\id 1TI Mazatec of Jalapa de Díaz
\h Xu̱ju̱n xi tjun kinꞌekjíhi̱ Timoteo̱
\toc1 Xu̱ju̱n xi tjun kitsꞌínkjihi̱ nda̱ postru̱ Pablo̱ Timoteo̱
\mt Xu̱ju̱n xi tjun kitsꞌínkjihi̱ nda̱ postru̱ Pablo̱ Timoteo̱
\c 1
\s Bꞌi̱ tsꞌín kikjaniñaha̱ Pablo̱ Timoteo̱
\p
\v 1 An Pablo̱, an xi kama nku nda̱ postru̱hu̱\f + \fr 1:1 \ft “Xi kisꞌexá” tsuhu̱ ra̱ “nda̱ postru̱” ko̱ a ra̱ “já postru̱”.\f* Jesucristo̱ xi nkú tsꞌín yꞌéjña Nti̱a̱ná xi tsꞌínkꞌankiná ko̱ Jesucristo̱ xi tíchuyáha̱á.
\v 2 Tífaniñaha Timoteo̱, ji xi ntína̱ a̱tꞌaha̱ nkuhú xi sꞌejinná.
\p Katsjáhi kju̱a̱nda ko̱ kju̱a̱jyu Nti̱a̱ Na̱ꞌminá ko̱ Nda̱ Nti̱a̱ná Cristo̱ Jesu ko̱ nda katasehi.
\s Bꞌi̱ tsꞌín kitsúyaha̱ Pablo̱ Timoteo̱ ni xi tjíhin nga tsꞌi̱ínko̱ já maestru̱ xi tsankꞌá
\p
\v 3 Xi nkú tsꞌín tsankihi nkꞌie nga ngjia a̱nte Macedoni̱a̱, ti̱nchin nanki Efe̱so̱ kixihin ko̱ tꞌechꞌóíhi̱ xu̱ta̱ xi najmi bꞌa̱ tjín ni xi tíbakúya,
\v 4 a̱tꞌaha̱ énchá xi nchja̱ xu̱ta̱ ko̱ xi nkú tsꞌín nibatutsꞌi̱hi̱n ra̱ ntje̱ cháha̱ títsꞌínsihi̱n. A̱tꞌaha̱ yo̱ nibáha̱ ra̱ nga bꞌésiko̱ xinkjín xu̱ta̱. Najmi basinko̱ná nga nꞌe̱é xá xi kitsjáná Nti̱a̱ná. Nga ní sꞌejinná, kui ní nihi xi basinko̱ná.
\p
\v 5 Mjena nga sꞌe̱ kju̱a̱tjo, kui kju̱a̱ha nga tsankihi ra nga kꞌúéchꞌoho̱ ri̱ xu̱ta̱ xuꞌbo̱. A̱tꞌaha̱ nkꞌie nga je ani̱ma̱ha̱ xu̱ta̱ ko̱ je sꞌeya kju̱a̱nkjintakꞌuhu̱n ko̱ ngayjehe kꞌun tsꞌín sꞌejin Nti̱a̱ná, yo̱ ní nibáha̱ ra̱ kju̱a̱tjo.
\v 6 Tjín xi ja ngji tꞌaxíhi̱n ni xuꞌbi̱. Kindyjajihi̱n ni̱yóo̱ ko̱ tsichujnejin én xi najmi tjíhi̱n sin.
\v 7 Já maestru̱hu̱ kju̱a̱téxumaha̱ Nti̱a̱ná mjehe̱ tsꞌi̱ín ma yjoho̱, ndaha tsa najmi mankjihi̱n ni xi nchja̱ ko̱ chu̱ba̱ bꞌa̱há tsu nga bꞌa̱ tjín ni xi bakúya.
\p
\v 8 Yaá nga nda kju̱a̱téxumaha̱ Nti̱a̱ná tsa sa̱kúya xi nkú tsꞌín tjíhin nga sa̱kúya.
\v 9 A̱tꞌaha̱ yaá nga najmi xu̱ta̱ xi ma na̱xu̱ nginku̱n Nti̱a̱ná tíjñanehe̱ kju̱a̱téxumoo̱. Xi najmi ntꞌéꞌén ní tíjñanehe̱ kju̱a̱téxumoo̱, xi najmi benkjún Nti̱a̱ná ko̱ tsꞌín ngatitsun, xi najmi tsꞌín ni xi na̱xu̱ tjín ko̱ najmi benkjún ni xi tsꞌe̱ Nti̱a̱ná, xi tsꞌínkꞌien na̱ꞌmihi̱ ko̱ tsꞌínkꞌien na̱aha̱ ko̱ tsꞌínkꞌien ani̱ma̱,
\v 10 xi chu̱ba̱ fantuko̱hó xinkjín, xi na̱, xi batéña xu̱ta̱ musu̱, xi nchja̱ én tsankꞌá, xi najmi tsꞌíntjusun ni xi tsꞌínkie Nti̱a̱ná nga tsꞌi̱ín, ko̱ xi tsꞌín tu̱ mí nihí ni xi fi kontra̱ha̱ ni nda xi bakuyáá.
\v 11 A̱tꞌaha̱ ni nda xi bakuyáá, yo̱ nibáha̱ ra̱ én nda tsu chánkaha̱ Nti̱a̱ná xi nꞌetsjoho̱. Ko̱ an kikꞌa̱i̱na nga kꞌueni̱jmíá kui én nda tsuu̱.
\s Bꞌi̱ tsꞌín títsjáha̱ Pablo̱ mábꞌa̱chjíhi̱ Cristo̱ a̱tꞌaha̱ kui kitsꞌín maha̱ nku nda̱ postru̱
\p
\v 12 Tsjaha̱ mábꞌa̱chjíhi̱ Nda̱ Nti̱a̱ná Jesucristo̱ xi tsjá ngaꞌyúnna, a̱tꞌaha̱ tsasejnuna nga ka̱mana tsꞌian xáha̱,
\v 13 ndaha tsa chꞌon tsꞌín kinchjané ni̱stjin nkꞌie ko̱ kitsjennkí unkie xu̱ta̱ xi tsꞌe̱ ko̱ én chꞌon tsu kixihi̱n. Tu̱nga kama ni̱ma̱há ra̱ an a̱tꞌaha̱ najmi be ni xi kitsꞌian ko̱ najmi kje̱e kui sꞌejinna.
