\id 1CO  - Maxakalí NT [mbl] (Brazil) -2011 bd
\h 1 KONĨN
\toc1 1 Konĩn
\toc2 1 Coríntios (1 Co)
\mt PAOT TE KONĨN XOP PU KAXꞌÃMIꞌ I
\c 1
\p
\v 1 ꞌŨgmũn Paot, ha Topa tek mũn yãykutnãhãꞌ, tu nũgkutnãhã ꞌãte hãpxopmã Yeyox Kunnix puꞌ, tu xa kaxꞌãmiꞌ, yũmũg xape Xox mũtik ꞌãte xa kaꞌãmiꞌ,
\v 2 nũy tappet xa mõꞌkutnãꞌ, nũy kõmẽn Konĩn yõg kuxa mãm kaꞌok xop xohix hah mõꞌkutnãꞌ, ꞌãkuxa xohip-xet Kunnix kuxa mũtik hah. Yã ꞌãxop Kunnix yõg xop, nũy Topa hã tikmũꞌũn xeꞌeꞌ. Hak mũꞌãte tappet mõꞌkutnãꞌax kamah ꞌũkuxa mãm kaꞌok xop xohix hah, nõm xop te yũmũg xuxyã Yeyox Kunnix tuꞌ xak, pu tuꞌ kox kaꞌogãꞌ. Yã Yeyox Kunnix teꞌ kuxa mãm kaꞌok xop xohix hãꞌ xuxyãꞌ.
\p
\v 3 Pũyã Topa yũmũg Tak ꞌãkuxa mãmmãꞌ, nũy tu yũmũg xuxyã Yeyox Kunnix mũtik xa hãmmaxnãꞌ.
\s Topa te Kunnix hã yũmũꞌã hãmmaxnãhãꞌ
\p
\v 4 Topa te xa hãmmaxnãhãꞌ, hak hittup, tu: ꞌÃmax, Topah! Kaxĩy. Yã Topa te xa hãmmaxnãhãꞌ, Yeyox te ꞌãxop pupiꞌ xok ha hãmmaxnãhãꞌ.
\v 5 Yã ꞌãkuxap-xet Yeyox Kunnix kuxa mũtik, pu hãmꞌãktux kaꞌok ha ꞌãyummũgãhã, xa hãmyũmmũg xohix.
\v 6 ꞌÃkuxa mãm kaꞌok hãmꞌãpakꞌax kopah, ha Kunnix ꞌãktux,
\v 7 yĩy Topa te xa hãmmaxnã xexkah, ꞌĩhã ꞌãxop te Topa yõg hãptup mõꞌnãꞌax xexka hip, ꞌĩhã yũmũg xuxyã Yeyox Kunnix nũn putup putpuꞌ.
\v 8 Ha ꞌãkaꞌogãp-tup, ꞌĩhãꞌ nũnꞌax hip, xayĩy ꞌãkuxa tu max, ꞌĩhã yũmũg xuxyã Yeyox Kunnix xupep, nũy ꞌũhep xop xohix yõg hãpxopmãꞌax kopit.
\v 9 Topa xip kaꞌok, tu mõꞌãgmũg xohix hãꞌ xip kaꞌok, tu yũmũg mũtik tihiꞌ, tu yũmũg xãnãhã, ꞌũ nũꞌ, nũy yũmũg kuxap-xet yũmũg xuxyã kuxa mũtik, nũy Topak-tok Yeyox Kunnix kuxa mũtik yũmũg kuxap-xet.
\s ꞌŨkuxa mãm kaꞌok xop te yãy tuk-mĩy
\p
\v 10 ꞌŨkxape xop, ꞌãte ꞌãxop tuꞌ xak, xap-tox puxet xix kuxap-xet, nũy yãy mũtik ta tuk-mĩy hok. Yã yũmũg xuxyã te ꞌãꞌ hõm yãy ꞌãxetꞌax, ꞌãte xaꞌ xak, xayĩy ꞌãgãy hok.
\v 11 Kono xape te xa ꞌãktux, tu ꞌãxop te yãy tuk-mĩyꞌax ꞌãktux,
\v 12 ha kaxĩy tikmũꞌũn ꞌũm te: “ꞌŨgmũn yã Paot yõg,” kaxĩy, haꞌ nõy te: “ꞌŨgmũn yã ꞌApot yõg,” kaxĩy, haꞌ nõy te: “ꞌŨgmũn yã Pet yõg,” kaxĩy, haꞌ nõy te: “Pak mũn yã Kunnix yõg,” kaxĩy.
\v 13 ꞌOk ꞌãxop te Kunnix yõg tikmũꞌũn koxip putup yãy puꞌ? ꞌOk ꞌũgmũn te mĩpkupnix tuk xok ꞌãxop pupiꞌ? ꞌÃmhok! ꞌOk ꞌãte yãy ꞌãxetꞌax hõm, pu tikmũꞌũn ꞌũm ꞌãp-tox pix? ꞌAp hõmꞌah. Kunnix puxet te yãy ꞌãxetꞌax hõm, pup-tox pix. ꞌAk mũnꞌah.
\p
\v 14 ꞌÃte Kinix xix Gax putox pix, pãyã tikmũꞌũn nõy putox pix ꞌohnãg, yĩy ꞌãte: ꞌÃmax Topah! Kaxĩy. Tuk hittup.
\v 15 Yã tikmũꞌũn te hãmꞌãktux hok, hu: “Paot te yãy ꞌãxetꞌax hõm puyĩp-tox pix,” kaxĩy. Yãꞌ koit.
\v 16 Nãy. ꞌÃte ꞌExteo putox pix kamah, xiꞌ xape xop, pap-tox nõy ꞌap pixꞌah ꞌãteꞌ.
\v 17 Kunnix te nũ ꞌũm kutnãꞌah ꞌũp-tox pix. ꞌÃmhok. Pa nũgkutnãhãꞌ, ꞌũyĩy ꞌãte hãmꞌãpak maxꞌax ꞌãktux, ꞌãte hãmꞌãktux max pu kakxop tuk-tup yũmmũg max, nũy Kunnix xexkanãꞌ. Yã yũmũg pupiꞌ xok mĩkupnix tuꞌ, yã hãmꞌãpak maxꞌax ꞌõhõm.
\s Topa te Kunnix hã tikmũꞌũn pu hãmyũmmũgãhãꞌ
\p
\v 18 Tikmũꞌũn kuxa yũm ꞌohnãg hãmꞌãpakꞌax max kopah, puxiꞌ yĩxix, tu hãmꞌãktuxꞌax putup nõg, tu: “ꞌÃp-tox kummuk!” kaxĩy, tuꞌ yĩpkox ꞌohnãg. Pa yũmũꞌãteꞌ xupak, tu: Hamũn! Yã hãmyũmmũg xeꞌeꞌ! kaxĩy, tuk yĩpkox pip hãmꞌãktuxꞌax kaꞌok puꞌ, ha Kunnix yũmũg pupiꞌ xok ꞌãktux, ha Topa kaꞌok, hu yũmũg kuxa kummuk xit, nũy kuxa max mõꞌtat ꞌũyãnãn tuꞌ. Yã hãmꞌãktuxꞌax kaꞌok, tu yũmũꞌã hã hãmꞌãpak max xeꞌeꞌ.
\v 19 Yã Topa yõg tappet te:
\q “ꞌÃte hãmꞌãktux tox xop yõg hãmꞌãktux kuxyãp-tup,” kaxĩy.
\p
\v 20 Piyãp xip tikmũꞌũn te hitop tu yãy peꞌpaxex, hu: “ꞌÃte hãmyũmmũg,” kaxĩy. Piyãp xip tikmũꞌũn te hitop tu yãy peꞌpaxex, hu: “ꞌÃte hãmꞌãktux max,” kaxĩy. Yãꞌ mõg, tuꞌ yĩpkox ꞌohnãg. Topa te hãmꞌãktux hitopꞌax tuꞌ mũg, hap-tox kummuk xop yõg hãmꞌãktux.
\p
\v 21 Topa te hãmyũmmũg, tuꞌ tux hok, pu tikmũꞌũn hãmyũmmũg hok, nũy hãmpeꞌpaxexꞌax hã Topa mũn yũmmũg hok, ꞌĩhãk mũꞌãte hãmꞌãpak maxꞌax ꞌãktux, puyĩy tikmũꞌũn yũmmũg, ha Topa te tikmũꞌun hã tu tehet, nõm xop kuxa mãm kaꞌok hãmꞌãpak max kopah, hã tu tehet, ꞌĩhãꞌ kuxa kummuk xit, nũy nõ kuxa max mõꞌtat ꞌũyãnãn tuꞌ.
\v 22 Yoneo xop te Topa yõg hãpxopmã xeꞌẽgnãg xak, nũy pẽnãꞌ, nũy hãmꞌãpak maxꞌax yũmmũg, ha Genex yõg puknõg xop te hãmyũmmũg xak,
\v 23 pak mũꞌãte Kunnix ꞌãktux, ha mĩpkupnix tuꞌ xok yũmũg pupiꞌ, yã hãmꞌãpak max. Pa Yoneo xop tep-tup nõg, xiꞌ puknõg xop te hãmꞌãpakꞌax ꞌãktux kummuk,
\v 24 pa Topa te yãy yõg tikmũꞌũn xãnãhãꞌ, pe Yoneo yõg tikmũꞌũn, peꞌ puknõg, haꞌ yĩmõgatux, pu hãmꞌãpak maxꞌax ꞌãpax, ha Topa te Kunnix nũꞌkutnãhãꞌ, pu yãy yõg tikmũꞌũn kaꞌogãꞌ, nũy yãy yõg tikmũꞌũn yũmmũgãꞌ.
\v 25 Ha tikmũꞌũn ꞌũm te hitop tu hãmꞌãktux, hu: “Yã hãmꞌãpakꞌax kummuk, tu hãmyũmmũgã hok,” kaxĩy. Nãy, tikmũꞌũn te hãmꞌãktux koheꞌ. Nõm hãmꞌãpakꞌax yã Topa yõg hãmyũmmũgꞌax xeꞌeꞌ. Haꞌ nõy ꞌũm te: “Yã hãmꞌãpak maxꞌax puꞌuk, tuꞌ kaꞌogã hok,” kaxĩy. Pa Topa teꞌ xuktux, yĩy hãmꞌãpakꞌax kaꞌok.
\p
\v 26 ꞌŨkxape xop, hãmpeꞌãpaxeh nõmhã. Hõmã ꞌãxop te hãmyũmmũg ꞌohnãg, tu tikmũꞌũn nõy xat ꞌohnãg, ha Topa te ꞌãxãnãhãꞌ, yã tikmũꞌũn te xa ꞌãktux ꞌũnõy puꞌ, hu: “Hãmyũmmũg kutõgnãg ꞌõhõm,” kaxĩy. Tu xa peꞌpaxex ꞌohnãg.
\v 27 Pa Topa te nõm tikmũꞌũn puꞌ hupmãhãꞌ, ꞌĩhã ꞌãyĩmõgatux, ꞌãk-tõgnãg hah ꞌãyĩmõgatux, xix ꞌãpukꞌuk hah ꞌãyĩmõgatux.
\v 28 Hõmã ꞌãxop yã hãmhok xop, yã Topa hãꞌ puknõg ꞌãxop, yĩy Topa te ꞌãyĩmõgatux, nũy nõm tikmũꞌũn xop yõg hãmpeꞌpaxex kuxyãꞌ,
\v 29 pu tikmũꞌũn ꞌũm te yãy mũn xexka peꞌpaxeh hok Topa keppah.
\v 30 Pa Topa te ꞌãxop hã yãykotĩnnãhãꞌ, tu yãy tu nũꞌ xok Kunnix hãꞌ, ha Kunnix te hãmyũmmũg xohix, tu yũmũg hĩnnãhãꞌ, ꞌũ tu hi xeꞌeꞌ, yã Topa te mõ yũmũg yãy, tu yũmũg kuxa tupmãhãꞌ, pu Topa hã yũmũꞌã tikmũꞌũn. Yã Kunnix te mĩpkupnix tuꞌ xok, nũy yũmũg yõg hãpxopmãꞌax kummuk hãꞌ pago.
\v 31 Yĩy Topa yõg tappet te: “Tikmũꞌũn te hãmpeꞌpaxex xexka putup, pũyã Topa yõg hãpxopmãꞌax pe tu paxeh xexkah, nũy yãy yõg hãpxopmã max pe tu paxeh ꞌohnãg,” kaxĩy.
\c 2
\s Paot te Kunnix xokꞌax ꞌãktux
\p
\v 1 ꞌŨkxape xop, hõmã ꞌãte xa hãmꞌãktux, tu xa Topa yõg hãmꞌãktuxꞌax ꞌãktux. Hõmã, hãmyãxatamuk xohix hã Topa yĩy ꞌohnãg, tu hãmꞌãktux ꞌohnãg, pãyã hõnhã Topa te hãmꞌãktux, yĩy ꞌãte xaꞌ xuktux Topa pupiꞌ, tu hãmꞌãktux max, puyĩy kakxop tuktup kama yũmmũg max.
\v 2 Yã ꞌãte hãmꞌãktuxꞌax nõy putup ꞌohnãg, nũy Yeyox Kunnix puxet ꞌãktux, nũy Yeyox xokꞌax puxet ꞌãktux. Yã mĩpkupnix tuꞌ xok, yũmũg pupiꞌ xok, nũy yũmũg kuxa kummuk xit, nũy kuxa max tat ꞌũyãnãn tuꞌ.
\v 3 Hõmã ꞌãhak mõg, tu tak puꞌuk, tuk kuxãnõg,
\v 4 tu Topa yõg hãmꞌãktux xaꞌ xuktux, xix xa hãmyũmmũgãhãꞌ, pãyã ꞌap hãmꞌãktux maxꞌah, puyĩy tikmũꞌũn te: “Yã hãmyũmmũg ꞌõhõm!” kaxĩy. ꞌÃmhok, pa Topa Koxuk tek kaꞌogãhãꞌ, ꞌũyĩy Yeyox Kunnix ꞌãktux, hak kaꞌogãhã kamah, ꞌãte hãpxopmã kaꞌok, pu tikmũꞌũn pẽnãꞌ, nũy: “Yã Topa te Paot nũꞌkutnãhãꞌ, pu yãy pupi hãmꞌãktux yũmũꞌãꞌ, tu hãpxopmã kaꞌok xeꞌeꞌ,” kaxĩy.
\v 5 Yĩy ꞌãkuxa mãm kaꞌok Topa kopah, hu ꞌãkuxa mãm ꞌohnãg tikmũꞌũn yõg hãmyũmmũgꞌax puknõg kopah, yã Topap-xet kopa ꞌãkuxa mãm kaꞌok, ꞌũkaꞌok hah.
\s Topa te hãmyũmmũg xeꞌẽgnãg
\p
\v 6 Ha ꞌãteꞌ kuxa mãm kaꞌok xop pu hãmꞌãktux, nõm xop te Topa Koxuk puꞌ yĩpkox pip, ha ꞌãte Yeyox Kunnix ꞌãktux, ꞌõhõm yũmũg pupi tu xok, nũy yũmũg kuxa kummuk xit, pãyã hãm xexka yõg tikmũꞌũn te hãmꞌãktux koheꞌ, tu Yeyox Kunnix putup nõg, xiꞌ xexka xop tep-tup nõg, ha tikmũꞌũn te nõm xatꞌax xop puꞌ yĩpkox pip putup ꞌohnãg.
\v 7 Yã ꞌãte Topa yõg hãmꞌãktux ꞌãktux, ha hãmyũmmũg xeꞌeꞌ. Hõmã hãmyãxatamuk xohix ꞌĩhãꞌ, ꞌap hãm ꞌũm xipꞌah, pãyã Topa te hãmpeꞌpaxex, tu yũmũꞌã ha hãmmaxnã xexkap-tup, hu: “Pũyã yãy kutok tikmũꞌũn pupi tu xok, nũy nõ kuxa kummuk xit,” kaxĩy. Pãyãꞌ xaptop, tuꞌ xuktux ꞌohnãg, tuꞌ yũmmũgã ꞌohnãg.
\v 8 Pax pu Topa hãꞌ puknõg xop yũmmũg, puxix yũmũg xuxyãp-tex hok, ꞌũgãy tup-tex. Pãyãꞌ kuxa mãm ꞌohnãg, hu yũmũg xuxyã max xeꞌẽgnãg putex.
\v 9 Pa Topa yõg tappet te hãmmaxnã xexka ꞌãktux, tu yũmũg xuxyã xok yũmũg pupiꞌax ꞌãktux, hu:
\q “Tikmũꞌũn teꞌ pẽnã ꞌohnãg, tuꞌ xupak ꞌohnãg,
\q tuꞌ peꞌpaxex ꞌohnãg,
\q pa Topa te hãmpeꞌpaxex, nũy yãy yõg tikmũꞌũn pu hãmmax nã xexkah,
\q nũy tup-tup pax xop pu hãmmaxnã xexkah,” kaxĩy.
\p
\v 10 Yã hõmã Topa yĩy ꞌohnãg, pa hõnhã yãy Koxuk te yũmũꞌã hãmꞌãktux, nũy yũmũg yũmmũgãꞌ, puyĩy xehomip xaptop ꞌohnãg. Yã Topa Koxuk te tikmũꞌũn yõg hãmpeꞌpaxex xohix yũmmũg, tu Topa yõg putupꞌax xohix yũmmũg, xix Topa yõg hãmpeꞌpaxex xohix yũmmũg.
\v 11 Tikmũꞌũn yãp-xet te yãy yõg hãmpeꞌpaxex xohix yũmmũg, yãp-xehnãg te hãmyũmmũg, ha Topa Koxuk yãp-xehnãg te Topa yõg hãmpeꞌpaxex yũmmũg.
\v 12 Ha Topa te yãy Koxuk xeꞌẽgnãg yũmũꞌã nũꞌkutnãhãꞌ, tuꞌ koxuk puknõg yũmũꞌã nũꞌkutnã ꞌohnãg, yã Topa Koxuk te yũmũꞌã hãmyũmmũgãhãꞌ, nũy Topa yõg hãmꞌãktux yũmũgãꞌ.
\p
\v 13 Yĩk mũꞌãte Topa Koxuk yõg hãmꞌãktuxꞌax ꞌãktux putup, xa tikmũꞌũn yõg hãmꞌãktuxꞌax pu ꞌãyĩpkox hok. Yã kaxĩy ꞌũgmũꞌãte hãmꞌãktux, tu Topa Koxuk yõg hãmꞌãktuxꞌax yũmmũgãhãꞌ, tu Topa yõg tikmũꞌũn pu hãmyũmmũgãhãꞌ, nõm xop te Topa Koxuk puꞌ yĩpkox pip.
