\id HEB  - Maxakalí NT [mbl] (Brazil) -2011 bd
\h ꞌEMEO
\toc1 ꞌEmeo
\toc2 Hebreus (Hb)
\mt ꞌEMEO XOP YÕG TAPPET
\c 1
\s Topak-tok
\p
\v 1 Hõmã hãmyãxatamuk xohix hã Topa te hãmꞌãktux pax, tu hãmꞌãktux punethok Yoneo xop yõg mõnãyxop puꞌ, ha tik xop te Topa pupi hãmꞌãktux, nũy mõnãyxop puꞌ xuktux,
\v 2 pa Topak-tok te yãy Tak pupi hãmꞌãktux nõmhã, tu yũmũꞌãꞌ xuktux. Nõꞌõm te Topa yũmũg Tak mũtik hãm xexka xop xohix mĩy, ha Topa tek-tok yãykutnãhãꞌ, pu hãm xexka yõg hãpxop xohix pop, xix pexkox yõg hãpxop xohix pop kamah,
\v 3 yãk-tok max, tu Topa max xeꞌẽgnãg putuk, tu yã Topa xeꞌẽgnãg kamah. ꞌŨyĩyꞌax kaꞌok, hu hãm xexka xop xohix xat, xix pexkox xop xohix xat, pu tu pip kaꞌok, ha mãyõn xop mãm kaꞌok, xix kõnãg xexka xup kaꞌok kamah, ha tikmũꞌũn kuxa kummuk tupmãhãꞌ, tuꞌ tupmã kux, ꞌĩhã pexkox haꞌ mõg, tu Topa xexka xeꞌẽgnãg yĩm xeꞌe hãꞌ yũm.
\s Topak-tok xix pexkox yõg nũꞌpok xop
\p
\v 4 Pexkox yõg nũꞌpok xop xexkak-tõgnãg, ha Topak-tok xexka xeꞌẽgnãg, yĩy Topa te nũꞌpok xop ꞌãxetꞌax kaꞌok mĩy, tuk-tok ꞌãxetꞌax mĩy max xeꞌẽgnãg.
\v 5 ꞌAp ta nũꞌpok xop pu hãmꞌãktuxꞌah, nũy yã nõm xop yãy kutok ꞌãktux hok, pa yãy kutok pu hãmꞌãktux, hu:
\q “ꞌÃmũn yã ꞌũgkutok.
\q Hõnhã ꞌãte ꞌãmũn yãk kutok ꞌãktux,” Kaxĩy.
\m Tu xe hãmꞌãktux, hu:
\q “ꞌŨgmũn yã ꞌõg ꞌÃtak.
\q Yã ꞌãmũn yãk kutok,” kaxĩy.
\m Tuk-tok puꞌ xuktux.
\v 6 Tuk-tok puxet nũꞌkutnãhã hãhãm tuꞌ, haꞌ xip ta tuꞌ, ha:
\q “Pũyã pexkox yõg nũꞌpok xop xohix kuxaꞌ yẽy ꞌãkeppah,
\q nũy tu nũktettex,” kaxĩy.
\m
\v 7 Pa nũꞌpok xop ꞌãktux, hu:
\q “Pũyã tu hãm mõꞌkaꞌok, kuxap putuk,
\q pũyã nõm kãmãnat xop yã kaꞌok,
\q tu ꞌãmuuh putuk kamah,” kaxĩy.
\m
\v 8 Tu yãy kutok pu hãmꞌãktux, hu:
\q “Topah, xateꞌ xat mõ kuma ꞌãmõg, tuꞌ xat kux ꞌohnãg,
\q tu ꞌõg tikmũꞌũn xat max, nũy tu hãmyok mĩy.
\q
\v 9 Xate hãmyok mĩyꞌax putup pax, xix hãpkohe mĩyꞌax putup nõg,
\q yĩy ꞌõgnũ Topa te xa yãykutnãhãꞌ, xa tikmũꞌũn hã ꞌãxexkaꞌ,
\q nũy ꞌãkuxa hittup xexkaꞌ, ha ꞌãxapek-tõgnãg xop,” kaxĩy.
\m
\v 10 Tu xe yãy kutok pu hãmꞌãktux, hu:
\q “Hõmã ꞌãmũn te mãxap, tu hãm xexka xohix mĩy,
\q yãy yĩm hã pexkox mĩy, tu hãpxop xohix mĩy.
\q
\v 11 Ha pexkox te yãy xaxogãp-tup, tuꞌ nõg,
\q xix hãhãm te yãyxaxogãp-tup, tuꞌ nõg,
\q pa ta tu ꞌãxip kaꞌok,
\q ha hãmyãxatamuk xohix punethok nõg, puxix pexkox xix hãhãm kutut,
\q tuꞌ nõg putup, tu topixxax kutut putuk nõg,
\q
\v 12 ha tikmũꞌũn te topixxax kutut xut,
\q nũy nõ tup hãꞌ yãnãn, nũy tu mõꞌtat,
\q ha kaxĩy xate pexkox xut putup, xix hãm xut putup,
\q nũy nõ nõy yãnãn tup mĩy,
\q pa ꞌãxip kaꞌok, tu kutut ꞌohnãg,” kaxĩy.
\m
\v 13 Ha Topa te pexkox yõg nũꞌpok xop xãnã ꞌõhnãg, pu yũhũm, pa yãy kutok xãnãhãꞌ, hu:
\q “Yũhũm ꞌũgyĩp xeꞌe hã, ꞌãte nõm kummuk xop nõãꞌ,
\q yĩy hip, ꞌãte nõm kummuk xop nõãꞌ,
\q tu nõm xop xa tuꞌ gãy xop nõãꞌ, tuꞌ kummugãp-tup ꞌũyãnãn tuꞌ,
\q ha ta xateꞌ hip, puyĩꞌ xohix yĩpkox piꞌ ꞌãxatꞌax tuꞌ,” kaxĩy.
\p
\v 14 Tep te xĩy pexkox yõg nũꞌpok xop? Yãꞌ koxuk xeꞌe xop, tu Topa pu hãpxopmãhãꞌ, ha nũꞌpok, nũy yãy yõg tikmũꞌũn mõꞌnĩynãm, puyĩꞌ mõg, hu mõxakux pexkox tuꞌ.
\c 2
\s Topa te tikmũꞌũn kuxa kummuk xit
\p
\v 1 ꞌÃpu yũmũg yĩpkox pip, hãmꞌãpak maxꞌax pu yũmũg yĩpkox pip, ꞌũyĩy hãpxopmã kummuk hok.
\v 2 Pexkox yõg nũꞌpok xop te hãmꞌãktux, tu hãpxeꞌe ꞌãktux, ha Topa teꞌ yĩpkox hok xop pu hãpkummugãhãꞌ,
\v 3 Tu yũmũg kuxa kummuk xitꞌax, tu yũmũꞌã hãmmax xeꞌẽgnãg nãꞌax, pa yũmũg yĩpkox hok, puxix Topa yũmũꞌã hãpkummugã xexkaꞌ, yũmũꞌãte Yeyox yõg hãmꞌãktux putup nõg hah. Haꞌ xuktux hãmãxap, ha hãmꞌãpak xop teꞌ yĩkopit, tu hãpxeꞌe ꞌãktux,
\v 4 ha Topa te hãpxeꞌe ꞌãktux kamah, hu hãpxopmã kaꞌok xeꞌẽgnãg, yã hãpxopmã xeꞌẽgnãg punethok, pu tikmũꞌũn pẽnã, nũy kuxaꞌ yẽy, yã tikmũꞌũn te nõm mĩy hok. Ha Topa Koxuk tep-tup pax, hu tikmũꞌũn kaꞌogãhãꞌ, pu hãpxopmã kaꞌok.
\s Yeyox Kunnix teꞌ kuxa kummuk xit
\p
\v 5 Ha Topa te pexkox yõg nũꞌpok xop yĩmõgatux ꞌohnãg, pu pexkox tu ꞌũyõg tikmũꞌũn xat. ꞌÃmhok. Pãyã yãy kutok Yeyox yãykutnãhã pu tu xat.
\v 6 Ha Topa yõg tappet te:
\q “Tikmũꞌũn yãk-tõgnãg, pãyã Topa te nõm hãmpeꞌpaxex, nũy ꞌũxutigãꞌ.
\q
\v 7 Ha hõnhã tikmũꞌũn kutõgnãg, ha pexkox yõg nũꞌpok xop xexkaꞌ,
\q pa Topa te tikmũꞌũn xexkãnãhãꞌ, pu tu xat,
\q
\v 8 Tuꞌ kaꞌogãhãꞌ, pu tu hep xop xohix xat,” kaxĩy.
\p Hamũn. Tappet teꞌ hep xop xohix xatꞌax ꞌãktux, ꞌa yũmũꞌãteꞌ pẽnãꞌah nõmhã, ꞌap tikmũꞌũn teꞌ hep xop xohix xat pẽnãꞌah.
\v 9 Pãyã yũmũg kuxa te Yeyox pẽnãhãꞌ, yã hãpxip kutõgnãg ꞌĩhãk-tõgnãg, Topa tep-tup hak-tõgnãg, ha nũꞌpok xop xexkaꞌ, pa Yeyox xok, tuꞌ hep xop xohix pupiꞌ xok, pu Topa yũmũꞌã hãmmaxnãꞌ, huꞌ xexkãnã xeꞌẽgnãg nõmhã, ꞌũxok hah xexkãnãhãꞌ.
\v 10 Topa te hãpxop xohix mĩy, ꞌũp-tup tuꞌ mĩy, tuk-tok xop putup, puyĩy tu max xeꞌẽgnãg, nũy Topa putuk tu max xeꞌẽgnãg. Yĩy Yeyox xũy, pu Topaꞌ xũyꞌax hã Yeyox yõg hãpxopmãꞌax kuxyãꞌ. Yã Yeyox te Topa yõg putat hã yũmũg mõgãhãꞌ.
\p
\v 11 Tu tikmũꞌũn kuxa kummuk tupmãhãꞌ, ha nõm xop te Topa hãꞌ Tak, yã Topa teꞌ kuxa mãm kaꞌok xop hã ꞌÃtak, yĩy Yeyox yãy xape xop ꞌãktux, ꞌap xape tu yãyhãhupꞌah.
\v 12 Yĩy tappet te Yeyox yõg hãmꞌãktuxꞌax ꞌãktux, hu:
\q “Topah, ꞌãtek xape xop pu ꞌãmũn ꞌãktux putup,
\q tu ꞌõg hãpxopmãꞌax kaꞌok ꞌãktux putup,
\q tu xa kutex putup, nũy Topa hãmꞌãktux max,
\q puyĩy tikmũꞌũn xohix yãykotĩnnãnãꞌ pip,” kaxĩy.
\m
\v 13 Ha tappet te xe:
\p “Topah, ꞌũgkuxa yũm kaꞌok ꞌãmũn kopah,” kaxĩy.
\p Tu xe:
\q “Nũntek xip, ꞌũgkutok xop tek mũtik pip,
\q Topa te ꞌũgkutok popmãhãꞌ,” kaxĩy.
\p
\v 14 Yeyox tek-tok ꞌãktux, ha tikmũꞌũn xeꞌeꞌ, ꞌap koxukꞌah, yãꞌ yĩn pip, xiꞌ yĩn hep ꞌãtaꞌ, yĩy Yeyox te yũmũꞌã hã tikmũꞌũn kutok, nũy tu xok, nũy Hãmgãyãgnãg nõãꞌ, nõm tep-tex.
\v 15 Ha tikmũꞌũn kuxãnõg, tuꞌ xokꞌax yĩpkutuk, ꞌũyõg hãmyãxatamuk xohix hãꞌ yĩpkutuk, ha Yeyox te nõm xop kuxa mãmmãhã, nũy nõ kuxãnõg kuxyãꞌ, pu tu hittup.
\v 16 Yeyox nũn. Tep haꞌ nũn? ꞌOk nũn, nũy pexkox yõg nũꞌpok xop mõꞌnĩynãm? ꞌÃmhok. Yã Topa yõg tappet te: ꞌŨnũn, nũy mõnãyxop hittap ꞌAmanãm mõkputox hã tu tehet,” kaxĩy.
\v 17 Hamũn. Yĩy Yeyox yãyhã tikmũꞌũn kutok, nũy tu xape xop putuk, nũy xape hã ꞌãmãnex xexka xeꞌẽgnãg. ꞌŨmax, tu tikmũꞌũn kuxa kaꞌ, tu Topa tu hãpxopmãhãꞌ, tu tuknõg ꞌohnãg, nũy tikmũꞌũn yõg hãpkummuk mĩyꞌax xaxogãꞌ, pu tu kux.
\v 18 Yã Yeyox xũy, tu yãy putupꞌax mĩy ꞌohnãg, hu hõnhã tikmũꞌũn hã tuꞌ tehet, tuꞌ kaꞌogãhãꞌ, puyĩy tu yãy putupꞌax mĩy hok kamah, nũy hãpxopmã kummuk hok.
\c 3
\s Yeyox xix Mõyyex
\p
\v 1 ꞌÃkuxa mãm kaꞌok Yeyox kopah, huk mũn hã ꞌãxape xop, ha Topa te ꞌãxãnãhã kamah. ꞌÃpu Yeyox ꞌũm peꞌãpaxeh, yã Topa te nũꞌkutnãhãꞌ, pu ꞌãmãnex xatꞌax yõg hãmꞌax hã tuꞌ hãm, ha yũmũg kuxa mãm kaꞌok nõ ꞌãmãnex xatꞌax kopah.
\v 2 Topa te Yeyox yãykutnãhãꞌ, pu tu hãpxopmãꞌ, ha kaxĩy mõnãyxop hittap Mõyyex te hãpxopmã max, yãy xape xop xohix kopa hãpxopmã max, tuꞌ tuknõg ꞌohnãg.
\v 3 Tikmũꞌũn te mĩptut max peꞌpaxex kutõgnãg, pa tikmũꞌũn te mĩptut mĩy, ha nõm tu peꞌpaxex xexkaꞌ. Kaxĩy mõnãyxop hittap Mõyyex yã xexka ꞌIyaet yõg tikmũꞌũn kopah, ha Yoneo xop te nõm ꞌãktux max, pãyã Yeyox mũn xexka xeꞌẽgnãg, tu Topa yõg tikmũꞌũn xohix hãꞌ xuxyãꞌ, yã Topak-tok xeꞌeꞌ.
\v 4 Kaxĩy mĩptut ꞌũm te yãy ꞌũm mĩy ꞌohnãg, ha Topa te hãpxop xohix mĩy. Hõmã Topa te ꞌIyaet yõg mõnãyxop xãnãhãꞌ, puyĩy yãy hã tikmũꞌũn.
\v 5 Mõyyex hãm Topa puꞌ, ꞌũyõg kãmãnat tuꞌ, tu yãy xape xop kopaꞌ hãm, tu tuknõg ꞌohnãg, tu Topa pupi tikmũꞌũn pu hãmꞌãktux, tu: “Topa te hãmꞌãktux putup,” kaxĩy.
