\id ROM  - Maxakalí NT [mbl] (Brazil) -2011 bd
\h HÕMÃN
\toc1 Hõmãn
\toc2 Romanos (Rm)
\mt PAOT TE HÕM YÕG KUXA MÃM KAꞌOK XOP PU KAXꞌÃMIꞌ
\c 1
\p
\v 1 ꞌŨgmũn yã Paot, Yeyox Kunnix tu hãpxopmãhãꞌ, ha Topa tek yãykutnãhãꞌ, tuk xãnãhãꞌ, nũy mõgkutnãꞌ, ꞌãte hãmꞌapak maxꞌax ꞌãktux, hu xa kaxꞌãmi nũhũ tappet.
\p
\v 2 Hõmã, hãmyãxatamuk xohix ꞌĩhã Topa te mõnãyxop hittap pu hãmꞌãktux xex, ha Topa yõg pupi hãmꞌãktux xop hittap teꞌ xuktux, tu tappet tu kaxꞌãmiꞌ, hu: “Topa te tik xop mõꞌ pok putup, pu xa hãmꞌãpak maxꞌax ꞌãktux,” kaxĩy.
\v 3 Yĩy Topa tappet te Topak-tok ꞌãktux, tu yũmũg xuxyã Yeyox Kunnix ꞌãktux, hak mũ yõg tikmũꞌũn kutok pit, yã mõnãyxop hittap Namix mõkputox Yeyox.
\v 4 Tuꞌ max xeꞌẽgnãg, Topa putuk tuꞌ, yã Topak-tok xeꞌeꞌ, tuꞌ xok xeꞌe, yĩy Topa te hãpxopmã kaꞌok xeꞌẽgnãg, tuꞌ hĩnnãhã putpuꞌ, puꞌ xohix yũmmũg, yã Yeyox mũn Topa hãk-tok.
\v 5 Yã Topa tek yãykutnãhãꞌ, nũy nũgkutnãꞌ, tu ꞌã yãy ꞌãxetꞌax hõm ꞌũ puknõg xop xohix kuxa mãmmã kamah, pu tuꞌ yĩpkox pi hãmꞌãpak maxꞌax puꞌ,
\v 6 ha ꞌãxop kuxa mãm kaꞌok kamah, kõmẽn Hõm tu ꞌãpip, ha Topa te ꞌãxãnãhãꞌ, xa Yeyox Kunnix hã ꞌãxapeꞌ.
\p
\v 7 Kaxĩy ꞌãte kaxꞌãmi tappet, tu kõmẽn Hõm yõg kuxa mãm kaꞌok xop pu kaꞌãmiꞌ, yã Topa te mõ ꞌãxop yãy xeꞌẽgnãg, tu ꞌãxop xãnãhãꞌ, xayĩy yãyhãꞌ yõg tikmũꞌũn.
\p Pũyã Topa yũmũg Tak xik-tok Yeyox Kunnix xa hãmmaxnãꞌ, xix ꞌãkuxa mãmmãꞌ.
\s Paot te Topa pu hãmꞌãktux, tuꞌ max ꞌãktux
\p
\v 8 ꞌÃte Topa pu hãmꞌãktux pax hãmãxap, hu: ꞌÃmax, Topah! kaxĩy. Tu Yeyox Kunnix hãꞌ xuktux, tu xa hãk hittup kamah. Yã hãm xexka xohix yõg tikmũꞌũn xa hãmꞌãktux max, ꞌãkuxa mãm kaꞌok hah.
\v 9 Topa tu ꞌãte hãpxopmãhã, nũy mĩy mãynãg, tu hãmꞌãpak maxꞌax ꞌãktux, tu Topak-tok ꞌãktux, haꞌ yũmmũg Topa teꞌ, tu ꞌãte hãpxeꞌe ꞌãktux yũmmũg. ꞌAp ꞌãte koitꞌah, yã ꞌãxaxok ꞌohnãg.
\v 10 Tu Topa tuꞌ xak pax, puyĩy kaꞌogãꞌ, tuꞌ xak kamah, pu tu mõgkutnã ꞌãhah, yã Topa te mõ yũmũg yãy xeꞌẽgnãg.
\v 11 ꞌÃhak mõg putup pax. ꞌÃteꞌ xak, ꞌũyĩy ꞌãhak mõg, nũy xa hãmmax nãꞌ, nũy ꞌãkaꞌogãꞌ
\v 12 pu yũmũg xohix mõꞌ yãy nĩynãm: ꞌÃxop te mõgnĩynãm, xik mũn te mõꞌãnĩynãm, hu Topa yõg putat hã yũmũg mõg kumak mõg.
\p
\v 13 ꞌŨkxape xop, ꞌãte xa hãmꞌãktux xeꞌeꞌ: ꞌŨgmõg putup ꞌãhah, yã ꞌãmnĩy xohix hãk mõg putup, pak mõg ꞌohnãg. ꞌÃhak mõg, ꞌokpa ꞌãteꞌ xak, nũy kama ꞌãmõgãꞌ. Hõmã ꞌãteꞌ puknõg xop mõgãhãꞌ, nõm xop te Yoneo yõg tikmũnꞌũn hãꞌ puknõg, Topa yõg putat hãꞌ mõgãhãꞌ, yã kaxĩy ꞌãteꞌ xak, nũy ꞌãmõgã kamah.
\v 14 Topa te mõgkutnãhã, ꞌãte hãmꞌãpak maxꞌax ꞌãktux, huk yĩy hokꞌah. Yã hãmꞌãktux putup Yoneo yõg tikmũꞌũn puꞌ, xix puknõg xop xohix puꞌ. ꞌÃte ta nemẽn, nũy hãmꞌãpak maxꞌax ꞌãktux ꞌũxohix puꞌ. ꞌAp tayũmak ta nẽmẽnꞌah. Yãꞌ nõy, yĩy hãmyũmmũg xop pu ꞌãte hãmꞌãktux, xix hãmyũmmũg ꞌohnãg xop pu ꞌãte hãmꞌãktux kamah, tu hãmꞌãpak maxꞌax ꞌãktux putup ꞌũxohix puꞌ,
\v 15 xix ꞌãxop puꞌ xuktuxꞌax kamah, ha kõmẽn xexka Hõm tu ꞌãpip, yĩk mõg putup ꞌõgnũ kõmẽn Hõm tuꞌ, nũy xa hãmꞌãktux hãmꞌãpak max.
\s Hãmꞌãpak maxꞌax mũn kaꞌok
\p
\v 16 Topa tek xat ꞌãte hãmꞌãpak max ꞌãktux, pu tikmũꞌũn kuxa mãm kaꞌok Yeyox Kunnix kopah, pu tuꞌ kuxa kummuk xit, nũy kuxa max tat ꞌũyãnãn tuꞌ. Yã hãmꞌãpakꞌax kaꞌok, ha ꞌãte yãyhãhup ꞌohnãg, nũy hãmꞌãpak maxꞌax ꞌãktux. Ha Yoneo xop te hãmꞌãpak hãmãxap, yã hãmꞌãpakꞌax kaꞌok, tu Yoneo yõg tikmũꞌũn kuxa kummuk xit, xix yãꞌ puknõg xop kuxa xit kamah, nũy kuxa max tat ꞌũyãnãn tuꞌ, yãꞌ nõy putuk.
\v 17 Topa tep-tup, pu tikmũꞌũn kuxa mãm kaꞌok Yeyox Kunnix kopah. Puxiꞌ, ha nõm tikmũꞌũn mõꞌyãy xeꞌẽgnãg. Yã hãmꞌãpak max xeꞌeꞌ! Hõmã tik te Topa pupi hãmꞌãktux, tu tappet tu kaxꞌãmiꞌ, nũy tikmũꞌũn puꞌ xuktux, hu: “Tikmũꞌũn kuxa yũm kaꞌok Topa kopah, puxix Topaꞌ kuxa kummuk tupmãꞌ, pu tu max, puyĩy tikmũꞌũn hi xeꞌẽgnãg,” kaxĩy.
\s Yãꞌ hep xop xohix te hãpxopmã kummuk
\p
\v 18 Topa gãy tikmũꞌũn kuxa kummuk hah, yũmũꞌãteꞌ yũmmũg, yã Topa tep-tup hok, pu tikmũꞌũn hãpxopmã kummuk hok. Yã tikmũꞌũn te hãpxopmã kummuk pax, tu Topa hãꞌ puknõg, puxiꞌ nõy Topa yũmmũg hok kamah.
\v 19 Ha Topa gãy, tuꞌ yãnãn tuꞌ kummugãhã, tuꞌ xũygãhãꞌ, tu nõm tikmũꞌũn pu hãmyũmmũgã tap, ꞌũkuxa kopaꞌ yũmmũgãhãꞌ, puyĩy tikmũꞌũn Topa yũmmũg max,
\v 20 ꞌĩhãꞌ pẽnã hok, ha hãmnõgnõy mĩy, xix hahãm, ha tikmũꞌũn xop xohix te hãmnõgnõy pẽnãhãꞌ, xix hahãm, tu Topa teꞌ mĩy yũmmũg, hu Topa xexka xeꞌẽgnãg yũmmũg, xix Topa kaꞌok xeꞌẽgnãg yũmmũg, xix Topa xok hok yũmmũg. Tep te xĩy tikmũꞌun te Topa yũmmũg hok? Yã Topa hi xeꞌẽgnãg.
\v 21 Yã hãmyũmmũg, pãyã tikmũꞌũn te Topa xaxok, tu nõm pu hãmꞌãktux ꞌohnãg, hu: “ꞌÃxexka Topah, xix ꞌãmax, xatek mũꞌã hãpxop xohix popmãhãꞌ,” kaxĩy. ꞌÃmhok, ꞌap xuktuxꞌah, pap-tox kummuk, tu hãmpeꞌpaxex ꞌohnãg, tu mõktu hãmyũmmũg ꞌohnãg, ꞌũkummuk tuꞌ.
\v 22 Tu yãy hãmyũmmũg peꞌpaxex, ꞌũhitop tu hãmpeꞌpaxex, ꞌũpa te hãmyũmmũug ꞌohnãg tuꞌ, tup-tox kummuk.
\v 23 Yã Topa hi xeꞌẽgnãg, pa tikmũꞌũn te nĩm, nũy topa komut xop pu nũktetex ꞌũyãnãn tuꞌ, haꞌ komut xop te tikmũꞌũn putuk, xix putuxnãg putuk, xix xokxop putuk, xiꞌ kep hãꞌ mõg xop putuk.
\p
\v 24 Yĩy Topa te tikmũꞌũn putox kummuk xop nĩm, pu yãy putupꞌax mĩy, hu hãpxopmã kummuk, tu yãy kummugãhãꞌ,
\v 25 tu Topa nĩm, tu hãpxop pu nũktetex ꞌũyãnãn tuꞌ, nõm hãpxop Topa teꞌ mĩy, ha Topa xeꞌẽgnãg nĩm, tuꞌ xaxok, nũy ꞌũkoitꞌãx putup ꞌũyãnãn tuꞌ, pa Topa mũn max, tuꞌ hi xeꞌẽgnãg, haꞌ nõg ꞌohnãg. Hamũn!
\p
\v 26 Yĩy Topa teꞌ nĩm, ha hãpxopmã kummuk, tuꞌ nõy puꞌ hupmãhãꞌ, ha ꞌũn xop te ꞌũn nõy pẽnãhãꞌ, nũy nũ mũtik tu yãyhãꞌ xupxet,
\v 27 ha tik xop te tik nõy pẽnãhãꞌ, nõ mõꞌãmã, nũy nũ mũtik tu nõm kummuk, tu ꞌũn putup nõg, pu nũ mũtik tu nõm, pa tik xop putup, yãꞌ kummuk, hu yãy pu hãpkummugãhãꞌ, yĩy Topa teꞌ kummugãhãꞌ, haꞌ pago.
\p
\v 28 Tikmũꞌũn kummuk te Topa xaxok, tu hãmyũmmũg putup ꞌohnãg, yĩy Topa teꞌ nĩm, pu hãmpeꞌpanõm kummuk, nũy hãpxopmã kummuk.
\v 29 Yãꞌ kummuk xeꞌẽgnãg, ꞌũxonnix, tuꞌ xupkumĩy nãm, tuꞌ nõy peꞌpaxex kummuk, tuꞌ nõy pu hãpkummugãhãꞌ, tuꞌ yĩpkumĩy, tu yãykix, tuꞌ nõy putex, tu yãy tuk-mĩy, tuꞌ koit, tuꞌ xupmãhĩy kummuk pax,
\v 30 tuꞌ nõy ꞌãktux kummuk, tu Topap-tup nõg, tu yãy mũn peꞌpaxex xexkaꞌ, ꞌĩhãꞌ nõy peꞌpaxex kutõgnãg, tu hãpkummuk mĩꞌax xak, tu yãy tak xiꞌ tut puꞌ yĩpkox ꞌohnãg,
\v 31 tu hãpkummuk mĩy pax, tu hãmꞌãktux xex, pãyãꞌ xaxok, huꞌ hitop tuꞌ xex, yãꞌ mĩy ꞌohnãg, tuꞌ nõy kuxa ka ꞌohnãg.
\v 32 Tu Topa yõg xatꞌax yũmmũg, haꞌ xat hok puꞌ mĩy hok, ka Topa te: “Pũyã tuꞌ xok ꞌũyãnãn tuꞌ,” kaxĩy, paꞌ yĩpkox ꞌohnãg, tu hãpkummuk mĩy pax, tuꞌ nõy xop pu hãpkummuk yũmmũgãhãꞌ, yãꞌ nõy xapit, puyĩy hãpxopmã kummuk kamah.
\c 2
\s Topa te hãpkummuk mĩy haꞌ pago
\p
\v 1 ꞌOk ꞌãxop te ꞌãnõy yõg hãpxopmãꞌax kopit? Yãꞌ kummuk ꞌãktux, pa ꞌãxop te hãpkummuk mĩy ꞌãnõy putuk, hu yãy yõg hãpxopmãꞌax kopitꞌax kamah. Yã ꞌãtix kummuk. Tep te xĩy ꞌãxop kama hãpkummuk mĩy?
\v 2 Topa mũn max, ha yũmũꞌãteꞌ yũmmũg, haꞌ kopit max, tuꞌ xat hok puyĩꞌ xohix hãpkummuk mĩy hok, haꞌ kummugãp-tup ꞌũyãnãn tuꞌ.
\v 3 Pa ꞌãxop te hãpxopmã kummuk, ꞌĩhã ꞌãnõy tu: “ꞌŨmĩy hokꞌ Yã Topa tep-tup nõg hãpxopmãꞌax kummuk, hu ꞌãxũygãp-tup,” kaxĩy. ꞌOk xate hãmpeꞌãpaxex, hu: “Topa tekmũn pẽnãꞌah?” Kaxĩy. Yãꞌ koit! Yãꞌ pẽnãhãꞌ! ꞌŨxohix te Topa pu yãy putuk, yĩy Topa te yã ꞌõg hãpxopmãꞌax kopit putup kamah, tu ꞌõg hãpkummuk mĩyꞌax hã ꞌãxũygãp-tup.
\v 4 Topa peꞌãpaxek-tõgnãg hok! Yãꞌ max xeꞌẽgnãg Topa, tuꞌ hip, xayĩ pẽnãꞌ, nũy yãyhãhup, nũy hãpkummuk mĩyꞌax nĩm. Yã ꞌãxop te hãmyũmmũg.
\v 5 ꞌÃyĩpkox hok, puxix Topa ꞌãxũygã, ꞌãxũy kutõgnãg nãꞌ mõg, tu mõktu ꞌãxũy xexka, ꞌĩhã Topa teꞌ hep xop xohix yõg hãpxopmãꞌax kopit, puꞌ xohix hãmyũmmũg: Yã Topa te hãmyok mĩy,
\v 6 tuꞌ xohix yõg hãpxopmãꞌax yũmmũg, tu pagop-tup ꞌũyãnãn tuꞌ, yã tikmũꞌũn te hãpxopmã kummuk, puxix Topaꞌ kummugãꞌ, ha tikmũꞌũn te hãpxopmã max, puxix Topa hãmmaxnãꞌ.
\v 7 Tikmũꞌũn yãg teꞌ xak, nũy hãpxopmã max, xiꞌ xak, nũy tu max xeꞌẽgnãg, Topa putuk, xiꞌ xak, pu Topa te: “ꞌÃxop yã yõgnũꞌ!” kaxĩy. Tu hãmmax hip, yĩy nõm xop hĩnnãp-tup xeꞌẽgnãg nũy Topa mũtik tu tihiꞌ.
\v 8 Pa tikmũꞌũn nõy te yãy peꞌpaxex puxet, nũy yãy putupꞌax mĩy, xix hãpxeꞌep-tup nõg, nũy hãpxopmã kummuk pax, ha Topa gãyãhãꞌ, ha hãpkummugãp-tup ꞌũyãnãn tuꞌ, nũy pago.
\v 9 Tikmũꞌũn xohix te hãpxopmã kummuk, puxix Topaꞌ yãnãn tuꞌ xũygãꞌ, yõgnũ Yoneo yõg tikmũꞌũn hãmãxap, hak-nãy tuꞌ puknõg xop xũygãꞌ.
\v 10 Tu tikmũꞌũn max pu hãmmaxnãp-tup ꞌũyãnãn tuꞌ, pu tu yãyhã max xeꞌẽgnãg, Topa putuk, haꞌ xekãnãp-tup, xiꞌ kuxa mãp-tup. Yã hãmmaxnãp-tup ꞌũyãnãn tuꞌ, tu Yoneo yõg tikmũꞌũn pu hãmmax nãp-tup hãmãxap, xik-nãy tuꞌ puknõg xop pu hãmmaxnãp-tup.
\v 11 Yã Topa pu ꞌũhep xohix te yãy putuk, tu hãpxopmãꞌax xohix kopit nũy yũmmũg, ꞌok pe hãpxopmã max, pe tu kummuk, nũy tu pago.
\p
\v 12 Hãm puknõg xop te Mõyyex yõg xatꞌax yũmmũg hok, tu hãpxopmã kummuk, ha Topa teꞌ yõg hãpxopmãꞌax kopit, tu tikmũꞌũn yãy xatꞌax hãꞌ kopit, ꞌĩhãꞌ xatꞌax yũmmũg ꞌohnãg, ha: “ꞌŨkummuk!” kaxĩy. Ha Yoneo yõg tikmũꞌũn te Mõyyex yõg xatꞌax yũmmũg, tu hãpxopmã kummuk, puxix Topaꞌ yõg hãpxopmãꞌax kopit, tu yãy yõg xatꞌax hãꞌ kopit, hu: “ꞌŨkummuk!” kaxĩy.
\v 13 Tikmũꞌũn te hãpxopmã max, puxix Topa tep-tup pax, ꞌok peꞌ xatꞌax yũmmũg, ꞌok peꞌ xatꞌax yũmmũg hok, ha tikmũꞌũn te hãpxopmã kummuk, puxix Topa tep-tup nõg, ꞌok peꞌ xatꞌax yũmmũg, ꞌok peꞌ xatꞌax yũmmũg hok.
\v 14 Hãm puknõg xop te Mõyyex yõg xatꞌax yũmmũgꞌah, paꞌ puknõg te hãpxopmã max, puxix tuꞌ mĩy, Topa yõg xatꞌax mĩy, ꞌĩhãꞌ yũmmũg hok.
\v 15 ꞌŨyũmmũg. Topa te yãy yõg xatꞌax yũmmũgãhãꞌ, nõm xop kuxa kopaꞌ yũmmũgãhãꞌ, yĩꞌ kuxa kopaꞌ yũmmũg, ꞌok pe hãpxopmã max, ꞌok peꞌ kummuk.
\v 16 Hãptup puxet mõꞌnãꞌax, ꞌĩhã Topa te Yeyox xat, pu tikmũꞌũn xop xohix yõg hãpxopmãꞌax kopit, nũy hãmpe tu panõm yũmmũg, nũy hãmpe tu pãnõm xaptopꞌax xohix yũmmũg, ha ꞌãte hãmꞌãpak, maxꞌax hã hãmꞌãktux, yã Topa te hãmpeꞌpãnõm xohix kopit putup, tu hãmꞌãpak maxꞌax hãꞌ kopit putup.
