\id 1TH  - Maxakalí NT [mbl] (Brazil) -2011 bd
\h 1 TEXANÕN
\toc1 1 Texanõn
\toc2 1 Tessalonicenses (1 Ts)
\mt PAOT TE KÕMẼN TEXANÕN YÕG TIKMŨꞌŨN PU TAPPET KAXꞌÃMI I
\c 1
\p
\v 1 ꞌŨgmũn Paot. ꞌÃteꞌ kaxꞌãmi nũhũꞌ tappet, yã ꞌãxop pu kaxꞌãmiꞌ, yã Kunnix kopa kuxa mãm xop puꞌ kaxꞌãmi kõmẽn Texanõn tuꞌ, yã yũmũg ꞌÃtak Topa yõg xop puꞌ, yã yũmũg xuxyã Yeyox Kunnix yõg xop puꞌ kaxꞌãmiꞌ. Xinax te ꞌãxop peꞌpaxex xix Tĩmõn teꞌ kamah. Pu yã Topa xa hãmmaxnãꞌ, xayĩy ꞌãkuxa mãm.
\s ꞌÃxop kuxa mãm Topa kopah
\p
\v 2 ꞌŨgmũꞌãte Topa pu hãmꞌãktux mõkumak mõg, hu: “Kunnix kopa kuxa mãm xop pu ꞌãmax.” Kaxĩy. Yã ꞌãxop puꞌ max Topah. ꞌŨgmũꞌãte Topa pu ꞌãxop ꞌãktux mõkumak mõg.
\v 3 Hamũn, ꞌũgmũꞌãte yãy ꞌÃtak Topa pu hãmꞌãktux, tu hãmpeꞌpaxex, ꞌãxop kuxa mãm kaꞌok, hu hãpxopmã max xohix. ꞌÃxop teꞌ nõy putup pax, hu ꞌãxop te hãpxopmã max punethok. Xate yũmũg xuxyã Kunnix hip kumaknãg. Hã kaxĩy yũmũꞌãte hãmpekpaxex, tu Topa pu hãmꞌãktux.
\v 4 ꞌŨkxape xop, Topa te ꞌãxop putup pax, tu tikmũꞌũn xohix kopa ꞌãxop yĩmõgãtux, tu ꞌãxop mĩy Topa yõg tikmũꞌũn xeꞌeꞌ. Hã kaxĩy ꞌũgmũꞌãte peꞌpaxex, tu Topa pu hãmꞌãktux.
\v 5 Hõmã ꞌũgmũꞌãte xa Topa yõg hãmꞌãpak maxꞌax ꞌãktux. ꞌŨgmũꞌãte nõm ꞌãktux, tu hãpxopmã kaꞌok xeꞌẽgnãg, tu Topa Koxuk mũtik xa Topa yõg hãmꞌãpak maxꞌax ꞌãktux, tuk mũg kuxa mãm kaꞌok Topa yõg hãmꞌãpak maxꞌax kopah. Hõmãg mũg tihi ꞌãxop kopah, ha xatek mũ yõg hãpxopmã maxꞌax pẽnãhãꞌ, yãg mũn max xaꞌ.
\v 6 Xate ꞌũgmũg max pẽnãhãꞌ, xix yũmũg xuxyã Yeyox yõg, tu nõꞌ max putuk. ꞌŨnõy te ꞌãxop kuteꞌex kummuk, pa ꞌãxop te Topa yõg hãmꞌãpak maxꞌax pahaꞌ, tu ꞌãkuxa hittup, yã Topa Koxuk te ꞌãkuxa hittupmãhãꞌ.
\v 7 ꞌÃxop max, ha ꞌãmax pẽnãhã Kunnix kopa kuxa mãm xop te hãpxexka Mãxenõn tuꞌ, xix hãpxexka Genex tuꞌ, tu nõꞌ max kamah, yã ꞌãxop putuk.
\v 8 Hamũn, ꞌãxop te yũmũg xuxyã Yeyox ꞌãktux hãpxexka Mãxenõn tuꞌ, xix hãpxexka Genex tuꞌ, yãꞌ xohix yĩmap teꞌ yũmmũg, ꞌãkuxa mãm kaꞌok. Putep nõy ꞌãktux putup ꞌũgmũꞌãteꞌ? Puxiꞌ.
