\id 1JN
\h 1 Juan
\toc1 1 Juan
\mt Xi³ ti¹tjon² xon⁴ xi³ pa²stro⁴ Juan qui³squi³-le⁴
nca³tsˀi³
\c 1
\s Je² en¹ xi³ tsjoa¹ cjoa⁴vi³jna³chon³
\p
\v 1 Je² xi³ ti¹jna³ sa³ˀnta³ nca³ to²tsˀin³-le⁴ cjoa⁴,
xi³ qui³no²ˀyai²⁴-jin⁴, xi³ xcoin³⁴-jin⁴
tsa³ˀya³-ni³jin⁴, xi³ qui³cho²tsen³-lai⁴jin⁴, xi³
ntsai⁴-jin⁴ qui³ni²cao⁴-ni³jin⁴, xi³ tˀa³tsˀe⁴ je² en¹
xi³ tsjoa¹ cjoa⁴vi³jna³chon³ nca³ntsjai².
\v 2 (Je² cjoa⁴vi³jna³chon³-ve⁴ coan³tsen³-ni¹.
Tsa³ˀyai³⁴-jin⁴. Jin⁴ ni¹⁴-jin⁴ testigo, vˀai²⁴-jin⁴ en¹,
cˀoa⁴ vˀai²⁴-jin⁴ cjoa⁴qui²xi⁴ xi³ tˀa³tsˀe⁴ je²
cjoa⁴vi³jna³chon³ nca³ntsjai²-ve⁴ xi³ ti¹jna³tˀa³-le⁴
Nˀai³-na¹, xi³ coan³tsen³-na³jin⁴.)
\v 3 Je² xi³ tsa³ˀyai³⁴-jin⁴ xi³ qui³no²ˀyai²⁴-jin⁴,
je²-vi⁴ xi³ cˀoa⁴-ti⁴sˀin² no²cjoa⁴ya³jin³-lai²⁴jin⁴,
jme¹-ni³ nca³ cˀoa⁴-ti⁴ jon² coi⁴yo³cjao³-si¹nio³ cao⁴
jin⁴-jin⁴. Xi³ ña³qui³ cjoa⁴qui²xi⁴ jin⁴-jin⁴
ti³yo³cjoai³⁴-jin⁴ Nˀai³-na¹ cao⁴ ˀnti¹-le⁴ Jesucristo.
\v 4 Je² cjoa⁴-vi⁴ cˀoa⁴-sˀin² chji³-lai²⁴jin⁴, jme¹-ni³
nca³ coan⁴tse³ya³-si¹ni³ cjoa⁴tsjoa³-no³.
\s Je² Ni³na¹ xi³ si¹ˀi³sen³
\p
\v 5 Je² cjoa⁴qui²xi⁴ je²-vi⁴ xi³ qui³no²ˀya²-lai⁴jin⁴,
xi³ no²cjoa⁴ya³jin³-lai²⁴jin⁴ nca³ jon². Je² Ni³na¹ xi³
si¹ˀi³sen³, tsin² cjoa⁴njion²-jin² xi³ tsˀe⁴
ni⁴ˀi⁴tse¹-jin².
\v 6 Tsa² ña¹ xi³ cˀoa⁴coi⁴xoan¹ nca³ ti³yo³cjoa³² cao⁴
je², cˀoa⁴ to⁴ya⁴-ni¹ jña³ nca³ njion² ma³nquian¹,
to⁴vˀe²nti³soa³². Li²coi³-ni³ cjoa⁴qui²xi⁴ xi³ nˀian².
\v 7 Cˀia⁴ tsa² jña³ nca³ i³sen³ ma³nquian¹, jo³-sˀin²
jña³ nca³ i³sen³ ti¹jna³ nca³ je², cˀoa⁴-sˀin²
ti³yo³cjoa³² xi²nquia⁴², cˀoa⁴ njin¹-le⁴ Jesucristo
ˀnti¹-le⁴ Ni³na¹ si¹tsje³ya³-na¹ nca³yi³je³ je¹-na¹.
\v 8 Tsa² cˀoa⁴coi⁴xoan¹ nca³ tsin²-na¹ je¹, ti⁴ña¹
chˀa²na⁴cha⁴-ni³le⁴² yao³-na¹. Tsin²-na¹ xi³ cjoa⁴qui²xi⁴.
\v 9 Tsa² ni²qui²xi⁴ya³nta³² je¹-na¹, Ni³na¹
nˀion¹tˀa³con³, cˀoa⁴ tjin¹-le⁴ cjoa⁴qui²xi⁴,
si¹cha³tˀa³ je¹-na¹, cˀoa⁴ si¹tsje³-na¹ nca³yi³je³ xi³
li²coi³ nta³ tjin¹.
\v 10 Tsa² cˀoa⁴coi⁴xoan¹ nca³ li²coi³ tsa³qui³jncha³²
je¹, Ni³na¹ chˀa³sje³nti³soa³². Je² en¹-le⁴ li²coi³
vˀe²jin³ta³coan³².
\c 2
\s Cristo je¹ntjai²-na¹ coan³-le⁴
\p
\v 1 Nca³tsˀio³ ˀnti¹xti³-na⁴, je² cjoa⁴-vi⁴ cji³-no³,
jme¹-ni³ nca³ tsi² coi⁴jnchi³-si¹nio³ je¹. Tsa² jnco³ xi³
tsa³jnqui³ je¹, ti¹jna³jnco³-na¹ xi³ fa³jin³-na¹ nqui³xcon⁴
Nˀai³-na¹, je² Jesucristo xi³ tjin¹-le⁴ cjoa⁴qui²xi⁴.
\v 2 Ti⁴je²-ni³ je¹ntjai²-na¹ coan³-le⁴, nca³
tsa³cja³ˀa¹xin²  je¹-na¹. A³li² tsa² to⁴tsan⁴²-jian² je¹,
to⁴nca³ cˀoa⁴²-ti⁴ tsˀe⁴ nca³tsˀi³ cho⁴ta⁴son³ˀnte³.
\v 3 Coi³ ˀya³-nia¹ nca³ tsa³ˀya³² nca³ je², tsa²
ni²cji³tjo³soan² cjoa⁴te¹xo³ma³-le⁴.
