\id 2TH Mazatec of Jalapa de Díaz
\h Xu̱ju̱n xi ma joho xi kinꞌekjíhi̱ xu̱ta̱ ni̱nku̱ Tesaloni̱ka̱
\toc1 Xu̱ju̱n xi ma joho xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Tesaloni̱ka̱
\mt Xu̱ju̱n xi ma joho xi kitsꞌínkjihi̱ nda̱ postru̱ Pablo̱ xu̱ta̱ ni̱nku̱ Tesaloni̱ka̱
\c 1
\s Bꞌi̱ tsꞌín kikjaniñaha̱ Pablo̱ xu̱ta̱ ni̱nku̱ xi tjín nanki Tesaloni̱ka̱
\p
\v 1 An Pablo̱, Silbano̱ ko̱ Timoteo̱ tísuniñai̱hi̱, jun xu̱ta̱ ni̱nku̱ xi tintsu̱bo̱o nanki Tesaloni̱ka̱, xi kikjꞌátsꞌe̱nu̱u Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\p
\v 2 Kasꞌenu̱u kju̱a̱nda ko̱ kju̱a̱jyu xi tsjáná Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\s Bꞌi̱ tsꞌín kitsúya Pablo̱ ni xi ka̱matꞌain xu̱ta̱ nkꞌie nga kjꞌu̱a̱í ngáha Jesucristo̱
\p
\v 3 Jun já ntsꞌe, ji̱n tjíhin nga tehe̱nte kꞌu̱a̱i̱hi̱ mábꞌa̱chjíhi̱ Nti̱a̱ná nga ja kichjubó éhe̱n. Kixi̱ tjíhin nga bꞌa̱ nꞌe̱i̱, a̱tꞌaha̱ ꞌyún tísꞌejin sanu̱u éhe̱n Nti̱a̱ná ko̱ a̱tꞌaha̱ bꞌi̱ ngján ꞌyún tínꞌetjó so xinki̱u.
\v 4 Kui nga tsjo maha̱ni̱ jun a̱jihi̱n xu̱ta̱ ni̱nku̱ xingisoo̱ xi Nti̱a̱ná ta̱ tsꞌe̱. Tíbixínyai̱ xi nkú tsꞌín tínꞌe chúkju̱o ni xi tímatꞌon ko̱ xi nkú tsꞌín tínꞌe sꞌejiun Nti̱a̱ná, ndaha tsa tínꞌe unchanu̱u ko̱ nkjin tíkjá kju̱a̱ni̱ma̱ tísakúnu̱u.
\v 5 Kui ni xuꞌbi̱ xi bakúchji nga kixi̱ basehe̱ Nti̱a̱ná mí nihi xi nda ko̱ tsa xi najmi nda títsꞌín xu̱ta̱. Tíbꞌaxki̱nu̱u nga jun xi tsuhu̱nu̱u má batéxuma. Kui kju̱a̱ha nga un tíbehe̱nu̱u.
\p
\v 6 Kixi̱ tsꞌi̱ín Nti̱a̱ná nga tsjáha̱ kju̱a̱ꞌun xu̱ta̱ xi títsꞌínkjꞌajinnu̱u kju̱a̱ꞌun
\v 7 ko̱ nga tsjánu̱u jun xi tínꞌekjꞌajinnu̱u kju̱a̱ꞌun nga nꞌe̱kjꞌáíyako̱ni̱. Bꞌa̱ ka̱ma ni̱stjin nga kjꞌu̱a̱íkúchji yjoho̱ Nda̱ Nti̱a̱ná Jesu, nkꞌie nga ni̱bajenko̱ nkꞌa ján ntítsjehe̱ xi tjíhi̱n ngaꞌyún nga tje̱njin tsꞌíhin ndꞌí.
\v 8 Kjꞌu̱a̱í tsꞌínkꞌíéchjí xi najmi be Nti̱a̱ná ko̱ xi najmi kintꞌéꞌéhe̱n én nda tsuhu̱ Nda̱ Nti̱a̱ná Jesu.
\p
\v 9 Kui xu̱ta̱ha xi tsꞌi̱ínkjáíhi̱n kju̱a̱ni̱ma̱ nga ndyja̱ sín. Nꞌe̱kjí tꞌaxín nginku̱n Nda̱ Nti̱a̱ná. Najmi sku̱e̱ kju̱a̱chánkaha̱ ko̱ ngaꞌyúhu̱n.
