\id 2CO  - Maxakalí NT [mbl] (Brazil) -2011 bd
\h 2 KONĨN
\toc1 2 Konĩn
\toc2 2 Coríntios (2 Co)
\mt PAOT TE KONĨN XOP PU KAXꞌÃMIꞌ II
\c 1
\p
\v 1 ꞌŨgmũn Paot. Topa tep-tup, huk xix Yeyox Kunnix yõg mõꞌpok xop kopah. ꞌÃte ꞌãxop puꞌ kaxꞌãmi nũhũ tappet yãy taknõy Tĩmõn mũtik. ꞌŨgmũꞌãte ꞌãxop puꞌ kaxꞌãmi, yã Topa kopaꞌ kuxa mãm kaꞌok xop pu kõmẽn Konĩn tuꞌ xix Topa yõg tikmũꞌũn pu hãpxexka Genex xexka tuꞌ.
\v 2 ꞌŨgmũꞌãtep-tup, pu yũmũ yõg tak Topa xa hãmmaxnãꞌ, puyĩy ꞌãkuxa mãmmãꞌ xix yũmũ xuxyã Yeyox Kunnix xa hãmmaxnãꞌ xix ꞌãkuxa mãmmãꞌ.
\s ꞌŨmax Topah
\p
\v 3 ꞌÃpu yũmũ Topa pu hãmꞌãktux, yã yũmũg xuxyã Yeyox Kunnux mũktak max pu hãmꞌãktux, hu:
\p —‍Xatek mũꞌã hã ꞌãteheꞌ. Yã ꞌãmax. Kaxĩy.
\p Hamũn, yũmũ yõg tak Topa te yũmũg pẽnãhãꞌ, tu yũmũg kuxa kaꞌ, tu tikmũꞌũn xohix xexka hãꞌ teheꞌ.
\v 4 ꞌŨgmũ yõg hãpkummuk pip, ha Topa tek mũꞌã hãꞌ teheꞌ, yĩk mũꞌãte tikmũꞌũn hãg teheꞌ. Yãꞌ pip tikmũꞌũn yõg hãpkummuk xohix kamah. Topa tek mũꞌã hãꞌ teheꞌ, hak mũꞌãteꞌ pẽnãhãꞌ, tu hãmyũmmũg, tu tikmũꞌũn hãg teheꞌ, yã Topa putuk.
\v 5 Hõmã Kunnix xũy, ha ta hõnhã kamak mũg xũy, yã Kunnix putuk. Topa te Kunnix hãꞌ teheꞌ, ha ta Kunnix tek mũꞌã hãꞌ te xexkaꞌ. Yã yũmũg xũy, Kunnix putuk, ha Topa tek mũꞌã hãꞌ teheꞌ, yã tute Kunnix hãꞌ te putuk.
\v 6 ꞌŨgmũg xũy, tu ꞌãxop pu Topa yõg hãmꞌãpak maxꞌax ꞌãktux, nũy ꞌãxop hãg tehet, ha Topa te ꞌãkuxa kummuk xit, nũy ꞌãkuxa max tat, ꞌũyãnãn tuꞌ. Topa te yũmũꞌã hãꞌ tuteꞌ, kopxik mũg ꞌãxop hãg tehet kamah, nũy ꞌãxop kaꞌogãꞌ, xayĩy ꞌãxop xũy hã tot, tu hãmmax hip. Yãk mũg putuk, ꞌũgmũꞌãte xũy hã tot kamah ꞌãxop putuk.
\v 7 ꞌŨgmũꞌãte xa hãmmax hip punethok. Yãg mũꞌãteꞌ yũmmũg ꞌãxop xũy ꞌũgmũg putuk, ha Topa te ꞌãxop hã tep-tup, tutek mũꞌãꞌ tep-tup putuk.
\p
\v 8 ꞌŨkxape xop, ꞌũgmũꞌãte xa hãmꞌãktux ꞌũxeheh, hõmã ꞌũgmũg xũy hãpxexka ꞌAx tuꞌ. Yã hãpkummuk xexka ꞌũgmũ yõg, yãꞌ kuxa mãm hok xop tek mũg kuteꞌex kummuk, huk mũꞌãte hãmpekpaxex ꞌũgmũg xakix kõmnãg.
\v 9 ꞌŨgmũꞌãte hãmpekpaxex tikmũꞌũn teꞌ xat, puk mũg kix. Yã hãpkummuk pip, yãꞌ kuxa mãm hok xop tek mũg kuteꞌex kummuk, ꞌũyĩg kuxa mãm kaꞌok Topa kopah, ꞌũyĩy yãy yõg kaꞌokꞌax kopak kuxa mãm hok. Yã Topa ꞌũkaꞌok, tu tikmũꞌũn putpuꞌ hĩnnã yũmmũg. Yãꞌ kaꞌok Topah.
\v 10 ꞌŨgmũ yõg hãpkummuk xekxaꞌ pip, hak mũg xakix kõmnãg, pa Topa teꞌ kummuk kopak mũg mõy, tuk mũg mõy putup kamah. ꞌŨgmũg kuxa mãm Topa kopah, tuk mũꞌãteꞌ yũmmũg Topa teꞌ kummuk kopak mũg mõy putup ꞌũxeheh.
\v 11 ꞌÃxop tek mũg hã ꞌã tehe kamah, yã ꞌãxop te Topa puk mũg ꞌãktux, yã ꞌãxop te Topa puk mũg ꞌãktux punethok, ha Topa teꞌ xupak putup, tuꞌ mĩy putup punethok, tuk mũꞌã maxnãp-tup, ha xohix teꞌ pẽnãp-tup, hu hãmꞌãktux putup, hu:
\p —‍Yãꞌ max Topah. Kaxĩy.
\s Paot te hãpxopmã nõy
\p
\v 12 ꞌŨgmũꞌãte yãy xexka ꞌãktux putup. ꞌŨgmũꞌãte hãpxopmã max punethok, huk yãyhãhup ꞌohnãg, yãg mũꞌãte ꞌãxop pu hãpxopmã max xexkaꞌ, tuk mũꞌãte hãmyũmmũg xaptop ꞌohnãg, tuk mũg kuxa teꞌ yũmmũg yãꞌ max. Yã Topa tek mũg maxnãhã hã kaxĩy, hak mũꞌãte tikmũꞌũn yõg hãmyũmmũgꞌax ꞌãktux ꞌohnãg, pa Topa yõg hãmyũmmũgꞌax ꞌãktux.
\v 13 ꞌŨgmũꞌãte xaꞌ kaxꞌãmi hãpxop, ha ꞌãxop te nõm mõkupix, tu hãmyũmmũg mõꞌkaꞌok, yã ꞌãteꞌ kaxꞌãmi ꞌãhĩynãg ꞌohnãg. ꞌÃteꞌ yũmmũg ꞌãxop te hãmyũmmũg xexkap-tup.
\v 14 Hõnhã ꞌãxop te xahix yũmmũg, pa ꞌãteꞌ yũmmũg, hãpxip ꞌĩhã ꞌãxop te hãmyũmmũg xexkap-tup, xayĩy ꞌãxop ꞌũgmũg ꞌãktux maxp-tup, ꞌĩhã putpuꞌ nũn Yeyox, hak mũꞌãte ꞌãxop ꞌãktux maxp-tup kamah.
\p
\v 15 Hõmã ꞌãte nõm yũmmũg xeꞌe, hu hãmpekpaxex ꞌãxop hak mõg, nũy xa maxnã ꞌũxeheh.
\v 16 Yã ꞌãte hãmpekpaxex ꞌũgmõg hãpxexka Mãxenõm tuꞌ, nũy ꞌãxop hak mõg kamah, nũy putpuk nũn, nũy ꞌãxop hak mõg ꞌũxeheh, xayĩy ꞌã hã tehet, yã ꞌã xitꞌax hõm, ha ta putpuk nũn putup hãpxexka Yonex tuꞌ. Yã ꞌãte hãmpekpaxex te kaxĩy, pa ꞌãmhok, ꞌak mõgꞌah.
\v 17 ꞌOk ꞌãxop te hãmpeꞌãpaxex ꞌãte hãmpekpaxex hitop? ꞌOk ꞌãte: “ꞌOk pek mõg putup tikmũꞌũn hah, pek mõg putupꞌah? ꞌĨntuꞌ.” Kaxĩy. ꞌÃmhok, hã kaxĩy ꞌãte hãmꞌãktux ꞌohnãg. Pa ꞌãte: “ꞌÃtep-tup. ꞌŨgmõg putup.” Kaxĩy.
\v 18 Topa te hãmꞌãktux xeꞌeꞌ, ha ꞌãte hãmꞌãktux xeꞌe kamah. ꞌÃte hãmꞌãktux ꞌohnãg, hu: “ꞌOk pek mõg putup, pek mõg putupꞌah? ꞌĨntuꞌ.” Kaxĩy. Hã kaxĩy ꞌãte hãmꞌãktux ꞌohnãg.
\v 19 Hõmã Xinex te xa Topak-tok ꞌãktux, yã Yeyox Kunnix ꞌãktux xix Tĩmõn teꞌ xix ꞌãteꞌ. ꞌOk ꞌũgmũꞌãte hãmꞌãktux hitop? ꞌÃmhok. ꞌOk ꞌũgmũꞌãte: “ꞌOk pe Yeyox te kaxĩy peꞌ kaxĩy? ꞌĨntuꞌ.” Kaxĩy. Hã kaxĩy ꞌũgmũꞌãte hãmꞌãktux ꞌohnãg. Pak mũꞌãte: “Yeyox te kaxĩy.” Hã kaxĩy ꞌũgmũꞌãte hãmꞌãktux xeꞌeꞌ.
\v 20 Hamũn, hõmã Topa te tikmũꞌũn pu hãmꞌãktux xex, nũy Yeyox nũꞌkutnãꞌ. Hãpxip ꞌĩhãꞌ nũn Yeyox. Yã Topa te hãpxeꞌe ꞌãktux. Hak mũꞌãte Yeyox ꞌãktux, tu hãpxeꞌe ꞌãktux kamah.
\v 21 Ha Topa te yũmũꞌã Yeyox yũmmũgãhãꞌ, ha yũmũꞌãte Yeyox yũmmũg xeꞌeꞌ, tu yũmũg kuxa mãm kaꞌok Yeyox kopah. Yã Topa te yũmũg yĩmõgãtux, kopxix yũmũg Yeyox yũmmũg.
\v 22 Topa te yũmũg yĩmũ kaxꞌãmi, hu: “Topa yõg”. Kaxĩy. Tute yũmũꞌãꞌ hõm Topa Koxuk. Hã kaxĩy yũmũꞌãteꞌ yũmmũg yũmũg yã Topa yõg xop, ha Topa te yũmũꞌã popmãp-tup hãpxop xohix, yã yũmũꞌã hãmmaxnãp-tup punethok.
\p
\v 23 ꞌÃte hãmꞌãktux, ha Topa teꞌ xupak, tuk kuxa yũmmũg. Hõmã ꞌãxop hak mõg ꞌohnãg. ꞌÃtep-tupꞌah ꞌãxop mãnõg, huk mõg ꞌohnãg ꞌãxop ha kõmẽn Konĩn tuꞌ.
\v 24 ꞌŨgmũꞌãteꞌ yũmmũg ꞌãkuxa mãm Yeyox kopah, yĩy tak mũꞌãte xe ꞌãxop mõgãp-tupꞌah, xayĩy ꞌãkuxa mãm kaꞌok, pa yũmũꞌãtep-tup, nũy ꞌãxop pu hãmyũmmũgãꞌ, xayĩy ꞌãkuxa hittup.
\c 2
\p
\v 1 Yã ꞌãte hãmpekpaxex ꞌa ꞌãxop hak mõg putupꞌah, nũy ꞌãxop mãnõg hok. Yã ꞌãtep-tupꞌah ꞌãkuxa hittup ꞌohnãg.
\v 2 ꞌÃte ꞌãxop kuxa hittup ꞌohnãg mĩy, kopxix ꞌũgkuxa hittup ꞌohnãg kamah. Tep-te ꞌũgkuxa hittupmãp-tup? Yã ꞌãxop teꞌ, pa ꞌãkuxa hittup ꞌohnãg.
\v 3 Hõmã ꞌãte ꞌãxop pu tappet kaxꞌãmi, pa ꞌãxop hak mõg ꞌohnãg, nũy ꞌãxop mãnõg hok, pa ꞌãte ꞌãxop mãnõg tappet tuꞌ. Pax ꞌãxop hak mõg, kopxix ꞌõg hãpkummuk mĩyꞌax pẽnãꞌ, nũy ꞌũgkuxa hittup ꞌohnãg. Pa ꞌãxop tek kuxa hittupmãhãꞌ, puꞌ max. ꞌÃteꞌ yũmmũg, ꞌũgkuxa hittup, ha ta ꞌãxop kuxa hittup kamah.
