\id JAS J Mazatec of Jalapa de Díaz
\h Xu̱ju̱n xi kitsꞌínntu Santiago̱
\toc1 Xu̱ju̱n xi kitsꞌínntu Santiago̱
\mt Xu̱ju̱n xi kitsꞌínntu Santiago̱
\c 1
\s Bꞌi̱ tsꞌín kikjaniñaha̱ Santiago̱ xu̱ta̱ ni̱nku̱
\p
\v 1 An Santiago̱, an nda̱ musu̱ síhi̱n Nti̱a̱ná ko̱ Nda̱ Nti̱a̱ná Jesucristo̱, títsꞌinkjínu̱u xu̱ju̱i̱n jun xi yꞌaha̱nu̱u ntje̱ te jo xi tsitjujíhi̱n ra̱ ntje̱ cháná Israel. Jun xi kindzjoyo a̱sunntee̱.
\p Tífaniñanu̱u.
\s Bꞌi̱ tsꞌín tsakúya Santiago̱ mí nihi xi basinko̱ná nga ndjá sꞌe̱jinná Nti̱a̱ná
\p
\v 2 Jun já ntsꞌe, tsjo ṉkjún katumanu̱u nkꞌie nga nkjin tíkjá ni ku̱i̱tjájiun nga ni̱banenu̱u.
\v 3 A̱tꞌaha̱ ja yo nga nkꞌie nga ni̱banenu̱u ni xi ku̱i̱tjájiun ko̱ nda bitjunkiu a̱tꞌaha̱ ndjá sꞌejinnu̱u Nti̱a̱ná, bꞌa̱ tsꞌín sa̱kúhu̱nu̱u nga ka̱ma nꞌe̱ chúkju̱o tu̱ mí nihí ni xi ka̱matꞌon.
\v 4 Tjehe̱nnto nga nkꞌie nga tínꞌe chúkju̱o, kju̱a̱chúkju̱a̱ xi tjínnu̱u katsꞌínndju̱ú xá xi tsꞌe̱ a̱jin ani̱ma̱nu̱u. Kui xi ngju̱a̱i̱ko̱nu̱u nga ka̱mo xi tjíhin nga ka̱mo ko̱ sꞌe̱yanu̱u xi nkú tsꞌín tjíhin nga sꞌe̱yanu̱u, ko̱ najmi chumi nihi xi ndyja̱tꞌanu̱u.
\p
\v 5 Tsa tjín a̱jinnu̱u xi ndyjatꞌaha̱ nga na̱nka̱ tsꞌínkjinkꞌun, katankihi̱ Nti̱a̱ná ko̱ Nti̱a̱ná tsjáha̱. A̱tꞌaha̱ kui ngayjehe kꞌun tsjáha̱ xu̱ta̱ ko̱ najmi bꞌéchꞌoho̱ yjoho̱ nga bꞌa̱ tsꞌín.
\v 6 Tu̱nga xi ku̱a̱nkihi̱ Nti̱a̱ná tjíhín nga sꞌe̱jihi̱n ko̱ najmi tu̱ jo jan katumaha̱. A̱tꞌaha̱ xi jo jan maha̱, kui xi nkú joyaha tꞌéhe̱n ntáchakꞌuu̱n, kui xi tu̱ má fiko̱hó ra̱ ntjo̱.
\v 7 Xi bꞌa̱ tsꞌín tjíyaha̱ najmi tu̱ kakuyá nga Nti̱a̱ná tsjáha̱ tsa mí nihi.
\v 8 A̱tꞌaha̱ jo jan tjíyaha̱ ko̱ najmi tsꞌínndju̱ú ni xi tsꞌín.
\s Bꞌi̱ tsꞌín kitsúya Santiago̱ nkú tjíhi̱n ra̱ nga̱tꞌa tsꞌe̱ xi xꞌa̱n ko̱ xi nchi̱ná
\p
\v 9 Nda̱ ntsꞌeé xi xꞌa̱n, kui xi tsjo katumaha̱, a̱tꞌaha̱ nkꞌa tje̱n nginku̱n Nti̱a̱ná.
\v 10 Ko̱ tsjo katumaha̱ xi tíꞌmi nda̱nchi̱ná, a̱tꞌaha̱ xꞌa̱n nginku̱n Nti̱a̱ná. A̱tꞌaha̱ xi nchi̱ná, kui xi ndyja̱ xi nkú joyaha naxú xi tjín a̱jin jñóo̱.
\v 11 Nkꞌie nga bitju tsꞌíu̱ ko̱ ꞌyún sje ma nubóo̱, tsꞌínxi jñóo̱ ko̱ jne naxúhu̱ ko̱ ndyjajihi̱nsén kju̱a̱tsjotjíhi̱n. Bꞌa̱ ta̱ tsꞌínndyja̱ xi tíꞌmi nda̱nchi̱ná a̱jihi̱n xá xi títsꞌín.
\s Bꞌi̱ tsꞌín tsakúya Santiago̱ nga̱tꞌa tsꞌe̱ ni xi bitjajíaán
\p
\v 12 Á bꞌa̱ nda tjíhin tsꞌe̱ xi títsꞌín chúkju̱a̱ha ni xi tínibánꞌehe̱, a̱tꞌaha̱ kui niu̱ tíbꞌéjña chji yáha kui ko̱ nkꞌie nga nda ku̱i̱tjuko̱ kui niu̱, tsꞌi̱ínkjáíhi̱n nga kꞌúéjña tíkꞌun. Kui chjíu̱ xi kitsúya títjun Nti̱a̱ná nga tsjáha̱ xu̱ta̱ xi tjoho̱ Nti̱a̱ná.
