\id 1PE  - Maxakalí NT [mbl] (Brazil) -2011 bd
\h 1 PET
\toc1 1 Pet
\toc2 1 Pedro (1 Pe)
\mt PET TE TAPPET KAXꞌÃMI I
\c 1
\p
\v 1 ꞌŨgmũn Pet, ha Yeyox Kunnix te nũgkutnãhãꞌ. ꞌÃte ꞌãxop puꞌ kaxꞌãmi nũhũ tappet. Topa te ꞌãxop yĩmõgãtux, yã Topa yõg xop ꞌãxop. ꞌÃte xaꞌ kaxꞌãmiꞌ, tu xa nũ tappet mõꞌkutnãhã hãpxexka Põꞌõn tuꞌ, xix hãpxexka Genex tuꞌ, xix hãpxexka Kapanox tuꞌ, xix hãpxexka ꞌAx tuꞌ, xix hãpxexka Mitĩn tuꞌ, yã hãpxexka xohix tu ꞌãxop nũpahaꞌ.
\v 2 Hõmã ꞌũhittap yũmũg ꞌãtak Topa tep-tup, hu ꞌãxop yĩmõgãtux, ha Topa Koxuk te ꞌãxop hãꞌ mĩy Topa yõg xeꞌe xop, xayĩy ꞌãxop Yeyox Kunnix ꞌãpax, nũy ꞌãyĩpkox piꞌ, ha Yeyox Kunnix te ꞌãxop pupiꞌ xok, hu ꞌãkuxa kummuk xit. Puyã Topa xa maxnã xexkaꞌ. Puyã Topa ꞌãkuxa mãmmã xexkaꞌ.
\s Hãmmax hip
\p
\v 3 ꞌÃpu yũmũ yũmũg xuxyã Yeyox Kunnix mũktak pu hãmꞌãktux, hu: “Xate yũmũꞌã maxnãhãꞌ. ꞌÃmax”. Kaxĩy. Topa te yũmũg kuxa ka xexkaꞌ, tu Yeyox Kunnix putpuꞌ hĩnnãhãꞌ, nũy yũmũꞌã kuxa tup popmãꞌ. Yũmũg kuxa ꞌũtup, huꞌ max hip punethok.
\v 4 Topa te yũmũꞌãꞌ popmãp-tup hãpxop max xohix pexkox tuꞌ, tu yũmũꞌã hãpxopmã maxp-tup. Yũmũꞌãte nõm hip, ha Topa te yũmũꞌã nõm popmãp-tup pexkox tuꞌ. Pa hõnhã Topa te nõm pẽnãhã ꞌõnteh pexkox tuꞌ. ꞌÃk-nox putupꞌah, tu ꞌa hãpxop kummuk hã kotĩnnãp-tupꞌah, tu ꞌap kutut putupꞌah.
\v 5 Yã ꞌõgnũ hãpxop, ha Topa ꞌũkaꞌok, tu ꞌãxop pẽnã max, ha ꞌãkuxa mãm Topa kopah, ha hãmyãxatamuk xohix xox putox ꞌĩhã Topa teꞌ mõy putup ꞌõg hãpkummuk xohix.
\p
\v 6 Yãꞌ max. ꞌÃpu ꞌãkuxa hittup. Pa hõnhã ꞌa ꞌãhittupꞌah. Yã ꞌãxop xũy punethok, haꞌ kuxa mãm hok xop te ꞌãxop kuteꞌex kummuk.
\v 7 ꞌÃxop te ꞌũkummuk hã tot, ha Topa teꞌ yũmmũg ꞌãkuxa mãm kaꞌok. Yã hãpkummuk pip, pa ꞌãkuxa mãm xeꞌeꞌ. Tikmũꞌũn te yãnãm ꞌãta yĩxux kopit kuxap kopah. Hã kaxĩy Topa te ꞌãxop yõg hãpxopmãꞌax kopit, ꞌĩhãꞌ pip ꞌõg hãpkummuk. Pa yãnãm ꞌãta yĩxux yãy koxyõy, pa tikmũꞌũn te nõm kopit kuxap kopah. Takat ꞌũyãnãm ꞌãta yĩxux, pa takat xexka ꞌãkuxa mãmꞌax. Tikmũꞌũn te yãnãm ꞌãta yĩxux kopit, ha ta Topa te ꞌãkuxa mãmꞌax kopit kamah, pu tu xip kaꞌok ꞌãkuxa mãmꞌax. ꞌÃxop teꞌ kummuk hã tot, pu tuꞌ kux, ha taꞌ putpuꞌ nũn putup Yeyox Kunnix, ha Topa te ꞌãxop ꞌãktux max putup, tu xa max xeꞌẽgnãg mĩy putup, tu hãmꞌãktux putup ꞌãxop max.
\v 8 ꞌÃxop te Yeyox Kunnix pẽnã ꞌohnãg, pa ꞌãxop te Yeyox putuppax. ꞌÃxop te nõm pẽnã ꞌohnãg, pa ꞌãkuxa mãm nõm kopah, tu mõktu ꞌãkuxa hittup max xexkaꞌ. Tep-te nõm hãpxop max ꞌãktux yũmmũg? ꞌAp yũmmũgꞌah. Yã ꞌãkuxa hittup xexkaꞌ.
\v 9 ꞌÃkuxa hittup xexkaꞌ, yã Topa te ꞌãxop mõy xet putup hãpkummuk mĩyꞌax kopah. ꞌÃkuxa mãm, puyĩy ꞌãkuxa mõy hãpkummuk mĩyꞌax kopah.
\p
\v 10 Hõnhã Topa te Yeyox Kunnix nũꞌkutnãhãꞌ, puyĩy ꞌãkuxa kummuk xit. Ha ta hõmã Topa pupi hãmꞌãktux xop te Yeyox nũn yũmmũg xak, tuꞌ yũmmũg xak punethok, tu hãmꞌãktux Topa te yãy kutok nũꞌkutnãp-tup.
