\id 2PE Mazatec of Jalapa de Díaz
\h Xu̱ju̱n xi ma joho xi kitsꞌínntu nda̱ postru̱ Pedro̱
\toc1 Xu̱ju̱n xi ma joho xi kitsꞌínntu nda̱ postru̱ Pedro̱
\mt Xu̱ju̱n xi ma joho xi kitsꞌínntu nda̱ postru̱ Pedro̱
\c 1
\s Bꞌi̱ tsꞌín kikjaniñaha̱ Pedro̱ xu̱ta̱ ni̱nku̱
\p
\v 1 An Simon Pedro̱, an nda̱ musu̱ síhi̱n ko̱ nda̱ postru̱hu̱ Jesucristo̱ títsꞌinkjínu̱u xu̱ju̱i̱n jun xi ja ta̱ kinꞌekjóho̱on nga sꞌejinnu̱u Nti̱a̱ná xi nkúhu ji̱n, tu̱ nga̱tꞌaha̱ nga na̱xu̱ kitsꞌín Jesucristo̱, kui xi Nti̱a̱ná ko̱ kui xi tsꞌínkꞌankiná. Ndaha̱nkjún tjín nga sꞌejinnu̱u.
\p
\v 2 Kasꞌe ṉkjúnnu̱u kju̱a̱nda ko̱ kju̱a̱jyu a̱tꞌaha̱ yo Nti̱a̱ná ko̱ Jesucristo̱ xi Nda̱ Nti̱a̱ná maha.
\s Bꞌi̱ tsꞌín tsakúya Pedro̱ xi nkú tsꞌín tjíhin nga kꞌúéntu xu̱ta̱ xi tsꞌe̱ Nti̱a̱ná
\p
\v 3 Nga̱tꞌaha̱ kju̱a̱chánkaha̱ ko̱ kju̱a̱ndaha̱ Nti̱a̱ná jꞌájihinná. Ko̱ tu̱ nga̱tꞌaha̱ nga yaá xi jꞌájinná, bꞌa̱ tsꞌín ngaꞌyúhu̱n kitsjáko̱honá ngayjee̱ ni xi machjénná, tu̱ xi ku̱i̱ntsu̱ba̱ tíkꞌuhunná ko̱ tu̱ xi cha̱nkjúhunná Nti̱a̱ná.
\v 4 Bꞌa̱ tsꞌín kitsjáhaná ni xi kitsúya títjun, xi ꞌyún chjí ko̱ xi ꞌyún chánka, tu̱ xi bꞌa̱ tsꞌín ku̱i̱yúhu̱ ru̱u ni xi nchja̱ha̱ ani̱ma̱ha̱ xu̱ta̱, ni xi títsꞌínkatsúhu̱n a̱sunntei̱, tu̱ xi sa̱kúhu̱nu̱u nga ku̱i̱ntsu̱ba̱ tíkꞌun xi nkú tsꞌín tíjña tíkꞌun Nti̱a̱ná.
\p
\v 5 Nkꞌie nga ja sꞌejinnu̱u Nti̱a̱ná nꞌe̱ kju̱a̱ꞌyúhu̱n yjonu̱u nga tꞌesún soho̱o nga kixi̱ tankínko̱o yjonu̱u. Ko̱ nga kixi̱ tíbankínko̱o yjonu̱u tꞌesún soho̱o nga mankjinnu̱u ni xi tsꞌe̱ Nti̱a̱ná.
\v 6 Ko̱ nga mankjinnu̱u tꞌesún soho̱o nga ja manu̱u bꞌechꞌó su̱bo̱o yjonu̱u ni xi tjín a̱sunntee̱. Ko̱ nga ma bꞌechꞌó su̱bo̱o yjonu̱u tꞌesún soho̱o nga tjínnu̱u kju̱a̱tsenta. Ko̱ kju̱a̱tsentoo̱ tꞌesún soho̱o nga tíyankjún Nti̱a̱ná.
\v 7 Ko̱ nga tíyankjún Nti̱a̱ná tꞌesún soho̱o nga tínꞌetjó xu̱ta̱ ni̱nku̱, a̱tꞌaha̱ kui xi já ntsꞌo maha. Ko̱ nga tínꞌetjó xu̱ta̱ ni̱nku̱ tꞌesún soho̱o nga tjínnu̱u kju̱a̱tjo.
