\id REV  - Maxakalí NT [mbl] (Brazil) -2011 bd
\h APOKALIPSE
\toc1 Apokalipse
\toc2 Apocalipse (Ap)
\mt TOPA TE YOÃM TUꞌ MŨG YEYOX KUNNIX XIX HÃPXOP XOHIX
\c 1
\p
\v 1 Yeyox Kunnix te yũmũꞌãꞌ mũg hãpxop punethok, tu yãy mũn mũg, ha ꞌãte nõm kaxꞌãmi tappet tuꞌ. Topa teꞌ xat, puꞌ mũg yãy yõg tikmũꞌũn tuꞌ, yã yãy yõg kãmãnat xop tuꞌ. Hãpxip kutõgnãg ꞌĩhã tikmũꞌũn te nõm hãpxop xohix pẽnãp-tup, ha Yeyox Kunnix te yũmũꞌã nõm hãpxop xohix mũg. Kunnix te nũꞌkutnãhã pexkox yõg nũꞌpok xop, puyĩy Yoãm tu nõm mũg.
\v 2 Yoãm teꞌ pẽnãhã, tu hãpxop xohix kaxꞌãmiꞌ, yãꞌ kaxꞌãmi nũ tappet tuꞌ. Topa teꞌ popmãhãꞌ, ha Yeyox Kunnix te tuꞌ mũg,
\v 3 ha tikmũꞌũn te nũ tappet mõkupix, puxix tuꞌ kuxa hittup. Tikmũꞌũn te nũ tappet ꞌãpak, tuꞌ yĩpkox pip, puxix tuꞌ kuxa hittup. Nũ tappet tuꞌ kaxꞌãmi hãpxopmãꞌax, ha hãpxip kutõgnãg ꞌĩhã tikmũꞌũn te nõm pẽnãp-tup.
\s Yeyox kopa kuxa mãm xop xohix teꞌ 7
\p
\v 4 ꞌŨgmũn Yoãm, tu nũ tappet kaxꞌãmi Yeyox kopa kuxa mãm xop xohix teꞌ 7 puꞌ hãpxexka ꞌAx tuꞌ. ꞌÃtep-tup, pu Topa ꞌãxop ha hãmmaxnãꞌ, nũy ꞌãkuxa mãmmãꞌ. Hõnhãꞌ xip Topah, tu taꞌ xip hõmã, tu taꞌ nũn putup.
\p Ha taꞌ pip ꞌũkoxuk xohix teꞌ 7 Topa keppah xix yõg mĩmpe yũmꞌax xeꞌẽgnãg keppah. ꞌÃtep-tup, pu Topa ꞌãxop pu hãmmaxnãꞌ, nũy ꞌãkuxa mãmmã kamah.
\v 5 ꞌÃtep-tup kamah, pu Yeyox Kunnix ꞌãxop ha hãmmaxnãꞌ, nũy ꞌãkuxa mãmmãꞌ. Yeyox te yũmũꞌa hãpxeꞌe xohix ꞌãktux. Yã Topak-tok te mãxap xip tuꞌ xok tãmnãg, tu putpuꞌ hiꞌ, tu hãm xexka yõg xatꞌax xop xat. Tute yãy yũmũg xeꞌẽgnãg, tuꞌ xok, hu yũmũg kuxa kummuk xit, tu kuxa max mõꞌtat, ꞌũyãnãn tuꞌ,
\v 6 tu yũmũg mĩy ꞌãmãnex xop, yã Topa yõg xop. Tute yũmũg xat, ha yũmũꞌãte Topa pu hãpxopmã max, yã yũmũg ꞌãtak Topa pu hãpxopmã max. Yeyox Kunnix yãꞌ max xeꞌẽgnãg, tuꞌ max xeꞌẽgnãg mõkumaꞌmõg, haꞌ kux ꞌohnãg. Hamũn.
\p
\v 7 Pẽnãꞌ, ꞌũnũn putup hãmgõy xexka kopah! Tikmũꞌũn xohix xexka teꞌ pẽnãp-tup. Hõmã ha ta tikmũꞌũn te pox xexka hãꞌ xuhmĩy. Yã tikmũꞌũn te nõm pẽnãp-tup, hu potap-tup. Hamũn. Hã kaxĩy.
\p
\v 8 Topa xexka ꞌũkaꞌok, tu hãmꞌãktux, hu: “ꞌŨgmũn yã mãxap xix kaꞌax. Hõmãꞌ xipꞌah hãm xexka xix yõg hãpxop xohix, ꞌĩhãg xip. Ha taꞌ nõg putup hãm xexka xix yõg hãpxop xohix, ꞌĩhãg xip putup. Hõnhãg xip, tu tak xip hõmã, tu tak nũn putup.” Kaxĩy.
\s Yoãm te Kunnix pẽnãhãꞌ
\p
\v 9 Ha tak mũn yã ꞌãtaknõy Yoãm. ꞌÃteꞌ xũy hã tot, yã ꞌãxop putuk. ꞌŨkxip Topa te nõm xat xop kopah ꞌãxop mũtik, tu Yeyox tuk xip kaꞌok ꞌãxop putuk. Hõmã ꞌãte tikmũꞌũn pu Topa ꞌãktux xix Yeyox ꞌãktux, ha tikmũꞌũn tek mũg, tuk xix nũnte hãm tot tuꞌ, ha kõnãg teꞌ yĩmap, yã hãm tot ꞌũxuxetꞌax Pat.
\v 10 Yenomĩy ꞌĩhã Topa Koxuk tek mõgãhãꞌ, pa ꞌãte yãnmũn xupepꞌax kaꞌok ꞌãpak ꞌũkxãm tuꞌ, yã mĩxux xop tut kaxyãꞌax putuk,
\v 11 tu hãmꞌãktux, hu:
\p —‍ꞌÃpu ꞌũpẽnã xop kaxꞌãmiꞌ, tu tappet hõm Yeyox kopa kuxa mãm xop teꞌ 7 puꞌ, yã kõmẽn ꞌEp tuꞌ, xix kõmẽn ꞌExmĩy tuꞌ, xix kõmẽn Pek tuꞌ, xix kõmẽn Tittit tuꞌ, xix kõmẽn Xahat tuꞌ, xix kõmẽn Pinanep tuꞌ, xix kõmẽn Namnixet tuꞌ.” Kaxĩy.
\p
\v 12 Ha ꞌũgyõkãnãm, nũy ꞌũkxãmpaꞌ pẽnãꞌ, nũy nõm te hãmꞌãktux pẽnãꞌ. Paꞌ pip kuyãnãm tatꞌax xohix teꞌ 7. Yã yãnãm ꞌãta yĩxux hãꞌ mĩy kũyãnãm tatꞌax.
\v 13 Paꞌ xip nõm te Tikmũꞌũn Kutok putuk kuyãnãm tatꞌax koteꞌ. ꞌŨyõg topixxax tox, tuꞌ pata tuꞌ kux, tuꞌ tat ꞌũkotex hĩyꞌax, yã yãnãm ꞌãta yĩxux hãꞌ mĩy,
\v 14 tuꞌ xep-nok, yã kahnẽn xep-nok putuk, pe tex xap ponnok putuk, tuꞌ pa te kuxap xexka putuk,
\v 15 tuꞌ pata te kuyãnãm mõꞌyõn, yã pipkup monõn pukpex xexka putuk, tuꞌ xutnuk. Tute hãmꞌãktux kaꞌok, yã xamoka xexka putuk.
\v 16 Tuꞌ yĩpxeꞌe hãꞌ tat mãyõnnãg xohix teꞌ 7, tuꞌ yĩkox tuꞌ xupep mĩkax xexkaꞌ, yãꞌ xox mut tix, tuꞌ pa te kuyãnãm xexka mõꞌyõn, yã mãyõn putuk mẽynix ꞌĩhãꞌ.
\p
\v 17 Ha ꞌãteꞌ pẽnãhãꞌ, tuk nãhã ꞌũpata yĩkak, tuk xok putuk. Pa tik nũn, tu nũktuk yĩmũꞌ yĩm xix, tu:
\p —‍ꞌÃkuxa nõg hok. ꞌŨgmũn yã mãxap xiꞌ kaꞌax. Yã hõmãꞌ xipꞌah hãm xexka xix yõg hãpxop xohix ꞌĩhãg xip. Ha taꞌ nõg putup hãm xexka xix yõg hãpxop xohix, ꞌĩhãg xip putup.
\v 18 ꞌŨkxip. Hõmã ꞌũkxok, pa pẽnãꞌ ꞌũkhi putpuꞌ, tuk xip putup mõkumakmõg hãmyãxatamuk xohix kux ꞌohnãg hã. ꞌŨgkaꞌok. ꞌÃteꞌ xat, puxiꞌ xakix ꞌũxohix. ꞌÃteꞌ xat hok, puxiꞌ xakix hok. ꞌÃte xakix xop xat kamah.
\v 19 ꞌÃpu hãmpẽnãꞌax kaxꞌãmi yã hõnhã yõg hãpxopmãꞌax kaxꞌãmi xix hãptup yõg hãpxopmãꞌax kaxꞌãmi kamah.
\v 20 ꞌÃte xaꞌ yũmmũgãhã hãpxop xaptop, yã tikmũꞌũn te nõm yũmmũg ꞌohnãg. ꞌŨpip mãyõnnãg xohix teꞌ 7 ꞌũgyĩpxeꞌe kopah, haꞌ pip kũyãnãm tatꞌax teꞌ 7. Mãyõnnãg teꞌ 7 yã pexkox yõg nũꞌpokꞌax teꞌ 7, yã nõm te Yeyox kopa kuxa mãm xop teꞌ 7 pẽnãhãꞌ. Ha ta kuyãnãm tatꞌax yã kõmẽn teꞌ 7 yõg Yeyox kopa kuxa mãm xop teꞌ 7. Kaxĩy.
\c 2
\s Kõmẽn ꞌEp yõg kuxa mãm xop pu hãmꞌãktux
\p
\v 1 Tu xe:
\p —‍ꞌÃpu kaxꞌãmi pexkox yõg nũꞌkutnãꞌax pu nõm te kõmẽn ꞌEp yõg Yeyox kopa kuxa mãm xop pẽnãhãꞌ. ꞌÃpu kaxꞌãmiꞌ, hu:
\p “ꞌÃte xa hãmꞌãktux. ꞌÃte mãyõnnãg teꞌ 7 tat ꞌũgyĩpxeꞌe hã, tu hãpkumep kuyãnãm tatꞌax yãnãm ꞌãta yĩxux koteꞌ.
\v 2 ꞌÃte ꞌãxop yõg hãpxopmãꞌax yũmmũg. ꞌÃteꞌ yũmmũg ꞌãxop te hãpxopmã max punethok, tu Yeyox tu ꞌãxop pip kaꞌok. ꞌÃteꞌ yũmmũg ꞌãxop teꞌ tot ꞌohnãg tik kummuk. Tik kummuk te: ‘ꞌŨgmũg pip Yeyox yõg mõꞌpok xop kopah.’ Kaxĩy. Pa ꞌãxop te yõg hãpxopmãꞌax kopit, tuꞌ koit yũmmũg.
\v 3 ꞌÃxop te hãmmax hip. ꞌÃxop yã yõgnũ xop, hu ꞌãxop xũy, pa ꞌãxop te hãpxopmã max kux ꞌohnãg.
\v 4 ꞌÃxop te hãmmax mĩy, pa ꞌãxop te hãpkummuk mĩy kamah. Yã hõmã ꞌãxop tek putup pax max, pa hõnhã ꞌãmhok.
\v 5 ꞌÃpu hãmpeꞌãpaxeh. Hõmã ꞌãxop te hãmmax mĩy, pa hõnhã ꞌa kaxĩyꞌah. ꞌÃpu hãpkummuk mĩy kux, nũy putpu mõg, nũy xeꞌ mĩy ꞌãxop te nõm mĩy hãmãxap. Pa ꞌãxop te hãpkummuk kux ꞌohnãg, kopxix ꞌãxop hak mõg, nũy xut ꞌõg kuyãnãm tatꞌax.
\v 6 Pa ꞌãxop max, yã ꞌãxop tep-tup nõg Nĩkonax xop yõg hãpxopmãꞌax. ꞌÃtep-tup nõg kamah.
\v 7 ꞌÃyĩpkox pip, nũy ta xupax Topa Koxuk te nõm ꞌãktux Yeyox kopaꞌ kuxa mãm xop puꞌ.” Kaxĩy.
\s Kõmẽn ꞌExmĩy yõg kuxa mãm xop pu hãmꞌãktux
\p
\v 8 Tu xe:
\p —‍ꞌÃpu kaxꞌãmi pexkox yõg nũꞌkutnãꞌax pu nõm te kõmẽn ꞌExmĩy yõg Yeyox kopaꞌ kuxa mãm xop pẽnãhãꞌ. ꞌÃpu kaxꞌãmi, hu:
\p “ꞌÃte xa hãmꞌãktux. ꞌŨgmũn yã mãxap xiꞌ kaꞌax. Yã hõmãꞌ xipꞌah hãm xexka xix yõg hãpxop xohix, ꞌĩhãg xip. Ha taꞌ nõg putup hãm xexka xix yõg hãpxop xohix, ꞌĩhãg xip putup, tuk xok tãmnãg pa putpuk hiꞌ.
\v 9 ꞌÃteꞌ yũmmũg ꞌãxop xũy. ꞌÃteꞌ yũmmũg ꞌãxop putexop ꞌohnãg, pa ꞌãmhok, ꞌãxop putexop xexkaꞌ! ꞌÃteꞌ yũmmũg tikmũꞌũn te ꞌãxop ꞌãktux kummuk, tu hãmꞌãktux hu: ‘ꞌŨgmũg yã Yoneo xop kopak pip.’ Kaxĩy. Pa ꞌãmhok, yãꞌ koit, yã Hãmgãyãgnãg yõg xop kopaꞌ pip.
\v 10 Hãpxip ꞌĩhã ꞌãxop xũyꞌax, pa ꞌãpu ꞌãkuxanõg hok. ꞌŨxupax. Hãmgãyãgnãg te ꞌõg hãpxopmãꞌax kopit putup, yãꞌ xat putup, pu tikmũꞌũn ꞌãxop xeh kanet kaꞌok kopah, ha ꞌãxũyꞌax ꞌãmnĩy teꞌ 10 hã. ꞌÃpu ꞌãtu pip kaꞌok, hu mõg hu yã ꞌãxakix, ha ꞌãte xa popmãp-tup ꞌãhiꞌax kux ꞌohnãg yõg xexka xop yõg kuxxax.
\p
\v 11 ꞌÃyĩpkox pip, nũy ta xupax Topa Koxuk te nõm ꞌãktux Yeyox kopaꞌ kuxa mãm xop puꞌ!
\p Tikmũꞌũn te xakixp-tup, tuk-nãy tuꞌ mõg putup Hãmgãyãgnãg pet tuꞌ, tuꞌ xũy, paꞌ xut xop mõg putupꞌah.” Kaxĩy.
\s Kõmẽn Pek yõg kuxa mãm xop pu hãmꞌãktux
\p
\v 12 Tu xe:
\p —‍ꞌÃpu kaxꞌãmi pexkox yõg nũꞌkutnãꞌax pu nõm te kõmẽn Pek yõg Yeyox kopaꞌ kuxa mãm xop pẽnãhãꞌ. ꞌÃpu kaxꞌãmi, hu:
\p “ꞌÃte xa hãmꞌãktux. Yõgnũ mĩkax xexka xox mut tix xip.
\v 13 ꞌÃteꞌ yũmmũg ꞌãpipꞌax. Yã Hãmgãyãgnãg yõg xexka xop yõg mĩmpe yũmꞌax xip ꞌõg kõmẽn kopah, yã Hãmgãyãgnãg yãꞌ xexkaꞌ, tuꞌ xat kõmẽn yõg xop. ꞌÃxop ꞌãtu ꞌãpip kaꞌok, hu yõgnũ putat max xak ꞌohnãg. Hõmãꞌ xip ꞌÃtip, yã yõgnũ kãmãnat, tu ꞌã tuꞌ xip kaꞌok, ha tikmũꞌũn tep-tex nõnte Hãmgãyãgnãg yõg xipꞌax tuꞌ, pa ꞌãxop te yõgnũ putat max xak ꞌohnãg.
\v 14 Pa ꞌãxop te hãpkummuk mĩy, yã yãg pip nõnte, tu Manak yõg hãmyũmmũg tat. Yã hõmã Manak te ꞌIyaet xop mõgãhãꞌ, pu hãpkummuk mĩy, yã xitꞌax mãhã tikmũꞌũn te topa komut xop pu nõm popmãhãꞌ. Tute tikmũꞌũn puꞌ yũmmũgãhãꞌ, puꞌ nõy hã xupxet kamah.
\v 15 ꞌŨpip kama ꞌũyãg xop, tu Nĩkonax xop yõg hãmyũmmũg tat.
\v 16 ꞌÃpu ꞌõg hãpkummuk mĩy kux. ꞌŨkux ꞌohnãg, kopxik mõg, nũy yãykix nõm tikmũꞌũn mũtik. Yã ꞌãte yãy kix putup mĩkax xexka hã nõm xip ꞌũgyĩkox kopah.
\p
\v 17 ꞌÃyĩpkox pip, nũy ta xupax Topa Koxuk te nõm ꞌãktux Yeyox kopaꞌ kuxa mãm xop puꞌ!
\p ꞌÃte pãm mãnã popmãp-tup ꞌũxut xop puꞌ. ꞌÃte nõm puꞌ popmãp-tup kama mĩkaxxap ponnok, tu nõm yĩmũꞌ kaxꞌamip-tup ꞌũxuxatꞌax tup, ha nõm teꞌ pop te ꞌãxetꞌax yũmmũg putup, paꞌ nõy teꞌ yũmmũg putup ꞌohnãg.” Kaxĩy.
\s Kõmẽn Tittit yõg kuxa mãm xop pu hãmꞌãktux
\p Tu xe:
\p
\v 18 —‍ꞌÃpu kaxꞌãmi pexkox yõg nũꞌkutnãꞌax pu nõm te kõmẽn Tittut yõg Yeyox kopaꞌ kuxa mãm xop pẽnãhãꞌ. ꞌÃpu kaxꞌãmi, hu:
\p “ꞌÃte xa hãmꞌãktux. ꞌŨgmũn yã Topak-tok, tuk pa te kuxap xexka putuk, tuk pata te kuyãnãm mõꞌyõn, tu pipkup monõn pukpex xexka putuk, tuꞌ xutnuk.
\v 19 ꞌÃte ꞌõg hãpxopmãꞌax yũmmũg. ꞌÃteꞌ yũmmũg ꞌãxop teꞌ nõy putup pax, tu ꞌãxop te ꞌãtu ꞌãpip kaꞌok, tu ꞌã hãpxopmã max punethok, tu ꞌãxop te hãmmax hip punethok. Hõmã ꞌãxop te hãpxopmã kõnãmãhãꞌ, pa hõnhã ꞌãxop te hãpxopmã max punethok.
\v 20 Pa ꞌãxop te hãpkummuk mĩy. Yãꞌ xip nõnte ꞌũhũn ꞌũxuxetꞌax Yeyamet, tu hãpkummuk mĩy, pa ꞌãxop te nõm hupmã ꞌohnãg. Tute hãmꞌãktux, hu: ‘Topa te nũgkutnãhãꞌ’. Kaxĩy. Tu tikmũꞌũn pu hãmyũmmũgãhãꞌ, tuꞌ koit, nũy yõgnũ kãmãnat xop mõgãꞌ, puyĩꞌ nõy hãꞌ xupxet, puyĩꞌ xit tikmũꞌũn te topa komut xop pu nõm popmãꞌ.
\v 21 ꞌÃteꞌ hip, tu ꞌũn kummuk puꞌ popmãhã ꞌãmnĩy xohix, puyĩy hãpkummuk mĩy kux, pa ꞌap-tupꞌah, yãꞌ kux ꞌohnãg.
\v 22 Yĩy ꞌãte ꞌũn xat putup, puyĩy mĩmpe mõꞌyõnꞌax tuꞌ xihip kaꞌok, tuꞌ xũy xexka putup. Ha ta tik te nũmũtik xonnix, yã Yeyamet putuk, tuꞌ xũy xexka putup kamah. Yã hãpxip kutõgnãg ꞌĩhã ꞌãte nõm mĩy putup. Pa tik te hãpkummuk mĩy kux, kopxiꞌ mĩy ꞌohnãg.
\v 23 ꞌÃte Yeyamet kutok kix putup, ha mõktuꞌ kuxa mãm xohix xop teꞌ yũmmũg putup, ꞌãte tikmũꞌũn kuxa pẽnãhãꞌ, xip-tox kopa pẽnãhãꞌ, tu hãpkummuk mĩyꞌax hã yãnãn.
\p
\v 24 Pa ꞌãxop nõy te kõmẽn Tittit tuꞌ pip, tu nõm hãmyũmmũg kummuk tat ꞌohnãg. Yã hãmyũmmũg ꞌũxuxetꞌax, hu: ‘Hãmgãyãgnãg yõg hãmyũmmũg xaptop.’ Kaxĩy. Pa tikmũꞌũn te xa nõm yũmmũgã ꞌohnãg, yĩy ꞌãxop te nõm yũmmũg ꞌohnãg. Nõmhã ꞌãte xa hãmꞌãktux, ꞌap ꞌãte ꞌãxop xat putupꞌah ꞌũxeheh, xayĩy hãpxop nõy mĩy. Puxix.
\v 25 ꞌŨpip ꞌãxop yõg hãpxopmãꞌax. ꞌÃpu ꞌũxeꞌ mĩy, ha mõktuk nũn putpuꞌ.
\v 26-28 ꞌÃteꞌ xat putup, puyĩy xut xop hãm xexka yõg xohix xop xat. Yã nõm teꞌ mĩy ꞌãte nõm putup ha mõktu hãmyãxatamuk xohix xox putox, ha ꞌãteꞌ xat putup, puyĩy nõm hãm xexka yõg xohix xop xat. Yã nõm xat putup, ꞌĩhã ꞌãte nõm xat kamah. Yõgnũ ꞌãtak teꞌ xat, ꞌũyĩy hãm xexka yõg xohix xop xat. Yã Topa tek xexka mĩy, hã kaxĩy ꞌãte nõm xop xexka mĩy putup, puyĩy hãm xexka xohix xop xat. Yãꞌ xat kaꞌok putup. Tik te nax koxyõy pipkup xexka tox hã. Hã kaxĩy ꞌũxat kaꞌok putup. ꞌÃte nõm xat xop puꞌ hõm putup mãyõnnãg xexkaꞌ.
