\id LUK  - Maxakalí NT [mbl] (Brazil) -2011 bd
\h NOK
\toc1 Nok
\toc2 Lucas (Lc)
\mt NOK TE YEYOX ꞌÃKTUX
\c 1
\s Nok te Teop pu kaxꞌãmiꞌ
\p
\v 1 Teop: —‍Hõmã tikmũꞌũn te hãpxopmã kaꞌok pẽnãhãꞌ, tuꞌ pẽnã hãmãxap, tu nõm hãpxopmãꞌax ꞌãktux,
\v 2 ha tik xop te nõm hãmꞌãktux kaxꞌãmi tappet tuꞌ,
\v 3 yĩy ꞌãte mõꞌkupix punethok, tu hãmꞌãpak, tuꞌ yĩkopit, nũy nõmhã yũmmũg max, tu hãmpeꞌpaxex, hu: Yãꞌ ꞌãte hãpxopmãꞌax xohix kaxꞌãmiꞌ, tu tappet tu kaxꞌãmiꞌ, nũy xa mõꞌkutnãꞌ,
\v 4 xa ꞌãkuxa yũm kaꞌok, nũy hãpxopmãꞌax kopaꞌ yũm kaꞌok, tikmũꞌũn te xa nõm yũmmũgãhãꞌ.
\s Pexkox yõg nũꞌkutnãꞌax te Yakanit pu hãmꞌãktux
\p
\v 5 Hõmã ꞌEnot te hãpxexka Yonex yõg tikmũꞌũn xat, ꞌĩhã Yakanit xip, tu ꞌAmit xop yõg ꞌãmanex, ꞌũxetut ꞌãxetꞌax ꞌIyamet, ha ꞌIyamet pa ꞌãmãnex kutok hex.
\v 6 Yãꞌ max Yakanit xiꞌ xetut, tu hãpxopmã max, ha Topa teꞌ pẽnãhãꞌ, tuꞌ xat, haꞌ yĩpkox pip xiꞌ xetut, ꞌũmĩynãg huꞌ mĩy,
\v 7 pa ꞌIyamet kaꞌok, tuk-tok ꞌohnãg, ꞌũk-tok pip ꞌokpa kutut ꞌIyamet xiꞌ yĩpxox.
\p
\v 8 ꞌÃmnĩy ꞌũm ꞌĩhã Yakanit te ꞌãmãnex yõg hãm hãꞌ hãm, tu Topa pet kopaꞌ hãm, ha ꞌAmit yõg xop xohix hãm, ha nõm xop te mõꞌ xap yõn, tuꞌ xap tuꞌ yũmmũgãhãꞌ, haꞌ xut Yakanit, nũy hãm, ꞌũnõy yãnãn tuꞌ,
\v 9 pu mĩm xax ꞌũm puk, nũy haxyã, xix mĩm hep ꞌũm puk, nũy Topa puꞌ haxyãꞌ, ha Yakanit te Topa pet xexka haꞌ mõꞌnãhãꞌ,
\v 10 ha Yoneo yõg tikmũꞌũn tek-nĩhãꞌ pip hãptopaꞌ, tu Topa pu hãmꞌãktux pax, ꞌĩhã ꞌãmãnex xop te mĩm hep puk, mĩmpe yĩmũꞌ yũm haꞌ puk, nũy Topa puꞌ haxyãꞌ.
\v 11 Hãpxip ꞌohnãg ꞌĩhã Yakanit te pexkox yõg nũꞌkutnãꞌax pẽnãhã, ha mĩmpe pukꞌax yĩkaꞌ xip, ꞌũyĩp xeꞌe hãꞌ xip,
\v 12 haꞌ kuxãnõg, tuꞌ kuxa teꞌ yẽy,
\v 13 pa nõm nũꞌkutnãꞌax te:
\p —‍ꞌÃkuxanõg hok, nũy ꞌãkaꞌok. Topa te ꞌõg hãmꞌãktuxꞌax ꞌãpak, ha ꞌãxetut te ꞌãk-tok pit put putup, ha xateꞌ xuxetꞌax mĩy putup Yoãm.
\v 14 ꞌÃk-tok put ꞌĩhã ꞌãkuxa hittup putup, ha tikmũꞌũn hittup putup kamah,
\v 15 yã Topa te ꞌãk-tok pit xexka mĩy putup, ꞌũtut tex kopaꞌ xip ꞌĩhã Topa Koxuk te ꞌãk-tok kaꞌogãp-tup, yĩy xupyãg xat hok puyĩy xoꞌop hok,
\v 16 tu ꞌIyaet yõg tikmũꞌũn punethok mõgãp-tup, tu ꞌIyaet yõg Topa ha mõgãp-tup.
\v 17 Yã Topa te ꞌãk-tok nũꞌkutnãp-tup tikmũꞌũn hah, pu yãy pupi hãmꞌãktux. Hõmã mõnãyxop hittap ꞌEnit te Topa pupi hãmꞌãktux, tuꞌ kaꞌok, ha kaxiy ꞌãk-tok kaꞌok putup, tuꞌ tak xop pu: “ꞌÃpu, yãyhãhup,” kaxĩy, puk-tok tu gãy kuxyãꞌ, nũy nõm putup pax ꞌũxeheh, ha ꞌãk-tok teꞌ yĩpkox ꞌohnãg xop pu hupmãp-tup, pu hãmpeꞌpaxex, nũy yãy hãmyoaꞌ, ꞌIyaet yõg tikmũꞌũn xatꞌax nũn ha hãmyoaꞌ. Kaxĩy.
\p
\v 18 Ha Yakanit te:
\p —‍ꞌĨntuꞌ. ꞌÃtep yũmmũgꞌah. ꞌŨgkuxa yũm ꞌohnãg hãmꞌãktux kopah. ꞌŨgkuxa te xa tuꞌ pa yũm kaꞌok, ꞌũgkutut xik xetut hah. Kaxĩy.
\p
\v 19 Ha nõm nũꞌkutnãꞌax te:
\p —‍ꞌŨgmũn Gamineo. Topa keppak xip, tu Topa puk hãm, ha xa nũgkutnãhãꞌ, ꞌũyĩy xa hãmyũmmũgãꞌ, tu xa hãmꞌãpak max ꞌãktux,
\v 20 pãyã xate ꞌãtu ꞌãpa yũm kaꞌok, tu kuxa yũm ꞌohnãg. Xapi ꞌãyĩy hok, tu mõktu ꞌãxetut te ꞌãk-tok put, yĩy ta ꞌãyiyꞌax ꞌũxeheh, ta tu ꞌãteꞌ koit ꞌohnãg hah. Kaxĩy. Tuꞌ mõg pexkox haꞌ put puꞌ.
\p
\v 21 Ha tikmũꞌũn te hãptopaꞌ pip, tu Yakanit hip, tuꞌ hip, tu xeꞌ hip, paꞌ nũn ꞌohnãg, haꞌ yẽy.
\v 22 Ha ta Yakanit te Topa pet xexka kopaꞌ xip, tu hãptopaꞌ mõg, tuꞌ yõyxõg kaꞌok, tuꞌ yĩy tapax ꞌohnãg, ha tikmũꞌũn te:
\p —‍ꞌŨpẽnãꞌ, Yakanit te Topa pet kopaꞌ xip, ꞌĩhã hãm yãy koxuk pẽnãhãꞌ. Kaxĩy. Haꞌ yĩm xix, ꞌũyĩy hok tuꞌ.
\p
\v 23 Tu ꞌãmãnex yõg hãmꞌax kux, tu taꞌ mõg, tu mõktu yãy pet tuꞌ xupep.
\v 24 Hãpxip kutõgnãg ꞌĩhãꞌ xetut te kopak-tok yũm, tu mẽy te 5 hãꞌ yãy pet kopaꞌ xip, tu hãpkumep ꞌohnãg, tu:
\p
\v 25 —‍Hõmã ꞌãte yãyhãhup, ꞌũgkutok ꞌohnãg tuꞌ, pa Topa tek pẽnãhãꞌ, tuk kuxa kaꞌ, tu yõgnũ yãyhãhup nõah, yã hõnhãk kutok yũm ꞌũgkopah. Kaxĩy.
\s Pexkox yõg nũꞌkutnãꞌax te Mãnix pu hãmꞌãktux
\p
\v 26 Tuk-tok xuk mẽy te 6 ꞌĩhã Topa te nũ Gamineo kutnãhãꞌ, tu hãpxexka Ganinet yõg kõmẽn Nãyane tu nũꞌkutnãhãꞌ, ha taꞌ nũn pexkox yõg nũꞌkutnãꞌax, tu nũktu Nãyane tuꞌ xupep,
\v 27 tu ꞌũn yãyta hok haꞌ mõg, haꞌ xuxetꞌax Mãnix, tu mõnãyxop Namix xop yõg Yoye mũtik yãytap-tup, pãyãꞌ hok yũm.
\v 28 Ha Gamineo te Mãnix pet ha mõꞌnãhãꞌ, tu:
\p —‍ꞌÃneo. Topa te xa hãmmaxnãhãꞌ, tu nũ mũtik tihiꞌ. Kaxĩy.
\p
\v 29 Pa Mãnix kuxãnõg, tu yãy pu hãmꞌãktux, hu: Putep mũn ꞌãktux nõꞌõm? Kaxĩy.
\v 30 Ha nũꞌkutnãꞌax te:
\p —‍Mãnix, Topa te xa hãmmaxnãhãꞌ, yĩy ꞌãkuxãnõg hok.
\v 31 Xate ꞌãk-tok pit put putup, tuꞌ xuxetꞌax mĩy putup Yeyox.
\v 32 Ha tikmũꞌũn xohix xat putup, yãꞌ xuxetꞌax nõy te: Topa Xeꞌẽgnãg kutok pit. Kaxĩy. Hõmã mõnãyxop Namix te tikmũꞌũn xat, ha kaxĩy ꞌãk-tok te tikmũꞌũn xat putup,
\v 33 tu mõnãyxop hittap Yako mõkputox xat putup, tu hãmyãxatamuk xohix hã tikmũꞌũn xat putup mõg kumaꞌ mõg, ꞌap xat kux putupꞌah Yeyox. Kaxĩy.
\p
\v 34 Pa Mãnix te:
\p —‍ꞌĨntuꞌ. ꞌÃtep yũmmũgꞌah. ꞌŨgkutok put te xĩy? Yãk hok yũm. ꞌÃte tik ꞌũm mũtik ꞌũgnõm ꞌohnãg. Kaxĩy.
\p
\v 35 Ha nõm nũꞌkutnãꞌax te:
\p —‍Topa Koxuk kaꞌok, tu ꞌãk-tok putnãp-tup, ꞌĩhã hok yũm, yĩy ꞌãk-tok max xeꞌẽgnãg, yã Topak-tok xeꞌẽgnãg.
\v 36 Yũmmũg. ꞌÃxape Iyamet kutut, tuk-tok teꞌ kopaꞌ yũm, ha mẽy te 6 ꞌũk-tok xuk, ꞌũk-tok nõm hãmãxap xuk.
\v 37 Topa te hãpxopmãꞌax xohix. Kaxĩy.
\p
\v 38 Ha Mãnix te:
\p —‍Hamũn. ꞌÃte Topa puk kopaxux hãk xip, tu nũk xup, tu Topa tu hãpxopmãhãꞌ. Xate hãmꞌãktux max. Kaxĩy.
\p Ha pexkox yõg nũꞌkutnãꞌax mõg.
\s Mãnix mõg ꞌIyamet pet hah
\p
\v 39 ꞌÃmnĩy kutõgnãg ꞌĩhã Mãnix yok, tu taꞌ mõg mõꞌkaꞌok, tu hãpxexka Yonex yõg kõmẽn tuꞌ mõg, tu hãm xanep tuꞌ mõg,
\v 40 tu mõktu Yakanit pet tuꞌ xupep, tu mõꞌnãhãꞌ, tu ꞌIyamet pu ꞌãneo,
\v 41 haꞌ xupak, tuk-tok teꞌ tut tex kopaꞌ hittup, tu yãy xit,
\v 42 ha ꞌIyamet yĩy kaꞌok, hu:
\p —‍Topa te ꞌũn xop pu hãmmaxnãhãꞌ, ha xa hãmmaxnã xexkah. Xate ꞌãk-tok put putup, ha Topa te nõm pu hãmmaxnãp-tup kamah.
\v 43 Tik tek xat mũk tut nũn. Putep tuk ha ꞌãnũn? ꞌAp yũmmũgꞌah ꞌãte pute ꞌũm. ꞌŨgkuxa teꞌ yẽy.
\v 44 ꞌÃte xa hãpxeꞌe ꞌãktux: ꞌÃte ꞌõg ꞌãneo ꞌãpak, ꞌĩhãg kutok tek tex kopaꞌ kuxa hittup, tu yãy xit.
\v 45 Topa te hãmꞌãktux, ha ꞌãkuxa yũm kaꞌok, huꞌ hip, pu Topa hãpxopmãꞌ, ha ꞌãkuxa hittup. Kaxĩy.
\s Mãnix tek-tex
\q
\v 46 Ha Mãnix te:
\q —‍ꞌŨgkuxa te ꞌã Topa xexka ꞌãktux,
\q
\v 47 tuk koxuk te Topa tuꞌ hittup kamah, hak hĩnnãhãꞌ,
\q tuk pẽnã max,
\v 48 ꞌĩhãk mũn kutõgnãg,
\q yã Topa hã kãmãnat hex,
\q yĩy tikmũꞌũn xohix te hãmꞌãktux putup mõꞌkumaꞌ mõg, hu:
\q “Topa te Mãnix pu hãmmaxnãhãꞌ.” Kaxĩy.
\q
\v 49 Ha Mãnix te xeꞌ:
\q —‍Topa kaꞌok xeꞌẽgnãg, tu tek mũn pu hãpxopmãhãꞌ,
\q yã Topa max xeꞌẽgnãg,
\q
\v 50 tu yãy yõg tikmũꞌũn kuxa kaꞌ, nõm xop yĩpkox pip Topa puꞌ,
\q ha tikmũꞌũn kuxa kaꞌ, xik-tok xop,
\q xik mõkputox kuxa kaꞌ Topa teꞌ,
\q nõm xop yĩpkox pip Topa puꞌ kuxa kaꞌ,
\q
\v 51 ha hãpxopmã max xeꞌẽgnãg, tuꞌ gãy nãm xop hã hãpxummãhãꞌ,
\q nõm xop te hãmpeꞌpaxex, hu: “ꞌŨgmũn xexkah.” Kaxĩy.
\q
\v 52 Topa teꞌ xexka xop xupepmãhã, puk-tõgnãg xop yãyhã tu xexkah,
\q
\v 53 haꞌ hok xop pu hãpxop punethok popmãhãꞌ,
\q tup-texop xexka pu hãpxop popmã ꞌohnãg,
\q tuꞌ: “Mõg, mõg!” Kaxĩy. Tuꞌ xupepmãhãꞌ.
\q
\v 54 Tu hãmꞌãktux xex mõnãyxop puꞌ, tuꞌ xutigãhãꞌ,
\q tu ꞌIyaet yõg tikmũꞌũn mõꞌnĩynãm,
\q tuꞌ yõg kãmãnat xop xaxok ꞌohnãg, tu mõꞌnĩynãm.
\q
\v 55 Hõmã, hãmyãxatamuk xohix ꞌĩhãꞌ,
\q Topa te mõnãyxop ꞌAmanãm pu hãmꞌãktux xex, tuꞌ xaxok ꞌohnãg.
\q Ta tuꞌ kux. Kaxĩy.
\p
\v 56 Mẽy 3 hã Mãnix te ꞌIyamet mũtik tihiꞌ, ha mẽy 3 kux, ꞌĩhã yãy pet haꞌ mõg, tuꞌ mõg tu mõktu xupep ꞌũyãy pet tuꞌ.
\s ꞌIyamet tek-tok ꞌãxetꞌax Yoãm put
\p
\v 57 ꞌÃmnĩy xohix nõg ꞌĩhã ꞌIyamet tek-tok put, haꞌ pit,
\v 58 haꞌ xape xop xix tikmũꞌũn teꞌ yĩmap hãꞌ pip teꞌ xupak, tu Topa te nõmhã hãmmax mĩy yũmmũg, ha ꞌIyamet kuxa hittup xix tikmũꞌũn.
\p
\v 59 Tikmũꞌũn nũn, ꞌãmnĩy te 7 nõg ꞌĩhãꞌ nũn, ꞌIyamet pet haꞌ nũn, nũy ꞌũk-tok pit yãy xax xak kutõgnãg, tuꞌ xuxetꞌax mĩy putup Yakanit, ꞌũtak ꞌãxetꞌax hã xanãp-tup,
\v 60 pãyãꞌ tut tep-tup nõg, tu:
\p —‍ꞌÃmhok, kaxĩy hok! ꞌÃteꞌ xuxetꞌax mĩyꞌax yãy xeꞌe tu Yoãm. Kaxĩy.
\p
\v 61 Ha tikmũꞌũn te:
\p —‍Putep xuktux? Yoãm te xĩy? ꞌÃxape ꞌũm ꞌãxetꞌax Yoãm? ꞌAp xipꞌah. Teptuꞌ xuxetꞌax mĩy putup Yoãm? ꞌŨ ꞌũm te nõ Yoãm? Kaxĩy.
\p
\v 62 Tuꞌ yĩm xix, pu Yakanit tek-tok ꞌãxetꞌax yũmmũgãꞌ,
\p
\v 63 ha Yakanit kaxꞌãmi putup, yĩy tik ꞌũm te tappet tuꞌ hõm, xix tappet kup, ha Yakanit kaxꞌãmiꞌ, hu: “ꞌŨxuxetꞌax piꞌ Yoãm.” Kaxĩy. Ha tikmũꞌũn kuxa teꞌ yẽy.
\v 64 Hãpxip ꞌohnãg ꞌĩhã Yakanit yõyxõg puꞌuk, tu hãmꞌãktux, tu Topa max ꞌãktux, hu:
\p —‍ꞌŨmax Topah. Kaxĩy.
\p
\v 65 Ha tikmũꞌũn te Yakanit pet tuꞌ yĩmap hãꞌ pip, tu kuxãnõg, tu tikmũꞌũn puꞌ xuktux, tu Yonex yõg hãm xanep tu tikmũꞌũn pip xop puꞌ xuktux, haꞌ xohix te nõmhã yũmmũg,
\v 66 huꞌ kuxa teꞌ yẽy, tu hãmpeꞌpaxex, hu:
\p —‍Kakxop xeꞌeꞌ, tuꞌ tuk kux, ꞌĩhã tik xexka putup. Kaxĩy.
\p Yã Topa te nõm kaꞌogãhãꞌ, tu nũ mũtik tihiꞌ.
\s Yakanit te Topa pupi hãmꞌãktux
\p
\v 67 Haꞌ tak Yakanit te Topa Koxuk hã nũꞌ xip, tu Topa pupi hãmꞌãktux, hu:
\q
\v 68 —‍ꞌÃpu yũmũꞌãte Topa max ꞌãktux, yã ꞌIyaet yõg Topa max,
\q tuꞌ nũn, nũy yãy yõg tikmũꞌũn mõy pu mõg,
\q
\v 69 tu tik xeꞌẽgnãg yãykutnãhãꞌ, tu nũꞌ kutnãhãꞌ,
\q haꞌ kaꞌok, hamũn yã mõnãxop Namix hã mõkputox,
\q tu yũmũg yõg tikmũꞌũn mõy gãy xop kopah, ꞌũmõg.
\q
\v 70 Hõmã, hãmyãxatamuk xohix ꞌĩhãꞌ Topa te tik max xop yĩymõgãtux,
\q puyĩy yãy pupi hãmꞌãktux, pũyĩy mõnãyxop pu hãmꞌãktux,
\q tu Topa teꞌ mõy putup ꞌãktux,
\q
\v 71 tu Topa te hãmꞌãktux xex ꞌãktux, hu:
\q Topa te ꞌãmõy putup gãy xop kopah,
\q nõm xop te ꞌãxop putup nõg. Kaxĩy.
\q
\v 72 Topa te mõnãyxop kuxa kaꞌ, tu yãy yõg hãmꞌãktux xex,
\q tuꞌ paꞌax max xutĩgãhãꞌ,
\q
\v 73 tu mõnãyxop hittap ꞌAmanãm mũtik hãmꞌãktux,
\q tu nõm pu hãmꞌãktux xex,
\q yã yãy ꞌãxetꞌax hã hãmꞌãktux xex,
\q
\v 74 nũy gãyxop kopa yũmũg mõy, pu Topa keppa yũmũk pip,
\q nũy ꞌãktettex, nũy Topa pu hãpxopmãꞌ, tuꞌ yĩpkutuk ꞌohnãg,
\q
\v 75 ꞌũyĩy hãmyok mĩy, ꞌũyĩy tu max xeꞌẽgnãg, Topa putuk,
\q yũmũg hiꞌax tox hã yũmũg max, mõg kumaꞌ mõg.
\q
\v 76 Ha ꞌãmũn, xõnnũꞌ, ꞌãxuxetꞌax nõy mĩy putup, hu:
\q Topa xeꞌẽgnãg pupi hãmꞌãktuxꞌax. Kaxĩy.
\q Xate Topa keppa ꞌãmõg, nũy ꞌũyõg putat max mĩy,
\q
\v 77 nũy yõg tikmũꞌũn pu hãmꞌãktux, hu:
\q “Topa te ꞌãkuxa kummuk xit, nũy kuxa max tat ꞌũyãnãn tuꞌ,
\q tu ꞌõg kummuk mĩyꞌax xaxogãp-tup, pu tu kux.”
\q
\v 78 Yã Topa te yãy yõg tikmũꞌũn kuxa kaꞌ,
\q hu tik nũꞌkutnãhãꞌ, ha yũmũg haꞌ nũn,
\q tu yũmũg yũmmũgãhãꞌ.
\q
\v 79 Tuꞌ nũn putup, tu hãmyũmmũg hã tikmũꞌũn kuxa hittupmãhãꞌ,
\q tu tikmũꞌũn te hãpkoxtap ta kaꞌ mãm xop pu hãptupmãhãꞌ,
\q ha kaxĩy Topa te yãy yõg putat yũmmũgãhãꞌ,
\q tu yũmũg kuxa mãmmãhãꞌ. Ta tuꞌ kux. Kaxĩy.
\p
\v 80 Ha Yakanit kutok pit ꞌũtuk, tu mõktu xiptap kaꞌok, tuꞌ tuk kux, tu hãm panip xexka kopaꞌ xip, tu mõktuꞌ xupep, pu ꞌIyaet yõg tikmũꞌũn pẽnãꞌ.
\c 2
\s Mãnix tek-tok put
\p
\v 1 Hãmyãxatamuk ꞌũm ꞌĩhã hãpxexka Hõm yõg xatꞌax xexka ꞌãxetꞌax ꞌAgõy, tu hãpxexka yõg tikmũꞌũn xohix xat, pu yãy yõg kõmẽn tu mõg, puyĩy gohet te tikmũꞌũn mõꞌkupix, nũy tikmũꞌũn xohix te xĩy yũmmũg,
\v 2 ha Hõm yõg gohet te tikmũꞌũn mõꞌkupix hãmãxap, ꞌĩhã Kinĩn te hãpxexka Xit yõg tikmũꞌũn xat.
\v 3 Ha tikmũꞌũn mõg, pu tu mõꞌkupix, ha yãy yõg kõmẽn tuꞌ mõg.
\p
\v 4 Yoye xip, tu hãpxexka Ganinet yõg kõmẽn Nãyane tuꞌ xip, tuꞌ mõg, tu mõktu hãpxexka Yonex yõg kõmẽn Menẽg tuꞌ xupep. Hõmã, hãmyãxatamuk xohix ꞌĩhã, mõnãyxop hittap Namix mũk tut teꞌ put, tu Menẽg kopa Namix put, ha Namix mũn te ꞌIyaet yõg tikmũꞌũn hittap xat, yĩy hõnhã Yoye mõg Menẽg tuꞌ, Namix mõkputox ꞌũm tuꞌ, tuꞌ mõg,
\v 5 tuꞌ xetut mũtik mõg, ha Mãnix tek-tok xuk xexka, haꞌ mõg.
\v 6 Yoye mõg, xix Mãnix, tu taꞌ mõg, tu mõktu Menẽg tuꞌ mõxahaꞌ, tu tihi ꞌĩhãk-tok nãhãꞌ.
\v 7 Kõmẽn yõg ꞌãmuk nũꞌxip, yĩy Mãnix tek-tok pit mãxap put, tu mũnũytut pet kopaꞌ put, tu topixxax hãꞌ kĩy, tu mũnũytut yõg mĩpkox xitꞌax kopaꞌ xex.
\s Tik xop te kahnẽn pẽnã max ꞌĩhã pexkox yõg nũꞌpok xop nũn
\p
\v 8 Ha kõmẽn kũnãpaꞌ pip tik xop te kahnẽn pẽnãhãꞌ, ꞌãmnĩy tox kaꞌok hãꞌ pẽnãhãꞌ,
\v 9 ꞌĩhã pexkox yõg nũꞌkutnãꞌax nũn, ha Topa yõg kuyãnãm teꞌ yĩmap ꞌũxakot, ha kuxãnõg xexkah,
\v 10 ha nũꞌkutnãꞌax te:
\p —‍ꞌÃkuxãnõg hok! ꞌŨg ꞌãpax! ꞌÃte xa hãmꞌãpak max ꞌãktux, nũy tikmũꞌũn kuxa xohix hittupmãꞌ:
\v 11 Yã hõnhã, ꞌãmnĩy ꞌĩhã, Namix yõg kõmẽn Menẽg kopaꞌ nãhãꞌ Kunnix, nõꞌõm ꞌaxop hã ꞌãxuxyãꞌ. Topa te nõm yãykutnãhãꞌ, tu ꞌIyaet yõg tikmũꞌũn ha nũꞌkutnãhãꞌ. Hamũn te tikmũꞌũn kuxa kummuk xit putup, nũy ꞌũyãnãn tuꞌ kuxa max mõꞌtat nõꞌõm.
\v 12 ꞌÃmõg, nũy xax, nũy xipiꞌ. Pẽnãꞌ! Kakxop te mũnũytut yõg mĩpkox kopaꞌ pip, ha topixxax hãꞌ kĩy, ha kaxĩy xate nõ kakxop yũmmũgꞌax. Kaxĩy.
\p
\v 13 Hãpxip ꞌohnãg ꞌĩhã pexkox yõg nũꞌpok xohix pip, ꞌũnõy mũtik pip, tu Topa ꞌãktux max, hu:
\q
\v 14 —‍Topa mũn xexka xeꞌẽgnãg pexkox kopah,
\q tu tikmũꞌũn kuxa mãmmãhã hãm tuꞌ,
\q mõꞌyãy xeꞌẽgnãg tuꞌ kuxa mãmmãhãꞌ. Kaxĩy.
\p
\v 15 Ha pexkox yõg nũꞌpok xop mõg, tu pexkox haꞌ mõg putpuꞌ, ha kahnẽn pẽnã xop te yãy pu hãmꞌãktux hu:
\p —‍Topa te yũmũg yũmmũgãhãꞌ. ꞌÃpu mõg, yũmũg mõg kõmẽn Menẽg tuꞌ, nũy pẽnãꞌ. Kaxĩy.
\p
\v 16 Tu taꞌ mõg mõꞌkaꞌok, tu mõktu mõxaha kõmẽn Menẽg tuꞌ, tu Mãnix pẽnãhãꞌ, xix Yoye pẽnãhãꞌ, xix kakxop, ha kakxop te mũnũytut yõg xitꞌax kox kopaꞌ pip.
\v 17 Haꞌ pẽnãhãꞌ, tu hãpxopmãꞌax kaꞌok ꞌãktux, tu kakxop ꞌãktux,
\v 18 ha tikmũꞌũn teꞌ xupak, tu kahnẽn pẽnã xop yĩyꞌax ꞌãpak, tuꞌ kuxa teꞌ yẽy,
\v 19 ha Mãnix hãmpeꞌpaxex nãm, tuꞌ xutĩgãhãꞌ.
\v 20 Ha kahnẽn pẽnãꞌax xop put puꞌ mõg, tu Topa ꞌãktux, hu:
\p —‍Topa mũn ꞌũxexkah. Kaxĩy. Tu Topa ꞌãktux max, tu:
\p —‍Pexkox yõg nũꞌkutnãꞌax te hãmꞌãktux hãmãxap, hãpxip ꞌĩhãk mũꞌãteꞌ pẽnãhãꞌ. Yã xexka xeꞌẽgnãg Topah! Kaxĩy.
\s Yãꞌ xuxetꞌax mĩy Yeyox
\p
\v 21 Ha ꞌãmnĩy te 8 nõg, ꞌĩhã kakxop pit yãy xax xak kutõgnãg, tuꞌ xuxetꞌax mĩy Yeyox. Hõmã pexkox yõg nũꞌkutnãꞌax te Yoye puꞌ xat, ꞌĩhã Mãnix te yãy kutok xuk, haꞌ xat tap puꞌ xuxetꞌax mĩy Yeyox, yĩy hõnhãꞌ mĩy.
\s Yoye xix Mãnix te Yeyox tat Topa pet xexka tuꞌ.
\p
\v 22 Ha ꞌãmnĩy te 40 hã Mãnix yĩpkox pip, tu Mõyyex yõg xatꞌax puꞌ yĩpkox pip, ꞌap Topa pet xexka kopa mõꞌnãꞌah, ha ꞌãmnĩy te 40 nõg, ꞌĩhãꞌ mõg, Yoye mũtik mõg, tu kakxop tat, tu kõmẽn Yenoyanẽn tuꞌ xupep, nũy xõnnũ hõm Topa puꞌ.
\v 23 Yã Topa teꞌ xat, hu: “Iyaet yõg tikmũꞌũn kutok mãxap ꞌũpit, puxix ꞌũktok yã Topa xeꞌẽgnãg yõg.” Kaxĩy.
\v 24 Yĩy putuxnãg 2 popmãhãꞌ, ꞌũk-tok tuꞌ yãnãn popmãhãꞌ, yã Topa teꞌ xat.
\p
\v 25 Ha Xĩmẽãm te Yenoyanẽn tu tihiꞌ, ꞌũkutut, tuꞌ max, tu hãpxopmã max, tu Topa xak, tu hãmmax hip, pu Topa ꞌIyaet yõg tikmũꞌũn mõy puknõg xop kopah, haꞌ hip, ha Topa Koxuk te Xĩmẽãm kaꞌogãhãꞌ,
\v 26 tuꞌ kuxa pu hãmyũmmũgãhãꞌ, hu: “ꞌAp ꞌãxok putupꞌah tu mõktu Topa te yãy yõg tik nũꞌkutnãhãꞌ, hak-nãy tu ꞌãxok putup.” Kaxĩy. Hãmyãxatamuk xohix punethok hã ꞌIyaet yõg tikmũꞌũn te Topa yõg hãmyãykutnãꞌax hip, ha Topa te hãmꞌãktux xex mõnãyxop hittap puꞌ,
\v 27 ha Topa Koxuk te Xĩmẽãm mõgãhãꞌ, Topa pet xexka haꞌ mõgãhãꞌ, haꞌ mõg, tu mõktu Topa pet xexka tuꞌ xupep, ha Yoye xix Mãnix te kakxop putmõg, tu Topa pet xexka tuꞌ mõxakux kamah, Topa teꞌ xat ha.
\v 28 Ha Xĩmẽãm te kakxop put, tu Topa pu hãmꞌãktux, hu:
\q —‍ꞌÃmax Topah!
\q
\v 29 Hõmã xate hãmꞌãktux xex, tu hãmꞌãktux hittap hãꞌ mĩy nõmhã,
\q hak kuxa hittup yĩk mõg putup, yĩk tux hok ꞌũ mõg,
\q yãk kuxa yũm hãk mõg.
\q
\v 30 ꞌÃte nõ kakxop pẽnãhãꞌ, xate nõm nũꞌkutnãhãꞌ,
\q pu tikmũꞌũn kuxa kummuk xit, nũy yãnãn tuꞌ max tat,
\q
\v 31 ha tikmũꞌũn xohix te Topa yõg tik pẽnãp-tup,
\q xixꞌ hep xohix xop teꞌ pẽnãp-tup,
\q
\v 32 ha Xate nõm nũꞌkutnãhã puknõg xop hah,
\q nũy nõm kuxa kummuk tupmãꞌ,
\q pu puknõg xop xohix ꞌõg putat max hã mõg,
\q pu ꞌIyaet yõg tikmũꞌũn xexkanãꞌ. Ta tuꞌ kux. Kaxĩy.
\p
\v 33 Ha Yeyox mũg tak teꞌ xupak, xixꞌ tut teꞌ xupak, tuk-tok pit ha kuxãnõg, tuꞌ yẽy.
\v 34 Ha Xĩmẽãm te:
\p —‍Pũyã Topa ꞌãxop kaꞌogãꞌ, yãꞌ max xeꞌe Topah! Kaxĩy.
\p Tu Yeyox mũg tut Mãnix pu hãmꞌãktux, hu:
\p —‍Topa te ꞌãk-tok pit nũꞌkutnãhã ꞌIyaet yõg tikmũꞌũn hah, haꞌ yãg tep-tup putup, haꞌ yãg tep-tup nõg putup,
\v 35 ha Topa te ꞌãk-tok hã tikmũꞌũn yãy kuxa kummuk yũmmũgãp-tup, ha yãy yõg hãmpeꞌpaxex yũmmũg putup. Tikmũꞌũn te mĩkax xexka hãꞌ xuhmĩy, haꞌ xũy, ha kaxĩy tikmũꞌũn te ꞌãkuxa xũygãp-tup, yĩy ꞌãkuxa teknõg putup. Kaxĩy.
\p
\v 36 Ha ꞌũn xip, ꞌũxuxetꞌax ꞌÃn, tu Topa pupi hãmꞌãktux. ꞌŨkutut ꞌÃn, tu ꞌAxeh yõg Pãnẽo hãk-tok hex. Hõmã, hãmyãxatamuk xohix ꞌĩhã ꞌÃn te yãytahaꞌ, tuꞌ yĩpxox mũtik tihi hãmyãxatamuk te 7 hã, haꞌ xok, ha ꞌÃn hok yũm,
\v 37 tu hãmyãxatamuk te 84 hã ãyãꞌ hok yũm, xix hõnhãꞌ hok yũm, tu kõmẽn Yenoyanẽn kopaꞌ xip, tu Topa pet xexka kopaꞌ xip, tu ꞌãmnĩy hãꞌ xip, xix hãptup, tu hãpkumep ꞌohnãg, tu Topa max ꞌãktux, tuꞌ xit hok, nũy Topa pu hãmꞌãktux.
\v 38 Tu hõnhã kakxop ꞌãktux Yenoyanẽn yõg tikmũꞌũn puꞌ, tu ꞌIyaet yõg tikmũꞌũn xexkãnãꞌax ꞌãktux, tu tikmũꞌũn pu hãmꞌãktux, nõm te Topa yõg hãmyãykutnãꞌax hip puꞌ xuktux.
\s Yoyex xix Mãnix teꞌ putpuꞌ mõg Nãyane tuꞌ
\p
\v 39 Ha Yoye te Topa yõg xatꞌax mĩy, xix Mãnix teꞌ mĩy, tuꞌ mĩy kux, tu ta Ganinet tu putpuꞌ mõg, tu mõktu yãy pet tuꞌ mõxahaꞌ, haꞌ pet te kõmẽn Nãyane kopaꞌ yũm.
\p
\v 40 Ha kakxop tuk tu mõktu kaꞌok, tu hãmyũmmũg, ha Topa te nõm pu hãmmaxnãhãꞌ.
\s Yeyox mõg Topa pet xexka tuꞌ
\p
\v 41 Hãmyãxatamuk xohix nõg ꞌĩhãꞌ mõg, nũy Yoneo xop yõg ꞌãmuk xexka ꞌãxetꞌax Nõaꞌyẽn mĩy, tuꞌ mõg, ꞌũtak xixꞌ tut te kõmẽn Yenoyanẽn tu mõg,
\v 42 ha kakxop yõg hãmyãxatamuk te 10 xixꞌ 2 mĩy, ꞌĩhã Yoneo xop yõg kakxop pit tuk tup mõg, tu Yenoyanẽn tuꞌ mõg, ꞌũyãy tak mũtik mõg, nũy ꞌãmuk xexka mĩy, nũy yãy yõg tikmũꞌũn mũtik mĩy, ha Yeyox mõg kamah,
\v 43 ha taꞌ mõg, tuꞌ pip, ha ꞌãmuk xexka mĩy, tu ꞌãmnĩy xohix hãꞌ mĩy, haꞌ kux, ha taꞌ mõg, tu yãy pet haꞌ mõg. ꞌAp Yeyox mõgꞌah, pãyãꞌ tak xixꞌ tut teꞌ yũmmũgꞌah,
\v 44 hu hãmpeꞌpaxex, hu: “Yeyox tek xape mũtik mõg.” Kaxĩy. Tuꞌ mõg ꞌãmnĩy puxet hãꞌ, tuk-tok pit xak, tuꞌ xape xop kopaꞌ xak, xixꞌ nõy xop kopaꞌ xak,
\v 45 pãyã ꞌaꞌ xipꞌah, ha putpuꞌ mõg Yenoyanẽn tuꞌ, nũy xax,
\v 46 tu ꞌãmnĩy tikoyuk hãꞌ xak, tuꞌ xipihiꞌ, ha Yeyox te Topa pet xexka kopaꞌ yũm, ha hãmyũmmũgã xop teꞌ xakot, ha Yeyox te hãmꞌãpak, tuꞌ yĩkopit,
\v 47 ha nõm xop te hãmꞌãpak hãꞌ yãnãn, tuꞌ yõg hãmꞌãktux kaꞌok ꞌãpak, yã hãmyũmmũg xexkah, yĩꞌ yẽy.
\v 48 Ha Yeyox mũk tak teꞌ pẽnãhãꞌ, xixꞌ tut, haꞌ yẽy, ha Mãnix te:
\p —‍Xõnnũꞌ, teptuꞌ mĩy xateꞌ? Pẽnãꞌ, ꞌãtak xik-mũn te ꞌãxak, yãk kuxa hittup ꞌohnãg xa tuꞌ. Kaxĩy.
\p
\v 49 Ha Yeyox te:
\p —‍Teptu ꞌãxop tek xak? Topa yã yõgnũ ꞌÃtak xeꞌeꞌ, yĩy ꞌãte yõgnũ ꞌÃtak pet xexka kopak xip. ꞌŨyũmmũg hok xateꞌ? Kaxĩy.
\p
\v 50 ꞌAꞌ tak tek-tok pit hãmꞌãktux yũmmũgꞌah, xixꞌ tut teꞌ yũmmũgꞌah.
\p
\v 51 Ha Yeyox mõg, ꞌũyãy tak mũtik mõg, xixꞌ tut mũtik mõg, tu taꞌ mõg tu mõktu kõmẽn Nãyane tuꞌ mõxahaꞌ, tu nõm puꞌ yĩpkox pip, haꞌ mũg tut te hãmpeꞌpaxex, tuꞌ xutĩgãhãꞌ.
\p
\v 52 Ha Yeyox tuk tu mõktu xexkah, tu hãmyũmmũg tu mõktu hãmyũmmũg xexkah, ha Topa tep-tup pax, xix tikmũꞌũn xohix tep-tup pax.
\c 3
\s Yoãm te Topa pupi hãmꞌãktux
\p
\v 1 Ha Hõm yõg tik te tikmũꞌũn xatꞌax yã ꞌãxetꞌax Timet Xex, tuꞌ xat hãmyãxatamuk xohix te 15 hã, ꞌĩhã Põn Pinat mũn te hãpxexka Yonex yõg tikmũꞌũn xat, ha ꞌEnot te hãpxexka Ganinet yõg tikmũꞌũn xat, haꞌ taknõy Pinip te hãpxexka ꞌItonet xix Tanakõnit yõg tikmũꞌũn xat, ꞌĩhã Nixãn te ꞌAminẽn yõg tikmũꞌũn xat.
\v 2 Tuꞌ xat ꞌĩhã ꞌAnãn yã Topa yõg ꞌãmãnex xexkah, xix Kaxpax kamah, ha Topa te Yoãm mõꞌkutnãhãꞌ, tu hãm panip xexka tu mõꞌkutnãhãꞌ, puyĩy Topa pupi hãmꞌãktux, ha Yoãm yã Yakanit kutok.
\v 3 Tuꞌ mõg, tu kõnãgkox xexka Yohnãm yĩkaꞌ mõg, tu hãmꞌãktux, tu Topa te hãmꞌãktux ꞌãktux, tu tikmũꞌũn puꞌ xuktux, tup-tox pix ꞌãktux, hu:
\p —‍ꞌÃpu yãyhãhup, nũy kummuk mĩy kux, ha ꞌãp-tox pix, pu Topa ꞌõg kummuk mĩyꞌax xaxogã, pu tu kux. Kaxĩy.
\p
\v 4 Hõmã mõnãyxop hittap ꞌIyait te Topa pupi hãmꞌãktux, tu tikmũꞌũn puꞌ xuktux, tu tappet tuꞌ kaxꞌãmiꞌ, hu:
\q “ꞌŨgꞌãpax. Tik yĩy kaꞌok, tu hãm panip xexka kopaꞌ yĩy kaꞌok, hu: ꞌÃpu Topa yõg putat max mĩy, tuꞌ yõg putat yoaꞌ,
\q
\v 5 yĩktix tu mõm yũm, haꞌ xut, nũy kox kotit kopa mõm tox yũm,
\q ꞌũkohe xit, nũy taꞌ yoaꞌ,
\q ꞌhãpkummuk xit tap, nũy ta tupmãꞌ.
\q
\v 6 Haꞌ hep xop xohix te nõm pẽnãp-tup,
\q Topa te nõm tik nũꞌkutnãp-tup,
\q pu tikmũꞌũn kuxa kummuk xit, nũy kuxa max tat ꞌũyãnãn tuꞌ.” Kaxĩy.
\p
\v 7 Ha hãpxexka yõg tikmũꞌũn punethok nũn nũktu Yoãm hah, puyĩy Yoãm putox pix, pãyãꞌ mãnõg, tu:
\p —‍ꞌÃxop yã kãyãk-tok xop putuk! ꞌÃkummuk! Pĩyãꞌ xat, xa nũ, nũy hãp kummuk mĩy tu kux, xayĩy xupmãn, ka Topa xatuꞌ gãy, hu ꞌãkummugã ꞌũyãnãn tuꞌ?
\v 8 ꞌÃpu yãyhãhup, tu ꞌõg hãpxopmã kummuk kux, nũy hãpxopmã max, pu tikmũꞌũn xohixꞌ pẽnãꞌ, nũy xate yãyhãhup yũmmũg, ha hãmpeꞌãpaxeh hok, hu: ꞌAmanãm mũn yã ꞌũgmũꞌã hã mõnãyxop, yĩy Topa tekmũg kummugãp-tupꞌah. Kaxĩy. Yãꞌ koit. ꞌÃte xa hãpxeꞌe ꞌãktux: Topa mũn yãꞌ kaꞌok, nũ mĩkaxxap hã ꞌAmanãm mõkputox xop mĩyꞌax!
\v 9 Mĩnta kup ꞌũm te mĩnta pip hok, puxix tikmũꞌũn ꞌũkup xax, tu kuxap kopa mõꞌpok, nũy mõꞌhap, ha kaxĩy Topa te nõm tikmũꞌũn pu hãpkummugãp-tup ꞌũyãnãn tuꞌ, yã hõnhãꞌ kummugãp-tup, haꞌ xũy xuxix tapax ꞌohnãg. ꞌÃpu hõnhã yãyhãhup, nũy hãpkummuk mĩy kux. Kaxĩy.
\p
\v 10 Ha tikmũꞌũn te Yoãm pu hãmꞌãktux, hu:
\p —‍Putep mĩyꞌax ꞌũgmũꞌũg? Kaxĩy.
\p
\v 11 Ha:
\p —‍Tikmũꞌũn xax 2 pip, pũyãꞌ koxip, nũy ꞌũnõy puꞌ xax nĩm, ꞌũnõy hok hõm. Ha tikmũꞌũn xitꞌax pip, pũyãꞌ koxip, nũy ꞌũnõy puꞌ hõm, ꞌũnõy hok puꞌ xitꞌax hõm. Kaxĩy.
\p
\v 12 Ha tik te Hõm yõg gohet pupi tayũmak pop, tuꞌ nũn, pup-tox pix, ha Yoãm pu hãmꞌãktux, hu:
\p —‍Notot, putep mũn mĩyꞌax ꞌũgmũꞌũg? Kaxĩy.
\p
\v 13 Ha:
\p —‍ꞌÕg kapitãm te ꞌãxop xat, ꞌãpuꞌ mĩy, tu nõm tayũmak pop puxehnãg, pãyã tayũmak te xexka nõy pop hok, ka tikmũꞌũn yõg tayũmak hã xupxet. Kaxĩy.
\p
\v 14 Ha xonat xop te kamaꞌ yĩkopit, hu:
\p —‍Putep mũn mĩyꞌax ꞌũgmũꞌũg? Kaxĩy.
\p Ha Yoãm te:
\p —‍ꞌÃnõy xop yõg tayumak mõy hok ꞌãgãy tuꞌ, tu kupex hãꞌ yõg tayũmak xut hok. ꞌÕg yãy yõg tayũmak paꞌ, ha puxiꞌ. Kaxĩy.
\p
\v 15 Ha ꞌIyaet yõg tikmũꞌũn teꞌ hip, ꞌĩhã Yoãm peꞌpaxex, hu: “ꞌOk nõꞌõm Kunnix? ꞌOk Topa te nõm yãykutnãhã xeꞌeꞌ?” Kaxĩy.
\v 16 Ha Yoãm te tikmũꞌũn pu hãmꞌãktux ꞌũxeheh, hu:
\p —‍ꞌÃte ꞌãp-tox pix, paꞌ nõy nũn putup, tuꞌ kaꞌok, hak mũn puꞌuk, tuk kopaxux hãk yũm putup, nũy tu pataxax koah, pãyãk-tõgnãg, huk yãyhãhup. Nõꞌõm te Topa Koxuk yĩxõnnãp-tup, puyĩy ꞌãkuxa kaꞌogãꞌ, nũy ꞌãkuxa kummuk tupmãꞌ, tuꞌ yĩpkox ꞌohnãg xop nõap-tup kuxap hã.
\v 17 Tu pẽnẽn paꞌ, nũy xap mõꞌpoꞌok, nũy xuxnãg xetox xap xeh miptut kopah, tuꞌ xux puk putup, tu kuxap hãꞌ puk putuk, ha nõm kuxap xok ꞌohnãg, yĩꞌ xũy xuxix tapax ꞌohnãg. Kaxĩy.
\p
\v 18 Tu hãmꞌãktux punethok, nũy tikmũꞌũn kaꞌogãꞌ, tu hãmꞌãpak max ꞌãktux.
\v 19 Pa Yoãm teꞌ xexka ꞌEnot mãnõg, yĩꞌ gãy. Hõmã ꞌEnot teꞌ taknõy xetut ꞌẼnonit mũg, ha Yoãm teꞌ yũmmũg, tu:
\p —‍ꞌÃmhok. Xate hãpxopmã kummuk! Topa tep-tup nõg, xix hãpxopmã kummuk xohix xateꞌ mĩy Topa tep-tup nõg. Kaxĩy.
\p Ha ꞌEnot gãy, tuꞌ xat puꞌ mũy, tu kanet kopaꞌ xix.
\v 20 Ha ꞌEnot te hãpxopmã kummuk tu mõktu xohix nõg nõy nãꞌ mõgãhãꞌ, tu Yoãm xix kanet kopah.
