\id GAL  - Maxakalí NT [mbl] (Brazil) -2011 bd
\h GAT
\toc1 Gat
\toc2 Gálatas (Gl)
\mt PAOT TE HÃPXEXKA GANAX YÕG TIKMŨꞌŨN PU TAPPET KAXꞌÃMIꞌ
\c 1
\s Tuteꞌ kuxa mãm kaꞌok xop pu ꞌãneo
\p
\v 1 ꞌŨgmũn Paot. ꞌÃte xa kaxꞌãmi nũhũ tappet. Yeyox Kunnix tek yãykutnãhãꞌ, xix Topa tek yãykutnãhãꞌ. ꞌA tikmũꞌũn tek nũnnãꞌah. Pa Yeyox Kunnix te nũgkutnãhãꞌ, xix yũmũg ꞌÃtak Topa teꞌ. Yã nõm te Yeyox Kunnix putpuꞌ hĩnnãhãꞌ.
\v 2 Nũnte ti yũmũg xape xop. Yãꞌ xohix te xa ꞌãneo hõm, xix hãpxexka Ganax yõg kuxa mãm kaꞌok xop xohix pu ꞌãneo hõm.
\p
\v 3 Pũyã yũmũ yõg ꞌÃtak Topa xa hãmmaxnãꞌ, xix yũmũg xuxyã Yeyox Kunnix xa hãmmaxnãꞌ, xix ꞌãkuxa mãmmã.
\p
\v 4 Yũmũg xuxyã Yeyox Kunnix te yãy mũn hõm, nũy yũmũg pupi tuꞌ xok, yũmũꞌãte hãpkummuk mĩy hah. ꞌŨxok, nũy yũmũg mõy hãm xexka kummuk kopah. Yã yũmũ yõg ꞌÃtak Topa tep-tup.
\v 5 ꞌÃpu yũmũg xohix te Topa max xeꞌẽgnãg ꞌãktux mõꞌkumak mõg, tuꞌ xuktux kux ꞌohnãg. Hamũn.
\s Yã hãmꞌãpak max puxehnãg Topa yõg
\p
\v 6 ꞌÃy! ꞌÃxop texĩy tu Topa nĩm mõꞌkaꞌok. Tute ꞌãxop xãnãhãꞌ, puyĩy Kunnix xa hãmmaxnãꞌ. Pa ꞌãxop te hãmꞌãpak max nõy ꞌãpak nõmhãꞌ. Yã hãmꞌãpakꞌax puknõg, ꞌap Topa yõgꞌah.
\v 7 ꞌAp xeꞌeꞌah. Nõm xop te ꞌãxop kummugãhãꞌ, tuꞌ xak, nũy Kunnix yõg hãmꞌãpak maxꞌax nõy yãnãn, pu tuꞌ yãyhã hitop.
\v 8 Pax ꞌũgmũg xa hãmꞌãpak max nõy ꞌãktux, puxix Topa ꞌũgkummugãꞌ, nũy pago. Pax pu pexkox yõg nũꞌpok xop nũn pexkox tuꞌ, tu xa hãmꞌãpak max nõy ꞌãktux, puxix Topa ꞌũkummugãꞌ, nũy pago. Hamũn. Hõmã ꞌãte xa hãmꞌãpak maxꞌax ꞌãktux,
\v 9 ꞌũgmũꞌãte hãmꞌãktux tap, tu hõnhã nõm ꞌãktux ꞌũxeheh. Tik ꞌũm te hãmꞌãpak maxꞌax puknõg ꞌãktux, pũyã Topa nõm kummugãꞌ, nũy tu pago. Yã nõm hãmꞌãpak max puknõg.
\v 10 Piyã ꞌãteꞌ xak nõmhãꞌ? ꞌOk pe tikmũꞌũn te yõg hãpxopmãꞌax putup? ꞌOk pe Topa te yõg hãpxopmãꞌax putup? Yã Topah, ꞌa tikmũꞌũnꞌah. Pax ꞌũg xak, puyĩy tikmũꞌũn yõg hãpxopmãꞌax putup, kopxik mũn hãm hok Topa tuꞌ. Yã tikmũꞌũn tuk hãmꞌax. Pa Topa mũn puk hãm xeꞌẽgnãg.
\s Texĩy Topa te Paot mõꞌkutnãhãꞌ
\p
\v 11 ꞌŨxape xop, ꞌãte ꞌãp-tup, xayĩy hãmyũmmũg. ꞌÃte hãmꞌãpak maxꞌax ꞌãktux, ꞌa tikmũꞌũn tek xatꞌah, ꞌãte nõm hãmꞌãpak maxꞌax ꞌãktux.
\v 12 ꞌA tikmũꞌũn te ꞌã hãmyũmmũgãꞌah, tu ꞌãꞌ xuktuxꞌah, pa Yeyox Kunnix teꞌ.
\p
\v 13 Ha ta ꞌãxop te yũmũ yõg hãpxopmãꞌax yũmmũg tap. Hõmã ꞌãte Yoneo xop yõg hãpxopmãꞌax tat, tu Kunnix kopaꞌ kuxa mãm xop kuteꞌex kummuk pax, tuꞌ xak, nũy nõm pu hãpkummugãꞌ, puyĩy nõm xop yãyxatat, tu yãy nõãꞌ.
\v 14 Hak xexka nõynãg mõg Yoneo xop kopah, yã Yoneo xop mõnãyxop yõg hãpxopmãꞌax xohix tat ꞌãteꞌ. Yãꞌ xatꞌax xohix ꞌãteꞌ mĩy mãynãg, tuꞌ xatꞌax ꞌũm xaxok ꞌohnãg.
\p
\v 15 Hõmã ꞌũktut tek put xetꞌah, ꞌĩhã Topa ꞌã yãykutnãhãꞌ, tuk xãnãhãꞌ, nũy mõgkutnãꞌ. Yã Topa te ꞌã hãmmaxnãhãꞌ,
\v 16 tu ꞌãꞌ mũg yãy kutok pit, ꞌũyĩy hãmꞌãpak maxꞌax ꞌãktux Yoneo xop hãꞌ puknõg xop puꞌ. ꞌÃte tikmũꞌũn ꞌũm yĩkopit ꞌohnãg. Nõm te tuk mũn yũmmũgã ꞌohnãg.
\v 17 ꞌAk mõgꞌ ah kõmẽn Yenoyanẽn tuꞌ, tu hãmꞌãktux ꞌohnãg Yeyox yõg mõꞌpok xop mũtik. Yã Yeyox te nõm mõꞌpok hãmãxap, tuk-nãy tuk mũn mõgkutnãhã. Ha tak mõg ꞌAnap tuꞌ, tu mõktuk xupep. Hãpxip ꞌĩhãg nũn putpu kõmẽn Namẽn tuꞌ, tu nũktuk xupep.
\v 18 Hãmyãxatamuk tikoyuk nõg, ha tak mõg Yenoyanẽn tuꞌ, nũy nox xip Pet pet tuꞌ, nũy hãmꞌãktux, tu noxk xip ꞌamnĩy te 15 hã.
\v 19 Hamũn, ꞌãte pẽnãhã Pet xix Tiak, yã yũmũg xuxyã yãy taknõy, pa mõꞌpok xop nõy ꞌaꞌ pẽnãꞌah.
\p
\v 20 ꞌÃte kaxꞌãmi nũhũ tappet, tu hãpxeꞌe kaxꞌãmiꞌ, tuꞌ koit ꞌohnãg. Topa keppa ꞌãteꞌ xuktux.
