\id 2TI Mazatec of Jalapa de Díaz
\h Xu̱ju̱n xi ma joho xi kinꞌekjíhi̱ Timoteo̱
\toc1 Xu̱ju̱n xi ma joho xi kitsꞌínkjihi̱ nda̱ postru̱ Pablo̱ Timoteo̱
\mt Xu̱ju̱n xi ma joho xi kitsꞌínkjihi̱ nda̱ postru̱ Pablo̱ Timoteo̱
\c 1
\s Bꞌi̱ tsꞌín kikjaniñaha̱ Pablo̱ Timoteo̱
\p
\v 1 An Pablo̱, an xi kama nku nda̱ postru̱hu̱\f + \fr 1:1 \ft “Xi kisꞌexá” tsuhu̱ ra̱ “nda̱ postru̱” ko̱ a ra̱ “já postru̱”.\f* Jesucristo̱ a̱tꞌaha̱ Nti̱a̱ná bꞌa̱ tsꞌín kama mjehe̱. Tíbitjusun ni xi kitsúya títjun nga tsꞌi̱ínkꞌíéntu tíkꞌun xu̱ta̱ xi sꞌejihi̱n Cristo̱ Jesu.
\v 2 Tífaniñaha Timoteo̱, ji xi nkúhu tsa ntína̱ ko̱ tjo ṉkjúnna ji.
\p Katsjáhi kju̱a̱nda ko̱ kju̱a̱jyu Nti̱a̱ Na̱ꞌminá ko̱ Nda̱ Nti̱a̱ná Cristo̱ Jesu ko̱ nda katasehi.
\s Bꞌi̱ tsꞌín kitsjá ngaꞌyúhu̱n Pablo Timoteo̱
\p
\v 3 Ni̱stjin ni̱stje̱n nchjantjáíhi nginku̱n Nti̱a̱ná ko̱ tsjaha̱ mábꞌachjíhi̱ nga̱tꞌa tsꞌe̱ ni xi tínꞌei. Kui xi títsꞌinxátꞌaha̱ xi nkú nga ta̱ kitsꞌín ntje̱ chána̱ ko̱ je tjíya kju̱a̱nkjintakꞌunna̱ nga bꞌa̱ títsꞌian.
\v 4 Fꞌáítsjenna nga kichꞌí ko̱ mjena skue ngáha ra tu̱ xi bꞌa̱ tsꞌín tséjihinna kju̱a̱tsjo.
\v 5 Tsꞌinkjꞌáítsjen xi nkú tsꞌín ngayjehe ani̱ma̱hi̱ sꞌejihin Nti̱aná. Tjun Loi̱da̱, na̱cháhi̱, bꞌa̱ ta̱ tsꞌín kisꞌejihi̱n, ko̱ Eunice̱, náhi̱. Ndꞌa̱i̱ be sisihi̱n kꞌan nga ko̱ ji bꞌa̱ ta̱ tsꞌín sꞌejihin.
\p
\v 6 Kui bꞌa̱ maha, títsꞌinkjꞌáítsjehen ra nga nꞌe̱ꞌyúnyai kju̱a̱nda xi kitsjáhi Nti̱a̱ná nkꞌie nga kingjennéhe ntsa̱.
\v 7 A̱tꞌaha̱ najmi kju̱a̱binkjun tsjáná Espiri̱tu̱ xi kitsꞌín nibáná Nti̱a̱ná. Ngaꞌyún ní tsjáná ko̱ kju̱a̱tjo, ko̱ ta̱ tsjáná nga na̱xu̱ sꞌe̱yaná.
\p
\v 8 Kui nga najmi tu̱ nꞌe subaha̱ ri̱ yjohi̱ nga kꞌúéni̱jmí Nda̱ Nti̱a̱ná ko̱ ta̱ ndaha nga kjíi̱yaꞌyán nga̱tꞌaha̱ nga tíbꞌeni̱jmíá. Ngaꞌyúhu̱n Nti̱a̱ná katasinko̱hi nga ku̱i̱tjájin kju̱a̱ni̱ma̱ nga̱tꞌaha̱ én nda tsuhu̱ Nti̱a̱ná xi nkúhu an.