\v 14 Pa Topa Koxuk te tikmũꞌũn ꞌũm kopaꞌ xihip hok, puxix tu nõm kaꞌogã hok. Nõm tikmũꞌũn yã Topa hãꞌ puknõg, tuꞌ yõg hãmꞌãktux ꞌãpak, pãyãꞌ yũmmũg ꞌohnãg. Yãꞌ Koxuk xeꞌẽgnãg te Topa yõg tikmũꞌũn yãp-xet kaꞌogãhãꞌ.
\v 15 Topa Koxuk te tikmũꞌũn kopa xihip, puxix tikmũꞌũn pa hãmyũmmũg, nũy hãpxopmãꞌax xohix kopit, xix hãmyũmmũg, peꞌ max, peꞌ kummuk. Paꞌ puknõg xop te nõm tikmũꞌũn yõg hãpxopmãꞌax kopit hok.
\v 16 Yĩy Topa yõg tappet te:
\q “ꞌÕk tikmũꞌũn ꞌũm te Topa yõg hãmpeꞌpaxex yũmmũg?
\q ꞌOk tikmũꞌũn ꞌũm te Topa pu hãmyũmmũgãhãꞌ? ꞌÃmhok.
\q Topa yãp-xehnãg te yãy yõg hãmpeꞌpaxex yũmmũg,
\q xix yãy pu hãmyũmmũg xeꞌẽgnãg,” kaxĩy.
\p Pa Kunnix te hãmyũmmũg, tu yũmũꞌã hãmyũmmũgãhãꞌ, ꞌũyĩy putox puxet Kunnix putox mũtik.
\c 3
\s Yũmũꞌã Topa hã kãmãnat
\p
\v 1 ꞌÃte xa hãpxeꞌe ꞌãktux. Yã ꞌãxop tek mũn hã ꞌãxapeꞌ, pa ꞌãte xa hãmꞌãktux yũmmũg, ꞌokpa Topa Koxuk te ꞌãkopaꞌ xip. Yã ꞌãxop te hãmpeꞌãpanõm kummuk, Topa hãꞌ puknõg xop putuk ꞌãxop te hãmpeꞌãpanõm, nõm te Topa puꞌ yĩpkox ꞌohnãg, xix kakxop putuk hãmpeꞌãpanõm, nõm xop te Topa yõg hãmꞌãktux yũmmũg kutõgnãg, yã kakxop putuk, ꞌãkuxa mãm puꞌuk tuꞌ.
\v 2 Kakxop puꞌũgnãg teꞌ yõktat hep xoꞌop, tuꞌ xitꞌax kaꞌok mã hok, ha kaxĩy ꞌãxop puꞌuk, tu Topa yõg hãmꞌãktux yũmmũg kutõgnãg, hõmã xix hõnhã ꞌãkuxa mãm puꞌuk.
\v 3 ꞌÃxop te Topa hãꞌ puknõg xop putuk, tu hãpxopmã kummuk, tuꞌ yãykix pax, xix yĩpkumĩy pax, tu Topa hãꞌ puknõg xop putuk, tu hãpxopmã kummuk.
\v 4 Tikmũꞌũn puxet te: “ꞌŨgmũn yã Paot yõg,” kaxĩy, haꞌ nõy te: “Pak mũn yã ꞌApot yõg,” kaxĩy. Yã Topa hãꞌ puknõg xop putuk hãpxopmãhãꞌ.
\p
\v 5 ꞌApot yã ꞌaꞌ xexkaꞌah, xik mũn ꞌak xexkaꞌah. Yãk mũꞌãte Kunnix tu hãpxopmãhãꞌ, puxiꞌ. Tu xa hãmꞌãpak maxꞌax ꞌãktux, ha ꞌãkuxa mãm kaꞌok yũmũg xuxyã kopah. Yũmũg xuxyã tuk mũꞌãte hãpxopmãhãꞌ, yãk mũg xat, ꞌũyõg kãmãnat hah.
\v 6 Tikmũꞌũn te hãpxa xexka hãꞌ hãm, ha tik hãmãxap te hãpxop xap xok, haꞌ nõy kũnãy tuꞌ hãm, tu kõnãg hã hãpxop xokax pix, puyĩy tu tuk mõꞌkaꞌok. ꞌŨtix hãm, pãyã Topa te hãmmaxnãhãꞌ. Ha kaxĩy ꞌãte xa hãmꞌãpak max ꞌãktux, ha ꞌApot te xa hãmyũmmũgãhãꞌ. Tikmũg hãm, pãyã Topa te xa hãmmaxnãhãꞌ, tu ꞌãkuxa mãmmãhãꞌ.
\v 7 Kãmãnat xop ꞌaꞌ xexkaꞌah, pãyã Topa mũn xexka xeꞌẽgnãg, tu hãmmaxnãhãꞌ.
\v 8 Ha kãmãnat xop xohix yãy putuk, ha Topa teꞌ hãmꞌax tuꞌ pagop-tup, tu kãmãnat hãm xexka tuꞌ pagop-tup punethok, ha kãmãnat hãm kutõgnãg tuꞌ pagok-tõgnãg putup.
\v 9 Yã ꞌApot xik mũn hãm Topa tuꞌ, ꞌãxop ha tikmũg hãm, puyĩy Topa ꞌãkaꞌogãꞌ, yĩy ꞌãxop te hãpxa putuk, ha Topa te xa hãmmaxnãhãꞌ, ha ꞌãxop te mĩptut putuk kamah, yã Topa yõg mĩptut.
\v 10 ꞌŨxuxyã teꞌ xat, pu mĩptut max mĩy, tu tik puxet xat hãmãxap, pu mĩkaxxap mĩm mõg hãpkox kopah, pu nõ mãykup mõꞌtat, haꞌ nõy kũnãy tuꞌ xat, pu nõm mõꞌxix hãpkox kopah. Ha Kaxĩy Topa tek kaꞌogãhãꞌ, pu hãmꞌãpak max ꞌãktux hãmãxap, puyĩy tikmũꞌũn kuxa mãm kaꞌok Yeyox Kunnix kopah, ha ꞌApot kũnãy tuꞌ nũn, nũy kuxa mãm kaꞌok xop yũmmũgã max.
\v 11 Mĩptut xuxyã te mãykup kaꞌok putup, yã mãykup te mĩptut kaꞌogãhãꞌ, pu tu yũm kaꞌok. Ha kaxĩy Topa te Yeyox Kunnix yãykutnãhãꞌ, pu yãp-xehnãg hã yũmũg pupi tuꞌ xok, nũy yãp-xehnãg hãꞌ kuxa kummuk xit, nũy kuxa max tat ꞌũyãnãn tuꞌ. ꞌAp nõy xipꞌah.
\v 12 Ha tikmũꞌũn yãg te pipkup yãnãm ꞌãta hã hãmꞌãta max mĩy, xiꞌ nõy te pipkup yãnãm ponnok hãꞌ mĩy, xiꞌ nõy te xap max hã hãmꞌãta mĩy. Haꞌ nõy te mĩmpe hã hãmꞌãta kummuk mĩy, xiꞌ nõy te xuxnak hãꞌ mĩy, xiꞌ nõy te xuxnãg xux hã hãmꞌãtaꞌ mĩy. Hã kaxĩy Topa yõg kãmãnat hãm kamah. ꞌŨyãg hãm max, tu Topa yõg hãmꞌãktux ꞌãktux, tu Topa yõg tikmũꞌũn kaꞌogãhãꞌ pu tu hãmyũmmũg. Haꞌ yãg nõy hãm kummuk, yĩy Topa yõg tikmũꞌũn puꞌuk, tu hãmyũmmũg ꞌohnãg.
\v 13 ꞌŨxuxyã te mĩptut kummuk mĩy, puxix kuxap hã mõꞌxut mõꞌkaꞌok, haꞌ nõg. Hã kaxĩy Kunnix yõg hãptup xeꞌe mõꞌnãp-tup, ꞌĩhã Topa te yãy yõg kãmãnat xop yõg hãpxopmãꞌax xohix kopit. Kãmãnat hãm kummuk, puxiꞌ yõg hãpxopmãꞌax xaxogãꞌ.
\v 14 ꞌŨxuxyã te mĩptut max mĩy, puxix kuxap hã mõꞌxut ꞌohnãg, yãꞌ yũm kaꞌok. Kaxĩy kãmãnat hãm max Topa tuꞌ, puxix Topa yõg hãpxopmãꞌax kopit, nũy nõ kãmãnat ha hãmmaxnã xexkaꞌ.
\v 15 Mĩptut kummuk mõꞌxut kuxap hã, puxix kãmãnat te hãmhok xip, tu tayũmak pop ꞌohnãg, pãyãꞌ xokꞌah. Kaxĩy Topa yõg kãmãnat hãm kummuk, puxix yãy kuxa tup, Topa teꞌ tupmã hah, tu Topa yõg putat hãmhok hãꞌ mõg, pãyã Topa te nõm kãmãnat pu pexkox yõg hãpxop ꞌaꞌ hõm putupꞌah.
\v 16 Yã ꞌãxop Topa pet xeꞌeꞌ, ꞌãkopaꞌ xip tuꞌ, ha ꞌãxop te hãmyũmmũg, ha Topa Koxuk te ꞌãkopaꞌ xip,
\v 17 yĩy Topa te ꞌãpẽnã max, ꞌãkopaꞌ pet tuꞌ. Tikmũꞌũn gãy te ꞌãkoxyõy putup, puxix Topaꞌ yãnãn tu ꞌũkoxyõy, ꞌãxop yã Topa pet xeꞌeꞌ.
\p
\v 18 Pũyã ꞌãmũn yãy hã mõꞌãmã hok. Tikmũꞌũn te hãmpeꞌpaxex, hu: “ꞌÃte hãmyũmmũg xexkaꞌ!” kaxĩy, pãyãꞌ hitop tu hãmpeꞌpaxex, yã Topa te: “ꞌÕhõm hãmyũmmũg ꞌohnãg, ꞌũkuxa mãm ꞌohnãg tuꞌ,” kaxĩy.
\v 19-20 Topa hãꞌ puknõg xop te: “Yã hãmyũmmũg nõꞌõm,” kaxĩy, puxix Topa te: “Pũyã yãy hã mõꞌãmãꞌ, hãmyũmmũg hok tuꞌ!” kaxĩy. Yĩy Topa yõg tappet te: “Topa te yãy mũn hãꞌ puknõg xop yũmmũg, tuꞌ yõg hãmpeꞌpãnõm yũmmũg, ha hãmyũmmũg ꞌũhitop tuꞌ, tup-tox kummuk xop putuk,” kaxĩy.
\v 21 Pũyã tikmũꞌũn yãy mũn xexka ꞌãktux hok, tu yãy yõg hãpxopmãꞌax tuꞌ kuxa hittup hok. Yã hãpxop xohix ꞌõgnũꞌ, pu Topa xa hãmmaxnãꞌ.
\v 22 Yĩy Paot, xix ꞌApot, xix Pet, ꞌũxohix te ꞌãpẽnã max, ha Topa te hãm xexka mĩy, nũy ꞌãkuxa hittupmãꞌ. Tu ꞌãkuxa hĩnnãhãꞌ, xayĩy ꞌãxakix ꞌĩhã, ꞌãmõg pexkox hah. Yã hõnhã Topa te mõꞌãyãy xeꞌẽgnãg, xix hõmã mõꞌãyãy xeꞌẽgnãg, xix hãptup ꞌĩhã mõꞌãyãy xeꞌẽgnãg putup. Yãꞌ xohix ꞌõgnũꞌ,
\v 23 ha ꞌãxop yã Kunnix yõg tikmũꞌũn, ha Kunnix yã Topa yõg hãmyãykutnãꞌax xeꞌẽgnãg.
\c 4
\s Yeyox yõg mõꞌpok xop
\p
\v 1 ꞌŨgmũꞌãte xa hã Kunnix yõg kãmãnat, tu hãpxopmãhãꞌ, nũy Kunnix pupi xa hãmyũmmũgãꞌ, nũy xa Topa yõg hãmꞌãktux xeꞌe ꞌãktux,
\v 2 Yĩy Topa tek mũg xat ꞌũ hãpxopmã max, nũy xa hãmyũmmũgãꞌ max, ha yũmũg xuxyã tek mũ yõg hãpxopmãꞌax pẽnãp-tup, nũy yũmmũg, ꞌok pek mũꞌãte hãpxopmã max, ꞌok pek mũꞌãte hãpxopmã kummuk.
\v 3 ꞌÃxop tek mũg hãmꞌax pẽnãp-tup. Pũyã tikmũꞌũn pa te hãmyũmmũg tuk mũg hãmꞌax pẽnãꞌ. Yãꞌ hitop. ꞌÃte yãy yõg hãmꞌax pẽnã hok yãy pu kamah.
\v 4 ꞌŨgkuxa teꞌ mĩy max ꞌãktux, pa yũmũg xuxyã puxet tek hãmꞌax pẽnãhãꞌ, tuꞌ yũmmũg, ꞌok pek hãm max, pek hãm kummuk.
\v 5 Yĩy ꞌãnõy yõg hãpxopmãꞌax kopit hok, nũy nõ ꞌãktux kummuk. Nãy, ꞌũhip, pu Topaꞌ kopit, ꞌĩhã nũꞌ. Tute hãpxop xaptopꞌax mũg putup, xix tikmũꞌũn yõg hãmpeꞌpaxex yũmmũg putup, ꞌĩhã Topa te hãpxopmãꞌax max pu pago.
\p
\v 6 ꞌŨkxape xop, ꞌãte xa hãmꞌãktux tap, tuk mũn ꞌãktux, xix ꞌApot ꞌãktux. ꞌÃtek mũg ꞌãktux, xayĩy ꞌãxop hãmyũmmũg, ha tappet teꞌ xat, hu: “Tappet yõg hãmꞌãktux pu ꞌĩpkox piꞌ,” kaxĩy. Yãꞌ kummuk, tik ꞌũm ꞌãktux max, ꞌĩhãꞌ nõy ꞌãktux kummuk.
\v 7 ꞌOk ꞌãxop te yãy xexka peꞌãpaxex? ꞌOk ꞌãxop te ꞌãnõy kutõgnãg peꞌãpaxex? Yãꞌ kummuk. Topa mũn te xa hãmmaxnãhãꞌ, tuꞌ hok hã hãmmaxnãhãꞌ, xayĩy yãy hitop xexka ꞌãktux hok!
\p
\v 8 ꞌÃxop yã yãy peꞌãpanõm ꞌũptexop, tu yãy peꞌãpanõm ꞌãxexka xop, tuk mũg peꞌãpanõm kutõgnãg xop, Pãyã yãy mõꞌãmãꞌ. ꞌŨyã yũmũg xohix xexka xop!
\v 9 ꞌÃte hãmpeꞌpaxex. Yãk mũꞌã mõꞌpok xop, pe Topa hã yũmũg kaꞌax xop, nũy tikmũꞌũn ꞌũgmũg kix, ꞌĩhã xohix teꞌ pẽnãhãꞌ, xix pexkox yõg nũꞌpok xop xohix teꞌ pẽnã kamah.
\v 10 Ha Topa hãꞌ puknõg xop te: “ꞌŨp-tox kummuk,” kaxĩy, huk mũg ꞌãktux, tu ꞌãxop ꞌãktux max, pãyã yũmũg xohix Kunnix yõg tikmũꞌũn. Hak mũg puꞌuk, pa ꞌãkaꞌok, ha ꞌãp-tup pax, pak mũg putup nõg.
\v 11 Yã putup tek mũg kix, hak mũꞌãte kõnãg tatꞌax xak. ꞌŨgmũg xax kunox, haꞌ gãy xop tek mũg kix, tu mũg xũygãhãꞌ, ꞌak pet ꞌũm yũmꞌah.
\v 12 Tuk mũg hãm punethok nũy xit, ꞌĩhã tikmũꞌũn te: “Pũyã Topa ꞌãkix!” kaxĩy. Hak mũꞌãte hãmꞌãktux hãꞌ yãnãn, hu: “Pũyã Topa xa hãmmaxnãꞌ!” kaxĩy. Hak mũg kummugãhãꞌ, pãyãk mũꞌãteꞌ gãy xop yõg hãmꞌãktux kummuk hãꞌ tot, tu hãmmax hip.
\v 13 Haꞌ gãy xop tek mũꞌã hãpkummugãhãꞌ, tuk mũg mãnõg, ꞌĩhãk mũg yĩy puꞌuk, nũy nõy gãy kuxyãꞌ. Yã Topa hãꞌ puknõg xop tek mũg putup nõg, tu: “Mõg, nũy ꞌãpep!” kaxĩy.
\p
\v 14 ꞌÃte xa kaxꞌãmiꞌ, nũy xa hãmyũmmũgãꞌ. ꞌÃte ꞌãxop putup pax, ꞌũgkutok putuk hah, ꞌa ꞌãte xaꞌ hupmãp-tupꞌah.
\v 15 Yã tik punethok te xa hãmyũmmũgãꞌax, pak mũn puxet hã ꞌõg ꞌãtak. ꞌÃte xa hã ꞌãtak, xa hãmꞌãpak maxꞌax ꞌãktux tuꞌ, ha ꞌãkuxa mãm kaꞌok Kunnix kopah.
\v 16 Hu ꞌãte xaꞌ kax, pu hãpxopmã max, nũy ꞌũgmũn putuk. Yã ꞌãte hãpxopmã max,
\v 17 hu ꞌãte Timõn mõꞌkutnãhãꞌ, tuk mũn hã ꞌũgkutnãꞌ, pu hãpxopmã nũ mũtik, hak mũg tix hãm max yũmũg xuxyã puꞌ. ꞌÃxutigãp-tup, xayĩy Topa yõg putat hã ꞌãmõg kaꞌok, yã ꞌãkuxa mãm kaꞌok Yeyox Kunnix kopah, ha taxĩy ꞌãte hãmyũmmũgãhãꞌ, ꞌũkuxa mãm kaꞌok xop xohix pu hãmyũmmũgãhãꞌ.
\p
\v 18 ꞌÃxop yãy xexka peꞌãpanõm, kopxix ꞌãhak mõg hok.
\v 19 Topa ꞌũgputup, ꞌũ mõg, yã hãpxip kutõgnãg kopxik mõg, nũy nõm xop te hãpxopmãꞌax yũmmũg. Haꞌ yĩy kaꞌok, yãy xexka peꞌãpanõm tuꞌ. ꞌÃpu hãpxopmã kaꞌok kamah!
\v 20 Topa te yãy yõg tikmũꞌũn xat, puyĩy yĩpkox piꞌ xeꞌeꞌ, nũy hãpxopmã max. Tikmũꞌũn te hitop tu hãmꞌãktux, tu hãpxopmã max hok, puxix tu yĩpkox ꞌohnãg.
