\id JAS
\h Santiago
\toc1 Santiago
\mt Xon⁴ xi³ Santiago qui³squi³-le⁴ nca³tsˀi³
\c 1
\s Santiago si¹ti²ˀnta³
\p
\v 1 An³ nia¹³ Santiago, xi³ cho⁴ˀnta³-le⁴ Ni³na¹ cao⁴
Nai³-na¹ Jesucristo, ti²cji³-no³ xi³ te³jao² ntje⁴-le⁴
Israel, xi³ cˀoa⁴-sˀin² tjio¹tsao³va³. Si³ti²ˀnta³-no³.
\s Je² Ni³na¹ xi³ tsjoa¹ cjoa⁴i³sen³ta³con²
\p
\v 2 ˀnti¹ntsˀe³, cjai¹nca³ to⁴nta³ ca²ta³ma³tsjoa³-no³
cˀia⁴ nca³ cja⁴ˀai¹nca¹ cjoa⁴ñˀain³ sˀe⁴-no³.
\v 3 ˀya³-nio¹³ cˀia⁴ nca³ cho²tˀa³-no³ xi³ tˀa³tsˀe⁴
xi³ ma³cjain¹-no³, coi³ xi³ si¹xa¹jin³-no³ cjoa⁴tse³jta³.
\v 4 Je² cjoa⁴tse³jta³ ca²ta³ma³jnco³, jme¹-ni³ nca³
cˀoa⁴-sˀin² ña³qui³ nta³ coan⁴jnco³-si¹nio³, nca³
tsi²jme³ xi³ cha⁴-no³.
\v 5 Tsa² jnco³ xi³ jon² xi³ cha³-le⁴
cjoa⁴ˀi³sen³-ta³con², ca²-ta³si¹je¹-le⁴ Ni³na¹, je² xi³
cjai¹nca³ tse³ tsjoa¹cjoa⁴tjao²-le⁴ nca³tsˀi³, cˀoa⁴
li²coi³ taon³ ve³. Cˀoa⁴-sˀin² cˀoai⁴-le⁴.
\v 6 To⁴nca³ ca²ta³ma³cjain¹-le⁴ cˀia⁴ nca³ si¹je¹.
A³li²jao²li²jan²-jin² vˀe¹⁴-con³. Je² xi³ jao² vˀe¹⁴-con³
jo³ nco³ya³-le⁴ nta¹chi³con³ cˀia⁴ nca³ ntjao⁴ fa³ˀa³ne²,
nca³ˀi⁴ nca³jan¹ vˀe¹tsao³va³.
\v 7 Je² cho⁴ta⁴ xi³ cˀoi⁴cjoan³ a³li²coi³
si⁴²cja³ˀai³tsjen³-jin² nca³ tjin¹ xi³ Nai³-na¹
tsjoa¹-le⁴.
\v 8 Je² cho⁴ta⁴ xi³ jao² vˀe¹⁴-con³ ni⁴to⁴cˀia³-jin²
nˀion¹ tjin¹-le⁴ nca³yi³je³ ntia⁴²-le⁴.
\v 9 Je² ntsˀe³² xi³ nqui²sa⁴ yo⁴ma⁴ ti¹jna³
ca²ta³ma³tsjoa³-le⁴ nca³ nqui²sa⁴ ncˀa³ ti¹jna³.
\v 10 To⁴nca³ je² xi³ nchi⁴na¹ ca²ta³ma³tsjoa³-le⁴ nca³
yo⁴ma⁴ ti¹jna³. Cˀoa⁴-sˀin² cha⁴ nca³ je² jo³-ni³ tsa²
na³xo¹-le⁴ jña¹.
\v 11 Cˀia⁴ nca³ ma³ncˀa³ tsˀoi¹, ma³sjoe². Je²
jña¹-ve⁴ xi², na³xo¹-le⁴ tsao³. Cˀoa⁴-sˀin² cha⁴ xi³
na³sca¹cjoan³-le⁴. Cˀoa⁴-ti⁴sˀin² cha⁴ xi³
cho⁴ta⁴nchi⁴na¹ cao⁴ nca³yi³je³ cjoa⁴ma⁴-le⁴.
\s Si⁴cjain¹-le⁴² cjoa⁴ñˀain³ xi³ co³tˀa³-na¹
\p
\v 12 Jo¹ to⁴nta³-le⁴ cho⁴ta⁴ xi³ si¹cjain¹-le⁴
cjoa⁴ñˀain³. Cˀia⁴ nca³ je³qui³cho²tˀa³-le⁴,
coi⁴njen⁴-le⁴ cjoa⁴vi³jna³chon³ xi³ jo³-ni³ jnco³ corona,
xi³ Ni³na¹ qui³tsjoa³ tsˀoa³ nca³ tsjoa¹-le⁴ je² xi³
tsjoa³que³ nca³ je².
\v 13 Cˀia⁴ tsa² jnco³ xi³ cjoa⁴tsˀen⁴ chˀao³ si¹cao⁴,
a³li² tso²-jin² tsa² je² Ni³na¹ xi³ chˀao³ si¹cao⁴ cao⁴
cjoa⁴tsˀen⁴. Je² Ni³na¹ a³li²coi³ ma³-le⁴ tjoe¹
cjoa⁴tsˀen⁴, cˀoa⁴ ni⁴jnco³-jin² xi³ je² chˀao³ si¹cao⁴
cao⁴ cjoa⁴tsˀen⁴.
\v 14 To⁴nca³ jnco¹jnco¹ ti⁴tsˀe⁴-ni³ cjoa⁴chi⁴nca⁴-le⁴
xi³ chˀao³ si¹cao⁴ nca³ je². Je² cjoa⁴chi⁴nca⁴-le⁴
nchja⁴ntˀe¹-le⁴ yao³-le⁴.
