\id JHN  - Maxakalí NT [mbl] (Brazil) -2011 bd
\h YOÃM
\toc1 Toãm
\toc2 João (Jo)
\mt YOÃM TE TOPA YÕG HÃMꞌÃPAK MAXꞌAX KAXꞌÃMIꞌ
\c 1
\s Topa yõg hãmꞌãktux te tikmũꞌũn hĩnnãhãꞌ
\p
\v 1 Hõmã ꞌũhittap ꞌap xipꞌah hãm xexkaꞌ, ha taꞌ xip Yeyox, tu Yeyox ꞌãxetꞌax nõy hã: Topa yõg Hãmꞌãktux. Kaxĩy. Yã tikmũꞌũn pu Topa mũg. Topa yõg Hãmꞌãktux te Topa mũtiꞌ tihiꞌ, tu Topa putuk, yã Topa xeꞌeꞌ.
\v 2 Topa te hãm xexka mĩy, ha Topa mũtiꞌ tihi Topa yõg Hãmꞌãktux.
\v 3 Topa te Yeyox kaꞌogãhãꞌ, puyĩy hãpxop xohix xexka mĩy. ꞌOk Topa te yãpxehnãg hãꞌ mĩy hãpxop? ꞌÃmhok. ꞌOk Topak-tok mũtiꞌ mĩy hãpxop xohix xexkaꞌ? Hamũn, ꞌũmĩy hãpxop xohix xexka nũmũtik.
\v 4 Topa yõg Hãmꞌãktux te yõnnãꞌĩ xohix hĩnnãhãꞌ, haꞌ hiꞌax te kuyãnãm putuk tikmũꞌũn kuxa kopah, tu tikmũꞌũn pu hãptupmãhãꞌ, puyĩy hãmyũmmũg,
\v 5 ha mõ yãnãm yõn hãpkoxtap kopah, ha hãpkoxtap te kuyãnãm putex ꞌohnãg. Hã kaxĩy Yeyox nũn, tu nũktu tikmũꞌũn kuxa kopa hãptupmãhãꞌ, paꞌ kummuk xop te Yeyox hupmã yũmmũg ꞌohnãg.
\p
\v 6 Ha taꞌ xip tihik ꞌũxuxetꞌax Yoãm, ha Topa teꞌ yãykutnãhãꞌ, tuꞌ xut tikmũꞌũn kopah, tu nũꞌkutnãhã tikmũꞌũn hah.
\p
\v 7 Ha taꞌ nũn Yoãm, nũy tikmũꞌũn pu Topak-tok ꞌãktux, yã nõm te kuyãnãm putuk ꞌãktux, puyĩy tikmũꞌũn xohix hãmꞌãktux ꞌãpax, nũy tuꞌ kuxa mãm kaꞌok.
\v 8 Yoãm te kuyãnãm putukꞌah, paꞌ nũn, nũy nõm te kuyãnãm putuk ꞌãktux.
\v 9 Nõm te kuyãnãm xeꞌe putuk, tu taꞌ nũn, tu nũktu tikmũꞌũn xohix tuꞌ xupep, yãꞌ nũn Yeyox.
\p
\v 10 Kuyãnãm, yã Topa yõg Hãmꞌãktux, yã Topak-tok, tuꞌ xip nũnte hãm xexka tuꞌ. Hõmã Topa te yãy kutok kaꞌogãhãꞌ, puyĩy hãm xexka mĩy, pa tikmũꞌũn te Topak-tok yũmmũg ꞌohnãg nõmhãꞌ.
\v 11 Yãꞌ nũn Topa yõg Hãmꞌãktux, tu nũktu yãy yõg hãm xexka tuꞌ xupep paꞌ xape xop tep-tup nõg,
\v 12 pa tikmũꞌũn yãg te Yeyox putup, tuꞌ kopaꞌ kuxa mãm, ha Topa te nõm xop kaꞌogãhãꞌ, puyĩy yãyhã xape xop Topa yõg, yã Topak-tok xop.
\v 13 Yã Topa hã xape xop. ꞌOk ꞌũtut teꞌ put xiꞌ tak te nõꞌ teheꞌ, yĩy yãyhã xape xop Topa hã? ꞌÃmhok. ꞌOk tut tep-tup xiꞌ tak, huꞌ put? ꞌÃmhok. Pa yã Topa mũn hã xape xop. Yã Topa tep-tup, ha yãyhã Topa xape xop.
\p
\v 14 Ha taꞌ nũn Topa yõg Hãmꞌãktux hãm xexka tuꞌ nũnteh, haꞌ tut teꞌ put, yã tikmũꞌũn Yeyox, tu tikmũꞌũn mũtiꞌ tihiꞌ. Yãꞌ max xeꞌẽgnãg, yãꞌ max tikmũꞌũn xohix puꞌ, tu hãpxeꞌe ꞌãktux, yã Topa te yãy kutok pit puxet ꞌũmax xeꞌẽgnãgãhãꞌ, yã Topa teꞌ maxnãhã tikmũꞌũn xohix puꞌ, ha hãmyok xohix ꞌãktux.
\p
\v 15 Ha taꞌ nũn Yoãm, tu nũktu hãmꞌãktux kaꞌok, hu:
\p —‍Hõmã ꞌãte xa hãmꞌãktux hu: “ꞌŨg peꞌ nũn putup tihik. Hamũn xexkaꞌ, ha tak mũn kutõgnãg, yã ꞌũyõg hãmyãxatamuk xohix kux ꞌohnãg pa yõgnũ xohix miax.” Kaxĩy.
\p
\v 16 ꞌŨkuxa max xeꞌẽgnãg, hu yũmũg xohix pu hãmmaxnãhãꞌ, tu xe hãmmaxnã mõkumaꞌmõg
\p
\v 17 Hõmã Topa te Mõyyex pu yãy yõg xatꞌax popmãhãꞌ, puyĩy Mõyyex Yoneo xop xat, pa Topa te Yeyox Kunnix pu hãmmaxnãhãꞌ, yĩy ta Yeyox te tikmũꞌũn pu hãmmaxnãhãꞌ, tu hãpxeꞌe ꞌãktux.
\v 18 Tikmũꞌũn te Topa pẽnã ꞌohnãg, pa Topak-tok puxehnãg te Topa putuk, tu Topa mũtiꞌ tihiꞌ, ha tikmũꞌũn te Topak-tok pẽnãhãꞌ, hu ta tuꞌ yũmmũg Topah. Yã tute yũmũꞌã Topa mũg.
\s Yoãm te tikmũꞌũn putox pix, tu Topa yõg hãmꞌãpak maxꞌax ꞌãktux
\p
\v 19 Ha taꞌ pip Yoneo xexka xop kõmẽn Yenoyanẽn tuꞌ, tu mõꞌpok ꞌãmãnex xop xix Nemi yõg xop, puyĩy Yoãm yĩkopit. Ha taꞌ nũn, tu nũktuꞌ yĩkopit, hu:
\p —‍ꞌŨꞌũm ꞌãmũn? Kaxĩy.
\p
\v 20 Ha Yoãm te hãmꞌãktux xeꞌe, hu:
\p —‍ꞌAk mũn Kunnixꞌah, yã Topa te Kunnix yãykutnãhãꞌ, puyĩy tikmũꞌũn kuxa kummuk xit. Kaxĩy.
\p
\v 21 Ha xeꞌ yĩkopit hu: ꞌŨꞌũm ꞌãmũn? ꞌOk ꞌEnit? Kaxĩy.
\p Ha Yoãm te:
\p —‍ꞌÃmhok. Kaxĩy.
\p Ha xe:
\p —‍ꞌOk ꞌãmũn nõꞌõm, tu Topa pupi hãmꞌãktux? ꞌOk putpu ꞌãnũn? Kaxĩy.
\p Ha:
\p ꞌÃmhok. Kaxĩy.
\p
\v 22 Ha:
\p —‍ꞌÃpu hãmꞌãktux, ꞌũꞌũm ꞌãmũn? ꞌŨgmũꞌãte ꞌãyũmmũg putup, hu mõg, hu nõm te nũg mũg pok xop pu hãmꞌãktux. Putep ꞌãktux? Kaxĩy.
\p
\v 23 Ha Yoãm te:
\p —‍Yã yãnmũn xupepꞌax ꞌũgmũn, tu hãmꞌãktux kaꞌok hãm panip xexka tuꞌ, hu: ꞌÃpu ꞌãxop putat yoaꞌ. Yũmũg xuxyã nũn. Yã ꞌõg hãpxopmãꞌax yoaꞌ. Kaxĩy.
\p Yã hãmꞌãktux teꞌ putuk ꞌIyait yõg, nõm te Topa pupi hãmꞌãktux.
\p
\v 24 Yã Paniye xop te Yoãm yĩkopit,
\v 25 hu:
\p —‍ꞌA ꞌãmũn yã Kunnixꞌah Topa te nõm yãy kutnãhãꞌ, xix ꞌap ꞌEnitꞌah, xix ꞌap nõyꞌah nõm te Topa pupix hãmꞌãktux. Tepte ꞌãxat xate tikmũꞌũn putox pix? Kaxĩy.
\p
\v 26 Ha Yoãm te:
\p —‍ꞌÃtep-tox pix kõnãg hã, pa ꞌãxop kopaꞌ xip nõꞌõm, pa yã ꞌãxop teꞌ yũmmũg ꞌohnãg,
\v 27 hak peꞌ nũn putup nõꞌõm. Hamũn xexkaꞌ, hak-mũn kutõgnãg, hu yõg pataxax koꞌap-tup ꞌohnãg. Yãk-tõgnãg ꞌũgmũn.
\v 28 Yã nõm hãpxopmãhã xiptuxexka Metãn tuꞌ kõnãg kox Yohnãm xatapah. Yã Yoãm te tikmũꞌũn putox pix ꞌõnteh.
\s Nõm te tikmũꞌũn pupiꞌ xok putup kahnẽn xok putuk
\p
\v 29 Hãptup ꞌĩhãꞌ nũn Yeyox Yoãm hah, ha Yoãm teꞌ pẽnãhãꞌ, tu:
\p —‍ꞌŨpẽnãꞌ nõm te tikmũꞌũn pupiꞌ xok putup Topa yõg tihik kahnẽn xok putuk. Tute tikmũꞌũn xohix kuxa kummuk xit putup.
\v 30 Hõmã ꞌãte nõm ꞌãktux, hu: “Tik tek peꞌ nũn putup, tuꞌ xexkah, ha tak mũn kutõgnãg. Yã ꞌũyõg hãmyãxatamuk xohix kux ꞌohnãg, pa yõgnũ xohix miax.” Kaxĩy.
\v 31 Hõmã ꞌaꞌ yũmmũgꞌah nõm tihik, pak nũn, nũy tikmũꞌũn putox pix, puyĩy tikmũꞌũn nõm yũmmũg. Kaxĩy.
\p
\v 32 Tu xe: ꞌÃteꞌ pẽnãhã Topa Koxuk te pexkox tuꞌ yĩxohoh, yã kuxxuxtut putuk, tu nũktu tik tuꞌ xupep, tu nõm yĩmũꞌ xip kaꞌok.
\v 33 Yã ꞌãteꞌ yũmmũgꞌah tihik, pa Topa te nũgkutnãhã, ꞌũyĩy tikmũꞌũn putox pix. Topa te: “Xate pẽnãp-tup Topa Koxuk yĩxop-tup, tu nũktu tik yĩmũꞌ xip kaꞌok putup, ha nõm te tikmũꞌũn puꞌ hõm putup Topa Koxuk.” Kaxĩy.
\v 34 ꞌÃte nõm pẽnãhãꞌ, tu xaꞌ xuktux, tihik yã Topak-tok. Kaxĩy.
\s Yeyox yõg tik xop te mãxap
\p
\v 35 Hãptup ꞌĩhã xeꞌ xip Yoãm tik tix mũtik, yã Yoãm mũtik mõg xop kopaꞌ pip,
\v 36 haꞌ nũn Yeyox, tu nõãꞌyẽn, ha Yoãm te Yeyox pẽnãhãꞌ, tu hãmꞌãktux, hu:
\p —‍Nõm te tikmũꞌũn pupiꞌ xok putup, kahnẽn xok putuk, yãꞌ yĩy ꞌohnãg, yã Topak-tok. Kaxĩy.
\p
\v 37 Ha tik tix teꞌ xupak, tu taꞌ mõg Yeyox hah, nũy Yeyox peꞌ mõg, tuꞌ mõg,
\v 38 Ha Yeyox yõkãnãm, tu tik tix pẽnãhãꞌ, tu:
\p —‍Tep mũn xak? Kaxĩy.
\p Ha:
\p —‍Notot, piꞌyã ꞌãpet yũm?
\p
\v 39 Ha Yeyox te:
\p —‍Mã, nũy pẽnãꞌ. Kaxĩy.
\p Taꞌ mõg Yeyox xix tik tix, tuꞌ pet pẽnãhãꞌ mãyõn he ꞌĩhãꞌ tihiꞌ, ꞌĩhã mõktu yã ꞌãmãxak.
\p
\v 40 Yã tik tix, ha yãp-xet ꞌãxetꞌax ꞌÃneneꞌ, yã Xĩmãm Pet taknõy. Yã hõmã tute Yoãm yõg hãmꞌãktux ꞌãpak, hu Yeyox peꞌ mõg.
\p
\v 41 Tu taꞌ mõg ꞌÃneneꞌ, nũy yãy taknõy xax, tuꞌ xipihiꞌ, tu:
\p —‍ꞌŨgmũꞌãte Kunnix xipihiꞌ, yã Topa te nõm yãykutnãhãꞌ. Kaxĩy.
\p
\v 42 Tu taꞌ nũn ꞌÃneneꞌ, tuꞌ taknõy Xĩmãm nũn nã nãꞌ nũn, tu nũktu Yeyox tuꞌ mõxahaꞌ, ha Yeyox te Xĩmãm pẽnãhãꞌ, tu:
\p —‍ꞌÃmũn yã Xĩmãm, yã Yoãm kutok. ꞌÃte xa ꞌãxetꞌax nõy hõm, yã Xep. Kaxĩy.
\p Yã Xep, yã ꞌãxetꞌax nõy hã: Pet, yã tikmũꞌũn yĩyꞌax hã: mĩkaxxap. Kaxĩy.
\s Yeyox teꞌ xãnãhã Pinip xix Nãtãnãyet
\p
\v 43 Hãptup ꞌĩhã Yeyox mõg putup hãpxexka Ganinet tuꞌ, tu Pinip xak, tuꞌ xipihiꞌ, tu:
\p —‍Mã, ꞌũg pe mõg! Kaxĩy.
\p
\v 44 Yã Pinip yõg kõmẽn Betxax. Yã ꞌÃnene yõg kõmẽn kamah, xix Pet yõg kamah.
\p
\v 45 Ha taꞌ mõg Pinip, tu Nãtãnãyet xak, tu mõktuꞌ xipihiꞌ, tu:
\p —‍ꞌŨgmũꞌãteꞌ xipihi nõꞌõm. Hõmã ꞌũhittap Mõyyex te nõm kaxꞌãmi Topa yõg xatꞌax yõg tappet tuꞌ, xix Topa pupix hãmꞌãktux xop te nõm kaxꞌãmi kamah. Yã Yeyox, yã Yoye kutok, yã kõmẽn Nãyane yõg tihik. Kaxĩy.
\p
\v 46 Ha Nãtãnãyet te:
\p —‍ꞌOk ꞌũm max tikmũꞌũn ꞌõnte Nãyane kopah? ꞌÃmhok. Kaxĩy.
\p Ha Pinip te:
\p —‍Pu yũmũ mõy, pẽnãꞌ. Kaxĩy.
\p
\v 47 Tu taꞌ mõg, paꞌ xip Yeyox, tuꞌ nõy nũn pẽnãhãꞌ, tu:
\p —‍Pẽnãꞌ ꞌIyaet xop yõg tik xeꞌe, yã tik teꞌ koit ꞌohnãg. Tik te hãpxopmã yok. Kaxĩy.
\p
\v 48 Ha Nãtãnãyet te:
\p —‍Teptu xatek yũmmũg? Texĩy? Kaxĩy.
\p Ha Yeyox te:
\p —‍ꞌÃte ꞌãpẽnãhãꞌ, yã ꞌãxip piget kup kakak, ha Pinip te ꞌãxãnãhãꞌ
\p
\v 49 Ha Nãtãnãyet te:
\p —‍Notot, ꞌãmũn Topak-tok. Xate ꞌĨyaet xop xat.
\p
\v 50 Ha Yeyox te:
\p —‍ꞌÃte xaꞌ xuktux ꞌãte ꞌãpẽnãhã piget kup kakak, yĩy ꞌãkuxa yũm ꞌũgkopah. ꞌOk kaxĩy ꞌãkuxa yũm? Yãꞌ max nũhũꞌ, pa xate xeꞌ pẽnãp-tup hãpxopmã max xohix xeꞌẽgnãg.
\v 51 ꞌÃte xa hãmꞌãktux xeꞌe xate pexkox xõn pẽnãp-tup, ha ta pexkox yõg nũꞌpok xop pepiꞌ mõg putup, tu putpuꞌ yĩxop-tup, tu nũktuk mũn xukaꞌ xup putup, yã Tikmũꞌũn Kutok xukaꞌ xup putup.
\c 2
\s Yeyox te yãyta pẽnãhãꞌ
\p
\v 1 ꞌÃmnĩy tix nõg, ꞌĩhã tikmũꞌũn yãytap-tup kõmẽn Kãnã tuꞌ hãpxexka Ganinet kopah, tu ꞌãmuk xexka mĩy, ha Yeyox mũktut xip.
\v 2 Ha tikmũꞌũn teꞌ xãnãhã Yeyox xix yõg tik te 12 xop, pu tu xit. Yĩy taꞌ mõg, tu mõktuꞌ mõxahaꞌ.
\v 3 Ha tikmũꞌũn xohix te xupyãg xoꞌop, ha mõktuꞌ kox, ha taꞌ xip Yeyox mũktut, tu Yeyox pu hãmꞌãktux, hu:
\p —‍ꞌŨkox xupyãg. ꞌŨnõg. Kaxĩy.
\p
\v 4 Ha Yeyox te:
\p —‍Mãy, hõnhã ꞌũkxat hok, ꞌũyĩy hãpxopmã xate nõm putup. ꞌA hõnhãꞌah. Pa hãpxip, ꞌĩhã Topa tek xat putup. Kaxĩy.
\p
\v 5 Haꞌ tut te kãmãnat pu:
\p —‍ꞌÃpu hãpxopmã tute ꞌãxop xat. Kaxĩy.
\p
\v 6 Ha taꞌ pip naxtox xexkanãm mĩkaxxap hã nõꞌõm ꞌũxohix teꞌ 6, ha Yoneo xop te nõm hã yãy pix, xix nax pix, xix kãnẽy pix, nũy yãy yõg xatꞌax mĩy. Yãꞌ xexkanãm naxtox. Naxtox puxet teꞌ tat nit xohix teꞌ 80, xiꞌ nõy 100.
\p
\v 7 Ha Yeyox te kãmãnat xop pu hãmꞌãktux, hu:
\p —‍ꞌÃpu kõnãg pux, pu naxtox hã nũꞌxih. Kaxĩy.
\p Haꞌ pux ha nũꞌxĩmnãg.
\p
\v 8 Ha Yeyox te:
\p —‍ꞌÃpuꞌ hep kutõgnãg xut, nũy pax mõg, nũy ꞌãmuk xexka yõg xatꞌax puꞌ hõm. Kaxĩy.
\p Haꞌ xut, tuꞌ pax mõg,
\v 9 ha xatꞌax teꞌ hep xoꞌop, pa ꞌap kõnãgꞌah, yã yãyhã xupyãg. Hãm ꞌũm tuꞌ nũn ꞌũhep? Yãꞌ yũmmũg ꞌohnãg, pa kãmãnat teꞌ yũmmũg nõm teꞌ hep xut, ha ꞌãmuk xexka yõg xatꞌax te tik te yãyta xãnãhãꞌ,
\v 10 tu:
\p —‍Tikmũꞌũn xohix teꞌ popmãhã xupyãg max hãmãxap, ha tikmũꞌũn te nõm xoꞌop, tu mõktu hix kaꞌok, hak-nãy tuꞌ popmãhã xupyãg kummuk, pa nõmhãꞌ pip xupyãg max ꞌohnũꞌ. Kaxĩy.
\p
\v 11 Yã hã kaxĩy Yeyox te hãpxopmã kaꞌok xeꞌẽgnãg hãmãxap, yã kõmẽn Kãnã tuꞌ mĩy hãpxexka Ganinet tuꞌ Yeyox max xeꞌẽgnãg, ha Yeyox yõg tik xop kuxa mãm Yeyox kopah.
\p
\v 12 Hãpxip ꞌĩhãꞌ mõg Yeyox, xiꞌ tut, xiꞌ taknõy xop, xix Yeyox yõg tik xop, tuꞌ nox tihi kõmẽn Kapãnãm tuꞌ.
\s Yeyox mõg Topa pet xexka tuꞌ
\p
\v 13 Hãpxip ꞌĩhã Yoneo xop teꞌ mĩy putup ꞌãmuk xexka ꞌũxuxetꞌax Nõãꞌyẽn. Ha taꞌ mõg Yeyox kõmẽn Yenoyanẽn tuꞌ, tuꞌ mõg, tu mõktuꞌ xupep.
\v 14 Tu taꞌ mõg Topa pet xexka tuꞌ, paꞌ kopaꞌ pip tikmũꞌũn, tu nõmenex mũnũytut pit, xix kahnẽn, xix kuxxuxtut, tu tayũmak hãꞌ nõy yãnãn, ha mĩmpe xitꞌax ꞌĩhãꞌ mãm,
\v 15 ha Yeyox te xikot mĩy poxit hã, tu hãptopa papuk kahnẽn xix mũnũytut pit, tu tayũmak nũꞌxok, yã tayũmak hãꞌ nõy yãnãn xop yõg, tuꞌ yõg mĩmpe xitꞌax nũꞌxok kamah.
\v 16 Tikmũꞌũn te kuxxuxtut nõnenex, ha Yeyox te nõm pu:
\p —‍ꞌÃpu kuxxuxtut mõgã nũpeheh. ꞌŨmĩy hok nãpet nũnte ꞌãtak pet kopah. Kaxĩy.
\p
\v 17 Ha Yeyox mũtik mõg xop teꞌ xutigãhãꞌ, yã Topa yõg tappet tuꞌ kaxꞌãmi hu: “Yã kuxap putuk ꞌũgkuxa kopah, yã ꞌãte Topa pet putuppax, tu Topa pet hã yĩpkumĩy.” Kaxĩy.
\p
\v 18 Ha Yoneo xexka xop te:
\p —‍ꞌÃpu hãpxopmã kaꞌok xeꞌẽgnãg, ꞌũyĩy yũmmũg Topa te nũꞌãkutnãhãꞌ, xayĩy xohix papuk Topa pet kũnãpah. Kaxĩy.
\p
\v 19 Ha Yeyox te:
\p —‍ꞌÃxop te nũꞌ pet putxok, kopxix xeꞌ mĩyꞌax ꞌãmnĩy tikoyuk hã. Kaxĩy.
\p
\v 20 Ha:
\p —‍ꞌOk xateꞌ mĩyꞌax ꞌãmnĩy tikoyuk hã? Tikmũꞌũn te Topa pet xexka mĩy hãmyãxatamuk xohix teꞌ 46 hã. Kaxĩy.
\p
\v 21 Pa ꞌãmhok, Yeyox te yãy yĩn ꞌãktux, yã Topa xip Yeyox kopah, Topa pet putuk.
\v 22 Hãpxip ha ta Yeyox putpuꞌ hiꞌ, ꞌĩhã Yeyox yõg tik xop teꞌ xutigãhã Yeyox yõg hãmꞌãktux, huꞌ kuxa mãm kaꞌok Topa yõg hãmꞌãktux kopa xix Yeyox yõg hãmꞌãktux kopah.
\s Yeyox te tikmũꞌũn xohix yũmmũg
\p
\v 23 ꞌŨxip Yeyox kõmẽn Yenoyanẽn tuꞌ, ꞌĩhã tikmũꞌũn teꞌ mĩy ꞌãmuk xexka ꞌãxetꞌax Nõãꞌyẽn, ha Yeyox te hãpxopmã kaꞌok xeꞌẽgnãg punethok. Yã tikmũꞌũn teꞌ mĩy yũmmũg ꞌohnãg. Tikmũꞌũn teꞌ pẽnãhãꞌ, huꞌ xohix kuxa mãm kaꞌok Yeyox kopah.
\v 24 Pa Yeyox kuxa yũm ꞌohnãg tikmũꞌũn kopah xix yõg hãmyũmmũg kopah, tute tikmũꞌũn xohix yũmmũg tuꞌ.
\v 25 ꞌOk Yeyox pu tikmũꞌũn yũmmũgãhãꞌ? ꞌÃmhok. Yã tute tikmũꞌũn xohix kuxa yũmmũg.
\c 3
\s Yeyox xix Nĩkonẽm
\p
\v 1 ꞌŨxip tihik ꞌũxuxetꞌax Nĩkonẽm, yã Yoneo xop yõg xatꞌax xop yõg tihik, yã Paniye xop kopaꞌ xip.
\v 2 ꞌÃmnĩy ꞌĩhãꞌ nũn Yeyox hah, nũy hãmꞌãktux, hu:
\p —‍ꞌŨgmũꞌãteꞌ yũmmũg Topa te nũꞌãkutnãhãꞌ. Yã xate hãpxopmã kaꞌok xeꞌẽgnãg. Paxpu Topa ꞌãyõkãmũ mõg hok, ha ta hãpxopmã kaꞌok xeꞌẽgnãg ꞌohnãg. Kaxĩy.
\p
\v 3 Ha Yeyox te:
\p —‍ꞌÃte xa hãmꞌãktux hãpxop xeꞌe. Tep-te Topa pẽnãp-tup xix yãy yõg tikmũꞌũn, ꞌĩhã Topa te yãy yõg tikmũꞌũn xat putup, haꞌ yĩpkox pip? Yã nõm nãhã ꞌũxeheh. ꞌAp nõy teꞌ pẽnãp-tupꞌah. Kaxĩy.
\p
\v 4 Ha Nĩkonẽm te:
\p —‍Tep texĩy tik xiptap ꞌũm nãhã ꞌũxeheh? ꞌOk ꞌũtut hã mõꞌnãhã ꞌũxeheh, ha xeꞌ put? Kaxĩy.
\p
\v 5 Ha Yeyox te:
\p —‍ꞌÃte xa hãpxeꞌe ꞌãktux. Yũmũg xakux. Yũmũg tut te yũmũg pop, ha ta Topa Koxuk te yũmũg mĩy Topa yõg tikmũꞌũn. Hã kaxĩy yũmũg xakux ꞌũxeheh, yã yũmũg xakux tix. Yũmũg xe xakux ꞌohnãg, kopxix yũmũg mõxakux ꞌohnãg Topa yõg tikmũꞌũn xop kopah.
\v 6 ꞌŨn tek-tok pop, haꞌ hi ꞌũk-tok. Ha ta Topa Koxuk teꞌ hĩnnãhã Topa yõg tikmũꞌũn.
\v 7 ꞌÃte xa hãmꞌãktux, hu: “ꞌÃpu nãhãy ꞌũxeheh. Hãmꞌãktux hok hu: Xok ꞌũm?” Kaxĩy.
\v 8 ꞌÃmuuh mõg hãm ꞌũm tup-tup, ha xate ꞌãmuuh ꞌãpak. Piꞌaꞌ nũꞌ? Xateꞌ yũmmũgꞌah. Piꞌaꞌ mõg? Xateꞌ yũmmũgꞌah. Yã xateꞌ pẽnã ꞌohnãg. Hã kaxĩy xateꞌ yũmmũg ꞌohnãg, Topa Koxuk teꞌ mĩy Topa yõg tikmũꞌũn, tuꞌ hĩnnãhã nõm xakux ꞌũxeheh.
\p
\v 9 Ha Nĩkonẽm te:
\p —‍Texĩy? Kaxĩy.
\p
\v 10 Ha Yeyox te:
\p —‍Xate ꞌIyaet yõg tikmũꞌũn pu hãmyũmmũgãhãꞌ, paꞌ yũmmũg ꞌohnãg Topa Koxuk teꞌ mĩy Topa yõg tikmũꞌũn.
\v 11 Hamũn, ꞌãte xa hãmꞌãktux xeꞌeꞌ. ꞌŨgmũꞌãte hãmyũmmũg, hu nõm ꞌãktux, tu hãmpẽnãhã, hu nõm ꞌãktux, pa ꞌãxop te yõgnũ hãmꞌãktux ꞌãpak ꞌohnãg.
\v 12 ꞌÃte xa hãm xexka yõg xop yõg hãpxopmãꞌax ꞌãktux, pa ꞌãkuxa yũm ꞌohnãg. ꞌÃte xa pexkox yõg xop yõg hãpxopmãꞌax ꞌãktux. Texĩy ꞌãkuxa yũm putup? ꞌAp yũm putupꞌah.
\v 13 Tikmũꞌũn te pexkox tuꞌ mõg ꞌohnãg, tu yĩxo ꞌohnãg hãm xexka tuꞌ, tu pexkox yõg xop yõg hãpxopmãꞌax ꞌãktux ꞌohnãg. ꞌŨkpuxet yã Tikmũꞌũn Kutok te nõm ꞌãktux, pexkox tuk yĩxohoh tuꞌ.
\p
\v 14 —‍Hõmã ꞌũhittap Mõyyex te kãyã komut mĩy hãm panip xexka tuꞌ, tu mĩm yĩpakaꞌ xup. Hã kaxĩy tikmũꞌũn tek mũn yĩpaka xup putup, yã Tikmũꞌũn Kutok yĩpaka xup putup,
\v 15 puyĩy xohix ꞌũm ꞌũkuxa mãm ꞌũgkopah, tuꞌ hi xeꞌẽgnãg mõkumaꞌ mõg, haꞌ kux ꞌohnãg.
\v 16 Yã Topa te mõꞌyãyxeꞌẽgnãg hãm xexka yõg xohix xop, hu yãy kutok pit puxehnãg nũꞌkutnãhãꞌ hãm xexka tuꞌ, puyĩy xohix ꞌũm ꞌũkuxa mãm kaꞌok Topak-tok kopah, huꞌ xakix kaꞌok putupꞌah, paꞌ hi xeꞌẽgnãg mõkumaꞌmõg putup, haꞌ kux ꞌohnãg.
\v 17 Topa te yãy kutok nũꞌkutnãhã hãm xexka tuꞌ, nũy nõm hã hãm xexka yõg xohix xop kuxa kummuk xit, nũy kuxa maxnãꞌ, nũy nõm yõg hãpkummuk mĩyꞌax hã yãnãn hok.
\p
\v 18 —‍Topa teꞌ kuxa mãm xop yõg hãpkummuk mĩyꞌax hã yãnãn ꞌohnãg, paꞌ yãnãn ꞌũkuxa mãm ꞌohnãg xop yõg hãpkummuk mĩyꞌax hã, yãꞌ kuxa mãm ꞌohnãg Topak-tok puxet kopa hah.
\v 19 Teptu Topa te hãpkummuk mĩyꞌax hã yãnãn? Yã Yeyox nũn, yã kũyãnãm nũn putuk, tu nũktuꞌ xupep nũnte hãm xexka tuꞌ, pa tikmũꞌũn tep-tup hãpkoxtap, ꞌap putupꞌah kũyãnãm, yã Yeyox putupꞌah, hãpkummuk mĩy tuꞌ.
\v 20 Yã hãpkummuk mĩyꞌax xop tep-tup nõg kũyãnãm, tuꞌ mõg ꞌohnãg kũyãnãm hah, nũy hãpkummuk mĩyꞌax pẽnã hok.
\v 21 Pa hãmyoaꞌax xop mõg Yeyox hah, yã kuyãnãm putuk hah, puyĩy xohix pẽnãꞌ, yã Topa ꞌãpak, hu hãmyok mĩy. Kaxĩy.
\s Yeyox xix Yoãm, yã nõm tep-tox pix
\p
\v 22 Tu taꞌ mõg Yeyox xix yãy yõg tik xop, tu mõktu hãpxexka Yonex tuꞌ mõxahaꞌ, tuꞌ nox tihiꞌ, tu tikmũꞌũn putox pix.
\v 23 Ha taꞌ xip Yoãm, yã ꞌẼnõm tuꞌ xip, yã Xanĩn yĩkak, tu tikmũꞌũn putox pix, kõnãg punethok hah, ha taꞌ nũn ꞌũxohix, hap-tox pix.
\v 24 Yã xonat te Yoãm mõꞌtat putup kanet kaꞌok hã, pa hõnhãꞌ xipꞌah kanet kopah.
\p
\v 25 Ha taꞌ pip Yoãm mũtik mõg yãg xop, tu yãy mãnõg kõnãmãhã Yoneo puxet mũtik. Yã Yoneo xop yõg ꞌãmuk xexka tu yãy mãnõg, yã ꞌãmuk xexka ꞌãxetꞌax Yãy Pix. Kaxĩy.
\p
\v 26 Taꞌ nũn Yoãm mũtik mõg xop Yoãm hah, tu:
\p —‍Yãyã, hõmãꞌ xip tihik ꞌãmũtik kõnãg kox xatapaꞌ, yã hõmã xate nõm ꞌãktux. Hõnhã tik tep-tox pix, ha tikmũꞌũn xohix te ha nũꞌ yãy xix. Kaxĩy.
\p
\v 27 Ha Yoãm te:
\p —‍Pexkox yõg Topa te tikmũꞌũn xexka mĩy, ha tikmũꞌũn xohix te nõm peꞌ mõg, paꞌ xexka mĩy hok, puxix tikmũꞌũn nõm peꞌ mõg ꞌohnãg.
\v 28 Hõmã ꞌãte xa yãy ꞌãktux, hu: “ꞌŨgmũn ꞌap Kunnixꞌah, yã ꞌãte tikmũꞌũn kuxa kummuk xit ꞌohnãg, pa Topa te nũgkutnãhã, ꞌũ mõg hãmãxap, hak-nãy tu nõm nũn.” Kaxĩy. Ha xateꞌ xupak, tuꞌ yũmmũg.
\v 29 Yã hã kaxĩy putuk: Tikmũꞌũn te yãytap-tup, ha ꞌũn te yãytaha yã tik te yãytaha yõg. Ha taꞌ xip tik te yãytaha xapeꞌ, tu hãmꞌãktux ꞌohnãg, pa hãmꞌãpak, tu tik te yãytaha yõg hãmꞌãktux ꞌãpak, huꞌ kuxa hittup xexkaꞌ, tuꞌ yãykũmĩy ꞌohnãg. Yãg mũn putuk. ꞌÃte tik te yãytaha xape putuk, tuk kuxa hittup xexka nõmhã, yã tikmũꞌũn xohix te Yeyox peꞌ mõg.
\v 30 Yãꞌ max, nõm xexka nõy nãꞌ mõg, pu tikmũꞌũn xohix nõm pẽnãꞌ, ha taꞌ max, ꞌũgmũn kutõgnãg nõy nãg mõg, pu tikmũꞌũn ꞌũgmũn pẽnãk-tõgnãg.
\s Nõm te pexkox tuꞌ yĩxohoh
\p
\v 31 Hõmã nõm xip pepiꞌ, tuꞌ yĩxohoh. Hamũn ꞌũxexkanãm, ha taꞌ xohix nõy ꞌap xexkaꞌah. Hãm xexka yõg tikmũꞌũn yã hãm xexka yõg xop xeꞌeꞌ, tu hãm xexka yõg tikmũꞌũn yõg hãpxop ꞌãktux. Ha ta nõm te pexkox tuꞌ yĩxohoh yãꞌ xexkanãm.
\v 32 Tute hãpxop pẽnãhã pexkox tuꞌ, tuꞌ pẽnãꞌax ꞌãktux, tuꞌ xupakꞌax ꞌãktux, pa tikmũꞌũn te yõg hãmꞌãktux kopaꞌ kuxa mãm ꞌohnãg.
\v 33 Pa tikmũꞌũn ꞌũm te ꞌũyõg hãmꞌãktux kopaꞌ kuxa mãm, puxix hãmꞌãktux hu: “Topa ꞌũmax xeꞌeꞌ.” Kaxĩy.
