\id JAS  - Maxakalí NT [mbl] (Brazil) -2011 bd
\h TIAK
\toc1 Tiak
\toc2 Tiago (Tg)
\mt TIAK TE KAXꞌÃMIꞌ
\c 1
\p
\v 1 ꞌŨgmũn Tiak. Topa pu ꞌãte hãpxopmãhãꞌ, xix yũmũg xuxyã Yeyox Kunnix pu ꞌãte hãpxopmãhãꞌ, tu Topa yõg tikmũꞌũn te hãpxexka xohix tuꞌ pip xop pu ꞌãneo.
\s ꞌÃkuxa yũm kaꞌok, nũy tu hãmyũmmũg
\p
\v 2 ꞌŨkxape xop, ꞌãkuxa hittup ꞌĩhã ꞌãxũy xexkaꞌ,
\v 3 yã ꞌãkuxa mãm kaꞌok, huꞌ xũyꞌax hãꞌ tot, nũy Topa yõg putat xak hok,
\v 4 nũy ꞌãmõg kuma ꞌãmõg, nũy Topa hã ꞌãxiptap xop, nũy tu hãpxopmã max xeꞌeꞌ.
\v 5 Tikmũꞌũn te hãmyũmmũg hok, puxix Topa tuꞌ xax, pu tu hãmyũmmũgãꞌ, ha Topa hittup, tu hãmyũmmũgã punethok, tu mõktu xohix, yã Topa mũn max, tuꞌ hok hã tikmũꞌũn xohix pu hãmyũmmũgãhãꞌ,
\v 6 yĩy ta tuꞌ xax, ꞌĩhã ꞌãkuxa yũm kaꞌok ꞌõm kopah, tu ꞌĩkopit hok. Tikmũꞌũn kuxa yũm hok te kõnãg xexka mahapꞌax putuk, tuꞌ kuxa kopa mahapnãm, tuꞌ yũm ꞌohnãg.
\v 7 Topa te nõm xop pu hãmyũmmũgã ꞌohnãg,
\v 8 ꞌũpuꞌuk hah, ꞌap-tox puxetꞌah Kunnix putox mũtik, ꞌap hãpxopmãꞌax yũmmũgꞌah.
\s ꞌŨp-texop xexka xiꞌ hok xop
\p
\v 9 Pũyãk xape hok hittup, ꞌĩhã Topa te nõm ha hãmmaxnãhãꞌ.
\v 10 Pũyãk xape tup-texop hittup kamah, ꞌihã Topa te hãmhõgnãgãhãꞌ. Yãꞌ yõg tayũmak yãyxaogãꞌax, tu mõktuꞌ xok, tu mĩnnut puxet putuk, ꞌũhok tuꞌ.
\v 11 Mãyõn kaꞌok, tu mĩxux mõꞌhap, haꞌ nak, tu tapmãhãꞌ, yĩy mĩnnut nãhã hãm tuꞌ, tuꞌ mãm, tuꞌ nõg, ha kaxĩy ꞌũp-texop xexka xok.
\s Hãpkummugãꞌax
\p
\v 12 Tikmũꞌũn xũy, puxix Topa yõg putat xax hok, pãyãꞌ kuxa hittup. Yã Topa te hãpxopmãꞌax xohix kopit, tuꞌ kopit kux, ꞌĩhã ꞌũhĩnnã xeꞌẽgnãg, tu ta tu hãmꞌãktux xex, nũy hĩnnãꞌ, Topap-tup pax hah.
\v 13 Pũyã tikmũꞌũn Topa kupex hok, ꞌĩhã hãpkummuk mĩy putup, ꞌĩhãꞌ xũyꞌax hãꞌ tot putupꞌah, hu: “Topa tek xapit, ꞌũ hãpkummuk mĩy,” kaxĩy. Yãꞌ koit. Topa te hãpkummuk mĩy ꞌohnãg, tu tikmũꞌũn xapit ꞌohnãg, puyĩy hãpkummuk mĩy.
\v 14 Pa tikmũꞌũn te hãpkummuk mĩy, ꞌũp-tup tuꞌ mĩy, tu yã mõꞌãmãꞌ, nũy mĩy.
\v 15 Tu hãpkummuk peꞌpaxex, tuꞌ mĩy putup, hu hãpkummuk mĩy, tuꞌ mĩy pax, tu mõktuꞌ xok, tu Topa hãꞌ puknõg xeꞌeꞌ.