\v 15 Cˀia⁴ nca³ je³ji³tjo³son² cjoa⁴chi⁴nca⁴-ve⁴
vˀe¹jna³ntje² cjoa⁴tsˀen⁴. Cˀia⁴ nca³ je³coan³jnco³
cjoa⁴tsˀen⁴-ve⁴, sˀe³-le⁴ cjoa⁴vi³ya³.
\v 16 ˀnti¹ntsˀe³, xi³ cjai¹ tsjoa³que⁴-no³, a³li²
xin²-jin² ntia⁴² ma³nquion¹³.
\v 17 Nca³yi³je³ xi³ cjoa⁴nta³, nca³yi³je³ cjoa⁴tjao² xi³
ña³qui³ nta³, nčhoa¹-ni³ ja⁴ncˀa¹, nčhoa¹jen³-ni³
Nˀai³-na¹ xi³ tsa³cˀe¹nta³ tsˀoi¹ cao⁴ sa¹ cao⁴ ni³ño³.
Je² Nˀai³-na¹ li²coi³ si¹cˀa³ntjai²ya³ yao³-le⁴,
ni⁴ˀi⁴tse¹-jin² si¹cˀa³ntjai²ya³ jo³-ni³ tsa² ncˀian¹.
\v 18 Je² xi³ cˀoa⁴-sˀin² coan³me³-le⁴, nca³
tsa³cˀe¹ntje²-na¹ xi³ to⁴tˀa³tsˀe⁴ en¹ xi³ cjoa⁴qui²xi⁴,
jme¹-ni³ nca³ ña¹ sˀe⁴jna³ti¹tjon²-nia³² nca³yi³je³ xi³
je² tsa³cˀe¹nta³.
\s Coi⁴no¹ˀya²-le⁴², cˀoa⁴ si⁴chjen¹ je² en¹-le⁴ Ni³na¹
\p
\v 19 Coi³ cjoa⁴-vi⁴ ˀnti¹ntsˀe³, xi³ cjai¹
tsjoa³que⁴-no³, nca³tsˀi³ cho⁴ta⁴ nti⁴ton⁴nti⁴ton⁴
ca²ta³nčhˀoe¹, to⁴nca³ ca²ta³cjen³jta³ nca³ nchja⁴,
a³li²to⁴cjoan¹-jin² ca²ta³ma³jti³-le⁴.
\v 20 Je² cho⁴ta⁴ xi³ ma³jti³-le⁴ li²coi³ sˀin¹ xi³
cjoa⁴qui²xi⁴ nqui³xcon⁴ Ni³na¹.
\v 21 Coi³ cjoa⁴ tˀe²jna³-nio³ nca³yi³je³ cjoa⁴ xi³
chˀao³ tjin¹, cao⁴ xi³ tse³ cjoa⁴tsˀen⁴. To⁴ˀi³nta³jin³
chjoao¹³ je² en¹ xi³ ja³ˀa³sˀen³jin³-no³, je² xi³
coan⁴-le⁴ cˀoa⁴sje³ntjai² ni⁴ma⁴-no³.
\v 22 Cˀoa⁴tˀiaon⁴³ jo³ tso² je² en¹-vi⁴, a³li²
to⁴no²ˀya²-jin²lao⁴³ nca³ cˀoa⁴-sˀin²
ti³chˀa²na⁴cha⁴-lao⁴³ yao³-no³.
\v 23 Tsa² jnco³ xi³ nčhˀoe¹ en¹-vi⁴, cˀoa⁴ li²coi³
cˀoa⁴sˀin¹ jo³ tso², je²-vi⁴ cˀoa⁴cjoan³ jo³-ni³ tsa²
jnco³ cho⁴ta⁴ xi³ jnco³ cho⁴tsin¹ co³tsen³sˀen³-ni³le⁴
ncjain¹.
\v 24 Je² qui³sco²tsen³-le⁴ yao³-le⁴, qui³, qui³cha³jin³
nti⁴ton⁴-ni³le⁴ jo³ cji³.
\v 25 To⁴nca³ jo¹ to⁴nta³ coan⁴-le⁴ je² xi³ nta³
va¹sjai³jin³ je² cjoa⁴te¹xo³ma³ xi³ ña³qui³ cjoa⁴qui²xi⁴,
xi³ si¹cˀe¹yo³ntai¹-na¹. Jo¹ to⁴nta³ coan⁴-le⁴ je² xi³
vˀe²jna³nˀion¹jin³, nca³ tsi² tsa² to⁴nčhˀoe¹, cˀia⁴
cha³jin³-le⁴, to⁴nca³ cˀoa⁴sˀin¹ jo³ tso².
\v 26 Tsa² jnco³ xi³ jon² xi³ si¹cja³ˀai³tsjen³ nca³
ve³xcon¹ Ni³na¹, xi³ li²coi³ vˀe¹chjoa²-le⁴ ni⁴jen⁴,
to⁴ti¹vˀa³na⁴cha⁴-le⁴ ni⁴ma⁴-le⁴. A³li²coi³ jme³ chji¹-le⁴
jo³-sˀin² ve³xcon¹ Ni³na¹.
\v 27 Cˀoa⁴-sˀin² ña³qui³ ˀya³xcoan¹ Ni³na¹ nca³
ma³nquin¹chon³-le⁴² xi³ jchˀan⁴ xi³ cˀen³ xˀin⁴-le⁴,
nca³ cjoa⁴ñˀain³ tjio¹fa³ˀai³, cˀoa⁴-ti⁴ nca³
chˀa⁴sje³xin²-le⁴² yao³-na¹ cjoa⁴ xi³ tjin¹
son³ˀnte³-vi⁴. Je²-vi⁴ xi³ cjoa⁴-le⁴ Ni³na¹ xi³ tsje³
tjin¹ xi³ tsi² jma² tjin¹ nqui³xcon⁴ Nˀai³-na¹.