\v 11 Hãmꞌũmhã nũꞌkutnãp-tup? Texĩy huꞌ nũn putup? Yã nõm teꞌ yũmmũg xak. Topa Koxuk, yã Kunnix Koxuk te Topa pupi hãmꞌãktux xop pu Yeyox xok ꞌãktux, tu putpuꞌ hi ꞌãktux, tu pexkox tuꞌ mõg ꞌãktux.
\v 12 Topa pupi hãmꞌãktux xop te yĩykopit, hu: “Hãmꞌũmꞌhãꞌ nũn? Hãmꞌũmhãꞌ xok putup, nũy putpuꞌ hiꞌ?” Kaxĩy. Ha Topa te: “Yã hõnhãꞌah. Yã ꞌãxape mõgputox xop teꞌ pẽnãp-tup”. Kaxĩy. Ha ta hõnhã ꞌãxop teꞌ xupak, tuꞌ yũmmũg. Yã Topa te ꞌãxop pu tik nũꞌkutnãhãꞌ, pu xa Topa yõg hãmꞌãpak maxꞌax ꞌãktux. Ha taꞌ xip Topa Koxuk pexkox tuꞌ, ha Topa te nõm nũꞌkutnãhãꞌ, pu tikmũꞌũn kaꞌogãꞌ, puyĩy xa Topa yõg hãmꞌãpak maxꞌax ꞌãktux max. Ha ta pexkox yõg nũꞌpok xop teꞌ xak, nũy Topa yõg hãmꞌãpak maxꞌax yũmmũg.
\s Topa te ꞌãxop xãnãhãꞌ, xayĩy Topa putuk
\p
\v 13 ꞌÃpu hãmpeꞌãpaxeh xeꞌeꞌ, nũy hãpxopmã max. ꞌÃpu pa ꞌãtix. ꞌÃpu hãpxop max hip punethok. Topa te xa nõm popmãp-tup, ꞌĩhã putpuꞌ nũn putup Yeyox Kunnix.
\v 14 ꞌÃpu Topa ꞌãpax, nũy ꞌãyĩpkox piꞌ. Hõmã ꞌãxop te hãmyũmmũg ꞌohnãg, tuꞌ mĩypax xate nõm putup. ꞌÃpu xeꞌ mĩy hok xate nõm putup, yã hãpxopmãꞌax kummuk.
\v 15 Pa ꞌãpu ꞌãkuxa tup tat. ꞌÃpu hãm yok mĩypax, nũy Topa putuk. Yã Topa te ꞌãxop xãnãhãꞌ, xayĩy Topa putuk.
\v 16 Yã Topa te yãy yõg tappet kopa hãmꞌãktux, hu: “ꞌÃpu ꞌãkuxa tup tat, nũy hãmyok mĩypax, nũy ꞌũgmũn putuk”. Kaxĩy.
\p
\v 17 ꞌÃxop te Topa pu hãmꞌãktux, hu: “ꞌÃtak”. Kaxĩy. Topa te tikmũꞌũn xohix yõg hãpxopmãꞌax kopit. Tikmũꞌũn te hãpkummuk xexka mĩy, puxix yãnãn xexkaꞌ. Tikmũꞌũn te hãpkummuk kutõgnãg mĩy, puxix yãnãn kutõgnãg. Tikmũꞌũn te hãmmax xexka mĩy, puxix hãpxop max xohix popmãꞌ. Tikmũꞌũn te hãmmax kutõgnãg mĩy, puxix hãpxop max kutõgnãg popmãꞌ. Yã tikmũꞌũn yõg hãpxopmãꞌax kopit xeꞌeꞌ, tuꞌ kopit yãy putuk. Xateꞌ yũmmũg. ꞌÃpu Topa yĩpkutuk ꞌõg hãmyãxatamuk tox hã.
\v 18 Hamũn, ꞌãxop teꞌ yũmmũg hõmã ꞌãxop te mõnãyxop yõg hãpxopmãꞌax hitop tat, pa Topa te pago takat, yã yãy kutok nũꞌkutnãhã, xayĩy ꞌãxop mõnãyxop yõg hãpxopmãꞌax hitop tat kuxyãꞌ. Yã tute pago takat xexkanãm, Topa te yãnãm ponnok pagoꞌah xix yãnãm ꞌãta yĩxux pagoꞌah. Yã nõm takat miax. Pa Topa teꞌ pago xexkanãm.
\v 19 Yã tute Kunnix nũꞌkutnãhãꞌ, puyĩy ꞌãxop pupi tuꞌ xok, nũy ꞌãkuxa kummuk xit. Kunnix xok, yã kahnẽn max putuk. Yã kahnẽn max kup kohe ꞌohnãg xiꞌ kup yãy xaꞌa ꞌohnãg. Hã kaxĩy putuk Kunnix, yã hãpkummuk mĩy ꞌohnãg.
\v 20 Hõmã ꞌũhittap ꞌap xipꞌah hãm xexkaꞌ, ha Topa te Kunnix yãykutnãhãꞌ, puyĩy yũmũg pupi tu xok. Hõnhã yã hãm xexka yõg hãmyãxatamuk xox putox ꞌĩhã Topa te yũmũꞌã Yeyox mũg.
\v 21 ꞌÃkuxa mãm Yeyox Kunnix kopah, tu mõktu ꞌãkuxa mãm Topa kopa kamah. Yã Topa te yãy kutok putpuꞌ hĩnnãhãꞌ, tu yãy kutok xexka mĩy, puyĩy tikmũꞌũn xohix Yeyox ꞌãktux max. Yã ꞌãkuxa mãm Topa kopah, tu hãpxop max hip Topa yõg.
\v 22 ꞌÃxop te hãmꞌãktux xeꞌe ꞌãpak, tu ꞌãyĩpkox pip, tu yãy kuxa kummuk xit, nũy hãpkummuk mĩy hok, nũy Yeyox kopa kuxa mãm xop putuppax xeꞌẽgnãg. ꞌÃpu nõm putuppax xexkanãm.