\p
\v 16 ꞌŨkxape xop, yãy pu koit hok.
\v 17 Topa te mãyõn xop xohix mĩy, tuꞌ mãynãg mĩy pexkox tuꞌ, yã pexkox yõg hãpxop xohix mãynãg. Yã hãmmax xohix Topa teꞌ mĩy, tu pexkox tu yũmũꞌã hãmmaxnãhãꞌ. Yã Topa mũn max xeꞌẽgnãg, tu yã yĩnmũn, tu yãy yãnãn ꞌohnãg, xix yãyhãꞌ nõy ꞌohnãg kamah.
\v 18 tu yũmũg putup, huꞌ xat, pu yũmũg tut yũmũg put, tu hãpxeꞌe ꞌãktux, ha yũmũg kuxa mãm kaꞌok nõm hãmꞌãktux kopah, ha yũmũg xe xanãhãꞌ, ꞌũyĩy yũmũg yãyhã Topak-tok xop te mãxap, pu hãpxop nõy xohix Topa hãk-nãy tuꞌ xop.
\s Hãmꞌãpax, nũy hãpxopmã max
\p
\v 19 ꞌŨkxape xop, ꞌũxaxok hok: ꞌÃnõy yõg hãmꞌãktux ꞌãpax punethok, nũy hãmꞌãktux kutõgnãg, yã ꞌãgãy hok.
\v 20 Tikmũꞌũn gãy, puxix hãpxopmã kummuk, ha Topa tep-tup nõg, hãmyok mĩyꞌax putup tuꞌ.
\v 21 Yĩy hãpkummuk mĩy hok, xix hãpxopmã kummuk hok, yãy mũn kutõgnãg peꞌãpaxeh, yã Topa yõg hãmꞌãktux te ꞌãkopaꞌ xip, yĩy ꞌĩpkox piꞌ, nũy ꞌãkuxa hi xeꞌeꞌ.
\p
\v 22 Yãyhã ꞌãmõꞌãmã hok. Topa yõg hãmꞌãktux ꞌãpax, xa ꞌĩpkox piꞌ, nũy hãpxopmã max.
\v 23 Tikmũꞌũn te nõm hãmꞌãktux ꞌãpak, tuꞌ yĩpkox hok, puxix tikmũꞌũn hãmyũmmũg ꞌohnãg putuk, ha ꞌĩypex hã tute yãy pẽnãhãꞌ, tu yãy pa pẽnãhãꞌ, tu hãmyũmmũg: Yã yãy pa xeꞌeꞌ,
\v 24 pa putpuꞌ mõg, tu yãy pa xaxok, haꞌ kux. Ha kaxĩy tikmũꞌũn te hãmyũmmũg hok te Topa yõg hãmꞌãktux xaxok.
\v 25 Pa tikmũꞌũn te hãmyũmmũg, tuꞌ xatꞌax max xeꞌẽgnãg ꞌãpak, nũy hãmyũmmũg max, puyiꞌ mãynãg mĩy, puxiꞌ xatꞌax hãmyũmmũgãꞌ, puyĩy tuꞌ hiꞌ xeꞌe. Topa te nõm tikmũꞌũn ha hãmmaxnãp-tup.
\p
\v 26 Tikmũꞌũn te: “ꞌŨgkuxa te Topa xak,” kaxĩy, pãyãꞌ yĩy kummuk pax, puxix tu Topa xak ꞌohnãg, tu yã yãyhã mõꞌãmãꞌ,
\v 27 Pa tikmũꞌũn te Topa yũmũg Tak xak xeꞌeꞌ, puxix ꞌũn hok mãm xop hã tu tehet, xix kakxop yãy tak pip hok xop hã tu tehet, nũy nõm ha hãmmaxnãꞌ, tu Topa hãꞌ puknõg xop yõg putat kummuk xak, nũy Topa yõg putat hãꞌ mõg kumaꞌ mõg.
\c 2
\s ꞌŨxohix yã yãy putuk
\p
\v 1 ꞌŨkxape xop, ꞌãkuxa mãm kaꞌok yũmũg xuxyã Yeyox Kunnix kopah, haꞌ max xeꞌẽgnãg, yĩꞌ hok xop xix ꞌũp-texop xexka putup pax, yãꞌ nõy putuk yũmũg xuxyã puꞌ.
