\id PHP Mazatec of Jalapa de Díaz
\h Xu̱ju̱n xi kinꞌekjíhi̱ xu̱ta̱ ni̱nku̱ Filipo̱
\toc1 Xu̱ju̱n xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Filipo̱
\mt Xu̱ju̱n xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Filipo̱
\c 1
\s Bꞌi̱ tsꞌín kikjaniñaha̱ Pablo̱ xu̱ta̱ ni̱nku̱ xi tjín nanki Filipo̱
\p
\v 1 An Pablo̱ ko̱ Timoteo̱, ji̱n xi tínꞌexátꞌai̱hi̱ Jesucristo̱. Ngayjee̱ jun xi tintsu̱bo̱o nanki Filipo̱, jun xi kikjꞌátsꞌe̱nu̱u Jesucristo̱ tísuniñai̱hi̱ ko̱ ta̱ tísuniñai̱hi̱ já xi basehe̱ xu̱ta̱ ni̱nku̱ ko̱ já xi ta̱ tjíhi̱n xá.
\p
\v 2 Kasꞌenu̱u kju̱a̱nda ko̱ kju̱a̱jyu xi tsjáná Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\s Bꞌi̱ tsꞌín kitsúya Pablo̱ xi nkú tsꞌín nchja̱ntjai xu̱ta̱ ni̱nku̱ Filipo̱
\p
\v 3 Tsjaha̱ mábꞌa̱chjíhi̱ Nti̱a̱ná xki̱ nga fꞌáítsjenna jun.
\v 4 Xki nga nchjaka̱ Nti̱a̱ná nchjantjáínu̱u ngatentoo̱. Tsjo mana nga bꞌa̱ tsꞌian
\v 5 a̱tꞌaha̱ nkuhú maka̱á xinki̱á nga tínꞌexátꞌaha̱á én nda tsuhu̱ Jesucristo̱. Bꞌaha̱ ra̱ ni̱stjin nga tjun tsichujinnu̱u ée̱n ko̱ santaha ndꞌa̱i̱.
\v 6 Behe̱ kꞌan nga xi kikꞌatutsꞌi̱hi̱n ni xi nda a̱jinnu̱u, kui xi tu̱ nku ngju̱a̱i̱ko̱ndjuhú santaha ni̱stjin nga kjꞌu̱a̱í ngáha Jesucristo̱.
\p
\v 7 A̱jin ani̱ma̱na̱ tintsu̱ba̱jiun, kui nga fꞌáítsjehenna jun. Xian nga nda tsꞌian nga fꞌáítsjenna jun a̱tꞌaha̱ nkuhú kju̱a̱ndaha̱ Nti̱a̱ná tísakúná jun ko̱ an, ndaha tsa nu̱ba̱yá kjíi̱yaꞌyán ko̱ ndaha tsa nginku̱n já tjíxóo̱ tíxinya chichꞌan én nda tsuhu̱ Jesucristo̱ ko̱ tíbꞌejñá chja nga najmi én tiya niu̱.
\v 8 Nti̱a̱ná be xi nkú tsꞌín mjena jun. Kju̱a̱tjoho̱ Jesucristo̱ xi tíjñajinna, kui xi tjoko̱ho̱nu̱u.
\p
\v 9 Nkꞌie nga nchjantjáínu̱u, bankihi̱ Nti̱a̱ná nga ꞌyún kasaá sa kju̱a̱tjo xi tjínnu̱u, ko̱ nga ꞌyún kasꞌenu̱u kju̱a̱nkjintakꞌun, ko̱ nga kixi̱ ka̱mankjinnu̱u ni xi tsꞌe̱ Nti̱a̱ná.
\v 10 Bꞌa̱ tsꞌín ka̱ma chjꞌa̱jihinnu má nihi xi kju̱axi̱ nga nda tu̱ xi je ku̱i̱ntsu̱ba̱hanu ko̱ najmi sꞌe̱ ni xi nꞌe̱nijéhe̱nu̱u ni̱stjin nga kjꞌu̱a̱í ngáha Cristo̱.
\v 11 Kui ni̱stjiu̱n ku̱a̱kuchjíú nkjin tíkjá ni xi na̱xu̱ kinꞌo, xi kitsjánu̱u Jesucristo̱ nga nꞌo̱o tu̱ xi sꞌe̱jña chjihi kju̱a̱chánkaha̱ Nti̱a̱ná ko̱ nꞌe̱tsjoho̱ ra̱.
\s Bꞌi̱ tsꞌín kitsúya Pablo̱ nga ngandaha̱ tíma ni xi tífꞌajin
\p
\v 12 Mjena nga cho̱o, já ntsꞌe, nga ni xi tímatꞌan e̱i̱, kui xi tu̱ sahá títsꞌín nga tífindju én nda tsuhu̱ Jesucristo̱.
\v 13 A̱tꞌaha̱ tíbe ngayjee̱ já juhu̱n nda̱ títjuu̱n ko̱ ngayjee̱ xu̱ta̱ xingisoo̱ nga nga̱tꞌaha̱ Cristo̱ kjíi̱yaꞌyúhunna.