\c 2
\s A³li² chja³ˀa²jin³-jian² cho⁴ta⁴
\p
\v 1 ˀnti¹ntsˀe³, a³li² chja³ˀa²jin³-jion²³ xi³
ni²sin³-lao⁴³, nca³ ma³cjain¹-no³ tˀa³tsˀe⁴ Nai³-na¹
Jesucristo xi³ ncˀa³ ti¹jna³.
\v 2 Tsa² ya⁴ jña³ nca³ ma³ñao³ cjoa⁴ˀa³sˀen³jin³-no³
jnco³ cho⁴ta⁴ xi³ taon⁴nco³ taon⁴si³ne² tjin¹-le⁴, cao⁴
na³jño³-le⁴ xi³ nta³ cjoan³, tsa² cˀoa⁴-ti⁴
cjoi⁴cho³sˀen³jin³-no³ jnco³ cho⁴ta⁴ma⁴ xi³ jnti¹ xi³
qui³xi³jnta²jon³ cji³,
\v 3 tsa² nqui²sa⁴ xcon¹ jchao⁴³ je² xi³ na³jño³ nta³
vˀa³cja¹, tsa² cˀoa⁴cˀoin¹-lao⁴³: Ti⁴jnai³ jña³ nta³
chon³-vi⁴, cˀoa⁴ tsa² cˀoa⁴cˀoin¹-lao⁴³ je²
cho⁴ta⁴ma⁴-ve⁴: To⁴ya⁴-la² ti⁴sen⁴ntoi³-ve⁴, a³xo⁴ i⁴-la²
ti⁴jna³tˀai³ na³nqui³-ve⁴,
\v 4 a³ tsi² ti⁴jon² chja³ˀa²jin³-nio³ xi²nquio⁴³, jo³-ni³
tsa² xca²le⁴ mao³ xi³ chˀao³ tjin¹
cjoa⁴fa³ˀai³tsjen³-le⁴.
\v 5 ˀnti¹ntsˀe³, xi³ cjai¹ tsjoa³que⁴-no³,
ti⁴no¹ˀyao²³: Ni³na¹ a³ tsi² tsa³cja³ˀa¹jin³
cho⁴ta⁴yo⁴ma⁴ xi³ tjin¹ i⁴ son³ˀnte³-vi⁴, jme¹-ni³ nca³
nˀion¹ coan⁴cjain¹-si¹ni³le⁴ tˀa³tsˀe⁴ Ni³na¹, nca³
cˀoai⁴cjoa⁴tjao²-si¹ni³le⁴ je² cjoa⁴te¹xo³ma³ xi³ Ni³na¹
qui³tsjoa³ tsˀoa³ nca³ tsjoa¹-le⁴ je² xi³ tsjoa³que³ nca³
je².
\v 6 To⁴nca³ jon² ˀya³taon³ cho⁴ta⁴yo⁴ma⁴. A³ tsi² tsa²
je² cho⁴ta⁴nchi⁴na¹ xi³ si¹cja³ˀa¹-no³ cjoa⁴ñˀain³, a³
tsi² tsa² cˀoa⁴-ti⁴ je² xi³ fi²cao⁴cjoa⁴nˀion¹-no³
nqui³xcon⁴ cjoa⁴te¹xo³ma³.
\v 7 A³ tsi² tsa² je² xi³ nchja⁴ˀaon³-le⁴ je² jan³ˀain¹
xi³ nta³, xi³ cˀoa⁴tsa³cˀin²-ni³no³.
\v 8 Nta³ nˀiaon²³, tsa² cjoa⁴qui²xi⁴ nca³ ni²tjo³son²³
je² cjoa⁴te¹xo³ma³ xi³ ncˀa³, jo³ tso² xon⁴ Escritura:
Tjao²cha³ ca²ta³mai³ xi²nqui⁴ jo³-ni³ tsa² yao³-li⁴.
\v 9 To⁴nca³ tsa² chja³ˀa²jion³ xi³ ni²sin³-lao⁴³, je¹
vi³jncho³. Cˀoa⁴-sˀin² je² cjoa⁴te¹xo³ma³ ca³ni¹ne²-no³
je¹ nca³ cho⁴ta⁴tsˀa³ntjai²cjoao⁴³.
\v 10 To⁴ˀya³-ni³ xi³ si¹tjo³son² nca³yi³je³
cjoa⁴te¹xo³ma³, cˀoa⁴ jnco³ cjoa⁴ fa³ˀa³ntjai²-le⁴,
je²-vi⁴ tjin¹-le⁴ je¹ xi³ tˀa³-tsˀe⁴ nca³yi³je³
cjoa⁴te¹xo³ma³.
\v 11 Je² xi³ cˀoa⁴qui³tso²: A³li² cha³jnqui³-jin² coain⁴,
cˀoa⁴-ti⁴ qui³tso²: A³li² cˀen³-jin² ni²cˀain³. Tsa²
tsi² cha³jnqui³ coain⁴, to⁴nca³ qui³tjen⁴jnco³-li² cˀen³,
je³tsˀa³ntjai²jcoi³ cjoa⁴te¹xo³ma³.
\v 12 Cˀoi⁴-sˀin² ti⁴no²cjoao⁴³, cˀoi⁴-sˀin² tˀiaon⁴³,
jo³-ni³ tsa² cho⁴ta⁴ xi³ me³ sˀe⁴nta³jin³-le⁴ tˀa³-le⁴
je² cjoa⁴te¹xo³ma³ xi³ si¹cˀe¹yo³ntai¹-na¹.
\v 13 Tjoe¹-le⁴ cjoa⁴ñˀain³, a³li²jme³ cjoa⁴ma⁴ta³con²
xi³ sˀe⁴ xi³ tˀa³tsˀe⁴ je² xi³ tsi²coi³ tjin¹-le⁴
cjoa⁴ma⁴ta³con². Je² cjoa⁴ma⁴ta³con² si¹qui³njen³-le⁴
cjoa⁴ñˀain³.