\p
\v 21 Hãpxip ꞌĩhã tak mõg hãpxexka Xit tuꞌ, xix hãpxexka Xinix tuꞌ,
\v 22 ha hãpxexka Yonex yõg kuxa mãm kaꞌok xop tek yũmmũg ꞌohnãg,
\v 23 pãyã hãmꞌãpak, hu: “Hõmã Paot tek mũg kummugãhãꞌ, pa hõnhã Topa yõg hãmꞌãpak maxꞌax ꞌãktux. Hõmã tutep-tup, nũy Topa yõg putat max koxyõy, pa hõnhã Topa yõg hãpxopmãꞌax ꞌãktux,” kaxĩy.
\v 24 Tuꞌ kuxa hittup ꞌũgmũn hã, tu Topa ꞌãktux max.
\c 2
\s Paot xix Yeyox yõg mõꞌpok xop
\p
\v 1 Hãmyãxatamuk te 14 nõg, ha ta xek mõg kõmẽn Yenoyanẽn tuꞌ, Maname mũtik mõg, tu Tit mõgãhãꞌ,
\v 2 Yã Topa te ꞌãꞌ pẽhãhãꞌ, tu ꞌãꞌ xuktux, tuk xat, ꞌũmõg Yenoyanãn tuꞌ, hu tak mõg, tu mõktuk xupep, tuꞌ pẽnã maxꞌax xexka xop mũtik hãmꞌãktux, ꞌap nõy xop mũtik hãmꞌãktuxꞌah. ꞌÃte nõm hãmyũmmũgãhã hãmꞌãpak maxꞌax, ꞌãte nõm ꞌãktux hãmpuknõg xop puꞌ, nõm xop te Yoneo xop hãꞌ puknõg, puyĩ xexka xop ꞌũghãmꞌax ꞌãktux max.
\v 3 Ha Tit mũn xip ꞌũgmũtik, tu hãpxexka Genex yõg tihik, yã Yoneo xop hãꞌ puknõg, pa tik xop tek xat ꞌohnãg, pu Tit yãy xax xax ꞌũyĩmap. ꞌÃmhok.
\v 4 Paꞌ nũn mõꞌãmãꞌax xop, ꞌap Kunnix kopaꞌ kuxa mãmꞌah, yã xetxox hex putuk, tuꞌ nũn, tu nũktu yũmũ yõg xop kopaꞌ mõxahãꞌ, nũy yũmũ yõg hãpxopmãꞌax max pẽnãꞌ. Yã yũmũ yõg hãpxop xakꞌax ꞌap-tuxꞌah, yã yũmũg kuxap-xet Yeyox Kunnix kuxa mũtik. Pa nõm mõꞌãmãꞌax xop tek putup, nũy yũmũg mõgã putat kummuk hã, nũy yũmũg kuxa hĩy, ꞌũyĩy hittup hok. Yã nõm teꞌ xat pax nãm. Yã ꞌũyõg hãpxop xakꞌax putux.
\v 5 Ha tak mũꞌãte nõm komut xop ꞌãpak ꞌohnãg. Hamũn, nõm ꞌãpak ꞌohnãg hokꞌah, xayĩy ꞌãxop pip kaꞌok Topa yõg hãmꞌãpak max tuꞌ.
\p
\v 6 Ha taꞌ xexka xop, yã tikmũꞌũn te nõm peꞌpaxex xexkaꞌ. (ꞌOk xexkaꞌ pek-tõgnãg? Yãꞌ nõy putuk. Topa te tikmũꞌũn yõg hãpxopmãꞌax xohix kopit, tuꞌ xax max hãꞌ kopit ꞌohnãg, pãyãꞌ kuxa kopaꞌ pẽnãhãꞌ.) Nõm xexka xop tehomi ꞌã hãmyũmmũgãhã hãm ꞌohnãg,
\v 7 pa nõm xop tek yũmmũg, Topa te mõgkutnãhã ꞌũgmũn, ꞌũyĩy Topa yõg hãmꞌãpak maxꞌax ꞌãktux Yoneo xop hãꞌ puknõg xop puꞌ, pa Topa te mõ Pet kutnãhã Yoneo xop hah. Ha nõm xexka xop teꞌ yũmmũg.
\v 8 Topa tek kaꞌogãhãꞌ, tu nũgkutnãhãꞌ, ꞌũmõg Yoneo hãꞌ puknõg xop hah, ha ta Topa te Pet kaꞌogãhãꞌ, tu mõꞌkutnãhãꞌ, pu Yoneo xop ha mõg.
\v 9 Topa te ꞌã hãmmaxnãhãꞌ, ha Tiak teꞌ yũmmũg, xix Pet teꞌ, xix Yoãm teꞌ. Yãꞌ pẽnã maxꞌax xexka xop tek yĩm nuhuk, xix Maname yĩm nuhuk, yãk mũg xohix xape xeꞌeꞌ. ꞌŨgmũꞌãte yãy mũtik hãmꞌãktux, tuꞌ xuktux, ꞌũmax ꞌũgmũg hãm Yoneo hãꞌ puknõg xop kopah, ha taꞌ nõm hãm Yoneo xop kopah.
\v 10 Pa nõm tek mũꞌãꞌ xak, pu hãpxop popmã pax ꞌũhok xop puꞌ. Hamũn. ꞌãtep-tup xexkaꞌ, nũy hãpxop popmã pax.
\s Pet xix Yoneo hãꞌ puknõg xop
\p
\v 11 Hõmã ha taꞌ nũn Pet, kõmẽn ꞌÃtikit tuꞌ nũn, ha ꞌãte tikmũꞌũn keppa hãmꞌãktux, hu: “Pet, xate hãpkummuk mĩy.” Kaxĩy.
\v 12 Hamũn. Pet xit hãmpuknõg xop mũtik, yãꞌ kuxa mãm kaꞌok xop, ha ta Tiak te nũꞌkutnãhã tihik, ha nõm nũn tu nũktuꞌ mõxahaꞌ, ha Pet teꞌ puknõg xop nĩm mõꞌkaꞌok. ꞌAp putupꞌah, puyĩy nũmũtik tu xit, Yoneo xop yĩpkutuk tuꞌ.
\v 13 Ha taꞌ pip kama ꞌÃtikit yõg Yoneo xop, yã yũmũg xape xop, tu nõm te Pet yõg hãpxopmãꞌax tat, tuꞌ yĩpkutuk kamah. Hamũn, Maname kama te Pet peꞌ mõg, tu Pet yõg hãpxopmãꞌax tat kamah.
\v 14 ꞌÃteꞌ pẽnãhãꞌ, ꞌap hãmyok mĩyꞌah, ꞌap hãmꞌãpak maxꞌax xeꞌeꞌah. ꞌÃte Pet pu hãmꞌãktux, ꞌũxohix keppaꞌ xuktux, hu: “ꞌÃmũn yã Yoneo, pa ꞌa xate mõnãyxop yõg hãpxopmãꞌax tatꞌah. Texĩy xateꞌ xat, pu Yoneo hãꞌ puknõg xop nõm hãpxopmãꞌax tat?” Kaxĩy.