\v 21 Piꞌyãꞌ mũn xatep-tup? ꞌOk ꞌũgmõg, nũy xikot hã ꞌãkixꞌax? ꞌOk pep-tup, ꞌũyĩyꞌax puꞌuk hã ꞌãhittupmãhãꞌ? Piyaꞌ mũn xatep-tup? Yã xatep-tup ꞌũg ꞌãhittupmãꞌ, yĩy hãpxopmã max.
\c 5
\s Tik teꞌ nõy hãꞌ xupxet
\p
\v 1 Tikmũꞌũn te ꞌãxop ꞌãktux kummuk, yã ꞌãxop ꞌũm yõg tik ꞌũm teꞌ nõy hãꞌ xupxet kummuk, yãꞌ xonnix kummuk, ha tikmũꞌũn nõy te Topa hãꞌ puknõg teꞌ mĩy ꞌohnãg. Yã tik te yãy tak xetut mũg, nũy nũ mũtik ꞌãnõm, tu hãpkummuk mĩy pax.
\v 2 Tep te xĩy ꞌãxop te yãy mũn max peꞌãpanõm? Yã ꞌãkummuk! ꞌÃpu yãyhãhup, nũy tik kummuk xupmã.
\v 3 ꞌŨyãk xihip nõmhã ꞌãxop mũtik! ꞌÃte tik yõg hãpxopmãꞌax kummuk kopit, ꞌĩhã hãptox tuk xip, ha yũmũg xuxyã Yeyox Kunnix te ꞌãꞌ hõm yãy ꞌãxetꞌax, ꞌãte tik hãpxopmãꞌax kummuk kopit.
\v 4 ꞌŨyãk xihip ꞌãxop mũtik, ꞌĩhã ꞌãxop te yãy kotĩnnãhãꞌ, ha yũmũg xuxyã te ꞌãkaꞌogãp-tup,
\v 5 xa tik kummuk hõm Hãmgãyãgnãg puꞌ. Pũyã tu xok, pãyã Topa teꞌ kuxa kummuk xit, puꞌ koxuk tu xip kaꞌok, ꞌĩhã yũmũg xuxyã Yeyox Kunnix nũn putpuꞌ.
\p
\v 6 ꞌÃxop yãy mũn max peꞌãpaxex. ꞌAp maxꞌah. Xate hãm hittap yõg hãmꞌãktux yũmmũg, yĩy: “Pãm yõg tokatogãꞌax kutĩgnãg te pãm xexkanãhãꞌ,” kaxĩy.
\v 7 Yã tokatogãꞌax te hãpkummuk mĩyꞌax putuk, yĩy hãpkummuk mĩy kux, nũy tu max, tu pãm putukꞌax, pãm tokatok hok putuk, yãꞌ tũmnãg. Hãpxip kutõgnãg ꞌĩhã ꞌũgmũ yõg Yoneo xop te ꞌãmuk xexka ꞌãxetꞌax Nõãꞌyẽn mĩy putup, ꞌĩhã kahnẽn putex, puꞌ xohixꞌ mãꞌ. Ha Kunnix te yũmũ yõg kahnẽn xeꞌeꞌ, tu mĩpkupnix tuꞌ xok tap yũmũg pupiꞌ, hu yũmũg hã kahnẽn xeꞌeꞌ.
\v 8 ꞌÃpu yũmũg Kunnix pekpaxeh, nõm te yũmũg pupiꞌ xok pekpaxeh, yã ꞌãmuk xexka Nõãꞌyẽn putuk, yĩy yũmũꞌãte hãpkummuk mĩy kux, ha pãm yõg tokatogã hok putuk. Yã pãm te hãmyok mĩyꞌax ꞌãktux, xix hãmmaxnãꞌax ꞌãktux.
\p
\v 9 ꞌÃte xa kaxꞌãmi tap, pu tikmũꞌũn kummuk mũtik ꞌãkotĩnnã hok, nõm tikmũꞌũn teꞌ nõy hãꞌ xupxet.
\v 10 ꞌÃxop te hãm xexka tuꞌ pip, yĩy hãpkummuk mĩy xop te xa yãy koteꞌ pip. Yĩꞌ xohix tu ꞌãxop ꞌãxatat hok. Ha nõm kummuk xop teꞌ nõy hãꞌ xupxet, xiꞌ nõy yõg hãpxop putup pax, xix hãpxopmã kummuk xix topa komut pu nũꞌ xup.
\v 11 Pa tikmũꞌũn te yãy ꞌãktux, tuꞌ kuxa yũm kaꞌokꞌax ꞌãktux, tu hãmꞌãktux max, pãyãꞌ nõy hãꞌ xupxet kummuk, xiꞌ xupkumĩy, xix topa komut pu nũꞌxup, xix kenmuk xoꞌop tu mõktu paptux, xiꞌ nõy kupex, xix hãpxop hãꞌ xupxet, puxix nõm tu ꞌãxatat, nũy nũ mũtik ꞌãxit hok.
\p
\v 12-13 ꞌÃte Topa hãꞌ puknõg xop yõg hãpxopmãꞌax kopit hok. Yã Topa mũn teꞌ kopit putup. Pa ꞌãxop te yãy yõg hãpxopmãꞌax kopitꞌax. Yãꞌ max xaꞌ kopit. Topa yõg tappet te: “Tikmũꞌũn kummuk xupmãꞌ, puyĩy ꞌãxop mũtik tu ti hok,” kaxĩy.
\c 6
\s Tikmũꞌũn teꞌ nõy kumĩy kummuk
\p
\v 1 ꞌÃxape te xa hãpkummugãꞌ, ꞌãpu ꞌãxape nõy ha mõg, ꞌãxape pa te hãmyũmmũg ha ꞌãmõg, pu ꞌãtix kopit. ꞌÃmõg hok Topa hãꞌ puknõg xop hah, pu tuꞌ kopit, pãyã ꞌãxape ha ꞌãmõg, tik kuxa yũm kaꞌok Yeyox kopa ha ꞌãmõg.
\v 2 ꞌOk yũmmũg hok xateꞌ? Topa yõg tikmũꞌũn te Topa hãꞌ puknõg xop hãpxopmãꞌax kopit putup. ꞌOk ꞌãpa te hãmyũmmũg hok?
\v 3 Yã yũmũꞌãte pexkox yõg nũꞌpok xop yõg hãpxopmãꞌax kopit putup kamah, hu yãy xape yõg hãpxopmãꞌax kopitꞌax nõmhã, puyĩꞌ nõy hã tu xape ꞌũxeheh.
\v 4 ꞌÃxape te ꞌãkteꞌex kummuk, yã hãpxopmãꞌax kutĩgnãg, ha ꞌãxape kummugãp-tup ꞌũyãnãn tuꞌ, puxix tik puknõg tuꞌ xax hok, puyĩy tuꞌ kopit. Kaxĩy hok.
\v 5 ꞌOk yãyhãhup hok xateꞌ? ꞌOk ꞌãxop mũtik xip hok tik pa te hãmyũmmũg, puyĩy ꞌãtix huꞌ kopit max?
\v 6 Yãꞌ xip! ꞌÃteꞌ yũmmũg! Pa ꞌãxop gãy, tuꞌ kuxa mãm hok xop ha ꞌãmõg, nũy tuꞌ xax, pu ꞌõg hãpxopmã kummukꞌax kopit.
\p
\v 7 ꞌÃxop yãytukmĩy tik puknõg keppah, yãꞌ kummuk. ꞌOk xate hãmyũmmũgꞌax xohix xaxok? ꞌŨtux hok pu ꞌãxape ꞌãkummugãꞌ. ꞌŨtux hok pu ꞌãxape ꞌõg hãpxop paꞌ.
\v 8 Pa ꞌãxop te ꞌãxape pu kummugã pax, haꞌ nõy yãnãn tu ꞌãkummugã pax. ꞌÃhup! Puxiꞌ! ꞌÃxop xape xop.
\v 9-10 Tikmũꞌũn kummuk te pexkox haꞌ mõg ꞌohnãg, nõm xop Topa puꞌ yĩpkox ꞌohnãg, ꞌap mõg putupꞌah hãpkummuk mĩyꞌax xop xohix, nõm teꞌ nõy hãꞌ xupxet, xix nõm te topa komut pu nũꞌxup, xix nõm teꞌ nõy xetut hãꞌ xupxet, xiꞌ nõy yĩpxox hãꞌ xupxet, xix nõm tik te tik nõy pẽnã kummuk, xix ꞌũn te ꞌũn nõy pẽnã kummuk xix nõm te hãpxop hãꞌ xupxet, xix nõm xupkumĩy, xix nõm te kenmuk xoꞌop tu mõktu paptux, xix nõm teꞌ nõy kupex, xix nõm te hãpxopmã kummuk pax.
\v 11 Hõmã ꞌãxop ꞌũm te hãpxopmãhã kaxĩy, pa Topa te ꞌãkuxa tupmãhãꞌ, xa ꞌãkuxa max, ha hõnhã ꞌãxop te Topa hã tikmũꞌũn, yũmũg xuxyã Yeyox Kunnix hã ꞌãxop yã Topa yõg tikmũꞌũn, xix Topa Koxuk hã ꞌãxop yã Topa yõg tikmũꞌũn.
\s Topa tu hãpxopmã max
\p
\v 12 Pa tikmũꞌũn ꞌũm te hãmꞌãktuxꞌax, hu: “ꞌÃte yãy putupꞌax xohix mĩyꞌax,” kaxĩy. Hamũn. Pãyã yãy putupꞌax mĩy, puxix xa kummugãꞌax. ꞌÃte hãpxopmãꞌax xohix kamah, pa ꞌãteꞌ tux hok, pu nõ hãpxopmãꞌax ꞌũgkummugã hok.
\v 13 Pa tikmũꞌun nõy te hãmꞌãktuxꞌax, hu: “Topa te hãpxop xitꞌax mĩy pu tikmũꞌũn mãꞌ, ha Topa te tikmũꞌũn tex mĩy, puyĩy tikmũꞌũn nõ tu xit,” kaxĩy. Hamũn. Pa Topa te tikmũꞌũn tex nõãp-tup, xiꞌ xitꞌax nõãp-tup kamah. Yã yũmũg yĩn mĩy, ꞌũyĩy yũmũg hãpxopmãhã yũmũg xuxyã tuꞌ, yũmũg yĩn ꞌũm mĩyꞌah, ꞌũyĩy yũmũg nõy hãꞌ xupxet. ꞌÃmhok. Yã yũmũg yĩn yã yũmũg xuxyã yõg.
\v 14 Topa te yũmũg xuxyã putpuꞌ hĩnnãhã, hu yũmũg hĩnnãꞌax putpu kamah, ꞌũkaꞌok tuꞌ.
\p
\v 15 ꞌOk ꞌãxop te hãmyũmmũg hok? ꞌÃxop yã Kunnix hã ꞌãyĩn puxet, Yãꞌ kummuk xexka, xa Kunnix yõg tik te xotit mũtik ꞌãnõm. Yãꞌ xotit hãꞌ yãyhã yĩn puxet. Pũyã Topa ꞌãtux hok, xayĩy ꞌãnõm hok!
\v 16 ꞌOk ꞌãxop te hãmyũmmũg hok? Yã tik te xotit mũtik nõm, puxix ꞌũn hãꞌ yĩn puxet, Topa yõg tappet te: “Yãꞌ tix te yãyhãꞌ yĩn puxet,” kaxĩy.
\v 17 Pa tikmũꞌũn kuxa yũm kaꞌok Yeyox kopah, puxix tu kuxap-xet yũmũg xuxyã kuxa mũtik.
\p
\v 18 ꞌũgꞌãpax, xayĩy ꞌãnõy hã ꞌãxupxet hok. Hãpkummuk mĩyꞌax nõy tikmũꞌũn yãy yĩn kummugãꞌah, pa tikmũꞌũn xonnix, puxix yãy yĩn kummugãꞌ.
\v 19 ꞌOk ꞌãxop te hãmyũmmũg hok? Yã Topa Koxuk xip ꞌãkopah, ha Topa te nũꞌkutnãhãꞌ, pu ꞌãmũtik tu xip kaꞌok, ꞌãxop yã yãy mũn xatꞌah, ꞌãmhok, yã Topa te yãy yõg tikmũꞌũn xat.
\v 20 Topa te ꞌãpop, tu hãpxopmã kaꞌok, nũy ꞌãkuxa tupmãꞌ, yã yãy kutok xok ꞌãxop pupiꞌ, nũy ꞌãkuxa tupmãꞌ, yĩy hãpkummuk mĩy hok, puyĩꞌ puknõg xop pẽnãꞌ, tu: “ꞌÃxop yõg Topa max, tu ꞌãkaꞌogãhãꞌ, xayĩy hãpxopmã max!” kaxĩy.
\c 7
\s Tikmũꞌũn te yãytaꞌax
\p
\v 1 ꞌÃxop te ꞌãꞌ kaxꞌãmi tappet tu, tu tappet tu yãy ꞌãktux, tuk yĩkopit, tu: “ꞌOk max tikmũꞌũn yãytax?” kaxĩy. Yãꞌ max pu yã tik yãytax hok, nũy yãꞌ hok xip,
\v 2 pa tikmũꞌũn punethok teꞌ nõy hãꞌ xupxet, yĩy ꞌãte: Yãꞌ max tik yãy yõg ꞌũn mũy, pu ꞌũn kamah yãy yõg tik mũy.
\v 3 ꞌÃte xeꞌ xat, puꞌ yĩpxox yãy xetut mũtik tu nõm max, xiꞌ xat, puꞌ xetut yãy yĩpxox mũtik tu nõm max.
\v 4 ꞌŨxetut yĩn yãꞌ yĩpxox yõg yĩn, yĩꞌ yĩpxox teꞌ xat, haꞌ yĩpxox yĩn yãꞌ xetut yõg yĩn, yĩꞌ xetut teꞌ xat.
\v 5 Xatix yãy mũn hõm, nũy ꞌũ nũ mũtik ꞌãnõm, nũy ꞌãti kaꞌõk. Pa Topa pu hãmꞌãktux pax, ꞌĩhã ꞌãp-tox puxet xix ꞌãkuxap-xet, hu ta hãpxip kutõgnãg ꞌĩhã ꞌãhok ꞌãnom. Pa hãmꞌãktux kux, ꞌĩhã nũ mũtik ꞌãnõm ꞌũxeheh, pu Hãmgãyãgnãg xatix kummugã hok, ꞌãnõm putup hah.
\p
\v 6 ꞌÃxep xatꞌah ꞌãte nõmhã, pãyã xa hãmyũmmũgãhãꞌ.
\v 7 ꞌÃtep-tup, pu tikmũꞌũn xohiꞌ hok piꞌ, ꞌũgputuk nũy, pa Topa te tikmũꞌũn xohix kaꞌogãhãꞌ, pu tu hãpxopmã max, tu tik puxet kaꞌogãhã puꞌ hok xip, xiꞌ nõy kaꞌogãhã pu yãyta max.
\p
\v 8 Yĩy ꞌãteꞌ hok pip xop pu hãmꞌãktux, puyĩꞌ hok piꞌ, hu yãyta hok ꞌũg putuk nũy. Haꞌ hok mãm xop pu ꞌãte hãmꞌãktux kamah, puꞌ hok mãm.
\v 9 Yãytap-tup te ꞌãp-tex, ꞌãpu yãytax. Yãytaꞌax ꞌũmax, yãytap-tup xũy mũn yãꞌ kummuk, yã kuxap putuk ꞌãkopah.
\p
\v 10 Ha ꞌãte tikmũꞌũn yãyta xop pu hãmꞌãktux, yã yũmũg xuxyã teꞌ xat, pu tu yãy xatat hok.
\v 11 Yãy xatat, puxiꞌ hok xip, tuꞌ nõy mũg hok, tu mõktu xe yãy yĩpxox mũg, xix yãy xetut mũg, nũy nũ mũtik tu ti kaꞌok ꞌũxeheh.
\p
\v 12 Tikmũꞌũn nõy pu ꞌãte hãmyũmmũgãhãꞌ, ꞌap Topa teꞌ xatꞌah. Tikmũꞌũn kuxa yũm kaꞌok Kunnix kopah, ha ꞌũn mũg, nõm kuxa yũm ꞌohnãg, tuꞌ yĩpxox mũtik tip-tup, puxix ꞌãtiꞌ. Pũyãꞌ xetut nĩm hok.
\v 13 Ha ꞌũn nõy kuxa yũm kaꞌok Kunnix kopah, tu tik mũg, nõm kuxa yũm ꞌohnãg, haꞌ yĩpxox te nũ mũtik nõm putup, puxix ꞌãtiꞌ. Pũyãꞌ yĩpxox nĩm hok.
\v 14 Yã Topa teꞌ yĩpxox ha hãmmaxnãꞌax, tuꞌ xetut kuxa yũmꞌax hã hãmmaxnãꞌax, tu ꞌũn nõy ha hãmmaxnãꞌax, ꞌũyĩpxox kuxa yũmꞌax hãꞌ hãmmaxnãꞌax, puyĩy tuk-tok xohix hu Topa yõg, ka Topa hãꞌ puknõg xop putuk, nõm te Topa yũmmũg ꞌohnãg.
\v 15 Peꞌ yĩpxox kuxa yũm hok teꞌ xetut nĩm putup, peꞌ xetut kuxa yũm hok teꞌ yĩpxox nĩm putup, pũyã ꞌãꞌ nĩm, haꞌ kux. Pũyãꞌ kuxa mãm kaꞌok xop pip. Yã Topa te yũmũg kuxa mãmmãhãꞌ, ꞌũyĩy nõy xop mũtik tu ti max.
\v 16 ꞌA xate hãmyũmmũgꞌah, ꞌa ꞌãnõy kuxa yũmmũgꞌah. ꞌOk peꞌ kuxa yũmꞌax Kunnix kopah, ꞌok peꞌ kuxa yũm hok. Pũyã mõg, ꞌũgmĩy hok.
\s Topa puꞌ yĩpkox xihip
\p
\v 17 Pũyã tikmũꞌũn xohix hãpxopmã max. Topa teꞌ xãnãhãꞌ, pu tu hãpxopmã max tikmũꞌũn kopah. Pũyã tu pip kaꞌok, nũy yãy yõg hãpxopmãꞌax mĩy. Yã ꞌãte tikmũꞌũn kuxa mãm xop xohix pu hãmyũmmũgãhãꞌ.