\v 9 Hõmãg mũg tihi ꞌãxop kopah, ha ꞌãxop te topa komut xop nĩm, tu ta Topa xeꞌe pe ꞌãmõg, ha tikmũꞌũn xohix te ꞌãyĩmap teꞌ xupak, tu hãmꞌãktux.
\v 10 Xate Topak-tok hip, Yã pexkox tu yĩxop-tup Topak-tok. Hõmã Topa te yãy kutok Yeyox putpuꞌ hĩnnãhãꞌ. Yeyox te yũmũg mõy putup, ꞌĩhã Topa gãy ꞌũkummuk xop mũtik.
\c 2
\s Paot te hãpxopmã max kõmẽn Texanõn tuꞌ
\p
\v 1 ꞌŨkxape xop, hõmãg mũg tihi ꞌãxop kopah, tu hãpxopmã max, ꞌap kummuk mĩyꞌah, ꞌa yãg mũg hitop tiꞌah ꞌãxop kopah.
\v 2 Hõmã tikmũꞌũn tek mũg kuteꞌex kummuk komẽn Pinio tuꞌ, tuk mũg mãnõg, pa hãpxip ꞌĩhãg mũg mõg, tu mõktu ꞌãxop tuk mũg mõxaha ꞌõnte kõmẽn Texanõn tuꞌ, ha kõmẽn Pinio yõg tikmũꞌũn tek kuteꞌex kummuk, ꞌãxop teꞌ yũmmũg. Pa yũmũ yõg Topa tek kuxa hittupmãhãꞌ, ha ꞌãte Topa yõg hãmꞌãpak maxꞌax ꞌãktux.
\v 3 ꞌŨgmũꞌãte Topa yõg hãmꞌãpak maxꞌax ꞌãktux, tuk mũꞌãte peꞌpaxex kummuk ꞌohnãg, tuk mũꞌãte ꞌõg hãpxop xak ꞌohnãg, tuk mũꞌãte ꞌãxop kupex ꞌohnãg.
\v 4 ꞌŨgmũꞌãte putep mũn ꞌãktux? Topa te nõ putup, ꞌũgmũꞌãte nõm ꞌãktux mõkumak mõg. Hamũn. Topa tek mũg putup, tuk mũꞌã Topa yõg hãmꞌãpak maxꞌax hõm, tuk mũg mõꞌpok, ha ꞌãte tikmũꞌũn xohix pu nõm ꞌãktux. ꞌŨgmũꞌãte putep mũn ꞌãktux? ꞌOk pe tikmũꞌũn te nõm putup pax hãmꞌãktux? ꞌOk pe Topa te nõm putup pax hãmꞌãktux? Yã tikmũꞌũn yõgꞌah, pa Topa tek mũ yõg putupꞌax kopit.
\v 5 ꞌÃxop teꞌ yũmmũg. Hõmãg mũg tihi ꞌãxop kopah. ꞌAk mũꞌãte xa hã xape komutꞌah. ꞌŨgmũꞌãte ꞌãxop kupex ꞌohnãg. ꞌOk ꞌũgmũꞌãte hãmꞌãktux max, pa ꞌõg hãpxop putup? ꞌÃmhok. ꞌAk mũꞌãtep-tupꞌah ꞌõg tayũmak. Topa teꞌ yũmmũg.
\v 6 ꞌAk ꞌũgmũꞌãtep-tupꞌah, puyĩy tikmũꞌũn ꞌũgmũg ꞌãktux max. ꞌAgmũꞌãte ꞌõg hãmꞌãktux max xak ꞌohnãg, xix tikmũꞌũn nõy yõg kamah.
\v 7 ꞌŨmax, pu Kunnix yõg mõꞌpok xop tikmũꞌũn yõg hãpxop xak, pak mũꞌãte nõm hã xak ꞌohnãg, ꞌaꞌ xatꞌax xop putukꞌah, pak mũꞌãte xaꞌ hãpxop popmãhãꞌ, yã ꞌũn tek-tok puꞌ popmãꞌax putuk.
