\id 1TI
\h 1 Timoteo
\toc1 1 Timoteo
\mt Xi³ ti¹tjon² xon⁴ xi³ pa²stro⁴ Pablo qui³squi³-le⁴
Timoteo
\c 1
\s Pablo si¹ti²ˀnta³
\p
\v 1 An³ nia¹³ Pablo, pa²stro⁴-le⁴ Jesucristo nca³
cˀoa⁴sˀin² tsa³cˀe¹ne²-na³ Ni³na¹ xi³
vˀa³sje³ntjai²-na¹, cao⁴ Nai³-na¹ Jesucristo xi³
ti³cho³ya²-le⁴².
\v 2 Ti²cji³-le²³, ji³ Timoteo, ji³ xi³ ña³qui³ ˀnti¹-na⁴,
jo³-sˀin² ma³cjain¹-na¹. Ni³na¹ Nˀai³-na¹ cao⁴ Cristo
Jesús Nai³-na¹ ca²ta³tsjoa¹-li² cjoa⁴nta³,
ca²ta³ma³ma⁴que³-li², ca²ta³si¹qui³njen³nchˀan¹jin³
ni⁴ma⁴-li⁴.
\s Pablo vˀe¹ne² nca³ tsi² tsa² cja⁴ˀai¹
cjoa⁴fa³ˀai³tsjen³ coi⁴tso⁴ya³
\p
\v 3 Jo³-sˀin² tsa³cˀe³tsˀoa²³-le²³ cˀia⁴ nca³ quia³
ya⁴ Macedonia nca³ tsa³qui³jnai³ ya⁴ Efeso, cˀoa⁴-sˀin²
vˀe³tsˀoa²³-le²³ ntˀai⁴, jme¹-ni³ nca³ cˀoe¹ne²-ni³lai⁴
xi³cˀa³ nca³ tsi² tsa² cja⁴ˀai¹-nca¹ cjoa⁴fa³ˀai³tsjen³
coi⁴tso⁴ya³.
\v 4 Ni⁴si¹sin³-jin²le⁴ xi³ to⁴ˀen¹, ni⁴vˀe¹xqui⁴-jin²le⁴
cho⁴ta⁴jchi¹nca³-le⁴ xi³ tsi²coi³ fe³tˀa³-le⁴. Je²
cjoa⁴-vi⁴ vˀe¹ntje² xi³ to⁴cjoa⁴cho³va²ya³ti³-ni³.
A³li²coi³ vˀe¹ntje² cjoa⁴-le⁴ Ni³na¹ xi³ tsˀe⁴ xi³
ma³cjain¹-na¹.
\v 5 Coi³ xi³ me³-le⁴ cjoa⁴te¹xo³ma³-le⁴ Ni³na¹ nca³
tsjoa³cha³² cao⁴ ni⁴ma⁴-na¹ xi³ tsje³, cao⁴
cjoa⁴fa³ˀai³tsjen³nta³-na¹, cao⁴ nca³ ña³qui³
cjoa⁴qui²xi⁴ ma³cjain¹-na¹.
\v 6 Tjin¹ cˀa³ xi³ tsa³qui³ncha³xin²-le⁴ coi³ cjoa⁴-vi⁴.
Qui³tˀa³-le⁴ en¹ xi³ tsi² tsa² coi³ jme³ chji¹-le⁴.
\v 7 Me³-le⁴ nca³ maestro-le⁴ cjoa⁴te¹xo³ma³ coan⁴, to⁴nca³
li²coi³ ma³cho⁴ya³-le⁴, ni⁴ xi³ nchja⁴-jin², ni⁴ xi³
si¹qui²xi⁴ya³-jin².
\v 8 To⁴nca³ ˀya³-nia¹ nca³ je² cjoa⁴te¹xo³ma³ cjai¹nca³
nta³ tjin¹, tsa² cho⁴ta⁴ si⁴²chjen¹ jo³-sˀin²
va³quin²-le⁴.
\v 9 ˀya³-nia¹ nca³ je² cjoa⁴te¹xo³ma³ ti¹jna³va³sen³
a³li² tˀa³tsˀe⁴ cho⁴ta⁴ xi³ tjin¹-le⁴ cjoa⁴qui²xi⁴,
to⁴tˀa³tsˀe⁴ cho⁴ta⁴ xi³ chˀao³ cjoan³, cao⁴ cho⁴ta⁴ xi³
ve³sin³ cjoa⁴-le⁴ Ni³na¹, cao⁴ xi³ si¹qui²ˀaon³ nˀai³-le⁴
na⁴-le⁴, cao⁴ xi³ cˀen³ si¹cˀen³,
\v 10 cao⁴ cho⁴ta⁴cha³jnqui³, cao⁴ je² cho⁴ta⁴xˀin⁴ xi³
chˀao³sˀin² ma³tsjoa³que³ xˀin⁴ xi¹ncjin¹, cao⁴ xi³
si¹che¹ cho⁴ta⁴xi¹ncjin¹, cˀoa⁴ cao⁴ to⁴jme³-sa³ve⁴ cjoa⁴
xi³ co²ntran⁴-le⁴ cjoa⁴fa³ˀai³tsjen³ xi³ nta³ tjin¹.
\v 11 Cˀoa⁴tso² je² en¹nta³ xi³ tˀa³tsˀe⁴
cjoa⁴je³ya³-le⁴ Ni³na¹ xi³ nˀion¹ nta³. Coi³ en¹ xi³
qui³sˀe³ne²-na³ nca³ an³.
\s Jo³-sˀin² nca³ si¹xa¹-le⁴ Cristo je² Pablo
\p
\v 12 Tsjoa³-le⁴ cjoa⁴nta³ je² xi³ qui³tsjoa³-na³
nca³nˀion¹, Cristo Jesús Nai³-na¹, nca⁴ cˀoa⁴-sˀin²
nˀion¹tˀa³con³-na³ nca³ tsa³ca³se¹jna³-na³ je² xa¹-vi⁴.
\v 13 Nca³sˀa⁴ qui³nchja²ˀoan³ Cristo,
qui³tjen⁴nqui³co²ntran⁴-le⁴, taon³ tsa³ˀve³, to⁴nca³
tsa³ve³ma⁴con³-na³, nca⁴ tji¹chjoa² xcoan³ nca³
cˀoa⁴qui³sˀian³, nca⁴ tsi²coi³ coan³cjain¹-na³.
\v 14 To⁴nca³ je² cjoa⁴nta³-le⁴ Nai³-na¹ cjai¹nca³
coan³ncjin²ya³-na³ jo³-sˀin² nca³ ma³cjain¹-na³ jo³-sˀin²
nca³ tsjoa³que⁴ nca³ ti²jna⁴coa⁴ Cristo Jesús.
