\id 2PE
\h 2 Pedro
\toc1 2 Pedro
\mt Xi³ ma³jao²-ni³ xon⁴ xi³ pa²stro⁴ Pedro qui³squi³-le⁴
nca³tsˀi³
\c 1
\s Pedro si¹ti²ˀnta³
\p
\v 1 An³ nia¹³ Simón Pedro, cho⁴ˀnta³-le⁴ cˀoa⁴
pa²stro⁴-le⁴ Jesucristo. Ti²cji³-no³ jon² xi³ to⁴nco¹son²
ma³cjain¹-no³ jo³-sˀin² ma³cjain¹-na³jin⁴ nca³ jin⁴-jin⁴.
Xi³ ma³cjain¹-na¹ nˀion¹ chji¹-le⁴. Cˀoa⁴-sˀin²
qui³tsˀai²-na¹ xi³ to⁴tˀa³tsˀe⁴  cjoa⁴qui²xi⁴-le⁴
Jesucristo xi³ Ni³na¹-na¹ cˀoa⁴ xi³
tsa³cˀa³sje³ntjai²-na¹.
\v 2 Ca²ta³sˀe³-sa³no³ cjoa⁴nta³,
ca²ta³njen³nchˀan¹jin³-sa³ ni⁴ma⁴-no³, nca³ ña³qui³ nta³
ˀyao³ Ni³na¹ cao⁴ Jesús Nai³-na¹.
\s Cˀoa⁴coan⁴ cjoan³² jo³ cjoan³ Ni³na¹
\p
\v 3 Je² nca³nˀion¹-le⁴ Ni³na¹ qui³tsjoa³-na¹ nca³yi³je³
xi³ ma³chjen¹-na¹ tˀa³tsˀe⁴ cjoa⁴vi³jna³chon³, cˀoa⁴ xi³
tˀa³tsˀe⁴ nca³ nta³ ˀya³xcoan¹ nca³ je². Cˀoa⁴-sˀin²
qui³tsjoa³-na¹ nca³ tsa³ˀya³² je² xi³ qui³nchja⁴-na¹
to⁴tˀa³tsˀe⁴ cjoa⁴je³ya³-le⁴ cao⁴ nca³nˀion¹-le⁴.
\v 4 To⁴tˀa³tsˀe⁴ coi³ cjoa⁴-ve⁴ tsa³cˀai²-ni³na¹ xi³
qui³ni²sˀe³nqui³-na¹ xi³ cjai¹nca³ nta³ tjin¹, xi³
cjai¹nca³ tse³ tjin¹, jme¹-ni³ nca³ cˀoa⁴-ti⁴sˀin²
tjoe¹-si¹ni³no³ nca³ cˀoa⁴coan⁴ cjoaon³ jo³ cjoan³ Ni³na¹,
nca⁴ tsa³qui³ncha³xin²-lao⁴³ je² cjoa⁴ xi³ tjio¹ i⁴
son³ˀnte³, xi³ si¹cji³tson¹-na¹, xi³ tsˀe⁴ cjoa⁴chi⁴nca⁴.
\v 5 Cˀoa⁴-ti⁴ jon² nˀion¹ ti⁴sin³-lao⁴³ nca³yi³je³ je²
cjoa⁴-vi⁴. Xi³ ma³cjain¹-no³ ca²ta³sˀe³-le⁴ nca³nˀion¹.
Je² nca³nˀion¹-no³ ca²ta³sˀe³-le⁴ cjoa⁴chji⁴ne⁴.
\v 6 Je² cjoa⁴chji⁴ne⁴-no³ ca²ta³sˀe³-le⁴ cjoa⁴ntˀe¹. Je²
cjoa⁴ntˀe¹-no³ ca²ta³sˀe³-le⁴ cjoa⁴tse³jta³. Je²
cjoa⁴tse³jta³-no³ ca²ta³sˀe³-le⁴ cjoa⁴xcon¹ta³con²
tˀa³tsˀe⁴ Ni³na¹.
\v 7 Je² cjoa⁴xcon¹ta³con²-no³ tˀa³tsˀe⁴ Ni³na¹
ca²ta³sˀe³-le⁴ cjoa⁴tjao²cha³ tˀa³tsˀe⁴ ntsˀao³. Je²
cjoa⁴tjao²cha³ tˀa³tsˀe⁴ ntsˀao³ ca²ta³sˀe³-le⁴
cjoa⁴tjao²cha³ tˀa³tsˀe⁴ nca³tsˀi³.