\v 2 Pa tikmũꞌũn yãg teꞌ hok xop putup nõg, tup-texop xexka putup pax, hap-texop te ꞌãxop mũtik yãy tu nũꞌnãhãꞌ tuꞌ xax max mõꞌtat, tu pipkup kõnãmõg tat yĩpkutok hãꞌ, ha tik hok nũn, kamah, tuꞌ xax kummuk mõꞌtat.
\v 3 Pe ꞌãxop tep-texop pu: “Yũhũm, nũy nũ mĩpe max yĩmũ yũm,” kaxĩy. Tuꞌ hok pu: Pe yĩy ꞌãknĩhã xihip ꞌõnteꞌ, pe yã hãm tu yũhũm,” kaxĩy.
\v 4 Puxiꞌ, ꞌãp-tox 2 ꞌãnõy hã, yã ꞌãxop hã yãy putuk ꞌohnãg.
\p
\v 5 ꞌŨkxape xop, ꞌũgꞌãpax: Topa teꞌ hok xop yĩmõgãtux, puꞌ kuxa mãm kaꞌok hamũn kopah, nũy yĩpkox piꞌ, ꞌĩhã Topa teꞌ xat, Topap-tup pax tuꞌ, yã Topa te hãmꞌãktux xex nõm xop mũtik,
\v 6 ha ꞌãxop teꞌ hok xop putup nõg, pãyã putexop xexka te xa hãpkummugãhãꞌ, tu tik pa te hãmyũmmũg ha ꞌãmõgãhãꞌ, nũy ꞌãkupeh,
\v 7 tu Yeyox Kunnix ꞌãktux kummuk, ha xaꞌ hõm yãyꞌãxetꞌax. Hap-texop te xa ꞌãktux kummuk, ha Topa te xa hãmmaxnahaꞌ.
\p
\v 8 ꞌÃxatꞌax pu yĩpkox piꞌ, puxix hãpxopmã max, haꞌ xat, hu: “ꞌÃnõy putup pax, xate yãy mũn putup pax putuk,” kaxĩy.
\v 9 ꞌÃxop te hãmhok xop putup nõg, xip-texop putup pax, ꞌũxax pẽnã tuꞌ, puxix Topa yõg xatꞌax pu ꞌãyĩpkox pip hok, tu hãpkummuk mĩy, ha Topa teꞌ kummuk ꞌãktux.
\v 10 Tikmũꞌũn te Topa yõg xatꞌax puxehnãg puꞌ yĩpkox hok, puxix tu xatꞌax xohix puꞌ yĩpkox ꞌohnãg. Yã Topa teꞌ xat, puꞌ xatꞌax xohix puꞌ yĩpkox piꞌ.
\v 11 Haꞌ xat, hu: ꞌÃxonnix hok,” kaxĩy. Tu xe: “ꞌŨp-tex hok,” kaxĩy. ꞌAp xatep-texꞌah, pãyãꞌ xonnix, puxix ꞌãyĩpkox hok, tuꞌ xatꞌax koxyõy.
\v 12 Topa te ꞌõg hãpxopmãꞌax kopitꞌax, yĩꞌ xatꞌax pu ꞌãyĩpkox piꞌ. Yãꞌ xatꞌax te yũmũꞌã hãmyũmmũgãhãꞌ, ꞌũyĩy yũmũg hi xeꞌeꞌ, nũy hãpxopmã max.
\v 13 Topa te tikmũꞌũn yõg hãpxopmãꞌax xohix kopit putup, ha tikmũꞌũn teꞌ nõy kuxa ka hok, puxix Topaꞌ ka hok xop kuxa ka hok ꞌũyãnãn tuꞌ, pa tikmũꞌũn teꞌ nõy kuxa kaꞌ, puxix Topa te nõm xop pu hãpkummugã hok.
\s ꞌÃkuxa yũm kaꞌok nũy hãpxopmã max
\p
\v 14 ꞌŨkxape xop, ꞌãꞌ maxꞌah, yãy kuxa yũmꞌax ꞌãktux, ꞌĩhã ꞌãnõy te ꞌõg hãpxopmã max pẽnã ꞌohnãg. Yã ꞌãkuxa yũm puꞌuk, ꞌap ꞌãkuxa yũm xeꞌeꞌah.