\v 15 Je² en¹-vi⁴ xi³ ña³qui³ cˀoa⁴tjin¹, xi³
va³quin²-le⁴ nca³ chjo¹ve¹ nca³tsˀia³²: Cristo Jesús
ja³ˀai³ i⁴ son³ˀnte³-vi⁴, ja³ˀai³ cˀa³sje³ntjai²
cho⁴ta⁴je¹. An³ nia¹³ xi³ cho⁴ta⁴je¹ti¹tjoan²³.
\v 16 Coi³ cjoa⁴ tsa³ve³ma⁴con³-na³, jme¹-ni³ nca³
cˀoa⁴-sˀin² Jesucristo coa⁴co²ti¹tjon²-si¹ni³
tˀa³tsˀan⁴ nca³yi³je³ cjoa⁴ma⁴ta³con²-le⁴. Cˀoa⁴-sˀin²
tsa³ca³co¹cho⁴ya³-le⁴ je² xi³ coan⁴cjain¹-le⁴ tˀa³tsˀe⁴
Cristo, jme¹-ni³ nca³ sˀe⁴-si¹ni³le⁴ cjoa⁴vi³jna³chon³
nca³ntsjai².
\v 17 Je² Cho⁴ta⁴ti¹tjon² xi³ va³te¹xo³ma³ntsjai², xi³
ni⁴cˀia³-jin² coi⁴ya², xi³ tsi² tsa² ma³tsen³-na¹, je²
Ni³na¹ xi³ to⁴je² to⁴jnco³ Ni³na¹, ca²ta³sˀe³-le⁴
cjoa⁴ncˀa³ cao⁴ cjoa⁴je³ya³ nca³ntsjai² nca³ntsjai².
Cˀoa⁴ ca²ta³ma³.
\v 18 Ji³ ˀnti¹-na⁴, Timoteo, je² cjoa⁴te¹xo³ma³-vi⁴
vˀe³ne²³-le²³, jo³-sˀin² to⁴nqui³-ni³ qui³sˀe³ en¹
tˀa³tsi⁴ nca³sˀa⁴, jme¹-ni³ nca³ nˀion¹ nta³
coi⁴xcan³-si¹ni³ xi³ to⁴tˀa³tsˀe⁴ cjoa⁴-vi⁴.
\v 19 A³li² ni²cha³jin³-jin² xi³ je³coan³cjain¹-li² cao⁴
cjoa⁴fa³ˀai³tsjen³nta³-li⁴. Tjin¹ cˀa³ xi³
tsa³cja³ˀa¹xin²-le⁴ yao³-le⁴ je²
cjoa⁴fa³ˀai³tsjen³nta³-le⁴. Cˀoa⁴-sˀin² qui³si³cha³ xi³
je³coan³cjain¹-le⁴.
\v 20 Cˀoa⁴²cjoan³ Himeneo cao⁴ Alejandro, je² xi³ an³
qui³tsjoa³tˀa³-le⁴ Satanás, jme¹-ni³ nca³ cao⁴
cjoa⁴ñˀain³ scoe⁴-ni³ nca³ tsi² ma³ no²cjoa⁴ˀaon³.
\c 2
\s Jo³-sˀin² ma³chjen¹ nca³ vˀe²tsˀoa³²
\p
\v 1 Cˀoa⁴-sˀin² vˀe³ne²³ ti¹tjon²-le⁴ nca³yi³je³ cjoa⁴
nca³ si⁴je¹, cˀoe¹tsˀoa³², cˀoe¹tsˀoa³ntje², cˀoe⁴²
cjoa⁴nta³ xi³ tˀa³tsˀe⁴ nca³tsˀi³ cho⁴ta⁴,
\v 2 xi³ tˀa³tsˀe⁴ cho⁴ta⁴ti¹tjon² cao⁴ nca³tsˀi³ xi³
ncˀa³ tjio¹, jme¹-ni³ nca³ nchˀan¹ coi⁴yo³-si¹nia³²,
cˀoa⁴ jme¹-ni³ nca³ to⁴jvi³ coa⁴nquin¹cao⁴-si¹nia³²
yao³-na¹ nca³ jcha⁴xcoan¹ Ni³na¹ nca³ jcha⁴xcoan¹ cjoa⁴.
\v 3 Je²-vi⁴ xi³ nta³ tjin¹, xi³ sa³sen¹-le⁴ Ni³na¹ xi³
vˀa³sje³ntjai²-na¹.
\v 4 Je² me³-le⁴ nca³ nca³tsˀi³ cho⁴ta⁴ coi⁴tjo³ntjai²,
cˀoa⁴ nca³ coi⁴cho³nčhˀoe² xi³ cjoa⁴qui²xi⁴.
\v 5 Jnco³ ma³-ni³ Ni³na¹, cˀoa⁴-ti⁴ jnco³ ma³-ni³ xi³
chji⁴ne⁴ˀen¹, Jesucristo cho⁴ta⁴xˀin⁴ xi³ si¹cjao²nta³
Ni³na¹ cao⁴ cho⁴ta⁴son³ˀnte³.
\v 6 Je² xi³ qui³tsjoa³ yao³-le⁴ jo³-ni³ chji¹-le⁴ xi³
tsa³cˀe¹chji¹ntjai² nca³tsˀi³. Qui³tsˀai² en¹ xi³
tˀa³tsˀe⁴ je²-vi⁴ nca³ ji³cho² ni⁴čhjin³ nca³
tsˀa³cao⁴-le⁴.
\v 7 Xi³ tˀa³tsˀe⁴ je² cjoa⁴ an³ qui³si³ca³sen¹jna³-na³
nca³ nchja²ya³ nca³ pa²stro⁴ coan³. (Ña³qui³ cjoa⁴qui²xi⁴
xi³ xian³, a³li²coi³ cjoa⁴nti³so³.) An³ va³co³ya²³-le⁴
cho⁴ta⁴ xi³ li² judío-jin² jo³-sˀin² ma³cjain¹-na¹ cao⁴
xi³ cjoa⁴qui²xi⁴.
\s Jo³-sˀin² ma³chjen¹-le⁴ nca³ fi²cao⁴ yao³-le⁴ je² xi³
ya¹nchjin¹
\p
\v 8 Me³-na³ˀni³ nca³ nca³tsˀi³ cho⁴ta⁴xˀin⁴
cˀoe⁴²tsˀoa³ nca³qui³jnta² ˀnte³, nca³ sco¹mi³ncˀa³
ntsja³ xi³ tsje³, nca³ tsi² tsa² jti³-le⁴, ni⁴ scan³-jin².