\s ꞌŨxohix kuxa mãm Yeyox kopah, yĩy Topa teꞌ kuxa kummuk tupmãhãꞌ
\p
\v 15 ꞌŨgmũg mũn yã Yoneo xop kopak pip. ꞌŨgmũg tak yã Yoneo, xik mũg tut, yã Yoneo xeꞌeꞌ, ꞌaꞌ puknõg kummuk xop yõgꞌah,
\v 16 pak mũꞌãte hãmyũmmũg: Tikmũꞌũn kuxa kaꞌok Yeyox Kunnix kopah, yĩy Topa teꞌ kuxa kummuk tupmãhãꞌ, puyĩy kuxa tu max. Pa tikmũꞌũn nõy te Topa yõg xatꞌax ꞌãpak, tuꞌ mĩy. ꞌOk hã kaxĩy yãy kuxa tupmã Topa keppa nõꞌõm? ꞌÃmhok. ꞌAp kaxĩyꞌah. Yũmũg mũn kama kuxa mãm kaꞌok Yeyox Kunnix kopah, pu Topa yũmũg kuxa kummuk tupmã. Yã hã kaxĩy Kunnix kopa yũmũg kuxa mãm kaꞌok. Mõyyex xatꞌax ꞌũm te yũmũg kuxa tupmã hok. Tep te Topa yõg xatꞌax mĩy, puyĩy Topa tikmũꞌũn kuxa kummuk tupmãꞌ, puyĩꞌ kuxa tu max? Yã tikmũꞌũn ꞌohnãg.
\v 17 Pa yũmũg kuxa mãm kaꞌok Kunnix kopah, nũy yũmũg kuxa tu max, pa hãpkummuk mĩy. ꞌOk Kunnix te hãpkummuk mĩyꞌax nõynãꞌ mõgahãꞌ? ꞌÃmhok.
\v 18 Hõmã ꞌãte hãpkummuk mĩy kux. Pax xeꞌ mĩy, kopxix ꞌũgkummuk, yã ꞌãte Topa yõg xatꞌax koxyõy.
\v 19 ꞌŨgkummuk, ha Topa yõg xatꞌax teꞌ xat, puk putex, pa Kunnix tek pupiꞌ xok, yĩy Mõyyex yõg xatꞌax tek xat hok. Hã kaxĩy ꞌũgmõg Topa peheh, tu Topa yõkãmũg mõg.
\v 20 Hõmã Kunnix tek pupiꞌ xok mĩpkupnix tuꞌ, ha Topa teꞌ putpuꞌ hĩnnãhãꞌ. Hõnhã ꞌak puxetꞌah, pa Kunnix xip ꞌũgkopah. Hõnhã Kunnix mũtik ꞌũgkuxa hi xeꞌẽgnãg. Yãg kuxa yũm kaꞌok Topak-tok pit kopah. Tute mõg yãy xeꞌẽgnãg, tuk pupiꞌ xok.
\v 21 Topah, ꞌãmax, tu ꞌãꞌ hok hã hãmmaxnãhãꞌ, yĩg kuxa hi xeꞌẽgnãg. Paxpu Mõyyex yõg xatꞌax tikmũꞌũn kuxa kummuk maxnãꞌ, puxix Kunnix tuꞌ hok hãꞌ xok. Pa Topa teꞌ hok hãꞌ hõm. Yã yũmũg pupiꞌ xok Yeyox, tu yũmũg kuxa kummuk tupmãhãꞌ.
\c 3
\s Hã texĩy Topa teꞌ kuxa kummuk tupmãhãꞌ
\p
\v 1 Hãpxexka Ganax yõg tikmũꞌũn, yã ꞌãxop putox kaꞌok, tu hãmyũmmũg ꞌohnãg. Tikmũꞌũn te ꞌãxop hitop mõgãhã hatoꞌah, hãmꞌãktux kummuk hã ꞌãmõgãhãꞌ. Hõmãg mũꞌãte ꞌãxop xohix pu hãmꞌãktux xeꞌeꞌ, Yeyox Kunnix xok mĩpkupnix tuꞌ, ha xateꞌ yũmmũg, tu ꞌãkuxa hãꞌ pẽnãhãꞌ. Pa tikmũꞌũn te ꞌãxop mõgãhã hatoꞌah.
\v 2 ꞌÃpu hãmꞌãktux puxet. ꞌOk ꞌãxop te Mõyyex yõg xatꞌax xohix mĩy, pu Topa yãy Koxuk nũꞌkutnã ꞌã hah? ꞌÃmhok. ꞌA kaxĩyꞌah. ꞌOk ꞌãxop te Topa yõg hãmꞌãpak maxꞌax ꞌãpak, tu ꞌãkuxa mãm kaꞌok, puyĩy Topa Koxuk ꞌãkopaꞌ xihip? Yã hamũn.
\v 3 ꞌÃxop texĩy ꞌãhitop xexkaꞌ? ꞌÃmõg kõnãmãhã Topa Koxuk mũtik, puyĩy ꞌãkaꞌogãꞌ, pa hõnhã xatep-tup, nũy ꞌãp-xet hã mõg, nũy yãy kaꞌogãꞌ, nũy ꞌãp-xet hã hãpxopmãꞌ. Teptu ꞌãxop teꞌ kaꞌax hã yãp-xehnãg mõg Topa yõg putat hã?
\v 4 ꞌOk ꞌãxop te hitop hã xũy hã tot? Pũyã hitop hok!
\v 5 ꞌOk ꞌãxop te Mõyyex yõg xatꞌax mĩy, yĩy ta Topa te xa nũꞌkutnã yãy Koxuk, tu ꞌãxop kopa hãpxopmã kaꞌok xeꞌẽgnãg? ꞌÃmhok. Pa ꞌãxop te Topa yõg hãmꞌãpak maxꞌax ꞌãpak, tu ꞌãkuxa mãm kaꞌok, yĩy ta Topa te xa mõꞌkutnãhã yãy Koxuk, ha ꞌãxop kopa hãpxopmã max xeꞌẽgnãg. Hamũn. Yã kaxĩy!
\p
\v 6 ꞌÃpu ꞌAmanãm peꞌãpaxeh. Topa yõg tappet te: “ꞌAmanãm kuxa yũm kaꞌok Topa kopah, yĩy Topa teꞌ kuxa tupmãhãꞌ, pu kuxa tu max. Yã Topa te ꞌAmanãm yõg hãpkummuk mĩyꞌax xaxogãhãꞌ, pu tu kux.” Kaxĩy. Hã kaxĩy yũmũg kuxa mãm kaꞌok, yĩy Topa te yãy Koxuk yũmũꞌã nũꞌkutnãhãꞌ.
\v 7 Yã ꞌãxop te hãmyũmmũg: Yã ꞌAmanãm hãꞌ mõkputox xeꞌeꞌ, yã ꞌãkuxa mãm kaꞌok kamah.
\v 8 Hõmã Topa yõg tappet te yũmũꞌã hãmyũmmũgãhãꞌ, hu: “Hãpxip ꞌihã Yoneo hãꞌ puknõg xop kuxa mãm kaꞌok putup Yeyox Kunnix kopah, yĩy Topa teꞌ kuxa kummuk tupmãp-tup, puyĩꞌ kuxa tu max.” Kaxĩy. Tu xe ꞌAmanãm pu hãmꞌãpak maxꞌax ꞌãktux, hu: “Topa te ꞌãmũn hã hãmmaxnãp-tup, yãꞌ hep xop xohix ha hãmmaxnãp-tup, xexka xohix tuꞌ hãmmaxnãp-tup,” kaxĩy.
\v 9 Ha ta ꞌAmanãm kuxa yũm kaꞌok, yĩy ta Topa te ꞌAmanãm hã hãmmaxnãhãꞌ, tuꞌ kuxa mãm kaꞌok xop xohix ha hãmmaxnãhãꞌ, yã ꞌAmanãm putuk.
