\id PHP
\h Filipenses
\toc1 Filipenses
\mt Xon⁴ xi³ pa²stro⁴ Pablo qui³squi³-le⁴ cho⁴ta⁴ filipenses
\c 1
\s Pablo si¹ti²ˀnta³
\p
\v 1 Jin⁴ ni¹⁴-jin⁴ Pablo cao⁴ Timoteo, cho⁴ˀnta³-le⁴
Jesucristo. Ti³chji³-lai²⁴jin⁴ nca³tsˀio³ xi³ cho⁴ta⁴-le⁴
Cristo ya⁴ Filipos. Ti³yo³cao⁴³ Cristo Jesús. Cˀoa⁴-ti⁴
ti³chji³-lai²⁴jin⁴ nca³ jon² xi³ ni²coi²ntao⁴³ cho⁴ta⁴-le⁴
Cristo, cao⁴ jon² xi³ ni²sin³-lao⁴³.
\v 2 Ca²ta³tsjoa¹-no³ cjoa⁴nta³,
ca²ta³si¹qui³njen³nchˀan¹jin³ ni⁴ma⁴-no³ Ni³na¹ Nˀai³-na¹
cao⁴ Nai³-na¹ Jesucristo.
\s Pablo vˀe¹tsˀoa³ xi³ tˀa³tsˀe⁴ cho⁴ta⁴-le⁴ Cristo xi³
tjio¹ ya⁴ Filipos
\p
\v 3 Tsjoa³-le⁴ cjoa⁴nta³ Ni³na¹-na⁴ xi³ tˀa³tsˀe⁴
nca³yi³je³ xi³ fa³ˀai³tsjen³-na³ xi³ tˀa³tsaon⁴³.
\v 4 Nca³ntsjai² cˀia⁴ nca³ vˀe³tsˀoa²³-le⁴ Ni³na¹,
tsjoa¹ vˀe³tsˀoa²ntjai²³-no³ nca³tsˀio³.
\v 5 Tsjoa³-le⁴ cjoa⁴nta³ Ni³na¹-na⁴ nca³ nta³
ti³mai¹cao⁴-nao¹³ xi³ tˀa³tsˀe⁴ je² en¹nta³ tˀa³tsˀe⁴
Cristo sa³ˀnta³ ni⁴čhjin³ nca³ qui³no²ˀya² ti¹tjon²³
sa³ˀnta³ ntˀai⁴-vi⁴ ntai⁴.
\v 6 Nta³ ˀve³-coan³ nca³ Ni³na¹ xi³ cˀoa⁴-sˀin²
tsa³cˀe¹tsˀia⁴cao⁴jin³ ni⁴ma⁴-no³ je² xa¹ xi³ nta³-ve⁴,
to⁴sin³ to⁴nta³ si⁴²jnco³ sa³ˀnta³ ni⁴čhjin³ nca³
cjoa⁴ˀai¹ Jesucristo.
\v 7 Tjin¹-na³ cjoa⁴qui²xi⁴ nca³ cˀoa⁴-sˀin²
si³cja³ˀai³tsjen³ tˀa³tsaon⁴³ nca³tsˀio³, nca⁴
si³cjao¹que³-no³. Jon² nio¹³ xi³ to⁴jnco³
ti³chjoe¹cao⁴-nao¹³ cjoa⁴nta³-le⁴ Ni³na¹, nca³ ti²jna⁴
cjoa⁴ñˀain³, cˀoa⁴ nca³ nchja²ntje²³ nca³
si³qui²xi⁴ya³nta³ je² en¹nta³ xi³ tˀa³tsˀe⁴ Cristo.
\v 8 Ni³na¹ je² ni¹ xi³ testigo-na⁴ jo³-sˀin² nca³
cjoa⁴qui²xi⁴ nˀion¹ tjao²que⁴-no³ cao⁴ cjoa⁴tjao²cha³-le⁴
Jesucristo.
\v 9 Je²-vi⁴ xi³ vˀe³tsˀoa²ntjai²³-no³, nca³ je²
cjoa⁴tjao²cha³-no³ coan⁴ncjin²ya³-ni³ cao⁴ cjoa⁴chji⁴ne⁴
cao⁴ cjoa⁴ˀi³sen³ta³con²,
\v 10 jme¹-ni³ nca³ jcha⁴-si¹nio³ xi³ nta³ tjin¹, cˀoa⁴
jme¹-ni³ nca³ tsje³ coan⁴-si¹nio³, nca³ ni⁴jme³-jin² je¹
sˀe⁴-no³ cˀia⁴ ni⁴čhjin³ nca³ cjoa⁴ˀai¹ Cristo.
\v 11 Vˀe³tsˀoa²ntjai²³-no³ nca³ nˀion¹ nta³
cˀoa⁴sˀiaon⁴³ je² cjoa⁴qui²xi⁴ xi³ nčhoa¹-ni³ Jesucristo.
Cˀoa⁴-sˀin² chˀa⁴sje³je³yao³, cˀoa⁴ nta³ chˀa⁴sjao³
Ni³na¹.
\s Pablo qui³ to⁴jnco³ ntia⁴²-le⁴ Cristo
\p
\v 12 ˀnti¹ntsˀe³², me³-na³ nca³ ca²ta³ˀyao³ nca³
to⁴tˀa³tsˀe⁴ je² cjoa⁴ xi³ cji³ma³tˀen³ nca³ an³,
nqui²sa⁴-sa³ to⁴ncjin² cˀa³ qui³sca³son² je² en¹nta³ xi³
tˀa³tsˀe⁴ Cristo.
\v 13 Je³ve³ nca³tsˀi³ xi³ tjio¹ i⁴ cuartel, cao⁴
nca³tsˀi³ xi³cˀa³, nca³ je¹ntjai²-le⁴ Cristo ti²jna⁴-nia¹³
cjoa⁴ñˀain³.