\v 23 Topa yõg hãmꞌãktux pip kaꞌok, tu yõg hãmyãxatamuk xohix kux ꞌohnãg. Topa te hãmꞌãktux, yĩy ta ꞌãxop yãyhã Topa yõg tikmũꞌũn. Topa yã yũmũg ꞌãtak, tu yõg hãmyãxatamuk xohix kux ꞌohnãg.
\v 24 Hamũn, Topa yõg tappet tuꞌ kaxꞌãmi, hu:
\q “Hãpxip kutõgnãg ꞌĩhã mĩxux nak,
\q ha hãpxip kutõgnãg ꞌĩhã nũꞌnãhã mĩnnut.
\q Hã kaxĩy tikmũꞌũn xohix xexkaꞌ, yã hãpxip kutõgnãg ꞌĩhãꞌ xakix.
\q
\v 25 Pa Topa xexka yõg hãmꞌãktux pip kaꞌok mõkumaꞌmõg hãmyãxatamuk xohix kux ꞌohnãg hã.” Kaxĩy.
\m Topa yõg hãmꞌãktux, yã Topa yõg hãmꞌãpak maxꞌax, yã ꞌũgmãꞌãte xa nõm ꞌãktux
\c 2
\s Topa pet yã Topa yõg tikmũꞌũn
\p
\v 1 ꞌÃpu hãpkummuk xohix mĩy kux. ꞌÃpuꞌ koit kux, nũy mõꞌãmã kux. ꞌÃpu ꞌãyĩpkũmĩy kux. ꞌÃpu hãmꞌãktux kux.
\v 2 kakxop puꞌũgnãg te yõktat hep putup xexkaꞌ, tu xoꞌop, tuꞌ tuk. Hã kaxĩy ꞌãxop. ꞌÃpu kakxop puꞌũgnãg putuk. Topa yõg hãmꞌãktux te yõktat hep putuk. ꞌÃxop te Topa yõg hãmꞌãktux pop, ha hãpxop max xohix nõy nãꞌ mõg ꞌãkuxa kopah, tu ꞌãxop tuk putup. Yã Topa te ꞌãkuxa kummuk xit, tu ꞌãkuxa maxnãhãꞌ.
\v 3 Yã Topa yõg tappet te: “ꞌŨxitꞌax max yãꞌ xuxpex. Hã kaxĩy ꞌũmax tikmũꞌũn te Topa yũmmũg, yãꞌ xuxpex putuk.” Kaxĩy.
\p
\v 4 ꞌÃxop kuxa mãm yũmũg xuxyã Yeyox kopah. Mĩkaxxap hi ꞌohnãg, pa Yeyox hiꞌ. ꞌŨkuxa mãm hok xop te Yeyox putup nõg, pa Topa tep-tup, tuꞌ yũmmũg ꞌũmax.
\v 5 Tikmũꞌũn te mĩkaxxap hãꞌ mĩy mĩptut. Hã kaxĩy ꞌãxop te mĩkaxxap putuk, ha Topa te ꞌãxop hã mĩy yãy pet, ha Topa Koxuk xip ꞌãkuxa kopa xix ꞌãxop kopah. Mã, puyĩy Topa ꞌãxop hãꞌ mĩy yãy pet. ꞌÃmãnex te Topa pet kopa Topa puꞌ hãpxopmãhãꞌ. Hã kaxĩy Topa Koxuk te ꞌãxop kaꞌogãhãꞌ, ha Yeyox Kunnix te ꞌãxop maxnãhãꞌ, xaxĩy Topa pu hãpxopmã xeꞌẽgnãg. ꞌÃmãnex xop te Topa pu mõꞌhap xokxop, nũy Topa puꞌ popmãꞌ. Hã kaxĩy ꞌãxop te Topa pu hãpxopmã max.
\v 6 Yã Topa yõg tappet te:
\q “ꞌÃte yãy nõm kutnãhãꞌ, yãꞌ max nõꞌõm, yã takat.
\q ꞌŨxip putup kõmẽn Xiãm tuꞌ.
\q Hã kaxĩy mĩptut mĩy xop teꞌ yãy kutnãhã mĩkaxxap takat, tu nõmhãꞌ mĩy ꞌũkupkũnĩy. Hã kaxĩy nõm te yãy yõg xop kaꞌogãhãꞌ. Tikmũꞌũn te nõm kopaꞌ kuxa mãm, tu yãyhãhup putup ꞌohnãg, yãꞌ kuxa hittup.” Kaxĩy.
\p
\v 7 ꞌÃxop kuxa mãm Yeyox kopah, tuꞌ yũmmũg ꞌũmax xeꞌẽgnãg Yeyox, yã takat xexka putuk. Paꞌ kuxa mãm hok xop tep-tup nõg Yeyox. ꞌŨp-tup nõg, pa Topa teꞌ mĩy ꞌũxexkaꞌ, yã Topap-tup xop yõg xexkaꞌ. Hã kaxĩy Topa yõg tappet te:
\q “Mĩptut mĩyꞌax te mĩkaxxap putupꞌah,
\q paꞌ nõy te nõm hãꞌ mĩy ꞌũkupkũnĩy xexkaꞌ,
\q ha mĩptut te nõm yĩmũꞌ yũm.” Kaxĩy.
\p
\v 8 Topa yõg tappet te xe:
\q “Mĩkaxxap te tikmũꞌũn nũꞌxok.
\q Hã kaxĩy tikmũꞌũn te nõm kopa kuxa mãm putupꞌah,
\q tu nõm hã yãy koxyõy putup.” Kaxĩy.
\p Hamũn, ꞌũkuxa mãm ꞌohnãg Topa yõg hãmꞌãktux kopah, yã Topa te nõm xat.
\p
\v 9 Pa Topa te ꞌãxop yĩmõgãtux, yã hep puxet yĩmõgãtux putuk. ꞌÃmãnex xop te Topa pu hãpxopmãhãꞌ. Hã kaxĩy ꞌãxop te Topa xexka pu hãpxopmãhãꞌ. ꞌÃxop te hãm xexka yõg tikmũꞌũn putuk ꞌohnãg, pa yã Topa yõg xop ꞌãxop. Topa te ꞌãxop yĩmõgãtux, xayĩy tikmũꞌũn pu Topa max xeꞌẽgnãg ꞌãkutux. Hõmã ꞌãxop te hãpkummuk mĩy, yã hãpkoxtap putuk. Pa Topa te ꞌãkuxa kummuk xit, tu ꞌãkuxa maxnãhãꞌ, yã kuyãnãm putuk Topa yõg.
