\id JUD  - Maxakalí NT [mbl] (Brazil) -2011 bd
\h YOT
\toc1 Yot
\toc2 Judas (Jd)
\mt YOT TEꞌ KUXA MÃM KAꞌOK XOP PU KAXꞌÃMIꞌ
\c 1
\p
\v 1 ꞌŨgmũn Yot, Yeyox Kunnix pu ꞌãte hãpxopmãhãꞌ, yã Tiak hãk taknõy, tu xa kaxꞌãmiꞌ, Topa te ꞌãxop xãnãhã hah, ha Topa yũmũg Tak te mõꞌãyãy xeꞌẽgnãg, xix Yeyox Kunnix te ꞌãpẽnãnãꞌ xip, nũy ꞌãpẽnã max.
\p
\v 2 Pũyã Topa ꞌãkuxa mãmmãꞌ, xix mõꞌãyãy xeꞌẽgnãg, xix ꞌãkuxa kaꞌ, ha mõktu yã ꞌãkuxa hittup xexkaꞌ.
\s Yot te mõꞌãmãꞌax xop ꞌãktux
\p
\v 3 ꞌŨkxape xop, ꞌãte ꞌãp-tup pax, tu xa kaxꞌãmiꞌ, nũy ꞌãkuxa kaꞌogãꞌ, nũy yũmũg xuxyã ꞌãktux. Yã yũmũg pupiꞌ xok, nũy yũmũg kuxa kummuk xit, nũy yãnãn tuꞌ kuxa max tat. Yĩy ꞌãte nũ mĩy tappet, nũy mõꞌãnĩynãm, xayĩy kuxa mãm hok xop pu hãmꞌãktux hãꞌ nõy yãnãn. Yã Topa te yãy yõg tikmũꞌũn pu hãmꞌãktux xeꞌẽgnãg, tu ꞌap xep ꞌãktux putupꞌah.
\v 4 Yã tik xop kuxa mãm ꞌohnãg, tuꞌ xaptop hãꞌ kuxa mãm kaꞌok xop kopaꞌ tihiꞌ, tu Topa yõg tikmũꞌũn puꞌ koit, tu hãmyũmmũgãhãꞌ, tu mõꞌãmãꞌax hã hãmyũmmũgãhãꞌ, tu Topa yõg hãmꞌãktux xeꞌe hãꞌ yãnãn hãmꞌãktux nõy. Yã yũmũ yõg Topa te yũmũꞌã hãmmaxnãhãꞌ, tu yũmũg kuxa kummuk tupmãhãꞌ, pãyã tik te koit xop teꞌ nõy xop pu yã mõꞌãmãꞌ, nũy yãy putupꞌax kummuk mĩy, tuꞌ nõy hãꞌ xupxet pax, tu yũmũg xuxyã puxehnãg putup nõg, nõm te yũmũꞌã hãmyũmmũgã xeꞌẽgnãg. Ha Topa yõg tappet te nõm tik te koit xop ꞌãktux tap. Yã Topa teꞌ yõg hãpxopmãꞌax kummuk ꞌãktux, tuꞌ kummugãp-tup ꞌũyãnãn tuꞌ, nũy tu pago.
\v 5 ꞌÃxop te hãmyũmmũg tap, pãyãꞌ xaxok hok: Yã Topa te ꞌIyaet yõg tikmũꞌũn mõy hãpxexka ꞌEyit kopah, ha hãmyãxatamuk punethok nõg, ꞌĩhãꞌ kuxa mãm hok xop kix.
\v 6 Pexkox yõg nũꞌpok xop xohix, pãyãꞌ yãg yĩpkox ꞌohnãg Topa puꞌ, tu Topa ꞌãxetꞌax xeꞌẽgnãg paꞌ, nũy Topa yãnãn tuꞌ xat, yãy xexka peꞌpaxex, tuꞌ hitop hã yãy xexka peꞌpaxex, tuꞌ xat kummuk nãm, tu yãy xipꞌax nĩm. Yĩy Topa gãy kãmãnat kummuk xop tuꞌ, tu pexkox yõg kãmãnat kummuk hãꞌ gãy, tu pipkup mãkxapꞌax hãꞌ hĩy kaꞌok, ha nõm koa hok, ha kaxĩy Topa teꞌ kummuk xop mõgãhãꞌ, tuꞌ tat, ha hãpkoxtap tuꞌ mãm, tuꞌ hip, pu Topaꞌ yãnãn tuꞌ xũygã xexkaꞌ, haꞌ xũy kuxyã ꞌohnãg.
