\id 1TH Mazatec of Jalapa de Díaz
\h Xu̱ju̱n xi tjun kinꞌekjíhi̱ xu̱ta̱ ni̱nku̱ Tesaloni̱ka̱
\toc1 Xu̱ju̱n xi tjun kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Tesaloni̱ka̱
\mt Xu̱ju̱n xi tjun kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Tesaloni̱ka̱
\c 1
\s Bꞌi̱ tsꞌín kikjaniñaha̱ Pablo̱ xu̱ta̱ ni̱nku̱ xi tjín nanki Tesaloni̱ka̱
\p
\v 1 An Pablo̱, Silbano̱ ko̱ Timoteo̱ tísuniñai̱hi̱, jun xu̱ta̱ ni̱nku̱ nanki Tesaloni̱ka̱, xi kikjꞌátsꞌe̱nu̱u Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\p Kasꞌenu̱u kju̱a̱nda ko̱ kju̱a̱jyu.
\s Bꞌi̱ tsꞌín títsꞌínkjꞌáítsjen Pablo̱ xi nkú tsꞌín kitsꞌínkjáíhi̱n xu̱ta̱ ni̱nku̱ nanki Tesaloni̱ka̱ én nda tsuhu̱ Jesucristo̱
\p
\v 2 Tehe̱nte nkꞌie nga chubako̱i̱ Nti̱a̱ná chubantjái̱hi̱ ko̱ ꞌba̱i̱hi̱ mábꞌa̱chjíhi̱ Nti̱a̱ná a̱tꞌaha̱ kichubó éhe̱n.
\v 3 Nginku̱n Nti̱a̱ Na̱ꞌminá fꞌáítsjen tehe̱nteni̱ xi nkú tsꞌín sꞌejinnu̱u Nti̱a̱ná ko̱ tínꞌo xá xi mjehe̱, xi nkú tsꞌín tjonu̱u ko̱ tíbisinko̱o xinki̱u, ko̱ xi nkú tsꞌín tínꞌechjúkjo̱o kju̱a̱ni̱ma̱ xi tíbitjajíún nga tíchuyóho̱o nga kjꞌu̱a̱í ngáha Nda̱ Nti̱a̱ná Jesucristo̱.
\p
\v 4 Jun já ntsꞌe, tjoho̱ Nti̱a̱ná jun ko̱ yai̱ nga jꞌájinnu̱u.
\v 5 A̱tꞌaha̱ nkꞌie nga kikꞌieni̱jmíi̱ én nda tsuhu̱ Jesucristo̱ a̱jinnu̱u, najmi tu̱ suba én kichubai̱. Kisꞌejña chji ní ngaꞌyúhu̱n Nti̱a̱ná. Espiri̱tu̱hu̱ Nti̱a̱ná kitsꞌínxá ko̱ ndaha̱chí najmi jo jan kamani̱ nga kichubai̱. Yo xi nkú nꞌe tintsu̱ba̱i̱ a̱jinnu̱u nga ngandanu̱u ni xi kinꞌei̱.
\p
\v 6 Nkꞌie nga kichaseni̱ ta̱ kichasoo̱hó Nda̱ Nti̱a̱ná, bꞌa̱ tsꞌín tsinchiyó xi nkú tsꞌín ku̱i̱ntsu̱bo̱o. A̱tꞌaha̱ nkꞌie nga ja kinꞌekjóho̱on éhe̱n Nti̱a̱ná, ta̱ kisakúnu̱u nkjin tíkjá kju̱a̱ni̱ma̱, tu̱nga Espiri̱tu̱hu̱ ní Nti̱a̱ná kitsjánu̱u kju̱a̱tsjo.
\v 7 Bꞌa̱ tsꞌín yꞌejña chjihi̱ ru̱u ngatentee̱ xu̱ta̱ xi sꞌejihi̱n Nti̱a̱ná xi tjín nga ngúsuhu̱n a̱nte Macedoni̱a̱ ko̱ a̱nte Akaya̱ xi nkú tsꞌín tsjenkíaá Nda̱ Nti̱a̱ná.
\p
\v 8 A̱tꞌaha̱ jun tjun kichjubó éhe̱n Nti̱a̱ná ko̱ tífindju ée̱n najmi tu̱ suba a̱nte Macedoni̱a̱ ko̱ a̱nte Akaya̱. Tu̱ má níhi tíya xi nkú tsꞌín tísꞌejinnu̱u Nti̱a̱ná. Kui nga najmi ta̱ machjéhe̱n ra̱ tsa nkú ku̱i̱xín saha̱ni̱ ji̱n.
