\id JUD Mazatec of Jalapa de Díaz
\h Xu̱ju̱n xi kitsꞌínntu Juda̱
\toc1 Xu̱ju̱n xi kitsꞌínntu Juda̱
\mt Xu̱ju̱n xi kitsꞌínntu Juda̱
\c 1
\s Bꞌi̱ tsꞌín kikjaniñaha̱ Juda̱ xu̱ta̱ ni̱nku̱
\p
\v 1 An Juda̱, an xi nda̱ musu̱ síhi̱n Jesucristo̱ ko̱ nda̱ ntsꞌé tíxihi̱n Santiago̱, títsꞌinkjínu̱u xu̱ju̱i̱n jun xi kichjꞌajinnu̱u. Nti̱a̱ Na̱ꞌminá tjoho̱ jun ko̱ tíkunnu̱u Jesucristo̱.
\p
\v 2 Katuma ni̱ma̱ha̱ Nti̱a̱ná jun ko̱ ꞌyún katsjánu̱u kju̱a̱jyu ko̱ kju̱a̱tjo.
\s Bꞌi̱ tsꞌín tsakúya Juda̱ ni xi tsꞌín já maestru̱ tsankꞌá xi tjínjihi̱n xu̱ta̱ ni̱nku̱
\p
\v 3 Já ntsꞌe, ja ndꞌa̱i mje ṉkjúhunna nga kꞌuetꞌánu̱u xi nkú tsꞌín nkuhú tsꞌankiá. Ndꞌa̱i̱ tjíhin nga tíbꞌentúnu̱u ko̱ tíbankinu̱u nga nꞌe̱ chúkju̱o̱ nga ti̱nchajiun xi nkú tsꞌín sꞌejinná, kui xi nkuhú nga kinꞌekjasꞌehe̱n ra̱ xu̱ta̱ xi kikjꞌátsꞌe̱ Nti̱a̱ná.
\v 4 Bꞌa̱ tíxian a̱tꞌaha̱ kꞌu̱a̱ já xi jasꞌenjin maña̱nu̱u. Kui xi ja ndꞌa̱i tíjñanehe̱ ra̱ ni xi kanéhe̱ a̱tꞌaha̱ najmi nda kitsꞌín. Najmi benkjún Nti̱a̱ná jóo̱ ko̱ tíi̱ncha tsꞌínkjꞌóntjaiya kju̱a̱ndaha̱ Nti̱a̱ná. Bꞌa̱ tíi̱ncha tsu nga nkꞌie nga kju̱a̱ndaha̱ Nti̱a̱ná tintsu̱ba̱jián ma nꞌeé tu̱ mí nihí ni. Ko̱ najmi tsꞌínkjáíhi̱n Jesucristo̱ xi Nda̱ Nti̱a̱ná maha ko̱ xi batéxumaná.
\p
\v 5 Ndaha tsa ja kisakúyanu̱u ni xi xínnu̱u, tu̱nga mjehéna tsꞌinkjꞌáítsjennu̱u. Nti̱a̱ná tsꞌasjejin xu̱ta̱ xi tsꞌe̱ nga kikꞌonsje a̱nte Egipto̱ ko̱ a̱skahan kitsꞌínkjesun xi najmi kisꞌejihi̱n.
\v 6 Ko̱ ntítsje xi najmi kixi̱ kitsꞌíntjusun xá xi kikꞌa̱i̱hi̱ nga tu̱ yꞌéntu masehén a̱ntehe̱, kui xi kjintuyáꞌyún sín má jyuu̱n santa nkúhu nga nꞌe̱ko̱ku̱a̱ nkꞌie nga ku̱i̱chú ni̱stjin chánka nga cha̱se̱he̱ mí nihi xi kitsꞌín nga nkúnkú xu̱ta̱.
\p
\v 7 Bꞌa̱ ta̱ i̱ncha kitsꞌín xu̱ta̱ xi kisꞌe nanki Sodoma̱ ko̱ nanki Gomorra̱ ko̱ nanki xi tjíndaihi̱, xi nkú nga i̱ncha kitsꞌín ntítsjee̱. I̱ncha kitsꞌínkasꞌehe̱n yjoho̱ nga chu̱ba̱ kikjantuko̱hó xinkjín. Najmi kikienkjún yjoho̱ nga ꞌyún tse ni xi i̱ncha kitsꞌín. Kui nga kinꞌe nibájenehe̱n ra̱ ndꞌí xi najmi maha̱ ꞌmeyaha. Bꞌa̱ tsꞌín kikꞌa̱i̱hi̱ ra̱ kju̱a̱ꞌun. Kui niu̱ xi bakúyaná nkú maná nkꞌie nga najmi nuꞌyáꞌéhe̱én Nti̱a̱ná.