\v 15 ꞌÃxape xax kummuk, ha putup tep-tex,
\v 16 ha tu hãpxop hõm ꞌohnãg, xix topixxax hõm ꞌohnãg, pa: “Pũyã Topa xa hãmmaxnãꞌ, xayĩy ꞌãxit max, nũy ꞌãxax max tat kamah,” kaxĩy,
\v 17 puxix ꞌãkuxa yũm puꞌuk, ꞌĩhã ꞌãnõy pu hãpxopmã ꞌohnãg, ꞌap ꞌãkuxa yũm xeꞌeꞌah.
\p
\v 18 Tikmũꞌũn te: “ꞌÃkuxa yũm kaꞌok, ha ꞌãte hãpxopmã max,” kaxĩy. Yĩy ꞌãte: Tikmũꞌũn te ꞌãkuxa yũmꞌax pẽnã hok, ꞌĩhã xate hãpxopmã ꞌohnãg. Pãyã ꞌãte hãpxopmã maxꞌax hã xaꞌ mũg, xayĩy pẽnãꞌ, nũy tuk kuxa yũm kaꞌok yũmmũg. Yã hãpxopmãꞌax max hã tikmũꞌũn teꞌ pẽnãꞌax,” kaxĩy.
\v 19 ꞌOk ꞌãkuxa yũm kaꞌok Topap-xehnãg kopah? Yãꞌ max. Yãmĩy kummuk xop kuxa mãm kaꞌok kamah, tu Topa yĩpkutuk, tu yãy nuhuknãm ꞌũkuxãnõg tuꞌ.
\v 20 ꞌÃptox kaꞌok, tu hãmyũmmũg ꞌohnãg! ꞌÃkuxa yũm kaꞌok, ꞌĩhã hãpxopmã max ꞌohnãg, tuꞌ hitop hã ꞌãkuxa yũm, ꞌap puxiꞌah.
\v 21 Tep te xĩy Topa te mõnãyxop hittap ꞌAmanãm max ꞌãktux? ꞌAmanãm tek-tok ꞌIyak hõmꞌax, nũy kuxap hã mõꞌhap Topa puꞌ, hu Topa te ꞌAmanãm max ꞌãktux, ꞌũyĩpkox xip hah.
\v 22 Yũmmũg. ꞌAmanãm kuxa yũm kaꞌok Topa kopah, tuꞌ yĩpkox xip, tu hãpxopmãhã kamah.
\v 23 Yĩy Topa yõg tappet te: ꞌAmanãm kuxa yũm kaꞌok Topa kopah, yĩꞌ kuxa tupmãhãꞌ, pu tu max,” kaxĩy. Ha Topa te ꞌAmanãm hãꞌ xapeꞌ.
\v 24 Yĩꞌ yũmmũg. Yã Topa te tikmũꞌũn putup pax, ꞌũyõg hãxopmãꞌax hãp-tup pax, ꞌũkuxa yũm kaꞌok ha hãpxopmãhãꞌ, haꞌ kuxa tupmãhãꞌ.
\p
\v 25 Xotit Haꞌap te ꞌIyaet yõg tik xop hã tu tehet, nõm xop teꞌ puknõg yõg hãm pẽnãꞌax, ha putat nõy haꞌ mõgãhãꞌ, puyĩy tu nũmãn, yĩy hãpxopmã max, ha Topa tep-tup pax.
\p
\v 26 Tikmũꞌũn koxuk teꞌ yĩn nĩm, puxix tikmũꞌũn tu xok, hã kaxĩy tikmũꞌũn kuxa yũm kaꞌok, tu hãpxopmã hok, puxiꞌ hi xeꞌe hok.
\c 3
\s Tikmũꞌun yõyxõg
\p
\v 1 ꞌŨkxape xop: ꞌAp maxꞌah, tikmũꞌũn punethok teꞌ nõy xop pu hãmyũmmũgãꞌ, ꞌĩhã yãy kotĩnnãhãꞌ pip. ꞌŨyũmmũgãꞌax, puxix Topaꞌ yĩkopit putup, nũy yũmmũg, pẽyã hãmyũmmũgã max, pẽyã hãmyũmmũgã kummuk.
\v 2 Yũmũg xohix te hãpkummuk mĩy, ha tikmũꞌũn yãy yĩyꞌax hã hãpkummuk ꞌãktux hok, puxix ꞌũmax xeꞌẽgnãg, tu yãy mõgã max.
