\id 2TI  - Maxakalí NT [mbl] (Brazil) -2011 bd
\h 2 TIMÕN
\toc1 2 Timõn
\toc2 2 Timóteo (2 Tm)
\mt PAOT TE TĨMÕN PU TAPPET KAXꞌÃMI II
\c 1
\p
\v 1 ꞌŨgmũn Paot. ꞌÃte xaꞌ kaxꞌãmi nũhũꞌ tappet. Topa te mõgkutnãhã ꞌũgmũn, tu Yeyox Kunnix yõg mõkpok xop kopak xix. Yã Topa tep-tup. Tute mõgkutnãhãꞌ, ꞌũyiy hiꞌax kux ꞌohnãg ꞌãktux, yã yũmũ yõg hiꞌax Yeyox Kunnix mũtik hiꞌax kux ꞌohnãg. Yã hõmã Topa te yũmũꞌã hãmꞌãktux xex, nũy yũmũꞌã hiꞌax kux ꞌohnãg hõm, yã yũmũg hi xeꞌẽgnãg mõkumak mõg, haꞌ kux ꞌohnãg.
\v 2 ꞌÃte xaꞌ kaxꞌãmiꞌ, yã Tĩmõn puꞌ. ꞌÃmũn ꞌũgkutok pit putuk Topa yõg putat kopah. Pu yã Topa xix yũmũg xuxyã Yeyox Kunnix xa hãmmaxnãꞌ, nũy ꞌãkuxa kaꞌ, xayĩy ꞌãkuxa mãm.
\s ꞌÃpu nõ hãpxop max pẽnã max
\p
\v 3 ꞌÃte Topa pu hãmꞌãktux, hu: “ꞌÃmax, puxiꞌ. ꞌŨmax hãpxop xohix.” Kaxĩy. ꞌÃte Topa pu hãpxopmã max, tuk kuxa max, yãg xape xop hittap putuk. ꞌÃte ꞌãxutigãhãꞌ, yã Topa pu hãmꞌãktux ꞌãmnĩy ꞌĩhã xix hãptup ꞌĩhãꞌ, yã Topa pu hãmꞌãktux, hu: “ꞌÃmax. Puxiꞌ.” Kaxĩy. Tu Topa pu ꞌãmũn ꞌãktux.
\v 4 Hõmã ꞌãpotahaꞌ, ha ꞌãte ꞌãpota xutigãhãꞌ, tup-tup xexkaꞌ, nũy yãy tu ꞌãmõxãn, nũy ꞌũgkuxa hittupmãꞌ.
\v 5 ꞌÃkuxa yũm kaꞌok Topa kopah, ha ꞌãte ꞌãkuxa yũm kaꞌok xeꞌe pekpaxex, yã ꞌãxukux Nox kuxa yũm kaꞌok putuk, xix ꞌãtut ꞌẼnnĩy putuk. ꞌÃteꞌ yũmmũg, ꞌũkuxa mãm, yã ꞌãmũn putuk.
\v 6 ꞌÃkuxa yũm. ꞌÃpu hãpxopmã xeꞌẽgnãg. Hõmã Topa te ꞌãkaꞌogãhãꞌ, xayĩy Topa pu hãpxopmã max, ꞌĩhã ꞌãte ꞌãyĩmũg yãy yĩm xex. ꞌÃpu hãpxopmã punethok nõꞌõm.
\v 7 Hamũn. Topa te yũmũꞌã Topa Koxuk hõm. ꞌOk Topa Koxuk te yũmũg puꞌugãhã xix yĩpkutugãhãꞌ? ꞌÃmhok. Topa Koxuk te yũmũg kaꞌogãhãꞌ, ꞌũyĩy xohix putup pax, tu yũmũꞌãte yãy yõg hãpkummuk mĩyꞌax mõꞌnĩy.
\p
\v 8 ꞌÃpu yũmũg xuxyã Yeyox Kunnix ꞌãktux, nũy Yeyox hã yãyhãhup hok xik-mũn hã yãyhãhup hok kamah, ꞌũgmũn yã Topa yõg kãmãnat. ꞌÃpu hãpkummuk hã tot, nũy tikmũꞌũn pu Yeyox ꞌãktux, ha Topa te ꞌãkaꞌogãp-tup.