\s Yoãm te Yeyox putox pix
\p
\v 21 Yoãm te tikmũꞌũn xohip-tox pix, tu Yeyox putox pix kamah, ha Yeyox te Topa pu hãmꞌãktux, ꞌĩhã pexkox xõn,
\v 22 ha Topa Koxuk yĩxohoh Yeyox hah, putuxnãg putuk tuꞌ yĩxohoh, ha Topa yĩy, tu pexkox kopaꞌ yĩy, tu:
\p —‍ꞌÃmũn ꞌũgkutok, yã mõꞌãyãy xeꞌẽgnãg, yã xatek-kuxa hittupmãhãꞌ. Kaxĩy.
\s Yeyox yõg mõnãyxop xohix
\p
\v 23 Ha Yeyox yõg hãmyãxatamuk te 30, ha ꞌIyaet yõg tikmũꞌũn hãmpeꞌpaxex, hu: Nõꞌõm Yoye kutok, kaxĩy. Ha Yoye te ꞌEnix kutok,
\v 24 ha Mãtat kutok, ha Nemiꞌ kutok, ha Mãkix kutok, ha Yãnãy kutok, ha Yoye kutok,
\v 25 ha Mãtatit kutok, ha ꞌÃmõy kutok, ha Nãõm kutok, ha ꞌExnix kutok, ha Nãgax kutok,
\v 26 ha Mãt kutok, ha Mãtatit kutok, ha Xẽmẽy kutok, ha Yoye kutok, ha Yot kutok,
\v 27 ha Yoãnãg kutok, ha Hex kutok, ha Yonomameo kutok, ha Xanatit kutok, ha Nenix kutok,
\v 28 ha Mẽkix kutok, ha ꞌAnix kutok, ha Koxãg kutok, ha ꞌEnmãnão kutok, ha ꞌEh kutok,
\v 29 ha Yoyoeꞌ kutok, ha ꞌEniex kutok, ha Yõy kutok, ha Mãtat kutok, ha Nemiꞌ kutok,
\v 30 ha Ximeãm kutok, ha Yona kutok, ha Yoye kutok, ha Yonãg kutok, ha ꞌEnitkĩy kutok,
\v 31 ha Mẽneaꞌ kutok, ha Mẽnãꞌ kutok, ha Mãtat kutok, ha Nãtãg kutok, ha Namix kutok,
\v 32 ha Yexeꞌ kutok, ha ꞌOmet kutok, ha Moax kutok, ha Xat kutok, ha Nãxõg kutok,
\v 33 ha ꞌÃmĩnanap kutok, ha ꞌAtmĩy kutok, ha ꞌAhnĩy kutok, ha ꞌExnõg kutok, ha Pet kutok, ha Yonah kutok,
\v 34 ha Yakoꞌ kutok, ha ꞌIyak kutok, ha ꞌAmãm kutok, ha Tet kutok, ha Nãkoh kutok,
\v 35 ha Xenok kutok, ha Hagaꞌok kutok, ha Panek kutok, ha ꞌEp kutok, ha Xat kutok,
\v 36 ha Kaxnãg kutok, ꞌAhpaxat kutok, ha Xẽy kutok, ha Nõeꞌ kutok, ha Namẽk kutok,
\v 37 ha Mẽtoyãnẽg kutok, ha ꞌẼnõk kutok, ha Yanet kutok, ha Mãneneo kutok, ha Kaxnãg kutok,
\v 38 ha ꞌEnõy kutok, ha Xet kutok, ha ꞌAnão kutok, ha Topak-tok.
\c 4
\s Yeyox te hãm panip xexka tuꞌ xip
\p
\v 1 Ha Topa Koxuk te Yeyox kuxa kaꞌogãhãꞌ, haꞌ xip kõnãg xexka Yohnãm tuꞌ, ha Topa Koxuk teꞌ mõgãhãꞌ, ha taꞌ mõg tu mõktu hãm panip xexka tuꞌ xupep,
\v 2 ha Hãmgãyãgnãg te Yeyox xapit puyĩy hãpxopmã kummuk, ꞌãmnĩy te 40 hãꞌ xapit, ha Yeyox xit ꞌohnãg, ha putup tep-tex,
\v 3 yĩy Hãmgãyãgnãg te:
\p —‍ꞌOk ꞌãmũn yã Topak-tok xeꞌeꞌ? Pax xa Topa hã ꞌãktok, ꞌãpuꞌ xat, pu nũhũ mĩkaxxap yãyhã pãm, xayĩꞌ mã, nũy ꞌãhiꞌ. Kaxĩy.
\p
\v 4 Pa Yeyox te:
\p —‍ꞌAp xat putupꞌah ꞌãteꞌ. Yã Topa tappet te: “ꞌA tikmũꞌũn kuxa te pãm puxet hãꞌ hiꞌah, yã pãm puxet hãꞌ kuxa hi ꞌohnãg.” Kaxĩy.
\p
\v 5 Ha Hãmgãyãgnãg te Yeyox mõgãhã yĩktix yĩmũꞌ, tu hãm xexka xohix tuꞌ mũg,
\v 6 tu:
\p —‍Hãm xexka xohix ꞌãte xaꞌ hõmꞌax xix tayũmak xohix xaꞌ hõmꞌax, xaꞌ xat tikmũꞌũn xohix, ꞌũgmũn te hãm xexka yõg xop xohix xat hah, yã hãm xexka xohix yõgnũ, hu ꞌãte xaꞌ hõmꞌax.
\v 7 ꞌÃkopaxux hãꞌ nũꞌ ꞌãxup ꞌũgmũn puꞌ, xik mũn xexka ꞌãktux, hata hãm xexka xohix ꞌognũꞌ! Kaxĩy.
\p
\v 8 Pa Yeyox te:
\p —‍ꞌA nũk xup putupꞌah. Topa tappet te: “Topa tu nũ ꞌãxup, tu nõm tu hãpxopmãꞌ. ꞌŨnõy tu nũ ꞌãxup hok, nũy nõm pu ꞌãyĩpkox pip hok.” Kaxĩy.
\p
\v 9 Ha Hãmgãyãgnãg te kõmẽn Yenoyanẽn haꞌ mõgãhãꞌ, tu Topa pet xexka tuꞌ mõgãhãꞌ, tuꞌ mõg tu mõktu Topa pet xexka yĩmũꞌ pip, tu:
\p —‍Pax xa yã Topa-tok xeꞌeꞌ, ꞌãpu, mõꞌãyõn, nũy hahãm tutnãy.
\v 10 Yã Topa yõg tappet te: “Topa te pexkox yõg xop nũꞌ pokꞌax ꞌãha, puyĩy ꞌãpẽna max, ka mĩkaxxap hã ꞌãpata xũy.” Kaxĩy.
\v 11 Topa tappet te xe hãmꞌãktux, hu: “Pexkox yõg nũꞌpok xop te ꞌãtatꞌax yãy yĩm hã, xayĩy ꞌãpata xũy hok mĩkaxxap tuꞌ.” Kaxĩy.
\p
\v 12 Ha Yeyox te:
\p —‍Topa yõg tappet te: “ꞌÕgnũ Topa hã hãpkuteꞌex hã gãyã hok.” Kaxĩy.
\p
\v 13 Ha Hãmgãyãgnãg teꞌ xapit kux, huꞌ mõg, tu Yeyox nĩm nõmhã.
\s Yeyox mõg hapxexka Ganinet tuꞌ, tu hãpxopmã kõnãmãhãꞌ
\p
\v 14 Ha Yeyox mõg, tu ta putpuꞌ mõg, Ganinet tuꞌ, tu mõktu xupep, ha Topa Koxuk teꞌ kaꞌogãhãꞌ, ha tikmũꞌũn te Yeyox ꞌãktux hãpxexka xohix tuꞌ,
\v 15 ha Yoneo yõg Topa pet kopa hãmyũmmũgãhãꞌ, ha tikmũꞌũn xohix te nõm ꞌãktux max.
\s Yeyox xip kõmẽn Nãyane tuꞌ
\p
\v 16 Ha Yeyox mõg, tu ta tuꞌ mõg, tu mõktu kõmẽn Nãyane tuꞌ xupep, tu yãy yõg hãm tuꞌ xupep, tu nit xap xohix ꞌĩhãꞌ mõg, tu Topa pet haꞌ mõg, tu hõnhãꞌ mõg, tu mõktu xupep, tu mõꞌnãhãꞌ, tuknĩhãꞌ xip, nũy Topa tappet mõꞌkupix,
\v 17 ha tik te mõnãyxop hittap ꞌIyait yõg tappet pahaꞌ, tu Yeyox puꞌ hõm, pu mõꞌkupix. Hõmã ꞌIyait te Topa pupi hãmꞌãktux, tu tappet tuꞌ kaxꞌãmi, ha hõnhã Yeyox te tappet pahaꞌ, tu hãmꞌãktux xak tappet kopah, tuꞌ xipihiꞌ, tu mõꞌkupix, hu:
\q
\v 18 “Topa Koxuk tek mũn kaꞌogãhãꞌ, tuk yãykutnãhãꞌ, ꞌũ hãmꞌãpak max ꞌãktux,
\q ꞌũ ꞌhok xop pu hãmꞌãktux, hak mũn tuꞌ xat, ꞌũ kanet kopaꞌ pip xop pu hãmꞌãktux, hu:
\q “Topa te kanet xõn xa ꞌãmõg.” Kaxĩy.
\q Hak mũn nũgkutnãhã ꞌũpa hok xop puꞌ,
\q ꞌũ hãmꞌãktux, pu hãmpẽnã max. Kaxĩy.
\q Ha nũgkutnãhã ꞌũ kuxa hittup ꞌohnãg xop pu hãmꞌãktux, hu: ꞌŨnĩm, ꞌũkummuk xop nĩm. Kaxĩy.
\q
\v 19 Yã hõnhã Topa te tikmũꞌũn mõꞌyãy xeꞌẽgnãg,
\q tu hãpxopmã max tikmũꞌũn puꞌ, tu ꞌkuxa kummuk xit,
\q nũy kuxa max tat ũyãnãn tuꞌ.”
\q Ta tuꞌ kux. Kaxĩy.
\p
\v 20 Ha Yeyox mõꞌkupix kux, tu tappet mõꞌxex, tu Topa pet yõg tik puꞌ hõm, tuꞌ yũm, ha tikmũꞌũn xohix teꞌ pẽnã kaꞌok,
\v 21 ha Yeyox te:
\p —‍ꞌÃxop te Topa te hãmꞌãktux ꞌãpak, ꞌãte xa mõꞌkupix nõmhã, yã hõmã Topa teꞌ xuktux, tuk mũn ꞌãktux, tu Topa tappet hã ꞌũgmũn ꞌãktux, yã hõnhãk nũn. Kaxĩy.
\p
\v 22 Ha tikmũꞌũn xohix teꞌ xupak, tuꞌ yẽy, tu Yeyox ꞌãktux max, hãmꞌãktux max hah, tu:
\p —‍ꞌOk hamũn yã Yoye kutok pit? Yamũn. Kaxĩy.
\p
\v 23 Ha Yeyox te:
\p —‍Pe ꞌãxop tekmũn pu hãmꞌãktuxꞌax, tu tikmũꞌũn yãy yõg hãmꞌãktux hãꞌ xuktuxꞌax, hu: Notot, ꞌõg yãy yõg hehmẽn xoꞌop. Kaxĩy. Tu xeꞌ: Xate hãpxopmã kaꞌok xeꞌẽgnãg kõmẽn Kapãnãn kopah. ꞌÃpu, ꞌõg kõmẽn kopaꞌ mĩy kamah. Kaxĩy.
\p
\v 24 Tu xe hãmꞌãktux, hu:
\p —‍ꞌÃte xa hãpxeꞌe ꞌãktux: Tikmũꞌũn xohix te Topa yõg tik xop putup pax, nõm te Topa pupi hãmꞌãktux, pãyã yãy xape ꞌũm putup nõg, xix nõm xop te kõmẽn kopa tihi tep-tup nõg, ꞌĩhã nõm tik te Topa pupi hãmꞌãktux.
\v 25 ꞌÃte xa hãpxeꞌe ꞌãktux: Hõmã ꞌũn hok mãm punethok hãpxexka ꞌIyaet kopah, ꞌĩhã mõnãyxop hittap ꞌEnit te Topa pupi hãmꞌãktux, yã ꞌIyaet yõg tihik, ha tehex ꞌohnãg, yã hãmyãxatamuk tikoyuk hã hãmhõgnãg,
\v 26 pa Topa te nũ ꞌEnit kutnã ꞌohnãg ꞌIyaet yõg hãpxexka tuꞌ, tu ꞌIyaet yõg ꞌũn hok mãm ha nũꞌkutnã ꞌohnãg. ꞌÃmhok. Topa teꞌ puknõg ꞌũn hok yũm hah mõꞌkutnãhãꞌ, tu kõmẽn Xanep yõg ꞌũn ha mõꞌkutnãhãꞌ, ha Xanep te hãpxexka puknõg Xinõm tuꞌ yũm,
\v 27 ha ꞌIyaet yõg tikmũꞌũn yãy xax kunut punethok, ꞌĩhã mõnãyxop ꞌEniyeo te Topa pupi hãmꞌãktux, tu ꞌIyaet yõg tihik kamah, pa Topa te nõm hittupmã ꞌohnãg. ꞌÃmhok. Pa hãpxexka Xit yõg tik puknõg ꞌãxetꞌax Naamã, tu yãy xax kunut nãm, ha Topa teꞌ hittupmãhãꞌ. Hamũn. Kaxĩy.
\p
\v 28 Ha tikmũꞌũn teꞌ xupak, huꞌ gãy,
\v 29 tuknĩhaꞌ pip, tu Yeyox mũg, tuꞌ yĩkũy, tu kõmẽn kũnãpa hãꞌ yĩkũy, tu yĩktix pepiꞌ mõgãhãꞌ, ha kõmẽn te yĩktix yĩmũꞌ yũm, ha tikmũꞌũn te hãm tu Yeyox putyõn putup.
\v 30 Pãyã Yeyox te tikmũꞌũn xop kotit hãꞌ mõg, tuꞌ mõg, tuꞌ xupahaꞌ,
\s Yãmĩy kummuk te tik kummugãhãꞌ
\p
\v 31 Tu taꞌ mõg tu mõktu kõmẽn Kapãnãn tuꞌ xupep, ha Kapãnãn te hãpxexka Ganinet kopaꞌ yũm, ha Yeyox te tikmũꞌũn yũmmũgãhãꞌ, nit xap ꞌĩhãꞌ yũmmũgãhãꞌ,
\v 32 ha tikmũꞌũn kuxãnõg, Yeyox te hãmyũmmũgã hah. Tikmũꞌũn xexka xop te hãmꞌãktux kaꞌok, ha kaxĩy Yeyox te hãmꞌãktux kaꞌok kamah, ꞌũxatꞌax tuꞌ.
\v 33 Ha tik xip, tu Topa pet kopaꞌ xip, ha yãmĩy kummuk te tik kopaꞌ xip, yĩy tik yĩy kaꞌok, tu:
\p
\v 34 —‍Nãyane yõg Yeyox, ꞌok xatek mũp-tex putup? ꞌÃte ꞌãyũmmũg. ꞌÃmũn yã Topa yõg nũꞌkutnãꞌax xeꞌeꞌ! Kaxĩy.
\p
\v 35 Ha Yeyox teꞌ mãnõg, tu:
\p —‍ꞌÃyĩy hok, nũy tik nĩm, nũy ꞌãpep! Kaxĩy.
\p Ha yãmĩy kummuk te mõ tik yõn hãm tuꞌ, tuꞌ xupep, tu tik xũygã ꞌohnãg,
\v 36 ha tikmũꞌũn xohix kuxãnõg, tuꞌ yẽy, tuꞌ nõy pu hãmꞌãktux, hu:
\p —‍Hãmꞌãktux ꞌũm nũhũꞌ? Yeyox te yãmĩy xat, tuꞌ xupepmãhãꞌ, yãy yõg hãmꞌãktuxꞌax hãꞌ xupepmãhãꞌ, tik te tikmũꞌũn xatꞌax putuk. Kaxĩy.
\p
\v 37 Ha tikmũꞌũn te Yeyox ꞌãktux punethok, tu kõmẽn Kapãnãm yĩkaꞌ xuktux,
\s Yeyox te tikmũꞌũn punethok hittupmãhãꞌ
\p
\v 38 Ha Topa pet tuꞌ xip, tu taꞌ mõg tu mõktu Xĩmãm pet tuꞌ xupep, haꞌ xetut mũg tut pakut, tuꞌ xax pukpex nãm, ha Yeyox tuꞌ xak pu tu hittupmãꞌ,
\v 39 yĩyꞌ mõg, tu mĩmpe yĩkaꞌ xip, tuꞌ xat pu tu xax ꞌãxiꞌ, ha xuxiꞌ, ha ꞌũn yok, tuknĩhãꞌ xip, tu hãpxop xitꞌax puk.
\p
\v 40 Ha mãyõn mõꞌnãhã ꞌĩhã tikmũꞌũn te pakut xop popnũn Yeyox hah, haꞌ xape xop te tikmũꞌũn pakut popnũn, ha Yeyox te pakut xop yĩmũꞌ yĩm nõm, tuꞌ xohix hittupmãhãꞌ,
\v 41 tu yãmĩy kummuk xop xupepmãnãm, haꞌ yĩy kaꞌok, tu:
\p —‍ꞌÃmũn yã Topak-tok xeꞌeꞌ! Kaxĩy.
\p Ha Yeyox teꞌ xat, hu:
\p —‍ꞌÃyĩy hok! Kaxĩy.
\p Tuꞌ tux hok pu hãmꞌãktux hok, yãmĩy kummuk te Yeyox yũmmũg hah, tu Yeyox yã Kunnix yũmmũg, yã Topa teꞌ yãykutnãhã xeꞌe, haꞌ yũmmũg, yĩy Yeyox teꞌ tux hok pu yĩy hok.
\s Yeyox te hãmꞌãpak maxꞌax ꞌãktux
\p
\v 42 Hãptup ꞌĩhã Yeyox te kõmẽn kopaꞌ xip, tu taꞌ mõg tu mõktu hãm panip tuꞌ xupep, ha tikmũꞌũn teꞌ xak, tuꞌ xipihiꞌ, tu:
\p —‍ꞌÃmõg hok ꞌũxeheh! Kaxĩy.
\p
\v 43 Pãyã Yeyox te:
\p —‍Topa te nũgkutnãhã pu hãmꞌãpak max ꞌãktux, puyĩy Topa yõg hãmꞌãktux puꞌ yĩpkox piꞌ, yã Topa te tikmũꞌũn xat xeꞌẽgnãg, ha kõmẽn nõy yõg tikmũꞌũn pu ꞌãteꞌ xuktux putup, huk mõg. Kaxĩy.
\p
\v 44 Tu taꞌ mõg, tu ꞌIyaet yõg hãpxexka Ganinet ha hãpkumep, tu Yoneo yõg Topa pet haꞌ mõg, tu hãmꞌãpak max ꞌãktux Topa pet kopah.
\c 5
\s Yeyox te yãy yõg tik xop yĩmõgatux
\p
\v 1 ꞌÃmnĩy ꞌũm ꞌĩhã Yeyox te kõnãg xexka Gẽnẽyane yõg hãpkux tuꞌ xip, tu hãmꞌãktux, ha tikmũꞌũn punethok pip, tuꞌ xupak xũy, hu Yeyox yĩkãgnãg hãꞌ pip, nũy xupak max,
\v 2 ha Yeyox teꞌ pẽnãhãꞌ, tu kõnãg tu mĩpkox hãꞌ mõg pẽnãhãꞌ, tu nõm mĩpkox 2 pẽnãhãꞌ, ha tikmũꞌũn te mĩpkox hã mõxakux, nũy kõnãg yĩmũ mõg, nũy mãpxamut, tuꞌ nĩm nõmhã, nũy mãpxamutꞌax pix,
\v 3 ha Yeyox mõg, tu mĩpkox kopaꞌ yũm, tu Xĩmãm yõg mĩpkox kopaꞌ yũm, tu Xĩmãm tuꞌ xak, pu mĩpkox te kõnãg xet hãꞌ mõg kutõgnãg. Haꞌ mõg, ha Yeyox te tikmũꞌũn yũmmũgãhãꞌ.
\p
\v 4 Tu hãmyũmmũgã kux, tu Xĩmãm puꞌ:
\p —‍Mõg, kõnãg xexka tuꞌ mõg, xayĩy mãm pop, pu ꞌãxape xop mãpxamut. Kaxĩy.
\p
\v 5 Ha:
\p —‍Yãyãꞌ, ꞌãmnĩy tox hãk mũg mãm xut ꞌohnãg, pãyã xateꞌ xat, yĩk mũꞌãte mãpxamutꞌax putyõn kõnãg kopah. Kaxĩy.
\p
\v 6 Tuꞌ mĩy, tu mãm xohix punethok pop, mãpxamut huꞌ pop, ha mãm putux haꞌ koxyõy,
\v 7 yĩyꞌ xape xop xãnãhãꞌ, pu mõꞌnĩynãm, ha mõꞌnĩynãm, tu mãm pop, tu mĩpkox nõy te kõnãg yĩmũꞌ mõg kopaꞌ xex, ha mĩpkox putux nãm, yĩy mõꞌnãhã ꞌũptux hah.
\v 8 Ha Xĩmãm teꞌ pẽnãhãꞌ, ꞌĩhãꞌ kopaxux hãꞌ nãhãꞌ, nũy Yeyox keppah ꞌũxup, tu:
\p —‍Yãyã, ꞌãmõg, tuk nĩm, ꞌũgkummuk hah! Kaxĩy.
\p
\v 9 Tu kuxãnõg, xiꞌ xape xop kuxãnõg mãpxamut xexka hah,
\v 10 ha Yemeneo kutok Tiak xiꞌ taknõy Yoãm, tu kuxãnõg kamah, tu Xĩmãm mũtik mãm pop, ha Yeyox te Pet pu hãmꞌãktux, hu:
\p —‍ꞌÃkuxãnõg hok. Hõmã xate mãm pop. Hõnhã xix hãptup ꞌĩhã xate tikmũꞌũn nũnnãp-tup pax ꞌũgmũn hah. Kaxĩy.
\p
\v 11 Ha mĩpkox yĩkũy, tu hãpkux haꞌ yĩkũy, tuꞌ nĩm, tu ta Yeyox mũtik mõg.
\s Yeyox te tik xax tapmãhãꞌ
\p
\v 12 Ha ꞌãmnĩy ꞌũm ꞌĩhã Yeyox te kõmẽn ꞌũm tuꞌ xip, ha tik xip, yã yãy xax kunut, tu Yeyox pẽnãhãꞌ, tuꞌ kopaxux haꞌ nãhãꞌ, tu:
\p —‍Notot, ꞌok xatek putup ꞌũghittupmãꞌ? Kaxĩy.
\p
\v 13 Ha Yeyox te yãy yĩm yok, tuꞌ xupit, tu:
\p —‍ꞌÃte ꞌãp-tup, ꞌãhittup. Kaxĩy.
\p Hãpxip ꞌohnãg ꞌĩhã tik hittup, haꞌ xax tup.
\v 14 Ha Yeyox teꞌ xat, hu:
\p —‍Tik ꞌũm pu ꞌĩy hok, pa mõg ꞌãmãnex hah, pu ꞌãxax pẽnãꞌ, ha xokxop ꞌũm Topa pu mõꞌhap. Hõmã Mõyyex teꞌ xat, ha tikmũꞌũn xohix teꞌ yũmmũgꞌax, tu Topa te ꞌãhittupmã yũmmũgꞌax. Kaxĩy.
\p
\v 15 Pãyã tikmũꞌũn xohix teꞌ xupak, tuꞌ nũn, pu Yeyox yõg hãmꞌãktux ꞌãpax, pu Yeyox hittupmãꞌ,
\v 16 pãyã Yeyox mõg, tu hãm panip xexka haꞌ mõg, nũy Topa pu hãmꞌãktux.
\s Yeyox te tik te hãpkumep hok hittupmãhãꞌ
\p
\v 17 ꞌÃmnĩy nõy ꞌĩhã Yoneo yõg Paniye xop, xix hãmyũmmũg xop te hãpxexka Ganinet yõg kõmẽn xohix tuꞌ pip, xix hãpxexka Yonex yõg kõmẽn xohix tuꞌ pip, xix kõmẽn Yenoyanẽn tuꞌ pip, tuꞌ nũn tu nũktu mõxaha mĩptut tuꞌ, tuꞌ mãm, nũy Yeyox ꞌãpax, ha tikmũꞌũn yũmmũgãhãꞌ, ha Topa te Yeyox kaꞌogãhã pu pakut xop hittupmãꞌ,
\v 18 ha tik xop nõy nũn, tu tik pakut tat, tu tutpe hã tat, yã tik te hãpkumep hok, haꞌ nũn tu nũktu mõxaha mĩptut tuꞌ, tu mõxakux putup, nũy tik pi Yeyox keppaꞌ, pãyã mĩptut nũꞌxip,
\v 19 tuꞌ xak, pãyãꞌ mõxa ꞌohnãg, hu mĩptut tu pepiꞌ mõg, tu hãpxax mõy, tu tik pakut te hãm tuꞌ nãhãꞌ, tu mĩptut kopaꞌ nãhãꞌ, ha Yeyox keppaꞌ pip,
\v 20 haꞌ pẽnãhãꞌ, haꞌ kuxa mãm kaꞌok Yeyox kopah, yĩy tik pakut pu hãmꞌãktux, hu:
\p —‍ꞌÃmũn, ꞌãte xa hãmꞌãktux, Topa te ꞌõg hãpkummuk mĩyꞌax xaxogãhãꞌ, pu tuꞌ kux. Kaxĩy.
\p
\v 21 Ha hãmyũmmũg xop xix Paniye xop tep-tup nõg, tu hãmꞌãktux hãꞌ nõy yãnãn, tuꞌ yãy pu yĩkopit, hu:
\p —‍Tik ꞌũm ꞌõhõm? Topap-xehnãg te hãpkummuk mĩyꞌax xaxogã ꞌãktux, pãyã Yeyox te yãy ꞌãktux, hu Topa ꞌãktux kummugãhãꞌ. Tik ꞌũm ꞌõhõm? Kaxĩy.
\p
\v 22 Ha Yeyox teꞌ yũmmũg, tu hãmpeꞌpaxex yũmmũg, hu:
\p —‍Putep mũn tu ꞌãpeꞌãpaxex ꞌãkuxa kopah?
\v 23 Piꞌya xatep-tup, pe ꞌãte mĩyꞌax kummuk xaxogã ꞌãktux, pe ꞌãteꞌ kup yok, nũy hãpkumep ꞌãktux. Piꞌya xatep-tup?
\v 24 ꞌÃte xa hãmꞌãktux, xa hãmyũmmũg. ꞌŨgmũn yã tikmũꞌũn kutok pit. ꞌŨgkaꞌok, ha Topa teꞌ yãy ꞌãxetꞌax hõm ꞌãꞌ, ꞌũyĩy hãpkummuk mĩyꞌax xaxogã ꞌãktux. ꞌĨy hok, nũy tak ꞌãpax. Kaxĩy.
\p Tu tik te hãpkumep hok pu:
\p —‍ꞌÃyok, nũy ꞌãgnĩhãxip, tutpe tu pepiꞌ xup, nũy ꞌãpet ha mõg. Kaxĩy. Tuꞌ xatꞌax hã hittupmãhãꞌ.
\p
\v 25 Ha hãpxip ꞌohnãg ꞌĩhãꞌ yok, tuknĩhaꞌ xip, tu tutpe pepiꞌ xup, tu yãy pet haꞌ mõg, tu Topa max ꞌãktux.
\v 26 Ha tikmũꞌũn kuxãnõg, tu Topa max ꞌãktux, hu:
\p —‍Hõnhã yũmũꞌãte hãpxopmã max xeꞌẽgnãg pẽnãhãꞌ! Kaxĩy.
\s Yeyox xix Nemix
\p
\v 27 Ha taꞌ mõg, Yeyox mõg, tu tik nõy pẽnãhãꞌ, ha tik te gohet pupi tikmũꞌũn yõg tayũmak pop, tuꞌ xuxetꞌax Nemix, tu gohet yõg pet kopaꞌ yũm, ha Yeyox te nõm pu:
\p —‍ꞌŨkpe mõg. Kaxĩy.
\p
\v 28 Haꞌ yok, tuknĩhãꞌxip, tu hãpxop xohix nĩm, nũy Yeyox mũtik mõg.
\v 29 Tu ꞌãmuk xexka mĩy yãy pet tuꞌ, Yeyox tuꞌ mĩy, ha tik punethok pip, tu gohet pupi tayũmak pop, tu mĩmpe xitꞌax yĩmap mãm,
\v 30 ha Paniye xop tep-tup nõg, xix hãmyũmmũg xop tep-tup nõg kamah, tu tik xop yĩkopit, nõm xop te Yeyox mũtik hãpkumep xop, hu:
\p —‍Tep tu ꞌãxit nõm tayũmak pop xop mũtik, xix tik kummuk xop mũtik xit? Kaxĩy.
\p
\v 31 Ha Yeyox teꞌ xupak, hu:
\p —‍Tikmũꞌũn hittup xop ꞌaꞌ hehmẽn putupꞌah, ꞌap notot xãnãꞌah, pãyã pakut xop mũn te hehmẽn putup, hu notot xãnãhãꞌ.
\v 32 Ha kaxĩy ꞌũgnũn nũy tikmũꞌũn kummuk xop xãnãꞌ, pu nũꞌ, nũy yãyhãhup, nũy hãpkummuk mĩyꞌax nĩm, pãyã tikmũꞌũn ꞌũm te yãy peꞌpaxex, hu: “ꞌŨgmax.” Kaxĩy. ꞌA ꞌãte xop xãnãꞌah pu nũꞌ. Kaxĩy.
\s Yeyox teꞌ xit hok ꞌãktux
\p
\v 33 Ha tikmũꞌũn te:
\p —‍Tik xop te Yoãm mũtik hãpkumep, Yoãm nõm tep-tox pix, ha ꞌãmnĩy punethok hãꞌ xit hok, nũy Topa pu hãmꞌãktux, ha Paniye xop yõg mũtik hãpkumep xop xit hok kamah, pãyã ꞌõg tik xop xit hokꞌah, xiꞌ xoꞌop. Kaxĩy.
\p
\v 34 Ha Yeyox te hãmyũmmũgãhãꞌ, nũy Topa yõg hãpxopmãꞌax yũmmũgãꞌ, tu:
\p —‍Tik te yãytahaꞌ, haꞌ xape xop hittup, tu ꞌãmuk xexka mĩy, haꞌ xape xop xit punethok, ꞌĩhãꞌ xip, ꞌĩhã tik te yãytaꞌ xip,
\v 35 pãyã hãpxip ꞌĩhã tik nõy te nõm mõgãhãꞌ, haꞌ mõg, ꞌĩhãꞌ xape xop kuxa teknõg, tuꞌ xit ꞌohnãg. ꞌŨgmõg, puxix yõg tik xop xit hok kamah. Kaxĩy.
\v 36 Tu xe hãmyũmmũgãhãꞌ, tu hãmꞌãktuxꞌax hã hãmyũmmũgãhãꞌ, nũy Topa yõg hãpxopmãꞌax ꞌãktux, tu hãmꞌãpakꞌax tup ꞌãktux, hu:
\p —‍Tikmũꞌũn xax kunox. ꞌOk ꞌũn te ta tu mõꞌyãg nõm, tu ꞌũn ꞌũm tuꞌ yãg tup pahaꞌ, pu tu xax kunox tu mõꞌxeh? ꞌAp paꞌah. Topixxax tup kaꞌok, haꞌ xax kunox puꞌuk, tu yãy potꞌax. Kaxĩy Yoãm yõg tik xop te mõnãyxop yõg hãpxopmãꞌax hittap tat, ha yõg tik xop te yõgnũ hãpxopmãꞌax tat, yã hãpxopmãꞌax tup tat.
\v 37 Ha tikmũꞌũn teꞌ hep xupyãg mĩy, tu xokxax tup hãꞌ xuk, pãyã ꞌũ ꞌũm te xupyãg tup xuk, tu xokxax kutut hãꞌ xuk? Yãmhok. Xokxax tup kaꞌok, haꞌ xax kutut puꞌuk, tuꞌ yãy potꞌax, ha xupyãg nũꞌnãꞌax, tu mõktu nõg,
\v 38 yĩy tik teꞌ hep xupyãg tup mĩy, mũy xokxax tup hãꞌ xuk.
\v 39 Ha tik te xupyãg kutut putup, tu taꞌ hep tup putup nõg, tu: “Nõm kutut nõm ꞌũmax. ꞌAꞌ tup maxꞌah.” Kaxĩy Yoãm yõg tik xop te hãpxopmãꞌax hittap tat putup, tu nõm tup putup nõg. Ta tuꞌ kux. Kaxĩy.
\c 6
\s Yeyox te nit xap ꞌãktux
\p
\v 1 ꞌNit xap te Yoneo yõg tikmũꞌũn hã hãptup xeꞌeꞌ, ha nit xap ꞌũm ꞌĩhã Yeyox hãpkumep, tu hãpxop yãy koxuk mep, ha xuxnãg xetox taꞌ, xiꞌ xap teꞌ kopaꞌ xip, ha tik xop te Yeyox mũtik hãpkumep, tuꞌ xap mõy, tuꞌ xap yõg xax nak mõy, tuꞌ yĩm hã kuyõnnãhãꞌ, tuꞌ xap xut, tuꞌ mãhãꞌ.
\v 2 Ha Paniye xop pip, tuꞌ yĩkopit, hu:
\p —‍Tep tu xate xuxnãg ta xetox xap mõy nit xap ꞌĩhãꞌ? Mõnãyxop hittap Mõyyex teꞌ xat hok pu yũmũg xut hok nit xap ꞌĩhãꞌ. Nõꞌõm yã Topa yõg hãptup xeꞌeꞌ. Kaxĩy.
\p
\v 3 Ha Yeyox te:
\p —‍ꞌOk ꞌãxop mõꞌkupix Topa yõg tappet? Hõmã putup te mõnãyxop hittap Namix putex, xix tik xop te Namix mũtik hãpkumep kix kamah,
\v 4 tu Topa pet xexka hã mõꞌnãhãꞌ, tu pãm pop, ha pãm te Topa keppaꞌ mãm, ha Topa teꞌ tux hok pu tikmũꞌũn nõm mã hok, ꞌãmãnex xop yãp-xet teꞌ mãhãꞌ, pãyã mõnãyxop hittap Namix teꞌ mãhãꞌ, tu nõm xop te mũtik hãpkumep puꞌ popmãhãꞌ, haꞌ mãhãꞌ. ꞌŨkux. Kaxĩy.
\p
\v 5 Tu xeꞌ:
\p —‍ꞌŨgmũn yã Tikmũꞌũn Kutok, hu nit xap xohix hãk xuxyãꞌ. Kaxĩy.
\s Tik yĩm xeꞌe nĩãꞌ
\p
\v 6 Ha nit xap nõy ꞌĩhã Yeyox te Topa pet haꞌ mõg, tuꞌ mõg, tu mõktu xupep Topa pet tuꞌ, tu mõꞌnãhãꞌ, tu hãmyũmmũgãhãꞌ, ha tik ꞌũm xip, haꞌ yĩm xeꞌe nĩãꞌ, tuꞌ puꞌũgnãg,
\v 7 ha tik xop te hãmyũmmũg teꞌ pẽnãhãꞌ, xix Paniye xop teꞌ pẽnãhãꞌ, nũy Yeyox pẽnãꞌ, nũy tik hittupmã pẽnãꞌ, ꞌok pe nit xap ꞌĩhãꞌ hittupmãꞌ, pu Yeyox kupeh,
\v 8 pãyã Yeyox te nõm peꞌpaxex yũmmũg, hu tik te yĩm nĩãꞌ pu hãmꞌãktux, hu:
\p —‍ꞌÃyok, nũy ꞌãꞌkihãxip, pu tikmũꞌũn ꞌãxakot. Kaxĩy.
\p Haꞌ yok, tuk-nĩhãꞌxip,
\v 9 ha Yeyox te:
\p —‍ꞌÃte ꞌãyĩkopit, putep xat Mõnãyxop Mõyyex? Mõyyex te putep tux hok pu mĩy hok nit xap hã? ꞌOk xat pu hãpxopmã max, ꞌok pe hãpxop mã kummuk? ꞌOk xat pu tik kõnãg kopa tuꞌ xut pu tu xok hok, pe tik nĩm pu tu xok? Kaxĩy.
\p
\v 10 Tuꞌ pẽnã kaꞌok, tu tikmũꞌũn yĩmmap xop pẽnã kaꞌok, tu tik yĩm nĩã pu hãmꞌãktux, hu:
\p —‍ꞌĨm yoah. Kaxĩy.
\p Haꞌ yok, haꞌ hittupmãhãꞌ.
\v 11 Ha tikmũꞌũn xexka xop gãy, tu hãmꞌãktux hãꞌ nõy yãnãn, tu Yeyox kummugãp-tup ꞌãktux.
\s Yeyox te yãy yõg tik xop te 12 yĩmõgatux
\p
\v 12 Ha ꞌãmnĩy ꞌũm ꞌĩhã Yeyox te yĩktix tox tuꞌ mõkãnĩn haꞌ mõg, nũy Topa pu hãmꞌãktux, ha ꞌãmnĩy tox hã Topa pu hãmꞌãktux.
\v 13 Ha hãptup, tu tik te mũtik hãpkumep xop xãnãhãꞌ, tu tik te 12 yĩmõgãtux nũy mõꞌpok, tuꞌ xuxetꞌax mĩy yãy yõg mõꞌpok xop. Kaxĩy.
\v 14 Haꞌ xohix te: Xĩmãm, ꞌũxuxetꞌax nõy Pet xixꞌ taknõy ꞌÃneneꞌ, xix Tiak, xix Yoãm, xix Pinip, xix Matõmẽo,
\v 15 xix Mãteo xix Tõmẽ, xix ꞌAppeo kutok Tiak, xix Xĩmãm nõy, nõm te yãy yõg Yoneo xop xexkanãp-tup,
\v 16 xix Tiak kutok Yot, xix Yot nõy, ꞌũxuxetꞌax nõy ꞌIxkanot, nõm teꞌ gãy xop mõgãhã Yeyox hah.
\s Yeyox te hãmyũmmũgãhãꞌ xix hittupmãhãꞌ
\p
\v 17 Ha Yeyox te yĩktix yĩxohoh, xixꞌ yõg tik xop yĩxohoh, tu hãm yok tuꞌ mõg, ha tikmũꞌũn punethok te Yeyox mũtik hãpkumep, tuꞌ pip, yã hãpxexka Yonex yõg tikmũꞌũn, xix kõmẽn Yenoyanẽn yõg, xix kõmẽn Tiro yõg, xix Xinõm yõg, nõm kõmẽn 2 te kõnãg kox xexka hũmnãg tuꞌ mãm,
\v 18 haꞌ nũn, tu Yeyox te hãmꞌãktux ꞌãpak, pũyĩꞌ pakut xop hittupmãꞌ, ha tikmũꞌũn te yãmĩy kummuk kopaꞌ pip xop nũn, haꞌ hittupmãhãꞌ.
\v 19 Ha tikmũꞌũn xohix te Yeyox ꞌãpit putup, Yeyox mũn kaꞌok hah, yĩy tikmũꞌũn kuxa hittup.
\s Tikmũꞌũn kuxa hittup xiꞌ teknõg
\p
\v 20 Yeyox te yãy mũtik hãpkumep xop pẽnãhãꞌ, tu:
\p —‍ꞌÃkuxa hittup ꞌãhok xop nõmhã. Yã Topa te ꞌãxop xat, ha Topa yõg tikmũꞌũn xeꞌeꞌ.
\p
\v 21 —‍ꞌÃkuxa hittup ꞌãp-tup xũy xop nõmhã. Topa te ꞌãtex hi kaꞌok putup.
\p —‍ꞌÃkuxa hittup ꞌãpota xop nõmhã. Topa te ꞌãxop kuxa hittupmãp-tup.
\p
\v 22 —‍ꞌÃkuxa hittup ꞌĩhã tikmũꞌũn te ꞌãp-tup nõg, tu ꞌãxop mãnõg, ꞌũkpe ꞌãmõg hah, hak mũn yã Tikmũꞌũn Kutok, tu ꞌãkeppak mõg.
\v 23 ꞌÃkuxa hittup ꞌĩhã ꞌãp-tup nõg. Yã pũn, pũn ꞌãkuxa hittup tuꞌ, yã Topa te xaꞌ hõm putup pexkox yõg hãpxop xohix. Hamũn. Hõmã mõnãyxop kummuk tep-tup nõg Topa pupi hãmꞌãktux xop kamah.
\p
\v 24 —‍Pa ꞌãkuxãnõg ꞌãptexop xexka tuꞌ. Hõnhã xate hãpxop xohix pip, yãꞌ puxiꞌ.
\p
\v 25 —‍ꞌÃkuxãnõg ꞌãxop hi kaꞌok nõmhã, putup te ꞌãkix putup hah.
\p —‍ꞌÃkuxãnõg ꞌãxop yĩxix nõmhã, ꞌãpotap-tup tuꞌ.
\p
\v 26 —‍ꞌÃkuxãnõg ꞌĩhã tikmũꞌũn xohix te xa ꞌãktux max. Hõmã mõnãyxop kummuk teꞌ koitꞌax xop ꞌãktux max kamah.
\s Xatuꞌ gãyxop putup pax
\p
\v 27 —‍ꞌŨg ꞌãpax. ꞌÃte xa hapxeꞌe ꞌãktux. ꞌÃpu, tikmũꞌũn gãy xop putup pax, tu hãpxopmã max ꞌãp-tup nõg xop puꞌ,
\v 28 nõm xop te xa hãpkummugãhãꞌ, yĩy ꞌãxop te nõm pu hãmmaxnãꞌ, tu Topa tuꞌ xak pu nõm hã hãmmaxnãꞌ, nõm xop te ꞌãxũygã pu hãmmaxnãhãꞌ. Nõm xop te xaꞌ: “Pũyã Topa xa hãpkummugãꞌ.” Kaxĩy. Pãyã ꞌãxop te nõm pu: “Pũyã Topa xa hãmmaxnãꞌ.” Kaxĩy.
\v 29 Tik ꞌũm te ꞌãpayĩn kix, ꞌapu tux hok pu ꞌãpayĩnnag nãg nõy kix kamah, ha tik ꞌũm te ꞌõg kãmĩn xut, ꞌãpuꞌ tux hok pu ꞌõg kayak xut nũy paxmõg kamah.
\v 30 Tik ꞌũm te ꞌãxak pu hãpxop ꞌũm hok hõm, ꞌãpu, tuꞌ hõm, ha tik te ꞌõg hãpxop xut, ꞌãpuꞌ tux hok puꞌ xut, yĩy putpuꞌ xak hok ꞌõg hãpxop.
\v 31 Xatep-tup, pu ꞌãnõy xa hãmmaxnãꞌ, yĩy ꞌãnõy pu hãmmaxnã hãmãxap.
\p
\v 32 —‍ꞌÃxop te ꞌãxape xop putup pax, tuꞌ puknõg xop putup nõg. Teptu ꞌãmpeꞌãpaxex, hu: Topa tek mũn pu hãmmaxnãp-tup, ꞌũgmũn max hah? Kaxĩy. ꞌÃmhok, yãꞌ koit. Tikmũꞌũn kummuk te yãy xape xop putup pax kamah, pa Topa te nõm hã hãmmaxnã ꞌohnãg.
\v 33 Tikmũꞌũn te xa hãpxopmã max, ha xate nõm pu hãpxopmãhãꞌ ꞌũyãnãn tuꞌ. Teptu ꞌãmpeꞌãpaxex, hu: Topa te ꞌã hãmmax nãp-tup, ꞌũgmũn max hah. Kaxĩy. ꞌÃmhok. Tikmũꞌũn kummuk teꞌ xapep-tup pax kamah, tu hãpxopmã max ꞌũyãnãn tuꞌ, pa Topa te nõm xop pu hãmmaxnã ꞌohnãg.
\v 34 Xate hãpxop ꞌũm hõm, tu taꞌ putpuꞌ pahaꞌ, tu ꞌãmpeꞌãpaxex, hu: Tik te pagop-tup. Kaxĩy. Teptu ꞌãmpeꞌãpaxex, hu: “Topa te ꞌã hãmmax nãp-tup, yãk mũn te hãpxopmã max.” Kaxĩy. ꞌÃmhok. Tik te hãpkummuk mĩy, tu hãpxop ꞌũm hõm kamah, tuꞌ nõy xop puꞌ hõm, nũy ta put pu paꞌ.
\v 35 ꞌA ꞌãmũnꞌah. ꞌÕg hãpxop xak hok, nũy put pu paꞌ. ꞌÃpuꞌ puknõg xop putup pax, tu hãmmaxnãꞌ, tu hãpxop hõm, pãyãꞌ xak hok ꞌũyãnãn tuꞌ, ha Topa te xa hãmmaxnãp-tup, yĩy ꞌãxop yã Topa xeꞌẽgnãg hã ꞌãktok xop, yã Topa mũn max, tu hãmmaxnãhã tik max xop puꞌ, xix tik kummuk xop puꞌ.
\v 36 Topa yã ꞌÃtak, tu tikmũꞌũn kuxa kaꞌ, ꞌãpu tikmũꞌũn nõy kuxa ka kamah, ꞌÃtak Topa putuk ꞌũkuxa kaꞌ, yã Topa max xeꞌẽgnãg.
\s Topa te hãpxopmãꞌax xohix kopit putup
\p
\v 37 —‍ꞌÃnõy yõg hãpxopmãꞌax kopit hok, nũy hãmꞌãktux kummuk, puyĩy Topa ꞌõg hãpxopmãꞌax kopit hok. ꞌÃnõy yõg hãpkummuk mĩyꞌax xaxogãꞌ, ha Topa te ꞌõg hãpkummuk mĩyꞌax xaxogãp-tup, pu tuꞌ kux.
\v 38 ꞌÃnõy puꞌ hõm, ha Topa te xaꞌ hõm putup, ha xate hãpxop punethok pop putup, yã Topa te hãpxop punethok xa popmãhãꞌ, yĩy ꞌãyĩm 2 nũꞌxip putup. ꞌÕg panat hã ꞌãnõy pu hãpxop xap hãmenex, puxix nõm panat hã xa hãmenex hãpxop xap kama ꞌũyãnãn tuꞌ. ꞌÃnõy puk-tõgnãg hõm, puxix xaꞌ hõm ꞌũk-tõgnãg kamah. ꞌÃnõy pu punethok hõm, puxix xaꞌ hõm punethok ꞌũyãnãn tuꞌ. Kaxĩy.
\p
\v 39 Tu xe hãm ꞌãktux, hu:
\p —‍Tik pa hok teꞌ nõy pa hok mũg, puyĩy mõgãꞌ, puxix tik 2 hãpkox haꞌ mõnãy.
\v 40 Tik te hãmyũmmũgãꞌax, tu hãmyũmmũg xexkah, ha tik te tappet mĩy yã hãmyũmmũg kutõgnãg, pãyã tappet mĩy kux, tute hãmyũmmũg xexkap-tup, nũy hãmyũmmũgã kamah.
\v 41 Xate ꞌãnõy yõg hãpxopmãꞌax kummuk pẽnãhãꞌ. Teptu xateꞌ pẽnã hok yãy yõg hãmpxopmãꞌax kummuk?
\v 42 Hu hãmꞌãktux hok ꞌãnõy puꞌ, hu: “Nãy, ꞌãte xa hãmyũmmũgãp-tup.” Kaxĩy, ꞌĩhã ꞌãpa te hãmyũmmũg ꞌohnãg. Xateꞌ yũmmũg hok? Yãy yõg hãpxopmã kummuk kux hãmãxap, xayĩy kũnãy tu ꞌãnõy yõg hãpxopmã kummuk kuxyãꞌ.
