\id 1JN Mazatec of Jalapa de Diaz
\h Xu̱ju̱n xi tjun kitsꞌínntu nda̱ postru̱ Jua
\toc1 Xu̱ju̱n xi tjun kitsꞌínntu nda̱ postru̱ Jua
\mt Xu̱ju̱n xi tjun kitsꞌínntu nda̱ postru̱ Jua
\c 1
\s Bꞌi̱ tsꞌín tsakúya Jua yáha Ée̱n
\p
\v 1 Tíbꞌeni̱jmíi̱hi̱ xi tu̱ bꞌa̱ tsꞌín jahá tíjña santa nkúhu nga tutsꞌihi̱n ni. Kinuꞌyái̱ nta̱ha̱ ko̱ tukui̱n kiyako̱ho̱ni̱. Kiyai̱ ko̱ ntsa̱i̱ kinꞌeko̱ho̱ni̱. Kui xi Én xi tsꞌínkꞌíéntu tíkꞌun xu̱ta̱.
\v 2 Yꞌejña tíkꞌun a̱jinni̱ ko̱ ji̱n kiyai̱. Tíbixínya kixi̱ ni xi kiyai̱ ko̱ tíbꞌeni̱jmíi̱ xi tíjña tíkꞌun sín, xi yꞌejñajihi̱n Nti̱a̱ Na̱ꞌmiu̱ ko̱ xi ji̱n kisꞌejña chjini̱.
\p
\v 3 Xi kiyai̱ ko̱ kinuꞌyái̱, kui xi ta̱ tíbꞌeni̱jmíi̱hi̱ ko̱ jun, tu̱ xi bꞌa̱ tsꞌín ko̱ jun nkuhú ka̱mako̱ho̱ni̱. Bꞌa̱ tsꞌín nkuhú ka̱mangujinka̱á Nti̱a̱ Na̱ꞌmiu̱ ko̱ Jesucristo̱ xi Ntíhi̱ maha.
\v 4 Tíbꞌetꞌai̱hi̱ ni xuꞌbi̱ tu̱ xi kꞌúé tsjo tsjoho̱nu̱u.
\s Bꞌi̱ tsꞌín tsakúya Jua nga ni xi nꞌeé bakúchji tsa kisꞌejinná Nti̱a̱ná
\p
\v 5 Tsakúyani̱ Jesucristo̱ nga Nti̱a̱ná, kui xi ndꞌí xi tsꞌín ndzjen ko̱ ndaha̱chí najmi tjín má jyun a̱jihi̱n. Kui xi tíbꞌeni̱jmíi̱hi̱.
\v 6 Tsa bꞌa̱ ku̱i̱xíaán nga Nti̱a̱ná tsꞌe̱ná ko̱ tu̱ sa má jyuu̱hún tintsu̱ba̱ ngáá, tíchꞌana̱cha̱á ko̱ najmi tínꞌeé ni xi na̱xu̱ tjín.
\v 7 Tu̱nga tsa tintsu̱ba̱á má ndzjee̱n xi nkú tsꞌín tíjña Nti̱a̱ná má ndzjee̱n, bꞌa̱ tsꞌín nkuhú maka̱á xinki̱á ko̱ jníhi̱ Jesucristo̱ xi Ntíhi̱ Nti̱a̱ná tsꞌín jená nga kjexínná ngayjee̱ ngatitsunná.
\p
\v 8 Tsa najmi tjínná ngatitsun ku̱i̱xíaán, ta̱ ñáha tíchꞌana̱cha̱ha̱á yjoná ko̱ najmi tíjñajinná ni xi na̱xu̱ tjín.
\v 9 Tsa nꞌe̱kié yjoná nga tjínná ngatitsun, tsꞌi̱ínndyjatꞌaná ngatitsunná Nti̱a̱ná ko̱ tsꞌi̱ín jená nga kjéxinná ngayjee̱ ni xi tjíntujínná xi najmi na̱xu̱ nginku̱n. Bꞌa̱ tsꞌi̱ín a̱tꞌaha̱ ja kitsjá éhe̱n nga bꞌa̱ tsꞌi̱ín ko̱ tsꞌín ni xi na̱xu̱ tjín.
\v 10 Tsa najmi tjínná ngatitsun ku̱i̱xíaán, tíya tsankꞌáá Nti̱a̱ná ko̱ najmi tíjñajin ani̱ma̱ná éhe̱n.
\c 2
\p
\v 1 Jun ntína̱, tíbꞌetꞌánu̱u ni xuꞌbi̱ tu̱ xi najmi nꞌe̱henu ngatitsun. Tu̱nga tsa tjín xi tsꞌi̱ín tje̱nꞌyún ngatitsun, tíjñaná xi ku̱i̱nchja̱ntjainá nginku̱n Nti̱a̱ Na̱ꞌmiu̱, kui xi Jesucristo̱ xi na̱xu̱ tsꞌín.
\v 2 Kui xi kitsjá yjoho̱ xi nkúhu chje̱ tu̱ xi nꞌe̱ndyjatꞌahaná ngatitsunná ñá xi ja kisꞌejinná. Ko̱ najmi tu̱ suba ngatitsunná kitsꞌínndyjatꞌa, ko̱ ní ngatitsuhu̱n ngayjee̱ xu̱ta̱ xi tjín a̱sunntee̱.
\p
\v 3 Tsa tínꞌetjusaán ni xi yꞌéjña Nti̱a̱ná, bꞌa̱ tsꞌín yahaná nga ja yaá Nti̱a̱ná.
