\id 1PE
\h 1 Pedro
\toc1 1 Pedro
\mt Xi³ ti¹tjon² xon⁴ xi³ pa²stro⁴ Pedro qui³squi³-le⁴
nca³tsˀi³
\c 1
\s Pedro si¹ti²ˀnta³
\p
\v 1 An³ nia¹³ Pedro pa²stro⁴-le⁴ Jesucristo. Ti²cji³-no³
nca³tsˀio³ xi³ cho⁴ta⁴xin²na³nquio³, xi³
tsˀa³tji³vi¹son²³ ˀnte³-ve⁴ ya⁴ Ponto, ya⁴ Galacia, ya⁴
Capadocia, ya⁴ Asia, ya⁴ Bitinia.
\v 2 Qui³tjoe¹jion³ jo³-sˀin² nca³ to⁴nqui³-ni³
tsa³ve³-le⁴con³ Ni³na¹ Nˀai³-na¹. Je² Espíritu Santo
qui³si³tsje³-no³, jme¹-ni³ nca³ si⁴tjo³son²-si¹ni³lao⁴³
Jesucristo, cˀoa⁴ jme¹-ni³ nca³ sˀe⁴tsao³jon³-si¹ni³no³
cao⁴ njin¹-le⁴ Jesucristo. Ca²ta³sˀe³sa³no³ cjoa⁴nta³,
ca²ta³njen³nchˀan¹jin³-sa³ ni⁴ma⁴-no³.
\s Ti³cho³ya²-le⁴² xi³ ti¹jna³con³
\p
\v 3 Jo¹ to⁴nta³-le⁴ Ni³na¹ Nˀai³-le⁴ Jesucristo Nai³-na¹,
xi³ cˀoa⁴-sˀin² to⁴tse³ cjoa⁴ma⁴ta³con² tjin¹-le⁴ nca³
qui³si³cho⁴tse⁴ya³-nca¹ni³na¹, jme¹-ni³ nca³
cho¹ya²-si¹ni³le⁴² xi³ ti¹jna³con³ nca³
ja³ˀa²ya³jin³-ni³le⁴ cˀen³ Jesucristo.
\v 4 Coi³ cˀoa⁴-sˀin² cˀoai⁴cjoa⁴tjao²-no³ xi³
ni⁴cˀia³-jin² cjoi⁴tson¹ya³-ni³, xi³ ni⁴cˀia³-jin²
coan⁴jnti¹-ni³, ni⁴xi²ntso¹-jin², xi³ ti¹jna³tjao²-no³ ya⁴
ncˀa³jmi³.
\v 5 Je² nca³nˀion¹-le⁴ Ni³na¹ si¹coi²nta⁴-no³ nca³
ma³cjain¹-no³ sa³ˀnta³ sˀe⁴-no³ je² cjoa⁴vi³tjo³ntjai²
xi³ ti¹jna³nta³, xi³ coan⁴tsen³ cˀia⁴ ni⁴čhjin³ xi³
cjoe⁴tˀa³.
\v 6 Coi³ xi³ jon² cji³ma³tsjoa³-no³, nta³ tsa² jnco³jao²
ni⁴čhjin³ ma³chjen¹ nca³ ti³chja³ˀao²³ cjoa⁴ñˀain³ xi³
cja⁴ˀai¹nca¹ tjin¹.
\v 7 Cˀoa⁴-sˀin² ti¹cho²tˀa³ xi³ ma³cjain¹-no³, jme¹-ni³
nca³ nta³ tjo¹sje³-ni³, tjo¹sje³je³ya³-ni³,
jcha⁴xcon¹-ni³le⁴ cˀia⁴ nca³ coan⁴tsen³ Jesucristo. Je²
xi³ ma³cjain¹-no³ nqui²sa⁴ to⁴nta³ chji¹-le⁴ cao⁴-ni³ tsa²
taon⁴si³ne² xi³ fi³tson³, nta³ tsa² cho²tˀa³-ni³ lˀi¹.
\v 8 A³li²coi³ tsa³ˀyao³ Jesucristo, to⁴nca³
tjao²cha³-nio¹³. Ma³cjain¹-no³ xi³ tˀa³tsˀe⁴ nca³ je²,
nta³ tsa² tsi² ti³ˀyao³ ntˀai⁴-vi⁴. Cji³ma³tsjoa³-no³
cao⁴ jnco³ cjoa⁴tsjoa³ xi³ ni⁴ˀya³-jin² xi³ ve³, xi³
nˀion¹ tjin¹-le⁴ cjoa⁴je³ya³.
\v 9 Coi³ nca³ ma³cjain¹-no³ sˀe⁴-no³ cjoa⁴vi³tjo³ntjai²
tˀa³tsˀe⁴ ni⁴ma⁴-no³.
\v 10 Je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹
tsa³ca¹ya³con³ je² cjoa⁴nta³ xi³ cjoa⁴ˀai¹-no³ nca³ jon².
Nˀion¹ qui³tsi²na³nqui³ya² je² cho⁴ta⁴, nˀion¹
tsa³ca¹sjai³ jo³-sˀin² vi²tjo⁴ntjai²-nia¹.
\v 11 Tsa³ca¹sjai³jin³ jña¹-le⁴ ni⁴čhjin³-ni³, cˀoa⁴ jo¹
coan⁴-ni³ xi³ qui³tso²-le⁴ je² Espíritu-le⁴ Cristo xi³
tsa³cˀe²jna³jin³ ni⁴ma⁴-le⁴, cˀia⁴ nca³ to⁴nqui³-ni³
tsa³ca¹ya³con³ cjoa⁴ñˀain³ xi³ cjoa⁴ˀai¹-le⁴ Cristo,
cˀoa⁴ cjoa⁴je³ya³-le⁴ xi³ coan⁴scan³-ni³ sˀe⁴-le⁴.
\v 12 Qui³ni²cho⁴ya³-le⁴ cho⁴ta⁴-ve⁴ nca³ li²
ti⁴tˀa³tsˀe⁴-jin²ni³, to⁴nca³ tˀa³tsan⁴² qui³si³xa¹cao⁴
je² cjoa⁴ xi³ qui³no²cjoa⁴ya³jin³-no³ ntˀai⁴-vi⁴. Je²
cho⁴ta⁴ xi³ qui³nchja⁴ya³jin³-no³ je² en¹nta³ xi³
tˀa³tsˀe⁴ Cristo cˀoa⁴qui³sˀin³ xi³ to⁴tˀa³tsˀe⁴ je²
Espíritu Santo xi³ qui³ni²ca³sen¹-ni³ ncˀa³jmi³. Je²
a²ncje⁴ me³-le⁴ scoe⁴ je² cjoa⁴-ve⁴.
