\id COL  - Maxakalí NT [mbl] (Brazil) -2011 bd
\h KONOXẼN
\toc1 Konoxẽn
\toc2 Colossenses (Cl)
\mt PAOT TE KÕMẼN KONOX YÕG KUXA MÃM KAꞌOK XOP PU KAXꞌÃMIꞌ
\c 1
\p
\v 1 Ũgmũn Paot, ha Topa tep-tup, pu Yeyox Kunnix nũgkutnãꞌ, yĩk mũn xik xape Tĩmõn te nũhũ tappet kaxꞌãmiꞌ,
\v 2 kõmẽn xexka Konox yõg tikmũꞌũn pu kaxꞌãmiꞌ, Konox yõg kuxa mãm xop pu kaxꞌãmiꞌ. Yã Kunnix te yũmũꞌã hãꞌ xape xeꞌeꞌ, yĩy yũmũg xape kamah. Pũyã Topa yũmũg Tak ꞌãmũtik pip, nũy ꞌãkuxa mãmmãꞌ, nũy xa hãmmaxnãꞌ.
\s Tu Topa pu hãmꞌãktux, nũy kuxa mãm kaꞌok xop maxꞌax ꞌãktux
\p
\v 3 ꞌŨgmũꞌãte yũmũg Tak Topa max ꞌãktux, ꞌĩhã nõm pu hãmꞌãktux ꞌãxop ꞌãxape xop pupiꞌ, yã Topa te yũmũg xuxyã Yeyox Kunnix hãꞌ Tak.
\v 4 ꞌÃkuxa mãm kaꞌok Yeyox Kunnix kopah, tu Topa yõg tikmũꞌũn xohix putup pax, hak mũꞌãteꞌ yũmmũg.
\v 5 Hõmã ꞌãxop te hãmꞌãpak maxꞌax ꞌãpak hãmãxap, hu hãmmax hip, nũy ꞌãhi xeꞌe mõ kuma mõg, hu ꞌãkuxa mãm kaꞌok, xiꞌ nõy putup pax ꞌĩhãꞌ hip, nũy hãpxip punethok ꞌĩhã pexkox yõg hãpxop pop.
\v 6 Yã Topa te hãmꞌãpak maxꞌax hã tikmũꞌũn xohix ha hãmmaxnãhãꞌ, yĩꞌ hep xop xohix pu hãmꞌãktux, yã kama ꞌãxop te hãmꞌãpak, tu Topa teꞌ xohix ha hãmmaxnãꞌax ꞌãpak, ha kaxĩy Topa te xa hãmmaxnãhãꞌ, ꞌĩhãꞌ xupak, ha hõnhã hãmmaxnã kamah.
\v 7 Ha yũmũg xape ꞌEpap te xa hãmyũmmũgãhãꞌ, tuk mũg pupi hãpxopmãhãꞌ, tu Kunnix pu hãpxopmã punethok,
\v 8 tuk mũꞌã Topa Koxuk ꞌãktux, ha xa kaꞌogãhãꞌ, nũy kuxa mãm xop xohix putup pax, yĩy ꞌEpap tek mũꞌãꞌ xuktux.
\p
\v 9 Hak mũꞌãteꞌ xupak, tu Topa tuꞌ xak, pu ꞌãxop pu hãmyũmmũgãꞌ, xayĩy hãmyũmmũg xeꞌeꞌ, nũy yã Topa putup, xayĩy ꞌãxop yũmmũg, nũy Topap-tupꞌax yũmmũg, hu yãy Koxuk te xa hãmyũmmũgãhãꞌ,
\v 10 xayĩy hãpxopmã max, ha Topa te ꞌãptup, xa hãpxopmã max mõ kuma ꞌãmõg, tu mõktu yã Topa yũmmũg xeꞌẽgnãg.
\v 11 Topa kaꞌok xeꞌẽgnãg, tu ꞌãkaꞌogãp-tup, xayĩy nõãꞌtot, ꞌĩhã ꞌãkuxa hittup,
\v 12 hu yũmũg Tak Topa pu hãmꞌãktux, hu: “ꞌÃmax Topah, xatek mũg kaꞌogãhãꞌ, ꞌũ pexkox yõg hãpxop pop, yĩy ꞌõg tikmũꞌũn xohix mũtik pop,” kaxĩy. Yã Topa te nõm hãpxop xex pexkox kopah, nũy yãy yõg xop puꞌ popmãꞌ. Yãꞌ popmãp-tup yãy yõg tikmũꞌũn puꞌ, nõm te Topa puꞌ yĩpkox pip.