\v 10 Hõmã ꞌãxop yã Topa yõg tikmũꞌũn ꞌohnãg, pa hõnhã ꞌãxop yã Topa yõg. Hõmã Topa te ꞌãxop kuxa kaꞌ, pa ꞌãxop teꞌ yũmmũg ꞌohnãg. Pa hõnhã ꞌãxop teꞌ yũmmũg.
\s Topa yõg kãmãnat
\p
\v 11 ꞌŨkxape xop, ꞌãxop te hãm xexka yõg puknõg xop putuk, yãꞌ kuxa mãm hok xop hã puknõg. ꞌÃpu hãpkummuk mĩy hok, ꞌãxop te nõm putup. Pox te xonat putex. Hã kaxĩy hãpkummuk mĩyꞌax te tikmũꞌũn koxyõy.
\v 12 Topa yũmmũg ꞌohnãg xop pip, hu ꞌãxop xakot. ꞌÃpu hãpxopmã max xexkaꞌ. Nõm te ꞌõg hãpxopmã max pẽnãp-tup. Nõm te hãmꞌãktux putup ꞌãxop kummuk, pa nõm teꞌ yũmmũg putup ꞌãxop te hãpxopmã max punethok. Nõm teꞌ yũmmũg putup nõm hãptup ꞌĩhã putpuꞌ nũn Yeyox Kunnix. Nõm teꞌ yũmmũg putup ꞌãxop max. Yã Topa ꞌãkutux max putup.
\p
\v 13 ꞌÃpu hãm xexka yõg gohet yõg xatꞌax xop ꞌãpax, nũy ꞌãyĩpkox piꞌ, yã Topa xexka tep-tup. Yã Hõm yõg xatꞌax ꞌãpax, yãꞌ xexkanãm.
\v 14 ꞌÃpu gohet yõg gohenanok xop ꞌãpax kamah, nũy ꞌãyĩpkox piꞌ, yã Topa xexka tep-tup. Yã Hõm yõg xatꞌax te gohenanok xop yĩmõgãtux, puyĩy tikmũꞌũn hãpkummuk mĩyꞌax hã yãnãn, puyĩy tikmũꞌũn hãmmax mĩy xop pu hãpxopmã max.
\v 15 Tikmũꞌũn te hãmꞌãktux hitop, yã tikmũꞌũn hitop. Topa tep-tup, puyĩy tikmũꞌũn ꞌõg hãpxopmã max pẽnãꞌ, nũy tuꞌ yẽy, yã hãmꞌãktux hitop kux.
\v 16 Kãmãnat xop teꞌ xuxyã puꞌ hãm, haꞌ xuxyã te nõm xatpax. Topa yõg xatꞌax te tikmũꞌũn xat kamah, tu hãmꞌãktux ꞌũkummuk tikmũꞌũn. Pa Topa yõg xatꞌax te xa hãmꞌãktux te kaxĩy ꞌohnãg. Pa ꞌãpu xe hãpxopmã kummuk hok, pa ꞌãpu Topa ꞌãpax, nũy Topa pu hãpxopmãꞌ.
\v 17 ꞌÃpu tikmũꞌũn xohix ꞌãpax. ꞌÃpuꞌ kuxa mãm xop putuppax. ꞌÃpu Topa yĩpkutuk. ꞌÃpu Hõm yõg xatꞌax ꞌãpax.
\s Kunnix te yũmũg pupiꞌ xũy
\p
\v 18 Kãmãnat xop, ꞌãpu ꞌũxatꞌax xop ꞌãpax max, nũy ꞌãyĩpkox piꞌ. ꞌÃpu xuxyã ꞌãpax, yã nõm max ꞌãpax xix nõm gãy kamah.
\v 19 ꞌÃxop teꞌ mĩy, puxix Topa xa maxnãꞌ. ꞌÃxop teꞌ yũmmũg Topa tep-tup. ꞌÃxop te hãpkummuk hã tot, puxix Topa xa maxnãp-tup. Yã ꞌãxop te hãpxopmã max, pa tikmũꞌũn te ꞌãkummugãhãꞌ,
\v 20 pa ꞌãxop te hãpkummuk mĩy, haꞌ nõy te ꞌãxop kix, ha taꞌ kummuk hitop hã tot. Pa ꞌãxop te hãpxopmã max, pa tikmũꞌũn te ꞌãxuygãhãꞌ, ha ꞌãxop teꞌ xũy hã tot max, puxix Topa xa maxnãꞌ.
\v 21 Yã Topa teꞌ xat, xayĩy ꞌãxũy. Yã hõmã Kunnix te ꞌãxop pupiꞌ xũy, xayĩy ꞌãxop nõm pẽnãꞌ, tu kamaꞌ mĩy Kunnux putuk.
\v 22 Kunnix te hãpkummuk mĩy ꞌohnãg, huꞌ koit ꞌohnãg. Tikmũꞌũn te Yeyox teꞌ koit ꞌãpak ꞌohnãg.
\v 23 Tikmũꞌũn te Yeyox pu hãmꞌãktux kummuk, pa Yeyox teꞌ yãnãn ꞌohnãg. Tuteꞌ xũy hãꞌ tot, pa hãmꞌãktux kummuk yãnãn ꞌohnãg, pa Topa kopaꞌ kuxa yũm, ha Topa te tikmũꞌũn yõg hãpxopmãꞌax kopit putup, nũy kummuk hã yãnãn.
\v 24 Kunnix te yũmũg pupiꞌ xok. Kunnix te hãpkummuk mĩy ꞌohnãg, ha ta yũmũꞌãte hãpkummuk mĩy, ha Topa te yũmũg pupi Kunnix xũygãhã mĩpkupnix yĩmũꞌ, kopxix yũmũg hãpkummuk mĩy kux, nũy hãpxeꞌe mĩypax. Kunnix kayax pip, puyĩy yũmũg hittupmãꞌ.