\v 8 ꞌŨgmũꞌãte ꞌãxop putup pax, hu xa Topa yõg hãmꞌãpak maxꞌax ꞌãktux, xix ꞌãxop pu yãy mũn popmãhã, yãg mũꞌãte ꞌãxop kaꞌogãhãꞌ.
\v 9 Hamũn, ꞌũkxape xop, xateꞌ yũmmũg. Hõmãg mũg tihi ꞌãxop kopah, tuk mũꞌãte hãpxopmã max punethok. Mãyõn mõg tox hãg mũg hãm, xix ꞌãmnĩy hã, nũy pop hok ꞌõg hãpxop xix ꞌõg tayũmak, tuk mũꞌãte xa Topa yõg hãmꞌãpak maxꞌax ꞌãktux.
\p
\v 10 ꞌÃxop teꞌ pẽnãhãꞌ, xix Topa teꞌ pẽnãhãꞌ, ꞌũgmũꞌãte hãpxopmãhã max ꞌãxop puꞌ, yã Kunnix kopa kuxa mãm xop puꞌ. Yãg mũꞌãte hãpxopmã max xeꞌẽgnãg, xix hãpxopmã yok. ꞌAꞌ hãpxopmã kummuk ꞌũm mĩyꞌah.
\v 11 ꞌŨgmũꞌãte ꞌãxop xohix hãg teheꞌ, yã ꞌãtak te yãy kutok hãꞌ tehe putuk. ꞌÃxop teꞌ yũmmũg.
\v 12 ꞌŨgmũꞌãte ꞌãxop xapit, tu ꞌãxop kuxa hittupmãhãꞌ, tu ꞌãxop xapit, xayĩy hãpxopmã max. Topa te nõm putup pax. Topa te ꞌãxop yĩmõgatux, xayĩy Topa yõg tikmũꞌũn xop mõkukox, xayĩy Topa max xeꞌẽgnãg pẽnãꞌ.
\p
\v 13 Hõmãg mũꞌãte xaꞌ Topa yõg hãmꞌãpak maxꞌax ꞌãktux, ha ꞌãxop teꞌ xupak, tu ꞌãyĩpkox pip. Xateꞌ peꞌpaxex, yã Topa yõg hãmꞌãktux, ꞌaꞌ tikmũꞌũn yõgꞌah. Hamũn, Topa yõg. Topa te hãpxopmã max ꞌãxop kopah, yãꞌ kuxa mãm kaꞌok xop kopah, ha mõktuk mũg hittup, tu Topa pu hãmꞌãktux, hu: “ꞌÃmax. ꞌÃmax nõm tikmũꞌũn puꞌ.” Kaxĩy.
\v 14 ꞌŨkxape xop, hõmã Yoneo xop te Yeyox Kunnix yõg tikmũꞌũn xop xohik-teꞌex kummuk hãpxexka Yonex tuꞌ, xix ꞌãxape xop te ꞌãxop kuteꞌex kummuk kamah, yãꞌ nõy putuk.
\v 15 Hõmã Yoneo xop te yũmũg xuxyã Yeyox putex, tu Topa pupi hãmꞌãktux xop kix, haꞌ xakix, tu ta hõnhã yũmũg kuteꞌex kummuk kamah. Topa te nõm xop putupꞌah. Nõm te tikmũꞌũn xohik-teꞌex kummuk.
\v 16 Hamũn, ꞌũgmũꞌãte Yoneo xop kũnãpa pip xop pu Topa yõg hãmꞌãpak maxꞌax ꞌãktux. Yã Topa yõg hãmꞌãpak maxꞌax te tikmũꞌũn kuxa mãmmãhã Topa kopah, ha Topa te tikmũꞌũn kuxa kummuk xit, nũy kuxa max mõꞌtat, ꞌũyãnãn tuꞌ. Ha ta Yoneo xop tep-tup, nũy nõm hã hãmꞌãktux kuxyãꞌ. Hã kaxĩy Yoneo xop te hãpkummuk mĩy xexkaꞌ, haꞌ gãy Topah, tu nõm kopit, nũy yõg kummuk hã yãnãn.