\v 14 Tu̱ nga̱tꞌaha̱ nga kjíi̱yaꞌyán, nkjin já ntsꞌeé ꞌyún tíi̱ncha ma ꞌyún kꞌun Nda̱ Nti̱a̱ná ko̱ tíi̱ncha ma kꞌun tíbꞌéni̱jmí éhe̱n.
\p
\v 15 Kju̱axi̱ nga tjín xi tíbꞌéni̱jmí ni xi kitsꞌín Cristo̱ a̱tꞌaha̱ tíma xintakꞌun ko̱ mjehe̱ nga tsꞌi̱ín ngana̱. Tu̱nga tjíhín ngá xi ngayjehe ani̱ma̱ha̱ tíbꞌéni̱jmí.
\v 16 Xi tíma xintakꞌun, kui xi tíi̱ncha bꞌéni̱jmí Cristo̱ a̱tꞌaha̱ ngandaha̱ tíi̱ncha bangisjai. Najmi kju̱axi̱hi̱ nga bꞌa̱ tíi̱ncha tsꞌín. Ni xi i̱ncha mje níhi̱ nkꞌie nga tu̱ sahá ꞌyún sa̱kúna kju̱a̱ni̱ma̱ nkꞌie nga kjíi̱yaꞌyán.
\v 17 Tu̱nga máha xu̱ta̱ xingisoo̱, tíi̱ncha bꞌéni̱jmí Cristo̱ a̱tꞌaha̱ tjíhi̱n ku̱a̱tjo. Be nga kjíi̱ya e̱i̱ tu̱ xi xínya chichꞌihinna én nda tsuhu̱ Nti̱a̱ná nginku̱n já tjíxóo̱.
\p
\v 18 Tu̱nga najmi chumi ni tsꞌi̱hín ra̱. Ndaha tsa najmi kju̱axi̱hi̱ ko̱ ndaha tsa ngayjehe kꞌun nga tíi̱ncha bꞌéni̱jmí, xi tu̱ ja ní tísꞌeni̱jmíhi ni xi kitsꞌín Cristo̱ ko̱ kui niu̱ xi tsjo mana. Ko̱ ꞌyún sꞌe̱ sana kju̱a̱tsjo.
\v 19 A̱tꞌaha̱ be nkꞌie nga tu̱ nga̱tꞌaha̱ nga tíchubantjáínú nginku̱n Nti̱a̱ná ko̱ xi nkú tsꞌín títsjá ngaꞌyúnna Espiri̱tu̱hu̱ Jesucristo̱ ku̱i̱tjuꞌa.
\v 20 Mje ṉkjúnna ko̱ tíkuyá nga ndaha̱chí najmi sa̱kúna kju̱a̱suba. Tu̱ sa ní ꞌyún ndjá kúási̱njña ndꞌa̱i̱ xi nkú nga títsꞌin tehe̱nte, ko̱ cha̱ kju̱a̱chánkaha̱ Cristo̱ a̱jihi̱n ni xi tímatꞌain yjonintena̱. Bꞌa̱ ka̱ma tsa tíi̱jña ko̱ tsa ja kabaya.
\p
\v 21 A̱tꞌaha̱ an bi nkꞌie nga tíi̱jña tíkꞌun sa, Cristo̱ tíi̱jña tíkꞌuhunna. Ko̱ tsa ni xi tíbayahana, tu̱ sahá tsꞌin ngana̱ka̱.
\v 22 Tsa kúáte̱jña tíkꞌun sa, ꞌyún xúbáya xána̱. Najmi be má nihi xi kjꞌuajián.
\v 23 A̱tꞌaha̱ síi̱jñaya masehe̱n nga joo̱ niu̱. Mjena kꞌuejñá a̱sunntee̱ ko̱ kfínsehe̱ Cristo̱. Tsa ni xi kfínsehe̱ ra̱ Cristo̱, tu̱ sahá ꞌyún nda tjín nga̱tꞌa tsꞌa̱n.
\v 24 Tu̱nga nga̱tꞌaha̱ ní ngandanu̱u ꞌyún machjén saha̱ nga kúáte̱jña tíkꞌun sa.
\v 25 Behe̱ kꞌan nga bꞌa̱ tjín niu̱, kui nga behena nga kúáte̱jña tíkꞌun sahana ko̱ nga kꞌu̱a̱ndaya sana a̱jinnu̱u, tu̱ xi ꞌyún sꞌe̱jin saha̱nu̱u ko̱ tsjo kꞌúénu̱u nga bꞌa̱ nꞌo̱o.
\v 26 Bꞌa̱ tsꞌín nkꞌie nga ku̱i̱chuse ngáha̱nu̱u, tsjo ka̱manu̱u nga nꞌe̱tsjoho̱o Cristo̱ Jesu.
