\id 1PE Mazatec of Jalapa de Díaz
\h Xu̱ju̱n xi tjun kitsꞌínntu nda̱ postru̱ Pedro̱
\toc1 Xu̱ju̱n xi tjun kitsꞌínntu nda̱ postru̱ Pedro̱
\mt Xu̱ju̱n xi tjun kitsꞌínntu nda̱ postru̱ Pedro̱
\c 1
\s Bꞌi̱ tsꞌín kikjaniñaha̱ Pedro̱ xu̱ta̱ ni̱nku̱
\p
\v 1 An Pedro̱, an nda̱ postru̱hu̱ Jesucristo̱ títsꞌinkjínu̱u xu̱ju̱i̱n jun xi jꞌájinnu̱u Nti̱a̱ná. Jun xi kindzjoyo a̱nte Ponto̱ nga tinimasún, ko̱ a̱nte Galaci̱a̱ ya, a̱nte Capadoci̱a̱, a̱nte Asi̱a̱ ko̱ a̱nte Bitini̱a̱.
\v 2 Kikie títjunnu̱u Nti̱a̱ Na̱ꞌminá, kui nga jꞌájihi̱nnu̱u ko̱ Espiri̱tu̱hu̱ kitsꞌín jenu̱u, tu̱ xi ku̱i̱núꞌyáꞌéhe̱n ru̱u Jesucristo̱ ko̱ tu̱ xi tu̱ nga̱tꞌaha̱ jníhi̱ Jesucristo̱ kju̱átsꞌe̱he̱nu̱u Nti̱a̱ná.
\p Kasꞌe ṉkjúnnu̱u kju̱a̱nda ko̱ kju̱a̱jyu.
\s Bꞌi̱ tsꞌín tsakúya Pedro̱ ni xi ñá tje̱he̱nná nga ku̱i̱chú ni̱stjin xi fekuu̱
\p
\v 3 Kanꞌetsjoho̱ Nti̱a̱ná xi Nti̱a̱ha̱ ko̱ Na̱ꞌmihi̱ Nda̱ Nti̱a̱ná Jesucristo̱. Nga̱tꞌaha̱ kju̱a̱ni̱ma̱takꞌun chánkaha̱ kitsꞌíntsin tse̱tse̱ ngáhaná nkꞌie nga kitsꞌínkjꞌáíya ngáha̱ ra̱ Jesucristo̱ a̱jihi̱n xu̱ta̱kꞌie̱n. Kui nga tíchuyáhaná nga ku̱i̱ntsu̱ba̱ tíkꞌaán ko̱ ñá
\v 4 ko̱ nga nꞌe̱kjáíhi̱ín ni xi tsjáná, ni xi najmi maha̱ batsun ko̱ najmi ma chu̱ntí ko̱ najmi maha̱ ꞌmeya, ni xi tjítjoho̱ ndji̱o̱jmi ján ngandanu̱u.
\v 5 Ngaꞌyúhu̱n Nti̱a̱ná tíkunko̱ho̱nu̱u tu̱ nga̱tꞌaha̱ nga sꞌejinnu̱u. A̱tꞌaha̱ tjíndaha̱ yjoho̱ Nti̱a̱ná nga ku̱a̱kúchji xi nkú tsꞌín tsꞌi̱ínkꞌanki xu̱ta̱ xi tsꞌe̱ ni̱stjin xi fekuu̱.
\p
\v 6 Kui kju̱a̱ha nga kitsejíhi̱nnu̱u kju̱a̱tsjo, ndaha tsa chuba ni̱stjin tjíhin nga nꞌe̱ nibánenu̱u nkjin tíkjá ni xi ku̱i̱tjájiun.
\v 7 Kui xi ku̱a̱kúchji yáha jun nga kju̱axi̱. A̱tꞌaha̱ nga sꞌejinnu̱u, kui xi ꞌyún chjí saha̱ ra̱ nga to̱onsinee̱. Ndaha tsa maha̱ batsun to̱onsinee̱, tu̱nga chasehé ra̱ tu̱ xi sꞌejña chjihi tsa kui kju̱axi̱. Ko̱ nkꞌie nga sꞌe̱jña chji xi nkú tsꞌín sꞌejin kju̱axi̱nu̱u, nda tsꞌín chu̱bayanénu̱u ko̱ sa̱kúnu̱u kju̱a̱chánka ko̱ nda kꞌúínnu̱u ni̱stjin nga kjꞌu̱a̱íkúchji yjoho̱ Jesucristo̱.
\p
\v 8 Tjonu̱u Jesucristo̱, ndaha tsa najmi yo nkú tjín. Ko̱ ndaha tsa najmi tíyo ndꞌa̱i̱, tu̱nga sꞌejihínnu̱u ko̱ tjínnu̱u kju̱a̱tsjo xi tjíhi̱n kju̱a̱chánka, xi najmi yaá xi nkú tsꞌín bixíyaá.
\v 9 Tjínnu̱u kui nii̱ a̱tꞌaha̱ tísakúnu̱u nga tínꞌekꞌankinu̱u, kui xi nibáha̱ ra̱ nga̱tꞌaha̱ nga sꞌejinnu̱u.
\p
\v 10 Já profeta̱ xi kisꞌe ni̱stjin nkꞌie, xi kitsúya títjun kju̱a̱nda xi sa̱kúnu̱u, kui xi kitsꞌínnkjinkꞌun nga ka̱ma chu̱ba̱yaha̱ xi nkú tsꞌín kꞌu̱a̱nkihi xu̱ta̱, a̱tꞌaha̱ mjehe̱ sku̱e̱ kui nii̱.
\v 11 Kama mjehe̱ nga i̱ncha sku̱e̱ yá xu̱ta̱ha ko̱ mí ni̱stjihin xi yꞌéjña chji Espiri̱tu̱hu̱ Cristo̱ xi yꞌejñajihi̱n já profeta̱ nga kitsúya títjuhu̱n kju̱a̱ꞌun xi tjíhin nga sku̱e̱ Cristo̱ ko̱ nga a̱skahan sꞌe̱ kju̱a̱chánka.