\v 6 Pa Kunnix te hãpxopmã xexkaꞌ, tuꞌ tuknõg ꞌohnãg, yãy Tak puꞌ hãm tuꞌ, tu yãy xape xop pẽnã max, ha Kunnix hã yũmũg xape, ꞌĩhã yũmũg kuxãnõg hok, ꞌĩhã yũmũg kuxa mãm kaꞌok, tu hãmmax hip.
\p
\v 7 Yĩy Topa Koxuk te:
\q “Hõnhã ꞌãxop te Topa yĩyꞌax ꞌãpak,
\q
\v 8 ꞌÃpu, ꞌĩpkox piꞌ, ka ꞌõg mõnãyxop yõg hãpxopmãꞌax mõꞌtat,
\q ha mõnãyxop yĩpkox ꞌohnãg, tu Topa gãyãhãꞌ,
\q ꞌĩhã hãm panip xexka tuꞌ pip,” kaxĩy.
\m
\v 9 Tu xe:
\q “ꞌÕnte ꞌõg mõnãyxop tek yĩkopit, tuk gãyãhãꞌ,
\q pãyã yõgnũ hãpxopmãꞌax xeꞌẽgnãg pẽnã tap,
\q hãmyãxatamuk xohix te 40 hãꞌ pẽnãhãꞌ,
\q
\v 10 Yĩk gãy nãm nõm tikmũꞌũn tuꞌ, tu:
\q ‘Yãꞌ kummuk pax, tu hãmpeꞌpaxex kummuk,
\q tu yõgnũ putat xak punethok, hãpkummuk mĩy huꞌ,’
\q
\v 11 huk gãy, tu yãy ꞌãxetꞌax hã hãmꞌãktux xex, hu:
\q ‘Nõm xop tek xipꞌax hã mõꞌãxakux hok,
\p nũy ꞌũgmũtik tu hãpxopmã kux hok,’ kaxĩy.”
\p
\v 12 ꞌŨkxape xop, ꞌõg pa ꞌãtiꞌ, ka Topa yõg putat xak, ꞌãkuxa kummuk tuꞌ xak, xix ꞌãkuxa mãm hok tuꞌ xak, ka Topa xeꞌẽgnãg nĩm.
\v 13 ꞌÃpu hõnhã mõ ꞌãnõy mõꞌnĩynãm, ꞌãmnĩy xohix hã mõꞌnĩynãm, ꞌĩhã Topa te tikmũꞌũn xãnãhãꞌ, puyĩy Topa puꞌ yĩpkox piꞌ. Yã hõmã Topa yõg tappet te hõnhã ꞌãktux, tu: “Hõnhã Topa te hãmꞌãktux,” kaxĩy. ꞌÃpu, ꞌãxop yãy nõy kaꞌogãꞌ, ka ꞌãyĩpkox moꞌ yãy yĩnnĩn, yãy puꞌ koit tuꞌ, xayĩy hãpxopmã kummuk hok.
\v 14 Hõmã yũmũg kuxa mãm kaꞌok Kunnix kopah, yã yũmũg kuxa mãm kaꞌok mõ kumak mõg, kopxix Kunnix hã yũmũg xapeꞌ.
\p
\v 15 Yĩy Topa yõg tappet te:
\q “Hõnhã ꞌãxop te Topa yĩyꞌax ꞌãpax, ꞌãpu ꞌãyĩpkox piꞌ,
\q ka mõnãyxop yõg hãpxopmãꞌax tat,
\q ha mõnãyxop yĩpkox ꞌohnãg,
\q tu Topa mũtik yãytuk-mĩy,” kaxĩy.
\p
\v 16 ꞌŨ ꞌũm te Topa yõg hãmꞌãktuxꞌax ꞌãpak, tu nũ mũtik yãy tuk-mĩy? Yã mõnãyxop te Mõyyex peꞌ mõg, tu hãmꞌãpak, tu yãytuk-mĩy, ha Mõyyex te nõm mõy tap hãpxexka ꞌEyit kopah.
\v 17 ꞌŨ ꞌũm tu Topa gãy hãmyãxatamuk xohix te 40 hã ta tuꞌ gãy? Yã tikmũꞌũn te hãpxopmã kummuk, huꞌ xakix hãm panip xexka tuꞌ.
\v 18 ꞌŨ ꞌũm te Topa yõg hãmꞌãktuxꞌax ꞌãpak, ꞌĩhãꞌ yãy ꞌãxetꞌax hã hãmꞌãktux xex, hu: “ꞌÕm xop ꞌũkxipꞌax hã mõxakux hok, nũy ꞌũg mũtik tu hãpxopmã kux hok,” kaxĩy? Yã tikmũꞌũn te hãmꞌãktuxꞌax ꞌãpak, tu Topa mũtik yãytuk-mĩy.
\v 19 Yĩy yũmũꞌãte hãmyũmmũg, yãꞌ mõxa ꞌohnãg, nũy Topa yõg xipꞌax hã mõxakux, ꞌũkuxa mãm ꞌohnãg tuꞌ mõxa ꞌohnãg.
\c 4
\p
\v 1 Hõmã Topa te yũmũꞌã hãmꞌãktux xex, tu hãmꞌãpak maxꞌax ꞌãktux, hu: “ꞌŨkxipꞌax hã mõꞌãxakuxꞌax, nũy ꞌũgmũtik ꞌãpiꞌ,” kaxĩy. ꞌÃpu, yũmũg pa ꞌãtiꞌ, nũy Topa yõg xipꞌax hã mõxakux xeꞌeꞌ.
\v 2 Tikmũꞌũn hittap teꞌ xupak, ha yũmũꞌãteꞌ xupak kamah, tu hãmꞌãpak maxꞌax ꞌãpak, kamah, pa tikmũꞌũn hittap kuxa ꞌũm mãm ꞌohnãg Topa kopah, yĩy Topa te nõm pu hãmmaxnã ꞌohnãg, ꞌũkuxa mãm ꞌohnãg hah,
\v 3 ha yũmũg kuxa mãm kaꞌok, tu Topa xipꞌax hã mõ yũmũ xakux, nũy Topa mũtik hãpxopmã kux, ha:
\q “ꞌŨggãy, hu yãy ꞌãxetꞌax hã hãmꞌãktux xex, hu:
\q ‘Nõm xop tek xipꞌax hã mõxakux hok,
\q nũy ꞌũgmũtik tu hãpxopmã kux hok.’ Kaxĩy.”
\p Topa teꞌ xuktux tap, ꞌĩhã tu hãm xexka xohix mĩy tu hãpxopmã kux.
\v 4 Yã Topa yõg tappet te hãptup te 7 ꞌãktux, yã hãptup xeꞌeꞌ, hu: “Topa te hãpxopmã kux, tu hãptup te 7 ꞌĩhã hãpxopmã ꞌohnãg, hãpxopmã kux tuꞌ,” kaxĩy.
\v 5 Tu xe: “Nõm xop te Topa xipꞌax hã mõxakux hok, nũy nũ mũtik tu hãpxopmã kux hok,” kaxĩy.
\v 6 Tikmũꞌũn hittap te hãmꞌãpakꞌax max ꞌãpak hãmãxap, tu Topa xipꞌax hã mõxakux hok, nũy nõm mũtik tu hãpxopmã kux hok, ꞌũkuxa mãm ꞌohnãg tuꞌ, pãyãꞌ nõy xop mõxap-tup, nũy Topa mũtik tu hãpxopmã kux.
\v 7 Hãmyãxatamuk xohix nõg ꞌĩhã Topa Koxuk te xe hãmꞌãktux, ha mõnãyxop Namix te Topa pupi hãmꞌãktux, yĩy:
\q “Hõnhã ꞌãxop te Topa yĩyꞌax ꞌãpak.
\q ꞌÃpu, ꞌipkox piꞌ,” kaxĩy.
\p
\v 8 Pax pu mõnãyxop hittap Yoyoe te tikmũꞌũn mõgã, pu Topa xipꞌax hã mõxakux, nũy tu hãpxopmã kux, puxix Topa xeꞌ xuktux hok mõnãyxop Namix puꞌ. Pãyã mõnãyxop mõxa ꞌohnãg, ꞌũyĩpkox ꞌohnãg tuꞌ, yĩy Topa teꞌ xuktux ꞌũxeheh.
\v 9 Pa hãptup xeꞌe mõꞌnãhã Topa yõg tikmũꞌũn puꞌ, nõm xop kuxa mãm kaꞌok xop pu mõꞌnãhãꞌ, tu Topa yõg hãptup te 7 putuk, ꞌĩhã Topa te hãpxopmã kux.
\v 10 Tikmũꞌũn te Topa xipꞌax hã mõxakux, nũy nõm mũtik tu hãpxopmã kux, puxix hãpxopmãꞌax xohix tu kux, tu xe hãpxopmã ꞌohnãg, Topa te hãpxopmã kux putuk.
\v 11 ꞌÃpu yũmũꞌã Topa xipꞌax hã mõxakux kamah, nũy Topa mũtik yũmũg hãpxopmã kux. ꞌÃpu yũmũg yĩpkox pip Topa puꞌ, kuꞌu yũmũg tikmũꞌũn kummuk putuk, tu yũmũꞌãte mõxakux ꞌohnãg.
\p
\v 12 Yã Topa yõg hãmꞌãktux xip kaꞌok. Tikmũꞌũn mĩkax xexka ꞌũxox tix hãꞌ xuhmĩy, tuꞌ xuhmĩy nũy ꞌũyĩn xit, nũy tuꞌ kup mũggãꞌ. Ha kaxĩy Topa yõg hãmꞌãktux kaꞌok, tu yũmũꞌã yãy kuxa yũmmũgãhãꞌ. Yũmũꞌãte mõꞌkupix, xix hãmꞌãpax, puxix nõm hãmꞌãktux yãy pekpaxexꞌax yũmmũgãꞌ, tu yãy pekpaxex xohix yũmmũgãhãꞌ xix yãy putupꞌax yũmmũgãhãꞌ, ꞌũyĩy yãy kuxa yũmmũg,
\v 13 yĩy tikmũꞌũn te hãpxopmãꞌax xaptop hok Topa puꞌ. Yã Topa te hãpxopmãꞌax xohix pẽnãhãꞌ, tu hãmyũmmũg, tu tikmũꞌũn yõg hãmpeꞌpaxex xohix yũmmũg, ha Topa pu yũmũg xohix te yãy yõg hãpxopmãꞌax ꞌãktux putup.
\s Yeyox te ꞌãmãnex xop xohix xatꞌax
\p
\v 14 ꞌÃpu yũmũg kuxa mãm kaꞌok, yã hõmã yũmũꞌãte hãmꞌãktux, tu yũmũg kuxa mãm kaꞌok Yeyox kopa ꞌãktux. Yũmũ yõg ꞌãmãnex xatꞌax xeꞌẽgnãg te Topa haꞌ mõg, tuꞌ keppaꞌ xip, yãꞌ xuxetꞌax Topak-tok Yeyox.
\v 15 Tu yũmũg kuxa kaꞌ, yũmũg puꞌuk ha yũmũg kuxa kaꞌ, haꞌ kummuk xop te yũmũꞌãꞌ kummugãhãꞌ, ꞌũyĩy hãpkummuk mĩy, tu Yeyox kummugãhã kamah, puyĩy hãpkummuk mĩy, pãyã hãpkummuk mĩy ꞌohnãg.
\v 16 ꞌÃpu yũmũg mõg, yũmũg kuxãnõg hok. Yã Topa ha yũmũg mõg, nũy nõm pu hãmꞌãktux, ha Topa te yũmũꞌã hãmmaxnãhãꞌ, xix yũmũg kuxa kaꞌ, xix mõ yũmũg nĩynãm.
\c 5
\p
\v 1 Topa te ꞌãmãnex xatꞌax yãykutnãhãꞌ, tu tikmũꞌũn kopaꞌ yãykutnãhãꞌ, pu tikmũꞌũn pupi hãmꞌãktux Topa puꞌ, ha Topa te ꞌãmãnex xohix yĩmõgatux, pu xokxop mõꞌhap, xix hãpxop, nũy Topa pu haxyãꞌ, puyĩy Topa tikmũꞌũn yõg hãpkummuk mĩyꞌax xaxogãꞌ, pu tu kux.
\v 2 Ha ꞌãmãnex xatꞌax yã puꞌuk kamah, nũy hãmyũmmũg hok xop hãꞌ tot, nũy hãpkummuk mĩyꞌax xop kuxa kaꞌ.
\v 3 ꞌŨpuꞌuk, hu yãy mũn pu hãpxop mõꞌhap hãmãxap, nũy Topa puꞌ haxyãꞌ, puyĩy hãpkummuk mĩyꞌax xaxogãꞌ, pu tu kux, hak-nãy tu ꞌãmãnex te tikmũꞌũn pu mõꞌhap kamah, puyĩy Topaꞌ yõg hãpkummuk mĩyꞌax xaxogã kamah.
\v 4 Tikmũꞌũn teꞌ xak ꞌohnãg pu Topa yãykutnãꞌ, puyĩy tu ꞌãmãnex xatꞌax. ꞌÃmhok. Topap-xehnãg te yãykutnãhãꞌ, tu mõnãyxop ꞌAnãm yãykutnã hãmãxap.
\p
\v 5 Ha kaxĩy Kunnix teꞌ xak ꞌohnãg, pu Topaꞌ yãykutnãꞌ, puyĩy yãyhã ꞌãmãnex xatꞌax. ꞌÃmhok. Pa Topa te:
\q “ꞌÃmũn yãk kutok!
\q Hõnhã ꞌãte xa hã ꞌũgkutok ꞌãktux,” kaxĩy.
\p
\v 6 Ha Topa yõg tappet te xe hãmꞌãktux, hu:
\q “Tik hittap Mẽkiyenek yã ꞌãmãnex mõ kumaꞌ mõg,
\q hã kaxĩy ꞌãmũn yã ꞌãmãnex mõ kuma mõg kamah,
\q tuꞌ kux ꞌohnãg,” kaxĩy.
\p
\v 7 Yeyox xip hãm tuꞌ, ꞌĩhã Topa pu hãmꞌãktux, tu ta tuꞌ xak, tuꞌ yĩy kaꞌok, tuꞌ potahaꞌ, pu Topaꞌ tux hok pu tikmũꞌũn putex hok, ha Topa teꞌ xupak. Yã yãykutõgnãg peꞌpaxex hah.
\v 8-9 ꞌŨk-tok, pãyãꞌ xũy, nũy tu yĩpkox pip yũmmũg, tu hãmyũmmũg max, hu tikmũꞌũn kuxa kummuk xitꞌax, tu tikmũꞌũn yĩpkox pip xop kuxa kummuk xitꞌax, nũy tu mõ kuxa max tat ꞌũyãnãn tuꞌ.
\v 10 Yã Topa te yãy kutok yãykutnãhãꞌ, puk-tok yãyhãꞌ xatꞌax, tuk-tok pu hãmꞌãktux, hu:
\p “ꞌÃmũn yã ꞌãmãnex xatꞌax, tu tik hittap Mẽkiyenek putuk,” kaxĩy.
\s ꞌÕg pa mõxip, xayĩy kuxa yũm kux
\p
\v 11 Yã ꞌũgmũꞌãte ꞌãmãnex ꞌãktux puꞌ max, nũy xa Yeyox ꞌãktux, yã yũmũ yõg ꞌãmãnex xatꞌax, ha xa hãmꞌãktux punethok, nũy xa hãmyũmmũgãꞌ, pãyã ꞌãp-tox kaꞌok.