\v 4 Je² xi³ cˀoi⁴tso²: An³-vi⁴ tsa³ˀve³ nca³ je², cˀoa⁴
li²coi³ si¹cji³tjo³son² cjoa⁴te¹xo³ma³-le⁴, je² cjai¹nca³
nti³so³. Tsin²-le⁴ cjoa⁴qui²xi⁴-jin² nca³ je².
\v 5 To⁴nca³ je² xi³ si¹cji³tjo³son² en¹-le⁴, ña³qui³
coan³jnco³jin³ ni⁴ma⁴-le⁴ cjoa⁴tjao²cha³-le⁴ Ni³na¹. Coi³
cjoa⁴ nca³ ˀya³-nia¹ nca³ je² ti³yo³coa⁴².
\v 6 Je² xi³ tso² nca³ ti¹jna³cao⁴ Jesucristo, ma³chjen¹
nca³ cˀoa⁴-sˀin² cˀoa¹mjen³, jo³-sˀin² tsa³cˀa³mjen³
nca³ je².
\s Je² cjoa⁴te¹xo³ma³ cho⁴tse⁴
\p
\v 7 Nca³tsˀio³ ˀnti¹ntsˀe³, li²coi³ cji³-no³
cjoa⁴te¹xo³ma³ cho⁴tse⁴, to⁴je² cjoa⁴te¹xo³ma³ jchi¹nca³
xi³ ti¹jna³-no³ sa³ˀnta³ nca³ coan³cjain¹ ti¹tjon²-no³.
Je² cjoa⁴te¹xo³ma³ jchi¹nca³ je² en¹ xi³ qui³no²ˀyao²³ jo³
sa³ˀnta³ nca³ ti¹tjon².
\v 8 Nqui²jnco³cˀa² cji³-nca¹ni³no³ cjoa⁴te¹xo³ma³
cho⁴tse⁴, xi³ cjoa⁴qui²xi⁴ xi³ tˀa³tsˀe⁴, cˀoa⁴ xi³
tˀa³tsaon⁴³. Je² xi³ cjoa⁴njion² ti¹fa³ˀa³to³, cˀoa⁴ je²
xi³ ña³qui³ lˀi¹ je³si¹ˀi³sen³.
\v 9 Je² xi³ tso² nca³ i³sen³ ti¹jna³, cˀoa⁴ chˀao³que³
ntsˀe⁴, je²-vi⁴ tji¹njion²-sa³le⁴.
\v 10 Je² xi³ tjao²que³ ntsˀe⁴ i³sen³ntsjai²-le⁴, cˀoa⁴
li²coi³ tjin¹-le⁴ jme³ xi³ si¹qui³tson¹.
\v 11 To⁴nca³ je² xi³ chˀao³que³ ntsˀe⁴ njion² jña³ nca³
ti¹jna³, cˀoa⁴ ña³qui³ njion² ntia⁴²-le⁴. Li²coi³ ve³
jña³ fi². Je² cjoa⁴njion² tsa³cˀe¹chjoa² xcon⁴.
\v 12 Cˀoa⁴-sˀin² cji³-no³ nca³ jon², ˀnti¹xti³-na⁴,
nca⁴ je² je¹-no³ qui³cha³tˀa³-no³ xi³ to⁴tˀa³tsˀe⁴
jan³ˀain¹-le⁴ Cristo.
\v 13 Cˀoa⁴-sˀin² cji³-no³ nca³ jon² xi³ nˀai³
ˀmi²-no³, nca⁴ tsa³ˀya³-nio¹³ je² xi³ ti¹jna³ sa³ˀnta³
nca³ to²tsˀin³-le⁴ cjoa⁴. Cˀoa⁴-sˀin² cji³-no³ nca³ jon²
xi³ xti³xˀion⁴³, nca⁴ jon² qui³ni²qui³njen³-lao⁴³ je²
nai⁴². Cˀoa⁴-sˀin² cji³-no³ nca³ jon², ˀnti¹xti³, nca⁴
tsa³ˀya³-nio¹³ Nˀai³-na¹.
\v 14 Cˀoa⁴-sˀin² qui³squi³-no³ nca³ jon² xi³ nˀai³
ˀmi²-no³, nca⁴ tsa³ˀya³-nio¹³ je² xi³ ti¹jna³ sa³ˀnta³
nca³ to²tsˀin³-le⁴ cjoa⁴. Cˀoa⁴-sˀin² qui³squi³-no³ nca³
jon² xi³ xti³xˀion⁴³, nca⁴ tjin¹-no³ nca³nˀion¹, cˀoa⁴
je² en¹-le⁴ Ni³na¹ sˀe³jin³ntsjai²-no³, cˀoa⁴
qui³ni²qui³njen³-lao⁴³ je² nai⁴².
\v 15 A³li² je²-jin² ni²me³ta³con²³ son³ˀnte³, ni⁴
nca³yi³je³ jña³-le⁴ xi³ chon³ son³ˀnte³. Tsa² jnco³ xi³
si¹me³con³ son³ˀnte³, tsin²-le⁴ cjoa⁴tjao²cha³-jin² xi³
tˀa³tsˀe⁴ Ni³na¹.
\v 16 Je² nca³yi³je³ xi³ tjin¹ son³ˀnte³, je²
cjoa⁴chi⁴nca⁴ xi³ tjin¹-le⁴ yao³-na¹, cao⁴ cjoa⁴chi⁴nca⁴
xi³ tjin¹-le⁴ xcoan³², cao⁴ cjoa⁴ncˀa³ta³con² xi³ tsˀe⁴
je² cjoa⁴vi³jna³chon³-na¹vi⁴, a³li² tsˀe⁴ Nˀai³-na¹,
tsˀe⁴ son³ˀnte³-vi⁴.
\v 17 Je² son³ˀnte³-vi⁴ fa³ˀa³to³-ni¹, cao⁴ nca³yi³je³
cjoa⁴chi⁴nca⁴-le⁴. To⁴nca³ je² xi³ si¹tjo³son² jo³ tso²
Ni³na¹ ña³qui³ cˀoa⁴-sˀin² vˀe²jna³ nca³ntsjai².