\s ꞌŨgmũꞌãte ꞌãxop xak
\p
\v 17 ꞌŨkxape xop, hõmã yũmũg yãy xatat hãpxip kutõgnãg hã. Yũmũg yãy xatat, pak mũꞌãte ꞌãxop pekpaxex punethok, tu ꞌãxop xak nãm, tu ꞌã hak mũg mõg putup pax.
\v 18 ꞌŨgmũꞌãte ꞌã hak mõg putup pax. ꞌŨgmũn Paot, ꞌã hak mõg putup punethok, pa Hãmgãyãgnãg tek kummugãꞌ, hak mõg ꞌohnãg.
\v 19 Yã hamũn, yũmũg xuxyã Yeyox te putpuꞌ nũn putup, ꞌĩhã ꞌãxop pip putup Yeyox keppah, tu ta ꞌãte hãpxop max hip putup, ha ꞌãxop tuk mũg kuxa hittup putup, tuk mũꞌãte ꞌãxop ꞌãktux xexkap-tup, yã xutꞌax ꞌãktux putup. Yã mõꞌtatꞌax ꞌãktux putup.
\v 20 Hamũn, ꞌũgmũꞌãte ꞌãxop pekpaxex punethok, tu ꞌãxop tuk mũg kuxa hittup.
\c 3
\p
\v 1 Hõmã yũmũg yãy xatat, hak mũꞌãte ꞌãxop xak. ꞌÃte yãy xatat hã tot ꞌohnãg, huk nox xip kõmẽn ꞌAtẽn tuꞌ,
\v 2 nũy ꞌã ha mõꞌkutnãhã Tĩmõn, yãg taknõy, yã Topa puꞌ hãpxopmã max ꞌũgmũtik, nũy Kunnix yõg hãmꞌãpak maxꞌax ꞌãktux. ꞌÃte ꞌã ha nõ mõꞌkutnãhãꞌ, pu ꞌãxop mũtik tu hãpxopmã max, xayĩy ꞌãkuxa mãm kaꞌok nõy nã mõg,
\v 3 xayĩy ꞌãxop xe hãpkummuk mĩy hok, tikmũꞌũn te ꞌãxop kuteꞌex kummuk hah. Yã hamũn, xateꞌ yũmmũg, Topa tep-tup, pu tikmũꞌũn yũmũg kuteꞌex kummuk.
\v 4 Hõmãg mũg tihi ꞌãxop kopah, tu ꞌãxop mũtik hãmꞌãktux, hu: “Nõm tek mũꞌãk-teꞌex kummuk putup.” Kaxĩy. Yã hãpxip ꞌĩhã tikmũꞌũn tek mũꞌãk-teꞌex kummuk. Hamũn.
\v 5 ꞌÃteꞌ hipꞌax hãꞌ tot ꞌohnãg, hu ꞌã ha mõꞌkutnãhã Tĩmõn, pu ꞌãkuxa mãm yũmmũg. ꞌOk Hãmgãyãgnãg te ꞌãmõgãhãꞌ? ꞌOk ꞌũgmũ yõg hãpxopmãꞌax koxyõy? ꞌÃteꞌ yũmmũg putup.
\p
\v 6 Ha taꞌ mõg, Tĩmõn, tu putpuꞌ nũn, tu hãmꞌãktux, ꞌãkuxa mãm kaꞌok Topa kopah, tu ꞌãxop te yãy putup pax, xix Topap-tup pax. Tĩmõn te hãmꞌãktux, ꞌãxop tek mũꞌã hãmꞌãktux max, tu xatek mũg pẽnãp-tup pax. Hamũn, ꞌũgmũꞌãte ꞌãxop pẽnãp-tup pax kamah.
\v 7 ꞌŨgmũg xũy, yã nõm tek mũg kuteꞌex kummuk, pak mũꞌãte ꞌãxop yõg hãpxopmãꞌax ꞌãpak, huk kuxa hittup. ꞌŨkxape xop, ꞌũgmũꞌãte ꞌãkuxa mãm kaꞌok ꞌãpak, tuk mũg kuxa hittup.
