\id EPH  - Maxakalí NT [mbl] (Brazil) -2011 bd
\h ꞌEPEX
\toc1 ꞌEpex
\toc2 Efésios (Ef)
\mt PAOT TE KÕMẼN ꞌEP YÕG TIKMŨꞌŨN KUXA MÃM KAꞌOK XOP PU KAXꞌÃMIꞌ
\c 1
\p
\v 1 ꞌŨgmũn Paot, ha Topa tep-tup, pu Yeyox Kunnix nũꞌkutnãꞌ, ha ꞌãte kõmẽn ꞌEp yõg tikmũꞌũn kuxa mãm kaꞌok xop pu kaxꞌãmi, nõm xop te Yeyox Kunnix tuꞌ pip kaꞌok, tuꞌ kuxap-xet Yeyox Kunnix kuxa mũtik,
\v 2 yĩy ꞌãte: Pũyã ꞌÃtak Topa xa hãmmaxnãꞌ, xix ꞌãkuxa mãmmãꞌ. Pũyã yũmũg xuxyã Yeyox Kunnix kama xa hãmmaxnã xexkaꞌ, yã ꞌãkuxap-xet Yeyox Kunnix kuxa mũtik.
\s Topa te Kunnix hã hãmmaxnãhãꞌ
\p
\v 3 ꞌÃpu yũmũg xuxyã yõg ꞌÃtak Topa pu hãmꞌãktux, hu: “ꞌÃmax Topah,” kaxĩy. Yã yũmũg xuxyã Yeyox Kunnix yõg ꞌãtak, tu yũmũꞌã ha hãmmaxnãhãꞌ, yã yũmũg kuxap-xet Kunnix kuxa mũtik, yĩy Topa te hãmmaxnãhãꞌ, tu yũmũꞌã popmãhã pexkox yõg hãpxop xohix.
\v 4 Topa te yũmũg yĩmõgãtux hãmãxap, nũy yũmũꞌã ha yãy yõg tikmũꞌũn, ꞌũyĩy yũmũg kuxap-xet Kunnix kuxa mũtik, hak-nãy tu hãm xexka xohix mĩy. Yã yũmũg yĩmõgatux, ꞌũ yũmũg yãyhã max xeꞌẽgnãg xop Topa puꞌ, mõ yũmũg yãy xeꞌẽgnãg hah,
\v 5 hup-tup tap, ꞌũ yũmũg Topa hãg kutok xop, yũmũg kuxa mãm kaꞌok Yeyox Kunnix kopah, hu hãmyũmmũg: Yã Topak-tok xop, kaxĩy Topa tep-tup,
\v 6 yĩy ꞌãpu yũmũꞌãte Topa xexka ꞌãktux, ha yũmũꞌã hã ꞌũhok tu hãmmaxnãhãꞌ, ꞌĩhãk-tok puxehnãg nũꞌkutnãhã yũmũꞌãꞌ, yã yãy kutok mõꞌyãy xeꞌẽgnãg.
\p
\v 7 Kunnix xok, mĩpkupnix tuꞌ xup, tuꞌ xok, nũy yũmũg mõy pu mõg, nũy yũmũ yõg hãpkummuk mĩyꞌax xaxogãꞌ, tu yũmũꞌã hãmmaxnãhãꞌ. Yãꞌ max xeꞌẽgnãg Topah,
\v 8 tu yũmũꞌãꞌ hok hã hãmmaxnã xexkaꞌ,
\v 9-10 yĩy hãmpeꞌpaxex, nũy hãpxop xohix yãy tu nũꞌxok, nũy pexkox yõg hãpxop xohix, xix hãm xexka yõg hãpxop xohix yãy tu nũꞌxok, puxix tikmũꞌũn xohix yãy tu nũꞌnãhãꞌ, puxix Kunnix tuꞌ xat, puyĩy nõm puꞌ yĩpkox piꞌ, yĩy yũmũꞌã hãmyũmmũgãp-tup, huꞌ yũmmũgãhãꞌ. Hõmã Topa te nõm hãmꞌãktux xeꞌe yũmmũgã ꞌohnãg, pãyã hõnhãꞌ yũmmũgãhãꞌ, ꞌũp-tup tuꞌ.
\p
\v 11 Topa te hãmpeꞌpaxex, tup-tup hãmãxap, tuꞌ mĩy, tu yũmũg yĩmõgatux, ꞌũ yũmũg yãyhã ꞌũyõg tikmũꞌũn, nũy yũmũg kuxap-xet Kunnix kuxa mũtik, ha kaxĩy Topa tep-tup.
\v 12 Hak mũg kuxa mãm kaꞌok hãmãxap, tu Kunnix hip, tu Topa xexka xeꞌẽgnãg ꞌãktux.
\p
\v 13 ꞌÃxop kamah te hãmꞌãpak maxꞌax ꞌãpak, yãꞌ nõy te xaꞌ xuktux, yĩy ꞌãkuxa mãm kaꞌok Kunnix kopah, ha Topa te xa mõꞌxut ꞌãkuxa puꞌ, yãy Koxuk hã xa mõꞌxut, yã kaxĩy tikmũꞌũn te mũnũytut mõꞌxut nũy yãy yõg mũnũytut yũmmũgãꞌ, yã ꞌãxop yã Topa yõg tikmũꞌũn xeꞌeꞌ.
\v 14 Kaxĩy Topa te hãmꞌãktux xex, nũy yũmũꞌã popmã pexkox yõg hãpxop xohix, tu yũmũg mõy putup, ꞌũ mõg, ha Topa Koxuk te: “Ya hamũn! Yã pexkox yõg hãpxop pop putup!” kaxĩy. ꞌÃpu, yũmũg Topa xexka xeꞌẽgnãg ꞌãktux!
\s Paot te Topa pu hãmꞌãktux
\p
\v 15 ꞌÃkuxa mãm kaꞌok yũmũg xuxyã Yeyox kopah, tuꞌ xape xohix xop putup pax, yãꞌ kuxa mãm kaꞌok xop xohix hã ꞌãxape, ha tikmũꞌũn te ꞌãꞌ xuktux,
\v 16 yĩy ꞌãte Topa pu hãmꞌãktux nãm, tuꞌ kuxyã ꞌohnãg, ꞌap ꞌãxop ꞌũm xaxokꞌah.
\v 17 Tu Topa tuꞌ xak, ꞌõhõm yã yũmũg Tak, tuꞌ max xeꞌẽgnãg, yã yũmũg xuxyã Yeyox Kunnix yõg Topah, ha tuꞌ xak, puyĩy Topa Koxuk ꞌãha mõꞌkutnãꞌ, nũy xa hãmyũmmũgãꞌ, xa Topa tu yũmmũg xeꞌeꞌ.
