\id ACT  - Maxakalí NT [mbl] (Brazil) -2011 bd
\h ꞌAT
\toc1 ꞌAt
\toc2 Atos (At)
\mt YEYOX YÕG MÕꞌPOK XOP TE HÃPXOPMÃHÃꞌ
\c 1
\p
\v 1 Teop:
\p Hõmã ꞌãte xa kaxꞌãmi hãmãxap tappet tuꞌ, nũy Yeyox yõg hãpxopmãꞌax xohix ꞌãktux xaꞌ, xiꞌ yõg hãmyũmmũgꞌax xohix ꞌãktux,
\v 2 ha Yeyox te yãy yõg tik xop yĩmõgatux, tu mõꞌpok, pu hãmꞌãpak max ꞌãktux, ha Topa Koxuk te Yeyox kaꞌogãhãꞌ, ha Topa te Yeyox mõgãhã pepi pexkox tuꞌ,
\v 3 nõm xok, tu putpuꞌ hiꞌ, ha tikmũꞌũn punethok teꞌ pẽnãhãꞌ, tu ꞌãmnĩy te 40 hãꞌ pẽnãhãꞌ, yĩy taꞌ xohix te hãmyũmmũg, yãꞌ hi putpuꞌ Yeyox. Tute Topa te tikmũꞌũn xat xeꞌẽgnãg ꞌãktux, tu Topa te yãy yõg tikmũꞌũn xat ꞌãktux,
\v 4 tu yãy yõg mõꞌpok xop mũtik tihiꞌ, tu:
\p —‍Nãy, Yenoyanẽn kopa nox piꞌ. Hõmã ꞌÃtak Topa te hãmꞌãktux xex, hu: “ꞌÃte yãy Koxuk Xeꞌẽgnãg nũꞌkutnãp-tup tikmũꞌũn xohix hah,” kaxĩy. ꞌÃte xa hãmꞌãktux, haꞌ xupak, huꞌ hip kõmẽn Yenoyanẽn kopah.
\v 5 Yoãm te kõnãg hãp-tox pix, pa hãpxip kutõgnãg ꞌĩhã ꞌãte Topa Koxuk xa nũꞌkutnãp-tup, ꞌãp-tox pixꞌax putuk nũꞌkutnãp-tup, puyĩy ꞌãkaꞌogãꞌ. Kaxĩy.
\s Yeyox te pexkox haꞌ mõg
\p
\v 6 Ha mõꞌpok xop te nũ mũtik pip, tu:
\p —‍Hãm ꞌũm hã xateꞌ puknõg xop mõy putup, nõm puknõg xop te yũmũ yõg hãm tuꞌ pip? ꞌOk hõnhã nõꞌ nõy yãnãn putup, nũy yũmũ yõg tikmũꞌũn ꞌIyaet xexkãnãꞌ? Kaxĩy.
\p
\v 7 Ha Yeyox te:
\p —‍ꞌÃmnĩy ꞌũm hãꞌ xexkãnãp-tup, ꞌÃtak puxet teꞌ yũmmũg. ꞌAp nõy ꞌũm teꞌ yũmmũgꞌah. ꞌA ꞌÃtak Topa te ꞌãyũmmũgãp-tupꞌah.
\v 8 Pa Topa Koxuk yĩxop-tup, yã kaxĩy Topa te ꞌãkaꞌogãp-tup, xak mũn ꞌãktux tikmũꞌũn puꞌ, kõmẽn Yenoyanẽn kopah hãmꞌãktux putup, xix hãpxexka Yonex tuꞌ, xix hãpxexka Xãmãnit tuꞌ, xix hãpxexka xohix tu hãmꞌãktux putup. Kaxĩy.
\p
\v 9 Tu hãmꞌãktux kux, ha Topa teꞌ mõgãhã pepiꞌ, pexkox haꞌ mõg, ha yãy yõg mõꞌpok xop teꞌ pẽnãhãꞌ, ha hãmgõy xexka teꞌ xaxogãhãꞌ, pãyãꞌ kopaꞌ mõg, tu mõktuꞌ xupep.
\v 10 Ha Yeyox yõg mõꞌpok xop teꞌ pẽnã kaꞌok, Yeyox pẽnãp-tup tuꞌ, tu pepi pẽnãꞌ, ꞌĩhã pexkox yõg mõꞌpok xop 2 mõxa mõꞌkaꞌok, tu topixxax ponnohnãg mõꞌtat,
\v 11 tu:
\p —‍Ganinet yõg tihik, tep mũn xak xate pexkox kopah? Topa te Yeyox mõgãhã pexkox hah, ha xateꞌ pẽnãhãꞌ, ha hãmgõy xexka kopaꞌ putpuꞌ nũn putup. Kaxĩy.
\s Tik xop te Mãtit yãykutnãhãꞌ
\p
\v 12 Ha yĩktix ꞌOnimet tuꞌ pip tik xop, tu taꞌ mõg, tu mõktu Yenoyanẽn tuꞌ mõxahaꞌ. Putahat ꞌap toxꞌah, yãꞌ hũmnãg, kinõm puxet.
\v 13 Tu mõktuꞌ mõxaha mĩptut tox tuꞌ, tu mĩpkuꞌĩn tu mõꞌkãnĩn, tu mĩptut kox tuꞌ mõgãhãꞌ, tuꞌ mõxakux. Tik xohix te: Pet, xix Yoãm, xix Tiak, xix ꞌAneneꞌ, xix Pinip, xix Tõmẽꞌ, xix Matẽmẽo, xix Mãteo, xix ꞌAppeo kutok Tiak, xix Xĩmãm, nõm te Yoneo xop xexkanãp-tup, xix Tiak nõy kutok Yot.
\v 14 Tuꞌ kuxap-xet, xip-tox puxet, ha ꞌũn xop nũ mũtik yãy tu nũꞌnãhãꞌ, xix Mãnix, Yeyox mũg tut, xix Yeyox taknõy xop. ꞌŨxohix te Topa xak, tu nõm pu hãmꞌãktux pax.
\p
\v 15 Hãpxip ꞌĩhã yãy tu nũꞌnãhãꞌ, ꞌũkuxa mãm kaꞌok xop xohix te 120, ha Pet tek-nĩhãꞌ xip, tu hãmꞌãktux, hu:
\p
\v 16-20 —‍ꞌŨnõy mũnõp xop, hõmã, hãmyãxatamuk xohix punethok ꞌĩhã, Topa Koxuk te hãmꞌãktux, tu mõnãyxop Namix hã hãmꞌãktux, ha kaxꞌãmiꞌ ꞌũkteꞌex yõg tappet tuꞌ, hu:
\p “Pũyã yãy hãmꞌax tuꞌ xut, puyĩy kãmãnat nõy hãm,” kaxĩy. Tu kaxꞌãmiꞌ, ha hãmyãxatamuk xohix nõg, ha Topa yõg hãmꞌãktux hittap hãꞌ mĩy nõmhã. Yeyox te Yot xãnãhãꞌ, pu yũmũg mũtik ꞌãtiꞌ, tu hãpxopmãhãꞌ, yã yũmũg hãꞌ xapeꞌ.
\p —‍Pãyã Yot teꞌ gãyxop mõgãhã Yeyox hah, nũy tayũmak pop, tu hãm hãꞌ nõy yãnãn, tu yõkãnãm tuꞌ nãhãꞌ, haꞌ yõn yãy koxyõy. Ha Yenoyanẽn yõg tikmũꞌũn xohix teꞌ xupak, tu nõm hãm ꞌãxetꞌax mĩy ꞌAxenãm, yãy yĩyꞌax hã: “ꞌŨhep ꞌãtaꞌax tu hahãm,” kaxĩy.
\p
\v 21 —‍ꞌÃpu, tik nõy yãykutnãꞌ, pu Yot pupi hãpxopmãꞌ, tik te yũmũg mũtik hãpkumep hãmyãxatamuk 3 hã, ꞌĩhã Yeyox te yũmũg mũtik hãpkumep.
\v 22 Tik te Yoãm putox pixꞌax pẽnãhãꞌ, tu Yeyox te pexkox tuꞌ mõg pepiꞌ pẽnãhãꞌ, yãꞌ xohix pẽnãhãꞌ, pu Yeyox yã putpuꞌ hi ꞌãktux, yũmũg mũtik tu hãmꞌãktux. Tu ta tuꞌ kux. Kaxĩy.
\p
\v 23 Ha tik xop te tik 2 yĩmõgatux, ꞌũxuxetꞌax Yoye Maxamax, yã ꞌãxetꞌax nõy Hãmyok, xix Mãtit,
\v 24 tu Topa pu hãmꞌãktux, hu:
\p —‍Topa ꞌãxexkah, yũmũꞌãte xa tuꞌ xak, xate tikmũꞌũn kuxa xohix yũmmũg hah, hukmũꞌã yũmmũgãꞌ: Piꞌãꞌ mũn putup xateꞌ? ꞌOk pe Maxamax, ꞌok pe Mãtit?
\v 25 Yot te Hãmgãyãgnãg pet haꞌ mõg, ꞌãpu yũmũꞌãꞌ nõy yãykutnãꞌ, pu Yot pupi hãpxopmãꞌ, nũy Yeyox yõg mõꞌpok xop kopaꞌ xihip, nũy Yot hãꞌ yãnãn hãpxopmãꞌ, Kaxĩy.
\p
\v 26 Tu mõꞌxap yõn, puyĩꞌ xap hãmyũmmũgãꞌ, haꞌ xut Mãtit, ha Mãtit te nõm tik te 11 mũtik hãpxopmãhãꞌ.
\c 2
\s Topa Koxuk te tikmũꞌũn ha yĩxohoh
\p
\v 1 Hãpxip ꞌĩhã Yoneo xop te ꞌãmuk xexka mĩy, ꞌũxuxetꞌax Pẽtekot, haꞌ kuxa mãm kaꞌok xop xohix te yãy kotĩnnãhã mĩptut puxet kopah,
\v 2 tuꞌ mãm, tu mõꞌkaꞌok tĩnnã kaꞌok ꞌãpak, yã ꞌãmuuh gãy putuk, tuꞌ xupep mĩptut kopah, tu mĩptut kopa nũꞌxip,
\v 3 haꞌ yõyxõg punethok pẽnãhãꞌ, yã kuxap putuk, tu hãpxummãhãꞌ, tu mõktu ꞌũp-tox xohix xukaꞌ mãm,
\v 4 ha Topa Koxuk te pexkox tuꞌ yĩxohoh, tuꞌ xohix kaꞌogãhãꞌ, pu tu hãmꞌãktux. Yã Topa Koxuk teꞌ yĩgãhãꞌ.
\p
\v 5 Ha hãpxexka xohix yõg Yoneo xop te Yenoyanẽn kopaꞌ tihiꞌ, nõm te Topa xak,
\v 6 tuꞌ xupak, tu yãy tu nũꞌnãhãꞌ, tuꞌ nũn, tu nũktu mõxahaꞌ, tu yãy yĩyꞌax xohix ꞌãpak, tuꞌ yẽy,
\v 7 tu kuxãnõg, tu:
\p —‍Pẽnãꞌ, ꞌõhõm Ganinet yõg tihik, tuꞌ yĩy, pãyãꞌ yĩyꞌax puknõg xohix hã hãmꞌãktux.
\v 8 Pute ꞌũm? Yũmũg nũn, tu hãmꞌãpak, tu yãy yĩyꞌax hã hãmꞌãpak.
\v 9 Yãꞌ yĩyꞌax xohix te: Pat yõg, xix Met yõg, xix ꞌEnamĩt yõg, xix Mẽyopatãm yõg, xix Yonex yõg, xix Kapanox yõg, xix Poꞌõn yõg, xix ꞌAx yõg yĩyꞌax,
\v 10 xix Pinik yõg, xix Pãnpit yõg, xix ꞌEyit yõg, xix Nip yõg, xix Xinẽn yõg, xix nõm te Hõm tuꞌ pip xop yãy yĩyꞌax nõm xop nũn, tu nũktu Yenoyanẽn tuꞌ mõxahaꞌ, tuꞌ pip.
\v 11 Yãꞌ yãg Yoneo, xiꞌ yãg yãꞌ puknõg xop, nõm te Topa xak, xix Yoneo mõnãyxop yõg hãpxopmãꞌax tat. Yã Kenet yõg, xix ꞌAnap yõg, yũmũꞌãte Topa yõg hãpxopmã max xeꞌẽgnãg ꞌãpak, tu yãy yĩyꞌax hãꞌ xupak. Kaxĩy.
\p
\v 12 Hu kuxãnõg, tu yãy pu yĩkopit, hu:
\p —‍ꞌĨntuꞌ, pute ꞌũm nũhũꞌ? Kaxĩy.
\p
\v 13 Ha tik yãg kuteꞌex kummuk, tu:
\p —‍Yã mĩnta hep xupyãg xoꞌop, hu nõ paptux! Kaxĩy.
\p Pãyã ꞌap paptuxꞌah.
\s Pet te hãmꞌãktux
\p
\v 14 Ha Pet yok, tuk-nĩhãꞌ xip tik te 11 kopah, tuꞌ yĩy kaꞌok tu:
\p —‍Yonex yõg tihik, xix kõmẽn Yenoyanẽn kopa ti xop kamah: ꞌŨgꞌãpax, ꞌãte ꞌũm mũgã ꞌãpax.
\v 15 ꞌA tik xop paptuxꞌah. ꞌÃmhok. Yã hõnhã mãyõn te pexkox pukaꞌ yũm.
\v 16 Pa hõmã tik hittap Yoeo te Topa pupi hãmꞌãktux, hu:
\q
\v 17 “Hõmã, hãmyãxatamuk xohix nõg putup,
\q ꞌĩhã Topa te yãy Koxuk yĩxõnnãp-tup ꞌũhep xop xohix hah,
\q ha ꞌãk-tok pit xix ꞌãk-tok hex te Topa pupi hãmꞌãktux putup,
\q haꞌ xiptap xop te yãy koxuk hãꞌ pẽnãp-tup, ha kutut xop te nõ yõnkup putup.
\q
\v 18 Ha ꞌãmnĩy ꞌũm ꞌĩhã Topa te yãy Koxuk yĩxõnnãp-tup yãy yõg kãmãnat xohix hah, tik xop xix ꞌũn xop,
\q ha Topa pupi hãmꞌãktux putup.
\q
\v 19 Ha Topa te hãpxopmã xeꞌẽgnãg xaꞌ mũg putup pexkox tuꞌ xix hãm tuꞌ,
\q haꞌ hep ꞌãta pẽnãp-tup, xix kuxap, xix kugõy.
\q
\v 20 Mãyõn yãnãm xok putup hãpkoxtap hah,
\q ha mãyõn hex yãyhãꞌ hep ꞌãtap-tup,
\q ha ꞌãmnĩy ꞌũm puxet ꞌĩhã Topa nũn putup,
\q tu hãm tuꞌ nũn putup, pu hãpxopmãꞌax xohix kopit.
\q
\v 21 Tikmũꞌũn ꞌũm te Topa ꞌãxetꞌax hãꞌ xãnãꞌ, puꞌ xut, puxix Topa nõm xut putup, pe tihik, pe ꞌũhũn.” Kaxĩy.
\p
\v 22 Pet te xe:
\p —‍ꞌIyaet yõg tikmũꞌũn, ꞌãyĩpkox piꞌ, tu hãmꞌãpax. Topa mũn te Nãyane yõg Yeyox yãykutnãhãꞌ, tu ꞌãxop ha nũꞌkutnãhãꞌ, nũy xaꞌ mũg. Tu Yeyox hã hãpxopmã max xeꞌẽgnãg ꞌãxop keppah, ha hãmyũmmũg xateꞌ.
\v 23 Topa te hãmyũmmũg, tu Yeyox hõm ꞌãxop xohix puꞌ, ha ꞌãxop tep-tup nõg, tu tik kummuk xop puꞌ hõm Yeyox, pu mĩpkupnix tup-tex.
\v 24 Pa Topa te putpuꞌ hĩnnãhãꞌ. ꞌŨxok xeꞌeꞌ, pãyã Topa mũn kaꞌok, tu putpuꞌ hĩnnãhãꞌ. Yã Yeyox te Topa hãk-tok xeꞌeꞌ.
\v 25 Hõmã mõnãyxop Namix te Topa pupi hãmꞌãktux, tu Yeyox ꞌãktux kamah, ꞌa yãy ꞌãktuxꞌah, hu:
\q “ꞌÃmnĩy xohix hã ꞌãtek xuxyã pẽnãhãꞌ,
\q ꞌũgyĩp xeꞌe hãꞌ xip, nũy mõknĩynãm, huk kuxãnõg ꞌohnãg.
\q
\v 26 Huk kuxa hittup, xik yĩyꞌax hittup.
\q Hõmãk xok putup, pãyãk kuxa yũm kaꞌok, tu hãmmax hip, tuk hittup.
\q
\v 27 Xatek koxuk nĩm putupꞌah. ꞌAp xukpot tuk nĩm putupꞌah.
\q Xatek hep kutox ꞌãta tux hok, puk-tox ꞌohnãg,
\q yãk mũn tik max xeꞌẽgnãg.
\q
\v 28 ꞌÕgnũ putat xeꞌẽgnãg hãk mõg. Xate ꞌaꞌ mũg putahat. ꞌŨgyĩkãgnãg hã ꞌãxip, yĩk kuxa hittup,” kaxĩy.
\p
\v 29 Tu xe:
\p —‍ꞌŨnõy mũnõm xop, ꞌãte xa hãpxeꞌe ꞌãktux: Mõnãyxop hittap Namix xok, ha nõ hãpkot, haꞌ yõg hãpkox xip ꞌũxukpot tuꞌ, tu yãꞌ xip hõnhã.
\v 30 Namix te Topa pupi hãmꞌãktux, tu Topa te hãmꞌãktux xex yũmmũg, tu Topa yãꞌ koit ꞌohnãg yũmmũg, yã yãy ꞌãxet hã Topa te hãmꞌãktux xex, hu: “ꞌÃte ꞌãmõkputox xekanãp-tup, pu tikmũꞌũn xohix tu xat,” kaxĩy.
\v 31 Hõmã kumak Namix te hõnhã yõg hãpxopmãꞌax pẽnãhãꞌ, tuꞌ koxuk hãꞌ pẽnãhãꞌ, tu Topa yõg hãmyãykutnãꞌax pẽnãhãꞌ, tuꞌ yõg putpu hiꞌax pẽnãhãꞌ, ha Topa te Yeyox nĩm ꞌohnãg xukpot kopah, ha Namix teꞌ pẽnãhãꞌ, tu Yeyox yãy hep ꞌãta kutox ꞌohnãg pẽnãhãꞌ.
\v 32 Hamũn, Topa te Yeyox hĩnnhã putpuꞌ, hak mũg xohix teꞌ pẽnãhãꞌ.
\v 33 Yĩy Topa teꞌ xexkãnãhã ꞌũyĩpxeꞌe hah, tu hãmꞌãktux xex, tu hãmꞌãktux, hu: “ꞌÃte Topa Koxuk yĩxõnnãp-tup tikmũꞌũn hah,” kaxĩy. Ha hõnhã ꞌãxohix teꞌ pẽnãhãꞌ, tuꞌ xupak.
\v 34 Namix mũn te pexkox ha ꞌaꞌ mõgꞌah. ꞌAp pepiꞌ mõgꞌah, pãyã hãmꞌãktux, hu: “Topa te hãmꞌãktux ꞌũkxuxyã puꞌ, hu: —‍‘ꞌŨgyĩpxeꞌe hã yũhũm.
\v 35 ꞌÃte xa tuꞌ gãy xop hupmãp-tup, xayĩꞌ xat, ha ꞌãmũn puꞌ yĩpkox piꞌ,’ ” kaxĩy.
\v 36 ꞌIyaet yõg tikmũꞌũn, ꞌãxop te Yeyox putex mĩpkupnix tuꞌ. ꞌÃte xa hãmꞌãktux xeꞌeꞌ, ꞌap koitꞌah: Topa te Yeyox yãykutnãhãꞌ, puyĩy ꞌãxop hã ꞌãxuxyã xeꞌẽgnãg. Tu yã Topa yõg hãmyãykutnãꞌax xeꞌeꞌ. Tu ta tuꞌ kux. Kaxĩy.
\p
\v 37 Haꞌ xohix teꞌ xupak, tu yãyhãhup, tuꞌ kuxa teꞌ xak, tu hãmꞌãktux Pet puꞌ, xix mõꞌpok xop xohix puꞌ, hu:
\p —‍ꞌŨnõy mõnõm xop, putep mũn mĩyꞌax? Kaxĩy.
\p
\v 38 Ha Pet te:
\p —‍ꞌÃpu yãyhãhup, nũy hãpkummuk mĩy kux, hap-tox pix, xa Yeyox yã ꞌãxuxyã ꞌãktux, ha Topa te ꞌãxop yõg hãpkummuk mĩyꞌax xaxogãp-tup, pu tuꞌ kux, ha xa nũꞌkutnãp-tup yãy Koxuk Xeꞌẽgnãg.
\v 39 Topa te xa hãmꞌãktux xex, hu: “ꞌÃte yãy Koxuk mõꞌkutnãp-tup xaꞌ, xix ꞌãk-tok hah, yãꞌ xohix hah, nõm te hãptox tuꞌ pip, Topa te nõm xop xãnãhãꞌ.” Kaxĩy.
\p
\v 40 Ha Pet te hãmꞌãktux punethok, nũy tu kaꞌõgãꞌ, tuꞌ xãnãhãꞌ, hu:
\p —‍ꞌÃnũn, tu tikmũꞌũn kummuk nĩm, Topa te tikmũꞌũn kummuk xũygãp-tup hah. Kaxĩy.
\p
\v 41 Ha tikmũꞌũn xohix xexkah te hãmꞌãpak, tuꞌ yĩpkox pip, hap-tox pix, yã yãy koxuk xop xohix te 3.000.
\v 42 Ha Yeyox yõg mõꞌpok xop te hãmyũmmũgãhã mõkumaꞌ mõg. Tu ꞌãmnĩy xohix hã Topa pu hãmꞌãktux, tu nũ mũtik hãmꞌãktux xiꞌ xit, nũy Yeyox nõm teꞌ pupiꞌ xok peꞌpaxeh.
\s Tikmũꞌũn kuxa mãm kaꞌok Yeyox Kunnix kopah
\p
\v 43 Ha tikmũꞌũn kuxãnõg, ꞌĩhã Yeyox yõg mõꞌpok xop te hãpxopmã kaꞌok xeꞌẽgnãg punethok,
\v 44 haꞌ kuxa mãm kaꞌok Yeyox kopaꞌ, tu yãy mũtik pip, tu hãpxop xohix koxip yãy puꞌ,
\v 45 ha tik xop te yãy yõg hãpxop xohix hãmenex, nũy ꞌũhok xop xohix puꞌ nĩm, tuꞌ xupkumĩy ꞌohnãg.
\v 46 ꞌÃmnĩy xohix hã yãy tu nũꞌnãhãꞌ Topa pet xexka kopaꞌ, tu yãy mũtik xit yãy pet kopaꞌ, nũy Yeyox xokꞌax peꞌpaxeh, tuꞌ kuxa hittup, yã kuxap-xet,
\v 47 tu Topa ꞌãktux max, ha tikmũꞌũn xohix tep-tup, ha ꞌãmnĩy xohix hã Topa te tikmũꞌũn kuxa kummuk xit, nũy yãnãn tuꞌ kuxa max tat, tuꞌ xohix nãg nõy nãꞌ mõgãhãꞌ, tu mõktu xohix.
\c 3
\s Topa te tik te hãpkumep hok hittupmãhãꞌ
\p
\v 1 Mãyõn he ꞌĩhã Pet mõg xix Yoãm, tu Topa pet xexka haꞌ mõg, nũy Topa pu hãmꞌãktux Yoneo xop mũtik.
\v 2 Tik ꞌũm te hãpkumep hok, tuꞌ xip. ꞌŨtut teꞌ put tu hãpkumep hok, yãy hiꞌax tox hã. ꞌÃmnĩy xohix hã tikmũꞌũn te Topa pet xexka mõꞌyĩnnĩnꞌax tuꞌ tat, nõꞌõm mõꞌyĩnnĩnꞌax ꞌãxetꞌax “ꞌŨmax”, ha tikmũꞌũn nũn, ha tik te tuꞌ kax, pu tu hãpxop ꞌũm hok popmãꞌ,
\v 3 ha Pet mõg nõmhã, xix Yoãm, tu Topa pet xexka hãꞌ mõxahaꞌ, ha tik te hãpkumep hok teꞌ pẽnãhãꞌ, tu:
\p —‍ꞌÃm hok hõm hãpxop ꞌũm! Kaxĩy.
\p
\v 4 Ha tik 2 teꞌ pẽnãhãꞌ, tuꞌ pẽnã kaꞌok, tu:
\p —‍Hẽnãꞌ! Kaxĩy.
\p
\v 5 Ha tik te hãpkumep hok teꞌ pẽnã kaꞌok, nũy hãpxop ꞌũm paꞌ.
\v 6 Ha Pet te hãmꞌãktux, hu:
\p —‍ꞌAp pipꞌah tayũmak, ꞌũyã xa hãpxop ꞌũm nõy hõm. Yã Nãyane yõg Yeyox Kunnix tekmũꞌã yãy ꞌãxetꞌax hõm, ꞌũ ꞌãxat, hu: ꞌÃpu, ꞌãk-nĩhã xihip, nũy hãpkumep! Kaxĩy.
\p Tuꞌ yĩyꞌax hãꞌ hittupmãhãꞌ.
\p
\v 7 Tuꞌ yĩpxeꞌe mũg, tuk-nĩhãꞌ xip, haꞌ nõy yok mõꞌkaꞌok, tuꞌ kup kaꞌok xiꞌ pata kaꞌok,
\v 8 tuꞌ hittup xexkaꞌ, hu: Pũn, pũn, pũn, kaxĩy, tu Topa ꞌãktux max.
\v 9 Ha tikmũꞌũn teꞌ pẽnãhãꞌ, tu hãpkumep pẽnãhãꞌ, tu Topa ꞌãktux max ꞌãpak,
\v 10 tu tik tupmãhã yũmmũg, hu hãmꞌãktux, hu:
\p —‍ꞌÃmnĩy xohix hãꞌ yũm, tu ta tuꞌ xak Topa pet xexka mõꞌyĩnnĩnꞌax ꞌŨmax tuꞌ! Kaxĩy.
\p Tuꞌ yẽy.
\s Pet te hãmꞌãktux Topa pet xexka kopaꞌ
\p
\v 11 Ha tik te Pet yãy kep hãꞌ mũg, xix Yoãm, ha tikmũꞌũn kuxãnõg, tuꞌ nũn, tu yãy tu nũꞌnãhãꞌ, Xanomãm yõg hãptopa hãmyĩkox tu yãy tu nũꞌnãhãꞌ,
\v 12 ha Pet te tikmũꞌũn pẽnãhãꞌ, tu hãmꞌãktux, hu:
\p —‍ꞌIyaet yõg tihik: Teptu ꞌãkuxãnõg, tuk pẽnã kaꞌok? Putep peꞌãpaxex? ꞌAk mũg kaꞌokꞌah, ꞌak mũg max xeꞌeꞌah, nũy tik hittupmãꞌ.
\v 13 Mõnãyxop hittap ꞌAmanãm yõg Topah, xix Mõnãyxop ꞌIyak yõg, xix Mõnãyxop Yako yõg Topah, xix mõnãyxop xohix yõg Topah, yã Topa teꞌ yõg Kãmãnat Xeꞌẽgnãg Yeyox xexkanã xeꞌẽgnãg, pa ꞌãxop tep-tup nõg, tuꞌ puknõg xop haꞌ mõgãhãꞌ. Pinat pa te hãmyũmmũg, tuꞌ xut putup, pu mõg, pãyã xatep-tupꞌah.
\v 14 ꞌŨmax xeꞌẽgnãg Yeyox, pãyã xatep-tup nõg, hu Pinat tuꞌ xak, pu tik kummuk xut ꞌũyãnãn tuꞌ, pu mõg, nõm teꞌ nõy putex.
\v 15 Yeyox teꞌ xohix hĩnnãhãꞌ, ha xatep-tex Yeyox, pa Topa teꞌ putpuꞌ hĩnnãhãꞌ, hak mũꞌãteꞌ pẽnãhãꞌ.
\v 16 Yã Yeyox mũn kaꞌok, tu tik hittupmãhãꞌ. Tik kuxa yũm kaꞌok Yeyox kopaꞌ, ha tik pata kup kaꞌogã xeꞌeꞌ. ꞌÃxop teꞌ pẽnãhãꞌ, tuꞌ yũmmũg.
\p
\v 17 —‍ꞌŨnõy mũnõm xop, hõmã ꞌãxop te hãmyũmmũg ꞌohnãg, xix ꞌãxexka xop te hãmyũmmũg ꞌohnãg.
\v 18 Hõmã tik xop hittap te Topa pupi hãmꞌãktux, tu tikmũꞌũn hittap pu hãmꞌãktux, hu: “Topa te Kunnix yãykutnãhãꞌ, pu nũꞌkutnã ꞌãxop hah,” kaxĩy. Yã Topa yõg hãmꞌãktux hittap hã Yeyox xok mĩpkupnix tuꞌ nõmhã.
\v 19 ꞌÃpu yãyhãhup, nũy ꞌõg hãpkummuk mĩy kux, tu Topa ha mõg, puyĩy Topa ꞌõg mĩyꞌax kummuk xaxogãꞌ, pu tuꞌ kux,
\v 20 puyĩy Topa ꞌãkuxa kaꞌogãꞌ, tu Yeyox yãykutnã tap, nũy xa nũꞌkutnãꞌ, tu nũꞌkutnãp-tup putpuꞌ,
\v 21 pa hõnhã pexkox tuꞌ xip, tu Topa yõg hãptup xeꞌe hip. Yã Topa pupi hãmꞌãktux xop teꞌ xuktux tap.
\v 22 Mõnãyxop hittap Mõyyex te Yeyox ꞌãktux kamah, tu: “Hõmã Topa te tik te yãy pupi hãmꞌãktux yãykutnãp-tup, ꞌãxop kopaꞌ yãykutnãp-tup, tu tik puxet xãnãp-tup, puyĩꞌ pupi hãmꞌãktux, ꞌũkputuk. ꞌŨxupax, nũy xatꞌax xohix mĩy.
\v 23 Tikmũꞌũn te Topa pupi hãmꞌãktux ꞌax ꞌãpax, tu ꞌãyĩpkox hok, puxix nõm xop yĩpkox pip hok xop kix putup,” kaxĩy.
\v 24 Ha tik xop xohix te hãmꞌãktux, yãꞌ xohix teꞌ xuktux, yãꞌ Xãmõꞌeo, yãꞌ xohix teꞌ xuktux.
\v 25 ꞌÃxop xik mũꞌũg yã nõm tik xop hãk mõkputox, ha hõmã Topa te paꞌax mĩy yũmũg mõnãyxop mũtik, tu mõnãyxop ꞌAmanãm pu hãmꞌãktux, hu: “ꞌÃmõkputox teꞌ hep xop xohix hã hãmmaxnãp-tup,” kaxĩy.
\p
\v 26 —‍Tu nũ Kãmãnat Xeꞌẽgnãg Yeyox kutnãhã ꞌãxop ha hãmãxap, pũyĩy ꞌãhittupmãꞌ xa hãpxopmã kummuk kux. Kaxĩy.
\c 4
\s Pet xix Yoãm te Yoneo xexka xop keppaꞌ tihiꞌ
\p
\v 1 Hãpxip ꞌohnãg ꞌĩhã Yoneo yõg ꞌãmãnex xop nũn, xix Topa pet xexka yõg xonat xop kapitãm, xix Xanoxeo xop nũn,
\v 2 ha Pet xix Yoãm te hãmꞌãktux tikmũꞌũn puꞌ, tu hãmyũmmũgãhã, tu Yeyox yõg putpuꞌ hiꞌax ꞌãktux, haꞌ xexka xop gãy,
\v 3 tu Pet mũg xix Yoãm, tu ꞌãmnĩy hã kanet haꞌ mõꞌtat, haꞌ tihiꞌ, ha ꞌãmnĩy, yã hãptup hip.
\v 4 Pa nõm te hãmꞌãpak kuxa mãm kaꞌok Pet yõg hãmꞌãktux kopaꞌ, haꞌ kuxa mãm tik xop xohix nõy nãꞌ mõg, tu mõktu 5.000, yãꞌ xohix xexka punethok.
\p
\v 5 Hãptup ꞌĩhã Yoneo xexka xop xix tik xop te hãmyũmmũg xop te yãy tu nũꞌnãhã Yenoyanẽn kopaꞌ,
\v 6 tu Yoneo ꞌãmãnex xexka xop mũtik pip, ꞌũxohix te: ꞌAnãn, yã ꞌãmãnex xop xohix xatꞌax, xix Kaxpax mũtik pip, xix Yoãm, xix ꞌAnexãn, xiꞌ xape xop,
\v 7 tu Pet xix Yoãm xãnãhãꞌ, tuꞌ yĩkopit, hu:
\p —‍Putep te ꞌãxop xat, xa tik pakut hittupmãꞌ? Putep hã ꞌãxop te nõm tik hittupmãhãꞌ? Kaxĩy.
\p
\v 8 Ha Topa Koxuk te Pet kaꞌogãhãꞌ, ha hãmꞌãktux kaꞌok, hu:
\p —‍Tikmũꞌũn xexka xop, xix tik xop te hãmyũmmũg xop: ꞌŨgꞌãpax!
\v 9 ꞌÃxop tek mũn yĩkopit, hu: “Putep te ꞌãxop xat, xa nõm tik hittupmãhãꞌ? Putep hã ꞌãxop teꞌ hittupmãhãꞌ?” Kaxĩy.
\v 10 ꞌŨgꞌãpax, ꞌãte xa hãmyũmmũgãꞌax, xa hãmyũmmũg, puyĩy ꞌIyaet yõg tikmũꞌũn hãmyũmmũg. ꞌÃxop te Nãyane yõg Yeyox Kunnix putex mĩpkupnix tuꞌ, ha Topa teꞌ hĩnnãhã putpuꞌ, hamũn te nõm tik hittupmãhãꞌ, Yeyox ꞌãxetꞌax ꞌãktux hãꞌ hittupmãhãꞌ. Pẽnãꞌ. Nõmhãꞌ xip, tu hãpkumep.
\v 11 Yeyox yã mĩptut hãꞌ mãykup putuk, xix koxuk. ꞌA ꞌãxop te Yeyox putup nõg, pa Topa teꞌ xexkanãhã xeꞌẽgnãg.
\v 12 ꞌOk xip tik nõy te tikmũꞌũn kuxa kummuk xit, nũy yãnãn tuꞌ kuxa max tat? ꞌOk xip hãpxexka xohix tuꞌ? ꞌAp xipꞌah. Yeyox yãp-xet xip. Topa te Yeyox ꞌãxetꞌax hõm tikmũꞌũn puꞌ, pu Yeyox yũmũg kuxa kummuk tu xit, nũy nõ max tat ꞌũyãnãn tuꞌ. Kaxĩy.
\p
\v 13 Haꞌ xexka xop te Pet pẽnãhã xix Yoãm, haꞌ yĩpkutuk ꞌohnãg, yĩy hãmpeꞌpaxex, hu:
\p —‍Tappet xax yũmmũg kutõgnãg, pãyã tute Yeyox mũtik hãpkumep, yãꞌ yõg tik xop, kaxĩy.
\p
\v 14 Ha tik tupmãhãꞌ xip, haꞌ xexka xop teꞌ pẽnãhãꞌ, hu yãyhãhup, tuꞌ yĩy ꞌohnãg,
\v 15 tu:
\p —‍ꞌÃpep, nũy hãptopa mõg. Kaxĩy.
\p Haꞌ mõg, haꞌ xexka xop te yãy mũtik hãmꞌãktux hãꞌ nõy yãnãn,
\v 16 hu:
\p —‍Putep mũn mĩyꞌax? Pet xix Yoãm te hãpxopmã kaꞌok xeꞌẽgnãg. Tep tu yãꞌ koit? Yã Yenoyanẽn yõg tikmũꞌũn xohix teꞌ pẽnãhãꞌ, tuꞌ yũmmũg.
\v 17 ꞌÃpu, nõm tik 2 xat hok, pu Yeyox ꞌãxetꞌax ꞌãktux hok tikmũꞌũn puꞌ, pu tikmũꞌũn Yeyox xaxok. Kaxĩy.
\p
\v 18 Tu Pet xãnãhã xix Yoãm, tuꞌ xat hok, hu:
\p —‍Yeyox ꞌãxetꞌax ꞌãktux hok, xix tikmũꞌũn pu Yeyox yũmmũgã hok. Kaxĩy.
\p
\v 19 Pa Pet xix Yoãm te:
\p —‍ꞌÃxop pa te hãmyũmmũg: Piꞌyãꞌ max, ꞌok pe ꞌãxop puk yĩpkox pip, ꞌok pe Topa puk yĩpkox pip? ꞌÃxop te hãmyũmmũg.
\v 20 ꞌŨgmũꞌãte Yeyox ꞌãxetꞌax ꞌãktux putup mõꞌkumaꞌ mõg, Topa teꞌ xat, hak mũg yĩpkox pip Topa pu hãmãxap, hu hãpxopmãꞌax pẽnãhã ꞌãktux putup, xix hãpxopmãꞌax ꞌãpak ꞌãktux putup kamah. Kaxĩy.
\p
\v 21-22 Ha tik hittup yõg hãmyãxatamuk te 40, yĩy tikmũꞌũn xohix te Topa ꞌãktux max, hãpxopmã kaꞌok xeꞌẽgnãg hah, haꞌ xexka xop te Pet xũygãp-tup, xix Yoãm, pãyã tikmũꞌũn yĩpkutuk, huꞌ mĩy ꞌok paꞌ gãy, tu Pet xupepmãhã xix Yoãm.
\s Yeyox yõg tik xop te Topa pu hãmꞌãktux
\p
\v 23 Haꞌ mõg, tu mõktu mõxahaꞌ xape pet tuꞌ, tuꞌ xexka xop yõg hãmꞌãktuxꞌax ꞌãktux ꞌũxape xop puꞌ, tu ꞌãmãnex xexka xop yõg hãmꞌãktuxꞌax ꞌãktux, xix tik xop te hãmyũmmũg yõg hãmꞌãktuxꞌax ꞌãktux.
\v 24 Haꞌ xupak, tu Topa pu hãmꞌãktux, tu yãy yĩy puxet hã hãmꞌãktux, hu:
\p —‍Topah, ꞌãxexka xeꞌẽgnãg, xate pexkox mĩy, xix hahãm, xix kõnãg xexkaꞌ, xix hãpxop xohix te kopaꞌ pip mĩy.
\v 25 Hõmã ꞌÃkoxuk Xeꞌẽgnãg te hãmꞌãktux, tuꞌ xat, pu ꞌõg kãmãnat Namix hãmꞌãktux, hu: “Tep tuꞌ puknõg xop gãy? Haꞌ hep xop xohix te hãmpeꞌpanõm, hu: ‘ꞌŨkxexkaꞌ’, kaxĩy, pak-tõgnãg, tu xe: ‘ꞌŨgkaꞌok’, kaxĩy, pãyãꞌ puꞌũgnãg.
\v 26 Hãpxexka xohix yõg xexka xop te yãy tu nũꞌnãhãꞌ, nũy Topa hã kumĩy, nũy Topa yõg hãmyãykutnãꞌax mũtik yãy tuk-mĩy,” kaxĩy.
\p
\v 27 —‍ꞌAp koitꞌah. Yã Yenoyanẽn yõg xexka xop, yã Yoneo yõg tikmũꞌũn xiꞌ puknõg xop, xix Pinat, xix ꞌEnot, tu yãy tu nũꞌnãhãꞌ, nũy ꞌõg Kãmãnat Xeꞌẽgnãg hã kumĩy, pãyã xate Yeyox yãykutnãhãꞌ, tu nõm xexkanã xeꞌẽgnãg.
\v 28 Hõmã xate hãmpeꞌãpaxex, tu hãmꞌãktux tap, yĩy ꞌõgnũ hãmꞌãktux hittap hã Yoneo yõg tikmũꞌũn kummuk te Yeyox kummugãhã nõmhã, xiꞌ puknõg kummuk xop teꞌ kummugãhã nõmhã.
\v 29 Tuꞌ gãy, tuꞌ yĩy gãynãm, yĩg mũꞌãte xa tuꞌ xak, xak mũg kaꞌogãꞌ, ꞌũyĩy hãpxopmã max, nũy nõm xexka xop yĩpkutuk hok, nũy ꞌõgnũ hãmꞌãktux ꞌãktux pax.
\v 30 Yã ꞌãkaꞌok, hu tikmũꞌũn hittupmãhãꞌ, tu hãpxopmãhãꞌ, xix hãpxopmã kaꞌok xeꞌẽgnãg, pu tikmũꞌũn pẽnãꞌ, tu ꞌõg Kãmãnat Xeꞌẽgnãg Yeyox hã hãpxopmãhãꞌ. Kaxĩy.