\v 4 Tsa tjín xi: “An be” ku̱i̱tsu̱, tu̱nga tu̱ sa najmi tsꞌíntjusuhún ngá ni xi yꞌéjña, kui xi nda̱ tsankꞌá. Najmi tíjñajin ani̱ma̱ha̱ ni xi na̱xu̱ tjín.
\v 5 Tu̱nga xi tsꞌíntjusun éhe̱n, kju̱axi̱ nga kui xi tsꞌíntjo Nti̱a̱ná xi nkú nga tsꞌín tjíhin nga tsꞌi̱íntjo. Nkꞌie nga bꞌa̱ nꞌe bintsubaá, bꞌa̱ nꞌe yahaná nga tintsu̱ba̱jii̱hín.
\v 6 Xi tíjñajin ni xi tsꞌe̱ Nti̱a̱ná ku̱i̱tsu̱, kui xi xi nkú tsꞌín yꞌejña Jesucristo̱, bꞌa̱ tsꞌín tjíhin nga kꞌúéjña.
\s Bꞌi̱ tsꞌín tíbatéxumaha̱ Jua xu̱ta̱ ni̱nku̱
\p
\v 7 Já ntsꞌena̱, ni xi tíbꞌetꞌánu̱u ndꞌa̱i̱, najmi a̱sꞌa̱i tíbꞌéjñahá Nti̱a̱ná. Kju̱a̱téxuma chá xi kinꞌekjasꞌen nínu̱u santaha nga tutsꞌihi̱n ni tíbetꞌánu̱u. Kui kju̱a̱téxuma chá xuꞌbi̱, kui éhen xi ja kinuꞌyó nkꞌie.
\v 8 Tu̱nga xi nkú tsꞌín yꞌejña Jesucristo̱ ko̱ xi nkú tsꞌín tintsu̱bo̱o bꞌéjña chji nku ni tse̱tse̱ xi yꞌaha̱ ra̱ ni xi yꞌéjña Nti̱a̱ná. Kui ni xi tíbꞌetꞌánu̱u e̱i̱ a̱tꞌaha̱ ja jꞌai tsꞌín ndzjen ndꞌí xi ndoo̱. Kui nga ja tífi ndyjaha má jyuu̱n.
\p
\v 9 Xi bꞌa̱ ku̱i̱tsu̱ nga má ndzjee̱n síjña tu̱nga tu̱ sa unkiehé ngá nda̱ ntsꞌe̱, kui xi má jyuu̱n síjñajin sa.
\v 10 Xi tjoho̱ nda̱ ntsꞌe̱, kui xi má ndzjee̱n síjña tehe̱nte, má nga najmi tjín ni xi tsꞌi̱ínkijnejihi̱n ngatitsun.
\v 11 Tu̱nga xi unkie nda̱ ntsꞌe̱, kui xi má jyuu̱n síjña ko̱ yo̱ tsúꞌba ko̱ najmi be má xi tje̱hen tífi, a̱tꞌaha̱ ja kitsꞌínka̱ha̱ má jyuu̱n.
\p
\v 12 Jun ntína̱, títsꞌinntúnu̱u a̱tꞌaha̱ tu̱ nga̱tꞌaha̱ ni xi kitsꞌín Jesucristo̱ kinꞌendyjatꞌaha̱nu̱u ngatitsunnu̱u.
\v 13 Ko̱ jun xi tíꞌminu̱u na̱ꞌmi, títsꞌinntúnu̱u a̱tꞌaha̱ ja yo xi tu̱ bꞌa̱ tsꞌín jahá tíjña santaha nga tutsꞌihi̱n ni. Ko̱ jun xi tíꞌminu̱u já a̱sti, títsꞌinntúnu̱u a̱tꞌaha̱ kinꞌe ngano̱ho̱o nda̱nindoo̱.
\p
\v 14 Jun ntína̱, ja kuatsꞌinntúnu̱u a̱tꞌaha ja yo Nti̱a̱ Na̱ꞌmiu̱. Ko̱ jun xi tíꞌminu̱u na̱ꞌmi, ja kuatsꞌinntúnu̱u a̱tꞌaha ja yo xi tu̱ bꞌa̱ tsꞌín jahá tíjña santaha nga tutsꞌihi̱n ni. Ko̱ jun xi tíꞌminu̱u já a̱sti, ja kuatsꞌinntúnu̱u a̱tꞌaha̱ tjínnu̱u ngaꞌyún ko̱ tíjñajin tehe̱nte ani̱ma̱nu̱u éhe̱n Nti̱a̱ná ko̱ a̱tꞌaha̱ ja kinꞌe ngano̱ho̱o nda̱nindoo̱.
\p
\v 15 Najmi tu̱ nꞌetjó a̱sunntee̱ ko̱ ta̱ ndaha ni xi tsjá a̱sunntee̱. Tsa tjín xi tjoho̱ a̱sunntee̱, kui xi najmi tjoho̱ Nti̱a̱ Na̱ꞌmiu̱.
\v 16 A̱tꞌaha̱ ngayjee̱ ni xi tsjá a̱sunntee̱ najmi má tíjña Nti̱a̱ Na̱ꞌmiu̱ nibáha̱ ra̱. A̱sunntee̱ ní nibáha̱ ra̱. Yo̱ nibáha̱ ra̱ nga nchja̱ha̱ ani̱ma̱ha̱ xu̱ta̱ ni xi tjín ko̱ nga mjehe̱ tsꞌi̱íntsꞌe̱ ni xi fásihi̱n ko̱ nga nkꞌa bꞌasje yjoho̱ nga̱tꞌaha̱ ni xi tjíhi̱n.