\v 13 Hõmã yũmũg kuxa kummuk, yã hãpkoxtap putuk yũmũg kuxa kopah, pãyã yũmũg Tak Topa te yũmũg kuxa maxnãhãꞌ, tu yũmũg nũnnãhã yãy kutok hah. Yã yãy kutok mõꞌyãy xeꞌẽgnãg, ꞌũk-tok yãp-xehnãg tuꞌ, puyĩy ꞌũk-tok Yeyox Kunnix yũmũg xat, nũy ꞌũkpẽnã max.
\v 14 Tu yũmũg pupiꞌ xok tap, nũy yũmũ yõg hãpkummuk mĩyꞌax xaxogãꞌ, pu tu kux.
\s Tute Kunnix ꞌãktux
\p
\v 15 Tikmũꞌũn ꞌũm te Topa pẽnã hok, ha Kunnix te yãy Tak Topa pa putuk xeꞌẽgnãg, tuk-tok te mãxap, hak-nãy tu Topa te hãpxop xohix mĩy.
\v 16 Yãk-tok mũtik Topa te hãpxop xohix mĩy, tu tu hãpxop xohix xatꞌax, tu hãpxop pẽnãꞌax mĩy, xix hãpxop pẽnã hok mĩy kamah, xix pexkox yõg xexka xop mĩy, xiꞌ yõg xatꞌax xop xohix mĩy. Topa tek-tok mũtik mĩy, xik-tok puꞌ mĩy hãpxop xohix.
\v 17 Kunnix xip tap, ꞌĩhã Topa te pexkox mĩy, xix hahãm, xix hãpxop xohix mĩy, tu nõm mũtik hãpxop xohix xex max, pu tu pip kaꞌok.
\v 18 Ha Kunnix teꞌ kuxa mãm kaꞌok xop hãp-tox. Yã tikmũꞌũn putox te yãy yĩn xat, nũy tu pẽnã max, ha kaxĩy Kunnix teꞌ kuxa mãm xop xat, nũy tu pẽnã max, tu nõm xop hĩnnãhãꞌ, yã Topak-tok te mãxap, tu putpuꞌ hi tap, nũy hãpxop xohix hã tu xexka xeꞌẽgnãg.
\v 19 Yã Topa tek-tok putup, yã Topa xeꞌẽgnãg kamah.
\v 20 Yĩy Topa te hãmpeꞌpaxex, tu yãy kutok nũꞌkutnãhãꞌ hãm tuꞌ, pu tu xok mĩpkupnix tuꞌ, nũy tuꞌ gãy nãm xop xohix nõãꞌ, puyĩy Topa hã tu xapeꞌ. Tu pexkox yõg gãy xop nõãp-tup kamah, puyĩꞌ xohix yã Topa hã tu xapeꞌ.
\p
\v 21 Hõmã Topa tu ꞌãpip hãptox hah, tu ꞌãyĩpkox ꞌohnãg, tu Topa hã ꞌãpuknõg, ꞌõg hãpxopmãꞌax kummuk tuꞌ, xix hãpeꞌãpaxex kummuk tu ꞌãpuknõg,
\v 22 pa Topak-tok xok, ha hõnhãꞌ Tak te xa hãꞌ xape, nũy yãy keppa ꞌãnũnnãꞌ, tu ꞌãkuxa tupmãhãꞌ, tu ꞌõg hãpkummuk mĩyꞌax xaxogãhãꞌ, nũy ꞌãmax ꞌãktux.
\v 23 Yĩy Topa yõg putat hã ꞌãmõg kaꞌok, huꞌ xak hok. ꞌÃxop te hãmꞌãpakꞌax max ꞌãpak, ha xaꞌ hipmãhãꞌ, xayĩy pexkox yõg hãpxop pop, huꞌ xaxok hok. ꞌŨgmũn Paot te hãmꞌãpakꞌax max ꞌãktux pax, tu hãpxexka yõg xop xohix puꞌ xuktux, hu hãpxopmãhãꞌ.