\s A³li²jme³ chji¹-le⁴ xi³ ma³cjain¹-na¹ tsa² tsi² nta³
tjin¹ xa¹-na¹
\p
\v 14 ˀnti¹ntsˀe³, jme¹ chji¹-le⁴ tsa² jnco³ xi³ coi⁴tso⁴
nca³ ma³cjain¹-le⁴ tˀa³tsˀe⁴ Ni³na¹, cˀoa⁴ li²coi³ nta³
tjin¹ xa¹-le⁴. A³ vi³tjo³ntjai²-ni¹ nca³ cˀoa⁴-sˀin²
ma³cjain¹-le⁴.
\v 15 Tsa² jnco³ ntsˀe³² tsa² jnco³ ti²chja³² xi³
qui³xi³jnta²jon³ cji³, tsa² cjai¹nca³ ma³chjen¹-le⁴ xi³
cji³ne³ nchaon³nchaon³,
\v 16 cˀoa⁴ tsa² jnco³ xi³ jon² cˀoi⁴coi⁴tso⁴-le⁴:
Ta³nquin¹la²na²ntao³, ti⁴so³ yao³-no³, ti⁴cho³, to⁴nca³
tsi² tsa² vˀai²-ni³lao⁴³ˀni³ je² tso³jmi² xi³
ma³chjen¹-le⁴ yao³-le⁴, jme¹ chji¹-le⁴.
\v 17 Cˀoa⁴-ti⁴sˀin² xi³ ma³cjain¹-na¹ to⁴cˀoa⁴-sˀin²
cha⁴jin³, tsa² to⁴xquia⁴ ma³cjain¹-na¹, cˀoa⁴ tsa² tsi²
nta³ tjin¹ xa¹-na¹.
\v 18 Tjin¹ cˀa³ xi³ cˀoi⁴coi⁴tso⁴: Ji³ ma³cjain¹-li²,
cˀoa⁴ an³ nta³ tjin¹ xa¹-na⁴. Ta⁴co²-nai¹³ jo³-sˀin² nca³
ma³cjain¹-li², tsa² tsi² nta³ tjin¹ xa¹-li⁴, cˀoa⁴ an³
coa³co³-le²³ jo³-sˀin² nca³ ma³cjain¹-na³ nca⁴ nta³ tjin¹
xa¹-na⁴.
\v 19 Ji³ ma³cjain¹-li² nca³ to⁴jnco³ Ni³na¹. Nta³
nˀiain²³. Cˀoa⁴-ti⁴ ma³cjain¹-le⁴ je² nai⁴² xi³ nta³jin³,
cˀoa⁴ fa³tse¹ˀni³.
\v 20 Cho⁴tai⁴ xi³ tsi²jme³ cjoa⁴fa³ˀai³tsjen³ tjin¹-li²,
a³ me³-li² jchai⁴ nca³ to⁴cha³jin³-ni¹ xi³ ma³cjain¹-na¹,
cˀia⁴ tsa² tsi² nta³ tjin¹ xa¹-na¹.
\v 21 A³ tsi² tsa² je² xa¹-le⁴ xi³ qui³si³cje³tˀa³ je¹-le⁴
Abraham, je² nˀai³jcha¹cjin³-na¹, cˀia⁴ nca³
qui³tsjoa³tˀa³ Isaac, je² ˀnti¹-le⁴, ya⁴ son²xta²-ve⁴.
\v 22 A³ tsi² ˀyai³ nca³ cˀoa⁴-sˀin² Abraham
qui³si³tjo³son²cao⁴ xa¹-le⁴ jo³-sˀin² coan³cjain¹-le⁴. Xi³
coan³cjain¹-le⁴ ña³qui³ coan³jnco³son²-ni¹ xi³
to⁴tˀa³tsˀe⁴ xa¹-le⁴.
\v 23 Cˀoa⁴-sˀin² ji³tjo³son² xon⁴ Escritura xi³ tso²:
Abraham coan³cjain¹-le⁴ tˀa³tsˀe⁴ Ni³na¹. Cˀoa⁴-sˀin²
coan³xqui⁴cao⁴ cjoa⁴qui²xi⁴. Mi²yo⁴-le⁴ Ni³na¹
tsa³cˀin²-le⁴.
\v 24 Je³ˀyao³-ˀni³ nca³ cho⁴ta⁴ fe³tˀa³ je¹-le⁴ xi³
to⁴tˀa³tsˀe⁴ xa¹-le⁴, a³li² tsa² to⁴coi³-jin² cˀia⁴ nca³
ma³cjain¹-le⁴.
\v 25 Cˀoa⁴²-ti⁴sˀin²ni³ je² chjon⁴²sca¹ xi³ Rahab ˀmi²,
a³ tsi² tsa² je³tˀa³ je¹-le⁴ xi³ to⁴tˀa³tsˀe⁴ xa¹-le⁴,
cˀia⁴ nca³ qui³si³sin³-le⁴ cho⁴ta⁴ xi³ ja³ˀai³cao⁴ en¹,
cˀia⁴ tˀa³xin² qui³sca³ni¹ xi¹ti¹.
\v 26 Jo³-sˀin² nca³ je² yao³-na¹ ti¹jna³cˀen³-ni¹, tsa²
tsi² ti⁴ti¹jna³jin³-ni³le⁴ ni⁴ma⁴-le⁴, cˀoa⁴-ti⁴sˀin² je²
xi³ ma³cjain¹-na¹ to⁴cha³jin³-ni¹, tsa² tsi² nta³ tjin¹
xa¹-na¹.
\c 3
\s Xi³ tˀa³tsˀe⁴ ni³jen³²
\p
\v 1 ˀnti¹ntsˀe³, a³li² ncjin²-jin² maestro mao³, nca³
je³ˀyao³ nca³ nqui²sa⁴ tse³ cjoa⁴ñˀain³ cˀoai⁴-na¹ xi³
maestro coan³².