\v 8 Tsa² tjin¹-no³ je² cjoa⁴-vi⁴, tsa² ma³ncjin²ya³jin³
ni⁴ma⁴-no³ je² cjoa⁴-vi⁴, li²coi³ tsjoa¹ˀnte³-no³ nca³
coi⁴yo³tsˀao²³, nca³ ni⁴jme³-jin² xi³ sˀiaon⁴³.
Cˀoa⁴-sˀin² coi⁴ma³son²cao⁴³ je² xi³ ma³cho⁴ya³-no³
tˀa³tsˀe⁴ je² Nai³-na¹ Jesucristo.
\v 9 To⁴nca³ je² xi³ tsin²-le⁴ je² cjoa⁴-vi⁴, xca⁴ ni¹,
a³li²coi³ nta³ ma³tsen³-le⁴. Qui³si³cha³jin³ nca³
je³coan³tsje³ ja⁴tˀa³tsˀe⁴ cjoa⁴tsˀen⁴ xi³ co²tse³
qui³sˀe³-le⁴.
\v 10 Coi³ cjoa⁴ ˀnti¹ntsˀe³, nqui²sa⁴ nta³
ti⁴xi¹ti¹ya³-lao⁴³ yao³-no³ nca³ coa⁴co²son²tsaon³ nca³
Ni³na¹ qui³nchja⁴-no³ cˀoa⁴ tsa³cja³ˀa¹jin³-no³. Tsa²
cˀoa⁴sˀiaon⁴³ je² cjoa⁴-vi⁴, ni⁴to⁴cˀia³-jin²
tsaon⁴nquio³.
\v 11 Cˀoa⁴-sˀin² cjai¹nca³ to⁴nta³ cˀoai⁴ˀnte³-no³
cˀia⁴ nca³ coi⁴tja¹sˀen³jion³ cao⁴ cjoa⁴je³ya³ je²
cjoa⁴te¹xo³ma³ntsjai²-le⁴ Jesucristo xi³ Nai³-na¹ cˀoa⁴
xi³ tsa³cˀa³sje³ntjai²-na¹.
\s Coi³ cjoa⁴ nca³ qui³squi³ Pedro
\p
\v 12 Coi³ cjoa⁴ li²coi³ coa²te⁴jna³jyoa¹³ nca³
si³cja³ˀai³tsjen³ ntsjai²-no³ je² cjoa⁴-vi⁴, nta³ tsa²
je³ˀyao³, nta³ tsa² je³ti³yo³nˀion¹jin³-lao⁴³ je²
cjoa⁴qui²xi⁴ xi³ je³tjin¹-no³.
\v 13 Tjen⁴ nca³ ti²jna⁴jin³-sa³ je² yao³-na⁴, cˀoa⁴xian³
nca³ nta³ tjin¹ nca³ cˀoa⁴-sˀin² cˀoe³ne²³-no³, nca³
si³cja³ˀai³tsjen³-no³.
\v 14 Je³ˀve³ nca³ nti⁴ton⁴ coi⁴tjo³xin²-na³ yao³-na⁴,
jo³-sˀin² tsa³ca³co¹-na³ je² Nai³-na¹ Jesucristo.
\v 15 Cˀoa⁴-ti⁴ cjai¹ nˀion¹ cˀoe³ne²³-le⁴ yao³-na⁴,
jme¹-ni³ nca³ cjoa⁴ˀai¹tsjen³-si¹ni³no³ nca³ntsjai² je²
cjoa⁴-vi⁴ cˀia⁴ nca³ cjoe⁴ coi³ya¹³ an³.
\s Je² xi³ tsa³ve³-ni³ xcon⁴ cjoa⁴je³ya³-le⁴ Cristo
\p
\v 16 Cˀia⁴ nca³ tsa³cˀin²ya³-lai²⁴jin⁴ xi³ tˀa³tsˀe⁴
nca³nˀion¹-le⁴ Jesucristo Nai³-na¹, cˀoa⁴ jo³-sˀin² nca³
cjoa⁴ˀai¹, li²coi³ qui³ni²sin³-lai⁴jin⁴ xi³ to⁴cuento
ˀmi², xi³ to⁴jin⁴ tsa³cˀe²ntai³⁴-jin⁴, to⁴nca³ je²
xcoin³⁴-jin⁴ cˀoa⁴-sˀin² tsa³ve³ je² cjoa⁴je³ya³-le⁴.