\v 9 Topa te yũmũg kuxa kummuk xit, nũy kuxa max mõꞌtat, ꞌũyãnãn tuꞌ, ha yũmũꞌãte yãyhã Topa yõg tikmũꞌũn. ꞌOk yũmũꞌãte hãpxopmã max, yĩy Topa te yũmũg kuxa kummuk tupmãhãꞌ, puyĩy kuxa tuꞌ max? ꞌÃmhok. Pa Topa tep-tup, yã ꞌũhok mĩy putup, hu yũmũg kuxa kummuk xit. Hõmãꞌ xipꞌah hãm xexkaꞌ, ꞌĩhã Topa te yũmũꞌã nõ hãpxop hok hõm, yã yũmũꞌã Yeyox Kunnix hok hõm, haꞌ pip hãpxop max yũmũ yõg Yeyox mũtik.
\v 10 Ha taꞌ nũn Yeyox Kunnix. Ha ta hõnhãꞌ pip nõm hãpxop max yũmũ yõg Yeyox mũtik. Yeyox Kunnix te yũmũg kuxa kummuk xit. Yeyox te xakixꞌax nõãꞌ, tu tikmũꞌũn pu hãmꞌãpak max ꞌãktux, yã tikmũꞌũn pu hiꞌax kux ꞌohnãg hõm putup.
\p
\v 11 Topa te mõgkutnãhã ꞌũgmũn, ꞌũyĩy hãmꞌãpak max ꞌãktux, ꞌũyĩy tikmũꞌũn pu hãmyũmmũgãꞌ.
\v 12 ꞌÃte hãmꞌãpak max ꞌãktux, yĩy taꞌ nõy tek kutex kummuk, yĩk xũy nũnteh. Pa yã ꞌãte yãyhãhupꞌah. ꞌÃte Topa yũmmũg, tuk kuxa yũm Topa kopah. ꞌÃte Topa pu popmãhã hãpxop xohix, ha tute nõ hãpxop pẽnãp-tup nõm hãptup ꞌĩhã. Yã hãptup mõꞌnãp-tup, ha Topa te tikmũꞌũn yõg hãpxopmãꞌax kopit putup, ꞌok pe max, ꞌok pe kummuk. ꞌÃteꞌ yũmmũg.
\p
\v 13 Hõmã ꞌãte xaꞌ yũmmũgãhã hãpxopmã xohix xeꞌeꞌ. ꞌÃpu, nõ kopa ꞌãkuxa yũm mõkuma mõg. ꞌÃpu tikmũꞌũn putup pax mõkuma mõg. Yãꞌ pop nõ hãpxop yũmũ yõg Yeyox Kunnix mũtik.
\v 14 Yã xaꞌ popmãhã hãpxop max xohix. Topa Koxuk xip yũmũg kopah. ꞌÃpu nõ hãpxop max pẽnãꞌ, ꞌĩhã Topa Koxuk te xa hã tu teheꞌ.
\v 15 Xateꞌ yũmmũg, hãpxexka ꞌAx yõg tikmũꞌũn xohix tek nĩm, xix Piy xix ꞌEhmõg tek nĩm kamah.
\v 16 Puyã Topa ꞌÕnẽxip xuxyã xop kuxa kaꞌ, nũy nõm pu hãpxopmã max. Hamũn, ꞌÕnẽxip tek kuxa hittupmãhã punethok. ꞌŨkxip kanet kaꞌok kopah, pa ꞌÕnẽxip te ꞌã tu yãyhãhup ꞌohnãg.
\v 17 ꞌŨnũn tu nũktu kõmẽn Hõm tuꞌ xupep tuk xak, tuk xak, tu nũktuk xipihiꞌ.
\v 18 Pu yã Topa ꞌÕnẽxip kuxa kaꞌ nõ hãptup ꞌĩhã Kunnix te putpuꞌ nũn. Yã ꞌÕnẽxip te ꞌũgmũg hã tu teheꞌ punethok kõmẽn ꞌEp tuꞌ. Xateꞌ yũmmũg.
\c 2
\s Xonat max putuk Yeyox Kunnix yõg
\p
\v 1 Xõnnẽ, ꞌãkuxa yũm Yeyox Kunnix kopah, tu nũmũtik ꞌãxip. Tute xa hok hãpxopmãhãꞌ. ꞌŨmax, pu Yeyox ꞌãkaꞌogãꞌ.