\s Je² co²ntran⁴-le⁴ Cristo
\p
\v 18 ˀnti¹xti³, je³ti¹fe³tˀa³ ni⁴čhjin³. Cjoa⁴ˀai¹ xi³
Cristo tso²-le⁴ yao³-le⁴, xi³ co²ntran⁴ coai⁴-le⁴,
jo³-sˀin² nca³ qui³no²ˀyao²³. Je³cˀoa⁴-sˀin² cji³ma³
ntˀai⁴-vi⁴, nca³ je³tjin¹ ncjin² xi³ Cristo tso²-le⁴
yao³-le⁴, xi³ co²ntran⁴ fi²-le⁴. Cˀoa⁴-sˀin² ˀya³-nia¹
nca³ je³ti¹fe³tˀa³ ni⁴čhjin³.
\v 19 Ji³tjo³sje³jin³-na¹, to⁴nca³ li² tsan⁴²-jian²
cho⁴ta⁴-ve⁴. Tsa² tsan⁴² tsa²cai³, ña³qui³ i⁴-jin²
tsa³ca³tio²ntsjai²cao⁴-na¹ tsa²cai³. Coi³ cˀoa⁴-sˀin²
ji³tjo³sje³jin³-na¹, nca³ cˀoa⁴-sˀin² coan⁴tsen³ nca³ li²
nca³tsˀi³-jin² cho⁴ta⁴ tsan⁴².
\v 20 Cˀoa⁴ tjin¹-no³ je² Espíritu Santo, xi³ je² xi³
tsje³ qui³tsjoa³-no³ jo³-ni³ si²ti⁴ xi³ qui³no²njon³
yao³-no³. Ña³qui³ ˀya³-nio¹³ jo³ tjin¹-ni³ cjoa⁴-vi⁴.
\v 21 Li²coi³ cˀoa⁴-sˀin² qui³squi³-no³ nca⁴ tsi² ˀyao³
xi³ cjoa⁴qui²xi⁴, to⁴nca³ qui³squi³-no³ nca⁴ je³ˀyao³ xi³
cjoa⁴qui²xi⁴, cˀoa⁴ nca⁴ je³ˀyao³ nca³ nca³yi³je³
cjoa⁴nti³so³ li²coi³ tsˀe⁴ xi³ cjoa⁴qui²xi⁴.
\v 22 ˀya¹-ni³ xi³ nti³so³. A³ tsi² tsa² je² xi³ tso² nca³
Jesús a³li² je² Cristo. Je²-vi⁴ ntˀai⁴ xi³ Cristo
tso²-le⁴ yao³-le⁴, xi³ co²ntran⁴ fi²-le⁴. Je²-vi⁴ xi³ tso²
nca³ je² Nˀai³-na¹ li²coi³ Ni³na¹, cˀoa⁴ Jesús li²coi³
ˀnti¹-le⁴.
\v 23 To⁴ˀya³-ni³ve⁴ xi³ tso² nca³ Jesús li²coi³
ˀnti¹-le⁴ Ni³na¹, je²-vi⁴ cˀoa⁴-ti⁴ tsin²-le⁴ Nˀai³-na¹.
To⁴ˀya³-ni³ve⁴ xi³ vˀe¹tsen³ en¹ nca³ Jesús ˀnti¹-le⁴
Ni³na¹, je²-vi⁴ cˀoa⁴-ti⁴ tjin¹-le⁴ Nˀai³-na¹.
\v 24 Je² xi³ qui³no²ˀyao²³ sa³ˀnta³ nca³ coan³cjain¹
ti¹tjon²-no³, ca²ta³sˀe³jin³-ta³con²³ nca³ntsjai². Tsa²
cˀoa⁴-sˀin² sˀe³jin³-ta³con²³ nca³ntsjai² je² xi³
qui³no²ˀyao²³ sa³ˀnta³ nca³ coan³cjain¹ ti¹tjon²-no³,
cˀoa⁴-ti⁴ jon² coi⁴yo³cjao³ntsjao²³ cao⁴ ˀnti¹-le⁴ cao⁴
Nˀai³-na¹.
\v 25 Je²-vi⁴ xi³ Ni³na¹ qui³tsjoa³-na¹ tsˀoa³ nca³
tsjoa¹-na¹, je² cjoa⁴vi³jna³chon³ nca³ntsjai²-ve⁴.
\v 26 Cˀoa⁴-sˀin² qui³squi³-no³ je² cjoa⁴-vi⁴ xi³ tsˀe⁴
je² xi³ jon² vˀa³na⁴cha⁴-no³.
\v 27 To⁴nca³ je² Espíritu Santo xi³ jon² qui³tsˀai²-no³
jo³-ni³ si²ti⁴ xi³ qui³no²njon³ yao³-no³,
ti¹jna³jin³ntsjai² ni⁴ma⁴-no³. Li²ˀya³ xi³ ma³chjen¹-no³
xi³ coi⁴tso⁴ya³-no³. Ti⁴je²-ni³ Espíritu Santo xi³
tso²ya³-no³ nca³yi³je³ cjoa⁴. Je² xi³ tjin¹-le⁴
cjoa⁴qui²xi⁴ li²coi³ nti³so³. Jo³-sˀin² nca³
qui³tso²ya³-no³, cˀoa⁴-sˀin² ti⁴yo³cjao³ntsjao²³ cao⁴
Cristo.
\v 28 Ntˀai⁴-vi⁴, ˀnti¹xti³, cˀoa⁴-sˀin²
ti⁴yo³cjao³ntsjao²³ cao⁴ Cristo, jme¹-ni³ nca³ nta³
nˀion¹tˀa³ta³con²-si¹nia³² cˀia⁴ nca³ coan⁴tsen³
nqui²jnco³cˀa² nca³ je², cˀoa⁴ jme¹-ni³ nca³ li²coi³
coan⁴soa³-si¹ni³na¹ nqui³xcon⁴ nca³ je² cˀia⁴ nca³
cjoa⁴ˀai¹.