\p
\v 31 Tu Topa pu hãmꞌãktux kux, ha mĩptut yãy nuhuk, ha Topa Koxuk teꞌ xohix kaꞌogãhãꞌ, hu Topa yõg hãmꞌãktux ꞌãktux, tuꞌ yĩpkutuk ꞌohnãg.
\s ꞌŨkuxa mãm kaꞌok xop te hãpxop xohix koxip
\p
\v 32 Yãꞌ kuxa mãm kaꞌok, tuꞌ kuxap-xet, xip-tox puxet. ꞌAp hãmꞌãktuxꞌah, hu: “Yõgnũꞌ”, kaxĩy. ꞌÃmhok. Pãyã hãpxop xohix yã yãy yõg, tuꞌ xupkumĩy ꞌohnãg.
\v 33 Ha Yeyox yõg mõꞌpok xop te hãmꞌãktux kaꞌok, tu yũmũg xuxyã Yeyox putpu hiꞌax ꞌãktux, ha Topa teꞌ kuxa mãm kaꞌok xop kaꞌogãhãꞌ, ha tikmũꞌũn tep-tup pax.
\v 34 ꞌAp hok xop pipꞌah, pap-te xop te mĩptut hãmenex xix hahãm, tu tayũmak pop, tuꞌ xape xop puꞌ popmãhãꞌ,
\v 35 Haꞌ mõꞌpok xop teꞌ pop, tuꞌ hok xop puꞌ popmãhãꞌ.
\p
\v 36 Ha Xip yõg tik yã Nemi hãꞌ mõkputox, tuꞌ xuxetꞌax Yoye Manameꞌ, haꞌ xuxetꞌax te tikmũꞌũn yĩyꞌax hã: “Nõm teꞌ nõy kaꞌogãhãꞌ”,
\v 37 tu yãy yõg hãm hãmenex, tu tayũmak pahaꞌ, tu mõꞌpok xop puꞌ hõm.
\c 5
\s ꞌÃnãnĩn xix Xapit
\p
\v 1 Tik ꞌãxetꞌax ꞌÃnãnĩn, xiꞌ xetut ꞌãxetꞌax Xapit, tu yãy yõg hãm hãmenex,
\v 2 haꞌ nõmenex, tu tayũmak pahaꞌ, tu mõꞌpot, tuꞌ yãg xaptop, tuꞌ yãg nõy paxnũn mõꞌpok xop hah, Yã mõꞌãmãꞌ, hu:
\p —‍Yã tayũmak xohix, yãꞌ kux, ꞌap nõy xipꞌah. Kaxĩy.
\p Haꞌ xetut te yãꞌ koit yũmmũg, tu mõꞌãmã kamah.
\v 3 Pa Pet te:
\p —‍ꞌÃnãnĩn, tep tu xate Hãmgãyãgnãg yõg hãmꞌãktux ꞌãpak, tu ꞌãyĩpkox xip nõm hãmꞌãktux kummuk puꞌ? Yã Topa Koxuk pu yãꞌ koit, tu tayũmak yãgnãg xaptop, tuꞌ yĩy ꞌohnãg!
\v 4 Hahãm ꞌõgnũ, xix tayũmak xohix ꞌõgnũꞌ. Putep mũn peꞌãpaxex ꞌãkuxa kopah? Xate tikmũꞌũn puꞌ koitꞌah, pa Topa mũn puꞌ koit. Kaxĩy.
\p
\v 5 Haꞌ xupak, tu hãm tuꞌ nãhãꞌ, tuꞌ xok xeꞌeꞌ, ha nõm teꞌ xupak kuxãnõg xexkaꞌ.
\v 6 Tik xiptap te ꞌÃnãnĩn kĩy topixxax hã, tu mõꞌtat, tu nõ hãpkot.
\p
\v 7 Ha ꞌot 3 nõg, ꞌĩhãꞌ xetut mõꞌnãhãꞌ, ꞌap te yĩpxox xokꞌax yũmmũgꞌah,
\v 8 ha Pet te:
\p —‍Pu, ꞌãyĩy. ꞌÕgnũ hahãm yõg tayũmak xohix te xĩy? Kaxĩy.
\p Ha:
\p —‍Hamũn. Yã tayũmak xohix, ꞌap nõy xipꞌah. Kaxĩy.
\p
\v 9 Pa Pet te:
\p —‍Tep tu ꞌãyĩpxox te koit, xix ꞌãmũn? ꞌOk Topa Koxuk puꞌ koit, nũy nõ gãyãꞌ? ꞌŨxupax: Tik te ꞌãyĩpxox nõ hãpkot, tu taꞌ nũn, tu nũꞌ, tu mõꞌãtat putup kama hãptopaꞌ. Kaxĩy.
\p
\v 10 Pet te hãmꞌãktux kux, ꞌĩhãꞌ xetut te hãm tuꞌ nãhãꞌ, Pet pata yĩkaꞌ nãhãꞌ, tuꞌ xok, ha tik xiptap nũn, tuꞌ pẽnãhãꞌ, tu hãptopa mõꞌtat, tuꞌ yĩpxox yõkãmãꞌ xe nõ hãpkot.
\v 11 Haꞌ kuxa mãm kaꞌok xop kuxãnõg xexkaꞌ, ha tikmũꞌũn xohix teꞌ xupak, tu kuxãnõg kamah.
\s Ha hãpxopmã kaꞌok xeꞌẽgnãg
\p
\v 12 ꞌŨkuxa mãm kaꞌok xop te yãy tu nũꞌnãhãꞌ Topa pet kux kaxax kaka hah, haꞌ kux kaxax ꞌãxetꞌax Xanomãm yõg, ha Yeyox yõg mõꞌpok xop te hãpxopmã kaꞌok xeꞌẽgnãg tikmũꞌũn kopah, puyĩꞌ pẽnãꞌ,
\v 13 yĩy tikmũꞌũn kuxa mãm ꞌohnãg xop kuxãnõg, tuꞌ kuxa mãm xop yĩpkutuk, ꞌap te yãy tu nũꞌnãꞌah nõm xop mũtik, pãyãꞌ xohix te nõm hãp-tup pax.
\v 14 Ha tikmũꞌũn punethok kuxa mãm kaꞌok yũmũg xuxyã kopah, tuꞌ nũn, tuꞌ nõy tuꞌ mõxahaꞌ, tu yãy tu nũꞌ kuxa mãm kaꞌok xop xok, tik xop xix ꞌũn xop,
\v 15 ha tikmũꞌũn teꞌ pakut xop tat putat kopah, tu mĩm xix ꞌextet tuꞌ xex, pu Pet koxuk kopa nãy, nũy hĩttupmãꞌ.
\v 16 Ha kõmẽn punethok te Yenoyanẽn yĩkaꞌ pip, ha kõmẽn nõy yõg tikmũꞌũn nũn Yenoyanẽn tuꞌ, tuꞌ pakut xop tat, xix yãmĩy kummuk kopaꞌ pip xop tat, haꞌ hittupmãhãꞌ.
\s ꞌŨxexka xop te tik xop kummugãhãꞌ
\p
\v 17 Pa tik te ꞌãmãnex xop xatꞌax teꞌ yĩpkumĩy, xix Xanoxeo xop teꞌ yĩpkumĩy,
\v 18 tuꞌ xat, pu Yeyox yõg mõꞌpok xop mũy, tu kõmẽn yõg kanet ha mõꞌtat, tuꞌ xex.
\v 19 Pa ꞌãmnĩy koxtap ꞌĩhã pexkox yõg nũꞌkutnãꞌax nũn, tu hãmyĩnnĩnꞌax xõn, tu tik xop mõy kanet kopah, tu hãptopaꞌ mõgãhãꞌ, tuꞌ xat, hu:
\p
\v 20 —‍Mõg, mõg, Topa pet xexka ha mõg, nũy Yeyox ꞌãktux, nõm te tikmũꞌũn xop xohix hĩnnãꞌax. Kaxĩy.
\p
\v 21 Ha hãmꞌãpak, tuꞌ mõg, tu mãyõn xupep ꞌĩhã tikmũꞌũn yũmmũgãhã Topa pet xexka kopah.
\p Ha ta tik te ꞌãmãnex xop xatꞌax nũn, xiꞌ yõg xop xohix, tu Yoneo xexka xop xohix xãnãhãꞌ, pu yãy tu nũnnãy, haꞌ xat, hu:
\p —‍ꞌÃpu, kanet tu nũnnãy Yeyox yõg mõꞌpok xop. Kaxĩy.
\p
\v 22 Ha xonat xop mõg kanet hah, tuꞌ xak, pãyã ꞌap tiꞌah, yĩy putpuꞌ nũn, tuꞌ xexka xop puꞌ xuktux,
\v 23 hu:
\p —‍Pipkup kaꞌok hã mõꞌyĩnnĩn, haꞌ xõn haꞌ xĩy ꞌohnãg, ha xonat xop te hãmyĩnnĩnꞌax yĩkaꞌ pip, nũy pẽnãꞌ, hak mũꞌãte kanet yõg hãmyĩnnĩnꞌax xõn, pãyã ꞌap tik ꞌũm xipꞌah kanet kopah. Kaxĩy.
\p
\v 24 Ha Topa pet xonat xop yõg kapitãm teꞌ xupak, xix ꞌãmãnex xexka xop teꞌ xupak kamah, tu:
\p —‍ꞌĨhok, pute ꞌũm? Kaxĩy.
\p
\v 25 Ha tik ꞌũm nũn, tu:
\p —‍Hõmã ꞌãxop te tik tigãhã kanet kopah, yã hõnhã Topa pet xexka tuꞌ pip, tu tikmũꞌũn yũmmũgãhãꞌ. Kaxĩy.
\p
\v 26 Ha xonat xop te tikmũꞌũn yĩpkutuk, tu hãmpeꞌpaxex, hu “Pe yã ꞌã mĩkaxxap tux!” kaxĩy. Hu mõꞌpok xop xũygã ꞌohnãg, pãyãꞌ mũg, tuꞌ nũnnãhãꞌ,
\v 27 tuꞌ xexka xop keppaꞌ xex, ha tik te ꞌãmãnex xop xatꞌax teꞌ yĩkopit, hu:
\p
\v 28 —‍ꞌOk ꞌãyĩpkox hok? Hõmãg mũꞌãte xaꞌ xat, hu: “ꞌÃyĩy hok, Yeyox ꞌãxetꞌax hã yũmmũgã hok!” kaxĩy. Pa ꞌãxop te tikmũꞌũn xohix yũmmũgãhã Yenoyanẽn kopah, nũy ꞌũgmũg kupex Yeyox xokꞌax hah, pu tikmũꞌũn ꞌũgmũg ꞌãktux kummuk. Kaxĩy.
\p
\v 29 Pa Pet xix mõꞌpok xop te hãmꞌãktux hãꞌ nõy yãnãn, tu:
\p —‍ꞌŨgmũꞌãte Topa yĩyꞌax ꞌãpak, tu Topa puk yĩpkox pip hãmãxap, tuk-nãy tu tikmũꞌũn puk mũg yĩpkox pip.
\v 30 ꞌÃxop te Yeyox putex mĩpkupnix tuꞌ, pipkup hãꞌ xup mĩpkupnix tuꞌ, nũy tup-tex, ha mõnãyxop yõg Topa teꞌ putpuꞌ hĩnnãhãꞌ,
\v 31 tuꞌ xexkanãhã yãy yĩpxeꞌe hãꞌ, nũy hãpkummuk mĩyꞌax xaxogãꞌ, pu tuꞌ kux.
\v 32 ꞌŨgmũꞌãteꞌ pẽnãhãꞌ, xix Topa Koxuk teꞌ pẽnãhãꞌ, tu hãmꞌãpak, tu xe hãmꞌãktux, ha Topa te yãy Koxuk Xeꞌẽgnãg nũꞌkutnãhã tikmũꞌũn hah, nõm xop kuxa mãm kaꞌok xop ha nũꞌkutnãhãꞌ. Kaxĩy.
\p
\v 33 Haꞌ xupak, tuꞌ gãynãm, tuꞌ kix putup,
\v 34 pa Paniye xop yõg tik xip, ꞌũxuxetꞌax Gãmãniet. ꞌÕhõm tik te hãmyũmmũg xexkaꞌ, tu Topa yõg xatꞌax yũmmũgãhãꞌ, ha tikmũꞌũn xohix tep-tup pax. Hak-nĩhãꞌ xip, tuꞌ xat, hu:
\p —‍ꞌÃpu, tik xop hãptopa mõgãꞌ. Kaxĩy.
\p Haꞌ mõgãhã Yeyox yõg mõꞌpok xop.
\v 35 Ha Gãmãniet teꞌ xexka xop pu hãmꞌãktux, hu:
\p —‍ꞌIyaet yõg tik xop, ꞌõg pa mõxip, xayĩy ꞌãmpeꞌãpaxeh, nũy hãpkummuk ꞌũm mĩy hok.
\v 36 Hõmã Teot te tikmũꞌũn xat putup, tu tik xop te 400 mõgãhãꞌ, hap-tex, ha nõm xop teꞌ peꞌ mõg teꞌ xaxok, haꞌ kux.
\v 37 Ha hãpxip ꞌĩhã gohet te tikmũꞌũn mõꞌkupix, tu tikmũꞌũn xohix te xĩy yũmmũg putup, hu mõꞌkupix, ꞌĩhã Ganinet yõg Yot xip, ha tikmũꞌũn punethok te Yot peꞌ mõg, haꞌ xok, ha tikmũꞌũn te yĩkãm xupmãhãꞌ.
\v 38-39 Yĩy hõnhã ꞌãte xa hãmꞌãktux, hu: Tik xop nĩm, tuꞌ kummugã hok. Piꞌyãꞌ? ꞌOk pe Topa te nõm nũꞌpok, ꞌok pe tik ꞌũm te nũꞌpok? ꞌÃteꞌ yũmmũgꞌah. Yĩꞌ hip, ka Topa mũtik yũmũg yãy tuk-mĩy. Kaxĩy.
\p Haꞌ xexka xop te Gãmãniet yõg hãmꞌãktux ꞌãpak, tuꞌ yĩpkox pip,
\v 40 tu Yeyox yõg mõꞌpok xop xãnãhãꞌ, tuꞌ kix xokxax hãꞌ, tuꞌ xat, hu:
\p —‍Yeyox ꞌãxetꞌax ꞌãktux hok! Kaxĩy.
\p Tuꞌ tux hok, pu mõg.
\p
\v 41 Haꞌ mõg, tuꞌ kuxa hittup. Yãꞌ xexka xop teꞌ xũygãhãꞌ, Yeyox xũy putuk tuꞌ xũygãhãꞌ, yĩꞌ hittup.
\v 42 Tu ꞌãmnĩy xohix hã hãmyũmmũgãhã Topa pet xexka kopah, xix mĩptut xohix kopah, tu Yeyox yã Kunnix ꞌãktux. Topa te nõm yãykutnãhã xeꞌẽgnãg.
\c 6
\s Tik te 7 te mõꞌpok xop hãꞌ teheꞌ.
\p
\v 1 Hãpxip ꞌĩhãꞌ kuxa mãm kaꞌok xop xohix nõy nãꞌ mõg. Ha Genex yĩyꞌax yõg tikmũꞌũn te:
\p —‍ꞌÃmnĩy xohix hã ꞌãxop tek xitꞌax popmãhã yũmũ yõg hok mãm xop puꞌ, pãyã ꞌũgmũg yĩyꞌax xop xateꞌ xaxok, tuk xitꞌax ꞌohnãg hõm, ꞌĩhã Yoneo yĩyꞌax hok mãm xop puꞌ popmãhãꞌ. Kaxĩy.
\p
\v 2 Ha mõꞌpok xop te 12 teꞌ kuxa mãm kaꞌok xop xohix xãnãhãꞌ, tu:
\p —‍Topa tek-mũg xat, ꞌũyõg hãmꞌãktux yũmmũgãꞌ, hak mũꞌãte Yeyox tu hãpxopmãhãꞌ. ꞌAp hãmyũmmũgã kux putupꞌah, nũy kuxa mãm kaꞌok xop tuꞌ xitꞌax popmãꞌ.
\v 3 ꞌÃpu, tik max te 7 yĩmõgatux ꞌãxop kopah, pu hãpxop popmãꞌ, puyĩy ꞌũn xop xaxogã hok,
\v 4 pak mũꞌãte Topa pu hãmꞌãktux pax putup, tu Topa yõg hãmꞌãktux yũmmũgãp-tup. Kaxĩy.
\p
\v 5 Haꞌ xohix te nõm hãmꞌãktux putup, huꞌ kuxa hittup, tu tik xop yĩmõgatux, tu ꞌExtep yãykutnãhã hãmãxap. Yãꞌ kuxa yũm kaꞌok, ha Topa Koxuk teꞌ kaꞌogãhãꞌ. Ha tik nõy yĩmõgatux ꞌExtep mũtik, tik xohix te: Pinip, xix Ponok, xix Nĩkãnõg, xix Tĩmãm, xix Pãm, xix kõmẽn ꞌÃtikit yõg Nĩkonao, yã Nĩkonao te Yoneo xop hãꞌ puknõg tap, pãyã hõmã nõm xop kopa mõꞌnãhãꞌ, tu mõnãyxop yõg hãpxopmãꞌax tat.
\v 6 Ha tik te 7 mõgãhã mõꞌpok xop hah, tuꞌ keppa tigãhãꞌ, ha Topa pu hãmꞌãktux, tup-tox yĩmũꞌ yĩm nõm, pu Topa Koxuk kaꞌogãꞌ.
\v 7 Ha tikmũꞌũn punethok te Topa yõg hãmꞌãktux ꞌãpak, ha Yenoyanẽn yõg tikmũꞌũn punethok kuxa mãm kaꞌok, haꞌ kuxa mãm kaꞌok xop xohix nõy nãꞌ mõg. ꞌÃmãnex xop kama te Topa yõg hãmꞌãktux puꞌ yĩpkox pip.
\s ꞌŨgãy xop te ꞌExtep mũg kaꞌok
\p
\v 8 Ha ꞌExtep te hãpxopmã xeꞌẽgnãg, pu tikmũꞌũn pẽnãꞌ, ha Topa teꞌ kaꞌogãhãꞌ, tup-tup pax,
\v 9 ha Topa pet ꞌãxetꞌax Nimet yõg, haꞌ yõg xop nũn, tu hãmꞌãktux hãꞌ nõy yãnãn ꞌExtep mũtik, ha tik xohix te: Xinẽn yõg, xix ꞌAnexanit yõg, xix Xinix yõg, xix ꞌAx yõg. ꞌŨxohix te hãmꞌãktux hãꞌ nõy yãnãn nãm ꞌExtep mũtik.
\v 10 Pa ꞌExtep te hãmyũmmũg xexkaꞌ, yã Topa Koxuk te nõm pu hãmyũmmũgãhãꞌ, haꞌ nõy xop teꞌ yẽy, tuꞌ gãy.
\v 11 Tuꞌ nõy xop pu tayũmak xaptop hãꞌ hõm, tuꞌ xat, hu:
\p —‍ꞌÃmõg, nũy yãꞌ koit. Kaxĩy.
\p Haꞌ mõg, tuꞌ koit, hu:
\p —‍ꞌExtep te hãmꞌãktux kummuk, tu Topa ꞌãktux kummuk xix Mõnãyxop Mõyyex ꞌãktux kummuk. Kaxĩy.
\p
\v 12 Tuꞌ yĩy hã tikmũꞌũn gãyãhãꞌ, xiꞌ xexka xop, xix hãmyũmmũg xop, tuꞌ koit hãꞌ xohix gãyãhãꞌ, tu ꞌExtep mõꞌtat, tuꞌ xexka xop keppaꞌ xix,
\v 13 ha tik xop te koit hã hãmꞌãktux, hu:
\p —‍ꞌExtep te hãmꞌãktux kummuk, tuꞌ xuktux pax, haꞌ kux ꞌohnãg, tu Topa pet xexka ꞌãktux kummuk, xix Mõyyex yõg xatꞌax ꞌãktux kummuk.
\v 14 Kãy te hãmꞌãktux, hak mũꞌãte hãmꞌãpak, ha: Nãyane yõg Yeyox te Topa pet xexka koxyõy putup, tu Mõyyex yõg hãpxopmãꞌax hittap nõãp-tup, nũy yãꞌ xatꞌax puknõg hãꞌ nõy yãnãn. Kaxĩy.
\p Pãyãꞌ koit.
\p
\v 15 Ha tikmũꞌũn xexka xop te ꞌExtep pẽnã kaꞌok, haꞌ pa hittup xeꞌẽgnãg, tu pexkox yõg mõꞌkutnãꞌax putuk.
\c 7
\s ꞌExtep te yãy pupi hãmꞌãktux
\p
\v 1 Ha tik te ꞌãmãnex xop xatꞌax te ꞌExtep yĩkopit, hu:
\p —‍ꞌOk tik te hãpxeꞌe ꞌãktux? Kaxĩy.
\p
\v 2 Ha ꞌExtep te:
\p —‍ꞌŨkxape xop xiꞌ tak mũnõm xop, ꞌũgꞌãpax: Topa xexka xeꞌẽgnãg te pexkox kopaꞌ xip, tu hãmꞌãktux mõnãyxop ꞌAmanãm puꞌ, ha hãpxexka Mẽyopotãm tuꞌ xip hãmãxap.
\v 3 Ha hãmꞌãktux, hu: “ꞌÕg hãm nĩm, xix ꞌãxape xop nĩm, nũy mõg hãm ꞌũm tu ꞌãte xaꞌ mũg putup,” kaxĩy.
\v 4 Haꞌ xip hãpxexka Kãnet tuꞌ, tuꞌ mõg, tu mõktu xupep kõmẽn ꞌAnãg tuꞌ, tuꞌ tihiꞌ, ha yãy tak xok, ha Topa te mõꞌkutnãhã ꞌõg hãm hah, nũnteꞌ.
\v 5 Pa Topa te ꞌAmanãm pu hãm ꞌohnãg hõm, hãm ꞌũm kutõgnãg tuꞌ hõm ꞌohnãg, ha ꞌAmanãm teꞌ puknõg yõg hãm tuꞌ xip, pa Topa te hãmꞌãktux xex, hu: “Hõmã ꞌãte xa nũ hãm hõm putup, tu ꞌãxok tehomip, ꞌãmõkputox puꞌ hõm putup,” kaxĩy. Pãyã ꞌAmanãm kutok hok.
\v 6 Ha Topa te xe hãmꞌãktux ꞌAmanãm puꞌ, hu: “ꞌÃk-tok xupep-tup xop teꞌ puknõg yõg hãm tuꞌ pip putup, ha hãmyãxatamuk xohix te 400 hãꞌ puknõg xop teꞌ xũygãp-tup, haꞌ hok hãꞌ hãm putup.
\v 7 ꞌŨkpa te hãmyũmmũg, ha hãmyãxatamuk te 400 nõg, ꞌĩhã ꞌãteꞌ gãy xop ꞌũyãnãn tuꞌ xũygãp-tup, ha ꞌãmõkputox xupepmãp-tup, puk xax nũnte, nũy tu nũk tetex,” kaxĩy.
\v 8 Ha Topa te paꞌax mĩy ꞌAmanãm mũtik, pu tuk-tok xupep-tup xop xohix hãmyũmmũg, yã Topa yõg tikmũꞌũn xeꞌeꞌ, ha Topa teꞌ xat, hu: “ꞌÃxop yãy nãg xax xak kutõgnãg ꞌũyĩmap. Puyã ꞌãk-tok pit xupep-tup xop xohix yãy xax mep, ha ꞌaꞌ kuxꞌah,” kaxĩy. Ha ꞌAmanãm tek-tok ꞌIyak put, ha ꞌãmnĩy te 8 nõg, ꞌĩhãk-tok pit yãy xax yĩmap tuꞌ xak, ha ꞌIyak tek-tok pit Yako put, ha Yako tek-tok put te 12, tuk-tok pit xohix yãy xax ꞌũyĩmap tuꞌ mep kutõgnãg.
\p
\v 9 —‍Ha mõnãyxop Yako kutok pit xop teꞌ taknõy yĩpkumĩy, tuꞌ taknõy Yoye putup nõg, huꞌ nõmenex hãpxexka ꞌEyit yõg puknõg xop puꞌ, tu tayũmak pop, haꞌ mõgãhãꞌ, tu ta tuꞌ mõg, tu mõktu xupep ꞌEyit tuꞌ, ha Yoye kuxa teknõg, pãyã Topa te Yoye mũtik tihiꞌ,
\v 10 tu hãpkummuk tuꞌ xut, tu mõꞌnĩynãm, puyĩy hãmyũmmũg xexkaꞌ, ha ꞌEyit yõg tik te tikmũꞌũn xatꞌax te Yoye putup pax, tuꞌ xexkanãhã yãy pet kopah, xix hãpxexka ꞌEyit kopah.
\v 11 Ha hãmyãxatamuk ꞌũm hã hãmhõgnãg, ꞌap xitꞌax pipꞌah, ha putup teꞌ kix ꞌEyit yõg tikmũꞌũn, xix Kãnãꞌãg yõg tikmũꞌũn, ha mõnãyxop te yãy xitꞌax xak, pãyã xipiꞌah.
\v 12 Pa tik ꞌũm te hãmꞌãktux Yako puꞌ, hu: “Yãꞌ pip xitꞌax ꞌEyit kopah.” Kaxĩy. Ha Yako tek-tok pit te 10 mõꞌpok ꞌEyit tuꞌ, haꞌ taknõy te 10 mõg hãmãxap, tu ta tuꞌ xitꞌax xak.
\v 13 Tuk-nãy tuꞌ mõg ꞌũxeheh, ha Yoye te hãmꞌãktux yãy taknõy xop puꞌ, hu: “ꞌŨgmũn yã ꞌãtaknõy Yoye!” kaxĩy. Ha tik teꞌ xatꞌax ꞌãxetꞌax Panaꞌoꞌ, tu Yoye xape xop yũmmũg.
\v 14 Ha Yoye te yãy tak xãnãhãꞌ, xiꞌ xape xop xohix, pu nũꞌ, ꞌũxohix te 75.
\v 15 Huꞌ nũn, tu ta tuꞌ nũn tu nũktu mõxaha ꞌEyit tuꞌ, ha hãpxip ꞌĩhã Yako xok xix Yoyeꞌ, xiꞌ taknõy xop.
\v 16 Haꞌ yĩnxax tat Xikẽg tu putpuꞌ, tu nõ hãpkot. Hõmã ꞌAmanãm te nõm xukpot pop, tu tayũmak hãꞌ yãnãn ꞌEmõg kutok mũtik.
\p
\v 17 —‍Ha ꞌIyaet yõg tikmũꞌũn xop xohix nõy nãꞌ mõg, tu mõktu xohix xexkaꞌ, ha hãmyãxatamuk xohix nõg, ꞌĩhã Topa te yãy yõg hãmꞌãktux xutigãhãꞌ, tu hãm xexka hõm ꞌAmanãm mõkputox puꞌ.
\v 18 Ha tik puknõg nõy xip ꞌEyit tuꞌ, nõm te Yoye yũmmũg ꞌohnãg,
\v 19 tu kokexmax putuk, tuꞌ gãynãm, tu yũmũg mõnãyxop xũygãhãꞌ, tuꞌ xat ꞌũgãy tuꞌ, hu: “ꞌŨtut tek-tok pit put, puyãꞌ nĩm hãptopaꞌ, puyĩꞌ xok!” kaxĩy.
\v 20 Ha Mõyyex mũg tut teꞌ put, haꞌ mãynãg, Topa te nõm putup pax, ha mãyõn hex ꞌãnuk te 3 hã yãy tak pet kopaꞌ xip,
\v 21 ha hãptopaꞌ xupep, tuꞌ xex, ha nõm xatꞌax kutok hex teꞌ xipihiꞌ, tup-tup, ꞌũmax hah, tuꞌ nõy yãy.
\v 22 Haꞌ puknõg xop te Mõyyex pu hãmyũmmũgꞌax hãmyũmmũgãhãꞌ, puyĩy hãmyũmmũg xexkaꞌ, ha hãmꞌãktux kaꞌok, xix hãpxopmã kaꞌok kamah. Kaxĩy.
\p
\v 23 ꞌExtep te xe:
\p —‍Hãmyãxatamuk te 40 nõg, ꞌĩhã Mõyyex mõg, nũy xape xop pẽnãꞌ,
\v 24 tuꞌ pẽnãhãꞌ, ha tik puknõg te ꞌIyaet yõg tik kummugãhãꞌ, ha Mõyyex teꞌ xape mõꞌnĩynãm, tu ꞌEyit yõg puknõg ꞌũyãnãn tuꞌ kix, haꞌ xok.
\v 25 Ha Mõyyex te hãmpeꞌpaxex, hu: “Topa tek putup, ꞌũxape xop mõꞌnĩynãm,” kaxĩy. Pãyã tik ꞌũm te Mõyyex yõg hãmpeꞌpaxex yũmmũg ꞌohnãg.
\v 26 Ha hãptup nõy ꞌĩhã tikmũꞌũn yãykix, ha Mõyyex teꞌ pẽnãhãꞌ, tuꞌ nõy nĩmãp-tup, hu: “ꞌÃxop yã xapeꞌ. Putep tu yãykix?” kaxĩy.
\p
\v 27 —‍Paꞌ nõy tep-tup nõg, tu: “ꞌŨ ꞌũm ꞌãmũn? ꞌŨ ꞌũm te ꞌãxexkanãhãꞌ, xayĩy hãpxopmãꞌax tu kopit? ꞌÃpa te hãmyũmmũg ꞌohnãg.
\v 28 Hõmã xate ꞌEyit yõg tik putex. ꞌOk hõnhã xatek mũn putexꞌax?” kaxĩy.
\v 29 Ha Mõyyex kuxãnõg, tuꞌ xupaha hãptox hah, tuꞌ nõy yõg hãpxexka Mĩniꞌãn tuꞌ xip, tu hãpkumep, tuk-tok pit 2 pop.
\p
\v 30 —‍Ha hãmyãxatamuk te 40 nõg, ha pexkox yõg nũꞌkutnãꞌax nũn, ha Mõyyex teꞌ pẽnãhãꞌ, tu hãm panip xexka yõg yĩktix Xĩnãy yĩmũꞌ pẽnãhãꞌ, ha mĩxux te kuxap xakot, ha pexkox yõg nũꞌkutnãꞌax teꞌ kopaꞌ xip,
\v 31 haꞌ pẽnãhãꞌ, tu kuxãnõg, tu hũmnãg tuꞌ mõg, tu Topa yĩyꞌax ꞌãpak, ha:
\v 32 “ꞌŨgmũn yã Mõnãyxop hã Topah, xix Mõnãyxop ꞌAmanãm hã Topah, xix Mõnãyxop ꞌIyak hã, xix Mõnãyxop Yako hã Topa kamah,” kaxĩy. Ha Mõyyex kuxãnõg xexkaꞌ, tu yãy puxuꞌux nãm, ꞌap pẽnãp-tupꞌah,
\v 33 ha Topa te: “Hãm te ꞌãk-nĩhã ꞌãxip hãm tuꞌ, mõꞌãnã hok, Topa xip tuꞌ.
\v 34 ꞌÃte yãy yõg tikmũꞌũn xũy pẽnãhã ꞌEyit kopah, huꞌ kokõn ꞌãpak, tuk nũn, ꞌãhak nũn, nũy mõꞌãkutnã ꞌEyit tuꞌ.” kaxĩy.
\p
\v 35 ꞌExtep te xe:
\p —‍Hõmã tikmũꞌũn te Mõyyex putup nõg, tu: “ꞌŨ ꞌũm te ꞌãxexkanãhãꞌ, xayĩy kopit?” kaxĩy. Pa hõnhã Topa te Mõyyex nũꞌkutnãhã tikmũꞌũn hah, nũy Mõyyex xexkãnãꞌ, nũy tikmũꞌũn mõy hãm puknõg kopah, ha Topa te pexkox yõg nũꞌkutnãꞌax nũꞌkutnãhãꞌ, nõm te mĩxux kopaꞌ xip, pu Mõyyex mũtik tu tiꞌ, tu mõꞌnĩynãm.
\v 36 Ha Mõyyex te ꞌIyaet yõg tikmũꞌũn hittap mõy hãpxexka ꞌEyit kopah, tu hãmyãxatamuk te 40 hãꞌ mõgahãꞌ, tu hãpxopmã kaꞌok xeꞌẽgnãg hãpxexka ꞌEyit tuꞌ, xix kõnãg xexka ꞌÃta tuꞌ, xix hãm panip xexka tuꞌ, puyĩy nõm tikmũꞌũn pẽnãꞌ.
\v 37 Hamũn, Mõyyex te tikmũꞌũn hittap pu hãmꞌãktux, hu: “Topa te tik yãykutnãp-tup puyĩy tu pupi hãmꞌãktux, ꞌãxape xop kopa yãykutnãp-tup, ꞌãnõy, ꞌũkputuk,” kaxĩy.
\v 38 Mõyyex xix tikmũꞌũn te hãm panip xexka tuꞌ pip, ha pexkox yõg nũꞌkutnãꞌax te hãmꞌãktux yĩktix Xĩnãy yĩmũꞌ, tu Mõyyex pu hãmꞌãktux, xix yũmũg mõnãyxop puꞌ, ha Mõyyex te Topa yõg xatꞌax pop, nũy yũmũg xohix puꞌ popmãꞌ.
\p
\v 39 —‍Mõnãyxop te Mõyyex yõg hãmꞌãktux ꞌãpak, pãyãꞌ yĩpkox ꞌohnãg, tuꞌ nĩm, tu hãpxexka ꞌEyit xak, tu ꞌEyit tuꞌ mõg putup putpuꞌ,
\v 40 tu hãmꞌãktux ꞌAnãm puꞌ, ha ꞌAnãm te ꞌIyaet yõg tikmũꞌũn hã ꞌãmãnex xatꞌax hãmãxap, ha hãmꞌãktux, hu: “ꞌÃpu, Topa komut ꞌũm pipkup hã mĩy, ꞌũyĩy heyah, puyĩy yũmũg xohix tu mõgãꞌ. Piꞌyãꞌ mõg Mõyyex, nõm tek mũg mõgãhãꞌ? ꞌAp yũmmũgꞌah,” kaxĩy.
\v 41 Ha mũnũytut kutok komut mĩy, pipkup yãnãmnãg ꞌãta hãꞌ mĩy, hu nõ heyah, ha xokxop mõꞌhap nõm mũnũytut kutok komut keppah, tuꞌ haxyãhãꞌ, tuꞌ kuxa hittup.
\v 42 Pa Topa te nõm topa komut xop putup nõg, hu tikmũꞌũn nĩm, ꞌũgãy tuꞌ, haꞌ kuxa mãm kaꞌok mãyõn kopah, xix mãyõn hex kopah, xix mãyõnnãg kopah, ha Topa pupi hãmꞌãktux xop hittap te tappet tu kaxꞌãmiꞌ, Topa pupi kaxꞌãmiꞌ, hu:
\q “Hãmyãxatamuk te 40 hã ꞌãxop te ꞌaꞌ mõꞌhap ꞌohnãg xokxop, ꞌũhax, hãm panip xexka kopah ꞌa mõꞌhapꞌah. ꞌÃmhok.
\q
\v 43 ꞌÃxop tep-tup puknõg xop yõg topahnãg komut xop, ꞌũxuxetꞌax Mõnok,
\q yã topahnãg komut Hẽnpãg yõg mãyõnnãg ꞌãxop tep-tup pax,
\q tu hãpxop ꞌũm ꞌãyĩm hãꞌ mĩy putup, hu nõ heyah.
\q ꞌÃte mõꞌãkutnãp-tup Maminõn kũnãpaꞌ, hãptox tuꞌ.” Kaxĩy.
\p
\v 44 —‍Mõnãyxop te Topa pet mĩy hãm panip xexka kopah, ha Topa te Mõyyex yũmmũgãhãꞌ, haꞌ mĩy, topixxax kaꞌok xexka hãꞌ mĩy.
\v 45 Ha mõnãyxop te Topa pet tat, ha Yoyoe te mõnãyxop mõgãhãꞌ, ha yãy yõg hãm tu nũꞌtat, ꞌĩhã Topa teꞌ puknõg xop xohix hãm kopaꞌ mõy, nũy mõnãyxop puꞌ hõm. Ha mõnãyxop pip, ha hãmyãxatamuk xohix mõg, ha Namix te ꞌIyaet yõg tikmũꞌũn xat.
\v 46 Ha Topa te Namix putup pax, ha Topa pet max xexka mĩy putup, mõnãyxop Yako yõg Topa puꞌ mĩy putup,
\v 47 pãyãk-tok Xanomãm teꞌ mĩy.
\p
\v 48 —‍Pa Topa xexka xeꞌẽgnãg te mĩptut ꞌũm kopaꞌ tiꞌah, nõm mĩptut yĩm hãꞌ mĩy, ha tik te Topa pupi hãmꞌãktux, tu:
\q
\v 49 “Pexkox xexka yãk xipꞌax xeꞌẽgnãg,
\q ha hahãm yãk mũn hã hãptonnokꞌax.
\q Xate ꞌa mĩptut ꞌũm mĩy putup, puk pipꞌax? ꞌAk pip putupꞌah.
\q
\v 50 ꞌŨgyĩm te hãpxop xohix mĩy.” Kaxĩy.
\p
\v 51 Yã ꞌExtep te hãmꞌãktux kux, tu:
\p —‍ꞌÃyĩpkox ꞌohnãg! ꞌÃkuxa mãm ꞌohnãg Topa kopah! Yã ꞌãmnĩy xohix hã Topa Koxuk pu ꞌãyĩpkox ꞌohnãg, mõnãyxop yĩpkox hok, xix ꞌãxop.
\v 52 Mõnãyxop te Topa pupi hãmꞌãktux xop kix, nõm te Yeyox nũnꞌax ꞌãktux, ha ꞌãxop te Topak-tok hõm hãm puknõg yõg xop puꞌ, puyĩp-tex.
\v 53 Pexkox yõg nũꞌpok xop te xa Topa yõg xatꞌax hõm, pa ꞌãxop tep-tup nõg. ꞌŨkux. Kaxĩy.
\p
\v 54 Haꞌ xexka xop te hãmꞌãpak, tuꞌ gãynãm, tuꞌ xox kãyãnãm, ꞌũgãy tuꞌ.
\v 55 Pa Topa Koxuk te ꞌExtep kaꞌogãhãꞌ, tu mõ pexkox kãgmãg, tu Topa yõg yãnãm xeꞌẽgnãg pẽnãhãꞌ, tu Yeyox pẽnãhã kamah, ha Topa yĩpxeꞌe hãk-nĩhãꞌ xip,
\v 56 tu:
\p —‍ꞌÃte pexkox kopaꞌ pẽnãhãꞌ, tu Yeyox pẽnãhãꞌ, yã Tikmũꞌũn Kutok, tu Topa yĩpxeꞌe hãk-nĩhãꞌ xip. Kaxĩy.
\p
\v 57 Pa Yoneo xexka xop gãynãm, tuꞌ yĩy kaꞌok, tu mõ yĩpkox yĩnnĩn, nũy hãmꞌãpak hok, tu mõꞌ nũꞌpahaꞌ,
\v 58 tu kõmẽn Yenoyanẽn kopaꞌ xut, hak-nãpaꞌ mõg, ha mĩkax xexka tux, nũy putex, ha tik xop teꞌ pẽnãhãꞌ, tuꞌ xax mõy, tu tik xiptap ꞌãxetꞌax Xaot pata yĩka mõꞌyõn.
\v 59 Ha mĩkaxxap xexka tux nãm, ꞌĩhã ꞌExtep te Yeyox xãnãhãꞌ, hu:
\p —‍Yãyã Yeyox, ꞌãte xa ꞌũgkoxuk hõm, paꞌ! Kaxĩy.
\p
\v 60 Tuꞌ kopaxux hãꞌ xip, tuꞌ yĩy kaꞌok, hu:
\p —‍Yãyãꞌ, ꞌãpu ꞌũyõg hãpkummuk mĩyꞌax xaxogãꞌ, pu tu kux! Kaxĩy.
\p Tu hãmꞌãktux kux, tuꞌ xok.
\p Ha Xaot teꞌ pẽnãhãꞌ, tu ꞌExtep xokꞌax putup, yĩꞌ kuxa hittup.
\c 8
\s Ha Xaot teꞌ kuxa mãm kaꞌok xop kummugãhãꞌ
\p
\v 1 Ha Yoneo xop teꞌ kuxa mãm kaꞌok xop kummugãhãꞌ kõmẽn Yenoyanẽn kopah, ha nũꞌpahaꞌ, tu mõ tikaꞌ mõg hãpxupmãhã tuꞌ, hãpxexka Yonex tuꞌ mõg, xix hãpxexka Xãmãnit tuꞌ mõg, ha mõꞌpok xop te 12 nox pip Yenoyanẽn kopah.
\v 2 Tik xop max te Topap-tup pax, tu ꞌExtep nõ hãpkot, tu mõꞌnĩy, tu ta pota kaꞌok.