\v 17 Ja tífe ni̱stjihi̱n a̱sunntee̱ ko̱ ni xi nchja̱ha̱ ani̱ma̱ha̱ xu̱ta̱, tu̱nga máha xi títsꞌín xi nkú tsꞌín mjehe̱ Nti̱a̱ná, kui xi kꞌúéjña sín.
\s Bꞌi̱ tsꞌín tsakúya Jua nga chúhu̱ún yjoná já xi fi kontra̱ha̱ Jesucristo̱
\p
\v 18 Jun ntína̱, ja ni̱stjin xi fekuu̱ tintsu̱ba̱á ndꞌa̱i̱. Ja kikꞌinyanu̱u nga tjíhin nga kjꞌu̱a̱í xi ngju̱a̱i̱ kontra̱ha̱ xi kitsꞌín nibá Nti̱a̱ná,\f + \fr 2:18,22 \ft “Xi kitsꞌín nibá Nti̱a̱ná” tsuhu̱ ra̱ “Cristo̱”.\f* ko̱ xi nkú kikꞌinnu̱u bꞌa̱ tsꞌín ndꞌa̱i̱ ja tíi̱ncha fꞌai ṉkjún já kontra̱ha̱ Jesucristo̱. Kui nga mankjihinná nga ja tinchajián ni̱stjin xi fekuu̱.
\v 19 Kui xi i̱ncha tsitjujínni̱ e̱i̱, tu̱nga najmi já tsꞌa̱ji̱hín niu̱. A̱tꞌaha̱ tsa já tsꞌa̱ji̱n niu̱, najmi i̱ncha ngji tꞌaxín ra̱ kai. Tu̱nga i̱ncha tsitjuhú tu̱ xi bꞌa̱ tsꞌín kiya chji chjihi nga tjín xi najmi ji̱n mako̱ni̱.
\p
\v 20 Máha jun, Jesucristo̱ kitsjánu̱u Espiri̱tu̱hu̱ Nti̱a̱ná ko̱ ngatentoo̱ mankjinnu̱u ni xi na̱xu̱ tjín.
\v 21 Tíbꞌetꞌá xu̱ju̱nnu̱u a̱tꞌaha̱ mankjinnu̱u ni xi na̱xu̱ tjín. Najmi nga̱tꞌaha̱ tsa najmi mankjinnu̱u, a̱tꞌaha̱ ní nga mankjinnu̱u, kui nga tíbꞌetꞌáha̱nu̱u. Ko̱ mankjinnu̱u nga ndaha nku kju̱a̱tsankꞌá najmi nibáha̱ ra̱ ni xi na̱xu̱ tjín.
\p
\v 22 Xi najmi tsꞌínkjáíhi̱n nga Jesu xi kitsꞌín nibá Nti̱a̱ná, kui xi nku nda̱ tsankꞌá. Kui xi nda̱ kontra̱ha̱ Jesucristo̱, a̱tꞌaha̱ najmi tsꞌínkjáíhi̱n nga Nti̱a̱ Na̱ꞌminá xi Nti̱a̱ ko̱ nga Jesucristo̱ xi Ntíhi̱.
\v 23 Tu̱ yáhá ni xi najmi tsꞌínkjáíhi̱n nga Jesucristo̱ xi Ntíhi̱ Nti̱aṉá, kui xi ta̱ ndaha najmi tíjñajihi̱n Nti̱a̱ Na̱ꞌmiu̱. Tu̱nga xi tsꞌínkjáíhi̱n nga Jesucristo̱ xi Ntíhi̱ Nti̱aṉá, kui xi ta̱ tíjñajihi̱n Nti̱a̱ Na̱ꞌmiu̱.
\p
\v 24 Kui bꞌa̱ maha, tꞌejñajin tehe̱ntehenu ani̱ma̱nu̱u én xi kinuꞌyó santa nkúhu nga tutsꞌihi̱n ni. Tsa sꞌe̱jñajin tehe̱nte ani̱ma̱nu̱u én xi kinuꞌyó santa nkúhu nga tutsꞌihi̱n ni, bꞌa̱ tsꞌín ko̱ jun ta̱ ku̱i̱ntsu̱ba̱jin tehe̱ntoho̱o Ntíu̱ ko̱ Nti̱a̱ Na̱ꞌmiu̱.
\v 25 Nga ku̱i̱ntsu̱ba̱ tíkꞌun síaán, kui nihi xi kitsúya títjunná Jesucristo̱ nga tsjáná.
\p
\v 26 Tíbꞌetꞌánu̱u ni xuꞌbi̱ a̱tꞌaha̱ tjín xi mjehe̱ kꞌu̱a̱na̱cha̱nu̱u.
\v 27 Tu̱nga máha jun, tíjñajin tehe̱ntenu̱u Espiri̱tu̱hu̱ Nti̱a̱ná xi kitsjánu̱u Jesucristo̱. Najmi machjéhe̱n tsa tjín xi ku̱a̱kúyanu̱u, a̱tꞌaha̱ ta̱ kuihi Espiri̱tu̱ bakúyayjenu̱u. Ni xi na̱xu̱ tjín bakúyanu̱u, najmi ni tsankꞌá. Kui nga xi nkú tsꞌín tsakúyaha̱nu̱u Espiri̱tu̱, bꞌa̱ nꞌe̱ ti̱ntsu̱ba̱jin tehe̱ntehe̱ ru̱u Jesucristo̱.
