\id PHM
\h Filemón
\toc1 Filemón
\mt Xon⁴ xi³ pa²stro⁴ Pablo qui³squi³-le⁴ Filemón
\c 1
\s Pablo si¹ti²ˀnta³
\p
\v 1 An³ nia¹³ Pablo, xi³ ti²jna⁴ nto⁴ya¹ xi³ tˀa³tsˀe⁴
Jesucristo. An³ cao⁴ ntsˀe³² Timoteo ti³chji³-lai²⁴jin⁴
Filemón. Tjao²cha³-lai²⁴jin⁴ nca³ ni²xa¹coa⁴² xi²nquia⁴².
\v 2 Cˀoa⁴-ti⁴ ti³chji³-lai²⁴jin⁴ Apia xi³
tjao²chai³⁴-jin⁴, cao⁴ Arquipo xi³ to⁴jncoa³²
so³nta²do⁴-le⁴ Ni³na¹, cao⁴ cho⁴ta⁴-le⁴ Cristo xi³ ma³ña³
ni³ˀya³-li⁴.
\v 3 Je² Ni³na¹ Nˀai³-na¹ cao⁴ Nai³-na¹ Jesucristo
ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³
ni⁴ma⁴-no³.
\s Je² cjoa⁴tjao²cha³-le⁴ Filemón, cˀoa⁴ nta³
ma³cjain¹-le⁴ tˀa³tsˀe⁴ Jesús
\p
\v 4 Cˀia⁴ nca³ vˀe³tsˀoa²³, nca³ntsjai² tsjoa³-le⁴
cjoa⁴nta³ Ni³na¹-na⁴, nca³ si³cja³ˀai³tsjen³-le²³ nca³
ji³.
\v 5 Tsjoa³-le⁴ cjoa⁴nta³ nca³ nčˀoe³-nia¹³ jo³-sˀin²
tjao²chai³, jo³-sin² ma³cjain¹-li² tˀa³tsˀe⁴ Nai³-na¹
Jesús, cˀoa⁴ tˀa³tsˀe⁴ nca³tsˀi³ cho⁴ta⁴-le⁴ Cristo.
\v 6 Vˀe³tsˀoa²³ jme¹-ni³ nca³ coan⁴chjen¹-si¹ni³ je²
cjoa⁴nta³ xi³ vˀai² nca³ ma³cjain¹-li², jme¹-ni³ nca³
coan⁴tsen³-si¹ni³ nca³yi³je³ cjoa⁴nta³ xi³ tjin¹-no³
tˀa³tsˀe⁴ Cristo Jesús.
\v 7 Cjai¹nca³ tse³ cjoa⁴tsjoa³ cao⁴ cjoa⁴ma⁴ta³con²
tjin¹-na³jin⁴ xi³ to⁴tˀa³tsˀe⁴ cjoa⁴tjao²cha³-li⁴, nca⁴
je³qui³njen³nchˀan¹jin³ ni⁴ma⁴-le⁴ cho⁴ta⁴-le⁴ Cristo, xi³
to⁴tˀa³tsi⁴, ˀnti¹ntsˀe³.
\s Pablo vˀe¹tsˀoa³ xi³ tˀa³tsˀe⁴ Onésimo
\p
\v 8 Nta³ tsa² cjai¹nca³ ma³nˀion¹coan³ cao⁴ Cristo nca³
vˀe³ne²³-le²³ jme³ xi³ ma³chjen¹,
\v 9 coi³ nca³ tjao²cha³² xi²nquia⁴², to⁴sa³
vˀe³tsˀoa²³-le²³, jo³-sˀin² cjoan³ nca³ an³, xi³ Pablo
jchi¹nca³, nca³ ntˀai⁴-vi⁴ nto⁴ya¹ ti²jna⁴ xi³ tˀa³tsˀe⁴
Jesucristo.
\v 10 Cˀoa⁴-sˀin² vˀe³tsˀoa²³-le²³ xi³ tˀa³tsˀe⁴
ˀnti¹-na⁴ Onésimo xi³ qui³si³jcha¹³ i⁴ ya³nto⁴ya¹.
\v 11 Je² xi³ nca³sˀa⁴ ni⁴to⁴jña³-jin² coan³chjen¹-li²,
to⁴nca³ ntˀai⁴-vi⁴ntai⁴ cji³ma³chjen¹-na¹ nca³ joa².
\v 12 Je² xi³ cˀoa⁴-sˀin² si³ca³sen¹nqui²ntia³-le²³.
Jo³-ni³ tsa² an³, cˀoa⁴-sˀin² ti⁴sin³-lai⁴.