\p
\v 8 Ko̱ bꞌa̱ ta̱ ka̱maha̱ já xi jasꞌejín maña̱nu̱u. Nga̱tꞌaha̱ nchi̱nihi̱ títsꞌín chu̱ntíhi yjoho̱ nginku̱n Nti̱a̱ná, najmi benkjún xi tjíhi̱n xá ko̱ chꞌon tsꞌín nchja̱yane xi i nkꞌa ján.
\v 9 Najmi ma bꞌa̱ nꞌe, ta̱ santaha ntítsje kꞌaku̱ Miguel najmi bꞌa̱ kitsꞌín. Nkꞌie nga tíkjánko̱ nda̱nindoo̱ nga tíkjányaha yjonintehe̱ Moise, najmi kama kꞌun tsa ta̱ kuihi kitsꞌíhi̱n kju̱a̱ yjoho̱. Tu̱ sa ní bꞌi̱ kitsú: “¡Nti̱a̱ná katsꞌínnijéhi ni xi tínꞌei!”
\v 10 Tu̱nga máha já xi jasꞌejin maña̱nu̱u, chu̱ba̱ chꞌohón tsꞌín nchja̱yane ni xi najmi mankjihi̱n. Ko̱ máha ni xi mankjin suba kuihi̱, xi chu̱ba̱ tsꞌínkjáíhín ra̱ xi nkú joyaha chu̱ nga najmi tsꞌínnkjinkꞌun, kui nga̱tꞌaha̱ ni xuꞌbi̱ títsꞌínkatsúhun yjoho̱.
\p
\v 11 ¡Ni̱ma̱ rú tsꞌíhin jóo̱! Ngakjá tjíma xi nkú tsꞌín ngakjá kikjatsúꞌba Cain. A̱tꞌaha̱ ꞌyún mjehe̱ to̱on, kui nga títsꞌínndyjajihi̱n ra̱ yjoho̱ xi nkúhu nda̱ profeta̱ Balaam. Ko̱ a̱tꞌaha̱ i̱ncha fi kontraha̱ xi tjíhi̱n xá, kui nga ku̱a̱yáha xi nkúhu Kore.
\p
\v 12 Nkꞌie nga a̱jihi̱n kju̱a̱tjoho̱ Nda̱ Nti̱a̱ná ma ñjakúko̱ xinki̱u, ta̱ bichú jóo̱ yo̱, tu̱nga najmi kjehén ra̱ ni̱yá nga kꞌúéntujínnu̱u jóo̱. Chu̱ba̱ kjinehé ko̱ ꞌbi nga najmi chumi nihi xi nusihi̱n. Xi nkú joyaha ni̱nti̱ xi najmi tjíhi̱n tsꞌí jóo̱, xi tu̱ má xi tje̱hén ni fiko̱ho̱ ntjo̱. Ko̱ xi nkú joyaha yá tu xi najmi bjaha̱ tu nga ni̱stjihi̱n, xi nkúhu yá xi kja̱ma̱ha̱ kjin kichjuyanji, yá xi tu̱ xí jahá kꞌien.
\v 13 Xi nkú tsꞌín baténdzjo xúhu̱ tꞌéhe̱n ntáchakꞌuu̱n nga ꞌyún, bꞌa̱ tsꞌín bakúchji jóo̱ ni chꞌonkꞌun xi tsꞌín, ni xi tjíhin nga ka̱ma subaha̱ kai. Kui xi nkú joyaha niñu xi kindyjajihi̱n ni̱yáha̱. Kui xi tje̱n síhi̱n má jyuu̱n.
\p
\v 14 Kitsꞌínkjó Nti̱a̱ná jóo̱ nkꞌie nga kitsꞌínkinchja̱ Enoc. Enoc kui xi kama ntje̱ xi ma yatuhu̱ ra̱ Adan. Bꞌi̱ kitsú: “An kikie nga jꞌaiko̱ Nti̱a̱ná nkjin ṉkjún mii̱ ntítsjehe̱,
\v 15 tu̱ xi ku̱a̱se̱he̱ ra̱ mí ni xi nda kitsꞌín ko̱ mí ni xi najmi nda kitsꞌín ngayjee̱ xu̱ta̱ ko̱ tu̱ xi xi najmi benkjúhun Nti̱a̱ná kꞌu̱éjñanehe̱ ra̱ mí nihi xi tje̱he̱n. Bꞌa̱ nꞌe̱he̱ tu̱ nga̱tꞌaha̱ ngayjee̱ ni chꞌonkꞌun xi i̱ncha kitsꞌín ko̱ tu̱ nga̱tꞌaha̱ ni ngayjee̱ én chꞌon tsu xi i̱ncha kitsúhu̱ Nti̱a̱ná.”