\v 12 Hãpxip punethok hã ꞌãxop te Topa yõg hãmꞌãktuxꞌax ꞌãpak, pãyã ꞌãxop te hãpxaxok, hu ꞌãnõy pu hãmyũmmũgã hok. Kakxop te hãmyũmmũg ꞌohnãg, tuꞌ yõktat puxehnãg xak, huꞌ xoꞌop, ꞌap te xogyĩn mãꞌah. Hã kaxĩy ꞌãxop te hãmꞌãpak kutõgnãg, tu hãmyũmmũg ꞌohnãg, kakxop putuk, ꞌap hãmꞌãktux kaꞌok ꞌãpakꞌah, ꞌãp-tox tuknõg tuꞌ.
\v 13 Kakxop puꞌũgnãg teꞌ yõktat hep xoꞌop, tu hãmyũmmũg ꞌohnãg, ꞌok pe hãmyok, ꞌok pe hãpkoheꞌ. Hã kaxĩy ꞌãxop te hãmꞌãktux te mãxap yũmmũg, pãyã hãmꞌãktux kaꞌok yũmmũg ꞌohnãg, hu hãpxopmãꞌax kopit kummuk.
\v 14 Yãꞌ xiptap xop te xogyĩn mãhãꞌ, tu hãmyũmmũg, tu hãmꞌãktux kaꞌok peꞌpaxex, nũy tu hãmmax yũmmũg, nũy tu hãpkummuk yũmmũg, puyĩy hãpxopmã max.
\c 6
\p
\v 1 ꞌÃpu yũmũ hãmpeꞌpaxex max, nũy hãmyũmmũg, nũy ꞌũxiptap xop putuk yũmũꞌãte hãmyũmmũg, nũy hãmyũmmũgꞌax te mãxap yũmmũg max. Yã nõm hãmyũmmũgꞌax te: Topa te tikmũꞌũn kuxa kummuk xit, hãpxopmãꞌax hok hãꞌ xit, nũy kuxa max mõꞌtat ꞌũyãnãn tuꞌ. Tikmũꞌũn kuxa yũm kaꞌok Yeyox kopah, puxix Topaꞌ hok hãꞌ kuxa xit. Kaxĩy. Yã hãmyũmmũgꞌax te mãxap ꞌõhõm, ha yũmũꞌãte hãmyũmmũg.
\v 2 Ha kama hãmyũmmũgꞌax te mãxap, puꞌ kuxa mãm kaꞌok xop ꞌũnõy putox pix, ꞌũkuxa yũm kaꞌok hah, haꞌ nõy putox yĩmũꞌ yĩm xix, puyĩy Topa Koxuk kaꞌogãꞌ, ꞌãxop te hãmyũmmũg kamah. Yã kama hãmyũmmũg te mãxap, hu: Topa teꞌ xakix xop putpuꞌ hĩnnãp-tup, ha hãptup xeꞌe mõꞌnãp-tup, ꞌĩhã Topa teꞌ hep xop xohix yõg hãpxopmãꞌax kopit, tuꞌ kummugãp-tup ꞌũyãnãn tuꞌ, tu hãpxaxok ꞌohnãg. Yã hãmyũmmũg te mãxap ꞌõhõm.
\v 3 ꞌÃpu yũmũꞌãte hãmꞌãktux kuxyãꞌ, ꞌũyĩy hãmꞌãktux nõy ꞌũm ꞌãktux, puyĩy Topa yũmũꞌã hãmꞌãktux kaꞌok yũmmũgãꞌ.
\p
\v 4 Topa yõg putat xak hok. ꞌÃxop te putat xak, nũy hãpxopmã kummuk, ta putpu ꞌãnũn hok. Tikmũꞌũn te Topa yõg putat hãꞌ mõg tap, tu pexkox yõg hãpxop pahaꞌ, Topa Koxuk te nõm kaꞌogãhãꞌ,
\v 5 ha Topa yõg hãmꞌãktux max xex ꞌũkuxa kopah, tu pexkox kaꞌokꞌax yũmmũg,
\v 6 tu Topa yõg putat xak, nũy putpu tu nũn hok, puxix Topa xeꞌ hupmã hok, puyĩy yãy yõg hãpxopmãꞌax kummuk kux. ꞌÃmhok. Yãꞌ nõy te Topak-tok ꞌãktux kummuk, tu Yeyox mũn pu hãpkummugãhãꞌ. Tu tep putep putuk? Tuꞌ kummuk xop putuk, nõm xop te Yeyox putex, haꞌ kummuk xop putuk, hu ta Topa yõg putat xak. Yã Yeyox puꞌ hupmã xexkaꞌ.
\p
\v 7 Hãm max te tex punethok pop, ha hãpxop punethok xokax, tuꞌ tuk, ha hãpxa xuxyã hittup, ha Topa te nõm pu hãmmaxnãhãꞌ.
\v 8 Ha hãm nõy te mĩmyãm punethok pip, xix mĩxux kummuk pip, yĩy Topa te nõm pu hãpkummugãhãꞌ, ha tikmũꞌũn teꞌ gõy hax nãm. Tikmũꞌũn te Topa yõg putat xak, tu hãpxa kummuk putuk, hãpxopmã kummuk tuꞌ.
\p
\v 9 ꞌŨkxape xop: ꞌÃte hãmꞌãktux hã xa hãmyũmmũgãhãꞌ, tu hãpxa ꞌãktux, nũy xa tikmũꞌũn kuxa ꞌãktux. Yã Topa te xa hãmmaxnãhãꞌ, ꞌa ꞌãxop te hãpxa kummuk putukꞌah, nõm Topa tep-tup nõg. ꞌÃmhok. Pãyã ꞌãxop te hãpxa max putuk, yã ꞌãmõg kuma mõg Topa yõg putat hã.
\v 10 Topa te hãmyok mĩy, tu ꞌõg hãpxopmãꞌax xaxok ꞌohnãg, ha ꞌãxop te Topap-tup pax, yĩy ꞌãxape hã tu tehet, nũy nõm xop mõꞌnĩynãm.
\v 11 ꞌŨgmũꞌãte ꞌãp-tup, xa ꞌãhittup hã Topa yõg putat hã ꞌãmõg, nũy tu mõ kuma mõg, nũy pexkox yõg hãpxop hip, nũy pop.
\v 12 ꞌÃkuxa tuknõg hok, pa ꞌãkuxa mãm kaꞌok, nõm xop putuk, nõm xop te Topa yõg putat hãꞌ mõg tap, xayĩy pexkox yõg hãpxop pop kamah. Yã Topa te xa hãmꞌãktux xex kamah, nõm xop putuk.
\s Topa te hãmꞌãktux xex
\p
\v 13 Hõmã Topa te hãmꞌãktux xex mõnãyxop ꞌAmanãm puꞌ, tu yãꞌ hitop xex hok, tuꞌ xexka xeꞌẽgnãg, haꞌ xohik-tõgnãg, yĩy yãy ꞌãxetꞌax hã hãmꞌãktux, nũy hãmꞌãktux xex,
\v 14 hu ꞌAmanãm pu hãmꞌãktux, hu: “ꞌÃte xa hãmꞌãktux xeꞌeꞌ, yã ꞌãte xa hãmmaxnãp-tup, xate yãy kutok pit put putup, pu ꞌãmõkputox xohix punethok,” kaxĩy.
\v 15 Yĩy ꞌAmanãm teꞌ hip, tu mõktu yãy kutok put, tu yãy mõkputox pẽnãhãꞌ.
\v 16 Tikmũꞌũn ꞌũm teꞌ nõy pu hãmꞌãktux xex, hu: Hãptup, kopxix nũꞌ, nũy xa pago. Topa te hãmyũmmũg. ꞌÃteꞌ koitꞌah.” Kaxĩy. Tu Topa ꞌãxetꞌax ꞌãktux ꞌĩhã ta tu hãmꞌãktux xex, puyĩꞌ nõy kuxa yũm kaꞌok hãmꞌãktuxꞌax kopah, nũy nõy kuxaꞌ yẽy.
\v 17 Topa te hãmꞌãktux xeꞌeꞌ, pu tikmũꞌũn yĩkopit hok, hu yãy ꞌãxetꞌax ꞌãktux, ꞌĩhã yãy yõg tikmũꞌũn pu hãmꞌãktux xex, nõm xop te hãpxop popꞌax pu hãmꞌãktux xex.
\v 18 Topa ꞌap te koitꞌah, tu hãmꞌãktux xex, xix hãpxopmãhãꞌ, tu yãy ꞌãxetꞌax hã hãpxopmãhãꞌ, tup te koit ꞌohnãg, pu yũmũg kuxa mãm kaꞌok, nũy tu hip, pu Topa yũmũꞌã hãmmaxnãꞌ, ꞌũ yũmũg kuxa hittup.
\v 19 Hu yũmũg kuxa mãm kaꞌok, tu yãy pu yĩkopit ꞌohnãg, pãyã yũmũꞌãteꞌ hip, ꞌũyĩy Topa keppa yũmũg piꞌ. Mĩpkox te kõnãg yĩmũꞌ mõg, ha pipkup putux xexka te mĩpkox tuꞌ hĩy, tu kõnãg kopaꞌ yũm, puyĩy mĩpkox mõg hok kõnãg yĩmũꞌ, ha kaxĩy yũmũg kuxa mãm kaꞌok, tu Yeyox puxehnãg kopaꞌ mãm kaꞌok. Kamah ꞌãmãnex xexka te Topa xipꞌax xeꞌẽgnãg hã mõꞌnãhãꞌ, tu topixxax max mõꞌyĩnnĩnꞌax hã mõꞌnãhãꞌ, nũy Topa keppaꞌ xihip. Ha yũmũꞌãteꞌ hip kamah, nũy pexkox yõg xipꞌax tu ꞌãmõxahaꞌ, nũy mõxakux, nũy Topa keppa yũmũg piꞌ.
\v 20 Yeyox te pexkox tuꞌ xupep hãmãxap, tu mõꞌnãhãꞌ, nũy yũmũꞌã hãmmaxnãꞌ, yã ꞌãmãnex xop xatꞌax xeꞌẽgnãg mõ kumaꞌ mõg, tu tik hittap Mẽkiyenek putuk.
\c 7
\p
\v 1 Nõm tik Mẽkiyenek te kõmẽn Xanẽm yõg tikmũꞌũn xohix xat, tu Topa xeꞌẽgnãg hã ꞌãmãnex, ha ꞌAmanãm teꞌ gãy xop mũtik yãykix, tuꞌ xexka xop kix, tu yãykix kux, tu taꞌ mõg, yãy pet ha putpuꞌ mõg, ha ta Mẽkiyenek teꞌ pẽnãhãꞌ, tu: “Pũyã Topa xa hãmmaxnãꞌ,” kaxĩy.
\v 2 Ha ꞌAmanãm teꞌ popmãhã hãpxop, ꞌũyõg hãpxop yãg te 10, tu ꞌãmãnex puꞌ yãg puxet hõm, ha ꞌAmanãm te nõm hãpxop mõy tap ꞌũgãy xop tuꞌ. Yã Mẽkiyenek ꞌãxetꞌax nõy mĩy, tu: Hãmyok xatꞌax, kaxĩy. Ha kõmẽn Xanẽm ꞌãxetꞌax mĩy, hu: ꞌŨkuxa yũmꞌax, kaxĩy. Yĩy ꞌãmãnex ꞌãxetꞌax nõy te: Tik te tikmũꞌũn xatꞌax, tu tikmũꞌũn kuxa mãmmãꞌax, kaxĩy.
\v 3 Ha tikmũꞌũn te ꞌãmãnex yãy tak yũmmũgꞌah, xiꞌ tut yũmmũgꞌah, xiꞌ yõg mõnãyxop yũmmũgꞌah, xix hãm ꞌũm hã ꞌũtut teꞌ putꞌax ꞌũm yũmmũgꞌah, xix ꞌãmnĩy ꞌĩhãꞌ xok yũmmũgꞌah, yã Topak-tok putuk, tu yã hãmyãxatamuk xohix hã ꞌãmãnex, haꞌ kuxa ꞌohnãg.
\p
\v 4 ꞌŨyũmmũg. Mẽkiyenek yãꞌ xatꞌax, yĩy mõnãyxop hittap ꞌAmanãm teꞌ hõm hãpxop yãg puxet, haꞌ gãyxop tu nõm hãpxop mõy tap.
\v 5 Mõyyex teꞌ xat, pu Nemi mõkputox te tikmũꞌũn tuꞌ yãg puxet paꞌ, ꞌũnõy yãg te 10 yã tikmũꞌũn yõg, ha Nemi yõg xop te yãy yõg tikmũꞌũn tuꞌ pahaꞌ, yã kama ꞌAmanãm hãꞌ mõkputox.
\v 6 Pa Mẽkiyenek mũn ꞌa Nemi hãꞌ mõkputoxꞌah, pa ꞌAmanãm tu hãpxop ta tuꞌ yãg puxet pahaꞌ, tu: “Pũyã Topa xa hãmmaxnãꞌ,” kaxĩy. Yã Topa te ꞌAmanãm pu hãmꞌãktux xex tap.
\v 7 Yã tik xexka xop te hãmꞌãktux, ha tik kutõgnãg xop te hãmꞌãpak. ꞌÃxop te hãmyũmmũg. Yĩy Mẽkiyenek te hãmꞌãktux, ha ꞌAmanãm teꞌ xupak.
\v 8 Ha ꞌãmãnex xop teꞌ yãg pahaꞌ, tu hãpxip ꞌĩhãꞌ xakix, haꞌ nõy teꞌ yãnãn tuꞌ pahaꞌ, tu mõktu xakix kamah, tikmũꞌũn xohix putuk. Pa Topa te Mẽkiyenek hi xeꞌe ꞌãktux, ha mõnãyxop yõg hãpxop ꞌũyãg pahaꞌ.
\v 9 Yã Nemi te ꞌAmanãm mũtik pago, haꞌ mõkputox te yãy yõg tikmũꞌũn tuꞌ pop.
\v 10 Tikmũꞌũn te hãmꞌãktux hu: Nemi mũg tut teꞌ put ꞌohnãg, ꞌĩhãꞌ xuxyã ꞌAmanãm te Mẽkiyenek pu pago, yĩy Nemi te ꞌAmanãm mũtik pago kamah. Kaxĩy tikmũꞌũn te hãmꞌãktux. Yã mõnãyxop ꞌAmanãm te yãy putix pupi pago.
\p
\v 11 ꞌĨyaet yõg tikmũꞌũn te Topa yõg xatꞌax yũmmũg, haꞌ xatꞌax te ꞌãmãnex xop ꞌãktux, ꞌõhõm ꞌAnãm mõkputox, yã ꞌAnãm xop te Nemi hãꞌ mõkputox, tu mõktu Topa puꞌ hãm, ꞌap puxiꞌah, ꞌũkuxa tupmã hok tuꞌ, yĩy ꞌãmãnex nõy nũn, yã Yeyox Kunnix nũn, tu Mẽkiyenek putuk, tu ꞌAnãm yõg ꞌãmãnex xop putuk ꞌohnãg.