\s Mĩm kup max xix mĩm kup kummuk ꞌãktux
\p
\v 43 —‍Mĩm kup max te mĩnta max tahaꞌ, ꞌap mĩnta kummugãꞌah, haꞌ kup kummuk te mĩnta max ta ꞌohnãg.
\v 44 Tikmũꞌũn te mĩnta pẽnãhaꞌ, nũy tuꞌ kup kopit. Mĩnta tu max, puxixꞌ kup tu max, ha mĩnta tu kummuk, puxixꞌ kup tu kummuk. ꞌA tikmũꞌũn te tepta xutꞌah mĩmyãm kup tuꞌ, tu xupxak xak ꞌohnãg mĩmyãm kup tuꞌ.
\v 45 Tik max te hãpxopmã max, ꞌũkuxa max tuꞌ mĩy, ha tik kummuk kuxa kummuk, tu hãpxopmã kummuk. ꞌŨyĩyꞌax te yãy kuxa kopa hãpxop yũmmũgãhãꞌ.
\s Tikmũꞌũn pet max xixꞌ kummuk ꞌãktux
\p
\v 46 —‍ꞌÃxop te: “ꞌÃmũn yãk xuxyãꞌ,” kaxĩy, pãyã ꞌãyĩpkox ꞌohnãg. ꞌÃte ꞌãxat, pãyã xateꞌ mĩy ꞌohnãg.
\v 47-48 ꞌÃte xa hãmyũmmũgãꞌax, nũy Topa yõg hãpxopmãꞌax yũmmũgãꞌ, nũy ta tikmũꞌũn yĩpkox pip ꞌãktux. Tikmũꞌũn te yõg hãmꞌãktux ꞌãpak, pũyãꞌ yĩpkox piꞌ, puyĩy tu ta hãmyũmmũg, tu tik pet max putuk. Ha hãpkot, tu mĩkaxxap tuꞌ xupep, pu tu kox tox tu nõm mõꞌtat, tu nõ mãykup mõꞌxix mĩhĩm, haꞌ kaꞌok, ha tex mõꞌyũm tuꞌ xupep, tu nũꞌxip, tu mĩptut kopaꞌ xup, tuꞌ xet xexkah, pãyã mĩptut kopa mõꞌyũm hãm hã, tuꞌ nak, tuꞌ kaꞌok, ha kaxĩy tik nũn, ꞌũghaꞌ nũn, nũy yõgnũ hãmꞌãktux ꞌãpax, tuk xupak, tuꞌ yĩpkox pip, tuꞌ kaꞌok kamah, mĩptut max mõꞌyũm hãm hã putuk.
\v 49 Pãyã tik nõy pet, tu ꞌap hãpkotꞌah, tu mõꞌtat mĩhĩm hãm pepiꞌ, tu mõꞌxix hãm tuꞌ, haꞌ puꞌuk, ha tex gãy te mĩptut xit, haꞌ topahaꞌ, tu hãpxop patõnnãhãꞌ, tuꞌ koxyõy mĩptut. Ha kaxĩy tik te yõgnũ hãmꞌãktux ꞌãpak, tuꞌ yĩpkox ꞌohnãg, tu puꞌuk kamah, mĩptut kummuk putuk. Ta tuꞌ kux. Kaxĩy.
\c 7
\s Yeyox te kãmãnat hittup mãhãꞌ
\p
\v 1 Ha Yeyox te hãmꞌãktux kux, tu tikmũꞌũn pu hãmꞌãktux kux, tu taꞌ mõg tu mõktu xupep kõmẽn Kapãnãn tuꞌ,
\v 2 ha tik puxet yã Hõm yõg gohet hã kãmãnat, haꞌ hãm max, yĩyꞌ xatꞌax tep-tup pax, haꞌ pakut, tuꞌ xok putũmnãg,
\v 3 ha tikmũꞌũn te Yeyox ꞌãktux, yĩy gohet yõg tik te Yoneo xexka xop tuꞌ xak, pu nũꞌ, pu Yeyox tuꞌ xax, pu mõg, nũy tik pakut hittupmãꞌ.
\v 4 Ha Yeyox haꞌ nũn, tuꞌ mõxahaꞌ, tu tuꞌ xak, hu:
\p —‍Gohet yõg tihik max, ꞌãpu, nõm mõꞌnĩynãm.
\v 5 Tute yũmũ yõg tikmũꞌũn putup pax, tu Topa pet mĩy yũmũ yõg tikmũꞌũn puꞌ. Kaxĩy.
\p
\v 6 Ha taꞌ mõg, ꞌũxexka xop mũtik mõg, tu gohet yõg kãmãnat haꞌ mõg, haꞌ pet hũmnãg tuꞌ yũm, ha gohet yõg tik teꞌ xape nũꞌpok, tu Yeyox ha nũꞌpok, nũy yãy pupi hãmꞌãktux, nũy Yeyox puꞌ hãmꞌãktux, hu:
\p —‍ꞌÃnũn hok, ꞌãxexka tuꞌ, hak-tõgnãg, hu ꞌãte yãyhãhup ꞌãkeppah.
\v 7 ꞌÃte hãmꞌãktux yũmmũgꞌah. ꞌÃkaꞌok, nũy hãmpakutꞌax mãnõg, pu mõg. ꞌÃpu, hãmpakutꞌax xat, puyĩy kãmãnat hittup, nũy xatꞌax hãꞌ hittup.
\v 8 Yũmmũg, gohet yõg xexka xop tek xat kamah, ha ꞌãte yõgnũ xonat xop xat, haꞌ yĩpkox pip. ꞌÃte xonat pu: “Mõg, mõg,” kaxĩy, haꞌ mõg, ha xonat nõy pu: “Mãꞌ, ꞌãnũꞌ!” kaxĩy, haꞌ nũn, ha ꞌãte kãmãnat puꞌ xat, hu: “ꞌŨmĩy,” kaxĩy, haꞌ mĩy. Puxiꞌ. Kaxĩy.
\p
\v 9 Ha Yeyox hup, tu tik pakut haꞌ mõgꞌah, tu gohet yõg tik te hãmꞌãktux ꞌãpak, tuꞌ hittup, tu tikmũꞌũn teꞌ peꞌ mõg xop pu hãmꞌãktux, hu:
\p —‍ꞌÃte xa hãpxeꞌe ꞌãktux: Tik kuxa yũm kaꞌok yõgnũ hãmꞌãktuxꞌax kopah. Yãꞌ puknõg, pãyã Iyaet yõg tikmũꞌũn kuxa mãm puꞌuk, yũmũ yõg tikmũꞌũn kuxa mãm puꞌuk. Kaxĩy.
\p
\v 10 Ha gohet yõg tik xape xop putpuꞌ mõg, kãmãnat pet haꞌ mõg, tuꞌ mõg tu mõktu mõxahaꞌ, ha kãmãnat xip, tuꞌ hittup nõmhã, ꞌũxatꞌax hã Yeyox te nõm hittupmãhãꞌ.
\s Yeyox teꞌ putpu hĩnnãhã ꞌũn kutok pit
\p
\v 11 Hãpxip kutõgnãg ꞌĩhã Yeyox mõg, tu taꞌ mõg tu mõktu kõmẽn Nãĩy tuꞌ, haꞌ xop te Yeyox mũtik hãpkumep xop pip, xix tikmũꞌũn punethok pip,
\v 12 tu kõmẽn yĩkaꞌ pip, ꞌĩhã tikmũꞌũn nũn, tu kõmẽn yĩkaꞌ nũn, nũy tik nõ hãpkot. ꞌŨn hok yũm, tuk-tok pit puxehnãg, haꞌ xok, ha tikmũꞌũn punethok te ꞌũn mũtik nũn, nũy tuk-tok nõ hãpkot,
\v 13 ha Yeyox teꞌ pẽnãhãꞌ, tu ꞌũn kuxa kaꞌ, hu:
\p —‍ꞌÃpota hok, ꞌũxak hok. Kaxĩy.
\p
\v 14 Tuꞌ mõg, tu tik xok yõg mĩpkox ꞌãpit, ha tikmũꞌũn hup, tuꞌ mõg ꞌohnãg, yĩy Yeyox te:
\p —‍ꞌŨgnix! ꞌAte ꞌãxat, hu: ꞌÃyok. Kaxĩy.
\p
\v 15 Ha put pu hiꞌ, tuꞌ yoah, tuꞌ yũm, tu hãmꞌãktux, ha Yeyox teꞌ mũk tut puꞌ hõm, haꞌ hittup.
\v 16 Haꞌ xohix kuxãnõg, tu Topa ꞌãktux max, hu:
\p —‍Topa te nũ tik yãykutnãhãꞌ, puyĩy yãy pupi hãmꞌãktux, tuꞌ nũn, nũy tikmũꞌũn pu hãmꞌãktux, haꞌ xexkah! Topa nũn, nũy yãy yõg tikmũꞌũn mõꞌnĩynãm. Kaxĩy.
\p
\v 17 Ha kaxĩy tikmũꞌũn te Yeyox ꞌãktux, tu hãpxexka xohix kopa hãmꞌãktux, xix hãpxexka hãmhũmnãg tu hãmꞌãktux.
\s Yoãm te mõ tik pok
\p
\v 18 Tik xop te Yoãm mũtik hãpkumep, tu nõm tep-tox pix mũtik hãpkumep, ha tik xop te Yoãm pu hãmꞌãktux, tu Yeyox te tik xok putpuꞌ hĩnnã ꞌãktux, ha Yoãm teꞌ yõg tik 2 mõg yĩmõgatux,
\v 19 tu Yeyox ha mõꞌpok, nũy yĩkopit, hu: “ꞌOk ꞌãmũn tihik, Topa te nõm yãykutnãhãꞌ? ꞌOk pe Topa teꞌ nõy nũꞌkutnãꞌax?” Kaxĩy.
\v 20 Ha tik xop te Yeyox haꞌ mõg, tu hãmꞌãktux, tu Yoãm te hãmꞌãktux ꞌãktux, hu:
\p —‍ꞌOk ꞌãmũn yã tihik, Topa te nõm yãykutnãhãꞌ? ꞌOk pe Topa teꞌ nõy nũꞌkutnãp-tup? ꞌŨkux. Kaxĩy.
\p
\v 21 ꞌĨhã Yeyox te tikmũꞌũn punethok hittupmãhã nõmhã, tu yãmĩy kummuk kopaꞌ pip xop hittupmãhãꞌ, xiꞌ pa hok xop hittupmãhãꞌ,
\v 22 tu hãmꞌãktux hãꞌ nõy yãnãn Yoãm yõg tik xop mũtik, hu:
\p —‍Putpu mõg, nũy Yoãm pu hãmꞌãktux, tu hãpxopmãꞌax xohix pẽnãꞌax ꞌãktux, hu: ꞌŨpa hok xop te hãmpẽnãhã, xix hãpkumep hok xop te hãpkumep, xix yãy xax kunut xop yãꞌ xax tup, xiꞌ yĩpkox hok xop te hãmꞌãpak, haꞌ xok tihik, tu putpu hiꞌ, haꞌ hok xop te hãmꞌãpak maxꞌax ꞌãpak.
\v 23 Ha tikmũꞌũn kuxa yũm kaꞌok ꞌũgmũn kopah, tuꞌ kuxa hittup, tuk yĩkopit ꞌohnãg. ꞌŨkux. Kaxĩy.
\p
\v 24 Ha Yoãm yõg tik xop mõg, ha Yeyox te Yoãm ꞌãktux tikmũꞌũn puꞌ, hu:
\p —‍ꞌÃmõg hãm panip tuꞌ, nũy Yoãm pẽnãꞌ. Putep xate pẽnãhãꞌ? ꞌOk mõg nũy mĩxux tox pẽnãꞌ? ꞌOk ꞌãmuuh te nõm mĩxux nuhuknãm? ꞌAp pẽnãꞌah.
\v 25 Xatep-tep pẽnãhã? ꞌOk mõg nũy tik pẽnãꞌ, tik te topixxax maxnãg mõꞌtat? ꞌÃmhok. Yoãm te xoktut xax mõꞌtat, ꞌap xax maxꞌah. Yũmmũg. Tikmũꞌũn nõy te topixxax max xeꞌe mõꞌtat, tu mĩptut max xeꞌe kopa tihiꞌ, tu ꞌãmuk xexka mĩy pax, tuꞌ xexka xop mũtik tihiꞌ, pãyã panip xexka tuꞌ tiꞌah xexka xop, ha Yoãm hok xip, tu panip xexka tuꞌ pet.
\v 26 Pãyã xatep-tep pẽnãhãꞌ? ꞌOk tik te Topa pupi hãmꞌãktux pẽnãhãꞌ? Hamũn. ꞌÃte xa hãpxeꞌe ꞌãktux. Yoãm mũn te Topa pupi hãmꞌãktux xeꞌeꞌ.
\v 27 Xateꞌ yũmmũg. Hõmã tik hittap te Yoãm ꞌãktux, tu Topa yõg tappet tu kaxꞌãmiꞌ, hu: “Topa te hãmꞌãktux, ha tik teꞌ nõm pupi hãmꞌãktux. Topa te nõm tik ꞌãkeppa mõꞌkutnãp-tup, nũy ꞌõg putat maxnãꞌ.” Kaxĩy.
\p
\v 28 —‍ꞌÃte xa hãpxeꞌe ꞌãktux. Tik xop hittap xexkak-tõgnãg, ha Yoãm xexka xeꞌeꞌ, pãyã tik kutõgnãg, tuꞌ yĩpkox xip, Topa te nõm xat hah, nõꞌõm xexka xeꞌẽgnãg. Kaxĩy.
\p
\v 29 Ha tik xop te gohet pupi tayũmak pop, tu Yeyox yõg hãmꞌãktux ꞌãpak. Hõmã Topa te nõm xat, haꞌ yĩpkox pip, ha Yoãm tep-tox pix.
\p
\v 30 Pãyã Paniye xop xix yũmmũgã xop yĩpkox ꞌohnãg, yĩy Yoãm tep-tox pix ꞌohnãg kamah.
\p
\v 31 Ha Yeyox te xe hãmꞌãktux, nũy hãmyũmmũgãꞌ, hu:
\p —‍Hõnhã tikmũꞌũn tep-tep putuk?
\v 32 Tu kakxop putuk, nõm te hãmnuhnõg tuꞌ mãm, ha hãmkuteꞌex, tuꞌ nõy puꞌ yĩy kaꞌok, hu: “ꞌŨgmũꞌãte kãyãhãꞌ, yãytaꞌax kãyã putuk, payã ꞌãxop te hãmyã ꞌohnãg, hakmũꞌãte kãyãhã, nõ hãpkot kãyãꞌax putuk, pãyã ꞌãxop tekmũ mũtik pota ꞌohnãg.” Kaxĩy.
\v 33 Yoãm tep-tox pix, tuꞌ xit hok, nũy Topa pu hãmꞌãktux, tuꞌ hep xupyãg xoꞌop hok, ha ꞌãxop te: “Yãmĩy kummuk te nõm kopaꞌ xip.” Kaxĩy. Pãyãꞌ koit.
\v 34 ꞌŨgnũn, ꞌũgmũn yã Tikmũꞌũn Kutok, tuk nũn, tuk xit xiꞌ xoꞌop, ha ꞌãxop tek mũn kummuk ꞌãktux, hu: “Pẽnãꞌ, ꞌũxit xexka nãm, tu xoꞌop xexka nãm kamah, tu tix kummuk hãꞌ xape, xix tik xop te gohet pupi tayũmak pop xop hãꞌ xape.” Kaxĩy.
\v 35 Tukmũn ꞌãktux kummuk, pãyã Topa te hãmyũmmũg, ha tikmũꞌũn yãg te nõm hãmyũmmũg putup, tu nõm max ꞌãktux, tuꞌ hãpxeꞌe ꞌãktux. Ta tuꞌ kux. ꞌŨkux. Kaxĩy.
\s Yeyox te Paniye tik pet haꞌ mõg
\p
\v 36 ꞌÃmnĩy ꞌŨm ꞌĩhã Paniye xop yõg tik te Yeyox xãnãhã, pu yãy pet tuꞌ xit, haꞌ mõg, tu mõꞌnãhãꞌ, tuꞌ yũm, tuꞌ xit,
\v 37 ha kõmẽn yõg xotit xip, ha tikmũꞌũn te nõm pu hãmꞌãktux, hu: ꞌOk yũmmũg xateꞌ? Yeyox te tik pet kopaꞌ xit. Kaxĩy. Yĩy nax tõynãg pahaꞌ, yã naxnãg max, takat xexkah, ha hãpxop hax max kopaꞌ xuk, tu kamah takat,
\v 38 ha Yeyox yĩkãgnãg hãꞌ xip, tu potahaꞌ, haꞌ pa hep te Yeyox pata tuꞌ nãhãꞌ, tuꞌ pa hep hãꞌ pata pix, hu Yeyox pata nakgãhãꞌ, tu yãy xetox hã ꞌũktux tuꞌ nakgãhãꞌ, tu Yeyox pata hax, tu hãpxop hax max pux, tu Yeyox pata tuꞌ pux.
\v 39 Ha Paniye yõg tik teꞌ pẽnãhãꞌ, tu hãmpeꞌpaxex, hu: “ꞌOk yũmmũg hok Yeyox teꞌ? Paxpu tu Topa pupi hãmꞌãktux xeꞌeꞌ, puxix ꞌũn xotit yũmmũg, huꞌ tux hox pu tuꞌ xupit hok.” Kaxĩy.
\p
\v 40 Ha Yeyox te Paniye yõg tik pu hãmꞌãktux, tu:
\p —‍Xĩmãm, ꞌãte xa hãmꞌãktux putup. Kaxĩy.
\p Ha:
\p —‍ꞌÃyĩy. Kaxĩy.
\p
\v 41 Ha hãmꞌãktux, nũy Topa yõg hãpxopmãꞌax yũmmũgãꞌ, hu:
\p —‍Hõmã tik 2 ta nemẽn tik nõy puꞌ, tuꞌ nõy pu ta nemen tayũmak hã, ha tik ꞌũm ta nemẽn tayũmak te 500, haꞌ nõy ta nemẽn tayũmak te 50.
\v 42 Pãyãꞌ nõm tik te tayũmak ꞌũm xipꞌah, ꞌap pagok yũmmũgꞌah, ha tik max teꞌ homip tuꞌ kax ꞌohnãg, haꞌ kux. ꞌÃte xa yĩkopit, hu: Tik ꞌũm kuxa hittup xeꞌeꞌ, nũy tik max tup-tup pax xexkah, pe tik ta nemẽn tayũmak te 50, pe tik ta nemẽn tayũmak te 500? Putep peꞌãpaxex? Kaxĩy.
\p
\v 43 Ha Xĩmãm te:
\p —‍Nõm tik ta nemẽn kutõgnãg ꞌũkuxa hittup kutõgnãg, ha tik ta nemẽn xexka kamaꞌ kuxa hittup xexkah, hu tik max tup-tup pax xexkah. Kaxĩy.
\p Ha:
\p —‍Hamũn.
\v 44 Nũ ꞌũn pẽnãꞌ. ꞌÃpet tu mõknãhãꞌ, ha kõnãg ꞌũm xate tatꞌah, puk pata pix, ha ꞌũn tek pata pix, yãy pa hep hãꞌ pix, tu xetox hãꞌ nakgãhãꞌ,
\v 45 hak mũg ꞌohnãg yãy kep ha, nũy ꞌaneo, pãyã ꞌũn tek pata hax punethok.
\v 46 Xate ꞌãꞌ hõmꞌah mĩxux hep tox, puk xe ꞌãnnut, pãyã ꞌũn te hãpxop hax max hep pux ꞌũkpata tuꞌ,
\v 47 yĩy ꞌãte xa hãpxeꞌe ꞌãktux: Topa te ꞌũn kuxa kummuk xit nũy kuxa max tat ꞌũyãnãn tuꞌ, yĩy ha Topap-tup pax xexkah. Topa te tikmũꞌũn yõg kummuk mĩyꞌax xexka xaxogãhãꞌ, yĩy ha Topap-tup pax xexka ꞌũyãnãn tuꞌ, ha Topa te tikmũꞌũn yõg kummuk mĩyꞌax kutõgnãg xaxogãhãꞌ, yĩy ha Topap-tup pax kutõgnãg. Kaxĩy.
\p
\v 48 Tu ꞌũn pu hãmꞌãktux, hu:
\p —‍Topa te ꞌõg kummuk mĩyꞌax xaxogãhãꞌ, haꞌ kux. Kaxĩy.
\p
\v 49 Ha tikmũꞌũn te Yeyox mũtik mãm te:
\p —‍ꞌŨ ꞌũm nũhũꞌ? Topap-xehnãg te hãpkummuk mĩyꞌax xaxogã ꞌãktux. Yeyox teꞌ xaxogã ꞌãktux hok! Kaxĩy.
\p
\v 50 Ha Yeyox te ꞌũn pu hãmꞌãktux, hu:
\p —‍ꞌÃkuxa yũm kaꞌok ꞌũgmũn kopah, yãꞌ puxiꞌ. Mõg. Pũyã ꞌãkuxa yũm. Kaxĩy.
\p Haꞌ mõg.
\c 8
\s ꞌŨn xop te Yeyox mũtik hãpkumep
\p
\v 1 Hãpxip kutõgnãg ꞌĩhã Yeyox hãpkumep, tu kõmẽn xohix kotit hãꞌ mõg, xiꞌ xip tu xexka xohix kotit hãꞌ mõg, tu hãmꞌãpak maxꞌax ꞌãktux, tu Topa te yãy yõg tikmũꞌũn xat ꞌãktux, tu nõm xop yĩpkox pip ꞌãktux, ha tik te 12 nũ mũtik mõg,
\v 2 ha ꞌũn xop mõg kamah. Hõmã Yeyox te nõm xop hittupmãhãꞌ, tu yãmĩy kummuk mõy ꞌũkopah, ha ꞌũn xohix te: Mãnix ꞌãxetꞌax Mãnanẽn, ha Yeyox te yãmĩy kummuk te 7 mõy ꞌũkopah,
\v 3 ha ꞌũn nõy Yoãn, tu Koy xetut, haꞌ xatꞌax ꞌEnot yõg kãmãnat te mãxap, tu nõm yõg hãpxop pẽnãhãꞌ, ha ꞌũn nõy Xoyãn, xix ꞌũn punethok te Yeyox mõꞌnĩynãm, tu tik te 12 mõꞌnĩynãm kamah, tu yãy yõg hãpxop tuꞌ popmãhãꞌ.
\s Tik te hãpxop xap xok
\p
\v 4 Ha tikmũꞌũn punethok nũn, yã kõmẽn xohix yõg tikmũꞌũn, tu Yeyox haꞌ nũn, tu yãy tu nũꞌnãhãꞌ, ha Yeyox teꞌ yũmmũgãhãꞌ, tu hãmꞌãktux hãꞌ hãmyũmmũgãhãꞌ, nũy Topa yõg hãpxopmãꞌax yũmmũgãꞌ, puyĩy tikmũꞌũn Topa yõg hãmꞌãktux puꞌ yĩpkox piꞌ, hu:
\p
\v 5 —‍Tik ꞌũm mõg nũy hãpxop xap xok, tuꞌ xap nãhã hãm kopah, nũy tuꞌ xok, haꞌ yãg te putat yĩka tuꞌ xok, yĩy tikmũꞌũn te pata hãꞌ totnok, tuꞌ koxyõy, ha putuxnãg teꞌ mãnãm,
\v 6 haꞌ xap yãg te mĩkax xap tuꞌ nãhãꞌ, tuꞌ xokax, pãyã hãmnak, haꞌ tap, tu yãy xaxogãhãꞌ.
\v 7 Haꞌ xap yãg te mĩmyãm xop kopaꞌ nãhãꞌ, tuꞌ xokax, tuꞌ tuk, tu mĩmyãm mũtik tuk, tu mõktu xexkah, pãyãꞌ xut ꞌohnãg, mĩmyãm kopaꞌ xip tuꞌ.
\v 8 Haꞌ xap yãg te hãm max tuꞌ nãhãꞌ, tuꞌ xokax, tuꞌ tuk, tu mõktu xohix xexkah, tuꞌ xap max xohix punethok hõm. Yãꞌ xap puxet teꞌ xap te 100 popmãhãꞌ. Ta tuꞌ kux. Kaxĩy. Tu xe hãmꞌãktux, hu:
\p —‍ꞌŨgꞌãpax, xa ꞌãyĩpkox piꞌ. Kaxĩy.
\s Yeyox te hãmyũmmũgãhãꞌ
\p
\v 9 Ha tikmũꞌũn te Yeyox mũtik hãpkumep, tuꞌ yĩkopit, hu:
\p —‍ꞌOk hãmꞌãktux ꞌũm nũhũꞌ? Teptu xate hãmꞌãktuxꞌax hã hãmyũmmũgãhãꞌ? Kaxĩy.
\v 10 Ha Yeyox te:
\p —‍Topa te xa hãmyũmmũgãhãꞌ, tu yãy yõg tikmũꞌũn xat, huꞌ yũmmũgãhãꞌ, puyĩy Topa yõg hãpxopmãꞌax yũmmũg, pãyã ꞌaꞌ tikmũꞌũn nõy pu hãmyũmmũgãꞌah, yĩy Topa te nõm pu hãmyũmmũgãhã hãmꞌãktuxꞌax hã, pu tu pa pip, pãyã ꞌa hãmpẽnãꞌah, xix hãmꞌãpak, pãyã ꞌa yũmmũgãhã hãmꞌãktuxꞌax hã, pu tu pa pip, pãyã ꞌaꞌ hãmpẽnãꞌah, xix hãmꞌãpak, pãyã ꞌaꞌ yũmmũgꞌah.
\p
\v 11 —‍Nõm hãmꞌãktux te ꞌãyũmmũgãhã kaxĩy: Mĩxux xap te Topa yõg hãmꞌãktux ꞌãktux.
\v 12 Hãpxop xap te putat yĩka tuꞌ nãhãꞌ, hã kaxĩy tik ꞌũm te Topa yõg hãmꞌãktux ꞌãktux, ha tikmũꞌũn teꞌ xupak, pãyã Hãmgãyãgnãg te hãmꞌãktux putup nõg, tuꞌ kuxa kopaꞌ xut, yĩyꞌ kuxa yũm ꞌohnãg Topa yõg hãmꞌãktux kopah, ha Topa teꞌ kuxa kummuk xit ꞌohnãg.
\v 13 Ha hãpxop xap te mĩkaxxap tuꞌ nãhãꞌ, hã kaxĩy tikmũꞌũn te hãmꞌãktux ꞌãpak, tuꞌ kuxa hittup, pãyãꞌ kuxa yũm kutõgnãg, tu mõktuꞌ xũy, huꞌ xaxok, tu Topap-tat xak.
\v 14 Haꞌ xap te mĩmyãm xop kopaꞌ nãhãꞌ, hã kaxĩy tikmũꞌũn te nõm hãmꞌãktuxꞌax ꞌãpak, pãyã yãy yõg hãpxop xak punethok, tu hãpkuteꞌex punethok, tuꞌ kuxa yũm ꞌohnãg, hu Topap-tat hãꞌ mõg puꞌũgnãg.
\v 15 Ha hãpxop xap te hãm max tuꞌ nãhãꞌ, ha kaxĩy tikmũꞌũn te hãmꞌãktuxꞌax ꞌãpak, tuꞌ yĩpkox pip hãmꞌãktux xeꞌe puꞌ, tuꞌ kuxa yũm kaꞌok hãmꞌãktuxꞌax kopah, tuꞌ xaxok ꞌohnãg, tu Topa yõg putat hãꞌ mõg, yãꞌ mõg kumak mõg. Tu ta tuꞌ kux. Kaxĩy.
\s Kũyãnãm ꞌãktux
\p
\v 16 Tu xe hãmꞌãktux, nũy Topa yõg hãpxopmãꞌax yũmmũgãꞌ, hu:
\p —‍Tikmũꞌũn te kuyãnãm tatꞌax yũm mĩpe yĩmũꞌ, pu tikmũꞌũn xohix pu tupmãꞌ, ꞌap mĩmpe kakaꞌ yũmꞌah, xix mana kopaꞌ yũm ꞌohnãg.
\v 17 Ha kaxĩy Topa te hãpxopmãꞌax xaptopꞌax yũmmũgãp-tup, tu tikmũꞌũn xohix yũmmũgãp-tup.
\p
\v 18 —‍Paxip, ꞌũgꞌãpax max. Tikmũꞌũn te hãmyũmmũg, Topa te nõm pu hãmyũmmũgãp-tup, pu tu hãmyũmmũg xohix, pãyã tikmũꞌũn nõy te hãmyũmmũg ꞌohnãg, Topa te nõm pu hãpxaxogãp-tup. Kaxĩy.
\s Yeyox mũg tut nũn xiꞌ taknõy xop
\p
\v 19 Yeyox mũg tut nũn, xiꞌ taknõy xop nũn tu nũktu Yeyox tuꞌ mõxahaꞌ, pãyã ꞌãꞌ pẽnãꞌah, tikmũꞌũn punethok hah,
\v 20 ha tik te Yeyox pu hãmꞌãktux, hu:
\p —‍ꞌÃtut nũn xix ꞌãtaknõy xop nũn, tu nũktu hãptopaꞌ tihiꞌ, tu ꞌãhip, nũy ꞌã mũtik hãmꞌãktux. Kaxĩy.
\p
\v 21 Pa Yeyox te:
\p —‍Yã tikmũꞌũn te Topa yõg hãmꞌãktux ꞌãpak, tuꞌ yĩpkox pip, yãk tut, xik taknõy, xik hex, tuk mũn hãꞌ xapeꞌ. Kaxĩy.
\s Yeyox te ꞌãmuuh xat, pu tuꞌ xuxiꞌ
\p
\v 22 ꞌÃmnĩy ꞌũm ꞌĩhã Yeyox te kõnãg xexka haꞌ mõg, tu ta mĩpkox xup hã nõm mõꞌnãhãꞌ, xix yãy mũtik hãpkumep xop teꞌ mõxakux, nũy kõnãg yĩmũꞌ mõg, ha Yeyox te:
\p —‍ꞌÃpu, yũmũ mõg nũpehe, kõnãg xexka xatapak hãpkux nõy tuꞌ. Kaxĩy.
\p Tuꞌ mõg,
\v 23 ꞌĩhã Yeyox pip mĩpkox kopah, tu mõꞌyõn, ha ꞌãmuuh kaꞌok mõꞌkoꞌuk kõnãg xexka tuꞌ, ha kõnãg te mĩpkox mahap, tuꞌ mõm tu mĩpkox kopa mõꞌnãhaꞌ, ha mĩpkox putux, tu kõnãg kopa mõꞌnãp-tup, yĩy tik xohix xokꞌax, tu kuxãnõg,
\v 24 tu Yeyox yĩka haꞌ mõg, tuꞌ tuhuk, haꞌ yãy koxak, yĩy:
\p Yãyãꞌ, Yãyãꞌ, yũmũg xakix putup! Kaxĩy.
\p Ha yãy koxak, tu ꞌãmuuh xat, xix kõnãg gãy xat, pu tu xuxiꞌ, haꞌ xuxiꞌ,
\v 25 ha Yeyox te tik xop pu hãmꞌãktux, hu:
\p —‍Piyaꞌ kuxa mãm ꞌũgkopah? Kaxĩy.
\p Ha Yeyox yĩpkutuk, tu yãy pu hãmꞌãktux, hu:
\p —‍ꞌŨ ꞌũm nõꞌõm? Tu ꞌãmuuh gãy xat, xix kõnãg gãy xat, haꞌ yĩpkox pip, tuꞌ kux. Kaxĩy.
\s Yeyox te yãmĩy kummuk xupepmãhãꞌ
\p
\v 26 Yeyox mõg, xixꞌ yõg tik xop te nõm mũtik mõg, tu mõktu mõxaha hãpxexka Yenax tu, ha Ganinet yõg kõnãg xexka kux tuꞌ yũm,
\v 27 ha Yeyox te mĩpkox kopaꞌ xupep, tuꞌ mõg hãm nak haꞌ, ha kõmẽn yõg tihik nũn tu nũktu Yeyox hah, tu ꞌãmnĩy xohix hã xax top, tuꞌ pet xip ꞌohnãg, pãyãꞌ xukpot tuꞌ xip, yãmĩy kummuk xop teꞌ kuxa kopaꞌ pip hah.
\v 28-29 Hãpxip punethok ꞌĩhã yãmĩy kummuk xop teꞌ kummukgãhãꞌ, haꞌ gãy, yĩy tikmũꞌũn te tik yĩm hĩy, xiꞌ kup hĩy, pip kup mũg xap hãꞌ hĩy, pãyã tik teꞌ koxyõy, ha yãmĩy kummuk te panip xexka tuꞌ mõgãhãꞌ, yĩy Yeyox te yãmĩy xat pu mõg, ha tik te Yeyox pẽnãhãꞌ tuꞌ yĩy kaꞌok, tu kopaxux haꞌ nãhãꞌ, tu nũꞌxup, tu:
\p —‍Yeyox, ꞌãmũn yã Topa xeꞌẽgnãg kutok. Xatep-tep tup? ꞌÃte xa tuꞌ xak ꞌũgkummugã hok. Kaxĩy.
\p
\v 30 Ha Yeyox teꞌ yĩkopit, hu:
\p —‍ꞌOk ꞌãxuxetꞌax te xĩy? Kaxĩy.
\p Yã yãmĩy punethok te tik kopa tihiꞌ, huꞌ yãnãn tu hãmꞌãktux, hu:
\p —‍ꞌŨkxuxetꞌax ꞌŨxohix Xop. Kaxĩy.
\v 31 Tu Yeyox tuꞌ xak pu Hãmgãyãgnãg Pet ha mõꞌpok hok.
\p
\v 32 Ha xapup punethok te yĩktix tuꞌ pip, tu hãmhũmnãg, yĩy yãmĩy te tuꞌ xak, puꞌ tux hok pu tu xapup xop kopaꞌ mõg, haꞌ tux hok pu mõg,
\v 33 tu tik nĩm, tu mõktu xapup xop hã mõxakux, ha xapup xop te yĩktix tuꞌ yĩxo mõꞌkaꞌok, tu kõnãg xexka tuꞌ mõxahaꞌ, tu kõnãg kopa nãm, tuꞌ xakix.
\p
\v 34 Ha tik xop te xapup pẽnãhãꞌ, tu xapup xakix pẽnãhãꞌ, tu nũꞌpahaꞌ, tuꞌ mõg, tu kõmẽn haꞌ mõg, nũy ꞌũkopa hãmꞌãktux, xix hãpxexka tuꞌ hãmꞌãktux,
\v 35 ha tikmũꞌũn nũn nũy tu pẽnãꞌ, tu Yeyox haꞌ nũn, tu tik pẽnãhãꞌ, yãmĩy kummuk teꞌ nĩm, haꞌ nũn, ha topixxax mõꞌtat, tuꞌ Yeyox yĩkãgnãg hãꞌ yũm,
\v 36 ha tik xop te xapup xop pẽnãꞌax mõg, tu tikmũꞌũn nõy pu hãmꞌãktux, tute tik hittup ꞌãktux,
\v 37 ha Yenax yõg tikmũꞌũn te xapup tu Yeyox yĩpkutuk, hu nõm xat pu mõg, pu hãpxexka nĩm, ha Yeyox ꞌũpapuk haꞌ mõg, tu kõnãg xexka haꞌ mõg, tu mĩpkox tu mõꞌnãhãꞌ, nũy mõg,
\v 38 ha tik hittup, tu Yeyox tuꞌ xak, hu:
\p —‍ꞌŨktux hok ꞌũ mõg ꞌãxop mũtik. Kaxĩy.
\p Pãyã Yeyox te:
\p
\v 39 —‍Yãy pet ha mõg, Topa te xa hãmmaxnãhãꞌ, yĩy tikmũꞌũn pu hãmꞌãktux, Kaxĩy.
\p Ha taꞌ mõg, tu tikmũꞌũn xohix pu hãpxopmãꞌax xeꞌẽgnãg ꞌãktux, Yeyox te nõm hãpxopmãhã.
\s Yeyox te ꞌũn hittupmãhãꞌ xix kakxop hex
\p
\v 40 Ha taꞌ mõg Yeyox, tu hãpkux nõy haꞌ mõg put puꞌ, tu mĩpkox hãꞌ mõg, tu kõnãg xexka yĩmũꞌ mõg, tu mõktu xupep hãpkux tuꞌ, xix yãy mũtik hãpkumep xop mõxa kamah, ha tikmũꞌũn xohix teꞌ hip, huꞌ hittup,
\v 41 ha tik nũn, ꞌũxuxetꞌax Yax, ꞌũxexkah, tu Yoneo yõg tikmũꞌũn xat, tu kõmẽn yõg Topa pet kopaꞌ xatꞌax, tuꞌ kopaxux haꞌ nãhãꞌ, tu Yeyox tuꞌ xak, puꞌ pet ha mõg,
\v 42 hak-tok hex puxehnãg, ꞌũyõg hãmyãxatamuk xohix te 12, ꞌũtuk tup, tuꞌ pakut, tuꞌ xok putũmnãg, yĩy Yeyox mõg.
\p Ha tikmũꞌũn xohix te nũ mũtik mõg, yãꞌ xohix punethok, tu yãy tu nũꞌnãhãꞌ, tuꞌ mũg kaꞌok,
\v 43 ꞌĩhã ꞌũn nũn, tuꞌ pakut, yã ꞌũn yõg hãmpakutꞌax, ha yãy hep ꞌãta xupep, ha hãmyãxatamuk xohix te 12 hãꞌ pakut, ꞌĩhã ꞌũn te notot xop xohix tuꞌ kax, pu tu hittupmãꞌ, ha ꞌũn te tayũmak xohix hã pago, tuꞌ hitop popmãhã notot xop puꞌ, pãyã hittup ꞌohnãg,
\v 44 hu Yeyox peꞌ mõg, tuꞌ yõg topixxax ꞌãpit, tuꞌ hittup,
\v 45 ha Yeyox te:
\p —‍ꞌŨ ꞌũm tek ꞌãpit? Kaxĩy.
\p Ha tikmũꞌũn xohix te:
\p —‍ꞌĨntu. ꞌÃkmũnꞌah. Kaxĩy.
\p Ha Pet te:
\p —‍Yãyãꞌ, tikmũꞌũn xohix te ꞌãyĩmap pip, tu ꞌãmũg kaꞌok. Kaxĩy.
\p
\v 46 Pa Yeyox te:
\p —‍Tikmũꞌũn ꞌũm nõm tek ꞌãpit, ꞌaꞌ yũmmũg. Topa tek kaꞌogãhãꞌ ꞌũ hittupmãꞌ, ha tikmũꞌũn ꞌũm nõm tek ꞌãpit xeꞌeꞌ, ꞌũyĩy hittupmãꞌ. Kaxĩy.
\p
\v 47 ꞌAp ꞌũn te yãy xaptop yũmmũgꞌah, huꞌ nũn, tu kuxãnõg, tu yãy nuhuk, tuꞌ kopaxux haꞌ nãhãꞌ Yeyox keppah, tu hãmꞌãktux, tu Yeyox xax ꞌãpit ꞌãktux, ha tikmũꞌũn xohix teꞌ xupak.
\v 48 Ha Yeyox te:
\p —‍Nixix, ꞌãkuxa yũm kaꞌok ꞌũgkopah, yĩy Topa te ꞌãhittupmãhãꞌ, Mõg ꞌãpet hah, ꞌĩhã ꞌãkuxa yũm. Kaxĩy.
\p
\v 49 Tu hãmꞌãktux ꞌĩhã tik nũn, yã Yax yõg kãmãnat, tu nõm pu hãmꞌãktux, hu:
\p —‍Yax, ꞌãk-tok hex yãꞌ xok. ꞌŨtux hok pu Notot put pu mõg, mõꞌkutnãꞌ pu yãy xipꞌax tu xihip. Kaxĩy.
\p
\v 50 Ha Yeyox teꞌ xupak, tu Yax pu hãmꞌãktux, hu:
\p —‍ꞌÃkuxãnõg hok, ꞌãkuxa yũm kaꞌok, ha Topa te ꞌãk-tok hittupmãp-tup hokꞌah. Kaxĩy.
\p
\v 51 Tuꞌ mõg tu mõktu Yax pet tuꞌ xupep, ha tikmũꞌũn mõxaha kamah, ha Yeyox teꞌ tux hok pu tikmũꞌũn mõxakux hok, tu Pet yĩmõgatux, xix Tiak, xix Yoãm, pu yãy mũtik mõg, haꞌ mõxakux Yeyox mũtik, xix kakxop hex mũg tak xiꞌ mũg tut mõxakux.
\p
\v 52 Pa tikmũꞌũn nõy ꞌap mõxakuxꞌah, tu hãptopaꞌ pip, tu kakxop hex hãꞌ potahaꞌ, ha Yeyox te:
\p —‍ꞌÃpota hok. Kakxop hex ꞌap xok xeꞌeꞌah, yã mõꞌyõn. Kaxĩy.
\p
\v 53 Ha tikmũꞌũn yĩxix kummuk, tu Yeyox ꞌãktux kummuk, tu:
\p —‍Yãꞌ xok xeꞌeꞌ! ꞌŨgmũꞌãteꞌ yũmmũg! Kaxĩy.
\p
\v 54 Pa Yeyox mõg, tu kakxop yĩm mũg, tuꞌ yĩy kaꞌok, tu:
\p —‍Nixix, ꞌãyok nũy ꞌãknĩhã xihip! Kaxĩy.
\p
\v 55 Haꞌ put pu hiꞌ, tuꞌ yok, tuknĩhãꞌxip, haꞌ xat, pu xitꞌax hõm kakxop puꞌ, puyĩy mãꞌ.
\v 56 Haꞌ tak xiꞌ tut kuxãnõg, tu tuꞌ kuxa hittup, pa Yeyox te:
\p —‍Tikmũꞌũn ꞌũm puꞌ xuktux hok! Kaxĩy.
\c 9
\s Yeyox te tik te 12 mõꞌpok
\p
\v 1 Yeyox te yãy yõg tik xop te 12 xãnãhãꞌ, tu yãy ꞌãxetꞌax hõm pu yãmĩy kummuk xohix xit tikmũꞌũn kopah, nũy tu tikmũꞌũn pakut xop hittupmãꞌ,
\v 2 Haꞌ xat, pu Topa yãy yõg tikmũꞌũn xat ꞌãktux, xiꞌ xat, pu ꞌyĩpkox pip ꞌãktux, xiꞌ xat pu tikmũꞌũn pakut xop hittupmãꞌ,
\v 3 tu:
\p —‍ꞌÃhok mõg, tu hãpxop ꞌũm ta hok, xiꞌ kup hã tu ꞌãmõg hok, xiꞌ tut ta hok, xix topixxax nõy ta hok.
\v 4 Ha tikmũꞌũn te: “ꞌŨkpet kopa ꞌãxipꞌax,” kaxĩy, ꞌãpu xihip kaꞌok, tuꞌ nĩm hok, ꞌĩhã kõmẽn kopa ꞌãtiꞌ.
\v 5 Pa tikmũꞌũn te: “Mõg, mõg,” kaxĩy, ꞌãpu mõg mõꞌkaꞌok, tu nõm tikmũꞌũn nĩm, tu hãpkõnõn ꞌãpata haꞌ xit, nũy tikmũꞌũn kummuk ꞌãktux. Ta tuꞌ kux. Kaxĩy.
\p
\v 6 Tu mõꞌpok, haꞌ mõg, tu hãpkumep, tuꞌ xip tu xexka xohix kotit kopaꞌ mõg, tu hãmꞌãpak max ꞌãktux, hu Topa te tikmũꞌũn xat ꞌãtux, ha yĩpkox pip ꞌãktux, tu kõmẽn yõg pakut xop hittupmãhãꞌ,
\v 7 tu hãpxopmã kaꞌok.
\p ꞌĨhã tikmũꞌũn nõy te Ganinet yõg gohenanok pu Yeyox ꞌãktux, tuꞌ yõg hãpxopmãꞌax ꞌãktux, ha gohenenaok ꞌãxetꞌax ꞌEnot, tu:
\p —‍Piꞌya nõꞌõm? Kaxĩy.
\p Ha tikmũꞌũn yãg te Yõam putpu hi ꞌãktux, nõm tep-tox pix,
\v 8 haꞌ yãg te:
\p —‍Mõnãyxop hittap ꞌEnit te put pu hi ꞌãktux. Yãꞌ xohix te hãmpeꞌpaxex, hu: “ꞌŨ ꞌũm nõm Yeyox?” Kaxĩy.
\v 9 Yĩy ꞌEnot te:
\p —‍ꞌÃteꞌ xat pu mõy Yoãm putox xak, pu tu xok, hap-tex, pa ꞌũ ꞌũm nõꞌõm, tu hãpxopmã kaꞌok? Kaxĩy.
\p Tuꞌ xak, nũy Yeyox pẽnãꞌ.
\s Yeyox te tikmũꞌũn xohix xexka xĩnnãhãꞌ
\p
\v 10 Ha Yeyox yãy yõg mõꞌpok xop nũn, tu putpuꞌ nũn, tu nũktu hãmꞌãktux Yeyox puꞌ, tu hãpxopmã kaꞌok ꞌãktux, ha Yeyox te tik xop te 12 mõgãhãꞌ, ꞌap nõy mõgãꞌah, tuꞌ mõg tu mõktu kõmẽn kutõgnãg Metxax tuꞌ mõxahaꞌ,
\v 11 pa tikmũꞌũn teꞌ yũmmũg, tuꞌ peꞌ mõg, ha Yeyox kuxa hittup, tu:
\p —‍ꞌOk ꞌãxop nũn? Kaxĩy.
\p Tu hãmyũmmũgãhãꞌ, hu:
\p —‍Topa te yãy yõg tikmũꞌũn xat. Kaxĩy.
\p Tuꞌ pakut xop hittupmãhãꞌ.
\p
\v 12 Ha ꞌãmnĩy, yĩy mõꞌpok xop te 12 te:
\p —‍Putup teꞌ kix tikmũꞌũn, ꞌãpu mõꞌpok pu mõg putpuꞌ, nũy xip tu xexka kopa hãpxop pop, nũy mĩptut ꞌũm kopa nũꞌxok, nũnte hãm panip hah. Kaxĩy.
\p
\v 13 Pa Yeyox te:
\p —‍ꞌÃpu, ꞌũxĩnnãꞌ, puyĩy tu hi kaꞌok. Kaxĩy. Ha:
\p —‍ꞌŨxitꞌax ꞌũm? ꞌAp xipꞌah. ꞌŨgmũꞌãte pãm xohix te 5 pip, xix mãm tix mãm, ha tikmũꞌũn xohix xexka punethok. Piꞌyãꞌ mõg putup, nũy pãm xohix pop, nũy tikmũꞌũn pu popmãꞌ, nũy tuꞌ xĩnnãꞌ? ꞌAp kõmẽn xexka yũmꞌah. Kaxĩy.
\p
\v 14 Ha tikmũꞌũn yõg tik xop xohix te 5.000, ha Yeyox te yãy yõg mõꞌpok xop xat, pu tikmũꞌũn hãm tu mõꞌxip, haꞌ yãg puxet te 50 mõꞌxip, xiꞌ nõy te 50 mõꞌxip, tu mõktu xohix.
\p
\v 15 Ha mõꞌpok xop yĩpkox pip, ha tikmũꞌũn xohix te hãm tuꞌ mãm,
\v 16 ha Yeyox te pãm xohix te 5 pop, xix mãm 2, tu pexkox haꞌ pẽnãhãꞌ, tu Topa ꞌãktux max, hu:
\p —‍Topa ꞌãmax. Xatek mũg hãpxop max xohix popmãhãꞌ. Puxiꞌ. Kaxĩy.