\p
\v 10 Tikmũꞌũn ꞌum kuxa yũm kaꞌok Mõyyex yõg xatꞌax kopah, pu tuꞌ kuxa maxnã Topa puꞌ. Pa Topa yõg xatꞌax te hãpkummuk mĩyꞌax ꞌãktux kummuk. Hamũn, Topa yõg tappet te: “ꞌŨxohix ꞌũm te Mõyyex yõg xatꞌax xohix xexka mĩy hok, puxix Topaꞌ kummugãp-tup ꞌũyãnãn tuꞌ, nũy nõ kummuk mĩyꞌax hã pago.” Kaxĩy.
\v 11 Yã tikmũꞌũn ꞌohnãg te Mõyyex yõg xatꞌax xohix mĩy, puyĩy Topaꞌ kuxa kummuk tupmãꞌ, puyĩꞌ kuxa tu max. Pa Topa yõg tappet te: “ꞌŨxohixꞌ kuxa mãm kaꞌok, puxix Topaꞌ kuxa kummuk tupmãꞌ, puyĩꞌ kuxa tu max. Yã nõm xop kuxa hi xeꞌẽgnãg,” kaxĩy.
\v 12 Pa nõm nõy xop te Mõyyex yõg xatꞌax mĩy putup, nũy yãy kuxa kummuk tupmã Topa puꞌ. ꞌAp putukꞌah nõm xop kuxa mãm kaꞌok Topa kopah, puyĩy Topaꞌ kuxa tupmãꞌ. Yã yãy hãpxopmãꞌax hãꞌ kuxa maxnãp-tup. Yã Topa yõg tappet te Mõyyex yõg xatꞌax mĩy xop ꞌãktux, hu: “Nõm ꞌũm te Topa yõg xatꞌax xohix xexka mĩy xeꞌẽgnãg, puxiꞌ kuxa hiꞌ.” Kaxĩy.
\p
\v 13 Topa te: “Yãꞌ kummuk nõm te Mõyyex yõg xatꞌax xohix xexka mĩy hok. Yã ꞌãte nõm ha hãpkummu nõ gãp-tup, nũyhãpkummuk mĩyꞌax hã pago.” Kaxĩy. Pa Kunnix te hãpkummugãꞌax hãꞌ tot yũmũg pupiꞌ, tu yũmũg pupiꞌ xok, yã tute yũmũg mõy, ꞌũyĩy yũmũg hi xeꞌẽgnãg. Yã Topa yõg tappet te: “Yãꞌ kummuk nõm te mĩpkupnix tuꞌ xup.” Kaxĩy.
\v 14 Ha mõktu Kunnix te yũmũg pupiꞌ xok, ꞌũyĩy yũmũg hi xeꞌẽgnãg. Topa teꞌ hok hã hãmmaxnãhãꞌ, puyĩy Yoneo hãꞌ puknõg xop ha hãmmaxnãꞌ. Yã hõmã Topa te ꞌAmanãm pu hãmꞌãktux xex, tu hãmmaxnãꞌax hep xop xohix ha ꞌãktux, tu hõnhã Yẽyox Kunnix hã hãmmaxnãhãꞌ, puyĩꞌ puknõg xop kuxa mãm kaꞌok Yeyox Kunnix kopah. Hõmã Topa te hãmꞌãktux xex, tuꞌ xuktux, yã yũmũꞌã ha yãy Koxuk nũꞌkutnãhãꞌ. Ha yũmũg kuxa mãm kaꞌok, yĩy ta Topa Koxuk te yũmũg kopaꞌ xip.
\s ꞌŨxatꞌax xix hãmꞌãktux xexꞌax
\p
\v 15 ꞌŨkxape xop, ꞌãte xa hãmyũmmũgãp-tup tu tikmũꞌun mĩyꞌax hã ꞌãyũmmũgãp-tup. Tik teꞌ nõy pu hãmꞌãktux xex, tu nõ kaxꞌãmi tappet tuꞌ. ꞌOk tikmũꞌun te nõ hãmꞌãktux xex koxyõy? ꞌÃmhok. ꞌOk tikmũꞌũn te hãmꞌãktux nõy kaxꞌãmi xehomiꞌ? ꞌÃmhok.
\v 16 Hõmã Topa te ꞌAmanãm pu hãmꞌãktux xex, xix ꞌAmanãm yãy mõkputox pu hãmꞌãktux xex. Yã mõkputox puxehnãg ꞌãktux, ꞌap xohixꞌah. Yã Kunnix te ꞌAmanãm hãꞌ mõkputox xeꞌeꞌ. Yã Topa te yãy nõm kutnãhãꞌ.
\v 17 ꞌŨyũmmũg. Hõmã Topa te nõm pu hãmꞌãktux xex, yã Topa teꞌ paꞌax hittap mĩy tikmũꞌũn mũtik, ha taꞌ nõg hãmyãxatamuk xohix teꞌ 430, ꞌĩhã Topa te tikmũꞌũn pu popmãhã Mõyyex yõg xatꞌax. ꞌOk Mõyyex yõg xatꞌax te nõ hãmꞌãktux xex koxyõy? ꞌOk paꞌax koxyõy? ꞌÃmhok.
\v 18 ꞌOk Topa te hãmmaxnãhã Mõyyex yõg xatꞌax mĩy xop hah? ꞌOk pe hãmꞌãktux xex ꞌũkopaꞌ kuxa mãm xop pu hãmmaxnãhãꞌ? Yã hãmmaxnãhãꞌ! Pax pu Topa hãmmaxnã Mõyyex yõg xatꞌax mĩy xop hah, puxix hãmꞌãktux xex xop kuxa mãm kaꞌok xop ha hãmmaxnã hok. Pa Topa te ꞌAmanãm pu hãmꞌãktux xex, tu nõm ha hãmmaxnãhãꞌ.
\p
\v 19 Teptu Topa teꞌ xatꞌax xohix xat? ꞌŨxat, pu tikmũꞌũn hãmyũmmũg, nũy yãy yõg hãpkummuk mĩyꞌax yũmmũg. Mõyyex yõg xatꞌax pip kaꞌok, tu mõktuꞌ xupep ꞌAmanãm mõkputox, ha Topa te nõm pu hãmꞌãktux xex, ha pexkox yõg nũꞌpok xop te tik pu Mõyyex yõg xatꞌax xohix popmãhãꞌ, ha tik te tikmũꞌũn pu nõm popmãhãꞌ. Nõm tik te yãy koteꞌ xip.
\v 20 Pa tik te yãy koteꞌ xip, puxix tu punethok. Pa Topa yãp-xet, ꞌap punethokꞌah. Topap-xet te hãmꞌãktux xex.
\s Texĩy ꞌũxatꞌax popmãhãꞌ
\p
\v 21 ꞌOk Mõyyex yõg xatꞌax te Topa yõg hãmꞌãktux xexꞌax nõãꞌ? ꞌÃmhok! Pax pu Mõyyex yõg xatꞌax tikmũꞌũn hĩnnãꞌ, puxix tikmũꞌũn nõm xatꞌax mĩy, nũy yãy kuxa kummuk tupmãꞌ. Pa ꞌãmhok, ꞌũxatꞌax teꞌ kuxa tupmã hok.
\v 22 Pa Topa yõg tappet teꞌ kummuk ꞌãktux, tu tikmũꞌũn xohix xexka kummuk ꞌãktux, xiꞌ puknõg xop xohix xexka kummuk ꞌãktux, hãpkummuk mĩy hah. Topa yõg tappet te nõm ꞌãktux, pu tu kuxa mãm kaꞌok, puyĩy Topa hãmmaxnãꞌ. Topa te nõm pu hãmꞌãktux xex, tuꞌ kuxa mãm kaꞌok xop pu hãmꞌãktux xex, nõm xop kuxa mãm kaꞌok Yeyox Kunnix kopah.