\v 8 Topa yõg putat max hã ꞌãxop mõg kuma mõg, kopxik kuxa hittup.
\v 9 ꞌŨgmũꞌãte Topa pu hãmꞌãktux, hu: “ꞌÃmax, timũꞌũn puꞌ. Tikmũꞌũn max, kopxik mũg kuxa hittup. ꞌÃmax. Puxiꞌ.” Kaxĩy.
\v 10 Hãptup kopxix Topa pu hãmꞌãktux xexka xix ꞌãmnĩy, tu hãmꞌãktux, hu: “ꞌÃpu ꞌũgmũg xat, ꞌũgmũg mõg tikmũꞌũn hah.” Kaxĩy. Hamũn, ꞌãxop hak mũg mõg putup, nũy ꞌãxop pu hãmyũmmũgã xate nõm yũmmũg ꞌohnãg Topa yõg putat max yõg hãpxop.
\p
\v 11 ꞌŨgmũꞌãtep-tup, pu yũmũg ꞌÃtak Topa ꞌãxop tuk mũg mõꞌpok, xix yũmũg xuxyã Yeyox ꞌãxop tuk mũg mõꞌpok.
\v 12 ꞌŨgmũꞌãtep-tup, xayĩy ꞌãxop yãy putup pax nõy nã mõg, xix ꞌãxop tikmũꞌũn xohix putup pax nõy nã mõg, ha mõktu ꞌãxop tek mũg putuk, yãg mũꞌãte ꞌãxop putup pax.
\v 13 Ha mõktu Topa te ꞌãxop kaꞌogãp-tup, ha ꞌãxop maxp-tup, tu ꞌãxop max xeꞌẽgnãg yũmũg ꞌÃtak Topa keppah, ꞌĩhã yũmũg xuxyã Yeyox te putpuꞌ nũn putup ꞌũyãy yõg xop mũtik.
\c 4
\s Hãpxopmãꞌax max, Topa te nõm putup
\p
\v 1 ꞌŨgmũꞌãte xe hãmꞌãktux. Hãg mũꞌãte xaꞌ yũmmũgãhã hãpxopmã max, Topa te nõm putup, ha ꞌãxop te hãpxopmã max. ꞌÃte xa hãmꞌãktux xix yũmũg xuxyã Yeyox te xa hãmꞌãktux, hu: “ꞌÃpu hãpxopmã max mĩy nõy nã mõg.” Kaxĩy.
\v 2 Yã hamũn, hõmã yũmũg xuxyã Yeyox tek mũg mõꞌpok, ꞌũgmũ ꞌãxop pu hãmyũmmũgãꞌ. Xateꞌ yũmmũg.
\v 3 Topa tep-tup, xayĩy ꞌãxop hãpxopmã kummuk kux, nũy ta Topa putuk. Topa tep-tup xayĩy ꞌãnõy hã xupxet hok.
\v 4 ꞌŨmax, pu tik yãy pu xetut xax, nũy nõm mũy, tu hãpkummuk mĩy ꞌohnãg. Tikmũꞌũn max te nõm putup.
\v 5 ꞌŨkummuk, pu tik yãy putupꞌax kummuk hã xetut xax, yã puknõg xop putuk, yã nõm te Topa yũmmũg ꞌohnãg xop putuk.
\v 6 ꞌŨkummuk, pu tik yãy taknõy kuteꞌex kummuk, nũy yãy puꞌ xetut xax. Hõmãg mũꞌãte xaꞌ hãmꞌãktux, hu: “Pa ꞌãtix, yũmũg xuxyã Yeyox te nõm kummuk yãnãn putup.” Kaxĩy.
\v 7 Topa te yũmũg xat, ꞌũyĩy yũmũ nõy hã xupxet hok. Pa Topa te yũmũg xat, yũmũg hãpxopmã kummuk kux, nũy ta Topa putuk.
\v 8 Tep te nũ hãmyũmmũgãꞌax ꞌãpak ꞌohnãg? ꞌOk tikmũꞌũn yõg hãmyũmmũgꞌax ꞌãpak ꞌohnãg? ꞌÃmhok. Yã Topa yõg. Yã Topa te xaꞌ hõm Topa Koxuk.