\v 2 Xate yõg hãmꞌãktux ꞌãpak tikmũꞌũn xohix mũtik. ꞌÃpu tik max xop puꞌ yũmmũgã nõm hãmꞌãktux, puyĩy nõm hã tikmũꞌũn xohix puꞌ yũmmũgãꞌ.
\p
\v 3 ꞌÃpu kummuk hã tot, Yeyox Kunnix yõg xonat max putuk.
\v 4 Xonat max te hãpxopmãꞌ puyĩy ꞌũyõg kapitãm tu hittup. Xonat max te hãpxopmã te xonat xop kũnãpa xop hãpxopmã putuk ꞌohnãg.
\v 5 Ha ta mõꞌmotyõn yũmmũg xop te pẽnãꞌax ꞌãpak ꞌohnãg, puxix mũn xut ꞌohnãg.
\v 6 Ha ta tik ꞌũm te hãm xa kaꞌok, puxix hãpxop xohix yĩkũy.
\v 7 ꞌÃpu yõg hãmꞌãktux peꞌãpaxeh, ha ta yũmũg xuxyã Yeyox Kunnix te xaꞌ yũmmũgãp-tup hãpxop xohix.
\p
\v 8 ꞌÃpu Yeyox Kunnix peꞌãpaxeh, yã Namix hã mõkputox, yãꞌ xok tãmnãg, pa yã putpuꞌ hiꞌ. ꞌÃte nõm hãmꞌãpak max ꞌãktux.
\v 9 Yã ꞌãte Yeyox yõg hãmꞌãpak max ꞌãktux, yĩy ta tikmũꞌũn te kanet kaꞌok kopak xix, tuk yĩm kĩy xik kup kĩy pipkup mãkxap hã, yã xupxet putuk, peꞌ nõy kix xop putuk. Pa tikmũꞌũn te Yeyox yõg hãmꞌãpak maxꞌax hĩy ꞌohnãg pipkup mãkxap hã.
\v 10 ꞌÃteꞌ kummuk xohix hã tot Kunnix kopa kuxa mãm xop puꞌ, yã Topa te nõm yĩmõgãtux, puyĩy nõ kuxa mãm Yeyox Kunnix kopah, puyĩy Topa nõ kuxa kummuk xit, puyĩy pẽnã hãpxop xohix max xeꞌẽnãg hãmyãxatamuk xohix kux ꞌohnãg hã.
\p
\v 11 Hãmꞌãktux xeꞌe hu:
\q “Yũmũg xakix Kunnix mũtik, kopxix ti Yeyox mũtik.
\q
\v 12 Yũmũꞌãte kummugã hã tot Kunnix mũtik, kopxix yũmũg tikmũꞌũn xat putup Kunnix mũtik.
\q Paxpu yũmũꞌãte nõy puꞌ xuktux Kunnix yũmmũg ꞌohnãg, ha ta Kunnix teꞌ xuktux putup yũmũg yũmmũg ꞌohnãg.
\q
\v 13 Paxpu yũmũꞌãte Kunnix tu pip kaꞌok ꞌohnãg, puxix Yeyox yũmũg tuꞌ xip kaꞌok. Yã Kunnix te kaxĩy, tu hãpxop nõy mĩyꞌah.”
\q Kaxĩy.
\s Kãmãnat max
\p
\v 14 ꞌÃpu tikmũꞌũn yũmmũgã nũhũꞌ. ꞌÃpu tikmũꞌũn yũmmũgã Topa keppa hã kaxĩy, hu: “Pa ꞌãtix. Yãy mãnõg hok. Yãy kix hok.” Kaxĩy. Hamũn, ꞌũyãy mãnõg, puxix hãpkummugãꞌ, yãꞌ xupak xop koxyõy.
\v 15 ꞌÃpu hãpxopmã max, puyĩy Topa ꞌõg hãpxopmãꞌax putup pax xayĩy ꞌõg hãpxopmãꞌax hã yãyhãhup hok. ꞌÃpu Topa hãmꞌãpak max yũmmũgã max.
\v 16 ꞌÃpu hãmꞌãktux hitop ꞌãpak hok, ꞌap Topa yõg hãmꞌãktuxꞌah. Nõm hãmꞌãktux hitop te tikmũꞌũn papuk, pu Topa nãpa mõg.