\p
\v 3 Pa Xaot te hãpkummugãhãꞌ, tuꞌ kuxa mãm kaꞌok xop xũygãhãꞌ, tuꞌ pet kopaꞌ mõy, tuꞌ yĩm kĩy kaꞌok, tu kanet kopaꞌ xex, tik xop xix ꞌũn xop.
\s Tik xop te hãmꞌãpak max ꞌãktux kõmẽn Xãmãnit kopah
\p
\v 4 Ha nõm nũꞌpaha te Topa yõg hãmꞌãktux ꞌãktux putat tox hã, xix kõmẽn xohix kopah.
\v 5 Ha taꞌ mõg Pinip, tu mõktu Xãmãnit tuꞌ xupep, tu Yeyox yã Kunnix ꞌãktux. Yã ꞌõhõm Yoneo yõg tikmũꞌũn xatꞌax xeꞌẽgnãg.
\v 6 Ha Xãmãnit yõg tikmũꞌũn kuxap-xet, xip-tox puxet, tu Pinip yõg hãmꞌãktux ꞌãpak, tu hãpxopmã xeꞌẽgnãg pẽnãhãꞌ.
\v 7 Ha Pinip te yãmĩy kummuk mõy Xãmãnit yõg tikmũꞌũn kopah, ha yãmĩy kummuk yĩy kaꞌok, tuꞌ mõg, ha hãpkumep hok xop hittup, tu hãpkumep, yãy hi haꞌ mõg.
\v 8 Yĩy Xãmãnit yõg tikmũꞌũn kuxa hittup xexkah.
\p
\v 9-11 Pa tik ꞌãxetꞌax Xĩmãm teꞌ xut mĩhĩm, tu hãmyãxatamuk xohix hã kugõy hãp-tex, tu yãy ꞌãktux xexkaꞌ, ha Xãmãnit yõg tikmũꞌũn kuxãnõg Xĩmãm hã, ꞌũxut mĩhĩm hah, tuꞌ yĩpkox pip Xĩmãm puꞌ, tu: “Yã Topa mũn te Xĩmãm kaꞌogãhã xexkaꞌ!” kaxĩy.
\p
\v 12 Pa Pinip nũn, tu Yeyox yõg hãmꞌãpak max ꞌãktux, tu Topa te yãy yõg tikmũꞌũn xat ꞌãktux, tu Yeyox yã Kunnix ꞌãktux, ha tikmũꞌũn kuxa mãm kaꞌok Yeyox kopah, hap-tox pix, tik xop xix ꞌũn xop.
\v 13 Ha Xĩmãm kuxa yũm kaꞌok kamah, hap-tox pix, ha Pinip peꞌ mõg, tu hãpxopmã xeꞌẽgnãg pẽnãhãꞌ, tu tikmũꞌũn hittupmãꞌax pẽnãhãꞌ, tu kuxãnõg.
\p
\v 14 Ha Yeyox yõg mõꞌpok xop pip Yenoyanẽn kopah, tu Xãmãnit yõg tikmũꞌũn yãyhã Yeyox yõg xop yũmmũg, tu Pet xix Yoãm mõꞌpok.
\v 15 Haꞌ mõg, tu mõktu mõxaha Xãmãnit tuꞌ, tu Topa tuꞌ xak, puyĩy yãy Koxuk nũꞌkutnã nõm tikmũꞌũn hah.
\v 16 Hõmã xix hõnhã Topa te yãy Koxuk Xeꞌẽgnãg nũꞌkutnã hok Xãmãnit yõg tikmũꞌũn hah, pa kõnãg hãp-tox pix puxehnãg, ꞌĩhã Yeyox yã yãy xuxyã ꞌãktux.
\v 17 Ha Pet xix Yoãm tep-tox yĩmũꞌ yĩm xex, ha Topa te tikmũꞌũn ha nũꞌkutnãhã yãy Koxuk Xeꞌẽgnãg.
\p
\v 18-19 Ha Xĩmãm teꞌ pẽnãhãꞌ, tu mõꞌpok xop tep-tox yĩmũꞌ yĩm xex pẽnãhãꞌ, yã Topa te yãy Koxuk nũꞌkutnãhã tikmũꞌũn hah, ha Xĩmãm teꞌ pẽnãhãꞌ, hu hãmꞌãktux, hu:
\p —‍ꞌAꞌ nõmenex nõm hãpkaꞌokꞌax, yĩy xa tayũmak hãꞌ nõy yãnãn ꞌũyĩy tikmũꞌũn putox yĩmũg yĩm xeh, puyĩy Topa Koxuk ꞌũkaꞌogãꞌ. Kaxĩy.
\p
\v 20-21 Pa Pet teꞌ mãnõg, tu:
\p —‍Topa te ꞌõg tayũmak nõãp-tup, xix ꞌãmũn nõãp-tup kamah! Xate hãmpeꞌãpaxex tayũmak hãꞌ nõy yãnãn, nũy Topa Koxuk paꞌ. Topa teꞌ hok tu nũꞌkutnãhãꞌ, pãyã xa nũꞌkutnã hok, ꞌãkuxa kummuk hah. Topa te ꞌãkaꞌogãp-tup ꞌohnãg.
\v 22 ꞌÃpu, yãyhãhup, tu hãpkummuk mĩy kux, tu Topa tuꞌ xax, pu ꞌõgnũ hãpkummuk mĩyꞌax xaxogãꞌ, pu tuꞌ kux.
\v 23 ꞌÃte ꞌãyũmmũg. ꞌÕgnũ hãpkummuk mĩyꞌax te ꞌãhĩy yãy puꞌ. ꞌÃmũn yĩpkumĩy xexka nãm. Kaxĩy.
\p
\v 24 Ha Xĩmãm te tuꞌ xak, hu:
\p —‍ꞌÃpu, Topa tuꞌ xax, ꞌũgmũn pupi tuꞌ xax, pu tu nũ hok hãpxopmãꞌax kummuk, nõm hãpxopmãꞌax kummuk xate hãmꞌãktux. Kaxĩy.
\p
\v 25 Ha Pet xix Yoãm te Topa yõg hãmꞌãktux ꞌãktux, tu taꞌ mõg putpu Yenoyanẽn tuꞌ, hu putat tox hã Yeyox yõg hãmꞌãpak maxꞌax ꞌãktux, nũy xip tu xexka xohix kopaꞌ xuktux.
\s Pinip te hãpkumep
\p
\v 26 Ha pexkox yõg nũꞌkutnãꞌax te Pinip pu hãmꞌãktux, hu:
\p —‍ꞌÃyok, nũy mõg Yenoyanẽn yõg putat hã, nũy mõy kõmẽn Gayat tu ꞌãpep. Kaxĩy.
\p Ha putat te hãm panip xexka kopaꞌ xip.
\p
\v 27 Ha taꞌ yok, tuꞌ mõg, tu hãpxexka yõg ꞌEtxop yõg tapãyõg pẽnãhãꞌ, ha tapãyõg yã ꞌEnnõk, tu ꞌEtxop yõg xatꞌax hex Kãnax hã kãmãnat, tu hãpxexka yõg tayũmak xex, tuꞌ pẽnã max, tuꞌ mõg Yenoyanẽn tuꞌ, nũy Topa xax, nũy Topa pu nũꞌ xup.
\v 28 Tu putpuꞌ nũn, tu te hãpxop yĩkũyꞌax yĩmũꞌ yũm, tuꞌ nũn, tu mõꞌkupix, tu Topa pupi hãmꞌãktuxꞌax ꞌIyait yõg tappet mõꞌkupix,
\v 29 ha Topa Koxuk te Pinip pu hãmꞌãktux, hu:
\p —‍Mõg, nũy nũ mũtik mõg hãpxop yĩkũyꞌax yĩmũꞌ. Kaxĩy.
\p
\v 30 Haꞌ mõg mõꞌkaꞌok, tu tapãyõg mõꞌkupix ꞌãpak, tu:
\p —‍ꞌOk yũmmũg xate hãpxop mõꞌkupixꞌax? Kaxĩy.
\p
\v 31 Haꞌ nõy yãnãn, tu:
\p —‍ꞌAp yũmmũgꞌah. ꞌA tik ꞌũm tek yũmmũgãꞌah. Kaxĩy.
\p Tuꞌ xãnãhãꞌ, pu mõg, pu yãy mũtik mõg. Ha hãpxop tatꞌax yĩmũꞌ mãm, tuꞌ nõy mũtik mõg.
\v 32 Ha mõꞌkupix hã kaxĩy:
\q “Tikmũꞌũn te kahnẽn mõgãhãꞌ, nũy putex, hã kaxĩy tikmũꞌũn te nõm tik mõgãhãꞌ, nũy putex.
\q Tikmũꞌũn te kahnẽn kutok xax xaxit, haꞌ yĩy hok, yã kaxĩy nõm tik yĩy ꞌohnãg.
\q
\v 33 Tuꞌ hok tu yãyhãhup, hãpkummuk mĩy ꞌohnãg tuꞌ, yĩy tik xop te hãpkoheꞌ mĩy, ꞌĩhã tik max pu hãpkummugãhãꞌ.
\q ꞌŨ ꞌũm te tik mõkputox ꞌũm pẽnãhãꞌ? ꞌAp xipꞌah, tik xok hah.” Kaxĩy.
\m
\v 34 Ha tapãyõg te:
\p —‍ꞌÃyĩy, tik ꞌũm ꞌõhõm? ꞌOk pe ꞌIyait te yãy kaxꞌãmiꞌ, ꞌok peꞌ nõy pupi kaxꞌãmiꞌ? Kaxĩy.
\p
\v 35 Ha Pinip te hãmꞌãktux, tu hãmyũmmũgãhãꞌ, tu nõm tappet hittap hã Yeyox ꞌãktux, tu Yeyox yõg hãmꞌãpak maxꞌax ꞌãktux, tu Topa yõg hãmꞌãktux hittap hã hãmyũmmũgãhãꞌ.
\p
\v 36 Haꞌ mõg putat hã, tu kõnãgkox pẽnãhãꞌ, ha tapãyõg te:
\p —‍Pẽnãꞌ! Kõnãgkox! ꞌÃpu, kõnãg hãk putox pix! Kaxĩy.
\p
\v 37 Ha Pinip te:
\p —‍ꞌÃte ꞌãp-tox pixꞌax. ꞌOk ꞌãkuxa yũm kaꞌok xeꞌeꞌ? Kaxĩy.
\p Haꞌ nõy te:
\p —‍Hamũn! ꞌŨgkuxa yũm kaꞌok Yeyox Kunnix kopah. ꞌÕhõm yã Topak-tok xeꞌẽgnãg. Kaxĩy.
\p
\v 38 Ha hãpxop yĩkũyꞌax tuꞌ xakux, ha Pinip te tapãyõg putox pix kõnãg hã.
\p
\v 39 Ha kõnãgkox tuꞌ xupep, tu putpuꞌ nũn, ha Topa Koxuk te Pinip putmõg, yĩy tapãyõg teꞌ pẽnã hok, tuꞌ kuxa hittup hãꞌ mõg yãy pet hah.
\v 40 Ha tik ꞌũm te Pinip pẽnãhã kõmẽn ꞌAyot tuꞌ, ha kõmẽn xohix tu hãmꞌãktux hãꞌ mõg, tu Yeyox yõg hãmꞌãpak maxꞌax ꞌãktux, tuꞌ mõg, tu mõktu xupep Xeyanet tuꞌ.
\c 9
\s Xaot te hãpkummuk mĩyꞌax hã yãyhãhup
\p
\v 1 Pa Xaot gãy, tuꞌ yĩy gãynãm, tu:
\p —‍ꞌÃte Yeyox mũtik mõg xop xohix kix putup! Kaxĩy.
\p Tuꞌ mõg tik te ꞌãmãnex xop xatꞌax hah,
\v 2 tu tappet pop, pu kõmẽn Namãn yõg xexka xop tuꞌ mũg, nũy Yeyox yõg putat hãꞌ mõg xop mũy, nũy tik xop xix ꞌũn xop mũy, nũy kĩy, tu nũktu Yenoyanẽn haꞌ mõgãꞌ.
\p
\v 3 Tu taꞌ mõg Namãn yõg putat hãꞌ mõg, ha kõmẽn hãmhũmnãg tuꞌ xip, ha hãpxip ꞌohnãg ꞌĩhã kuyãnãm xexka xakot Xaot yĩmap.
\v 4 Ha Xaot te hãm tuꞌ nãhãꞌ, tu yãnmũn xupepꞌax ꞌãpak, ha:
\p —‍Xaot, Xaot, tep tu xatek xũygãhãꞌ? Kaxĩy.
\p
\v 5 Ha Xaot kuxãnõg, tu:
\p —‍ꞌŨ ꞌũm ꞌãmũn? Kaxĩy.
\p Haꞌ nõy te:
\p —‍ꞌŨgmũn yã Yeyox. Xatek mũn xũygãhãꞌ,
\v 6 pa ꞌãyok, nũy ꞌãk-nĩhã xihip, tu mõg tu mõktu kõmẽn Namãn tu xupep. ꞌÕnte tik ꞌũm te xa hãmyũmmũgãp-tup. Kaxĩy.
\p
\v 7 Ha tikmũꞌũn te Xaot mũtik hãpkumep, tuꞌ hip, tuꞌ yẽy. Tuꞌ yĩyꞌax ꞌãpak, pãyã ꞌa tik ꞌũm pẽnãꞌah.
\v 8 Ha Xaot yok, tuk-nĩhãꞌ xip, pãyã hãmpẽnã hok, ha tik te Xaot yĩm mũg, tuꞌ mõgãhãꞌ, tu mõktu mõxaha Namãn tuꞌ.
\v 9 Ha ꞌãmnĩy 3 hã Xaot te hãmpẽnã hok, tuꞌ xit hok, xiꞌ xoꞌop hok kamah.
\p
\v 10 Ha kõmẽn Namãn kopaꞌ xip tik kuxa yũm kaꞌok Yeyox kopah, ꞌũxuxetꞌax ꞌÃnãnĩn, ha yãy koxuk hã hãmꞌãpak, ha yũmũg xuxyã teꞌ xãnãhãꞌ, hu:
\p —‍ꞌÃnãnĩn! Kaxĩy.
\p Ha:
\p —‍Te ꞌũm? Kaxĩy.
\p
\v 11 Ha yũmũg xuxyã teꞌ xat, hu:
\p —‍ꞌÃyok, nũy mõg putat yok hã Yot pet hah, nũy Tax yog tik ꞌãxetꞌax Xaot xax. ꞌŨpẽnãꞌ! Tute Topa mũtik hãmꞌãktux!
\v 12 Tuꞌ yõtkup hã tik ꞌãxetꞌax ꞌÃnãnĩn pẽnãhãꞌ, haꞌ nũn, tuꞌ xupep, tup-tox yĩmũꞌ yĩm xex, pu xe hãmpẽnãꞌ. Kaxĩy.
\p
\v 13 Pa ꞌÃnãnĩn teꞌ yãnãn, hu:
\p —‍Yãyãꞌ, tikmũꞌũn te Xaot ꞌãktux kummuk. Tute ꞌõg tikmũꞌũn xũygãhã Yenoyanẽn kopah,
\v 14 tu Yenoyanẽn tuꞌ xip, tu tappet pop Yoneo yõg ꞌãmãnex xexka xop tuꞌ, tuꞌ nũn, nũy mũy, nũy kĩy, nõm xop te ꞌãxãnãhãꞌ. Kaxĩy.
\p
\v 15 Pa yũmũg xuxyã te:
\p —‍ꞌÃmõg. ꞌÃte Xaot yãykutnãhã, puk mũn ꞌãktux hãmpuknõg xop puꞌ, xiꞌ xexka xop puꞌ, xix Yoneo yõg tikmũꞌũn puꞌ,
\v 16 tuꞌ xũy putup ꞌũgmũn hã, ha ꞌãte tu nõm ꞌãktux putup. Kaxĩy.
\p
\v 17 Ha ꞌÃnãnĩn mõg, tu mĩptut tuꞌ xupep, tu mõꞌnãhãꞌ, tu Xaot putox yĩmũꞌ yĩm xex, tu:
\p —‍ꞌŨgnõy Xaot, xate yũmũg xuxyã Yeyox pẽnãhã putat kopah, hak xat xaꞌ, pu xe pẽnãꞌ, pu Topa Koxuk ꞌãkuxa kaꞌogãꞌ. Kaxĩy.
\p
\v 18 Hãpxip ꞌohnãg ꞌĩhã ꞌũxax ꞌũm te Xaot pa tuꞌ nãhãꞌ, haꞌ xax yã mãpxax putuk, ha Xaot te hãmpẽnã max, tuꞌ yok, tuk-nĩhãꞌ xip, hãp-tox pix,
\v 19 haꞌ xit, xiꞌ xoꞌop, tu mõktu kaꞌok.
\s Xaot te kõmẽn Namãn tuꞌ xip
\p ꞌÃmnĩy kutõgnãg ꞌĩhã Xaot te nõm xop kuxa mãm kaꞌok xop mũtik tihi Namãn kopah.
\v 20 Tuꞌ mõg Topa pet hah, nũy Yeyox ꞌãktux, tu hãmyũmmũgãhãꞌ, hu:
\p —‍Yeyox yã Topak-tok xeꞌẽgnãg! Kaxĩy.
\p
\v 21 Haꞌ xohix kuxãnõg, hu yãy pu hãmꞌãktux, hu:
\p —‍ꞌOk yã Xaot xeꞌeꞌ? Hõmã Xaot kuxa yũm ꞌohnãg Yeyox kopah, tuꞌ gãynãm nõm xop tuꞌ, nõm xop te Yeyox ꞌãxetꞌax hã Topa xãnãhãꞌ, haꞌ nũn, nũy mũy, nũy kĩy, nũy Yenoyanẽn yõg ꞌãmãnex xop haꞌ mõgãꞌ. Pãyã hõnhã Xaot kuxa yũm kaꞌok Yeyox kopah, tu Yeyox ꞌãktux! Kaxĩy.
\p Tuꞌ kuxa teꞌ yẽy.
\p
\v 22 Ha Xaot kaꞌok, tu hãmꞌãktux max, tu Yeyox yã Kunnix ꞌãktux, tu yã Topa yõg hãmyãykutnãꞌax ꞌãktux, ha tikmũꞌũn te Namãn kopaꞌ pip teꞌ yẽy.
\p
\v 23 Hãpxip kutõgnãg ꞌĩhã Yoneo gãy xop te yãy tu nũꞌnãhãꞌ, nũy Xaot putex.
\v 24 Tuꞌ xaptop hãꞌ pip Namãn yõg mõꞌyĩnnĩnꞌax tuꞌ, tuꞌ Xaot hip, tu ꞌãmnĩy xohix hãꞌ hip, xix hãptup xohix hã mõꞌyĩnnĩnꞌax hã pẽnãnãꞌ pip, nũy Xaot mũy, nũy putex, pa tik ꞌũm te Xaot puꞌ xuktux.
\v 25 Ha ꞌãmnĩy koxtap ꞌĩhã tik xop te Xaot mũtik hãpkumep te Xaot xix manax kopah, puꞌ gãy xop ꞌũp-tex hok, ꞌũxaptop tuꞌ xix, tu hãpxux ꞌĩhãꞌ yũm, pu tu xupmãn, haꞌ xut, haꞌ xupahaꞌ.
\s Xaot te kõmẽn Yenoyanẽn tuꞌ xip
\p
\v 26 Tu taꞌ mõg, tu mõktu xupep Yenoyanẽn tuꞌ, tu nõm xape xop pẽnãp-tup, pãyã nõm xop kuxãnõg, tu hãmpeꞌpaxex, hu: “Xaot te yã mõꞌãmãꞌ. Tuteꞌ koit. ꞌA Yeyox yõgꞌah.” Kaxĩy. Tuꞌ yĩpkutuk.
\v 27 Pa Maname nũn, nũy Xaot mõꞌnĩynãm, tuꞌ mõgãhã mõꞌpok xop hah, ha mõꞌpok xop teꞌ pẽnãhã, ha Maname te nõm xop pu hãmyũmmũgãhãꞌ. Yã hõnhã Xaot te Yeyox ꞌãktux, tu yũmũg xuxyã yõg hãmꞌãktuxꞌax ꞌãktux Namãn kopah, tuꞌ yĩpkutuk ꞌohnãg.
\p
\v 28 Ha Xaot te nõm xop mũtik nox tihiꞌ, tu yũmũg xuxyã ꞌãktux Yenoyanẽn xohix kopah,
\v 29 tuꞌ yĩpkutuk ꞌohnãg, tu hãmꞌãktux hãꞌ nõy yãnãn Genex yĩyꞌax xop mũtik, ha nõm gãy xop te Xaot putex putup.
\v 30 Pãyãꞌ xape xop teꞌ yũmmũg, tu Xaot mõgãhã Xeyanet tuꞌ, tu yãy yõg hãm haꞌ kutnãhã kõmẽn Tax tuꞌ.
\p
\v 31 Ha hãpxexka Yonex yõg kuxa mãm kaꞌok xop hittup, tuꞌ kuxa mãm, xix hãpxexka Ganinet yõg xop kuxa mãm, xix hãpxexka Xãmãnit yõg xop, tuꞌ hittup, ꞌũgãy nõg hah, tu Topa xak, tuꞌ kuxa teꞌ yẽy Topa keppah, tu yũmũg xuxyã Yeyox yõg putat hãꞌ mõg, ha Topa Koxuk teꞌ kaꞌogãhãꞌ, ha tikmũꞌũn nũn, tu nõm xop xohix nõy nãꞌ mõg.
\s Pet te kõmẽn Nit tuꞌ mõg, xix kõmẽn Yop tuꞌ
\p
\v 32 Ha Pet te hãpkumep punethok, tu kõmẽn xohix tuꞌ mõg, tu ꞌãmnĩy ha taꞌ mõg, tu mõktu xupep kõmẽn Nit tuꞌ, tuꞌ kuxa mãm xop xape xop mũtik pip.
\v 33 Ha tik ꞌũm ꞌãxetꞌax ꞌẼnẽy xip, tu hãmyãxatamuk xohix te 8 hã hãpkumep hok, tu mĩmpe mõꞌyõnꞌax yĩmũꞌ pip.
\v 34 Ha Pet te:
\p —‍ꞌẼnẽy, Yeyox Kunnix te ꞌãhittupmãhãꞌ. ꞌÃyok, nũy ꞌãk-nĩhã xip, xa ꞌõg komenok yũm. Kaxĩy.
\p Haꞌ yok, tuk-nĩhãꞌ xip.
\v 35 Ha Nit yõg tixmũꞌũn xohix teꞌ pẽnãhãꞌ, xix Xanõn yõg xop teꞌ pẽnãhãꞌ, huꞌ kuxa mãm kaꞌok yũmũg xuxyã kopah, tu yãyhã Yeyox yõg tikmũꞌũn.
\p
\v 36 Ha ꞌũn ꞌũm xip, Yop kopaꞌ xip, tuꞌ xuxetꞌax Tamit, yãꞌ xuxetꞌax nõy Nok, nõm tikmũꞌũn yĩyꞌax hã: “Mũnũy.” Kaxĩy. Ha Nok kuxa yũm kaꞌok Yeyox kopah. Nõm ꞌũn max, tu hãpxopmã max, ha tikmũꞌũn teꞌ yũmmũg, ha hãpxop hok popmãhãꞌ, ꞌũhok xop puꞌ nĩm.
\v 37 Tu ꞌãmnĩy ꞌũm ꞌĩhãꞌ pakut, tuꞌ xok, haꞌ pix, tu mĩpkuꞌĩn yĩmũꞌ put mõg, tuꞌ mõg, tu mõꞌtat pepi mĩptut nõy yĩmũꞌ mõgꞌax kopah, tuꞌ xex.
\v 38 Ha Pet te Yop tuꞌ yĩkãꞌ xip, haꞌ kuxa mãm kaꞌok xop te tik 2 mõꞌpok, ha Pet xãnãhãꞌ, tu taꞌ mõg, tu mõktu Pet ha mõxahaꞌ, tu:
\p —‍Mãꞌ! ꞌÃnũn mõꞌkaꞌok! Kaxĩy.
\p
\v 39 Haꞌ yok, tu yõkãmũꞌ nũn, tu nũktu mõxaha mĩptut tuꞌ, ha ꞌũn hok mãm xop te Pet yĩmap hãꞌ potahaꞌ. Hõmã Nok te topixxax xap, ꞌũhok mãm xop pupiꞌ xap, yã hõnhã Pet tu nõm xax mũg, nũy Pet tu Nok mũn max mũgãꞌ.
\v 40 Ha Pet teꞌ xohix xat, hu:
\p —‍Hãptopa ꞌãmõxãn. Kaxĩy.
\p Haꞌ mõg, yĩy Pet teꞌ kopaxux hãꞌ xip, tu Topa pu hãmꞌãktux, tu hãmꞌãktux kux, tu pepiꞌ mõg, tu Nok yĩnxax xat, hu:
\p —‍Tamit, ꞌãyok, nũy pepi xip. Kaxĩy.
\p Haꞌ pa koꞌaꞌ, tuꞌ yũm.
\v 41 Ha Pet teꞌ yĩm hãꞌ mũg, tuꞌ yoaꞌ, tu ꞌũn xop xãnãhãꞌ, xiꞌ kuxa mãm kaꞌok xop, tu:
\p —‍ꞌŨpẽnãꞌ! Yãꞌ hiꞌ! Kaxĩy.
\p
\v 42 Ha Yop yõg tikmũꞌũn xohix teꞌ yũmmũg, huꞌ kuxa mãm kaꞌok yũmũg xuxyã Yeyox kopah,
\v 43 ha ꞌãmnĩy xohix hã Pet te Yop kopaꞌ nox xip, Xĩmãm mũti tiꞌ, ha xokxax hã hãm Xĩmãm, tu xokxax xut, tuꞌ hĩy, tuꞌ xup, haꞌ nak.
\c 10
\s Pet xix Kohnẽn
\p
\v 1 Ha tik puknõg ꞌũm ꞌãxetꞌax Kohnẽn, tu kõmẽn xexka Xeyanet kopaꞌ pet, tu ꞌItat yõg xonat xop hã kapitãm.
\v 2 Tu Topa xak, tuꞌ kuxa teꞌ yẽy Topa keppah, xik-tok teꞌ, xiꞌ xetut teꞌ, xiꞌ xape xop xohix te Topa xak, nõm te Kohnẽn pet kopaꞌ tihiꞌ. Tu Yoneo hok pip xop pu hãpxop hok nĩm, tuꞌ xupkumĩy ꞌohnãg, tu ꞌãmnĩy xohix hã Topa pu hãmꞌãktux.
\v 3 Ha mãyõn he ꞌĩhã Kohnẽn te pexkox yõg nũꞌkutnãꞌax pẽnãhãꞌ, yãykoxuk hãꞌ pẽnãhãꞌ, tuꞌ pẽnã max, haꞌ nũn Kohnẽn hah, tu hãmꞌãktux, hu:
\p —‍Kohnẽn. Kaxĩy.
\p
\v 4 Haꞌ nõy teꞌ yẽy, tu kuxãnõg xexkaꞌ, tuꞌ pẽnã kaꞌok, tu:
\p —‍Pute ꞌũm nũhũꞌ? Kaxĩy.
\p Haꞌ nõy te:
\p —‍Topa te ꞌõg hãmꞌãktuxꞌax ꞌãpak, tu ꞌõg hãpxopmã max pẽnãhãꞌ, tu ꞌãxaxok ꞌohnãg.
\v 5 ꞌÃpu, tik ꞌũm mõꞌpok kõmẽn Yop tuꞌ, pu Xĩmãm Pet xãnãꞌ,
\v 6 ha Xĩmãm nõy pet tuꞌ xip, nõm Xĩmãm nõy te xokxax hãꞌ hãm, tuꞌ xut, tuꞌ hĩy, tuꞌ xup, haꞌ nak, ha Xĩmãm pet te kõnãg xexka kux tuꞌ yũm. Kaxĩy.
\p
\v 7 Tuꞌ mõg, pexkox yõg nũꞌkutnãꞌax mõg, ha Kohnẽn teꞌ yõg kãmãnat 2 mõꞌpok, xix xonat xeꞌep-xet mõꞌkutnãhãꞌ, ha xonat te Topa xak kamah.
\v 8 Ha Kohnẽn te mõꞌpok xop pu hãmyũmmũgãhãꞌ, tu tu pexkox yõg nũꞌkutnãꞌax te hãmꞌãktux ꞌãktux, tu Yop tu mõꞌpok.
\p
\v 9 Ha hãptup ha taꞌ mõg, tu mõktu mõxaha kõmẽn Yop tuꞌ, ꞌĩhã Pet te mãyõn te yãy koteꞌ yũm ꞌĩhã pepiꞌ mõg, tu mĩptut xanep yĩmũꞌ yũm, nũy Topa pu hãmꞌãktux.
\v 10 ꞌŨp-tup tep-tex, haꞌ xit putup, paꞌ xitꞌax puk ꞌohnãg, yĩꞌ hip, tu yãy koxuk hãꞌ pẽnãhãꞌ, ha pexkox xõn,
\v 11 ha Pet teꞌ pẽnãhãꞌ, ha pexkox tu topixxax xexka yĩxohoh, tuꞌ kuxyã hãꞌ hĩy,
\v 12 tu xokxop kopaꞌ xex, xix putuxnãg, xiꞌ kep hãꞌ mõg xop.
\v 13 Ha yãnmũn xupepꞌax te:
\p —‍Pet, ꞌãyok, nũy kix, nũy mãꞌ! Kaxĩy.
\p
\v 14 Pa Pet te:
\p —‍ꞌAk mũnꞌah. ꞌÃteꞌ mã xetꞌah xokxop mã hok xop. Kaxĩy.
\p
\v 15 Haꞌ yãnmũn xupepꞌax te xeꞌ:
\p —‍Topa te nõm putup, yĩꞌ max. Kaxĩy.
\p
\v 16 Haꞌ yĩxohoh, tuꞌ nũn tehomip tikoxyuk, ha pexkox tuꞌ mõg, tu yãy xaxogãhãꞌ.
\p
\v 17 Pa Pet teꞌ yẽy, tu:
\p —‍Topa tep-tep ꞌũgyũmmũgãp-tup? Kaxĩy.
\p Tu hãmpeꞌpaxex, ꞌĩhã Kohnẽn yõg kãmãnat nũn, tu nũktu mõxahaꞌ, tu Xĩmãm pet xak, tu yãꞌ xipiꞌ, tu mĩptut yõg mõꞌyĩnnĩnꞌax tuꞌ tihiꞌ,
\v 18 tuꞌ xãnãhãꞌ, hu:
\p —‍ꞌOk xip Xĩmãm Pet? Kaxĩy.
\p
\v 19 Ha Pet te hãpxopmãꞌax peꞌpaxex, ꞌĩhã Topa Koxuk te:
\p —‍ꞌŨpẽnãꞌ! Yã tik 3 te ꞌãxak.
\v 20 ꞌÃpu, nãhãy, nũy nõm xop mũtik mõg. ꞌÃkuxãnõg hok, ꞌãte nõm tik nũꞌpok ꞌãhã. Kaxĩy.
\p
\v 21 Ha Pet yĩxohoh, tu:
\p —‍Yãk mũn Xĩmãm Pet. Tep ha ꞌãnũn? Kaxĩy.
\p
\v 22 Haꞌ nõy te:
\p —‍ꞌÃhak nũn. Kapitãm Kohnẽn tek mũg nũꞌpok, yãꞌ mãx, tu hãmyok mĩy, tu Topa xak, tuꞌ kuxa teꞌ yẽy Topa keppah, ha ꞌIyaet yõg tikmũꞌũn xohix te nõm putup pax, ha pexkox yõg nũꞌkutnãꞌax teꞌ xat, hãk mũg nũꞌpok, ha ꞌãxãnãhãꞌ, pu Kohnẽn pet ha mõg, ꞌũyĩy ꞌognũ hãmꞌãktuxꞌax ꞌũm ꞌãpax. Kaxĩy.
\p
\v 23 Ha Pet te tik 3 tuꞌ kax, puꞌ xit, nũy mõhõn yãy pet kopah.
\p Hãptup ha taꞌ mõg Kohnẽn yõg tik mũtik, haꞌ xape xop mõg kamah,
\v 24 tu mõktu hãptup nõy ꞌĩhãꞌ mõxaha Xeyanet tuꞌ, ha Kohnẽn teꞌ hip, tuꞌ xape xop xohix mũtik hip,
\v 25 ha Pet nũn tu nũktu mõꞌnãhãꞌ, ha Kohnẽn teꞌ kopaxux hãꞌ nãhãꞌ, tu nũꞌxup, nũy heyak,
\v 26 pa Pet te:
\p —‍Xihip ꞌãk-nĩhãꞌ. Yãk mũn tihik kamah. Kaxĩy.
\p
\v 27 Tu hãmꞌãktux hãꞌ nõy yãnãn, tu mõꞌnãhãꞌ, tu tikmũꞌũn punethok pẽnãhãꞌ,
\v 28 tu hãmꞌãktux, hu:
\p —‍Yoneo yõg xatꞌax xateꞌ yũmmũg, haꞌ xat hok, hu: “Mõnã hok tik puknõg pet kopah,” kaxĩy. Pa Topa tek mũn yũmmũgãhãꞌ, hu: “Hãmpeꞌãpaxeh hok, hu: —‍Topa teꞌ puknõg xop putup nõg, kaxĩy. ꞌÃmhok. Topa te nõm putup, puyĩy yãyhã yãy yõg tikmũꞌũn,” kaxĩy.
\v 29 Xatek xãnãhãꞌ, ꞌãhak nũn. Putep hã xatek xãnãhãꞌ? Kaxĩy.
\p
\v 30 Ha Kohnẽn te:
\p —‍Hõmã, ꞌãmnĩy te 4 ꞌĩhã, mãyõn he ꞌĩhã, ꞌãte Topa pu hãmꞌãktux, tu tik ꞌũm pẽnãhãꞌ, haꞌ yõg topixxax te yãnãm putuk,
\v 31 ha: “Kohnẽn, Topa te ꞌõg hãmꞌãktuxꞌax ꞌãpak, tu ꞌõg hãpxop popmãꞌax pẽnãhãꞌ.
\v 32 ꞌÃpu, Yop tu mõꞌpok, pu Xĩmãm Pet xãnãꞌ, ha kõnãg xexka kux tuꞌ xip Xĩmãm nõy pet kopah, ha Xĩmãm te xokxax hãꞌ hãm, tuꞌ xut, tuꞌ hĩy, tuꞌ xup, haꞌ nak,” kaxĩy.
\v 33 Hãpxip ꞌohnãg ꞌĩhã ꞌãte ꞌãxãnãhãꞌ, ha ꞌãnũn, hak mũg hittup. Hõnhãk mũg pip, ha Topa tek mũg pẽnãhãꞌ, hak mũꞌãte ꞌõgnũ hãmꞌãktuxꞌax ꞌãpak putup, Topa te nõm ꞌãxat, xaꞌ xuktux. Kaxĩy.
\s Pet te puknõg xop pu hãmyũmmũgãhãꞌ
\p
\v 34 Ha Pet te hãmꞌãktux, hu:
\p —‍Hõnhã ꞌãte hãmyũmmũg. Yã Topa teꞌ xohip-tup, ꞌok pe Yoneo yõg tikmũꞌũn, ꞌok peꞌ puknõg, ha Topa puꞌ nõy putuk.
\v 35 Topa te hãmyok mĩyꞌax xop xohip-tup pax, ha tikmũꞌũn ꞌũm xohix te Topa xak, tuꞌ kuxa teꞌ yẽy Topa keppah, puxix Topa nõm putup,
\v 36 tu yãy pupi hãmꞌãktuxꞌax nũꞌkutnãhã ꞌIyaet yõg tikmũꞌũn hah, tu Yeyox Kunnix nũꞌkutnãhãꞌ, ha Yeyox teꞌ kuxa mãm yũmmũgãhãꞌ, xix yãy kep hãꞌ mũgꞌax kama yũmmũgãhãꞌ, ꞌũyĩy yũmũg hittup. Yã Yeyox yũmũg xohix hãg xuxyãꞌ.
\v 37 Yoãm te hãmꞌãpak maxꞌax ꞌãktux hãmãxap, tup-tox pix, tu Topa yõg hãmꞌãktuxꞌax ꞌãktux hãpxexka Ganinet kopah, xix hãpxexka Yonex xohix kopah.
\v 38 Hak-nãy tu Topa te Nãyane yõg Yeyox ha yãy Koxuk nũꞌkutnãhãꞌ, nũy nõ kaꞌogãꞌ, ha yãyhã kaꞌok xeꞌẽgnãg, tu hãpkumep hãpxexka xohix tuꞌ, tu hãpxopmã max, tu tikmũꞌũn xohix hittupmãhãꞌ, Hãmgãyãgnãg te nõm xop kummugãhãꞌ, yã Topa te Yeyox mũtik xip.
\v 39 Hak mũꞌãteꞌ pẽnãhã Yoneo yõg hãpxexka tuꞌ, xix Yẽnoyãnẽn kopah, pa Yoneo yõg tikmũꞌũn te Yeyox putex mĩpkupnix tuꞌ. Kaxĩy.
\p
\v 40 Tu xe:
\p —‍Pa ꞌãmnĩy 3 nõg, ꞌĩhã Topa teꞌ hĩnnãhã putpuꞌ, hak mũꞌãteꞌ pẽnãhãꞌ.
\v 41 Yãk mũg xit xiꞌ xoꞌop Yeyox mũtik. ꞌAp tikmũꞌũn xohix teꞌ pẽnãꞌah.
\v 42 Ha Topa tek mũg xat, ꞌũ hãmꞌãpak maxꞌax ꞌãktux, nũy tikmũꞌũn xohix pu hãmꞌãktux, nũy tikmũꞌũn xohix yũmmũgaꞌ, ha Topa te Yeyox putpu nũꞌkutnãp-tup, pu tikmũꞌũn yõg hãpxopmãꞌax kopit, xiꞌ puknõg yõg, ꞌũxakix xop, xiꞌ hi xop yõg hãpxopmãꞌax kopit putup.
\v 43 Hõmã Topa pupi hãmꞌãktux xop te Yeyox ꞌãktux, hu: “Topa te tikmũꞌũn yõg hãpkummuk mĩyꞌax xaxogãꞌax, pu tuꞌ kux, nõm xop kuxa mãm kaꞌok Kunnix kopah, ꞌũkaꞌok hah,” kaxĩy.
\s Topa Koxuk te Yoneo hãꞌ puknõg xop kaꞌogãhãꞌ
\p
\v 44 ꞌAp Pet te hãmꞌãktux kuxꞌah, ꞌĩhã Topa Koxuk teꞌ puknõg xop ha yĩxohoh, nõm te hãmꞌãpak haꞌ yĩxohoh,
\v 45 ha Yoneo yõg kuxa mam kaꞌok xop teꞌ yẽy, tu:
\p —‍Topa te kamaꞌ puknõg xop ha yãy Koxuk nũꞌkutnãhãꞌ! Kaxĩy.
\p
\v 46 Haꞌ puknõg xop te yãy puꞌ puknõg yĩyꞌax hã hãmꞌãktux, Topa teꞌ kaꞌogãhã, puyĩꞌ xuktux, nũy Topa ꞌãktux max nõmhãꞌ.
\v 47 Ha Pet te:
\p —‍ꞌŨ ꞌũm teꞌ puknõg xop pup-tox pixꞌax xat hok? ꞌAk mũnꞌah. Yã Topa te yãy Koxuk nũꞌkutnãhãꞌ puknõg xop hah, ꞌũgmũg putuk! Kaxĩy.
\p
\v 48 Huꞌ xat, hu:
\p —‍Kõnãg hãp-tox pix, puyĩy Yeyox yã yãy xuxyã ꞌãktux. Kaxĩy.
\p Ha Kohnẽn teꞌ xak, pu tu ꞌãmnĩy kutõgnãg hãꞌ nox xihip yãy pet kopah, haꞌ nox xip.
\c 11
\s Pet te hãpxopmãꞌax ꞌãktux
\p
\v 1 Ha hãpxexka Yonex kopaꞌ pip Yeyox yõg mõꞌpok xop, xiꞌ xape xop, tuꞌ puknõg xop kuxa mãm kaꞌokꞌax ꞌãpak,
\v 2 ha Pet nũn, tu nũktu xupep Yenoyanẽn tuꞌ, haꞌ xape xop teꞌ puknõg xop te yãyhã Yoneo hãmãxap putup, huꞌ mãnõg,
\v 3 tu:
\p —‍Tep mĩy xateꞌ? Tep tu ꞌãxit hãmpuknõg xop mũtik, nõm te yãy xax yĩmap tuꞌ mep ꞌohnãg? Kaxĩy.