\p
\v 13 Nkꞌie nga tjín xi tínibánehe̱ nga tsꞌi̱ín ni xi najmi nda, najmi tu̱ katsꞌínnkjinkꞌun tsa Nti̱a̱ná xi títsꞌín nibánehe̱ kui niu̱. A̱tꞌaha̱ Nti̱a̱ná najmi nchja̱ha̱ nga tsꞌi̱ín ni xi najmi nda, ko̱ ta̱ ndaha najmi tsꞌi̱ín nibánehe̱ xu̱ta̱ nku ni xi nchja̱ha̱ tu̱ xi tsꞌi̱íhin ni xi najmi nda.
\v 14 Ni xi nchja̱ níhi̱ a̱ni̱ma̱ha̱ xu̱ta̱, kui xi bꞌana̱cha̱ha̱ ko̱ kjeꞌyúhu̱n tu̱ xi tsꞌi̱íhin ni xi najmi nda.
\v 15 A̱sꞌa̱i tu̱ nku fásihín ra̱ ni xi nchja̱ha̱ ani̱ma̱ha̱ ko̱ yo̱ tsihin ngatitsuu̱n. Ko̱ nkꞌie nga ja sá ngatitsuu̱n, yo̱ nibáha̱ ra̱ ngabayoo̱.
\p
\v 16 Jun já ntsꞌena̱, najmi tu̱ chꞌana̱cho̱ho̱ yjonu̱u.
\v 17 Ngayjee̱ ni xi ꞌyún nda xi ꞌba̱i̱ná, kui nihi xi ꞌyún nda ko̱ ndji̱o̱jmi ján nibáha̱ ra̱. Kui xi tsjáná Na̱ꞌminá xi kitsꞌínnda ngayjee̱ ni xi batꞌai nkꞌa ján, xi najmi bꞌóntjaiya ko̱ ta̱ ndaha najmi fꞌajniyá xi nkúhu nku nkꞌíén.
\v 18 Kama mjehe̱ nga kitsꞌín maná ntíhi̱. Én xi bakúyaná ni xi na̱xu̱ tjín, kui xi kitsꞌínchjén nga kitsꞌíntsinná, tu̱ xi ku̱i̱chu mahaná xi nkú joyaha tu xi tjun chjúsítje̱n a̱jihi̱n ngayjee̱ ni xi kitsꞌínnda.
\s Bꞌi̱ tsꞌín tsakúya Santiago̱ xi nkú tsꞌín chúhu̱un nja̱á ko̱ xi nkú tsꞌín tjíhin nga nꞌetjusaán éhe̱n Nti̱a̱ná
\p
\v 19 Nꞌe̱kjꞌáítsjon ni xuꞌbi̱, já ntsꞌena̱. Ti̱ntsu̱ba̱ ndo nga ta̱sinñju, chúyako̱o nga chu̱bo ko̱ ꞌni katuma kjannu̱u.
\v 20 A̱tꞌaha̱ kju̱a̱kjoo̱n najmi basinko̱ná nga na̱xu̱ nꞌeé nginku̱n Nti̱a̱ná.
\v 21 Kui bꞌa̱ maha, tꞌentuhunu ngayjee̱ ni xi si ko̱ ni chꞌonkꞌun xi tjín ṉkjún. Nꞌe̱sje ni̱ma̱kju̱o yjonu̱u nga nꞌe̱kjóho̱on én xi kisꞌentje̱jin ani̱ma̱nu̱u. Kui xi tjíhi̱n ngaꞌyún nga tsꞌi̱ínkꞌankinu̱u.
\p
\v 22 Tu̱nga nꞌe̱tjusunnú ée̱n. A̱tꞌaha̱ tsa tu̱ nku ku̱a̱sinñjuhú ru̱u ko̱ najmi nꞌe̱tjusun, yjonu̱u tíchꞌana̱cho̱.
\v 23 Xi tu̱ basínñjuhú ra̱ ée̱n ko̱ najmi tsꞌíntjusun, kui xi xi nkú joyaha xu̱ta̱ xi baseya nku chu̱tsín nga basehe̱ sénni̱stjihi̱n,
\v 24 a̱sꞌa̱i fi ko̱ kutjuhú cha̱yaha̱ ni xi kuakie.
\v 25 Tu̱nga máha xu̱ta̱ xi base sisihi̱n kju̱a̱téxuma xi na̱xu̱ tjín, kju̱a̱téxuma xi tsꞌín nda̱íná, ko̱ xi tu̱ nku bꞌejñajihín kui kju̱a̱téxumoo̱, xi najmi tsꞌínchaya ni xi basínñjuhu̱ nga tu̱ sahá tsꞌíntjusun ni xi títsu kju̱a̱téxumoo̱, kui xu̱ta̱ha xi Nti̱a̱ná tsꞌín nga nda ka̱matꞌain a̱jihi̱n ni xi tíi̱ncha tsꞌín.
\p
\v 26 Tsa tjín xi bꞌa̱ maha̱ nga nda tsꞌín nginku̱n Nti̱a̱ná, tu̱nga tsa tu̱ sa najmi mahá ngáha̱ bꞌéchꞌoho̱ tsꞌa xi nkú nga tsꞌín nchja̱, kui xi bꞌana̱cha̱ha̱ yjoho̱ ko̱ najmi chumi ni chjíhi̱ ra̱ xi nkú tsꞌín benkjún Nti̱a̱ná.
\v 27 Tu̱nga nkꞌie nga bisinka̱á ntí xi ja kꞌien xi cháha̱ ko̱ jminchjín xi ja kꞌien xꞌi̱hi̱n nga un tíbehe̱, ko̱ nkꞌie nga najmi nꞌesika̱á yjoná ni chꞌonkꞌun xi tjín a̱sunntee̱, bꞌa̱ tsꞌín je ko̱ nda nꞌeé nginku̱n Nti̱a̱ná xi Na̱ꞌminá maha.