\v 12 Tu̱nga Nti̱a̱náhá tsakúchjihi̱ já profeta̱ xuꞌbo̱ nga ni xi tíi̱ncha tsuya najmi kui ka̱matsꞌe̱, nga ní ngandanu̱u bꞌa̱ kitsúhu. Kui niu̱ xi ta̱ kitsúyanu̱u já xi yꞌéni̱jmínu̱u én nda tsuhu̱ Jesucristo̱. Ngaꞌyúhu̱n Espiri̱tu̱ xi kinꞌe nibáha ndji̱o̱jmi ján yꞌéni̱jmíhi̱nu̱u. Ko̱ ta̱ ntítsjee̱ mje ṉkjúhu̱n nga sku̱e̱ nkú tjíhi̱n ra̱ ni xuꞌbi̱.
\s Bꞌi̱ tsꞌín tsakúya Pedro̱ nga ti̱ntsu̱ba̱ ndaá a̱tꞌaha̱ Nti̱a̱ná ja tsꞌe̱ná
\p
\v 13 Kui bꞌa̱ maha, cha̱se̱ sisihi̱n ru̱u xi nkú nꞌo̱o. Nda nꞌe̱nkjíntakꞌun ko̱ chúya kꞌunkꞌuhu̱un kju̱a̱nda xi kjꞌu̱a̱ítsjánu̱u Jesucristo̱ ni̱stjin nga ku̱a̱kúchji yjoho̱.
\v 14 Bꞌa̱ nꞌo̱o xi nkú tsꞌín ntí xi ntꞌéꞌén. Najmi ta̱ nꞌehenu xi nkú tsꞌín kinchja̱ ani̱ma̱nu̱u ni̱stjin nkꞌie, nkꞌie nga najmi kje̱e yo Nti̱a̱ná.
\v 15 Tsje katumo nginku̱n Nti̱a̱ná, xi nkú tsꞌín tsje xi jꞌájinnu̱u.
\v 16 A̱tꞌaha̱ bꞌi̱ tsꞌín tjítꞌa éhe̱n Nti̱a̱ná: “Tsje katumo, a̱tꞌaha̱ tsjená.”
\p
\v 17 Xihi̱ “Na̱ꞌmihí” bixíhu̱un xi ngúsuhún basehe̱ tsa nda ko̱ tsa najmi nda ni xi tsꞌín nga nkúnkú xu̱ta̱, kui nga kasꞌenu̱u kju̱a̱binkjuhu̱n xi nkú tsꞌín kuankínko̱o yjonu̱u nkꞌie nga ti̱nimasún so e̱i̱ a̱sunntei̱.
\v 18 Yo nga kisꞌechjíntjainu̱u tu̱ xi ka̱ma nda̱íhi̱nu̱u nga chu̱ba̱ tintsu̱ba̱nú. Bꞌa̱ tsꞌín tintsu̱bo̱o nkꞌie a̱tꞌaha̱ kui nihi xi yꞌéjñanu̱u ntje̱ chánu̱u. Najmi to̱onsine ko̱ tsa to̱ontaba kinꞌechjén nga kisꞌechjíntjainu̱u, ni xi maha̱ batsun.
\v 19 Jníhi̱ ní Cristo̱ kinꞌechjén, kui xi ꞌyún chjí. Xi nkúhu nku chu̱tsa̱nka̱ kama Cristo̱, chu̱tsa̱nka̱ xi najmi chumi nihi xi kꞌuhu̱n ko̱ xi najmi uhu̱n.
\p
\v 20 Kintehe̱ ni nga kamanda a̱sunntee̱ kisꞌenda títjun ni xi tsꞌi̱ín Cristo̱, ko̱ ni̱stjin feku xi kichꞌaá ndꞌa̱i̱ jꞌaikúchji yjoho̱ ngandanu̱u.
\v 21 Nga̱tꞌaha̱ Cristo̱ sꞌejihi̱nnu̱u Nti̱a̱ná, kui xi kitsꞌínkjꞌáíya ngáha̱ ra̱ Cristo̱ ngabayoo̱ ko̱ kitsjáha̱ kju̱a̱chánka. Kui nga tínꞌe sꞌejihinnu ko̱ tíma ꞌyún takꞌuhunnu Nti̱a̱ná.
\p
\v 22 Ndꞌa̱i̱ ni̱ nga ja kamaje ani̱ma̱nu̱u a̱tꞌaha̱ kinuꞌyáꞌóho̱on én xi na̱xu̱ tjín ko̱ nga tu̱ xí ndahá tsꞌín tjíyanu̱u nga nꞌe̱tjó xu̱ta̱ ni̱nku̱, kui nga ngayjee̱ ani̱ma̱nu̱u nꞌe̱tjóhonu xinki̱u.
\v 23 A̱tꞌaha̱ ja kitsin tse̱tse̱ ngáhanu. Najmi kitsiun xi nkú tsꞌín tsin xu̱ta̱ xi maha̱ ꞌme. Éhe̱n ní Nti̱a̱ná kitsꞌíntsin tse̱tse̱ ngáha̱nu̱u. Kui xi fi ndju. Najmi ka̱maha̱ kfe̱.
\p
\v 24 A̱tꞌaha̱ bꞌi̱ tsꞌín tjítꞌa xu̱ju̱n éhe̱n Nti̱a̱ná:
\q Ngayjee̱ xu̱ta̱, xi nkú joyaha jñá xi tjín.
\q Ko̱ ngayjee̱ kju̱a̱chánkaha̱ xu̱ta̱,
\q xi nkú joyaha naxúhu̱ jñóo̱.
\q Xi jñóo̱ ko̱ jne naxúu̱,
\q
\v 25 tu̱nga éhe̱n Nti̱a̱ná santaha tu̱ nkjéhé ni ngju̱a̱i̱ ndju.
\m Kui ée̱n, kui én nda tsu xi ja kisꞌeni̱jmí a̱jinnu̱u.
\c 2
\p
\v 1 Kui bꞌa̱ maha, nꞌe̱ tꞌaxíhinnu ngayje kju̱a̱chꞌonkꞌun, ngayje ni tsankꞌá, kju̱a̱joho̱nkjin, kju̱a̱xintakꞌun ko̱ ngayje tíkjá kju̱a̱chubatitꞌain.