\v 9 Nti̱a̱ná kitsꞌínkꞌankiná ko̱ jꞌájinná nga ka̱maá xu̱ta̱ xi tsꞌe̱. Tu̱nga najmi nga̱tꞌaha̱ ní ni xi kinꞌeé jꞌájihinná. Bꞌa̱ ní kitsꞌín a̱tꞌaha̱ bꞌa̱ tsꞌín yꞌénda títjun ko̱ bꞌa̱ tsꞌín nibá kju̱a̱ndaha̱. Kintehe̱ ni nga kamanda a̱sunntei̱, a̱jihi̱n Cristo̱ Jesu kitsꞌín nga ñá tsuhuná kju̱a̱nda xuꞌbi̱.
\v 10 Ndꞌa̱i̱ ni̱ ma ja yꞌéjña chji kju̱a̱ndoo̱ nkꞌie nga ja jꞌai Cristo̱ Jesu xi kitsꞌínkꞌankiná nga jꞌai kjexín ngaꞌyúhu̱n ngabayoo̱ ko̱ tsꞌasje chji nga ka̱ma ku̱i̱ntsu̱ba̱ tíkꞌun síán tu̱ ngatꞌaha̱ én nda tsuhu̱ Nti̱a̱ná.
\p
\v 11 Nti̱a̱ná kitsꞌín mana nku xi bꞌéni̱jmí éhe̱n, nku nda̱ postru̱ ko̱ nku nda̱ maestru̱.
\v 12 Kui kju̱a̱ha nga tífꞌa̱jihinna kju̱a̱ni̱ma̱. Tu̱nga najmi subahá mana, a̱tꞌaha̱ be yá xi kitsꞌin sꞌejian ko̱ behe̱ kꞌan nga tjíhi̱n ngaꞌyún nga kjꞌu̱átjo ni xi kitsꞌínkjasꞌenna. Bꞌa̱ tsꞌi̱ín santaha nkúhu nga ku̱i̱chú ni̱stjin nga cha̱se̱he̱ mí nihi xi kitsꞌín nga nkúnkú xu̱ta̱.
\p
\v 13 Ndjá nꞌe̱ sꞌejin Cristo̱ Jesu ko̱ ti̱nchinjín kju̱a̱tjoho̱. Xi nkú kitsꞌinko̱ho nga tsakuyáha, ni nda xi tsakuyáha, bꞌa̱ nꞌe̱i.
\v 14 Ngaꞌyúhu̱n Espiri̱tu̱ Santo̱ xi tíjñajinná chúnko̱ho̱ ri̱ én nda tsu xi kinꞌekjasꞌehin.
\p
\v 15 Ja yai nga ja i̱ncha kitsꞌín nga mana ngayjee̱ xu̱ta̱ xi tjín nga ngúsuhu̱n a̱nte Asi̱a̱. Santaha ko̱ nda̱ Figelo̱ ko̱ nda̱ Hermoge̱ne̱ bꞌa̱ kitsꞌínko̱na.
\p
\v 16 Nti̱a̱ná katase ni̱ma̱ha̱ xu̱ta̱ xinkjín nda̱ Onesifo̱ro̱. Nkjin ni̱yá kitsjá ngaꞌyúnna ndo̱ ko̱ najmi kama subaha̱ nga̱tꞌaha̱ nga kjíi̱yaꞌyán.
\v 17 Ni xi kitsꞌín ní, nkꞌie nga jꞌai nanki Roma̱ tsangisjaina santaha nkúhu nga kisakúhu̱ an.
\v 18 Nda̱ Nti̱a̱ná katase ni̱ma̱ha̱ ni̱stjin nga cha̱se̱he̱ mí nihi xi kitsꞌín nga nkúnkú xu̱ta̱. Ko̱ ji ja ya sisin xi nkú tsꞌín tsasinko̱ná ndo̱ nanki Efe̱so̱.
\c 2
\s Bꞌi̱ tsꞌín yꞌéjña chu̱ba̱ya Pablo̱ nkꞌie nga tsakúyaha̱ Timoteo̱
\p
\v 1 Kui bꞌa̱ maha, ji ntína̱, nꞌe̱jahani ngaꞌyún xi sakújinná kju̱a̱ndaha̱ Cristo̱ Jesu.