\v 4 Hõmã ꞌãte xa kaxꞌãmi, nũy ꞌõg hãpkummuk mĩyꞌax ꞌãktux, nũy ꞌãxop mãnõg, tuk kuxa hittup ꞌohnãg, tuk kuxa nõg, tuk pota punethok. ꞌA ꞌãte putupꞌah, nũy ꞌãkuxa hittup ꞌohnãg mĩy, pa ꞌãtep-tup, xayĩy ꞌãxop yũmmũg ꞌãte ꞌãxop putuppax.
\s Tik yõg hãpkummuk mĩyꞌax xaxok, haꞌ kux
\p
\v 5 Yã hõmã ꞌãte ꞌãxop pu tappet kaxꞌãmi, nũy ꞌãxop pu hãmꞌãktux hu: “ꞌÃpu tik yõg hãpkummuk mĩyꞌax hã yãnãn, nõm teꞌ tut mũtiꞌ nõm, nõm te ꞌãxop kopaꞌ xip”. Kaxĩy. Yãꞌ xip ꞌãxop kopah, ha ꞌãxop kummugã miax. Yã nõm tik xipꞌah ꞌũgmũtik, hu ꞌãte nõm kummugã ꞌohnãg.
\v 6 Pa ꞌãxop xohix teꞌ yãnãn. Puxix. ꞌŨkux.
\v 7 ꞌÃpu ꞌũxaxogãꞌ, pu tu kux. ꞌÃpu tik kuxa hittupmãꞌ, puyĩy ꞌũkuxa tuknõg xexka hok, nũy Topa yõg putat max xak hok.
\v 8 ꞌÃpu tik pu hãmꞌãktux ꞌãxop teꞌ putuppax.
\v 9 Texĩy ꞌãte xa tappet kaxꞌãmiꞌ? Yã ꞌãtep-tup, nũy ꞌõg hãxopmãꞌax kopit. ꞌOk ꞌãxop teꞌ mĩy ꞌãte nõm xat? ꞌOk ꞌãxop te tik yõg hãpkummuk mĩyꞌax yãnãn putup? ꞌOk ꞌãxop teꞌ xaxok putup, pu tuꞌ kux?
\v 10 Yã ꞌãxop te tik yõg hãpkummuk mĩyꞌax xaxok, haꞌ kux, ha ꞌãteꞌ xaxok kamah, haꞌ kux. Tik te ꞌũgkummugã ꞌohnãg, pa ꞌãteꞌ xaxok, haꞌ kux. ꞌÃte Kunnix pu nõm ꞌãktux, ꞌãxop teꞌ xaxok hah. Yã ꞌãxop te tik pu hãmꞌãktux ꞌãxop teꞌ xaxok.
\v 11 Yũmũꞌãteꞌ xaxok, puyĩy Hãmgãyãgnãg xut hok, pa yũmũꞌãteꞌ xut. Hamũn yũmũꞌãteꞌ yũmmũg Hãmgãyãgnãg tep-tup, nũy tik koxyõy.
\s Paot kuxanõg, hu taꞌ mõg
\p
\v 12 Hõmãg mõg kõmẽn Tonot tuꞌ, tu mõktuk xupep, tu Kunnix yõg hãmꞌãpak maxꞌax ꞌãktux, tuꞌ yũmmũg Topa tep-tup ꞌãte Topa pu hãpxopmã ꞌõnteh, nũy Topa yõg hãmꞌãpak maxꞌax ꞌãktux.
\v 13 Pak kuxanõg, ꞌãte yũmũg taknõy Tit xipix ꞌohnãg tuꞌ, huꞌ kuxa mãm kaꞌok xop pu hãm ꞌãktux hu: “ꞌŨgmõg.” Kaxĩy. Hu tak mõg hãpxexka Mãxenõn tuꞌ.
\s Topa yõg hãmꞌãpakmaxꞌax ꞌãktux max
\p
\v 14 Yãꞌ max Topah. Xonat xop mõg, tu mõktu xonat puknõg xop mũtik yãykix xix tikmũꞌũn mũtik, tuꞌ xut, tuꞌ pop xonat puknõg xop xix tikmũꞌũn, tu nõm nũnnãhãꞌ, tu nũktuꞌ mõxahaꞌ. Haꞌ xape xop teꞌ pẽnãhã, tuꞌ yũmmũg xonat xop kaꞌok. Hã kaxĩy Topa te yũmũg mĩy yãy yõg xop, ha tikmũꞌũn teꞌ pẽnãhãꞌ, ꞌũkaꞌok Topah. Ha taꞌ hax max te hãpxumãhãꞌ. Hã kaxĩy tikmũꞌũn te xohix nõy nãꞌ mõg nõm teꞌ yũmmũg ꞌũmax Topah.
\v 15 Ha ta ꞌãmãnex xop teꞌ puk kõnnõn kugõy hax max yõg, ha hax max mõg pepix Topa tuꞌ hãptox tuꞌ. Hã kaxĩy yũmũꞌãte tikmũꞌũn pu Kunnix ꞌãktux, ha mõktu tikmũꞌũn xohix te Kunnix yũmmũg hãptox tuꞌ. Yã yũmũꞌãte xohix pu Kunnix ꞌãktux, yãꞌ kuxa kummuk xit xop puꞌ, xiꞌ kuxa kummuk xit hok xop puꞌ.
\v 16 Pa yã hax max ꞌohnãg ꞌũkuxa kummuk xit hok xop puꞌ, yã hax kummuk, yã xok kutox hax putuk, pa yã hax max ꞌũkuxa kummuk xit xop puꞌ, tu nõm hĩnnãhãꞌ. Yũmũꞌãte hax max putuk. ꞌOk yũmũg max, nũy hax max putuk?
\v 17 ꞌŨgmũꞌãte Topa yõg hãmꞌãpak max ꞌãktux, yãꞌ max Topa yõg hãmꞌãpak, tu hãpxop takat putuk. Yũmũꞌãte tikmũꞌũn putuk ꞌohnãg, nõm te Topa yõg hãmꞌãktux ꞌãktux kummuk, tu hãpxop tamanat hãmenex putuk. Pa Topa te yũmũg mõkpok, kopxix hãmꞌãktux, ha tikmũꞌũn teꞌ xupak, ha Topa teꞌ xupak kamah. Yũmũꞌãte hãpxeꞌe ꞌãktux. Yũmũg yã Kunnix yõg kãmãnat.
\c 3
\s Topa yõg paꞌax tup
\p
\v 1 ꞌÃxop te putep mũn peꞌãpaxex? ꞌÕk ꞌũgmũꞌãte yãy xexka ꞌãktux? ꞌÃmhok. Õk ꞌũgmũꞌãte tik nõy putuk? ꞌÃmhok. Yã tik tep-tup, puyĩy tikmũꞌũn tappet kaxꞌãmiꞌ. Tappet te: “ꞌŨmax tihik nũhũꞌ. ꞌÃpu nõm ꞌãpax!” Kaxĩy. ꞌOk ꞌũgmũꞌãtep-tup tappet te kaxĩy, ꞌãxop te nõm kaxꞌãmiꞌ peꞌ nõy teꞌ kaxꞌãmiꞌ? ꞌÃmhok. ꞌÃtep-tupꞌah.
\v 2 Tikmũꞌũn te nõm tappet mõkupix, tuꞌ yũmmũg, ꞌũmax tihik. Hã kaxĩy tikmũꞌũn xohix te ꞌãxop pẽnãhãꞌ, tuꞌ yũmmũg, ꞌãte ꞌãxop pu hãmyũmmũgã max, yã ꞌũgkuxa max.
\v 3 ꞌŨnõy te tappet kaxꞌãmiꞌ, hak mũꞌãteꞌ mõgãhã tikmũꞌũn tuꞌ. Hã kãxĩy Kunnix tek mũg pu hãm yũmmũgãhãꞌ, hak mũꞌãte tikmũꞌũn pu nõm yũmmũgãhãꞌ. Hõmã tikmũꞌũn te pipkup xox hã kaxꞌãmi mĩkaxxap pe yĩmũꞌ. Hã kaxĩy Topa Koxuk te tikmũꞌũn kuxa maxnãhãꞌ, puyĩy hãpxopmã max.
\p
\v 4 ꞌŨgmũꞌãte hãpxeꞌe ꞌãktux nõꞌõm, yã ꞌũgmũg kuxa mãm xeꞌe Topa kopah, yã ꞌũgmũg kuxa mãm Kunnix kopah.
\v 5 ꞌŨgmũg kaꞌok ꞌohnãg, tuꞌ yũmmũg ꞌohnãg Topa pu hãpxopmãꞌ, nũy Topa yõg hãmꞌãpak maxꞌax ꞌãktux. Pa Topa tek mũg kaꞌogãhãꞌ, ꞌũyĩy Topa pu hãpxopmãꞌ.
\v 6 Tutek mũg kaꞌogãhãꞌ, ꞌũyĩy tikmũꞌũn pu Topa yõg paꞌax tup yũmmũgãꞌ. Topa yõg paꞌax tup te Topa yõg xatꞌax putuk ꞌohnãg. Topa yõg paꞌax tup kaxꞌãmi ꞌohnãg tappet tuꞌ. Pa Topa Koxuk te yũmũꞌã hãmyũmmũgãhãꞌ. Topa yõg xatꞌax te hãmꞌãktux ꞌũkummuk tikmũꞌũn, yĩy taꞌ xakix tikmũꞌũn. Pa Topa Koxuk te tikmũꞌũn kuxa maxnãhãꞌ, tu tikmũꞌũn mĩy Topa yõg tikmũꞌũn, yã tikmũꞌũn hĩnnãhãꞌ.
\p
\v 7 Hõmã ꞌũhittap ꞌũkaxꞌãmi Topa yõg xatꞌax mĩkaxxap pe yĩmũꞌ pipkup xox hã, ha tikmũꞌũn teꞌ pẽnãhã yãꞌ max xeꞌẽgnãg Topah. Ha taꞌ xip Mõyyex, ha tikmũꞌũn teꞌ pẽnãhã Mõyyex pa yĩn max xeꞌẽgnãg, pa hãpxip ꞌĩhã Mõyyex pa yĩn max xeꞌẽgnãg kutõgnãg nõy nãꞌ mõg. Tikmũꞌũn pa te mãyõn yãnãm tot ꞌohnãg. Hã kaxĩy tikmũꞌũn te Mõyyex pa yĩn pẽnã tot ꞌohnãg. Hã kaxĩy Topa te yãy yõg xatꞌax popmãhãꞌ. Topa yõg xatꞌax te hãmꞌãktux tikmũꞌũn ꞌũkummuk, tuꞌ xakix putup. Topa teꞌ xatꞌax popmãhãꞌ, ha tikmũꞌũn teꞌ pẽnãhã ꞌũmax xeꞌẽgnãg Topah. Hã kaxĩy ꞌũmax xeꞌẽgnãg Topa te yãy xatꞌax popmãhãꞌ,
\v 8 paꞌ max xeꞌẽgnãgnãm Topa Koxuk te tikmũꞌũn mĩy Topa yõg tikmũꞌũn.
\v 9 Topa yõg xatꞌax te hãmꞌãktux ꞌũkummuk tikmũꞌũn, paꞌ max xeꞌẽgnãg Topa yõg xatꞌax, paꞌ max xeꞌẽgnãg Topa Koxuk te tikmũꞌũn kuxa kummuk xit, nũy ꞌũyãnãn tuꞌ max tat.
\v 10 Yãꞌ max xeꞌẽgnãgnãm hõnhã. Hõmã yãꞌ max xeꞌẽgnãg, paꞌ nõg.
\v 11 Hãmyãxatamuk xohix hãꞌ pip ꞌũxatꞌax, tuꞌ max xeꞌẽgnãg, paꞌ nõg. Pa hãmyãxatamuk xohix hãꞌ max xeꞌẽgnãgnãm hõnhã!
\p
\v 12 ꞌŨgmũg kuxa mãm Topa yõg paꞌax tup kopah, huk mũg nõm ꞌãktux kaꞌok, tuk mũg kuxanõg ꞌohnãg.
\v 13 ꞌAp Mõyyex putukꞌah ꞌũgmũꞌãteꞌ. Mõyyex te yãy pa yĩn mõꞌnĩy topixxax hã, puyĩy ꞌIyaet yõg tikmũꞌũn pẽnã hok ꞌũpa yĩn teꞌ max xeꞌẽgnãg kutõgnãg nõy nãꞌ mõg, tu mõktuꞌ nõg.
\v 14 Yã ꞌIyaet yõg tikmũꞌũn te nõm putuk. Hõmã xix hõnhã ꞌIyaet yõg tikmũꞌũn teꞌ mõkupix Topa yõg paꞌax hittap yõg tappet, tuꞌ pa te hãmyũmmũg ꞌohnãg, yã topixxax teꞌ pa yĩn mõꞌnĩy putuk, yĩy ta hãm yũmmũg ꞌohnãg. Ha ta tik kuxa mãm Kunnix kopah, tuꞌ tihi Kunnix mũtik, huꞌ pa pip, tu hãmyũmmũg, ha ꞌap xipꞌah topixxax putuk, yã ꞌũpa mõꞌnĩyꞌax xip ꞌohnãg. Yã hãmyũmmũg.