\v 2 Katumo xi nkú joyaha ntínta xi mje ṉkjúhu̱n ntáchiki. Bꞌa̱ tsꞌín katuma mjenu̱u én xi ndoo̱. Kui xi tsjá ngaꞌyúhu̱n kju̱a̱nkjintakꞌunnu̱u, tu̱ xi bꞌa̱ tsꞌín sa̱áhanu santaha nkúhu nga kju̱átsꞌe̱ sínnu̱u Nti̱a̱ná.
\v 3 Xihi̱ jahá kichjutꞌo ngandaha̱ Nda̱ Nti̱a̱ná.
\s Bꞌi̱ tsꞌín tsakúya Pedro̱ nga nku ndi̱o̱ kꞌaku̱ kitsꞌín ma Jesucristo̱ nga yꞌéjña chu̱ba̱ya
\p
\v 4 Nibákꞌun tiñoho̱o Nda̱ Nti̱a̱ná, kui xi nkú joyaha nku ndji̱o̱ xi tíjña tíkꞌun. Kikjaníya xu̱ta̱ ndji̱o̱ xuꞌbo̱, tu̱nga Nti̱a̱náhá jꞌájin ndji̱o̱ ko̱ nginku̱n Nti̱a̱ná ꞌyún chjíhi̱ ra̱.
\v 5 Jun xi nkú joyaha ndji̱o̱ xi tjíntu tíkꞌun, xi kinꞌendako̱ho nku ni̱nku̱ xi najmi a̱sunntee̱ yꞌaha̱ ra̱. Kinꞌe manu̱u já na̱ꞌmi jehe̱ Nti̱a̱ná xi tsjáha̱ chje̱ Jesucristo̱, chje̱ xi nkꞌa ján tje̱he̱n ra̱. A̱ Nti̱a̱náhá tíꞌbo̱ho̱ kui chje̱ nga bꞌa̱ tínꞌo, kui chje̱ xi sasíhi̱n Nti̱a̱ná.
\p
\v 6 A̱tꞌaha̱ bꞌi̱ tsꞌín tjítꞌa xu̱ju̱n éhe̱n Nti̱a̱ná:
\q An kꞌuejñá nanki Sion nku ndji̱o̱ kꞌaku̱,
\q xi jꞌajián ko̱ xi ꞌyún chjí.
\q Ndaha̱chí najmi sa̱kúhu̱ kju̱a̱suba
\q xu̱ta̱ xi sꞌe̱jihi̱n ndji̱o̱.
\m
\v 7 Nga̱tꞌa tsꞌa̱jun xi sꞌejinnu̱u Nda̱ Nti̱a̱ná, chjíhi̱ ra̱ kui ndji̱o̱. Tu̱nga xi najmi sꞌejihi̱n, bitjusun má nga bꞌi̱ tsꞌín tjítꞌa xu̱ju̱n éhe̱n Nti̱a̱ná:
\q Ndji̱o̱ xi kikjaníya já chji̱ne̱xjóo̱,
\q kui xi ja jꞌai ma ndji̱o̱ kꞌaku̱.
\m
\v 8 Ko̱ bꞌi̱ ta̱ títsu ya:
\q Tsichu ma nku ndji̱o̱ xi tsꞌín saténki xu̱ta̱,
\q nku na̱xi̱ xi tsꞌínxuntuhu̱.
\m Saténki xu̱ta̱ xuꞌbo̱ nga̱tꞌaha̱ ée̱n, a̱tꞌaha̱ najmi ntꞌéꞌéhe̱n ée̱n. Bꞌa̱ maha̱ xu̱ta̱ xuꞌbo̱ a̱tꞌaha̱ ja bꞌa̱ tsꞌín tíjña nga bꞌa̱ ka̱maha̱.
\p
\v 9 Tu̱nga máha jun, jun xi xu̱ta̱ xi kichjꞌajin, jun já na̱ꞌmi xi tsꞌínxátꞌaha̱ xi batéxumaha̱ nkꞌa ján, tsjenú jun xi xu̱ta̱ na̱xi̱nantáha̱ Nti̱a̱ná, xu̱ta̱ xi ja tsichu ma tsꞌe̱ Nti̱a̱ná. Bꞌa̱ kinꞌe manu̱u tu̱ xi ku̱i̱xínyahanu xi nkú tsꞌín chánka xi jꞌájinnu̱u. A̱tꞌaha̱ Nti̱a̱ná jꞌájinnu̱u nga ku̱i̱tjujiun má jyuu̱n ko̱ nga ku̱i̱tjásꞌe̱njiun má nga tsꞌín ndzjen kju̱a̱chánkaha̱.
\v 10 Ni̱stjin nkꞌie, najmi xu̱ta̱ na̱xi̱nantá kikꞌinnu̱u, tu̱nga ndꞌa̱i̱ ja tsichumo xu̱ta̱ na̱xi̱nantáha̱ Nti̱a̱ná. Ko̱ ni̱stjin nkꞌie najmi kichase ni̱ma̱nu̱u, tu̱nga ndꞌa̱i̱ ja tíchase ni̱ma̱nu̱u.
\s Bꞌi̱ tsꞌín tsakúya Pedro̱ xi nkú tsꞌín tjíhin nga kuankíka̱á yjoná a̱jihi̱n xu̱ta̱ xi tjín a̱sunntei̱
\p
\v 11 Tjona jun, já ntsꞌe. Tíbankinu̱u nga tꞌechꞌóho̱o yjonu̱u xi nkú tsꞌín mjehe̱ ani̱ma̱nu̱u. A̱tꞌaha̱ kui nii̱, kui xi tífi kontra̱nu̱u. Yo nga xin nankinu̱u ko̱ tu̱ tínimasúnnú e̱i̱ a̱sunntei̱.
\v 12 Tu̱ nku kixi̱hí tankínko̱o yjonu̱u a̱jihi̱n xu̱ta̱ xi najmi be Nti̱a̱ná. Bꞌa̱ nꞌo̱o ndaha tsa bꞌa̱ i̱ncha ku̱i̱tsu̱ nga najmi nda tínꞌo. Tu̱nga i̱ncha sku̱e̱hé ni nda xi nꞌo̱o ko̱ tsꞌi̱íntsjoho̱ Nti̱a̱ná ni̱stjin nga ku̱a̱nki kuenta̱.