\s Yoneo xop xix Mõyyex yõg xatꞌax
\p
\v 17 Ha ꞌãxop te: “ꞌŨgmũꞌũg Yoneo xop yõg,” kaxĩy. ꞌÃkuxa mãm kaꞌok Mõyyex yõg xatꞌax kopah, mõnãyxop hittap Mõyyex te kaxꞌãmiꞌ, ha ꞌãkuxa mãm kaꞌok nõꞌõm kopah, tu: “ꞌŨgmũꞌũg yã Yoneo xop yõg, ha Yoneo yõg tikmũꞌũn yã Topa hã tikmũꞌũn xeꞌeꞌ,” kaxĩy. Yãꞌ hitop tu yãy mũn xexka peꞌ ãpaxex.
\v 18 Tu Topa yõg putupꞌax yũmmũg, xayĩꞌ mĩy mãynãg. Tu hãmmaxꞌax yũmmũg, xayĩy hãpxopmã max. Pãyã hitop tu hãmyũmmũg,
\v 19 hu yãy peꞌãpaxex hitop, hu: “ꞌÃte hãmyũmmũg, hu hãmyũmmũg hok xop pu hãmyũmmũgãꞌax,” kaxĩy.
\v 20 ꞌÃkuxa mãm kaꞌok ꞌũxatꞌax kopah, yã hãmmax xohix yũmmũgãhãꞌ, xix hãpxeꞌe yũmmũgãhãꞌ, yĩy ꞌãxop teꞌ tuktup xop pu hãmyũmmũgãꞌax, xix hãmyũmmũg hok xop pu hãmyũmmũgãꞌax.
\v 21 Pãyã yãy pu hãmyũmmũgãꞌax xateꞌ xaxok, tu Topa yõg hãmꞌãktux ꞌãktux, pãyãꞌ mĩy ꞌohnãg. ꞌÃxop te: “ꞌÃxupxet hok!” kaxĩy, tu ꞌãnõy puꞌ xat, pu tuꞌ xupxet hok, ꞌĩhã xateꞌ xupxet.
\v 22 Tuꞌ xat hok, puꞌ nõy hãꞌ xupxet hok, pa ꞌãxop te ꞌãnõy hãꞌ xupxet kamah. Tu topa komut xop putup nõg, pãyã topa komut pet tu xateꞌ xupxet, nũy puknõg xop gãyãꞌ. Yã ꞌãkummuk!
\v 23 ꞌÃxop te yãymũn xexka peꞌãpaxex, Topa te xaꞌ hõm yãy xatꞌax hah, pãyã ꞌaꞌ mĩyꞌah, ꞌãyĩpkox ꞌohnãg tuꞌ, yĩꞌ puknõg xop te Topa ꞌãktux kummuk, yã ꞌãxop te Topa puꞌ hupmãhãꞌ, haꞌ yãyhãhup.
\v 24 Topa yõg tappet te: “ꞌŨpuknõg xop te Topa ꞌãktux kummuk, ꞌãxop Yoneo xop te hãpxopmã kummuk hah,” kaxĩy.
\p
\v 25 Yoneo yõg yũmũg tikmũꞌũn te kakxop pit xop yãy nãg xax yĩmap tuꞌ mep, puyĩy tikmũꞌũn te hãmyũmmũg. Yã Topa yõg tikmũꞌũn xeꞌeꞌ. Yoneo xop teꞌ xatꞌax puꞌ yĩpkox pip, puxix tu max, paꞌ yĩpkox hok, puxix yãy xax mep ꞌũhitop tuꞌ.
\v 26 ꞌŨpuknõg xop teꞌ xatꞌax puꞌ yĩpkox piꞌ, puxix tu Topa hã tikmũꞌũn xeꞌeꞌ, ꞌĩhã yãy xax yĩmap mep ꞌohnãg.
\v 27 Ha kaxĩy puknõg xop te yũmũg yõg hãpxopmãꞌax kopit putup, nũy hãpxopmãꞌax yũmmũg, tu yãy xax yĩmap tuꞌ mep ꞌohnãg, pãyã Topa yõg xatꞌax puꞌ yĩpkox pip, nũy hãpxopmã max, pa yũmũꞌãte Topa yõg xatꞌax yũmmũg max, tuꞌ pit xop yãy xax mep, pãyãꞌ yĩpkox hok, tu hãpxopma kummuk, puxiꞌ puknõg xop te yũmũ yõg hãpxopmãꞌax kopit putup.
\v 28 Yoneo yõg tikmũꞌũn yã Topa yõg tikmũꞌũn xeꞌeꞌ. Piyãꞌ Yoneo xop yõg? Tikmũꞌũn te xĩy yã Topa yõg xeꞌeꞌ? Tikmũꞌũn teꞌ xax xak puxet, tu yãyhã ꞌohnãg Topa yõg tikmũꞌũn. ꞌÃmhok.
\v 29 Pa tikmũꞌũn kuxa te Topa xak, nõꞌõm te Yoneo xop yõg xeꞌeꞌ, ha Topa Koxuk teꞌ kuxa tupmãhã, pu tu Topa hã tikmũꞌũn, ꞌũxatꞌax teꞌ mĩy hok hah. Yã Topa tep-tup, tuꞌ max ꞌãktux. ꞌAp tikmũꞌũn nõy te hãmꞌãktuxꞌah.
\c 3
\p
\v 1 Tikmũꞌũn ꞌũm teꞌ yĩkopit, hu: “ꞌOk max ꞌũgmũn yã Yoneo xop yõg?” kaxĩy. Xix: “ꞌOk max Yoneo xop pit yãy nãg xax yĩmap nũy xak?” kaxĩy.
\v 2 Yãꞌ max xeꞌeꞌ. Topa tek mũ yõg Yoneo xop pu yãy yõg hãmꞌãktux ꞌãktux, ꞌũyĩy tu xeh max.
\v 3 Tikmũꞌũn ꞌũm te hãmꞌãktux, hu: “Pa Yoneo yõg tikmũꞌũn punethok yĩpkox pip ꞌohnãg, tu Topa yõg hãmꞌãktux puꞌ yĩpkox ꞌohnãg,” kaxĩy. ꞌAꞌ yũmmũg, pa Topa mũn max, tu Yoneo yõg tikmũꞌũn pu hãmꞌãktux xex, tuꞌ xaxok ꞌohnãg.
\v 4 Hamũn! Topa te hãpxeꞌe ꞌãktux, tu hãmyok mĩy, tuꞌ koit ꞌokpa tikmũꞌũn xohix te mõꞌãmãꞌ, yĩy Topa tappet te:
\q “Yã Topa te hãmyok mĩy, tu hãpxeꞌe ꞌãktux,
\q tuꞌ koit ꞌohnãg,
\q puꞌ pa te hãmyũmmũg xeꞌeꞌ yĩkopit, tu: ꞌŨmax,”
\m Kaxĩy.
\p
\v 5 Yũmũꞌãte hãpxopmã kummuk, kopxix tikmũꞌũn nõy pu Topa mũy, yã hãmyok mĩy Topa teꞌ, ha yũmũ yõg hãxopmãꞌax kummuk hã yũmũꞌãte hãmyũmmũgãhãꞌ. Yã tikmũꞌun punethok te hitop tu hãmꞌãktux, hu: “Pũyã Topa ꞌũgkummugã hok, nũy yũmũ yõg hãpkummuk mĩy hãꞌ pagoꞌ, ꞌAp maxꞌah Topa ꞌũgkummugãꞌ! Kaxĩy.
\v 6 Nãy, Topap-xehnãg te hãmyok mĩyꞌ Yã Topa mũn pa te hãmyũmmũg xeꞌẽgnãg, nũy tikmũꞌũn xop xohix yõg hãpxopmãꞌax kopit, xiꞌ hep xop xohix yõg hãpxopmãꞌax kopit. Paxpu Topa hãpxopmã kummuk, puxix tu tikmũꞌũn xohix yõg hãpxopmãꞌax kopit hok.
\p
\v 7 ꞌÃte xe hãmꞌãktux, hu: Yãk mũn te koit, pãyã Topap-xehnãg te koit ꞌohnãg. Tikmũꞌũn xohix te yã koit pax, hu hãmyũmmũg. Yã Topap-xehnãg mũn max xeꞌẽgnãg. Ha tikmũꞌũn ꞌũm te hitop tu yĩkopit, hu: “Teptu Topa teꞌ yãnãn tuk kummugãhãꞌ, ꞌãte koit hah?” Kaxĩy.
\v 8 Tikmũꞌũn nõy te hitop tu hãmꞌãktux, hu: Yãꞌ max yũmũꞌãte hãpkummuk mĩy, puyĩy Topa hãmmaxnãꞌ, yãꞌ yãnãn tu hãmmaxnãꞌ,” kaxĩy. Ha tikmũꞌũn nõy tekmũn kummuk ꞌãktux, hu: “Paot te nõm ꞌãktux.” Kaxĩy. Tuꞌ koit. Topa te hãmꞌãktux kummuk xop hãpkummugãp-tup ꞌũyãnãn tuꞌ.
\s ꞌŨxohix te hãpxopmã kummuk
\p
\v 9 ꞌOk Topa tekmũ yõg Yoneo xop peꞌpaxex max, xiꞌ puknõg xop peꞌpaxex kummuk? ꞌÃmhok! Yãꞌ xohix te yãy putuk Topa puꞌ, ꞌũxohix te hãpxopmã kummuk putup pax, haꞌ kuxa hĩy kaꞌok,
\v 10 yĩy Topa yõg tappet te:
\q “Tikmũꞌũn yok ꞌũm ꞌap xipꞌah.
\q
\v 11 tu yã hãmyũmmũg ꞌohnãg, xix Topa xak ꞌohnãg.
\q
\v 12 ꞌŨxohix te Topa nĩm, tu Topa yõg putat xak.
\q ꞌŨ ꞌũm te hãpxopmã max? ꞌAp xipꞌah, ꞌap puxehnãg xipꞌah.
\q
\v 13 ꞌŨyĩyꞌax te xukpot hax xũy, yãꞌ kummuk, tu yã mõꞌãmã pax,
\q ꞌŨyĩkox te kãyãnox yĩkox putuk, nũy tu yĩyꞌax hãp-tex.
\q
\v 14 Tuꞌ mãnõg, hu: ‘Pũyã Topa ꞌãxat hã ꞌãp-tex!’ kaxĩy.
\q
\v 15 Yãꞌ xak, nũy tikmũꞌũn xũygãꞌ, nũy putex,
\q
\v 16 tu hãpkutꞌex kummuk pax nãꞌ xip, tu hãpkoxyõy pax,
\q
\v 17 tuꞌ nõy kuxa yũmmã ꞌohnãg,
\q
\v 18 tu Topa yĩpkutuk ꞌohnãg, nũy tu nũktettex,
\q yãꞌ kuxa teꞌ yẽy ꞌokpa Topa xip.” Kaxĩy.
\p
\v 19 Yũmũꞌãte hãmyũmmũg, tu Topa teꞌ xatꞌax hõm yũmmũg, ha Yoneo yõg tikmũꞌũn puꞌ hõm, tuꞌ hõm puyĩꞌ xohix yãy yõg hãpxopmãꞌax yũmmũg, nũy yãyhãhup Topa tuꞌ, ha Topa te tikmũꞌũn xohix, xiꞌ hep xop xohix yõg hãpxopmãꞌax kopit putup, nũy yõg hãpxopmã kummuk yũmmũg, nũy yãnãn tuꞌ kummugãꞌ.
\v 20 Paxpu tikmũꞌũn Topa xatꞌax puꞌ yĩpkox piꞌ, puxiꞌ kuxa tupmã hok. ꞌÃmhok. ꞌŨxatꞌax te tikmũꞌũn pu hãmyũmmũgãhãꞌ, pãyãꞌ kuxa kummuk tupmã ꞌohnãg.
\s Tikmũꞌũn kuxa yũm kaꞌok Yeyox kopah, puxix Topaꞌ kuxa kummuk tupmãꞌ
\p
\v 21 Pa Topa te tikmũꞌũn kuxa kummuk tupmã nõmhãꞌ, tuꞌ xatꞌax hok hãꞌ tupmãhãꞌ, ha Mõyyex yõg xatꞌax te yũmũꞌã hãmyũmmũgãhãꞌ, xix tik hittap xop te Topa pupi hãmꞌãktux, tu yũmũꞌã hãmyũmmũgãhã kamah, yĩy Topa yõg tappet te: Ya hamũn! Kaxĩy.
\v 22 Topa teꞌ kuxa kummuk tupmãhãꞌ, pu tu kuxa max. ꞌŨkuxa yũm kaꞌok Yeyox Kunnix kopah, yĩy Topa teꞌ tupmãhãꞌ. Yãꞌ hep xohix te yãy putuk, yã Yoneo yõg tikmũꞌũn, xix nõm xop te Yoneo xop hãꞌ puknõg, yã yãy putuk. Ha Topa teꞌ kuxa mãm kaꞌok xop xohix tupmãhãꞌ, pu tu kuxa max.
\v 23 ꞌŨhep xop xohix te Topa yõg putat xak, tuꞌ nĩm, tu hãpxopmã kummuk pax, hu Topa putuk ꞌohnãg.
\v 24 Pa Topa te hãmmaxnãhãꞌ, tu nõm kuxa kummuk tupmãhãꞌ, ꞌũhok hãꞌ tupmãhãꞌ, yã Yeyox Kunnix xok hãꞌ tupmãhãꞌ, pu tu kuxa max. Yeyox Kunnix xok, nũy tikmũꞌũn kuxa kummuk xit, nũy kuxa max tat ꞌũyãnãn tuꞌ.
\v 25 Topa te tuꞌ mũg Kunnix tu: “ꞌŨpẽnãꞌ,” kaxĩy, tu nõm yãykutnãhãꞌ, pu mĩpkupnix tu tuꞌ xok, puyĩy Topa tikmũꞌũn yõg hãpkummugãꞌax xaxogãꞌ, pu tu kux, Yeyox Kunnix xokꞌax hã Topa teꞌ xaxogãhãꞌ, tu hãmyok mĩy xeꞌẽgnãg tuꞌ xaxogãhãꞌ, tikmũꞌũn kuxa mãm kaꞌok hãꞌ xaxogãhãꞌ. Hõmã Topa te nõãꞌtot tikmũꞌũn yõg hãpxopmãꞌax kummuk, tu ꞌap koitꞌah,
\v 26 pa hõnhã Kunnix mũg, haꞌ xok tikmũꞌũn pupiꞌ, pu tikmũꞌũn xohiꞌ yũmmũg, nũy: “Yã Topa te hãmyok mĩy, hamũn, Topa max xeꞌẽgnãg,” kaxĩy. Ha hãmyũmmũgãhãꞌ, puyĩy yũmmũg. Yã Topa te tikmũꞌũn kuxa kummuk tupmãhãꞌ, tuꞌ kuxa mãm kaꞌok xop tupmãhãꞌ, nõm xop kuxa mãm kaꞌok Yeyox kopah.
\p
\v 27 Putep te xĩy yã yãy peꞌãpaxex? Putep te xĩy ꞌãyõgkãnãmnãm hã ꞌãxip? ꞌOk yũmũꞌãte hãmyok mĩy, pu Topa yũmũg putup? ꞌOk yũmũg yĩpkox pip Topa yõg xatꞌax puꞌ, nũy yũmũg kuxa tupmãꞌ? ꞌÃmhok. ꞌAp kaxĩyꞌah. Pãyã yũmũg kuxa mãm kaꞌok Yeyox kopah, hu Topa te yũmũg kuxa tupmãhãꞌ, pu tu kuxa max.
\v 28 Huꞌ yũmmũg, Topa teꞌ kuxa yũmꞌax puxehnãg hã tikmũꞌũn kuxa tupmãhãꞌ, tuꞌ xatꞌax hãꞌ tupmã ꞌohnãg, tuꞌ yĩpkox pipꞌax hãꞌ tupmã ꞌohnãg.
\v 29 ꞌOk Topa te Yoneo xop puxet hã yã Topah? ꞌOk pe Topa teꞌ puknõg xop hã yã kamah? Hamũn! Yãꞌ hep xohix xop hã Topah.
\v 30 Topap-xet, tu Yoneo yõg tikmũꞌũn kuxa tupmãhãꞌ, ꞌũkuxa mãm kaꞌok hãꞌ tupmãhãꞌ, tuꞌ puknõg xop kuxa mãm xop kuxa tupmãhãꞌ.
\v 31 ꞌOk Topa teꞌ xatꞌax nõãꞌ, puyĩy tikmũꞌũn kuxa mãm kaꞌok Yeyox kopah? ꞌÃmhok. Topa teꞌ nõãꞌ ꞌohnãg, hak mũꞌãteꞌ xat, puyĩꞌ yĩpkox piꞌ, nũy mãynãg mĩy.
\c 4
\s Paot te mõnãyxop ꞌAmanãm ꞌãktux
\p
\v 1 ꞌÃpu yũmũꞌãte ꞌAmanãm ꞌãktux, nõm te Yoneo yõg tikmũꞌũn xohix hã mõnãyxop hãmãxap. Putep ꞌãktuxꞌax yũmũꞌãteꞌ?
\v 2 Yã Topa te ꞌAmanãm max ꞌãktux. Teptu Topa teꞌ xuktux? ꞌOk hãpxopmãꞌax hãꞌ xuktux? ꞌÃmhok. Yãꞌ hok tu Topa te mõꞌyãy xeꞌẽgnãg, yĩy ꞌAmanãm te yãy mũn kutõgnãg peꞌpaxex.
\v 3 Yã Topa yõg tappet te: “ꞌAmanãm kuxa yũm kaꞌok Topa kopah, yĩy Topa teꞌ kuxa kummuk tupmãhãꞌ, pu tu kuxa max.” Kaxĩy.
\v 4 Tikmũꞌũn hãm, hu tayũmak pahaꞌ, ꞌũhok hãꞌ pa ꞌohnãg, pãyã hãmꞌax tuꞌ pahaꞌ.
\v 5 Ha tikmũꞌũn kuxa kummuk, ꞌap hãpxopmã max yũmmũgꞌah, paꞌ kuxa yũm kaꞌok Topa kopah, puxix Topa pẽnãꞌ, nũy kuxa yũmꞌax pẽnãꞌ, tuꞌ hok hãꞌ kuxa kummuk tupmãhãꞌ. ꞌOk Topa te tikmũꞌũn kuxa kummuk xohix tupmãhãꞌ? ꞌÃmhok. Pa nõm xop te hãpxopmã max hok, tuꞌ kuxa mãm kaꞌok, yã Topa te nõm kuxa tupmãhãꞌ.
\v 6 Hõmã mõnãyxop hittap Namix te hãmꞌãktux, tu tikmũꞌũn hittupꞌax ꞌãktux, Topa teꞌ yõg hãpkummuk mĩyꞌax xaxogãhãꞌ, yã hãpxopmãꞌax hok hãꞌ tupmãhãꞌ, haꞌ hittup tikmũꞌũn, yĩy Namix te:
\q
\v 7 “Tikmũꞌũn kuxa hittup, Topa te ꞌũyõg hãpkummuk mĩyꞌax
\q xaxogãhã hah, pu tu kux.
\q
\v 8 Tikmũꞌũn kuxa hittup, Topa teꞌ yõg hãpkummuk mĩyꞌax
\q mõꞌkupix ꞌohnãg, haꞌ hittup,” kaxĩy.
\p
\v 9 Piꞌyãꞌ tikmũꞌũn hittup? ꞌOk Yoneo yõg tikmũꞌũn puxet hittup? ꞌOk peꞌ puknõg xop hittup kamah? Namix te putep ꞌãktux? Yã Namix teꞌ hep xop xohix ꞌãktux, nõm kuxa mãm kaꞌok xop ꞌãktux, yĩy Topa yõg tappet te xe: “ꞌAmanãm kuxa yũm kaꞌok Topa kopah, yĩy Topa teꞌ kuxa tupmãhãꞌ, pu tu kuxa max,” kaxĩy.
\v 10 Hãm ꞌũm hã Topa teꞌ tupmãhãꞌ? Piꞌyãꞌ? ꞌOk pe ꞌAmanãm te yãy nãg xex xak ꞌũyĩmap tu hãmãxap, hak-nãy tuꞌ tupmãhãꞌ? ꞌOk pe Topa te ꞌAmanãm kuxa tupmã hãmãxap, hak-nãy tu yãy xax xak ꞌũyĩmap tuꞌ? Yã Topa teꞌ tupmã hãmãxap,
\v 11 hak-nãy tu ꞌAmanãm te yãy xax yĩmap tuꞌ xak, puyĩy tu yãy kuxa yũmꞌax yũmmũgãꞌ, yãꞌ kuxa yũm ꞌax ha Topa te ꞌAmanãm putup, tuꞌ kuxa tupmã hãmãxap, pu tu max, yĩy ꞌAmanãm te yũmũꞌ hã mõnãyxop, ha yũmũg kuxa mãm kaꞌok hã yũmũg kuxa tupmãhã yãy puꞌ, pa yũmũg yãg te yãy xax ꞌũyĩmap tuꞌ mep hok.