\v 18 xix tuꞌ xak, pu ꞌãp-tox maxnãꞌ, xa hãmyũmmũg xexkaꞌ. Kuyãnãm te hãptupmãhãꞌ, ha kaxĩy Topa te tikmũꞌũn kuxa yũmmũgãhãꞌ, pu tu hãmmax hip, ha Topa te ꞌãxop xãnãhãꞌ, haꞌ nũꞌ, xayĩy pop pexkox yõg hãpxop xohix. Kaxĩy Topa te yãy yõg tikmũꞌũn mũtik hãmꞌãktux xex, hu: “ꞌÃte ꞌãxop pu popmãp-tup pexkox yõg hãpxop xohix,” kaxĩy. Ha ꞌãte Topa tuꞌ xak, pu pexkox yõg hãpxop xohihnãg xaꞌ mũg, xayĩy yũmmũg,
\v 19-20 ha hãmyũmmũgãhãꞌ, xa hãmyũmmũg, nũy Topa mũn kaꞌok xeꞌẽgnãg yũmmũg, haꞌ kaꞌok, nũy putpu Kunnix hĩnnãꞌ, nũy pexkox kopaꞌ yũmmãꞌ Topa yĩpxeꞌe hah, ha kaxĩy Topa te yũmũg kuxa kopa hãpxopmãhãꞌ, nũy yũmũg kuxa hĩnnã kamah.
\v 21 Yã Kunnix xexka xeꞌẽgnãg nõmhã pexkox tuꞌ, tu pexkox yõg xop xohix xat, xix hãm xexka yõg xop xohix xat, xix Hãmgãyãgnãg yõg xop xohix xat, xix hãm xexka yõg gohet xohix xat, xix hãm xexka yõg gohet mõꞌnãꞌax xat putup.
\v 22 Topa te Kunnix xexkanã xeꞌẽgnãg, tuꞌ kuxa mãm kaꞌok xop ha mõꞌkutnãhãꞌ, puyĩy ꞌũp-xehnãg xat, yãꞌ xuxyãp-xet.
\v 23 ꞌŨkuxa mãm kaꞌok xop te Kunnix yĩn putuk hah, ꞌũkuxa mãm xohix xop yã Kunnix hãꞌ yĩn, ha Kunnix te nõm xop tuꞌ xip, tu yũmũg yãy putox, tu yũmũg xat, nũy yũmũg pẽnã max. Yã Kunnix te hãm xohix xop xix pexkox xohix xop hãꞌ xuxyãꞌ.
\c 2
\s Tu yũmũg hĩnnãhã xeꞌẽgnãg
\p
\v 1 Hõmã ꞌãxop te hãpxopmã kummuk pax, yã ꞌãyĩpkox ꞌohnãg Topa puꞌ,
\v 2 tup-tat kummuk hã ꞌãmõg, xix yãmĩy kummuk puꞌ ꞌãyĩpkox pip, haꞌ kummuk xop te ꞌãxat pax, nõm xop yĩpkox ꞌohnãg Topa puꞌ xop xat pax.
\v 3 Yã yũmũg xohix te hãpxopmã kummuk, tu yũmũ yõg yãy putupꞌax mĩy, tu yãy mũn xat kummuk, tu hãmpekpaxex kummuk, hu hãpxopmã kummuk kamah. Ha kaxĩy hã Topa te yũmũg kummugãꞌax ꞌũyãnãn tuꞌ, tu yũmũg xũygãꞌax,
\v 4 pãyã tute yũmũg kuxa ka xexkaꞌ, tu yũmũg mõꞌyãy xeꞌẽgnãg
\v 5 hu yũmũg hĩnnãhãꞌ, ꞌĩhã yũmũg puꞌuk, yũmũg yĩpkox ꞌohnãg, huk hittup ꞌohnãg, ha yũmũg kuxa hĩnnãhã Kunnix mũtik, yãꞌ hok hã yũmũg kuxa kummuk xit, nũy kuxa max tat ꞌũyãnãn tuꞌ.
\v 6 Topa te Kunnix putpu hĩnnãhãꞌ, tu yũmũg hĩnnãhã kamah, ꞌũyĩy hi xeꞌẽgnãg, yã Kunnix mũtik yũmũꞌãteꞌ xat, tu pexkox tuꞌ xat Kunnix mũtik. Yã yũmũg kuxap-xet Yeyox Kunnix kuxa mũtik.
\v 7 Topa te yũmũꞌã ha hãmmaxnãhãꞌ, pu tikmũꞌũn mõkputox tuꞌ mũg, ha Topa te yũmũꞌã ha hãmmax xeꞌẽgnãg nãhãꞌ, puꞌ hep xop xohix mõkputox yũmmũg, ha Topa te nõm mõꞌyãy xeꞌẽgnãg, ha Yeyox Kunnix te yũmũg pupiꞌ xok, nũy hep xohix xop pu mõꞌyãyꞌax yũmmũgãꞌ.
\v 8 Ha Topa te ta nemẽn ꞌohnãg, tu xa hãmmaxnãhãꞌ, ꞌĩhãꞌ hok tu ꞌãxop kuxa kummuk xit, nũy kuxa max tat ꞌũyãnãn tuꞌ, ꞌãkuxa mãm kaꞌok Yeyox Kunnix kopa hah. ꞌÃxop te hãpxopmã max ꞌohnãg, pu Topaꞌ yãnãn tuꞌ xa hãmmaxnãꞌ. Yãmhok. Topa te xaꞌ hok hãꞌ kuxa kummuk xit.
\v 9 Hamũn. ꞌÃxop te hãpxopmã ꞌohnãg, puyĩy Topa ta nemẽn, nũy ꞌãkuxa kummuk xit. ꞌÃmhok. Yĩy yãy mũn max peꞌãpaxeh hok. Yãk-tĩgnãg. Yã ꞌãkummuk.
\v 10 Topa te yãp-xehnãg hã ꞌãkuxa kummuk xit, ha Kunnix xok, nũy yũmũg kuxa kummuk tupmãꞌ, ꞌũyĩy hãpxopmã max, nũy Topa yõg putat hã yũmũ mõy, nũy yũmũg kuxap-xet Yeyox Kunnix kuxa mũtik.
\s Yũmũg kuxap-xet Kunnix kuxa mũtik
\p
\v 11 Hõmã ꞌãxop puknõg, ꞌap Yoneo yõg tikmũꞌũnꞌah, yĩy Yoneo xop te ꞌãxuxetꞌax mĩy. “Yãy nãg xax mep ꞌohnãg xop.” kaxĩy, nũy yãy yõg xax mepꞌax ꞌãktux. Yãꞌ hittap hã xix hõnhã Yoneo yõg tikmũꞌũn teꞌ pit xop yãy xax mep ꞌũyĩmap tuꞌ. Pa ꞌãxop yõg mõnãyxop teꞌ xax xak ꞌohnãg, yã Topa hã ꞌãpuknõg.
\v 12 Hõmã ꞌãxop Kunnix hã ꞌãpuknõg kamah, ꞌap Topa yõg tikmũꞌun kopa ꞌãpipꞌah, ha Topa teꞌ paꞌax mĩy Yoneo yõg tikmũꞌũn mũtik, ꞌãxop mũtik ꞌap mĩyꞌah, Topa yũmmũg ꞌohnãg hah, tu hãpkutnãꞌax Kunnix hip ꞌohnãg, puyĩy ꞌãkuxa tupmãꞌ. Yã Topa hã ꞌãpuknõg, tu tu ꞌãpip ꞌohnãg.