\p
\v 29 ꞌÃyĩpkox pip, nũy ta xupax Topa Koxuk te nõm ꞌãktux Yeyox kopaꞌ kuxa mãm xop puꞌ!” kaxĩy.
\c 3
\s Kõmẽn Xahat yõg kuxa mãm xop pu hãmꞌãktux
\p
\v 1 Tu xe:
\p —‍ꞌÃpu kaxꞌãmi pexkox yõg nũꞌkutnãꞌax puꞌ, nõm te kõmẽn Xahat yõg Yeyox kopaꞌ kuxa mãm xop pẽnãhãꞌ. ꞌÃpu kaxꞌãmi, hu:
\p “ꞌÃte xa hãmꞌãktux. ꞌÃte yãy yĩm hãꞌ tat ꞌũkoxuk xohix teꞌ 7 Topa yõg xix mãyõnnãg teꞌ 7. ꞌÃte ꞌãxop yõg hãpxopmãꞌax yũmmũg. Tikmũꞌũn te hãmpeꞌpaxex ꞌãxop hiꞌ, pa ꞌãmhok, ꞌãxop teꞌ xakix xop putuk.
\v 2 ꞌÃpu yãy koxah. ꞌÃpu yãy kaꞌogãꞌ, nũy hãpxopmãꞌax kaꞌogãꞌ, nũy hãpxopmã max hupmã hok. ꞌÃteꞌ yũmmũg ꞌãxop yõg hãpxopmãꞌax ꞌap xeꞌeꞌah Topa keppah, yã Topa puꞌ kummuk.
\v 3 Hõmã ꞌũnõy te xa hãpxop max yũmmũgãhãꞌ, ha ꞌãxop teꞌ xupak. ꞌÃpu nõm peꞌãpaxeh, nũy mĩy, nũy ꞌãxop yõg hãpkummuk mĩyꞌax nõãꞌ. Pa ꞌãxop yãy koxak ꞌohnãg, kopxix ꞌũgnũn putpuꞌ xupxet nũn putuk, yã tikmũꞌũn te xupxet hip ꞌohnãg. Texĩy ꞌũgnũn? Hãmꞌũmhãg nũn? ꞌÃxop teꞌ yũmmũg putup ꞌohnãg.
\v 4 Paꞌ yãg tihi Xahat tuꞌ, tu yõg topixax tup, yã xutputux ꞌohnãg. ꞌÃxop te hãpkumep putup ꞌũgmũtik, tu topixxax ponnok tat putup. Yãꞌ max te kaxĩy.
\v 5 ꞌũxut xop te topixxax ponnok tat putup, ha ꞌa ꞌãteꞌ mõy putupꞌah ꞌũyõg xuxetꞌax tappet tuꞌ, Topa te nõm kaxꞌãmiꞌ, yã Topa te nõm tuꞌ kaxꞌãmiꞌ, tikmũꞌũn ꞌãxetꞌax nõm hi xeꞌẽgnãg mõkumaꞌmõg, haꞌ kux ꞌohnãg. ꞌÃte hãmꞌãktux putup, hu: ‘Yõgnũ tikmũꞌũn nõꞌõm.’ Kaxĩy. Yã Topa keppa ꞌãte nõm ꞌãktux putup xix pexkox yõg nũꞌpok xop keppah.
\p
\v 6 ꞌÃyĩpkox pip, nũy ta xupax Topa Koxuk te nõm ꞌãktux Yeyox kopaꞌ kuxa mãm xop puꞌ!” Kaxĩy.
\s Kõmẽn Pinanep yõg kuxa mãm xop pu hãmꞌãktux
\p
\v 7 Tu xe:
\p —‍ꞌÃpu kaxꞌãmi pexkox yõg nũꞌkutnãꞌax puꞌ, nõm te kõmẽn Pinanep yõg Yeyox kopaꞌ kuxa mãm xop pẽnãhãꞌ. ꞌÃpu kaxꞌãmi hu:
\p “ꞌÃte xa hãmꞌãktux. ꞌŨgmax xeꞌẽgnãg, tu ꞌãte hãpxeꞌe mĩy, tuk yĩm hã tat Namix yõg pipkup hãmyĩnnĩnꞌax. Tute hãpxõn, ha ta tikmũꞌũn te mõhãmyĩnnĩn yũmmũg ꞌohnãg. Tu tu mõhãmyĩnnĩn, ha ta tikmũꞌũn te hãpxõn yũmmũg ꞌohnãg.
\v 8 ꞌÃte ꞌãxop yõg hãpxopmãꞌax yũmmũg. ꞌÃteꞌ yũmmũg ꞌãxop kaꞌok kutõgnãg. ꞌÃte ꞌãxop pu hãmyũmmũgãhãꞌ, ha ꞌãxop teꞌ mĩy, tu ꞌãtu ꞌãpip kaꞌok. ꞌÃte xa hãpxõn, ha ta tikmũꞌũn te mõhãmyĩnnĩn yũmmũg ꞌohnãg.
\v 9 ꞌŨxupax. ꞌŨpip Hãmgãyãgnãg nõnteh, tu hãmꞌãktux, hu: ‘ꞌŨgmũg pip Yoneo xop kopah.’ Kaxĩy. Pa yãꞌ koit. ꞌÃteꞌ xat putup, ha nõm nũn putup, tu nũktu hãm tuꞌ pip putup ꞌãxop keppah, tuꞌ yũmmũg putup, ꞌãte mõ ꞌãxop yãy xeꞌẽgnãg.
\v 10 ꞌÃxop te yõgnũ xatꞌax mĩy. ꞌÃte xaꞌ xat, hu: ‘ꞌÃpu hãpxop max hip. ꞌÃpu putat max xak hok.’ Kaxĩy. Ha ꞌãxop teꞌ mĩy. Yĩy ꞌãte ꞌãxop pẽnã maxp-tup, ha taꞌ nũn putup hãpxop xohix kummuk, puyĩy hãm xexka yõg tikmũꞌũn xohix yõg hãpxopmãꞌax kopit.
\v 11 Hãpxip kutõgnãg ꞌĩhãg mõg putup ꞌãxop hah. ꞌŨpip ꞌõg hãpxopmãꞌax max. ꞌÃpu nõm pẽnã kaꞌok, nũy mĩy kux hok, yĩy taꞌ nõy te ꞌap xupxet putupꞌah. ꞌŨxut xop yõg kuxxax yã ꞌõgnũꞌ.
\v 12 ꞌÃteꞌ xut xop hãꞌ mĩy mãykup putuk yãy pet yõg. ꞌÃte ꞌãxop kaꞌogãp-tup, ha xate xek pet nĩm putupꞌah. ꞌÃte xut xop yĩmũꞌ kaxꞌãmip-tup Topa ꞌãxetꞌax xix Topa yõg kõmẽn yõg ꞌãxetꞌax kaxꞌãmip-tup kamah, yãꞌ xuxetꞌax kõmẽn Yenoyanẽn Tup. Kaxĩy. Yenoyanẽn Tup te pexkox tuꞌ yĩxop-tup. ꞌÃte xut xop yĩmũꞌ kaxꞌãmi putup ꞌũyõg xuxetꞌax tup kamah.
\p
\v 13 ꞌÃyĩpkox pip, nũy ta xupax Topa Koxuk te nõm ꞌãktux Yeyox kopaꞌ kuxa mãm xop puꞌ!” Kaxĩy.
\s Kõmẽn Namnixet yõg kuxa mãm xop pu hãmꞌãktux
\p
\v 14 Tu xe:
\p —‍ꞌÃpu kaxꞌãmi pexkox yõg nũꞌkutnãꞌax pu nõm te kõmẽn Namnixet yõg Yeyox kopa kuxa mãm xop pẽnãhãꞌ. ꞌÃpu kaxꞌãmi, hu:
\p “ꞌÃte xa hãmꞌãktux. ꞌÃte Topa tuk xip kaꞌok, tu Topa yõg xatꞌax mĩy pax, yãg hup ꞌohnãg, tu tikmũꞌũn pu Topa yõg hãmꞌãktux xeꞌe ꞌãktux. Hõmã ꞌãteꞌ mĩy Topa mũtik hãpxop xohix.
\v 15 ꞌÃte ꞌõg hãpxopmãꞌax yũmmũg. ꞌÃxop pukpex ꞌohnãg xix xuxix ꞌohnãg, yã ꞌãxop tek putup pax xexka ꞌohnãg xik putuppax kutõgnãg ꞌohnãg. ꞌÃtep-tup pe pukpex pe xuxix,
\v 16 pa ꞌãxop pukpex miax, yĩy ꞌãte ꞌãxop yãy yĩkox kopa mõꞌyõn.
\v 17 ꞌÃxop te: ‘ꞌŨgmũg pute xop xexkaꞌ, tu hãpxop xohix xexka pip ꞌũgmũ yõg. ꞌAk mũꞌãte hãpxop nõy putupꞌah. Puxix.’ Kaxĩy. Pa ꞌãxop te hãmyũmmũg ꞌohnãg ꞌãxop yãyꞌĩgãꞌ, xix ꞌãhittup ꞌohnãg, xix ꞌãp-te xop ꞌohnãg, xix ꞌãpa hok, xix ꞌãxax top.
\v 18 Hõmã ꞌãte xa hãmꞌãktux, hu: Mã, ha ꞌãte ꞌãxop mĩy putup ꞌũp-te xop xexka ꞌãkuxa kopah. Mã, nũy pop topixxax ponnok, nũy ꞌãxax top kummuk pak. Mã, nũy pop hehmẽn ꞌãpa puꞌ, nũy hãmpẽnãꞌ, nũy hãmyũmmũg.
\v 19 ꞌÃte mõ tikmũꞌun yãy xeꞌẽgnãg, ha nõm te hãpkummuk mĩy, ha ꞌãte: Kaxĩy hok, yãꞌ maxꞌah. Kaxĩy. Tu nõm xũygãhãꞌ. Yã ꞌãte mõ nõm yãy xeꞌẽgnãg. ꞌÃpu hãmpeꞌãpxeh, nũy hãpkummuk mĩy kux.
\v 20 ꞌŨxupax. ꞌŨkxip hãmyĩnnĩnꞌax yĩkah, tu hãmꞌãktux, hu: Hãpxon! Kaxĩy. Tikmũꞌũn ꞌũm ꞌũkopaꞌ xip, tuꞌ xupak, tu hãpxõn, kopxix mõnãy ꞌũpet hã, tuk xit putup nũmũtik, haꞌ xit putup ꞌũgmũtik.
\p
\v 21 ꞌÃteꞌ xut xop xat putup puyĩy mãhãm ꞌũgmũtik ꞌũxexka xop yõg mĩmpe yũmꞌax yĩmũꞌ, ha ꞌãteꞌ xohix xat putup, yã nõm teꞌ xat putup kamah, yãk mũn putuk putup. Hõmã ꞌãteꞌ xut, tu hõnhãg yũm yõgnũ ꞌãtak mũtik ꞌũyõg mĩmpe yũmꞌax yĩmũ ꞌũxexka xop yõg.
\p
\v 22 ꞌÃyĩpkox pip, nũy ta xupax Topa Koxuk te nõm ꞌãktux Yeyox kopaꞌ kuxa mãm xop puꞌ!” Kaxĩy.
\c 4
\s Topa ꞌãktux max pexkox tuꞌ
\p
\v 1 Hãpxip ꞌĩhã ꞌãteꞌ pẽnãhã pexkox tuꞌ, ha hãmyĩnnĩnꞌax xõn, ha nõm yĩy ꞌũxeheh nõm te ꞌã hãmꞌãktux hõmã, yãꞌ yĩy te mĩxux xop tut kaxyãꞌax putuk, tu hãmꞌãktux, hu:
\p —‍Mã nũnte pexkox tuꞌ, ha ꞌãte xa mũg hãpxopmãꞌax pipꞌax hãpxip kutõgnãg ꞌĩhã, yã tikmũꞌũn te nõm pẽnãp-tup! Kaxĩy.
\p
\v 2 Hãpxip ꞌohnãg ꞌĩhã Topa Koxuk tek mõgãhãꞌ, hak mõg, paꞌ xip nõm teꞌ xat yõg mĩmpe yũmꞌax xeꞌẽgnãg, ha ꞌõm teꞌ yĩmũꞌ yũm,
\v 3 tuꞌ pa te mõ kuyãnãm yõn, yã mĩkaxxap takat putuk, yã mĩkaxxap yax putuk, xix mĩkaxxap xanõn putuk, ha taꞌ xip texxux, tu nõm teꞌ xat yõg mĩmpe yũmꞌax xakot, yã texxux yĩxux, tu mĩkaxxap ꞌexmẽnat putuk.
\v 4 Ha taꞌ pip kama ꞌũxexka xop yõg mĩmpe mãmꞌax xohix teꞌ 24, tu nõm teꞌ xat xakot, ha mĩmpe mãmꞌax teꞌ 24 yĩmũꞌ mãm tik xexka teꞌ 24, tu topixxax ponnok tat, tuꞌ xexka xop yõg kuxxax yãnãm ꞌãta yĩxux mõꞌtat,
\v 5 ha nõm teꞌ xat yõg mĩmpe yũmꞌax te koteꞌ xip, ha ta nõnte tuꞌ xupep yãnãm kõꞌãynãm, xix hãmnãhũn, xix tex tĩnnãhãꞌ. Ha taꞌ pip nõm teꞌ xat yõg mĩmpe yũmꞌax keppa kuyãnãm tatꞌax xohix teꞌ 7, tu yõg kuyãnãm pip, yãꞌ koxuk teꞌ 7 Topa yõg.
\v 6 Ha taꞌ xip nõm teꞌ xat yõg mĩmpe yũmꞌax keppa kõnãg xexkaꞌ, yã gahap putuk, yã mĩkaxxap ponnok max putuk.
\p Ha ta ꞌõm pip, tu nõm teꞌ xat yõg mĩmpe yũmꞌax xakot, yã yõnnãꞌĩ teꞌ 4, tuꞌ pa pip ꞌũkeppa xiꞌ xãmpah.
\v 7 Yã yõnnãꞌĩ teꞌ 4 ha yãp-xet te xoktut putuk, ha taꞌ nõy te mũnũytut kutok putuk, ha taꞌ nõy pa te tik pa putuk, ha taꞌ nõy te mõmõka putuk, tu topahah.
\v 8 ꞌŨxohix teꞌ 4 yõg yĩmãg pip. Yãp-xet yõg yĩmãg xohix teꞌ 6, haꞌ nõy yõg teꞌ 6, haꞌ nõy yõg teꞌ 6, haꞌ nõy yõg teꞌ 6. Yõnnãꞌĩ xohix pa xohix pip ꞌũyĩmap xiꞌ kopah. Yõnnãꞌĩ tek-teꞌex hãptup tox hã xix ꞌãmnĩy tox hã, tuꞌ hup ꞌohnãg, tu:
\p —‍Topah, ꞌãmax xeꞌẽgnãg, ꞌãmax xeꞌẽgnãg, ꞌãmax xeꞌẽgnãg. ꞌÃkaꞌok xexkanãm, nũy hãpxop xohix xexka mĩy yũmmũg. Hõmã ꞌãxip xix hõnhã ꞌãxip, tu ꞌãnũn putup. Kaxĩy.
\p
\v 9 Hã kaxĩy yõnnãꞌĩ tek-teꞌex nõm teꞌ xat pu, yã nõm te mĩmpe yũmꞌax yĩmũꞌ yũm, yã nõm ti mõkumaꞌmõg hãmyãxatamuk xohix kux ꞌohnãg hã,
\v 10 ꞌĩhã tik xexka teꞌ 24 te hãm tuꞌ xakux nõm keppah, tuꞌ nõm ꞌãktux max, nũy nõm xexka mĩy yãy kuxa kopah, tu yãy yõg xexka xop yõg kuxxax xex hãm tuꞌ nõm keppah, yã nõm teꞌ xat keppah, tu:
\q
\v 11 —‍ꞌÃmũn yũmũg xuxyãꞌ, yã yũmũ yõg Topah. ꞌÃmax, haꞌ xohix teꞌ yũmmũg ꞌãmax xeꞌẽgnãg, xix ꞌãxexkanãm, xix ꞌãkaꞌok xexkanãm.
\q Hamũn, xateꞌ xohix xexka mĩy. Xatep-tup, yĩy taꞌ pip ꞌũxohix, tuꞌ hiꞌ.
\q Kaxĩy.
\c 5
\s Tappet tox xix Kahnẽn Kutok
\p
\v 1 Ha taꞌ pẽnãhã ꞌãte, paꞌ xip tappet tox kĩy xahix ꞌũyĩpxeꞌe kopah, yã nõm teꞌ xat ꞌũyĩm kopah, yã nõm te mĩmpe yũmꞌax yĩmũꞌ yũm, ha tappet tox kĩy xahix yĩmũꞌ pip kaxꞌãmiꞌax punethok ꞌũkeppa xiꞌ xãmpah, ha kĩyꞌax xohix teꞌ 7 te tappet tox kĩy.
\v 2 Ha taꞌ xip pexkox yõg nũꞌkutnãꞌax kaꞌok, yã Topa yõg kãmãnat, ha hãmꞌãktux kaꞌok, hu:
\p —‍Piꞌãꞌ xip nõm max, yã nõm te kĩyꞌax mep yũmmũg, nũy tappet tox koꞌah? Kaxĩy.
\p
\v 3 Paꞌ xipꞌah pexkox tuꞌ xix hãm xexka tuꞌ nõm max, yã nõm te tappet tox koꞌah, nũy kopaꞌ pẽnãꞌ.
\v 4 ꞌŨkpotahaꞌ, yãꞌ xipꞌah nõm max, yã nõm te tappet tox koꞌah, nũy kopaꞌ pẽnãꞌ.
\v 5 Ha taꞌ xip tik xexkaꞌ, tu hãmꞌãktux, hu:
\p —‍ꞌÃpota hok. Pẽnãꞌ, ꞌŨxip nõm kaꞌok, tu xoktut putuk, yã xuxetꞌax Yona xop yõg xoktut, yã Namix yõg xupepmã xop kopaꞌ xip, yã tuteꞌ xut. Tute kĩyꞌax mep yũmmũg, nũy tappet tox koꞌah. Kaxĩy.
\p
\v 6 ꞌÃteꞌ pẽnãhãꞌ, paꞌ xip nõm xuxetꞌax Kahnẽn Kutok. Kaxĩy. ꞌŨk-nĩhãꞌ xip nõm teꞌ xat yõg mĩmpe yũmꞌax yĩmũꞌ, ha yõnnãꞌĩ teꞌ 4 te Kahnẽn Kutok xakot, ha tik xexka teꞌ 24 te Kahnẽn Kutok xakot kamah, ha Kahnẽn Kutok xok tap, payãꞌ putpuꞌ hiꞌ, tup-tox kup xohix teꞌ 7, tuꞌ pa xohix teꞌ 7. ꞌŨp-tox kup xiꞌ pa yã koxuk teꞌ 7 Topa yõg, yã koxuk mõꞌpok hãpxexka xohix tuꞌ.
\v 7 Ha taꞌ mõg Kahnẽn Kutok, haꞌ xip tappet tox ꞌũnõy yĩm kopah, yã nõm teꞌ xat yĩm kopah, yã nõm yũm mĩmpe yũmꞌax yĩmũꞌ, ha Kahnẽn Kutok te tappet pahaꞌ,
\v 8 yãꞌ pahaꞌ, ha yõnnãꞌĩ teꞌ 4 te hãm tuꞌ pip Kahnẽn Kutok keppah xix tik xexka teꞌ 24 te hãm tuꞌ pip kamah Kahnẽn Kutok keppah. Ha yõnnãꞌĩ yõg ꞌap pip, nũy yõg tutxit kaxyãꞌ, xix tik xexka xop teꞌ kamah, tuꞌ xohix yõg kãnẽy yãnãm ꞌãta yĩxux pip kamah, nũy nõm kopa mõꞌhap ꞌũkõnnõn, nũy tu hax max ꞌãpep pepix. Hã kaxĩy ꞌũkuxa mãm kaꞌok xop te Topa pu hãmꞌãktux, ha hãmꞌãktux te pepiꞌ mõg.
\v 9 ꞌŨxohix tek-tex tup hãk-tex, hu:
\q —‍ꞌÃmax ꞌãpu tappet tox paꞌ,
\q nũy kĩyꞌax mep.
\q Hamũn, hõmã tikmũꞌũn te ꞌãp-tex,
\q yã tikmũꞌũn pupi ꞌãxok,
\q nũy tikmũꞌũn mõgã Topa hah.
\q Yãꞌ xohix mõgãhãꞌ,
\q yã hep xohix xop yõg xop, xiꞌ yĩyꞌax xohix yõg xop,
\q xix hãm xexka xohix yõg xop, xix xop xohix.
\q
\v 10 ꞌŨxohix te ꞌãmãnex xop putuk,
\q tu Topa pu hãpxopmã max.
\q Topa te nõm xat, yãꞌ yõg tikmũꞌũn,
\q ha Topa yõg tikmũꞌũn teꞌ nõy xohix xat putup hãm xexka tuꞌ.
\q Kaxĩy.
\p
\v 11 ꞌÃteꞌ pẽnãhã ꞌũxeheh, tu pexkox yõg nũꞌpok xop ꞌãpak, yãꞌ xohix teꞌ 10.000 punethok xiꞌ 1.000 punethok. ꞌŨxohix te nõm teꞌ xat xakot, yã nõm te mĩmpe yũmꞌax yĩmũꞌ yũm, xix yõnnãꞌĩ teꞌ 4 xakot, xix tik xexka teꞌ 24 xakot.
\v 12 ꞌŨxohix tek-tex kaꞌok, hu:
\q —‍Hõmã tikmũꞌũn tep-tex Kahnẽn Kutok.