\c 2
\s Bꞌi̱ tsꞌín tsakúya Santiago̱ nga ngúsuhún nꞌe̱ka̱á xu̱ta̱
\p
\v 1 Jun já ntsꞌena̱, Nda̱ Nti̱a̱ná Jesucristo̱ tjíhi̱n kju̱a̱chánka ko̱ kui xi sꞌejinnu̱u. Kui nga najmi tu̱ ngabi nꞌehenu a̱jihi̱n xu̱ta̱.
\v 2 Kꞌúéjñaha̱ ra̱á tsa kju̱a̱sꞌenjinnu̱u xi má nga ma ñjakúko̱o xinki̱u nku nda̱ xi tjíyaha̱ stji̱nkꞌun to̱onsine ko̱ yja najyun tsjo tjín, ko̱ tsa ta̱ kju̱a̱sꞌen yo̱ nku nda̱ xꞌa̱n xi yja najyun chá.
\v 3 Tsa nda nꞌe̱kjóho̱on nda̱ xi yja najyun tsjo tjíu̱n nga: “Ti̱nchin a̱nte nda xuꞌbi̱” kꞌúíhu̱un, ko̱ tsa bꞌa̱ kꞌúíhu̱un nda̱ xꞌo̱n: “Ti̱si̱njña ndjui yo̱ ji” ko̱ tsa: “Ti̱nchintetꞌání” kꞌúíhu̱un,
\v 4 tsa bꞌa̱ nꞌo̱o, ¿a najmi ngabihí tínꞌo? ¿A najmi chꞌohón tsꞌín ja tínꞌenkjíntakꞌun nga jun tíchasoho̱o yá xi nkꞌa tje̱n?
\p
\v 5 Jun já ntsꞌena̱, ta̱sinñjú nga Nti̱a̱ná jꞌájin xu̱ta̱ xi xꞌa̱n xi tjín a̱sunntei̱ tu̱ xi sa̱kúhu̱ ra̱ kju̱a̱nchi̱ná xi tjíhi̱n xi sꞌejinná ko̱ tu̱ xi tsꞌi̱ínkjáíhi̱n ra̱ nga Nti̱a̱ná ku̱a̱téxumaha̱. Kui nii̱ xi kitsúya títjun Nti̱a̱ná nga tsjáha̱ xi tjoho̱.
\v 6 Tu̱nga máha jun, xi najmi chumi ni chjíhi̱ ra̱ nꞌe mo xu̱ta̱ xꞌa̱n. ¿A najmi jánchi̱nóo̱hó xi bꞌana̱cha̱nu̱u nga ngandaha̱ nꞌo ni xi nꞌo ko̱ a najmi kuihí xi fiko̱ kju̱a̱ꞌyúnnu̱u nginku̱n já jue nga batéjénenu̱u?
\v 7 ¿A najmi kuihí jóo̱ xi najmi benkjún Jesucristo̱, kui xi ja tsꞌe̱nu̱u?
\p
\v 8 Nda nꞌo̱o tsa nꞌe̱tjusun kju̱a̱téxuma xi xi ꞌyún nkꞌa tje̱n, xi nkú tsꞌín tjítꞌa xu̱ju̱n éhe̱n Nti̱a̱ná: “Nꞌe̱tjóí xu̱ta̱hi̱ xi nkú nga tsꞌín tjohi yjohi̱.”
\v 9 Tu̱nga tsa ngabi nꞌo̱o a̱jihi̱n xu̱ta̱, ngatitsun tínꞌo ko̱ kju̱a̱téxumoo̱ ku̱i̱tsu̱yanu̱u nga jé tje̱nnu̱u.
\p
\v 10 A̱tꞌaha̱ tsa tjín xi tsꞌi̱íntjusunyje kju̱a̱téxumoo̱, tu̱nga tsa ndyja̱tꞌahá ra̱ nga tsꞌi̱íntjusun nku ni xi tjítꞌa yo̱, kui xi jé tsjehe̱n nga̱tꞌaha̱ ngayjee̱ ni xi tjítꞌa kju̱a̱téxumoo̱.
\v 11 A̱tꞌaha̱ xi: “Najmi tu̱ chꞌatꞌaihi̱ chji̱íhi̱n” kitsú, kui xi ta̱: “Najmi tu̱ nꞌekꞌiein” kitsú. Máha ji, ndaha tsa najmi chꞌa̱tꞌaihi̱ chji̱íhi̱n ko̱ tsa xꞌi̱hi̱n, tu̱nga tsa nꞌe̱kꞌienní ani̱ma̱, tsa bꞌa̱ nꞌe̱i̱, jé tje̱hin nga tíbiyunéí kju̱a̱téxumaha̱ Nti̱a̱ná.
\p
\v 12 Chu̱bo ko̱ nꞌo̱o xi nkúhu tsa kju̱a̱téxuma xi tsꞌín nda̱íná nꞌe̱ko̱kju̱a̱ko̱ho̱nu̱u.
\v 13 A̱tꞌaha̱ ni̱stjin nga ku̱a̱se̱he̱ Nti̱a̱ná mí nihi xi kitsꞌín xu̱ta̱, najmi ka̱ma ni̱ma̱ha̱ xi najmi kama ni̱ma̱ha̱ xu̱ta̱ xingisoo̱. Tu̱nga xi kama ni̱ma̱ha̱ xu̱ta̱ xingisoo̱, kui xi nda ku̱i̱tju kui ni̱stiu̱n.