\v 17 Ni³na¹ Nˀai³-na¹ tsa³cˀa³sje³nta³ cˀoa⁴
tsˀa³sje³je³ya³ Jesucristo cˀia⁴ nca³ tsa³cja¹cao⁴-ni³
jta⁴ xi³ ja³ˀai³-ni³ ya⁴ jña³ nca³ je³ya³ chon³ ya⁴
ncˀa³jmi³ xi³ qui³tso²: Je²-vi⁴ ˀnti¹-na⁴ xi³ cjai¹nca³
nta³ tjao²que⁴, jo³ nta³ qui³sˀe³coan³ xi³ tˀa³tsˀe⁴.
\v 18 Cˀoa⁴-ti⁴ jin⁴-jin⁴ qui³no²ˀya²-lai⁴jin⁴ jta⁴ xi³
ncˀa³jmi³ ja³ˀai³-ni³, cˀia⁴ nca³ ya⁴ to⁴jnco³
tsa³qui³yo³coai⁴-jin⁴ ya⁴ ni³nto³tsje³-ve⁴.
\v 19 Cˀoa⁴-sˀin² nqui²sa⁴ nˀion¹ ti¹jna³qui²xi⁴-na³jin⁴
je² en¹ xi³ to⁴nqui³-ni³ qui³sˀe³ya³ta³coan³². Cjai¹nca³
nta³ nˀiaon²³ tsa² si⁴sion³ je² en¹-ve⁴, jo³-ni³ tsa²
jnco³ ya¹lˀi¹ xi³ si¹ˀi³sen³ ˀnte³ jña³ nca³ njion²,
jo³ sa³ˀnta³ nca³ sˀe⁴sen¹, cˀoa⁴ sa³ˀnta³ nca³
si⁴²ˀi³sen³jin³-le⁴ ni⁴ma⁴-no³ jo³-ni³ ni³ño³tse³.
\v 20 Ti¹tjon² ca²ta³ma³cho⁴ya³-no³ je²-vi⁴ nca³
ni⁴jnco³-jin² en¹ xi³ qui³sˀe³ya³ta³con², xi³ tsˀe⁴ xon⁴
Escritura, xi³ to⁴xquia⁴ cho⁴ta⁴ tsa³cˀe¹nta³.
\v 21 Nca⁴ ni⁴čhjin³ co²tse³ ja³ˀai³ je² en¹ xi³
tsa³ca¹ya³con³-na¹, li²coi³-jin² nca³ cˀoa⁴-sˀin²
coan³me³-le⁴ cho⁴ta⁴son³ˀnte³. To⁴sa³ qui³nchja⁴ya³ je²
cho⁴ta⁴ xi³ tsje³ tjio¹ ja⁴tˀa³tsˀe⁴ Ni³na¹, jo³-sˀin²
qui³si³ˀi³sen³jin³ cjoa⁴fa³ˀai³tsjen³-le⁴ je² Espíritu
Santo.
\c 2
\s Cho⁴ta⁴nti³so³ xi³ qui³nchja⁴ya³ tˀa³tsˀe⁴ Ni³na¹,
cˀoa⁴ cho⁴ta⁴nti³so³ xi³ va³co¹ya³
\p
\v 1 Cˀoa⁴-ti⁴ ya⁴ na⁴xi⁴na³nta¹-ve⁴ tsa³ca³tio²
cho⁴ta⁴nti³so³ xi³ qui³tso² nca³ qui³nchja⁴ya³ tˀa³tsˀe⁴
Ni³na¹, jo³-sˀin² sˀe⁴jin³-no³ cho⁴ta⁴nti³so³ xi³
coa⁴co²ya³. Je² sca⁴ni²jin³ˀma³-no³ cjoa⁴ xi³
si⁴²qui³tson¹-no³, cˀoa⁴ li²coi³ coan⁴cjain¹-le⁴
tˀa³tsˀe⁴ je² Nai³-na¹ xi³ tsa³cˀe¹chji¹ntjai²
tˀa³tsˀe⁴. Cˀoa⁴-sˀin² coa⁴²sjai³-le⁴ yao³-le⁴ xi³
nti⁴ton⁴ cha⁴jin³.