\v 2 Nca⁴ nca³tsˀi³ nia¹ tse³ to⁴chˀao³ nˀian². Tsa²
jnco³ xi³ tsi² chˀao³ tso² en¹-le⁴, je²-vi⁴ xi³ ña³qui³
cho⁴ta⁴nta³. Cˀoa⁴-ti⁴ ma³-le⁴ va³te¹xo³ma³-le⁴ yao³-le⁴
jo³-ni³ tsa² xi³ tji¹ˀa³ freno.
\v 3 Coe⁴-ni³ ña¹ vˀe²ˀa³² freno tsˀoa³ na⁴xin¹,
jme¹-ni³ nca³ si⁴²tjo³son²-si¹ni³na¹. Cˀoa⁴-sˀin²
ni²ntˀe¹ yao³-le⁴.
\v 4 Coe⁴-ni³ cˀoa⁴-ti⁴ je² barco. Nta³ tsa² cjai¹nca³
je³, nta³ tsa² cjai¹nca³ nˀion¹ ntjao⁴ xi³ fi²cao⁴, cjai¹
to⁴ˀnti¹ cji³ ya¹te³ timón xi³ fi²cao⁴ barco
to⁴jña³-ni³ve⁴ nca³ me³-le⁴ fi²cao⁴ je² xi³ ca³ni¹.
\v 5 Cˀoa⁴-ti⁴sˀin² je² ni³jen³² ˀnti¹ cji³, to⁴nca³
a³li² to⁴cˀoa⁴cji³ tse³ cjoa⁴ xi³ ma³-le⁴. Coe⁴-ni³ nta³
tsa² to⁴ˀi⁴tse¹ lˀi¹, a³li² to⁴cˀoa⁴cji³ jña¹jcha¹
va³ca¹.
\v 6 Je² ni³jen³² jo³ lˀi¹ ni¹, cjai¹nca³ chˀao³ sˀin¹.
Cˀoa⁴-sˀin² ni³jen³² ti¹jna³jin³-le⁴ yao³-na¹, je² xi³
si¹qui³tson¹-na¹ nca³yi³je³ yao³-na¹, va³ca¹ nca³yi³je³ jo³
xa¹ cˀoa⁴ cji³ma³-ni³. Ya⁴ infierno nčhoa¹-ni³ xi³ va³ca¹
ni³jen³².
\v 7 Nca³yi³je³ jo³ tjin¹ jco⁴ya³ cho⁴ xi³ tjin¹ cao⁴
ni⁴se³ cao⁴ ye⁴ cao⁴ cho⁴ jin³ na³nta¹ ma³ntˀe¹, cˀoa⁴
ni²ntˀe¹ xi³ cho⁴ta⁴son³ˀnte³ ˀmi²-na¹.
\v 8 To⁴nca³ ni⁴jnco³-jin² cho⁴ta⁴ xi³ coan⁴-le⁴ si⁴²ntˀe¹
ni⁴jen⁴, nca³ je² ni³jen³² jnco³ cjoa⁴tsˀen⁴ xi³ tsi² tsa²
ma³ ni²cˀe¹jyo². A³li² to⁴cˀoa⁴cji³ tjin¹-le⁴ xqui³toan¹
xi³ si¹cˀen³-ni³na¹.
\v 9 Cao⁴ ni³jen³² chˀa²sje³je³ya³-nia¹ Ni³na¹ Nˀai³-na¹,
cˀoa⁴ cao⁴ ni³jen³² no²cjoa⁴ˀaon³-ni³le⁴² cho⁴ta⁴ xi³
cˀoa⁴coan³ cjoan³ jo³ cji³ Ni³na¹.
\v 10 Ti⁴je²-ni³ tsˀoa³ vi³tjo³-ni³ en¹nta³ cao⁴
en¹tsˀen⁴. ˀnti¹ntsˀe³, a³li²coi³ ma³chjen¹ nca³
cˀoi⁴-sˀin² ma³ je² cjoa⁴-vi⁴.
\v 11 Jnco³ nca⁴jao⁴ a³ ti⁴ya⁴ vi³tjo³-ni³ na³nta¹tsje³
cao⁴ na³nta¹jnčha³.
\v 12 ˀnti¹ntsˀe³ je² ya¹higo a³ va³-le⁴ to³ xi³ aceituna
ˀmi², a³xo⁴ xca⁴to³tse⁴² a³ va³-le⁴ higo. Cˀoa⁴-ti⁴sˀin²
ni⁴jnco³-jin² nca⁴jao⁴ na³nta¹ xi³ ti⁴ya⁴ sˀe³-ni³le⁴
na³nta¹jnčha³ cao⁴ na³nta¹tsje³.
\s Je² cjoa⁴ˀi³sen³ta³con² xi³ ncˀa³ nčhoa¹-ni³
\p
\v 13 ˀya¹-ni³ xi³ jon² xi³ chji⁴ne⁴ xi³ xˀin⁴cjoa⁴.
Ca²ta³va³co¹ xa¹-le⁴ jo³-sˀin² nca³ nta³ fi²cao⁴ yao³-le⁴
cao⁴ cjoa⁴ˀi³nta³-jin³ xi³ tsˀe⁴ cjoa⁴ˀi³sen³ta³con².
\v 14 Tsa² ni⁴ma⁴-no³ tjin¹-le⁴ cjoa⁴xin²ta³con² xi³ vao³
xi³ sja³, tsa² tjin¹-le⁴ cjoa⁴co²ntran⁴, a³li²
chˀa²sje³nta³-jion²³ yao³-no³, ni⁴chˀa²sje³
nti³so³-jion²³ xi³ cjoa⁴qui²xi⁴.
\v 15 A³li²coi³ ncˀa³ nčhoa¹-ni³ cjoa⁴ˀi³sen³ta³con²
je²-vi⁴, to⁴ˀi⁴² tsˀe⁴ son³ˀnte³-vi⁴, tsˀe⁴ xi³ xa¹
cˀoa⁴cjoan³, tsˀe⁴ nai⁴².