\v 12 Yã ꞌãmãnex nõy, yĩꞌ xatꞌax nõy kamah.
\v 13-14 Yã yũmũg xuxyã Yeyox nũn, nũy ꞌãmãnex yõg hãmꞌax hãꞌ hãm, tu Yona xop yõg tihik, ꞌap Nemi yõg tikꞌah, ha Yot xop te ꞌãmãnex yõg hãmꞌax hãꞌ hãm ꞌohnãg, yã Mõyyex te Yona xop xat ꞌohnãg, pu tu hãm.
\s ꞌÃmãnex xatꞌax yã Mẽkiyenek putuk
\p
\v 15 ꞌÃxop te hãmyũmmũgꞌax. ꞌŨnũn ꞌãmãnex nõy, tu Mẽkiyenek putuk, ꞌap Nemi hãꞌ mõkputoxꞌah.
\v 16 Mõyyex teꞌ xat, pu Nemi mõkputox puxet hãm, nũy Yoneo yõg tikmũꞌũn hã ꞌãmãnex, ha tikmũꞌũn te yãykutnãhãꞌ, pu tu hãm, pãyã yũmũg xuxyã te yũmũꞌã hã ꞌãmãnex xexkaꞌ, ꞌũhi kux ꞌohnãg hã yũmũꞌã hã ꞌãmãnex.
\v 17 Yĩy Topa yõg tappet te: “Tik hittap Mẽkiyenek yã ꞌãmãnex, tuꞌ kux ꞌohnãg, hã kaxĩy ꞌãmũn yã ꞌãmãnex kamah, ꞌakux putup ꞌohnãg!” kaxĩy.
\v 18 Yĩy Topa teꞌ xatꞌax nõãꞌ. Yã tikmũꞌũn puꞌuk, ꞌa hãpxopmã max yũmmũgꞌah, tuꞌ yĩpkox pip Mõyyex yõg xatꞌax puꞌ, Mõyyex teꞌ xat,
\v 19 pãyã yãy kuxa tupmã hok, pu tu max, tu hãmmax hip, pu Topa nũnnãꞌ, puyĩy tu yãy mũtik ti mõꞌkumaꞌ mõg. Pãyã Yeyox nũn, yĩy yũmũꞌãteꞌ hip, puyĩy yũmũg mõgã Topa yĩkãgnãg hah.
\p
\v 20 Yã Topa teꞌ xat, pu Nemi yõg ꞌãmãnex xop tu hãm, pãyã nõm xop pu hãmꞌãktux ꞌũm xex ꞌohnãg, pu tu hãpxopmã kux. ꞌÃmhok.
\v 21 Pãyã hãmꞌãktux xex ꞌãmãnex nõy puꞌ, yã Yeyox mũn pu hãmꞌãktux xex, hu:
\q “Topa te xa hãmꞌãktux xex,
\q tu yãy puꞌ hupmãp-tup ꞌohnãg, tu:
\q ‘ꞌAmũn yã ꞌãmãnex xeꞌeꞌ, ꞌap ꞌãkux ꞌohnãg.’ ” Kaxĩy.
\p
\v 22 Hu Yeyox mũn yã ꞌãmãnex xeꞌeꞌ, tuꞌ paꞌax tũmnãg yõg ꞌãmãnex, yãꞌ paꞌax tup mũn max xeꞌeꞌ, haꞌ paꞌax hittap mũn miax.
\p
\v 23 ꞌŨyõg ꞌãmãnex xop xohix punethok, ꞌũxakix tuꞌ, yĩꞌ nõy mõxahaꞌ, nũy tu hãm.
\v 24 Pa Yeyox hi mõ kumaꞌ mõg, ꞌũxok putup ꞌohnãg, yĩꞌ nõy nũn ꞌohnãg, nũy yãnãn tu tuꞌ hãm, pãyã Yeyox yã ꞌãmãnex yãp-xet,
\v 25 tu hõnhã tikmũꞌũn kuxa kummuk xitꞌax, xix hãptup ꞌĩhãꞌ xitꞌax, ꞌap kuxꞌah, tu nõm xop kuxa te Topa xak xop mõꞌnĩynãm, puyĩy Topa yĩkãgnãg hã nũꞌ. Ha Yeyox te nõm pupiꞌ xak, nũy mõꞌnĩynãm, yãꞌ hi mõ kumaꞌ mõg, nũy Topa tuꞌ xax, pu mõ tu xape nĩynãm.
\p
\v 26 Hu Yeyox yã ꞌãmãnex xatꞌax xeꞌẽgnãg, ha yũmũg xohix tep-tup pax, ha hãpkummuk mĩy ꞌohnãg, yãꞌ max xeꞌẽgnãg. Topa te Yeyox yãykutnãhãꞌ, tuꞌ xut, tuꞌ xexkanã xeꞌẽgnãg, pu pexkox yõg xop hã tu xexkaꞌ.
\v 27 Ha ꞌãmãnex xatꞌax nõy te mõꞌãpxop hap, nũy Topa puꞌ haxyãꞌ, tu ꞌãmnĩy tu xohix puxix mõꞌhap, puyĩy yãy yõg hãpkummuk mĩyꞌax xaxogãꞌ, xix tikmũꞌũn xohix yõg mĩyꞌax xaxogãhãꞌ. Pa Yeyox yãy pu mõꞌhap ꞌohnãg, hãpkummuk mĩy ꞌohnãg tuꞌ, tu tu yãy mũn hõm, tuꞌ xok ꞌãmnĩy puxet ꞌĩhãꞌ, nũy tikmũꞌũn yõg hãpkummuk mĩyꞌax xaxogãꞌ, pu tu kux.
\v 28 Ha Mõyyex teꞌ xat, pu tik xop yĩmõgatux, pu tikmũꞌũn nõ ꞌãmãnex xatꞌax, haꞌ max miax, pa Topa te hãmꞌãktux xex ꞌũk-nãy tuꞌ, tuk-tok yã hãmyãykutnãhãꞌ, yã Topak-tok max xeꞌẽgnãg mõ kumaꞌ mõg.
\c 8
\s Yeyox yã yũmũ yõg ꞌãmãnex xeꞌẽgnãg
\p
\v 1 Yeyox mũn yũmũ yõg ꞌãmãnex xeꞌẽgnãg, yã pexkox tuꞌ xip, tu Topa xexka xeꞌẽgnãg yĩpxeꞌe hãꞌ yũm, nũy nõm mũtik tu xexkaꞌ. Yã hãmyũmmũg xeꞌe ꞌõhõm.
\v 2 Hõmã hãmyãxatamuk xohix ꞌĩhã Yoneo yõg ꞌãmãnex te Topa pet hã mõꞌnãhãꞌ, tikmũꞌũn te nõm pet mĩy topixxax kaꞌok hã, pu tu xokxop hep ꞌũm nũnnãy. Pãyã yũmũ yõg ꞌãmãnex xatꞌax, tuꞌ hãm pexkox kopah, yã nõꞌõm Topa xipꞌax xeꞌeꞌ, tu pexkox tuꞌ yũm.
\p
\v 3 Topa te ꞌãmãnex xatꞌax xop xohix yĩmõgatux, pu hãpxop xix xokxop mõꞌhap, nũy Topa pu haxyãꞌ, nũy Topa puꞌ hõm, yĩy yũmũ yõg ꞌãmãnex xatꞌax hãm kamah, nũy Topa pu yãy mũn hõm, nũy yũmũg xohix pupi tu xok.
\v 4 Pax pu Yeyox hãm tuꞌ xihip, puxix yũmũꞌã hã ꞌãmãnex hok. Yã Mõyyex teꞌ xat, pu mõnãyxop Nemi mõkputox tu tuꞌ hãm, nũy mõ xokxop hãp, nũy Topa puꞌ haxyãꞌ, ha Yeyox yã Nemi yõg xop hãꞌ puknõg.
\v 5 Ha Topa te Mõyyex xat, pu topixxax kaꞌok xexka hã Topa pet mĩy, tuꞌ mĩyꞌax yũmmũgãhãꞌ, haꞌ mĩy, haꞌ pet te pexkox yõg pet hã pet komut.
\v 6 Pa Yeyox te ꞌãmãnex yõg hãpxopmãꞌax mĩy, tuꞌ mãynãg mĩy, yã ꞌãmãnex xatꞌax xeꞌẽgnãg, huꞌ paꞌax tup mĩy Topa mũtik, xix tikmũꞌũn mũtik, Topa te hãmꞌãktux xex haꞌ paꞌax mĩy. Yã paꞌax hittap yõg max miax, ha paꞌax tup yõg max xeꞌẽgnãg.
\p
\v 7 Pax puꞌ paꞌax hittap tu kaꞌok xeꞌẽgnãg, puxix paꞌax tup mĩy hok,
\v 8 pãyã Topa te tikmũꞌũn yũmmũg, ha hãpxopmã kummuk punethok, yĩy Topa te:
\q “ꞌÃmnĩy mõꞌnãp-tup, ꞌĩhã ꞌãte paꞌax tup mĩyꞌax,
\q ꞌIyaet yõg tikmũꞌũn mũtik mĩyꞌax,
\q xix Yona yõg tikmũꞌũn mũtik mĩyꞌax.
\q
\v 9 Yãꞌ paꞌax nõy, ꞌũtup, ha ꞌãte nõm hittap mĩy mõnãyxop mũtik,
\q nũy mõgãꞌ, nũy hãpxexka ꞌEyit tu ꞌũxupmãꞌ,
\q pa mõnãyxop tek xaxok, tuk paꞌax xaxok kamah,
\q yĩy ꞌãtep-tup nõg,” kaxĩy.
\m
\v 10 Tu xe hãmꞌãktux, hu:
\q “ꞌÃte paꞌax tup mĩy putup,
\q tu ꞌIyaet yõg tikmũꞌũn mũtik yõgnũ hãmꞌãktux xex putup,
\q ꞌãte tikmũꞌũn putox tuꞌ xex putup, xiꞌ kuxa kopaꞌ xex,
\q ꞌãte nõm tikmũꞌũn hã Topah,
\q hak mũn hã yã tikmũꞌũn xeꞌe, ꞌũyãnãn tuꞌ.
\q
\v 11 Tute hãmyũmmũg putup, yãꞌ xohix tek yũmmũg putup,
\q huꞌ nõy yũmmũgãꞌax hitop tuꞌ,
\q ꞌa hãmꞌũm ꞌãktux putupꞌah, nũy: ‘Topa yũmmũg.’ Kaxĩy.
\q Yãꞌ xohix tek yũmmũg putup, ꞌũk-tõgnãg xop tek yũmmũg nãm,
\q ha mõktu xexka xop tek yũmmũg nãm.
\q
\v 12 Ha ꞌãte hãpkummuk mĩyꞌax xaxogãp-tup, pu tu kux,” kaxĩy.
\p
\v 13 Hãpxop kutut te yãy xaxogã tãmnãg, Topa teꞌ paꞌax hittap kux, ha yãy xaxogãꞌax, yĩy paꞌax tup mĩy.
\c 9
\s Tikmũꞌũn kuxa teꞌ yẽy Topa keppah
\p
\v 1 Nõm paꞌax hãmãxap te Topa pu nũꞌxup yũmmũgãhãꞌ, ha tikmũꞌũn te Topa pet mĩy, nũy Topa pu nũ ꞌãxup, ꞌũpaꞌax teꞌ pet mĩy yũmmũgãhãꞌ,
\v 2 Ha Topa pet kox hã mõxakux hãmãxap, ha topixxax kaꞌok xexka hãꞌ mĩy, haꞌ xuxetꞌax mĩy, hu: Topa xipꞌax. Kaxĩy. Ha kuyãnãm kup yũm, xix mĩmpe xup, ha mĩmpe yĩmũ pãm mãm, tu Topa keppaꞌ mãm.
\v 3 Ha topixxax max te hãmyĩkox nõy mõꞌyĩnnĩn, haꞌ pet kox ꞌãxetꞌax Topa xipꞌax xeꞌẽgnãg,
\v 4 haꞌ kopaꞌ xup mĩmpeꞌ, tu pipkup yãnãm hã mõꞌnĩy, pu mĩm xax mõꞌhap, xix mõ xokxop hap, nũy Topa pu haxyãꞌ, haꞌ paꞌax yõg mĩpkox yũm, ha pipkup yãnãm hãꞌ mĩy, tu mĩpkox kopa nax mãynãg yũm, haꞌ xitꞌax ꞌãxetꞌax mãnãg xex nax kopah, yã pãm putuk, xix mõnãyxop ꞌAnãm yõg kup tõy xex mĩpkox kopah. Hõmã mĩxux te nõm kup tõy nak tuꞌ xokax, Topa te hãmꞌãktux hah, haꞌ xatꞌax yõg mĩkaxxap yũm mĩpkox kopah, haꞌ xatꞌax kaxꞌãmiꞌ mĩkaxxap tuꞌ.
\v 5 Ha mĩpkox yĩmũꞌ pip ꞌũyõnnãꞌĩꞌ 2, yã pexkox yõg yõnnãꞌĩ hãꞌ komut xop, tu Topa xipꞌax yũmmũgãhãꞌ, ꞌũyĩmãg kup te mõꞌkox nĩy, ꞌõnte Topa te hãpkummuk mĩyꞌax xaxogãhãꞌ, pu tu kux. Yãꞌ puxiꞌ. ꞌÃte hãmꞌãktux nõy putup kamah.
\p
\v 6 ꞌÃmnĩy xohix ꞌĩhã ꞌãmãnex xop te Topa xipꞌax hã mõxakux, nũy ꞌãmãnex yõg hãmꞌax hã tuꞌ hãm,
\v 7 pa Topa xipꞌax xeꞌẽgnãg hã mõxa ꞌohnãg, yã ꞌãmãnex xatꞌax puxehnãg teꞌ xipꞌax xeꞌẽgnãg hã mõꞌnãhãꞌ, tu hãmyãxatamuk yõg ꞌãmnĩy puxet, ꞌĩhã Topa xipꞌax xeꞌẽgnãg hã mõꞌnãhãꞌ, nũy xokxop hep ꞌãta nũnnãy ꞌũxipꞌax kopah, tu yãy mũn pu nũꞌnãhãꞌ, xix tikmũꞌũn xohix pu nũꞌnãhãꞌ, pu Topa tikmũꞌũn yõg hãpkummuk mĩyꞌax xaxogãꞌ, tikmũꞌũn te hãpkummuk mĩy hãmyũmmũg ꞌohnãg tuꞌ, ha Topa teꞌ xaxogãhãꞌ.
\v 8 Ha kaxĩy Topa Koxuk te yũmũꞌã hãmyũmmũgãhã nõmhã, ꞌũyĩy yũmũg yũmmũg max, yã ꞌãmãnex xatꞌax te xokxop hep nũꞌnãhãꞌ, puyĩy tu hãm mõnãy, pãyã tikmũꞌũn nõy te Topa xipꞌax xeꞌẽgnãg hã mõxakux ꞌohnãg, yã Topa teꞌ xat hok, pu xipꞌax xeꞌẽgnãg hã mõ tu xakux hok.
\v 9 Ha ꞌãmãnex te Topa pu mõꞌãpxop hap, xix xokxop, pu tikmũꞌũn Topa pu nũꞌãktettex, pãyã ꞌap te puxiꞌah, yã tikmũꞌũn kuxa ꞌũm tupmã ꞌohnãg.