\v 29 Tsa² ˀya³-nio¹³ nca³ je² tjin¹-le⁴ cjoa⁴qui²xi⁴,
cˀoa⁴-ti⁴ ca²ta³ˀyao³ nca³ nca³tsˀi³ cho⁴ta⁴ xi³ sˀin¹
xi³ cjoa⁴qui²xi⁴, je²-vi⁴ qui³tsin³ xi³ tˀa³tsˀe⁴ Ni³na¹.
\c 3
\s ˀnti¹-le⁴ Ni³na¹ ˀmi²-na¹
\p
\v 1 Ne² cˀoa⁴tjin¹ cjoa⁴tjao²cha³ xi³ qui³tsjoa³-na¹
Nˀai³-na¹, jme¹-ni³ nca³ ˀnti¹-le⁴ Ni³na¹
ˀmi²-si¹ni³na¹. Coi³ nca³ i⁴ son³ˀnte³ li²ˀya³ xi³
ve³-na¹, nca³ tsi²coi³ tsa³ve³ Ni³na¹.
\v 2 Jon² xi³ cjai¹nca³ tsjoa³que⁴-no³, ntˀai⁴-vi⁴
ˀnti¹-le⁴ Ni³na¹ nia¹ nca³ ña¹. Cje³-sa³ ma³tsen³-jin²
jo³ coan⁴ cjoan³², to⁴nca³ ˀya³-nia¹ cˀia⁴ nca³
coan⁴tsen³ nca³ je², cˀoa⁴-ti⁴ cˀoa⁴coan⁴ cjoan³² jo³
cjoan³ nca³ je², nca⁴ cˀoa⁴-sˀin² jcha⁴² jo³ cjoan³ nca³
je².
\v 3 Nca³tsˀi³ xi³ tjin¹-le⁴ cjoa⁴tsjoa³ nca³ sco¹ya³-le⁴
nca³ je², coan⁴tsje³ ni⁴ma⁴-le⁴ jo³-sˀin² tsje³ cjoan³
nca³ je².
\v 4 Nca³tsˀi³ xi³ je¹ ma³jnqui³, fa³ˀa³to³ntjai²-le⁴
cjoa⁴te¹xo³ma³. Je² xi³ je¹ ˀmi² xi³ fa³ˀa³to³ntjai²-le⁴
cjoa⁴te¹xo³ma³.
\v 5 ˀya³-nio¹³ nca³ coi³ cjoa⁴ coan³tsen³-ni³ Cristo,
jme¹-ni³ nca³ cjoa⁴ˀa²xin²-si¹ni³ je¹-na¹. Tsin²-le⁴
je¹-jin² nca³ je².
\v 6 To⁴ˀya³-ni³ xi³ ti¹jna³cao⁴ Cristo nca³ntsjai²,
li²coi³ ma³jnqui³ je¹. To⁴ˀya³-ni³ve⁴ xi³ ma³jnqui³ je¹,
li²coi³ tsa³ve³ Cristo, ni⁴ tsa³ve³xcon³-jin² Cristo.
\v 7 ˀnti¹xti³, a³li² vˀai²ˀnte³-jion² nca³ ˀya³ xi³
jon² vˀa³na⁴cha⁴-no³. Je² xi³ sˀin¹ xi³ cjoa⁴qui²xi⁴,
cjai¹nca³ tjin¹-le⁴ cjoa⁴qui²xi⁴, jo³-sˀin² nca³ Cristo
cˀoa⁴-ti⁴ tjin¹-le⁴ cjoa⁴qui²xi⁴.
\v 8 Je² xi³ ma³jnqui³ je¹, tsˀe⁴ nai⁴², nca⁴ je² nai⁴²
ma³jnqui³ je¹ jo³ sa³ˀnta³ nca³ to²tsˀin³-le⁴ cjoa⁴. Coi³
nca³ tsˀa³tsen³-ni³ ˀnti¹-le⁴ Ni³na¹, jme¹-ni³ nca³
si⁴²qui³xo¹ya³-si¹ni³ xa¹-le⁴ nai⁴².
\v 9 Nca³tsˀi³ xi³ qui³tsin³ xi³ tˀa³tsˀe⁴ Ni³na¹,
li²coi³ je¹ ma³jnqui³, nca⁴ je² ntje⁴-le⁴ Ni³na¹
ti¹jna³jin³ntsjai² ni⁴ma⁴-le⁴. A³li²coi³ ma³-le⁴ ma³jnqui³
je¹, nca⁴ qui³tsin³ xi³ tˀa³tsˀe⁴ Ni³na¹.
\v 10 Cˀoi⁴-sˀin² ˀya³-ni³le⁴ je² xi³ ˀnti¹-le⁴ Ni³na¹,
cˀoa⁴ je² xi³ ˀnti¹-le⁴ nai⁴². Nca³tsˀi³ xi³ tsi²
cjoa⁴qui²xi⁴ xi³ sˀin¹, xi³ tsi² tjao²que³ ntsˀe⁴, a³li²
tsˀe⁴ Ni³na¹-jin².
\v 11 Je² cjoa⁴qui²xi⁴ xi³ qui³no²ˀyao²³ sa³ˀnta³ nca³
coan³cjain¹ ti¹tjon²-no³, nca³ tjao²cha³ coan⁴² xi²nquia⁴².
\v 12 A³li²coi³ cˀoa⁴nˀiaon²³ jo³-ni³ Caín xi³ tsˀe⁴
nai⁴², xi³ qui³si³cˀen³ ntsˀe⁴. A¹-ni³ nca³
qui³si³cˀen³-si¹ni³. A³ tsi² coi³ nca³ tsi² nta³ xa¹-le⁴,
cˀoa⁴ je² xa¹-le⁴ ntsˀe⁴ tjin¹-le⁴ cjoa⁴qui²xi⁴.
\v 13 Nca³tsˀio³ ˀnti¹ntsˀe³, a³li² ma³xcon¹-jin²no³
tsa² cho⁴ta⁴son³ˀnte³ chˀao³que³-no³.