\s Paot teꞌ kuxa mãm kaꞌok xop pupi hãpxopmãhãꞌ
\p
\v 24 Tuk xũy ꞌãxop pupiꞌ, nũy Kunnix pupik xũy, huk kuxa hittup, Kunnix xop pupik xũy tuꞌ. Yã Kunnix hã yũmũg yĩn puxet, ha yũmũg xat, nũy yũmũg pẽnã max, yãy yĩn pẽnã max putuk.
\v 25 Topa tek mũn yãykutnãhãꞌ, nũy mõgkutnãꞌ Kunnix yĩn xop hah, nũy Topa pupi hãmꞌãktux, nũy xa hãmꞌãktux xohix ꞌãktux.
\v 26 Hãmyãxatamuk xohix punethok hã Topa te hãmpeꞌpaxex, tuꞌ yĩy ꞌohnãg, pa hõnhãꞌ kuxa mãm kaꞌok xop puꞌ hãmyũmmũgãhãꞌ, yã hãmꞌãktux xeꞌeꞌ.
\v 27 Topa teꞌ hep xohix xop pu hãmyũmmũgãhãꞌ, tu hãmꞌãktuxꞌax xeꞌeꞌ yũmmũgãhãꞌ, ha hãmꞌãktux nũhũꞌ, hu: Kunnix te ꞌãkuxa kopaꞌ xip, nũy xaꞌ popmã pexkox yõg hãpxop xohix, yĩy ꞌãxop yãyhãp-tup max xeꞌẽgnãg, Kunnix putuk.
\v 28 Ha kaxĩy ꞌũgmũꞌãte hãmꞌãktux, tu Kunnix ꞌãktux tikmũꞌũn xohix puꞌ, tu hãmyũmmũg, nũy hãmyũmmũgã max, nũy ꞌãmõgã Topa hah, xayĩy ꞌãkuxap-xet Kunnix mũtik, nũy Topa hã ꞌãtix tap,
\v 29 yĩy ꞌãte hãpxopmã punethok, ha Kunnix tek kaꞌogãhãꞌ, ha ꞌãte hãpxopmãhãꞌ punethok.
\c 2
\p
\v 1 ꞌÃte xa hãmꞌãktux, xayĩy yũmmũg. ꞌŨghãm punethok ꞌãxop pupiꞌ, xix kõmẽn Namnixet yõg kuxa mãm xop pupiꞌ, yãꞌ xohix pupiꞌ, nõm tek pẽnã ꞌohnãg pupik hãm.
\v 2 ꞌÃte hãpxopmãhãꞌ, nũy ꞌũgnõy kaꞌogãꞌ, puyĩꞌ kuxap-xet yãy putup, nũy hãmyũmmũg xexkaꞌ, nũy hãmꞌãktux xeꞌeꞌ yũmmũg. Kunnix yã Topa yõg hãmꞌãktux xeꞌeꞌ, Topa te tikmũꞌũn pu hãmyũmmũgãhãꞌ.
\v 3 Yãk-tok xeꞌe te Topa yõg hãmyũmmũgꞌax xohix yũmmũgãhãꞌ.
\p
\v 4 Yĩy ꞌãte xa hãmꞌãktux, hu: Koitꞌax pu ꞌĩpkox pip hok, yãꞌ kummuk xop te mõꞌãmã pax. ꞌŨpa max, ha taꞌ kuxa mũn kummuk.
\v 5 Hãptox tuk xip, pak kuxa te ꞌãkuxa mũtik yãp-xet, ꞌãkuxa mãm kaꞌok Kunnix kopah, hak kuxa hittup xexkaꞌ.
\s Kunnix te yũmũg hĩnnãhãꞌ
\p
\v 6 ꞌÃxop te: “Yeyox Kunnix yã yũmũg xuxyãꞌ,” kaxĩy. Hu nũ mũtik ꞌãkuxap-xet, nũy hãpxopmã max.
\v 7 Mĩm yĩpxatit te hãm hã mõꞌnãhãꞌ, tu hãm kopaꞌ xip kaꞌok, kaxĩy ꞌãpip kaꞌok Kunnix tuꞌ, puyĩy ꞌãkaꞌogãꞌ, xayĩy ꞌãkuxa mãm kaꞌok xexkaꞌ, hak mũꞌãte xa hãmyũmmũgãhãꞌ, ꞌũxaxok hok, nũy Topa pu hãmꞌãktux, nũy: “ꞌÃmax Topah!” kaxĩy.