\v 15 Hõnhã ha taꞌ pip Yoneo xop, tuꞌ mõkupix Topa yõg xatꞌax yõg tappet. Mõyyex te nõm kaxꞌãmiꞌ, pa tikmũꞌũn pa te hãmyũmmũg ꞌohnãg, yã topixxax teꞌ pa mõꞌnĩy putuk.
\v 16 Pa Topa tappet te Mõyyex ꞌãktux, hu: “Tute yõkanãm, nũy yũmũg xuxyã pẽnãꞌ, haꞌ xut topixxax ꞌũpa yĩn tuꞌ”. Kaxĩy. Hã kaxĩy Topa te tikmũꞌũn yõg hãpkummuk mĩyꞌax mõy, ha tikmũꞌũn te hãmyũmmũg.
\v 17 Yã Topa yõg tappet te: “Yũmũg xuxyãꞌ”. Kaxĩy. Yã Topa Koxuk. Topa Koxuk xip tikmũꞌũn mũtik, puxix tikmũꞌũn kuxa kummuk xit.
\v 18 Topa ꞌũmax xeꞌẽgnãg, ha hõmã Mõyyex te Topa mũtik hãmꞌãktux, yĩy taꞌ max xeꞌẽgnãg Mõyyex paꞌ. Hã kaxĩy yũmũg xuxyã Topa Koxuk max xeꞌẽgnãg, tuꞌ nũn tu nũktu yũmũg kuxa tupmã nõy nãꞌ mõg.
\c 4
\s Nax takat ꞌohnãg te hãpxop max xeꞌẽgnãg tat
\p
\v 1 Topa tek mũg pẽnãhãꞌ, tuk mũg kuxa kaꞌ, tuk mũg xat, ꞌũyĩy tikmũꞌũn pu Topa yõg paꞌax yũmmũgãꞌ, yĩy tak mũg kuxanõg ꞌohnãg.
\v 2 ꞌŨgmũꞌãte hãpkummuk mĩyꞌax xohix xaptopꞌax kux, nũy yãyhãhup hok, huꞌ koit ꞌohnãg, tuk mũꞌãte Topa yõg hãmꞌãpak maxꞌax ꞌãktux max, tuꞌ koit ꞌohnãg ꞌũgmũꞌãteꞌ, pak mũꞌãte hãpxeꞌe ꞌãktux, ha tikmũꞌũn teꞌ xupak, ha Topa teꞌ xupak kamah, ha tikmũꞌũn te yãy kuxa kopaꞌ yũmmũg ꞌũgmũꞌãte hãpxeꞌe ꞌãktux, tuꞌ yũmmũg ꞌũgmũꞌãte hãpxopmã max.
\v 3 ꞌŨgmũꞌãte Topa yõg hãmꞌãpak maxꞌax ꞌãktux. ꞌŨkuxa mãm hok xop pa te Topa yõg hãmꞌãpak maxꞌax yũmmũg ꞌohnãg, paꞌ nõy xop teꞌ yũmmũg.
\v 4 Teptu ꞌũkuxa mãm ꞌohnãg? Yã Hãmgãyãgnãg, yã nõm te hãm xexka yõg tikmũꞌũn xat, tu tikmũꞌũn putox kaꞌogãhãꞌ, puyĩy tikmũꞌũn Topa yõg hãmꞌãpak maxꞌax ꞌãpak kummuk, xix Yeyox max xeꞌẽgnãg ꞌãpak kummuk xix Topa max xeꞌẽgnãg yũmmũg ꞌohnãg. Hamũn, Yeyox te Topa putuk xeꞌeꞌ.
\v 5 ꞌŨgmũꞌãte yãy ꞌãktux ꞌohnãg, pak mũꞌãte Yeyox Kunnix ꞌãktux nõm te tikmũꞌũn xat, tuk mũꞌãte hãmꞌãktux ꞌũgmũꞌãte ꞌãxop pu hãpxopmãhãꞌ, yã Yeyox te nõm putup.
\v 6 Hõmã Topa te: “Pu yã xip kũyãnãm, puyĩy nõãꞌ hãpkoxtap”. Kaxĩy. Topa teꞌ mĩy kama kũyãnãm putuk yũmũg kuxa kopah, yã yũmũg kuxa tupmãhãꞌ. Yã yũmũg kuxa tup, kopxix yũmmũg ꞌũmax xeꞌẽgnãg Topah, tu Kunnix pa max yũmmũg kamah.
\p
\v 7 Yã hãpxop xohix max xeꞌẽgnãg pip yũmũg kopah, pa yũmũg max ꞌohnãg, yã takat ꞌohnãg putuk. Yãꞌ nax putuk, yã nax te hãpxop max xeꞌẽgnãg tat, paꞌ puꞌuk nax, tuꞌ takat ꞌohnãg. Tikmũꞌũn te yũmũg pẽnãhãꞌ, tuꞌ yũmmũg Topa ꞌũkaꞌoknãm, pa yũmũg puꞌuk, yã nax putuk.
\v 8 Tikmũꞌũn kummuk te yũmũg kuteꞌex, pa yũmũꞌãte hãpxopmã max kux ꞌohnãg. Hãpxip ꞌĩhã yũmũg kuxa mãm puꞌuk, pa yũmũg kuxa mãm kux ꞌohnãg.
\v 9 Tikmũꞌũn punethok te yũmũg tuꞌ gãy, pa yũmũg xape pip. Yũmũg xũy, pa yũmũg kuxa mãm kux ꞌohnãg.
\v 10 Yũmũg xakix kõmnãg punethok, yã Yeyox putuk, puyĩy tikmũꞌũn pẽnãꞌ Yeyox mõg yũmũg mũtik.
\v 11 Hãpkummuk pip, ha yũmũ yõg hãmyãxatamuk tox hã yũmũg xakix kõmnãg, tu Yeyox pu hãpxopmã max, puyĩy tikmũꞌũn pẽnãꞌ Yeyox mõg yũmũg mũtik. Yũmũg xakix putup, pa Yeyox hi hãmyãxatamuk xohix kux ꞌohnãg hã.
\v 12 ꞌŨgmũg xakix kõmnãg, xayĩy tu xa Topa yõg hãmꞌãpak maxꞌax ꞌãktux, xayĩy hi xeꞌẽgnãg mõkumaꞌãmõg, haꞌ kux ꞌohnãg.
\p
\v 13 Topa yõg tappet te: “ꞌŨgkuxa yũm, hu ꞌãte Topa yõg hãmꞌãpak maxꞌax ꞌãktux”. Kaxĩy. Topa Koxuk te yũmũg kuxa mãmmãhã kamah, ha yũmũg kuxa mãm, hu yũmũꞌãte Topa yõg hãmꞌãpak maxꞌax ꞌãktux.
\v 14 ꞌŨgmũꞌãteꞌ yũmmũg, hõmã Topa te yũmũg xuxyã Yeyox putpuꞌ hĩnnãhãꞌ, tuk mũg putpuk hĩnnãp-tup kamah, tuk mũg mõgãp-tup ꞌãxop mũtik Topa hah, tu mõktu yũmũg pip putup Topa keppah.
\v 15 Pa hõnhã ꞌũgmũg xũy, xayĩy ꞌãxop hãpxop max pop, ha Topa te tikmũꞌũn pu hãmmaxnãp-tup, ha nõm xohix nõynãp-tup, tu Topa pu hãmꞌãktux nõynãp-tup, tu Topa pu hãmꞌãktux, hu: “ꞌÃmax, xatek mũꞌã hãmmaxnãhãꞌ”. Kaxĩy. Ha Topa te yãy xexka mĩy nõynãꞌ mõg putup ꞌũkuxa kopah.
\s Yũmũꞌãtep-tuppax pepix pip xop Topa yõg
\p
\v 16 Yĩy tak mũg hup ꞌohnãg, tuk mũg kuxa nõg ꞌohnãg. ꞌŨgmũg yĩn puꞌuk nõynãꞌ mõg ꞌãmnĩy xohix ꞌĩhã, pa Topa te yũmũg kuxa kaꞌogãhã ꞌãmnĩy xohix ꞌĩhãꞌ.
\v 17 Yũmũg xũy kutõgnãg hõnhã nũnte hãm xexka tuꞌ, paꞌ nõg putup, ha hãpxip ꞌĩhãꞌ max xeꞌẽgnãg, tuꞌ kux putup ꞌohnãg pexkox tuꞌ. Yã hõnhã yũmũg xũy, yã hãpxop kutõgnãg, pa pexkox tuꞌ max xeꞌẽgnãg, yã hãpxop xexkaꞌ.
\v 18 Yũmũꞌãtep-tup ꞌohnãg hãm xexka yõg hãpxop tikmũꞌũn te nõm pẽnãhãꞌ, pa yũmũꞌãtep-tuppax pepix pip xop Topa yõg tikmũꞌũn te nõm pẽnã ꞌohnãg. Yã hãmpẽnã xop ꞌũnõg putup, pa hãmpẽnã ꞌohnãg xop pip mõkumaꞌ mõg hãmyãxatamuk xohix kux ꞌohnãg hã.
\c 5
\p
\v 1 Hamũn, yũmũꞌãteꞌ yũmmũg yũmũg pip yãy pet kopah. Hã kaxĩy yũmũg pip yãy yĩn kopa kamah nũnte hãm xexka tuꞌ. ꞌŨkpet nõg. Hã kaxĩy ꞌũkxok putup, yãg yĩn xok putup, puxix Topa yũmũꞌã ꞌũgyĩn nõy mĩy pexkox tuꞌ, ha yũmũg pip putup ꞌũgyĩn tup kopah, yã ꞌũkpet tup putuk. Topa mũn te nõm mĩy, haꞌ xip putup mõkumaꞌ mõg hãmyãxatamuk xohix kux ꞌohnãg hã.
\v 2 Pa hõnhã yũmũꞌãtep-tup xexka yãy pet pexkox tuꞌ, yã yũmũg yĩn tup putup, nũy nõm kopaꞌ piꞌ.
\v 3 Yũmũg pip putup yãy pet tup kopah, yã yũmũꞌãte mõꞌtat putup yãy yĩn tup, nũy yũmũg koxuk hok pipꞌah.
\v 4 Hõnhã yũmũg pip yãy pet kopah, yã yũmũg yĩn kopah, tu yũmũg kokõn. ꞌAp maxꞌah. ꞌA yũmũꞌãtep-tupꞌah yãy yĩn putyõn, pa yã yũmũꞌãtep-tup pexkox yõg pet, yã yũmũg yĩn tup putup. ꞌAp yũmũꞌãtep-tupꞌah yãy yĩn nõm xok putup, pa yã yũmũꞌãtep-tup yãy yĩn tup nõm xok putup ꞌohnãg. Yũmũg yĩn hittap xok putup, ha taꞌ pip putup yũmũg yĩn tup pexkox tuꞌ.
\v 5 Topa te yũmũg mĩy, ꞌũyĩy yũmũg yãy pet hãꞌ nõy yãnãn, yã yãy yĩn hãꞌ nõy yãnãn, hu Topa te yũmũꞌãꞌ hõm yãy Koxuk. ꞌŨxip Topa Koxuk, kopxix yũmũꞌ yũmmũg Topa te yũmũꞌã yũmũg yĩn tup popmãp-tup.
\p
\v 6 Hã kaxĩy yũmũg kuxa hittup. Yũmũꞌãteꞌ yũmmũg yũmũg pip yãy yĩn kopa nũnteh, pa yũmũg pip ꞌohnãg Topa pet kopa pexkox tuꞌ.
\v 7 Hamũn, ꞌa yũmũꞌãteꞌ pẽnãꞌah pexkox yõg hãpxop, pa yũmũg kuxa mãm kaꞌok, hu hãmyũmmũg.
\v 8 Yũmũg kuxa hittup xexkaꞌ, tup-tup, nũy xok, yã yãy yĩn nĩm, nũy pet nõy paꞌ, yã yãy yĩn tup paꞌ, nũy Topa mũtik piꞌ.
\v 9 Pa yũmũꞌãtep-tup, nũy Topa kuxa hittupmãꞌ, pe yũmũg pip yãy yĩn kopah, pe yũmũg pip yãy yĩn tup kopa pexkox tuꞌ.
\v 10 Hãpxip ꞌĩhã yũmũg xohix mõg putup, nũy Kunnix keppak piꞌ, ha tute yũmũ yõg hãpxopmãꞌax kopit putup yũmũꞌãte nõm mĩy nũnte hãm xexka tuꞌ, ha yũmũg xohix teꞌ pop putup yãy yõg hãpxop. Yũmũꞌãte hãpxopmã kummuk nũnte hãm xexka tuꞌ, kopxix hãpxop kummuk pop putup. Pa yũmũꞌãte hãpxopmã max nũnteh, kopxix hãpxop max pop putup.
\s Topa xape xop
\p
\v 11 Yũmũꞌãte Topa yĩpkutuk yũmmũg, hu yũmũꞌãte tikmũꞌũn xapit, puyĩy Topa yõg putat hã mõg. Topa te yũmũg yũmmũg xeꞌeꞌ. ꞌÃtep-tup, xayĩy ꞌãxop ꞌũgmũg yũmmũg kama ꞌãkuxa kopah.