\q Pa hõnhã ꞌãxip, yã ꞌãmax, yã ꞌãkaꞌok nõynãꞌãmõg.
\q Xateꞌ xohix yõg hãpxop pop. Xate hãpxohix yũmmũg,
\q haꞌ xohix te ꞌãmũn ꞌãpak, nũy ꞌãxexka mĩy, nũy ꞌãmũn ꞌãktux max.
\q Kaxĩy.
\p
\v 13 Ha taꞌ xupak ꞌãte ꞌũhi xop xohix pexkox tuꞌ xix kõnãg xexka tuꞌ, yã xohik-tex, hu:
\q —‍Yãꞌ max xeꞌẽgnãg nõm teꞌ xat, nõm te mĩmpe yũmꞌax yĩmũꞌ yũm.
\q Yãꞌ max xeꞌẽgnãg Kahnẽn Kutok.
\q Yũmũꞌãte nõm puꞌ popmãhã hãpxop xohix.
\q Yũmũꞌãte nõm ꞌãktux max, tu nõm ꞌãpak,
\q tuꞌ xexka mĩy yãy kuxa kopah.
\q Tute yũmũg xat putup mõkumaꞌmõg, haꞌ kux ꞌohnãg.
\q Kaxĩy.
\p
\v 14 Ha yõnnãꞌĩ teꞌ 4 te:
\p —‍Hamũn! Kaxĩy.
\p Ha tik xexka xop te hãm tuꞌ pip, tuꞌ kuxa teꞌ yẽy, tu Topa ꞌãktux max xix Kahnẽn Kutok ꞌãktux max.
\c 6
\s ꞌŨkĩyꞌax
\p
\v 1 ꞌÃte xeꞌ pẽnãhãꞌ, ha Kahnẽn Kutok teꞌ kĩyꞌax mãxap xak. Ha taꞌ xip yõnnãꞌĩ puxet, nõm teꞌ 4 xop kopaꞌ xip. ꞌŨyĩy te tex tĩnnãꞌax putuk. Tute:
\p —‍Mãꞌ! Kaxĩy.
\p
\v 2 ꞌÃteꞌ pẽnãhãꞌ, paꞌ xip kãmãnok ponnok, ha nõm teꞌ yĩmũꞌ yũm, tu pox kĩy tat, haꞌ nõy te tuꞌ hõm ꞌũxatꞌax xexka yõg kuxxax yãnãm ꞌãta yĩxux. Ha taꞌ mõg, nũy hãm xexka pop xix yõg tikmũꞌũn pop.
\p
\v 3 Ha ta xeꞌ xak kĩyꞌax nõy Kahnẽn Kutok teꞌ, yã kĩyꞌax tix, ha ꞌãteꞌ xupak, ha yõnnãꞌĩ nõy, yãꞌ tix te hãmꞌãktux, hu:
\p —‍Mã! Kaxĩy.
\p
\v 4 Yĩy taꞌ xupep kãmãnok nõy, yã xuttah, ha ꞌõm teꞌ yĩmũꞌ yũm, haꞌ nõy te nõm kaꞌogãhãꞌ, puyĩy tikmũꞌũn yãykix kakĩynãgãꞌ. Ha nõm te kãmãnok yĩmũꞌ yũm, tuꞌ pop mĩkax xexka tox.
\v 5 Ha ta xeꞌ xak ꞌũkĩyꞌax Kahnẽn Kutok teꞌ, yãꞌ tikoyuk, ha ꞌãteꞌ xupak, ha yõnnãꞌĩ nõy, yã tikoyuk te:
\p —‍Mã! Kaxĩy.
\p ꞌÃteꞌ pẽnãhãꞌ, paꞌ xip kãmãnok nõy, yãꞌ mũnnĩy. Ha nõm teꞌ yĩmũꞌ yũm, tuꞌ tat hãpxop mõmũgꞌax.
\v 6 Ha ꞌãteꞌ xupak, ha yõnnãꞌĩ teꞌ 4 te hãmꞌãktux, hu:
\p —‍Mãyõn puxet haꞌ hãmꞌax yõg tayumak teꞌ pop xuxnãg xe tox xap nit puxet pe xenat xap yõg nit tikoyuk. Paꞌ nõy hok ꞌayet hep tox xix xupyãg mõy hok, yã nõnenex hok! Kaxĩy.
\p
\v 7 Ha ta xeꞌ xak ꞌũkĩyꞌax nõy Kahnẽn Kutok teꞌ, yã 4, ha ꞌãteꞌ xupak, ha yõnnãꞌĩ nõy, yãꞌ 4 te:
\p —‍Mã! Kaxĩy.
\p
\v 8 ꞌÃteꞌ pẽnãhãꞌ, paꞌ xip kãmãnok nõy, yã pap-nok putuk. Ha ꞌõm teꞌ yĩmũꞌ yũm, tuꞌ xuxetꞌax yã Xakixꞌax, kaxĩy, xix Hãmgãyãgnãg Pet, kaxĩy, tu kãmãnok nõy peꞌ mõg ꞌũyĩkãgnãg. Haꞌ nõy te nõm kãꞌogãhãꞌ, puyĩy xat, hãm xexka yõg tikmũꞌũn yõg yãg teꞌ 4 yõg yãg puxet kix, yã tikmũꞌũn te yãykix kakĩynãg putup, tuꞌ putup xũy hãꞌ xakix putup, tu hãmpakut hãꞌ xakix putup, ha xokxop gãy teꞌ kix putup.
\p
\v 9 Ha taꞌ xak ꞌũkĩyꞌax nõy Kahnẽn Kutok teꞌ, yãꞌ 5, ha ꞌãteꞌ pẽnãhãꞌ, paꞌ pip yãmĩy xohix xokxop mõꞌhapꞌax kakak. Hõnhã yã yãmĩy, pa hõmã yã tikmũꞌũn, tu hãm xexka tuꞌ pip, tu Topa yõg hãmꞌãpak maxꞌax ꞌãktux, yĩy ta tikmũꞌũn gãy, tuꞌ kix, haꞌ xakix, tu nõmhã yãꞌ yãmiy, tuꞌ pip xokxop mõꞌhapꞌax kakak, 
\v 10 tu hãmꞌãktux kaꞌok, hu:
\p —‍Topa, xatek mũg xat, yã ꞌãkaꞌoknãm. Xateꞌ xohix xat. ꞌÃmax xeꞌẽgnãg, tu hãpxeꞌe mĩy. Hãm ꞌũmhã xate hãm xexka yõg tikmũꞌũn yõg hãpkummugãꞌax hã nõy yãnãn putup? Yã nõm tek mũg kix, hak xakix. Kaxĩy.
\v 11 ꞌŨxohix teꞌ pop topixxax ponnok tox, haꞌ nõy te:
\p —‍Nãy, ꞌũhip kutõgnãg, ha mõktuꞌ xohix xexka nũn, tu nũktuꞌ mõxaha nũnteh, yã Topa yõg kãmãnat kamah, yã ꞌãxop putuk, yã ꞌãxape xop. Tikmũꞌũn te nõm kix putup kamah, haꞌ xakix putup. Kaxĩy.
\p
\v 12 Ha taꞌ xak ꞌũkĩyꞌax nõy Kahnẽn Kutok teꞌ, yãꞌ 6, ha hãm xexka nuhuknãm, tu yãy pot, ha ta mãyõn yãyhãm-nĩy, tu topixxax mũnnĩy putux putuk, ha ta mãyõn hex yãyhã xuttah, tu hep ꞌãta putuk.
\v 13 Ha ta mãyõnnãg te pexkox tuꞌ yĩxohoh, yã mĩnta pik xakuxꞌax putuk, yã ꞌãmuuh xexka teꞌ kup nuhuk, hã kaxĩy putuk.
\v 14 Ha taꞌ nõg pexkox, tu tappet tox kĩy putuk, ha yĩktix xohix xexka te yãy pipꞌax nĩm, tu taꞌ mõg xix hãm tot kõnãg yõg xohix te yãy pipꞌax nĩm, tu taꞌ mõg.
\v 15 Ha taꞌ pip ꞌũxatꞌax xop, xix xexka xop, xix xonat xexka xop, xix ꞌũp-texop xexka xop, xiꞌ kaꞌok xop, xix kãmãnat xop, xix xuxyã xop. Yãꞌ xohix xexka te yãy xaptop mĩkaxxap xexka kakak xix yĩktix tuꞌ,
\v 16 tu yĩktix pu hãmꞌãktux xix mĩkaxxap pu hãmꞌãktux, hu:
\p —‍ꞌÃpu ꞌũgmũ yĩmũg nãy, nũy ꞌũgmũ mõꞌnĩy, nũy ꞌũgmũ xaptop, puyĩy nõm tek mũg pẽnã hok nõm teꞌ xat, yã nõm te mĩmpe yĩmũꞌ yũm, puyĩy Kahnẽn Kutok tek mũg yãnãn hok.
\v 17 Yã hõnhã nõm gãy xexkaꞌ. Tep teꞌ gãyꞌax hãꞌ tot putup? Yã ꞌap hãꞌ tot putupꞌah. Kaxĩy.
\c 7
\s ꞌIyaet yõg tikmũꞌũn xohix teꞌ 144.000
\p
\v 1 Hãpxip ꞌĩhã ꞌãteꞌ pẽnãhã pexkox yõg nũꞌpokꞌax teꞌ 4, haꞌ pip hãm xexka tuꞌ, ha yãp-xet xip nõntix tuꞌ haꞌ nõy xip xot tuꞌ, haꞌ nõy xip mãyõn mõꞌnãꞌax tuꞌ, haꞌ nõy xip mãyõn xupepꞌax tuꞌ. Yãꞌ xohix te ꞌãmuuh mũg ꞌũyĩm hã, puyĩy ꞌãmuuh mõkoux hok hãm xexka tuꞌ, xix kõnãg xexka tuꞌ, xix mĩmmãtik tuꞌ.
\v 2 Ha ꞌãteꞌ pẽnãhãꞌ, paꞌ xip pexkox yõg nũꞌkutnãꞌax, tu mãyõn xupepꞌax tuꞌ nũn, tu Topa yõg kaxꞌãmiꞌax tat, yã Topa xeꞌẽgnãg yõg, yã Topa hi xeꞌẽgnãg. Pexkox yõg nũꞌkutnãꞌax te hãmꞌãktux kaꞌok yãy xape teꞌ 4 puꞌ. Yã Topa te nõm 4 xop kaꞌogãhãꞌ, puyĩy hãm xexka koxyõy xix kõnãg xexka koxyõy.
\v 3 Ha nõm pexkox yõg nũꞌkutnãꞌax te:
\p —‍Hõnhãꞌ koxyõy hok hãm xexka xix kõnãg xexkaꞌ, xix mĩhĩm. Nãy, puk mũꞌãteꞌ kaxꞌãmi Topa yõg kãmãnat xohix xexka kux tuꞌ. Kaxĩy.
\p
\v 4 Hã ꞌãteꞌ xupak ꞌũxohix texĩy ꞌũkux tuꞌ kaxꞌãmip-tup, yã Topa yõg xop, yã hep puxet ꞌIyaet yõg tikmũꞌũn xohix teꞌ 144.000,
\v 5 yã Yona yõg xupepmã xop yõg xohix teꞌ 12.000, xix Hoꞌop yõg xupepmã xop yõg xohix teꞌ 12.000, xix Gat yõg xupepmã xop yõg xohix teꞌ 12.000,
\v 6 xix ꞌAxe yõg xupepmã xop yõg xohix teꞌ 12.000, xix Nãptanix yõg xupepmã xop yõg xohix teꞌ 12.000, xix Mãnãxex yõg xupepmã xop yõg xohix teꞌ 12.000,
\v 7 xix Xĩmẽãm yõg xupepmã xop yõg xohix teꞌ 12.000, xix Nemi yõg xupepmã xop yõg xohix teꞌ 12.000, xix Ixakat yõg xupepmã xop yõg xohix teꞌ 12.000,
\v 8 xix Yemonõm yõg xupepmã xop yõg xohix teꞌ 12.000, xix Yoye yõg xupepmã xop yõg xohix teꞌ 12.000, xix Meyamĩy yõg xupepmã xop yõg xohix teꞌ 12.000. Yã xohix teꞌ 144.000.
\s Tikmũꞌũn xohix xexkaꞌ
\p
\v 9 Hãpxip ꞌĩhã ꞌãteꞌ pẽnãhãꞌ, paꞌ pip tikmũꞌũn xohix xexkaꞌ, yãꞌ xohix. Tep-teꞌ mõkupix? Yã mõkupix yũmmũg ꞌohnãg. Yãꞌ pip punethok, yã xop xohix yõg, xix hep xohix xop yõg, xix hãpxexka xohix yõg xop, xiꞌ yĩyꞌax xohix yõg xop. Yãꞌ xohix tek-nĩhãꞌ pip nõm teꞌ xat keppah, yã nõm te mĩmpe yũmꞌax yĩmũꞌ yũm, xix Kahnẽn Kutok keppaꞌ pip, tuꞌ xohix teꞌ tat topixxax ponnok tox, tu paxxap xux pop ꞌũyĩm hã,
\v 10 tuꞌ xohix te hãmꞌãktux kaꞌok, hu:
\p —‍Topa te yũmũg kuxa kummuk xit, nũy kuxa max mõꞌtat ꞌũyãnãn tuꞌ, yã Topa xexkanãm, xix Kahnẽn Kutok, tuꞌ xatꞌax yõg mĩmpe mãmꞌax yĩmũꞌ mãm. Kaxĩy.
\p
\v 11 Ha pexkox yõg nũꞌpokꞌax xohix xexka tek-nĩhãꞌ pip, tu nõm teꞌ xat yõg mĩmpe yũmꞌax xakot tik xexka teꞌ 24 mũtik xix yõnnãꞌĩ teꞌ 4 mũtik, tu hãm tuꞌ pip, tu hãm tu nũktettex, tuꞌ pip nõm teꞌ xat yõg mĩmpe yũmꞌax keppah, tu Topa xexka mĩy yãy kuxa kopah, tu:
\p
\v 12 —‍Hamũn, ꞌãpu yũmũ Topa ꞌãktux max mõkumaꞌ mõg, haꞌ kux ꞌohnãg. Topa yãꞌ max xeꞌẽgnãg, tu hãmyũmmũg xexkanãm mõkumaꞌ mõg, haꞌ kux ꞌohnãg. Topa te yũmũꞌãꞌ popmãhã hãpxop xohix, yĩy yũmũꞌãte hãmꞌãktux, hu: “ꞌÃmax. Puxix. ꞌŨmax.” Kaxĩy. ꞌÃpu yũmũ hãmꞌãktux hã kaxĩy hãmyãxatamuk xohix kux ꞌohnãg hã. ꞌÃpu yũmũ yãy yõg Topa ꞌãpax mõkumagmõg, haꞌ kux ꞌohnãg. Topa te hãpxop xohix yũmmũg tuꞌ kaꞌoknãm hãmyãxatamuk xohix kux ꞌohnãg hã. Hamũn. Kaxĩy.
\p
\v 13 Ha ta tik xexka puxet xip, tuk yĩkopit, hu:
\p —‍ꞌŨꞌũm ꞌõhõm, yã topixxax ponnok tox tat? Hãm ꞌũm tuꞌ nũn? Kaxĩy.
\p
\v 14 Ha ꞌãte:
\p —‍ꞌĨntuꞌ, xateꞌ yũmmũg. Kaxĩy.
\p Ha:
\p —‍Yã hõmã ꞌũyõg hãpxop kummuk xexkaꞌ, tuꞌ xũy xexkaꞌ, tu yãy yõg topixxax pix Kahnẽn Kutok hep ꞌãta kopah, yĩy topixxax ponnok.
\v 15 Nõm xop pip Topa keppa xix Topa yõg mĩmpe yũmꞌax keppah. Topa pet kopaꞌ pip ꞌãmnĩy ꞌĩhã xix hãptup ꞌĩhã, ha nõm te mĩmpe yũmꞌax yĩmũꞌ yũm te nõm xop hã tep-tup.
\v 16 ꞌA xe putup ꞌũm pip putupꞌah xix kõnãg putup pip putupꞌah ꞌũxeheh. Ha mãyõn yãnãm kaꞌok te nõm xop puk putupꞌah ꞌũxeheh, xix kuxap kaꞌok te nõm xop puk putupꞌah ꞌũxeheh.
\v 17 Hamũn, Kahnẽn Kutok xip, ꞌũxatꞌax yõg mĩmpe yũmꞌax tuꞌ xip, tu nõm xop pẽnãp-tup, yã Kahnẽn pẽnãꞌax max putuk, tu nõm mõgãp-tup hãmmax tuꞌ, xix kõnãg xupepꞌax tuꞌ, ha yõg kõnãg te tikmũꞌũn hĩnnãhãꞌ, ha Topa teꞌ pota pa hep xohix nagãp-tup. Kaxĩy.
\c 8
\s ꞌŨkĩyꞌax, yãꞌ 7
\p
\v 1 Ha ta xe kĩyꞌax nõy xak Kahnẽn Kutok teꞌ, yã kĩyꞌax 7, haꞌ yẽy, yã hãmꞌãpak ꞌohnãg ꞌot xahix hã.
\v 2 ꞌÃteꞌ pẽnãhãꞌ, paꞌ pip pexkox yõg nũꞌpokꞌax teꞌ 7 nõm te Topa keppaꞌ pip, tuꞌ pop mĩxux xop tut teꞌ 7, nũy kaxyãꞌ.
\p
\v 3 Ha taꞌ xip pexkox yõg nũꞌkutnãꞌax nõy, tu kõnnõn mõꞌhapꞌax yĩkaꞌ xip. Tuteꞌ pop kugõy hax max yõg kõnnõn, nũy pugãꞌ, nũy kugõy yãy kotĩnnã ꞌũkuxa mãm kaꞌok xop yõg Topa pu hãmꞌãktux mũtik, puyĩy kugõy mõg pepix Topa pu hãmꞌãktux mũtik Topa hah. ꞌŨpugãhã kõnnõn mõꞌhapꞌax yãnãm ꞌãta yĩxux yĩmũꞌ nõm teꞌ xat yõg mĩmpe yũmꞌax keppah.
\v 4 Ha pexkox yõg nũꞌkutnãꞌax te kõnnõn nũꞌxok kõnnõn mõꞌhapꞌax yĩmũꞌ, ha kõnnõn yõg kugõy mõg pepiꞌ ꞌũkuxa mãm kaꞌok xop yõg Topa pu hãmꞌãktux mũtik, tu mõktu Topa tuꞌ mõxahaꞌ,
\v 5 ha pexkox yõg nũꞌkutnãꞌax te kõnnõn yõg kãnẽy pahaꞌ, tu kõnnõn mõꞌhapꞌax tuꞌ paha kuxap, tuꞌ xix kãnẽy kopah, tu mõꞌyõn hãm xexka tuꞌ, yĩy ta tex tĩnnã punethok, ha yãnãm kõꞌãynãm, ha hãm xexka nuhuk, tu yãy pot.
\s Mĩxux xop tut kaxyãhãꞌ
\p
\v 6 Ha taꞌ pip pexkox yõg nũꞌpokꞌax teꞌ 7, tuꞌ pop mĩxux xop tut, nũy kaxyãꞌ.
\p
\v 7 Ha pexkox yõg nũꞌkutnãꞌax mãxap te mĩxux xop tut kaxyãhãꞌ, ha tex xap nũꞌnãhã xix kuxap hep ꞌãta mũtik tu nũktu: “Po,” kaxĩy hãm xexka tuꞌ, haꞌ puk hãm xexka yãg puxet, ha ta yãg tix puk ꞌohnãg, ha mĩm yãg puxet puk, ha ta yãg tix puk ꞌohnãg, ha mĩxux yĩxux yãg puxet puk, ha taꞌ yãg tix puk ꞌohnãg.
\p
\v 8 Ha pexkox yõg nũꞌkutnãꞌax nõy xip, yãꞌ tix, tu mĩxux xop tut kaxyãhãꞌ, ha ta pexkox tuꞌ xip hãpxop, yã yĩktix xexka putuk, tu kuxap xexka hãꞌ puk, ha nõm teꞌ pahaꞌ, tu hãm tu nũꞌyõn yĩktix, ha taꞌ nãhãꞌ, tu nũktu: “Po,” kaxĩy, kõnãg xexka tuꞌ. Ha kõnãg xexka yãg puxet te yãyhã hep ꞌãtaꞌ, ha taꞌ yãg tix te yãyhã hep ꞌãta ꞌohnãg.
\v 9 Ha taꞌ xakix kõnãg xexka kopaꞌ pip xop yãg puxet, ha taꞌ xakix ꞌohnãg yãg tix, ha ta yãy koxyõy mĩpkox yãg puxet, ha taꞌ yãg tix yãy koxyõy ꞌohnãg.
\p
\v 10 Ha taꞌ xip pexkox yõg nũꞌkutnãꞌax nõy pexkox tuꞌ, yã pexkox yõg nũꞌkutnãꞌax tikoyuk, tu mĩxux xop tut kaxyãhãꞌ, ha ta pexkox tuꞌ nãhã mãyõnnãg, tuꞌ puk, yã kuyãnãm tatꞌax xexka putuk. ꞌŨnãhã, tu nũktu: “Po”, kaxĩy, kõnãg kox yãg puxet tuꞌ, ha taꞌ yãg tix hã mõꞌnã ꞌohnãg, tu kõnãg xupup kox yãg puxet hã mõꞌnãhãꞌ, ha taꞌ yãg tix hã mõꞌnã ꞌohnãg.
\v 11 Yã mãyõnnãg ꞌũxuxetꞌax, tu: kohãgnãgꞌax. Kaxĩy. Ha kõnãg yãg puxet yãyhã kohãgnãg, ha ta yãg tix yãyhã kohãgnãg ꞌohnãg, ha tikmũꞌũn punethok teꞌ xoꞌop, huꞌ xakix.