\v 2 Ncjin² xi³ coai⁴tjen⁴nqui³-le⁴ ntia⁴² xi³ chˀao³
tjin¹. Xi³ to⁴tˀa³tsˀe⁴ coi⁴nchja⁴ˀaon³-ni³le⁴ ntia⁴²
xi³ qui²xi⁴.
\v 3 Cao⁴ cjoa⁴xin²ta³con² si⁴²qui³njen³-ni³ xi³
to⁴tˀa³tsaon⁴³, nca³ cˀoa⁴na⁴cha⁴-no³ cao⁴ en¹ xi³ tsi²
tsa² coi³ cˀoa⁴tjin¹. Sa³ˀnta³ co²tse³ ti¹jna³co³ya³
cjoa⁴ñˀain³-le⁴. Li²coi³ coan⁴tse³-le⁴, li²coi³
vˀe²jna³fe² xi³ cha⁴jin³.
\v 4 Ni³na¹ li²coi³ qui³si³cha³tˀa³-le⁴ je² a²ncje⁴ xi³
tsa³jnqui³ je¹, to⁴ya⁴² qui³sca³ni¹ jña³ lˀi¹ ti¹ti²,
cˀoa⁴ qui³si³cˀe¹jna³nˀion¹ ya⁴ nca⁴jao⁴ jña³ njion²
chon³, sa³ˀnta³ nca³ sˀe⁴nta³jin³-le⁴.
\v 5 Ni³na¹ li²coi³ qui³si³cha³tˀa³-le⁴ son³ˀnte³
jchi¹nca³, to⁴nca³ qui³si³ca³sen¹ jtsi¹nˀion¹ xi³
tsa³nca³son² son³ˀnte³-le⁴ cho⁴ta⁴tsˀen⁴.
Qui³si³cˀe¹yo³con³ to⁴je² Noé xi³ qui³nchja⁴ya³ xi³
cjoa⁴qui²xi⁴, cao⁴ nqui² ña³to³ cho⁴ta⁴.
\v 6 Ni³na¹ qui³si³cja³ˀa¹ cjoa⁴ñˀain³ je² na⁴xi⁴na³nta¹
Sodoma cao⁴ Gomorra nca³ qui³si³qui³xo²ya³. To⁴chao³lˀi¹
tsa³qui³ncha¹ne². Cˀoa⁴-sˀin² tsa³ca³co¹cho⁴ya³-le⁴ je²
xi³ tsa³ca³tio²-sa³, xi³ tsi² tsa² ve³xcon¹ Ni³na¹, je²
cjoa⁴ñˀain³ xi³ cjoa⁴ˀai¹-le⁴.
\v 7 Cˀoa⁴ tsa³cˀa³sje³ntjai² Lot xi³
cho⁴ta⁴cjoa⁴qui²xi⁴, xi³ si³ coan³-le⁴ to⁴tˀa³tsˀe⁴
cho⁴ta⁴tsˀen⁴ xi³ to⁴cjoa⁴chi⁴nca⁴ qui³tjen⁴nqui³-le⁴.
\v 8 (Je² cho⁴ta⁴cjoa⁴qui²xi⁴-ve⁴ tsa³cˀe²jna³jin³-le⁴
cho⁴ta⁴tsˀen⁴-ve⁴. Tsa³ve³ cˀoa⁴ qui³nčhˀoe¹ xi³
cˀoa⁴qui³sˀin³ je² xi³ to⁴cjoa⁴tsˀen⁴ tjin¹-le⁴.
Nchaon³nchaon³ aon³ coan³-le⁴ nca³ nta³ tjin¹ ni⁴ma⁴-le⁴
je² cho⁴ta⁴cjoa⁴qui²xi⁴-ve⁴.)
\v 9 Cˀia⁴ ni⁴čhjin³ nca³ fa³ˀa¹ cjoa⁴ñˀain³, je²
Nai³-na¹ ma³-le⁴ vˀa³sje³ntjai² cho⁴ta⁴ xi³ ve³xcon¹ nca³
je². Ma³-le⁴ si¹cˀe¹jna³tjao² je² xi³ tsin²-le⁴
cjoa⁴qui²xi⁴-jin², sa³ˀnta³ ni⁴čhjin³ nca³
sˀe⁴nta³jin³-le⁴, jme¹-ni³ nca³ cˀoa⁴-sˀin²
sˀe⁴jna³ne²-ni³le⁴ cjoa⁴ñˀain³.