\s Tsje³ coan⁴nquin¹coa⁴² yao³-na¹
\p
\v 13 Coi³ cjoa⁴-vi⁴ ti⁴ca³tio¹ntao³
cjoa⁴fa³ˀai³tsjen³-no³, to⁴jvi³ ti⁴yo³, ña³qui³ nta³
cho¹ya³-lao⁴³ je² cjoa⁴nta³ xi³ cjoa⁴ˀai¹-no³ cˀia⁴ nca³
coan⁴tsen³-no³ Jesucristo.
\v 14 Jo³-ni³ ˀnti¹xti³ntˀe¹ li² ni²tjo³son²-jin²lao⁴³
cjoa⁴chi⁴nca⁴-no³ jo³-ni³ nca³sˀa⁴, cˀia⁴ nca³
tjio¹njion²-sa³ cjoa⁴fa³-ˀai³tsjen³-no³.
\v 15 Jo³-sˀin² nca³ tsje³ cjoan³ je² xi³ qui³nchja⁴-no³,
cˀoa⁴-ti⁴ jon² tsje³ ca²ta³mao³ jo³-sˀin² ma³nquin¹cao⁴³
yao³-no³.
\v 16 Cˀoa⁴-sˀin² tji¹tˀa³ xon⁴: Tsje³ ca²ta³mao³ nca³
jon², nca⁴ tsje³ nia¹³ nca³ an³.
\v 17 Tsa² Nˀai³ cˀoin¹-lao⁴³ je² xi³ to⁴nco¹son² fi²cao⁴
nca³tsˀi³ cho⁴ta⁴, nca³ vˀe¹nta³jin³ jo³ sˀin¹ xa¹-le⁴
nca³ jnco¹jnco¹, jcha⁴xcon¹³ Ni³na¹. Cˀoa⁴-sˀin²
ti⁴yo³cao⁴³ yao³-no³ jo³ tjin¹ ni⁴čhjin³ ti³ma³son²³
son³ˀnte³.
\v 18 Je³ˀyao³ nca³ coan³chji¹ntjao²³ jo³-sˀin² nca³
chˀao³ tsa³qui³yo³, xi³ cˀoa⁴-sˀin² qui³sˀe³-no³
jo³-ni³ tsa² cjoa⁴tjao²-le⁴ xi³jcha¹-no³. Li² tsa²
coan³chji¹ntjai²-jion²³ cao⁴ tso³jmi² xi³ fi³tson³, ni⁴
cao⁴ taon⁴si³ne²-jin², ni⁴ cao⁴ taon⁴čhoa³-jin²,
\v 19 to⁴nca³ coan³chji¹ntjao²³ cao⁴ je² njin¹-le⁴ Cristo
xi³ nˀion¹ chji¹-le⁴, xi³ jo³-ni³ tsa² tsˀe⁴
ˀnti¹va³rre² xi³ tsi² jña³ chˀao³ cji³-le⁴ xi³ ña³qui³
tsje³.
\v 20 Cristo cˀoa⁴-sˀin² to⁴nqui³-ni³ qui³sa³sen³nta³ jo³
sa³ˀnta³ nca³sˀa⁴, nca³ cje³ sˀe³nta³-jin² son³ˀnte³,
to⁴nca³ je³coan³tsen³ je² ni⁴čhjin³fe³tˀa³-vi⁴ xi³
tˀa³tsaon⁴³.
\v 21 Xi³ to⁴tˀa³tsˀe⁴ Cristo ma³cjain¹-no³ xi³
tˀa³tsˀe⁴ Ni³na¹, je² xi³ qui³si³cja³ˀa¹ya³jin-ni³le⁴
cˀen³, cˀoa⁴-ti⁴ je² xi³ qui³tsjoa³-le⁴ cjoa⁴je³ya³. Coi³
cjoa⁴-vi⁴ nca³ cˀoa⁴-sˀin² ma³cjain¹-no³, cˀoa⁴
cho¹ya³-lao⁴³ tˀa³tsˀe⁴ Ni³na¹.
\v 22 Qui³ni²tsjao³ ni⁴ma⁴-no³ nca³ qui³ni²tjo³son²-lao⁴³
xi³ cjoa⁴qui²xi⁴ xi³ to⁴tˀa³tsˀe⁴ je² Espíritu Santo,
nca³ ña³qui³ cjoa⁴qui²xi⁴ ma³tsjoa³chao³ ntsˀao³. Nˀion¹
nta³ ca²ta³ma³tsjoa³chao³ xi²nquio⁴³ cao⁴ ni⁴ma⁴-no³ xi³
tsje³ tjin¹.
\v 23 Qui³tsin³ nqui²jnco³cˀao²³, a³li² tsˀe⁴ ntje⁴ xi³
fi³tson³-jin², to⁴nca³ tsˀe⁴ xi³ tsa² fi³tson³, xi³
to⁴tˀa³tsˀe⁴ en¹-le⁴ Ni³na¹ xi³ ti¹jna³con³, cˀoa⁴ xi³
cˀoe¹jna³ntsjai².
\v 24 Nca³tsˀi³ cho⁴ta⁴ nco³ya³-le⁴ tsa² xca⁴, cˀoa⁴ je²
cjoa⁴je³ya³-le⁴ cho⁴ta⁴son³ˀnte³ nco³ya³-le⁴ tsa²
na³xo¹-le⁴ xca⁴. Xi² xca⁴-ve⁴, cˀoa⁴ na³xo¹-le⁴ tsao³.
\v 25 To⁴nca³ je² en¹-le⁴ Nai³-na¹ ña³qui³ ti¹jna³
nca³ntsjai². Je² en¹-vi⁴ je² en¹nta³ xi³ tˀa³tsˀe⁴ Cristo
xi³ qui³no²cjoa⁴ya³jin³-no³.
\c 2
\p
\v 1 Tˀe²jnao³-ˀni³ nca³yi³je³ cjoa⁴tsˀen⁴, cao⁴
nca³yi³je³ cjoa⁴chˀa²na⁴cha⁴, cao⁴ cjoa⁴jao²ncjain¹, cao⁴
cjoa⁴xin²ta³con², cao⁴ cjoa⁴xin²ta³con², cao⁴ nca³yi³je³
xi³ no²cjoa⁴ˀaon³.