\v 9 A̱tꞌaha̱ xu̱ta̱ tíi̱ncha nchja̱ni̱jmíyaha xi nkú tsꞌín jun kinꞌekjáínni̱ nkꞌie nga tsichusei̱hi̱, ko̱ xi nkú tsꞌín kinꞌekjí tꞌaxíún nti̱a̱ xi ntsja xu̱ta̱ tsꞌínndaha nga kinꞌekjóho̱on Nti̱a̱ná. Ndꞌa̱i̱ yjankiu Nti̱a̱ xi tíjña tíkꞌuu̱n. Kju̱axi̱ nga kui xi Nti̱a̱ná.
\v 10 Ndꞌa̱i̱ tíchuyóho̱o Ntíhi̱ Nti̱a̱ná xi nibá ngáha ndji̱o̱jmi ján. Kui xi Jesu xi Nti̱a̱ná kitsꞌínkjꞌáíya ngáha̱ ra̱ ngabayoo̱ ko̱ xi tsꞌi̱ínkꞌankiná ni̱stjin nga nibánehe̱ kju̱a̱kjaha̱n Nti̱a̱ná a̱sunntee̱.
\c 2
\s Bꞌi̱ tsꞌín títsꞌínkjꞌáítsjen Pablo̱ xi nkú tsꞌín kitsꞌínxá a̱jihi̱n xu̱ta̱ ni̱nku̱ nanki Tesaloni̱ka̱
\p
\v 1 A̱tꞌaha̱ ja yo jun, já ntsꞌe, nkꞌie nga najmi xá tiya kama nkꞌie nga tsichii̱ a̱jinnu̱u.
\v 2 Yo nga un kikieni̱ ko̱ chꞌon kamatꞌai̱n nanki Filipo̱ kintehe̱ ni nga tsichii̱ a̱jinnu̱u. Tu̱nga Nti̱a̱náhá kitsjá ngaꞌyúnni̱, kui nga ndjá kinꞌesjehe̱ni̱ yjoni̱ nga yꞌeni̱jmíi̱ én nda tsuhu̱ Nti̱a̱ná a̱jinnu̱u. Bꞌa̱ kinꞌei̱ ndaha tsa nkjin maha xi ngji kontra̱ni̱.
\p
\v 3 Najmi ni xi ngasten ko̱ tsa ni xi chꞌonkꞌun nibáha̱ ra̱ ni xi bꞌeni̱jmíi̱ ko̱ ta̱ ndaha najmi chꞌana̱cha̱i̱hi̱ xu̱ta̱.
\v 4 Nda ní tsaseni̱ Nti̱a̱ná ko̱ kinꞌekjasꞌenni̱ nga kꞌúéni̱jmíi̱ én nda tsuhu̱, ko̱ bꞌa̱ nꞌe tíchubai̱. Najmi xu̱ta̱ tíꞌba̱i̱hi̱ kju̱a̱tsjo. Nti̱a̱ níná tíꞌba̱i̱hi̱ kju̱a̱tsjo, kui xi be xi nkú tsꞌín tjíntuyáni̱.
\p
\v 5 Xi nkú nꞌe ja yo, najmi kichuba un ui̱n ko̱ ta̱ ndaha najmi kichꞌana̱cha̱i̱hi̱, tsa tu̱ xi bꞌa̱ tsꞌín kju̱a̱i̱hi̱ni̱ to̱on. Nti̱a̱ná be nga bꞌa̱ tjín ni xi tíxian.
\v 6 Najmi tsinchisjái̱ tsa kju̱a̱chánka sa̱kúni̱ a̱jinnu̱u ko̱ ta̱ ndaha a̱jihi̱n xu̱ta̱ xingisoo̱,
\v 7 ndaha tsa ji̱n xi já postru̱hu̱ Cristo̱ kama kai tsinchii̱hi̱ ni xi machjénni̱. Kichase sisii̱hi̱n. Bꞌa̱ kinꞌei̱ xi nkú tsꞌín nku ta̱chju̱ún xi basehe̱ ntíhi̱.
\p
\v 8 ꞌYún ṉkjún tjoni̱ jun, kui nga santaha najmi tu̱ nku én nda tsuhu̱ Nti̱a̱ná kinꞌekjasꞌehe̱n ri̱. Tsa ni xi ku̱a̱yántjaihi̱ ri̱ kai, tsayantjáíhi̱ ri̱. ꞌYún ṉkjún kisasíni̱ jun.
