\id 2TH  - Maxakalí NT [mbl] (Brazil) -2011 bd
\h 2 TEXANÕN
\toc1 2 Texanõn
\toc2 2 Tessalonicenses (2 Ts)
\mt PAOT TE KÕMẼN TEXANÕN YÕG TIKMŨꞌŨN PU TAPPET KAXꞌÃMI II
\c 1
\p
\v 1 ꞌŨgmũn Paot. ꞌÃteꞌ kaxꞌãmi nũhũꞌ tappet, ꞌãxop puꞌ kaxꞌãmiꞌ, yã Kunnix kopa kuxa mãm xop puꞌ kõmẽn Texanõn tuꞌ, yã yũmũg ꞌÃtak Topa yõg xop puꞌ, xix yũmũg xuxyã Yeyox Kunnix yõg xop puꞌ. Xinax te ꞌãxop peꞌpaxex xix Tĩmõn te kamah.
\p
\v 2 Pu yã Topa xix yũmũg xuxyã Yeyox xa hãmmaxnãꞌ, xayĩy ꞌãkuxa mãm.
\s Yeyox nũn putup, ha Topa te xohix yõg hãpxopmãꞌax kopit putup
\p
\v 3 ꞌÃkuxa mãm nõy nã ꞌãmõg xexkaꞌ, tu ꞌãxop teꞌ xohix putup pax nõy nã ꞌãmõg, yĩy taꞌ max, ꞌũyĩy ꞌũgmũ ꞌãxop ꞌãktux punethok Topa pu, hu: “Yãꞌ max. Puxiꞌ. ꞌÃmax ꞌũkxape xop puꞌ.” Kaxĩy.
\v 4 ꞌŨgmũꞌãte ꞌãxop ꞌãktux max Kunnix kopa kuxa mãm xop xohix puꞌ. Hamũn, ꞌãkuxa mãm kaꞌokꞌax xexkaꞌ, ꞌĩhã tikmũꞌũn te ꞌãxop kummugãhãꞌ, ha xate kummuk xohix hã tot.
\p
\v 5 Tikmũꞌũn te ꞌãxop kummugãhãꞌ, yĩy ta Topa te tikmũꞌũn yõg hãpxopmãꞌax kopit putup, nũy tuꞌ kummugã ꞌũyãnãn tuꞌ. Yãꞌ kopitꞌax yok, ꞌap koheꞌah. ꞌŨxohix te ꞌãxũy pẽnãhãꞌ, huꞌ yũmmũg, Topa te tikmũꞌũn yõg hãpxopmãꞌax kopit putup. Yãꞌ yok. ꞌÃxop te ꞌãxũy hã tot, yãꞌ kummuk hã tot, ha Topa teꞌ yũmmũg. ꞌÃmax, yã Topa Xexka yõg tikmũꞌũn xop pu ꞌãmax. Hamũn, ꞌãxũy, Topa Xexka yõg tikmũꞌũn xop pu ꞌãxũy.
\v 6 Topa te tikmũꞌũn yõg hãpxopmãꞌax kopit putup. Yãꞌ yok, yãꞌ xeꞌeꞌ. Tute kummugã yãnãn putup, yã nõm te ꞌãkummugã hã yãnãn putup,
\v 7 ꞌĩhã yũmũg xuxyã Yeyox te pexkox tuꞌ nũn pexkox yõg nũꞌpok xop mũtik, yã kuxap kopaꞌ nũn putup, tu ꞌãxũy nõãp-tup.
\v 8 Tu kummugã hã yãnãn putup Topa yũmmũg ꞌohnãg xop puꞌ, xix ꞌũyĩpkox ꞌohnãg xop puꞌ. Yã nõm te yũmũg xuxyã Yeyox yõg hãmꞌãpak maxꞌax ꞌãpak ꞌohnãg.