\v 14 Ncjin² ma³-ni³ xi³ ntsˀe³² cho⁴va² nca³ ti³yo³coa⁴²
Nai³-na¹. Coi³ cjoa⁴ tjio¹cjoe¹ cjoa⁴nˀion¹ta³con² nca³
cjoa⁴ñˀain³ ti²jna⁴ nca³ an³. To⁴nqui²sa⁴-sa³
ma³nˀion¹con³ nca³ nchja⁴ je² en¹-le⁴ Ni³na¹, nca³
tsin²-le⁴ cjoa⁴jcon³-jin².
\v 15 Tjin¹ cˀa³ cho⁴ta⁴ xi³ cjoa⁴qui²xi⁴ nchja⁴ya³
tˀa³tsˀe⁴ Cristo nca³ ma³xin²con³, cˀoa⁴ nca³ cjan¹cao⁴
xi³cˀa³. To⁴nca³ cˀoa⁴-ti⁴ tjin¹ cˀa³ cho⁴ta⁴ xi³
ña³qui³ cao⁴ cjoa⁴nta³-le⁴ nchja⁴ya³-ni³.
\v 16 Je² xi³cˀa³ nchja⁴ya³ en¹ tˀa³tsˀe⁴ Cristo, to⁴nca³
to⁴xo⁴cˀoa⁴ tjio¹sˀin¹ nca³ me³-le⁴ nca³ nqui²sa⁴ tse³
cjoa⁴ñˀain³ sca⁴ne²-na³.
\v 17 To⁴nca³ je² xi³cˀa³ ña³qui³ cao⁴ cjoa⁴tjao²cha³
nchja⁴ya³-ni³, nca³ ve³-ni³ nca³ coi³ xa¹ qui³sˀe³ne²-na³
nca³ coi³nchja²ntje²³ je² en¹nta³ tˀa³tsˀe⁴ Cristo.
\v 18 Jme¹ ni¹-ˀni³. To⁴jo³ tjio¹nchja⁴ya³ tˀa³tsˀe⁴
Cristo, nta³ tsa² tjin¹ cˀa³ xi³ to⁴xo⁴cˀoa⁴ tjio¹sˀin¹,
cˀoa⁴ nta³ tsa² tjin¹ cˀa³ xi³ cao⁴ cjoa⁴qui²xi⁴
nchja⁴ya³-ni³. Coi³ ma³tsjoa³-na³, to⁴jo³ coan⁴tsjoa³-na³.
\v 19 ˀve³-nia¹³ nca³ je²-vi⁴ cˀoa⁴-sˀin²
cjoe⁴tˀain³-na³, coi²-tjo⁴ntjai²³-nia¹³ nca³
ti³vˀe²tsˀoa³ntjai²-nao¹³. Cˀoa⁴-ti⁴ je² Espíritu
Santo-le⁴ Jesucristo ti¹va³sen¹cao⁴-na³.
\v 20 Cˀoa⁴-sˀin² nˀion¹ me³-na³, cˀoa⁴ ti²co³ya³-le⁴
nca³ ni⁴to⁴jme³-jin² xi³ coan⁴soa³-ni³na³. To⁴sa³ cao⁴
nca³yi³je³ cjoa⁴nˀion¹ta³con² jo³-ni³ nca³ntsjai²
cˀoa⁴-ti⁴ ntˀai⁴-vi⁴, nqui²sa⁴-sa³ coi⁴tjo³je³ya³ Cristo
xi³ to⁴tˀa³tsˀan⁴, nta³ tsa² coa²te⁴jna³coan³, nta³ tsa²
coi³ya¹³.
\v 21 To⁴jnco³ ntia⁴²-le⁴ Cristo ti²fia³ nca³ ti²jna⁴coan³,
cˀia⁴ tsa² mˀen³, coi⁴njen⁴-na³.
\v 22 To⁴nca³ tsa² coa²te⁴jna³coan³, cˀia⁴² nta³ coi⁴tjo³
xa¹-na⁴. Li²coi³ ˀve³ an³-vi⁴ jña³-le⁴ xi³ cjoa³ˀa³jian³.
\v 23 Je² nca³ jao² cjoa⁴-ve⁴ ti²jna⁴jin³ va³sen³-le⁴.
Cjai¹nca³ tso²³-coan³ an³-vi⁴ nca³ coi²tjo⁴jian³ i⁴-vi⁴,
nca³ coa²te⁴jna³coa⁴ Cristo, coi³ xi³ nqui²sa⁴ nˀion¹ nta³
tjin¹.
\v 24 To⁴nca³ tsa² coa²te⁴jna³coan³, coi³ xi³ nqui²sa⁴
ma³chjen¹ xi³ tˀa³tsaon⁴³.
\v 25 Nta³ ˀve³-coan³ je²-vi⁴. ˀve³-nia¹³ nca³
coa²te⁴jna³-sa³, nca³ to⁴jo³ coa²te⁴jna³jin³-sa³no³
nca³tsˀio³, jme¹-ni³ nca³ sˀe⁴-sa³ni³no³ cjoa⁴tsjoa³,
cˀoa⁴ jme¹-ni³ nca³ coa⁴nquin¹ti¹tjon² cao⁴ nqui²sao⁴³
jo³-sˀin² ma³cjain¹-no³.
\v 26 Nqui²ntia³ cjoi¹con³-no³, jme¹-ni³ nca³ nqui²sa⁴
nˀion¹ coi⁴nˀo⁴sje³je³yao³ Cristo to⁴tˀa³tsˀan⁴.