\s Bꞌi̱ tsꞌín kitsúyaha̱ Pablo̱ xu̱ta̱ ni̱nku̱ nga tu̱ nku ndjáhá ku̱i̱ncha
\p
\v 27 Nkuhú nga ti̱ntsu̱ba̱hanu xi nkú tsꞌín tje̱he̱n ra̱ xu̱ta̱ xi yꞌa én nda tsuhu̱ Cristo̱. Kui nga tsa kfínsenu̱u, skue, ko̱ tsa kjin kúáte̱jña, kuintꞌe én xi nkú tsꞌín tintsu̱bo̱o, nga ndjá tincho, nga nkuhú ni xi nꞌe̱nkjíntakꞌun, ko̱ nga nkuhú tínꞌe mo yjonu̱u nga ta̱ ñja ta̱ ñja tínꞌo̱o ngaꞌyún ngandaha̱ én nda tsuhu̱ Cristo̱ xi sꞌejinná.
\v 28 Ndaha̱chí najmi tu̱ binkjun já kontra̱nu̱u. Kui niu̱ xi ku̱a̱kúchjihi̱ xu̱ta̱ xuꞌbo̱ nga ndyja̱ ko̱ nga jun xi nꞌe̱kꞌankinu̱u. Nti̱a̱ná tsjánu̱u nga nꞌe̱ ngano̱o.
\p
\v 29 A̱tꞌaha̱ jun bi kikꞌa̱i̱nu̱u nga sꞌe̱jinnu̱u Cristo̱, tu̱nga ta̱ kikꞌa̱i̱hínu̱u nga nga̱tꞌaha̱ ta̱ cho̱o kju̱a̱ni̱ma̱.
\v 30 Bꞌa̱ ta̱ tsꞌín tíbitjajíún kju̱a̱ni̱ma̱ ndꞌa̱i̱ xi nkúhu kju̱a̱ni̱ma̱ xi kiyo nga jꞌa̱jian ko̱ xi tínuꞌyó ndꞌa̱i̱.
\c 2
\s Bꞌi̱ tsꞌín tsakúya Pablo̱ xi nkú tsꞌín tjíhin nga sꞌe̱yaná
\p
\v 1 Kui bꞌa̱ maha tsa Cristo̱ basinko̱nu̱u, ko̱ tsa kju̱a̱tjoho̱ tsjá ngaꞌyúnnu̱u, ko̱ tsa Espiri̱tu̱hu̱ nkuhú títsꞌín manu̱u, ko̱ tsa nda tíchasoho̱o ko̱ tíma ni̱ma̱nu̱u xinki̱u,
\v 2 kui nga nꞌe̱henu nga tu̱ xí tsjohó katꞌena. Nkuhú kasꞌeyanu̱u ko̱ nkuhú kju̱a̱tjo xi kasꞌeya ani̱ma̱nu̱u. Nkuhú chꞌa̱ xinki̱u ko̱ nkuhú ni xi nꞌe̱nkjíntakꞌun.
\v 3 Ndaha nku ni najmi tu̱ nꞌo tsa tu̱ xi nꞌe̱ ngana̱ha̱ ru̱u xinki̱u ko̱ tsa tu̱ xi nkꞌa nꞌe̱sjehenu yjonu̱u. Tu̱ sa ní ni̱ma̱kju̱a̱ nꞌe̱sjo yjonu̱u ko̱ cha̱so̱ho̱ xinki̱u, cha̱so̱ho̱ xi nkúhu tsa ꞌyún nkꞌa tje̱n nga jun.
\v 4 Najmi tu̱ nku ni xi tsꞌa̱jun chasoho̱, ta̱ cha̱so̱ho̱ ni xi tsꞌe̱ já ntsꞌo.
\p
\v 5 Bꞌa̱ ta̱ tsꞌín kasꞌeyanu̱u xi nkú tsꞌín kisꞌeyaha̱ Cristo̱ Jesu.
\v 6 Kui xi tu̱ bꞌa̱ tsꞌín Nti̱a̱náhá, tu̱nga najmi kitsꞌínnisihí ni nga yꞌéjña chji nga kui xi Nti̱a̱ná.
\v 7 Tu̱ sa ní yꞌéchꞌoho̱ yjoho̱ yáha kui ko̱ nku nda̱ musu̱ kitsꞌín ma yjoho̱ nga jꞌai tsin xi nkú tsꞌín tsin xu̱ta̱.
\v 8 Ko̱ nkꞌie nga kikꞌa yjoninte, kinte tsꞌasje yjoho̱. Kintꞌéꞌéhe̱n Nti̱a̱ná santaha nga ngji ngabayoo̱. Kruu̱ kinꞌekꞌientꞌá.
\p
\v 9 Kui kju̱a̱ha Nti̱a̱ná ꞌyún tse kju̱a̱chánka kitsjáha̱ ra̱, ko̱ kitsjáha̱ nku jꞌáín xi tu̱ xí ꞌyúhún nkꞌa tje̱n,
\v 10 tu̱ xi nkꞌie nga ku̱i̱núꞌyáha jꞌáíhi̱n Jesu ku̱i̱nchakúnchꞌin tu̱ yáhá ni xi tjín ndji̱o̱jmi ján ko̱ a̱sunntee̱ ko̱ kinte tꞌanankiu̱.
\v 11 Ko̱ ngayjee̱ xi tjín bꞌa̱ ku̱i̱tsu̱ nga Jesucristo̱ xi Nti̱a̱. Bꞌa̱ tsꞌín sꞌe̱jña chjihi kju̱a̱chánkaha̱ Nti̱a̱ Naꞌmiu̱.