\v 16 Ya⁴ jña³ nca³ tjin¹ cjoa⁴xin²ta³con² cjoa⁴co²ntran⁴,
ya⁴²-ve⁴ tjin¹ cjoa⁴si³ cao⁴ nca³yi³je³ cjoa⁴tsˀen⁴.
\v 17 To⁴nca³ je² cjoa⁴ˀi³sen³ta³con² xi³ ncˀa³
nčhoa¹-ni³, ti¹tjon²-cjoan²la² tsje³, cˀia⁴ to⁴jvi³,
i³nta³jin³, ntˀe¹, tse³ cjoa⁴ma⁴ta³con² xi³ tjin¹-le⁴,
nta³ xa¹-le⁴, li²coi³ ve³sin³, li²coi³ nti³so³.
\v 18 Je² cho⁴ta⁴ xi³ ma³-le⁴ si¹qui³njen³nchˀan¹jin³, je²
ni¹ xi³ nchˀan¹-sˀin² vˀe¹ntje² cjoa⁴qui²xi⁴.
\c 4
\s Je² xi³ mi²yo⁴-le⁴ cjoa⁴son³ˀnte³ ma³
\p
\v 1 Jña¹ nčhoa¹-ni³no³ cjoa⁴jchan¹ cjoa⁴si³. A³ tsi²
tsa² tsˀe⁴ cjoa⁴tsjoa³ xi³ ma³me³-le⁴ ni⁴ma⁴-no³, coi³ xi³
vi³xcan¹-jin³ yao³-no³.
\v 2 Ma³xin²-ta³con²³ jon², to⁴nca³ tsin²-no³. Ni²cˀaon³,
to⁴cjoa⁴xin²ta³con² ti¹ti²-nio³, to⁴nca³ li²jme³ xi³
njen⁴-no³. Ni²jchaon¹³, vi³xcaon²³, to⁴nca³ tsin²-no³ jme³
xi³ me³-no³ nca³ tsi²coi³ ni²jao¹³.
\v 3 Ni²jao¹³, to⁴nca³ li²coi³ tjoe¹-no³, chˀao³ tjin¹ xi³
ni²jao¹³ jme¹-ni³ nca³ si⁴chjen¹-si¹nio³ xi³ tˀa³tsˀe⁴
cjoa⁴tsjoa³-no³.
\v 4 Jon² xi³ xˀion⁴³, xi³ ya¹nchjon¹³, xi³ qui³njion²³
ntia⁴²-le⁴ Ni³na¹, a³ tsi² tsa² ˀyao³ nca³ je² xi³
mi²yo⁴-le⁴ cjoa⁴son³-ˀnte³ co²ntran⁴-le⁴ Ni³na¹ ni¹.
To⁴ˀya³-ni³ xi³ me³-le⁴ si¹mi²yo⁴ cjoa⁴son³ˀnte³,
co²ntran⁴-le⁴ Ni³na¹ ma³.
\v 5 A³ ni²cja³ˀai³tsjen³-nio¹³ nca³ je² xon⁴ Escritura
to⁴ya⁴³-ni³ cˀoi⁴tso²: Je² Espíritu xi³
ti¹jna³jin³ntsjai² ni⁴ma⁴-na¹ tjao²que³-na¹ jo³ sa³ˀnta³
ma³chi⁴ni⁴-ni¹.
\v 6 To⁴nca³ je² Ni³na¹ tsjoa¹ xi³ nqui²sa⁴ tse³ cjoa⁴nta³.
Coi³ cjoa⁴ cˀoi⁴tso²-ni³: Ni³na¹ vˀe²jna³ta²ja³-le⁴ xi³
ncˀa³con³, tsjoa¹-le⁴ cjoa⁴nta³ je² xi³ i³nta³jin³con³.
\v 7 Ti⁴tjo³son²-lao⁴³ Ni³na¹. Ti⁴yo³ta²ja³-lao⁴³ je²
nai⁴², cˀoa⁴-sˀin² coa⁴nca³ tˀa³xin²-ni³no³.
\v 8 Ti⁴čhian³tˀa³-lao⁴³ Ni³na¹, cˀia⁴ cˀoa⁴-ti⁴ je²
si⁴²čhian³tˀa³-no³ nca³ jon². Xi³ cho⁴ta⁴jao¹³, ti⁴tsjao³
ntsao⁴³, cˀoa⁴ jon² xi³ jao² vˀao²-ta³con²³ ti⁴tsjao³
ni⁴ma⁴-no³.
\v 9 Ti⁴cjao¹jion³, ti⁴vao³, chi¹ˀntao¹³. Je²
cjoa⁴vi³jno²-no³ ca²ta³vˀa³ntjai²ya³ nca³ chi¹ˀntiao¹³.
Je² cjoa⁴tsjoa³-no³ cjoa⁴va³ ca²ta³ma³.
\v 10 Ca²ta³fa³ˀa³jen³-no³ nqui³xcon⁴ Nai³-na¹. Cˀoa⁴ je²
cˀoa⁴sje³je³ya³-no³.
\s A³li² chˀao³-jin² ˀmi²-le⁴² xi²nquia⁴²
\p
\v 11 ˀnti¹ntsˀe³, a³li² chˀao³-jin² ˀmi²-lao⁴³
xi²nquio⁴³. Je² xi³ chˀao³ tso²-le⁴ ntsˀe⁴, xi³ ve³sin³
ntsˀe⁴, je²-vi⁴ chˀao³ tso²-le⁴ cjoa⁴te¹xo³ma³, ve³sin³
cjoa⁴te¹xo³ma³. Tsa² ji³ ˀya³sin³ cjoa⁴te¹xo³ma³, li²coi³
ni²tjo³soin²³ cjoa⁴te¹xo³ma³-ve⁴, jo³-ni³ tsa² xca²le⁴
chˀa²sjai³ yao³-li⁴.