\v 14 Cˀoa⁴-sˀin² ˀya³² nca³ ji³tja³toa³² ni⁴čhjin³-le⁴
cjoa⁴te¹xo³ma³-le⁴ cjoa⁴vi³ya³, cˀoa⁴ ji³tja³sˀen³²
ni⁴čhjin³-le⁴ cjoa⁴te¹xo³ma³-le⁴ cjoa⁴vi³jna³chon³
nca³ntsjai², nca⁴ cˀoa⁴-sˀin² tjao²cha³² ntsˀe³². Je²
xi³ tsi² tjao²que³ ntsˀe⁴ cjoa⁴vi³ya³ ti¹jna³nqui³ntsjai².
\v 15 To⁴ˀya³-ni³ve⁴ xi³ chˀao³que³ ntsˀe⁴, je² jo³-ni³
tsa² xi³ cˀen³ si¹cˀen³. ˀya³-nio¹³ nca³ je² xi³ cˀen³
si¹cˀen³, je² cjoa⁴vi³jna³chon³ nca³ntsjai²-ve⁴ a³li²coi³
ti¹jna³jin³ ni⁴ma⁴-le⁴.
\v 16 Cˀoa⁴-sˀin² coan³cho⁴ya³-na¹ je² xi³ cjoa⁴tjao²cha³
ˀmi², nca³ Cristo qui³tsjoa³ yao³-le⁴ cao⁴ njin¹-le⁴ xi³
tˀa³tsan⁴². Cˀoa⁴-ti⁴ ña¹-je⁴ ma³chjen¹-na¹ nca³
cˀoai⁴tˀa³² yao³-na¹ cao⁴ njin¹-na¹ xi³ tˀa³tsˀe⁴
ntsˀe³².
\v 17 To⁴nca³ je² xi³ tjin¹-le⁴ nca³yi³je³ xi³
ma³chjen¹-le⁴ xi³ tsˀe⁴ son³ˀnte³, cˀoa⁴ scoe⁴ jnco³
ntsˀe⁴ xi³ tsin²-le⁴ xi³ ma³chjen¹-le⁴, cˀoa⁴
cˀoe⁴²chjoa²-le⁴ ni⁴ma⁴-le⁴, a³ ti¹jna³jin³ntsjai²
ni⁴ma⁴-le⁴ cjoa⁴tjao²cha³-le⁴ Ni³na¹.
\v 18 Nca³tsˀio³ ˀnti¹xti³-na⁴, ña³qui³ nta³ tjao²cha³
ca²ta³ma³² xi²nquia⁴². A³li² to⁴ˀen¹ coi⁴no²cjoa⁴²,
to⁴nca³ je² cjoa⁴tjao²cha³ xi³ cjoa⁴qui²xi⁴ xi³ sˀian⁴².
\v 19 Cˀoa⁴-sˀin² ˀya³-nia¹ nca³ ña¹-vi⁴ tsˀe⁴ xi³
cjoa⁴qui²xi⁴, cˀoa⁴ nˀion¹ nta³ ti¹jna³ ni⁴ma⁴-na¹
nqui³xcon⁴ nca³ je².
\v 20 Tsa² ni⁴ma⁴-na¹ va¹nqui³-na¹, nqui²sa⁴ ncˀa³ ti¹jna³
Ni³na¹ cao⁴-ni³ tsa² ni⁴ma⁴-na¹. Je² ña³qui³ ve³
nca³yi³je³ cjoa⁴.
\v 21 Jon² xi³ cjai¹nca³ tsjoa³que⁴-no³, tsa² ni⁴ma⁴-na¹
li²coi³ va¹nqui³-na¹, nta³ nˀion¹tˀa³ta³coan³² nqui³xcon⁴
Ni³na¹.
\v 22 To⁴jme³-ni³ xi³ ni²je¹-le⁴², je² tsjoa¹-na¹, nca³
ni²cji³tjo³soan² cjoa⁴te¹xo³ma³-le⁴, cˀoa⁴ nca³yi³je³
cjoa⁴ xi³ sa³sen¹con³ nca³ je² cˀoa⁴nˀian² nqui³xcon⁴.
\v 23 Je²-vi⁴ xi³ cjoa⁴te¹xo³ma³-le⁴: Ca²ta³ma³cjain¹-na¹
tˀa³tsˀe⁴ jan³ˀain¹-le⁴ ˀnti¹-le⁴ Ni³na¹, Jesucristo,
cˀoa⁴ tjao²cha³ ca²ta³ma³² xi²nquia⁴², jo³-sˀin²
tsa³ca³te¹xo³ma³-na¹ nca³ je².
\v 24 Je² xi³ si¹cji³tjo³son² cjoa⁴te¹xo³ma³-le⁴,
ti¹jna³cao⁴ Ni³na¹, cˀoa⁴ Ni³na¹ ti¹jna³cao⁴ nca³ je².
Cˀoi⁴-sˀin² ˀya³nia¹ nca³ Ni³na¹ ti¹jna³jin³ntsjai²
ni⁴ma⁴-na¹, nca⁴ qui³tsjoa³-na¹ je² Espíritu Santo.
\c 4
\s Je² Espíritu Santo xi³ tsˀe⁴ Ni³na¹, cˀoa⁴ je²
espíritu xi³ co²ntran⁴ fi²-le⁴ Cristo
\p
\v 1 Jon² xi³ tsjoa³que⁴-no³, a³li² ma³cjain¹-jin²no³
nca³tsˀi³ espíritu, to⁴nca³ cho¹tˀa³-nio¹³ tsa² tsˀe⁴
Ni³na¹ espíritu-ve⁴. Cjai¹nca³ to⁴ncjin² cho⁴ta⁴ xi³
cjoa⁴nti³so³ nchja⁴ya³, xi³ si¹ma³son² son³ˀnte³.
\v 2 Cˀoi⁴-sˀin² ˀya³-nio¹³ je² Espíritu Santo xi³
tsˀe⁴ Ni³na¹: Nca³tsˀi³ espíritu xi³ vˀe¹tsen³ en¹ nca³
Jesucristo ja³ˀai³ cao⁴ yao³-le⁴, je²-vi⁴ xi³ tsˀe⁴
Ni³na¹.