\v 27 Nta³ ta³nquin¹cao⁴³ yao³-no³, jo³-sˀin² va³quin²-le⁴
je² en¹nta³ xi³ tˀa³tsˀe⁴ Cristo, jme¹-ni³ nca³ tsa² coan⁴
cjoi¹con³-no³, cˀoa⁴ tsa² tsi² tsa² cjoia¹³,
cjoi³nčhˀoe³-nia¹³ xi³ tˀa³tsaon⁴³ nca³ nta³ coi⁴yo³ nca³
to⁴jnco³ cjoa⁴fa³ˀai³tsjen³ sˀe⁴-no³, cˀoa⁴ nca³
cˀoai⁴-lao⁴³ nca³nˀion¹ xi²nquio⁴³ xi³ tˀa³tsˀe⁴ en¹nta³
xi³ ma³cjain¹-na¹.
\v 28 Ni⁴to⁴jme³-jin² xi³ vi³jcon³-lao⁴³ xi³ chˀao³
ve³con³-no³. Coi³ xi³ ña³qui³ cˀoa⁴-sˀin²
va³co¹son²tsen³-le⁴ nca³ coai⁴cha³, to⁴nca³ jon²
coi²tjo⁴ntjai²-nio¹³. Je² Ni³na¹ xi³ cˀoa⁴-sˀin²
va³co¹son²tsen³.
\v 29 Jon² tsa³cˀai²-no³ xi³ to⁴tˀa³tsˀe⁴ Cristo, a³li²
tsa² to⁴coi³ cjoan² nca³ ma³cjain¹-no³, to⁴nca³ cˀoa⁴-ti⁴
coan⁴-no³ je¹ntjai²-le⁴ xi³ tsˀe⁴.
\v 30 Cˀoa⁴-ti⁴sˀin² jon² ti³yo³jion³ cjoa⁴si³, jo³-sˀin²
nca³ tsa³ˀyao³ nca³ tsa³ca²te⁴jna³jian³. Cˀoa⁴-ti⁴
ntˀai⁴-vi⁴ no²ˀya²-nio³ jme³ cjoa⁴ xi³ ti²jna⁴jian³.
\c 2
\s Jo³-sˀin² nca³ ja³ˀa³jen³-le⁴ Cristo cˀoa⁴ jo³-sˀin²
nca³ ji³tjo³je³ya³
\p
\v 1 Tsa² si¹nˀion¹-ta³coan³² Cristo, tsa² je²
cjoa⁴tjao²cha³ vˀe¹ne²-na¹, tsa² ña³qui³ cjoa⁴qui²xi⁴
ti³yo³cjoa³² cao⁴ je² Espíritu Santo, tsa² tjin¹-na¹
cjoa⁴tjao²cha³ cao⁴ cjoa⁴ma⁴ta³con²,
\v 2 ti⁴jnco³-nao¹³ cjoa⁴tsjoa³-na⁴. Tˀe²jnco³ta³con²³,
ti⁴cˀoa⁴-sˀin²ni³ ca²ta³ma³tsjoa³chao³, ti⁴jnco³ yao³-no³,
cˀoa⁴ to⁴jnco³ cjoa⁴fa³ˀai³tsjen³ ca²ta³sˀe³-no³.
\v 3 A³li² cˀoa⁴ to⁴chˀao³ntai³ mao³. A³li² cˀoa⁴-jin²
to⁴ncˀa³ta³con² mao³. To⁴sa³ cjoa⁴yo⁴ma⁴ cjia³ta³con²³
nca³ cho¹son²-ni³lao⁴³ nca³ xi³cˀa³ nqui²sa⁴ nta³ ma³-le⁴
cjoa⁴ xi³ tjin¹ cao⁴-ni³ tsa² jon².
\v 4 A³li² coi²nta⁴-jin² nˀiaon²³ xi³ to⁴tsaon⁴³ cjoa⁴,
to⁴nca³ cˀoa⁴-ti⁴ tˀiaon⁴³ coi²nta⁴ tsˀe⁴ xi³ cja⁴ˀai¹
cho⁴ta⁴.
\v 5 Ca²ta³sˀe³-no³ nca³ jon² jña³-le⁴ cjoa⁴fa³ˀai³tsjen³
xi³ qui³sˀe³-le⁴ Cristo Jesús.
\v 6 Je² Cristo nta³ tsa² ma³nco¹son² cao⁴ Ni³na¹,
coan³jyo³-le⁴ nca³ qui³tsjion³tˀa³ yao³-le⁴.
\v 7 Qui³tsjion³con³ yao³-le⁴, to⁴cho⁴ˀnta³ tsa³ve³con³
yao³-le⁴, cˀoa⁴ cho⁴ta⁴son³ˀnte³ coan³.
\v 8 Cˀia⁴ nca³ je³cˀoa⁴cji³ jo³-ni³ jnco³ cho⁴ta⁴xˀin⁴,
qui³si³cˀa³jen³jta³ yao³-le⁴, qui³si³tjo³son²-ni³ nta³
tsa² cjoa⁴vi³ya³, nta³ tsa² qui³ni²cˀen³tˀa³ cro².
\v 9 Coi³ cjoa⁴ nˀion¹ nta³ tsˀa³sje³je³ya³ Cristo je²
Ni³na¹. Qui³tsjoa³-le⁴ je² jan³ˀain¹ xi³ nqui²sa⁴-sa³
to⁴ti¹tjon² ti¹jna³ cao⁴-ni³ tsa² nca³yi³je³ jan³ˀain¹,
\v 10 jme¹-ni³ nca³ coi⁴ncha¹xco¹nchˀin³-si¹ni³ nca³tsˀi³
xi³ tˀa³tsˀe⁴ jan³ˀain¹-le⁴ Jesús.
Coi⁴ncha¹xco¹nchˀin³-le⁴ nca³tsˀi³ xi³ tjio¹ ncˀa³jmi³,
cao⁴ xi³ tjio¹ i⁴ son³ˀnte³ cao⁴ xi³ tjio¹jin³ na³nqui³,
\v 11 jme¹-ni³ nca³ si⁴²qui²xi⁴ya³nta³-si¹ni³ nca³tsˀi³
cho⁴ta⁴ nca³ Jesucristo je² ni¹ Nai³-na¹. Cˀoa⁴-sˀin²
cˀoa⁴sje³je³ya³ Ni³na¹ Nˀai³-na¹.