\p
\v 23 Hamũn, yũmũg kuxa mãm kaꞌok nõmhã, pa hõmã Mõyyex yõg xatꞌax te yũmũg kuxa hĩy, kanet kaꞌok kopaꞌ hĩy putuk, ha mõktu yũmũg kuxa mãm kaꞌok nõmhã.
\v 24 Hamũn, Mõyyex yõg xatꞌax te yũmũg hãmyũmmũgãhãꞌ, nũy yũmũg mõgãꞌ, ha mõktuꞌ xupep Yeyox Kunnix, pu tu yũmũg kuxa mãm kaꞌok Yeyox Kunnix kopah, puxix Topa yũmũg kuxa kummuk tupmãꞌ, ꞌũyĩy kuxa tu max.
\v 25 Hu nõmhã yũmũg kuxa mãm kaꞌok, ha Topa yõg xatꞌax te yũmũꞌã hãmyũmmũgãhãꞌ, haꞌ kux.
\p
\v 26 ꞌÃxop xohix kuxa mãm kaꞌok Yeyox Kunnix kopah, hu ta ꞌãxop yã Topak-tok xop, yã ꞌãkuxap-xet Yeyox Kunnix kuxa mũtik.
\v 27 Yã ꞌãxohix mõxaha Kunnix yõg xop kopah, ha ꞌãp-tox pix, yã ꞌãkuxa mãm Kunnix kopah, tu nõmhã Kunnix putuk, yã Kunnix xip ꞌãxohix kopah.
\v 28 Yã Topa te yũmũg xohix hã teheꞌ, haꞌ yãy putuk ꞌũkuxa mãm kaꞌok xop, yã Yoneo xop xiꞌ puknõg xop te yãy putuk. Yã nõm teꞌ hok hãꞌ hãm, xix nõm te tayũmak hãꞌ hãm, tu yãy putuk. Yã tik xix ꞌũn te yãy putuk. Yã xohix teꞌ nõy putuk, yãꞌ xohix kuxa mãm kaꞌok Yeyox Kunnix kopah. ꞌAp pipꞌah ꞌũxexka xop xik-tõgnãg xop. Yã yãp-xet, ꞌũkuxap-xet, tu yãy putuk.
\v 29 Yã ꞌãxop mõxakux Kunnix yõg xop kopah, hu ta kama ꞌAmanãm hã ꞌãmõkputox, ha Topa te xa hãmmaxnãp-tup kamah, yã tute hãmꞌãktux xex ꞌAmanãm mõkputox puꞌ.
\c 4
\p
\v 1 ꞌŨyũmmũg. ꞌŨtak ꞌũm yõg hãpxop xohix, tuꞌ xok putup, hak-hãy tuk-tok teꞌ pop putup, ꞌũyõg ꞌãtak yõg hãpxop pop putup. Paꞌ xip ꞌãtak, hak-tok ꞌũhok, yãꞌ hok hãꞌ hãm yãy tak puꞌ. ꞌŨyõg ꞌãtak teꞌ popmãꞌax hãpxop, yãk-tok yõg hãpxop, tuꞌ pop putup, pa hõnhãꞌ popꞌah. Yã hõnhã hãmhõgnãg ꞌũk-tok.
\v 2 Ha taꞌ xuxyã te nõm kutok xat, nũy tu pẽnã max, ha taꞌ xuxyã nõy te hãpxop pẽnãnãꞌ xip, nõm hãpxop ꞌãtak tek-tok puꞌ popmãꞌax, yã nõm tek-tok pẽnãhãꞌ, tu hãpxop pẽnãhãꞌ, tu mõktu nõm ꞌãmnĩy ꞌũm mõꞌnãhãꞌ, yã tik yõg ꞌãtak te nõm ꞌãmnĩy ꞌãktux tap.
\v 3 Hã kaxĩy yũmũg mũn hõmã kamah. Yã yũmũꞌãte nõm kutok putuk, ha yãmĩy kummuk xop te yũmũg xat kummuk, ha nõm xop pu yũmũꞌãteꞌ hok hãꞌ hãpxopmãhãꞌ yãmĩy xop puꞌ, xix Topa hãꞌ puknõg xop pu yũmũꞌãte hãpxopmãhãꞌ.
\v 4 Pa hãpxip ꞌĩhã nõm hãptup mõꞌnãhãꞌ, ꞌĩhã Topa te yãy kutok pit nũꞌkutnãhãꞌ, haꞌ tut teꞌ put, yã Yoneo xop kopaꞌ xip Topak-tok, ha ta Mõyyex yõg xatꞌax xohix xexka puꞌ yĩpkox xip Topak-tok, nũnte hãm xexka tuꞌ xip ꞌĩhãꞌ.
\v 5 Topak-tok nũn, nũy nõkõpanat yũmũg xohix, puyĩy Mõyyex yõg xatꞌax yũmũg xat hok, tuꞌ nũn, nũy yũmũg kuxa hĩnnã xeꞌẽgnãg, ꞌũyĩy yũmũg xohix yãyhã Topak-tok xop.
\p
\v 6 Yã ꞌãxop yã Topak-tok xop, yĩy ta Topa te nũꞌkutnãhã yãy Koxuk ꞌãkuxa hah, ha Topa Koxuk te Topa pu: “ꞌÃtak, yõgnũ ꞌãtak!” Kaxĩy.
\v 7 Hamũn, yã hõnhãꞌ kux, ꞌãxop te ꞌa hok hã ꞌãhãmꞌah, pa nõmhã ꞌãxop yã Topak-tok, ha Topa te xaꞌ popmãp-tup yãy yõg hãpxop, yã yãy kutok pu nõm popmãp-tup.
\s Paot kuxãnõg. ꞌOk Ganax yõg xop kuxa mãm kux?
\p
\v 8 Pãyã hõmã ꞌãxop te Topa hã ꞌãpuknõg, ha ta topa komut xop te ꞌãxop xat pax, tu yã mõꞌãmãꞌ.
\v 9 Pa nõmhã ꞌãxop te Topa yũmmũg, yã Topa te ꞌãxop yũmmũg hãmãxap, hak-nãy tu ꞌãxop te Topa yũmmũg. Texĩy tu putpu ꞌãxop mõg, nũy Topa hãꞌ puknõg xop yõg hãpxopmãꞌax tat ꞌũxeheh? Nõm hãpxopmãꞌax te ꞌãxop hã te ꞌohnãg. Yã ꞌãkummugãꞌax ꞌũxeheh.
\v 10 Yã ꞌãxat, xa nit xãn ꞌĩhã ꞌãhãm hok, tu ꞌãmuk xexka mĩyꞌax xat, xix mãyõnhex tupꞌax yõg ꞌãmuk xat, xix mõꞌãgmũꞌax yõg, xix hãmyãxatamuk yõg.
\v 11 ꞌŨgkuxãnõg. ꞌOk hitop hãg hãm ꞌũgmũn ꞌãxop kopah? ꞌOk ꞌãkuxa mãm kux, nũy nõ xatꞌax hittap mĩy?
\p
\v 12 ꞌŨkxape xop, ꞌãpu yõg hãpxopmãꞌax tat. Yã ꞌãxop hãgxape, yãg kummugã ꞌohnãg.
\v 13 Xatek yũmmũg, hõmã ꞌũkpakut, ꞌihã noxk xip ꞌãxop mũtik, hu ꞌãte Topa yõg hãmꞌãpak maxꞌax ꞌãktux hãmãxap ꞌãxop puꞌ.