\v 7 Tikmũꞌũn te xa kõmẽn Xonõm ꞌãktux, xix kõmẽn Gõmõg ꞌãktux, xix kõmẽnnãg te hãmhumnãg tuꞌ pip ꞌãktux. ꞌŨxohix kõmẽn hittap. Haꞌ yõg tikmũꞌun xop te hãpxopmã kummuk pax kamah, nũꞌpok xop putuk, tuꞌ nõy mũtik nõm kummuk pax, xiꞌ nõy hãꞌ xupxet. Yã kuxap te mõꞌhap mõꞌkumaꞌ mõg, tuꞌ xũygãhãꞌ. ꞌŨxaxok hok, xa ꞌãxop kaxĩy ꞌãxũy hok.
\p
\v 8 Yã nõm te koit xop yãy yõnkup hã hãpxopmãhãꞌ, nũy yãy yĩn kummugãꞌ, ꞌa Topa yõg hãmꞌãktux ꞌũm ꞌãpakꞌah, ꞌũyĩpkox ꞌohnãg tuꞌ, tu pexkox yõg nuꞌpok xop max mãnõg kummuk.
\v 9 Yã nũꞌpok xop yõg xatꞌax yã Mĩget, tu ꞌap nõy xop mãnõgꞌah. ꞌÃmhok. Hõmã Mĩget te Hãmgãyãgnãg pu hãmꞌãktux, tu Mõyyex yõg xokxax ꞌãktux, haꞌ nõy yãnãn, ꞌĩhã Mĩget mãnõg ꞌohnãg, tute: “Pũyã Topa ꞌãmãnõg!” kaxĩy.
\v 10 Pa tik teꞌ koit xop te mãnõg, pa hãmyũmmũg ꞌohnãg. Tu hãm yõg hãpxopmãꞌax puxet yũmmũg, xokxop putuk, haꞌ nõg.
\v 11 Pũyã tu kuxãnõg, nõm tik te koit xop! Tute tik hittap Kãyĩy yõg putat kummuk hãꞌ mõg, nũy yõg hãpxopmãꞌax kummuk tat, tu tayũmak putup xũy, tik hittap Manaꞌãm putup, yĩy hãpxopmã kummuk kamah. Hõmã Kone gãy Topa tuꞌ, ha Topa tep-tex, hãpkummuk mĩy hah, ha tikmũꞌũn te hãpkummuk mĩy kamah, Kone putuk, ha Topa teꞌ kix kamah.
\v 12 Ha tikmũꞌũn teꞌ koit xop te ꞌãxop yõg ꞌãmuk xexka hãꞌ mõg, tu kenmuk xoꞌop, tu mõktu paptux, tuꞌ nõy xop puꞌ hupmãhãꞌ. Tu yãy peꞌpaxex, paꞌ nõy ꞌũm peꞌpaxex ꞌohnãg. Yã texgõy xexka putuk, ꞌãmuuh te ꞌũnõã mõꞌkaꞌok. Tu mĩnta kup kummuk putuk, yã hãmyãxatamuk xohix hã mĩnta ꞌohnãg tahaꞌ, ha mĩm kup putuk, tikmũꞌũn te nõm xut hãm kopah, ha yĩpxatit te hãptopa tuꞌ tap.
\v 13 Tu kõnãg kox xexka gãy putuk, ha yãy mahapnãm. Kaxĩy tikmũꞌũn teꞌ koit te hãpxopmãꞌax kummuk hãꞌ hupmãhãꞌ. Ha mãyõnnãg ꞌũm putuk, nõm te pexkox yõg putat xaxok, ha hitop hã hãpkumep, tuꞌ xupep ꞌohnãg, yĩy Topa teꞌ koit xop puꞌ pet, ha hãpkoxtap kopaꞌ pip kaꞌok, mõꞌkumaꞌ mõg, tuꞌ pip kux ꞌohnãg, yã hãptupmã ꞌohnãg.