\v 2 Jo³-ni³ ˀnti¹le³ xi³ sˀa⁴ ca²tsin³, ca²ta³ma³me³-no³
je² nta¹chi³qui³ xi³ tˀa³tsˀe⁴ ni⁴ma⁴-no³, xi³ ña³qui³
nta³, jme¹-ni³ nca³ cˀoa⁴-sˀin² coan⁴jcha¹-si¹nio³ nca³
coi²tjo⁴ntjao²³.
\v 3 Nca⁴ qui³cho²tˀao³ nca³ je² Nai³-na¹ tjin¹-le⁴
cjoa⁴nta³.
\s Je² la⁴jao⁴ xi³ ti¹jna³con³
\p
\v 4 Ti⁴čhian³tˀa³-lao⁴³ yao³-no³ Nai³-na¹, je² jo³-ni³
la⁴jao⁴ xi³ ti¹jna³con³, xi³ cho⁴ta⁴ tsa³cja³ˀa¹xin²,
to⁴nca³ xi³ Ni³na¹ tsa³cja³ˀa¹jin³ nca³ nˀion¹ chji¹-le⁴.
\v 5 Cˀoa⁴-ti⁴ jon² jo³-ni³ tsa² la⁴jao⁴ xi³ tjio¹con³
ca²ta³mao³, jnco³ ni³ˀya³ xi³ tsˀe⁴ espíritu, cˀoa⁴
ca²ta³mao³ na⁴ˀmi³ xi³ tsje³ nca³ cˀoai⁴tˀa³-nio³
cjoa⁴tjao² xi³ tsˀe⁴ espíritu, xi³ sa³sen¹-le⁴ Ni³na¹,
to⁴tˀa³tsˀe⁴ Jesucristo.
\v 6 Jo³-sˀin² ti¹nchja⁴ xon⁴ Escritura: Coe⁴-ni³ ya⁴
Sión cˀoe³jna²³ xi³ lao⁴ti¹tjon² xi³ lao⁴xi⁴nqui⁴, xi³
nˀion¹ chji¹-le⁴. Coi³ la⁴jao⁴-ve⁴ Cristo ni¹. Je² xi³
coan⁴cjain¹-le⁴ xi³ tˀa³tsˀe⁴ li²coi³ coan⁴soa³-le⁴.
\v 7 Cjai¹nca³ tjin¹-le⁴ cjoa⁴je³ya³ xi³ tˀa³tsaon⁴³ xi³
ma³cjain¹-no³ xi³ tˀa³tsˀe⁴. Xi³ tˀa³tsˀe⁴ je² xi³ tsi²
si¹tjo³son², je² jo³-ni³ la⁴jao⁴ xi³ chji⁴ne⁴xjao¹
tsa³cja³ˀa¹xin², to⁴nca³ coan³ la⁴jao⁴xi⁴nqui⁴,
\v 8 cˀoa⁴ la⁴jao⁴ xi³ sa⁴te¹nqui³, cˀoa⁴ la⁴jao⁴ˀnti¹
xi³ si¹jti³-le⁴ je² xi³ sa³te¹nqui³ to⁴tˀa³tsˀe⁴ je²
en¹-le⁴ Ni³na¹ nca⁴ tsˀa³ntjai²cjoa⁴, nca³ cˀoa⁴-sˀin²
tsa³cˀai²-ni³le⁴.
\s Je² na⁴xi⁴na³nta¹-le⁴ Ni³na¹
\p
\v 9 Jon² nio¹³ na⁴xi⁴na³nta¹ xi³ qui³tjo³jion³. Jon² nio¹³
na⁴ˀmi³ xi³ ncˀa³ xa¹-le⁴. Jon² nio¹³ na⁴xi⁴na³nta¹ xi³
tsje³, na⁴xi⁴na³nta¹ tˀa³tsˀe⁴ Ni³na¹, jme¹-ni³ nca³
coi⁴no²cjoa⁴ya³-nio³ cjoa⁴nta³ xi³ tsˀe⁴ Ni³na¹ xi³
qui³nchja⁴-no³ jña³ nca³ i³sen³xcon¹, ji²tjo⁴³ jña³ nca³
njion².
\v 10 Jon² nca³sˀa⁴ a³li² na⁴xi⁴na³nta¹-jion²³, to⁴nca³
ntˀai⁴-vi⁴ Ni³na¹ no²cjoa⁴-nio³. Nca³sˀa⁴ li²coi³
coan³ma⁴que³-no³ Ni³na¹, to⁴nca³ ntˀai⁴-vi⁴
je³coan³ma⁴que³-no³.
\s Nta³ coan⁴nquin¹coa⁴² yao³-na¹ jo³-ni³ tsa² je² xi³
si¹xa¹-le⁴ Ni³na¹
\p
\v 11 Jon² xi³ tsjoa³que⁴-no³, vˀe³tsˀoa²³-no³ jo³-ni³
tsa² cho⁴ta⁴xin²na³nqui³ xi³ to⁴tjio¹tso³ma²son²
son³ˀnte³, ta⁴te²chjoa²-lao⁴³ yao³-no³ cjoa⁴chi⁴nca⁴-le⁴
xi³ cjan¹cao⁴ ni⁴ma⁴-no³.
\v 12 Nta³ ta³nquin¹cao⁴³ yao³-no³ ya⁴jin³-le⁴ cho⁴ta⁴ xi³
li² judío-jin². Nta³ tsa² jo³-ni³ cho⁴ta⁴tsˀen⁴
ve³con³-no³, cˀia⁴ tsa² scoe⁴ nca³ nta³ xa¹-no³,
cˀoa⁴sje³je³ya³ Ni³na¹ coi³ ni⁴čhjin³ nca³ Ni³na¹
cjoa⁴ˀai¹con³-le⁴.
\v 13 Xi³ to⁴tˀa³tsˀe⁴ Ni³na¹ ti⁴tjo³son²-lao⁴³
nca³tsˀi³ xi³ va³te¹xo³ma³-no³, tsa² cho⁴ta⁴ti¹tjon²
ti⁴tjo³son²-lao⁴³ jo³-ni³ nca³jco⁴-le⁴ nca³yi³je³,
\v 14 tsa² gobernador cˀoa⁴-ti⁴ ti⁴tjo³son²-lao⁴³ jo³-ni³
tsa² xi³ Ni³na¹ qui³si³ca³sen¹ nca³jao⁴-le⁴, nca³
tsjoa¹-le⁴ cjoa⁴ñˀain³ cho⁴ta⁴tsˀen⁴, cˀoa⁴ nca³
cˀoa⁴sje³nta³ xi³ nta³ sˀin¹.