\v 10 Yã Mõyyex teꞌ xat hok, puꞌ xitꞌax ꞌũm mã hok, xiꞌ xat hok, pu xoꞌopꞌax ꞌũm xoꞌop hok, xiꞌ xat, pu yãy xax pix, xix kãnẽy pix, nũy Topa pu maxnãꞌ, pãyã yãy kuxa tupmã ꞌohnãg, huꞌ hip, puyĩy Topaꞌ kuxa kummuk tupmãꞌ.
\p
\v 11 Yĩy Kunnix nũn, tu yãyhã ꞌãmãnex xohix xatꞌax, tu yũmũꞌã hãmmaxnãhãꞌ, tu Topa pet xeꞌe kopaꞌ hãm, ha tikmũꞌũn te nõm pet mĩy ꞌohnãg, ꞌap hãm xexka tuꞌ yũmꞌah, yã pexkox tuꞌ yũm.
\v 12 Ha Kunnix nũn, tuꞌ pet hã mõꞌnãhã yãp-xet, tu Topa xipꞌax xeꞌẽgnãg kopa mõꞌnãhãꞌ, tuꞌ hep ꞌãta nũꞌnãhãꞌ, pãyã ꞌa mũnũytut hep ꞌãta ꞌũm nũꞌnãꞌah, xix ꞌa mot hep ꞌãta ꞌũm nũꞌnãꞌah. ꞌÃmhok. Yã yũmũg pupiꞌ xok, tu yãy hẽp ꞌãta nũꞌnãhãꞌ, nũy yũmũg kuxa kummuk ꞌũm xit, nũy tu mõ kuxa max tat ꞌũyãnãn tuꞌ, pu yũmũg hi xeꞌe, ꞌap kuxꞌah.
\v 13 ꞌÃmãnex xop nõy te mot hep ꞌãta nũꞌnãhãꞌ, xix mũnũytut pit hep ꞌãte nũꞌnãhãꞌ, tu mũnũytut kutok pit mõꞌhap Topa puꞌ, tu xogyĩn putok nũꞌxok tikmũꞌũn tuꞌ, pu tu nõ xax maxnã Topa puꞌ, nũy tu hãpkummuk xit, pu tikmũꞌũn Topa keppa nũꞌãktettex, nũy kuxaꞌ yẽy.
\v 14 Topa Koxuk hi xeꞌẽgnãg, tu Kunnix kaꞌogãhãꞌ, pu tu xok mĩpkupnix tuꞌ, tu yãy hep ꞌãta nũꞌnãhãꞌ, tu yãy mũn hõm Topa puꞌ, nũy tikmũꞌũn pupi tuꞌ xok. Ha xokxop hep ꞌãta kaꞌok kutõgnãg, tu tikmũꞌũn kuxa kummuk tupmã hok, pa Yeyox yãy hep ꞌãta kaꞌok xexkaꞌ, tu yũmũg kuxa kummuk xit, tu yũmũ yõg hãpxopmãꞌax hitop kuxyãꞌ, nũy yũmũg kaꞌogãꞌ, yũmũꞌãte hãpxopmã Topa xeꞌẽgnãg puꞌ.
\p
\v 15 Yĩy Kunnix te tikmũꞌũn xapit, pu Topa hã yãy xape xop, tuꞌ paꞌax tup hãꞌ xape, puyĩy Topa nõm pu hãmmaxnãꞌ, tute nõm xop xãnãhãꞌ, nũy tu hãmmaxnã mõꞌkumaꞌ mõg, tu hãmꞌãktux xex tap. Kunnix xok, hu tikmũꞌũn mõy pu mõg Topa yĩkãgnãg hã, nũy hãpxopmã kummuk kux, yã hõmãꞌ mĩy, ꞌũpaꞌax hittap xip, ꞌĩhãꞌ mĩy.
\p
\v 16 Tikmũꞌũn xok putup, ha yãy xape teꞌ yõg hãpxop xohix pop putup, yĩy tappet tu kaxꞌãmiꞌ, pu tikmũꞌũn xexka xop mõꞌkupix, nũy yũmmũg, nũy tuꞌ xape xop pu hãpxop popmãꞌ. Haꞌ xok, puxiꞌ xexka xop ꞌũyõg hãpxop popmãꞌ, tik xape xop puꞌ popmãꞌ, tappet tuꞌ kaxꞌãmi tap hah, tu taꞌ xok xeꞌeꞌ.
\v 17 Nõm tikmũꞌũn hiꞌ, ha taꞌ pop ꞌohnãg, paꞌ xape xop hip, pu tu xok, ha tappet puꞌuk. Pa tikmũꞌũn xok, puxix tappet kaꞌok, tuꞌ yõg hãpxop popmãꞌax yũmmũgãhãꞌ, pu tu xape xop pop.
\v 18 Hã kaxĩy ꞌũpaꞌax hãmãxap teꞌ xat, pu xokxop kix Topa pu, nũy hep ꞌãta nũnnãy.
\v 19 Mõyyex teꞌ xatꞌax ꞌãktux hãmãxap tikmũꞌũn puꞌ, tuk-nãy tu mũnũytut pit xix mot kix, tuꞌ hep ꞌãta kanop kõnãg hã, tu nũꞌ xok, pu topixxax nõm ꞌãta xup, nũy nũꞌxok, xix mĩxux ꞌixop hã nũꞌxok, tuꞌ xatꞌax yõg tappet yĩmũ nũꞌnãhã, xix tikmũꞌũn xohix yĩmũ nũꞌnãhãꞌ,
\v 20 tu: “Topa yõg paꞌax kaꞌok, yĩy ꞌãte nũhũ hep ꞌãta nũꞌxok, xa ꞌãxop xohix pẽnãꞌ, nũy ꞌãyĩpkox pi paꞌax tuꞌ,” kaxĩy.
\v 21 Kaxĩy Mõyyex teꞌ xat, puꞌ hep nũꞌnã Topa pet kopah, xix Topa xakꞌax yõg kãnẽy tu nũꞌxok.
\v 22 Yãꞌ xat, puꞌ hep ꞌãta nũꞌxok, pu hãpxop tu max Topa puꞌ. ꞌŨhep ꞌãta puxehnãg hã Topa te hãpkummuk mĩyꞌax xaxogãhãꞌ, pu tu kux.
\s Yã Kunnix te yũmũg kuxa kummuk xit, ꞌũxok tuꞌ
\p
\v 23 Mõnãyxop Mõyyex teꞌ xat, pu Yoneo ꞌãmãnex hep ꞌãta nũꞌxok Topa pet yõg hãpxop tuꞌ, puyĩy tu hãpxop maxnã Topa puꞌ. Tu xokxop hep nũꞌxok, nũy hãpxop maxnãꞌ, xix xogyĩn putok nũꞌnãhãꞌ, nũy tikmũꞌũn xax maxnã Topa puꞌ, pãyã nõm hãmmaxnãꞌax te tikmũꞌũn kuxa kummuk tupmã ꞌohnãg, yĩy Kunnix xok, yũmũg pupiꞌ xok, nũy yũmũg kuxa maxnã Topa puꞌ, tu yãy hep ꞌãta nũꞌnãhãꞌ, nũy pexkox yõg hãpxop maxnã Topa pu kamah.
\v 24 Yĩy Kunnix xok hãmãxap, tuk-nãy tu pexkox yõg pet xeꞌe hã mõktu mõꞌnãhãꞌ, tikmũꞌũn te nõm mĩy ꞌohnãg, ha Topa yĩpxeꞌe haꞌ yũm nũy yũmũg pupi hãmꞌãktux Topa puꞌ.
\v 25 Yoneo xop yõg ꞌãmãnex xatꞌax te Topa xipꞌax hã mõꞌnãhãꞌ, tu hãmyãxatamuk xohix ꞌĩhã mõꞌnãhã, tu hãmyãxatamuk yõg ꞌãmnĩy tup-xet ꞌĩhã mõꞌnãhãꞌ, tu Topa xipꞌax kopa mõꞌnãhãꞌ, tu xokxop hep ꞌãta tat ꞌũxeheh. Pa Kunnix xok puxehnãg,
\v 26 nũy tuꞌ xũy puxet, tuꞌ xok, nũy tikmũꞌũn kuxa kummuk tu xit, ꞌap xep xokꞌah, yãꞌ kux, yãꞌ puxiꞌ.
\v 27 ꞌŨhep xop xohix xakix puxet, hak-nãy tu Topa teꞌ yõg hãpxopmãꞌax kopit putup, ꞌok pe hãpxopmã max, ꞌok peꞌ kummuk, tuꞌ kummuk xop pu hãpkummugãp-tup, nũy tu yãnãn, tuꞌ max xop pu hãmmaxnãp-tup ꞌũyãnãn tuꞌ.
\v 28 Ha kaxĩy Kunnix xok ꞌãmnĩy puxet ꞌĩhãꞌ, nũy hãm xexka xohix yõg hep xop xohix pupi tuꞌ xok, nũy hãpkummuk mĩyꞌax xaxogãꞌ, ꞌap xep xok putupꞌah, pãyã putpuꞌ nũn putup, nũy yãy yõg tikmũꞌũn hãm tuꞌ mõy, puyĩy nũ mũtik tu pip kaꞌok, tuꞌ hip nõmhã, pu nũꞌ.
\c 10
\p
\v 1 Mõyyex te ꞌIyaet yõg tikmũꞌũn xat, pu mõ xokxop hap, nũy haxyãꞌ, haꞌ xat, nũy tikmũꞌũn pu hãmyũmmũgãꞌ, puyĩy ꞌãmãnex xeꞌe hip, nõm te tikmũꞌũn pupiꞌ xokꞌax. Yã Yeyox Kunnix mũn yũmũ yõg ꞌãmãnex xeꞌe, tu yũmũꞌã hãmmaxnãhãꞌ. ꞌÃmãnex xop te mõ xokxop hap pax, yã hãmyãxatamuk xohix ꞌĩhã mõꞌhap, tu tikmũꞌũn kuxa kummuk tupmã ꞌohnãg. Yã tikmũꞌũn xak, nũy yãy kuxa maxnã Topa puꞌ, puyĩy Topa yĩkãgnãg hãꞌ mõg, pãyã yãy kuxa tupmã hok.
\v 2 Pax pu tikmũꞌũn hãpxop mõꞌhapꞌax hãꞌ yãy kuxa tupmã Topa puꞌ, puxix hãpkummuk mĩyꞌax xaxogãꞌ, ha hãpxop mõꞌhapꞌax kuxyãhãꞌ,
\v 3 pa tikmũꞌũn te hãpxop mõꞌhap, nũy Topa pu haxyãꞌ, ha mõꞌhapꞌax te yãy yõg hãpxopmãꞌax kummuk xutigãhãꞌ, yĩꞌ xaxok ꞌohnãg, tu hãmyãxatamuk xohix hã xe mõꞌhap, tu xe mõꞌhap,
\v 4 Mũnũytut hep ꞌãta, xix mot hep ꞌãta te hãpkummuk mĩyꞌax xaxogã ꞌohnãg.
\p
\v 5 Yĩy Kunnix nũn, tu yĩy hãm tuꞌ nũn ꞌĩhã, tuꞌ Tak Topa pu hãmꞌãktux, hu:
\q “ꞌÃtak, xatep-tupꞌah tikmũꞌũn te xokxop mõꞌhap, nũy tu haxyãꞌ,
\q pak yĩn mĩy.
\q
\v 6 ꞌAp ꞌãkuxa hittupꞌah, ꞌĩhã tikmũꞌũn te ꞌãkeppa mõꞌhap,
\q puyĩy hãpkummuk mĩyꞌax xaxogãꞌ.
\q
\v 7 Yĩy ꞌãte hãmꞌãktux, hu: ꞌYãk xip, Topah,
\q tuk nũn, nũy ꞌõg putupꞌax mĩy, ha kaxĩy tik teꞌ xatꞌax yog tappet tu kaxꞌãmiꞌ, nũy ꞌũgmũn ꞌãktux,” kaxĩy.
\p
\v 8 Tu hãmꞌãktux hãmãxap, hu: “Xatep-tupꞌah tikmũꞌũn te xokxop mõꞌhap, nũy haxyãꞌ, ꞌAp ꞌãkuxa hittupꞌah, ꞌĩhã tikmũꞌũn te ꞌãkeppa mõꞌhap, nũy hãpkummuk mĩyꞌax xaxogãꞌ,” kaxĩy. Tup-tup ꞌokpaꞌ xatꞌax teꞌ xat.
\v 9 Tuk-nãy tu hãmꞌãktux, hu: “Yãk xip, Topah, tuk nũn, nũy ꞌõg ꞌũm putupꞌax mĩy,” kaxĩy. Yã kaxĩy Topa te mõꞌhapꞌax hitop kuxyãhãꞌ, nũy Kunnix ꞌãktux ꞌũyãnãn tuꞌ, ha yũmũg pupiꞌ xok.
\v 10 Yeyox Kunnix te Topa puꞌ yĩpkox pip, hu yũmũg kuxa kummuk tupmãhãꞌ, yã ꞌãmnĩy puxet ꞌĩhãꞌ xok, tu yũmũg pupiꞌ xok mĩpkupnix tuꞌ, ꞌa xep xokꞌah.
\p
\v 11 Yoneo yõg ꞌãmãnex xop xohix hãm, tu ꞌãmnĩy xohix ꞌĩhãꞌ hãm Topa pet kopah, tu mõ hãpxop hap punethok, xix xokxop mõꞌhap punethok, nũy Topa puꞌ haxyãꞌ, pa mõꞌhapꞌax te yũmũg kuxa tupmã hok. ꞌÃmhok.
\v 12 Yĩy Yeyox xok yũmũg pupiꞌ, ꞌãmnĩy puxehnãg ꞌĩhãꞌ xok, tu xehomip xok ꞌohnãg, yãꞌ puxiꞌ, ꞌũkux, ha Topa yĩpxeꞌe hãꞌ yũm, nũy nũ mũtik tuꞌ xexkaꞌ,
\v 13 tuꞌ hip, pu Topa tu ta tu gãyxop nõãꞌ, tuꞌ kummugãhã ꞌũyãnãn tuꞌ, puyĩꞌ xohix yĩpkox pi Yeyox xatꞌax puꞌ.
\v 14 Ha Yeyox xok puxet, nũy tikmũꞌũn kuxa tupmã, pu kuxa tu max Topa puꞌ, yĩy hõnhã Topa yĩkãgnãg hãꞌ pip.
\p
\v 15-16 Ha Topa Koxuk te hãmꞌãktux hãmãxap, tu tikmũꞌũn kuxa tupmãꞌax ꞌãktux, hu:
\q “Hãmyãxatamuk xohix nõg, kopxix paꞌax nõy mĩy,
\q yã Topa teꞌ xuktux, tu yã yõgnũ xatꞌax xex putup,
\q tikmũꞌũn putox tuꞌ xex putup, xiꞌ kuxa kopaꞌ xex putup,” kaxĩy.
\p
\v 17 Tuk-nãy tu hãmꞌãktux, hu: “ꞌÃteꞌ xaxogãp-tup ꞌõg hãpkummuk mĩyꞌax, xix ꞌõg hãpkummugãꞌax ꞌãteꞌ xutigã ꞌohnãg,” kaxĩy.