\v 34 Topa te yãy kutok nũꞌkutnãhãꞌ, ha tute Topa yõg hãmꞌãktux ꞌãktux, ha Topa te nõm puꞌ hõm Topa Koxuk, ha nõm hã nũꞌxĩmnãg Topa Koxuk hã, tu Topa Koxuk ꞌãpaknãm.
\v 35 Yãꞌ tak Topa te yãy kutok mõꞌyãy xeꞌẽgnãg, tuꞌ nõy pu hãpxop xohix popmãhãꞌ, puyĩy ꞌũxohix xop xat.
\v 36 Tikmũꞌũn ꞌũm kuxa yũm Topak-tok kopah, tuꞌ hi xeꞌẽgnãg mõkumaꞌmõg, haꞌ kux ꞌohnãg. Ha taꞌ nõy ꞌũm te Topak-tok pit ꞌãpak ꞌohnãg, tu ꞌaꞌ hi xeꞌẽgnãg mõkumaꞌmõg putupꞌah, pa Topa te nõm tuꞌ gãy mõkunãꞌmõg, haꞌ kux ꞌohnãg.
\c 4
\s Yeyox xix hãpxexka Xãmãnit yõg ꞌũhũn
\p
\v 1 Ta tikmũꞌũn xohix te hãmꞌãktux, ha Paniye xop teꞌ xupak. Yã hãmꞌãktux Yeyox mũtik hãpkumep xop xohix nõy nãꞌ mõg xexkaꞌ, ha ta Yoãm mũtik hãpkumep xop xohix tapax ꞌohnãg. Tikmũꞌũn te kamaꞌ hãmꞌãktux, Yeyox te tikmũꞌũn xohip-tox pix, ha ta Yoãm te tikmũꞌũn tĩgnãg putox pix.
\v 2 Pa ꞌãmhok. Yeyox te ꞌap-tox pixꞌah, pa Yeyox yõg tik xop tep-tox pix.
\p
\v 3 Ha Yeyox te nõm ꞌãpak, tu taꞌ mõg hãpxexka Yonex kũnãpah, tu putpuꞌ mõg hãpxexka Ganinet tuꞌ.
\v 4 Paꞌ xip hãpxexka Xãmãnit, ha nõm hã yãykutut, yã Topa tep-tup.
\p
\v 5 Tu taꞌ nũn, tu nũktu kõmẽn Xik tuꞌ xupep hãpxexka Xãmãnit kopah, yã Yako yõg hãm yĩkah. Yã hõmã Yako te yãy kutok Yoye pu hãm hõm.
\v 6 Yãꞌ xip Yako yõg kõnãg xupup kox, ha taꞌ tuknõg Yeyox, hu kõnãg xupup kox kux tuꞌ yũm, ꞌĩhã mãyõn te yãy koteꞌ yũm.
\p
\v 7 Ha taꞌ nũn ꞌũhũn hãpxexka Xãmãnit yõg, nũy kõnãg tat xut. Ha Yeyox te:
\p —‍ꞌÃ kõnãg ꞌũm tat, ꞌũ xoꞌop. Kaxĩy.
\p
\v 8 Yã Yeyox yõg tik xop ꞌap xipꞌah. ꞌŨmõg kõmẽn tuꞌ, nũy yãy xitꞌax pop.
\p
\v 9 Ha ꞌũn te:
\p —‍ꞌÃmũn yã Yoneo xop kopa ꞌãxip, pak mũn yã Xãmãnit xop kopak xip. Teptu ꞌãtu ꞌãkax, hu: “ꞌÃ kõnãg ꞌũm tat”? Kaxĩy.
\p Yã Xãmãnit xop te hãpxopmã ꞌohnãg Yoneo xop mũtik.
\p
\v 10 Ha Yeyox te:
\p —‍ꞌOk xateꞌ yũmmũg Topa te tikmũꞌũn pu nõm hok hõm, tu nũꞌ nõm kutnãhãꞌ? ꞌOk xateꞌ yũmmũg ꞌũgmũn ꞌũꞌũm? Xateꞌ yũmmũg, nũy ta ꞌãtu ꞌãkax, yĩy ꞌãte xaꞌ hõm kõnãꞌãg, nõm te tikmũꞌũn hĩnnã xeꞌẽgnãg. Kaxĩy.
\p
\v 11 Ha ꞌũn te:
\p —‍Notot, naxtox ꞌũm yũm hok, ha kõnãg xupup kox tox. Tep hãꞌ xut xate kõnãꞌãg, nõm te tikmũꞌũn hĩnnã xeꞌẽgnãg?
\v 12 Yũmũ yõg mõnãyxop Yako te yũmũꞌã hõm nũhũꞌ kõnãg xupup kox. Yako teꞌ xoꞌop nũhũꞌ kõnãꞌãg, xik-tok teꞌ, xix yõg xokxop tut xop teꞌ. ꞌOk ꞌãmũn xexkaꞌ, ha ta Yakok-tõgnãg? Kaxĩy.
\p
\v 13 Ha Yeyox te:
\p Tikmũꞌũn teꞌ xoꞌop kõnãꞌãg nũhũꞌ, pa hãpxip ꞌĩhã kõnãg tup-tup xũy ꞌũxeheh.
\v 14 Pa ꞌãte tikmũꞌũn pu kõnãg nõy hõm, ha tikmũꞌũn te nõm xoꞌop, tu xe kõnãg putup xũy pip putupꞌah. ꞌÃte tikmũꞌũn puꞌ hõm nõꞌõm kõnãꞌãg, ha nõm te nãgyĩkox putuk tikmũꞌũn kuxa kopah, tu tikmũꞌũn hĩnnã xeꞌẽgnãg mõkumaꞌmõg, haꞌ kux ꞌohnãg. Kaxĩy.
\p
\v 15 Ha ꞌũn te:
\p —‍ꞌÃꞌ hõm nõꞌõm kõnãꞌãg, ha xe kõnãg putup xũy ꞌũm pip putupꞌah, ha ꞌãte putpuk nũn putupꞌah nũnteh, nũy kõnãg tat xut. Kaxĩy.
\p
\v 16 Ha Yeyox te:
\p —‍Mõg, nũy ꞌãyĩpxox xãnãꞌ, pu nũꞌ. Kaxĩy.
\p
\v 17 Ha ꞌũn te:
\p —‍ꞌAp xipꞌah ꞌũgyĩpxox. Kaxĩy.
\p Ha Yeyox te:
\p
\v 18 —‍Hamũn, xate hãmꞌãktux xeꞌeꞌ, ꞌaꞌ xipꞌah ꞌãyĩpxox. Pa hõmã xate ꞌãyĩpxox mũtik yãytahaꞌ, tuꞌ nĩm, nũy nõy mũtik yãytaꞌ, tu mõktu ꞌãyĩpxox xohix teꞌ 5 te kaxĩy, ha ta hõnhã ꞌãtihi tik mũtik, pa yã ꞌa ꞌĩpxoxꞌah. Xate hãmꞌãktux xeꞌe, ꞌap koitꞌah. Kaxĩy.
\p
\v 19 Ha ꞌũn te:
\p —‍ꞌÃteꞌ yũmmũg nõmhã, xate Topa pupi hãmꞌãktux, yã ꞌũgyũmmũg xexkah.
\v 20 ꞌŨgmũ yõg mõnãyxop te Topa pu nũktettex yĩktix tuꞌ nũhũꞌ, pa ꞌãxop teꞌ xuktux, ꞌũmax, pu Topa pu nũktettex kõmẽn Yenoyanẽn tuꞌ. Kaxĩy.
\p
\v 21 Ha Yeyox te:
\p —‍Nixxix, ꞌũxupax. Hãpxip puxix tikmũꞌũn te Topa pu nũktettex putup, pa yĩktix tu nũktettex hok, xix Yenoyanẽn tuꞌ nũktettex hok.
\v 22 ꞌÃxop te Topa pu nũktettex, pa nõm yũmmũg ꞌohnãg. ꞌŨgmũꞌãte Topa pu nũktettex, tu nõm yũmmũg. ꞌŨgmũg xop yã Yoneo xop, ha taꞌ xip tik puxet Yoneo xop kopah, tu nõm te tikmũꞌũn kuxa kummuk xit, tuꞌ kuxa maxnãhãꞌ.
\v 23 Pa hãpxip ꞌĩhã, yã hõnhã ꞌĩhã tikmũꞌũn te Topa pu nũktettex putup, tu Topa ꞌãktux max xeꞌep-tup yãy kuxa kopah, tu Topa yõg hãmyũmmũg xeꞌe yũmmũg putup. Topa tep-tup, puyĩy tikmũꞌũn Topa pu nũktettex hã kaxĩy.
\v 24 Topa yãꞌ koxuk, ꞌap yĩn xipꞌah. Yãꞌ max, pu tikmũꞌũn Topa pu nũktettex yãy kuxa hã, tu Topa yõg hãmyũmmũg xeꞌe yũmmũg. Kaxĩy.
\p
\v 25 Ha ꞌũn te:
\p —‍ꞌŨnũn putup nõꞌõm. Topa te nõm nũꞌkutnãp-tup, yãꞌ xuxetꞌax Kunnix, yã Topa te nõm yãykutnãhãꞌ. ꞌÃteꞌ yũmmũg ꞌũnũn putup, tu yũmũꞌã hãpxop xohix xexka yũmmũgãp-tup. Kaxĩy.
\p
\v 26 Ha Yeyox te:
\p —‍Yã hamũn, yãg mũn, nõm te ꞌãmũtik hãmꞌãktux. Kaxĩy.
\p
\v 27 Ha taꞌ nũn Yeyox yõg tik xop, tu nũktuꞌ pẽnãhãꞌ Yeyox te hãmꞌãktux ꞌũn mũtik, tuꞌ yẽy, tu ꞌũn puꞌ yĩkopit ꞌohnãg, hu: “Putep putup?” Kaxĩy. Tu Yeyox puꞌ yĩkopit ꞌohnãg, hu: “Tep mũn ꞌãktux?” Kaxĩy.
\p
\v 28 Ha ꞌũn te yãy yõg naxtox nĩm, tu taꞌ mõg kõmẽn tuꞌ, tu tikmũꞌũn pu hãmꞌãktux, hu:
\p
\v 29 —‍Mã, nũy pẽnã tihik, tuteꞌ xuktux ꞌãte hãpxopmã xohix xexkaꞌ. ꞌOk nõꞌõm yã Kunnix, yã Topa te nõm yãykutnãhãꞌ? Kaxĩy.
\p
\v 30 Ha taꞌ mõg tikmũꞌũn, nũy Yeyox pẽnãꞌ.
\p
\v 31 Ha taꞌ pip Yeyox yõg tik xop, tu Yeyox mũtik hãmꞌãktux, hu:
\p —‍Yãyã, ꞌãpu ꞌãxitꞌax mãꞌ. Kaxĩy.
\p
\v 32 Ha:
\p —‍ꞌŨxip xitꞌax yõgnũꞌ xateꞌ yũmmũgꞌah. Kaxĩy.
\p
\v 33 Ha Yeyox yõg tik xop te yãy mũtik hãmꞌãktux, hu:
\p —‍ꞌOk tikmũꞌũn te tuꞌ hõm ꞌũxitꞌax? Kaxĩy.
\p
\v 34 Ha Yeyox te:
\p —‍Pute ꞌũm ꞌũgxitꞌax? Yã ꞌãte hãpxopmã Topa te nõm putup. Yã ꞌũgxitꞌax putuk. Topa te nũgkutnãhãꞌ, hak hãm kuxyãp-tup. Yã ꞌãte Topa puk hãm, yãꞌ xitꞌax putuk. Yã ꞌãxop tep-tuppax ꞌãxitꞌax, ha ꞌãtep-tuppax ꞌũghãm Topa te nõm putup.
\v 35 Xate hãmꞌãktux, hu: “Mãyõnhex ꞌãnuk xohix teꞌ 4 nõg putup, ꞌĩhãꞌ taꞌ mĩntaꞌ.” Kaxĩy. Pa ꞌãte xa hãmꞌãktux, hãmpẽnãꞌ! Hõnhã ꞌũtaꞌ. ꞌŨnũnnãꞌ, puꞌ max hõnhãꞌ. Pẽnã tikmũꞌũn nũn hõnhã, nũy kuxa mãm ꞌũgkopah, yã mĩnta ta nũnnã putuk hõnhã.
\v 36 Tikmũꞌũn te mĩnta ta nũnnãhãꞌ, ha xuxyã te tuꞌ pago. Hã kaxĩy nõm te ꞌãtu tikmũꞌũn nũnnãhãꞌ, puyĩy hi xeꞌẽgnãg mõkumaꞌmõg, haꞌ kux ꞌohnãg, yĩy taꞌ kuxa hittup nõm te hãpxop xap xok xix nõm te mĩnta ta nũnnãhãꞌ, yãꞌ hittup ꞌũtix. Hã kaxĩy tik te tikmũꞌũn puk mũn yũmmũgãhãꞌ, ha taꞌ nõy te tikmũꞌũn mãmmãhã ꞌũgkopah, yãꞌ kuxa hittup ꞌũtix.
\v 37 Yã hãmꞌãktux xeꞌeꞌ: “Tik te hãpxop xap xok, ha taꞌ nõy te mĩnta ta nũnnãhãꞌ”. Kaxĩy. Hã kaxĩy tik te tikmũꞌũn puk mũn yũmmũgãhãꞌ, ha taꞌ nõy te tikmũꞌũn kuxa mãmmãhã ꞌũgkopah.
\v 38 ꞌÃte mõ ꞌãxop pok, xa mĩnta ta nũnnãꞌ. Xate hãmxa ꞌohnãg. ꞌŨnoy te hãm xahaꞌ, ha xate mĩnta nũnnãhãꞌ. Yã xate tikmũꞌũn kuxa mãmmãhã ꞌũgkopah. Kaxĩy.
\p
\v 39 Ha taꞌ kuxa mãm kaꞌok Yeyox kopa kõmẽn Xãmãnit yõg tikmũꞌũn xohix. Yã ꞌũn te hãmꞌãktux, hu: “Mã, nũy pẽnã tihik, tute hãmꞌãktux ꞌãte hãpxopmã xohix xexkaꞌ”. Kaxĩy.
\v 40 Taꞌ nũn kõmẽn Xãmãnit yõg tikmũꞌũn, tu nũktu Yeyox tuꞌ kax, pu nox xip. Haꞌ nox tihiꞌ nũmũtik ꞌãmnĩy tix hã.
\p
\v 41 Ha xe xape xohix te Yeyox yõg hãmꞌãktux ꞌãpak, huꞌ kuxa mãm kaꞌok Yeyox kopah, 
\v 42 tu ꞌũn pu hãmꞌãktux, hu:
\p —‍Hõmã ꞌũgmũꞌãte ꞌõg hãmꞌãktux ꞌãpak, pa hõnhã Yeyox yõg hãmꞌãktux ꞌãpak, huꞌ yũmmũg Yeyox te hãm xexka yõg tikmũꞌũn kuxa kummuk xit, nũy kuxa max mõꞌtat, ꞌũyãnãn tuꞌ. Kaxĩy.
\s Yeyox te tik xexkak-tok hittupmãhãꞌ
\p
\v 43 ꞌÃmnĩy tix nõg, ha taꞌ mõg Yeyox hãpxexka Ganinet tuꞌ.
\v 44 Yã, hõmã Yeyox teꞌ xuktux hu: “ꞌŨxape xop te Topa pupi hãmꞌãktux xop ꞌãpak ꞌohnãg yãy yõg hãm tuꞌ, pa hãm nõy yõg tikmũꞌũn te nõm ꞌãpak. Kaxĩy.
\p
\v 45 Taꞌ nũn Yeyox, tu nũktuꞌ xupep hãpxexka Ganinet tuꞌ, ha Ganinet yõg tikmũꞌũn tep-tup Yeyox. Yã hõmã Ganinet yõg tikmũꞌũn teꞌ pẽnãhã Yeyox te hãpxopmã kaꞌok xeꞌẽgnãg punethok kõmẽn Yenoyanẽn tuꞌ, ꞌĩhãꞌ xip ꞌãmuk xexka ꞌãxetꞌax Nõãꞌyẽn.
\p
\v 46 Ha taꞌ mõg Yeyox, tu mõktuꞌ xupep kõmẽn Kãnã tuꞌ hãpxexka Ganinet kopah. Yã hõmã Yeyox te kõnãg hã xupyãg mĩy Kãnã tuꞌ, yã yãyhã xupyãg.
\p Ha taꞌ xip Kãnã tu kõmẽn Kapãnãm yõg tik xexkaꞌ hak-tok pakut.
\v 47 Tik te Yeyox nũn ꞌãpak, tu taꞌ mõg, tu mõktu Yeyox tuꞌ kax, pu nũꞌ, nũyk-tok pit hittupmãꞌ, yã ꞌũxok putũmnãg.
\v 48 Ha Yeyox te:
\p —‍ꞌÃte hãpxopmã kaꞌok xeꞌẽgnãg ꞌohnãg, ha ta ꞌãkuxa yũm ꞌohnãg. Kaxĩy.
\p
\v 49 Ha tik te:
\p —‍Yãyã, mã hõnhã mõꞌkaꞌok. ꞌŨxok putũmnãg ꞌũgkutok! Kaxĩy.
\p
\v 50 Ha Yeyox te:
\p —‍Mõg, ꞌãk-tok hip-tup. Kaxĩy.
\p Ha tik kuxa yũm Yeyox yõg hãmꞌãktux kopah, tu taꞌ mõg,
\v 51 pa yõg kãmãnat xip putat kopah, tu hãmꞌãktux, hu:
\p —‍ꞌŨhi ꞌãk-tok. Kaxĩy.
\p
\v 52 Ha tik te:
\p —‍Piꞌyãꞌ yũm mãyõn, ꞌĩhãꞌ hittup kõnãmãhãꞌ? Kaxĩy.
\p Ha:
\p —‍Yã mãyõn te yãy koteꞌ yũm, ꞌĩhã xuxiꞌ. Kaxĩy.
\p
\v 53 Ha tik teꞌ yũmmũg yã mãyõn te yãy koteꞌ yũm ꞌĩhã Yeyox te: “ꞌÃk-tok hip-tup”. Kaxĩy.
\p Ha tik kuxa mãm Yeyox kopah, xixꞌ xape xop kuxa mãm kamah.
\p
\v 54 Yã Yeyox te hãpxopmã kaꞌok xeꞌẽgnãg tix hãpxexka Ganinet tuꞌ. Yã hõmã Yeyox xip hãpxexka Yonex tuꞌ, tu taꞌ nũn hãpxexka Ganinet tuꞌ.
\c 5
\s Yeyox teꞌ hittupmãhã tik yĩn mõg hok
\p
\v 1 Hãpxip ꞌĩhãꞌ xipꞌax Yoneo xop yõg ꞌãmuk xexka kõmẽn Yenoyanẽn kopah, ha taꞌ mõg Yeyox Yenoyanẽn tuꞌ, tu mõktuꞌ xupep.
\v 2 ꞌŨxup puxhep max kõmẽn yõg hãmpakꞌax yĩkox yĩkah. Yã hãmyĩkox ꞌũxuxetꞌax kahnẽn yõg hãmyĩkox, ha puxhep max ꞌũxuxetꞌax Metex, yã Yoneo xop yĩyꞌax kopah. Yãꞌ pip kuxkaxax xohix teꞌ 5 puxhep max yĩmap.
\v 3 Ha kuxkaxax kopaꞌ pip pakut xop, yãꞌ pa hok xop xix hãpkumep hok xop xix yĩn mõg hok xop. ꞌŨxohix te kõnãg yoꞌok hip.
\v 4 Hãpxip ha taꞌ xupep pexkox yõg nũꞌkutnãꞌax, tu kõnãg kanop, ha ta pakut xop mõg kõnãg hah, ha nõm mõꞌnãhã hãmãxap, puxix tuꞌ hittup.
\p
\v 5 Ha taꞌ xip tihik, tuꞌ pakutpax hãmyãxatamuk xohix teꞌ 38 hã.
\v 6 Ha Yeyox teꞌ pẽnãhãꞌ, tuꞌ yũmmũg tik pakut mõkumaꞌmõg, ha Yexox te:
\p —‍ꞌOk xatep-tup ꞌãhittup? Kaxĩy.
\p
\v 7 Ha tik pakut te:
\p —‍Yãyã, ꞌap xipꞌah ꞌũnõy, nõm tek mõgãhã puxhep max tuꞌ, ꞌĩhã kõnãg yoꞌok. ꞌÃte mĩkaxxap kuꞌĩn hãg yĩxohoh, paꞌ nõy xupep hãmãxap. Kaxĩy.
\p
\v 8 Ha Yeyox te:
\p —‍Pu ꞌãg-nĩhã xip! ꞌÕg ꞌĩxtet paꞌ, nũy ta mõg! Kaxĩy.
\p
\v 9 Ha tik hittup mõꞌkaꞌok, tu ꞌĩxtet pahaꞌ, tu taꞌ mõg.
\v 10 Paꞌ pip Yoneo xop, tu tik pu hãmꞌãktux, hu:
\p —‍Hõnhã nit xap. Yãꞌ kaxꞌãmi tikmũꞌũn yõg xatꞌax yõg tappet tuꞌ, tu hãmꞌãktux, hu: “Nit xap hã ꞌĩxtet tat hok”. Kaxĩy.
\p
\v 11 Ha tik te:
\p —‍Tik tek hittupmãhãꞌ, tu ꞌã hãmꞌãktux, hu: “Pu ꞌõg ꞌĩxtet paꞌ, nũy ta mõg. Kaxĩy.
\p
\v 12 Ha:
\p —‍ꞌŨꞌũm tihik nõꞌõm, nõm te hãmꞌãktux hu: “Pu ꞌõg ꞌĩxtet paꞌ”? Kaxĩy.
\p
\v 13 Pa tik teꞌ yũmmũg ꞌohnãg, yãꞌ mõg Yeyox. Yãꞌ pip tikmũꞌũn xohix ꞌõnteh, yĩy taꞌ mõg.
\p
\v 14 Hãpxip ꞌĩhãꞌ mõg Yeyox Topa pet xexka haꞌ, tu mõktu tik xipihiꞌ, tu:
\p —‍ꞌÃpu yãy pẽnãꞌ, yã ꞌãhittup. Pu ꞌũxe hãpkummuk mĩy hok. Hãpkummuk mĩy, nũy ta putpu ꞌãpakut xexkanãm. Kaxĩy.
\p
\v 15 Taꞌ mõg tihik, tu Yoneo xop pu hãmꞌãktux hu:
\p —‍Yeyox tek hittupmãhãꞌ. Kaxĩy.
\p
\v 16 Yĩy taꞌ gãy Yoneo xop, hu Yeyox kuteꞌex kummuk. Yã nit xap ꞌĩhã tik hittupmãhãꞌ.
\p
\v 17 Pa Yeyox te tu hãmꞌãktux, hu:
\p —‍Yõgnũ ꞌãtak hãm mõkumaꞌmõg, tuꞌ hup ꞌohnãg, ha tak hãm kamah. Kaxĩy.
\p
\v 18 Yĩy taꞌ gãy xexka Yoneo xop, hu Yeyox putex putup. Yã Yeyox te nit xap yõg xatꞌax koxyõy, tu Topa ꞌãktux hu: “Yognũ ꞌãtak”. Kaxĩy. Yã Topa putuk Yeyox. Yĩy taꞌ gãy Yoneo xop.
\s Topak-tok teꞌ xat
\p
\v 19 Ha Yeyox te:
\p —‍ꞌÃte hãmꞌãktux xeꞌe, ꞌap koitꞌah. ꞌŨgmũn, yã ꞌãtak kutok pit, tu yãp-xehnãg hã hãpxopmã ꞌohnãg, pa yõg ꞌãtak te hãpxopmãꞌ, ha ꞌãteꞌ pẽnãhãꞌ, tu kamaꞌ mĩy, hãꞌ putuk.
\v 20 ꞌÃtak te mõgyãy xeꞌẽgnãg, yã mõ yãy kutok yãy xeꞌẽgnãg, tuk-tok pu yãy yõg hãpxopmãꞌax xohix mũg, puyĩy pẽnãꞌ. Hõnhã tute tikmũꞌũn pu hãpxopmãꞌax mũg, ta hãpxip ꞌĩhã hãpxopmãꞌax max xeꞌẽgnãg mũg putup, xayĩy ꞌãkuxa yẽy.
\v 21 Yõgnũ ꞌãtak te xakix xop putpuꞌ hĩnnãhãꞌ, yã tuteꞌ hĩnnãhãꞌ, xixk mũn Topak-tok te tikmũꞌũn hĩnnãhã kamah, tu tikmũꞌũn ꞌũm putup tu nõm hĩnnãhãꞌ.
\v 22 Yõgnũ ꞌãtak te tikmũꞌũn yõg hãpxopmãꞌax kopit ꞌohnãg, nũy yõg hãpkummuk mĩꞌax hã yãnãn ꞌohnãg. Tute yãy kutok xat, pu kopit,
\v 23 puyĩy ꞌũgmũn pe tu paxeh xexkah, yã tikmũꞌũn te ꞌãtak peꞌpaxex xexka putuk. Tikmũꞌũn ꞌũm tek-tok peꞌpaxex xexka ꞌohnãg, tu ꞌãtak peꞌpaxex xexka ꞌohnãg kamah. Yã ꞌãtak te yãy kutok nũꞌkutnãhãꞌ.
\p
\v 24 —‍Nũhũ yã hãmꞌãktux xeꞌeꞌ. Tikmũꞌũn ꞌũm te yõgnũ hãmꞌãktux ꞌãpak, tu Topa kopaꞌ kuxa mãm kaꞌok, puxix hi xeꞌẽgnãg mõkumaꞌmõg, haꞌ kux ꞌohnãg. Topa te nũgkutnãhãꞌ. ꞌÃte nõm yõg hãpkummuk mĩyꞌax hã yãnãn putupꞌah, haꞌ xakix xeꞌe putupꞌah, paꞌ hi xeꞌẽgnãg mõkumaꞌmõg, haꞌ kux ꞌohnãg.
\v 25 Nũhũ hãmꞌãktux xeꞌe. Hãpxip ꞌĩhã, yã hõnhã ꞌĩhã kamah, xakix xop te Topak-tok yõg hãmꞌãktux ꞌãpak putup, tuꞌ xupak xop hip-tup.
\v 26 ꞌÃtak kopaꞌ xip ꞌũhiꞌax, yã tute hiꞌax hõm. Tute yãy kutok puꞌ hõm, haꞌ xip ꞌũhiꞌax Topak-tok pit kopah. ꞌŨgmũn, yã Topak-tok, tu hiꞌax hõm kamah,
\v 27 ha ꞌãtak te yãy kutok xat, pu tikmũꞌũn yõg hãpkummuk mĩyꞌax kopit. Hamũn, ꞌũgmũn yã Tikmũꞌũn Kutok.
\p
\v 28 —‍Texĩy ꞌãkuxa teꞌ yẽy? Hãpxip ꞌĩhã xukpot tu xakix xohix xop te yõgnũ hãmꞌãktux ꞌãpak putup,
\v 29 tu xukpot nĩm putup, tu taꞌ mõg. Nõm te hãpxopmã max te putpuꞌ hip-tup, tu hi xeꞌẽgnãg mõkumaꞌmõg, haꞌ kux ꞌohnãg, ha ta nõm te hãpkummuk mĩy te putpuꞌ hip-tup, haꞌ kopit putup ꞌũyõg hãpkummuk mĩyꞌax, nũy hãpkummuk mĩyꞌax hãꞌ yãnãn.
\s Yeyox teꞌ xat
\p
\v 30 Yeyox te xe:
\p —‍ꞌÃte yãp-xehnãg hã hãpxopmã ꞌohnãg, pa Topa te hãmꞌãktux, ha ꞌãteꞌ xupak ꞌũxohix xexkah. Hã kaxĩy ꞌãte tikmũꞌũn yõg hãpxopmãꞌax kopit, tuꞌ kopit xeꞌeꞌ. ꞌÃteꞌ mĩy ꞌohnãg ꞌãte nõm putup, pa ꞌãteꞌ mĩy Topa te nõm putup. Tute nũgkutnãhã ꞌũgmũn.
\p
\v 31 —‍ꞌÃte yãy ꞌãktux, ha ta ꞌãxop hãmꞌãktux, Yeyox maxꞌah, yã hãmꞌãktux ꞌap xeꞌeꞌah.
\v 32 Paꞌ nõy tek mũn ꞌãktux kamah. Yã ꞌãtak tek mũn ꞌãktux kamah. ꞌÃteꞌ yũmmũg tutek mũn ꞌãktux xeꞌeꞌ.
\v 33 Hõmã ꞌãxop te mõꞌ nõy pok Yoãm hah, ha Yoãm tek mũn ꞌãktux xeꞌeꞌ.
\v 34 ꞌAp ꞌãtep-tupꞌah, pu tikmũꞌũn tek mũn ꞌãktux. Pa ꞌãte xa Yoãm ꞌãktux, xayĩy ꞌãxop Yoãm yõg hãmꞌãktux ꞌãpax, puyĩy Topa ꞌãxop kuxa kummuk xit, nũy kuxa max mõꞌtat, ꞌũyãnãn tuꞌ.
\p
\v 35 —‍Yoãm te kuyãnãm tatꞌax putuk, ha xatep-tup, tu ꞌãkuxa hittup Yoãm yõg kuyãnãm kopah. Yã kuyãnãm xip, ha tikmũꞌũn te hãmyũmmũg, tu Topa yõg putat max pẽnãhãꞌ. Yãꞌ xip Yoãm, ha tikmũꞌũn tek mũn yũmmũg xix hãmmax yũmmũg.
\v 36 Yoãm tek mũn ꞌãktux, yãꞌ max. Pa ꞌãte hãpxopmã max. Yãꞌ max xeꞌẽgnãg. Yõg ꞌãtak te nũgkutnãhãꞌ, ꞌũyĩy hãpxopmã kaꞌok xeꞌẽgnãg. Nõm te xak mũn mũg, ha xateꞌ yũmmũg yõgnũ ꞌãtak te nũgkutnãhãꞌ.
\v 37 ꞌÃtak tek mũn ꞌãktux max kamah. Tute nũgkutnãhã nũnteh. ꞌA xate Topa te hãmꞌãktux ꞌãpakꞌah, tu Topa pẽnã ꞌohnãg,
\v 38 ha ꞌap xip kaꞌokꞌah Topa yõg hãmꞌãpak maxꞌax ꞌãkuxa kopah, ꞌãkuxa mãm ꞌohnãg Topa yõg hãmꞌãpak maxꞌax kopah hah. Topa te nũgkutnãhãꞌ, pa ꞌãkuxa mãm ꞌohnãg ꞌũgkopah.
\v 39 ꞌÃxop te Topa yõg tappet mõkupix punethok, tu hãmpeꞌãpaxex Topa yõg tappet mõkupix, xayĩy hi xeꞌẽgnãg mõkumaꞌãmõg, haꞌ kux ꞌohnãg. Pa ꞌãmhok. Yã Topa yõg tappet tek mũn ꞌãktux,
\v 40 pa ꞌa ꞌãxop tep-tupꞌah, nũy ꞌũg ha nũꞌ, nũy hi xeꞌẽgnãg mõkumaꞌãmõg, haꞌ kux ꞌohnãg.
\p
\v 41 —‍ꞌA ꞌãteꞌ xakꞌah, pu tikmũꞌũn ꞌũgmũn ꞌãktux max.
\v 42 Yã ꞌãte ꞌãxop yũmmũg, yã ꞌãxop te Topap-tuppax ꞌohnãg ꞌãkuxa hã.
\v 43 Yõgnũ ꞌãtak te ꞌãꞌ hõm yãy yõg xuxetꞌax, ha ꞌãte yãy ꞌãtak pupik xip, pa ꞌa ꞌãxop tek mũn pa ꞌohnãg ꞌãkuxa hã. Yã ꞌãxop tek putup nõg. Ha taꞌ nõy nũn, yã ꞌũyãy yõg xuxetꞌax hãꞌ nũn, ha ta ꞌãxop nõy pap-tup ꞌãkuxa hã, tuꞌ nõy putup pax putup.
\v 44 ꞌÃxop tep-tup, pu tikmũꞌũn ꞌãxop ꞌãktux max, pa ꞌãxop tep-tupꞌah, pu Topa mũn ꞌãxop ꞌãktux max. Texĩy ꞌãkuxa mãm putup?
\v 45 Hãmpeꞌãpaxex hok ꞌãte yõgnũ ꞌãtak pu ꞌãxop ꞌãktux kummuk putup. ꞌÃmhok. ꞌÃkuxa mãm Mõyyex kopah, ha Mõyyex te Topa pu ꞌãxop ꞌãktux kummuk putup.
\v 46 ꞌÃkuxa mãm xeꞌe Mõyyex kopah, nũy ta ꞌãxop kuxa mãm ꞌũgkopah, tuk mũn ꞌãpak. Hamũn Mõyyex tek mũn kaxꞌãmiꞌ.
\v 47 Pa ꞌãkuxa mãm xeꞌe ꞌohnãg Mõyyex yõg tappet kopah. Texĩy ꞌãxop kuxa mãm putup yõgnũ hãmꞌãktux kopah, tu nõm ꞌãpak? Kaxĩy.
\c 6
\s Yeyox te tikmũꞌũn pu xitꞌax nĩm
\p
\v 1 Hãpxip ꞌĩhãꞌ mõg Yeyox, tu kõnãg xexka xak, yã kõnãg xexka ꞌãxetꞌax Ganinet yõg xix ꞌãxetꞌax nõy yã Timenit.
\v 2 Ha tikmũꞌũn xohix te Yeyox peꞌ mõg. Yã Yeyox te hãpxopmã kaꞌok xeꞌẽgnãg, tu pakut xop hittupmãhãꞌ, ha tikmũꞌũn teꞌ pẽnãhãꞌ, huꞌ peꞌ mõg.
\p
\v 3 Ha taꞌ mõg Yeyox xix yãy yõg tik xop yĩktix tuꞌ, tuꞌ mãm.
\v 4 Haꞌ xipꞌax Yoneo xop yõg ꞌãmuk xexka ꞌãxetꞌax Nõãꞌyẽn.
\v 5 Ha Yeyox teꞌ pẽnãhãꞌ, paꞌ nũn tikmũꞌũn xohix, ha Yeyox te Pinip pu hãmꞌãktux, hu:
\p —‍Piꞌyã yũmũꞌãteꞌ popꞌax xitꞌax tikmũꞌũn xohix puꞌ? Kaxĩy.
\p
\v 6 Yã Yeyox te nõm ꞌãktux, nũy Pinip yõg hãpxopmãꞌax kopit. Yã Yeyox teꞌ yũmmũg tute hãpxopmãp-tup.
\p
\v 7 Ha Pinip te:
\p —‍Pãm yõg tayũmak xohix. Yã tik hãm mey teꞌ 4, nũy tayũmak pop, nũy nõm hãꞌ pop pãm, ha ta tikmũꞌũn te pãm kutõgnãg mãp-tup. Kaxĩy.
\p
\v 8 Ha ꞌÃnene te hãmꞌãktux, yã ꞌÃnene te Yeyox yõg tik xop kopaꞌ xip, yã Pet taknõy. ꞌÃnene te:
\p
\v 9 —‍ꞌŨxip nũnte kakxop pit, tu yõg pãm te xemat hãꞌ mĩy, tuꞌ xohix teꞌ 5, xix yõg mãm tix pip kamah. Tu texĩy tikmũꞌũn xohix puꞌ? Kaxĩy.
\p
\v 10 Ha Yeyox te:
\p —‍ꞌÃpu ꞌũxat, pu tikmũꞌũn mãhãm. Kaxĩy. Yãꞌ xux xohix pip. Haꞌ xat, haꞌ mãm tikmũꞌũn, yãꞌ xohix teꞌ 5.000 tihik, ha ꞌũn pip kamah xix kakxop.
\v 11 Ha Yeyox te pãm pop, tu Topa pu hãmꞌãktux, hu:
\p —‍ꞌŨmax pãm xix mãhãm. Puxiꞌ. ꞌÃmax. Kaxĩy.
\p Tu pãm koxip, tu tikmũꞌũn puꞌ nĩm, tu mãm koxip kamah, tu tikmũꞌũn puꞌ nĩm, ha tikmũꞌũn te xohix pop, hu taꞌ kux, ꞌap nõy putupꞌah. Puxix.