\p
\v 8 ꞌÕg pa ꞌãtiꞌ! Tikmũꞌun te ꞌãkuxa hãꞌ xupxet putup, mõꞌãmãꞌax hã ꞌãkuxa hãꞌ xupxet putup, hãmꞌãktux hitop hã nõm xupxet putup. Nõm hãmꞌãktux yã Topa hãꞌ puknõg xop yõg hãmꞌãktux, ꞌap Topa yõgꞌah, ha pexkox yõg xexka xop te Topa tuꞌ gãy, tu hãmꞌãktux, pãyã Kunnix teꞌ xuktux ꞌohnãg.
\v 9 Yã Kunnix te Topa xeꞌẽgnãg putuk, tu tikmũꞌũn kutok xeꞌeꞌ, tu yãy putuk xeꞌẽgnãg,
\v 10 ha Topa te Kunnix mũtik ꞌãhĩnnã xeꞌeꞌ, yã ꞌãkuxap-xet Kunnix kuxa mũtik, ha Kunnix xexka xeꞌẽgnãg, tu pexkox yõg xop xat, xix hãm tuꞌ pip xop xat, nõm xop hãꞌ xatꞌax, tuꞌ xat.
\p
\v 11 Yoneo xop teꞌ pit xop yãy nãg xax mep ꞌũyĩmap, pãyã Kunnix te ꞌãkuxa kummuk xit, nũy taꞌ yãnãn tu kuxa max tat.
\v 12 ꞌÃp-tox pix ꞌĩhã ꞌãxop te hãpxopmã kummuk kux, ha Kunnix nõ hãpkot, ha Topa teꞌ putpuꞌ hĩnnã xeꞌeꞌ. Yã ꞌãkuxa mãm kaꞌok Topa kopaꞌ, ha kaꞌognãg xexkaꞌ, tu Kunnix putpuꞌ hĩnnãhãꞌ, tu kamah ꞌãxop kuxa hĩnnã xeꞌẽgnãg.
\v 13 Hõmã ꞌãxop te hãpxopmã kummuk pax, yã Topa hã ꞌãxop puknõg, tu kamah Yoneo yõg tikmũꞌũn hã ꞌãpuknõg, pa Topa te ꞌãkuxa hĩnnãhãꞌ, Kunnix hĩnnã putuk ꞌãhĩnnãhãꞌ, tu hãpkummuk mĩyꞌax xohix xaxogãhãꞌ, pu tu kux.
\v 14 Yã Kunnix te yũmũg pupiꞌ xok, tu yũmũg yãnãn tuꞌ xok mĩpkupnix tuꞌ, ꞌũyĩy Topa hãk xapeꞌ, pũyĩy yũmũg kummuk mĩyꞌax hãꞌ pago. Yã yũmũg kuxa kummuk tupmãhãꞌ, puyĩy yũmũg kuxa tu max Topa puꞌ.
\v 15 Ha hãpkummuk yõg xexka xop puꞌ kuxyãhãꞌ, tu mĩpkupnix tuꞌ xup, nũy mõktuk-tõgnãg, tu pipkup mãkxapꞌax hãꞌ hĩy, tuꞌ hupmãhãꞌ, haꞌ mõgãhãꞌ, puꞌ xohiꞌ pẽnãꞌ, tuꞌ yũmmũg, tu Kunnix teꞌ xat xeꞌẽgnãg yũmmũg, ha hãpxohix te nõm puꞌ yĩpkox pip.
\p
\v 16 ꞌŨtux hok pu tikmũꞌũn ꞌõg hãpxopmãꞌax kopit hok, nũy xoꞌopꞌax hã ꞌãxat hok, xix ꞌãxitꞌax hã ꞌãxat hok, xix nit xãn hã ꞌãxat hok, xayĩy ꞌãhãm hok. ꞌŨtux hok, pu ꞌãxat hok, xayĩy nit xap yĩy ta ꞌãhãm hok, xix ꞌãmuk xexka mĩyꞌax hã ꞌãxat hok, xix mãyõnhex tup ꞌĩhã ꞌãxat hok. Yãꞌ tux hok pu ꞌãxat hok.