\v 12 Ha ꞌAmanãm te Yoneo yõg tikmũꞌũn hã mõnãyxop yã kamah, nõm xop kuxa mãm kaꞌok Topa kopah, tu ꞌAmanãm putuk, Topa yõg putat hãꞌ mõg ꞌAmanãm putuk tuꞌ, ha kaxĩy ꞌAmanãm kuxa yũm kaꞌok hãmãxap, tuk-nãy tu yãy nãg xex yĩmãp tuꞌ xak.
\s Topa te hãmꞌãktux xex
\p
\v 13 Topa te ꞌAmanãm pu hãmꞌãktux xex, xix ꞌAmanãm mõkputox pu hãmꞌãktux xex kamah, nũy tu hãm xexka hõmꞌax ꞌõm puꞌ, xiꞌ mõkputox puꞌ, puyĩy yãy yõg nũ hãm xexkah, ha hãmꞌãktux xex, ꞌAmanãm kuxa yũm kaꞌok hah. Teptu hãmꞌãktux xex ꞌAmanãm puꞌ? ꞌOk xex ꞌũxatꞌax mĩy hah? ꞌÃmhok. Topa mũn te hãmꞌãktux xex hãmãxap, ꞌAmanãm kuxa yũm kaꞌok hah, hak-nãy tu ꞌAmanãm teꞌ xatꞌax puꞌ yĩpkox xip.
\v 14 Yoneo yõg tikmũꞌũn yĩpkox pip Mõyyex yõg xatꞌax puꞌ. Paxpu Topa te hãmꞌãktux xex ꞌũyĩpkox pip xop puꞌ, puxik-tõgnãg, puꞌ kuxa mãm kaꞌok, puxix Topa hãmꞌãktux hitop tuꞌ xex.
\v 15 ꞌŨxatꞌax te Topa te hãmyok mĩy ꞌãktux. Tikmũꞌũn yĩpkox ꞌohnãg Topa yõg xatꞌax puꞌ, nũy tu hãpxopmã kummuk, puxix yãy tu Topa gãyãhãꞌ, ha Topa teꞌ kummugãp-tup ꞌũyãnãn tuꞌ. Paxpuꞌ xatꞌax tu xip hok, puxix tikmũꞌũn hãmyũmmũg ꞌohnãg, nũy xatꞌax puꞌ yĩpkox piꞌ, puxix Topa tu gãy hok kamah.
\p
\v 16 ꞌŨyũmmũg. ꞌAmanãm kuxa yũm kaꞌok Topa kopah, yĩy Topa te hãmꞌãktux xex xeꞌeꞌ, tuꞌ hok hõmꞌax ꞌAmanãm mõkputox puꞌ, nõm xop kuxa mãm kaꞌok xop puꞌ hok hõm, nõm te Topa yõg putat hãꞌ mõg, ꞌAmanãm putuk, ha yũmũꞌã hã ꞌãtak, yã yũmũg kuxa kama mãm kaꞌok.
\p
\v 17 Ha Topa yõg tappet te: “ꞌŨhẽp xop xohix te ꞌAmanãm ꞌãktux putup, hu: ‘ꞌAmanãm yã yũmũꞌã hã mõnãyxop, yã yũmũg kuxa mãm kaꞌok kamah, ꞌAmanãm putuk,’ ” kaxĩy. Yĩy Topa te hãmꞌãktux xex kaꞌok, ha ꞌAmanãm kuxa yũm kaꞌok Topa kopah, yã Topa xexkah, tu tikmũꞌũn xakixꞌax hĩnnãhãꞌ, tu hãm xexka xohix yõg hãpxop mĩy, tu hãpxop hok hãꞌ mĩy, ꞌũxatꞌax hãꞌ mĩy.
\v 18 ꞌAmanãm kutut, xiꞌ xetut kutut, ꞌũkaꞌok, tuk-tok ꞌokpa Topa te ta tu hãmꞌãktux xex, hu: “ꞌÃmõkputox xohix xexka pip punethok,” kaxĩy. Yĩy ꞌAmanãm kuxa yũm kaꞌok, tu hãmmax hip, paꞌ kutut xeꞌe ꞌAmanãm,
\v 19 ꞌũyõg hãmyãxatamuk xohix te 100, haꞌ yĩn puꞌuk, paꞌ kuxa yũm kaꞌok, tuꞌ yĩkopit ꞌohnãg, ꞌĩhãꞌ xetut kaꞌok yũmmũg,
\v 20 tuꞌ hittup, tuꞌ kuxa yũm kaꞌok, Topa te hãmꞌãktux xex tuꞌ, tu nõm pu: “ꞌÃmax. Xate ꞌãꞌ hõm putup ꞌũgkutok pit. Ya hãmũn. Puxiꞌ,” kaxĩy.
\v 21 Tu hãmyũmmũg, hu: “Topa te ꞌãꞌ hõm putup ꞌũgkutok pit, tuꞌ kaꞌok xeꞌẽgnãg, nũy tu ꞌãꞌ hõm,” kaxĩy.
\v 22 Huꞌ kuxa yũm kaꞌok Topa kopah, ha Topa teꞌ kuxa tupmãhãꞌ, pu tu kuxa max.
\v 23-24 Topa yõg tappet te ꞌAmanãm ꞌãktux, tu yũmũꞌã ꞌãktux kamah, yã Topa teꞌ kuxa mãm kaꞌok xop xohix kuxa tupmãhãꞌ, ꞌũ tu kuxa max, ha yũmũg kuxa mãm kaꞌok Topa kopah, nõm te yũmũg xuxyã hĩnnãhãꞌ putpuꞌ, yã Yeyox Kunnix mũn hĩnnãhãꞌ,
\v 25 ha te Topa tux hok, pu tikmũꞌũn putex, ha yũmũg pupiꞌ xok, nũy yũmũg yõg hãpxopmãꞌax kummuk tuꞌ xok hãꞌ pago, ha Topa te putpuꞌ hĩnnãhãꞌ, nũy yũmũg kuxa kummuk tupmã Topa tuꞌ.
\c 5
\s Topa te yũmũg kuxa kummuk tupmãhãꞌ
\p
\v 1 Topa te yũmũg kuxa kummuk tupmãhãꞌ, yũmũg kuxa mãm kaꞌok hah. Yã Topa gãy kux, ha yũmũg kuxa mãm, nũy tu hittup. Yũmũg xuxyã Yeyox Kunnix te yũmũg kuxa mãmmãhãꞌ,
\v 2 tu yũmũg mõgãhãꞌ, ꞌũmõg Topa yõg putat hã. Yã yũmũg kuxa mãm kaꞌok Kunnix kopah, yĩy Topa te yũmũꞌã hãmmaxnãhãꞌ, ha Topa yõg putat hã yũmũg mõg kumak mõg. Yã yũmũg kuxa hittup, ꞌĩhãꞌ mãm kaꞌok, tu hãmmax hip, nũy yãyhã tu max xeꞌẽgnãg, Topa putuk.
\v 3 Yũmũꞌãteꞌ hip kamah, ꞌĩhã yũmũg xũy, pãyãk kuxa hittup, ꞌĩhãk xũy kamah. Yã kaxĩy yũmũg xũy hãꞌ tot.
\v 4 Yũmũꞌãte nõãꞌ tot, ha Topa teꞌ pẽnãhãꞌ, tu yũmũg putup, yĩy yũmũꞌãte hãmmax hip, nũy yãyhã Topa putuk.
\v 5 Yũmũg kuxa teknõg ꞌohnãg, yã Topa te hãmꞌãktux, tute mõ yũmũg yãy xeꞌẽgnãg ꞌãktux, ha Topa Koxuk te yũmũg kuxa yũmmũgãhãꞌ, tu Topa te mõ yũmũg yãy xeꞌẽgnãg yũmmũgãhãꞌ, ha Topa te yãy Koxuk nũꞌkutnãhã yũmũꞌãꞌ, yĩy hãmmax hip.
\p
\v 6 Hõmã yũmũꞌãte Topa hãk puknõg, tu hãpxopmã max hok, ha Kunnix xok, yũmũg pupiꞌ xok, yũmũg kuxa kummuk, yĩꞌ xok, ha Topa te ꞌãmnĩy puxet yãykutnãhãꞌ, ha Kunnix xok nõꞌõm ꞌãmnĩy ꞌĩhãꞌ, nũy yũmũg kuxa kaꞌogãꞌ, ꞌũyĩy yũmũg hãpxopmã max.
\v 7 Tikmũꞌũn ꞌũm teꞌ nõy pupiꞌ xokꞌax? ꞌOk tik te hãmyok mĩy pupiꞌ xokꞌax? Yãꞌ kaꞌok, nũy nõy yãnãn tuꞌ xok, pa tikmũꞌũn kutõgnãg te tik max ꞌũyãnãn tuꞌ xokꞌax.
\v 8 Pa Topa te mõ yũmũg yãy xeꞌẽgnãg, tu yũmũg yũmmũgãhãꞌ, yã Kunnix te yũmũg pupiꞌ xok tap, ꞌĩhã yũmũg kummuk nãm!
\v 9 Haꞌ xok, nũy yũmũg kuxa kummuk tupmãꞌ, pu tu kuxa max, puyĩy Topa gãy kuxyã yũmũg pupiꞌ.
\v 10 Hõmã Topa te yũmũꞌã tuꞌ gãy, pa Topak-tok xok, nũy yũmũg kuxa kummuk xit, nũy kuxa max tat ꞌũyãnãn tuꞌ, ha hõnhã Topa te yũmũꞌã hãk xapeꞌ, ha Kunnix hi putpuꞌ, tu yũmũg kopaꞌ xip.
\v 11 Yũmũg kuxa hittup xeꞌeꞌ, yã Topa yũmũꞌã hãk xape, xix Yeyox Kunnix te yũmũg kuxa hittupmãhãꞌ, yã yũmũg xuxyãꞌ, tu Topa gãy kuxyãhãꞌ, yĩy Topa hã yũmũg xapeꞌ.
\s ꞌAnão xix Kunnix
\p
\v 12 Tik te mãxap puxet te hãpxopmã kummuk hãm xexka tuꞌ, huꞌ xok, hãpxopmã kummuk tuꞌ xok, yĩꞌ hep xop xohix xakixꞌax, ꞌũxohix te hãpxopmã kummuk tuꞌ.
\v 13 Hõmã, hãmyãxatamuk xohixnãg hã, ꞌap xipꞌah Topa yõg xatꞌax, haꞌ hep xop xohix te hãpxopmã kummuk, pãyã Topa te hãpxopmãꞌax kummuk mõꞌkupix ꞌohnãg, yã tikmũꞌũn teꞌ yõg xatꞌax yũmmũg hok.
\v 14 Mõnãyxop hãmãxap ꞌAnão ꞌaꞌ yĩpkox pipꞌah ꞌũxatꞌax puꞌ, tu hãpkummuk mĩy, haꞌ hep xop xohix te hãpxopmã kummuk, huꞌ xakix nãm, ꞌĩhã ꞌAnão xip hãpxexka tuꞌ, haꞌ xohix xakix, tu mõktu mõnãyxop hittap Mõyyex xip, nõm te Topa yõg xatꞌax kaxꞌãmiꞌ, yãꞌ xohix xakix.
\p ꞌAnão yã tikmũꞌũn kummuk hã mõnãyxop hãmãxap, ha Yeyox Kunnix ꞌũk-nãy tuꞌ nũn, nũy yãyhã tikmũꞌũn kuxa tup xop hã mõnãyxop.
\v 15 ꞌŨyũmmũg. Topa te hãmmax nãhãꞌ, pãyãp-xetꞌah. Topa te hãmhok hãꞌ hãmmaxnãhãꞌ, pa ꞌAnão te hãpkummugãhãꞌ. Ya hamũn. ꞌŨhep xop xohix xakix, ꞌAnão te hãpkummuk mĩy, haꞌ xakix, pa Topa mũn max xeꞌẽgnãg, tu hãmmaxnãhã hãmhok hãꞌ, tu tikmũꞌũn kuxa kummuk xit, Yeyox xok hãꞌ xit, nũy kuxa max ꞌũyãnãn tuꞌ tat, Yeyox Kunnix te tikmũꞌũn mõꞌyãy xeꞌẽgnãg hah.
\v 16 ꞌŨyũmmũg. Tik puxet te hãpkummuk mĩy, ha Topa gãy, tu: “Yãꞌ kummuk ꞌõhõm!” kaxĩy. Pa Topa te hãpkummuk mĩyꞌax xop pu hãmmaxnãhãꞌ, ꞌũhok hã hãmmax nãhãꞌ, tu hãpkummuk mĩyꞌax xexka xaxogãhãꞌ, tuꞌ kuxa kummuk xit, ꞌũhok hãꞌ xit, nũy kuxa max tat tuꞌ yãnãn.
\v 17 Hamũn. Tik puxet te hãpkummuk mĩy, yĩꞌ hep xop xohix xakixꞌax. Yã hãpxopmã xexkah, tuꞌ xohix pu hãpkummugãhãꞌ. Pa tik nõy te hãpxopmã xexka xeꞌẽgnãg, ꞌũxuxetꞌax Yeyox Kunnix, tu hãmmax xexka nãhãꞌ ꞌũxohix puꞌ, nõm xop kuxa mãm kaꞌok Yeyox kopaꞌ xop pu hãmmaxnãhãꞌ, ha Topa teꞌ kuxa kummuk tupmãhãꞌ, pu tu kuxa max, ha Kunnix te yũmũꞌã xexkãnãp-tup, ꞌũyĩy nũ mũtik yũmũg hi xeꞌẽgnãg, nũy hi mõkumak mõg.
\p
\v 18 Tik puxet te hãpkummuk mĩy, yĩꞌ hep xop xohix xakixꞌax, ha hãpxopmãꞌax max puxet nõy teꞌ xohix kuxa tupmãhãꞌ, tuꞌ hĩnnãhãꞌ.
\v 19 Tik puxet teꞌ hep xop xohix pu hãpkummugãhãꞌ, tu Topa puꞌ yĩpkox xip ꞌohnãg, hu yãy putox xop xohix pu hãpkummugãhãꞌ, yãꞌ hep xop xohix te hãpkummuk mĩy kamah. Pãyã tik puxet nõy teꞌ xohix pu hãmmaxnãhãꞌ, tuꞌ yĩpkox xip Topa puꞌ, hu hãmmaxnãhãꞌ, tuꞌ kuxa kummuk tupmãhãꞌ.
\p
\v 20 Topa teꞌ xatꞌax hõm, nũy hãpkummuk yũmmũgãꞌ, ha hãpxopmãꞌax kummuk teꞌ nõy nãꞌ mõg tu mõktu yãꞌ xohix, pa Topa te hãpxopmã hok hã hãmmaxnãhãꞌ, tu nõy nãꞌ mõg tu mõktu xohix xexkah.
\v 21 Hõmã tikmũꞌũn te hãpxopmã kummuk, haꞌ kuxa hĩy kaꞌok, pa hõnhã Topa te hãmmaxnãhãꞌ, tuꞌ hok hã tikmũꞌũn kuxa kummuk tupmãhãꞌ, pu tu max, puyĩy hãmyok mĩy, nũy tu hi xeꞌẽgnãg mõ kumaꞌ yũmũg xuxyã mũtik, nũy Yeyox Kunnix mũtik hãpxopmãꞌax xohix xat.
\c 6
\s Kunnix tek mũg kuxa tupmãhãꞌ
\p
\v 1 Yũmũꞌãtep-tep ꞌãktuxꞌax? ꞌOk max, yũmũg hãpxopmã kummuk pax, puyĩy Topa hãmmaxnã xexkaꞌ?
\v 2 ꞌÃmhok! Kaxĩy hok! Yã yũmũg kuxa mãm kaꞌok Yeyox kopah, ha Topa te yũmũg kuxa kummuk tupmãhãꞌ, pu tu kuxa tup, nũy hãpxopmã kummuk putup hok, nũy kuxyãꞌ. Tikmũꞌũn xok, tu hãpxopmã kux, ha kaxĩy yũmũꞌãte hãpxopmã kummuk tu kux kamah,
\v 3 Yũmũg kuxap-xet Yeyox Kunnix kuxa mũtik nũy. Yã yũmũg pupiꞌ xok, ꞌũyĩy yũmũg hãpxopmã kummuk tu kux, ha tikmũꞌũn te yũmũg putox pix, puyĩꞌ xohix hãmyũmmũg. Yã Kunnix xok yũmũg pupiꞌ, pu yũmũg kuxap-xet yãy kuxa mũtik.
\v 4 Yeyox Kunnix xok, ha nõ hãpkot yũmũg pupi kamah, pu yũmũ yõg hãpxopmãꞌax kummuk xaxogãꞌ. Ha yũmũg putox pix, nũy yũmũꞌã hãmyũmmũgãꞌ, ꞌũyĩy hãpkummuk mĩy kux. Ha Topa yũmũg Tak te Kunnix putpu hĩnnãhãꞌ, tu yũmũg kaꞌogãhã kamah, ꞌũyĩy yũmũg hi xeꞌe Yeyox mũtik, nũy tu hãpxopmã max.
\p
\v 5 Yã Kunnix xok, yũmũg pupiꞌ xok, ꞌũyĩy yũmũꞌã hãpxopmã kummuk tu kux, haꞌ putpuꞌ hi yũmũg pupi kamah, ꞌũyĩy yũmũg hi xeꞌeꞌ.
\v 6 Tu hãmyũmmũg. Hõmã yũmũꞌãte hãpxopmã kummuk, tuꞌ mĩy pax, pa Kunnix te mĩpkupnix yĩmũ tuꞌ xok, yũmũg pupiꞌ xok, nũy yũmũg kuxa tupmãꞌ, pu hãpkummuk yũmũg kuxa hĩy hok, pu yũmũꞌã hãpxopmã kummuk tu kux, nũy yãnãn tu hãpxopmã max.
\v 7 Tikmũꞌũn xok, tu hãpkummuk mĩy kux.
\v 8 Kunnix xok yũmũg pupiꞌ, ꞌũyĩy hãpkummuk mĩy tu kux, tuꞌ putpuꞌ hi yũmũg pupi kamah, ꞌũyĩy hi mõꞌkumak mõg yãy mũtik.
\v 9 ꞌŨyũmmũg. Topa te Kunnix hĩnnãhãꞌ putpuꞌ, yĩy xe xok putup ꞌohnãg. Yã Topa teꞌ hĩnnãhãꞌ, pu tu hi mõꞌkumaꞌ mõg.
\v 10 Yãꞌ xok, ha hãpkummuk mĩꞌax xop te xe Kunnix putex ꞌohnãg, ꞌap xep xok putupꞌah, pa Topa tuꞌ hi xeꞌẽgnãg.
\v 11 Yã Kunnix xok ꞌãxop pupiꞌ, nũy ꞌõg kummuk mĩyꞌax kuxyãꞌ. ꞌŨxaxok hok! Hõnhã Kunnix hi xeꞌe Topa tuꞌ, ha ꞌãkuxap-xet Yeyox Kunnix kuxa mũtik, nũy Topa tu ꞌãhi xeꞌe kamah.
\p
\v 12 Hãpkummuk mĩy hok, xix yãy putupꞌax mĩy hok, xayĩy yãy kummugã hok.
\v 13 Topap-xehnãg pu ꞌĩpkox piꞌ, pu tu ꞌãxat. Yã xa hãmmaxnã xexkaꞌ! Tu ꞌãhĩnnãhãꞌ, ha Topa tu ꞌãhiꞌ, nũy hãmyok mĩy, yĩy ꞌãnõy pu ꞌãyĩpkox hok, xayĩy hãpkummuk mĩy hok.
\v 14 Tikmũꞌũn kummuk pu ꞌãyĩpkox hok. Yã yũmũg xat hok. Pa Topa te yũmũg hĩnnãhãꞌ, ꞌap xatꞌax te yũmũg hĩnnãꞌah, pa Topa te yũmũꞌã hãmmaxnãhãꞌ, tuꞌ hok hãꞌ nãhãꞌ, ha yũmũg hi xeꞌẽgnãg.