\v 2 Ko̱ ni xi kinuꞌyáí nga kixian nginku̱n nkjin xu̱ta̱, kui xi nꞌe̱kjasꞌeihi̱n já xi ma ꞌyún takꞌaán, já xi ka̱ma ku̱a̱kúya ngáha̱ ra̱ kjꞌa̱í.
\p
\v 3 Nꞌe̱ chúkju̱a̱i̱ kju̱a̱ni̱ma̱ xi ku̱i̱tjájin, a̱tꞌaha̱ ji xi nkú joya nda̱ juhu̱n Cristo̱ Jesu ji, nda̱ jun xi nda tsꞌín xáha̱.
\v 4 Yaá nga ndaha nku nda̱ jun xi tíkján najmi tsungijin yjoho̱ ni xi tjín a̱sunntei̱. Bꞌa̱ tsꞌín a̱tꞌaha̱ mjehe̱ nga nda sku̱e̱he̱ xi kitsjá xáha̱.
\v 5 Ko̱ ta̱ máha nku nda̱tsuton, najmi ka̱ma tsꞌi̱ín ngana̱ tsa najmi tsúton xi nkú tsꞌín tíjña nga nuton.
\v 6 Ko̱ ta̱ máha nku xi títsꞌín kju̱a̱ni̱ma̱ nga títsꞌínxá, bichú ni̱stjin nga sakúhu̱ ni tjun xi bꞌéntje̱.
\v 7 Nꞌe̱chu̱ba̱yahi̱ yjohi̱ ni xi tíxihin ko̱ bꞌa̱ ta̱ tsꞌín Nda̱ Nti̱a̱ná tsꞌi̱ín nga ka̱mankjihin ngayjee̱ nii̱.
\p
\v 8 Nꞌe̱kjꞌáítsjein Jesucristo̱ xi jꞌáíya ngáha̱ ra̱ ngabayoo̱, xi ntje̱he̱ David yꞌaha̱ ra̱. Bꞌi̱ tsu én xi tíbꞌeni̱jmíá.
\v 9 Ko̱ kui nga̱tꞌaha̱ ée̱n un tíbehena ko̱ santaha kjíi̱yaꞌyán xi nkúhu tsa an xi nda̱ chꞌon kꞌan. Tu̱nga máha éhe̱n Nti̱a̱ná, najmi kjiyaꞌyún.
\v 10 Kui nga ngandaha̱ xu̱ta̱ xi Nti̱a̱ná jꞌájin títsꞌin chúkju̱a̱hana ngayjee̱ ni xi tímatꞌan, tu̱ xi ko̱ kui i̱ncha sa̱kúhu̱ ra̱ nga Cristo̱ Jesu tsꞌi̱ínkꞌanki ko̱ tsjáha̱ kju̱a̱chánka xi najmi maha̱ feya.
\p
\v 11 Ma nꞌe sꞌejin én xi tsu:
\q Tsa tsayaka̱á Cristo̱,
\q ta̱ ku̱i̱ntsu̱ba̱ tíkꞌunko̱ ngáhaná.
\q
\v 12 Tsa tínꞌe chúkju̱á nga un tíbená,
\q ta̱ ku̱a̱texumaka̱á.
\q Tsa najmi nꞌe̱kié yjoná nga yaá,
\q ko̱ kui najmi tsꞌi̱ínkie yjoho̱ nga bená.
\q
\v 13 Tsa najmi chꞌa sꞌejihi̱n ñá,
\q tu̱nga kui ma ma ꞌyún takꞌaán,
\q a̱tꞌaha̱ kui najmi maha̱ tsꞌínjo éhe̱n.
\s Bꞌi̱ tsꞌín tsakúyaha̱ Pablo̱ Timoteo̱ xi nkú tsꞌín tsꞌi̱ínxátꞌaha̱ Cristo̱
\p
\v 14 Nꞌe̱kjꞌáítsjeihi̱n xu̱ta̱ ni̱nku̱, nginku̱n Nti̱a̱ná tu̱ xí bꞌa̱há tꞌihi̱n, nga najmi tu̱ mí éhen ni i̱ncha kꞌu̱ésiyáha, a̱tꞌaha̱ kui ni xuꞌbi̱ xi najmi chumi ni chjíhi̱ ra̱. Tu̱ sa ní tsꞌínndyjajihi̱n xu̱ta̱ xi mjéñjuhu̱ kui niu̱.