\p Tu yãy yõg mõꞌpok xop pu pãm koxip, tu xeꞌ koxip, tu nõg nõy nãꞌ mõg tu mõktu xohix, nũy tikmũꞌũn xohix xĩnnãꞌ,
\v 17 haꞌ xohix teꞌ mãhãꞌ, tuꞌ hi kaꞌok, pãyã pãm pip punethok, ha tikmũꞌũn xit tap ꞌĩhã tik xop te pãm pop, tu manax kopaꞌ xex, ha manax te 12 nũꞌxip pãm hah, xix mãm hah.
\s Pet teꞌ Yeyox yã Kunnix ꞌãktux
\p
\v 18 ꞌÃmnĩy nõy ꞌĩhã Yeyox puxehnãg xip, tu Topa pu hãmꞌãktux, ha yãy yõg mõꞌpok xop nũn, tu Yeyox yĩkãgnãg hãꞌ pip, ha Yeyox te:
\p —‍Tikmũꞌũn te putep ꞌãktux ꞌãꞌ? Kaxĩy.
\p
\v 19 Ha tik xop te:
\p —‍ꞌŨyãg te ꞌãmũn yã Yoãm ꞌãktux, nõm tep-tox pix, haꞌ yãg nõy te ꞌãmũn yã ꞌEnit ꞌãktux, hõmã nõꞌõm ꞌEnit te Topa pupi hãmꞌãktux, haꞌ yãg nõy te: “Yeyox yã tik hittap nõy, tu Topa pupi hãmꞌãktux, yã putpu hi nõmhã.” Kaxĩy.
\p
\v 20 Ha:
\p —‍Xix ꞌãxop? Putep ꞌãmpeꞌãpanõm? ꞌOk pek mũn? Kaxĩy.
\p Ha Pet te:
\p —‍ꞌÃmũn yã Kunnix, Topa te xa yãykutnãhãꞌ. Kaxĩy.
\s Yeyox teꞌ xokꞌax ꞌãktux, xiꞌ putpuꞌ hiꞌax ꞌãktux
\p
\v 21 Ha Yeyox te:
\p —‍Nãy, hãmꞌãktux hok tikmũꞌũn nõy puꞌ. Kaxĩy.
\p
\v 22 Tu xe hãmꞌãktux, hu:
\p —‍ꞌŨgmũn yã Tikmũꞌũn Kutok, tuk xũy xexkap-tup, ha Yoneo xexka xop tek mũn putup nõg, xix ꞌãmãnex xexka xop, xix hãmyũmmũg xop tek mũn putup nõg, tuk putex putup, ha ꞌãmnĩy tikoyuk nõg, ꞌĩhã put puk hip-tup. Kaxĩy.
\p
\v 23 Tu hãpxip kutõgnãg ꞌĩhã xe hãmꞌãktux, tuꞌ xohix pu hãmꞌãktux, hu:
\p —‍Tikmũꞌũn tek mũn mũtik hãpkumep putup, puxix yãy peꞌpaxexk-tõgnãg, tu mõktu yãy putupꞌax xaxok, nũy ꞌãmnĩy xohix hãꞌ yãy yõg mĩpkupnix tat, nũy xũy, nũy ꞌũgmũn putuk xũy, tuk mũn mũtik hãpkumep xeꞌẽgnãg.
\v 24 Ha tikmũꞌũn te yãy xaxok hok, puxix tuꞌ hi xeꞌe ꞌohnãg, pa tikmũꞌũn xok ꞌũgmũn hah, puxix tu hip-tup mõ kumaꞌ mõg, tuꞌ hi kux ꞌohnãg.
\v 25 Teptu hãpxexka yõg hãpxop xohix pop, pãyãꞌ xok? ꞌŨp-texop xexkah, tuꞌ xok, tu hãpxop xohix xaxok, ꞌũxok tuꞌ, puxix yãꞌ hok xeꞌẽgnãg.
\v 26 Tikmũꞌũn tek mũn hã yãyhãhup, xix yõgnũ hãmꞌãktux hã yãyhãhup, ꞌũnõy xop pu yãyhãhup, hu: “ꞌAkmũn Yeyox yõgꞌah”, kaxĩy, kopxix ꞌãte nõm tikmũꞌũn hã yãyhãhup ꞌũyãnãn tuꞌ. ꞌÃtak Topa pu ꞌãte nõm xop hã yãyhãhup, ꞌĩhãk nũn, hu: “ꞌõhõm ꞌãꞌ yõgꞌah,” kaxĩy, ꞌĩhãk xexka xeꞌẽgnãg nũn, ꞌÃtak Topa putuk, xix pexkox yõg nũꞌpok xop putuk.
\v 27 ꞌÃte xa hãpxeꞌe ꞌãktux: ꞌÃxop ꞌãyãg xok putup hok, tu mõktu Topa te yãy yõg tikmũꞌũn xat xeꞌẽgnãg. Ta tuꞌ kux. Kaxĩy.
\s Yeyox xix Mõyyex xix ꞌEnit
\p
\v 28 Ha ꞌãmnĩy te 8 nõg, ꞌĩhã Yeyox te Pet mõgãhãꞌ, xix Tiak, xix Yoãm, ha yĩktix tu mõꞌkãnĩn haꞌ mõg tu pũnãmep, nũy Topa pu hãmꞌãktux.
\v 29 Yeyox te hãmꞌãktux ꞌĩhãꞌ pa yãnãm putuk, ha topixxax tũmnãg, tu kuyãnãn putuk.
\v 30 Hãpxip ꞌohnãg ꞌĩhã tik 2 tihiꞌ, tu Yeyox pu hãmꞌãktux hãꞌ nõy yãnãn, tik puxet ꞌãxetꞌax Mõyyex, haꞌ nõy ꞌãxetꞌax ꞌEnit, yã Yoneo yõg tikmũꞌũn hã mõnãyxop hittap, hõmã Topa teꞌ mõgãhãꞌ pexkox tuꞌ, nũy tihiꞌ hãmyãxatamuk xohix hã,
\v 31 ha Topa yõg yãnãm xeꞌẽgnãg te pexkox tuꞌ xakot, ha tik 2 te Yeyox xokꞌax ꞌãktux, tuꞌ xok putup kõmẽn Yenoyanẽn kopa ꞌãktux, tu Topa tep-tup kaxĩy ꞌãktux,
\v 32 ꞌĩhã Pet xiꞌ nõy xop mõꞌyõn kaꞌok, tu yãy koxak, tu Yeyox xexka xeꞌẽgnãg pẽnãhãꞌ, tu tik 2 xexka xeꞌẽgnãg pẽnãhãꞌ,
\v 33 ha tik hittap 2 mõg putup, ꞌĩhã Pet te:
\p —‍Yãyãꞌ, yãꞌ max nũntek mũg pip. ꞌÃpu, yũmũ mĩptut kumex tikoyuk mĩy, yãpxet ꞌã puꞌ, xix nõy Mõyyex puꞌ, xixꞌ nõy ꞌEnit puꞌ. Kaxĩy.
\p Pãyã hãmyũmmũg ꞌohnãg.
\v 34 Tu hãmꞌãktux, ꞌĩhã hãmgõy xexka nũn, tu tik 2 xaxogãhãꞌ, tu mõꞌnĩy, ha tik xop kuxãnõg, ꞌĩhã hãmgõy kopaꞌ xip, hãmpẽnã ꞌohnãg hah,
\v 35 ha Topa yĩy, tute hãmgõy xexka kopa hãmꞌãktux, hu:
\p —‍Nũhũ ꞌũgkutok pit xeꞌẽgnãg. ꞌÃte nõm yãykutnãhãꞌ. ꞌŨxupax!. Kaxĩy.
\p
\v 36 Tu hãmꞌãktux kux, ha Yeyox puxehnãg xip, ha yãy yõg mũtik hãpkumep xop yĩy ꞌohnãg, ꞌap hãmꞌãktuxꞌah, tu hãpxopmã ꞌũm pẽnãꞌax ꞌãktux ꞌohnãg ꞌũnõy xop pu nõmhã.
\s Yeyox te kakxop pit hittupmãhãꞌ
\p
\v 37 Hãptup ꞌĩhã yĩktix tu ꞌũyĩxohoh, ha tikmũꞌũn xohix punethok pip, tu Yeyox hip,
\v 38 ha tik xip, tuꞌ yĩy kaꞌok tu:
\p —‍Notot, mãꞌ! ꞌŨgkutok pit puxehnãg pakut.
\v 39 Yãmĩy kummuk teꞌ pakutnãhãꞌ, haꞌ yĩy kaꞌok, tu hãm tuꞌ nãhãꞌ, tu yãy pu xuꞌux, ha yĩkonnop te yĩkox tuꞌ xupep, ꞌũyĩy xax tuꞌ xupep. Yã yãmĩy teꞌ xũygãhãꞌ, tuꞌ nĩm ꞌohnãg.
\v 40 ꞌÃte ꞌõg tik te ꞌãmutik hãpkumep xop tuꞌ xak, tu nõm xop tuꞌ xak, pu yãmĩy xit pu mõg, pãyã ꞌap xit yũmmũgꞌah. Kaxĩy.
\p
\v 41 Ha Yeyox te:
\p —‍Tikmũꞌũn kuxa mãm ꞌohnãg, tuꞌ kummuk ꞌãmnĩy xohix hã, ꞌãte ꞌãxop nõãꞌtot. Hãm ꞌũm hãꞌ kuxꞌax? Kaxĩy.
\p Tuꞌ tak pu hãmꞌãktux, hu:
\p —‍ꞌÃk-tok putnũꞌ. Kaxĩy.
\p
\v 42 Haꞌ putnũn, ꞌĩhã yãmĩy kummuk ꞌũkopa nuhukgãhãꞌ, tu hãm tuꞌ putxok, ha Yeyox te yãmĩy xat pu mõg, yĩꞌ mõg, ha kakxop hittup, ha Yeyox teꞌ tak haꞌ mõgãhãꞌ.
\v 43 Ha tikmũꞌũn xohix kuxãnõg, Topa mũn xeꞌẽgnẽg kaꞌok hah, tuꞌ yẽy,
\s Yeyox teꞌ xokꞌax ꞌãktux ꞌũxeheh
\p Tikmũꞌũn kuxa teꞌ yẽy, ꞌĩhã Yeyox te yãy yõg mũtik hãpkumep xop pu hãmꞌãktux, hu:
\p
\v 44 —‍ꞌŨgꞌãpax, ꞌũxaxok hok! ꞌÃte xa hãpxeꞌe ꞌãktux: ꞌŨgmũn yã Tikmũꞌũn Kutok, ha tik puxet te gãy xop mõgãp-tup ꞌũghah, ꞌũkoitꞌax hãk mõgãp-tup, pu tuk putex. Kaxĩy.
\p
\v 45 Haꞌ xupak, pãyã nõm hãmꞌãktux kaꞌok, yĩy tik xop kuxa yũm ꞌohnãg, huꞌ yũmmũgꞌah, ꞌap yĩkopit putupꞌah.
\s ꞌŨ ꞌũm xexkah?
\p
\v 46 Tik xop te yãy mũtik hãmꞌãktux hãꞌ nõy yãnãn, nũy piꞌyã tik yãy xexka yũmmũg, nũy piꞌyãk-tõgnãg yũmmũg, hu: —‍ꞌŨgmũn yãk xexkah, kaxiy, haꞌ nõy te: —‍ꞌAp ꞌũxexkaꞌah, yãk-tõgnãg, pãyãꞌ nõy yãꞌ xexkah. Kaxĩy.
\v 47 Ha Yeyox teꞌ yũmmũg, ha kakxop teꞌ yĩkaꞌ xip, yĩꞌ put,
\v 48 tu:
\p —‍Tikmũꞌũn tek putup, ha ꞌãte kakxop putup, nõm yĩpkox pip, puxix nõm tikmũꞌũn yã kakxop putup kamah. Tikmũꞌũn tek putup, puxix ꞌÃtak Topa putup kamah, nõm te nũgkutnãhãꞌ. ꞌŨk-tõgnãg xop yĩpkox pip, nõm xop te yãyhãp-tup xexkah xop, ꞌãxop mũtik. Kaxĩy.
\s Tikmũꞌũn te ꞌãxop tukmĩy hok, puxix ꞌãxop mũtik tu hãpxopmãꞌ
\p
\v 49 Ha Yoãm te:
\p —‍Yãyãꞌ, ꞌũgmũꞌãte tik pẽnãhãꞌ, tu yãmĩy kummuk xit, tu xaꞌ xuktux, tu ꞌãxuxetꞌax ꞌãktux hãꞌ xut, hak mũꞌãteꞌ tux hok pu mĩy hok, hamũn tek mũk mũtik hãpxopmã ꞌohnãg hah. Kaxĩy.
\v 50 Ha Yeyox te hãmꞌãktux Yoãm puꞌ, xix yãy yõg mũtik hãpkumep xop pu hãmꞌãktux, hu:
\p —‍ꞌŨtux hok pu mĩy. Tik te ꞌãxop mũtik yãy tu yãnãn hok, puxix tu ꞌãmũtik hãpxopmãꞌ. Kaxĩy.
\s Xãmãnit yõg tikmũꞌũn te Yeyox putup nõg
\p
\v 51 Hãpxip kutõgnãg ꞌĩhã ꞌũxexka xop te Yeyox putex putup, yãꞌ xokꞌax hũmnãg, haꞌ yũmmũg, hu kõmẽn Yenoyanẽn haꞌ mõg putup,
\v 52 tu tik xop mõꞌpok hãmãxap, haꞌ mõg, tu mõktu hãpxexka Xãmãnit tuꞌ mõxahaꞌ, nũy pipꞌax xax, tuꞌ mõg, nũy ꞌãmuk xax,
\v 53 pãyã hãpxexka yõg tikmũꞌũn tep-tup nõg, tu kõmẽn Yenoyanẽn haꞌ mõg pẽnãhãꞌ, hup-tup nõg.
\v 54 Ha Tiak xix Yoãm gãy, tu:
\p —‍ꞌOk xatep-tup ꞌũgmũꞌãteꞌ xat, pu kuxap pexkox tu nũꞌyõn, nũy tikmũꞌũn kummuk kix? Kaxĩy.
\p
\v 55 Pa Yeyox teꞌ mãnõg, tuꞌ yokãnãm,
\v 56 tuꞌ kep haꞌ mõg, tu xip tu xexka, nõy haꞌ mõg, ha yãy mũtik hãpkumep xop mõg kamah.
\s Tikmũꞌũn te Yeyox peꞌ mõg putup
\p
\v 57 Tuꞌ mõg, ꞌĩhã tik te Yeyox pu hãmꞌãktux hu:
\p —‍ꞌÃte ꞌãmũtik hãpkumep putup, yãꞌ hãm ꞌũm tu ꞌãmõgꞌax ꞌũgmõg kamah. Kaxĩy.
\p
\v 58 Ha Yeyox te:
\p Kokexmax hex pet, xix putuxnãg xohix pet, pak mũn yã Tikmũꞌũn Kutok, ꞌãk pet ꞌũm pipꞌah ꞌũ kopak pihiꞌ. Kaxĩy.
\p
\v 59 Tu tik nõy xãnãhãꞌ, hu:
\p —‍ꞌŨgmũtik hãpkumep, kaxĩy.
\p Paꞌ nõy te:
\p —‍Nãy. Yãy pet hak mõg tap nũy ꞌãtak nõ hãpkot, nũy ꞌãmũtik hãpkumep kũnãy tuꞌ. Kaxĩy.
\p
\v 60 Ha:
\p —‍Pũyã xakix xop ꞌũnõy xop nõ hãpkot, pa nũꞌ, nũy ꞌũgmũtik hãpkumep, nũy Topa yãy yõg tikmũꞌũn xat ꞌãktux. Kaxĩy.
\p
\v 61 Ha tik nõy te:
\p —‍ꞌŨgmõg ꞌãpehe, pak tux hok ꞌũ xape xop pu ꞌãneo, nũy hãpkumepꞌax ꞌãktux. Kaxĩy.
\p
\v 62 Ha:
\p —‍Tik hãm, tu taꞌ taxutnak nĩm, nũy hãm kumãgnãg mõg, puxix Topa nõm xe homip xat putup ꞌohnãg. Kaxĩy.
\c 10
\s Yeyox te tik te 72 mõꞌpok
\p
\v 1 Hãpxip kutõgnãg ꞌĩhã Yeyox te tikmũꞌũn pẽnãhãꞌ, tu tik nõy yĩmõgãtux, ha tik xohix te 72 yĩmõgãtux, tu tik 2 mõꞌpok, xix tik 2 nõy mõꞌpok, xix tik 2 nõy gã hu mõꞌpok, tu mõktu xohix, nũy ꞌũkeppaꞌ mõg kõmẽn xohix hah, xix xipꞌax xohix hah,
\v 2 ꞌĩhãꞌ xat, hu:
\p —‍Hãpxop xohix taꞌ, xix yĩmpaꞌ, pa kãmãnat pipꞌah pu hãpxop nũnnãꞌ. ꞌÃpu, Topa tuꞌ xax, pu tikmũꞌũn nũꞌpok, pu hãpxop nũnnãꞌ. ꞌÃpu, Topa tuꞌ xax, pu tikmũꞌũn nũꞌpok, pu hãmꞌãpak max ꞌãktux.
\v 3 Mõg. ꞌÃxop yãꞌ gãy hok xop, kahnẽn putuk, ha ꞌãte mõꞌãpok hãmgãy xop kopah, nõm gãy xop te kokex gãy putuk.
\v 4 Tayũmak paxmõg hok, xix tuhut, xix pataxax tat hok. Putat kopaꞌ hip hok, nũy hãmꞌãktux hãꞌ nõy yãnãn.
\v 5 Mĩptut ꞌũm tu ꞌãmõxap-tup, hu ta hãmꞌãktux hãmãxap, hu: “Pũyãꞌ kuxa mãm nũ mĩptut kopah,” kaxĩy, tuknãy tuꞌ mõxaꞌax.
\v 6 Tikmũꞌũn max te mĩptut kopa tihiꞌ, puxiꞌ kuxa mãm, pa tikmũꞌũn kummuk tihiꞌ, puxiꞌ kuxa mãm ꞌohnãg, pa ꞌãkuxa mãm pax putup.
\p
\v 7 —‍Mĩptut kopaꞌ nox pihiꞌ, hu taꞌ mõg hok mĩptut nõy tuꞌ, pãyã piꞌ, nũyꞌ xit, nũy xoꞌop. Mĩptut yõg tikmũꞌũn te ꞌãp-tup, pu pihiꞌ, hu ta piꞌ. Yãꞌ max tikmũꞌũn hãm punethok, tuꞌ xit max kamah.
\v 8 Tikmũꞌũn te ꞌãp-tup, tu xaꞌ hõm xitꞌax, ꞌãpu, ꞌũpaꞌ, nũy mãꞌ, ꞌĩhã kõmẽn tuꞌ pip.
\v 9 Kõmẽn yõg pakut xop hittupmãꞌ, tu hãmꞌãktux, hu: “Hõnhã Topa te ꞌãxop xat nũnteꞌ. ꞌÃpu ꞌãyĩpkox piꞌ,” kaxĩy.
\p
\v 10 —‍Pa kõmẽn tu mõxaha, ha nõm tikmũꞌũn te ꞌãp-tup nõg, ꞌãpu kõmẽn kotit hã mõg, nũy hãmꞌãktux, hu:
\v 11 “ꞌAp maxꞌah kõmẽn, tu Topa yõg hãmꞌãktux putup nõg, yĩy kõmẽn yõg hãpkõnõn tek mũk pata tuꞌ mõy, nũy Topa gãy ꞌãktux. Pãyãꞌ xaxok hok. Hõnhã Topa te ꞌãxop xat nũnte, ha ꞌãxop tep-tup nõg, tu yĩpkox ꞌohnãg.” Kaxĩy.
\p Tu xe hãmꞌãktux, hu:
\p
\v 12 —‍ꞌÃte xa hãpxeꞌe ꞌãktux: Hãptup xeꞌe mõꞌnãp-tup, ꞌĩhã Topa te kõmẽn kummuk yõg tikmũꞌũn kopit putup, tuꞌ kummukgãp-tup ꞌũyãnãn tuꞌ, tu kõmẽn kummuk yõg tikmũꞌũn kuxa kak-tõgnãg, ha kõmẽn hittap Xonõm yõg tikmũꞌũn kuxa ka xexka putup. Kaxĩy.
\s Kõmẽn xexka yõg tikmũꞌũn kuxa mãm ꞌohnãg
\p
\v 13 Tu xe:
\p —‍Kõmẽn Konãy yõg tikmũꞌũn xũy putup, xix kõmẽn Metxax yõg tikmũꞌũn xũy kamah. Topa te hãpxopmã xeꞌẽgnãg kõmẽn kopah, pãyã hãpkummuk hã yãyhãhup ꞌohnãg, hu hãpkummuk mĩy pax. Paxpu Topa hãpxopmã xeꞌẽgnãg kõmẽn hittap Tinok yõg tikmũꞌũn keppah, xix kõmẽn hittap Xinõm yõg tikmũꞌũn keppah, puxix yãyhãhup xexkah, nũy tu kummuk mĩy kux, tu xagok hã mõꞌtatꞌax, tu putok hã yãy mõꞌnĩy, pu tikmũꞌũn xohix yã yãyhãhup pẽnãꞌ.
\v 14 Hãptup mõꞌnãp-tup ꞌĩhã Topa te hãpxopmãꞌax xohix kopit putup, tu kõmẽn Metxax yõg tikmũꞌũn kuxa kak-tõgnãg, xix kõmẽn Konay yõg tikmũꞌũn kuxa kak-tõgnãg, pãyã kõmẽn Tinok yõg tikmũꞌũn kuxa ka xexkah, xix kõmẽn Xinõm yõg tikmũꞌũn kuxa ka xexkah.
\v 15 Ha kõmẽn Kapãnãn yõg tikmũꞌũn kummuk te pexkox haꞌ mõg putup, pãyã yãyhãhup ꞌohnãg, nũy tu kummuk mĩy kux, yĩy Topa te mõꞌpok putup Hãmgãyãgnãg pet hah. Kaxĩy.
\p
\v 16 Tu yãy yõg mũtik hãpkumep xop pu hãmꞌãktux, hu:
\p —‍Tikmũꞌũn te ꞌõg hãmꞌãktux ꞌãpak, tuꞌ yĩpkox pip, puxik mũn pu yĩpkox pip kamah, yãy putuk yĩnmũn. Tikmũꞌũn te ꞌãp-tup nõg, puxik mũn putup nõg kamah. Tikmũꞌũn tek mũn putup nõg, puxix Topap-tup nõg kamah, nõm tek mũn nũgkutnãhãꞌ. Ta tuꞌ kux. Kaxĩy.
\s Tik te 72 nũn putpuꞌ
\p
\v 17 ꞌÃmnĩy ꞌũm ꞌĩhã tik xop put puꞌ nũn nãm, tik xop te 72 nũn, tuꞌ kuxa hittup xexkah, tu:
\p —‍Yãyãꞌ! Xate ꞌãxuxetꞌax ꞌãꞌ hõm, ꞌũyĩy yãmĩy kummuk xop xit, hak mũkꞌãteꞌ xit, pu mõg xupahaꞌ! Kaxĩy.
\p
\v 18 Ha Yeyox te:
\p —‍Hamũn. ꞌÃte Hãmgãyãgnãg pẽnãhãꞌ. Tex yãnãm te hãm tuꞌ xakot mõꞌkaꞌok, hã kaxĩy Hãmgãyãgnãg te pexkox tuꞌ nãhãꞌ, tex yãnãm putuk.
\v 19 ꞌŨgꞌãpax, ꞌãte yãy ꞌãxetꞌax xaꞌ hõm, xa nõ kãyã gãy tonnok, nũy tup-tex, xiꞌ xok pata kuhmĩy tonnok nũy tup-tex, nũy Hãmgãyãgnãg yõg hãpxopmãꞌax kuxyãꞌ, pu ꞌãxũygã hok,
\v 20 pa ꞌãkuxa hittup hok, ꞌãxop kaꞌok tuꞌ. ꞌÃmhok. Topa te ꞌãxuxetꞌax mõꞌkupix pexkox kopah, yãꞌ xipꞌax max xaꞌ popmãhãꞌ pexkox tuꞌ, pu ꞌãhittup. Kaxĩy.
\s Yeyox kuxa hittup xexkah
\p
\v 21 Hãpxip ꞌohnãg ꞌĩhã Topa Koxuk te Yeyox kuxa hittupmãhãꞌ, ha Topa pu hãmꞌãktux, hu:
\p —‍ꞌÃtak, ꞌãmũn yã pexkox hã ꞌãxuxyãꞌ, xix hãm xexka hã ꞌãxuxyãꞌ. ꞌÃmax, xate tikmũꞌũn ꞌũk-tõgnãg xop pu hãmyũmmũgãhãꞌ, tu tikmũꞌũn xexka xop puꞌ xaptop, puyĩy tu yũmmũg hok. Hamũn. Kaxĩy xatep-tup. Kaxĩy.
\p
\v 22 Tu xe:
\p —‍Yõg ꞌÃtak te ꞌãꞌ popmãhã hãpxop xohix, ꞌũ puxehnãg ꞌãtak yũmmũg, xix tik xop ꞌãte hãmyũmmũgã xop te ꞌÃtak Topa yũmmũg. Kaxĩy.
\p
\v 23 Tu yãy yõg xop xãnãhãꞌ, nũy tup-xehnãg pu hãmꞌãktux, hu:
\p —‍ꞌÃkuxa hittup, hãpxopmã pẽnã nũy, ha tikmũꞌũn kuxa hittup te nõm pẽnãhã kamah.
\v 24 ꞌÃte xa hãpxeꞌe ꞌãktux: Hõmã, hãmyãxatamuk xohix ꞌĩhã tik te Topa pupi hãmꞌãktux, nũy tikmũꞌũn puꞌ xuktux, tu nõm hãpxopmãꞌax xeꞌẽgnãg xak, nũy pẽnãꞌ, haꞌ xatꞌax xop hittap teꞌ pẽnãp-tup kamah, pãyãꞌ pẽnãꞌah, tu hãmꞌãktux ꞌãpak putup, pãyãꞌ xupakꞌah, ha ꞌãxop teꞌ xupak nõmhã. Kaxĩy.
\s Xãmãnit yõg tik max
\p
\v 25 Tik te hãmyũmmũg xip, tu Yeyox yĩkopit putup, tu taꞌ nũn, nũy Yeyox yĩkopit, tu:
\p —‍Notot, ꞌãtep-tep mũn mĩyꞌax nũy Topa mũtik ꞌũghi xeꞌẽgnãg mõg kumak mõg, haꞌ kux ꞌohnãg? Kaxĩy.
\p
\v 26 Ha:
\p —‍Tep-te ꞌũmãgãhã Topa yõg tappet hã? Topa tep-tep xat xaꞌ? ꞌOk xateꞌ yũmmũg? Kaxĩy.
\p
\v 27 Ha tik te:
\p —‍Yamũn. Topa tappet te Topap-tup pax xat hãmãxap, tu tikmũꞌũn te Topap-tup pax xat, tuꞌ kuxa hãp-tup pax xat, tup-tup pax kaꞌok xat, tup-tox hãp-tup pax xat, tu yãꞌ nõy putup pax xat, yãy putup pax putuk. Kaxĩy.
\p
\v 28 Ha:
\p —‍Yamũn. ꞌÃpu mĩy, tu hip-tup ꞌap nõgꞌah Topa mũtik. Kaxĩy.
\p
\v 29 Haꞌ nõy te yãy peꞌpaxex max, hu:
\p —‍ꞌŨ ꞌũm tek mũn hãk nõy? Kaxĩy.
\p
\v 30 Ha Yeyox te hãmꞌãktux hã hãmyũmmũgãhãꞌ, nũy Topa yõg hãpxopmãꞌax yũmmũgãꞌ, nũy ꞌũnõy pu hãmmaxnãꞌax ꞌãktux, hu:
\p —‍Kõmẽn Yenoyanẽn te yĩktix yĩmũꞌ yũm, ha ta Yoneo yõg tik te kõmẽn tu kekpaꞌ mõg, tu kõmẽn Yenikot haꞌ mõg putup, ꞌĩhã tik kummuk xop teꞌ mũg, tuꞌ yõg topixxax hãꞌ xupxet, tuꞌ kix kakixnãg, tuꞌ nĩm, haꞌ xok putũmnãg.
\v 31 Ha ꞌãmãnex puxet tep-tat hãꞌ nũn, tu Yenikot haꞌ mõg, tu tik pẽnãhãꞌ, pãyã nõãꞌyẽn, tuꞌ mõg,
\v 32 ha Nemix xop yõg tik kamaꞌ nũn, tu tuꞌ pẽnãhãꞌ, tu nõãꞌyẽn, tuꞌ mõg.
\v 33 Pa hãpxexka Xãmãnit yõg puknõg te putat hãꞌ nũn, tu nũktu xupep, tu tik pẽnãhãꞌ, tu tik kayax punethok haꞌ kuxa kaꞌ,
\v 34 tu hũmnãg tuꞌ xip, tu heptox hã kayax kuꞌuk, tu topixxax ponnok hãꞌ kĩy, tu kãmãnok yĩmũ tu yãy keppaꞌ yũm, tuꞌ mõg, tu mõktu pipꞌax tuꞌ xupep, tu ꞌãmuk haꞌ mõg, nũy ti kaꞌok, tu tik pakut pẽnãmax.
\v 35 Hãptup nõy ꞌĩhãꞌ puknõg teꞌ pipꞌax tu tu pagok, tu tayũmak hõm, tu: “ꞌŨpẽnã max, xa tik hãpxop xex, nũy taꞌ xĩnnãꞌ. Putpuk nũn putup, tu xaꞌ hõmꞌax tayũmak nõy.” Ta tuꞌ kux. Kaxĩy.
\p
\v 36 Tu tik te hãmyũmmũg puꞌ yĩkopit, hu:
\p —‍Putep ꞌãmpeꞌãpaxex? ꞌŨ ꞌũm te tik hãꞌ xapeꞌ, nõm hãpxupxet xop teꞌ kix kakixnãg? Kaxĩy.
\p
\v 37 Ha:
\p —‍Tik puknõg te nõm tik kuxa kaꞌ, huꞌ nõy hãꞌ xapeꞌ. Kaxĩy.
\p Ha:
\p —‍Hamũn. Mõg, nũy kaxĩy ꞌãnõy pu hãpxopmãꞌ. Kaxĩy.
\s Yeyox te Mãꞌat xix Mãnix pet haꞌ mõg
\p
\v 38 Yeyox mõg, tu taꞌ mõg, xix yãy yõg mũtik hãpkumep xop, tu taꞌ mõg, tu mõktu xip tu xexka tuꞌ mõxahaꞌ, ha ꞌũn xip, ꞌũxuxetꞌax Mãꞌat, tuꞌ xãnãhãꞌ, pu nũꞌ, haꞌ nũn, tu ta tuꞌ pip,
\v 39 ha ꞌũn tutnõy ꞌãxetꞌax Mãnix, tu Yeyox nũktu keppaꞌ yũm, nũy yõg hãmꞌãktux ꞌãpak,
\v 40 ꞌĩhã Mãꞌat te ꞌãmuk xexka, tup-xehnãg te ꞌãmuk, tu hãpxop kutet, hu Yeyox yĩkãgnãg haꞌ nũn, tu:
\p —‍Yãyãꞌ, putep ꞌãpeꞌãpaxex: ꞌok max yãk puxet te ꞌãmuk? ꞌÃpu, ꞌũktutnõy xat, pu nũꞌ, nũy hãk tehet. Kaxĩy.
\v 41 Ha Yeyox te:
\p —‍Mãꞌat, Mãꞌat ꞌãyãykuxop punethok,
\v 42 pa hãpxop puxet ꞌũmax, ha ꞌãtutnõy te nõm hãpxop max xeꞌẽgnãg yãykutnãhãꞌ, tu Topa yõg hãmꞌãktux ꞌãpak hãmãxap, ha tik ꞌũm teꞌ kuxa kopaꞌ xut ꞌohnãg. Kaxĩy.
\c 11
\s Yeyox te Topa pu hãmꞌãktuxꞌax yũmmũgãhãꞌ
\p
\v 1 ꞌÃmnĩy puxet ꞌĩhã Yeyox xip, tu yãy yõg xop mũtik ꞌãtiꞌ, tu Topa pu hãmꞌãktux, haꞌ yõg tik puxet te:
\p —‍Yãyãꞌ, ꞌũgmũk yũmmũgã kamah, ꞌũyĩy Topa pu hãmꞌãktux. Hõmã Yoãm te yãy yõg tik xop yũmmũgãhãꞌ. Kaxĩy.
\p
\v 2 Ha Yeyox te:
\p —‍ꞌÃpu Topa pu hãmꞌãktux kaxĩy, hu:
\q “ꞌÃtak,
\q pũyã tikmũꞌũn xohix kuxaꞌ yẽy ꞌãkeppa, nũy ꞌãmax xeꞌẽgnãg ꞌãktux.
\q Pũyã hãpxexka xohix yõg tikmũꞌũn ꞌõg xatꞌax puꞌ yĩpkox piꞌ.
\q
\v 3 ꞌÃmnĩy xohix ꞌĩhãk mũk ꞌã hãpxop ꞌũm nũꞌkutnã, puyĩyꞌ mãꞌ,
\q
\v 4 hak mũ yõg hãpkummuk mĩyꞌax xaxogãꞌ, pu tu kux. Tikmũꞌũn nõy tek mũꞌã kummugãhãꞌ, hak mũ ꞌãte nõm mĩyꞌax xaxogãhã kamah,
\q tu xa tuꞌ xak, xak mũg kopitnã hok. ꞌŨkux.” Kaxĩy.
\p
\v 5 Tu xe hãmꞌãktux, nũy Topa yõg hãpxopmãꞌax yũmmũgãꞌ, nũy tikmũꞌũn kuxa teknõg hok ꞌãktux, hu:
\p —‍ꞌÃmnĩy kote ꞌĩhã ꞌãmõgꞌax ꞌãxape pet hah, tu mõktu xupep, nũy ta tuꞌ xak, hu: “Hãpxop hak nũn, ꞌõgnũ ꞌĩhã tuꞌ hõm,
\v 6 ꞌũkxape nũn, tuꞌ xit pip ꞌohnãg.” Kaxĩy.
\p
\v 7 —‍ꞌOk ꞌãxape te xa hãmꞌãktuxꞌax kummuk? Hu: “Mõg, ꞌãpep, ꞌãmnĩy koxtap hah, hak kutok tek mũn mũtik nõm, xaꞌ xõn putupꞌah ꞌãteꞌ, tu hãpxop xitꞌax xaꞌ hõm putupꞌah.” Kaxĩy. ꞌOk ꞌãxape te xaꞌ xuktuxꞌax kaxĩy? ꞌÃmhok.
\p
\v 8 —‍ꞌÃte xa hãpxeꞌe ꞌãktux: ꞌÃxape yok putup hok, pãyã xate tuꞌ xak, tu xeꞌ xak, tu xeꞌ xak, puxix ꞌãxape tuꞌ yokꞌax, tuknĩhaꞌ xip, tuꞌ paꞌax hãpxop nũy xaꞌ hõm, ꞌãmõg xak tuꞌ. Ta tuꞌ kux.
\v 9 Yã ꞌãte xa hãpxeꞌe ꞌãktux, hu: ꞌÃpu Topa tuꞌ xax, ha xaꞌ hõm putup, ꞌũxaꞌ mõg, tuꞌ xipihiꞌ. Hãptopa tu xip, tuꞌ xãnãꞌ, puxix xa hãpxõn.
\v 10 Tikmũꞌũn xohix te tuꞌ xak, tuꞌ xipihiꞌ, ha mõꞌyĩnnĩnꞌax xõn putup, ꞌĩhã tikmũꞌũn ꞌũm te hãptopaꞌ xip tuꞌ xãnãhãꞌ.
\v 11 ꞌÃk-tok ꞌũm te xa tuꞌ xak hu: ꞌÃm mãm ꞌũm hõm. Kaxĩy. Xate nõm pu kãyã gãy hõm ꞌohnãg ꞌũyãnãn tuꞌ. ꞌÃmhok.
\v 12 ꞌÃk-tok te xa tuꞌ xakꞌax puyĩy xok xuꞌuk tuꞌ hõm. Xate nõm puꞌ hõm xok pata kuhmĩy ꞌohnãg ꞌũyãnãn tuꞌ. ꞌÃmhok.
\v 13 ꞌÃxop kummuk, tu hãpxopmã kummuk, pãyã ꞌãk-tok pu hãpxop max popmãhãꞌ, ha ꞌÃtak Topa te pexkox kopaꞌ xip, tuꞌ max xeꞌẽgnãg, tu xa yãy Koxuk nũꞌkutnãp-tup, nõm xop te ta tuꞌ xak ha nũꞌkutnãp-tup, tikmũꞌũn xop te ꞌÃtak Topa ta tuꞌ kax, puyĩy nũꞌkutnãꞌ. Ta tuꞌ kux. Kaxĩy.
\s Yeyox xix Meyemo
\p
\v 14 Hãpxip kutõgnãg ꞌĩhã Yeyox te yãmĩy kummuk xit, tu yãmĩy yĩy hok xit pu mõg, tuꞌ mõg, ꞌĩhã tik te hãmꞌãktux max, ha tikmũꞌũn kuxa teꞌ yẽy.
\v 15 Paꞌ yãg te:
\p —‍Meyemo te yãmĩy xit, huꞌ yõg xatꞌax, tu Yeyox xat pu yãmĩy xit tikmũꞌũn kopah, pu tu hittupmãꞌ. Kaxĩy.
\p
\v 16 Haꞌ yãg teꞌ yĩkopit putup, tu Yeyox tuꞌ xak, hu:
\p —‍ꞌÃpu, yĩꞌ mãꞌ hãpxopmã kaꞌok xeꞌẽgnãg, ꞌũgmũꞌãꞌ pẽnã, nũy ꞌũgmũꞌã yũmmũg, ꞌũyĩy Topa te ꞌãp-tup pax yũmmũg. Kaxĩy.
\v 17 Pa Yeyox te tikmũꞌũn yõg hãmpeꞌpaxex yũmmũg, tu:
\p —‍Hãpxexka yõg tikmũꞌũn yãykix, puxiꞌ nõg. ꞌŨxape xop yãykix yãy mũtik, puxix hãpxummãnãm.
\v 18 Pax pu Hãmgãyãgnãg yõg yãmĩy yãykix, puxix ꞌũnõg kamah. ꞌÃxop tek mũn ꞌãktux, tu Meyemo tek xat ꞌãktux, ꞌũ xit yãmĩy kummuk.
\v 19 Xate yã koit. ꞌÕgnẽ tik xop te yãmĩy kummuk xit kamah. ꞌŨ ꞌũm te ꞌãxop kaꞌõgãhãꞌ, xa mõy? ꞌAp Hãmgãyãgnãgꞌah. Topa te ꞌãkaꞌogã hokꞌah. Ha kaxĩy ꞌũxohix te ꞌãxop te koitꞌax yũmmũg.
\v 20 Topa tek mũn kaꞌogãhã ꞌũ yãmĩy xupepmãꞌ, ha kaxĩy ꞌũxohix teꞌ yũmmũg, tu Topa kaꞌok yũmmũg, tu yãy yõg tikmũꞌũn xat kamah yũmmũg, nũnte ꞌãxop teꞌ pẽnãhãꞌ.
\p
\v 21 —‍Tik kaꞌok xup mĩkax xexkah, tu yãyhã pẽnãnãꞌ xip, haꞌ nũn ꞌohnãg kummuk xop, nũy xupxet,
\v 22 pa tik kaꞌok xexka nũn, nõm ta tut, tuꞌ nõy yãyhã topoh, tu yãy mũg, tu mĩkax xexka xut, ꞌũxexka tuꞌ, tuꞌ nõy yõg hãpxop xohix hãꞌ xupxet, tuꞌ pop, tu yãy yõg tik xop puꞌ koxip.
\p
\v 23 —‍Tikmũꞌũn tek mũn mũtik hãpxopmã hok, puxik mũtik yãy tukmĩy. Tikmũꞌũn tek mũn mõꞌnĩynãm hok pu hãpxop nũnnãꞌ, puxix hãpxummãhãꞌ. Kaxĩy.
\s Yãmĩy kummuk te put puꞌ nũn
\p
\v 24 Tu xe hãmꞌãktux, hu:
\p —‍Yãmĩy kummuk te tikmũꞌũn kopaꞌ xip, tuꞌ mõg, nũy ꞌũnĩm, tu hãmnak tu hãpkumep, tuꞌ xipꞌax nõy xak, nũy xihip. ꞌŨxipihok, puxix yãy pu hãmꞌãktux, hu: Put puk mõg putup nõm tikmũꞌũn hah, nũy xihip. Kaxĩy.
\v 25 Tuꞌ nũn tu nũktu xupep, pa tik te yãy kopaꞌ xit, haꞌ max nõmhã,
\v 26 yĩy yãmĩy mõg, tu yãy nõy xop te 7 xãnãhãꞌ pu nũ mũtik nũn, ha yãmĩy kummuk xeꞌe, tu tikmũꞌũn haꞌ mõxahaꞌ, tu kopaꞌ pip, ha tikmũꞌũn kuxa teꞌ yẽy. Hõmã ꞌũkopaꞌ xũy kutõgnãg, pãyã hõnhãꞌ xũy xexkah. Ta tuꞌ kux. Kaxĩy.
\s Tikmũꞌũn kuxa hittup xeꞌeꞌ
\p
\v 27 Hãpxip kutõgnãg ꞌĩhã tikmũꞌũn xohix xexka pip, ha ꞌũn xip kamah, tuꞌ yĩy kaꞌok, hu:
\p —‍ꞌŨn kuxa te ꞌãput hittup, xix xa pu yãy xoꞌopmãhãꞌ, tuꞌ kuxa hittup. Kaxĩy.
\p
\v 28 Ha Yeyox te:
\p —‍Hamũn, pãyã hittupꞌax xexka tikmũꞌũn kuxa te Topa yõg hãmꞌãktux ꞌãpak, tuꞌ yĩpkox pip. Kaxĩy.
\s Tikmũꞌũn te hãpxopmã kaꞌok xeꞌẽgnãg xak
\p
\v 29 Ha tikmũꞌũn te yãy tu nũꞌnãhãꞌ, tu Yeyox ꞌũxakot haꞌ pip, tuꞌ xak pu tikmũꞌũn pu hãpxopmã kaꞌok, puyĩyꞌ pẽnãꞌ, nũy Topa tep-tup yũmmũg, yĩy Yeyox te:
\p —‍Hõnhãꞌ pip tikmũꞌũn kummuk, tu Topa tuꞌ xak pu nõm pu hãpxopmã kaꞌok xeꞌẽgnãg, pãyã ꞌap hãpxopmãp-tupꞌah, ha mõnãyxop hittap Yõn yõg hãpxopmã kaꞌok puxehnãg pẽnãp-tup.
\v 30 Hõmã Yõn te kõmẽn xexka Nĩn yõg tikmũꞌũn pu hãmꞌãktux, tu Topa ta tuꞌ gãy ꞌãktux. Yã hõnhã ꞌũgmũn, Tikmũꞌũn Kutok te tikmũꞌũn pu hãmꞌãktux nõmhã, tu Topa te ta tuꞌ gãy ꞌãktux kamah.
\v 31 ꞌÃmnĩy mõꞌnãp-tup ꞌĩhã Topa te ꞌIyaet yõg tikmũꞌũn yõg hãpxopmãꞌax kopit, tuꞌ xũygãp-tup, ha ꞌũn hittap te hãpxexka Xamah yõg tikmũꞌũn xat, tu hõnhãꞌ pip tikmũꞌũn kummuk ꞌãktuxꞌax. Hõmã, yã hittap, tuꞌ nũn, nũy Xanomãm yõg hãmꞌãktux ꞌãpak, ha ꞌIyaet yõg tikmũꞌũn xat, tu hãmyũmmũg xexkah. Pãyã nũntek xip, tuk mũn hãmyũmmũg yĩn koxuk xeꞌẽgnãg.
\v 32 ꞌÃmnĩy mõꞌnãp-tup ꞌĩhã Topa te hõnhãꞌ pip tikmũꞌũn yõg hãpxopmãꞌax kopit, tuꞌ xũygãp-tup, ha Nĩn yõg tikmũꞌũn te hõnhãꞌ pip tikmũꞌũn kummuk ꞌãktuxꞌax, yãyhãhup ꞌohnãg hah. Hõmã Yõn te Topa pupi hãmꞌãktux, nũy ta tikmũꞌũn puꞌ xuktux, tu Topa te Nĩn yõg tikmũꞌũn tuꞌ gãy ꞌãktux, ha nõm tikmũꞌũn te yãyhãhup, tu hãpkummugãꞌax kux, pa hõnhãꞌ pip tikmũꞌũn te yãyhãhup ꞌohnãg, tu hãpkummuk mĩy pax, ha Yõn xexka kutõgnãg, yãk mũn xexka xeꞌẽgnãg. Ta tuꞌ kux. Kaxĩy.
\s Yeyox te Topa yõg kũyãnãm ꞌãktux
\p
\v 33 Tu xe hãmꞌãktux, nũy Topa yõg hãpxopmãꞌax yũmmũgãꞌ, hu:
\p —‍Tikmũꞌũn te kũyãnãm tatꞌax pahaꞌ, tu mĩmpe yĩmũꞌ xix, nũy hãptupmã max, yĩy tikmũꞌũn te mĩptut ha mõxakux, tu hãmpẽnãm max, pa nax kopaꞌ xuk ꞌohnãg kũyãnãm tatꞌax, ka mõꞌnĩy. Yã kũyãnãm max te hãptupmãhãꞌ, ha tikmũꞌũn xohix tep-tup pax.
\v 34 ꞌŨpa te kũyãnãm putuk. ꞌŨpa tup teꞌ kuxa hittupmãhãꞌ, pãyãꞌ pa kuꞌuk teꞌ kuxa hittupmã ꞌohnãg, tu yãyhã hãpkoxtap.
\v 35 ꞌÕg pa ꞌãtiꞌ, ꞌõg kũyãnãm tatꞌax xaxok hok, ka yãyhã hãpkoxtap, kaxĩy Topa yõg hãmyũmmũg xaxok hok kamah, xayĩy Topa yõg putat hã mõg kuma mõg.
\v 36 Kũyãnãm te mĩptut kopaꞌ xakot, tu hãptupmãhãꞌ, ha kaxĩy ꞌãte hãmꞌãktuxꞌax hã xa hãmyũmmũgãhãꞌ, pũyĩy hãmyũmmũg, nũy yõgnũ hãmꞌãktux puꞌ yĩpkox piꞌ, nũy ꞌãkuxa tu hittup. ꞌŨkux. Kaxĩy.
\s Yeyox teꞌ xexka xop pu hãmꞌãktux
\p
\v 37 Tu hãmꞌãktux kux, ꞌĩhã Paniye xop yõg tik teꞌ xãnãhãꞌ, puꞌ xit, ha taꞌ mõg tik pet hah, tuꞌ xit,
\v 38 ha Paniye yõg tik te:
\p —‍Pute ꞌũm? Teptu ꞌãxit, pãyã ꞌap yãy yĩm ꞌũm pixꞌah? Kaxĩy.
\p
\v 39 Ha:
\p —‍ꞌÃte xa hãmyũmmũgãhãꞌ. ꞌÃxop te kãnẽy xãm pix, xix kãnẽy xoꞌopꞌax xãm pix, pa ꞌãxop kuxa kopa tupmã ꞌohnãg, ha yãy ꞌĩgã, yã ꞌãkopa kummuk xix yãykix yãy tukmĩy pax.