\p
\v 16 Najmi tjín ni xi sasíhi̱n já xuꞌbi̱. Tu̱ mí nihí ni xi bꞌa̱ tsꞌínko̱. Nkuhú ni xi nchja̱ha̱ ani̱ma̱ha̱, kui xi bangisjai. Nkꞌa bꞌasje yjoho̱ nga nchja̱, ko̱ tu̱ xi sa̱kúhu̱ ra̱ ni xi i̱ncha mjehe̱, nda nchja̱yane kꞌu̱a̱ xu̱ta̱.
\s Bꞌi̱ tsꞌín kitsjáni̱yáha̱ Juda̱ xu̱ta̱ ni̱nku̱
\p
\v 17 Tu̱nga jun já ntsꞌena̱, nꞌe̱kjꞌáítsjon én xi kitsúya títjun já postru̱hu̱ Nda̱ Nti̱a̱ná Jesucristo̱.
\v 18 Bꞌa̱ kitsúnu̱u: “Ni̱stjin xi fekuu̱ sꞌe̱ xu̱ta̱ xi ku̱a̱jnu̱kie ni xi tsꞌe̱ Nti̱a̱ná ko̱ kꞌúéntujín ni chꞌonkꞌun xi i̱ncha fásihi̱n.”
\v 19 Kui xu̱ta̱ha xi bakjánya xu̱ta̱ ni̱nku̱, xi tsꞌín ni chꞌonkꞌun xi nchja̱ha̱ ani̱ma̱ha̱. Najmi tíjñajihi̱n Espiri̱tu̱hu̱ Nti̱a̱ná.
\p
\v 20 Tu̱nga máha jun, já ntsꞌena̱, ndjá ti̱nchajiun xi nkú tsꞌín sꞌejinnu̱u, kui xi tu̱ xí na̱xu̱hú nginku̱n Nti̱a̱ná. Ko̱ xi nkú tsꞌín tsjáni̱yánu̱u Espiri̱tu̱hu̱ Nti̱a̱ná, bꞌa̱ tsꞌín chu̱bako̱o Nti̱a̱ná.
\v 21 Katjindjuko̱nu̱u kju̱a̱tjoho̱ Nti̱a̱ná nga chúyoho̱o ni̱stjin nga Nda̱ Nti̱a̱ná Jesucristo̱ tsꞌi̱ínkꞌíéntu tíkꞌunko̱ sínná kju̱a̱ni̱ma̱ takꞌuhu̱n.
\p
\v 22 Katuma ni̱ma̱nu̱u xi jo jan tímaha̱.
\v 23 Nꞌe̱sjejiun a̱jin ndꞌíu̱ xi yo̱ tjíntujín. Xi machjéhe̱n nga ka̱ma ni̱ma̱nu̱u, katuma ni̱ma̱nu̱u. Tu̱nga chúhún ru̱u yjonu̱u nga bꞌa̱ nꞌo̱, tu̱ xi najmi tsꞌi̱ínkatsúhu̱nnu̱u ni chꞌonkꞌun xi kitsꞌín.
\s Bꞌi̱ tsꞌín kitsꞌíntsjoho̱ Juda̱ Nti̱a̱ná
\p
\v 24 Nti̱a̱ná tjíhi̱n ngaꞌyún nga kúnnu̱u tu̱ xi najmi kuankín tꞌaxíhi̱n ru̱u ni xi tsꞌe̱, ko̱ tsꞌi̱ín nga najmi chumi nihi xi chju̱ntí sꞌe̱nu̱u ko̱ tsjánu̱u kju̱a̱tsjo chánka tu̱ xi ku̱i̱nchahanu nginku̱n ni̱stjin nkꞌie nga kua̱kúchji kju̱a̱chánkaha̱.
\v 25 Nku tutuhú kui xi Nti̱a̱ná xi tsꞌínkꞌankiná. Kui xi kanꞌetsjoho̱, kayaha̱ nga chánka ko̱ nga kui xi batéxuma, ko̱ nga kui xi tjíhi̱n ngaꞌyún, tu̱ nga̱tꞌaha̱ Nda̱ Nti̱a̱ná Jesucristo̱. Bꞌa̱ kama ko̱ tu nkjéhé ni nga bꞌa̱ tíma. Bꞌa̱ katuma.