\v 12 ꞌAk mũꞌãtep-tupꞌah, nũy xa yãy ꞌãktux ꞌũxeheh, xayĩy ꞌãxop ꞌũgmũg putup. Pak mãꞌãtep-tup, xayĩy ꞌãxop ꞌũgmũ yõg hãpxopmãꞌax max yũmmũg, xayĩy ꞌãxop ꞌũgmũg ꞌãktux max. ꞌŨgmũꞌãtep-tup, xayĩy ꞌãxop tikmũꞌũn pu hãmꞌãktux max yũmmũg nõm te hãptopa pẽnãhãꞌ, paꞌ kuxa yũmmũg ꞌohnãg.
\v 13 Pa ꞌãte yãy xexka ꞌãktux, kopxik putox kummuk putuk. Pa ꞌãte yãy xexka ꞌãktux, nũy Topa ꞌãktux max. Pa ꞌũkputox max putuk, kopxix ꞌũp-tup, xa hãmmaxnãꞌ.
\v 14 Kunnix te yũmũg putuppax, yĩy yũmũꞌãte hãpxopmã max. Hamũn, yũmũꞌãteꞌ yũmmũg tik puxet teꞌ hep xop xohix pupiꞌ xok, yã tikmũꞌũn xohix ꞌũkummuk, huꞌ xakix.
\v 15 Kunnix teꞌ hep xop xohix pupiꞌ xok, puyĩy tikmũꞌũn yãy pu hãpxopmã pax hok, pa Kunnix pu hãpxopmãꞌ. Tute nõm pupiꞌ xok, tu putpuꞌ hiꞌ.
\p
\v 16 Tikmũꞌũn te Kunnix yõg hãpxopmãꞌax kopit mõꞌkaꞌok, yã hãmpeꞌpaxex kutõgnãg, tu hãmꞌãktux mõꞌkaꞌok, hu: “Kunnix ꞌũkummuk”. Kaxĩy. Yã yũmũg putuk hõmã. Yã hõmã yũmũꞌãte Kunnix yõg hãpxopmãꞌax kopit mõꞌkaꞌok kamah. Pa hõnhã ꞌap kaxĩyꞌah. Yã ꞌãte Kunnix yũmmũg xeꞌeꞌ.
\v 17 Tikmũꞌũn ꞌũm kuxap-xet Kunnix kuxa mũtik, yã tikmũꞌũn kuxa tup. Hãpxop kummuk xohix ꞌũhittap nõg, pa hõnhã ꞌũtup hãpxop xohix, yã hiꞌax tup, tuꞌ max.
\v 18 Yã Topa te hãpxopmã xohix te kaxĩy. Hõmã yũmũg ꞌũgãy xop, tu Topap-tup nõg. Pa Topa te nũꞌkutnãhã Kunnix, tu nõmhã yũmũg mĩy Topa xape xop, tu mõ yũmũg pok, ꞌũyĩy hep xop xohix mĩy Topa yõg xape xop.
\v 19 Yũmũꞌãte tikmũꞌũn pu hãmꞌãktux Topa te Kunnix mũtik tikmũꞌũn xohix mĩy Topa xape xop, tu tikmũꞌũn yõg hãpkummuk mĩyꞌax xaxok, pu tuꞌ kux.
\p
\v 20 ꞌŨgmũꞌãte Kunnix pu hãpxopmã max, tuk mũꞌãte Kunnix ꞌãktux, yã Topa tek mũꞌãꞌ hõm yãy ꞌãxetꞌax, ꞌũyĩy hãmꞌãktux max, tuk mũꞌãte ꞌãxop xãnãhãꞌ. ꞌŨgmũꞌãte Kunnix mũtik ꞌãxop xãnãhãꞌ. ꞌÃpu ꞌũtux hok, puyĩy Topa ꞌãxop mĩy Topa xape xop, yã ꞌãxop gãy tuꞌ kux.
\v 21 Kunnix te hãpkummuk mĩy ꞌohnãg. Pa Topa tep-tup, yĩy Kunnix te yũmũ yõg hãpkummuk mĩyꞌax tat, tu yũmũg pupiꞌ xok, ꞌũyĩy yũmũg yãyhãk max xeꞌẽgnãg Topa keppah, tu yũmũg kuxap-xet Kunnix kuxa mũtik.
\c 6
\p
\v 1 ꞌŨgmũꞌãte hãpxopmã max Topa mũtik, tu ꞌãxop pu hãmꞌãktux, hu: Hõmã Topa te ꞌãxop pu hãmmaxnãhãꞌ. ꞌÃpu hãpxopmã hitop hok hõnhã. Kaxĩy.
\v 2 Topa te hãmꞌãktux. ꞌÃpu ꞌũxupax. Topa te: “Nõmhã ꞌãmnĩy max xupep. ꞌÃte ꞌãxop ꞌãpak nõmhã. ꞌÃtep-tup nõmhã, nũy ꞌãkuxa kummuk xit, nũy ꞌãxop hãg tehet”. Kaxĩy. ꞌŨxupax. Topa tep-tup, nũy ꞌãxop pu hãpxopmã max. ꞌÃpu nõm pop, puyĩy Topa ꞌãkuxa kummuk xit, nũy ꞌãkuxa max tat, ꞌũyãnãn tuꞌ.
\p
\v 3 ꞌŨgmũꞌãte Topa pu hãpxopmã max, tuk mũꞌãtep-tupꞌah hãpkummuk mĩy. Tikmũꞌũn teꞌ xak putup, pak mũ yõg hãpkohe xipip-tupꞌah.
\v 4 Pak mũꞌãtep-tup, nũy hãmmax mĩy xohix, puyĩy tikmũꞌũn pẽnãꞌ, tuꞌ yũmmũg ꞌũgmũg yã Topa yõg kãmãnat. ꞌŨgmũꞌãte hãmmax mĩy, tu hãpkummuk hã tot, xix hãpkuteꞌex kummuk hã tot, xik xũy hã tot.
\v 5 Yã tikmũꞌũn tek mũg kix xikot hã, tuk mũg xex kanet kaꞌok kopah, tu tikmũꞌũn xohix te yãy tu nũꞌnãhãꞌ, nũy ꞌũgmũg kuteꞌex kummuk, hak mũꞌãte Topa pu hãpxopmã punethok, tu mõgyõn kutõgnãg, tuk mũg xit kutĩgnãg.
\v 6 ꞌŨgmũꞌãte hãpxeꞌe mĩy, tu hãmyũmmũg, tu tikmũꞌũn pu hãmmax mĩy, yĩy tikmũꞌũn teꞌ yũmmũg ꞌũgmũg yã Topa yõg kãmãnat. Topa Koxuk xip ꞌũgmũtik, hak mũꞌãte Topap-tuppax xix tikmũꞌũn putuppax, ha Topa ꞌũkaꞌok, tuꞌ xip ꞌũgmũg mũtik, yĩy tikmũꞌũn teꞌ yũmmũg ꞌũgmũg yã Topa yõg kãmãnat.
\v 7 ꞌŨgmũꞌãte hãpxopmã xeꞌeꞌ. Hã kaxĩy ꞌũgmũꞌãte Hãmgãyãgnãg kummugãhãꞌ, ha Hãmgãyãgnãg tek mũꞌã kummugã ꞌohnãg.
\v 8 Tikmũꞌũn yãg tek mũg ꞌãpak, paꞌ yãg tek mũg ꞌãpak ꞌohnãg. ꞌŨyãg tek mũg ꞌãktux kummuk, pa yã yãg nõy tek mũg ꞌãktux max. ꞌŨyãg te hãmpeꞌpaxex ꞌũgmũꞌãteꞌ koit, paꞌ yãg nõy te hãmpeꞌpaxex ꞌũmũꞌãteꞌ koit ꞌohnãg.
\v 9 Tikmũꞌũn tek mũg yũmmũg ꞌohnãg putuk, pa tikmũꞌũn xohix tek mũg yũmmũg. Tikmũꞌũn te hãmpeꞌpaxex ꞌũgmũg xakix putũmnãg, pa yãg mũg hiꞌ. Tikmũꞌũn tek mũg kix mĩm topnãg hã, pak mũg xakix ꞌohnãg.
\v 10 ꞌŨgmũg xũy, pa yãg mũg kuxa hittuppax. ꞌŨgmũg yã hok xop, pak mũꞌãte tikmũꞌũn putexop xexkanãhã putuk. Yũmũ yõg hãpxop pip ꞌohnãg putuk, pa yã hãpxop xohix yũmũ yõg, yã Topa yõg hãpxop.
\p
\v 11 ꞌŨkxape xop kõmẽn Konĩn tuꞌ, ꞌũgmũꞌãte ꞌãxop pu hãmꞌãktux punethok, nũy xaꞌ xuktux hãpxop xohix ꞌũgmũg kuxa kopah.
\v 12 ꞌŨgmũꞌãte yãy kuxa yõg hãpxop ꞌãktux. Yã xate yũmũg yũmmũg. Pa ꞌãxop tep-tup, nũy yãy kuxa yõg hãpxop ꞌãktux hok, hak mũꞌãteꞌ yũmmũg ꞌohnãg ꞌãxop kuxaꞌ.
\v 13 ꞌÃte ꞌãxop pu hãmꞌãktux, yã yãy kutok pu hãmꞌãktux putuk. ꞌÃte yãy kuxa yõg hãpxop ꞌãktux. ꞌÃpu xuktux kama ꞌãkuxa yõg hãpxop ꞌũgmũg putuk.
\s ꞌŨkummuk xop nĩm
\p
\v 14 ꞌÃpu kuxa mãm hok xop mũtik ꞌãmõg hok. ꞌAp maxꞌah. Texĩy max xop mõg ꞌũkummuk xop mũtik? ꞌAp mõgꞌah, yãꞌ maxꞌah. Texĩy kuyãnãm xip hãpkoxtap kopah? ꞌÃmhok. ꞌŨxip kuyãnãm, puxix tuꞌ nõg hãpkoxtap.
\v 15 Texĩy Kunnix mõg Hãmgãyãgnãg mũtik? ꞌAp mõgꞌah, yãꞌ maxꞌah. Texĩy kuxa mãm xop te kuxa mãm hok xop hãꞌ xapeꞌ? Yã ꞌap xapeꞌah.
\v 16 ꞌOk max tikmũꞌũn te Topa pet haꞌ mõg xix topa komut pet haꞌ mõg kamah? ꞌAꞌ maxꞌah. Yã Topa te:
\q “ꞌŨkxip putup yãy yõg tikmũꞌũn mũtik, tu nõm xop kopak xip putup.
\q ꞌŨgmũn yã nõm yõg Topah, ha nõm yã yõgnũ tikmũꞌũn.” Kaxĩy.
\q
\v 17 Topa te xe:
\q “ꞌÃpu kummuk xop nĩm, nũy mõg.
\q ꞌÃpu xupxet xop nĩm,
\q ha ꞌãte ꞌãxop pop putup,
\q
\v 18 nũy ꞌãxop hã ꞌõg ꞌãtak ꞌũgmũn,
\q hak-tok pit xik hex ꞌãxop.
\q Hã kaxĩy hãmꞌãktux Topa, nõm te hãpxop xohix mĩy yũmmũg.”
\q Kaxĩy.
\c 7
\p
\v 1 ꞌŨkxape max xop, Topa te yũmũꞌã hãpxop xohix ꞌãktux xex. ꞌÃpu yũmũ hãpkummuk mĩyꞌax kux, puyĩy Topa yũmũg kuxa pix, tu yũmũg putupꞌax kummuk nõãꞌ. ꞌÃpu yũmũ hãmmãynãg mĩy, nũy Topa ꞌãpax max.
\s ꞌŨkuxa hittup Paot
\p
\v 2 Pu yã ꞌãkuxa ꞌũkxax. ꞌŨgmũꞌãte tikmũꞌũn kummugã ꞌohnãg, tu tikmũꞌũn koxyõy ꞌohnãg, tu tikmũꞌũn yõg hãpxop pop ꞌohnãg.
\v 3 ꞌA ꞌãte hãmꞌãktuxꞌah ꞌãxop kummuk. Pa hõmã ꞌãte hãmꞌãktux, xix hõnhã hãmꞌãktux ꞌãte ꞌãxop xak, yã hõnhã ꞌãxop xak, xix pexkox tu ꞌãxop xak putup kamah.
\v 4 ꞌŨgkuxa yũm ꞌãxop kopah, tu hãmpekpaxex ꞌãxop max. Yõgnũ hãpkummuk pip, pak kuxa yũm, tuk kuxa hittup xexkaꞌ.
\p
\v 5 Hõmãg mũg mõg hãpxexka Mãxenõn tuꞌ, tu mõktuk mũg mõxahaꞌ, hak mũ yõg hãpkummuk punethok pip, yã tikmũꞌũn tek mũg kuteꞌex kummuk, hak mũg kuxanõg.
\v 6 Pa Topa te tikmũꞌũn kuxa hittupmãhãꞌ, tuk mũg kuxa hittupmãhã kamah. Yã Tit nũn, nũy ꞌũgkuxa hittupmãꞌ.