\v 10 Bꞌa̱ ka̱ma kui ni̱stjiu̱n nkꞌie nga ja kjꞌu̱a̱í tsꞌínkjáíhi̱n Nda̱ Nti̱a̱ná kju̱a̱chánkaha̱ a̱jihi̱n xu̱ta̱ xi tsꞌe̱, ko̱ ngayjee̱ xu̱ta̱ xi kisꞌejihi̱n tsjo ka̱maha̱ nga sku̱e̱. Ta̱ cho̱o a̱tꞌaha̱ kinꞌe sꞌejiun éhe̱n Nti̱a̱ná xi tsixínyai̱ a̱jinnu̱u.
\p
\v 11 Kui kju̱a̱ha, nkꞌie nga chubako̱ho̱ni̱ Nti̱a̱ná tehe̱nte chubantjáíhi̱ ri̱, tu̱ xi kꞌu̱a̱xki̱hi̱nu̱u Nti̱a̱ná nga jun xi tsuhu̱nu̱u nga ka̱mankuko̱o xu̱ta̱ xi jꞌájin. Binchii̱hi̱ Nti̱a̱ná nga katsꞌíntjusunko̱ ngaꞌyúhu̱n ngayje tíkjá ni xi nda mjenu̱u nga nꞌo̱o ko̱ ngayjee̱ xá xi tínꞌo tu̱ nga̱tꞌaha̱ nga sꞌejinnu̱u.
\v 12 Nkꞌie nga bꞌa̱ ka̱ma, sa̱kúhu̱ kju̱a̱chánka Nda̱ Nti̱a̱ná Jesu a̱jinnu̱u ko̱ jun ta̱ sa̱kúnu̱u kju̱a̱chánka nga̱tꞌaha̱ Nda̱ Nti̱a̱ná, xi nkú tsꞌín tje̱he̱n ra̱ kju̱a̱ndaha̱ Nti̱a̱ná ko̱ kju̱a̱ndaha̱ Nda̱ Nti̱a̱ná Jesucristo̱.
\c 2
\s Bꞌi̱ tsꞌín tsakúya Pablo̱ ni chꞌonkꞌun xi ka̱ma kintehe̱ ni nga kjꞌu̱a̱íkúchji yjoho̱ Jesucristo̱
\p
\v 1 Jun já ntsꞌe, nga̱tꞌa tsꞌe̱ nga kjꞌu̱a̱í ngáha Nda̱ Nti̱a̱ná Jesucristo̱ ko̱ nga ka̱ma ñjakúka̱á, ji̱n tíbinchii̱hi̱
\v 2 nga najmi tu̱ ki̱tsa̱ nꞌekꞌóntjaiyo xi nkú tsꞌín nꞌenkjíntakꞌun. Najmi tu̱ fanta̱ha̱ ru̱u yjonu̱u tsa ku̱i̱núꞌyó én nga ja kuichu ni̱stjin nga kjꞌu̱a̱í ngáha Nda̱ Nti̱a̱ná, ndaha tsa tjín xi bꞌa̱ ku̱i̱tsu̱ nga Espiri̱tu̱hu̱ Nti̱a̱ná títsꞌínkinchja̱ha̱ ko̱ tsa bꞌa̱ ku̱i̱tsu̱ nga éhe̱n Nti̱a̱ná tíbꞌéni̱jmí, ko̱ ndaha tsa nꞌe̱kjóho̱on nku xu̱ju̱n xi nkúhu tsa ji̱n kinꞌe nibái̱.
\p
\v 3 Ndaha̱chí najmi tu̱ ꞌba̱i̱nto tsa tjín xi kꞌu̱a̱na̱cha̱nu̱u. A̱tꞌaha̱ kintehe̱ ni nga ku̱i̱chú kui ni̱stjiu̱n, tjun i̱ncha tsꞌi̱ín tꞌaxín xu̱ta̱ Nti̱a̱ná ko̱ ku̱a̱kúchji yjoho̱ nda̱ xi ngatitsuu̱n tsꞌe̱he̱, xi nga̱kꞌi̱e̱n tje̱he̱n ra̱.