\s Bꞌi̱ tsꞌín tsakúya Santiago̱ ni xi ꞌmihi̱ nga sꞌejinná
\p
\v 14 Jun já ntsꞌena̱, ¿mí xi chjíhi̱ ra̱ tsa tjín xi títsu nga sꞌejihi̱n Nti̱a̱ná tu̱nga tu̱ sa najmi títsꞌíntjusuhún ngá xi nkú tsꞌín sꞌejihi̱n? ¿A ka̱mahá nꞌe̱kꞌanki tu̱ nga̱tꞌaha̱ nga bꞌa̱ tsꞌín sꞌejihi̱n?
\v 15 Kꞌúéjñaha̱ ra̱á tsa nku nda̱ ntsꞌeé ko̱ tsa nku nichjaá ndyjatꞌáha̱ najyun ko̱ najmi tjíhi̱n nichine.
\v 16 Ko̱ tsa tjín a̱jinnu̱u xi: “Tankíhin ndo, ti̱chꞌokjó sisiun najyun ko̱ chi̱ne̱ sisiun”, tsa ku̱i̱tsu̱hu̱ tu̱nga najmi ku̱a̱si̱nko̱hó nga tsjáha̱ ni xi machjéhe̱n, ¿a najmi tu̱ kju̱a̱ndahá bꞌa̱ ku̱i̱tsu̱?
\v 17 Bꞌa̱ ta̱ tsꞌín tíjña nga̱tꞌa tsꞌe̱ xi nkú tsꞌín sꞌejinná. Tsa najmi tínꞌetjusaán xi nkú tsꞌín sꞌejinná, bꞌa̱ ta joya xi nkúhu tsa ndaha̱chí najmi sꞌejinná.
\p
\v 18 Kutsa tjíhín xi bꞌa̱ ku̱i̱tsu̱: “Ji xi sꞌejihin Nti̱a̱ná ko̱ an títsꞌintjusan ni xi nda.” Tu̱nga ta̱kúchjihíní nga sꞌejihin Nti̱a̱ná nkꞌie nga najmi tínꞌetjusuin xi nkú tsꞌín sꞌejihin, ko̱ an ni xi títsꞌintjusan kuakuchjíko̱ho ra nga sꞌejinna Nti̱aṉá.
\v 19 Ji xi sꞌejihin nga nkuhú maha Nti̱a̱ná. Nda ṉkjún nꞌei. Tu̱nga jánindoo̱hó bꞌa̱ ta̱ tsꞌín sꞌejihi̱n, ko̱ bꞌatsénkjún.
\p
\v 20 Najmi nda tsꞌín tínꞌenkjíntakꞌuin. ¿A mjehi cha̱i̱ nga najmi basinko̱ná nga sꞌejinná Nti̱a̱ná tsa najmi tínꞌetjusaán xi nkú tsꞌín sꞌejinná?
\v 21 Ntje̱ cháná Abraham na̱xu̱ tsichu ma nginku̱n Nti̱a̱ná tu̱ nga̱tꞌaha̱ ni xi kitsꞌíntjusun nkꞌie nga kitsjá Isaac xi ntíhi̱ xi nkúhu chje̱ a̱sun na̱chan chje̱.
\p
\v 22 Tíyai nga nkuhú tsichu ma xi nkú tsꞌín kisꞌejihi̱n Abraham ko̱ xi nkú tsꞌín kitsꞌíntjusun ni xi kikꞌihi̱n. Xi nkú tsꞌín kisꞌejihi̱n, kui xi tsichu ma ndju̱ú nkꞌie nga kitsꞌíntjusun ni xi kikꞌihi̱n. Kuihí ni xuꞌbi̱ xi ꞌmihi̱ nga sꞌejinná.
\v 23 Bꞌa̱ tsꞌín tsitjusuhun ni xi tjítꞌa xu̱ju̱n éhe̱n Nti̱a̱ná: “Kisꞌejihi̱n Abraham Nti̱a̱ná ko̱ kui niu̱ xi kitsꞌínchjíhi̱ ra̱ Nti̱a̱ná nga Abraham xi nku nda̱ xi na̱xu̱.” Ko̱ bꞌa̱ kikꞌihi̱n Abraham nga kui xi nda̱ꞌamigo̱ho̱ Nti̱a̱ná.
\v 24 Tíyo nga na̱xu̱ bichú ma xu̱ta̱ nginku̱n Nti̱a̱ná tu̱ nga̱tꞌaha̱ ni xi tsꞌíntjusun ko̱ najmi tu̱ nku nga̱tꞌaha̱ nga sꞌejihi̱n Nti̱a̱ná.
\p
\v 25 Ko̱ bꞌa̱ ta̱ kamatꞌain na̱ská Rahab. Na̱xu̱ tsichu ma nginku̱n Nti̱a̱ná tu̱ nga̱tꞌaha̱ ni xi kitsꞌíntjusun, nkꞌie nga nda tsꞌín kitsꞌínkjáíhi̱n já Israel xi tsichuse ꞌmaha̱ nankihi̱ ko̱ kitsjáni̱yáha̱ nga xin kitsꞌínkji.
\v 26 Xi nkú tsꞌín najmi tíjña tíkꞌun yjonintehe̱ xu̱ta̱ nga ja bitju ani̱ma̱ha̱, bꞌa̱ ta̱ tsꞌín najmi tíjña tíkꞌun xi nkú tsꞌín sꞌejinná Nti̱a̱ná tsa najmi tínꞌetjusaán xi nkú tsꞌín sꞌejinná.
\c 3
\s Bꞌi̱ tsꞌín tsakúya Santiago̱ nkú kꞌuhu̱n njaá
\p
\v 1 Jun já ntsꞌe, najmi tu̱ nkjin xi ka̱ma já maestru̱ kasꞌe a̱jinnu̱u, a̱tꞌaha̱ yo nga ji̱n xi já maestru̱i̱ ndyjun nkini̱ ꞌyún ndjá cha̱se̱he̱ ni xi tínꞌei̱ nga xu̱ta̱ xingisoo̱.