\v 7 Yã Tit xupep, yĩg mũg kuxa hittup. Yã ꞌãxop max, yĩy Tit kuxa hittup, hu ꞌã nõm ꞌãktux, yĩg mũg kuxa hittup kamah. Tit te hãmꞌãktux ꞌãxop tek xak punethok, tu ꞌãxop te nõm tik kummuk tu yãyhãhup, tu ꞌãxop tep-tup punethok, nũy ꞌã hã ꞌãtehet.
\p
\v 8 Hõmã ꞌãte ꞌãxop mãnõg tappet hã, yĩy ꞌãxop kuxa hittup ꞌohnãg. Pa puxix, ꞌũmax tappet. ꞌOk peꞌ kummuk ꞌãkuxa hittup ꞌohnãg? ꞌÃmhok. Yãꞌ max. Yãꞌ max tappet.
\v 9 Hõnhã ꞌũgkuxa hittup. ꞌOk ꞌãkuxa hittup ꞌohnãg, ꞌũyĩg kuxa hittup? ꞌÃmhok. Pa ꞌãkuxa hittup ꞌohnãg, hu hãpkummuk mĩyꞌax kuxyãhãꞌ. Topa teptup ꞌãxop kuxa hittup ꞌohnãg, nũy hãpkummuk mĩyꞌax kuxyãꞌ.
\v 10 Yã Topa tep-tup ꞌãxop kuxa hittup ꞌohnãg, nũy hãpkummuk mĩyꞌax kuxyã, ha Topa te ꞌãkuxa kummuk xitꞌax. Yã hãmmax, ꞌãxop kuxa hittup ꞌohnãg, yãꞌ max. Pax xa kuxa hittup ꞌohnãg teꞌ kuxa mãm hok xop putuk, puxix tuꞌ kummuk. Yãꞌ kuxa hittup ꞌohnãg te tikmũꞌũn kix.
\v 11 Pẽnãꞌ, Topa te hãpxop max mĩy, ꞌĩhã ꞌãkuxa hittup ꞌohnãg. ꞌÃxop te hãmmax xak punethok, tup-tup punethok, pu tikmũꞌũn yũmmũg ꞌãxop te hãpxeꞌe mĩy. ꞌÃxop te hãpkummuk mĩyꞌax putup nõg xexkaꞌ, tu nõm hãpkummuk mĩyꞌax yĩpkutuk xexkaꞌ, tu ꞌãxop tek xak punethok. ꞌÃxop te nõm hãpkummuk mĩyꞌax yãnãn mõꞌkaꞌok, yã nõm tik kummuk yõg hãpkummuk mĩyꞌax yãnãn mõꞌkaꞌok. Tikmũꞌũn teꞌ yũmmũg ꞌãxop te hãpxeꞌe xohix mĩy.
\p
\v 12 Yã hõmã ꞌãte xa tappet kaxꞌãmi, xayĩy ꞌãxop yũmmũg ꞌãxop tek mũg putuppax, tu Topap-tuppax kamah. Hã kaxĩy ꞌãte xa tappet kaxꞌãmiꞌ. Nõm tik kummuk teꞌ tut mũtik nõm, tuꞌ tak pu hupmãhãꞌ. Pa hã kaxĩy ꞌãte xaꞌ kaxꞌãmi ꞌohnãg.
\v 13 Hõnhã ꞌũgmũg kuxa hittup.
\p Yã ꞌãxop te Tito kuxa hittupmãhãꞌ, yĩg mũg kuxa hittup punethok kamah.
\v 14 Hõmã ꞌãte Tit pu hãmꞌãktux ꞌãxop max. Hamũn, hõnhã ꞌãte hãmpekpaxex ꞌãxop max. ꞌŨgmũꞌãte ꞌãxop pu hãpxeꞌe ꞌãktux mõkumakmõg, tu Tit pu hãmꞌãktux ꞌãxop max.
\v 15 Ha Tit te ꞌãxop putuppax nõy nãꞌ mõg, tuꞌ yũmmũg ꞌãxop yĩpkox pip, tu Tit yõg hãmꞌãktux ꞌãpak, tuꞌ mĩy.
\v 16 ꞌŨgkuxa hittup, yã ꞌũgkuxa yũm ꞌãxop kopah.
\c 8
\s Tayũmak nĩm punethok
\p
\v 1 ꞌŨkxape xop, ꞌũgmũꞌãtep-tup, xayĩy ꞌãxop yũmmũg Topa te hãmmaxnãhã Yeyox kopa kuxa mãm xop pu hãpxexka Mãxenõn tuꞌ.
\v 2 ꞌŨyõg hãpkummuk punethok pip, nũy yõg kuxa mãmꞌax kopit, paꞌ kuxa hittup xexkanãm, tu tayũmak punethok popmãhãꞌ. Yãp-te xop kutõgnãg, paꞌ popmãhã ꞌũpunethok.
\v 3 Nõm teꞌ popmãhã tayũmak xohix yãy yõg, tu tehomiꞌ popmãhãꞌ. Yã ꞌũp-tup,
\v 4 tuk mũꞌã hãmꞌãktux, hu: “ꞌŨgmũꞌãtep-tup xexkaꞌ nũ tayũmak popmãꞌ Topa yõg tikmũꞌũn pu hãpxexka Yonex tuꞌ.” Kaxĩy.
\v 5 ꞌŨgmũꞌãte hãmpekpaxex, yãꞌ xohix popmãhãꞌ. Yãꞌ xohix, ha nõm te Topa pu yãy popmãhã hãmãxap, tuk-nãy tu ꞌũgmũꞌã yãy popmãhã kamah, ha Topa tep-tup.
\v 6 Tit te ꞌãxop hãꞌ teheꞌ, xayĩy tayũmak yãy tu nũꞌxoh, hak mũꞌãte Tit mũtik hãmꞌãktux, puyĩy xe ꞌãxop hã tu tehet, puyĩy tayũmak yãy tu nũꞌxo kux. ꞌÃxop teꞌ nõy putuppax, hu tayũmak popmãhãꞌ.
\v 7 ꞌÃxop yãp-te xop kutognãg, pap-te xop xexka putuk. Yã ꞌãxop kuxa mãm xexkaꞌ, tu hãmꞌãktux max yũmmũg, tu hãmyũmmũg xexkaꞌ, tuꞌ nõy hã ꞌãtepax xexkaꞌ, tuk mũg putuppax xexkaꞌ. ꞌÃpu tayũmak xohix popmã kamah.
\p
\v 8 ꞌÃte ꞌãxop xat ꞌohnãg, pa ꞌãtep-tup, nũy ꞌõg putuppaxꞌax kopit. Yã ꞌãxop teꞌ nõy putuppax, yã Yeyox putuk.
\v 9 ꞌÃxop teꞌ yũmmũg yũmũg xuxyã Yeyox Kunnix teꞌ nõy hãꞌ teheꞌ. Hõmã ꞌũhittap Yeyox ꞌũp-te xop xexka pexkox tuꞌ, paꞌ nũn hãm xexka tuꞌ, tu yãyhãp-te xop kutõgnãg, nũy yũmũꞌã hã tu tehet. Yeyox ꞌũp-te xop ꞌohnãg, pa yũmũp-te xop xexka mĩy, yã yũmũꞌã hãmmaxnãhãꞌ.
\p
\v 10 ꞌÃte hãmpekpaxex hã kaxĩy. Hõmã hãmyãxatamuk nõy ꞌĩhã ꞌãxop te tayũmak yãy tu nũꞌxoh kõnãmãhãꞌ. Hõnhã tayũmak yãy tu nũꞌxoh kux, puꞌ max. ꞌÃxop te tayũmak popmãhãꞌ, ha taꞌ nõy xohix teꞌ popmã ꞌohnãg. ꞌÃxop tep-tuppax, nũy tayũmak popmãꞌ.
\v 11 ꞌÃpu tayũmak yãy tu nũꞌxoh kux hõnhã. ꞌÃxop te tayũmak nĩm putuppax hãmãxap. ꞌÃpu tayũmak nĩm putuppax hõnhã, nũy nĩm kuxyã.
\v 12 ꞌÃxop te tayũmak nĩm pax, puxix Topa tep-tuppax ꞌõg nĩmꞌax. Paꞌ pip ꞌohnãg ꞌõg hãpxop, puxix Topa puꞌ max kamah.
\v 13 ꞌA ꞌãtep-tupꞌah, xayĩy ꞌãxop tayũmak xohix nĩm, paꞌ nõy teꞌ nĩm ꞌohnãg. Yãꞌ max ꞌũnõy te tayũmak nĩm kamah ꞌãxop putuk.
\v 14 Pa hõnhã ꞌõg hãpxop punethok pip. Yãꞌ max, ꞌãxop te nõm hã ꞌãtehet. Hãpxip, puxix tuꞌ pip ꞌohnãg ꞌõg hãpxop, puxiꞌ nõy ꞌãxop hãꞌ tep-tup, yãꞌ nõy yõg hãpxop punethok pip. Yã hã kaxĩy ꞌãxop te hãpxop hok nĩm putup, haꞌ nõy te hãpxop hok nĩm putup yãy putuk.
\v 15 Yã Topa yõg tappet te nõm ꞌãktux, hu:
\q “Tik teꞌ pop hãpxop xohix, pap-te xop xexka ꞌohnãg
\q Ha ta tik nõy teꞌ pop hãpxop tĩgnãg, pap hok xop ꞌohnãg.” Kaxĩy.
\s Tit xix yãy xape xop
\p
\v 16 ꞌÃte Topa pu hãmꞌãktux, hu: “Topa, ꞌãmax. Xate Tit pu hãm maxnãhãꞌ, ha tutep-tup tikmũꞌũn hãꞌ tehe ꞌũgmũn putuk”. Kaxĩy.
\v 17 Hamũn, hõmã ꞌãte Tit puꞌ xak, ha tutep-tup xexkaꞌ, nũy ꞌãxop hã tu tehet. Tutep-tup, hu ꞌãxop haꞌ mõg.
\v 18 ꞌŨgmũꞌãte taknõy mõkutnãp-tup Tit mũtik. Yeyox kopa kuxa mãm xop xohix te nõm putuppax, tu nõm ꞌãpak. Tute Topa yõg hãmꞌãpak maxꞌax ꞌãktux.
\v 19 Yeyox kopa kuxa mãm xop te nõm yãykutnãhãꞌ, puyĩg mũg mũtik mõg, nũy ꞌõg nĩmꞌax xop mõgãꞌ, nũy yũmũg xuxyã Yeyox ꞌũxexka mĩy, xayĩy ꞌãxop yũmmũg ꞌũgmũꞌãtep-tup xexkaꞌ, nũy ꞌãxop hãg tehet.
\p
\v 20 ꞌŨgmũꞌãtep-tup ꞌohnãg, puyĩy tikmũꞌũn hãmꞌãktux, hu: “Paot te tayũmak yãg hãꞌ xupxet”. Kaxĩy. Yã ꞌãtep-tupꞌah.
\v 21 Pak mũꞌãtep-tup, nũy hãpxeꞌe mĩy. Yã Topa teꞌ pẽnãhã xix tikmũꞌũn teꞌ pẽnãhã kamah.
\p
\v 22 ꞌŨgmũꞌãte taknõy mõkutnãhã ꞌũnõy mũtik. ꞌŨgmũꞌãte taknõy yõg hãpxopmãꞌax kopit punethok, huk mũꞌãteꞌ yũmmũg ꞌũmax, tup-tup xexka, nũy tikmũꞌũn hã tu tehet. Nõm taknõy kuxa yũm ꞌãxop kopah, hu ꞌãxop hã tep-tup xexkaꞌ.
\v 23 Tit yã yõgnũ kãmãnat, tu hãpxopmãhã ꞌũgmũtik, nũy ꞌãxop hã tu tehet. ꞌŨmõg putup ꞌũtaknõy xop Tit mũtik. Yãꞌ max ꞌũtaknõy xop. Yeyox kopa kuxa mãm xop te nõm mõꞌpok, nũy Kunnix puꞌ mĩy hãpxop max, nũy Kunnix ꞌãktux max.
\v 24 ꞌÃpu nõm putuppax, puyĩy Yeyox kopa kuxa mãm xop yũmmũg ꞌãxop te nõm putuppax, tuꞌ yũmmũg ꞌũgmũꞌãte ꞌãxop ꞌãktux max, tuꞌ koit ꞌohnãg.
\c 9
\s Tayũmak nĩm hãpxexka Yonex xop puꞌ
\p
\v 1 Yeyox kopa kuxa mãm xop xohix te hãpxexka Yonex yõg Yeyox kopa kuxa mãm xop puꞌ nĩm tayũmak, ha ꞌãte xe xa kaxꞌãmi putupꞌah.
\v 2 ꞌÃteꞌ yũmmũg ꞌãxop tep-tup, nũy tayũmak nõ ꞌã tehet, ha ꞌãte ꞌãxop ꞌãktux max hãpxexka Mãxanõn xop puꞌ. ꞌÃte: “ꞌÃxape xop hãpxexka Genex yõg xop tep-tup, nũy tayũmak nõm hã tu tehet. Yã hãmyãxatamuk puxet hã Genex xop tep-tup”. Kaxĩy. Ha Mãxanõn xop te nõm mõkupix, tu hõnhã tutep-tup, nũy tayũmak nĩm kamah.