\v 4 Kui xi tsꞌi̱ín chánka yjoho̱ ko̱ ngju̱a̱i̱ kontra̱ha̱ ngayjee̱ ni xi tsu xu̱ta̱ nga Nti̱a̱ ko̱ ngayjee̱ ni xi benkjún xu̱ta̱. Santaha a̱nte nkjúhu̱n ni̱nku̱hu̱ Nti̱a̱ná kꞌúéjña nga nti̱a̱ tsꞌi̱ín ma suba yjoho̱.
\p
\v 5 ¿A najmi ta̱ fꞌáítsjehénnu̱u, nkꞌie nga tsáte̱jñajinnu̱u kixinyanu̱u ni xuꞌbi̱?
\v 6 Ko̱ ja yo ndꞌa̱i̱ mí nihi xi tíbꞌéchjaha̱ nda̱ xi ngatitsuu̱n tsꞌe̱he̱, tu̱ xi ku̱a̱kúchjihi yjoho̱ nga ku̱i̱chú ni̱stjihi̱n.
\v 7 A̱tꞌaha̱ ja títsꞌínxá ndꞌa̱i̱ ngaꞌyúhu̱n ngatitsun xi tíjñaꞌmoo̱. Tu̱ ni xi ndyjahá sa, ndyja nga chjúxin xi tíbꞌéchjaha̱ ndꞌa̱i̱.
\v 8 Nkꞌiehé ku̱a̱kúchji yjoho̱ nda̱ chꞌonkꞌuu̱n. Tu̱nga ntjo̱ tsꞌahá Nda̱ Nti̱a̱ná Jesu tsꞌi̱ín ngana̱ko̱ho̱ ra̱ ko̱ ndꞌíhi̱ sénni̱stjihi̱n tsꞌi̱ínkjeko̱o nkꞌie nga kjꞌu̱a̱í.
\p
\v 9 Nda̱nindoo̱ tsꞌi̱ínxájihi̱n nda̱ chꞌonkꞌuu̱n nkꞌie nga kjꞌu̱a̱í. Chánka ngaꞌyún xi kjꞌu̱a̱íko̱. Tsꞌi̱ín ni xi ku̱a̱kúchji ngaꞌyúhu̱n ko̱ kju̱a̱nkjún tsankꞌá tsꞌi̱ín.
\v 10 Tsꞌi̱ínchjén ngayje tíkjá ni xi najmi nda nga kꞌu̱a̱na̱cha̱ha̱ xu̱ta̱ xi tjíhin nga ndyja̱. Kui xu̱ta̱ha xi kitsꞌín tꞌaxín én xi na̱xu̱, én xi ka̱ma tsꞌi̱ínkꞌankihi̱ kai.
\v 11 Kui kju̱a̱ha nga Nti̱a̱ná tsꞌi̱ín nibáha̱ ra̱ xu̱ta̱ xuꞌbo̱ nku ngaꞌyún xi kꞌu̱a̱na̱cha̱ha̱ nga sꞌe̱jihi̱n én tsankꞌóo̱.
\v 12 Bꞌa̱ tsꞌín nꞌe̱nijéhe̱ ra̱ ngatentee̱ xi najmi kisꞌejihi̱n én xi na̱xu̱, xi tu̱ sahá kama tsjoho̱ ni xi najmi na̱xu̱ nginku̱n Nti̱a̱ná.
\s Bꞌi̱ tsꞌín kinchja̱ Pablo̱ nga ndjá ku̱i̱nchajin xu̱ta̱ Tesaloni̱ka̱ ni xi tsꞌe̱ Nti̱a̱ná
\p
\v 13 Tu̱nga máha ji̱n, tehe̱nte tjíhin nga kꞌu̱a̱i̱hi̱ mábꞌa̱chjíhi̱ Nti̱a̱ná a̱tꞌaha̱ kichjubó éhe̱n. ꞌYún tjoho̱ Nda̱ Nti̱a̱ná jun, já ntsꞌeé. A̱tꞌaha̱ santaha nkúhu nga tutsꞌihi̱n ni jꞌájinnu̱u Nti̱a̱ná tu̱ xi nꞌe̱kꞌankihi̱nu̱u nga̱tꞌaha̱ Espiri̱tu̱hu̱ Nti̱a̱ná xi títsꞌín jenu̱u nginku̱n ko̱ nga̱tꞌaha̱ én na̱xu̱ xi kisꞌejinnu̱u.