\v 15 Je²-vi⁴ xi³ me³-le⁴ Ni³na¹ nca³ nta³ nˀiaon²³.
Cˀoa⁴-sˀin² cˀoe¹chjoao²³ cjoa⁴njion²ta³con²-le⁴ cho⁴ta⁴
xi³ tsi²jme³ cjoa⁴fa³ˀai³tsjen³ tjin¹-le⁴.
\v 16 Jon² xi³ cho⁴ta⁴ntai¹ nio¹³. A³li² ni²chjen¹-jion²³
cjoa⁴ntai¹-no³ nca³ cˀoe¹ˀma³ cjoa⁴tsˀen⁴-no³, to⁴nca³
cˀoa⁴tˀiaon⁴³ jo³-ni³ tsa² je² xi³ si¹xa¹-le⁴ Ni³na¹.
\v 17 Jcha⁴xcon¹³ nca³tsˀi³. Ca²ta³ma³tsjoa³chao³
ntsˀao³. Ti⁴jcon¹chao³ Ni³na¹. Jcha⁴xcon¹³
cho⁴ta⁴ti¹tjon².
\v 18 Cho⁴ˀntao³, jcha⁴xcon¹³ ti⁴tjo³son²-lao⁴³ nai³-no³.
A³li² to⁴je²-jin² ni²tjo³son²-lao⁴³ xi³ nta³, xi³
ve³tjao²-no³. Cˀoa⁴-ti⁴ ti⁴tjo³son²-lao⁴³ je² xi³ cao⁴
cjoa⁴tsˀen⁴ vˀe¹xa¹-no³.
\v 19 Je²-vi⁴ xi³ nta³ sa³sen¹-le⁴ Ni³na¹, tsa² jnco³ xi³
to⁴tˀa³tsˀe⁴ cjoa⁴fa³ˀai³tsjen³-le⁴ nqui³xcon⁴ Ni³na¹,
si¹cjain¹-le⁴ cjoa⁴ñˀain³ xi³ tsi² tsa² va³quin²-le⁴.
\v 20 Jme¹ chji¹-le⁴ tsa² jcho¹cjoa⁴-no³ cˀia⁴ nca³
ma³jtsin³-no³ nca³ vi³jncho³ je¹. To⁴nca³ tsa²
jcho¹cjoa⁴-no³ cˀia⁴ nca³ vˀai²-no³ cjoa⁴ñˀain³ nca³
nta³ nˀiaon²³, je²-vi⁴ xi³ cjoa⁴qui²xi⁴ sa³sen¹-le⁴
Ni³na¹.
\v 21 Coi³ cjoa⁴ qui³no²cjoa⁴-ni³no³. Je² Cristo cˀoa⁴-ti⁴
tsa³cja³ˀa¹ cjoa⁴ñˀain³ xi³ tˀa³tsan⁴².
Tsa³cˀe¹jna³cho⁴ya³-na¹ ntia⁴² xi³ tsˀe⁴, jme¹-ni³ nca³
cˀoa⁴-ti⁴ jon² coi⁴ma³-si¹nio³ jo³-sˀin² tsa³cˀa³mjen³
nca³ je¹.
\v 22 Cristo li²coi³ tsa³jnqui³ je¹, ni⁴ qui³nchja⁴-jin²
en¹chˀa²na⁴cha⁴.
\v 23 Cˀia⁴ nca³ qui³no²cjoa⁴ˀaon³-le⁴ ni⁴jo³-jin²
qui³tso² nca³ je². Cˀia⁴ nca³ tsa³cja³ˀa¹ cjoa⁴ñˀain³
li²coi³ qui³scan³cao⁴, to⁴ya⁴ qui³sca³ni¹tˀa³-le⁴ cjoa⁴
je² xi³ vˀe¹nta³jin³ cao⁴ cjoa⁴qui²xi⁴.
\v 24 Je² soa³ tsa³cˀa³ xi³ tsan⁴² je¹, cˀia⁴ nca³
qui³tsjen³tjen⁴va³tˀa³ cro² yao³-le⁴, jme¹-ni³ nca³
coi⁴yo³chon³-si¹nia³² tˀa³tsˀe⁴ cjoa⁴qui²xi⁴, nca⁴
je³ti³yo³tˀa³xin²-le⁴² xi³ je¹ ˀmi² jo³-ni³ tsa² cˀen³.
Coi³ nca³ qui³tsin²ˀaon³ nca³ je², coi³ coan³nta³-nio³.
\v 25 Jon² nio¹³ jo³-ni³ va³rre² xi³ qui³cha³xcon³
ntia⁴²-le⁴, to⁴nca³ ntˀai⁴-vi⁴ je³ji³nčhoa³nčhˀoe²-nio³
nqui²ntia³ je² Pastor xi³ si¹coi²nta⁴ ni⁴ma⁴-no³.
\c 3
\s Jo³-sˀin² ma³chjen¹ nca³ fi²cao⁴ yao³-le⁴ xi³
ya¹nchjin¹, cˀoa⁴ xi³ xˀin⁴-le⁴
\p
\v 1 Cˀoa⁴-ti⁴sˀin²ni³ jon² xi³ ya¹nchjon¹³, na³nqui³
ti⁴yo³-lao⁴³ xˀin⁴-no³, jme¹-ni³ nca³ je² xˀin⁴-no³ xi³
tsi² ma³cjain¹-le⁴ je² en¹-le⁴ Ni³na¹
coi⁴njen⁴tˀa³-si¹ni³le⁴ Cristo, a³li² to⁴tˀa³tsˀe⁴
en¹-le⁴ ya¹nchjin¹-le⁴jin², to⁴coi³ cjoa⁴ nca³ nta³ fi²cao⁴
yao³-le⁴ je² ya¹nchjin¹-le⁴.
\v 2 Nca⁴ co³tsen³-no³ nca³ tsje³ ti³yo³cao⁴³ yao³-no³,
nca³ vi³jcon³chao³.