\v 2 A̱tꞌaha̱ ngatenteé nꞌeé nkjin tíkjá ni xi najmi bꞌa̱ tjín. Tsa tjín xi najmi bitju tsꞌa ni xi najmi bꞌa̱ tjín, kui xi ja tsichu ma xi tjíhin nga ka̱ma ko̱ ta̱ maha̱ bꞌéchꞌoyjehe̱ yjoho̱ tu̱ mí nihí ni.
\p
\v 3 Nkꞌie nga bꞌeꞌaha̱á nꞌútsꞌa ndje̱ tu̱ xi ku̱i̱ntꞌéꞌéhenná, ndaha tsa chánka tu̱nga ntꞌéhéná.
\v 4 Ta̱ cha̱se̱ chu̱ba̱yoho̱o yábarku̱. Ndaha tsa i ko̱ ndaha tsa bꞌi̱ ngján ꞌyún nibá ntjo̱ xi kjenimanehe̱, tu̱nga já xi tsꞌínko̱hó yóo̱ fiko̱ xi má nga mjehe̱, a̱tꞌaha̱ yá i̱chí xi tje̱n tutsꞌin yábarku̱ xi bate ntóo̱ tsjáni̱yáko̱ho̱ ra̱.
\p
\v 5 Bꞌa̱ ta̱ tjín nga̱tꞌa tsꞌe̱ njaá. Kui xi nku tíkjá i̱chíhi̱ yjonintená, tu̱nga mahá ra̱ tsꞌín ni xi i. Cha̱se̱ chu̱ba̱yoho̱o xi nkú tsꞌín kutin i̱chí ndꞌí maha̱ bꞌéti nku jñáchá chánka.
\v 6 Xi nkú joyaha nku ndꞌí njaá. Tu̱ xí chꞌonkꞌuhún. Yjonintená tíjñajin tu̱nga tsꞌínkatsúnyjehéná. Nga̱kꞌi̱e̱n bꞌétꞌa ndꞌíhi̱ njaá, ko̱ kui xi bꞌétꞌa ndꞌí xki̱ ni̱stjin xi kichꞌaá.
\p
\v 7 Ngayje tíkjá chu̱ kjan xi tjín ma nꞌentꞌé, ni̱see̱, ye̱, chu̱ xi tjín a̱jin ntáchakꞌuu̱n. Kui xi xu̱ta̱ tsꞌínntꞌéhe̱.
\v 8 Tu̱nga ndahá nku najmi maha̱ tsꞌínntꞌé njaá. Kui xi nku ni chꞌonkꞌun xi najmi ma nꞌekꞌíéjña jyu. Xi nkúhu ye̱, kitsejíhi̱n ra̱ xán xi tsꞌínkꞌienná.
\p
\v 9 Njaá nꞌechjéén nga nꞌetsjoo̱hó Nti̱a̱ Na̱ꞌminá ko̱ ta̱ kuihi xi nꞌechjéén nga én xi najmi nda ꞌmihi̱í xu̱ta̱, xu̱ta̱ xi Nti̱a̱ná kitsꞌínnda nga kikꞌíéyaha̱ xi nkúhu kui.
\v 10 Ta̱ kuihi tsu̱ꞌbaá bitjuhu̱ én xi nꞌetsjoko̱ho̱ ra̱á Nti̱a̱ná, ko̱ ta̱ kuihi xi bitjuhu̱ én xi najmi nda ꞌmihi̱í xu̱ta̱. Jun já ntsꞌena̱, najmi tjíhin nga bꞌa̱ nꞌe̱é.
\p
\v 11 ¿A mahá ta̱ kuihi ntá ti̱xa̱ xi bitjuhu̱ ntánijua xi nda ta̱ bitjuhu̱ ntánijua xi sja?
\v 12 Jun já ntsꞌena̱, ¿a mahá tsjá tu olibo̱ nku yá higuera̱? ¿A mahá tsjá tu higo̱ nku nꞌú tuntsja̱jé? Bꞌa̱ ta̱ tsꞌín, ta̱ ndaha najmi ma bitjuhu̱ ntánijua xi nda nku ntá ti̱xa̱ má bitju ntánijua xi ntia.
\s Bꞌi̱ tsꞌín tsakúya Santiago̱ kju̱a̱nkjinkꞌun xi nibáha̱ ra̱ Nti̱a̱ná
\p
\v 13 ¿Yá xi na̱nka̱ tsꞌínnkjinkꞌun a̱jinnu̱u ko̱ mankjihi̱n ni xi tjín? Kixi̱ katjiko̱ yjoho̱ ko̱ katsꞌín ni xi nda nga ni̱ma̱kju̱a̱ katꞌasje yjoho̱, ko̱ bꞌa̱ tsꞌín katakúchjihi nga kju̱axi̱ nga kui xi na̱nka̱ tsꞌínnkjinkꞌun.
\v 14 Tu̱nga tsa kju̱a̱xintakꞌun tíjñajin ani̱ma̱nu̱u ko̱ mjenu̱u nkꞌa kuankíhu̱un xinki̱u, najmi tu̱ tsjo katumanu̱u, a̱tꞌaha̱ bꞌa̱ tsꞌín tíbiyunéhenu én xi na̱xu̱ tjín ni xi bakúya.
\v 15 Xi bꞌa̱ tsꞌín tsꞌínkjínkꞌun, najmi Nti̱a̱ná xi tíbakúyaha̱ xi nkú tsꞌín na̱nka̱ tsꞌínkjínkꞌun. A̱sunntee̱ ní tsꞌe̱, kju̱a̱nkjintakꞌuhu̱n xu̱ta̱ nibáha̱ ra̱, ko̱ nda̱nindoo̱ tsꞌe̱.