\p
\v 4 Pa Pet te tik xop yũmmũgãhãꞌ, hu:
\p
\v 5 —‍ꞌÃte Topa pu hãmꞌãktux Yop kopah, tu yãy koxuk hãꞌ pẽnãhãꞌ, ha pexkox tu topixxax xexka yĩxohoh, tuꞌ kuxyã hãꞌ hĩy, tuꞌ nũn tu nũktu ꞌũghaꞌ nũn.
\v 6 ꞌÃteꞌ pẽnã kaꞌok, ha xokxop gãy xop kopaꞌ xuk, xiꞌ kep hãꞌ mõg xop, xix putuxnãg,
\v 7 haꞌ yãnmũn xupepꞌax te: “Pet, ꞌãyok, nũy kix, nũy mãꞌ!” kaxĩy.
\v 8 Pa ꞌãte: “ꞌAk mũnꞌah. ꞌÃteꞌ mã xet xokxop nõm mã hok xop,” kaxĩy.
\v 9 Haꞌ yãnãn, hu: “Topa te nõm putup, yĩꞌ max,” kaxĩy.
\v 10 Haꞌ xe yĩxohoh te 3, ha pexkox tuꞌ mõg putpuꞌ, tu yãy xaxogãhãꞌ.
\v 11 Ha Xeyanet yõg tik 3 nũn, tu nũktu mõxahãꞌ, tik puknõg te nõm mõꞌpok ꞌãꞌ,
\v 12 ꞌĩhã Topa Koxuk te: “Mõy, ꞌãmõg, tuꞌ yĩkopit hok.” Kaxĩy. Ha tak mũg mõg, nũꞌ xape te 6 mũtik mõg, tu mõktu mõxaha tik puknõg pet tuꞌ.
\v 13 Ha tik puknõg te hãmꞌãktux, hu: “Hõmã ꞌãte pexkox yõg nũꞌkutnãꞌax pẽnãhã mĩptut kopah, haꞌ xat, hu: ‘ꞌÃpu, tik ꞌũm Yop tu mõꞌpok, pu Xĩmãm Pet xãnãꞌ.
\v 14 Pet te xa Topa yõg hãmꞌãpakꞌax yũmmũgãp-tup, xix ꞌãxape, pu ꞌãkuxa mãm kaꞌok nõm hãmꞌãktuxꞌax kopah, pu Topa ꞌãkuxa kummuk xit, nũy nõ max tat ꞌũyãnãn tuꞌ,’ kaxĩy.”
\v 15 Yĩy ꞌãte hãmꞌãktux, ꞌĩhã Topa Koxuk teꞌ puknõg xop tuꞌ yĩxohoh, ꞌũgmũg putuk. Hõmã Topa Koxuk te yũmũꞌã tuꞌ yĩxohoh, tu yũmũꞌã tuꞌ xip hãm tu kamah.
\v 16 ꞌÃte hãmpeꞌpaxex. Yũmũg xuxyã te hãmꞌãktux, hu: “Yoãm tep-tox pix kõnãg hã, pa ꞌãte xa nũꞌkutnãp-tup Topa Koxuk, puyĩy ꞌãkaꞌogãꞌ,” kaxĩy.
\v 17 Hõmã yũmũg kuxa mãm kaꞌok yũmũg xuxyã Yeyox kopah, ha Topa te yũmũꞌã nũꞌkutnãhã yãy Koxuk. Yã hõnhãꞌ puknõg xop kuxa mãm kaꞌok yũmũg xuxyã kopa kamah, ha Topa te yãy Koxuk nũꞌkutnãhã kamah, yãꞌ nõy putuk. ꞌÃte Topa mutik yãy tuk-mĩy putupꞌah. Kaxĩy.
\p
\v 18 Haꞌ mõꞌpok xop teꞌ xupak, tuꞌ mãnõg kux, tuꞌ yẽy. Tu Topa ꞌãktux max, hu:
\p —‍Yã Topa teꞌ puknõg xop pu hũpmãhãꞌ, pu hãpkummuk mĩy kux, nũy hi xeꞌẽgnãg! Kaxĩy.
\s ꞌÃtikit yõg xop kuxa mãm kaꞌok Yeyox kopah
\p
\v 19 Tikmũꞌũn te ꞌExtep putex Yenoyanẽn tuꞌ, haꞌ gãy xop teꞌ kuxa mãm kaꞌok xop kummugãhãꞌ, tuꞌ xũygãhãꞌ, haꞌ xupmãhã hãptox tuꞌ, hãpxexka Penix tuꞌ, xix hãmyĩn yũm Xip tuꞌ, xix kõmẽn ꞌÃtikit tuꞌ, tu hãmꞌãpak maxꞌax ꞌãktux hãꞌ mõg, tu Yoneo yõg tikmũꞌũn pu hãmꞌãktux, ꞌap puknõg xop pu hãmꞌãktuxꞌah.
\v 20 Pãyã Xip yõg tihik, xix kõmẽn Xinẽn yõg tik mõg, tu taꞌ mõg, tu mõktu mõxaha ꞌÃtikit tuꞌ, tu hãmꞌãktux hãꞌ mõg, tu yũmũg xuxyã Yeyox yõg hãmꞌãpak maxꞌax ꞌãktux Genex yõg puknõg xop puꞌ kamah,
\v 21 ha Topa teꞌ kuxa mãm kaꞌok xop mõꞌnĩynãm, tuꞌ kaꞌogãhãꞌ, haꞌ puknõg xop punethok kuxa mãm kaꞌok yũmũg xũxyã Yeyox kopah, tu hãpkummuk mĩy kux.
\p
\v 22 Haꞌ kuxa mãm kaꞌok xop teꞌ xupak Yenoyanẽn kopah, tu mõ Maname kutnãhã ꞌÃtikit tuꞌ.
\v 23 Ha taꞌ mõg, tu mõktu xupep ꞌÃtikit tuꞌ, tu Topa te nõm xop ha hãmmaxnã pẽnãhãꞌ, haꞌ kuxa hittup xexkaꞌ, tu hãmyũmmũgãhãꞌ, nũy kaꞌogãꞌ, puyĩꞌ kuxa mãm xeꞌe yũmũg xuxyã kopah, mõ kumaꞌ mõg.
\v 24 ꞌŨmax Manameꞌ, yã Topa Koxuk teꞌ kaꞌogãhãꞌ, haꞌ kuxa yũm kaꞌok xeꞌeꞌ, haꞌ puknõg xop xohix nũktu Yeyox tu yãy kotĩnnãhãꞌ.
\p
\v 25 Ha taꞌ mõg Manameꞌ, tu mõktu xupep Tax tuꞌ, nũy Xaot xax,
\v 26 tuꞌ xipihiꞌ, tuꞌ nũnnãhã ꞌÃtikit tuꞌ, ha hãmyãxatamuk puxet hã Xaot xix Maname teꞌ kuxa mãm kaꞌok xop mũtik nũn tu nũꞌnãhãꞌ, tu nõm xop xohix pu hãmyũmmũgãhãꞌ, ha nũ mũtik yãy kotĩnnãhãꞌ, ha ꞌÃtikit yõg tikmũꞌũn teꞌ xuxetꞌax mĩy kõnãmãhãꞌ, tu: “Kunnix yõg xop.” Kaxĩy.
\p
\v 27 Ha Topa pupi hãmꞌãktux xop te Yenoyanẽn tuꞌ pip, tu taꞌ nũn tu nũktu mõxaha ꞌÃtikit tuꞌ,
\v 28 ha tik te Topa pupi hãmꞌãktux ꞌãxetꞌax ꞌÃg, tuꞌ yok, tuk-nĩhãꞌ xip, tu hãmꞌãktux, Topa Koxuk teꞌ yũmmũgãhãꞌ, ha ꞌÃg te:
\p —‍ꞌŨxitꞌax nõg putup, yã hãmhõgnãg, ha putup teꞌ kix putup tikmũꞌũn xop xohix te hãm xexka xohix kopaꞌ pip. Kaxĩy.
\p Ha hãmhõgnãg, ꞌĩhã Kanao te Hõm yõg tikmũꞌũn xat.
\p
\v 29 Ha ꞌÃtikit yõg kuxa mãm kaꞌok xop te:
\p —‍ꞌÃpu, yũmũg tayũmak ꞌũm mõgãꞌ, pu Yenoyanẽn yõg xape xop puꞌ popmãꞌ. Kaxĩy.
\p
\v 30 Haꞌ mõgãhãꞌ, ha Maname xix Xaot mõg Yonex tuꞌ, nũy tayũmak mõgã tik pẽnã maxꞌax xop puꞌ.
\c 12
\s ꞌŨgãy xop te xe hãpkummugãhãꞌ
\p
\v 1 Yã ꞌEnot te Yoneo yõg tikmũꞌũn xat, tu hãpkummugãhãꞌ, tuꞌ kuxa mãm kaꞌok xop xũygãhãꞌ,
\v 2 tu Yoãm taknõy Tiak putex mĩkax xexka hã.
\v 3 Ha Yoneo xop hittup, yĩy ꞌEnot teꞌ pẽnãhãꞌ, tu xeꞌ nõy putex putup, hu Pet mũg kamah, ha kanet ha mõꞌtat, ꞌĩhã Yoneo yõg ꞌãmuk xexka ꞌãxetꞌax Pãm Tokatok Hok mãhãꞌ.
\p
\v 4-6 Ha ꞌEnot te Pet xix kanet kopah, ha xonat xop yãg te 4 teꞌ pẽnãnãꞌ pip, ha ꞌEnot te Pet putex putup hãptup ꞌĩhãꞌ, ꞌãmuk xexka kux, ꞌĩhãp-tex putup, yĩꞌ kuxa mãm kaꞌok xop te Topa pu hãmꞌãktux, tu ꞌãmnĩy tox hã Topa tuꞌ xak, Pet pupiꞌ xak, ꞌĩhã Pet mõꞌõn kanet kopah, ha pipkup mãg xap 2 hãꞌ hĩy, ha xonat 2 te hãmyĩnnĩnꞌax yĩkaꞌ tihiꞌ, nũy pẽnãnãꞌ tiꞌ.
\v 7 Hãpxip ꞌohnãg ꞌĩhã pexkox yõg nũꞌkutnãꞌax xip, ha kuyãnãm xexkaꞌ, ha pexkox yõg mõꞌkutnãꞌax te Pet nuhuk, tu:
\p —‍ꞌŨpitnãy, nũy mõg mõꞌkaꞌok! ꞌÃyok, nũy ꞌãk-nĩhã xihip! Kaxĩy.
\p Ha pipkup mãg xap 2 teꞌ yĩy yãy koꞌaꞌ.
\p
\v 8 Ha nũꞌkutnãꞌax te:
\p —‍ꞌÃxax mõꞌtat, tu ꞌãpata xax tat. Kaxĩy.
\p Haꞌ tat, ha nũꞌkutnãꞌax te:
\p —‍Kap mõꞌtat tu mõyãy nĩy, tuk pe mõg. Kaxĩy.
\p
\v 9 Haꞌ peꞌ mõg, pa Pet te hãmpeꞌpaxex, tu yãy koxuk hãꞌ pẽnãꞌax peꞌpaxex.
\v 10 Ha tik te xonat hãꞌ yẽn, tuꞌ mõg, tu xonat nõy hãꞌ yẽn, ha pipkup mõꞌyĩnnĩnꞌax yãy xõn, ha kõmẽn kotit hãꞌ mõg, ha nũꞌkutnãꞌax te yãy xaxogãhãꞌ.
\v 11 Ha Pet te hãmyũmmũg, ꞌap yõtkupꞌah, tu:
\p —‍Topa te pexkox yõg nũꞌkutnãꞌax nũꞌkutnãhã ꞌũghah, pu ꞌEnot yõg kanet kopak xut, ha ꞌEnot tek xũygãp-tup hok! ꞌAp Yoneo yõg tikmũꞌũn tek xokꞌax pẽnãp-tupꞌah. Kaxĩy.
\p
\v 12 Tu taꞌ mõg, tu hãmpeꞌpaxex, tu mõktu xupep Mãnix pet tuꞌ, yã Yoãm Mãꞌak mũg tut, haꞌ kuxa mãm kaꞌok xop xohix te yãy tu nũꞌnãhãꞌ, tu Topa pu hãmꞌãktux pax, tu Pet pupi hãmꞌãktux.
\v 13 Ha Pet te hãptopa tuꞌ xãnãhãꞌ, hu:
\p —‍Hãpxõn! Kaxĩy.
\p Ha kakxop hex ꞌãxetꞌax Hone nũn,
\v 14 tu Pet yĩyꞌax yũmmũg, tuꞌ kuxa hittup xexkaꞌ, huꞌ mõg mõꞌkaꞌok ꞌũxape xop tuꞌ, tu:
\p Yaꞌ xip Pet! Kaxĩy.
\p
\v 15 Haꞌ kuxa mãm kaꞌok xop te:
\p —‍ꞌÃp-tox kummuk! ꞌAp hamũnꞌah! Kaxĩy.
\p Pa Hone te:
\p —‍Hamũn! ꞌÃteꞌ yĩyꞌax ꞌãpak! Kaxĩy.
\p Tu xeꞌ xuktux, haꞌ xape xop te:
\p —‍ꞌÕhõm yã pexkox yõg nũꞌkutnãꞌax, nõm te Pet pẽnã max. Kaxĩy.
\p
\v 16 Pãyã Pet te:
\p —‍Hãpxõn, hãpxõn! Kaxĩy.
\p Tu xe:
\p —‍Hãpxõn! Kaxĩy.
\p Ha hãpxõn, tuꞌ pẽnãhãꞌ, tuꞌ yẽy.
\v 17 Ha Pet teꞌ yĩm nuhuk, tu:
\p —‍ꞌÃyĩy hok, pu xonat xop nũn hok. Kaxĩy.
\p Tu hãmꞌãktux puꞌuk, hu:
\p —‍Topa te hãpxopmã max, puk mũn xut. Mõg, Tiak pu hãmꞌãktux, nũy kanet kopak xut ꞌãktux ꞌũxape xop puꞌ. Kaxĩy.
\p Tuꞌ mõg, tu mõktu xupahaꞌ.
\p
\v 18 Ha hãptup ha ta xonat xop te Pet xak kanet kopah, pãyã ꞌap xipꞌah, ha xonat xop kuxãnõg, tu:
\p —‍Piꞌyãꞌ xip Pet? Kaxĩy.
\p
\v 19 Ha ꞌEnot teꞌ xat, pu tu Pet xax, haꞌ xak, pãyã ꞌaꞌ pẽnãꞌah, yĩy ꞌEnot gãy xexkaꞌ, tu xonat xop mũg, tuꞌ yĩkopit, tuꞌ kix kakixnãg, haꞌ xakix.
\p Ha ꞌEnot mõg, tu taꞌ mõg tu mõktu Xeyanet tuꞌ, tu ꞌãmnĩy xohix hãꞌ nox xip.
\s ꞌEnot xok
\p
\v 20 Tu ta tuꞌ gãy Tinok yõg tikmũꞌũn tuꞌ, xix Xinõm yõg tikmũꞌũn tuꞌ, hu ꞌap hãpxop mõgãp-tupꞌah. Ha nõm tikmũꞌũn kuxãnõg, tuꞌ gãy kux xak, pu ꞌEnot te hãpxop xe mõgãꞌ. Ha yãy tu nũꞌnãhãꞌ ꞌEnot pet xexka kopah, tu ꞌEnot yõg kãmãnat Manax yũmmũgãhãꞌ, pu ꞌEnot pu nõm tikmũꞌũn pupi hãmꞌãktux.
\v 21 Hãptup nõy ꞌĩhã ꞌEnot te tik teꞌ xatꞌax yõg topixxax max mõꞌtat, tuꞌ xatꞌax yõg mĩmpeꞌ yũmꞌax yĩmũꞌ yũm, nũy tu tikmũꞌũn xat, tu hãmꞌãktux tox, tu hãmꞌãktux kux,
\v 22 ha tikmũꞌũn yĩy kaꞌok, tu:
\p —‍Topahnãg ꞌũm yĩyꞌax putuk, ꞌap tik yĩyꞌah. Kaxĩy.
\p
\v 23 Ha hãpxip ꞌohnãg ꞌĩhã pexkox yõg nũꞌkutnãꞌax te ꞌEnot kix, tuꞌ pakutnãhãꞌ, ha puxõꞌõy teꞌ mãhãꞌ, haꞌ xok, Topa ꞌãktux max ꞌohnãg tuꞌ.
\p
\v 24 Haꞌ kuxa mãm kaꞌok xop mõg hãptox tuꞌ, tu Yeyox yõg hãmꞌãpak maxꞌax ꞌãktux, ha tikmũꞌũn punethok kuxa mãm kaꞌok Yeyox Kunnix kopah.
\p
\v 25 Ha Maname xip Yenoyanẽn tuꞌ, xix Xaot, tuꞌ yõg hãmꞌax kux, tuꞌ mõg, tu taꞌ mõg tu mõktu mõxaha ꞌÃtikit tuꞌ, tu Yoãm Mãꞌak mõgãhãꞌ.
\c 13
\s Maname xix Xaot te hãpkumep kõnãmãhãꞌ
\p
\v 1 ꞌÃntikit yõg kuxa mãm kaꞌok xop kopaꞌ xip Topa pupi hãmꞌãktuxꞌax xop, xix hãmyũmmũgãꞌax xop. ꞌŨxohix te: Manameꞌ, xix Xĩmãm Tapãyõg, xix Xinẽn yõg Noxit, xix Xaot, xix Mãnãꞌẽm. Hõmã ꞌEnot mũg tut te Mãnãꞌẽm pahaꞌ, ha ꞌEnot mũtik yãy tu tittap, tuꞌ taknõy putuk, pãyã ꞌaꞌ taknõyꞌah.
\v 2 Hãptup ꞌũm ꞌĩhã nõm tik xop te Topa pu nũktettex, tuꞌ kuxa teꞌ yẽy, tuꞌ xit hok, nũy Topa pu hãmꞌãktux, ha Topa Koxuk te:
\p —‍ꞌÃte Maname yãykutnãhã, xix Xaot yãykutnãhãꞌ, tu nõm xãnãhãꞌ, pu tu hãpxopmãꞌ, nũy hãmꞌãpak maxꞌax ꞌãktux hãptox tuꞌ. Kaxĩy.
\p
\v 3 Haꞌ xohix te Topa pu hãmꞌãktux, huꞌ xit hok, tu Maname putox yĩmũꞌ yĩm xex, xix Xaot, tu hãptox tu mõꞌpok.
\s Tu Xip tuꞌ tihiꞌ
\p
\v 4 Topa Koxuk te mõ Maname kutnãhãꞌ, xix Xaot, haꞌ mõg tu mõktu mõxaha kõmẽn Xeneo tuꞌ, tu mĩpkox hãꞌ mõg, nõm mĩpkox te kõnãg yĩmũꞌ mõg, tu mõktu mõxaha hãmyĩn yũm Xip tuꞌ,
\v 5 tu taꞌ mõg, tu mõktu mõxaha kõmẽn Xanamĩn tuꞌ, tu Topa yõg hãmꞌãktuxꞌax ꞌãktux Yoneo yõg Topa pet kopah, ha Yoãm Mãꞌak te mõꞌnĩynãm.
\v 6 Tu taꞌ mõg hãmyĩn yũm tuꞌ, tu mõktu mõxaha kõmẽn Pap tuꞌ.
\p Ha Yoneo yõg tik yãꞌ xut mĩhĩm, ꞌũxuxetꞌax Mayeyox, tu Topa pupi hãmꞌãktuxꞌax putuk, pãyã mõꞌãmãꞌ. ꞌAꞌ maxꞌah Mayeyox.
\v 7 Tu tik nõy mutik xip, ꞌãxetꞌax Xet Paot, tu Xip yõg tikmũꞌũn xat, tu hãmyũmmũg xexkah, tu Maname tuꞌ xãnãhã xix Xaot, nũy Topa yõg hãmꞌãktuxꞌax ꞌãpax max.
\v 8 Ha Mayeyox ꞌãxetꞌax nõy ꞌEnip, ha tikmũꞌũn yĩyꞌax hã: “ꞌŨxut mĩhĩm,” kaxĩy. Tutep-tup nõg, tu Xet Paot xut putup, puyĩy Topa yõg hãmꞌãktux ꞌãpax hok.
\v 9 Ha Xaot ꞌãxetꞌax nõy yã Paot kamah, ha Topa Koxuk teꞌ kaꞌogãhãꞌ, yĩy mĩm pẽnã kaꞌok,
\v 10 tu:
\p —‍ꞌÃmũn yã Hãmgãyãgnãg yõg. ꞌÃkuxa kummuk, yã hãmmax hã ꞌãpuknõg. Xate koit pax. Topa teꞌ yõg putat yok mĩy, pãyã xateꞌ koheꞌ mĩy. Paxĩp! ꞌÃhup!
\v 11 Hõnhã Topa te ꞌãkix, ha hãpxip kutõgnãg ꞌĩhã xate hãmpẽnã hok putup, tu ꞌãmnĩy xohix hã mãyõn ꞌũm pẽnãp-tup ꞌohnãg. Kaxĩy.
\p Ha hãpxip ꞌohnãg ꞌĩhã hãmpẽnãmnok, tuꞌ pa hok, tu tikmũꞌũn xak, puyiꞌ yĩm hãꞌ mõgãꞌ,
\v 12 Ha Xet Paot te Topa yõg hãpxopmãꞌax kaꞌok xeꞌẽgnãg pẽnãhãꞌ, huꞌ kuxa yũm kaꞌok Yeyox kopah, tu Topa yõg hãmyũmmũgãꞌax ꞌãpak, tuꞌ yẽy.
\s Tu hãpxexka Pixit yõg kõmẽn ꞌÃtikit tuꞌ tihiꞌ
\p
\v 13 Ha kõmẽn Pap tuꞌ tihiꞌ, ha taꞌ mõg Paot xiꞌ xape xop, tu mĩpkox hãꞌ mõg, tu mõktu mõxaha hãpxexka Pãnpit yõg kõmẽn Pehek tuꞌ, tu mĩpkox hãꞌ mõg ꞌũxeheh, pa Yoãm Mãꞌak teꞌ nĩm, tu putpuꞌ mõg, tu mõktuꞌ xupep Yenoyanẽn tuꞌ.
\v 14 Ha taꞌ mõg Maname xix Paot, Pehek tuꞌ pip, tuꞌ mõg, tu mõktu mõxaha hãpxexka Pixit yõg kõmẽn ꞌÃtikit tuꞌ, tu Yoneo yõg Topa pet hãꞌ mõxakux, nit xap ꞌĩhãꞌ, ha Yoneo xop yõg hãptup xeꞌeꞌ, haꞌ mãm,
\v 15 ha Yoneo yõg tik te Mõyyex yõg xatꞌax mõꞌkupix, xix Topa pupi hãmꞌãktux xop yõg tappet mõꞌkupix, tu mõꞌkupix kux, ha Topa pet yõg tik teꞌ nõy xat, te:
\p —‍ꞌŨgnõy xop, ꞌãyĩy, nũy ꞌõgnũ hãmꞌãktux hã tikmũꞌũn kaꞌogãꞌ. Kaxĩy.
\p
\v 16 Ha Paot tek-nĩhãꞌ xip, tuꞌ yĩm xix, puꞌ nõy tu: “ꞌĨy hok!” kaxĩy. Tu hãmꞌãktux, hu:
\p —‍ꞌIyaet yõg tihik, xik nõy xop, nõm te Topa xak, nõm kuxa teꞌ yẽy Topa keppah, ꞌũg ꞌũm ꞌãpax:
\v 17 Hõmã hãmyãxatamuk punethok hã, ꞌĨyaet yõg Topa te mõnãyxop hittap yĩmõgatux, tu ꞌIyaet yõg tikmũꞌũn xexkanãhã hãpxexka ꞌEyit kopah, tuꞌ puknõg yõg hãpxexka tuꞌ mõy, tu yãy yõg kaꞌokꞌax hãꞌ mõy.
\v 18 Ha tikmũꞌũn max ꞌohnãg, pãyã hãmyãxatamuk te 40 hã Topa te hãpkummuk mĩyꞌax xop hãꞌ tot, hãm panip xexka tu nõꞌãtot, tu mõꞌnĩynãm, tuꞌ nĩm ꞌohnãg,
\v 19 tuꞌ puknõg hep xop te 7 kix hãpxexka Kãnãꞌãg kopah, tuꞌ yõg hãm pop, tu tikmũꞌũn puꞌ hõm, pu tikmũꞌũn mõkputox xohix piꞌ
\v 20 hãmyãxatamuk te 450 hã.
\p Ha hãmyãxatamuk te 450 nõg, ha Topa te tikmũꞌũn pa te hãmyũmmũg kaꞌok xop yĩmõgatux, puyĩy tikmũꞌũn xat, xix Topa pupi hãmꞌãktuxꞌax Xãmõꞌeo yãykutnãhã, puyiꞌ xat.
\v 21 Pa tikmũꞌũn te tik teꞌ xat xexka xak, ha Topa te Xao yãykutnãhãꞌ, yã Meyamĩy yõg Kix kutok pit, haꞌ xexkanãhãꞌ, tu tikmũꞌũn puꞌ hõm, ha hãmyãxatamuk te 40 hã Xao mũn te ꞌIyaet yõg tikmũꞌũn xat.
\v 22 Ha Xao xok, ha Topa te Namix yãykutnãhãꞌ, puyĩy tikmũꞌũn xat, tu hãmꞌãktux, hu: “ꞌÃte Namix putup pax, tuk kuxa hittup Yexe kutok pit hã. Yãꞌ max. ꞌÃteꞌ xat, haꞌ mĩy.” kaxĩy.
\v 23 Ha Namix mõkputox yã Yeyox, ha Topa te ꞌIyaet yõg tikmũꞌũn ha nũꞌkutnãhãꞌ, pu tikmũꞌũn kuxa kummuk xit, nũy kuxa max mõꞌtat ꞌũyãnãn tuꞌ.
\v 24 Yoãm nũn hãmãxap, tup-tox pix, tu ꞌIyaet yõg tikmũꞌũn xohix pu hãmꞌãktux, hu: “ꞌÃpu, yãyhãhup, nũy hãpxop kummuk mĩy kux,” kaxĩy.
\v 25 Pãyã Yoãm te hãpxopmã kux, tu: “Tep kunãy tu hãmpeꞌãpaxex? ꞌAk mũn yã Topa yõg hãmyãykutnãꞌaxꞌah, paꞌ nõy tek peꞌ nũn putup, nõm ꞌũm xexka xeꞌẽgnãg. ꞌÃte yãy kopaxux hãk yũm putup, nũy tu pataxax koaꞌ, pãyãk kutõgnãg, hu yãyhãhup.” Kaxĩy.
\p
\v 26 Yã Paot te xe:
\p —‍ꞌŨgnõy mũnõm xop, ꞌAmanãm mõkputox, xix nõm nõy xop te Topa xak, nõm kuxa teꞌ yẽy Topa keppah: Topa te hãmꞌãpak maxꞌax nũꞌkutnãhã ꞌãhah.
\v 27 Pãyã Yenoyanẽn kopa tihi tikmũꞌũn te hãmyũmmũg ꞌohnãg, xiꞌ yõg xexka xop, ha nit xap xohix ꞌĩhã Topa pet haꞌ mõg, Yoneo xop yõg hãptup xeꞌe ꞌĩhãꞌ mõg, tu Topa yõg tappet mõꞌkupixꞌax ꞌãpak, pãyãꞌ yĩpkox ꞌohnãg, hu Yeyox putup nõg. Hõmã Topa pupi hãmꞌãktux xop hittap te Yeyox xokꞌax ꞌãktux, ha hõnhã Yoneo yõg tikmũꞌũn gãy xop tep-tex, Topa yõg hãmꞌãktux hittap hãp-tex.
\v 28 Yãꞌ gãy nãm Yeyox tuꞌ, tu Pinat tuꞌ xak, pu Yeyox putex, pãyã Yeyox te hãpkummuk ꞌũm mĩy ꞌohnãg.
\v 29 Ha hõmã, Yeyox mũg tut te nõm put ꞌohnãg, ꞌĩhã Topa pupi hãmꞌãktux xop te Yeyox xũyꞌax kaxꞌãmiꞌ, tu tappet tuꞌ kaxꞌãmiꞌ, ha hõnhã Yoneo yõg tikmũꞌũn te Yeyox putex mĩpkupnix tuꞌ, Topa yõg hãmꞌãktux hittap hãp-tex, ha mĩpkupnix tuꞌ xut, tu nõ hãpkot.
\v 30 Pa Topa teꞌ putpuꞌ hĩnnãhãꞌ,
\v 31 ha ꞌãmnĩy xohix hãꞌ mõg, haꞌ xape xop teꞌ pẽnãhãꞌ, nõm te hãmyãxatamuk 3 hã hãpkumep Yeyox mũtik, tu Ganinet tuꞌ pip hãmãxap, tuꞌ nũn, tu nũktu Yenoyanẽn tuꞌ, tu Yeyox putpu hi yãꞌ pẽnãhãꞌ, nũy tikmũꞌũn nõy pu hãmꞌãktux.
\p
\v 32 —‍Hak mũꞌãte hãmꞌãpak max. ꞌax xa nũnnãhãꞌ. Hõmã Topa te yũmũg mõnãyxop pu hãmꞌãktux xex,
\v 33 tu hõnhãꞌ mĩy Yeyox hĩnnãꞌax hã, ha hõmã Topa te hãmꞌãktux xex, ha Topa yõg hãmꞌãktuxꞌax kaxꞌãmi ꞌũktex yõg tappet 2 kopah, hu:
\q “ꞌÃmũn yã ꞌũgkutok.
\q Hõnhã ꞌãte ꞌãmũn yãg kutok ꞌãktux.” Kaxĩy.
\p
\v 34 —‍Tu Yeyox kutox ꞌohnãg ꞌãktux, tu putpuꞌ hi ꞌãktux, hu:
\q “Hõmã ꞌãte Namix pu hãmꞌãktux xex, nũy tu hãmmaxnã xeꞌẽgnãg.” Kaxĩy.
\p
\v 35 Tu xe hãmꞌãktux, hu:
\q “Xatek hep kutox putupꞌah, tuꞌ tux hok puk hep kutox hok, ꞌũgmũn yã ꞌõg kãmãnat max xeꞌẽgnãg hah.” Kaxĩy.
\p
\v 36 Tu xe:
\p —‍Ha Namix te Topa pu hãpxopmãhãꞌ, tu hãpxopmã kux, tuꞌ xok, ha mõnãyxop mũtik nõ hãpkot, hak-tox,
\v 37 pãyã Topa te Yeyox hĩnnãhã putpuꞌ, ꞌak-toxꞌah.
\v 38 ꞌŨnõy mũnõm xop, ꞌãte xa hãmyũmmũgãp-tup: Topa te ꞌõg hãpkummuk mĩyꞌax xaxogãp-tup, tu Yeyox puxet hãꞌ xaxogãp-tup, pu tuꞌ kux.
\v 39 Tikmũꞌũn kuxa yũm kaꞌok Yeyox kopah, puxix Topa nõm hãpkummuk mĩyꞌax xaxogãꞌ, pu tuꞌ kux. Mõyyex yõg xatꞌax hittap puꞌuk, tu hãpkummuk mĩyꞌax ꞌũm xaxogã hok, pãyã Yeyox kaꞌok.
\v 40 ꞌÕg pa mõxip! ꞌÃyĩpkox pip, nũy Topa gãyꞌax pẽnã hok, ha Topa tappet te:
\q
\v 41 “Nãy, xa hip, ꞌãxop yĩxix kummuk xop, ꞌãxop kuxa mãm ꞌohnãg xop.
\q ꞌÃpu ꞌãkuxa yẽy, nũy yãy xaxogãꞌ, haꞌ kux.
\q Hõnhã ꞌãte hãpxopmãp-tup,
\q ha tik ꞌũm te xa hãmꞌãktuxꞌax,
\q pãyã ꞌãkuxa mãm ꞌohnãg. ꞌŨkux. Kaxĩy.”
\p
\v 42 Tu hãmꞌãktux kux, ha tikmũꞌũn te Paot tuꞌ xak, pu nit xap nõy ꞌĩhã hãmꞌãktux ꞌũxeheh. Tuꞌ mõg.
\v 43 Ha Yoneo yõg tikmũꞌũn punethok yĩpkox pip, xiꞌ puknõg te Topa xak xop, nõm te Yoneo xop hãꞌ mõxakux, tu Paot peꞌ mõg, xix Manameꞌ, nũy hãmꞌãktuxꞌax ꞌãpax, ha tikmũꞌũn yũmmũgãhãꞌ, puyĩꞌ kuxa mãm kaꞌok xeꞌẽgnãg Yeyox kopah.
\p
\v 44 Ha nit xap nõy ꞌĩhã kõmẽn ꞌÃtikit yõg tikmũꞌũn xohix te yãy tu nũꞌnãhãꞌ, nũy Topa te hãmꞌãktux ꞌãpax,
\v 45 ha Yoneo xop teꞌ xohix pẽnãhãꞌ, tuꞌ yĩpkumĩy, tu Paot mãnõg, hu:
\p —‍Paot te mõꞌãmãꞌ, yãꞌ kummuk. ꞌŨxupax hok. Kaxĩy.
\p
\v 46 Pa Paot te hãmꞌãktux kaꞌok xix Manameꞌ, tuꞌ yĩpkutuk ꞌohnãg, tu:
\p —‍Hõmã Topa tek xat, hu: “ꞌÃpu, yõgnũ hãmꞌãktuxꞌax ꞌãktux Yoneo xop pu hãmãxap,” kaxĩy. Pãyã ꞌãyĩpkox ꞌohnãg, tu ꞌãkuxa hi xeꞌẽgnãg putup nõg, yĩk mũg mõg hãmpuknõg xop hah, ꞌũyĩy hãmꞌãpak maxꞌax ꞌãpax, nũy yĩpkox piꞌ, nũy kuxa mãm kaꞌok Yeyox kopah.
\v 47 ꞌŨgmũg xuxyã tek xat, hu: “ꞌÃte mõꞌãpok puꞌ puknõg xop pu hãmyũmmũgãꞌ, xaꞌ hittupmãꞌ, nũy nõm xop pu Topa yõg hãmꞌãpak maxꞌax ꞌãktux, xix hãpxexka xohix yõg xop pu hãmꞌãktux, ꞌũyĩy tikmũꞌũn kuxa kummuk xit, nũy kuxa max tat ꞌũyãnãn tuꞌ,” kaxĩy. ꞌŨkux.
\p
\v 48 Haꞌ puknõg xop te hãmꞌãpak, tuꞌ kuxa hittup, tu Topa yõg hãmꞌãktux ꞌãktux max. Hõmã Topa te nõm yĩmõgatux, puꞌ kuxa tu mãm kaꞌok Yeyox kopah, nũy hi xeꞌẽgnãg mõꞌkumaꞌ mõg.
\p
\v 49 Ha Topa yõg hãmꞌãktuxꞌax ꞌãktux hãpxexka xohix tuꞌ,
\v 50 pãyã Yoneo xop te Yoneo xexka xop xix ꞌũn xexka xop pu hãmꞌãktux, hu:
\p —‍ꞌÃpu, tik kummuk xat, pu mõg hãptox tuꞌ. Kaxĩy.
\p Ha ꞌũn xop te Paot putup nõg, xix Manameꞌ, tuꞌ xat, pu mõg hãptox tuꞌ.
\v 51 ꞌŨmõg, tu hãmnak ha pataxax mõy, tuk-toꞌok, pu hãpkõnõn nũnnãy, nũy Yoneo xop yõg hãpkummuk mĩyꞌax ꞌãktux. Tuꞌ mõg, tu mõktu mõxaha kõmẽn ꞌIkõn tuꞌ,
\v 52 haꞌ kuxa mãm kaꞌok xop kuxa hittup xeꞌẽgnãg, yã Topa Koxuk teꞌ kaꞌogãhãꞌ.
\c 14
\s Tu ꞌIkõn tuꞌ tihiꞌ
\p
\v 1 Tu kõmẽn ꞌIkõn tuꞌ tihiꞌ, tu Topa pet hãꞌ mõꞌnãhãꞌ, tu hãmꞌãktux max, yĩy Yoneo yõg tikmũꞌũn xohix xexkaꞌ, xix Genex yõg puknõg xop xohix xexka kuxa mãm kaꞌok Yeyox kopah.
\v 2 Pa Yoneo yõg tik ꞌũm kuxa mãm ꞌohnãg, tuꞌ kuxa mãm xop putup nõg, huꞌ kummuk ꞌãktux ꞌũpuknõg xop puꞌ, nũy gãyãꞌ.
\v 3 Ha ꞌãmnĩy punethok hãꞌ tihiꞌ, tu yũmũg xuxyã ꞌãktux, tuꞌ xuxyã te hãmmaxnã ꞌãktux, yã hãpxeꞌe ꞌãktux, ha Yeyox te mõꞌpok xop yõg hãmꞌãktux putup, huꞌ kaꞌogãhãꞌ, puyĩy hãpxopmã kaꞌok xeꞌẽgnãg, pu tikmũꞌũn xohix pẽnãꞌ.
\v 4 Ha tikmũꞌũn te hãmpeꞌpanõm, haꞌ yãg te: “Yoneo xop mũn max,” kaxĩy. Haꞌ yãg nõy te: “Hamũnꞌah. Pãyã Yeyox yõg tik xop mũn max,” kaxĩy.
\p
\v 5 Haꞌ puknõg xop xix Yoneo xop xiꞌ yõg xexka xop te mõꞌpok xop kummugãp-tup, tu mĩkaxxap xexka hãꞌ tux putup, nũy kix,
\v 6 haꞌ xupak, tu nũꞌpahaꞌ, tu mõktu mõxaha hãpxexka Nikõn yõg kõmen Nixtat tuꞌ, xix kõmẽn Nep tuꞌ, xix hãm yĩmap tuꞌ,
\v 7 tu Yeyox yõg hãmꞌãpak maxꞌax ꞌãktux.
\s Tu kõmẽn Nixtat xix kõmẽn Nep tuꞌ tihiꞌ
\p
\v 8 Ha Nixtat kopaꞌ xip tik ꞌũm te hãpkumep ꞌohnãg, ha hãmyãxatamuk xohix hãꞌ mõg ꞌohnãg, ꞌũhiꞌax tox hã, yãꞌ yũm kaꞌok,
\v 9 tu Paot yõg hãmꞌãktuxꞌax ꞌãpak, tuꞌ kuxa yũm kaꞌok ꞌũhittupmãꞌax kopah, ha Paot teꞌ pẽnã kaꞌok, tuꞌ nõy kuxa yũm kaꞌok pẽnãhãꞌ,
\v 10 tuꞌ yĩy kaꞌok, tu:
\p —‍ꞌÃk-nĩhã xihip! Kaxĩy.
\p Haꞌ yok, tuk-nĩhãꞌ xip mõꞌkaꞌok, tuꞌ mõg kõnãmãhã nõmhã, tu hãpkumep.
\v 11 Ha tikmũꞌũn teꞌ pẽnãhãꞌ, tuꞌ yĩy kaꞌok, tu hãmꞌãktux Nikõn yĩyꞌax hã, hu:
\p —‍Yã topahnãg te mõxahaꞌ, tu tikmũꞌũn mũtik yãy putuk! Kaxĩy.
\p
\v 12 Tu Maname puꞌ mĩy ꞌũxuxetꞌax nõy, hu: “Yop”, xix Paot puꞌ, hu: “Mẽkot”, hãmꞌãktux punethok hah.
\v 13 Ha topahnãg Yop yõg ꞌãmãnex nũn, ha topahnãg pet te kõmẽn kunãpaꞌ yũm, ha mũnũytut pit nũnnãhãꞌ, xix mĩnnut max, tu hãmpeꞌpaxex, hu: “Nõm tik 2 yã topahnãg, ha ꞌãte mũnũytut pit kix putup, nũy nõm topahnãg 2 pu mõꞌhap, nũy haxyãꞌ, nũy heyah Nixtat yõg tikmũꞌũn mũtik,” kaxĩy.
\v 14 Pa tik nõy te mõꞌpok xop puꞌ xuktux, haꞌ xupak, hu yãy tu topixxax pot, nũy kuxa hittup ꞌohnãg ꞌãktux, tu tikmũꞌũn haꞌ mõg, tuꞌ yĩy kaꞌok, tu:
\p
\v 15 —‍ꞌÃhup! Putep mũn mĩy putup? ꞌAk mũn yã Topaꞌah, yãk mũn tihik, ꞌãxop putuk, tu hãmꞌãpak maxꞌax ha xaꞌ nũnnãhãꞌ, xa ꞌãnĩm hãpxop ꞌũm ꞌãyĩm hãꞌ mĩy, nũy heyah, xa Topa xeꞌẽgnãg xax, yãꞌ hi xeꞌẽgnãg, nõm te hãmnõgnõy mĩy, xix hahãm, xix kõnãg xexkaꞌ, xix hãpxop xohix kopaꞌ pip.
\v 16 Hõmã tikmũꞌũn xop xohix te hãpxopmã xohix, ꞌap Topa teꞌ kuxyãꞌah, paꞌ tux hok pu mĩy, nũy yãy putat hãꞌ mõg,
\v 17 ha xaꞌ nũꞌkutnãhã tehex, xayĩy hãpxop ta nũnnãy ꞌãpet hah, nũy ꞌãxit, nũy ꞌãkuxa hittup. Kaxĩy.