\p
\v 13 Nga̱tꞌaha̱ nga Nda̱ Nti̱a̱ná tsꞌe̱nu̱u, kui nga cha̱nkjúhunnu ngayjee̱ já xi tjíhi̱n xá e̱i̱ a̱sunntei̱. Bꞌa̱ nꞌo̱o nginku̱n nda̱ títjun kꞌaku̱ Roma̱
\v 14 ko̱ bꞌa̱ nꞌo̱o nginku̱n já kꞌaku̱ xi bꞌéxá nda̱ títjun kꞌaku̱ nga tsꞌínnijéhe̱ xi chꞌon tsꞌín ko̱ nga kja̱nínkꞌa xi nda tsꞌín.
\v 15 A̱tꞌaha̱ mjehe̱ Nti̱a̱ná nga nꞌo̱o ni xi nda. Bꞌa̱ tsꞌín kꞌúéchjahanu tsꞌa xu̱ta̱ xi najmi be Nti̱a̱ná ko̱ najmi mankjihi̱n ni xi tsꞌe̱.
\p
\v 16 Nda̱ínu̱u yjonu̱u nginku̱n Nti̱a̱ná, tu̱nga najmi tu̱ nꞌechjénnú kju̱a̱nda̱ínu̱u tsa kꞌu̱a̱i̱ntoho̱o yjonu̱u nga nꞌo̱o ni xi najmi nda. Tu̱ sa ní ti̱ntsu̱bo̱o xi nkú tsꞌín bꞌentu xu̱ta̱ xi tsꞌínxátꞌaha̱ Nti̱a̱ná.
\v 17 Cha̱nkjún ngayjee̱ xu̱ta̱. Nꞌe̱tjó xi ta̱ Ntíhi̱ Nti̱a̱ná. Cha̱nkjún Nti̱a̱ná. Nu̱úꞌyáꞌóho̱on nda̱ títjun kꞌaku̱ Roma̱.
\s Bꞌi̱ tsꞌín títsuya Pedro̱ ni xi tjíhin nga tsꞌi̱ín xu̱ta̱ musu̱ xi kichꞌatse
\p
\v 18 Jun xu̱ta̱ musu̱ xi kichꞌatsenu̱u, cha̱nkjún já nti̱a̱nu̱u ko̱ nu̱úꞌyáꞌóho̱on, najmi tu̱ suba xi nda tjíyaha̱ ko̱ xi ma ni̱ma̱ha̱ jun xi bꞌa̱ nꞌe̱ko̱o. Bꞌa̱ ní ta̱ nꞌe̱ko̱o xi kjan tsꞌínko̱nu̱u.
\v 19 A̱tꞌaha̱ nda nginku̱n Nti̱a̱ná nga tsꞌi̱ín chúkju̱a̱ jámu̱su̱ kju̱a̱ꞌun xi tífꞌajin, ndaha tsa najmi tjíhin nga kjꞌu̱a̱jin niu̱ kai, tu̱nga tsꞌín chúkju̱a̱há a̱tꞌaha̱ ja kitsjáha̱ yjoho̱ Nti̱a̱ná.
\v 20 Tu̱nga tsa chꞌon tínꞌo ko̱ tsa a̱sꞌa̱i títsꞌínꞌunnu̱u já nti̱a̱nu̱u ko̱ tínꞌechjúkju̱o, ¿mí ni chánkaha xi tínꞌo ma? Tu̱nga tsa nda tínꞌo ko̱ a̱sꞌa̱i tínꞌe chúkju̱o kju̱a̱ꞌun xi tíbitjajíún, kuihí ni xuꞌbi̱ xi nda nginku̱n Nti̱a̱ná.
\p
\v 21 Jꞌájinnu̱u Nti̱a̱ná nga nꞌo̱o ni xi nda ko̱ nga nꞌe̱ chúkju̱o ni xi tu̱ kju̱a̱ndahá ku̱i̱tjájiun, xi nkú ta̱ kitsꞌín Cristo̱ nga un kikiehe̱ ngandanu̱u. Yꞌéjña chu̱ba̱yanu̱u, tu̱ xi bꞌa̱ ta̱ nꞌe̱henu.
\v 22 Najmi kitsꞌín ngatitsun ko̱ najmi kikꞌana̱cha̱.
\v 23 Nkꞌie nga chꞌon kikꞌihi̱n, najmi chꞌon tsꞌín kitsꞌínkꞌóya. Nkꞌie nga un kikiehe̱, najmi bꞌa̱ kitsú nga kꞌu̱a̱sje chjí ni xi tínꞌehe̱. Tu̱ sa ní a̱ya ntsja Nti̱a̱ná yꞌéjñaya yjoho̱, a̱tꞌaha̱ kui xi kixi̱ tsꞌín kju̱a̱.
\p
\v 24 Kui kikjin kikꞌanji ngatitsunná nga kisꞌetꞌa kruu̱. Bꞌa̱ kitsꞌín tu̱ xi ku̱a̱yáha̱ ra̱á ngatitsuu̱n ko̱ na̱xu̱ nꞌe̱é nga ku̱i̱ntsu̱ba̱á. Ko̱ tu̱ nga̱tꞌaha̱ nga kinꞌeꞌuhu̱n Cristo̱, kui nga kinꞌenkihi̱nu̱u.
\v 25 Ni̱stjin nkꞌie xi nkú joyaha chu̱tsa̱nka̱ xi ngji tꞌaxín kamo, tu̱nga ndꞌa̱i̱ ja kikꞌóyakꞌun ngáhanu Nda̱ bastuu̱, kui xi kunnu̱u.
\c 3
\s Bꞌi̱ tsꞌín títsuya Pedro̱ xi nkú tsꞌín tjíhin nga // kꞌúéntuko̱ xinkjín xu̱ta̱
\p
\v 1 Ko̱ jun xi tíꞌminu̱u jminchjín, cha̱nkjún xꞌi̱nnu̱u. Bꞌa̱ tsꞌín ni xi nꞌe̱henu tsꞌi̱íhin nga sꞌe̱jihi̱n Nti̱a̱ná xꞌi̱nnu̱u. Najmi ni xi chu̱bo tsꞌi̱ín nga sꞌe̱jihi̱n xꞌi̱nnu̱u.