\v 10 Xi³ ti¹tjon², je²-ve⁴ xi³ fi²tjen⁴nqui³-le⁴
cjoa⁴chi⁴nca⁴-le⁴ yao³-le⁴, xi³ to⁴ya⁴² tjio¹ma³jin³
cjoa⁴chˀao³cjoa⁴jnti¹-le⁴, xi³ to⁴cjoa⁴sca¹ ve³con³
cjoa⁴te¹xo³ma³, xi³ nˀion¹ xi¹jin³,
cho⁴ta⁴tsˀa³ntjai²cjoa⁴, li²coi³ tsa³cjon¹ nca³
nchja⁴ˀaon³-le⁴ xi³ ncˀa³ tjio¹.
\v 11 Ti⁴je²-ni³ a²ncje⁴, nta³ tsa² nqui²sa⁴ tjin¹-le⁴
nca³nˀion¹ cao⁴-ni³ je², nta³ tsa² nqui²sa⁴ ti¹tjon²
tjio¹ma³ cao⁴-ni³ je², li²coi³ fi²co²ntran⁴-le⁴, li²coi³
nchja⁴ˀaon³-le⁴ nqui³xcon⁴ Nai³-na¹.
\v 12 Jo³-ni³ tsa² cho⁴ xi³ li²coi³ nčhˀoe¹, xi³ to⁴xa¹
cˀoa⁴cjoan³-ni³ xi³ to⁴xa¹ qui³tsin³-ni³ nca³ coi⁴nto⁴va⁴
nca³ si⁴cˀen³, je² cho⁴ta⁴-vi⁴ nchja⁴chˀao³-le⁴ cjoa⁴ xi³
tsi² tsa² ma³cho⁴ya³-le⁴, to⁴jnco³ cao⁴ je² coi⁴ya²-ni¹
cha⁴jin³-ni¹.
\v 13 Cˀoa⁴-sˀin² tjoe¹-le⁴ chji¹-le⁴ nca³ tsin²-le⁴
cjoa⁴qui²xi⁴-jin². Cˀoa⁴-sˀin² tsjoa³ ma³-le⁴,
si¹ña³con³ yao³-le⁴ nta³ tsa² ni⁴čhjin³. Je² cho⁴ta⁴-ve⁴
jnti¹, tsen³ chˀao³ cjoan³. Tjin¹-le⁴ cjoa⁴tsjoa³ nca³
vˀa³na⁴cha⁴ cˀia⁴ nca³ tjio¹cjen²cao⁴-no³.
\v 14 Tjin¹nqui³ntsjai² xcon⁴ cjoa⁴cha³jnqui³. Li²coi³
ma³-le⁴ tsjion¹ je¹-ve⁴. Si¹ntˀe¹tˀa³-le⁴ je¹ je² cho⁴ta⁴
xi³ to⁴ˀi⁴ to⁴jan¹ si¹cja³ˀai³tsjen³. Je³cˀoa⁴-sˀin²
coan³nca³-le⁴ ni⁴ma⁴-le⁴ cjoa⁴chˀao³ntai³. ˀnti¹-le⁴
cjoa⁴taon³ ni¹.
\v 15 Qui³si³cˀe¹jna³ ntia⁴²qui²xi⁴, xin² qui³-le⁴, nca³
qui³tjen⁴nqui³-le⁴ ntia⁴²-le⁴ Balaam, ˀnti¹-le⁴ Beor, je²
xi³ coan³tsjoa³que³ xi³ cao⁴ cjoa⁴tsˀen⁴ qui³njen³.
\v 16 Qui³no²cjoa⁴ti³cao⁴ xi³ tˀa³tsˀe⁴ cjoa⁴tsˀen⁴-le⁴.
Jnco³ cho⁴chˀa¹ xi³ tsi² ma³-le⁴ en¹, qui³nchja⁴ jo³-ni³
tsa² cho⁴ta⁴xˀin⁴, tsa³cˀe¹chjoa²ˀa³ cjoa⁴sca¹-le⁴ je²
Balaam xi³ qui³nchja⁴ya³ xi³ tˀa³tsˀe⁴ Ni³na¹.