\s Yũmũꞌã Topa hã kãmãnat xop
\p
\v 15 Mõyyex yõg xatꞌax tap, ha Topap-xehnãg te nõmhã yũmũg xat, tu yũmũꞌã hãmmaxnãhãꞌ. ꞌÃxop te-putep peꞌãpaxex? ꞌOk Topa te yũmũg kuxa tupmãhãꞌ, ꞌũyĩy yũmũg hãpkummuk mĩy? ꞌAp hamũnꞌah! Yãmhok!
\v 16 ꞌÃxop te hãmyũmmũg. Tik teꞌ nõy puꞌ hãm, puxix yãꞌ nõy yõg kãmãnat, tuꞌ yĩpkox pip, tu hãmꞌãpak, nũy tu hãm max. Ha kaxĩy tikmũꞌũn te Topa puꞌ yĩpkox pip, tu Topa hã ꞌũyõg kãmãnat, ha nõm pu hãmmaxnãhãꞌ, tuꞌ kuxa kummuk tupmãhãꞌ, pu tu kuxa max. Pãyã tikmũꞌũn yĩpkox hok, puxix tu hãpxopmã kummuk, tu yãy kuxa tupmã hok. Yĩy Topa te nõm putup nõg, ꞌũkuxa kummuk hah. Yã yãy kummugãhãꞌ.
\v 17 Nũ mõy Topa pu hãmꞌãktux, nũy: “ꞌÃmax Topah!” kaxĩy. Yã hõmã ꞌãxop te hãpxopmã kummuk, pãyã hõnhã Topa pu ꞌãyĩpkox pip, hãmꞌãpak max ꞌãpakꞌax tuꞌ, ha tikmũꞌũn te xa hãmyũmmũgãhãꞌ, tu xa hãpxeꞌe yũmmũgãhãꞌ, yĩy ꞌãkuxa tep-tup, tuꞌ hittup xexkaꞌ.
\v 18 Hõmã ꞌãkuxa hittup ꞌohnãg, hãpxopmã kummuk tuꞌ, pãyã nõmhã Topa yõg putat hã ꞌãmõg, nũy hãpxopmã max, nũy Topa yõg putupꞌax mãynãg mĩy, hu ꞌãkuxa hittup xexkaꞌ.
\v 19 ꞌA ꞌãxop te hãmyũmmũgꞌah, yĩy ꞌãte hãmꞌãktuxꞌax hã xa hãmyũmmũgãp-tup. Hõmã ꞌãxop teꞌ xak, nũy hãpkummuk mĩy, tuꞌ mĩy pax, tu ꞌãnõy hãꞌxupxet, tu ꞌãnõy kummugã pax, Hu mõy, hõnhã xax, nũy Topap-xehnãg pu hãpxopmã max, xayĩy ꞌãhi xeꞌeꞌ, xayĩy ꞌãnõy pu hãmmaxnãꞌ.
\p
\v 20 Hõmã ꞌãxop te hãpxopmã kummuk pax, tu Topa pu ꞌãyĩpkox ꞌohnãg.
\v 21 Nãy ꞌũxutigãꞌ, nũy ꞌõg hãpxopmãꞌax kummuk peꞌãpaxeh. ꞌOk ꞌãhittup, ꞌĩhã hãmpeꞌãpaxex? ꞌOk pe xate yãyhãhup? Yã xate yãyhãhup, hãpxopmã kummuk tuꞌ. Hõmã ꞌãkuxa hittup ꞌohnãg, yã Hãmgãyãgnãg Pet ha ꞌãmõgꞌax.
\v 22 Pa Topa te ꞌãkuxa kaꞌ, tu ꞌãkuxa kummuk tupmãhãꞌ, xa kuxa max, nũy Topap-xehnãg pu ꞌãxop hãpxopmã max, nũy ꞌãhi xeꞌẽgnãg mõ kuma ꞌãmõg.
\v 23 Tikmũꞌũn te hãpxop kummuk hã yãy kummugãhã ꞌũyãnãn tuꞌ, nũy pago, hu ta xakix. Pa Topa te hãmmaxnãhãꞌ, ꞌũhok hã hãmmaxnãhãꞌ, nũy tikmũꞌũn hĩnnã xeꞌẽgnãg. Yeyox Kunnix xok hãꞌ hĩnnãhãꞌ, nõꞌõm yũmũg xuxyã xeꞌeꞌ, ha yũmũg kuxap-xet Kunnix kuxa mũtik.
\c 7
\s Paot te yãytaꞌax xop hã hãmyũmmũgãhãꞌ
\p
\v 1 ꞌŨkxape xop, ꞌãxop xohix teꞌ xatꞌax yũmmũg, hu hãmꞌãktux yũmmũg kamah yõgnũꞌ. ꞌŨxatꞌax yãꞌ xat tikmũꞌũn xohix, ha taꞌ xakix xop ꞌap xatꞌah.
\v 2 ꞌŨyũmmũg. ꞌŨn yãytahaꞌ, haꞌ xatꞌax te ꞌũgmĩy kaꞌok, tuꞌ yĩpxox mũggã kaꞌok, paꞌ yĩpxox xok, puxix ꞌũhĩyꞌax koaꞌ, ha taꞌ nĩm, tuꞌ hok yũm.
\v 3 Kaxĩy, ꞌũn te tik nõy mũtik nõm ꞌĩhãꞌ yĩpxox xip, puxix tikmũꞌũn te: “Yã ꞌũn kummuk, tuꞌ nõy hãꞌ xupxet,” kaxĩy. Pa ꞌũn yĩpxox xok, puxix tup-xehnãg, nũy hok yũm, tu nõm puꞌ yĩpkox xip kux, yãꞌ max, ꞌũn te tik nõy mũy, nũy nũ mũtik yãytax.
\v 4 ꞌŨkxape xop, yã kaxĩy ꞌãxop te ꞌãhok pip xop putuk. Yã Kunnix xok ꞌĩhã Mõyyex yõg xatꞌax pu ꞌãyĩpkox kux, nũy hõnhã Kunnixp-xet pu ꞌãyĩpkox piꞌ. Yã ꞌãxop te Kunnix hãꞌ yĩn xexkaꞌ, tu yã hõnhã ꞌũyõg, ha putpuꞌ hiꞌ, ꞌũyĩy yũmũg hãpxopmã max Topa puꞌ.
\v 5 Hõmã yũmũꞌãte hãpxopmãhãꞌ, tu yã yãy yõg putupꞌax xohix mĩy, tikmũꞌũn xop xohix putuk, yũmũꞌãteꞌ mĩy, haꞌ xatꞌax te hãpkummuk mĩy xat hok, ꞌũmĩy hok, hu hãpkummuk mĩy putup xũy, tu mõktu yũmũg xakix.
\v 6 Pa hõnhã yũmũg hok pip, ha yũmũg hĩyꞌax koaꞌ, yũmũg hok pip, nũy Topap-xehnãg pu hãpxopmã max. Topa Koxuk te yũmũg hĩnnãhã xeꞌeꞌ, tu yũmũg putox kummuk tupmãhã, haꞌ xatꞌax hittap te yũmũg xat kux.
\v 7 Yũmũꞌãtep-tep ꞌãktuxꞌax? ꞌOk xatꞌax kummuk? ꞌÃmhokꞌ Yãꞌ max, pãyãꞌ xatꞌax tekmũn pu hãmyũmmũgãhãꞌ, ꞌũ yũmmũg, ꞌok peꞌ max, ꞌok peꞌ kummuk. ꞌŨxatꞌax tek xat hok, ꞌũyĩy hãpxop putup xũy hok. Paxpuk xat hok, kopxix hãpxop putup xũy hok, pa hõnhã ꞌãte hãmyũmmũg, hu hãpxop putup xũy xeꞌeꞌ.
\v 8 Yĩꞌ xatꞌax tek xat, ꞌũyĩy tuk nõy yõg hãpxop putup xũy hok, hu ꞌãte hãpxop putup xũy. Pax puk xat hok, kopxix Topa yõg hãmpeꞌpaxex yũmmũg hok, xix yãy yõg hãpxopmãꞌax kummuk yũmmũg hok. Yã Topa pa te hãmyũmmũg xeꞌẽgnãg, huꞌ xat, ꞌũyĩy hãpxopmã max.
\v 9 Hõmã ꞌãteꞌ xatꞌax yũmmũg ꞌohnãg, tu hãmpekpaxex, hu: “Yã ꞌãte hãpxopmã max,” kaxĩy. Pa Topa tek xat, ꞌũyĩy hãpkummuk mĩy hok, ha ꞌãteꞌ xupak, tu hãmyũmmũg, tu yãy kuxa kummuk yũmmũg,
\v 10 hu yãy kuxa tu teknõg. Yã Topa teꞌ xatꞌax hõm, puyĩy tikmũꞌũn hĩnnãꞌ, pak yũmmũgãhãꞌ, ꞌũ yũmũ yãy yõg hãpxopmãꞌax kummuk.
\v 11 ꞌÃte hãpkummuk mĩy, hu yãy pu mõꞌãmãꞌ, tu yãy mũn max pekꞌpaxex, pãyãꞌ koit. Hu ꞌãte yãy kuxa putex, tu: “ꞌÃte Topa yõg xatꞌax mĩy hok.” Kaxĩy.
\p
\v 12 Yã Topa yõg xatꞌax max xeꞌẽgnãg, tu hãpxeꞌeꞌ.
\v 13 Tepte xĩy? ꞌOk hãpxop max tek kummugãhãꞌ? ꞌÃmhok! Pãyã ꞌãte hãpkummuk mĩy, ha Topa yõg xatꞌax max, tu yõgnũ hãpxopmãꞌax kopit, nũy ꞌũgmũn yũmmũgãꞌ, yã ꞌãte hãpkummuk mĩy xeꞌeꞌ.
\s Tikmũꞌũn kuxa te yãy tuk-mĩy
\p
\v 14 Yũmũꞌãte hãmyũmmũg. ꞌŨxatꞌax yã Topa yõg, hak mũn puꞌuk, hu hãpxopmã kummuk pax, tu hãpxopmã kummuk mõ kumak mõg.
\v 15 ꞌĨntuꞌ. ꞌÃte hãpxopmã maxp-tup, pãyã ꞌap mĩyꞌah, tu hãpxopmã kummuk putup nõg, pãyã ꞌũmĩy.
\v 16 Tu hãpxopmã kummuk, ꞌĩhã nõm putup nõg, kopxix: Yã hamũn. Topa yõg xatꞌax max xeꞌeꞌ. Kaxĩy.
\v 17 ꞌAk mũn teꞌ mĩyꞌah, pãyã hãpkummuk tek kuxa kopaꞌ xip mũn teꞌ mĩy.
\v 18 ꞌÃteꞌ xak, nũy hãpxopmã max, pãyã ꞌaꞌ mĩy yũmmũgꞌah ꞌãteꞌ, ꞌũgkuxa kummuk tuꞌ.
\v 19 Tuꞌ xak, nũy hãpxopmã max, pãyã ꞌaꞌ mĩyꞌah, tuꞌ yãnãn tu hãpxopmã kummuk.
\v 20 ꞌA ꞌãte hãpkummuk mĩy putupꞌah, pãyãꞌ mĩy, yĩy hãpkummuk tek kuxa kopaꞌ xip tek kummugãhãꞌ,
\v 21 yĩy ꞌãte hãmyũmmũg. ꞌÃte hãpxopmã max putup, ꞌĩhã hãpxopmã kummuk ꞌũp-xehnãg.
\v 22 ꞌŨgkuxa te Topa yõg xatꞌax hãꞌ hittup,
\v 23 pãyã ꞌãte hãpkummuk mĩy pax, ꞌũgkuxa kummuk tuꞌ. Tu hãpxopmã max xak, pãyãg kuxa kummuk tuk hĩy, ꞌũ hãpxopmã max hok.
\v 24 Huk hittup ꞌohnãg. ꞌŨ ꞌũm mũn tek kaꞌogãꞌax, ꞌãte hãpxopmã max?
\v 25 Topa tek kaꞌogãp-tup, yĩy ꞌãte: “Topa ꞌãmax,” kaxĩy. Yã Yeyox Kunnix te ꞌũ ꞌũm hã ꞌãtehet.
\p Kaxĩy ꞌũgkuxa kopa ꞌãteꞌ xak, nũy Topa yõg xatꞌax ꞌũgyĩpkox xihip, nũy ꞌũgmãynãg mĩy, pãyã ꞌãteꞌ mĩy yũmmũgꞌah, hu hãpkummuk mĩy pax.
\c 8
\s Topa Koxuk tek mũg kaꞌogãhãꞌ
\p
\v 1 Topa te yũmũg kummuk ꞌũm ꞌãktuxꞌah nõmhã, yã yũmũg kuxap-xet Yeyox Kunnix kuxa mũtik, ha Topa te yũmũg ꞌũm ꞌãktux kummuk ꞌohnãg Yeyox Kunnix hah.
\v 2 Topa Koxuk te yũmũg hĩnnã xeꞌe Yeyox Kunnix mũtik, tu yũmũg mõy, puꞌ xatꞌax yũmũg kuxa hĩy hok, ꞌũyĩy yũmũg hãpkummuk mĩy hok, nũy yũmũg xakix hok kamah.
\v 3 ꞌŨxatꞌax te yũmũg ꞌũm kuxa tupmãꞌah. Yũmũꞌãte yãy putupꞌax mĩy, yĩy hãpxopmã kummuk pax, pa Topa kaꞌok, tu yũmũg kuxa tupmãhãꞌ, pu tu kuxa max, tu hãpxopmãꞌax kummuk ꞌãktux kummuk kamah, huk-tok pit nũꞌkutnãhãꞌ, ha yãyhã tikmũꞌũn kutok nũy hãpkummuk kuxyãꞌ,
\v 4 ꞌũyĩy yũmũg hãpxopmã max, nũy tuꞌ xatꞌax xohix pu yũmũg yĩpkox piꞌ, yãꞌ xatꞌax max xeꞌeꞌ. Ha Topa Koxuk te yũmũg kaꞌogãhãꞌ, ꞌũyĩy yãy putupꞌax mĩy hok.
\v 5 Tikmũꞌũn te yãy putupꞌax mĩy, puxix tute hãpkummuk mĩy, pa tikmũꞌũn te Topa Koxuk puꞌ yĩpkox pip, puxix tu hãpxopmã max, Topa Koxuk pekpaxex tuꞌ.
\v 6 Tikmũꞌũn te yãy putupꞌax mĩy, puxix tu xakix, hãmpeꞌpaxex kummuk tuꞌ, pa tikmũꞌũn te Topa Koxuk puꞌ yĩpkox pip, nũy hãpxopmã max, puxix tu hi xeꞌeꞌ, tuꞌ kuxa mãm max, Topa Koxuk peꞌpaxex tuꞌ.
\v 7 Yĩy tikmũꞌũn gãy, tu Topap-tup nõg, nũy yãy putupꞌax mĩy, tu yã hãmpeꞌpaxex kummuk, tu Topa yõg xatꞌax puꞌ yĩpkox ꞌohnãg, tuꞌ mĩy ꞌap yũmmũgꞌah,
\v 8 yĩy Topa te nõm xop putup hok, nõm te yãy putupꞌax mĩy pax.
\p
\v 9 Pa ꞌãxop te yãy putupꞌax mĩy ꞌohnãg. ꞌÃmhok. ꞌÃxop te Topa Koxuk pu ꞌãyĩpkox pip. ꞌÃxop te nõm pu ꞌãyĩpkox piꞌ, puxix Topa Koxuk ꞌãkopa xip. Tikmũꞌũn te Kunnix Koxuk xip hok, puxix Kunnix yõg hok.
\v 10 Kunnix te ꞌãkopaꞌ xip, puxix Topa Koxuk ꞌãhĩnnãꞌ, Topa te ꞌãkuxa tupmãhã hah, pa ꞌãyĩn xok putup, xate hãpkummuk mĩy pax hah.
\v 11 Topa Koxuk te Yeyox Kunnix hĩnnãhãꞌ putpuꞌ, tu ꞌãkopaꞌ xip, yĩy kamah hĩnnãp-tup putpu ꞌãxop yĩn, yã hõnhãꞌ xip ꞌãkopah.
\p
\v 12 ꞌŨkxape xop: Yã Topa te yũmũꞌã hãmmaxnãhãꞌ, yĩy yũmũꞌãte tu ta nemẽn. ꞌÃpu yũmũꞌã yãy yõg putupꞌax mĩy hok.
\v 13 ꞌÃxop teꞌ mĩy, hu ta xok, pa Topa Koxuk pu ꞌãyĩpkox pip, hu ta yã hi xeꞌẽgnãg.
\v 14 Tikmũꞌũn te Topa Koxuk puꞌ yĩpkox pip, yã ꞌõhõm Topak-tok xeꞌẽgnãg.
\v 15 Yã Topa Koxuk te ꞌãkuxa kummugã ꞌohnãg, paꞌ hittupmãhãꞌ, nũy tu kuxãnõg hok. ꞌŨyũmmũg. Yũmũꞌãte yãyhã Topak-tok xop, pu yũmũg kaꞌogãꞌ, ꞌũyĩy Topa pu hãmꞌãktux, hu: “Tak, yõgnũ ꞌÃtak!” kaxĩy.
\v 16 Ha Topa Koxuk te yũmũg koxuk pu hãmꞌãktux, nũy yũmũꞌã Topak-tok xop ꞌãktux.
\v 17 Yũmũg yã Topak-tok xop, hu pexkox yõg hãpxop max xohix pop putup, Topa te nõm xex yãy yõg tikmũꞌũn puꞌ, ha yũmũꞌãteꞌ pop putup Kunnix mũtik. Yã Topa te nõm hãpxop max xex Kunnix puꞌ, tu pexkox kopaꞌ xex, ha yũmũꞌãte hãpxop mõꞌkoxip putup Kunnix mũtik. Nõm mũtik yũmũg xũy, kopxix yũmũg yãyhã max xeꞌẽgnãg Kunnix putuk.
\s Yũmũꞌãte yãyhãp-tup max xeꞌẽgnãg
\p
\v 18 ꞌÃte hãmpeꞌpaxex, hu: Yũmũg xũy kutõgnãg nõmhã, tuk kuxa hittup xeꞌẽgnãg putup hõmã, ꞌĩhã hãptup xeꞌe nõy punethok mõꞌnãhãꞌ, ꞌĩhã yũmũg yãyhãp-tup max xeꞌẽgnãg.
\v 19 Topa te yõnnãꞌĩ xohix mĩy, haꞌ hip, tuꞌ xak, pu Topa nõm tu yãy yõg kutok xop mũg.
\v 20 Hõmã hãpxopmãꞌax xohix yãyhã hitop, Topa tep-tup hah, ha hãmmax hip,
\v 21 puyĩy Topa tux hok, pu tik-tox hok, ꞌũ yãyhã max xeꞌẽgnãg, Topak-tok xop xohix mũtik.
\v 22 Yũmũꞌãte hãmyũmmũg, nõm yõnnãꞌĩ xop tuꞌ kokõn, tuꞌ xũy, ꞌũn tek-tok put putup, tuꞌ xũy, tuꞌ kokõn, ha kaxĩy yõnnãꞌĩ xohix xũy pu Topaꞌ hittupmãꞌ.
\v 23 Pãyãꞌ hok pipꞌah. ꞌÃmhok. Yã yũmũꞌãte kopa yãꞌ kokõn kamah, ha Topa te yũmũꞌã yãy Koxuk hok hõm hãmãxap, haꞌ hip, nũy yũmũg yãyhã Topak-tok xop, yã yũmũg tupmãhã, ꞌũyĩy yũmũg tup mõꞌkumak mõg.
\v 24 Yã yũmũg kuxa tupmãhãꞌ, yũmũg kuxa mãm kaꞌok haꞌ tupmãhãꞌ, ha yũmũꞌãte hãmmax hip. ꞌA hõnhã yũmũꞌãteꞌ pẽnãꞌah, tuk kuxa mãm kaꞌok, hu hãmyũmmũg, yã yũmũꞌãteꞌ pẽnãp-tup. Pax pu tikmũꞌũn hãmpẽnãꞌ, puxiꞌ hip ꞌohnãg.
\v 25 Pa tikmũꞌũn teꞌ pẽnã hok, puxix tu kuxa mãm kaꞌok, tu hãmmax hip, puyĩy Topa ꞌãꞌ mĩy.