\v 18 Tu hãpkummuk mĩyꞌax xaxogãhãꞌ, haꞌ kux, ꞌap xe mõꞌhapꞌah, ꞌap xehomi xokxop mõꞌhap putupꞌah. Yãꞌ puxiꞌ.
\s Topa yĩkãgnãg hã yũmũg pip
\p
\v 19 Yĩy yũmũg mõg Topa keppah, nũy nũ mũtik hãmꞌãktux. Yã Yeyox Kunnix xok yũmũg pupiꞌ, nũy yũmũg nũnnãꞌ, ꞌũyĩy yũmũg mõg, nũy Topa mũtik hãmꞌãktux, tu kuxãnõg ꞌohnãg.
\p
\v 20 Hõmã topixxax max te nõm hãmyĩkox mõꞌyĩnnĩn, pu tikmũꞌũn mõ tu xakux hok, ha Yoneo yõg ꞌãmãnex xatꞌax teꞌ xut, nũy mõnãy, ha kaxĩy Yeyox xok, yũmũg pupiꞌ xok, nũy yũmũg mõgã Topa yĩkãgnãg hãꞌ, nũy yũmũg hi xeꞌẽgnãg.
\v 21 Ha yũmũ yõg ꞌãmãnex xeꞌẽgnãg te Topa pet xeꞌẽgnãg kopaꞌ xat, tu pexkox tuꞌ xat, ꞌũxuxetꞌax Yeyox Kunnix.
\v 22 ꞌÃpu yũmũ mõg Topa yĩkãgnãg hã, pãyã yã yũmũg kuxap-xet, tu yãy pu mõꞌãmã hok, ꞌũmãm kaꞌok tuꞌ, Topa te yũmũ yõg hãpkummuk mĩyꞌax xaxogã hah, pu tu kux, ha yũmũg putox pix, ꞌũ yũmũ hãpxopmã kummuk kux, ꞌũyĩy yũmũg hãpxopmã max ꞌũyãnãn tuꞌ.
\v 23 Topa te hãmꞌãktux xex, ꞌãpu yũmũg kuxa mãm kaꞌok nõm hãmꞌãktux kopah, Topa te yã koit ꞌohnãg, yĩy ꞌũgmũꞌãteꞌ hip, pu Topa yũmũꞌã pexkox yõg hãpxop popmãꞌ, ha yũmũg nõy puꞌ xuktux.
\v 24 ꞌÃpu, yũmũg xape kuxa kaꞌ, nũy ꞌũm hãk tehet, ꞌũp-tup pax tuꞌ, nũy tu xape hã hãmmaxnãꞌ.
\v 25 ꞌŨkuxa mãm kaꞌok xop te yãykotĩnnãꞌ pip, ha ta mõy kamah, nũy nõm xop mũtik piꞌ, nũy Topa pu hãmꞌãktux. ꞌŨxaxok hok. Tikmũꞌũn nõy mõgꞌax kuxyãhãꞌ, ꞌaꞌ maxꞌah. Pãyã ꞌãmõg pax, nũy ꞌãnõy mũtik Topa tu ꞌãkax, nũy mõ yãy nĩynãm. Yã yũmũg xuxyã nũn putup, yĩy yãy tu nũꞌnãꞌ pax.
\p
\v 26 Topa te xa hãmyũmmũgãhãꞌ, yĩy ꞌãxop teꞌ yõg hãmꞌãktux xeꞌe yũmmũg, hu hãpkummuk mĩy kux, nũy xehomip hãpxopmã kummuk hok, ꞌũp-tup huꞌ mĩy hok, ka Topa ꞌõg hãpkummuk mĩyꞌax xe xaxogã hok. Pãyãꞌ xax, xa Topa pu hãpxopmã max. Yã Kunnix xok tap, xayĩy ꞌãxop hãpkummuk mĩyꞌax kux.
\v 27 Hu ꞌãkuxãnõg, yã Topa te ꞌõg hãpxopmãꞌax kopit putup, tu kuxap xeꞌe hãꞌ gãy xop kix xexkap-tup, yã Topa teꞌ yĩpkox hok xop nõãp-tup kuxap xeꞌe hã.
\v 28 Yoneo yõg tikmũꞌũn hittap te Mõyyex yõg xatꞌax puꞌ yĩpkox ꞌohnãg, tu hãpkummuk mĩy pax, tikmũꞌũn nõy 2, pe 3 teꞌ pẽnãꞌ, puxiꞌ xexka xop nõm putex, tuꞌ kuxa ka ꞌohnãg.
\v 29 Topa te putep-tep mĩy putup, ꞌĩhã tikmũꞌũn te nõm kutok putup nõg? Yã nõm kummuk xop te Yeyox hep ꞌãta kutõgnãg peꞌpaxex, hu: “Yãk-tõgnãg, pu Yeyox Kunnix ꞌũgkuxa tupmãꞌ,” kaxĩy. ꞌŨyĩpkox hok, puxix Topaꞌ yãnãn tuꞌ kummugã xexkaꞌ, hãpkummuk xexka mĩy haꞌ. Yã Topa Koxuk te mõꞌyãy xeꞌẽgnãg, ha tikmũꞌũn te Topa Koxuk kummuk ꞌãktux, tuꞌ mãnõg, puxix Topaꞌ yãnãn tuꞌ kummugã xexkaꞌ, hãpkummuk xexka mĩy hah.
\v 30 Yũmũꞌãte hãmyũmmũg, tu Topa te hãmꞌãktux yũmmũg, ha: “ꞌÃte hãpkummugãp-tup ꞌũyãnãn tuꞌ, nũy tu nõy yõg kummuk mĩyꞌax tu pago,” kaxĩy. Tu xe: “Topa te yãy yõg tikmũꞌũn yõg hãpxopmãꞌax kopit putup, nũy nõ hãpxopmãꞌax yũmmũg, ꞌok pe max, ꞌok pe kummuk,” kaxĩy.
\v 31 Topa gãy tikmũꞌũn tuꞌ, tikmũꞌũn te hãpxopmã kummuk tuꞌ gãy, yĩy ꞌãkuxãnõg, nũy Topa xeꞌẽgnãg gãyã hok.
\p
\v 32 Hõmã Topa te xa hãmyũmmũgãhãꞌ, ha ꞌãxop xũy, haꞌ kummuk xop te ꞌãkummugãhãꞌ, pãyã ꞌãkuxa tuknõg ꞌohnãg. ꞌŨxaxok hok.
\v 33 Haꞌ gãy xop teꞌ yãg mãnõg, tuꞌ xũygãhãꞌ, pu tikmũꞌũn xohiꞌ pẽnãꞌ, haꞌ yãg nõy xũy ꞌũnõy xop mũtik, yã ꞌãkuxap-xet ꞌãnõy kuxa mũtik.
\v 34 Tu kanet kopaꞌ pip xop kuxa kaꞌ, tu ꞌãkuxa hittup ꞌĩhãꞌ kummuk xop te ꞌõg hãpxop xohix hãꞌ xupxet, hãmyũmmũg tu hã hittup, yã ꞌõg hãpxop mãynãg pip kaꞌok pexkox tuꞌ, haꞌ nõg ꞌohnãg.
\v 35 Yĩy ꞌãkuxa tuknõg hok, ka Topa yõg putat xax, ha Topa te xa hãmmaxnã xexkap-tup ꞌũyãnãn tuꞌ.
\v 36 Hãpxopmãꞌax kaꞌok hãꞌ tot, nũy Topa pu ꞌãyĩpkox piꞌ, nũy nõm putupꞌax mĩy, xayĩy pexkox yõg hãpxop pop, yã Topa te xa hãmꞌãktux xex.
\v 37 Yĩy Topa yõg tappet te:
\q “Nãy. Hãpxip kutõgnãg kopxik nũn putup mõꞌkaꞌok.
\q
\v 38 Ha tikmũꞌũn te hãmyok mĩy, tuꞌ kuxa mãm kaꞌok,
\q puxix tu hi xeꞌeꞌ, pa tikmũꞌũn te yõgnũ putat xak,
\q nũy putpuꞌ mõg, kopxik kuxa hittup ꞌohnãg,” kaxĩy.
\p
\v 39 Pa yũmũꞌãte Topa yõg putat xak putupꞌah, hu yãy ꞌũm nõãp-tupꞌah. ꞌÃmhok. Yũmũg kuxa mãm kaꞌok, nũy yũmũg hi xeꞌe, nũy Topa yõg putat hã yũmũg mõ kumak mõg.
\c 11
\s Tikmũꞌũn kuxa mãm kaꞌok Topa kopah
\p
\v 1 Yũmũg kuxa mãm kaꞌok Topa kopah, hu hãmmax hip, pu Topa pexkox yõg hãpxop yũmũꞌãꞌ popmãꞌ, ha ta yũmũꞌãte nõm hãpxop pẽnã hok nõmhã.
\v 2 Yã mõnãyxop hittap kuxa mãm kaꞌok kamah, yĩy Topa tep-tup pax.
\p
\v 3 Yũmũg kuxa mãm kaꞌok, hu hãmyũmmũg, yã Topa te pexkox mĩy xix hahãm, yã hãpxop xohix mĩy, hãmꞌãktuxꞌax hãꞌ mĩy, tu hãpxop pẽnã hok hã hãpxop mĩy, pu tikmũꞌũn pẽnãꞌ.
\p
\v 4 Yã mõnãyxop hittap ꞌAmeo kuxa yũm kaꞌok, hu mõ kahnẽn hap, nũy Topa pu haxyãꞌ, ha Topa tep-tup pax, pãyãꞌ taknõy Kãyĩy yõg mõꞌhapꞌax putup ꞌohnãg. Ha ꞌAmeo te hãmyok mĩy, ꞌũkuxa yũm kaꞌok tuꞌ, ha Topa tep-tup pax, ha yũmũꞌã hãmyũmmũgãhãꞌ.
\p
\v 5 Xix mõnãyxop hittap ꞌẼnõg kuxa yũm kaꞌok, huꞌ xok ꞌohnãg. Yã Topa te hãm tuꞌ xut, nũy pexkox haꞌ mõgãꞌ, ha tikmũꞌũn te ꞌẼnõg xak, nũy tu pẽnãꞌ, paꞌ pẽnãꞌah, haꞌ kux. Ha Topa yõg tappet te: “Topa te ꞌẼnõg putup pax,” kaxĩy.
\v 6 Tikmũꞌũn kuxa yũm hok, puxix Topa nõm putup nõg. Pãyã tikmũꞌũn kuxa yũm kaꞌok tu: “Yã Topa xip!” kaxĩy, tu Topa xak, puxix Topa nõm tikmũꞌũn ha hãmmaxnãꞌ.
\p
\v 7 Xix mõnãyxop hittap Nõe kuxa yũm kaꞌok, hu Topa te nõm pu hãmyũmmũgãhãꞌ, tu ꞌãmnĩy mõꞌnãꞌax yõg hãpxopmãꞌax yũmmũgãhãꞌ, haꞌ yĩpkox xip, tu mĩpkox xexka mĩy, kõnãg xexka yĩmũꞌ mõgãhãꞌ, pu nõm mõnãy, nũy kopaꞌ piꞌ, xiꞌ xape xop teꞌ kopaꞌ piꞌ, nũy kõnãg hã mõꞌ tutnã hok, puyĩy tu xakix hok. Ha kaxĩy Nõe te Topa hãꞌ puknõg xop yãꞌ kummuk ꞌãktux, ꞌũkuxa mãm ꞌohnãg hah, ha Topa te Nõe kuxa tupmãhãꞌ, ꞌũkuxa yũm kaꞌok hah.
\p
\v 8 Xix mõnãyxop hittap ꞌAmanãm te Topa teꞌ xãnãꞌax ꞌãpak, tuꞌ yĩpkox xip, huꞌ mõg hãptox ha, Topa te hãmꞌãktux xex hah. Haꞌ kuxa yũm kaꞌok, tu yãy yõg hãm nĩm, tu piyãꞌ mõg yũmmũg, ꞌokpaꞌ mõg,
\v 9 tuꞌ kuxa yũm kaꞌok, huꞌ puknõg xop mũtik tihiꞌ, ha Topa te ꞌAmanãm pu nõm hãm xexka hõm putup. Tu topixxax kaꞌok hãꞌ pet, ꞌũk-tok ꞌIyak mũtik, hak-tok Yako pet kama topixxax kaꞌok hã, ha Topa te nõm mũtik hãmꞌãktux xex kamah, nũy tu hãpxexka hõm.
\v 10 Yã ꞌAmanãm teꞌ hip, nũy Topa yõg kõmẽn xeꞌe tuꞌ xihip, ha pexkox tuꞌ yũm kõmen, haꞌ koxyõy hok, Topa teꞌ mĩy hah.
\p
\v 11 Xix mõnãyxop hex Xat kuxa yũm kaꞌok kamah, huk-tok put, tu ta kutut, tu Topa yõg hãmꞌãktux xex yũmmũg, tuꞌ kuxa yũm kaꞌok, pu Topa ꞌũk-tok putnã.
\v 12 Hã kaxĩy ꞌAmanãm kutut, tuꞌ puꞌuk, pãyãꞌ mõkputox xohix xexka punethok, mãyõnnãg putuk, xix hãpkux yõg ꞌãmot xohix putuk.
\p
\v 13 Ha nõm xop kuxa mãm kaꞌok, tu mõktuꞌ xakix, tu Topa yõg hãpxop ꞌaꞌ popꞌah, pa hãptox tuꞌ pẽnãhãꞌ, tu hãmyũmmũg, tu yãy mũn puknõg ꞌãktux, tu hãmyãxatamuk xohix hã hãpkumep, tuꞌ pet ꞌohnãg hãm xexka tuꞌ,
\v 14 tu hãmꞌãktux, tu yãy yõg hahãm xak pexkox tuꞌ,
\v 15 ꞌa putpuꞌ mõg putupꞌah. Pax pu yãy yõg hãm hittap xax, nũy putpuꞌ mõg, puxiꞌ mõg,
\v 16 pap-tup nõg, tu pexkox tu hãm nõy xak, nũy ta tuꞌ piꞌ, ha Topa te nõm tikmũꞌũn hã Topa xeꞌẽgnãg, tu nõm tu yãyhãhup ꞌohnãg, hu kõmẽn xeꞌẽgnãg mĩy pexkox kopa, tu ta tu tuꞌ pip kaꞌok.
\p
\v 17 Xix ꞌAmanãm kuxa yũm kaꞌok, yĩy Topa teꞌ yõg hãpxopmãꞌax kopit, tuꞌ xat, puk-tok ꞌIyak mõꞌhap, pu Topa ꞌAmanãm kuxa kopit, nũy ta tu hãmyũmmũg, ꞌok pe ꞌAmanãm yĩpkox xip, ꞌok peꞌ yĩpkox ꞌohnãg. Hõmã Topa te hãmꞌãktux xex tap, ha ꞌAmanãm mõkputox punethok ꞌãktux, pa ꞌAmanãm yĩpkox xip, tu mõk-tok puxehnãg hapꞌax,
\v 18 ꞌĩhãꞌ kuxa yũm kaꞌok hãmꞌãktux xexꞌax kopah, ha: “ꞌÃk-tok ꞌIyak hã ꞌãmõkputox tu punethok,” kaxĩy.