\v 3 A³li² to⁴son²ncˀa³-le⁴jin² nca³ nta³ sa³yo³-lao⁴³,
nca³ jo³ nta³ vˀe²nˀion¹³ ntsja⁴-no³, nca³ vˀe²nquio³
xi³ taon⁴si³ne², nca³ jo³ xcon¹ cjoan³ na³jño³-no³,
\v 4 to⁴nca³ ti⁴chjaon¹³ xi³ ti¹jna³ˀma³ ja⁴jin³
ni⁴ma⁴-na¹, xi³ tsi² tsa² fi³tson³ nca³ tsˀe⁴ ni⁴ma⁴ntˀe¹
xi³ to⁴jvi³. Je² xi³ nqui²sa⁴ tse³ chji¹-le⁴ nqui³xcon⁴
Ni³na¹.
\v 5 Ni⁴čhjin³ jchi¹nca³ je² ya¹nchjin¹ xi³ tsje³ tjio¹,
xi³ qui³sco³ya²-le⁴ Ni³na¹, cˀoa⁴-sˀin² qui³si³chjen¹
ni⁴ma⁴nta³-le⁴, nca³ na³nqui³ tsa³ca³tio²-le⁴ xˀin⁴-le⁴.
\v 6 Jo³ qui³sˀin³ Sara nca³ qui³si³tjo³son²-le⁴ Abraham,
nca³ nai³-na⁴ qui³tso²-le⁴. Jon² nio¹³
ja⁴xti³ya¹nchjin¹-le⁴ Sara, tsa² nta³ nˀiaon²³, tsa²
tsi²jme³ xi³ ma³xcon¹-no³.
\v 7 Jon², xi³ xˀion⁴³, cˀoa⁴-ti⁴sˀin² ti⁴yo³cao⁴³
ya¹nchjin¹-no³ jo³-sˀin² nca³ nta³ ma³cho⁴ya³-no³.
Jcha⁴cho⁴tao⁴³ ya¹nchjin¹-no³ jo³-ni³ tsa² jnco³ cho⁴tsin¹
xi³ nqui²sa⁴ čhjoe³, nca⁴ to⁴jnco³ tjin¹-no³ cjoa⁴tjao²
xi³ cjoa⁴vi³jna³chon³, jme¹-ni³ nca³ je² xi³ vˀe²tsˀoao³
li²coi³ sa⁴te¹chjoa²-si¹ni³.
\s Chja⁴ˀa²xian² xi³ chˀao³ tjin¹, cˀoa⁴sˀian⁴² xi³
nta³ tjin¹
\p
\v 8 Xi³ fe³tˀa³-ni³, nca³tsˀio³ to⁴jnco³ tˀiaon⁴³
ni⁴ma⁴-no³, ti⁴jao²-ta³con²³, tjao²cha³ ca²ta³mao³
xi²nquio⁴³ jo³-ni³ tsa² ntsˀao³, jcha⁴ma⁴ta³con²³
xi²nquio⁴³, i³nta³na³nqui³ cho⁴vao²³.
\v 9 A³li² cjoa⁴tsˀen⁴-jin² ni²nco¹son²cao⁴³ xi³
cjoa⁴tsˀen⁴, a³li² cjoa⁴ˀaon³ta³con²-jin²
ni²nco¹son²cao⁴³ xi³ cjoa⁴ˀaon³ta³con², to⁴sa³ nta³
ti⁴chi³con³tˀaon³. Je³ˀyao³ nca³ coi³ qui³no²cjoa⁴-no³,
jme¹-ni³ nca³ sˀe⁴-si¹ni³no³ cjoa⁴ni²chi³con³tˀain³.
\v 10 Je² xi³ me³-le⁴ tjao²que³ cjoa⁴vi³jna³chon³, xi³
me³-le⁴ scoe⁴ ni⁴čhjin³ xi³ nta³, ca²ta³vˀe¹chjoa²-le⁴
ni⁴jen⁴ xi³ cjoa⁴tsˀen⁴, je² čhjoa⁴tsˀoa³ a³li²
nchja⁴-jin² en¹chˀa²na⁴cha⁴.
\v 11 Ca²ta³va³sen²xin²-le⁴ cjoa⁴tsˀen⁴, nta³
ca²ta³sˀin¹. Ca²ta³va¹sjai³ cjoa⁴nchˀan¹ta³con²,
cˀoa⁴-sˀin² ca²ta³fi²tjen⁴nqui³-le⁴.
\v 12 Xcon⁴ Nai³-na¹ ya⁴ ti¹co³tsen³-le⁴ xi³ qui²xi⁴
vˀe¹ma³, cˀoa⁴ xo⁴ño³ ti¹nčhˀoe¹-le⁴ xi³ vˀe¹tsˀoa³,
to⁴nca³ ncjain¹ Nai³-na¹ chˀao³ ti¹va³-le⁴ xi³ sˀin¹
cjoa⁴tsˀen⁴.
\v 13 ˀya¹-ni³ xi³ coan⁴-le⁴ si⁴²qui²ˀaon³-no³, tsa² jon²
ma³nquin¹tjen⁴nqui³-lao⁴³ xi³ nta³ tjin¹.
\v 14 Cˀoa⁴-ti⁴ tsa² cjoa⁴ñˀain³ chja³ˀao²³ xi³
to⁴tˀa³tsˀe⁴ xi³ nta³ nˀiaon²³, jo¹ to⁴nta³-no³. A³li²
jcon³-jin²lao⁴³ nca³ je², a³li² cˀoa⁴-jin² ma³-no³.
\v 15 To⁴nca³ ja⁴jin³ ni⁴ma⁴-no³ jcha⁴xcon¹³ Ni³na¹ xi³
Nai³-na¹. Cao⁴ cjoa⁴ntˀe¹ cao⁴ cjoa⁴xcon¹ta³con²
ti⁴yo³ntao³ nca³ntsjai², nca³ coan⁴ coi⁴xon¹ya³-lao⁴³ nca³
jnco¹jnco¹ xi³ sco¹na³nqui³ya³-no³ xi³ tˀa³tsˀe⁴ cjoa⁴
xi³ ti³cho³ya²-lao⁴³.
\v 16 Ca²ta³sˀe³-no³ cjoa⁴fa³ˀai³tsjen³ xi³ nta³ tjin¹,
jme¹-ni³ nca³ coan⁴soa³-si¹ni³le⁴ je² xi³ fa³je¹tˀa³
tˀa³tsaon⁴³ jo³-ni³ tsa² cho⁴ta⁴tsˀaon⁴³, xi³
nchja⁴ˀaon³-no³ nca³ nta³ ti³ma³nquin¹cao⁴³ yao³-no³
tˀa³tsˀe⁴ Cristo.