\v 17 Kayax te yĩn mãhãꞌ. Hã kãxĩy nõm hãmꞌãktux te hãpkummugãhãꞌ, yã hãmꞌãktux te ꞌĨmẽnẽm yõg hãmãktux putuk, xix Pinet yõg putuk.
\v 18 Nõm te Topa yõg putat max xak, nũy Kunnix kopa kuxa mãm xop kuxa mãmꞌax koxyõy. Nõm teꞌ yũmmũgãhã, hu: “Hõmã xakix xop yĩn putpuꞌ hiꞌ.” Kaxĩy. Pa yãꞌ koit. ꞌŨputpuꞌ hiꞌah hõmã, paꞌ putpuꞌ hip-tup.
\v 19 Pa Topa ꞌũkaꞌok, xix Topa yõg tikmũꞌũn ꞌũkaꞌok, yã mĩptut mĩm mãykup kaꞌok putuk, ha Topa te nõ mĩm mãykup yĩmũ kaxꞌãmi hu: “Topa te yãy yõg tikmũꞌũn yũmmũg.” Kaxĩy. Tu xe: “Kunnix kopa kuxa mãm xop, ꞌãpu hãmkummuk mĩyꞌax nĩm!” Kaxĩy.
\p
\v 20 Mĩptut max xexka kopaꞌ pip kãnãypetxax max xix kanenãm max. Yãꞌ pipkup yãnãm ꞌãtã yĩxux hãꞌ mĩy xix yãnãm ponnok hãꞌ mĩy. Yã ꞌãmuk xexka puꞌ max. Ha taꞌ pip kama nõm nõy kummuk, yã mĩm hãꞌ mĩy xix putõy hãꞌ mĩy. Yã ꞌãmuk puꞌ.
\v 21 Tikmũꞌũn te hãpkummuk mĩyꞌax xohix kux, puxix kãnẽypetxax max putuk xix kanenãm max putuk. Topa te nõm hã hãpxopmã max, yã Topa xexka yõg tikmũꞌũn, yãꞌ max Topa puꞌ, yãꞌ max mõkumaꞌ mõg hãpxopmã max xohix puꞌ.
\v 22 ꞌÃpu tuktup xop yõg hãpkummuk mĩyꞌax kux. ꞌÃpu hãpxopmã yok, nũy ꞌãkuxa mãm kaꞌok, nũy xohix putup pax, nũy yãy kix hok. ꞌÃpu nõm mĩy ꞌũkuxa tup xop mũtik, yã Topa tuꞌ kax xop mũtik.
\v 23 Tikmũꞌũn te hãmꞌãktux hitop, tu hãmyũmmũg ꞌohnãg. Hãpxopmã hã kaxĩy hok ꞌãmũn. Hãpxip ꞌĩhã tikmũꞌũn te yãy mãnõg xexkap-tup, tu yãy kix-tup.
\v 24 Pa Topa yõg kãmãnat te kaxĩyꞌah, yã yãy mãnõgꞌah, paꞌ xohix puꞌ max, tuꞌ nõy pu hãmyũmmũgã max, tuꞌ nõy yõg hãpkummuk mĩyꞌax hãꞌ tot.
\v 25 tuꞌ nõy yõg hãpkummuk koheꞌ mĩyꞌax yoaꞌ, ꞌĩhãꞌ gãy ꞌohnãg, yĩy ta Topa tep-tup nũy kuxa max popmãꞌ. Topa tep-tup, pu tikmũꞌũn yãyhãhup, nũy hãpkummuk mĩyꞌax kux, nũy hãmyok yũmmũg,
\v 26 tu Hãmgãyãgnãg yõg pamãg putuk kopa mõxahaꞌ. Hamũn, hõmã Hãmgãyãgnãg te nõm mũg, tu nõm xat pax, yã pãmãg putuk.
\c 3
\s Hãm xexka yõg hãmyãxatamuk xohix xox putox
\p
\v 1 Hãmyũmmũg nũhũꞌ. Hãm xexka yõg hãmyãxatamuk xohix xox putox ꞌĩhã tikmũꞌũn pu hãpkummugãp-tup.