\v 9 Nõm xop xũy putup mõkumaꞌ mõg, hãmyãxatamuk xohix kux ꞌohnãg hã, tu Topa mũtik pip putupꞌah, xix yũmũg xuxyã Yeyox mũtik pip putupꞌah. Nõm te yũmũg xuxyã Yeyox max xeꞌẽgnãg pẽnãp-tupꞌah, xix yũmũg xuxyã Yeyox yõg kaꞌokꞌax yũmmũg putupꞌah,
\v 10 ꞌĩhã nõm hãptup mõꞌnãp-tup, ꞌĩhã putpuꞌ nũn yũmũg xuxyã Yeyox, puyĩy Kunnix kopa kuxa mãm xop te Yeyox ꞌãktux max, tu Yeyox peꞌpaxex max, yãꞌ kuxa mãm kaꞌok xop xohix xexka te kaxĩy. ꞌÃxop kama nũ mũtik pip putup. Hamũn, ꞌãkuxa mãm kaꞌok Topa yõg hãmꞌãpak maxꞌax kopah, ꞌũgmũꞌãte xa nõm ꞌãktux.
\p
\v 11 ꞌŨgmũꞌãte ꞌãxop ꞌãktux punethok Topa pu, xayĩy ꞌãxop ꞌãmax xeꞌe Topa puꞌ. Yã Topa te ꞌãxop yĩmõgatux, xayĩy ꞌãmax xeꞌeꞌ. ꞌŨgmũꞌãte ꞌãxop ꞌãktux Topa pu, xayĩy ꞌãxop hãpxopmã max xohix putup, ꞌãxop te nõm putup. Topa kaꞌok te ꞌãxop hã tuteꞌax. ꞌũgmũꞌãte ꞌãxop ꞌãktux Topa pu, xayĩy ꞌãhãm xohix kux, yã ꞌãkuxa mãm, hu ꞌãhãm kaꞌok.
\v 12 Hã kaxĩy yũmũg xuxyã Yeyox ꞌũmax xeꞌe nõy nãꞌ mõg putup ꞌãkuxa kopah, ha ta ꞌãxop max nõy nã ꞌãmõg putup Yeyox mũtik, ha tikmũꞌũn teꞌ pẽnãp-tup, tu Topa ꞌãktux maxp-tup. ꞌŨmax Topa xix yũmũg xuxyã Yeyox Kunnix, tu xa hok hãpxopmãhãꞌ.
\c 2
\s Tik kummuk xexkaꞌ
\p
\v 1 ꞌÃte yũmũg xuxyã Yeyox Kunnix te putpuꞌ nũnꞌax kaxꞌãmi xix yãy tu nũ yũmũg nãꞌax Kunnix mũtik kaxꞌãmiꞌ.
\v 2 Tik ꞌũm teꞌ koit, hu: “Yãꞌ xip yũmũg xuxyã Kunnix yõg hãptup. Yã putpuꞌ nũn Kunnix tu nũktuꞌ xip.” Kaxĩy. ꞌÃpu ꞌũyõg hãmꞌaktux pa hok. ꞌÃkuxanõg hok. Tep teꞌ nõm ꞌãktux, pe Topa pupi hãmꞌãktux xop, peꞌ nõy te Topa yõg hãmꞌãpak maxꞌax ꞌãktux, peꞌ nõy te hãmꞌãktux, ꞌãte nõm kaxꞌãmiꞌ. ꞌÃmhok. ꞌŨyõg hãmꞌãktux pa hok. Yũmũg xuxyã Kunnix yõg hãptup xipꞌah, paꞌ nũn putup, xix Yeyox xipꞌah nõmhã, paꞌ nũn putup.
\v 3 ꞌÃpuꞌ koitꞌax ꞌãpak hok. Yũmũg xuxyã Kunnix yõg hãptup nũn putup, yã Yeyox te putpuꞌ nũn putup, paꞌ xohix te Topap-tup nõg hãmãxap putup, ha ta nõm tik kummuk xexka xip putup hãmãxap, tu tikmũꞌũn pu yãy mũg putup, yã Hãmgãyãgnãg yõg tihik.
