\id PHM  - Maxakalí NT [mbl] (Brazil) -2011 bd
\h PINẼM
\toc1 Pinẽm
\toc2 Filemom (Fm)
\mt PAOT TE PINẼM PU KAXꞌÃMIꞌ
\c 1
\p
\v 1 ꞌŨgmũn Paot, ꞌũkxip kanet kopah, Yeyox Kunnix pu ꞌãte hãpxopmãhãꞌ, tu kanet kopak xip, ha yũmũg xape Tĩmõn tek mũtik tihiꞌ, yĩk mũꞌãte xa kaxꞌãmiꞌ, Pinẽm, yãk mũg mũtik hãpxopmãhãꞌ,
\v 2 ha ꞌkuxa mãm kaꞌok xop pu kaxꞌãmi kamah, nõm te yãy tu nũꞌnãhã ꞌãpet tuꞌ, hak mũꞌãte kamah nũ mĩy tappet, yũmũg xape hex ꞌApit puꞌ mĩy, xix ꞌAkip puꞌ mĩy, yã yũmũg mũtik hãm kamah.
\p
\v 3 Pũyã yũmũg Tak Topa xa hãmmaxnãꞌ, xix ꞌãkuxa mãmmãꞌ. Pũyã yũmũg xuxyã Yeyox Kunnix xa hãmmaxnãꞌ.
\s Pinẽm teꞌ xape xohix putup pax
\p
\v 4 Pinẽm, xatek mũn hãk xape xeꞌeꞌ, yĩy ꞌãte Topa pu hãmꞌãktux pax, tu ꞌãpekpaxex, tu Topa pu hãmꞌãktux, hu: ꞌÃmax Topah! Kaxĩy.
\v 5 ꞌÃte hãmꞌãktux tap, hu: Xate Topa yõg tikmũꞌũn xohix putup pax, ha tikmũꞌũn teꞌ yũmmũg, tuꞌ xuktux, ha ꞌãteꞌ xupak, tu ꞌãkuxa yũm kaꞌokꞌax yũmmũg, ha ꞌyũm kaꞌok yũmũg xuxyã Yeyox kopah.
\v 6 Topa te yũmũꞌã hãmmaxnãhãꞌ, tu Kunnix hã hãmmaxnãhãꞌ, yĩy ꞌãte Topa tuꞌ xak, puyĩy yũmũꞌã yũmmũgãꞌ, ꞌũyĩy hãmyũmmũg, nũy yũmũg kuxa mãm kaꞌok yũmmũg, yã yũmũg kuxap-xet Kunnix kuxa mũtik hah.
\v 7 Xatek mũn hã ꞌãxapeꞌ, tuk mũn putup pax, tuk kuxa hittupmãhãꞌ, ha mõgnĩynãm. Yã xate Topa yõg tikmũꞌũn kuxa xohix kaꞌogãhãꞌ.
\s Paot te Pinẽm tuꞌ xak, pu ꞌOnẽy mõꞌnĩynãm
\p
\v 8 Yĩy ꞌãte xaꞌ xatꞌax, ꞌãhã ꞌãtaknõy hah, xa hãpxopmã max.
\v 9 Pa ꞌãte ꞌãp-tup pax xexkaꞌ, hu xa tuꞌ xak puxehnãg, yãk mũn Paot, tu Yeyox Kunnix pu hãpxopmãhãꞌ, huk xip kanet kopah Yeyox ꞌãktux tuꞌ, pa ꞌãte ꞌãxat ꞌap putupꞌah.
\v 10 Hu xa tuꞌ xak, ꞌOnẽy pupiꞌ xak, hak kutok putuk. ꞌÃte nõ mõgãhã Topa yõg putat hã, yĩy ꞌãhak-tok, ha kanet kopak xip ꞌĩhãk mũn ꞌOnẽy hãꞌ tak, tu hãmyũmmũgãhãꞌ.
\v 11 Hõmã ꞌOnẽy hãm kummuk ꞌãmũn puꞌ, paꞌ hãm max ꞌũgmũn puꞌ, xix ꞌãmũn pu hãm maxp-tup nõmhã.