\v 3 Hõnhã ꞌãte ꞌũtaknõy mõꞌpok ꞌãxop hah, nũy ꞌãxop ꞌãktux max hitop hok, pa ꞌãxop te tayũmak nĩm putup. Yã hã kaxĩy ꞌãte hãmꞌãktux hõmã.
\v 4 Pa Mãxanõn yõg xop mõg ꞌũgmũtik ꞌãxop hah, tuꞌ pẽnãhã ꞌãxop yõg tayũmak nĩmꞌax pip ꞌohnãg, kopxix ꞌũgyãyhãhup putup, xix ꞌãxop yãyhãhup putup kamah. Hamũn ꞌũgkuxa yũm ꞌãxop kopah.
\v 5 ꞌÃte hãmpekpaxex ꞌũmax ꞌũtaknõy xop mõꞌpok hãmãxap ꞌãxop hah, puyĩy ꞌõg tayũmak nĩmꞌax yãy tu nũꞌxoh, ꞌãxop te hãmꞌãktux xex, hak-nãy tu ꞌãxop hak mõg putup, tuk xupep putup, haꞌ pip ꞌõg tayũmak nĩmꞌax, ha tikmũꞌũn teꞌ pẽnãp-tup ꞌãxop tep-tup, huꞌ nĩm tayũmak, paꞌ nõy te ꞌãxop xat ꞌohnãg, puꞌ nĩm.
\p
\v 6 ꞌÃpu ꞌũxaxok hok, tikmũꞌũn te hãpxop xap xok tĩgnãg, puxix mĩnta ta tĩgnãg pop, pa tikmũꞌũn te hãpxop xap punethok xok, puxix mĩnta ta punethok pop putup. Hã kaxĩy ꞌãxop teꞌ nĩm tayũmak tĩgnãg, nũy ta hãmmaxnãk-tõgnãg, pa ꞌãxop teꞌ nĩm tayũmak xohix, nũy ta hãmmaxnã punethok.
\v 7 ꞌÃxop te hãmpeꞌãpaxex ꞌãkuxa kopa tayũmak xohix nĩm putup. ꞌÃpu ꞌũnĩm. ꞌŨxupkũmĩy xop kuxa hittup ꞌohnãg. ꞌÃpu ꞌãxupkumĩy hok. Tikmũꞌũn teꞌ nĩm, ꞌũnõy teꞌ xat hah. ꞌÃmhok, yãꞌ maxꞌah. Pa ꞌãkuxa tu hittup hãꞌ nĩm, yãꞌ max, yã Topa tep-tuppax.
\v 8 Ha Topa te ꞌãxop pu popmãhã ꞌõg hãpxop xohix, ha mõktu ꞌõg hãpxop xohix xexkaꞌ pip, tu ꞌãxop ꞌũm hokꞌah, yã mõkuma ꞌãmõg, tu ꞌõg hãpxop pip, nũy ꞌãxop hãpxopmã max.
\v 9 Hamũn, Topa yõg tappet te: “Topa teꞌ popmãhã hãpxop xohix ꞌũhok xop puꞌ, tu hãmmaxnãhã mõkumaꞌ mõg, haꞌ kux ꞌohnãg”. Kaxĩy.
\p
\v 10 Topa te hãpxop xap popmãhãꞌ, puyĩy tikmũꞌũn xoh hãpxopxap. Topa te xitꞌax popmãhãꞌ, puyĩy tikmũꞌũn mãꞌ. Topa te tikmũꞌũn pu hãpxop xap xohix popmãp-tup, tuꞌ tukgãp-tup, ha tikmũꞌũn te mĩnta ta xohix popmãp-tup. Hã kaxĩy Topa te xa hãpxop xohix popmãhãꞌ, ha ꞌãxop teꞌ nĩm tayũmak xohix, ha Topa te tikmũꞌũn puꞌ maxnãp-tup nõm teꞌ pop.
\v 11 Topa te ꞌãxop mĩy putup ꞌũp-te xop xexka putuk, xayĩy ꞌãxop tikmũꞌũn puꞌ nĩm mõkumaꞌãmõg, ha tikmũꞌũn xohix te hãmꞌãktux putup, hu: “Topa, ꞌãmax. Xatek mũꞌã popmãhã hãpxop xohix”. Kaxĩy.
\v 12 ꞌÃxop te tikmũꞌũn puꞌ nĩm hãpxop xohix, yĩy yõg hãpxop pip, puxix tu Topa pu hãmꞌãktux, hu: “Topa, ꞌãmax, xateꞌ popmãhã hãpxop xohix”. Kaxĩy.
\v 13 ꞌÃxop te Kunnix yõg hãmꞌãpak maxꞌax ꞌãpak, tuꞌ mĩy mõkumaꞌãmõg, tu nõm ꞌãktux mõkuma ꞌãmõg, tu tayũmak xohix nĩm hãpxexka Yonex yõg xop puꞌ xix tikmũꞌũn nõy puꞌ. ꞌÃxop teꞌ nĩm punethok, yĩy tikmũꞌũn xohix te Topa ꞌãktux maxp-tup.
\v 14 Tikmũꞌũn te Topa pu ꞌãxop ꞌãktux maxp-tup, tu ꞌãxop putuppax. Topa te ꞌãxop puꞌ hõm hãpxop max, yã Topa te ꞌãxop puꞌ hõm yãy Koxuk.
\v 15 Topa te yãy kutok xeꞌẽgnãg hõm. ꞌÃpu yũmũ Topa pu hãmꞌãktux, hu: “Topa, ꞌãmax. Xate yãy Koxuk hõm”. Kaxĩy.
\c 10
\p
\v 1 ꞌŨgmũn Paot, tu yãy kutõgnãg pekpaxex, tuk gãy ꞌohnãg, tu hãmꞌãktux puꞌuk, tu ꞌãxop puk max, yã Kunnix putuk. Pa tikmũꞌũn te: “Paot te yãy kutõgnãg peꞌpaxex, tu hãmꞌãktux puꞌuk nũnte ꞌũgmũg mũtik, pa hãmꞌãktux kaꞌok hatoꞌah”. Kaxĩy.
\v 2 Hãpxip ꞌĩhãg mõgꞌax, nũy xihip ꞌãxop mũtik. ꞌÃxop yãg te hãpkummuk mĩy, kopxix hãmꞌãktux kaꞌok. Pa ꞌa ꞌãtep putupꞌah. ꞌÃpu hãpkummuk mĩy hok. Hamũn, ꞌãte hãmꞌãktux kaꞌok ꞌũkummuk xop puꞌ. Nõm te hãmꞌãktux ꞌãte hãpxopmã kummuk, nũy yãy yõg putupꞌax mĩy. Yãꞌ koit.
\v 3 Hamũn, ꞌũkxip hãm xexka tuꞌ, pa Topa pu hãpxopmã max, nũy tikmũꞌũn kuxa mãmmã Yeyox kopah, tu tikmũꞌũn mũtik yãykix ꞌohnãg, yãꞌ kuxa mãm hok xop putuk ꞌohnãg ꞌãteꞌ.
\v 4 ꞌŨkuxa mãm hok xop te mĩm topnãg hã yãy kix xix pox hã, xix mĩkax hã. ꞌAk mũꞌãte yãy kix hã kaxĩyꞌah. Pa Topa te ꞌũgmũg kaꞌogãhãꞌ, ꞌũyĩy Hãmgãyãgnãg yõg yãmĩy xop yõg hãpkummuk mĩyꞌax nõãꞌ, xix Hãmgãyãgnãg yõg tikmũꞌũn yõg hãpkummuk mĩyꞌax nõãꞌ, xix koitꞌax nõãꞌ, xix hãmyũmmũgãꞌax te koit nõãꞌ.
\v 5 Hãm teꞌ tux hok, pu tikmũꞌũn Topa yũmmũg hok, ha ꞌãte nõm hãpxop kaꞌok xohix koxyõy. ꞌŨgmũꞌãte tikmũꞌũn pu hãmyũmmũgãhãꞌ, puyĩy Kunnix pe tu paxeh punethok, nũy Kunnix ꞌãpax.
\v 6 ꞌÃxop te Kunnix tuꞌ pip kaꞌok, tu ꞌãyĩpkox pip. Yãꞌ max. Pak mũꞌãte yĩpkox ꞌohnãg xop te hãpkummuk mĩyꞌax yãnãn putup.
\v 7 ꞌÃxop te hãmyũmmũg kutõgnãg. ꞌOk xip tihik, tu hãmpeꞌpaxex, yã Kunnix yõg tihik? ꞌŨgmũg yã Kunnix yõg tihik kamah.
\v 8 Topa tek xexkanãhãꞌ, pa ꞌãte nõm ꞌãktux kutõgnãg, pak yãyhãhup ꞌohnãg. Nõm ꞌãktux, puꞌ max. Topa tek kaꞌogãhãꞌ, ꞌũyĩy ꞌãkuxa hittupmãꞌ. ꞌÃtep-tupꞌah ꞌãxop nõãꞌ.
\v 9 ꞌAp ꞌãtep-tupꞌah ꞌãkuxanõãꞌ yõgnũ tappet hã.
\v 10 Tikmũꞌũn te: “Paot te hãmꞌãktux kaꞌok yãy yõg tappet tuꞌ, paꞌ xip nũnte yũmũg kopah, puxix hãmꞌãktux puꞌuk, tu hãmꞌãktux hitop mĩy”. Kaxĩy.
\v 11 ꞌŨmax, puyĩy tikmũꞌũn yũmmũg, pek mũꞌãte tappet kaxꞌãmiꞌ, pek mũꞌãte ꞌãxop pu hãmꞌãktux, yã yãy putuk. Pek xip nũnte, pek mõg, nũy ꞌãxop kopak xihip, yã yõgnũ hãmꞌãktux te yãy putuk.
\p
\v 12 ꞌŨtihi ꞌãxop kopa Yeyox yõg mõꞌpok xop teꞌ koit xop, tu yãy xexka ꞌãktux. ꞌÃtep-tupꞌah yãy xexka ꞌãktux, nũy ꞌõm xop putuk. Yã tik hitop. ꞌÕm te yãy yõg hãpxopmãꞌax kopit, tu Topa yõg xatꞌax ꞌãpak ꞌohnãg, tu yãy yõg xatꞌax mĩy.
\v 13 Topa tek mũg mõkpok, ꞌũyĩy mũg tikmũꞌũn kopa hãpxopmã max xix ꞌãxop kopa hãpxopmã max. ꞌÃte nõm ꞌãktux maxp-tup. Pa Topa tek mũg mõkpok, ꞌũyĩy hãpxopmã nõy ꞌohnãg.
\v 14 Hõmãg mũg mõg ꞌãxop hah, nũy Kunnix yõg hãmꞌãpak maxꞌax ꞌãktux ꞌãxop puꞌ. Topa tek mũg xat, ꞌũyĩy hãpxopmãꞌ, ha ꞌãte hãpxopmã nõy mĩy putupꞌah.
\v 15 Pa tik nõy te Topa puꞌ hãm, nũy tikmũꞌũn kuxa mãmmãꞌ, ha ꞌãte nõm ꞌãktux putupꞌah ꞌãte nõm kuxa mãmmãhãꞌ. ꞌÃmhok. Yãꞌ nõy te nõm kuxa mãmmãhãꞌ. Pak mũꞌãteꞌ hip ꞌãxop kuxa mãm nõy nãꞌ mõg putup, hak mũꞌãteꞌ hip, ꞌũyĩy mũg hãpxopmã nõy nãg mõg ꞌãxop kopah. ꞌŨgmũꞌãte hãpxopmã max, ha Topa te nõm putup, hak mũꞌãte hãpxop nõy mĩy putupꞌah ꞌãxop kopah,
\v 16 tuk mũꞌãte Topa yõg hãmꞌãpak maxꞌax ꞌãktux yũmmũg hãpxexka nõy tuꞌ, ha tik nõy te Topa yõg hãmꞌãpak maxꞌax ꞌãktux kamah. ꞌAp ꞌãte nõm ꞌãktux putupꞌah ꞌũkpuxet te hãmꞌãpak maxꞌax ꞌãktux. ꞌÃmhok. Yãꞌ nõy teꞌ kamah.
\v 17 Pa Topa yõg tappet te: “ꞌOk ꞌãxop te yãy xexka ꞌãktux putup? ꞌÃpu Topa xexka ꞌãktux”. Kaxĩy.
\v 18 Topa te tikmũꞌũn ꞌãktux max, puyĩy tikmũꞌũn tu max. Pa tikmũꞌũn te yãy xexka ꞌãktux, puyĩy tikmũꞌũn tu kummuk.
\c 11
\s Paot xix Yeyox yõg mõꞌpok teꞌ koit xop
\p
\v 1 ꞌÃte hãmꞌãktux hã hãpkuteꞌex kutõgnãg putup. ꞌÃpu ꞌũg ꞌãpax.