\v 12 Tuꞌ mã kux, tuꞌ hix kaꞌok, ha Yeyox te yãy yõg tik xop pu:
\p —‍ꞌÃpu yã ꞌãxitꞌax yãg xohix mãm tikmũꞌũn te nõm putupꞌah. Nõm putyõn hok. Kaxĩy.
\p
\v 13 Ha Yeyox yõg tik xop teꞌ xitꞌax yãg mãm, tu manax hãꞌ tat, yã manax xohix teꞌ 12, tikmũꞌũn te nõm mã ꞌohnãg. Yã Yeyox te pãm xemat teꞌ 5 hãꞌ mĩy xohix.
\p
\v 14 Ha tikmũꞌũn teꞌ pẽnãhãꞌ, yã Yeyox te hãpxopmã kaꞌok xeꞌẽgnãg. Tikmũꞌũn te:
\p —‍Topa yõg tappet tuꞌ xuktux, ꞌũnũn putup tik te Topa pupi hãmꞌãktux hãm xexka tuꞌ. Hamũn, Yeyox yã nõꞌõm. Kaxĩy.
\p
\v 15 Tikmũꞌũn tep-tup, nũy Yeyox mõgã mõꞌkaꞌok, nũy Yeyox mĩy tikmũꞌũn yõg xatꞌax, pa Yeyox teꞌ yũmmũg, hu taꞌ mõg yĩktix tuꞌ, tu yãp-xehnãg xip.
\s Yeyox te kõnãg yĩmũꞌ mõg pata hã
\p
\v 16 ꞌÃmãxak ha taꞌ mõg Yeyox yõg tik xop, tu yĩktix tu yĩxohoꞌ tu mõktuꞌ mõxaha kõnãg xexka tuꞌ,
\v 17 tu mĩpkox tuꞌ mõxahaꞌ, tu nõm mõxakux, tu kõnãg tuꞌ mõg kõmẽn Kapãnãm tuꞌ. ꞌÃmnĩy, ha taꞌ xupep ꞌohnãg Yeyox yãy yõg tik xop tuꞌ.
\v 18 Pa ꞌãmuuh xexka te mõꞌkouk, ha kõnãg tot xexkah,
\v 19 ha Yeyox yõg tik xop te mĩpkox mõgãhãꞌ, tu mõktu 5 kĩnõm haꞌ mõg peꞌ 6 haꞌ mõg, tuꞌ pẽnãhãꞌ, paꞌ xip Yeyox, ha kõnãg yĩmũꞌ hãpkumep, yãꞌ kõnãg yĩmũꞌ mõg pata hã, tu mĩpkox yĩkaꞌ nũn, ha taꞌ yĩpkutuk Yeyox yõg tik xop,
\v 20 ha Yeyox te:
\p —‍ꞌŨgyĩpkutuk hok, yãg mũn. Kaxĩy.
\p
\v 21 Tu ta mĩpkox hã mõꞌnãhã Yeyox, yĩy taꞌ hittup Yeyox yõg tik xop, yã mõꞌnãhãꞌ, ta hãpxip ꞌohnãg ha taꞌ xupep mĩpkox hãpkux nõy tuꞌ.
\s Tikmũꞌũn te Yeyox xak
\p
\v 22 Hãptup ha ta tikmũꞌũn te kõnãg xexka xatapaꞌ pip hãpkux nõy tuꞌ, tuꞌ pẽnãhã mĩpkox kutõgnãg yãp-xehnãg mõg nõm te Yeyox yõg tik xop tat, pa Yeyox mõꞌtat ꞌohnãg.
\p
\v 23 Ha taꞌ nũn kõmẽn Timenit tuꞌ mĩpkox xape xohix, tu nũktuꞌ mõxaha hãpkux tuꞌ. Yã hõmã tikmũꞌũn te pãm mãhã ꞌõnteh. Yã Yeyox te Topa pu pãm ꞌãktux ꞌõnteh.
\v 24 Ha tikmũꞌũn teꞌ pẽnãhã ꞌap xipꞌah Yeyox, ha Yeyox yõg tik xop ꞌap pipꞌah kamah. Tikmũꞌũn te mĩpkox tuꞌ mõxahaꞌ, tu taꞌ mõg kõmẽn Kapãnãm tuꞌ, nũy Yeyox xax.
\s Yeyox te pãm putuk, tu tikmũꞌũn hĩnnãhãꞌ
\p
\v 25 Tu taꞌ mõg tikmũꞌũn, tu kõnãg xexka xak, tu mõktuꞌ mõxaha hãpkux nõy tuꞌ, tu Yeyox xak, tuꞌ xipihiꞌ, tu Yeyox pu:
\p —‍Notot, hãmꞌũmhã ꞌãxupep nũnteh? Kaxĩy.
\p
\v 26 Ha:
\p —‍ꞌÃte xa hãpxeꞌe ꞌãktux. ꞌÃxop tek xak, xayĩy pãm mãꞌ, tu mõktu ꞌãhix kaꞌok. ꞌÃte hãpxopmãꞌ, pa ꞌãxop te nõm yũmmũg ꞌohnãg. ꞌŨgkaꞌok, pa ꞌãxop te nõm yũmmũg ꞌohnãg.
\v 27 ꞌÃpu pãm xax hok, yã hãpxip kutõgnãg ꞌĩhãg-nox pãm. ꞌÃpu pãm nõy xax, yãꞌ nõy xip kaꞌok hãmyãxatamuk xohix kux ꞌohnãg hã. ꞌŨgmũn, yã Tikmũꞌũn Kutok, tu xaꞌ popmãp-tup pãm nõꞌõm. Hamũn, Topa tek xat, ꞌũꞌ hõm nõꞌõm. Kaxĩy.
\p
\v 28 Ha tikmũꞌũn te:
\p —‍Topa te putep putup, pu tikmũꞌũn mĩy? Kaxĩy.
\p
\v 29 Ha Yeyox te:
\p —‍Topa tep-tup nũhũꞌ. Tutep-tup, pu tikmũꞌũn kuxa mãm nõm kopah Topa te nõm nũꞌkutnãhãꞌ. Kaxĩy.
\p
\v 30 Ha tikmũꞌũn te:
\p —‍ꞌÃpu hãpxopmã kaꞌok xeꞌẽgnãg, puyĩy tikmũꞌũn kuxa mãm ꞌãkopah. Putep mũn mĩy putup?
\v 31 Hõmã ꞌũhittap yũmũ yõg mõnãyxop teꞌ mãhã nõm te pãm putuk ꞌũxuxetꞌax mãnãꞌ, yã hãm panip xexka tuꞌ mãhãꞌ. Hãmũn, Topa yõg tappet te: “Topa te pexkox tuꞌ putxok pãm, puyĩy tikmũꞌũn mãꞌ. Kaxĩy.
\p
\v 32 Ha Yeyox te:
\p —‍ꞌÃte xa hãpxeꞌe ꞌãktux. ꞌAꞌ Mõyyex te xaꞌ põpmã ꞌohnãg pexkox yõg pãm, pa yõgnũ ꞌãtak te xaꞌ popmãhã pexkox yõg pãm xeꞌeꞌ.
\v 33 Topa te pãm ꞌũm popmãhãꞌ? Yã nõm te pexkox tuꞌ nũn, ha nõm te tikmũꞌũn xohix hĩnnã mõkumaꞌmõg, haꞌ kux ꞌohnãg. Kaxĩy.
\p
\v 34 Ha tikmũꞌũn te:
\p —‍Notot, ꞌãpu ꞌũgmũꞌã popmãꞌ nõꞌõm pãm. ꞌÃpu nõm popmã mõkumamõg. Kaxĩy.
\p
\v 35 Ha Yeyox te:
\p —‍ꞌÃte pãm putuk nõꞌõm pexkox yõg. Pãm te tikmũꞌũn hĩnnãhãꞌ, ha ꞌãte tikmũꞌũn hĩnnãhãꞌ, puyĩy hi xeꞌẽgnãg mõkumaꞌmõg. Tikmũꞌũn tek haꞌ nũn, puxix putup xũy nõãp-tup ꞌũkuxa kopah. Tikmũꞌũn tek mũn kopaꞌ kuxa mãm, puxix kõnãg putup xũy putuk nõãp-tup ꞌũkuxa kopah, yã ꞌa xe kõnãg putup xũy putuk xip putupꞌah ꞌũkuxa kopah.
\v 36 Pa ꞌãte xaꞌ xuktux, ꞌãxop tek pẽnãhãꞌ, pa ꞌãkuxa mãm kaꞌok ꞌohnãg.
\v 37 Yõgnũ ꞌãtak te ꞌãꞌ popmãhã tikmũꞌũn, puyĩyꞌ kuxa mãm ꞌũgkopah, ha nõm tek haꞌ nũn putup, ha ꞌãte xohix pop putup, tu ꞌãtep-tup nõg ꞌohnãg putup, yã yõg xop, ꞌãte mõ nõm yãy xeꞌẽgnãg.
\v 38 Hamũn, ꞌãte pexkox tuk nũn tuk yĩxohoꞌ, nũy mĩy Topa te nõm putup. Yã tute nũgkutnãhãꞌ. ꞌAk nũnꞌah, nũy mĩy ꞌãte nõm putup.
\v 39 Topa te nũgkutnãhãꞌ, ꞌũyĩy hãpxopmãꞌ, yã ꞌãte yãy yõg tikmũꞌũn xaxok ꞌohnãg. Yã nõm teꞌ kuxa mãmꞌax xaxok putupꞌah, ha Hãmgãyãgnãg te nõm pop putupꞌah. ꞌÃtak te ꞌã nõm popmãhãꞌ, ha ꞌãte nõm putpuꞌ hĩnnãp-tup hãmyãxatamuk xohix xox putox ꞌĩhãꞌ.
\v 40 Hamũn, yõgnũ ꞌãtak tep-tup hã kaxĩy. ꞌŨp-tup, puyĩy nõm hi xeꞌẽgnãg mõkumaꞌmõg, yã nõm xohix te Topak-tok pẽnãhãꞌ, huꞌ kuxa mãm Topak-tok kopah. Ha ta hãmyãxatamuk xohix xox putox ꞌĩhã putpuꞌ hĩnnãp-tup ꞌãteꞌ. Kaxĩy.
\p
\v 41 Ha Yoneo xop te Yeyox ꞌãktux kummuk kõnãmãhãꞌ. Yã Yeyox te: “ꞌŨgmũn yã pãm putuk, nõm te pexkox tuꞌ yĩxhohoꞌ”. Kaxĩy.
\p
\v 42 Ha Yoneo xop te:
\p —‍Yã tihik nũhũꞌ, yã Yeyox. ꞌOk Yoyek-tok? Yũmũꞌãteꞌ yũmmũg ꞌũyõg ꞌãtak xiꞌ tut. Teptu hãmꞌãktux pexkox tuꞌ yĩxohoꞌ? Kaxĩy.
\p
\v 43 Ha Yeyox te:
\p —‍ꞌÃhup. Yãy mũtik hãmꞌãktux kummuk hok!
\v 44 Yõgnũ ꞌãtak tek ha tikmũꞌũn nũnnãhãꞌ, yãꞌ kuxa mãm ꞌũgkopah. Ha Topa te tikmũꞌũn nũnnãp-tupꞌah, yãꞌ kuxa mãm putupꞌah ꞌũgkopah. Ha ta hãmyãxatamuk xohix xox putox ꞌĩhã ꞌãte yãy yõg xop putpuꞌ hĩnnãp-tup.
\v 45 Hõmã ꞌũhittap tik te Topa pupi hãmꞌãktux xop teꞌ kaxꞌãmi, hu: “Topa te tikmũꞌũn xohix xexka pu hãmyũmmũgãhãꞌ. ꞌŨxohix te ꞌãtak ꞌãpak, hu hãmyũmmũg, yã nõm xohix ꞌũg haꞌ nũn putup.
\v 46 ꞌAp ꞌãte hãmꞌãktuxꞌah tik ꞌũm te Topa pẽnãhãꞌ. Nõm te Topa haꞌ nũn, yã nõm puxehnãg te Topa pẽnãhãꞌ.
\p
\v 47 —‍ꞌÃte xa hãpxeꞌe ꞌãktux. Tikmũꞌũn kuxa mãm kaꞌok ꞌũgkopah, puxix hi xeꞌẽgnãg mõkumaꞌmõg, haꞌ kux ꞌohnãg.
\v 48 ꞌŨgmũn yã pãm putuk, tu tikmũꞌũn hĩnnãhãꞌ.
\v 49 Hõmã ꞌũhittap mõnãyxop te pãm mãnã mãhã hãm panip xexka tuꞌ, paꞌ xakix pax.
\v 50 Pa tikmũꞌũn ꞌũm te pãm nõy mãhãꞌ, puxix xakix kaꞌok putup ꞌohnãg.
\v 51 ꞌŨgmũn yã pãm putuk, tu tikmũꞌũn hĩnnãhãꞌ, haꞌ hi xeꞌẽgnãg mõkumaꞌmõg, haꞌ kux ꞌohnãg. ꞌÃte pexkox tuk yĩxohoh. Tikmũꞌũn ꞌũm teꞌ mãhãꞌ, puxix hi xeꞌẽgnãg mõkumaꞌmõg, haꞌ kux ꞌohnãg. Pute ꞌũm pãm nõꞌõm ꞌãte tikmũꞌũn pu nõm hõm? Yã yãy yõg yĩn. ꞌÃte yãy yĩn hõm, puyĩy tikmũꞌũn xohix hi xeꞌẽgnãg mõkumaꞌmõg, haꞌ kux ꞌohnãg. Kaxĩy.
\p
\v 52 Ha taꞌ gãy Yoneo xop, tu yãy mũtik hãmꞌãktux, hu:
\p —‍Texĩy tik te yũmũꞌã yãy yĩn hõm, ꞌũ mãꞌ? Kaxĩy.
\p Yã tikmũꞌũn kuxa mãmꞌax teꞌ putuk tikmũꞌũn te Yeyox yĩn mãhãꞌ.
\p
\v 53 Ha Yeyox te:
\p —‍ꞌÃte xa hãpxeꞌe ꞌãktux. Tikmũꞌũn te Tikmũꞌũn Kutok yĩn mã ꞌohnãg, yãg yĩn mã ꞌohnãg, pixix hi xeꞌẽgnãg mõkumaꞌmõg ꞌohnãg. Tikmũꞌũn te Tikmũꞌũn Kutok hep ꞌãta xoꞌop ꞌohnãg, puxix hi xeꞌẽgnãg mõkumaꞌmõg ꞌohnãg.
\v 54 ꞌŨxohix tek yĩn mãhãꞌ, tuk hep ꞌãta xoꞌop, puxix hi mõkumaꞌmõg, haꞌ kux ꞌohnãg, ha ta hãmyãxatamuk xohix xox putox ꞌĩhã ꞌãte nõm putpuꞌ hĩnnãp-tup.
\v 55 Hamũn, ꞌũgyĩn yã xitꞌax xeꞌe, xik hep ꞌãta yã hep xeꞌeꞌ.
\v 56 Tikmũꞌũn ꞌũm tek yĩn mãhãꞌ xik hep ꞌãta xoꞌop, yã nõm kuxa mãm ꞌũgkopah, hak xip kaꞌok nũmũtik.
\v 57 Yõgnũ ꞌãtak te nũgkutnãhãꞌ, tuk hĩnnãhãꞌ. Hã kaxĩy ꞌãte tikmũꞌũn hĩnnãhãꞌ, nõm tek yĩn mãhãꞌ, yãꞌ kuxa mãm ꞌũgkopah.
\v 58 ꞌÃte pãm putuk, tu pexkox tuk yĩxohoh, yãꞌ putukꞌah pãm nõy. Mõnãyxop te nõm mãhãꞌ, paꞌ xakixpax. ꞌŨxohix ꞌũm tek yĩn mãhãꞌ, yãꞌ kuxa mãm ꞌũgkopah, puxix hi xeꞌẽgnãg mõkumaꞌmõg, haꞌ kux ꞌohnãg. Kaxĩy.
\p
\v 59 Hã kaxĩy hãmꞌãktux Yeyox Yoneo yõg Topa pet kopah kõmẽn Kapãnãm tuꞌ.
\s Yeyox yõg hãmꞌãktuxꞌax te tikmũꞌũn hĩnnãhãꞌ
\p
\v 60 Yã hãmꞌãktux ꞌãpak tikmũꞌũn xohix, nõm te Yeyox peꞌ mõg, tu:
\p —‍Yã tute yũmũꞌã hãmyũmmũg kaꞌok yũmmũgãhãꞌ. ꞌŨꞌũm te nõm ꞌãpak, nũy yĩpkox piꞌ? Yã tik ꞌohnãg. Kaxĩy.
\p
\v 61 Hã kaxĩy hãmꞌãktux kummuk Yeyox peꞌ mõg xop. Tikmũꞌũn te Yeyox pu hãmꞌãktux ꞌohnãg, pa Yeyox te tikmũꞌũn yõg hãmꞌãktuxꞌax yũmmũg, tu:
\p —‍ꞌOk yõgnũ hãmꞌãktux te ꞌãxop kuxa nõãꞌ?
\v 62 Paxpu ꞌãxop teꞌ pẽnãhã ꞌũgmũn, yã Tikmũꞌũn Kutok pẽnãhãꞌ, ꞌĩhãg mõg pepix putpuꞌ yãy yõg xipꞌax tuꞌ, nũy ta putep pe ꞌãxop paxex putup?
\v 63 Tikmũꞌũn koxuk pip, puxix hi tikmũꞌũn. Yõgnũ hãmꞌãktux teꞌ koxuk putuk, tu tikmũꞌũn hĩnnãhãꞌ.
\v 64 Paꞌ pip ꞌãxop kopah tikmũꞌũn kuxa mãm ꞌohnãg. Kaxĩy.
\p Yã hõmã ꞌũhittap Yeyox teꞌ yũmmũg mõkumaꞌmõg yãg xop kuxa mãm ꞌohnãg, tu kamaꞌ yũmmũg tik teꞌ gãy xop mõgãp-tup Yeyox hah, puyĩy xũygãꞌ.
\p
\v 65 Ha Yeyox te:
\p —‍Hamũn ꞌãte xa hãmꞌãktux, Topa tek ha tikmũꞌũn nũnnãhã, puxix ꞌũg ha nũꞌ. Pa Topa tek ha tikmũꞌũn nũnnã ꞌohnãg, puxix nũn ꞌohnãg, yã ꞌũgkopaꞌ kuxa mãm putupꞌah. Kaxĩy.
\p
\v 66 Yĩy ta Yeyox nĩm tikmũꞌũn xohix teꞌ, tu xe Yeyox peꞌ mõg ꞌohnãg,
\v 67 ha Yeyox te yãy yõg tik te 12 xop pu:
\p —‍ꞌOk ꞌãxop tek nĩm putup kamah, nũy ta mõg? Kaxĩy.
\p
\v 68 Ha Xĩmãm Pet te:
\p —‍Tep pek mũg mõg putup? ꞌÕg hãmꞌãktuxꞌax tek mũg hĩnnãhãꞌ, hak mũg hi hãmyãxatamuk xohix kux ꞌohnãg hã.
\v 69 ꞌŨgmũꞌãteꞌ yũmmũg ꞌãmũn yã Kunnux, ha Topa te ꞌãmũn yãykutnãhãꞌ. Yã Topa tu ꞌãnũn. Kaxĩy.
\p
\v 70 Ha Yeyox te:
\p —‍ꞌOk ꞌãte ꞌãxop yĩmõgãtux tikmũꞌũn kopah? Pa ꞌãxop kopaꞌ xip yãp-xet, yã Hãmgãyãgnãg xop yõg tik te ꞌãxop kopaꞌ xip. Kaxĩy.
\p
\v 71 Hamũn, Yeyox te Yot ꞌãktux, yã Xĩmãm kutok Yot, yãꞌ xip Yeyox yõg tik te 12 xop kopah, pa hãpxip ꞌĩhã Yot teꞌ gãy xop mõgãp-tup Yeyox hah, puyĩy Yeyox xũygãꞌ.
\c 7
\s Yeyox xixꞌ taknõy xop
\p
\v 1 Taꞌ mõg Yeyox, tu hãpkumep hãpxexka Ganinet tuꞌ. ꞌAꞌ putupꞌah, nũy hãpkumep hãpxexka Yonex tuꞌ, yã Yoneo xexka xop tep-tup, nũy Yeyox putex Yonex tuꞌ.
\v 2 Hãpxip kutõgnãg ꞌĩhãꞌ xipꞌax ꞌãmuk xexka ꞌãxetꞌax Mĩptutnãg Yõg ꞌÃmuk Xexkaꞌ.
\v 3 Ha taꞌ pip Yeyox taknõy xop, tu:
\p —‍ꞌÃpu mõg Yonex tuꞌ, puyĩy ꞌãmũtik hãpkumep xop pẽnãꞌ xate hãpxopmã kaꞌok xeꞌẽgnãg.
\v 4 Xatep-tup, pu tikmũꞌũn ꞌãyũmmũg, ha ta yãy yõg hãpxopmãꞌax xaptop putupꞌah. Xate hãpxopmã kaꞌok xeꞌẽgnãg. ꞌÃpu ꞌũmĩy, puyĩy tikmũꞌũn xohix pẽnãꞌ, nũy ꞌãyũmmũg. Kaxĩy.
\p
\v 5 Yã ꞌaꞌ taknõy xop mũn te Yeyox kopa kuxa mãm ꞌohnãg
\p
\v 6 Ha Yeyox te:
\p —‍Hõnhã ꞌũmĩy hok puꞌ max. ꞌAp xeꞌeꞌah hõnhã, pa ꞌãmnĩy xohix ꞌũxeꞌe ꞌãxop yõg.
\v 7 Tikmũꞌũn xohix te ꞌãxop putup nõg yũmmũg ꞌohnãg, pa tikmũꞌũn xohix tek putup nõg, yã ꞌãte hãmꞌãktux punethok tikmũꞌũn te hãpkummuk mĩy.
\v 8 ꞌÃpu mõg ꞌãmuk xexka hah. ꞌAp ꞌũgmõg putupꞌah nõmhã. ꞌA ꞌãmnĩy xeꞌeꞌah yõgnũꞌ. Kaxĩy.
\p
\v 9 Hã kaxĩy Yeyox te hãmꞌãktux, tuꞌ nox xip hãpxexka Ganinet tuꞌ.
\s Yeyox mõg ꞌãmuk xexka hah
\p
\v 10 Ha taꞌ mõg ꞌũtaknõy xop ꞌãmuk xexka hah, ha hãpxip ꞌĩhãꞌ mõg kama Yeyox, pa yãy xaptop, yã tikmũꞌũn teꞌ pẽnã ꞌohnãg.
\v 11 Ha Yoneo xexka xop te Yeyox xak ꞌãmuk xexka tuꞌ, tu tikmũꞌũn yĩykopit, hu:
\p —‍Piꞌyãꞌ xip Yeyox? Kaxĩy.
\p
\v 12 Ha tikmũꞌũn te hãmꞌãktux pũꞌũgnãg punethok, haꞌ yãg te:
\p —‍Yã tik max nõꞌõm. Kaxĩy.
\p Paꞌ yãg nõy te:
\p —‍Tute mõꞌãmãꞌ. Kaxĩy.
\p
\v 13 Paꞌ xohix te hãmꞌãktux pũꞌũgnãg, yã hãmꞌãktux xaptop, Yoneo xexka xop yĩpkutuk tuꞌ
\p
\v 14 Hãpxip ꞌãmuk xexka kote ꞌĩhãꞌ mõg Yeyox, tu mõktu Topa pet xexka hã mõꞌnãhãꞌ, tu tikmũꞌũn pu hãmyũmmũgãhã kõnãmãhãꞌ,
\v 15 ha Yoneo xexka xop teꞌ yẽy, tu:
\p —‍Texĩy kãy te hãmyũmmũg xexkaꞌ, pa tappet mĩy ꞌohnãg? Kaxĩy.
\p
\v 16 Ha Yeyox te:
\p —‍ꞌA ꞌãte yãy yõg hãmyũmmũg yũmmũgãꞌah, pa Topa yõg, yã tute nũg mũn kutnãhãꞌ.
\v 17 Tikmũꞌũn ꞌũm tep-tup, nũy mĩy Topa te nõm putup, puxix yũmmũg putup ꞌãte Topa yõg hãmyũmmũg ꞌãktux, ꞌa yõgꞌah.
\p
\v 18 Tikmũꞌũn ꞌũm te yãy yõg hãmyũmmũg ꞌãktux, puxip-tup, pu tikmũꞌũn hãmpeꞌpaxex yãꞌ xexka nõꞌõm. Ha taꞌ nõy tep-tup, pu tikmũꞌũn hãmpeꞌpaxex yãꞌ xexka Topah. Yã Topa te nũ nõm kutnãhãꞌ, yã tik yok, yãꞌ koit ꞌohnãg.
\v 19 Hõmã Mõyyex te xaꞌ popmãhã Topa te nõm xat. Hamũn, pa ꞌãxop xohix teꞌ mĩy ꞌohnãg Topa yõg xatꞌax. Teptu ꞌãxop tep-tup, nũy ꞌũkputex? Kaxĩy.
\p
\v 20 Ha tikmũꞌũn te:
\p —‍Yãmĩy kummuk xip ꞌãkopah. Tep-te ꞌãp-tex putup? Kaxĩy.
\p
\v 21 Ha Yeyox te:
\p —‍ꞌÃte hãpxopmã kaꞌok xeꞌẽgnãg puxet, yĩy ꞌãxop kuxa teꞌ yẽy.
\v 22 Hõmã ꞌũhittap mõnãyxop tek-tok pit xop xax mep ꞌũyĩmap hãmãxap, ha ta hãmyãxatamuk punethok nõg, ꞌĩhã Mõyyex teꞌ xat, puꞌ mĩy nõꞌõm, yĩy ta hõnhã ꞌãxop teꞌ mĩy ꞌãmnĩy hãm hok ꞌĩhãꞌ.
\v 23 ꞌÃxop tek-tok pit xax mep ꞌũyĩmap ꞌãmnĩy hãm hok ꞌĩhãꞌ, nũy Mõyyex yõg xatꞌax mĩy. Texĩy ꞌãxop gãy, yã ꞌãte tik hittupmãhã ꞌãmnĩy hãm hok ꞌĩhãꞌ?
\v 24 ꞌÃxop te hãmpẽnãhã mõꞌkaꞌok, tu yõgnũ hãpxopmãꞌax kopit mõꞌkaꞌok, tu hãmꞌãktux mõꞌkaꞌok ꞌũgkummuk. Kaxĩy hok! ꞌÃpu yõgnũ hãpxopmãꞌax kopit mõꞌkaꞌok hok! Kaxĩy.
\s ꞌOk Topa te Yeyox yãykutnãhãꞌ?
\p
\v 25 Ha ta kõmẽn Yenoyanẽn yõg yãg xop te:
\p —‍ꞌOk nõꞌõm tihik? ꞌOk tikmũꞌũn teꞌ kãy putex putup?
\v 26 Pẽnãꞌ! Tute tikmũꞌũn xohix mũtik hãmꞌãktux, pa tikmũꞌũn te Yeyox pa ꞌohnãg, yãꞌ mũg ꞌohnãg. ꞌOk xexka xop teꞌ yũmmũg ꞌohnãg yã Yeyox, Topa te nõm yãykutnãhãꞌ?
\v 27 ꞌŨnũn nõꞌõm, Topa te nõm yãykutnãhãꞌ, puxix tikmũꞌũn yũmmũg putupꞌah ꞌũyõg xipꞌax, xix hãm tuꞌ nũn yũmmũg putupꞌah, pa yũmũg xohix teꞌ yũmmũg Yeyox yõg xipꞌax, xix yõg hãm tuꞌ nũn, xix yõg ꞌãtak, xiꞌ tut. Kaxĩy.
\p
\v 28 Ha taꞌ xip Yeyox Topa pet xexka kopah, tu tikmũꞌũn pu hãmyũmmũgãhãꞌ, tu hãmꞌãktux kaꞌok, hu:
\p —‍ꞌOk ꞌãxop tek mũn yũmmũg xeꞌeꞌ? ꞌOk ꞌãxop teꞌ yũmmũg hãm tuk nũn? ꞌAk puxet nũnꞌah, yã Topa xeꞌe te nũgkutnãhãꞌ, pa ꞌãxop te Topa yũmmũg ꞌohnãg.
\v 29 Pa ꞌãte nõm yũmmũg. Yã ꞌãte nõm tuk nũn, ha tute nũgkutnãhãꞌ. Kaxĩy.
\p
\v 30 Ha tikmũꞌũn teꞌ kax, pu xonat xop Yeyox mũy, paꞌ mũg ꞌohnãg, yã Yeyox mũg yõg ꞌãmnĩy xeꞌe xupep ꞌohnãg.
\v 31 Pa tikmũꞌũn punethok kuxa mãm kaꞌok Yeyox kopah, tu:
\p —‍Kunnix nũn, yã Topa te nõm yãykutnãhãꞌ, haꞌ nũn, tu hãpxopmã kaꞌok xeꞌẽgnãg. Yã Yeyox teꞌ mĩy punethok te kaxĩy. Kaxĩy.
\s Xonat xat, pu Yeyox mũy
\p
\v 32 Yã tikmũꞌũn xohix te hãmꞌãktux pũꞌũgnãg te kaxĩy, ha Paniye xop teꞌ xupak, hu xonat xat xix ꞌãmãnex xexka xop te xonat xat, pu Yeyox mũy.
\p
\v 33 Ha Yeyox te:
\p —‍Hãpxip kutõgnãg hãg xipꞌax ꞌãxop kopah, tu tak mõg putup nõm hah, yã nõm te nũgkutnãhãꞌ, yã nõm hak mõg putup.
\v 34 ꞌÃxop tek xak putup, pak xipi tapax ꞌohnãg. Yã ꞌũgmõg putup nõm hãm tuꞌ, pa ꞌãmõg yũmmũg ꞌohnãg. Kaxĩy.
\p
\v 35 Ha Yoneo xexka xop te yãy mũtik hãmꞌãktux, hu:
\p —‍Piꞌyãꞌ mõg putup? Texĩy yũmũꞌãte nõm xipi tapax ꞌohnãg? ꞌOk mõg putup kõmẽn tuꞌ hãpxexka Genex tuꞌ? Yã Yoneo xop pip ꞌõnteh. ꞌOk Genex yõg xop pu hãmyũmmũgãp-tup?
\v 36 Putep ꞌãktux? Tute: “ꞌÃxop tek xak putup, pak xipi tapax ꞌohnãg. ꞌÃmõg yũmmũg ꞌohnãg.” Kaxĩy. Putep xuktux Yeyox? Kaxĩy.
\s Kõnãg kox putuk tikmũꞌũn kuxa kopah
\p
\v 37 Ta ꞌãmuk xexka yõg ꞌãmnĩy xox putox, yã ꞌãmuk xexka yõg ꞌãmnĩy xexkaꞌ, ꞌĩhãꞌ xip Yeyox, tu hãmꞌãktux kaꞌok, hu:
\p —‍ꞌŨꞌũm te kõnãg putup xũynãg putuk ꞌãkuxa kopah. Mã ꞌũg ha, nũy xoꞌop putuk.
\v 38 Yã Topa yõg tappet te: “Tikmũꞌũn ꞌũm ꞌũgkopaꞌ kuxa mãm, tuꞌ kuxa kopaꞌ mõg putup kõnãg kox xexka punethok putuk, yã kõnãg xet putuk, tu hãptopaꞌ mõg putup”. Kaxĩy.
\p
\v 39 Yã Yeyox te Topa Koxuk ꞌãktux, yã kõnãg kox putuk Topa Koxuk tikmũꞌũn kuxa kopah, tu tikmũꞌũn hĩnnãhãꞌ. ꞌŨkuxa mãm xop te Topa Koxuk pap-tup. Pa nõm ꞌãmnĩy ꞌĩhã Yeyox te hãmꞌãktux, ꞌĩhãꞌ hõm ꞌohnãg Topa Koxuk. Nãy, pu Yeyox xok, tu putpuꞌ hiꞌ, tu yõg hãm xeꞌẽgnãg tuꞌ mõg hãmãxap, tuk-nãy tu Topa Koxuk hõm putup.
\s Tikmũꞌũn hãmpeꞌpaxexꞌax yãy pot
\p
\v 40 Tikmũꞌũn teꞌ xupak, ha punethok te:
\p —‍Yã tute Topa pupi hãmꞌãktux xeꞌeꞌ. Kaxĩy.
\p
\v 41 Ha taꞌ yãg te:
\p —‍Nõm yã Kunnix, yã Topa te nõm yãykutnãhãꞌ. Topa yõg tappet te hãmꞌãktux Kunnix nũn putup. Kaxĩy.
\p Pa tikmũꞌũn nõy te:
\p —‍ꞌAꞌ Ganinet tuꞌ nũn putupꞌah Kunnix.
\v 42 Topa yõg tappet te hãmꞌãktux Kunnix te Namix yõg xupepmã xop kopaꞌ xip putup, tu nãp-tup kõmẽn Menẽg tuꞌ, yã Namix yõg xipꞌax Menẽg. Kaxĩy.
\p
\v 43 Ha tikmũꞌũn hãmpeꞌpaxexꞌax yãy pot.
\v 44 Yã yãg xop tep-tup, pu xonat Yeyox mũy, paꞌ mũg ꞌohnãg.
\s Yoneo xexka xop kuxa mãm ꞌohnãg Yeyox kopah
\p
\v 45 Ha taꞌ mõg putpuꞌ xonat xop ꞌãmãnex xexka xop hah, tu paniye xop haꞌ mõg, haꞌ yĩykopit, hu:
\p —‍Teptu Yeyox nũnnã ꞌohnãg? Kaxĩy.
\p
\v 46 Ha xonat xop te:
\p —‍Yã hãmꞌãktux max Yeyox teꞌ. Tep-te hãmꞌãktux nõm tik yõg hãmꞌãktux putuk? Yã tik ꞌohnãg. Hãmꞌũmhã hãmꞌãktux nõm tik yõg hãmꞌãktux putuk? Yã hãmꞌãktux ꞌohnãg. Kaxĩy.
\p
\v 47 Ha Panixet xop te:
\p —‍ꞌOk ꞌãkuxa mãm ꞌũyõg mõꞌãmãꞌax kopa kamah?
\v 48 Tik xexka ꞌũm kuxa yũm kãy kopah, xix Paniye ꞌũm? Hãmꞌũmhãꞌ? Yã tik xexka ꞌohnãg xix Paniye ꞌohnãg kuxa mãm kãy kopah. ꞌÃmhok.
\v 49 Tikmũꞌũn teꞌ yũmmũg ꞌohnãg Mõyyex yõg xatꞌax, yĩy Topa te nõm xũygãp-tup. Kaxĩy.
\p
\v 50 Paꞌ xip Nĩkonẽm, yã hõmã Yeyox haꞌ mõg Nĩkonẽm, yã Paniye xop kopaꞌ xip. Tute:
\p
\v 51 —‍Yũmũ yõg xatꞌax te hãmꞌãktux, hu: “Ãpu tik yõg hãpxopmãꞌax kopit hãmãxap, tuk-nãy tuꞌ xuktux ꞌũkummuk tihik.” Kaxĩy.
\p
\v 52 Haꞌ nõy te:
\p —‍ꞌOk hãpxexka Ganinet tu ꞌãnũn kamah Yeyox putuk? ꞌÃpu mõkupix max Topa yõg tappet, ha xateꞌ yũmmũg putup Topa pupi hãmꞌãktux xop te hãpxexka Ganinet tuꞌ nũn ꞌohnãg. Kaxĩy.
\v 53 Ha taꞌ nũn tikmũꞌũn yãy pet hah.
\c 8
\s ꞌŨn teꞌ nõy hãꞌ xupxet
\p
\v 1 Ha taꞌ mõg tikmũꞌũn xohix xexka yãy pet hah, ha taꞌ mõg Yeyox yĩktix ꞌOnimet Kup tuꞌ
\v 2 Hãptup mãyõn xupep ꞌĩhãꞌ mõg Yeyox tu mõktu putpuꞌ xupep Topa pet xexka tuꞌ, pa tikmũꞌũn xop xexka te Yeyox xakot, ha Yeyox yũm, tu tikmũꞌũn pu hãmyũmmũgãhã kõnãmãhãꞌ.