\v 17 Yãꞌ xohix te nũ pexkox yõg hãpxopmãꞌax hãꞌ komut, yãꞌ koxuk putuk, ꞌap xeꞌeꞌah. Hõmã Topa teꞌ xat pu Yoneo xop mĩy. Topa te tu xoꞌopꞌax xat, xix nõm hãpxop xohix xat, nũy tikmũꞌũn pu Kunnix ꞌãktux, pa hõnhã Kunnix xip xeꞌẽgnãg, yĩy hãpxopmãꞌax komut yãyhãꞌ hitop, haꞌ kux.
\v 18 Tikmũꞌũn te koitꞌax hã ꞌĩpkox hok, nõm xop te yãy ꞌãktux xexka hã ꞌĩpkox hok. Tu hãpxopmãꞌax xeꞌẽgnãg pẽnãꞌax ꞌãktux, tu mõꞌãmãꞌ, ꞌĩhãꞌ xat, xa pexkox yõg nũꞌpok xop pu nũktettex, nũy nõm ꞌũxexka ꞌãktux, ha hitop hã yãy kutõgnãg ꞌãktux, ꞌĩhã yãy xexka peꞌpaxex, tu yãy putupꞌax kummuk mĩy.
\v 19 Tu Kunnix nĩm, haꞌ kuxa mãm kaꞌok xop hãp-tox, puyĩy nõm xop xohix yã kuxap-xet, yãy yĩn puxet putuk, haꞌ xohix nãg nõy nãꞌ mõg, tu mõktu xexkaꞌ, yã Topa tep-tup hah.
\s Kunnix mũtik yũmũg hi, xix yũmũg xakix
\p
\v 20 Kunnix xok, nũy ꞌõg hãpkummuk mĩyꞌax kuxyãꞌ, xayĩy yãmĩy kummuk yõg xexka xop nĩm. Tep tu xate nõm ꞌãpak?
\v 21 Ha ꞌãxat, hu: “ꞌŨxupit hok nũhũꞌ,” kaxĩy, tu xe: “ꞌŨmã hok ꞌõhõm,” kaxĩy, tu xe: “ꞌŨpa hok nõꞌõm,” kaxĩy. Pa nõm pu ꞌĩpkox hok.
\v 22 Hãpxop xohix nõgꞌax, tu yãyxaxogãꞌax, ha tikmũꞌũn teꞌ xat hok, pu mĩy hok, pa Topa teꞌ xat ꞌohnãg.
\v 23 Yãꞌ xatꞌax puknõg te hãmyũmmũg putuk, pãyãꞌ hitop, haꞌ xat pu pexkox yõg nũꞌkutnãꞌax pu nũꞌxup, nũy yãy xax te kutuk, pãyãꞌ koit, yãꞌ hitop, tu tikmũꞌũn yõg hãpeꞌpaxex maxnã ꞌohnãg, tup-tupꞌax kummuk pu hupmã ꞌohnãg kamah.
\c 3
\p
\v 1 Kunnix mũtik ꞌãhi xeꞌeꞌ. Hõmã ꞌãxop te hãpxopmã kummuk kux, hu pexkox yõg hãpxop xax nõmhã, yã Kunnix yũm ꞌõnteꞌ, tu Topa yĩpxeꞌe hãꞌ yũm.
\v 2 Pexkox yõg hãpxopmãꞌax peꞌãpaxeh, nũy hãm yõg hãpxopmãꞌax xaxogãꞌ.
\v 3 Hõmã ꞌãxop te hãpkummuk mĩy pax, pa Topa te ꞌãhĩnnãhãꞌ, tu Kunnix hĩnnã putuk, tu ꞌãpẽnã max, yã ꞌãxop kuxap-xet Kunnix mũtik, xix Topa mũtik.
\v 4 Kunnix te ꞌãhĩnnã xeꞌeꞌ, nũy ꞌãkopa tuꞌ xip kaꞌok, tu putpuꞌ nũn putup, puꞌ hep xop xohiꞌ pẽnãꞌ, haꞌ nũn, ꞌĩhã ꞌãxop xexkanãp-tup, ha mõktu yã ꞌãxexkaꞌ, Kunnix mũtik yã ꞌãxexka putup, puꞌ xohiꞌ pẽnãꞌ.