\v 17 Tsa² cˀoa⁴-sˀin² me³-le⁴ Ni³na¹, to⁴sa³ nqui²sa⁴
nta³ tsa² chja³ˀao²³ cjoa⁴ñˀain³ xi³ to⁴tˀa³tsˀe⁴ xi³
nta³ nˀiaon²³, cao⁴-ni³ tsa² xi³ to⁴tˀa³tsˀe⁴ xi³
chˀao³ sˀiaon⁴³.
\v 18 Cˀoa⁴-ti⁴ to⁴jnco³ cˀa², ntia³ tsa³cja³ˀa¹nˀion¹
cjoa⁴ñˀain³ Cristo xi³ to⁴tˀa³tsˀe⁴ cjoa⁴tsˀen⁴. Je²
xi³ tjin¹-le⁴ cjoa⁴qui²xi⁴ tsa³cja³ˀa¹ cjoa⁴ñˀain³ xi³
tˀa³tsˀe⁴ xi³ tsin²-le⁴ cjoa⁴qui²xi⁴, jme¹-ni³ nca³
coai⁴cao⁴-si¹ni³na¹ Ni³na¹. Ña³qui³ cˀen³ jo³ cjoan³
yao³-le⁴, to⁴nca³ qui³ni²cˀe¹jna³con³ jo³ cjoan³
espíritu-le⁴.
\v 19 Cao⁴ coi³ espíritu-le⁴ qui³ qui³nchja⁴ya³jin³-le⁴
je² espíritu xi³ tjio¹ cjoa⁴ñˀain³,
\v 20 xi³ nca³sˀa⁴ tsˀa³ntjai²cjoa⁴ coan³. Ni³na¹ cao⁴
cjoa⁴tse³jta³ qui³si³cjain¹-le⁴ je²
cho⁴ta⁴tsˀa³ntjai²cjoa⁴-ve⁴ cˀia⁴ ni⁴čhjin³ nca³ Noé
ti¹vˀe¹nta³ je² barco. Ja⁴ya³ barco-ve⁴ to⁴choa³ cho⁴ta⁴,
to⁴jin³ ma³-ni³, xi³ ji³tjo³ntjai²jin³ na³nta¹.
\v 21 Je² na³nta¹-ve⁴ nco³ya³-le⁴ je² xi³ ntˀai⁴-vi⁴
vˀa³sje³ntjai²-na¹, xi³ coi³ cjoa⁴sa³te¹nta¹. Je²
cjoa⁴sa³te¹nta¹ li²coi³ fa³ˀa¹xin²-na¹ cjoa⁴tsˀen⁴-le⁴
yao³-na¹. To⁴coi³ xi³ tso² nca³ nta³ cjoa⁴fa³ˀai³tsjen³
tjin¹-na¹ nqui³xcon⁴ Ni³na¹ to⁴tˀa³tsˀe⁴ nca³
ja³ˀa²ya³-ni³le⁴ Cristo.
\v 22 Qui³mi³ ncˀa³jmi³ Cristo. Ti¹jna³tˀa³ nca³
qui²xi⁴-le⁴ Ni³na¹. A²ncje⁴ cao⁴ nca³yi³je³ cjoa⁴te¹xo³ma³
cao⁴ nca³yi³je³ nca³nˀion¹ tjio¹nqui³-le⁴ nca³ je².
\c 4
\s Nta³ si⁴chjen¹ cjoa⁴nta³-le⁴ Ni³na¹
\p
\v 1 Xi³ tˀa³tsan⁴² Cristo tsa³cja³ˀa¹-ni³ cjoa⁴ñˀain³
yao³-le⁴. Jon² cˀoa⁴-ti⁴sˀin² chjoao¹³ nca³nˀion¹ cao⁴
xi³ ti⁴je²-ni³ cjoa⁴fa³ˀai³tsjen³. Je² xi³
tsa³cja³ˀa¹-ni³ cjoa⁴ñˀain³ yao³-le⁴, li²coi³ ti⁴je¹
va³jnqui³-ni³,
\v 2 jme¹-ni³ nca³ je² vˀe²jna³-si¹ni³ jo³-sˀin² nca³
me³-le⁴ Ni³na¹ je² ni⁴čhjin³ nca³ ti¹jna³-sa³. Li²coi³
vˀe²jna³jin³ cjoa⁴chi⁴nca⁴-le⁴ cho⁴ta⁴son³ˀnte³.
\v 3 Je³coan³-ni³na¹ ni⁴čhjin³ xi³ je³ja³ˀa³to³ nca³
cˀoa⁴qui³nˀian² jo³-sˀin² coan³me³-le⁴ cho⁴ta⁴ xi³ li²
judío-jin², cˀia⁴ nca³ tsa³nquin¹coa⁴² yao³-na¹
nca³yi³je³ xi³ chˀao³ tjin¹, cao⁴ cjoa⁴xin²ta³con², cao⁴
cjoa⁴chˀi⁴, cao⁴ cjoa⁴vi³chi³sjoe², cao⁴
cjoa⁴vi³chi³sˀoia¹, nca³ tsa³ˀya³xcon¹ xco¹son² xi³
li²coi³ tjo³ˀnte³-na¹.
\v 4 Coi³ cjoa⁴ je³cji³ma³xcon¹-ni³le⁴ nca³ tsi² tsa²
ma³nquin¹cao⁴³ xi³ ti⁴je²-ni³ cjoa⁴ xi³ li²coi³
ti⁴ma³ntˀe¹-ni³, xi³ si¹qui³tson¹ya³.
Tjio¹nchja⁴ˀaon³-no³.
\v 5 Je² cho⁴ta⁴ xo⁴cjoan³-ve⁴ tsjoa¹-le⁴ coi²nta⁴ je² xi³
ti¹jna³nta³ nca³ cˀoe⁴²nta³jin³-ni³le⁴ xi³ tjio¹con³ cao⁴
xi³ tjio¹cˀen³.