\v 3 Ha taꞌ pip kama tik te hãmyũmmũg xop xix Paniye xop, tuꞌ nũnnãhã ꞌũhũn. Hõmã ꞌũn teꞌ nõy hãꞌ xupxet, ha tikmũꞌũn teꞌ pẽnãhãꞌ. Nõm te ꞌũn xix tikmũꞌũn keppah, hak-nĩhãꞌ xip.
\v 4 Ha nõm xop te Yeyox pu hãmꞌãktux, hu:
\p —‍Notot, nũ ꞌũn teꞌ nõy hãꞌ xupxet, ha tikmũꞌũn teꞌ pẽnãhãꞌ. Yãꞌ xonnix.
\v 5 Ha ta hõmã Mõyyex teꞌ kaxꞌãmi yũmũ yõg xatꞌax yõg tappet tuꞌ, tu kaxꞌãmi, pu tikmũꞌũn ꞌũn te kaxĩy tuꞌ mĩkaxxap hã tux, tu nõp-tex. Putep xuktux ꞌãmũn nõmhãꞌ. Putep mũn mĩy putup yũmũꞌãteꞌ? Kaxĩy.
\p
\v 6 Yã Paniye xop yõg hãmꞌãktux te pamãg putuk. Yã ꞌũp-tup, puyĩy Yeyox hãmꞌãktux kummuk, puyĩy tikmũꞌũn xuktux Yeyox ꞌũkummuk. Pa Yeyox nũꞌxup, tuꞌ yĩm kutok hãꞌ kaxꞌãmi hãm tuꞌ.
\v 7 Ha tik te xeꞌ yĩykopit punethok, haꞌ yok Yeyox, tu:
\p —‍ꞌOk xip nũnte tik te hãpkummuk mĩy ꞌohnãg? ꞌŨxip, puxix mõ xap yõn hãmãxap putup. Kaxĩy.
\p
\v 8 Yeyox nũꞌxup ꞌũxeheh, tu xe kaxꞌãmi hãm tuꞌ,
\v 9 haꞌ xupak xop ꞌũp-xet huꞌ mõg, yã kutut mõg hãmãxap, tu mõktu tik xip ꞌohnãg Yeyox mũtik xix ꞌũn mũtik. Yãꞌ xip Yeyox xix ꞌũhũn,
\v 10 ha Yeyox yok, tu:
\p —‍Nixxix, piꞌyãꞌ mõg tihik? Piꞌãꞌ pip tik te hãmꞌãktux ꞌãkummuk? Kaxĩy.
\p
\v 11 Ha:
\p —‍Yãyã, ꞌũmõg kaꞌmãm, yãꞌ pipꞌah. Kaxĩy.
\p Ha Yeyox te:
\p —‍Hamũn, ꞌa ꞌãte hãmꞌãktuxꞌah ꞌãkummuk, ꞌa yã ꞌãkummukꞌah. Mõg, nũy xe hãpkummuk mĩy hok. Kaxĩy.
\s Yeyox te tikmũꞌũn xohix yõg kũyãnãm putuk
\p
\v 12 Ta xeꞌ xip Yeyox xix tikmũꞌũn, ha Yeyox te:
\p —‍ꞌÃte kuyãnãm putuk tikmũꞌũn xohix puꞌ. Nõm te ꞌũg peꞌ mõg, yãꞌ xip kuyãnãm putuk ꞌũkuxa kopah, yã hiꞌax kux ꞌohnãg yõg kuyãnãm, ha nõm xop ꞌaꞌ pipꞌah hãpkoxtap kopah. Kaxĩy.
\p
\v 13 Ha Paniye xop te:
\p —‍Nõmhã ꞌãp-xehnãg te yãy ꞌãktux, yĩy ꞌõg hãmꞌãktux ꞌũxeꞌe ꞌohnãg. Kaxĩy.
\p
\v 14 Ha Yeyox te:
\p —‍Paxpuk puxehnãg te yãy ꞌãktux, puxix ꞌũxeꞌe yõg hãmꞌãktux. Hamũn, ꞌãteꞌ yũmmũg hãm tuk nũn, xix hãm tuk mõg putup kamaꞌ yũmmũg. Pa xateꞌ yũmmũg ꞌohnãg hãm tuk nũn, xix hãm tuk mõg putup kama xateꞌ yũmmũg ꞌohnãg.
\v 15 ꞌÃxop te hãmꞌãktux mõꞌkaꞌok ꞌũnõy kummuk, yã ꞌãxop te tikmũꞌũn xohix putuk. Pa ꞌãte hãmꞌãktux ꞌohnãg ꞌũnõy kummuk.
\v 16 Paxpu ꞌãte hãmꞌãktux ꞌũnõy kummuk, kopxix ꞌũnõy yõg hãpxopmãꞌax kopit xeꞌeꞌ. ꞌŨgpuxehnãg xip ꞌohnãg, pa yõgnũ ꞌãtak xip ꞌũgmũtik. Tute nũgkutnãhãꞌ.
\v 17 Yã ꞌũkaxꞌãmi ꞌõg xatꞌax yõg tappet tuꞌ, ꞌũtix te pẽnã xop ꞌãktux, ha hãmꞌãktux tix te yãy putuk, puxiꞌ xeꞌe ꞌũyõg hãmꞌãktux.
\v 18 ꞌÃte yãy ꞌãktux, ha yõgnũ ꞌãtak tek mũn ꞌãktux kamah, yã hãmꞌãktux tix te yãy putuk. Tute nũgkutnãhãꞌ Kaxĩy.
\p
\v 19 Ha nõm te:
\p —‍Piꞌyãꞌ xip ꞌõg ꞌãtak? Kaxĩy.
\p Ha Yeyox te:
\p —‍ꞌAp ꞌãxop tek yũmmũgꞌah xix yõgnũ ꞌãtak ꞌap yũmmũgꞌah kamah. Paxpu ꞌãxop ꞌũgyũmmũg, hu ta yõgnũ ꞌãtak yũmmũg kamah. ꞌA ꞌãxop tek ꞌũgyũmmũgꞌah. Kaxĩy.
\p
\v 20 Hã kaxĩy Yeyox te xohix pu hãmyũmmũgãhã Topa pet xexka kopah. ꞌÕnte tikmũꞌũn te mĩpkox kopa tayũmak nĩm. ꞌAꞌ xonat te Yeyox mũgꞌah, yã yõg ꞌãmnĩy xeꞌeꞌah, yĩꞌ mũg ꞌohnãg.
\s ꞌŨꞌũm Yeyox
\p
\v 21 Ta xe hãmꞌãktux Yeyox tikmũꞌũn mũtik, hu:
\p —‍ꞌŨgmõg putup nũpeheh, ha xatek xak putup, paꞌ pip ꞌõg hãpkummuk mĩyꞌax, ꞌĩhã ꞌãxakix putup, hu ꞌãmõg yũmmũg ꞌohnãg yõgnũ xipꞌax, tu ꞌaꞌ nõm tu ꞌãmõg putupꞌah. Kaxĩy.
\p
\v 22 Ha Yoneo xexka xop te:
\p —‍Tute hãmꞌãktux: “ꞌÃmõg yũmmũg ꞌohnãg yõgnũ xipꞌax. Putep xuktux? ꞌOk yãy putex putup? Kaxĩy.
\p
\v 23 Ha Yeyox te:
\p —‍ꞌÕg pipꞌax pip nũnte hãm xexka tuꞌ, pa ꞌũkxipꞌax pip pepix pexkox tuꞌ. ꞌÕgnũ pipꞌax yã hãm xexkaꞌ, pa ꞌũkxipꞌax xipꞌah hãm xexka tuꞌ.
\v 24 Hã kaxĩy ꞌãte xa hãmꞌãktux, ꞌũpip ꞌõg hãpkummuk mĩyꞌax, ꞌĩhã ꞌãxakix putup. ꞌÃxop kuxa mãm ꞌohnãg ꞌũgmũn kopah, ꞌĩhã ꞌõg hãpkummuk mĩyꞌax pip kaꞌok ꞌãxop mũtik. Hamũn, ꞌãkuxa mãm ꞌohnãg ꞌũgmũn kopah, yã ꞌũkxuxetꞌax nõy yã ꞌũgmũn yãg mũn. Kaxĩy.
\p
\v 25 Ha nõm te:
\p —‍ꞌÃmũn ꞌũꞌũm? Kaxĩy.
\p Ha Yeyox te:
\p —‍Hõmã ꞌãte xa nõm ꞌãktux punethok
\v 26 ꞌÃte xe xa hãmꞌãktux punethok, tu xe ꞌõg hãpxopmãꞌax kopit putup punethok, nũy hãmꞌãktux ꞌãxop te hãpkummuk mĩy punethok. Topa te nũgkutnãhãꞌ, yãꞌ xeꞌeꞌ, ha ꞌãte nõm yõg hãmꞌãktux ꞌãpak, tu nõm ꞌãktux tikmũꞌũn xohix puꞌ, tu hãpxop nõy ꞌãktux ꞌohnãg. Kaxĩy.
\p
\v 27 Ha tikmũꞌũn teꞌ yũmmũg ꞌohnãg Yeyox yõg hãmꞌãktux, yã Yeyox yõg ꞌãtak ꞌãktuxꞌax yũmmũg ꞌohnãg.
\v 28 Ha Yeyox te:
\p —‍ꞌÃxop tek mũn Tikmũꞌũn Kutok xup putup pepix mĩpkupnix tuꞌ, hak xup putup, tuk xok putup, ꞌĩhã ꞌãxop teꞌ yũmmũg putup ꞌũgmũn yãg mũn, tu ꞌãxop teꞌ yũmmũg putup ꞌãte yãp-xehnãg hã hãpxopmã ꞌohnãg, pa yõgnũ ꞌãtak yõg hãmyũmmũg ꞌãktux ꞌãteꞌ, tu hãpxop nõy ꞌãktux ꞌohnãg,
\v 29 ha Topa te nũgkutnãhãꞌ, yãꞌ xip ꞌũgmũtik, tuk nĩm putupꞌah. Yã hamũn, ꞌãte hãpxopmãꞌ, hã Topa tep-tuppax, ha hãpxop nõy mĩy ꞌohnãg. Kaxĩy.
\p
\v 30 Ha tikmũꞌũn teꞌ xupak Yeyox yõg hãmꞌãktux, haꞌ punethok kuxa mãm Yeyox kopah.
\s Nõm te hok hã hãm putuk
\p
\v 31 Ha Yeyox te Yoneo xop yõg kuxa mãm kaꞌok xop pu hãmꞌãktux, hu:
\p —‍ꞌÃxop te yõgnũ hãmyũmmũg tu ꞌĩpkox pip, tuꞌ mĩy, nũy ta ꞌãxop yã yõgnũ xop.
\v 32 ꞌÃxop te nõm te hok hã hãm putuk, haꞌ nõy te ꞌãxop xatpax. Pa ꞌãxop teꞌ yũmmũg putup hãmyũmmũgꞌax xeꞌe, ha hãmyũmmũg xeꞌeꞌax te ꞌãxop mõy putup, xayĩy mõg, tu xe nõm te hok hã hãm xop putukꞌah. Kaxĩy.
\p
\v 33 Pa tikmũꞌũn te:
\p ꞌAmanãm yõg xupepmã xop kopak mũg pip, tu nõm te hok hã hãm putuk ꞌohnãg. Yãꞌ nõy tek mũg xatpax ꞌohnãg. Teptu xate hãmꞌãktux, ꞌũgmũg mõy, nũy ta mõg? Kaxĩy.
\p
\v 34 Ha Yeyox te:
\p —‍ꞌÃte xa hãmꞌãktux hãmyũmmũg xeꞌeꞌ. Tikmũꞌũn ꞌũm te hãpkummuk mĩy, ha hãpkummuk mĩyꞌax putup xũyꞌax te tikmũꞌũn xatpax, ha tikmũꞌũn te nõm te hok hã hãm putuk.
\v 35 ꞌAꞌ nõm te hok hã hãm xip kaꞌokꞌah xuxyã xop kopah, paꞌ mõg putup. ꞌAꞌ xip kaꞌokꞌah. Ha tak-tok xip kaꞌok xuxyã xop kopah, tuꞌ mõg putupꞌah, yãꞌ xip kaꞌok.
\v 36 Pak mũn Topak-tok te ꞌãxop mõy, xa mõg, yã ꞌãmõg putup xeꞌeꞌ, tu nõm te hok hã hãm putuk putup ꞌohnãg, ha hãpkummuk mĩyꞌax te ꞌãxop xat putup ꞌohnãg.
\v 37 ꞌÃteꞌ yũmmũg ꞌãxop yã mõnãyxop ꞌAmanãm yõg xupepmã xop. Pa ꞌãxop tep-tup, nũy ꞌũkputex. ꞌÃxop te yõgnũ hãmyũmmũg pa ꞌohnãg, hup-tup, nũy ꞌũkputex.
\v 38 Yõgnu ꞌãtak te ꞌãꞌ mũg hãpxop punethok, ha ꞌãte xa nõm ꞌãktux, pa ꞌãxop teꞌ mĩy ꞌõgnũ ꞌãtak yõg xatꞌax. Kaxĩy.
\p
\v 39 Ha tikmũꞌũn te:
\p —‍Yõgnũ ꞌãtak yã ꞌAmanãm. Kaxĩy.
\p Ha Yeyox te:
\p Paxpu ꞌãxop yã ꞌAmanãm yõg xop, nũy ta hãpxopmã yã ꞌAmanãm putuk.
\v 40 Topa te ꞌã hãmꞌãktux, ha ꞌãte xa nõm ꞌãktux, yã hãpxop nõy ꞌãktux ꞌohnãg. Pa ꞌãxop tep-tup, nũy ꞌũkputex, yã ꞌa ꞌAmanãm putukꞌah.
\v 41 ꞌÃxop te hãpxopmã ꞌõgnũ ꞌãtak putuk. Kaxĩy.
\p Ha tikmũꞌũn te:
\p —‍Topa mũn yã ꞌũgmũ yõg ꞌãtak, yã Topap-xehnãg, yãg mũg yã Topak-tok xeꞌe, yã ꞌap ꞌãmũn putukꞌah. Kaxĩy.
\p
\v 42 Ha Yeyox te:
\p —‍Paxpu Topa yã ꞌõgnũ ꞌãtak, nũy ta ꞌãxop putuppax ꞌũgmũn. Hamũn, ꞌãte Topa tuk nũn, tu nũktuk xupep nũnteh. ꞌA ꞌãte nũ yãy kutnãꞌah, pa yã Topa teꞌ.
\v 43 Teptu ꞌãxop teꞌ yũmmũg ꞌohnãg yõgnũ hãmꞌãktux. ꞌOk ꞌãxop te nõãꞌ tot ꞌohnãg yõgnũ hãmꞌãktux?
\v 44 ꞌÃxop yã Hãmgãyãgnãg kutok, tu ꞌãxop teꞌ mĩy ꞌõgnũ ꞌãtak te nõm putup. Yã hãm xexka yõg hãmyãxatamuk tox hã Hãmgãyãgnãg teꞌ kixpax. Tutep-tup nõg hokꞌah hãmyũmmũgꞌax xeꞌe, yã Hãmgãyãgnãg ꞌũyok ꞌohnãg, tuꞌ koitpax, yã Hãmgãyãgnãg te kaxĩy, tuꞌ koitpax, yã koitꞌax xohix xexka mĩy. Koitꞌax yã Hãmgãyãgnãg kutok.
\v 45 ꞌÃte xa hãpxeꞌe ꞌãktux, yãꞌ koit ꞌohnãg, pa ꞌãxop kuxa mãm ꞌohnãg yõgnũ hãmyũmmũgꞌax kopah.
\v 46 Piꞌyã ꞌãxop kopa teꞌ xuktuxꞌax ꞌãte hãpkummuk mĩy? Yã tik te nõm ꞌãktux ꞌohnãg. ꞌÃte hãpxeꞌe ꞌãktux. Teptu ꞌãxop tek kopa ꞌãkuxa mãm ꞌohnãg?
\v 47 Topa yõg tikmũꞌũn te Topa yõg hãmꞌãktuxꞌax ꞌãpak, tuꞌ yĩpkox pip. Pa ꞌãxop ꞌaꞌ Topa yõgꞌah, hu ꞌãyĩpkox pip ꞌohnãg. Kaxĩy.
\s Yeyox xix ꞌAmanãm
\p
\v 48 Ha Yoneo xexka xop te:
\p —‍ꞌOk ꞌũgmũꞌãte hãpxeꞌe ꞌãktux ꞌãmũn te Xãmãnit xop kopa ꞌãxip, haꞌ xip yãmĩy kummuk ꞌãkopah? Yã hamũn. Kaxĩy.
\p
\v 49 Ha Yeyox te:
\p —‍ꞌAp xipꞌah yãmĩy kummuk ꞌũgkopah. ꞌÃte yõgnũ ꞌãtak max ꞌãktux, ha ta ꞌãxop tek mũn ꞌãktux kummuk.
\v 50 ꞌA ꞌãteꞌ xak ꞌohnãg, puyĩy tikmũꞌũn ꞌũgmũn ꞌãktux max. ꞌÃteꞌ xak ꞌohnãg, puyĩy tikmũꞌũn ꞌũgmũn xexka mĩy. Yãꞌ nõy puxet tek mũn ꞌãktux max, tuk xexka mĩy, tu ꞌõg hãpxopmãꞌax kopit, tuꞌ xuktux ꞌãxop koheꞌ, pak mũn yok.
\v 51 ꞌÃte hãpxeꞌe ꞌãktux. Nõm ꞌũm te yõg hãmꞌãktuxꞌax ꞌãpak, tuꞌ yĩpkox pip, puxix hi xeꞌẽgnãg mõkumaꞌ mõg, haꞌ kux ꞌohnãg yã xakix xeꞌe putup ꞌohnãg. Kaxĩy.
\p
\v 52 Ha Yoneo xop te:
\p —‍ꞌŨgmũꞌãteꞌ yũmmũg nõmhãꞌ ꞌũxip yãmĩy kummuk ꞌãkopah. ꞌAmanãm xok, xix tik te Topa pupi hãmꞌãktux xop xakix kamah, pa xateꞌ xuktux, hu: “Nõm ꞌũm te yõg hãmꞌãktuxꞌax ꞌãpak, tuꞌ yĩpkox pip, puxix xakix xeꞌe putup ꞌohnãg.
\v 53 Yũmũ yõg ꞌãtak ꞌAmanãm xok. Xate putep mũn ꞌãktux? ꞌOk ꞌãmũn xexkaꞌ, pa ꞌAmanãm kutõgnãg? Yã Topa pupi hãmꞌãktux xop xakix kamah. ꞌOk xate hãmpeꞌãpaxex ꞌãxexkanãm? Kaxĩy.
\p
\v 54 Ha Yeyox te:
\p —‍Paxpu ꞌãte yãy max ꞌãktux, tu yãy xexka mĩy, puxix tuꞌ kummuk, yã hãmꞌãktux kummuk. Pa yõgnũ ꞌãtak tek mũn max ꞌãktux, tuk xexka mĩy. Yã yõgnũ ꞌãtak teꞌ mĩy. Yõgnũ ꞌãtak yã ꞌãxop teꞌ xãnãhãꞌ, hu: “Topa yũmũ yõg”.
\v 55 Pa ꞌãxop te nõm yũmmũg ꞌohnãg hokꞌah, pa ꞌãte nõm yũmmũg. Paxpu ꞌãte hãmꞌãktux nõm yũmmũg ꞌohnãg, kopxix koit, yã ꞌãxop putuk. Pa ꞌãte nõm yũmmũg, tu yõg hãmꞌãktuxꞌax ꞌãpak, tuk yĩpkox pip.
\v 56 Hõmã ꞌũhittap ꞌõg ꞌãtak ꞌAmanãm kuxa hittup yã tuteꞌ yũmmũg ꞌãte hãpxopmãꞌax, tuꞌ yũmmũg, huꞌ kuxa hittup. Kaxĩy.
\p
\v 57 Ha Yoneo xop te:
\p —‍ꞌA ꞌõg hãmyãxatamuk te 50ꞌah. ꞌOk xate ꞌAmanãm pẽnãhãꞌ? Kaxĩy.
\p
\v 58 Ha Yeyox te:
\p —‍ꞌÃte xa hãpxeꞌe ꞌãktux. Hõmãg xip ha kunãy tuꞌ xip ꞌAmanãm. ꞌŨgxip mõkumakmõg. Kaxĩy.
\p
\v 59 Ha tikmũꞌũn te mĩkaxxap pop, nũy nõ Yeyox tux, nũy putex, pa Yeyox te yãy xaptop, tu taꞌ mõg Topa pet xexka kũnãpah.
\c 9
\s Yeyox xix tik pa hok
\p
\v 1 Ta xe hãpkumep Yeyox, paꞌ xip tihik, tuꞌ pa hok. ꞌŨtut teꞌ put, ꞌĩhãꞌ pa hok, tu yõg hãmyãxatamuk tox hãꞌ pa hok.
\v 2 Ha taꞌ pip Yeyox yõg tik xop, tu Yeyox puꞌ yĩkopit, hu:
\p —‍Yãyãꞌ, tep-te hãpkummuk mĩy, yĩy tik pa hok, ꞌĩhãꞌ tut teꞌ put? ꞌOk pe tik te hãpkummuk mĩy, ꞌok peꞌ tak xiꞌ tut? Kaxĩy.
\p
\v 3 Ha Yeyox te:
\p —‍ꞌAꞌ tik te yãy pa hokgãꞌah, xiꞌ tak teꞌ pa hokgãꞌah, xiꞌ tut teꞌ pa hokgãꞌah. Yã tik pa hok, puyĩy tikmũꞌũn yũmmũg Topa kaꞌok xexka te tik puꞌ mĩy putup hãpxop max xeꞌẽgnãg.
\v 4 ꞌÃpu yũmũ hãm mõkumakmõg. Yã Topa te nũgkutnãhãꞌ, ꞌũ hãm. ꞌÃpu yũmũ hãm. Hãpxip ꞌĩhã yũmũg hãm putup ꞌohnãg, yã ꞌãmnĩy putuk ꞌĩhã tikmũꞌũn hãm ꞌohnãg.
\v 5 ꞌŨkxip nũnte hãm xexka tuꞌ, tu ꞌãte tikmũꞌũn pu Topa mũg xix hãmmax mũg. Yã ꞌãte kuyãnãm putuk, yã tikmũꞌũn pu hãpxop xohix tupmãhãꞌ. Kaxĩy.
\p
\v 6 Ta Yeyox te mõꞌ yĩyhep yõn hãm tuꞌ, tu hãm kotĩnnãhãꞌ, tu putõy mĩy, tu putõy hã tik pa mõꞌnĩy,
\v 7 tu tik pu hãmꞌãktux, hu:
\p —‍Mõg, nũy yãy pa pix puxhep Xinoꞌe tuꞌ. Yã kõnãg kox te puxhep xetnãhãꞌ. Kaxĩy.
\p Yã Xinoꞌe te tikmũꞌũn yĩyꞌax hã: “Mõkutnãhãꞌ” Kaxĩy.
\p Ha taꞌ mõg tihik, tu yãy pa pix, tu hãmpẽnãhãꞌ, tu putpuꞌ nũn, tu nũktuꞌ xupep.
\v 8 Ha taꞌ pip tik xape xop xix tikmũꞌũn nõy. Hõmã nõm te tik pẽnãhãꞌ, ꞌĩhã tik te ta tu hãpxop kax xix tayũmak xak. Haꞌ xohix te:
\p —‍ꞌOk nõꞌõm tihik. ꞌOk hõmãꞌ yũm, tu ta tuꞌ kax, nũy tayũmak pop? Kaxĩy.
\p
\v 9 Haꞌ yãg te:
\p —‍Hamũn nõꞌõm. Kaxĩy.
\p Ha taꞌ yãg nõy te:
\p —‍ꞌÃmhok, yã nõm putuk. Kaxĩy.
\p Pa tik te:
\p —‍Yãg mũn. Kaxĩy.
\p
\v 10 Ha tikmũꞌũn te:
\p —‍Texĩy xate hãmpẽnãhã nõmhãꞌ? Tep-te ꞌãpa mĩy? Kaxĩy.
\p
\v 11 Ha tik te
\p —‍ꞌŨxip tihik ꞌũxuxetꞌax Yeyox, tu putõy mĩy, tu nõm mõg pa nĩy, tuk xat hu: “Mõg, nũy yãy pa pix puxhep Xinoꞌe tuꞌ”. Kaxĩy. Ha tak mõg, tu yãy pa pix, tu hãpxip ꞌohnãg ꞌĩhã ꞌãte hãmpẽnãhãꞌ. Kaxĩy.
\p
\v 12 Ha tikmũꞌũn te:
\p —‍Piꞌyãꞌ xip nõm tihik? Kaxĩy.
\p Ha tik te:
\p —‍ꞌĨntuꞌ, ꞌa ꞌãtep yũmmũgꞌah. Kaxĩy.
\s Paniye xop teꞌ yĩkopit
\p
\v 13 Ha ta tik mõgãhã tikmũꞌũn te Paniye xop hah.
\v 14 Yã nit xap, yã Yoneo xop yõg ꞌãmnĩy hãm hok ꞌĩhã Yeyox te putõy mĩy, tu tik pa mĩy.
\v 15 Ha Paniye xop te xe tik hãꞌ yĩkopit, texĩy hãmpẽnãhã nõmhãꞌ. Ha tik te:
\p —‍Yã tute putõy hã mõ ꞌũgpa nĩy, ha ꞌãte yãy pa pix, hu nõmhã hãmpẽnãhãꞌ. Kaxĩy.
\p
\v 16 Ha Paniye yãg xop te:
\p —‍Nõm teꞌ nõy pa mĩy, ꞌap Topa yõg tikꞌah. Yã tute ꞌãmnĩy hãm hok yõg xatꞌax ꞌãpak ꞌohnãg. Kaxĩy.
\p Pa yãg nõy te:
\p —‍ꞌOk tik kummuk te hãpxop kaꞌok xeꞌẽgnãg texĩy mĩy? ꞌÃmhok. Kaxĩy.
\p Yã yãg tep-tup nõg Yeyox, ha ta yãg tep-tup, yã nõm putox puxet ꞌohnãg.
\v 17 Ha Paniye xop te xe:
\p —‍Tep-te xa ꞌãpa mĩy? Xate putep mũn ꞌãktux? Texĩy nõꞌõm tihik? Kaxĩy.
\p Ha tik te xe:
\p —‍Yã nõm te Topa pupi hãmꞌãktux xop kopaꞌ xip. Kaxĩy.
\p
\v 18 Ha Yoneo xop yõg xexka xop kuxa mãm ꞌohnãg. Hõmã tik pa hok, pa hõnhã hãmpẽnãhãꞌ, pa nõm kuxa mãm ꞌohnãg, huꞌ xãnãhã tik yõg ꞌãtak xiꞌ tut,
\v 19 yĩy taꞌ nũn, tu nũktuꞌ mõxahaꞌ. Ha Yoneo xexka xop te:
\p —‍ꞌOk nũhũ ꞌãk-tok pit? Xate hãmꞌãktux, xateꞌ put, tu ta pa hok. Texĩy hõnhã hãmpẽnãhãꞌ? Kaxĩy.
\p
\v 20 Haꞌ tak xiꞌ tut te:
\p —‍Hamũn, ꞌũgmũg kutok, hak mũꞌãteꞌ yũmmũg ꞌũnãhãꞌ, tu taꞌ pa hok,
\v 21 pak mũꞌãteꞌ yũmmũgꞌah tu texĩy tu hõnhã hãmpẽnãhãꞌ, tuk mũꞌãteꞌ yũmmũgꞌah, tep-te tu pa mĩy. ꞌÃpu ꞌũgmũk-tok yĩkopit. Yãꞌ xiptap, tu hãmyũmmũg. Tute xa hãmꞌãktux putup. Kaxĩy.
\p
\v 22 Yã ꞌãtak te Yoneo xexka xop yĩpkutuk xiꞌ tut teꞌ, hu kaxĩy hãmꞌãktux. Yã Yoneo yõg xexka xop teꞌ xat, pu tikmũꞌũn Yoneo xop yõg Topa pet hã mõxa hok nõm te hãmꞌãktux Yeyox yã Kunnix, yã Topa nũ nõm kutnãhãꞌ.
\v 23 Yĩy ta hãmꞌãktux hã kaxĩy ꞌãtak xiꞌ tut, yã hãmꞌãktux hu: “Yãꞌ xiptap. ꞌÃpuꞌ yĩkopit”. Kaxĩy.
\p
\v 24 Ha Yoneo xexka xop te xeꞌ xãnãhã tihik, yãꞌ tut te nõm put, tu ta pa hok. Ha ta tik nũn, haꞌ nõy te:
\p —‍ꞌÃpu hãmꞌãktux xeh Topa keppah. ꞌÃpu koit hok. ꞌŨgmũꞌãteꞌ yũmmũg ꞌũkummuk Yeyox, yã hãpkummuk mĩy. Kaxĩy.
\p
\v 25 Ha tik te:
\p —‍ꞌÃteꞌ yũmmũgꞌah ꞌok pe tuꞌ max, ꞌok pe tuꞌ kummuk nõꞌõm, pa ꞌãteꞌ yũmmũg hõmã ꞌũkpa hok, pa hõnhã ꞌãte hãmpẽnãhãꞌ. Kaxĩy.
\p
\v 26 Ha: Texĩy? Putep mũn mĩy? Tep texĩy ꞌãpa mĩy? Kaxĩy.
\p
\v 27 Ha tik te:
\p —‍ꞌÃte xa hãmꞌãktux, pa ꞌãyĩpkox ꞌohnãg. Tep texĩy ꞌãxop te xe yĩkopit? Kaxĩy.
\p Haꞌ nõy te:
\p —‍ꞌOk xatep-tup, nũy Yeyox mũtik mõg? Kaxĩy.
\p
\v 28 Tuk-teꞌex kummuk, tu:
\p —‍Yeyox mũtik ꞌãmõg, pak mũg mõg Mõyyex mũtik.
\v 29 ꞌŨgmũꞌãteꞌ yũmmũg Topa te Mõyyex mũtik hãmꞌãktux, pa nõꞌõm, yã hãm ꞌũm tuꞌ nũn? Yãꞌ yũmmũgꞌah. Kaxĩy.
\p
\v 30 Ha tik te:
\p —‍Texĩy ꞌãxop teꞌ yũmmũg ꞌohnãg? ꞌÃxop teꞌ yũmmũgꞌah hãm ꞌũm tuꞌ nũn, pa tutek pa mĩy.
\v 31 Yũmũꞌãteꞌ yũmmũg Topa te hãpkummuk mĩyꞌax xop ꞌãpak ꞌohnãg, pa Topa teꞌ nõy xop ꞌãpak, yã nõm te Topa ꞌãpak, tuꞌ yĩpkox pip, tuꞌ mĩy Topa te nõm putup.
\v 32 Hãm xexka yõg hãmyãxatamuk xohix xexka ꞌĩhã tikmũꞌũn te hãpxopmã kaꞌok xeꞌẽgnãg ꞌohnãg, yã nõm putuk ꞌohnãg. ꞌOk xateꞌ xupak tikmũꞌũn teꞌ pa mĩy, nõm nãhã, hu ta pa hok? ꞌÃmhok.
\v 33 Paxpu Topa yõg tik ꞌohnãg ꞌõhõm, puxix hãpxopmã kaꞌok xeꞌẽgnãg ꞌohnãg. Kaxĩy.
\p
\v 34 Ha:
\p —‍ꞌÃmũn, ꞌãnãhã hãpkummuk mĩyꞌax mũtik, tu hãpkummuk mĩypax. ꞌOk xatek mũꞌã hãmyũmmũgãꞌ? ꞌÃmhok. Kaxĩy.
\p Tuꞌ ta tik putyõn Yoneo xop yõg Topa pet kũnãpah, tuꞌ xat, pu xe mõꞌnã hok.
\s Pa hok xop putuk
\p
\v 35 Yãꞌ putyõn, ha Yeyox teꞌ xupak, tu taꞌ mõg, nũy tik xax, tuꞌ xipihiꞌ, tu:
\p —‍ꞌOk ꞌãkuxa yũm kaꞌok Tikmũꞌũn Kutok kopah? Kaxĩy.
\p
\v 36 Ha tik te:
\p —‍Yãyã, ꞌãpu hãmꞌãktux, ꞌũꞌũm nõꞌõm? ꞌŨgkuxa yũm putup nõm kopah. Kaxĩy.
\p
\v 37 Ha Yeyox te:
\p Yãk mũn, ꞌãte ꞌãmũtik hãmꞌãktux nõmhã. Kaxĩy.
\p
\v 38 Ha tik te:
\p —‍Yãyã, ꞌũgkuxa yũm kaꞌok ꞌãkopah. Kaxĩy.
\p Tuꞌ kopaxux hãꞌ xip Yeyox keppah.
\p
\v 39 Ha Yeyox te:
\p —‍ꞌŨgnũn hãm xexka tuꞌ, nũy tikmũꞌũn yõg hãpxopmãꞌax kopit, nũy tikmũꞌũn xatat. Tikmũꞌũn yãg te hãmꞌãktux, hu: “ꞌŨgmũꞌãte Topa yõg hãmꞌãktux yũmmũg kutõgnãg, pak mũꞌãtep-tup, ꞌũ hãmyũmmũg”. Kaxĩy. Yã nõm teꞌ pa hok xop putuk, pa hãpxip ꞌĩhã hãmpẽnãhãꞌ. Ha ta tikmũꞌũn yãg nõy te hãmꞌãktux hitop, hu: “ꞌŨgmũꞌãte Topa yõg hãmꞌãktux yũmmũg”. Kaxĩy. Yã nõm te pa hok xop putuk. Kaxĩy.
\p
\v 40 Ha Paniye xop teꞌ xupak, haꞌ yãg teꞌ yĩkopit, hu:
\p —‍Texĩy, ꞌok ꞌũgmũg pa hok xop putuk? Kaxĩy.
\p
\v 41 Ha Yeyox te:
\p —‍ꞌÃxop te hãmꞌãktux Topa yõg hãmꞌãktux yũmmũg kutõgnãg, pap-tup, nũy hãmyũmmũg, nũy taꞌ pa hok xop putuk, tuk-nãy tu hãmpẽnãhãꞌ, yã ꞌãmax Topa keppah. Pa ꞌãxop te kaxĩy ꞌohnãg. Yã ꞌãxop te hitop ꞌãktux Topa yõg hãmꞌãktux yũmmũg, nũy taꞌ pa hok xop putuk, tu ꞌãkummuk Topa keppa mõkuma ꞌãmõg. Kaxĩy.
\c 10
\s Kahnẽn
\p
\v 1 Ta xe tikmũꞌũn pu hãmꞌãktux Yeyox te, hu:
\p —‍ꞌÃte xaꞌ yũmmũgãp-tup hãpxop, tu hãpxeꞌe ꞌãktux putup. ꞌŨxip kahnẽn yõg hãmpakꞌax, haꞌ xupxet te hãmpakꞌax ꞌãtex, pa hãmpakꞌax yĩkox hãꞌ xupep ꞌohnãg,
\v 2 pa kahnẽn yõg pẽnãꞌax te hãmpakꞌax yĩkox hãꞌ xupep,
\v 3 ha hãmyĩkox pẽnãꞌax te hãpxõn, haꞌ xupep kahnẽn yõg pẽnãꞌax, tu kahnẽn xãnãhãꞌ, yã xuxetꞌax xohix hãꞌ xãnãhã kahnẽn, ha kahnẽn teꞌ xupak, huꞌ peꞌ mõg, ha kahnẽn yõg pẽnãꞌax te kahnẽn mõgãhã hãptopah,
\v 4 tu hãptopaꞌ pip, tuꞌ pẽnãꞌax te mãxap tuꞌ mõg, ha kahnẽn teꞌ peꞌ mõg, kahnẽn teꞌ yũmmũg pẽnãꞌax yõg hãmꞌãktux tuꞌ,
\v 5 ha kahnẽn teꞌ nõy peꞌ mõg ꞌohnãg. ꞌŨnõy te kahnẽn xãnãhãꞌ, pa kahnẽn nũpanãm, kahnẽn teꞌ yũmmũg ꞌohnãg ꞌũnõy yõg hãmꞌãktux tuꞌ. Kaxĩy.
\p
\v 6 Yeyox te nõm ꞌãktux, nũy tikmũꞌũn pu hãpxop nõy yũmmũgãhãꞌ, pa tikmũꞌũn te hãmyũmmũg ꞌohnãg. Tikmũꞌũn te hãmpeꞌpaxex texĩy hãmꞌãktux.