\v 25 Kahnẽn te yãy xaxok, tu putat yũmmũg ꞌohnãg. Hã kaxĩy ꞌãxop hõmã, tu Topa yõg putat max yũmmũg ꞌohnãg. Kahnẽn pẽnãꞌax te kahnẽn xipihiꞌ, tuꞌ nũnnãhãꞌ, ha kahnẽn teꞌ peꞌ mõg, ha pẽnãꞌax te kahnẽn pẽnãhãꞌ. Hã kaxĩy Topa te ꞌãxop nũnnãhãꞌ, Topa yõg putat tuꞌ mõxahaꞌ, ha ꞌãxop pip Topa mũtik, ha Topa te ꞌãxop pẽnãhãꞌ, tu ꞌãkuxa maxnãhãꞌ.
\c 3
\s ꞌĨpxox xiꞌ xetut xop
\p
\v 1 Kãmãnat xop, ꞌãpu xatꞌax xop ꞌãpax. Xetut xop, ꞌãpu ꞌãyĩpxox xop ꞌãpax kamah. ꞌÃyĩpxox kuxa mãm hok Topa yõg hãmꞌãktux kopah, puxix ꞌõg hãpxopmã max pẽnãꞌ, huꞌ kuxa mãm putup. Yã xate hãmꞌãktux putupꞌah,
\v 2 pa ꞌãyĩpxox teꞌ pẽnãp-tup xate hãpxeꞌe mĩy, tu ꞌãyĩpxox ꞌãpak.
\v 3 ꞌŨn te yãy xe panip xap, tu xapmax xohix tat, tu topixxax max mõꞌtat, puyĩy tikmũꞌũn xohix ꞌũn ꞌãktux max. ꞌÃpu kaxĩy hok.
\v 4 Pa ꞌãpu ꞌãmax yãy putuk ꞌãkuxa kopah, yã ꞌãkuxa yũm, tu ꞌãkuxa gãy ꞌohnãg. Hã kaxĩy ꞌãmax yãy putuk xexka Topa puꞌ.
\v 5 Yã hõmã ꞌũn xop hã kaxĩy, yãꞌ kuxa max, tu Topa kopa kuxa mãm, nũy hãmmax hip, tu yãy kuxa max mĩy, yã ꞌĩpxox ꞌãpak, tuꞌ yĩpkox pip.
\v 6 Hõmã Xat te kaxĩy, tu ꞌĩpxox ꞌAmanãm ꞌãpak, tuꞌ yĩpkox pip. Xat te ꞌĩpxox pu: “ꞌÃpu xat. ꞌÃte nõꞌ mĩy putup.” Kaxĩy. Xix hõnhã ꞌãxop te hãpxopmã max, tu ꞌãkuxa mãm, nũy ta Xat putuk.
\p
\v 7 Hã kaxĩy ꞌĩpxox xop. ꞌĨpxox xop, ꞌãpu yãy xetut peꞌãpaxeh max, yã ꞌãxetut puꞌuk, ha ta ꞌãmũn kaꞌok. ꞌÃpu yã xetut ꞌãpax. Yã Topa te ꞌãxop hĩnnãhã mõkumaꞌãmõg, haꞌ kux ꞌohnãg, xix ꞌãxetut hĩnnãhã kamah, haꞌ kux ꞌohnãg. Xate yãy xetut pu ꞌãmax, nũy ta Topa pu hãmꞌãktux maxp-tup. Pa xate yãy xetut pu ꞌãkummuk, nũy ta Topa pu hãmꞌãktux kummuk putup.
\s Nõm te hãpxopmã max, yĩy tikmũꞌũn te nõm xũygãhãꞌ
\p
\v 8 Xix ꞌãxop kamah. Yãꞌ max ꞌãp-tox puxet xix ꞌãkuxap-xet. ꞌÃpu yãy putuppax, nũy ꞌãtaknõy xop max putuk. ꞌÃpu tikmũꞌũn pu hãpxopmã max, nũy nõm ꞌãpax.
\v 9 Tikmũꞌũn te ꞌãxop kummugãhãꞌ. ꞌÃpu ꞌũyãnãn hok. Tikmũꞌũn te ꞌãmãnõg kummuk. ꞌÃpu ꞌũyãnãn hok. Pa ꞌãpu nõm kummuk xop pu hãpxopmã max. ꞌÃpu nõm pu hãmꞌãktux max. Hamũn, Topa te ꞌãxop xãnãhãꞌ, tu xa hãmꞌãktux xex, nũy xa hãpxopmã max.
\v 10 Yã Topa yõg tappet te:
\q “ꞌOk xatep-tup hãpxop max ꞌõg hãmyãxatemak xohix tox hã, nũy ꞌãkuxa hittup?
\q ꞌÃpu hãmꞌãktux kummuk hok, nũy koit hok,
\q
\v 11 nũy hãpkummuk mĩy kux,
\q nũy yãy kix kuxyã pax,
\q nũy yãy kix kux.
\q
\v 12 Hamũn, Topa teꞌ pẽnã max hãpxeꞌe mĩy xop,
\q ha nõm te Topa pu hãmꞌãktux,
\q ha Topa teꞌ xupak, nũy mĩy.
\q Pa Topa te hãpkummuk mĩyꞌax xop ꞌãpak ꞌohnãg.” Kaxĩy.
\p
\v 13 ꞌÃxop te hãpxopmã max putuppax, puxix ꞌãkoxyõy kaꞌok putupꞌah.
\v 14 Pa ꞌãxop te hãpxeꞌe mĩy, pa tikmũꞌũn te ꞌãk-teꞌex kummuk, ha ta ꞌãkuxa hittup. ꞌÃpu tikmũꞌũn yĩpkutuk hok. ꞌÃpu ꞌãkuxanõg hok.