\v 9 Cˀoa⁴-ti⁴ je² xi³ ya¹nchjin¹ ca²ta³vˀa³cja¹ na³jño³
xi³ nta³ xi³ va³quin²-le⁴. Ca²ta³sˀe³ i⁴tse¹-le⁴
cjoa⁴soa³ta³con² nca³ nta³ ca²ta³fi²cao⁴ yao³-le⁴. A³li²
to⁴se¹xcon¹-jin² vˀe¹nˀion¹ ntsja⁴jco⁴. A³li²
taon⁴si³ne²-jin², a³li² to³fa³nqui³chji¹-jin², a³li²
chˀo¹tji³chji¹-jin² si¹chjen¹.
\v 10 To⁴sa³ ca²ta³sˀin¹ xa¹ xi³ nta³, jo³-sˀin²
va³quin²-le⁴ ya¹nchjin¹ xi³ tso² nca³ ve³xcon¹ Ni³na¹.
\v 11 Je² xi³ ya¹nchjin¹ to⁴jvi³ to⁴jvi³ ca²ta³co³tˀa³ya³,
na³nqui³ ca²ta³va³tio²-le⁴ nca³yi³je³.
\v 12 Li²coi³ tsjoa³ ˀnte³ nca³ ya¹nchjin¹
coi⁴tso⁴ya³-le⁴, ni⁴je²-jin² coa⁴te²xo³ma³-le⁴
cho⁴ta⁴xˀin⁴, to⁴nca³ jyo¹ ca²ta³va³tio²,
\v 13 nca⁴ Adán ti¹tjon² qui³sˀe³nta³, scan³ Eva.
\v 14 Adán li²coi³ qui³chˀa²na⁴cha⁴-le⁴, to⁴nca³
chjon⁴²-ve⁴ qui³chˀa²na⁴cha⁴-le⁴, ña³qui³
tsˀa³ntjai²cjoa⁴-ni³.
\v 15 To⁴nca³ coi⁴tjo³ntjai²-ni¹ nca³ sˀe⁴-le⁴ xti³, tsa²
ña³qui³ cˀoe¹jna³ntsjai²cao⁴ xi³ ma³cjain¹-le⁴, nca³
tsjoa³que³, nca³ tsje³, nca³ nta³ fi²cao⁴ yao³-le⁴.
\c 3
\s Cjoa⁴ xi³ ma³chjen¹-le⁴ je² xi³ si¹coi²nta⁴
na⁴xi⁴na³nta¹-le⁴ Cristo
\p
\v 1 Je² en¹-vi⁴ ña³qui³ cˀoa⁴²tjin¹: Tsa² jnco³ xi³
me³-le⁴ xa¹ nca³ si⁴²coi²nta⁴ na⁴xi⁴na³nta¹-le⁴ Cristo,
cjai¹nca³ nta³ xa¹ xi³ me³-le⁴.
\v 2 Ma³chjen¹ nca³ je² xi³ si¹coi²nta⁴ na⁴xi⁴na³nta¹-le⁴
Cristo a³li²jme³ je¹ sˀe³-le⁴. To⁴jnco³ chjon⁴²
ca²ta³sˀe³-le⁴. Cho⁴ta⁴to⁴jvi³ ca²ta³ma³, cˀoa⁴
cho⁴ta⁴ˀi³nta³ta³con², cˀoa⁴ cho⁴ta⁴ xi³ nta³
si¹cho⁴ya³-le⁴ yao³-le⁴, xi³ nta³ si¹sin³-le⁴ xi³
fa³ˀai³con³-le⁴, xi³ nta³ ma³-le⁴ va³co¹ya³.
\v 3 Ma³chjen¹ nca³ tsi² si¹sin³-le¹ vino, nca³ tsi²
vˀe¹-le⁴ cho⁴ta⁴. A³li² cho⁴ta⁴chi⁴nca⁴-jin² ma³
tˀa³tsˀe⁴ tso³jmi², nca³ to⁴cho⁴ta⁴ntˀe¹ ni¹, nca³
li²coi³ cjoa⁴si³ si¹sin³, nca³ li²coi³ chi⁴nca⁴-le⁴ taon⁴.
\v 4 Ma³chjen¹ nca³ nta³ va³te¹xo³ma³-le⁴ ni³ˀya³-le⁴,
nca³ nta³ vˀe¹ne²-le⁴ xti³-le⁴ nca³ ña³qui³ nta³
ca²ta³ve³xcon¹ cjoa⁴.
\v 5 (Je² xi³ tsi² tsa² ma³-le⁴ va³te¹xo³ma³ ni³ˀya³-le⁴,
jo¹-sˀin² si⁴²coi²nta⁴ na⁴xi⁴na³nta¹-le⁴ Ni³na¹.)
\v 6 A³li² tsa² je²-jin² xi³ to⁴sˀa⁴ coan³cjain¹-le⁴,
jme¹-ni³ nca³ tsi² sca⁴jin³-si¹ni³ xi³ ti⁴coi³-ni³
cjoa⁴ñˀain³ jo³-ni³ tsa² nai⁴², nca⁴ ncˀa³con³ coan⁴.
\v 7 Cˀoa⁴-ti⁴ ma³chjen¹ nca³ xi³ cja⁴ˀai¹ cho⁴ta⁴ nta³
cˀoa⁴sje³ nca³ je², jme¹-ni³ nca³ tsi² tsa²
sca⁴jin³-si¹ni³ cjoa⁴soa³ cao⁴ chen⁴-le⁴ nai⁴².
\s Cjoa⁴ xi³ ma³chjen¹-le⁴ je² xi³ si¹sin³-le⁴
na⁴xi⁴na³nta¹-le⁴ Cristo
\p
\v 8 Ti⁴cˀoa⁴-sˀin²ni³ je² xi³ si¹sin³-le⁴
na⁴xi⁴na³nta¹-le⁴ Cristo, tjin¹ne²-le⁴ nca³ scoe⁴xcon¹
cjoa⁴, a³li² jao²jan²-jin² vˀe¹⁴con³, a³li² to⁴xquia⁴
ˀvi³-jin² vino, a³li² cho⁴ta⁴chi⁴nca⁴-jin² ma³ tˀa³tsˀe⁴
tso³jmi².
\v 9 Cˀoa⁴-sˀin² ca²ta³sˀe³-le⁴ je² cjoa⁴ˀma³ xi³
ma³cjain¹-na¹ cao⁴ cjoa⁴fa³ˀai³tsjen³ xi³ tsje³.