\s Yeyox te kahnẽn yõg pẽnãꞌax max putuk
\p
\v 7 Ta xe hãmꞌãktux Yeyox te, hu:
\p —‍ꞌÃte xa hãpxeꞌe ꞌãktux. Kahnẽn te hãmpakꞌax yĩkox hã mõxakux hãmpakꞌax kopah. Yãꞌ pip ꞌũkopah, haꞌ nõy te kahnẽn koxyõy ꞌohnãg. Hã kaxĩy ꞌãte yõg kuxa mãm kaꞌok xop pẽnãhãꞌ, haꞌ nõy te nõm koxyõy ꞌohnãg.
\v 8 Kahnẽn te xupxet ꞌãpak ꞌohnãg. Hã kaxĩy yõg kuxa mãm kaꞌok xop te nõm te koit hãꞌ yũmmũgã xop ꞌãpak ꞌohnãg.
\v 9 Kahnẽn te hãmpakꞌax yõg hãmyĩkox hã mõxakux hãmpakꞌax kopah, tu taꞌ mõg nõmhã hatoꞌah kamah, nũy tu xit. ꞌŨnõy te kahnẽn koxyõy ꞌohnãg. Hã kaxĩy ꞌãte yõg kuxa mãm xop pẽnãhãꞌ, haꞌ nõy te nõm koxyõy ꞌohnãg.
\v 10 Ha ta xupxet nũn, nũy tu xupxet, nũy kahnẽn kix, nũy xohix koxyõy. Hã kaxĩy ꞌũnõy tep-tup, nũy yõg kuxa mãm kaꞌok xop kix, nũy koxyõy. Pa ꞌãte yõg kuxa mãm kaꞌok xop pẽnã max, haꞌ kuxa mãm, tuꞌ hittup, yãꞌ kuxa hittup xexkah.
\p
\v 11 —‍Ta ꞌãte kahnẽn pẽnãꞌax max putuk kamah. Kahnẽn pẽnãꞌax max te kahnẽn pupi tu xok, yã ꞌãte tikmũꞌũn pupik xok putup.
\v 12 Ha taꞌ xip kãmãnat. Xuxyã te nõm pu pago, pu tu kahnẽn pẽnãꞌ, pa ꞌap kahnẽn yõg pẽnãꞌax xeꞌeꞌah, yã kãmãnat, yã ꞌũyõgꞌah kahnẽn. Ta kokexkata nũn, ha ta mõxupaha kãmãnat, yĩy ta kokexkata te kahnẽn pop, ha kahnẽn xohix nũpãnãm.
\v 13 Kãmãnat mõxupahaꞌ. Hamũn, tayũmak tuꞌ hãm, tu kahnẽn putuppax ꞌohnãg.
\v 14-15 Pa ꞌãte kahnẽn yõg pẽnãꞌax max putuk. Yõgnũ ꞌãtak tek yũmmũg, ha ꞌãte yãy yõg ꞌãtak yũmmũg. ꞌÃte yãy yõg kuxa mãm xop yũmmũg, ha yõg kuxa mãm kaꞌok xop tek yũmmũg, ha ꞌãte mõ nõm yãyxeꞌẽgnãg, hu nõm pupik xok putup.
\p
\v 16 —‍Ha ta kahnẽn nõy xohix pip hãmpakꞌax kũnãpah. Hã kaxĩy tikmũꞌũn panip xop kuxa mãm kaꞌok putup ꞌũgkopah. Nõm tek mũn ꞌãpak putup, haꞌ kuxa mãm kaꞌok xop nõy mõxakux putup, ha xohix kuxap-xet, tup-tox puxet, ha ꞌãte xohix xexka pẽnãp-tup.
\p
\v 17 —‍ꞌÃteꞌ tux hok, pu tikmũꞌũn ꞌũkputex, puxix tikmũꞌũn ꞌũkputex, ha putpuk hip-tup. Hã kaxĩy ꞌãtak Topa tek mõyãy xeꞌẽgnãg.
\v 18 ꞌÃte tux hok, pu tikmũꞌũn ꞌũkputex hok, puxix tikmũꞌũn ꞌũkputex hok. ꞌÃtep-tup, puxix tikmũꞌũn ꞌũkputex. Topa teꞌ xat, ha ꞌãtep-tup, kopxik xok putup, tu putpuk hip-tup. Kaxĩy.
\p
\v 19 Tikmũꞌũn teꞌ xupak Yeyox yõg hãmꞌãktux, tu yãy yõg hãmpeꞌpaxexꞌax te yãy putuk ꞌohnãg.
\v 20 Tikmũꞌũn punethok te:
\p —‍Yãꞌ xip yãmĩy kummuk Yeyox kopah! ꞌŨp-tox kummuk! Teptu ꞌãxop te nõm ꞌãpak? Kaxĩy.
\p
\v 21 Ha ta tikmũꞌũn nõy te:
\p —‍Tik te hãmꞌãktux max hã kaxĩy ꞌohnãg nõm kopaꞌ xip yãmĩy kummuk. Texĩy tute tik pa hok puꞌ pa mĩy? Kaxĩy.
\s Yoneo xop te Yeyox putup nõg
\p
\v 22 Ha taꞌ xip ꞌãmuk xexkah kõmẽn Yenoyanẽn tuꞌ, yã Topa pet xexka yõg ꞌãmuk xexkah. Yã hõmã ꞌũhittap tikmũꞌũn te xeꞌ mĩy Topa pet xexkaꞌ, tu nõ ꞌãmuk xexka mĩy. Yã hãmꞌãxĩynãg.
\v 23 Ha taꞌ hãpkumep Yeyox te Topa pet xexka kux kaxax kakaꞌ, yã kux kaxax ꞌãxetꞌax Xanomãm Yõg Kux Kaxax.
\v 24 Ha taꞌ nũn Yoneo xop, tu nũktu Yeyox xakot, tu:
\p —‍ꞌÃmnĩy xohix texĩy hãg mũꞌãteꞌ hipꞌax, nũy hãmyũmmũg? ꞌÃpu hãpxeꞌe ꞌãktux. ꞌOk ꞌãmũn yã Kunnix, Topa te nõm yãykutnãhãꞌ? Kaxĩy.
\p
\v 25 Ha Yeyox te:
\p —‍Hõmã ꞌãte xa hãmꞌãktux, pa ꞌãkuxa mãm ꞌohnãg ꞌũgkopah. ꞌÃte hãpxopmã max yõgnũ ꞌãtak te nõm putup, ha ꞌãxop teꞌ pẽnãhãꞌ, tu nõm hãg yũmmũgꞌax.
\v 26 Pa ꞌãxop tep-tup ꞌohnãg, nũy ꞌãkuxa mãm, ꞌa ꞌãxop te yõgnũ kahnẽn putukꞌah tuꞌ, yã yõgnũ kuxa mãm kaꞌok xop putukꞌah.
\v 27 ꞌÃte yãy yõg kuxa mãm kaꞌok xop xãnãhãꞌ, ha nõm tek ꞌãpak, tuꞌ yĩpkox pip. ꞌÃte nõm yũmmũg, ha nõm tek peꞌ mõg, yã kahnẽn putuk, yã kahnẽn te kahnẽn pẽnãꞌax peꞌ mõg putuk.
\v 28 Yã yõg kuxa mãm kaꞌok xop, haꞌ nõy te nõm pop putupꞌah. ꞌÃte yãy yõg xop hĩnnãhãꞌ, haꞌ pip hãmyãxatamuk xohix kux ꞌohnãg hã Topa yĩkaꞌ, yãꞌ xakix xexkap-tupꞌah.
\v 29 Yõgnũ ꞌãtak ꞌã kuxa mãm xop popmãhãꞌ. Ha yõgnũ ꞌãtak ꞌũxexkanãm. ꞌŨkuxa mãm xop yã yõgnũ ꞌãtak yõg, haꞌ nõy te nõm pop putupꞌah.
\v 30 Yõgnũ ꞌãtak ꞌũxexka xik mũn yã yãy putuk. Kaxĩy.
\p
\v 31 Ha Yoneo xop te mĩkaxxap pop, nũy Yeyox tux, nũy putex.
\v 32 Ha Yeyox te:
\p —‍ꞌÃte hãpxopmã max punethok ꞌãxop kopah. Yã yõgnũ ꞌãtak teꞌ xat, ꞌũ mĩy. Hãpxopmãꞌax ꞌũm ꞌũkummuk, yĩy ꞌãxop tek tux putup mĩkaxxap hã? Kaxĩy.
\p
\v 33 Ha Yoneo xop te:
\p —‍ꞌŨgmũꞌãtep-tup, nũy ꞌãtux mĩkaxxap hã. Yã xate hãpxop kummuk mĩy, yã Topa ꞌãktux kummuk, yã xateꞌ xuktux ꞌãmũn yã Topah, pa ꞌãmhok, yã tihik ꞌãmũn. Kaxĩy.
\p
\v 34 Ha Yeyox te:
\p —‍ꞌŨkaxꞌãmi ꞌõg xatꞌax yõg tappet tuꞌ, hu: “ꞌÃxop te Topa putuk”. Kaxĩy.
\v 35 Tu xe:
\p —‍Topa te nõm puꞌ hõm yãy yõg hãmꞌãktux, tu nõm xãnãhãꞌ, hu: “Topa putuk xop”. Kaxĩy. Yãꞌ kaxꞌãmi Topa yõg tappet tu nõꞌõm, ha Topa yõg tappet teꞌ koit ꞌohnãg.
\v 36 Ha Topa tek mũn yãykutnãhãꞌ, tu nũgkutnãhã nũnte hãm xexka tuꞌ, ha ꞌãteꞌ hãmꞌãktux ꞌũgmũn yã Topak-tok. Texĩy ꞌãxop tek mũn ꞌãktux kummuk?
\v 37 Paxpu ꞌãte yõgnũ ꞌãtak pu hãpxopmã ꞌohnãg, ha ta ꞌãpu ꞌãkuxa mãm hok.
\v 38 Pa ꞌãte yõgnũ ꞌãtak pu hãpxopmãhãꞌ. ꞌÃxop tek kopa ꞌãkuxa mãm ꞌohnãg, pa ꞌãpu ꞌãkuxa mãm yõg hãpxopmãꞌax kopah, yã yõg hãpxopmãꞌax kaꞌok xeꞌẽgnãg kopah, nũy yũmmũg xeꞌe yõgnũ ꞌãtak xip ꞌũgmũtik, xik xip yõgnũ ꞌãtak mũtik. Kaxĩy.
\p
\v 39 Ha Yoneo xop te xonat xat, pu Yeyox mũy, pa Yeyox te tikmũꞌũn kopaꞌ xip, tuꞌ mõg,
\v 40 tu mõktu kõnãg kox Yohnãm xak putpuk, tu mõktuꞌ xupep Yoãm yõg xipꞌax tuꞌ, yã hõmã Yoãm te tikmũꞌũn putox pix nõnteh, ha Yeyox teꞌ nox xip.
\v 41 Ha taꞌ nũn tikmũꞌũn punethok, tu nũktu Yeyox tuꞌ mõxahaꞌ, tu hãmꞌãktux, hu:
\p —‍Yoãm te hãpxopmã kaꞌok xeꞌẽgnãg ꞌohnãg, pa Yoãm te Yeyox ꞌãktux, ha hãmꞌãktux xohix ꞌũxeꞌeꞌ, yãꞌ koit ꞌohnãg. Kaxĩy.
\p
\v 42 Ha ta tikmũꞌũn punethok kuxa mãm kaꞌok Yeyox kopah.
\c 11
\s Nay xok
\p
\v 1 Ha taꞌ xip tihik ꞌãxetꞌax Nay, yãꞌ xip xiptuxexka Metãn tuꞌ, tuꞌ pakut. Ha ta kamaꞌ tihiꞌ Metãn tu Mãnix xiꞌ tutnõy, yã Mãꞌat.
\v 2 Yã hõmã Mãnix te hep haxnãg max pux, yãꞌ takat, tu Yeyox pata yĩmũꞌ pux, tuꞌ xe hãꞌ pata nagãhãꞌ, yã Mãnix te Yeyox putuppax. Manix taknõy yã Nay pakut.
\v 3 Mãnix teꞌ nõy mõꞌkutnãhã xix Mãꞌat teꞌ, puyĩy Yeyox xãnãꞌ, hu:
\p —‍Yãyã, yã ꞌãxape ꞌũpakut. Xate nõm mõꞌyãy xeꞌẽgnãg. Kaxĩy.
\p
\v 4 Ha Yeyox te:
\p —‍Yãꞌ pakut, paꞌ pakut, puyĩy tikmũꞌũn pẽnãꞌ Topa te hãpxopmã kaꞌok xeꞌẽgnãg. Tikmũꞌũn teꞌ pẽnãp-tup yãꞌ max xeꞌẽgnãg Topa xix Topak-tok. Kaxĩy.
\p
\v 5 Yeyox te mõꞌyãy xeꞌẽgnãg Mãꞌat xiꞌ tutnõy xix Nay.
\v 6 Nay pakut, ha Yeyox teꞌ xupak, tuk-nãy tuꞌ nox xip ꞌãmnĩy tix hã, yãꞌ mõgꞌah Nay hah.
\v 7 ꞌŨnõg ꞌãmnĩy tix, ha Yeyox te yãy yõg tik te 12 xop pu hãmꞌãktux, hu:
\p —‍ꞌÃpu yũmũ mõg hãpxexka Yonex tuꞌ. Kaxĩy.
\p
\v 8 Ha Yeyox yõg tik xop te:
\p —‍Yãyã, hõmã hãpxip kutõgnãg ꞌĩhã Yoneo xop tep-tup, nũy mĩkaxxap hã ꞌãp-tex ꞌõnteh. ꞌOk xatep-tup, nũy putpu mõg. ꞌÃmõg hok!
\v 9 Ha Yeyox te:
\p —‍Mãyõn mõg puxet yõg ꞌot xohix teꞌ 12. Tik ꞌũm te hãpkumep hãptup hah, hu nãp-tupꞌah, yã hãmpẽnãhã ꞌĩhãꞌ xip kuyãnãm. Kuyãnãm xip ꞌĩhã ꞌãte hãpxopmãhãꞌ.
\v 10 Pa tik ꞌũm te hãpkumep ꞌãmnĩy ꞌĩhã, huꞌ nãp-tup, yã hãpkoxtap. Hãpxip ꞌĩhã hãpkoxtapꞌax, ꞌĩhã ꞌãte hãpxopmã ꞌohnãg. Kaxĩy.
\p
\v 11 Tu xe:
\p —‍Yũmũg xape Nay te mõꞌyõn, pak mõg putup, nũy tuhuk. Kaxĩy.
\p
\v 12 Ha Yeyox yõg tik xop te:
\p —‍Yãyã, mõꞌyõn, puyã xip, ꞌũhittup putup. Kaxĩy.
\p
\v 13 Pa Yeyox te xokꞌax ꞌãktux, yãꞌ xok, pa Yeyox yõg tik xop te hãmpeꞌpaxex, Yeyox te mõꞌyõnꞌax ꞌãktux.
\v 14 Yĩy Yeyox te hãmꞌãktux kaꞌok, hu:
\p —‍Nay ꞌũxok.
\v 15 ꞌAk xipꞌah Nay mũtik, ꞌĩhãꞌ xok, pak kuxa hittup, yã ꞌãte ꞌãxop kuxa mãmmãp-tup. ꞌÃpu yũmũ mõg Nay hah. Kaxĩy.
\p
\v 16 Ha Tõmẽꞌ, yãꞌ xuxetꞌax nõy te ꞌŨktonnix, yã Tõmẽ te:
\p —‍ꞌÃpu yũmũ mõg yãyã mũtik, nũy xakix nũmũtik. Kaxĩy.
\s Yeyox te tikmũꞌũn hĩnnãhãꞌ
\p
\v 17 Ha taꞌ mõg Yeyox, tuꞌ xupak tikmũꞌũn te hãmꞌãktux hõmã ꞌãmnĩy teꞌ 4 ꞌĩhã Nay hãpkot.
\v 18 Xiptuxexka Metãn xix kõmẽn Yenoyanẽn yõg kinõm teꞌ 3 kõmnãg.
\v 19 Yĩy taꞌ mõg Yoneo xohix, nũy Mãꞌat kuxa hittupmãꞌ xix Manix kuxa hittupmãꞌ, yãꞌ taknõy xok, haꞌ potahaꞌ.
\v 20 ꞌŨnũn Yeyox, ha Mãꞌat teꞌ xupak, tu taꞌ mõg, nũy yãy tu xakux, pa Mãnix nox xip yãy pet tuꞌ.
\v 21 Ha taꞌ mõg Mãꞌat Yeyox hah, tu mõktuꞌ xupep, tu:
\p —‍Yãyã, pax xa xip nũnteh, puxix ꞌũktaknõy xok ꞌohnãg.
\v 22 Pa ꞌãteꞌ yũmmũg, xate Topa tuꞌ xak hãpxop ꞌũm nõmhã, puxix xa hãpxopmãꞌ. Kaxĩy.
\p
\v 23 Ha Yeyox te:
\p —‍ꞌÃtaknõy te putpuꞌ hip-tup. Kaxĩy.
\p
\v 24 Ha Mãꞌat te:
\p —‍ꞌÃteꞌ yũmmũg, hãmyãxatamuk xohix xox putox ꞌĩhã putpuꞌ hip-tup. Kaxĩy.
\p
\v 25 Ha Yeyox te:
\p —‍ꞌÃte tikmũꞌũn putpuꞌ hĩnnãhãꞌ, tu hiꞌax hõm, yã hãmhĩnnãꞌax xip ꞌũgkopah. Tikmũꞌũn ꞌũm kuxa mãm ꞌũgkopah, huꞌ hip-tup. Tikmũꞌũn xakix, puxix tu hip-tup.
\v 26 Ha tikmũꞌũn ꞌũm pip, tuꞌ kuxa mãm kaꞌok ꞌũgkopah, puxix tu xok xexka putup ꞌohnãg. ꞌOk ꞌãkuxa mãm nũꞌ hãmꞌãktux kopah? Kaxĩy.
\p
\v 27 Ha Mãꞌat te:
\p —‍Yãyã, hamũn, ꞌũgkuxa yũm. ꞌÃteꞌ yũmmũg, ꞌãmũn yã Kunnix, yã Topak-tok, tu ꞌãnũn nũnte hãm xexka tuꞌ. Kaxĩy.
\s Yeyox potahaꞌ
\p
\v 28 Tu taꞌ nũn Mãꞌat, tu nũktuꞌ xupep, tuꞌ tutnõy Mãnix mũtik hãmꞌãktux, yãꞌ tix te yãy mũtik hãmꞌãktux, ꞌap nõy xipꞌah. Mãꞌat te:
\p —‍Yãyã xip, tu ꞌãxak. Kaxĩy.
\p
\v 29 Ha Mãnix teꞌ xupak, tu taꞌ mõg mõꞌkaꞌok, nũy Yeyox ha mõg.
\v 30 Yã Yeyox xupep ꞌohnãg xiptuxexka tuꞌ, paꞌ xip nõm xipꞌax tuꞌ, yã hõmã hãmꞌãktux Mãꞌat mũtik ꞌõnteh.
\p
\v 31 Ha taꞌ pip Yoneo xop mĩptut kopah, nũy Mãnix kuxa hittupmãꞌ, tu Mãnix pẽnãhãꞌ. Yãꞌ yok Mãnix, tu taꞌ mõg mõꞌkaꞌok hãptopah, ha Yoneo xop te hãmpeꞌpaxex Mãnix mõg xukpot tuꞌ, nũy pohoh.
\p
\v 32 Taꞌ mõg Mãnix, tu mõktu Yeyox haꞌ xupep, tu Yeyox pẽnãhãꞌ, tu hãm tuꞌ xip Yeyox pata yĩkak, tu:
\p —‍Yãyã, pax xa xip nũnte, puxix ꞌũktaknõy xok ꞌohnãg. Kaxĩy.
\p
\v 33 Mãnix potahaꞌ, ha Yeyox te pota pẽnãhãꞌ xix Yoneo xop pota pẽnãhã nõm nũn Mãnix mũtik, tuꞌ kuxa kaꞌ xexkah,
\p
\v 34 tu:
\p —‍Piꞌyã ꞌãxop te nõ hãpkot? Kaxĩy.
\p Haꞌ nõy te:
\p —‍Yãyã, mã, nũy pẽnãꞌ. Kaxĩy.
\p
\v 35 Ha Yeyox potahaꞌ
\p
\v 36 Yĩy Yoneo xop te:
\p —‍ꞌŨpẽnãꞌ, Yeyox te Nay mõꞌyãy xeꞌẽgnãg xexkaꞌ. Kaxĩy.
\p
\v 37 Paꞌ yãg te:
\p —‍ꞌOk tute tik pa hok puꞌ pa mĩy? Hamũn. Paxpu Nay hittupmã, puxix tu xok ꞌohnãg. Kaxĩy.
\s ꞌŨputpuꞌ hi Nay
\p
\v 38 Haꞌ kuxa kaꞌ xexka ꞌũxehet Yeyox, tu taꞌ mõg xukpot tuꞌ, haꞌ xip Nay yõg mĩkaxxap kox, ha mĩkaxxap te mõhãmnĩnyĩn mĩkaxxap kox.
\v 39 Ha Yeyox te xat, hu:
\p —‍ꞌÃpuꞌ xut mĩkaxxap. Kaxĩy.
\p Ha Mãꞌat, yã tik mũktutnõy te:
\p —‍Yãyã, ꞌũhax kummuk xexkaꞌax. Yãꞌ xok hõmã ꞌãmnĩy teꞌ 4. Kaxĩy.
\p
\v 40 Ha Yeyox te:
\p —‍ꞌOk ꞌãte xa hãmꞌãktux, ꞌãkuxa yũm, hu taꞌ pẽnãp-tup Topa te hãpxopmã max xeꞌẽgnãg mĩy putup? Kaxĩy.
\p
\v 41 Ha tikmũꞌũn te mĩkaxxap yõkãnãmãhãꞌ, ha Yeyox te pepi pẽnãhãꞌ, tu:
\p —‍Yõgnũ ꞌãtak, ꞌãmax, xate yõg hãmꞌãktux ꞌãpak.
\v 42 ꞌÃteꞌ yũmmũg, xate yõg hãmꞌãktux ꞌãpak mõkumaꞌãmõg. Pa ꞌãte nũ ꞌãktux, puyĩy tikmũꞌũn hãmꞌãktux ꞌãpax, huꞌ kuxa mãm ꞌũgmũn kopah, yã xate nũgkutnãhãꞌ. Kaxĩy.
\p
\v 43 Ta hãpxip ꞌĩhã Yeyox teꞌ xãnã kaꞌok, hu:
\p —‍Ney, ꞌãpep, nũy nũꞌ! Kaxĩy.
\p
\v 44 Ha ta nõm xok xupep, yãꞌ yĩm kĩy xix pataꞌ, yã xakix xop yõg topixxax kĩyꞌax hã, xix pa yĩn kĩy kamah. Ha Yeyox te:
\p —‍ꞌÃpu ꞌũkoꞌaꞌ, nũy xut, pu mõg. Kaxĩy.
\s Tikmũꞌũn tep-tup puyĩy xonat Yeyox putex
\p
\v 45 Yãꞌ pip Yoneo punethok, tuꞌ pẽnãhãꞌ, huꞌ kuxa mãm kaꞌok Yeyox kopah. Yãꞌ nũn, nũy Manix mũtik pip, tuꞌ pẽnãhãꞌ Yeyox te Nay putpuꞌ hĩnnãhãꞌ, huꞌ kuxa mãm kaꞌok Yeyox kopah.
\p
\v 46 Ha taꞌ yãg mõg putpuꞌ, nũy Paniye xop pu Yeyox yõg hãpxopmãꞌax ꞌãktux, tu hãmꞌãktux,
\v 47 yĩy taꞌ yãy tu nũꞌnãhã Paniye xop xix ꞌãmãnex xexka xop xix tik pa te hãmyũmmũg xop, tu:
\p —‍Putep mũn mĩy putup yũmũꞌãteꞌ? Tik te hãpxopmã kaꞌok xeꞌẽgnãg punethok.
\v 48 Yũmũꞌãteꞌ tux hok, pu mĩy hãpxopmã kaꞌok xeꞌẽgnãg hã kaxĩy, puxix tikmũꞌũn xohix xexka kuxa mãm kaꞌok putup Yeyox kopah, ha taꞌ nũn putup Hõm yõg xop, tu yũmũ yõg Topa pet koxyõy putup, xix yũmũg xop xohix xexka kix putup. Kaxĩy.
\p
\v 49 Paꞌ xip yãp-xet ꞌũxuxetꞌax Kaxpax, yã nõm hãmyãxatamuk ꞌĩhã ꞌãmãnex xop xat Kaxpax teꞌ, tu:
\p —‍ꞌÃxop te hãmyũmmũg ꞌohnãg.
\v 50 ꞌOk ꞌãxop te hãmpeꞌãpaxex ꞌohnãg? Yãꞌ max, pu tik puxet tikmũꞌũn pupiꞌ xok, pa yãꞌ kummuk, pu yũmũg xohix xexka xakix. Kaxĩy.
\p
\v 51 Yã Kaxpax te yãy yõg hãmpeꞌpaxexꞌax ꞌãktux ꞌohnãg, pa yã nõm hãmyãgxatamuk ꞌĩhã ꞌãmanex xop xat Kaxpax teꞌ, tu Topa pupiꞌ hãmꞌãktux, tu Yeyox xokꞌax ꞌãktux. Yã Yeyox te Yoneo xop pupiꞌ xok putup.
\v 52 Yã Yeyox te Yoneo xop pupiꞌ xok putup, tuꞌ xok putup, nũy yãytunũꞌxoh nõm nõy kamah, yã hãm panip tuꞌ pip hãpxexka xohix tuꞌ, yã Topak-tok xop, tu Yoneo xop hãꞌ mĩy putup xiꞌ nõy hãꞌ, pu tuꞌ pip puxet, yã xop puxet.
\p
\v 53 Ha ta Yoneo xexka xop te yãy mũtik hãmꞌãktux kõnãmãhã nõmhã texĩy Yeyox putex putup,
\v 54 yĩy ta Yeyox te yãy xaptop hã hãpkumep hãpxexka Yonex tuꞌ, tu hãpxip ꞌĩhãꞌ mõg, tu mõktuꞌ xupep hãm nak yĩkaꞌ, tuꞌ nox xip kõmẽn ꞌEpayĩy tuꞌ yãy yõg tik xop mũtik.
\p
\v 55 Ha ta hãmhũmnãg Yoneo xop yõg ꞌãmuk xexka xuxetꞌax Nõãꞌyẽn, ha taꞌ mõg tikmũꞌũn punethok kõmẽn Yenoyanẽn tuꞌ, nũy yãy pix, nũy Yoneo yõg xatꞌax mĩy.
\p
\v 56 Ha ta tikmũꞌũn te Yeyox xak kõmẽn tuꞌ, tu yãy mũtik hãmꞌãktux, hu:
\p —‍Putep hãmpeꞌãpaxax, ꞌok nũn putup Yeyox ꞌãmuk xexka hah? Kaxĩy.
\p
\v 57 Ha taꞌ xat ꞌãmãnex xexka xop teꞌ xix Paniye xop teꞌ, pu tikmũꞌũn ꞌũm Yeyox pẽnãꞌ, mãꞌ, nũy nõm ꞌãktux, puyĩy xonat xat, pu Yeyox mũy.
\c 12
\s Yeyox xip xiptuxexka Metãn tuꞌ
\p
\v 1 Ta xe ꞌãmnĩy teꞌ 6 ꞌĩhãꞌ xipꞌax ꞌãmuk xexka ꞌũxuxetꞌax Nõãꞌyẽn, ha taꞌ mõg Yeyox, tu mõktuꞌ xupep xiptuxexka Metãn tuꞌ, yã Nay pet yũm Metãn tuꞌ, yã hõmã Yeyox te nõm putpuꞌ hĩnnãhãꞌ.
\v 2 Ha taꞌ puk ꞌãmuk, tu Mãꞌat te xitꞌax nũnnãhãꞌ, nũy tikmũꞌũn puꞌ nĩm, ha taꞌ yũm Nay mĩmpe xitꞌax tuꞌ Yeyox mũtik,
\v 3 ha Manix teꞌ paha hep haxnãg max takat xexkah, yãꞌ kit xahix, yã mĩnnut nãn hãꞌ mĩy. Manix te nõm pux Yeyox pata yĩmũꞌ, tu yãy xe hãꞌ pata nagãhãꞌ. ꞌŨhax mãynãg ꞌũhep yõg, tu hãpxip ꞌĩhã mĩptut hã nũꞌxip ꞌũhax max.
\v 4 Ha taꞌ xip Yot ꞌIxkanot, yã Yeyox yõg tik te 12 xop kopaꞌ xip, yãꞌ gãy xop mõgãp-tup, puyĩy Yeyox xũygãꞌ.
\v 5 Yot te:
\p —‍Teptu hep haxnãg nõmenex ꞌohnãg, nũy 2 xẽmãn yõg hãm hãꞌ pop tayũmak, nũy hok xop pu tayũmak nĩm? Kaxĩy.
\p
\v 6 Yã Yot te hãmꞌãktux te kaxĩy, pa hok xop putuppax ꞌohnãg, paꞌ xupxet putup, yã tuteꞌ tat tayũmak Yeyox yõg xix Yeyox yõg tik xop yõg, tu nõm hã tatꞌax kopa yãy pu tayũmak mõypax.
\p
\v 7 Ha Yeyox te:
\p —‍Pu yã xip ꞌũhũn. Hãmꞌãktux kummuk hok. Tute hep tat, nũy ꞌũgyĩn muk, yã ꞌũkxok putup.
\v 8 ꞌŨhok xop pip kaꞌok mõkumaꞌmõg ꞌãxop kopah, pa noxk xip kaꞌok ꞌohnãg ꞌãxop kopah. Kaxĩy.
\s ꞌŨxexka xop tep-tup, nũy Nay putex
\p
\v 9 Ha ta tikmũꞌũn xohix xexka teꞌ xupak hatoꞌa Yeyox xip xiptuxexka Metãn tuꞌ, tu taꞌ mõg, nũy Yeyox pẽnãꞌ xix Nay pẽnãꞌ, yã putpuꞌ hiꞌ.
\v 10 Yĩy ta ꞌãmãnex xexka xop te yãy mũtik hãmꞌãktux texĩy yĩp-tex Nay kamah.
\v 11 Yã Yeyox te Nay putpuꞌ hĩnnãhãꞌ, ha Yoneo punethok teꞌ pẽnãhãꞌ, tuꞌ xupak, hu yãy yõg xexka xop nĩm, nũy kuxa mãm Yeyox kopah, yĩy taꞌ xexka xop tep-tup nũy Nay putex.
\s Yeyox te kõmẽn Yenoyanẽn ha mõꞌnãhãꞌ
\p
\v 12 Hãptup ha taꞌ pip tikmũꞌũn ꞌãmuk xexka tuꞌ ꞌãxetꞌax Nõãꞌyẽn, tuꞌ xupak Yeyox nũn kõmẽn Yenoyanẽn tuꞌ.
\v 13 Ha tikmũꞌũn xohix teꞌ pop patxap kup mãg, tu taꞌ mõg Yeyox hah, tuꞌ mõg, tu hãmꞌãktux kaꞌok hu:
\p —‍ꞌŨmax xeꞌẽgnãg Topah. Topa, ꞌãpu nõm pu hãmmaxnãꞌ xate nũ nõm kutnãhãꞌ, yã tute ꞌIyaet xop xat. Topa, ꞌãpu nõm pu hãmmaxnãꞌ. Kaxĩy.
\p
\v 14 Ha Yeyox teꞌ paha yomẽn kutok, tu nõm yĩmũꞌ yũm. Yã Topa yõg tappet te:
\v 15 “Kõmẽn Xiãm yõg tikmũꞌũn, ꞌãpu ꞌãkuxa nõg hok. ꞌŨnũn ꞌõg tik xexkah, yã yomẽn kutok yĩmũꞌ yũm”. Kaxĩy.
\p
\v 16 Ha Yeyox yõg tik xop te nõm kaxꞌãmi xutigã ꞌohnãg, pa Yeyox mõg putup pepi pexkox tuꞌ, ꞌĩhãꞌ yũmmũg putup Topa yõg tappet yõg hãmꞌãktux xix tikmũꞌũn te hãpxopmã yũmmũg putup kamah.
\p
\v 17 Yã tikmũꞌũn teꞌ pẽnãhã Yeyox te Nay xãnãhã mĩkaxxap kox kopah, tu putpuꞌ hĩnnãhãꞌ, ha tikmũꞌũn teꞌ xape xohix pu nõm ꞌãktux.
\v 18 Haꞌ nõy teꞌ xupak Yeyox te hãpxopmã kaꞌok xeꞌẽgnãg, hu taꞌ mõg Yeyox hah.
\v 19 Yĩy ta yãy mũtuk hãmꞌãktux Paniye xop teꞌ, hu:
\p —‍Pẽnãꞌ. Tikmũꞌũn tek mũg ꞌãpak ꞌohnãg, pa tikmũꞌũn xohix xexka te Yeyox peꞌ mõg. Kaxĩy.
\s Genex yõg xop mõg, nũy Yeyox pẽnãꞌ
\p
\v 20 Yãꞌ pip tikmũꞌũn xohix Yenoyanẽn tu ꞌãmuk xexka tuꞌ, tu Topa pu nũktettex, ha nõm xop kopaꞌ xip hãpxexka Genex yõg xop,
\v 21 tuꞌ nũn, tu nũktu Pinip haꞌ mõxahaꞌ, tu:
\p —‍Yãyã, ꞌũgmũꞌãtep-tup, nũy Yeyox pẽnãꞌ. Kaxĩy.
\p Yã Pinip yõg kõmẽn yã Metxax, yã hãpxexka Ganinet kopaꞌ xip.
\p
\v 22 Tu taꞌ mõg Pinip, tu mõktu ꞌÃnene puꞌ xuktux nõꞌõm, ha taꞌ mõg tik tix, tu mõktu Yeyox puꞌ xuktux nõꞌõm,
\v 23 ha Yeyox te:
\p —‍ꞌŨgmũn yã Tikmũꞌũn Kutok. Hãpxip kutõgnãg ꞌĩhãg xok putup, hak-nãy tu Topa te ꞌũkxexka mĩy putup, ha tikmũꞌũn xohix tek mũn ꞌãktux max putup.
\v 24 Tikmũꞌũn te hãpxop xap xok. Yãk-tõgnãg hãpxopxap, pa hãpxip ꞌĩhã yãyhã kup, tu mĩnta ta xohix popmãhãꞌ, yãꞌ max xeꞌẽgnãg. Hã kaxĩy putuk ꞌũgmũn. ꞌŨkxok putup, pa putpuk hip-tup, ha nõmhãꞌ max xeꞌẽgnãg.
\v 25 Hã kaxĩy kama tikmũꞌũn. Tikmũꞌũn te yãy yõg putupꞌax mĩy ꞌohnãg, puxiꞌ pop putup hãpxop max xeꞌẽgnãg, yã Topa yĩkaꞌ pip putup hãmyãxatamuk xohix kux ꞌohnãg hã. Ha taꞌ nõy te yãy yõg putupꞌax mĩy, puxiꞌ pop putupꞌah hãpxop max xeꞌẽgnãg, yã Topa yĩkaꞌ pip putupꞌah hãmyãxatamuk xohix kux ꞌohnãg hã.
\v 26 Yõgnũ kãmãnat te yãy putupꞌax mĩyꞌah, paꞌ mĩy ꞌãte nõm putup, tuk peꞌ mõg putup, nũy ꞌũgmũtik pip, ha Topa te nõm xexka mĩy putup. Kaxĩy.
\s Yeyox te hãmꞌãktux ꞌũxok putup
\p
\v 27 Tu Yeyox te xe:
\p —‍Hõnhã ꞌĩhãg kuxa hittup ꞌohnãg. ꞌÃte putep ꞌãktux putup? ꞌOk ꞌãte hãmꞌãktux putup, hu: “Yõgnũ ꞌãtak, ꞌãpu ꞌũkxũy xut”. Kaxĩy. ꞌÃmhok, ꞌãte nõm ꞌãktux putupꞌah. Pak nũn, nũy tu xok.