\v 2 ꞌÃte ꞌãxop yĩpkũmĩy, ha Topa te ꞌãxop yĩpkũmĩy. ꞌÃtak te yãy kutok hex xat, pu yãy tax tik puxet mũtik. Yãk-tok hex yã tuk tup max. Hã kaxĩy ꞌãte ꞌãxop popmãhã Kunnix puꞌ, yã yãp-xet puꞌ. Hã kaxĩy ꞌãxop te hex tuktup max putuk.
\v 3 Pa ꞌũgkuxanõg. Hõmã ꞌãxop te Kunnix tu ꞌãpip kaꞌok, tu Kunnix putuppax xeꞌeꞌ. Pa ꞌãte hãmpekpaxex ꞌãxop te hãmpeꞌãpaxex kummuk putup, nũy Kunnix nĩm, yã ꞌEma putuk. Tute hãmpeꞌpaxex kummuk. Yã kãyã yõg koitꞌax kopaꞌ kuxa yũm.
\v 4 Hamũn nõm Yeyox yõg mõꞌpok xop teꞌ koit xop te ꞌãxop haꞌ mõg, nũy Kunnix nõy ꞌãktux, yã yõgnũ Kunnix xeꞌe ꞌohnãg, pa ꞌãxop te tik yõg hãmꞌãktux ꞌãpak. ꞌÃxop teꞌ koxuk nõy pahaꞌ, ꞌa Topa Koxukꞌah. Hõmã ꞌãxop te Topa Koxuk pahaꞌ, hak mũg pip ꞌãxop kopah. Pa ꞌãxop te hãmꞌãpak nõy pahaꞌ, ꞌa yõgnũ putukꞌah ꞌũgmũꞌãte ꞌãxop pu nõm ꞌãktux.
\p
\v 5 ꞌÃxop te hãmpeꞌãpaxex Yeyox te mõꞌpok nõm teꞌ koit xop. ꞌOk xexka ꞌõhõm, ha tak mũn kutõgnãg? ꞌÃmhok.
\v 6 ꞌÃteꞌ yũmmũg ꞌãte hãmꞌãktux max yũmmũg ꞌohnãg, pa ꞌãte hãmyũmmũg, tu nõ hãmyũmmũgã max. ꞌÃxop tek mũg ꞌãpak punethok, huꞌ yũmmũg.
\p
\v 7 Hõmã ꞌãte ꞌãxop pu Topa yõg hãmꞌãpak maxꞌax ꞌãktux, pa ꞌõg tayũmak pop ꞌohnãg. ꞌÃte yãy kutõgnãg mĩy, xayĩy ꞌãxop ꞌãxexkaꞌ. ꞌOk ꞌãte hãpkummuk mĩy? ꞌÃmhok.
\v 8 Hõmã ꞌãte hãpxopmã max ꞌãxop kopah, ꞌĩhã Yeyox kopa kuxa mãm xop nõy te ꞌãꞌ popmãhã tayũmak. ꞌÃte ꞌũyõg hãpxop pop, nũy ꞌãxop hãg tehet, yãꞌ xupxet putuk.
\v 9 ꞌÃte hãpxopmã max ꞌãxop kopah, pa ꞌãte ꞌãxop yõg hãpxop xak ꞌohnãg xix ꞌõgnũ tayũmak xak ꞌohnãg, pa hãpxexka Mãxenõn yõg taknõy xop te ꞌãꞌ nũnnãhã hãpxop xohix. Hõmã ꞌãte ꞌõg hãpxop pop ꞌohnãg, tu ꞌa ꞌãte ꞌõg hãpxop pop putupꞌah. ꞌÃte ꞌõg hãpxop pop ꞌohnãg putup.
\v 10 ꞌÃte hãmꞌãktux Kunnix mũtik. ꞌÃte hãmꞌãktux ꞌãte Topa yõg hãmꞌãpak maxꞌax ꞌãktux putup hãpxexka Genex yõg tikmũꞌũn puꞌ, pa ꞌãte ꞌũyõg hãpxop pop putupꞌah, ha tikmũꞌũn tek hupmãp-tupꞌah.
\v 11 Teptu ꞌãte nõm ꞌãktux? ꞌOk ꞌãte ꞌãxop putuppax ꞌohnãg? ꞌÃmhok. ꞌÃte ꞌãxop putuppax.
\p
\v 12 Hõnhã ꞌãte Kunnix puk hãm putup, puyĩy tikmũꞌũn yũmmũg ꞌũkummuk Yeyox yõg mõꞌpok teꞌ koit xop, puyĩy yãy xexka ꞌãktux hok. Hamũn, nõm te hãmꞌãktux hãpxopmã yãg mũn putuk. Paꞌ koit.
\v 13 ꞌÃp Kunnix yõg mõꞌpok xop xeꞌeꞌah nõꞌõm, yãꞌ koit xop. Nõm te hãmꞌãktux hãpxopmã max, tu Kunnix yõg mõꞌpok xop putuk.
\v 14 Hãmũn, Hãmgãyãgnãg te yãyhã pexkox yõg nũꞌpok xop putuk, yãꞌ max xeꞌẽgnãg xop putuk.
\v 15 Tikmũꞌũn xohix teꞌ yũmmũg Hãmgãyãgnãg yõg tikmũꞌũn te hãpxeꞌe mĩy xop putuk. Nõm te hãpkummuk mĩy, ha Topa te yõg hãpkummuk mĩyꞌax xohix yãnãn putup.
\s Hãpxop kummuk Paot yõg
\p
\v 16 ꞌÃte xe hãmꞌãktux, ꞌãpu hãmpeꞌãpaxex hok, ꞌãte hãpxopmã hitop. Pa ꞌãxop te hãmpeꞌãpaxex, ꞌãte hãpxopmã hitop, kopxix yãy xexka ꞌãktux, yã tik hitop putuk.
\v 17 ꞌÃte hãmꞌãktux putup, pa Topa te hãmꞌãktux te kaxĩy putupꞌah. ꞌÃte yãy xexka ꞌãktux, kopix tik hitop putuk.
\v 18 Paꞌ pip tikmũꞌũn xohix, tu yãy xexka ꞌãktux, yã hãm xexka yõg tikmũꞌũn kummuk putuk, yĩy ꞌãte yãy xexka ꞌãktux putup kamah.
\v 19 ꞌÃxop te hãmpeꞌãpaxex hãmyũmmũg xexkaꞌ, xayĩy ꞌãxop hitop ꞌãpakpax.
\v 20 Tik te ꞌãxop xatpax, ha ta ꞌãxop nõm ꞌãpax, tuꞌ mĩy. Tik te ꞌõg hãpxop pop, ha ta ꞌãxop nõm popmãꞌ. Tik te ꞌãxop tuxhok, xa hãpxopmã hok, ha ta ꞌãxop nõm mĩy ꞌohnãg. Tik te yãy xexka ꞌãktux, ha ta ꞌãxop hãmpeꞌãpaxex ꞌũxexka tihik. Tik te yãy yĩm hã ꞌãpa yĩn kix, ha ta ꞌãxop hãmpeꞌãpaxex yãꞌ max tihik.
\v 21 ꞌŨgyãyhãhup, pa ꞌãte hãmꞌãktux putup, ꞌũgmũg puꞌuk hu nõm tik te hãpxopmã putuk ꞌohnãg.
\p Pa tik te yãy xexka ꞌãktux, kopxix yãy xexka ꞌãktux putup kamah, tu hãmꞌãktux hitop.
\v 22 ꞌOk tik te ꞌEmeneo xop kopaꞌ pip? Hamũn, yãg mũn kamah. ꞌOk tik te ꞌIyaet xop kopaꞌ pip? Hamũn, yãg mũn kamah. ꞌOk ꞌAmanãm yõg xupepmã xop kopaꞌ pip tihik? Hamũn, yãg mũn kamah.
\v 23 ꞌOk tik te Kunnix pu hãpxopmã max? Hamũn. ꞌÃte Kunnix pu hãpxopmã max punethok. Yã ꞌãte hãmꞌãktux hitop, tup-tox kummuk putuk. ꞌŨhãm puꞌuk tihik pak hãm kaꞌok. Tik pip kutõgnãg kanet kaꞌok kopah, pak xip punethok kanet kaꞌok kopah. Tikmũꞌũn te nõm kix kutõgnãg xikot hã, pak kix punethok xikot hã. Tik xakix kutõgnãg kõmnãg, pak xok punethok kõmnãg.
\v 24 Yoneo xop tek kix xikot hã ꞌũxohix teꞌ 39. Hã kaxĩy ꞌũgkix xohix teꞌ 5.
\v 25 Hõm xop tek kix punethok xikot hã. Hã kaxĩy ꞌũgkix ꞌũxohix teꞌ 3. Yoneo xop te mĩkaxxap punethok hãg tux yãp-xet, nũy ꞌũkputex. ꞌŨgmũ yõg mĩpkox yãy koxyõy tikoyuk kõnãg yĩmũꞌ, tuk xip puxet kõnãg kopa mãyõn mõg tox hã xix ꞌãmnĩy tox hã.
\v 26 ꞌÃte hãpkumep punethok, tuk xok punethok kõmnãg kõnãg xexka kopah, tu xupxet tep-tex punethok kõmnãg, ha Yoneo xop tek kummugãhãꞌ xix Yoneo kũnãpa pip xop teꞌ. ꞌŨkxok kõmnãg kõmẽn kopah, xix mĩmãtik kopah, xix kõnãg xexka kopah, haꞌ xape teꞌ koit xop tek kummugãhãꞌ.
\v 27 ꞌŨghãm kaꞌok, hu ꞌãmnĩy punethok ꞌĩhã mõgyõn kutõgnãg, tu putup tek putex punethok, tu kõnãg putup tek putex punethok, tuk xitꞌax pip kutõgnãg, xik pet pip kutõgnãg, xix yõg topixxax kutõgnãg,
\v 28 xix hãpxop xohik-tõgnãg, tu ꞌãmnĩy xohix hã ꞌãte hãpxopmãhã Yeyox kopa kuxa mãm xop xohix puꞌ, yãg hãm kaꞌok.
\v 29 Hamũn, Yeyox kopaꞌ kuxa mãm xop puꞌuk, kopxix ꞌũgkuxa hittup ꞌohnãg, tuk puꞌuk kamah. Tikmũꞌũn te Yeyox kopa kuxa mãm xop mõgãhãꞌ, pu hãpkummuk mĩy, kopxix ꞌũggãy, tuk kuxa hittup ꞌohnãg.
\p
\v 30 Pax ꞌũ yãy xexka ꞌãktux, kopxix yãy puꞌuk ꞌãktux putup.
\v 31 ꞌŨxip Topa yã yũmũg xuxyã Yeyox mũktak. ꞌŨmax xeꞌẽgnãg Topah, tu yõg hãmyãxatamuk xohix kux ꞌohnãg. Tuteꞌ yũmmũg ꞌãteꞌ koit ꞌohnãg.
\v 32 Hõmã ꞌũkxip kõmẽn Namãn tuꞌ, ha taꞌ xip hãpxexka yõg xatꞌax yõg gohenanok te mõꞌpok xonat, puyĩy kõmẽn pakꞌax yõg hãmyĩkox pẽnãꞌ, puyĩy xonat ꞌũgmũy. Yã mĩkaxxap hã nõꞌõm hãmpakꞌax, tuꞌ tox.
\v 33 Paꞌ xip hãmkoxnãg hãmpakꞌax tuꞌ, ha ꞌãte nõm hãg xupep, tu manex kopak yũm, hak xape tek yĩyxohõnnãhã manex hã poxit hã, ha tak mõg.
\c 12
\s Paot te hãpxop xeꞌẽgnãg pẽnãhã pexkox tuꞌ
\p
\v 1 ꞌAꞌ maxꞌah, yãy xexka ꞌãktux, yãꞌ kummuk, yã ꞌãte xe yãy xexka ꞌãktux putup. ꞌÃte yãy yõnkupꞌax ꞌãktux putup, yã Topa te ꞌãꞌ mũg hãpxop xohix ꞌũgyõnkup hã.
\v 2 Hõmã hãmyãxatamuk teꞌ 14 ꞌĩhã hãm tek mũg, nũy ꞌũgmõgã pepix pexkox tuꞌ. ꞌÃteꞌ yũmmũgꞌah, ꞌok pek mõg, ꞌok pek yõnkup, ꞌãteꞌ yũmmũgꞌah. Yã Topap-xet teꞌ yũmmũg.
\v 3 ꞌÃte xe hãmꞌãktux. ꞌOk pe hãm tek mũg, nũy mõgã pepix pexkox tuꞌ, ꞌok pek yõnkup, ꞌãteꞌ yũmmũgꞌah, pa Topap-xet teꞌ yũmmũg.
\v 4 ꞌŨkxip ꞌõnte pexkox tuꞌ, tu hãpxop xeꞌẽgnãg ꞌãpak, pa nõm ꞌãktux yũmmũg ꞌohnãg. Tikmũꞌũn te nõm xop ꞌãktux yũmmũg ꞌohnãg.
\v 5 ꞌÃte yãy xexka ꞌãktux putupꞌah, pa yãy puꞌukꞌax ꞌãktux putup.