\v 9 ¿A fꞌáítsjennu̱u, já ntsꞌe, xi nkú tsꞌín kinꞌexái̱ ko̱ kiyai̱ kju̱a̱ni̱ma̱ a̱jinnu̱u? Ni̱stjin ni̱stje̱n kinꞌexái̱ tu̱ xi najmi chꞌá ka̱maha̱ni̱ nkꞌie nga yꞌeni̱jmíi̱hi̱ én nda tsuhu̱ Nti̱a̱ná.
\p
\v 10 Jun ko̱ Nti̱a̱ná be xi nkú tsꞌín je ko̱ na̱xu̱ tintsu̱ba̱i̱ a̱jinnu̱u jun xi sꞌejinnu̱u Nti̱a̱ná, ko̱ nga najmi tjín xi kja̱níneni̱ tsa mí nihi.
\v 11 Yo xi nkú tsꞌín kichii̱hi̱n nga nkúnkú jun, xi nkú tsꞌín kuhu̱n xi tíꞌmi na̱ꞌmi ntíhi̱.
\v 12 Kikꞌa̱i̱ ni̱yái̱hi̱ ko̱ kikꞌa̱i̱ ngaꞌyíi̱hi̱n. Kikꞌinyai̱hi̱ nga ku̱i̱ntsu̱bo̱o xi nkú tsꞌín tjíhin nga kꞌúéntu xu̱ta̱ xi tsꞌe̱ Nti̱a̱ná. A̱tꞌaha̱ jun jꞌájinnu̱u Nti̱a̱ná nga ku̱i̱tjásꞌe̱njiun nga Nti̱a̱ná ku̱a̱téxumanu̱u ko̱ nga sa̱kúnu̱u kju̱a̱chánkaha̱.
\p
\v 13 Kui kju̱a̱ha nga najmi nꞌekjꞌáíyai̱ nga tehe̱nte ꞌba̱i̱hi̱ mábꞌa̱chjíhi̱ Nti̱a̱ná, a̱tꞌaha̱ kichjubó éhe̱n Nti̱a̱ná xi kikꞌieni̱jmíi̱. Najmi kinꞌekjóho̱on xi nkúhu tsa éhe̱n xu̱ta̱. Kju̱axi̱ kjáíhin nga kui xi éhe̱n Nti̱a̱ná ko̱ títsꞌínxájinnu̱u ndꞌa̱i̱ jun xi sꞌejinnu̱u Nti̱a̱ná.
\v 14 Jun já ntsꞌe, bꞌa̱ ta̱ kamatꞌon xi nkú kamatꞌain xu̱ta̱ ni̱nku̱hu̱ Nti̱a̱ná xi tjín a̱nte Judea̱ xi ta̱ sꞌejihi̱n Cristo̱ Jesu. Un kikienu̱u a̱ya ntsja xu̱ta̱ nankinu̱u xi nkú tsꞌín ta̱ un kikiehe̱ xu̱ta̱ ni̱nku̱ xuꞌbo̱ a̱ya ntsja xu̱ta̱ judio̱ xinkjín.
\p
\v 15 Kui xi ta̱ i̱ncha kitsꞌínkꞌien Nda̱ Nti̱a̱ná Jesu ko̱ já profeta̱, ko̱ ji̱n i̱ncha kikatje̱nnkini̱. Najmi maha̱ i̱ncha tsꞌín ni xi sasíhi̱n Nti̱a̱ná ko̱ fi kontra̱ha̱ ngatentee̱ xu̱ta̱.
\v 16 Bꞌéchꞌoni̱ nga bꞌeni̱jmíi̱hi̱ xu̱ta̱ xi najmi ntje̱ judio̱ tje̱he̱n ra̱ én xi tsꞌínkꞌankihi̱ xu̱ta̱. Tehe̱nte títsꞌíntsené jé yjoho̱ nga bꞌa̱ tíi̱ncha tsꞌín, tu̱nga ndꞌa̱i̱ ja jꞌaikꞌúhu̱n xu̱ta̱ xuꞌbo̱ kju̱a̱kjaha̱n Nti̱a̱ná.
\s Bꞌi̱ tsꞌín kitsúya Pablo̱ nkꞌie nga ta̱ mjehé ngáha̱ ra̱ ngju̱a̱i̱sehe̱ xu̱ta̱ ni̱nku̱ Tesaloni̱ka̱
\p
\v 17 Jun já ntsꞌe, kama mje ṉkjúnni̱ ko̱ tu̱ ni xí tsinchisjáí ni̱yá níi̱ nga kuankíi̱nse̱ ngáha̱ ri̱ nkꞌie nga ja jꞌa chuba ni̱stjin nga tsankin tꞌaxíi̱n má nga tintsu̱bo̱o, ndaha tsa najmi ngji tꞌaxíhi̱n xinkjín ani̱ma̱ná.