\v 14 ꞌYún nda kitsꞌínko̱na Nda̱ Nti̱a̱ná ko̱ kitsjána nga kui sꞌe̱jinna ko̱ kitsjána kju̱a̱tjo xi kui nibáha̱ ra̱.
\p
\v 15 Én xi ma nꞌe sꞌejin xuꞌbi̱ ko̱ ngayjee̱ xu̱ta̱ tjíhin nga tsꞌi̱ín sꞌejin, nga Cristo̱ Jesu jꞌai a̱sunntei̱ tu̱ xi jꞌai tsꞌínkꞌankihi xu̱ta̱ ngatitsun, bꞌaha̱ ra̱ aṉ xi ꞌyún tjínna jé.
\v 16 Tu̱nga kuihí kju̱a̱ha kama ni̱ma̱ha̱ ra̱ an Nti̱a̱ná, tu̱ xi nkꞌie nga cha̱hana an xi ꞌyún tjínna jé, ku̱a̱kúchjihi Jesucristo̱ ngayjee̱ kju̱a̱tsentaha̱. Bꞌa̱ tsꞌín kisꞌejña chu̱ba̱yaha̱ ra̱ an xu̱ta̱ xi a̱skahan sꞌe̱jihi̱n Jesucristo̱ ko̱ sa̱kúhu̱ nga kꞌúéntu tíkꞌun sín.
\v 17 Kui bꞌa̱ maha, ¡kayankjún ko̱ katsꞌínkie yjoho̱ xu̱ta̱ nga tjíhi̱n kju̱a̱chánka santaha tu̱ nkjéhé ni Nti̱a̱ná xi Nda̱ rei̱ xi batéxuma sín, xi najmi maha̱ ꞌme, xi najmi ma chji, xi nku tutu Nti̱a̱ná maha! Bꞌa̱ katuma.
\p
\v 18 Ji Timoteo̱, xi nkúhu tsa ntína̱ ji, ja kuaxinyaha ni xi nꞌe̱i̱. Én xi kitsjáhi já xi kinchja̱ én xi kitsjáha̱ Nti̱a̱ná nibáha̱ ra̱ kui nii̱. En xi i̱ncha kitsú ku̱a̱si̱nko̱hi nga nda ku̱i̱tjusun xá xi tínꞌei.
\v 19 Ndjá ti̱si̱njñajin ni xi sꞌejinná ko̱ je kasꞌeya kju̱a̱nkjintakꞌuhi̱n. A̱tꞌaha̱ tjín xi ja kitsꞌín tꞌaxín ni xuꞌbi̱ ko̱ bꞌa̱ tsꞌín kitsꞌínndyjajihi̱n ra̱ yjoho̱. Najmi ta̱ sꞌejihi̱n ra̱ Nti̱a̱ná.
\v 20 Bꞌa̱ kamatꞌain nda̱ Himeneo̱ ko̱ nda̱ Alejandro̱. Kui jóo̱ xi ja kitsꞌinkjasꞌen a̱ya ntsja nda̱nindoo̱ tu̱ xi katehe nga tjíhin nga sku̱e̱nkjún Nti̱a̱ná nga ku̱i̱nchja̱.
\c 2
\s Bꞌi̱ tsꞌín tsakúya Pablo̱ ni xi nꞌe̱ a̱ya ni̱nku̱
\p
\v 1 Títjun tíbankia nga xu̱ta̱ ni̱nku̱ katankihi̱ Nti̱a̱ná ni xi machjéhe̱n. Kanchja̱ko̱ ko̱ katankintjáí ngayjee̱ xu̱ta̱ xi tjín ko̱ katsjáha̱ mábꞌa̱chjíhi̱ nga nda títsꞌínko̱ho̱.
\v 2 Kanchja̱ntai já rei̱ ko̱ ngayjee̱ já xi tjíhi̱n xá, tu̱ xi kju̱a̱jyu ko̱ kju̱a̱nchꞌán sꞌe̱hená nga ku̱i̱ntsu̱ba̱á ko̱ tu̱ nku cha̱nkjúhúnná Nti̱a̱ná ko̱ nda ku̱i̱ntsu̱ba̱á.
\v 3 A̱tꞌaha̱ kui ni xuꞌbi̱ xi nda ko̱ sasíhi̱n Nti̱a̱ná xi tsꞌínkꞌankiná.
\v 4 Mjehe̱ Nti̱a̱ná nga nꞌe̱kꞌanki ngatentee̱ xu̱ta̱ ko̱ nga ku̱i̱chú mankjihi̱n ni xi na̱xu̱ tjín.
\p
\v 5 A̱tꞌaha̱ nkuhú maha Nti̱a̱ná ko̱ nkuhú maha nda̱ xi nchja̱ntjai xu̱ta̱ nginku̱n Nti̱a̱ná. Jesucristo̱, kui xi nda̱ xuꞌbo̱.
\v 6 Kui xi kitsjá yjoho̱ nga yꞌéchjíntjai ngayjee̱ xu̱ta̱. Kui niu̱ xi kikꞌinyaha̱ xu̱ta̱ nkꞌie nga tsichu ni̱stjin xi yꞌénda Nti̱a̱ná.
\v 7 Kui kju̱a̱ha nga kinꞌe mahana nku xi bꞌéni̱jmí én nda tsuhu̱ Nti̱a̱ná, nku nda̱ postru̱. Kju̱axi̱ ni xi tíxian. Najmi tíbꞌana̱cha̱. Kinꞌe mana nda̱ maestru̱hu̱ xu̱ta̱ xi najmi ntje̱ judio̱ tje̱he̱n ra̱ tu̱ xi kuakuyáha̱ ra̱ ni xi tjíhin nga sꞌe̱jihi̱n, ni xi na̱xu̱ tjín.