\s Yũmũg hi xeꞌẽgnãg
\p
\v 5 Yãy yõg putupꞌax kummuk mĩy hok, nũy hãpkummuk mĩy kux, ha tikmũꞌũn te hãpkummuk mĩy, tuꞌ nõy hãꞌ xupxet, xiꞌ xonnix, xiꞌ gãy, xiꞌ nõy yõg hãpxop putup. Tikmũꞌũn te hãpxop putup pax xexkaꞌ, puxix tu Topap-tup hok, ha kaxĩy hãpxop te topa komut xop putuk, tikmũꞌũn tep-tup xexka hah, tu mõktu Topa xeꞌẽgnãg xaxogãhãꞌ,
\v 6 ha Topa gãy tikmũꞌũn te hãpkummuk mĩy tuꞌ, nõm xop te Topa puꞌ yĩpkox ꞌohnãg, yĩꞌ kummugãp-tup ꞌũyãnãn tuꞌ.
\v 7 Hõmã ꞌãxop te yãy putupꞌax kummuk mĩy, huꞌ mĩy pax, Topa pu ꞌãyĩpkox ꞌohnãg tuꞌ
\p
\v 8 Paꞌ kuxyã nõmhã, xayĩy mĩy hok ꞌũxeheh, yãy putupꞌax kummuk mĩy hok, xix ꞌãgãy hok, xix ꞌãnõy pu hãpkummugã hok, xatep-tup nõg tuꞌ, xiꞌ kupeh hok, xix ꞌãyĩy kummuk hok, nũy ꞌãnõy mãnõg hok.
\v 9 Koit hok ꞌãnõy puꞌ. Yã Topa te ꞌãkuxa kummuk xit, nũy kuxa max tat ꞌũyãnãn tuꞌ.
\v 10 Yĩy hãpkummuk mĩyꞌax xohix kux, pu Topa ꞌãkuxa tupmã ꞌãmnĩy xohix hã, nũy xa hã yãy putup, xayĩy Topa yũmmũg xeꞌẽgnãg.
\v 11 Yĩꞌ kuxa mãm kaꞌok xop puxet, yã Kunnix hãꞌ kuxap-xet, xip-tox puxet, ꞌap ꞌãxop Yõneo xop yõgꞌah, xiꞌ puknõg xop yõgꞌah, xix tikmũꞌũn yõgꞌah, xix ꞌãyuhuk yõgꞌah, xix kamoka xop yõgꞌah, xix kãmãnat xop yõg ꞌah, xiꞌ xatꞌax xop yõgꞌah, pãyã ꞌãxop yã Kunnix yõg, haꞌ xexka xeꞌẽgnãg, tu yãy yõg tikmũꞌũn xohix kuxa kopaꞌ xip, haꞌ xohix te yã yãy putuk Kunnix puꞌ.
\p
\v 12 ꞌÃxop yã Topa yõg tikmũꞌũn, ha mõꞌãyãy xeꞌẽgnãg, tu ꞌãyĩmõgatux yãy mũn puꞌ, yĩy ꞌãnõy kuxa kaꞌ, tu nõãꞌtot, tu nõm pu hãmmaxnãhãꞌ, xix yãy kutõgnãg peꞌãpaxeh, nũy ꞌãnõy peꞌãpaxex max, xix ꞌãyĩy puꞌuk, nũy ꞌãnõy gãyã hok,
\v 13 nũy ꞌũyõg hãpkummuk mĩyꞌax xaxogãꞌ, ꞌĩhã ꞌãnõy te xa hãpkummugãꞌ. Yã kaxĩy yũmũg xuxyã te ꞌãxop yõg hãpkummuk mĩyꞌax xaxogãhãꞌ, pu tu kux.
\v 14 Ha ta mõy ꞌãnõy putup pax xexkaꞌ, nũy nõm hã ꞌãkuxap-xet, xix ꞌãp-tox puxet.
\v 15 Pũyã Kunnix ꞌãkuxa mãmmãꞌ, nũy ꞌãnõy mũtik tu ti max, nũy yãytuk-mĩy hok. Yã Topa te ꞌãxãnãhãꞌ, nũy ꞌãkuxa mãmmãꞌ, nũy nõm hã ꞌãp-xet, ꞌãyĩn puxet putuk. ꞌŨxaxok hok, nũy Topa max ꞌãktux, hu: “ꞌÃmax Topa, tu yũmũꞌã hãpxop xohix popmãhãꞌ, yãꞌ puxiꞌ,” kaxĩy.