\v 13 Pa hõnhã Yeyox Kunnix mũn te ꞌãxop nũnnãhãꞌ, tu Topa yĩkãgnãg ha ꞌãnũnnãhãꞌ, ha Kunnix xok mĩpkupnix tuꞌ, nũy ꞌãnũnnãꞌ, nũy tu kuxap-xet ꞌãxop kuxa mũtik.
\v 14 Yã hõmã ꞌãxop xix Yoneo xop yãytuk-mĩy punethok, ha Kunnix xok, xa ꞌãxop xix Yoneo xop yãyhã Kunnix yõg tikmũꞌũn puxet, haꞌ xok, nũy yãytuk-mĩy kuxyãꞌ, ꞌũ yũmũg kuxa xohix tu mãmmãꞌ, xayĩy ꞌãxop yã Yoneo xop hã ꞌãxapeꞌ,
\v 15 ha Yoneo xop yõg xatꞌax nõãꞌ, ha tikmũꞌũn xop 2 yãyhã tikmũꞌũn xop puxet, tuꞌ yãyhã tikmũꞌũn tup, ha Topa teꞌ kuxa mãmmãhãꞌ,
\v 16 Yã Kunnix te mĩpkupnix tuꞌ xok, nũy yãykixꞌax kuxyãꞌ, puyĩy Yoneo xop xiꞌ puknõg xop yãy putup pax, yĩy Topa ha putpuꞌ nũnnãhãꞌ, puyĩy Topa yĩkãgnãg hãꞌ pip.
\v 17 Yã Kunnix nũn, tu hãmꞌãpak maxꞌax ꞌãktux, tu Topa gãy kuxꞌax ꞌãktux, pu tikmũꞌũn kuxa tuꞌ mãm, ꞌãxop puknõg xop pu hãmꞌãktux, Topa tu hãptox tu ꞌãpip, xix Yoneo xop pu hãmꞌãktux, nõm xop te Topa tu yĩkãgnãg hãꞌ pip.
\v 18 Hamũn. Kunnix te yũmũg xohix nũnnãhãꞌ, pe Yoneo yõg tikmũꞌũn, peꞌ puknõg yõg tikmũꞌũn, ha yũmũg nũnnãhã Topa hah, ha Topa Koxuk te yũmũg kaꞌogãhãꞌ, yũmũg Topa hã yĩkãgnãg piꞌ.
\p
\v 19 Yĩy ꞌãxop puknõg ꞌohnãg nõmhãꞌ. Yã Topa yõg tikmũꞌũn kamah, tu Topa hã ꞌãxapeꞌ!
\v 20 Topa te tik xop nũꞌpok pu hãmꞌãpak maxꞌax ꞌãktux, tu tik xop nõy nũꞌpok, pu Topa pupi hãmꞌãktux, ha nõm tik xop 2 te Kunnix ꞌãktux, tu Kunnix xokꞌax ꞌãktux, ha ꞌãxop yĩpkox pip, tuꞌ kuxa mãm kaꞌok Yeyox Kunnix kopah,
\v 21 haꞌ xohix nõg nõy nãꞌ mõgãhãꞌ, tu mõktu xohix, yã Topa yõg tikmũꞌũn xeꞌeꞌ.
\v 22 Kaxĩy ꞌãkuxap-xet Kunnix kuxa mũtik, pu Topa ꞌãxop tuꞌ xip kaꞌok, nũy yãy Koxuk te ꞌãxop tuꞌ xip kaꞌok.
\c 3
\s Paot te Yoneo xop hãꞌ puknõg xop pu hãmꞌãpak maxꞌax ꞌãktux
\p
\v 1 Yãk mũn Paot, tu Yeyox Kunnix pu hãpxopmãhãꞌ, yã kanet kopak xip, ꞌãxop pu hãmꞌãpak maxꞌax ꞌãktux tuꞌ, tu Topa pu hãmꞌãktux ꞌãxop pupiꞌ.
\v 2 Yã Topa te nũgkutnãhã ꞌãhah, nũy xa hãmmaxnãꞌ, ha ꞌãxop te hãmꞌãpak, tu hãmyũmmũg.
\v 3 Hõmã, hãmhittap ꞌĩhãꞌ, Topa te hãmpeꞌpaxex, pa tikmũꞌũn ꞌũm pu hãmꞌãktux ꞌohnãg, tu nõm peꞌpaxexꞌax ꞌãktux ꞌohnãg hãmyãxatamuk xohix hã, tu yãk mũn pu hãmꞌãktux nõmhã. ꞌÃte xa kaxꞌãmi kutõgnãg nũhũ tappet tuꞌ. Yã Topa te hãmpeꞌpaxex tap, tu Yoneo xop xiꞌ puknõg xop yãy kotĩnnãp-tup, pũyĩy yãyhãꞌ xapeꞌ, puyĩy Topaꞌ xohix ha hãmmaxnã xexkaꞌ.
\v 4 ꞌÃxop te tappet mõꞌkupix, ꞌaꞌ yũmmũg, yã ꞌãte tappet mĩy, nũy yõg hãmpekpaxexꞌax ꞌãyũmmũgãꞌ, nũy xa Kunnix ꞌãktux, ꞌõhõm xok mĩpkupnix tuꞌ, yũmũg pupiꞌ xok, nũy Yoneo xop xiꞌ puknõg xop ha hãmmaxnãꞌ.
\v 5 Hõmã Topa yĩy ꞌohnãg, tu hãmꞌãktux ꞌohnãg, pa hõnhã Topa Koxuk te hãmyũmmũgãhãꞌ, tu tik xop puꞌ xuktux, tu tik max mõꞌpok, pu tu hãmꞌãktux, xix tik max xop te Topa pupi hãmꞌãktux tuꞌ xuktux,
\v 6 Yã hãmꞌãktux xeꞌeꞌ, hu: Topa teꞌ puknõg xop xix Yoneo xop ha hãmmaxnãhãꞌ, yã yãy putuk. ꞌŨxohix te Kunnix hã ꞌũyĩn. Tikmũꞌũn putox te yãy yĩn xat, nũy tuꞌ pẽnã max, hã kaxĩy Kunnix te yũmũg xat, nũy tuk pẽnã max. Yã Topa te Kunnix hã hãmꞌãktux xex, nũy hãmꞌãpak maxꞌax hã hãmmaxnãꞌ, nũy Yoneo xop xiꞌ puknõg xop ha hãmmaxnãꞌ, yã yãy putuk.
\p
\v 7 Topa tek xãnãhãꞌ, tu mõgkutnãhãꞌ, ꞌũyĩy ꞌã hãmꞌãpak maxꞌax ꞌãktux, tuk yãy kutnãhãꞌ, xik kaꞌogãhãꞌ.
\v 8 Yãk-tõgnãg, ha Topa yõg tikmũꞌũn xohix xexkaꞌ, pa Topa tekmũn yãykutnãhãꞌ, ꞌũyĩꞌ puknõg xop pu hãmꞌãpak maxꞌax ꞌãktux, ha hãmꞌãpakꞌax te Kunnix ꞌãktux, ha Kunnix teꞌ kuxa mãm xop ha hãmmax xeꞌẽgnãg gãhãꞌ, yĩy tikmũꞌũn kuxa teꞌ yẽy.