\v 19 Pa ꞌAmanãm te Topa yũmmũg, tu tikmũꞌũn putpu hĩnnãꞌax yũmmũg, Pax puk-tok xok, puxiꞌ tak putpuꞌ put, ha ꞌAmanãm kuxa yũm kaꞌok.
\p
\v 20 Xix mõnãyxop ꞌIyak kuxa yũm kaꞌok, hu Topa te hãmmaxnãꞌax ꞌãktux ꞌũk-tok Yako puꞌ, xik-tok ꞌEyao puꞌ xuktux,
\p
\v 21 Xix mõnãyxop Yako kuxa yũm kaꞌok, tuꞌ xok putup, ꞌĩhãk-tok Yoye kutok pu hãmmaxnãꞌax ꞌãktux, tu kup tõy tuꞌ xup, ꞌĩhãꞌ kuxa teꞌ yẽy Topa keppah.
\p
\v 22 Xix mõnãyxop Yoye kuxa yũm kaꞌok kamah, tuꞌ xok putup, ꞌĩhã ꞌãmnĩy mõꞌnãꞌax ꞌãktux, tu tikmũꞌũn te hãpxexka ꞌEyit tu nũꞌpaꞌax ꞌãktux, tuꞌ xat, puꞌ yõg xokxax mõꞌtat, nũy hãpxexka nõy tu nõ hãpkot.
\p
\v 23 Ha tik te hãpxexka ꞌEyit yõg tikmũꞌũn xohix xat, tu xonat xop xat, pu ꞌIyaet yõg tikmũꞌũn kutok pit xop xohix kix, ꞌĩhãꞌ tut teꞌ put, ha mõnãyxop Mõyyex mũg tak, xiꞌ mũg tut tek-tok pit put, tuꞌ xaptop, tu mẽy 3 hãꞌ xaptop, puyĩy xonat xop pẽnã hok. Yã mãynãg kakxop, yĩꞌ tak xiꞌ tut teꞌ xatꞌax pu yĩpkox ꞌohnãg, tuꞌ xaptop, puyĩꞌ gãy xop ꞌũk-tok putex hok.
\p
\v 24 Xix Mõyyex kuxa yũm kaꞌok, tuꞌ tuk, tu mõktu xiptap, tuꞌ xatꞌax kutok hex nĩm, pu tikmũꞌũn te yãꞌ xatꞌax kutok hex kutok ꞌãktux hok,
\v 25 Yãp-tup, tu Topa yõg tikmũꞌũn mũtik xũy putup, tu hãpkuteꞌex kummuk putup nõg,
\v 26 tu hãmpeꞌpaxex, hu: “Yãꞌ max Topa yõg yĩmõgatux xop hãk xũy, pãyãꞌ kummuk, ꞌãte hãpxexka ꞌEyit yõg tayũmak xohix pop,” kaxĩy. Tu pexkox yõg hãpxop puxet xak, puyĩꞌ paꞌ.
\p
\v 27 Yãꞌ kuxa yũm kaꞌok ꞌĩhã hãpxexka ꞌEyit nĩm, tu tik teꞌ xatꞌax yĩpkutuk ꞌohnãg, xiꞌ gãyꞌax yĩpkutuk ꞌohnãg, tu mõꞌkumaꞌ mõg, tu Topa ꞌãtigãhãꞌ, ꞌĩhãꞌ pẽnã hok,
\v 28 tuꞌ kuxa yũm kaꞌok, tu ꞌãmuk xexka hãmãxap mĩy ꞌũxuxetꞌax Nõãꞌyẽn, haꞌ xat, pu hãmyãxatamuk xohix ꞌĩhãꞌ mĩy, tuꞌ xat, pu kahnẽn hep ꞌãta hã mõꞌyĩnnĩnꞌax muk, pu pexkox yõg nũꞌkutnãꞌax mõ tu nã hok, nũy tikmũꞌũn kutok hãmãxap xohix kix hok.
\p
\v 29 Xix ꞌIyaet yõg tikmũꞌũn kuxa mãm kaꞌok, hu kõnãg xexka ꞌÃta xak, ha hãmnak, tuꞌ xup ꞌohnãg, ꞌĩhã tikmũꞌũn teꞌ xak. Ha ꞌEyit yõg xonat xop xak putup, ha ta kõnãg xexka te mõꞌnĩy, ha kõnãg hãp nũm, tũ kopap-nũm.
\p
\v 30 Xix ꞌIyaet yõg tikmũꞌũn kuxa mãm kaꞌok, tu kõmẽn xexka Yenikot yĩmap hãꞌ mõg, tu xeꞌ mõg, tu mõktu xohix te 7, ha kõmẽn hãmꞌãta kaꞌok, tu kõmẽn xohix yĩmap, tu yãy koxyõy, haꞌ: Noꞌ!
\v 31 Xiꞌ xotit Haꞌap kuxa yũm kaꞌok, ha ta ꞌIyaet yõg tik 2 te kõmẽn puknõg Yenikot haꞌ nũn, nũy puknõg yõg kõmen pẽnãꞌ, ha Haꞌap te tik pẽnãꞌax 2 xaptop, puyĩy xonat xop kix hok, yĩy Haꞌap ꞌa xokꞌah, pãyã Yenikot yõg tikmũꞌũn xohix xakix.
\p
\v 32 ꞌÃte putep mũn ꞌãktuxꞌax? Yã hãmꞌãktux tox ꞌãtep-tupꞌah, nũy Yineꞌãm ꞌãktux, xix Manak ꞌãktux, xix Xãnxãm ꞌãktux, xix Yepte ꞌãktux, xix Namix ꞌãktux, xix Xãmõꞌeo ꞌãktux, xix Topa pupi hãmꞌãktuxꞌax xop ꞌãktux.
\v 33 ꞌŨxohix kuxa mãm kaꞌok, hu hãpxexka yõg tikmũꞌũn xohix mũtik yãytuk-mĩy, tu hãm pahaꞌ, haꞌ mõg, ha hãpxopmã max, yĩy Topa te tuꞌ hãpxop popmãhãꞌ, hãmꞌãktux xex tu tuꞌ popmãhãꞌ, ha Topa teꞌ kaꞌogãhãꞌ, pu tu hãmgãy yĩkox mõꞌyĩnnĩn, puꞌ kix hok,
\v 34 ha kuxap xexka kuxyãhãꞌ, tuꞌ xupahaꞌ, pu mĩkax xexka hãp-tex hok, haꞌ puꞌuk, ha Topa teꞌ kaꞌogãhãꞌ. Yãꞌ puknõg xop mũtik yãykix tu mõktu hãm pahaꞌ.
\v 35 Ha ꞌũn kuxa mãm kaꞌok, yĩꞌ xape te putpu hiꞌ, ꞌũxakix kaꞌok, tu putpuꞌ hiꞌ.
\p Haꞌ gãyxop teꞌ yãg xũygãhãꞌ, tuk-teꞌex kummuk, tu mõktuꞌ kix, haꞌ xupmãp-tup ꞌohnãg, nũy tu hi xeꞌẽgnãg.
\v 36 Haꞌ gãyxop teꞌ yãg puꞌ hupmãhãꞌ, tuꞌ kix kakixnãg, tuꞌ yãg nõy hĩy, nũy kanet kopa nũꞌxok,
\v 37 tuꞌ yãg nõy kix mĩkaxxap putux hã, xiꞌ yãg nõy pot xehot hãꞌ, xiꞌ yãg nõy kix mĩkax xexka hã. Ha hãpkumep hitop tuꞌ, tu kahnẽn xokxax mõꞌtat, xix mot xokxax mõꞌtat, tu hãmhok, haꞌ xũygãhãꞌ, tuk-teꞌex kummuk,
\v 38 ha hãm panip tu hãpkumep, tu yĩktix pepiꞌ mõg, tu hãpkox kopaꞌ pet. Tuꞌ max, ha hãm xexka yõg Topa hãꞌ puknõg xop kummuk.
\p
\v 39 Haꞌ kuxa mãm kaꞌok, yĩy Topa tep-tup pax, tu nõm pu hãmꞌãktux xex, pa Topa yõg hãpxop ꞌap popꞌah.
\v 40 Yã Topa te nõm xop hipmãhãꞌ, pup-xehnãg hãꞌ pop hok, pãyãꞌ hip, nũy yũmũg mũtik pexkox yõg hãpxop xohix pop.
\c 12
\s Topa te yũmũꞌã hã ꞌÃtak
\p
\v 1 Yã nõm tikmũꞌũn xohix teꞌ hip, ꞌũyĩy yũmũg kuxa mãm kaꞌok, yũmũg xape hittap kuxa mãm kaꞌok putuk, ꞌũyĩy yũmũg xohix pexkox yõg hãpxop pop. Yũmũg mõg mõꞌkaꞌok Topa yõg putat hã, kopxix hãpxop putux nĩm, nũy mõg xupmãn. Yã kaxĩy yũmũꞌãte hãpkummuk mĩy hok, nũy Topa puk yĩpkox piꞌ. Yã hãpkummuk mĩyꞌax te hãpxop putux putuk, yĩy mĩy hok, ꞌũyĩy yũmũg mõg mõꞌkaꞌok Topa yõg putat hãꞌ, tu kuxãnõg ꞌohnãg.
\v 2 Yeyox pe yũmũg paxeh, ꞌĩhã yũmũg mõg. Yã Yeyox mũn te yũmũg kuxa mãmmãhãꞌ, ꞌũyĩy mãm kaꞌok nõm kopah, ha yũmũg kaꞌogãhãꞌ, ꞌũmõg Topa yõg putat hã yũmũg. Yeyox kuxa tuknõg ꞌohnãg, tuꞌ xok mĩpkupnix tuꞌ, yũmũg pupiꞌ xok, tuꞌ xũy xexkaꞌ, pãyã yãy peꞌpaxex, hu: “Yãk xũy kutõgnãg,” kaxĩy, ꞌĩhãꞌ gãy xop nõm puꞌ hupmãhaꞌ. Pãyã Yeyox kuxa hittup xexkaꞌ, tu Topa hip tuꞌ, pu Topa pexkox yõg hãpxop popmãꞌ, ha Topa yĩpxeꞌe hãꞌ yũm nõmhã, nũy yãy ꞌÃtak mũtik tu xexka pexkox kopah.
\p
\v 3 Yeyox yãy xũyꞌax pe tu paxeh, xiꞌ kummuk xop gãyꞌax pe tu paxeh. Yã Yeyox xũy punethok hãꞌ tot, ꞌũyĩy kamah yũmũg kuxa tuknõg hok, nũy Topa yõg putat xak hok.
\v 4 ꞌÃxop te yãy putupꞌax mĩy kutõgnãg. Topa pu ꞌãyĩpkox pip, pãyã kama yãy putupꞌax mĩy. Yãꞌ max xa Topa putupꞌax puxet mĩy, xayĩy hãpkummuk mĩyꞌax xohix tu kux.
\p
\v 5 ꞌOk ꞌãxop te Topa yõg hãmꞌãktux xaxok? ꞌÃxop yã Topa hã ꞌãk-tok xop, yĩy xa hãmꞌãktux, hu:
\q “Xonnẽꞌ, ꞌũgꞌãpax! ꞌÃkuxa tuknõg hok ꞌãte ꞌãmãnõg hah.
\q
\v 6 Yã ꞌãmãnõg, nũy xa hãmyũmmũgãꞌ, xayĩy ꞌãmax,
\q ꞌãmũn yãk mũn hã ꞌãk-tok xop tuꞌ,
\q ha mõꞌãyãy xeꞌẽgnãg,” kaxĩy.
\p
\v 7 ꞌÃxũy, tu xa hãꞌ tot, Topa yã ꞌãxop hã ꞌÃtak, tu xa hãmyũmmũgãhãꞌ, ꞌõg ꞌãtak putuk. ꞌOk xip kakxop ꞌũm, ꞌũyõg ꞌãtak te nõm mãnõg hok? ꞌAp xipꞌah.
\v 8 Pax pu Topa ꞌãmãnõg hok, yĩy ta ꞌãxop ꞌa Topak-tokꞌah, hak-tok xohix mãnõg, nũy tu hãmyũmmũgãꞌ, puyĩy hãpxopmã max ꞌũyãnãn tuꞌ.
\v 9 Yũmũg tak xohix te yũmũg mãnõg, nũy tu hãmyũmmũgãꞌ, ha yũmũg yĩpkox pip, tuꞌ tak max pekpaxex. Yĩy ꞌãpu yũmũg Tak Topa pu ꞌãyĩpkox piꞌ, xayĩy ꞌãhi xeꞌẽgnãg.
\v 10 Yũmũg tak te yũmũꞌã hãmyũmũgãhãꞌ, ꞌĩhã yã yũmũꞌã hã kakxop, hãmyok tu hãmpeꞌpaxex hah, pa Topa te hãmyũmmũgãhãꞌ ꞌũ yũmũg tu max, nũy Topa putuk yũmũg tu max xeꞌẽgnãg.
\v 11 Topa te yũmũg mãnõg, ha yũmũg kuxa hittup ꞌohnãg, pa hãpxip kutõgnãg, ꞌĩhã yũmũg kuxa mãm, ha yũmũꞌãte hãpxopmã max, tu hãmyok mĩy ꞌũyãnãn tuꞌ.
\s Topa te hãmyũmmũgãhãꞌ
\p
\v 12 ꞌÃyok, ꞌãknĩhã xihip, ꞌãkuxa tuknõg hok, nũy Topa yõg putat hã mõg.
\v 13 Tu hãmyok hã mõg, nũy tikmũꞌũn puꞌuk mõgã max, nũy nõm kaꞌogãꞌ.
\p
\v 14 Tikmũꞌũn te ꞌãyĩmap hãꞌ pip, yĩy nõm mũtik yãytuk-mĩy hok, pãyã hãpxopmã max, xayĩy Topa pẽnãꞌ. Yã hãpxopmãꞌax kummuk xop te Topa pẽnã hok.
\v 15 Topa te xa hãmmaxnãhãꞌ, ꞌõg pa ꞌãtiꞌ, nũy Topa yõg putat xax hok, xa tikmũꞌũn kummugã hok, xix xũygã hok, ka ꞌãxop mĩnta xũy putuk, nõm te tikmũꞌũn xũygãhãꞌ, yã ꞌãnõy puꞌ xũygã hok.
\v 16 ꞌÕg pa ꞌãtiꞌ, nũy ꞌãnõy hã xupxet hok, xix Topa yõg hãpxop ꞌãktux kummuk hok, ꞌEyao putuk. Tik hittap ꞌEyao yã mõnãyxop ꞌIyak kutok hãmãxap, tu yãy tak yõg hãpxop xohix popꞌax. Ha Topa te hãmꞌãktux xex tap, tu ꞌIyak kutok hãmãxap ha hãmmaxnãꞌax. Pãyã ꞌEyao kummuk, tuꞌ tak yõg hãpxop peꞌpaxex ꞌohnãg, ꞌap hãmmaxnãꞌax ꞌũm putupꞌah, yĩy ꞌũxohix nõy yãnãn, tuꞌ taknõy kuhmõy Yako mũtik nõy yãnãn, nũy ꞌãmuk kutĩgnãg paꞌ, ꞌũp-tup xũy tuꞌ.