\s Bꞌi̱ tsꞌín tsakúya Pablo̱ xi nkú tsꞌín kꞌúéntu xu̱ta̱ ni̱nku̱ a̱jihi̱n xu̱ta̱
\p
\v 12 Kui bꞌa̱ maha, jun já ntsꞌena̱, xi nkú tsꞌín tehe̱nte kinuꞌyáꞌénnú nkꞌie nga tsáte̱jñajinnu̱u, bꞌa̱ ta̱ nꞌo̱o ndꞌa̱i̱ nkꞌie nga kjin tíi̱jñanu̱u. Cha̱nkjún Nti̱a̱ná ko̱ katꞌatsó nga nꞌe̱ndju̱ú ni xi títsꞌín Nti̱a̱ná a̱jinnu̱u nga títsꞌínkꞌankinu̱u.
\v 13 A̱tꞌaha̱ xi nkú tsꞌín sasíhi̱n Nti̱a̱ná, kui xi títsꞌín nga nꞌe̱ mjo ko̱ nga nꞌo̱o ni xi mjehe̱.
\p
\v 14 Tsa tjín ni xi nꞌo̱o, najmi tu̱ katuma stinu̱u nga bꞌa̱ nꞌo ko̱ najmi tu̱ chubatiko̱o xinki̱u,
\v 15 tu̱ xi je ko̱ na̱xu̱ sku̱e̱he̱nu̱u xu̱ta̱. Jun xi ntíhi̱ Nti̱a̱ná ko̱ tjíhin nga je ku̱i̱ntsu̱ba̱jiuhu̱n xu̱ta̱ xi tjín ndꞌa̱i̱ xi chꞌonkꞌun ko̱ xi ja kitsꞌínkatsún kju̱a̱nkjintakꞌuhu̱n. Katumo a̱jihi̱n xu̱ta̱ xuꞌbo̱ xi nkúhu niñu xi tíbatꞌai má jyuu̱n.
\v 16 Chu̱bani̱jmíyahanu én xi tsꞌínkꞌíéntu tíkꞌuhu̱n xu̱ta̱. Tsa bꞌa̱ nꞌo̱o, tsjo kꞌúéna ni̱stjin nga kjꞌu̱a̱í ngáha Cristo̱. A̱tꞌaha̱ nkꞌie ka̱ma chji nga najmi tu̱ kju̱a̱ndahá kitsꞌian ngaꞌyún nga kitsꞌinxá a̱jinnu̱u.
\p
\v 17 Nkꞌie nga sꞌejinnu̱u Nti̱a̱ná, bꞌa̱ joyaha tsa chje̱ tíꞌbo̱ho̱o Nti̱a̱ná. Ko̱ tsa nꞌe̱kꞌienna e̱i̱, an xi ku̱i̱chú ma xi nkú joyaha chje̱ xi tsꞌi̱ínndju̱útꞌa chje̱ xi tíꞌbo̱ho̱ Nti̱a̱ná. Tu̱nga tsjohó tjínna ndaha tsa bꞌa̱ nꞌe̱na. Ta̱ nꞌe̱tsjoko̱ho kju̱a̱tsjona̱.
\v 18 Bꞌa̱ ta̱ tsꞌín tsjo katumanu̱u ko̱ ta̱ tjennú kju̱a̱tsjonu̱u.
\s Bꞌi tsꞌín kitsúyaha̱ Pablo̱ xu̱ta̱ Filipo̱ nga tsꞌi̱ínkjisehe̱ Timoteo̱
\p
\v 19 Tsa Nda̱ Nti̱a̱ná Jesu tsjánte, ki̱tsa̱ tsꞌinkjísenu̱u Timoteo̱ tu̱ xi tsjo ka̱mahana nga kuintꞌe ni xi tíma a̱jinnu̱u.
\v 20 Najmi tjín sana kjꞌa̱í xi nkúhu kui, xi bꞌa̱ ta̱ tsꞌín tsꞌínnkjinkꞌun xi nkúhu an nga kjinta̱ha̱ ra̱ jun.
\v 21 A̱tꞌaha̱ kjꞌa̱í xu̱ta̱ha bi ni xi tsꞌe̱ bangisjai, najmi ni xi tsꞌe̱ Jesucristo̱.
\p
\v 22 Tu̱nga jahá yo xi nkú kꞌun Timoteo̱ ko̱ xi nkú tsꞌín títsꞌínxáko̱na nga tíbꞌéni̱jmíko̱na én nda tsuhu̱ Jesucristo̱, xi nkú joyaha nku nda̱ti xi tsꞌínxáko̱ na̱ꞌmihi̱.
\v 23 Kui nga tíbꞌendáhana nga kui tsꞌinkjísenu̱u chu̱ba̱ nga skue xi nkú tsꞌín sꞌe̱nda ni xi tífꞌa̱jian.
\v 24 Ko̱ behe̱ kꞌan nga Nda̱ Nti̱a̱ná ta̱ tsjántena nga ka̱ma kfínsenu̱u.