\p
\v 26 Ha Topa Koxuk te mõ yũmũg nĩynãm, yũmũg kuxa puꞌuk hah. Ha yũmũꞌãte Topa mũtik hãmꞌãktux yũmmũgꞌah, yĩy Topa Koxuk te Topa tu ta tuꞌ xak, yũmũg pupi tuꞌ xak, ꞌũkokõn ꞌĩhã yũmũg pupiꞌ xak, nũy ꞌũyĩy hok hã hãmꞌãktux, nũy Topa pu hãmꞌãktux.
\v 27 Ha Topa te tikmũꞌũn kuxa kopa pẽnãhãꞌ, tu yãy Koxuk peꞌpaxex tuꞌ yũmmũg, ha yãy Koxuk xeꞌẽgnãg te Topa tuꞌ xak, yãy yõg tikmũꞌũn pupiꞌ xak, tu Topa yõg putupꞌax yũmmũg.
\v 28 Topa te yũmũꞌã hãmmaxnãhãꞌ, tu hãmmaxnãp-tup mõꞌkumaꞌ mõg, tu hãpxopmãꞌax xohix hã yũmũꞌã hãmmaxnãhãꞌ. Yã yũmũꞌãte Topap-tup pax xexkaꞌ, yũmũg yĩmõgatux hah, tu yũmũg xãnãhãꞌ, mõ yũmũg yãy xeꞌẽgnãg tuꞌ, ha yũmũꞌãteꞌ yũmmũg, hu yũmũg kuxa mãm.
\v 29 Topa te yũmũg yĩmõgatux tap, tu yãy pu yũmũg pop, ꞌũ yũmũg yãyhã ꞌãhã tuk-tok putuk, pu Kunnix yã mãxap, ha yũmũg xohix yã nõm mõ nũ kuhmõy.
\v 30 Ha Topa te yãy pu yũmũg pop tap, xix yũmũg xãnãhãꞌ, xix yũmũg kuxa tupmãhãꞌ, pu tu kuxa max, ꞌũyĩy yũmũg yãyhã max xeꞌẽgnãg, Kunnix putuk.
\s Topa te mõ yũmũg yãy xeꞌẽgnãg Yeyox Kunnix hã
\p
\v 31 Hamũn, yĩy yũmũꞌãtep-tep ꞌãktuxꞌax? Topa te yũmũ mũtik tihiꞌ, yĩy tikmũꞌũn kummuk te hitop tu yũmũꞌã hãpkummugãhãꞌ.
\v 32 Topa te yãy kutok pit puxet kumĩy ꞌohnãg, pa yũmũꞌãꞌ hõm. ꞌŨk-tok hõm yũmũꞌãꞌ, puxix tu hãpxop xohix yũmũꞌãꞌ hok popmãp-tup kamah.
\v 33 Topa te yãy yõg tikmũꞌũn yĩmõgatux. ꞌOk tik ꞌũm xip, nũy ꞌũkummuk ꞌãktux? ꞌAp tik ꞌũm xipꞌah, yã Topa mũn teꞌ kuxa tupmãhãꞌ, pu tu kuxa max.
\v 34 Yĩy tikmũꞌũn ꞌũm ꞌaꞌ kummuk ꞌãktuxꞌah. Kunnix xok, yã putpuꞌ hiꞌ, tu Topa yĩpxeꞌe hãꞌ xip, tu yũmũg pupi Topa tu ta tuꞌ xak,
\v 35 tu mõ yũmũg yãy xeꞌẽgnãg. ꞌAp tikmũꞌũn ꞌũm xipꞌah, xix hãpxopmãꞌax ꞌũm xipꞌah, nũy Topa puꞌ hupmã hok, puyĩy Topa yũmũg putup hok. Yũmũg xũy xix hãpxop xakꞌax tat punethok, xix tikmũꞌũn te yũmũg xũygãhãꞌ, ha putup te yũmũg kix, ha topixxax ꞌũm yũmũg xip hok, xix tikmũꞌũn kummuk teꞌ xak, nũy yũmũg kix, puxix Kunnix mũn mõ yũmũg yãy xeꞌẽgnãg, tu yũmũg nĩm ꞌohnãg.
\v 36 Topa yõg tappet te: “ꞌÃmnĩy xohix hã tikmũꞌũn te yũmũg putup nõg, tu yũmũg kix putup, yũmũꞌã yã Topa hã tikmũꞌũn hah. Tikmũꞌũn te kahnẽn mõgãhãꞌ, nũy putex, ha taxĩy yũmũg mõgãhãꞌ, nũy yũmũg kix,” kaxĩy.
\p
\v 37 Pãyã tute yũmũg nõã hok, Yeyox Kunnix te mõ yũmũg yãy xeꞌẽgnãg hah, yĩy yũmũg kuxa hittup xexkaꞌ, ꞌĩhã pexkox ha yũmũg mõg kumak mõg.
\v 38 Yĩy ꞌãte hãmyũmmũg. Kunnix te mõ yũmũg yãy xeꞌẽgnãg, tu yũmũg nĩm ꞌohnãg. Pe yũmũg hiꞌ, pe yũmũg xakix, puxix Kunnix yũmũg nĩm hok. Pexkox yõg xop xix yãmĩy xop te yũmũg nĩmmã hok, ha hõnhã Kunnix te yũmũg mũtik tihiꞌ, tu hãptup hã yũmũg mũtik hi putup, xix hãptup nõy xohix hã Kunnix te yũmũg ꞌũm nĩm putupꞌah, mõ yũmũg yãy xeꞌẽgnãg tuꞌ.
\v 39 Yã pexkox yõg xop te Kunnix nĩmmãp-tup hok yũmũꞌãꞌ, xix hãm xexka xix hãm kakaꞌ pip xop te yũmũꞌã nĩmmãp-tup hok kamah. ꞌAp xipꞌah hãpxopmãꞌax te Topa pu hupmãhãꞌ, puyĩy yũmũg nĩm, ha mõ yũmũg yãy xeꞌẽgnãg, yũmũg xuxyã Yeyox Kunnix hã Topa te mõ yũmũg yãy xeꞌẽgnãg.
\c 9
\s Topa xix yãy yõg tikmũꞌũn
\p
\v 1 ꞌÃte xa hãpxeꞌe ꞌãktux: ꞌŨgmũn yã Kunnix yõg, hu ꞌap koitꞌah. Topa Koxuk tek kopaꞌ xip, tuk kuxa pu hãmyũmmũgãhãꞌ, tu: “A xatep koitꞌah,” kaxĩy.
\v 2 ꞌŨgkuxa hittup ꞌohnãg, yãk kuxa xũy, ꞌĩhã ꞌãte yãy yõg tikmũꞌũn peꞌpaxex. Yãk xape xeꞌe Yoneo yõg tikmũꞌũn, ꞌũgmũg hep puxet tuꞌ.
\v 3 ꞌÃte hãmꞌãktuxꞌax hu: Pũyã Topa ꞌũgkummugãꞌ, nũy ꞌũkxape hã hãmmaxnãꞌ! Tu xe hãmꞌãktuxꞌax, hu: Pũyã Kunnix ꞌũgnĩm, nũy tuk xape mõꞌnĩynãm ꞌũyãnãn tuꞌ.
\v 4 Nõꞌõm yã Topa yõg tikmũꞌũn, haꞌ yĩmõgatux, pu Topa hãk-tok xop, ha Topa teꞌ xexkanãhãꞌ, yãy mũtik, tuꞌ paꞌax mĩy nõm xop mũtik, tu tuꞌ xatꞌax hõm. Yã ꞌõm te Topa xak, tuꞌ yẽy Topa keppah, ha Topa te nõꞌõm mũtik hãmꞌãktux xex.
\v 5 Ha mõnãyxop hittap mõkputox, ha Kunnix mũn kama mõnãyxop hã mõkputox. Pũyãꞌ xohix Topa xexka ꞌãktux mõ kumaꞌ mõg, ꞌũxexka xeꞌẽgnãg hah. Hamũn.
\p
\v 6 Pa ꞌa Topa te hãmꞌãktux hitop tuꞌ xexꞌah. ꞌÃmhok. ꞌAp kaxĩyꞌah, pãyã ꞌIyaet yõg tikmũꞌũn xohix ꞌa Topa yõgꞌah. ꞌÃmhok. Topa te ꞌa xohix yĩmõgatuxꞌah.
\v 7 Yã Mõnãyxop hittap nãm ꞌAmanãm mõkputox, pãyãꞌ yãg Topa hã yãy kutok xop. ꞌAp xohixꞌah. Yĩy hõmã Topa te ꞌAmanãm pu hãmꞌãktux, hu: “ꞌÃk-tok ꞌIyak mõkputox yã ꞌãmõkputox xeꞌeꞌ, ꞌap nõy xop ꞌũm ꞌãmõkputoxꞌah. Yãꞌ puknõg,” kaxĩy.
\v 8 Yĩy Topa te ꞌAmanãm mõkputox xohix ꞌap putupꞌah, pa hãmꞌãktux xex ꞌAmanãm mũtik hu: “ꞌÃk-tok ꞌIyak mõkputox, nõꞌõm ꞌãmõkputox xeꞌeꞌ, ꞌãte xa hãmꞌãktux xex hah,” kaxĩy.
\v 9 Tu hãmꞌãktux xex, hu: “Hãpxip ꞌĩhãꞌ putpuk nũnꞌax, ha ꞌãxetut Xat tek-tok put putup,” kaxĩy.
\p
\v 10 Ha ꞌIyak xetut Hemek, tuk-tok pit 2 pop, haꞌ tak ꞌIyak ꞌũp-xet,
\v 11-12 pa Topa tek-tok puxet yãykutnã tap, hak-tok 2 teꞌ tut tex kopa tihiꞌ, ꞌĩhã Topa teꞌ tut pu hãmꞌãktux, hu: “ꞌÃk-tok hãmãxap teꞌ taknõy puꞌ hãm putup, tuꞌ taknõy ꞌũk-nãy tuꞌ nãhã puꞌ hãm putup,” kaxĩy. Pa Topa te hãmꞌãktux, ꞌĩhãk-tok 2 teꞌ tut tex kopaꞌ tihiꞌ, tu hãpxopmã ꞌohnãg, peꞌ mãx, peꞌ kummuk, pa Topa teꞌ yãykutnã tap,
\v 13 yĩy Topa yõg tappet te: “ꞌÃte Yako putup pax, tu ꞌEyao putup nõg,” kaxĩy.
\p
\v 14 Yũmũꞌãte putep ꞌãktuxꞌax? ꞌOk Topa te hãpxopmã koheꞌ? ꞌÃmhok.
\v 15 Tu Mõnãyxop Mõyyex pu hãmꞌãktux, hu: “ꞌÃtep-tup, nũy tikmũꞌũn ꞌũm kuxa kaꞌ, kopxiꞌ kuxa kaꞌ. Yã puxiꞌ,” kaxĩy.
\v 16 ꞌŨyũmmũg. Topa te nõm tikmũꞌũn kuxa kaꞌ, ꞌok pe tikmũꞌũn tep-tup, ꞌok pep-tup hok, ꞌok pe tikmũꞌũn te hãpxopmãhãꞌ, pe hãpxopmã hok, pãyã Topa teꞌ kuxa kaꞌ.
\v 17 Topa yõg tappet te Panaꞌo hittap ꞌãktux, ha Topa te nõm pu hãmꞌãktux, hu: “ꞌÃte ꞌãxexkanãhãꞌ, nũy xa hãmyũmmũgãꞌ, xayĩy ꞌũgmũn kaꞌok yũmmũg, puyĩy hãm xexka xohix yõg tikmũꞌũn tek xuxetꞌax yũmmũg,” kaxĩy.
\v 18 Yĩy Topa tep-tup, nũy tikmũꞌũn kuxa kaꞌ, puxiꞌ kuxa kaꞌ, tup-tup, nũy tikmũꞌũn nõy kuxa mãmmã hok, puxiꞌ mãm ꞌohnãg.
\s Topa te tikmũꞌũn kuxa kaꞌ, tu hãpkummuk hãꞌ yãnãn kamah
\p
\v 19 Pa tikmũꞌũn te: “ꞌOk Topa te hãpkohe mĩy, ꞌĩhã tikmũꞌũn kummuk ꞌãktux? Topa te tikmũꞌũn kuxa mãmmã hok, puxix tikmũꞌũn kuxa mãm ꞌohnãg, Topa mũn tep-tup hah,” kaxĩy.
\v 20 Nãy. Yãy peꞌãpaxex xexka hok. ꞌÃk-tõgnãg, ha Topa mũn xexka xeꞌẽgnãg. Xate putõy putuk, nõm hã tikmũꞌũn te nax mĩy. Pax pu putõy te: “Tep tu xãhã nax?” kaxĩy.
\v 21 Nãy. Tikmũꞌũn te putõy hã nax mĩy, yã hãmyok miy, tuꞌ nax huꞌ mĩy, tu naxtox nũnnãp-tup, huꞌ mĩy. ꞌŨp-tup, huꞌ mĩy, haꞌ yãg mãynãg, xix ꞌũnõy max miax.
\p
\v 22 Ha kaxĩy Topa te hãmyok mĩy. Tuteꞌ xohix puꞌ gãy yũmmũgãp-tup, puꞌ xohix Topa yã ꞌũkaꞌok yũmmũg, yĩy tikmũꞌũn kummuk hãꞌ tot, tu nõm koxyõyꞌax.
\v 23 Tuꞌ max xeꞌẽgnãg, tu yũmũꞌã hãmmaxnãhãꞌ, tu yũmũꞌã hãmyũmmũgãhãꞌ, ꞌũ yũmmũg. Yĩy Topa te yũmũg kuxa kaꞌ, ꞌũ yũmũg yãyhã max xeꞌẽgnãg kamah, hamũn mũtik,
\v 24 tu yũmũg xãnãhãꞌ, Yoneo yõg tikmũꞌũn kopa ꞌũyãg xãnãhãꞌ, xiꞌ puknõg xop kopa ꞌũyãg xãnãhãꞌ.
\v 25 Hõmã ꞌOyex te Topa pupi hãmꞌãktux, tu tappet tu kaxꞌãmiꞌ, hu:
\q “ꞌÃteꞌ puknõg xop putup, yã yõgnũ tikmũꞌũn,
\q hõmã ꞌãte tu nõm xop putup nõg,
\q pãyã hõnhã nõm mõꞌyãy xeꞌẽgnãg.
\q
\v 26 ꞌÕnte Topa xeꞌẽgnãg te nõm xop pu hãmꞌãktux tap, tu:
\q ꞌYã ꞌãxop puknõg, ꞌap yõgꞌah tikmũꞌũn, kaxĩy.
\q Yã ꞌõnte Topa xeꞌẽgnãg te yãy yõg tikmũꞌũn ꞌãktux putup,
\q yã Topa hi xeꞌẽgnãg,” kaxĩy.
\p
\v 27 Ha ꞌIyait kama te Topa pupi hamꞌãktux, tu: “Yoneo yõg tikmũꞌũn xohix punethok yã ꞌãmot xap xohix punethok putuk, pa ꞌãtek-tĩgnãg yĩmõgatux, nũy kuxa kummuk xit, nũy kuxa max mõꞌtat ꞌũyãnãn tuꞌ.
\v 28 ꞌŨgnũn mõꞌkaꞌok, tuꞌ hep xop xohix tu pagop-tup, tuꞌ kummugãp-tup ꞌũyãnãn tuꞌ,” kaxĩy.
\v 29 Hõmã ꞌIyait te Topa pupi hãmꞌãktux, tu: “Pax pu Topa xeꞌẽgnãg yũmũg mõkputox xohix kix, puxix yũmũ yõg kõmẽn te Xonõm putuk, xix Gõmõg putuk, yãꞌ hok yũm,” kaxĩy.
\s ꞌIyaet yõg tikmũꞌũn te hãmꞌãpak maxꞌax ꞌãpak
\p
\v 30 Yũmũꞌãtep tep ꞌãktuxꞌax? Nũhũꞌ: Yãꞌ puknõg te Topa xak ohnãg, tu hãpxopmã max hok Topa puꞌ, pa Topa teꞌ kuxa tupmãhãꞌ, pu tu kuxa max, ꞌũkuxa mãm kaꞌok tuꞌ,
\v 31 ꞌĩhã Yoneo yõg tikmũꞌũn te Topa yõg xatꞌax xak, nũy Topa puꞌ xatꞌax hã yãy kuxa tupmãꞌ, tuꞌ tupmã hok.
\v 32 Tep tuꞌ tupmã hok? ꞌŨkuxa mãm ꞌohnãg, tu hãpxopmã punethok, nũy yãyhã ꞌũmax, huꞌ kuxa mãm ꞌohnãg Topa kopah. Tu tikmũꞌũn putuk, nõm tikmũꞌũn te mĩkaxxap xexka yĩmũ hãm tuꞌ nãhãꞌ, ha mĩkaxxap yĩmũꞌ nãhãꞌ.
\v 33 Yã Topa yõg tappet te Kunnix ꞌãktux, ꞌĩhã mĩkaxxap xexka ꞌãktux, tu:
\q “Pẽnãꞌ! Yĩktix Xiãm tu ꞌãte mĩkaxxap xexka mõꞌyũm,
\q pu tikmũꞌũn hãm tu nãꞌ, mĩkaxxap teꞌ kup hãꞌ tak, haꞌ nãhãꞌ,
\q ha tikmũꞌũn kuxa yũm kaꞌok mĩkaxxap kopah,
\q puxix tu yãy puꞌ hũpmã hok,” kaxĩy.
\m Yã tappet te Kunnix ꞌãktux, nũy tikmũꞌũn kuxa mãmꞌax yũmmũgãꞌ.
\c 10
\p
\v 1 ꞌŨkxape xop, ꞌãteꞌ xak, puyĩy yõgnũ tikmũꞌũn kuxa mãm kaꞌok Yeyox Kunnix kopah, ha ꞌãte Topa tuꞌ xak pax tikmũꞌũn pupiꞌ,
\v 2 tu hãmyũmmũg, ha Topap-xehnãg xak, pa hãmyũmmũg ꞌohnãg.
\v 3 ꞌAp kuxa tupmã yũmmũgꞌah, tu yãy peꞌpaxex hã yãy kuxa kummuk tupmãp-tup, pa Topap-xehnãg te tikmũꞌũn kuxa tupmãhãꞌ, pu tu kuxa max.
\v 4 Ha Kunnix nũn, nũy mĩpkupnix tuꞌ xok yũmũg pupiꞌ, puyĩy tikmũꞌũn kuxa mãm kaꞌok ꞌõm kopah, puxix Topaꞌ kuxa tupmãꞌ, pu tu kuxa max, yĩy Yoneo xop hitop tuꞌ xatꞌax mĩy. Yãꞌ kuxa tupmã hok.
\s Topa te tikmũꞌũn xohix kuxa kummuk xitꞌax
\p
\v 5 Mõnãyxop hittap Mõyyex teꞌ xatꞌax ꞌãktux, hu: “Tikmũꞌũn yĩpkox pip ꞌũxatꞌax puꞌ, puxiꞌ xatꞌax nõm hĩnnãp-tup,” kaxĩy. Ha kaxĩy ꞌũxatꞌax te tikmũꞌũn kuxa tupmãhã Topa puꞌ, ꞌĩhã tikmũꞌũn te nõm puꞌ yĩpkox pip, ha Mõyyex te tuꞌ xuktux.
\v 6 Pa Topa yõg tappet te hãmꞌãktux nõy yã kamah, tu Topa te tikmũꞌũn kuxa tupmã ꞌãktux, tu Topa teꞌ kuxa mãm kaꞌok xop kuxa tupmã ꞌãktux, hu: “ꞌŨyĩpkopit hok, hu: ‘ꞌŨ ꞌũm te pexkox tuꞌ mõg putup, nũy yũmũg kuxa kummuk tupmãꞌ?’ ” kaxĩy. Tu Kunnix nũꞌkutnãꞌax ꞌãktux, yãꞌ nũn tap, nũy yũmũg kuxa tupmãꞌ.
\v 7 Tu xeꞌ yĩkopit, hu: “ꞌŨ ꞌũm te xakix xop pet haꞌ mõg putup, nũy yũmũg kuxa tupmãꞌ?” kaxĩy. Yã Topa te Kunnix putpuꞌ hĩnnã tap ꞌãktux.
\v 8 Tu xe hãmꞌãktux, hu: “Topa te hãmꞌãktux, tu hãmꞌãktux ꞌũm mõꞌkutnãhã xaꞌ, ha ꞌãxop te hãmꞌãpak, tu xeꞌ xuktux, yã ꞌãkuxa kopaꞌ xip,” kaxĩy. Hak mũꞌãte Topa yõg hãmꞌãktuxꞌax xaꞌ xuktux, xayĩy ꞌãkuxa yũm kaꞌok Topa kopah.