\v 15 Ngayjehe kꞌuin nꞌe̱i ni xi nda nginku̱n Nti̱a̱ná tu̱ xi nda sku̱e̱he ni xi tínꞌei. Nꞌe̱i xi nkúhu nku nda̱ musu̱ xi najmi ma subaha̱ ni xi títsꞌín ko̱ xi nda tsꞌín bakúya én xi na̱xu̱ tjín.
\p
\v 16 Najmi tu̱ nungijin yjohi̱ én tiya xi tjín a̱sunntei̱, a̱tꞌaha̱ xi bꞌa̱ tsꞌín nchja̱, kui xi tu̱ nku fi tꞌaxíhín ra̱ Nti̱a̱ná.
\v 17 Ko̱ kui éhe̱n xi nkú joyaha tsé xi fina̱nka̱. Najmi maha̱ manda. Bꞌa̱ tsꞌín tsatsun nda̱ Himeneo̱ ko̱ nda̱ Fileto̱.
\v 18 Kui xi ja ngji tꞌaxíhi̱n ni xi na̱xu̱ tjín. Bꞌa̱ tíi̱ncha tsu nga ja jꞌa ni̱stjin nga kjꞌu̱a̱íya ngáha̱ ra̱ xu̱ta̱ ngabayoo̱. Bꞌa̱ tsꞌín títsꞌínndyjajihi̱n ra̱ kꞌu̱a̱ xu̱ta̱ xi sꞌejihi̱n Nti̱a̱ná.
\v 19 Tu̱nga tu̱ nkú ndjáhá síjña éhe̱n Nti̱a̱ná. Síjña xi nkúhu nku xjó xi: “Nda̱ Nti̱a̱ná be xu̱ta̱ xi tsꞌe̱”, tsu ntu xi tjítꞌaha̱. Ko̱ bꞌa̱ ta̱ tsꞌín tjítꞌa yaha̱: “Ngayjee̱ xi tsu nga sꞌejihi̱n Cristo̱ katsꞌín tꞌaxíhi̱n yjoho̱ ni xi najmi na̱xu̱ nginku̱n Nti̱a̱ná.”
\p
\v 20 Xi nkúhu nku niꞌya chánka, najmi tu̱ suba ni to̱onsine ko̱ to̱ontaba tjíhi̱n. Ta̱ tjín níhi̱ ni xi kamandako̱ho yá ko̱ ninte. Kꞌu̱a̱ xi nꞌechjén nkꞌie nga tjín sꞌí ko̱ kꞌu̱a̱ xi nꞌechjén tehe̱nte.
\v 21 Ko̱ bꞌa̱ ta̱ tsꞌín tíjña a̱jinná. Tsa tjín xi ja kitsꞌín je yjoho̱, kui xi nkú joyaha ni xi ma nꞌechjén nkꞌie nga tjín sꞌí. Ja je ko̱ Nti̱a̱ná ka̱ma tsꞌi̱ínchjéhe̱n, a̱tꞌaha̱ ja tjíndaha̱ yjoho̱ nga ka̱ma tsꞌi̱ín ngayjee̱ ni xi nda.
\p
\v 22 Chíhi̱n yjohi̱ ni xi nchja̱ha̱ ani̱ma̱ha̱ já i̱stiu̱. Nꞌe̱i ni xi na̱xu̱ nginku̱n Nti̱a̱ná, tu̱ nku nꞌe̱ sꞌejinní Nti̱a̱ná, ko̱ kasꞌehi kju̱a̱tjo ko̱ kju̱a̱jyu. Nkuhú nꞌe̱ mako̱i̱ yjohi̱ xu̱ta̱ xi je tjíntuyá ani̱ma̱ha̱ ko̱ nchja̱ha̱ Nda̱ Nti̱a̱ná.
\v 23 Najmi tu̱ nꞌesihi̱n én tsujnu tsutꞌa ko̱ én xi najmi tjíhi̱n sin xi nchja̱ xu̱ta̱, a̱tꞌaha̱ ja yai nga yo̱ nibáha̱ ra̱ kju̱a̱chán.