\p
\v 8 A̱tꞌaha̱ tsa bꞌa̱ nꞌe̱ ku̱i̱ntsu̱bo̱o ko̱ tsa tu̱ nkú bꞌa̱ nꞌe̱nú, ka̱ma ndju̱útꞌa ni xi ja yoho̱o Nda̱ Nti̱a̱ná Jesucristo̱. Kui nii̱ xi ku̱a̱si̱nko̱nu̱u nga nda nꞌe̱tjusun ni xi nꞌo ko̱ najmi ku̱i̱ntsu̱ba̱ tsꞌo.
\v 9 Tu̱nga xi najmi bꞌa̱ tsꞌín tjíntu, kui xi najmi ma chjihi̱. Ka̱ ma. Títsꞌínchaya nga ja tsichu ma jehe̱ ngatitsun xi kisꞌehe̱ ni̱stjin nkꞌie.
\p
\v 10 Kui bꞌa̱ maha, já ntsꞌe, nꞌe̱ kju̱a̱ꞌyún saha̱ ru̱u yjonu̱u nga ta̱kúchjiu nga kju̱axi̱ nga Nti̱a̱ná ja kinchja̱nu̱u ko̱ jꞌájinnu̱u. A̱tꞌaha̱ tsa bꞌa̱ nꞌe̱ ku̱i̱ntsu̱bo̱o, ndaha̱chí najmi kuankíún tꞌaxíhu̱un Nti̱a̱ná.
\v 11 Bꞌa̱ tsꞌín kꞌu̱a̱i̱nte tsjo tsjoho̱nu̱u nga ku̱i̱tjásꞌo̱on má batéxuma sín Nda̱ Nti̱a̱ná Jesucristo̱. Kui xi tsꞌínkꞌankiná.
\s Bꞌi̱ tsꞌín títsuya Pedro̱ mí kju̱a̱ha nga tu̱ nkú tíbakúyahá ra̱ xu̱ta̱ ni̱nku̱
\p
\v 12 Kui nga tsꞌinkjꞌáítsjen tehe̱ntehe̱nu̱u ni xi tíbꞌetꞌánu̱u, ndaha tsa ja yo ko̱ ndaha tsa ja ndjá tinchajiun ni xi na̱xu̱ tjín xi ja yo.
\v 13 An kjinena nga tsꞌinkjꞌáítsjennu̱u niu̱ nkꞌie nga tíi̱jñaya sa yjoninte xuꞌbi̱.
\v 14 A̱tꞌaha̱ ja be nga chubahá ndyjaha̱ nga kꞌuejñá yjoninte xuꞌbi̱, xi nkú tsꞌín yꞌéjña chjina Nda̱ Nti̱a̱ná Jesucristo̱.
\v 15 Ko̱ tsꞌian ngaꞌyún, nga nkꞌie nga ja kꞌuejñá a̱sunntei̱, tu̱ nkú nꞌe̱kjáítsjennú ni xi tíxinu̱u.
\p
\v 16 Nkꞌie nga tsixínyai̱hi̱ xi nkú tsꞌín kjꞌu̱a̱í Ndanti̱a̱ná Jesucristo̱, xi nkú tsꞌín kjꞌu̱a̱íko̱ ngaꞌyún chánkaha̱, najmi én tsankꞌá xi najmi chumi ni chjíhi̱ ra̱ kinꞌechjéi̱n. Kju̱a̱chánkaha̱ ní yꞌejña chjii̱, kui xi tunkuin tunkuin kiyaha̱ni̱.
\v 17 Nti̱a̱ Na̱ꞌminá kitsjáha̱ nga cha̱nkjún ko̱ nga sꞌe̱he̱ kju̱a̱chánka nkꞌie nga kinuꞌyá nta̱ha̱ Nti̱a̱ná xi tu̱ xí tjíhín ra̱ kju̱a̱chánka. Bꞌi̱ kitsú: “Kui xuꞌbi̱ xi Ntína̱. Tjona ko̱ tsjo mana.”