\p
\v 12 Ha taꞌ xip pexkox yõg nũꞌkutnãꞌax nõy pexkox tuꞌ, yã pexkox yõg nũkutnãꞌax 4, tu mĩxux xop tut kaxyãhãꞌ, ha hãpxop teꞌ kix ꞌũyãg puxet mãyõn yõg, xix mãyõn hex yõg, xix mãyõnnãg yõg, ha ta ꞌũyõg yãg tix kix ꞌohnãg, yĩy taꞌ xohix te yãy yõg kuyãnãm yãg puxet xaxok, ha taꞌ yãg tix xaxok ꞌohnãg, ha ta hãm xexta tu hãpkoxtap hãptup yãg puxet, ha taꞌ yãg tix hãpkoxtap ꞌohnãg, ha ꞌãmnĩy te kaxĩy kamah.
\p
\v 13 ꞌÃteꞌ pẽnãhãꞌ, paꞌ xip mõmõkaꞌ, tuꞌ topaha pepiꞌ mõg, tu hãmꞌãktux, hu:
\p —‍Hãpkummuk! Hãpkummuk! Yãꞌ kummuk xexka hãm xexka xohix xop yõg, ha pexkox yõg nũꞌpok tikoyuk nõy te mĩxux xop tut kaxyãp-tup. Kaxĩy.
\c 9
\p
\v 1 Ha taꞌ xip pexkox yõg nũꞌkutnãꞌax nõy pexkox tuꞌ, yã pexkox yõg nũꞌkutnãꞌax 5, tu mĩxux xop tut kaxyãhãꞌ. ꞌÃteꞌ pẽnãhã, paꞌ xip mãyõnnãg hãm xexka tuꞌ. Yã hõmã nõm te pexkox tuꞌ nãhãꞌ. Haꞌ nõy te tuꞌ hõm pipkup mõhãmyĩnnĩnꞌax hãpkox tox xexka yõg,
\v 2 ha mãyõnnãg te hãpxõn, ha kugõy xexka xupep, yã ꞌãmukꞌax xexkanãm yõg, tu kugõy te mãyõn yãnãm pak, ha yãykote hãpkoxtap.
\v 3 Ha taꞌ pip kunihit kugõy kopah, tu taꞌ mõg, tu mõktu mõxaha hãm xexka tuꞌ, haꞌ nõy te kunihit kaꞌogãhãꞌ, haꞌ kaꞌok, yã xokpatakuhmĩy putuk.
\v 4 Haꞌ nõy teꞌ xat, pu xux mã hok, xix mĩm xux mã hok, xix mĩxux puk mã hok, paꞌ xat, pu tik kuteꞌex. Hamũn, yãꞌ pip ꞌohnãg Topa yõg kaxꞌãmiꞌax nõm tik tuꞌ.
\v 5 ꞌŨxat, pu kunihit tik kix hok, paꞌ xat, pu tik kuteꞌex mãyõn ꞌãnuk xohix teꞌ 5 hã, tuꞌ xũygãhãꞌ, yã xokpatakuhmĩy teꞌ xuhmĩy putuk.
\v 6 Ha mãyõn ꞌãnuk xohix teꞌ 5 hãꞌ xũy tihik, tup-tup ꞌũxakix, paꞌ xakix ꞌohnãg, ꞌaꞌ xakix putupꞌah.
\p
\v 7 Yã kunit te xonat yõg kãmãnok putuk, nõm teꞌ yãy kix. Tup-tox hã mõꞌtat ꞌũxatꞌax xexka yõg kuxxax yãnãm ꞌãta yĩxux putuk, tuꞌ payĩn te tikmũꞌũn payĩn putuk.
\v 8 Tuꞌ xe te ꞌũn xe putuk, tuꞌ xox te xoktut xox putuk,
\v 9 tuꞌ kep xax te xonat yõg kepxax putuk, yã pipkup hãꞌ mĩy, tuꞌ yĩmãg payãhã te hãmnãhũn xexkanãm putuk, yã xonat xop yõg kãmãnok hãmnãhũn putuk, xix hãpxop yĩkũyꞌax te hãmnãhũn putuk, yã xonat yõg hãpxop yĩkũyꞌax,
\v 10 tuꞌ nãꞌkup xox te xokpatakuhmĩy nãꞌkup xox putuk, tuꞌ nãꞌkup xox te tik xũygãhã mãyõn ꞌãnuk xohix teꞌ 5 hã.
\v 11 Ha taꞌ xip kunihit xop yõg xexkaꞌ, yã pexkox yõg nũꞌkutnãꞌax. Tute hãpkox tox xexka pẽnãhãꞌ, yãꞌ xuxetꞌax ꞌAmanõm, yã ꞌEmeneo xop yĩyꞌax kopah, xiꞌ xuxetꞌax ꞌApõyãm, yã Genex yĩyꞌax kopah. Yã tikmũꞌũn yĩyꞌax kopah, hu ꞌũkoxyõyꞌax. Kaxĩy.
\p
\v 12 Tu taꞌ kux hãpkummuk mãxap, haꞌ nũn putup hãpkummuk nõy tix.
\p
\v 13 Ha taꞌ xip pexkox yõg nũꞌkutnãꞌax nõy pexkox tuꞌ, yã pexkox yõg nũꞌkutnãꞌax 6, tu mĩxux xop tut kaxyãhãꞌ, ha ꞌãteꞌ yãnmũn xupepꞌax ꞌãpak, yã xokxop mõꞌhapꞌax yõg xupꞌax tuꞌ nũn, yã xokxop mõꞌhapꞌax yãnãm ꞌãta yĩxux xip Topa keppah.
\v 14 Ha yãnmũn xupepꞌax te pexkox yõg nũꞌkutnãꞌax pu hãmꞌãktux, yã nõm teꞌ 6 pu hãmꞌãktux, hu:
\p —‍ꞌÃpu ꞌãyĩm koꞌaꞌ, pu mõg pexkox yõg nũꞌpokꞌax teꞌ 4, nõm pip kõnãg kox ꞌEppanat kũnãpah. Kaxĩy.
\p
\v 15 Ha ꞌĩm koꞌaꞌ, pu mõg. Nõm teꞌ hip nõm ꞌot, xix nõm hãptup, xix nõm mãyõn ꞌãnuk, xix nõm hãmyãxatamuk. ꞌŨhip, nũy tikmũꞌũn yãg puxet kix, puyĩy tu xakix, ha taꞌ yãg tix kix ꞌohnãg.
\v 16 Ha ꞌãteꞌ xupak ꞌũxohix nõꞌõm, yã xonat te kãmãnok yĩmũꞌ mãm, yã xonat xohix teꞌ 200.000.000.
\v 17 Ha ꞌãteꞌ pẽnãhã, tu kãmãnok pẽnãhã xix nõm teꞌ yĩmũꞌ mãm, ha yõg kep xax pip, yãꞌ xutta te kuxap ꞌãta putuk, xix yĩxux te mĩkaxxap xapit putuk, xix xutta yĩxux te mĩkaxxap ꞌũxop putuk. Ha kãmãnok putox te xoktut putox putuk, haꞌ yĩkox kopaꞌ xupep kuxap xix kugõy xix mĩkaxxap ꞌũxop.
\v 18 Yã hãpxop xũygãꞌax tikoyuk pip, yã kuxap, xix kugõy, xix mĩkaxxap ꞌũxop, tu tikmũꞌũn yãg puxet kix, haꞌ xakix. Ha taꞌ yãg tix kix ꞌohnãg.
\v 19 Ha kãmãnok teꞌ yĩkox hãꞌ nõy kix, xiꞌ nãgkup hãꞌ kix kamah. Yãꞌ nãgkup te kãyãp-tox putuk, haꞌ xox pip, tu nõm hã tu tikmũꞌũn putop.
\p
\v 20 Ha taꞌ pip ꞌũhi xop. Yã hãpxop xũygãꞌax te nõm kix ꞌohnãg. Nõm xop te hãpkummuk mĩy kux ꞌohnãg, tu yãmĩy puk-teꞌex kux ꞌohnãg, tu topa komut xop pu nũktettex kux ꞌohnãg, yã pipkup yãnãm ꞌãta yĩxux hãꞌ mĩy topa komut xop, xix yãnãm ponnok hãꞌ mĩy, xix pipkup monõn hãꞌ mĩy, xix mĩkaxxap hãꞌ mĩy, xix mĩm hãꞌ mĩy. Yã topa komut xop te hãmpẽnã ꞌohnãg xix hãmꞌãpak ꞌohnãg, xix hãpkumep ꞌohnãg.
\v 21 Tikmũꞌũn teꞌ nõy kixpax, pa yãyhãhup ꞌohnãg, nũy hãpkummuk mĩy kux ꞌohnãg, tu mĩm mĩy, tuꞌ hup ꞌohnãg, tuꞌ nõy hã xupxet, tu hãpxop xupxet, tuꞌ hup ꞌohnãg.
\c 10
\s Tappet tox kĩy kutõgnãg
\p
\v 1 Ha ꞌãteꞌ pẽnãhãꞌ, paꞌ xip pexkox yõg nũꞌkutnãꞌax kaꞌok pexkox tuꞌ, tu kugõy tat, yã topixxax putuk, tu texxux tep-tox xakot, yãꞌ kuxxax putuk, tuꞌ pa te mãyõn putuk, tuꞌ kup te kuxap putuk, tu taꞌ yĩxohoh.
\v 2 Tu tappet tox kĩy kutõgnãg tat ꞌũyĩm kopah, haꞌ pata xeꞌe te kõnãg xexka tonnok, haꞌ pata nõy te hãm tonnok,
\v 3 haꞌ yĩy kaꞌok, yã xoktut punethok yĩyꞌax putuk. ꞌŨyĩy kaꞌok, ha tex tĩnnãꞌax xohix teꞌ 7 teꞌ yãnãn.
\v 4 ꞌŨyĩy kux, ha ꞌãteꞌ kaxꞌãmi putup, pa ꞌõm yĩy pexkox tuꞌ, ha ꞌãteꞌ xupak, ha hãmꞌãktux, hu:
\p —‍ꞌÃpu hãmꞌãktux xaptop. ꞌÃpu textĩnnãꞌax yõg hãmꞌãktux kaxꞌãmi hok. Kaxĩy.
\p
\v 5 ꞌÃteꞌ pẽnãhã pexkox yõg nũꞌkutnãꞌax te kõnãg xexka tonnok xix hãhãm, haꞌ yĩm pepiꞌ xix,
\v 6 tu hãmꞌãktux, hu:
\p —‍Hãpxip kutõgnãg ꞌĩhãꞌ nũn. Topa te yõgnũ hãmꞌãktux yũmmũg, yã Topa teꞌ yũmmũg, yã Topa hi mõkumaꞌmõg hãmyãxatamuk xohix kux ꞌohnãg hã, tu pexkox mĩy xix yãykoteh, xix nõm kopaꞌ pip xop, xix hãm xexka mĩy, xix nõm tuꞌ pip xop, xix kõnãg xexka mĩy, xix nõm te kopaꞌ pip xop.
\v 7 Hõmã Topa te Topa pupi hãmꞌãktux xop pu hãmꞌãktux xex, yã hãpxop xaptop. Hãpxip kutõgnãg ꞌĩhã Topa te nõm hãpxopmãp-tup, ha pexkox yõg nũꞌpokꞌax teꞌ 7 te mĩxux xop tut kaxyãp-tup. Kaxĩy.
\p
\v 8 Ha ta xeꞌ yĩy pexkox tuꞌ, ha ꞌãteꞌ xupak, ha hãmꞌãktux, hu:
\p —‍Mõg, nũy pa tappet tox nõm xip pexkox yõg nũꞌkutnãꞌax yĩm kopah nõm te kõnãg xexka tonnok xix hãhãm. Kaxĩy.
\p
\v 9 Ha tak mõg pexkox yõg nũꞌkutnãꞌax hah, tu:
\p —‍ꞌÃꞌ hõm tappet tox kĩy kutõgnãg. Kaxĩy.
\p Ha:
\p —‍ꞌŨpa, nũy mãꞌ. Xateꞌ mãhãꞌ, haꞌ yãyhãꞌ xũy putup ꞌãtex kopah, paꞌ xuxpex ꞌãyĩkox kopah, yã pukhep putuk. Kaxĩy.
\p
\v 10 Ha ꞌãteꞌ paha tappet tox ꞌũgyĩm kopah, tuꞌ mãhãꞌ, haꞌ xuxpex ꞌũgyĩkox kopah, yã pukhep putuk. ꞌÃteꞌ mãhãꞌ, ha hãpxip ꞌĩhãꞌ xũy ꞌũktex kopah.
\v 11 Ha tute:
\p —‍Xate Topa yõg hãmꞌãktux pop. Xate hãmꞌãktux putup tikmũꞌũn xohix puꞌ, xix hãpxexka xohix xop puꞌ, xiꞌ yĩyꞌax yõg xohix xop puꞌ, xix hãpxexka xohix yõg tik xatꞌax xohix puꞌ. Xate hãmꞌãktux putup, hãpxop kummuk nũn. Kaxĩy.
\c 11
\s Tik tix te Topa yõg hãmꞌãktux ꞌãktux
\p
\v 1 Haꞌ nõy te ꞌãꞌ hõm mõhãmmũgꞌax tox, tu:
\p —‍ꞌÃpu mõ Topa pet xexka mũy, nũy mẽn xohix texĩy yũmmũg, xix xokxop mõꞌhapꞌax yõg mẽn kamah. ꞌÃpu mõkupix ꞌũxohix te Topa keppa nũktettex Topa pet xexka kopah.
\v 2 Pa ꞌãpu mõ hãm mũy hok hãm nuhnõg Topa pet xexka kũnãpah, yã Topa pet xexka yĩkãgnãg hã. Hamũn, Topa te hãm hõm Yoneo xop kũnãpa pip xop puꞌ, ha nõm te hãm tonnok putup mãyõn ꞌãnuk xohix teꞌ 42 hã, xix kõmẽn xeꞌẽgnãg tonnok putup kamah.
\v 3 ꞌÃte mõꞌpok putup tik tix, puyĩy yõgnũ hãmꞌãktux ꞌãktux hãm xexka tuꞌ. Nõm te topixxax kummuk mõꞌtat, nõm hãg tu xago. Hamũn, yãꞌ kuxa hittup ꞌohnãg, yã tikmũꞌũn te hãpkummuk mĩy. Nõm te Topa yõg hãmꞌãktux ꞌãktux putup ꞌãmnĩy xohix teꞌ 1260 hã. Kaxĩy.
\p
\v 4 Yã Topa yõg hãmꞌãktux tatꞌax tix te mĩm kup ꞌonimet tix putuk, xix kuyãnãm tatꞌax tix putuk. Nõm te hãm xexka yõg xatꞌax xexka keppa pip putup.
\v 5 Tikmũꞌũn ꞌũm te nõm tik tix kuteꞌex kummuk, puxix tik tix yĩkox kopaꞌ xupep kuxap, nũy puknõg gãy xop kummuk koxyõy, nũy nõm kix, haꞌ xakix putup.
\v 6 Topa te tik tix kaꞌogãp-tup, ha nõm teꞌ xat putup, hu pexkox mõꞌnĩy, yĩy tex tip-tup ꞌohnãg, ha tik tix te Topa yõg hãmꞌãktux ꞌãktux putup. Ha Topa te tik tix kaꞌogãp-tup, ha nõm teꞌ xat putup, yĩy ta kõnãg xupup kox xohix yõg kõnãg te yãyhã hep ꞌãtap-tup. Ha Topa te nõm kaꞌogãp-tup, puyĩy hãm xexka kix, yĩy taꞌ nũn putup hãpxop kummuk xohix, tik te nõm putup.
\p
\v 7 Tu ta Topa yõg hãmꞌãktux ꞌãktux kux, ha ta hãpkox tox xexka kopaꞌ xupep xok xexkaꞌ, nũy tik tix mũtik yãy kix, tuꞌ xat putup, tuꞌ nõy kix putup, haꞌ xakix,
\v 8 haꞌ yĩn pip putat kopa kõmẽn xeꞌẽgnãg kopah, yã tikmũꞌũn tep-tex Yeyox mĩpkupnix yĩmũꞌ kõmẽn xeꞌẽgnãg tuꞌ. Yã kõmẽn yõg tikmũꞌũn te hãpkummuk mĩy. Yã kõmẽn ꞌãxetꞌax Xonõm Putuk xix ꞌEyit Putuk.
\v 9 ꞌŨxohix xop te tik tix yĩn pẽnãp-tup ꞌãmnĩy tikoyuk xix xahix hã. Hãmũn, ꞌũxat putup, pu nõ hãpkot hok. ꞌŨxohix teꞌ pẽnãp-tup, yã hãm xexka yõg xohix xop, yãꞌ hep xohix xop xix yĩyꞌax xohix xop, xix xop xohix,
\v 10 tu hãm xexka yõg tikmũꞌũn xohix kuxa hittup putup, ꞌũxakix tik tix hah. ꞌŨxohix kuxa hittup, tu yãy pu hãpxop max hok popmãp-tup. Hamũn, nõm tik tix te Topa pupi hãmꞌãktux, tuꞌ xat, pu hãm xexka yõg tikmũꞌũn xũygãꞌ.
\v 11 Pa ꞌãmnĩy tikoyuk nõg, ꞌĩhã Topa te tik tix kopa xitxok, nũy putpuꞌ hĩnnãꞌ, yĩy tak-nĩhãꞌ pip, haꞌ xohix teꞌ pẽnãhãꞌ, huꞌ yĩpkutuk xexkah,
\v 12 ha tik tix teꞌ xupak, pa nõm teꞌ xãnã kaꞌok hu:
\p —‍Mã nũnte pepiꞌ. Kaxĩy
\p Ha taꞌ mõg tik tix pepiꞌ, tu hãmgõy xexka hãꞌ mõxahaꞌ, tu taꞌ mõg pepi pexkox tuꞌ, ha taꞌ pip ꞌũgãy xop hãm xexka tuꞌ, tuꞌ pẽnãhãꞌ.
\v 13 Ha hãm nuhuk xexkaꞌ, tuꞌ yãy pot, yĩy ta kõmẽn yãg puxet koxyõy, ha taꞌ yãg teꞌ 9 koxyõy ꞌohnãg, yĩy ta tikmũꞌũn xohix teꞌ 7.000 xakix hãm nuhuk hã. Ha ta tikmũꞌũn nõy kuxanõg, tu pexkox yõg Topa ꞌãktux max.
\p
\v 14 ꞌŨnõg hãpkummuk tix. ꞌŨpẽnãꞌ, ꞌũnõy nũn.
\s Mĩxux xop tut kaxyãhãꞌ yãꞌ 7
\p
\v 15 Ha taꞌ xip pexkox yõg nũꞌkutnãꞌax nõy, yã pexkox yõg mõkutnãꞌax 7, tu mĩxux xop tut kaxyãhãꞌ, ha taꞌ yĩy kaꞌok pexkox tuꞌ, hu:
\p —‍Yũmũg xuxyã xexka teꞌ xohix xat, yã Kunnix teꞌ xat hãpxexka xohix yõg xexka xop, xix yõg tikmũꞌũn, tu nõm xat putup hãmyãxatamuk xohix kux ꞌohnãg hã. Kaxĩy.
\p
\v 16 Ha taꞌ pip tik xexka teꞌ 24 pexkox tuꞌ, tuꞌ xexka xop yõg mĩmpe mãmꞌax yĩmũꞌ mãm, tu taꞌ yok, tu Topa pu nũktettex,
\v 17 tu:
\p —‍Topa xexkaꞌ, ꞌãkaꞌok, yã ꞌãxip mõkumaꞌãmõg hõnhã xix hõmã. ꞌÃmax, ꞌãkaꞌok xexkaꞌ, tu hõnhã ꞌãxexkaꞌ, yã tikmũꞌũn xohix xat kõnãmãhãꞌ.
\v 18 Ha Topap-tup nõg xop ꞌũgãy xexkaꞌ, yãꞌ yũmmũg ꞌãgãy hõnhã, tu xakix xop yõg hãpxopmãꞌax kopit putup. Nõmhã xate ꞌõg kãmãnat xop pu hãpxopmã maxp-tup, xix tik te ꞌãpupi hãmꞌãktux xop pu hãpxopmã maxp-tup, tu ꞌõg tikmũꞌũn pu hãpxopmã maxp-tup, nõm te ꞌãyĩpkutuk, yãꞌ xexka xop xik-tõgnãg xop. Nõmhã xateꞌ koxyõy putup nõm te hãm xexka koxyõy. Kaxĩy.
\p
\v 19 Ha taꞌ xõn Topa pet xexka pexkox kopah, paꞌ pẽnãhã ꞌũkopa Topa yõg paꞌax yõg mĩpkox. Ha ta yãnãm kõꞌãynãm, ha tex tĩnnã xe xexkaꞌ, tu tex xap nũꞌnãhãꞌ, ha ta hãm xexka nuhuk punenhok.
\c 12
\s ꞌŨhũn xix xok xexka ꞌãtaꞌ
\p
\v 1 Ha ꞌãteꞌ pẽnãhãꞌ, paꞌ xip ꞌũhũn, ha hãpxopmãhãꞌ. Yũmũꞌãteꞌ pẽnãhãꞌ, huꞌ yũmmũg hãpxopmãꞌax nũn putup. ꞌŨn te mãyõn tat, yã topixxax putuk, ha mãyõn hex xip ꞌũpata kakah, ha mãyõnnãg teꞌ 12 te yõg kuxxax putuk.
\v 2 ꞌŨn tek-tok xuk, tuꞌ put putũmnãg, huꞌ xũy, huꞌ potahaꞌ.
\p
\v 3 ꞌÃte ꞌũn pẽnãhãꞌ, paꞌ xip xok xexka ꞌãtaꞌ, tuꞌ: Kẽm. Yãꞌ xexka nãm, pa kakxexka putuk. ꞌŨp-tox xohix teꞌ 7, tup-tox kup xohix teꞌ 10, haꞌ xatꞌax xexka yõg kuxxax teꞌ 7 pip ꞌũp-tox xohix yĩmũꞌ.