\v 17 ꞌÃxop te mõnãyxop yõg hãmꞌãktux yũmmũg max. Hãpxip ꞌĩhã ꞌEyao te hãmpeꞌpaxex, tu yãy tak yõg hãpxop xak, xix hãmmaxnãꞌax xak, hu xe yã nõꞌ nõy yãnãn putup, tuꞌ potahaꞌ, tuꞌ xak, pãyãꞌ kux. ꞌAp xeꞌ nõy yãnãnꞌah.
\p
\v 18 ꞌÃxop te Topa yĩkãgnãg hã ꞌãpip. Yã ꞌIyaet yõg tikmũꞌũn hittap te yĩktix Xinãy kakaꞌ pip, tu hãpxahĩgnãg tuꞌ pip, tu yĩktix mõꞌkãmnãg pẽnãhãꞌ, tu Topa yõg kuxap xexka pẽnãhãꞌ, tu hãptup ꞌĩhã hãpkoxtap pẽnãhãꞌ, xix texgãy tuꞌ yãnãm pẽnãhãꞌ, tu kuxãnõg xexkaꞌ. Pãyã ꞌãxop te nõm hãpxopmã kaꞌok pẽnã ꞌohnãg nõmhã, yã ꞌãkuxãnõg ꞌohnãg.
\v 19 Ha nõm tikmũꞌũn te mĩxux xop tu kãyãꞌax ꞌãpak, xix Topa yĩy ꞌãpak, tu hãmꞌãpak, tu kuxãnõg xexkaꞌ, huꞌ xak, puyĩy tu yĩy hok,
\v 20 Topa yĩy hãꞌ tot ꞌohnãg hah, haꞌ xat, hu: “Yĩktix ꞌãpit hok, pe tikmũꞌũn, pe xokxop, ka mĩkaxxap hã tikmũꞌũn ꞌãtux, tu ꞌãp-tex!” kaxĩy.
\v 21 Tikmũꞌũn te Topa yõg hãpxopmã kaꞌokꞌax pẽnãhãꞌ, tuꞌ kuxãnõg xexkaꞌ, yĩy Mõyyex te: “ꞌÃte yãy puxuꞌux, ꞌũgkuxãnõg tuꞌ!” kaxĩy.
\p
\v 22 Pa ꞌãxop kuxãnõg ꞌohnãg, yã yĩktix Xiãm tu ꞌãmõxahaꞌ, Topa xeꞌẽgnãg yõg kõmẽn tu ꞌãmõxahaꞌ, pexkox yõg kõmẽn Yenoyanẽn tu ꞌãmõxahaꞌ, tu pexkox yõg nũꞌpok xop xohix punethok pẽnãhãꞌ,
\v 23 xix Topak-tok xop te mãxap pẽnãhãꞌ, ha yãy tu nũꞌnãhãꞌ, tuꞌ kuxa hittup xexkaꞌ. Yã Topa te nõm xop ꞌãxetꞌax kaxꞌãmi pexkox kopah, pu yãy mũtik tu pip kaꞌok pexkox tuꞌ, xix ꞌãxop te Topa pẽnãhãꞌ, haꞌ pa te hãmyũmmũg, tuꞌ hep xop xohix yõg hãpxopmãꞌax kopit putup, tu tikmũꞌũn yõg mĩyꞌax xohix tu pago. Xix tikmũꞌũn xakix xop pẽnãhãꞌ, ha hãmyok mĩy, yãꞌ kuxa tup, Topa teꞌ tupmãhãꞌ, pu tu kuxa max xeꞌẽgnãg.
\v 24 Xix Yeyox pẽnãhãꞌ, haꞌ paꞌax tup mĩy, tuꞌ xok yũmũg pupiꞌ, tu yãy hep ꞌãta nũꞌnãhã mĩpkupnix tuꞌ, yã tik hittap Kayĩy gãy, tuꞌ taknõy ꞌAmeo putex, tuꞌ yõg hep ꞌãta nũꞌnãhãꞌ, pãyã Yeyox hep ꞌãta nũꞌnãhãꞌ, pu hãpkummuk mĩyꞌax xaxogãꞌ.
\p
\v 25 ꞌÕg pa ꞌãti! Tikmũꞌũn yĩpkox ꞌohnãg, puxix tu xakix, tu mõxa hok, nũy Topa mũtik tu pip kaꞌok, yĩy ꞌãpu yũmũg yĩpkox pip Topa yõg hãmꞌãktux puꞌ, nũy yã yũmũg hi xeꞌeꞌ.
\v 26 Hõmã Topa yĩyꞌax te hãm nuhuk, pa hõnhã Topa te: “Hãpxip ꞌĩhã ꞌãte xe hãm nuhuk putup, ha mõktu pexkox yãy nuhuk kamah,” kaxĩy.
\v 27 Tu xe hãm nuhuk ꞌãktux, ha ta hãm xexka yõg hãpxop nõãp-tup, pu pexkox yõg hãpxop tu pip kaꞌok.
\p
\v 28 Yĩy ꞌũyã yũmũg kuxa te Topa max ꞌãktux. Yã Topa mũtik yũmũꞌãteꞌ xat putup, tuꞌ xat kux ꞌohnãg. Yũmũꞌãte Topa max ꞌãktux, tu nõm pu yũmũg nũktettex, nũy yũmũg kuxaꞌ yẽy, yã Topa tep-tup kaxĩy.
\v 29 Hamũn. Yũmũ yõg Topa kaꞌok, tu kuxap putuk. Yã kuxap te hãpxop xohix nõãꞌ, ha kaxĩy Topa te tikmũꞌũn kummuk nõãp-tup, nũy ꞌũmĩyꞌax kummuk tu pago.
\c 13
\p
\v 1 ꞌÃxape xop putup pax, nũy tu nõm putup kux hok. ꞌÕhõm yã Kunnix yõg tikmũꞌũn, yĩy ꞌãxop hã ꞌãxapeꞌ.
\v 2 ꞌÃxape puknõg xapit, putnũ, nũy ꞌãpet kopa xihip. Hõmã tikmũꞌũn hittap teꞌ puknõg xop xãnãhãꞌ, nũy yãy pet tuꞌ piꞌ, nũy nũy mõꞌnĩynãm, tu hãmyũmmũg hok, ꞌĩhã pexkox yõg nũꞌpok xop xãnãhãꞌ, ha tikmũꞌũn pet kopa mõꞌxip.
\v 3 Kanet kopaꞌ pip xop xaxok hok, pãyã mõꞌnĩynãm, xa tep-tup kamah, pu ꞌãnõy ꞌãhĩyꞌax xaxok hok. Xix ꞌãxape xop xũyꞌax xaxok hok, nũy tu mõꞌnĩynãm. Xatep-tup kamah pu ꞌãnõy ꞌãxũy xaxok hok, nũy mõꞌãnĩynãm.
\v 4 Yãꞌ max pu yãytax, nũy tu xetut mũtik yãy kep mũg nõm, xiꞌ yĩpxox mũtik yãy kep mũg nõm. Topa teꞌ nõy hãꞌ xupxet xop kopit putup, xiꞌ xonnix xop kopit putup, nũy nõ hãpkummugãꞌ.
\p
\v 5 ꞌOk tayũmak putup te ꞌãp-tex? ꞌŨxupkumĩy hok, xix ꞌãnõy yõg hãpxop putup hok, xayĩy ꞌõg hãpxop tu ꞌãhittup, yãꞌ puxiꞌ. Topa te xa hãmꞌãktux xex, hu: ꞌÃte yã ꞌãnĩm ꞌohnãg, nũy ꞌãmũtik ꞌãtiꞌ,” kaxĩy.
\v 6 Yĩy yũmũg kuxãnõg ꞌohnãg, nũy tu hãmꞌãktux, hu:
\q “Topa te mõgnĩynãm, yĩy ꞌũgkuxãnõg ꞌohnãg.
\q Yã tikmũꞌũn ꞌũm tek kuxa kummugã hok,” kaxĩy.
\p
\v 7 ꞌÃpẽnã maxꞌax xop xaxok hok, Topa yõg hãmꞌãktux xaꞌ xuktux hah, haꞌ kuxa mãm kaꞌok Yeyox kopah ꞌĩhãꞌ xakix, yĩy xax, xa ꞌãkuxa yũm kaꞌok kamah, nũy yã ꞌãnõy yõg hãpxopmãꞌax tat.
\v 8 Yeyox Kunnix xip kaꞌok. Yã hõmã hãmyãxatamuk xohix hãꞌ xip kaꞌok, xix hõnhãꞌ xip kaꞌok, xix hãptup xohix ꞌĩhãꞌ xip kaꞌok putup mõꞌkumaꞌ mõg. Yamũn yĩnmũn, tu yãyhãꞌ nõy ꞌohnãg, tu yãy yãnãn ꞌohnãg.
\v 9 Tikmũꞌũn te hãmyũmmũg kummuk hã xa hãmyũmmũgãp-tup, ha ta ꞌãyĩpkox hok, pu ꞌãmõgã kummuk hok. Yã Topa te yũmũg kuxa kaꞌogãhãꞌ, ꞌũtu max, pu yũmũgꞌã hãmmaxnãhãꞌ. Haꞌ puknõg xop te ꞌãxat, tuꞌ xat hok, xaꞌ xit hok, yĩy ꞌãkaꞌogã ꞌohnãg.
\p
\v 10 Mõyyex te Yoneo yõg ꞌãmãnex xop xat hok, pu xogyĩn mõꞌhap ꞌax mã hok, tikmũꞌũn te Topa pu nõm xogyĩn mõꞌhap, nũy haxyãꞌ,
\v 11 haꞌ yõg ꞌãmãnex xatꞌax te xokxop hep ꞌãta tat Topa xipꞌax xeꞌẽgnãg tuꞌ, pu Topa yã tikmũꞌũn yõg hãpkummuk mĩyꞌax xaxogãꞌ, pu tu kux. Ha xokxop yĩn tat, Yoneo yõg tikmũꞌũn teꞌ pipꞌax kũnãpaꞌ tat, nũy mõy mõꞌhap, haꞌ nõg.
\v 12 Yĩy Yeyox xok kõmẽn xexka kũnãpa kamah, nũy yãy hep ꞌãta nũnnãy, pu Topa tikmũꞌũn kuxa kummuk tupmãꞌ, pu tu kuxa max.
\v 13 ꞌÃpu yũmũ mõg Yeyox hah, nũy Yeyox pe mõg, nũy yũmũg xũy kamah. Hõmã Yeyox xũy, ꞌũkummuk xop te nõm puꞌ hupmãhãꞌ, haꞌ xũy, ha kaxĩy yũmũg xũy kamah, haꞌ kummuk xop te yũmũꞌãꞌ hũpmãhãꞌ.
\v 14 Hãm xexka yõg kõmẽn xohix nõãp-tup, ꞌãpu yũmũꞌãte pexkox yõg kõmẽn xax, yã nõm kõmẽn xip kaꞌok, yĩy yũmũꞌãteꞌ xak, nũy pexkox ha yũmũg mõg.
\v 15 Hu yũmũꞌãte yãy mũn popmãhã Topa puꞌ, nũy nõm max tãmnãg ꞌãktux, tu Topa pu hãmꞌãktux, puyĩꞌ xupax, hu: ꞌÃmax xeꞌẽgnãg, Topah! Kaxĩy.
\v 16 Hãpxopmã max, tuꞌ xaxok hok, nũy ꞌãnõy hã ꞌãtehet. Yã Topa tep-tup.
\p
\v 17 ꞌÃpẽnã max xop pu ꞌãyĩpkox piꞌ, nũy nõ xatꞌax mĩy. Nõm xop hãm Topa puꞌ, tu ꞌãpẽnãnãꞌ pip, tu Topa pupi ꞌãpẽnã max, xa ꞌãxop mõ kuma mõg Topa yõg putat hã. ꞌÃyĩpkox piꞌ, puxix ꞌãpẽnã max, nũy yãy hãpxopmãꞌax tu kux. ꞌÃyĩpkox pip hok, puxix yãy pu hãpkummugãꞌ, ha ꞌãpẽnãꞌax xop yãy hãpxopmãꞌax tuꞌ kuxa hittup ꞌohnãg.
\p
\v 18 Topa pu hãmꞌãktux pax, nũy ta tu tuꞌ kax, puk mũg kaꞌogãꞌ. Hak mũg kuxa te yãy yĩkopit, tu yãy yõg hãpxopmãꞌax ꞌãktux. Yãk mũ ꞌãteꞌ xak nũy hãpxopmã max pax.
\v 19 Tu xa tuꞌ xak nãm, xa ꞌãxop Topa tu xax, puyĩy mõgkutnã kaꞌok ꞌãhah.
\s Topa pu hãmꞌãktux
\p
\v 20 Topa te yũmũg xuxyã Yeyox putpu hĩnnãhãꞌ, ha Topa yõg tikmũꞌũn pẽnãnãꞌ xip. Yãꞌ pẽnã maxꞌax xexkaꞌ. Kaxĩy tik te yãy yõg kahnẽn xop pẽnã max, yĩy Topa teꞌ paꞌax tup mĩy, ha Yeyox xok, tuꞌ hep ꞌãta nũꞌnãhãꞌ, pu Topa paꞌax mĩy. Haꞌ paꞌax kuxyã ꞌohnãg.
\v 21 Pũyã Topa ꞌãkuxa mãmmãꞌ, xix xa hãmmaxnãꞌ, xa ꞌãyĩpkox piꞌ. Pũyã Topa ꞌãkaꞌogãꞌ, xayĩy hãpxopmã max, nũy Topa yõg putupꞌax mĩy. Pũyã Topa yũmũg kuxa tupmã, ꞌũ kuxa tu max, tuk putup tuꞌ. Pũyã tikmũꞌũn xohix Kunnix max xeꞌẽgnãg ꞌãktux, nũy tuꞌ xuktux mõꞌkumaꞌ mõg.
\s Tute hãmꞌãktux kux
\p
\v 22 ꞌŨkxape xop, ꞌãte xa tuꞌ xak, xa ꞌãpax, nũy tuk ꞌãhãꞌ tot. ꞌÃte xa kaxꞌãmiꞌ, nũy ꞌãkꞌogãꞌ, xa ꞌãkuxa tuknõg hok. ꞌAp toxꞌah nũhũ tappet.
\v 23 ꞌÃte xa hãmꞌãpakꞌax max ꞌũm ꞌãktux, xayĩy hãmyũmmũg. Yã yũmũg xape Timõn te kanet tuꞌ xip tap, haꞌ xut pu mõg. ꞌũg haꞌ nũn, kopxix mõꞌkutnã ꞌãxop hah, puyĩy ꞌãpẽnã.
\p
\v 24 ꞌÃpẽnã maxꞌax xop xohix pu ꞌãneo, xix Topa yõg tikmũꞌũn xohix pu ꞌãneo. Hãpxexka ꞌItat yõg yũmũg xape xop te ꞌãneo kamah.
\p
\v 25 Puyã Topaꞌ xohix ha hãmmaxnãꞌ. Tu ta tuꞌ kux.