\v 18 Ji̱n kinuꞌyái̱ nta̱ xuꞌbi̱ xi nibaha nkꞌa ján nkꞌie nga tintsu̱ba̱ko̱i̱ Jesucristo̱ tje̱nnki̱ xi má kama kju̱a̱nkjúu̱n.\f + \fr 1.18 \ft “Tje̱nnki̱ má kama kju̱a̱nkjúu̱n.” Cha̱se̱i̱hi̱ Mateo̱ 17:1-5; Marco̱ 9:2-7; Luca̱ 9:24-35.\f*
\p
\v 19 Bꞌa̱ tsꞌín bitju na̱xu̱hu én xi kinchja̱ já profeta̱ nkꞌie. Nda tínꞌo tsa tíbasinñjuhu̱u ée̱n. Kui xi nkú joyaha ndꞌí xi tíbꞌatꞌai má jyuu̱n santa nkúhu nga ku̱i̱chú ma sen ni̱stjin xi ma ndyjuu̱n ko̱ niñu xi ma chji nga ta̱ jyuu̱n tsꞌi̱ín ndzjen a̱jin ani̱ma̱nu̱u.
\v 20 Katumankjinnu̱u nga ndaha nku ni xi kinchja̱ já profeta̱, xi tjítꞌa xu̱ju̱n éhe̱n Nti̱a̱ná, najmi ma mjena̱xa̱á xi nkú tsꞌín mjená.
\v 21 A̱tꞌaha̱ najmi ani̱ma̱ha̱ xu̱ta̱ nibaha ni xi kinchja̱ já profeta̱. Espiri̱tu̱hu̱ ní Nti̱a̱ná kitsꞌín nga kinchja̱ xu̱ta̱ én xi nibaha̱ ra̱ Nti̱a̱ná.
\c 2
\s Bꞌi̱ tsꞌín tsakúya Pedro̱ ni xi tsꞌín já maestru̱ tsankꞌá xi tjínjihi̱n xu̱ta̱ ni̱nku̱
\p
\v 1 A̱jihi̱n xu̱ta̱ xi ntje̱ judio̱ tje̱he̱n ra̱ kisꞌe já profeta̱ tsankꞌá, xi nkú nga ta̱ tsꞌín sꞌe̱ a̱jinnu̱u já maestru̱ tsankꞌá. Kui xi já maña̱ xi ngakjá ku̱a̱kúya ni xi tsꞌe̱ Nti̱a̱ná. Kjꞌa̱í ni xi ku̱a̱kúyanu̱u, kui xi tsꞌi̱ínkatsúnnu̱u. Najmi tsꞌi̱ínkie yjoho̱ nga Nda̱ Nti̱a̱ná xi tsꞌasjejihi̱n. Bꞌa̱ tsꞌín ki̱tsa̱ tsꞌi̱ín nibánehe̱ ra̱ yjoho̱ nga nꞌe̱kje.
\v 2 Nkjin xi i̱ncha tsꞌi̱ín ni xi i̱ncha tsꞌín jóo̱, ni xi tu̱ subahá maná. Kui nga̱tꞌaha̱ jóo̱ chꞌon tsꞌín chu̱bayanéhe ni xi na̱xu̱ tjín.
\v 3 Tu̱ nga̱tꞌaha̱ nga ꞌyún i̱ncha mjehe̱ to̱on, kui nga kꞌu̱a̱na̱cha̱ha̱nu̱u nga kjéꞌanu̱u ni xi tsꞌa̱jun. Nga̱tꞌa tsꞌe̱ jóo̱ ja ndꞌa̱i tjíndaha̱ ra̱ yjoho̱ xi tsꞌi̱ínnijéhe̱ ra̱. Ja tíjña nda ni̱stjin nga nꞌe̱kje.
\p
\v 4 Ni̱stjin nkꞌie Nti̱a̱ná najmi kitsꞌínndyjatꞌaha̱ ntítsje xi i̱ncha kitsꞌín ngatitsun. A̱jin nga̱kꞌi̱e̱n ní kikjꞌaníkjꞌaya. Má jyuu̱n kingjáyaꞌyún, tjíntu nda nga nꞌe̱ko̱kju̱a̱.
\v 5 Ko̱ ta̱ ndaha najmi kitsꞌínndyjatꞌaha̱ xu̱ta̱ xi kisꞌe nú chá ján. Ntá kitsꞌínkjeko̱ho xi najmi kikienkjúhu̱n. Tu̱nga máha Noe, kui xi yꞌéni̱jmí ni xi na̱xu̱ tjín, kui xi kinꞌenkꞌanki ko̱ yatu sa xu̱ta̱.