\v 4 Xok xexka ꞌãta teꞌ nãgkup hãꞌ paha mãyõnnãg yãg puxet, haꞌ yãg tix pop ꞌohnãg, tu hãm xexka tuꞌ mõ nõy yõn, ha mõktu: Po. Kaxĩy. Ha ꞌũn tek-tok put putup, ha taꞌ nũn xok xexka ꞌãta, tu nũktu ꞌũn keppaꞌ xip, nũy kutok mãꞌ,
\v 5 ha ꞌũn tek-tok pit put, yãk-tok te hãm xexka yõg tikmũꞌũn xohix xop xat putup, yã pipkup tox xexka hãꞌ xat putup, yãꞌ xat kaꞌok putup. ꞌŨk-tok put, ha hãpxip ꞌohnãg ha ta ꞌõm xip, tuk-tok pahaꞌ, tu nõm mõgãhã pexkox tuꞌ, yã Topa haꞌ mõg xix Topa yõg mĩmpe yũmꞌax xeꞌẽgnãg tuꞌ.
\v 6 Ha ta ꞌũn mõxupahaꞌ hãm nak tuꞌ. Yã Topa te ꞌũn puꞌ xipꞌax mĩy. Ha Topa te nõ tehe ꞌãmnĩy xohix teꞌ 1260 hã.
\p
\v 7 Ha taꞌ yãy kix kakĩynãg pexkox tuꞌ Mĩget mũtik xok xexka ꞌãta xix Mĩget yõg pexkox yõg nũꞌpok xop mũtik.
\v 8 Nõm te xok xexka ꞌãta putyõn pexkox kũnãpaꞌ.
\v 9 ꞌŨꞌũm xok xexka ꞌãtaꞌ? Yã Hãmgãyãgnãg, yã Xatanãy. Yã tute hãm xexka yõg xohix xop puꞌ koit pax. Yãꞌ putyõn pexkox kũnãpãꞌ, xix yãy yõg pexkox yõg nũꞌpok xop, yã yõg xape xop, haꞌ yĩxohoh, tu nũktu hãm xexka tuꞌ mõxohaꞌ.
\p
\v 10 Ha ꞌãteꞌ xupak, paꞌ yĩy kaꞌok pexkox kopa hu:
\p —‍Hõnhã Topa te tikmũꞌũn mõy hãpkummuk kopah. Hõnhã tikmũꞌũn teꞌ pẽnãhã ꞌũkaꞌok Topah, yãꞌ xexkaꞌ. Hõnhã Topa yõg Kunnix teꞌ xohix xat! Hamũn, hõmã Hãmgãyãgnãg xip pexkox tuꞌ, tu Topa mũtik hãmꞌãktux, hu: “Topa kopa kuxa mãm xop te hãpkummuk mĩy.” Kaxĩy. Yã ꞌãmnĩy xohix hã hãmꞌãktux te kaxĩy xix hãptup xohix hã. Paꞌ putyõn pexkox kũnãpah.
\v 11 Hõmã ha ta yũmũg xape xop teꞌ xut, ha ta Hãmgãyãgnãg teꞌ xut ꞌohnãg. Yũmũg xape xop teꞌ xut Kahnẽn Kutok hep ꞌãta hã xix hãmꞌãktux xeꞌe hã, tuꞌ xakix yĩpkutuk ꞌohnãg.
\v 12 Pexkox yõg xop, ꞌãpu ꞌãkuxa hittup! Pa hãm xexka tuꞌ kummuk xexkaꞌ xix kõnãg xexka tuꞌ, yã Hãmgãyãgnãg te hãm xexka tuꞌ xupep. ꞌŨgãy xexkaꞌ. Tuteꞌ yũmmũg hãpxip kutõgnãg puxix tuꞌ kux. Kaxĩy.
\p
\v 13 Ha xok xexka ꞌãta teꞌ pẽnãhãꞌ, yã hãm xexka tuꞌ xip. Paꞌ xip ꞌũhũn, tuk-tok pit put. Ha ta ꞌũn yĩnnãhãꞌ xok xexka teꞌ.
\v 14 Pa ꞌõm xip, tu ꞌũn puꞌ yĩmãg tix popmãhãꞌ, yãꞌ xexka ꞌũyĩmãg, yã mõmõka yĩmãg putuk. Ha ta topaha pepix ꞌũhũn, tuꞌ mõg, tu mõktuꞌ xupep hãm nak tuꞌ, haꞌ nõm nõy te ꞌũn hãꞌ teheꞌ hãmyãxaꞌamuk tikoyuk xix xahix hã, ha xok xexka ꞌãta teꞌ xũygã ꞌohnãg.
\v 15 Yã xokxexka ꞌãta yĩykox kopaꞌ xupep kõnãgkox, nũy ꞌũn mõgãꞌ.
\v 16 Pa hãpxexka te ꞌũn hãꞌ teheꞌ, tu yãy pot, ha kõnãg te hãpkox hã mõꞌnãhãꞌ,
\v 17 yĩy taꞌ gãy xok xexka ꞌãtaꞌ, tu taꞌ mõg, nũy yãykix ꞌũn xupepmã xop mũtik, xix Topa yõg xatꞌax mĩy xop xohix mũtik, xix Yeyox yõg hãmꞌãktux xeꞌe ꞌãpak xop mũtik, tuꞌ xip hãm kux tuꞌ xok xexka ꞌãtaꞌ.
\c 13
\s Xok xexka tix
\p
\v 1 ꞌÃteꞌ pẽnãhãꞌ, paꞌ xip xok xexka nõy, haꞌ xip kõnãg xexka kopah, tuꞌ xupep, tu taꞌ mõg, tup-tox kup xohix teꞌ 10, tup-tox xohix teꞌ 7, ha xatꞌax xexka yõg kuxxax teꞌ 10 tat ꞌũp-tox kup teꞌ 10 yĩmũꞌ, ha xuxetꞌax kummuk kaxꞌãmi ꞌũp-tox yĩmũꞌ.
\v 2 Yã xok xexka te neppat putuk, yã hãmgãy kõmnãg putuk, tuꞌ pata te ꞌux pata putuk, tuꞌ yĩkox te xoktut yĩkox putuk. Ha xok xexka ꞌãta te xok xexka xexkanãhãꞌ, tu kaꞌogãhãꞌ, puꞌ xat.
\v 3 Pa xok xexka putox puxet xok putuk, pa hãpxip ꞌĩhãꞌ hittup, yĩy taꞌ yẽy hãm xexka yõg tikmũꞌũn xohix, hu xok xexka putup, huꞌ peꞌ mõg,
\v 4 tu xok xexka pu nũktettex. Hamũn, xok xexka ꞌãta te xok xexka xexkanãhãꞌ, tuꞌ kaꞌogãhãꞌ, ha tikmũꞌũn te xok xexka pu nũktettex, tu:
\p —‍Yã xeꞌẽgnãg xok xexkaꞌ. Yãꞌ kaꞌok xexkaꞌ. Tep-te yãykix putup xok xexka mũtik? Yã yãykix putupꞌah. Kaxĩy.
\p
\v 5 Haꞌ tux hok, ha xok xexka te hãmꞌãktux kummuk xexka mãyõn ꞌãnuk xohix teꞌ 42 hã, tuꞌ xat pax kamah,
\v 6 tu Topa ꞌãktux kummuk kõnãmãhãꞌ, xix Topa yõg xipꞌax ꞌãktux kummuk, xix pexkox tuꞌ pip xop ꞌãktux kummuk.
\v 7 Ha taꞌ tux hok, ha xok xexka te yãykix Topa kopa kuxa mãm xop mũtik, ha xok xexka teꞌ xut. Haꞌ tux hok, ha xok xexka teꞌ xat ꞌũhep xop xohix, xix hãpxexka xohix yõg xop, xix ꞌũyĩyꞌax xohix yõg xop, xix xop xohix.
\v 8 Hãm xexka yõg xohix xop te xok xexka pu nũktettex. Hõmã ha ta hãm xexka xipꞌah, ha Topa te yãy yõg xop ꞌãxetꞌax kaxꞌãmiꞌ, yã Topa kopa kuxa mãm xop ꞌãxetꞌax kaxꞌãmi yãy yõg tappet kopah, pu tu hi xeꞌe, haꞌ kux ꞌohnãg, yã Kahnẽn Kutok yõg xop nõꞌõm. Yã tikmũꞌũn te Kahnẽn Kutok putex. Paꞌ nõy xop pip, haꞌ xuxetꞌax kaxꞌãmi ꞌohnãg nõm tappet tuꞌ. Nõm xohix te xok xexka pu nũktettex.
\p
\v 9 ꞌÃyĩpkox pip, ꞌãpu xupax.
\v 10 Topa teꞌ xat, puxix tikmũꞌũn Topa kopa kuxa mãm xop pop putup, nũy mõgã yãy yõg hãm tuꞌ. Pa Topa teꞌ xat hok, puxix nõm mõgã hok. Topa teꞌ xat, puxix tikmũꞌũn Topa kopa kuxa mãm xop kix putup mĩkax xexka hã. Paꞌ xat hok puxiꞌ kix hok, yĩy taꞌ max, pu Topa kopa kuxa mãm xop Topa tuꞌ pip kaꞌok, nũy ꞌũkuxa mãm kaꞌok.
\p
\v 11 Ha ꞌãteꞌ pẽnãhãꞌ, paꞌ xip xok xexka nõy, tu hãm kopaꞌ xupep, tuꞌ xip, yã ꞌũp-tox kup tix, yã Kahnẽn Kutok putox kup putuk, tu hãmꞌãktux te xok xexka ꞌãta yõg hãmꞌãktux putuk.
\v 12 Xok xexka yãꞌ xexkaꞌ, yãꞌ xatꞌax kaꞌok, yã xok xexka mãxap te nõm xexka mĩy, ha nõm te xok xexka mãxap puꞌ hãmxopmãhãꞌ, tuꞌ xat, pu hãm xexka yõg xohix xop te xok xexka mãxap pu nũktettex. Yã hõmã xok xexka mãxap yõg kayax xexka xip, tuꞌ xok putũmnãg, paꞌ hittup mõꞌkaꞌok.
\v 13 Ha xok xexka te hãpxop kaꞌok xeꞌẽgnãg mĩy, yã kuxap xãnãhãꞌ, ha pexkox kopaꞌ xupep kuxap, tu nũꞌnãhãꞌ, tu nũktu hãm tu: Po. Kaxĩy. Ha tikmũꞌũn xohix xexka teꞌ pẽnãhãꞌ.
\v 14 Yã xok xexka te hãpxop kaꞌok xeꞌẽgnãg mĩy, yĩy tikmũꞌũn kuxa mãm xok xexka kopah. Xok xexka teꞌ koit, yĩy tikmũꞌũn kuxa mãm koitꞌax kopah. Xok xexka te hãpxop kaꞌok xeꞌẽgnãg mĩy xok xexka mãxap keppah, tu tikmũꞌũn xat, pu topa komut mĩy, yã xok xexka mãxap putuk. Hãmũn ꞌũnõy te xok xexka mãxap xuhmĩy mĩkax xexka hã, paꞌ hiꞌ.
\v 15 Topa teꞌ tux hok, ha xok xexka te xit xok topa komut kopah, yĩy taꞌ hiꞌ, hu hãmꞌãktux, tuꞌ xat, puꞌ kix nõm te topa komut pu nũktettex ꞌohnãg.
\v 16 Tuꞌ xat pu kaxꞌãmi hãm xexka yõg tikmũꞌũn xohix yĩm xeꞌe tuꞌ, xiꞌ kux tuꞌ. Yã tikmũꞌũn xohix xat te kaxĩy, yã kutõgnãg xop xix xexka xop, xix ꞌũp-texop xexka xop, xix hok xop, xix kãmãnat xop, xix xatꞌax xop. Yãꞌ xohix.
\v 17 ꞌŨkaxꞌãmiꞌax xip ꞌohnãg, puxix hãpxop hãmenex ꞌohnãg. Yãꞌ kaxꞌãmi xok xexka ꞌãxetꞌax, pe xok xexka yõg xohix texĩy.
\p
\v 18 ꞌÃpu hãmyũmmũg. Hãmyũmmũg, xayĩy yũmmũg putup texĩy xok xexka yõg xohix texĩy. Yã tik yõg xohix texĩy. Yãꞌ 666.
\c 14
\s Topa yõg xop tek-texꞌax tup hãk-tex
\p
\v 1 ꞌÃteꞌ pẽnãhãꞌ, paꞌ xip Kahnẽn Kutok yĩktix Xiãm yĩmũꞌ, ha taꞌ pip tikmũꞌũn xohix teꞌ 144.000, ha yũmũg ꞌãtak Topa xuxetꞌax kaxꞌãmi pip ꞌũxohix kux tuꞌ.
\v 2 ꞌÃteꞌ xupak, paꞌ xip ꞌũyãnmũn xupepꞌax pexkox tuꞌ, yã xamoka xexka te hãmnãhũn putuk, xix tex tĩnnã xexka putuk, xix ꞌap kaxyãꞌax putuk.
\v 3 Ha tikmũꞌũn te 144.000 te pẽnãhã nõm te mĩmpe yũmꞌax xeꞌẽgnãg yĩmũꞌ yũm, xix yõnnãꞌĩ teꞌ 4, xix tik xexkaꞌ. ꞌŨxohix tek-texꞌax tup hãk-tex, yã Topap-tup pax xop teꞌ yũmmũg nõm kutex tup, paꞌ nõy teꞌ yũmmũg ꞌohnãg. Topa te nõm kuxa mãm xop pop, yã Topa yõg tikmũꞌũn,
\v 4 yã nõm kuxa tup, tu ꞌũn mũtik xonnix ꞌohnãg, yãꞌ tup, tu Kahnẽn Kutok peꞌ mõg. Hõmã nõm te hãm xexka yõg xohix xop mũtik yãy kotĩnnãhãꞌ, ha Topa te nõm yĩmõgãtux, tu nõm pop, yã Topa yõg xop xix Kahnẽn Kutok yõg xop.
\v 5 Yã nõm xop teꞌ koit ꞌohnãg, yã hãpkummuk mĩy ꞌohnãg.
\s Topa yõg nũꞌpokꞌax tikoyuk te hãmꞌãktux
\p
\v 6 ꞌÃteꞌ pẽnãhãꞌ, paꞌ xip pexkox yõg nũꞌkutnãꞌax nõy, tu topahaꞌ, tu pepiꞌ mõg, tu Topa yõg hãmꞌãpak maxꞌax ꞌãktux, nũy hãm xexka yõg xohix xop pu nõm ꞌãktux, yã xop xohix puꞌ, xix hep xohix puꞌ, xix yĩyꞌax xop xohix puꞌ, xix hãpxexka xohix yõg xop puꞌ. Yã Topa yõg hãmꞌãpak xip kaꞌok, tu yõg hãmyãxatamuk xohix kux ꞌohnãg.
\v 7 Pexkox yõg nũꞌkutnãꞌax te hãmꞌãktux kaꞌok, hu:
\p —‍ꞌÃpu Topa yĩpkutuk, nũy Topa xexka ꞌãktux max. Hamũn, hãpxip kutõgnãg ꞌĩhã Topa te tikmũꞌũn xohix yõg hãpxopmãꞌax kopit putup. Yã hõmã tuteꞌ mĩy pexkox xix yãykoteh, xix hãm xexkaꞌ, xix kõnãg xexkaꞌ, xix kõnãg xupepꞌax xohix. ꞌÃpu Topa pu nũktettex. Kaxĩy.
\p
\v 8 Pexkox yõg nũꞌkutnãꞌax teꞌ nõy te mãxap peꞌ mõg, tu:
\p —‍ꞌŨkoxyõy, haꞌ nõg kõmẽn xexka Maminõn. Maminõn xexka yõg tikmũꞌũn te hãm xexka yõg tikmũꞌũn xohix mõgãhãꞌ, pu tu nõy hã xupxet, yãꞌ kummuk, yã xupyãg xũy xexka putuk.
\p
\v 9 Ha pexkox yõg mõꞌkutnãꞌax nõy xape tix peꞌ mõg, tu hãmꞌãktux kaꞌok, hu:
\p —‍Tep-te xok xok xexka pu nũktettex xix xok xexka yõg komut pu nũktettex? Tep-teꞌ paha xok xexka yõg kaxꞌãmĩ ꞌũkux tuꞌ, xix ꞌũyĩm tuꞌ?
\v 10 Yã nõm teꞌ pop putup Topa yõg gãyꞌax xexkaꞌ, yã xupyãg xũy xexka popꞌax putuk, yãꞌ xũy xexka ꞌũkuxa kopah, yã ꞌũxop yõg kuxap kopah,
\v 11 tuꞌ xũy pip hãmyãxatamuk xohix kux ꞌohnãg hã, ꞌĩhã kugõy te pepiꞌ mõg. Haꞌ xũy kux ꞌohnãg hãptup ꞌĩhã xix ꞌãmnĩy ꞌĩhãꞌ. Yãꞌ xũy nõm xop, yã xok xexka pu nũktettex xix xok xexka yõg komut pu nũktettex, tuꞌ pop xok xexka ꞌãxetꞌax kaxꞌãmiꞌ. Kaxĩy.
\p
\v 12 ꞌŨmax, puꞌ kuxa mãm xop te Topa yõg putat kopaꞌ pip kaꞌok, yã Topa yõg xatꞌax mĩy xop, yã Yeyox tuꞌ pip kaꞌok xop.
\p
\v 13 Ha ꞌãteꞌ xupak, paꞌ xip yãnmũn xupepꞌax pexkox tuꞌ, tu:
\p —‍ꞌÃpu kaxꞌãmi nũhũꞌ, tu: “ꞌŨkuxa hittup nõm te yũmũg xuxyã Yeyox mũtik mõg ꞌĩhãꞌ xakix.” Kaxĩy
\p Ha Topa Koxuk te:
\p —‍Hamũn. Hõmã ꞌũhãm kaꞌok, pa nũꞌyãynõynãg putup pax putup, ha yõg hãpxopmãꞌax max mõg putup nũmũtik. Kaxĩy.
\s Mõꞌ put yõn hãm xexka yõg tikmũꞌũn
\p
\v 14 Ha ꞌãteꞌ pẽnãhãꞌ, paꞌ xip hãmgõy xexkam-nok, ha ꞌõm teꞌ yĩmũꞌ yũm, yã tik putuk, tuꞌ xatꞌax xexka yõg kuxxax tat, yã pipkup yãnãm ꞌãta yixux hãꞌ mĩy ꞌũkuxxax, haꞌ xip kupukhe xexka ꞌũyĩm kopah.
\v 15 Ha pexkox yõg nũꞌkutnãꞌax nõy te Topa pet xexka kopaꞌ xupep, tu hãmꞌãktux kaꞌok ꞌũnõy puꞌ, yã nõm te hãmgõy xexka yĩmũꞌ yũm, hu:
\p —‍ꞌÃpu ꞌõg kupukhe xexka paꞌ. Mõg, nũy hãpxop xohix put. Hamũn, hõnhã yã hãptup xeꞌeꞌ. Hãm xexka yõg tikmũꞌũn xohix te mĩnta ta putuk. ꞌŨmax, xayĩy nõm put hõnhãꞌ. Kaxĩy.
\p
\v 16 Ha nõm te hãmgõy xexka yĩmũꞌ yũm, tu yõg kupukhe xexka pahaꞌ, tu mõꞌ put yõn hãm xexka yõg, tuꞌ put hãm xexka yõg tikmũꞌũn.
\p
\v 17 Ha ꞌãteꞌ pẽnãhã, paꞌ xip pexkox yõg nũꞌkutnãꞌax nõy, tu pexkox yõg Topa pet xexka kopaꞌ xupep, haꞌ xip kama ꞌũyõg kupukhe xexka xox max.
\p
\v 18 Ha taꞌ xip pexkox yõg nũꞌkutnãꞌax nõy. Tute kuxap pẽnãhã, yã xokxop mõꞌhapꞌax yõg kuxap Topa pet xexka kopah, tu xokxop mõꞌhapꞌax yĩkaꞌ xupep, tu hãmꞌãktux kaꞌok ꞌũnõy puꞌ, yã nõm te kupukhe xexka xox max mũg, yã nõm pu hãmꞌãktux, hu:
\p —‍Mõg, nũy ꞌõg kupukhe hã put mĩnta ꞌop hãmxexka yõg. Hamũn, yãꞌ taꞌ. Kaxĩy.
\p
\v 19 Ha taꞌ mõg, tu kupukhe mõꞌ put yõn hãm xexka tuꞌ, tu mĩnta ꞌop mep, tu mõꞌ nõm yõn hãpxop hep xutꞌax kopah, yã Topa ꞌũgãy, ha tikmũꞌũn koxyõy putup.
\v 20 Yã mĩnta ꞌop hep xut kõmẽn kũnãpaꞌ, ha tikmũꞌũn hep ꞌãta xupep, tu puxhep xexka mĩy, ꞌũxexka teꞌ 300 mẽn putuk, xiꞌ xet te mẽn puxet xix xahix putuk.
\c 15
\s Pexkox yõg nũꞌpok xop te hãpxũygãꞌax tat
\p
\v 1 ꞌÃteꞌ pẽnãhãꞌ, paꞌ pip pexkox yõg nũꞌpok xohix teꞌ 7 pexkox tuꞌ, tu hãpxũygãꞌax teꞌ 7 tat, yã kaꞌax, yã Topa gãy kux putup. Yã ꞌãteꞌ pẽnãhã hãpxop xeꞌe xaptop.
\v 2 ꞌÃteꞌ pẽnãhãꞌ, paꞌ xip kõnãg xexkaꞌ, yã xunnuk te minino putuk, xix kuxap mũtik yãykotĩnnãꞌax putuk. ꞌÃteꞌ pẽnãhãꞌ, paꞌ pip nõm teꞌ xut xop, pa xok xexka teꞌ xut ꞌohnãg, xix yõg komut teꞌ xut ꞌohnãg, xix nõm te xok xexka yõg xohix texĩyꞌax tat, yã 666 kaxꞌami nõm yĩmũꞌ, yãꞌ xut ꞌohnãg. Ha nõm teꞌ xut xop pip kõnãg xexka yõg hãm kux tuꞌ, yã kõnãg xexka te minino putuk yõg. Nõm teꞌ xut xop te ꞌap mũg, nũy nõm kaxyãꞌ. Yã Topa te tuꞌ popmãhãꞌ,
\v 3 hak-tex Mõyyex yõg kutex, yã Mõyyex te Topa puꞌ hãpxopmã max. ꞌŨk-tex kama Kahnẽn Kutok yõg kutex, tuk-tex, hu:
\p —‍Topah, ꞌãxexka, tuꞌ xohix xat. Xate hãpxopmã max xeꞌẽgnãg. ꞌÃmũn yã hãpxexka xohix yõg tikmũꞌũn yõg xatꞌax xexkaꞌ. Xate hãpxeꞌe mĩy, yã hãpxopmã xeꞌeꞌ.