\v 16 A̱tꞌaha̱ xi má nga tjín kju̱a̱xintakꞌun ko̱ xi má nga nkꞌa fihi̱ xinkjín xu̱ta̱, najmi nkuhú yꞌa xinkjín ko̱ ngayje tíkjá ni chꞌonkꞌun ma.
\p
\v 17 Tu̱nga xu̱ta̱ xi Nti̱a̱ná tsjáha̱ nga na̱nka̱ tsꞌínnkjinkꞌun, kuihí xuꞌbo̱ xi je nginku̱n Nti̱a̱ná, tjíhi̱n kju̱a̱jyu, nda tjíyaha̱, najmi si, ni̱ma̱ tjíyaha̱ ko̱ ni xi nda tsꞌín, najmi ngabi tsꞌín, ko̱ na̱xu̱ tsꞌín.
\p
\v 18 Xu̱ta̱ xi bꞌéntje̱ kju̱a̱jyu, kju̱jyu sa̱kúhu̱. Kui nii̱ xi nga chjihi̱ nga na̱xu̱ tsꞌín xu̱ta̱.
\c 4
\s Bꞌi̱ tsꞌín tsakúya Santiago̱ mí nihi xi ngakjá tínꞌeé
\p
\v 1 ¿Má nibáha̱ ra̱ kju̱a̱chán ko̱ kju̱a̱sti xi sꞌe a̱jinnu̱u? ¿A najmi nga̱tꞌaha̱ ní ni xi fasihu̱un nibáha̱ ra̱? Kui niu̱ xi kjánko̱nu̱u.
\v 2 Mjenu̱u tsa mí nihi, tu̱nga najmi sakúhúnu̱u. Nꞌekꞌion ani̱ma̱ ko̱ ma xintakꞌun, tu̱nga najmi mahá bichú tje̱nnkiu ni xi mjenu̱u. Nꞌestiko̱o xinki̱u ko̱ bixkjanko̱o. Najmi sakúnu̱u ni xi mjenu̱u a̱tꞌaha̱ najmi Nti̱a̱ná binchuhu̱u.
\p
\v 3 Ko̱ nkꞌie nga binchu, najmi nꞌekjóho̱on a̱tꞌaha̱ ngakjá binchu. Ni tiya xi mjehénu̱u nꞌe̱tsjojíún, kui nihi xi binchu.
\v 4 ¡Jun xi najmi kixi̱ yjankiu Nti̱a̱ná! ¿A najmi yanú nga xi tjoho̱ a̱sunntee̱, kui xi kontra̱ha̱ Nti̱a̱ná? Tu̱ yáhá ni xi mjehe̱ nga ka̱ma nda̱migo̱ho̱ a̱sunntee̱, kui xi nda̱ kontra̱ha̱ Nti̱a̱ná títsꞌín ma yjoho̱.
\p
\v 5 Tjíhi̱n sin nga bꞌi̱ tsꞌín tjítꞌa: “Espiri̱tu̱hu̱ Nti̱a̱ná xi yꞌéjñajinná, kui xi ꞌyún mje tsꞌatihi̱ ñá.”
\v 6 Nti̱a̱ná tsjá saná kju̱a̱nda. Kui nga bꞌi̱ títsuhu xu̱ju̱n éhe̱n Nti̱a̱ná: “Nti̱a̱ná tsjáha̱ kju̱a̱nda xi ni̱ma̱kju̱a̱ ko̱ fi kontra̱ha̱ xi ngakꞌun.”
\p
\v 7 Kui nga ni̱ma̱kju̱a̱ nꞌe̱sjehenu yjonu̱u nginku̱n Nti̱a̱ná. Tankín kontro̱ho̱o nda̱nindoo̱, ko̱ kui xi ngju̱a̱i̱ tꞌaxínnu̱u.
\v 8 Tankínkꞌun tiñoho̱o Nti̱a̱ná, ko̱ Nti̱a̱ná ni̱bakꞌún tiñanu̱u. Jun xi nꞌo ngatitsun, je ti̱ntsu̱bo̱o. Jun xi jo jan tjíyanu̱u, nꞌo̱o nga katumaje ani̱ma̱nu̱u.
\v 9 Nꞌe̱kio yjonu̱u nga tje̱nnu̱u nginku̱n Nti̱a̱ná. Tankínchjꞌa̱ha̱ ru̱u ani̱ma̱nu̱u nga chꞌi̱ú. A̱ntehe̱ nga cha̱jnu̱u, tu̱ sahá chꞌi̱ú. A̱ntehe̱ nga tsjo kꞌúénu̱u, tu̱ sahá katꞌe nusin nusinnu̱u.
\v 10 Nꞌe̱ ni̱ma̱kju̱o yjonu̱u nginku̱n Nti̱a̱ná, ko̱ kui xi kja̱nínkꞌanu̱u.
\s Bꞌi̱ tsꞌín tsakúya Santiago̱ nkú tsꞌín cha̱se̱éhe̱ já ntsꞌe̱é
\p
\v 11 Jun já ntsꞌe, najmi tu̱ chubatitꞌón xinki̱u. Xi nchja̱titꞌain nda̱ ntsꞌe̱ ko̱ xi basehe̱ tsa nda ko̱ tsa najmi nda títsꞌín nda̱ ntsꞌe̱, kui xi tínchja̱titꞌain kju̱a̱téxumaha̱ Nti̱a̱ná ko̱ bꞌa̱ títsu nga najmi kixi̱ tínchja̱ kju̱a̱téxumoo̱. Tsa bꞌa̱ tíbixín nga najmi kixi̱ tínchja̱ kju̱a̱téxumoo̱, najmi tínuꞌyáꞌéíhi̱n. Ji ní xi chu̱ba̱ tíchasehé ri̱ tsa nda ko̱ tsa najmi nda títsu kju̱a̱téxumoo̱.