\v 10 Cˀoa⁴-ti⁴ je² cho⁴ta⁴ xi³ si¹sin³-le⁴
na⁴xi⁴na³nta¹-le⁴ Cristo, ti¹tjon² ca²ta³cho²tˀa³, cˀia⁴²
ca²ta³si¹xa¹, tsa² tsi² tsa² jme³ je¹ tjin¹-le⁴.
\v 11 Ti⁴cˀoa⁴-sˀin²ni³ je² xi³ ya¹nchjin¹, tjin¹ne²-le⁴
nca³ scoe⁴xcon¹ cjoa⁴, a³li² chˀao³-jin² si¹cˀa³xqui⁴
xi¹ncjin¹. Cho⁴ta⁴ to⁴jvi³ ca²ta³ma³, nta³
ca²ta³si¹cji³tjo³son² nca³yi³je³.
\v 12 Je² cho⁴ta⁴ xi³ si¹sin³-le⁴ na⁴xi⁴na³nta¹-le⁴ Cristo
to⁴jnco³ chjon⁴² ca²ta³sˀe³-le⁴. Nta³
ca²ta³va³te¹xo³ma³-le⁴ xti³-le⁴ cao⁴ ni³ˀya³-le⁴.
\v 13 Je² cho⁴ta⁴ xi³ nˀion¹ nta³ si¹sin³-le⁴
na⁴xi⁴na³nta¹-le⁴ Cristo, cjai¹nca³ nta³ ˀnte³ sa⁴co²-le⁴,
cˀoa⁴ coan⁴nˀion¹con³, nca⁴ ma³cjain¹-le⁴ tˀa³tsˀe⁴
Cristo Jesús.
\s Je² cjoa⁴ˀma³-ve³ jo³-sˀin² ˀya³xcoan¹ Ni³na¹
\p
\v 14 Je²-vi⁴ ti²cji³-le²³, nta³ tsa² ti²co³ya³ nca³
nti⁴ton⁴ cjoi³cho³nčhˀoe²-le²³.
\v 15 Tsa² coan⁴tse³ya²-na³, ti²cji³-le²³ jme¹-ni³ nca³
jcha⁴-si¹ni³ jo³-sˀin² nca³ ma³chjen¹-li² nca³ ˀmi³coai⁴
yao³-li⁴ ya⁴ ni³ˀya³-le⁴ Ni³na¹ xi³ coi³ na⁴xi⁴na³nta¹-le⁴
Ni³na¹ xi³ ti¹jna³con³. Nca⁴ nco³ya³-le⁴ xjao¹nˀion¹ ni¹,
cˀoa⁴ xjao¹ja⁴ma⁴ xi³ tsjoa¹nca³nˀion¹-le⁴ xi³
cjoa⁴qui²xi⁴.
\v 16 Ña³qui³ ˀya³² nca³tsˀia³² nca³ cjai¹nca³ to⁴je³ya³
je² cjoa⁴ˀma³-ve⁴ jo³-sˀin² ˀya³xcoan¹ Ni³na¹. Ni³na¹
tsa³ˀya³-le⁴ nca³ cho⁴ta⁴yao³ cjoan³ jo³-ni³ ña¹. Xi³
to⁴tˀa³tsˀe⁴ Espíritu Santo tsa³ˀya³-le⁴ nca³ tjin¹-le⁴
cjoa⁴qui²xi⁴. Tsa³ve³ je² a²ncje⁴-ve⁴.
Qui³no²cjoa⁴ya³jin³-le⁴ nca³tsˀi³ na⁴xi⁴na³nta¹. Xi³ i⁴
son³ˀnte³-vi⁴ tjio¹ coan³cjain¹-le⁴ tˀa³tsˀe⁴. Qui³tjoe¹
ncˀa³jmi³ cao⁴ cjoa⁴je³ya³.
\c 4
\s Sˀe⁴ cˀa³ xi³ to⁴xin² ntia⁴² coai⁴
\p
\v 1 To⁴nca³ je² Espíritu Santo nchja⁴tsen³-ni¹ nca³ je²
ni⁴čhjin³ xi³ nčhoa¹, tjin¹ cˀa³ xi³ to⁴xin² ntia⁴²
coai⁴-le⁴ en¹ xi³ ma³cjain¹-na¹, cjoi⁴nčhˀoe¹-le⁴
espíritu xi³ vˀa³na⁴cha⁴-le⁴, cao⁴
cjoa⁴fa³ˀai³tsjen³-le⁴ nai⁴² xi³ nta³jin³.
\v 2 Jao² coai⁴-ni³ nca³ coi⁴nchja⁴ en¹nti³so³, nca³
xi¹jin³ cjoa⁴fa³ˀai³tsjen³-le⁴, jo³-ni³ xi³
qui³ti²jma²jon³.
\v 3 Li²coi³ tsjoa¹ˀnte³ nca³ coi⁴xan³ cho⁴ta⁴.
Cˀoa⁴-sˀin² cˀoe⁴²ne² nca³ tsi² tsa² coan⁴ chi⁴ne⁴
tso³jmi² xi³ Ni³na¹ tsa³cˀe¹nta³. Ni³na¹ tsa³cˀe¹nta³
tso³jmi² jme¹-ni³ nca³ scoe¹-si¹ni³ je² xi³ nta³
fi²tˀa³-le⁴ Ni³na¹ cao⁴ je² xi³ ve³ xi³ cjoa⁴qui²xi⁴,
cˀoa⁴ tsjoa¹ cjoa⁴nta³ nca³ scoe¹.
\v 4 Je² nca³yi³je³ xi³ Ni³na¹ tsa³cˀe¹nta³ nta³-ni¹.
Ni⁴to⁴jme³-jin² xi³ chja⁴ˀa²xian². Coan⁴² chi⁴ne⁴² tsa²
cˀoe⁴² cjoa⁴nta³.
\v 5 Nca⁴ je² en¹-le⁴ Ni³na¹ cao⁴ xi³ vˀe²tsˀoa²
si¹tsje³-ni³ tso³jmi²-ve⁴.
\s Cjoa⁴ xi³ ma³chjen¹-le⁴ jnco³ xi³ nta³ si¹xa¹-le⁴ Cristo
\p
\v 6 Tsa² je² cjoa⁴-vi⁴ cˀoa⁴cˀoin¹-lai⁴ ntsˀe³²,
cjai¹nca³ nta³ si⁴xa¹-lai⁴ Jesucristo. Coan³jcha¹coai⁴ en¹
xi³ ma³cjain¹-na¹ cao⁴ xi³ nta³ cjoa⁴fa³ˀai³tsjen³ xi³
ji³cho²tjen⁴nqui³-lai⁴.