\v 3 Tikmũꞌũn te kãmãnok mõgãhãꞌ, tu pipkup kohe te kamãnok yĩkox kopaꞌ xip hã mõgãhãꞌ, pu mõg, ha yũmũꞌãte yĩmũꞌ mãm, nũy nõ mõg.
\v 4 Kamah mĩpkox xexka te kõnãg yĩmũ mõg, ha ꞌãmuuh kaꞌok teꞌ mõgãhãꞌ, pa tikmũꞌũn te mĩm kutõgnãg hãꞌ mõgãhã, nũy nõ hãpkux xuhmĩy yĩmũ ꞌãpep hãmnak hah.
\v 5 Ha tikmũꞌũn yõyxõg kaxĩy, ꞌũk-tõgnãg, pãyã ꞌũyĩyꞌax te hãpxopmã xexkaꞌ. Kuxap kup kutĩgnãg, pãyã hãmhipak xexka mõꞌxut xexkaꞌ,
\v 6 hã kaxĩy ꞌũyõyxõg kutĩgnãg, pãyãꞌ yĩyꞌax te hãpkummugã xexkaꞌ, tu Hãmgãyãygnãg yõg kuxap gãy putuk, tuꞌ nõy kuxa tuknõgãhãꞌ, tu mõktu kummugã xexkaꞌ, ꞌũxupmãhĩy kummuk tuꞌ.
\v 7 Tikmũꞌũn te xokxop xohix mũgꞌax xix putuxnãg, xix xokxop yãy hi xip mũgꞌax, xix xokxop yĩkũy mũgꞌax, xix mãm xohix mũgꞌax,
\v 8 pa tikmũꞌũn teꞌ yõyxõg ꞌũm mũg hok, puyĩy tu yĩy kux, ꞌũkummuk hah, tu kãyã gãy yõyxõg putuk, tuꞌ yĩyꞌax hãꞌ mõy putex.
\v 9 Yũmũꞌãte yãy yĩyꞌax hã yũmũg Tak Topa max ꞌãktux, xiknõy mãnõg, hu: “Pũyã Topa xa hãpkummugãꞌ,” kaxĩy, tuꞌ mãnõg, yã Topa teꞌ hep xop xohix mĩy yãymũn putuk, ha yũmũꞌãteꞌ xaxok.
\p
\v 10 Tikmũꞌũn yĩyꞌax 2, tu Topa pu hãmꞌãktux max, ꞌĩhãꞌ nõy pu hãmꞌãktux kummuk. ꞌŨkxape xop, kaxĩy ꞌãktux hok!
\v 11 Kõnãg xupup kox puxet te kõnãg xut, ha kõnãg puxet, pẽyãꞌ xuxpex, ꞌok pẽyãꞌ kohãgnãg, tu kõnãg 2 ꞌohnãg, pap-xet.
\v 12 Tikmũꞌũn te xupxak xut hok tepta kup tuꞌ, tu gõyap xut hok nanũy kup tuꞌ. ꞌÃmhok! Yã kaxĩy kõnãg kox kummuk tu kõnãg xuxpex tat ꞌohnãg.
\s Hãmyũmmũg xeꞌeꞌ
\p
\v 13 Piyãꞌ xip tikmũꞌũn te hãmyũmmũg? ꞌOk xip ꞌãxop kopaꞌ? Pũyã hãpxopmã max, tu yãy mũn kutõgnãg peꞌpaxeh, nũy hãmyũmmũg xexkaꞌ.
\v 14 Pa ꞌãyĩpkumĩy hok, tu yãy mũn xexka peꞌãpaxex hok, xiꞌ koit hok, nũy mõꞌãmã hok, puyĩꞌ nõy ꞌãpeꞌpaxex, hu: “Yã ꞌõhõm te hãmyũmmũg!” kaxĩy.
\v 15 Yã hãpxopmãꞌax kummuk te yãmĩy xop kummuk yõg hãmyũmmũgꞌax putuk, xix xokxop yõg, xix Topa hãꞌ puknõg xop yõg hãmyũmmũgꞌax putuk. Yãꞌ kummuk.
\v 16 Tikmũꞌũn kummuk te yãy mũn peꞌpaxex xexkaꞌ, tuꞌ yĩpkũmĩy, tu tikmũꞌũn xohix kummugãhãꞌ, tuꞌ mõgã kummuk, yĩy hãpxopmã kummuk punethok.