\v 2 Sku̱e̱ xi nkú tsꞌín na̱xu̱ tíbankínko̱o yjonu̱u ko̱ nga tíyankjún Nti̱a̱ná.
\p
\v 3 Najmi tu̱ tsjo nꞌekꞌíésunkꞌo yjonu̱u, tsa nihi xi nkjún tsꞌín kꞌúéndo ntsja̱nu̱u ko̱ tsa nihi xi nkjún tsꞌín ngjúátꞌo to̱onsine ko̱ tsa najyun xi ꞌyún chjí ndyjo̱o.
\v 4 Tu̱ sa ní a̱jin ani̱ma̱nu̱u kasꞌe kju̱a̱tsjotjín xi najmi maha̱ feya, kui xi tsuhu̱ ra̱ nga nda kasꞌeyanu̱u ko̱ najmi stinta. Kui ni xuꞌbi̱ xi ꞌyún chjíhi̱ ra̱ nginku̱n Nti̱a̱ná.
\p
\v 5 Ni̱stjin nkꞌie bꞌa̱ tsꞌín yꞌénda yjoho̱ jminchjín je xi kisꞌe. Kui xi kama ꞌyún takꞌun Nti̱a̱ná ko̱ i̱ncha kikienkjún xꞌi̱hi̱n.
\v 6 Xi nkúhu Sara̱, kui xi kintꞌéꞌéhe̱n Abraham ko̱ “Chá Nti̱a̱na̱” kitsúhu̱. Tsa ni xi nda nꞌe̱henu ko̱ najmi ku̱i̱nkjún ni xi ka̱matꞌon, jun xi ntíhi̱ Sara̱ bꞌa̱.
\p
\v 7 Ko̱ jun xi tíꞌminu̱u jáxꞌi̱n, nꞌe̱nkjínkꞌun sisiun xi nkú tsꞌín ku̱i̱ntsu̱ba̱ko̱o chju̱únnu̱u. Cha̱nkjún a̱tꞌaha̱ najmi ndjá tjíyaha̱ xi nkúhu jun, ko̱ a̱tꞌaha̱ jun ko̱ kui ta̱ ñja nꞌe̱kjáínko̱ho̱o kju̱a̱ndaha̱ Nti̱a̱ná nga ku̱i̱ntsu̱ba̱ tíkꞌun. Bꞌa̱ tsꞌín ti̱ntsu̱ba̱ko̱o tu̱ xi najmi chumi nihi xi kꞌu̱échjaha̱ ra̱ nga chu̱bako̱o Nti̱a̱ná.
\s Bꞌi̱ tsꞌín tsakúya Pedro̱ xi nkú tsꞌín tjíhin nga ku̱i̱ntsu̱ba̱á
\p
\v 8 Ko̱ ni xi fekuhu, nda tsꞌín ti̱ntsu̱ba̱ko̱o xinki̱u. Bꞌi̱ ngján cha̱se̱ ni̱mo̱ho̱o ko̱ nꞌe̱tjó xinki̱u a̱tꞌaha̱ ntsꞌo mahanu. Nꞌe̱ꞌyún takꞌun xinki̱u ko̱ ni̱ma̱kju̱a̱ katumo.
\v 9 Najmi tu̱ nꞌesꞌechjíú tsa chꞌon tínꞌenu̱u ko̱ najmi tu̱ én chꞌon tsu nꞌekꞌóyo tsa chꞌon tíꞌminu̱u. Tu̱ sa ní chu̱bantjó nginku̱n Nti̱a̱ná xi nkú títsꞌínnu̱u, a̱tꞌaha̱ tu̱ xi nda tsꞌi̱ínko̱honu Nti̱a̱ná, kui nga kichjꞌajihi̱nnu̱u.
\p
\v 10 A̱tꞌaha̱ bꞌi̱ títsu xu̱ju̱n éhe̱n Nti̱a̱ná:
\q Xi mjehe̱ tsꞌi̱íntjo ni̱stjin xi yꞌa,
\q ko̱ mjehe̱ nga tsjo tsꞌín kjꞌu̱a̱ha̱ ni̱stjin,
\q kui xi katꞌéchꞌoho̱ nja̱i̱ én chꞌon tsu,
\q ko̱ najmi tu̱ katitju tsꞌa én tsankꞌá.
\q
\v 11 Katsꞌín tꞌaxíhi̱n yjoho̱ kju̱a̱chꞌonkꞌuu̱n,
\q ko̱ katsꞌín ni xi nda.
\q Katangisjai kju̱a̱jyu ko̱ katꞌejñajin.
\q
\v 12 A̱tꞌaha̱ Nti̱a̱ná basehe̱ xu̱ta̱ xi na̱xu̱ tsꞌín,
\q ko̱ nda basínñjuhu̱ ni xi ꞌmihi̱ nga chubako̱,
\q tu̱nga fi kontra̱há ra̱ xi chꞌon tsꞌín.
\s Bꞌi̱ tsꞌín tsakúya Pedro̱ xi nkú tsꞌín sꞌe̱yaná tsa kju̱a̱ni̱ma̱ ku̱i̱tjájián
\p
\v 13 ¿Yá xi chꞌon tsꞌi̱ínnu̱u tsa ngayjehe kꞌun nꞌo̱o ni xi nda?
\v 14 ¡Á bꞌa̱ nda tjíhin tsꞌa̱jun tsa nkꞌie nga tínꞌo ni xi na̱xu̱ tjín tíbitjajíún kju̱a̱ni̱ma̱! Najmi tu̱ binkjun xu̱ta̱ ko̱ najmi tu̱ nkjún manu̱u.
\v 15 Tu̱ sa ní cha̱nkjún Cristo̱ a̱jin ani̱ma̱nu̱u, a̱tꞌaha̱ kui xi Nda̱ Nti̱a̱nu̱u maha. Ko̱ ti̱ntsu̱ba̱ ndo nga ka̱manu̱u kꞌúínyoho̱o xi ngju̱ásjaiyanu̱u nga̱tꞌa tsꞌe̱ kju̱a̱nda xi tíchuyóho̱o.