\v 6 Pax ꞌũ yãy xexka ꞌãktux, kopxix hãmꞌãktux hitop putupꞌah, pa hãpxeꞌe ꞌãktux. Pa ꞌãte yãy xexka ꞌãktux putupꞌah. ꞌÃte yãy xexka ꞌãktux, puxix tikmũꞌũn hãmpeꞌpaxex ꞌũgxexkaꞌ. Pa ꞌãmhok, tikmũꞌũn te yõgnũ hãpxopmãꞌax pẽnãhãꞌ, tu yõg hãmꞌãktux ꞌãpak, puxix tikmũꞌũn ꞌũgyũmmũg.
\p
\v 7 Pa Topa tep-tupꞌah, ꞌãte yãy xexka pekpaxex. ꞌÃteꞌ pẽnãhãꞌ hãpxop max xeꞌẽgnãg pexkox tuꞌ, yĩy ta ꞌãꞌ hõm Topa teꞌ hãpxũy, yã mĩmyãm putuk ꞌũgyĩn kopah, yã Hãmgãyãgnãg yõg mõꞌkutnãꞌax putuk tuk xũygãhãꞌ, ꞌũyĩy yãy xexka pekpaxex hok.
\v 8 ꞌÃte Topa pu yãy xũy ꞌãktux tikoyuk, tu Topa puꞌ kax, puyĩy ꞌũkxũy xut.
\v 9 Pa Topa te: “ꞌÃmhok, puxix. ꞌŨkxip ꞌãmũtik, tu xa hãmmaxnãhãꞌ. Puxix. ꞌŨgkaꞌok, ꞌĩhã ꞌãpuꞌuk”. Kaxĩy. Topa tek hittupmã ꞌohnãg. Puxix, ꞌũgkuxa hittup. ꞌÃte yãy puꞌukꞌax ꞌãktux maxp-tup, ha Kunnix xip ꞌũgmũtik, tu hãpxopmã max punethok putup. Yãꞌ kaꞌok Kunnix.
\v 10 ꞌŨgpuꞌuk, ha tikmũꞌũn tek mũn ꞌãktux kummuk, hak xũy, ha tikmũꞌũn tek kuteꞌex kummuk, haꞌ maxꞌah hãpxop, ꞌĩhã ꞌãte Kunnix pu hãpxopmãhãꞌ. Pa puxix. ꞌŨgkuxa hittup. ꞌŨkpuꞌuk, kopxix ꞌũgkaꞌok.
\s Putep mũn mĩy putup Yeyox kopa kuxa mãm xop
\p
\v 11 Hamũn, ꞌãte hãmꞌãktux hitop nõmhã, pa ꞌãxop tep-tup. ꞌÃxop te hãmpeꞌãpaxex ꞌohnãg ꞌũgmax. Hamũn, ꞌũkpuꞌuk, pak max kamah, yã Yeyox yõg mõꞌpok teꞌ koit xop putuk, nõm tihi ꞌãxop kopah.
\v 12 ꞌŨkxip Yeyox yõg mõꞌpok xop kopah. ꞌÃxop teꞌ yũmmũg, tuꞌ pẽnãhã hãpxopmãꞌax ꞌãte nõm mĩy punethok. ꞌÃte hãpxopmã kaꞌok xeꞌẽgnãg ꞌãxop kopah, ha ꞌãxop teꞌ yũmmũg Topa teꞌ mĩy, ha ꞌãkuxa teꞌ yẽy. Yã hãpxopmã kaꞌok xeꞌẽgnãg.
\v 13 ꞌÃte ꞌãxop kopa hãpxopmãhãꞌ, Yeyox kopa kuxa mãm xop nõy xohix kopa putuk, pa ꞌãte ꞌõg hãpxop pop ꞌohnãg xix ꞌõg tayũmak, pa Yeyox kopa kuxa mãm xop nõy xohix te ꞌã hãꞌ teheh, tu ꞌãꞌ popmãhã hãpxop xix tayũmak. Yã hã kaxĩy maxꞌah. ꞌÃteꞌ kummuk mĩy. ꞌApu ꞌũxaxogãꞌ, pu tuꞌ kux.
\p
\v 14 Hõnhã putat tikoyuk ꞌĩhãg mõg putup ꞌãxop hah, tu ꞌa ꞌãte xa tuk kax putupꞌah. ꞌÃte ꞌãxop putup, pa ꞌõg tayũmak putupꞌah. Hamũn, ꞌũmaxꞌah ꞌũk-tok te yõg ꞌãtak pu popmãhã hãpxop xohix xiꞌ tut puꞌ, paꞌ max ꞌãtak tek-tok puꞌ popmãhã hãpxop xohix xiꞌ tut teꞌ.
\v 15 Hak kuxa hittup, tu yõgnũ hãpxop xohix põpmãhãꞌ, tu xa hok hãm kaꞌok putup, nũy ꞌãxop hãg tehet. ꞌÃte ꞌãxop putuppax xexkaꞌ. ꞌOk ꞌãxop tek putuppax putup kutõgnãg?
\p
\v 16 ꞌÃxop teꞌ yũmmũg ꞌãteꞌ pop ꞌohnãg ꞌõg hãpxop, pa tikmũꞌũn te hãmꞌãktux putup ꞌãte ꞌãxop puꞌ koit, tu ꞌãxop mõgãhã, paꞌ koit.
\v 17 Texĩy? ꞌOk ꞌãte tik mõꞌpok, puyĩy ꞌõg hãpxop pop? ꞌÃmhok.
\v 18 ꞌÃte Tit pu: “ꞌÃpu mõg tikmũꞌũn hah”. Kaxĩy. Yĩy taꞌ mõg Tit ꞌãxop hah. Ha ꞌãte taknõy nõy mõꞌkutnãhã Tit mũtik. ꞌOk Tit te ꞌõg hãpxop pop? Putep hãmpeꞌãpaxex? ꞌÃmhok. ꞌOk Tit te hãpxopmã tek mũn putuk? ꞌOk Tit tep-tup ꞌãte nõm putup? Hamũn.
\v 19 ꞌOk ꞌãxop te hãmpeꞌãpaxex ꞌũgmũꞌãtep-tup, tu hãmꞌãktux punethok, xayĩy ꞌãxop ꞌũgmũn putup? ꞌÃmhok. Pak mũꞌãte hãmꞌãktux, ha Topa te nõm ꞌãpak, ha Kunnix tep-tup nõm hãmꞌãktux. ꞌŨgmũꞌãte hãpxopmã xohix, nũy ꞌãxop hãg tehet.
\v 20 ꞌŨgkuxa nõg. ꞌÃte hãmpekpaxex ꞌũgmũg mõg putup ꞌãxop hah, pa ꞌãxop te yãyhã kummuk, tuꞌ putuk ꞌohnãg ꞌãte nõm putup. ꞌÃte hãmpekpaxex ꞌãteꞌ putuk ꞌohnãg ꞌãxop te nõm putup. ꞌŨgkuxa nõg. ꞌÃte hãmpekpaxex ꞌãte ꞌãxop pẽnãp-tup, ꞌĩhã ꞌãxop te yãy mãnõg, tu ꞌãxop teꞌ yĩpkumĩy, tu ꞌãxop gãy, tu ꞌãxop teꞌ xupkũmĩy, tu hãmꞌãktux kummuk, tu hãpxũmãhĩy, tu yãy xexka peꞌãpaxex, tu yãy kuteꞌex pax.
\v 21 ꞌŨgkuxa nõg. ꞌÃxop hak mõg putup. ꞌÃte hãmpekpaxex Topa tek mũn yãyhãhupmãp-tup ꞌãxop kopah, hak kuxa hittup ꞌohnãg putup. ꞌÃteꞌ pẽnãp-tup tikmũꞌũn kummuk nõm te hãpkummuk mĩy, paꞌ yãyhãhup ꞌohnãg, tu hãpkummuk mĩyꞌax kux ꞌohnãg, yãꞌ nõy hãꞌ xupxet, tu hãpkummuk mĩyꞌax xohix putuppax.
\c 13
\s Hãmꞌãktux kuxꞌax
\p
\v 1 Yã putat tikoyuk nõmhã, ha tak mõg putup ꞌãxop hah. Topa yõg tappet te: “Tikmũꞌũn tix ꞌok pe tikoyuk te, ‘Nõm te hãpkummuk mĩy, hak mũꞌãte hãpkummuk mĩyꞌax pẽnãhãꞌ’. Kaxĩy. ꞌÃpu nõm ꞌãpax. Pa yãp-xet te nõm ꞌãktux, ꞌãpu nõm ꞌãpax hok.” Kaxĩy.
\v 2 Hõmã putat tix ꞌĩhã ꞌãte hãpkummuk mĩy xop pu hãmꞌãktux, hu, “ꞌÃxop te hãpkummuk mĩy. ꞌÃpu ꞌũhup!” Kaxĩy. Hõmã ꞌãte xe nõm ꞌãktux. Hãpxip ꞌĩhãg mõg putup ꞌãxop hah, tu ꞌãte hãpkummuk mĩy xohix xop xũygãp-tup.
\v 3 ꞌÃte hãpxop xeꞌe mĩy putup, ha ꞌãxop teꞌ pẽnãp-tup, tuꞌ yũmmũg Kunnix te ꞌã yãy ꞌãxetꞌax hõm. Kunnix ꞌũkaꞌok. ꞌÃxop te nõm pẽnãhãꞌ.
\v 4 Pa hõmã Kunnix ꞌũpuꞌuk, yã tikmũꞌũn tep-tex mĩpkupnix yĩmũꞌ, pa hõnhã ꞌũxip, ha Topa teꞌ hĩnnãhãꞌ, yĩy hõnhãꞌ kaꞌok. Yũmũꞌãte Kunnix kopa kuxa mãm, tu nũmũtik mõg, tu yũmũg puꞌuk, pak mũg tip-tup ꞌãxop kopah, ha Topa tek mũg kaꞌogãp-tup.
\p
\v 5 ꞌÃpu yãy yõg hãpxopmãꞌax kopit. ꞌÃpu yãy kopit, nũy yãy kuxa yũmmũg. ꞌOk ꞌãkuxa mãm Yeyox kopah? Hamũn, ꞌãxop teꞌ yũmmũg Yeyox xip ꞌãkuxa kopah. Pa ꞌãkuxa mãm ꞌohnãg Yeyox kopah, puxix Yeyox xipꞌah ꞌãkuxa kopah.
\v 6 ꞌÃteꞌ hip ꞌãxop teꞌ yũmmũg putup ꞌũgmũg xeꞌeꞌ, tuk mũg pip Yeyox yõg mõꞌpok xop kopah.
\v 7 ꞌŨgmũꞌãte Topa pu hãmꞌãktux, tuꞌ xak, xayĩy ꞌãxop hãpkummuk mĩy hok. ꞌAk mũꞌãtep-tupꞌah, pu tikmũꞌũn hãmꞌãktux ꞌũgmũg hãm max ꞌãxop kopah, yã ꞌãxop te hãmmax mĩy, pak mũꞌãtep-tup, xayĩy ꞌãxop hãmmax mĩy, puyĩy tikmũꞌũn yũmmũg ꞌũgmũg puꞌuk, pa Topa ꞌũkaꞌok.
\v 8 ꞌŨgmũꞌãte hãpxeꞌe koxyõy ꞌohnãg, pa hãpxeꞌe ꞌãktux yũmmũg.
\v 9 ꞌŨgmũg puꞌuk, ha tikmũꞌũn tek mũg putup nõg, kopxik mũg kuxa hittup. ꞌÃxop kaꞌok, kopxik-mũg kuxa hittup, tuk mũꞌãte Topa pu hãmꞌãktux, tu ta tuk kax, pu Topa ꞌãxop max xeꞌe mĩy.
\v 10 ꞌŨkxip hãptox ꞌãxop tuꞌ, tu nũꞌ tappet kaxꞌãmiꞌ, nũy ꞌũggãy ꞌohnãg ꞌãxop kopah, yã Topa tek xexka mĩy putup ꞌãxop kopah, ꞌũyĩy ꞌãxop hãg tehet, ꞌũyĩy ꞌãxop koxyõy hok.
\p
\v 11 ꞌŨkuxꞌax tappet. ꞌŨkxape xop, ꞌãpu ꞌũxax, nũy hãpxopmã max xohix. ꞌÃpu yõgnũ hãmꞌãktux ꞌãpax. ꞌÃpu ꞌãp-tox puxet ꞌãxop. Yãy kix hok, ha Topa te mõ ꞌãxop yãy xeꞌẽgnãg, tu ꞌãxop kopa xip putup, nũy ꞌãkuxa mãmmãꞌ.
\p
\v 12 ꞌÃpu yãy mũy xape max xop putuk. Yeyox kopa kuxa mãm xop xohix te hãmꞌãktux ꞌãxop peꞌpaxex.
\p
\v 13 Topa yõg tikmũꞌũn xohix te ꞌãxop peꞌpaxex.
\v 14 ꞌŨgmũꞌãtep-tup, puyĩy yũmũg xuxyã Yeyox Kunnix ꞌãxop pu hãmmaxnãꞌ, xayĩy ꞌãxop mũtik mõg. Tu ta tuꞌ kux.