\p
\v 14 Mõnãyxop hittap xexka ꞌẼnõg te Topa pupi hãmꞌãktux, tu tik te mãxap ꞌAnão hã mõkputox. Yã ꞌAnão tek-tok put, ha tehomik tok put, ha tehomik-tok put, ha tehomik-tok put, tu mõktu xohix te 7, ha mõkputox ꞌãxetꞌax ꞌẼnõg, tu tikmũꞌũn teꞌ koit xop ꞌãktux, hu: “Pẽnãꞌ! Yũmũg xuxyã nũn, pexkox yõg nũꞌpok xop xohix te 1.000 punethok mũtik nũn,
\v 15 nũy tikmũꞌun yõg hãpxopmãꞌax xohix kopit, tuꞌ nũn, nũy kuxa mãm hok xop yõg hãpxopmãꞌax kopit, nũy yõg hãmꞌãktuxꞌax kummuk hãꞌ kopit, Topa ꞌãktux kummuk haꞌ kopit putup, tuꞌ kummugãp-tup ꞌũyãnãn tuꞌ,” kaxĩy.
\p
\v 16 Yãꞌ koit xop yĩy, yãꞌ nõy nãg, hu yãy pupiꞌ gãy nãm, xiꞌ nõy kupex, tu yãy yõg putupꞌax mĩy, tu yãymũn xexka ꞌãktux, tu tikmũꞌũn nõy puꞌ hitop hã hãmꞌãktux, hu: “ꞌÃte ꞌãp-tup pax,” kaxĩy. ꞌŨnõy yõg hãpxop popꞌax tu hãmꞌãktux max, pãyãꞌ kuxa kummuk!
\s Tute hãmyũmmũgãhãꞌ
\p
\v 17 Pa ꞌãxop yã ꞌãhã ꞌãxape, yĩy yũmũg xuxyã yõg mõꞌpok xop peꞌãpaxeh, ha Topa pupi hãmꞌãktux,
\v 18 tu: “Hãmyãxatamuk xox putox mõꞌnãp-tup, ꞌĩhã tikmũꞌũn teꞌ koitꞌax nũn putup, tu xa hã yĩxix kummuk. Yã nõm xop kuxa mãm ꞌohnãg, hu yãy putupꞌax mĩy,” kaxĩy.
\v 19 Tu ꞌãxop gãyãp-tup, xayĩy ꞌãyãyxatat. Yã Topa Koxuk puꞌ yĩpkox ꞌohnãg, pa yãy pup-xet yĩpkox pip.
\v 20 ꞌŨkxape xop, ꞌãpu ꞌãxop mõꞌkuma ꞌãmõg Topa yõg putat hã, ꞌãkuxa mãm kaꞌok tu ꞌãmõg, nũy yãy kaꞌogãꞌ. Yã Topa te hãmꞌãktux max xeꞌẽgnãg, tu ꞌãkuxa tupmãhãꞌ, xa ꞌãkuxa max. Topa te ꞌãkaꞌogãhãꞌ, xa Topa pu hãmꞌãktux pax.
\v 21 Topa te mõꞌãyãy xeꞌẽgnãg, yĩy hãpxopmã max nõm puꞌ, ꞌĩhã yũmũg xuxyã Yeyox Kunnix hip, puyĩy ꞌãkuxa kaꞌ, nũy ꞌãkuxa hĩnnã xeꞌẽgnãg.
\p
\v 22 ꞌÃpu tikmũꞌũn yãy kuxa yĩkopitꞌax xop ꞌũm kuxa kaꞌ, yãp-tox 2.
\v 23 Tuꞌ kuxa xakix putũmnãg, ꞌũmãm puꞌuk tuꞌ. Tikmũꞌũn te kuxap tu hãpxop max mõy, ka mõꞌhap, huꞌ nõg, kaxĩy ꞌãnõy xop kuxa kaꞌ kamah, pu Topa yã ꞌũkuxa ka xexkaꞌ, pa ꞌãkuxãnõg, ka ꞌũyõg putupꞌax kummuk te ꞌãmõgãꞌ, xa hãpkummuk mĩy.
\s Tu Topa pu hãmꞌãktux, nũy tuꞌ xuktux max
\p
\v 24 Topa te ꞌãpẽnãꞌax max, xa Topa yõg putat xak hok, tu ꞌãkuxa tupmãꞌax, xa ꞌãkuxa max xeꞌẽgnãg, xix ꞌãkuxa hittupmãꞌax, xa Topa keppa ꞌãpiꞌ.
\v 25 Pũyã Topa yãp-xehnãg max xeꞌẽgnãg, xiꞌ xexka xeꞌẽgnãg, xiꞌ kaꞌok xeꞌẽgnãg, xiꞌ xohix xat xeꞌẽgnãg, yã hõmã xix hõnhã, xix hãmyãxatamuk xohix xox putox ꞌĩhãꞌ, mõ kumaꞌ mõg. Pũyãꞌ xohix Topa xexka xeꞌẽgnãg ꞌãktux. Hamũn!.