\v 12 To⁴jnco³ ma³-ni³ je² xi³ tsjoa¹ cjoa⁴te¹xo³ma³, xi³
ma³-le⁴ vˀa³sje³ntjai², cˀoa⁴ ti⁴je²-ni³ xi³ ma³-le⁴
si¹cha³jin³ cho⁴ta⁴. ˀya¹-ni³ nca³ ji³ nca³ ˀya³sin³ xi³
cja⁴ˀai¹ cho⁴ta⁴.
\s Cjoa⁴vi³jna³chon³-na¹ jo³-ni³ tsa² yo³jvi³
\p
\v 13 Coe⁴-ni³ ntˀai⁴ jon² xi³ vi³xon¹³: Ntˀai⁴-vi⁴ cao⁴
nchaon³-li⁴ cjoian¹ na⁴xi⁴na³nta¹tse³ jan¹, jnco³ no¹ ya⁴
coi⁴yoa³², cˀoa⁴ coi⁴nta¹ tso³jmi², coi⁴njen⁴son²-na¹.
\v 14 A³li²coi³ ˀyao³ jme³ xi³ coan⁴ nchaon³-li⁴
jnqui³-li⁴. Jme¹-ni³ve⁴ cjoa⁴vi³jna³chon³-no³. Ña³qui³
cjoa⁴qui²xi⁴-ni¹ nca³ jon² jo³-ni³ tsa² yo³jvi³ xi³
vˀa³tsen³ jnco³ tjo², sa³sa³ cha³-ni³.
\v 15 To⁴sa³ cˀoi⁴coi⁴xon¹³: Tsa² je² Nai³-na¹ me³-le⁴,
tsa² coi⁴yo³choan³², cˀoa⁴sˀian⁴² je²-vi⁴ a³xo⁴
cˀoa⁴sˀian⁴² xi³ cja⁴ˀai¹.
\v 16 To⁴nca³ ntˀai⁴-vi⁴ nˀo²sje³ncˀao³ yao³-no³ xi³
tˀa³tsˀe⁴ cjoa⁴ncˀa³ta³con²-no³. Chˀao³ tjin¹
nca³yi³je³ jo³-sˀin² nˀo²sje³ncˀao³ yao³-no³.
\v 17 Je² xi³ ma³-le⁴ nca³ nta³ sˀin¹, to⁴nca³ tsi² tsa²
cˀoa⁴sˀin¹, je² xi³ tjin¹-le⁴ je¹.
\c 5
\s Xi³ tˀa³tsˀe⁴ cjoa⁴nchi⁴na¹
\p
\v 1 Coe⁴-ni³ ntˀai⁴-vi⁴ jon² xi³ cho⁴ta⁴nchi⁴nao¹³,
chi¹ˀntao¹³ chi¹ˀntia¹vao³ to⁴tˀa³tsˀe⁴ cjoa⁴ñˀain³
xi³ cjoa⁴ˀai¹-no³.
\v 2 Cjoa⁴nchi⁴na¹-no³ je³ji³ˀnto³. Je² na³jño³-no³
je³coan³qui³xo³.
\v 3 Je² taon⁴si³ne² cao⁴ taon⁴čhoa³-no³ je³coan³ntsjao¹.
Je² ntsjao¹-le⁴ coan⁴ testigo xi³ co²ntran⁴-no³.
Coa⁴ca²yi³je³ yao³-no³ jo³-ni³ tsa² lˀi¹.
Tsa³qui³ncha³xco¹³ cjoa⁴nchi⁴na¹-no³ xi³ tˀa³tsˀe⁴
ni⁴čhjin³ xi³ cjoe⁴tˀa³.
\v 4 Coe⁴-ni³ je² xi³ qui³si³xa¹ na³nqui³-no³
vˀe¹jna³tsˀin³ya³ chji¹-le⁴ xi³ qui³chˀa²na⁴cha⁴-lao⁴³
xi³ cje³ vˀe²chji¹-jin²lao⁴³. Tjio¹vˀe¹jta³ je² xi³
qui³si³xa¹. Nai³-na¹, je² xi³ nca³jco⁴-le⁴ so³nta²do⁴,
qui³nčhˀoe¹ jta⁴-le⁴.
\v 5 To⁴ña³qui³ cjoa⁴tsjoa³ tsa³qui³yo³jion³ i⁴
son³ˀnte³, chˀao³ tsa³nquin¹cao⁴³ yao³-no³. To⁴xquia⁴
qui³ni²ña³-ta³con²nio¹³ ni⁴ma⁴-no³ cˀia⁴ ni⁴čhjin³ nca³
qui³ni²cˀen³ xi³cˀa³.
\v 6 Tsa³cˀai²-lao⁴³ cjoa⁴ñˀain³, qui³ni²cˀaon³
cho⁴ta⁴cjoa⁴qui²xi⁴, cˀoa⁴ je² li²coi³
tsa³cˀe²jna³ta²ja³-no³.
\s Cjoa⁴cho³ya³cao⁴cjoa⁴ cao⁴ cjoa⁴vˀe²tsˀoa³
\p
\v 7 Coi³ cjoa⁴-vi⁴ ˀnti¹ntsˀe³, cho¹ya³cao⁴cjoao⁴³ jo³
sa³ˀnta³ nca³ cjoa⁴ˀai¹ Nai³-na¹. Coe⁴-ni³ je² xi³
si¹xa¹jin³ na³nqui³ co³ya³-le⁴ tso³jmi²ntje² xi³ nˀion¹
chji¹-le⁴, xi³ tsjoa¹-le⁴ na³nqui³-ve⁴. Co³ya³cao⁴cjoa⁴-le⁴
jo³ sa³ˀnta³ nca³ cjoa⁴ˀai¹-le⁴ jtsi¹tjon² cao⁴ jtsi¹ xi³
scan³ ti⁴vˀa³-nca¹ni³.
\v 8 Cˀoa⁴-ti⁴sˀin² jon² cho¹ya³cao⁴cjoao⁴³.