\p
\v 8 Kui bꞌa̱ maha, mjena nga tu̱ má a̱ntehé ni kanchja̱ko̱ Nti̱a̱ná jáxꞌi̱u̱n, katjénkꞌahá tsꞌíhin ntsja ko̱ je kasꞌeya ani̱ma̱ha̱ nga bꞌa̱ i̱ncha tsꞌi̱ín. Najmi tu̱ kju̱a̱kjan tjíntujíhi̱n nga bꞌa̱ i̱ncha tsꞌi̱ín ko̱ tsa kju̱a̱stinta.
\p
\v 9 Ko̱ máha jminchjíu̱n, mjena nga najmi tu̱ ni xi nkjún tsꞌín kꞌu̱énda yjoho̱, tsa tu̱ xi bꞌa̱ tsꞌín nda sku̱e̱he̱ ra̱ xu̱ta̱ xingisoo̱. Katenkjún ní yjoho̱ ko̱ ni̱ma̱kju̱a̱ katꞌasje. Najmi tu̱ nihi xi nkjún tsꞌín katꞌénda ntsja̱ha̱, tsa tsꞌi̱íntsejnúhu yjoho̱ to̱onsine ko̱ tsa ndji̱o̱ tsjo kꞌun perla̱, ko̱ tsa ngju̱a̱ najyun xi ꞌyún chjí.
\v 10 Xá xi nda ní nꞌe, kui niu̱ xi tsjo tsꞌín katakúhu̱, xi nkú tsꞌín tje̱he̱n ra̱ jminchjín xi ja kitsjáha̱ yjoho̱ nga sku̱e̱nkjún Nti̱a̱ná.
\p
\v 11 Jyu katasínñju jminchjíu̱n ni xi tísakúyaha̱ ko̱ kantꞌéꞌéhe̱n ée̱n.
\v 12 Najmi tsjanté tsa nku ta̱chju̱ún ku̱a̱kúya a̱ya ni̱nku̱ ko̱ tsa kui nkꞌa kjꞌu̱a̱ha̱ jáxꞌi̱u̱n. Tu̱ sa ní jyu katꞌejña.
\v 13 A̱tꞌaha̱ najmi Eva̱ tjun kinꞌenda, tjun ní Adan kinꞌenda.
\v 14 Ko̱ najmi Adan xi kichꞌana̱cha̱ha̱. Ta̱chjúu̱n ní xi kichꞌana̱cha̱ha̱ ko̱ bꞌa̱ tsꞌín tsijnejihin ngatitsun.
\v 15 Tu̱nga nꞌe̱kꞌankihí jminchjíu̱n nga ku̱a̱se̱he̱ ntí xi sꞌe̱he̱, tsa ndjá ku̱i̱nchajin ni xi sꞌejinná ko̱ kju̱a̱tjoo̱ ko̱ ni xi je nginku̱n Nti̱a̱ná, ko̱ tsa nda sꞌe̱yaha̱.
\c 3
\s Bꞌi̱ tsꞌín tsakúya Pablo̱ má jáha xi ka̱ma tsꞌi̱ín xáha̱ ni̱nku̱
\p
\v 1 Én xi ma nꞌe sꞌejin xuꞌbi̱. Tsa tjín xi mjehe̱ ku̱a̱se̱he̱ xu̱ta̱ ni̱nku̱, nda tjín xá xi mjehe̱.
\v 2 Tu̱nga katumahá nda̱ xi ku̱a̱se̱he̱ ni̱nku̱ nku nda̱ xi najmi tjín ni xi chu̱bayanéhe̱ ra̱, xi nkuhú maha chju̱úhu̱n, xi kixi̱ fiko̱ yjoho̱, xi nda basehe̱ ni xi tsꞌín, xi benkjúhu̱n xu̱ta̱, xi nda tsꞌínkjáíhi̱n xu̱ta̱ niꞌyaha̱, xi maha̱ bakúyaha̱ xu̱ta̱,
\v 3 xi najmi ꞌyún ꞌbi binu̱, xi najmi ki̱tsa̱ ma kjaha̱n, xi nda ani̱ma̱ha̱, xi tsjoho̱ kju̱a̱jyu, ko̱ xi najmi to̱on mangimjehe̱.
\p
\v 4 Tjíhin nga nda tsꞌín ku̱a̱téxumaha̱ xu̱ta̱ xi tjín niꞌyaha̱ ko̱ tsꞌi̱ín nga ntíhi̱ ku̱i̱ntꞌéꞌéhe̱n ko̱ nga kixi̱ sku̱e̱nkjúhu̱n.
\v 5 A̱tꞌaha̱ nku nda̱ xi najmi maha̱ batéxumaha̱ xu̱ta̱ xi tjín niꞌyaha̱, ¿nkú tsꞌín ka̱maha̱ ra̱ kúnntaha ni̱nku̱hu̱ Nti̱a̱ná?
\p
\v 6 Ko̱ najmi tjíhin nga sꞌe̱tꞌa xá nku nda̱ xi a̱sꞌa̱i kisꞌejihín ra̱ Nti̱a̱ná, tu̱ xi najmi nkꞌa kꞌu̱a̱sjehe yjoho̱ ko̱ ku̱i̱jne̱jihin ngatitsun xi tsijnejin nda̱nindoo̱ ko̱ bꞌa̱ tsꞌín nꞌe̱nijéhe̱ ra̱.
\v 7 Nda̱ xi mjehe̱ xá xuꞌbi̱ ta̱ tjíhin nga ja yankjún a̱jihi̱n xu̱ta̱ xi najmi sꞌejihi̱n Nti̱a̱ná, tu̱ xi najmi chꞌa chꞌon tsꞌín ku̱i̱nchja̱yanéhe̱ ra̱ ko̱ tu̱ xi najmi ku̱i̱jne̱jihin kju̱a̱maña̱ha̱ nda̱nindoo̱.