\v 7 To⁴nca³ je² xi³ to⁴xquia⁴ en¹ xi³ vˀa³sje³nqui³
cjoa⁴-le⁴ Ni³na¹, xi³ tsi²jme³ chji¹-le⁴, ti⁴sen⁴xin²-lai⁴.
Chˀa⁴sjai³ nca³nˀion¹-li⁴ xi³ tˀa³tsˀe⁴ nca³
jcha⁴xcoin¹³ Ni³na¹.
\v 8 Je² nca³nˀion¹ xi³ vˀa³sje³ yao³-na¹ to⁴choa³
chji¹-le⁴, to⁴nca³ cˀia⁴ nca³ ˀya³xcoan¹ Ni³na¹ chji¹-le⁴
ni¹ nca³yi³je³. A³li² to⁴cˀoa⁴²cji³ chji¹-le⁴ tˀa³tsˀe⁴
je² cjoa⁴vi³jna³chon³ xi³ qui³ni²sˀe³nqui³-na¹ ntˀai⁴-vi⁴
cao⁴ xi³ sˀa⁴ nčhoa¹.
\v 9 Je² en¹-vi⁴ xi³ ña³qui³ cˀoa⁴tjin¹, xi³ va³quin²-le⁴
nca³ chjo¹ve¹.
\v 10 Coi³ je²-vi⁴ ni²xa¹ntje². Cˀoa⁴-ti⁴ chja⁴ˀa²-le⁴²
cjoa⁴ñˀain³ xi³ nchja⁴ˀaon³-na¹, nca⁴ cˀoa⁴-sˀin²
nˀion¹ cho³ya²-le⁴² Ni³na¹ xi³ ti¹jna³con³, xi³ ma³-le⁴
vˀa³sje³ntjai² nca³tsˀi³ cho⁴ta⁴,
va³sen²tsˀia³-cjoan²ni³ xi³ ma³cjain¹-le⁴.
\s Timoteo va¹ntia⁴²-le⁴ cho⁴ta⁴-le⁴ Cristo
\p
\v 11 Tˀe²nai²³, cˀoa⁴ ta⁴co²yai³ coi³ cjoa⁴-vi⁴.
\v 12 Ni⁴to⁴ˀya³-jin² xi³ taon³ ca²ta³ve³-li², nta³ tsa²
xti³-sai³, to⁴nca³ cˀoa⁴-sˀin² tja³ntia⁴²-lai⁴ je² cho⁴ta⁴
xi³ ma³cjain¹-le⁴ cao⁴ je² en¹-li⁴, cao⁴ jo³-sˀin²
ˀmi³coai⁴ yao³-li⁴, cao⁴ jo³-sˀin² tsjoa³chai³, cao⁴
espíritu-li⁴, cao⁴ jo³-sˀin² nca³ ma³cjain¹-li², cao⁴
jo³-sˀin² nca³ tsjai³.
\v 13 Cˀia⁴ ˀnta³ nca³ cjoi⁴choa³, cˀoa⁴-sˀin²
tˀe²xquiai⁴, tˀe²nai²³, ta⁴co²yai³.
\v 14 A³li² njion²-ta³con²jin²³ je² cjoa⁴tjao² xi³
ti¹jna³-li², xi³ tsa³cˀai²-li², jo³-sˀin²
tsa³cja³ya³ta³con²-li² cˀia⁴ nca³ cho⁴ta⁴jchi¹nca³-le⁴
cho⁴ta⁴-le⁴ Cristo tsa³ca¹son²-li² ntsja³.
\v 15 Cho¹tˀa³ya³coai⁴ je² cjoa⁴-vi⁴, to⁴coi³ xa¹
tˀiain⁴, jme¹-ni³ nca³ scoe⁴-si¹ni³ nca³tsˀi³ jo³-sˀin²
nca³ ˀmi³ti¹tjoin²³.
\v 16 Ti⁴coi²ntai⁴ yao³-li⁴, cˀoa⁴ ti⁴coi²ntai⁴ je² xi³
ti³va³co²yai³. Ña³qui³ cˀoa⁴-sˀin² nta³ tˀin³cao⁴-sai³.
Cˀia⁴ nca³ cˀoa⁴nˀiain²³ nca³yi³je³ je²-vi⁴,
cˀoa⁴sˀin² coi²tjo⁴ntjai²³ nca³ ti⁴ji³-ni³, cˀoa⁴-ti⁴
je² xi³ nčhˀoe¹-li².
\c 5
\s Cjoa⁴nta³ xi³ ma³chjen¹ xi³ tˀa³tsˀe⁴ xi³cˀa³
\p
\v 1 A³li² no²cjoa⁴ti³cao⁴-jin²³ cho⁴ta⁴jchi¹nca³,
to⁴tˀe²ne²-lai⁴ jo³-ni³ tsa² nˀai³-li⁴. Je² xi³ nqui²sa⁴
xti³ tˀe²ne²-lai⁴ jo³-ni³ tsa² ntsˀai³.
\v 2 Je² ya¹nchjin¹ jchi¹nca³ tˀe²ne²-lai⁴ jo³-ni³ tsa²
na⁴-li⁴, je² xti³ya¹nchjin¹ jo³-ni³ tsa² ti³chjai³ nca³
ña³qui³ tsje³ ca²ta³mai³.
\v 3 Jcha⁴xcoin¹³ ya¹nchjin¹ xi³ cˀen³ xˀin⁴-le⁴ xi³
ña³qui³ cˀan² cjoa⁴qui²xi⁴.
\v 4 Tsa² jnco³ ya¹nchjin¹cˀan² xi³ tjin¹-le⁴ xti³ cao⁴
xti³ntai⁴, ti¹tjon²-cjoa²la² ca²ta³ma³-le⁴ xti³-ve⁴ nca³
ca²ta³ve³xcon¹ cho⁴ta⁴ni³ˀya³-le⁴ jo³-sˀin² nca³ ve³xcon¹
Ni³na¹, cˀoa⁴ ca²ta³tsjoa¹ nca³jao³-le⁴ cjoa⁴tjao²cha³
xi³jcha¹-le⁴. Je²-vi⁴ xi³ nta³ tjin¹ xi³ sa³sen¹-le⁴
Ni³na¹.
\v 5 Je² xi³ chjon⁴²cˀan² cjoa⁴qui²xi⁴ nca³ cˀen³
xˀin⁴-le⁴, cˀoa⁴ xi³ to⁴je² ti¹jna³, je³ti¹co³ya³
tˀa³tsˀe⁴ Ni³na¹. Cˀoa⁴sˀin² fi²cao⁴-sa³ nca³ si¹je¹
cjoa⁴nta³ nca³ vˀe¹tsˀoa³ ni⁴čhjin³ cao⁴ ni⁴tjen⁴.
