\id PHM Mazatec of Jalapa de Diaz
\h Xu̱ju̱n xi kinꞌekjíhi̱ Filemon
\toc1 Xu̱ju̱n xi kitsꞌínkjihi̱ nda̱ postru̱ Pablo̱ Filemon
\mt Xu̱ju̱n xi kitsꞌínkjihi̱ nda̱ postru̱ Pablo̱ Filemon
\c 1
\s Bꞌi̱ tsꞌín kikjaniñaha̱ Pablo̱ Filemon
\p
\v 1 An Pablo̱ kjíi̱yaꞌyán nga̱tꞌaha̱ Cristo̱ Jesu. An ko̱ nda̱ ntsꞌeé Timoteo̱ tísuniñai̱hi̱ nda̱ Filemon. Tjo ṉkjúnna ji. Ji xi ta̱ tínꞌexátꞌaihi̱ Cristo̱.
\v 2 Tísuniña yai̱hi̱ nichjaá Api̱a̱, ko̱ nda̱ ntsꞌeé Arkipo̱ xi ta̱ títsꞌín ngaꞌyún nga̱tꞌaha̱ Cristo̱, ko̱ xu̱ta̱ ni̱nku̱ xi ma ñjakú niꞌyahi̱.
\p
\v 3 Kasꞌenu̱u kju̱a̱nda ko̱ kju̱a̱jyu xi tsjáná Nti̱a̱ Na̱ꞌminá ko̱ Nda̱ Nti̱a̱ná Jesucristo̱.
\s Bꞌi̱ tsꞌín kitsúya Pablo̱ xi nkú tsꞌín nchja̱ntjai Filemon
\p
\v 4 Fꞌáítsjenna ji nkꞌie nga nchjaka̱ Nti̱a̱ná. Tehe̱nte tsja mábꞌa̱chjíhi̱
\v 5 nga tíꞌmiyana xi nkú tsꞌín tjohi ngayjee̱ xu̱ta̱ xi Nti̱a̱ná kitsꞌín tsꞌe̱ ko̱ xi nkú tsꞌín nꞌe sꞌejin Nda̱ Nti̱a̱ná Jesu.
\p
\v 6 Bankihi̱ Nti̱a̱ná nga xi nkú tsꞌín nꞌe sꞌejin ni xi ngujihín nꞌe sꞌejián, kui xi katsꞌínxájin kju̱a̱nkjintakꞌuhi̱n tu̱ xi bꞌa̱ tsꞌín ka̱mankjihin ri ngayjee̱ ni nda xi tjínná nga̱tꞌaha̱ Cristo̱ Jesu.
\v 7 Tsjo ṉkjún tjínna ko̱ sakúna ngaꞌyún nga̱tꞌaha̱ xi nkú tsꞌín tjohi xu̱ta̱ ni̱nku̱. A̱tꞌaha̱ nga̱tꞌahi̱, nda̱ ntsꞌé, kisakú ngaꞌyúhu̱n ani̱ma̱ha̱ xu̱ta̱ xi tsꞌe̱ Nti̱a̱ná.
\s Bꞌi̱ tsꞌín nchja̱ntjai Pablo̱ Onesi̱mo̱
\p
\v 8 Kui bꞌa̱ maha, ndaha tsa ngajoho̱ Cristo̱ ka̱ma kuinchjako̱ masen masehen ni xi tjíhin nga nꞌe̱i,
\v 9 tu̱nga tu̱ sa ní tíbankihi ni xi xíhin a̱tꞌaha̱ tjoná xinki̱á. An Pablo̱ xi ja kama chá ko̱ kjíi̱yaꞌyán ndꞌa̱i̱ tu̱ nga̱tꞌaha̱ Cristo̱ Jesu
\v 10 tíbankihi nku kju̱a̱nda nga̱tꞌa tsꞌe̱ Onesi̱mo̱. Kui xi ja tsichu ma xi nkú joyaha tsa ntína̱ e̱i̱ a̱ya nu̱ba̱yóo̱.
\v 11 Kui xi najmi kamachjéhin ni̱stjin nkꞌie tu̱nga ndꞌa̱i̱ ji ko̱ an machénná ndo̱.
\p
\v 12 Títsꞌinkjíse ngáhara. Nꞌe̱kjáíhi̱n xi nkúhu tsa an niu̱.