\v 14 ꞌŨkpakut xexkaꞌ, pa ꞌãxop tek putup pax, tuk mũn tu yãyhãhup ꞌohnãg, tuk kuxa kaꞌ, tu ꞌãhãk teheꞌ, tuk hãꞌ tot, yã pexkox nũꞌpok xop putuk, yã Yeyox Kunnix putuk,
\v 15 ha ꞌãxop tek mũn hã ꞌãhittup xexkaꞌ! Hamũn, hõmã ꞌãxop tek mũn hã ꞌãhittup xexkaꞌ, pa hõmhã ꞌãmhõk. Texĩy?
\v 16 ꞌOk ꞌãte xa hãpxeꞌe ꞌãktux, hu yãyhã ꞌãxop hãk puknõg? Pa tĩy! ꞌOk ꞌãhãg puknõg nõmhã?
\p
\v 17 Yã nõm xop te ꞌãp-tup pax ꞌãktux, nũy ꞌãxop mõgã, pãyã yõg putat kaꞌax kummuk, tu yũmũg yãy xatat putup, ꞌãxop xik mũn, xayĩy nõm pe ꞌãmõg.
\v 18 Taꞌ max, pu nõm xop ꞌãp-tup pax. Tikmũꞌũn teꞌ nõy putup pax, tu hãpxopmã max, ꞌĩhã ꞌãxop mũtik xip, ꞌãxop mũtik xip hok kamah. ꞌÃte xa hãpxeꞌe ꞌãktux.
\v 19 ꞌŨgkutok xop, ꞌũgkuxa xũy, yãꞌ tut tek-tok put xũy putuk. Hã kaxĩy ꞌãte ꞌãxop hãg kuxa xũy, ha mõktu ꞌãxop yãyhã Kunnix putuk.
\v 20 ꞌÃtep-tup, nũy noxk xip ꞌãxop mũtik nõmhã, nũy ꞌõg hãmpe tu panõm hãꞌ nõy yãnãn. ꞌŨgkuxãnõg. ꞌA ꞌãxop yõg hãpxopmãꞌax maxꞌah.
\s Tu ꞌAgah xix Xat ꞌãktux
\p
\v 21 ꞌÃpu, ꞌã hãmꞌãktux! ꞌÃxop tep-tup, nũy Moyyex yõg xatꞌax mĩy, nũy yãy kuxa tupmã Topa puꞌ. Mõyyex yõg xatꞌax tep-tep ꞌãktux?
\v 22 ꞌŨxuktux kaxĩy: Yã mõnãyxop ꞌAmanãm kutok 2. ꞌŨk-tok puxet mũg tut yãꞌ hok hãꞌ hãm, yãꞌ nõy teꞌ xat, haꞌ hok hãꞌ hãm, yãꞌ puknõg. Pak-tok nõy mũg tut yã ꞌũn xeꞌẽgnãg, ꞌap hok hãꞌ hãmꞌah, pãyã kãmãnat xat.
\v 23 Ha ꞌŨn yãꞌ hok hãꞌ hãm, tuk-tok pit put, yã kaxĩy ꞌũn xohix tek-tok put. Pa ꞌũn nõy yãꞌ nõy xat, tuk-tok pit put, ha hãmhũmnãg ꞌũnãꞌax, ha Topa te hãmꞌãktux xex, tu kakxop putnãhãꞌ.
\v 24 Hamũn te yũmũꞌã hãmyũmmũgãhãꞌ hãpxopmãꞌax nõy. ꞌŨn 2 te hãpxopmãꞌax yũmmũgãhãꞌ, Topa teꞌ paꞌax mĩy tikmũꞌũn mũtik. ꞌŨn puxet yãꞌ hok hãm. Yãꞌ xuxetꞌax ꞌAgah, ha ꞌũn nõy te ꞌAgah xat. Hã kaxĩy Topa te tikmũꞌũn xat, tuꞌ xatꞌax xohix popmãhã yĩktix Xĩnãy tuꞌ, hã kaxĩy ꞌÃgah hãꞌ mõkputox, yãꞌ hok hãꞌ hãm, tuꞌ yãy xat ꞌohnãg.
\v 25 Yĩktix Xinãy xip ꞌAnap tuꞌ, tuꞌ yõg tikmũꞌũn yãꞌ hok hãꞌ hãm, xix kõmẽn Yenoyanẽn yõg tikmũꞌũn yãꞌ hok hãꞌ hãm. Nõm xop te ꞌAgah mõkputox putuk.
\v 26 Ha taꞌ xip kõmẽn Yenoyanãn nõy, tu pepiꞌ xup pexkox tuꞌ. Nõm yõg tikmũꞌun te yãy xat, ꞌap hok hãꞌ hãmꞌah, nõm kõmẽn yũmũꞌã hãꞌ tut xeꞌeꞌ.
\v 27 Yĩy Topa yõg tappet te:
\q “ꞌÃhittup, xate ꞌãk-tok put xetꞌah,
\q ꞌÃhittup ꞌãk-tok put tu ꞌãxũy ꞌohnãg.
\q Yã tik teꞌ xetut nĩm, hak-tok xohix punethok.
\q Ha tik teꞌ xetut mũtik nõm, hak-tok kutõgnãg.” Kaxĩy.
\p
\v 28 Hõmã Topa te hãmꞌãktux xex ꞌAmanãm puꞌ, yĩꞌ xetut Xat tek-tok ꞌIyak put. ꞌŨkxape xop, hã kaxĩy yũmũg yãyhã Topak-tok xop, Topa te hãmꞌãktux xex hah.
\v 29 Yã hõmã ꞌAmanãm kutok puxet, pa Topa te nõm hãmãxap hã hãmꞌãktux xex ꞌohnãg. Ha tak-nãy tuꞌ nõy put, ha Topa Koxuk te nõm hã hãmꞌãktux xex, hak-tok te mãxap teꞌ taknõy tek-teꞌex kummuk. Yã hã kaxĩy hõnhã kamah.
\v 30 Putep xuktux Topa yõg tappet? Yã hãmꞌãktux, hu: “ꞌÃpuꞌ xat pu mõg, ꞌũn teꞌ hok hãꞌ hãm, xik-tok. Hãmũn, yã ꞌãtak te yãy yõg hãpxop popmãp-tupꞌah nõm ꞌũn kutok puꞌ, pãyãk-tok nõy puꞌ popmãp-tup, tu yãy xetut xeꞌek-tok puꞌ popmãp-tup.” Kaxiy.
\v 31 Yĩy ta ꞌũkxape xop, yũmũg mũn yãꞌ xetut xeꞌe hãk kutok xop, nõm teꞌ nõy xat. ꞌAp ꞌũn nõy hã yũmũg kutok ꞌohnãg, nõm teꞌ hok hãꞌ hãm. ꞌÃmhok.
\c 5
\s Tuteꞌ xatꞌax ꞌãktux, xiꞌ hi xeꞌẽgnãg ꞌãktux
\p
\v 1 Yã Kunnix te yũmũg kuxa hĩnnã tap, ꞌũyĩy hi xeꞌẽgnãg. Hõmã Yoneo xop yõg xatꞌax te yũmũg xat, ha yũmũg kuxa hĩy, pa Kunnix te yũmũg mõy, ha yũmũg mõg. ꞌÃpu nox piꞌ, puyĩyꞌ xatꞌax ꞌãkuxa hĩy hok ꞌũxeheh, kaꞌ hok hã ꞌãhãm ꞌũxeheh.
\p
\v 2 ꞌÃpu ꞌũg-ãpax, ꞌũgmũn Paot, tu ꞌãxop pu hãmꞌãktux: ꞌÃxop te hitop yãy xax mep ꞌũyĩmap, nũy yãy kuxa kummuk tupmã Topa puꞌ. ꞌOk Kunnix te hitop tuꞌ xok ꞌãxop pupiꞌ?