\v 2 Hamũn. Tikmũꞌũn te yãy putup pax putup, tu tayũmak putup, tu yãy xexka peꞌpaxex putup, tu xuxetꞌax kummuk ꞌãktux putup, ꞌap ꞌãtak ꞌãpak putupꞌah, xixꞌ tut ꞌãpak putupꞌah, tuꞌ xuktux putupꞌah hu: “Puxiꞌ. Topa, ꞌãmax.” Kaxĩy. Tu Topa putuk ꞌohnãg putup,
\v 3 tuꞌ nõy putup nõg putup, ꞌaꞌ yãy kix kux putupꞌah, tuꞌ nõy kupex putup, tu yãy yõg hãpkummuk mĩyꞌax putup xũy kuxyãp-tupꞌah, tuꞌ gãy putup, tu hãpxopmã max putup nõg putup,
\v 4 tuꞌ gãy xop mõgãp-tup, puyĩy yãy xape xũygãꞌ, tuꞌ pa te hãmyũmmũg ꞌohnãg putup, tu yãy xexka peꞌpaxex putup, tuꞌ yãy pu hãpxop max xohix xak putup, pa Topa xak ꞌohnãg,
\v 5 tu Kunnix kopa kuxa mãm xop putuk putup, pa yã ꞌap-tupꞌah, puyĩy Topa hãpxopmã max nõm kopah, yãꞌ kuxa kopah. ꞌÃpu nõm tikmũꞌũn pe mõg hok.
\v 6 Nõm tikmũꞌũn kopaꞌ pip nõm teꞌ nõy yõg xuxyã xop hã mõꞌxahaꞌ, kokex putuk, tu ꞌũn mõgãhãꞌ, ha ꞌũn teꞌ peꞌ mõg, yã ꞌũn te hãmyok yũmmũg kutõgnãg, tuꞌ koit ꞌãpak pax, tu hãpxop kummuk mĩy pax, ꞌũp-tup pax hãpxop kummuk, tuꞌ peꞌ mõg.
\v 7 Tu tikmũꞌũn xohix yõg hãmyũmmũg ꞌãpak, pa hãmyũmmũg xeꞌeꞌ ohnãg.
\v 8 Hamũn, Yãn xix Yãm putuk. Hõmã nõm te Mõyyex putup nõg. Hã kaxĩy kama hõnhã nõm te hãmyũmmũg xeꞌep-tup nõg. Yã ꞌũp-tox kummuk, tuꞌ yõg putahat ꞌap Topa yõg putat xeꞌeꞌah.
\v 9 Pa yã hãptox haꞌ mõg putupꞌah. Hãpxip ꞌĩhã tikmũꞌũn xohix teꞌ yũmmũg putup, nõm yõg hãmyũmmũg ꞌap xeꞌeꞌah. Hamũn, Yãn xix Yãm putuk.
\s ꞌÃpu hãmyũmmũg max
\p
\v 10 Pa xate yõg hãmyũmmũg ꞌãpak, tu yõg hãpxopmãꞌax pẽnãhãꞌ, tuꞌ yũmmũg yõg putahat, nõm ꞌãtep-tup, tuꞌ kuxa yũmꞌax yũmmũg. ꞌÃte nõm hãpxopmã kuxꞌah, ha xateꞌ pẽnãhãꞌ. ꞌÃte xohix putup pax, ha xateꞌ yũmmũg. ꞌÃte Topa yõg putat xak ꞌohnãg, ha xateꞌ yũmmũg.
\v 11 Tikmũꞌũn tek kuteꞌex kummuk kõmẽn ꞌÃtikit tuꞌ xix kõmẽn ꞌIkõn tuꞌ xix kõmẽn Nixtat tuꞌ, yĩk xũy, ha xateꞌ yũmmũg. ꞌÃteꞌ kummuk hã tot, pa Topa teꞌ xũy nõãꞌ, ha tak mõg.
\v 12 Tikmũꞌũn max tep-tup, nũy hãpxopmã max Yeyox Kunnix mũtik, yã Topa putuk, tu nõm xohix xexka teꞌ xũy hã tot putup, yã tikmũꞌũn nõy te nõm xohix xexka kuteꞌex kummuk putup.
\v 13 Yã kummuk xop kummuk nõynãꞌ mõg putup, xix Kunnix kopa kuxa mãm teꞌ koit xop kummuk nõynãꞌ mõg putup. Nõm teꞌ koit, ha tikmũꞌũn kuxa mãm koit kopah, ha nõm kuxa mãm yãy yõg koit kopa kamah.
