi nda tsu, ko̱ tsa én ton chꞌon tsu, ko̱ tsa nku én xi najmi nda fane, a̱tꞌaha̱ najmi chumi ni chjíhi̱ ra̱ ni xuꞌbo̱. Tu̱ sa ní én xi tsjáha̱ mábꞌa̱chjíhi̱ Nti̱a̱ná chu̱bo.
\v 5 A̱tꞌaha̱ ja yo nga xi chu̱ba̱ fantuko̱hó xinkjín, ko̱ xi tsꞌín ni xi chu̱ntí nginku̱n Nti̱a̱ná, ko̱ xi fásihi̱n ni xi tjíhi̱n xu̱ta̱ xingisoo̱, kui xi najmi tsuhu̱ ra̱ nga Cristo̱ ko̱ Nti̱a̱ná ku̱a̱téxumaha̱. Xi tífásihi̱n ni xi tjíhi̱n xu̱ta̱ xingisoo̱, kui xi kjꞌa̱í nti̱a̱ tje̱nnki.
\p
\v 6 Najmi tu̱ ꞌba̱i̱nto tsa tjín xi kꞌu̱a̱na̱cha̱ko̱nu̱u nku én tiya, a̱tꞌaha̱ nga̱tꞌaha̱ ni xuꞌbi̱ kju̱a̱kjaha̱n Nti̱a̱ná nibánehe̱ ra̱ xu̱ta̱ xi najmi ntꞌéꞌéhe̱n.
\v 7 Kui nga najmi tu̱ jun nꞌengujihi̱n ru̱u yjonu̱u xu̱ta̱ xi bꞌa̱ tíi̱ncha tsꞌín.
\p
\v 8 A̱tꞌaha̱ ni̱stjin nkꞌie má jyuu̱n tintsu̱bo̱o, tu̱nga ndꞌa̱i̱ ja má ndzjee̱n tintsu̱bo̱o nga nkuhú mako̱o Nda̱ Nti̱a̱ná. Kui nga ti̱ntsu̱ba̱hanu xi nkú tsꞌín tjíhin nga kꞌúéntu xi tjíntu má ndzjee̱n.
\v 9 Nꞌo̱o ni xi nda ko̱ na̱xu̱ ko̱ kixi̱, a̱tꞌaha̱ kui niu̱ xi bakúchji nga má ndzjee̱n tje̱he̱nná.
\v 10 Ti̱nchísjo má nihi xi sasíhi̱n Nti̱a̱ná.
\v 11 Ndaha̱chí najmi tu̱ nꞌo ni xi najmi chumi ni chjíhi̱ ra̱, ni xi tsꞌín xu̱ta̱ xi tsꞌe̱ má jyuu̱n. Tu̱ sa ní tꞌe̱jñachiu nga najmi nda niu̱.
\p
\v 12 A̱tꞌaha̱ tu̱ ñáhá xí subahá maná nga nꞌekjáá ni xi tsꞌínꞌma xu̱ta̱ xuꞌbo̱.
\v 13 Tu̱nga ma chjihí ngayjee̱ ni xi tjín nkꞌie nga sꞌentuchjí má ndzjee̱n,
\v 14 a̱tꞌaha̱ ndꞌíu̱ bꞌéjña chji tu̱ mí nihí ni. Kui nga bꞌa̱ tsꞌín tjítꞌa:
\q Nꞌe̱kjꞌáíhi̱ yjohi̱, ji xi kisufei.
\q Ti̱síntje̱i̱n a̱jihi̱n xu̱ta̱kꞌie̱n.
\q Tsa bꞌa̱ nꞌe̱i̱, Cristo̱ tsꞌi̱ín ndzjehin.
\p
\v 15 Kui bꞌa̱ maha, nda nda cha̱se̱henu xi nkú nꞌe ku̱i̱ntsu̱bo̱o. Najmi tu̱ ni xi tsꞌín xu̱ta̱ stje̱n nꞌo. Nꞌe̱ nínú xi nkú tsꞌín xu̱ta̱ nkjinkꞌun.
\v 16 Nꞌo̱o ni xi nda tu̱ mí chu̱ba̱há ni nga sa̱kúntenu̱u nga bꞌa̱ nꞌo̱o, a̱tꞌaha̱ chꞌon chun ni̱stjin xi kichꞌaá ndꞌa̱i̱.
\v 17 Kui nga najmi tu̱ nchi̱ni nꞌesjehenu yjonu̱u. Katumankjin nínu̱u mí nihi xi mjehe̱ Nda̱ Nti̱a̱ná nga nꞌo̱o.