\v 28 ꞌÃtak, ꞌãpu ꞌãxexka nõy nã mõg tikmũꞌũn xop kopah! Kaxĩy.
\p Ha taꞌ hãmꞌãktux Topa pexkox tuꞌ, hu:
\p —‍ꞌÃte yãy xexka mĩy nõy nãg mõg tikmũꞌũn xop kopah, tu xeꞌ mĩy putup. Kaxĩy.
\p
\v 29 Ha tikmũꞌũn teꞌ xupak, tu hãmꞌãktux, hu:
\p —‍Yã tex tĩnnãhãꞌ. Kaxĩy.
\p Paꞌ nõy te:
\p —‍Yã pexkox yõg nũꞌpok xop te hãmꞌãktux. Kaxĩy.
\p
\v 30 Pa Yeyox te:
\p —‍Topa te hãmꞌãktux, xayĩy ꞌãxop xupax. Kaxĩy.
\p
\v 31 Hãpxip kutõgnãg, ꞌĩhã Topa te hep yãy koxuk xop yõg hãpxopmãꞌax kopit putup, nũy yõg hãpkummuk mĩyꞌax hãꞌ yãnãn. Hãpxip kutõgnãg ꞌĩhã Topa teꞌ puꞌugãp-tup nõm te Topap-tup ꞌohnãg xop xat.
\v 32 ꞌÃte mĩpkupnix yĩmũg xup putup, tu yãy puꞌ pop putup tikmũꞌũn xohix hãpxexka xohix tuꞌ. Kaxĩy.
\p
\v 33 Yã Yeyox te hãmꞌãktux hã kaxĩy, hu tikmũꞌũn pu hãmyũmmũgãhã te kaxĩy xok putup.
\p
\v 34 Ha tikmũꞌũn te:
\p —‍Pak mũꞌãteꞌ mõkupix xatꞌax yõg tappet tu Kunnix xipꞌax hãmyãxatamuk xohix kux ꞌohnãg hã, pa xate hãmꞌãktux Tikmũꞌũn Kutok xup putup mĩpkupnix yĩmũꞌ, tuꞌ xok putup. ꞌŨꞌũm Tikmũꞌũn Kutok? Kaxĩy.
\p
\v 35 Ha Yeyox te:
\p —‍Hãpxip kutognãg hãg xipꞌax nũnteh. ꞌÃpu ꞌũg ꞌãpax, nũy hãmyũmmũg, ꞌĩhãg xip nũnteh. Yã ꞌãte kuyãnãm putuk. ꞌŨkxip, ha tikmũꞌũn te hãmyũmmũg. Kuyãnãm xip, ha tikmũꞌũn te hãmpẽnãhãꞌ.
\v 36 ꞌÃpu ꞌãkuxa mãm kaꞌok ꞌũgkopah, ꞌĩhãg xip, nũy hãmyũmmũg. Kaxĩy.
\s Yoneo xop kuxa mãm ꞌohnãg Yeyox kopah
\p Yeyox te hãmꞌãktux kux, tu taꞌ mõg, tu yãy xaptop,
\v 37 tu hãpxopmã kaꞌok xeꞌẽgnãg punethok, ha tikmũꞌũn teꞌ pẽnãhãꞌ, paꞌ kuxa mãm ꞌohnãg Yeyox kopah.
\v 38 Yã hõmã ꞌũhittap ꞌIyait te Topa pupi hãmꞌãktux, yã hõnhã putuk hãpxopmãꞌax. ꞌIyait te: “Topah, ꞌũꞌũm kuxa mãm yũmũ yõg hãmꞌãktux kopah? Yãꞌ kuxa mãm ꞌohnãg. Tep-teꞌ yũmmũg, yã Topa te hãpxopmã kaꞌok xeꞌẽgnãg? Yãꞌ yũmmũg ꞌohnãg”. Kaxĩy.
\p
\v 39 Hã kaxĩy ꞌũkuxa mãm yũmmũg ꞌohnãg. Hamũn, ꞌIyait te:
\q
\v 40 “Topa te tikmũꞌũn pa te hãmyũmmũg ꞌohnãg mĩy,
\q tu tikmũꞌũn putox kaꞌok mĩy,
\q puyĩy tikmũꞌũn pa hãmyũmmũg ꞌohnãg,
\q puyĩy tikmũꞌũn hãmyũmmũg hok,
\q puyĩy tikmũꞌũn hãpkummuk mĩy kux hok,
\q puyĩy Topa tikmũꞌũn kuxa kummuk xit hok.”
\m Kaxĩy.
\p
\v 41 ꞌIyait te hãmꞌãktux, tuteꞌ yũmmũg Yeyox ꞌũmax xeꞌẽgnãg tuꞌ, hu Yeyox ꞌãktux.
\p
\v 42 Pa Yoneo xexka xohix xop kuxa mãm Yeyox kopah, pa nõm te Paniye xop yĩpkutuk, hu hãmꞌãktux xaptop, puyĩy Paniye xop xat hok, pu Yoneo xop yõg Topa pet hã mõxakux hok.
\v 43 Yãꞌ xexka xop tep-tup punethok, pu tikmũꞌũn nõm ꞌãktux max, pap-tup kutõgnãg, pu Topa nõm ꞌãktux max.
\s Yeyox yõg hãmꞌãktuxꞌax te tikmũꞌũn yõg hãpxopmãꞌax kopit
\p
\v 44 Ha ta xe hãmꞌãktux Yeyox, hu:
\p —‍Tikmũꞌũn ꞌũm kuxa mãm ꞌũgkopah, yãꞌ kuxa mãm kama nõm kopah, nõm te nũgkutnãhãꞌ.
\v 45 Tikmũꞌũn ꞌũm tek pẽnãhãꞌ, yã nõm pẽnãhã kamah, nõm te nũgkutnãhãꞌ.
\v 46 ꞌŨgnũn hãm xexka tuꞌ, tuk mũn, yã hãm xexka yõg tikmũꞌũn yõg kuyãnãm putuk, yãꞌ kuxa mãm ꞌũgkopa xop kuxa te hãpkoxtap kopaꞌ pip ꞌohnãg.
\v 47 Tikmũꞌũn ꞌũm te yõgnũ hãmꞌãktux ꞌãpak, paꞌ yĩpkox ꞌohnãg, kopxix yõg hãpxopmãꞌax kopit putupꞌah. Yã ꞌũgnũn hãm xexka tuꞌ, nũy tikmũꞌũn kuxa kummuk xit, tuꞌ kuxa max mõꞌtat, ꞌũyãnãn tuꞌ, nũy yõg hãpkummuk mĩyꞌax hã yãnãn hok.
\v 48 Tikmũꞌũn ꞌũm tek putup nõg, xix yõg hãmꞌãktux putup nõg, puxix Topa hãmꞌãktux putup, hu: “Yãꞌ kummuk nõꞌõm. Nõm te Yeyox yõg hãmꞌãktux ꞌãpak ꞌohnãg. Kaxĩy Topa te hãmꞌãktux putup hãmyãxatamuk xohix xox putox ꞌĩhãꞌ.
\p
\v 49 Hamũn ꞌãte yãp-xehnãg hã hãmꞌãktux ꞌohnãg, pa yõgnũ ꞌãtak te nũgkutnãhãꞌ, tu ꞌãꞌ hõm hãmꞌãktuxꞌax, ꞌũyĩy tikmũꞌũn pu nõm ꞌãktux.
\v 50 Ha ꞌãteꞌ yũmmũg Topa yõg xatꞌax te tikmũꞌũn mõgãhãꞌ, puyĩy hi xeꞌẽgnãg mõkumaꞌ mõg, haꞌ kux ꞌohnãg. Yõgnũ ꞌãtak te ꞌãꞌ hõm hãmꞌãktuxꞌax, ꞌũyĩy tikmũꞌũn pu nõm ꞌãktux.
\c 13
\s Yeyox te yãy yõg tik xop pata pix
\p
\v 1 Hãmhũmnãg, yã ꞌãmnĩy puxet ꞌĩhãꞌ xipꞌax ꞌãmuk xexka ꞌũxuxetꞌax Nõãꞌyẽn ꞌĩhã Yeyox teꞌ yũmmũg, hãpxip ꞌĩhã hãm xexka nĩm putup, nũy yãy ꞌãtak ha mõg. Tute mõꞌyãy xeꞌẽgnãg yãy yõg kuxa mãm xop, tu mõꞌyãy xeꞌẽgnãg kux ꞌohnãg.
\p
\v 2 Taꞌ xit Yeyox yãy yõg tik te 12 xop mũtik. Hõmã Hãmgãyãgnãg te Yot ꞌIxkanot mõgãhãꞌ, pu hãmpeꞌpaxex texĩy gãy xõp mõgãp-tup Yeyox hah, puyĩyꞌ xũygãꞌ.
\v 3 Ha Yeyox teꞌ yũmmũg yãy yõg ꞌãtak te tuꞌ popmãhã ꞌũxohix xexkah, puyĩy nõm xat. Yeyox teꞌ yũmmug Topa tuꞌ nũn, tu Topa haꞌ mõg putup putpuꞌ.
\v 4 Yeyox yũm mĩmpe xitꞌax tuꞌ, tu tak-nĩhãꞌ xip, tu topixxax xut ꞌũyĩmũ nõꞌõm, tu topixxax yãy nagãꞌax pahaꞌ, tu nõ yãy kunãy hĩy,
\v 5 tuꞌ pux kõnãꞌãg pa pixꞌax kopah, tu yãy yõg tik xop pata pix kõnãmãhãꞌ, tu topixxax yãy nagãꞌax hã nagãhãꞌ nõm tek-nãy hĩy hã,
\v 6 tuꞌ xupep Xĩmãm Pet yĩkak, pa Pet te:
\p —‍Yãyã, ꞌãmhok. ꞌOk ꞌũkpata pix putup? Kaxĩy.
\p
\v 7 Ha Yeyox te:
\p —‍Hõnhã xateꞌ yũmmũgꞌah ꞌãte hãpxopmãhãꞌ, pa hãpxip ꞌĩhaꞌ yũmmũg putup xateꞌ. Kaxĩy.
\p
\v 8 Ha Pet te:
\p —‍Xatek pata pix putup ꞌohnãg. ꞌÃmhok!
\p Pa Yeyox te:
\p Paxpu ꞌãpata pix ꞌohnãg, ha ta ꞌãmũn yã yõgꞌah. Yã ꞌãxipꞌah yõg tik xop kopah. Kaxĩy.
\p
\v 9 Ha Xĩmãm Pet te:
\p —‍Yãyã, ꞌãpu ꞌũkpata pix, xik yĩm xik putox! Kaxĩy.
\p
\v 10 Ha Yeyox te:
\p —‍Tikmũꞌũn te tatxok, huꞌ xexka tup. ꞌA xe tatxok putupꞌah, paꞌ pata pix putup ꞌũxeheh. ꞌÃxop xohix kuxa tup, pa yãp-xet ꞌãmhok, yãꞌ xutputux.
\v 11 Hamũn, Yeyox teꞌ yũmmũg nõm teꞌ gãy xop mõgãp-tup Yeyox hah, puyĩy xũygãꞌ. Hã kaxĩy hãmꞌãktux hu: “ꞌÃxop xohix kuxa tup, pa yãp-xet, ꞌãmhok, yãꞌ xutputux”. Kaxĩy.
\p
\v 12 Yeyox teꞌ pata pix kux, tu topixxax mõꞌtat putpuꞌ, tu taꞌ mõg yãy yõg xipꞌax tuꞌ mĩmpe tuꞌ xitꞌax tuꞌ, tu:
\p —‍ꞌOk ꞌãxop teꞌ yũmmũg teptu ꞌãte ꞌãpata pix?
\v 13 ꞌÃxop tek xãnãhã, hu: “Notot”, Kaxĩy, xix: “Yãyã”. Kaxĩy. Hamũn, yãg mũn.
\v 14 ꞌÃte ꞌãxop xat, tu ꞌãte ꞌãxop pu hãmyũmmũgãhãꞌ, tu ꞌãpata pix kamah. Yã ꞌũkxexkaꞌ, pa ꞌãpata pix, yĩy ta ꞌãxop teꞌ nõy pata pix, puꞌ max. Yã ꞌãte ꞌãxop hãg teheh. ꞌÃpu tikmũꞌũn hã ꞌãtehet.
\v 15 ꞌÃte hãpxopmãꞌ, xayĩy ꞌãxop pẽnãꞌ, nũy mĩy kamah.
\v 16 ꞌÃte xa hãpxeꞌe ꞌãktux nõm teꞌ xat yãꞌ xexkaꞌ, pa kãmãnat yãk-tõgnãg. Nõm te mõ nõy kutnãhãꞌ yãꞌ xexkaꞌ, pa nõm mõg yãk-tõgnãg. ꞌŨkxexkaꞌ, pa yã kãmãnat putuk. Yã ꞌãte ꞌãpata pix, yã kãmãnat putuk. ꞌÃte ꞌãxop hãg teheh. ꞌÃpu kãmãnat putuk kamah, nũy tikmũꞌũn hã ꞌãtehet.
\v 17 ꞌÃxop teꞌ yũmmũg nõm hãpxop xeꞌe nõmhã. ꞌÃxop teꞌ mĩy, nũy ta ꞌãkuxa hittup.
\p
\v 18 —‍ꞌÃte ꞌãxop xohix xexka ꞌãktux ꞌohnãg, tu tap-xet ꞌãktux. ꞌÃte yãy yõg yĩmõgãtux xop yũmmũg. Pa Topa yõg tappet te: “Tik xit ꞌũgmũtik, tu ꞌã tuꞌ gãy”. Kaxĩy. Ta hõnhãꞌ gãy.
\v 19 ꞌÃte nõm ꞌãktux hõnhã. Hãpxip ꞌĩhã ꞌãxop te nõm hãpxopmãꞌax pẽnãp-tup. ꞌÃte nõm ꞌãktux hõnhã, xayĩy ꞌãkuxa mãm putup, tuꞌ yũmmũg putup ꞌũgꞌãxetꞌax ꞌũgmũn yãg mũn. Kaxĩy.
\v 20 ꞌÃte xa hãpxeꞌe ꞌãktux. ꞌÃte mõꞌpok tihik, ha ta xohix ꞌũm te nõm putuppax yãg putuppax putuk. Ha nõm tek putuppax te Topap-tuppax kamah, yã Topa te mõgkutnãhã ꞌũgmũn.
\s Yot teꞌ gãy xop mõgãp-tup
\p
\v 21 Yeyox te hãmꞌãktux kux, tuꞌ kuxa hittup ꞌohnãg tu hãmꞌãktux, hu:
\p —‍ꞌÃte xa hãpxeꞌe ꞌãktux, yãꞌ xip ꞌũp-xet ꞌãxop kopah, tu nõm teꞌ gãy xop mõgãp-tup ꞌũg hah, puyĩy ꞌũgxũygãꞌ. Kaxĩy.
\p
\v 22 Ha Yeyox yõg tik xop te yãy pẽnãhãꞌ, tuꞌ kuxa teꞌ yẽy. Putep ꞌãktux?
\v 23 Ha taꞌ xip tihik Yeyox yõg tik xop kopah. Yã Yeyox te mõ nõm yãy xeꞌẽgnãg, haꞌ yũm Yeyox yĩkak,
\v 24 ha Ximãm Pet te nõm puꞌ yĩm mahap, tu:
\p —‍ꞌÃpu ꞌũyĩykopit, putep xuktux. Kaxĩy.
\p
\v 25 Ha nõm mõg Yeyox yĩkãgnãg, tu:
\p —‍Yãyã, ꞌũꞌũm nõꞌõm? Kaxĩy.
\p
\v 26 Ha Yeyox te:
\p —‍ꞌÃte pãm mõꞌtat putup hep kopah, tu pãm hõm putup nõm tik puꞌ. Hamũn nõꞌõm. Kaxĩy.
\p Tu pãm pahaꞌ, tu mõꞌtat hep kopah, tu Yot puꞌ hõm, yã Ximãm ꞌIxkanot kutok.
\v 27 Ha Yot te pãm pahaꞌ, tu hãpxip ꞌohnãg ꞌĩhã Hãmgãyãgnãg te Yot hã mõꞌnãhãꞌ, ha Yot te Hãmgãyãgnãg ꞌãpak. Ha Yeyox te:
\p —‍Xatep-tup, nũy hãpxopmãꞌ. ꞌÃpu ꞌũmĩy mõꞌkaꞌok. Kaxĩy.
\p
\v 28 Pa xohix te mĩmpe xitꞌax tuꞌ mãm, tuꞌ yũmmũg ꞌohnãg, putep xuktux Yeyox Yot puꞌ.
\v 29 Yã Yot te Yeyox yõg tik xop yõg tãyũmak tatꞌax pẽnãhãꞌ, ha yãg te hãmpeꞌpaxex Yeyox te Yot xat, pu mõg, nũy pãm pop ꞌãmuk xexka puꞌ, ha ta yãg te hãmpeꞌpaxex Yeyox teꞌ xat, pu mõg, nũy tayũmak popmã ꞌũhok xop puꞌ.
\p
\v 30 Yot te pãm pahaꞌ, tu taꞌ mõg hãptopah. Yã ꞌãmnĩy.
\s ꞌŨxatꞌax tup
\p
\v 31 Ha Yeyox te:
\p —‍Hõmã tikmũꞌũn teꞌ pẽnãhãꞌ, ꞌũmax xeꞌẽgnãg Tikmũꞌũn Kutok. Tikmũꞌũn tek yũmmũg, huꞌ yũmmũg Topa ꞌũmax xeꞌẽgnãg.
\v 32 Tikmũꞌũn tek yũmmũg, huꞌ yũmmũg Topa ꞌũmax xeꞌẽgnãg, yĩy ta Topa te tikmũꞌũn puk mũn mũg ꞌũgmax xeꞌẽgnãg. Hãpxip kutõgnãg ꞌĩhã Topa te nõm mĩy putup.
\v 33 ꞌŨkxape xop, hãpxip kutõgnãg hak xip kuxꞌax ꞌãxop kopah. ꞌÃxop tek xakꞌax, pa ꞌãxop tek mõgꞌax yũmmũg ꞌohnãg. Yã hõmã ꞌãte Yoneo xop pu nõm ꞌãktux.
\v 34 ꞌÃte xaꞌ hõm xatꞌax tup, hu:
\p —‍ꞌÃpu ꞌãnõy putuppax, ꞌãte ꞌãxop putuppax putuk.
\v 35 ꞌÃxop te ꞌãnõy putuppax, puxix tikmũꞌũn xohix yũmmũg ꞌãxop pip yõg tik xop kopah. Kaxĩy.
\s Yeyox te Pet mũtik hãmꞌãktux
\p
\v 36 Ha Ximãm Pet te:
\p —‍Yãyã, piyã ꞌãmõg? Kaxĩy.
\p Ha Yeyox te
\p —‍ꞌŨkpe ꞌãmog yũmmũg ꞌohnãg, pa hãpxip ꞌĩhãg pe ꞌãmõg putup. Kaxĩy.
\p
\v 37 Ha Pet te
\p —‍Texĩy ꞌãpek mõg yũmmũg ꞌohnãg hõnhã? ꞌÃte xa tuk xok putup. Kaxĩy.
\p
\v 38 Ha Yeyox te:
\p —‍ꞌOk xate ꞌã tu ꞌãxok putup? ꞌÃmhok. ꞌÃte xa hãpxeꞌe ꞌãktux, xate hãmꞌãktux tikoyuk putup, hu: “ꞌÃkxipꞌah ꞌũgmũn Yeyox yõg tik xop kopah”. Kaxĩy. Hak-nãy tu xokakkak pit xatap-tup. Kaxĩy.
\c 14
\s Yeyox te tikmũꞌũn mõgãhã yãy tak hah
\p
\v 1 Ta Yeyox te:
\p ꞌÃkuxa nõg hok. ꞌÃpu ꞌãkuxa mãhãm Topa kopah. ꞌÃpu ꞌãkuxa mãhãm ꞌũgkopah kamah.
\v 2 Yõgnũ ꞌãtak pet kopaꞌ pip pipꞌax punethok. ꞌŨgmõg putup, nũy ꞌãpipꞌax max mĩy. Paxpu te kaxĩy ꞌohnãg, kopxix xaꞌ xuktux ꞌohnãg nũhũꞌ.
\v 3 ꞌŨgmõg putup, tuꞌ max mĩy putup ꞌãpipꞌax, tu putpuk nũn putup, tu ꞌãxop mõgãp-tup, xayĩy pip ꞌãpipꞌax tu ꞌũgmũtik.
\v 4 ꞌÃxop teꞌ yũmmũg putahat nõꞌ mõg ꞌũkxipꞌax tuꞌ. Kaxĩy.
\p
\v 5 Ha Tõmẽ te:
\p —‍Yãyã, ꞌũgmũꞌãteꞌ yũmmũgꞌah. Piyãꞌ yũm ꞌãxipꞌax? Texĩy ꞌũgmũꞌãteꞌ yũmmũg putahat? Kaxĩy.
\p
\v 6 Ha Yeyox te:
\p ꞌÃte putat putuk, tu putat mõg yõgnũ ꞌãtak hah. Hã kaxĩy ꞌãte tikmũꞌũn mõgãhã yãy tak hah. ꞌAp xipꞌah putat nõy. ꞌÃte tikmũꞌũn pu hãpxeꞌe yũmmũgãhãꞌ, tu tikmũꞌũn hĩnnãhãꞌ, puyĩy hi max, haꞌ kux ꞌohnãg.
\v 7 ꞌÃxop teꞌ yũmmũg, tu yõgnũ ꞌãtak yũmmũg putup kamah. Hamũn, ꞌãxop teꞌ yũmmũg yõgnũ ꞌãtak. Kaxĩy.
\p
\v 8 Ha Pinip te:
\p —‍Yãyã, ꞌãpu ꞌũgmũꞌã ꞌõg ꞌãtak mũg. ꞌŨgmũꞌãte xa tuk kax putupꞌah hãpxop nõy. Kaxĩy.
\p
\v 9 Ha Yeyox te:
\p —‍ꞌÃmnĩy xohix hãg xip ꞌãxop mũtik. Pinip, ꞌok xatek yũmmũg ꞌohnãg? Tikmũꞌũn ꞌũm tek pẽnãhãꞌ, hu yõg ꞌãtak pẽnãhã kamah. Teptu xateꞌ xuktux, hu: “ꞌÃpu ꞌũgmũꞌã ꞌõg ꞌãtak mũg”? Kaxĩy.
\v 10 Pinip, ꞌok ꞌãkuxa yũm ꞌohnãg, ꞌũkxip yõgnũ ꞌãtak mũtik, ha yõgnũ ꞌãtak xip ꞌũgmũtik, tu yã kuxap-xet. ꞌÃte xa hãmꞌãktux, ꞌa yõgꞌah hãmꞌãktux. Pa yõgnũ ꞌãtak xip ꞌũgmũtik, tu hãpxopmã max xeꞌẽgnãg.
\v 11 ꞌÃpu ꞌãkuxa mãm nũ hãmꞌãktux kopah. Yã ꞌũkxip yõg ꞌãtak mũtik, ha yõg ꞌãtak xip ꞌũgmũtik, tu yã kuxap-xet. Pa yõg hãmꞌãktux kopa ꞌãkuxa mãm ꞌohnãg, pa ꞌãpu ꞌãkuxa mãm yõg hãpxopmãꞌax kopah.
\v 12 ꞌÃte xa hãpxeꞌe ꞌãktux, tikmũꞌũn ꞌũm kuxa mãm ꞌũgkopah, yã nõm te hãpxopmã kaꞌok xeꞌẽgnãg mĩy putup, ꞌũgmũn putuk. Yã ꞌãte hãpxopmã kaꞌok xeꞌẽgnãg mĩy, pa nõm te hãpxopmã kaꞌok xeꞌẽgnãg punethok mĩy putup, yõgnũ ꞌãtak hak mõg putup hah.
\v 13 ꞌÃxop te Topa tuꞌ xak hãpxop ꞌũm, tu ꞌãkuxa mãm ꞌũgkopah, kopxix xaꞌ popmãp-tup nõm hãpxop xohix. Topa te ꞌãꞌ popmãp-tup, ha ꞌãte xa nõm popmãp-tup. Hã kaxĩy ꞌãxop te Topa max xeꞌẽgnãg yũmmũg putup.
\v 14 ꞌÃxop te ꞌã tuꞌ xak hãpxop ꞌũm, kopxix nõm mĩy putup. Kaxĩy.
\s Topa te Topa Koxuk hõm putup
\p
\v 15 Tu Yeyox te xe:
\p —‍ꞌÃxop tek putuppax, nũy ta mĩy putup ꞌãte nõm xat.
\v 16 ꞌÃte Topa tuꞌ xak, ha tute xa Topa Koxuk hõm putup nõm te ꞌãxop hãꞌ tep-tup, tute xa nõm hõm putup. Yãg mũn putuk, yã Topa Koxuk, yã hãpxeꞌe yõg, ha tute ꞌãxop mũtik nox xipꞌax mõkumaꞌmõg hãmyãxatamuk xohix kux ꞌohnãg hã.
\v 17 Ha taꞌ kuxa mãm ꞌohnãg xop te Topa Koxuk pa yũmmũg ꞌohnãg. Topa Koxuk pẽnã ꞌohnãg tuꞌ. Pa ꞌãxop te Topa Koxuk yũmmũg, yãꞌ xip ꞌãxop mũtik hah. Kaxĩy.
\p
\v 18 Tu xe:
\p —‍ꞌÃte ꞌãxop nĩm tãmnãg putupꞌah, yã ꞌãxop teꞌ hok pip xop putuk putupꞌah. ꞌÃte ꞌãxop nĩm putup, tuk mõg putup, pak nũn putup putpuk ꞌã hah.
\v 19 Hãpxip ꞌĩhãꞌ kuxa mãm ꞌohnãg xop tek pẽnãp-tupꞌah, pa ꞌãxop tek pẽnãp-tup, tu ꞌãxop pip putup, ꞌũkxip putup hah.
\v 20 Nõm ꞌãmnĩy ꞌĩhã ꞌãxop teꞌ yũmmũg putup ꞌũkxip yõgnũ ꞌãtak mũtik, ha ꞌãxop pip ꞌũgmũtik, yã kuxap-xet, hak xip ꞌãxop mũtik.
\p
\v 21 —‍Tikmũꞌũn ꞌũm te yõgnũ xatꞌax pop, tu nõm mĩy, yã tutek putuppax, ha yõgnũ ꞌãtak te nõm putuppax putup, nõm tek putuppax, ha ꞌãte nõm putuppax putup kamah, tu yãy mũg putup ꞌõm puꞌ.
\p
\v 22 Yot xip, yã ꞌaꞌ Yot ꞌIxkanotꞌah, paꞌ nõy, yã Yot te:
\p —‍Yãyã, texĩy xate ꞌũgmũꞌã yãy mũg, paꞌ kuxa mãm ꞌohnãg xop pu yãy mũg ꞌohnãg? Kaxĩy.
\p
\v 23 Ha Yeyox te:
\p —‍Tikmũꞌũn ꞌũm tek putuppax, yã nõm te yõgnũ hãmꞌãktux pap-tup, tuꞌ mĩy putup, ha yõgnũ ꞌãtak te nõm putuppax, tuꞌ nũn putup, tu nũktu nõm haꞌ xupep, tuꞌ xip putup nũmũtik.
\v 24 Tikmũꞌũn ꞌũm tek putup nõg, puxix yõgnũ hãmꞌãktux ꞌãpak ꞌohnãg, yãꞌ yĩpkox ꞌohnãg. ꞌÃxop te hãmꞌãktux ꞌãpak. ꞌAꞌ yõgꞌah hãmꞌãktux, pa yõg ꞌãtak yõg. Tute nũgkutnãhã ꞌũgmũn.
\p
\v 25 —‍ꞌÃte xa nõm hãpxop ꞌãktux nõmhã, tuk xip ꞌãxop mũtik nõmhã.
\v 26 Yõgnũ ꞌãtak te Topa Koxuk nũꞌkutnãp-tup, ha tute ꞌãxop hãꞌ tep-tup, yã ꞌãte ꞌãxop hãg teheh putuk, ꞌĩhã ꞌãkuxa mãm ꞌũgkopah. Topa Koxuk tek mũn pupiꞌ xip putup. Tute xa hãpxop xohix yũmmũgãp-tup, tu ꞌãxop pu xutĩgãhã yõgnũ hãmꞌãktux xohix:
\p
\v 27 —‍ꞌÃte ꞌãkuxa mãmmãhãꞌ. ꞌŨgkuxa yũm kaꞌok, ha ꞌãte ꞌãkuxa mãmmãhãꞌ, ꞌũkputuk. ꞌÃte hãm xexka yõg kummuk xop kuxa mãmmã ꞌohnãg. ꞌÃpu ꞌũyĩpkutuk hok. ꞌÃpu ꞌãkuxa nõg hok.
\v 28 ꞌÃxop teꞌ xupak, yã ꞌãte xaꞌ xuktux hu: “ꞌŨgmõg putup, pa ꞌãhak nũn putup putpuꞌ. ꞌÃxop tek putuppax, nũy ta ꞌãkuxa hittup, yãg mõg putup yãy yõg ꞌãtak hah. ꞌŨkxexka, pa nõm xexka nãm.
\v 29 Hõnhã ꞌãte xa hãmꞌãktux hãptup yõg hãpxopmãꞌax. Hãpxip ꞌĩhã ꞌãxop te nõm pẽnãp-tup, tu ꞌãkuxa mãm putup ꞌũgkopah.
\v 30 ꞌÃte xe hãmꞌãktux kutĩgnãg, yã Topa hã puknõg xop yõg xatꞌax nũn hõnhã. Nõm tek xat ꞌohnãg,
\v 31 paꞌ max, pu tikmũꞌũn xohix yũmmũg ꞌãte yõgnũ ꞌãtak putuppax, nũy mĩy tute nõm xohix xat. ꞌÃpu yũmũ mõg. Kaxĩy.
\c 15
\s Yeyox te tox kup kũnĩy putuk
\p
\v 1 Ta Yeyox te:
\p —‍ꞌÃte xaꞌ yũmmũgãp-tup hãpxop. ꞌÃte tox kup kũnĩy xeꞌe putuk, yã mĩnta ꞌop yõg, ha ta yõgnũ ꞌãtak te tox pẽnãꞌax putuk.
\v 2 ꞌŨgkopa kuxa mãm xop te tox mãg max putuk xix tox yĩpkup max. ꞌŨgkopa kuxa mãm xop te hãpxopmã max, ha nõm te mĩnta ta põpmã putuk. Ha tak kopa kuxa mãm hok xop te tox mãg kummuk putuk xix tox yĩpkup kummuk. ꞌŨgkopa kuxa mãm hok xop te hãpxopmã maxꞌah, tu mĩnta ta popmã ꞌohnãg putuk. ꞌŨkuxa mãm xop kuxa mãm ꞌũgkopah. Hã kaxĩy tox mãg te tox kup xahix tuꞌ pip xix tox yĩpkup teꞌ. Yõgnũ ꞌãtak tep-tupꞌah kuxa mãm hok xop. Hã kaxĩy tox pẽnãꞌax te mĩm mãg kummuk mep, tuꞌ putyõn xix yĩpkup kummuk. ꞌŨkuxa mãm hok xop teꞌ kuxa mãm xop nĩm, haꞌ max nõmhã. Hã kaxĩy tox mãg kummuk pipꞌah xix tox yĩpkup kummuk pipꞌah, ha ta tox yĩpkup max te mĩnta ta punethok popmãhã nõmhã.
\v 3 Hõmã ꞌãkuxa mãm yõgnũ hãmꞌãktux kopah, ha yõgnũ ꞌãtak te ꞌãkuxa kummuk xit.
\v 4 ꞌÃpu ꞌã tu pip kaꞌok, ha ꞌãte ꞌãxop tuk xip kaꞌok putup. ꞌÃxop ꞌã tu ꞌãpip kaꞌok ꞌohnãg, nũy ta hãpxopmã max ꞌohnãg, tu ꞌãxop teꞌ mĩy ꞌohnãg putup Topa te nõm putup. Hã kaxĩy tox mãg te tox kup xahix tuꞌ pipꞌah xix tox yĩpkup, puxix mĩnta ta popmã hok.
\p
\v 5 —‍ꞌÃte tox kup xahix putuk, ha ꞌãxop te tox mãg putuk xix tox yĩpkup. ꞌÃxop te ꞌã tu ꞌãpip kaꞌok, nũy ꞌãkuxa mãm kaꞌok ꞌũgkopah, tu ꞌãxop tuk xip kaꞌok, nũy hãpxopmã max xohix ꞌãxop mũtik, ha ta ꞌãxop hãpxopmã max punethok, nũy mĩy Topa te nõm putup. Pa ꞌãxop te ꞌã tu ꞌãpip kaꞌokꞌah, nũy ta hãpxopmã max hok, tuꞌ mĩy ꞌohnãg Topa te nõm putup. Hã kaxĩy tox kup xahix xix tox mãg xix tox yĩpkup.
\v 6 Tox pẽnãꞌax teꞌ putyõn tox mãg kummuk xohix xix tox yĩpkup kummuk xohix, haꞌ nak, ha tikmũꞌũn te nõm yãy tu nũꞌxok, tu kuxap kopa mõꞌpok, haꞌ puk. Hã kaxĩy putuk ꞌũkuxa mãm hok xop, yã ꞌãtuꞌ pip kaꞌok ꞌohnãg.
\v 7 ꞌÃxop nox pip ꞌã tuꞌ, ha yõgnũ hãmꞌãktux teꞌ nox xip ꞌãxop tuꞌ, ꞌĩhã ꞌã tuꞌ xak xate nõm putup, ha ꞌãte xaꞌ popmãp-tup ꞌũxohix.
\v 8 ꞌÃxop te hãpxopmã max punethok, yĩy tikmũꞌũn teꞌ pẽnãp-tup, yãꞌ max xeꞌẽgnãg Topah. Hã kaxĩy kama tikmũꞌũn teꞌ pẽnãp-tup ꞌãxop mõg Yeyox mũtik, yã mĩnta max punethok putuk.
\v 9 ꞌÃte mõ ꞌãxop yãy xeꞌẽgnãg, yã yõgnũ ꞌãtak te mõg mũn yãy xeꞌẽgnãg putuk. ꞌÃpu nox pi ꞌũgmũtik, ꞌũyĩy mõ ꞌãxop yãy xeꞌẽgnãg.
\v 10 ꞌÃxop teꞌ mĩy ꞌãte nõm xat, nũy ta nox ꞌãpip putup ꞌũgmũtik, ha ꞌãte mõ ꞌãxop yãy xeꞌẽgnãg putup. Yã ꞌãteꞌ mĩy yõg ꞌãtak te nõm xat. Hã kaxĩy putuk ꞌãxop xik mũn.
\p
\v 11 —‍ꞌÃte xa nõm hãpxop ꞌãktux, nũy ꞌãkuxa hittupmãꞌ, ha ꞌãkuxa hittup xexkaꞌ.
\v 12 ꞌÃte ꞌãxop xat, hu: ꞌÃpu ꞌãnõy putuppax ꞌãte ꞌãxop putuppax putuk.
\v 13 Tikmũꞌũn te yãy xape pupiꞌ xok, puxix yãy xapep-tuppax xexkanãm. Yã tikmũꞌũn xohix te yãy xape pupiꞌ xakix ꞌohnãg.
\v 14 ꞌÃxop te yõgnũ xatꞌax mĩy, ꞌĩhã ꞌũkxape ꞌãxop.
\v 15 ꞌÃte ꞌãxãnã kux, hu: “Yõgnũ kãmãnat xop”. Kaxĩy. Yã kãmãnat xop teꞌ yũmmũg ꞌohnãg ꞌũxatꞌax xop yõg hãpxopmãꞌax. Pa ꞌãte ꞌãxop xãnãhã, hu: “ꞌŨkxape xop”. Kaxĩy. ꞌÃte ꞌãxop puꞌ xuktux yõg ꞌãtak te nõm ꞌãktux.
\v 16 ꞌÃxop tek mũn yãykutnã ꞌohnãg, pa ꞌãte ꞌãxop mũn yĩmõgãtux, tu mõ ꞌãxop pok, xayĩy hãpxopmã max punethok, yã mĩnta ta punethok putuk. ꞌÃxop te hãpxopmã max putup, ha tikmũꞌũn te nõm pẽnãp-tup, huꞌ kuxa mãm kaꞌok putup, tu ꞌã tu nox pip kaꞌok putup. Ha ꞌãxop te yõg ꞌãtak tuꞌ xak hãpxop ꞌũm, tu ꞌãkuxa mãm ꞌũgkopah, ha tute xaꞌ popmãp-tup hãpxop xohix.