\p
\v 18 Ha Paot te Nixtat yõg tik xat hok, pu mõꞌhap hok yãy puꞌ, xix Maname puꞌ, nũy heyah.
\v 19 Ha ꞌÃtikit yõg Yoneo xop nũn, xix ꞌIkõn yõg xop, tu Nixtat yõg tikmũꞌũn pu hãmꞌãktux, tuꞌ gãyãhã Yeyox yõg mõꞌpok xop hãꞌ, ha tikmũꞌũn te mĩkaxxap xexka tux punethok, nũy Paot putex, ha hãm tuꞌ nãhãꞌ, tuꞌ xok putũmnãg, ha tikmũꞌũn te Paot hãm manit haꞌ mõg, tu kõmẽn kotit hãꞌ xut, tuk-nãpaꞌ mõg, tu hãmpeꞌpaxex, hu: “Nõmhãꞌ xok xeꞌeꞌ,” kaxĩy.
\v 20 Paꞌ kuxa mãm kaꞌok xop te yãy tu nũꞌnãhãꞌ, tu Paot yĩmap hãꞌ pip, ha Paot yũm, tuꞌ yok, tuk-nĩhãꞌ xip, tuꞌ xupep putpu kõmẽn tuꞌ, tu hãptup ꞌĩhã Maname mũtik mõg, tu mõktu mõxaha Nep tuꞌ.
\s Tu Xit xix ꞌÃtikit ha putpuꞌ mõg
\p
\v 21 Tu Yeyox yõg hãmꞌãpak maxꞌax ꞌãktux, ha Nep yõg tikmũꞌũn punethok kuxa mãm kaꞌok Yeyox kopah, ha hãmꞌãktux kux, ha putpuꞌ mõg, tu mõktu mõxaha Nixtat tuꞌ, tuꞌ mõg tu mõktu mõxaha ꞌIkõn tuꞌ, tuꞌ mõg, tu mõktu mõxaha ꞌÃtikit tuꞌ.
\v 22 Tu hãmꞌãktux xeꞌeꞌ, tu hãmyũmmũgãhãꞌ, puyĩꞌ kaꞌogãꞌ, nũy kuxa mãmmã kaꞌok Yeyox kopah, ha hãmꞌãktux, hu:
\p —‍Nõm xop te Yeyox pu yĩpkox pip, puxiꞌ xũyꞌax hãꞌ tot, ꞌĩhã pexkox haꞌ mõg. Kaxĩy.
\p
\v 23 Ha Paot te tik pẽnã max xop yĩmõgatux, ꞌũkuxa mãm kaꞌok xop xohix kopaꞌ yĩmõgatux, tuꞌ xat, puꞌ nõy xop pẽnã max, nũy tu xeh, ha Topa pu hãmꞌãktux, huꞌ xit hok hã hãmꞌãktux, tuꞌ pẽnã max xop pu:
\p —‍ꞌÃkuxa mãm kaꞌok Topa kopah. Pũyã hõnhã Topa ꞌãmõgãꞌ, xix ꞌãpẽnãꞌ, xix ꞌãnĩm hok! Kaxĩy.
\p
\v 24 Tu taꞌ mõg, Pixit kotit hãꞌ mõg, tu mõktu mõxaha Pãnpit tuꞌ.
\v 25 Tuꞌ mõg, tu mõktu mõxaha Pehek tuꞌ, tu Topa yõg hãmꞌãktuxꞌax ꞌãktux, tuꞌ mõg, tu mõktu mõxaha ꞌAtat tuꞌ, tu hãpxopmãhãꞌ, tu yãꞌ kux,
\v 26 tu mĩpkox hãꞌ mõg, nõm te kõnãg yĩmũꞌ mõg, ha mõktu mõxaha hãpxexka Xit yõg kõmẽn ꞌÃtikit tu putpuꞌ, nũy Topa yõg hãpxopmãꞌax kaꞌok xeꞌẽgnãg ꞌãktux, nũy kuxa mãm kaꞌok xop puꞌ xuktux. Hõmã ꞌÃtikit yõg kuxa mãm kaꞌok xop te Topa tuꞌ xak, pu Paot pẽnã max, xix Maname pẽnã max, ha mõꞌpok, pu hãmꞌãpak maxꞌax ꞌãktux kõmẽn xohix tuꞌ, tuꞌ mõg tap, tu hãpxopmãhãꞌ, tu ta putpuꞌ nũn ꞌũxeheh.
\v 27 Ha ꞌÃtikit tuꞌ mõxahaꞌ, tuꞌ kuxa mãm kaꞌok xop xãnãhãꞌ, haꞌ nũn tu nũktu nũꞌnãhãꞌ, ha tik te hãmꞌãktux, tu Topa yõg hãpxopmãꞌax xohix ꞌãktux, tu Topa teꞌ puknõg xop pu yãy yõg putat yok mĩy ꞌãktux, tuꞌ puknõg kuxa mãm kaꞌok Yeyox kopa ꞌãktux.
\v 28 Tu ꞌãmnĩy xohix hãꞌ nox ti kuxa mãm kaꞌok xop mũtik ꞌÃtikit kopah.
\c 15
\s Tu Kõmẽn Yenoyanẽn xop mũtik yãykotĩnnãhãꞌ
\p
\v 1 Hãpxip kutõgnãg ꞌĩhã Yonex yõg tikmũꞌũn nũn, tu nũktu mõxaha ꞌÃtikit tuꞌ, tuꞌ nõy xop yũmmũgãhãꞌ, hu:
\p —‍ꞌÃxop yã puknõg. ꞌÃpu, tik xop nãg xax mep ꞌũyĩmap, puyĩy Topa ꞌãxop kuxa kummuk xit, nũy ꞌãkuxa max tat ꞌũyãnãn tuꞌ. Mõyyex yõg xatꞌax hittap te ꞌãxat, yĩy hõmã xix hõnhã, hãmyãxatamuk xohix punethok hã, Yoneo tik xop xohix teꞌ mĩy, yã kakxop pit ꞌĩhãꞌ mĩy. Kaxĩy.
\p
\v 2 Pa Paot xix Maname te:
\p —‍Kaxĩy hok! ꞌÃmhok! Topa teꞌ puknõg xop xat ꞌohnãg, pu yãy xax xak. Kaxĩy.
\p Tu hãmꞌãktux hãꞌ nõy yãnãn nãm punethok, haꞌ kuxa mãm kaꞌok xop te Paot xix Maname yĩmõgatux, tu mõꞌpok, xix ꞌÃtikit yõg nõy xop mõꞌpok, puꞌ mõg Yenoyanẽn tuꞌ, nũy Yeyox yõg tik xop yĩkopit, xix tik pẽnã max xop yĩkopit.
\v 3 Tu taꞌ mõg, Penix kotit hãꞌ mõg, xix Xãmãnit kotit hãꞌ mõg, tuꞌ puknõg xop te Topa haꞌ mõg ꞌãktux, haꞌ kuxa mãm xop xohix hittup xexkaꞌ.
\v 4 Ha mõktu mõxaha Yeyoyanẽn tuꞌ, haꞌ kuxa mãm kaꞌok xop hittup xexka kamah, xix Yeyox yõg mõꞌpok xop, xix tik pẽnã max xop, ha Paot te Topa yõg hãpxopmãꞌax ꞌãktux, Topa te hãpxopmã Paot hã, xix Maname hã, yĩꞌ xuktux.
\v 5 Pa Paniye yõg kuxa mãm kaꞌok xop tek-nĩhãꞌ pip, tu:
\p —‍Topa teꞌ xat, pu tik xop nãg xax yĩmap mep. ꞌÃpu, hãmpuknõg yõg tik xop xax mep kutõgnãg, nõm xop kuxa mãm kaꞌok Yeyox kopah, puyĩy Mõyyex yõg xatꞌax hittap xohix puꞌ yĩpkox piꞌ. Kaxĩy.
\p
\v 6 Ha mõꞌpok xop, xix tik pẽnã max xop nũn, tu nũktu nũꞌnãhãꞌ, nũy hãmpe tu pãnõm.
\v 7 Tu hãmꞌãktux hãꞌ nõy yãnãn nãm, ha Pet tek-nĩhãꞌ xip, tu:
\p —‍ꞌŨkxape xop: Hõmã Topa tek yãykutnãhã ꞌãxop kopah, ꞌãxop teꞌ yũmmũg, ha mõgkutnãhãꞌ, ꞌũ hãmꞌãpak maxꞌax ꞌãktux hãmpuknõg xop puꞌ, haꞌ puknõg xop te hãmꞌãpak, tuꞌ yĩpkox pip, tuꞌ kuxa mãm kaꞌok Yeyox kopah.
\v 8 Topa te tikmũꞌũn xop kuxa yũmmũg, tu Topa Koxuk nũꞌkutnãhãꞌ puknõg xop hah, ꞌũgmũg putuk,
\v 9 haꞌ puknõg xop te Yoneo yõg tikmũꞌũn mũtik yãy putuk Topa puꞌ, tuꞌ kuxa mãm kaꞌok Yeyox kopah, ha Topa teꞌ yõg hãpkummuk mĩyꞌax xaxogãhãꞌ, pu tuꞌ kux.
\v 10 Tep tu ꞌãkuxa mãm ꞌohnãg Topa yõg hãpxopmãꞌax kopah? Mõyyex yõg xatꞌax xohix tox xexkaꞌ, yũmũgꞌãte yãy yũmmũgã hok, ꞌap mĩy yũmmũgꞌah, xix mõnãyxop teꞌ mĩy hok kamah. Tep tu ꞌãxop teꞌ puknõg xop xat, ꞌĩhãg mũꞌãte Mõyyex yõg xatꞌax xohix mĩy hok? ꞌAp maxꞌah nũhuꞌ.
\v 11 Pãyã yũmũg xuxyã Yeyox teꞌ hok hã hãmmaxnãhãꞌ, tu yũmũg kuxa kummuk xit, xiꞌ puknõg xop kuxa kummuk xit kamah, nũy yãnãn tuꞌ kuxa max tat, yã yãy putuk. Yũmũg xuxyã Yeyox teꞌ hok hãꞌ yãnãn, nõm xop kuxa mãm kaꞌok nõm kopah. Kaxĩy.
\p
\v 12 Ha tik xop yĩy ꞌohnãg, yĩy Maname yõg hãmꞌãktuxꞌax ꞌãpak, xix Paot yõg, ha Topa te hãpxopmã xeꞌẽgnãg, puyĩꞌ puknõg xop pẽnãꞌ, ha tik mõꞌpokꞌax teꞌ xuktux,
\v 13 tu hãmꞌãktux kux, ha Tiak te:
\p —‍ꞌŨkxape xop, ꞌũgꞌãpax:
\v 14 Xĩnãm te xa hãmꞌãktux, hu: “Topa teꞌ puknõg xop mõꞌyãy xeꞌẽgnãg, tu ꞌãꞌ hãmyũmmũgãhã hãmãxap, tu nõm xop yĩmõgatux hãmpuknõg xop kopah, ha yãyhã Topa yõg tikmũꞌũn,” kaxĩy.
\v 15 Hõmã tik hittap te Topa pupi hãmꞌãktux kamah, hu:
\q
\v 16-18 “Hõmã, hãmyãxatamuk xohix ꞌĩhã, Topa te hãmꞌãktux, hu:
\q ‘Hõmã ꞌãte mõnãyxop Namix xexkanãhãꞌ,
\q haꞌ yõg tikmũꞌũn tek xak,
\q ha hõnhãk nũn putup,
\q tu Namix mõkputox puxet xexkanãp-tup, puyĩꞌ hep xohix xop ꞌũk xax,
\q ha ꞌãte nõm puknõg xop mõꞌyãy xeꞌẽgnãg,
\q tuꞌ nõy yãy, nũy yãy ꞌãxetꞌax mĩy yõgnũ tikmũꞌũn,’ ” kaxĩy. ꞌŨkux.
\p
\v 19 Ha Tiak te xe hãmꞌãktux, hu:
\p —‍ꞌÃte ꞌãpekpaxex. Yãꞌ max hãmpuknõg xop kuxa mãm kaꞌok xop te Yoneo yõg xatꞌax mĩy hok, xix mõnãyxop yõg hãpxopmãꞌax tat hok kamah, nũy kuxa mãm puxehnãg Yeyox kopah.
\v 20 ꞌÃpu, yũmũꞌãte tappet kaxꞌãmiꞌ kuxa mãm kaꞌok xop puꞌ, nũy tuꞌ xat hok, puꞌ mã hok topa komut xop xitꞌax, xix xok xop ꞌũm mãy mũg tup-tex mã hok, xix xokxop hep ꞌãta mã hok, xiꞌ nõy hãꞌ xupxet hok.
\v 21 Yã nit xap xohix ꞌĩhã Yoneo xop te Mõyyex yõg xatꞌax mõꞌkupix Topa pet kopah, tu Mõyyex te hãmꞌãktux ꞌãktux kõmẽn xohix kopah. Yãꞌ puxiꞌ. ꞌŨkux. Kaxĩy.
\s Tu tappet tu kaxꞌãmiꞌ
\p
\v 22 Ha mõꞌpok xop, xix tik pẽnã max xop, xiꞌ kuxa mãm kaꞌok xop xohix te Tiak yõg hãmꞌãktuxꞌax ꞌãpak, tup-tox puxet, hu tik 2 yĩmõgatux, pu Paot xix Maname mũtik mõg, tu ꞌÃtikit tu mõꞌpok, ha tik 2 ꞌãxetꞌax Yot Maxamax, xix Xinax, haꞌ xape xop tep-tup pax, tu nõm peꞌpaxex max.
\v 23 Ha kaxꞌãmiꞌ kuxa mãm kaꞌok xop puꞌ, tu tik hã mõ tappet kutnãhãꞌ, ha tappet tu kaxꞌãmiꞌ, hu:
\p “Yeyox yõg mõꞌpok xop xix tik pẽnã max xop te ꞌãneo, ꞌũkxape xop pu ꞌãneo, ꞌÃtikit yõg kuxa mãm kaꞌok xop, xix Xit yõg kuxa mãm kaꞌok xop, xix Xinix yõg kuxa mãm kaꞌok xop pu ꞌãneo.
\p
\v 24 ꞌŨgmũꞌãteꞌ nõy xop yõg hãmꞌãktuxꞌax ꞌãpak, nõm te nũnteꞌ tihiꞌ, tu ꞌãhãꞌ mõg, tu ꞌãxat, hu: ‘ꞌÃpu, tik xop xohix yãy xax mep kutõgnãg, pu Topa ꞌãkummuk mĩyꞌax xaxogã ꞌũyãnãn tuꞌ,’ kaxĩy. Ha ꞌãkuxa hittup ꞌohnãg. ꞌAk mũꞌãte nõm Yoneo tik xop mõꞌpokꞌah, ꞌak mũn te ꞌãxatꞌah.
\v 25 Hu hõnhãk mũꞌãte xohix te tik 2 yĩmõgatux, pu xa mõꞌpok, ha Paot, xix Maname mũtik mõg. ꞌÃxohix te Paot putup pax, xix Manameꞌ, tu nõm peꞌpaxex max.
\v 26 Yãꞌ hi Yeyox tuꞌ, yã yãy xuxyãꞌ, yĩy xe yãy yõgꞌah. Yeyox teꞌ xat, pu mõg, haꞌ mõg, ꞌok peꞌ hiꞌ, ꞌok peꞌ xok.
\v 27 Hak mũꞌãte Xinax mõꞌpok, xix Yot, ha xaꞌ xohix hãmyũmmũgãp-tup.
\v 28 Ha Topa Koxuk te ꞌãxat hãmãxap, hak-nãy tuk mũꞌãte, hu:
\v 29 ꞌŨmã hok topa komut xop xitꞌax, xix xokxop ꞌũm mãy mũg tup-tex mã hok, xix xokxop hep ꞌãta mã hok, tu ꞌãnõy hã xupxet hok. Puxiꞌ, yãꞌ max. Haꞌ kux.” Kaxĩy.
\p
\v 30 Ha taꞌ mõg tik xop, tu mõktu mõxaha ꞌÃtikit tuꞌ, haꞌ kuxa mãm kaꞌok xop te yãy tu nũꞌnãhãꞌ, nũy mõꞌpok yõg tappet mõꞌkupix,
\v 31 tu mõꞌkupix kux, haꞌ kuxa hittup xexkaꞌ.
\v 32 Ha Yot xix Xinax yã Topa pupi hãmꞌãktux xeꞌeꞌ, tuꞌ xape xop kaꞌogãhãꞌ.
\v 33 ꞌÃmnĩy kutõgnãg ꞌĩhãꞌ tihiꞌ, tu putpuꞌ mõg, tu mõktu mõxaha Yenoyanẽn tuꞌ.
\v 34 Pa Xinax mõgꞌah, tuꞌ nox xip ꞌÃtikit tuꞌ.
\p
\v 35 Ha Paot xip ꞌÃtikit tuꞌ, xix Manameꞌ, tuꞌ nox tihiꞌ, tu hãmyũmmũgãhãꞌ, nũy Topa yõg hãmꞌãktuxꞌax ꞌãktux, ꞌũnõy xop mũtik.
\s Paot xix Maname te yãy xatat
\p
\v 36 Ha ꞌãmnĩy punethok nõg, ha Paot te Maname pu hãmꞌãktux, hu:
\p —‍ꞌÃpu, yũmũ mõg putpuꞌ, nũy xape xop xohix pẽnãꞌ, nũy kõmẽn xohix kopaꞌ pẽnãꞌ, nũy Topa yõg hãmꞌãktuxꞌax xe ꞌãktux. Kaxĩy.
\p
\v 37 Ha Maname te Yoãm Mãꞌak mõgãp-tup,
\v 38 pa Paot tep-tup nõg. Hõmã Yoãm Mãꞌak teꞌ nĩm Pãnit tuꞌ, tu hãpxopmã ꞌohnãg.
\v 39 Ha Paot te hãmꞌãktux hãꞌ nõy yãnãn Maname mũtik, tuꞌ gãy, ha Maname gãy, tu yãy xatat, ha Maname te Yoãm Mãꞌak mõgãhãꞌ, tuꞌ mõg, tu mĩpkox hãꞌ mõg, nõm te kõnãg xexka yĩmũꞌ mõg, tu mõktu mõxaha hãmyĩn yũm ꞌãxetꞌax Xip tuꞌ.
\v 40 Pa Paot te Xinax yãykutnãhã pu mõg, haꞌ nõy xop te:
\p —‍Pũyã Topa ꞌãmũtik mõg. Kaxĩy.
\p
\v 41 Haꞌ mõg, tu Xit kotit hãꞌ mõg, xix Xinit kotit hãꞌ mõg, tuꞌ kuxa mãm xop kaꞌogãhãꞌ.
\c 16
\s Tĩmõn te Paot mũtik mõg, xix Xinax
\p
\v 1 Tuꞌ mõg, tu mõktu mõxaha kõmẽn Nep tuꞌ, xix kõmẽn Nixtat tuꞌ, ha tik ꞌũm xip, ꞌũxuxetꞌax Tĩmõn, tuꞌ kuxa yũm kaꞌok Yeyox kopah, tuꞌ mũg tut Yoneo hex, pãyãꞌ tak Genex yõg, tu Yoneo xop hãꞌ puknõg.
\v 2 Ha Nixtat tuꞌ pip xape xop te Tĩmõn putup pax, xix ꞌIkõn yõg xop teꞌ,
\v 3 ha Paot teꞌ mõgãp-tup yãy mũtik, huꞌ nõy yãy xax yĩmap xak kutõgnãg, nũy Yoneo xop gãyã hok, yãꞌ xohix te Tĩmõn mũg tak yãꞌ puknõg yũmmũg.
\v 4 Ha taꞌ mõg kõmẽn tuꞌ, tu Yeyox yõg mõꞌpok xop, xix Yenoyanẽn yõg tik pẽnã max xop pupi hãmyũmmũgãhãꞌ, tuꞌ xape xop pu hãmyũmmũgãhãꞌ,
\v 5 Haꞌ xape xop kuxa mãm kaꞌok Yeyox kopah, ꞌĩhãꞌ xohix nõy nãꞌ mõg.
\s Tik xop te kõmẽn Tonot haꞌ mõg
\p
\v 6 Ha taꞌ mõg, tu mõktu hãpxexka Pinik kotit hãꞌ mõg, xix hãpxexka Ganax kotit hãꞌ mõg, ha Topa Koxuk te hãmꞌãktux xat hok, hu:
\p —‍ꞌAx yõg kõmẽn kopa hãmꞌãktux hok! Kaxĩy.
\p
\v 7 Ha taꞌ mõg, tu mõktu mõxaha Mĩy tuꞌ, tuꞌ mõg putup Mitĩn tuꞌ, pa Yeyox Koxuk teꞌ xat hok, pu mõg hok.
\v 8 ꞌAp mõgꞌah, tu Mĩy hãꞌ yẽn hãꞌ mõg, tu mõktu Tonot tuꞌ mõxahaꞌ.
\v 9 Ha ꞌãmnĩy hã Paot te yãy koxuk hã hãpxexka Mãxenõn yõg tik pẽnãhãꞌ, hak-nĩhãꞌ xip, tu Paot tuꞌ xak, hu:
\p —‍Mãꞌ! Mãxenõn tu ꞌãnũꞌ, nũy mõy ꞌũgmũg nĩynãm. Kaxĩy.
\p
\v 10 Hãpxip ꞌohnãg ꞌĩhã Paot koxuk teꞌ pẽnã kux, hak mũg mõg putup Mãxenõn tuꞌ, tu hãmpeꞌpaxex, hu: “Topa tek mũg xãnãhãꞌ, ꞌũ Yeyox yõg hãmꞌãpak maxꞌax ꞌãktux Mãxenõn yõg tikmũꞌũn puꞌ,” kaxĩy. (Hak mũn Nok te kaxꞌãmiꞌ.)
\s Tu kõmẽn Pinio tuꞌ tihiꞌ
\p
\v 11 Tuk mũg pip Tonot kopah, tuk mũg mõg mĩpkox hã, kõnãg xexka yĩmũꞌ mõg, tu mõktu hãmyĩn yũm ꞌãxetꞌax Xãmõtanax tuꞌ mõxahaꞌ. Hãptup ꞌĩhãg mũg mõg, tu mõktu mõxaha kõmẽn Nẽyap tuꞌ.
\v 12 Tuk mũg mõg, tu mõktu mõxaha hãpxexka Mãxenõn yõg kõmẽn te mãxap Pinio tuꞌ, haꞌ yõg gohet yã hãpxexka Hõm yõg, ha ꞌãmnĩy punethok hak mũg tihi Pinio kopah.
\v 13 Tu nit xap ꞌĩhãk mũg mõg kõmẽn kunãpaꞌ, tu Topa yõg hãmꞌãktuxꞌax pet xak, nũy Topa pu hãmꞌãktux, ꞌĩhã kõnãgkox tuꞌ mõxahaꞌ, hu kõnãg kux tuk mũg mãm, ha ꞌũn pip, hak mũꞌãte ꞌũn mũtik hãmꞌãktux.
\v 14 Ha kõmẽn Tittit yõg ꞌũn xip, tu topixxax max hãmenex, ꞌũxuxetꞌax Nit, tu Topa xak, tuꞌ kuxa teꞌ yẽy Topa keppah, tu Yeyox hãmꞌãpak maxꞌax ꞌãpak, ha Topa teꞌ kuxa tupmãhãꞌ, yĩy Paot yõg hãmꞌãktuxꞌax ꞌãpak, tuꞌ yĩpkox xip,
\v 15 hap-tox pix, xiꞌ xape xop ꞌũpet kopa tihiꞌ xop putox pix, haꞌ xak, hu:
\p —‍ꞌŨgkuxa yũm kaꞌok Yeyox kopah, yĩy ꞌũkpet ha mõg, nũy nox piꞌ. Kaxĩy.
\p Hak mũg mõg Nit pet hah.
\s Tu kanet kopaꞌ tihi kõmẽn Pinio tuꞌ
\p
\v 16 ꞌÃmnĩy kutõgnãg nõg, ꞌĩhãk mũg mõg Topa pet hah, haꞌ mĩm hex te putat hãꞌ nũn, tu yãmĩy pupi hãmꞌãktux, tu hãpxopmãꞌax pẽnã hok ꞌãktux, tu hãmꞌãktux hã tayũmak xexka pop, tu tik xop ꞌũm puꞌ popmãhãꞌ, tu nõm tik xop puꞌ hok hãꞌ hãm.
\v 17 Tu Paot peꞌ mõg, xik mũg peꞌ mõg, tuꞌ yĩy kaꞌok, hu:
\p —‍Nũ tik xop te Topa xeꞌẽgnãg hã kãmãnat, hu xa hãmyũmmũgãp-tup, nũy Topa yõg putat hã ꞌãmõgãꞌ. Kaxĩy.
\p
\v 18 Tu xe hãmꞌãktux hã kaxĩy, ꞌãmnĩy xohix hãꞌ xuktux, ha hãmꞌãktux kux ꞌohnãg, yĩy Paot gãy, tuꞌ yõkãnãm, tu yãmĩy kummuk mãnõg, hu:
\p —‍Hõmã Yeyox te yãmĩy kummuk mõy tikmũꞌũn kopah, tuꞌ mõg pexkox tuꞌ, tuk mũꞌã yãy ꞌãxetꞌax hõm, pu yãmĩy kummuk mõy, hu ꞌãte ꞌãxat, hu: ꞌÃpep, nũy mĩm hex ꞌãpeꞌ nĩm. Kaxĩy.
\p Haꞌ nĩm, tuꞌ mõg xupahaꞌ.
\v 19 Pa tik xop nõy te mĩm yõg tayũmak xak, huꞌ gãy xexkah, tu Paot mũg, xix Xinax, tuꞌ xexka xop keppaꞌ mõgãhãꞌ, haꞌ xexka xop te kõmẽn yõg hãmnuknõg tuꞌ pip,
\v 20 ha tik xop gãy, tuꞌ kupex, hu:
\p —‍Nũ tik yã Yõneo yõg xop, tu kõmẽn Pinio yõg tikmũꞌũn gãyãhãꞌ, tu hãpxopmã kummuk yũmmũgãhãꞌ,
\v 21 ha Hõm yõg gohet te nõm hãpxopmãꞌax putup nõg, tuꞌ xat hok, ꞌũ mĩy hok, hak mũꞌãte Hõm yõg tikmũꞌũn. Kaxĩy.
\p
\v 22 Ha tikmũꞌũn te yãy tu nũꞌnãhãꞌ, tup-tox puxet, nũy Paot kix, xix Xinax kix, ha kõmẽn yõg xexka xop te tik yõg topixxax koxip, tuꞌ mõy, tuꞌ xat, pu kix mĩm mũnãg hã.
\v 23 Tuꞌ kix kakixnãg, tu kanet haꞌ mõgãhãꞌ, tu kanet yõg xonat xat, hu:
\p —‍Pẽnã kaꞌok, pu tu xupa hok! Kaxĩy.
\p
\v 24 Ha hãmꞌãpak, tu kanet hã mõꞌtat, tuꞌ kopa tigãhãꞌ, tuꞌ xex, tu tik kup hĩy mĩm kaꞌax tuꞌ, haꞌ mõg ꞌohnãg, tuꞌ pip.
\p
\v 25 Ha ꞌãmnĩy kote ꞌĩhã Paot xix Xinax te Topa pu hãmꞌãktux, tuk-tex, nũy Topa ꞌãktux max, ha kanet kopaꞌ pip tikmũꞌũn teꞌ xupak.
\v 26 Hãpxip kutõgnãg ꞌĩhã hãm yãy nuhuk nãm, ha mĩptut yõg hãpkopa mĩkaxxap nuhut, ha mõꞌyĩnnĩnꞌax te yãy xõn, ha tikmũꞌũn te kanet kopaꞌ pip, haꞌ hĩyꞌax koaꞌ, nõm te kanet kopaꞌ xup, haꞌ mõxahaꞌ.
\v 27 Ha kanet yõg xonat te yãy koxak, tu kanet mõꞌyĩnnãꞌax pẽnãhãꞌ, pa yãy xõn, ha xonat te hãmpeꞌpaxex, hu: “Yãꞌ xohix nũꞌpahaꞌ!” Kaxĩy. Hu yãy putex putup mĩkax xexka hã,
\v 28 pa Paot yĩy kaꞌok, tu:
\p —‍Yãy xuhmĩy hok! Yãg mũg xohiꞌ pip! Kaxĩy.
\p
\v 29 Haꞌ nõy te:
\p —‍Kuyãnãm paxnũꞌ. Kaxĩy.
\p Tu mõꞌnãhãꞌ, tu kuxãnõg, tu yãy puxuꞌuxnãm, tuꞌ kopaxux hãꞌ nãhã Paot keppah, xix Xinax keppah,
\v 30 tuꞌ yok, tuk-nĩhãꞌ xip, tu hãpkopaꞌ mõy, tu:
\p —‍ꞌŨgnõy, ꞌãte putep mĩyꞌax, puyĩy Topa ꞌũgkuxa kummuk xit, nũy ꞌãtuꞌ gãy hok? Kaxĩy.
\p
\v 31 Ha Paot xix Xinax te:
\p —‍ꞌÃkuxa yũm kaꞌok ꞌũgmũg xuxyã Yeyox kopah, puxix Topa ꞌãkuxa kummuk xit, nũy yãnãn tu ꞌãkuxa max tat, ꞌãmũn, xix ꞌãxape te ꞌãpet kopaꞌ pip. Kaxĩy.
\p
\v 32 Ha tik xop te Topa yõg hãmꞌãktuxꞌax ꞌãktux kanet yõg xonat puꞌ, xixꞌ xape xop puꞌ.
\v 33 ꞌÃmnĩy kote ꞌĩhãꞌ xonat teꞌ nõy yõg kayax pix, ha Paot xix Xinax te xonat putox pix, xiꞌ xape xop, nõm xop kuxa mãm kaꞌok Yeyox kopah.
\v 34 Ha xonat te yãy pet haꞌ mõgãhãꞌ, tu hãpxop pop nũn, haꞌ mãhãꞌ, ha xonat kuxa yũm kaꞌok Topa kopah, xiꞌ xape xop kamah, huꞌ kuxa hittup.
\p
\v 35 Hãptup ha ta Hõm yõg xexka xop teꞌ xat, hu:
\p —‍Kanet kopaꞌ mõy tik 2, pu mõg, tu nũmãn. Kaxĩy.
\p
\v 36 Ha xonat te Paot pu hãmꞌãktux, hu:
\p —‍Tik xexka xop te ꞌãmõy putup, ha ꞌãnũpap-tup, hu mõy, xa ꞌãkuxa mãm. Kaxĩy.
\p
\v 37 Pa Paot te:
\p —‍ꞌÃmhok! Kaxĩy hok! Hõmã tik tek mũg kix kakixnãg, ha kõmẽn Pinio yõg tikmũꞌũn teꞌ pẽnãhãꞌ. Hak mũg yĩkopit ꞌohnãg, tuk mũ yõg hãpxopmãꞌax kopit, ꞌokpak mũg hãpxexka Hõm yõg tihik, ha kanet kopak mũg tigãhãꞌ, yã hõnhã nũmãn yãy xaptop tuꞌ! ꞌÃmhok! ꞌAk mũg mõg putupꞌah. ꞌÃpu, tik xãnãꞌ, pu nũꞌ, pu nũy ꞌũgmũg mõy kanet kopah, nũy hãptopak mũg mõgãꞌ. Kaxĩy.
\p
\v 38 Ha xonat xop te Hõm yõg xexka xop pu hãmꞌãktux, haꞌ xexka xop kuxãnõg, Paot xix Xinax yã hãpxexka Hõm yõg tik hah.
\v 39 Haꞌ nũn, tu tik 2 pu hãmꞌãktux, hu:
\p —‍ꞌÃgãy hok ꞌãtuꞌ. ꞌÃte nũktu yãyhãhup hokꞌah. Kaxĩy.
\p Tu kanet kopaꞌ mõy, tu taꞌ mõg, tu kõmẽn kunãpaꞌ mõgãhãꞌ, tu:
\p —‍ꞌÃmõg. Kaxĩy.
\p
\v 40 Haꞌ mõg, tu Nit pet haꞌ mõg, tuꞌ xape xop mõꞌnĩynãm, tuꞌ mõg.
\c 17
\s Tu kõmẽn Texanõn tuꞌ tihiꞌ
\p
\v 1 Tu taꞌ mõg, kõmẽn ꞌÃppip kotit hãꞌ mõg, xix kõmẽn ꞌAponõn kotit hãꞌ mõg, tu mõktu mõxaha kõmẽn Texanõn tuꞌ, ha Yoneo yõg Topa pet yũm,
\v 2 ha nit xap yã Yoneo yõg hãptup xeꞌeꞌ, yĩy nit xap xohix ꞌĩhã Paot te Yoneo yõg Topa pet haꞌ mõg, hu hõnhãꞌ mõg, tu nit xap
\v 3 ꞌĩhã hãmꞌãktux hãꞌ nõy kutnãhãꞌ. Kaxĩy.
\p
\v 4 Ha tik ꞌũm te:
\p —‍Hamũn! Kaxĩy.
\p Hu Paot xix Xinax mũtik yãy kotĩnnãhãꞌ, ha Genex yõg puknõg xop te Topa xak, xix ꞌũn xexka xop, tu nõm tik mũtik yãy kotĩnnãhãꞌ.
\p
\v 5 Pa Yoneo xop teꞌ yĩpkumĩy, tu tik kummuk yĩmõgatux, nõm hãm hok xop, tu hãpkuteꞌex kummuk pax, ꞌap maxꞌah, tu kõmẽn xohix kopa hãpkummugãhãꞌ, tu kõmẽn xohix gãyãhãꞌ, tu Paot xak xix Xinax, hu Yaxãm pet hãꞌ mõxakux.
\v 6 Pãyã ꞌap tiꞌah, yĩy Yaxãm mũg, tuꞌ xut yãy pet kopah, tuꞌ xape xop mõy kamah, tu kõmẽn yõg xexka xop keppaꞌ mõgãhãꞌ, tu:
\p —‍Nũ tik te hãm xexka xohix tu hãpkummugãhãꞌ, tu nũktu nũn kamah,
\v 7 tu Yaxãm pet kopaꞌ tihiꞌ, haꞌ xohix te hãpxexka Hõm yõg Xex putup pax, pa tik xop kummuk te hãpkummuk yũmmũgãhãꞌ, hu: “Hõm yõg Xex tek mũg xat ꞌohnãg. Yã Yeyox tek mũg xat xeꞌẽgnãg! Kaxĩy.”
\p
\v 8 Ha Texanõn yõg tikmũꞌũn te hãmꞌãpak, xix kõmẽn yõg xexka xop, huꞌ gãy,
\v 9 tu tayũmak xak Yaxãm tu hãmãxap, xiꞌ nõy xop tuꞌ, puyĩy Paot xix Xinax mõy, puyĩy kõmẽn Texanõn nĩm. Ha pago, tu nũꞌpahaꞌ.
\s Tu kõmẽn Menet tuꞌ tihiꞌ
\p
\v 10 Ha ꞌãmnĩy hãꞌ kuxa mãm kaꞌok xop te Paot xix Xinax mõgãhãꞌ, tuꞌ mõg tu moktu mõxaha kõmẽn Menet tuꞌ, tu Yoneo yõg Topa pet hãꞌ mõxakux.
\v 11 Ha Menet yõg Yoneo xop te hãmyok mĩy, pa Texanõn yõg xop te hãpkoheꞌ mĩy. Yã Menet yõg tikmũꞌũn te Topa yõg tappet mõꞌkupix nãm, puyĩy Paot yõg hãmꞌãktux kopit, nũy hãmyũmmũg, nũy hãpxeꞌe yũmmũg.
\v 12 Hũ Menet yõg tikmũꞌũn punethok kuxa mãm kaꞌok Yeyox kopah, xix Genex yõg ꞌũn xexka xop, xix tik xop.
\v 13 Ha Paot te hãmꞌãpak maxꞌax ꞌãktux, ha Texanõn yõg Yoneo xop te hãmꞌãpak, huꞌ gãy, tuꞌ nũn, tu nũktu tikmũꞌũn gãyãhãꞌ.
\v 14 Haꞌ xape xop te Paot xut, tu:
\p —‍Mõg, mõg, pu ꞌãp-tex hok! Kaxĩy.
\p Haꞌ mõg, kõnãg xexka haꞌ mõg, pãyã Xinax nox xip, xix Tĩmõn, tu Menet kopaꞌ tihiꞌ.
\v 15 Ha nõm xape xop te Paot mõgãhã kõmẽn xexka ꞌAtẽn tuꞌ, tu putpuꞌ mõg Menet tuꞌ, tu Paot pupi hãmꞌãktux, nũy Xinax xãnãꞌ, xix Tĩmõn, pu kõmẽn ꞌAtẽn tuꞌ mõg mõꞌkaꞌok.
\s Tu kõmẽn ꞌAtẽn tuꞌ xip
\p
\v 16 Ha Paot te ꞌAtẽn tu tik 2 hip, tu kõmẽn xexka pẽnãhãꞌ, tu topahnãg komut pẽnãhãꞌ, ha nõm komut yĩm hãꞌ mĩy, nũy heyah, ha kõmẽn nũꞌxip nõm hãpxop hã, yĩy Paot kuxa hittup ꞌohnãg.
\v 17 Tuꞌ mõg Yoneo yõg Topa pet hah, nũy Yoneo xop mũtik hãmꞌãktux hãꞌ nõy yãnãn nãm, xix nõm xop te Topa xak xop mũtik hãmꞌãktux hãꞌ nõy yãnãn. Tu nãpet haꞌ mõg kamah, ha ꞌãmnĩy xohix hã hãmꞌãktux hãꞌ nõy yãnãn ꞌAtẽn yõg tikmũꞌũn mũtik.
\v 18 Tu hãmꞌãktux, tu hãmyũmmũgꞌax xop ꞌãxetꞌax ꞌEpikoneo xop mũtik hãmꞌãktux, xix ꞌExtox xop mũtik hãmꞌãktux hãꞌ nõy yãnãn, haꞌ yãg teꞌ yĩkopit, hu:
\p —‍Kãy te hãmꞌãktux punethok. Putep mũn ꞌãktux putup? Kaxĩy.
\p Haꞌ yãg nõy teꞌ yãnãn, hu:
\p —‍Tute topahnãg puknõg ꞌãktux. Kaxĩy.
\p Ha Paot te Yeyox ꞌãktux, tu Yeyox putpuꞌ hi ꞌãktux.
\v 19 Ha tik xop te hãmyũmmũg te Paot yĩm mũg, tu ꞌAxenop yõg hãmyũmmũg xop haꞌ mõgãhãꞌ, pu hãmꞌãktuxꞌax ꞌãpax, tuꞌ yĩkopit, hu: koneo xop mũtik hãmꞌãktux, xix ꞌExtox xop mũtik hãmꞌãktux hãꞌ nõy yãnãn, haꞌ yãg teꞌ yĩkopit, hu:
\p —‍Kãy te hãmꞌãktux punethok. Putep mũn ꞌãktux putup? Kaxĩy.
\p Haꞌ yãg nõy teꞌ
\p —‍ꞌOk hãmyũmmũgꞌax tup nũhũ xate hãmyũmmũgãhãꞌ?
\v 20 ꞌÃpu, ꞌãyĩy, tu hãmyũmmũgꞌax puknõg ꞌãktux, nũy ꞌũgmũ yũmmũgãꞌ. Kaxĩy.
\v 21 Yã ꞌAtẽn yõg tikmũꞌũn hãm hok, xix puknõg xop te kõmẽn kopaꞌ tihiꞌ hãm ꞌohnãg, pa hãmꞌãpak pax, nũy tu xeꞌ xuktux, tu ꞌãmnĩy xohix hã hãmꞌãpak tup ꞌãpak, xiꞌ xeꞌ xuktux.
\v 22 Ha Paot te hãmꞌãktux, ha ꞌAnenop xop te Paot xakot, ha Paot te:
\p —‍ꞌAtẽn yõg tikmũꞌũn: ꞌÃxop te ꞌõg topahnãg komut xop xohix xak.
\v 23 ꞌÃte hãpkumep, tu topahnãg komut punethok pẽnãhãꞌ, nõm mĩy nũy heyah, ha ꞌãte topahnãg yõg mĩmpe pẽnãhãꞌ, ha tikmũꞌũn te topahnãg pu hãpxop ꞌũm hõm, tu mĩmpe yĩmũꞌ xix, ha tik ꞌũm te mĩmpe yĩmũꞌ kaxꞌãmiꞌ, hu: “Nũhũ topa puknõg puꞌ,” kaxĩy. ꞌÃte xa nõm puknõg ꞌãktux putup.