\v 9 Ha Topa te nũgkutnãhãꞌ, ꞌũ hãmꞌãktux xeꞌeꞌ, nũy hãmꞌãpak maxꞌax ꞌãktux tikmũꞌũn xop xohix puꞌ, tuk hittup. Hõmã Topa te hãmpeꞌpaxex, nũy Yoneo xop, xiꞌ puknõg xop ha hãmmaxnãꞌ, ha hãmyãxatamuk xohix hãꞌ yĩy ꞌohnãg, pãyã hõnhãk xat, ꞌãte tikmũꞌũn xohix pu hãmyũmmũgãꞌ. Yã Topa max xeꞌẽgnãg, tu hãpxop xohix mĩy, tu kamaꞌ hep xohix xop ha hãmmaxnãhãꞌ.
\v 10 Tuꞌ kuxa mãm kaꞌok xop ha hãmmaxnãhãꞌ, nũy pexkox yõg xexka xop tuꞌ mũy, nũy xatꞌax xop tuꞌ mũy, puyĩy hãmyũmmũg, yã Topa te hãmyũmmũg xeꞌẽgnãg.
\v 11 Hõmã, hãmyãxatamuk xohix ꞌĩhãꞌ, ꞌap xipꞌah hahãm, xix pexkox ꞌap xipꞌah, ꞌĩhã Topa te hãmpeꞌpaxex, nũy Yeyox Kunnix xokꞌax hãꞌ hep xohix xop yãy tu nũnnãy, pu nõ yãyhã tikmũꞌũn yãp-xehnãg. Yã hõnhã Topa teꞌ mĩy, yũmũg xuxyã Yeyox xokꞌax hã ꞌũmĩy,
\v 12 ꞌũyĩy yũmũg kuxap-xet Kunnix kuxa mũtik, huꞌ mãm kaꞌok ꞌũkopah, hu yũmũg kuxãnõg ꞌohnãg, nũy Topa yĩkãgnãg hã yũmũg piꞌ.
\v 13 ꞌŨkxũy, pa ꞌãkuxa tuknõg hok, nũy Topa yõg putat hã mõg. Yã Topa tek xũy hã xa hãmmaxnãhãꞌ.
\s Kunnix te mõ yũmũg yãy xeꞌẽgnãg
\p
\v 14 Yĩk kopaxux hãk xip yũmũg Tak Topa puꞌ. Yã yũmũg Tak xeꞌẽgnãg, tu hãpxop xohix mĩy,
\v 15 tu yũmũg pẽnã max, yũmũg ꞌãtak putuk, mõ yũmũg yãy xeꞌẽgnãg tuꞌ, ha hãmmaxnãhã yãy kutok xop haꞌ, tu pexkox yõg kutok xop, xix hãm xexka yõg kutok xop ha hãmmaxnãhãꞌ.
\v 16 Yãꞌ max xeꞌẽgnãg! ꞌÃteꞌ xak, puyĩy Topa Koxuk ꞌãkuxa kaꞌogãꞌ, xa ꞌãkaꞌok,
\v 17 ha tuꞌ xak kamah, pu ꞌãkuxa mãmmã kaꞌok, pu Kunnix ꞌãkuxa kopa xihip, xayĩy ꞌãxapep-tup pax, nũy kama Topap-tup pax xexkaꞌ,
\v 18 nũy Topa yõg tikmũꞌũn xohix mũtik hãmyũmmũg. Yã Kunnix te tikmũꞌũn mõꞌyãy xeꞌẽgnãg, yĩy nõm peꞌãpaxeh mõktu ꞌãkuxa teꞌ yẽy Topa puꞌ, yã yũmũg putox kaꞌok ꞌĩhã nõm mõꞌyãyꞌax pekpaxex. Ha kaxĩy ꞌãkuxa hittup xexkaꞌ, yã Topa mũn te ꞌãkopaꞌ xip kaꞌok,
\v 19 tu mõktu ꞌãxop te hãmyũmmũg xeꞌeꞌ, yã Kunnix te yũmũg mõꞌyãy xeꞌẽgnãg mõ kumaꞌ mõg. ꞌÃpuꞌ xak, nũy mõꞌyãyꞌax yũmmũg, nũy ꞌãkuxaꞌ yẽy, ha kaxĩy Topa xeꞌẽgnãg te ꞌãkopaꞌ xip kaꞌok.
\p
\v 20 Pũyãꞌ xohix Topa xexka ꞌãktux, ha yũmũg kaꞌogãhãꞌ, tu yũmũꞌã ha hãmmaxnã xexkaꞌ, ꞌĩhã yũmũꞌãte ta tuꞌ xak, pu hãmmaxnãk-tõgnãg. Yã Topa te hãmpeꞌpaxex xexkaꞌ, ha yũmũꞌãte hãmpekpaxex kutõgnãg.
\v 21 Pũyãꞌ kuxa mãm kaꞌok xop xohix Topa max xeꞌẽgnãg ꞌãktux, pũyãꞌ xuktux mõ kumaꞌ mõg. Yã Yeyox Kunnix te yũmũg kaꞌogãhãꞌ ꞌũyĩy Topa max xeꞌẽgnãg ꞌãktux. Pũyã hãmyãxatamuk xohix hãꞌ xuktux, pu tu kux ꞌohnãg. Hamũn.
\c 4
\s Kunnix hã yũmũg yĩn puxet
\p
\v 1 Yeyox Kunnix pu ꞌãte hãpxopmãhãꞌ, nũy hãmꞌãpak maxꞌax ꞌãktux, hu kanet kopak xip, ha xa tuꞌ xak, xa hãpxopmã max. Topa te ꞌãxãnãhãꞌ, xa hãpxopmã max.
\v 2 Yãy kutõgnãg peꞌãpaxex, nũy ꞌãyĩy puꞌuk, nũy ꞌãnõy hip, nũy nõãꞌtot, ꞌãxop te ꞌãxapep-tup pax tuꞌ.
\v 3 ꞌÃnõy gãyã hok, nũy yã ꞌãxop putox puxet, xix ꞌãkuxap-xet, yã Topa Koxuk te ꞌãxop nũnnãhãꞌ, xa yãyhã tikmũꞌũn, nũy yãp-xet.
\v 4 Topa Koxuk puxet, xix ꞌãxop yã Kunnix hã ꞌãyĩn puxet, ha Topa te ꞌãxãnãhãꞌ, xa Kunnix nũnꞌax hip, xayĩy pexkox tu nũ mũtik ꞌãmõg, nũy ꞌãpip kaꞌok.
\v 5 Ha yũmũg xuxyãp-xet kamah, ha yũmũg kuxa mãm Yeyox Kunnix yãp-xehnãg kopah, ha yũmũg putox pix kamah, ꞌũyĩy yũmũg xuxyãp-xet ꞌãktux.