\v 24 Xi títsꞌínxátꞌaha̱ Nda̱ Nti̱a̱ná najmi tjíhin nga kju̱a̱chán kju̱ájin yjoho̱. Nda ní tsꞌín katsꞌínsihi̱n ngayjee̱ xu̱ta̱. Ko̱ tjíhin nga ka̱maha̱ ku̱a̱kúyaha̱ xu̱ta̱. Katsꞌín chúkju̱a̱ ni xi ka̱matꞌain.
\p
\v 25 Ni̱ma̱kju̱a̱ katꞌasje yjoho̱ nkꞌie nga tsjáni̱yáha̱ xi tífi kontra̱ha̱. Kutsa Nti̱a̱náhá tsjáha̱ xu̱ta̱ xuꞌbo̱ nga tsꞌi̱ínkꞌóntjaiya ani̱ma̱ha̱ nga sku̱e̱ ni xi na̱xu̱ tjín
\v 26 ko̱ nga ku̱a̱nkaha̱ ni xi tsꞌana̱cha̱ko̱ho̱ ra̱ nda̱nindoo̱. A̱tꞌaha̱ i̱ncha kjintuyáꞌyún ko̱ ni xi mjehe̱ nda̱nindoo̱ títsꞌínko̱ho̱.
\c 3
\s Bꞌi̱ tsꞌín tsakúya Pablo̱ xi nkú ka̱ma kintehe̱ ni nga kjꞌu̱a̱í ngáha Nda̱ Nti̱a̱ná
\p
\v 1 Katumankjihin ni xuꞌbi̱. Ni̱stjin xi fekuhu sꞌe̱ ni̱stjin kju̱a̱ꞌun.
\v 2 A̱tꞌaha̱ ka̱maxkín xu̱ta̱ ko̱ ꞌyún tsꞌi̱ín mje to̱on. Ngakꞌun ka̱ma ko̱ nkꞌa kꞌu̱a̱sje yjoho̱. Chꞌon tsꞌín ku̱i̱nchja̱ne Nti̱a̱ná ko̱ najmi ku̱i̱ntꞌéꞌéhe̱n xi cháha̱. Ndjá sꞌe̱yaha̱ ko̱ najmi sku̱e̱nkjún Nti̱a̱ná.
\v 3 Najmi sꞌe̱he̱ kju̱a̱tjo ko̱ najmi ka̱ma ni̱ma̱ha̱ xu̱ta̱. Ku̱i̱nchja̱yane xu̱ta̱ ko̱ najmi kꞌu̱échꞌoho̱ yjoho̱ ni xi ku̱i̱nchja̱ha̱ ani̱ma̱ha̱. Kjan ka̱ma ko̱ ngju̱a̱i̱ kontra̱ha̱ ngayjee̱ ni xi nda.
\v 4 Tsankꞌá ka̱ma, najmi ka̱ma nusihi̱n ni xi i̱ncha tsꞌi̱ín, ko̱ tséjihi̱n ra̱ kju̱a̱ngakꞌun. Najmi ku̱a̱ngisjai Nti̱a̱ná. Ni xi ku̱i̱nchja̱ níhi̱ ani̱ma̱ha̱ ku̱a̱ngisjai.
\v 5 Bꞌa̱ i̱ncha tsꞌi̱ín xi benkjún Nti̱a̱ná tsꞌi̱ín, tu̱nga xi nkú tsꞌín tjíntu kui niu̱ xi ku̱a̱kúchji nga najmi tíjñajihi̱n ngaꞌyún xi Nti̱a̱ná tsjáha̱ xu̱ta̱ xi benkjúhu̱n.
\p Nꞌe̱ tꞌaxíhi̱n yjohi̱ xu̱ta̱ xuꞌbi̱.
\v 6 A̱tꞌaha̱ xi bꞌa̱ kꞌun, kui xi xki̱ niꞌya i̱ncha fi ko̱ bꞌana̱cha̱ha̱ jminchjín xi najmi ndjá tjíntuyáha̱, xi kitsejíhi̱n ra̱ ngatitsun ko̱ ntꞌéꞌéhe̱n tu̱ mí nihí ni xi nchja̱ha̱ ani̱ma̱ha̱.
\v 7 Kui jminchjíu̱n xi tehe̱nte bangiya tu̱nga ndahá i̱chí najmi ma bichú mankjin sisihi̱n ni xi na̱xu̱ tjín.