\v 40 ꞌÃp-tox kummuk xop, tu hãmyũmmũg ꞌohnãg. Topa te ꞌãkuxa mĩy xix ꞌãyĩn xax mĩy, pũyĩy ꞌãkuxa tup, xix ꞌãxax, pu tuꞌ max.
\v 41 ꞌÃpu, ꞌõg hãpxop hõm ꞌũhok xop puꞌ, nõm hãpxop xate kãnẽy kopaꞌ xex, tu tuꞌ hok hõm, nũy ꞌãkuxa tupmãꞌ.
\p
\v 42 —‍ꞌÃkuxãnõg, ꞌãxop Paniye xop! Xate mĩxux xuxpex te 100 pop, ꞌũmã yĩmũ putup, tu Topa pu popmãhã te 10, pa xate hãmyok mĩyꞌax xaxok, xix Topap-tup pax xateꞌ xaxok. Yãꞌ max hãmmax xohix mĩy, tuꞌ xaxok ꞌohnãg.
\p
\v 43 —‍ꞌÃkuxãnõg ꞌãxop Paniye xop! ꞌÃxop te mĩmpe yũmꞌax max xak, Topa pet kopa tuꞌ xup, tuꞌ yũm, tup-tup pu tikmũꞌũn ꞌãxãnãꞌ, hu: Notot. Kaxĩy. Nũy ꞌãxexka ꞌãktux kõmẽn tuꞌ.
\p
\v 44 —‍ꞌÃkuxãnõg, ꞌãxop te xukpot putuk, ha tikmũꞌũn te ꞌãyĩmũ hãpkumep, tuꞌ xukpot pẽnãꞌah. ꞌŨkux. Kaxĩy.
\p
\v 45 Ha hãmyũmmũg xop yõg tik te:
\p —‍Nãy, xatek mũg mãnõg kamah! Kaxĩy.
\p
\v 46 Ha:
\p —‍ꞌÃkuxãnõg, ꞌãxop hãmyũmmũg xop! ꞌÃxop te tikmũꞌũn xat, tu hãpxop putux tatnãhãꞌ, ha ꞌĩm hãꞌ tot ꞌohnãg, pa ꞌãxop te nõm mõꞌnĩynãm ꞌohnãg.
\v 47 ꞌÃkuxãnõg! Hõmã tikmũꞌũn hittap te Topa pupi hãmꞌãktux, nũy tikmũꞌũn puꞌ xuktux, ha ꞌõg mõnãyxop hittap teꞌ kix, ha ꞌãxop te nõm hãmꞌãktux xop pu xukpot maxnãhãꞌ,
\v 48 pu tikmũꞌũn xohix yũmmũg, yã ꞌãxop te ꞌõg mõnãyxop kummuk putuk. Mõnãyxop teꞌ kix, ha ꞌãxop teꞌ yõg xukpot maxnãhãꞌ,
\v 49 yĩy Topa te hãmyũmmũg, tu hãmꞌãktux, hu: “ꞌÃte yãy pupi hãmꞌãktuxꞌax xop mõꞌpok putup, pu tikmũꞌũn pu hãmꞌãktux, ha tikmũꞌũn teꞌ yãg kix putup, xiꞌ yãg xũygãp-tup.” Kaxĩy.
\v 50 Yĩy Topa te hõnhãꞌ pip tikmũꞌũn xũygãp-tup, ꞌũyãnãn tuꞌ xũygãp-tup, yã hãmyãxatamuk xohix xexka hã tikmũꞌũn kummuk te Topa yõg tik xop kix.
\v 51 Tikmũꞌũn hittap te ꞌAmeo putex hãmꞌãxap, yã ꞌAnão kutok ꞌAmeo putex, tu Topa yõg xop xohix kix, tu mõktu Yakanit putex, nõm Topa pet kopaꞌ xip, nũy nõm pu xokxop mõꞌhap nũy haxyãꞌ, pãyã tik kummuk te Topa pet kopap-tex. ꞌÃte xa hãpxeꞌe ꞌãktux, yã hõnhã Topa te tikmũꞌũn xũygãp-tup, hãpkummuk xohix mĩy haꞌ xũygãp-tup, nũy hãpkummugãꞌax hã pago.
\p
\v 52 —‍ꞌÃkuxãnõg, ꞌãxop hãmyũmmũg xop! Topa te xaꞌ hõm pipkup mõꞌhãmyĩnnĩnꞌax, nũy hãmyũmmũgꞌax xõn, pãyã ꞌãxop te hãmyũmmũg ꞌohnãg, tuꞌ xat hok pu tikmũꞌũn yũmmũgã hok kamah. ꞌŨkux. Kaxĩy.
\p
\v 53 Tuꞌ mõg, ha hãmyũmmũg xop xix Paniye xop gãy, tu Yeyox ꞌãktux kummuk, tuꞌ xupmãhĩy, tuꞌ yĩkopit,
\v 54 tu Yeyox yõg hãmꞌãktuxꞌax hãꞌ kopit, tuꞌ xupak, pũyĩy hãmꞌãktux kummuk.
\c 12
\s Yeyox te Mõꞌãmãꞌax ꞌÃktux
\p
\v 1 —‍ꞌÕg pa ꞌãtiꞌ! Paniye xop mõꞌãmãꞌ, yãꞌ pa mũn max, pãyãꞌ kuxa kummuk, tuꞌ koit pax, tu pãm yõg tokatogãꞌax putuk, ha pãm kopaꞌ xip, tuꞌ mõmmãhã tu mõktu xexkah, ha kaxĩy Paniye xop mõꞌãmã tikmũꞌũn kopah, tu mõꞌãmã mũn mĩy.
\v 2 Tikmũꞌũn kummuk te yãy yõg hãpkummuk mĩyꞌax xaptop, tu mõꞌnĩy, pa Topa te tikmũꞌũn xohix tuꞌ mũg putup, pu tikmũꞌũn xohixꞌ pẽnãꞌ.
\v 3 Tikmũꞌũn yĩy puꞌũgnãg ꞌãmnĩy koxtap hã, pa Topa te tikmũꞌũn xohix puꞌ xupakgãp-tup, ha hãmꞌãktuxꞌax puꞌuk mĩptut kopah, pa tikmũꞌũn xohix teꞌ xuktuxꞌax kaꞌok, tu hãmꞌãktuxꞌax kaꞌok hãꞌ xupak putup. Kaxĩy.
\s Tep-teꞌ yĩpkutuk?
\p
\v 4 Tu xe hãmꞌãktux, hu:
\p —‍ꞌÃxop tek mũn hã ꞌãxapeꞌ. Tik xop kummuk yĩpkutuk hok. Nõm te ꞌãyĩn xeꞌep-tex, pa ꞌãkoxuk putex ꞌohnãg,
\v 5 pa Topa mũn kaꞌok xeꞌẽgnãg, yĩy nõm yĩpkutuk, nõꞌõm te ꞌãp-texꞌax, tu mõꞌãkutnãꞌax Hãmgãyãgnãg Pet ha, puꞌ xihip. Hamũn. Topa mũn yĩpkutuk.
\p
\v 6 —‍Putuxnãg xop ꞌaꞌ takatꞌah, tu tayũmak kutõgnãg hãꞌ nõy yãnãn, pãyã Topa te nõm xop xaxok ꞌohnãg,
\v 7 tu ꞌãxe mõꞌkupix, tuꞌ xohix te xĩy yũmmũg. ꞌÃkuxãnõg hok. Topa te putuxnãg xop xohip-tup kutõgnãg, tu ꞌãxop mũn putup xexkah. Kaxĩy.
\s Yãꞌ max Kunnix ꞌãktux ꞌãnõy puꞌ
\p
\v 8 Tu xe hãmꞌãktux, hu:
\p —‍ꞌŨgmũn ya Tikmũꞌũn Kutok, tu xa hãmꞌãktux nãm. Tikmũꞌũn teꞌ xohix pu hãmꞌãktux, hu: ꞌŨgmũn yã Yeyox yõg, kaxĩy, kopxix ꞌãte hãmꞌãktux putup, tu pexkox yõg nũꞌpok xop puꞌ xuktux putup, hu: Hamũn yã yõgnũꞌ. Kaxĩy.
\p
\v 9 Pa tikmũꞌũn teꞌ xohix pu hãmꞌãktux, hu: ꞌAk mũn yã Yeyox yõgꞌah, kaxĩy, tuk mũn hã yãyhãhup tuꞌ xuktux, kopxix ꞌãte hãmꞌãktux putup, tu pexkox yõg nũꞌpok xop pu hãmꞌãktux putup, hu: “Hãmũn ꞌap yõgnũꞌah.” Kaxĩy.
\p
\v 10 —‍Tikmũꞌũn tek mũn ꞌãktux kummuk, puxix Topa xaxogãp-tup, pa tikmũꞌũn te Topa Koxuk ꞌãktux kummuk, puxix Topa xaxogãp-tup ꞌohnãg.
\p
\v 11 —‍Yũmũ yõg tik te tikmũꞌũn xatꞌax te ꞌãxop mõgãp-tup Topa pet hah, nũy ꞌãyĩkopit, tu gohenanok keppa ꞌãyĩkopit, xix ꞌũxexka xop keppa ꞌãyĩkopit, pa kuxãnõg hok, tu xutigãhok, hu: “Pute ꞌũm ꞌãte ꞌãktux putup, ꞌãte ꞌũggãꞌ?” Kaxĩy.
\v 12 Yã Topa Koxuk te xa hãmyũmmũgãp-tup, tu hãmꞌãktuxꞌax xa hãmyũmmũgãp-tup. Kaxĩy.
\s ꞌŨptexop xexka pa te hãmyũmmũg ꞌohnãg
\p
\v 13 Ha tik te tikmũꞌũn mũtik tihiꞌ, tu Yeyox pu hãmꞌãktux, hu:
\p —‍Notot, ꞌãpu, ꞌũktaknõy mãnõg, nũy hãmyũmmũgãꞌ. Hõmãk mũg tak xok, hak taknõy te ꞌãtak yõg hãpxop xohix pop, tuꞌ yãgnãg ꞌaꞌ hõm putupꞌah. ꞌÃpu, tuꞌ xat, pu hãpxop koxip. Kaxĩy.
\p
\v 14 Ha Yeyox te:
\p —‍ꞌAk pa te hãmyũmmũgꞌah, nũy hãpxop koxip. Kaxĩy.
\p
\v 15 Tu xe hãmꞌãktux, hu:
\p —‍ꞌŨgꞌãpax max. ꞌÃxupkũmĩy hok. ꞌÃnõy yõg hãpxop putup hok. Tikmũꞌũn hi xeꞌeꞌ, puxix ꞌũptexop xiꞌ hok xop te yãy putuk, yĩy ꞌãxupkũmĩy hok, xaꞌ hi xeꞌeꞌ. Kaxĩy.
\p
\v 16 Tu tikmũꞌũn yũmmũgãhãꞌ, hãmꞌãktuxꞌax hãꞌ hãmyũmmũgãhãꞌ, nũy Topa yõg hãpxopmãꞌax yũmmũgãꞌ, nũy xupkũmĩy hok ꞌãktux, hu:
\p —‍ꞌŨptexop yõg hahãm xexkah, ha hãpxop ta xohix xexkah, tu ta hãpxop nũnãhãꞌ, tu mĩptut kutõgnãg kopa nũꞌxok hãꞌ xohix, ha nũꞌxip,
\v 17 yĩy hãmpeꞌpaxex, hu: “Yõgnũ hãpxop punethok ꞌãte nũnnãhãꞌ, piꞌyãꞌ xex putup ꞌãteꞌ? ꞌĨntuꞌ.
\v 18 Nãy. ꞌÃte mĩptut kutõgnãg koxyõyꞌax, nũy ꞌnõy xexka mĩy, nũy yõgnũ hãpxop xohix nũꞌxok,
\v 19 tu yãy pu hãmꞌãktuxꞌax, hu: ꞌŨghittup xexkah, tuk mũn ꞌũptexop xexkah, yã hõnhã puxiꞌ, ꞌak hãm putupꞌah ꞌũxeheh. ꞌŨkux. ꞌŨkteknõg, huk xitꞌax punethok, xixꞌ xoꞌopꞌax punethok, tuk kuxa hittup.” Kaxĩy.
\v 20 Pa Topa te: “ꞌÃp-tox kummuk, tu hãmyũmmũg ꞌohnãg. Hõnhã, ꞌãmnĩy hã, ꞌãxok putup, ha ꞌũ ꞌũm teꞌ popꞌax ꞌõgnũ hãpxop, ꞌõg hãpxop xate nõm nũꞌxok?” Ta tuꞌ kux. Kaxĩy.
\p
\v 21 Tu xe:
\p —‍Kaxĩy ꞌũptexop xohix xakix, nõm xop te Topa keppa ꞌũhok xop. Kaxĩy.
\s Tikmũꞌũn kuxa yũm kaꞌok Topa kopah
\p
\v 22 Tu yãy yõg tik xop pu hãmꞌãktux, hu:
\p —‍Yĩy ꞌãte xa hãmꞌãktux, hu: ꞌÃxutigãhok, yĩy: “Putep mũn ꞌãteꞌ mãꞌax?” Kaxĩy, xix: ꞌÃte piꞌyaꞌ mũn tatꞌax topixxax?” Kaxĩy.
\v 23 ꞌÃhiꞌax mũn max xexkah, ha ꞌãxitꞌax max kutõgnãg, xix ꞌãyĩn max xexkah, ha topixxax max kutõgnãg.
\v 24 Putuxnãg katãmnãg pẽnãꞌ. Yã hãpxop xap xok ꞌohnãg, tu hãpxop taꞌax nũnnã ꞌohnãg, nũy pet kopa nũꞌxok, pa Topa te nõm pu hãpxop hõm, pũyĩꞌ mãꞌ. ꞌŨyũmmũg hok, xateꞌ? Topa te putuxnãg xop putup pax kutõgnãg, pa ꞌãxop putup pax xexkah.
\v 25 Tik te: “ꞌŨkxok putup, pãyã ꞌũghiꞌax tox xak, nũy hãmyãxatamuk kutõgnãg nõy hiꞌ.” Kaxĩy. Paꞌ xutigãꞌax hã tik hi tox ꞌohnãg.
\v 26 Tikmũꞌũn te hãxopmã kutõgnãg ꞌaꞌ yũmmũgꞌah, nũy tu hi tox, hu hãpxomã xexka yũmmũg ꞌohnãg, hu xutigã hok.
\v 27 ꞌÃpu mĩnnut pẽnãꞌ. ꞌŨtuk max, tuꞌ hãm ꞌohnãg, tu topixxax xap ꞌohnãg yãy puꞌ, haꞌ xax max. Hõmã mõnãyxop hittap Xanomãm yãp-texop xexkah, tu topixxax max mõꞌtat mõg kumaꞌ, pa Xanomãm xax ꞌãnuk kutõgnãg, ha mĩnnut xax ꞌãnuk xeꞌeꞌ.
\v 28 Topa mũn te xax max hõm mĩnnut xop puꞌ, pu mõꞌtat, tu hõnhãꞌ xip, pa hãptup ꞌĩhãꞌ tu tap, ha kuxap kopa mõꞌyõn. Yũmmũg hok xateꞌ? Topa te xaꞌ hõm putup topixxax max kamah, xa mõꞌtat. ꞌÃkuxa yũm puꞌuk Topa kopah.
\v 29 ꞌÃkuxãnõg hok, tu yãy yõg hãpxop xak hok, nũy xit, nũy xoꞌop.
\v 30 ꞌÃmhok. Tikmũꞌũn te Topa yũmũgꞌah, hu taꞌ xak, pãyã Topa yã ꞌÃtak xeꞌeꞌ, tu pexkox tuꞌ xip, tu ꞌãpẽnã max, tu ꞌãxix kaꞌok,
\v 31 tu yãy yõg tikmũꞌũn xat, yĩy ꞌĩpkox piꞌ Topa pu hãmãxap, ha ta xaꞌ popmãp-tup hãpxop xohix. Kaxĩy.
\s Pexkox yõg hãpxop xohix
\p
\v 32 Tu xe:
\p —‍ꞌÃkuxãnõg hok. ꞌÃxop yã ꞌÃtak Topak-tok xop, ha mõꞌãyãy xeꞌẽgnãg, hu ꞌãxat xeꞌẽgnãg kamah.
\v 33 ꞌÕg hãpxop xohix hãmenax, nũy tayũmak pop, nũy hok xop puꞌ nĩm. ꞌÃpu ꞌãxap tuhut nũy tayũmak tat, nũy mõꞌxuk ponnok, ha hãmyãxatamuk nõg putup, ꞌĩhãꞌ tut ponnok tup, yĩy ꞌõg tayũmak xeh, nũy mõꞌxuk pexkox kopah, ha tik kummuk te nõꞌ xupxet ꞌohnãg, haꞌ kut teꞌ mã ꞌohnãg.
\v 34 ꞌÃkuxa te yãy yõg hãpxop xak, yĩy xeh pexkox kopah, nũy yãy mũn mõg putup pexkox ha kamah, ꞌŨkux. Kaxĩy.
\s Kãmãnat xop teꞌ pẽnãnãꞌ pip
\p
\v 35 Tu xe hãmꞌãktux, nũy Topa yõg hãpxopmãꞌax yũmmũgãꞌ, nũy tikmũꞌũn mõꞌõn hok ꞌãktux, hu:
\p —‍ꞌÃyok, mõg ꞌãxax tat, nũy hãm, tu ꞌõg kũyãnãm mõꞌtat.
\v 36 Kãmãnat hãm ꞌĩhã yãy xuxyãꞌ hip, yãꞌ xuxyã xape yãytahaꞌ, yĩy ꞌãmuk xexka haꞌ mõg, tu putpuꞌ nũn tu nũktu yãy pet haꞌ nũn, tu hãptopa haꞌ xãnãhãꞌ, ha kãmãnat xop te hãpxõn, tu hãpxõn mõꞌkaꞌok.
\v 37 Kãmãnet xop hãm max yãy xuxyã puꞌ, puxix yãy kuxa hittup, ha nõm xuxyã kuxa hittup pax, hu kãmãnat xop pu hãpxop popmãp-tup, tuꞌ xat puꞌ xitꞌax puk, ha kãmãnat xop puꞌ hõm,
\v 38 yĩy kuxa hittup, ꞌũyõg hãpxop pẽnã max hah, tu mõꞌyõn ꞌokpa ꞌãmnĩy koxtap, ꞌihãꞌ xuxyã xupep.
\v 39 ꞌŨxaxok hok. Paxpu mĩptut xuxyã hãmyũmmũg, tu hãm ꞌũm hã tik te hãpxupxet nũn yũmmũg, puxiꞌ xuxyã yãy pet pẽnã max, puyĩy tik tu nõ hãpxop hã xupxet hok.
\v 40 ꞌÃxop kamah mõꞌõn hok, nũy ꞌãmnĩy xohix hã pẽnãmax. ꞌŨgmũn yã Tikmũꞌũn Kutok, tuk nũn putup putpuꞌ, ha hãm ꞌũm hãk nũn putup, ꞌap ꞌãxop tek yũmmũgꞌah ꞌũgnũnꞌax, hu ꞌõg pa ꞌãtiꞌ! Tu ta tuꞌ kux. Kaxĩy.
\s Kãmãnat max
\p
\v 41 Ha Pet te:
\p —‍Yãyãꞌ, ꞌok xatek mũg puxehnãg puꞌ hãmyũmmũgãhãꞌ, tu hãmꞌãktux hã hãmyũmmũgãhãꞌ, pe tikmũꞌũn xohix pu hãmyũmmũgãhãꞌ? Kaxĩy.
\p
\v 42 Ha hãmꞌãktux, nũy Topa yõg hãpxopmãꞌax yũmmũgãꞌ, hu:
\p —‍Tik te hãmyũmmũg, tu hãm max yãy xuxyã puꞌ, haꞌ xuxyã kuxa yũm kaꞌok nõꞌõm kopah, tuꞌ xat, puyĩy kãmãnat xop hã mãxap, nũy hãpxop xohix pẽnã max, tu ꞌãmnĩy xohix ꞌĩhã tikmũꞌũn kãmãnat xop xĩnnã max.
\v 43 Haꞌ xuxyã nũn putpuꞌ, tu kãmãnat pẽnãhãꞌ, haꞌ hãm max, huꞌ kuxa hittup xexkah.
\v 44 ꞌÃte xa hãpxeꞌe ꞌãktux: ꞌŨxuxyã te kãmãnat pu hãmꞌãktux putup, hu: “Hõmã xate yõgnũ hãpxop pẽnã max. Hõnhã yõg hãpxop xohix pẽnãꞌax, nũy xeh max, tu yõgnũ kãmãnat xop xohix xatꞌax kamah.” Kaxĩy.
\v 45 Paxpu kãmãnat hãmpeꞌpaxex, hu: “Yãk xuxyã mõg, tu putpuꞌ nũn ꞌohnãg,” kaxĩy, tuꞌ pit xop kuteꞌex kummuk, xiꞌ hex xop kuteꞌex kummuk, xix kenmuk xoꞌop xexka tu mõktuꞌ paptux, tuꞌ xit xexkah, tuꞌ hãm ꞌohnãg,
\v 46 puxiꞌ xuxyã nũn mõꞌkaꞌok, ꞌap kãmãnat teꞌ yũmmũgꞌah, haꞌ gãy, tu: Mõg, mõg, nũy ꞌãpep! Kaxĩy. Tuꞌ kix hãꞌ yãnãn putup, ꞌũyĩpkox ꞌohnãg hah.
\p
\v 47 —‍Kãmãnat te yãy xuxyã puꞌ hãm, tu hãmyũmmũg, tuꞌ xuxyãp-tupꞌax yũmmũg, haꞌ yĩpkox ꞌohnãg, puxiꞌ xuxyã teꞌ kix kakixnãg, ꞌũp-tox kaꞌõgnãg hãꞌ kix putup.
\v 48 Pa kãmãnat nõy te yãy xuxyã puꞌ hãm, tuꞌ nõm tep-tupꞌax yũmmũg ꞌohnãg, hu ꞌũhãm kummuk, puxiꞌ xuxyã teꞌ kix kutõgnãg putup. Topa te tikmũꞌũn hõm punethok, puxiꞌ xat pu tuꞌ hãm punethok ꞌũyãnãn tuꞌ.
\s Tikmũꞌũn te Yeyox hã yãy tukmĩy
\p
\v 49 Tu xe:
\p —‍ꞌŨgnũn nũy Topa gãy ꞌãktux, ha Topa gãy tikmũꞌũn kummuk tuꞌ. Kuxap te hãmpuk, hã kaxĩy Topa te nõm tikmũꞌũn xũygãp-tup. Paxpu hãmpuk nõmhã, kopxik hittup.
\v 50 Tikmũꞌũn te kõnãg kox hãꞌ mõxakux pup-tox pix, ha kaxĩy tikmũꞌũn tek xũygãp-tup, tu mõktuꞌ xũy xexkah, yĩk kuxa teknõg.
\v 51 ꞌOk ꞌãmpeꞌãpaxex, hu: “Yeyox nũn pu hãpxexka xohix yõg kuxa mãmmãꞌ,” kaxĩy? ꞌÃmhok. ꞌAp hamũnꞌah. ꞌŨgnũn pu tikmũꞌũn te yãytuk-mĩy,
\v 52 ꞌŨxape xop te 5 te yãytuk-mĩy putup, ha 3 yãytuk-mĩy putup 2 nõy mũtik, ha 2 yãytuk-mĩy putup 3 mũtik.
\v 53 Yã ꞌãtak xop tek-tok pit xop mũtik yãytuk-mĩy putup, hak-tok pit xop teꞌ tak xop mũtik tuk-mĩy putup yãy tuꞌ, ꞌũtut xop tek-tok hex xop mũtik yãytuk-mĩy putup, hak-tok hex xop teꞌ tut xop mũtik tuk-mĩy putup yãy tuꞌ, haꞌ yĩpxox mũk tut xop teꞌ xetut xop mũtik yãytuk-mĩy putup, haꞌ xetut xop teꞌ yĩpxox mũk tut xop mũtik kũmĩy putup. Kaxĩy.
\p
\v 54 Tu tikmũꞌũn pu hãmꞌãktux kamah, hu:
\p —‍ꞌÃxop te texgõy pẽnãhãꞌ, tu: “Tex tip-tup.” Kaxĩy. Yã tehex xeꞌẽgnãg. Yamũn.
\v 55 Ha ꞌãmuuh xexka mõꞌkoꞌuk, ha: “Hãmpukpex mĩy putup.” Kaxĩy. Yãꞌ pukpex. Yamũn.
\v 56 ꞌOk hãmyũmmũg hok xateꞌ? Yã ꞌãpa hitop tu max, pãyã ꞌãkuxa kummuk! Tu hãm yõg hãpxop yũmmũg, xix hãmnõgnõy yõg, pa hõnhã Topa te hãpxopmã kaꞌok, ha xateꞌ yũmmũg ꞌohnãg. Kaxĩy.
\s ꞌŨgãy kuxyãhãꞌ
\p
\v 57 Tu hãmꞌãktux kux putup, hu:
\p —‍Teptu ꞌãxop te yãy yĩkopit hok, nũy hãpxopmãꞌax yũmmũg hãmãxap, peꞌ kummuk, peꞌ max?
\v 58 Tik te ꞌãkupex, tu pa te hãmyũmmũg xop ha ꞌãmõgãp-tup, ꞌãpu, nũmũtik mõg, ꞌĩhã yãykix kuxyãhãꞌ, ka hãmyũmmũg xop xaꞌ hõm xonat xop pu, pu mõg ꞌãtat hah, nũy xip kaꞌok.
\v 59 ꞌÃte xa hãpxeꞌe ꞌãktux: Xate ꞌã xupap-tup hok, ꞌĩhã xate pago hok tayũmak xexka hã. Kaxĩy.
\c 13
\s ꞌÃpu, hãpkummuk mĩy kux, ka ꞌãxok
\p
\v 1 Haꞌ nũn tikmũꞌũn, tu hãmꞌãktux Yeyox puꞌ, tu hãpxexka yõg tikmũꞌũn xatꞌax Pinat ꞌãktux, ha hõmãꞌ xat pu xonat xop tik xop kix, ha hãpxexka Ganinet yõg tik xop xakix, ꞌĩhã hãpxop mõꞌhap, nũy Topa puꞌ haxyãꞌ.
\v 2 Ha Yeyox te:
\p —‍Ganinet yõg tik xop xakix. Putep hãmpeꞌãpaxex? ꞌOk tik xop kummuk xeꞌe ꞌõhõm? ꞌOk Ganinet yõg tikmũꞌũn nõy max?
\v 3 ꞌÃmhok. Xate yãyhãhup hok, nũy ꞌõg hãpkummukgã kux hok, hu ta xakix putup kamah, tik xop putuk.
\v 4 ꞌOk xate xipꞌax Xinoꞌe yõg tik te 18 yũmmũg? Mĩptut tox te yãy koxyõy, tu tik yĩmũꞌ koxyõy tu tuꞌ nãhãꞌ, tuꞌ kix. ꞌOk tik kummuk xeꞌe nõꞌõm? ꞌOk kõmẽn Yenoyanẽn yõg tikmũꞌũn nõy max?
\v 5 ꞌÃmhok. Xate yãyhãhup hok, nũy ꞌõg hãpkummukgã hup hok, hu ta xakix putup kamah, tik xop te 18 putuk. Kaxĩy.
\p
\v 6 Tu hãmꞌãktuxꞌax hãꞌ hãmyũmmũgãhãꞌ, nũy Topa yõg hãpxopmãꞌax yũmmũgã, nũy tikmũꞌũn yãyhãhup ꞌãktux, pu tu hãpkummuk mĩy kux, hu:
\p —‍Tik te hãpxaꞌax tuꞌ xip, ha nanũy kup xip, pa mĩnta ꞌũm xip ꞌohnãg,
\v 7 ha kãmãnat te hãpxop pẽnãhãꞌ, haꞌ xuxyã te: “Pẽnãꞌ! Hãmyãxatamuk tikoyuk hã ꞌãte mĩnta ta xak, paꞌ xip ꞌohnãg. Mõg, tuꞌ kup xak, ꞌũkummuk hah, pu mĩnta kup nõy xok hãm kopah.” Kaxĩy.
\v 8 Pa kãmãnat te: “Nãy, ꞌũxup nõg, tu hãmyãxatamuk nõy hip. ꞌÃteꞌ kup yĩmap kot putup, tu ꞌanop hãpkox kopaꞌ xuk putup,
\v 9 ha hãmyãxatamuk nõy nõg, kopxix tu taꞌ pẽnãꞌ, pe tut max, tu mĩnta punethok ꞌũta xupep. ꞌŨkup kummuk, tu mĩnta ꞌohnãg tu ta panipnãg, kopxiꞌ xak.” Ta tuꞌ kux. Kaxĩy.
\s Yeyox te ꞌũn hittupmãhã ꞌĩhã nit xap
\p
\v 10 Hãpxip kutõgnãg ꞌĩhã, nit xap ꞌĩhã, Yeyox te Topa pet kopa hãmyũmmũgãhãꞌ,
\v 11 ha ꞌũn xip, tu hãmyãxatamuk xohix te 18 hã xãm xok, ha yãmĩy kummuk teꞌ pakutnãhãꞌ, haꞌ xãm yok ꞌohnãg,
\v 12 ha Yeyox teꞌ pẽnãhãꞌ, tuꞌ xãnãhãꞌ, hu:
\p —‍Mãꞌ, yã hãg, Kaxĩy.
\p Tu xeꞌ:
\p —‍Topa te ꞌãhittupmãhãꞌ! Kaxĩy.
\p
\v 13 Tu ꞌũn yĩmũꞌ yĩm xex, haꞌ yok, tu Topa max ꞌãktux.
\v 14 Pa tik te Topa pet kopaꞌ xat, tuꞌ gãy, Yeyox te nit xap hãꞌ tikmũꞌũn hittupmãꞌ, haꞌ gãy, tup-tup nõg, hu tikmũꞌũn pu hãmꞌãktux, hu:
\p —‍ꞌÃmnĩy te 6 hã tikmũꞌũn hãm, tuꞌ nũn, pũyĩy hittupmãꞌ, pa ꞌap nit xapꞌah. Kaxĩy. Nõꞌõm Yoneo xop yõg hãptup xeꞌeꞌ, ha Yoneo yõg tikmũꞌũn hãm ꞌohnãg nit xap ꞌĩhãꞌ.
\p
\v 15 Ha Yeyox te:
\p —‍Xate mõꞌãmãꞌ. ꞌÃpa mũn max, pãyã ꞌãkuxa mũn kummuk! Tikmũꞌũn te mũnũytut tak xip, ꞌok pe yohmẽn xip, tuꞌ hĩy tuꞌ xix hãmpakꞌax kopah, tu nit xap ꞌĩhã koah, nũy mõgã kõnãg hah, puꞌ xoꞌop, yãꞌ max,
\v 16 pa ꞌũn xip, tu mõnãyxop hittap ꞌAmanãm hãꞌ mõkputox, ha Hãmgãyãgnãg teꞌ xãm hĩy kaꞌok, tu hãmyãxatamuk xohix te 18 hãꞌ hĩy. Teptu ꞌãxop tek tux hok puꞌ xut hok pu mõg? Kaxĩy.
\p
\v 17 Haꞌ gãy xop te yãyhãhup, tuꞌ yĩy ꞌohnãg, ꞌĩhã tikmũꞌũn te Yeyox yõg hãpxopmãꞌax xohix putup pax, tuꞌ kuxa hittup.
\s Mõytat xap
\p
\v 18 Ha Yeyox te hãmꞌãktux, nũy Topa yõg hãpxopmãꞌax yũmmũgãꞌ,
\p —‍Topa te tikmũꞌũn xat te xĩy? ꞌOk xateꞌ yũmmũg? ꞌÃte xa hãmyũmmũgãꞌax, hu:
\v 19 Tik te mĩpkup mõytat xap pahaꞌ, tu hãpkot, haꞌ kopaꞌ xok, ha xokax, tuꞌ tuk, tu mõktu mõytat kup xupax, ha putuxnãg te yãy pet mĩy mĩmmãg kopah. Kaxĩy tikmũꞌũn kutõgnãg te Topa puꞌ yĩpkox pip hãmãxap, hak-nãy tu tikmũꞌũn nõy yĩpkox pip, ha tikmũꞌũn nõy xohix nõg nõy nãꞌ mõgãhãꞌ, tu mõktu xohix. Ta tuꞌ kux. Kaxĩy.
\s Tokatogãꞌax
\p
\v 20 Tu xeꞌ yĩkopit, hu:
\p —‍Topa te tikmũꞌũn xat te xĩy? ꞌÃte xa hãmyũmmũgãꞌax, nũy Topa yõg hãpxopmãꞌax xa hãmyũmmũgãꞌ hu:
\v 21 ꞌŨn te pãm yõg tokatogãꞌax pahaꞌ, tuꞌ xap xoxtix tinik kõnõn kopaꞌ kanop, tu mõktu ꞌũpohot, ha pãm mõmmãhãꞌ. Kaxĩy tikmũꞌũn kutõgnãg yĩpkox pip hãmãxap, haꞌ nãg nõy nãꞌ mõgãhãꞌ, tu mõktu xohix yĩpkox pip. Tu ta tuꞌ kux. Kaxĩy.
\s Hãmyĩkox kutõgnãg
\p
\v 22 Yeyox te hãpkumep xix yãy yõg tik xop, tu ta kõmẽn tuꞌ mõg, xix xip tu xexka tuꞌ mõg, tu hãmyũmmũgãhãꞌ, tu kõmẽn xexka Yenoyanẽn haꞌ mõg,
\v 23 ha tikmũꞌũn ꞌũm teꞌ yĩkopit, hu:
\p —‍Yãyãꞌ, ꞌok tikmũꞌũn kutõgnãg teꞌ kuxa kummuk xit, nũy tu kuxa max ꞌũyãnãn tuꞌ tat? Kaxĩy.
\p
\v 24 Yĩy Yeyox te:
\p —‍ꞌÃpu, hãpxopmã punethok, nũy hãmyĩkox kutõgnãg hãꞌ mõxakux. Tikmũꞌũn punethok mõxakux putup, paꞌ mõxakux ꞌohnãg, tu ta yã ꞌãtihiꞌ.
\p
\v 25 —‍Ha mĩptut xuxyã yok putup, tu mõꞌyĩnnĩnꞌax hã mõꞌyĩnnĩn, ꞌĩhã ꞌãxop tihiꞌ hãptopa, tuꞌ xãnã-tup, hu: “Hãpxõn, hãpxõn,” kaxĩy, paꞌ xuxyã te: “Kõmẽn ꞌũm yõg ꞌãxop? ꞌÃte ꞌãyũmmũgꞌah, ꞌapxõn putupꞌah, xayĩy pexkox ha mõxakux hok.”
\v 26 Ha ꞌãxop te hãmꞌãktux putup, hu: “ꞌŨgmũꞌãte hãpxop mãhã ꞌãmũtik, nũy ta xoꞌop. Xate yõg kõmẽn kopak hãmyũmmũgãhãꞌ.” Kaxĩy.
\v 27 Haꞌ yãnãn tu hãmꞌãktux putup, hu: “ꞌA ꞌãte ꞌãxop yũmmũgꞌah. Mõg, mõy, nũy ꞌãpep, yã ꞌãxop te hãpkummuk mĩy pax!” Kaxĩy.
\v 28 Ha Topa teꞌ xat yãy yõg tikmũꞌũn pexkox tuꞌ, ha ꞌãxop te pẽnãp-tup hãptox tuꞌ, tu mõnãyxop pẽnãp-tup, ha pexkox kopaꞌ pip, ha mõnãyxop hittap ꞌAmanãm pẽnãp-tup, xix mõnãyxop ꞌIyak, xix mõnãyxop Yako pẽnãp-tup pax xix Topa pupi hãmꞌãktux xop pẽnãp-tup, ꞌĩhã hãptopa ꞌãtihiꞌ, ha mõꞌãxakux putup, pa mõꞌãxakux ꞌohnãg, tu potap-tup, hu ꞌãxox kãyãhãꞌ, ꞌãxũy xexka tuꞌ.
\v 29 Ha hãpxexka xohix yõg tikmũꞌũn nũn putup, hãptox tuꞌ nũn putup, nũy ꞌãmuk xexka mĩy, tuꞌ mãm putup, nũy tuꞌ xit, tu Topa puꞌ yĩpkox pip.
\v 30 Pa nõm xop mõxa tap xop hãꞌ kaꞌax putup, ha nõm kaꞌax hã nõm nũn, tuꞌ mãxap putup. Ta tuꞌ kux. Kaxĩy.
\p
\v 31 Hãpxip ꞌohnãg ꞌĩhã Paniye yõg tikmũꞌũn nũn, tu:
\p —‍Mõy, mõg. ꞌŨxatꞌax ꞌEnot te ꞌãp-tex putup! Kaxĩy.
\p
\v 32 Ha Yeyox te:
\p —‍Mõg, ꞌãte mõꞌãpok, xa nõm mõꞌãmãꞌax pu hãmꞌãktux, hu: ꞌÃteꞌ xupepmãhã yãmĩy kummuk, tu tikmũꞌũn hittupmãhãꞌ, ꞌãteꞌ hõnhãꞌ mĩy, xix hãptup hã, nũy hãptup nõy, kopxix hãpxopmãꞌax kux.
\v 33 ꞌŨgmõg putup kõmẽn Yenoyanẽn hah, yã hõnhã ꞌãte hãpkumep putup, xix hãptup, xix hãptup nõy hãpkumep putup, nũy Yenoyanẽn tuk xupep, pu tikmũꞌũn tek putex, tu Topa pupi hãmꞌãktux xop kix, yã hõmã nõm xop xohix kix Yenoyanẽn kopah.
\p
\v 34 —‍ꞌŨgꞌãpax, kõmẽn Yenoyanẽn yõg tikmũꞌũn! ꞌÃxop te Topa pupi hãmꞌãktux xop punethok kix, Topa te kõmẽn ha nũꞌ pok tik xop, ha xate mĩkaxxap xexka tux hãꞌ kix. Xokakkak tek-tok xãnãhãꞌ, nũy mõꞌtat yãy kaka, hã kaxĩy ꞌãte kõmẽn yõg tikmũꞌũn xãnãhãꞌ, pãyã ꞌũgha ꞌãnũn putup ꞌohnãg.
\v 35 Yĩy ꞌãpet ꞌũhok yũm putup, ha xatek pẽnãp-tup ꞌũxeheh, ꞌĩhã ꞌã ꞌãktux, hu: “Topa te yãy ꞌãxetꞌax hõm xaꞌ, pu nũꞌ. Pũyã xa hãmmax nãꞌ.” Tu ta tuꞌ kux. Kaxĩy.
\c 14
\s Yeyox te tik hittupmãhãꞌ
\p
\v 1 Ha nit xap nõy ꞌĩhã Yeyox te Paniye yõg tik haꞌ mõg, tuꞌ pet haꞌ mõg, ha yãꞌ xexkah, ha tikmũꞌũn teꞌ pẽnã kaꞌok Yeyox,
\v 2 ha tik nũn, ꞌũyĩpkup mõm, xix patakup, tu Yeyox haꞌ nũn,
\v 3 ha Yeyox te hãmyũmmũg xop pu hãmꞌãktux, xix Paniye xop pu hãmꞌãktux, hu:
\p —‍Mõnãyxop hittap Mõyyex te Topa yõg xatꞌax kaxꞌãmiꞌ. ꞌOk xat hok pu tikmũꞌũn hittupmã hok nit xap hã? Kaxĩy.
\p
\v 4 Haꞌ yĩy ꞌohnãg, yĩy Yeyox te tik pakut mũg, tuꞌ hittupmãhãꞌ, tuꞌ pet ha mõꞌkutnãhãꞌ,
\v 5 tuꞌ xexka xop pu hãmꞌãktux, hu:
\p —‍Pe ꞌãk-tok te hãpkox kopa mõꞌnãhãꞌ, pe ꞌõg mũnũytut tak te hãpkox kopa mõꞌnãhãꞌ nit xap hã, ꞌok hãpxip ꞌohnãg ꞌĩhã xateꞌ xutꞌax pu mõg? Yãꞌ xutꞌax mõꞌkaꞌok. Yã kaxĩy ꞌãte tikmũꞌũn hittupmãhã nit xap ꞌĩhã. Kaxĩy.
\p
\v 6 Haꞌ xutigãhãꞌ, tu hãmꞌãktux yũmmũg ꞌohnãg.
\s Yeyox te ꞌãmuk xexka hãꞌ mõgꞌax ꞌãktux
\p
\v 7 ꞌŨyũm Yeyox, tuꞌ xexka xop pẽnãhãꞌ, haꞌ yũmꞌax max yãykutnãhã yãy puꞌ, ha tikmũꞌũn teꞌ mũtik mãm yũmmũgãhãꞌ, tu hãmꞌãktuxꞌax hã hãmyũmmũgãhã, nũy Topa yõg hãpxopmãꞌax yũmmũgã, hu:
\p
\v 8 —‍Tikmũꞌũn yãytahaꞌ, haꞌ nõy te ꞌãxãnãhã pu ꞌãmuk xexka ha mõg, ꞌãpu mõg, paꞌ yũmꞌax max xak hok yãy puꞌ. ꞌÃmhok. Peyã tik xexka mõg kamah, ha ꞌãk-tõgnãg,
\v 9 puxix mĩptut xuxyã xa hãmꞌãktux, hu: “ꞌÃpu, yũmꞌax nõy xax nũy tu yũm. Tik xexka te nũ yũmꞌax max putup, nũy tu yũm.” Kaxĩy. Ha xate yãyhãhup, tuꞌ yũmꞌax nõy xak.
\v 10 Kaxĩy mĩy hok. Pa tik te ꞌãxãnãhã pu mõg ꞌũpet hah, ꞌãpu, mõg, paꞌ yũmꞌax kummuk yãykutnãꞌ, nũy yũm, ha tikmũꞌũn te xa hãmꞌãktuxꞌax hu: “ꞌÃmũn tek mũn hã ꞌãxapeꞌ, mãꞌ, nũy ꞌũyũmꞌax max yĩmũꞌ yũm.” Kaxĩy. Ha ꞌãhittup xexkah, yã tikmũꞌũn xohix teꞌ pẽnãhãꞌ, tu ꞌãxape te ꞌãp-tup pax pẽnãhã, ha ꞌãhittup.
\v 11 Kaxĩy Topa teꞌ hupmãp-tup tikmũꞌũn te yãy xexka peꞌ paxex, ha tikmũꞌũn te yãy peꞌpaxexk-tõgnãg te yãyhãp-tup xexkah. Ũkux. Kaxĩy.
\p
\v 12 Tu Paniye yõg tik pu hãmꞌãktux, tu tik teꞌ xãnãhã pu hãmꞌãktux hu:
\p —‍Xate ꞌãmuk xexka mĩy, ꞌãpu ꞌãxape xop xãnã hok pu tuꞌ xit, xix ꞌãnõy xop xãnã hok, xip-texop xexka te ꞌãyĩmap pip xãnã hok, yãꞌ xohix xãna hok, ka nõm xop teꞌ yãnãn tu ꞌãxãnãꞌ, nũy pago.
\v 13 Pa ꞌãmuk xexka xateꞌ mĩy, ꞌãpu hãpxop hok xop xãnãꞌ, xix hãpkumep hok xop xãnãꞌ, xiꞌ pa hok xop xãnãꞌ.
\v 14 Hamũn. Ha Topa te xa hãmmaxnãp-tup, ꞌũhok xop te xa pago ꞌohnãg hah, yã Topa mũn te xa pago putup, ꞌĩhã tikmũꞌũn te hãmyok mĩy xop hiꞌ putpuꞌ. ꞌŨkux. Kaxĩy.
\s ꞌÃmuk xexkah
\p
\v 15 Tik te mĩmpe xitꞌax tuꞌ yũm, tuꞌ xupak, tu hãmꞌãktux Yeyox puꞌ, hu:
\p —‍Tikmũꞌũn kuxa hittup, nõm te Topa yõg ꞌãmuk xexka mãp-tup. Kaxĩy.
\p
\v 16 Ha Yeyox te hãmyũmmũgãhãꞌ, nũy Topa yõg hãpxopmãꞌax yũmmũgãꞌ, nũy Topa te tikmũꞌũn xãnã ꞌãktux, hu:
\p —‍Tik te ꞌãmuk xexka mĩy, tu tikmũꞌũn punethok xãnãhãꞌ, puꞌ pet haꞌ nũꞌ, nũy xit,
\v 17 tu ꞌãmuk xexka mĩy, haꞌ puk, ha kãmãnat xat, pu tikmũꞌũn yũmmũgãꞌ, hu: “Yãꞌ puk, mãꞌ, nũy xit.” Kaxĩy.
\p
\v 18 —‍Pa tikmũꞌũn tep-tup nõg, yĩy tik puxet te: “ꞌÃte hãm max nõmenax, tu tayũmak ꞌũyãnãn tuꞌ hõm, nũy pop. ꞌŨgmõg putup, nũy pẽnãꞌ, ꞌaꞌ mãp-tupꞌah.” Kaxĩy.
\p
\v 19 —‍Haꞌ nõy te: “ꞌÃte mox te 10 pop. ꞌŨgmõg putup nũy pẽnãꞌ, ꞌak xit putupꞌah.” Kaxĩy.
\p
\v 20 —‍Ha nõy te: “ꞌÃte yãytaha, huk mõg putupꞌah.” Kaxĩy.
\p
\v 21 —‍Ha kãmãnat nũn put puꞌ, tu yãy xuxyã puꞌ xuktux, haꞌ gãy, tu: “Mõg, ꞌãmõꞌkaꞌok, kõmẽn kotit ha mõg, nũy kõmẽn yõg tikmũꞌũn hok xop nũnnãꞌ, ꞌũk pet tu nũnnãꞌ.” Kaxĩy.
\p
\v 22 —‍Haꞌ mĩy, tu hãpxip kutõgnãg ꞌĩhã putpuꞌ nũn, tu: “Xateꞌ xat, ha ꞌãteꞌ mĩy, pa ꞌãmuk xexka punethok.” Kaxĩy.
\p
\v 23 —‍Haꞌ nõy xe mõꞌkutnãhãꞌ, hu: “Mõg, putat xexka hã mõg, xix putat kutõgnãg hã mõg, nũy tikmũꞌũn xapit, tu nũnnãꞌ, pu ꞌãmuk xexka xohix mãꞌ.
\v 24 ꞌÃte hãpxeꞌe ꞌãktux xaꞌ, hu: ꞌŨxexka xop ꞌãteꞌ xãnãhãꞌ, hap-tup nõg, huꞌ yõg ꞌãmuk xexka mãp-tup ꞌohnãg.” Ta tuꞌ kux. Kaxĩy.
\s Tikmũꞌũn te Yeyox mũtik hãpkumepꞌax
\p
\v 25 ꞌÃmnĩy nõy tu ta hãpkumep, ha tikmũꞌũn punethok teꞌ mũtik hãpkumep, haꞌ yõkãnãm, tu hãmꞌãktux, hu:
\p
\v 26 —‍Tikmũꞌũn tek mũn mũtik hãpkumep putup, pũyãk putup pax xexkah, tu yãy yõg xape xop putup kutõgnãg. Tikmũꞌũn tek mũn mũtik hãpkumep, pũyã yãy tak putup kutõgnãg, xiꞌ mũg tut, xiꞌ xetut, xik-tok, xiꞌ tutnõy xop, xiꞌ pit xop, xiꞌ hex xop putup kutõgnãg, xix yãy peꞌpaxex kutõgnãg, nũy ꞌũkputup xexkah.
\v 27 Tikmũꞌũn te yãy yõg mĩpkupnix tat hok, tuꞌ xũy hok ꞌũgmũn putuk, puxix yõgnũ tikmũꞌũn mũtik hãpkumep hok.