\v 9 ꞌOk xatep-tup, pu Topa ꞌãkuxa kummuk xit, nũy kuxa max mõꞌtat ꞌũyãnãn tuꞌ? Xatep-tup, ꞌãpu ꞌãnõy pu hãmꞌãktux, hu: Yeyox mũn yãk xuxyãꞌ! Kaxĩy. Tu ꞌãkuxa yũm kaꞌok Yeyox Kunnix kopah, Topa teꞌ putpu hĩnnãhã hah. Xate hãpxopmã kaxĩy, puxix Topa ꞌãkuxa kummuk xit, nũy kuxa max tat ꞌũyãnãn tuꞌ.
\v 10 Yũmũg kuxa mãm kaꞌok, ha Topa te yũmũg kuxa tupmãꞌ, pu tu kuxa max, yũmũꞌãteꞌ yĩkox hã xuktux, puxix Topa yũmũg kuxa kummuk xit.
\v 11 Topa yõg tappet te: “Tikmũꞌũn kuxa yũm kaꞌok nõm kopah, puxix tu yãy pu hupmã hok,” kaxĩy.
\v 12 Haꞌ hep xop xohix pu hãmmaxnãhãꞌ, nõm xop kuxa mãm kaꞌok Topa kopah, tu Topa pu yãy putuk, Yoneo yõg tikmũꞌũn xiꞌ puknõg xop. Topa yã yũmũg xuxyãꞌ, tu hãmmaxnãhã ꞌũhep xop xohix puꞌ, nõm xop te Topa tuꞌ xak, pu hãmmaxnãꞌ.
\v 13 Topa yõg tappet te xe: “Topa teꞌ hep xop xohix kuxa kummuk xit putup, nũy kuxa max yãnãn tuꞌ tat, nõm xop te Topa tuꞌ xak, puꞌ xit,” kaxĩy.
\p
\v 14 Paꞌ hep xop punethok te ta tuꞌ xak hok, ꞌũkuxa mãm ꞌohnãg tuꞌ, hu hãmꞌãpak ꞌohnãg. Tu hãmꞌãpak hok, tikmũꞌũn te hãmꞌãktux ꞌohnãg hah.
\v 15 Tu hãmꞌãktux hok, tikmũꞌũn te mõꞌkutnã ꞌohnãg hah. Topa yõg tappet te: “Yãꞌ max tikmũꞌũn nũꞌ, nũy hãmꞌãpakꞌax max ꞌãktux,” kaxĩy.
\p
\v 16 ꞌAꞌ xohix tep-tupꞌah. Hõmã mõnãyxop hittap ꞌIyait te Topa pupi hãmꞌãktux, tu kaxꞌãmiꞌ, tu: “Topah, piꞌyãꞌ yĩpkox ꞌũm pip ꞌũgmũꞌãte hãmꞌãktux?” kaxĩy.
\v 17 Yĩy tikmũꞌũn te Kunnix ꞌãktuxꞌax ꞌãpak hãmãxap, tuk-nãy tuꞌ kuxa yũm kaꞌok nõm hãmꞌãktuxꞌax kopah.
\p
\v 18 Pa ꞌãte xeꞌ yĩkopit, hu: ꞌOk tikmũꞌũn te hãmꞌãpak hok? HamŨn. Yãꞌ xupak. Topa yõg tappet te:
\q “Tikmũꞌũn xohix teꞌ yĩyꞌax ꞌãpak,
\q yã hãm xexka xohix yõg tikmũꞌũn te nõm hãmꞌãktuxꞌax ꞌãpak.”
\m Kaxĩy.
\p
\v 19 Hak yĩkopit, hu: “ꞌOk Yoneo yõg tikmũꞌũn te hãm ꞌũm yũmmũg hok?” kaxĩy. Yãꞌ yũmmũg. Pa hõmã mõnãyxop hittap Mõyyex te Topa yõg hãmꞌãktux kaxꞌãmiꞌ, tu:
\q “ꞌÃte ꞌãyĩpkumĩygãp-tup, ꞌũpuknõg xop hã ꞌãyĩpkumĩygãp-tup,
\q ꞌũpuknõg xop yãꞌ hep puxet ꞌohnãg, pãyã ꞌãte ꞌãyĩpkumĩygã-tup,
\q ꞌĩhã puknõg xop yãyhã yõgnũ tikmũꞌũn.
\q ꞌÃte ꞌãgãyãp-tup nõm puknõg xop hah,
\q nõm puknõg xop pa te hãmyũmmũg ꞌohnãg hã
\q ꞌãte ꞌãgãyãp-tup,” kaxĩy.
\p
\v 20 Ha mõnãyxop hittap ꞌIyait kuxãnõg ꞌohnãg, tu Topa pupi hãmꞌãktux tikmũꞌũn puꞌ, tu:
\q “Nõm xop tek ꞌũm xak hok, pak xipihiꞌ,” kaxĩy.
\p
\v 21 Tu Yoneo xop ꞌãktux, hu:
\q “ꞌÃte tikmũꞌũn xãnãhãꞌ, mõꞌyãy xeꞌẽgnãg tuꞌ,
\q pãyãꞌ yĩpkox ꞌohnãg, xix hãmꞌãpak ꞌohnãg,” kaxĩy.
\c 11
\s Topa te ꞌIyaet yõg tikmũꞌũn kuxa kaꞌ
\p
\v 1 ꞌÃte xeꞌ yĩkopit, hu: ꞌOk Topa tep-tup hok yãy yõg tikmũꞌũn? ꞌŨp-tup! ꞌŨgmũn kama nõm Yoneo tikmũꞌũn yõg. ꞌŨgmũn ꞌIyaet yõg tihik, yãk mũn mõnãyxop ꞌAmanãm mõkputox, xix Meyamĩy yõg xop kopak xip.
\v 2 Topa te Yoneo tikmũꞌũn putup hokꞌah, tu nõm yĩmõgatux tap. Hõmã mõnãyxop hittap ꞌEnit te ꞌIyaet yõg tikmũꞌũn ꞌãktux kummuk Topa puꞌ,
\v 3 tu: “Topah, tikmũꞌũn te ꞌõg tik xop kix, nõm xop te ꞌãmũn pupi hãmꞌãktux, ha ꞌõg mĩmpe koxyõy, tu mĩmpe hãpxop mõꞌhapꞌax Topa puꞌ koxyõy, hak mũn puxehnãg xip, hak putex putup kama nõmhã,” kaxĩy.
\v 4 Ha Topa teꞌ yãnãn tu hãmꞌãktux, hu: “ꞌÃte tik max xop xohix te 700 yĩmõgatux, ha topa komut Mat pu nũktettex ꞌohnãg,” kaxĩy.
\v 5 Yã hõnhã kaxĩy kamah. Topa te tikmũꞌũn kutõgnãg xop yĩmõgatux, tu nõm xop ha hãmmaxnãhãꞌ, tuꞌ kuxa kaꞌ,
\v 6 tuꞌ yĩmõgatux ꞌũkuxa ka tuꞌ. Pax pu Topa hãpxopmã max hãꞌ yĩmõgãtux, puxix tu tikmũꞌũn kuxa ka hitop tuꞌ, pãyã Topa teꞌ hok hã hãmmaxnãhãꞌ.
\p
\v 7 Yĩy Yoneo xop teꞌ xak, puyĩy ꞌũxatꞌax hãꞌ kuxa tupmã Topa puꞌ, pãyãꞌ hitop tuꞌ xak. Ha tikmũꞌũn kutõgnag Topa te yĩmõgatux, nũy ꞌũkuxa tupmã yãymũn puꞌ, ha Yoneo nõy xop xexka te Topa puꞌ yĩpkox ꞌohnãg.
\v 8 Topa yõg tappet te: “Topa te nõm xop putox kaꞌogãhãꞌ, yã hõnhã hãmyũmmũg ꞌohnãg,” kaxĩy.
\v 9 Ha Mõnãyxop Namix te:
\q “Pũyã Topa ꞌũyõg hãpxopmãꞌax kummuk hãꞌ pago.
\q Pũyã yãy yõg kummũkꞌax hãꞌ kummuk xop mũg kaꞌok.
\q
\v 10 Pũyãꞌ pẽnã hok, xix hãpxop xakꞌax tuꞌ hittupmã hok,” kaxĩy.
\p
\v 11 ꞌÃte xeꞌ yĩkopit. Yoneo yõg tikmũꞌũn te Kunnix putup nõg, yĩy Topa te nõm pu hãpkummugãhãꞌ. ꞌOk Topa tep-tup hok? Yãp-tup! Pãyã Topa teꞌ hip, pu tuꞌ puknõg xop yĩpkox piꞌ, puyĩy Yoneo yõg tikmũꞌũn yĩpkumĩy puknõg xop hã, nũy tuꞌ yĩpkox pi kamah Topa puꞌ.
\v 12 Yoneo yõg tikmũꞌũn te hãpxopmã kummuk, yĩy Topa teꞌ hep xop xohix ha hãmmaxnãhãꞌ, tu hãmmaxnãp-tup xexkaꞌ, ꞌĩhã Yoneo yõg tikmũꞌũn kamaꞌ yĩpkox pip, ꞌĩhã Yoneo yõg tikmũꞌũn punethok yĩpkox pip hãmꞌãpak max ta tuꞌ. Yã Topa teꞌ xohix te xĩy mõꞌkupix, pu yĩpkox piꞌ.
\s Topa te Yoneo xop hãꞌ puknõg xop kuxa kummuk xitꞌax
\p
\v 13 ꞌÃteꞌ puknõg xop pu hãmꞌãktux nõmhã. Topa te mõgkutnãhãꞌ puknõg xop hah, pu hãmꞌãpak maxꞌax ꞌãktux, hak kuxa hittup.
\v 14 Pũyã Yoneo yõg tikmũꞌũn ꞌũpuknõg xop pẽnãꞌ, nũy kuxa mãm kaꞌok yũmmũg, huꞌ yĩpkumĩy, yã ꞌãteꞌ xak, puꞌ yĩpkumĩy, pu Topa ꞌũkuxa kummuk xit, nũy kuxa max yãnãn tu mõꞌtat.
\v 15 ꞌŨpuknõg xop yãyhã Topa hãꞌ xapeꞌ, ꞌĩhã Topa te Yoneo xop putup nõg, tu Yoneo yõg tikmũꞌũn xohix putup ꞌũxeheh, puxix Topaꞌ xakix xop putpuꞌ hĩnnãꞌ.
\p
\v 16 Tikmũꞌũn te pãm koxip, nũy Topa pu ꞌõm yãg hõm, puxix pãm xohix Topa yõg. Tikmũꞌũn te yĩpxatit hõm Topa puꞌ, puxix mĩm xexka kup kama Topa yõg, xix mĩmmãg kamah. Yã mõnãyxop hittap te mĩm yĩpxatit putuk, ha mĩmmãg te hõnhã yõg Yoneo xop putuk.
\v 17 Mĩm xexka kup ꞌOnimet, tu hãmpakꞌax xukaꞌ yũm, haꞌ mĩmmãg ꞌum xak, ha ꞌOnimet kup puknõg tu mĩmmãg xut, ꞌũkup te hãmhipak tuꞌ yũm haꞌ xut, haꞌ mĩmmãg xut, nũy kup nõy putox tuꞌ hĩy, pu tu tox, mĩmmãg nõy putuk. ꞌÃxop puknõg xop te ꞌOnimet puknõg putuk, Topa te xa hãmmaxnãhãꞌ, tu xa hãmmaxnãhã Yoneo xop putuk.
\v 18 Yĩy Yoneo xop yãk-tõgnãg peꞌãpaxeh hok: ꞌA ꞌãxop te yĩpxatit putukꞌah. ꞌÃmhok. Pãyã ꞌãxop te mĩmmãg putuk, yã mĩmmãg teꞌ yĩpxatit tuꞌ tup.
\p
\v 19 Pa ꞌãxop te: “Tikmũꞌũn te mĩmmãg xeꞌeꞌ xut, nũy nõ puknõg hĩy ꞌũp-tox tuꞌ, pu tu tox. Ha kaxĩy Topa te yãy yõg Yoneo xop mõy, nũy ꞌũgmũg nõy hãꞌ yãnãn, puk mũg yã yãy yõg tikmũꞌũn, mõ ꞌũgmũg yãy xeꞌẽgnãg tuꞌ,” kaxĩy.
\v 20 Hamũn. Hãpxip kutõgnãg ꞌĩhã Topa tep-tup nõg, ꞌũkuxa mãm ꞌohnãg hah, ha ꞌãkuxa mãm kaꞌok, yĩy Topa te ꞌãp-tup pax, pa yãy peꞌãpaxeh xexka hok. ꞌÃkuxãnõg, ka ꞌãkuxa mãm kux.
\v 21 Hõnhã Topa te yãy yõg Yoneo xop putup nõg. ꞌÃkuxa te Topa nĩm, puxix Topa kamah ꞌãp-tup nõg.
\v 22 Topa te hãmyok mĩy, tu tikmũꞌũn kuxa ka kamah. Tu hãmyok mĩy ꞌĩhã tikmũꞌũn kummuk xũygãhãꞌ, tuꞌ yãnãn tuꞌ kummugãhãꞌ, tu ꞌãkuxa kaꞌ, ꞌãyĩpkox pip hah. ꞌÃyĩpkox hok, puxix Topa ꞌãmõy kamah.
\v 23 Yoneo yõg tikmũꞌũn te yãy putat kummuk nĩm, nũy kuxa mãm kaꞌok Kunnix kopah, puxix Topaꞌ putpuꞌ kuxa mãmmãꞌ, yãy yõg xipꞌax tuꞌ. Ha tikmũꞌũn te mĩmmãg xeꞌe hĩy putpuꞌ, puyĩy xip kaꞌok. Kaxĩy Topa te Yoneo xop mãmmãꞌax ꞌũxeheh.
\v 24 ꞌÃxop puknõg, tu ꞌOnimet mĩmmãg putuk. Tikmũꞌũn te mĩmmãg xut, nũy kup xeꞌe tuꞌ hĩy, pu tuꞌ kup xeꞌe hãꞌ mĩmmãg. Yoneo yõg tikmũꞌũn te ꞌOnimet kup xeꞌe putuk, ha Topa te yã yãg putup nõg, tuꞌ xep-tupꞌax kamah, puyĩy yãy mũn hã tikmũꞌũn xeꞌe ꞌũxeheh.
\s Yã Topa mũn max xeꞌẽgnãg
\p
\v 25 ꞌŨkxape xop, ꞌũgꞌãpax: Hõnhã Yoneo yõg tikmũꞌũn yĩpkox ꞌohnãg, pa hãptup nõy xohix ꞌĩhãꞌ yĩpkox pip putup, ꞌĩhãꞌ puknõg xop xohix punethok te Topa yõg putat hãꞌ mõg, ha Topa teꞌ xohix te xĩy mõꞌkupix, pu mõg. ꞌÃte xa hãmꞌãktuxꞌax ꞌãktux, xayĩy yãy yõg hãmyũmmũg peꞌãpaxeh hok. Ha Topa te hãmꞌãktux xeꞌeꞌ, nũy yãy yõg tikmũꞌũn pu hãmyũmmũgãꞌ.
\v 26 Tu Yoneo yõg tikmũꞌũn xohix mõy putup, hãpkummugãꞌax tuꞌ mõy putup, yĩy Topa yõg tappet te:
\q “Tik te yĩktix Xiãm tuꞌ xip,
\q tuꞌ nũn putup, nũy tikmũꞌũn kuxa kummuk xit,
\q nũy Mõnãyxop Yako mõkputox
\q kuxa kummuk xit.
\q
\v 27 ꞌÃte hãmpaꞌax mĩy putup tikmũꞌũn mũtik,
\q ꞌĩhã ꞌãteꞌ kuxa kummuk xit,
\q tuꞌ kuxa max yãnãn tuꞌ tat,” kaxĩy.
\p
\v 28 Yoneo xop te Topa hãꞌ puknõg, hãmꞌãpak maxp-tup nõg tuꞌ, ha kaxĩy ꞌãxop yã Yoneo xopꞌah, nũy Topa hã ꞌãxapeꞌ, pa Topa te Yoneo xop yĩmõgatux tap, mõnãyxop hittap haꞌ yĩmõgatux, tu hãmꞌãktux xex, hu: “ꞌÃte ꞌãmõkputox hãk xape mõg kumak mõg, tuk kux ꞌohnãg,” kaxĩy.
\v 29 Topa te Yoneo yõg tikmũꞌũn yĩmõgatux, tu mõꞌyãy xeꞌẽgnãg, haꞌ hupmã ꞌohnãg, yã Topa teꞌ kuxyã ꞌohnãg, tu nõm hã hãmmaxnãp-tup.
\v 30 Hõmã ꞌãxop puknõg, ꞌap Yoneo xopꞌah, ꞌãyĩpkox ꞌohnãg Topa puꞌ, ha Topa te ꞌãkuxa kaꞌ, Yoneo xop yĩpkox ꞌohnãg ha ꞌãkuxa kaꞌ.
\v 31 Yã Topa te ꞌãkuxa kaꞌ, ha Yoneo xop yĩpkox ꞌohnãg nõmhã, pu Topa kama nõm xop kuxa kaꞌ.
\v 32 Yãꞌ hep xop xohix yĩpkox ꞌohnãg Topa puꞌ, yĩy Topa teꞌ hĩy, yãy yõg hãpxopmãꞌax haꞌ hĩy, ha Topa teꞌ xohix kuxa kaꞌ, puꞌ xohix tuꞌ mũg.
\s Pũyã Topa max xeꞌẽgnãg ꞌãktux
\p
\v 33 Topa te yã xohix ha hãmmaxnã xeꞌẽgnãg, pexkox yõg hãpxop xexka xeꞌẽgnãg hã, ha hãmyũmmũg xeꞌẽgnãg. ꞌA tikmũꞌũn te Topa yõg hãpxopmãꞌax xohix yũmmũgꞌah, nũy tu nõy puꞌ yũmmũgãꞌ. ꞌÃmhok.
\v 34 Yĩy Topa yõg tappet te:
\q “Tikmũꞌũn ꞌũm te Topa yõg hãmpeꞌpaxex yũmmũgꞌah,
\q tu Topa pu hãmyũmmũgã ꞌohnãg,
\q
\v 35 tu Topa pu hãpxop hõm ꞌohnãg kamah, pu tu ta nemẽn,
\q nũy yãnãn tuꞌ pago. ꞌÃmhok.” Kaxĩy.
\p
\v 36 Yã Topa-xet te hãpxop xohix mĩy, tu hãpxop xohix hinnãhãꞌ, tu yãymũn puꞌ mĩy, xix yãy pu hĩnnãhãꞌ. Yã Topa mũn xexka xeꞌẽgnãg. Pũyã tikmũꞌũn te nõm xexka ꞌãktux mõ kumaꞌ mõg! Hamũn!
\c 12
\s ꞌÃpu yũmũꞌãte Topa tu hãpxopmãꞌ
\p
\v 1 Yĩy ꞌãte xak xape xop xapit, xayĩy Topap-xehnãg pu yãymũn hõm, tikmũꞌũn te hãpxop hok hõm putuk. Yã ꞌãxop te ta nemẽn, Topa te ꞌãkuxa ka hah, xayĩy nõm puxehnãg pu ꞌãyĩpkox piꞌ. Yã Topa tep-tup pax. Hamũn. Yã kaxĩy ꞌãxop te Topa pu nũꞌãktettex xeꞌeꞌ.
\v 2 Hãm xexka tuꞌ pip tikmũꞌũn yã Topa hãꞌ puknõg, yĩy nõm pu ꞌĩpkox hok, nũy yõg hãpxopmãꞌax tat hok. Pa Topa te ꞌãp-tox maxnãꞌax, xayĩy Topa yõg putupꞌax yũmmũg, nũy hãpxopmã max. Topa te nõm putup, yĩy ꞌã mãynãg mĩy Topa tuꞌ.
\p
\v 3 Topa tek mũn ha hãmmaxnãhãꞌ, tuk kaꞌogãhãꞌ, yĩy xa hãmꞌãktux, hu: ꞌÃmpeꞌãpaxeh max, nũy yãy yõg hãpxopmãꞌax kopit max. Topa te ꞌãkuxa mãmmã kaꞌok, xayĩy ꞌãxop xohix hãpxopmã max, Topa te yã ꞌãxat hah.