\s Bꞌi tsꞌín kitsúyaha̱ Pablo̱ xu̱ta̱ Filipo̱ nga títsꞌínkjisehe̱ Epafrodito̱
\p
\v 25 Tu̱nga ndꞌa̱i̱ títsꞌinnkjíhi̱n kꞌan nga tjíhin nga ta̱ tsꞌinkjísehé ngáha̱nu̱u nda̱ ntsꞌeé Epafrodito̱. Kui xi títsꞌínxáko̱na nga tífꞌajinko̱na kju̱a̱ni̱ma̱ nga̱tꞌaha̱ Cristo̱. Kui xi yꞌexó nga kinꞌe nibásenú tu̱ xi ku̱a̱si̱nko̱hona nga tsꞌi̱ín ni xi machjénna.
\v 26 Tu̱ xí tíma bahá ra̱ jun ko̱ kjinta̱ha̱ ra̱ jun, a̱tꞌaha̱ be nga kinuꞌyó nga kisaté chꞌin.
\v 27 Kju̱axi̱ kjáíhin nga ꞌyún ndjáhá kisaté chꞌin, nga ja ma ku̱a̱yáhá kai. Tu̱nga Nti̱a̱náhá tsase ni̱ma̱ha̱ nga kitsꞌínnkihi̱. Ko̱ najmi tu̱ suba kui xi tsase ni̱ma̱ha̱ Nti̱a̱ná, ta̱ tsase ni̱ma̱na ko̱ an, a̱tꞌaha̱ tsa kꞌien ndo̱ ꞌyún kama tse kju̱a̱bana̱ kai.
\p
\v 28 Kui nga ki̱tsa̱ mjehena nga tsꞌinkjísehe̱nu̱u tu̱ xi tsjo kꞌúéhe̱nu̱u nga cha̱ ngáhanu ko̱ tu̱ xi najmi ta̱ ꞌyún sꞌe̱nta̱hana.
\v 29 Nꞌe̱kjóho̱on ndo̱ xi nkú tsꞌín tje̱he̱n ra̱ xu̱ta̱ xi tsꞌe̱ Nda̱ Nti̱a̱ná. Tsjo katꞌenu̱u nga bꞌa̱ nꞌo̱o. Cha̱nkjún xu̱ta̱ xi bꞌa̱ kꞌun xi nkúhu kui.
\v 30 A̱tꞌaha̱ nga̱tꞌaha̱ xáha̱ Cristo̱ ja ma kꞌienntjáíhí ni kai. Kitsjá yjoho̱ ndaha tsa ja ma kꞌiehén tu̱ xi tsꞌi̱íntjusuhun ngandana̱ xá xi kikꞌa̱i̱hi̱ru̱u.
\c 3
\s Bꞌi̱ tsꞌín kitsúya Pablo̱ nkú tsꞌín yꞌéjña ni xi kisꞌehe̱
\p
\v 1 Kui bꞌa̱ maha, já ntsꞌena̱, tsjo katꞌenu̱u a̱tꞌaha̱ Nda̱ Nti̱a̱ná Jesucristo̱ tíjñajinnu̱u. Najmi tífehe̱ kꞌan nga ta̱ kui ta̱ maha ni xi tíbꞌetꞌánu̱u, a̱tꞌaha̱ ngandanu̱u niu̱.
\p
\v 2 Chúhu̱un yjonu̱u já chꞌonkꞌun xi ja yo, xi chꞌonkꞌun xá xi títsꞌín, xi mjehe̱ nga nꞌe̱ circuncision tiya.
\v 3 A̱tꞌaha̱ circuncision xi ndoo̱, kui xi kichꞌaá ñá xi yankjáán Nti̱a̱ná xi nkú tsꞌín bakúyaná Espiri̱tu̱hu̱ Nti̱a̱ná ko̱ ma ꞌyún kꞌaán nga̱tꞌaha̱ ni xi kitsꞌín Cristo̱ Jesu, najmi nga̱tꞌaha̱ ni xi nꞌehe̱ yjonintená.
\p
\v 4 An bi ka̱ma ṉkjún ka̱ma ꞌyún kꞌan ntje̱ xi yꞌahana. Najmi tjín kjꞌa̱í xi bꞌa̱ tsꞌín ka̱ma ꞌyún kꞌun nii̱ xi nkúhu an,
\v 5 nga a̱jihi̱n xu̱ta̱ xi ntje̱ Israel tje̱he̱n ra̱ kitsian ko̱ kinꞌena ni circuncision nga tjínna jin ni̱stjin nga kitsian. Ntje̱ cháni̱ Benjamin tje̱henna. Xu̱ta̱ hebreo̱hó xi chána̱. Nku nda̱ fariseo̱ xi ꞌyún kitsꞌíntjusun chichꞌin kju̱a̱téxumaha̱ Moise kama.
\v 6 Kui kju̱a̱téxumoo̱ ꞌyún kikuhu̱n nga santaha kitsjennkí unkie xu̱ta̱ ni̱nku̱hu̱ Cristo̱. Na̱xu̱ tsáte̱jña xi nkú tsꞌín bakúya kju̱a̱téxumoo̱. Najmi tjín xi chꞌon tsꞌín kinchja̱yanena nga̱tꞌa tsꞌe̱ kui nii̱.