\p
\v 18 Najmi tu̱ nꞌe chꞌi̱u, a̱tꞌaha̱ kui niu̱ xi tsꞌín nga nꞌeé tu̱ mí nihí ni. Tu̱ sa ní Espiri̱tu̱hu̱ Nti̱a̱ná katsejíhi̱nnu̱u.
\v 19 Salmo̱ ko̱ soho̱n ni̱nku̱ chu̱bani̱jmíyako̱honu xinki̱u ko̱ só xi nkú tsꞌín ku̱a̱kúyanu̱u Espiri̱tu̱hu̱ Nti̱a̱ná. Ngayjehe ani̱ma̱nu̱u só ko̱ nꞌe̱tsjoho̱o Nda̱ Nti̱a̱ná.
\v 20 Tu̱ mí kju̱a̱há ni tehe̱nte tjoho̱on mábꞌa̱chjíhi̱ Nti̱a̱ Na̱ꞌminá. Bꞌa̱ nꞌo̱o a̱tꞌaha̱ Nda̱ Nti̱a̱ná Jesucristo̱ tsꞌe̱nu̱u.
\s Bꞌi̱ tsꞌín tsakúya Pablo̱ xi nkú tsꞌín kꞌúéntuko̱ xinkjín xu̱ta̱
\p
\v 21 Cha̱nkjún xinki̱u a̱tꞌaha̱ Cristo̱ tíyankjún.
\v 22 Jun xi tíꞌminu̱u chju̱ún, cha̱nkjún xꞌi̱nnu̱u. Bꞌa̱ nꞌo̱o xi nkú tsꞌín tíyankjún Nda̱ Nti̱a̱ná.
\v 23 A̱tꞌaha̱ xi tíꞌmi xꞌi̱n, kui xi síjña títjuhu̱n chju̱úhu̱n xi nkú ta̱ tsꞌín Cristo̱ síjña títjuhu̱n xu̱ta̱ ni̱nku̱. Xu̱ta̱ ni̱nku̱ kui xi yjonintehe̱ Cristo̱, ko̱ Cristo̱ kui xi kitsꞌínkꞌankihi̱.
\v 24 Xi nkú tsꞌín xu̱ta̱ ni̱nku̱ benkjún Cristo̱, bꞌa̱ ta̱ tsꞌín xi tíꞌmi chju̱ún tu̱ nkjéhé ni katenkjún xꞌi̱hi̱n.
\p
\v 25 Ko̱ jun xi tíꞌminu̱u xꞌi̱n, nꞌe̱tjó chju̱únnu̱u xi nkú tsꞌín Cristo̱ kitsꞌíntjo xu̱ta̱ ni̱nku̱ ko̱ kitsjá yjoho̱ ngandaha̱.
\v 26 Bꞌa̱ kitsꞌín tu̱ xi kikjꞌátsꞌe̱he. Éhe̱n kitsꞌín jeko̱ho ko̱ ntánijua tsanéjnuko̱ho
\v 27 tu̱ xi ja tjíhi̱n ra̱ kju̱a̱chánka xu̱ta̱ ni̱nku̱ nkꞌie nga ku̱i̱chú nginku̱n. Najmi sꞌe̱he̱ ni chu̱ntí, najmi chꞌon kꞌúé, ko̱ najmi sꞌe̱he̱ tsa mí nihi. Mje níhi̱ Cristo̱ nga je ko̱ nga nda kikjin ka̱ma xu̱ta̱ ni̱nku̱.
\p
\v 28 Bꞌa̱ ta̱ tsꞌín xi tíꞌmi xꞌi̱n tjíhin nga tsꞌi̱íntjo chju̱úhu̱n. Katsꞌíntjo xi nkú tsꞌín tjoho̱ yjonintehe̱. Xi tjoho̱ chju̱úhu̱n, kui xi tjoho̱ yjoho̱.
\v 29 A̱tꞌaha̱ najmi tjín xi unkie yjonintehe̱. Tsjá níhi̱ nichine ko̱ kuhu̱n xi nkú nga tsꞌíhi̱n Cristo̱ xu̱ta̱ ni̱nku̱.
\v 30 A̱tꞌaha̱ ta̱ yjonintehe̱ Cristo̱ tintsu̱ba̱jián.
\p
\v 31 Bꞌi̱ tsꞌín tjítꞌa: “Kui nga nku nda̱ kꞌu̱éjñaha xi cháha̱ nga kꞌúéjñako̱ chju̱úhu̱n ko̱ nkuhú yjoninte ku̱i̱chú ma nga joo̱.”
\v 32 ꞌYún na̱nka̱ ni xuꞌbi̱, tu̱nga nkꞌiehé nga nchjani̱jmíya Cristo̱ ko̱ xu̱ta̱ ni̱nku̱ tsꞌinchjén niu̱.