\v 18 Kui nga kama mjehe̱ni̱ nga kuankíi̱nse̱ ngáha̱ ri̱. An Pablo̱ nku jo ni̱yá kama mjena nga kfínse ngáha̱nu̱u kai, tu̱nga nda̱nindoo̱hó yꞌéchjani̱.
\v 19 A̱tꞌaha̱, ¿mí nihi xi tíchuyái̱hi̱ ko̱ mí nihi xi ka̱ma kju̱a̱tsjoni̱ ko̱ mí nihi xi ka̱ma chánka nꞌe̱sjeko̱ho̱ni̱ yjoni̱ nginku̱n Nda̱ Nti̱a̱ná Jesucristo̱ nkꞌie nga kjꞌu̱a̱í ngáha? ¿A najmi juhún?
\v 20 Kju̱axi̱ nga jun xi kju̱a̱chánkani̱ ko̱ kju̱a̱tsjoni̱.
\c 3
\s Bꞌi̱ tsꞌín kitsúya Pablo̱ mí kju̱a̱ha nga yꞌéxáha Timoteo̱
\p
\v 1 Kui bꞌa̱ maha nkꞌie nga najmi ta̱ kama ꞌyún saha̱ni̱, tu̱ xi bꞌa̱ tsꞌín cha̱ha̱ni̱ ni xi tímatꞌon yꞌendai̱ nga ku̱i̱ntsu̱ba̱ su̱ba̱i̱ nanki Atena̱
\v 2 ko̱ kinꞌekjíi̱ nda̱ ntsꞌeé Timoteo̱, nga kui xi ngju̱a̱i̱senu̱u. Kui xi ta̱ títsꞌínxátꞌaha̱ Nti̱a̱ná nga tíbꞌéni̱jmí én nda tsuhu̱ Cristo̱. Kinꞌekjíi̱ tu̱ xi tsjá ngaꞌyúhu̱nnu̱u nga ku̱a̱si̱nko̱ho̱nu̱u ko̱ ndjá ku̱i̱nchajiun xi sꞌejinná.
\v 3 Najmi mjeni̱ tsa tjín xi tjín a̱jinnu̱u kfe̱he̱ kꞌun tu̱ nga̱tꞌaha̱ ni xi tífꞌajin. Ja yo nga tjíhin nga bꞌa̱ ka̱matꞌaán.
\p
\v 4 A̱tꞌaha̱ nkꞌie nga tintsu̱ba̱ sai̱ a̱jinnu̱u, tsixínya títjui̱hi̱n nga sa̱kúná kju̱a̱ꞌun, xi nkú nga ja kama ko̱ yo.
\v 5 Kui kju̱a̱ha tu̱ xí kisꞌenta̱hána. Kui nga kitsꞌinkjísehe̱nu̱u Timoteo̱ tu̱ xi skuehena tsa tu̱ bꞌa̱ tsꞌín ndjáhá sꞌejin sanu̱u. Najmi mjena tsa nda̱nindoo̱ kjútꞌayákꞌunnu̱u, tsa bꞌa̱ tsꞌínndyja̱ha xá xi kinꞌei̱ a̱jinnu̱u.
\p
\v 6 Ja kikꞌóya ngáha Timoteo̱ nga ngjisenu̱u. Én nda tsu jꞌaiko̱ni̱. Bꞌa̱ títsu nga tu̱ nkú bꞌa̱há tsꞌín sꞌejinnu̱u Nti̱a̱ná ko̱ nga tu̱ bꞌa̱ tsꞌín tjíhínnu̱u kju̱a̱tjo. Kitsúyani̱ nga tsjo ma tehe̱ntenu̱u nga fꞌáítsjennu̱u ji̱n ko̱ nga tu̱ xí mjehénu̱u cha̱ ngáha̱ni̱ xi nkú ta̱ tsꞌín ji̱n ꞌyún mjeni̱ nga cha̱i̱hi̱ jun.
\p
\v 7 Kui kju̱a̱ha, já ntsꞌe, a̱jihi̱n kju̱a̱nusin xi tjínni̱ ko̱ kju̱a̱ꞌun xi tíbeni̱, tísakú ngaꞌyúnni̱ nga tínuꞌyái̱ nga tu̱ nku bꞌa̱há tsꞌín ndjá sꞌejinnu̱u Nti̱a̱ná.