\s Coi⁴yo³jin³ ˀi³sen³ˀi³sen³² i⁴ son³ˀnte³-vi⁴ jo³-ni³
tsa² lˀi¹
\p
\v 12 Jon² xi³ cjai¹nca³ tsjoa³que⁴-no³, jo³-sˀin² nca³
qui³ ni²tjo³son²³ nca³ntsjai², a³li² to⁴cˀia⁴-jin²
cˀoa⁴nˀiaon²³ cˀia⁴ nca³ an³ ti²jna⁴, to⁴jo³
cˀoa⁴tˀiaon⁴³ ntˀai⁴-vi⁴ nta³ tsa² tsian²³. Cˀoa⁴-sˀin²
ti⁴chjaon¹³ cjoa⁴vi³tjo³ntjai²-no³ cao⁴ cjoa⁴jcon³ cao⁴
cjoa⁴fa³tse¹.
\v 13 Je² Ni³na¹ nta³ ti¹si¹xa¹jin³ ni⁴ma⁴-no³, jo³-sˀin²
nca³ me³-le⁴ cjoa⁴nta³-le⁴, jme¹-ni³ nca³
cˀoa⁴coi⁴tso⁴-si¹ni³ta³-con²³ nca³ jon², cˀoa⁴ jme¹-ni³
nca³ cˀoa⁴sˀian⁴-si¹nio³.
\v 14 Nta³ cˀoa⁴tˀiaon⁴³ nca³yi³je³, a³li²
no²cjoa⁴ti³cao⁴-jion²³, a³li² cho¹na³nqui³ya³-jion²³,
\v 15 jme¹-ni³ nca³ ni⁴jme³-jin² je¹ xi³ sˀe⁴-si¹ni³no³,
cˀoa⁴ nca³ nta³ coain¹cao⁴-si¹nio³ yao³-no³ nca³ ˀnti¹-le⁴
Ni³na¹ nio¹³ xi³ ña³qui³ tsjao³. Ti³yo³jin³-lao⁴³
cho⁴ta⁴son³ˀnte³ xi³ tsˀen⁴, xi³ chˀao³ tjio¹con³.
Cˀoa⁴-sˀin² ti⁴yo³jin³ ˀi³sen³ˀi³saon³ i⁴
son³ˀnte³-vi⁴ jo³-ni³ tsa² lˀi¹.
\v 16 Ti⁴cˀa³vi¹son²³ je² en¹ xi³ tˀa³tsˀe⁴
cjoa⁴vi³jna³chon³, jme¹-ni³ nca³ je² ni⁴čhjin³ nca³
cjoa⁴ˀai¹ Cristo coan⁴tsjoa³-si¹ni³na³, nca³ tsi² tsa²
to⁴cjoa⁴tjao²-jin² qui³to²ca³na⁴cha⁴, ni⁴to⁴cjoa⁴tjao²-jin²
qui³si³xa¹³.
\v 17 Nta³ tsa² cˀoa⁴-sˀin² njin¹-na⁴ cˀoe⁴²jten³son² je²
cjoa⁴tjao² xi³ vˀai²tˀao³ xi³ coi³ xa¹-no³ tˀa³tsˀe⁴ xi³
ma³cjain¹-no³, ma³tsjoa³-na³ a³li² to⁴cjoa⁴tsjoa³ xi³
tjin¹-na³ xi³ tˀa³tsaon⁴³.
\v 18 Cˀoa⁴-ti⁴sˀin² ca²ta³ma³tsjoa³-no³ nca³ jon², a³li²
to⁴nta³ tsjoa³ ca²ta³sˀe³-no³ xi³ tˀa³tsˀan⁴.
\s Xi³ tˀa³tsˀe⁴ Timoteo cao⁴ Epafrodito
\p
\v 19 To⁴nca³ ti²co³ya²-le⁴ tsa² me³-le⁴ Nai³-na¹ Jesús,
nca³ xi¹ti¹ si³ca³sen¹³-no³ Timoteo, jme¹-ni³ nca³
cˀoa⁴-ti⁴ an³ nta³ cˀoe³-si¹nia³ coan³ nca³
je³tjin¹jin³-na³ jo³-sˀin² ti³yo³.
\v 20 Ni⁴ˀya³-jin² xi³ tjin¹-na³ xi³ ti⁴cˀoa⁴-sˀin²
nco¹son² tjin¹³-con³ jo³-ni³ Timoteo, nca³ ña³qui³
si¹cjao¹que³-no³.
\v 21 Nca³tsˀi³ xi³cˀa³ va¹sjai³ xi³ ti⁴tsˀe⁴-ni³, a³li²
tsa² je²-jin² xi³ tsˀe⁴ Cristo Jesús.
\v 22 Je³tsa³ˀyao³ jo³ tjin¹ cjoa⁴qui²xi⁴-le⁴ Timoteo,
jo³-ni³ tsa² ˀnti¹-na⁴, cˀoa⁴-sˀin² qui³si³xa¹cao⁴-na³
xi³ tˀa³tsˀe⁴ je² en¹nta³ tˀa³tsˀe⁴ Cristo.
\v 23 Ti²co³ya²-le⁴ nca³ si³ca³sen¹³-no³ Timoteo, cˀia⁴
nca³ scoe³nti⁴toan⁴ jme³ xi³ coan⁴tˀen³.
\v 24 Ma³nˀion¹tˀa³con³-nia³ Nai³-na¹, tsa² me³-le⁴ nca³
je², cjoi¹con³ nti⁴ton⁴-no³ an³-vi⁴.