\p
\v 6 Ta̱ yꞌéjñanehe̱ Nti̱a̱ná nga nꞌe̱kje nanki Sodoma̱ ko̱ nanki Gomorra̱. Tu̱ nasuhú kitsꞌín ma na̱xi̱nantóo̱. Bꞌa̱ tsꞌín yꞌéjña nkjúhu̱n ra̱ xu̱ta̱ xi sꞌe̱ a̱skahan xi najmi sku̱e̱nkjún Nti̱a̱ná.
\v 7 Tu̱nga kitsꞌínkꞌankihí Lot, kui xi nku nda̱ xi na̱xu̱ kitsꞌín, xi un kikiehe̱ nga kikie xi nkú tsꞌín yꞌentu xu̱ta̱ chꞌonkꞌun xi kitsjántehe̱ yjoho̱ nga kitsꞌín tu̱ mí nihí ni.
\v 8 A̱tꞌaha̱ nda̱ xuꞌbi̱ xi na̱xu̱ kitsꞌín, xi yꞌejñajihi̱n xu̱ta̱ xuꞌbo̱, xki̱ ni̱stjin un ṉkjún kikiehe̱ nkꞌie nga kikie ko̱ kintꞌé ni chꞌonkꞌun xi kitsꞌín jóo̱. Bꞌa̱ kamaha̱ a̱tꞌaha̱ je tjíyaha̱.
\p
\v 9 Kui bꞌa̱ maha, ngayjee̱ nii̱ bakúchji xi nkú tsꞌín Nti̱a̱ná maha̱ bꞌasjenki xu̱ta̱ xi benkjúhu̱n a̱jihi̱n ni xi nibánehe̱, ko̱ be xi nkú tsꞌín kuyáko̱ xu̱ta̱ xi najmi na̱xu̱ tsꞌín, xi tjíhin nga un sku̱e̱he̱ nga ku̱i̱chú ni̱stjin nga cha̱se̱he̱ mí nihi xi kitsꞌín nga nkúnkú xu̱ta̱.
\v 10 Ko̱ ꞌyún un sku̱e̱he̱ xi tjíntujín ni chu̱ntí xi nchja̱ha̱ ani̱ma̱ha̱ ko̱ najmi benkjún xi tjíhi̱n xá nkꞌa ján. Kui jóo̱ xi si ko̱ tu̱ mí nihí ni xi i̱ncha tsꞌín. Najmi tsankjún nga chꞌon tsꞌín nchja̱yane xi i nkꞌa ján.
\v 11 Tu̱nga ntítsjee̱, ndaha tsa ꞌyún tjíhi̱n ngaꞌyún ko̱ nga nkꞌa tje̱n nga já xuꞌbo̱, najmi chꞌon tsꞌín nchja̱yane xi chꞌonkꞌun xi tjíhi̱n kju̱a̱chánka ko̱ najmi batéjéne nginku̱n Nti̱a̱ná.
\p
\v 12 Tu̱nga máha já xuꞌbo̱, chu̱ba̱ chꞌohón tsꞌín nchja̱ne ni xi najmi mankjihi̱n. Kui xi nkú joyaha chu̱. Najmi maha̱ tsꞌínnkjinkꞌun. Chu̱ba̱ tjíntuhú nga tsꞌín ni xi nibá suba kuihi̱. Kui xi xi nkúhu chu̱ xi nuba ko̱ nꞌekꞌien. Kui nga ndyja̱ha jóo̱ xi nkúhu chu̱.
\v 13 Tsꞌi̱ínkjáíhi̱n chjíhi̱ ni chꞌonkꞌun xi i̱ncha tsꞌín. Bꞌa̱ tsu nga sakúhu̱ kju̱a̱tsjo nkꞌie nga títsꞌíntsjojín tu̱ mí ni chꞌonkꞌuhún ni nga ni̱stjiu̱n. Kui jóo̱ xi nkú joyaha chu̱ntí ko̱ tsjíán a̱jinnu̱u. Santaha tsꞌíntsjojín kju̱a̱najmindaha̱ nkꞌie nga kjineko̱nu̱u ni̱ñu̱.
\p
\v 14 Najmi ma be nda nku ta̱chju̱ún. Najmi mjétꞌíáha̱ nga tsꞌín ngatitsun. Bꞌana̱cha̱ha̱ xu̱ta̱ xi najmi ndjá tíi̱ncha. Tu̱ ni xí ki̱tsa̱ xáhá tsꞌínnkjinkꞌun nkú tsꞌín sa̱kúhu̱ ra̱ to̱on. Ni xi tsꞌín, kui xi ngju̱a̱i̱ko̱ho̱ má nga ndyja̱.