\v 4 Nõm tik kummuk xexka te Topap-tup nõg putup, xix Topa yõg hãpxop xohix putup nõg putup. Tute yãy xexka mĩy putup, tu Topak-tõgnãg ꞌãktux putup. Tu taꞌ mõg putup, tuꞌ yũm putup Topa pet xexka kopah, tu hãmꞌãktux putup, hu: “ꞌŨgmũn, yã Topah.” Kaxĩy.
\p
\v 5 Xateꞌ yũmmũg nõꞌõm. Hõmã ꞌũgxip ꞌãxop kopah, tu nõm ꞌãktux.
\v 6 Hõnhã hãm teꞌ tux hok, puꞌ mĩy hok nõm hãpxop kummuk. Xateꞌ yũmmũg. Hãpxip ꞌĩhã nõm tik kummuk xexka xipꞌax.
\v 7 Hamũn, hõnhã ꞌĩhã hãpxop kummuk mĩyꞌax xexka pip, tuꞌ xaptop, pa hãpxip ꞌĩhã xut putup hãm teꞌ tux hok, haꞌ nõm hãpxop kummuk mĩyꞌax pip putup. ꞌAp xaptop putupꞌah hãpxop kummuk mĩyꞌax.
\v 8 Yã xipꞌax nõm tik kummuk xexkaꞌ, pa yũmũg xuxyã Yeyox te putpuꞌ nũn putup, tup-tex putup, yã xitxut hãp-tex putup, yã Yeyox yõg kuyãnãm hãp-tex putup.
\v 9 Hamũn, Hãmgãyãgnãg te nõm tik kummuk xexka kaꞌogãp-tup, puyĩy hãpxopmã kaꞌok xeꞌẽgnãg xohix. Tuteꞌ koit putup, ha tikmũꞌũn te yõg mõꞌãmãꞌax pap-tup. Yã tikmũꞌũn kuxa mãm tik kummuk yõg hãpxopmãꞌax kaꞌok xeꞌẽgnãg kopah.
\v 10 Nõm tik kummuk xexka te Topa yũmmũg ꞌohnãg xop puꞌ koit xohix xexkap-tup. Nõm te hãmyũmmũg xeꞌe yũmmũg ꞌohnãg, tu hãmyũmmũg xeꞌep-tup pax ꞌohnãg, ha Topa te nõm mõy ꞌohnãg hãpkummuk mĩyꞌax kopah. Nõm te Topa pẽnãp-tupꞌah, pa yãy koxyõy putup.
\v 11 Yĩy ta Topa teꞌ xat putup, pu nõm kuxa mãm kaꞌok koitꞌax kopah.
\v 12 Yĩy ta Topa tep-tup nõg putup nõm kuxa mãm ꞌohnãg hãmyũmmũg xeꞌe kopah. Yã nõm tep-tup pax koitꞌax.
\s Topa te ꞌãxop yĩmõgãtux
\p
\v 13 ꞌŨmax, ꞌũgmũꞌãte ꞌãxop ꞌãktux punethok Topa puꞌ, hu: “ꞌÃmax tikmũꞌũn puꞌ. Puxiꞌ. ꞌÃmax.” Kaxĩy. Hamũn, ꞌũkxape xop, Topa te ꞌãxop putup pax. Topa te ꞌãxop yĩmõgatux tikmũꞌũn xohix kopah. ꞌA hõmãꞌ xipꞌah hãm xexkaꞌ, ꞌĩhã Topa te ꞌãxop yĩmõgatux, nũy ꞌãxop kuxa kummuk xit, nũy kuxa max mõꞌtat, ꞌũyãnãn tuꞌ. Yã Topa Koxuk kaꞌok hã ꞌãxop kuxa kummuk xit, xayĩy ꞌãxop yãyhã Topa yõg tikmũꞌũn, tu ꞌãkuxa mãm hãmꞌãktux xeꞌe kopah.
