\id 3JN Mazatec of Jalapa de Díaz
\h Xu̱ju̱n xi ma jahan xi kitsꞌínntu nda̱ postru̱ Jua
\toc1 Xu̱ju̱n xi ma jahan xi kitsꞌínntu nda̱ postru̱ Jua
\mt Xu̱ju̱n xi ma jahan xi kitsꞌínntu nda̱ postru̱ Jua
\c 1
\s Bꞌi̱ tsꞌín kikjaniñaha̱ Jua Gayo̱
\p
\v 1 An xi nda̱cháha̱ xu̱ta̱ ni̱nku̱ títsꞌinkjíhi xu̱ju̱i̱n nda̱ xinkjíán Gayo̱. Tjo kju̱axi̱na ji.
\p
\v 2 Ji nda̱ ntsꞌena̱, bankihi̱ Nti̱a̱ná nga xi nkú tsꞌín nda tísájin ni xi tsꞌe̱, bꞌa̱ ta̱ tsꞌín nda kasakú ni̱yáhi ngayjee̱ ni xi nꞌe̱i̱ ko̱ nga nda ni̱stjin xi tsjáhi nga ku̱i̱nchin.
\v 3 A̱tꞌaha̱ tsjo ṉkjún kamana nkꞌie nga jꞌaisena kꞌu̱a̱ já ntsꞌeé nga kitsúyana ni xi kikie, nga tu̱ nkú tje̱nnkiní Nti̱a̱ná ko̱ nga xi nkú tsꞌín tisinjñajin ni xi yaha̱ ra̱ ni xi na̱xu̱ tjín.
\v 4 Nga ntꞌe nga ntína̱ tíi̱nchajin ni xi na̱xu̱ tjín, kui nihi xi ꞌyún tsjána kju̱a̱tsjo.
\s Bꞌi̱ tsꞌín kitsúya Jua xi nkú tsꞌín Gayo̱ tsasinko̱ xu̱ta̱ ni̱nku̱ // xi jꞌaikꞌúhu̱n
\p
\v 5 Ji nda̱tsꞌena̱, tínꞌei ni xi bꞌa̱ tjín nkꞌie nga tíbisinko̱i̱ já ntsꞌeé ko̱ ꞌyún ṉkjún sa nda tínꞌei nga tíbisinko̱i̱ xi nibáha xin nanki.
\v 6 Nginku̱n xu̱ta̱ ni̱nku̱ kitsúya já ntsꞌeé xuꞌbi̱ xi nkú tsꞌín tjohi. Ko̱ nda nꞌe̱i̱ tsa ku̱i̱si̱nko̱i̱ nga tsꞌi̱ínndju̱ú ngáha ni̱yáha̱, a̱tꞌaha̱ bꞌa̱ tsꞌín tjíhin nga ku̱i̱si̱nka̱á xu̱ta̱ xi tsꞌínxátꞌaha̱ Nti̱a̱ná.
\p
\v 7 A̱tꞌaha̱ tjoho̱ Jesucristo̱, kui nga i̱ncha tsitjuhu nankihi̱. Najmi i̱ncha kitsꞌínkjáíhi̱n ni xi tsꞌe̱ xu̱ta̱ a̱sunntee̱.
\v 8 Kui bꞌa̱ maha, tjíhin nga kꞌu̱a̱i̱ntehe̱ ra̱á niꞌyaná já ntsꞌeé xi nkúhu xuꞌbi̱, tu̱ xi ku̱i̱si̱nko̱honá nga kꞌu̱éni̱jmí ni xi na̱xu̱ tjín.
\s Bꞌi̱ tsꞌín kitsúya Jua xi nkú chꞌon kitsꞌín Diotre̱fe̱
\p
\v 9 Kitsꞌinkjíhi̱ nku xu̱ju̱n xu̱ta̱ ni̱nku̱, tu̱nga máha Diotre̱fe̱, tsjoho̱ nga tu̱ nku kuihí ku̱a̱téxumaha̱ xu̱ta̱ ni̱nku̱. Najmi títsꞌínkjáíhi̱n xá xi tjínni̱.
\v 10 Kui kju̱a̱ha, tsa kfíhinna yo̱, tsꞌinnisihi̱ ra̱ ni xi títsꞌín. A̱tꞌaha̱ én tsankꞌá tíkjesíntje̱nneni̱ ko̱ chꞌon tsꞌín tínchja̱yaneni̱. Ko̱ najmi tu̱ nku ni xuꞌbi̱ xi títsꞌín. Ta̱ najmi tsꞌínkjáíhi̱n já ntsꞌeé xi bichúkꞌuhu̱n. Bꞌéchjaha̱ xi mjehe̱ tsꞌi̱ínkjáíhi̱n já ntsꞌeé ko̱ mꞌosje a̱jihi̱n xu̱ta̱ ni̱nku̱.
\p
\v 11 Ji nda̱ ntsꞌena̱, najmi tu̱ nꞌei ni xi tsꞌín já chꞌonkꞌuu̱n. Ni xi tsꞌín ní já xi nda tsꞌín, kui xi nꞌe̱i. Xi nda títsꞌín, kui xi Nti̱a̱ná tsꞌe̱he̱. Tu̱nga xi chꞌon títsꞌín, kui xi najmi kje̱e be Nti̱a̱ná.
\s Bꞌi̱ tsꞌín kitsúya Jua nga nda títsꞌín Demetri̱o̱
\p
\v 12 Ngayjee̱ xu̱ta̱ tsuya nga nda títsꞌín Demetri̱o̱, ko̱ kju̱axi̱ kjáíhin ni xi i̱ncha tsu. Ko̱ ji̱n ta̱ nda chubani̱jmíyaha̱ni̱ nkú nda tsꞌín ndo̱. Ji yai nga kju̱axi̱ ni xi chubai̱.
\s Bꞌi̱ tsꞌín kitsꞌínkje Jua xu̱ju̱i̱n
\p
\v 13 Tjín ṉkjún sana ni xi xíhin, tu̱nga najmi mjehéna xu̱ju̱n kꞌuetꞌáha,
\v 14 a̱tꞌaha̱ mjena kfínse xatíhi ko̱ kuinchjani̱jmíko̱ho.
\p
\v 15 Kasꞌehi kju̱a̱jyu. Xi tjoho̱ ji xi tjín e̱i̱ tíi̱ncha tsꞌínkjihi kju̱a̱suniña, ko̱ ta̱ tje̱hi̱n i̱chí kju̱a̱suniñani̱ nga nkúnkú xi tjoni̱ xi tjín yo̱.