\p
\v 28 Kui bꞌa̱ maha ndꞌa̱i̱, ntína̱, ti̱ntsu̱ba̱jin tehe̱ntehe̱ ru̱u Jesucristo̱, tu̱ xi najmi jo jan ka̱mahaná nkꞌie nga ku̱a̱kúchji yjoho̱ ko̱ najmi ka̱ma subaná nginku̱n nkꞌie nga kjꞌu̱a̱í.
\v 29 Yo nga na̱xu̱ tsꞌín Jesucristo̱. Kui nga ta̱ tjíhin nga cha̱hanu nga ngayjee̱ xu̱ta̱ xi tsꞌín ni xi na̱xu̱, kui xi kitsjáha̱ Nti̱a̱ná nga ntíhi̱ ka̱ma.
\c 3
\s Bꞌi̱ tsꞌín tsakúya Jua nga ntíhi̱ Nti̱a̱ná kitsꞌín maná
\p
\v 1 Cha̱so̱o xi nkú tsꞌín tjo tsꞌatihi̱ ñá Nti̱a̱ Na̱ꞌminá, nga santaha ntíhi̱ Nti̱a̱ná ꞌminá. Ko̱ kju̱axi̱ nga ntíhi̱ Nti̱a̱ná ñá. Kui kju̱a̱ha nga najmi behená xu̱ta̱ a̱sunntee̱, a̱tꞌaha̱ najmi be Nti̱a̱ná.
\v 2 Jun já ntsꞌena̱, ñá xi ntíhi̱ Nti̱a̱ná ndꞌa̱i̱. Ko̱ ndaha tsa najmi kje̱e yaá nkú kꞌúéntaá a̱skahan, tu̱nga yanáá nga bꞌa̱ kꞌúéntaá xi nkúhu Jesucristo̱ nkꞌie nga kjꞌu̱a̱íkúchji yjoho̱, a̱tꞌaha̱ cha̱ sisián xi nkú tjín.
\v 3 Ko̱ ngatentee̱ xi bꞌa̱ tsꞌín tíkuyáha̱ Jesucristo̱, kui xi títsꞌín nga tínꞌe je nginku̱n Nti̱a̱ná. Bꞌa̱ tíꞌbe xi nkú tsꞌín je Jesucristo̱.
\p
\v 4 Tu̱ yáha ni xi títsꞌín ngatitsun, kui xi tíbangane kju̱a̱téxumaha̱ Nti̱a̱ná. Nkꞌie nga biyuné kju̱a̱téxumaha̱ Nti̱a̱ná, kui nii̱ xi ngatitsuu̱n.
\v 5 Ja yo nga jꞌaikúchji yjoho̱ Jesucristo̱ tu̱ xi jꞌaikjexíhin ngatitsunná. Ndaha nku ngatitsun najmi kisꞌehe̱.
\v 6 Kui bꞌa̱ maha, ngayjee̱ xi tíjñajin tehe̱ntehe̱ ra̱ Jesucristo̱ najmi tsꞌín ngatitsun. Tu̱nga ngayjee̱ xi títsꞌín ngatitsun, najmi kje̱e be Jesucristo̱ ko̱ ta̱ ndaha najmi kje̱e mankjihi̱n yáha kui.
\p
\v 7 Jun ntína̱, najmi tu̱ chꞌa xi kꞌu̱a̱na̱cha̱nu̱u. Xi tsꞌín ni xi na̱xu̱ tjín, kui xi na̱xu̱ nginku̱n Nti̱a̱ná xi nkú tsꞌín na̱xu̱ Jesucristo̱.
\v 8 Tu̱nga xi tsꞌín ngatitsun, kui xi nda̱nindoo̱ tsꞌe̱he̱, a̱tꞌaha̱ nda̱nindoo̱ kitsꞌín ngatitsun santaha nkúhu nga tutsꞌihi̱n ni. Kui kju̱a̱ha nga jꞌaikúchjihi yjoho̱ Ntíhi̱ Nti̱a̱ná, tu̱ xi tsꞌi̱ínndyja xáha̱ nda̱nindoo̱.
\p
\v 9 Ngayje̱e xi Nti̱a̱ná kitsjáha̱ nga ka̱ma ntíhi̱ najmi nkaha̱ tsꞌín ngatitsun, a̱tꞌaha̱ kju̱a̱tíkꞌuhu̱n Nti̱a̱ná tíjñajihi̱n. Najmi nkaha̱ tsꞌín ngatitsun, a̱tꞌaha̱ Nti̱a̱ná kitsjáha̱ nga ka̱ma ntíhi̱.
\v 10 Bꞌa̱ tsꞌín sꞌejña chjihi yá xi ntíhi̱ Nti̱a̱ná ko̱ yá xi ntíhi̱ nda̱nindoo̱. Tu̱ yáhá ni xi najmi na̱xu̱ tsꞌín ko̱ a ra̱ najmi tjoho̱ ntsꞌe̱, kui xi najmi Nti̱a̱ná tsꞌe̱he̱.
\s Bꞌi̱ tsꞌín tsakúya Jua nga nꞌe̱tjáá xinki̱á
\p
\v 11 Nga tjíhin nga bꞌi̱ ngjáán nꞌe̱tjáá xinki̱á, bꞌa̱ tsu én xi kinuꞌyó santaha nkúhu nga tutsꞌihi̱n ni.