\v 15 Ja ngji tꞌaxíhi̱n ni xi na̱xu̱ tjín ko̱ ja kindyjajihi̱n, kui nga bꞌa̱ tíi̱ncha tsꞌíhin xi nkú kitsꞌín nda̱ profeta̱ Balaam xi ntíhi̱ Beor. Kitsꞌín mje to̱on Balaam ko̱ jꞌáchjí nga kitsꞌín ni xi najmi nda.
\v 16 Tu̱nga kichubatiko̱hó nga̱tꞌaha̱ ngatitsuhu̱n. Búrrúhu̱, chu̱ chꞌá xi najmi maha̱ nchja̱, nta̱ha̱ xu̱ta̱ kikꞌa nga yꞌéchꞌoho̱ Balaam nga tsꞌi̱ín kju̱a̱luku̱ xi títsꞌín kai.
\p
\v 17 Já xi tíbꞌana̱cha̱ha̱ xu̱ta̱, kui xi nkú joyaha ntá ti̱xa̱ xi najmi tjíhi̱n ntá, ni̱nti̱ xi tu̱ má fiko̱hó ra̱ ntjo̱. Kui xi tje̱he̱n ra̱ má tu̱ xí jyuhún.
\v 18 I̱ncha nchja̱ én ngakꞌun ko̱ én xi najmi tjíhi̱n sin. Bakúya nga ma nꞌe ni xi nchja̱ha̱ xu̱ta̱ ko̱ nga ma tsꞌín tu̱ mí nihí ni. Bꞌa̱ tsꞌín bꞌana̱cha̱ha̱ ra̱ xi a̱sꞌa̱i kikjexíhín yjoho̱ a̱jihi̱n xu̱ta̱ xi tjíntujín ni xi najmi bꞌa̱ tjín.
\v 19 Ndaha tsa ni xi tsꞌínkatsúhu̱n xu̱ta̱ tjíꞌyúhu̱n, tu̱nga chu̱ba̱ bꞌa̱há i̱ncha tsu nga tsꞌi̱ín nda̱íhi̱ xu̱ta̱. Tjíꞌyún jóo̱, a̱tꞌaha̱ ni xi tsꞌín ngana̱ná, kui xi bꞌéꞌyúnná.
\p
\v 20 Tsa ja i̱ncha tsankin tꞌaxíhi̱ín ni chꞌonkꞌun xi tjín asunntei̱ a̱tꞌaha̱ kinꞌekjáíhi̱ín Nda̱ Nti̱a̱ná Jesucristo̱ xi bꞌasjejinná, tu̱nga tsa ta̱ ku̱i̱jne̱jihín ngáhaná kui niu̱ ko̱ nꞌe̱ndyjaha̱á, ꞌyún chꞌonkꞌun ma sahá a̱kahan.
\v 21 Kui nga tu̱ sahá ra̱ nda tjín tsa najmi kikie jóo̱ ni xi na̱xu̱ tjín, a̱tꞌaha̱ ꞌyún kama chꞌonkꞌun sa nga kikie ni xi ndoo̱. Bꞌa̱ kamaha̱ nga ngji tꞌaxíhi̱n kju̱a̱téxuma je xi kikꞌa̱i̱hi̱.
\v 22 Tíbitjusunjíhi̱n jóo̱ én xi nchja̱ xu̱ta̱: “Nañóo̱ ta̱ kjine ta̱ ma ngáha ni xi bisuhu̱. Chi̱nka̱ xi a̱sꞌa̱i mama kabinguya tímꞌotikjájin yjoho̱ siu̱.”
\c 3
\s Bꞌi̱ tsꞌín tsakúya Pedro̱ nkꞌie nga kjꞌu̱a̱í tsꞌínko̱kju̱a̱ Nda̱ Nti̱a̱ná Jesucristo̱ a̱sunntee̱
\p
\v 1 Tjona jun, já ntsꞌe. Xuꞌbi̱ xi xi ma joho̱ ra̱ xu̱ju̱n xi títsꞌinkjínu̱u. Xu̱ju̱n xuꞌbi̱ ko̱ xi tjuu̱n yꞌetꞌánu̱u tu̱ xi nꞌe̱kjꞌáítsjehennu ni xi ja tsakuyánu̱u. Bꞌa̱ kitsꞌian tu̱ xi cha̱hanu xi nkú tsꞌín sꞌe̱yaha̱nu̱u.