\v 13 Mjena nga kꞌúéjñako̱ sana e̱i̱ tsakai tu̱ xi ngajohi̱ tsꞌi̱ínxátꞌahana e̱i̱ má nga kjíi̱yaꞌyán tu̱ nga̱tꞌaha̱ én nda tsuhu̱ Nda̱ Nti̱a̱ná.
\v 14 Tu̱nga ndahá nku ni najmi mjena chu̱ba̱ tsꞌian tsa najmi tjínkuhu̱ takꞌuin, tu̱ xi ani̱ma̱hi̱ ni̱baha̱ ra̱ kju̱a̱nda xi nꞌe̱ní ko̱ najmi an tsꞌin kju̱a̱ꞌyúhunra.
\p
\v 15 Kutsa kuihí kju̱a̱ha ngji tꞌaxíhin ri Onesi̱mo̱ chuba ni̱stjin, tu̱ xi nꞌe̱kjáín sín ngáha̱ ri̱ ndꞌa̱i̱.
\v 16 Tu̱nga najmi ta̱ xi nkúhú ni tsa nku nda̱ musu̱ xi kichꞌatsei cha̱se̱hi̱. Tu̱ sa ní cha̱se̱hi̱ xi nkúhu nku nda̱ xi ꞌyún chjí saha̱ ra̱ nga nku nda̱ musu̱. Nga̱tꞌa tsꞌa̱n nda̱tsꞌé ja tsichu ma ndo̱ ko̱ tjona. Nga̱tꞌa tsꞌi̱ ꞌyún chjí saha̱ ra̱ ndo̱, a̱tꞌaha̱ ta̱ tsꞌi̱ínxátꞌa ngáha ri ko̱ ta̱ sꞌejihi̱n Nda̱ Nti̱a̱ná xi nkúhu ji.
\p
\v 17 Kui bꞌa̱ maha, xihi̱ yaní nga nkuhú tinchajián ni xi ngujihín sꞌejinná, nꞌe̱kjáín ngáha̱ ri̱ Onesi̱mo̱ xi nkúhu tsa an niu̱.
\v 18 Tsa tjín má najmi nda kitsꞌínko̱hi ko̱ tsa tjín ni xi tje̱he̱n tsꞌi̱, kuenta̱na̱ tꞌetꞌai niu̱.
\v 19 An kꞌuechjá ni xi tje̱he̱n. An Pablo̱ ntuna̱ tíbꞌetꞌáhana xu̱ju̱i̱n nga bꞌa̱ tsꞌian, ndaha tsa ka̱ma tsꞌinkjꞌáítsjehen ni xi tje̱hin tsꞌa̱n. Nga̱tꞌana̱ tinchihinni.
\v 20 Ji nda̱ ntsꞌe, a̱tꞌaha̱ tjohi̱ Nda̱ Nti̱a̱ná, kasakújinna ji nku kju̱a̱nda. Tjen ngaꞌyíhi̱n ani̱ma̱na̱ tu̱ nga̱tꞌaha̱ nga nkuhú kichꞌaá Cristo̱.
\p
\v 21 Bꞌa̱ tsꞌín tíbꞌetꞌáha a̱tꞌaha̱ behe̱ kꞌan nga ku̱i̱núꞌyáꞌénní. Be nga ꞌyún nꞌe̱tjusun sai ni xi tíbankihi.
\v 22 Ko̱ ta̱ tíbankihi kjꞌa̱í sa ni. Tꞌendaní nku a̱nte niꞌyahi̱, a̱tꞌaha̱ tíbinchihu̱u Nti̱a̱ná nga ka̱ma kfínsenu̱u. Tu̱ tíkuyáhá ra̱ nga bꞌa̱ ka̱ma.
\s Bꞌi̱ tsꞌín kitsꞌínkje Pablo̱ xu̱ju̱i̱n
\p
\v 23 Títsꞌínkjihi kju̱a̱suniña nda̱ Epa̱fra̱. E̱i̱ ta̱ kjiyaꞌyúnko̱na nga̱tꞌaha̱ Cristo̱ Jesu.
\v 24 Ko̱ ta̱ títsꞌínkjihi kju̱a̱suniña nda̱ Marko̱, nda̱ Aristarko̱, nda̱ Dema̱ ko̱ nda̱ Luko̱. Kui jái̱ ta̱ yꞌanjiko̱na xá xi títsꞌian.
\p
\v 25 Kju̱a̱ndaha̱ Nda̱ Nti̱a̱ná Jesucristo̱ kasꞌeyaha̱ ani̱ma̱nu̱u.