\v 14 Pa ꞌãmũn kaxĩyꞌah. ꞌÃpu nox xihip hãmyũmmũg kopah, yã xa nõm yũmmũgãhãꞌ. Yã ꞌãkuxa yũm, nõm kopah. Xateꞌ yũmmũg nõm te xaꞌ yũmmũgãhãꞌ.
\v 15 Hõmã ꞌãmũn kakxop xix hõnhã ꞌĩhãꞌ yũmmũg Topa tappet xeꞌeꞌ. Topa tappet te xaꞌ yũmmũgãhãꞌ, Yeyox te ꞌãkuxa kummuk xit, nũy kaxa max mõꞌtat, ꞌũyãnãn tuꞌ, ĩhã ꞌãkuxa yũm Yeyox Kunnix kopah.
\v 16 Topa te kaxꞌãmigãhã hãpxop xohix xexka Topa yõg tappet tuꞌ, yã Topa yõg hãmꞌãktux xohix xexkah. Topa yõg tappet teꞌ yũmmũgã max, tu tikmũꞌũn yõg hãpkummuk mĩyꞌax mãnõg, tu hãpxopmã kohe yoaꞌ, tu hãpxopmã yok yũmmũgãhãꞌ,
\v 17 puyĩy Topa yõg tikmũꞌũn yãyhã tuꞌ kaꞌok, tu hãpxopmã max xohix yũmmũg, nũy hãpxopmã max xohix.
\c 4
\p
\v 1 ꞌÃte xa hãmꞌãktux, ha Topa teꞌ xupak xix Yeyox Kunnix teꞌ. Yeyox Kunnix teꞌ kopit putup tikmũꞌũn xohix xexka yõg hãpxopmãꞌax, yã hi xop yõg hãpxopmãꞌax kopit putup xix xakix xop yõg, tuꞌ max mõꞌpot xixꞌ kummuk, ꞌĩhã putpuꞌ nũn putup Kunnix, yãꞌ xip yũmũg xuxyã Yeyox Kunnix, tuꞌ xat, yãy yõg tikmũꞌũn.
\v 2 ꞌÃte xa hãmꞌãktux, ꞌãpu Topa hãmꞌãpak max ꞌãktux mõkuma mõg ꞌãmnĩy hãꞌ max ꞌĩhã xix ꞌãmnĩy hãꞌ kummuk ꞌĩhã kamah. ꞌÃpu hãpkummuk mĩyꞌax xop puꞌ yũmmũgã putat max. ꞌÃpu tikmũꞌũn tuꞌ kax, puyĩy hãpxopmã max. ꞌÃpu tikmũꞌũn yõg hãpxopmã max hip mõkumaꞌ mõg. ꞌÃpu tikmũꞌũn pu hãmyũmmũgã mõkuma mõg.
\v 3 Hãpxip ꞌĩhã tikmũꞌũn te hãmyũmmũgã xeꞌe ꞌãpak putupꞌah, pap-tup, nũy hãpxop nõy ꞌãpax, tu notot xop xak putup punethok, ha ta notot xop teꞌ yũmmũgãp-tup hãpxop nõy nõm hãpxop xohix tikmũꞌũn tep-tup, nũy xupax.
\v 4 Tikmũꞌũn te hãmyũmmũg xeꞌe kux putup, nũy hãmꞌãktux hitop ꞌãpax.
\v 5 Pa ꞌãmũn, ꞌãpu ꞌõg hãxopmã hitop mõꞌnĩy mõkuma mõg. ꞌÃpuꞌ kummuk hã tot. ꞌÃpu Topa hãmꞌãpak max ꞌãktux Yeyox yũmmũg ꞌohnãg xop puꞌ. ꞌÃpu ꞌõg hãpxopmã nõy xohix mĩy, tu mõktuꞌ kux. Yã Topa pu ꞌãhãm.
\p
\v 6 Ha tak xok putũmnãg. Hãpxip ꞌĩhãg mõg putup.
\v 7 Topa puk hãm max, haꞌ kux. Putat kux ha tak xupep. ꞌŨgkuxa yũm kux ꞌohnãg.