\v 17 ꞌÃte ꞌãxop xat, ꞌãpu ꞌãnõy putuppax. Kaxĩy.
\s Tikmũꞌũn teꞌ kuteꞌex kummuk putup Yeyox yõg xop
\p
\v 18 Tu Yeyox te xe:
\p —‍ꞌŨkuxa mãm hok xop te ꞌãxop putup nõg. ꞌÃpu hãmyũmmũg, nõm tek putup nõg hãmãxap.
\p
\v 19 Paxpu ꞌãxop kuxa mãm hok xop kopa pip, nũy nũmũtik mõg, puxix ꞌãxop putuppax, yã yãy yõg xop putuppax. Pa ꞌãxop pipꞌah nõm xop kopah. Pa ꞌãte ꞌãxop yãykutnãhã kuxa mãm hok xop kopah. ꞌÃmũn ꞌap kuxa mãm hok xopꞌah. Hã kaxĩy nõm te ꞌãxop putup nõg.
\v 20 Hõmã ꞌãte xa hãmꞌãktux. ꞌÃpu hãmꞌãktuxꞌax xaxok hok. ꞌŨxatꞌax xop yãꞌ xexkaꞌ, pa kãmãnat xop yãg-tõgnãg. Tikmũꞌũn tek kuteꞌex kummuk, puxix ꞌãxop kuteꞌex kummuk putup kamah. Tikmũꞌũn te yõgnũ hãmꞌãktux ꞌãpak, tuꞌ yĩpkox pip, puxix ꞌõg hãmꞌãktux ꞌãpak putup kamah, tuꞌ yĩpkox pip.
\v 21 Tikmũꞌũn te ꞌãxop kuteꞌex kummuk te kaxĩy, ꞌãxop yõgnũ hah. Yã nõm teꞌ yũmmũg ꞌohnãg Topah. Tute nũgkutnãhãꞌ.
\v 22 Paxpuk nũn ꞌohnãg, puxix tikmũꞌũn yãy hãpkummuk mĩyꞌax yũmmũg ꞌohnãg. Pak nũn, tu tikmũꞌũn pu hãmyũmmũgãhãꞌ. Nõmhã tikmũꞌũn teꞌ yũmmũg yãy yõg hãpkummuk mĩyꞌax.
\v 23 Tikmũꞌũn tek putup nõg, xix yõg ꞌãtak putup nõg kamah.
\v 24 ꞌÃte hãpxopmã kaꞌok xeꞌẽgnãg tikmũꞌũn kopah, yĩy tikmũꞌũn teꞌ pẽnãhãꞌ, tu yãy yõg hãpkummuk mĩyꞌax yũmmũg, huꞌ yãyhãhup. Tik nõy te hãpxopmã kaꞌok xeꞌẽgnãg ꞌohnãg, ꞌak putukꞌah. Pa tikmũꞌũn teꞌ pẽnãhã ꞌãte hãpxopmã max, tuk putupnõg xix yõg ꞌãtak putup nõg kamah.
\v 25 Hõmã ꞌũhittap Topa yõg tappet te: “Tikmũꞌũn tek putup nõg, pa ꞌãte hãpkummuk mĩy ꞌohnãg”. Kaxĩy. Hamũn, hõnhã tikmũꞌũn te kaxĩy putuk, yã Topa yõg tappet teꞌ koit ꞌohnãg.
\p
\v 26 —‍Ta Topa Koxuk te xa hãꞌ tep-tup, yãꞌ xeꞌe Topa Koxuk. Hõnhãꞌ xip yõgnũ ꞌãtak mũtik, ha ꞌãte xa nõm nũꞌkutnãp-tup, ha tutek mũn ꞌãktux putup.
\v 27 Ha ꞌãxop tek mũn ꞌãktux putup kamah, yã ꞌãxop pip ꞌũgmũtik hãmyãxatamuk xohix hã nũnte hãm xexka tuꞌ.
\c 16
\p
\v 1 Ta Yeyox te xe:
\p —‍ꞌÃte xaꞌ xuktux hãpxop xohix, xayĩy putat max xak hok.
\v 2 Tikmũꞌũn te ꞌãxop xat putup, xa mõxa hok Yoneo yõg Topa pet hã. Hãpxip ꞌĩhã tikmũꞌũn te ꞌãxop kix putup, ha ꞌãxop xakix putup, ha tikmũꞌũn te hãmpeꞌpaxex putup Topa puꞌ hãm.
\v 3 Yã tikmũꞌũn teꞌ mĩy putup yõgnũ ꞌãtak kopaꞌ kuxa mãm ꞌohnãg tuꞌ, xik mũn kopaꞌ kuxa mãm ꞌohnãg tuꞌ.
\v 4 Pa ꞌãte xa hãmꞌãktux tikmũꞌũn te ꞌãxop kummugãp-tup. Hãpxip ha ta tikmũꞌũn te ꞌãxop kummugãp-tup, ha ꞌãxop teꞌ xuktux putup, hu: “Yã hamũn Yeyox te nõm ꞌãktux hõmã. Yã hõnhã te kaxĩy”. Kaxĩy.
\s Topa Koxuk te hãpxopmãp-tup
\p Ta Yeyox te xe:
\p —‍Hõmã ꞌãte xa nõm ꞌãktux ꞌohnãg, yãk xip ꞌãxop kopah.
\v 5 Pa hãpxip ꞌĩhãg mõg putup, yã nõm hak mõg putup, nõm te nũgkutnãhãꞌ, pa ꞌãxop teꞌ yĩkopit ꞌohnãg, hu: “Tep hah?” Kaxĩy.
\v 6 Pa hõnhã ꞌãte xa nõm ꞌãktux, ha ꞌãkuxa hittup ꞌohnãg.
\v 7 Pa ꞌãte xa hãpxeꞌe ꞌãktux, yãꞌ max noxk xip nũnteh, paꞌ max xeꞌẽgnãg ꞌũgmõg. Paxpuk mõg ꞌohnãg, puxix Topa Koxuk nũn putupꞌah, nũy ꞌãxop hã tu tehet. Pak mõg, kopxix nũ nõm kutnãp-tup ꞌãxop hah.
\v 8 Ha taꞌ nũn putup Topa Koxuk, tu nũktu tikmũꞌũn pu hãm yũmmũgãꞌ, hu: “Tikmũꞌũn te hãpkummuk mĩy, tu tikmũꞌũn te hãm yok yũmmũg ꞌohnãg, ha Topa te tikmũꞌũn yõg hãpkummuk mĩyꞌax hã yãnãn putup, tu nõm xũygãp-tup.” Kaxĩy.
\v 9 Topa Koxuk te hãmꞌãktux putup, hu: “Tikmũꞌũn te hãpkummuk mĩy. Yã Yeyox kopaꞌ kuxa mãm ꞌohnãg.” Kaxĩy.
\v 10 Yãy yõg ꞌãtak hak mõg putup, ha ta Topa Koxuk nũn putup, tu nũktu tikmũꞌũn pu hãmyok yũmmũgãp-tup, tuꞌ xuktux putup, hu: “Yãꞌ yok Yeyox”. Kaxĩy.
\v 11 Topa Koxuk te hãmꞌãktux putup, Topa te tikmũꞌũn yõg hãpkummuk mĩyꞌax hã yãnãn putup, tu nõm xũygãp-tup. Hamũn, Topa teꞌ kuxa mãm hok xop yõg xatꞌax yãnãn, pu tuꞌ kux, tu nõm xũygãhãꞌ, pu tuꞌ kux.
\p
\v 12 —‍ꞌŨpip yõgnũ hãmꞌãktux nõy punethok. ꞌÃxop pu nõm yũmmũgãhãꞌ, puꞌ max, pa hõnhã ꞌãxop te hamyũmmũgãꞌax xohix hã tot ꞌohnãg.
\v 13 Pa hãpxip ꞌĩhãꞌ nũn putup Topa Koxuk, tu xa hãmyok yũmmũgãp-tup. Tute ꞌãxop mõgãp-tup putat max hã, yã xaꞌ yũmmũgãp-tup hãmyok xohix xexkah. Tute yãy yõg hãmꞌãktux ꞌãktux putupꞌah, pa hãm ꞌãpak ꞌãktux putup, tu xa nõm ꞌãktux putup, tu hãptup yõg hãpxopmãꞌax ꞌãktux putup.
\v 14 ꞌÃte tuꞌ popmãp-tup hãmꞌãktux, ha tute xa nõm ꞌãktux putup. Hã kaxĩy xateꞌ yũmmũg putup ꞌũgmax xeꞌẽgnãg.
\v 15 Yõgnũ ꞌãtak yõg hãpxopmãꞌax xohix xexka yã yõgnũ kamah. Hã kaxĩy ꞌãte xa hãmꞌãktux Topa Koxuk teꞌ pop putup yõg hãpxop, tu xa nõm yũmmũgãp-tup. Kaxĩy.
\s ꞌŨkuxa hittup ꞌohnãg, tuꞌ kuxa hittup
\p
\v 16 Ta Yeyox te xe:
\p —‍Hãpxip kutõgnãg yĩy ta ꞌãxop tek pẽnãp-tupꞌah, tu xe hãpxip kutõgnãg yĩy ta xek pẽnãp-tup. Kaxĩy.
\p
\v 17 Ha Yeyox yõg tik yãg xop te:
\p —‍Teptu hãmꞌãktux? ꞌŨxuktux, hu: “Hãpxip kutõgnãg yĩy ta ꞌãxop tek pẽnãp-tupꞌah, tu xe hãpxip kutõgnãg yĩy ta xek pẽnãp-tup”. Kaxĩy. Texĩy hãmꞌãktux? ꞌŨxuktux, hu: “Hamũn, yõgnũ ꞌãtak hak mõg putup”. Kaxĩy.
\v 18 Teptu ꞌũxuktux, hu: “Hãpxip kutõgnãg”? Kaxĩy. ꞌĨntuꞌ, putep mũn ꞌãktux? Yũmũꞌãteꞌ yũmmũgꞌah. Kaxĩy.
\v 19 Nõm tep-tup, nũy Yeyox yĩkopit, ha Yeyox teꞌ yũmmũg, tu:
\p —‍Hãpxip kutõgnãg yĩy ta ꞌãxop tek pẽnãp-tupꞌah, tu xe hãpxip kutõgnãg yĩy ta xek pẽnãp-tup. ꞌOk kaxĩy ꞌãxop te yãy yĩkopit?
\v 20 ꞌÃte xa hãpxeꞌe ꞌãktux. ꞌÃte ꞌãxop mũtik tip-tupꞌah, ha ꞌãxop potap-tup, tu ꞌãkuxa hittup ꞌohnãg putup, paꞌ kuxa mãm hok xop kuxa hittupꞌax. ꞌÃkuxa hittup ꞌohnãg putup, pa hãpxip ꞌĩhã ꞌãkuxa hittup putup.
\v 21 ꞌÃte xaꞌ yũmmũgãp-tup hãpxop. Yã ꞌũn tek-tok put putuk, yãk-tok put putup, haꞌ xũy. Pak-tok xip, ha taꞌ xũy xaxok, tuꞌ hittup, ꞌũk-tok pit xip hah, yãꞌ xip ꞌũk-tok pit nõy hãm xexka tuꞌ.
\v 22 Yã ꞌãxop putuk. Hõnhã ꞌãkuxa hittup ꞌohnãg, pa hãpxip ꞌĩhã ꞌãxop hak nũn putup putpuk, ha ꞌãkuxa hittup putup, ha tikmũꞌũn te ꞌãkuxa hittupꞌax nõãꞌ yũmmũg putupꞌah.
\p
\v 23 —‍Hãpxip ꞌĩhã ꞌãxop tek mũn tuꞌ xak putup hãpxop ꞌohnãg, pa ꞌãte xaꞌ xuktux ꞌãxop te yõgnũ ꞌãtak mũn tuꞌ xak putup hãpxop, tu ꞌãkuxa mãm ꞌũgkopah, ha tute xaꞌ popmãp-tup hãpxop xohix.
\v 24 Hõmã tu yã hõnhã ꞌãxop te Topa tuꞌ xak ꞌohnãg hãpxop, tu ꞌãkuxa mãm ꞌũgkopah. ꞌÃpu ta tuꞌ xax, xayĩy ꞌãkuxa hittup xexkanãm.
\s Yeyox teꞌ kuxa mãm hok xop pop
\p
\v 25 ꞌÃte xa hãmyũmmũgãhã, tuꞌ xuktux tikmũꞌũn te tox mãg putuk xix kahnẽn putuk. Hõnhã ꞌãte hãmꞌãktux hã kaxĩy. Pa hãpxip ꞌĩhã kaxĩyꞌah, pa xa yãy ꞌãtak yũmmũgãp-tup mõꞌkaꞌok.
\v 26 ꞌÃmnĩy xupep ꞌĩhã yõgnũ ꞌãtak tuꞌ xak putup hãpxop ꞌãxop teꞌ, tu ꞌãkuxa mãm ꞌũgkopah, ha ꞌãte xa hãmꞌãktuxꞌah ꞌãte yãy yõg ꞌãtak tuꞌ xak, pu xaꞌ hõm hãpxop.
\v 27 Hamũn, yõgnũ ꞌãtak te mõ ꞌãxop yãy xeꞌẽgnãg, ꞌãxop tek putuppax hah, xix ꞌãkuxa mãm hah. Yã ꞌãkuxa mãm, tuꞌ yũmmũg ꞌãte Topa tuk nũn.
\v 28 Hamũn, ꞌãte Topa tuk nũn, tu nũktuk xupep nũnte hãm xexka tuꞌ, pa hõmãg mõg putup, yã hãm xexka nĩm putup, nũy yãy yõg ꞌãtak ha mõg putpuꞌ. Kaxĩy.
\p
\v 29 Ha Yeyox yõg tik xop te:
\p —‍Nõmhã xate hãmꞌãktux mõꞌkaꞌok, ꞌap xate hãmꞌãktux nõy hã yũmmũgã ꞌohnãg.
\v 30 ꞌŨgmũꞌãteꞌ yũmmũg xateꞌ yũmmũg hãpxop xohix xexkaꞌ. ꞌA xatep-tupꞌah tikmũꞌũn te xa hãmyũmmũgãhãꞌ. Yã xateꞌ yũmmũg tikmũꞌũn yõg hãmpeꞌpaxexꞌax xohix xexkah. Nõmhãg mũꞌãteꞌ yũmmũg Topa tu ꞌãnũn. Kaxĩy.
\p
\v 31 Ha Yeyox te:
\p —‍ꞌOk ꞌãkuxa mãm hõnhã.
\v 32 Hãpxip kutõgnãg ꞌihã ꞌãxop te hãpxumãꞌax yãy pet tuꞌ, kopxix puxet hã xip putup. Pa ꞌa ꞌũkpuxet xipꞌah, pa yãy yõg ꞌãtak xip putup ꞌũgmũtik.
\v 33 ꞌÃte xa nõm ꞌãktux, xayĩy ꞌãkuxa mãm, yã ꞌãkuxa mãm kaꞌok ꞌũgkopah. ꞌŨkuxa mãm hok xop te ꞌãxũygãp-tup, pa ꞌãkuxa nõg hok, yã ꞌãteꞌ kuxa mãm hok xop pop, yã ꞌãteꞌ xut. Kaxĩy.
\c 17
\s Yeyox te Topa pu hãmꞌãktux
\p
\v 1 Ta hãmꞌãktux kux Yeyox, tu pepiꞌ pẽnãhã pexkox tuꞌ, tu Topa pu hãmꞌãktux, hu:
\p —‍Tak, ꞌãmnĩy nõꞌõm xupep xate nõm ꞌãktux. ꞌÃpu ꞌũgxexka xeꞌẽgnãg mĩy, puyĩy tikmũꞌũn pẽnã ꞌũgmax xeꞌẽgnãg. Yã tikmũꞌũn teꞌ yũmmũg putup kama ꞌãxexka xeꞌẽgnãg xix ꞌãmax xeꞌẽgnãg.
\v 2 Xatek mũn mĩy ꞌũkxexkaꞌ, yã tikmũꞌũn xohix yõg xexkaꞌ, tu tikmũꞌũn xohix hĩnnãhãꞌ, hã hi xeꞌẽgnãg mõkumaꞌmõg, haꞌ kux ꞌohnãg. Xate ꞌãꞌ popmãhã ꞌũxohix, haꞌ kuxa mãm ꞌũgkopah. Yã ꞌãte nõm hĩnnãhãꞌ, haꞌ kux ꞌohnãg.
\v 3 Texĩy tikmũꞌũn hi xeꞌẽgnãg mõkumaꞌmõg, haꞌ kux ꞌohnãg? Yã tikmũꞌũn te ꞌãyũmmũg, yã Topa yũmmũg. ꞌAp xipꞌah Topa xeꞌe nõy. Texĩy tikmũꞌũn hi xeꞌẽgnãg mõkumaꞌmõg, haꞌ kux ꞌohnãg? Yã tikmũꞌũn tek mũn yũmmũg. Xate nũgkutnãhãꞌ.
\v 4 ꞌÃte tikmũꞌũn pu ꞌãmax xeꞌẽgnãg yũmmũgãhãꞌ. ꞌÃte hãpxopmã kux xate ꞌã nõm xax.
\v 5 Tak, ꞌũkxip putup nõnteh ꞌãmũtik. ꞌÃpu ꞌãꞌ hõm hãpxop max xeꞌẽgnãg nõnteh, yã ꞌũkxexka mĩy. Hõmã ꞌũhittap ꞌa hãm xexka xipꞌah, hak max xeꞌẽgnãg xik xexkaꞌ. ꞌÃpu ꞌãm popmã ꞌũxeheh nõꞌõm.
\p
\v 6 —‍Xate tikmũꞌũn yĩmõgãtux hãm xexka yõg tikmũꞌũn kopah, tu ꞌã tikmũꞌũn popmãhãꞌ, pu ꞌũgkopa kuxa mãm, ha ꞌãte tu ꞌãyũmmũgãhãꞌ, yã yõgnũ tikmũꞌũn, ha xate ꞌãꞌ popmãhã nõꞌõm, ha nõm te ꞌõg hãmꞌãktux ꞌãpak, tuꞌ yĩpkox pip,
\v 7 tu nõm teꞌ yũmmũg xate ꞌãꞌ popmãhã hãmꞌãkux xohix, tuk kaꞌogã punethok.
\v 8 Xate ꞌãꞌ popmãhã hãmꞌãktux, ha ꞌãte tikmũꞌũn pu nõm ꞌãktux, tuꞌ yũmmũg xeꞌeꞌ, ꞌãtuk nũn, tuꞌ kuxa mãm xate nũgkutnãhãꞌ.
\p
\v 9 —‍ꞌÃte yãy yõg kuxa mãm xop ꞌãktux. ꞌA ꞌãte puknõg xop ꞌãktuxꞌah. Pa ꞌãte yãy yõg xop ꞌãktux xate ꞌã nõm popmãhãꞌ, yã ꞌõg kuxa mãm kaꞌok xop kamah.
\v 10 ꞌŨxohix xexka yõgnũ tikmũꞌũn xix ꞌõgnũ kamah, ha tikmũꞌũn xohix xexka ꞌõgnũ xix yõgnũ kamah, ha tikmũꞌũn teꞌ pẽnãhãꞌ, tuꞌ yũmmũg ꞌãte hãpxopmã xeꞌẽgnãg.
\v 11 Hãpxip kutõgnãg ꞌĩhã ꞌã hak mõg putup, tu ꞌap ꞌũkxip putupꞌah hãm xexka tuꞌ. Pa yõgnũ xop teꞌ kuxa mãm hok xop mũtik yãy kotĩnnãp-tup. ꞌÃpu yõg xop hã ꞌãtehet. ꞌÃpu nõm pẽnã max, ꞌãkaꞌok hah. Yã ꞌãkaꞌok, ha xatek kaꞌogãhã hã kaxĩy. ꞌÃpu nõm pẽnã max, puꞌ xohix tuꞌ kuxap-xet, yã yũmũg putuk.
\v 12 ꞌŨkxip yõg xop mũtik, tu nõm hãg teheh, tuꞌ pẽnã max. Xatek kaꞌogãhãꞌ, hã kaxĩy ꞌãte nõm hãk teheh, tu nõm xaxok ꞌohnãg, yãꞌ kuxa mãm kux putupꞌah, pa yã tik puxet xaxok. Yã hõmã ꞌũhittap Topa yõg tappet te: “ꞌŨxaxogãp-tup yãp-xet”. Kaxĩy. Hã kaxĩy ꞌãteꞌ xaxok tik puxet.
\v 13 Hõnhã ꞌã hak mõg putup. Tak, ꞌãte ꞌãmũtik hãmꞌãktux hõnhã, puyĩyꞌ kuxa mãm xop kuxa hittup xexkaꞌ ꞌũgkuxa hittup putuk.
\v 14 ꞌÃte yãy yõg xop pu ꞌõg hãmꞌãktux hõm, haꞌ kuxa mãm hok xop teꞌ kuxa mãm xop putup nõg. ꞌAꞌ kuxa mãm hok xopꞌah nõꞌõm, yãg mũn putuk. ꞌAꞌ kuxa mãm hok xop yõgꞌah ꞌũgmũn.
\v 15 ꞌA ꞌãte xa tuk kaxꞌah, xayĩy yãy yõg xop mõy ꞌũkuxa mãm hok xop kopah. ꞌÃmhok, ꞌũmõy hok. Pa ꞌãte xa tuk kax, xayĩy nõm pẽnã max, puyĩy Hãmgãyãgnãg nõm pop hok.
\v 16 ꞌŨgmũn ꞌaꞌ kuxa mãm hok xop yõgꞌah. Hã kaxĩy nõm xop ꞌaꞌ kuxa mãm hok xop yõgꞌah kamah.
\v 17 ꞌÃte hãpxeꞌe ꞌãktux, ha tikmũꞌũn teꞌ xupak, tuꞌ yĩpkox pip, tuꞌ mĩy, tu ꞌãputuk. ꞌÃtep-tup nõꞌõm.
\v 18 ꞌÃte yãy yõg xop mõꞌpok hãpxexka xohix tu. Xate nũgkutnãhã hãm xexka tuꞌ, yã yãy putuk.
\v 19 ꞌÃte xa yãy mũn hõm, nũy mĩy xate nõm putup, puyĩy nõm xa yãy mũn popmãꞌ, nũy mĩy xate nõm putup.
\p
\v 20 —‍ꞌÃte yãy yõg xop ꞌãktux ꞌãmũtik. Nõm te hãmꞌãpak maxꞌax ꞌãktux putup, ha taꞌ nõy xop kuxa mãm putup ꞌũgkopah, ha ꞌãte nõy xop ꞌãktux ꞌãmũtik kamah.
\v 21 Tak, ꞌãte xa tuk kax, puyĩy nõm xop xohix tu kuxap-xet, nũy yãy putuppax yã yũmũg putuk. ꞌÃxip ꞌũgmũtik, hak xip ꞌãmũtik. ꞌÃtep-tup, puyĩy nõm xop tu kuxap-xet, nũy yãy putuppax, puyĩy hãm xexka yõg tikmũꞌũn yũmmũg xate nũgkutnãhãꞌ.
\v 22 Xatek mĩy ꞌũkxexkaꞌ, tuk max xeꞌẽgnãg mĩy. Hã kaxĩy ꞌãte yãy yõg xop max xeꞌẽgnãg mĩy, puyĩy tu kuxap-xet, nũy yãy putuppax yũmũg putuk.
\v 23 ꞌŨkxip nũmũtik, ha ꞌãxip ꞌũgmũtik, puyĩy nõm xop tu kuxap-xehnãg, puyĩy hãm xexka yõg tikmũꞌũn yũmmũg xate nũgkutnãhã puyĩy hãm xexka yõg tikmũꞌũn yŨmmũg xate mõg mũn yãy xeꞌẽgnãg.
\v 24 Tak, xate ꞌã nõm tikmũꞌũn popmãhãꞌ, ha ꞌãtep-tup, puyĩy nõm nox piꞌ ꞌãmũtik ꞌũkxipꞌax tuꞌ, puyĩyꞌ pẽnã ꞌũkxexkah, tuk max xeꞌẽgnãg. Yã xatek mĩy ꞌũkxexkah, tuk max xeꞌẽgnãg mĩy. Hamũn, hõmã ꞌũhittap hãm xexka ꞌap xipꞌah, ha xate mõg mũn yãy xeꞌẽgnãg.
\v 25 Tak, xate hãpxopmã yok. ꞌŨkuxa mãm hok xop te ꞌãyũmmũg ꞌohnãg, ha ta ꞌãte ꞌãyũmmũg, ha yãy yõg xop teꞌ yũmmũg xate nũgkutnãhãꞌ.
\v 26 ꞌÃte nõm pu ꞌãmũn yũmmũgãhãꞌ, tu xe nõm xop pu xe ꞌãmũn yũmmũgãp-tup punethok, puyĩyꞌ nõy putuppax xatek putuppax putuk. ꞌÃte xe tu ꞌãmũn yũmmũgãp-tup punenthok, nũy noxk xip nũmũtik. Kaxĩy.
\c 18
\s ꞌŨgãy xop te Yeyox mũg
\p
\v 1 Yeyox te Topa pu hãmꞌãktux kux, tu taꞌ mõg yãy yõg tik te 12 xop mũtik, tu mõktu kõnãg kox Xet xak, ha taꞌ xip mĩm mãtiknãg max, ha Yeyox te nõꞌ mõxakux yãy yõg tik xop mũtik.
\v 2 Pa Yot te mĩm mũtiknãg yũmmũg. Tuteꞌ gãy xop mõgãp-tup Yeyox hah, puyĩy Yeyox xũygãꞌ. Yã mĩm mũtiknãg yũmmũg. Yã Yeyox xix yãy yõg tik xop te yãy tu nũꞌnã punethok ꞌõnteh.
\v 3 Ha taꞌ nũn Yot xonat xop mũtik xix Topa pet xexka yõg xonat xop mũtik. Yã ꞌãmãnex xexka xop te nũꞌpok Topa pet xexka yõg xonat xop xix Paniye xop te, ha mĩkaxxaxka tahaꞌ xix mĩm topnãg pop xix kuyãnãm tatꞌax tat.
\v 4 Ha Yeyox te hãmyũmmũg hãpxopmãꞌax xohix, hu taꞌ nõy haꞌ mõg, tu:
\p —‍Tep mũn xak? Kaxĩy.
\p
\v 5 Ha nõm te:
\p —‍Yã Yeyox mũn xak kõmẽn Nãyane yõg Yeyox. Kaxĩy.
\p Ha Yeyox te:
\p —‍Yãg mũn. Kaxĩy.
\p Yãꞌ xip Yot ꞌũgãy xop mũtik.
\p
\v 6 Ha Yeyox te:
\p —‍Yãg mũn. Kaxĩy.
\p Ha nõm xop teꞌ xãm hãꞌ mõg, tu hãm tuꞌ xakux.
\p
\v 7 Ha Yeyox te xe:
\p —‍Tep mũn xak? Kaxĩy.
\p Ha nõm te:
\p
\v 8 —‍Yã Yeyox xak kõmẽn Nãyane yõg. Kaxĩy.
\p
\v 9 Yã hõmã Yeyox te Topa pu hãmꞌãktux hu: “Tak, xate ꞌãꞌ popmãhã nõm xop, ha ꞌãteꞌ xaxok ꞌohnãg”. Kaxĩy. Yã nõmhã putuk hãpxopmãꞌax.
\p
\v 10 Haꞌ xip Xĩmãm Pet, tuꞌ xut yãy yõg mĩkaxxexkaꞌ, tuꞌ xak ꞌãmãnex xexka yõg kãmãnat yĩpkox. Yã kãmãnat ꞌũxuxetꞌax Mãꞌok.
\v 11 Ha Yeyox te Pet pu hãmꞌãktux, hu:
\p —‍ꞌÃpu mõꞌtat ꞌõg mĩkaxxexka ꞌũxax hã. ꞌOk xate hãmpeꞌãpaxex ꞌãte xũy hã tot putupꞌah? Yã yõgnũ ꞌãtak te ꞌã xũy hõm putup. Kaxĩy.
\s Yeyox te ꞌÃnãn haꞌ mõg
\p
\v 12 Hãpxip ꞌĩhã xonat xop te Yeyox mũg xix xonat xop yõg kapitãm teꞌ xix Topa pet xexka yõg xonat xop teꞌ, tu Yeyox kĩy,
\v 13 tu taꞌ mõgãhã ꞌÃnãn hah. ꞌÃnãn yã Kaxpax xuxyã, ha Kaxpax te ꞌãmãnex xop xat nõm hãmyãxatamuk hã.
\v 14 Hõmã Kaxpax te Yoneo xop puꞌ xuktux ꞌũmax, pu tik puxet te tikmũꞌũn xohix xexka pupiꞌ xok.
\s Pet te hãmꞌãktux Yeyox yũmmũg ꞌohnãg
\p
\v 15 Ha Xĩmãm Pet te Yeyox peꞌ mõg, ha taꞌ nõy teꞌ peꞌ mõg, yãꞌ nõy xip Yeyox yõg tik xop kopah, yã tik te ꞌãmãnex xop xat hã xapeꞌ hu mõꞌnãhã tik te ꞌãmãnex xop xat pet yõg hãmnuhnõg hã, yã Yeyox mũtiꞌ mõxahaꞌ,
\v 16 ha taꞌ nox xip Pet hãptopa hãmpakꞌax yĩykox tuꞌ, tu ꞌũn mũtik hãmꞌãktux nõm teꞌ yĩykox pẽnãhãꞌ, tu Pet nũnnãhã ꞌũkopah,
\v 17 ha ꞌũn te Pet pu hãmꞌãktux, hu:
\p —‍ꞌOk ꞌãxip Yeyox yõg tik xop kopah? Kaxĩy.
\p Ha Pet te:
\p —‍ꞌÃmhok. ꞌAk mũnꞌah. Kaxĩy.
\p
\v 18 ꞌŨxapxũy, yĩꞌ kuhuꞌ xonat teꞌ, xix mĩptut pẽnãꞌax xop teꞌ xix mĩptut yõg hãmnuhnõg pẽnãꞌax xop teꞌ, tu kuxap xakot, tu nõ xapuk. Ha Pet te kama nũmũtik xip, tuꞌ xapuk.
\s Yeyox mõg tik te ꞌãmãnex xop xat hah
\p
\v 19 Ha ta tik te ꞌãmãnex xop xat te Yeyox yĩkopit, hu:
\p —‍Texĩy ꞌõg tik xop. Xate putep mũn yũmmũgãhãꞌ? Kaxĩy.
\p
\v 20 Ha Yeyox te:
\p —‍Hõmã ꞌãte hãmꞌãktux punethok tikmũꞌũn xop kopah, haꞌ xohix teꞌ xupak. ꞌÃte Yoneo yõg Topa pet kopa hãmꞌãktux Yoneo xohix puꞌ, haꞌ xohix teꞌ xupak. ꞌÃte hãmꞌãktux xaptop ꞌohnãg.
\v 21 Hamũn, teptu xatek yĩkopit? ꞌÃpuꞌ xupak xop yĩkopit. Nõm te yõg hãmꞌãktux ꞌãpak, hu hãmyũmmũg. Kaxĩy.
\p
\v 22 Yeyox te hãmꞌãktux, ha xonat xip, yã nõm te mĩptut pẽnãhãꞌ xix mĩptut yõg hãmnuhnõg pẽnãhãꞌ, tuꞌ yĩm hã Yeyox kix, tu:
\p —‍Texĩy xate hãmꞌãktux kummuk tik te ꞌãmãnex xop xat puꞌ? Kaxĩy.
\p
\v 23 Ha Yeyox te:
\p —‍Paxpu hãmꞌãktux kummuk, puxixꞌ max, xa xuktux yã hãmꞌãktux kummuk. Pa ꞌãte hãmꞌãktux max. Teptu xatek kix? Kaxĩy.
\p
\v 24 Yĩy ta mõ Yeyox kutnãhã ꞌÃnãn teꞌ, yĩy taꞌ mõg Yeyox, tu pipkup mãkxap hãꞌ kĩy, haꞌ mõg, tu mõktu Kaxpax haꞌ xupep. Yã Kaxpax te ꞌãmãnex xop xat.
\s Pet te xeꞌ xuktux Yeyox yõg tikꞌah
\p
\v 25 Ha taꞌ nox xip tu kuxap hã xapuk, ha nõm te:
\p —‍ꞌOk ꞌãxip Yeyox yõg tik te 12 xop kopah? Kaxĩy.
\p Ha Pet te:
\p —‍ꞌÃmhok, ꞌak mũnꞌah. Kaxĩy.
\p
\v 26 Ha taꞌ xip tik te ꞌãmãnex xop xat yõg kãmãnat, yã hõmã Pet teꞌ nõm yõg xape yĩpkox xak. Kãmãnat te:
\p —‍ꞌÕk ꞌãte ꞌãpẽnãhã Yeyox mũtik mĩptut yõg hãmnuhnõg kopah? Kaxĩy.
\p
\v 27 Ha Pet te:
\p —‍ꞌÃmhok! Kaxĩy.
\p Ha hãpxip ꞌohnãg ꞌĩhã xokakkak pit xatahaꞌ.
\s Yeyox mõg Pinat hah
\p
\v 28 Mãyõn kutõgnãg ha taꞌ mõg Yeyox gohenanok pet tuꞌ. Pa Yoneo xop mõxa ꞌohnãg. Yã Yoneo xop yõg xatꞌax teꞌ tux hok, pu tu mõxa hok Hõm xop pet kopah, ꞌĩhã ꞌãmuk xexka mĩy, yã ꞌãmuk xexka ꞌũxuxetꞌax Nõãꞌyẽn.
\v 29 Ha taꞌ mõg Pinat mĩptut kũnãpah, nũy Yoneo xop mũtik hãmꞌãktux, tu:
\p —‍Texĩy huꞌ nũnnãꞌ? Putep kummuk mĩy? Kaxĩy.
\p
\v 30 Ha Yoneo xop te:
\p —‍Hãpkummuk mĩy ꞌohnãg, kopxiꞌ nũnnã ꞌohnãg ꞌã hah. Kaxĩy.
\p
\v 31 Ha Pinat te:
\p —‍ꞌŨpip ꞌãxop yõg xatꞌax, yã nõm kaxꞌãmi tappet tuꞌ. ꞌÃpu ꞌũyõg hãpxopmãꞌax kopit. Kaxĩy.
\p Ha Yoneo xop te:
\p —‍ꞌÃmhok, ꞌãpu ꞌũkopit. ꞌŨgmũ yõg xatꞌax teꞌ xat ꞌohnãg tikmũꞌũn putex. Kaxĩy.
\p
\v 32 Hamũn. Hõmã Yeyox te hãmꞌãktux mĩpkupnix yĩmũꞌ xok putup. Yã Hõm xop te tikmũꞌũn kix mĩpkupnix yĩmũꞌ, pa Yoneo xop te tikmũꞌũn kix ꞌohnãg mĩpkupnix yĩmũꞌ. Yã Yeyox te hãmꞌãktux xeꞌeꞌ.
\p
\v 33 Ha Pinat te putpu mõꞌnãhã mĩptut hã, tu Yeyox pu hãmꞌãktux hu:
\p —‍ꞌÕk xate Yoneo xop xat? Kaxĩy.
\p
\v 34 Ha Yeyox te:
\p —‍ꞌOk yã ꞌãp-xet te hãmpeꞌãpaxex, huk yĩkopit, peꞌ nõy te xaꞌ xak, yĩy xatek yĩkopit? Kaxĩy.
\p
\v 35 Ha Pinat te:
\p —‍ꞌOk hãmpeꞌãpaxex Yoneo xop kopak xip? ꞌÃmhok. ꞌÃxape xop te ꞌãnũnnãhã nũnteh. Putep kummuk mĩy xateꞌ? Kaxĩy.
\p
\v 36 Ha Yeyox te:
\p —‍ꞌŨkxexkah, tu yãy yõg xop xat. Pa ꞌãte hãm xexka yõg xexka xop putukꞌah. Hã kaxĩy ꞌãte xatꞌah. Paxpu hãm xexka yõg xexka xop putuk, puxix yõg xop yãykix ꞌũgãy xop mũtik, puyĩꞌ nõy ꞌũgmõgã hok Yoneo xop hah. Pa ꞌãmhok. ꞌÃte hãm xexka yõg xexka xop putukꞌah. Kaxĩy.