Ti⁴nˀion¹jion³ ni⁴ma⁴-no³, nca³ je³nčhoa¹čhian³
ni⁴čhjin³ nca³ cjoa⁴ˀai¹ Nai³-na¹.
\v 9 ˀnti¹ntsˀe³, a³li² nca³ˀi⁴ nca³jan¹-jin²
so³je¹tˀa³-lao⁴³ xi²nquio⁴³, jme¹-ni³ nca³ tsi²
sˀe⁴-si¹ni³no³ cjoa⁴ñˀain³. Coe⁴-ni³ je² juez
ti¹jna³jčho³ xo⁴ntjoa⁴.
\v 10 ˀnti¹ntsˀe³, je² xi³ qui³nchja⁴ya³ tˀa³tsˀe⁴
jan³ˀain¹-le⁴ Nai³-na¹, tsa³cja³ˀa¹ cjoa⁴ñˀain³,
qui³sco³ya²cao⁴cjoa⁴. Jo³ qui³sˀin³ nca³ je²
cˀoa⁴tˀiaon⁴³ nca³ jon².
\v 11 Coe⁴-ni³, jo¹ to⁴nta³-le⁴ ˀmi²-le⁴² je² xi³
jcho¹cjoa⁴-le⁴ cjoa⁴ñˀain³. Je³qui³no²ˀyao²³ nca³
cjoa⁴tse³jta³ qui³sˀe³-le⁴ Job, cˀoa⁴ tsa³ˀyao³
jo³-sˀin² coan³me³-le⁴ Nai³-na¹, nca³ je² Nai³-na¹
cjai¹nca³ tjin¹-le⁴ cjoa⁴ma⁴ta³con², ve³ma⁴-ni¹.
\v 12 ˀnti¹ntsˀe³, ti¹tjon²-le⁴ nca³yi³je³ cjoa⁴, a³li²
vˀai²-jion²³ en¹-no³, ni⁴cao⁴ jan³ˀain¹-le⁴
ncˀa³jmi³-jin², ni⁴tsˀe⁴ son³ˀnte³-jin², ni⁴tsˀe⁴
cja⁴ˀai¹ cjoa⁴-jin². Cˀia⁴ tsa² jaon³-no³, jaon³
ti⁴xon¹³. Cˀoa⁴ cˀia⁴ tsa² mai³-no³, mai³ ti⁴xon¹³,
jme¹-ni³ nca³ tsi² sˀe⁴-si¹ni³no³ cjoa⁴ñˀain³.
\v 13 A³ ti¹jna³jin³jnco³-no³ xi³ ti¹fa³ˀa¹ cjoa⁴ñˀain³.
Ca²ta³-vˀe¹tsˀoa³. A³ ti¹jna³jin³jnco³-no³ xi³
tsjoa³-le⁴. Ca²ta³se³tˀa³-le⁴ Ni³na¹.
\v 14 A³ ti¹jna³jin³jnco³-no³ xi³ ti¹mˀen³.
Ca²ta³nchja⁴-le⁴ cho⁴ta⁴jchi¹nca³ xi³ tsˀe⁴ cho⁴ta⁴-le⁴
Cristo, ca²ta³vˀe¹tsˀoa³ntjai² xi³ tˀa³tsˀe⁴ xi³
ti¹mˀen³, ca²ta³si¹ca³jon³ si²ti⁴ cao⁴ jan³ˀain¹-le⁴
Nai³-na¹.
\v 15 Tsa² ma³cjain¹-na¹ cˀia⁴ nca³ vˀe²tsˀoa³ntje²,
coi⁴tjo³ntjai² je² xi³ ti¹mˀen³, cˀoa⁴ je² Nai³-na¹
si⁴²qui³so¹tjen⁴. Tsa² tsa³jnqui³ je¹, cˀoa⁴-sˀin²
cha⁴tˀa³-le⁴.
\v 16 Chja³ˀa²ta³con²tˀa³-lao⁴³ xi²nquio⁴³,
tˀe²tsˀoa³ntjao²³ xi²-nquio⁴³, jme¹-ni³ nca³
coan⁴nta³-si¹nio³. Je² cjoa⁴vˀe²tsˀoa³-le⁴
cho⁴ta⁴cjoa⁴qui²xi⁴ cjai¹ tjin¹-le⁴ nca³nˀion¹, cjai¹nca³
nta³ vi³tjo³son²-le⁴.
\v 17 Elías cˀoa⁴-ti⁴ jnco³ cho⁴ta⁴ xi³ cˀoa⁴cjoan³
jo³-ni³ tsa² ña¹. Tsa³cˀe¹tsˀoa³ qui³si³je¹ nca³ tsi²
cˀoa⁴ jtsi¹. Jan² no¹ va³sen³ nca³ tsi² tsˀa³ jtsi¹
son³ˀnte³.
\v 18 Nqui²jnco³cˀa² tsa³cˀe¹tsˀoa³. Je² ncˀa³jmi³
qui³tsjoa³ jtsi¹, cˀoa⁴ je² na³nqui³ qui³tsjoa³
tso³jmi²ntje².
\v 19 ˀnti¹ntsˀe³, tsa² jnco³ xi³ jon² xi³ xin² qui³-le⁴
ntia⁴²qui²xi⁴, cˀoa⁴ tsa² xi³jnco³ nchja⁴-le⁴ nca³
si⁴²cˀo¹fa³ya³tˀa³-ni³le⁴ Ni³na¹,
\v 20 je² xi³jnco³ xi³ qui³nchja⁴-le⁴ nca³
qui³si³cˀo¹fa³ya³tˀa³-ni³le⁴ Ni³na¹ cho⁴ta⁴-ve⁴ xi³ xin²
ntia⁴² qui³, ca²ta³ve³ nca³ cˀoa⁴sje³ntjai²-ni³
cjoa⁴vi³ya³ jnco³ cho⁴ta⁴. A³li² to⁴cˀoa⁴cji³ je¹ xi³
cˀoe⁴²ˀma³.