\v 6 Coi³ cjoa⁴ nca³ cˀoa⁴-ti⁴ qui³no²cjoa⁴ya³jin³-le⁴ xi³
tjio¹cˀen³ je² en¹nta³ xi³ tˀa³tsˀe⁴ Cristo, jme¹-ni³
nca³ coa⁴tio⁴con³-si¹ni³ cao⁴ espíritu jo³-sˀin²
ti¹jna³con³ Ni³na¹, nta³ tsa² qui³sˀe³nta³jin³-ni³le⁴
jo³-sˀin² sˀe³nta³jin³-le⁴ cho⁴ta⁴son³ˀnte³ cˀia⁴ nca³
tjio¹con³-ni³ yao³-le⁴.
\v 7 To⁴nca³ ma³čhian³-le⁴ nca³ cjoe⁴tˀa³ nca³yi³je³
cjoa⁴. To⁴jvi³ to⁴ˀi³nta³ ti⁴yo³, tˀe²tsˀoa³ntsjao²³.
\v 8 Xi³ ti¹tjon²-le⁴ nca³yi³je³ cjoa⁴, nˀion¹
ca²ta³ma³tsjoa³chao³ xi²nquio⁴³, nca⁴ ncjin² cjoa⁴tsˀen⁴
vˀe¹ˀma³tˀain³ cjoa⁴tjao²cha³-ve⁴.
\v 9 Tˀai²-lao⁴³ ˀnte³ xi²nquio⁴³ nca³ si⁴²cja¹ya³.
Tsjoa¹ cˀoa⁴tˀiaon⁴³.
\v 10 Jo³-sˀin² cjoa⁴nta³ tsa³cˀai²-le⁴, nca³ jnco¹jnco¹
ca²ta³si¹chjen¹ tˀa³tsˀe⁴ xi³ cja⁴ˀai¹. Ca²ta³si¹chjen¹
jo³-sˀin² xi³ nta³ si¹chjen¹ xi³ cja⁴ˀai¹nca¹
cjoa⁴nta³-le⁴ Ni³na¹.
\v 11 Tsa² jnco³ xi³ nchja⁴, ca²ta³nchja⁴ jo³ tso² en¹-le⁴
Ni³na¹. Tsa² jnco³ xi³ si¹xa¹cao⁴, ca²ta³si¹xa¹cao⁴ jo³
tjin¹ nca³nˀion¹ xi³ tsjoa¹ Ni³na¹, jme¹-ni³ nca³
coi⁴tjo³je³ya³-si¹ni³ Ni³na¹ cao⁴ nca³yi³je³ cjoa⁴ xi³
to⁴tˀa³tsˀe⁴ Jesucristo. Tsˀe⁴ ni¹ cjoa⁴je³ya³ cao⁴
cjoa⁴te¹xo³ma³ xi³ ni⁴cˀia³-jin² cjoe⁴tˀa³. Cˀoa⁴
ca²ta³ma³.
\s Chja³ˀa² cjoa⁴ñˀain³ nca³ cho⁴ta⁴-le⁴ Cristo nia¹
\p
\v 12 Jon² xi³ cjai¹nca³ tsjoa³que⁴-no³, li²
ma³xcon¹-jin²lao⁴³ xi³ fa³ˀai³ne²-no³, jo³-ni³ tsa² jnco³
cjoa⁴xcon¹ xi³ co³tˀa³-ni³no³ cao⁴ lˀi¹.
\v 13 Tsa² chja³ˀa²cao⁴³ cjoa⁴ñˀain³ Cristo, to⁴sa³ nta³
ca²ta³ma³tsjoa³-no³, jme¹-ni³ nca³ cˀoa⁴-sˀin² cjai¹nca³
tsjoa³ coan⁴-si¹ni³no³ cˀia⁴ nca³ coan⁴tsen³
cjoa⁴je³ya³-le⁴ Cristo.
\v 14 Tsa² no²cjoa⁴ˀaon³-no³ xi³ tˀa³tsˀe⁴
jan³ˀain¹-le⁴ Cristo, jo¹ to⁴nta³-no³. Je² cjoa⁴je³ya³-le⁴
cˀoa⁴ je² Espíritu xi³ tsˀe⁴ Ni³na¹ tjio¹cao⁴-no³.
Cjoa⁴qui²xi⁴ ni¹ je² cho⁴ta⁴ nchja⁴ˀaon³-le⁴ Cristo,
to⁴nca³ jo³ nˀiaon²³ nca³ jon² tjo¹sje³je³ya³-ni¹.
\v 15 Cˀoa⁴-sˀin² ni⁴jnco³-jin² xi³ jon² cjoa⁴ˀa²
cjoa⁴ñˀain³ jo³-ni³ tsa² xi³ cˀen³ qui³tjen⁴-le⁴, xi³
che¹, xi³ chˀao³ sˀin¹, a³xo⁴ xi³ ca³ni¹jin³ yao³-le⁴ xi³
tsi² tsa² je² vˀa³cao⁴-le⁴.
\v 16 To⁴nca³ tsa² jnco³ xi³ fa³ˀa¹ cjoa⁴ñˀain³ nca³
cho⁴ta⁴-le⁴ Cristo, a³li² ma³soa³-jin²le⁴. To⁴sa³ nqui²sa⁴
ca²ta³vˀa³sje³je³ya³ Ni³na¹ nca³ yˀa³ jan³ˀain¹-le⁴.
\v 17 Je³ji³cho² ni⁴čhjin³ nca³ cˀoe⁴²tsˀia⁴cao⁴ nca³
sˀe⁴nta³jin³-le⁴ cho⁴ta⁴-le⁴ Ni³na¹. Tsa² ti¹tjon²
cˀoe⁴²tsˀia⁴cao⁴-na¹ nca³ ña¹, jo¹-sˀin² cjoe⁴tˀa³-le⁴
xi³ tsi² tsa² si¹tjo³son²-le⁴ je² en¹nta³-le⁴ Ni³na¹.
\v 18 Tsa² ñˀain³ vi³tjo³ntjai² je² xi³ qui²xi⁴ vˀe¹ma³,
jo¹-sˀin² coi⁴tjo³ je² xi³ tsi² ma³cjain¹-le⁴ cao⁴ xi³
cho⁴ta⁴je¹.
\v 19 Coi³ cjoa⁴ je² xi³ fa³ˀa¹ cjoa⁴ñˀain³ jo³ qui³tso²
Ni³na¹, nta³ ca²ta³sˀin¹, ca²ta³tsjoa¹tˀa³-le⁴ ni⁴ma⁴-le⁴
Ni³na¹ xi³ nta³ qui³si³nta³ nca³yi³je³.