\v 25 To⁴nca³ qui³si³cja³ˀai³tsjen³ nca³ coan³chjen¹ nca³
qui³si³ca³sen¹³-no³ Epafrodito, je² ntsˀe³ xi³
si¹xa¹cao⁴-na³, tso²ˀva³cao⁴-na³ jo³-ni³ tsa²
so³nta²do⁴-le⁴ Ni³na¹. Je² xi³ qui³ni²ca³sen¹-nao¹³,
jme¹-ni³ nca³ si⁴²xa¹-si¹ni³na³ jme³ xi³ ma³chjen¹-na³.
\v 26 Cjai¹nca³ me³-le⁴ nca³ scoe⁴-no³ nca³tsˀio³.
Cjai¹nca³ to⁴coan³va³-le⁴ nca³ je³qui³no²ˀyao²³ nca³
je³ti¹mˀen³ nca³ je².
\v 27 Ña³qui³ cjoa⁴qui²xi⁴-ni¹ nca³ cjai¹nca³ to⁴tao¹ coan³
tsa²cai³, sa³ˀnta³ ja⁴me³ cˀen³. To⁴nca³ Ni³na¹
coan³ma⁴que³-ni¹, a³li² tsa² to⁴je²-jin², cˀoa⁴-ti⁴
coan³ma⁴que³-na³ an³, jme¹-ni³ nca³ tsi² nqui²sa⁴ tse³
sˀe⁴-si¹ni³na³ cjoa⁴va³.
\v 28 Coi³ nˀion¹ nti⁴ton⁴ ti²si³ca³sen¹³-no³, jme¹-ni³
nca³ coan⁴tsjoa³-si¹ni³no³ cˀia⁴ nca³ jcha⁴nqui²ntiao³.
Cˀoa⁴-sˀin² tjo¹xin² i⁴tse¹-na³ cjoa⁴va³-na⁴.
\v 29 Coi³ cjoa⁴ chjoe¹tjao²³ cao⁴ nca³yi³je³ cjoa⁴tsjoa³
nca³ ti³yo³coa⁴² Nai³-na¹. Cˀoa⁴-sˀin² jcha⁴cho⁴tao⁴³ xi³
cˀoa⁴cjoan³ jo³ cjoan³ nca³ je².
\v 30 Tˀa³tsˀe⁴ xa¹-le⁴ Cristo nca³ je³me³ cˀen³.
Qui³tsjoa³le⁴con³ nca³ coi⁴ya², jme¹-ni³ nca³
qui³si³jnco³-si¹ni³no³ jme³-sa³ve⁴ xa¹-no³ xi³ qui³cha³ xi³
to⁴tˀa³tsˀan⁴.
\c 3
\s Chˀa⁴sje³² nca³nˀion¹-na¹, jme¹-ni³ nca³
coi⁴njen⁴-si¹ni³na¹ xi³ tsˀe⁴ Cristo
\p
\v 1 Nqui²jnco³ en¹ xi³ xin²³-no³, ˀnti¹ntsˀe³. Tsjoa¹
tˀao²³ta³con²³ nca³ ti³yo³cao⁴³ Nai³-na¹. Cjoa⁴qui²xi⁴-ni¹
nca³ an³ li²coi³ ma³si³-na³ nca³ squi³-no³ xi³ ti⁴coi³-ni³
cjoa⁴. Cˀoa⁴-sˀin² sˀe⁴ nca³nˀion¹-no³.
\v 2 Nta³ ti⁴coi²nta⁴-lao⁴³ yao³-no³ nia¹. Nta³
ti⁴coi²nta⁴-lao⁴³ yao³-no³ cho⁴ta⁴ xi³ chˀao³ sˀin¹. Nta³
ti⁴coi²nta⁴-lao⁴³ yao³-no³ cho⁴ta⁴ xi³ va³te³ yao³-le⁴.
\v 3 Ña¹ nia¹ xi³ ña³qui³ cho⁴ta⁴ xi³ tsˀe⁴
cjoa⁴circuncisión. ˀya³xcon¹-nia¹ cao⁴ je² Espíritu xi³
tsˀe⁴ Ni³na¹, cˀoa⁴ nˀion¹ tjin¹-na¹ cjoa⁴tsjoa³ nca³
ti³yo³coa⁴² Cristo Jesús. A³li²coi³ to⁴yao³-na¹ xi³
nˀion¹tˀa³-ta³coan³².
\v 4 Nta³ tsa² an³ tjin¹-na³ jo³-sˀin² nca³
ma³nˀion¹tˀa³coan³ yao³-na⁴. Tsa² jnco³ xi³
si¹cja³ˀai³tsjen³ nca³ va³quin²-le⁴ nca³ nˀion¹tˀa³con³
yao³-le⁴, an³ nia¹³ xi³ nqui²sa⁴ nta³ va³quin²-na³.
\v 5 Cˀia⁴ nca³ qui³tsian³, nca³ coan³ jin³ ni⁴čhjin³-ni³,
cˀia⁴ cjoa⁴circuncisión coan³-na³. An³ nia¹³ ntje⁴-le⁴
Israel, xi³ tsˀe⁴ xi¹ncjin¹ Benjamín. Ña³qui³ cho⁴ta⁴
hebreo tjen⁴-nia³ an³-vi⁴. Xi³ tˀa³tsˀe⁴ cjoa⁴te¹xo³ma³
an³ nia¹³ partido-le⁴ cho⁴ta⁴ fariseo.
\v 6 Coan³cjain¹-na³ cjoa⁴-vi⁴ sa³ˀnta³ qui³tjen⁴nqui³
co²ntran⁴-le⁴ na⁴xi⁴na³nta¹-le⁴ Cristo. Xi³ tˀa³tsˀe⁴
cjoa⁴qui²xi⁴ xi³ tsˀe⁴ cjoa⁴te¹xo³ma³ ni⁴jme³-jin² je¹
tjin¹-na³.