\v 8 Títsjá ngaꞌyúnni̱ nga yai̱ nga ndjá tinchajiun Nda̱ Nti̱a̱ná.
\v 9 Najmi tísakújinni̱ én xi nkú tsꞌín kꞌu̱a̱i̱hi̱ ri̱ mábꞌa̱chjíhi̱ Nti̱a̱ná a̱tꞌaha̱ ndjá tinchajihu̱un Nda̱ Nti̱a̱ná ko̱ tíꞌba̱i̱ni̱ kju̱a̱tsjo nginku̱n Nti̱a̱ná.
\v 10 Ni̱stjin ni̱stje̱n ꞌyún ṉkjún binchii̱hi̱ Nti̱a̱ná tu̱ xi katsjántehe̱ni̱ nga cha̱se̱ꞌa ngáhaná xinki̱á ko̱ nga nꞌe̱ndju̱útꞌai̱ ni xi sꞌejinnu̱u, tsa tu̱ aha tjín ni xi ndyjatꞌa sa.
\p
\v 11 Katsjáni̱yáni̱ Nti̱a̱ Na̱ꞌminá ko̱ Nda̱ Nti̱a̱ná Jesu tu̱ xi ka̱ma kuankíhi̱nse̱ ngáha̱ ri̱.
\v 12 Ko̱ ꞌyún katsjá sanu̱u kju̱a̱tjo Nda̱ Nti̱a̱ná tu̱ xi bꞌi̱ ngján nꞌetjóhonu xinki̱u ko̱ xu̱ta̱ xingisoo̱ xi nkú tsꞌín tjoni̱ jun.
\v 13 Katsjá ngaꞌyúhu̱n ani̱ma̱nu̱u tu̱ xi najmi chumi ni sa̱kújihi̱nnu̱u ko̱ je sꞌe̱yaha̱nu̱u nginku̱n Nti̱a̱ Na̱ꞌminá ni̱stjin nga kjꞌu̱a̱íko̱ Nda̱ Nti̱a̱ná Jesu ngayjee̱ xu̱ta̱ xi kikjꞌátsꞌe̱.
\c 4
\s Bꞌi̱ tsꞌín tsakúya Pablo̱ xi nkú tsꞌín tjíhin nga ku̱i̱ntsu̱ba̱á nginku̱n Nti̱a̱ná
\p
\v 1 Ndꞌa̱i̱ já ntsꞌe, ngajoho̱ Nda̱ Nti̱a̱ná Jesu tíbinchii̱hi̱ ko̱ tíꞌba̱i̱ ni̱yái̱hi̱ nga nꞌe̱henu xi nkú tsꞌín kisakúyanu̱u ko̱ xi nkú tínꞌo tu̱ nkú bꞌa̱há nꞌe̱ so. A̱tꞌaha̱ ja yꞌejña chjii̱hi̱ xi nkú tsꞌín tjíhin nga ku̱i̱ntsu̱bo̱o ko̱ nga kꞌu̱o̱ho̱o kju̱a̱tsjo Nti̱a̱ná.
\v 2 Yo kju̱a̱téxuma xi kinꞌekjasꞌei̱hi̱n, kui kju̱a̱téxumaha xi yꞌéjña Nda̱ Nti̱a̱ná Jesu.
\p
\v 3 Ni xi mjehe̱ Nti̱a̱ná, mjehe̱ nga xu̱ta̱ je ka̱mo nginku̱n. Nꞌe̱ tꞌaxíhu̱un yjonu̱u nga chu̱ba̱ súntuko̱nú xinki̱u.
\v 4 Nga nkúnkú xi tjín a̱jinnu̱u katumankjihi̱n xi nkú tsꞌín je ko̱ kixi̱ tsꞌi̱ínchjén yjonintehe̱.
\v 5 Najmi tu̱ nku ni xi fásihi̱n yjonintenu̱u nꞌesihu̱un, xi nkú nga tsꞌín xu̱ta̱ xi tjín a̱sunntee̱ xi najmi be Nti̱a̱ná.
\p
\v 6 Ndaha nku najmi tu̱ chꞌa xi ku̱a̱nkikju̱a̱ha̱ nda̱ ntsꞌe̱ ko̱ tsa kꞌu̱a̱na̱cha̱ha̱. Xi nkú tsꞌín kikꞌinyai̱hi̱ ko̱ yꞌejña chjii̱hi̱, Nti̱a̱ná tsꞌi̱ínnijéhe̱ ra̱ xu̱ta̱ xi tsꞌi̱ín kui nii̱.