\p
\v 24 —‍Topa xeꞌẽgnãg te hãm xexka mĩy, xix hãpxop xohix mĩy, hu pexkox xix hahãm xat. ꞌAꞌ pet mĩy xakꞌah tikmũꞌũn yĩm hã. Yã mĩptut kopa ti ꞌohnãg. ꞌŨxexka xeꞌẽgnãg Topah.
\v 25 Tu hãpxop ꞌũm xak ꞌohnãg, yã hãpxop xohix mĩy, nũy tikmũꞌũn puꞌ xit xut popmãhãꞌ, xiꞌ hiꞌax, xix hãpxop xohix yãꞌ hok popmãhãꞌ.
\v 26 Tu tik puxet mĩy hãmãxap, tu nõm hãꞌ mĩy tikmũꞌũn xohix, xiꞌ hep xohix, pu yõg hãm tu ꞌãtiꞌ, ha Topa te tikmũꞌũn pu hãm ꞌũm hãꞌ xakuxꞌax xat, xix hãm ꞌũm hãꞌ xakixꞌax xat, tuꞌ pipꞌax ꞌũm xat, pu mõg hãpxexka pu kopa ꞌãtiꞌ.
\v 27 Puyĩy tikmũꞌũn Topa xax, nũy xipiꞌ, pãyã tikmũꞌũn yĩka hã Topa xip.
\v 28 Hõmã ꞌõgnũ tik te hãmyũmmũg te kaxꞌãmiꞌ, hu: “Topa hã yũmũꞌãteꞌ xit xut, xix yũmũg mõg, xix yũmũg tihiꞌ,” kaxĩy. Haꞌ nõy te: “Yũmũꞌã Topa hã kutok xeꞌeꞌ,” kaxĩy.
\v 29 Hamũn, yũmũꞌã Topa hã kutok, hu hãmpeꞌãpaxex hok, hu: “Topa te pipkup yãnãm putuk,” kaxĩy. Xix hãmpeꞌãpaxex hok, hu: “Topa te mĩkaxxap putuk,” kaxĩy. ꞌÃmhok. Tik ꞌũm te Topa xeꞌe mĩy ꞌohnãg.
\v 30 Hõmã tikmũꞌũn te hãmyũmmũgꞌah, ha Topa te nõãꞌtot, pa nõmhã Topa teꞌ xat, xa yãyhãhup, tu hãpkummuk mĩy kux, pu Topa ꞌãxop yõg hãpkummuk mĩyꞌax xaxogãꞌ, pu tu kux.
\v 31 Yã Topa pa te hãmyũmmũg, tu hãptup puxet yãykutnãhãꞌ, ꞌĩhãꞌ tute hep xop xohix yõg hãpxopmãꞌax kopit putup, tu tik te hãmyok mĩy hãꞌ kopit putup, tu Yeyox yãykutnãhã, pu tu kopit, haꞌ putpu nõm hĩnnãhãꞌ, nũy tikmũꞌũn xohix pu hãmyũmmũgãꞌ. Kaxĩy.
\p
\v 32 Ha tikmũꞌũn teꞌ xupak, haꞌ yãg te:
\p —‍Putep te hãmꞌãktux? ꞌŨxok, tu putpuꞌ hiꞌ?” Kaxĩy.
\p Tuꞌ yĩxix kummuk. Haꞌ yãg nõy te:
\p —‍Yãꞌ max. Hãptup ꞌũm nõy ꞌĩhã xe xa ꞌãpak putup. Kaxĩy.
\p
\v 33 Ha Paot mõg,
\v 34 pãyã tik ꞌũm kuxa mãm kaꞌok, ꞌũxohix te: ꞌAxenop yõg Nionĩy, xix ꞌũn Nãm, xiꞌ nõy xop kuxa mãm kaꞌok.
\c 18
\s Tu kõmẽn Konĩn tuꞌ tihiꞌ
\p
\v 1 Ha Paot te ꞌAtẽn tuꞌ xip, tu taꞌ mõg, tu mõktu xupep kõmẽn Konĩn tuꞌ.
\v 2 Ha Põꞌõn yõg Yoneo xip, ꞌãxetꞌax ꞌAk, xiꞌ xetut Pinixit, tu hãpxexka ꞌItat tuꞌ tihiꞌ, tu hãpxip kutõgnãg nũn. Hõmã hãpxexka Hõm yõg tik te tikmũꞌũn xatꞌax Kanao Xex te Yoneo xop nũmãhãꞌ, ha hõnhã Paot mõg ꞌAk hah, xiꞌ xetut hah.
\v 3 Ha Paot xix ꞌAk te yĩmãgkox xexka mĩy hãꞌ hãm, tu topixxax kaꞌok hãꞌ mĩy, tuꞌ nõmẽnex, tu tayũmak pop, ha Paot te ꞌAk mũtik tihiꞌ.
\v 4 Ha nit xap xohix ꞌĩhã Paot mõg Yoneo yõg Topa pet hah, tu hãmꞌãktux hãꞌ nõy yãnãn nãm Yoneo xop mũtik, xix Genex yõg xop mũtik hãmꞌãktux, nũy hãmyũmmũgãꞌ.
\p
\v 5 Ha Xinax xix Tĩmõn te Mãxenõn tuꞌ tihiꞌ, tuꞌ nũn, tu nũktu mõxaha Konĩn tuꞌ, ꞌĩhã Paot te hãmꞌãktux Yoneo xop puꞌ, hu:
\p —‍Yeyox yã Kunnix, yã Topa teꞌ yãykutnãhãꞌ. Kaxĩy.
\p
\v 6 Pa tikmũꞌũn tep-tup nõg, tuꞌ yĩpkox ꞌohnãg, tuꞌ mãnõg, tu Yeyox ꞌãktux kummuk, yĩy Paot te yãy yõg topixxax kutoꞌok, tu:
\p —‍Topa te ꞌõg hãpxopmãꞌax kopit putup, nũy hãpkummuk mĩyꞌax hãꞌ yãnãn. Kaxĩy.
\p Tu xe hãmꞌãktux, hu:
\p —‍Xate Topa yõg putat yok max putup nõg. ꞌAk yãy kuxopꞌah, huk mõg Yoneo xop hãꞌ puknõg xop hah. Kaxĩy.
\p
\v 7 Tuꞌ mõg Tix Yox pet hah, ha Topa xak, tuꞌ kuxa teꞌ yẽy Topa keppah, yã yãy pet te Yoneo yõg Topa pet yĩkaꞌ yũm.
\v 8 Ha Kinix te Topa pet yõg xop xat, tuꞌ kuxa yũm kaꞌok Yeyox kopah, xiꞌ xape xop kamah, ha Konĩn yõg tikmũꞌũn punethok te Paot yõg hãmꞌãktuxꞌax ꞌãpak, tuꞌ kuxa mãm kaꞌok, hap-tox pix.
\p
\v 9 Ha ꞌãmnĩy koxtap ꞌĩhã Yeyox te Paot pu hãmꞌãktux, ha Paot te yãy koxuk hãꞌ xupak, yĩy:
\p —‍ꞌÃkuxãnõg hok, xix yãy xaptop hok.
\v 10 Yã ꞌãmũtik ꞌũktihiꞌ, tu ꞌãpẽnãnãg xip, pu tik ꞌũm ꞌãmũy hok. Yã yõgnũ tikmũꞌũn punethok pip nũ kõmẽn tuꞌ. Kaxĩy.
\p
\v 11 Haꞌ xip hãmyãxatamuk puxet xiꞌ xahiꞌ, tu Topa yõg hãmꞌãktuxꞌax yũmmũgãhã Konĩn yõg tikmũꞌũn puꞌ.
\p
\v 12 Ha Gat te hãpxexka Genex yõg tikmũꞌũn xat, ha Yoneo xop te yãy tu nũꞌnãhãꞌ, nũy Paot kupeh, tuꞌ mũg, tuꞌ mõgãhã kõmẽn yõg xexka xop keppah, nõm xop pa te hãmyũmmũg keppah, puyĩꞌ yĩkopit.
\v 13 Haꞌ kupex, hu:
\p —‍Kãy te Topa xakꞌax yũmmũgãhã tikmũꞌũn puꞌ, pãyã tik te yũmũg xat teꞌ xat hok, kãy te hãmyũmmũgã kummuk hah. Kaxĩy.
\p
\v 14 Ha Paot teꞌ yĩkox xix, ꞌũyĩy putup tuꞌ, pãyã Gat te hãmꞌãktux Yoneo xop puꞌ, hu:
\p —‍Nãy. ꞌOk pe kãy tep-tex, ꞌok pe nõ xupxet, kopxiꞌ kopit,
\v 15 pãyã ꞌãxop yĩyꞌax ꞌãte yũmmũgꞌah, xix ꞌõg xatꞌax puknõg ꞌãte kama yũmmũgꞌah, xiꞌ xuxetꞌax ꞌũm ꞌãteꞌ yũmmũgꞌah. ꞌAk kopit putupꞌah ꞌãteꞌ. Kaxĩy.
\p
\v 16 Tu papuk hãpxupmãhãꞌ, haꞌ mõg, tuꞌ gãy.
\v 17 Haꞌ xohix te Topa pet xop xatꞌax Xox mũg, tuꞌ kix Gat keppah, pãyã Gat teꞌ pẽnã hok, tu nũpe mõꞌkep, tu nũpe mõꞌkut.
\s Tu kõmẽn ꞌÃtikit tu putpuꞌ mõg
\p
\v 18 Ha ꞌãmnĩy xohix nõg, ꞌĩhã Paot te mĩpkox hãꞌ mõg, nõm te kõnãg yĩmũꞌ mõg, ha mõktu xupep hãpxexka Xit tuꞌ, ha Pinixit xix ꞌAk te nũmũtik mõg, tu mõktu mõxaha kõmẽn Xẽnkenex tuꞌ, ha Paot teꞌ xe mep, tuꞌ xut xok nãm, Topa pu hãmꞌãktux xex tuꞌ.
\v 19 Tuꞌ mõg, tu mõktu mõxaha kõmẽn ꞌEp tuꞌ, tu Pinixit xix ꞌAk nĩm, tuꞌ mõg Yoneo yõg Topa pet hah, tu hãmꞌãktux hãꞌ nõy yãnãn Yoneo xop mũtik.
\v 20 Tuꞌ mõg putup, pa Yoneo xop te:
\p —‍Nãy! ꞌÃmõg hok! Kaxĩy.
\p
\v 21 Pãyãꞌ mõg putup, hu:
\p —‍Topa tek putup, kopxix putpu ꞌãhãk nũꞌ. Kaxĩy.
\p Tu mĩpkox hãꞌ mõg.
\v 22 tu mõktu xupep kõmẽn Xeyanet tuꞌ, haꞌ mõg kuxa mãm kaꞌok xop hah, tuꞌ mõg, tu mõktu mõxaha ꞌÃtikit tuꞌ,
\v 23 tu ꞌãmnĩy punethok hãꞌ tihiꞌ, tuꞌ mõg, tu hãpxexka Ganax kotit hãꞌ mõg, xix Pinik kotit hãꞌ mõg, tuꞌ kuxa mãm kaꞌok xop kaꞌogãhãꞌ.
\s ꞌApot te kõmẽn ꞌEp tuꞌ xip
\p
\v 24 Ha kõmẽn xexka ꞌAnexãnit yõg Yoneo pit nũn kõmẽn ꞌEp tuꞌ, ꞌũxuxetꞌax ꞌApot, tute Topa yõg hãmꞌãktuxꞌax ꞌãktux max, tu Topa yõg tappet hittap yũmmũg xeꞌeꞌ.
\v 25 Tu Topa yõg putat yũmmũg, tuꞌ hittup, tu Yeyox ꞌãktux, tu Topa yõg hãmyũmmũgꞌax yũmmũgãhãꞌ, pa Yoãm puxet yõg putox pixꞌax yũmmũg, tup-tox pixꞌax nõy yũmmũgꞌah, ꞌũp-tox pix nũy Yeyox yã yãy xuxyã ꞌãktux yũmmũgꞌah.
\v 26 Tu hãmꞌãktux, tuꞌ yĩpkutuk ꞌohnãg Yoneo yõg Topa pet kopah, ha Pinixit xix ꞌAk teꞌ xupak, tu yãy pet haꞌ mõgãhãꞌ, nũy Topa yõg putat yũmmũgã xeꞌeꞌ.
\v 27 Ha ꞌApot te hãpxexka Genex tuꞌ mõg putup, ha ꞌEp yõg kuxa mãm kaꞌok xop te mõꞌnĩynãm, tu tappet kaxãmi Genex yõg kuxa mãm kaꞌok xop puꞌ, puyĩꞌ nũꞌ nũnãnãm yãy nõy putuk. Haꞌ mõg, tu mõktu xupep Genex tuꞌ, tu nõm xop mõꞌnĩynãm punethok ꞌũyãnãn tuꞌ, tu hãmyũmmũgãhãꞌ, tuꞌ kaꞌok, tuꞌ nõy xop kaꞌogãhãꞌ, ha Topa te hãmmaxnãhãꞌ.
\v 28 Ha Yoneo xop mũtik hãmꞌãktux hãꞌ nõy yãnãn nãm, tu Topa yõg tappet hã Yeyox yã Kunnix ꞌãktux, tu Topa te nõm yãykutnãhã ꞌãktux, ha Yoneo xop teꞌ yẽy, tuꞌ yĩy ꞌohnãg.
\c 19
\s Paot te ꞌEp tuꞌ xip
\p
\v 1 ꞌApot te Konĩn tuꞌ xip, ꞌĩhã Paot yĩnãpaꞌ nũn kõmẽn xohix yĩktix yĩmũꞌ pip tuꞌ, tu nũktu xupep ꞌEp tuꞌ, tuꞌ kuxa mãm xop pipihiꞌ,
\v 2 tuꞌ yĩkopit, hu:
\p —‍ꞌOk Topa Koxuk te ꞌãkuxa kaꞌogãhãꞌ, ꞌĩhã ꞌãkuxa mãm kaꞌok tap Yeyox kopah? Kaxĩy.
\p Haꞌ nõy te:
\p —‍Topa Koxuk ꞌũm? ꞌAk mũꞌãteꞌ yũmmũgꞌah. Kaxĩy.
\p
\v 3 Ha Paot te:
\p —‍ꞌÃp-tox pixꞌax te xĩy? Kaxĩy.
\p Haꞌ nõy te:
\p —‍Yoãm yõg putox piꞌax. Kaxĩy.
\p
\v 4 Ha Paot te:
\p —‍Yoãm tep-tox pix, xa yãyhãhup, nũy hãpkummuk mĩy kux, xa kuxa mãm kaꞌok Yeyox kopah, nõm te Yoãm peꞌ nũn. Kaxĩy.
\p
\v 5 Haꞌ xupak, hap-tox pix, ꞌĩhã Yeyox yã yãy xuxyã ꞌãktux.
\v 6 Ha Paot tep-tox yĩmũꞌ yĩm xex, ha Topa Koxuk te nõm xop ha yĩxohoh, haꞌ yĩyꞌax puknõg xohix hã hãmꞌãktux, tu Topa yõg hãmꞌãktuxꞌax ꞌãktux.
\v 7 Ha tik xohix yaꞌomiꞌ mõg te 12.
\p
\v 8 Ha Paot mõg Yoneo yõg Topa pet hah, tu mãyõn ꞌãnuk 3 hã hãmꞌãktux hãꞌ nõy yãnãn tikmũꞌũn mũtik, nũy Topa te yãy yõg tikmũꞌũn xat ꞌãktux.
\v 9 Pa tikmũꞌũn yĩpkox pip ꞌohnãg, tuꞌ kuxa mãm ꞌohnãg Yeyox kopah, tu Topa yõg putat ꞌãktux kummuk tikmũꞌũn nõy puꞌ, yĩy Paot mõg, tuꞌ kuxa mãm kaꞌok xop mõgãhãꞌ, tu ꞌãmnĩy xohix hã Tinãn yõg tappet mĩyꞌax pet kopa hãmyũmmũgãhãꞌ.
\v 10 Hãmyãxatamuk 2 hã hãmyũmmũgãhãꞌ, ha hãpxexka ꞌAx yõg tikmũꞌũn xohix te Topa yõg hãmꞌãktuxꞌax ꞌãpak, Yoneo xop teꞌ xupak, xiꞌ puknõg xop.
\s Xep kutok put te 7
\p
\v 11 Ha Topa te hãpxopmã kaꞌok xeꞌẽgnãg, tu Paot kaꞌogãhã, pu hãpxopmãꞌ.
\v 12 Ha nõm tikmũꞌũn te Paot yõg topixxax yãg pop, tuꞌ pakut xop puꞌ popmãhãꞌ, ha hãmpakutꞌax teꞌ pakut xop tuꞌ xupepmãhãꞌ, haꞌ hittup, xix yãmĩy kummuk xop tuꞌ xupepmãhã kamah.
\v 13-14 Ha Yoneo yõg taknõy xop te 7 pip, tu Yoneo yõg ꞌãmãnex xop xatꞌax Xep kutok, tu hãpkumep pax, nũy yãmĩy kummuk xupepmãꞌ, tu Yeyox ꞌãxetꞌax yũmmũg, ꞌĩhã hãmpeꞌpaxex, hu: “Yeyox ꞌãxetꞌax yãꞌ kaꞌok. ꞌApu, yãmĩy kummuk tikmũꞌũn kopaꞌ xut Yeyox ꞌãxetꞌax ꞌãktux hãꞌ,” kaxĩy. Hu yãmĩy tuꞌ xat, hu:
\p —‍ꞌÃte ꞌãxat, Yeyox ꞌãxetꞌax hã, yã Paot te nõm ꞌãktux. Pu ꞌãpep xa mõg. Kaxĩy.
\p
\v 15 Pãyã yãmĩy kummuk te:
\p —‍Yeyox ꞌãteꞌ yũmmũg, xix Paot yũmmũg, pa ꞌũ ꞌũm ꞌãxop? ꞌÃte ꞌãyũmmũgꞌah. Yeyox te ꞌãxop pu yãy ꞌãxetꞌax hõm ꞌohnãg. Kaxĩy.
\p
\v 16 Ha tik nõm yãmĩy kummuk kopaꞌ xip teꞌ yok mõꞌkaꞌok, tu nõm taknõy xop te 7 kix kakixnãg, yĩy kayax tahaꞌ, tuꞌ xax top hã mĩptut tu nũꞌpahaꞌ.
\v 17 Ha ꞌEp yõg tikmũꞌũn xohic teꞌ yũmmũg, Yoneo xop xix Genex yõg xop teꞌ yũmmũg, tuꞌ kuxãnõg, tu Yeyox ꞌãxetꞌax kaꞌok ꞌãktux, tuꞌ kuxa teꞌ yẽy.
\v 18 Ha tikmũꞌũn punethok kuxa mãm kaꞌok Yeyox kopah, tuꞌ nũn, ha nõm te hõmã mĩhĩm, tu hõnhã yãyhãhup, tu yãy yõg hãpkummuk mĩyꞌax ꞌãktux, nũy tu mĩy kux.
\v 19 Tuꞌ mĩm xop yõg tappet xax xohix popnũn, tu kuxap kopa mõꞌpok, haꞌ mõꞌxut, ha tikmũꞌũn xohix teꞌ pẽnãhãꞌ, ha tappet xax xohix yõg tayũmak te 50.000.
\v 20 Yã kaxĩy hã tikmũꞌũn te Topa yõg hãmꞌãktuxꞌax ꞌãpak, tu xe hãmꞌãktux hãptox tuꞌ, ha tikmũꞌũn punethok kuxa mãm kaꞌok, tuꞌ yĩpkox pip.
\s Nemẽn te ꞌEp yõg tikmũꞌũn gãyãhãꞌ
\p
\v 21 Ha hãpxip kutõgnãg ꞌĩhã Paot mõg putup Yenoyanẽn tuꞌ, Mãxenõn kotit hãꞌ mõg putup, xix hãpxexka ꞌAkax kotit hãꞌ mõg putup, tu hãmꞌãktux, hu:
\p —‍Yenoyanẽn tuk mõg, nũy mõy tu ꞌãpep, tuk-nãy tu ꞌãte Hõm pẽnãp-tup kamah. Kaxĩy.
\p
\v 22 Tu Timõn xix ꞌEnax mõꞌpok hãpxexka Mãxenõn tuꞌ, tu hãpxip kutõgnãg ꞌĩhã Hõm yõg hãpxexka ꞌAx tuꞌ tihiꞌ.
\p
\v 23 Ha ꞌEp yõg tikmũꞌũn te Topa yõg putat tuꞌ gãy,
\v 24 ha tik ꞌũm ꞌãxetꞌax Nemẽn, tu topahnãg hex Niãm komut mĩy, xiꞌ pet komut mĩy, pu heyeh, tu pipkup yãnãm ponnok hãꞌ mĩy, tu tayũmak xexka pop.
\v 25 Tu tik te topahnãg komut mĩy xop xãnãhãꞌ, ha yãy tu nũꞌnãhãꞌ, ha Nemẽn te:
\p —‍Tik xop: Yũmũg hãm, nũy tayũmak xexka pop, ꞌãxop teꞌ yũmmũg.
\v 26 Pa Paot te hãmꞌãktux, ha tikmũꞌũn xohix te hãmꞌãpak, ha hãmꞌãktux, hu: “Tik teꞌ yĩm hãꞌ mĩy nõm topahnãg komut. ꞌAp Topa xeꞌeꞌah, yã hãpxop mõꞌãmãꞌax, yĩy hãpxop te mõꞌãmãꞌax nĩm,” kaxĩy. Ha tikmũꞌũn punethok yĩpkox pip, hu topahnãg komut xop hãmenex putupꞌah.
\v 27 Hak kuxãnõg, pu tikmũꞌũn topahnãg ꞌa pop putup hok, xix Niãn pet ꞌaꞌ putup hok, xix topahnãg hex Niãn mũn putup hok, ꞌĩhã hãpxexka ꞌAx xohix te nõm pu heyah, xix hãpxexka nõy xohix teꞌ. Yĩy yũmũꞌãte tayũmak xak. Kaxĩy.
\p
\v 28 Haꞌ xupak, tuꞌ gãy xexkah, tuꞌ yĩy kaꞌok, hu:
\p —‍ꞌEp yõg Niãn xexka xeꞌẽgnãg! Kaxĩy.
\p
\v 29 Ha tikmũꞌũn xohix te hãmꞌãktux punethok kõmẽn xohix kopah, hu hãmꞌãpak ꞌohnãg, tu yãy tu nũꞌnãhã mĩptut xexka kopah, tixmũꞌũn yõg yãy tu nũꞌnãꞌax pet kopah, ha Mãxenõn yõg tik 2 tihiꞌ. Yã Paot mũtik hãpkumep, ha tikmũꞌũn gãy, tu nõm tik 2 mõgãhã tikmũꞌũn yõg yãy tu nũꞌnãꞌax pet hah,
\v 30 ha Paot mõg putup, nũy tikmũꞌũn pu hãmꞌãktux, paꞌ kuxa mãm kaꞌok xop teꞌ tux hok, pu mõg hok.
\v 31 Ha ꞌAx yõg xexka xop te Paot hãꞌ xape, tuꞌ xak, hu:
\p Tikmũꞌũn yõg yãy tu nũꞌnãꞌax pet ha ꞌãmõg hok pu gãyxop ꞌãpenã hok! Kaxĩy.
\p
\v 32 Ha tikmũꞌũn yĩy kaꞌok, tu hãmꞌãktux punethok, hu hãmꞌãpak ꞌohnãg, tu tep tu yãy tu nũꞌnãhãꞌ yũmmũg ꞌohnãg.
\v 33 Ha Yoneo xop te Topa pet xop xatꞌax ꞌAnexãn xut, tuꞌ kopaꞌ mõgãhãꞌ, pu hãmꞌãktux tikmũꞌũn puꞌ, ha ꞌAnexãn yĩm xix, hãmꞌãktux putup tuꞌ, pu ꞌEp yõg tikmũꞌũn gãy hok Yoneo xop tuꞌ.
\v 34 Pa tikmũꞌũn te ꞌAnexãn yã Yoneo yũmmũg, tuꞌ yĩy kaꞌok, tu xeꞌ yĩy xexkaꞌ, tu xeꞌ yĩy, tu yãnmũn xupepꞌax puxet putuk, tu ꞌot 2 hã te:
\p —‍ꞌEp yõg Niãn yãꞌ xexka xeꞌẽgnãg. Kaxĩy.
\p
\v 35 Ha kõmẽn yõg kaxãmiꞌax te:
\p —‍ꞌÃhup, ꞌãhup! Kaxĩy.
\p Tu xeꞌ xuktux, hu:
\p —‍ꞌEp yõg tikmũꞌũn: ꞌŨ ꞌũm te kõmẽn ꞌEp yũmmũg hok? Yãꞌ xohix teꞌ yũmmũg, ha ꞌEp te topahnãg hex Niãn pet xexka xix, tu topa xap xix, nõm te pexkox tuꞌ nãhãꞌ, yãꞌ xohix teꞌ yũmmũg,
\v 36 yãꞌ yũmmũg tap, yĩy ꞌãhup, nũy hãpkummuk mĩy hok.
\v 37 Xate tik 2 nũnnãhãꞌ, ha ꞌap kummukꞌah, tu topa hex Niãn ꞌãktux kummuk ꞌohnãg, tu topa hex Niãn yõg hãpxop ꞌũm hãꞌ xupxet ꞌohnãg.
\v 38 Nemẽn te hãmꞌãktux ꞌũm putup, xix yãy xop teꞌ, puxix tik pa te hãmyũmmũg tuꞌ xax, puyĩꞌ kopit, yĩy mõg, nũy tik ꞌũm kupeh.
\v 39 Pe hãpxopmãꞌax nõy kopit putup, puxix tikmũꞌũn xohix kopit.
\v 40 ꞌÃte koitꞌah, pa ꞌãte gohet yõg hãmpeꞌpaxex yĩpkutuk, pax pu: “ꞌEp yõg tikmũꞌũn yãykix kakixnãg,” kaxĩy, puxix xonat xop nũꞌpok ꞌEp tu, puyĩk yĩkopit, tep tu ꞌãgãy nãm. Pãyã ꞌap yũmmũgꞌah ꞌãteꞌ. Kaxĩy.
\p
\v 41 Tu hãmꞌãktux, tu:
\p —‍Mõg. Kaxĩy.
\p Haꞌ mõg.
\c 20
\s Paot te Mãxenõn tuꞌ xip, xix Genex tuꞌ xip
\p
\v 1 Ha Paot teꞌ kuxa mãm kaꞌok xop xãnãhãꞌ, tu hãmꞌãktux hãꞌ kãꞌogãhãꞌ, tu:
\p —‍ꞌŨgmõg. Kaxĩy.
\p Tu taꞌ mõg hãpxexka Mãxenõn tuꞌ.
\v 2 Tu hãm xohix kotit hã hãpkumep, tu hãmꞌãktux hãꞌ kuxa mãm kaꞌok xop kaꞌogãhãꞌ, tuꞌ mõg tu mõktu hãpxexka Genex tuꞌ xupep.
\v 3 Tuꞌ xip mãyõn ꞌãnuk 3 hã, haꞌ mõg, ha Yoneo xop tep-tex putup, ha mĩpkox te kõnãg yĩmũꞌ mõg hãꞌ mõꞌnãhãꞌ, nũy hãpxexka Xit kotit hãꞌ mõg, tu Mãxenõn tu putpuꞌ nũn putup.
\v 4 Ha Paot mũtik nũn kõmẽn Menet yõg Pihok-tok Xopat, xix kõmẽn Texanõn yõg ꞌÃnixtah, xiꞌ yõg Xegõn, xix kõmẽn Nep yõg Gax, xiꞌ yõg Tĩmõn, xix hãpxexka ꞌAx yõg Tikik, xiꞌ yõg Tonop,
\v 5 tu Paot keppaꞌ mõg, hak mũn Nok te kaxꞌãmiꞌ, hak mũꞌãte Paot hip kõmẽn Tonot tuꞌ.
\v 6 Ha Yoneo xop yõg ꞌãmuk xexka ꞌãxetꞌax “pãm tokatok hok” kux, hak mũg pip Pinio tuꞌ, tu mĩpkox hãk mũg mõg, tu kõnãg yĩmũꞌ mõg, ha ꞌãmnĩy te 5 nõg, ꞌĩhãk mũg mõg tu mõktu mõxaha Tonot tuꞌ, haꞌ nõy xop mũtik yãy tu nũꞌnãhãꞌ, tuꞌ pip ꞌãmnĩy te 7 hã.
\s Paot te Tonot tuꞌ xip
\p
\v 7 Tu yenomĩy ꞌĩhãk mũg yãy tu nũꞌnãhãꞌ, tu pãm koxip, nũy mãꞌ, nũy Yeyox yã yũmũg pupiꞌ xok pekpaxeh, ha Paot mõg putup hãptup ꞌĩhãꞌ, hu hãmꞌãktux tox, tu ꞌãmnĩy kote ꞌĩhã hãmꞌãktux, tuꞌ kux ꞌohnãg.
\v 8 Ha kuyãnãm tatꞌax punethok te mĩptut nõy yĩmũꞌ mõgꞌax kopaꞌ pip, hak mũg yãy tu nũꞌnãhãꞌ,
\v 9 ha tik xiptap ꞌEttik xip, tu mĩptut tox yãy yĩmũꞌ mõgꞌax 3 kopaꞌ xip, tu yanẽn kox yĩmũꞌ yũm, ha kũmĩm tep-tex, ha mõꞌyõn, Paot yõg hãmꞌãktux tox hah, ha hãm tuꞌ nãhãꞌ, tuꞌ xok.
\v 10 Ha Paot te mĩptut yĩmũ tuꞌ yĩxohoh, tu ꞌEttik mũg, tuꞌ nõy xop pu hãmꞌãktux, hu:
\p —‍Kuxãnõg hok! Yãꞌ koxuk teꞌ kopaꞌ xip, yãꞌ hiꞌ! Kaxĩy.
\p
\v 11 Tu xe pepiꞌ mõg, tu pãm koxip, tuꞌ mãhãꞌ, nũy Yeyox peꞌpaxeh, tu hãmꞌãktux yũmũg xape xop mũtik, ha xokakkak xatahaꞌ, ꞌĩhã hãmꞌãktux kux, tuꞌ mõg.
\v 12 Ha ꞌEttik hiꞌ, yĩy tikmũꞌũn kuxa hittup xexkaꞌ, tuꞌ yãy pet haꞌ mõg.
\s Tu Mĩnet haꞌ mõg
\p
\v 13 Hak mũn Nok te xe kaxãmiꞌ, tuk mũg mõg mĩpkox hã, tuꞌ mõg, tu mõxaha hãmyĩn yũm ꞌAxox tuꞌ, tu Paot hip, ꞌĩhã Paot te hãm tu yãꞌ mõg.
\v 14 Tuꞌ xupep, ꞌũgmũꞌãte ta tu yãy tu nũꞌnãhãꞌ, hak mũg mõg, tu mõktu mõxaha kõmẽn Mĩtinẽn tuꞌ.
\v 15 Tuk mũg mõg mĩpkox hã, tu Kiox hãꞌ yẽn, tu hãptup nõy kõmẽn Xãmõy tuꞌ mõxahaꞌ, tuk mũg mõg, tu mõktu mõxaha kõmẽn Mĩnet tuꞌ.
\v 16 Ha Paot mõg putup nõg kõmẽn ꞌEp tuꞌ, nũy mõg mõꞌkaꞌok, nũy kõmẽn Yenoyanẽn tu ꞌãmõxãn, nũy Yoneo yõg ꞌãmuk xexka Pẽtekot mĩy.
\s Paot te hãmꞌãktux
\p
\v 17 Tu kõmẽn Mĩnet tuꞌ xip, tu ꞌEp yõg tik pẽnã max xop xãnãhãꞌ,
\v 18 haꞌ nũn, ha Paot te:
\p —‍Hõmãg nũn ꞌAx tu hãmãxap, ha xatek yũmmũg, tu yõgnũ hãpxopmãꞌax yũmmũg kamah, ꞌĩhã hãmyaxatamuk xohix hãk xip ꞌãxop mũtik.
\v 19 Tu hãpxopmãhã Topa tuꞌ, tuk kutõgnãg, tuk kuxa hittup ꞌohnãg, yã Yoneo xop tek kummugãhãꞌ.
\v 20 Ha xa hãmꞌãktux xeꞌe, tu Topa yõg hãmꞌãktuxꞌax xohix ꞌãktux, tuꞌ xaxok ꞌohnãg, tu xa hãmyũmmũgãhãꞌ, nũy ꞌãkaꞌogãꞌ, nũy mõꞌãnĩynãm, ha tikmũꞌũn tek xupak, ꞌĩhã ꞌãte kõmẽn kotit hã xa hãmyũmmũgãhãꞌ, xix mĩptut xohix kopa hãmyũmmũgãhã kamah.
\v 21 Tu xa hãmꞌãktux xeꞌeꞌ, tu Yoneo yõg tikmũꞌũn pu hãmꞌãktux, xix Genex yõg tikmũꞌũn pu hãmꞌãktux, tu Topa pu yãyhãhup ꞌãktux, tu ꞌõg hãpkummuk mĩy kux ꞌãktux, tu ꞌãkuxa mãm kaꞌok Yeyox kopa ꞌãktux.
\v 22 Yã hõnhã ꞌũgꞌãpax: ꞌŨgmõg Yenoyanẽn tuꞌ, ha Topa Koxuk tek xat, ha nõm puk yĩpkox xip, tu ꞌaꞌ hãmyũmmũgꞌah, ꞌok pek hip-tup, ꞌok pek xok putup,
\v 23 pãyã Topa Koxuk te ꞌã hãmꞌãktux kõmẽn xohix tuꞌ, hu: “Kanet kopa ꞌãxix putup, xix ꞌãxũy putup,” kaxĩy.
\v 24 Pa ꞌak kuxãnõgꞌah, ꞌa yãy mũn tuk hiꞌah, pãyã Topa tuk hiꞌ. ꞌOk pek hiꞌ, yãꞌ mãx, pek xok, yãꞌ max, ꞌũyĩy yãy yõg hãpxopmãꞌax kux. Yeyox tek yãykutnãhãꞌ, ꞌũyĩy Yeyox yõg hãmꞌãpak maxꞌax ꞌãktux, haꞌãte hãpxõpmãhãꞌ, yã Topa teꞌ hep xop xohix pu hãmmaxnãhãꞌ.
\p
\v 25 —‍Hõmã ꞌãte Topa te yãy yõg tikmũꞌũn xat ꞌãktux, tu nũktu ꞌãxop pu hãmꞌãktux, tu hõnhã hãmyũmmũg: Yã ꞌãxop tek ꞌũm pẽnãp-tupꞌah ꞌũxeheh.
\v 26-27 ꞌŨgꞌãpax: ꞌÃte xa hãpxeꞌe ꞌãktux, ꞌãte ꞌãxop pu hãmꞌãktux, tu Topa yõg hãmꞌãktuxꞌax xohix ꞌãktux, tu Topa yõg hãmꞌãktux ꞌũm xaxok ꞌohnãg. Tik ꞌũm yĩpkox hok, puxix yãy yõg hãpkummuk mĩyꞌax tat.
\v 28 Pẽnã kaꞌok! Topa Koxuk te ꞌãxat, puꞌ kuxa mãm kaꞌok xop pẽnã max, nũy kaꞌogãꞌ; Yã Topak-tok xok nõm pupiꞌ, tu yãy hep ꞌãta nũꞌnãhãꞌ, nũy nõm xop kuxa tupmãꞌ.
\v 29 ꞌŨgmõg, ha nõm ꞌãkopaꞌ pip putup, kokex gãy nãm putuk, tuꞌ nũn putup, nũy kuxa mãm kaꞌok xop kix ꞌãxop kopah. Kokex gãy te kahnẽn kix, hã kaxĩy nõm gãy xop teꞌ kuxa mãm kaꞌok xop kix putup.
\v 30 Ha tik kummuk te ꞌãxop kopaꞌ pip putup, tu hãmꞌãktux hã mõꞌãmãp-tup, haꞌ kuxa mãm kaꞌok xop mõgãp-tup, pu Topa yõg putat xax.
\v 31 ꞌÕg pa mõxip! Pẽnã max! ꞌŨxaxok hok! Hãmyãxatamuk tikoyuk hã ꞌãte xa hãmyũmmũgãhãꞌ, ꞌok pe ꞌãmnĩy tox hã, ꞌok pe hãptup tox hã, ꞌãteꞌ xohix yũmmũgãhãꞌ, tuk potahaꞌ, ꞌãp-tup pax tuꞌ.
\p
\v 32 —‍Yã hõnhã ꞌãte: ꞌÃxop yã Yeyox yõg tikmũꞌũn. Pũyã Topa ꞌãpẽnã max, xix nũ mũtik tiꞌ, xix xa hãmyũmmũgãꞌ, xix ꞌãxex, xix xa hãmmaxnãꞌ, xix xa pexkox yõg hãpxop popmãꞌ yãy yõg tikmũꞌũn mũtik.
\v 33 ꞌAk xupkumĩyꞌah, tuk nõy yõg hãpxop putup ꞌohnãg, tuk nõy yõg tayũmak yĩpkumĩy ꞌohnãg, tuk nõy yõg topixxax yĩpkumĩy ꞌohnãg.
\v 34 ꞌÃmhok. ꞌŨghãm punethok, nũy tayũmak pop, nũy hãpxop ꞌũm pop, nũy mãꞌ, tuꞌ nõy xop puꞌ popmãhãꞌ,
\v 35 nũy xa hãmyũmmũgã ꞌũghãmꞌax hã, xayĩy nõm hãpxop ꞌũm pip hok xop puꞌ hõm, xiꞌ pakut xop puꞌ hõm, nũy Yeyox yõg hãmꞌãktuxꞌax xutigãꞌ, hu: “Tikmũꞌũn te hãpxop ꞌũm paꞌ, puxiꞌ kuxa hittup kutõgnãg, pa tikmũꞌũn te hãpxop ꞌũm hõm, puxiꞌ kuxa hittup xexkaꞌ,” kaxĩy. ꞌŨkux.
\p
\v 36 Tu hãmꞌãktux kux, tuꞌ kopaxux hãꞌ xip, tu Topa pu hãmꞌãktux ꞌũnõy xop mũtik.
\v 37 Haꞌ potahaꞌ, tu yãy kep hãꞌ mũg.
\v 38 Yãꞌ kuxa te Paot xak, hãmꞌãktuxꞌax hah. Yãꞌ xuktux, hu: “ꞌA xe xatek ꞌũm pẽnãp-tupꞌah,” kaxĩy. Haꞌ mõgãhã mĩpkox hah.
\c 21
\s Paot te Yenoyanẽn haꞌ mõg
\p
\v 1 Hak mũg mõg mĩpkox hã, tu kõnãg xexka xak, mĩpkox te kõnãg yĩmũꞌ mõg hãꞌ xak, tuk mũg mõg tu mõktu hãmyĩn yũm Kox tuꞌ mõxahaꞌ, tu hãptup nõy ha tak mõg tu mõktu mõxaha hãmyĩn yũm Honex tuꞌ, tu xek mũg mõg, tu mõktu kõmẽn Paꞌat tuk mũg mõxahaꞌ.
\v 2 Ha mĩpkox nõy mõg Penix tuꞌ, hak mũꞌãteꞌ xipihiꞌ, tu nõm mĩpkox hãk mũg mõg,
\v 3 tu hãmyĩn yũm Xip pẽnãhãꞌ, tu ꞌĩpxax haꞌ mõg, tu mõktu mõxaha hãpxexka Xit tuꞌ, tu kõnãg hãꞌ mõg, tu mõktu mõxaha kõmẽn Tinok tuꞌ, pu mĩpkox hãpxop popꞌax xupepmãhã kõmẽn Tinok tuꞌ,
\v 4 haꞌ kuxa mãm kaꞌok xop pipihiꞌ, tu ꞌãmnĩy xohix te 7 hãꞌ nox pip kuxa mãm kaꞌok xop mũtik, ha Topa Koxuk te Paot xũyꞌax yũmmũgãhãꞌ kuxa mãm kaꞌok xop puꞌ, yĩy: “Yenoyanẽn tu ꞌãmõg hok!” kaxĩy.
\v 5 Pa xemãn nõg, ꞌĩhãk mũg mõg, haꞌ nõy xop tek mũg mõgãhã kõmẽn kunãpaꞌ, xiꞌ xetut xop teꞌ, xix kakxop teꞌ, hak mũg kopaxux hãꞌ pip, tu Topa pu hãmꞌãktux hãpkux tuꞌ,
\v 6 tu yãy kep mũg, xix yãy hax, tu ꞌãneo, nũy mõg, hak mũg mõg mĩpkox hã, paꞌ nõy xop te putpuꞌ mõg yãy pet hah.
\p
\v 7 ꞌŨgmũg pip kõmẽn Tinok tuꞌ, tu mõktu mõxaha kõmẽn Tonẽmãy tuꞌ, tuꞌ kuxa mãm xop yõg xape xop pẽnãhãꞌ, tuꞌ nox pip ꞌãmnĩy tox hã.