\v 7 To⁴jme³-ni³ve⁴ xi³ tsˀan⁴ xi³ je³qui³si³qui³njen³,
qui³si³cha³jian³ nca³yi³je³, jme¹-ni³ nca³
coi⁴njen⁴-si¹ni³na³ Cristo.
\v 8 Cjoa⁴qui²xi⁴-ni¹, cˀoa⁴-sˀin² ˀve³coan³ nca³yi³je³
cjoa⁴ nca³ li²jme³ chji¹-le⁴. Cjai¹nca³ to⁴nqui²sa⁴
chji¹-le⁴ nca³ nta³ ˀve³ Cristo Jesús, Nai³-na⁴.
Tˀa³tsˀe⁴ Cristo qui³si³cha³-nia³ nca³yi³je³, to⁴jo³-ni³
tsa² tje¹ ˀve³coan³, jme¹-ni³ nca³ cˀoa⁴-sˀin²
coi⁴njen⁴-si¹ni³na³ Cristo,
\v 9 cˀoa⁴ jme¹-ni³ nca³ coan⁴nca³tˀa³-si¹ni³le⁴ an³
Cristo. Je² cjoa⁴qui²xi⁴ xi³ tsˀan⁴ xi³ to⁴tˀa³tsˀe⁴ nca³
si³tjo³soan²³ cjoa⁴te¹xo³ma³, li²coi³ ti⁴tjin¹-ni³na³,
to⁴nca³ je³tjin¹-na³ ntˀai⁴-vi⁴ je² cjoa⁴qui²xi⁴ xi³
to⁴tˀa³tsˀe⁴ nca³ ma³cjain¹-na³ tˀa³tsˀe⁴ Cristo, je²
cjoa⁴qui²xi⁴ xi³ tsˀe⁴ Ni³na¹, xi³ sa³co¹-na¹ xi³
to⁴tˀa³tsˀe⁴ nca³ ma³cjain¹-na¹.
\v 10 Cˀoa⁴-sˀin² ˀve³coan³ nca³yi³je³ cjoa⁴ nca³ li²jme³
chji¹-le⁴, jme¹-ni³ nca³ scoe³-si¹nia³ Cristo cao⁴
nca³nˀion¹-le⁴ nca³ ja³ˀa³ya²-le⁴, cˀoa⁴ jme¹-ni³ nca³
cˀoa⁴coan⁴tˀain³-si¹nia³ cjoa⁴ñˀain³ nca³ fi³tˀa³-le⁴
Cristo. Cˀoa⁴ ca²ta³cjoan³ nca³ an³ jo³ cjoan³ nca³ je²
nca³ cˀen³.
\v 11 Tsa² cˀoa⁴-la² nqui²sa⁴-sˀin² cjoi³cho³ nčhˀoe²³
nca³ cjoa⁴ˀa¹ya³jin³-ni³na³ cˀen³.
\v 12 Cje³ fi³cho³ nčhˀoe²³-jian²³ je²-vi⁴, cje³
ma³jnco³-jin²na³, to⁴nca³ cjoi¹tjen⁴nqui³-le⁴ je²
cjoa⁴-vi⁴, jme¹-ni³ nca³ coi⁴njen⁴-si¹ni³na³ xi³ ti⁴coi³-ni³
cjoa⁴ nca⁴ Cristo tsˀa³sje³ntjai²-na³.
\v 13 ˀnti¹ntsˀe³, an³ nia¹³ xi³ ˀve³ nca³ cje³ fi³cho³
nčhˀoe²³-jian²³, to⁴nca³ jnco³ cjoa⁴ ti²sˀian³. Ña³qui³
ti²si³cha³jian³ je² xi³ je³ja³ˀa³to³, to⁴nca³
vˀa³sje³-nia¹³ nca³nˀion¹, jme¹-ni³ nca³ cjoi³cho³
nčhˀoe²-si¹nia³ xi³ sˀa⁴ nčhoa¹.
\v 14 Sˀin³-le⁴ cjoa⁴nˀion¹ yao³-na⁴, jme¹-ni³ nca³
cjoi³cho³ nčhˀoe²-si¹nia³ choa⁴ nca³ tjoe¹-na³ chji¹-na⁴
xi³ tsˀe⁴ Ni³na¹, xi³ coi³ nca³ Ni³na¹ coi⁴nchja⁴mi³-na¹
ncˀa³jmi³ nca⁴ ti³yo³coa⁴² Cristo Jesús.
\v 15 Nca³tsˀia³² xi³ je³qui³sca³son² no¹-na¹,
ca²ta³sˀe³-na¹ je² cjoa⁴fa³ˀai³tsjen³. Tsa² cja⁴ˀai¹
cja⁴ˀai¹ cˀoao¹³-ta³con²³ cˀoa⁴-ti⁴ coa⁴co²-no³ je²-vi⁴
Ni³na¹.
\v 16 To⁴nca³ je² xi³ je³ji³cho²tjen⁴nqui³-le⁴²,
to⁴cˀoa⁴-sˀin² se¹ntia⁴² cjoin³cao⁴-sa³² to⁴nco¹son²
cˀoe¹-ta³coan³².
\v 17 ˀnti¹ntsˀe³, nca³tsˀio³ chjen¹nqui³-nao¹³ jo³
ti²sˀian³ an³-vi⁴. Cho¹tsen³-lao⁴³ je² cho⁴ta⁴ xi³ tjio¹ma³
jo³-sˀin² ti³fa³ntia⁴²-lai²⁴jin⁴ nca³ jin⁴-jin⁴.
\v 18 Ncjin² ma³-ni³ cho⁴ta⁴co²ntran⁴-le⁴ cro²-le⁴ Cristo
xi³ si¹ma³. Ncjin² cˀa³ cˀoa⁴qui³xin³-no³, to⁴jo³ tjen⁴
nta¹xcoan³ nca³ cˀoa⁴ti²xin³-no³ ntˀai⁴-vi⁴.