\v 18 Tik te yãy nãg xax yĩmap tuꞌ xak tap, ꞌĩhã Topa teꞌ xãnãhãꞌ, puxiꞌ xak hok, nũy koex xut. Ha tik te yãy xax xak ꞌõhnãg ꞌĩhã Topa teꞌ xãnãhãꞌ, puxiꞌ xak hok, nũy xax xak hok.
\v 19 Yãꞌ xax xakꞌax, xiꞌ xax xak hok, yã Topa pu yãy putuk, pa Topa yõg xatꞌax pu ꞌĩpkox piꞌ, nũy hãpxopmã max.
\v 20 Pũyãꞌ xohix hãpxopmã max, Topa teꞌ xãnãhãꞌ, pu tu hãpxopma max tikmũꞌũn kopah. Pũyã tuꞌ pip kaꞌok, nũy yãy yõg hãpxopmãꞌax mĩy.
\v 21 ꞌOk ꞌãhãm ꞌãxatꞌax pu, ꞌĩhã Topa te ꞌãxãnãhãꞌ? ꞌOk ꞌãhok hã ꞌãhãm, tu tayũmak ꞌũm pa hok? ꞌŨxutigã hok, pa mõgꞌax nũy ꞌãnõy pu ꞌãhãm, nũy tayũmak pop, puxi mõy, tuꞌ hãm.
\v 22 Yã yũmũg xuxyã te ꞌãkuxa kummuk xut, ꞌĩhã ꞌãxãnãhãꞌ, tuꞌ xut, xa mõg, xayĩy yũmũg xuxyã hã ꞌãptix, nũy nõm pu ꞌãyĩpkox xihip. Kamah tik hãm ꞌũnõy puꞌ, nũy tayũmak pop, yã kamah Kunnix hã ꞌũptix, nũy yũmũg xuxyã puꞌ hãm ꞌũhok hã, nũy nõm puꞌ yĩpkox xip.
\v 23 Topa te yãy kutok nũꞌkutnãhãꞌ, pu ꞌãxop pupi tu xok. Yã yãy kutok yãp-xehnãg, ha Topa te mõꞌyãy xeꞌẽgnãg, pãyã nũꞌkutnãhãꞌ, pu ꞌãxop pupi tu xok, puyĩy ꞌãxop hã ꞌãxuxyãp-xet.
\v 24 Topa te ꞌãxãnãhãꞌ, tu ꞌãyĩmõgatux. ꞌÃpu pi kaꞌok, nũy Topa pu ꞌãhãm mõ kuma mõg.
\p
\v 25 ꞌŨkxape xop: Xatek yĩkopit, hu: “ꞌOk max tikmũꞌũn yãytax?” kaxĩy. Topa tek xatꞌah, ꞌũyĩy ꞌãteꞌ hok pip xop pu hãmꞌãktux, pãyã ꞌãte hãmpeꞌpaxex max, ha Topa tek kuxa kaꞌ, yĩy ꞌãte nõm xop pu hãmyũmmũgãꞌax.
\v 26 Hõnhãꞌ gãyxop te yũmũg xũygã punethok, yĩꞌ max, pu tu tik yãyta hok.
\v 27 ꞌOk xate ꞌũn mũgꞌax, nũy yãytax? ꞌÃpu, yãytaꞌ. ꞌOk yãꞌ hok ꞌãxip? ꞌÃpu ꞌãhok xihip.
\v 28 Yãꞌ max puꞌ xetut mũy, yã hãpkummuk ꞌohnãg. ꞌŨn hok yũm yãytax, hu ta hãmmax mĩy, pãyãꞌ yãykuxopꞌax punethok, ha ꞌãte ꞌãp-tupꞌah, xa yãykuxop.
\p
\v 29 ꞌŨkxape: ꞌÃte xa hãmꞌãktux, nũy xa hãmyũmmũgãꞌ. Yã hãmyãxatamuk xohix yõg ꞌãmnĩy xox putox, ha hãpxip kutõgnãg ꞌĩhã tikmũꞌũn xohix hok pipꞌax putuk hãpxopmãp-tup, ꞌok peꞌ yãytahaꞌ, ꞌok peꞌ yãytahok.
\v 30 Haꞌ kuxa hittup ꞌohnãg xop teꞌ kuxa hittup xop putukꞌax, xiꞌ kuxa hittup xop teꞌ kuxa hittup ꞌohnãg xop putukꞌax, xix hãpxop pop xop te hãmhõgnãg pip xop putukꞌax,
\v 31 ha nõm xop te hãpxop hãꞌ hãm xop teꞌ nõy xop putukꞌax, nõm xop teꞌ yãykuxop ꞌohnãg putukꞌax. Yã hãpxip kutõgnãg ꞌĩhã hãm xexka nõg putup.
\p
\v 32 ꞌÃte ꞌãp-tup nõg, xa yãy kuxop, nũy hãpxop xakꞌax tat. ꞌŨhok pip xop te yũmũg xuxyã xak, nũy tu hãm max, puyĩy tu xuxyã kuxa hittupmãꞌ.
\v 33 Paꞌ yĩpxox xop te hãpxop xakꞌax tat, puyĩꞌ xetut kuxa hittupmãꞌ.
\v 34 Tu yũmũg xuxyã pu hãpxopmã kamah, yĩp-tox tix, xiꞌ kuxa tix. Haꞌ xetut xop te yũmũg xuxyã pu hãpxopmãp-tup, yãp-tixix, paꞌ yĩpxox kuxa hittupmãp-tup kamah, hu yãykuxop, tup-tox tix, xiꞌ kuxa tix.
\p
\v 35 ꞌÃte ꞌãxop hãk putup, nũy mõꞌãnĩynãm, yĩy xa hãmyũmmũgãhãꞌ. ꞌA ꞌãte ꞌãkummugãp-tupꞌah, pãyã ꞌãp-tup, xa ꞌãxop hãpxopmã max, nũy tu mãynãg mĩy, nũy ꞌãkuxa hittup, nũy ꞌap-tox puxet hã, xix ꞌãkuxa ꞌãkuxap-xet hã Topa xa tu hãm.
\p
\v 36 Tik te yãytaꞌax, pa yãyta hok peꞌpaxex, tuꞌ xetut ꞌap nõm yũmmũgꞌah, tuꞌ mũg putup, pũyãꞌ mũy. ꞌAp hãpkummuk ꞌũm mĩyꞌah.
\v 37 Pa tik teꞌ hok xip putup tu yãy hok, tuꞌ max peꞌpaxex, puꞌ xetut nĩm, nũy nũ mũtik nõm ꞌohnãg, puxix yãyta hok, pãyãꞌ hok xihip.
\v 38 Tik teꞌ xetut xip tap mũg, nũy nũ mũtik yãytax, yã hãpxopmã max, pa tik teꞌ mũg ꞌohnãg, nũy yãꞌ hok xip, yã hãpxopmã max xeꞌẽgnãg.
\p
\v 39 ꞌŨn teꞌ yĩpxox mũg, nũy nĩm hok, paꞌ yĩpxox xok, puxix tu kux. Yãꞌ max. puꞌ nõy mũy, nũy xe yãytax, nũy nõy kuxa yũm kaꞌokꞌax mũtik yãytax.
\v 40 Pa ꞌãte hãmpeꞌpaxex, hu: Yãꞌ max xeꞌe, puꞌ hok tu xip kaꞌok. Yã kaxĩy Topa Koxuk te ꞌã hãmyũmmũgãhãꞌ.
\c 8
\s Tikmũꞌũn te xogyĩn hõm topa komut xop puꞌ
\p
\v 1 ꞌÃxop tek yĩkopit, hu: “ꞌOk max, ꞌũgmũg xitꞌax xohix mãꞌ?” kaxĩy. Yĩy ꞌãte hãpxop xitꞌax ꞌãktux putup, tikmũꞌũn teꞌ xitꞌax hõm topa komut xop puꞌ. Tikmũꞌũn te hãpxeꞌe ꞌãktux, hu: “Yũmũg xohix te hãmyũmmũg,” kaxĩy. Pa hãmyũmmũgꞌax kutõgnãg te hãpkummugãhãꞌ, ꞌĩhã tikmũꞌũn yãy mũn xexka peꞌpaxex, pãyã tikmũꞌũn teꞌ nõy putup pax, tuꞌ nõy kaꞌogãhãꞌ, tu hãmyũmmũg xeꞌeꞌ.
\v 2 Tikmũꞌũn te yãy peꞌpaxex, hu: “ꞌÃte hãmyũmmũg!” kaxĩy, puxix hãmyũmmũg ꞌohnãg,
\v 3 pa tikmũꞌũn te Topap-tup pax, puxix yã Topa te nõm yũmmũg.
\p
\v 4 ꞌÃte xa topa komut ꞌãktuxꞌax. Yũmũꞌãteꞌ yũmmũg. Topa komut xop ꞌap xeꞌeꞌah. Yã mõꞌãmãꞌax xop, Topa yãp-xehnãg xip pexkox tuꞌ,
\v 5 pa Topa hãꞌ puknõg xop te komut xop ꞌãxet “topah”, ha topa komut pip punethok, hãmnõgnõy tuꞌ pip, xix hãm tuꞌ pip, ha kamah tikmũꞌũn xuxyã punethok pip.
\v 6 Pa yũmũꞌãte Topap-xehnãg yũmmũg, yã Kunnix hã mũnũn tu yũmũg ꞌÃtak, tu hãpxop xohix mĩy, ha Topa tu yũmũg hiꞌ. Ha yũmũg xuxyã yãp-xet xip kamah, yã Yeyox Kunnix, tu hãpxop xohix mĩy kamah, yãy Tak mũtik, xiꞌ hep xohix xop mĩy, hu yũmũg mĩy kamah.
\p
\v 7 Pãyãꞌ kuxa mãm kaꞌok xop yã xohix teꞌ yũmmũgꞌah, ꞌũyãg te topa koumut xop peꞌpaxex tap, xix hõnhã peꞌpaxex kamah, tu hãpxop xitꞌax peꞌpaxex, hu: “Yã tikmũꞌũn te nõm xitꞌax hõm topa komut puꞌ,” kaxĩy. Tuꞌ kuxa hittup ꞌohnãg, tuꞌ tux hok pu tu xit hok, ꞌap xitꞌax mãp-tupꞌah.
\v 8 Pa hãpxop xitꞌax ꞌũm te yũmũg kuxa tupmã ꞌohnãg, pu Topa yũmmũg putup! ꞌÃmhok. ꞌOk peꞌ xitꞌax mãꞌ, ꞌok peꞌ xitꞌax mã hok, puxix yũmũg kuxa kummugã ꞌohnãg.
\p
\v 9 ꞌÕg pa ꞌãtiꞌ, yãy putupꞌax mĩy hok, ka xate ꞌãxape puꞌuk pu hãpkummugãꞌ, tuꞌ mõgã kummuk, pu tu yãy pu hãpkummuk mĩy.
\v 10 ꞌÃxape kuxa yũm puꞌuk, haꞌ kuxa teꞌ tux hok puꞌ xitꞌax ꞌũm mã hok, tu ꞌãxit pẽnãhãꞌ, xate komut xop yõg xitꞌax mãhãꞌ, puxix ꞌãxapeꞌ mãp-tup, ꞌĩhãꞌ kuxa teꞌ tux hok puꞌ mã hok.
\v 11 Ha Kunnix xok ꞌãxape puꞌuk pupiꞌ, pãyã ꞌãxape te Topa yõg putat xak, nũy ꞌãpe mõg, nũy ꞌãmũn puꞌ yĩpkox xip, yĩy ta ꞌãnõy mõgã kummuk,
\v 12 tu ꞌãxape kummugãhãꞌ, hu Kunnix pu hãpkummugãhã kamah, Kunnix te ꞌãxape pupiꞌ xok hah.
\v 13 Yĩy ꞌãte xogyĩn mã hok, kak xape mõgã kummuk, pu tu yãy kuxa pu hãpkummuk mĩy, ꞌũkxit hah.
\c 9
\s Yeyox te mõ tik kutnãhãꞌ
\p
\v 1 ꞌOk ꞌãte yãy xat hok? Yãk xat. ꞌOk Yeyox Kunnix te nũgkutnã hok? Yã nũgkutnãhãꞌ. ꞌOk ꞌãte yũmũg xuxyã Yeyox pẽnã hok? Yãꞌ pẽnãhãꞌ. Yeyox pu ꞌãte hãpxopmãhãꞌ, ꞌĩhã xa hãmꞌãpakꞌax max ꞌãktux, yĩy ꞌãkuxa mãm kaꞌok yũmũg xuxyã kopah.
\v 2 Yeyox Kunnix te nũgkutnãhãꞌ, pãyãꞌ kuxa mãm xop nõy tek mũn puꞌ yĩpkox ꞌohnãg, ha ꞌãxop tek mũn pu ꞌãyĩpkox pip, yã ꞌãmõg Topa yõg putat hã, ha tikmũꞌũn xohix teꞌ pẽnãhãꞌ, hu hãmyũmmũg, yã yũmũg xuxyã te nũgkutnãhãꞌ, ꞌãte hãmꞌãpak maxꞌax ꞌãktux.
\p
\v 3 Tikmũꞌũn tek kummuk ꞌãktux, kopxix yãy ꞌãktux,
\v 4 hu: ꞌOk tux hok ꞌãꞌ hõm ꞌũkxitꞌax, xix xoꞌopꞌax ꞌũghãm hah?
\v 5 Pax ꞌũkxetut mũy, haꞌ kuxa mãm kaꞌok, ꞌok ꞌãxop tek tux hok ꞌãte nõm mõgãꞌ, pu nũ mũtik mõg, nũy hãmꞌãpak maxꞌax ꞌãktux? Yã mõꞌpok xop nõy teꞌ xetut xop mõgãhãꞌ, yã yũmũg xuxyã Yeyox taknõy xop teꞌ mõgãhãꞌ, xix Pet kama teꞌ xetut mõgãhãꞌ.
\v 6 Yã Maname xik mũn puxet hãm, ꞌũgmũg yĩm hãk mũg hãm, nũy xit, nũy tu pipꞌax tuꞌ pago. Yeyox yõg mõꞌpok xop nõy teꞌ hok hã hãpxop pop, hãmyũmmũgãꞌax tuꞌ pop.
\v 7 ꞌOk xonat ꞌũm hãm, ꞌok yãy yĩm hãꞌ hãm, nũy xit, nũy pipꞌax tuꞌ pago? ꞌAp hãmꞌah! Yã gohet teꞌ pago. Tikmũꞌũn ꞌũm te yãy yõg mĩnta xut hok, nũy mãꞌ? Yãꞌ mãhãꞌ. ꞌŨxohix te yãy yõg kup tuꞌ xut mĩnta, tuꞌ mãhãꞌ. Maket ꞌũm teꞌ yõg mũnũytut hep xoꞌop hok? Yãꞌ xoꞌop!
\p
\v 8 ꞌŨxohix teꞌ yũmmũg, yã hãpxopmãꞌax max, pu yãy hãmꞌax hã tu xit, xix tu pet, yĩy Mõyyex yõg xatꞌax kamah yã hãmꞌãktux,
\v 9 tu: “Mũnũytut tak yĩkox hĩy hok, puyĩꞌ xit hok, ꞌĩhãꞌ xuxnãg xetox xap mõy tuꞌ tonnok. Pũyãꞌ xux mãꞌ,” kaxĩy. ꞌOk Topa te hãmꞌãktux, tu mũnũytut tak putup paxꞌax ꞌaktux? ꞌÃmhok.
\v 10 Pa yũmũꞌãꞌ xuktux, ꞌũyĩy yũmũg yãy hãmꞌax hã yũmũg xit, xik pet. Tikmũꞌũn te hãmꞌãpak maxꞌax ꞌãktux, puxix tik putuk, nõm te hãpxop xap xok, ha tikmũꞌũn te hãmyũmmũgãhãꞌ, puxix tik putuk, nõm te hãpxop taꞌax nũnnãhãꞌ, yãꞌ xohix te yãy hãmꞌax hãꞌ xit, xiꞌ pet. Kaxĩy Maname xik mũn hãm, nũy Topa yõg hãmꞌãktux ꞌãktux. Yãꞌ hãmꞌax xeꞌeꞌ!
\v 11 ꞌŨgmũꞌãte xa hãmꞌãpak maxꞌax ꞌãktux. ꞌOk ꞌaxop tek mũꞌã ta nemẽn hok, nũy hãpxop ꞌũgmũꞌã popmã ꞌũyãnãn tuꞌ? Yã ꞌãxop te ta nemẽn.
\v 12 Yũmũg xuxyã yõg tik mõꞌpok xop teꞌ hip, xa tuꞌ popmã hãpxop. Yãꞌ max, pa ꞌãxop tek mũꞌãꞌ ta nemẽn hãmãxap.
\p Pãyãk mũꞌãte xa tuꞌ xak hã hãmhõgnãg, nũy ꞌãxop pu hupmã hok, nũy Topa puk mũg hãm max.
\v 13 ꞌÃxop te hãmyũmmũg. ꞌÃmãnex xop te Topa pet xexka kopaꞌ hãm, tu Topa pet tuꞌ xitꞌax pop, nũy mãꞌ, ha tikmũꞌũn te xokxop mõꞌhap, nũy Topa pu hãxyãꞌ, ha ꞌãmãnex xop te xogyĩn yãg pahaꞌ, tuꞌ mãhãꞌ.
\v 14 Ha kaxĩy yũmũg xuxyã teꞌ xat, puꞌ yõg kãmãnat xop kama tu xit, tu yãy yõg hãmꞌãx hãꞌ xit, tu hãmꞌãpak maxꞌax ꞌãktux hu hãꞌ xitꞌax pop hãmꞌãpak xop tuꞌ.
\p
\v 15 Hãmyãxatamuk xohix hã ꞌãte hãmyũmmũgãhãꞌ, tu hãpxop ꞌũm xak ꞌohnãg, xak mũꞌã pago, xix hõnhã ꞌãte ꞌaꞌ xakꞌah kamah. ꞌŨyãk xok, pãyã hãpxop ꞌũm xak ꞌãte putupꞌah. ꞌA xak xetꞌah ꞌãteꞌ.
\v 16 ꞌÃte hãmꞌãpak maxꞌax ꞌãktux pax, tuk hittup, paꞌ kummuk ꞌãte yãy xexka pekpaxex, hãmꞌãpakꞌax ꞌãktux tuꞌ. Yã ꞌãte ta nemẽn Topa puꞌ, nũy hãmꞌãktux. ꞌÃte hãmꞌãktux hok, puxix Topa ꞌũgkummugãꞌ.
\v 17 Yĩy ꞌãte hãmꞌãpak maxꞌax ꞌãktux putup pax, tu hãmmax hip kamah, pu yũmũg xuxyã ꞌã hãmmaxnãꞌ. ꞌÃte hãmꞌãktux, Topa tek xat hah, yã Topa te ꞌãꞌ hõm ꞌũghãmꞌax.