\v 6 Ha Topa yũmũg Tak yãp-xehnãg, tuꞌ xohix hãꞌ xuxyã, tu tikmũꞌũn kopa hãpxopmãhãꞌ tuꞌ kopaꞌ xip.
\p
\v 7 Kunnix te Topa Koxuk yũmũꞌã ha nũꞌkutnãhãꞌ, pu yũmũg kaꞌogãꞌ, ꞌũyĩy yũmũg hãpxopmã kaꞌok, nũy yãy xape kaꞌogã kamah.
\v 8 ha Topa yõg tappet te:
\q “Tik te pepiꞌ mõg, tuꞌ gãy xop kĩy, nũy yãy mũtik mõgãꞌ,
\q xix kanet kopaꞌ pip xop mõy, nũy mõgã kamah,
\q tu yã tu hãpxop hok popmãhãꞌ,” kaxĩy
\p
\v 9 Tep tu hãmꞌãktux, hu: “Tik te pepiꞌ mõg,” kaxĩy? ꞌŨxuktux, nũy tik kakaꞌ mõg hãmãxapꞌax ꞌãktux. Tu yã yũmũg xuxyã Kunnix ꞌãktux, ꞌĩhã tik puxet ꞌãktux.
\v 10 Yã tik puxet xok, ha nõ hãpkot, tu putpuꞌ hi, tu pepiꞌ mõg pexkox ha, yã kakaꞌ mõg hãmãxap, tuk-nãy tu pepiꞌ mõg, hãmnõgnõy kũnãpaꞌ mõg, tu hãm xexka tuꞌ xip, xix pexkox tuꞌ xip kamah, nũy pexkox xop yĩkãgnãg hãꞌ xip, nũy tikmũꞌũn yĩkãgnãg hãꞌ xip kamah.
\v 11 Tu Topa Koxuk hõm tikmũꞌũn puꞌ, puyĩꞌ kuxa mãm kaꞌok xop kaꞌogãꞌ. Tuꞌ yãg kaꞌogãhãꞌ, nũy mõꞌpok, xiꞌ yãg kaꞌogãhãꞌ, pu Topa pupi hãmꞌãktux tikmũꞌũn puꞌ, xiꞌ yãg kaꞌogãhãꞌ, pu hãmꞌãpak maxꞌax ꞌãktux, xiꞌ yãg kaꞌogãhãꞌ, puꞌ kuxa mãm xop pẽnã max, xiꞌ yãg kaꞌogãhãꞌ, puꞌ kuxa mãm kaꞌok xop pu hãmyũmmũgãꞌ.
\v 12 Yĩy Kunnix pu tu hãpxopmã max, puyĩꞌ kuxa mãm kaꞌok xop kaꞌogãꞌ. Yãꞌ kuxa mãm kaꞌok xop te Kunnix hãꞌ yĩn puxet. Tikmũꞌũn putox te yãy yĩn xat, nũy tu pẽnã max, ha Kunnix teꞌ kuxa mãm kaꞌok xop xat kamah, nũy tu pẽnã max.
\v 13 Yã yũmũg kuxa mãm kaꞌok Kunnix kopah, hu yũmũg kuxap-xet Kunnix kuxa mũtik. Yã Kunnix hã yũmũg xohix yã tikmũꞌũn puxet, nũy yũmũg Topak-tok xop xeꞌẽgnãg, tu mõktu Topa pu yũmũg xiptap xop putuk, tu mõktu Kunnix putuk.
\v 14 Yã kakxop putuk, ꞌĩhã hãmpeꞌãpaxeh hok. ꞌÃpu hãmyũmmũg, xa tik kummuk xop pu ꞌãyĩpkox ꞌohnãg, tu hãmꞌãktuxꞌax puknõg ꞌãpax hok, ka Topa yõg putat xax, tik kummuk te xa mõꞌãmã hah.
\v 15 Hãmꞌãpax hok. Pa hãmꞌãktux xeꞌeꞌ, koit hok, ꞌãnõy putup pax tu hãpxeꞌe ꞌãktux, nũy Kunnix putuk. Yã Kunnix yãk xohix hã yũmũg putox, nũy yũmũg pẽnã max.
\v 16 Kunnix hã yũmũg xohix yĩn, nũy nõm hã hãmꞌãpak nãm, pu yũmũg xohix xat. Haꞌ kup teꞌ yĩn tu yãy hiꞌ, nũy tu mõg max, ha kaxĩy tikmũꞌũn kuxa mãm kaꞌok xop xape xop te yãy tu hi kamah, nũy Kunnix hãꞌ yĩn, tu yãy hittupmãhãꞌ, tu yãy putup pax.
\s Yũmũg kuxa hi xeꞌẽgnãg nõmhã
\p
\v 17 Yĩy ꞌãte xa hãmꞌãktux nãm, hu: Tikmũꞌũn te Topa yũmmũg hok, puxix hitop tu hãmpeꞌpaxex. Yã Kunnix te yãy ꞌãxetꞌax ꞌãꞌ hõm, ꞌãte ꞌãxat, hu: Hãpxopmãꞌax hitop kuxyãꞌ, nũy nõm hãmhitop hãmpeꞌpaxex xop mũtik mõg hok, nõm xop yã Topa hãꞌ puknõg.
\v 18 Hap-tox kaꞌok, tu hãmyũmmũg ꞌohnãg, tup-tup nõg, pu Topa ꞌũhĩnnãꞌ, tuꞌ yĩpkox ꞌohnãg Topa puꞌ, yĩy nõm kummuk xop nĩm, nũy kummuk mĩyꞌax xop pe ꞌãmõg hok.
\v 19 Ha yãyhãhup ꞌohnãg, tuꞌ nõy hãꞌ xupxet pax, tuꞌ xak, nũy hãpkummuk xohix mĩy.
\p
\v 20 Pa ꞌãxop te Kunnix yũmmũg max, hu hãpxopmã max, Kunnix te hãpxopmã max hah.
\v 21 Hõmã tikmũꞌũn te xa Kunnix ꞌãktux, ha ꞌãkuxa mãm kaꞌok nõm kopah, hu nõm mũtik hãmyok mĩy, nũy Topa yõg putat hã ꞌãmõg,
\v 22 tu hãpxopmãꞌax hittap nĩm, nũy tu yãy putup mĩyꞌax hok, yã ꞌãkummugã tap,
\v 23 ha Topa te ꞌãkuxa xix ꞌãp-tox tupmãꞌax,
\v 24 xa ꞌãxop max xeꞌẽgnãg Topa putuk. Yã Topa mũn te hãmyok mĩy, tu hãpxopmã max, tu hãmmaxnã xeꞌẽgnãg.
\p
\v 25 Yĩy koit hok, hu ta ꞌãnõy pu hãpxeꞌe ꞌãktux, yã yũmũg xohix te Kunnix hãꞌ yĩn.
\v 26 ꞌÃgãy, ꞌĩhã hãpkummuk mĩy hok, pãyã ꞌãxuxiꞌ, nũy ꞌãmnĩy tox hã ꞌãgãy hok.
\v 27 ꞌŨtux hok pu Hãmgãyãgnãg ꞌãkuxa kummugã hok.