\v 3 Nca³tsˀi³ espíritu xi³ tsi² tsa² vˀe¹tsen³ en¹ nca³
Jesucristo ja³ˀai³ cao⁴ yao³-le⁴, a³li² tsˀe⁴
Ni³na¹-jin². Je²-vi⁴ ntˀai⁴ je² espíritu xi³ Cristo
tso²-le⁴ yao³-le⁴, xi³ co²ntran⁴ fi²-le⁴. Cˀoa⁴-sˀin²
qui³no²ˀyao²³ nca³ cjoa⁴ˀai¹, cˀoa⁴ ntˀai⁴-vi⁴
je³ti¹jna³ i⁴ son³ˀnte³-vi⁴.
\v 4 Jon² nio¹³, ˀnti¹xti³-na⁴, tsˀe⁴ Ni³na¹ nio¹³,
cˀoa⁴ qui³ni²qui³njen³-lao⁴³ je² xi³ nchja⁴ya³
cjoa⁴nti³so³, nca⁴ je² xi³ ti¹jna³jin³ ni⁴ma⁴-no³ nqui²sa⁴
ncˀa³ ti¹jna³ cao⁴-ni³ tsa² je² nai⁴² xi³ tso²ˀva³ i⁴
son³ˀnte³-vi⁴.
\v 5 Je² xi³ nchja⁴ya³ cjoa⁴nti³so³, tsˀe⁴ son³ˀnte³ ni¹.
Coi³ nchja⁴-ni¹ xi³ tsˀe⁴ son³ˀnte³, cˀoa⁴ je²
son³ˀnte³ nčhˀoe¹-le⁴ nca³ je².
\v 6 To⁴nca³ ña¹ tsˀe⁴ Ni³na¹ nia¹. Je² xi³ ña³qui³ nta³
ve³ Ni³na¹, nčhˀoe¹-na¹. Je² xi³ tsi² tsˀe⁴ Ni³na¹,
li²coi³ nčhˀoe¹-na¹. Coi³ cjoa⁴ nca³ ˀya³-nia¹ je²
espíritu xi³ cjoa⁴qui²xi⁴ cˀoa⁴ je² espíritu xi³
nti³so³.
\s Je² Ni³na¹ xi³ cjoa⁴tjao²cha³
\p
\v 7 Jon² xi³ cjai¹nca³ tsjoa³que⁴-no³, cˀoa⁴-sˀin²
tjao²cha³ ca²ta³ma³² xi²nquia⁴², nca⁴ je² xi³
cjoa⁴tjao²cha³ ˀmi² tsˀe⁴ Ni³na¹. To⁴ˀya³-ni³ve⁴ xi³
tjao²que³, je² xi³ qui³tsin³ tˀa³tsˀe⁴ Ni³na¹, cˀoa⁴
ña³qui³ nta³ ve³ Ni³na¹.
\v 8 Je² xi³ tsi² tjao²que³, ni⁴cˀia³-jin² tsa³ve³ Ni³na¹.
Je² Ni³na¹ xi³ cjoa⁴tjao²cha³.
\v 9 Cˀoa⁴-sˀin² coan³cho⁴ya³-le⁴ ni⁴ma⁴-na¹ jo³-sˀin²
nca³ Ni³na¹ tjao²que³-na¹, nca⁴ qui³si³ca³sen¹ i⁴
son³ˀnte³-vi⁴ je² ˀnti¹-le⁴ xi³ to⁴jnco³ ma³-ni³,
jme¹-ni³ nca³ coi⁴yo³chon³-si¹nia¹ xi³ to⁴tˀa³tsˀe⁴.
\v 10 Cˀoi⁴-sˀin² tjin¹ xi³ cjoa⁴tjao²cha³: A³li²
coi³-jin² nca³ ña¹ xi³ coan³tsjoa³cha³² Ni³na¹, to⁴nca³
je² Ni³na¹ xi³ coan³tsjoa³que³-na¹ nca³ ña¹.
Qui³si³ca³sen¹ ˀnti¹-le⁴ xi³ je¹ntjai²-na¹ coan³-le⁴.
\v 11 Jon² xi³ tsjoa³que⁴-no³, tsa² Ni³na¹ cˀoa⁴-sˀin²
coan³tsjoa³que³-na¹, cˀoa⁴-ti⁴ ma³chjen¹-na¹ nca³ ña¹
nca³ tjao²cha³ coan⁴² xi²nquia⁴².
\v 12 Ni⁴ˀya³-jin² xi³ qui³sco²tsen³-le⁴ Ni³na¹. Tsa²
tjao²cha³ coan⁴² xi²nquia⁴², Ni³na¹ ti¹jna³jin³ntsjai²
ni⁴ma⁴-na¹, cˀoa⁴ cjoa⁴tjao²cha³-le⁴ ña³qui³
coan³jnco³jin³ ni⁴ma⁴-na¹.
\v 13 Cˀoa⁴-sˀin² ˀya³-nia¹ nca³ ti³yo³coa⁴² nca³ je²,
cˀoa⁴ je² ti¹jna³cao⁴-na¹ nca³ ña¹, nca⁴ qui³tsjoa³-na¹
je² Espíritu Santo-le⁴.
\v 14 Cˀoa⁴ jin⁴-jin⁴ qui³cho²tsen³-ni¹⁴jin⁴, cˀoa⁴
testigo mai³⁴-jin⁴ nca³ vˀai²⁴-jin⁴ en¹ nca³ Nˀai³-na¹
qui³si³ca³sen¹ ˀnti¹-le⁴, nca³ je² xi³ vˀa³sje³ntjai²
son³ˀnte³.
\v 15 To⁴ˀya³-ni³ve⁴ xi³ vˀe¹tsen³ en¹ nca³ Jesús je²
ˀnti¹-le⁴ Ni³na¹, Ni³na¹ ti¹jna³cao⁴ nca³ je², cˀoa⁴ je²
ti¹jna³cao⁴ Ni³na¹.