\p
\v 8 Bꞌa̱ ta̱ tjín tsꞌe̱ já xi basinko̱ já xi basehe̱ ni̱nku̱. Tjíhin nga já xi benkjún yjoho̱ sꞌe̱tꞌa xá, xi najmi nchja̱ én tsankꞌá, xi najmi bꞌatihi̱ nga ꞌbi binu̱, xi najmi mjehe̱ to̱on xi chꞌon tsꞌín sakú.
\v 9 Tjíhin nga ndjá katinchajin ni xi sꞌejinná, ni xi kisꞌejña ꞌma ni̱stjin nkꞌie ko̱ tísꞌejña chji ndꞌa̱i̱, ko̱ je kasꞌentuyá kju̱a̱nkjintakꞌuhu̱n.
\v 10 Tjun kachase sisihi̱n xi nkú tsꞌín tjíma já xuꞌbi̱. Tsa najmi chumi nihi xi sa̱kújin, kasꞌetꞌa xá nga ku̱a̱si̱nko̱ já xi basehe̱ ni̱nku̱.
\p
\v 11 Ko̱ bꞌa̱ ta̱ tsꞌín jminchjíu̱n, tjíhin nga katenkjún yjoho̱, najmi tu̱ én tsankꞌá kꞌu̱a̱sjené xu̱ta̱, kixi̱ katjiko̱ yjoho̱, ko̱ katuma ꞌyún takꞌaán.
\p
\v 12 Nkuhú chju̱ún kasꞌejñaha̱ nda̱ xi kꞌu̱a̱i̱ xáha̱ nga ku̱a̱si̱nko̱ já xi basehe̱ ni̱nku̱. Tjíhin nga nda tsꞌín ku̱a̱téxumaha̱ ntíhi̱ ko̱ xu̱ta̱ xi tjín niꞌyaha̱.
\v 13 A̱tꞌaha̱ xi kixi̱ fiko̱ xá xuꞌbi̱, kui xi yankjún a̱jihi̱n xu̱ta̱ xingisoo̱ ko̱ najmi jo jan maha̱ nkꞌie nga bꞌéni̱jmí nga ja kisꞌejihi̱n Jesucristo̱.
\p
\v 14 Ndaha tsa mjena kfínse xatíhi, tu̱nga tíbꞌetꞌáhá ra ni xuꞌbi̱
\v 15 tsa tu̱ aha kꞌu̱a̱ndayana nga kfínsehe. Tíbꞌetꞌáha kui nii̱ tu̱ xi bꞌa̱ tsꞌín cha̱hani xi nkú tsꞌi̱ín xu̱ta̱ xi tsꞌe̱ Nti̱a̱ná, kui xi xu̱ta̱ ni̱nku̱hu̱ Nti̱a̱ná xi tíjña tíkꞌuu̱n. Tíi̱ncha kjanínkꞌa ko̱ tsjá ngaꞌyúhu̱n én xi na̱xu̱ tjín.
\p
\v 16 Tíjña chji chji nga ꞌyún tse ni xi yꞌaha̱ ra̱ ni xi sꞌejinná, kui nihi xi kisꞌejña ꞌma ni̱stjin nkꞌie ko̱ ja yꞌéjña chji Nti̱a̱ná ndꞌa̱i̱.
\q Tsakúchji yjoho̱ nga kikꞌa yjoninte,
\q yꞌéjña chji Espiri̱tu̱ nga kui xi na̱xu̱.
\q Ntítsjee̱ kikiehe̱,
\q kisꞌeni̱jmíhi̱ a̱jihi̱n xu̱ta̱.
\q Xu̱ta̱ a̱sunntei̱ kisꞌejihi̱n kui,
\q ko̱ ngji ngáha má tíjña kju̱a̱chánkaha̱.
\c 4
\s Bꞌi̱ tsꞌín kitsúyaha̱ Pablo̱ Timoteo̱ nga sꞌe̱ xi ngju̱a̱i̱ tꞌaxíhi̱n én nda tsuhu̱ Cristo̱
\p
\v 1 Tsuya chji chji Espiri̱tu̱hu̱ Nti̱a̱ná nga ni̱stjin xi fekuu̱ sꞌe̱ xi ngju̱a̱i̱ tꞌaxín ko̱ nga najmi ta̱ sꞌe̱jihi̱n ra̱ Nti̱a̱ná. Tsjénnkihi̱ jáninda xi kꞌu̱a̱na̱cha̱ha̱ xu̱ta̱ ko̱ ni xi ku̱a̱kúya jánindoo̱.
\v 2 Kui niu̱ xi ku̱i̱tsu̱ya já maña̱ tsankꞌá xi tu̱ tsjohó ra̱ bakúchji xi nkú tsꞌín benkjún Nti̱a̱ná, kui já xi ja tsatsun kju̱a̱nkjintakꞌuhu̱n.
\p
\v 3 Kui jóo̱ najmi tsꞌínjꞌo̱ nga bixan xu̱ta̱ ko̱ bꞌéchꞌo má nihi xi najmi ma chine, nichine xi Nti̱a̱ná yꞌéjña nga kji̱ne̱ xu̱ta̱ xi sꞌejihi̱n Nti̱a̱ná, xi ja kikie ni xi na̱xu̱ tjín ko̱ tsjáha̱ má bꞌa̱chjíhi̱ Nti̱a̱ná nkꞌie nga kjine ni xi tjín.
\v 4 Nda ní ngayjee̱ ni xi kitsꞌínnda Nti̱a̱ná. Najmi tjíhin nga nꞌe̱ tꞌaxíaán niu̱ tsa kꞌu̱a̱íhi̱ mábꞌa̱chjíhi̱ Nti̱a̱ná nga títsjáná.
\v 5 A̱tꞌaha̱ bichú ma je nginku̱n Nti̱a̱ná ni xi sakúná nkꞌie nga mankjinná éhe̱n Nti̱a̱ná ko̱ nkꞌie nga chubaka̱á Nti̱a̱ná.