\v 17 Topa te pexkox tuꞌ xip, tu hãmyũmmũg xeꞌẽgnãg, tu yãy yõg tikmũꞌũn pu hãmyũmmũgãhãꞌ, puyĩy tikmũꞌũn kuxa tu tup, puyĩy yãytuk-mĩy kuxyãꞌ, puyĩꞌ kuxa yũm, ha Topa te hãmyũmmũgãhãꞌ, nũy hãmmaxnãꞌ, nũy tikmũꞌũn hãꞌ xapeꞌ, tuꞌ kuxa kaꞌ, puyĩy hãpxopmã max ꞌũyãnãn tuꞌ,
\v 18 haꞌ kuxa yũmmãhãꞌ, puyĩy hãmyok mĩy pax.
\c 4
\s Topa hãꞌ puknõg xop yã ꞌãxape hok
\p
\v 1 Teptu yãy tuk-mĩy ꞌãnõy mũtik? ꞌÃxop te yãy putupꞌax kummuk mĩy, tu yãykix.
\v 2 Tu hãpxop putup xũy, pãyãꞌ pa hok, hup-tex putup, nũy nõm hãpxop paꞌ, tu ꞌãnõy yõg hãpxop putup, ꞌap pa yũmmũgꞌah, hu yãykix, tu Topa tuꞌ xak ꞌohnãg, pu xaꞌ hõm.
\v 3 Xate Topa tuꞌ xak, tuꞌ pa ꞌohnãg, ꞌũxak kummuk tuꞌ. Tuꞌ xak, nũy yãy putupꞌax mĩy.
\v 4 ꞌÃxop te Topa nĩmꞌax. Topa hãꞌ puknõg xop te Topap-tup nõg. ꞌOk yũmmũg hok xateꞌ? ꞌÃxop te nõm puknõg xop hã ꞌãxapeꞌ, hu ta Topa hã ꞌãpuknõg kamah.
\v 5 Topa yõg tappet te tikmũꞌũn kuxa ꞌãktux, tuꞌ hitop tuꞌ xuktux ꞌohnãg, hu: “Topa te tikmũꞌũn kuxa mĩy, haꞌ yĩpkũmĩy, tup-tex,” kaxĩy,
\v 6 Pa Topa kaꞌok xeꞌẽgnãg, tu tikmũꞌũn kuxa kaꞌogãhãꞌ, yã Topa yõg tappet te xe: “Tikmũꞌũn yãy mũn xexka peꞌpaxex, puxix Topa putup nõg, pak-tõgnãg xop pu hãmmaxnãhãꞌ, nõm xop yãymũn kutõgnãg peꞌpaxex ha hãmmaxnãhãꞌ,” kaxĩy.
\v 7 Yĩy ꞌĩpkox pi Topa puꞌ, nũy Hãmgãyãgnãg yĩpkutuk hok, nũy nõm mũtik kumĩy, haꞌ xupap-tup.
\v 8 ꞌÃxop yã hãpxopmã kummuk xop, ꞌãpu Topa hã mõg, nũy yĩka hãꞌ pip, ha ꞌãhaꞌ nũn putup, nũy ꞌãkuxa kummuk xit, nũy kuxa max mõꞌtat ꞌũyãnãn tuꞌ. Hãpkummuk mĩy kux, ꞌãyĩm pix putuk, nũy ꞌãkuxa tup, nũy ꞌãmax, nũy ꞌãp-xet Topa kuxa mũtik,
\v 9 ꞌÃkuxa hittup hok, nũy pota punethok, nũy hãpkummuk mĩy kux,
\v 10 tu Topa tuꞌ xax, pu mõꞌãnĩynãm, nũy ꞌãkaꞌogãꞌ, ha ꞌãxexkanãp-tup.
\s ꞌÃnõy ꞌãktux kummuk hok
\p
\v 11 ꞌŨkxape xop, ꞌãnõy ꞌãktux kummuk hok, ꞌũxuktux kummuk, puxix ꞌãxop ꞌãnõy yĩkopit, tu Topa yõg xatꞌax kopit kamah, yã ꞌãkummuk. Tikmũꞌũn te Topa yõg xatꞌax kopit, puxix Topa tuꞌ yĩpkox ꞌohnãg.