\v 15 Pa ꞌãpu Kunnix ꞌãpax, nũy nõm xexka mĩy ꞌãkuxa kopah, yã ꞌãxuxyã xexkaꞌ. Texĩy ꞌãkuxa mãm Topa kopah, nũy hãmmax hip? ꞌÃpu nõm peꞌãpaxeh. Hãpxip ꞌĩhã tikmũꞌũn te xa yĩkopit putup, hu: “Texĩy ꞌãkuxa mãm? Texĩy xate hãmmax hip?” Kaxĩy. Yã xate nõm ꞌãktux yũmmũg putup nõmhã.
\v 16 Xate yãy kuxa mãmꞌax ꞌãktux putup, tu xate hãmꞌãktux max putup, tuꞌ nõy ꞌãpak max putup.
\v 17 ꞌÃxop te hãpxopmã max, yĩy tikmũꞌũn te ꞌãxop kuteꞌex kummuk, yãꞌ max, yã Topa tep-tup. Pa ꞌãxop te hãpxopmã kummuk, yĩy tikmũꞌũn te ꞌãxop kuteꞌex kummuk, puxix tuꞌ kummuk.
\v 18 Hamũn, Kunnix te tikmũꞌũn pupiꞌ xok. Kunnix ꞌũmax, pa tikmũꞌũn te hãpkummuk mĩy, yã nõm max te nõm kummuk xop pupiꞌ xok, nũy tikmũꞌũn kuxa mãmmã Topa kopah. Kunnix yĩn xok, paꞌ koxuk hiꞌ,
\v 19 tu taꞌ mõg Kunnix koxuk, tu mõktu yãmĩy pu hãmꞌãktux kanet kaꞌok kopah.
\v 20 Yã tikmũꞌũn yõg yãmĩy. Hõmã ꞌũhittap nõm tikmũꞌũn pip hãm xexka tuꞌ, tu Topa kopa kuxa mãm ꞌohnãg, ha Topa teꞌ hip punethok, ha Nõe te mĩpkox xexka mĩy, yã mĩptut xexkaꞌ, yã kõnãg yĩmũꞌ mõg nõꞌõm. Hãpxip ꞌĩhã tikmũꞌũn xohix xakix kõnãg kopah, pa xohix teꞌ 8 mõxakux mĩpkox kopah, tuꞌ xakix ꞌohnãg, ꞌap xakixꞌah kõnãg kopah.
\v 21 Yã mĩpkox kopaꞌ xakix ꞌohnãg, yãꞌ hiꞌ. Hã kaxĩy tikmũꞌũn hi xeꞌẽgnãg mõkumaꞌmõg, haꞌ kux ꞌohnãg. Tikmũꞌũn kuxa tup, tuꞌ kuxa mãm Topa kopah, hap-tox pix. Yã putox pixꞌax te tikmũꞌũn xax pix ꞌohnãg. Yeyox Kunnix putpuꞌ hiꞌ, nũy tikmũꞌũn hĩnnãꞌ.
\v 22 Tu taꞌ mõg Yeyox Kunnix pepix pexkox tuꞌ, tu mõktuꞌ yũm Topa yĩm xeꞌe tuꞌ, tu pexkox yõg nũꞌpok xop xohix xat, xix pexkox yõg xexka xop xat, xix pexkox yõg xexkanãg xop xat.
\c 4
\p
\v 1 Hõmã Kunnix yĩn xũy. Hã kaxĩy ꞌãxop xũy putup kamah. ꞌÃpu hãmpeꞌãpaxeh Kunnix te hãmpeꞌpaxex putuk. Hamũn, tikmũꞌũn xũy, puxix hãpkummuk mĩy putuppaxꞌah.
\v 2 ꞌÃpu ꞌũmĩypax Topa te nõm putup, tu mõktu ꞌãxakix, ha Topa te ꞌãxat putup. ꞌÃpu ꞌũmĩy hok xate nõm putup.
\v 3 Hõmã ꞌãxop te nõm mĩy punethok, tu Topap-tup nõg xop teꞌ mĩy putuk. Yã Topap-tup nõg xop te hãpkummuk mĩy pax, tuꞌ nõy hã xupxetpax, tuꞌ paptuxpax, tu hãpkuteꞌexpax, tuꞌ xitpax tikmũꞌũn xohix mũtik, tu yãy kotĩnnãhãꞌ, nũy kenmuk xoꞌoppax, tu topa komut xop pu hãmꞌãktuxpax.
\v 4 Pa hõnhã ꞌãxop te hã kaxĩy mĩy ꞌohnãg Topap-tup nõg xop mũtik. Ha Topap-tup nõg xop te: “Teptu ꞌãxop te hãpxopmã hok ꞌũgmũg mũtik?” Kaxĩy. Yã ꞌãxop gãy ꞌohnãg, tu hãpkummuk mĩy ꞌohnãg nũmũtik, yĩy ꞌãxop mãnõg, nũy ꞌãxop ꞌãktux kummuk.
\v 5 Pa hãpxip ꞌĩhã nõm kummuk xop te Topa keppaꞌ pip putup, ha Topa te nõm yõg hãpxopmãꞌax kopit putup, ha nõm te yãy yõg hãpxopmãꞌax ꞌãktux putup. Yã Topa te hi xop yõg hãpxopmãꞌax kopit putup, ha taꞌ xakix xop putpuꞌ hip-tup, ha Topa te yõg hãpxopmãꞌax kopit putup kamah.
\v 6 Hã kaxĩy xakix xop te Topa yõg hãmꞌãpak maxꞌax ꞌãpak. Hõmã nõm xakix xop yã tikmũꞌũn, tuꞌ pip hãm xexka tuꞌ, ha Topa te yõg hãpxopmãꞌax kopit. Nõm xop yõg yãmĩy te Topa yõg hãmꞌãpak maxꞌax ꞌãpak, nũy hãpxopmãꞌax te Topa yõg putuk.
\p
\v 7 Hãpxip ꞌĩhã hãpxop xohix nõg putup. Yãꞌ kux. ꞌÃpu ꞌãp-tox max. Pa ꞌãtix, nũy Topa pu hãmꞌãktux max.