\v 4 Tep-te ꞌãyĩpkutuk ꞌohnãg? Tep-te ꞌãmax xeꞌẽgnãg ꞌãktux putupꞌah? ꞌÃp-xet yã ꞌãkuxa tup xeꞌẽgnãg, ha hãpxexka xohix yõg tikmũꞌũn nũn putup, nũy xa nũktettex. Hamũn, xate hãpxeꞌe mĩy, haꞌ xohix teꞌ pẽnãhãꞌ. Kaxĩy.
\p
\v 5 Hãpxip ꞌĩhã ꞌãteꞌ pẽnãhãꞌ, pexkox xõn, paꞌ xip Topa pet xexkaꞌ, yã topixxax kaꞌok hãꞌ mĩy. Topa xip, ha nõnte tikmũꞌũn te Topa yũmmũg.
\v 6 Ha ta Topa pet xexka kopa pexkox yõg nũꞌpok teꞌ 7, tu hãpxũygãꞌax teꞌ 7 tat, tu topixxax tup ꞌãnuk tat, yã topixxax nĩn, tuꞌ tat ꞌũkote hĩyꞌax, yã pipkup yãnãm ꞌãta yĩxux hãꞌ mĩy.
\v 7 Ha taꞌ pip nõm yõnnãꞌĩ teꞌ 4, ha ta yãp-xet te pexkox yõg nũꞌpok teꞌ 7 puꞌ popmãhã ꞌãmuk xakꞌax xohix teꞌ 7, yã pipkup yãnãm ꞌãta yĩxux hãꞌ mĩy. ꞌÃmuk xakꞌax hã nũꞌxĩmnãg Topa gãyꞌax, yã Topa xip hãmyãxatamuk xohix kux ꞌohnãg hã.
\v 8 Ha taꞌ xip Topa yãy pet kopah, haꞌ pet hã nũꞌxĩmnãg Topa yõg hãmmax xeꞌẽgnãg xiꞌ yõg kaꞌokꞌax, yĩy ta nũꞌxĩmnãg kugõy hã. Ha tikmũꞌũn teꞌ mõxakux yũmmũg ꞌohnãg, ha mõktuꞌ kux hãpxũygãꞌax teꞌ 7. Yã pexkox yõg nũꞌpok teꞌ 7 te nõm xat. Hak-nãy tuꞌ tikmũꞌũn te mõxakux putup.
\c 16
\s ꞌÃmuk xakꞌax kopaꞌ pux Topa yõg gãyꞌax
\p
\v 1 ꞌÃteꞌ xupak, paꞌ xip yãnmũn xupepꞌax kaꞌok Topa pet xexka kopah, tu pexkox yõg nũꞌpok xop pu hãmꞌãktux, hu:
\p —‍Mõg, nũy ꞌãmuk xakꞌax kopaꞌ pux Topa gãyꞌax hãpxexka tuꞌ. Kaxĩy.
\p
\v 2 Ha taꞌ mõg pexkox yõg mõkutnãꞌax mãxap, tuꞌ yõg ꞌãmuk xakꞌax kopaꞌ pux hãm xexka tuꞌ, ha taꞌ pip kayax kummuk xexka tikmũꞌũn yõg. Yã nõm yĩmũꞌ pip xok xexka yõg kaxꞌãmi, ha nõm te topa komut pu nũktettex.
\p
\v 3 Ha taꞌ mõg pexkox yõg nũꞌkutnãꞌax nõy, yãꞌ tix, tuꞌ yõg ꞌãmuk xakꞌax kopaꞌ pux kõnãg xexka tuꞌ, ha ta kõnãꞌãg te yãyhã hep ꞌãta, yãꞌ xakix xop yõg, yĩy taꞌ xakix kõnãg kopa hi xop xohix xexkaꞌ.
\p
\v 4 Ha taꞌ mõg pexkox yõg nũꞌkutnãꞌax nõy, yã tikoyuk, tu yõg ꞌãmuk xakꞌax kopaꞌ pux kõnãg kox tuꞌ, xix kõnag xupepeꞌax tuꞌ yĩy ta kõnãg te yãyhã hep ꞌãtaꞌ.
\v 5 ꞌÃteꞌ xupak, paꞌ xip pexkox yõg nũꞌkutnãꞌax, yã nõm te kõnãg pẽnãhãꞌ. Tute:
\p —‍Topa ꞌãmax xeꞌẽgnãg. Xate hãpxeꞌe mĩy, tu hãpkummuk mĩyꞌax yãnãn. ꞌÃmax xeꞌẽgnãg. ꞌÃxip hõnhã xix hõmã.
\v 6 Hamũn. Tikmũꞌũn te Topa kopa kuxa mãm xop xuhmĩy, xix Topa pupi hãmꞌãktux xop xuhmĩy, haꞌ hep ꞌãta nũꞌnãhãꞌ, yĩy ta xate tikmũꞌũn puꞌ hõm hep ꞌãtaꞌ, puꞌ xoꞌop. Yãꞌ yãnãn. Kaxĩy.
\p
\v 7 ꞌÃteꞌ xupak, paꞌ xip yãnmũn xupepꞌax xokxop mõꞌhapꞌax tuꞌ, tu hãmꞌãktux, hu:
\p —‍Topah, ꞌãxexkaꞌ, ꞌãkaꞌok. Xate tikmũꞌũn yõg hãpxopmãꞌax kopit max, yãꞌ xeꞌeꞌ, yãꞌ yok. Kaxĩy
\p
\v 8 Ha taꞌ mõg pexkox yõg nũꞌkutnãꞌax nõy, yãꞌ 4, tu yõg ꞌãmuk xakꞌax kopaꞌ pux mãyõn tuꞌ, yĩy taꞌ pukpex xexkaꞌ, ha Topa teꞌ xat, pu tikmũꞌũn xax mõꞌhap.
\v 9 Hãmpukpex xexka te tikmũꞌũn xax mõꞌhap, ha nõm te:
\p —‍Yãꞌ kummuk xexka Topah. Kaxĩy.
\p Yã Topa teꞌ xat, puꞌ xũygãꞌ. Pa nõm te yõg hãpkummuk mĩyꞌax kux ꞌohnãg, tu Topa xexka ꞌãktux max ꞌohnãg.
\p
\v 10 Ha taꞌ mõg pexkox yõg nũꞌkutnãꞌax nõy, yãꞌ 5, tu yõg ꞌãmuk xakꞌax kopaꞌ pux xok xexka yõg mĩmpe yũmꞌax xeꞌẽgnãg tuꞌ, yĩy ta hãpkoxtap xok xexka yõg tikmũꞌũn yõg pipꞌax tuꞌ, ha tikmũꞌũn te yãy yõyxõg putop, ꞌũxũy xexka tuꞌ.
\v 11 tu:
\p —‍Pexkox yõg Topah, ꞌãkummuk xexkaꞌ. Xatek mũg xũygã pax, tuk mũꞌã kayax popmãhãꞌ. Kaxĩy.
\p
\v 12 Ha taꞌ mõg pexkox yõg nũꞌkutnãꞌax nõy, yãꞌ 6, tu yõg ꞌãmuk xakꞌax kopaꞌ pux kõnãg kox ꞌEppanat tuꞌ, yĩy taꞌ nak. Nõmhãꞌ xip putat nak, puyĩy hãm tu mãyõn xupep tuꞌ nũn ꞌũxexka xop.
\v 13 Ha ꞌãteꞌ pẽnãhã, paꞌ pip yãmĩy yãyꞌĩgãhnãg tikoyuk, yã hupnãg putuk, tuꞌ pip xok xexka ꞌãta yĩkox kopah, xix xok xexka yĩkox kopah, xix Topa pupix hãmꞌãktux mõꞌãmũꞌax xop yĩkox kopah, tu taꞌ mõg.
\v 14 Yãmĩy kummuk te hãpxopmã kaꞌok xeꞌẽgnãg, tu taꞌ mõg hãm xexka yõg xatꞌax xexka xohix xop hah, nũy nõm yãy tu nũꞌxoh, puyĩy yãykix kakihnãg Topa kaꞌok xexka yõg hãptup ꞌihãꞌ.
\p
\v 15 “ꞌŨgꞌãpax: ꞌũgnũn putup, yã xupxet nũn putuk. ꞌÃpu ꞌãpa kaꞌok, nũy hãmpẽnãꞌ. ꞌÃpu ꞌãxax xix ꞌãyĩkãgnãg hã nũ tat mõꞌkaꞌok, nũy ꞌãxax top hok, nũy yãyhãphup hok. Xateꞌ mĩy, nũy ta ꞌãkuxa hittup.” Kaxĩy.
\v 16 Hãpxip ha ta yãmĩy te yãy tunũꞌxoh ꞌũxexka xop hãpxexka tuꞌ, yãꞌ xuxetꞌax ꞌAhmãget hãpxexkaꞌ, yã Yoneo yĩyꞌax te kaxĩy.
\p
\v 17 Ha taꞌ mõg pexkox yõg nũꞌkutnãꞌax nõy, yãꞌ 7, tu yõg ꞌãmuk xakꞌax kopaꞌ pux pexkox yokoma tuꞌ. Ha ta Topa pet xexka kopaꞌ xip yãnmũnxupepꞌax, tu:
\p —‍Puxix. ꞌŨkux. Kaxĩy.
\p
\v 18 Ha yãnãm kõꞌãynãg, ha hãmnãhũn, ha tex tĩnnãhãꞌ, ha hãm xexka yãy nuhuk xexkaꞌ, tu yãy pot. Yã hãm yãy nuhuk xexka nãm. Hõmã Topa teꞌ mĩy tihik hãmãxap xix hõnhã hãm yãy nuhuk kutõgnãg, pa nõmhã hãm yãy nuhuk xexka nãm.
\v 19 Ha ta kõmẽn yãy koxip tikoyuk. Ha ta koxyõy hãpxexka xohix yõg kõmẽn xohix. Ha Topa te kõmẽn Maminõn xexka peꞌpaxex, tuꞌ gãy xexkaꞌ, tu yõg tikmũꞌũn xũygãhãꞌ.
\v 20 Ha taꞌ nõg hãptox xohix kõnãg yõg xix yĩktix xohix.
\v 21 Ha ta pexkox tuꞌ pip texxap xexkaꞌ, tu ta nũꞌnãhã texxap xexkaꞌ, yã yãp-xet nõ hãp-tux haꞌ 40 kit. ꞌŨnũꞌnãhãꞌ, tu nũktu tikmũꞌũn tu nũꞌnãhãꞌ, ha tikmũꞌũn te:
\p —‍ꞌŨkummuk xexka Topah. Kaxĩy.
\p Hãmũn, ꞌũxũy xexkaꞌ, yã hãpkummuk, yĩy Topa ꞌãktux kummuk.
\c 17
\s Xotit xexkaꞌ
\p
\v 1 ꞌŨkxip, paꞌ nũn pexkox yõg nũꞌkutnãꞌax, nõm xip ꞌũxape xop teꞌ 7 kopah, yã hõmã ꞌãmuk xakꞌax teꞌ 7 tat. ꞌŨnũn tu nũktu:
\p —‍Mã. ꞌÃte xa mũg putup ꞌũxũygãp-tup xotit xexkaꞌ, yã kõmẽn, yã kõnãg kox punethok pukaꞌ pip.
\v 2 Ha hãm xexka yõg xatꞌax xexka xohix xop te xotit xexka mũtik yãy kuteꞌex, tu hãpkummuk xexka mĩy nũmũtik, yãꞌ paptux putuk. Kaxĩy.
\p
\v 3 Ha Topa Koxuk tek mõgãhãꞌ, ha ta pexkox yõg nũꞌkutnãꞌax tek tat hãm nak tuꞌ, ha ꞌãteꞌ pẽnãhãꞌ, paꞌ xip ꞌũhũn, tu kãyã xexka ꞌãta yĩmũꞌ yũm, yã kãyã xexka ꞌãta yĩmũꞌ pip kaxꞌãmiꞌax kummuk punethok, yã xuxetꞌax kummuk kaxꞌãmi, yã kãyã xexka putox teꞌ 7, tup-tox kup teꞌ 10.
\v 4 Ha ꞌũn te topixxax ꞌãta tat, tuꞌ tat xapmax, xix yĩm hĩꞌax, xix yĩpkutok tatꞌax, xiꞌ yĩpkox xap, xix patakup hĩyꞌax, yãꞌ xohix te pipkup yãnãm ꞌãta yĩxux hãꞌ mĩy, xix mĩkaxxap te takat hãꞌ mĩy, xix kupxat xap hãꞌ mĩy. Tuteꞌ tat kãnẽy, yã pipkup yãnãm ꞌãta yĩxux hãꞌ mĩy, ha kopaꞌ pip hãpxop punethok yãyĩgãhnãg xiꞌ xut putux, yã ꞌũyõg hãpkummuk mĩyꞌax yõg hãpxop.
\v 5 Haꞌ kux tuꞌ pip ꞌũkaxꞌami ꞌũxuxetꞌax xaptopꞌax, hu: “Kõmẽn Maminõn Xexkaꞌ, yã xotit xop mũktut, xiꞌ kummuk xop mũktut hãm xexka yõg.” Kaxĩy.
\v 6 ꞌÃteꞌ pẽnãhãꞌ ꞌũn paptux, yã Topa kopa kuxa mãm xop hep ꞌãta xoꞌop. Ha Yeyox tuꞌ pip kaꞌok, yĩy taꞌ nõy teꞌ kix.
\p Ha ꞌãteꞌ pẽnãhãꞌ, yã ꞌũn kummuk. ꞌŨgkuxa teꞌ yẽy.
\v 7 Haꞌ nũn pexkox yõg nũꞌkutnãꞌax, tu ꞌãꞌ yĩykopit, hu:
\p —‍Xate xĩy tu ꞌãkuxa teꞌ yẽy? ꞌÃte xa hãmyũmmũgãp-tup. ꞌŨhũn xix kãyã xexkaꞌ, yã nõm te ꞌũn tat, yã nõm putox teꞌ 7 xix putox kup teꞌ 10.
\v 8 Xateꞌ pẽnãhã kãyã xexkaꞌ. Hõmã ꞌũhiꞌ, paꞌ xok. Tute hãpkox tox xexka kopaꞌ xupep putup, ha taꞌ nõy tep-tex putup. Ha taꞌ nũn putup tikmũꞌũn. Hõmã xipꞌah hãm xexkaꞌ, ꞌĩhã nõm tikmũꞌũn yõg ꞌãxetꞌax kaxꞌãmi ꞌohnãg ꞌũhiꞌax yõg tappet kopah, putu hi xeꞌe, haꞌ kux ꞌohnãg. Nõm nũn putup, tuꞌ pẽnãp-tup kãyã xexka xok, huꞌ yẽy. Hõmã ꞌũhiꞌ, tuk-nãy tuꞌ xok, pa hãpxip ꞌĩhã putpuꞌ xipꞌax.
\p
\v 9 —‍ꞌÃpu hãmyũmmũg. ꞌũp-tox teꞌ 7 te yĩktix teꞌ 7 putuk, ha ꞌũn te yĩktix teꞌ 7 yĩmũꞌ yũm. ꞌũp-tox teꞌ 7 te tikmũꞌũn yõg xatꞌax xexka teꞌ 7 putuk,
\v 10 tuꞌ xatꞌax xexka teꞌ 5 xakix, ha hõnhã yãp-xet ꞌũxexkaꞌ, tuꞌ tikmũꞌũn xat, haꞌ nõy xexka nũn putup, tu hãpxip ꞌĩhãꞌ xipꞌax.
\v 11 Ha ta kãyã xexkaꞌ, yã ꞌũxatꞌax xexka nõy, yãꞌ 8. Hõmãꞌ xip, pa hõnhãꞌ xip ꞌohnãg. Yãꞌ xip ꞌũxape xop teꞌ 7 kopah. ꞌŨnõy tep-tex putup.
\p
\v 12 —‍Ha xateꞌ pẽnãhã ꞌũp-tox kup teꞌ 10, nõm teꞌ xatꞌax xexka teꞌ 10 putuk, tu hãpxip nõm te tikmũꞌũn xat putup. Yã Topa teꞌ xat putup, ha nõm te tikmũꞌũn xat putup kãyã xexka mũtik hãpxip kutõgnãg hã,
\v 13 tup-tup hãpxop puxet. ꞌŨp-tup, nũy kãyã xexka xexkanãꞌ,
\v 14 tuꞌ yãykix putup Kahnẽn Kutok mũtik, pa Kahnẽn Kutok teꞌ xut putup, xix Kahnẽn Kutok te nõm xãnãꞌax xop teꞌ xut putup, yã yõg yĩmõgãtux xop, yã nõm te Kahnẽn Kutok tuꞌ pip kaꞌok. Hamũn teꞌ xut putup. Kahnẽn Kutok, yã xuxyã xop yõg xuxyãꞌ, xix xatꞌax xexka xop yõg xatꞌax xexkaꞌ. Kaxĩy.
\p
\v 15 Ha pexkox yõg nũꞌkutnãꞌax te ꞌã hãmꞌãktux ꞌũxeheh, hu:
\p —‍Pute ꞌũm kõnãg kox xohix xotit te nõm pukaꞌ yũm? Yã hãm xexka yõg xop xohix xexkaꞌ, yã tikmũꞌũn xop xohix, yãꞌ hep xop xohix, yãꞌ yĩyꞌax xop xohix.
\v 16 Xateꞌ pẽnãhã ꞌũp-tox kup teꞌ 10 xix kãyã xexka pẽnãhãꞌ. Nõm te xotit putup nõg putup. Nõm teꞌ pop putup ꞌũyõg hãpxop xohix, haꞌ xax topꞌax, tu xotit yĩn mãp-tup, tu kuxap hãꞌ koxyõy putup.
\v 17 Hamũn, Topa teꞌ xat, ha tikmũꞌũn te kãyã xexka ꞌãta yõg xatꞌax mĩy, yã tikmũꞌũn tep-tup, yã Topa teꞌ xat.
\p
\v 18 —‍Xateꞌ pẽnãhã, yãꞌ xip ꞌũhũn. Yã ꞌũn te kõmẽn putuk, ha kõmẽn kopaꞌ pip tihik, tu nõm te hãm xexka yõg xatꞌax xexka xop xat putup. Kaxĩy.
\c 18
\s ꞌŨkoxyõy kõmẽn Maminõn
\p
\v 1 Hãpxip ꞌĩhã ꞌãteꞌ pẽnãhãꞌ, paꞌ xip pexkox yõg nũꞌkutnãꞌax nõy, tu pexkox kopaꞌ xupep, tu ta yĩxohoh, yãꞌ xexkaꞌ, tuꞌ xat punethok, ha hãm xexka yõg tikmũꞌũn xohix teꞌ pẽnãhãꞌ, yãꞌ max xeꞌẽgnãg,
\v 2 tu hãmꞌãktux kaꞌok, hu:
\p —‍ꞌŨnõg, yã kõmẽn Maminõn xexka ꞌũnõg. Hõnhã yã yãmĩy pet xix yãmĩy yãyꞌĩgãnãg pet, xix putux kummuk yãyꞌĩgãnãg pet.
\v 3 Hõmã tute tikmũꞌũn mõgãhãꞌ, puyĩy hãpkummuk xut putux mĩy, ha hãm xexka yõg xatꞌax xexka xop teꞌ nõm nũmũtik, ha tikmũꞌũn te yãy hãm texop xexkaꞌ, tuꞌ nõmenex kõmẽn Maminõn xexka yõg hãpxop xohix. Kaxĩy.
\p
\v 4 ꞌÃteꞌ xupak, paꞌ xip yãnmũn xupepꞌax pexkox tu, tu hãmꞌãktux hu:
\q —‍Yõgnũ tikmũꞌũn, mã, ꞌãpu kõmẽn nĩm! Mõg!
\q ꞌÃpu hãpkummuk mĩy hok nũmũtik,
\q nũy ꞌãxũy hok nũmũtik.
\q
\v 5 Yã ꞌũyõg hãpkummuk mĩyꞌax punethok, tuꞌ xexka te yĩktix putuk,
\q tu yĩktix xanep te pexkox xuhmĩy,
\q ha Topa te yõg hãpkummuk mĩyꞌax ꞌãtigãhãꞌ.
\q
\v 6 Kõmẽn yõg xop te ꞌãxop kuteꞌex kummuk. ꞌÃpuꞌ yãnãn.
\q ꞌÃpuꞌ yãnãn tix.
\q Kõmẽn yõg xop te ꞌãxop xũygãhãꞌ. ꞌÃpuꞌ yãnãn, nũy nõm xũygã tix.
\q
\v 7 Kõmẽn yõg xop te yãy xexka mĩy, tu yãy putexop xexka mĩy. ꞌÃpu nõm xũygã xexkaꞌ, yãꞌ kummugã xexkaꞌ.
\q Hamũn, kõmẽn yõg xop te yãy mũtik hãmꞌãktux, hu:
\q “ꞌŨgmũg, yãg kaꞌok, yãꞌ xohix xat.
\q ꞌAp hok yũmꞌah ꞌũgmũn.
\q ꞌA ꞌãte hãpkummuk pẽnãp-tupꞌah!” Kaxĩy.
\q
\v 8 Pa ꞌãmhok. Tute hãpkummuk mĩy, yĩy taꞌ nũn mõkaꞌok hãpkummuk ꞌãmnĩy puxet ꞌĩhã. Yãꞌ xakip-tup, tuꞌ kuxa hittup ꞌohnãg putup, tu putup teꞌ kix putup,
\q ha kuxap teꞌ koxyõy putup.
\q Yãꞌ kaꞌok Topa xexkaꞌ, tuꞌ nõy yõg hãpkummuk mĩyꞌax yãnãn.