\v 8 Topa te ꞌãꞌ hõm putup ꞌũxut xop yõg hãpxop xeꞌẽgnãg pexkox tuꞌ, yã kuxa tupnãg hõm putup yũmũg xuxyã Yeyox Kunnix keppah. Yũmũg xuxyã Yeyox Kunnix te tikmũꞌũn yõg hãpxopmãꞌax kopit putup. Tute ꞌãꞌ hõm putup nõm hãptup, ꞌĩhãꞌ nũn, tuꞌ nõy xohix puꞌ popmãp-tup ꞌũkuxa tupnãg kamah, yã Yeyox Kunnix te putpuꞌ nũn putup pax xop puꞌ popmãp-tup.
\s Hã kaxĩy ꞌũgmũn
\p
\v 9 Ta Tĩmõn, ꞌãpu hãpxip ꞌohnãg ꞌĩhã nũꞌ.
\v 10 Hamũn, Nep te hãmxexka yõg hãpxop max putup pax, huk nĩm, tu taꞌ mõg kõmẽn Texanõn tuꞌ. Ha taꞌ mõg Kenexẽn kama hãpxexka Ganax tuꞌ, ha taꞌ mõg Tit hãpxexka Namãy tuꞌ.
\v 11 Ta Nok puxehnãg xip ꞌũgmũtik. Mõy, Mãꞌak xak, nũy nũnnãꞌ, pu tu hãm ꞌũgmũtik. ꞌŨhãm max.
\v 12 Ta ꞌãte Tikik mõꞌkutnãhã kõmẽn ꞌEp tuꞌ.
\v 13 ꞌÃnũn, nũy paxnũꞌ yõg kayak. ꞌÃte nõm nĩm hãpxexka Tonot tuꞌ Kap pet tuꞌ. ꞌÃpu tappetxax paxnũ kama xix tappet nõy.
\p
\v 14 Ha ta ꞌAnexãn tek kummukgã xexkaꞌ, yã pipkup hãꞌ hãm ꞌAnexãn. Yũmũg xuxyã Yeyox te ꞌũyõg hãpkummuk mĩyꞌax yãnãn putup.
\v 15 Paxip tik tu nõꞌõm. Tute yũmũ yõg hãmꞌãktux mũtik yãy kix pax.
\p
\v 16 Ha ta hõmã gohet yõg tik pa te hãmyũmmũg te yõg hãpxopmãꞌax kopit hãmãxap, ꞌĩhã tikmũꞌũn pip ꞌohnãg ꞌũgmũtik. ꞌÃte-tupꞌah, puyĩy Topa nõm tikmũꞌũn yõg kummuk mĩyꞌax yãnãn.
\v 17 Pa yũmũg xuxyã Yeyox xip ꞌũgmũtik, tuk kaꞌogãhãꞌ, ꞌũyĩy Topa yõg hãmꞌãpak max xohix ꞌãktux, puyĩy puknõg xop hãmꞌãpak max ꞌãpax. Yã yũmũg xuxyã Yeyox tek xut hãmgãy yĩkox kopa putuk.
\v 18 Yũmũg xuxyã Yeyox tek xut putup hãpkummuk xohix kopah kamah, tuk mõgãp-tup pexkox tuꞌ. Yã ꞌõnte yũmũg xuxyã Yeyox teꞌ xat putup yãy yõg tikmũꞌũn. Yãꞌ max xeꞌẽgnãg mõkumaꞌ mõg. Hamũn.
\s ꞌÃtep-tup, pu Topa nox xihip ꞌãxop mũtik
\p
\v 19 ꞌÃpu Pinixit pu hãmꞌãktux xix ꞌAk pu xix ꞌÕnẽxip xuxyã xop puꞌ. ꞌÃte nõm xaxok ꞌohnãg.
\v 20 Ha ta ꞌEnax nox xip kõmẽn Konĩn tuꞌ. Ha ta ꞌãte Tonop piꞌ komẽn Mĩnet tuꞌ. Yãꞌ pakut.
\v 21 Ta ꞌãpu nũꞌ mõgꞌãgmũg ꞌãxix hãmmũmũꞌ. Ta ꞌEop te xaꞌ hãmꞌãktux xix Pononẽn teꞌ, xix Nĩn teꞌ xix Kanap teꞌ xix Kunnix kopa kuxa mãm xop xohix xexka te hãmꞌãktux, ꞌãxop xaxok ꞌohnãg.
\p
\v 22 ꞌÃtep-tup, pu Topa nox xihip ꞌãkoxuk mũtik. ꞌÃtep-tup, pu Topa xa hãmmaxnãꞌ.
\p Tu ta tuꞌ kux.