\v 4 Tikmũꞌũn yĩn puxet, tuꞌ kup punethok, xix hãpxop te yĩn kopaꞌ pip punethok, xiꞌ mĩyꞌax punethok.
\v 5 Kaxĩy yũmũg xohix punethok, pãyã yũmũg kuxap-xet Kunnix kuxa mũtik, yãk puxet, yã ꞌãyĩn putuk.
\v 6 Topa te yũmũg xohix kaꞌogãhãꞌ, tuꞌ hok hã kaꞌogãhãꞌ, nũy hãpxopmãꞌ, tuꞌ hok hã yãy yũmũg kaꞌogãhãꞌ. Tu tikmũꞌũn puxet kaꞌogãhãꞌ, pu Topa pupi hãmꞌãktux. Pũyã nõm tikmũꞌũn hãmꞌãktux, Topa teꞌ kuxa mãmmã kaꞌok hah.
\v 7 Xix tikmũꞌũn nõy kaꞌogãhãꞌ, puꞌ nõy hã tu tehet. Pũyã nõm tikmũꞌũn hã tuꞌ tehet. Xix tikmũꞌũn nõy kaꞌogãhãꞌ, pu hãmyũmmũgãꞌ. Pũyã hãmyũmmũgãꞌ.
\v 8 Xix tikmũꞌũn nõy kaꞌogãhãꞌ, pu tuꞌ xape xop mõꞌnĩynãm, nũy kaꞌogãꞌ. Pũyã mõꞌnĩynãm. Xiꞌ nõy kaꞌogãhãꞌ, pu hãpxop hok popmãꞌ. Pũyãꞌ popmãꞌ, nũy tuꞌ xupkumĩy hok. Xiꞌ nõy kaꞌogãhãꞌ pu tuꞌ xat. Pũyã tuꞌ xat max. Xiꞌ nõy kaꞌogãhãꞌ, pu tuꞌ nõy kuxa kaꞌ, nũy tu hittupmãꞌ. Pũyã tu hittup, ꞌũnõy kuxa ka ꞌĩhãꞌ.
\p
\v 9 ꞌÃxape hã mõꞌãmã hok, pa nõm putup pax xeꞌeꞌ. Hãpkummukꞌax putup hok, nũy tu hãmmax xax, nũy hãpxopmã max mõ kumaꞌ mõg.
\v 10 ꞌÃxop xohix Kunnix hã ꞌãxapeꞌ, yĩy ꞌãxop xohix hã yãy xapeꞌ. ꞌÃpu, yãy putup pax, nũy ꞌãnõy peꞌãpaxeh xexkanã xip.
\v 11 Hãpxopmã max, tu tuknõg hok, nũy Topa pu hãpxopmã, ꞌãkuxa hittup tuꞌ.
\v 12 ꞌÃkuxa hittup ꞌĩhã Yeyox Kunnix nũnꞌax hãꞌ hip, tu hãpxopmã kaꞌok hãꞌ tot, nũy hãmmax hip, xix Topa pu hãmꞌãktux mõ kuma mõg, yãꞌ kux hok.
\v 13 ꞌÃxupkumĩy hok, tu ꞌãxape hok xop pu hãpxop hõm, xiꞌ puknõg xop xãnãꞌ, pu ꞌãpet kopaꞌ mõy mõꞌxip.
\p
\v 14 Topa tuꞌ xax, pu hãmmaxnã tikmũꞌũn kummuk hah, nũy nõm xop te ꞌãkummugã xop ha hãmmaxnãꞌ, ha Topa tuꞌ xax hok, puyĩy nõm pu hãpkummugã ꞌũyãnãn tuꞌ. ꞌÃmhok.
\v 15 Tikmũꞌũn potahaꞌ, ꞌãpu nũ yõkãmũ poho kamah. Tikmũꞌũn hittup, ꞌãpu nũ mũtik ꞌãhittup kamah.
\v 16 ꞌÃnõy mũtik ꞌãti max, ha yãy tukmĩy hok. Yãy peꞌãpaxeh xexka hok, paꞌ nõy te ꞌãxatꞌax pu ꞌãyĩpkox piꞌ, nũy nõm pu ꞌãhãm max. Yãy pe ꞌãpaxeh hok, hu: Yã puxehnãg ꞌãte hãmyũmmũg. Kaxĩy.
\p
\v 17 Tikmũꞌũn te xa hãpkummugãꞌ, ꞌãpu, ꞌãyãnãn tu hãpkummugã hok. ꞌÃpu, hãpxopmã max, puyĩꞌ xohix yũmmũg, tu: “Hãpxopmã max ꞌõhõm,” kaxĩy, nũy xa hãmꞌãktux max.
\v 18 ꞌŨxax, nũy tikmũꞌũn xohix mũtik yãykix ta tu yãytuk-mĩy ꞌohnãg, nũy ꞌãxohix kuxa mãmmãꞌ.
\v 19 Tikmũꞌũn te xa hãpkummugãꞌ, ꞌãpu ꞌũyãnãn tuꞌ kummugã hok. ꞌÃmhok. Pũyã Topaꞌ kummugãꞌ, ha Topa yõg tappet te Topa yõg hãmꞌãktux ꞌãktux, tu: “ꞌŨgmũn yã Topah, tu hãpkummugãp-tup ꞌũyãnãn tuꞌ, nũy tu pago,” kaxĩy.
\v 20 Ha Topa yõg tappet te xa hãmyũmmũgãhãꞌ, hu: “Tikmũꞌũn te xa tuꞌ gãy, tup-tup xũy, ꞌãpu, tuꞌ hõm hãpxop, puyĩꞌ mãꞌ. ꞌŨgãy xop te kõnãg tat xak, ꞌãpu, kõnãg tat, nũy hõm, puyĩꞌ xoꞌop. Kaxĩy xateꞌ gãy xop kuxyãhãꞌ, pu yãyhãhup xexkaꞌ, yãꞌ payĩn pukpex,” kaxĩy.
\v 21 Tux hok, xa hãpkummuk mĩy hok, pa hãpxopmã max, xayĩy hãmmax mĩy.
\c 13
\s Gohet yõg tik xop pu ꞌãyĩpkox piꞌ
\p
\v 1 Pũyãꞌ xohix gohet pu yĩpkox piꞌ, nũy tik xop te tikmũꞌun xatꞌax pu yĩpkox piꞌ. Yã Topa teꞌ tux hok pu tu tikmũꞌũn xat.
\v 2 Tikmũꞌũn te gohet xop puꞌ yĩpkox hok, puxix Topa puꞌ yĩpkox hok kamah, ha Topa te nõm tikmũꞌũn yõg hãpxopmãꞌax kummuk kopit, tuꞌ xũygãp-tup, pu tu pago.
\v 3 Tikmũꞌũn te hãpxopmã max, puxix gohet yĩpkutuk hok, ha tikmũꞌũn te hãpxopmã kummuk, puxiꞌ yĩpkutuk. Xatep-tup nũy ꞌãkuxãnõg hok, ꞌãpu hãpxopmã max, puyĩy tik te ꞌãxatꞌax ꞌãmax ꞌãktux.
\v 4 ꞌÕhõm te Topa puꞌ hãm, nũy xa hãmmaxnãꞌ. Xate hãpkummuk mĩy, ꞌãpu ꞌãxatꞌax yĩpkutuk, tute ꞌãxũygãꞌax, xa tu pago. Topa teꞌ xatꞌax xop xat, puꞌ yãnãn tu tikmũꞌũn kummuk pu hãpkummugãꞌ.
\v 5 Yĩy ꞌãxatꞌax xop pu ꞌãyĩpkox piꞌ, Topa te ꞌãxat hah, ꞌãkuxa te ꞌãxat hãmãxap, ha ꞌãxũygã hok kamah.
\p
\v 6 ꞌÕg tayũmak hã pago kama gohet puꞌ, gohet te nõm tayũmak xak hah. Yãꞌ xatꞌax xop te Topa pu hãpxopmãhãꞌ, ꞌĩhã ꞌãxat.
\v 7 Hu pago tayũmak hã xate ta nemen, xixꞌ xatꞌax xop peꞌãpaxex xexka kama xate ta nemẽn.
\s ꞌÃnõy ha hãmmaxnãꞌ
\p
\v 8 Tikmũꞌũn pu ta nemẽn hok, pap-tup pax xexkaꞌ. Tikmũꞌũn te Topa yõg xatꞌax mãynãg mĩy, ꞌĩhãꞌ nõy putup pax.
\v 9 ꞌŨxatꞌax te: “ꞌÃnõy hã xupxet hok,” kaxĩy, xix: “ꞌŨp-tex hok,” kaxĩy, xix: “Hãpxop hã xupxet hok,” kaxĩy, xix: “ꞌÃnõy yĩpkumĩy hok,” kaxĩy. Yãꞌ xatꞌax xohix te yũmũꞌã hãmyũmmũgãhãꞌ, ha hãmyũmmũgꞌax puxet, hu: ꞌÃnõy putup pax, yã yãy mũn putup pax putuk. Kaxĩy.
\v 10 Tikmũꞌũn teꞌ nõy putup pax, puxiꞌ nõy pu hãpkummugã ꞌohnãg, yĩy tikmũꞌũn teꞌ xatꞌax puꞌ yĩpkox pip, ꞌĩhãꞌ nõy putup pax xeꞌeꞌ.
\v 11 ꞌÃpu, ꞌãnõy putup pax. Yã hãptup xeꞌe mõꞌnãꞌax, puxix Kunnix nũꞌ, nũy yãy yõg tikmũꞌũn yãy tu nũꞌxok, ꞌãkuxa tuknõg hok, nũy tikmũꞌũn mõꞌyõn putuk hok. Yã hõmã yũmũg kuxa mãm kaꞌok Yeyox kopah,
\v 12 pa yã hãptũmnãg, ha hãptup te hãpkanet hã mõꞌnãꞌax, ha kaxĩy yũmũg xuxyã xupep putup. ꞌÃpu, yũmũꞌãte hãpkummuk mĩy kux, nũy ꞌãmnĩy koxtap kopa yõg hãpxopmãꞌax kuxyãꞌ, nũy hãpkummuk mũtik yãy tuk-mĩy mãyõn xupep ꞌĩhãꞌ.
\v 13 Yĩy hãmyok mĩy nõmhã, yãy xaptop hok. Hãpkuteꞌex kummuk hok, xix kenmuk xoꞌop hok, nũy ꞌãpaptux hok, xix ꞌũpẽnã pax hok, xayĩy hãpkummuk mĩy hok, xix ꞌãnõy hã xupxet hok, xix hãmpeꞌãpaxeh kummuk hok, xix yãykix hok, xix ꞌãyĩpkumĩy hok.
\v 14 Yã yũmũg xuxyã Yeyox Kunnix te ꞌãpupiꞌ xip, nũy ꞌãxeh, yĩꞌ tux hok pu xeh, ha yãy pu ꞌĩpkox pip hok, nũy yãy yõg putupꞌax mĩy hok, ka hãpkummuk mĩy.
\c 14
\s ꞌÃnõy yõg hãpxopmãꞌax kopit hok
\p
\v 1 ꞌÃxop kopaꞌ pip tikmũꞌũn kuxa mãm puꞌuk, ꞌãpu nõm putup pax, pa hãmꞌãktux hãꞌ nõy yãnãn hok, ꞌũyõg hãmpeꞌpaxex hã yãy tuk-mĩy hok.
\v 2 Tikmũꞌũn kuxa yũm kaꞌok, puxiꞌ xitꞌax xohix mãhãꞌ, pa tikmũꞌũn kuxa yũm puꞌuk te xogyĩn mã ꞌohnãg.
\v 3 Tikmũꞌũn yãg te hãpxop xohix mãhãꞌ. Pũyãꞌ nõy mũn putup, nõm te xogyĩn ma hok, nũy nõm peꞌpaxeh kutõgnãg hok. Tikmũꞌũn yãg te xogyĩn mã ꞌohnãg. Puyãꞌ nõy putup, nõm te hãpxop xohix mãhãꞌ, pu nõm peꞌpaxex kutõgnãg hok. Topa te nõm putup pax, yãꞌ puxiꞌ.
\v 4 ꞌOk yãy peꞌãpaxex xexkaꞌ, nũy ꞌãnõy yõg kãmãnat yõg hãpxopmãꞌax kopit? Yũmũg xuxyã teꞌ kopit putup, nũy hãmyũmmũg, ꞌok pe kãmãnat hãm max, peꞌ hãm kummuk. Yãꞌ hãm maxp-tup. Topa teꞌ kaꞌogãꞌax, puyĩy hãpxopmã max.
\p
\v 5 Tikmũꞌũn yãg te hãptup tuknõg putup, ꞌĩhãꞌ nõy te ꞌãmnĩy xohip-tup, ha ꞌãmnĩy xohix te yãy putuk hamũn puꞌ. Pũyã tikmũꞌũn kuxa xohix mãm kaꞌok, nũy hãmyũmmũg, nũy yãy yõg hãpxopmãꞌax yũmmũg, ꞌok peꞌ max, ꞌok peꞌ kummuk.
\v 6 Tikmũꞌũn te hãptup tuknõg putup, puxix mõy Topa xexka ꞌãktux, ꞌĩhã nõm hãptup putup, ha tikmũꞌũn te hãpxop xohix mãꞌ, puxix Topa xexka ꞌãktux, ꞌĩhã hãpxopmãhãꞌ, hu: “ꞌÃmax Topah, tu hãpxop xohix ꞌãꞌ hõm, nũy ꞌũkxĩnnãꞌ,” kaxĩy. Ha tikmũꞌũn te xogyĩn mã hok, puxix tu Topa xexka ꞌãktux ꞌĩhãꞌ mã hok, tu: ꞌÃmax Topah, xa hãm yõg hãpxop punethok ꞌãꞌ hõm, nũy ũkxĩnnãꞌ,” kaxĩy.
\v 7 Tikmũꞌũn puxehnãg hã ꞌap hiꞌah, tup-xehnãg hã ꞌap xokꞌah, pãyã Topa te yũmũg xat, ꞌok pe yũmũg hiꞌ, pe yũmũg xakix.
\v 8 Yũmũg hi, kopxix Topa tu yũmũg hiꞌ. Yũmũg xakix, kopxix Topa tu yũmũg xakix. Yã kaxĩy, pe yũmũg hiꞌ, pe yũmũg xakix, kopxix Topa yõg yũmũꞌãꞌ.
\v 9 Kunnix xok, tu putpuꞌ hiꞌ, nũy tu yãyhã nõm hi xop yãy xuxyãꞌ, xiꞌ xakix xop yãy xuxyã kamah.
\v 10 Xix ꞌãmũn, tep tu xate ꞌãxape yõg hãpxopmãꞌax kopit, nũy hãpxopmãꞌax ꞌãktux kummuk? ꞌÃnõy ꞌãktux kummuk hok. Yũmũg xohix te Topa keppak pip putup, pu yũmũg yõg hãpxopmãꞌax xohix kopit, nũy hãmyũmmũg, ꞌok pe yũmũꞌãte hãpxopmã max, pe hãpxopmã kummuk.
\v 11 Yĩy Topa yõg tappet te Topa yõg hãmꞌãktux ꞌãktux. Ha Topa te:
\q “ꞌÃte xa hãpxeꞌe ꞌãktux, tu xa hãmꞌãktux xex:
\q Yãk hi mõkumak mõg,
\q yĩy ꞌũhep xohix xop tek keppa nũktettex putup, nũy tu kuxaꞌ yẽy,
\q tutek mũn ha Topa xeꞌẽgnãg ꞌãktux putup,” kaxĩy.
\p
\v 12 Yĩy yũmũg xohix te Topa keppak pip putup, nũy yãy yõg hãpxopmãꞌax ꞌãktux.
\s ꞌÃnõy kummugã hok
\p
\v 13 ꞌÃxape kummuk ꞌãktux hok. ꞌÃmhok, hãpxopmã hok, nũy ꞌãnõy pu hãpkummugã hok, puyĩy hãpkummuk mĩy hok.
\v 14 ꞌŨgkuxap-xet yũmũg xuxyã kuxa mũtik, hu ꞌãte hãmyũmmũg, ha hãpxop xitꞌax xohix max, ꞌũyĩꞌ mãꞌ, pa tikmũꞌũn yãg te: “Nõm te xokxop mã hok xop. Yãꞌ kummuk tikmũꞌũn teꞌ mãꞌ,” kaxĩy, puxix nõm xitꞌax yã nõm tikmũꞌũn hã ꞌũmã hok.
\v 15 Xate nõm hãpxop mãꞌ, hu ta ꞌãxape kuxa hittupmã hok, tuꞌ kummugãhãꞌ, hu nõm putup nõg. ꞌÃxitꞌax hã ꞌãxape pu hãpkummugã hok, ka tute Topa yõg putat xak. ꞌOk yũmmũg xateꞌ? Yã Kunnix te ꞌãxape pupiꞌ xok, nũy nõ hãmmaxnãꞌ, pa xateꞌ kummugãhã ꞌãxitꞌax hã. ꞌÃpu ꞌãnõy kuxa putex hok!
\v 16 Xate hãpxopmãhãꞌ, tu hãmpeꞌãpaxex, hu: “Yã ꞌãte hãpxopmã max,” kaxĩy. Yãꞌ max, pa ꞌãxape mũtik hãmꞌãktux hok, nũy nõy yãnãn hok. Yã ꞌãxape te hãmpeꞌpaxex nõy. ꞌÃyĩy hok, xayĩy ꞌãxape gãyã hok, ka ꞌãxape ꞌõg hãpxopmãꞌax kopit kummuk.
\v 17 Topa te yãy yõg tikmũꞌũn xat, tu tikmũꞌũn kuxa tuꞌ xat, tu putep mũn mãꞌax ꞌap xatꞌah, xix putep xoꞌopꞌax ꞌap xatꞌah. ꞌÃmhok. Topa te tikmũꞌũn xat, pu max, tuꞌ xat, pu tu kuxa yũm kaꞌok, tuꞌ xat, pu tu kuxa hittup xexkaꞌ, ha Topa Koxuk teꞌ kuxa hittupmãꞌax, tu hãpxopmãꞌax max hãꞌ kuxa yũmmãꞌax.
\v 18 Ha tikmũꞌũn te Kunnix pu hãpxopmã kaxĩy, puxix Topa nõm ꞌũmax ꞌãktux, ha tikmũꞌũn xohix te nõm ꞌũmax ꞌãktux kamah.
\p
\v 19 ꞌÃpu yũmũꞌãte hãxopmã maxnãꞌ, nũy kuxa yũmmãꞌ, nũy yũmũg xape kaꞌogãꞌ.
\v 20 Pa nũy ta nõy kummugã hok. ꞌÃxitꞌax hã ꞌãnõy kummugã hok. ꞌÃmhok. ꞌÕg pa ꞌãtiꞌ! ꞌÃnõy yã Topa yõg, ha Topa te nõm putup pax, ꞌũyõg hah, haꞌ kummugã hok, nũy ꞌãxit max.
\v 21 Topa tep-tup tikmũꞌũn te xogyĩn mã hok, xix ta hep xupyãg xoꞌop hok, kaꞌ nõy hã hãpkummugãhãꞌ.
\v 22 Xate hãpxopmãhãꞌ, tuꞌ max peꞌãpaxex, ꞌãkuxa yũm kaꞌok, hu ꞌãxit, xiꞌ xoꞌop, ha xateꞌ yũmmũg, xix Topa teꞌ yũmmũg. Puxiꞌ. Tikmũꞌũn kuxa yũm kaꞌok yãy yõg hãpxopmãꞌax kopah, puxix tu kuxa hittup xexkaꞌ, haꞌ kuxa te yãy mũn tu: Yãꞌ max. ꞌÃte hãpxopmã max hõnhã,” kaxĩy.
\v 23 Pa tikmũꞌũn kuxa yũm puꞌuk, tu yãy mũn yĩkopit, ꞌok peꞌ max, ꞌok peꞌ kummuk, ꞌũ hãpxop ꞌũm mãꞌ, puxix Topaꞌ tux hok puꞌ mã hok, ꞌũkuxa yũm ꞌohnãg hah. Tikmũꞌũn kuxa yũm puꞌuk, ꞌĩhã hãpxopmãꞌ, puxix hãpkummuk mĩy, ꞌũkuxa yũm puꞌuk tuꞌ.