\v 12 Nku tutuhú maha xi kitsjá kju̱a̱téxumoo̱, kui xi basehe̱ tsa nda ko̱ tsa najmi nda ni xi tsꞌín xu̱ta̱. Kui xi maha̱ tsꞌínkꞌanki xu̱ta̱ ko̱ tsꞌín nga ndyja xu̱ta̱. ¿Tu̱nga yáha ji xi tíchaseihi̱ tsa nda ko̱ tsa najmi nda ni xi títsꞌín xu̱ta̱ xinki̱?
\s Bꞌi̱ tsꞌín tsakúya Santiago̱ nga a̱ya ntsja Nti̱a̱ná ku̱i̱ntsu̱ba̱yaá
\p
\v 13 Máha ndꞌa̱i̱ jun xi bꞌa̱ bixíún: “Ndꞌa̱i̱ ko̱ tsa ndyjunni̱ kuankíaán nanki xuꞌbo̱. Tsa nku nú ka̱maná yo̱. Chꞌa̱tseé ko̱ ku̱a̱teñaá ni ko̱ nꞌe̱ ngana̱saán to̱on.”
\v 14 Bꞌa̱ bixíún, tu̱nga najmi yanú ni xi ka̱matꞌon ndyjunni̱, tsa ku̱i̱ntsu̱ba̱ so. Jun xi nkú joyaha ni̱nti̱ xa̱ xi kutju ma chji ko̱ kutjuhú ndyjajihi̱nsén.
\p
\v 15 Tu̱ sa ní bꞌi̱ ti̱xíún: “Tsa mjehe̱ Nti̱a̱ná, katsjáná ni̱stjín ko̱ cha̱se̱é ni xi nꞌe̱é.”
\v 16 Tu̱nga ndꞌa̱i̱, nkꞌa tínꞌesjo yjonu̱u a̱jihi̱n kju̱a̱ngakꞌunnu̱u. Ngatentee̱ xi bꞌa̱ tsꞌín nkꞌa bꞌasje yjoho̱, kui xi najmi nda ni xi títsꞌín.
\v 17 Xi be xi nkú tsꞌín tsꞌi̱ín ni xi nda ko̱ najmi bꞌa̱ títsꞌín, kui xi títsꞌín ngatitsun.
\c 5
\s Bꞌi̱ tsꞌín tsakúya Santiago̱ ni xi tje̱he̱n ra̱ xu̱ta̱ nchi̱ná // xi najmi na̱xu̱ tsꞌínko̱ xu̱ta̱ musu̱hu̱
\p
\v 1 Jun xi ꞌminu̱u xu̱ta̱ nchi̱ná, chꞌi̱ú ko̱ chꞌi̱íbo nga̱tꞌaha̱ kju̱a̱ni̱ma̱ xi ni̱banenu̱u.
\v 2 Ja tsatsun kju̱a̱nchi̱nánu̱u. Ja jehe̱ xubíu̱ najyunnu̱u.
\v 3 Ja katju tsjíán to̱onsinenu̱u ko̱ to̱ontabanu̱u, ko̱ kui tsjío̱n xi kju̱a̱kúchji nga chꞌon kinꞌo ko̱ tsꞌi̱ínkje yjonintenu̱u xi nkú tsꞌín tsꞌínkje ndꞌíu̱ ni xi tjín. Jun xi tíchꞌatjó kju̱a̱nchi̱ná ni̱stjin ndꞌa̱i̱ xi ni̱stjin xi fekuhu.
\p
\v 4 Cha̱se̱ maru̱u. Najmi yꞌechjíhu̱u xu̱ta̱ musu̱ xi kitsꞌínxájin jñánu̱u, ko̱ to̱on xi najmi yꞌechjíhu̱u tíkjintáya nga tífi kontra̱nu̱u. Ni xi tíkjintáyaha já musu̱ xi jꞌáya ntje̱nu̱u, kui xi ja tsichu nginku̱n Nti̱a̱ná xi tjíhi̱n ngaꞌyún.
\v 5 Ni xi nkjún tsjo tsꞌín tintsu̱bo̱o e̱i̱ a̱sunntei̱ ko̱ najmi tíbꞌechꞌóho̱o yjonu̱u ngayjee̱ ni xi mjenu̱u. Tínꞌe chánko yjonu̱u, tu̱nga xi nkú joyahá ni turu̱ jun, xi tínꞌe chánka tu̱ xi nꞌe̱kꞌiehen.
\v 6 Bꞌa̱ tsixíún nga tjíhi̱n jé xi najmi tjíhi̱n jé ko̱ bꞌa̱ tsꞌín kinꞌekꞌiehennu. Najmi ka̱maha̱ tsasinko̱ yjoho̱.
\s Bꞌi̱ tsꞌín tsakúya Santiago̱ xi nkú tsꞌín chúyaha̱á Nda̱ Nti̱a̱ná
\p
\v 7 Tu̱nga máha jun, já ntsꞌena̱, nꞌe̱ chúkju̱a̱ sahanu santa nkúhu nga kjꞌu̱a̱í ngáha Nda̱ Nti̱a̱ná. Cha̱se̱ chu̱ba̱yoho̱o xu̱ta̱ xi tsꞌínxájin jñáha̱, xi nkú tsꞌín kuyáha̱ ntje̱ xi nda xi tsjá tꞌanankiu̱. Kuyá kꞌukꞌun santa nkúhu nga fꞌai tsꞌí xi bꞌa ni̱stjin chu̱tsꞌíu̱.
\v 8 Bꞌa̱ ta̱ tsꞌín jun chúya kꞌun kꞌuhu̱un nga ja ma kjꞌu̱a̱íhí Nda̱ Nti̱a̱ná ko̱ tjen ngaꞌyúhu̱un ani̱ma̱nu̱u, a̱tꞌaha̱ ja tíbichú tiña kui ni̱stjiu̱n.