\p
\v 9 ꞌOk ꞌãte xa putup paxꞌax kaxꞌãmip-tup, yã Kunnix kopa kuxa mãm xop yõg putup paxꞌax? ꞌÃmhok. ꞌA ꞌãte xa kaxꞌãmip-tupꞌah. Hõmã Topa te xaꞌ yũmmũgãhãꞌ, xayĩy xohix putup pax,
\v 10 ha ꞌãxop tep-tup pax Kunnix kopa kuxa mãm xop xohix hãpxexka Mãxenõn tuꞌ. ꞌÃpu tikmũꞌũn xohixp-tup pax nõy nã mõg.
\v 11 ꞌÃpu hãmyĩmtuk, nũy ꞌõg hãpxopmã mĩy, nũy ta ꞌãnõy yõg hãpxopmãꞌax kuteꞌex hok, nũy ta ꞌãhãm, xayĩy ꞌõg tayũmak piꞌ. Yã hõmã ꞌũgmũꞌãte xa nõm ꞌãktux.
\v 12 Hã kaxĩy nõm xop kuxa mãm ꞌohnãg Yeyox kopa te ꞌãmax peꞌpaxex putup, ha taꞌ nõy te ꞌãxop hãꞌ te ꞌohnãg putup.
\s Yũmũg xuxyã Yeyox te putpuꞌ nũn putup
\p
\v 13 ꞌŨkxape xop, ꞌũgmũꞌãte-tup, xayĩy hãmyũmmũg xakix xop yõg hãpxopmãꞌax, nũy xakix xop hã ꞌãkuxa xũy hok, nũy ꞌãpota xexka hok, nũy xateꞌ putuk hok nõm te hãpxop max hip ꞌohnãg.
\v 14 Yũmũg kuxa kopaꞌ yũmmũg, Yeyox xok xeꞌeꞌ, tu putpuꞌ hiꞌ, tu putpuꞌ nũn putup, ha Topa te Yeyox mũtik xakix xop nũnnãp-tup, yã nõm kuxa mãm kaꞌok Yeyox kopa xop nũnnãp-tup.
\v 15 Topa Xexka te nõm ꞌãktux, hak mũꞌãte nõm ꞌãktux. Yũmũg xuxyã Kunnix te putpuꞌ nũn putup, ꞌĩhã xakix xop putpuꞌ hip-tup, tuꞌ mõg hãmãxap putup Kunnix hah, hak-nãy tu hi xop mõg putup Kunnix hah.
\v 16 Pexkox yõg nũꞌpok xop yõg xatꞌax teꞌ xat kaꞌok putup, haꞌ nõy te Topa yõg mĩxux xop tut kaxyãp-tup, ꞌĩhã yumũ xuxyã Kunnix mũn te pexkox tuꞌ yĩxop-tup! Ha ta putpuꞌ hip-tup xakix xop, nõm kuxa mãm kaꞌok Kunnix kopah.
\v 17 Hag-nãy tu nõmhã hi xop mõgãp-tup pepix kamah, tu mõktuꞌ xohix yãy tu nũꞌ nãp-tup hãmgõy xexka kopah, nũy yũmũg xuxyã Kunnix mũtik mõg. Hã kaxĩy nõm te Yeyox mũtik tip-tup, tu xeꞌ yãy xatat putupꞌah.
\v 18 ꞌÃpu tikmũꞌũn kuxa hittupmã nũ hãmꞌãktux hã.
\c 5
\s ꞌÃpu Yeyox te putpuꞌ nũnꞌax hip
\p
\v 1 ꞌŨkxape xop, hãm ꞌũm hãꞌ xipꞌax nõm hãpxop? Mõꞌãgmũꞌax ꞌũm? ꞌÃmnĩy ꞌũm? Putep putuk putup hãpxop xohix, ꞌĩhã putpuꞌ nũn putup Yeyox? Hãm ꞌũm hãꞌ? ꞌÃteꞌ yũmmũgꞌah, huꞌ kaxꞌãmip-tupꞌah.