\v 8 Xi nkú tsꞌín játjꞌe Jane̱ ko̱ Jambre̱ ngji kontra̱ha̱ Moise ni̱stjin nkꞌie, bꞌa̱ ta̱ tsꞌín ko̱ kui já xuꞌbi̱ tífi kontra̱ha̱ ni xi na̱xu̱ tjín. Najmi nda kju̱a̱nkjintakꞌuhu̱n ko̱ yaha̱ nga najmi Nti̱a̱ná sꞌejihi̱n.
\v 9 Tu̱nga najmi ngju̱a̱i̱ndjuko̱hó ni xi i̱ncha yꞌa, a̱tꞌaha̱ ngayjee̱ xu̱ta̱ sku̱e̱ kju̱a̱nchi̱nihi̱. Bꞌa̱ ka̱matꞌain xi nkú nga ta̱ kamatꞌain Jane̱ ko̱ Jambre̱.
\s Bꞌi̱ tsꞌín kitsjáni̱yáha̱ Pablo̱ Timoteo̱
\p
\v 10 Ji Timoteo̱, ja yai sisin ni xi tsakuyá ko̱ xi nkú tsꞌian. Ta̱ yai ni xi mjena tsꞌian, xi nkú tsꞌín sꞌejinna, kju̱a̱tsentana̱, kju̱a̱tjona̱, ko̱ xi nkú tsꞌín títsꞌin chúkju̱a̱ ni xi tímatꞌan.
\v 11 Yai xi nkú tsꞌín kitsjennkí unkiena xu̱ta̱, ko̱ kju̱a̱ꞌun xi kikie, ko̱ ni xi kamatꞌan nanki Antiokia̱, nanki Ikoni̱o̱ ko̱ nanki Listra̱. Kitsjennkí unkiena xu̱ta̱ tu̱nga Nda̱ Nti̱a̱náhá tsasinko̱na a̱jihi̱n ngayjee̱ ni xuꞌbi̱.
\p
\v 12 Kju̱axi̱ nga ngayjee̱ xi mjehe̱ sku̱e̱nkjún Nti̱a̱ná ko̱ Cristo̱ Jesu, kui xi tsjénnki unkiehe̱ xu̱ta̱.
\v 13 Tu̱nga máha xu̱ta̱ chꞌonkꞌuu̱n ko̱ xi tsankꞌóo̱, ꞌyún chꞌonkꞌun ka̱ma sa. Kꞌu̱a̱na̱cha̱ ko̱ ta̱ chꞌa̱na̱cha̱ha̱.
\p
\v 14 Tu̱nga máha ji, ndjá ti̱si̱njñajin ni xi tsinchiyáí, ni xi tsichu mankjihin. A̱tꞌaha̱ yai yá xi tsakúyahi niu̱.
\v 15 Nꞌe̱kjꞌáítsjein nga santa nkúhu nga ndyjahi yai nkú títsu xu̱ju̱n éhe̱n Nti̱a̱ná. Kui xi tsje. Kui xi tjíhi̱n ngaꞌyún nga tsjáhi kju̱a̱nkjintakꞌun, a̱tꞌaha̱ sꞌejihin Cristo̱ Jesu ko̱ tíbꞌanki.
\v 16 Espiri̱tu̱hu̱ Nti̱a̱ná kitsꞌínxájihi̱n xi yꞌétꞌa ngayjee̱ xu̱ju̱n éhe̱n Nti̱a̱ná ko̱ kui xu̱ju̱n basinko̱ná nga bakuyáha̱á xu̱ta̱, nga nꞌekꞌa ni̱yáha̱á, nga bixínyaha̱á má nihi xi najmi nda tjín títsꞌín, ko̱ nga ꞌba̱i̱ ni̱yáha̱á xi nkú tsꞌín na̱xu̱ ngju̱a̱i̱ko̱ yjoho̱.
\v 17 Bꞌa̱ tsꞌín xu̱ju̱n tu̱ xi nda̱ xi tsꞌínxátꞌaha̱ ra̱ Nti̱a̱ná sku̱e̱ sisihin ni xi tjíhin nga tsꞌi̱ín nga tsꞌi̱ín xá xi nda.