\v 17 Je² cho⁴ta⁴-vi⁴ jo³-ni³ tsa² nca⁴jao⁴ na³nta¹ xi³
tsin²-le⁴ na³nta¹, jo³-ni³ tsa² yo³jvi³xa⁴ xi³ fi²cao⁴
xquin¹. Xi³ tˀa³tsˀe⁴ je² cho⁴ta⁴ ti¹jna³tjao²-le⁴
cjoa⁴njion² ya⁴jin³ njion²nˀion¹-ve⁴ nca³ntsjai²
ni⁴čhjin³.
\v 18 Cˀia⁴ nca³ nchja⁴ en¹ncˀa³ xi³ tsi²jme³ chji¹-le⁴,
cao⁴ cjoa⁴chi⁴nca⁴-le⁴ yao³-le⁴ si¹ntˀe¹tˀa³-le⁴ je¹ je²
cho⁴ta⁴ xi³ cjoa⁴qui²xi⁴ ji³tjo³xin²-le⁴ xi³ tsi² nta³
tjio¹ma³.
\v 19 Si¹sˀe³nqui³-le⁴ nca³ to⁴sca⁴ni²ntai¹, to⁴nca³ je²
cjoa⁴chi⁴nca⁴-le⁴ va³te¹xo³ma³ntsjai²-le⁴. Je² xi³
qui³ni²qui³njen³-le⁴, na³nqui³ ti¹jna³-le⁴, jo³-ni³
cho⁴ˀnta³ ma³-le⁴ je² xi³ qui³si³qui³njen³-le⁴.
\v 20 Cjoa⁴qui²xi⁴ ni¹, tsa² je² xi³ cˀoa⁴-sˀin²
tsa³qui³ncha³xin²tˀa³-le⁴ je² cjoa⁴chˀao³cjoa⁴jnti¹-ve⁴
xi³ tjin¹ i⁴ son³ˀnte³, nca³ je³tsa³ve³ Nai³-na¹ xi³
tsa³cˀa³sje³ntjai²-na¹, je² Jesucristo, tsa²
nqui²jnco³cˀa² tjio¹si¹cˀo¹jin³ yao³-le⁴
cjoa⁴chˀao³cjoa⁴jnti¹-ve⁴, je³qui³ni²qui³njen³-le⁴.
To⁴nqui²sa⁴ chˀao³sˀin² tjio¹ xi³ fe³tˀa³-ni³ cao⁴-ni³
nca³ to²tsˀin³-le⁴ cjoa⁴.
\v 21 To⁴nqui²sa⁴ nta³-ni³ tsa²cai³-ni³, tsa² tsi² tsa²
tsa³ve³ ntia⁴² xi³ cjoa⁴qui²xi⁴, cao⁴-ni³ tsa² scan³-ni³
nca³ tsa³ve³, qui³si³cˀo¹fa³ya³-ni³le⁴ cjoa⁴te¹xo³ma³ xi³
tsje³, xi³ tsa³cˀai²-le⁴.
\v 22 Ña³qui³ cˀoa⁴-sˀin² cji³ma³-le⁴ jo³ tso² en¹ xo⁴
tso²: Je² nia¹ qui³squi³ne³ nqui²ntia³ nta¹vi³so³-le⁴,
cˀoa⁴ je² chi⁴nca⁴ xi³ je³tsa³ca³nco¹ya³ nqui²ntia³
tsa³ca³nco¹ya³ ya⁴jin³ nta¹si³.
\c 3
\s Je² Nai³-na¹ qui³tsjoa³ tsˀoa³ nca³ cjoa⁴ˀai¹
\p
\v 1 Jon² xi³ tjao²que⁴-no³, ti²cji³-no³ ntˀai⁴-vi⁴ xi³
ma³jao²-ni³ xon⁴. Nca³ jao² xon⁴-ve⁴ vˀe³ne²³-no³ jme¹-ni³
nca³ si³cja³ˀa¹-si¹ni³le⁴ cjoa⁴fa³ˀai³tsjen³-no³ xi³
tsje³,
\v 2 jme¹-ni³ nca³ cjoa⁴ˀai¹tsjen³-si¹ni³no³ je² en¹ xi³
co²tse³ tsa³ca¹ya³con³ je² cho⁴ta⁴ xi³ tsje³ tsa³ca³tio²,
xi³ qui³nchja⁴ya³ tˀa³tsˀe⁴ Ni³na¹, cˀoa⁴ nca³
cjoa⁴ˀai¹tsjen³-si¹ni³no³ je³ cjoa⁴te¹xo³ma³-le⁴ Nai³-na¹
xi³ tsa³cˀa³sje³ntjai²-na¹, xi³ qui³tsˀai²-no³
to⁴tˀa³tsˀe⁴ pa²stro⁴-no³.