\v 28 Tikmũꞌũn teꞌ xupxet tap, puxi tuꞌ kuxyãꞌ xupxet, nũy tu max, nũy xe tu xupxet hok, nũy tu hãm max, tu hãmyok mĩy, puyĩy tikmũꞌũn hok xop pu hãpxop popmãꞌ.
\v 29 Hãmꞌãktux kummuk hok, hu ta hãmꞌãktux max, nũy mõꞌãnõy nĩynãm, nũy ꞌãnõy hittupmãꞌ.
\v 30 Topa Koxuk puꞌ hupmã hok, ka tuꞌ kuxa hittup ꞌohnãg. Yã Topa te xa yãy Koxuk nũꞌkutnãhãꞌ, nũy tu hãmꞌãktux xeh, nũy ꞌãpẽnã max. ꞌAp maxꞌah tikmũꞌũn te Topa Koxuk kuxa pu hupmãꞌ. Yã ꞌãpẽnã max xeꞌẽgnãg, tu ꞌãkuxa hittupmãhãꞌ, tu xa hãmꞌãktux xex, xayĩy Topa yõg tikmũꞌũn. Yĩy Kunnix te ꞌãmõgãp-tup pexkox tuꞌ, ꞌĩhã hãptup xeꞌe mõꞌnãꞌax, ha Kunnix nũn, nũy yãy xape xop mõgãꞌ.
\v 31 Yĩpkũmĩy hok, xix ꞌãgãy hok, ꞌãnõy mãnõg hok, hãpkuteꞌex kummuk hok,
\v 32 pa ꞌãnõy kuxa kaꞌ, nũy tuꞌ yõg hãpkummuk mĩyꞌax xaxogãꞌ, pu tu kux. Yã Topa te ꞌõg hãpkummuk mĩyꞌax xaxogãhãꞌ, haꞌ kux, Kunnix xokꞌax hãꞌ xaxogãhãꞌ.
\c 5
\s Yũmũꞌã Topa hã yãy kutok xop
\p
\v 1 Topa hã ꞌãxop kutok xop, ha mõꞌãyãy xeꞌẽgnãg, yĩy hãpxopmã max, nũy ꞌÃtak Topa putuk ꞌãxop, nũy hãpxopmã max.
\v 2 ꞌÃxape xop putup pax, yã kaxĩy Kunnix te mõg yũmũg yãy xeꞌẽgnãg, tu yũmũg pupiꞌ xok, ha Topa tep-tup, tuꞌ hittup.
\p
\v 3 Topa hã ꞌãxop tikmũꞌũn xeꞌeꞌ, hu hãmꞌãktux max, nũy tu hãpkummuk ꞌãktux hok, nũy ꞌãnõy yõg hãpxop putup hok, nũy xonnix hok, nũy ꞌãnõy hã ꞌãxupxet hok, ꞌũmĩy hok. Yã Topa yõg tikmũꞌũn hãmꞌãktux kummuk pu kummuk,
\v 4 pa hãmꞌãktux max, nũy hãmꞌãktux kummuk tu kux, nũy hãmꞌãktux hitop tu kux, nũy tu Topa max ꞌãktux pax, hu: ꞌÃmax Topa! Kaxĩy.
\v 5 ꞌÃte xa hãpxeꞌe ꞌãktux: Topa xix Kunnix te tikmũꞌũn xop putup nõg, nõm teꞌ nõy hãꞌ xupxet xop, tu nõm mũtik tikmũꞌũn xat ꞌohnãg, yãꞌ kummuk xop te hãpkummuk mĩy, tuꞌ nõy hãꞌ xupxet, tuꞌ nõy yõg hãpxop putup pax, yã hãpxop ꞌũm te nõm xop hã topa komut, ꞌũp-tup pax xexka hah, tu Topa xeꞌep-tup kutõgnãg, yã hãpxop xohix mũn putup pax xeꞌeꞌ.
\p
\v 6 ꞌŨtux hok puꞌ nõy ꞌãmõꞌãmã hok hãmꞌãktux hitop hã. Topa te hãpxopmãꞌax kummuk putup nõg, tuꞌ yĩpkox ꞌohnãg xop kummugãp-tup ꞌũyãnãn tuꞌ.
\v 7 ꞌÃpu, nõm kummuk xop nĩm.
\v 8 Yã hõmã ꞌãxop te hãpkummuk mĩy pax, ha hãpkoxtap te ꞌãkuxa kopaꞌ xip, pa Topa te ꞌãkuxa kummuk xit, tu ꞌãkuxa tupmãhãꞌ, hu hãpxopmã max nõmhã.
\v 9 Topa te ꞌãkuxa tupmãhãꞌ, ꞌãpu hãpxopmã max, nũy ꞌãnõy kuxa kaꞌ, nũy hãmyok mĩy, nũy hãpxeꞌe ꞌãktux.
\v 10 Xiꞌ xak, nũy xe hãpxopmã maxꞌax hã Topa kuxa hittupmãꞌ.
\v 11 Hãpxopmã hitop hok, tikmũꞌũn nõy xop mũtik, hãpxopmã hok, nũy xetxox putuk hãpxopmã hok. Yã xetxox te hãpkoxtap ꞌĩhãꞌ xupxet, tuꞌ xaptop. ꞌÃpu, ꞌõg hãpxopmãꞌax mũg tikmũꞌũn tuꞌ.
\v 12 Yã hãpxopmãꞌax xaptop te yãy puꞌ hũpmãhãꞌ,
\v 13 ꞌĩhã tikmũꞌũn nõy teꞌ yũmmũg, haꞌ kummuk,
\v 14 ha tikmũꞌũn teꞌ yũmmũgãhãꞌ, nũy tuꞌ mũg, yĩy Topa yõg tappet te:
\q “ꞌÃxop mõꞌãyõn xop, yãy koxak,
\q ꞌãyok, nũy ꞌãxit, nũy ꞌãhiꞌ,
\q ha Kunnix te xa hãptupmãp-tup,” kaxĩy.
\m Yã hãptupmãp-tup, ha kaxĩy Kunnix te yũmũg hãmyũmmũgãhãꞌ, ꞌũyĩy yũmũg hãmyũmmũg max.
\p
\v 15 ꞌÕg pa ꞌãtiꞌ. ꞌÃpu, Topa yõg putat hã ꞌãmõg kuma ꞌãmõg, tu hãmyũmmũg, nũy hãpxopmã max.
\v 16 Yã hãmyãxatamuk teꞌ nõy hã yãykutut, yĩy ꞌãmnĩy xohix hã Topa pu hãpxopmã max, tikmũꞌũn nõy te hãpxopmã kummuk hah.
\v 17 ꞌÃp-tox kaꞌok hok, hu hãmyũmmũg max, pa yũmũg xuxyã pu ꞌãyĩpkox piꞌ, nũy ꞌũyõg hãmputupꞌax mĩy.
\p
\v 18 Ta hep xupyãg xoꞌop hok, xa paptux hok, ha ꞌãkummugãꞌ. Pũyã Topa Koxuk ꞌãkopa xip, nũy ꞌãkuxa hittupmãꞌ.