\v 12 Topap-xet te ꞌãxat, ꞌũpa te hãmyũmmũg, tup-xehnãg hã ꞌũhep xop xohix yõg hãpxopmãꞌax kopit putup, tu tikmũꞌũn kuxa kummuk xitꞌax, nũy yãnãn tuꞌ kuxa max tat, tuꞌ kummuk mĩy pax xop kixꞌax. Yãy ꞌãpeꞌãpaxeh hok, nũy ꞌãxape yõg hãpxopmãꞌax kopit, nũy Kunnix yõg xop yĩkopit. Kunnix yãp-xet te hãpxopmãꞌax xohix kopit, nũy tu hãmyũmmũg, pe yãꞌ max, pe yãꞌ kummuk.
\s Hãptup peꞌãpaxek-tõgnãg
\p
\v 13 ꞌÃxop te: “Pe hõnhã, pa hãptup, kopxik mõg kõmẽn tuꞌ, nũy nox xihip, nũy hãpxop hãmenex, ꞌũyĩy tayũmak xexka punethok pop,” kaxĩy. Nãy. ꞌŨgꞌãpax:
\v 14 ꞌÃxop te hãptup yõg hãpxopmãꞌax yũmmũg ꞌohnãg! Tu hãmgõy putuk, yã hõnhãꞌ xip, tu hãpxip kutõgnãg ꞌĩhã yãyxaxogãhãꞌ, ha hãpxip kutõgnãg ꞌĩhã ꞌãxop xakix putup, ha kama yãy xaxogãp-tup.
\v 15 ꞌÃpu hãmꞌãktux kaxĩy, hu: “Topa tek putup, kopxik mũg mĩy,” kaxĩy.
\v 16 Pa ꞌãxop te yãy mũn xexka peꞌãpaxex, tu yãy mũn xexka ꞌãktux. ꞌAp maxꞌah.
\v 17 Tikmũꞌũn te hãpxopmãꞌax yũmmũg, tuꞌ mĩy hok, puxix hãpxopmã kummuk.
\c 5
\s ꞌŨp-texop xexka pu hãmꞌãktux
\p
\v 1 ꞌÃp-texop, ꞌũgꞌãpax nõmhã: ꞌÃpota punethok putup, ꞌãxũy tuꞌ.
\v 2 ꞌÕg tayũmak kunox, haꞌ kut te ꞌãxax kunoxyãhãꞌ.
\v 3 ꞌÕg tayũmak kutut te yãy koxyõy, ꞌãxupkũmĩy hah, ha tikmũꞌũn teꞌ pẽnãhãꞌ, tu ꞌãkummuk ꞌãktux putup, ꞌãxop te tayũmak punethok pop, tu yãy tuꞌ xex.
\v 4 ꞌA ꞌãxop te ꞌõg kãmãnat xop puꞌ pagoꞌah, ꞌũhãmꞌax yãnãn tuꞌ pago ꞌohnãg, yĩy ꞌãxop kummuk ꞌãktux, tu Topa xeꞌẽgnãg pu hãmꞌãktux, haꞌ xupak. ꞌOk ꞌãxop teꞌ xupak hok?
\v 5 ꞌÃxop te hãpkuteꞌex, tu ꞌãmuk xexka punethok mĩy hãm tuꞌ, tu yãy topmãhãꞌ, nũy xok, mũnũytut top putuk ꞌãxok putup, ha Topa te xa hãpkummugãp-tup ꞌũyãnãn tuꞌ.
\v 6 Yã ꞌãxop teꞌ hok xop kix, ha hãpkummuk mĩy ꞌohnãg, pãyãꞌ puꞌuk, ꞌũhok tuꞌ, huꞌ xakix.
\s Yũmũg xuxyã nũnꞌax hip
\p
\v 7 ꞌŨkxape xop, yũmũg xuxyã pu yũmũg hip, put nũꞌ, ꞌũxuxyã xop te yãy yõg hãpxop hip, puyĩy hãpxop ta punethok nũnnã yãy pet hah, hu tex hip, xix tex ti hip.
\v 8 ꞌÃpu ꞌũhip kamah, nũy yũmũg xuxyã hip, haꞌ nũn putup mõꞌkaꞌok, yĩy ꞌãkuxa tuknõg hok.
\p
\v 9 ꞌŨkxape xop, ꞌãxupmãhĩy kummuk hok, ka Topa ꞌãyĩyꞌax kummuk ꞌãktux, ꞌũpa te hãmyũmmũg tu yũmũg yĩkaꞌ xip, yã hãpxip kutõgnãg ꞌĩhãꞌ nũn putup.