\v 7 A̱tꞌaha̱ najmi jꞌájinná Nti̱a̱ná tsa tu̱ xi ni xi chu̱ntí ku̱i̱ntsu̱ba̱jihinná. Jꞌájin níná tu̱ xi ni xi je ku̱i̱ntsu̱ba̱jihinná nginku̱n.
\v 8 Kui bꞌa̱ maha, xi tsꞌi̱ín tꞌaxíhin kju̱a̱téxuma xuꞌbi̱, kui xi najmi ku̱a̱téxumaha̱ xu̱ta̱ títsꞌín tꞌaxín. Kju̱a̱téxumaha̱ ní Nti̱a̱ná xi kitsjánu̱u Espiri̱tu̱ Santo̱ títsꞌín tꞌaxín.
\p
\v 9 Nga̱tꞌa tsꞌe̱ kju̱a̱tjo xi tíjñajinná ñá xi  ntsꞌeé mahaná, najmi machjén tsa kꞌuetꞌá xu̱ju̱nnu̱u. A̱tꞌaha̱ Nti̱a̱ná ja tsakúyanu̱u nga bꞌi̱ ngján tjíhin nga nꞌe̱tjó xinki̱u.
\v 10 Bꞌa̱ tsꞌín kjáíhin tínꞌetjó ngayjee̱ já ntsꞌeé xi tjín nga ngúsuhu̱n a̱nte Macedoni̱a̱. Tu̱nga ji̱n tíbinchii̱hi̱, já ntsꞌe, nga ꞌyún ṉkjún kasꞌe sanu̱u kju̱a̱tjo.
\v 11 Ti̱nchísjo nga kasꞌenu̱u ku̱a̱jyu nga ti̱ntsu̱bo̱o, ko̱ nꞌo̱o ni xi tsꞌa̱jun, ko̱ ntso̱o nꞌe̱xáko̱honu. Bꞌa̱ nꞌo̱ xi nkú tsixíi̱n nga nꞌo̱o,
\v 12 tu̱ xi nda tsꞌín ku̱i̱nimahanu a̱jihi̱n xu̱ta̱ xi najmi sꞌejihi̱n Nti̱a̱ná ko̱ tu̱ xi najmi chumi nihi xi ndyja̱tꞌaha̱nu̱u.
\s Bꞌi̱ tsꞌín tsakúya Pablo̱ xi nkú tsꞌín kjꞌu̱a̱íkjꞌáná Nda̱ Nti̱a̱ná Jesu
\p
\v 13 Jun já ntsꞌe, mjeni̱ nga cho̱o ni xi ka̱maha̱ xu̱ta̱ xi ja kꞌien, tu̱ xi najmi kꞌúé babaha̱ ra̱ yjonu̱u xi nkú tsꞌín ꞌbe babaha̱ xu̱ta̱ xingisoo̱, xu̱ta̱ xi najmi chumi nihi xi tíkuyáha̱.
\v 14 Xi nkú tsꞌín sꞌejinná nga kꞌien Jesu ko̱ jꞌáíya ngáha̱ ra̱ ngabayoo̱, bꞌa̱ ta̱ tsꞌín sꞌejinná nga Nti̱a̱ná tsꞌi̱ínkjꞌáíyako̱ ngáha̱ ra̱ Jesu xu̱ta̱ kꞌie̱n, kui xu̱ta̱ xi kisꞌejihi̱n Jesu.
\p
\v 15 Éhe̱n Nda̱ Nti̱a̱ná ni xi tíbixínyai̱ nga ñá xi tintsu̱ba̱á ni̱stjin nga kjꞌu̱a̱í ngáha Nda̱ Nti̱a̱ná najmi ku̱i̱tjá títjuhu̱ún xu̱ta̱ xi ja kꞌie̱n.
\v 16 A̱tꞌaha̱ nkꞌa ján ni̱baha Nda̱ Nti̱a̱ná. Ku̱i̱núꞌyá nku nta̱ xi kꞌu̱éxá ngajoho̱ Nti̱a̱ná, kui xi nta̱ha̱ ntítsje kꞌaku̱, ko̱ kju̱a̱ne̱ tjioho̱ Nti̱a̱ná. Tjun xu̱ta̱ xi kisꞌejihi̱n Cristo̱ kintehe̱ ni nga ku̱a̱yá kjꞌu̱a̱íyaha̱ ngabayo.