\p
\v 9 Jun já ntsꞌe, najmi tu̱ kju̱a̱sti binchajoho̱on xinki̱u, a̱tꞌaha̱ tsa bꞌa̱ nꞌo̱o cha̱se̱he̱ kju̱a̱nu̱u. A̱tꞌaha̱ xi ku̱a̱se̱he̱ mí nihi xi tsꞌín xu̱ta̱ ja síjñasti a̱nkju̱o̱.
\p
\v 10 Jun já ntsꞌena̱, cha̱se̱ chu̱ba̱yoho̱o xi nkú tsꞌín un kikiehe̱ ko̱ xi nkú tsꞌín kitsꞌín chúkju̱a̱ já profeta̱ xi ngajoho̱ Nti̱a̱ná kinchja̱.
\v 11 “¡Á bꞌa̱ nda tjíhin tsꞌe̱!” Bꞌa̱ ꞌmihi̱í xi tsꞌín chúkju̱a̱ ni xi matꞌain. Ja kinuꞌyó xi nkú tsꞌín kitsꞌín chúkju̱a̱ Job ni xi kamatꞌain ko̱ yo xi nkú kitsꞌínko̱ho̱ Nti̱a̱ná a̱skahan. A̱tꞌaha̱ ꞌyún tjíhi̱n kju̱a̱ni̱ma̱takꞌun Nti̱a̱ná ko̱ ma ni̱ma̱ha̱ xu̱ta̱, kui nga bꞌa̱ tsꞌíhin.
\s Bꞌi̱ tsꞌín tsakúya Santiago̱ xi nkú ma nga chubaka̱á Nti̱a̱ná
\p
\v 12 Jun já ntsꞌena̱, kui ni xuꞌbi̱ xi ꞌyún tíbankinu̱u. Najmi tu̱ nungijiun ndji̱o̱jmi ján ni xi ku̱i̱xíún ko̱ ta̱ ndaha tꞌanankiu̱, ko̱ ta̱ ndaha najmi tu̱ nungijiun tu̱ mí nihí ni xi tjín. Tsa tíchasjaiyanu̱u, “joho̱n” ti̱xíún tsa bꞌa̱ tjín, ko̱ “najmi” ti̱xíún tsa najmi bꞌa̱ tjín. Bꞌa̱ nꞌo̱o tu̱ xi najmi tsꞌi̱ínnijéhe̱nu̱u Nti̱a̱ná.
\p
\v 13 Tsa tíjñajinnu̱u xi un tíbehe̱, kanchja̱ko̱ Nti̱a̱ná. Tsa tíjña nku xi tsjo tjíhi̱n, kase tsjoho̱ Nti̱a̱ná.
\v 14 Tsa tíjña nku xi kjijña un, kanchja̱ha̱ jácháha̱ xu̱ta̱ ni̱nku̱ tu̱ xi chu̱bantjaihi nga i̱ncha ku̱i̱nchja̱ko̱ jóo̱ Nti̱a̱ná ko̱ ngajoho̱ Nda̱ Nti̱a̱ná katꞌojnuhu̱ seti̱.
\v 15 Ko̱ nkꞌie nga kuinchja̱ko̱ Nti̱a̱ná xi sꞌejihi̱n, ka̱manda xi kjijña uu̱n ko̱ Nda̱ Nti̱a̱ná kjésíntje̱he̱n. Ko̱ tsa tje̱he̱n ngatitsun xi kjijña uu̱n, ka̱ma ndyjatꞌaha̱.
\v 16 Kui nga bꞌi̱ ngján tꞌinyaha̱ ru̱u xinki̱u ngatitsun xi tje̱nnu̱u, ko̱ bꞌi̱ ngján chu̱ba̱ntjo xinki̱u nga chu̱bako̱ Nti̱a̱ná tu̱ xi ka̱ma nkihi̱nu̱u. A̱tꞌaha̱ nkꞌie nga ndjá nchja̱ko̱ Nti̱a̱ná xi na̱xu̱ nginku̱n Nti̱a̱ná, ꞌyún tjíhi̱n ngaꞌyún ni xi nchja̱.
\p
\v 17 Nda̱ profeta̱ Elia̱, ta̱ xu̱ta̱ kama xi nkúhu ñá. Nkꞌie nga kinchja̱ko̱ Nti̱a̱ná ndjá bꞌa̱ kitsꞌín. Kui chu̱bo̱ tsanki nga najmi tu̱ kꞌu̱a̱ tsꞌí, ko̱ najmi kikꞌa tsꞌí a̱sun tꞌanankiu̱ jan nú masen.
\v 18 A̱skahan ta̱ kinchja̱ko̱ ngáha Nti̱a̱ná, ko̱ kikꞌa tsꞌí ko̱ kama chá ngáha ni a̱sun tꞌanankiu̱.
\p
\v 19 Jun já ntsꞌena̱, tsa tjín a̱jinnu̱u xi ngju̱a̱i̱ tꞌaxíhi̱n ni xi na̱xu̱ tjín ko̱ tsa a̱sꞌa̱i tjín xi tsꞌi̱ín nga kui nda̱ xuꞌbo̱ kꞌo̱óyakꞌun ngáha ni xi na̱xu̱ tjíu̱n,
\v 20 tsa bꞌa̱ ka̱ma, katumankjinnu̱u nga tu̱ yáhá ni xi tsꞌi̱ín nga kꞌu̱éjña ngáha nku xu̱ta̱ngatitsun ni̱yá chꞌonkꞌuhu̱n, kui xi tíbꞌasjejihi̱n ngabayoo̱ ko̱ títsꞌín nga nkjin ngatitsun nꞌe̱ndyjatꞌa.