\v 19 Xi³ cjoe⁴tˀa³ ni⁴čhjin³-le⁴ to⁴cha⁴-jin² yao³-le⁴.
To⁴me³-le⁴ tsˀoa⁴ si¹sin³-le⁴. Je² cjoa⁴je³ya³-le⁴
to⁴cjoa⁴soa³-le⁴ ni¹. To⁴si¹cja³ˀai³tsjen³ xi³ tˀa³tsˀe⁴
cjoa⁴-le⁴ son³ˀnte³.
\v 20 Ña¹-vi⁴ cho⁴ta⁴-le⁴ ncˀa³jmi³ nia¹. Ya⁴²
cjoa⁴ˀai¹-ni³ Jesucristo Nai³-na¹ xi³ vˀa³sje³ntjai²-na¹,
to⁴je² xi³ ti³cho³ya³-le⁴².
\v 21 Je² ni¹ xi³ si⁴²cˀa³ntjai²ya³ yao³yo⁴ma⁴-na¹,
jme¹-ni³ nca³ coan⁴nco¹son²-si¹nia³² jo³-sˀin² tsen³ya²
cji³ yao³-le⁴ nca³ je². Ti⁴coi³ nca³nˀion¹-le⁴
si⁴²chjen¹-ni³ jo³-sˀin² si¹chjen¹ nca³ va³te¹xo³ma³
nca³yi³je³.
\c 4
\s Tsjoa¹ cˀoe¹³-ta³coan³² nca³ ti³yo³coa⁴² Nai³-na¹
\p
\v 1 ˀnti¹ntsˀe³, cjai¹ tsjoa³que⁴-no³, si³cjao¹jian³ xi³
tˀa³tsaon⁴³. Jon² nio¹³ xi³ ni²tsjoa³-lao⁴³ ni⁴ma⁴-na⁴.
Jon² nio¹³ jo³-ni³ tsa² corona-na⁴. Nˀion¹ ti⁴yo³cao⁴³
Nai³-na¹, jon² xi³ tsjoa³que⁴-no³.
\v 2 Ti²vˀe³ne²³-le⁴ je² Evodia cao⁴ Síntique, nca³
nco¹son² ca²ta³vˀe¹³-con³ nca⁴ tjio¹cao⁴ Nai³-na¹.
\v 3 Cˀoa⁴-ti⁴ ji³-lai²³ ˀnti¹ntsˀe³ xi³ ña³tjen⁴
ni²xai¹³, vˀe³ne²³-le²³ nca³ nta³ ti⁴sen⁴coai⁴ je²
ya¹nchjin¹-ve⁴ xi³ qui³si³xa¹cao⁴-na³ tˀa³tsˀe⁴ je²
en¹nta³ tˀa³tsˀe⁴ Cristo, cao⁴ Clemente, cao⁴ xi³cˀa³ xi³
qui³si³xa¹cao⁴-na³ xi³ ya⁴ xon⁴ xi³ tsˀe⁴ cjoa⁴vi³jna³chon³
tjio¹tˀa³ jan³ˀain¹-le⁴.
\v 4 Tsjoa¹ tˀao²³-ta³con²³ nca³ntsjai² nca³ ti³yo³cao⁴³
Nai³na¹. Nqui²jnco³cˀa² cˀoa⁴xin²-nca¹ni³no³ tsjoa¹
tˀao²³-ta³con²³.
\v 5 Ca²ta³ve³ nca³tsˀi³ cho⁴ta⁴ jo³-sˀin² nca³ ntˀao¹³
nca³ jon². Nai³-na¹ ti¹jna³čhian³.
\v 6 A³li² cˀoa⁴-jin² ma³-no³. To⁴jme³-ni³ve⁴ xi³
ma³chjen¹-no³, ti⁴je¹-lao⁴³ Ni³na¹, tˀe²tsˀoa³-lao⁴³,
cˀoa⁴ tˀai²-lao⁴³ cjoa⁴nta³. Cˀoa⁴-sˀin²
ca²ta³sˀe³jin³-le⁴ Ni³na¹ jme³ xi³ ni²jao¹³.
\v 7 Je² cjoa⁴nchˀan¹ta³con²-le⁴ Ni³na¹ xi³ ña³qui³
fa³ˀa³to³-le⁴ nca³yi³je³ cjoa⁴fa³ˀai³tsjen³-le⁴ cho⁴ta⁴,
je² xi³ si⁴²coi²nta⁴ ni⁴ma⁴-no³ cao⁴ cjoa⁴fa³ˀai³tsjen³-no³
nca⁴ ti³yo³cao⁴³ Cristo Jesús.
\s Si⁴cja³ˀai³tsjen³² tˀa³tsˀe⁴ je² nca³yi³je³ xi³
cjoa⁴qui²xi⁴
\p
\v 8 Cˀoa⁴xin² nqui²jnco³-no³ en¹ xi³ fe³tˀa³-ni³,
ˀnti¹ntsˀe³. Ti⁴cja³ˀai³tsjaon³ tˀa³tsˀe⁴ je²
nca³yi³je³ xi³ cjoa⁴qui²xi⁴, nca³yi³je³ xi³ ña³qui³
cˀoa⁴tjin¹, nca³yi³je³ xi³ tjin¹-le⁴ cjoa⁴qui²xi⁴,
nca³yi³je³ xi³ tsje³ tjin¹, nca³yi³je³ xi³ na³sca¹ tjin¹,
nca³yi³je³ xi³ nta³ ti¹ˀya³-le⁴, to⁴jña³-ni³le⁴ xi³
tjin¹-le⁴ cjoa⁴nta³, to⁴jña³-ni³le⁴ xi³ tjin¹-le⁴
cjoa⁴nˀo²sje³nta³. Coi³ xi³ si⁴cja³ˀai³tsjaon³.