\v 2 Yũmũg xuxyã Yeyox yõg hãptup xupep putup, ha Yeyox te putpuꞌ nũn putup, yã xupxetꞌax xupep putuk, ꞌĩhã tikmũꞌũn te nõm hip ꞌohnãg. ꞌÃxop teꞌ yũmmũg.
\v 3 Tikmũꞌũn te hãmꞌãktux putup, hu: “Yãmyĩptuk nũnte. ꞌAꞌ hãm xũy ꞌũm pipꞌah. Yãꞌ max hãpxop xohix.” Kaxĩy. Pa hãpxip ꞌohnãg ꞌĩhã hãm xũy pip mõꞌkaꞌok, tu xohix koxyõy, yã ꞌũn tek-tok put xũy putuk, yãꞌ xupep mõꞌkaꞌok. ꞌAp nũpap-tupꞌah tikmũꞌũn.
\v 4 Pa ꞌãkuxa kopa hãpkoxtap ꞌohnãg, hu Yeyox yõg hãptup hip, yã Yeyox te putpuꞌ nũn hip, yã ꞌap xupxetꞌax xupepꞌax putukꞌah xaꞌ.
\v 5 ꞌÃxop xohix yã kuyãnãm yõg tikmũꞌũn, yã hãptup yõg yã ꞌãkuxa tup. Yũmũg mũn ꞌa ꞌãmnĩy yõgꞌah, ꞌa hãpkoxtap yõgꞌah, pa hãmyũmmũg.
\v 6 ꞌÃpu mõ yũmũ yõn hok, yã ꞌap nõy putukꞌah. ꞌÃpu yũmũ pa kaꞌok, nũy hãmpẽnãꞌ, nũy Yeyox hip.
\v 7 ꞌÃmnĩy ꞌĩhã mõꞌyõn pax tikmũꞌũn, yã ꞌãmnĩy ꞌĩhã paptux xop paptux. Yãꞌ kuxa mãm ꞌohnãg xop te kaxĩy.
\v 8 Pa ꞌãxop yã hãptup yõg. Pu yũmũg pa kaꞌok, nũy hãmpẽnãꞌ, nũy Yeyox hip. ꞌÃpu yũmũ mõꞌtat kuxa mãm kaꞌokꞌax xix putup paxꞌax. Yã nõm te xonat yõg pipkup hã kep xax putuk. ꞌA hãpxop kummuk te mõꞌnãp-tupꞌah. ꞌÃpu yũmũ mõꞌtat kama Topa yõg hãpxop max hipꞌax. Hamũn, Topa te tikmũꞌũn kuxa kummuk xit, nũy kuxa max mõꞌtat, ꞌũyãnãn tuꞌ. Ta nõm te xonat xop yõg pipkup hã kuxxax putuk. ꞌA hãpxop kummuk te mõꞌnãp-tupꞌah. ꞌÃpu mõꞌtat.
\v 9 Topa te yãy ha yũmũg xãnãhãꞌ, nũy yũmũꞌã tuꞌ gãy hok, pa yũmũg xuxyã Yeyox Kunnix hã yũmũg kuxa kummuk xit, nũy kuxa max mõꞌtat, ꞌũyãnãn tuꞌ.
\v 10 Yeyox te yũmũg pupiꞌ xok, ꞌũyĩy nũ mũtik ꞌãtiꞌ, pe yũmũg pip ꞌĩhã putpuꞌ nũn Kunnix, pe yũmũg xakix, ꞌĩhã putpuꞌ nũn Kunnix.
\v 11 ꞌÃpu yãy mũtik hãmꞌãktux, pu yĩpkutuk tu nõg. ꞌÃpu tikmũꞌũn kuxa hittupmãꞌ. Yã xate nõm mĩy nõmhã. ꞌãpu ꞌãhup hok.
\s ꞌÃpu hãpxopmã te kaxĩy
\p
\v 12 ꞌŨkxape xop, ꞌũgmũꞌãte xaꞌ xak, ꞌãpu hãmꞌax xupax, nõm te hãpxopmã max ꞌãxop kopah. Yã Topa te nõm yĩmõgãtux, puyĩy ꞌãxop mõgãꞌ, puyĩy ꞌãxop pu hãmyũmmũgãꞌ.
