\id 3JN  - Maxakalí NT [mbl] (Brazil) -2011 bd
\h 3 YOÃM
\toc1 3 Yoãm
\toc2 3 João (3 Jo)
\mt YOÃM TEꞌ XAPE ꞌÃXETꞌAX GAX PU KAXꞌÃMIꞌ III
\c 1
\p
\v 1 ꞌŨgmũn yã tik pẽnã maxꞌax, tuk xape Gax pu kaxꞌãmiꞌ, ꞌãte nõm putup pax xeꞌeꞌ.
\p
\v 2 ꞌŨkxapeꞌ, ꞌãte Topa tuꞌ xak tap, puyĩy xa hãmmaxnãꞌ, xayĩy ꞌãkuxa hittup putuk ꞌãhittup.
\v 3 Yũmũg xape nũn, tu ꞌãmũn ꞌãktux, hak kuxa hittup xexkaꞌ, hak xape te xate hãpxopmã max ꞌãktux, xix xate hãpxaxok hok ꞌãktux, xix xate hãmyok mĩy ꞌãktux,
\v 4 yĩk kuxa hittup, ꞌãmũn tek mũn hã ꞌũgkutok tuꞌ.
\s Tu Gax ꞌãktux max
\p
\v 5 ꞌŨkxape: Yũmũg xape pu ꞌãhãm max, xix yũmũg xape puknõg pu ꞌãhãm max kamah.
\v 6 Ha ꞌãmũn ꞌãktux, ꞌĩhãꞌ kuxa mãm kaꞌok xop yãykotĩnnãꞌ pip, xix xate ꞌãxapep-tup pax ꞌãktux. Hõmhã ꞌãte xaꞌ xak, xa nũhũ ꞌãxape xop mõꞌnĩynãm, pu xeꞌ mõg, nũy hãmꞌãpakꞌax max ꞌãktux, ꞌãhittup hah, nũy ꞌãhã ꞌãtehet, nũy Topa kuxa hittupmãꞌ.
\v 7 Yã Kunnix puꞌ hãm, tu hãpkumep, nũy hãmꞌãpak maxꞌax ꞌãktux, tu tikmũꞌũn kuxa mãm hok xop tu tayũmak pop ꞌohnãg.
\v 8 Yĩy yũmũꞌãte nõm ꞌa tetꞌax, nũy nõm xop mũtik yũmũg pupiꞌ hãm, nũy hãmꞌãktux xeꞌe ꞌãktux hãpxexka nõy tuꞌ.
\s Tu Niot ꞌãktux, xix Nemẽn ꞌãktux
\p
\v 9 Hõmã ꞌãte tappet kutõgnãg mĩy, tu ꞌãxop kuxa mãm kaꞌok xop ha mõꞌkutnãhãꞌ, pa Niot tep-tup nõg, yãy peꞌpaxex xexka tuꞌ, tu ꞌãxop xat putup,
\v 10 yĩy ꞌãhak mõg, tu mõktuk xupep, tu Niot pu hãmꞌãktux putup, tuꞌ yõg hãpxopmãꞌax ꞌãktux putup. Yãk mũg ꞌãktux kummuk, tuꞌ koit xexkaꞌ, Tu hãpxopmã kummuk kamah, tuꞌ xape xop ꞌap xãnãꞌah, nũy pet tu mõꞌxip. Tuꞌ xat hok kamah, pu yãy xape nõy xãnã hok, haꞌ mĩy, puxixꞌ xat hok, pu yãykotĩnnã tuꞌ xip hok ꞌũxape xop mũtik.
\p
\v 11 ꞌŨkxape,: ꞌÃnõy yõg hãpxopmãꞌax max tat, tu hãpxopmãꞌax kummuk kuxyãꞌ. Yã Topa yõg xop te hãpxopmã max, pa tikmũꞌũn te hãpxopmã kummuk, ꞌap Topa ꞌũm pẽnã xetꞌah.
\p
\v 12 ꞌŨxohix te Nemẽn ꞌãktux max, ha hãmyok mĩy, yĩg mũꞌãteꞌ xuktux max, ha xateꞌ yũmmũg, yãg mũꞌãte hãmꞌãktux xeꞌeꞌ.
\s Tu ꞌãneo hõm
\p
\v 13 ꞌÃte xa hãpxopmãꞌax xohix ꞌãktuxꞌax, pa tappet tu ꞌãteꞌ mĩy putupꞌah,
\v 14 Hu ꞌãteꞌ hip, nũy ꞌãpẽnãꞌ, ꞌĩhã xa hãmꞌãktux putup.
\p
\v 15 Pũyã Topa ꞌãkuxa yũmmãꞌ. Yũmũg xape xohix te ꞌãneo. ꞌÃte yũmũg xape xop xaxok ꞌohnãg, nõm xop te ꞌãmũtik pip. Hu xaꞌ xak, xak mũn ꞌãktux, nũy yũmũg xape xohix puꞌ xuktux. Tu ta tuꞌ kux.