\v 16 Ña¹ tsa³ˀya³-nia¹ cˀoa⁴ coan³cjain¹-na¹ nca³
tjao²que³-na¹ Ni³na¹. Je² Ni³na¹ xi³ cjoa⁴tjao²cha³. Cˀoa⁴
to⁴ˀya³-ni³ xi³ tjin¹ntsjai²-le⁴ cjoa⁴tjao²cha³,
ti¹jna³cao⁴ Ni³na¹, cˀoa⁴ Ni³na¹ ti¹jna³cao⁴ nca³ je².
\v 17 Cˀoa⁴-sˀin² ma³jnco³jin³-na¹ cjoa⁴tjao²cha³,
jme¹-ni³ nca³ sˀe⁴-si¹ni³na¹ cjoa⁴nˀion¹ta³con² cˀia⁴
ni⁴čhjin³ nca³ sˀe⁴nta³jin³ cjoa⁴. Jo³-sˀin² cjoan³ nca³
je², cˀoa⁴-sˀin² cjoan³² nca³ ña¹ i⁴ son³ˀnte³-vi⁴.
\v 18 A³li² cjoa⁴jcon³-jin² tjin¹ cˀia⁴ nca³ tjao²cha³²
xi²nquia⁴². Cˀia⁴ nca³ ña³qui³ cjoa⁴qui²xi⁴ tjao²cha³²,
tjo¹xin²-na¹ cjoa⁴jcon³-ve⁴. Xi³ cjoa⁴jcon³-ve⁴ tjin¹-le⁴
cjoa⁴ñˀain³. Je² xi³ tsa³cjon³ a³li²coi³
coan³jnco³jin³-le⁴ cjoa⁴tjao²cha³.
\v 19 Ña¹ cjai¹nca³ tjao²cha³² Ni³na¹, nca⁴ je² tjao²que³
coan³-na¹ nca³ ti¹tjon².
\v 20 Tsa² jnco³ xi³ cˀoa⁴tso²: An³ cjai¹nca³ tjao²que⁴
Ni³na¹, to⁴nca³ chˀao³ ve³ ntsˀe⁴, nti³so³ ni¹. Je² xi³
ntsˀe⁴ tsa³ve³-ni³ xcon⁴, cˀoa⁴ tsi² tjao²que³ ntsˀe⁴,
jo¹-sˀin² coan⁴-ni³ nca³ tjao²que³ coan⁴-ni³ Ni³na¹, xi³
tsi² tsa² tsa³ve³-ni³ xcon⁴.
\v 21 Je²-vi⁴ cjoa⁴te¹xo³ma³ xi³ Ni³na¹ qui³tsjoa³-na¹: Je²
xi³ tjao²que³ Ni³na¹, cˀoa⁴-ti⁴ ma³chjen¹ nca³ tjao²que³
ntsˀe⁴.
\c 5
\s Ni²qui³njen³-le⁴² son³ˀnte³ nca⁴ ma³cjain¹-na¹
\p
\v 1 Nca³tsˀi³ xi³ ma³cjain¹-le⁴ nca³ Jesús je² Cristo,
je²-vi⁴ qui³tsin³ tˀa³tsˀe⁴ Ni³na¹. To⁴ˀya³-ni³ve⁴ xi³
tjao²que³ xi³jcha¹-le⁴ cˀoa⁴-ti⁴ tjao²que³ nca³tsˀi³ xi³
qui³tsin³ tˀa³tsˀe⁴.
\v 2 Cˀoi⁴-sˀin² ˀya³-nia¹ nca³ tjao²cha³² ˀnti¹-le⁴
Ni³na¹, cˀia⁴ nca³ tjao²cha³² Ni³na¹, cˀoa⁴
ni²cji³tjo³soan² cjoa⁴te¹xo³ma³-le⁴.
\v 3 Cˀoa⁴-sˀin² tjao²cha³² Ni³na¹, nca³ ni²cji³tjo³soan²
cjoa⁴te¹xo³ma³-le⁴. Je² cjoa⁴te¹xo³ma³-le⁴ a³li²
ñˀain³-jin² tjin¹.
\v 4 Je² nca³tsˀi³ xi³ qui³tsin³ tˀa³tsˀe⁴ Ni³na¹,
si¹qui³njen³-le⁴ son³ˀnte³-vi⁴. Coi³ cjoa⁴ nca³
ni²qui³njen³-le⁴² son³ˀnte³-vi⁴, nca⁴ ma³cjain¹-na¹.
\v 5 ˀya¹-ni³ xi³ si¹qui³njen³ son³ˀnte³-vi⁴. A³ tsi²
tsa² je² xi³ ma³cjain¹-le⁴ nca³ Jesús je² ˀnti¹-le⁴
Ni³na¹.
\s Je² Espíritu Santo xi³ si¹qui²xi⁴ya³ en¹
\p
\v 6 Je² Jesucristo ja³ˀai³-ni³ cao⁴ na³nta¹ cao⁴ njin¹.
A³li² tsa² to⁴cao⁴ na³nta¹-jin² ja³ˀai³-ni³, to⁴nca³ cao⁴
na³nta¹ cao⁴ njin¹. Cˀoa⁴ je² Espíritu Santo xi³
si¹qui²xi⁴ya³ en¹, nca⁴ je² Espíritu Santo je² xi³
cjoa⁴qui²xi⁴.
\v 7 Jan² ma³-ni³ xi³ si¹qui²xi⁴ya³ en¹ ya⁴ ncˀa³jmi³, je²
Nˀai³-na¹, je² en¹ xi³ ti⁴je²-ni³ Cristo, cao⁴ je²
Espíritu Santo. To⁴ña³qui³ jnco³ ma³ nca³ jan²-ve⁴.
\v 8 Cˀoa⁴-ti⁴ jan² ma³-ni³ xi³ si¹qui²xi⁴ya³ en¹ i⁴
son³ˀnte³-vi⁴, je² Espíritu, je² na³nta¹, cao⁴ njin¹. Je²
nca³ jan²-vi⁴ ma³nco¹son² en¹-le⁴.
\v 9 Tsa² cˀoa⁴-sˀin² chjoe¹ en¹ xi³ si¹qui²xi⁴ya³
cho⁴ta⁴son³ˀnte³-vi⁴, je² en¹ xi³ si¹qui²xi⁴ya³ Ni³na¹
nqui²sa⁴ nta³ tjin¹. Je²-vi⁴ xi³ en¹-le⁴ Ni³na¹ xi³
qui³si³qui²xi⁴ya³ xi³ tˀa³tsˀe⁴ ˀnti¹-le⁴.