\v 13 ꞌÃpu nõm hãmꞌax xupax xexkaꞌ. ꞌÃpu nõm putup pax, tute hãpxopmã max hah. ꞌÃpu yãy kix hok.
\p
\v 14 ꞌŨkxape xop, ꞌũgmũꞌãte xaꞌ xak. ꞌÃpu tuknõgnãg xop pu hãmꞌãktux, pu tu hãm. ꞌÃpu ꞌũyĩpkutuk xop kuxa hittupmãꞌ. ꞌÃpu puꞌuk xop hã ꞌãtehet. ꞌÃpu ꞌũyõg hãpxopmã max hip punethok.
\v 15 ꞌÃpu hãpkummuk mĩyꞌax hã yãnãn hok. Pa ꞌãpu tikmũꞌũn pu hãpxopmã max ꞌãxop. ꞌÃpu hãpxopmã max mõkuma mõg tikmũꞌũn xohix puꞌ. ꞌÃpu yãy pu hãpxopmã max ꞌãxop.
\p
\v 16 ꞌÃpu yã mãyõn mõg tox hã ꞌãkuxa hittup pax xix ꞌãmnĩy tox hã ꞌãkuxa hittup pax.
\v 17 ꞌÃpu Topa pu hãmꞌãktux mõkuma mõg.
\v 18 ꞌÃpu hãpxop xohix ꞌãyĩmap ꞌãktux Topa puꞌ, hu: “Puxiꞌ. ꞌÃmax xohix puꞌ. ꞌÃmax.” Kaxĩy. Hamũn, Topa tep-tup nõm hãpxopmãꞌax ꞌĩhã ꞌãxop mõg Yeyox Kunnix mũtik.
\p
\v 19 Yã Topa Koxuk yõg hãpxopmãꞌax kuxyã hok.
\v 20 Hãmpeꞌãpaxeh hok: “Yãꞌ kummuk, Topa pupi hãmꞌãktux xop te hãmꞌãktux,” kaxĩy. Yãꞌ max ꞌũyõg hãmꞌãktux.
\v 21 Pa ꞌãpu hãpxopmãꞌax xohix kopit. ꞌÃpu hãpxop max putyõn hok, xix hãpxopmãꞌax max putyõn hok.
\v 22 ꞌÃpu hãpxop kummuk mĩyꞌax xohix kux.
\p
\v 23 Topa te yũmũꞌãꞌ hõm hãmyĩptukꞌax. ꞌÃtep-tup, pu Topa yãy pu ꞌãxop xohix pop, yã ꞌũyõg xop xeꞌẽgnãg ꞌãxop. ꞌÃtep-tup, pu Topa ꞌãxop pẽnã max, yã ꞌãkoxuk pẽnãꞌ, xix ꞌãkuxa, xix ꞌãyĩn, xayĩy ꞌõg hãpkummuk mĩyꞌax pip putupꞌah, ꞌĩhãꞌ putpuꞌ nũn putup yũmũg xuxyã Yeyox Kunnix.
\v 24 Hamũn, Topa tep-tup nõm hãpxopmãꞌax. Tute ꞌãxop xãnãhãꞌ, tu ꞌãxop tuꞌ xip kaꞌok. Topa tep-tup.
\p
\v 25 ꞌŨkxape xop, ꞌãpu Topa pu ꞌũgmũn ꞌãktux.
\p
\v 26 ꞌÃpu taknõy xohix pu hãmꞌãktux, hu: “ꞌŨgmũꞌãte ꞌãxop xaxok ꞌohnãg.” Kaxĩy. ꞌÃpu xape xop yãy kep hã mũy, yã taknõy max putuk.
\p
\v 27 ꞌÃte xaꞌ xak, ha yũmũg xuxyã Yeyox teꞌ xupak, ꞌãpu nũ tappet mõkupix taknõy xohix puꞌ, xix tukũm xohix puꞌ, yã Kunnix kopa kuxa mãm xop puꞌ.
\p
\v 28 Puyã yũmũg xuxya Yeyox Kunnix xa hãmmaxnãꞌ.
\p Tu ta tuꞌ kux.