\p
\v 7 Nkꞌie bi, nga̱tꞌa tsꞌa̱n ꞌyún chjíhi̱ ra̱ ngatentee̱ ni xuꞌbi̱, tu̱nga ndꞌa̱i̱ tu̱ nga̱tꞌa tsꞌe̱ Cristo̱ xi nkú joyaha ni xi najmi chumi ni chjíhi̱ ra̱ kitsꞌin ma kui niu̱.
\v 8 Ndꞌa̱i̱ bꞌa̱ xian nga najmi chumi ni chjíhí ra̱ ngayjee̱ niu̱, a̱tꞌaha̱ ja be Cristo̱ Jesu. Kui xi Nda̱ Nti̱a̱na̱ maha ko̱ kui xi ꞌyún chjí saha̱ ra̱ nga tu̱ mí nihí ni. Nga̱tꞌaha̱ Cristo̱ kitsꞌinndyja ngayjee̱ ni xi tjínna tu̱ xi ka̱ma tsꞌin ngana̱hana Cristo̱. Ndꞌa̱i̱ nkꞌie nga basehe̱ ni xi kindyjoo̱, bꞌa̱ mana xi nkúhu tsa stjé niu̱ mana.
\v 9 Mjena kúáte̱jñajian ni xi kitsꞌín Cristo̱. Nkꞌie kitsꞌintjusan kju̱a̱téxumoo̱. Kuenta̱ tsꞌa̱n tsangisja nga na̱xu̱ ku̱i̱chú ma nginku̱n Nti̱a̱ná. Tu̱nga ndꞌa̱i̱hí sꞌejinna Jesucristo̱. Kui nga Nti̱a̱ná títsjáhana nga na̱xu̱ tíi̱jña nginku̱n tu̱ nga̱tꞌaha̱ nga sꞌejinna.
\p
\v 10 Ni xi mjena ndꞌa̱i̱, mjena nga skue sisian Cristo̱ ko̱ ngaꞌyúhu̱n Nti̱a̱ná xi kitsꞌínkjꞌáíya ngáha̱ ra̱ Cristo̱ ngabayoo̱. Mjena nga ta̱ sa̱kúna kju̱a̱ni̱ma̱ xi kitsꞌínkjáíhi̱n. Mjena bꞌa̱ kꞌúé xi nkú kikꞌie Cristo̱ nkꞌie nga kꞌien
\v 11 tu̱ xi ta̱ kjꞌu̱a̱íyahana ko̱ an a̱jihi̱n xu̱ta̱ kꞌie̱n.
\s Bꞌi̱ tsꞌín kitsúya Pablo̱ ni xi kingjásihi̱n nga yꞌejña
\p
\v 12 Najmi bꞌa̱ tíxian tsa ja kisakúna ni xi kuaxian ko̱ a ra̱ tsa ja kama yá xi tjíhin nga ka̱ma. Tu̱nga tu̱ nku tífi tje̱nnkiná ni xi kuaxian, tu̱ xi sa̱kúhuna ni xi kama mjehe̱ Cristo̱ Jesu nkꞌie nga kisakúhu̱ an.
\v 13 Jun já ntsꞌe, najmi bꞌa̱ mana tsa ja kisakúna niu̱. Ni xi títsꞌinná, títsꞌinchaya ni xi chóo̱ ko̱ títsꞌin kju̱a̱ꞌyúhún ra̱ yjona̱ tu̱ xi sa̱kúhuna ni xi ni̱ba a̱skahan.
\v 14 Cristo̱ Jesu tsꞌínchjén Nti̱a̱ná nga tínchja̱ná nkꞌa ján. An bi tífi tje̱nnkia ni xi títsu nga tsjáha̱ xi ntꞌé éhe̱n.
\p
\v 15 Bꞌa̱ tsꞌín tjíhin nga sꞌe̱yahaná ñá xi ja tsichu maá xi tjíhin nga ka̱maá. Ko̱ tsa tjín xi kjꞌa̱í tsꞌín sꞌe̱yaha̱, Nti̱a̱ná ta̱ kꞌu̱éjña chjihi̱ ni xuꞌbo̱.
\v 16 Tu̱nga tjíhín ni nga tu̱ nku ndjáhá ku̱i̱nchajián ni xi ja kinꞌekjáíhi̱ín santaha ndꞌa̱i̱.
\p
\v 17 Jun já ntsꞌe, bꞌa̱ nꞌo̱o xi nkú nga títsꞌian ko̱ ta̱ cha̱se̱ chu̱ba̱yoho̱o xu̱ta̱ xi bꞌa̱ ta̱ tíi̱ncha tsꞌín xi nkú tsꞌín kikꞌiejña chu̱ba̱yai̱hi̱.
\v 18 A̱tꞌaha̱ nkjin maha xi tjíntu xi nkúhu tsa tu̱ kju̱a̱ndahá kinꞌekꞌien Cristo̱ a̱tꞌa kruu̱. Ja ma nkjin ni̱yá bꞌa̱ xinnu̱u ko̱ ndꞌa̱i̱ santaha tíi̱nta tsꞌíhinna nga tíxinyanu̱u xi nkú tsꞌín tjíyaha̱ xu̱ta̱ xuꞌbo̱.