\v 12 Najmi bꞌa̱ha tu̱ nꞌeé xi nkúhu Cain. Kui xi nda̱nindoo̱ tsꞌe̱he̱. Kui nga kitsꞌínkꞌiehen nda̱ ntsꞌe̱. ¿Á kitsꞌínkꞌiehen? Kitsꞌínkꞌien a̱tꞌaha̱ na̱xu̱ ni xi kitsꞌín nda̱ ntsꞌe̱ ko̱ máha kui, chꞌon kitsꞌín.
\p
\v 13 Jun já ntsꞌena̱, najmi tu̱ ma nkjúnnu̱u tsa tsꞌi̱ín unkienu̱u xu̱ta̱ a̱sunntee̱.
\v 14 Ja yaá ñá nga tsitjujián a̱jihi̱n ngabayoo̱ ko̱ nga ku̱i̱ntsu̱ba̱ tíkꞌaán nginku̱n Nti̱a̱ná. Yaá ni xuꞌbi̱ a̱tꞌaha̱ tjoná já ntsꞌeé. Xi najmi tjíhi̱n kju̱a̱tjo, kui xi tíjñajin sa ngabayoo̱.
\v 15 Ngayjee̱ xi unkie nda̱ ntsꞌe̱, nda̱tsꞌínkꞌien ani̱ma̱há xuꞌbo̱, ko̱ ja yo nga nku nda̱tsꞌínkꞌien ani̱ma̱ najmi tíjñajihi̱n kju̱a̱tíkꞌun sín.
\p
\v 16 Yaá ni xi ꞌmihi̱ kju̱a̱tjo a̱tꞌaha̱ Jesucristo̱ kitsꞌínkjasꞌen yjoho̱ ngandaná. Bꞌa̱ ta̱ tsꞌín ko̱ ñá tjíhin nga nꞌe̱kjasꞌeén yjoná ngandaha̱ já ntsꞌeé.
\v 17 Tsa nku nda̱nchi̱ná tíbe nga ndyjatꞌaha̱ nda̱ ntsꞌe̱ ni xi machjéhe̱n tu̱nga najmi ka̱ma ni̱ma̱há ra̱, ¿a tíjñajin kju̱a̱tjoho̱ Nti̱a̱ná ani̱ma̱ha̱?
\v 18 Jun ntína̱, najmi tu̱ suba énnu̱u xi bꞌa̱ ku̱i̱tsu̱ nga tjínnu̱u kju̱a̱tjo nga chu̱bo. Tu̱ sa ní ni xi katakúchji nga tjínnu̱u kju̱a̱tjo nꞌo̱o.
\p
\v 19 Yaá nga a̱jihi̱n ni xi na̱xu̱ tintsu̱ba̱jián ko̱ najmi jo jan maná nkꞌie nga tintsu̱ba̱á nginku̱n Nti̱a̱ná.
\v 20 Kui nga ndaha tsa ani̱ma̱ná bꞌa̱ títsu nga tjínná jé, tu̱nga ꞌyúhún chánka sa Nti̱a̱ná nga ani̱ma̱ná ko̱ kui xi beyjená.
\v 21 Jun já ntsꞌena̱, tsa najmi chumi nihi xi títsꞌínnijéná ani̱ma̱ná, najmi jo jan maná nga tinchaá nginku̱n Nti̱a̱ná,
\v 22 ko̱ kui tsjáná ngayjee̱ ni xi ku̱i̱nchíhi̱í, a̱tꞌaha̱ tínꞌetjusaán ni xi yꞌéjña ko̱ tínꞌeé ni xi sasíhi̱n.
\p
\v 23 Nga nꞌe̱ sꞌejián Jesucristo̱ xi Ntíhi̱ maha ko̱ nga bꞌi̱ ngján nꞌe̱tjáá xinki̱á xi nkú tsꞌín yꞌéjña, kui xi kju̱a̱téxumaha̱ Nti̱a̱ná.
\v 24 Xi títsꞌíntjusun xi nkú tsꞌín yꞌéjña, kui xi tíjñajin tehe̱nte Nti̱a̱ná ko̱ Nti̱a̱ná tíjñajin tehe̱ntehe̱ xu̱ta̱ xuꞌbo̱. Ko̱ nga̱tꞌaha̱ Espiri̱tu̱ xi kitsjáná, bꞌa̱ ta̱ nꞌe yahaná nga kui tíjñajin tehe̱ntená.
\c 4
\s Bꞌi̱ tsꞌín tsakúya Jua má xi kui Espiri̱tu̱hu̱ Nti̱a̱ná
\p
\v 1 Jun já ntsꞌena̱, najmi tu̱ nꞌe sꞌejiun ngatentee̱ xi bꞌa̱ ku̱i̱tsu̱nu̱u nga Espiri̱tu̱hu̱ Nti̱a̱ná títsꞌín nga tínchja̱. Tu̱ sa ní cha̱se̱ sisihu̱un xi nkú ku̱i̱tsu̱, tu̱ xi bꞌa̱ nꞌe̱ cha̱hanu tsa kju̱axi̱ nga Espiri̱tu̱hu̱ Nti̱a̱ná tíjñajihi̱n a ra̱ najmi. A̱tꞌaha̱ kitsejíhin a̱sunntee̱ já profeta̱ tsankꞌá.