\v 17 Ko̱ a̱skahan ñá xi tintsu̱ba̱ tíkꞌun saá kui ni̱stjiu̱n nꞌe̱kjínjiko̱ná xu̱ta̱ xuꞌbo̱ a̱jin ni̱nti̱u̱ xi má nga nꞌe̱kjáíhi̱ín Nda̱ Nti̱a̱ná nkꞌa ján. Yo̱hó ni̱ ma ku̱i̱ntsu̱ba̱ka̱ síha̱án Nda̱ Nti̱a̱ná.
\v 18 Kui én xuꞌbi̱ tjen ngaꞌyúnko̱ho̱ ru̱u xinki̱u.
\c 5
\s Bꞌi̱ tsꞌín kitsúya Pablo̱ xi nkú chun nkꞌie nga kjꞌu̱a̱í Nda̱ Nti̱a̱ná
\p
\v 1 Jun já ntsꞌe, nga̱tꞌa tsꞌe̱ ni̱stjin xi nibá ko̱ nkjé ku̱i̱tjusun niu̱, najmi machjéhe̱n tsa kꞌuetꞌá xu̱ju̱nnu̱u.
\v 2 A̱tꞌaha̱ jun ja ya sisiun ni̱stjin nga kjꞌu̱a̱í ngáha Nda̱ Nti̱a̱ná, kjꞌu̱a̱í ni̱stjin nga najmi chꞌa xi tíkuyáha̱, xi nkú tsꞌín fꞌai nku nda̱ ndyjé nga jyuu̱n.
\v 3 Nkꞌie nga: “Tjínná kju̱a̱jyu ndꞌa̱i̱ ko̱ ja nda nꞌe tintsu̱ba̱á”, ku̱i̱tsu̱ xu̱ta̱, nkꞌie tje̱nꞌyún ni̱banehé ra̱ ni xi tsꞌi̱ínkjehe̱ xi nkú tsꞌín nibánehe̱ chji̱nti̱ nku ta̱chju̱ún xi ja tsíhi̱n ntí. Najmi sꞌe̱ má ku̱a̱nka ꞌma xu̱ta̱ kui ni̱stjin xuꞌbo̱.
\p
\v 4 Tu̱nga máha jun, já ntsꞌe, najmi má jyuu̱n tintsu̱bo̱o, tsa tu̱ ndyjahánu̱u nga kjꞌu̱a̱í ni̱stjin xuꞌbo̱ xi nkú joyaha nku nda̱ ndyjé.
\v 5 Ngatentoo̱ tintsu̱bo̱o má ndzjee̱n ko̱ má ni̱stjiu̱n. Najmi má ni̱stje̱n ko̱ tsa má jyuu̱n tsꞌe̱ná.
\v 6 Kui nga najmi tu̱ sufehená xi nkúhu xu̱ta̱ xingisoo̱. Ti̱ntsu̱ba̱ tíkꞌun nínáá ko̱ cha̱se̱éhe̱ ni xi nꞌe̱é.
\p
\v 7 A̱tꞌaha̱ xi fantufé, nga jyuu̱n fantufé, ko̱ xi ma chꞌi̱, nga jyuu̱n ma chꞌi̱.
\v 8 Tu̱nga ñá xi má ndzjee̱n tsꞌe̱ná tjíhin nga nꞌe̱nkjín sisihi̱ín takꞌaán ko̱ kꞌúéndaá yjoná xi nkú joyaha já jun xi kja̱án. Nꞌe̱ sꞌejián Nti̱a̱ná, kasꞌená kju̱a̱tjo, ko̱ chúyaha̱á nga kꞌu̱a̱nkiá. Bꞌa̱ tsꞌín chjúhu̱n ra̱á yjoná xi nkú tsꞌín kuhu̱n yjoho̱ já jun xi kján.
\p
\v 9 A̱tꞌaha̱ najmi bꞌa̱ tsꞌín yꞌénda Nti̱a̱ná tsa ñá sa̱kúná kju̱a̱kjaha̱n. Yꞌéjña ní nga Nda̱ Nti̱a̱ná Jesucristo̱ tsꞌi̱ínkꞌankiná.
\v 10 Kui xi kꞌienntjáíhiná tu̱ xi ku̱i̱ntsu̱ba̱ tíkꞌunko̱honá, ndaha tsa ja tsayaá ko̱ ndaha tsa tintsu̱ba̱ tíkꞌun saá e̱i̱ a̱sunntei̱.
\v 11 Kui bꞌa̱ maha, bꞌi̱ ngján tjen ngaꞌyúhu̱nru̱ú xinki̱u ko̱ ti̱si̱nko̱o tu̱ xi ndjá ku̱i̱nchunjíhinnu xi sꞌejinná. Bꞌa̱ nꞌo̱o xi nkú nga tínꞌo santaha ni̱stjin ndꞌa̱i̱.