\v 2 Nꞌe̱kjꞌáítsjoho̱on yjonu̱u én xi kinchja̱ já profeta̱ je xi kisꞌe ni̱stjin nkꞌie ko̱ kju̱a̱téxuma xi tsakúyanu̱u já postru̱, kju̱a̱téxumaha̱ Jesucristo̱ xi Nda̱ Nti̱a̱ná maha ko̱ kui xi tsꞌínkꞌankiná.
\p
\v 3 Katumankjin sisinnu̱u nga ni̱stjin xi fekuu̱ sꞌe̱ xi kꞌúéntujín ni chꞌonkꞌun xi nchja̱ha̱ ani̱ma̱ha̱ ko̱ ku̱a̱jnu̱kie én xi ja kinꞌekjóho̱on.
\v 4 Bꞌi̱ i̱ncha ku̱i̱tsu̱: “¿Á najmi tsitjusuhun én xi kitsúhu nga kjꞌu̱a̱í ngáha? Bꞌaha̱ ra̱ ni̱stjin nga kꞌien ntje̱ cháná santaha ndꞌa̱i̱, tu̱ nkú bꞌa̱há tíma a̱sunntei̱ xi nkú kama nkꞌie nga a̱sꞌa̱i kamandahá.”
\p
\v 5 Najmi mjehe̱ tsꞌi̱ínkjꞌáítsjen nga ni̱stjin nkꞌie én xi tsitjuhu tsꞌa Nti̱a̱ná kitsꞌínndako̱ho nkꞌa ján ko̱ tꞌanankiu̱. Kui tꞌanankiu̱ xi a̱jin ntánijuo̱ nibaha̱ha̱ ra̱ ko̱ nga̱tꞌaha̱ ntánijuo̱ kisꞌejñaha.
\v 6 Ko̱ nga̱tꞌaha̱ ntánijuaha̱ tsꞌí xi ꞌyún kitsꞌoo̱ kinꞌekjehe tꞌananki xi kisꞌejña ni̱stjin nkꞌie.
\v 7 Tu̱nga máha nkꞌa ján ko̱ tꞌananki xi tíjña ndꞌa̱i̱, kui xi ta̱ kuihi éhe̱n Nti̱a̱ná tíbꞌejña ndaha̱ tu̱ xi kꞌu̱étihi. Tísꞌejña nda santa nkúhu nga ku̱i̱chú ni̱stjin nga cha̱se̱he̱ mí nihi xi kitsꞌín nga nkúnkú xu̱ta̱ ko̱ nga nꞌe̱kje xu̱ta̱ xi najmi kikienkjún Nti̱a̱ná.
\p
\v 8 Tu̱nga najmi tu̱ nꞌechayanú ni xuꞌbi̱, já ntsꞌena̱. Nginku̱n Nti̱a̱ná nku ni̱stjin, kui xi nkú joyaha nku mii̱ nú. Ko̱ nku mii̱ nú, kui xi nkú joyaha nku ni̱stjin.
\v 9 Najmi títsꞌínkꞌandaya Nti̱a̱ná nga tsꞌi̱íntjusun ni xi kitsúya títjun, a̱tꞌaha̱ kꞌu̱a̱ xi bꞌa̱ maha nga títsꞌínkꞌandaya. Tíbakú nínu̱u kju̱a̱tsentaha̱ Nti̱a̱ná, a̱tꞌaha̱ najmi mjehe̱ tsa tjín xi ndyja̱. Mjehe̱ nga ngatentee̱ xu̱ta̱ ngju̱a̱i̱kjꞌáha̱ ra̱ ani̱ma̱ha̱.
\p
\v 10 Xi nkú tsꞌín tu̱ ndyjaháná nga fꞌai nku nda̱ ndyjé, bꞌa̱ ka̱ma ni̱stjin nga kjꞌu̱a̱í ngáha Nda̱ Nti̱a̱ná. Kui ni̱stjiu̱n ndyja̱jihi̱nsén nkꞌa ján nga ni xi nkjún tsꞌín kju̱a̱neya, ko̱ ka̱manantá nga ku̱i̱ti̱ ni xi kamandako̱ho ni xi tjín. Tꞌanankiu̱ ko̱ ngayjee̱ ni xi tjíhi̱n ku̱i̱ti̱.