\v 8 Hãptup ꞌĩhãk mũg mõg, tu mõktu mõxaha kõmẽn Xeyanet tuꞌ, tu Pinip pet tuꞌ nox pip. Pinip te hãmꞌãpak max ꞌãktux pax. Hõmã ꞌũkuxa mãm kaꞌok xop te tik te 7 yĩmõgatux, pu hãpxop xitꞌax popmãꞌ, nũy hok xop puꞌ popmãꞌ, tu Pinip yãykutnãhã kamah.
\v 9 Ha Pinip kutok hex te 4, ꞌap yãytaꞌah, ꞌũxohix yã Topa pupi hãmꞌãktux.
\v 10 Hak mũg nox pip Pinip pet kopah, ꞌihã tik te Topa pupi hãmꞌãktux nũn, ꞌũxuxetꞌax ꞌAg, tu Yonex tuꞌ xip,
\v 11 tuꞌ nũn, tu nũktu xupep Xeyanet tuꞌ, tu Paot yõg nãy hĩyꞌax pahaꞌ, tu nõ yãy yĩm kĩy, xiꞌ kup kĩy, tu:
\p —‍Topa Koxuk te hãmꞌãktux, hu: “Hã kaxĩy Yenoyanẽn yõg Yoneo gãy xop te Paot kĩy putup, nũy puknõg xop ha mõgãꞌ,” kaxĩy.
\p
\v 12 Haꞌ xupak, ha tikmũꞌũn xik mũꞌãte Paot tuꞌ xak, hu:
\p —‍Yenoyanẽn tu ꞌãmõg hok! Kaxĩy.
\p
\v 13 Ha Paot te:
\p —‍ꞌÃxop tep-tep mũn mĩy? Tep tu ꞌãpotahaꞌ, tuk kuxa xũygãhãꞌ? ꞌAk kuxãnõgꞌah. ꞌOk pe kanet kopak xip, ꞌok pek xok Yenoyanẽn tuꞌ, ꞌãte Yeyox tu hãpxopmãhãꞌ, nũy Yeyox ꞌãxetꞌax ꞌãktux max. Kaxĩy.
\p
\v 14 Tu hãmꞌãktux kux, hak mũꞌãteꞌ hup, tu:
\p —‍Pũyã Topa yãy putupꞌax mĩy. Kaxĩy.
\p
\v 15 Tuk mũg mõg, tu yãy yõg hãpxop pop, tuꞌ xuk, nũy Yenoyanẽn tuꞌ mõg.
\v 16 Ha kõmẽn Xeyanet yõg kuxa mãm kaꞌok xop ꞌũm ꞌũgmũg mũtik mõg, tuk mũg mõgãhã hãmyĩn yũm Xip yõg Mẽnãn hah, haꞌ kuxa yũm kaꞌok tap, hãmyãxatamuk xohix hãꞌ yũm, haꞌ pet kopak nox pip.
\s Paot te Tiak pẽnãhãꞌ
\p
\v 17 Tuk mũg mõg, tu mõktu mõxaha kõmẽn Yenoyanẽn tuꞌ, haꞌ nõy xop tek mũg pẽnãhãꞌ, tuꞌ kuxa hittup.
\v 18 Hãptup ꞌĩhãk mũg mõg Tiak pet hah, ha Paot tek mũg mũtik mõg, ha tik pẽnãmax xop xohiꞌ pip.
\v 19 Ha Paot te ꞌãneo, tu Topa te hãpxopmã max xohix ꞌãktux, tu Paot kaꞌogãhã pu hãpxopmãꞌax hãmpuknõg xop kopa ꞌãktux.
\v 20 Haꞌ xupak, tuꞌ kuxa hittup xexkaꞌ, tu Topa ꞌãktux max, tu Paot pu hãmꞌãktux, hu:
\p —‍ꞌŨgnõy: Yoneo xop punethok kuxa mãm kaꞌok Yeyox kopah, ha xateꞌ yũmmũg, ha Mõyyex yõg xatꞌax xohix puꞌ yĩpkox pip kamah, nũy mãynãg mĩy.
\v 21 Ha tikmũꞌũn te ꞌãmũn ꞌãktux, tu ꞌãkupex, hu: “Paot te Yoneo xop yũmmũgã kummuk, tu nõm xop te hãmpuknõg kopaꞌ pip pu hãmyũmmũgãhãꞌ, hu: “ꞌÃpu, Mõyyex yõg xatꞌax nĩm, tuk-tok pit nãg xax yĩmap mep hok, tu mõnãyxop yõg hãpxopmãꞌax hittap tat hok kamah,” kaxĩy. Pãyã tikmũꞌũn te koit.
\v 22 Putep mũn mĩy? ꞌÃnũn, haꞌ xohix te hãmyũmmũg putup.
\v 23 Nãy, ꞌũgꞌãpax, nũy mĩy: Nũnteꞌ pip tik te 4, nõm tik te Topa pu hãmꞌãktux xex.
\v 24 ꞌÃmõg, tu nõm tik mõgãhãꞌ, tu tik xemepꞌax hãꞌ pago, pu Yoneo yõg tikmũꞌũn xohix pẽnãꞌ, nũy ꞌãyĩpkox xip Mõyyex yõg xatꞌax puꞌ yũmmũg.
\v 25 Yãk mũꞌãteꞌ puknõg xop pu tappet kaxꞌãmiꞌ, tuꞌ xat, pu topa komut xop xitꞌax mã hok, xix xokxop hep ꞌãta mã hok, xix xokxop ꞌũm mãy mũg tup-tex mã hok, xiꞌ nõy hãꞌ xupxpet hok. Kaxĩy.
\p
\v 26 Yĩy Paot mõg, tu tik te 4 mõgãhãꞌ, tu hãptup nõy ꞌĩhã yãy pix tik te 4 mũtik, tu Mõyyex yõg xatꞌax puꞌ yĩpkox xip, tuꞌ mĩy, tu tik te Topa pet xexka xop xatꞌax puꞌ xuktux, tu ꞌãmnĩy ꞌũm pixꞌax kux putup yũmmũgãhãꞌ, ha ꞌãmnĩy te 7 mõꞌnãp-tup, ꞌĩhã yãy pix kux putup. Ha Paot te xokxop ꞌũm putex putup, nũy Topa pu mõꞌhap, nũy tuꞌ hãxyãꞌ.
\s Yoneo gãy xop te Paot mũg
\p
\v 27 Ha xemãn puxet hãꞌ nõg putup, ha Paot te Yoneo yõg Topa pet xexka kopaꞌ xip, ꞌĩhã ꞌAx yõg Yoneo xop teꞌ pẽnãhãꞌ, tu Yoneo yõg tikmũꞌũn gãyãhãꞌ, tu hãmꞌãktux hã nũktuꞌ xohix gãyãhãꞌ, tu Paot mũg,
\v 28 tu:
\p —‍ꞌIyaet yõg tihik, mãꞌ! Nũ tik te hãmyũmmũgã kummuk hãpxexka xohix tuꞌ, pu Mõyyex yõg xatꞌax xaxogãꞌ, tu Topa pet xexka ꞌãktux kummuk, tu Genex yõg puknõg xop nũnnãhãꞌ, pu Topa xipꞌax yãyhãp-tup-tũynãg. Kaxĩy.
\p
\v 29 Hõmã Yoneo yõg tikmũꞌũn te Paot pẽnãhã kõmẽn kopah, ha ꞌEp yõg tik puknõg ꞌãxetꞌax Tonop mõgãhãꞌ, ha hãmpeꞌpaxex, hu: “Paot teꞌ mõgãhã Topa pet xexka kopa kamah,” kaxĩy. Pãyãꞌ mõgãꞌah.
\v 30 Ha nõm tikmũꞌũn xohix gãy, tu yãy tu nũꞌnãhã mõꞌkaꞌok, tu Paot mũg, tu Topa pet xexka kopaꞌ xut, tu yãykumĩy hãptopah, ha hãpxip ꞌohnãg Topa pet xexka mõꞌyĩnnĩn.
\v 31 Ha tikmũꞌũn te Paot putex putup, ha tik ꞌũm te xonat yõg Kononeo pu hãmꞌãktux, hu:
\p —‍Yenoyanẽn yõg tikmũꞌũn xohix gãy nãm! Kaxĩy.
\p
\v 32 Ha xonat xop yõg Kononeo te xonat xop xat, xix kapitãm xop, haꞌ nũn mõꞌakꞌok, ha Yoneo yõg tikmũꞌũn teꞌ pẽnãhãꞌ, hu Paot kix kux.
\v 33 Ha Kononeo te Paot mũg, tuꞌ xut gãy xop kopah, tu pipkup mãg xap hãꞌ hĩy, tuꞌ yĩkopit, hu:
\p —‍ꞌŨ ꞌũm nũhũꞌ? Kaxĩy.
\p Tu xe:
\p —‍Putep mũn mĩy? Kaxĩy.
\p
\v 34 Ha nõm tikmũꞌũn gãy te hãmꞌãktux hãꞌ yãnãn, yĩy Kononeo te hãmꞌãpak ꞌohnãg, huꞌ xat, hu:
\p —‍Kãy mõgã xonat pet kaꞌok hah. Kaxĩy.
\p
\v 35 Haꞌ mõgãhã mĩptut mĩpkuꞌĩn tuꞌ, pa nõm tikmũꞌũn tep-tex putũmnãg, yĩy xonat xop te Paot pupi tu pepiꞌ xup, tu mĩptut hã mõxakux.
\v 36 Ha Yoneo yõg tikmũꞌũn xohix teꞌ peꞌ mõg, tuꞌ yĩy kaꞌok, tu:
\p —‍ꞌŨp-tex! ꞌŨp-tex! Kaxĩy.
\s Paot te yãy pupi hãmꞌãktux
\p
\v 37 Ha xonat pet haꞌ mõgãhãꞌ, ꞌĩhã Paot te:
\p —‍ꞌOk xatek tux hok ꞌũ hãmꞌãktux? Kaxĩy.
\p
\v 38 Ha Kononeo te:
\p —‍Xate Genex yĩyꞌax yũmmũg. ꞌOk ꞌãmũn yã ꞌEyit yõg tihik, nõm te tik te 4.000 mõgãhã hãm panip tuꞌ, nũy gohet mũtik yãykix? Kaxĩy.
\p
\v 39 Ha Paot te:
\p —‍ꞌAk mũnꞌah. Yãk mũn Tax yõg Yoneo, tu hãpxexka Xinit tuk nãhãꞌ, ha Tax mũn kõmẽn xexka hokꞌah. ꞌOk xatek tux hok, ꞌãte hãmꞌãktux tikmũꞌũn puꞌ? Kaxĩy.
\p
\v 40 Ha Kononeo te:
\p —‍ꞌÃpu, ꞌãyĩy. Kaxĩy.
\p Ha Paot te mĩpkuꞌĩn yĩmũꞌ xip, ꞌĩhãꞌ yĩm xix, pu tikmũꞌũn yĩy hok, ha Paot te hãmꞌãktux tikmũꞌũn puꞌ, Yoneo xop yãy yĩyꞌax hã hãmꞌãktux, hu:
\c 22
\p
\v 1 —‍ꞌŨnõy mũnõm xop, xiꞌ tak mũnom xop, ꞌũgꞌãpax ꞌãte hãmꞌãktux. Kaxĩy.
\p
\v 2 Ha Yoneo yõg tikmũꞌũn te yãy yĩyꞌax ꞌãpak, tu:
\p —‍Nãy, hup, nũy ꞌĩy hok. Kaxĩy.
\p Tuꞌ yĩy ꞌohnãg, ha Paot te:
\p
\v 3 —‍ꞌŨgmũn Yoneo, tu kõmẽn Tax yõg tihik, tu hãpxexka Xinit tuk nãhãꞌ, pa kõmẽn Yenoyanẽn kopak tittap, ha hãmyũmmũgãꞌax Gãmãniet te ꞌã hãmyũmmũgãhãꞌ, tu mõnãyxop hittap yõg hãpxopmãꞌax xohix ꞌã hãmyũmmũgãhãꞌ, ha ꞌãte Topa xak ꞌãxop xohix putuk, tuꞌ xatꞌax mĩy mãynãg.
\v 4 Hõmãg gãy, tuꞌ kuxa mãm kaꞌok xop kix putup, Yeyox yõg putat putup nõg tuꞌ. ꞌAteꞌ mũg, tu kanet kopaꞌ xex nõm xop, ꞌok pe tihik, ꞌok pe ꞌũhũn.
\v 5 Ha tik te ꞌãmãnex xop xatꞌax teꞌ yũmmũg, xix tik te hãmyũmmũg xop teꞌ yũmmũg. ꞌA ꞌãte mõꞌãmãꞌah, pãyã hãpxeꞌe ꞌãktux. Nõm xop te ꞌaꞌ popmãhã tappet, tu kõmẽn Namãn yõg Yoneo xop pu kaxꞌãmiꞌ, ꞌũyĩy kuxa mãm kaꞌok xop mũy, tuꞌ kĩy, nũy kix. Kaxĩy.
\p
\v 6 Tu xe hãmꞌãktux, hu:
\p —‍Tu tak mõg, tu kõmẽn Namãn tu hãmhũmnãg tuk xip, mãyõn yãy koteꞌ yũm ꞌĩhãk xip, ha hãpxip ꞌohnãg ꞌĩhã kuyãnãm xexka te pexkox tuꞌ xakot.
\v 7 Hak nãhã hãm tuꞌ, tu yãnmũn xupepꞌax ꞌãpak, ha: “Xaot, Xaot, teptu xatek xũygãhãꞌ?” Kaxĩy.
\p
\v 8 —‍Ha ꞌãte: “ꞌŨ ꞌũm ꞌãmũn?” kaxĩy.
\p —‍Ha tute: “ꞌŨgmũn Nãyane yõg Yeyox. Xatek xũygãhãꞌ,” kaxĩy.
\p
\v 9 —‍Ha tikmũꞌũn te ꞌũgmũtik mõg te kuyãnãm pẽnãhãꞌ, pãyã ꞌaꞌ yĩyꞌax ꞌũm ꞌãpakꞌah.
\v 10 Ha ꞌãteꞌ yĩkopit, hu: Yãyãꞌ, putep xatek putup ꞌũ mĩy xaꞌ?” kaxĩy.
\p —‍Ha: “ꞌÃyok, nũy mõg, tu mõktu xupep Namãn tuꞌ, ha tik ꞌũm te xa hãmꞌãktux putup, tu Topa yõg xatꞌax xa hãmyũmmũgãp-tup,” kaxĩy.
\p
\v 11 —‍Yã ꞌãte hãmpẽnã hok nõm kuyãnãm xexka hah, yĩy tikmũꞌũn tek mõgãhãꞌ, yĩm hã Namãn tuꞌ.
\v 12 Ha tik te Topa xak, ꞌũxuxetꞌax ꞌÃnãnĩn, ha Namãn yõg Yoneo xop xohix te nõm ꞌãktux max.
\v 13 Hak haꞌ nũn, tuk yĩkãgnãg xip, tu hãmꞌãktux, hu: “ꞌŨgnõy Xaot, Topa te ꞌãpa maxnãhãꞌ, xa xe hãmpẽnãꞌ,” kaxĩy.
\p —‍Hak pa max, ha ꞌãte ꞌÃnãnĩn pẽnãhãꞌ,
\v 14 ha: “Hõmã hãmyãxatamuk xohix ꞌĩhã mõnãyxop yõg Topa te xa yãykutnãhãꞌ, xa Topa yõg putupꞌax mĩy, nũy tik te hãmyok mĩy ꞌãxetꞌax Yeyox pẽnãꞌ, nũy nõm yĩyꞌax ꞌãpax, ha hõnhã xateꞌ xupak, xiꞌ pẽnãhãꞌ, xix hãmyũmmũg,
\v 15 tu Yeyox yõg hãmꞌãpak mãxꞌax ꞌãktux putup tikmũꞌũn xohix puꞌ, tu hãpxopmãꞌax xohix pẽnãꞌax ꞌãktux putup.
\v 16 Putep hip xateꞌ? ꞌÃpu, ꞌãte ꞌãp-tox pix putup, pu Topa ꞌãkuxa maxnãꞌ, nũy ꞌõg hãpkummuk mĩyꞌax xaxogãꞌ, ꞌĩhã Yeyox yã ꞌãxuxyã ꞌãktux,” kaxĩy.
\p
\v 17 Tu xe hãmꞌãktux, hu:
\p —‍Tuk nũn putpuꞌ, tu nũktu xupep kõmẽn Yenoyanẽn tuꞌ, tu Topa pu hãmꞌãktux Topa pet xexka kopah, tu yãy koxuk hã Yeyox pẽnãhãꞌ,
\v 18 ha hãmꞌãktux, hu: “Mõg, Yenoyanẽn kunãpa ꞌãmõg, yã tikmũꞌũn tek mũn ꞌãktuxꞌax putup nõg,” kaxĩy.
\p
\v 19 —‍Ha ꞌãte: “Yãyãꞌ, tikmũꞌũn te ꞌãte hãpkummugãhã yũmmũg, ha ꞌãteꞌ kuxa mãm kaꞌok xop mũg Topa pet kopah, haꞌ yũmmũg kamah, yã ꞌãte kanet haꞌ mõꞌtat, tuꞌ kix nõm xop kuxa mãm kaꞌok ꞌãkopah, ha tikmũꞌũn xohix teꞌ yũmmũg.
\v 20 Tikmũꞌũn te ꞌõg nũꞌkutnãꞌax ꞌExtep putex, ꞌĩhãk xip, tu pekpaxex max, tup-tup, tu tikmũꞌũn yõg topixxax pẽnãhãꞌ nõm te ꞌExtep putex,” kaxĩy.
\p
\v 21 —‍Ha Yeyox te: “ꞌÃmõg, ꞌãte ꞌãmõgãp-tup hãptox tuꞌ, hãmpuknõg xop hah,” kaxĩy. Tu ta tuꞌ kux. Kaxĩy.
\p
\v 22-23 Ha tikmũꞌũn te Paot yõg hãmꞌãktuxꞌax ꞌãpak, tuꞌ yĩy ꞌohnãg, pa Paot teꞌ puknõg xop ꞌãktux, yĩy ta tikmũꞌũn gãy, tup-tup nõg, tuꞌ yĩy kaꞌok tu:
\p —‍ꞌŨp-tex! ꞌŨp-tex! Kaxĩy.
\p —‍Tik kummuk putex! Kaxĩy.
\p —‍Pũyã tu xok! Kaxĩy.
\p Tu topixxax tox mahap, tu hãpkõnõn mõꞌpok pepiꞌ, ꞌũgãy tuꞌ.
\v 24 Ha xonat xop yõg Kononeo teꞌ pẽnãhãꞌ, hu Paot xut mõꞌkaꞌok, tuꞌ xat, pu xonat pet xexka kaꞌok haꞌ mõgãꞌ, ha xeꞌ xat, puꞌ kix xokxax hã, ha:
\p —‍ꞌŨxũy hã hãmꞌãktux putup, tu ꞌõg hãpxopmãꞌax kummuk ꞌãktux putup. Kaxĩy.
\p
\v 25 Ha xokxax xit hãꞌ hĩy, nũy nõꞌ kix ꞌĩhãꞌ Paot te Kapitãm yĩkopit, hu:
\p —‍ꞌOk Hõm yõg gohet teꞌ xat, pu Hõm yõg tik ꞌũm kix, ꞌĩhã hãpkummuk mĩy ꞌohnãg? Kaxĩy.
\p
\v 26 Ha xonat xop yõg Kapitãm teꞌ xupak, tu Kononeo pu hãmꞌãktux, hu:
\p —‍Nãy, paxip. Putep mũn mĩy putup? Kãy yã Hõm yõg tihik! Kaxĩy.
\p
\v 27 Ha nõm Kononeo nũn, tu Paot yĩpkopit, hu:
\p —‍ꞌÃyĩy. ꞌOk ꞌãmũn yã Hõm yõg tihik? Kaxĩy.
\p Ha:
\p —‍Ya hamũn. Kaxĩy.
\p
\v 28 Ha Kononeo te:
\p —‍ꞌÃte tayũmak xexka hã pago, nũy yãyhã Hõm yõg tihik. Kaxĩy.
\p Pa Paot te:
\p —‍Yã Hõm yõg ꞌũgnãhãꞌ, xik mũg tak, xik mũg tut. Yãk mũn Hõm yõg tik xeꞌeꞌ. Kaxĩy.
\p
\v 29 Ha xonat xop nõm teꞌ kix putup nũꞌpahaꞌ, ꞌũkuxãnõg tuꞌ, ha Kononeo kuxãnõg kamah, Paot kĩy huh, ꞌĩhã Hõm yõg gohet teꞌ xat hok puyĩy Hõm yõg tik kix hok.
\s Paot teꞌ xexka xop keppaꞌ xip
\p
\v 30 Hãptup ꞌĩhã Kononeo te Paot xut, tu Yoneo xop yõg tik xop pa te hãmyũmmũg haꞌ mõgãhãꞌ, xix ꞌãmãnex xexka xop keppah, puꞌ yĩkopit, nũy Paot yõg hãpkummuk mĩyꞌax yũmmũg. Ha Paot te Yoneo xexka xop keppaꞌ xip.
\c 23
\p
\v 1 Tu tik xop pa te hãmyũmmũg pẽnã kaꞌok, tu:
\p —‍ꞌŨnõy mũnõm xop, Topa tek kuxa yũmmũg, ha hãmyok mĩy ꞌũghiꞌax tox hã. Kaxĩy.
\p
\v 2 Ha tik te ꞌãmãnex xop xatꞌax ꞌÃnãnĩn, tuꞌ xat, pu Paot yĩkox kix,
\v 3 ha Paot te:
\p —‍Pũyã Topa ꞌãkix! ꞌÃpa max, pãyã ꞌãkuxa kummuk! Xateꞌ nõy mõgãhã mõꞌãmãꞌax hã. ꞌÃyũm, nũy hãpxopmãꞌax kopit, nũy Mõyyex yõg xatꞌax hãꞌ kopit, pa Mõyyex teꞌ kixꞌax xat hok. Kaxĩy.
\p
\v 4 Ha tik nõy te:
\p —‍Teptu xate ꞌãmãnex xop xatꞌax mãnõg? Kaxĩy.
\p
\v 5 Ha Paot te:
\p —‍ꞌŨgnõy, ꞌãteꞌ yũmmũgꞌah. ꞌOk tik te ꞌãmãnex xop xatꞌax nõꞌõm? Topa yõg tappet tek xat, hu: “Tik te ꞌãxop xatꞌax ꞌũm ꞌãktux kummuk hok,” kaxĩy.
\p
\v 6-8 Tuꞌ xexka xop pẽnãhãꞌ, haꞌ yãg Paniye xop, haꞌ yãg Xanoxeo xop. Paniye xop xohix kuxa mãm kaꞌok putpuꞌ hiꞌax kopah, hu: “Tikmũꞌũn xohix xakix, tuꞌ putpuꞌ hip-tup,” tu xe: “Yãꞌ pip koxuk, xix pexkox yõg nũꞌpok xop,” kaxĩy. Pa Xanoxeo xop xohix kuxa mãm ꞌohnãg, tu: “ꞌÃmhok. ꞌAꞌ koxuk ꞌũm xipꞌah. Yãꞌ xakix xeꞌeꞌ, tu putpuꞌ hip-tup ꞌohnãg,” kaxĩy. Yĩy Paot yĩy kaꞌok, tu:
\p —‍ꞌŨnõy mũnõm xop: ꞌŨgmũn Paniye yõg, huk kuxa yũm kaꞌok putpuꞌ hĩnnãꞌax kopah. Xatek yĩkopit, ꞌok peꞌ xakix xop putpuꞌ hip-tup, ꞌok peꞌ hip-tup hok. Kaxĩy.
\p Ha Paniye xop te hãmꞌãktux hãꞌ nõy yãnãn Xanoxeo xop mũtik, tuꞌ gãy nãm.
\v 9 Tuꞌ yĩy kaꞌok, tu yãykix putup Paot hã, ha tik te hãmyũmmũg yok, yã kama Paniye yõg, tu:
\p —‍Yãꞌ max Paot! ꞌOk pe koxuk ꞌũm, ꞌok pe pexkox yõg nũꞌkutnãꞌax ꞌũm te kãy pu hãmꞌãktux, kopxix Topa mũtik yũmũg kumĩy putup hok. Kaxĩy.
\p
\v 10 Haꞌ gãy xexkah, yĩy xonat yõg Kononeo te Paot hãꞌ yĩpkutuk, tuꞌ xat, puꞌ xut, tu xonat pet kaꞌok haꞌ mõgãhãꞌ.
\p
\v 11 ꞌÃmnĩy koxtap ꞌĩhã Yeyox xip Paot yĩkaꞌ, tu:
\p —‍ꞌÃkuxãnõg hok! ꞌÃmũn tek mũn pupi hãmꞌãktux, tu ꞌũgmũn ꞌãktux putup kõmẽn Yenoyanẽn tuꞌ, xix hãpxexka Hõm tu kamah. Kaxĩy.
\s Haꞌ xaptop hã Paot putex putup
\p
\v 12 Hãptup ꞌĩhã Yoneo xop te yãy tu nũꞌnãhãꞌ, tu hãmꞌãktux xex, tu Topa ꞌãxetꞌax ꞌãktux hã hãmꞌãktux xex, tu:
\p —‍Paot putex hok, kopxik xit hok! Kaxĩy.
\p
\v 13 Yã tik te 40 tep-tex putup,
\v 14 tuꞌ mõg ꞌãmãnex xexka xop hah, xix tik xop te hãmyũmmũg hah, tu:
\p —‍ꞌŨgmũꞌãte hãmꞌãktux xex Topa puꞌ, hu: “Paot putex hok, kopxik xit hok,” kaxĩy.
\v 15 ꞌÃmõg, Hõm yõg xonat xop yõg Kononeo hah, nũy tuꞌ xax, pu Paot nũnnãy, ꞌũyĩkopit nũy, pãyã mõꞌãmãꞌ. ꞌŨgmũꞌãtep-tex putup putat hã, ꞌũxaptop huh ꞌũp-tex putup. Kaxĩy.
\p
\v 16 Pa Paot ꞌũptix teꞌ xupak, tuꞌ mõg tu mõktu xupep xonat pet kaꞌok xexka tuꞌ, tu Paot puꞌ xuktux,
\v 17 ha Paot te xonat yõg Kapitãm xãnãhãꞌ, hu:
\p —‍Nũ tik tuktup mõgã ꞌãxop yõg Kononeo hah, puyĩy hãmꞌãpakꞌax ꞌãpax. Kaxĩy.
\p
\v 18 Haꞌ mõgãhãꞌ nõm Kononeo hah, tu:
\p —‍Paot te kanet kopaꞌ xup, tuk xãnãhãꞌ pu tik tuktup mõgã ꞌãhah. Kaxĩy.
\p
\v 19 Ha Kononeo te tik tuktup yĩm hãꞌ mũg, tuꞌ xut, tuꞌ yĩkopit, hu:
\p —‍Xate putep ꞌãktux putup? Kaxĩy.
\p
\v 20 Ha tik tuktup te:
\p —‍Yoneo xop te yãy tu nũꞌnãhãꞌ, nũy ꞌãmũn tuꞌ xax, xa hãptup ꞌĩhã Paot mõgãꞌ, pu xeꞌ yĩkopit. Pãyã mõꞌãmãꞌ. ꞌAꞌ yĩkopit putupꞌah, pãyãp-tex putup.
\v 21 Yã tik te 40 te hãmꞌãktux xex Topa puꞌ, tuꞌ xit hok xiꞌ xoꞌop hok, nũy Paot putex. Yã hõnhãp-tex putup. Kaxĩy.
\p
\v 22 Ha Kononeo te tik tuktup pu hãmꞌãktux, hu:
\p —‍Hãmꞌãktux hok, ꞌaꞌ xaptop hokꞌah. Kaxĩy.
\s Ha Paot mõgãhã Gohenanok Penik hah
\p
\v 23 Tu Kapitãm 2 xãnãhãꞌ, tuꞌ xat, hu:
\p —‍ꞌÃmnĩy koxtap ꞌĩhã mõg kõmẽn Xeyanet tuꞌ, yã hõnhã kãmãnok te 200 pop, xix xonat xop te 200 pop kamah, pu kãmãnok yĩmũꞌ mãm, ha xonat nõy te 200, te yãꞌ pata hãꞌ mõg, tu pox tox tat pop.
\v 24 Ha Paot pu kãmãnok nũnnãy, tu Gohenanok Penik haꞌ mõgãꞌ. Kaxĩy.
\p
\v 25 Tu Gohenanok Penik pu tappet kaxꞌãmiꞌ, hu:
\p
\v 26 “ꞌŨgmũn Kononeo Kanao Nix, ꞌãte Gohenanok xeꞌe Penik pu kaxꞌãmiꞌ, nũy hãmyũmmũgãꞌ, tu ꞌãneo.
\p
\v 27 Yoneo xop te nũ tik mũg, nũy putex, hak xut Yoneo gãy xop kopah. Yã hãpxexka Hõm yõg tik ꞌãxa.
\v 28 Tuꞌ mõgãhã Yoneo yõg pa te hãmyũmmũg xop hah, nũy Paot yõg hãpkummuk mĩyꞌax yũmmũg.
\v 29 Ha Yoneo xop te yãy yõg xatꞌax hãꞌ yĩkopit, tuꞌ kupex, tu Paot yõg hãmyũmmũgꞌax puknõg ꞌãktux, pãyã kãy te tik ꞌũm putex ꞌohnãg, tu yãꞌ xupxet ꞌohnãg, ꞌaꞌ kummukꞌah, ꞌap putex putupꞌah ꞌãteꞌ, yã kanet kopaꞌ xix ꞌap putupꞌah ꞌãte kamah.
\v 30 Ha Yoneo xop tep-tex putup ꞌũxaptop huh, yĩy hãpxip ꞌohnãg ꞌãte xa mõgãp-tup, pu Yoneo xop kupeh, ha xateꞌ kopit. Tu ta tuꞌ kux.” Kaxĩy.
\p
\v 31 Ha ta ꞌãmnĩy koxtap ꞌĩhã xonat xop te kãmãnok yĩmũꞌ mãm xop mõg, ha xonat xop te pox tox tat mõg, tuꞌ pata hãꞌ mõg, tu putpuꞌ mõg Yenoyanẽn tuꞌ,
\v 32 ha kãmãnok yũmũꞌ mãm xop te Paot mũtik mõg. Tuꞌ mõg,
\v 33 tu mõktu mõxaha kõmẽn Xeyanet tuꞌ, tu Gohenanok Penik pu tappet hõm, tu Paot mõgãhã Penik keppah.
\v 34 Ha tappet mõꞌkupix hãmãxap, tuk-nãy tuꞌ yĩkopit, hu:
\p —‍Piꞌyã ꞌõgnũ hahãm? Kaxĩy.
\p Ha Paot te:
\p —‍Yã Xinit. Kaxĩy.
\p
\v 35 Ha Penik te:
\p —‍Nãy, ꞌãte ꞌõg hãmꞌãktuxꞌax ꞌãpak putup, ꞌĩhã kupexꞌax xop nũꞌ. Kaxĩy.
\p Tuꞌ xat, pu Paot xix ꞌũxatꞌax ꞌEnot yõg kopitꞌax pet kopah, haꞌ mõgãhãꞌ, tuꞌ xix.
\c 24
\s Yoneo xop te Paot kupex
\p
\v 1 ꞌÃmnĩy te 5 nõg, ꞌĩhã tik te ꞌãmãnex xop xatꞌax ꞌÃnãnĩn nũn, tu nũktu xupep kõmẽn Xeyanet tuꞌ, xix Yoneo xexka xop nũn, xix tik gãy xop yõg hãmꞌãktuxꞌax Tet nũn, nũy Paot kupeh.
\v 2 Haꞌ xãnãhãꞌ, ha Tet te nõm Gohenanok pu hãmyũmmũgãhãꞌ hu:
\p —‍Gohenanok Penik: Tikmũꞌũn xohix te ꞌãp-tup pax, ꞌõg hãpxopmãꞌax max hah, ha Yoneo yõg tikmũꞌũn kuxa xohix mãm, tuꞌ hittup, xate hãmyũmmũg hah,
\v 3 yĩy tikmũꞌũn xohix te ꞌãmũn ꞌãktux max. Yãꞌ puxiꞌ.
\v 4 ꞌÃte hãmꞌãktux kutõgnãg putup. ꞌŨgꞌãpax, kopxix hãpxip kutõgnãg hãmꞌãktux kux.
\v 5 Paot te hãmꞌãktux kummuk, tuꞌ yĩy hã nũktu tikmũꞌũn xohix gãyãhãꞌ, tu hãpxexka xohix tuꞌ mõg, yã Nãyane yõg xop xohix xat.
\v 6 Hõmã tute Yoneo yõg Topa pet xexka yãyhãp-tũynãg putup, tu tik puknõg mõgãhã Topa pet xexka kopah, pak mũꞌãteꞌ mũg, nũy hãpxopmãꞌax kummuk kopit ꞌũgmũ yõg xatꞌax hã.
\v 7 Pa ꞌãxop yõg Kononeo gãy, tu Paot xut, tuꞌ mõgãhãꞌ, tuꞌ xat, pu nũ nõm xop kãy kupeh, nũy Paot kupeh ꞌãkeppah.
\v 8 ꞌÃpu, ꞌũyĩkopit, nũy hãpxopmãꞌax kummuk yũmmũg. Kaxĩy.
\p
\v 9 Ha Yoneo xop te:
\p —‍Ya hamũn! ꞌAp koitꞌah! Kaxĩy. Pãyãꞌ koit.
\s Paot te yãy ꞌãktux Penik keppah
\p
\v 10 Ha Gohenanok Penik te tuꞌ yĩm xix, nũy Paot puꞌ:
\p —‍ꞌÃyĩy, kaxĩy.
\p Ha Paot te:
\p —‍Gohenanok Penik, hãmyãxatamuk xohix hã xatek mũ yõg tikmũꞌũn yõg hãpxopmãꞌax kopit max, yãk hittup, nũy xa hãmꞌãktux.
\v 11 ꞌÃmnĩy xohix te 12 ꞌĩhã ꞌãte Yenoyanẽn tuꞌ xupep nũy nũk xup Topa puꞌ, ꞌũxohix teꞌ yũmmũg.
\v 12 ꞌÃte hãmꞌãktux hãꞌ nõy yãnãn ꞌohnãg tikmũꞌũn mũtik, tuk yĩy hã gãyã ꞌohnãg Topa pet xexka kopah, ꞌa kõmẽn kopa hãk ꞌũm gãyãꞌah.
\v 13 Yoneo xexka xop te koit.
\v 14 Pa Yeyox yõg putat hãk xip, tu Topa xak, tu nõm pu nũk xup, tuk yĩpkox xip Mõyyex yõg xatꞌax xohix puꞌ, xix Topa pupi hãmꞌãktux xop xohix puꞌ.
\v 15 Tuk kuxa yũm kaꞌok: yã tikmũꞌũn te hãmyok mĩy te putpuꞌ hip-tup, xix tikmũꞌũn te hãpkohe mĩy te putpuꞌ hip-tup kamah, ha nõm Yoneo xop te yãy putpuꞌ hiꞌax hip kamah, tu hãmmax hip.
\v 16 Yãk hãmyok mĩy, ha Topa tek yũmmũg, xix tikmũꞌũn. Kaxĩy.
\p
\v 17 Tu xe hãmꞌãktux, hu:
\p —‍Ha hãmyãxatamuk xohix nõg, ꞌĩhãk nũn, tu nũktu xupep yõgnũ hãpxexka tuꞌ, nũy hãpxop hok popmã Topa puꞌ, xix yõgnũ tikmũꞌũn puꞌ,
\v 18 ꞌĩhã ꞌAk yõg Yoneo xop nũn, tuk pẽnãhã Topa pet xexka kopah, ha ꞌãte yãy pix, Topa yõg xatꞌax tek xat hah, hak yĩy ꞌohnãg, yãk puxehnãg xip.
\v 19 Piꞌyãꞌ pip ꞌAx yõg Yoneo xop hõnhã? ꞌAp nũnꞌah, nũy ꞌũgkupeh.
\v 20 Hõmã Yoneo xexka xop tek yĩkopit. ꞌÃpu, nõm xexka xop ꞌũyãnãn tuꞌ yĩkopit, ꞌok pe ꞌãte hãpxeꞌe ꞌãktux, ꞌok pe ꞌãte koit.
\v 21 Pãyã hõmã nõm xop te yõgnũ hãmꞌãktuxꞌax putup nõg, ꞌĩhã ꞌãte hãmꞌãktux, hu: “Hõnhã xatek yĩkopit, ꞌok pe xakix xop putpuꞌ hip-tup, ꞌok pe putpuꞌ hip-tup hok,” kaxĩy. Tu ta tuꞌ kux.
\p
\v 22 Ha Penik te hãmyũmmũg, tu Topa yõg putat yũmmũg max, pãyã ꞌap Paot yĩkopit putupꞌah, hu:
\p —‍Nãy, ꞌũhip, pu xonat xop yõg Kononeo Nix nũꞌ. ꞌŨnũn, yĩy ta ꞌãte ꞌãkopit. Kaxĩy.
\p
\v 23 Tuꞌ xat, ha Paot xix mĩptut kopah, pu xonat pẽnãꞌ, pãyã hãpkumep mĩptut xexka kopah, tu hãpxopmãp-tup, puxiꞌ mĩy, haꞌ tux hok kamah puꞌ xape xop pẽnãꞌ, nũy hãpxop ꞌũm popmã Paot puꞌ.
\s Paot te yãy pupi hãmꞌãktux Penik keppah, xix Nonoxit keppah
\p
\v 24 ꞌÃmnĩy kutõgnãg ꞌĩhãꞌ nõg, ha Penik nũn, xiꞌ xetut Nonoxit nũn kamah, nõm Yoneo hex, ha Paot xãnãhãꞌ, ha Paot te tikmũꞌũn kuxa yũm kaꞌok Yeyox Kunnix kopa ꞌãktux, haꞌ xupak.
\v 25 Ha Paot te:
\p —‍Topa teꞌ xak, pu tikmũꞌũn xohix hãmyok mĩy, haꞌ yõg hãpxopmãꞌax xohix kopit putup, ꞌok peꞌ max, ꞌok peꞌ kummuk. Kaxĩy.
\p Ha Penik kuxãnõg, tu Topa teꞌ kopitꞌax yĩpkutuk, hu:
\p —‍Mõg, mõg! Kaxĩy.
\p Tu xe:
\p —‍Hãptup nõy kopxix ꞌãxãnãꞌ. Kaxĩy.
\p
\v 26 Pãyã tayũmak ꞌũm hip, pu Paot tu tayũmak ꞌũm xax, yĩy xãnã punethok, hãmꞌãktux hãꞌ nõy yãnãn nãm huh, pa yã Paot te tuꞌ hõm ꞌohnãg.
\p
\v 27 Ha hãmyãxatamuk 2 nõg, ha Penik mõg kumaꞌ mõg, ha Pox Pex nũn ꞌũyãnãn tuꞌ, ha Penik te Paot xix mĩptut kopah, nũy Yoneo xop kuxa hittupmãꞌ.
\c 25
\s Paot te Hõm yõg tik teꞌ xohix xatꞌax tuꞌ xak, puyĩꞌ xut pu mõg
\p
\v 1 Ha Pex nũn tu nũktu kõmẽn Xeyanet tuꞌ xupep, ha ꞌãmnĩy 3 nõg, ꞌĩhãꞌ mõg tu mõktu Yenoyanẽn tuꞌ xupep.
\v 2 Ha ꞌãmãnex xexka xop te hãmyũmmũgãhãꞌ, xix Yoneo xexka xop te hãmyũmmũgãhãꞌ, tu Paot ꞌãktux, tuꞌ kupex, tuꞌ xak,
\v 3 pu Paot nũnnãy Yenoyanẽn tuꞌ, ꞌũxaptop putex putup ha putat kopah.
\v 4 Pa Pex te:
\p —‍ꞌÃmhok. Yãꞌ xip Xeyanet tuꞌ, hak mõg putup putpu Xeyanet tuꞌ.
\v 5 Nãy, pax xa Paot kupex, hu ta mõg ꞌũgmũtik, nũy kupeh. Kaxĩy.
\p
\v 6 Ha ꞌãmnĩy te 10 nõg, ꞌĩhã Pex te Xeyanet tu putpuꞌ nũn, tu hãptup nõy ꞌĩhãꞌ xat pu Paot nũnnãy.
\v 7 Haꞌ nũn, ha Yenoyanẽn yõg Yoneo xop teꞌ kupex nãm, tu yĩkopit, pãyã hãmꞌãktux hã koit, ha Pex teꞌ gãy xop yõg hãmꞌãktux ꞌãpak, tu:
\p —‍ꞌĨntuꞌ. ꞌÃte hãmyũmmũgꞌah, ꞌok pe Paot te hãpkummuk mĩy, ꞌok peꞌ mĩy hok? Kaxĩy.