\s Bꞌi̱ tsꞌín tsakúya Pablo̱ ni xi i̱ncha tsꞌi̱ín xu̱ta̱ ni̱nku̱
\p
\v 12 Jun já ntsꞌe, tíbinchii̱hi̱ nga katumankjinnu̱u nga Nda̱ Nti̱a̱ná títsꞌínxátꞌaha̱ já xi tíi̱ncha tsꞌínxájinnu̱u, já xi yja títjunnu̱u ko̱ títsjáni̱yánu̱u.
\v 13 ꞌYún cha̱nkjún ko̱ nꞌe̱tjó jóo̱ tu̱ nga̱tꞌaha̱ xá xi tíi̱ncha tsꞌín. Ko̱ bꞌi̱ ngján kasꞌenu̱u kju̱a̱jyu nga tintsu̱ba̱ko̱o xinki̱u.
\p
\v 14 Jun já ntsꞌe̱, ta̱ tíbinchii̱hi̱ ni xuꞌbi̱. Tjen ni̱yóho̱o xi najmi mjehe̱ tsꞌi̱ínxá. Tjen ngaꞌyúhu̱un xi tífehe̱ kꞌun. Ti̱si̱nko̱o xi najmi ndjá tíi̱nchajin xi sꞌejinná. Nꞌe̱ꞌyún takꞌuhu̱un ngatentee̱ xu̱ta̱.
\v 15 Tsa tjín a̱jinnu̱u xi chꞌon kinꞌehe̱, cha̱so̱o nga najmi tu̱ tsꞌi̱ín ngajoya ngáha ni xi kinꞌehe̱. Bꞌi̱ ngján nda nꞌe̱ tehe̱ntoho̱o xinki̱u ko̱ ngayjee̱ xu̱ta̱ xingisoo̱.
\p
\v 16 Tehe̱nte tsjo katꞌenu̱u.
\v 17 Tu̱ nkú chu̱bako̱nú Nti̱a̱ná.
\v 18 Tu̱ mí nihí ni xi ka̱matꞌon, tjoho̱on mábꞌa̱chjíhi̱ Nti̱a̱ná. A̱tꞌaha̱ kui niu̱ xi mjehe̱ Nti̱a̱ná nga nꞌo̱o jun xi sꞌejinnu̱u Cristo̱ Jesu.
\p
\v 19 Najmi tu̱ nꞌekꞌienyo ndꞌí xi títsꞌínkatꞌai Espiri̱tu̱hu̱ Nti̱a̱ná a̱jinnu̱u.
\v 20 Najmi tu̱ tohón manu̱u xi nchja̱ én xi tsjá Nti̱a̱ná.
\v 21 Cha̱so̱ho̱o ngayjee̱ tu̱ mí nihí ni nga ti̱nchísjaijiun ni xi nda ko̱ kui xi nꞌo̱o.
\v 22 Tꞌechꞌóho̱o yjonu̱u ngayje tíkjá ni xi najmi nda.
\p
\v 23 Nti̱a̱ná xi tsjáná kju̱a̱jyu, kui xi katsꞌín jeyjenu̱u nginku̱n ko̱ kakunnu̱u, tu̱ xi ndaha̱chí najmi sꞌe̱he jé a̱jin kju̱a̱nkjintakꞌunnu̱u ko̱ tsa a̱jin ani̱ma̱nu̱u ko̱ tsa a̱jin yjonintenu̱u ni̱stjin nga kjꞌu̱a̱í ngáha Nda̱ Nti̱a̱ná Jesucristo̱.
\v 24 Nti̱a̱ná xi kixi̱ tsꞌíntjusun ni xi nchja̱, kui xi jꞌájinnu̱u ko̱ tsꞌi̱íntjusun nii̱.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 25 Jun já ntsꞌe, nkꞌie nga chu̱bako̱o Nti̱a̱ná, chu̱bantjáíni̱.
\p
\v 26 Ngajoni̱ súniñaha̱ ru̱u ngatentee̱ já ntsꞌeé.
\p
\v 27 Ngajoho̱ Nda̱ Nti̱a̱ná tíbankihi̱nu̱u nga kanꞌeya xu̱ju̱i̱n nginku̱n ngatentee̱ já ntsꞌeé.
\p
\v 28 Kasꞌenu̱u kju̱a̱ndaha̱ Nda̱ Nti̱a̱ná Jesucristo̱.