\s Bꞌi̱ tsꞌín kitsúyaha̱ Pablo̱ Timoteo̱ xi nkú tsꞌín kꞌúéjñajihi̱n xu̱ta̱ ni̱nku̱
\p
\v 6 Nda tsꞌín nꞌe̱xátꞌaihi̱ Jesucristo̱ tsa bꞌi̱ tsꞌín ku̱a̱kúyaihi̱ já ntsꞌeé. Kasakú ngaꞌyúnko̱i̱hi én xi sꞌejinná, én nda xi tsinchiyáí ko̱ kichꞌai.
\v 7 Najmi tu̱ nꞌesihi̱n énchá nchi̱ni xi tsꞌe̱ a̱sunntei̱. Nꞌe̱nkahi̱ ani̱ma̱hi̱ ni xi tsꞌe̱ Nti̱a̱ná.
\v 8 Kju̱axi̱ kjáíhin nga nkꞌie nga nꞌenkaha̱á yjoná nku ni, basinko̱ho̱ yjonintená. Tu̱nga ꞌyúhún basinko̱ná nga nꞌe̱nkaha̱á ani̱ma̱ná nga cha̱nkjáán Nti̱a̱ná. A̱tꞌaha̱ nga tíyankjáán Nti̱a̱ná, kui xi basinko̱ná xi nkú tsꞌín tintsu̱ba̱á ndꞌa̱i̱ ko̱ ta̱ xi nkú tsꞌín ku̱i̱ntsu̱ba̱á a̱skahan.
\p
\v 9 Én xi ma nꞌe sꞌejin xuꞌbi̱ ko̱ ngayjee̱ xu̱ta̱ tjíhin nga tsꞌi̱ín sꞌejin.
\v 10 Kui kju̱a̱ha ꞌyún tínꞌexáhaná ko̱ tíꞌba̱i̱hi̱ ra̱á kju̱a̱ni̱ma̱ yjoná, a̱tꞌaha̱ tíchuyáá ni nda xi tsjáná Nti̱a̱ná xi tíjña tíkꞌun. Kui xi maha̱ tsꞌínkꞌanki ngayjee̱ xu̱ta̱, xi sꞌejihi̱n kui bꞌaha̱ ra̱ nga tsꞌínkꞌanki.
\p
\v 11 Bꞌa̱ tsꞌín tjenni̱yáíhi̱ xu̱ta̱ ko̱ ta̱kúyaihi̱.
\v 12 Najmi tu̱ chꞌa xi tu̱ tohón katumaha̱ ji a̱tꞌaha̱ nda̱ti. Nkꞌie nga sku̱e̱hi xu̱ta̱ xi sꞌejihi̱n Nti̱a̱ná xi nkú tsꞌín chubai, xi nkú tsꞌín tinchin, xi nkú tsꞌín nꞌetjóí xu̱ta̱, xi nkú tsꞌín sꞌejihin Nti̱a̱ná, ko̱ xi nkú tsꞌín je tinchin nginku̱n Nti̱a̱ná, ta̱ katumaha̱ kui nii̱.
\p
\v 13 Nꞌeyajihi̱n xu̱ta̱ ni̱nku̱ éhe̱n Nti̱a̱ná, ta̱kúyai ko̱ tjen ngaꞌyúíhi̱n santaha nga ku̱i̱chá yo̱.
\v 14 Najmi tu̱ nꞌe nga mahi̱ yjohi̱ kju̱a̱nda xi kikꞌa̱i̱hi nkꞌie nga kitsjáhi éhe̱n Nti̱a̱ná já xi Nti̱a̱ná kitsꞌínkinchja̱ha̱. Bꞌa̱ kama nkꞌie nga kingjénnehi ntsja jácháha̱ xu̱ta̱ ni̱nku̱.
\v 15 Nda nꞌe̱sihi̱n ni xuꞌbi̱ ko̱ ti̱si̱njñajin, tu̱ xi sku̱e̱he ngayjee̱ xu̱ta̱ nga tíxubáya ni xi kikꞌa̱i̱hi.
\v 16 Chíhi̱n yjohi̱ ko̱ nda cha̱se̱hi̱ ni xi tíbakuyáí. Nꞌe̱tjusun tehe̱ntei niu̱. Tsa bꞌa̱ nꞌe̱i̱, nꞌe̱kꞌanki yjohi̱ ko̱ ta̱ nꞌe̱kꞌanki xi tíi̱ncha basínñjihi.
\c 5
\s Bꞌi̱ tsꞌín kitsúyaha̱ Pablo̱ Timoteo̱ xi nkú tsꞌín tsꞌi̱ínxáko̱ xu̱ta̱ ni̱nku̱
\p
\v 1 Najmi tu̱ ndjá chubako̱i̱ nku nda̱ chá. Tjenni̱yáíhi̱ xi nkúhu tsa na̱ꞌmihi̱ maha. Bꞌa̱ ta̱ nꞌe̱ko̱i já xu̱nkúu̱ xi nkúhu tsa já ntsꞌei maha.
\v 2 Ko̱ tjenni̱yáíhi̱ jminchjín chóo̱ xi nkúhu tsa náhi̱ maha, ko̱ i̱stinchjín xu̱nkúu̱ xi nkúhu tsa nichjai maha. Je kasꞌeya ani̱ma̱hi̱ nkꞌie nga tjenni̱yáíhi̱ jminchjíu̱n.
\p
\v 3 Ti̱si̱nko̱i̱ jminchín xi ja kꞌien xꞌi̱hi̱n, kui xi najmi chꞌa xi tjíhi̱n.
\v 4 Tu̱nga tsa nku ta̱chju̱ún xi ja kꞌien xꞌi̱hi̱n xi na̱a ko̱ tsa na̱chá tíꞌmi, xi títsu na̱a ko̱ tsa na̱chá, kui xi tjun katuma chu̱ba̱yaha̱ ni xi tjíhin nga tsꞌi̱ín a̱tꞌaha̱ ja sꞌejihi̱n Nti̱a̱ná. Katsꞌínkꞌóya ngáha̱ ra̱ kju̱a̱nda xi kitsjáha̱ xi cháha̱ nkꞌie nga kjintí. A̱tꞌaha̱ kui nii̱ xi sasíhi̱n Nti̱a̱ná.