\v 2 Xi bꞌa̱ tsu nga yjoninte kikꞌa Jesucristo̱ nga jꞌai a̱sunntei̱, kui niu̱ xi ku̱a̱kúchjinu̱u nga kui xi tíjñajihi̱n Espiri̱tu̱ xi tsꞌe̱ Nti̱a̱ná.
\v 3 Ko̱ xi najmi bꞌa̱ tsu nga bꞌa̱ tsꞌín jꞌai Jesucristo̱, kui xi najmi tíjñajihi̱n Espiri̱tu̱hu̱ Nti̱a̱ná. Espiri̱tu̱ chꞌonkꞌun xi tsꞌe̱ ní nda̱ kontra̱ha̱ Cristo̱ tíjñajihi̱n. Ja kinuꞌyó nga tjíhin nga kjꞌu̱a̱í xi ngju̱a̱i̱ kontra̱ha̱ xi kitsꞌín nibá Nti̱a̱ná.\f + \fr 4:3 \ft “Xi kitsꞌín nibá Nti̱a̱ná” tsuhu̱ ra̱ “Cristo̱”.\f* Kui ja tíjña a̱sunntee̱ ndꞌa̱i̱.
\p
\v 4 Jun ntíntíntína̱, Nti̱a̱ná tsꞌe̱nu̱u ko̱ ja kinꞌe ngano̱ho̱o já profeta̱ tsankꞌá xuꞌbo̱, a̱tꞌaha̱ xi tíjñajinnu̱u ꞌyún tjín saha̱ ngaꞌyún nga xi tíjñajihi̱n xu̱ta̱ a̱sunntee̱.
\v 5 Kui já xuꞌbo̱ xi xu̱ta̱ a̱sunnte. Kui nga ni xi tsꞌe̱ a̱sunntee̱ nchja̱ni̱jmíyaha ko̱ xu̱ta̱ a̱sunntee̱ basínñjuhu̱ ni xi nchja̱.
\v 6 Tu̱nga máha ji̱n, Nti̱a̱ná tsꞌe̱ni̱. Xu̱ta̱ xi ja be Nti̱a̱ná, kui xi basínñjuni̱. Xu̱ta̱ xi najmi Nti̱a̱ná tsꞌe̱he̱, kui xi najmi basínñjuni̱. Bꞌa̱ nꞌe cha̱ha yá xi tíjñajihi̱n Espiri̱tu̱ xi tsuya ni xi na̱xu̱ tjín ko̱ yá xi tíjñajihi̱n jáninda xi bꞌana̱cha̱.
\s Bꞌi̱ tsꞌín tsakúya Jua mí nihi xi yꞌaha̱ kju̱a̱tjoo̱
\p
\v 7 Jun já ntsꞌena̱, bꞌi̱ ngján nꞌe̱tjáá xinki̱á, a̱tꞌaha̱ Nti̱a̱ná nibáha̱ ra̱ kju̱a̱tjoo̱ ko̱ ngayjee̱ xi tjíhi̱n kju̱a̱tjo, kui xi kitsjáha̱ Nti̱a̱ná nga ntíhi̱ ka̱ma ko̱ kui xi be Nti̱a̱ná.
\v 8 Xi najmi tjíhi̱n kju̱a̱tjo, najmi kje̱e be Nti̱a̱ná, a̱tꞌaha̱ kju̱a̱tjohó Nti̱a̱ná.
\p
\v 9 Bꞌi̱ tsꞌín tsakúchjiná kju̱a̱tjoho̱ Nti̱a̱ná. Kitsꞌín nibá Ntí nku tutuhu̱ a̱sunntei̱, tu̱ xi nga̱tꞌaha̱ Ntíhi̱ sa̱kúhuná nga ku̱i̱ntsu̱ba̱ tíkꞌaán.
\v 10 ¿Mí nihi xi ꞌmihi̱ kju̱a̱tjoo̱? Najmi tsa ñá xi kinꞌetjáá Nti̱a̱ná. Kui ní xi kitsꞌíntjoná ko̱ kitsꞌín nibá Ntíhi̱ tu̱ xi tsꞌi̱ínndyjatꞌaha ngatitsunná nkꞌie nga kitsjá yjoho̱ xi nkúhu chje̱. Kuihí ni xuꞌbi̱ xi tsakúchji kju̱a̱tjoo̱.
\p
\v 11 Jun já ntsꞌena̱, tsa bꞌa̱ tsꞌín kitsꞌíntjoná Nti̱a̱ná, kui nga ko̱ ta̱ ñá ta̱ tjíhin nga bꞌi̱ ngján nꞌe̱tjohoná xinki̱á.
\v 12 Ndaha nku najmi kje̱e be nkú tjín Nti̱a̱ná, tu̱nga tsa bꞌi̱ ngján nꞌetjáá xinki̱á, Nti̱a̱ná tíjñajin tehe̱ntená ko̱ kju̱a̱tjoho̱ sꞌejña chji kikjin a̱jinná.
\p
\v 13 Yaá nga tintsu̱ba̱jin tehe̱ntehe̱é Nti̱a̱ná ko̱ nga kui tíjñajin tehe̱ntená, a̱tꞌaha̱ kitsjáná Espiri̱tu̱hu̱.
\v 14 Ko̱ ji̱n kiya kikjii̱n ko̱ tíbixínyakixi̱ nga Nti̱a̱ Na̱ꞌmiu̱ kitsꞌín nibá Ntíhi̱ tu̱ xi tsꞌi̱ínkꞌankihi xu̱ta̱ xi tjín a̱sunntee̱.