\p
\v 37 Ha Pinat te:
\p —‍ꞌOk ꞌãmũn xexkaꞌ? Kãxĩy.
\p Ha Yeyox te:
\p —‍Hamũn, xate nõm ꞌãktux ꞌũkxexkaꞌ. ꞌŨgnũn hãm xexka tuꞌ, tuk nãhãꞌ, nũy hãpxeꞌe ꞌãktux, yã hãpxeꞌẽgnãg. Hãmyoaꞌax yõg tikmũꞌũn te yõgnũ hãmꞌãktux ꞌãpak, tuꞌ yĩpkox pip. Kaxĩy.
\p
\v 38 Ha Pinat te:
\p —‍Pute ꞌũm hãmyok? Yãꞌ xipꞌah hãmyok. Pute ꞌũm hãpxeꞌe? Yãꞌ xipꞌah hãpxeꞌeꞌ. Kaxĩy.
\s Yoneo xop tep-tup nõg Yeyox
\p Tu taꞌ mõg hãptopa Pinat, nũy Yoneo xop pu hãmꞌãktux, hu:
\p —‍ꞌAp kummukꞌah tihik.
\v 39 Pa ꞌõg hãpxopmãꞌax te kaxĩy. Yã hãmyãxatamuk xohix ꞌĩhãꞌ mĩy ꞌãmuk xexka ꞌũxuxetꞌax Nõãꞌyẽn, ꞌĩhã ꞌãte kanet kaꞌok kopaꞌ xut tik puxet, pu mõg. Piꞌyã ꞌãxop tep-tup? ꞌOk mõg putup nõm te Yoneo xop xat? Kaxĩy.
\p
\v 40 Ha Yoneo xop te hãmꞌãktux kaꞌok, hu:
\p —‍ꞌÃmnok, ꞌaꞌ mõg putupꞌah. ꞌÃpu Mahamax xut, pu mõg. Kaxĩy.
\p Yãꞌ xupxet Mahamax.
\c 19
\p
\v 1 Ha Pinat teꞌ xat ha xonat te Yeyox kix xikot hã.
\v 2 Ha xonat xop teꞌ mĩy ꞌũkuxxax, yã mĩmyãm tox mãg hãꞌ mĩy, tu mõktu Yeyox putox yĩmũꞌ xix, puyĩy xexka xop putuk, tu Yeyox pu mõꞌ xax tat topixxax ꞌãtaꞌ, puyĩy xexka xop putuk.
\v 3 Tuꞌ nũn xonat, tu hãpkuteꞌex, hu:
\p —‍ꞌÃmax. Xate Yoneo xop xat. Kaxĩy.
\p Tuꞌ yĩm hã Yeyox kix.
\v 4 Ha taꞌ mõg hãptopa ꞌũxehet Pinat, tu Yoneo xop pu hãmꞌãktux, hu:
\p —‍ꞌŨxupax. ꞌÃte tik yõg hãpkummuk mĩyꞌax xak, paꞌ pipi ꞌohnãg. ꞌAꞌ kummukꞌah tihik. ꞌÃte nõm hãꞌ nũnnãp-tup, xayĩy yũmmũg ꞌãte yõg hãpkummuk mĩyꞌax pipi ꞌohnãg, ti xũygãp-tupꞌah. Kaxĩy.
\p
\v 5 Ha taꞌ mõg Yeyox hãptopah, hap-tox yĩmũꞌ yũm ꞌũkuxxax, yã mĩmyãm tox mãg hãꞌ mĩy, ha mõꞌtat topixxax ꞌãtaꞌ. Ha Pinat te:
\p —‍ꞌŨpẽnãꞌ tihik! Kaxĩy.
\p
\v 6 Ha ꞌãmãnex xexka xop te hãmꞌãktux kaꞌok xix Yoneo xexka xop teꞌ, hu:
\p —‍ꞌÃpu mĩpkupnix yĩmũp-tex pipkup hã, ꞌãpu mĩpkupnix yĩmũp-tex pipkup hã. Kaxĩy.
\p Ha Pinat teꞌ xat, hu:
\p —‍ꞌÃpu ꞌũmõgã, nũy mĩpkupnix yĩmũp-tex pipkup hã. ꞌÃte Yeyox yõg hãpkummuk mĩyꞌax pipi ꞌohnãg, huꞌ xũygãp-tupꞌah. Kaxĩy.
\p
\v 7 Pa Yoneo xop te hãmꞌãktux yãnãn, hu:
\p —‍ꞌŨkaxꞌãmi ꞌũgmũ yõg xatꞌax, tu nõm teꞌ xat, pup-tex. Hamũn, tute hãmꞌãktux, “Ũgmũn yã Topak-tok”. Kaxĩy.
\p
\v 8 Ha Pinat teꞌ xupak, tuꞌ kuxa nõg nõy nãꞌ mõg.
\v 9 Tu xe mĩptut hã mõꞌnãhãꞌ, tu Yeyox pu hãmꞌãktux, hu:
\p —‍Hãm ꞌũm tu ꞌãnũn? Kaxĩy.
\p Pa Yeyox te hãmꞌãktux ꞌohnãg.
\p
\v 10 Ha Pinat te:
\p —‍ꞌOk hãmꞌãktux ꞌohnãg? ꞌOk xateꞌ yũmmũg, ꞌãteꞌ xat, xa mõg, paꞌ xat hok, xa mõg hok. ꞌÃteꞌ xat, puxix xonat ꞌãp-tex mĩpkupnix yĩmũꞌ. Kaxĩy.
\p
\v 11 Ha Yeyox te:
\p —‍Topa teꞌ xat, xaꞌ xat, paꞌ xat hok, xaꞌ xat ꞌohnãg. Xate hãpkummuk mĩy, paꞌ nõy te hãpkummuk xexka mĩy, nõm te ꞌãhak mõgãhãꞌ. Kaxĩy.
\p
\v 12 Ha Pinat teꞌ xupak, hup-tup, nũy Yeyox xat pu mõg. Pa Yoneo xop te hãmꞌãktux kaꞌok, hu:
\p —‍Paxpu Yeyox xat, pu mõg, hu ta Hõm xop xape ꞌohnãg ꞌãmũn. Hõm xop tep-tup nõg nõm te yãy xexka mĩy. Kaxĩy.
\p
\v 13 Ha Pinat teꞌ xupak, tu ta xe mõꞌnãhã mĩptut hã, tu ta Yeyox mõgãhã hãptopah, tu pa te hãmyũmmũg xop yõg mĩmpe yĩmũꞌ yũm hãm tu ꞌũxuxetꞌax Mĩkax Pet Xax. Yã ꞌãxetꞌax nõy yã Gabatah, yã Yoneo xop yĩyꞌax kopah.
\v 14 Mãyõn te yãykoteꞌ yũmꞌax. Hãpxip ꞌĩhã ꞌãmuk xexka mĩyꞌax, yã ꞌãmuk xexka ꞌãxetꞌax Nõãꞌyẽn. Ha Pinat te Yoneo xop pu hãmꞌãktux, hu:
\p —‍ꞌŨxip nũnte ꞌohnũ xexkaꞌ. Kaxĩy.
\p
\v 15 Pa Yoneo xop te:
\p —‍ꞌÃpu ꞌũp-tex, ꞌãpu ꞌũp-tex, ꞌãpu ꞌũp-tex mĩpkupnix yĩmũꞌ! Kaxĩy.
\p Ha Pinet te:
\p —‍ꞌOk ꞌãtep-texꞌax mĩpkupnix yĩmũ tik te ꞌãxop xat? Kaxĩy.
\p Ha ꞌãmãnex xexka xop te:
\p —‍Yã Hõm xop yõg xexkap-xehnãg tek mũg xat. Puxix. Kaxĩy.
\p
\v 16 Ha Pinat te xonat xop pu Yeyox hõm, pup-tex mĩpkupnix yĩmũ pipkup hã. Ha xonat xop te Yeyox pẽnãhãꞌ.
\s Yeyox putex mĩpkupnix yĩmũꞌ
\p
\v 17 Ha taꞌ mõg Yeyox, tu mĩpkupnix tahaꞌ, tuꞌ mõg, tu mõktuꞌ xupep hãm tu, yã hãhãm ꞌũxuxetꞌax putox kup, yã Yonet xop yãy yĩyꞌax tu Gok.
\p
\v 18 Ha xonat te pipkup hãꞌ xuhnĩy Yeyox mĩpkupnix tuꞌ, haꞌ xup. Ha xonat te pipkup hãꞌ xuhmĩy kama tik tix nõy mĩpkupnix nõy tuꞌ, hak-tetex tik tix, yãp-xet xup Yeyox yĩpxax tuꞌ xiꞌ nõy xup Yeyox yĩpxeꞌe tuꞌ, ha Yeyox xup yãykoteꞌ.
\v 19 Ha Pinat teꞌ kaxꞌãmiꞌ, tuꞌ xat, pu nõm xix Yeyox yõg mĩpkupnix xox putox tuꞌ. ꞌŨkaxꞌãmi, hu: “Kõmẽn Nãyane yõg Yeyox. Tute Yoneo xop xat”. Kaxĩy.
\v 20 Ha Yoneo punethok te nõ mõkupix. Hãmhũmnãg yũm kõmẽn, tu yõg tikmũꞌũn teꞌ yĩyꞌax tikoyuk hã hãmꞌãktux, yĩy ta Pinat te nõm kaxꞌãmi ꞌũyĩyꞌax tikoyuk hãꞌ, yã Yoneo xop yõg yĩyꞌax hã xix Hõm xop yõg yĩyꞌax hã xix Genex xop yõg yĩyꞌax hã.
\v 21 Pa ꞌãmãnex xexka xop te Pinat pu hãmꞌãktux, hu:
\p —‍ꞌŨkaxꞌãmi hok, hu: “Tute Yoneo xop xat”. Kaxĩy. ꞌÃpu ꞌũkaxꞌãmi, hu: “Tik te hãmꞌãktux hu: ‘ꞌÃte Yoneo xop xat’ ”. Kaxĩy.
\p
\v 22 Ha Pinat te:
\p —‍Puxix. ꞌÃte xe kaxꞌãmip-tupꞌah. Kaxĩy.
\p
\v 23 Yã xonat te pipkup hãꞌ xuhmĩy Yeyox, tu Yeyox yõg topixxax mõy, tu mõ topixxax koxip, tu mõktu topixxax xop teꞌ 4 mĩy xonat teꞌ 4 puꞌ. Nõm teꞌ paha Yeyox yõg kayak, yã ꞌũyõg xapꞌax xipꞌah.
\v 24 Ha xonat xop te yãy mũtik hãmꞌãktux, hu: ꞌÃpu yũmũ kayak koxip hok. ꞌÃpu yũmũ mõ xap yõn, puyĩy xonat puxet paꞌ. Yã hõmã ꞌũhittap ꞌũkaxꞌãmi Topa yõg tappet tuꞌ, hu: “Nõm te mõꞌkoxip yõgnũ topixxax, tu mõ xap yõn, nũy yõg kayak paꞌ”. Kaxĩy. Hamũn, ꞌũkaxꞌãmi xeꞌeꞌ. Hã kaxĩy, yĩy ta xonat teꞌ mĩy.
\p
\v 25 Ha taꞌ xip Yeyox yõg mĩpkupnix yĩkãgnãg hã Yeyox mũktut xix Yeyox mũktut tutnõy, yã Mãnix, yã Konop xetut, ha Mãnix Mãnanẽn xip kamah.
\v 26 Ha Yeyox teꞌ pẽnãhã yãy tut xix tik te Yeyox yõg tik te 12 xop kopaꞌ xip, yã Yeyox te mõ nõm yãy xeꞌẽgnãg.
\p Yeyox te:
\p —‍Mãy, nõꞌõm ꞌãk-tok pit. Kaxĩy.
\p
\v 27 Tu xe hãmꞌãktux ꞌũnõy puꞌ, nõm te Yeyox yõg tik te 12 xop kopaꞌ xip, hu:
\p —‍Nõꞌõm ꞌãtut. Kaxĩy.
\p Ha tik te ꞌũn mõgãhã yãy pet hah.
\s Yeyox xok
\p
\v 28 Ha Yeyox teꞌ yũmmũg ꞌũhãm kux, tu hãmꞌãktux, hu:
\p —‍Kõnãg putup tek putex. Kaxĩy.
\p Yã Topa yõg tappet yõg hãmꞌãktux putuk. Hõmã ꞌũhittap nõm teꞌ kaxꞌãmi Topa yõg tappet tuꞌ.
\p
\v 29 Ha taꞌ xip naxtox, ha kopaꞌ xup xupyãg kummuk, ha ꞌõm te tok hã hep tit, tu nõm mĩm hãꞌ xuhmĩy, tuꞌ xix Yeyox yĩkox xax tuꞌ.
\v 30 Ha Yeyox te xoꞌop, tu:
\p —‍ꞌŨkhãm kux. Kaxĩy.
\p Tup-tox put xok, tuꞌ xok, ha taꞌ mõg ꞌũkoxuk.
\s Xonat te Yeyox xuhmĩy
\p
\v 31 Ta Yoneo xop te Pinat puꞌ xak. ꞌŨp-tup, puyĩy xonat xop xakix xop kup kũnãkohoh. ꞌŨp-tup kamah, puyĩy mĩpkupnix tuꞌ mõy ꞌũxakix xop. Yã xexta pet, ha nõm tep-tup nõg ꞌũxakix xop kutetex pepix mĩpkupnix yĩmũ nit xap hã. Nit xap yã Yoneo xop yõg ꞌãmnĩy tuknõg, yã hãm hok, ha nõm nit xap xexkah.
\p
\v 32 Ha taꞌ mõg xonat xop, tu tik puxet kup xaꞌah, tu tik nõy kup xaꞌah nõm xakix Yeyox mũtik.
\v 33 Xonat nũn Yeyox hah, tuꞌ pẽnãhãꞌ ꞌũxok tãmnãg, yĩyꞌ kup xaꞌa ꞌohnãg.
\v 34 Xonat puxet te Yeyox puka xuhmĩy pox xexka hã, tu hãpxip ꞌohnãg ꞌĩhãꞌ xupep hep ꞌãta xix kõnãꞌãg.
\p
\v 35 Tak mũn Yoãm. ꞌÃte hãpxop xohix pẽnãhãꞌ, tu nõm kaxꞌãmi, xayĩy ꞌãkuxa mãm Yeyox kopah. ꞌÃteꞌ yũmmũg, yã hãmꞌãktux xeꞌeꞌ. ꞌAp koitꞌah.
\v 36 Yã xonat te Yeyox kup xaꞌa ꞌohnãg. Yã Topa yõg tappet te hãmꞌãktux putuk. Yã Topa yõg tappet te: “ꞌŨkup xaꞌap-tup hok”. Kaxĩy.
\v 37 Yã Topa yõg tappet hãmꞌãktux nõy putuk. Yã Topa yõg tappet te: “Nõm teꞌ pẽnãp-tup, yã ꞌũxuhmĩy pox xexka hã”. Kaxĩy.
\s Yeyox hãpkot
\p
\v 38 Hõmã kõmẽn ꞌAnimãtex yõg Yoye te Yeyox peꞌ mõg. Pa Yeyox peꞌ mõg yãy xaptop, yã Yoneo xexka xop yĩpkutuk. Taꞌ mõg Yoyeꞌ, tu mõktu Pinat tuꞌ kax Yeyox yĩn, ha Pinat te:
\p —‍Mõy paꞌ. Kaxĩy.
\p Yĩy taꞌ mõg Yoyeꞌ, tuꞌ paha Yeyox yĩn, tuꞌ mõgãhãꞌ.
\p
\v 39 Hõmã ha taꞌ mõg Nĩkonẽm ꞌãmnĩy ꞌĩhãꞌ, tu Yeyox mũtik hãmꞌãktux. Tu taꞌ mõg Nĩkonẽm, yã Yoye mũtik mõg. Nĩkonẽm teꞌ mõgãhã mĩm kõnyõn hax max, yãꞌ xohix teꞌ 45 kit, yãꞌ xuxetꞌax ꞌanoex xix mĩhaꞌ.
\v 40 Ta nõm tik tix te Yeyox yĩn kĩy topixxax tox hã, tu kopaꞌ mãm mĩm kõnyõn hax max. Hã kãxĩy Yoneo xop teꞌ mĩy, nũy yĩn hãpkot.
\v 41 Ha taꞌ yũm xukpot max hãm tu Yeyox putex yĩkãgnãg, ha xukpot tuꞌ yũm mĩkaxxap kox, yã mĩkaxxap kox tũmnãg.
\v 42 Hãptup yã Yoneo xop yõg ꞌãmniy hãm hok, yã nit xap, ha Yeyox yĩn yũm mĩkaxxap kox kopah. Yã hãmhũmnãg mĩkaxxap kox.
\c 20
\s Mĩkaxxap kox kox
\p
\v 1 Ye nomĩy hãptupꞌax, yã hãpkoxtap ha taꞌ mõg Mãnix Mãnanẽn, tu mõktuꞌ xupep mĩkaxxap kox tuꞌ, tuꞌ pẽnãhãꞌ, pap xip hok mĩkaxxap xexka hãmmõꞌyĩnnĩn mĩkaxxap yĩkox tuꞌ. Putep-teꞌ xut?
\v 2 Taꞌ mõg mõꞌkaꞌok, tu Xĩmãm Pet mũtik hãmꞌãktux, xixꞌ nõy mũtik hãmꞌãktux, yã nõm xip Yeyox yõg tik xop kopah, yã Yeyox te mõ nõm yãy xeꞌẽgnãg. Manix Mãnanẽn te:
\p —‍Tikmũꞌũn teꞌ xut Yeyox yĩn mĩkaxxap kox kopah, hak mũꞌãteꞌ yũmmũgꞌah hãm ꞌũm tuꞌ yũm ꞌũyĩn. Kaxĩy.
\p
\v 3 Ha taꞌ mõg Pet xiꞌ nõy mĩkaxxap kox hah.
\v 4 ꞌŨmõg mõꞌkaꞌok ꞌũtix, paꞌ nõy mõg mõꞌkaꞌok xeꞌeꞌ, tu mõktuꞌ xupep hãmãxap,
\v 5 tuꞌ mõꞌ pa yũm, hu mĩkaxxap kox hã mõꞌ pa yũm, tuꞌ pẽnãhã topixxax tox, pa mõꞌnã ꞌohnãg.
\v 6 Hãpxip kutõgnãg ꞌĩhãꞌ xupep Xĩmãm Pet, tu mõꞌnãhã mĩkaxxap kox hã, tuꞌ pẽnãhã topixxax yũm.
\v 7 Haꞌ xip topixxax tox nõy nõm te Yeyox putox kĩy, yãꞌ kĩy, tu yãp-xehnãg tuꞌ xip, yã topixxax nõy mũtik xipꞌah.
\v 8 Ha nõm te mĩkaxxap kox hãꞌ xupep hãmãxap, tu mõꞌnãhãꞌ, tuꞌ pẽnãhãꞌ, tuꞌ kuxa yũm.
\v 9 Pa nõm xop teꞌ yũmmũg xeꞌe ꞌohnãg. Yã Topa yõg tappet te: “ꞌŨputpuꞌ hiꞌax”. Kaxĩy.
\p
\v 10 Tu taꞌ mõg putpuꞌ Yeyox yõg tik xop yãy pet hah.
\s Yeyox te Mãnix Mãnanẽn puꞌ yãy mũg
\p
\v 11 Ha taꞌ xip Mãnix mĩkaxxap kox yĩkak hãptopah, tu potahaꞌ, tu mõꞌ pa yũm, tu kopaꞌ pẽnãhãꞌ.
\v 12 Paꞌ pip pexkox yõg nũꞌpok xop yõg tik tix, tu topixxax ponnok mõꞌtat, tuꞌ mãm Yeyox yĩn xipꞌax tuꞌ, yã yãp-xet xip Yeyox pata xipꞌax tuꞌ, haꞌ nõy xip Yeyox putox xipꞌax tuꞌ,
\v 13 tu:
\p —‍Yãhãg, teptu ꞌãpotahaꞌ? Kaxĩy.
\p Ha:
\p Tikmũꞌũn teꞌ mõgãhã ꞌũkxuxyãꞌ. ꞌA ꞌãteꞌ yũmmũgꞌah hãm ꞌũm tuꞌ yũm. Kaxĩy.
\p
\v 14 Tute hãmꞌãktux, tu yõkãnãm, tu Yeyox pẽnãhã, pa Yeyox yũmmũg ꞌohnãg.
\v 15 Ha Yeyox te:
\p —‍Yãhãg, teptu ꞌãpotahaꞌ? Tep mũn xak? Kaxĩy.
\p Yã ꞌũn te hãmpeꞌpaxex yã tihik nõm te xukpot pẽnãhãꞌ, tu:
\p —‍ꞌOk xate nõm mõgãhãꞌ? ꞌÃpu ꞌãꞌ xuktux. Piꞌyã yũm, hak mõg putup, nũy paꞌ. Kaxĩy.
\p
\v 16 Ha Yeyox te:
\p —‍Mãnix! Kaxĩy.
\p Ha Mãnix te hãꞌ yõkanãm, tu hãmꞌãktux Yoneo xop yãy yĩyꞌax hã, hu:
\p —‍Hamõn! Kaxĩy.
\p Yã tikmũꞌũn yĩyꞌax hã, “Yãyã”. Kaxĩy.
\p
\v 17 Ha Yeyox te:
\p —‍ꞌÃpu ꞌũgmũg hok. Yãg mõg putup putpuꞌ yõgnũ ꞌãtak hah. ꞌÃpu mõg ꞌũkxape xop hah, nũy hãmꞌãktux ꞌũgmõg yãy yõg ꞌãtak hah, yã ꞌõgnũ, yã yõgnũ Topa, yã ꞌõgnũ. Kaxĩy.
\p
\v 18 Ha taꞌ mõg Mãnix Mãnanẽn Yeyox yõg tik xop hah, tu mõktu hãmꞌãktux, yã yãyã Yeyox pẽnãhãꞌ, tu Yeyox yõg hãmꞌãktux ꞌãktux.
\s Yeyox te yãy yõg tik xop pu yãy mũg
\p
\v 19 Ye nomĩy yõg ꞌãmãxak, ha taꞌ yãy tu nũꞌnãhã Yeyox yõg tik xop, tu mõhãmyĩnnĩn pipkup hã, yã Yoneo xexka yĩpkutuk. Ha taꞌ nũn Yeyox, tu nũktuꞌ xip yãy yõg xop kopah, tu:
\p —‍ꞌÃkuxa nõg hok. Kaxĩy.
\p
\v 20 Yã tute hãmꞌãktux, tu nõm pu yãy yĩm mũg xix yãy puka mũg, yã kayax mũg, ha nõm te yãy xuxyã pẽnãhãꞌ, huꞌ hittup xexkaꞌ.
\v 21 Ha Yeyox te:
\p —‍ꞌÃkuxa nõg hok. Yõgnũ ꞌãtak te nũgkutnãhãꞌ. Hã kaxĩy ꞌãte ꞌãxop mõꞌpok kamah. Kaxĩy.
\p
\v 22 Tute hãmꞌãktux, tuꞌ nõy yĩmũꞌ xitxok, tu:
\p —‍ꞌÃpu ꞌũpa Topa Koxuk.
\v 23 ꞌÃxop te tikmũꞌũn yõg hãpkummuk mĩyꞌax xaxok, haꞌ kux, puxix Topa hãpkummuk mĩyꞌax xaxok, haꞌ kux kamah. Pa ꞌãxop te tikmũꞌũn yõg hãpkummuk mĩyꞌax xaxok ꞌohnãg, haꞌ kux ꞌohnãg, puxix Topa hãpkummuk mĩyꞌax xaxok putupꞌah, haꞌ kux ꞌohnãg kamah. Kaxĩy.
\s Yeyox xix Tõmẽꞌ
\p
\v 24 Ha taꞌ xip Tõmẽ Yeyox yõg tik xop kopah, yã kama ꞌũxuxetꞌax kutonnix. ꞌAp xipꞌah ꞌĩhãꞌ xupep Yeyox.
\v 25 Ha Yeyox yõg tik xop te Tõmẽ pu hãmꞌãktux hu:
\p —‍ꞌŨgmũꞌãte yãy xuxyã pẽnãhãꞌ. Kaxĩy.
\p Ha Tõmẽ te:
\p —‍ꞌÃteꞌ pẽnã ꞌohnãg ꞌũyõg kayax ꞌũyĩm tuꞌ, pipkup te nõm xuhmĩy, kopxix ꞌũgkuxa yũm putupꞌah. Tuk yĩpkutok hã kayax ꞌãpit ꞌohnãg, kopxix ꞌũgkuxa yũm putupꞌah, tuk yĩm hã ꞌãpit ꞌohnãg ꞌũpukaꞌ, kopxix ꞌũgkuxa yũm putupꞌah. Kaxĩy.
\p
\v 26 Xẽmãn puxet nõg, ꞌĩhã yãy tu nũꞌnãhã Yeyox yõg tik xop mĩptut kopah, haꞌ xip Tõmẽ nũmũtik. Nõm te mõhãmnĩnyĩn pipkup hã, pa Yeyox nũn, tu nũktu nõm xop kopaꞌ xip, tu:
\p —‍ꞌÃkuxa nõg hok. Kaxĩy.
\p
\v 27 Tu Tõmẽ pu hãmꞌãktux, hu:
\p —‍ꞌÃpu ꞌãyĩm xix nũnte. ꞌÃpu ꞌũgyĩm pẽnãꞌ. ꞌÃpu ꞌãyĩm hãg ꞌãpit ꞌũkpukaꞌ. ꞌÃpu ꞌãkuxa yũm ꞌohnãg kuxyãꞌ. ꞌÃpu ꞌãkuxa yũm. Kaxĩy.
\p
\v 28 Ha Tõmẽ te: Yãyã, yõgnũ Topah. Kaxĩy.
\p
\v 29 Ha Yeyox te:
\p —‍ꞌOk ꞌãkuxa yũm, xate hãmpẽnãhã tuꞌ? ꞌŨhittup tikmũꞌũn kuxa mãm, paꞌ pẽnã ꞌohnãg. Kaxĩy.
\p
\v 30 Ta Yeyox te hãpxopmã kaꞌok xeꞌẽgnãg nõy punethok, pa nõm kaxꞌãmi ꞌohnãg nũ tappet tuꞌ.
\v 31 Pa hãpxopmãꞌax kaxꞌãmi, xayĩy ꞌãkuxa mãm, yã Yeyox yã Kunnix, yã Topa te nũꞌkutnãhãꞌ. Yãꞌ kaxꞌãmi, xayĩy ꞌãkuxa mãm, yã Yeyox yã Topak-tok. ꞌÃkuxa mãm Yeyox kopah, nũy ta hi xeꞌẽgnãg mõkumaꞌ mõg, haꞌ kux ꞌohnãg.
\c 21
\s Yeyox te yãy yõg tik te 7 pu yãy mũg
\p
\v 1 Ta Yeyox te yãy yõg tik xop pu yãy mũg ꞌũxeheh konãg xexka Timenit yõg hãpkux tuꞌ. Yãꞌ yãy mũg hã kaxĩy.
\v 2 ꞌŨpip Xĩmãm Pet, xix Tõmẽ ꞌũxuxetꞌax Kutonnix kamah, xix Nãtãnãyet, yã xiptuxexka Kãnã yõg tihik hãpxexka Ganinet tuꞌ, xix Yemeneo kutok xop, xix tik tix nõy, yã Yeyox yõg tik xop kopaꞌ pip.
\v 3 Ha Xĩmãm Pet teꞌ nõy pu hãmꞌãktux, hu:
\p —‍ꞌŨgmõg, nũy mãm xuk. Kaxĩy.
\p Ha xape xop te:
\p —‍ꞌÃpu yũmũ mõg. Kaxĩy.
\p Tu taꞌ mõg kaꞌmãm, tu mõktu mĩpkox tuꞌ mõxahaꞌ, tuꞌ mõxakux, tu taꞌ mõg kõnãg xexka tuꞌ, tu mãm xuk ꞌãmnĩy tox hã, pap xuk ꞌohnãg.
\v 4 Mãyõn xupep, ꞌĩhãꞌ xip Yeyox hãm kux tuꞌ, pa Yeyox yõg tik xop teꞌ yũmmũg ꞌohnãg, yãꞌ xip Yeyox.
\v 5 Ha Yeyox te:
\p —‍ꞌŨkxape xop, ꞌok mãm ꞌũm xuk hok? Kaxĩy.
\p Ha nõm te:
\p —‍ꞌAp xukꞌah. Kaxĩy.
\p
\v 6 Ha Yeyox te:
\p —‍ꞌÃpu mõ mãpxukꞌax yõn mĩpkox yõg yĩpxeꞌe hãꞌ yũm, tu ꞌãxop teꞌ pipip-tup. Kaxĩy.
\p Ha nõm teꞌ mĩy, ha mãm nũꞌxĩmnãg ꞌũxukꞌax hã, ha tik te mãmxukꞌax mõy yũmmũg ꞌohnãg.
\v 7 Haꞌ xip tihik, yã Yeyox yõg tik xop kopaꞌ xip, yã Yeyox te mõ nõm yãy xeꞌẽgnãg. Tute Pet pu hãmꞌãktux, hu:
\p —‍Yã yũmũg xuxyã nõꞌõm. Kaxĩy.
\p Ha Xĩmãm Pet xaxtop, hu mõ toppixxax tat, tuꞌ pũn kõnãg kopah.
\v 8 Ha ta xape te yãꞌ pip mĩpkox kopah. Ha ta mĩpkox xix hãpkux yõg mẽn xohix teꞌ 100. Ha taꞌ mõg, tu mãpxukꞌax nũnnãhã kõnãg kopah, yã mãm nũꞌxĩmnãg.
\v 9 Tuꞌ mõg, tu mõktuꞌ mõxaha hãpkux tuꞌ, tu hãpkux tuꞌ mõg, tu mõktu kuxap pẽnãhãꞌ, tu mãm pugã pẽnãhã xix pãm.
\v 10 Ha Yeyox te:
\p —‍Putnũꞌ mãhãm ꞌãxop teꞌ xuk. Kaxĩy.
\p
\v 11 Ha ta mõꞌnãhã Xĩmãm Pet mĩpkox hã, tu mãpxukꞌax yĩkũy, tuꞌ nũnnãhãꞌ, yã mãm nũꞌxĩmnãg mãm xohix teꞌ 153. ꞌŨxohix mãhãm, pa mãpxukꞌax yãy pot ꞌohnãg.
\v 12 Ha Yeyox te:
\p —‍Mã, nũy ꞌãxit. Kaxĩy.
\p Ha tik teꞌ yĩkopit ꞌohnãg, hu:
\p —‍ꞌŨꞌũm ꞌãmũn? Kaxĩy.
\p Yã hã kaxĩy yĩkopit ꞌohnãg, paꞌ yũmmũg, yãꞌ xuxyãꞌ.
\v 13 Yeyox te pãm pop, tu tik puꞌ popmãhãꞌ, tu mãm pop, tu tik puꞌ popmãhãꞌ.
\p
\v 14 Hãmũn, Yeyox te putpuꞌ hiꞌ, tu yãy yõg tik xop pu yãy mũg tikoyuk.
\s Yeyox xix Pet
\p
\v 15 Taꞌ xit kux, ha Yeyox te Xĩmãm Pet pu hãmꞌãktux, hu:
\p —‍ꞌOk xatek putuppax xexka, pa ꞌõm putuppax kutõgnãg? Kaxĩy.
\p Ha Pet te:
\p —‍Yãyã, hamũn, xateꞌ yũmmũg, ꞌãte ꞌãp-tuppax. Kaxĩy.
\p Ha Yeyox te:
\p —‍ꞌÃpu tikmũꞌũn pu yõg hãmꞌãktux yũmmũgãꞌ, nũy nõm pẽnãꞌax putuk. Kaxĩy.
\p
\v 16 Ha Yeyox te:
\p —‍Xĩmãm, yã Yoãm Kutok, ꞌok xatek putuppax? Kaxĩy.
\p Ha:
\p —‍Yãyã, hamũn, xateꞌ yũmmũg, ꞌãte ꞌãp-tuppax. Kaxĩy.
\p Ha Yeyox te:
\p —‍ꞌÃpu tikmũꞌũn pẽnãꞌ kahnẽn pẽnãꞌax putuk. Kaxĩy.
\p
\v 17 Ha Yeyox te xe hãmꞌãktux, hu:
\p Xĩmãm, yã Yoãm kutok, ꞌok xatek putuppax? Kaxĩy.
\p Ha Pet kuxa hittup ꞌohnãg, Yeyox teꞌ yĩkopit tikoyuk hah tu:
\p —‍Yãyã, xateꞌ yũmmũg hãpxop xohix xexkah. Xateꞌ yũmmũg, ꞌãte ꞌãp-tuppax. Kaxĩy.
\p Ha Yeyox te:
\p —‍ꞌÃpu tikmũꞌũn pẽnãꞌ, kahnẽn pẽnãꞌax putuk.
\v 18 ꞌÃte xa hãpxeꞌe ꞌãktux. Hõmã ꞌãtuktup, tu yãy kũnãy hĩy, nũy ta mõg, tu hãpkumep hãm xohix tuꞌ xatep-tup. Pa hãpxip ꞌĩhã ꞌãkututꞌax, tu ꞌãyĩm yoap-tup, haꞌ nõy te ꞌãyĩm kĩy putup, tu ꞌãmõgãp-tup hãm tu xatep-tupꞌah. Kaxĩy.
\p
\v 19 Hã kaxĩy Yeyox te hãmꞌãktux hã kaxĩy Pet putex putup, puyĩy tikmũꞌũn yũmmũg ꞌũxexka Topah. Yeyox te Pet pu hãmꞌãktux hu:
\p —‍ꞌÃpu ꞌũkpe mõg. Kaxĩy.
\s Yeyox te tik nõy ꞌãktux
\p
\v 20 Pa Pet te yõkãnãm, tu tik nõy pẽnãhãꞌ, yã Yeyox te mõ nõm yãy xeꞌẽgnãg. Yã hõmã nõm xip Yeyox yĩkãgnãg, tuꞌ yĩkopit, hu: “Yãyã, tep-teꞌ gãy xop mõgãp-tup ꞌã ha, puyĩy ꞌãxũygãꞌ?” Hã kaxĩy nõm te hãmꞌãktux hõmã.
\v 21 Ha Pet te nõm pẽnãhãꞌ, tu Yeyox pu hãmꞌãktux, hu:
\p —‍Yãyã, xix ꞌõhõm tihik. Tikmũꞌũn te nõm pu putep mũn mĩy putup? Kaxĩy.
\p
\v 22 Ha Yeyox te:
\p —‍Paxpu ꞌãtep-tup tik nox xihip nũnte, ha mõktuk nũn putpuk, ha ta xateꞌ yũmmũg putupꞌah. ꞌÃpu ꞌũkpe mõg! Kaxĩy.
\p
\v 23 Yĩy ta Yeyox mũtik mõg xop kopa hãmꞌãktux punethok, yã hãmꞌãktux tik xok putupꞌah. Pa ꞌãmhok. Yeyox ꞌap xuktuxꞌah ꞌũxok putupꞌah. Pa Yeyox te: “Paxpu ꞌãtep-tup tik nox xihip nũnteh, ha mõktuk nũn putpuk, ha ta xateꞌ yũmmũg putupꞌah”. Kaxĩy.
\p
\v 24 Nõꞌõm tihik yãg mũn. ꞌÃte hãpxop xohix xeꞌe ꞌãktux, tu nõm kaxꞌãmi nũnteh. Yũmũꞌãteꞌ yũmmũg ꞌũxeꞌe nũ hãmꞌãktux.
\s ꞌŨkux
\p
\v 25 Yeyox te hãpxopmã nõy punethok kamah. ꞌŨkaxꞌãmi Yeyox yõg hãpxopmãꞌax xohix xexkaꞌ, puxix pipꞌax tappet xohix xexkah. ꞌÃte hãmpekpaxex hãm xexka putukꞌah tappet xohix. Yã hãm xexka kutõgnãg, pa nõm tappet xexkah.
\p Tu ta tuꞌ kux.