\v 6 To⁴nca³ je² xi³ to⁴tsjoa¹ˀnte³ qui³te³-le⁴ yao³-le⁴
xi³ cao⁴ cjoa⁴tsjoa³, nta³ tsa² ti¹jna³con³ nco³ya³-le⁴
ti¹jna³cˀen³-ni¹.
\v 7 Cˀoa⁴-sˀin² tˀe²nai²³ je² cjoa⁴-vi⁴, jme¹-ni³ nca³
tsi² tsa² jme³ je¹ sˀe⁴-ni³le⁴.
\v 8 Tsa² jnco³ xi³ tsi² tsa² si¹coi²nta⁴ xi¹ncjin¹,
va³sen²tsˀia³cjoan²ni³ je² xi³ tsˀe⁴ ni³ˀya³-le⁴,
to⁴tsa³cˀe²jna³ˀma³cao⁴ cjoa⁴ xi³ coan³cjain¹-le⁴.
To⁴nqui²sa⁴ chˀao³ si¹cˀe¹jna³ yao³-le⁴ cao⁴-ni³ xi³ tsi²
tsa² ma³cjain¹-le⁴.
\v 9 Tja³ya³xqui⁴ tˀa³ xon⁴ jo³-ni³ ya¹nchjin¹cˀan² xi³
cˀen³ xˀin⁴-le⁴ to⁴je² xi³ je³jan²can³ no¹ tjin¹-le⁴, xi³
to⁴jnco³ xˀin⁴ qui³sˀe³-le⁴,
\v 10 xi³ nta³ tsa³ˀya³-le⁴ xi³ to⁴tˀa³tsˀe⁴ xa¹-le⁴ xi³
nta³, tsa² qui³si³jcha¹ xti³, tsa² qui³si³sin³-le⁴ xi³
ja³ˀai³con³-le⁴, tsa² tsa³ca³ne¹jon³ ntso⁴co⁴ cho⁴ta⁴-le⁴
Cristo, tsa² tsa³qui³ncha²cao⁴ xi³ cjoa⁴va³ tjin¹-le⁴, tsa²
cˀoa⁴-sˀin² nta³ qui³si³xa¹ nca³yi³je³ cjoa⁴.
\v 11 To⁴nca³ je² ya¹nchjin¹cˀan² xi³ xti³-sa³ xi³ cˀen³
xˀin⁴-le⁴ a³li² ni²cˀa³sˀen³tˀa³-jin²³ xon⁴. Tsa²
cja⁴ˀai¹-nca¹sˀin² coa⁴tio²⁴-con³, co²ntran⁴-le⁴ Cristo
coai⁴-ni³. Scan³-ni³ me³-le⁴ nca³ coi⁴xan³.
\v 12 Cˀoa⁴-sˀin² sa⁴co²-le⁴ cjoa⁴ñˀain³ nca⁴ li²coi³
qui³si³cji³tjo³son² xi³ coan³cjain¹-le⁴ nca³ ti¹tjon².
\v 13 Cˀoa⁴²-ti⁴ ma³nca³-le⁴ nca³ ma³tsˀe²,
to⁴vˀe¹ma³son² ni³ˀya³ nca³ i⁴ nca³ jan¹. A³li² tsa²
to⁴coi³-jin² nca³ vˀe¹ma³tsˀe², cˀoa⁴-ti⁴
to⁴cjoa⁴sin³cjoa⁴-le⁴, to⁴tsˀoa³ vˀe¹ma³cao⁴.
Vˀe¹ma³nchja⁴ xi³ tsi² tsa² ma³chjen¹.
\v 14 Coi³ xi³ me³-na³ nca³ je² xi³ ya¹nchjin¹cˀan² xi³
xti³-sa³ xi³ cˀen³ xˀin⁴-le⁴, ca²ta³vi³xan³,
ca²ta³sˀe³-le⁴ xti³, ca²ta³va³te¹xo³ma³ ni³ˀya³-le⁴.
A³li² tsjoa¹ˀnte³-jin²le⁴ co²ntran⁴-le⁴ nca³ chˀao³
coi⁴tso⁴.
\v 15 Je³tjin¹ cˀa³ xi³ qui³si³cˀo¹fa³ya³-ni³ yao³-le⁴,
xi³ qui³tˀa³-le⁴ Satanás.
\v 16 Tsa² jnco³ cho⁴ta⁴xˀin⁴ a³xo⁴ chjon⁴² xi³
ma³cjain¹-le⁴, xi³ tjin¹ xi¹ncjin¹ xi³ ya¹nchjin¹cˀan² xi³
cˀen³ xˀin⁴-le⁴, ca²ta³si¹coi²nta⁴, jme¹-ni³ nca³ tsi²
tsa² coan⁴chˀa¹ne²-si¹ni³le⁴ je² na⁴xi⁴na³nta¹-le⁴
Cristo, cˀoa⁴ jme¹-ni³ nca³ sˀe⁴-si¹ni³le⁴ xi³
ma³chjen¹-le⁴ je² xi³ ya¹nchjin¹cˀan² cjoa⁴qui²xi⁴.
\v 17 Je² cho⁴ta⁴jchi¹nca³ xi³ nta³ va³te¹xo³ma³
va³quin²-le⁴ nca³ can³-ni³ cˀa³ ca²ta³ˀya³xcon¹,
va³sen²tsˀia³-cjoan²ni³ xi³ tse³ xa¹ tjin¹-le⁴ nca³
nchja⁴ya³ nca³ va³co¹ya³.
\v 18 Je² xon⁴ Escritura cˀoi⁴tso²: A³li² nˀo¹-jin²
vˀe²ˀai³ je² nčha⁴ja⁴ntˀe¹ xi³ si¹cˀa³tji³ trigo-ve⁴.
Cjai¹nca³ va³quin²-le⁴ nca³ je² xi³ si¹xa¹,
ca²ta³ma³chji¹-le⁴.
\v 19 A³li² ni²sin³-jin²³ xi³ va¹nqui³ cho⁴ta⁴jchi¹nca³,
tsa² tsin³-le⁴ jao² jan² testigo xi³ si¹qui²xi⁴ya³ cjoa⁴.
\v 20 Je² xi³ tjio¹ma³jnqui³ je¹ ti⁴no²cjoa⁴ti³coai⁴
nqui³xcon⁴ nca³tsˀi³, jme¹-ni³ nca³ xi³cˀa³ cˀoa⁴-sˀin²
coan⁴xcon¹-si¹ni³le⁴.