\p
\v 5 Nku ta̱chju̱ún xi ja kꞌien xꞌi̱hi̱n ko̱ xi najmi chꞌa xi tjíhi̱n, kui xi kuyá nga Nti̱a̱ná ku̱a̱si̱nko̱ho̱. Ni̱stjin ni̱stje̱n nchja̱ko̱ Nti̱a̱ná nga bankihi̱ ni xi machjéhe̱n.
\v 6 Tu̱nga xi ja kitsꞌínkjasꞌehe̱n yjoho̱ kju̱a̱tsjo xi tjín, kui xi ja kꞌien ndaha tsa tíjña tíkꞌun sa.
\p
\v 7 Nꞌe̱kꞌa ni̱yáko̱i̱ xu̱ta̱ ni̱nku̱ ni xi kuaxihin, tu̱ xi najmi chu̱bayanéhe nga̱tꞌaha̱ ni xi tíi̱ncha tsꞌín.
\v 8 A̱tꞌaha̱ xi najmi nkjún maha̱ xu̱ta̱ xinkjín, bꞌaha̱ ra̱ xi tjíntu niꞌyaha̱, kui xi títsꞌín tꞌaxín xi sꞌejinná ko̱ ꞌyún chꞌonkꞌun sa nga xu̱ta̱ xi najmi sꞌejihi̱n Nti̱a̱ná.
\p
\v 9 Tu̱ jꞌáíhi̱n ní jminchjín xi kꞌien xꞌi̱hi̱n, xi ja tjíhi̱n cháte ko̱ te nú, kui xi kasꞌetꞌa xu̱ju̱n, xi nkuhú xꞌi̱n kisꞌejñaha̱,
\v 10 xi behe̱ xu̱ta̱ nga nda kitsꞌín, xi ꞌmihi̱ nga nda tsꞌín kitsꞌínchá ntíhi̱, nga nda tsꞌín kitsjántehe̱ xu̱ta̱ niꞌyaha̱, nga nda tsꞌín kitsꞌínkjáíhi̱n xu̱ta̱ xi tsꞌe̱ Nti̱a̱ná, nga nda tsꞌín tsasinko̱ xu̱ta̱ xi un kikiehe̱ ko̱ nga ngayjehe ani̱ma̱ha̱ kitsꞌín ngayje tíkjá ni xi nda.
\p
\v 11 Jminchjín xi ja kꞌien xꞌi̱hi̱n tu̱nga kjintíhí sa, najmi tu̱ bꞌetꞌa xu̱ju̱i̱n. A̱tꞌaha̱ nkꞌie nga ku̱i̱nchja̱ ani̱ma̱ha̱, ngju̱a̱i̱ tꞌaxíhi̱n Cristo̱ ko̱ ka̱ma mjehe̱ nga ku̱i̱xan ngáha.
\v 12 Kui niu̱ nꞌe̱nijéhe̱ ra̱, a̱tꞌaha̱ najmi ngjiko̱ndju ni xi tjun kitsꞌínkjasꞌehe̱n yjoho̱.
\v 13 Ko̱ ni xi i̱ncha tsꞌín ya, tsꞌe ma ko̱ xki̱ niꞌya i̱ncha bꞌema. Ko̱ najmi tu̱ suba tsꞌe ma, én ní ya i̱ncha bꞌemako̱ ko̱ tsungijin yjoho̱ tu̱ mí nihí ni, ko̱ nchja̱ ni xi najmi tjíhin nga ku̱i̱nchja̱.
\v 14 Kui bꞌa̱ maha, mjehena nga ku̱i̱xahan jminchjín xi ja kꞌien xi̱hi̱n xi ndyja saha̱, ko̱ nga sꞌe̱he̱ ntí ko̱ nga ku̱a̱se̱he̱ niꞌyaha̱, tu̱ xi bꞌa̱ tsꞌín najmi tsjántehe tsa ku̱i̱nchja̱yanéhe̱ ra̱ xi fi kontra̱ná.
\v 15 A̱tꞌaha̱ tjín xi ja ngji tꞌaxín ko̱ yjankihi̱ Satana ndꞌa̱i̱.
\p
\v 16 Tsa niꞌyaha̱ xu̱ta̱ xi sꞌejihi̱n Nti̱a̱ná tjíntutꞌá jminchjín xi ja kꞌien xꞌi̱hi̱n, katsjáha̱ ni xi machjéhe̱n, tu̱ xi najmi chꞌá ka̱maha̱ ra̱ xu̱ta̱ ni̱nku̱. Bꞌa̱ tsꞌín xu̱ta̱ ni̱nku̱ ka̱ma ku̱a̱si̱nko̱ho kjꞌa̱í jminchjín xi ja kꞌien xꞌi̱hi̱n xi najmi chꞌa xi tjíhi̱n.
\p
\v 17 Ko̱ máha jácháha̱ xu̱ta̱ ni̱nku̱ xi yja títjun nga nda tsꞌín tífindjuko̱ xáha̱, kui xi ꞌyún kayankjún, bꞌaha̱ ra̱ xi tjíhi̱n xá tsꞌe̱ sꞌéni̱jmí ko̱ xi bakúya éhe̱n Nti̱a̱ná.
\v 18 A̱tꞌaha̱ bꞌa̱ títsu éhe̱n Nti̱a̱ná: “Najmi tu̱ tsa bꞌeꞌai tsꞌa chu̱ xi tíbasine tuni̱ñu̱ nga tíbitjíá.” Ko̱ bꞌa̱ ta̱ tsꞌín tjítꞌa ya: “Nda̱ xi títsꞌínxá tjíhi̱n kixi̱ nga ka̱machjíhi̱.”