\v 33 Jun tjíhin nga nꞌe̱tjó chju̱únnu̱u xi nkú tsꞌín tjonu̱u yjonu̱u. Ko̱ xi tíꞌmi chju̱ún katenkjún xꞌi̱hi̱n.
\c 6
\p
\v 1 Ko̱ jun xi tíꞌminu̱u ntí, ti̱núꞌyáꞌóho̱on xi chánu̱u a̱tꞌaha̱ Nda̱ Nti̱a̱ná sꞌejinnu̱u. A̱tꞌaha̱ kui niu̱ xi nda tjín nginku̱n Nti̱a̱ná.
\v 2 A̱jihi̱n kju̱a̱téxuma xi kinꞌekjasꞌehe̱n Moise kui kju̱a̱téxuma xuꞌbi̱ xi tjun títsuya ni xi Nti̱a̱ná tsjáha̱ xi ku̱i̱ntꞌéꞌéhe̱n. Bꞌa̱ títsu: “Cha̱nkjúín na̱ꞌmihi̱ ko̱ na̱ahi̱
\v 3 tu̱ xi nda ka̱matꞌaihinni ko̱ tse ni̱stjin ka̱maha ri nga ku̱i̱nchin a̱sunntee̱.”
\p
\v 4 Ko̱ jun xi tíꞌminu̱u na̱ꞌmi, najmi tu̱ chu̱ba̱ kjan nꞌeko̱o ntínu̱u. Tu̱ sa ní tjen ni̱yóho̱o nga nꞌe̱chó ko̱ ta̱kúyoho̱o ni xi tsꞌe̱ Nti̱a̱ná.
\p
\v 5 Ko̱ jun xi tíꞌminu̱u xu̱ta̱ musu̱ xi kichꞌatse, ti̱núꞌyáꞌóho̱on xi já nti̱a̱nu̱u e̱i̱ a̱sunntei̱. Cha̱nkjún ko̱ ti̱nkjún ko̱ ngayjehe ani̱ma̱nu̱u ti̱núꞌyáꞌóho̱on, xi nkú joyaha tsa Cristo̱ tínuꞌyáꞌóho̱on.
\v 6 Najmi tu̱ nku nkꞌie nga tíbasenu̱u nga bꞌa̱ nꞌo̱o, tsa tu̱ xi bꞌa̱ tsꞌín nda sku̱e̱he̱nu̱u. Nꞌe̱ nínú xi nkúhu xu̱ta̱ musu̱ xi Cristo̱ tsꞌatse. Ngayjehe ani̱ma̱nu̱u nꞌo̱o ni xi mjehe̱ Nti̱a̱ná.
\v 7 Nkꞌie nga tínꞌo nku xá, ngayjehe kꞌun bꞌa̱ no̱o. Bꞌa̱ no̱o xi nkúhu tsa nku xáha̱ Nda̱ Nti̱a̱ná tínꞌo.
\v 8 A̱tꞌaha̱ yo nga Nti̱a̱ná tsjá ngajoya ngáha̱ ra̱ ni xi nda kitsꞌín nga nkúnkú xu̱ta̱, ndaha tsa musu̱ xi kichꞌatse ko̱ ndaha tsa xi nda̱íhi̱ yjoho̱.
\p
\v 9 Jun xi tíꞌminu̱u já nti̱a̱, bꞌa̱ ta̱ nꞌo̱o xi nkú nga tíxihi̱n xu̱ta̱ musu̱. Najmi tu̱ binchankjúhu̱un. Ja yo nga nkuhú maha Nda̱ Nti̱a̱nu̱u xi tíjña ndji̱o̱jmi ján ko̱ nga kui xi najmi ngabi tsꞌín a̱jihi̱n xu̱ta̱.
\s Bꞌi̱ tsꞌín tsakúya Pablo̱ xi nkú tsꞌín kꞌúéndaá yjoná // tu̱ xi najmi tsꞌi̱ín ngana̱ha̱ná nda̱nindoo̱
\p
\v 10 Ni xi fekuhu xi xínnu̱u, kasakúnu̱u ngaꞌyún a̱jihi̱n ngaꞌyún chánkaha̱ Nda̱ Nti̱a̱ná.
\v 11 Xi nkú joyaha já jun xi bꞌénda yjoho̱ nga kján, bꞌa̱ tsꞌín nꞌe̱chꞌoko̱honu yjonu̱u ni xi tsjáná Nti̱a̱ná, tu̱ xi ndjá ka̱ma ku̱i̱nchahanu nga kuankín kontro̱ho̱ kju̱a̱maña̱ha̱ nda̱nindoo̱.