\c 4
\p
\v 1 Nginku̱n Nti̱a̱ná ko̱ nginku̱n Cristo̱ Jesu, kui xi ku̱a̱se̱he̱ ni xi kitsꞌín xu̱ta̱ xi tjíntu tíkꞌun ko̱ xi ja kꞌien nkꞌie nga kjꞌu̱a̱íkúchji yjoho̱ nga kjꞌu̱a̱ítéxuma, tu̱ xí tíbankihí ra nga
\v 2 tꞌeni̱jmí éhe̱n Nti̱a̱ná. Tu̱ nkú bꞌa̱há nꞌe̱i̱ tu̱ mí ni̱stjihín ni ko̱ tu̱ mí chu̱ba̱há ni. Tꞌinyaihi̱ xu̱ta̱ tsa najmi nda tjín ni xi títsꞌín, ko̱ nꞌe̱kꞌa ni̱yáí, ko̱ tjennni̱yáíhi̱. Kasꞌe tehe̱ntehi kju̱a̱tsenta nkꞌie nga ku̱a̱kúyai éhe̱n Nti̱a̱ná.
\p
\v 3 A̱tꞌaha̱ ku̱i̱chú ni̱stjin nga najmi ta̱ tsꞌi̱ínsihi̱n ra̱ xu̱ta̱ én nda xi bakuyáá, xi nda tsꞌínko̱ná. Tu̱ sa ní i̱ncha ku̱a̱ngisjai nga nkjin ṉkjún já maestru̱ xi ku̱a̱kúyaha̱ ni xi tsjoho̱ nga ku̱i̱ntꞌé, a̱tꞌaha̱ kui niu̱ xi nchja̱ha̱ ani̱ma̱ha̱.
\v 4 Ngju̱a̱i̱ tꞌaxíhi̱n ko̱ najmi ta̱ ku̱a̱sínñjuhu̱ ra̱ én xi na̱xu̱ tjín. Énchá xi nchja̱ xu̱ta̱ i̱ncha tsꞌi̱ínsihi̱n.
\v 5 Tu̱nga máha ji, tu̱ nkú cha̱se̱ sisinní ni xi nꞌe̱i. Nꞌe̱ chúkju̱a̱i kju̱a̱ꞌuu̱n. Nꞌe̱kjasꞌeihi̱n yjohi̱ nga tꞌeni̱jmí éhe̱n Nti̱a̱ná. Nda nꞌe̱tjusuin xáhi̱.
\p
\v 6 An bi, ja ma ka̱maná nku chje̱ xi ku̱i̱chúsehe̱ Nti̱a̱ná. Ja tíbichú tiña chu̱ba̱ nga kꞌuejñá a̱sunntei̱.
\v 7 Ja tsási̱nchjaha̱ xi fi kontra̱ha̱ éhe̱n Nti̱a̱ná. Ja tsichu kjetꞌa ni̱yána̱. Tu̱ nkú kisꞌejihínna Nti̱a̱ná.
\v 8 Ja tíkuyána ndꞌa̱i̱ chjí xi tsꞌi̱ínkjáíhi̱n xu̱ta̱ xi ja na̱xu̱ nginku̱n Nti̱a̱ná. Nda̱ Nti̱a̱ná tsjána niu̱, a̱tꞌaha̱ na̱xu̱ tsꞌi̱ínko̱ xu̱ta̱ ni̱stjin nga ku̱a̱se̱ mí nihi xi kitsꞌín nga nkúnkú. Ko̱ najmi tu̱ nku an tsjána chjí xuꞌbo̱. Ta̱ tsjáha̱ ngayjee̱ xu̱ta̱ xi tjoho̱ ko̱ xi tíi̱ncha kuyá nga kjꞌu̱a̱í ngáha.
\s Bꞌi̱ tsꞌín kitsúya̱ha̱ Pablo̱ Timoteo̱ ni xi mjehe̱ nga tsꞌi̱ín
\p
\v 9 Nꞌe̱ ki̱tsa̱ xáíhi̱ yjohi̱ nga nibáa̱se̱ xatíní.