\v 16 Pũyã Kunnix yõg hãmꞌãktux xeꞌe ꞌãkuxa kopaꞌ xip, tu xa hãmyũmmũgãhãꞌ, xaꞌ yũmmũg, nũy ꞌãnõy puꞌ yũmmũgãꞌ, tuk-tex, nũy Topa xexka ꞌãktux, nũy ꞌãkuxa yã Topa max ꞌãktux.
\v 17 ꞌOk pe ꞌãxop te hãpxopmãhãꞌ, pe hãmꞌãktux, hu ta yũmũg xuxyã Yeyox ꞌãktux, nũy Topa yũmũg Tak pu: ꞌÃmax Topah. Xate yũmũg xuxyã Yeyox yũmũꞌã nũꞌkutnãhãꞌ. ꞌÃmax! kaxĩy.
\s Te xĩy hã hãpxopmãhãꞌ
\p
\v 18 ꞌÃte ꞌũn xop xat, puꞌ yĩpxox pu yĩpkox piꞌ, yã Kunnix teꞌ xat.
\p
\v 19 Haꞌ yĩpxox xop xat, puꞌ xetut putup pax, huꞌ kuxa kaꞌ.
\p
\v 20 Hak-tok xop xat, pu yãy tak pu yĩpkox, xiꞌ tut pu yĩpkox. Yã Topa teꞌ xat.
\p
\v 21 ꞌÃk-tok gãyã hok, ka ꞌãk-tok kuxa tuknõãꞌ.
\p
\v 22 Kãmãnat xop, ꞌãxuxyãꞌ nõm tik te ꞌãxat pu ꞌĩpkox piꞌ, nũy tu hãm max, yã ꞌãmnĩy xohix hã hãm max, ꞌok pe ꞌãpẽnãꞌ, ꞌok pe ꞌãpẽnã hok, yĩy Topa pu hãm max, ꞌãxop tep-tup pax tuꞌ.
\v 23 ꞌÃpu hãpxopmã max, pu Topa pẽnãꞌ, nũy ꞌõg hãpxopmãꞌax putup, ha Topa pu hãpxopmãꞌ, ꞌãhittup tuꞌ.
\v 24 ꞌŨxaxok hok: Yũmũg xuxyã te pagop-tup hokꞌah xaꞌ, tu pexkox yõg hãpxop xex yãy yõg tikmũꞌũn puꞌ, yã Kunnix te ꞌãxop hã ꞌãxatꞌax xeꞌeꞌ,
\v 25 tuꞌ yãnãn tu pago, tu hãpkummuk mĩy xop kummugãhã ꞌũyãnãn tuꞌ. Yã Topa te hãmyok mĩy, nũy xohix pu pago, yã Topa pu ꞌũxohix teꞌ nõy putuk.
\c 4
\p
\v 1 ꞌÃxop ꞌãxuxyã xop, ꞌãpu hãmyok mĩy, nũy ꞌõg kãmãnat pu pago max, Topa yã ꞌãxuxyã xeꞌeꞌ, tu ꞌãxat, tu pexkox tuꞌ xip, yĩy ꞌõg kãmãnat xop pu pago max, nũy nõm pu hãmmaxnãꞌ.
\s Paot te hãmyũmmũgãhãꞌ
\p
\v 2 Topa pu hãmꞌãktux pax, tu ꞌõg pa mõxip, mõꞌõn hok, nũy Topa max ꞌãktux, xaꞌ popmã hãpxop xohix hah.
\v 3 Ha kamak mũg pupi tuꞌ xax, pu Topa ꞌũgkaꞌogãꞌ, ꞌũgmũ Topa yõg hãmꞌãktux xeꞌe ꞌãktux, nũy Kunnix ꞌãktux. Yã kanet kopak xip, ꞌãte Kunnix ꞌãktux tuꞌ.
\v 4 Ha Topa tuꞌ xax, puk kaꞌogãꞌ, ꞌũ Kunnix hã hãmyũmmũgã max, yã Topa tep-tup pax.
\p
\v 5 Hãmyũmmũg, nũy ꞌũkuxa mãm hok xop pu hãpxopmã max ꞌãmnĩy xohix hã, xayĩy hãmyũmmũgꞌax hã Kunnix ꞌãktux max tikmũꞌũn puꞌ.