\v 21 Vˀe³ne²³-le²³ nqui³xcon⁴ Ni³na¹ cao⁴ Nai³-na¹
Jesucristo cao⁴ a²ncje⁴ xi³ qui³tjoe¹jin³, nca³
tˀe²jin³-ta³coin²³ nca³yi³je³ cjoa⁴-vi⁴. Ni⁴jme³-jin²
cjoa⁴ xi³ to⁴nqui³-ni³ cˀoe¹nta³jin³, cˀia⁴ nca³ cje³
tsin² cjoa⁴qui²xi⁴. Ni⁴ˀya³-jin² cho⁴ta⁴ xi³ chja⁴ˀa²jin³
nca³ si⁴sin³-lai⁴.
\v 22 A³li²ˀya³ xi³ fa³son² nti⁴ton⁴-lai⁴ ntsai⁴, nca³
cˀoai⁴-lai⁴ xa¹. A³li² ya⁴-jin² ni²jnco³coai⁴ je¹-le⁴ xi³
cja⁴ˀai¹. Ña³qui³ tsje³ ti⁴jnai³.
\v 23 A³li² to⁴xquia⁴ na³nta¹-jin² ˀyoi³, to⁴nca³
ti⁴chjen¹ i⁴tsai¹³ vino xi³ tˀa³tsˀe⁴ ntsˀoai³ cao⁴ je²
chˀin³ xi³ tjin¹ntsjai²-li².
\v 24 Je² je¹-le⁴ cˀa³ cho⁴ta⁴ tjio¹son²tsen³-ni¹ ti¹tjon²
nca³ sˀe³nta³jin³-le⁴, to⁴nca³ xi³cˀa³ scan³ coan⁴tsen³
tsˀe⁴.
\v 25 Cˀoa⁴-ti⁴sˀin² je² xi³ nta³ xa¹ tjio¹son²tsen³-ni¹
ti¹tjon². Cˀoa⁴ je² xi³ cja⁴ˀai¹-sˀin² cjoan³ li²coi³
coan⁴ coa⁴tio⁴ˀma³.
\c 6
\p
\v 1 Je² nca³tsˀi³ xi³ cho⁴ˀnta³ ma³ ca²ta³ve³xcon¹
nai³-le⁴, jme¹-ni³ nca³ tsi² tsa² coi⁴no²cjoa⁴ˀaon³-ni³le⁴
jan³ˀain¹-le⁴ Nai³-na¹ cao⁴ je² cjoa⁴fa³ˀai³tsjen³-le⁴.
\v 2 Je² xi³ tjin¹-le⁴ nai³ xi³ ma³cjain¹-le⁴ tˀa³tsˀe⁴
Cristo, a³li² to⁴cjoa⁴-jin² ve³con³, nca⁴ cˀoa⁴²-ti⁴
ntsˀe⁴. To⁴sa³ nqui²sa⁴ nta³ ca²ta³si¹xa¹-le⁴ nca⁴ je²
nai³-le⁴ cho⁴ˀnta³-ve⁴ cˀoa⁴-ti⁴ ma³cjain¹-le⁴
tˀa³tsˀe⁴ Cristo, cˀoa⁴ tjao²cha³ ma³ xi¹ncjin¹. Je²
cjoa⁴-vi⁴ ta⁴co²yai³, cˀoa⁴ tˀe²nai²³.
\s Nta³ cˀoe¹jnco³-ta³coan² nca³ ˀya³xcoan¹ Ni³na¹
\p
\v 3 Tsa² tjin¹ cˀa³ xi³ cja⁴ˀai¹ tso² xi³ va³co¹ya³, xi³
tsi²coi³ tji¹jnco³con³ tˀa³tsˀe⁴ je² en¹ xi³ nta³ xi³
tsˀe⁴ Nai³-na¹ Jesucristo cao⁴ je² cjoa⁴fa³ˀai³tsjen³
jo³-sˀin² nca³ ˀya³xcoan¹ Ni³na¹,
\v 4 je² cho⁴ta⁴ ma³ncˀa³con³-ni¹. Ni⁴jme³-jin² xi³
ma³-le⁴, to⁴cjoa⁴sca¹ tjin¹-le⁴ tˀa³tsˀe⁴ xi³ to⁴ˀen¹
xi³ to⁴cjoa⁴cho⁴va²ti³ya³-ni³. Ya⁴ nčhoa¹-ni³
cjoa⁴xin²ta³con², cjoa⁴vi³xcan¹, en¹ˀaon³, cao⁴ xi³
to⁴cjoa⁴tjao² va¹ne²-le⁴ cjoa⁴.
\v 5 Ya⁴ nčhoa¹-ni³ xi³ chˀao³-sˀin² fao¹ti³ cho⁴ta⁴ xi³
je³chi³tson³ya² cjoa⁴fa³ˀai³tsjen³-le⁴, xi³ tsin²-le⁴
cjoa⁴qui²xi⁴-jin², xi³ to⁴ve³xcon¹ Ni³na¹ tˀa³tsˀe⁴ xi³
njen³-le⁴. Chja⁴ˀa²xin²-lai⁴ yao³-li⁴ xi³ cˀoa⁴cjoan³.
\v 6 Cjai¹nca³ to⁴tse³ coi⁴njen⁴-na¹ tsa²
vˀe²jnco³ta³coan² nca³ ˀya³xcoan¹ Ni³na¹.
\v 7 Ni⁴to⁴jme³-jin² cjoa⁴ xi³ qui³tsin³coa⁴² i⁴
son³ˀnte³. Ña³qui³ cˀoa⁴-jin² tjin¹ nca³ ni⁴jme³-jin²
xi³ coan⁴-na¹ chˀa⁴sje³².
\v 8 Tsa² tjin¹-na¹ xi³ chi³ne³² cao⁴ na³jño³ xi³
chˀa²cja¹, to⁴cˀoa⁴-sˀin² cˀoe¹jnco³-ta³coan².
\v 9 Je² xi³ me³-le⁴ nca³ coan⁴nchi⁴na¹ sca⁴jin³ xi³
chˀao³ si⁴²cao⁴, cˀoa⁴ sca⁴nqui³ tsa² chen⁴. Sca⁴jin³
cjoa⁴xin²ta³con², cˀoa⁴ cjoa⁴sca¹ xi³ si¹qui²ˀaon³, xi³
si¹cha³jin³ xi³ si¹cji³tson¹ cho⁴ta⁴.