\v 19 Najmi tu̱ nꞌesihi̱n xi ku̱a̱téjéne nku nda̱cháha̱ xu̱ta̱ ni̱nku̱ tsa najmi tjíhi̱n tsa jo ko̱ tsa jan já testiyu̱.
\v 20 Tu̱nga máha xi tu̱ nku tíi̱ncha tsꞌíhín sa ngatitsun, kui xi nginku̱n ngayjee̱ xu̱ta̱ ni̱nku̱ nꞌe̱kꞌa ni̱yáí, tu̱ xi kasꞌejña nkjúhu̱n ra̱ xu̱ta̱ ni̱nku̱.
\p
\v 21 Nginku̱n Nti̱a̱ná ko̱ Jesucristo̱ ko̱ ntítsje xi tsꞌe̱, tíbankihi nga nꞌe̱tjusuin ni xi tíxihin. Najmi tu̱ ngabi nꞌei nga cha̱se̱i̱hi̱ xu̱ta̱. Nkuhú nꞌe̱i̱.
\v 22 Najmi tu̱ chꞌa chu̱ba̱ mjenéí ntsa̱i̱ nga kꞌu̱a̱i̱ xáíhi̱. A̱tꞌaha̱ tsa chu̱ba̱ kꞌu̱a̱i̱ xáhá ri̱, nꞌengujin yjohi̱ ngatitsuhu̱n. Je katumai.
\p
\v 23 Najmi ta̱ tu̱ nku ntánijua sꞌihini. Tu̱ sa ní sꞌi̱ i̱chí ko̱ binu̱ tu̱ xi ka̱mandaha ka̱ntsꞌai ko̱ ku̱i̱tjuxín chꞌin xi nkjin ni̱yá tsjáhi kju̱a̱sti.
\p
\v 24 Tjín ngatitsun xi yaha̱ kintehe̱ ni nga nꞌe̱ko̱kju̱a̱ xi bꞌa̱ kitsꞌíu̱n, ko̱ tjín ngá xi yaha̱ a̱skahan.
\v 25 Bꞌa̱ ta̱ tsꞌín ya chji chji ni nda xi tsꞌín xu̱ta̱, ko̱ ni xi najmi tjíntuchjí ndꞌa̱i̱ najmi ka̱ma sꞌe̱ntuꞌmá tehe̱nte.
\c 6
\p
\v 1 Máha xu̱ta̱ musu̱ xi kichꞌatse, bꞌi̱ tsꞌín katsꞌínnkjinkꞌun nga̱tꞌa tsꞌe̱ jántji̱a̱ha̱. Katenkjún kju̱axi̱ jóo̱, tu̱ xi bꞌa̱ tsꞌín cha̱nkjúhun Nti̱a̱ná ko̱ ni xi tíbakuyáá.
\v 2 Ko̱ xi tjíhi̱n já nti̱a̱ xi sꞌejihi̱n Nti̱a̱ná, kui xi ta̱ katenkjún, ndaha tsa já ntsꞌe̱ ja tsichu ma jóo̱. Tu̱ sa ní nda tsꞌín katsꞌínxátꞌa saha̱, a̱tꞌaha̱ tjoho̱ xi títsꞌínkjáíhi̱n xáha̱ ko̱ a̱tꞌaha̱ ta̱ sꞌejihi̱n Nti̱a̱ná.
\p Kui nii̱ xi ta̱kúyaihi̱ ko̱ ti̱xínyaihi̱ xu̱ta̱ ni̱nku̱.
\s Bꞌi̱ tsꞌín tsakúya Pablo̱ nga̱tꞌa tsꞌe̱ to̱oo̱n
\p
\v 3 Tsa tjín xi kjꞌa̱í ni tíbakúya, nga ja ngji tꞌaxíhi̱n ni nda xi tsakúya Nda̱ Nti̱a̱ná Jesucristo̱ ko̱ kju̱a̱téxuma xi bakúyaná nkú tsꞌín cha̱nkjáán Nti̱a̱ná,
\v 4 xi bꞌa̱ tsꞌíu̱n, kui xi chu̱ba̱ nkꞌahá tíbꞌasje yjoho̱. Najmi chumi nihi xi be. Najmi nda títsꞌínnkjinkꞌun ko̱ chu̱ba̱ mjehé ra̱ kꞌu̱ékjoko̱ xu̱ta̱ ko̱ kꞌu̱ésiyáha tu̱ mí éhen ni. Kui xi bꞌéntje̱ kju̱a̱xintakꞌuu̱n ko̱ kju̱a̱kjoo̱n, nga chꞌon tsuhu̱ xinkjín xu̱ta̱ ko̱ nga najmi sꞌejihi̱n xinkjín,
\v 5 nga kjánko̱ tehe̱nte xinkjín xu̱ta̱ xi ngakjá tsꞌínnkjinkꞌun ko̱ xi najmi tjíhi̱n ni xi na̱xu̱ tjín. Kui jóo̱ xi ni xi tsꞌe̱ Nti̱a̱ná ma nchi̱nántjaihi.
\p
\v 6 Nga ní yankjáán Nti̱a̱ná, kui xi kju̱a̱nchi̱ná chánkaná, kui nga najmi ta̱ kjꞌa̱í nihi fasihi̱n ra̱á.
\v 7 Bꞌa̱ tjín a̱tꞌaha̱ najmi chumi nihi xi jái̱ka̱á a̱sunntei̱ ko̱ najmi chumi nihi xi kuankínko̱ ngáhaná.
\v 8 Kui bꞌa̱ maha, tsa tísakúná nichine ko̱ najyun xi tíndyjaá, tsjo katꞌená.
\p
\v 9 Xi mjehe̱ ka̱ma nchi̱ná, kui xi najmi maha̱ bꞌéchꞌoho̱ yjoho̱ ni xi nchja̱ha̱ ani̱ma̱ha̱, ko̱ ngayjee̱ ni xi ma mjehe̱ bꞌétꞌaꞌyúhu̱n niu̱. Nkjin tíkjá ni xi ma mjehe̱, tu̱nga tu̱ a nihí niu̱ ko̱ tsꞌínꞌuhu̱n. Tsꞌínkatsúhu̱n ko̱ tsꞌínndyjaha̱ niu̱.