\v 28 Xate mĩptut tox mĩyꞌax, hu ꞌãyũm hãmãxap, nũy yãy yĩkopit, hu: Tayũmak xohix te xĩy yõgnũꞌ? Kaxĩy. Tu ꞌõg tayũmak mõꞌkupix. Paxpu ꞌõg tayũmak punethok, ꞌãpu, mĩptut mĩy.
\v 29 Paxpu mĩptut hãm tuꞌ xup, pa ꞌõg tayũmak kutõgnãg, puxix mĩptut kuxyã hok, haꞌ nõy te xa ꞌãktuxꞌax kummuk, hu:
\v 30 “ꞌŨpa te hãmyũmmũg ꞌohnãg ꞌõhõm. ꞌŨyõg tayũmak xohik-tõgnãg, pãyã mõꞌkupix yũmmũg ꞌohnãg kamah.” Kaxĩy. Ta tuꞌ kux.
\p
\v 31 Tu xe hãmꞌãktux, nũy Topa yõg hãpxopmãꞌax yũmmũgãꞌ, hu:
\p —‍Hãpxexka yõg tik teꞌ ꞌxatꞌax, tu xonat xop xohix te 10,000 mõꞌpok, nũy hãpxexka nõy yõg xonat xop mũtik yãykix, pa xonat xop nõy xohix te 20,000, yĩy tik te tikmũꞌũn ꞌxatꞌax yũm, nũy yãy yĩkopit hãmãxap, hu: “ꞌOk yõgnũ xonat xop kaꞌok, pe xonat nõy xop kaꞌok?” Kaxĩy.
\v 32 Xonat xop nõy kaꞌok, puxix tik xop mõꞌpok hãpxexka nõy hah, pu taꞌ xexka xop tuꞌ xax, pu yãykix kuxyãꞌ, ha hãptox tu mõꞌpokꞌax, nũy gãy kuxyãꞌ.
\p
\v 33 —‍Kaxĩy ꞌãxop te yãy yõg hãpxop xohix nĩm hok, hu ꞌũgmũn mũtik xate hãpkumep hok kamah. Kaxĩy.
\s ꞌÃmot Xuxpex
\p
\v 34 Tu xe hãmꞌãktux, hu:
\p —‍ꞌÃmot xuxpex mũn max, pa yãy xuxpex nõg, puxix maxꞌah ꞌeheꞌ,
\v 35 ha tikmũꞌũn tep-tup nõg, hu hãptopa mõꞌyõn. ꞌŨgꞌãpax, nũy ꞌãyĩpkox piꞌ. Kaxĩy.
\c 15
\s Kahnẽn te yãy xaxok
\p
\v 1 Hãpxip kutõgnãg ꞌĩhã tik xop nũn, nũy Yeyox yĩy ꞌãpax, tu gohet pupi tikmũꞌũn yõg tayũmak pop, ha Yoneo yõg tikmũꞌũn te nõm tik xop putup nõg,
\v 2 ha Paniye xop xix hãmyũmmũg xop te Yeyox ꞌãktux kummuk, hu:
\p Nũ tik te tik kummuk hãꞌ xape, tu nõm mũtik xit. Yã kummuk Yeyox. Kaxĩy.
\p
\v 3 Ha Yeyox te hãmyũmmũgãhãꞌ, tu Topa yõg hãpxopmãꞌax yũmmũgãꞌ, tu kahnẽn ꞌãktux hã hãmyũmmũgãhãꞌ, nũy tu Topa te tikmũꞌũn kummuk xak ꞌãktux, hu:
\p
\v 4 —‍Tikmũꞌũn yõg kahnẽn te 100, tu kahnẽn puxet xaxok, huꞌ mõg, tuꞌ xipꞌax kox, tu kahnẽn xop te 99 nĩm, nũy kahnẽn puxet xak, tuꞌ xak, tu mõktu xipihiꞌ,
\v 5 tu xipihiꞌ, tu taꞌ kuxa hittup xexkah, tuꞌ nũn putpuꞌ, tu kahnẽn teꞌ yĩpak hãꞌ tat,
\v 6 tuꞌ nũn tu nũktu xupep yãy pet tuꞌ, tuꞌ xape xop xãnãhãꞌ, xix hãm yĩmap haꞌ pip xop xãnãhãꞌ, tu: “ꞌÃkuxa hittup ꞌũgmũtik! Yã ꞌãte yãy yõg kahnẽn xipihi!” Kaxĩy. Ta tuꞌ kux.
\p
\v 7 —‍Kaxĩy pexkox kopaꞌ pip xop kuxa hittup xexkah, tik kummuk yãyhãhup haꞌ hittup xexkah, paꞌ kuxa hittup kutõgnãg ꞌĩhã tik xop te yãy peꞌpaxex, hu: “ꞌŨgmax.” Kaxĩy.
\p
\v 8 Ha Yeyox te tayũmak hã hãmyũmmũgãhãꞌ, nũy Topa yõg hãpxopmãꞌax yũmmũgãꞌ, nũy Topa te tikmũꞌũn kummuk xak ꞌãktux, hu:
\p —‍ꞌŨn puxet te tayũmak ꞌãnuk te 10 pip, tup-xet xaxok, tuꞌ xak, tu kuyãnãm hãꞌ xak, tuꞌ pet kunut xit max, tuꞌ xak,
\v 9 tuꞌ xipihiꞌ, tuꞌ pahaꞌ, tuꞌ kuxa hittup, tuꞌ xape xop xãnãhãꞌ, xix hãmhũmnãg haꞌ pip xop, tu: ꞌÃkuxa hittup ꞌũgmũtik, ꞌãxop. ꞌÃte yãy yõg tayũmak ꞌãnuk xipihiꞌ!” Kaxĩy. Ta tuꞌ kux.
\p
\v 10 —‍Kaxĩy pexkox yõg mõꞌpok xop kuxa hittup, tik kummuk ta yãyhãhup haꞌ kuxa hittup. Kaxĩy.
\s Tik kutok xupahaꞌ
\p
\v 11 Tu xe hãmꞌãktux nũy hãmyũmmũgãꞌ, nũy Topa yõg hãpxopmãꞌax yũmmũgãꞌ, nũy Topa te tikmũꞌũn kummuk putup ꞌãktux, pu tu yãyhãhup, xix hãpkummuk mĩy kux. Tu hãmꞌãktux, hu:
\p —‍Tik tek-tok pit 2, yãꞌ xip tap,
\v 12 hak-tok teꞌ nõy hãꞌ kuhmõy te yãy tak pu hãmꞌãktux, hu: “ꞌÃtak, ꞌãxok, kopxix ꞌãte ꞌõg hãpxop pop, ꞌũyãg popꞌax, pa hõnhã ꞌãteꞌ yãg putup, yã tayũmak putup tek putex. ꞌÃteꞌ hip putupꞌah, xa ꞌãxok. ꞌÃꞌ hõm nõmhã, ꞌũyĩy nõmenax, nũy tayũmak pop, nũyk mõg hãptox tuꞌ.” Kaxĩy.
\p —‍Haꞌ tak te hãpxop xohix koxip, tuk-tok te kuhmõy tu tuꞌ yãg popmãhãꞌ.
\v 13 Hãpxip kutõgnãg ꞌĩhãk-tok te ꞌũyãg tayũmak pop, tuꞌ mõg hãptox tuꞌ, tu mõktu hãpxexka puknõg tuꞌ xupep, tu hãpkummuk mĩy pax, tu tayũmak xexka xaxogãnãg, haꞌ nõg.
\p
\v 14 —‍Haꞌ hok, ꞌũyõg tayũmak hoknãg, ha hãmhõgnãg hãpxexka xohix tuꞌ, yĩy putup tep-tex, xix hãpxexka yõg tikmũꞌũn xohix kix,
\v 15 ha hãpxop ꞌũm xak, nũy mãꞌ, tu: ꞌŨm hõm. ꞌŨgmãꞌ, kaxĩy, haꞌ nõy te yãy yõg hãm tu mõꞌkutnãhãꞌ, pu xapup pẽnãꞌ,
\v 16 ha putup tep-tex, hu xapup xitꞌax xak, paꞌ hõm ꞌohnãg tik teꞌ,
\v 17 yĩy yãy koxak, tu yãy mũtik hãmꞌãktux, hu: “ꞌÃtak yõg kãmãnat xop xit punethok, tu tuꞌ hix kaꞌok, ha putup tek putex.
\v 18 Put puk mõg ꞌãtak hah, yãy ꞌÃtak pet hak mõgꞌax, tu hãmꞌãktuxꞌax, hu: “ꞌÃtak, ꞌãte hãpkummuk mĩy pax, tu yãyhãhup Topa tuꞌ, xix xa tuꞌ,
\v 19 ꞌÃmax, hak mũn kummuk, tu xaꞌ hupmãhãꞌ, puk mũn yã ꞌãk-tok ꞌãktux. ꞌŨktux hok puk hãm ꞌõg kãmãnat xop mũtik.” Kaxĩy.
\v 20 Tu putpuꞌ mõg yãy tak pet hah.
\p —‍Tu mõktuꞌ pet tuꞌ xupep, hak-tok te hãptox tuꞌ xip, ꞌĩhãꞌ tak teꞌ pẽnãhãꞌ, tuk-tok teꞌ nõy hã kuhmõy kuxa kaꞌ, tuꞌ mõg mõꞌkaꞌok, tuk-tok mũg yãy kep hah, nũy tu ꞌãneo, ta tuꞌ kuxa hittup tu ꞌãneo,
\v 21 hak-tok te: “ꞌÃtak, ꞌãte hãpkummuk mĩy pax, tu Topa pu hãpkummugãhãꞌ, xix ꞌãmũn puꞌ, tu xa hupmãhã puk mũn yã ꞌãk-tok ꞌãktux.” Kaxĩy.
\p
\v 22 —‍Pãyãꞌ tak te kãmãnat xat, tu: “Mõꞌkaꞌok, mõg, tu topixxax max popnũꞌ, pu xõnnũ tat, ha hãpxop ꞌũm yãnãm paxnũ pu xõnnũ tu yĩpkutok ha mõꞌtat, ha pata xax max popnũꞌ, puꞌ tat,
\v 23 ha mũnũytut kutok tuktup max nũnnãꞌ, tup-tex. ꞌÃpu yũmũ nõ ꞌãmuk xexka mĩy ꞌũghittup tuꞌ.
\v 24 Xõnnẽ nũn, ha yũmũg kuxa hittup. Hõmãꞌ xok putuk, tuꞌ hittup nõmhã, hõmãꞌ xupaha, tuꞌ putpuꞌ nũn nõmhã.” Kaxĩy.
\p —‍Tu ꞌãmuk xexka mĩy!
\p
\v 25 —‍Hak-tok te mãxap xip, hãpxa xexka tuꞌ xip, tu putpuꞌ nũn yãy pet hah, tu kãyã ꞌãpak, xix hãmyã ꞌãpak,
\v 26 yĩy: “Pute ꞌũm nũhũꞌ? Tep tu tikmũꞌũn kãyãhã yĩy hãmyãꞌ?” Kaxĩy.
\p
\v 27 —‍Ha: “ꞌÃtaknõy nũn, ha ꞌãtak xat pu mũnũytut kutok putex, ꞌũkuxa hittup tuꞌ, ꞌũk-tok putpuꞌ nũn haꞌ kuxa hittup.” Kaxĩy.
\p
\v 28 —‍Pak-tok te mãxap gãy, tuꞌ mõꞌnãp-tupꞌah mĩptut hãꞌ, haꞌ tak nũn, tu ta tuꞌ xapit, pu mõnãy,
\v 29 pak-tok te: “Hãmyãxatamuk xohix hã xatek-xat, hak yĩpkox xip, tuꞌ mĩy, pãyã xate hãpxop ꞌũm ꞌaꞌ hõmꞌah, xate mot kutok kutõgnãg ꞌaꞌ hõm ꞌohnãg, puk xape xop mũtik ꞌãmuk xexka mĩy,
\v 30 pa ꞌãk-tok nõy nũn, tuꞌ xotit xop punethok pẽnãhãꞌ, tu ꞌõg tayũmak hãꞌ pagok, ha tayũmak nõg, ha ꞌãhaꞌ nũn putpuꞌ, ha xate ꞌãmuk xexka mĩy!” Kaxĩy.
\p
\v 31 Haꞌ tak te: “Xõnnũꞌ! Hãmyãxatamuk xohix hã ꞌũgmũtik ꞌãxip, ha ꞌãte yãy yõg hãpxop xohix popmãp-tup xaꞌ.
\v 32 Yãꞌ max yũmũg kuxa hittup, nũy ꞌãmuk xexka mĩy, ꞌãtaknõy put puꞌ nũn, ha yũmũg kuxa hittup. Yãꞌ xok putuk, pãyãꞌ hiꞌ, tuꞌ xupahaꞌ, pãyãꞌ putpuꞌ nũn.” Kaxĩy. Tu ta tuꞌ kux. Kaxĩy Yeyox te tikmũꞌũn yũmmũgãhãꞌ, tu Topa te tikmũꞌũn kummuk xak ꞌãktux, puyĩy yãyhãhup, xix hãpkummuk mĩy kux, nũy tu kuxa hittup.
\c 16
\s Kãmãnat te mãxap te hãpkoheꞌ mĩy
\p
\v 1 Yeyox te xe hãmꞌãktux yãy yõg tik xop puꞌ, nũy Topa yõg hãpxopmãꞌax yũmmũgãꞌ, hu:
\p —‍ꞌŨptexop xexka xip, ha tik te nõ pẽnãnãꞌ xip, yã kãmãnat te mãxap, ha tik nõy nũn, tup-texop xexka pu hãmꞌãktux, hu: “Nõm kãmãnat te mãxap te ꞌõg hãpxop xohix pẽnãhã, tu hãmyũmmũg ꞌohnãg, tuꞌ kmũꞌũn kummuk xak ꞌãktux, puyĩy yãyhãhup, xix hãpkummuk mĩy kux, nũy tu kuxa hittup.
\s Kãmãnat te xaxogãnãg ꞌõg hãpxop.” Kaxĩy.
\p
\v 2 Hap-texop te yãy yõg kãmãnat haꞌ xãnãhãꞌ, tu: “Xatep-teꞌ mũn mĩy? Tikmũꞌũn te ꞌãkummuk ꞌãktux. Hõnhã xate nõ pẽnã kux. Puxiꞌ.” Kaxĩy.
\p
\v 3 —‍Ha kãmãnat te yãy pu hãmꞌãktux, hu: “ꞌÃtep-te mũn mĩyꞌax? ꞌŨkxuxyã tek mũn putup nõg. ꞌAk mũn kaꞌokꞌah, ꞌũyĩy mũꞌ hãpxaꞌ. Hãpxop ꞌũhok tuꞌ kax ꞌãtep-tupꞌah, ꞌãte yãyhãhup tuꞌ.
\v 4 Nãy. ꞌÃteꞌ yũmmũg. ꞌŨkxape xeꞌe xop max, ha ꞌãte nõm xop pu hãmꞌãktux hã hãmmaxnãꞌax, puk mũn pu hãmmax hã yãnãn, ꞌũ pet kopak xihip, ꞌĩhãk xuxyã tek xat pu mõg.” Kaxĩy.
\p
\v 5 —‍Huꞌ xuxyã yõg kãmãnat nõy haꞌ xãnãhãꞌ, xix kãmãnat nõy haꞌ xãnãhãꞌ, tu mõktu xohix, tu ꞌõm te mãxap pu hãmꞌãktux, hu: “Hãpxop xohix te xĩy xate ta nemẽn yũmũg xuxyã puꞌ?” Kaxĩy.
\p
\v 6 —‍Haꞌ nõy te: “Hep tox yõg kãnẽy te 100 ꞌãte ta nemẽn.” Kaxĩy.
\p —‍Ha: “Ta nemẽn yõg paꞌ tappet, tu mõꞌkupix, hu: 50 ꞌũyãnãn tuꞌ, nũy ꞌõg hãpxop yãggã xate ta nemẽn.” Kaxĩy.
\p
\v 7 —‍Tu tik tek-nãy tuꞌ xãnãhãꞌ, tu: “Xate ta nemẽn hã xĩy hãpxop?” Kaxĩy.
\p —‍Ha: “ꞌÃte ta nemẽn xuxnãg yõg panat xohix te 1.000.” Kaxĩy.
\p —‍Ha xeꞌ: “ꞌÕgnũ ta nemẽn yõg paꞌ tappet, nũy mõꞌkupix haꞌ yũm, hu: 800 nũy ꞌõg ꞌũyãnãn tuꞌ.” Kaxĩy.
\p
\v 8 —‍Haꞌ xuxyã te hãmyũmmũg, tuꞌ yõg kãmãnat te hãpkohe mĩy yũmmũg, tu hãmyũmmũg ꞌãktux kamah. Ta tuꞌ kux.
\p —‍Kaxĩy Topa hãꞌ puknõg xop te hãmyũmmũg xexkah, pãyã Topa yõg tikmũꞌũn te hãmyok mĩy, tu hãmyũmmũg kutõgnãg,
\v 9 yĩy ꞌãte xa hãmꞌãktux: Yãꞌ max tikmũꞌũn te tayũmak hã hãmmaxnãꞌ, nũyꞌ xape xop pu hãpxopmã max, puyĩy nõm xop mõꞌãnĩynãm ꞌũyãnãn tuꞌ, ꞌĩhã ꞌõg tayũmak nõg, puxix ꞌãmõgã pexkox hah, xa xihip kaꞌok. 
\v 10 Tik te hãmyok mĩy, tu hãpxop kutõgnãg pẽnã max, puxix hãpxop xexka pẽnã max kamah. Kaxĩy tik kummuk te hãpxop kutõgnãg pẽnã kummuk, puxix hãpxop xexka pẽnã kummuk kamah.
\v 11 Tik te hãpkoheꞌ mĩy, tu tayũmak hãꞌ pẽnã kummuk, puxix kamah Topa yõg hãpxopmã max pẽnã kummuk.
\v 12 Xate ꞌãnõy yõg hãpxop pẽnã kummuk, puxix tikmũꞌũn kuxa ꞌãkopa yũm ꞌohnãg, tu hãpxop max xaꞌ hõm putup ꞌohnãg kamah. ꞌÃmhok.
\p
\v 13 —‍Tikmũꞌũn te yãy xuxyã 2 puꞌ hãm hok, ka xuxyãp-xet putup pax, ꞌĩhãꞌ nõy putup nõg. Ha tikmũꞌũn xupkũmĩy, puxix tayũmak tuꞌ hãm, pa tikmũꞌũn te Topa xak, puxix Topa tuꞌ hãm. ꞌŨkux. Kaxĩy.
\s Yeyox te hãmꞌãktux
\p
\v 14 Ha Paniye yõg xop teꞌ xupak, tu Yeyox hah yĩxix kummuk, huꞌ xox yĩxix, tu tayũmak hã kũmĩy, huꞌ gãy, tuꞌ yĩxix kummuk.
\v 15 Pa Yeyox te:
\p —‍Tikmũꞌũn te ꞌãpẽnãhãꞌ, tu: ꞌŨmax, kaxĩy, ꞌãhã, pãyã Topa te ꞌãkuxa kopa pẽnãhãꞌ, tup-tup nõg, ꞌãkuxa kummuk hah.
\p
\v 16 —‍Hõmã mõnãyxop hittap Mõyyex te Topa yõg xatꞌax kaxꞌãmi, haꞌ nõy xop te Topa pupi hãmꞌãktux, nũy tikmũꞌũn puꞌ xuktux, tu hãmyãxatamuk xohix hã hãmyũmmũgãhãꞌ, tu mõktu Yoãm xip, nõm tep-tox pix, ha hõnhã Topa te yãy yõg tikmũꞌũn xat, ha hãmꞌãpak max ꞌãktux, haꞌ xohix yĩpkox pip, puyĩy Topa yõg putat haꞌ mõg.
\p
\v 17 —‍Ha pexkox te yãy xagogãp-tup, xix hahãm, pãyã Topa yõg hãmãktux xip kaꞌok, haꞌ xaxogã ꞌohnãg.
\p
\v 18 —‍Tikmũꞌũn teꞌ xetut nĩm, tu ꞌũn nõy mũg, yã hãpxopmã kummuk, ha tik nõy teꞌ nõy xetut mũg, nũy yãytax, yã hãpxopmã kumuk kamah, tuꞌ nõy hãꞌ xupxet. Kaxĩy.
\s ꞌŨptexop xexka xix Nay
\p
\v 19 Tu xe hãmꞌãktux, nũy hãmyũmmũgãꞌ, nũy Topa yõg hãpxopmãꞌax yũmmũgãꞌ, puyĩy Topa yõg hãmꞌãktux puꞌ yĩpkox pip, hu:
\p —‍ꞌŨptexop xip, tu topixxax max tat, tu taꞌ mĩy pax ꞌãmuk xexkah,
\v 20 ha tik hok xip, tuꞌ pakut, tuꞌ pip ꞌũptexop yõg hãmyĩkox tuꞌ, ꞌũxuxetꞌax Nay, ꞌũkayax punethok tuꞌ pip,
\v 21 tuꞌ xitꞌax ꞌũm xak, putup tep-tex hah, ha kokex xop te tik kayax xup, tuꞌ yõyxõg hãꞌ xup.
\v 22 Hãpxip kutõgnãg tik hok ꞌãxetꞌax Nay xok, ha pexkox yõg nũ ꞌpok xop teꞌ put, tuꞌ tat, tu pexkox ha mõꞌtat, ha mõnãyxop hittap ꞌAmanãm mũtik tihi pexkox kopah, tuꞌ hittup, ꞌĩhã ꞌũp-texop xok kamah, ha nõ hãpkot,
\v 23 haꞌ xakix xop yõg pipꞌax tuꞌ mõg, tuꞌ xũy xexkah, tu mõnãyxop hittap ꞌAmanãm pẽnãhãꞌ, ha hãptox tuꞌ xip pepiꞌ, pa Nay te ꞌAmanãm mutik pepiꞌ tihiꞌ,
\v 24 yĩp-texop teꞌ xãnã kaꞌok, hu: “Yã ꞌãmãxap ꞌAmanãmꞌ!” kaxĩy, ha: “Putep mũn putup xateꞌ?” Kaxĩy. Haꞌ nõy te: “ꞌŨg ꞌũm kuxa kaꞌ, ꞌũkxũy hah. ꞌÃpu, Nay nũꞌkutnãꞌ, nũy yĩpkutok hã ꞌũgyõyxõg ꞌũm pix, kõnãg hãꞌ pix. Yãk xũy xexka kuxap kopah.” Kaxĩy.
\p
\v 25 —‍Pa ꞌAmanãm te: “Xõnnũꞌ, Topa te xa hãmmaxnãhã hãm tuꞌ, ꞌĩhã Nay ha hãpkummugãhãꞌ, yã hõnhãꞌ hittup pax ꞌĩhã ꞌãxũy,
\v 26 ha hãpkanet xexka xip, ka mõnãy ꞌũghah, ha kamak mõg ꞌohnãg ꞌãha kuꞌu mõnãy.” Kaxĩy.
\p
\v 27 —‍Hap-texop te: “Nay nũꞌkutnã ꞌũktak pet hah.
\v 28 ꞌŨktaknõy xohix te 5 tihiꞌ, yĩy mõꞌkutnã hãm tuꞌ, ka nũ pipꞌax haꞌ nũn, huꞌ xũy.” Kaxĩy.
\p
\v 29 —‍Pa ꞌAmanãm te: “ꞌÃmhok. ꞌA mõꞌkutnãp-tupꞌah ꞌãtaknõy xop hah. Yãꞌ xip Topa tappet, nũy mõꞌkupix, nũy yĩpkox piꞌ. Yãꞌ puxiꞌ.” Kaxĩy.
\p
\v 30 —‍Haꞌ nõy te: Yãk-tõgnãg, ꞌap punetꞌah. ꞌŨktaknõy xop kuxa mãm ꞌohnãg Topa yõg tappet kopah. ꞌÃpu, mõ Nay kutnãꞌ, nũy taknõy xop haꞌ mõg. Pax pu tik xok xeꞌeꞌ, tu put pu hiꞌ, tuk taknõy xop pu hãmꞌãktux, puxiꞌ kuxa mãm kaꞌok hãmꞌãktuxꞌax kopah, tu yãyhãhup, nũy hãpkummuk mĩy kux.” Kaxĩy.
\p
\v 31 —‍Pa ꞌAmanãm te: “ꞌŨkuxa mãm ꞌohnãg Topa yõg tappet kopah, huꞌ mãm hok tikmũꞌũn hãmꞌãktuxꞌax kopa kamah, tu tik xop tu putpu hi ꞌãpakꞌax, ꞌĩhãꞌ kuxa mãm ꞌohnãg.” Ta tuꞌ kux.
\c 17
\s Hãpkummuk mĩyꞌax xaxogãhãꞌ, pu tuꞌ kux
\p
\v 1 Yeyox te yãy yõg mũtik hãpkumep xop pu hãmꞌãktux, hu:
\p —‍ꞌÃmnĩy xohix ꞌĩhã hãpxopmãꞌax kummuk teꞌ kummukgãꞌax, pa tikmũꞌũn te hãpkummuk mĩy, nũy nõy kummukgãꞌ, puxix Topa nõm xũygã xexka.
\v 2 Yãꞌ max nõm tik teꞌ kummukgã mũg, nũy mĩkax xexka hĩy ꞌũmãykox tuꞌ, tu kõnãg xexka kopa tuꞌ xok, haꞌ kummuk nõm te tikmũꞌũn kutõgnãg pu hãpkummuk mĩyꞌax yũmmũgãhãꞌ.
\v 3 ꞌÕg pa ꞌãtiꞌ! ꞌÃnõy te hãpkummukgãhãꞌ. ꞌÃpuꞌ mãnõg, pu yãyhãhup, ha ta xaxogãꞌ.
\v 4 ꞌÃnõy te xa hãpkummukgã pax, tu xeꞌ mĩy pu tu 7, ꞌĩhã xa tuꞌ xak pu kummugãꞌax xaxogãꞌ. ꞌÃpu ꞌãnõy kuxa kaꞌ, nũy hãpkummuk mĩyꞌax xaxogãꞌ, pu tu kux. Kaxĩy.
\s ꞌŨkuxa yũm kaꞌok
\p
\v 5 Ha yãy yõg xop te:
\p —‍ꞌŨgmũ kuxa mãm kutõgnãg. ꞌÃpuk mũ kuxa mãmmãꞌ, pu tu mãm kaꞌok. Kaxĩy.
\p
\v 6 Ha Yeyox te:
\p —‍ꞌOk ꞌãkuxa mãm kutĩgnãg? Pẽnã mĩm xexka kup ꞌãxetꞌax mõytat, ha mĩm xap kutĩgnãg. Pax xa kuxa mãm kutĩgnãg kaxĩy, hu ta mĩm xexka kup nõy piget puꞌ xat, hu: “Hãm tu yãy xut, nũy kõnãg xexka kopa ꞌãxip, nũy kõnãg kaka yõg hãm kopa ꞌãxok,” kaxĩy, puxix mĩm xexka kup yĩpkox piꞌ, nũyꞌ mĩy. Kaxĩy.
\s Kãmãnat hãmꞌax
\p Tu xe:
\p
\v 7 —‍ꞌÕg kãmãnat te hãpxaꞌ, pe mũnũytut pẽnãꞌ, tu ꞌãmnĩy hã putpuꞌ nũn ꞌãpet tuꞌ, pãyã xateꞌ xapit hok pu yũhũm, nũy xit.
\v 8 ꞌÃmhok, pãyãꞌ xat, hu: “Hãpxop ꞌũm puk, tu mõktu max, tu hãpxop keꞌet, tu kãnẽy yĩmũꞌ xak-nãy ꞌũkxit. ꞌŨkxit kux yĩy ta ꞌãxit ꞌũk-nãy tu xix xoꞌop.” Kaxĩy.
\v 9 Tu ꞌõg kãmãnat pu hãmꞌãktux hok, nũy: “Puxiꞌ, ꞌãhãm max,” kaxĩy. ꞌÃmhok.
\v 10 Kaxĩy ꞌãxop yã Topa hã kãmãnat xop. Topa xatꞌax xohix pu ꞌãyĩpkox pip, xapix tu hãmꞌãktux, hu: “ꞌŨgmũg hãm kummuk Topa puꞌ, ꞌũxatꞌax mĩy puxehnãg tuꞌ.” Kaxĩy.
\s Yeyox te tikmũꞌũn xax kunut xop hittupmãhãꞌ
\p
\v 11 Tu ta hãpkumep, tu kõmẽn Yenoyanẽn haꞌ mõg, ha hãpxexka Xamãnit teꞌ keppaꞌ yũm, xix hãpxexka nõy Ganinet teꞌ xãm paꞌ yũm.
\v 12 Tuꞌ mõg tu mõktuꞌ xupep xip tu xexka tuꞌ, ha tik te 10 pip, tu pakut, tu yãy xax kunutnãm, kayax punethok tuꞌ, hãptox tuꞌ pip xipꞌax tuꞌ,
\v 13 tuꞌ xãnãhãꞌ, hu:
\p —‍Yeyox, Notot! ꞌŨgmũ kuxa kaꞌ! Kaxĩy.
\p
\v 14 Haꞌ pẽnãhãꞌ, tu:
\p —‍Mõg, ꞌãmãnex xop ha mõg pu ꞌãpẽnãꞌ. Kaxĩy.
\p Haꞌ mõg. ꞌŨmõg, ꞌĩhãꞌ hittup, haꞌ xax tap tup xupep tu max,
\v 15 Ha tik puxet yã hãpxexka Xãmãnit yõg, yãꞌ puknõg, tu yãy xax tap max pẽnãhãꞌ, yĩꞌ putpuꞌ nũn, tuꞌ yĩy kaꞌok, tu Topa max ꞌãktux, ꞌũhittup tuꞌ,
\v 16 tuꞌ kopaxux haꞌ nãhãꞌ, tu Yeyox pu hãmꞌãktux, hu: ꞌÃmax xeꞌẽgnãg! Kaxĩy.
\p
\v 17 Ha:
\p —‍Tik xohix te 10 hittup. Piꞌyãꞌ pip nõm tix xohix te 9?
\v 18 Tu putpuꞌ nũn ꞌohnãg, tu Topa max ꞌãktux ꞌohnãg, pãyãꞌ puknõg puxehnãg te Topa max ꞌãktux. Kaxĩy.
\p
\v 19 Tuꞌ puknõg pu:
\p —‍ꞌÃyok, nũy mõg, ꞌãkuxa yũm kaꞌok, yĩy Topa te ꞌãhittupmãhãꞌ. Kaxĩy.
\s Topa te yãy yõg tikmũꞌũn xat putup
\p
\v 20 Hãpxip kutõgnãg ꞌĩhã Yeyox te hãmyũmmũgãhãꞌ, yĩy Paniye yõg xop teꞌ yĩkopit, hu:
\p —‍Hãm ꞌũm ꞌĩhã Topa te hãm xexka xohix yõg tikmũꞌũn xat putup hãm tuꞌ? Kaxĩy.
\p Ha:
\p Tikmũꞌũn teꞌ xak, tuꞌ pẽnãp-tup,
\v 21 ꞌA hãmꞌãktux putupꞌah, hu: “Hẽnãꞌ, ꞌũxip nũnteꞌ,” kaxĩy. ꞌÃmhok. Xix ꞌap hãmꞌãktux putupꞌah, hu: “Pẽnãꞌ, ꞌõnteꞌ xip,” kaxĩy. ꞌÃmhok. Tikmũꞌũn teꞌ pẽnã ꞌohnãg ꞌĩhã Topa te yãy yõg tikmũꞌũn xat. ꞌÃmhok. Yã Topa te tikmũꞌũn kuxa kopaꞌ xat. Kaxĩy.
\p
\v 22 Tu yãy yõg mũtik mõg xop pu hãmꞌãktux, hu:
\p —‍ꞌŨgmũn yã Tikmũꞌũn Kutok, ha ꞌãmnĩy punethok nõg putup, ꞌĩhã xe ꞌãxop tek mũn pẽnãp-tup, pãyã ꞌak pẽnãꞌah,
\v 23 ha tikmũꞌũn te xa hãmꞌãktux putup, hu: “Hẽnãꞌ, Yeyox xip,” kaxĩy. Haꞌ nõy te: “Pẽnãꞌ, ꞌõnteꞌ xip,” kaxĩy. Pak xip putupꞌah. ꞌÃmõg hok nũy pẽnãꞌ. ꞌAk xip putupꞌah.
\v 24 ꞌŨgmũn yã Tikmũꞌũn Kutok, huk nũn putup mõꞌkaꞌok, ꞌũgnũn putup tex yãnãm xexka putuk, ha hãpxexka xohix yõg tikmũꞌũn tek pẽnãp-tup,
\v 25 pa hõnhãk xũy nãm putup hãmãxap, ha tikmũꞌũn tek putup nõg.
\v 26 Hõmã tikmũꞌũn hittap te mõnãyxop Nõe putup nõg kamah,
\v 27 tuꞌ xit, tuꞌ xoꞌop, tu yãytahaꞌ, tu hãmyãxatamuk xohix hãꞌ yĩpkox pip ꞌohnãg Topa yõg hãmꞌãktux puꞌ, tu mõktu Nõe te mĩptut xexka hã mõꞌnãhãꞌ, nõm mĩptut te kõnãg hãꞌ mõg ha mõꞌnãhãꞌ, ha tex xexkah, ha kõnãg kox xohix nũꞌxip, tuꞌ hãmnak hãꞌ xupep nãm, ha mõktu tikmũꞌũn xohix xakix kõnãg kopah.
\v 28 Ha tikmũꞌũn hittap te mõnãyxop No putup nõg kamah, tuꞌ xit, tuꞌ xoꞌop, tu hãpxop hãmenax, tuꞌ hãm, tuꞌ pet punethok, tu hãmyãxatamuk xohix hãꞌ yĩpkox pip ꞌohnãg Topa yõg hãmꞌãktux puꞌ,
\v 29 tu mõktu No te kõmẽn Xonõm nĩm, ha hãpxip ꞌohnãg ꞌĩhã kuxap te pexkox tuꞌ xakot, xix mĩkax xap pukpex te pexkox tuꞌ nãhãꞌ, tu tikmũꞌũn koxyõy, ꞌũpuk haꞌ nõaꞌ.
\v 30 Kaxĩy tikmũꞌũn te hãpxopmãp-tup ꞌĩhãk nũn, hak mũn yã Tikmũꞌũn Kutok,
\v 31 tuk nũn ꞌĩhã xupmãn mõꞌkaꞌok, pe yã mĩptut kopaꞌ pip, pe yã hãm tu tihiꞌ. ꞌŨhip hok, ꞌõg hãpxop nĩm, pũyãꞌ piꞌ, pãyã ꞌãxupmãn mõꞌkaꞌok, ka ꞌãxok.
\v 32 Mõnãyxop te xa No xetut ꞌãktux, tuꞌ yõkãnãm huꞌ xok, ꞌũxaxok hok nõꞌõm!
\v 33 Tikmũꞌũn xak, pũyĩy hi, puxix tuꞌ xok, pa tikmũꞌũn xok puxix hi xeꞌẽgnãg.
\v 34 ꞌÃte xa hãpxeꞌe ꞌãktux, ꞌũgnũn putup, ꞌĩhã tikmũꞌũn 2 mõꞌyõn, ha yã mõgãp-tup ꞌũpxet, tuꞌ nõy nĩm putup,
\v 35 ha ꞌũn 2 te xuxnãg xetox xap koxyõy putup, nũy nõ pãm mĩy, hã mõgãp-tup ꞌũn puxet, tuꞌ nõy nĩm putup,
\v 36 ha tik 2 hãm putup, hã mõgãp-tup tik puxet, tuꞌ nõy nĩm putup. Kaxĩy.
\p
\v 37 Haꞌ yõg xop te Yeyox yĩyꞌax ꞌãpak, huꞌ yĩkopit, hu:
\p —‍Yãyãꞌ, piꞌyaꞌ xip nũhũꞌ? Kaxĩy.
\p Ha:
\p —‍Kuptap xop te yãy tu nũꞌ nãhãꞌ nũy xokxax tu hãmhũmnãg pip. Kaxĩy.
\c 18
\s Tik pa te hãmyũmmũg xix ꞌũn hok yũm
\p
\v 1 Yeyox te hãmyũmmũgãhã hãmꞌãktuxꞌax hã, nũy Topa yõg hãpxopmãꞌax yũmmũgãꞌ, pũyĩy tikmũꞌũn Topa pu hãmꞌãktux pax, nũy kuxa teknõg hok, tu:
\p
\v 2 —‍Tik pa te hãmyũmmũg, tuꞌ xip kõmẽn kopah, tuꞌ kuxãnõg ꞌohnãg, hu Topa yĩpkutuk hok, xix tikmũꞌũn yĩpkutuk ꞌohnãg.
\v 3 Ha kõmẽn kopaꞌ xip ꞌũhũn, tuꞌ hok yũm, tu ꞌãmnĩy xohix hã tik pa te hãmyũmmũg haꞌ mõg, nũy ta tuꞌ xak, hu: “ꞌÃpu, mõknĩynãm. Tikmũꞌũn kummuk hupmã, pu tu ꞌã hãpkummugã kux,” kaxĩy. Pa tik te hãpkoheꞌ mĩy, tuꞌ kuxyã ꞌohnãg.
\p
\v 4 —‍Ha ꞌãmnĩy xohix hã tik teꞌ kuxyã ꞌohnãg, pa ꞌãmnĩy xohix hã ꞌũn nũn, nũy ta tuꞌ xax, pu hãpkummuk mĩy kuxyãꞌ, hu ꞌãmnĩy xohix hãꞌ mĩy, tu mõktu tik te yãy pu hãmꞌãktux, hu: “ꞌÃte Topa yĩpkutuk ꞌohnãg, tu tikmũꞌũn puk yĩpkox ꞌohnãg kamah,
\v 5 pa ꞌũn te ꞌaꞌ xak puꞌ kummuk mĩy xop kuxyãꞌ, tuk kuxa teknõg, ꞌũn nũn kux ꞌohnãg hah. Puxiꞌ. ꞌÃte ꞌũn mõꞌnĩynãm putup, puk putox kummugã hok.” Kaxĩy. Ta tuꞌ kux.
\p
\v 6 Tu xe:
\p —‍Tik pa te hãmyũmmũg, pãyã hãpkoheꞌ mĩy, ha ꞌũn te ta tuꞌ xak, tu xe tuꞌ xak, tuꞌ hup ꞌohnãg, tu mõktu tik te mõꞌnĩynãm.
\v 7 ꞌOk Topa te yãy yõg tikmũꞌũn mõꞌnĩynãm hok, mõ nõm yãy xeꞌẽgnãg tuꞌ? Hamũn. Yãꞌ yĩmõgatux, tu mõꞌnĩynãm xeꞌẽgnãg, nõm xop te ꞌãmnĩy xohix hã ta tuꞌ xak, xix hãptup xohix hã, pu tu mõꞌnĩynãm.
\v 8 ꞌÃte xa hãpxeꞌe ꞌãktux: Topa te hãpkummuk mĩy xop kuxyãhãꞌ, nũy yãy yõg tikmũꞌũn mõꞌnĩynãm mõꞌkaꞌok. ꞌŨgmũn yã Tikmũꞌũn Kutok, tuk nũn putup putpuꞌ. ꞌOk tikmũꞌũn kuxa mãm putup ꞌũgkopa ꞌĩhãk nũn? ꞌĨntuꞌ! Kaxĩy.
\s Paniye yõg tihik, xix tik te gohet pupi tãyũmak pop
\p
\v 9 Tu hãmꞌãktux nõy hã hãmyũmmũgãhãꞌ, nũy Topa yõg hãpxopmãꞌax yũmmũgãꞌ, pu tikmũꞌũn yãy peꞌpaxex max hok, nũy nõy peꞌpaxexk-tõgnãg hok kamah, tu:
\p
\v 10 —‍Tik 2 mõg, tu Topa pet xexka haꞌ mõg, nũy Topa pu hãmꞌãktux, ha tik puxet Paniye xop yõg, xiꞌ nõy te gohet pupi tayũmak pop,
\v 11 ha Paniye yõg tik te yãy peꞌpaxex max, tu Topa pu hãmꞌãktux, tu yãy puꞌ xuktux, hu: “Topah, ꞌũgmũn max. Tikmũꞌũn xohix kummuk pax, tu hãpxop hãꞌ xupxet, xiꞌ nõy hãꞌ xupxet, tu hãpkummuk mĩy, nũ tik kummuk putuk, tik te gohet pupi tãyũmak pop putuk, yãꞌ kummuk, ha tak mũn max.
\v 12 ꞌŨkxit hok xegõn pet xohix ꞌĩhãꞌ, xix kĩn pet xohix ꞌĩhãk xit hok, nũy ta Topa pu hãmꞌãktux, tu yõg tayũmak yãg ꞌãte Topa puꞌ hõm, yã tayũmak xohix te 10 yõgnũꞌ, hu Topa pup-xet hõm. Puxi. ꞌŨkux.” Kaxĩy. Pa Topa te nõm peꞌpaxex kummuk.
\p
\v 13 —‍Ha tik te gohet pupi tayũmak pop, tu yãyhãhup, tu hãptopa tuꞌ xip ꞌũgnĩhaꞌ, tu Topa yĩpkutuk, hu pexkox pẽnãp-tup ꞌohnãg, tu nũꞌ xup, tu yãy kep toꞌok, tu: “Topa, ꞌũg ꞌũm kuxa kaꞌ, ꞌãte hãpkummugã pax hah.” Kaxĩy. Ta tuꞌ kux.
\p
\v 14 Tu xe:
\p —‍ꞌÃte xa hãpxeꞌe ꞌãktux: Tik te gohet pupi tayũmak pop, tu te yãy pet haꞌ mõg putpuꞌ, ha Topa teꞌ kuxa yũmmãhãꞌ, pa Paniye yõg tik kuxa yũm ꞌohnãg, Topa teꞌ kuxa yũmmã ꞌohnãg hah. Tik te yãy xexka peꞌpaxex, puxix Topaꞌ hupmãꞌ, ha tik te yãk-tõgnãg peꞌpaxex, puxix tu yãyhãꞌ xexkah. Kaxĩy.
\s Yeyox xix kakxop
\p
\v 15 Ha ꞌũn xop tek-tok tat Yeyox hah, puꞌ xupit, pũyĩy kakxop pu hãm ꞌũm maxnãꞌ, ha yãy yõg mũtik hãpkumep xop teꞌ pẽnãhãꞌ, tu ꞌũn xop mãnõg,
\v 16 pa Yeyox teꞌ xãnãhãꞌ, hu:
\p —‍Mãꞌ. Pũyã kakxop nũ ꞌũghah, tuꞌ tux hok pũyĩy nũꞌ, yã Topa teꞌ xat putup kakxop kuxa tuꞌ.
\v 17 ꞌÃte xa hãpxeꞌe ꞌãktux, ꞌũxaxok hok: Kakxop yĩpkox pip Topa yõg xatꞌax puꞌ, ha Topa tep-tup pu tikmũꞌũn yĩpkox pip kamah, kakxop putuk, nũy Topa yõg tikmũꞌũn kopaꞌ piꞌ. Kaxĩy.
\s ꞌŨp-texop xexka
\p
\v 18 Ha Yoneo yõg tik teꞌ xatꞌax, tuꞌ nũn, tu Yeyox yĩkopit, hu:
\p —‍Notot, xate yũmmũgãꞌax, yã ꞌãmax. ꞌÃtep-tep mũn mĩyꞌax nũy ꞌũghi xeꞌẽgnãg mõꞌkumak mõg? Kaxĩy.
\p
\v 19 Ha:
\p —‍Tep tu xatek mũn ꞌãxetꞌax max? ꞌAp xipꞌah tikmũꞌũn kuxa max. Topa mũn puxehnãg max.
\v 20 Xate Topa yõg xatꞌax xohix yũmmũg, hu: “ꞌÃnõyꞌ hãꞌ xupxet hok, xip-tex hok, xix ꞌãnõy yõg hãpxop hãꞌ xupxet hok, xiꞌ koit hok, xix ꞌõg ꞌãtak pu ꞌãyĩpkox piꞌ, xix ꞌãtut pu ꞌãyĩpkox piꞌ.” Kaxĩy.
\p
\v 21 Ha tik te:
\p —‍ꞌAꞌ yũmmũg. Hãmyãxatamuk xohix hã ꞌãteꞌ xatꞌax yũmmũg, tuk yĩpkox xip. Kaxĩy.
\p
\v 22 Haꞌ xupak, tu:
\p —‍Pãyã hãpxopmãꞌax puxet xateꞌ xaxok, ꞌap mĩyꞌah. Mõy, nõmenax ꞌõg hãpxop xohix, nũy tayũmak pop, tuꞌ nĩm ꞌũhok xop puꞌ, ha Topa te pexkox yõg hãpxop xaꞌ xex putup pexkox kopa, ha nũn tu nũktu ꞌŨkpe mõg. Kaxĩy.
\p
\v 23 Ha tik te hãmꞌãpak, tuꞌ kuxa hittup ꞌohnãg, ꞌũp-texop xexka tuꞌ, tu Yeyox nĩm.
\v 24 Ha Yeyox teꞌ pẽnãhãꞌ, tu:
\p —‍ꞌŨp-texop te yõg hãpxop nĩm putup hok, puxix Topa yõg xatꞌax puꞌ yĩpkox hok kamah.
\v 25 Ha xoktut kãmẽn te ꞌãmuxnãg ta kup kox hã mõꞌtat ꞌohnãg, yã hãpxopmã kaꞌok miax, pãyã ꞌũp-texop te Topa puꞌ yĩpkox xip, yã hãpxopmã hok xeꞌẽgnãg. Kaxĩy.
\p
\v 26 Ha yãy yõg xop teꞌ xupak, tu:
\p —‍ꞌŨ ꞌũm mũn te Topa puꞌ yĩpkox xipꞌax? Yã hãpxopmã kaꞌok xexkah. Kaxĩy.
\p
\v 27 Pa Yeyox te:
\p —‍Tikmũꞌũn ꞌaꞌ kaꞌokꞌah, pa Topa mũn kaꞌok xexkah, nũy tu hãpxopmã kaꞌok xeꞌẽgnãg. Kaxĩy.
\p
\v 28 Ha Pet te:
\p —‍Pẽnãꞌ, ꞌũgmũg yãy pet nĩm, nũy ꞌãpek mõg. Kaxĩy.
\p
\v 29 Ha:
\p —‍ꞌÃte xa hãpxeꞌe ꞌãktux: Tikmũꞌũn te yãy pet nĩm, tuꞌ xetut nĩm, tuꞌ tak yĩmot nĩm, tuꞌ tut nĩm, tuk-tok nĩm, tuꞌ nĩm nũy yãyhã Topa yõg tikmũꞌũn, puyĩy Topa nõm xat,
\v 30 puxix Topa nõm pu hãmmax hãꞌ yãnãn putup hãm tuꞌ, haꞌ hi xeꞌẽgnãg putup pexkox tuꞌ, haꞌ kux ꞌohnãg. Kaxĩy
\s Yeyox teꞌ xokꞌax ꞌãktux, xiꞌ putpu hiꞌax
\p
\v 31 Haꞌ mõg, ha Yeyox te yãy yõg tik xop xapit, tu:
\p —‍Pẽnãꞌ, pũm, yũmũ mõg kõmẽn Yenoyanẽn tuꞌ, pu tik kummuk ꞌũkputex. Hõmã tik xop te Topa pupi hãmꞌãktux, tu kaxꞌãmi tappet tuꞌ, tuk mũn Tikmũꞌũn Kutok ꞌãktux. Yã Topa yõg hãmꞌãktux hittap hãk kummugãp-tup,
\v 32 ha puknõg xop hak mõgãp-tup, pu ꞌã tu yãyhãhupmãꞌ, tuꞌ yĩy hep nũꞌxok putup,
\v 33 tu ꞌãꞌ kix kakixnãg putup, tuk putex putup, ꞌũtik xok xeꞌeꞌ, ha ꞌãmnĩy tikoyuk nõg ꞌĩhã putpuk hip-tup. Kaxĩy.