\v 10 Je² xi³ si¹me³con³ taon⁴, ya⁴ nčhoa¹-ni³ nca³yi³je³
cjoa⁴tsˀen⁴. Je² cho⁴ta⁴ xi³ coi³ si¹me³con³, xin² ntia⁴²
qui³-le⁴ en¹ xi³ ma³cjain¹-na¹. A³li² to⁴cˀoa⁴cji³
cjoa⁴so³ cjoa⁴ñˀain³ tsa³cja³ˀa¹.
\s Je² cjoa⁴jchan¹ xi³ nta³ tˀa³tsˀe⁴ xi³ ma³cjain¹-na¹
\p
\v 11 To⁴nca³ ji³, cho⁴ta⁴ xi³ tsˀe⁴ Ni³na¹,
ti⁴sen⁴xin²-lai⁴ cjoa⁴-vi⁴. Cˀoa⁴-sˀin² tˀin³coai⁴
yao³-li⁴ cao⁴ xi³ cjoa⁴qui²xi⁴, cao⁴ cjoa⁴xcon¹ta³con²
tˀa³tsˀe⁴ Ni³na¹, cao⁴ xi³ nta³ ma³cjain¹-li², cao⁴
cjoa⁴tjao²cha³, cao⁴ cjoa⁴tse³ta³con², cao⁴
cjoa⁴ˀi³nta³jin³ta³con².
\v 12 Nta³ ti⁴xcan¹tˀai³ je² cjoa⁴jchan¹ xi³ nta³
tˀa³tsˀe⁴ xi³ ma³cjain¹-na¹. Chjoai¹³ je²
cjoa⁴vi³jna³chon³ xi³ nca³ntsjai², je² xi³
qui³no²cjoa⁴-ni³li² cˀia⁴ nca³ nta³ tsa³cˀai²
cjoa⁴qui²xi⁴-li⁴ nqui³xcon⁴ ncjin² testigo.
\v 13 Cˀoa⁴-sˀin² vˀe³ne²³-le²³ nqui³xcon⁴ Ni³na¹ xi³
tsjoa¹ntsjai²-le⁴ cjoa⁴vi³jna³chon³ nca³yi³je³, cˀoa⁴
nqui³xcon⁴ Jesucristo xi³ nta³ qui³tsjoa³ cjoa⁴qui²xi⁴-le⁴
nqui³xcon⁴ Poncio Pilato.
\v 14 Nta³ ti⁴jna³coai⁴ je² cjoa⁴te¹xo³ma³-vi⁴, jme¹-ni³
nca³ tsi² jnti¹ coan⁴-si¹ni³, cˀoa⁴ nca³ tsi² chˀao³
coi⁴tjo³-si¹ni³ sa³ˀnta³ nca³ coan⁴tsen³ nqui²ntia³-ni³
Nai³-na¹ Jesucristo.
\v 15 Cˀia⁴ nca³ cjoi⁴cho³ ni⁴čhjin³-le⁴, Ni³na¹
si⁴²cˀa³tsen³ Cristo. Ni³na¹ to⁴je² xi³ cˀoa⁴-sˀin²
nˀion¹ nta³ ti¹jna³, xi³ to⁴je² xi³ ncˀa³ cjoa⁴te¹xo³ma³
tjin¹-le⁴, Cho⁴ta⁴ti¹tjon² xi³ ti¹tjon²-le⁴ nca³tsˀi³
cho⁴ta⁴ti¹tjon², Nai³ xi³ ti¹tjon²-le⁴ nca³tsˀi³ nai³.
\v 16 To⁴je² Ni³na¹ xi³ ni⁴cˀia³-jin² mˀen³. Ya⁴
ti¹jna³jin³ lˀi¹ xi³ tsi² tsa² ˀya³ xi³ coan⁴ cjoi⁴cho³.
Je² xi³ ni⁴jnco³-jin² cho⁴ta⁴ tsa³ve³, ni⁴coan⁴-jin²le⁴
scoe⁴. Je² ca²ta³sˀe³-le⁴ cjoa⁴je³ya³, ca²ta³sˀe³-le⁴
cjoa⁴te¹xo³ma³ nca³ntsjai². Cˀoa⁴ ca²ta³ma³.
\v 17 Je² cho⁴ta⁴nchi⁴na¹ xi³ tjin¹ son³ˀnte³,
tˀe²ne²-lai⁴. A³li² ncˀa³-ta³con²jin² ma³. A³li²
si¹nˀion¹tˀa³-ta³con²jin² je² cjoa⁴nchi⁴na¹-ve⁴ xi³ tsi²
cˀoa⁴tjin¹. Ca²ta³si¹nˀion¹tˀa³con³ Ni³na¹ xi³
ti¹jna³con³, xi³ cjai¹nca³ tse³ tsjoa¹-na¹ nca³yi³je³
tso³jmi², jme¹-ni³ nca³ sˀe⁴-si¹ni³na¹ cjoa⁴tsjoa³.
\v 18 Je² cho⁴ta⁴nchi⁴na¹-ve⁴ cjoa⁴nta³ ca²ta³sˀin¹,
nˀion¹ tse³ cjoa⁴nta³ ca²ta³sˀe³-le⁴, ca²ta³si¹tjao²cha³
xi³ yo⁴ma⁴, nca³ sin³ nca³ nta³ ca²ta³tsjoa¹.
\v 19 Cˀoa⁴-sˀin² ca²ta³vˀe¹xco¹ xi³ ti⁴tˀa³tsˀe⁴-ni³
jo³-ni³ tsa² xi³ ca²sˀe³ntje² tˀa³tsˀe⁴ ni⁴čhjin³ xi³
cjoa⁴ˀai¹, jme¹-ni³ nca³ scoe¹-si¹ni³ cjoa⁴vi³jna³chon³
xi³ nca³ntsjai².
\v 20 Ji³-lai²³ Timoteo, nta³ ti⁴jna³coai⁴ je² xi³
qui³sˀe³ne²-li². Ti⁴sen⁴xin²-lai⁴ na⁴jmi¹ xi³
to⁴cjoa⁴tjao², xi³ tsi²jme³ chji¹-le⁴ tˀa³tsˀe⁴ Ni³na¹,
cao⁴ xi³ cjoa⁴cho³va²ya³ti³-ni³ xi³ tsˀe⁴
cjoa⁴chji⁴ne⁴nti³so³.
\v 21 Tjin¹ cˀa³ xi³ si¹qui²xi⁴ya³ coi³ cjoa⁴, to⁴nca³
xin² ntia⁴² qui³-le⁴ en¹ xi³ ma³cjain¹-na¹. Ca²ta³sˀe³-li²
cjoa⁴nta³. Cˀoa⁴ ca²ta³ma³.