\p
\v 16 Tu̱nga ni̱ma̱kju̱a̱há nꞌe̱sjo yjonu̱u ko̱ cha̱nkjún jóo̱ nga bꞌa̱ nꞌo̱o. Najmi tu̱ chumi ni chu̱ba̱ nꞌekꞌanjiu yjonu̱u, tu̱ xi nkꞌie nga chu̱bayanéhe̱nu̱u kju̱a̱suba kasakúhu̱ ra̱ xi tínchja̱titꞌainnu̱u nga̱tꞌaha̱ xi nkú tsꞌín na̱xu̱ tíbankínko̱o yjonu̱u nga yjankiu Cristo̱.
\v 17 Tsa ni xi kju̱a̱ni̱ma̱ tíbitjajíhinnu, bꞌa̱ katuma tsa Nti̱a̱ná bꞌa̱ tsꞌín mjehe̱. Tu̱nga nga̱tꞌaha̱ ní nga nda tínꞌo bꞌa̱ katumanu̱u, najmi nga̱tꞌaha̱ nga chꞌon tínꞌo.
\p
\v 18 A̱tꞌaha̱ kui nihi xi ta̱ jꞌajin Cristo̱. Nkuhú ni̱yá kꞌien tu̱ xi kitsꞌínndyjajnuhu ngatitsuhu̱n xu̱ta̱. Xi na̱xu̱ nginku̱n Nti̱a̱ná un kikiehe̱ ngandaha̱ xi najmi na̱xu̱ nginku̱n Nti̱a̱ná. Bꞌa̱ kamaha̱ tu̱ xi ngjiko̱honá nginku̱n Nti̱a̱ná. Kui xi nga̱tꞌa tsꞌe̱ yjonintehe̱ kinꞌekꞌien tu̱nga nga̱tꞌa tsꞌe̱hé espiri̱tu̱hu̱ kinꞌekjꞌáíyaha̱.
\v 19 Ko̱ espiri̱tu̱ nkꞌie nga ngjikꞌíéni̱jmíhi̱ xi ja kꞌien xi kjintuyáꞌyún,
\v 20 xi najmi kintꞌéꞌén ni̱stjin nga yꞌejña Noe nkꞌie, kui ni̱stjiu̱n nga tsakúchji kju̱a̱tsentaha̱ Nti̱a̱ná nga kikuyá tsa ngju̱a̱i̱kjꞌáha̱ ra̱ ani̱ma̱ha̱ xu̱ta̱ nkꞌie nga títsꞌínnda tsutsu chánkoo̱ Noe. Jin mahá xu̱ta̱ xi kitsꞌínkꞌankihi̱ ntóo̱ nkꞌie nga i̱ncha jasꞌen tsutsu chánkoo̱.
\p
\v 21 Ntóo̱ yꞌéjña chji títjun xi nkú tsꞌín kitsꞌínkꞌankinu̱u ntánijuo̱ nkꞌie nga saténtáá. Tu̱nga nkꞌie nga saténtáná, nꞌekꞌankiná a̱tꞌaha̱ jꞌáíyaha̱ Jesucristo̱ ngabayoo̱. Najmi saténtáá tsa tu̱ xi chjuxíhin kju̱a̱chu̱ntíhi̱ yjonintená. Bꞌa̱ ní nꞌená tu̱ xi tíbinchisjáíhiná nga je sꞌe̱yahaná nginku̱n Nti̱a̱ná.
\v 22 Ngjinji Jesucristo̱ nkꞌa ján ko̱ tíjñatꞌaha̱ Nti̱a̱ná. Ntꞌéꞌéhe̱n ntítsjee̱, xi tjín yaha̱ xá ko̱ xi batéxuma.
\c 4
\s Bꞌi̱ tsꞌín títsuya Pedro̱ ni xi kꞌúéchꞌoo̱hó yjoná
\p
\v 1 Tu̱ nga̱tꞌaha̱ nga un kikiehe̱ Cristo̱ nga kikꞌa yjoninnte, kui nga tjehe̱n ru̱u yjonu̱u nga ta̱ kui niu̱ xi kjꞌu̱a̱jin. A̱tꞌaha̱ xu̱ta̱ xi ja jꞌajin kju̱a̱ni̱ma̱, kui xi ja yꞌéjña ngatitsuu̱n.
\v 2 Bꞌa̱ i̱ncha kitsꞌín tu̱ xi ni̱stjin xi kꞌu̱a̱ saha najmi ta̱ kꞌúéntuhu xi nkú tsꞌín nchja̱ha̱ ani̱ma̱ha̱. Kꞌúéntu ní xi nkú tsꞌín mjehe̱ Nti̱a̱ná.
\v 3 Ja jꞌa xi nkú nꞌe tintsu̱bo̱o ni̱stjin nkꞌie, nkꞌie nga kinꞌo ni xi tsjoho̱ xu̱ta̱ xi najmi be Nti̱a̱ná, ko̱ kikꞌa̱i̱ntoho̱o yjonu̱u nga kinꞌo tu̱ mí nihí ni, ko̱ kinꞌo ni xi nchja̱ha̱ ani̱ma̱nu̱u, ko̱ kama chꞌi̱u, ko̱ kikꞌo̱ho̱o kju̱a̱tsjo ani̱ma̱nu̱u, ko̱ tu̱ nku kju̱a̱tsjohó kama mjenu̱u, ko̱ kiyankjún nti̱a̱ chꞌonkꞌun xi tsꞌínnda xu̱ta̱.
\p
\v 4 Xu̱ta̱ xuꞌbo̱ najmi mankjihi̱n á najmi ta̱ nꞌeko̱honu ni chꞌonkꞌun xi tu̱ ni xí jahá kitsꞌínkjasꞌehe̱n yjoho̱. Kui nga ndꞌa̱i̱ chꞌon tsꞌín nchja̱yanehe̱nu̱u.
\v 5 Tu̱nga tjíhín ni nga tsꞌi̱ínkjasꞌen kuenta̱ nginku̱n Nti̱a̱ná. Kui xi ja tjíndaha̱ yjoho̱ nga ku̱a̱se̱he̱ mí nihi xi kitsꞌín nga nkúnkú xi tjíntu tíkꞌuu̱n ko̱ xi ja kꞌie̱n.
\v 6 Kui kju̱a̱ha nga ta̱ kisꞌeni̱jmíhi̱ ra̱ xi ja kꞌie̱n én nda tsuhu̱ Nti̱a̱ná, tu̱ xi kꞌúéntu tíkꞌuhun espi̱ri̱tu̱hu̱ xi nkú tsꞌín mjehe̱ Nti̱a̱ná, ndaha tsa ja kichasehe̱ xi nkú tsꞌín yꞌentu a̱sunntee̱.