\p
\v 34 Pa yãy yõg tik xop te hãmyũmmũg ꞌohnãg. Hãmꞌãpak, tup-tox kaꞌok.
\s Yeyox te tik pa hok puꞌ pa nãhãꞌ
\p
\v 35 Ha taꞌ mõg, tu mõktu mõxa kõmẽn Yenikot hãmhũmnãg tuꞌ, ha tik pa hok yũm, tu putat yĩka te tuꞌ yũm, nũy hãpxop hok xak,
\v 36 tu hãmꞌãpak nĩm ꞌĩhã tikmũꞌũn xohix xexka nũn, tuꞌ yĩkopit, hu:
\p —‍Tep haꞌ mõg tikmũꞌũn xohix? Kaxĩy.
\p
\v 37 Ha:
\p —‍Kõmẽn Nãyane yõg Yeyox te putat haꞌ nũn. Kaxĩy.
\p
\v 38 Ha tik pa hok teꞌ xãnãhãꞌ, hu:
\p —‍Yeyox, ꞌãmũn yã mõnãyxop hittap Namix hã ꞌãmõkputox, ꞌũg ꞌũm kuxa kaꞌ. Kaxĩy.
\p
\v 39 Ha tikmũꞌũn nõy teꞌ keppaꞌ pip, tu:
\p —‍Puxiꞌ, ꞌãyĩy hok. Kaxĩy.
\p Paꞌ yĩy nõy kaꞌok, hu:
\p —‍ꞌÃmũn yã mõnãyxop hittap Namix hã ꞌãmõkputox. ꞌŨg ꞌũm kuxa kaꞌ. Kaxĩy.
\p
\v 40 Ha Yeyox tu tuꞌ hup, tuꞌ xat, pu nũnnãꞌ, hu nũnnãhãꞌ, haꞌ yĩkaꞌ xip, ha Yeyox te:
\p
\v 41 —‍Xatep-tek putup ꞌãte xaꞌ mĩy? Kaxĩy.
\p Ha:
\p —‍Notot, ꞌÃte hãm ꞌũm pẽnãp-tup. Kaxĩy.
\p
\v 42 Ha Yeyox te:
\p —‍ꞌÃpu, hãmpẽnãꞌ. ꞌÃkuxa yũm kaꞌok ꞌũgkopah, yĩy Topa te ꞌãpa maxnãhãꞌ. Kaxĩy.
\p
\v 43 Hãpxip ꞌohnãg ꞌĩhã hãmpenã max, tuꞌ kuxa hittup xexkah, tu Topa max ꞌãktux, xix Topa kaꞌok ꞌãktux, ha tikmũꞌũn teꞌ pẽnãhãꞌ, hu Topa max ꞌãktux kamah.
\c 19
\s Yeyox xix Yakeo
\p
\v 1 Yeyox te kõmẽn Yenikot tuꞌ xupep, tuꞌ kotit haꞌ mõg,
\v 2 ha tik ꞌãxetꞌax Yakeo xip. Hamũn te puknõg yõg gohet pupi tayũmak pop, tu tikmũꞌũn yõg tayũmak pop, tup-texop xexkah,
\v 3 tu Yeyox pẽnãp-tup, nũy tuꞌ yũmmũg, pãyãk-tõgnãg, ꞌaꞌ toxꞌah, ha tikmũꞌũn xexka punethok, yĩyꞌ pẽnã ꞌohnãg.
\v 4 Tikmũꞌũn xop mõg ꞌĩhã tik yokomaꞌ mõg, tu mõktuꞌ nõy hip, tuꞌ kup xexka piget pepiꞌ mõg, tuꞌ xip ha mõkahmãg, nũy Yeyox pẽnãꞌ, putat haꞌ nũn hah,
\v 5 tuꞌ xupep, tu mõkahmãg tuꞌ penãhãꞌ, tu Yakeo pu hãmꞌãktux, hu:
\p —‍Yakeo, hãm tu ꞌãnũ mõꞌkaꞌok, Hõnhã ꞌũkxipꞌax ꞌãpet kopah. Kaxĩy.
\p
\v 6 Haꞌ kuxa hittup, tu hãm tuꞌ nãhãꞌ, tu hãm tonnok, tu yãy pet haꞌ mõgãhãꞌ, ꞌũkuxa hittup tuꞌ.
\v 7 Ha tikmũꞌũn teꞌ pẽnãhãꞌ, tup-tup nõg, hu:
\p —‍Yeyox te tik kummuk hãꞌ xapeꞌ, tu tik te hãpxop hãꞌ xupxet mũtik mõg, nũy xihip, nũy tu xit. Kaxĩy.
\p
\v 8 Haꞌ xit kux ꞌĩhã Yakeo yok, tu hãmꞌãktux Yeyox pu, nũy tikmũꞌũn xupax, tu:
\p —‍Yõgnũ hãpxop xohix ꞌãteꞌ koxip putup, nũy xahix nĩm ꞌũhok xop puꞌ. Hõmã ꞌãteꞌ nõy yõg tayũmak puxet hãꞌ xupxet, kopxix hõnhã nõm pu tayũmak tehomi te 4 popmãp-tup, ꞌũnõy yãnãn tuꞌ. Kaxĩy.
\p
\v 9 Ha Yeyox te:
\p —‍Hõnhã Topa te ꞌãkuxa kummuk xit, nũy kuxa max tat ꞌũyãnãn tuꞌ, xix ꞌãxape kuxa kummuk xit kamah, ꞌãxape te ꞌãpet kopa tihiꞌ. ꞌÃmũn yã mõnãyxop hittap ꞌAmanãm hã ꞌãmõkputox kamah.
\v 10 ꞌŨgmũn yã Tikmũꞌũn Kutok, tuk nũn, nũy tikmũꞌũn xax, nũy xaxnãm, nõm tikmũꞌũn te Topa yõg putat xak, ꞌũ mõgã, puyĩy Topa yõg putat haꞌ mõg ꞌũxeheh. Kaxĩy.
\s Tayũmak ꞌãnuk te
\p
\v 11 Ha hãmꞌãpak tikmũꞌũn teꞌ, ꞌĩhã Yeyox te hãmꞌãktuxꞌax hã hãmyũmmũgãhãꞌ, nũy Topa yõg hãpxopmãꞌax yũmmũgãꞌ, pũyĩy Topa pu hãpxopmã max, ha kõmẽn Yenoyanẽn hãmhũmnãg tu Yeyox xip, tu yãy yõg xop yũmmũgãhãꞌ, kaꞌ peꞌpaxex, hu: “Topa te tikmũꞌũn xop xohix xat putup nõmhã,” pãyã ꞌap xohix xatꞌah nõmhã,
\v 12 yĩy Yeyox te:
\p —‍Tik teꞌ xatꞌax yãy kutok mõg hãpxexka nõy tuꞌ, hãptox tuꞌ mõg, nũy yãyhã hãpxexka yõg tik te tikmũꞌũn xohix xat, nũy hãmyãxatamuk kutõgnãg nõg, puxix putpu nũꞌ.
\v 13 Tu kãmãnat te 10 xãnãhãꞌ, tup-xet pu tayũmak puxet hõm, xix kãmãnat tuk-nãy tuꞌ hõm tayũmak puxet, tu mõktu xohix pu tayũmak puxet hõm, tu: “Hãpxop hãmenax nũy tayũmak punethok pop, tu mõktu ꞌũkxupep put puꞌ.” Kaxĩy.
\p
\v 14 —‍Tuꞌ mõg, pãyã ꞌũyõg tikmũꞌũn tep-tup nõg, tu tik xop mõꞌpok hãptox tuꞌ, ꞌõm xatꞌax ha mõꞌpok, nũy nõ: “ꞌŨgmũꞌãte ꞌãp-tup nõg. ꞌÃpu, xihip hãptox tuꞌ. Putpu ꞌãnũn hok, nũy mũꞌã xat.” Kaxĩy.
\p
\v 15 —‍Pa hãmyãxatamuk kutõgnãg nõg ꞌĩhãꞌ xupep putpuꞌ, tu kãmãnat te 10 xãnãhãꞌ, nõm xop teꞌ yõg tayũmak pop, tu hãpxop hãmenax xiꞌ nõꞌ nõy yãnãn nũy tayũmak xexka pop, haꞌ xatꞌax te tik xop te 10 xãnãhã nũyꞌ yĩkopit, nũy tayũmak xohix te xĩy tik xop teꞌ pop yũmmũg.
\v 16 Ha kãmãnat hãmãxap nũn, tu: “ꞌÃte ꞌõg tayũmak hã tayũmak nõy te 10 pop,” kaxĩy.
\p
\v 17 Haꞌ xatꞌax te:
\p —‍Yãꞌ max, ꞌãhãm max. ꞌÃte mõꞌãkutnãp-tup kõmẽn xohix te 10 hah, xa pẽnãnãꞌ xip. Kaxĩy.
\p
\v 18 —‍Ha kãmãnat tuk-nãy tuꞌ nũn, tu: “ꞌÕg tayũmak hã ꞌãte tayũmak nõy te 5 pop.” Kaxĩy.
\p
\v 19 —‍Ha: “ꞌÃte mõꞌãkutnãp-tup kõmẽn xohix te 5 hah, xa pẽnãhãꞌ xip.” Kaxĩy.
\p
\v 20 —‍Ha kãmãnat te kaꞌax tuꞌ xip, tuꞌ nũn, tu: “Nõ pa ꞌõg tayũmak. ꞌÃte topixxax hãꞌ kĩy, tuꞌ xaptop,
\v 21 ꞌũgkuxãnõg tuꞌ. ꞌÃte ꞌãyĩpkutuk, ꞌãmũn xupkũmĩy hah. Xate ꞌãnõy yõg tayũmak pahaꞌ, ha tik nõy te hãpxop xap xok, ha ꞌãmũn te nõ nũnnãhãꞌ.” Kaxĩy.
\p
\v 22 —‍Haꞌ xatꞌax te: “ꞌÃhãm kummuk. ꞌÃte ꞌãkopitꞌax, ꞌõg hãmꞌãktuxꞌax hã ꞌãte ꞌãhãm kummuk yũmmũg. Xatek xupkũmĩy ꞌãktux, tu ꞌãtu hãpxop nũnnã ꞌãktux.
\v 23 Pax xa yõgnũ tayũmak maꞌãg kopaꞌ xex, pu tikmũꞌũn nõy hãpxop hãmenax, puxix tayũmak tu xohix punethok nõmhã.” Kaxĩy.
\p
\v 24 —‍Tu tikmũꞌũn teꞌ yĩmmap tu ꞌõm pip pu hãmꞌãktux, hu: “Tayũmak xut tik tuꞌ, tu tik nõy puꞌ hõm, tik te tayũmak te 10 pop puꞌ hõm.” Kaxĩy.
\p
\v 25 —‍Ha tikmũꞌũn te: “Yãꞌ pip tayũmak punethok, yãꞌ pip tayũmak te 10.” Kaxĩy.
\p
\v 26 —‍Ha: “ꞌÃte xa hãpxeꞌe ꞌãktux: Tikmũꞌũn te hãpxop punethok pip ha hãpxop nõy nãꞌ mõgꞌax tu mõktu yãꞌ xohix, ha hãpxop xohix xutꞌax, tuꞌ hok tuꞌ.
\v 27 Tik xop nũnnã nõmhã, tik xop tek putup nõg, tuk mũn teꞌ xat putup nõg. ꞌÃpu, ꞌũnũnnãꞌ, nũy ꞌũgkeppaꞌ kix.” Ta tuꞌ kux.
\s Yeyox te kõmẽn Yenoyanẽn tuꞌ xupep
\p
\v 28 Tu hãmꞌãktux kux, ꞌĩhãꞌ mõg, tu kõmẽn Yenoyanẽn haꞌ mõg, haꞌ yõg mũtik hãpkumep xop teꞌ peꞌ mõg,
\v 29 tuꞌ mõg, tuꞌ xipꞌax Metpaye te hãmhũmnãg tuꞌ pip, xiꞌ xipꞌax Metãn te hãmhũmnãg tuꞌ pip, tu yĩktix ꞌOnimet yĩkaꞌ pip, ha yãy yõg tik 2 mõꞌpok, pu mõg nũ peheh, tu:
\p
\v 30 —‍ꞌÃmõg xip tu xexka tuꞌ, tu yohmẽnnãg tuk tup pẽnãp-tup, ha tikmũꞌũn ꞌũm teꞌ yĩmũꞌ yũm hok. ꞌŨxut, nũy nũnnãꞌ.
\v 31 Tik te ꞌãyĩkopit, ꞌãpu, tu hãmꞌãktux, hu: “ꞌŨgmũg xuxyã tep-tup, puyĩy nõ yĩmuꞌ yũm.” Kaxĩy.
\p
\v 32 Haꞌ mõg, tu Yeyox teꞌ xatꞌax hãꞌ mĩy.
\v 33 Tu yohmẽnnãg xut, ꞌĩhã yohmẽn xuxyã nũn, tu:
\p —‍Tep tuꞌ xut ꞌãxop te nũ yohmẽn? Kaxĩy.
\v 34 Ha:
\p —‍ꞌŨgmũg xuxyã tep-tup, ꞌũg mũg xut, yĩk tux hok ꞌũ xut. Kaxĩy. Haꞌ tux hok, haꞌ hĩyꞌax koah.
\p
\v 35 Tu Yeyox haꞌ nũnnãhãꞌ, tu topixxax te yohmẽn yĩmũꞌ yũm, tuꞌ yũm,
\v 36 tuꞌ mõg, ha tikmũꞌũn te nũ yãy xex topixxax putat kopah, ha Yeyox te nũktu yĩmũꞌ mõg,
\v 37 tu yĩktux ꞌOnimet tu hãmhũmnãg tuꞌ xip, ha tixmũꞌũn xohix xexka te Yeyox mũtik hãpkumep, tuꞌ kuxa hittup xexkah, tu Topa max ꞌãktux, xix Topa kaꞌok ꞌãktux, tuꞌ yĩy kaꞌok hãpxopmã max xeꞌẽgnãg pẽnãhã tuꞌ,
\v 38 tu hãmꞌãktux, hu:
\p —‍Pũyã Topa tik teꞌ xatꞌax pu hãmmax nãꞌ. Yã yãy ꞌãxetꞌax tu hõm pu nũꞌ, ha pexkox kopaꞌ pip xop kuxa mãm, yã Topa xexka xeꞌẽgnãg. Kaxĩy.
\p
\v 39 Ha Paniye yõg xop te tikmũꞌũn mũtik pip, tu Yeyox pu hãmꞌãktux, hu:
\p —‍Notot, ꞌãpu ꞌõg tik xop mãnõg, pu yĩy hok. Kaxĩy.
\p
\v 40 Ha:
\p —‍ꞌÃte xa hãmꞌãktux: Pax pu tik xop yĩy hok, puxix mĩkaxxap yĩy kaꞌok, ꞌũhittup tuꞌ. Kaxĩy.
\s Yeyox te Kõmẽn Yenoyanẽn haꞌ potahaꞌ
\p
\v 41 Tuꞌ mõg, tu kõmẽn Yenoyanẽn te hãmhũmnãg tuꞌ xip, tu kõmẽn pẽnãhãꞌ, huꞌ potahaꞌ,
\v 42 tu kõmẽn yõg tikmũꞌũn pu hãmꞌãktux, hu:
\p —‍Pax xa hãmyũmmũg, tu hãmmax xak, nũy tu kuxa mãm, puxix Topa xa hãmmaxnãꞌ, pãyã hãmyũmmũg ꞌohnãg xateꞌ,
\v 43 ha hãmyãxatamuk ꞌũm nõg ꞌĩhãꞌ puknõg gãy xop te kõmẽn yĩmmap tuꞌ pip putup, ha ꞌãnũꞌpap-tup, pãyã ꞌãnũꞌpa ꞌohnãg,
\v 44 ha kõmẽn koxyõy putup, xix tikmũꞌũn te kõmẽn kopaꞌ pip kix putup, xix kakxop, tu mĩptut yõg tiyot xohix koxyõy putup, ꞌãxop te hãmyũmmũg ꞌohnãg hah. Topa te ꞌãhaꞌ nũn, pãyã ꞌãxop te hãmyũmmũg ꞌohnãg. Kaxĩy.
\s Yeyox xip Topa pet xexka kopah
\p
\v 45 Hãpxip ꞌohnãg ꞌĩhã Yeyox te Topa pet xexka haꞌ mõꞌnãhãꞌ, tu tikmũꞌũn teꞌ kopaꞌ pip xop papuk, nõm xop te hãpxop hãmenax Topa pet xexka kopaꞌ papuk,
\v 46 tu:
\p —‍Hõmã tik te Topa tappet hãꞌ kaxꞌãmi, hu: “Tikmũꞌũn te Topa pet xexka hãꞌ mõxakux nũy Topa pu hãmꞌãktux,” kaxĩy, pãyã ꞌãxop tep-tũynãg, ha yãyhã hãpxupxet pet. Kaxĩy.
\p
\v 47 ꞌÃmnĩy xohix hã Yeyox te tikmũꞌũn yũmmũgãhãꞌ Topa pet kopah, ha Yoneo yõg ꞌãmãnex xop, xix hãmyũmmũg xop, xix tikmũꞌũn xexka xop te Yeyox putup nõg, tup-tex putup,
\v 48 ꞌĩhã tikmũꞌũn xohix kuxa mãm kaꞌok Yeyox yõg hãmꞌãktuxꞌax kopah, yĩꞌ xexka xop teꞌ xaptop, tuꞌ gãy.
\c 20
\s Topa te Yeyox tuꞌ hõm yãy ꞌãxetꞌax
\p
\v 1 ꞌÃmnĩy puxet ꞌĩhã Yeyox xip Topa pet xexka kopah, tu tikmũꞌũn yũmmũgãhãꞌ, xix hãmꞌãktux max ꞌãktũx, ha Yoneo xexka xop nũn, xix ꞌãmãnex xexka xop nũn, xix hãmyũmmũg xop nũn, xix tikmũꞌũn xatꞌax xop nũn,
\v 2 tu Yeyox yĩkopit, hu:
\p —‍ꞌŨ ꞌũm te xaꞌ hõm yãy ꞌãxetꞌax, xa hãmyũmmũgã tikmũꞌũn? Kaxĩy.
\p
\v 3 Haꞌ nõy yãnãn tuꞌ yĩkopit, hu:
\p —‍ꞌÃpu ꞌãꞌ hãmꞌãktux:
\v 4 ꞌŨ ꞌũm te Yoãm nũꞌkutnãhãꞌ, pup-tox pix tikmũꞌũn? ꞌOk Topa te nũꞌkutnãhãꞌ, pe tikmũꞌũn te nũꞌkutnãhãꞌ? ꞌÃyĩy. Kaxĩy.
\p
\v 5 Haꞌ xexka xop te yãy pu hãmꞌãktux hãꞌ nõy yãnãn, tu:
\p —‍Yũmũꞌãtep-putep mũn ꞌãktuxꞌax? Pe yũmũꞌãte Topa teꞌ xat ꞌãktux, puxix tu hãmꞌãktux, hu: “Putep-te xĩy ꞌãkuxa yũm ꞌohnãg ꞌũp-tox pixꞌax kopah?” Kaxĩy.
\v 6 Pe yũmũꞌãte tikmũꞌũn teꞌ xatꞌax ꞌãktux, puxix tikmũꞌũn mĩkaxxap pop, nũy nõꞌ yũmũg kix. Yoãm putup pax tuꞌ, yãꞌ xohix te hãmpeꞌpaxex, hu: “Yoãm te Topa pupi hãmꞌãktux.” Kaxĩy.
\p
\v 7 Huꞌ xexka xop te hãmyũmmũg, pa hãmꞌãktux ꞌũm putupꞌah, hu:
\p —‍ꞌĨntuꞌ, ꞌap yũmmũgꞌah. Kaxĩy.
\p
\v 8 Ha Yeyox te:
\p —‍ꞌA ꞌãte xa hãmꞌãktux putupꞌah kamah, tu ꞌũ ꞌũm te ꞌãꞌ xat ꞌãktux putup ꞌohnãg. Kaxĩy.
\s Kãmãnat xop Kummuk
\p
\v 9 Tu hãmꞌãktux hã tikmũꞌũn yũmmũgãhãꞌ, nũy Topa yõg hãpxopmãꞌax yũmmũgãꞌ, nũy yãy xokꞌax ꞌãktux, ꞌĩhãꞌ xuxyãk-tok ꞌãktux, hu:
\p —‍Tikmũꞌũn ꞌũm te mĩnta ꞌop xap xok punethok, tu yãy yõg hãpxaꞌax hõm tikmũꞌũn nõy puꞌ, ha tik te pupi pagok, haꞌ nõy yõg hahãm, ha ta hãpxexka nõy haꞌ mõg, tu mõktu mõxahaꞌ, tu hãmyãxatamuk xohix hãꞌ nox xip,
\v 10 ha hãmyãxatamuk xohix nõg, ꞌĩhã hãpxaꞌax xuxyã te mĩnta ꞌop yõg tayũmak xak, hu yãy yõg hãm tu kãmãnat nũꞌkutnãhãꞌ, tu nũꞌkutnãhãꞌ, pũyĩy mĩnta ꞌop yõg tayũmak pop, haꞌ nũn tu nũktu xupep, pãyã tikmũꞌũn xop teꞌ kix kakixnãg, tu yãꞌ hok mõꞌkutnãhã yãy pet hah.
\v 11 Ha nõm xuxyã te xe nũꞌkutnãhãꞌ, tu kãmãnat nõy nũꞌkutnãhãꞌ nũy tayũmak pop, haꞌ nũn tu nũktu xupep, pãyã tikmũꞌũn xop teꞌ kix kakixnãg kamah, tuꞌ hupmãhãꞌ, tu yãꞌ hok mõꞌkutnãhã yãy pet hah.
\v 12 Ha hãpxaꞌax xuxyã te xe nũꞌkutnãhã, ha tikmũꞌũn teꞌ kix kamah, xix mõꞌkutnãhãꞌ.
\v 13 Yĩꞌ xuxyã te: “ꞌÃte putep mũn mĩyꞌax? Tikmũꞌũn te kãmãnat xop putup nõg, tuꞌ yĩpkox ꞌohnãg. Nãy, ꞌãte ꞌũgkutok pit mõꞌkutnãꞌax, nõm te mãxap mõꞌkutnãꞌax, pũyĩy tikmũꞌũn nõm tuꞌ yĩpkox piꞌ. ꞌŨxexka peꞌpaxex tuꞌ.” Kaxĩy. Tu nũꞌkutnãhãꞌ, haꞌ nũn, tu nũktu xupep ꞌũtak yõg hahãm tuꞌ.
\p
\v 14 —‍Ha tikmũꞌũn te hãm pupi pagok, tuꞌ kummuk, tu hãpxaꞌax xuxyãk-tok xeꞌe pẽnãhãꞌ, tu yãy pu hãmꞌãktux, hu: “ꞌÕhõm ꞌũxuxyãk-tok te mãxap. ꞌÃpu, yũmũp-tex, pũyĩy yũmũ yõg yãyhã hãpxaꞌax.” Kaxĩy.
\p
\v 15 —‍Tu hãpxaꞌax tu hãptopa mõgãhãꞌ, tup-tex, haꞌ xok. Putep mũn peꞌãpaxex, putep mũn mĩy putup mĩnta xuxyã teꞌ?
\v 16 ꞌŨnũn putup tikmũꞌũn kummuk hah, tuꞌ kixꞌax, pu tu xakix xeꞌẽgnãg, tu mĩnta yõg hãpxaꞌax hõm putup tikmũꞌũn nõy puꞌ. Ta tuꞌ kux. Kaxĩy.
\p Ha tikmũꞌũn teꞌ xupak, tu:
\p —‍ꞌÃmhok! Pũyã Topa tux hok puꞌ hõm hok! Kaxĩy.
\p
\v 17 Pa Yeyox teꞌ pẽnã kaꞌok, tu:
\p —‍Hõmã tik te Topa pupi hãmꞌãktux, tu tappet hã kaxꞌãmiꞌ, hu: “Tikmũꞌũn te mĩptut xexka mĩyꞌax, tu mĩm xexkap-tup nõg, pa Topa teꞌ mĩy mĩptut mãykup xix mĩptut koxuk, yĩy mĩm xexka xeꞌẽgnãg.” Kaxĩy.
\v 18 Tikmũꞌũn te nõm mĩm xexka tuꞌ nãhãꞌ, tu yãy putex, pa mĩm xexka te tikmũꞌũn yĩmũꞌ nãhãꞌ, tuꞌ koxyõyꞌax tu mõktuꞌ xok xeꞌeꞌ. Kaxĩy.
\s Gohet puknõg pu tayũmak hõm
\p
\v 19 Ha tik te hãmyũmmũg xop gãy, xix ꞌãmãnex xexka xop gãy, tu Yeyox teꞌ xuktux kummuk yũmmũg, tuꞌ mũg putup nõmhã, nũy ꞌũp-tex, pãyã tikmũꞌũn yĩpkutuk,
\v 20 yĩꞌ xexka xop teꞌ hip, tu Yeyox pẽnãnãꞌ pip, tu tik xop mõꞌpok, pu tuꞌ pẽnã max, yãꞌ pa max, pãyãꞌ kuxa kummuk, tu Yeyox yõg hãmꞌãktux ꞌãpak, nũy yãy xexka xop puꞌ xuktux, xaptop hã hãmꞌãktuxꞌax, pũyĩꞌ xexka xop Yeyox kupex, nũy mũg, nũy gohet yõg xonat pupiꞌ mũg,
\v 21 haꞌ pẽnãꞌax xop te Yeyox haꞌ mõg, tu:
\p —‍Notot, xate tikmũꞌũn yũmmũgãꞌax, tuꞌ yũmmũgã max, hak mũꞌãteꞌ yũmmũg, ha xatep-tup tikmũꞌũn xohix, tu hãpxeꞌe ꞌãktux pax, hu tikmũꞌũn xohix mõgãhã, hãmyok mĩy hã nõ mõgãhãꞌ.
\v 22 ꞌÃyĩy. ꞌOk Topa yõg xatꞌax teꞌ xat hok, ꞌũ puknõg yõg gohet pu tayũmak hõm hok, ꞌok peꞌ xat ꞌũ tuꞌ hõm? Kaxĩy.
\p
\v 23 Pa Yeyox te nõm tik xop yã mõꞌãmãꞌax yũmmũg, tu nõm pẽnãꞌax yõg hãmpeꞌpaxex yũmmũg, ꞌap maxꞌah, yĩy hãmꞌãktux, hu:
\p
\v 24 —‍ꞌÃꞌ mũg tayũmak ꞌãnuk. Putep koxuk nũhũꞌ? Kaxĩy.
\p Ha:
\p —‍Gohet yõg tik teꞌ xatꞌax koxuk. Kaxĩy.
\p
\v 25 Yĩy:
\p —‍Gohet puꞌ hõm gohet yõg hãpxop, xix Topa puꞌ hõm Topa yõg hãpxop. Kaxĩy.
\p
\v 26 Ha tik pẽnãꞌax xop teꞌ yẽy, tuꞌ yĩy ꞌohnãg, Yeyox te hãmyũmmũg, yĩꞌ yĩy ꞌohnãg.
\s Yeyox te putpu hiꞌax ꞌãktux
\p
\v 27 Ha Xanoxeo yõg tik xop nũn, ha nõm xop te putpu tikmũꞌũn hi ꞌohnãg ꞌãktux, tu Yeyox yĩkopit, hu:
\p
\v 28 —‍Notot, xate tikmũꞌũn yũmmũgãꞌax. Hõmã mõnãyxop hittap Mõyyex teꞌ xatꞌax kaxꞌãmiꞌ, tu: “Tik te yãytahaꞌ, tuꞌ xok, tuk-tok ꞌohnãg, pũyã yãy taknõy ꞌũxetut mũy, nũy yãy taknõy nõm xok pupik-tok put.” ꞌŨkux. Kaxĩy.
\v 29 Tu xe hãmꞌãktux, hu:
\p —‍ꞌŨtaknõy xop xohix te 7 tihiꞌ ꞌãxaꞌ, ha ꞌõm te mãxap te yãytahaꞌ, tuꞌ xok, pãyãk-tok xip ꞌohnãg,
\v 30 haꞌ taknõy tek-nãy tuꞌ yãytahaꞌ, tuꞌ taknõy nõm xok xetut mũg, tuꞌ xok kamah, tuk-tok xip ꞌohnãg.
\v 31 Haꞌ taknõy tek-nãy tuꞌ, tuꞌ taknõy nõm xok yõg xetut mũg, tuꞌ xok, tuk-tok ꞌohnãg, tu mõktu taknõy xop xohix te 7 te ꞌũn mũg, tuꞌ xok, tuk-tok ꞌohnãg,
\v 32 haꞌ taknõy xop xetut puxet xok, ꞌũkaꞌax hãꞌ xok ꞌãxaꞌ.
\v 33 Hãptup mõꞌnãp-tup, ꞌĩhã Topa te putpuꞌ hĩnnãp-tup tikmũꞌũn xakix xop. Tep teꞌ xetut mũgꞌax? Yãꞌ taknõy xop xohix te 7 te ꞌũn puxet hãꞌ yĩpxox. Kaxĩy.
\p
\v 34 Ha Yeyox te:
\p —‍Hõnhã tikmũꞌũn te yãytahaꞌ,
\v 35 pa Topa te yãy yõg tikmũꞌũn xexkãnãp-tup, pu tu hi ꞌap kuxꞌah, hu yãytap-tup ꞌohnãg,
\v 36 tu pexkox yõg nũ ꞌpok xop putuk, yã Topa hãk-tok xop xeꞌeꞌ, ꞌũhi putpu hah, tu xakip-tup ꞌohnãg,
\v 37 ha mõnãyxop hittap Mõyyex te putpu hiꞌax ꞌãktux, ꞌĩhã Topa yã mõnãyxop yõg Topa ꞌãktux, tu ꞌAmanãm yõg Topa ꞌãktux, xix ꞌIyak yõg Topa ꞌãktux, xix Yako yõg Topa ꞌãktux,
\v 38 yĩy Topa te tikmũꞌũn hiꞌax xop yõg Topa, ꞌap xakix xop yõg Topaꞌah, yã ꞌũxohix te Topa tuꞌ hi xeꞌe”. Kaxĩy.
\p
\v 39 Ha hãmyũmmũg xop te:
\p —‍Xate hãmꞌãktux max, xate yã hãmyũmmũgã max. Kaxĩy.
\p
\v 40 Haꞌ yẽy, hu xeꞌ yĩkopit ꞌohnãg.
\s Topa yõg hãmyãykutnãꞌax ꞌãktux
\p
\v 41 Yĩy Yeyox teꞌ yãnãn tuꞌ yĩkopit, hu:
\p —‍Tep te xĩy Topa tappet te: “Topa yõg hãmyãykutnãꞌax te mõnãyxop hittap Namix hãꞌ mõkputox?”
\v 42 Namix mũn tek-texꞌax yõg tappet tu kaxꞌãmi, hu: “Topa xeꞌẽgnãg tek xuxyã pu hãmꞌãktux, hu: “Ũgyĩp xeꞌe ha ꞌãyũm,
\v 43 tu mõktu ꞌãte tik xop te ꞌãha gãy nõaꞌ,’ ” kaxĩy.
\v 44 Yũmmũg. Namix te yãy xuxyã ꞌãktux, tu kama yãy mõkputox ꞌãktux. Tep tu Namix teꞌ mõkputoxꞌax yãꞌ xuxyã ꞌãktux? Kaxĩy.
\s Yeyox te tik te hãmyũmmũg xop ꞌãktux
\p
\v 45 Ha tikmũꞌũn xip, ꞌĩhã Yexox te yãy yõg xop pu hãmꞌãktux, tu:
\p
\v 46 —‍ꞌÕg pa mõxip! Hãmyũmmũg xop te topixxax tox mõꞌtat, tup-tup, pu tikmũꞌũn ꞌãneo kõmẽn kopah, haꞌ yũmꞌax max xak, tu Yoneo xop yõg Topa pet kopa mĩmpe max xak, nũy mãhãm, tu ꞌãmuk xexka haꞌ mõg pax, ha tikmũꞌũn te: “ꞌŨxexka ꞌõhõm.” Kaxĩy.
\v 47 Ha Topa pu hãmꞌãktux kumaknãg, pu tikmũꞌũn pẽnãꞌ, tu ꞌũn hok mãm xop tuꞌ mõy tayũmak xexkah, tu mõꞌãmã hã Topa pu hãmꞌãktux. Pa Topa te hãmyũmmũg, tup-tup nõg, huꞌ xũygãp-tup, Topa te mõꞌãmãꞌax xop xũygãp-tup xexka. Kaxĩy.
\c 21
\s ꞌŨn hok yũm te Topa pu tayũmak hõm
\p
\v 1 Ha Yeyox te Topa pet xexka kopaꞌ xip, tu tikmũꞌũn pẽnãhãꞌ, ha ꞌũp-texop xexka nũn, tu tayũmak punethok mõꞌtat Topa pet yõg mĩpkox kopah,
\v 2 ha Yeyox te ꞌũn pẽnãhã kamah, ꞌũn hok yũm haꞌ pẽnãhãꞌ, ha tayũmak kaꞌok 2 hõm.
\v 3 Yĩy:
\p —‍ꞌÃte xa hãpxeꞌe ꞌaktux: Nũhũ ꞌũn te tayũmak kutõgnãg hõm, pãyãꞌ xexkah, ꞌũxohix tuꞌ,
\v 4 ha ꞌũp-texop xexka xop te tayũmak xexka hõm, pãyãk-tõgnãg, ꞌũyãg tuꞌ, ha ꞌũn ꞌũhok te yãy yõg tayũmak xohix hõm. Kaxĩy.
\p
\v 5 Ha tikmũꞌũn te Topa pet xexka ꞌãktux, tu mĩkaxxap max hãꞌ pet ꞌãktux, hõmã tikmũꞌũn hittap teꞌ xap popmãhã, ha nõꞌ pet, ha Yeyox te:
\p
\v 6 —‍Hãmyãxatamuk mõꞌnãp-tup, ꞌĩhãꞌ puknõg gãy xop te Topa pet koxyõy putup, haꞌ yõg mĩkaxxap max xohix putyõn putup. Kaxĩy.
\s Hãpkummugãꞌax ꞌãktux
\p
\v 7 Ha tikmũꞌũn teꞌ yĩkopit, hu:
\p —‍Yãyãꞌ, hãm ꞌũm hãꞌ mĩyꞌax? ꞌOk hãpxopmãꞌax pẽnãp-tup, nũy tu hãm ꞌũm hãꞌ yũmmũg? Kaxĩy.
\p
\v 8 Ha Yeyox te:
\p —‍ꞌÕg pa ꞌãtiꞌ, ka tikmũꞌũn kummuk xop putat kummuk hã ꞌãmõgãꞌ, yã mõꞌãmãꞌax hã ꞌãmõgãꞌax, tu: “ꞌŨgmũn yã Topa yõg hãmyãykutnãꞌax ꞌãxetꞌax Kunnixꞌ” kaxĩy, xix: “Hõnhãk nũn,” kaxĩy. ꞌÕg paꞌãtiꞌ! Nõm tikmũꞌũn pe ꞌãmõg hok!
\v 9 Ha xa hãmꞌãktuxꞌax, tu tikmũꞌũn xop xohix yãykixꞌax ꞌãktux, pa ꞌãkuxãnõg hok. Yã yãykix punethok putup, pãyã ꞌap ꞌãmnĩy mõg putõynãgꞌah. Kaxĩy.
\p
\v 10 Tu xe:
\p —‍Hãpxexka yõg tikmũꞌũn te yãy nõy yõg tikmũꞌũn gãyãꞌax, xix gohet te yãy nõy gãyãꞌax.
\v 11 Ha hãmyãynuhuk xexka putup, xix hãmhõgnãg, ha tikmũꞌũn teꞌ xitꞌax xak putup, pãyã hãmhõgnãg, xix hãmpakut xexka pip putup, ha tikmũꞌũn te hãpxopmãꞌax pẽnãp-tup, ha pexkox tu yĩmũ nãp-tup, ha tikmũꞌũn xohix kuxãnõg putup.
\p
\v 12 —‍Haꞌ gãy xop te ꞌãmũg putup hãmãxap, tu ꞌãxũygãp-tup, xix yãy tu nũꞌnãꞌax pet ha ꞌãmõgãp-tup, nũy ꞌãyĩkopit, tuꞌ xatꞌax xop ha ꞌãmõgãp-tup, ꞌũgmũn hãh,
\v 13 yĩy ꞌãxop te hãmꞌãpak max ꞌãktuxꞌax,
\v 14 hu xutigãhok, ꞌãkuxãnõg hok, nũy: “Putep mũn ꞌãktuxꞌax ꞌãteꞌ?” Kaxĩy. ꞌÃmhok.
\v 15 Hãpxip ꞌohnãg ꞌĩhã ꞌãte ꞌãyũmmũgãp-tup, ha hãmꞌãktux maxꞌax, pu tu ꞌãkupex xop yẽy.
\v 16 Ha yãy ꞌatak te ꞌãmũg putup, xix ꞌãtaknõy xop, xix ꞌãxape xop, tu ꞌãmũg putup, tu kanet ha mõgãp-tup, pũyĩy ꞌãp-tex, tu ꞌãxop yãg putex putup,
\v 17 ha tikmũꞌũn xohix te ꞌãp-tup nõg, ꞌãxop yã yõgnũ tikmũꞌũn hah,
\v 18 pa Topa te ꞌãpẽnã max, tu ꞌãpẽnãnãꞌ xip, yĩy ꞌãxe te ꞌãp-tox tu ꞌap nãp-tupꞌah, nũy tu yãyxaxok hok,
\v 19 yĩy Topa yõy putat xak hok, nũy ꞌãhi xeꞌẽgnãg. Kaxĩy.
\s Gãy xop te Yenoyanẽn koxyõy putup
\p
\v 20 Tu xe hãmꞌãktux, hu:
\p —‍ꞌÃxop te kõmẽn Yenoyanẽn pẽnãp-tup, haꞌ puknõg yõg xonat xop te kõmẽn Yenoyanẽn xakot putup, nũy kõmẽn koxyõy, tuꞌ koxyõy putup, hõnhã xateꞌ yũmmũg.
\v 21 Pũyã hãpxexka Yonex kopaꞌ pip tikmũꞌũn nũꞌmãn, tu yĩktix tuꞌ mõg nũꞌpahaꞌ, pũyã kõmẽn kopaꞌ pip tikmũꞌũn yãy papuk, pũyã kõmẽn tu hãptopaꞌ pip tikmũꞌũn kõmẽn tu mõꞌxakux hok.
\v 22 Ha Topa gãy Yoneo yõg tikmũꞌũn mũtik, tuꞌ xũygãp-tup. Hõmã tik te Topa pupi hãmꞌãktux, tu tappet tuꞌ kaxꞌãmiꞌ, yã Topa yõg hãmꞌãktux hittap hãꞌ pẽnãp-tup nõmhã.
\v 23 Pa ꞌũn tek-tok xuk yãy kopah, tuꞌ xũy xexkap-tup, xix ꞌũn tek-tok pu yãy xoꞌopmãhãꞌ, tuꞌ xũy xexkap-tup. Nũ tikmũꞌũn xohix potap-tup, ha hãpxexka xohix yõg tikmũꞌũn xũy putup, yã Topa teꞌ xũygãp-tup xexka,
\v 24 haꞌ kixꞌax mĩkax xexka hã, yĩꞌ yãgꞌax tikmũꞌũn ꞌũyãg, tuꞌ yãg nõy mũg putup, tu hãpxexka puknõg haꞌ mõgãp-tup. Hãmpuknõg xop te kõmẽn Yenoyanẽn tonnok putup, nõm xop te Topa yũmmũg ꞌohnãg, tu mõktu Topa te puknõg xop pu hãmꞌãktux, hu: “Puxiꞌ.” Kaxĩy.
\p
\v 25 Tu xe hãmꞌãktux, hu:
\p —‍Tikmũꞌũn te hãpxopmãꞌax kaꞌok pẽnãp-tup, mãyõn tu hãpxopmãꞌax pẽnãp-tup, xix mãyõn hex tuꞌ, xix mãyõnnãg tuꞌ, ha hãpxexka yõg tikmũꞌũn xohix kuxa teknõg, tu kõnãg xexka yoꞌok xexka ꞌãpakꞌax, huꞌ kuxãnõg.
\v 26 Tik xop kuxa teknõg putup, ꞌũkuxãnõg tuꞌ, ha hãpxop te hãmnõgnõy tuꞌ pip xop te yãy nuhuk putup,
\v 27 hak mũn yã Tikmũꞌũn Kutok, tuk nũn putup put puꞌ, ꞌĩhã tikmũꞌũn tek pẽnãhãꞌ, hãmgõy xexka kopak nũn putup, ꞌũgkaꞌok xeꞌẽgnãg tuꞌ, tuk xexka xeꞌẽgnãg nũn putup.
\v 28 ꞌÃxop te nõm hãpxopmãꞌax kaꞌok pẽnãꞌ, ꞌãpu pexkox yokomak pẽnãꞌ. Yã ꞌãxuxyãꞌ nũn, pu ꞌãmõy, nũy ꞌãxũy kuxyãꞌ. Ta tuꞌ kux. Kaxĩy.
\s Tute piget kup ꞌãktux
\p
\v 29 Yeyox te hãmꞌãktux nõy hã hãmyũmmũgãhãꞌ, nũy Topa yõg hãpxopmãꞌax yũmmũgãꞌ, hu:
\p —‍Mĩm kup piget pẽnãꞌ, xix mĩm kup xohix pẽnãꞌ,
\v 30 ꞌũmĩxux xupep, ꞌũxokax puk tup, ꞌĩhã xateꞌ yũmmũg, yã hãm pukpex xupep.
\v 31 Kaxĩy ꞌãxop te hãpxopmãꞌax kaꞌok pẽnãhãꞌ, ꞌĩhã hãmyũmmũg, tu Topa nũn yũmmũg, haꞌ nũn, pu yãy yõg tikmũꞌũn xat, yãꞌ hãmhũmnãg.
\p
\v 32 —‍ꞌÃte xa hãpxeꞌe ꞌãktux: Hõnhãꞌ pip tikmũꞌũn yãg te hãpxopmãꞌax xohix pẽnãp-tup.
\v 33 Pax pu yõgnũ hãmꞌãktuxꞌax nõg, puxix pexkox xix hahãm nõg hãmãxap, hãmꞌãktuxꞌax kaꞌok xeꞌẽgnãg hah. Kaxĩy.
\s Pu tikmũꞌũn yãꞌ pẽnãnãꞌ pip
\p
\v 34 Tu hãmꞌãktux kux, tu:
\p —‍ꞌÕg pa mõxip! Yãy pupiꞌ pẽnã max, pu yãy yõg hãpxop xakꞌax ꞌãhĩy hok, pu ꞌãmuk xexka xix kenmuk xoꞌop xexka ꞌãhĩy hok, ka ꞌãxop hãmyũmmũg ꞌohnãg, ꞌĩhã Topa yõg hãptup xeꞌe mõꞌnãhãꞌ.
\v 35 Yã mõꞌnãp-tup hãpxexka xohix tuꞌ, xix tikmũꞌũn xop xohix tuꞌ, ha pãmãg te xokxop mũg, ꞌũxaptop haꞌ mũg, kaxĩy Topa yõg ꞌãmnĩy mõꞌnãp-tup, ꞌĩhã tikmũꞌũn pa pip ꞌohnãg.
\v 36 ꞌÕg pa mõxip, xix yãy pupiꞌ pẽnã max. Topa pu hãmꞌãktux, pũyĩy ꞌãkaꞌogãꞌ, pu hãpxopmã kummuk tu hãpxupmãꞌ, nũy ꞌũgmũn keppaꞌ piꞌ, ꞌũgmũn yã Tikmũꞌũn Kutok hah. Ta tuꞌ kux. Kaxĩy.
\p
\v 37 ꞌÃmnĩy xohix hã Yeyox te Topa pet xexka kopa hãmyũmmũgãhãꞌ, tu ꞌãmãxak xohix ꞌĩhãꞌ mõg, tu yĩktix ꞌOnimet yĩmũꞌ mõg, nũy yĩmũꞌ piꞌ,
\v 38 ha mãyõn kũynãg xut xohix, ꞌĩhãꞌ putpuꞌ nũn, tu Topa pet xexka haꞌ nũn, nũy hãmyũmmũgãꞌ, ha tikmũꞌũn xohix xexka nũn, mãyõn xupep ꞌĩhãꞌ nũn, nũy Yeyox te hãmꞌãktux ꞌãpax.
\c 22
\s Yoneo xexka xop te Yeyox putex putup
\p
\v 1 Ha Yoneo yõg tikmũꞌũn te ꞌãmuk xexka mĩy putup, ꞌũxuxetꞌax pãm tokatok hok, haꞌ xuxetꞌax nõy te Nõaꞌyẽn,
\v 2 ha ꞌãmãnex xexka xop xix hãmyũmmũg xop te Yeyox putex putup, tuꞌ xaptop hãp-tex putup, tikmũꞌũn yĩpkutuk tuꞌ. Yã tikmũꞌũn te Yeyox putup pax.
\s Yot pa mũn max, pãyãꞌ kuxa kummuk
\p
\v 3 Ha Hãmgãyãgnãg te Yot kuxa kummugãhã, ha Yeyox yõg tik xop mũtik hãpkumep.
\v 4 Pãyãꞌ mõg, tu ꞌãmãnex xexka xop mũtik hãmꞌãktux, ha yãy yãnãn, ha Yot te:
\p —‍ꞌÃte ꞌãxop mõꞌnĩynãmꞌax, xayĩy Yeyox mũy. Kaxĩy.
\p
\v 5 Haꞌ hittup, tu tuꞌ hõmꞌax tayũmak,
\v 6 ha Yot te tayũmak putup, hu hãmpeꞌpaxex punethok, nũy xexka xop mõꞌnĩynãm, puꞌ xaptop hah Yeyox mũy, pũyĩy tikmũꞌũn yũmmũg hok.
\s ꞌÃmuk xexka Nõaꞌyẽn mĩy
\p
\v 7 Ha ꞌãmnĩy punethok nõg, ꞌĩhã Yoneo xop te ꞌãmuk xexka Nõaꞌyẽn mĩy, tu pãm tokatok hok mãhãꞌ, tu kahnẽn kutok putex, tu mõꞌhap, pu tikmũꞌũn xohixꞌ mãꞌ,
\v 8 ha Yeyox te Pet xix Yoãm mõꞌpok, tu:
\p —‍Mõg, nũy yũmũꞌã ꞌãmuk xexka mĩy, nũy yũmũg mãꞌ. Kaxĩy.
\p
\v 9 Ha:
\p —‍Piꞌyãꞌ mĩyꞌax? Kaxĩy.
\p
\v 10 Ha:
\p —‍ꞌŨgꞌãpax. Kõmẽn xexka tu mõnãy, tu tikmũꞌũn ꞌũm pẽnãp-tup, ha nax tox hã kõnãg tat, tu ꞌãhaꞌ nũn putup. ꞌŨpe mõg, tu mõktu mõxaha mĩptut tuꞌ, tuꞌ mõxakux,
\v 11 tu mĩptut xuxyã pu hãmꞌãktux, hu: “ꞌŨgmũg xuxyã tek mũg xat, pu ꞌãyĩkopit, hu: Piꞌaꞌ xip mĩptut ꞌũm kox, pu ꞌãte ꞌãmuk xexka ꞌãxetꞌax Nõaꞌyẽn mĩy yãy yõg tik xop mũtik?” Kaxĩy.
