\id 2JN  - Maxakalí NT [mbl] (Brazil) -2011 bd
\h 2 YOÃM
\toc1 2 Yoãm
\toc2 2 João (2 Jo)
\mt YOÃM TE ꞌŨN KUXA YŨM KAꞌOKꞌAX PU KAXꞌÃMIꞌ II
\c 1
\p
\v 1 ꞌŨgmũn yã tik pẽnã maxꞌax, tuk xape hex pu kaxꞌãmiꞌ, xik xape kutok xop pu kaxꞌãmiꞌ, ꞌãte nõm putup pax xeꞌeꞌ. ꞌAk puxetꞌah. Yã tikmũꞌũn te hãmyok mĩy, tu ꞌãp-tup pax kamah.
\v 2 ꞌŨgmũꞌãte ꞌãp-tup pax, hãpxeꞌe tek mũ kuxa kopaꞌ xip hah. Yãꞌ xip kaꞌok mõ kumaꞌ mõg.
\p
\v 3 Pũyã yũmũg Tak Topa xa hãmmaxnãꞌ, xix ãkuxa kaꞌ, xix ꞌãkuxa mãmmãꞌ. Pũyãk-tok Yeyox Kunnix mũtik xa hãmmaxnãꞌ, xi mõꞌãyãy xeꞌẽgnãg, hãmyok mĩy tuꞌ.
\s Tu hãpxeꞌe ꞌãktux, xix yãy putup pax ꞌãktux
\p
\v 4 Tikmũꞌũn te ꞌãxop ꞌãktux, yã ꞌãk-tok te hãmyok mĩy, ha tikmũꞌũn teꞌ xuktux, ha kaxĩy yũmũg Tak Topa te yũmũg xat, yĩk kuxa hittup.
\v 5 ꞌŨkxape hex, ꞌũyã yũmũ yãy putup pax. Yã Topa teꞌ xat tap, ꞌũyã yũmũg yãy putup pax.
\v 6 Tikmũꞌũn teꞌ nõy putup pax, puxix Topa yõg xatꞌax mĩy. Yã ꞌãte xeꞌ xatꞌax ꞌãktux, hu: “ꞌŨyã yũmũ yãy putup pax mõg kumak mõg,” kaxĩy.
\p
\v 7 Tikmũꞌũn punethok teꞌ nõy pu mõꞌãmãꞌ, tu hãpxexka xohix tuꞌ pip. Tu Yeyox Kunnix ꞌãktux, hu: “ꞌAp tikmũꞌun kutok xeꞌeꞌah,” kaxĩy. Yã Kunnix tuꞌ gãy xop, tu yãꞌ koit.
\v 8 ꞌÕg pa ꞌãtiꞌ, ka ꞌãhãmꞌax xaxok, puyĩy pexkox yõg hãpxop hã Topa xa pago.
\p
\v 9 Kunnix te hãmyũmmũgãhãꞌ, yãꞌ puxiꞌ, pa tikmũꞌũn te hãmyũmmũg putup xũy, hu yãy pu hãmyũmmũgꞌax puknõg yũmmũgãhãꞌ, puxix Topa nõm tikmũꞌũn mũtik tu ti hok. Pa tikmũꞌũn te hãmyũmmũgꞌax ꞌãpax, puxix Topa nõm mũtik ꞌatiꞌ, hak-tok te nõm mũtik tihiꞌ.
\v 10 ꞌÃha tikmũꞌũn nõy mõg, tu Kunnix yõg hãmꞌãktux xeꞌe yũmmũgã hok, yĩy ta ꞌãpet tuꞌ xãnã hok, pu mõꞌxip, xix hãmmaxnãꞌax ꞌãktux hok, nũy: “Pũyã Topa ꞌãkuxa yummãꞌ,” kaxĩy. ꞌŨxuktux hok.
\v 11 Yã tikmũꞌũn teꞌ kummuk xop pu hãmmaxnãꞌax ꞌãktux, puxiꞌ kummuk xop mũtik hãpkummuk mĩy.
\s Tu hãmꞌãktux kux
\p
\v 12 ꞌÃte xe xa hãmꞌãktux putup, pa kaxꞌãmiꞌax hã ꞌãte ꞌap hãmꞌãktux putupꞌah xaꞌ. ꞌŨgmõg putup ꞌãha, nũy xa hãmꞌãktux, xa ꞌãxop yãnãn tu ꞌã hãmꞌãktux, ꞌũyĩy yũmũg kuxa hittup xexkaꞌ.
\p
\v 13 Topa te ꞌãxape hex yãykutnãhãꞌ, hak-tok xop te xa ꞌãneo. Tu ta tuꞌ kux.