\v 14 Hõmãg mũꞌãte xa Topa yõg hãmꞌãpak maxꞌax ꞌãktux, ha Topa te nõm hã ꞌãxãnãhãꞌ, xayĩy pẽnã hãpxop xeꞌẽgnãg xohix yũmũg xuxyã Yeyox Kunnix mũtik.
\v 15 ꞌŨkxape xop, ꞌãpu Topa tu nox piꞌ. ꞌÃpu hãmyũmmũg max tu nox piꞌ. Yãg mũꞌãte xaꞌ yũmmũgãhã nõꞌõm. ꞌŨgmũꞌãte xa hãmꞌãktux nõꞌõm, tu xaꞌ kaxꞌãmi nõꞌõm kamah.
\p
\v 16 Yũmũg xuxyã Yeyox Kunnix te yũmũg putup pax xix yũmũg ꞌÃtak Topa teꞌ, tuk mũꞌã hok hãpxopmãhã, tu yũmũg kuxa hittupmãhã mõkumaꞌ mõg haꞌ kux ꞌohnãg tu hãpxop max hipmãhãꞌ.
\v 17 ꞌŨgmũꞌãtep-tup, puyĩy yũmũg xuxyã Yeyox Kunnix ꞌãkuxa hittupmãꞌ xix yũmũg ꞌÃtak ꞌãkuxa hittupmãꞌ, nũy ꞌãxop kaꞌogãꞌ, xayĩy hãpxopmã max, xayĩy hãmꞌãktux max.
\c 3
\s ꞌÃpu Topa puk mũg ꞌãktux
\p
\v 1 ꞌŨkxape xop, ꞌãpu Topa puk mũg ꞌãktux, ꞌũyĩy ꞌũgmũg yũmũg xuxyã Yeyox yõg hãmꞌãpak maxꞌax ꞌãktux hãpxexka xohix tuꞌ mõꞌkaꞌok, puyĩy xohix nõm ꞌãpax, puyĩy xohix putup pax xexka Yeyox yõg hãmꞌãpak maxꞌax, yã ꞌãxop putuk kõmẽn Texanõn tuꞌ. Xate nõm ꞌãpak, tup-tup pax.
\v 2 ꞌÃpu Topa puk mũg ꞌãktux, puyĩy Topa ꞌũgmũꞌã hã tu tehet, ꞌĩhã tikmũꞌũn kummuk tek mũg kuteꞌex kummuk. Hamũn, tikmũꞌũn xohix xexkaꞌah te Topa yõg hãmꞌãpak maxꞌax ꞌãpak. Yãꞌ yĩpkox ꞌohnãg.
\p
\v 3 Pa Topa te yãy yõg xop tuꞌ xip kaꞌok. Tute ꞌãxop kaꞌogãp-tup, tu ꞌãxop hã tu tep-tup, puyĩy Hãmgãyãgnãg ꞌãxop kuteꞌex hok.
\v 4 Yũmũg xuxyã Yeyox tek mũg kuxa mãmmãhã ꞌãxop kopah, yã ꞌãxop teꞌ mĩy nõꞌõm. ꞌŨgmũꞌãte xa hãmꞌãktux, tuꞌ mĩy putup. ꞌŨgmũꞌãteꞌ yũmmũg xeꞌeꞌ.
\p
\v 5 ꞌŨgmũꞌãtep-tup, pu yũmũg xuxyã Yeyox ꞌãxop mõgãꞌ, xayĩy ꞌãxop Topap-tup pax, xayĩy ꞌãxop nox piꞌ Topa yõg putat max kopah, yã Yeyox putuk.
\s Tikmũꞌũn hãm ꞌohnãg, puxiꞌ xit hok
\p
\v 6 Yũmũg xuxyã Yeyox Kunnix tek xat, tuk mũg xex Yeyox xipꞌax kopah, yĩk mũꞌãte ꞌãxop xat, xayĩy ꞌãxop taknõy tuknõgnãg xop tu nox piꞌ hok, nõm hãm ꞌohnãg xop, nõm tek mũ yõg xatꞌax ꞌãpak ꞌohnãg.