\v 12 Ha xaꞌ mũg putup hãpkox xexkah, yã mĩmpe yũmꞌax punethok, xix mĩmpe xitꞌax punethok mãm, ha mĩptut mõkãnĩn yĩmũꞌ yũm. ꞌÕnte ꞌãmuk xexka mĩy, ꞌũxuxetꞌax Nõãꞌyẽn. Kaxĩy.
\p
\v 13 Ha Yeyox teꞌ xat kux, ꞌĩhã Pet mõg, xix Yoãm, tuꞌ xatꞌax xohiꞌ mĩy, yã Yeyox yõg hãmꞌãktuxꞌax hã hãpxopmãhãꞌ, tu ꞌãmuk xexka mĩy nõm mĩptut kopah.
\s Yũmũg xuxyã yõg xitꞌax
\p
\v 14 Tuꞌ mĩy kux, ha Yeyox yũm, tu mĩmpe xitꞌax yĩmũꞌ yũm, ha yãy yõg mõꞌpok xop te nũ mũtik mãm,
\v 15 ha:
\p —‍ꞌÃteꞌ xak, ꞌũxit ꞌãxop mũtik, nũy ꞌãxop mũtik ꞌãmuk xexka ꞌãxetꞌax Nõaꞌyẽn mĩy hãmãxap, tuk-nãy tuk xũy putup,
\v 16 tu xa hãmꞌãktux, hu: ꞌAk ꞌũm xit ꞌãmuk xexka ꞌũxeheh nũnte, pãyã tikmũꞌũn te Nõaꞌyẽn xeꞌe yũmmũg, kopxik xit putup, ꞌĩhã Topa yõg tikmũꞌũn xohix yĩpkox pip. Kaxĩy.
\p
\v 17 Tu kãnẽy pahaꞌ, tu Topa pu:
\p —‍ꞌÃmax! Kaxĩy.
\p Tu xe:
\p —‍ꞌŨpa kãnẽy, xayĩy ꞌãxop xohi xoꞌop.
\v 18 ꞌÃte xa hãmꞌãktux: ꞌA ꞌãte mĩnta hep xupyãg xe xoꞌop putupꞌah, pa Topa yõg tikmũꞌũn xohix yĩpkox pip, kopxiꞌ xoꞌop putup ꞌũxeheh. Kaxĩy.
\p
\v 19 Tu pãm pahaꞌ, tuꞌ koxip, tu Topa pu: ꞌÃmax! Kaxĩy. Tu yãy yõg tik xop puꞌ popmãhãꞌ, tu:
\p —‍Nũhũ ꞌũgyĩn, yãk xok ꞌãxop pupiꞌ, ꞌũkoxip, nũy tak xaxok hok. Kaxĩy.
\p
\v 20 Haꞌ xit kux, ꞌĩhã Yeyox te:
\p —‍Nũ kãnẽy pa kamah, yãꞌ hep teꞌ kopaꞌ xup. Topa te paꞌax tup mĩy tikmũꞌũn mũtik, hak hep ꞌãta nũꞌnãhã ꞌãxop puꞌ, pu paꞌax tup mĩy.
\v 21 Pa tik mõꞌãmãꞌax te yũmũk mũtik xit, tu gãyxop mõgãp-tup ꞌũghah.
\v 22 ꞌũgmũn yã Tikmũꞌũn Kutok, tuk xok putup, pa Topa gãynãm, tu tik mõꞌãmãꞌax hãꞌ gãy. Kaxĩy.
\p
\v 23 Yeyox yõg tik xop te yãy yĩkopit, hu:
\p —‍Piꞌyãꞌ nõm teꞌ kummugãꞌ? Kaxĩy.
\s Piꞌyãꞌ tik teꞌ xohix xatꞌax
\p
\v 24 Tu kamah hãmꞌãktux hãꞌ nõy yãnãn, nũy tik ꞌũm ꞌũxohix xatꞌax yũmmũg,
\v 25 yĩy Yeyox te:
\p —‍Hãmpuknõg xop yõg tik teꞌ xat, haꞌ yõg tikmũꞌũn yĩpkox pip, tuꞌ yõg gohenanok ꞌãxetꞌax mĩy, hu: Tik te tikmũꞌũn hãꞌ xapeꞌ. Kaxĩy.
\v 26 Pa ꞌãxop kopa ꞌãnõy xat hok. Pũyãꞌ xatꞌax hãpxopmã ꞌũnõy xop puꞌ, ꞌãtaknõy tuꞌ kaꞌax putuk, yã yãyhãꞌax kutõgnãg, nũy tikmũꞌũn xohix pu yĩpkox piꞌ.
\v 27 Piꞌyã mũn xexka? ꞌOk tik te mĩmpe tuꞌ yũm, nũy tu xit, pe tik te hãpxop tat nũy nõy xĩnnãꞌ? Nõm teꞌ yũm yãꞌ xexkah, pãyã ꞌãxop xohix pu ꞌãte hãpxopmãhãꞌ.
\p
\v 28 ꞌÃxop tek mũtik hãpkumep, tuk mũtik hãpxopmãhãꞌ xix ꞌãxũy.
\v 29 Yõg ꞌãtak te ꞌã yãy ꞌãxetꞌax hõm ꞌũ tikmũꞌũn xat, yã kaxĩy ꞌãte yãy ꞌãxetꞌax xaꞌ hõm, xa tikmũꞌũn xat,
\v 30 nũy ꞌũgmũtik ꞌãxit xiꞌ xoꞌop, yõgnũ hãpxexka tuꞌ ãxitꞌax, xaꞌ yũmꞌax max yĩmũꞌ yũm, nũy ꞌIyaet yõg tikmũꞌũn yõg hãpxopmãꞌax xohix kopit.
\s Yeyox te Pet pu hãmꞌãktux
\p
\v 31 Tu xe:
\p —‍Xĩmãm, ꞌũgꞌãpax max. Hãmgãyãgnãg te ꞌãp-tup, nũy ꞌãnuhuk. Tikmũꞌũn te xuxnãg nuhuk, pẽnẽn hã nuhut, hã kaxĩy Hãmgãyãgnãg te ꞌãxut putup,
\v 32 pa ꞌãte Topa pu hãmꞌãktux, ta tu ꞌã xak, pu ꞌãkaꞌogãꞌ, nũy ꞌãkuxa yũmmã kaꞌok. ꞌŨg ha ꞌãnũnꞌax putpuꞌ, ꞌãpu ꞌãnõy xop kaꞌogãꞌ. Kaxĩy.
\p
\v 33 Ha Xĩmãm Pet te:
\p —‍ꞌÃte ꞌãmũtik ꞌũgmõg, tu kanet hak mõgꞌax ꞌãmũtik nõmhã, nũy xok ꞌãmũtik. Kaxĩy.
\p
\v 34 Yĩy:
\p —‍ꞌÃte xa hãpxeꞌe ꞌãktux, Pet: Xate tikmũꞌũn yĩpkutuk, huk nĩm putup, tu hãmꞌãktux putup, tu: “Yeyox ꞌãtep yũmmũgꞌah.” Kaxĩy. Tu xeꞌ xuktux putup, tu xeꞌ xuktux putup. Xate koit kux, ꞌĩhã xokakkak te xatap-xehnãg putup. Kaxĩy.
\s Yeyox te yãy yõg tik xop yũmmũgãhãꞌ
\p
\v 35 Tu yãy yõg xop pu hãmꞌãktux hu:
\p —‍Hõmã ꞌãte mõꞌãpok, ꞌũhok mõꞌãpok, ꞌap pata xax ꞌãptatꞌah, xix tayũmak ꞌap tatꞌah, xix xagok ꞌãxop tep tatꞌah. ꞌOk putup te ꞌãp-tex ꞌĩhã ꞌãmõg? Kaxĩy.
\p Ha:
\p —‍ꞌÃmhok, yã puxiꞌ. Kaxĩy.
\p
\v 36 Ha:
\p —‍Pa hõnhã ꞌõg tayũmak tat, xix xagok mõꞌtat. ꞌÕg kayak hãmẽnax, nũy tayũmak paꞌ, nũy mĩkax xexka ꞌũm paꞌ, tuꞌ mõꞌtat.
\v 37 Hõmã tik hittap xop te Topa pupi hãmꞌãktux, tuꞌ yõg hãmꞌãktux yã tappet tu kaxꞌãmiꞌ, hu: “Tik teꞌ kummuk xop mũtik mõg.” Kaxĩy. Huk mũn ꞌãktux, ha Topa yõg hãmꞌãktux hittap hã tikmũꞌũn kummuk te hãpxopmãp-tup nõmhã, ꞌũkxok hãh hãpxopmãp-tup. Kaxĩy.
\p
\v 38 Haꞌ yõg tik xop te:
\p —‍Hẽnãꞌ, mĩkax xexka 2 tihiꞌ. Kaxĩy.
\p Ha: —‍Puxiꞌ. Kaxĩy.
\s Yeyox te yĩktix ꞌOnimet tuꞌ xip
\p
\v 39 Tuꞌ mõg, tu ꞌãmnĩy hã yĩktix ꞌOnimet haꞌ mõg, tu ꞌãmãxak xohix ꞌĩhãꞌ mõg, haꞌ yõg tik xop teꞌ mũtik mõg,
\v 40 tu yĩktix yĩmũꞌ mõxahaꞌ, ha Yeyox te:
\p —‍Topa tuꞌ xax, pu ꞌãkaꞌogãꞌ, xa hãpkummuk mĩy hok. Kaxĩy
\p
\v 41 Tup-xehnãg haꞌ mõg kutõgnãg, tuꞌ kopaxux hãꞌ xip, tu Topa mũtik hãmꞌãktux, hu:
\p
\v 42 —‍ꞌÃtak, ꞌãte xa tuꞌ xak ꞌũyĩk xũy hok. Ka ꞌãte yãy yõg putupꞌax mĩy, ꞌũyã ꞌõg putupꞌax mĩy hãmãxap. Kaxĩy.
\p
\v 43 Ha pexkox yõg nũꞌkutnãꞌax xupep, tu Yeyox kaꞌogãhãꞌ,
\v 44 haꞌ xũy xexka, hu hãmpukpex hep teꞌ xax tuꞌ nãhãꞌ, yãꞌ hep punethok, ꞌũhep ꞌãta putuk, tu hãm tu nũꞌ nãhãꞌ.
\p
\v 45 Ha Topa pu hãmꞌãktux nãm, tuꞌ kux, tuknĩhãꞌ xip, tu yãy yõg tik xop xak, tuꞌ pipihiꞌ, ha mõꞌyõn kaꞌok, ꞌũkuxa teknõg tu mõꞌyõn,
\v 46 ha:
\p —‍Te xĩy hu mõꞌõn? ꞌÃyok, ꞌãknĩhã ꞌatiꞌ, nũy Topa tuꞌ xax, pũyĩy ꞌãkaꞌogãꞌ, xa hãpkummuk mĩy hok. Kaxĩy.
\s Xonat xop te Yeyox mũg, tuꞌ kĩy
\p
\v 47 Yeyox te hãmꞌãktux, ꞌĩhã tik xop nũn, ha Yot teꞌ nũnnãhãꞌ, ꞌãmnĩy xohix hã tu Yeyox mũtik mõg, hu yãy kep haꞌ mũg, nũy tu ꞌãneo.
\v 48 Pa Yeyox te:
\p —‍Xatep-tep mũn mĩy putup, Yot? ꞌŨgmũn yã Tikmũꞌũn Kutok. ꞌOk xatek mũg yãy kep hah, mõꞌãmãꞌax hak mũg, nũy gãy xõp tuk mũg? Kaxĩy.
\p
\v 49 Ha tik xop teꞌ pẽnãhãꞌ, nõm tik te Yeyox mũtik hãpkumep, tuꞌ pẽnãhãꞌ, tu hãmyũmmũg, hu:
\p —‍Yãyã, ꞌok xatek putup ꞌũkix mĩkax xexka hã? Kaxĩy.
\p
\v 50 Hu tik te mĩkax xexka pahaꞌ, tu ꞌãmãnex xatꞌax yõg kãmãnat yĩpkox xak, tuꞌ yĩpkox xaxit, ꞌũyĩpxeꞌe hã nõm xip,
\v 51 ha:
\p —‍Hup! Kaxĩy.
\p Tuꞌ yĩpkox ꞌãpit, tuꞌ tapmãhãꞌ,
\v 52 tu ꞌãmãnex xop pu hãmꞌãktux, xix Topa pet yõg kapitãm puꞌ xuktux, xiꞌ xexka xop pu hãmꞌãktux, hu:
\p —‍ꞌOk ꞌãnũn, nũy tik te hãpxop hãꞌ xupxetꞌax mũy? Tep tu ꞌãxop te mĩkax xexka tat, xix mĩhĩm?
\v 53 ꞌÃmnĩy xohix hã ꞌãte tikmũꞌũn yũmmũgãhãꞌ, Topa pet xexka kopa hãmyũmmũgãhãꞌ, ha ꞌãxop tek mũg ꞌohnãg. ꞌÃkaꞌok nõmhã, xix Hãmgãyãgnãg kaꞌok nõmhã, nõm te hãpkoxtap kopaꞌ xip. Kaxĩy.
\s Pet te Yeyox yũmmũg hok ꞌãktux
\p
\v 54 Haꞌ mũg, tuꞌ mõgãhã ꞌãmãnex xatꞌax pet hah, ha Pet te hãptox tuꞌ peꞌ mõg,
\v 55 ha ꞌãmãnex yõg kãmãnat xop te kuxap xexka mĩy hãptopaꞌ, tu kuh xexka yĩmmap haꞌ mãm, ha Pet te kãmãnat xop mũtik mãm,
\v 56 ha kãmãnat hex te Pet pẽnãhãꞌ, kuxap yõg kuyãnãm hãꞌ pẽnãhãꞌ, tu:
\p —‍Nũ kãy te Yeyox mũtik hãpkumep! Kaxĩy.
\p
\v 57 Pa Pet te:
\p —‍ꞌÃmhok! ꞌÃte nõꞌõm ꞌap yũmmũgꞌah! Kaxĩy.
\p
\v 58 Hãpxip kutõgnãg ꞌĩhã tik teꞌ pẽnãhãꞌ, tu:
\p —‍Xate Yeyox yõg tik xop mũtik ti kamah. Kaxĩy.
\p Pa Pet te:
\p —‍ꞌAk mũnꞌah. Kaxĩy.
\p
\v 59 Hãpxip kutõgnãg ꞌĩhã yã ꞌũnõy te:
\p —‍Hamũn, tute Yeyox mũtik hãpkumep! ꞌŨyĩyꞌax yã hãpxexka Ganinet yõg kamah! Kaxĩy.
\p
\v 60 Pa Pet te xe hãmꞌãktux, hu:
\p —‍Pute ꞌũm? Xate putep mũn xuktux? ꞌA ꞌãteꞌ yũmmũgꞌah! Kaxĩy.
\p Ha hãpxip ꞌohnãg ꞌĩhã xokakkak tak xatahaꞌ,
\v 61 ha Yeyox te haꞌ yokãnãm, tu Pet pẽnã kaꞌok, ha Pet te Yeyox yõg hãmꞌãktux peꞌpaxex. Yã hõmã Yeyox te hãmꞌãktux, hu: “Xate koit tikoyuk putup, tuk mũn yũmmũg hok ꞌãktux, ꞌĩhã xokakkak tak xatap-xehnãg.” Kaxĩy.
\v 62 Ha Pet te yãyhãhup xexkah, tu hãptopaꞌ mõg, tuꞌ pota punethok.
\s Xonat xop te Yeyox kix
\p
\v 63 Ha tik xop te Yeyox mũg, tuk-texꞌex kummuk, tuꞌ kix,
\v 64 tu topixxax hã Yeyox pa mõꞌnĩy, tuꞌ yĩkopit, hu:
\p —‍ꞌÃpu, ꞌũgmũꞌã Topa pupi hãmꞌãktux. ꞌŨ ꞌũm nõm te ꞌãkix? Kaxĩy.
\p
\v 65 Tu hãmꞌãktux hã Yeyox kuxa xũygãhãꞌ, ꞌãmnĩy tox hãꞌ xũygãhãꞌ.
\s Yoneo xexka xop te Yeyox yĩkopit
\p
\v 66 Ha mãyõn xupep, ꞌĩhãꞌ Yoneo xexka xop te yãy tu nũꞌ nãhã ta tu ꞌãmãnex xexka xop mũtik, xix hãmyũmmũg xop mũtik yãy tu nũꞌ nãhãꞌ, ha Yeyox mõgãhãꞌ, ꞌãmãnex xatꞌax pet haꞌ mõgãhãꞌ, puyĩꞌ yĩkopit.
\v 67 Tu:
\p —‍ꞌOk ꞌãmũn yã Kunnix? ꞌOk Topa te xa yãykutnãhãꞌ? ꞌÃpu, ꞌũgmũꞌãꞌ xuktux. Kaxĩy.
\p Pa Yeyox te:
\p —‍ꞌÃkuxa mãm ꞌohnãg yõgnũ hãmꞌãktux tuꞌ.
\v 68 ꞌÃte ꞌãyĩkopit, puxix ꞌãxop ꞌap hãm ꞌũm ꞌãktux putupꞌah,
\v 69 pak mũn yã Tikmũꞌũn Kutok, yã hõnhãk yũmꞌax Topa yĩpxeꞌe hah, Topa kaꞌok xeꞌẽgnãg yĩpxeꞌe hak yũmꞌax. Kaxĩy.
\p
\v 70 Haꞌ xexka xop te:
\p —‍ꞌOk ꞌãmũn yã Topak-tok xeꞌẽgnãg? Kaxĩy.
\p Ha:
\p —‍Xateꞌ xuktux. Kaxĩy.
\p
\v 71 Haꞌ xexka xop te:
\p —‍Puxiꞌ! Kãy yãy yĩyꞌax hã ꞌũgmũꞌãteꞌ xupak! Kaxĩy.
\c 23
\s Pinat te Yeyox yĩkopit
\p
\v 1 Haꞌ xexka xop xohix ꞌũknĩhaꞌ tihiꞌ, tu Yeyox mõgãhã gohenanok haꞌ, ꞌũxuxetꞌax Pinat,
\v 2 haꞌ kupex nãm, hu:
\p —‍Kãy te tikmũꞌũn yũmmũgã kummuk, tuꞌ xat hok pu tayũmak hõm hok gohet puꞌ, tu yãy mũn yã tik te tikmũꞌũn xatꞌax ꞌãktux, tu Topa teꞌ yãykutnã ꞌãktux. Kaxĩy.
\p
\v 3 Ha Pinat te Yeyox yĩkopit, hu:
\p —‍ꞌOk xate Yoneo yõg tikmũꞌũn xat xeꞌẽgnãg? Kaxĩy.
\p Ha:
\p —‍ꞌÃ xateꞌ xuktux. Kaxĩy.
\p
\v 4 Yĩy Pinat te ꞌãmãnex xop pu hãmꞌãktux, xix tikmũꞌũn pu hãmꞌãktux, hu:
\p —‍Yeyox te hãpkummugã ꞌohnãg. Yãꞌ max. Kaxĩy.
\p
\v 5 Pãyãꞌ xexka xop te:
\p —‍Yãꞌ kummuk ta pax! Tute tikmũꞌũn gãyãhãꞌ, tu hãmyũmmũgãꞌax hãꞌ gãyãhã hãpxexka xohix tuꞌ, yã Yonex tuꞌ, xix Ganinet tuꞌ, xix nũnte kamah. Kaxĩy.
\p
\v 6 Ha Pinat teꞌ xupak, tuꞌ yĩkopit, hu:
\p —‍ꞌOk kãy mũn yã Ganinet yõg? Kaxĩy.
\p
\v 7 Haꞌ kupexꞌax xop te:
\p —‍Hamũn. Kaxĩy.
\p Yĩy Pinat teꞌ xat, pu ꞌEnot haꞌ mõgãꞌ, ha ꞌEnot te Yoneo yõg tikmũꞌũn xohix xat, tu kõmẽn Yenoyanẽn tuꞌ xip.
\v 8 Ha xonat xop teꞌ mõgãhãꞌ, tu mõktu mõxaha ꞌEnot pet hah, haꞌ pẽnãhãꞌ, huꞌ kuxa hittup, tu ꞌãmnĩy xohix hãꞌ pẽnãp-tup, pãyã pẽnã ꞌohnãg, yã hõnhã pẽnãꞌax, ha tikmũꞌũn te Yeyox ꞌãktux ꞌEnot puꞌ, ha ꞌEnot xak, puyĩy Yeyox hãpxopmã kaꞌok xeꞌẽgnãg,
\v 9 huꞌ yĩkopit, tu xe yãꞌ yĩkopit, pãyã Yeyox teꞌ yẽy.
\v 10 Ha ꞌãmãnex xexka xop xix hãmyũmmũg xop tihiꞌ, tu Yeyox kupex nãm.
\v 11 Ha ꞌEnot tup-tup nõg, xix yõg xonat xop, tuꞌ kuteꞌex kummuk, tuꞌ xexka xop yõg topixxax mũn mõꞌtat nũy Yeyox kummukgãꞌ, tu put puꞌ mõgãhã Pinat hah.
\v 12 Hõmã ꞌEnot gãy Pinat hãꞌ, xix Pinat gãy ꞌEnot hãꞌ, pa hõnhã yãy tuꞌ gãy xit, tu yãyhãꞌ xape.
\s Pinat teꞌ xat pu Yeyox putex
\p
\v 13 Ha Pinat te ꞌãmãnex xop xãnãhãꞌ, xiꞌ xexka xop xãnãhãꞌ, hay yãy tu nũꞌnãhãꞌ,
\v 14 ha:
\p —‍ꞌÃxop te nũktu tik nũnnãhãꞌ, tuꞌ kupex, tu tikmũꞌũn gãyã ꞌãktux, pa ꞌãteꞌ yĩkopit, ha yãꞌ max, ꞌap hãpkummuk ꞌũm mĩyꞌah,
\v 15 ha ꞌEnot te yĩkopit kamah, tuꞌ put pu nũꞌkutnãhãꞌ. Hãpkummuk ꞌũm mĩy ꞌohnãg, puyĩy tu xok,
\v 16 Yĩy ꞌãteꞌ xat putup puꞌ kix xikot hã, nũy xut pu mõg. Kaxĩy.
\p
\v 17 Hãmyãxatamuk xohix ꞌĩhã Pinat te tik kummuk xut, ꞌãmuk xexka Nõaꞌyẽn ꞌĩhãꞌ xut, tu kanet kopaꞌ xip tik xut, pu mõg, ha Yoneo yõg tikmũꞌũn te yãykutnã tik puxet, pu mõg, ha Pinat te Yeyox xut putup pu mõg,
\v 18 pa Yoneo yõg tikmũꞌũn xohix yĩy kaꞌok, hu:
\p —‍ꞌŨmõgã Yeyox, nũꞌ putex. ꞌŨgmũꞌãtep-tup nõg, pa Mahamax xut pu mõg. Kaxĩy.
\p
\v 19 Ha Mahamax teꞌ nõy putex, tu kanet kopaꞌ xip, tu tikmũꞌũn gãyãhãꞌ, pu tuꞌ kix gohet yõg xonat xop.
\p
\v 20 Pa Pinat te:
\p —‍Nãy. Hãmpeꞌãpaxex max, ꞌũyã xaꞌ xut tik max, tu Yeyox xaꞌ xutꞌax. Kaxĩy.
\p
\v 21 Pa tikmũꞌũn tep-tup nõg, tuꞌ yĩy kaꞌok, tu:
\p —‍ꞌŨp-tex, ꞌũp-tex, mĩpkupnix hãp-tex! Kaxĩy.
\p
\v 22 Ha Pinat te xe hãmꞌãktux tikmũꞌũn puꞌ, hu:
\p —‍Putep mũn mĩy Yeyox teꞌ, xap-tex? Yãꞌ max, hãpkummuk mĩy ꞌohnãg tuteꞌ, yĩy ꞌãteꞌ xutꞌax pu mõg. Kaxĩy.
\p
\v 23 Ha xe tikmũꞌũn yĩy kaꞌok, tu Yeyox putup nõg ꞌãktux,
\v 24 yĩy Pinat teꞌ xat, pu Yeyox putex, xix Mahamax xut pu mõg,
\v 25 haꞌ xut tik kummuk Mahamax, pu tikmũꞌũn gãy Yeyox mõgãꞌ.
\s Mĩpkupnix tu Yeyox putex
\p
\v 26 Haꞌ mõgãhãꞌ, ꞌĩhã xonat xop te Xinẽn yõg tik Ximãm xat, pu mĩpkupnix tax, tu Yeyox peꞌ mõg, tuꞌ tahaꞌ.
\v 27 Ha tikmũꞌũn xohix xexka teꞌ peꞌ mõg, xix kõmẽn yõg ꞌũn xop, tuꞌ potahãꞌ mõg,
\v 28 ha Yeyox teꞌ hã yokãnãm, tu:
\p —‍ꞌŨgmũn hã ꞌãpota hok, pãyã yãymũn hã ꞌãpotahaꞌ, xix ꞌãk-tok hã potahaꞌ.
\v 29 ꞌÃmnĩy mõꞌnãp-tup, ꞌĩhã tikmũꞌũn te hãmꞌãktux, hu: “ꞌŨhũn kuxa hittup, nõm tek-tok ꞌohnãg, ha kamaꞌ kuxa hittup nõm ꞌũn tek-tok yãy xoꞌopmã hok.” Kaxĩy.
\v 30 Ha tikmũꞌũn kuxa teknõgꞌax, tu: “Pũyã yĩktix ꞌũgmũk tuꞌ nãy, nũy mõknĩy.” Kaxĩy.
\v 31 Yã hõnhã mĩm yĩxux, haꞌ puk putup. Putep mũn mĩyꞌax mĩm nak hã? Yãꞌ puk putũmnãg. Kaxĩy hõnhã tik max xok. Putep mũn mĩyꞌax tik kummuk hã? Kaxĩy.
\p
\v 32 Ha xonat xop te tik kummuk 2 mõgãhãꞌ, nũy tuꞌ kix Yeyox mũtik,
\v 33 haꞌ mõg tu mõktu yĩktix hãmhũmnãg tuꞌ mõxaha, ha yĩktix ꞌãxetꞌax Gok, ꞌũkuxoh tox putuk tuꞌ, ha xonat xop te Yeyox yĩm xuhmĩy, xix pata xuhmĩy, pu mĨpkupnix tuꞌ xup, ha Yeyox te yãy koteꞌ xip: yã tik puxet te ꞌũyĩpxeꞌe hãꞌ xup, xix tik nõy te ꞌũyĩpxax hãꞌ xup.
\p
\v 34 Ha Yeyox te:
\p —‍ꞌÃtak, ꞌũyõg hãpkummuk mĩyꞌax xaxogãꞌ, pu ta tuꞌ kux, hãmyũmmũg ꞌohnãg hah. Kaxĩy.
\p Ha xonat xop te Yeyox xax koxip, pãyãꞌ max, ꞌũkoxyõy putupꞌah, hu mõꞌxap yõn, nũy tik yãykutnãꞌ, pu paꞌ.
\v 35 Ha tikmũꞌũn xohix mõꞌxip, tuꞌ pẽnãhãꞌ, haꞌ xexka xop kuteꞌex kummuk, tu:
\p —‍Tute tikmũꞌũn hĩnnãhã putpuꞌ. Pũyã yãy xit hõnhãꞌ, nũy mõg, puyĩy tuꞌ xok hok! Pax pu yã Kunnix, nõm Topa te yãykutnãhãꞌ, puxix yãy xit hõnhã nũy mõg! Kaxĩy.
\p
\v 36 Ha xonat xop kama xox yĩxix kummuk, tuk-texꞌex kummuk, tuꞌ xupyãg kummuk xoꞌopmãp-tup,
\v 37 tu:
\p —‍ꞌOk xate Yoneo tikmũꞌũn xat xeꞌeꞌ? ꞌÃpu, mĩpkupnix tu yãy xit. Kaxĩy.
\p
\v 38 Ha tappet tu kaxꞌãmiꞌ, tup-tox yĩmũꞌ hĩy, mĩpkup nix tuꞌ hĩy, tu kaxꞌãmiꞌ, hu: “Nũhũ tik te Yoneo yõg tikmũꞌũn xohix xat.” Kaxĩy.
\p
\v 39 Ha tik nõy te mĩpkupnix tuꞌ xup, tuk-teꞌex kummuk kamah, tu Yeyox pu hãmꞌãktux, hu:
\p —‍ꞌOk ꞌãmũn yã Kunnix? ꞌOk Topa te xa yãykutnahãꞌ? ꞌÃpu yãy xit, xikmũg mõy kamah. Kaxĩy.
\p
\v 40 Pa tik nõy teꞌ mãnõg, hu:
\p —‍ꞌOk xate Topa yĩpkutuk hok? Hõnhã ꞌãxok, xate hãpkummugãhãꞌ tu xok.
\v 41 ꞌŨgmũꞌãte hãpkummuk mĩy punethok, yĩk mũg kix, pa nũ tik te hãmyok mĩy, tu hãpkummugã ꞌohnãg. Kaxĩy.
\p
\v 42 Tu Yeyox tuꞌ xak, hu:
\p —‍Yeyox, ꞌũkxaxok hok, ꞌĩhã xate yãy yõg tikmũꞌũn xohix xat. Kaxĩy.
\p
\v 43 Ha:
\p —‍ꞌÃte xa hãpxeꞌe ꞌãktux: Hõnhã xatek mũn mũtik ꞌãxip putup pexkox kopah. Kaxĩy.
\s Yeyox xok
\p
\v 44 Ha mãyõn te pexkox koteꞌ yũm, ꞌĩhã hãpkoxtap te hãpxexka xohix tuꞌ xip, tu ꞌot 3 hãꞌ xip mãyõn heꞌ,
\v 45 ꞌĩhã mãyõn kuyãnãm xok, ha Topa pet xexka yõg topixxax yãy koxip, nõm te hãmyĩkox mõꞌyĩnnĩn.
\v 46 Ha Yeyox yĩy kaꞌok, tu:
\p —‍ꞌÃtak, ꞌãte xaꞌ hõm yãy koxuk!. Kaxĩy.
\p Tu hãmꞌãktux kux, tuꞌ xok xeꞌeꞌ.
\v 47 Ha xonat xop yõg kapitãm te Topa max ꞌãktux, tu:
\p —‍Yamũn! Nũ tik te hãpkummugã ꞌohnãg! Kaxĩy.
\p
\v 48 Ha tikmũꞌũn xohix xexka nũn, tu yãy tu nũꞌnãhãꞌ, tuꞌ pẽnãhãꞌ, tuꞌ kuxãnõg, tu yãy kep toꞌok, tuꞌ yẽy, ꞌũkuxa teknõg tuꞌ.
\v 49 Ha tikmũꞌũn te Yeyox hãꞌ xape pip, xix ꞌũn pip, nõm xop teꞌ peꞌ mõg, tu Ganinet tuꞌ pip kõnãmãhaꞌ, tu Yeyox mũtik hãpkumep tap, tu hãpxopmãꞌax xohix pẽnãhã nõmhãꞌ.
\s Yoye te Yeyox nõ hãpkot
\p
\v 50 Ha tik max xip, ꞌũxuxetꞌax Yoye, tu hãpxexka Yonex tuꞌ nãhãꞌ, tu kõmẽn ꞌAnimãtex yõg tihik, tu Yoneo xexka xop mũtik mõg, yãꞌ max, tu hãmyok mĩy,
\v 51 tuꞌ xexka xop yõg hãpxopmãꞌax putup nõg, tuꞌ kuxa yũm kaꞌok Yeyox kopah, tuꞌ xak, pu Topa puꞌ yĩpkox piꞌ,
\v 52 tuꞌ mõg Pinat hah, tu ta tuꞌ xak, pu Yeyox xokxax tuꞌ hõm, puyĩy nõ hãpkot, haꞌ hõm.
\v 53 Ha mĩpkupnix tuꞌ xup Yeyox, ha Yoye teꞌ xokxax xut, tu topixxax max hãꞌ kĩy, tu mĩkax xap kox kopa nõ hãpkot, haꞌ hok xip, mĩkax xap ꞌũkox, ꞌũxokxax nõy teꞌ kopaꞌ xip ꞌohnãg.
\v 54 Yã xexta pet, ꞌĩhã Yoneo yõg tikmũꞌũn te nit xap yõg hãpxop mĩy, yã ꞌãmãxak, ꞌĩhã nit xap mõꞌnãhãꞌ.
\p
\v 55 ꞌŨhũn xop te Ganinet tuꞌ pip tap, tu Yeyox peꞌ nũn pax, tu xukpot pẽnãhãꞌ, ha Yoye te Yeyox xokxax xex mĩkax xap kox kopa haꞌ pẽnãhãꞌ,
\v 56 tu putpuꞌ mõg, tu hãpxop hax maxꞌax mĩy, nũy xokxax xutxok.
\p Tu nit xap hãꞌ hip. Yã hõmã, hãmyãxatãmuk hittap ꞌĩhãꞌ, Topa te Yoneo xop xat hok, pu tu nit xap ꞌĩhã hãm hok.
\c 24
\s Yeyox te putpuꞌ hiꞌ
\p
\v 1 Ha yenomĩn ꞌĩhã, mãyõn te hãpkanet tuꞌ xupep ꞌĩhã, ꞌũn xop te xokpot haꞌ mõg, tu hãpxop hax maxꞌax tat,
\v 2 tuꞌ mõg tu mõktu mõxaha mĩkax xap kox tuꞌ. Hõmã mĩkax xap te mõ kox nĩy, pãyã hõnhãꞌ yĩkũy tap, tu mĩkax kox xõn, ha ꞌũn xop teꞌ kox kopa pẽnãhãꞌ.
\v 3 ꞌAp Yeyox xokxax ꞌũm xipꞌah, tu mĩkax xap kox kopaꞌ xip ꞌohnãg,
\v 4 yĩy ꞌũn te: “Pute ꞌũm?” Tu hãpeꞌpaxex, ꞌĩhã tik 2 teꞌ yĩkaꞌ tihiꞌ, ꞌũpata hãꞌ tihiꞌ, yãꞌ yõg topixxax tũmnãg, kuyãnãm putuk,
\v 5 ha ꞌũn xop kuxãnõg, tu nũktettex, tu yãy pa mõꞌnĩy, tuꞌ yẽy, ha pexkox yõg xop te:
\p —‍Tep tu ꞌãxop te yãy hiꞌax xop xak hãmxukpot tuꞌ?
\v 6 ꞌAp xipꞌah Yeyox, yãꞌ putpuꞌ hiꞌ! ꞌOk ꞌãxop teꞌ xaxok? Tute xa hãmꞌãktux ꞌĩhã hãpxexka Ganinet tuꞌ tihiꞌ,
\v 7 ha tik kummuk teꞌ mõꞌãmãꞌ, nũy gãyxop mõgã Yeyox hah. Yeyox yã Tikmũꞌũn Kutok, tu xa hãmꞌãktux, tu yãy yõg xokꞌax ꞌãktux, tu mĩpkunix hãꞌ xokꞌax xaꞌ xuktux, tu putpu hiꞌax ꞌãmnĩy tikoyuk ꞌĩhã xa hãmꞌãktux. Kaxĩy.
\p
\v 8 Ha ꞌũn xop te hãmpeꞌpaxex, tu: “Hamũn! Hõmã Yeyox tek mũꞌã hãmꞌãktux.” Kaxĩy.
\v 9 Tu putpuꞌ mõg, tu Yeyox yõg tik xop te 11 pu hãmꞌãktux, xix tikmũꞌũn te nõm mũtik hãpkumep puꞌ xuktux.
\v 10 Nõm ꞌũhũn ꞌãxetꞌax Manix Mãnanẽn, xiꞌ nõy ꞌãxetꞌax Yoãn, xiꞌ nõy ꞌãxetꞌax Mãnix, ha Mãnix yã Tiak mũk tut, ha ꞌũn xop te Yeyox yõg mõꞌpok xop pu hãmꞌãktux,
\v 11 pa tik xop kuxa mãm ꞌohnãg ꞌũn yõg hãmꞌãktux tuꞌ, tu: “Yãꞌ xupmãhĩy!” Kaxĩy.
\v 12 Pãyã Pet yok, tuꞌ mõg mõꞌkaꞌok ꞌũxukpot tuꞌ, tuꞌ xupep, ꞌĩhã pẽnã tuꞌ mõg, nũy mĩkax kox kutõgnãg hãꞌ mõnãy, tu topixxax te xokxax kĩyꞌax pẽnãhãꞌ, yãp-xehnãg yũm, tu putpuꞌ nũn mĩptut tuꞌ, tuꞌ kuxa teꞌ yẽy.
\s ꞌẼmãꞌox yõg putahat
\p
\v 13 ꞌĨhã tik 2 hãpkumep, tu xip tu xexka ꞌẼmãꞌox haꞌ mõg, ha mõꞌãgmũg 2 kõmẽn Yenoyanẽn tuꞌ,
\v 14 ha yãy pu hãmꞌãktux, tu hãpxopmãꞌax xohix ꞌãktux,
\v 15 tu hãmꞌãktux, ꞌĩhã Yeyox xip, hãpxip ꞌohnãg ꞌĩhãꞌ xip, tu tik mũtik mõg,
\v 16 ha tik xop teꞌ pẽnãhãꞌ, pãyãꞌ yũmmũgꞌah.
\v 17 Ha Yeyox te:
\p —‍Tep-tep ꞌãktux ꞌãxop teꞌ, ꞌĩhã hãpkumep? Kaxĩy.
\p Ha tik xop hãpkumep kux, ꞌũhittup ꞌohnãg tuꞌ,
\v 18 ha tik puxet ꞌãxetꞌax Keneꞌop, tu:
\p —‍Tikmũꞌũn xohix te kõmẽn kopaꞌ pip, tu hãpxopmã kummuk yũmmũg. ꞌOk ꞌãp-xehnãg teꞌ yũmmũg hok? Kaxĩy.
\p
\v 19 Ha:
\p —‍Hãpxopmãꞌax tute xĩy? Kaxĩy.
\p Haꞌ nõy te:
\p —‍Kõmẽn Nãyane yõg Yeyox te Topa pupi hãmꞌãktux, tu hãpxopmã kaꞌok, Topa keppaꞌ mĩy, xix tikmũꞌũn keppaꞌ mĩy, tu hãmyũmmũgã kaꞌok kamah,
\v 20 ha ꞌãmãnex xop xik mũ yõg xexka xop te xonat xop puꞌ hõm, pu tup-tex, tu mĩpkupnix hãp-tex, haꞌ xok xeꞌẽgnãg,
\v 21 pak mũꞌãte hãmpeꞌpaxex tap, hu: “Pe Yeyox yã Topa yõg mõꞌkutnãꞌax, haꞌ yãykutnãhãꞌ, pu ꞌIyaet yõg tikmũꞌũn xexkãnãꞌ!” Hamũn, pãyãꞌ xok, ha hõnhã ꞌãmnĩy tikoyuk nõg.
\v 22 Yã hõnhã ꞌũn te hãmꞌãktux, hak mũ kuxãnõg. Mãyõn xupep ꞌĩhã ꞌũn mõg, ꞌũxukpot haꞌ mõg,
\v 23 pãyã Yeyox xokxax xip ꞌohnãg, mĩkax xap kox kopaꞌ xip ꞌohnãg, ha putpuꞌ nũn, tu pexkox yõg mõꞌpok xop ꞌãktux, tuꞌ pẽnãhã nõꞌõm, ha Yeyox putpuꞌ hiꞌax ꞌãktux,
\v 24 ha tik te xukpot haꞌ mõg kamah, haꞌ kox xip, pãyã ꞌap pẽnãꞌah Yeyox. Kaxĩy.
\p
\v 25 Ha Yeyox te:
\p —‍ꞌÃp-tox kummuk, ꞌãkuxa yũm puꞌuk hãmꞌãktuxꞌax kopah! Hõmã tik hittap te Topa pupi hãmꞌãktux, tu tappet hã kaxꞌãmiꞌ, pãyã ꞌãkuxa yũm ꞌohnãg hãmꞌãktuxꞌax kopah.
\v 26 ꞌOk ꞌãxop te hãmyũmmũg hok? Topa te yãykutnãhãꞌ, pu tuꞌ xũy, nũy yãyhã tu xexkah. Kaxĩy.
\p
\v 27 Tu Topa tappet hã tik 2 yũmmũgãhãꞌ, tu mõnãyxop Mõyyex yõg xatꞌax hã hãmyũmmũgãhãꞌ, tu mõktu tik xohix te Topa pupi hãmꞌãktux xop ꞌãktux, tu kama yãy mũn ꞌãktux, tu Topa yõg hãmꞌãktux hittap hã hãmyũmmũgãhãꞌ, nũy yãy mũn ꞌãktux.
\p
\v 28 Ha mõktu xip tu xexka tuꞌ mõxahaꞌ, ha Yeyox mõgꞌax nõ peheꞌ,
\v 29 pa tik 2 te:
\p —‍Nãy, ꞌãmõg hok! ꞌŨgmũ ꞌãtuꞌ xip, nũy mõhõn nũnteꞌ, yã hõnhã ꞌãmãxak. Kaxĩy.
\p Yĩy Yeyox te tik mũtik mõg,
\v 30 tu nõm mũtik xit, tu pãm pahaꞌ, tu Topa pu: “ꞌÃmax,” kaxĩy, tu pãm koxip, tu yãy xape puꞌ popmãhãꞌ,
\v 31 ha Topa te tik pa maxnãhãꞌ, ha Yeyox yũmmũg, ha hãpxip ꞌohnãg ꞌĩhã Yeyox xip ꞌohnãg, yã yãy xaxogãhãꞌ,
\v 32 ha yãy pu hãmꞌãktux, hu:
\p —‍Yãk kuxa hittup xexka ꞌĩhã hãmꞌãktux putat kopah, tu Topa tappet hittap hã hãmyũmmũgãhãꞌ! Kaxĩy. Haꞌ nõy te: Yamũn! Kaxĩy.
\p
\v 33 Tuꞌ yok mõꞌkaꞌok, tu Yenoyanẽn tuꞌ mõg, tu mõktu mõxahaꞌ, ha tik te 11 te yãy tu nũꞌnãhãꞌ, xiꞌ mũtik pip xop,
\v 34 tu:
\p —‍Hamũn! yã Yeyox te putpuꞌ hi xeꞌẽgnãg! Yã Ximãm teꞌ pẽnãhãꞌ! Kaxĩy.
\p
\v 35 Ha tik 2 te Yeyox ꞌãktux, tu Yeyox te putat kopa hãmyũmmũgã ꞌãktux, tu pãm koxip tu ta ꞌõm xip hok ꞌãktux.
\s Yeyox xip tik xop mũtik
\p
\v 36 Ha hãpxip ꞌohnãg ꞌĩhãꞌ, hãmꞌãktux ꞌĩhãꞌ, Yeyox te nõm xop kopaꞌ xip, tu:
\p —‍Pũyã Topa ꞌãkuxa mãmmãꞌ! Kaxĩy.
\p
\v 37 Pãyã tik xop kuxãnõg, tuꞌ koxuk yĩpkutuk, pãyã ꞌaꞌ koxukꞌah,
\v 38 ha Yeyox te:
\p —‍Teptu ꞌãkuxãnõg? Putep mũn hãpkĩy hã xateꞌ?
\v 39 Mãꞌ, ꞌũgyĩm pẽnãꞌ, xik pata pẽnãꞌ, yã ꞌũgmũn yĩnmũn. Mãꞌ, nũy ꞌũg ꞌãpit. ꞌŨkoxuk teꞌ yĩn xip ꞌohnãg, xiꞌ kup tox xip ꞌohnãg, pak yĩm pip, xik pata pip, xik yĩn xeꞌe xip! Kaxĩy.
\p
\v 40 Tu hãmꞌãktux kux, ꞌĩhã yãy yĩm tuꞌ mũg, xix yãy pata tuꞌ mũg, tikmũꞌũn te mũtik hãpkumep tuꞌ mũg,
\v 41 ha tikmũꞌũn kuxa hittup xexka nãm, tuꞌ yẽy, hu yãy kuxa yĩkopit, yĩy Yeyox te:
\p —‍ꞌŨpuk? Kaxĩy.
\p
\v 42 Ha tuꞌ hõm mãhãm, ha mõꞌhap kuxap xox yãꞌ tuꞌ,
\v 43 haꞌ mãhãꞌ, ꞌĩhã tikmũꞌũn xohix teꞌ pẽnãhãꞌ.
\v 44 Ha Yeyox te:
\p —‍Hõmã ꞌãmũtik ꞌũkxip, tu ꞌãxop hãmyũmmũgãhãꞌ, tu Topa tappet hã ꞌãyũmmũgãhãꞌ, xayĩy ꞌãyũmmũg, ha mõnãyxop hittap Mõyyex teꞌ xatꞌax kaxꞌãmiꞌ, xix tik xop te Topa pupi hãmꞌãktux te kaxꞌãmiꞌ, ha kaxĩy ꞌũkxũyꞌax xik xokꞌax kaxꞌãmiꞌ, yak mũn Kunnix. Kaxĩy.
\p
\v 45 Tu yãy yõg xop putox maxnãhãꞌ, pu tu hãmyũmmũg, nũy Topa yõg hãmꞌãktux hittap hã hãmyũmmũg,
\v 46 tu xe hãmꞌãktux, hu:
\p —‍Topa yõg tappet te Kunnix ꞌãktux, ꞌũxuxetꞌax nõy yã Topa yõg hãmyãykutnãꞌax, ha tappet teꞌ xokꞌax ꞌãktux, tu nõ hãpkotꞌax ꞌãktux, tu ꞌãmnĩy tikoyuk nõg ꞌĩhã putpuꞌ hiꞌax ꞌãktux, yãk mũn ꞌãktux,
\v 47 tuꞌ xat, pu hãmꞌãktux, pũyĩy hãmꞌãpak maxꞌax ꞌãktux hãm xexka xohix tuꞌ, ꞌũhep xohix puꞌ, tu kõmẽn Yenoyanẽn kopa hãmꞌãktuxꞌax hãmãxap, pu tikmũꞌũn yãyhãhup, tu hãpkummuk mĩy kux, pũyĩy Topa xaxogãꞌ, pu tuꞌ kux.
\v 48 ꞌÃxop te nõmhã hãpxopmãꞌax xohix pẽnãhã xiꞌ xupak,
\v 49 Nãy, ꞌũhip, yã Topa te ꞌãxop pu hãmꞌãktux xex, ha ꞌãte xa nũꞌkutnãp-tup, pa kõmẽn Yenoyanẽn kopa ꞌãtiꞌ, ꞌũhip tuꞌ, tu mõktu Topa te ꞌãxop kaꞌogãhãꞌ, tu Topa Koxuk nũꞌkutnãp-tup, pu ꞌãkaꞌokgãꞌ, ha ꞌãxop te hãpkaꞌokꞌax mõꞌtat putup, topixxax putuk. Kaxĩy.
\s Yeyox mõg pepi pexkox tuꞌ
\p
\v 50 Tuꞌ xip tu xexka Metãn tuꞌ mõgãhãꞌ, tuꞌ yĩm kute tex pepiꞌ, tu:
\p —‍Pũyã Topa xa hãmmaxnãꞌ! Kaxĩy.
\p
\v 51 Tu hãmꞌãktux ꞌĩhã pepiꞌ mõg, tu pexkox haꞌ mõg,
\v 52 ha nõm tikmũꞌũn teꞌ kopaxux haꞌ mõxip, tu nũktettex, tuꞌ yẽy, tu Yenoyanẽn tuꞌ putpuꞌ mõg, tuꞌ kuxa hittup xexkah,
\v 53 tu ꞌãmnĩy xohix hãꞌ pip Topa pet xexka kopah, nũy Topa max ꞌãktux pax.
\p Tu ta tuꞌ kux.