\v 10 Topa yõg tik xop peꞌãpaxeh, nõm xop te Topa pupi hãmꞌãktux, tu tikmũꞌũn puꞌ xuktux, ha Topa te tu yãy ꞌãxetꞌax hõm, haꞌ xũyꞌax hãꞌ tot.
\v 11 Yũmũꞌãte nõm xop ꞌãktux max, ꞌũxũyꞌax hãꞌ tot hah, xix mõnãyxop hittap Yo ꞌãktux, yã nõãꞌtot punethok, yĩy Topa te hamũn ha hãmmaxnãhãꞌ, yã Topa mũn max xeꞌẽgnãg, tu tikmũꞌũn kuxa kaꞌ, nũy nõm pu hãmmaxnãꞌ.
\p
\v 12 ꞌŨkxape xop, ꞌãte xa hãpxeꞌe ꞌãktux. Topa ꞌãxetꞌax ꞌãktux hok, ꞌĩhã hãmꞌãktux xex, xix pexkox ꞌãktux hok, xix hãm ꞌãktux hok ꞌĩhã hãmꞌãktux xex. ꞌÃpu hãmꞌãktux kutõgnãg, hu: “Hamũn,” kaxĩy, xix: “ꞌÃmhok,” kaxĩy. Yãꞌ puxiꞌ, ka Topa ꞌãkummugãꞌ, xate hãmꞌãktux kummuk hah.
\p
\v 13 ꞌÃxũy, ꞌãpu mõg, nũy Topa pu hãmꞌãktux. ꞌÃhittup, ꞌãpu ꞌãkteh, nũy Topa max ꞌãktux.
\v 14 Tikmũꞌũn pakut, puxix tik te ꞌãpẽnã max xop xãnãꞌ, pu Topa pu hãmꞌãktux, nũy tu hep tox pux, ꞌũpakut putox tuꞌ pux, puyĩy Topa ꞌũhittupmãꞌ, yã yũmũg xuxyã teꞌ hõm yãy ꞌãxetꞌax, pu tikmũꞌũn hittupmãꞌ.
\v 15 Topa pu hãmꞌãktux, ꞌĩhãꞌ kuxa mãm kaꞌok Yeyox kopah, puxix Topaꞌ hittupmãꞌ, tu hãpkummuk mĩyꞌax xaxogãꞌax, pu tu kux.
\v 16 ꞌÃpu yãy pu ꞌõg hãpkummuk mĩꞌax ꞌãktux, nũy tu yãy pupi hãmꞌãktux, puyĩy Topa ꞌãhittupmãꞌ. Pũyãꞌ kuxa mãm xop xohix yãy xape xop pupi hãmꞌãktux Topa puꞌ. Ha Topa te tikmŨꞌũn yõg hãmꞌãktux ꞌãpak, ha ꞌãxape kuxa te Topa xak, puxix Topa hãmꞌãktux ꞌãpax.
\v 17 Mõnãyxop hittap ꞌEnit te Topa pupi hãmꞌãktux, tu yũmũg putuk, tu Topa xak, tu nõm mũtik hãmꞌãktux kaꞌok, tu tuꞌ xak, pu tex hok, ha hãmyãxatamuk 3 hã xiꞌ xahix tex ti ꞌohnãg, ha hãmnak mõꞌnãhãꞌ.
\v 18 Ha xe Topa tuꞌ xak, ha tex xat, haꞌ tihiꞌ, ha hãpxop punethok nũnnãhãꞌ.
\p
\v 19 ꞌũkxape xop, ꞌãxop te Topa yõg putat xak, ha ta ꞌãnõy te putpu ꞌãmõgãhãꞌ, xayĩy Topa yõg putat hã mõg ꞌũxexheh, puxix ꞌãnõy xa ha hãmmaxnãꞌ.
\v 20 ꞌŨxaxok hok: Tikmũꞌũn teꞌ nõy mõꞌnĩynãm, puyĩy hãpkummuk mĩy kux, ha ta hãpxopmã max, ha nõm mõgã max Topa yõg pũtat hã, puyĩy hi xeꞌẽgnãg. Ha Topa teꞌ yõg hãpkummuk mĩyꞌax xaxogãp-tup, pu tu kux. ꞌAp Hãmgãyãgnãg Pet haꞌ mõg putupꞌah ꞌõhõm. Tu ta tuꞌ kux.