\c 5
\s Je² cho⁴ta⁴jchi¹nca³ ca²ta³si¹coi²nta⁴ je² cho⁴ta⁴-le⁴
Cristo
\p
\v 1 Vˀe³tsˀoa²³-le⁴ nca³tsˀi³ cho⁴ta⁴jchi¹nca³ xi³
tjio¹jin³-no³, cˀoa⁴-ti⁴ an³ cho⁴ta⁴jchi¹nca³ nia¹³ cao⁴
je². An³ tsa³ˀve³ cjoa⁴ñˀain³ xi³ qui³sˀe³-le⁴ Cristo,
cˀoa⁴-ti⁴ an³ sˀe³-na³ cjoa⁴je³ya³ xi³ coan⁴tsen³.
\v 2 Ti⁴coi²ntao⁴³ je² cho⁴ta⁴-le⁴ Ni³na¹ xi³
tjio¹jin³-no³. A³li² cao⁴ cjoa⁴nˀion¹-jin² ni²coi²ntao⁴³,
to⁴cao⁴ cjoa⁴nta³-no³ cˀoa⁴sˀiaon⁴³. A³li² tˀa³tsˀe⁴
xi³ coi⁴njen⁴-no³ xi³ chˀao³ tjin¹, to⁴cao⁴² cjoa⁴tsjoa³
cˀoa⁴sˀiaon⁴³.
\v 3 A³li² tsa² nˀion¹-jin² vˀe²ne²-lao⁴³ cho⁴ta⁴ xi³
vˀa³cao⁴-no³, to⁴nca³ tja³ntia⁴²-lao⁴³ cho⁴ta⁴-le⁴ Ni³na¹.
\v 4 Cˀia⁴ nca³ coan⁴tsen³ je² Pastorti¹tjon² xi³
si¹coi²nta⁴, jon² xi³ tjoe¹-no³ je² corona xi³ tsi²
fi³tson³, xi³ tsˀe⁴ cjoa⁴je³ya³.
\v 5 Cˀoa⁴-ti⁴ jon² xi³ na³nqui³ ti³yo³, ti⁴tjo³son²-lao⁴³
cho⁴ta⁴jchi¹nca³. Ca²ta³ma³ i³nta³jin³-ta³con²lao⁴³
xi²nquio⁴³ nca³tsˀio³, ca²ta³fa³ˀa³jen³-no³, nca⁴ Ni³na¹
vˀe²jna³ta²ja³-le⁴ xi³ ncˀa³con³. Tsjoa¹-le⁴ cjoa⁴nta³
je² xi³ i³nta³jin³-ta³con².
\v 6 So³ma⁴tˀa³nqui³-lao⁴³ ntsja³ Ni³na¹ xi³ tjin¹-le⁴
nca³nˀion¹, jme¹-ni³ nca³ je² si⁴²quin³ncˀa³-si¹ni³no³
cˀia⁴ nca³ coi⁴cho³ ni⁴čhjin³-ve⁴.
\v 7 Je² ti⁴cˀa³mio³ nca³yi³je³ cjoa⁴ni²cjao¹jin³-no³,
nca⁴ je² ti¹si¹coi²nta⁴-no³.
\v 8 To⁴jvi³ to⁴ˀi³nta³ ti⁴yo³, ti⁴yo³chon³ˀntao³, nca⁴
je² co²ntran⁴-no³, je² nai⁴², jo³-ni³ tsa² xa³ xi³
ti¹va³te¹, ti¹si¹cˀo¹tji³ntai³-no³, ti¹va¹sjai³ ˀya³ xi³
squi⁴ne⁴.
\v 9 Nˀion¹ ti⁴yo³ta²ja³-lao⁴³ je² nai⁴². Nˀion¹
ti⁴yo³-lao⁴³ xi³ ma³cjain¹-no³, nca⁴ je³ˀyao³ nca³
ti⁴je²-ni³ cjoa⁴ñˀain³ cˀoa⁴-sˀin² vi³tjo³son² cao⁴
nca³tsˀi³ ntsˀao³ xi³ tjio¹ i⁴ son³ˀnte³.
\v 10 To⁴nca³ Ni³na¹ xi³ tjin¹yi³je³-le⁴ cjoa⁴nta³, xi³
qui³nchja⁴-na¹ xi³ to⁴tˀa³tsˀe⁴ Jesucristo, nca³
sˀe⁴-na¹ cjoa⁴je³ya³-le⁴ xi³ ti¹jna³ nca³ntsjai². Cˀia⁴
nca³ je³qui³chja³ˀa² jnco³tjo²³ cjoa⁴ñˀain³,
coan⁴scan³-ni³ je² soa³ Ni³na¹ si⁴²nta³ya³-no³,
si⁴²cˀe¹jna³nta³-no³, tsjoa¹-no³ nca³nˀion¹, nta³
si⁴²cˀe¹yo³-no³.
\v 11 Je² ca²ta³sˀe³-le⁴ cjoa⁴je³ya³ cao⁴ cjoa⁴te¹xo³ma³
nca³ntsjai². Cˀoa⁴ ca²ta³ma³.
\s Cjoa⁴ni²ti²ˀnta³ xi³ fe³tˀa³
\p
\v 12 Tsen³ ma³-na³ nca³ nˀion¹ tˀa³con³ ntsˀe³ Silvano,
je² xi³ qui³squi³ xi³ tˀa³tsˀan⁴, nca³ an³ qui³sca³ni³
i⁴tse¹-no³ en¹. Ti²vˀe³ne²³-no³, ti²si³qui²xi⁴ya³-no³ nca³
ña³qui³ cjoa⁴nta³-le⁴ Ni³na¹ je²-vi⁴ xi³ ti³yo³jin³-lao⁴³.
\v 13 Si¹ti²ˀnta³-no³ je² cho⁴ta⁴-le⁴ Cristo xi³ tjio¹ ya⁴
Babilonia, xi³ to⁴jnco³ qui³tjoe¹jin³ cao⁴ jon².
Si¹ti²ˀnta³-no³ Marcos, ˀnti¹-na⁴.
\v 14 Ti⁴ti²ˀntao³ xi²nquio⁴³, tˀe²tˀa³tsˀoao²³
xi²nquio⁴³, nca³ cˀoa⁴-sˀin² tsjoa³chao³ xi²nquio⁴³.
Ca²ta³njen³nchˀan¹jin³ ni⁴ma⁴-no³ nca³tsˀio³ xi³
ti³yo³cao⁴³ Jesucristo. Cˀoa⁴ ca²ta³ma³.