\v 8 ꞌÃpu ꞌãnõy putuppaxnãm. Xate ꞌãnõy putuppax, nũy taꞌ nõy yõg hãpkummuk mĩyꞌax yũmmũg kutõgnãg.
\v 9 ꞌÃpu ꞌãpet xõnpax, puyĩy puknõg xop mõxakux. ꞌÃpu hãmꞌãktux hok, hu: “ꞌÃtep-tupꞌah puknõg xop nũnteh.” Kaxĩy.
\v 10 Topa te tikmũꞌũn kaꞌogãhãꞌ, puyĩy Topa pu hãpxopmã max. Tute yãp-xet kaꞌogãhãꞌ, pu hãpxopmãꞌ, tuꞌ nõy kaꞌogãhãꞌ, pu hãpxopmãꞌ nõy mĩy, yã ꞌũxohix kaꞌogãhã te kaxĩy. ꞌÃpu nõm xohix mĩy, nũy tikmũꞌũn hã ꞌãtehet,
\v 11 Topa te ꞌãkaꞌogãhãꞌ, xayĩy ꞌãxop tikmũꞌũn xohix pu hãmꞌãktux. ꞌÃpu Topa yõg hãmꞌãktux ꞌãktux tikmũꞌũn puꞌ. Topa te ꞌãkaꞌogãhãꞌ, xayĩy ꞌãxop kuxa mãm xop pu hãpxopmã max. ꞌÃpu hãpxopmã max, ꞌĩhã Topa te ꞌãkaꞌogãhãꞌ, puyĩy tikmũꞌũn te: “Yãꞌ max xeꞌẽgnãg Yeyox Kunnix”. Kaxĩy. ꞌÃpu Topa pu nõm ꞌãktux kamah, hu: “Ãmax xeꞌẽgnãg. ꞌÃkaꞌoknãm. ꞌŨgmũꞌãte nõm ꞌãktux putup hãmyãxatamuk xohix kux ꞌohnãg hã. Kaxĩy.
\s Yeyox kopaꞌ kuxa mãm xop xũy
\p
\v 12 ꞌŨkxape xop, ꞌãte ꞌãp-tuppax. ꞌÃxop teꞌ xũy xexka hã tot, yã tikmũꞌũn te ꞌãxop kuteꞌex kummuk. ꞌÃpu hãmꞌãktux hok, hu: “Teptu ꞌũkxũy xexkaꞌ?” Kaxĩy. Hã kaxĩy hãmꞌãktux hok. Yã Topa teꞌ xat, puꞌ kuxa mãm xohix xop xũy hã tot.
\v 13 ꞌÃpu ꞌãkuxa hittup. Yã Kunnix teꞌ xũy hã tot, ha ta ꞌãxop te xũy hã tot kamah. ꞌÃxop te xũy hã tot, xayĩy ꞌãxop kuxa hittup xexka putup, ꞌĩhã putpuꞌ nũn Yeyox, ha tikmũꞌũn xohix teꞌ yũmmũg putup ꞌũmax xeꞌẽgnãg Yeyox.
\v 14 ꞌÃxop kuxa mãm Yeyox kopah, tu Kunnix mũtik ꞌãmõg, yĩy ta tikmũꞌũn te ꞌãxop mãnõg, nũy ꞌãxop ꞌãktux kummuk. ꞌÃpu ꞌãkuxa hittup. Tikmũꞌũn te ꞌãxop kuteꞌex kummuk, Topa Koxuk mõg ꞌãxop mũtik hah, yãꞌ Koxuk xeꞌẽgnãg.
\v 15 Pa xateꞌ nõy putex, peꞌ xupxet, pe hãpkummuk mĩy, pe hãpxũmãhĩy, haꞌ nõy te xa hã yãnãn, yĩy ꞌãxũy. ꞌÃmhok! Kaxĩy hok. Yã hitop ꞌãxũy.
\v 16 Pa ꞌãkuxa mãm Yeyox Kunnix kopah, yĩy taꞌ nõy te ꞌãkuteꞌex kummuk, ha ꞌãxũy. Hamũn. Yãꞌ max nõmhãꞌ. ꞌÃpu ꞌãyãyhãhup hok. ꞌÃpu Topa pu hãmꞌãktux, hu: “Kunnix, ꞌãmõg ꞌũgmũtik. ꞌÃmax”. Kaxĩy.
\p
\v 17 Hãpxip ꞌohnãg ꞌĩhã Topa te tikmũꞌũn yõg hãpxopmãꞌax xohix kopit putup, tu yãy yõg tikmũꞌũn yõg hãpxopmãꞌax kopit putup hãmãxap. Texĩy Topa te tikmũꞌũn yõg hãmxopmãꞌax kopit kux putup? Yã tute Topa yõg hãmꞌãpak maxꞌax ꞌãpak hok xop yõg hãpxopmãꞌax kopit putup, nũy hãpkummuk hã yãnãn.
\v 18 Yã Topa yõg tappet te:
\q “Yã hãpxopmãꞌax kaꞌok Topa te tikmũꞌũn kuxa kummuk xit, puyĩy hãpkummuk mĩyꞌax hã yãnãn hok.
\q Texĩy Topap-tup nõg xop nõm te hãpkummuk mĩy? Yã Topa te yõg hãpkummuk mĩyꞌax hã yãnãn putup.” Kaxĩy.
\p
\v 19 ꞌÃxop teꞌ xũy hã tot, Topa teꞌ xat hah. ꞌÃpu Topa kopa ꞌãkuxa mãm kaꞌok. Topa te ꞌãxop mĩy. ꞌÃpu ꞌãkuxa mãm Topa kopah, nũy hãpxopmã max. Topa te xa hãmꞌãktux xex, tu nõm xohix mĩy.
\c 5
\s Yeyox kopa kuxa mãm xop pẽnãꞌax xop
\p
\v 1 ꞌŨkuxa mãm xop pẽnãꞌax max xop, ꞌãte xaꞌ kaxꞌãmiꞌ. ꞌŨgmũn yãꞌ kuxa mãm xop yõg pẽnãꞌax max kamah ꞌãxop putuk. Hõmã Yeyox xũy, tuꞌ xok, ha ꞌãteꞌ pẽnãhãꞌ, tu tikmũꞌũn pu nõm ꞌãktux, yĩy tikmũꞌũn tek kummugãhãꞌ. Hãpxip ꞌĩhã putpuꞌ nũn putup Yeyox, ha ꞌãte Kunnix pẽnãp-tup yãꞌ max xeꞌẽgnãg, ha Kunnix te xa maxnãp-tup.