\v 14 Kui kju̱a̱ha kinchja̱ha̱nu̱u Nti̱a̱ná nga kitsꞌínkintꞌénu̱u én nda tsu xi yꞌeni̱jmíi̱ a̱jinnu̱u, tu̱ xi bꞌa̱ tsꞌín sa̱kúhu̱nu̱u kju̱a̱chánkaha̱ Nda̱ Nti̱a̱ná Jesucristo̱.
\p
\v 15 Kui bꞌa̱ maha, já ntsꞌe, ndjá ti̱nchahanu ko̱ nꞌe̱tjusun ni xi tsinchiyó nga kinꞌekjasꞌei̱hi̱n, ni xi tsixínyai̱hi̱ ko̱ xi yꞌétꞌa xu̱ju̱i̱hi̱n.
\v 16 Tjoho̱ ñá Nti̱a̱ Na̱ꞌminá ko̱ tsjá ngaꞌyúnná ko̱ tsjáná nga chúyaha̱á ni xi nda, a̱tꞌaha̱ chánka kju̱a̱ndaha̱. Nda̱ Nti̱a̱ná Jesucristo̱ ko̱ Nti̱a̱ Na̱ꞌminá
\v 17 katsjá ngaꞌyúhu̱n ani̱ma̱nu̱u ko̱ katsꞌín nga ni xi nda nꞌo̱o ko̱ chu̱bo.
\c 3
\s Bꞌi̱ tsꞌín tsanki Pablo̱ nga chu̱bako̱ Nti̱a̱ná
\p
\v 1 Ni xi xín yanu̱u, já ntsꞌe, chu̱bantjáíni̱ nkꞌie nga chu̱bako̱o Nti̱a̱ná. Ti̱nchúhu̱u nga ki̱tsa̱ katjitse ko̱ nda tsꞌín kanꞌekjáíhi̱n éhe̱n Nda̱ Nti̱a̱ná tu̱ má xi tje̱hén ni. Bꞌa̱ katuma xi nkú nga kama a̱jinnu̱u.
\v 2 Ko̱ ti̱nchíntjaini̱ tu̱ xi Nti̱a̱ná kjéxihi̱nni̱ a̱jihi̱n já xi kitsꞌínkatsún kju̱a̱nkjintakꞌuhu̱n ko̱ chꞌonkꞌun xi tjín. A̱tꞌaha̱ najmi ngayjee̱ xu̱ta̱ sꞌejihi̱n Nti̱a̱ná.
\p
\v 3 Tu̱nga tsꞌíntjusuhún Nda̱ Nti̱a̱ná ni xi nchja̱. Kui xi ndjá tsꞌi̱ínkinchánu̱u ko̱ kúnnu̱u a̱jihi̱n ni chꞌonkꞌun xi tjín.
\v 4 Xihi̱ nkuhú Nda̱ Nti̱a̱ná sꞌejinná behe̱ takꞌui̱n nga tínꞌetjusun ko̱ nga tu̱ nku nꞌe̱tjusunnú kju̱a̱téxuma xi kinꞌekjasꞌei̱hi̱n.
\v 5 Nda̱ Nti̱a̱ná katsjáni̱yáha̱ ani̱ma̱nu̱u nga nꞌe̱ mjo xi nkú tsꞌín mjehe̱ ñá Nti̱a̱ná ko̱ nga nꞌe̱ chúkju̱o ni xi tíbitjajíún xi nkú tsꞌín kitsꞌín chúkju̱a̱ Cristo̱.
\s Bꞌi̱ tsꞌín tsakúya Pablo̱ nkꞌie nga tsꞌi̱ínxá xu̱ta̱ ni̱nku̱ Tesaloni̱ka̱
\p
\v 6 Jun já ntsꞌe, ngajoho̱ Nda̱ Nti̱a̱ná Jesucristo̱ bꞌa̱ tíꞌmii̱hi̱ nga nꞌe̱ tꞌaxíhu̱un yjonu̱u ngatentee̱ já ntsꞌeé xi tjíntu tsꞌe, xi najmi tíi̱ncha tsꞌín xi nkú tsꞌín tíjña én xi tsakuyái̱hi̱ ko̱ kinꞌekjóho̱on.