\v 3 Ti¹tjon² ma³chjen¹ nca³ ca²ta³ˀyao³ je²-vi⁴, nca³ je²
ni⁴čhjin³ xi³ cjoe⁴tˀa³ cjoa⁴ˀai¹ xi³ tsjoa³-le⁴
vi³jno²que³, xi³ ti⁴tsˀe⁴-ni³ cjoa⁴chi⁴nca⁴-le⁴
cˀoe¹ma³jin³.
\v 4 Cˀoi⁴coi⁴tso⁴: Jña¹ ti¹jna³ ntai⁴ xi³ qui³tsjoa³
tsˀoa³ nca³ cjoa⁴ˀai¹. Jo³ sa³ˀnta³ nca³ cˀen³
xi³jcha¹-na¹, to⁴jo³ cˀoa⁴-sˀin² chon³ jo³ sa³ˀnta³ nca³
qui³sˀe³nta³ son³ˀnte³.
\v 5 Cjoa⁴qui²xi⁴ cai³-le⁴ scoe⁴ cho⁴ta⁴ nca³ cao⁴ je²
en¹-le⁴ Ni³na¹ qui³sˀe³nta³-ni³ ncˀa³jmi³ ni⁴čhjin³
co²tse³, cˀoa⁴ je² na³nqui³ xi³ ji³tjo³xin²-le⁴
na³nta¹-ve⁴, xi³ vˀai²nca³nˀion¹-le⁴ cao⁴ na³nta¹.
\v 6 Cao⁴ na³nta¹-ve⁴ qui³cha³ je² son³ˀnte³ xi³ qui³sˀe³
cˀia⁴ ni⁴čhjin³-ve⁴ nca³ tsa³nca³son² na³nta¹.
\v 7 Ti⁴je²-ni³ en¹-le⁴ Ni³na¹ ti¹vˀe¹tjao² je² ncˀa³jmi³
cao⁴ son³ˀnte³ xi³ tjin¹ ntˀai⁴, jme¹-ni³ nca³
coi⁴ti⁴-si¹ni³ coi³ ni⁴čhjin³ nca³ sˀe⁴nta³jin³-le⁴
cjoa⁴, nca³ cha⁴ cho⁴ta⁴ xi³ tsi² ve³xcon¹ Ni³na¹.
\v 8 To⁴nca³ jon² xi³ tsjoa³que⁴-no³, a³li²
ni²cha³jin³-jion²³ cjoa⁴-vi⁴, nca³ jnco³ ni⁴čhjin³ jnco³
jmi³ no¹ ma³-le⁴ Nai³-na¹, cˀoa⁴ jnco³ jmi³ no¹ jnco³
ni⁴čhjin³ ma³-le⁴ Nai³-na¹.
\v 9 Je² Nai³-na¹ li²coi³ si⁴²tse³ya² xi³
qui³si³sˀe³nqui³, jo³-sˀin² si¹cja³ˀai³tsjen³ cˀa³ nca³
ma³tse³ya²-le⁴, to⁴nca³ tjin¹-le⁴ cjoa⁴tse³jta³ xi³
tˀa³tsan⁴². Cai³-le⁴ nca³ jnco³ xi³ cha⁴. To⁴me³-le⁴ nca³
cjoi⁴cho² si¹cˀa³ntjai²ya³ cjoa⁴fa³ˀai³tsjen³-le⁴
nca³tsˀi³.
\v 10 Je² ni⁴čhjin³-le⁴ Nai³-na¹ cjoa⁴ˀai¹ jo³-ni³ tsa²
che¹ nca³njion². Cˀia⁴ je² ncˀa³jmi³ coi⁴xo⁴ya³, jo³
nˀion¹ cjoa⁴ne³ya³. Je² nca³yi³je³ xi³ si¹ˀi³sen³
ncˀa³jmi³ coi⁴ti⁴, cha⁴. Je² son³ˀnte³ cao⁴ je² tso³jmi²
xi³ i⁴ tjin¹ coi⁴ti⁴.
\v 11 Tsa² nca³yi³je³ cjoa⁴-vi⁴ coi⁴xo⁴ya³-ni¹, jo¹-sˀin²
ma³nquin¹cao⁴³ yao³-no³ xi³ tˀa³tsˀe⁴ cjoa⁴ xi³ tsje³,
cˀoa⁴ jo¹-sˀin² ˀya³xcon¹³ Ni³na¹.