\v 19 ꞌÃxape pu Topa yõg hãmꞌãktux ꞌãktux, xix Topa yõg hãmꞌãktuxꞌax kutex, nũy tu ꞌãnõy kaꞌogãꞌ, tu yũmũg xuxyã Yeyox pu ꞌãxop kutex, nũy nõm pu: Yãyãꞌ, ꞌãmax! Kaxĩy.
\v 20 ꞌÃpu Topa yũmũg Tak pu hãmꞌãktux kamah, nũy ꞌũmax ꞌãktux, ha yũmũg xuxyã Yeyox Kunnix tep-tup, ꞌũ yũmũg Topa max ꞌũm ꞌãktux.
\v 21 Yeyox Kunnix yã yũmũg xuxyã, yĩy yũmũg yãy xape xohix puk yĩpkox pip.
\s ꞌŨyĩpxox xiꞌ xetut ꞌãktux
\p
\v 22 Pũyã ꞌũhũn yãy yĩpxox puꞌ yĩpkox xip, nũy yũmũg xuxyã Kunnix puꞌ yĩpkox piꞌ kamah.
\v 23 ꞌŨyĩpxox te yãy xetut xat, ha kaxĩy Kunnix teꞌ kuxa mãm kaꞌok xop xat, tu nõm pupiꞌ xok, pu tu yãyhã Kunnix hã tu yĩn, nũy Kunnix pu ꞌãyĩpkox piꞌ. Yã tikmũꞌũn putox te yãy yĩn xat, nũy tu pẽnã max. Ha kaxĩy Kunnix teꞌ kuxa mãm kaꞌok xop xat, nũy tu pẽnã max.
\v 24 Pũyã ꞌũn yãy yĩpxox pu yãꞌ yĩpkox piꞌ. Kaxĩy ꞌũkuxa mãm kaꞌok xop te Kunnix puꞌ yĩpkox pip.
\p
\v 25 Pũyãꞌ yĩpxox yãy xetut mõꞌyãy xeꞌẽgnãg, yã kaxĩy Kunnix teꞌ kuxa mãm kaꞌok xop mõꞌyãy xeꞌẽgnãg, tu nõm pupiꞌ xok,
\v 26 puyĩy Topa hã ꞌũyõg tikmũꞌũn, ha kõnãg hãꞌ pix, xix yãy yõg hãmꞌãktuxꞌax hã yũmũg yũmmũgãhãꞌ,
\v 27 ꞌũyĩy yũmũg mãynãg hamũn puꞌ, nũy hãpkummuk hok hã yũmmũg pip, nũy yãyhã max xeꞌẽgnãg.
\v 28 Tik te yãy mũn pẽnã max. Pũyã yãy xetut kaxĩy pẽnã max kamah. Tik teꞌ xetut pẽnã max, puxix yãy mũn pẽnã max kamah.
\v 29 ꞌOk xip tikmũꞌũn te yãy mũn putup hok? ꞌÃmhok, Yãp-tup. Yãꞌ xohix te yãy mũn putup, hu yãy xĩnnãhãꞌ, ha kaxĩy Kunnix teꞌ kuxa mãm kaꞌok xop putup, tu nõm pẽnã max.
\v 30 Yã yũmũꞌãte Kunnix hãk yĩn, pu yũmũg xat, nũy yũmũg pẽnã max,
\v 31 yĩy Topa yõg tappet te: “Pũyã tik yãy tak nĩm, xiꞌ tut nĩm, nũy tu xetut mũy, nũy nũ mũtik ꞌãtiꞌ. Yã yãyhãꞌ yĩn puxet. Kaxĩy.
\v 32 Ha kaxĩy Topa yõg tappet te hãmꞌãktux xeꞌeꞌ, tu yũmũꞌã hãmyũmmũgãhãꞌ, hu Kunnix xiꞌ kuxa mãm kaꞌok xop ꞌãktux. Yãꞌ kuxa mãm xop te Kunnix hãp-tox puxet,
\v 33 tu ꞌãxop ꞌãktux kamah, nũy yĩpxox yãy xetut pẽnã max, yãy mũn pẽnã max putuk, nũy xetut yãy yĩpxox puꞌ yĩpkox piꞌ, ꞌũyĩpxox xexka peꞌpaxex tuꞌ.
\c 6
\s ꞌÃtak mũnõm xop xik-tok xop ꞌãktux
\p
\v 1 Kakxop, Topa te ꞌãp-tup, xa ꞌõg ꞌãtak pu ꞌãyĩpkox piꞌ, xix ꞌãtut pu ꞌãyĩpkox piꞌ, yã hãmyok.
\v 2 Topa yõg tappet te: “Yã ꞌãtak mũn ꞌãktux max, xix mãy ꞌãktux max,” kaxĩy. Yã Topa te ꞌãxat hãmãxap, xa ꞌãtak max ꞌãktux, hak-nãy tu hãmꞌãktux xex, pu tikmũꞌũn tu hittup tox,
\v 3 hu: “nũy ꞌãhittup, pu Topa xa hãmmaxnãꞌ, xa ꞌãhittup tox hãm xexka tuꞌ,” kaxĩy.
\p
\v 4 ꞌÃtak mũnõm xop, xix mãy mõnõm xop: ꞌÃpu ꞌãk-tok kuteꞌex kummuk hok, nũy tu gãyã hok, tu nõm yũmmũgãꞌ, puyĩy hãpxopmã max, yã Kunnix te xaꞌ hõm yãy ꞌãxetꞌax, xa ꞌãk-tok yũmmũgã max.
\p
\v 5 ꞌÃxop kãmãnat xop, ꞌãxuxyã nõm te ꞌãxatꞌax pu ꞌãyĩpkox xip, ꞌãkuxãnõg, nũy mãynãg hãpxopmãꞌ, nũy Kunnix pu ꞌãhãm.
\v 6 ꞌÃxuxyã pu ꞌãyĩpkox xip, nũy ꞌãhãm max, ꞌãxuxyã te ꞌãpẽnãhã ꞌĩhã, xix ꞌãpẽnã hok ꞌĩhãꞌ kama ꞌãhãm max. ꞌÃmun yã Kunnix hã kãmãnat, yĩy Topa te ꞌãxat, xa ꞌãxuxyã yõg xatꞌax mĩy, ꞌãxop te Kunnix putup pax tuꞌ.
\v 7 ꞌÃhãm max ꞌãhittup tuꞌ, Kunnix pu ꞌãhãm, hu ꞌãhittup, ꞌãxuxyãp-xet pu ꞌãhãmꞌah, yã yũmũg xuxyã Kunnix pu ꞌãhãm kamah.
\v 8 Topa te yã ꞌãpẽnãhãꞌ, tu tikmũꞌũn xohix xop pu pagop-tup, tute tikmũꞌũn te hãpxopmã max pu hãmmaxnãhãꞌ, xix tikmũꞌũn te hãpxopmã kummuk pu hãpkummugãhãꞌ.