\v 3 ꞌÃte xe hãmꞌãktux, tik ꞌũm te yãy xax mep ꞌũyĩmap, puxiꞌ max, pu tu mĩy Mõyyex yõg xatꞌax xohix xexkaꞌ, ꞌap xahixꞌah. Topa teꞌ xuktux.
\v 4 Nõm ꞌũm tep-tup, nũy Mõyyex yõg xatꞌax mĩy, puyĩy Topa tikmũꞌũn kuxa kummuk tupmãꞌ, puyĩꞌ kuxa tu max, puxix Topa nõm ꞌũm hã hãmmaxnã ꞌohnãg, haꞌ kuxa tupmã ꞌohnãg. ꞌA Kunnix yõgꞌah.
\v 5 Pa yũmũg kuxa mãm kaꞌok, hu yũmũꞌãte hãmmax hip, pu Topa yũmũg kuxa kummuk tupmãꞌ yã Topa te yũmũ yõg hãpkummuk mĩyꞌax xaxogãhãꞌ, haꞌ kux. Yã yũmũꞌãte hãmmax hip, ꞌĩhã yũmũg kuxa mãm kaꞌok, yĩy Topa Koxuk te yũmũg kaꞌogãhãꞌ.
\v 6 Yũmũꞌãte yãy xax mep ꞌũyĩmap, peꞌ yãy xax mep ꞌũyĩmap hok, yãꞌ yãy putuk Topa puꞌ, pa Topa tep-tup, yũmũg kuxa mãm kaꞌok, hu yũmũꞌãtek nõy putup pax nõmhãꞌ.
\p
\v 7 Hõmã ꞌãxop mõg putat max hã, tu ꞌãyĩpkox pip, hu hãmꞌãpak maxꞌax xeꞌe ꞌãpak. Pa nõmhã ꞌãmhok. Putep te ꞌãxop mõgãhãꞌ, pu nõm putat xak?
\v 8 ꞌA Topaꞌah yã Topa te yãy ha ꞌãxop xãnãhãꞌ.
\v 9 ꞌÃpu hãmyũmmũg. Tikmũꞌũn te: “ꞌŨxip hãmãxap pãm tokatogãꞌax kutõgnãg, pa hãpxip ꞌĩhã nõm pãm xexkaꞌ,” kaxĩy. Hã kaxĩy hãpkummuk teꞌ xexka nõy nãꞌ mõg.
\v 10 ꞌŨgkuxa yũm kaꞌok Topa kopah, tu hãmyũmmũg, ꞌa ꞌãxop te hãmpeꞌãpaxex nõy putupꞌah, pak mũn putuk hãmpeꞌãpaxex. ꞌŨgkuxa yũm kaꞌok Topa kopah, tu hãmyũmmũg, Topa te nõm tik kummuk xũygãp-tup, nõm te ꞌãxop mõgãhã hatoꞌaꞌ.
\p
\v 11 ꞌŨkxape xop, putep hãmpeꞌãpaxex? ꞌOk ꞌãte hãmꞌãktux, pu tikmũꞌũn Topa yõg xatꞌax mĩy, nũy yãy kuxa kummuk tupmãꞌ? ꞌÃmhok. ꞌA ꞌãteꞌ xuktuxꞌah. ꞌOk tikmũꞌũn tek kummugãhãꞌ? Hamũn. ꞌOk tikmũꞌũn te Yeyox yõg xokꞌax ꞌãpak, tuꞌ xok mĩpkupnix tu xupak, tuꞌ gãy hok? ꞌÃmhok. Yãꞌ gãy tikmũꞌũn!
\v 12 Nõm te ꞌãxop kummugãhãꞌ, yã ꞌãtep-tup, pu nõm yãy mep xexkaꞌ!
\p
\v 13 Hamũn. ꞌŨkxape xop, Topa te yãy ha ꞌãxop xãnãhãꞌ. Tutep-tupꞌah puꞌ xatꞌax ꞌãxop xat pax nãm. Pa Topa te ꞌãxop mõy, xa mõg. Pa nõmhã yãy putupꞌax mĩy hok, ꞌãkuxa te nõm kummuk tep-tup, pa ꞌãpu ꞌãnõy putup pax, nũy ta ꞌãnõy ha hãmmaxnãꞌ.
\v 14 Yã mõyyex yõg xatꞌax xohix te hãpxopmãꞌax puxet ꞌãktux, hu: “ꞌÃpu ꞌãnõy putup pax, yã yãy putup pax putuk,” kaxĩy.
\v 15 Pa ꞌãxop yãy mãnõg, xix yãy kix, puxix xokxop putuk, yã yãy mãhãꞌ.
\s Topa Koxuk xix tikmũꞌũn yõg putupꞌax
\p
\v 16 Pa ꞌãte xa hãmꞌãktux, ꞌãpu Topa Koxuk pu ꞌãyĩpkox pip, nũy yãy yõg putupꞌax mĩy hok.
\v 17 Yã tikmũꞌun te yãy yõg putupꞌax mĩy, puxix Topa Koxuk puꞌ yĩpkox hok, ha Topa Koxuk puꞌ yĩpkox pip, puxix yãy yõg putupꞌax mĩy hok. Yã Topa Koxuk te yũmũg yãy yõg putupꞌax hãꞌ puknõg, ha yũmũg yãy putupꞌax te Topa Koxuk hãꞌ puknõg. ꞌAp yãy putuk ꞌohnãg, yĩy Topa Koxuk puxet pu ꞌãyĩpkox pip.
\v 18 Ha Topa Koxuk te ꞌãmõgãꞌ, puxix Mõyyex yõg xatꞌax ꞌãxat pax hok.
\p
\v 19 Yũmũꞌãte yãy putupꞌax mĩy. puxix tikmũꞌũn yũmũ yõg hãpxopmãꞌax pẽnãꞌ. Yã yũmũꞌãtek nõy hãk xupxet pax, tu ꞌũn xop pẽnã kummuk, tu tik xop pẽnã kummuk, tu kokex putuk, tu yũmũꞌãte hã kaxĩy putup pax hãpxopmãꞌax xut putux,
\v 20 tu topa komut xop pu nũktettex, tu mĩm mĩy, tu yũmũg yãy putup nõg, tu yãy kuteꞌex kummuk, tu yãy tup-tup hãpxop xohix, tu yũmũg gãy, tu yũmũg xupkũmĩy, tu yũmũg yãy tuk-mĩy, tu yũmũꞌãte tikmũꞌũn xohix nĩm, nũy yãgnãg mõgãꞌ,
\v 21 tu yũmũꞌãte yĩpkũmĩy, tu yũmũg paptux, tu yũmũg yãy hi pax, nũy hãpkuteꞌex pax. Nõm te yãy putupꞌax mĩy xop texĩy mĩy. Hõmã ꞌãte xa hãmꞌãktux, tu hõnhã xeꞌ xuktux. Tikmũꞌũn teꞌ mĩy nõꞌõm, ꞌaꞌ mõꞌnãp-tupꞌah Topa yõg xop kopah, yã Topa te nõm xat xop kopaꞌ xip, pãyã hãpkummuk mĩy xop xat ꞌohnãg.