\v 6 Hãmyũmmũg, nũy hãmꞌãktux max, nũy tu hãmꞌãktux hãꞌ nõy yãnãn max.
\s Tuk-nãy tu ꞌãneo
\p
\v 7 Yũmũg xape Tikik te Kunnix pu hãpxopmãhãꞌ, tuk mũg mũtik hãpxopmãhãꞌ, tu xa hãmꞌãpakꞌax ꞌãktux putup, nũy ꞌũgmũn ꞌãktux.
\v 8 ꞌÃte ꞌãxop hah mõꞌkutnãhãꞌ, pu ꞌãkaꞌogãꞌ, nũy putpuꞌ nũꞌ, nũy xak mũg ꞌãktux.
\v 9 Tu yũmũg xape ꞌÕnẽy mũtik mõg, ha ꞌõgnũ kõmẽn yõg tihik, tu xa hãmꞌãpakꞌax xohix ꞌãktuxꞌax, tuk mũg ꞌãktuxꞌax.
\p
\v 10 ꞌAnixtah ꞌũgmũtik kanet kopaꞌ tihiꞌ, tu ꞌãneo, xix Maname tiktak Mãꞌak te ꞌã ꞌãneo kamah. ꞌÃte xa hãmꞌãktux tap, tu ꞌãha Mãꞌak mõgꞌax ꞌãktux, pu tu ꞌãpet kopaꞌ xip, ꞌĩhã putpu ꞌãhaꞌ mõg.
\v 11 Yoyoe ꞌãxetꞌax nõy yã Hãmyok, tu xa ꞌãneo kamah. Nũ tik 2 te Yoneo yõg tihik, tuk mũtik hãm, ha Yoneo xop nõy hãm ꞌõhnãg ꞌũgmũtik, puyĩy Topa yãy yõg tikmũꞌũn xat, haꞌ yĩpkox pip, ha tik 3 te hãpxopmãhãꞌ punethok, nũy tu yãy hãk tehet.
\p
\v 12 ꞌEpap te ꞌõgnũ kõmẽn yõg tihik kamah, tu Yeyox Kunnix pu hãpxopmãhãꞌ, tu ꞌa ꞌãneo, tu Topa tuꞌ xak pax, ꞌãxop pupiꞌ xak, puyĩy ꞌãkaꞌogãꞌ, nũy Topa hã ꞌãxiptap, nũy Topa pu ꞌãxop hãpxopmãꞌ.
\v 13 Yã ꞌEpap hãm punethok, ꞌãteꞌ yũmmũg, ha ꞌãxop pupiꞌ hãm punethok, xix kõmẽn Namnixet yõg tikmũꞌũn puꞌ hãm punethok, xix Yenap yõg tikmũꞌũn puꞌ hãm punethok.
\v 14 Notot Nok yũmũꞌã hãꞌ xape, tu ꞌãꞌ ꞌãneo, xix Nep te ꞌãꞌ ꞌãneo kamah.
\p
\v 15 ꞌŨgmũꞌãte Namnixet yõg xape xop pu ꞌãneo, xix Nĩꞌip pu ꞌãneo, xiꞌ kuxa mãm kaꞌok xop pu ꞌãneo, nõm Nĩꞌip pet tu yãy tuꞌnãhã ꞌãneo kamah.
\v 16 ꞌÃpu nũ tappet mõꞌkupix hãmãxap, nũy kunãy tu Namnixet yõg xop ha mõꞌkutnãꞌ, pu mõꞌkupix kamah. Mõꞌkupix Namnixet xop yõg tappet ꞌũyãnãn tuꞌ.
\v 17 ꞌÃpu ꞌAkip pu hãmꞌãktux, hu: “Yũmũg xuxyã te ꞌãxat, xa hãpxopmãꞌ, yĩy hãpxopmã max, nũy nõ kuxyã Kunnix puꞌ,” kaxĩy.
\p
\v 18 ꞌÃte Kaxꞌãmi yãy yĩm hã, hu: ꞌŨgmũn Paot te ꞌãxop pu ꞌãneo. Kanet Kopak xip, yãk xaxok hok!
\p Pũyã Topa xa hãmmaxnãꞌ!
\p Tu ta tuꞌ kux.