\p
\v 12 Yĩy mõꞌkutnãhã ꞌãha putpuꞌ, ꞌĩhãk kuxa teꞌ xak.
\v 13 ꞌA ꞌãte mõꞌkutnãp-tupꞌah, pãyã tu xip kaꞌok nũnte, hu mõgnĩynĩynãm, ꞌĩhãk xip kanet kopah hãmꞌãpak maxꞌax ꞌãktux tuk xip, pu ꞌOnẽy ꞌã miy pupi nõ tuk tehet,
\v 14 pãyã ꞌãte yãy puꞌ mĩy putupꞌah, tup-tup, xate ꞌã hãmꞌãktux, hu: “Yãꞌ max, ꞌOnẽy xihip ꞌãmũtik, nũy ꞌãhã ꞌãtehet,” kaxĩy. Yĩy ꞌãte mõꞌkutnãhã ꞌãha, xayĩyꞌ tux hok pu putpu nũꞌ.
\p
\v 15 Pe ꞌOnẽy te xa hãptox haꞌ xip, nũy hõnhã tuꞌ xip kaꞌok ꞌãmũtik.
\v 16 Hõmãꞌ hãm putupꞌah, tu ꞌõg kãmãnat, tuꞌ hok hãꞌ hãm, pa hõnhã ꞌãmũn hãꞌ xape, ꞌãtaknõy putuk, tu Kunnix hã ꞌãxapeꞌ, ha yũmũꞌãtep-tup pax, ꞌãmũn xik mũn, yã yũmũꞌã hãꞌ xape xeꞌeꞌ.
\p
\v 17 Xate ꞌãhã ꞌãxape, ꞌĩhã ꞌOnẽy xãnãꞌ, pu ꞌãpet tu mõꞌxip, xatek mũn xãnãꞌax putuk.
\v 18 Ha hãpxop ꞌũm xaꞌ xupxet, kopxix tu pago.
\v 19 Nũnte ꞌãte kaxꞌãmi tappet tuꞌ, hu: ꞌŨgmũn yã Paot, tu ꞌOnẽy pupi pagop-tup. Kaxĩy. Hõmã ꞌãte xa hãmꞌãpak maxꞌax ꞌãktux, tu yã Kunnix ꞌãktux, ha ꞌãkuxa yũm kaꞌok, ha Kunnix te ꞌãkuxa hĩnnã xeꞌeꞌ, ꞌãte xaꞌ xuktux hah, yĩy xatek tu ꞌã tu yãy xitꞌax hã ta nemẽn, pãyã ꞌa ꞌãte xaꞌ xuktux putupꞌah.
\v 20 ꞌŨkxape: ꞌÃpu ꞌũgmũn pupi ꞌOnẽy putup pax, yũmũg xuxyã pupip-tup pax, nũy ꞌũgkuxa ꞌũm hittupmãꞌ, nũy ꞌãmũn te ꞌãhãꞌ taknõy.
\p
\v 21 ꞌÃte xa kaxꞌãmiꞌ, ꞌĩhãk kuxa yũm kaꞌok xaꞌ, tu hãmyũmmũg. Yã xate hãpxopmãp-tup mãynãg, nũy ꞌOnẽy hã ꞌãxape xeꞌeꞌ.
\v 22 ꞌÃxop te Topa pu hãmꞌãktux, tu tuꞌ xak, pu ꞌãhak mõgãꞌ, ha ꞌãteꞌ hip, pu Topa xe mõgkutnãꞌ, yĩy ꞌãte ꞌãpet tu mõꞌxip putup.
\s Tuk-nãy tu ꞌãneo
\p
\v 23 ꞌEpap te ꞌãneo, yã kanet kopaꞌ xip ꞌũgmũtik. Yeyox Kunnix puꞌ hãm, hu kanet kopaꞌ xip.
\v 24 Xix Mãꞌak, xix ꞌAnixtah, xix Nep, xix Nok te ꞌaneo. Yãꞌ xohix tek mũtik hãm.
\p
\v 25 Pũyã yũmũg xuxyã Yeyox Kunnix xa hãmmaxnãꞌ. Tu ta tuꞌ kux.