\c 15
\s ꞌÃpu, ꞌãnõy yõg putupꞌax mĩy
\p
\v 1 Topa tek xat, ꞌũyĩy yũmũg xape xop mõꞌnĩynãm, nõm xop kuxa mãm puꞌuk mõꞌnĩynãm, nũy nõ kaꞌogãꞌ, nũy yũmũg yãy yõg putupꞌax mĩy hok.
\v 2 ꞌÃnõy yõg putupꞌax mĩy, nũy nõm ha hãmmaxnãꞌ, pu tu kuxa yũm kaꞌok Yeyox kopah.
\v 3 Kunnix te yãy yõg putupꞌax mĩy ꞌohnãg, yĩy Topa yõg tappet te Kunnix ꞌãktux, tu hãmꞌãktux, hu: “Tikmũꞌũn te ꞌãkummuk ꞌãktux, puxik mũn kummuk ꞌãktux kamah,” kaxĩy.
\v 4 Hõmã tik xop hittap te Topa pupi hãmꞌãktux, tu tappet tu kaxꞌãmiꞌ, ha mõꞌyũmũg nĩynãm, ꞌũyĩy nõãꞌtot, ha Topa yõg tappet te yũmũg kaꞌogãhãꞌ, ꞌũ Kunnix putpu nũnꞌax hip.
\v 5 Topa te ꞌãkaꞌogãhãꞌ, xix xa hãꞌ totnãhãꞌ. Pũyã Topa ꞌãxop kuxa puxetnãꞌ, xix ꞌãp-tox puxetnã kamah, xayĩy Yeyox Kunnix yõg hãpxopmãꞌax tat,
\v 6 nũy Topa yũmũg Tak max ꞌãktux, nũy ꞌãyĩyꞌax puxet hã Topa max ꞌãktux, yã ꞌõhõm yũmũg xuxyã Yeyox Kunnix hã ꞌÃtak.
\s Yã hãmꞌãpak max ꞌãktux Yoneo xop hãꞌ puknõg xop puꞌ
\p
\v 7 ꞌÃpu, ꞌãxape putup, yã kaxĩy Kunnix te ꞌãp-tup, tu mõꞌãyãy xeꞌẽgnãg. ꞌÃxape putup pax, pu tikmũꞌũn te: “Topa mũn max xeꞌẽgnãg!” kaxĩy.
\v 8 ꞌÃte xa hãpxeꞌe ꞌãktux: Kunnix te Yoneo xop tu hãpxopmãhãꞌ, tu nõm xop ha hãmmaxnãhãꞌ, pu nõm xop yũmmũg, tu Topa te hãmyok mĩy yũmmũg. Yã Topa teꞌ yõg hãmꞌãktux xex, tu mõnãyxop hittap puꞌ xex, tuꞌ xaxok ꞌohnãg, tu mãynãg mĩy.
\v 9 Ha Kunnix te hãxopmãhãꞌ, puꞌ puknõg xop yũmmũg kamah, yã Topa te puknõg xop kuxa kaꞌ, puyĩy Topa max ꞌãktux, yĩy Topa yõg tappet te:
\q “Yã ꞌãmax Topah, yĩy ꞌãteꞌ puknõg xop pu hãmꞌãktux putup,
\q tuk-tex putup, nũy ꞌãmax ꞌãktux,” kaxĩy.
\q
\v 10 Tu xe hãmꞌãktux, hu:
\q “Pũyãꞌ puknõg xop kuxa hittup Yoneo xop mũtik.
\q Yã Topa te Yoneo yõg tikmũꞌũn yĩmõgatux,” kaxĩy.
\q
\v 11 Tu xe:
\q “Pũyãꞌ puknõg xop xohix Topa xexka ꞌãktux,
\q pũyãꞌ hep xop xohix Topa pu hãmꞌãktux punethok,
\q nũy tu: ‘ꞌÃmax xeꞌẽgnãg,’ kaxĩy, Topa puꞌ,” kaxĩy.
\p
\v 12 Ha mõnãyxop hittap ꞌIyait te Topa yõg tappet tu kaxꞌãmiꞌ, hu:
\q “Yexe mõkputox ꞌũm nũn putup, nũy puknõg xop xat,
\q haꞌ hittup, tuꞌ hip, pu mõkputox nũꞌ,” kaxĩy.
\p
\v 13 Yã Topa te yũmũg kuxa hittupmãhãꞌ, pũyã ꞌãkuxa mãmmã, xayĩꞌ hip, Yã yũmũꞌãꞌ hõm putup pexkox yõg hãpxop xohix, ha yũmũꞌãteꞌ hip, nũy pop. Yã Topa Koxuk te ꞌãkaꞌogãhãꞌ, xa hãmmax hip kamah, nũy pexkox yõg hãpxop tu pop.
\s Paot te hãpxeꞌe ꞌaktux
\p
\v 14 ꞌŨkxape xop, ꞌũgkuxa yũm kaꞌok ꞌãkopah, yã ꞌãkuxa max, tu hãmyũmmũg, ha ꞌãte ꞌãyũmmũg, ha hãmyũmmũg max, nũy ꞌãnõy pu hãmyũmmũgãꞌ.
\v 15 Pa ꞌãte xa kaxꞌãmi tappet, tu xa hãpxeꞌe ꞌãktux, tuk kuxãnõg ꞌohnãg, nũy xa xaxogã hok. Yã Topa tek yãykutnãhãꞌ, ꞌũ hãpxopmã nõm pupiꞌ, tuk hittup xexkaꞌ.
\v 16 Yã hãpxopmãhã Yeyox Kunnix tuꞌ, nũy hãmpuknõg yõg xop mõꞌnĩynãm, tu Topa yõg hãmꞌãpak maxꞌax ꞌãktux, ꞌãmãnex putuk tuꞌ, puyĩꞌ puknõg xop kuxa mãm kaꞌok Topa kopah. Yã mõꞌyãy xeꞌẽgnãg, ha Topa Koxuk te nõm xop yĩmõgatux, nũy Topa kuxa hittupmãꞌ.
\v 17 ꞌŨghittup xexkaꞌ, Topa tu ꞌãte hãpxopmãhãꞌ, tuk kuxa hittup. Yãk kuxap-xet Kunnix kuxa mũtik.
\v 18 ꞌAp ꞌũgkuxãnõgꞌah, tu hãmꞌãktux xeꞌeꞌ, nũy Kunnix te hãpxopmãꞌax ꞌãktux, ꞌa ꞌãte hãmꞌãktux nõy ꞌãktux ꞌũm putupꞌah, pa Kunnix ꞌũgmũg ꞌũm hã hãpxopmã kaꞌok, puyĩꞌ puknõg xop kuxa mãm kaꞌok Topa kopah, ꞌãte hãmꞌãktux, nũy hãmyũmmũgãꞌ, puyĩꞌ puknõg xop yĩpkox pi Topa puꞌ.
\v 19 Topa Koxuk te mõgkutnãhãꞌ, tuk kaꞌogãhãꞌ, ꞌãte hãpxopmã xeꞌẽgnãg, puyĩꞌ puknõg xop pẽnãꞌ, hak kaꞌogãhãꞌ, ꞌũ hãpxopmã kaꞌok xeꞌẽgnãg. Yã kaxĩy tikmũꞌũn ꞌũm teꞌ mĩy hok, yĩk xip Yenoyanẽn tuꞌ, tuk mõg, tuk xupep hãpxexka ꞌInit tuꞌ, nũy hãmꞌãpak maxꞌax xohix ꞌãktux, nũy Kunnix ꞌãktux.
\v 20 ꞌÃte hãpxopmã punethok, nũy hãmꞌãpak maxꞌax ꞌãktux, nũy Kunnix ꞌãktux puknõg xop puꞌ, nõm xop te Kunnix ꞌãxetꞌax ꞌãpak hok puꞌ xuktux, nũy nõy yõg hãpxopmãꞌax mĩy hok. ꞌÃte putupꞌah, ꞌũnõy te hãpxopmã hãmãxap, ꞌũg-nãy tu hãpxopmãꞌ.
\p
\v 21 Ha Topa yõg tappet te:
\q “Tikmũꞌũn ꞌũm te nõm ꞌãktux ꞌohnãg, pãyãꞌ puknõg teꞌ pẽnãp-tup,
\q ha hãmꞌãpak ꞌohnãg xop te hãmyũmmũg putup,” kaxĩy.
\s Paot te kõmẽn xexka Hõm tuꞌ mõg putup
\p
\v 22 ꞌÃmnĩy xohix hã ꞌãteꞌ xak, nũy ꞌãhak mõg, pãyãk mõgꞌah.
\v 23 ꞌÃte hãpxopmã kux nũnte, kopxix ꞌãhak mõg. Yã ꞌãteꞌ hip hãmyãxatamuk xohix hã, ꞌũg ꞌãha mõg.
\v 24 Huk mõg putup nõmhã. ꞌŨgmõg putup hãpxexka ꞌExpãn hah, tu ꞌãp-tup, xa mõgnĩynãm, ꞌũyĩy ꞌExpãn tuk mõg, tu ꞌãxop mũtik ꞌũkxip putup hãmãxap.
\v 25 Hõnhãk mõg Yenoyanẽn tuꞌ, nũy Topa yõg tikmũꞌũn tu hãpxopmãꞌ.
\v 26 Yã hãpxexka Mãxenõn yõg kuxa mãm kaꞌok xop, xix hãpxexka Genex yõg kuxa mãm kaꞌok xop te tayũmak pop, nũy Topa yõg tikmũꞌũn puꞌ popmã Yenoyanẽn tuꞌ, nũy hok xop puꞌ popmãꞌ.
\v 27 Nõm kuxa mãm xop teꞌ popmãp-tup, nũy hok xop puꞌ popmãꞌ. Yãꞌ max ꞌũ popmãꞌ, Yoneo xop puꞌ yãnãn tuꞌ popmãhãꞌ. Yã Yoneo xop teꞌ puknõg xop ha hãmmaxnãhãꞌ, yĩꞌ puknõg xop te tu ta nemẽn, nũy yãnãn tuꞌ hok xop pu hãpxop popmãꞌ.
\v 28 ꞌÃte hãpxopmã kux, kopxiꞌ hok xop pu hãpxop popmõg, tu ꞌExpãn hak mõg putup, tuk mõg putat hã, kopxix ꞌãhak mõg kamah.
\v 29 ꞌŨgmõg, nũy ꞌãha hãmmaxnãꞌ, pu Kunnix ꞌãha hãmmaxnã xexkaꞌ.
\p
\v 30 ꞌŨkxape xop, ꞌãte ꞌãxapit, yũmũg xuxyã te mõ yũmũg yãy xeꞌẽgnãg hah, xix Topa Koxuk te mõgyãy hah, xa mõgnĩynãm, nũy Topa puk ꞌãktux nãm, puk mũn kaꞌogãꞌ,
\v 31 tuk pẽnã max, tuk mõgnĩy, puyĩy Yoneo yõg kuxa mãm hok xop tek kummugã hok. ꞌÃpu, Topa tuꞌ xax kamah, puyĩy Yenoyanẽn yõg kuxa mãm kaꞌok xop ꞌũgputup, ꞌãte hãpxopmã max hah.
\v 32 Topa tek putup, kopxik mõg ꞌũm ꞌãhah, tuk hittup xexkaꞌ, nũy ꞌãmũtik ꞌũktihiꞌ, nũy ꞌãmũtik ꞌũghittup.
\v 33 Pũyã Topa ꞌãkuxa mãmmãꞌ, xix ꞌãmũtik tihiꞌ. Hamũn!
\c 16
\s Paot teꞌ xape xop pu ꞌãneo
\p
\v 1 Pep yã yũmũg xape hex, tuꞌ max, tu kõmẽn Xẽnkenex yõg kuxa mãm kaꞌok xop pu hãpxopmãhãꞌ, tuꞌ hok xop pu hãpxop popmãhãꞌ,
\v 2 yĩy nõm putup, nũy nõ tu ꞌãtehet, yã yũmũg xuxyã ꞌũyõg kamah. Pũyãꞌ xohix hã tuꞌ tehet, yã tikmũꞌũn punethok hãꞌ xape, xik mũn hãꞌ xapeꞌ.
\v 3 ꞌÃte Pinixit xix ꞌAk pu ꞌãneo hõm, yãk mũn mũtik Topa tu hãpxopmãhãꞌ, tu yãk mũn hã ꞌũkxape xeꞌeꞌ.
\v 4 Tu ꞌãꞌ xokꞌax, yĩy ꞌãte nõm pu: ꞌÃmax xeꞌeꞌ, kaxĩy. ꞌÃteꞌ puknõg xop yõg kuxa mãm kaꞌok xop xohix mũtik hãmꞌãktux, hu: ꞌÃmax xeꞌe! Kaxĩy.
\v 5 ꞌÃteꞌ kuxa mãm kaꞌok xop pu ꞌãneo hõm kamah, nõm xop te ꞌAk pet tu yãy tu nũꞌnãhãꞌ.
\p ꞌÃte ꞌẼpẽn pu ꞌãneo hõm kamah, hak mũn hã ꞌũkxapeꞌ, tu ꞌAx yõg tik te mãxap, nũy kuxa yũm Yeyox kopah.
\v 6 ꞌÃte Mãnix pu ꞌãneo hõm, ha ꞌãxop pu hãpxopmãhã punethok.
\v 7 Xix ꞌÃnenõn xix Yõn pu ꞌãneo hõm, ha kama Yoneo yõg tihik, ꞌũgmũn putuk, tuk mũn mũtik pip kanet kopah. Yeyox yõg mõꞌpok xop teꞌ yũmmũg max, haꞌ kuxa mãm kaꞌok hãmãxap, hak-nãy tuk kuxa yũm kaꞌok kamah.
\p
\v 8 ꞌÃte ꞌÃpit pu ꞌãneo hõm, hak mũn hã yã ꞌũkxapeꞌ xeꞌe, yãg mũg kuxap-xet yũmũg xuxyã kuxa mũtik.
\v 9 Xix ꞌOhmãn pu ꞌãneo hõm, hak mũ mũtik hãpxopmãhãꞌ, tu Kunnix tu hãxopmãhãꞌ, xix ꞌExtak pu ꞌãneo hõm, hak mũn hã ꞌũkxape xeꞌeꞌ.
\v 10 Xix ꞌApet pu ꞌãneo hõm, yã Kunnix tu hãpxopmã xexkaꞌ, ha tikmũꞌũn teꞌ yũmmũg. Xix ꞌAnixtop pet kopaꞌ pip xop pu ꞌãneo hõm.
\v 11 Xix ꞌEnoniãm pu ꞌãneo hõm kamah, ha Yoneo yõg tik kamah, xix Nãxix pet kopaꞌ pip xape xop pu ꞌãneo hõm kamah.
\p
\v 12 Xix Tinipẽn xix Tinipox pu ꞌãneo hõm, yã Topa tu hãpxopmãhãꞌ, xix Pex, hak mũn hã ꞌũkxapeꞌ, tu yũmũg xuxyã tu hãpxopmãhã xexkaꞌ.
\v 13 Xix Hop pu ꞌãneo hõm, yã hãpxopmãhã xexka Topa tuꞌ, xiꞌ tut pu ꞌãneo, yãk mũn hã yãꞌ tut.
\v 14 ꞌÃte ꞌAxĩn pu ꞌãneo hõm, xix Penegõn puꞌ hõm, xix ꞌEhẽm puꞌ hõm, xix Paꞌot puꞌ hõm, xix ꞌEhãm puꞌ hõm, xix yũmũg xape xop teꞌ pet kopaꞌ pip pu ꞌãneo hõm.
\v 15 Xix Pinot pu ꞌãneo hõm, xix Yonit puꞌ hõm, xix Neneo puꞌ hõm, xiꞌ hex puꞌ hõm, xix ꞌOnĩm puꞌ hõm, xix Topa yõg tikmũꞌũn xohix pu ꞌãneo hõm, nõm teꞌ mũtik pip xop pu ꞌãneo hõm kamah.
\p
\v 16 Yãy kep ha yãy mũg, nũy tu ꞌãneo. Yã Kunnix yõg tikmũꞌũn xohix te ꞌãxop pu ꞌãneo hõm.
\s Paot te hãmyũmmũgãhãꞌ
\p
\v 17 ꞌŨkxape xop, ꞌãte xa hãmꞌãktux: ꞌOg pa mõxip! Tikmũꞌũn kummuk te xa hãmꞌãktux hãꞌ nõy yãnãn, puyĩy ꞌãgãyãꞌ, puyĩy yãy xakot, ha Topa yõg hãmꞌãktux yũmmũgã kummuk. ꞌÃpu, ꞌũnĩm nõm kummuk xop.
\v 18 Tikmũꞌũn te hãpxopmã kummuk ha xĩy, puxix Kunnix yũmũg xuxyã tu hãpxopmã ꞌohnãg, pãyã hãpxop xak, nũy xit. Tu hãmꞌãktux mãynãg, nũy yã tikmũꞌũn pu mõꞌãmãꞌ, nũy tikmũꞌũn hãmyũmmũg hok xop pu mõꞌãmãꞌ.
\v 19 Tikmũꞌũn xohix te ꞌãyĩpkox pipꞌax yũmmũg, ha hãmꞌãpak maxꞌax pu ꞌãyĩpkox pip, ꞌãyĩy xa tuk hittup, tup-tup, xa hãmyũmmũg, nũy hãpxopmã max, pãyã ꞌa ꞌãte putupꞌah, xa hãpxopmã kummuk yũmmũg. ꞌÃmhok.
\v 20 Topa te yũmũg kuxa mãmmãhãꞌ, tu hãpxip kutõgnãg ꞌĩhã Hãmgãyãgnãg koxyõy putup, pu ꞌãxop totnok nãm, tuꞌ nõãꞌ.
\p Pũyã yũmũg xuxyã Yeyox xa hãmmaxnãꞌ!
\p
\v 21 Tĩmõn tek mũtik hãpxopmãhãꞌ, tu xa ꞌãneo hõm, xix Noxit, xix Yaxãm, xix Xoxit, te ꞌãneo hõm kamah. Nũ tik xop xohix Yoneo xop, ꞌũgmũn putuk.
\p
\v 22 ꞌŨgmũn Tex, tu Paot pupi tappet kaxꞌãmiꞌ, tu ꞌãxop pu ꞌãneo hõm, yãk mũn Kunnix yõg, ꞌãxop putuk.
\p
\v 23 Xix Gax te ꞌãneo, hak mũg pip Gax pet tuꞌ, haꞌ kuxa mãm xop te nũ pet tu ta tu yãy tu nũꞌnãhãꞌ, tu nũꞌãktettex. Xix ꞌEnax te ꞌãneo, ha kõmẽn yõg tayũmak xex, xix Koat te ꞌãneo, ha yũmũꞌã hãꞌ xapeꞌ.
\p
\v 24 Pũyã yũmũg xuxyã Yeyox Kunnix ꞌãxop xohix ha hãmmaxnãꞌ! Hamũn!
\s Paot te Topa xexka xeꞌẽgnãg ꞌãktux
\p
\v 25 ꞌÃpu yũmũg Topa xexka ꞌũm ꞌãktux! Tu ꞌãkuxa mãmmãꞌax kaꞌok, xayĩy ꞌãkuxa mãm kaꞌok mõꞌ kumaꞌ mõg. Yã hãmꞌãpakꞌax teꞌ xuktux, ꞌãte nõm te xaꞌ xuktux, tu Yeyox Kunnix xaꞌ xuktux. Hõmã Topa te hãpxaptop,
\v 26 pa hõnhã hãmyũmmũgãhãꞌ, tu tik xop hittap hãꞌ yũmmũgãhãꞌ, nõm xop te Topa pupi hãmꞌãktux, tu tappet tu kaxꞌãmiꞌ, pu Topa yõg tikmũꞌũn hãmyũmmũg, ha Topa hi xeꞌẽgnãg mõ kumaꞌ mõg, tuꞌ xat, puꞌ hep xop xohix puꞌ xuktux, pu hãm xexka xohix yõg tikmũꞌũn puꞌ xuktux, puyĩꞌ xohix yĩpkox piꞌ, xiꞌ kuxa mãm kaꞌok hãmꞌãpak maxꞌax kopah.
\p
\v 27 Topap-xehnãg, ꞌũnõy ꞌaꞌ tiꞌah, ha hãmyũmmũg xeꞌẽgnãg. Pũyãꞌ xohix Topa xexka xeꞌẽgnãg ꞌãktux, Yeyox Kunnix ha hãmꞌãktux.
\p Tu ta tuꞌ kux.