\p
\v 22 Pa Topa Koxuk xip yũmũg kuxa kopah, puxiꞌ pip hãpxopmã max xohix yũmũg kopah. Yã mĩnta ta putuk yũmũg kopah. Yũmũꞌãtek nõy putup pax, tu yũmũg kuxa hittup pax, tu yũmũg kuxa mãm, tu yũmũꞌãte hãmmax hip, tu yũmũg gãy ꞌohnãg, tuk nõy ha hãmmaxnãhãꞌ, tuꞌ nõy tu yũmũg pip kaꞌok,
\v 23 tu hãpkummuk yãnãn ꞌohnãg, tu yãy putupꞌax mĩy ꞌohnãg. ꞌŨmĩy nõm hãpxopmã max, puxix Mõyyex yõg xatꞌax hitop tu yũmũg xat.
\v 24 Ha Yeyox Kunnix yõg xop xohix te yãy putupꞌax mĩy kux. Yeyox Kunnix xok mĩpkupnix tuꞌ, puyĩy yũmũ yõg putupꞌax kummuk kux.
\v 25 Topa Koxuk te yũmũg kuxa hĩnnãhãꞌ, nũy yũmũg mõgãꞌ, ꞌũyĩy hãpxopmã max xohix. ꞌÃpu nõm pu ꞌãyĩpkox piꞌ.
\v 26 ꞌÃpu yũmũg yãy xexka pek paxex hok, tuk nõy kuteꞌex kummuk hok, tuknõy tu yĩpkumĩy hok.
\c 6
\s ꞌÃpu ꞌãnõy pupi hãpxop putux tat
\p
\v 1 ꞌŨkxape xop: ꞌũxip tikmũꞌũn ꞌũm, tu hãpkummuk mĩy. Ha ta nõy ꞌũm xip ꞌãxop kopah, nõm te Topa Koxuk puꞌ yĩpkox xip pax. Yãꞌ max, nõm te Topa Koxuk ꞌãpak pax teꞌ nõy putpuꞌ nũnnã putat max tuꞌ, tuꞌ nõy te hãpkummuk mĩy nũnnã putpuꞌ. Pũyãꞌ gãy hok, Topa Koxuk te nõm xat hah. Pũyã tu yãy kutõgnãg peꞌpaxeh. Yã paxip, nũy hãpkummuk mĩy hok kamah
\v 2 ꞌApu ꞌãnõy yõg hãpxop putux tat, yã ꞌãnõy yõg hãpkummuk hãꞌ tat. Hã kaxĩy xate Kunnix yõg xatꞌax mĩy.
\v 3 Tik ꞌũm te yãy xexka peꞌpaxex, pãyãk-tõgnãg. Tuteꞌ yãy puꞌ koit.
\v 4 ꞌÃpu yãy yõg hãpxopmãꞌax kopit, ꞌãnõy yõg hãpxopmãꞌax kopit hok pa ꞌõgnũ ꞌũp-xet. ꞌÃnõy yõg hãpxopmãꞌax ꞌãktux kummuk hok, pãyãꞌ yõg max. Hã kaxĩy tu xate yãy yõg kopit, tu yãy pẽnãp-tup max, ꞌĩhã ꞌãnõy yõg hãpxopmãꞌax kopit ꞌonhãg.
\v 5 Hamũn, ꞌũxohix te yãy yõg hãpxop putux tat putup, yã yãy yõg hãpkummuk hãꞌ tot putup.
\p
\v 6 Tik ꞌũm te ꞌãyũmmũgãhã Topa yõg tappet. ꞌÃpu nũ mũtik yãy puꞌ pot ꞌõg hãpxop max xohix.
\v 7 ꞌApu hãmpeꞌãpaxeh hitop hok, yã Topa kuxa yũm ꞌohnãg koitꞌax kopah. Tik te hãpxopxap xok tu nõm hãꞌ ta mõy putup, ꞌap ta nõyꞌah.
\v 8 Tikmũꞌũn te pẽyõg xap xok hãm tuꞌ, puxix pẽyõg ta nũnnãp-tup yãy pet hah. Hã kaxĩy tikmũꞌũn te yãy putupꞌax mĩy, puxix hãpkummuk hãꞌ yãnãn, ha tikmũꞌũn te Topa Koxuk puꞌ yĩpkox xip, tu hãpxopmã max, puxix tuꞌ hi xeꞌẽgnãg mõꞌkumaꞌ mõg, haꞌ kux ꞌohnãg.
\v 9 ꞌÃpu yũmũg hãpxopmã max, yã tuknõg hok. Yũmũg hup hok, kopxix hãpxip ꞌĩhã hãmmaxnãp-tup, yãy ha hãmmaxnãp-tup.
\v 10 Hu ꞌãpu yũmũg hãpxopmã max mõꞌkumak mõg tikmũꞌũn xohix puꞌ, tuꞌ xape xop pu hãpxopmã max xeꞌẽgnãg, yãꞌ kuxa mãm xop xape xop puꞌ.
\s ꞌŨkuxꞌax
\p
\v 11 Ta hẽnãꞌ, ꞌãte xa kaxꞌãmi xexkaꞌ, yã ꞌũgyĩm hã kaxꞌãmi xexkaꞌ.
\v 12 Nõm tik tep-tup, pu tikmũꞌũn nõm ꞌãktux max. Nõm tik tep-tup nũy ꞌãxop mõgãꞌ, nũy ꞌãxop xat, xayĩy ꞌãxax mep ꞌũyĩmap. Texĩy? ꞌAp nõm xop te Kunnix xokꞌax ꞌãktux putupꞌah. Yã mĩpkupnix tuꞌ xok, pãyã nõm xop teꞌ xaxok, puyĩy tikmũꞌũn nõm kuteꞌex kummuk hok.
\v 13 Hamũn, nõm te yãy xax mep ꞌũyĩmap, pa nõm te Mõyyex yõg xatꞌax xohix mĩy ꞌohnãg, pa nõm te ꞌãp-tup, nũy ꞌãxat, xayĩy ꞌãxop yãy xax mep ꞌũyĩmap. Texĩy? Nõm tik tep-tup, nũy yãy ꞌãktux xexkaꞌ, ꞌũxohix te yãy xax mep ꞌũyĩmap hah.
\v 14 Pak mũn ꞌa yãy xexka ꞌãktux putupꞌah, pa ꞌãte yũmũg Yeyox Kunnix ꞌãktux putup haꞌ xok mĩpkupnix tuꞌ, yũmũg pupiꞌ xok. Yã Kunnix tek pupiꞌ xok, ꞌũyĩy hãm xexka yõg hãpxop xohix xak hok, puyĩy Kunnix puxet tuk kuxa hi nõmhã, ꞌãte nõm pu hãpxopmãꞌ.
\v 15 Pe yãy xax mep ꞌũyĩmap, pe yãy xax mep ꞌũyĩmap hok, yã hãpxopmãꞌax kutõgnãg. Pa Topa te yũmũg kuxa tupmãhãꞌ, yũmũg kuxa tu max, ꞌũyĩy hãpxopmã max xexkaꞌ.
\v 16 ꞌÃpu ꞌãyĩpkox piꞌ, xayĩy Topa yõg putupꞌax mĩy. Pũyã Topa ꞌãkuxa mãmmãꞌ, xix ꞌãkuxa kaꞌ, xayĩy Topa hã yãy yõg tikmũꞌũn xeꞌeꞌ.
\p
\v 17 Nõmhã puxiꞌ. ꞌÃpu tikmũꞌũn ꞌũxek kummugã hok. Yã hamũn. hõmã tikmũꞌũn tek kummugãhãꞌ, yĩy kayax pip yõgnũꞌ, yã Yeyos puk hok hãk hãm.
\p
\v 18 ꞌŨxape xop, pũyã yũmũg xuxyã Yeyox Kunnix xa hãmmaxnã mõꞌkumaꞌ mõg. Hamũn.
\p Tu ta kux.