\p
\v 9 ꞌÃxop ꞌãxuxyã xop: ꞌÃpu ꞌõg kãmãnat xop pu hãpxopmã max, xix nõm mãnõg hok, tu: “ꞌÃte ꞌãkixꞌax!” kaxĩy. ꞌŨxaxok hok: ꞌÃxuxyã xop xix kãmãnat xop xohix te Topa puꞌ hãm, ha pexkox tuꞌ xip, ha yã xohix Topa yõg kãmãnat, yã ꞌãxohix te Topa pu yãꞌ nõy putuk.
\s Topa yõg xonat xop
\p
\v 10 Hõnhã ꞌãkuxap-xet yũmũg xuxyã kuxa mũtik, hu ꞌãkaꞌok, yã yũmũg xuxyã te ꞌãkaꞌogãhãꞌ, ꞌũyĩy hãpkummuk mĩy hok.
\v 11 Xonat xop te pipkup hãꞌ yãy mõꞌtat, puyĩꞌ gãy xop kummugã hok. Ha kaxĩy Topa te ꞌãkaꞌogãhãꞌ, pu Hãmgãyãgnãg ꞌãkuxa kummugã hok.
\v 12 Yã yũmũꞌãte tikmũꞌũn gãy mũtik yãykix ꞌohnãg. ꞌÃmhok. Pãyã pexkox yõg gãyxop mũtik yũmũg yãytuk-mĩy. ꞌŨxohix yã hãpkoxtap yõg gãy xop, tu yũmũg nõãp-tup, yĩy Topa te yũmũg kaꞌogãꞌax, ꞌũyĩꞌ gãy xop yõg kummuk mĩyꞌax kuxyãꞌ.
\v 13 ꞌÃpu, Topa yõg hãpkaꞌok paꞌ, nũy ꞌãkaꞌok, xonat xop putuk, nũy gãy xop yõg hãpxopmãꞌax kummuk kuxyãꞌ, nũy ꞌãnũ pa hok, ꞌãkuxãnõg ꞌohnãg tuꞌ. Yã ꞌãkuxa tu mãm kaꞌok ꞌãpiꞌ.
\v 14 Ha xonat teꞌ xax kaꞌok hã mõꞌtat, ha pipkup hãꞌ xax mĩy, pu xonat xop mõꞌyãy nĩy, tu yãy kũnãy hĩy pipkup hãꞌ. Kaxĩy Topa te ꞌãxat, xa hãmyok mĩy, nũy yãyhãhup hok, yã yãy kunãy hĩyꞌax putuk. Ha tikmũꞌũn xohix te ꞌãxop ꞌãktuxꞌax, hu: “Yãꞌ koit ꞌohnãg,” kaxĩy. Kama xonat te pipkup xax mõꞌtat, nũy nõ yãy kep mõꞌnĩy, puyĩꞌ gãy xop xonat xuhmĩy hok. Ha kaxĩy ꞌãxop te hãpxopmã max, puyĩy tikmũꞌũn pẽnãꞌ, hu: “Yãꞌ max ꞌõhõm. ꞌAp hãpkummuk ꞌũm mĩyꞌah,” kaxĩy. Tu yũmũg xuxyã ꞌãktux max.
\v 15 Ha xonat xop te pataxax kaꞌok tat, nũy hãpkumep mõꞌkaꞌok, ha kaxĩy ꞌãmõg mõꞌkaꞌok, nũy hãmꞌãpak maxꞌax ꞌãktux, ꞌãkuxa hittup tuꞌ, ha hãmꞌãpak maxꞌax te tikmũꞌũn kuxa mãmmãhãꞌ.
\v 16 Ha xonat xop te pipkup ꞌãnuk xexka tat, nũy mõꞌyãy nĩy, nũy gãy xop yõg pox xox mõꞌhapꞌax tu xok. Ha kaxĩy ꞌãkuxa mãm kaꞌok Kunnix kopah, nũy Topa tu ꞌãpip kaꞌok, pu Hãmgãyãgnãg ꞌãkuxa kummugã hok.
\v 17 Ha xonat xop te mõꞌyãy kux xax kaꞌok tat, nũy nõ yãyputox pak, puyĩꞌ gãy xop ꞌũp-tox tak hok. Hã kaxĩy ꞌãxop te Topa peꞌãpaxex, tu ꞌãkuxa tuknõg ꞌohnãg, hãmpeꞌãpaxex max tuꞌ. Yã Topa te ꞌãkuxa kummuk xit tap, nũy mõ ꞌãkuxa max tat ꞌũyãnãn tuꞌ. Ha xonat xop te mĩkax xexka pop, nũy gãy xop kix. Ha kaxĩy ꞌãxop te Topa yõg hãmꞌãktuxꞌax ꞌãktux, nũy yãmĩy kummuk yõg hãpxopmãꞌax kummuk nõꞌãꞌ, ha Topa Koxuk te ꞌãkaꞌogãhãꞌ, xayĩy hãmꞌãktux kaꞌok.
\v 18 ꞌÃxop te Topa yõg hãmꞌãktux ꞌãktux, ta Topa pu hãmꞌãktux pax, ha Topa Koxuk te xa hãmyũmmũgãꞌax xa Topa pu hãmꞌãktux max. ꞌÕg pa ꞌãtiꞌ, ꞌãkuxa tuknõg hok, nũy Topa yõg tikmũꞌũn pupi hãmꞌãktux Topa puꞌ.
\v 19 Tu Topa ta tuꞌ xax, puyĩy ꞌũgmũn pu hãmꞌãktux, nũy kaꞌogãꞌ, ꞌũg hãmꞌãktux tikmũꞌũn puꞌ, nũy Topa yõg hãmꞌãktuxꞌax xeꞌe yũmmũgãꞌ.
\v 20 Tu te nũgkutnãhãꞌ, ꞌãte hãmꞌãpak maxꞌax ꞌãktux, tuꞌ xuktux kamah, ꞌĩhã kanet kopak xip, yĩy Topa ta tuꞌ xax puk kaꞌogãꞌ, nũy hãmꞌãpak maxꞌax ꞌãktux pax.
\s Paot teꞌ xape xop ꞌãneo
\p
\v 21 Yũmũg xape Tikik te ꞌũgmũtik hãpxopmãhã, nũy ꞌũgmũn tu nõ tu tehet, tu ꞌãhaꞌ mõg putup, hak mũn ꞌãktuxꞌax, nũy xa hãmyũmmũgãꞌ,
\v 22 tu ꞌãhaꞌ mõg, nũy xa hãmꞌãktux, nũy ꞌũgmũg hãmꞌax ꞌãktux, xayĩy ꞌãxop hittup kamah.
\p
\v 23 Pũyã Topa yũmũg Tak xix yũmũg xuxyã Yeyox Kunnix ꞌãkuxa mãmmãꞌ, xix mõꞌãyãy xeꞌẽgnãg, xix ꞌãkuxa mãmmã kaꞌok yãy mũn kopah.
\v 24 Pũyã Topa xa kãmmaxnãꞌ, ꞌĩhã ꞌãxop te yũmũg xuxyã Yeyox Kunnix putup pax mõꞌkuma ꞌãmõg. Tu ta tu kux.