\v 7 ꞌŨmax, xayĩy ꞌãxop hãpxopmãꞌ, ꞌũgmũg putuk. Hõmãg mũg pip ꞌãxop kopah, ꞌĩhãg mũg tuknõg ꞌohnãg.
\v 8 ꞌŨgmũꞌãte hok popꞌah tikmũꞌũn yõg hãpxop, pa hãpxop xohix hã pago. Tuk mũꞌãte hãpxopmã max mõkumak mõg. Hãptup ꞌĩhãg mũg hãm pax xix ꞌãmnĩy ꞌĩhã, xayĩy ꞌãxop pago ꞌohnãg.
\v 9 ꞌŨmax, pu Kunnix kopa kuxa mãm xop yõg xexka xop ꞌõg hãpxop pop, pak mũꞌãte ꞌõg hãpxop xak ꞌohnãg, tuꞌ pop ꞌohnãg, xayĩy ꞌãxop ꞌũgmũg pẽnãꞌ, nũy kamaꞌ mĩy ꞌũgmũg putuk.
\v 10 Hõmãg mũg tihiꞌ ãxop kopah, tuk mũꞌãte hãmꞌãktux, hu: “Tikmũꞌũn hãm ꞌohnãg, puxix xit hok, puꞌ max.” Kaxĩy.
\p
\v 11 ꞌŨgmũꞌãte kaxꞌãmi nũhũꞌ, ꞌũgmũꞌãteꞌ xupak tuꞌ, yã tikmũꞌũn tuknõgnãg pax pip ꞌõnte, yã hãpxumãhĩygã pax.
\v 12 Yũmũg xuxyã Yeyox Kunnix teꞌ xat, tuk mũg xex Yeyox xipꞌax kopah, yĩg mũꞌãte ꞌãxop xat, xayĩy ꞌãxop tuknõgnãg pax xop pu hãmꞌãktux: “ꞌÃmaxꞌah. ꞌÃpu ꞌãxumãhĩy hok, nũy hãm hãꞌ pop yãy yõg hãpxop.” Kaxĩy.
\v 13 ꞌŨkxape xop, ꞌãpu ꞌãkuxa tuknõg hok, ꞌĩhã hãpxopmã max.
\v 14 Paꞌ pip ꞌõnte, nõm te nũꞌ tappet putup nõg putup, tu nõm ꞌãpak putupꞌah. ꞌÃpu tik te kaxĩy tu ꞌãti hok, puyĩy yãy yõg hãpkummuk mĩyꞌax hã yãyhãhup.
\v 15 Pa ꞌãpu nõm tik puꞌ mĩy hãpxop, ꞌap puknõg putukꞌah, pa yã ꞌãtaknõy putuk.
\s Pu yã Yeyox ꞌãxop tu xihip kaꞌok
\p
\v 16 ꞌŨgmũꞌãtep-tup, yũmũg xuxyã Yeyox ꞌãkuxa mãmmãꞌ, ꞌĩhã ꞌãkuxa mãm Yeyox kopah, nũy ꞌãkuxa mãm kaꞌok mõkumaꞌ mõg, ꞌĩhã ꞌãxop te hãpxopmã xohix. Pu yã yũmũg xuxyã Yeyox ꞌãxop tu xihip kaꞌok.
\p
\v 17 ꞌÃteꞌ kaxꞌãmi nũhũ, hu: “ꞌŨgmũn Paot te ꞌãxop pu kaxꞌãmiꞌ, hu ꞌãte ꞌãxop peꞌpaxex.” Kaxĩy. ꞌÃte yãy yõg ꞌãxetꞌax kaxꞌãmi hã kaxĩy. Yã yõg tappet xohix te kaxĩy.
\p
\v 18 Pu yã yũmũg xuxyã Yeyox Kunnix ꞌãxop xohix pu hãmmaxnã punethok.
\p Tu ta tuꞌ kux.