\p
\v 11 Kui bꞌa̱ maha, tsa bꞌa̱ tsꞌín nꞌe̱katsún ngayjee̱ niu̱, ¿nkú tsꞌín tjíhin nga ku̱i̱tsu̱bo̱o ni̱ ma? Tjíhin nga je ku̱i̱ntsu̱bo̱o ko̱ cha̱nkjún Nti̱a̱ná
\v 12 ko̱ nga ka̱mangimjenu̱u nga ku̱i̱chú ni̱stjin nkꞌie nga tsꞌi̱ín Nti̱a̱ná ni xi kitsú nga tsꞌi̱ín, ni̱stjin nkꞌie nga ku̱i̱ti̱ ko̱ nꞌe̱kje nkꞌa ján ko̱ nga ndꞌíu̱ tsꞌi̱ínnantá ni xi tjín.
\v 13 Tu̱nga máha ñá, tíchuyáá nku nkꞌa tse̱tse̱ ko̱ tꞌananki tse̱tse̱, xi nkú tsꞌín kitsúya títjun Nti̱a̱ná. Yo̱hó má nga na̱xu̱ ku̱i̱ntsu̱ba̱á nginku̱n Nti̱a̱ná.
\p
\v 14 A̱tꞌaha̱ tíchuyóho̱o ni xuꞌbi̱, jántsena̱, kui nga tjen ngaꞌyúhu̱n ru̱u yjonu̱u tu̱ xi sꞌe̱he̱nu̱u kju̱a̱jyu nginku̱n Nti̱a̱ná ko̱ tu̱ xi najmi sꞌe̱he a̱jinnu̱u ni xi chu̱ntí ko̱ tsa ni xi chu̱bayané.
\v 15 Tꞌejintakꞌun, tíbakúchjiná kju̱a̱tsentaha̱ Nti̱a̱ná tu̱ xi títsjántehená nga kꞌu̱a̱nkiá. Ni xuꞌbi̱ ja ta̱ yꞌétꞌanu̱u nda̱ ntsꞌena̱ Pablo̱. Kui xi xi nkú tsꞌín tíjña kju̱a̱nkjintakꞌun xi kitsjáha̱ Nti̱a̱ná, bꞌa̱ tsꞌín yétꞌa.
\v 16 Nga nkúnkú xu̱ju̱n xi kitsꞌínntu ta̱ kui ni xuꞌbi̱ kinchja̱ni̱jmíyaha. Tjín ni xi yꞌétꞌa xi ꞌni mankjihi̱n xu̱ta̱. Kui niu̱ xi fiko̱ ngakjá xu̱ta̱ xi najmi be sisin ni xi tsꞌe̱ Nti̱a̱ná ko̱ xi najmi ndjá tíi̱nchajin ni xi sꞌejinná. Fiko̱ ngakjá niu̱ xi nkú ta̱ tsꞌín ta̱ fiko̱ngakjá ni xi ja ta̱ tjítꞌa. Bꞌa̱ tsꞌín ta̱ kuihi títsꞌínkjihi yjoho̱ má ndyja̱.
\s Bꞌi̱ tsꞌín kitsꞌínkje Pedro̱ xu̱ju̱i̱n
\p
\v 17 Kui bꞌa̱ maha, já ntsꞌena̱, ja yo ni xuꞌbi̱. Kui nga chúhu̱n ru̱u yjonu̱u tu̱ xi najmi kjébéfehe̱nu̱u kju̱a̱bꞌana̱cha̱ha̱ já chꞌonkꞌuu̱n, ko̱ tu̱ xi najmi kuankín tꞌaxíhi̱n ru̱u ni xi ndjá tinchajiun.
\v 18 Kasájin so kju̱a̱ndaha̱ Jesucristo̱ ko̱ kaya so ni xi tsꞌe̱, a̱tꞌaha̱ kui xi Nda̱ Nti̱a̱ná maha ko̱ tsꞌínkꞌankiná.
\p ¡Nꞌe̱kié yjoná nga tjíhi̱n kju̱a̱chánka ndꞌa̱i̱ ko̱ santaha tu̱ nkjéhé ni! Bꞌa̱ katuma.