\v 15 Tu̱ yáhá ni xi tsꞌi̱ínkjáíhi̱n nga Jesu xi Ntíhi̱ Nti̱a̱ná, kui xi tíjñajin tehe̱nte Nti̱a̱ná ko̱ Nti̱a̱ná tíjñajin tehe̱ntehe̱ xu̱ta̱ xuꞌbo̱.
\p
\v 16 Mankjinná ko̱ sꞌejinná nga tjoho̱ ñá Nti̱a̱ná. Nti̱a̱ná kui xi kju̱a̱tjo, ko̱ xi tíjñajin tehe̱nte kju̱a̱tjoo̱, kui xi tíjñajin tehe̱nte Nti̱a̱ná ko̱ Nti̱a̱ná tíjñajin tehe̱ntehe̱ xu̱ta̱ xuꞌbo̱.
\v 17 Bꞌa̱ tsꞌín sꞌejña chji kikjihin kju̱a̱tjoo̱ a̱jinná, tu̱ xi najmi jo jan ka̱mahaná ni̱stjín nkꞌie nga ku̱a̱se̱he̱ Nti̱a̱ná mí nihi xi kitsꞌín nga nkúnkú xu̱ta̱. A̱tꞌaha̱ xi nkú tsꞌín yꞌejña Jesucristo̱, bꞌa̱ tsꞌín tintsu̱ba̱á a̱sunntei̱.
\v 18 Má nga tjín kju̱a̱tjo najmi tjín kju̱a̱binkjun. Kju̱a̱tjo xi kui kikjiu̱n, kui xi mꞌosje kju̱a̱binkjuu̱n, a̱tꞌaha̱ xi tje̱n kju̱a̱ha̱, kui xi tsankjún. Kui bꞌa̱ maha, xi tsankjúhun, kui xi najmi kje̱e tíjñajihi̱n kju̱a̱tjo xi kui kikjin.
\p
\v 19 Ñá tjoná Nti̱a̱ná a̱tꞌaha̱ Nti̱a̱ná tjun kitsꞌíntjoná.
\v 20 Tsa tjín xi: “Tjona Nti̱a̱ná”, ku̱i̱tsu̱ ko̱ tu̱ sa unkiehé ngá nda̱ ntsꞌe̱, kui xi tíbꞌana̱cha̱. A̱tꞌaha̱ xi najmi tjoho̱ nda̱ ntsꞌe̱ xi tíma tíbaseꞌa, ¿nkú tsꞌín tsꞌi̱íntjoho Nti̱a̱ná nga najmi tíbe?
\v 21 Xi tjoho̱ Nti̱a̱ná tjíhin nga ta̱ tsꞌi̱íntjo nda̱ ntsꞌe̱. Kuihí kju̱a̱téxuma xuꞌbi̱ xi kinꞌekjái̱ín.
\c 5
\s Bꞌi̱ tsꞌín tsakúya Jua ni xi tsꞌín xi ntíhi̱ Nti̱a̱ná
\p
\v 1 Ngayjee̱ xi sꞌejihi̱n nga Jesu xi kitsꞌín nibá Nti̱a̱ná,\f + \fr 5:1 \ft “Xi kitsꞌín nibá Nti̱a̱ná” tsuhu̱ ra̱ “Cristo̱”.\f* kui xi kitsjáha̱ Nti̱a̱ná nga ntíhi̱ ka̱ma. Ko̱ ngayjee̱ xi tjoho̱ Nti̱a̱ Na̱ꞌminá, kui xi ta̱ tjoho̱ ngayjee̱ xi ntíhi̱ Nti̱a̱ná.
\v 2 Nkꞌie nga tjoná Nti̱a̱ná ko̱ tínꞌetjusaán ni xi yꞌéjña, ya chji chjiá nga ta̱ tjoná ngayjee̱ xi ntíhi̱ Nti̱a̱ná.
\v 3 Nga nꞌe̱tjáá Nti̱a̱ná, kui xi tsuhu̱ ra̱ nga nꞌe̱tjusaán ni xi yꞌéjña. Ko̱ najmi chꞌá xi áí ni xi yꞌéjña Nti̱a̱ná,
\v 4 a̱tꞌaha̱ ngayjee̱ xi ja ntíhi̱ Nti̱a̱ná tsꞌín ngana̱ha̱ a̱sunntei̱. Ko̱ nga̱tꞌaha̱ nga sꞌejinná Jesucristo̱, bꞌa̱ tsꞌín kinꞌe ngana̱ha̱ ra̱á a̱sunntee̱.
\v 5 Xi sꞌejihi̱n nga Jesu xi Ntíhi̱ Nti̱a̱ná, kui xi tsꞌín ngana̱ha̱ a̱sunntee̱.
\s Bꞌi̱ tsꞌín tsakúya Jua xi nkú tsꞌín Nti̱a̱ná yꞌéjña chji Jesu
\p
\v 6 Ntánijua ko̱ jní jꞌai sꞌejña chjihi Jesucristo̱. Najmi tu̱ suba ntánijua, ntánijua ní ko̱ jní. Ko̱ Espiri̱tu̱hu̱ Nti̱a̱ná ta̱ tsuya kui nii̱, a̱tꞌaha̱ kju̱axi̱ ni xi nchja̱ Espiri̱tu̱.