\s Bꞌi̱ tsꞌín tsakúya Pedro̱ nga nda nꞌe̱xáka̱á ni xi kitsjáná Nti̱a̱ná
\p
\v 7 Ja tíbichú tiña ni̱stjin nga nꞌe̱kje ngayjee̱ ni xi tjín. Kui nga cha̱se̱ sinsihi̱n ru̱u ni xi nꞌo̱o ko̱ najmi tu̱ nꞌekjꞌáíyo nga chu̱bako̱o Nti̱a̱ná.
\v 8 ꞌYún mjena nga nꞌe̱tjó xinki̱u, a̱tꞌaha̱ kju̱a̱tjoo̱ nkjin ṉkjún ngatitsun tsꞌínndyjajnu.
\v 9 Nꞌe̱kjóho̱on xinki̱u niꞌyanu̱u ko̱ tsjo katꞌenu̱u nga bꞌa̱ nꞌo̱o.
\p
\v 10 Xi nkú nga tsꞌín xki̱ kju̱a̱nda xi kinꞌekjóho̱on nga nkúnkú, bꞌa̱ tsꞌín nꞌe̱ chjónjihi̱in xinki̱u kui niu̱. Ngandaha̱ xinki̱u̱ katumachjén kju̱a̱ndoo̱, a̱tꞌaha̱ tjíhin nga nda nꞌe̱ chjón nga nkúnkú kju̱a̱ndaha̱ Nti̱a̱ná xi kinꞌekjasꞌennu̱u.
\v 11 Tsa tjín xi ku̱i̱nchja̱, én xi títsjáha̱ Nti̱a̱ná kui xi kanchja̱. Tsa tjín xi ku̱a̱si̱nko̱ xu̱ta̱, katasinko̱ xi nkú tsꞌín tíjña ngaꞌyún xi títsjáha̱ Nti̱a̱ná. Bꞌa̱ tsꞌín a̱jihi̱n ngayjee̱ ni xi nꞌo̱o sa̱kúhu̱ ra̱ kju̱a̱chánka Nti̱a̱ná. Bꞌa̱ ka̱ma a̱tꞌaha̱ Jesucristo̱ yjankiu. Kui xi kasꞌehe̱ kju̱a̱chánka ko̱ ngaꞌyún santaha tu̱ nkjéhé ni. Bꞌa̱ katuma.
\s Bꞌi̱ tsꞌín tsakúya Pedro̱ xi nkú tsꞌín ndjá ku̱i̱nchajián ni xi tsꞌe̱ Nti̱a̱ná
\p
\v 12 Tjona jun, já ntsꞌe. Najmi tu̱ katuma nkjúnnu̱u ni xi tímatꞌon nga ndjá tíchjutꞌayákꞌunnu̱u, tsa bꞌa̱ kamanu̱u tsa ni xi kjꞌa̱í kui nii̱.
\v 13 Tu̱ sa ní tsjo katꞌenu̱u nga tísakútꞌanu̱u kju̱a̱ꞌun, kju̱a̱ꞌun xi ta̱ jꞌajin Cristo̱, tu̱ xi ꞌyún tse katumaha kju̱a̱tsjonu̱u ni̱stjin nga ka̱ma chji kju̱a̱chánkaha̱ Cristo̱.
\v 14 Tsa chꞌon tíꞌminu̱u a̱tꞌaha̱ Cristo̱ yjankiu, ¡á bꞌa̱ nda tjíhin tsꞌa̱jun! A̱tꞌaha̱ Espiri̱tu̱hu̱ Nti̱a̱ná tíjñajinnu̱u, Espiri̱tu̱ xi tjíhi̱n kju̱a̱chánka.
\v 15 Tjín xi un behe̱ a̱tꞌaha̱ ani̱ma̱ tsꞌínkꞌien, ko̱ tsa ndyjé tsꞌín, ko̱ tsa chꞌon tsꞌín, ko̱ tsa chu̱ba̱ tsungijihín yjoho̱ kju̱a̱ xi tjíhi̱n kjꞌa̱í xu̱ta̱ha, tu̱nga najmi bꞌa̱há katuma a̱jinnuu.
\v 16 Tu̱nga tsa tjín xi un tíbehe̱ a̱tꞌaha̱ Cristo̱ kitsꞌínkjasꞌehe̱n yjoho̱, najmi tu̱ katuma subaha̱. Tu̱ sa ní katsꞌíntsjoho̱ Nti̱a̱ná a̱tꞌaha̱ Cristo̱ tje̱nki.
\p
\v 17 Ja chu̱ba̱ nga ku̱a̱tutsꞌi̱hi̱n ra̱ Nti̱a̱ná nga ku̱a̱se̱he̱ mí nihi xi tsꞌín xu̱ta̱. Xu̱ta̱ xi tsꞌe̱ kꞌu̱a̱ha̱ ra̱. Tsa ñá ku̱a̱tutsꞌi̱nko̱ho̱ná, ¿nkú sa tsꞌi̱íhi̱n xi najmi títsꞌínkjáíhi̱n én nda tsuhu̱ Nti̱a̱ná?
\v 18 Tsa ꞌni bꞌanki xi na̱xu̱ tsꞌín, ¿yá xi behe̱ nkú kꞌúé tsꞌe̱ xi najmi benkjún Nti̱a̱ná ko̱ xi títsꞌín ngatitsun?
\v 19 Kui bꞌa̱ maha, xi fꞌajihin kju̱a̱ni̱ma̱ nkꞌie nga Nti̱a̱ná títsjánte, katsꞌínkjasꞌen ani̱ma̱ha̱ a̱ya ntsja xi kitsꞌínndaha̱, kui xi ma ꞌyún takꞌaán, ko̱ tu̱ nkú ndahá katsꞌín.