\v 10 Je² xi³ ma³cjain¹-le⁴ tˀa³tsˀe⁴ ˀnti¹-le⁴ Ni³na¹,
je² cjoa⁴ xi³ qui³ni²qui²xi⁴ya³ ti¹jna³jin³ ni⁴ma⁴-le⁴. Je²
xi³ tsi² ma³cjain¹-le⁴ tˀa³tsˀe⁴ Ni³na¹, tsa³cˀa³sje³
nti³so³ Ni³na¹, nca³ tsi²coi³ coan³cjain¹-le⁴ je² en¹ xi³
Ni³na¹ qui³si³qui²xi⁴ya³ xi³ tˀa³tsˀe⁴ ˀnti¹-le⁴.
\v 11 Je²-vi⁴ xi³ en¹-le⁴: Nca³ Ni³na¹ qui³tsjoa³-na¹ je²
cjoa⁴vi³jna³chon³ nca³ntsjai²-ve⁴, cˀoa⁴ je²
cjoa⁴vi³jna³chon³-vi⁴ ti¹jna³jin³ je² ˀnti¹-le⁴.
\v 12 Je² xi³ tjin¹-le⁴ je² ˀnti¹-le⁴, cˀoa⁴-ti⁴
tjin¹-le⁴ je² cjoa⁴vi³jna³chon³-vi⁴. Je² xi³ tsin²-le⁴
ˀnti¹-le⁴ Ni³na¹, tsin²-le⁴ je² cjoa⁴vi³jna³chon³-vi⁴.
\s Jo³-sˀin² nca³ ˀya³² jña³-le⁴ xi³ cjoa⁴vi³jna³chon³
nca³ntsjai²
\p
\v 13 Je² nca³yi³je³ cjoa⁴-vi⁴ qui³squi³-no³ nca³ jon² xi³
ma³cjain¹-no³ xi³ tˀa³tsˀe⁴ jan³ˀain¹-le⁴ ˀnti¹-le⁴
Ni³na¹, jme¹-ni³ nca³ jcha⁴-si¹nio³ nca³ tjin¹-no³ je²
cjoa⁴vi³jna³chon³ nca³ntsjai²-vi⁴, cˀoa⁴ jme¹-ni³ nca³
coan⁴cjain¹ntsjai²-si¹ni³no³ tˀa³tsˀe⁴ jan³ˀain¹-le⁴
ˀnti¹-le⁴ Ni³na¹.
\v 14 Cˀoa⁴-sˀin² nˀion¹tˀa³ta³coan³² ntˀai⁴
nqui³xcon⁴ nca³ je². Tsa² ni²je¹ to⁴jme³-ni³ cjoa⁴
jo³-sˀin² me³-le⁴ nca³ je², je² nčhˀoe¹-na¹.
\v 15 Cˀoa⁴ tsa² ˀya³² nca³ je² nčhˀoe¹-na¹,
to⁴jme³-ni³ cjoa⁴ xi³ ni²je¹-le⁴², ˀya³-nia¹ nca³
tjin¹-na¹ je² cjoa⁴ xi³ qui³ni²je¹-le⁴².
\v 16 Tsa² jnco³ xi³ scoe⁴ nca³ ntsˀe⁴ ti¹va³jnqui³ je¹,
a³li² tsa² je² je¹ xi³ va³quin²-le⁴ cjoa⁴vi³ya³, si⁴²je¹
tˀa³tsˀe⁴ ntsˀe⁴, cˀoa⁴ cˀoai⁴-le⁴ cjoa⁴vi³jna³chon³,
tsa² je² je¹ xi³ ma³jnqui³ tsi² va³quin²-le⁴ cjoa⁴vi³ya³.
Tjin¹ je¹ xi³ va³quin²-le⁴ cjoa⁴vi³ya³. A³li²coi³
cˀoa⁴xian³ nca³ cˀoe⁴²tsˀoa³ ja⁴tˀa³tsˀe⁴ je² je¹-vi⁴.
\v 17 Nca³yi³je³ xi³ li²coi³ nta³ tjin¹, je¹ ni¹, to⁴nca³
tjin¹ je¹ xi³ tsi² va³quin²-le⁴ cjoa⁴vi³ya³.
\v 18 ˀya³-nia¹ nca³ nca³tsˀi³ xi³ qui³tsin³ tˀa³tsˀe⁴
Ni³na¹, a³li²coi³ je¹ ma³jnqui³. To⁴nca³ je² xi³ qui³tsin³
tˀa³tsˀe⁴ Ni³na¹, je² Jesucristo si¹coi²nta⁴ nca³ je²,
cˀoa⁴ je² nai⁴² li²coi³ tsoa⁴.
\v 19 ˀya³-nia¹ nca³ ña¹ tsˀe⁴ Ni³na¹ nia¹, cˀoa⁴ i⁴
nca³qui³jnta² son³ˀnte³-vi⁴ ti¹jna³cao⁴ nai⁴².
\v 20 ˀya³-nia¹ nca³ je² ˀnti¹-le⁴ Ni³na¹ ja³ˀai³-ni¹.
Qui³si³cho⁴ya³-na¹ jme¹-ni³ nca³ jcha⁴-si¹nia³² je² xi³
ña³qui³ cjoa⁴qui²xi⁴. Ti³yo³coa⁴² nca³ je² xi³ ña³qui³
cjoa⁴qui²xi⁴, xi³ Jesucristo je² ˀnti¹-le⁴. Je²-vi⁴ xi³
Ni³na¹ cjoa⁴qui²xi⁴, cˀoa⁴ je²-vi⁴ xi³ cjoa⁴vi³jna³chon³
nca³ntsjai²-ve⁴.
\v 21 ˀnti¹xti³-na⁴, chja⁴ˀa²xin²-lao⁴³ yao³-no³
nca³yi³je³ xi³ xco¹son² cjoan³. Cˀoa⁴ ca²ta³ma³.