\v 7 Jan maha xi bꞌéjña chji yáha Jesucristo̱:
\v 8 Espiri̱tu̱hu̱ Nti̱a̱ná, ntánijuo̱ ko̱ jníu̱. Nkuhú bꞌa̱ i̱ncha tsu nga joo̱n.
\p
\v 9 Tsa nꞌekjáíhi̱ín én xi nchja̱ xu̱ta̱ nga nchja̱ni̱jmíyaha nku ni, tu̱nga yúhún chjíhi̱ ra̱ én xi nchja̱ Nti̱a̱ná. Á ꞌyún chjíhi̱ ra̱, a̱tꞌaha̱ Nti̱a̱ná xi kinchja̱ nga yꞌéjña chji Ntíhi̱.
\v 10 Xi sꞌejihi̱n Ntíhi̱ Nti̱a̱ná, kui xi ani̱ma̱ha̱ tíjñajihi̱n én xi kinchja̱ Nti̱a̱ná nga yꞌéjña chji Ntíhi̱. Tu̱nga xi najmi sꞌejihi̱n Nti̱a̱ná, kui xi tíbe tsankꞌá, a̱tꞌaha̱ najmi sꞌejihi̱n én xi kinchja̱ Nti̱a̱ná nga yꞌéjña chji Ntíhi̱.
\p
\v 11 Nga kitsjáná nga ku̱i̱ntsu̱ba̱ tíkꞌun síaán ko̱ nga Ntíhi̱ sakújinná kju̱a̱tíkꞌun xuꞌbi̱, kui én xuꞌbi̱ xi kinchja̱ Nti̱a̱ná.
\v 12 Xi tíjñajihi̱n Ntíhi̱ Nti̱a̱ná, kui xi tíjñaha̱ kju̱a̱tíkꞌuu̱n. Tu̱nga xi najmi tíjñajihi̱n Ntíhi̱ Nti̱a̱ná, kui xi najmi tíjñaha̱ kju̱a̱tíkꞌuu̱n.
\s Bꞌi̱ tsꞌín kitsꞌínkje Jua xu̱ju̱i̱n
\p
\v 13 Kuakꞌietꞌánu̱u ni xuꞌbi̱, jun xi sꞌejinnu̱u Ntíhi̱ Nti̱a̱ná, tu̱ xi cha̱hanu nga tíjñanu̱u kju̱a̱tíkꞌun xuꞌbi̱ ko̱ ku̱i̱ntsu̱ba̱ tíkꞌun síún.
\p
\v 14 Maꞌyúnkꞌaán Nti̱a̱ná, a̱tꞌaha̱ yaá tsa ku̱i̱nchíhi̱í xi nkú tsꞌín mjehe̱ nga ku̱i̱nchíhi̱í, ku̱a̱sínñjuná.
\v 15 Ko̱ xi nkú tsꞌín yaá nga Nti̱a̱ná basínñjuhu̱ tu̱ mí nihí ni xi binchihi̱í, bꞌa̱ ta̱ tsꞌín yaá nga ja nꞌe̱kjáíhi̱ín ni xi kuakinchihi̱í.
\p
\v 16 Tsa tjín xi tíbe nga ngatitsun títsꞌín nda̱ ntsꞌe̱, ko̱ tsa ngatitsun xi títsꞌín najmi ngabaya tje̱he̱n ra̱, nkꞌie nga ku̱i̱nchja̱ko̱ Nti̱a̱ná kanchja̱ntjai ko̱ Nti̱a̱ná tsjá ngáha̱ ra̱ nda̱ ntsꞌe̱ nga kꞌúéjña tíkꞌun. Ngatitsun xi najmi tje̱he̱n ra̱ ngabaya tínchjani̱jmíyahana. A̱tꞌaha̱ tjín ngatitsun xi tje̱he̱n ra̱ ngabaya. Najmi tíbankia nga chu̱bantjo xi tsꞌi̱ín ngatitsun xuꞌbo̱.
\v 17 Ngayjee̱ ni xi najmi nda xi tsꞌín xu̱ta̱, kui xi ngatitsun, tu̱nga tjíhín ngatitsun xi najmi tje̱he̱n ra̱ ngabaya.
\p
\v 18 Yaá nga xi kitsjáha̱ Nti̱a̱ná nga ka̱ma ntíhi̱ najmi nkaha̱ nga tsꞌín ngatitsun, a̱tꞌaha̱ Ntíhi̱ Nti̱a̱ná kuhu̱n xu̱ta̱ xuꞌbo̱ ko̱ najmi tsꞌínko̱ho̱ nda̱nindoo̱.
\v 19 Ko̱ yaá nga Nti̱a̱ná tsꞌe̱ná ko̱ nga nda̱nindoo̱ batéxumaha̱ ngayjee̱ a̱sunntee̱.
\v 20 Ko̱ ta̱ yaá nga jꞌai Ntíhi̱ Nti̱a̱ná ko̱ kitsjáná kju̱a̱nkjintakꞌun tu̱ xi cha̱haná Nti̱a̱ xi nku tutuu̱. Tintsu̱ba̱jihi̱ín xi nku tutuu̱, kui xi Jesucristo̱ Ntíhi̱ Nti̱a̱ná. Kuihí xi Nti̱a̱ xi nku tutuu̱ ko̱ kui xi tsjáha̱ nga kꞌúéntu tíkꞌun sín xu̱ta̱.
\p
\v 21 Jun ntína̱, ti̱yú tꞌaxíhu̱un nti̱a̱ xi xu̱ta̱ tsꞌínnda.