\c 5
\s Bꞌi̱ tsꞌín títsuya Pedro̱ xi nkú tsꞌín cha̱se̱he̱ xu̱ta̱ ni̱nku̱hu̱ Nti̱a̱ná
\p
\v 1 An xi nda̱chá a̱jihi̱n xu̱ta̱ ni̱nku̱. Tunkán kikieko̱hona kju̱a̱ni̱ma̱ha̱ xi jꞌajin Cristo̱ ko̱ ta̱ an xi sa̱kútꞌana kju̱a̱chánka xi sꞌe̱jña chji ndyjun nkini̱. Tíbankihi̱ jácháha̱ xu̱ta̱ ni̱nku̱ xi tjín a̱jinnu̱u.
\v 2 Chúhu̱un chu̱tsa̱nka̱ha̱ Nti̱a̱ná xi kinꞌekjasꞌennu̱u. Cha̱so̱ho̱o, tu̱nga najmi tu̱ chasehé ru̱u xi nkúhu tsa kju̱a̱ꞌyún tínꞌehe̱nu̱u. Ngayje níhi kꞌun cha̱so̱ho̱ xi nkú tsꞌín mjehe̱ Nti̱a̱ná. Ko̱ ta̱ ndaha tsa to̱on mjenu̱u, tsa kui kju̱a̱ha nga cha̱se̱he̱ru̱u. Cha̱so̱ níhi̱ a̱tꞌaha̱ mjenu̱u nga cha̱so̱ho̱ xu̱ta̱ ni̱nku̱.
\p
\v 3 Najmi tu̱ ndjá nꞌeko̱o xu̱ta̱ xi kinꞌekúnntanu̱u. Tu̱ sa ní tꞌejña chu̱ba̱yoho̱o xi nkú i̱ncha tsꞌi̱ín xu̱ta̱ ni̱nku̱hu̱ Nti̱a̱ná.
\v 4 Bꞌa̱ tsꞌín nkꞌie nga kjꞌu̱a̱íkúchjihi yjoho̱ Nda̱ bastu kꞌaku̱, nꞌe̱kjóho̱on chjíhi̱ kju̱a̱chánka xi najmi maha̱ fe.
\s Bꞌi̱ tsꞌín títsuya Pedro̱ mí nihi xi cha̱se̱éhe̱ nga ku̱i̱ntsu̱ba̱á
\p
\v 5 Ko̱ ta̱ jun xi tíꞌminu̱u já xu̱nkú, tíbankinu̱u nga cha̱nkjún jácháha̱ xu̱ta̱ ni̱nku̱. Ngatento bꞌi̱ ngján ni̱ma̱kju̱a̱ nꞌe̱sjo yjonu̱u nginku̱n xinki̱u, a̱tꞌaha̱ bꞌi̱ tsꞌín tjítꞌa:
\q Nti̱a̱ná fi kontra̱ha̱ xi ngakꞌun,
\q tu̱nga tsjáhá ra̱ kju̱a̱nda xi ni̱ma̱kju̱a̱ tjíntuyáha̱.
\m
\v 6 Kui nga nꞌe̱ ni̱ma̱kju̱a̱hanu yjonu̱u kinte ngaꞌyún chánkaha̱ Nti̱a̱ná, tu̱ xi kui kꞌu̱a̱sjenkꞌaha̱nu̱u nkꞌie nga ku̱i̱chú chu̱ba̱.
\v 7 Nti̱a̱ná nꞌe̱kjasꞌoho̱on ngayjee̱ ni xi kjinta̱ha̱nu̱u, a̱tꞌaha̱ kui xi kjinta̱ha̱ ra̱ jun.
\p
\v 8 Cha̱se̱ chu̱ba̱yoho̱o ni xi nꞌo̱o ko̱ ti̱ntsu̱ba̱ ndo, a̱tꞌaha̱ nda̱nindoo̱ xi nda̱ kontra̱nu̱ maha. Tsúꞌba xi nkú joyaha xa xi tíbꞌéntsji̱ nga tíbangisjai xu̱ta̱ xi kji̱ne̱.
\v 9 Tankín kontro̱ho̱o ko̱ ndjá ti̱nchajiun nga sꞌejinnu̱u Ntia̱ná. A̱tꞌaha̱ yo nga ta̱ kui kju̱a̱ꞌuhun xi títsꞌín chúkju̱a̱ já ntsꞌo xi tjín nga ngúsuhu̱n a̱sunntee̱.
\p
\v 10 Nkꞌie nga ja un kabenu̱u chuba ni̱stjin, Nti̱a̱ná kikjin, kui xi tsjáná ngayje tíkjá kju̱a̱nda, kui xi Cristo̱ kitsꞌínchjén nga jꞌájinná nga sa̱kúná kju̱a̱chánkaha̱ xi najmi maha̱ feya, tsꞌi̱ín nga ka̱mo xi tjíhin nga ka̱mo, tsjá ngaꞌyúnnu̱u, ndjá tsꞌi̱ínkinchánu̱u ko̱ najmi ta̱ tsufi ku̱i̱nchahanu.
\v 11 Kui xi tu̱ nkjéhé ni tjíhi̱n ngaꞌyún. Bꞌa̱ katuma.
\s Bꞌi̱ tsꞌín kitsꞌínkje Pedro̱ xu̱ju̱i̱n
\p
\v 12 Silbano̱ xi nda̱ ntsꞌé xihi̱n, xi kixi̱ fiko̱ xáha̱, kui xi tsasinko̱na nga kitsꞌinntá xu̱ju̱i̱n. Chubahá ni xi tíbetꞌánu̱u nga títsjani̱yánu̱u ko̱ tíxinya kixi̱nu̱u nkꞌie nga ni xi tjítꞌa e̱i̱, kuihí xi kju̱a̱ndaha̱ Nti̱a̱ná. Ndjá ti̱nchajiun kju̱a̱ndoo̱.
\p
\v 13 Títsꞌínkjinu̱u kju̱a̱suniña xu̱ta̱ ni̱nku̱ xi tjín a̱nte Babiloni̱a̱. Kui xi ta̱ jꞌájihi̱n Nti̱a̱ná xi nkúhu jun. Ta̱ títsꞌínkjinu̱u kju̱asuniña Marko̱, kui xi ntína̱ xihi̱n.
\v 14 Bꞌi̱ ngján tsjo nꞌe̱ súniñoho̱o xinki̱u.
\p Kasꞌenu̱u kju̱a̱jyu ngatento jun xi tintsu̱ba̱jihu̱un Cristo̱.