\v 2 ꞌÃpu ꞌũkuxa mãm xop pẽnã max, yã kahnẽn pẽnãꞌax te kahnẽn pẽnã max putuk. Topa te xaꞌ popmãhã ꞌũkuxa mãm xop, xayĩy pẽnãꞌ. ꞌÃpu ꞌũp-tuppax, nũy nõm pẽnãꞌ. Yã Topa tep-tup. ꞌÃpu ꞌãkokõn hok, pa nõm xop pẽnã max. Xateꞌ kuxa mãm xop pẽnãhãꞌ, nũy tayũmak pop, puxix tuꞌ kummuk. Pa xateꞌ kuxa mãm xop pẽnãp-tuppax, puxix tuꞌ max.
\v 3 ꞌÃpuꞌ kuxa mãm xop xatpax hok, xate nõm pẽnãhãꞌ, pa ꞌãpu hãpxopmã max, puxix nõm ꞌãpẽnãꞌ, nũy kamaꞌ mĩy ꞌãputuk.
\v 4 Hãpxip ꞌĩhã putpuꞌ nũn putup Yeyox. Kahnẽn xuxyã teꞌ pẽnãꞌax pẽnã max. Hã kaxĩy Yeyox te ꞌãxop pẽnã max, tu xaꞌ popmãp-tup ꞌũxatꞌax xexka yõg kuxxax max xeꞌẽgnãg, nũy ꞌãxexka mĩy.
\p
\v 5 Tik tup xop, ꞌãpu tik hitap xop ꞌãpax, nũy ꞌãyĩpkox piꞌ. ꞌÃpu yãy kutõgnãg peꞌãpaxeh, nũy nõy hã ꞌãtehet. Yã Topa yõg tappet te: “Topa tep-tupꞌah yãy xexka peꞌpaxex xop, pa Topa te yãy kutõgnãg peꞌpaxex xop pu hãmmaxnãhãꞌ”. Kaxĩy.
\v 6 ꞌÃpu yãy kutõgnãg peꞌãpaxeh nõy nã mõg, ha Topa kaꞌok te ꞌãxop hã tep-tup, tu hãpxip ꞌĩhã tutep-tup putup, tu ꞌãxop xexka mĩy putup.
\v 7 ꞌOk ꞌãkuxanõg? ꞌÃpu hãmꞌãktux Topa mũtik, nũy ꞌãkuxa mãm kaꞌok Topa kopah, nũy ꞌãkuxanõg kux.
\p
\v 8 Pa ꞌãtix! Hãmpẽnãꞌ. Yã Hãmgãyãgnãg ꞌũgãy, tu hãpkumep. Hãmgãy teꞌ: mit, mit, mit. Yã xok xak, nũy putex. Hã kaxĩy Hãmgãyãgnãg tep-tup, nũy ꞌãkuxa mãmꞌax kuxyãꞌ.
\v 9 ꞌÃpu ꞌãkuxa mãm mõkumamõg. ꞌÃpu ꞌũtuxhok, pu Hãmgãyãgnãg ꞌãxop mõgã hok, xayĩy hãpkummuk mĩy hok. Yã xateꞌ yũmmũg ꞌãxape kuxa mãm xop xohix pip hãpxexka xohix tuꞌ, haꞌ kuxa mãm hok xop te nõm kummugãhãꞌ, yã ꞌãxop kummũgã putuk.
\v 10 ꞌÃxop xũy putup ꞌũxeheh, pa hãpxip ꞌĩhãꞌ kux, ha Topa max xeꞌe te xa maxnãp-tup, tu ꞌãxop xãnãp-tup, xayĩy piꞌ ꞌãxop Kunnix mũtik mõkumaꞌãmõg, haꞌ kux ꞌohnãg. Yãꞌ max xeꞌẽgnãg. Topa te ꞌãkuxa mãmmãp-tup, tu xa kaꞌok hõm putup. ꞌÃkuxa mãm putup Topa kaꞌok kopah.
\v 11 Yũmũꞌãte: “Topa ꞌũkaꞌok xexka hãmyãxatamuk xohix kux ꞌohnãg hã. Hamũn.” Kaxĩy.
\s Tikmũꞌũn te ꞌãxop peꞌpaxex
\p
\v 12 ꞌÃte hãmꞌãktux, ha Xinax te hãmꞌãktux kaxꞌãmi nũ tappet tuꞌ. ꞌÃteꞌ yũmmũg Xit yã yũmũg taknõy putuk, tu ꞌãtuꞌ xip kaꞌok. ꞌÃtep-tup, nũy ꞌãkuxa hittupmãꞌ. ꞌÃte xa hãmꞌãktux ꞌũxeꞌe nũhũ hãmꞌãktux Topa max yõg. ꞌÃpu ꞌãkuxa mãm Topa yõg hãmꞌãktux kopah.
\p
\v 13 ꞌŨpip Yeyox kopa kuxa mãm kaꞌok xop hãpxexka Maminõn tuꞌ, yã ꞌãxape xop. Topa te nõm yĩmõgãtux. Nõm te ꞌãxop pu hãmꞌãktux ꞌãxop peꞌpaxex. Ha taꞌ xip kama ꞌũk-tok pit putuk Mãꞌak, tu ꞌãxop pu hãmꞌãktux kamah ꞌãxop peꞌpaxex.
\p
\v 14 ꞌÃxop yãy tu nũꞌnãhãꞌ. ꞌÃpu yãy putuppax, yã xape xop max putuk. ꞌÃtep-tup, xayĩy ꞌãxop kuxa mãm max, yã ꞌãxop yã Kunnix yõg xop. Hamũn.
\p Tu ta tuꞌ kux.