\v 18 ꞌOk Topa te ꞌãꞌ pagop-tup? Tu te pago hã xĩy? Yãk kuxa hittupmãhãꞌ, nũy hãmꞌãpak maxꞌax ꞌãktux, nũy hok hãꞌ xuktux, kaxĩy Topa te ꞌãꞌ pago, tuk kuxa hittupmãhãꞌ, ha ꞌãteꞌ nõy yõg tayũmak xak ꞌohnãg.
\p
\v 19 ꞌÃte yãy xat, nũy Topa yõg hãmꞌãktuxꞌax ꞌãktux, ha tikmũꞌũn tek xat ꞌohnãg! Pa tikmũꞌũn xohix puk hãm, tuk hok hãk hãm, puyĩy tikmũꞌũn kuxa punethok mãm kaꞌok Yeyox Kunnix kopah.
\v 20 ꞌŨkhãm Yoneo xop mũtik, kopxix ꞌãte Yoneo xop yõg hãpxopmãꞌax tat, puyĩꞌ kuxa mãm kaꞌok Yeyox Kunnix kopah. ꞌA Mõyyex yõg xatꞌax tek xatꞌah, pa Yoneo xop mũtik xip, ꞌĩhã ꞌãteꞌ xatꞌax puk yĩpkox xip, nũy Yoneo xop hãk xapeꞌ.
\v 21 ꞌŨkxip puknõg xop mũtik, kopxix ꞌãte Mõyyex yõg xatꞌax xaxogãhãꞌ, puyĩy puknõg xop kuxa mãm kaꞌok yũmũg xuxyã kopah. Pa Topa yõg xatꞌax puk yĩpkox xip, ha Kunnix yõg xatꞌax tek xat xeꞌeꞌ.
\v 22 ꞌŨxip kuxa mãm puꞌuk xop mũtik, kopxix ꞌãteꞌ yõg hãpxopmãꞌax tat, nũy tu kaꞌogãꞌ, puyĩꞌ kuxa mãm kaꞌok. Ha kaxĩy ꞌãteꞌ hep xop xohix yõg hãpxopmãꞌax tat, nũy hãpxopmãꞌax xohix hã tikmũꞌũn ꞌũm mõgã Topa yõg putat hã.
\p
\v 23 ꞌÃte hãpxopmãꞌax xohix tat, nũy hãmꞌãpak maxꞌax ꞌãktux, pu Topa ꞌã hãmmaxnãꞌ.
\v 24 Tikmũꞌũn mõg mõꞌkaꞌok, haꞌ xohix mõg, pãyã yãp-xehnãg xupep tap, xiꞌ yãg nõy xohix mõxa tu kunãy tuꞌ, pãyãꞌ xohix mõg, puyĩꞌ mõxa tap. Ha kaxĩy ꞌãxop mõg.
\v 25 Ha tik xop mõg punethok, tuꞌ xak, nũy tu xupep tap, tuꞌ mõg mõꞌkaꞌok, pa tik puxehnãg xupep tap, tu kãnẽy mãynãg pahaꞌ. Pa hãmyãxatamuk xohix nõg ꞌĩhãꞌ kãnẽy yãykoxyõy, pãyã yũmũꞌãte mõxap-tup, tu pexkox tu mõxap-tup, ꞌũyĩy pexkox yõg hãpxop xeꞌẽgnãg pop, ha yãykoxyõy ꞌohnãg.
\v 26 Kaxĩy ꞌãte hãpxopmã max, tu Topa Koxuk puk yĩpkox xip, nũy hãmyok mĩy. ꞌA ꞌãte hitop tu hãpxopmãꞌah, pãyã mãynãg hãpxopmãhãꞌ, tu Topa pu hãpxopmã max.
\v 27 ꞌÃte yãy yõg putupꞌax mĩyꞌah, nũy tu hãpxopmã max mõg kumak mõg, tuk kuxa teknõg ꞌohnãg, ꞌũyĩy hãmꞌãpak maxꞌax ꞌãktux kux, puyĩy Topa te: “Xate hãpxopmã mãynãg, mãꞌ, mõnãy, nũy ꞌũgyĩkãgnãg ꞌãxip kaꞌok!” Kaxĩy.
\c 10
\s Topa komut pu nũꞌãxup hok
\p
\v 1 ꞌŨkxape xop, ꞌãte hãmꞌãktux putup, xayĩy xaxok hok. Hõmã ꞌũgmũg mõnãyxop hittap te Mõyyex peꞌ mõg, ꞌĩhã hãpxexka ꞌEyit tu nũꞌpahaꞌ. Hãmgõy xexka teꞌ xohix mõꞌnĩy, tu kõnãg xexka ꞌÃtaꞌ xak.
\v 2 Tu hãmgõy xexka kopaꞌ pip, xix kõnãg xexka hã mõxakux, ꞌĩhã Mõyyex peꞌ mõg,
\v 3 ꞌŨxohix te pexkox yõg hãpxop puxet mãhãꞌ,
\v 4 tu pexkox yõg hep xoꞌop. Yã mĩkaxxap xexka tuꞌ xoꞌop, ha kaxĩy Kunnix tuꞌ xoꞌopmãhãꞌ, tu Kunnix mũtik mõg putat tox hã.
\v 5 Pa tikmũꞌũn punethok te Topa gãyãhãꞌ, huꞌ xakix hãm panip xexka tuꞌ.
\p
\v 6 Ha Topa teꞌ xat, pu tik tappet mĩy, nũy yũmũꞌã hãpxopmãꞌax xohix yũmmũgãꞌ, ꞌũyĩy yũmũg hãpxop hitop xak hok.
\v 7 ꞌÃpu topa komut xop pu nũꞌãktettex hok, nũy Topa xeꞌẽgnãg nĩm hok. Yã Topa yõg tappet te tikmũꞌũn hittap ꞌãktux, tu: “Tikmũꞌũn mãm, nũy xit, nũy xoꞌop, tuꞌ yok, nũy hãmyãꞌ topa komut xop puꞌ,” kaxĩy.
\v 8 ꞌÃpu yũmũg xonnix hok, yã tikmũꞌũn hittap xonnix punethok, yĩꞌ yãg xohix te 23.000 xakix, ꞌãmnĩy puxet ꞌĩhãꞌ xakix.
\v 9 ꞌÃpu yũmũꞌãte Topa gãyã hok, hãpkummuk mĩy tuꞌ. Yã tikmũꞌũn hittap teꞌ gãyãhãꞌ, tu hãpkummuk mĩy pax, yĩy kãyã gãy teꞌ kix.
\v 10 Yã tikmũꞌũn hittap te Topa gãyãhãꞌ, yĩy pexkox yõg mõꞌkutnãꞌax teꞌ kix, yã mõꞌkutnãꞌax ꞌãxetꞌax ꞌŨxokꞌax.
\p
\v 11 Ha tappet mĩy, nũy yũmũꞌãꞌ yũmmũgãꞌ, ꞌũyĩy tikmũꞌũn hittap putuk hok. Yã hõnhã hãmyãxatamuk xohix kaꞌax, tuꞌ xox putox.
\p
\v 12 ꞌÕg pa ꞌãtiꞌ. ꞌÃkuxãnõg, Topa tuꞌ xax, pu mõꞌãnĩynãm, xayĩy hãpkummuk mĩy hok.
\v 13 ꞌÃxop te hãpkummuk mĩy putup, yãy yõg putupꞌax kummuk tuꞌ mĩy, ha kaxĩy tikmũꞌũn xohix te hãpkummuk mĩy putup, pa Topa te xa hãmꞌãktux xex, tu ꞌãkaꞌogãꞌax, xayĩy hãpkummuk mĩy hok, yĩy Topa tuꞌ xax, hu: Topah, mõknĩynãm, ꞌũyĩy hãpkummuk mĩy hok!” kaxĩy, ha Topa te ꞌãkaꞌogãp-tup.
\p
\v 14 ꞌÃxop tek mũn hã ꞌũg ꞌãxape xop, hu ꞌõg pa ꞌãtiꞌ, pu topa komut pu nũꞌãk-tettex hok.
\v 15 ꞌÃte xa hãmꞌãktux, ꞌãxop te hãmyũmmũg hah, hu yõgnũ hãmꞌãktux kopit max, ꞌũyĩy ꞌãxop yũmmũgãꞌ. Yã Topa yõg hãmꞌãktux xeꞌeꞌ.
\v 16 Hõmã Kunnix te tik xop puꞌ hõm kãnẽy, ha mĩnta hep xupyãg ꞌũkopaꞌ xup, ha yũmũg xat, ꞌũ yũmũg xupyãg xoꞌop kamah, pu yũmũꞌã ha hãmmaxnãꞌ, yĩy yũmũꞌãte kamah kãnẽy hãꞌ xoꞌop, tu Topa pu: “ꞌÃmax Topah. Xate yũmũꞌã xupyãg xeꞌeꞌ hõm, tu pexkox yõg xupyãg xeꞌeꞌ hõm. Puxiꞌ,” kaxĩy. ꞌOk hãmyũmmũg hok, xateꞌ? Xate xupyãg xoꞌop, hu ta ꞌãxape xop xohix mũtik xoꞌop, nũy yũmũg xohix peꞌãpaxex, ha yũmũg xuxyã xok, mĩpkupnix tuꞌ xok, tu yãy hep ꞌãta nũꞌnãhãꞌ, nũy yũmũꞌã ha hãmmaxnãꞌ. Ha yũmũꞌãte pãm koxip, nũy yũmũg xape xop mũtik mãꞌ, nũy yũmũg xuxyã pekpaxex. Yã yũmũg xuxyã te mĩpkupnix tuꞌ xũy, nũy yũmũꞌã hãmmaxnãꞌ.
\v 17 Yã pãm puxet, haꞌ xohix teꞌ mãhãꞌ, yĩy Kunnix hã yũmũg yĩn puxet kamah, yã yũmũg kuxap-xet Kunnix kuxa mũtik.
\p
\v 18 Yoneo yõg tikmũꞌũn peꞌãpaxeh. Tu Topa pet kopaꞌ xitꞌax mãhãꞌ, ꞌĩhãꞌ ãmãnex te mõꞌhap, nũy Topa puꞌ haxyãꞌ.
\v 19 ꞌÃtep-tep ꞌãktux putup? ꞌOk topa komut kaꞌok? ꞌAp kaꞌokꞌah, yãꞌ hitop. ꞌOk hãpxop xitꞌax kaꞌok, tikmũꞌũn te nõm topa komut xop puꞌ hõm? Yãmhok!
\v 20 ꞌAp kaꞌokꞌah. Pa tikmũꞌũn te nõm xitꞌax hõm yãmĩy kummuk puꞌ, ꞌĩhã komut xop puꞌ hõm, ꞌap Topa puꞌ hõmꞌah. ꞌÃtep-tupꞌah, xa yãmĩy kummuk yõg hãpxop pop.
\v 21 ꞌÃxop te Topa yõg kãnẽy hãꞌ xoꞌop, nũy yũmũg xuxyã peꞌãpaxex. ꞌÃpu yãmĩy kummuk yõg kãnẽy hã xoꞌop hok. ꞌÃxop te Topa yõg hãpxop mãhãꞌ, nũy yũmũg xuxyã peꞌãpaxex. ꞌÃpu yãmĩy yõg hãpxop mã hok.
\v 22 ꞌOk yũmũꞌãte Topa gãyãp-tup? ꞌÃkuxãnõg! Paxip! Topa kaꞌok, ha ta yũmũg puꞌuk.
\s ꞌÃnõy yõg putupꞌax mĩy
\p
\v 23 Tikmũꞌũn ꞌũm te: “Yũmũꞌãte yãy putup mĩyꞌax,” kaxĩy. Mõy mĩy, pãyãꞌ mĩyꞌax ꞌũm te xa hãpkummugãꞌax. Ha xe: “Yũmũꞌãte yãy putup mĩyꞌax,” kaxĩy. Hamũn. Pa xateꞌ mĩyꞌax ꞌũm ꞌũhitop tuꞌ mĩy.
\v 24 Yãy putupꞌax mĩy hok, pa ꞌãnõy putupꞌax mĩy, nũy nõm kuxa hittupmãꞌ.
\p
\v 25 ꞌÃkuxa te yãy tux hok xa xogyĩn mãꞌ, ꞌãpu, xogyĩn xohix mãꞌ, tuꞌ nõy yĩkopit hok.
\v 26 Yã Topa yõg tappet te: “Hãm xexka yã Topa yõg, xix hãpxop xohix ꞌũyõg kamah,” kaxĩy.
\p
\v 27 Tikmũꞌũn kuxa mãm hok te ꞌãxãnãhã xa ꞌãxit, ꞌãmõg putup, nũy mõg, nũy hãpxop xohix mãꞌ, hu ꞌãnõy yĩkopit hok, ka ꞌãkuxa ꞌãkupex, hu ꞌãhittup ꞌohnãg.
\v 28 Pa tikmũꞌũn ꞌũm te: “Nãy! ꞌŨmã hok! Yã topa komut xop puꞌ hõm tap!” kaxĩy, ꞌãpuꞌ mã hok, ka ꞌãkuxa ꞌãkupex, huꞌ hittup ꞌohnãg,
\v 29 xayĩy ꞌãnõy pu hãpkummugã hok.
\p Ha tikmũꞌũn ꞌũm te: ‘Tep tu ꞌãtek nõy pekpaxex, nũy xogyĩn mã hok? Tep tuk yãy putupꞌax mĩy hok?’
\v 30 Nãy, ꞌãte Topa pu hãmꞌãktux hãmãxap, hu: ‘ꞌÃmax Topah. Yã xate ꞌãꞌ hõm hãpxop,’ kaxĩy, tuk-nãy tuk xit. Tep tu tikmũꞌũn te ꞌã xuktux kummuk? Yã Topa te ꞌãꞌ hõm xitꞌax ꞌũg ꞌũmãꞌ,” kaxĩy.
\p
\v 31 Hãpxopmã max, nũy Topa kuxa hittupmãꞌ, pe ꞌãxop xit, peyãꞌ xoꞌop, peꞌ yã hãpxopmãꞌ, nũy ta Topa pu: “ꞌÃmax Topah. Xate ꞌãꞌ hõm hãpxop max punethok. Puxiꞌ,” kaxĩy.
\v 32 ꞌÃpu hãpxopmã max, nũy Yoneo xop pu hãpkummugã hok, nũy puknõg xop pu hãpkummugã hok, nũy taꞌ kuxa mãm kaꞌok xop pu hãpkummugã hok.
\v 33 ꞌÃpu hãpxopmãꞌ, nũy yõgnũ hãpxopmãꞌax tat. ꞌÃteꞌ xak, nũy xohix kuxa hittupmãꞌ, ꞌap yãy pekpaxexꞌah, pak xape xop pekpaxex, ꞌũyĩꞌ xohix mõgã Topa yõg putat hã.
\c 11
\p
\v 1 ꞌÃpu yõgnũ hãpxopmãꞌax tat. Yã kaxĩy ꞌãte Kunnix yõg hãpxopmãꞌax tat.
\s ꞌŨn xop te ꞌãmũtik kotĩnnãhãꞌ
\p
\v 2 ꞌÃte xa hãmꞌãktux max, xate yõg hãmꞌãktux xaxok ꞌohnãg hah, tu ꞌã yĩpkox pip.
\v 3 Pa ꞌãte ꞌãp-tup, xa hãmyũmmũg. Yã Kunnix teꞌ yĩpxox xat, haꞌ yĩpxox te yãy xetut xat, ha Topa te Kunnix xat.
\v 4 ꞌAp maxꞌah, pu tik xop kuxxax tat, nũy nõ yãykotĩnnãꞌ pip, nũy Topa pu hãmꞌãktux, xix Topa pupi hãmꞌãktux ꞌãxape xop puꞌ. ꞌA Kunnix tep putupꞌah kaxĩy.
\v 5-6 Pa ꞌũn xop tep-tox mõꞌnĩy, puxix tu max. Kunnix tep putup. ꞌŨtux hok pu ꞌũn tep-tox mõꞌnĩy, nũy yãykotĩnnãꞌ pip, nũy Topa pu hãmꞌãktux, xix Topa pupi hãmꞌãktux ꞌãxape xop puꞌ. ꞌA Kunnix tep putupꞌah, ꞌĩhã ꞌũn tep-tox mõꞌnĩy hok, tu ꞌũn nõy putuk, nõm teꞌ xe mõy. Pũyãp-tox mõꞌnĩy, nũy yãyhãhup hok.
\v 7 Tik xop tep-tox mõꞌnĩy hok. Yã Topa teꞌ nõy yãy putuk haꞌ mĩy, pu Topa kuxa hittupmãꞌ, ha ꞌũn te tik kuxa hittupmãhãꞌ.
\v 8 Topa te tik mĩy hãmãxap, tuk-nãy tu tik kup tuꞌ xut, nũy ꞌũxetut mĩy.
\v 9 ꞌAp Topa te tik mĩyꞌah, puyĩꞌ xetut hã tu teheꞌ. ꞌÃmhok. pa ꞌũn mĩy, puyĩy tik hã tu teheꞌ.
\v 10 Yĩy ꞌũn xop tep-tox mõꞌnĩy pexkox yõg nũꞌpok xop hah, nũy pẽnãꞌ, nũy hãmyũmmũg. Yãꞌ xetut te yãy yĩpxox puꞌ yĩpkox pip.
\v 11 Topa yõg putat hã tihik xix ꞌũhũn te mõꞌyãy nĩynãm.
\v 12 Topa te tik tuꞌ kup xut, nũy ꞌũn mĩy, ha kama tik te ꞌũn tuꞌ nãhãꞌ. Yã Topa te hãpxopmã xohix.
\p
\v 13 ꞌÃpu ꞌãxop teꞌ kopit: ꞌOk max, ꞌũn putox mõꞌnĩy hok, nũy yãykotĩnnãhãꞌ piꞌ, nũy Topa pu hãmꞌãktux?
\v 14 Tik mũn xe tox pu kummuk, yã Topa yõg tikmũꞌũn teꞌ yũmmũg,
\v 15 pa ꞌũn mũn xe tox pu max, tup-tox mõꞌnĩy.
\v 16 Tikmũꞌũn ꞌũm te hãmꞌãktux putup yãnãn tuꞌ, tu xe tox ꞌãktux putup, kopxix ꞌãte tu xe hãmꞌãktux, hu: ꞌŨgmũꞌãteꞌ xat, xiꞌ kuxa mãm xop xohix teꞌ xat, pu ꞌũn xop tup-tox mõꞌnĩy, nũy yãykotĩnnãꞌ piꞌ, nũy Topa pu hãmꞌãktux.