\q Kaxĩy.
\p
\v 9 Ha hãm xexka yõg xexka xop te hãpkummuk mĩy nũmũtik, ha kõmẽn mõꞌhap, ha kugõy te pepiꞌ mõg, ha xatꞌax xexka xop teꞌ pẽnãp-tup, tuꞌ potap-tup, tuꞌ kuxa hittup ꞌohnãg putup,
\v 10 tuꞌ xũy yĩpkutuk, tuꞌ pip hãptox tuꞌ, tu hãmꞌãktux, hu:
\p —‍Tu texĩy, tuꞌ kummuk? Kõmẽn Maminõn yãꞌ xexkaꞌ, tuꞌ kaꞌok, pa ꞌot puxet nõg ꞌĩhãꞌ kux. Yã Topa te ꞌõg hãpkummuk mĩyꞌax yãnãn.
\p
\v 11 Ha hãm xexka yõg nõmenex xop te kõmẽn hã potahaꞌ, tuꞌ kuxa hittup ꞌohnãg. Yã tikmũꞌũn te yõg hãpxop hãmenex kux.
\v 12 Yã nõmenex ꞌohnãg ꞌũyõg hãpxop, yã pipkup yãnãm ꞌãta yĩxux hãꞌ nõꞌõm, xix pipkup ponnok hãꞌ nõꞌõm, xix mĩkaxxap te takat, xix kupxat xap, xix topixxax te nĩn hãꞌ mĩy, xix topixxax yĩxux mũnnĩy, xix topixxax te xet hãꞌ mĩy, xix topixxax ꞌãtaꞌ, xix hãpxop mãynãg mĩm max hãꞌ mĩy, xix hãpxop xohix xoktox xox hãꞌ mĩy, xix mĩm te takat hãꞌ mĩy, xix pipkup monõn hãꞌ mĩy, xix pipkup hãꞌ mĩy, xix mĩkaxxap mãm hãꞌ mĩy,
\v 13 xix mĩpxax kõnnõn kãnẽn hãꞌ mĩy, xix tẽpet xuxpex, xix kõnnõn mõꞌhap haꞌ hax max, xix mĩhaꞌ haxnãg max, xix hep haxnãg max, xix xupyãg, xiꞌ top hep ꞌayet, xix xuxnãg max kõnnõn, xix xuxnãg xe tox, xix mũnũytut, xix kahnẽn, xix kãmãnok, xix hãpxop yĩkũyꞌax, xix tikmũꞌũn kãmãnat xop, xix tikmũꞌũn kuxaꞌ. Yã hãpxop xohix hãmenex kux.
\v 14 Ha nõmenex xop te kõmẽn ꞌãktux, hu:
\p —‍Kõmẽn yõg tikmũꞌũn tep-tup hãpxop max xohix, pa hõnhãꞌ nõg. ꞌŨp-te xop xexka tuꞌ kux. Hõmã kõmẽn max te yãy putuk, paꞌ nõg, tu xep xip putupꞌah. Kaxĩy.
\p
\v 15 Ha nõmenex xop te nõmenex punethok kõmẽn kopah, tu hõnhãꞌ xũy yĩpkutuk, tuꞌ pip hãptox tuꞌ, tu potap-tup, tuꞌ kuxa hittup ꞌohnãg.
\p
\v 16 Tu:
\p —‍Tu texĩy tuꞌ kummuk kõmẽn xexkaꞌ. Hõmã kõmẽn yõg tikmũꞌũn te topixxax max tat, yã nĩn hãꞌ mĩy, yã topixxax ꞌãtaꞌ, xix topixxax yĩxux mũnnĩy, xix kahnẽn xe hãꞌ mĩy topixxax ꞌãtaꞌ, tu xapmax tahaꞌ, xiꞌ yĩm hĩyꞌax, xiꞌ yĩpkutok tatꞌax, xiꞌ yĩpkox xap, yã pipkup yãnãm ꞌãta yĩxux hãꞌ mĩy, xix mĩkaxxap te takat hãꞌ mĩy, xix kupxat xap hãꞌ mĩy.
\v 17 Pa ꞌot puxet nõg, ꞌĩhã yõg hãpxop xohix xexka xaxok. Kaxĩy.
\p Ha ta mĩpkox mõgãꞌax xexka xop teꞌ pẽnãp-tup hãptox tuꞌ, xix nõm te mĩpkox hãꞌ mõg xop, xix mĩpkox mõgãꞌax xop, xix nõm te mĩpkox hã tayũmak pop,
\v 18 Yãꞌ xohix te hãmꞌãktux kaꞌok putup, hu:
\p —‍Hãmyãxatamuk xohix xexka hãꞌ xip ꞌohnãg kõmẽn nõy te nõm putuk. Kaxĩy.
\p
\v 19 Tu yãy putox yĩmũ hãpkõnnõn mõꞌpok, yãꞌ kuxa hittup ꞌohnãg, tuꞌ potahaꞌ, tuꞌ kuxa xũy, tu:
\p —‍Tu texĩy tuꞌ kummuk? Yãꞌ kummuk kõmẽn puꞌ. Hõmã mĩpkox yõg tikmũꞌũn xohix mõg kõmẽn tuꞌ, tu yãyhãp-texop xexkaꞌ. Pa ꞌot puxet nõg ꞌĩhã kõmẽn yõg tikmũꞌũn te hãpxop xohix xexka xaxok. Kaxĩy.
\p
\v 20 Ha ta pexkox kopaꞌ pip xop te:
\p —‍ꞌÃpu kõmẽn koxyõyꞌax hã ꞌãkuxa hittup. Yeyox kopa kuxa mãm xop, ꞌãpu ꞌãkuxa hittup, xix Yeyox yõg mõꞌpok xop, xix Topa pupi hãmꞌãktux xop. Hamũn, Topa te kõmẽn yõg tikmũꞌũn yõg hãpxopmãꞌax kummuk yãnãn. Kaxĩy.
\p
\v 21 Ha taꞌ xip pexkox yõg nũꞌkutnãꞌax, tu mĩkaxxap xexka pahaꞌ, yãꞌ xexkaꞌ, te mĩkaxxap kõnnõnãꞌax putuk. Tuteꞌ pahaꞌ, tu nũꞌyõn kõnãg xexka tuꞌ, tu hãmꞌãktux, hu:
\p —‍Kaxĩy kõmẽn Maminõn xexka nũꞌyõn putup, yã nũꞌyõn mõꞌkaꞌok putup, ha tikmũꞌũn teꞌ xe pẽnãp-tupꞌah.
\v 22 Tikmũꞌũn te xe ꞌap kaxyãꞌax xupak putupꞌah kõmẽn kopah, xix kaxyãꞌax xop, xix panao kaxyãꞌax, xix tonõmet kaxyãꞌax, yã xeꞌ xohix xupak putupꞌah. Tikmũꞌũn te ꞌaꞌ xupak putupꞌah kãmãnat hãm, xix mĩkaxxap kõnnõnãꞌax ꞌãpak putupꞌah ꞌũxeheh,
\v 23 tu xe pẽnãp-tupꞌah kuyãnãm tatꞌax xix yõg kuyãnãm kõmẽn kopah. Tikmũꞌũn te xeꞌ xupak putupꞌah yãyta xop yõg hãmꞌãktux kõmẽn kopah. Hõmã kõmẽn yõg nõmenex xop ꞌũkaꞌok xexkaꞌ, pa hãpxexka nõy yõg nõmenex xop kaꞌok kutõgnãg. Hõmã kõmẽn yõg tikmũꞌũn teꞌ koit pax. Kaxĩy.
\p
\v 24 Hõmã kõmẽn Maminõn yõg tikmũꞌũn teꞌ kix Topa pupi hãmꞌãktux xop xix Yeyox kopa kuxa mãm xop kõmẽn kopah, tuꞌ kixgãhãꞌ ꞌũxohix hãpxexka xohix tuꞌ. Hã kaxĩy Topa te yõg hãpkummuk mĩyꞌax yãnãn.
\c 19
\p
\v 1 Hãpxip ꞌĩhã ꞌãteꞌ xupak, paꞌ xip yãnmũn xupepꞌax xexka pexkox tuꞌ, yã tikmũꞌũn xohix yõg hãmꞌãktux putuk. Tu hãmꞌãktux, hu:
\p —‍ꞌŨmax Topah. Topa te tikmũꞌũn mõy hãpkummuk kopah. Topa ꞌũmax xeꞌẽgnãg, tuꞌ kaꞌok xexkaꞌ.
\v 2 Yãꞌ xeꞌe, tuꞌ yok Topah, hu tikmũꞌũn yõg hãpkummuk mĩyꞌax yãnãn. Tute xotit xexka yõg hãpkummuk mĩyꞌax yãnãn. Xotit xexka te hãm xexka yõg tikmũꞌũn xohix mõgãhãꞌ, puyĩy hãpkummuk mĩy nũmũtik. Tuteꞌ kix Topa yõg kãmãnat, yĩy Topa te nõm xũygãhãꞌ. Kaxĩy.
\p
\v 3 Tu xe hãmꞌãktux kaꞌok, hu:
\p —‍ꞌŨmax Topah. Kõmẽn xexka mõꞌxut, ha kugõy te pepiꞌ mõg putup hãmyãxatamuk xohix kux ꞌohnãg hãꞌ. Kaxĩy.
\p
\v 4 Ha taꞌ pip tik xexka teꞌ 24, xix yõnnãꞌĩ teꞌ 4, tu Topa pu nũktettex, tu Topa ꞌãktux max, ha Topa yũm mĩmpe yũmꞌax xeꞌẽgnãg yĩmũꞌ. ꞌŨxohix te:
\p —‍Hamũn. ꞌũmax Topah. Kaxĩy.
\s Kahnẽn Kutok yõg yãyta yõg ꞌãmuk xexkaꞌ
\p
\v 5 Ha taꞌ xip ꞌũyãnmũnxupepꞌax ꞌũxexka yõg mĩmpe yũmꞌax xeꞌẽgnãg tuꞌ, tu:
\p —‍Topa yõg kãmãnat xop, ꞌãpu yũmũ yõg Topa ꞌãktux max. Tihik, yãꞌ xexka xik-tõgnãg, ꞌãpu yũmũ yõg Topa ꞌãktux max. Topa yĩpkutuk xop, ꞌãpu yũmũ yõg Topa ꞌãktux max. Kaxĩy.
\p
\v 6 Ha ꞌãteꞌ xupak, paꞌ xip hãmnũhũn, yã tikmũꞌũn xohix yõg hãmꞌãktux putuk, pe xamoka xexka yõg hãmnũhũn putuk, pe tex tĩnnãꞌax putuk. ꞌÃteꞌ xupak, ha nõm te:
\p —‍ꞌŨmax Topah. Yũmũ yõg Topa te hãpxop xohix xexka mĩy yũmmũg. Hamũn, ꞌũxexkaꞌ.
\v 7 ꞌÃpu yũmũ hittup, tu yũmũg kuxa hittup. ꞌÃpu yũmũ Topa ꞌũxexka ꞌãktux. Hamũn, hãpxip kutõgnãg ꞌĩhã yãytap-tup Kahnẽn Kutok hah, ha ꞌũn te yãytap-tup te yãy maxnãhã, nũy yãytax,
\v 8 tuꞌ pop topixxax tup, yã nĩn hãꞌ mĩy, yãꞌ xunnuk ꞌũyõg topixxax. Kaxĩy.
\p Hamũn, nõm topixxax nĩn te Topa kopa kuxa mãm xop yõg hãpxopmãꞌax max putuk.
\p
\v 9 Ha pexkox yõg nũꞌkutnãꞌax te ꞌã hãmꞌãktux, hu:
\p —‍ꞌÃpu kaxꞌãmi, hu: “ꞌŨkuxa hittup nõꞌõm. Yã Topa te nõm xãnãhãꞌ, pu nũꞌ Kahnẽn Kutok yõg yãyta yõg ꞌãmuk xexka hah.” Kaxĩy.
\p Tu xe:
\p —‍Topa te hãmꞌãktux xeꞌeꞌ. Kaxĩy.
\p
\v 10 Ha ꞌãte pexkox yõg nũꞌkutnãꞌax pu nũꞌxup, pa tute:
\p —‍ꞌÃmhok. Kaxĩy hok. ꞌÃte Topa pu hãpxopmã max yã ꞌãmũn putuk xix ꞌãxape putuk, yã Yeyox yõg hãmꞌãpak xeꞌe ꞌãpak xop putuk. ꞌÃpu Topa pu nũꞌãxup. Kaxĩy.
\p Yã Topa pupi hãmꞌãktux xop te Yeyox yõg hãmꞌãpak xeꞌe ꞌãktux.
\s ꞌÕm te kãmꞌãnok ponnok yĩmũꞌ yũm
\p
\v 11 ꞌÃteꞌ pẽnãhãꞌ, ha pexkox xõn, paꞌ xip kãmãnok ponnok, ha nõm teꞌ yĩmũꞌ yũm ꞌũxuxetꞌax Nõm Teꞌ Nõy Tuꞌ Xip Kaꞌok xix Nõm Xeꞌeꞌ. Tute ꞌũxohix yõg hãpkummuk mĩyꞌax kopit, yãꞌ yok, tuꞌ nõy mũtik yãykix.
\v 12 ꞌŨpa te kuxap putuk, tuꞌ tat ꞌũxatꞌax xexka yõg kuxxax punethok, tu ꞌũxuxetꞌax kaxꞌãmi tat, paꞌ xohix teꞌ xuxetꞌax yũmmũg ꞌohnãg, pa nõm puxet teꞌ yũmmũg yãy yõg xuxetꞌax.
\v 13 ꞌŨtat topixxax tox, yãꞌ patok ꞌũhep ꞌãta hã. ꞌŨxuxetꞌax “Topa yõg Hãmꞌãktux.” Kaxĩy.
\v 14 Ha pexkox yõg xonat xop teꞌ peꞌ mõg, tu kãmãnok ponnok yĩmũꞌ mãm kamah, tu taꞌ mõg, tu topixxax nĩn ponnok tup tat,
\v 15 ha mĩkaxxexka xox max xip ꞌũyĩkox kopah, tuꞌ xupep. Tute mĩkax xexka hãꞌ xut putup, ha ta hãm xexka yõg xop xohix teꞌ xut putupꞌah. Tute hãm xexka yõg xop xohix xat putup pipkup xexka tox hã. Tuteꞌ koxyõy putup, yã mĩnta ꞌop hep xutꞌax putuk. Yãꞌ gãy Topah. Topa te hãpxop xohix xexka mĩy yũmmũg.
\v 16 Nõm te kãmãnok yĩmũꞌ yũm, tu topixxax tuꞌ kaxꞌãmi, hu: “ꞌŨxatꞌax xexka yõg xatꞌax xexka xix xuxyã xop yõg xuxyãꞌ”. Kaxĩy. Tuꞌ paxix yĩmũ nõm kaxꞌãmi kamah.
\p
\v 17 Ha ꞌãteꞌ pẽnãhã, paꞌ xip pexkox yõg nũꞌkutnãꞌax mãyõn yãnãm tuꞌ, tuꞌ xãnã kaꞌok putux xohix xop nõm topahaꞌ. ꞌŨxãnãhã, hu:
\p —‍Mã, Topa yõg ꞌãmuk ha nũꞌ.
\v 18 Mã, nũy ꞌũxatꞌax xexka yĩn mãꞌ, xix xonat yõg xatꞌax xop yĩn, xix xonat yĩn, xix kãmãnok yĩn, xix kãmãnok yĩmũꞌ mãm xop yĩn, xix tik xohix yĩn, yã kãmãnat xop yĩn, xix xuxyã xop yĩn, xiꞌ xexka xik-tognãg xop yĩn. Kaxĩy.
\p
\v 19 Ha ꞌãteꞌ pẽnãhã, paꞌ xip kãyã xexka ꞌãta, xix hãm xexka yõg xatꞌax xexka xop pip xix yõg xonat xop. ꞌŨxohix tu yãy tu nũꞌnãhãꞌ, nũy yãykix nũmũtik, yã nõm te kãmãnok yĩmũꞌ yũm mũtik xix yõg xonat xop mũtik.
\v 20 Ha kãyã xexka ꞌãta teꞌ xut ꞌohnãg, haꞌ nõy teꞌ mũg, tuꞌ hĩy, tu Topa pupi hãmꞌãktux mõꞌãmũꞌax mũg, tuꞌ hĩy. Yã hõmã Topa pupi hãmꞌãktux mõꞌãmũꞌax xop te hãpxopmã kaꞌok xeꞌẽgnãg kãyã xexka ꞌãta puꞌ. Tute hãpxopmã kaꞌok xeꞌẽgnãg, paꞌ koit, yĩy taꞌ peꞌ mõg tikmũꞌũn, yã tikmũꞌũn tuꞌ xip kãyã xexka ꞌãta yõg kaxꞌãmiꞌax, tu kãyã xexka ꞌãta yõg topa komut pu nũktettex.
\p Ta mõ kãyã xexka ꞌãta yõn kuxap ꞌũxop yõg kopah, yãꞌ hiꞌ, xix Topa pupi hãmꞌãktux mõꞌãmãꞌax xop kamah. Yã kuxap te kõnãg xexka putuk.
\v 21 Ha ta nõm te kãmãnok yĩmũꞌ yũm yõg mĩkax xexka teꞌ yĩkox kopaꞌ xupep, tuꞌ xuhmĩy xonat xop, tuꞌ kix, haꞌ xakix, ha ta putux yãyꞌĩgã xop nũn, tu nũktu xonat xop yĩn mãhãꞌ, tuꞌ hix kaꞌok.
\c 20
\s Hãmãxatamuk teꞌ 1.000
\p
\v 1 ꞌÃteꞌ pẽnãhã, paꞌ xip pexkox yõg nũꞌkutnãꞌax, tu pexkox kopaꞌ xupep, tu ta yĩxohoh, tuꞌ yĩm kopaꞌ tat hãpkox tox xexka yõg pipkup hãmyĩnnĩnꞌax xix pipkup mãgxap tat,
\v 2 tu xok xexka ꞌãta pahaꞌ. ꞌŨꞌũm xok xexka ꞌãta? Yã nõm kãyã hittap, yã Hãmgãyãgnãg, yã Niap, yã Xatanãy. Pexkox yõg mõkutnãꞌax te nõm hĩy hãmyãxatamuk xohix teꞌ 1.000 hã,
\v 3 Yãꞌ putxok hãpkox tox xexka kopah, tu mõꞌyĩnnĩn, tuꞌ kĩy, puyĩy hãpxexka yõg tikmũꞌũn xe mõgã hok, puyĩy tikmũꞌũn hãpkummuk mĩy hok, ha mõktuꞌ nõg putup hãmyãxatamuk xohix teꞌ 1.000, hak-nãy tu Hãmgãyãgnãg xut, pu mõg hãpxip kutõgnãg hã.
\p
\v 4 Ha ꞌãteꞌ pẽnãhãꞌ, paꞌ pip nõm xop teꞌ xexka xop yõg mĩmpe mãmꞌax yĩmũꞌ mãm. Topa teꞌ xat, ha nõm te tikmũꞌũn yõg hãpxopmãꞌax kopit. Ha ꞌãteꞌ pẽnãhãꞌ, paꞌ pip tikmũꞌũn yãmĩy. Hõmã nõm tikmũꞌũn te Topa yõg hãmꞌãktux kopa kuxa mãm, tu hõnhã Yeyox yũmmũg, tu taꞌ mõg, nũy Yeyox yõg hãmꞌãpak max ꞌãktux, yĩy ta tikmũꞌũn teꞌ kix, haꞌ xakix. Nõm te kãyã xexka pu nũktettex ꞌohnãg, xix yõg topa komut pu nũktettex ꞌohnãg, tuꞌ pop ꞌohnãg kãyã xexka yõg kaxꞌãmiꞌax yãy kux tuꞌ, peꞌ yĩm tuꞌ. Pa hõnhã hiꞌ, tu yãyhã xexka xop Kunnix mũtik hãmyãxatamuk xohix te 1.000 hã.
\v 5 Hamũn, ꞌũputpuꞌ hi hãmãxap, pa xakix xop nõy te putpuꞌ hi ꞌohnãg, ha mõktuꞌ nõg hãmyãxatamuk teꞌ 1.000.
\v 6 Yãꞌ kuxa hittup nõm te putpuꞌ hi hãmãxap. Yã xe xakix putupꞌah, paꞌ nõy xe xakix putup, tuꞌ pip putup Topa yõg hãptox tuꞌ, yã xakix tik putuk. Paꞌ nõy xe xakix putupꞌah. Nõm te Topa yõg ꞌãmãnex xop putuk xix Kunnix yõg, tuꞌ xohiꞌ xat putup Kunnix mũtik hãmyãxatamuk xohix teꞌ 1.000 hã.
\s Hãmgãyãgnãg nuꞌxok
\p
\v 7 Hãmyãxatamuk te 1.000 nõg putup, ha ta ꞌõm te Hãmgãyãgnãg xut putup ꞌũyõg kanet kaꞌok kopah.
\v 8 Ha taꞌ mõg putup, nũy koit, nũy mõgã hãpxexka xohix yõg tikmũꞌũn hãpxexka xohix tuꞌ, yã Gogeꞌ xix Mãgogeꞌ. Ha Hãmgãyãgnãg te nõm yãy tu nũꞌxoh, puyĩy yãykix, yã tikmũꞌũn xohix, yã xohix te ꞌãmot xap xohix putuk hãpkux yõg.
\p
\v 9 Yãꞌ xohix te hãm panip tuꞌ pip, tu taꞌ nũn putup, tu nũktu Topa kopa kuxa mãm xop xakot, xix Topa yõg kõmẽn xakot, yã Topa te nõm putup pax. Pa hãpxip ꞌĩhã kuxap te pexkox kopaꞌ xupep, tu nũktuꞌ nãhãꞌ, tu nũktu nõm tikmũꞌũn koxyõy.