\v 10 A̱tꞌaha̱ nkꞌie nga ꞌyún mjehe̱ to̱on xu̱ta̱, yo̱ nibáha̱ ra̱ ngayje tíkjá ni chꞌonkꞌun. Tjín xi bꞌa̱ i̱ncha kitsꞌín, ꞌyún i̱ncha kama mje saha̱ to̱on, kui nga ngji tꞌaxíhi̱n ra̱ ko̱ najmi ta̱ kisꞌejihi̱n ra̱ Nti̱a̱ná. Bꞌa̱ tsꞌín ta̱ kui ta̱ maha kitsꞌínꞌuhu̱n ra̱ yjoho̱.
\s Bꞌi̱ tsꞌín kitsjáni̱yáha̱ Pablo̱ Timoteo̱
\p
\v 11 Tu̱nga máha ji xi Nti̱a̱ná tsꞌe̱hi, ti̱yú tꞌaxíhi̱n ngayjee̱ ni xuꞌbi̱. Ti̱nchinjín ni xi na̱xu̱ nginku̱n Nti̱a̱ná, cha̱nkjúín Nti̱a̱ná, ko̱ tu̱ nku nꞌe̱ sꞌejinní Nti̱a̱ná. Kasꞌehi kju̱a̱tjo ko̱ kju̱a̱tsenta ko̱ kju̱a̱ni̱ma̱takꞌun.
\v 12 Nꞌe̱ sahani ngaꞌyún nga chꞌa̱i xi sꞌejinná. Chꞌa̱ ntsjan ntsjain xi tsꞌínkꞌíéjña tíkꞌun sínná, a̱tꞌaha̱ jꞌájihin nga ku̱i̱nchun tíkꞌuin. Kui kju̱a̱ha nga tsixínyahani nga sꞌejihin Jesucristo̱ nginku̱n nkjin xu̱ta̱.
\p
\v 13 Nti̱a̱ná xi tsꞌínkꞌíéntu tíkꞌun ngayjee̱ xi tjín ko̱ Jesucristo̱ xi kitsúya yáha kui nkꞌie nga kinꞌeko̱kju̱a̱ nginku̱n Ponci̱o̱ Pilato̱, tíi̱ncha be nga tíbꞌexáha.
\v 14 Nꞌe̱tjusun sisin ni xi tíxihin ko̱ najmi tu̱ kasꞌe má ndyja̱jihin. Bꞌa̱ nꞌe̱i santaha nkúhu nga kjꞌu̱a̱íkúchji yjoho̱ Nda̱ Nti̱a̱ná Jesucristo̱.
\v 15 Kui xi kjꞌu̱a̱í nkꞌie nga ku̱i̱chú chu̱ba̱, chu̱ba̱ xi Nti̱a̱ná yꞌéjña, a̱tꞌaha̱ Nti̱a̱ná xi nꞌetsjoho̱ ko̱ kui xi batéxuma suba, kui xi Nda̱ rei̱hi̱ já rei̱ ko̱ Nti̱a̱ha̱ já nti̱a̱.
\v 16 Nku tutu kui xi najmi maha̱ ndyja, xi tíjñajin ndꞌí nga najmi chꞌa ma bichúkꞌun tiñaha̱, xi najmi kje̱e chꞌa behe̱ ko̱ najmi chꞌa ma baseꞌaha̱. ¡Kui xi tu̱ nkjéhé ni kayankjún ko̱ kasakúchji ngaꞌyúhu̱n! Bꞌa̱ katuma.
\p
\v 17 Já nchi̱ná xi tjín a̱sunntei̱ nꞌe̱kꞌa ni̱yáí nga najmi tu̱ nkꞌa kꞌu̱a̱sje yjoho̱ ko̱ nga najmi tu̱ kju̱a̱nchi̱náha̱ ka̱ma ꞌyún kꞌun, a̱tꞌaha̱ maha̱ fe kju̱a̱nchi̱nóo̱. Nti̱a̱ níná katuma ꞌyún kꞌun, kui xi tsjáná ngayje tíkjá ni xi machénná tu̱ xi nda tsꞌín ku̱i̱ntsu̱ba̱haná.
\v 18 Bꞌa̱ tꞌihi̱n já nchi̱nóo̱ nga katsꞌín ni xi nda ko̱ nga kui niu̱ xi katuma kju̱a̱nchi̱ná ndaha̱. Katsjáha̱ xu̱ta̱ xingisoo̱ ni xi machjéhe̱n ko̱ najmi tu̱ katsꞌínxkíhi̱n xu̱ta̱ ni xi tjíhi̱n.
\v 19 Tsa tsꞌi̱ín kui nii̱, sꞌe̱he̱ kju̱a̱nchi̱ná nda xi ku̱a̱si̱nko̱ho̱ ko̱ sa̱kúhu̱ nga kꞌúéntu tíkꞌun xi nkú tsꞌín tje̱he̱n ra̱.
\p
\v 20 Ji Timoteo̱, nꞌe̱tjusun sisin chꞌá xi kichꞌanji. Najmi tu̱ nungijin yjohi̱ én tiya xi tjín a̱sunntei̱ ko̱ ta̱ ndaha ni tsankꞌá xi bꞌésiyáha xu̱ta̱ xi bꞌa̱ tsu nga tjíhi̱n kju̱a̱nkjintakꞌun.
\v 21 A̱tꞌaha̱ tjín xi kitsꞌín sꞌejin kju̱a̱nkjintakꞌun tsankꞌá xuꞌbo̱ ko̱ bꞌa̱ tsꞌín i̱ncha ngji tꞌaxíhi̱n ra̱ xi sꞌejinná.
\p Kju̱a̱ndaha̱ Nti̱a̱ná kasꞌenu̱u.