\v 19 Kui xi tíi̱ncha fi má nga ndyja̱, ko̱ ni xi i̱ncha mjehe̱ sꞌe̱he̱ kui xi nti̱a̱ha̱. Tíi̱ncha bangisjai kju̱a̱chánka a̱jihi̱n ni xi tu̱ subahá maná, ko̱ tu̱ nku ni xi tsꞌe̱hé a̱sunntee̱ tjíntuyáha̱ kju̱a̱nkjintakꞌuhu̱n.
\p
\v 20 Tu̱nga máha ñá, nanki xi tíjña nkꞌa ján tje̱he̱nná. Yo̱hó nankiná má nga tíchuyáha̱á nga ni̱bajehen Nda̱ Nti̱a̱ná Jesucristo̱ xi tsꞌi̱ínkꞌankiná.
\v 21 Tjíhi̱n ngaꞌyún nga ku̱a̱téxumaha̱ ngatentee̱ ni xi tjín ko̱ tsꞌi̱ínchjén ngaꞌyúhu̱n nga tsꞌi̱ínkꞌóntjaiya yjoninte xꞌa̱n xi kichꞌaá ndꞌa̱i̱. Xi nkú tsꞌín tjíhi̱n kju̱a̱chánka yjonintehe̱, bꞌa̱ ta̱ tsꞌi̱ínkꞌíé xi tsꞌa̱ñá.
\c 4
\s Bꞌi̱ tsꞌín kitsúya Pablo̱ ni xi i̱ncha tsꞌi̱ín xu̱ta̱ ni̱nku̱ Filipo̱
\p
\v 1 Kui bꞌa̱ maha, já ntsꞌena̱, tjo ṉkjúnna jun ko̱ fꞌáítsjenna jun. Jun xi kju̱a̱tsjona̱ ko̱ nga chjihi̱ xána̱. Tu̱ nku bꞌa̱ nꞌe̱ ndjáhá ti̱nchajiun Nda̱ Nti̱a̱ná, jun xu̱ta̱ tjona̱.
\p
\v 2 Tíbankihi̱ na̱ Ebodi̱a̱ ko̱ tíbankihi̱ na̱ Sinti̱ke̱ nga kanchja̱ko̱ nda ngáha xinkjín a̱tꞌaha̱ nkuhú Nda̱ Nti̱a̱ná i̱ncha yjanki.
\v 3 Ko̱ ji ta̱ tíbankihi nga ti̱si̱nko̱i̱ jminchjíu̱n, ji xi bꞌa̱ ta̱ tsu xá xi tínꞌei. A̱tꞌaha̱ nga yꞌeni̱jmíá yo̱, kui jminchjíu̱n ta̱ yꞌéni̱jmí én nda tsuhu̱ Nti̱a̱ná, xi nkú nga ta̱ kitsꞌín nda̱ Clemente̱ ko̱ xu̱ta̱ xingisoo̱ xi kitsꞌínxáko̱na. Kui xi ja tjíntutꞌá jꞌáíhi̱n xu̱ju̱n má nga tjíntutꞌá jꞌáíhi̱n xu̱ta̱ xi kꞌúéntu tíkꞌun sín.
\p
\v 4 Kasꞌenu̱u kju̱a̱tsjoho̱ Nda̱ Nti̱a̱ná. Bꞌa̱há ta̱ tíxin ngáha̱nu̱u. Tsjo katꞌenu̱u.
\v 5 Ngatentee̱ xu̱ta̱ i̱ncha kate nga nda ani̱ma̱nu̱u. Ja tíjña tiña Nda̱ Nti̱a̱ná.
\p
\v 6 Najmi tu̱ chumi nihi xi fanta̱ha̱ ru̱u yjonu̱u. Tu̱ sa ní tehe̱nte tꞌinyoho̱o Nti̱a̱ná ni xi machjénnu̱u nga chu̱bako̱o. Ti̱nchíhu̱u ko̱ ta̱ tjoho̱on mábꞌa̱chjíhi̱ ni xi tíꞌba̱i̱nu̱u.
\v 7 Kju̱a̱jyuhu̱ Nti̱a̱ná xi najmi mankjihi̱n xu̱ta̱, kui xi kúhu̱n ani̱ma̱nu̱u ko̱ tsjáni̱yá xi nkú tsꞌín nꞌe̱nkjínkꞌun a̱tꞌaha̱ Cristo̱ Jesu tsꞌe̱nu̱u.
\p
\v 8 Ko̱ ni xi fekuhu, já ntsꞌe, tíbankinu̱u nga nꞌe̱nkjínkꞌun ni xi na̱xu̱ tjín, ni xi yankjún, ni xi nda, ni xi je, ni xi tsjo kꞌun, ni xi nda chasehe̱. Ngayjee̱ ni xi ꞌyún nda ko̱ ni xi sasínná, kui nii̱ xi nꞌe̱nkjínkꞌun.