\v 9 Je² xi³ coan³jnco³jao²-no³, je² xi³ qui³tjoe¹-no³, je²
xi³ qui³no²ˀyao²³, je² xi³ tsa³ˀyao³ jo³ nca³ qui³sˀian³
an³-vi⁴, cˀoa⁴-ti⁴sˀin² tˀiaon⁴³-ˀni³. Je² Ni³na¹ xi³
si¹qui³njen³nchˀan¹jin³ ni⁴ma⁴-no³, cˀoe¹jna³cao⁴-no³.
\s Pablo tsa³cˀe¹³-con³ nca³ cho⁴ta⁴ filipenses
qui³si³tjao²que³ nca³ je²
\p
\v 10 Jo³ tsjoa¹ tsa³cˀe³⁴-coan³ nca³ ti²jna⁴coa⁴ Nai³-na¹
nca³ sˀa⁴ qui³ni²tjao²cha³ nqui²ntia³-nao¹³. Cˀoa⁴-sˀin²
coan³me³ntsjai²-no³, to⁴nca³ li²coi³ qui³tjo³ˀnte²-no³.
\v 11 A³li² jo³ ti²xian³ tsa² jme³ xi³ cha³-na³.
Je³coan³nca³-na³ nca³ to⁴nta³ sˀe³⁴-coan³ jo³ tjin¹ xi³
tjin¹-na³.
\v 12 ˀve³-nia¹³ cjoa⁴yo⁴ma⁴. ˀve³-nia¹³ cjoa⁴tse³ya³.
To⁴jme³-ni³ve⁴ xi³ ma³tˀen³ an³-vi⁴, tsa² nˀion¹
ma³squia³, tsa² nˀion¹ vao³-na³, cˀoa⁴ tsa² tse³
sˀe³-na³, cˀoa⁴ tsa² tse³ si³cha³-je⁴, je³coan³nca³-na³.
\v 13 Nca³yi³je³ coan⁴-na³ nca⁴ ti²jna⁴coa⁴ Cristo xi³
tsjoa¹-na³ nca³nˀion¹.
\v 14 To⁴nca³ cjai¹ nta³ qui³nˀiaon²³ nca³
tsa³qui³ncha³cao⁴-nao¹³ cˀia⁴ nca³ ti²fa³ˀa³
cjoa⁴ñˀain³.
\v 15 Cˀoa⁴-ti⁴ jon² xi³ cho⁴ta⁴ filipenses ˀmi²-no³,
ˀya³-nio¹³ nca³ to⁴jon² nio¹³ xi³ tsa³qui³ncha³cao⁴-nao¹³
cˀia⁴ nca³ ti¹tjon² qui³chja¹cao⁴-no³ je² en¹nta³
tˀa³tsˀe⁴ Cristo, cˀia⁴ nca³ ji²tjo⁴-nia³ Macedonia.
Ni⁴ˀya³-jin²sa³ xi³ cho⁴ta⁴-le⁴ Cristo xi³
tsa³ca³sen¹cao⁴-na³ cao⁴ xi³ tsjoa¹ cao⁴ xi³ tjoe¹, to⁴jon²
nio¹³.
\v 16 Cˀoa⁴-ti⁴ cˀia⁴ nca³ tsa³ca²te⁴jna³ ya⁴ Tesalónica,
qui³ni²ca³sen¹ ya³ntia³jao²cˀa³-nao¹³ jme³ xi³
coan³chjen¹-na³.
\v 17 A³li² tsa² jme³ cjoa⁴tjao²-no³ xi³ me³-na³, to⁴coi³
xi³ me³-na³ nca³ je² chji¹-no³ ca²ta³ma³tjao²-sa³no³
to⁴tˀa³tsˀe⁴ je² cjoa⁴nta³ xi³ nˀiaon²³.
\v 18 Je³qui³sca³tˀa³-na³ nca³yi³je³, je³ja³ˀa³ntjai²-le⁴
xi³ tjin¹-na³. Je³to⁴coan³-ni³na³ ntˀai⁴.
Je³qui³sca³tˀa³-na³ tso³jmi² xi³ qui³ni²ca³sen¹cao⁴³
Epafrodito. Jo³-ni³ tsa² jta⁴ xi³ na⁴sca¹ njen⁴, sa³sen¹-le⁴
Ni³na¹ coi³ cjoa⁴tjao²-no³ xi³ tsa³cˀai²tˀao³, cˀoa⁴ je²
scoe¹.
\v 19 Ni³na¹-na⁴ tsjoa¹-no³ to⁴jme³-sa³ve⁴ xi³ cha³-no³,
jo³-sˀin² tjio¹ cjoa⁴nchi⁴na¹-le⁴ cao⁴ tse³ cjoa⁴je³ya³,
nca⁴ ti³yo³cao⁴³ Cristo Jesús.
\v 20 Je² Ni³na¹ Nˀai³-na¹ ca²ta³vi³tjo³je³ya³ nca³ntsjai²
nca³ntsjai². Cˀoa⁴ ca²ta³ma³.
\s Cjoa⁴ni²ti²ˀnta³ xi³ fe³tˀa³
\p
\v 21 Ti⁴ti²ˀntao³ jnco¹jnco¹ cho⁴ta⁴-le⁴ Cristo. Je²
nca³tsˀi³ ntsˀe³² xi³ i⁴ tjio¹cao⁴-na³ si¹ti²ˀnta³-no³.
\v 22 Nca³tsˀi³ cho⁴ta⁴-le⁴ Cristo si¹ti²ˀnta³-no³. Je²
xi³ ti¹tjon² si¹ti²ˀnta³-no³ je² xi³ tjio¹ ntˀia³-le⁴
César.
\v 23 Ca²ta³sˀe³-no³ nca³tsˀio³ je² cjoa⁴nta³-le⁴
Jesucristo je² Nai³-na¹. Cˀoa⁴ ca²ta³ma³.