\p
\v 8 Ha Paot te:
\p —‍ꞌÃte hãpkummuk ꞌũm mĩy ꞌohnãg, ꞌok pe Yoneo yõg Topa pet xexka tuꞌ, ꞌok pe Hõm yõg gohet puknõg tuꞌ. Kaxĩy.
\p
\v 9 Pa Pex te Yoneo xop kuxa hittupmãp-tup, hu:
\p —‍ꞌOk mõg putup Yenoyanẽn tuꞌ, ꞌãte ꞌãyĩkopit? Kaxĩy.
\p
\v 10 Pa Paot te:
\p —‍ꞌAk mõg putupꞌah. ꞌÃte Xex putup, pu yõgnũ hãpxopmãꞌax kopit. Yãꞌ max. ꞌÃte hãpkummuk ꞌũm mĩy ꞌohnãg, ha xateꞌ yũmmũg.
\v 11 Pax pu Yoneo xop koit hok, kopxix xupap-tup hok. Yã ꞌãteꞌ xokꞌax yĩpkutuk ꞌohnãg. Pax pu Yoneo xop koit, ha ꞌãte hãpkummuk ꞌũm mĩy hok, ꞌãpuꞌ xat puk putex hok. ꞌÃte Hõm yõg tik teꞌ xohix xatꞌax putup, yã ꞌãte Xex putup, puk yĩkopit. Kaxĩy.
\p
\v 12 Ha Pex teꞌ xexka xop mũtik hãmꞌãktux hãꞌ nõy yãnãn, ha hãmꞌãktux kux, tu Paot pu hãmꞌãktux, hu:
\p —‍Xate Xex mũn putup, hu Xex ha ꞌãmõg. Kaxĩy.
\s Paot te ꞌAginip keppaꞌ xip
\p
\v 13 Hãpxip kutõgnãg ꞌĩhãꞌ ꞌAginip nũn, tu tikmũꞌũn xat, tuꞌ nũn tu nũktu kõmẽn Xeyanet tuꞌ xupep, xix Menenĩn, tu Pex haꞌ nũn, nũy ꞌãneo.
\v 14 Tuꞌ tihiꞌ, ꞌãmnĩy xohix hãꞌ tihiꞌ, ha Pex te Paot ꞌãktux ꞌAginip tuꞌ, tu hãmꞌãktux, hu:
\p —‍Tik ꞌũm xip, ha Penik te mĩptut kopaꞌ xix, tuꞌ xut pu mõg ꞌohnãg.
\v 15 Hõmã ꞌũkxip Yenoyanẽn tuꞌ, ha Yoneo yõg ꞌãmãnex xexka xop teꞌ kupex, tup-tex putup,
\v 16 pa ꞌãte: “Hõm yõg gohet teꞌ xat hok pu tik ꞌũm ꞌũhok tup-tex hok. ꞌÃmhok. Hõm yõg gohet teꞌ xat, puꞌ kupeh xop kãy haꞌ nũn, nũy kupeh, pu kãy yã yãy ꞌãktux, nũy kupex xop yõg hãmꞌãktux hãꞌ yãnãn,” kaxĩy.
\v 17 Haꞌ nũn yãy tu nũꞌnãhãꞌ, ha ꞌãteꞌ hip putupꞌah, tu hãptup nõy hãꞌ xat, pu Paot nũnnãy, ꞌũyĩꞌ yĩkopit.
\v 18 Haꞌ kupex xop teꞌ kupex, pa kãy te hãpkummuk mĩy ꞌohnãg, tup-tex ꞌohnãg, tuꞌ xupxet ꞌohnãg,
\v 19 pãyã Yeyox ꞌãktux, nõm xok, ha Yoneo xop te hãmꞌãktux hãꞌ nõy yãnãn nãm Paot mũtik, ha Paot te: “Yeyox hi putpuꞌ. ꞌŨgkuxa yũm kaꞌok Yeyox putpuꞌ hiꞌax kopah,” kaxĩy.
\v 20 ꞌÃte hãmpeꞌpaxex, hu: “Pute ꞌũm nũhũꞌ? Kaxĩy. Tuk yĩkopit, pãyãꞌ yĩkopit yũmmũgꞌah, hu Paot puꞌ: “ꞌOk mõg putup Yenoyanẽn tuꞌ, ꞌãte ꞌãyĩkopit?” kaxĩy.
\v 21 Pa Paot te: “ꞌÃmhok. ‘Ak mõg putupꞌah. ꞌÃte Xex putup, puk yĩkopit,” kaxĩy. ꞌÃteꞌ xat, pu nũnteꞌ xix, pu Xex ha mõꞌkutnãꞌ. Kaxĩy.
\p
\v 22 Ha ꞌAginip te:
\p —‍ꞌÃte kãy yõg hãmꞌãktux ꞌãpak putup. Kaxĩy.
\p Ha Pex te:
\p —‍Hãptup ꞌĩhã hãmꞌãpak putup. Kaxĩy.
\p
\v 23 Hãptup ꞌĩhã ꞌAginip nũn, tu tik teꞌ xatꞌax yõg topixxap max mõꞌtat, tu Pex yõg mĩptut hãmꞌãta kox xexka hãꞌ mõꞌnãhãꞌ, tu kõmẽn yõg xexka xop xix xonat yõg Kononeo xop mũtik mõxakux, ha Pex teꞌ xat, pu Paot nũnnãy, haꞌ nũn.
\v 24 Ha Pex te:
\p —‍ꞌÃxexka ꞌAginip, xix ꞌãxexka xop xohix: ꞌÃxop te kãy pẽnãhãꞌ, yã Yoneo yõg tikmũꞌũn xohix teꞌ xak, nũy tup-tex.
\v 25 Ha ꞌãteꞌ yĩkopit, ha hãpkummuk xexka ꞌũm mĩy ꞌohnãg, pup-tex, ha yũmũg xatꞌax xexka Xex mũn putup, puꞌ yĩkopit, yĩy Xex ha ꞌãte mõꞌkutnãp-tup.
\v 26 Tu tappet tu kaxꞌãmi putup Xex pu kamah. Pute ꞌũm ꞌãte kaxꞌãmiꞌ? ꞌAp yũmmũgꞌah ꞌãteꞌ. Hu ꞌãte Paot xat, pu hãmꞌãktux, xayĩy yĩkopit. Tuꞌ yĩkopit kux, kopxix kaxꞌãmiꞌ,
\v 27 nũy tappet hã Paot yõg hãpkummuk mĩyꞌax Xex pu hãmyũmmũgãꞌ. Kaxĩy.
\c 26
\s Paot te yãy pupi hãmꞌãktux ꞌAginip keppah
\p
\v 1 Ha ꞌAginip te Paot pu hãmꞌãktux, hu:
\p —‍ꞌÃpu, ꞌãyĩy. Kaxĩy.
\p Ha Paot teꞌ yĩm pepiꞌ xix, tu hãmꞌãktux, hu:
\p
\v 2-3 —‍ꞌÃxexka ꞌAginip, xate Yoneo xop xat, tu Mõyyex yõg xatꞌax yũmmũg, yĩk kuxa hittup, tu kupex xop pu hãmꞌãktux hãꞌ yãnãn putup. ꞌŨghip, nũy ꞌũgꞌãpax.
\p
\v 4 —‍Yoneo xop xohix tek yũmmũg, yã yõgnũ hãm tuk xip hãmãxap, tuk nũn Yenoyanẽn tuꞌ, ꞌihãk mũn kakxop tuktup, xiꞌ xiptap.
\v 5 Yoneo xop tek yũmmũg, hak mũn Paniye xop yõg, nõm xop te Topa xak xeꞌẽgnãg.
\v 6 Yã hõnhã xatek yĩkopit Topa te hãmꞌãktux xex hã, ha Topa te mõnãyxop pu hãmꞌãktux xex, hu: “Tikmũꞌũn xohix te putpuꞌ hip-tup,” kaxĩy.
\v 7 Hõmã Topa te hãmꞌãktux xex, ha Yoneo yõg tikmũꞌũn xohix teꞌ xak, tu ꞌãmnĩy xohix hã Topa pu nũk tetex, pa Yoneo xop tek kupex, ꞌĩhãk kux yũm kaꞌok putpuꞌ hiꞌax kopah, xix hãmmax hip.
\v 8 Teptu hãmpeꞌãpanõm? ꞌOk Topa te hãpxopmãꞌax kaꞌok mĩy hok? Yãꞌ mĩy. ꞌOk Topa te putpu ꞌãhĩnnꞌãp-tup hok? Yãp-tup. Kaxĩy.
\p
\v 9-10 Tu xe hãmꞌãktux, hu:
\p —‍Hõma ꞌãte hãmpeꞌpaxex, hu: “Yeyox mũn kummuk,” kaxĩy. Tu Yeyox ꞌãktux kummuk, tuꞌ kuxa mãm kaꞌok xop xex kanet kopah, ha Yoneo yõg ꞌãmãnex xop tek xat, tu ꞌãꞌ hõm yãy ꞌãxetꞌax, ꞌũyĩy tu xeh, tuꞌ kix, tuk hittup.
\v 11 Tuꞌ kix kakixnãg Yoneo yõg Topa pet kopah, tu Yeyox ꞌãktux kummuk yĩgãhãꞌ, tuꞌ gãynãm, tuꞌ pek mõg hãptox tuꞌ, nũy mũy, nũy xũygãꞌ.
\s Paot te yãy kuxa yũm ꞌãktux
\p
\v 12 —‍Yã ꞌãmãnex xexka xop te ꞌãꞌ hõm yãy ꞌãxetꞌax, tu kaxꞌãmi tappet tuꞌ, ha ꞌãte nõm tappet mõgãhãꞌ, tuk mõgꞌax Namãn tuꞌ,
\v 13 tu putat hãk mõg, mãyõn te yãy koteꞌ yũm ꞌĩhãꞌ, ꞌãte kuyãnãm kaꞌok pẽnãhãꞌ, ha pexkox tuꞌ xakot, ha mãyõn yãnãm kutõgnãg, pa Topa yõg yãnãm xexkaꞌ, hak nõy xop teꞌ pẽnãhã kamah.
\v 14 Hak mũg xohix hãm tuꞌ xakux, ha ꞌãte yãnmũn xupepꞌax ꞌãpak, ha Yõneo xop yãy yĩyꞌax hã hãmꞌãktux, hu: “Xaot, Xaot: Teptuk xũygãhãꞌ? Yã tu nõ yãy mũn xũygãhãꞌ,” kaxĩy.
\p
\v 15 —‍Ha ꞌãte: “ꞌŨ ꞌũm ꞌãmũn?” kaxĩy.
\p —‍Ha:
\p “ꞌŨgmũn yã Yeyox, ha xatek xũygãhãꞌ kuxa mãm kaꞌok xop hã.
\v 16 Pa ꞌãyok, tuk-nĩhã xip. ꞌÃhak nũn, nũy xã yãykutnãꞌ, xak mũn pu hãpxopmãꞌ, xak mũg pẽnãhã hãmãxap, ha xaꞌ mũg putup ꞌũxeheh, xak mũn ꞌãktux tikmũꞌũn puꞌ.
\v 17 Yã ꞌãte mõꞌãkutnãp-tup Yoneo yõg tikmũꞌũn hah, xix hãmpuknõg xop hah, tu ꞌãpẽnãnãꞌ xip, nũy ꞌãxut nõm gãy xop kopah.
\v 18 ꞌÃte nõm tikmũꞌũn kuxa hittupmãp-tup, ꞌõg hãmꞌãktuxꞌax hãꞌ hittupmãp-tup, pu hãpkoxtap ꞌũkuxa nĩm, ha Topa yõg yãnãm xeꞌe teꞌ kuxa hittupmãp-tup, pu yõgnũ putat hãꞌ mõg, ha xate hãmꞌãktux hã, ꞌãte nõm tikmũꞌũn mõy putup Hãmgãyãgnãg tuꞌ, puyĩy Topaꞌ kummuk mĩyꞌax xaxogãꞌ, pu tu kux, puyĩy yãyhã Topa yõg tikmũꞌũn, nõm xop kuxa mãm kaꞌok ꞌũgmũn kopah.” ꞌŨkux. Kaxĩy.
\p
\v 19 Tu xe:
\p —‍ꞌOk yũmmũg, ꞌãxexka ꞌAginip? ꞌŨgmũg xuxyã tek xat pexkox tuꞌ, hak yĩpkox xip.
\v 20 Tu hãmꞌãktux Namãn tu hãmãxap, tuk-nãy tu Yenoyanẽn tu hãmꞌãktux, xix hãpxexka Yonex tuꞌ, xiꞌ puknõg xop punethok puꞌ, tu yãyhãhup yũmmũgãhãꞌ, pu hãpkummuk mĩy kux, nũy Topa ha mõg, puyĩy hãmyok mĩy, puꞌ xohix te yãyhãhup pẽnãꞌ.
\v 21 Pãyã Yoneo xop tek putup nõg, tuk mũg, ꞌĩhã Topa pet xexka kopak xip, hak putex putup.
\v 22 Pa Topa tek kaꞌogãhãꞌ, yĩy ꞌãte hãmꞌãktux kux ꞌohnãg, tuꞌ xohix pu hãmyũmmũgãhãꞌ, tu Topa tappet hittap puxehnãg hã hãmyũmmũgãhãꞌ. Hõmã Mõyyex te hãmꞌãktux, xix Topa pupi hãmꞌãktux xop te hãmꞌãktux kamah, yĩy ꞌãte tikmũꞌũn xohix pu hãmꞌãktux hãmãxap,
\v 23 nũy Yoneo yõg tikmũꞌũn kuxa kummuk xit, xiꞌ puknõg xop kuxa kummuk xit, yã hõnhãꞌ hep xop xohix kuxa max yãnãnꞌax. Tu ta tuꞌ kux. Kaxĩy.
\p
\v 24 Tu hãmꞌãktux kux, ha Pex yĩy kaꞌok, tu:
\p —‍Paot, ꞌãp-tox kummuk! Xate tappet punethok mõꞌkupix, ha tappet te ꞌãp-tox kummugãhãꞌ! Kaxĩy.
\p
\v 25 Pa Paot te:
\p —‍ꞌAp ꞌũkputox kummukꞌah. Yã hãpxeꞌe ꞌãktux. Kaxĩy.
\p
\v 26 Tu ꞌAginip pu hãmꞌãktux, hu:
\p —‍ꞌÃte yãyhãhup ꞌohnãg, ha tikmũꞌũn xohix teꞌ yũmmũg. ꞌAginip, xate hãmyũmmũg kamah. Topa teꞌ xaptop hãꞌ mĩy ꞌohnãg.
\v 27 Hõmã Topa pupi hãmꞌãktux xop te Topa te hãmꞌãktux ꞌãktux. ꞌAginip, ꞌok ꞌãkuxa yũm kaꞌok Topa pup hãmꞌãktux xop kopah? Yãꞌ yũm. ꞌAꞌ yũmmũg. Kaxĩy.
\p
\v 28 Ha ꞌAginip te:
\p —‍Nãy, ꞌok ꞌãpeꞌãpaxex, hu: “Hãpxip kutõgnãg ꞌĩhã ꞌAginip te yãhãp-tup Kunnix yõg”? ꞌÃmhok! ꞌA yãyhãp-tupꞌah ꞌãteꞌ. Kaxĩy.
\p
\v 29 Ha Paot te:
\p —‍Yãꞌ max ꞌãmũn yãyhã Kunnix yõg. ꞌOk pe hãpxip kutõgnãg ꞌĩhãꞌ, ꞌok pe hãpxip tap ꞌĩhãꞌ, ꞌãtep-tup ꞌãxohix yãyhã Kunnix yõg, ꞌũkputuk, pa kupuk mãg xap hãꞌ hĩyꞌax ꞌaꞌ putupꞌah. Kaxĩy.
\p
\v 30 Ha ꞌAginip tek-nĩhãꞌ xip, xix Pex, xix Menenĩn, xiꞌ xexka xop xohix te nũ mũtik mãm xop,
\v 31 tuꞌ mõg, tu hãmꞌãktux hãꞌ nõy yãnãn, hu:
\p —‍Nũhũ tik max, haꞌ maxꞌah tik xix kanet kopah, tup-tex mũn kummuk. Yã tik te hãpxopmã max. Kaxĩy.
\p
\v 32 Ha ꞌAginip te Pex pu hãmꞌãktux, hu:
\p —‍Kãy xupaꞌax, pãyã Xex mũn haꞌ mõg putup, pu hãpxopmãꞌax tuꞌ kopit. Pũyãꞌ mõg! Kaxĩy.
\c 27
\s Paot te kõmẽn Hõm haꞌ mõg
\p
\v 1 Ha Paot mõgãp-tup hãpxexka ꞌItat tuꞌ (hak mũn Nok te xe kaxꞌãmiꞌ, tuk mõg Paot mũtik), mĩpkox hãk mũg mõg, nõm mĩpkox te kõnãg yĩmũꞌ mõg, ha xonat xop te 100 yõg kapitãm te Paot pẽnãnãꞌ xip, tuꞌ kãy nõy xop pẽnãhã kamah, yã Kapitãm Yot te xonat xop ꞌĨpet yõg.
\v 2 Hak mũg mõg kõmẽn ꞌAnamãtĩn yõg mĩpkox hã, tu hãpkux te hãpkũyãgnãg hãk mũg mõg, ha hãpxexka Mãxenõn yõg ꞌAnixtah te kõmẽn Texanõn, tuꞌ xip, tuꞌ nũn, tuk mũg mũtik mõg.
\v 3 Ha hãptup ꞌĩhã kõmẽn Xinõm tuꞌ mõxahaꞌ, ha Yot max Paot tuꞌ, tu hãm tuꞌ mõg tux hok, pu mõg, nũy xape xop pẽnãꞌ, pu nõm Paot mõꞌnĩynãm, nũy nõ hãpxop tuꞌ popmãꞌ, ha ꞌãmnĩy hãꞌ xape pet tuꞌ nox xip, tu mõꞌyõn.
\v 4 Tu hãptup ꞌĩhãk mũg mõg mĩpkox hã, tu hãmyĩn yũm Xip tuꞌ yĩpxeꞌe hãk mũg mõg, ꞌãmuuh kaꞌok tuꞌ keppa mõꞌkouk hah.
\v 5 Hak mũg mõg kõnãg xexka xak tuꞌ, ha hãpxexka Xinix yĩkãgnãg, xix hãpxexka Pẽnpit, tuk mũg mõg, tu mõktu mõxaha hãpxexka Nix yõg kõmẽn Mĩha tuꞌ.
\v 6 Ha xonat yõg Kapitãm te kõmẽn ꞌAnexãnit yõg mĩpkox xipihiꞌ, haꞌ nũn, tu hãpxexka ꞌItat haꞌ mõg putup, hak mũg mõg nõm mĩpkox hã.
\p
\v 7 Tuk mũg mõgnãg, pak mũg mõg puꞌũgnãg, ꞌãmuuh kaꞌok hah, ha ꞌãmnĩy punethok ꞌĩhã mõxaha hãmyok tu, kõmẽn Xinit keppah, pa ꞌãmuuh gãy, ha mĩpkox mõg ꞌohnãg, hak mũg mõg yĩpxax hah, hãmyĩn yũm Kenet tuꞌ, ha kõmẽn Xanmõn yĩkãgnãg.
\v 8 Ha mĩpkox te hãm tuꞌ xupep, tu hãpkux yĩkãgnãg hãꞌ xip, tuꞌ mõgnãg mõg, tu mõktu mõxaha hãmyĩkox Kõnãg Xexka Yĩkox Max tuꞌ, ha kõmẽn Nayet te hãmhũmnãg.
\p
\v 9 Tuk mũg pip ꞌãmnĩy xohix hã, ha hãmyãxatamuk kaꞌax, yã Yoneo xop te ꞌãmuk xexka ꞌãxetꞌax “yãy kuxa mãxnãꞌax” mĩy tap, ha hõnhã ꞌãmuuh gãy ꞌãxi mõꞌkouk, ha tex gãy, hu kõnãg xexka gãyãhãꞌ, ha Paot te tik te mĩpkox mõgãhã pu hãmꞌãktux, hu:
\p
\v 10 —‍Tihik, hõnhã mĩpkox hãk mõg maxꞌah, ꞌãmuuh kaꞌok hah, Tuꞌ gãy, hak mũg kix putup kõnãg gãy hã, ha kõnãg te mĩpkox kopaꞌ pip hãpxop koxyõy putup, xix mĩpkox, xix tikmũꞌũn kix putup kamah. Kaxĩy.
\p
\v 11 Pãyã Kapitãm Yot te hãmpeꞌpaxex, hu:
\p —‍Paot te mĩpkox mõgꞌax yũmmũg kutõgnãg, pa mĩpkox xuxyã teꞌ yũmmũg xexkaꞌ, xix mĩpkox yõg tik mõgãꞌax. Kaxĩy.
\p Huꞌ yĩpkox pip ꞌohnãg Paot puꞌ. Ha mĩpkox xuxyã xiꞌ mõgãꞌax mõg putup.
\v 12 Hãmyĩkox Kõnãg Xexka Yĩkox Max mũn maxꞌah, pu mãyõn ꞌãnuk mẽy 3 hãk nox piꞌ, nũy ꞌãmuuh gãy kuxꞌax hip, nũy hãmꞌãxi hãk pip, hu kõmẽn Penix tuꞌ mõg putup, nũy hãmyĩn yũm Kenet yõg hãmyĩkox tuk nox piꞌ. Penix te mõꞌkouk yok haꞌ yũm, huꞌ max, pu mãyõn ꞌãnuk nũn 3 hãk pip.
\s ꞌAmuuh gãy te mõꞌkouk
\p
\v 13 Ha ꞌãmuuh te mõꞌkouk haꞌ xuxiꞌ, ha hãmpeꞌpanõm, hu: “Yã hõnhãꞌ max ꞌãmuuh,” kaxĩy. Ha pipkup putux te mĩpkox hãm tuꞌ xup kõnãg kopah, haꞌ xut, tuꞌ mõg, tu Kenet yõg hãpkux hãmhũmnãg hãꞌ mõg.
\v 14 Hãpxip kutõgnãg ꞌĩhã ꞌãmuuh gãy te hãm tuꞌ xupep, ꞌãmuuh ꞌãxetꞌax Nõnet, tuꞌ gãy xeꞌẽgnãg,
\v 15 ha tik te mĩpkox ꞌũm mõgã hok, yã ꞌãmuuh te nuhuknãm, yĩy mĩpkox yãy tuꞌ mõgãhãꞌ.
\v 16 Ha hãmyĩn yũm Kanap tuk mũg mõg, pu ꞌãmuuh hẽnãhãꞌ, haꞌ mõg, ꞌĩhã ꞌãmuuh te xuxik-tõgnãg, mĩpkox kutõgnãg te kõnãg kopaꞌ xip, haꞌ xut, kõnãg hã nõm nũnnãhãꞌ, tu mĩpkox xexka kopa pepiꞌ xex, tuꞌ hĩy.
\v 17 Haꞌ hĩy kux, hak mũg mĩpkox xexka hĩy kaꞌok poxit xexka kaꞌok hã, nõm kup tuꞌ hĩy kaꞌok, pu ꞌãmuuh koxyõy hok, hak mũg kuxãnõg, Nip yõg hãpkux kummuk yĩpkutuk tuꞌ, tu mĩpkox yõg topixxax xexka keppa nũnnãhãꞌ, ꞌãmuuh te nõm mõꞌkouk, tuꞌ mõgãhãꞌ, pu Nip tu mõg hok.
\v 18 Ha ꞌãmuuh gãy te mĩpkox mõꞌyõn, tu mahamnãm kõnãg yĩmũꞌ, ha mĩpkox te hãpxop punethok tat, tup-tux, hak mũg kuxãnõg, tuk mũꞌãte nõm hãpxop mõꞌpok kõnãg tuꞌ, pu mĩpkox te tutnap.
\v 19 Tu ꞌãmnĩy 3 hãk mũꞌãte yãy yõg yĩm hã mĩpkox yõg hãpxop xupepmãhãꞌ.
\p
\v 20 ꞌÃmnĩy xohix hãk mũꞌãte mãyõn pẽnã ꞌohnãg xix mãyõnnãg, ha ta ꞌãmuuh kaꞌok, hak mũꞌãte hãmpekpaxex xakix putup.
\p
\v 21 ꞌÃmnĩy punethok hãk mũg xit ꞌohnãg, yĩy Paot yok, tuk-nĩhãꞌ xip nõm tik xop kopah, tu:
\p —‍ꞌÃxop, teptu ꞌãyĩpkox ꞌohnãg ꞌũgmũn puꞌ? Teptu Kenet tuꞌ nox ꞌãpip hok? ꞌÃte ꞌãyummũgãp-tup, pãyã xatep-tup nõg, yã hõnhã hãpxop punethok xaxogãhãꞌ kõnãg xexka kopah.
\v 22 Pa ꞌãkuxãnõg hok! ꞌAp tik ꞌũm xok putupꞌah, pa mĩpkox mũn yãy koxyõy putup.
\v 23 ꞌÃte Topa pu hãpxopmãhãꞌ, yĩy ꞌãmnĩy koxtap hã pexkox yõg nũꞌkutnãꞌax tek haꞌ nũn, tuk yĩkaꞌ xip,
\v 24 tu ꞌã hãmꞌãktux, hu: “Paot, ꞌãkuxãnõg hok. Xate Xex keppa xip putup, ha Topa te mĩpkox kopa tikmũꞌũn pẽnãnãꞌ xip, xayĩy ꞌãxakix hok, yãꞌ hip-tup,” kaxĩy.
\v 25 Yĩy ꞌãkuxa hittup, Topa te hãmꞌãktux xex hah, ꞌĩhãk kuxa yũm kaꞌok Topa kopah.
\v 26 Pa mĩpkox te hãmyĩn yũm yõg hãpkux haꞌ mõg putup. Kaxĩy.
\p
\v 27 Ha ꞌãmnĩy te 14 nõg, ꞌĩhãk mũꞌãte kõnãg xexka Mẽnitehãn tuk mõxahaꞌ, ha ꞌãmuuh kaꞌok te mĩpkox yãy mõgãhãꞌ, ha ꞌãmnĩy kote ꞌĩhã mĩpkox yõg tik xop te hãmpeꞌpaxex, hu:
\p —‍Hãm ꞌũm xip tu hãmhũmnãg. Kaxĩy.
\p
\v 28 Tu kõnãg yõg mẽt mõꞌkupix, ha kõnãg xet yõg mẽt xohix te 36, ha xeꞌ mõg, tu kõnãg yõg mẽt xe mõꞌkupix, ha mẽt te 27.
\v 29 Ha hãpkux yõg mĩkaxxap xexka yĩpkutuk, tu mĩpkox te mĩkax tu yãy koxyõy yĩpkutuk, yĩy mĩpkox yõg pipkup putux te 4 kõnãg kopa mõꞌpok, nõm poxit hĩyꞌax mĩpkox nãꞌkup tu nõꞌhãp, pu mĩpkox tu mõg hok. Ha Topa tuꞌ xak, pu hãptup mõnãy.
\v 30 Pa mĩpkox yõg tik xop te nũꞌpap-tup, tu mĩpkox kutõgnãg te kõnãg yĩmũ mõg hãꞌ mõxakux, tu tuꞌ xaptop hãꞌ mõgãp-tup, tu hãmꞌãktux, nũy mõꞌãmãꞌ, hu:
\p —‍ꞌŨgmũg mõg, nũy pipkup nõy mõꞌyõn kõnãg xexka kopah, pu mĩpkox tu mõg kux. Kaxĩy.
\p Pãyãꞌ koit.
\v 31 Ha Paot te xonat yõg Kapitãm pu hãmꞌãktux, xix xonat xop puꞌ, hu:
\p —‍ꞌŨxat, puꞌ xohix mĩpkox kopaꞌ piꞌ, ka ꞌãxop xakix. Kaxĩy.
\p
\v 32 Ha Kapitãm teꞌ xat, pu mĩpkox kopaꞌ piꞌ, ha xonat xop te mĩpkox kutõgnãg xit xak, ha yãy xeꞌe tuꞌ mõg, ha kõnãg gãy teꞌ xupepmãhãꞌ.
\p
\v 33 Ha hãptup ꞌĩhã Paot te:
\p —‍ꞌÃpu, ꞌãxit. ꞌÃmnĩy te 14 hã ꞌãxop xit ꞌohnãg, ꞌãkuxãnõg tuꞌ.
\v 34 Yĩy xa hãmꞌãktux, xa ꞌãxit, nũy yãy kaꞌogãꞌ. Topa te hãmꞌãktux xex, ꞌap ꞌãxaxok putupꞌah, ꞌap xakix putupꞌah, xix ꞌap xũy putupꞌah. Kaxĩy.
\p
\v 35 Tu hãmꞌãktux kux, tu pãm pahaꞌ, tu Topa ꞌãktux max, tuꞌ koxip, tuꞌ mãhãꞌ, haꞌ xohix teꞌ pẽnãhãꞌ.
\v 36 Tuꞌ kuxa hittup, tuꞌ xit.
\v 37 Yã nõm xop te mĩpkox kopaꞌ pip xop xohix te 276.
\v 38 Tuꞌ xit, tuꞌ hi kaꞌok, tu pãm xap xuxnãg te xetox pop, tu kõnãg xexka tu mõꞌpok, pu mĩpkox tu tutnep.
\s Tikmũꞌũn xohix te hãmnak tuꞌ mõxahaꞌ
\p
\v 39 Tu hãptup ha ta hãm pẽnãhãꞌ, hãm ꞌũm ꞌap yũmmũgꞌah, pa hãpkux pẽnãhãꞌ, haꞌ max, ha hãpkux tu mĩpkox mõgãp-tup.
\v 40 Ha pipkup te nĩpkox putux yãhãꞌ, haꞌ mõg ꞌohnãg, ha kõnãg xexka kopa mõꞌpok, tu mĩmpe nõm mĩpkox mõgãꞌax koꞌaꞌ, ha topixxax xexka hĩy ꞌãmuuh te nõm tõmãhãꞌ, tu hãpkux haꞌ mõg.
\v 41 Pa mĩpkox xupup te ꞌãmot yĩmũꞌ pip, tuꞌ mõg ꞌohnãg, ha mĩpkox ta kup te kõnãg yĩmũꞌ xup, tu yãy mahap, ha kõnãg xexka gãy teꞌ koxyõy.
\p
\v 42 Ha xonat xop te tikmũꞌũn nõm kanet kopaꞌ pip xop kix putup, pu tu nũꞌpa hok,
\v 43 pãyã xonat yõg Kapitãm te Paot putup pax, tup-tex putupꞌah, huꞌ xat hok, pu nõm xop kix hok, tu xeꞌ xat, pu kõnãg tu tuk-nĩhãm mõg.
\v 44 Ha nõm mõg yũmmũg hok xop te mĩmpe hãꞌ mõg, haꞌ xohix te nũꞌpahaꞌ, tu hãpkux tuꞌ mõxahaꞌ.
\c 28
\s Paot te Mãot tuꞌ xip
\p
\v 1 Hak mũg nũꞌpahaꞌ, tu hãm ꞌũm yũmmũg, ha hãmyĩn yũm ꞌãxetꞌax Mãot.
\v 2 Ha Mãot yõg tikmũꞌũn tek mũg kuxa kaꞌ, tu kuxap xexka mĩy, hãm ꞌãxi hah, ha tex tihix, haꞌ xap tep-tex.
\v 3 Ha Paot te kuh pop, tu kuxap yĩmũ mõꞌpok, ha kãyã gãy kuh tuꞌ xupep, pukpex tuꞌ xupep hah, tu Paot yĩm putop, tu ta tuꞌ xup.
\v 4 Ha Mãot yõg tikmũꞌũn teꞌ pẽnãhãꞌ, tuꞌ nõy pu hãmꞌãktux, hu:
\p —‍ꞌÕhõm tik kummuk putuk. ꞌÃte nõm tik teꞌ nõy putex pekpaxex. Kõnãg xexka gãy tuꞌ xupahaꞌ, pa Topa tep-tup nõg, tu kãyã pup-tõmãhãꞌ. Kaxĩy.
\p Ha kaxĩy nõm tikmũꞌũn te Paot peꞌpaxex kummuk.
\p
\v 5 Pãyã Paot teꞌ yĩm puhmĩy, tu nõ kãyã mõꞌyõn kuxap kopah, tuꞌ pakut ꞌohnãg, tuꞌ xũy ꞌohnãg.
\v 6 Ha tikmũꞌũn te Paot yĩm mõm hip, tuꞌ xok tuꞌ nãꞌ pẽnãp-tup, tu xeꞌ hip, pãyã Paot hittup pax, tuꞌ pakut ꞌohnãg, yĩy tikmũꞌũn teꞌ yẽy, hu:
\p —‍Hamũn yã topahnãg ꞌũm! Kaxĩy.
\p
\v 7 Ha Mãot yõg xexka Pup, tup-texop xexkah, yãꞌ yõg hãm punethok pip, tu yãy pet ha tuk mũg xãnãhãꞌ, ꞌũ non pix, ha ꞌãmnĩy 3 hãk mũg pip.
\v 8 Ha Pup mũg tak pakut, haꞌ xax pukpex, tuꞌ xakuk xiꞌ ta hep, ha Paot mõg, tup-tox yĩmũꞌ yĩm xex, tu Topa pu hãmꞌãktux hãꞌ hittupmãhãꞌ, hã xax xuxiꞌ.
\v 9 Ha Mãot yõg tikmũꞌũn pakut xop teꞌ xupak, tuꞌ nũn, haꞌ hittupmãhãꞌ.
\v 10 Haꞌ kuxa hittup xexkaꞌ, tuk mũg hãpxop hok põpmãhãꞌ, ha mĩpkox kopak mũg mõg, ha nõm xop te hãpxop punethok ꞌũgmũꞌãꞌ nĩm.
\s Tu Mãot nĩm, nũy Hõm haꞌ mõg
\p
\v 11 Ha mĩpkox nõy te hãmyĩn yũm Mãot tuꞌ xip, hãm ꞌãxiꞌ yõg mẽy 3 hãꞌ xip, tu kõmẽn xexka ꞌAnexãnit tuꞌ nũn, ha mĩpkox ꞌãxetꞌax “topak-tonnix”, kaxĩy. Ha mẽy 3 nõg, hak mũg mõg mĩpkox hã.
\v 12 Tu ta kõmẽn Xinakox tuk-mũg mõg, tuk pip ꞌãmnĩy 3 hã.
\v 13 Tu hãmhũmnãg tuꞌ mõg, tu ꞌItat yõg kõmẽn Hey pẽnãhãꞌ, ha hãptup nõy ꞌĩhã ꞌãmuuh max te mõꞌkouk, tuk mũg mõgã mõꞌkaꞌok, tu mõktu ꞌãmnĩy 2 hã kõmẽn Potep tuk mũg mõxahaꞌ.
\v 14 Tuk mũg kuxa mãm kaꞌok xop xape pipihiꞌ, hak mũꞌãteꞌ pet tuꞌ pip ꞌãmnĩy te 7 hã, tuk mũg mõg, tu mõktu mõxaha kõmẽn xexka Hõm tuꞌ.
\v 15 Hak xape xop teꞌ xupak, tuꞌ nũn, tu nũktu ꞌAp yõg hãm nãkox tuꞌ mõxahaꞌ, xix Mẽn tikoyuk tuꞌ mõxahaꞌ, ha Paot kaꞌogãhãꞌ, ha Paot te Topa ꞌãktux max, tu yãy kuxa hittup xexkah.
\s Tu Hõm tuꞌ xip
\p
\v 16 Tu Hõm kopak mũg mõxahaꞌ, ha Paot te xonat puxehnãg mũtik tihi mĩptut kopah, pu pẽnãnãꞌ xip. Ha Paot te mĩptut xuxyã pu tayũmak hõm nũy mĩptut kopa ꞌãtiꞌ.
\p
\v 17 Ha ꞌãmnĩy 3 nõg, ꞌĩhã Paot te Hõm yõg Yoneo xop xãnãhãꞌ, ha yãy tu nũꞌnãhãꞌ, ha Paot te:
\p —‍ꞌŨnõy mũnom xop, Yoneo xop tek mũg, pãyã ꞌãte hãpxopmã ꞌũm kummuk ꞌohnãg tikmũꞌũn tuꞌ, xix mõnãyxop yõg hãpxopmãꞌax ꞌãte kummugã ꞌohnãg, ha kanet kopak xix, tuꞌ puknõg xop hak mõgãhãꞌ.
\v 18 Hak yĩkopit, tuk xupagãp-tup, ꞌãte hãpkummuk ꞌũm mĩy ꞌohnãg hah, ꞌũyĩk xok.
\v 19 Pa Yoneo xop tek putup nõg, yãk putex putup, yĩy ꞌãte tuꞌ xak, pu Xex ꞌũgyĩkopit, yãg gãy ꞌohnãg Yoneo yõg tikmũꞌũn tuꞌ.
\v 20 Tu ꞌãpẽnãp-tup, nũy xa hãmꞌãktux, hak hĩy kupuk mãg xap ha Yeyox hã, yã ꞌIyaet yõg tikmũꞌũn xohix te nõm hip, hãmmax hip tuꞌ. Kaxĩy.
\p
\v 21 Haꞌ nõy te:
\p —‍ꞌAk mũꞌãte tappet ꞌũm mõꞌkupixꞌah, ha Yonex yõg xop te nũ tappet kutnã ꞌohnãg, ha Hõm yõg nõy xop te ꞌãkummuk ꞌãktux ꞌohnãg.
\v 22 Hak mũꞌãte ꞌõg hãmꞌãktuxꞌax ꞌãpak putup, nũy hãmyũmmũg. Teptu Yoneo xop xohix te Yeyox xop putup nõg? Kaxĩy.
\p
\v 23 Ha Yoneo xop te hãptup ꞌũm nũn, Yoneo xop punthok nũn, nũy hãmꞌãpax, tu yãy tu nũꞌnãhã Paot pet tuꞌ, ha Paot te Topa te yãy yõg tikmũꞌũn xat yũmmũgãhãꞌ, tu hãptup tox hã hãmꞌãktux, tu ꞌãmnĩy ꞌĩhã hãmꞌãktux kux, tu Yeyox ꞌãktux, tu Mõyyex yõg xatꞌax hã hãmyũmmũgãhãꞌ, xix Topa pupi hãmꞌãktux xop hã hãmyũmmũgãhã kamah, nũy Yeyox yã Topa yõg hãmyãykutnãꞌax ꞌãktux.
\v 24 Haꞌ yãg kuxa mãm kaꞌok, paꞌ yãg kuxa mãm ꞌohnãg,
\v 25 tu yãy pu hãmꞌãktux, tu hãmꞌãktux hãꞌ nõy yãnãn, tu hãmꞌãktux ꞌĩhãꞌ mõg, Ha Paot te:
\p —‍Hõmã Topa Koxuk te hãmyũmmũg, yĩy ꞌIyait te Topa pupi hãmꞌãktux, tu mõnãyxop pu hãmꞌãktux, hu:
\q
\v 26 “ꞌÃmõg, tikmũꞌũn hah, tu hãmꞌãktux, hu:
\q ꞌÃxop te hãmꞌãpak, pãyã hãm ꞌũm ꞌãpak ꞌohnãg,
\q tu hãmpenãhãꞌ, pãyã hãm ꞌũm pẽnã ꞌohnãg.
\q
\v 27 Yã tikmũꞌũn putox kaꞌok,
\q tu mõꞌyãy yĩpkox yĩnnĩn, nũy hãmꞌãpak hok,
\q xiꞌ pa kĩy kamah, nũy hãmpẽnã hok,
\q ka hãmyũmmũg, xix yãyhãhup,
\q ka Topa yõg putat hãꞌ mõg ꞌũxeheh, ꞌãte nõm hittupmãꞌax,
\q pãyãp-tup nõg. Yã Topa teꞌ xuktux tap.” Kaxĩy.
\p
\v 28 Ha Paot xe hãmꞌãktux, hu:
\p —‍ꞌÃte xa hãpxeꞌe ꞌãktux: Topa te hãmꞌãpak maxꞌax nũꞌkutnãp-tup hãmpuknõg xop hah, haꞌ yĩpkox pip, puyĩy Topa ꞌũkuxa kummuk xit, nũy kuxa max tat ꞌũyãnan tuꞌ. Kaxĩy.
\p
\v 29 Ha Yoneo xop mõg, tu hãmꞌãktux hãꞌ nõy yãnãn nãm hãꞌ mõg.
\p
\v 30 Hãmyãxatamuk 2 hã Paot teꞌ yõg mĩptut kopaꞌ xip, haꞌ xape xop nũn, nũy Paot pẽnãꞌ, haꞌ kuxa hittup, tu Topa te yãy yõg tikmũꞌũn xat ꞌãktux pax.
\v 31 Tu Topa te Yeyox yãykutnãhã ꞌãktux tikmũꞌũn puꞌ, haꞌ puknõg xop teꞌ tux hok, pu mĩy, ꞌĩhãꞌ xohix teꞌ yũmmũg.
\p Ha Nok te Yeyox yõg mõꞌpok xop yõg hãpxopmãꞌax ꞌãktux kux.