\p
\v 12 A̱tꞌaha̱ najmi xu̱ta̱ a̱sunnte tíbixkjanka̱á. Xi tjín níhi̱ ngaꞌyún tíbixkjanka̱á, xi nkꞌa xáha̱, xi batéxuma a̱sunnte ngatitsun xuꞌbi̱. Kui xi jáninda chꞌonkꞌun ṉkjún xi tjín nkꞌa ján.
\v 13 Kui nga tꞌendahanu yjonu̱u xi nkú joyaha já jun xi Nti̱a̱ná kitsjáyjehe̱ ni xi tsꞌi̱ínchꞌoko̱ho̱ ra̱ yjoho̱, tu̱ xi ku̱i̱chúkju̱a̱ha̱nu̱u nkꞌie nga ku̱i̱chú ni̱stjin xi ndjá ni̱ba. Ko̱ nga ja tjínda sisinnu̱u yjonu̱u, ndjá ti̱ncho.
\p
\v 14 Kui bꞌa̱ maha, ndjá ti̱nchahanu. Ni xi yꞌéjña Nti̱a̱ná ko̱ ni xi na̱xu̱ nginku̱n, kui xi nꞌe̱chꞌoko̱honu yjonu̱u xi nkúhu já jun xi tsꞌínchꞌoho̱ yjoho̱.
\v 15 Tꞌendo yjonu̱u nga tꞌeni̱jmíú én nda tsu xi tsuya kju̱a̱jyuhu̱ Nti̱a̱ná.
\v 16 Machjéhe̱n nga nꞌe̱ sꞌejiun Nti̱a̱ná, tu̱ xi najmi tjín xi nkú tsꞌín tsꞌi̱ínꞌuhu̱nnu̱u nda̱nindoo̱.
\v 17 Tꞌejin takꞌun nga Nti̱a̱ná kitsꞌínkꞌankinu̱u. Chjúbó éhe̱n, kui xi kitsjánu̱u Espiri̱tu̱hu̱ Nti̱a̱ná tu̱ xi ku̱i̱si̱nko̱ko̱honu yjonu̱u.
\p
\v 18 Tehe̱nte chu̱bako̱o Nti̱a̱ná xi nkú tsꞌín tsjáni̱yánu̱u Espiri̱tu̱hu̱. Chu̱bako̱o ko̱ ti̱nchíhu̱u ni xi machjénnu̱u. Ti̱ntsu̱ba̱ ndo ko̱ najmi tu̱ nꞌekjioho̱o takꞌun nga chu̱bantjo ngayjee̱ xu̱ta̱ xi tsꞌe̱ Nti̱a̱ná.
\v 19 Ko̱ ta̱ chu̱bantjainú nkꞌie nga chu̱bako̱o Nti̱a̱ná, tu̱ xi tsjáhana én xi kuinchja, tu̱ xi ndjá kuinchjahana nga kꞌueni̱jmíá ni xi kisꞌejña ꞌma ni̱stjin nkꞌie, xi ja tíbꞌéjña chji én nda tsuhu̱ Nti̱a̱ná ndꞌa̱i̱.
\v 20 Kui nga̱tꞌaha̱ ée̱n kjíi̱yaꞌyúhunna an xi tsúꞌba̱ ngajoho̱ Nda̱ Nti̱a̱ná. Chu̱bantjainú nginku̱n Nti̱a̱ná tu̱ xi kuinchjahana xi nkú tsꞌín tjíhin nga kuinchja ko̱ tu̱ xi najmi tsankjuhunna.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 21 Ngatentee̱ ni xi tímatꞌan ko̱ ni xi títsꞌian ku̱i̱tsu̱yanu̱u Tiki̱ko̱, nda̱ ntsꞌeé xi tjona ko̱ xi kixi̱ títsꞌínxátꞌaha̱ Nda̱ Nti̱a̱ná.
\v 22 Kui kju̱a̱ha títsꞌinkjísehe̱nu̱u tu̱ xi cha̱hanu nkú tsꞌín tintsu̱ba̱i̱ ko̱ tu̱ xi tsjá ngaꞌyúhu̱n ra̱ ani̱ma̱nu̱u.
\p
\v 23 Nti̱a̱ Na̱ꞌminá ko̱ Nda̱ Nti̱a̱ná Jesucristo̱ katsjáha̱ já ntsꞌeé kju̱a̱jyu ko̱ kju̱a̱tjo, ko̱ katꞌéyaha̱ nga ꞌyún sꞌe̱jihi̱n.
\v 24 Kju̱a̱ndaha̱ Nti̱a̱ná kasꞌehe̱ ngatentee̱ xi tjoho̱ Nda̱ Nti̱a̱ná Jesucristo̱, kju̱a̱tjo xi najmi maha̱ feya.