\v 10 Yã Hãmgãyãgnãg te tikmũꞌũn puꞌ koit. Haꞌ nõy teꞌ mũg Hãmgãyãgnãg, tu nũꞌxok kuxap kopah, yã mĩkaxxap ꞌũxop yõg kuxap kopah. Yã kuxap te kõnãg xexka putuk, haꞌ pip kama kãyã xexka xix Topa pupi hãmꞌãktux mõꞌãmãꞌax. Yãꞌ xohix xũy hãptup ꞌĩhã xix ꞌãmnĩy ꞌĩhã hãmyãxatamuk xohix kux ꞌohnãg hã.
\s Tikmũꞌũn yõg hãpxopmãꞌax kopit
\p
\v 11 Ha ꞌãteꞌ pẽnãhãꞌ, paꞌ xip ꞌũxatꞌax xexka yõg mĩmpe yũmꞌax xeꞌẽgnãg xexka ponnok, ha ꞌõm te yĩmũꞌ yũm. Ha nõm keppa ꞌũnõg hãm xexka xix pexkox yokomaꞌ. Yã ꞌap pipꞌah.
\v 12 ꞌÃteꞌ pẽnãhãꞌ, paꞌ pip xakix xop, yãꞌ xexka xik-tõgnãg xop, haꞌ xatꞌax xexka yõg mĩmpe yũmꞌax xeꞌẽgnãg keppak-nĩhãꞌ pip, haꞌ xõn tappet, tuꞌ nõy xõn. Yã hiꞌax xop yõg tappet yã hiꞌax xop ꞌãxetꞌax pip tappet tuꞌ, huꞌ hi mõkumaꞌmõg, haꞌ kux ꞌohnãg. Yã Topa yĩkak pip putup. Ha tikmũꞌũn hãpxopmãꞌax yõg kaxꞌãmiꞌax pip tappet tuꞌ. Ha ꞌõm teꞌ mõkupix, nũy tikmũꞌũn yõg hãpxopmãꞌax kopit.
\v 13 Ha taꞌ putpuꞌ hiꞌ xakix xop, nõm xakix kõnãg kopah. Ha putpuꞌ hi xakix xop, yã nõm pip xukpot tuꞌ, tuꞌ xohix nũn, haꞌ nõy te yõg hãpxopmãꞌax kopit.
\v 14 Haꞌ putxok kuxap kopa hãpxakixꞌax xix xakix xop. Yã kuxap te kõnãg xexka putuk. Kuxap xexka yã xakixꞌax tix.
\v 15 Tikmũꞌũn yõg xuxetꞌax kaxꞌãmi ꞌohnãg ꞌũhi xop yõg tappet tuꞌ, puxix nõy nõm nũꞌxok kuxap kopah, nõm te kõnãg xexka putuk.
\c 21
\p
\v 1 ꞌÃteꞌ pẽnãhãꞌ, paꞌ xip pexkox yokomaꞌ nõy tup xix hãm xexka nõy tup. Hamũn, ꞌũnõg pexkox yokoma mãxap xix hãm xexka mãxap.
\v 2 ꞌÃteꞌ pẽnãhãꞌ, paꞌ xip kõmẽn xeꞌẽgnãg, yã kõmẽn Yenoyanẽn nõy tup, tu pexkox kopaꞌ xupep, tu ta yĩxohoh. Yãꞌ max yãy putuk. Yã ꞌũn te yãytap-tup putuk, tuꞌ xax max tat, tuꞌ mõg, nũy yãy yĩpxox mũy.
\v 3 ꞌÃteꞌ xupak, paꞌ xip yãnmũn xupepꞌax ꞌũxatꞌax xexka yõg mĩmpe yũmꞌax xeꞌẽgnãg tuꞌ, tu hãmꞌãktux, hu:
\p —‍Hõnhã Topa te yãy kotĩnnãhã tikmũꞌũn mũtik. Tute yãykotĩnnãp-tup nũmũtik. Yã yõg tikmũꞌũn. Topa xip putup nũmũtik, yã tikmũꞌũn yõg Topah.
\v 4 Topa te tikmũꞌũn pa hep kutux putup. ꞌA xep xakix putupꞌah, tu xeꞌ kuxa hittup ꞌohnãg putupꞌah, tu xeꞌ xũy putupꞌah. Yãꞌ nõg hãpxop hittap. Kaxĩy.
\p
\v 5 Ta nõm teꞌ xatꞌax xexka yõg mĩmpe yũmꞌax xeꞌẽgnãg yĩmũꞌ yũm, tu:
\p —‍Nõmhã ꞌãte hãpxop xohix tup mĩy putup. Kaxĩy.
\p Tu xe ꞌã hãmꞌãktux, hu:
\p —‍ꞌÃpu nõm kaxꞌãmiꞌ yã hãmꞌãktux xeꞌeꞌ. ꞌŨmax, pu tikmũꞌũn kuxa mãm hãmꞌãktux kopah. Kaxĩy.
\p
\v 6 Tu xe:
\p —‍Puxix. ꞌŨkux. ꞌŨgmũn yã mãxap xix kaꞌax, yã ꞌAppa xix ꞌÕm. ꞌOk kõnãg putup te ꞌãp-tex? ꞌÃte xa hok hõm putup kõnãꞌãg, yã kõnãg xupepꞌax yõg, ha nõm te ꞌãxop hĩnnãp-tup.
\v 7 ꞌÃte ꞌã tuꞌ pip kaꞌok xop pu nõm hõm, hak mũn yã ꞌũyõg Topah, yã ꞌũk-tok xop nõꞌõm.
\v 8 Paꞌ pip ꞌũkuxanõg xop, xiꞌ kuxa mãm ꞌohnãg xop, xix yãyꞌĩgã xop, xix nõm teꞌ nõy kix xop, xiꞌ nõy hã xupxet xop, xix mĩm mĩy xop, xix topa komut pu nũktettex xop, xiꞌ koit xop. Yãꞌ xohix yõg pipꞌax pip, yã mĩkaxxap ꞌũxop yõg kuxap kopah, yã kõnãg xexka putuk, yã xakixꞌax tix. Kaxĩy.
\s Kõmen Yenoyanẽn tup
\p
\v 9 Ha taꞌ xip pexkox yõg nũꞌkutnãꞌax, nõm teꞌ xape teꞌ 7 xop kopaꞌ xip. Hõmã nõm xop te ꞌãmuk xakꞌax teꞌ 7 tat, ha nõm kopaꞌ pip hãpxũygãꞌax teꞌ 7. Yã nõm pexkox yõg nũꞌkutnãꞌax ꞌũkhaꞌ nũn, tu nũktu:
\p —‍Mã, ꞌãte xa mũg putup ꞌũn te yãytap-tup, yã Kahnẽn xetut. Kaxĩy.
\p
\v 10 Ha Topa Koxuk tek xat, tuk mõgãhã yĩktix xox putox tuꞌ, tu ꞌã mũg Yenoyanẽn, yã kõmẽn xeꞌẽgnãg, ha pexkox kopaꞌ xupep, xix Topa yĩkaꞌ xupep, tu taꞌ yĩxohoh.
\v 11 ꞌŨyõg kuyãnãm yã Topa yõg hãmmax xeꞌẽgnãgꞌax. Kõmẽn te kuyãnãm mĩy, yã mĩkaxxap te takat putuk, yã mĩkaxxap yax putuk, xix ꞌũtup te mĩkaxxap kinixat putuk.
\v 12 Kõmẽn yõg hãmpakꞌax tox xexkaꞌ, ha yõg hãmpakꞌax yõg hãmyĩnnĩnꞌax xohix teꞌ 12, ha pexkox yõg nũꞌpok teꞌ 12 te nõm pẽnãhãꞌ. Haꞌ pip ꞌũkaxꞌãmiꞌax hãmyĩnnĩnꞌax tuꞌ, yã ꞌIyaet xop yõg hep xop teꞌ 12 yõg xuxetꞌax.
\v 13 Haꞌ patpe tuꞌ pip hãmyĩnnĩnꞌax teꞌ tikoyuk, yã patpe xohix te kãxĩy, yã mãyõn xupep tuꞌ tikoyuk, ha xot tuꞌ tikoyuk, ha nõntix tuꞌ tikoyuk, ha mãyõn mõꞌnãꞌax tu tikoyuk.
\v 14 Ha kõmẽn yõg hãmpakꞌax xip mĩkaxxap teꞌ 12 yĩmũꞌ. Mĩkaxxap teꞌ 12 tuꞌ pip kaxꞌãmixꞌa, yã Kahnẽn Kutok yõg mõꞌpok teꞌ 12 ꞌãxetꞌax kaxꞌãmiꞌ.
\p
\v 15 Ha pexkox yõg nũꞌkutnãꞌax te hãmꞌãktux ꞌũgmũtik, tuꞌ tat mõhãmmũgꞌax, nũy kõmẽn yõg mẽn mõkupix, xix hãmyĩnnĩnꞌax yõg mẽn, xix hãmpakꞌax yõg mẽn.
\v 16 Kõmẽn yõg hãmpakꞌax yõg patpe teꞌ 4. Patpe xohix yõg mẽn te yãy putuk. Pexkox yõg nũꞌkutnãꞌax te kõmẽn yõg mẽn mõkupix, ꞌũtox te 2.200 kinõm, xix patpe xix patpe nõy yõg 2.200 kinõm kamah. Ha kõmẽn tox pepix yõg kinõm teꞌ 2.200 kamah, yãꞌ yãy putuk.
\v 17 Pexkox yõg nũꞌkutnãꞌax te hãmpakꞌax yõg patpe tix yõg mẽn mõkupix, yãꞌ xohix teꞌ 64, yã tikmũꞌũn yõg mẽn hãꞌ mõkupix pexkox yõg nũꞌkutnãꞌax teꞌ.
\v 18 Kõmẽn yõg hãmpakꞌax te mĩkaxxap yax hãꞌ mĩy, ha ta kõmẽn te pipkup ꞌãta yĩxux hãꞌ mĩy, yã kuyãnãm mĩy tuꞌ tup, tu minino putuk.
\v 19 Kõmẽn yõg hãmpakꞌax yõg kupkũnĩy yĩmũꞌ pip mĩkaxxap te takat punethok. Yã ꞌũkupkũnĩy kakak yõg mĩkaxxap yax, xix ꞌũkupkũnĩy yĩmũꞌ xip tix yõg mĩkaxxap xapit, xix ꞌũkupkũnĩy yĩmũꞌ xip tikoyuk yõg mĩkaxxap ꞌak, xix ꞌũkupkũnĩy yĩmũꞌ xip 4 yõg mĩkaxxap ꞌexmẽnat,
\v 20 xix ꞌũkupkũnĩy yĩmũꞌ xip 5 yõg mĩkaxxap xanõn, xix ꞌũkupkũnĩy yĩmũꞌ xip 6 yõg mĩkaxxap xahnix, xix ꞌũkupkũnĩy yĩmũꞌ xip 7 yõg mĩkaxxap kiniyot, xix ꞌũkupkũnĩy yĩmũꞌ xip 8 yõg mĩkaxxap menit, xix ꞌũkupkũnĩy yĩmũꞌ xip 9 yõg mĩkaxxap topay, xix ꞌũkupkũnĩy yĩmũꞌ xip 10 yõg mĩkaxxap kiniyop, xix ꞌũkupkũnĩy yĩmũꞌ xip 11 yõg mĩkaxxap yaxĩn, xix ꞌũkupkũnĩy yĩmũꞌ xip 12 yõg mĩkaxxap ꞌãmãtix.
\v 21 Ha hãmyĩnnĩnꞌax teꞌ 12 te kupxat xap teꞌ 12 hãꞌ mĩy, yã yãpxet te kupxat xap puxet hãꞌ mĩy. Ha kõmẽn yõg putat te pipkup yãnãm ꞌãta yĩxux hãꞌ mĩy, yã yãnãm mĩy, tuꞌ tup, yã minino putuk.
\p
\v 22 Ha ꞌãteꞌ pẽnã ꞌohnãg Topa pet xexka kõmẽn kopah. ꞌAp xipꞌah. Yã Topa xip kõmẽn kopah xix Kahnẽn Kutok xip. Puxix. Topa ꞌũxexkaꞌ, tu hãpxop xohix xexka yũmmũg.
\v 23 Ha ꞌap xipꞌah mãyõn, xix mãyõn hex, yã ꞌap putupꞌah mãyõn yãnãm xix mãyõn hex yãnãm. Hamũn, Topa max xeꞌẽgnãg xix Kahnẽn Kutok, hu kuyãnãm punethok pip. Puxix.
\v 24 Ha taꞌ pip tikmũꞌũn hãm xexka tuꞌ, ha kõmẽn te nõm yĩmũ mõ kuyãnãm yõn, ha hãm xexka yõg xatꞌax xexka xop nũn putup, tu hãpxop max nũnnãp-tup, tu nũktu kõmẽn hã mõxakux.
\v 25 Ha kõmẽn yõg mõhãmyĩnnĩnꞌax xõn hãptup tox hã, tu nõhãmyĩnnĩn putup ꞌohnãg. Hãmũn, ꞌap xipꞌah ꞌãmniy ꞌõnteh.
\v 26 Ha hãm xexka xohix yõg hãpxop xeꞌẽgnãg nũnnãp-tup kõmẽn tuꞌ, xix yõg hãpxop max.
\v 27 Pa hãpxop yãyꞌĩgã nũnnãp-tup ꞌohnãg kõmẽn tuꞌ, yã hãpkummuk mĩyꞌax nũnnãp-tup ꞌohnãg xiꞌ koitꞌax nũnnãp-tup ꞌohnãg. Pa mõꞌnãp-tup nõm tikmũꞌũn, yã ꞌũyõg xuxetꞌax kaxꞌami Kahnẽn Kutok yõg hiꞌax xop yõg tappet tuꞌ.
\c 22
\p
\v 1 Ha pexkox yõg nũꞌkutnãꞌax te ꞌãꞌ mũg kõnãg kox, ha yõg kõnãꞌãg te tikmũꞌũn hĩnnãhãꞌ, tu kuyãnãm mĩy, tuꞌ tup, tu kinixat putuk. Kõnãg kox te Topa yõg mĩmpe yũmꞌax xeꞌẽgnãg tuꞌ xupep xix Kahnẽn Kutok yõg,
\v 2 tu taꞌ mõg putat koteꞌ, ha taꞌ pip kõnãg kox yõg hãpkux tix tuꞌ mĩm kup tix, yã hiꞌax yõg, tu mey puxet ꞌĩhã mĩnta ta punethok, ha mey nõy ꞌĩhã minta taꞌ nõy punethok. Yã hã kaxĩy mey teꞌ 12 yõg mĩnta ta xohix teꞌ 12. Ha yõg mĩm xux te hãpxexka xohix yõg tikmũꞌũn hittupmãhãꞌ.
\v 3 ꞌAp xipꞌah hãpxop kummuk, Topa te nõm putup nõg. Ha taꞌ xip kõmẽn kopa Topa yõg mĩmpe yũmꞌax xeꞌẽgnãg xix Kahnẽn Kutok yõg, ha yõg kãmãnat te Topa pu nũktettex xix Kahnẽn Kutok pu nũktettex,
\v 4 tu Topa pa pẽnãp-tup xix Kahnẽn Kutok pa pẽnãp-tup, ha Topa ꞌãxetꞌax pip tikmũꞌũn kux tuꞌ, xix Kahnẽn Kutok ꞌãxetꞌax.
\v 5 Ha ꞌap xip putupꞌah ꞌãmnĩy ꞌũxeheh, yĩy ta ꞌap xip putupꞌah kuyãnãm tatꞌax xix mãyõn yãnãm. Yã Topa xexka te hãptupmãp-tup, ha Topa yõg xop teꞌ xohix xat putup hãmyãxatamuk xohix kux ꞌohnãg hã.
\s Yeyox te putpuꞌ nũn
\p
\v 6 Ha pexkox yõg nũꞌkutnãꞌax te ꞌã hãmꞌãktux, hu:
\p —‍Nõm hãmꞌãktux ꞌũxeꞌe. ꞌŨmax, pu tikmũꞌũn hãmꞌãktux kopa kuxa mãm. Ha Topa xexka te Topa pupi hãmꞌãktux xop pu Topa Koxuk hõm, ha ta nõmhã Topa te yõg pexkox yõg nũꞌkutnãꞌax mõkutnãhãꞌ, nũy Topa yõg kãmãnat pu hãmꞌãktux hãpxopmãꞌax texĩy pipꞌax hãpxip kutõgnãg ꞌĩhã. Kaxĩy.
\p
\v 7 Ha Yeyox te:
\p —‍ꞌÃpu ꞌũxupax. Hãpxip kutõgnãg ꞌĩhãg mõg putup ꞌãxop hah. ꞌŨkuxa hittup nõm te nũ hãmꞌãktux ꞌãpak, nũy mĩy. Nũ hãmꞌãktux te ꞌãxop pu hãpxop xohix yũmmũgãhãꞌ. Hãpxip ꞌĩhãꞌ pip putup nõm hãpxop xohix. Kaxĩy.
\p
\v 8 ꞌŨgmũn Yoãm. ꞌÃteꞌ xupak nõm hãpxop xohix, tu nõm pẽnãhãꞌ. ꞌÃteꞌ xupak kux, tuꞌ pẽnã kux, tu pexkox yõg nũꞌkutnãꞌax pu nũkxup, yã nõm te ꞌã hãpxop xohix mũg.
\v 9 Pa tute ꞌã hãmꞌãktux hu:
\p —‍ꞌÃmhok. ꞌŨgmũn pu nũꞌãxup hok. ꞌŨgmũn yã Topa yõg kãmãnat ꞌãmũn putuk, xix ꞌãtaknõy xop putuk, xix Topa pupi hãmꞌãktux xop putuk, xix nõm te nũ tappet yõg hãmꞌãktux ꞌãpak xop putuk. ꞌÃpu Topa pu nũꞌãxup. Kaxĩy.
\p
\v 10 Tu xe ꞌã hãmꞌãktux, hu:
\p —‍ꞌÃpu tikmũꞌũn pu nũ hãmꞌãktux ꞌãktux. Nũ hãmꞌãktux te tikmũꞌũn pu hãpxopmãꞌax mũg nõm pip putup. Hãpxip kutõgnãg ꞌĩhã nõm hãpxopmãꞌax pip putup.
\v 11 Tikmũꞌũn te hãpkummuk mĩy, puxix xe hãpkummuk mĩy putup. Tikmũꞌũn te hãpxop yãyꞌĩgã mĩy, puxix xe hãpxop yãyꞌĩgã mĩy putup. Tikmũꞌũn te hãpxopmã max, puxix xe hãpxopmã max putup. Tikmũꞌũn ꞌũmax xeꞌẽgnãg, puxix xeꞌ max xeꞌẽgnag. Kaxĩy.
\p
\v 12 Ha Yeyox te:
\p —‍ꞌÃpu ꞌũxupax. Hãpxip kutõgnãg ꞌĩhã ꞌãxop hak mõg putup. ꞌÃte ꞌãxop pu hãpxop popmãp-tup. ꞌÃte nõm te hãpxopmã max punethok puꞌ popmãp-tup hãpxop punethok. ꞌÃte nõm te hãpxopmã max kutõgnãg puꞌ popmãp-tup hãpxop tĩgnãg.
\v 13 ꞌŨgmũn yã mãxap xix kaꞌax, yã ꞌAppa xix ꞌÕm.
\p
\v 14 ꞌŨkuxa hittup nõm te yãy topixxax tox pix, haꞌ tup. Topa teꞌ xat, ha nõm te mĩnta ta mãp-tup ꞌũhiꞌax yõg mĩm kup yõg. Tute kõmẽn hãmyĩkox hã mõxakux putup.
\v 15 Pa kõmẽn kũnãpaꞌ pip ꞌũnõy hãꞌ xupxet xop, xix mĩm mĩy xop, xix yãyꞌĩgã xop, xix nõm te topa komut pu nũktettex, xiꞌ koit xop, tu hãpxop mõꞌãmũꞌ mĩy
\p
\v 16 Ha Yeyox te:
\p —‍ꞌŨgmũn Yeyox. ꞌÃte pexkox yõg nũꞌkutnãꞌax mõkutnãhãꞌ, puyĩy nũ hãpxop ꞌãktux Topa kopa kuxa mãm xop puꞌ. ꞌŨgmũn yã Namix hã xupepmãꞌ. Yõgnũ kuyãnãm kaꞌok, yã ꞌũgmax xeꞌẽgnãg, yã mãyõnnãg xexka kuyãnãm putuk. Kaxĩy.
\p
\v 17 Ha Topa Koxuk te:
\p —‍Mãꞌ. Kaxĩy.
\p Ha ꞌũn te yãytap-tup te:
\p —‍Mãꞌ. Kaxĩy.
\p Haꞌ xupak xop te:
\p —‍Mãꞌ. Kaxĩy.
\p ꞌOk kõnãg putup te ꞌãp-tex? Mãꞌ, nũy kõnãg hok paꞌ, yã kõnãg te tikmũꞌũn hĩnnãhã nõꞌõm.
\s Hãmꞌãktux kuxꞌax
\p
\v 18 Hak mũn Yoãm. ꞌÃte xa hãmꞌãktux, hu: Xateꞌ xupak nũ hãmꞌãktux, tu xa hãpxopmãꞌax ꞌãktux nõm pip putup. Xate tehomi kaxꞌamiꞌ, pe hãmꞌãktux nõy, puxix Topa ꞌãxũygãp-tup, yãꞌ putuk nõm hãpxũygãꞌax kaxꞌãmi nũ tappet tuꞌ.
\v 19 Ha xate nũꞌ hãmꞌãktux yãg xut, puxix Topa te ꞌõg hãpxop max xut putup, yã nõm mĩnta ta xut putup ꞌũhiꞌax yõg mĩm kup yõg, tu ꞌõg hãpxop xut putup, yã kõmẽn xeꞌẽgnãg yõg Yã nũ tappet te nõm ꞌãktux.
\p
\v 20 Yeyox te:
\p —‍Nũ tappet ꞌũmax. Hamũn, ꞌãxop hak mõg putup hãpxip kutognãg ꞌĩhãꞌ. Kaxĩy.
\p Hãmũn Yãyã Yeyox, mãꞌ mõꞌkaꞌok!
\p
\v 21 Pu yã yũmũg xuxyã Yeyox ꞌãxop xohix ha hãmmaxnãꞌ.
\p Tu ta tuꞌ kux.