\v 13 Me³-na³ tsa²cai³, nca³ i⁴ cˀoe¹jna³cao⁴-na³,
jme¹-ni³ nca³ je² coan⁴chjen¹-si¹ni³na³ nca³jao³⁴-li⁴ nca³
ji³ ntˀai⁴-vi⁴ nca³ ti²jna⁴ˀya³ nto⁴ya¹ to⁴tˀa³tsˀe⁴
je² en¹nta³ xi³ tˀa³tsˀe⁴ Cristo.
\v 14 To⁴nca³ ni⁴to⁴jme³-jin² xi³ to⁴ˀan³
cˀoa⁴qui³sˀian³, tsa² tsi² cˀoa⁴-sˀin² coan³me³-li²
nca³ ji³, jme¹-ni³ nca³ je² cjoa⁴nta³-li⁴ a³li²
to⁴cjoa⁴nˀion¹-jin² sˀe⁴-si¹ni³. To⁴ji³ xi³ cˀoa⁴-sˀin²
coan³me³-li².
\v 15 Jo³-la²ni³ tsa² coi³ cjoa⁴ nca³ coan³cjin³tˀa³-li²
jo³ tjin¹ ni⁴čhjin³, jme¹-ni³ nca³ chjoe¹tjao²-si¹ni³
nca³ntsjai².
\v 16 A³li²coi³ ti⁴cˀoa⁴-sˀin²ni³ jo³-ni³ tsa² cho⁴ˀnta³
chjoe¹-tjoai²³, to⁴nqui²sa⁴ ncˀa³ cao⁴-ni³ tsa²
cho⁴ˀnta³, jo³-ni³ tsa² ntsˀai³ xi³ tsjoa³chai³. A³li²
to⁴tsˀan⁴-jian² ntsˀe³, to⁴nca³ nqui²sa⁴ nˀion¹ ntsˀai³
ma³-ni³ nca³ ji³. Ntsˀe³² cho³va² cao⁴ yao³-na¹,
cˀoa⁴-ti⁴ tˀa³tsˀe⁴ Nai³-na¹.
\v 17 Tsa² cˀoa⁴-sˀin² mi²yo⁴ cho³va², chjoe¹tjoai²
jo³-ni³ tsa² an³.
\v 18 Tsa² jña³-ve⁴ taon³ tsa³ve³-li², tsa² qui³tjen⁴-le⁴
tsi⁴, tˀai²tˀain³-nai¹³ coi²nta⁴.
\v 19 An³ Pablo ntsa⁴ qui³squi³-nia³, an³ cˀoe³chja¹³.
A³li²coi³ cˀoa⁴xin¹-le²³ nca³ nqui²sa⁴ tse³ qui³tjen⁴-li²
cjoa⁴vi³jna³chon³-li⁴ xi³ tˀa³tsˀan⁴.
\v 20 Jaon³, ntsˀe³, ca²ta³ma³tsjoa³ya³-na³ tˀa³tsi⁴ nca³
ti³yo³coa⁴² Nai³-na¹. Ti⁴qui³njen³nchˀan¹yai³ ni⁴ma⁴-na⁴
nca³ ti³yo³coa⁴² Nai³-na¹.
\v 21 Qui³squi³-le²³ nca³ ˀve³ nca³ si⁴tjo³son²-nai¹³.
ˀve³-nia¹³ nca³ nqui²sa⁴ tse³-sa³ cˀoa⁴sˀiain⁴
jo³-sˀin² ti²xin³-le²³.
\v 22 Cˀoa⁴-ti⁴sˀin², ti⁴chon³nta³-nai¹³ ˀnte³ jña³
coa²te⁴jna³. An³ co³ya²-le⁴ nca³ to⁴tˀa³tsˀe⁴ nca³
ti³vˀe²tsˀoao⁴³, cjoi³cho³nčhˀoe²-no³.
\s Mi²yo⁴ si¹ti²ˀnta³
\p
\v 23 Si¹ti²ˀnta³-li² Epafras, je² mi²yo⁴-na⁴ i⁴
nto⁴ya¹-vi⁴ to⁴tˀa³tsˀe⁴ Cristo Jesús.
\v 24 Cˀoa⁴-ti⁴ si¹ti²ˀnta³-li² Marcos, Aristarco, Demas,
cao⁴ Lucas, xi³ to⁴jnco³ si¹xa¹cao⁴-na³.
\v 25 Je² cjoa⁴nta³-le⁴ Nai³-na¹ Jesucristo ca²ta³sˀe³-le⁴
ni⁴ma⁴-no³. Cˀoa⁴ ca²ta³ma³.