\v 10 A̱tꞌaha̱ nda̱ Dema̱ ꞌyún tjo saha̱ ni xi tjín a̱sunntei̱. Ja kitsꞌín nga mana. Nanki Tesaloni̱ka̱ ngji. Nda̱ Krescente̱ ngá a̱nte Galaci̱a̱ ngji, ko̱ nda̱ Tito̱ ja ngji a̱nte Dalmaci̱a̱.
\v 11 Tu̱ nkuhú nda̱ Luko̱ tíjñako̱ sana e̱i̱. Ti̱nchísjai nda̱ Marko̱ ko̱ nibáko̱i̱, a̱tꞌaha̱ kui xi ka̱ma ku̱a̱si̱nko̱na a̱jihi̱n xána̱.
\v 12 Nda̱ Tiki̱ko̱ bi, nanki Efe̱so̱ kitsꞌinkjíá.
\v 13 Nkꞌie nga ni̱bai, nibáko̱ní najyunna̱ xi tsꞌinchjén ni̱stjin chu̱nchꞌóo̱n. Kui xi yꞌejñá nanki Troa̱, niꞌyaha̱ nda̱ Karpo̱. Ko̱ ta̱ nibáko̱ní xu̱ju̱nna̱. Tu̱ xí najmi tu̱ nꞌechayaní i̱chí xi tja̱ba̱xín kamandako̱ho.
\p
\v 14 Tse ṉkjún kju̱a̱sti kitsjáná nda̱ Alejandro̱, nda̱ xi tsꞌínnda ni ki̱cha̱. Nda̱ Nti̱a̱ná kꞌu̱échjí ngajoya ngáha̱ ra̱ ni xi kitsꞌín.
\v 15 Ko̱ ji, chíhi̱n yjohi̱ ndo̱, a̱tꞌaha̱ tu̱ xí ꞌyúhún ngji kontra̱ha̱ én xi tíbꞌeni̱jmíaá.
\p
\v 16 Nkꞌie nga tjun kinchjantjá yjona̱ nginku̱n já tjíxóo̱, najmi chꞌa tsasinko̱na. Ngayjee̱ yꞌéntu masenna. Najmi tu̱ katꞌaxki̱hi̱ ra̱ Nti̱a̱ná ni xi i̱ncha kitsꞌín.
\v 17 Tu̱nga Nda̱ Nti̱a̱náhá tsasinko̱na ko̱ kitsjána ngaꞌyún tu̱ xi kama yꞌeni̱jmíyjehena éhe̱n. Bꞌa̱ tsꞌín kintꞌéhe ngayjee̱ xu̱ta̱ xi najmi ntje̱ judio̱ tje̱he̱n ra̱. Tsꞌasjeꞌana Nda̱ Nti̱a̱ná ngabayoo̱.
\v 18 Ko̱ ta̱ kꞌu̱a̱sjejinna a̱jihi̱n ngayjee̱ ni chꞌonkꞌun xi tjín ko̱ ngju̱a̱i̱ko̱na má batéxuma ndji̱o̱jmi ján. ¡Nꞌe̱kié yjoná nga tjíhi̱n kju̱a̱chánka santaha tu̱ nkjéhé ni! Bꞌa̱ katꞌe.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 19 Tjeihi̱n kju̱a̱suniñana̱ na Priska̱ ko̱ nda̱ Akila̱ ko̱ xu̱ta̱ xinkjín nda̱ Onesifo̱ro̱.
\v 20 Nanki Corinto̱ yꞌejña nda̱ Erasto̱. Nanki Mileto̱ kisatéchꞌin nda̱ Trofi̱mo̱ ko̱ yo̱ yꞌejñá.
\v 21 Nꞌe̱ꞌahi̱ yjohi̱ nga nibáa̱se̱ní kintehe̱ ni nga kjꞌu̱a̱í ni̱stjin chu̱nchꞌóo̱n. Títsꞌínkjihi kju̱a̱suniña nda̱ Eubu̱lo̱ ko̱ nda̱ Pudente̱ ko̱ nda̱ Lino̱ ko̱ na Claudi̱a̱ ko̱ ngayjee̱ já ntsꞌeé xi tjín e̱i̱.
\p
\v 22 Nda̱ Nti̱a̱ná Jesucristo̱ katꞌejñako̱hi. Ngatentoo̱ kasꞌenu̱u kju̱a̱ndaha̱ Nti̱a̱ná.