\v 9 Nꞌe̱tjusun ni xi tsakuyánu̱u ko̱ xi kixinyanu̱u nga nꞌo̱o, ni xi kinuꞌyó nga kinchja ko̱ xi kiyo nga kitsꞌian. Bꞌa̱ nꞌo̱o ko̱ kꞌúéjñajinnu̱u Nti̱a̱ná xi tsjáná kju̱a̱jyu.
\s Bꞌi̱ tsꞌín kitsjáha̱ Pablo̱ mábꞌa̱chjíhi̱ xu̱ta̱ ni̱nku̱ Filipo̱ a̱tꞌaha̱ tsasinko̱ho̱
\p
\v 10 ꞌYún títsjána kju̱a̱tsjo Nda̱ Nti̱a̱ná nga ta̱ kisꞌenta̱há ngáha̱nu̱u an. Kju̱axi̱ nga tehe̱nte kjinta̱ha̱nu̱u an, tu̱nga santahá ni ndꞌa̱i̱ kisakú ni̱yánu̱u nga tsisinko̱nú.
\v 11 Najmi tsuhu̱ ra̱ tsa ndyjatꞌana tsa mí nihi, tsa kui nga bꞌa̱ tíxihi̱nnu̱u. A̱tꞌaha̱ ja kamankjinna nga tsjo kꞌúéna a̱jihi̱n tu̱ mí nihí ni xi ka̱matꞌan.
\v 12 Be xi nkú tsꞌín bintsu̱ba̱jián kju̱a̱xꞌa̱n ko̱ ta̱ be xi nkú tsꞌín bintsu̱ba̱jián kju̱a̱nchi̱ná. Ja kama nkana tu̱ mí nihí ni, tsa tsé sisinna ko̱ tsa ka̱ma bjona, tsa ꞌyún sꞌe̱na ni ko̱ tsa najmi chumi nihi xi sꞌe̱na.
\v 13 Tsꞌin chúkju̱a̱ tu̱ mí nihí ni, a̱tꞌaha̱ Cristo̱ tsjá ngaꞌyúnna.
\v 14 Tu̱nga ndahá tínꞌo nga tíbisinko̱nú a̱jihi̱n kju̱a̱ni̱ma̱ xi tífꞌa̱jian.
\p
\v 15 Jun xu̱ta̱ ni̱nku̱ nanki Filipo̱, yo ni xuꞌbi̱. Nkꞌie nga tjun yꞌeni̱jmínu̱u én nda tsuhu̱ Jesucristo̱ ko̱ nkꞌie nga tsitja a̱nte Macedoni̱a̱, a̱jihi̱n xu̱ta̱ ni̱nku̱ xingisoo̱ tu̱ nkuhú jun xi tsisinko̱nú. Kikꞌa̱i̱nú xi nkú tjín kitsjánu̱u Nti̱a̱ná.
\v 16 Santaha nga tsáte̱jña nanki Tesaloni̱ka̱, nku jo ni̱yá ta̱ kinꞌekjínú ni xi kamachjénna.
\v 17 Najmi chje̱ xi tíꞌba̱i̱nú tíbangisja. Tíbangisja níná nga ꞌyún kasꞌe sanu̱u kju̱a̱nchi̱ná nginku̱n Nti̱a̱ná.
\p
\v 18 Ja kitsꞌinkjáíhi̱n ngayjee̱ ni xi kinꞌe nibánú ko̱ santaha tíbꞌanki tímana ndꞌa̱i̱. Ni xi kinꞌe nibáko̱nú Epafrodito̱, kui xi kitsꞌínndju̱ú ngayjee̱ ni xi machjénna. Kui niu̱ xi nkú joyaha nku chje̱ sinjne̱ xi tsꞌínkjáíhi̱n Nti̱a̱ná ko̱ sasíhi̱n.
\v 19 Tsjánu̱u Nti̱a̱ná ngatentee̱ ni xi machjénnu̱u, xi nkú tsꞌín tíjñajin kju̱a̱nchi̱ná chánka xi sakújinná Cristo̱ Jesu.
\v 20 ¡Nti̱a̱ná xi Na̱ꞌminá maha, kui xi kayaha̱ kju̱a̱chánkaha̱ santaha tu̱ nkjéhé ni! Bꞌa̱ katuma.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 21 Tjoho̱on kju̱a̱suniñana̱ ngatentee̱ xu̱ta̱ xi tsꞌe̱ Cristo̱ Jesu. Títsꞌínkjinu̱u kju̱a̱suniña já ntsꞌeé xi tjíntuko̱na e̱i̱.
\v 22 Títsꞌínkjinu̱u kju̱a̱suniña ngatentee̱ xu̱ta̱ xi tsꞌe̱ Nti̱a̱ná xi tjín e̱i̱. Ko̱ xi tíi̱ncha tsꞌínxá niꞌyaha̱ nda̱ títjun kꞌaku̱ Cesa̱r, kui xi ꞌyún títsꞌínkji sanu̱u kju̱a̱suniña.
\p
\v 23 Katꞌejñajinnu̱u kju̱a̱ndaha̱ Nda̱ Nti̱a̱ná Jesucristo̱.