\s Yũmũg xuxyã yõg xitꞌax
\p
\v 17 Hõnhã ꞌãte xa hãmyũmmũgꞌax nõy ꞌãktux, ꞌãxop te hãpxopmã kummuk hah. ꞌÃxop te yãy tu nũꞌãnãhãꞌ, tu yãy kummugãhãꞌ.
\v 18 Tikmũꞌũn te ꞌã hãmꞌãktux, tu ꞌãxop ꞌãktux, ha ꞌãxop yãy tuk-mĩy pax, ꞌĩhã yãy tu nũꞌãnãhãꞌ, nũy Topa pu hãmꞌãktux, hak kuxa yũm kutõgnãg nõm hãmꞌãktux kopah.
\v 19 Yãꞌ max ꞌãxop yãyxatat kutõgnãg, pu hãpxopmãꞌax max xop tu mũg.
\v 20 ꞌÃxop yãy tu nũꞌãnãhãꞌ, nũy xit, nũy yũmũg xuxyã peꞌãpaxex, pu, ꞌãxit hok.
\v 21 Yã ꞌũyãg xit mõꞌkaꞌok, nũy ꞌũhi mõꞌkaꞌok, haꞌ yãg putup xũy, haꞌ yãg nõy paptux.
\v 22 ꞌOk yã ꞌãpet ꞌũm yũm hok, hu ta xit xix xoꞌop, nũy ꞌãhiꞌ? Kaxĩy ꞌãxop teꞌ kuxa mãm kaꞌok xop putup hok, xiꞌ hok xop puꞌ hupmãhãꞌ. Xatep tep peꞌãpaxex? ꞌOk hãpxopmãꞌax max nõꞌõm? ꞌAp maxꞌah! Yãꞌ kummuk!
\p
\v 23 Yũmũg xuxyã te ꞌã hãmyũmmũgãhãꞌ, ha xaꞌ yũmmũgãꞌax, hu: Yũmũg xuxyã Yeyox te yãy yõg tik xop mũtik xit ꞌãmnĩy hã, ha tikmũꞌũn gãy teꞌ mũgꞌax, nũy tup-tex, yĩy pãm paꞌ tap,
\v 24 tu Topa pu: “ꞌÃmax Topah. Tuk mũꞌãꞌ hõm ꞌãxitꞌax max. Puxiꞌ!” kaxĩy. Tu pãm koxip, tu: “Nũhũ ꞌũgyĩn, yãk xok ꞌãxop pupiꞌ. ꞌŨg paꞌ, nũy mãꞌ, huk xaxok hok,” kaxĩy.
\v 25 ꞌŨxit kux, ꞌĩhã yũmũg xuxyã te kãnẽy paꞌ, tu: “Topa teꞌ paꞌax tup mĩy tikmũꞌũn mũtik, tuk yĩn hep ꞌãta hãꞌ paꞌax mĩy, ꞌũkxok tuꞌ. ꞌÃte yãy hep ꞌãta nũꞌnãp-tup, nũy paꞌax tup mĩy. Kãnẽy paꞌ, nũy tuꞌ xoꞌop, ꞌĩhãk mũn peꞌãpaxex, nũy huk xaxok hok,” kaxĩy.
\v 26 ꞌÃxop te pãm mãhãꞌ, xix kãnẽy tuꞌ xoꞌop, puxix yũmũg xuxyã xokꞌax ꞌãktux pax, ha mõktu putpuꞌ nũn.
\p
\v 27 Tikmũꞌũn kuxa kummuk te nõm pãm mãhãꞌ, xix nõm xupyãg xoꞌop, puxix Topa gãy, yũmũg xuxyã peꞌpaxex ꞌohnãg hah, yĩy Topa teꞌ kummugãp-tup ꞌũyãnãn tuꞌ.
\v 28 Yãy kuxa yĩkopit hãmãxap, nũy yãy yõg hãpxopmãꞌax yũmmũg, nũy kunãy tu pãm mãꞌ, xix kãnẽy hãꞌ xoꞌop.
\v 29 Tikmũꞌũn xit, xix xoꞌop, tu hãmpeꞌpaxex ꞌohnãg, tu yũmũg xuxyã peꞌpaxex hok, puxix Topa gãy, nũy tuꞌ xũygãꞌ. Yã yũmũg xuxyã xok yũmũg pupiꞌ, nũy yũmũg kuxa kummuk xit.
\v 30 Tikmũꞌũn punethok te hãmpeꞌpaxex ꞌohnãg, huꞌ pakut, xiꞌ puꞌuk, ha tikmũꞌũn ꞌũm xakix tap.
\v 31 Tikmũꞌũn te yãy kuxa yĩkopit hãmãxap, nũy yãy hãpxopmãꞌax yũmmũg, puyĩy Topa ꞌũkuxa maxnãꞌ, puxix Topaꞌ xũygã hok.
\v 32 Pa Topa te yũmũ yõg hãpxopmãꞌax kopit, nũy tuꞌ yũmmũg, tu yũmũg xũygãhãꞌ, ꞌũyĩy Topa yõg putat xak hok, nũy Hãmgãynãgnãg pet hã yũmũg mõg hok Topa hãꞌ puknõg xop mũtik.
\p
\v 33 ꞌÃxop yãytu nũꞌãnãhãꞌ, nũy Topa yõg xitꞌax mãꞌ, nũy yũmũg xuxyã peꞌãpaxex, ꞌãpu ꞌãxape xop hip.
\v 34 Putup te ꞌãp-tex, yĩy ta yãy pet tu ꞌãxit hãmãxap, tuk-nãy tu ꞌãxape xop mũtik yãy kotĩnnãhãꞌ, pu Topa ꞌãxop xũygã hok, ꞌãxop te hãpkummuk mĩy hah. Ha hãpxopmãꞌax nõy ꞌãteꞌ kopit putup, ꞌĩhã ꞌãxop mũtik ꞌũkxip.
\c 12
\s Topa Koxuk te tikmũꞌũn kaꞌogãꞌax
\p
\v 1 ꞌŨkxape xop, ꞌãte ꞌãp-tup, xa ꞌãxop hãmyũmmũg max, nũy Topa Koxuk yã tikmũꞌũn kaꞌogã yũmmũg, haꞌ kuxa mãm kaꞌok xop kaꞌogãhãꞌ, puyĩy hãpxopmã max.
\v 2 ꞌÃxop te ꞌõg hãpxopmãꞌax hittap yũmmũg, ꞌĩhã Topa hã ꞌãpuknõg, ha topa komut xop yĩy hok te ꞌãxat, tu ꞌãmõgã kummuk.
\v 3 Yĩy ꞌãte xa hãmyũmmũgãhã. Tikmũꞌũn ꞌũm te: “Pũyã Topa Yeyox pu hãpkummugãꞌ,” kaxĩy, yã Topa Koxuk teꞌ kaꞌogã ꞌohnãg, pu tu hãmꞌãktux kummuk. ꞌÃmhok. Ha tikmũꞌũn ꞌũm te: “Yeyox yã yũmũg xuxyã!” kaxĩy, yã Topa Koxuk teꞌ kaꞌogãhãꞌ, pu tu hãpxeꞌe ꞌãktux.
\p
\v 4 Topa Koxuk te tikmũꞌũn kaꞌogãhãꞌ, pu hãpxopmã max punethok, tup-xehnãg teꞌ kaꞌogãhãꞌ, pu tu hãpxopmãꞌ.
\v 5 Ha yũmũꞌãte hãpxopmã punethok, nũy yũmũg xuxyã tu hãpxopmãꞌ, yã yũmũg xuxyãp-xet puk hãm.
\v 6 Ha tikmũꞌũn ꞌũm kaꞌogãhãꞌ, pu tu hãpxopmãꞌ, tuꞌ nõy kaꞌogãhãꞌ, pu tu hãpxopmã nõy, ha Topap-xet teꞌ xohix kaꞌogãhãꞌ, pu tu hãpxopmãꞌ.
\v 7 Topa teꞌ kuxa mãm xop xohix ha hãmmaxnãhãꞌ, tuꞌ xohix tuꞌ mũg. Yã Topa Koxuk teꞌ kuxa mãm kaꞌok xop xohix kopaꞌ xip, ha Topa teꞌ xipꞌax tuꞌ mũg, puyĩꞌ xohix pẽnãꞌ.
\v 8 Topa Koxuk te tikmũꞌũn ꞌũm kaꞌogãhãꞌ, puyĩyꞌ nõy mõꞌnĩynãm hãmꞌãktux hã, xiꞌ nõy kaꞌogãhãꞌ, puyĩꞌ nõy hãmyũmmũgãꞌ,
\v 9 xiꞌ nõy kaꞌogãhãꞌ, puyĩy kuxa yũm kaꞌok, xiꞌ nõy kaꞌogãhãꞌ, puyĩy nõy pakut hittupmã
\v 10 xiꞌ nõy kaꞌogãhãꞌ, puyĩy hãpxopmã kaꞌok xeꞌẽgnãg, yã tikmũꞌũn puxet teꞌ mĩy hok, xiꞌ nõy kaꞌogãhãꞌ, puyĩy Topa pupi hãmꞌãktux, xiꞌ nõy kaꞌogãhãꞌ, puyĩy hãmyũmmũg, nũy Topa Koxuk yõg hãpxopmãꞌax yũmmũg, nũy ꞌũkoxuk puknõg yõg hãpxopmãꞌax yũmmũg kamah, xiꞌ nõy kaꞌogãhãꞌ, puyĩꞌ yĩyꞌax puknõg hã hãmꞌãktux, xiꞌ nõy kaꞌogãhãꞌ, puyĩy nõ hãmꞌãktux puknõg yũmmũgãꞌ.
\v 11 Yã Topa Koxuk puxet, tuꞌ kuxa mãm xop xohix kaꞌogãhãꞌ, tup-tup, hu tikmũꞌũn kaꞌogãꞌax pu hãpxopmã punethok.
\s Kunnix hã ꞌãyĩn puxet
\p
\v 12 Tikmũꞌũn yĩn puxet, tuꞌ kup punethok pip, haꞌ mãg teꞌ yĩn kopaꞌ pip punethok, xiꞌ kuxa, xiꞌ tex, yãꞌ xohix, hã kaxĩy yũmũg xohix, tu Kunnix hãk yĩn puxet.
\v 13 Yã yũmũg xohip-tox pix, Topa Koxuk te yũmũg putox pix, nũy Kunnix hã yũmũg yĩn puxet. Yã yũmũg xohix, ꞌok pe Yoneo xop, ꞌok peꞌ puknõg xop, ꞌok pe tayũmak pop tu yũmũg hãm, ꞌok peꞌ xuxyã xatꞌax pu yũmũg hok hãꞌ hãm, yã yũmũg xohix te Kunnix hãꞌ yĩn puxet. Ha Topa Koxuk te yũmũg xohix kopaꞌ xip, yĩy yũmũg kuxap-xet Yeyox Kunnix kuxa mũtik.
\p
\v 14 Haꞌ yĩn kup puxetꞌah. ꞌÃmhok. Yãꞌ kup punethok.
\v 15 Pax puꞌ pata yĩy, tu hãmꞌãktux, hu: “ꞌAkmũn te yãk yĩmꞌah, huk yĩn yõg ꞌohnãg,” kaxĩy. Puxiꞌ yãꞌ yĩn yõg xeꞌeꞌ.
\v 16 Pax puꞌ yĩpkox yĩy, tu: “ꞌAk paꞌah, huk mũn yĩn yõg ꞌohnãg,” kaxĩy. Pãyã yãꞌ yĩn yõg xeꞌeꞌ.
\v 17 Pax puꞌ pa puxet xip ꞌũyĩn kopah, puxix hãmꞌãpak ꞌohnãg. Pax puꞌ yĩpkox puxet xip ꞌũyĩn kopah, puxix tuꞌ hax ꞌohnãg.
\v 18 Yĩy Topa te tikmũꞌũn mĩy, tuꞌ yĩn mĩy, haꞌ kup punethok, xiꞌ mãg punethok, ꞌũp-tup haꞌ mĩy.
\v 19 Pax puꞌ kuxap-xehnãg xip, puxix tu kuxap-xet, ꞌap yĩnꞌah. ꞌÃmhok.
\v 20 Yãꞌ kopaꞌ pip xop xohix hãꞌ yĩn puxet.
\p
\v 21 Pax pu tikmũꞌũn pa yĩy, nũy tuꞌ yĩm pu hãmꞌãktux, hu: “Mõg, ꞌãte ꞌãp-tupnõg,” kaxĩy. Yãꞌ kummuk, ꞌũhitop tuꞌ xuktux. Ha kaxĩy ꞌãxop yã ꞌãkuxa mãm kaꞌok xop, tu Kunnix hã ꞌãyĩn puxet, tu ꞌãxape xupmã hok.
\v 22 ꞌAmhok. ꞌŨyĩm xut, puxiꞌ yĩn tu puꞌuk, ha kaxĩy ꞌãxop yãy xape xut hok, ka ꞌãxop ꞌãpuꞌuk kamah.
\v 23 Tikmũꞌũn te yãy yĩn mõꞌnĩy, ꞌũyãg mõꞌnĩy, nũy nõ xex max,
\v 24 tu mõꞌ yãg nõy nĩy ꞌohnãg. Hã kaxĩy Topa te tikmũꞌũn yĩn xohix mĩy, haꞌ xohix max,
\v 25 haꞌ yãyxatat ꞌohnãg, yĩy yãy hã tu tehet.
\v 26 ꞌŨyĩn yãg xũy, puxix tu yĩn xohix xũy kamah. ꞌŨyĩn yãg tap, puxix tu yĩn xohix tap. ꞌŨkuxa mãm kaꞌok xop te tikmũꞌũn yĩn putuk, ꞌũyãg xũy, haꞌ nõy xop xohix hittup ꞌohnãg.
\p
\v 27 ꞌÃxop te Kunnix hã ꞌãyĩn, yã ꞌãxohix te Kunnix hã ꞌãyĩn yãg.
\v 28 Topa te hãpxopmã mãynãg ꞌũkuxa mãm kaꞌok xop kopah, tu tik xop mõꞌpok hãmãxap, hak-nãy tu tik xop nõy te Topa pupi hãmꞌãktux, hak-nãy tu tik xop nõy te hãmyũmmũgãhãꞌ, hak-nãy tu tik xop nõy te hãpxopmã kaꞌok xeꞌẽgnãg, ha tikmũꞌũn puxet teꞌ mĩy hok, hak-nãy tu tik xop nõy teꞌ pakut xop hittupmãhãꞌ, xiꞌ nõy xop teꞌ nõy hã tuꞌ tehet, xiꞌ nõy xop teꞌ nõy xat, xiꞌ nõy xop teꞌ yĩyꞌax puknõg hãꞌ yĩy.
\v 29 ꞌAꞌ xohix mõꞌpokꞌah, ꞌaꞌ xohix te Topa pupi hãmꞌãktuxꞌah, ꞌaꞌ xohix te hãmyũmmũgãꞌah, xix ꞌa hãpxopmã kaꞌokꞌah.
\v 30 ꞌAꞌ xohix teꞌ pakutꞌax hittupmãꞌah, xiꞌ yĩyꞌax puknõg hãꞌ yĩyꞌah, xiꞌ nõy pu ꞌaꞌ yĩyꞌax ꞌũm yũmmũgãꞌah.
\v 31 Yĩy Topa tuꞌ xax, pu ꞌãkaꞌogãꞌ, xayĩy ꞌãnõy kaꞌogã ꞌũyãnãn tuꞌ.
\p Pãyã ꞌãte xaꞌ mũg putup putat xeꞌẽgnãg.
\c 13
\s ꞌÃnõy putup pax
\p
\v 1 Pax tikmũꞌũn yĩyꞌax hãk yĩy, xix pexkox yõg nũꞌpok xop yĩyꞌax hãk yĩy, pãyã ꞌãtek nõy putup pax hok, kopxiꞌ hitop tuk yĩy, yãk yĩyꞌax te ꞌãmãnex te xap kãyãꞌax putuk, yãꞌ kax kaꞌok, pãyã hitop hãꞌ kax, tuꞌ nõy yũmmũgã ꞌohnãg.
\v 2 Pax ꞌãte Topa pupi hãmꞌãktux, xix hãmyũmmũg xexkaꞌ, xix hãmꞌãktux xeꞌe yũmmũg, xik kuxa yũm ꞌũm kaꞌognãg, nũy yĩktix xut hãm tuꞌ, pap-tup pax hok, kopxiꞌ hitop hã hãpxopmãꞌ.
\v 3 Pax ꞌãte yãy yõg hãpxop xohix popmãꞌ, xix yãy yĩn hõm pu mõꞌhap, nũy Topa pu haxyãꞌ, pa ꞌãtep-tup pax hok, kopxiꞌ hitop hã hãpxopmãꞌ.
\p
\v 4 Tikmũꞌũn teꞌ nõy putup pax, puxiꞌ hip, tu nõãꞌ tot, tuꞌ nõy kuxa kaꞌ. ꞌAp yĩpkumĩyꞌah, tu yãy mũn kutõgnãg peꞌpaxex, ꞌa yãy mũn xexka ꞌãktuxꞌah,
\v 5 tuꞌ yĩy puꞌuk, nũy tuꞌ nõy gãyã hok, ꞌap yãy mũn te mãxap peꞌpaxexꞌah, ꞌap gãyꞌah, ꞌaꞌ nõy yõg hãpkummuk mĩyꞌax xutigãꞌah, pãyãꞌ xaxogãhãꞌ.
\v 6 Tikmũꞌũn teꞌ nõy putup pax, puxiꞌ nõy hãpkoheꞌ mĩy hã tu hittup hok, pãyã hãmyok mĩyꞌax hãꞌ hittup.
\v 7 ꞌAp kuxa teknõgꞌah, pãyã nõãꞌtot, ꞌũkuxa yũm kaꞌok tuꞌ, tu hãmmax hip, puyĩy Topa hãpxopmãꞌ.
\p
\v 8 Tup-tup pax, tup-tup kux ꞌohnãg. Hõnhã tikmũꞌũn te Topa pupi hãmꞌãktux, tuꞌ xuktux kux putup. Haꞌ yĩyꞌax puknõg hã tikmũꞌũn yĩy, pãyãꞌ kux putup kamah. Ha hãmyũmmũg, pãyãꞌ xaxogãp-tup kamah.