\v 7 A̱tꞌaha̱ jun ja yo xi nkú tsꞌín tjíhin nga ku̱i̱ntsu̱bo̱o nga cha̱se̱ chu̱ba̱yani̱. Najmi tintsu̱ba̱ tsꞌei̱ a̱jinnu̱u.
\p
\v 8 Ndaha nku najmi chu̱ba̱ kichinei̱ nichinehe̱ tsa najmi yꞌechjíi̱hi̱. Ni̱stjin ni̱stje̱n ní kinꞌexái̱ ko̱ kiyai̱ kju̱a̱ni̱ma̱ tu̱ xi ndaha nku xi tjín a̱jinnu̱u najmi ji̱n yꞌenéhe̱ ri̱ yjoni̱.
\v 9 Kju̱axi̱ nga kama tsinchii̱hi̱ ni xi kamachjénni̱ kai, a̱tꞌaha̱ tjínni̱ kixi̱ nga bꞌa̱ nꞌe̱i̱. Tu̱nga tu̱ sa ní kinꞌexái̱ nga yꞌejña chu̱ba̱yai̱hi̱ xu̱ta̱, tu̱ xi bꞌa̱ ta̱ nꞌe̱henu xi nkú nga kinꞌei̱.
\v 10 A̱tꞌaha̱ nkꞌie nga tintsu̱ba̱i̱ a̱jinnu̱u, kikꞌa̱i̱hi̱ kju̱a̱téxuma xuꞌbi̱: “Tsa tjín xi najmi mjehe̱ tsꞌi̱ínxá, ta̱ najmi kakjine ma.”
\p
\v 11 A̱tꞌaha̱ tínuꞌyái̱ én nga tjín a̱jinnu̱u xi tjíma tsꞌe, xi najmi chumi nihi xi tíi̱ncha tsꞌín, nga tu̱ sahá chu̱ba̱ tíi̱ncha tsungijihín yjoho̱ má najmi kui tje̱he̱n ra̱.
\v 12 Ngajoho̱ Nda̱ Nti̱a̱ná Jesucristo̱ bꞌa̱ tíꞌmii̱hi̱ ko̱ tíbinchii̱hi̱ xu̱ta̱ xuꞌbo̱ nga tu̱ sahá jyukjꞌi katsꞌínxá. Bꞌa̱ tsꞌín sa̱kúhu̱ ra̱ ni xi machjéhe̱n.
\p
\v 13 Ko̱ jun já ntsꞌe, najmi tu̱ nꞌekjentoho̱o yjonu̱u nga nꞌo̱o ni xi nda.
\v 14 Tsa tjín xi najmi tsꞌi̱ínsihi̱n én xi tíbꞌetꞌai̱ xu̱ju̱i̱n, cha̱se̱ sisiun yá xi bꞌa̱ tsꞌi̱ín ko̱ najmi ta̱ mako̱honu, tu̱ xi katuma subaha̱ ra̱.
\v 15 Tu̱nga najmi tu̱ chasehé ru̱u xi nkúhu tsa kui xi xu̱ta̱ kontra̱nu̱u. Tjenni̱yá níhu̱u a̱tꞌaha̱ nda̱ ntsꞌo maha.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 16 Nda̱ Nti̱a̱ná xi tsjáná kju̱a̱jyu, kui xi katsjá tehe̱ntenu̱u kju̱a̱jyu a̱jihi̱n ni xi ku̱i̱tjájiun. Nda̱ Nti̱a̱ná katꞌejñajinnu̱u ngatentoo̱.
\p
\v 17 An Pablo̱ ntuna̱ tíbꞌetꞌáha̱nu̱u kju̱a̱suniñana̱. Kui xi bakúchji ngayjee̱ xu̱ju̱n xi tsꞌinkjíhi̱ xu̱ta̱. Bꞌa̱ tsꞌín bꞌetꞌá.
\p
\v 18 Ngatentoo̱ kasꞌenu̱u kju̱a̱ndaha̱ Nda̱ Nti̱a̱ná Jesucristo̱.