\v 12 Je³ti³cho³ya²cao⁴³ yao³-no³, nˀion¹ me³ta³con²³ nca³
cjoa⁴ˀai¹ ni⁴čhjin³-le⁴ Ni³na¹. Cˀia⁴ ni⁴čhjin³ coi⁴ti⁴
coi⁴xo⁴ya³ ncˀa³jmi³. Cˀoa⁴ je² nca³yi³je³ xi³
si¹ˀi³sen³ ncˀa³jmi³ coan⁴ na³nta¹-ni³ cao⁴ lˀi¹.
\v 13 To⁴nca³ ti³cho³ya²-le⁴² ncˀa³jmi³ cho⁴tse⁴ cao⁴
son³ˀnte³ cho⁴tse⁴, jña³ nca³ ti¹jna³ntsjai² xi³
cjoa⁴qui²xi⁴, jo³-sˀin² nca³ qui³tsjoa³ tsˀoa³ Ni³na¹.
\v 14 Coi³ cjoa⁴ nca³ ti³cho³ya²-lao⁴³ je² cjoa⁴-vi⁴, jon²
xi³ tsjoa³que⁴-no³, ti⁴xi¹ti¹ya³-lao⁴³ yao³-no³ nca³ nta³
coan⁴nquin¹cao⁴³ yao³-no³, jme¹-ni³ nca³
coan⁴sjai³-si¹ni³no³ nqui³xcon⁴ Jesucristo, nca³ tsi² jme³
cjoa⁴jnti¹ tsi² jme³ je¹ sˀe⁴-no³, cˀoa⁴ nca³ nchˀan¹
coi⁴yo³.
\v 15 Cjoa⁴vi³tjo³ntjai² ca²ta³ma³-no³ je²
cjoa⁴tse³jta³-le⁴ Nai³-na¹. Cˀoa⁴-ti⁴sˀin² qui³squi³-no³
ntsˀe³² Pablo xi³ tjao²cha³², jo³-sˀin² tsa³cˀai²-le⁴
cjoa⁴ˀi³sen³ta³con².
\v 16 Cˀoa⁴-sˀin² nca³yi³je³ xon⁴-le⁴ qui³squi³tˀa³ je²
cjoa⁴-vi⁴. Tjio¹jin³ cˀa³ cjoa⁴ xi³ cjai¹nca³ ñˀain³
ma³cho⁴ya³-na¹. Je² cho⁴ta⁴ xi³ tsi² tsa² ma³cho⁴ya³-le⁴,
xi³ to⁴ˀi⁴ to⁴jan¹ si¹cja³-ˀai³tsjen³, si¹cˀa³ntjai²ya³
coi³ cjoa⁴-vi⁴. Cˀoa⁴-sˀin² si¹cao⁴ xi³ cja⁴ˀai¹ xon⁴
Escrituras. Coi³ cjoa⁴ va³quin²-sa³le⁴ nca³ cha⁴.
\v 17 Jon² xi³ tsjoa³que⁴-no³, nca⁴
je³qui³ni²qui³nčhˀoe¹-no³, ti⁴coi²ntao⁴³ yao³-no³,
jme¹-ni³ nca³ tsi² tsa² cˀoa⁴-ti⁴ jon² xin² ntia⁴²
coan⁴nquin¹-si¹nio³, nca³ cˀoa⁴na⁴cha⁴-no³ je² cho⁴ta⁴ xi³
chˀao³ cjoan³, cˀoa⁴ jme¹-ni³ nca³ tsi² tsa²
tsao⁴jen³nqui³-si¹ni³ nca³nˀion¹-no³.
\v 18 Ca²ta³ma³jcha¹jin³-no³ cjoa⁴nta³-le⁴ cˀoa⁴
cjoa⁴fa³ˀai³tsjen³-le⁴ Nai³-na¹ Jesucristo xi³
tsa³cˀa³sje³ntjai²-na¹. Je² ca²ta³vi³tjo³je³ya³
ntˀai⁴-vi⁴, cˀoa⁴ sa³ˀnta³ nca³ ni⁴čhjin³ xi³ tsi²
cjoe⁴tˀa³. Cˀoa⁴ ca²ta³ma³.