\v 9 ꞌŨgmũꞌãte hãmyũmmũg kutõgnãg, ha tikmũꞌũn te Topa pupi hãmꞌãktux kutõgnãg kamah,
\v 10 pa ꞌãmnĩy ꞌũm mõꞌnãꞌax, ꞌĩhã yũmũg xuxyã nũn, ꞌĩhãꞌ xexka xeꞌẽgnãg tuꞌ nũn, ha Topa Koxuk te tikmũꞌũn kaꞌogãꞌax kux putup, yũmũꞌãte yãyhã kaꞌok hah, ha hãpxopmãꞌax hittap yãyxaxogãp-tup.
\p
\v 11 Hõmãk kutĩgnãg, yãk mũn hã kakxop, tu hãmꞌãktux, tu kakxop putuk, xix ꞌãte hãmpekpaxex tu kakxop putuk, pãyã hõnhãk xip tap, hu ꞌãte kakxop yõg hãpxopmã putuk ꞌa mĩyꞌah.
\v 12 Hõnhã yũmũꞌãte yãy pa pẽnãꞌax hã yãy pa pẽnãhãꞌ, tuꞌ pẽnã kummuk, pa ꞌãmnĩy ꞌũm mõꞌnãp-tup, ꞌĩhã yũmũꞌãte Topa pa pẽnã max, ꞌũyĩkãgnãg hãꞌ tihi tuꞌ. Hõnhã yũmũgꞌãte Topa yũmmũg kutõgnãg, pa ꞌãmnĩy ꞌũm mõꞌnãp-tup, ha ꞌãte Topa yũmmũg maxp-tup, yã kaxĩy hã Topa tek yũmmũg.
\p
\v 13 Hõnhã yũmũg kuxa mãm kaꞌok Yeyox Kunnix kopah. Yã hãpxopmãꞌax max. Xix yũmũꞌãte hãmmax hip, tu Kunnix putpuꞌ nũnꞌax hip, nũy yũmũg mõg pexkox hah. Yã hãpxopmãꞌax max kamah. Xix yũmũg yãy putup pax, tuꞌ kux ꞌohnãg. Yã hãpxopmã maxꞌax xeꞌẽgnãg.
\c 14
\s Topa Koxuk te tikmũꞌũn kaꞌogãhãꞌ
\p
\v 1 ꞌŨmax, taꞌ nõy putup pax. ꞌÃpu ꞌãnõy putup pax xexkaꞌ. Topa tuꞌ xax pu pexkox yõg hãpxop popmã xaꞌ. Yãꞌ max xeꞌeꞌ, pu Topa pupi hãmꞌãktux.
\v 2 ꞌŨyĩyꞌax puknõg hã tikmũꞌũn yĩy, puxix Topa tu hãmꞌãktux, pãyã tikmũꞌũn ꞌũm pu hãmꞌãktuxꞌah, ꞌũyĩyꞌax yãꞌ puknõg hah, ha Topa Koxuk teꞌ kaꞌogãhãꞌ, pu Topa yõg hãmꞌãktux xeꞌe ꞌãktux.
\v 3 Pa tikmũꞌũn te Topa pupi hãmꞌãktux, puxix tikmũꞌũn puꞌ xuktux, tu mõꞌnĩynãm, tu nõ teheh.
\v 4 Tikmũꞌũn yĩy, ꞌũyĩyꞌax puknõg hãꞌ yĩy, puxix mõ yãy nĩynãm, pãyã tikmũꞌũn te Topa pupi hãmꞌãktux, puxiꞌ kuxa mãm kaꞌok xop xohix mõꞌnĩynãm.
\p
\v 5 ꞌÃte ꞌãp-tup, xa yĩyꞌax puknõg hã ꞌãyĩy, pãyã ꞌãte ꞌãp-tup xexkaꞌ, xa Topa pupi hãmꞌãktux, nũy ꞌãnõy xop kaꞌogãꞌ, haꞌ nõy te yãy mũn puxet kaꞌokgãhãꞌ. Yãꞌ yĩyꞌax puknõg hã hãmꞌãktux. Pãyã tikmũꞌũn xip, nũy nõy pu hãmyũmmũgãꞌ, puxiꞌ yĩyꞌax puknõg yõg hãmꞌãktux yũmmũgãꞌ, nũy hãmꞌãktuxꞌax hãꞌ nõy kaꞌogãꞌ.
\v 6 ꞌŨkxape, ꞌãhãk mõg, tuꞌ yĩyꞌax puknõg hãk yĩy, kopxix mõꞌãnĩynãm ꞌokpa Topa yõg hãmꞌãktux xeꞌe ꞌãktux. Pãyã ꞌãte xa hãmyũmmũgãhãꞌ, ꞌĩhã tikmũꞌũn yãy yĩyꞌax hã ꞌãte Topa pupi hãmꞌãktux, tu xaꞌ xuktux, kopxix mõꞌãnĩynãm xeꞌẽꞌ.
\p
\v 7 ꞌŨgꞌãpax, xayĩy hãmyũmmũg. Tikmũꞌũn kutex, ha kama hãpxop kãyãꞌax pip punethok. Tik kãyã kummuk, puxix tikmũꞌũn kutex yũmmũg ꞌohnãg.
\v 8 Tik ꞌũm te kãyãꞌax, mĩxux xop tut hã kãyãhãꞌ, nũy xonat xop xãnãꞌ, tu kãyã kummuk, puxix xonat te hãmꞌãpak, pãyã hãmyũmmũg ꞌohnãg, ꞌok yãykixꞌax, ꞌok peꞌ xitꞌax.
\v 9 Ha kaxĩy ꞌãxop te hãpxopmãhãꞌ. Tikmũꞌũn teꞌ yĩyꞌax puknõg hãꞌ yĩy, puxiꞌ nõy te hãmꞌãktux ꞌũm yũmmũgꞌah, ꞌũpuknõg hah, ha hãmꞌãktux yãyxaxogãꞌax.
\v 10 Hãm xexka yõg yĩyꞌax xohix punethok, haꞌ yĩyꞌax xohix hãꞌ hep nõy xop te hãmꞌãktux, tu yãy yĩyꞌax hã hãmyũmmũg.
\v 11 ꞌÃteꞌ yĩyꞌax yũmmũg hok, puxix tik puknõg hãmꞌãktux, tu ꞌãhãꞌ puknõg, ha hamũn hãk puknõg kamah.
\v 12 Yĩy xax, pu Topa Koxuk ꞌãkaꞌogãꞌ, paꞌ xax hãmãxap, pu ꞌãkaꞌogã, xayĩy ꞌãnõy xop kaꞌogã kamah.
\p
\v 13 Yãꞌ max tikmũꞌũn teꞌ yĩyꞌax puknõg hãꞌ yĩy, pãyã max xexkaꞌ, ꞌũnõy xop pu hãmꞌãktux yũmmũgãꞌ, nũy tikmũꞌũn yãy yĩyꞌax hã hãmyũmmũgãꞌ, puyĩy hãmyũmmũg.
\v 14 Topa pu ꞌãte hãmꞌãktux, ꞌũyĩyꞌax puknõg hãk yĩy, kopxik kuxa te hãmꞌãktux xeꞌeꞌ, pak putox te hãmyũmmũg ꞌohnãg, ꞌãteꞌ yĩyꞌax puknõg yũmmũg ꞌohnãg tuꞌ.
\v 15 ꞌÃte putep mũn mĩyꞌax? ꞌÃte Topa pu hãmꞌãktux yãy kuxa hã, tuꞌ yĩyꞌax puknõg hãk yĩy, pa yãy putox hã ꞌãte hãmꞌãktux kamah, nũy tikmũꞌũn yãy yĩyꞌax hã hãmꞌãktux, hu hãmyũmmũg.
\v 16 ꞌÃkuxa hã xate Topa pu hãmꞌãktux, puxix ꞌãxapeꞌ xupax, pãyãꞌ yĩyꞌax yũmmũg hok, puxix hãmꞌãktux yũmmũg hok, nũy tu: Hamũn, kaxĩy. Yãꞌ hitop hãꞌ xupak, ꞌũyĩyꞌax puknõg yũmmũg ꞌohnãg tuꞌ.
\v 17 Yĩy xate hãmꞌãktux mãynãg, ꞌĩhã Topa pu hãmꞌãktux, pãyã ꞌãxape xop mõꞌnĩynãm ꞌohnãg.
\v 18 ꞌÃte Topa pu: ꞌÃmax Topah, xatek kaꞌogãhãꞌ, ꞌũg yĩyꞌax puknõg hãk yĩy punethok, kaxĩy. Yãk yĩy punethok, ha ta ꞌãxop yĩy kutõgnãg.
\v 19 Pãyã yãy kotĩnnãꞌ xop mũtik tihiꞌ, kopxix tikmũꞌũn yãy yĩyꞌax hã hãmꞌãktux, ꞌãtep-tup, pu tikmũꞌũn yõg hãmꞌãktux kutõgnãg ꞌãpax, puyĩy Topaꞌ kaꞌogã, puꞌ nõy xop pu nõ hãmꞌãktux. Paꞌ yĩyꞌax puknõg hãk yõg tox ꞌãte putupꞌah.
\p
\v 20 ꞌŨkxape: ꞌÃxop hã kakxopꞌah, pãyã hãpkummuk mĩy hok, kakxop putuk, ꞌihã hãmpeꞌãpaxeh ꞌũxip tap xop putuk.
\v 21 Yã Topa yõg tappet te Topa yõg hãmꞌãktuxꞌax ꞌãktux, hu:
\q “ꞌÃte nũhũ tikmũꞌũn pu hãmꞌãktux putup,
\q tuꞌ yĩyꞌax puknõg hã hãmꞌãktux putup,
\q xiꞌ puknõg yĩkox hã hãmꞌãktux putup,
\q pa yõg tikmũꞌũn te hãm ꞌũm ꞌãpak ꞌohnãg,” kaxĩy.
\p
\v 22 Tikmũꞌũn teꞌ yĩyꞌax puknõg hã Topa pupi hãmꞌãktux, puxix tuꞌ kuxa mãm hok xop pu hãmꞌãktux, yã hãpxopmã xeꞌẽgnãg, pãyãꞌ kuxa mãm kaꞌok xop pu hãm ꞌũm ꞌãktuxꞌah.
\v 23 ꞌÃxop yãykotĩnnãhãꞌ, ꞌãxohix teꞌ yĩyꞌax puknõg hã ꞌãyĩy, puxix hãmyũmmũg hok xop te: “ꞌŨxohip-tox kummuhnãg!” kaxĩy.
\v 24 Pa ꞌãxop xohix te Topa pupi hãmꞌãktux, ꞌĩhãꞌ kuxa mãm hok xop mõxakux, puxix hãmꞌãpax, tu yãy yõg hãpxopmãꞌax kummuk tuꞌ yãyhãhup, ha Topa teꞌ kopit putup, hamũn te hãmyũmmũg hah.
\v 25 Ha Topa te hãmpeꞌpaxex yũmmũgãp-tup, yĩy nũꞌxup putup, ꞌũkuxa teꞌ yẽy tuꞌ, tu: “Ya hamũn! Topa te ꞌãxop mũtik pip!” kaxĩy.
\s Hãpxopmã max ꞌĩhã yãy kotĩnnãꞌ pip
\p
\v 26 ꞌŨkxape xop, ꞌãte xe xa hãmꞌãktux putup. ꞌÃxop yãykotĩnnãꞌ pip ꞌĩhãꞌ, yãꞌ max ꞌãxape ꞌũm kutex, nũy Topa ꞌãktux max, xiꞌ nõy hãmyũmmũgãꞌ, xiꞌ nõy te Topa yõg hãmꞌãktux xeꞌe ꞌãktux, Topa teꞌ yũmmũgã tuꞌ xuktux. Xiꞌ max, ꞌãnõy yĩyꞌax puknõg hã tu yĩy, xiꞌ nõy te yĩyꞌax yõg hãmyũmmũgꞌax ꞌãktux, tu tikmũꞌũn yãy yĩyꞌax hã hãmyũmmũgãhãꞌ, puyĩꞌ kuxa mãm xop xohix mõꞌnĩynãm.
\v 27 ꞌÃxop ꞌũm yĩyꞌax puknõg hã ꞌãyĩy putup, ꞌĩhã ꞌãyĩy, ꞌãp-xet yĩy hãmãxap, xik-nãy tuꞌ nõy yĩy, xik-nãy tuꞌ noy, tu mõktu yã tikoyuk yĩy, tuꞌ hip, puꞌ nõy ꞌũyĩyꞌax puknõg hãꞌ yãnãn, nũy tikmũꞌũn yãy yĩyꞌax hãꞌ xuktux, puyĩꞌ xohix hãmyũmmũgãꞌ.
\v 28 ꞌŨxip hok tik teꞌ yũmmũgãꞌ, ha taꞌ kux, tu yãy pu hãmꞌãktux, xix Topa pu hãmꞌãktux yãy kuxa kopah.
\v 29 Tikmũꞌũn 2 tu yĩy kux, pe 3 tu yĩy kux, xaꞌ hip, puꞌ nõy xop kopit, ꞌok pe tik te Topa pupi hãmꞌãktux, ꞌok peꞌ koxuk puknõg pupi hãmꞌãktux.
\v 30 ꞌŨxape yok, tu hãmꞌãktux putup, ꞌĩhãꞌ nõy te Topa pupi hãmꞌãktux, puxix tikmũꞌũn mãxap hã hãmꞌãktux kux, tu taꞌ yũm, puꞌ nõy Topa yõg hãmꞌãktux ꞌũyãnãn tu ꞌãktux.
\v 31 ꞌÃxop xohix te Topa pupi hãmꞌãktuxꞌax, ꞌũp-xet hãmãxap, hak-nãy tuꞌ nõy teꞌ, xik-nãy tuꞌ nõy, tu mõktu ꞌãxohix te hãmꞌãktux kux, ha kaxĩy ꞌãxop te hãmꞌãktux xohix yũmmũg putup, nũy tu hittup.
\v 32 Tikmũꞌũn te Topa pupi hãmꞌãktux, puxix yãy mũn xat, ꞌok peꞌ max hãmꞌãktux, ꞌok peꞌ kummuk hãmꞌãktux.
\v 33 Yã Topa te yũmũg xãnã hok, ꞌũg hãpxopmã kummuk, pa yũmũg xãnãhã ꞌũg hãpxopmã max.
\p Ha kaxĩy ꞌũkuxa mãm kaꞌok xop xohix yãykotĩnnãnãꞌ pip.
\v 34 Ha ꞌũn xop yĩy hok. ꞌŨxat hok, puyĩy hãmꞌãktux hok. Yoneo xop yõg xatꞌax teꞌ xat hok kamah, yĩy tux hok, pu ꞌũn kuxa mãm kaꞌok xop xat hok kamah.
\v 35 ꞌŨn teꞌ yĩkopit putup, puxiꞌ hip, nũy yãy pet kopa yãy yĩpxox yĩkopit. ꞌŨn te hãmꞌãktux, ꞌĩhãꞌ xohix yãykotĩnnãhãꞌ pip, puxix tu hupmãꞌ.
\p
\v 36 ꞌOk ꞌãxop te Topa yõg hãmꞌãktux mĩy? ꞌAp mĩyꞌah. ꞌOk pe Topa te mõꞌãp-xet kutnãhãꞌ? ꞌÃmhok.
\v 37 ꞌÃxop ꞌũm te yãy xexka peꞌãpaxeh, nũy mõ ꞌãkutnãp-xet peꞌãpaxeh, xix Topa Koxuk te ꞌãkaꞌogãꞌax peꞌãpaxeh, kopxix xa hãmyũmmũgãꞌ. Yũmũg xuxyã tek xat ꞌũxa kaxꞌãmiꞌ.
\v 38 Tikmũꞌũn ꞌũm te hãmꞌãpak hok, ꞌãpu nõm pu ꞌãyipkox pip hok kamah.
\p
\v 39 ꞌŨkxape xop: ꞌÃpu, Topa pupi hãmꞌãktux pax, tuꞌ tux hok, pu yĩyꞌax puknõg hã tu yĩy kamah. Yãꞌ max.
\v 40 Pãyã hãpxopmã mãynãg, ꞌĩhã yãykotĩnnãhãꞌ ꞌãpip.
\c 15
\s Kunnix te putpuꞌ hiꞌ
\p
\v 1 ꞌÃte xa hãmꞌãpak maxꞌax ꞌãktux, kaꞌ xaxok. ꞌÃxop te hãmꞌãpak, yã ꞌãkuxa mãm kaꞌok hõmã xix hõnhãꞌ.
\v 2 Yã hãmꞌãpak maxꞌax hã ꞌãxop kuxa tup, tuꞌ mãm kaꞌok ꞌãmõ kuma ꞌãmõg. ꞌOk pe ꞌãkuxa te yã hitop hãꞌ mãm kaꞌok.
\p
\v 3 Topa te ꞌã hãmꞌãktux, ha ꞌãte xaꞌ xuktux, yã hãmꞌãktux xeꞌeꞌ, hu: Kunnix xok, yũmũg pupiꞌ xok, yũmũꞌãte hãpkummuk mĩy pax haꞌ xok, ha Topa yõg tappet teꞌ xuktux,
\v 4 ha nõ hãpkot, ha ꞌãmnĩy 3 nõg, ꞌĩhãꞌ putpuꞌ hiꞌ, ha Topa yõg tappet teꞌ xuktux,
\v 5 ha Pet te Kunnix pẽnãhãꞌ, hak-nãy tu mõꞌpok xop te 12 teꞌ pẽnãhãꞌ,
\v 6 hak-nãy tu tikmũꞌũn te 500 teꞌ pẽnãhãꞌ, nõm xop kuxa mãm kaꞌok te 500 teꞌ pẽnãhãꞌ. Tikmũꞌũn ꞌũm yãꞌ pip, pãyãꞌ yãg xakix hittap.
\v 7 Hak-nãy tu Tiak teꞌ pẽnãhãꞌ, hak-nãy tu mõꞌpok xop xohix teꞌ pẽnãhãꞌ.
\p
\v 8 Ha kaꞌax hã ꞌãte Kunnix pẽnãhãꞌ, ꞌũkaꞌax hãk kuxa te yũmũg xuxyã kopaꞌ yũm kaꞌok.
\v 9 Yã ꞌãte mõꞌpok xop hãk kaꞌax, tuk kutõgnãg, huk xax te kutuk, tu yãyhãhup, pãyã Yeyox te nũgkutnãhã ꞌũkaꞌax hã. Hõmã ꞌãte kuxa mãm kaꞌok xop xũygãhãꞌ, huk xax te kutuk.
\v 10 Pa Topa te ꞌã hãmmaxnãhãꞌ, huk mõgkutnãhã, ha ꞌãte hãpxopmãhã punethok, ha mõꞌpok xop nõy hãpxopmã kutõgnãg, pak puxetꞌah, yã Topa tek kaꞌogãhãꞌ, ꞌũyĩy hãpxopmã kaꞌok.
\v 11 Yĩy ꞌãtep yũmmũg putupꞌah, ꞌok pek hãm, ꞌok pe yãk nõy hãm, pak mũg xohix te hãmꞌãpak maxꞌax ꞌãktux, ha ꞌãkuxa mãm kaꞌok hãmꞌãktuxꞌax kopah.
\s Yũmũꞌãte putpuk hip-tup
\p
\v 12 Hak mũꞌãte Kunnix te putpu hiꞌax ꞌãktux. Tep te xĩy ꞌãxop ꞌũm te: “Yũmũg yog xakix xop te putpu hip-tup ꞌohnãg,” kaxĩy.
\v 13 Pax puꞌ xakix xop putpu tu hi hok, puxix Kunnix ꞌa putpu hiꞌah kamah.
\v 14 Pax pu Kunnix putpu tu hi hok, kopxik mũg hitop hã hãmꞌãpak maxꞌax ꞌãktux, ha yã ꞌãkuxa kama ꞌũhitop hãꞌ mãm.
\v 15 Kamah: Kunnix putpu tu hi hok, kopxik mũg yãꞌ koit, ꞌihã Kunnix putpu hiꞌax ꞌãktux. Pax puꞌ xakix xop putpu tu hi hok, puxix Topa yã Kunnix putpu hĩnnã hok kamah.
\v 16 Pax puꞌ xakix xop putpu tuꞌ hi hok, puxix Kunnix putpu tu hi hok.
\v 17 Pax pu Kunnix putpu tu hi hok, puxix ꞌãkuxa hitop hãꞌ mãm kaꞌok Kunnix kopah, ha ꞌãkuxa tup ꞌohnãg. Yãꞌ kummuhnãg.
\v 18 Pax puꞌ xakix xop kuxa hitop tuꞌ mãm, tu Topa yõg putat hãꞌ mõg hok, puxix tu Topa hãptox hãꞌ pi nõmhãꞌ.
\v 19 Pax hãm tup-xet hã yũmũ ꞌãte Kunnix hip, xix pexkox hã yũmũg mõg hok, puxix yũmũg kuxa xakix putũmnãg, yũmũg hittup ꞌohnãg tuꞌ, haꞌ kuxa mãm hok xop tu hittup.
\p
\v 20 Pãyã Kunnix te putpu hi xeꞌẽgnãg, ꞌãte hãpxeꞌe ꞌãktux, yĩꞌ xakix xop te putpuꞌ hip-tup kamah.
\v 21 Tik puxet ꞌAnão te hãpkummuk mĩy, yĩy yãꞌ xohix xakix, hã kaxĩy tik puxet nõy teꞌ putpuꞌ hĩnnãhãꞌ.
\v 22 ꞌŨxohix xakix mõnãyxop te mãxap ꞌAnão hah, hã kaxĩy ꞌũxohix te putpuꞌ hip-tup, Kunnix hãh. Yã Kunnix teꞌ putpuꞌ hĩnnãp-tup.
\v 23 Tu ta putpuꞌ hi hãmãxap, hak-nãy tu Kunnix yõg tikmũꞌũn hip-tup, ꞌĩhã Kunnix putpuꞌ nũn.
\v 24 Yã hãmyãxatamuk kaꞌax xohix yõg xox putox, ha Kunnix te hãpkummuk xop yõg xexka xop xohix nõãp-tup, xiꞌ xatꞌax kummuk xop xohix nõãp-tup, nũy Topa yũmũg Tak haꞌ nũnnãꞌ, puyĩy Topa puꞌ yĩpkox piꞌ.
\v 25 Ha Kunnix teꞌ xat putup, tu mõktu Topa teꞌ gãyxop kuxyãꞌ, tu mõktu hãmgãy xop xohix kuxyãhãꞌ, tuk-tok Kunnix haꞌ nũnnãp-tup, pu tuꞌ nõaꞌ.
\v 26 Haꞌ kaꞌax hã Topa teꞌ xat putup, puyĩy tikmũꞌũn xakix hok,
\v 27 yĩy Topa yõg tappet te: “Topa teꞌ xexka xop xohix nũnnãhãꞌ, pu tuꞌ yĩpkox piꞌ,” kaxĩy. Pãyã Topa mũn xexkaꞌ, tu Kunnix haꞌ nũnnãꞌax hãmgãy xop yõg xexka xop,
\v 28 tuꞌ kuxyãhãꞌ, puxik-tok te yãy Tak puꞌ yĩpkox xihip, pu tuꞌ xat, tuꞌ hep xop xohix xatꞌax, ꞌũxexka xeꞌẽgnãg tuꞌ.
\p
\v 29 Tikmũꞌũn ꞌũm teꞌ nõy xok tup-tox pix, yĩy ꞌãte ꞌãyĩkopit, hu: Teptu xatep-tox pix ꞌãxape xok pupiꞌ, ꞌĩhã xateꞌ putpuꞌ hiꞌax ꞌãktux hok?
\v 30 Xik mũꞌãg. Tep tuk mũg xũy, xik mũg xakix putũmnãg, nũy hãmꞌãpak maxꞌax ꞌãktux?
\v 31 ꞌŨkxape xop, ꞌãte xa hãmꞌãktux, tu hãpxeꞌe ꞌãktux. ꞌÃmnĩy xohix ꞌĩhãk xok putũmnãg. ꞌÃte xa hãpxeꞌe ꞌãktux. ꞌÃxop te hãpxopmã max, yĩk hittup, yã yũmũg kuxap-xet yũmũg xuxyã Yeyox Kunnix kuxa mũtik.
\v 32 Hõmãk xip nũnte kõmẽn ꞌEpex tuꞌ, haꞌ gãy xop te hãmgãy putuk, tuk putex putup, ꞌãte hãmꞌãpak max ꞌãktux hah. Pax ꞌãte hãmꞌãktux, puyĩy tikmũꞌũn ꞌũgmax ꞌãktux, kopxiꞌ hitop hã hãmꞌãktux. Pax puꞌ xakix xop putpu tu hi hok, kopxix max yũmũg hãpxopmã hãmpuknõg xop putuk, ha: “ꞌÃpu yũmũg xit, xix xoꞌop. Yã hãptup ꞌĩhã yũmũg xakix,” kaxĩy. Yãꞌ hitop hã hãpxopmãhãꞌ.
\p
\v 33 Yãy hã mõꞌãmã hok. Tik kummuk mũtik ꞌãmõg, hu ta ꞌãkummuk kamah.
\v 34 ꞌÃpu hãpxopmã kummuk kuxyãꞌ, tu Topa yõg putat hã ꞌãmõg putpuꞌ. ꞌÃxop ꞌũm te Topa yũmmũg ꞌohnãg. ꞌÃte xaꞌ xuktux nũy xaꞌ hupmãꞌ.
\s Yũmũg yĩn te putpuꞌ hip-tup
\p
\v 35 Pa tikmũꞌũn ꞌũm xek yĩkopit, hu: “Tep te xĩy ꞌũxakix xop putpu hip-tup?” kaxĩy. “ꞌŨyĩn te xĩy?” kaxĩy.
\v 36 ꞌÃxop te hãmyũmmũg ꞌohnãg! ꞌÃxop te hãpxop xap xok ꞌĩhãꞌ xok, pu tuꞌ xokax.
\v 37 Haꞌ xap, ꞌok pe xuxnãg xetox xap, ꞌok pe mĩxux xap nõy, ꞌũxap mũn ꞌap mĩxux yĩnmũnꞌah.
\v 38 Ha Topa te hãpxop xap xohix yãyhã mĩxux, yã Topa tep-tup.
\p
\v 39 Haꞌ hiꞌax xop xohix punethok. Yã tikmũꞌũn yĩn puxet, xix xokxop yĩn yãꞌ nõy, xix putuxnãg xop yĩn yãꞌ nõy, xix mãm xop yĩn yãꞌ nõy.
\p
\v 40 Ha pexkox yõg xop yĩn yãꞌ nõy, xix hãm xexka yõg xop yĩn yãꞌ nõy. Haꞌ xohix max, pãyã hãmmax nõy. ꞌAp nõy putukꞌah.
\v 41 Mãyõn max, tu hãptupmãhãꞌ, ha mãyõnhex max, tu ꞌãmnĩy tupmãhãꞌ, ha mãyõnnãg xop xohix max kamah, tu hãptupmã nõy. ꞌAp nõy putukꞌah.
\p
\v 42-43 Ha kaxĩy ꞌũxakix xop te putpu hip-tup. ꞌŨyĩn yã hahãm yõg, ha nõ hãpkot, ꞌũkummuk tuꞌ, yãꞌ xok xeꞌeꞌ. Pa putpuꞌ hi, ꞌĩhãꞌ yĩn tup, tu yĩn kaꞌok, tu yĩn max, ꞌa xep xok putupꞌah.
\v 44 Putpuꞌ hi, ꞌihã yã pexkox yõg yĩn. ꞌŨyĩn hittap yã hãm yõg, haꞌ yĩn tup pexkox yõg.
\v 45 Yĩy Topa yõg tappet te: “Tik te mãxap ꞌãxetꞌax ꞌAnão, ha Topa teꞌ hĩnnãhãꞌ,” kaxĩy. Pa ꞌAnão nõy ꞌãxetꞌax Kunnix, tu hãpxohix hĩnnãhãꞌ.
\v 46 Tu hãm yõg yĩn mĩy hãmãxap, nũy kunãy tu pexkox yõg yĩn mĩy.
\v 47 Ha ꞌAnão te mãxap mĩy, ꞌĩhã hãpkõnõn hãꞌ mĩy, pa ꞌAnão nõy te pexkox tuꞌ nũn.
\v 48 Hãm xexka yõg xop te hãm yõg ꞌAnão putuk, ha pexkox yõg xop te ꞌAnão nõy putuk, nõm te pexkox tuꞌ nũn.
\v 49 Yũmũꞌãte hãm yõg tik putuk nõmhã, pãyã tik nõy te pexkox tuꞌ nũn, ha yũmũꞌãte Kunnix putuk putup.
\p
\v 50 ꞌŨkxape xop, ꞌãte xa hãmyũmmũgãp-tup, hu: Tikmũꞌũn yĩn yã hãm yõg, haꞌ yĩn xiꞌ hep ꞌãta hãꞌ mĩy, yĩy Topa pẽnã hok pexkox kopah, tu pexkox yõg hãpxop pop hok kamah.
\p
\v 51 ꞌŨg ꞌãpax, nũy hãmꞌãktux xeꞌe ꞌãpax. ꞌAp xohix xakip-tupꞌah. pãyã yũmũg yãyhãp-tup pexkox yõg tikmũꞌũn,
\v 52 hãpxip ꞌohnãg ꞌĩhãꞌ, tikmũꞌũn pa xax te kutãgnãg, ꞌĩhã yũmũg yãyhã pexkox yõg tikmũꞌũn, ꞌĩhã mĩxux xop tut kãyãp-tup. Haꞌ xakix xop te putpu hip-tup, ꞌũyĩn yã pexkox yõg yĩn, tu putpuꞌ hip-tup, ha yũmũꞌãte yãyhãp-tup kamah.
\v 53 Yã Topa te hãm yõg yĩn xit putup, nũy pexkox yõg yĩn hã yũmũg mõꞌtat ꞌũyãnãn tuꞌ, pu tu xakixꞌax xop yãyhã xakix hok xop,
\v 54 Ha pexkox yõg yĩn hã mõ yũmũg tat putup, ꞌũyĩy yũmũg xakix hok, yã Topa teꞌ xat putup, nũy yũmũg xakix kuxyãꞌ, ꞌũyĩy yũmũg hi xeꞌẽgnãg mõ kumak mog. Yã Topa yõg tappet te: “Topa teꞌ xat hok pu tikmũꞌũn xep xakix hok, yĩy Topa teꞌ xũyꞌax kuxyã kamah, Topa mũn kaꞌok xeꞌẽgnãg tuꞌ.”
\q
\v 55 “Tep tu tikmũꞌũn xohix xũy?
\q Teptu tikmũꞌũn xohix xakix?” kaxĩy.
\p
\v 56 Yã tikmũꞌũn xohix te hãpkummuk mĩy, tuꞌ xatꞌax puꞌ yĩpkox ꞌohnãg, huꞌ xohix xũy, huꞌ xohix xakix.
\v 57 Pa yũmũꞌãte Topa pu hãmꞌãktux, tu: “ꞌÃmax Topah. Xatek mũ kaꞌogãhãꞌ, ꞌũyĩg mũg xakix hok, yãk mũg xuxyã Yeyox Kunnix tek mũg hĩnnã xeꞌẽgnãg,” kaxĩy.
\p
\v 58 Yĩy Topa yõg putat hã ꞌãmõy kuma ꞌãmõg. Topa pu hãpxopmã max, yã yũmũg xuxyã te xa pagop-tup, ꞌãxop teꞌ yũmmũg.
\c 16
\s Paot te tayũmak pop mõg putup hãpxexka Yonex tuꞌ
\p
\v 1 Hõmã ꞌãte hãpxexka Ganax yõg kuxa mãm xop pu hãmyũmmũgãhãꞌ, pu tayũmak pop, nũy Yonex yõg ꞌũhok xop pu mõꞌkutnãꞌ. Yãꞌ max ꞌãxop kaxĩy pop kamah, nũy hok pu popmãꞌ,
\v 2 yĩy: Yenomĩn xohix ꞌĩhã tayũmak ꞌũm mõy, nũy xeh, nõm tayũmak ꞌãxop teꞌ popꞌax, tu mõktu ꞌãhak xupep, pu tayũmak pop hok ꞌĩhãk nũn.
\v 3 Tuk xupep ꞌĩhã, ꞌãte tappet mĩy putup, nũy mõꞌkutnãꞌ, ꞌĩhã ꞌãxop te tik xop yĩmõgatux, pu tayũmak mõgã kõmẽn Yenoyanẽn hah.
\v 4 Pek mõg kamah tik xop mũtik.
\s Paot te hãmpeꞌpaxex
\p
\v 5 ꞌŨgmõg putup hãpxexka Mãxenõn ha hãmãxap, nũy kunãy tu ꞌãhak mõg,
\v 6 Pak xip kaꞌok putup ꞌãxop mũtik hãmꞌãxĩ hã, ha ꞌãxop ꞌhã ꞌãteꞌax, pu ꞌãte hãpkumep kumaknãg.
\v 7 ꞌA ꞌãtep-tupꞌah ꞌãxop tuk xip puꞌũgnãg. Topa ꞌũkputup, ꞌũkxip kaꞌok.
\p
\v 8 Nũn tek xip putup ꞌEpex tuꞌ, tuꞌ hip, pu Yoneo xop yõg ꞌãmuk xexka ꞌãxetꞌax Pẽtekot mĩy,
\v 9 puk hãm xexkah, nũy hãmꞌãpakꞌax max ꞌãktux, tikmũꞌũn xohix puꞌ, pa tikmũꞌũn yãg te hãmꞌãpak maxꞌax putup nõg.
\p
\v 10 Timõn xupep ꞌĩhãꞌ, mõy xãnãꞌ pu ꞌãpet kopa mõꞌxip, nũy nõ hittupmãꞌ. Yã hãpxopmãhã ꞌũgmũn putuk, tu yũmũg xuxyã pu hãpxopmãhãꞌ.
\v 11 Pũyã Tĩmõn peꞌãpaxeh kutõgnãg hok. ꞌÃmhok, pa hã tuꞌ teheꞌ, pu tu mõg, ꞌũkuxa yũm ꞌĩhãꞌ, nũy ꞌũgha nũ putpuꞌ. ꞌÃteꞌ hip, pu nũk xape xop mũtik.
\p
\v 12 ꞌÃte ꞌApot ꞌãktux putup. Hõmã ꞌãte tu hãmꞌãktux, tu xeꞌ xuktux, pu ꞌãha mõg, yũmũg xape xop nõy mũtik, pa tute hãmpeꞌpaxex, tu hõnhãꞌ mõg putupꞌah. Hãpxip kutõgnãg, puxiꞌ mõg.
\s Tu ta hãmꞌãktux kux
\p
\v 13 ꞌÕg pa mõxip, ꞌãkuxa mãm kaꞌok. ꞌÃkuxãnõg hok, nũy ta ꞌakaꞌok.
\v 14 ꞌÃpu ꞌãhãm, ꞌĩhã ꞌãnõy putup pax xexkaꞌ.
\p
\v 15 ꞌÃxop te ꞌExteo yũmmũg, xiꞌ xape xop. Nõm xop kuxa mãm hãmãxap hãpxexka Genex tuꞌ, tu Topa yõg tikmũꞌũn pu hãpxopmã max. ꞌÃte xa tuꞌ xak, yãk xape xop,
\v 16 pu nõm xop xiꞌ xape xop yõg hãpxopmãꞌax tat, tu hãmꞌãpak, nũy nũ mũtik hãpxopmã, xa hã tu tehet.
\p
\v 17 ꞌŨgkuxa hittup, ꞌũkxape xop nũn, hak kuxa hittup. Yã ꞌExteo nũn, xix Potõnãn nũn, xix ꞌAhkax nũn, ha mõgnĩynãm ꞌãxop pupiꞌ, ꞌãxop pip hok hah.
\v 18 Ha mõgnĩynãm xexkaꞌ, tu mõꞌãnĩynãm kamah. ꞌÃteꞌ yũmmũg. Yãꞌ max yũmũꞌãte nõm xop ꞌãktux max.
\p
\v 19 Hãpxexka ꞌAx yõg kuxa mãm xop te ꞌãneo. ꞌAk xix Pinixit te ꞌãneo, xiꞌ kuxa mãm xop te nõm pet tu yãytu nũꞌnãhãꞌ, tu ꞌãxop pu ꞌãneo hõm.
\v 20 Hayũmmũg xape xop nũnteꞌ pip, tu xa ꞌũyĩmãꞌõy, tu ꞌãmũg putup yãy kep hã, ꞌãp-tup pax tuꞌ.
\p Yũmũg xape xop xohix pu ꞌãneo hõm, ꞌũgmũn pupi ꞌãneo.
\p
\v 21 ꞌÃte tappet kup pahaꞌ, nũy tappet mĩy, hu: ꞌŨgmũn Paot te xa ꞌãneo.
\p
\v 22 Nõm xop te yũmũg xuxyã putup nõg, pũyã Topa nõm hã hãpkummugãꞌ. Yã yũmũg xuxyã nũn putpuꞌ, yĩy mãꞌ, Yãyãꞌ!
\p
\v 23 Pũyã yũmũg xuxyã Yeyox xa hãmmaxnãꞌ!
\p
\v 24 Yã ꞌãte ꞌãxop xohix putup pax Yeyox Kunnix hah. Tu ta tuꞌ kux.